੧੧. ਏਕਾਦਸਮਨਯੋ ਸਙ੍ਗਹਿਤੇਨਸਮ੍ਪਯੁਤ੍ਤਵਿਪ੍ਪਯੁਤ੍ਤਪਦਵਣ੍ਣਨਾ

੪੦੯. ਤੇਤਿ ਸਙ੍ਖਾਰਕ੍ਖਨ੍ਧਧਮ੍ਮਾ. ਸੇਸੇਹੀਤਿ ਅਵਸਿਟ੍ਠੇਹਿ ਵੇਦਨਾਸਞ੍ਞਾਵਿਞ੍ਞਾਣਕ੍ਖਨ੍ਧੇਹਿ. ‘‘ਏਤੇਨ ਸਹ ਸਮ੍ਬਨ੍ਧੋ’’ਤਿ ਇਮਿਨਾ ਪਦਾਨਂ ਸਮ੍ਬਨ੍ਧਦਸ੍ਸਨਮੁਖੇਨ ‘‘ਸਮੁਦਯਸਚ੍ਚੇਨ ਯੇ ਧਮ੍ਮਾ ਸਮ੍ਪਯੁਤ੍ਤਾ’’ਤਿ ਪਾਲ਼ਿਯਾ ਅਤ੍ਥਵਿਵਰਣਂ ਪਾਕਟਤਰਂ ਕਤ੍ਵਾ ਕੇਹਿਚੀਤਿਪਦਸ੍ਸਤ੍ਥਂ ਕਾਤੁਂ ‘‘ਕੇਹਿਚੀਤਿ ਏਤਸ੍ਸ ਪਨਾ’’ਤਿਆਦਿਮਾਹ. ਅਤ੍ਥਂ ਦਸ੍ਸੇਤੁਂ ਆਹਾਤਿ ਸਮ੍ਬਨ੍ਧੋ. ਵਿਸੇਸੇਤ੍ਵਾਤਿ ਏਤ੍ਥ ਤੇਸਂ ਧਮ੍ਮਾਨਂ ਤਣ੍ਹਾਵਜ੍ਜਾਨਂ ਸਙ੍ਖਾਰਕ੍ਖਨ੍ਧਧਮ੍ਮਾਯਤਨਧਮ੍ਮਧਾਤੁਪਰਿਯਾਪਨ੍ਨਤਾਕਿਤ੍ਤਨਂ ਵਿਸੇਸਨਂ ਦਟ੍ਠਬ੍ਬਂ, ਯਤੋ ਤੇ ਸਮੁਦਯਸਚ੍ਚੇਨ ਖਨ੍ਧਾਦਿਸਙ੍ਗਹੇਨ ਸਙ੍ਗਹਿਤਾਤਿ ਵੁਤ੍ਤਾ. ਸਯਂ ਅਤ੍ਤਨਾ ਸਮ੍ਪਯੁਤ੍ਤੋ ਨ ਹੋਤੀਤਿ ਵੁਤ੍ਤਂ ‘‘ਅਤ੍ਤਵਜ੍ਜੇਹੀ’’ਤਿ. ਤੇਨ ਵੁਤ੍ਤਂ ‘‘ਚਿਤ੍ਤਂ ਨ ਵਤ੍ਤਬ੍ਬਂ ਚਿਤ੍ਤੇਨ ਸਮ੍ਪਯੁਤ੍ਤਨ੍ਤਿਪਿ, ਚਿਤ੍ਤੇਨ ਵਿਪ੍ਪਯੁਤ੍ਤਨ੍ਤਿਪੀ’’ਤਿ. ਸਮ੍ਪਯੋਗਾਰਹੇਹੀਤਿ ਵਿਸੇਸਨਂ ਸੁਖੁਮਰੂਪਂ ਨਿਬ੍ਬਾਨਨ੍ਤਿ ਦ੍ਵੇ ਸਨ੍ਧਾਯ ਕਤਂ, ਨ ਤਣ੍ਹਾਦਿਕੇ.

ਏਕਾਦਸਮਨਯਸਙ੍ਗਹਿਤੇਨਸਮ੍ਪਯੁਤ੍ਤਵਿਪ੍ਪਯੁਤ੍ਤਪਦਵਣ੍ਣਨਾ ਨਿਟ੍ਠਿਤਾ.