੪. ਚਤੁਤ੍ਥਪਾਰਾਜਿਕਂ
ਚਤੁਸਚ੍ਚਵਿਦੂਤਿ ਚਤ੍ਤਾਰਿ ਸਚ੍ਚਾਨਿ ਸਮਾਹਟਾਨਿ ਚਤੁਸਚ੍ਚਂ, ਤਂ ਅਵੇਦਿ ਪਟਿਵਿਜ੍ਝੀਤਿ ਚਤੁਸਚ੍ਚਵਿਦੂ. ਸਤਿਪਿ ਸਾਵਕਾਨਂ ਪਚ੍ਚੇਕਬੁਦ੍ਧਾਨਞ੍ਚ ਚਤੁਸਚ੍ਚਵਿਦੁਭਾਵੇ ਅਨਞ੍ਞਪੁਬ੍ਬਕਤ੍ਤਾ ਭਗਵਤੋ ਚਤੁਸਚ੍ਚਦਸ੍ਸਨਸ੍ਸ ਤਤ੍ਥ ਚ ਸਬ੍ਬਞ੍ਞੁਤਾਯ ਬਲੇਸੁ ਚ ਵਸੀਭਾਵਸ੍ਸ ਪਤ੍ਤਿਤੋ ਪਰਸਨ੍ਤਾਨੇਸੁ ਪਸਾਰਿਤਭਾਵੇਨ ਪਾਕਟਤ੍ਤਾ ਚ ਭਗਵਾਵ ਵਿਸੇਸੇਨ ‘‘ਚਤੁਸਚ੍ਚਵਿਦੂ’’ਤਿ ਥੋਮਨਂ ਅਰਹਤਿ.
ਵਗ੍ਗੁਮੁਦਾਤੀਰਿਯਭਿਕ੍ਖੁਵਤ੍ਥੁਵਣ੍ਣਨਾ
੧੯੩. ਅਧਿਟ੍ਠੇਮਾਤਿ ਸਂਵਿਦਹਾਮ. ਦੂਤਕਮ੍ਮਨ੍ਤਿ ਗਿਹੀਨਂ ਪਣ੍ਣਂ ਵਾ ਸਾਸਨਂ ਵਾ ਗਹੇਤ੍ਵਾ ਤਤ੍ਥ ਤਤ੍ਥ ਗਮਨਂ. ਇਰਿਯਾਪਥਂ ਸਣ੍ਠਪੇਤ੍ਵਾਤਿ ਪਧਾਨਾਨੁਰੂਪਂ ਕਤ੍ਵਾ. ਪੁਚ੍ਛਨ੍ਤਾਨਂ ਵਾਤਿ ‘‘ਅਯ੍ਯਾ ਸਨ੍ਤਇਰਿਯਾਪਥਾ ਅਤਿਵਿਯ ਉਪਸਨ੍ਤਾ, ਕਤਰਂ ਵਿਸੇਸਮਧਿਗਚ੍ਛਿਂਸੂ’’ਤਿ ਪੁਚ੍ਛਨ੍ਤਾਨਂ. ਅਨਾਗਤਸਮ੍ਬਨ੍ਧੇ ਪਨ ਅਸਤੀਤਿ ‘‘ਭਾਸਿਤੋ ਭਵਿਸ੍ਸਤੀ’’ਤਿ ਪਾਠਸੇਸਂ ਕਤ੍ਵਾ ਅਨਾਗਤਸਮ੍ਬਨ੍ਧੇ ਅਸਤਿ. ‘‘ਭਾਸਿਤੋ’’ਤਿ ਅਤੀਤਵਚਨਂ ਕਥਂ ਅਨਾਗਤਵਚਨੇਨ ਸਮ੍ਬਨ੍ਧਮੁਪਗਚ੍ਛਤੀਤਿ ਆਹ ‘‘ਲਕ੍ਖਣਂ ਪਨ ਸਦ੍ਦਸਤ੍ਥਤੋ ਪਰਿਯੇਸਿਤਬ੍ਬ’’ਨ੍ਤਿ. ਈਦਿਸੇ ਹਿ ਠਾਨੇ ‘‘ਧਾਤੁਸਮ੍ਬਨ੍ਧੇ ਪਚ੍ਚਯਾ’’ਤਿ ਇਮਿਨਾ ਲਕ੍ਖਣੇਨ ਧਾਤ੍ਵਤ੍ਥਸਮ੍ਬਨ੍ਧੇ ਸਤਿ ਅਯਥਾਕਾਲਵਿਹਿਤਾਪਿ ਪਚ੍ਚਯਾ ਸਾਧਵੋ ਭਵਨ੍ਤੀਤਿ ਸਦ੍ਦਸਤ੍ਥਵਿਦੂ ਵਦਨ੍ਤਿ.
੧੯੪. ਵਣ੍ਣਵਾਤਿ ਇਮਿਨਾ ਸਕਲਸਰੀਰਾਨੁਗਤਵਣ੍ਣਸ੍ਸ ਮਨਾਪਤਾ ਵੁਤ੍ਤਾ. ਪਸਨ੍ਨਮੁਖਵਣ੍ਣਾਤਿ ਇਮਿਨਾ ਸਕਲਸਰੀਰਵਣ੍ਣਤੋਪਿ ਅਧਿਕਤਰਂ ਮੁਖਵਣ੍ਣਸ੍ਸ ਮਨਾਪਤਾ ਵੁਤ੍ਤਾ. ਵਿਪ੍ਪਸਨ੍ਨਛਵਿਵਣ੍ਣਾਤਿ ਇਮਿਨਾ ਪਨ ਵਿਜ੍ਜਮਾਨਸ੍ਸੇਵ ਸਰੀਰਵਣ੍ਣਸ੍ਸ ਅਤਿਵਿਯ ਪਸਨ੍ਨਤਾ ਵੁਤ੍ਤਾ. ਯਸ੍ਮਾ ਇਨ੍ਦ੍ਰਿਯਾਨਂ ਊਨਤ੍ਤਂ ਵਾ ਪੂਰਣਤ੍ਤਂ ਵਾ ਨਤ੍ਥਿ, ਤਸ੍ਮਾ ‘‘ਅਭਿਨਿਵਿਟ੍ਠੋਕਾਸਸ੍ਸ ਪਰਿਪੁਣ੍ਣਤ੍ਤਾ’’ਤਿ ਵੁਤ੍ਤਂ. ਛਟ੍ਠਸ੍ਸ ਅਭਿਨਿਵਿਟ੍ਠੋਕਾਸੋ ਹਦਯਵਤ੍ਥੁ, ਪਞ੍ਚਪਸਾਦਾਨਂ ਅਭਿਨਿਵਿਟ੍ਠੋਕਾਸਸ੍ਸ ਪਰਿਪੁਣ੍ਣਤਾਵਚਨੇਨੇਵ ਹਦਯਵਤ੍ਥੁਆਦਿਸਕਲਸਰੀਰਸ੍ਸ ਪਰਿਪੁਣ੍ਣਤਾ ਦਸ੍ਸਿਤਾਯੇਵ ਹੋਤੀਤਿ ਆਹ – ‘‘ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨ’’ਨ੍ਤਿ. ਯਥਾ ਤਨ੍ਤਿ ਏਤ੍ਥ ਤਨ੍ਤਿ ਨਿਪਾਤਮਤ੍ਤਂ. ਭਨ੍ਤਮਿਗਪ੍ਪਟਿਭਾਗਾਤਿ ਕਤ੍ਤਬ੍ਬਾਕਤ੍ਤਬ੍ਬਸ੍ਸ ਅਜਾਨਨਤੋ ਭਨ੍ਤਮਿਗਸਦਿਸਾ. ਚਤੁਚਕ੍ਕਨ੍ਤਿ ਚਤੁਇਰਿਯਾਪਥਂ. ਇਰਿਯਾਪਥੋ ਹਿ ਇਧ ਪਵਤ੍ਤਨਟ੍ਠੇਨ ‘‘ਚਕ੍ਕ’’ਨ੍ਤਿ ਅਧਿਪ੍ਪੇਤੋ. ਨਵਦ੍ਵਾਰਨ੍ਤਿ ਨਵਹਿ ਵਣਮੁਖੇਹਿ ਨਵਦ੍ਵਾਰਂ. ਦੁਕ੍ਖਨ੍ਤਿ ਸੀਸਰੋਗਾਦਿਦੁਕ੍ਖਂ. ਸਬ੍ਬਕਿਚ੍ਚੇਸੂਤਿ ਪਤ੍ਤਪਚਨਚੀਵਰਰਜਨਯੋਗਟ੍ਠਾਨਾਦਿਕਿਚ੍ਚੇਸੁ. ਯਾਪੇਤੁਨ੍ਤਿ ਵਹਿਤੁਂ ਪਵਤ੍ਤੇਤੁਂ. ਤੇਨਾਹ ‘‘ਗਮੇਤੁ’’ਨ੍ਤਿ.
੧੯੫. ਸਨ੍ਤੋਤਿ ਇਮਿਨਾ ਤੇਸਂ ਵਿਜ੍ਜਮਾਨਤਂ ਦਸ੍ਸੇਤਿ, ਸਂਵਿਜ੍ਜਮਾਨਾਤਿ ਇਮਿਨਾ ਪਨ ਤੇਸਂ ਉਪਲਬ੍ਭਮਾਨਤਂ ਦਸ੍ਸੇਤਿ. ਤੇਨਾਹ – ‘‘ਅਤ੍ਥਿ ਚੇਵ ਉਪਲਬ੍ਭਨ੍ਤਿ ਚਾ’’ਤਿ. ਉਪਲਬ੍ਭਨ੍ਤੀਤਿ ਦਿਸ੍ਸਨ੍ਤਿ, ਞਾਯਨ੍ਤੀਤਿ ਅਤ੍ਥੋ. ਪਨ੍ਥਦੂਹਨਕਮ੍ਮਨ੍ਤਿ ਪਨ੍ਥਘਾਤਨਕਮ੍ਮਂ. ਹਨਨ੍ਤੋਤਿ ਮਾਰੇਨ੍ਤੋ. ਘਾਤੇਨ੍ਤੋਤਿ ਮਾਰਾਪੇਨ੍ਤੋ. ਅਥ ਵਾ ਹਨਨ੍ਤੋਤਿ ਬਨ੍ਧਨਤਾਲ਼ਨਾਦੀਹਿ ਹਿਂਸਨ੍ਤੋ. ਘਾਤੇਨ੍ਤੋਤਿ ਮਾਰੇਨ੍ਤੋ. ਛਿਨ੍ਦਨ੍ਤੋਤਿ ਪਰੇਸਂ ਹਤ੍ਥਾਦੀਨਿ ਛਿਨ੍ਦਨ੍ਤੋ. ਪਚਨ੍ਤੋਤਿ ਦਣ੍ਡੇਨ ਉਪ੍ਪੀਲ਼ੇਨ੍ਤੋ. ਪਚਨਞ੍ਹੇਤ੍ਥ ਦਹਨਂ ਵਿਬਾਧਨਂ ਅਧਿਪ੍ਪੇਤਂ. ਪਚਨ੍ਤੋਤਿ ਵਾ ਤਜ੍ਜੇਨ੍ਤੋ ਤਾਸੇਨ੍ਤੋ. ਅਥ ਵਾ ਪਚਨ੍ਤੋਤਿ ਗਾਮੇਸੁ ਅਗ੍ਗਿਪਾਤਨਵਸੇਨ ਗੇਹਾਦੀਨਿ ਝਾਪੇਤ੍ਵਾ ਤਤ੍ਥ ਅਜੇਲ਼ਕਾਦੀਨਿ ਪਚਨ੍ਤੋ.
ਯੇ ਸਿਕ੍ਖਾਪਦੇਸੁ ਬਹੁਲਗਾਰਵਾ ਨ ਹੋਨ੍ਤਿ ਆਪਤ੍ਤਿਵੀਤਿਕ੍ਕਮਬਹੁਲਾ, ਤੇ ਸਿਕ੍ਖਾਪਦੇਸੁ ਅਤਿਬ੍ਬਗਾਰਵਾ. ਉਦ੍ਧਤੇਤਿ ਅਕਪ੍ਪਿਯੇ ਕਪ੍ਪਿਯਸਞ੍ਞਿਤਾਯ ਕਪ੍ਪਿਯੇ ਅਕਪ੍ਪਿਯਸਞ੍ਞਿਤਾਯ ਅਵਜ੍ਜੇ ਵਜ੍ਜਸਞ੍ਞਿਤਾਯ ਵਜ੍ਜੇ ਅਵਜ੍ਜਸਞ੍ਞਿਤਾਯ ਚ ਉਦ੍ਧਚ੍ਚਪਕਤਿਕੇ. ਉਨ੍ਨਲ਼ੇਤਿ ਉਗ੍ਗਤਨਲ਼ੇ, ਉਟ੍ਠਿਤਤੁਚ੍ਛਮਾਨੇਤਿ ਵੁਤ੍ਤਂ ਹੋਤਿ. ਚਪਲੇਤਿ ਪਤ੍ਤਚੀਵਰਮਣ੍ਡਨਾਦਿਨਾ ਚਾਪਲ੍ਲੇਨ ਯੁਤ੍ਤੇ. ਮੁਖਰੇਤਿ ਮੁਖਖਰੇ, ਖਰਵਚਨੇਤਿ ਵੁਤ੍ਤਂ ਹੋਤਿ. ਵਿਕਿਣ੍ਣਵਾਚੇਤਿ ਅਸਂਯਤਵਚਨੇ ਦਿਵਸਮ੍ਪਿ ਨਿਰਤ੍ਥਕਵਚਨਪ੍ਪਲਾਪਿਨੇ. ਮੁਟ੍ਠਾ ਨਟ੍ਠਾ ਸਤਿ ਏਤੇਸਨ੍ਤਿ ਮੁਟ੍ਠਸ੍ਸਤੀ, ਸਤਿਵਿਰਹਿਤੇਤਿ ਵੁਤ੍ਤਂ ਹੋਤਿ. ਅਸਮ੍ਪਜਾਨੇਤਿ ਨਿਪ੍ਪਞ੍ਞੇ. ਪਾਕਤਿਨ੍ਦ੍ਰਿਯੇਤਿ ਸਂਵਰਾਭਾਵੇਨ ਗਿਹਿਕਾਲੇ ਵਿਯ ਵਿਵਟਇਨ੍ਦ੍ਰਿਯੇ. ਆਚਰਿਯੁਪਜ੍ਝਾਯੇਹਿ ਪਰਿਚ੍ਚਤ੍ਤਕੇਤਿ ਧਮ੍ਮੇਨ ਆਮਿਸੇਨ ਚ ਅਸਙ੍ਗਹੇਤ੍ਵਾ ਆਚਰਿਯੁਪਜ੍ਝਾਯੇਹਿ ਪਰਿਚ੍ਚਤ੍ਤੇ ਅਨਾਥੇ ਅਪ੍ਪਤਿਟ੍ਠੇ. ਲਾਭਗਰੁਕੇਤਿ ਪਚ੍ਚਯਗਰੁਕੇ.
ਇਰਿਯਾਪਥਸਣ੍ਠਪਨਾਦੀਨੀਤਿ ਆਦਿ-ਸਦ੍ਦੇਨ ਪਚ੍ਚਯਪਟਿਸੇਵਨਸਾਮਨ੍ਤਜਪ੍ਪਾਨਂ ਗਹਣਂ ਵੇਦਿਤਬ੍ਬਂ. ਮਹਾਨਿਦ੍ਦੇਸੇ (ਮਹਾਨਿ. ੮੭) ਹਿ ਇਰਿਯਾਪਥਸਣ੍ਠਪਨਪਚ੍ਚਯਪਟਿਸੇਵਨਸਾਮਨ੍ਤਜਪ੍ਪਨਵਸੇਨ ਤਿਵਿਧਂ ਕੁਹਕਵਤ੍ਥੁ ਆਗਤਂ. ਤਤ੍ਥ ਪਾਪਿਚ੍ਛਸ੍ਸੇਵ ਸਤੋ ਸਮ੍ਭਾਵਨਾਧਿਪ੍ਪਾਯਕਤੇਨ ਇਰਿਯਾਪਥੇਨ ਵਿਮ੍ਹਾਪਨਂ ਇਰਿਯਾਪਥਸਣ੍ਠਪਨਸਙ੍ਖਾਤਂ ਕੁਹਕਵਤ੍ਥੁ. ਤਥਾ ਚੀਵਰਾਦੀਹਿ ਨਿਮਨ੍ਤਿਤਸ੍ਸ ਤਦਤ੍ਥਿਕਸ੍ਸੇਵ ਸਤੋ ਪਾਪਿਚ੍ਛਤਂ ਨਿਸ੍ਸਾਯ ਪਟਿਕ੍ਖੇਪਨੇਨ ਤੇ ਚ ਗਹਪਤਿਕੇ ਅਤ੍ਤਨਿ ਸੁਪ੍ਪਤਿਟ੍ਠਿਤਸਦ੍ਧੇ ਞਤ੍ਵਾ ਪੁਨ ਤੇਸਂ ‘‘ਅਹੋ ਅਯ੍ਯੋ ਅਪ੍ਪਿਚ੍ਛੋ, ਨ ਕਿਞ੍ਚਿ ਪਟਿਗ੍ਗਣ੍ਹਿਤੁਂ ਇਚ੍ਛਤਿ, ਸੁਲਦ੍ਧਂ ਵਤ ਨੋ ਅਸ੍ਸ, ਸਚੇ ਅਪ੍ਪਮਤ੍ਤਕਮ੍ਪਿ ਕਿਞ੍ਚਿ ਪਟਿਗ੍ਗਣ੍ਹੇਯ੍ਯਾ’’ਤਿ ਨਾਨਾਵਿਧੇਹਿ ਉਪਾਯੇਹਿ ਪਣੀਤਾਨਿ ਚੀਵਰਾਦੀਨਿ ਉਪਨੇਨ੍ਤਾਨਂ ਤਦਨੁਗ੍ਗਹਕਾਮਤਂਯੇਵ ਆਵਿਕਤ੍ਵਾ ਪਟਿਗ੍ਗਹਣੇਨ ਚ ਤਤੋ ਪਭੁਤਿ ਅਸੀਤਿਸਕਟਭਾਰੇਹਿ ਉਪਨਾਮਨਹੇਤੁਭੂਤਂ ਵਿਮ੍ਹਾਪਨਂ ਪਚ੍ਚਯਪਟਿਸੇਵਨਸਙ੍ਖਾਤਂ ਕੁਹਕਵਤ੍ਥੂਤਿ ਵੇਦਿਤਬ੍ਬਂ. ਪਾਪਿਚ੍ਛਸ੍ਸੇਵ ਪਨ ਸਤੋ ਉਤ੍ਤਰਿਮਨੁਸ੍ਸਧਮ੍ਮਾਧਿਗਮਪਰਿਦੀਪਨਵਾਚਾਯ ਤਥਾ ਤਥਾ ਵਿਮ੍ਹਾਪਨਂ ਸਾਮਨ੍ਤਜਪ੍ਪਨਸਙ੍ਖਾਤਂ ਕੁਹਕਵਤ੍ਥੂਤਿ ਵੇਦਿਤਬ੍ਬਂ. ਚਿਤ੍ਤਲਪਬ੍ਬਤਾਦਿਵਿਹਾਰੋ ਲੋਕਸਮ੍ਮਤਸੇਨਾਸਨਂ ਨਾਮ. ਲੋਕਸਮ੍ਮਤ …ਪੇ… ਉਪਾਯੇਹਿ ਸਂਵਣ੍ਣਿਯਮਾਨਗੁਣੋਤਿ ਸਮ੍ਬਨ੍ਧੋ. ਪਰਿਪਾਚੇਤੁਨ੍ਤਿ ਪਰਿਣਾਮੇਤੁਂ. ਸੁਦ੍ਧਚਿਤ੍ਤੇਨ ਅਤ੍ਤਨੋ ਗਨ੍ਥਧੁਰਾਦਿਕਮ੍ਮਂ ਕਤ੍ਵਾ ਵਿਚਰਨ੍ਤਾਨਂ ਤਮ੍ਮੂਲਕਪਚ੍ਚਯਪਰਿਭੋਗੇ ਦੋਸਾਭਾਵਂ ਦਸ੍ਸੇਤੁਂ ‘‘ਯੇ ਪਨਾ’’ਤਿਆਦਿ ਵੁਤ੍ਤਂ. ਭਿਕ੍ਖਾਚਾਰੇ ਅਸਮ੍ਪਜ੍ਜਮਾਨੇਤਿ ਗੋਚਰਗਾਮੇ ਭਿਕ੍ਖਾਯ ਚਰਿਤ੍ਵਾ ਲਭਿਤਬ੍ਬਪਿਣ੍ਡਪਾਤੇ ਅਸਮ੍ਪਜ੍ਜਨ੍ਤੇ. ਤੇ ਚ ਵਤ੍ਤਸੀਸੇਨ ਸਬ੍ਬਮ੍ਪੇਤਂ ਕਰੋਨ੍ਤਿ, ਨ ਲਾਭਨਿਮਿਤ੍ਤਂ. ਤੇਨ ਵੁਤ੍ਤਂ ‘‘ਤਨ੍ਤਿਪਵੇਣਿਘਟਨਕਾ ਸਾਸਨਜੋਤਕਾ’’ਤਿ.
ਕਿਚ੍ਛੇਨਾਤਿ ਨ ਦੁਕ੍ਖਾਯ ਪਟਿਪਦਾਯ. ਬੁਦ੍ਧਾਨਞ੍ਹਿ ਚਤ੍ਤਾਰੋਪਿ ਮਗ੍ਗਾ ਸੁਖਾਪਟਿਪਦਾਵ ਹੋਨ੍ਤਿ, ਪਾਰਮੀਪੂਰਣਕਾਲੇ ਪਨ ਸਰਾਗਦੋਸਮੋਹਸ੍ਸੇਵ ਸਤੋ ਆਗਤਾਨਂ ਯਾਚਕਾਨਂ ਅਲਙ੍ਕਤਪ੍ਪਟਿਯਤ੍ਤਂ ਸੀਸਂ ਕਨ੍ਤਿਤ੍ਵਾ ਗਲਲੋਹਿਤਂ ਨੀਹਰਿਤ੍ਵਾ ਸੁਅਞ੍ਜਿਤਾਨਿ ਅਕ੍ਖੀਨਿ ਉਪ੍ਪਾਟੇਤ੍ਵਾ ਕੁਲਵਂਸਪ੍ਪਤਿਟ੍ਠਾਪਕਂ ਪੁਤ੍ਤਂ ਮਨਾਪਚਾਰਿਨਿਂ ਭਰਿਯਨ੍ਤਿ ਏਵਮਾਦੀਨਿ ਦੇਨ੍ਤਸ੍ਸ ਅਞ੍ਞਾਨਿਪਿ ਖਨ੍ਤਿਵਾਦੀਸਦਿਸੇਸੁ ਅਤ੍ਤਭਾਵੇਸੁ ਛੇਜ੍ਜਭੇਜ੍ਜਾਦੀਨਿ ਪਾਪੁਣਨ੍ਤਸ੍ਸ ਆਗਮਨੀਯਪਟਿਪਦਂ ਸਨ੍ਧਾਯੇਤਂ ਵੁਤ੍ਤਂ. ਕਸਿਰੇਨਾਤਿ ਤਸ੍ਸੇਵ ਵੇਵਚਨਂ.
ਏਕਸ੍ਸੇਵ ਦਾਤੁਂ ਅਸਕ੍ਕੁਣੇਯ੍ਯਤਾਯ ਗਰੁਭਾਵਤੋ ‘‘ਗਰੁਭਣ੍ਡਾਨੀ’’ਤਿ ਵੁਤ੍ਤਂ, ਸਬ੍ਬੇਸਂ ਭਾਜੇਤ੍ਵਾਪਿ ਗਹੇਤੁਂ ਅਸਕ੍ਕੁਣੇਯ੍ਯਤਾਯ ‘‘ਗਰੁਪਰਿਕ੍ਖਾਰਾਨੀ’’ਤਿ ਵੁਤ੍ਤਂ. ਸਾਧਾਰਣਪਰਿਕ੍ਖਾਰਭਾਵੇਨਾਤਿ ਸਙ੍ਘਿਕਤ੍ਤਾ ਸਬ੍ਬਭਿਕ੍ਖੁਸਾਧਾਰਣਪਰਿਕ੍ਖਾਰਭਾਵੇਨ. ਸਙ੍ਗਣ੍ਹਾਤਿ ਉਪਲਾਪੇਤੀਤਿ ਇਦਂ ਅਥੇਯ੍ਯਚਿਤ੍ਤਂ ਸਨ੍ਧਾਯ ਵੁਤ੍ਤਂ. ਤੇਨੇਵਾਹ – ‘‘ਤਥਾਭਾਵਤੋ ਥੇਨੇਤ੍ਵਾ’’ਤਿ, ਅਵਿਸ੍ਸਜ੍ਜਿਯਅਵੇਭਙ੍ਗਿਯਭਾਵਤੋ ਥੇਨੇਤ੍ਵਾਤਿ ਅਤ੍ਥੋ. ਗਰੁਭਣ੍ਡਞ੍ਹਿ ਕੁਲਸਙ੍ਗਹਤ੍ਥਾਯ ਵਿਸ੍ਸਜ੍ਜੇਨ੍ਤੋ ਵਿਭਜਨ੍ਤੋ ਚ ਤਸ੍ਸ ਅਵਿਸ੍ਸਜ੍ਜਿਯਅਵਏਭਙ੍ਗਿਯਭਾਵਂ ਥੇਨੇਤਿ. ਕੁਲਦੂਸਕਦੁਕ੍ਕਟਂ ਆਪਜ੍ਜਤੀਤਿ ਏਤ੍ਥ ‘‘ਯੋ ਵਿਸ੍ਸਜ੍ਜੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ ਵੁਤ੍ਤਤ੍ਤਾ ਵਿਸ੍ਸਜ੍ਜਨਪਚ੍ਚਯਾ ਥੁਲ੍ਲਚ੍ਚਯੇਨਪਿ ਨ ਮੁਚ੍ਚਤਿ.
ਅਸਨ੍ਤਨ੍ਤਿ ਅਵਿਜ੍ਜਮਾਨਂ. ਅਭੂਤਨ੍ਤਿ ਅਨੁਪ੍ਪਨ੍ਨਂ. ਅਨੁਪ੍ਪਨ੍ਨਤ੍ਤਾ ਹਿ ਤਸ੍ਸ ਤਂ ਅਸਨ੍ਤਨ੍ਤਿ. ਪੁਰਿਮਸ੍ਸ ਪਚ੍ਛਿਮਂ ਕਾਰਣਵਚਨਂ. ਉਲ੍ਲਪਤੀਤਿ ਉਗ੍ਗਤਾਯੁਕੋ ਲਪਤਿ. ਸੀਲਞ੍ਹਿ ਭਿਕ੍ਖੁਨੋ ਆਯੁ, ਤਂ ਤਸ੍ਸ ਤਥਾਲਪਨਸਮਕਾਲਮੇਵ ਵਿਗਚ੍ਛਤਿ. ਅਸਨ੍ਤਸਮ੍ਭਾਵਨਾਯਾਤਿ ਅਤ੍ਤਨੋ ਅਵਿਜ੍ਜਮਾਨਗੁਣੇਹਿ ਸਮ੍ਭਾਵਨਾਯ. ਏਵਞ੍ਹਿ ਗਣ੍ਹਤਾ…ਪੇ… ਥੇਨੇਤ੍ਵਾ ਗਹਿਤਾ ਹੋਨ੍ਤੀਤਿ ਏਤ੍ਥ ਅਸਨ੍ਤਸਮ੍ਭਾਵਨਾਯ ਰਟ੍ਠਪਿਣ੍ਡਸ੍ਸ ਥੇਨੇਤ੍ਵਾ ਗਹਿਤਤ੍ਤਾ ਲੋਕੁਤ੍ਤਰਧਮ੍ਮੋਪਿ ਥੇਨਿਤੋਯੇਵ ਹੋਤਿ. ਕਿਤਵਸ੍ਸੇਵਾਤਿ ਕਿਤਵਸ੍ਸ ਸਕੁਣਗ੍ਗਹਣਮਿਵ. ਕੇਰਾਟਿਕਸ੍ਸਾਤਿ ਸਠਸ੍ਸ. ਗੋਤ੍ਤਂ ਵੁਚ੍ਚਤਿ ਸਾਧਾਰਣਨਾਮਂ, ਮਤ੍ਤ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ, ਤਸ੍ਮਾ ਸਮਣਾਤਿ ਗੋਤ੍ਤਮਤ੍ਤਂ ਅਨੁਭਵਨ੍ਤਿ ਧਾਰੇਨ੍ਤੀਤਿ ਗੋਤ੍ਰਭੁਨੋ, ਨਾਮਮਤ੍ਤਸਮਣਾਤਿ ਵੁਤ੍ਤਂ ਹੋਤਿ.
ਵਗ੍ਗੁਮੁਦਾਤੀਰਿਯਭਿਕ੍ਖੁਵਤ੍ਥੁਵਣ੍ਣਨਾ ਨਿਟ੍ਠਿਤਾ.
ਅਧਿਮਾਨਵਤ੍ਥੁਵਣ੍ਣਨਾ
੧੯੬. ਹੇਟ੍ਠਿਮਮਗ੍ਗੇਹਿ ਞਾਤਮਰਿਯਾਦਾਯ ਏਵ ਜਾਨਨਤੋ ਅਞ੍ਞਾ ਅਗ੍ਗਮਗ੍ਗਪਞ੍ਞਾ, ਤਸ੍ਸਾ ਫਲਭਾਵਤੋ ਅਗ੍ਗਫਲਪਞ੍ਞਾ ਤਂਸਹਗਤਾ ਸਮ੍ਮਾਸਙ੍ਕਪ੍ਪਾਦਯੋ ਚ ਅਞ੍ਞਾਤਿ ਵੁਤ੍ਤਾਤਿ ਆਹ ‘‘ਅਞ੍ਞਂ ਬ੍ਯਾਕਰਿਂਸੂਤਿ ਅਰਹਤ੍ਤਂ ਬ੍ਯਾਕਰਿਂਸੂ’’ਤਿ. ਅਰਿਯਸਾਵਕਸ੍ਸ ਤਾਵ ਨੁਪ੍ਪਜ੍ਜਤੀਤਿ ਪਹੀਨਾਧਿਮਾਨਪਚ੍ਚਯਤ੍ਤਾ ਨੁਪ੍ਪਜ੍ਜਤਿ. ਸੀਲਵਤੋਪਿ…ਪੇ… ਨੁਪ੍ਪਜ੍ਜਤਿ ਅਕਾਰਕਭਾਵਤੋ. ਤਿਲਕ੍ਖਣਂ ਆਰੋਪੇਤ੍ਵਾਤਿ ਕਲਾਪਸਮ੍ਮਸਨਵਸੇਨ ਤਿਲਕ੍ਖਣਂ ਆਰੋਪੇਤ੍ਵਾ. ਆਰਦ੍ਧਵਿਪਸ੍ਸਕਸ੍ਸਾਤਿ ਉਦਯਬ੍ਬਯਾਨੁਪਸ੍ਸਨਾਯ ਆਰਦ੍ਧਵਿਪਸ੍ਸਕਸ੍ਸ. ਸੁਦ੍ਧਸਮਥਲਾਭੀ ਵਿਪਸ੍ਸਨਾਯ ਕਮ੍ਮਂ ਅਕਤ੍ਵਾਪਿ ਕਿਲੇਸਸਮੁਦਾਚਾਰਂ ਅਪਸ੍ਸਨ੍ਤੋ ਕੇਵਲਂ ਅਞ੍ਞਾਣਬਲੇਨ ‘‘ਅਰਿਯੋਹਮਸ੍ਮੀ’’ਤਿ ਮਞ੍ਞਤੀਤਿ ਆਹ ‘‘ਸੁਦ੍ਧਸਮਥਲਾਭਿਂ ਵਾ’’ਤਿ. ‘‘ਅਰਹਾ ਅਹ’’ਨ੍ਤਿ ਮਞ੍ਞਤਿ ਉਚ੍ਚਵਾਲਙ੍ਕਵਾਸੀ ਮਹਾਨਾਗਤ੍ਥੇਰੋ ਵਿਯ.
ਤਲਙ੍ਗਰਵਾਸੀ ਧਮ੍ਮਦਿਨ੍ਨਤ੍ਥੇਰੋ ਕਿਰ ਨਾਮ ਏਕੋ ਪਭਿਨ੍ਨਪ੍ਪਟਿਸਮ੍ਭਿਦੋ ਮਹਾਖੀਣਾਸਵੋ ਮਹਤੋ ਭਿਕ੍ਖੁਸਙ੍ਘਸ੍ਸ ਓਵਾਦਦਾਯਕੋ ਅਹੋਸਿ. ਸੋ ਏਕਦਿਵਸਂ ਅਤ੍ਤਨੋ ਦਿਵਾਟ੍ਠਾਨੇ ਨਿਸੀਦਿਤ੍ਵਾ ‘‘ਕਿਨ੍ਨੁ ਖੋ ਅਮ੍ਹਾਕਂ ਆਚਰਿਯਸ੍ਸ ਉਚ੍ਚਵਾਲਙ੍ਕਵਾਸੀਮਹਾਨਾਗਤ੍ਥੇਰਸ੍ਸ ਸਮਣਭਾਵਕਿਚ੍ਚਂ ਮਤ੍ਥਕਪ੍ਪਤ੍ਤਂ, ਨੋ’’ਤਿ ਆਵਜ੍ਜੇਨ੍ਤੋ ਪੁਥੁਜ੍ਜਨਭਾਵਮੇਵਸ੍ਸ ਦਿਸ੍ਵਾ ‘‘ਮਯਿ ਅਗਚ੍ਛਨ੍ਤੇ ਪੁਥੁਜ੍ਜਨਕਾਲਕਿਰਿਯਮੇਵ ਕਰਿਸ੍ਸਤੀ’’ਤਿ ਚ ਞਤ੍ਵਾ ਇਦ੍ਧਿਯਾ ਵੇਹਾਸਂ ਉਪ੍ਪਤਿਤ੍ਵਾ ਦਿਵਾਟ੍ਠਾਨੇ ਨਿਸਿਨ੍ਨਸ੍ਸ ਥੇਰਸ੍ਸ ਸਮੀਪੇ ਓਰੋਹਿਤ੍ਵਾ ਵਨ੍ਦਿਤ੍ਵਾ ਵਤ੍ਤਂ ਦਸ੍ਸੇਤ੍ਵਾ ਏਕਮਨ੍ਤਂ ਨਿਸੀਦਿ. ‘‘ਕਿਂ, ਆਵੁਸੋ ਧਮ੍ਮਦਿਨ੍ਨ, ਅਕਾਲੇ ਆਗਤੋਸੀ’’ਤਿ ਚ ਵੁਤ੍ਤੋ ‘‘ਪਞ੍ਹਂ, ਭਨ੍ਤੇ, ਪੁਚ੍ਛਿਤੁਂ ਆਗਤੋਮ੍ਹੀ’’ਤਿ ਆਹ. ਤਤੋ ‘‘ਪੁਚ੍ਛਾਵੁਸੋ, ਜਾਨਮਾਨਾ ਕਥਯਿਸ੍ਸਾਮਾ’’ਤਿ ਵੁਤ੍ਤੋ ਪਞ੍ਹਸਹਸ੍ਸਂ ਪੁਚ੍ਛਿ. ਥੇਰੋ ਪੁਚ੍ਛਿਤਂ ਪੁਚ੍ਛਿਤਂ ਪਞ੍ਹਂ ਅਸਜ੍ਜਮਾਨੋਵ ਕਥੇਸਿ. ਤਤੋ ‘‘ਅਤਿਤਿਕ੍ਖਂ ਵੋ, ਭਨ੍ਤੇ, ਞਾਣਂ, ਕਦਾ ਤੁਮ੍ਹੇਹਿ ਅਯਂ ਧਮ੍ਮੋ ਅਧਿਗਤੋ’’ਤਿ ਵੁਤ੍ਤੋ ‘‘ਇਤੋ ਸਟ੍ਠਿਵਸ੍ਸਕਾਲੇ, ਆਵੁਸੋ’’ਤਿ ਆਹ. ਸਮਾਧਿਮ੍ਹਿ, ਭਨ੍ਤੇ, ਵਲ਼ਞ੍ਜੇਥਾਤਿ. ਨ ਇਦਂ, ਆਵੁਸੋ, ਭਾਰਿਯਨ੍ਤਿ. ਤੇਨ ਹਿ, ਭਨ੍ਤੇ, ਏਕਂ ਹਤ੍ਥਿਂ ਮਾਪੇਥਾਤਿ. ਥੇਰੋ ਸਬ੍ਬਸੇਤਂ ਹਤ੍ਥਿਂ ਮਾਪੇਸਿ. ਇਦਾਨਿ, ਭਨ੍ਤੇ, ਯਥਾ ਅਯਂ ਹਤ੍ਥੀ ਅਞ੍ਜਿਤਕਣ੍ਣੋ ਪਸਾਰਿਤਨਙ੍ਗੁਟ੍ਠੋ ਸੋਣ੍ਡਂ ਮੁਖੇ ਪਕ੍ਖਿਪਿਤ੍ਵਾ ਭੇਰਵਂ ਕੋਞ੍ਚਨਾਦਂ ਕਰੋਨ੍ਤੋ ਤੁਮ੍ਹਾਕਂ ਅਭਿਮੁਖਂ ਆਗਚ੍ਛਤਿ, ਤਥਾ ਨਂ ਕਰੋਥਾਤਿ. ਥੇਰੋ ਤਥਾ ਕਤ੍ਵਾ ਵੇਗੇਨ ਆਗਚ੍ਛਤੋ ਹਤ੍ਥਿਸ੍ਸ ਭੇਰਵਂ ਆਕਾਰਂ ਦਿਸ੍ਵਾ ਉਟ੍ਠਾਯ ਪਲਾਯਿਤੁਂ ਆਰਦ੍ਧੋ. ਤਮੇਨਂ ਖੀਣਾਸਵਤ੍ਥੇਰੋ ਹਤ੍ਥਂ ਪਸਾਰੇਤ੍ਵਾ ਚੀਵਰਕਣ੍ਣੇ ਗਹੇਤ੍ਵਾ ‘‘ਭਨ੍ਤੇ, ਖੀਣਾਸਵਸ੍ਸ ਸਾਰਜ੍ਜਂ ਨਾਮ ਹੋਤੀ’’ਤਿ ਆਹ. ਸੋ ਤਸ੍ਮਿਂ ਕਾਲੇ ਅਤ੍ਤਨੋ ਪੁਥੁਜ੍ਜਨਭਾਵਂ ਞਤ੍ਵਾ ‘‘ਅਵਸ੍ਸਯੋ ਮੇ, ਆਵੁਸੋ, ਧਮ੍ਮਦਿਨ੍ਨ ਹੋਹੀ’’ਤਿ ਵਤ੍ਵਾ ਪਾਦਮੂਲੇ ਉਕ੍ਕੁਟਿਕਂ ਨਿਸੀਦਿ. ‘‘ਭਨ੍ਤੇ, ਤੁਮ੍ਹਾਕਂ ਅਵਸ੍ਸਯੋ ਭਵਿਸ੍ਸਾਮਿਚ੍ਚੇਵਾਹਂ ਆਗਤੋ, ਮਾ ਚਿਨ੍ਤਯਿਤ੍ਥਾ’’ਤਿ ਕਮ੍ਮਟ੍ਠਾਨਂ ਕਥੇਸਿ. ਥੇਰੋ ਕਮ੍ਮਟ੍ਠਾਨਂ ਗਹੇਤ੍ਵਾ ਚਙ੍ਕਮਂ ਓਰੁਯ੍ਹ ਤਤਿਯੇ ਪਦਵਾਰੇ ਅਗ੍ਗਫਲਂ ਅਰਹਤ੍ਤਂ ਪਾਪੁਣਿ. ਥੇਰੋ ਕਿਰ ਦੋਸਚਰਿਤੋ ਅਹੋਸਿ.
ਅਧਿਮਾਨਵਤ੍ਥੁਵਣ੍ਣਨਾ ਨਿਟ੍ਠਿਤਾ.
ਸਵਿਭਙ੍ਗਸਿਕ੍ਖਾਪਦਵਣ੍ਣਨਾ
੧੯੭-੧੯੮. ਯਸ੍ਮਾ ਪਨਾਤਿਆਦਿ ‘‘ਅਸਨ੍ਤਂ ਅਭੂਤਂ ਅਸਂਵਿਜ੍ਜਮਾਨ’’ਨ੍ਤਿ ਏਤੇਸਂ ਕਾਰਣਵਚਨਂ. ਤਤ੍ਥ ਯਨ੍ਤਿ ਯਂ ਉਤ੍ਤਰਿਮਨੁਸ੍ਸਧਮ੍ਮਂ. ਅਨਭਿਜਾਨਨ੍ਤਿ ਅਤ੍ਤਨਿ ਅਤ੍ਥਿਭਾਵਂ ਅਜਾਨਨ੍ਤੋ. ਸਮੁਦਾਚਰਤੀਤਿ ‘‘ਅਤ੍ਥਿ ਮਯ੍ਹਂ ਏਸ ਧਮ੍ਮੋ’’ਤਿ ਕਥੇਤਿ ਜਾਨਾਪੇਤਿ ਵਾ. ‘‘ਅਸਨ੍ਤਂ ਅਭੂਤ’’ਨ੍ਤਿ ਇਮਸ੍ਸ ਕਾਰਣਵਚਨਂ ਸਨ੍ਤਾਨੇ ਅਨੁਪ੍ਪਨ੍ਨੋਤਿ. ਞਾਣੇਨ ਚ ਅਸਚ੍ਛਿਕਤੋਤਿ ਇਦਂ ਪਨ ‘‘ਅਸਂਵਿਜ੍ਜਮਾਨ’’ਨ੍ਤਿ ਏਤਸ੍ਸ ਕਾਰਣਵਚਨਂ. ਪਕਤਿਮਨੁਸ੍ਸੇਹਿ ਉਤ੍ਤਰਿਤਰਾਨਂ ਬੁਦ੍ਧਾਦਿਉਤ੍ਤਮਪੁਰਿਸਾਨਂ ਅਧਿਗਮਧਮ੍ਮੋ ਉਤ੍ਤਰਿਮਨੁਸ੍ਸਧਮ੍ਮੋਤਿ ਆਹ ‘‘ਉਤ੍ਤਰਿਮਨੁਸ੍ਸਾਨ’’ਨ੍ਤਿਆਦਿ. ਤਨ੍ਤਿ ਉਤ੍ਤਰਿਮਨੁਸ੍ਸਧਮ੍ਮਂ. ਅਥ ਪਦਭਾਜਨੇ ਬਹੁਵਚਨਨਿਦ੍ਦੇਸੋ ਕਸ੍ਮਾ ਕਤੋਤਿ ਆਹ ‘‘ਪਦਭਾਜਨੇ ਪਨਾ’’ਤਿਆਦਿ. ਕਿਞ੍ਚਾਪਿ ਉਤ੍ਤਰਿਮਨੁਸ੍ਸਧਮ੍ਮੋ ਅਬ੍ਯਾਕਤੋਪਿ ਹੋਤਿ, ਆਰੋਗ੍ਯਟ੍ਠੇਨ ਪਨ ਬਾਹਿਤਿਕਸੁਤ੍ਤੇ ਵਿਯ ‘‘ਕੁਸਲੇ ਧਮ੍ਮੇ’’ਤਿ ਵੁਤ੍ਤਂ. ਅਸ੍ਸਾਤਿ ਉਤ੍ਤਰਿਮਨੁਸ੍ਸਧਮ੍ਮਸ੍ਸ. ਖਣਲਯਮੁਹੁਤ੍ਤ-ਸਦ੍ਦਾ ਅਞ੍ਞਤ੍ਥ ਭਿਨ੍ਨਤ੍ਥਾਪਿ ਹੋਨ੍ਤਿ, ਇਧ ਪਨ ਖਣਪਰਿਯਾਯਵਸੇਨੇਵ ‘‘ਤਂ ਖਣਂ ਤਂ ਲਯਂ ਤਂ ਮੁਹੁਤ੍ਤ’’ਨ੍ਤਿ ਪਾਲ਼ਿਯਂ ਵੁਤ੍ਤਂ.
ਅਧਿਗਨ੍ਤਬ੍ਬਤੋ ਅਧਿਗਮੋ, ਝਾਨਾਦਿ, ਅਧਿਗਮਸ੍ਸ ਪੁਚ੍ਛਾ ਅਧਿਗਮਪੁਚ੍ਛਾ. ਤੇਨਾਹ ‘‘ਝਾਨਵਿਮੋਕ੍ਖਾਦੀਸੂ’’ਤਿਆਦਿ. ਉਪਾਯਪੁਚ੍ਛਾਤਿ ਅਧਿਗਮੁਪਾਯਪੁਚ੍ਛਾ. ਕਿਨ੍ਤੀਤਿ ਕੇਨ ਪਕਾਰੇਨ, ਕੇਨ ਵਿਧਿਨਾਤਿ ਅਤ੍ਥੋ. ਕਤਮੇਸਂ ਤ੍ਵਂ ਧਮ੍ਮਾਨਂ ਲਾਭੀਤਿ ਇਦਂ ਪਨ ਪੁਬ੍ਬੇ ‘‘ਕਿਂ ਤੇ ਅਧਿਗਤ’’ਨ੍ਤਿ ਅਨਿਦ੍ਧਾਰਿਤਭੇਦਾ ਝਾਨਾਦਿਵਿਸੇਸਾ ਪੁਚ੍ਛਿਤਾਤਿ ਇਦਾਨਿ ਤੇਸਂ ਨਿਦ੍ਧਾਰੇਤ੍ਵਾ ਪੁਚ੍ਛਨਾਕਾਰਦਸ੍ਸਨਂ.
ਤਸ੍ਮਾਤਿ ਯਸ੍ਮਾ ਯਥਾਵੁਤ੍ਤੇਹਿ ਛਹਾਕਾਰੇਹਿ ਅਧਿਗਮਬ੍ਯਾਕਰਣਂ ਸੋਧੇਤਬ੍ਬਂ, ਤਸ੍ਮਾ. ਏਤ੍ਤਾਵਤਾਵਾਤਿ ਏਤ੍ਤਕੇਨ ਬ੍ਯਾਕਰਣਮਤ੍ਤੇਨੇਵ ਨ ਸਕ੍ਕਾਤਬ੍ਬੋ. ਬ੍ਯਾਕਰਣਞ੍ਹਿ ਏਕਚ੍ਚਸ੍ਸ ਅਯਾਥਾਵਤੋਪਿ ਹੋਤੀਤਿ. ਇਮੇਸੁ ਪਨ ਛਸੁ ਠਾਨੇਸੁ ਸੋਧਨਤ੍ਥਂ ਵਤ੍ਤਬ੍ਬੋਤਿ ਯਥਾ ਨਾਮ ਜਾਤਰੂਪਪਤਿਰੂਪਕਮ੍ਪਿ ਜਾਤਰੂਪਂ ਵਿਯ ਖਾਯਤੀਤਿ ਜਾਤਰੂਪਂ ਨਿਘਂਸਨਤਾਪਨਚ੍ਛੇਦਨੇਹਿ ਸੋਧੇਤਬ੍ਬਂ, ਏਵਮੇਵ ਇਮੇਸੁ ਇਦਾਨੇਵ ਵੁਤ੍ਤੇਸੁ ਛਸੁ ਠਾਨੇਸੁ ਪਕ੍ਖਿਪਿਤ੍ਵਾ ਸੋਧਨਤ੍ਥਂ ਵਤ੍ਤਬ੍ਬੋ. ਵਿਮੋਕ੍ਖਾਦੀਸੂਤਿ ਆਦਿ-ਸਦ੍ਦੇਨ ਸਮਾਧਿਸਮਾਪਤ੍ਤਿਞਾਣਦਸ੍ਸਨਮਗ੍ਗਭਾਵਨਾਫਲਸਚ੍ਛਿਕਿਰਿਯਾਦਿਂ ਸਙ੍ਗਣ੍ਹਾਤਿ. ਪਾਕਟੋ ਹੋਤੀਤਿ ਅਧਿਗਤਵਿਸੇਸਸ੍ਸ ਸਤਿਸਮ੍ਮੋਸਾਭਾਵਤੋ. ਸੇਸਪੁਚ੍ਛਾਸੁਪਿ ਪਾਕਟੋ ਹੋਤੀਤਿ ਪਦੇ ਏਸੇਵ ਨਯੋ.
ਸਬ੍ਬੇਸਞ੍ਹਿ ਅਤ੍ਤਨਾ ਅਧਿਗਤਮਗ੍ਗੇਨ ਪਹੀਨਕਿਲੇਸਾ ਪਾਕਟਾ ਹੋਨ੍ਤੀਤਿ ਇਦਂ ਯੇਭੁਯ੍ਯਵਸੇਨ ਵੁਤ੍ਤਂ. ਕਸ੍ਸਚਿ ਹਿ ਅਤ੍ਤਨਾ ਅਧਿਗਤਮਗ੍ਗਵਜ੍ਝਕਿਲੇਸੇਸੁ ਸਨ੍ਦੇਹੋ ਉਪ੍ਪਜ੍ਜਤਿਯੇਵ ਮਹਾਨਾਮਸ੍ਸ ਸਕ੍ਕਸ੍ਸ ਵਿਯ. ਸੋ ਹਿ ਸਕਦਾਗਾਮੀ ਸਮਾਨੋਪਿ ‘‘ਤਸ੍ਸ ਮਯ੍ਹਂ, ਭਨ੍ਤੇ, ਏਵਂ ਹੋਤਿ ‘ਕੋ ਸੁ ਨਾਮ ਮੇ ਧਮ੍ਮੋ ਅਜ੍ਝਤ੍ਤਂ ਅਪ੍ਪਹੀਨੋ, ਯੇਨ ਮੇ ਏਕਦਾ ਲੋਭਧਮ੍ਮਾਪਿ ਚਿਤ੍ਤਂ ਪਰਿਯਾਦਾਯ ਤਿਟ੍ਠਨ੍ਤਿ, ਦੋਸਧਮ੍ਮਾਪਿ ਚਿਤ੍ਤਂ ਪਰਿਯਾਦਾਯ ਤਿਟ੍ਠਨ੍ਤਿ, ਮੋਹਧਮ੍ਮਾਪਿ ਚਿਤ੍ਤਂ ਪਰਿਯਾਦਾਯ ਤਿਟ੍ਠਨ੍ਤੀ’’’ਤਿ (ਮ. ਨਿ. ੧.੧੭੫) ਭਗਵਨ੍ਤਂ ਪੁਚ੍ਛਿ. ਅਯਂ ਕਿਰ ਰਾਜਾ ਸਕਦਾਗਾਮਿਮਗ੍ਗੇਨ ਲੋਭਦੋਸਮੋਹਾ ਨਿਰਵਸੇਸਾ ਪਹੀਯਨ੍ਤੀਤਿ ਸਞ੍ਞੀ ਅਹੋਸਿ. ਕਿਂ ਅਰਿਯਸਾਵਕਸ੍ਸ ਏਵਂ ਸਨ੍ਦੇਹੋ ਉਪ੍ਪਜ੍ਜਤੀਤਿ? ਆਮ ਉਪ੍ਪਜ੍ਜਤਿ. ਕਸ੍ਮਾ? ਪਣ੍ਣਤ੍ਤਿਯਂ ਅਕੋਵਿਦਤ੍ਤਾ. ‘‘ਅਯਂ ਕਿਲੇਸੋ ਅਸੁਕਮਗ੍ਗਵਜ੍ਝੋ’’ਤਿ ਇਮਿਸ੍ਸਾ ਪਣ੍ਣਤ੍ਤਿਯਾ ਅਕੋਵਿਦਸ੍ਸ ਹਿ ਅਰਿਯਸਾਵਕਸ੍ਸ ਏਵਂ ਹੋਤਿ. ਕਿਂ ਤਸ੍ਸ ਪਚ੍ਚਵੇਕ੍ਖਣਾ ਨਤ੍ਥੀਤਿ? ਅਤ੍ਥਿ, ਸਾ ਪਨ ਨ ਸਬ੍ਬੇਸਂ ਪਰਿਪੁਣ੍ਣਾ ਹੋਤਿ. ਏਕੋ ਹਿ ਪਹੀਨਕਿਲੇਸਮੇਵ ਪਚ੍ਚਵੇਕ੍ਖਤਿ, ਏਕੋ ਅਵਸਿਟ੍ਠਕਿਲੇਸਮੇਵ, ਏਕੋ ਮਗ੍ਗਮੇਵ, ਏਕੋ ਫਲਮੇਵ, ਏਕੋ ਨਿਬ੍ਬਾਨਮੇਵ. ਇਮਾਸੁ ਪਨ ਪਞ੍ਚਸੁ ਪਚ੍ਚਵੇਕ੍ਖਣਾਸੁ ਏਕਂ ਵਾ ਦ੍ਵੇ ਵਾ ਨੋ ਲਦ੍ਧੁਂ ਨ ਵਟ੍ਟਤਿ. ਇਤਿ ਯਸ੍ਸ ਪਚ੍ਚਵੇਕ੍ਖਣਾ ਨ ਪਰਿਪੁਣ੍ਣਾ, ਤਸ੍ਸ ਮਗ੍ਗਵਜ੍ਝਕਿਲੇਸਪਣ੍ਣਤ੍ਤਿਯਂ ਅਕੋਵਿਦਤ੍ਤਾ ਏਵਂ ਹੋਤਿ. ਉਗ੍ਗਹਪਰਿਪੁਚ੍ਛਾਕੁਸਲਾਤਿ ਸਜ੍ਝਾਯਮਗ੍ਗਸਂਵਣ੍ਣਨਾਸੁ ਨਿਪੁਣਾ.
ਯਾਯ ਪਟਿਪਦਾਯ ਯਸ੍ਸ ਅਰਿਯਮਗ੍ਗੋ ਆਗਚ੍ਛਤਿ, ਸਾ ਪੁਬ੍ਬਭਾਗਪਟਿਪਤ੍ਤਿ ਆਗਮਨਪਟਿਪਦਾ. ਸੋਧੇਤਬ੍ਬਾਤਿ ਸੁਦ੍ਧਾ ਉਦਾਹੁ ਨ ਸੁਦ੍ਧਾਤਿ ਵਿਚਾਰਣਵਸੇਨ ਸੋਧੇਤਬ੍ਬਾ. ਨ ਸੁਜ੍ਝਤੀਤਿ ਤਤ੍ਥ ਤਤ੍ਥ ਪਮਾਦਪਟਿਪਤ੍ਤਿਸਬ੍ਭਾਵਤੋ. ਅਪਨੇਤਬ੍ਬੋਤਿ ਅਤ੍ਤਨੋ ਪਟਿਞ੍ਞਾਯ ਅਪਨੇਤਬ੍ਬੋ. ‘‘ਸੁਜ੍ਝਤੀ’’ਤਿ ਵਤ੍ਵਾ ਸੁਜ੍ਝਨਾਕਾਰਂ ਦਸ੍ਸੇਤੁਂ ‘‘ਦੀਘਰਤ੍ਤ’’ਨ੍ਤਿਆਦਿ ਵੁਤ੍ਤਂ. ਪਞ੍ਞਾਯਤੀਤਿ ਏਤ੍ਥਾਪਿ ‘‘ਯਦੀ’’ਤਿ ਪਦਂ ਆਨੇਤ੍ਵਾ ਯਦਿ ਸੋ ਭਿਕ੍ਖੁ ਤਾਯ ਪਟਿਪਦਾਯ ਪਞ੍ਞਾਯਤੀਤਿ ਸਮ੍ਬਨ੍ਧੋ. ਚਤੂਸੁ ਪਚ੍ਚਯੇਸੁ ਅਲਗ੍ਗਤ੍ਤਾ ‘‘ਆਕਾਸੇ ਪਾਣਿਸਮੇਨ ਚੇਤਸਾ’’ਤਿ ਵੁਤ੍ਤਂ. ਵੁਤ੍ਤਸਦਿਸਨ੍ਤਿ ਤਸ੍ਸ ਭਿਕ੍ਖੁਨੋ ਬ੍ਯਾਕਰਣਂ ਇਮਸ੍ਮਿਂ ਸੁਤ੍ਤੇ ਵੁਤ੍ਤੇਨ ਸਦਿਸਂ, ਸਮਨ੍ਤਿ ਅਤ੍ਥੋ.
ਖੀਣਾਸਵਪਟਿਪਤ੍ਤਿਸਦਿਸਾ ਪਟਿਪਦਾ ਹੋਤੀਤਿ ਦੀਘਰਤ੍ਤਂ ਸੁਵਿਕ੍ਖਮ੍ਭਿਤਕਿਲੇਸਤ੍ਤਾ. ਖੀਣਾਸਵਸ੍ਸ ਨਾਮ…ਪੇ… ਨ ਹੋਤੀਤਿ ਪਹੀਨਵਿਪਲ੍ਲਾਸਤ੍ਤਾ ਜੀਵਿਤਨਿਕਨ੍ਤਿਯਾ ਚ ਅਭਾਵਤੋ ਨ ਹੋਤਿ. ਪੁਥੁਜ੍ਜਨਸ੍ਸ ਪਨ ਅਪ੍ਪਹੀਨਵਿਪਲ੍ਲਾਸਤ੍ਤਾ ਜੀਵਿਤਨਿਕਨ੍ਤਿਸਬ੍ਭਾਵਤੋ ਚ ਅਪ੍ਪਮਤ੍ਤਕੇਨਪਿ ਹੋਤਿ.
ਤਤ੍ਰਿਮਾਨਿ ਵਤ੍ਥੂਨਿ – ਦੀਘਭਾਣਕਅਭਯਤ੍ਥੇਰੋ ਕਿਰ ਏਕਂ ਪਿਣ੍ਡਪਾਤਿਕਂ ਪਰਿਗ੍ਗਹੇਤੁਂ ਅਸਕ੍ਕੋਨ੍ਤੋ ਦਹਰਸ੍ਸ ਸਞ੍ਞਂ ਅਦਾਸਿ. ਸੋ ਤਂ ਨਹਾਯਮਾਨਂ ਕਲ੍ਯਾਣੀਨਦੀਮੁਖਦ੍ਵਾਰੇ ਨਿਮੁਜ੍ਜਿਤ੍ਵਾ ਪਾਦੇ ਅਗ੍ਗਹੇਸਿ. ਪਿਣ੍ਡਪਾਤਿਕੋ ‘‘ਕੁਮ੍ਭੀਲੋ’’ਤਿ ਸਞ੍ਞਾਯ ਮਹਾਸਦ੍ਦਂ ਅਕਾਸਿ, ਤਦਾ ਨਂ ‘‘ਪੁਥੁਜ੍ਜਨੋ’’ਤਿ ਜਾਨਿਂਸੁ. ਚਨ੍ਦਮੁਖਤਿਸ੍ਸਰਾਜਕਾਲੇ ਪਨ ਮਹਾਵਿਹਾਰੇ ਸਙ੍ਘਤ੍ਥੇਰੋ ਖੀਣਾਸਵੋ ਦੁਬ੍ਬਲਚਕ੍ਖੁਕੋ ਵਿਹਾਰੇਯੇਵ ਅਚ੍ਛਤਿ. ਤਂ ਰਾਜਾ ‘‘ਥੇਰਂ ਪਰਿਗ੍ਗਣ੍ਹਿਸ੍ਸਾਮੀ’’ਤਿ ਭਿਕ੍ਖੂਸੁ ਭਿਕ੍ਖਾਚਾਰਂ ਗਤੇਸੁ ਅਪ੍ਪਸਦ੍ਦੋ ਉਪਸਙ੍ਕਮਿਤ੍ਵਾ ਸਪ੍ਪੋ ਵਿਯ ਪਾਦੇ ਅਗ੍ਗਹੇਸਿ. ਥੇਰੋ ਸਿਲਾਥਮ੍ਭੋ ਵਿਯ ਨਿਚ੍ਚਲੋ ਹੁਤ੍ਵਾ ‘‘ਕੋ ਏਤ੍ਥਾ’’ਤਿ ਆਹ. ਅਹਂ, ਭਨ੍ਤੇ, ਤਿਸ੍ਸੋਤਿ. ਸੁਗਨ੍ਧਂ ਵਾਯਸਿ ਨੋ ਤਿਸ੍ਸਾਤਿ. ਏਵਂ ਖੀਣਾਸਵਸ੍ਸ ਭਯਂ ਨਾਮ ਨਤ੍ਥਿ. ਏਕਚ੍ਚੋ ਪਨ ਪੁਥੁਜ੍ਜਨੋਪਿ ਅਤਿਸੂਰੋ ਹੋਤਿ ਨਿਬ੍ਭਯੋ, ਸੋ ਰਜਨੀਯੇਨ ਆਰਮ੍ਮਣੇਨ ਪਰਿਗ੍ਗਣ੍ਹਿਤਬ੍ਬੋ. ਵਸਭਰਾਜਾਪਿ ਹਿ ਏਕਂ ਥੇਰਂ ਪਰਿਗ੍ਗਣ੍ਹਮਾਨੋ ਘਰੇ ਨਿਸੀਦਾਪੇਤ੍ਵਾ ਤਸ੍ਸ ਸਨ੍ਤਿਕੇ ਬਦਰਸਾਲ਼ਵਂ ਮਦ੍ਦਮਾਨੋ ਨਿਸੀਦਿ. ਮਹਾਥੇਰਸ੍ਸ ਖੇਲ਼ੋ ਚਲਿਤੋ, ਥੇਰਸ੍ਸ ਪੁਥੁਜ੍ਜਨਭਾਵੋ ਆਵਿਭੂਤੋ. ਖੀਣਾਸਵਸ੍ਸ ਹਿ ਰਸਤਣ੍ਹਾ ਨਾਮ ਸੁਪ੍ਪਹੀਨਾ, ਦਿਬ੍ਬੇਸੁਪਿ ਰਸੇਸੁ ਨਿਕਨ੍ਤਿ ਨਾਮ ਨ ਹੋਤਿ. ਤਸ੍ਮਾ ਇਮੇਹਿ ਉਪਾਯੇਹਿ ਪਰਿਗ੍ਗਹੇਤ੍ਵਾ ਸਚਸ੍ਸ ਭਯਂ ਵਾ ਛਮ੍ਭਿਤਤ੍ਤਂ ਵਾ ਰਸਤਣ੍ਹਾ ਵਾ ਉਪ੍ਪਜ੍ਜਤਿ, ‘‘ਨ ਤ੍ਵਂ ਅਰਹਾ’’ਤਿ ਅਪਨੇਤਬ੍ਬੋ.
ਅਸਨ੍ਤਗੁਣਸਮ੍ਭਾਵਨਲਕ੍ਖਣਾ ਪਾਪਿਚ੍ਛਾਤਿ ਆਹ – ‘‘ਯਾ ਸਾ ਇਧੇਕਚ੍ਚੋ…ਪੇ… ਆਦਿਨਾ ਨਯੇਨਾ’’ਤਿ. ਆਦਿ-ਸਦ੍ਦੇਨ ‘‘ਅਸ੍ਸਦ੍ਧੋ ਸਮਾਨੋ ‘ਸਦ੍ਧੋਤਿ ਮਂ ਜਨੋ ਜਾਨਾਤੂ’ਤਿ ਇਚ੍ਛਤਿ, ਅਪ੍ਪਸ੍ਸੁਤੋਵ ਸਮਾਨੋ ‘ਬਹੁਸ੍ਸੁਤੋਤਿ ਮਂ ਜਨੋ ਜਾਨਾਤੂ’ਤਿ ਇਚ੍ਛਤਿ, ਸਙ੍ਗਣਿਕਾਰਾਮੋਵ ਸਮਾਨੋ ‘ਪਵਿਵਿਤ੍ਤੋਤਿ ਮਂ ਜਨੋ ਜਾਨਾਤੂ’ਤਿ ਇਚ੍ਛਤਿ, ਕੁਸੀਤੋਵ ਸਮਾਨੋ ‘ਆਰਦ੍ਧਵੀਰਿਯੋਤਿ ਮਂ ਜਨੋ ਜਾਨਾਤੂ’ਤਿ ਇਚ੍ਛਤਿ, ਮੁਟ੍ਠਸ੍ਸਤੀਵ ਸਮਾਨੋ ‘ਉਪਟ੍ਠਿਤਸ੍ਸਤੀਤਿ ਮਂ ਜਨੋ ਜਾਨਾਤੂ’ਤਿ ਇਚ੍ਛਤਿ, ਅਸਮਾਹਿਤੋਵ ਸਮਾਨੋ ‘ਸਮਾਹਿਤੋਤਿ ਮਂ ਜਨੋ ਜਾਨਾਤੂ’ਤਿ ਇਚ੍ਛਤਿ, ਦੁਪ੍ਪਞ੍ਞੋਵ ਸਮਾਨੋ ‘ਪਞ੍ਞਵਾਤਿ ਮਂ ਜਨੋ ਜਾਨਾਤੂ’ਤਿ ਇਚ੍ਛਤਿ, ਅਖੀਣਾਸਵੋਵ ਸਮਾਨੋ ‘ਖੀਣਾਸਵੋਤਿ ਮਂ ਜਨੋ ਜਾਨਾਤੂ’ਤਿ ਇਚ੍ਛਤਿ, ਯਾ ਏਵਰੂਪਾ ਇਚ੍ਛਾ ਇਚ੍ਛਾਗਤਾ ਪਾਪਿਚ੍ਛਤਾ ਰਾਗੋ ਸਾਰਾਗੋ ਚਿਤ੍ਤਸ੍ਸ ਸਾਰਾਗੋ, ਅਯਂ ਵੁਚ੍ਚਤਿ ਪਾਪਿਚ੍ਛਤਾ’’ਤਿ (ਵਿਭ. ੮੫੧) ਏਵਂ ਵੁਤ੍ਤਂ ਪਾਲ਼ਿਪਦੇਸਂ ਸਙ੍ਗਣ੍ਹਾਤਿ. ਪਾਪਿਕਾਯਾਤਿ ਲਾਮਿਕਾਯ ਇਚ੍ਛਾਯ. ਅਪਕਤੋਤਿ ਪਾਪਿਕਾਯ ਇਚ੍ਛਾਯ ਸਮ੍ਮਾਆਜੀਵਤੋ ਅਪੇਤੋ ਕਤੋਤਿ ਇਚ੍ਛਾਯ ਅਪਕਤੋ. ਤਥਾਭੂਤੋ ਚ ਮਿਚ੍ਛਾਜੀਵੇਨ ਅਭਿਭੂਤੋ ਪਰਾਜਿਤੋ ਨਾਮ ਹੋਤੀਤਿ ਆਹ ‘‘ਅਭਿਭੂਤੋ ਪਰਾਜਿਤੋ’’ਤਿ.
ਸਾਮਞ੍ਞਂ ਦੁਪ੍ਪਰਾਮਟ੍ਠਂ ਨਿਰਯਾਯੁਪਕਡ੍ਢਤੀਤਿ ਯਥਾ ਕੁਸੋ ਯੇਨ ਦੁਗ੍ਗਹਿਤੋ, ਤਸ੍ਸ ਹਤ੍ਥਂ ਅਨੁਕਨ੍ਤਤਿ ਫਾਲੇਤਿ, ਏਵਮੇਵ ਸਮਣਧਮ੍ਮਸਙ੍ਖਾਤਂ ਸਾਮਞ੍ਞਮ੍ਪਿ ਖਣ੍ਡਸੀਲਾਦਿਤਾਯ ਦੁਪ੍ਪਰਾਮਟ੍ਠਂ ਨਿਰਯਾਯ ਉਪਕਡ੍ਢਤਿ, ਨਿਰਯੇ ਨਿਬ੍ਬਤ੍ਤਾਪੇਤੀਤਿ ਅਤ੍ਥੋ. ਸਿਥਿਲੋਤਿ ਓਲੀਯਿਤ੍ਵਾ ਕਰਣੇਨ ਸਿਥਿਲਗ੍ਗਾਹੇਨ ਕਤੋ. ਪਰਿਬ੍ਬਾਜੋਤਿ ਖਣ੍ਡਾਦਿਭਾਵਪ੍ਪਤ੍ਤੋ ਸਮਣਧਮ੍ਮੋ. ਭਿਯ੍ਯੋ ਆਕਿਰਤੇ ਰਜਨ੍ਤਿ ਅਬ੍ਭਨ੍ਤਰੇ ਵਿਜ੍ਜਮਾਨਂ ਰਾਗਰਜਾਦਿਂ ਏਵਰੂਪੋ ਸਮਣਧਮ੍ਮੋ ਅਪਨੇਤੁਂ ਨ ਸਕ੍ਕੋਤਿ, ਅਥ ਖੋ ਤਸ੍ਸ ਉਪਰਿ ਅਪਰਮ੍ਪਿ ਰਾਗਰਜਾਦਿਂ ਆਕਿਰਤੀਤਿ ਅਤ੍ਥੋ. ਭਿਕ੍ਖੁਭਾਵੋਤਿ ਪਾਰਾਜਿਕਂ ਆਪਜ੍ਜਿਤ੍ਵਾ ‘‘ਸਮਣੋ ਅਹ’’ਨ੍ਤਿ ਪਟਿਜਾਨਨਤੋ ਵੋਹਾਰਮਤ੍ਤਸਿਦ੍ਧੋ ਭਿਕ੍ਖੁਭਾਵੋ. ਅਜਾਨਮੇਵਾਤਿ ਪਾਠੇ ਏਵਾਤਿ ਅਵਧਾਰਣਤ੍ਥੇ ਨਿਪਾਤੋ. ਅਜਾਨਮੇਵਨ੍ਤਿ ਪਾਠੇ ਪਨ ਏਵਂ ਜਾਨਾਮਿ ਏਵਂ ਪਸ੍ਸਾਮੀਤਿ ਅਵਚਨ੍ਤਿ ਯੋਜੇਤਬ੍ਬਂ.
ਪਦਭਾਜਨੀਯਵਣ੍ਣਨਾ
੧੯੯. ਅਸੁਭਜ੍ਝਾਨਾਦੀਨੀਤਿ ਆਦਿ-ਸਦ੍ਦੇਨ ਕਾਯਗਤਾਸਤਿਜ੍ਝਾਨਞ੍ਚ ਕਸਿਣਜ੍ਝਾਨਞ੍ਚ ਸਙ੍ਗਣ੍ਹਾਤਿ. ਤੇਨ ‘‘ਕਾਯਗਤਾਸਤਿਜ੍ਝਾਨਂ ਪਥਵੀਕਸਿਣਜ੍ਝਾਨਂ ਸਮਾਪਜ੍ਜਿ’’ਨ੍ਤਿਆਦਿਂ ਵਦਨ੍ਤੋਪਿ ਪਾਰਾਜਿਕੋਵ ਹੋਤੀਤਿ ਵੇਦਿਤਬ੍ਬਂ. ਵਿਮੋਕ੍ਖੋਤਿ ਏਤ੍ਥ ਵਿ-ਸਦ੍ਦੋ ਵਿਸੇਸਤ੍ਥੋ ਵਿਵਿਧਤ੍ਥੋ ਵਾਤਿ ਦਸ੍ਸੇਨ੍ਤੋ ਆਹ ‘‘ਸੁਟ੍ਠੁ ਮੁਤ੍ਤੋ’’ਤਿਆਦਿ. ਵਿਮੋਕ੍ਖੋਤਿ ਚਤ੍ਤਾਰੋ ਅਰਿਯਮਗ੍ਗਾ. ਤਸ੍ਸ ਸਗੁਣਤੋ ਸੁਞ੍ਞਤਾਦਿਨਾਮਲਾਭਂ ਦਸ੍ਸੇਨ੍ਤੋ ਆਹ ‘‘ਸੋ ਪਨਾਯ’’ ਨ੍ਤਿਆਦਿ. ਮਗ੍ਗੋ ਹਿ ਨਾਮ ਪਞ੍ਚਹਿ ਕਾਰਣੇਹਿ ਨਾਮਂ ਲਭਤਿ ਸਰਸੇਨ ਵਾ ਪਚ੍ਚਨੀਕੇਨ ਵਾ ਸਗੁਣੇਨ ਵਾ ਆਰਮ੍ਮਣੇਨ ਵਾ ਆਗਮਨੇਨ ਵਾ. ਸਚੇ ਹਿ ਸਙ੍ਖਾਰੁਪੇਕ੍ਖਾ ਅਨਿਚ੍ਚਤੋ ਸਙ੍ਖਾਰੇ ਸਮ੍ਮਸਿਤ੍ਵਾ ਵੁਟ੍ਠਾਤਿ, ਅਨਿਮਿਤ੍ਤਵਿਮੋਕ੍ਖੇਨ ਵਿਮੁਚ੍ਚਤਿ, ਸਚੇ ਦੁਕ੍ਖਤੋ ਸਮ੍ਮਸਿਤ੍ਵਾ ਵੁਟ੍ਠਾਤਿ, ਅਪ੍ਪਣਿਹਿਤਵਿਮੋਕ੍ਖੇਨ ਵਿਮੁਚ੍ਚਤਿ, ਸਚੇ ਅਨਤ੍ਤਤੋ ਸਮ੍ਮਸਿਤ੍ਵਾ ਵੁਟ੍ਠਾਤਿ, ਸੁਞ੍ਞਤਵਿਮੋਕ੍ਖੇਨ ਵਿਮੁਚ੍ਚਤਿ, ਇਦਂ ਸਰਸਤੋ ਨਾਮਂ ਨਾਮ. ਯਸ੍ਮਾ ਪਨੇਸ ਅਨਿਚ੍ਚਾਨੁਪਸ੍ਸਨਾਯ ਸਙ੍ਖਾਰਾਨਂ ਘਨਵਿਨਿਬ੍ਭੋਗਂ ਕਤ੍ਵਾ ਨਿਚ੍ਚਨਿਮਿਤ੍ਤਧੁਵਨਿਮਿਤ੍ਤਸਸ੍ਸਤਨਿਮਿਤ੍ਤਾਨਿ ਪਜਹਨ੍ਤੋ ਆਗਤੋ, ਤਸ੍ਮਾ ਅਨਿਮਿਤ੍ਤੋ. ਦੁਕ੍ਖਾਨੁਪਸ੍ਸਨਾਯ ਪਨ ਸੁਖਸਞ੍ਞਂ ਪਹਾਯ ਪਣਿਧਿਂ ਪਤ੍ਥਨਂ ਸੁਕ੍ਖਾਪੇਤ੍ਵਾ ਆਗਤਤ੍ਤਾ ਅਪ੍ਪਣਿਹਿਤੋ. ਅਨਤ੍ਤਾਨੁਪਸ੍ਸਨਾਯ ਅਤ੍ਤਸਤ੍ਤਪੁਗ੍ਗਲਸਞ੍ਞਂ ਪਹਾਯ ਸਙ੍ਖਾਰਾਨਂ ਸੁਞ੍ਞਤੋ ਦਿਟ੍ਠਤ੍ਤਾ ਸੁਞ੍ਞਤੋਤਿ ਇਦਂ ਪਚ੍ਚਨੀਕਤੋ ਨਾਮਂ ਨਾਮ.
ਰਾਗਾਦੀਹਿ ਪਨੇਸ ਸੁਞ੍ਞਤਤ੍ਤਾ ਸੁਞ੍ਞਤੋ. ਰੂਪਨਿਮਿਤ੍ਤਾਦੀਨਂ ਰਾਗਨਿਮਿਤ੍ਤਾਦੀਨਂਯੇਵ ਵਾ ਅਭਾਵੇਨ ਅਨਿਮਿਤ੍ਤੋ. ਰਾਗਾਦਿਪਣਿਧਿਆਦੀਨਂ ਅਭਾਵਤੋ ਅਪ੍ਪਣਿਹਿਤੋਤਿ ਇਦਮਸ੍ਸ ਸਗੁਣਤੋ ਨਾਮਂ. ਸ੍ਵਾਯਂ ਸੁਞ੍ਞਤਂ ਅਨਿਮਿਤ੍ਤਂ ਅਪ੍ਪਣਿਹਿਤਞ੍ਚ ਨਿਬ੍ਬਾਨਂ ਆਰਮ੍ਮਣਂ ਕਰੋਤੀਤਿ ਸੁਞ੍ਞਤੋ ਅਨਿਮਿਤ੍ਤੋ ਅਪ੍ਪਣਿਹਿਤੋਤਿ ਵੁਚ੍ਚਤਿ, ਇਦਮਸ੍ਸ ਆਰਮ੍ਮਣਤੋ ਨਾਮਂ. ਆਗਮਨਂ ਪਨ ਦੁਵਿਧਂ ਵਿਪਸ੍ਸਨਾਗਮਨਂ ਮਗ੍ਗਾਗਮਨਞ੍ਚ. ਤਤ੍ਥ ਮਗ੍ਗੇ ਵਿਪਸ੍ਸਨਾਗਮਨਂ ਲਬ੍ਭਤਿ, ਫਲੇ ਮਗ੍ਗਾਗਮਨਂ. ਅਨਤ੍ਤਾਨੁਪਸ੍ਸਨਾ ਹਿ ਸੁਞ੍ਞਤਾ ਨਾਮ, ਸੁਞ੍ਞਤਵਿਪਸ੍ਸਨਾਯ ਮਗ੍ਗੋ ਸੁਞ੍ਞਤੋ. ਅਨਿਚ੍ਚਾਨੁਪਸ੍ਸਨਾ ਅਨਿਮਿਤ੍ਤਾ ਨਾਮ, ਅਨਿਮਿਤ੍ਤਵਿਪਸ੍ਸਨਾਯ ਮਗ੍ਗੋ ਅਨਿਮਿਤ੍ਤੋ. ਇਦਂ ਪਨ ਨਾਮਂ ਨ ਅਭਿਧਮ੍ਮਪਰਿਯਾਯੇਨ ਲਬ੍ਭਤਿ. ਤਥਾ ਹਿ ਤਂ ਸਙ੍ਖਾਰਨਿਮਿਤ੍ਤਸ੍ਸ ਅਵਿਜਹਨਤੋ ਨ ਨਿਪ੍ਪਰਿਯਾਯੇਨ ਅਨਿਮਿਤ੍ਤਂ, ਸੁਤ੍ਤਨ੍ਤਪਰਿਯਾਯੇਨ ਪਨ ਲਬ੍ਭਤਿ. ਤਤ੍ਰ ਹਿ ਗੋਤ੍ਰਭੁਞਾਣਂ ਅਨਿਮਿਤ੍ਤਂ ਨਿਬ੍ਬਾਨਂ ਆਰਮ੍ਮਣਂ ਕਤ੍ਵਾ ਅਨਿਮਿਤ੍ਤਨਾਮਕਂ ਹੁਤ੍ਵਾ ਸਯਂ ਆਗਮਨਿਯਟ੍ਠਾਨੇ ਠਤ੍ਵਾ ਮਗ੍ਗਸ੍ਸ ਨਾਮਂ ਦੇਤੀਤਿ ਵਦਨ੍ਤਿ, ਤੇਨ ਮਗ੍ਗੋ ਅਨਿਮਿਤ੍ਤੋਤਿ ਵੁਤ੍ਤੋ. ਮਗ੍ਗਾਗਮਨੇਨ ਪਨ ਫਲਂ ਅਨਿਮਿਤ੍ਤਨ੍ਤਿ ਯੁਜ੍ਜਤਿਯੇਵ. ਦੁਕ੍ਖਾਨੁਪਸ੍ਸਨਾ ਸਙ੍ਖਾਰੇਸੁ ਪਣਿਧਿਂ ਸੁਕ੍ਖਾਪੇਤ੍ਵਾ ਆਗਤਤ੍ਤਾ ਅਪ੍ਪਣਿਹਿਤਾ ਨਾਮ, ਅਪ੍ਪਣਿਹਿਤਵਿਪਸ੍ਸਨਾਯ ਮਗ੍ਗੋ ਅਪ੍ਪਣਿਹਿਤੋ, ਅਪ੍ਪਣਿਹਿਤਮਗ੍ਗਸ੍ਸ ਫਲਂ ਅਪ੍ਪਣਿਹਿਤਂ. ਏਵਂ ਵਿਪਸ੍ਸਨਾ ਅਤ੍ਤਨੋ ਨਾਮਂ ਮਗ੍ਗਸ੍ਸ ਦੇਤਿ, ਮਗ੍ਗੋ ਫਲਸ੍ਸਾਤਿ ਇਦਂ ਆਗਮਨਤੋ ਨਾਮਂ. ਸੁਞ੍ਞਤ੍ਤਾਤਿ ਵਿਵਿਤ੍ਤਤ੍ਤਾ. ਨ ਹਿ ਮਗ੍ਗੇ ਰਾਗਾਦਯੋ ਸਨ੍ਤਿ, ਉਪਰੂਪਰਿ ਉਪ੍ਪਜ੍ਜਨਕਰਾਗਾਦੀਨਂ ਕਾਰਣਤ੍ਤਾ ਰਾਗਾਦਯੋ ਨਿਮਿਤ੍ਤਨ੍ਤਿ ਆਹ ‘‘ਰਾਗਦੋਸਮੋਹਨਿਮਿਤ੍ਤੇਹੀ’’ਤਿ. ਸਵਿਗ੍ਗਹਾਨਂ ਵਿਯ ਉਪਟ੍ਠਾਨਮ੍ਪੇਤ੍ਥ ਨਿਮਿਤ੍ਤਨ੍ਤਿ ਵਦਨ੍ਤਿ. ਰਾਗਾਦਯੋਵ ਪਵਤ੍ਤਿਟ੍ਠਾਨਟ੍ਠੇਨ ਪਣਿਧੀਤਿ ਆਹ ‘‘ਰਾਗਦੋਸਮੋਹਪਣਿਧੀਨ’’ਨ੍ਤਿ.
ਵਤ੍ਥੁਵਿਜ੍ਜਾਦਿਂ ਸਨ੍ਧਾਯ ਅਵਚਨਤੋ ‘‘ਵਿਜ੍ਜਾਨਂ ਲਾਭੀਮ੍ਹੀ’’ਤਿ ਵੁਤ੍ਤੇਪਿ ਹੋਤਿ. ਏਕੇਕਕੋਟ੍ਠਾਸਵਸੇਨਾਤਿ ਸਤਿਪਟ੍ਠਾਨਚਤੁਕ੍ਕਾਦਿਏਕੇਕਕੋਟ੍ਠਾਸਵਸੇਨ. ਕਿਞ੍ਚਾਪਿ ਮਹਾਅਟ੍ਠਕਥਾਯਮ੍ਪਿ ਏਕੇਕਕੋਟ੍ਠਾਸਵਸੇਨੇਵ ਦਸ੍ਸਿਤਂ, ਤਤ੍ਥ ਪਨ ‘‘ਲੋਕੁਤ੍ਤਰਾਨਂ ਸਤਿਪਟ੍ਠਾਨਾਨ’’ਨ੍ਤਿਆਦਿਨਾ ਪਚ੍ਚੇਕਂ ਲੋਕੁਤ੍ਤਰ-ਸਦ੍ਦਂ ਯੋਜੇਤ੍ਵਾ ਏਕੇਕਕੋਟ੍ਠਾਸਵਸੇਨੇਵ ਵੁਤ੍ਤਂ, ਇਧ ਲੋਕੁਤ੍ਤਰ-ਸਦ੍ਦੇਨ ਵਿਨਾਤਿ ਅਯਮੇਤ੍ਥ ਵਿਸੇਸੋ. ਤਤ੍ਥਾਤਿ ਤੇਸੁ ਕੋਟ੍ਠਾਸੇਸੁ.
ਨਨੁ ਚ ‘‘ਕਿਲੇਸਪ੍ਪਹਾਨਮੇਵਾ’’ਤਿ ਕਸ੍ਮਾ ਵੁਤ੍ਤਂ. ਨ ਹਿ ਕਿਲੇਸਾਨਂ ਪਹਾਨਮਤ੍ਤਂ ਉਤ੍ਤਰਿਮਨੁਸ੍ਸਧਮ੍ਮੋ ਹੋਤੀਤਿ ਯੋ ਵਦੇਯ੍ਯ, ਤਂ ਸਨ੍ਧਾਯ ਕਿਲੇਸਪ੍ਪਹਾਨਸ੍ਸ ਮਗ੍ਗਕਿਚ੍ਚਤ੍ਤਾ ਕਿਚ੍ਚਵਸੇਨ ਮਗ੍ਗੋ ਦੀਪਿਤੋਤਿ ਦਸ੍ਸੇਤੁਂ ‘‘ਤਂ ਪਨਾ’’ਤਿਆਦਿ ਵੁਤ੍ਤਂ. ਕਾਮਰਾਗਂ ਸਨ੍ਧਾਯ ‘‘ਤਤਿਯਮਗ੍ਗੇਨ ਹਿ ਰਾਗਦੋਸਾਨਂ ਪਹਾਨ’’ਨ੍ਤਿ ਵੁਤ੍ਤਂ, ਨ ਪਨ ਰੂਪਰਾਗਅਰੂਪਰਾਗੇ ਸਨ੍ਧਾਯ. ਨ ਹਿ ਤੇ ਤੇਨ ਪਹੀਯਨ੍ਤਿ ਚਤੁਤ੍ਥਮਗ੍ਗੇਨ ਪਹਾਤਬ੍ਬਤ੍ਤਾ.
ਰਾਗਾ ਚਿਤ੍ਤਂ ਵਿਨੀਵਰਣਤਾਤਿ ਰਾਗਾ ਚਿਤ੍ਤਸ੍ਸ ਵਿਨੀਵਰਣਤਾਤਿ ਵੁਤ੍ਤਂ ਹੋਤਿ. ਰਾਗਾ ਵਿਮੁਤ੍ਤਸ੍ਸ ਚਿਤ੍ਤਸ੍ਸ ਤਸ੍ਸੇਵ ਰਾਗਨੀਵਰਣਸ੍ਸ ਅਭਾਵੇਨ ਵਿਗਤਨੀਵਰਣਤ੍ਤਾ ਵਿਨੀਵਰਣਤਾਤਿ ਅਤ੍ਥੋ ਵੇਦਿਤਬ੍ਬੋ. ਏਸ ਨਯੋ ਸੇਸੇਸੁਪਿ.
ਯਾ ਚ ਪਞ੍ਚ ਵਿਜ੍ਜਾਤਿ ਯੋਜੇਤਬ੍ਬਂ. ਨਿਬ੍ਬਟ੍ਟਿਤਲੋਕੁਤ੍ਤਰਤ੍ਤਾਤਿ ਵਿਸੁਂਯੇਵ ਲੋਕਤੋ ਅਪਗਤਲੋਕੁਤ੍ਤਰਤ੍ਤਾ. ਯਥਾ ਵਿਨਾ ਲੋਕੁਤ੍ਤਰ-ਸਦ੍ਦੇਨ ‘‘ਸਤਿਪਟ੍ਠਾਨਾਦੀਨਂ ਲਾਭੀਮ੍ਹੀ’’ਤਿ ਵੁਤ੍ਤੇਪਿ ਪਾਰਾਜਿਕਂ ਹੋਤਿ, ਏਵਮਿਧਾਪਿ ‘‘ਅਤ੍ਥਪਟਿਸਮ੍ਭਿਦਾਯ ਲਾਭੀਮ੍ਹੀਤਿ ਵੁਤ੍ਤੇਪਿ ਹੋਤਿਯੇਵਾ’’ਤਿ ਵਤ੍ਤੁਂ ਯੁਜ੍ਜਤਿ. ਕਿਞ੍ਚਾਪਿ ਯੁਜ੍ਜਤਿ, ਅਥ ਖੋ ਮਹਾਅਟ੍ਠਕਥਾਯਂ ਵਿਭਾਗੇਨ ਵੁਤ੍ਤਤ੍ਤਾ ਨ ਸਕ੍ਕਾ ਏਵਮਿਦਂ ਵਤ੍ਤੁਨ੍ਤਿ ਦਸ੍ਸੇਤੁਂ ‘‘ਮਹਾਅਟ੍ਠਕਥਾਯਂ ਪਨ…ਪੇ… ਨ ਸਕ੍ਕਾ ਅਞ੍ਞਂ ਪਮਾਣਂ ਕਾਤੁ’’ਨ੍ਤਿ ਵੁਤ੍ਤਂ. ਤਮ੍ਪਿ ਤਤ੍ਥੇਵ ਪਟਿਕ੍ਖਿਤ੍ਤਨ੍ਤਿ ਸਮ੍ਬਨ੍ਧੋ.
ਸੁਦ੍ਧਿਕਵਾਰਕਥਾਵਣ੍ਣਨਾ
੨੦੦. ਉਲ੍ਲਪਨਾਕਾਰਨ੍ਤਿ ਸਮਾਪਜ੍ਜਿਨ੍ਤਿਆਦਿਉਲ੍ਲਪਨਾਕਾਰਂ. ਆਪਤ੍ਤਿਭੇਦਨ੍ਤਿ ‘‘ਨ ਪਟਿਵਿਜਾਨਨ੍ਤਸ੍ਸ ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿਆਦਿਆਪਤ੍ਤਿਭੇਦਂ. ਪੁਨ ਆਨੇਤ੍ਵਾ ਪਠਮਜ੍ਝਾਨਾਦੀਹਿ ਨ ਯੋਜਿਤਨ੍ਤਿ ਏਤ੍ਥ ‘‘ਪਠਮਜ੍ਝਾਨੇਨਾ’’ਤਿ ਪਾਠੋਤਿ ਗਣ੍ਠਿਪਦੇ ਵੁਤ੍ਤਂ, ਤਦੇਵ ਯੁਤ੍ਤਂ.
ਕਤ੍ਤੁਸਾਧਨੋਪਿ ਭਣਿਤ-ਸਦ੍ਦੋ ਹੋਤੀਤਿ ਆਹ ‘‘ਅਥ ਵਾ’’ਤਿਆਦਿ. ਯੇਨ ਚਿਤ੍ਤੇਨ ਮੁਸਾ ਭਣਤਿ, ਤੇਨੇਵ ਚਿਤ੍ਤੇਨ ਨ ਸਕ੍ਕਾ ‘‘ਮੁਸਾ ਭਣਾਮੀ’’ਤਿ ਜਾਨਿਤੁਂ, ਅਨ੍ਤਰਨ੍ਤਰਾ ਪਨ ਅਞ੍ਞੇਨ ਚਿਤ੍ਤੇਨ ‘‘ਮੁਸਾ ਭਣਾਮੀ’’ਤਿ ਜਾਨਾਤੀਤਿ ਵੁਤ੍ਤਂ ‘‘ਭਣਨ੍ਤਸ੍ਸ ਹੋਤਿ ਮੁਸਾ ਭਣਾਮੀ’’ਤਿ. ਅਯਮੇਤ੍ਥ ਅਤ੍ਥੋ ਦਸ੍ਸਿਤੋਤਿ ਤੀਹਿ ਅਙ੍ਗੇਹਿ ਸਮਨ੍ਨਾਗਤੋ ਮੁਸਾਵਾਦੋਤਿ ਅਯਮੇਤ੍ਥ ਅਤ੍ਥੋ ਦਸ੍ਸਿਤੋ. ਨ ਸਕ੍ਕਾ ਨ ਭਵਿਤੁਨ੍ਤਿ ਪੁਬ੍ਬਭਾਗਤੋ ਪਟ੍ਠਾਯ ਆਭੋਗਂ ਕਤ੍ਵਾ ਭਣਿਤਤ੍ਤਾ ਨ ਸਕ੍ਕਾ ਨ ਭਵਿਤੁਂ. ਆਪਤ੍ਤਿਯਾ ਨ ਕਾਰੇਤਬ੍ਬੋਤਿ ਪੁਬ੍ਬਭਾਗਕ੍ਖਣੇ ‘‘ਮੁਸਾ ਭਣਿਸ੍ਸਾਮੀ’’ਤਿ ਆਭੋਗਂ ਵਿਨਾ ਸਹਸਾ ਭਣਨ੍ਤਸ੍ਸ ਵਚਨਕ੍ਖਣੇ ‘‘ਮੁਸਾ ਏਤ’’ਨ੍ਤਿ ਉਪਟ੍ਠਿਤੇਪਿ ਨਿਵਤ੍ਤੇਤੁਮਸਕ੍ਕੁਣੇਯ੍ਯਤਾਯ ਅਵਿਸਯਭਾਵਤੋ ਆਪਤ੍ਤਿਯਾ ਨ ਕਾਰੇਤਬ੍ਬੋ. ਦਵਾਤਿ ਸਹਸਾ. ਰਵਾਤਿ ਅਞ੍ਞਂ ਵਤ੍ਤੁਕਾਮਸ੍ਸ ਖਲਿਤ੍ਵਾ ਅਞ੍ਞਭਣਨਂ.
ਤਂ ਜਾਨਾਤੀਤਿ ਤਂਞਾਣਂ, ਤਸ੍ਸ ਭਾਵੋ ਤਂਞਾਣਤਾ, ਞਾਣਸ੍ਸ ਅਤ੍ਥਸਂਵੇਦਨਨ੍ਤਿ ਅਤ੍ਥੋ. ਞਾਣਸਮੋਧਾਨਨ੍ਤਿ ਞਾਣਸ੍ਸ ਬਹੁਭਾਵੋ, ਏਕਚਿਤ੍ਤੁਪ੍ਪਾਦੇ ਅਨੇਕਞਾਣਤਾਤਿ ਅਤ੍ਥੋ. ਨ ਹਿ ਸਕ੍ਕਾ…ਪੇ… ਜਾਨਿਤੁਨ੍ਤਿ ਆਰਮ੍ਮਣਕਰਣਸ੍ਸ ਅਭਾਵਤੋ ਵੁਤ੍ਤਂ. ਅਸਮ੍ਮੋਹਾਵਬੋਧੋ ਚ ਈਦਿਸਸ੍ਸ ਞਾਣਸ੍ਸ ਨਤ੍ਥਿ, ‘‘ਭਣਿਸ੍ਸਾਮੀ’’ਤਿ ਪਵਤ੍ਤਚਿਤ੍ਤਂ ‘‘ਭਣਾਮੀ’’ਤਿ ਪਵਤ੍ਤਚਿਤ੍ਤਸ੍ਸ ਪਚ੍ਚਯੋ ਹੁਤ੍ਵਾ ਨਿਰੁਜ੍ਝਤਿ, ਤਞ੍ਚ ‘‘ਭਣਿਤ’’ਨ੍ਤਿ ਪਵਤ੍ਤਚਿਤ੍ਤਸ੍ਸ ਪਚ੍ਚਯੋ ਹੁਤ੍ਵਾਤਿ ਆਹ – ‘‘ਪੁਰਿਮਂ ਪੁਰਿਮਂ ਪਨ…ਪੇ… ਨਿਰੁਜ੍ਝਤੀ’’ਤਿ. ਤਸ੍ਮਿਂ ਪੁਬ੍ਬਭਾਗੇ ਸਤਿ ‘‘ਸੇਸਦ੍ਵਯਂ ਨ ਹੇਸ੍ਸਤੀ’’ਤਿ ਏਤਂ ਨਤ੍ਥਿ, ਅਵਸ੍ਸਂ ਹੋਤਿਯੇਵਾਤਿ ਵੁਤ੍ਤਂ ਹੋਤਿ, ਭਣਿਸ੍ਸਾਮੀਤਿ ਪੁਬ੍ਬਭਾਗੇ ਸਤਿ ‘‘ਭਣਾਮਿ ਭਣਿਤ’’ਨ੍ਤਿ ਏਤਂ ਦ੍ਵਯਂ ਨ ਨ ਹੋਤਿ, ਹੋਤਿਯੇਵਾਤਿ ਅਧਿਪ੍ਪਾਯੋ. ਏਕਂ ਵਿਯ ਪਕਾਸਤੀਤਿ ਅਨੇਕਕ੍ਖਣੇ ਉਪ੍ਪਨ੍ਨਮ੍ਪਿ ਚਿਤ੍ਤਂ ਏਕਕ੍ਖਣੇ ਉਪ੍ਪਨ੍ਨਸਦਿਸਂ ਹੁਤ੍ਵਾ ਪਕਾਸਤਿ. ਸਮਾਪਜ੍ਜਿਨ੍ਤਿਆਦੀਨੀਤਿ ਆਦਿ-ਸਦ੍ਦੇਨ ਸਮਾਪਜ੍ਜਾਮਿ, ਸਮਾਪਨ੍ਨੋਤਿ ਇਮਾਨਿ ਦ੍ਵੇ ਸਙ੍ਗਣ੍ਹਾਤਿ. ਤਤ੍ਥ ਸਮਾਪਜ੍ਜਿਂ, ਸਮਾਪਨ੍ਨੋਤਿ ਇਮੇਸਂ ਅਸਤਿਪਿ ਕਾਲਨਾਨਤ੍ਤੇ ਵਚਨਵਿਸੇਸਂ ਸਨ੍ਧਾਯ ਵਿਸੁਂ ਗਹਣਂ.
੨੦੭. ਸਕਭਾਵਪਰਿਚ੍ਚਜਨਵਸੇਨਾਤਿ ਅਤ੍ਤਨੋ ਸਨ੍ਤਕਭਾਵਸ੍ਸ ਪਰਿਚ੍ਚਜਨਵਸੇਨ. ਮਗ੍ਗੁਪ੍ਪਤ੍ਤਿਤੋ ਪੁਬ੍ਬੇ ਵਿਯ ‘‘ਸਰਾਗੋ ਸਦੋਸੋ’’ਤਿ ਵਤ੍ਤਬ੍ਬਤਾਭਾਵਤੋ ਚਤ੍ਤਮ੍ਪਿ ਕੇਚਿ ਗਣ੍ਹਨ੍ਤਿ, ਨਯਿਦਮੇਵਨ੍ਤਿ ਦਸ੍ਸਨਤ੍ਥਂ ‘‘ਵਨ੍ਤੋ’’ਤਿ ਵੁਤ੍ਤਂ. ਨ ਹਿ ਯਂ ਯੇਨ ਵਨ੍ਤਂ, ਸੋ ਪੁਨ ਤਂ ਆਦਿਯਤਿ. ਤੇਨਾਹ ‘‘ਅਨਾਦਿਯਨਭਾਵਦਸ੍ਸਨਵਸੇਨਾ’’ਤਿ. ਵਨ੍ਤਮ੍ਪਿ ਕਿਞ੍ਚਿ ਸਨ੍ਤਤਿਲਗ੍ਗਂ ਸਿਯਾ, ਨਯਿਦਮੇਵਨ੍ਤਿ ਦਸ੍ਸਨਤ੍ਥਂ ‘‘ਮੁਤ੍ਤੋ’’ਤਿ ਵੁਤ੍ਤਂ. ਤੇਨਾਹ ‘‘ਸਨ੍ਤਤਿਤੋ ਵਿਮੋਚਨਵਸੇਨਾ’’ਤਿ. ਮੁਤ੍ਤਮ੍ਪਿ ਕਿਞ੍ਚਿ ਮੁਤ੍ਤਬਨ੍ਧਨਂ ਵਿਯ ਫਲਂ ਕੁਹਿਞ੍ਚਿ ਤਿਟ੍ਠਤਿ, ਨ ਏਵਮਿਦਨ੍ਤਿ ਦਸ੍ਸਨਤ੍ਥਂ ‘‘ਪਹੀਨੋ’’ਤਿ ਵੁਤ੍ਤਂ. ਤੇਨਾਹ ‘‘ਕ੍ਵਚਿ ਅਨਵਟ੍ਠਾਨਦਸ੍ਸਨਵਸੇਨਾ’’ਤਿ. ਯਥਾ ਕਿਞ੍ਚਿ ਦੁਨ੍ਨਿਸ੍ਸਟ੍ਠਂ ਪੁਨ ਆਦਾਯ ਸਮ੍ਮਦੇਵ ਨਿਸ੍ਸਟ੍ਠਂ ਪਟਿਨਿਸ੍ਸਟ੍ਠਨ੍ਤਿ ਵੁਚ੍ਚਤਿ, ਏਵਂ ਵਿਪਸ੍ਸਨਾਯ ਨਿਸ੍ਸਟ੍ਠਂ ਆਦਿਨ੍ਨਸਦਿਸਂ ਮਗ੍ਗੇਨ ਪਹੀਨਂ ਪਟਿਨਿਸ੍ਸਟ੍ਠਂ ਨਾਮ ਹੋਤੀਤਿ ਦਸ੍ਸਨਤ੍ਥਂ ‘‘ਪਟਿਨਿਸ੍ਸਟ੍ਠੋ’’ਤਿ ਵੁਤ੍ਤਂ. ਤੇਨਾਹ ‘‘ਆਦਿਨ੍ਨਪੁਬ੍ਬਸ੍ਸ ਪਟਿਨਿਸ੍ਸਗ੍ਗਦਸ੍ਸਨਵਸੇਨਾ’’ਤਿ. ਉਕ੍ਖੇਟਿਤੋਤਿ ਉਤ੍ਤਾਸਿਤੋ, ਉਤ੍ਤਾਸੇਤ੍ਵਾ ਪਲਾਪਿਤੋਤਿ ਵੁਤ੍ਤਂ ਹੋਤਿ. ਯੋ ਚ ਉਤ੍ਤਾਸੇਤ੍ਵਾ ਪਲਾਪਿਤੋ, ਨ ਪੁਨ ਸੋ ਤਂ ਠਾਨਂ ਆਗਚ੍ਛਤੀਤਿ ਆਹ ‘‘ਪੁਨ ਅਨਲ੍ਲੀਯਨਭਾਵਦਸ੍ਸਨਵਸੇਨਾ’’ਤਿ, ਪੁਨ ਆਗਨ੍ਤ੍ਵਾ ਸਨ੍ਤਾਨੇ ਅਨੁਪ੍ਪਤ੍ਤਿਭਾਵਦਸ੍ਸਨਵਸੇਨਾਤਿ ਅਤ੍ਥੋ. ਖਿਟ-ਸਦ੍ਦਂ ਸਦ੍ਦਸਤ੍ਥਵਿਦੂ ਉਤ੍ਤਾਸਤ੍ਥੇ ਪਠਨ੍ਤੀਤਿ ਆਹ – ‘‘ਸ੍ਵਾਯਮਤ੍ਥੋ ਸਦ੍ਦਸਤ੍ਥਤੋ ਪਰਿਯੇਸਿਤਬ੍ਬੋ’’ਤਿ. ਅਣੁਯੇਵ ਅਣੁਸਹਗਤਂ, ਅਤਿਖੁਦ੍ਦਕਨ੍ਤਿ ਵੁਤ੍ਤਂ ਹੋਤਿ.
ਸੁਦ੍ਧਿਕਵਾਰਕਥਾਵਣ੍ਣਨਾ ਨਿਟ੍ਠਿਤਾ.
ਵਤ੍ਤੁਕਾਮਵਾਰਕਥਾਵਣ੍ਣਨਾ
੨੧੫. ਕੇਵਲਞ੍ਹਿਯਨ੍ਤਿ ਕੇਵਲਞ੍ਹਿ ਅਯਂ. ‘‘ਵਾਰੋ’’ਤਿ ਅਜ੍ਝਾਹਰਿਤਬ੍ਬਂ. ਤਙ੍ਖਣਞ੍ਞੇਵ ਜਾਨਾਤੀਤਿ ‘‘ਪਠਮਜ੍ਝਾਨਂ ਸਮਾਪਜ੍ਜਿ’’ਨ੍ਤਿਆਦਿਮ੍ਹਿ ਵੁਤ੍ਤੇ ਤਦਤ੍ਥਸ੍ਸ ਪਕਤਿਯਾ ਵਿਜਾਨਨਲਕ੍ਖਣਂ ਸਨ੍ਧਾਯ ਵੁਤ੍ਤਂ. ਏਵਂ ਪਨ ਵਚੀਭੇਦਂ ਅਕਤ੍ਵਾ ਪਕ੍ਕਮਨਾਦੀਸੁ ਅਞ੍ਞਤਰੋ ਭਿਕ੍ਖੁ ‘‘ਮਂ ਅਰਹਾਤਿ ਜਾਨਾਤੂ’’ਤਿ ਤਮ੍ਹਾ ਆਵਾਸਾ ਪਠਮਂ ਪਕ੍ਕਮਤੀਤਿ ਆਗਤਵਤ੍ਥੁਮ੍ਹਿ ਵਿਯ ਤਸ੍ਮਿਂ ਖਣੇ ਅਵਿਦਿਤੇਪਿ ਨਿਕ੍ਖਨ੍ਤਮਤ੍ਤੇ ਪਾਰਾਜਿਕਂ. ਜਾਨਨਲਕ੍ਖਣਨ੍ਤਿ ‘‘ਤਙ੍ਖਣੇ ਜਾਨਨਂ ਨਾਮ ਈਦਿਸ’’ਨ੍ਤਿ ਵੁਤ੍ਤਲਕ੍ਖਣਂ. ਵਿਞ੍ਞਤ੍ਤਿਪਥੇਤਿ ਕਾਯਵਚੀਵਿਞ੍ਞਤ੍ਤੀਨਂ ਗਹਣਯੋਗ੍ਗੇ ਪਦੇਸੇ, ਪਕਤਿਚਕ੍ਖੁਨਾ ਪਕਤਿਸੋਤੇਨ ਚ ਦਟ੍ਠੁਂ ਸੋਤੁਞ੍ਚ ਅਰਹਟ੍ਠਾਨੇਤਿ ਵੁਤ੍ਤਂ ਹੋਤਿ. ਤੇਨ ਵਿਞ੍ਞਤ੍ਤਿਪਥਂ ਅਤਿਕ੍ਕਮਿਤ੍ਵਾ ਠਿਤੋ ਚੇ ਕੋਚਿ ਦਿਬ੍ਬੇਨ ਚਕ੍ਖੁਨਾ ਦਿਬ੍ਬਾਯ ਚ ਸੋਤਧਾਤੁਯਾ ਦਿਸ੍ਵਾ ਸੁਤ੍ਵਾ ਚ ਜਾਨਾਤਿ, ਨ ਪਾਰਾਜਿਕਨ੍ਤਿ ਦੀਪੇਤਿ. ਅਸ੍ਸੁਤਪੁਬ੍ਬਸ੍ਸ ‘‘ਕਿਮਿਦਂ ਵੁਤ੍ਤ’’ਨ੍ਤਿ ਸਂਸਯੁਪ੍ਪਤ੍ਤਿਸਬ੍ਭਾਵਤੋ ‘‘ਸੁਤਂ ਹੋਤੀ’’ਤਿ ਵੁਤ੍ਤਂ. ਪਠਮਂ ਵਚਨਮਤ੍ਤਂ ਅਸ੍ਸੁਤਪੁਬ੍ਬੇਨਪਿ ‘‘ਪਠਮਜ੍ਝਾਨਂ ਸਮਾਪਜ੍ਜਿ’’ਨ੍ਤਿ ਵੁਤ੍ਤੇ ‘‘ਕਿਮਿਦ’’ਨ੍ਤਿ ਸਨ੍ਦੇਹਂ ਅਨੁਪ੍ਪਾਦੇਤ੍ਵਾ ‘‘ਝਾਨਂ ਨਾਮ ਕਿਰੇਸ ਸਮਾਪਜ੍ਜੀ’’ਤਿ ਏਤ੍ਤਕਮਤ੍ਤੇਪਿ ਞਾਤੇ ਪਾਰਾਜਿਕਂ ਹੋਤਿਯੇਵ.
ਅਨਾਪਤ੍ਤਿਭੇਦਕਥਾਵਣ੍ਣਨਾ
੨੨੨. ਅਨੁਲ੍ਲਪਨਾਧਿਪ੍ਪਾਯਸ੍ਸਾਤਿ ਅਤਿਕ੍ਕਮਿਤ੍ਵਾ ਅਵਤ੍ਤੁਕਾਮਸ੍ਸ, ‘‘ਉਤ੍ਤਰਿਮਨੁਸ੍ਸਧਮ੍ਮੋ ਅਯ’’ਨ੍ਤਿ ਅਸਲ੍ਲਕ੍ਖੇਨ੍ਤਸ੍ਸਾਤਿ ਅਧਿਪ੍ਪਾਯੋ. ਸਰੂਪਤੋ ਪਨ ‘‘ਅਨਾਪਤ੍ਤਿ ਭਿਕ੍ਖੁ ਅਨੁਲ੍ਲਪਨਾਧਿਪ੍ਪਾਯਸ੍ਸਾ’’ਤਿ ਵਿਨੀਤਵਤ੍ਥੂਸੁ ਤਤ੍ਥ ਤਤ੍ਥ ਆਗਤਵਤ੍ਥੁਵਸੇਨ ਵੇਦਿਤਬ੍ਬੋ. ‘‘ਉਤ੍ਤਰਿਮਨੁਸ੍ਸਧਮ੍ਮੋ ਅਯ’’ਨ੍ਤਿ ਅਸਲ੍ਲਕ੍ਖੇਤ੍ਵਾ ਵਦਨ੍ਤੋਪਿ ਵੋਹਾਰਤੋ ਅਞ੍ਞਂ ਬ੍ਯਾਕਰੋਨ੍ਤੋ ਨਾਮ ਹੋਤੀਤਿ ਵੁਤ੍ਤਂ ‘‘ਅਞ੍ਞਂ ਬ੍ਯਾਕਰੋਨ੍ਤਸ੍ਸਾ’’ਤਿ.
ਪਦਭਾਜਨੀਯਵਣ੍ਣਨਾ ਨਿਟ੍ਠਿਤਾ.
ਭਾਯਨ੍ਤੋਪੀਤਿ ‘‘ਇਮਸ੍ਸ ਮਯਿ ਨਤ੍ਥਿਭਾਵਂ ਅਞ੍ਞੇਪਿ ਜਾਨਨ੍ਤਾ ਅਤ੍ਥਿ ਨੁ ਖੋ’’ਤਿ ਭਾਯਨ੍ਤੋਪਿ.
ਵਿਨੀਤਵਤ੍ਥੁਵਣ੍ਣਨਾ
੨੨੩. ਸੇਕ੍ਖਭੂਮਿਯਨ੍ਤਿ ਇਮਿਨਾ ਝਾਨਭੂਮਿਮ੍ਪਿ ਸਙ੍ਗਣ੍ਹਾਤਿ. ਤਿਣ੍ਣਂ ਵਿਵੇਕਾਨਨ੍ਤਿ ਕਾਯਚਿਤ੍ਤਉਪਧਿਵਿਵੇਕਾਨਂ.
ਪਿਣ੍ਡਾਯ ਚਰਣਸ੍ਸ ਭੋਜਨਪਰਿਯੋਸਾਨਤ੍ਤਾ ਵੁਤ੍ਤਂ ‘‘ਯਾਵ ਭੋਜਨਪਰਿਯੋਸਾਨ’’ਨ੍ਤਿ. ਭੁਤ੍ਵਾ ਆਗਚ੍ਛਨ੍ਤਸ੍ਸਪਿ ਪੁਨ ਵੁਤ੍ਤਨਯੇਨੇਵ ਸਮ੍ਭਾਵਨਿਚ੍ਛਾਯ ਚੀਵਰਸਣ੍ਠਪਨਾਦੀਨਿ ਕਰੋਨ੍ਤਸ੍ਸ ਦੁਕ੍ਕਟਮੇਵ.
੨੨੫. ਆਰਾਧਨੀਯੋ, ਆਵੁਸੋ, ਧਮ੍ਮੋ ਆਰਦ੍ਧਵੀਰਿਯੇਨਾਤਿ ਵਤ੍ਥੁਦ੍ਵਯਂ ਏਕਸਦਿਸਮ੍ਪਿ ਦ੍ਵੀਹਿ ਭਿਕ੍ਖੂਹਿ ਵਿਸੁਂ ਵਿਸੁਂ ਆਰੋਚਿਤਤ੍ਤਾ ਭਗਵਤਾ ਵਿਨਿਚ੍ਛਿਨਿਤਂ ਸਬ੍ਬਮ੍ਪਿ ਵਿਨੀਤਵਤ੍ਥੂਸੁ ਆਰੋਪੇਤਬ੍ਬਨ੍ਤਿ ਪਾਲ਼ਿਯਂ ਆਰੋਪਿਤਂ.
੨੨੬. ਪਸਾਦਭਞ੍ਞਨ੍ਤਿ ਕੇਵਲਂ ਪਸਾਦਮਤ੍ਤੇਨ ਭਣਨਂ, ਨ ਪਨ ‘‘ਸਭਾਵਤੋ ਏਤੇ ਅਰਹਨ੍ਤੋਯੇਵਾ’’ਤਿ ਚਿਨ੍ਤੇਤ੍ਵਾ. ਤੇਨੇਵੇਤ੍ਥ ਅਨਾਪਤ੍ਤਿ ਵੁਤ੍ਤਾ. ਯਦਿ ਪਨ ‘‘ਏਤੇ ਸਭਾਵਤੋ ਅਰਹਨ੍ਤੋਯੇਵਾ’’ਤਿ ਮਞ੍ਞਮਾਨੋ ‘‘ਆਯਨ੍ਤੁ ਭੋਨ੍ਤੋ ਅਰਹਨ੍ਤੋ’’ਤਿਆਦੀਨਿ ਵਦਤਿ, ਨ ਸਮ੍ਪਟਿਚ੍ਛਿਤਬ੍ਬਂ.
੨੨੭. ਪਦਸਾ ਗਮਨਂ ਸਨ੍ਧਾਯ ਕਤਿਕਾਯ ਕਤਤ੍ਤਾ ‘‘ਯਾਨੇਨ ਵਾ’’ਤਿਆਦਿਮਾਹ. ਤਤ੍ਥ ਵਿਜ੍ਜਾਮਯਿਦ੍ਧਿਂ ਸਨ੍ਧਾਯ ‘‘ਇਦ੍ਧਿਯਾ’’ਤਿ ਵੁਤ੍ਤਂ. ਅਞ੍ਞਮਞ੍ਞਂ ਰਕ੍ਖਨ੍ਤੀਤਿ ‘‘ਯੋ ਇਮਮ੍ਹਾ ਆਵਾਸਾ ਪਠਮਂ ਪਕ੍ਕਮਿਸ੍ਸਤਿ, ਤਂ ਮਯਂ ‘ਅਰਹਾ’ਤਿ ਜਾਨਿਸ੍ਸਾਮਾ’’ਤਿ ਏਵਂ ਕਤਿਕਾਯ ਕਤਤ੍ਤਾ ਅਪੁਬ੍ਬਾਚਰਿਮਂ ਅਸੁਦ੍ਧਚਿਤ੍ਤੇਨ ਗਚ੍ਛਨ੍ਤਾਪਿ ਸਹ ਨਿਕ੍ਖਨ੍ਤਭਾਵਤੋ ਅਞ੍ਞਮਞ੍ਞਂ ਰਕ੍ਖਨ੍ਤਿ. ਕੇਚਿ ਪਨ ‘‘ਹਤ੍ਥਪਾਸਂ ਅਵਿਜਹਿਤ੍ਵਾ ਅਞ੍ਞਮਞ੍ਞਸ੍ਸ ਹਤ੍ਥਂ ਗਣ੍ਹਨ੍ਤੋ ਵਿਯ ਗਚ੍ਛਨ੍ਤੋਪਿ ‘ਉਟ੍ਠੇਥ ਗਚ੍ਛਾਮ, ਏਥ ਗਚ੍ਛਾਮਾ’ਤਿ ਏਵਂ ਸਂਵਿਦਹਿਤ੍ਵਾ ਗਮਨੇ ਪੁਬ੍ਬਾਪਰਂ ਗਚ੍ਛਨ੍ਤੋਪਿ ਨਾਪਜ੍ਜਤੀ’’ਤਿ ਵਦਨ੍ਤਿ. ਏਤਂ ਪਨ ਅਧਮ੍ਮਿਕਂ ਕਤਿਕਵਤ੍ਤਨ੍ਤਿ ‘‘ਇਧ ਅਰਹਨ੍ਤੋਯੇਵ ਵਸਨ੍ਤੂਤਿ ਯਦਿ ਭਿਕ੍ਖੂ ਕਤਿਕਂ ਕਰੋਨ੍ਤਿ, ਏਤਂ ਅਧਮ੍ਮਿਕਂ ਕਤਿਕਵਤ੍ਤ’’ਨ੍ਤਿ ਚੂਲ਼ਗਣ੍ਠਿਪਦੇ ਵੁਤ੍ਤਂ. ਹੇਟ੍ਠਾ ਵੁਤ੍ਤਂ ਪਨ ਸਬ੍ਬਮ੍ਪਿ ਕਤਿਕਵਤ੍ਤਂ ਸਨ੍ਧਾਯ ਏਤਂ ਵੁਤ੍ਤਨ੍ਤਿ ਅਮ੍ਹਾਕਂ ਖਨ੍ਤਿ, ਵੀਮਂਸਿਤ੍ਵਾ ਗਹੇਤਬ੍ਬਂ. ਨਾਨਾਵੇਰਜ੍ਜਕਾਤਿ ਨਾਨਾਜਨਪਦਵਾਸਿਨੋ. ਸਙ੍ਘਲਾਭੋਤਿ ਯਥਾਵੁਡ੍ਢਂ ਅਤ੍ਤਨੋ ਪਾਪੁਣਨਕੋਟ੍ਠਾਸੋ. ਅਯਞ੍ਚ ਪਟਿਕ੍ਖੇਪੋ ਇਮਿਨਾਵ ਨੀਹਾਰੇਨ ਬਹਿਸੀਮਟ੍ਠਾਨਂ ਅਵਿਸੇਸੇਨ ਸਙ੍ਘਲਾਭਸ੍ਸ ਸਾਮਿਭਾਵਾਪਾਦਨਂ ਸਨ੍ਧਾਯ ਕਤੋ. ਵਿਸੇਸਤੋ ਪਨ ਬਹਿਸੀਮਟ੍ਠਾਨਮ੍ਪਿ ਪਰਿਚ੍ਛਿਨ੍ਦਿਤ੍ਵਾ ਏਕੇਕਕੋਟ੍ਠਾਸਤੋ ‘‘ਏਤ੍ਤਕਂ ਦਾਤੁਂ, ਈਦਿਸਂ ਵਾ ਦਾਤੁਂ, ਏਤ੍ਤਕਾਨਂ ਵਾ ਦਾਤੁਂ, ਈਦਿਸਸ੍ਸ ਵਾ ਦਾਤੁਂ ਰੁਚ੍ਚਤਿ ਸਙ੍ਘਸ੍ਸਾ’’ਤਿ ਅਪਲੋਕਨਕਮ੍ਮਂ ਕਤ੍ਵਾ ਦਾਤੁਂ ਵਟ੍ਟਤਿ.
੨੨੮. ਆਯਸ੍ਮਾ ਚ ਲਕ੍ਖਣੋਤਿਆਦੀਸੁ ਕੋ ਪਨਾਯਸ੍ਮਾ ਲਕ੍ਖਣੋ, ਕਸ੍ਮਾ ਚਸ੍ਸ ਲਕ੍ਖਣੋਤਿ ਨਾਮਂ ਅਹੋਸਿ, ਕੋ ਚਾਯਸ੍ਮਾ ਮਹਾਮੋਗ੍ਗਲ੍ਲਾਨੋ, ਕਸ੍ਮਾ ਚ ਸਿਤਂ ਪਾਤ੍ਵਾਕਾਸੀਤਿ ਤਂ ਸਬ੍ਬਂ ਪਕਾਸੇਤੁਂ ‘‘ਯ੍ਵਾਯ’’ਨ੍ਤਿਆਦਿ ਆਰਦ੍ਧਂ. ਲਕ੍ਖਣਸਮ੍ਪਨ੍ਨੇਨਾਤਿ ਪੁਰਿਸਲਕ੍ਖਣਸਮ੍ਪਨ੍ਨੇਨ. ਬ੍ਰਹ੍ਮਸਮੇਨਾਤਿ ਬ੍ਰਹ੍ਮਤ੍ਤਭਾਵਸਮੇਨ. ਈਸਕਂ ਹਸਿਤਂ ਸਿਤਨ੍ਤਿ ਵੁਚ੍ਚਤੀਤਿ ਆਹ ‘‘ਮਨ੍ਦਹਸਿਤ’’ਨ੍ਤਿ. ਅਟ੍ਠਿਕਸਙ੍ਖਲਿਕਨ੍ਤਿ ਨਯਿਦਂ ਅਵਿਞ੍ਞਾਣਕਂ ਅਟ੍ਠਿਸਙ੍ਖਲਿਕਮਤ੍ਤਂ, ਅਥ ਖੋ ਏਕੋ ਪੇਤੋਤਿ ਆਹ ‘‘ਪੇਤਲੋਕੇ ਨਿਬ੍ਬਤ੍ਤਂ ਸਤ੍ਤ’’ਨ੍ਤਿ. ਏਤੇ ਅਤ੍ਤਭਾਵਾਤਿ ਪੇਤਤ੍ਤਭਾਵਾ. ਨ ਆਪਾਥਂ ਆਗਚ੍ਛਨ੍ਤੀਤਿ ਦੇਵਤ੍ਤਭਾਵਾ ਵਿਯ ਪਕਤਿਯਾ ਆਪਾਥਂ ਨ ਆਗਚ੍ਛਨ੍ਤਿ. ਤੇਸਂ ਪਨ ਰੁਚਿਯਾ ਆਪਾਥਂ ਆਗਚ੍ਛੇਯ੍ਯੁਂ. ਮਨੁਸ੍ਸਾਨਂ ਦੁਕ੍ਖਾਭਿਭੂਤਾਨਂ ਅਨਾਥਭਾਵਦਸ੍ਸਨਪਦਟ੍ਠਾਨਾ ਕਰੁਣਾਤਿ ਆਹ ‘‘ਕਾਰੁਞ੍ਞੇ ਕਤ੍ਤਬ੍ਬੇ’’ਤਿ. ਅਤ੍ਤਨੋ ਚ ਸਮ੍ਪਤ੍ਤਿਂ ਬੁਦ੍ਧਞਾਣਸ੍ਸ ਚ ਸਮ੍ਪਤ੍ਤਿਨ੍ਤਿ ਪਚ੍ਚੇਕਂ ਸਮ੍ਪਤ੍ਤਿ-ਸਦ੍ਦੋ ਯੋਜੇਤਬ੍ਬੋ. ਤਦੁਭਯਂ ਵਿਭਾਵੇਤੁਂ ‘‘ਤਞ੍ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ‘‘ਅਤ੍ਤਨੋ ਚ ਸਮ੍ਪਤ੍ਤਿਂ ਅਨੁਸ੍ਸਰਿਤ੍ਵਾ ਸਿਤਂ ਪਾਤ੍ਵਾਕਾਸੀ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਧਮ੍ਮਧਾਤੂਤਿ ਸਬ੍ਬਞ੍ਞੁਤਞ੍ਞਾਣਂ ਸਨ੍ਧਾਯ ਵਦਤਿ, ਧਮ੍ਮਧਾਤੂਤਿ ਵਾ ਧਮ੍ਮਾਨਂ ਸਭਾਵੋ. ਉਪਪਤ੍ਤੀਤਿ ਜਾਤਿ. ਉਪਪਤ੍ਤਿਸੀਸੇਨ ਹਿ ਤਥਾਰੂਪਂ ਅਤ੍ਤਭਾਵਂ ਵਦਤਿ. ਦੁਸ੍ਸਦ੍ਧਾਪਯਾ ਹੋਨ੍ਤਿ, ਤਦਸ੍ਸ ਤੇਸਂ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ. ਦੁਸ੍ਸਦ੍ਧਾਪਯਾਤਿ ਇਦਞ੍ਚ ਨ ਲਕ੍ਖਣਤ੍ਥੇਰਂ ਸਨ੍ਧਾਯ ਵੁਤ੍ਤਂ, ਯੇ ਪਨ ਸੁਣਨ੍ਤਿ ‘‘ਏਵਂ ਕਿਰ ਵੁਤ੍ਤ’’ਨ੍ਤਿ, ਤੇ ਸਨ੍ਧਾਯ. ਅਥ ਲਕ੍ਖਣਤ੍ਥੇਰੋ ਕਸ੍ਮਾ ਨ ਅਦ੍ਦਸ, ਕਿਮਸ੍ਸ ਦਿਬ੍ਬਚਕ੍ਖੁ ਨਤ੍ਥੀਤਿ? ਨੋ ਨਤ੍ਥਿ, ਮਹਾਮੋਗ੍ਗਲ੍ਲਾਨੋ ਪਨ ਆਵਜ੍ਜੇਨ੍ਤੋ ਅਦ੍ਦਸ, ਇਤਰੋ ਅਨਾਵਜ੍ਜਨੇਨ ਨ ਅਦ੍ਦਸ.
ਵਿਤੁਡੇਨ੍ਤੀਤਿ ਵਿਨਿਵਿਜ੍ਝਿਤ੍ਵਾ ਡੇਨ੍ਤਿ, ਅਸਿਧਾਰੂਪਮੇਹਿ ਤਿਖਿਣੇਹਿ ਲੋਹਤੁਣ੍ਡਕੇਹਿ ਵਿਜ੍ਝਿਤ੍ਵਾ ਵਿਜ੍ਝਿਤ੍ਵਾ ਇਤੋ ਚਿਤੋ ਚ ਗਚ੍ਛਨ੍ਤੀਤਿ ਅਤ੍ਥੋ. ਤੇਨਾਹ ‘‘ਵਿਨਿਵਿਜ੍ਝਿਤ੍ਵਾ ਗਚ੍ਛਨ੍ਤੀ’’ਤਿ. ‘‘ਵਿਤੁਦਨ੍ਤੀ’’ਤਿ ਵਾ ਪਾਠੋ. ਫਾਸੁਲ਼ਨ੍ਤਰਿਕਾਹੀਤਿ ਭੁਮ੍ਮਤ੍ਥੇ ਨਿਸ੍ਸਕ੍ਕਵਚਨਂ. ਲੋਹਤੁਣ੍ਡਕੇਹੀਤਿ ਲੋਹਸਲਾਕਾਸਦਿਸੇਹਿ, ਕਾਲ਼ਲੋਹਮਯੇਹੇਵ ਵਾ ਤੁਣ੍ਡਕੇਹਿ. ਪਸਾਦੁਸ੍ਸਦਾਤਿ ਇਮਿਨਾ ਅਟ੍ਠਿਸਙ੍ਘਾਤਮਤ੍ਤਂ ਹੁਤ੍ਵਾ ਪਞ੍ਞਾਯਮਾਨਾਨਮ੍ਪਿ ਕਾਯਪ੍ਪਸਾਦਸ੍ਸ ਬਲਵਭਾਵਂ ਦਸ੍ਸੇਤਿ. ਪਕ੍ਕਗਣ੍ਡਸਦਿਸਾਤਿ ਇਮਿਨਾ ਪਨ ਅਤਿਵਿਯ ਮੁਦੁਸਭਾਵਤਂ ਦਸ੍ਸੇਤਿ. ਅਚ੍ਛਰਿਯਂ ਵਤਾਤਿ ਗਰਹਨਚ੍ਛਰਿਯਂ ਨਾਮੇਤਂ.
ਚਕ੍ਖੁਭੂਤਾਤਿ ਸਮ੍ਪਤ੍ਤਦਿਬ੍ਬਚਕ੍ਖੁਕਾ, ਲੋਕਸ੍ਸ ਚਕ੍ਖੁਭੂਤਾਤਿ ਏਵਂ ਵਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ. ਯਤ੍ਰਾਤਿ ਹੇਤੁਅਤ੍ਥੇ ਨਿਪਾਤੋਤਿ ਆਹ ‘‘ਯਤ੍ਰਾਤਿ ਕਾਰਣਵਚਨ’’ਨ੍ਤਿ. ਅਪ੍ਪਮਾਣੇ ਸਤ੍ਤਨਿਕਾਯੇ, ਤੇ ਚ ਖੋ ਵਿਭਾਗੇਨ ਕਾਮਭਵਾਦਿਭੇਦੇ ਭਵੇ, ਨਿਰਯਾਦਿਭੇਦਾ ਗਤਿਯੋ, ਨਾਨਤ੍ਤਕਾਯਨਾਨਤ੍ਤਸਞ੍ਞੀਆਦਿਵਿਞ੍ਞਾਣਟ੍ਠਿਤਿਯੋ, ਤਥਾਰੂਪੇ ਸਤ੍ਤਾਵਾਸੇ ਚ ਸਬ੍ਬਞ੍ਞੁਤਞ੍ਞਾਣਞ੍ਚ ਮੇ ਉਪਨੇਤੁਂ ਪਚ੍ਚਕ੍ਖਂ ਕਰੋਨ੍ਤੇਨ.
ਗੋਘਾਤਕੋਤਿ ਗੁਨ੍ਨਂ ਅਭਿਣ੍ਹਂ ਹਨਨਕੋ. ਤੇਨਾਹ ‘‘ਵਧਿਤ੍ਵਾ ਵਧਿਤ੍ਵਾ’’ਤਿ. ਤਸ੍ਸਾਤਿ ਗੁਨ੍ਨਂ ਹਨਨਕਮ੍ਮਸ੍ਸ. ਅਪਰਾਪਰਿਯਕਮ੍ਮਸ੍ਸਾਤਿ ਅਪਰਾਪਰਿਯਵੇਦਨੀਯਕਮ੍ਮਸ੍ਸ. ਬਲਵਤਾ ਗੋਘਾਤਕਕਮ੍ਮੇਨ ਵਿਪਾਕੇ ਦੀਯਮਾਨੇ ਅਲਦ੍ਧੋਕਾਸਂ ਅਪਰਾਪਰਿਯਵੇਦਨੀਯਂ, ਤਸ੍ਮਿਂ ਵਿਪਕ੍ਕਵਿਪਾਕੇ ਇਦਾਨਿ ਲਦ੍ਧੋਕਾਸਂ ‘‘ਅਵਸੇਸਕਮ੍ਮ’’ਨ੍ਤਿ ਵੁਤ੍ਤਂ. ਕਮ੍ਮਸਭਾਗਤਾਯਾਤਿ ਕਮ੍ਮਸ੍ਸ ਸਭਾਗਭਾਵੇਨ ਸਦਿਸਭਾਵੇਨ. ਆਰਮ੍ਮਣਸਭਾਗਤਾਯਾਤਿ ਆਰਮ੍ਮਣਸ੍ਸ ਸਭਾਗਭਾਵੇਨ ਸਦਿਸਭਾਵੇਨ. ਯਾਦਿਸੇ ਹਿ ਆਰਮ੍ਮਣੇ ਪੁਬ੍ਬੇ ਤਂ ਕਮ੍ਮਂ ਤਸ੍ਸ ਚ ਵਿਪਾਕੋ ਪਵਤ੍ਤੋ, ਤਾਦਿਸੇਯੇਵ ਆਰਮ੍ਮਣੇ ਇਦਂ ਕਮ੍ਮਂ ਇਮਸ੍ਸ ਵਿਪਾਕੋ ਚ ਪਵਤ੍ਤੋਤਿ ਕਤ੍ਵਾ ਵੁਤ੍ਤਂ ‘‘ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨਾ’’ਤਿ. ਭਵਤਿ ਹਿ ਤਂਸਦਿਸੇਪਿ ਤਬ੍ਬੋਹਾਰੋ ਯਥਾ ਸੋ ਏਵ ਤਿਤ੍ਤਿਰੋ, ਤਾਨਿਯੇਵ ਓਸਧਾਨੀਤਿ. ਯਸ੍ਮਾ ਕਮ੍ਮਸਰਿਕ੍ਖਕਵਿਸਯੇ ‘‘ਕਮ੍ਮਂ ਵਾ ਕਮ੍ਮਨਿਮਿਤ੍ਤਂ ਵਾ’’ਤਿ ਦ੍ਵਯਮੇਵ ਵੁਤ੍ਤਂ, ਯਸ੍ਮਾ ਚ ਗਤਿਨਿਮਿਤ੍ਤਂ ਵਿਯ ਕਮ੍ਮਂ ਕਮ੍ਮਨਿਮਿਤ੍ਤਞ੍ਚ ਕਮ੍ਮਤੋ ਭਿਨ੍ਨਂ ਵਿਸੁਂ ਹੁਤ੍ਵਾ ਨ ਤਿਟ੍ਠਤਿ, ਤਸ੍ਮਾ ਸਰਿਕ੍ਖਕਵਿਪਾਕਦਾਨਸ੍ਸ ਕਾਰਣਭਾਵਤੋ ਯਤ੍ਥ ਕਮ੍ਮਸਰਿਕ੍ਖਕੇਨ ਵਿਪਾਕੇਨ ਭਵਿਤਬ੍ਬਂ, ਤਤ੍ਥ ਕਮ੍ਮਂ ਵਾ ਕਮ੍ਮਨਿਮਿਤ੍ਤਂ ਵਾ ਗਹੇਤ੍ਵਾ ਪਟਿਸਨ੍ਧਿ ਹੋਤੀਤਿ ਵਦਨ੍ਤਿ. ਤੇਨੇਵਾਹ – ‘‘ਤਸ੍ਸ ਕਿਰ…ਪੇ… ਨਿਮਿਤ੍ਤਂ ਅਹੋਸੀ’’ਤਿ. ਤਤ੍ਥ ਨਿਮਿਤ੍ਤਂ ਅਹੋਸੀਤਿ ਪੁਬ੍ਬੇ ਕਤੂਪਚਿਤਸ੍ਸ ਪੇਤੂਪਪਤ੍ਤਿਨਿਬ੍ਬਤ੍ਤਨਵਸੇਨ ਕਤੋਕਾਸਸ੍ਸ ਤਸ੍ਸ ਕਮ੍ਮਸ੍ਸ ਨਿਮਿਤ੍ਤਭੂਤਂ ਇਦਾਨਿ ਤਥਾ ਉਪਟ੍ਠਹਨ੍ਤਂ ਤਸ੍ਸ ਵਿਪਾਕਸ੍ਸ ਨਿਮਿਤ੍ਤਂ ਆਰਮ੍ਮਣਂ ਅਹੋਸਿ. ਸੋਤਿ ਗੋਘਾਤਕੋ. ਅਟ੍ਠਿਕਸਙ੍ਖਲਿਕਪੇਤੋ ਜਾਤੋ ਕਮ੍ਮਸਰਿਕ੍ਖਕਵਿਪਾਕਵਸੇਨ.
੨੨੯. ਪੇਸਿਯੋ ਕਤ੍ਵਾਤਿ ਗਾਵਿਂ ਵਧਿਤ੍ਵਾ ਵਧਿਤ੍ਵਾ ਗੋਮਂਸਂ ਫਾਲੇਤ੍ਵਾ ਪੇਸਿਯੋ ਕਤ੍ਵਾ. ਸੁਕ੍ਖਾਪੇਤ੍ਵਾਤਿ ਕਾਲਨ੍ਤਰਂ ਠਪਨਤ੍ਥਂ ਸੁਕ੍ਖਾਪੇਤ੍ਵਾ. ਸੁਕ੍ਖਾਪਿਤਮਂਸਪੇਸੀਨਞ੍ਹਿ ਵਲ੍ਲੂਰਸਮਞ੍ਞਾਤਿ. ਨਿਪ੍ਪਕ੍ਖਚਮ੍ਮੇਤਿ ਵਿਗਤਪਕ੍ਖਚਮ੍ਮੇ. ਉਰਬ੍ਭੇ ਹਨ੍ਤੀਤਿ ਓਰਬ੍ਭਿਕੋ. ਏਲ਼ਕੇਤਿ ਅਜੇ. ਨਿਵਾਪਪੁਟ੍ਠੇਤਿ ਅਤ੍ਤਨਾ ਦਿਨ੍ਨਨਿਵਾਪੇਨ ਪੋਸਿਤੇ ਅਸਿਨਾ ਵਧਿਤ੍ਵਾ ਵਧਿਤ੍ਵਾ ਵਿਕ੍ਕਿਣਨ੍ਤੋ. ਏਕਂ ਮਿਗਨ੍ਤਿ ਦੀਪਕਮਿਗਂ. ਕਾਰਣਾਹੀਤਿ ਯਾਤਨਾਹਿ. ਞਤ੍ਵਾਤਿ ਕਮ੍ਮਟ੍ਠਾਨਂ ਞਤ੍ਵਾ. ਪੇਸੁਞ੍ਞੁਪਸਂਹਾਰਵਸੇਨ ਇਤੋ ਸੁਤਂ ਅਮੁਤ੍ਰ, ਅਮੁਤ੍ਰ ਵਾ ਸੁਤਂ ਇਧ ਸੂਚੇਤੀਤਿ ਸੂਚਕੋ. ਅਨਯਬ੍ਯਸਨਂ ਪਾਪੇਸਿ ਮਨੁਸ੍ਸੇਤਿ ਸਮ੍ਬਨ੍ਧੋ.
ਵਿਨਿਚ੍ਛਯਾਮਚ੍ਚੋਤਿ ਰਞ੍ਞਾ ਅਡ੍ਡਕਰਣੇ ਠਪਿਤੋ ਵਿਨਿਚ੍ਛਯਮਹਾਮਤ੍ਤੋ. ਸੋ ਹਿ ਗਾਮਜਨਕਾਯਂ ਕੂਟਟ੍ਠੇਨ ਵਞ੍ਚੇਤੀਤਿ ‘‘ਗਾਮਕੂਟੋ’’ਤਿ ਵੁਚ੍ਚਤਿ. ਕੇਚਿ ‘‘ਤਾਦਿਸੋਯੇਵ ਗਾਮਜੇਟ੍ਠਕੋ ਗਾਮਕੂਟੋ’’ਤਿ ਵਦਨ੍ਤਿ. ਸਮੇਨ ਭਵਿਤਬ੍ਬਂ ਧਮ੍ਮਟ੍ਠੋਤਿ ਵਤ੍ਤਬ੍ਬਤੋ. ਰਹਸ੍ਸਙ੍ਗੇ ਨਿਸੀਦਨਵਸੇਨ ਵਿਸਮਾ ਨਿਸਜ੍ਜਾ ਅਹੋਸਿ. ਫੁਸਨ੍ਤੋਤਿ ਥੇਯ੍ਯਾਯ ਫੁਸਨ੍ਤੋ.
੨੩੦. ਅਨਿਸ੍ਸਰੋਤਿ ਮਾਤੁਗਾਮੋ ਸਸਾਮਿਕੋ ਅਤ੍ਤਨੋ ਫਸ੍ਸੇ ਅਨਿਸ੍ਸਰੋ. ਧਂਸਿਤ੍ਵਾਤਿ ਭਸ੍ਸਿਤ੍ਵਾ ਅਪਗਨ੍ਤ੍ਵਾ. ਮਙ੍ਗਨਵਸੇਨ ਉਲਤੀਤਿ ਮਙ੍ਗੁਲਿ, ਵਿਰੂਪਬੀਭਚ੍ਛਭਾਵੇਨ ਪਵਤ੍ਤਤੀਤਿ ਅਤ੍ਥੋ. ਤੇਨਾਹ ‘‘ਵਿਰੂਪਂ ਦੁਦ੍ਦਸਿਕਂ ਬੀਭਚ੍ਛ’’ਨ੍ਤਿ.
ਉਦ੍ਧਂ ਉਦ੍ਧਂ ਅਗ੍ਗਿਨਾ ਪਕ੍ਕਸਰੀਰਤਾਯ ਉਪ੍ਪਕ੍ਕਂ, ਹੇਟ੍ਠਤੋ ਪਗ੍ਘਰਣਵਸੇਨ ਕਿਲਿਨ੍ਨਸਰੀਰਤਾਯ ਓਕਿਲਿਨੀ, ਇਤੋ ਚਿਤੋ ਚ ਅਙ੍ਗਾਰਸਮ੍ਪਰਿਕਿਣ੍ਣਤਾਯ ਓਕਿਰਿਨੀ. ਤੇਨਾਹ ‘‘ਸਾ ਕਿਰਾ’’ਤਿਆਦਿ. ਅਙ੍ਗਾਰਚਿਤਕੇਤਿ ਅਙ੍ਗਾਰਸਞ੍ਚਯੇ. ਸਰੀਰਤੋ ਪਗ੍ਘਰਨ੍ਤਿ ਅਸੁਚਿਦੁਗ੍ਗਨ੍ਧਜੇਗੁਚ੍ਛਾਨਿ ਸੇਦਗਤਾਨਿ. ਤਸ੍ਸ ਕਿਰ ਰਞ੍ਞੋਤਿ ਕਾਲਿਙ੍ਗਸ੍ਸ ਰਞ੍ਞੋ. ਨਾਟਕਿਨੀਤਿ ਨਚ੍ਚਨਕਿਚ੍ਚੇ ਅਧਿਗਤਾ ਇਤ੍ਥੀ. ਸੇਦਨ੍ਤਿ ਸੇਦਨਂ, ਤਾਪਨਨ੍ਤਿ ਅਤ੍ਥੋ.
ਅਸੀਸਕਂ ਕਬਨ੍ਧਂ ਹੁਤ੍ਵਾ ਨਿਬ੍ਬਤ੍ਤਿ ਕਮ੍ਮਾਯੂਹਨਕਾਲੇ ਤਥਾ ਨਿਮਿਤ੍ਤਗ੍ਗਹਣਪਰਿਚਯਤੋ. ਲਾਮਕਭਿਕ੍ਖੂਤਿ ਹੀਨਾਚਾਰਤਾਯ ਲਾਮਕੋ, ਭਿਕ੍ਖੁਵੇਸਤਾਯ ਭਿਕ੍ਖਾਹਾਰੇਨ ਜੀਵਨਤੋ ਚ ਭਿਕ੍ਖੁ. ਚਿਤ੍ਤਕੇਲ਼ਿਨ੍ਤਿ ਚਿਤ੍ਤਰੁਚਿਯਂ ਤਂ ਤਂ ਕੀਲ਼ਨ੍ਤੋ. ਅਯਮੇਵਾਤਿ ਭਿਕ੍ਖੁਵਤ੍ਥੁਸ੍ਮਿਂ ਵੁਤ੍ਤਨਯੋ ਏਵ.
੨੩੧. ਨਿਸ੍ਸੇਵਾਲਪਣਕਕਦ੍ਦਮੋਤਿ ਤਿਲਬੀਜਕਾਦਿਭੇਦੇਨ ਸੇਵਾਲੇਨ ਨੀਲਮਣ੍ਡੂਕਪਿਟ੍ਠਿਵਣ੍ਣੇਨ ਉਦਕਪਿਟ੍ਠਂ ਛਾਦੇਤ੍ਵਾ ਨਿਬ੍ਬਤ੍ਤਪਣਕੇਨ ਕਦ੍ਦਮੇਨ ਚ ਵਿਰਹਿਤੋ. ਸੁਨ੍ਦਰੇਹਿ ਤਿਤ੍ਥੇਹੀਤਿ ਸੁਖਾਵਗਾਹਣਟ੍ਠਾਨਤਾਯ ਕਦ੍ਦਮਾਦਿਦੋਸਵਿਰਹਤੋ ਚ ਸੁਨ੍ਦਰੇਹਿ ਤਿਤ੍ਥੇਹਿ. ਤਤੋ ਉਦਕਦਹਤੋ ਤਂਹੇਤੁ, ਤਂ ਉਪਨਿਸ੍ਸਾਯਾਤਿ ਅਤ੍ਥੋ. ਨਾਗਭਵਨਗਤੋਪਿ ਹਿ ਸੋ ਰਹਦੋ ਤਤੋ ਉਪਰਿਮਨੁਸ੍ਸਲੋਕੇ ਜਲਾਸਯੇਨ ਸਮ੍ਬਨ੍ਧੋ ਹੋਤਿ. ਤੇਨ ਵੁਤ੍ਤਂ ‘‘ਤਤੋ ਅਯਂ ਤਪੋਦਾ ਸਨ੍ਦਤੀ’’ਤਿ. ਅਥ ਵਾ ਤਤੋਤਿ ਨਾਗਭਵਨੇ ਉਦਕਦਹਤੋ ਅਯਂ ਤਪੋਦਾ ਸਨ੍ਦਤਿ. ਤਞ੍ਹਿ ਉਪਰਿਭੂਮਿਤਲਂ ਆਰੋਹਤਿ, ਉਣ੍ਹਭਾਵੇਨ ਤਪਨਤੋ ਤਪਂ ਉਦਕਂ ਏਤਿਸ੍ਸਾਤਿ ਅਨ੍ਵਤ੍ਥਨਾਮਵਸੇਨ ਤਪੋਦਾਤਿ ਵੁਚ੍ਚਤਿ. ਪੇਤਲੋਕੋਤਿ ਪੇਤਾਨਂ ਆਵਾਸਟ੍ਠਾਨਂ. ਕੇਚਿ ਪਨ ‘‘ਪੇਤਲੋਕੋਤਿ ਲੋਹਕੁਮ੍ਭੀਨਿਰਯਾ ਇਧਾਧਿਪ੍ਪੇਤਾ’’ਤਿ ਵਦਨ੍ਤਿ, ਨਗਰਸ੍ਸ ਪਨ ਪਰਿਤੋ ਪਬ੍ਬਤਪਾਦਵਨਨ੍ਤਰੇਸੁ ਬਹੂ ਪੇਤਾਵਾਸਾਪਿ ਸਨ੍ਤੇਵ. ਸ੍ਵਾਯਮਤ੍ਥੋ ਪੇਤਵਤ੍ਥੁਪਾਲ਼ਿਯਾ ਲਕ੍ਖਣਸਂਯੁਤ੍ਤੇਨ ਇਮਾਯ ਚ ਵਿਨੀਤਵਤ੍ਥੁਪਾਲ਼ਿਯਾ ਦੀਪੇਤਬ੍ਬੋ.
ਕਤਹਤ੍ਥਾਤਿ ਥਿਰਤਰਂ ਲਕ੍ਖੇਸੁ ਅਵਿਰਜ੍ਝਨਸਰਕ੍ਖੇਪਾ. ਈਦਿਸਾ ਪਨ ਤਤ੍ਥ ਵਸੀਭੂਤਾ ਕਤਹਤ੍ਥਾ ਨਾਮ ਹੋਨ੍ਤਿ, ਤਸ੍ਮਾ ਯੋ ਸਿਪ੍ਪਮੇਵ ਉਗ੍ਗਣ੍ਹਾਤਿ, ਸੋ ਕਤਹਤ੍ਥੋ ਨਾਮ ਨ ਹੋਤਿ, ਇਮੇ ਪਨ ਕਤਹਤ੍ਥਾ, ਚਿਣ੍ਣਵਸੀਭਾਵਾਤਿ ਵੁਤ੍ਤਂ ਹੋਤਿ. ਸਿਪ੍ਪਦਸ੍ਸਨਵਸੇਨ ਕਤਂ ਰਾਜਕੁਲਾਨਿ ਉਪੇਚ੍ਚ ਅਸਨਂ ਸਰਕ੍ਖੇਪੋ ਏਤੇਹੀਤਿ ਕਤੁਪਾਸਨਾ, ਰਾਜਕੁਲਾਦੀਸੁ ਦਸ੍ਸਿਤਸਿਪ੍ਪਾਤਿ ਵੁਤ੍ਤਂ ਹੋਤਿ. ਪਭਗ੍ਗੋਤਿ ਪਰਾਜਿਤੋ.
੨੩੨. ਦੋਸਦਸ੍ਸਨ ਪੁਬ੍ਬਕ ਰੂਪ ਵਿਰਾਗ ਭਾਵਨਾ ਸਙ੍ਖਾਤ ਪਟਿਪਕ੍ਖ ਭਾਵਨਾਵਸੇਨ ਪਟਿਘਸਞ੍ਞਾਨਂ ਸੁਪ੍ਪਹੀਨਤ੍ਤਾ ਮਹਤਾਪਿ ਸਦ੍ਦੇਨ ਅਰੂਪਸਮਾਪਤ੍ਤਿਤੋ ਨ ਵੁਟ੍ਠਾਤਿ, ਤਥਾ ਪਨ ਨ ਸੁਪ੍ਪਹੀਨਤ੍ਤਾ ਸਬ੍ਬਰੂਪਾਵਚਰਸਮਾਪਤ੍ਤਿਤੋ ਵੁਟ੍ਠਾਨਂ ਸਿਯਾਤਿ ਇਧ ਆਨੇਞ੍ਜਸਮਾਧੀਤਿ ਚਤੁਤ੍ਥਜ੍ਝਾਨਸਮਾਪਤ੍ਤਿ ਅਧਿਪ੍ਪੇਤਾਤਿ ਆਹ ‘‘ਅਨੇਜਂ ਅਚਲਂ ਕਾਯਵਾਚਾਵਿਪ੍ਫਨ੍ਦਵਿਰਹਿਤਂ ਚਤੁਤ੍ਥਜ੍ਝਾਨਸਮਾਧਿ’’ਨ੍ਤਿ. ਅਞ੍ਞਤ੍ਥ ਪਨ ਸਮਾਧਿਪਚ੍ਚਨੀਕਾਨਂ ਅਤਿਦੂਰਤਾਯ ਨ ਇਞ੍ਜਤੀਤਿ ਆਨੇਞ੍ਜੋਤਿ ਅਰੂਪਾਵਚਰਸਮਾਧਿ ਵੁਚ੍ਚਤਿ. ਸਮਾਧਿਪਰਿਪਨ੍ਥਕੇ ਧਮ੍ਮੇਤਿ ਵਿਤਕ੍ਕਵਿਚਾਰਾਦਿਕੇ ਸਨ੍ਧਾਯ ਵਦਤਿ. ਵਿਤਕ੍ਕਾਦੀਸੁ ਆਦੀਨਵਸਲ੍ਲਕ੍ਖਣਸ੍ਸ ਨ ਸੁਟ੍ਠੁਕਤਭਾਵਂ ਸਨ੍ਧਾਯਾਹ ‘‘ਨ ਸੁਟ੍ਠੁ ਪਰਿਸੋਧੇਤ੍ਵਾ’’ਤਿ.
ਨਨੁ ਚਾਯਮਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਭਗਵਤੋ ਪਠਮਵਸ੍ਸੇਵ ਅਭਿਨਵਪ੍ਪਤ੍ਤਅਰਹਤ੍ਤੋ, ਇਦਞ੍ਚ ਉਤ੍ਤਰਿਮਨੁਸ੍ਸਧਮ੍ਮਪਾਰਾਜਿਕਂ ਵੀਸਤਿਮਵਸ੍ਸਤੋ ਉਪਰਿ ਪਞ੍ਞਤ੍ਤਂ, ਕਥਂ ਇਮਸ੍ਸ ਵਤ੍ਥੁਨੋ ਇਮਸ੍ਮਿਂ ਪਾਰਾਜਿਕੇ ਭਗਵਤਾ ਵਿਨਿਚ੍ਛਿਤਭਾਵੋ ਵੁਤ੍ਤੋਤਿ? ਨਾਯਂ ਦੋਸੋ. ਅਯਞ੍ਹੇਤ੍ਥ ਆਚਰਿਯਾਨਂ ਕਥਾਮਗ੍ਗੋ – ਅਪਞ੍ਞਤ੍ਤੇਪਿ ਸਿਕ੍ਖਾਪਦੇ ਥੇਰਸ੍ਸ ਵਚਨਂ ਸੁਤ੍ਵਾ ‘‘ਅਤ੍ਤਨੋ ਅਪ੍ਪਤਿਰੂਪਂ ਉਤ੍ਤਰਿਮਨੁਸ੍ਸਧਮ੍ਮਂ ਏਸ ਵਦਤੀ’’ਤਿ ਮਞ੍ਞਮਾਨਾ ਭਿਕ੍ਖੂ ਥੇਰਸ੍ਸ ਦੋਸਂ ਆਰੋਪੇਨ੍ਤਾ ਉਜ੍ਝਾਯਿਂਸੁ. ਭਗਵਾ ਚ ਥੇਰਸ੍ਸ ਤਥਾਵਚਨੇ ਕਾਰਣਂ ਦਸ੍ਸੇਤ੍ਵਾ ਨਿਦ੍ਦੋਸਭਾਵਂ ਕਰੋਨ੍ਤੋ ‘‘ਅਨਾਪਤ੍ਤਿ, ਭਿਕ੍ਖਵੇ, ਮੋਗ੍ਗਲ੍ਲਾਨਸ੍ਸਾ’’ਤਿ ਆਹ. ਸਙ੍ਗੀਤਿਕਾਰਕਾ ਪਨ ਉਤ੍ਤਰਿਮਨੁਸ੍ਸਧਮ੍ਮਾਧਿਕਾਰਤ੍ਤਾ ਤਮ੍ਪਿ ਵਤ੍ਥੁਂ ਆਨੇਤ੍ਵਾ ਇਧ ਆਰੋਪੇਸੁਨ੍ਤਿ.
ਸਾਵਕਾਨਂ ਉਪ੍ਪਟਿਪਾਟਿਯਾ ਅਨੁਸ੍ਸਰਣਂ ਨਤ੍ਥੀਤਿ ਦਸ੍ਸੇਤੁਂ ‘‘ਨ ਉਪ੍ਪਟਿਪਾਟਿਯਾ’’ਤਿ ਆਹ. ਅਸਞ੍ਞਸਮਾਪਤ੍ਤਿਨ੍ਤਿ ਸਞ੍ਞਾਵਿਰਾਗਭਾਵਨਾਯ ਵਾਯੋਕਸਿਣਨਿਬ੍ਬਤ੍ਤਿਤਂ ਚਤੁਤ੍ਥਜ੍ਝਾਨਸਮਾਪਤ੍ਤਿਂ ਵਦਤਿ. ਪੁਬ੍ਬੇਨਿਵਾਸਞਾਣਂ ਚੁਤਿਪਟਿਸਨ੍ਧਿਂ ਗਣ੍ਹਨ੍ਤਮ੍ਪਿ ਅਨਨ੍ਤਰਪਚ੍ਚਯਕ੍ਕਮਵਨ੍ਤਾਨਂ ਅਰੂਪਧਮ੍ਮਾਨਂ ਵਸੇਨੇਵ ਗਣ੍ਹਾਤੀਤਿ ਆਹ – ‘‘ਤਤਿਯੇ ਅਤ੍ਤਭਾਵੇ ਚੁਤਿਮੇਵ ਅਦ੍ਦਸਾ’’ਤਿ. ਨਯਤੋ ਸਲ੍ਲਕ੍ਖੇਸੀਤਿ ਵਟ੍ਟੇ ਸਂਸਰਣਕਸਤ੍ਤਾਨਂ ਖਨ੍ਧਾਨਂ ਅਭਾਵਕਾਲੋ ਨਾਮ ਨਤ੍ਥਿ, ਅਸਞ੍ਞਭਵੇ ਪਨ ਅਚਿਤ੍ਤਕਾ ਹੁਤ੍ਵਾ ਪਞ੍ਚ ਕਪ੍ਪਸਤਾਨਿ ਪਵਤ੍ਤਨ੍ਤਿ, ਇਮਿਨਾ ਨਯੇਨ ਸਲ੍ਲਕ੍ਖੇਸਿ. ਦੁਕ੍ਕਰਂ ਕਤਨ੍ਤਿ ਖਨ੍ਧਵਿਕਲਸ੍ਸ ਪੁਬ੍ਬੇਨਿਵਾਸਸ੍ਸ ਅਨੁਸ੍ਸਰਣਂ ਠਪੇਤ੍ਵਾ ਸਮ੍ਮਾਸਮ੍ਬੁਦ੍ਧਂ ਨ ਸਕ੍ਕਾ ਅਞ੍ਞੇਹਿ ਕਾਤੁਨ੍ਤਿ ਨਯਤੋ ਸਲ੍ਲਕ੍ਖੇਨ੍ਤੇਨਪਿ ਦੁਕ੍ਕਰਂ ਕਤਨ੍ਤਿ ਅਧਿਪ੍ਪਾਯੋ. ਪਟਿਵਿਦ੍ਧਾਤਿ ਪਟਿਵਿਦ੍ਧਸਦਿਸਾ. ਯਥਾ ਨਾਮ ਕੋਚਿ ਧਨੁਸਿਪ੍ਪੇ ਕਤਹਤ੍ਥੋ ਏਕਂ ਕੇਸਸਙ੍ਖਾਤਂ ਵਾਲਂ ਸਤਕ੍ਖਤ੍ਤੁਂ ਵਿਦਾਲੇਤ੍ਵਾ ਤਤੋ ਏਕਂ ਅਂਸੁਂ ਗਹੇਤ੍ਵਾ ਵਾਤਿਙ੍ਗਣਫਲਸ੍ਸ ਮਜ੍ਝਟ੍ਠਾਨੇ ਬਨ੍ਧਿਤ੍ਵਾ ਅਪਰਂ ਅਂਸੁਂ ਕਣ੍ਡਸ੍ਸ ਅਗ੍ਗਕੋਟਿਯਂ ਯਥਾ ਤਸ੍ਸ ਅਂਸੁਸ੍ਸ ਊਕਾਮਤ੍ਤਂ ਵਾ ਲਿਕ੍ਖਾਮਤ੍ਤਂ ਵਾ ਕਣ੍ਡਸ੍ਸ ਅਗ੍ਗਕੋਟਿਤੋ ਅਧਿਕਂ ਹੁਤ੍ਵਾ ਤਿਟ੍ਠਤਿ, ਏਵਂ ਬਨ੍ਧਿਤ੍ਵਾ ਉਸਭਮਤ੍ਤੇ ਠਾਨੇ ਠਿਤੋ ਕਣ੍ਡਬਦ੍ਧਾਯ ਵਾਲਕੋਟਿਯਾ ਵਾਤਿਙ੍ਗਣਬਦ੍ਧਂ ਵਾਲਸ੍ਸ ਕੋਟਿਂ ਪਟਿਵਿਜ੍ਝੇਯ੍ਯ, ਏਵਮੇਵ ਇਮਿਨਾਪਿ ਕਤਂ ਦੁਕ੍ਕਰਨ੍ਤਿ ਵੁਤ੍ਤਂ ਹੋਤਿ. ਏਤਦਗ੍ਗਨ੍ਤਿ ਏਸੋ ਅਗ੍ਗੋ. ਯਦਿਦਨ੍ਤਿ ਯੋ ਅਯਂ. ਲਿਙ੍ਗਵਿਪਲ੍ਲਾਸਵਸੇਨੇਤਂ ਵੁਤ੍ਤਂ.
ਵਿਨੀਤਵਤ੍ਥੁਵਣ੍ਣਨਾ ਨਿਟ੍ਠਿਤਾ.
ਨਿਗਮਨਵਣ੍ਣਨਾ
੨੩੩. ਇਧਾਤਿ ਇਮਸ੍ਮਿਂ ਭਿਕ੍ਖੁਵਿਭਙ੍ਗੇ. ਉਦ੍ਦਿਟ੍ਠਾਤਿ ਇਧ ਪਾਤਿਮੋਕ੍ਖਵਸੇਨ ਅਨੋਸਾਰਿਤਤ੍ਤਾ ਚਤ੍ਤਾਰੋ ਪਾਰਾਜਿਕਾਵ ਉਦ੍ਦਿਟ੍ਠਾ ਕਥਿਤਾਤਿ ਅਤ੍ਥੋ ਗਹੇਤਬ੍ਬੋ. ਯਦਿ ਏਵਂ ਹੇਟ੍ਠਾ ਥੁਲ੍ਲਚ੍ਚਯਦੁਕ੍ਕਟਾਨਮ੍ਪਿ ਵੁਤ੍ਤਤ੍ਤਾ ਪਾਰਾਜਿਕਾਵ ਉਦ੍ਦਿਟ੍ਠਾਤਿ ਕਸ੍ਮਾ ਵੁਤ੍ਤਾਤਿ? ਪਾਰਾਜਿਕਾਧਿਕਾਰਤ੍ਤਾ ਸਨ੍ਤੇਸੁਪਿ ਥੁਲ੍ਲਚ੍ਚਯਦੁਕ੍ਕਟੇਸੁ ਇਧ ਪਾਰਾਜਿਕਾਵ ਵੁਤ੍ਤਾ. ਯੇਸਂ…ਪੇ… ਅਸਂਵਾਸੋਤਿ ਇਮਮਤ੍ਥਂ ਵਾ ਦੀਪੇਤੁਕਾਮੋ ਤਂਸਮ੍ਬਨ੍ਧੇਨ ‘‘ਉਦ੍ਦਿਟ੍ਠਾ ਚਤ੍ਤਾਰੋ ਪਾਰਾਜਿਕਾ’’ਤਿ ਆਹ. ਤਤ੍ਥਾਯਸ੍ਮਨ੍ਤੇਤਿਆਦਿਕਂ ਪਨ ਅਨੁਞ੍ਞਾਤਪਾਤਿਮੋਕ੍ਖੁਦ੍ਦੇਸਕ੍ਕਮੋਪਿ ਅਯਮੇਵ, ਨਾਞ੍ਞੋਤਿ ਦਸ੍ਸਨਤ੍ਥਂ ਵੁਤ੍ਤਂ. ਭਿਕ੍ਖੁਨੀਨਂ ਅਸਾਧਾਰਣਾਨਿ ਚਤ੍ਤਾਰੀਤਿ ਉਬ੍ਭਜਾਣੁਮਣ੍ਡਲਿਕਾ ਵਜ੍ਜਪਟਿਚ੍ਛਾਦਿਕਾ ਉਕ੍ਖਿਤ੍ਤਾਨੁਵਤ੍ਤਿਕਾ ਅਟ੍ਠਵਤ੍ਥੁਕਾਤਿ ਇਮਾਨਿ ਚਤ੍ਤਾਰਿ ਭਿਕ੍ਖੁਨੀਨਂ ਭਿਕ੍ਖੂਹਿ ਅਸਾਧਾਰਣਾਨਿ ਨਾਮ. ਏਤੇਸੁ ਉਬ੍ਭਜਾਣੁਮਣ੍ਡਲਿਕਾ ਨਾਮ ਯਾ ਕਾਯਸਂਸਗ੍ਗਰਾਗੇਨ ਅਵਸ੍ਸੁਤਾ ਤੇਨੇਵ ਰਾਗੇਨ ਅਵਸ੍ਸੁਤਸ੍ਸ ਮਨੁਸ੍ਸਪੁਰਿਸਸ੍ਸ ਅਕ੍ਖਕਾਨਂ ਅਧੋ ਜਾਣੁਮਣ੍ਡਲਾਨਂ ਕਪ੍ਪਰਾਨਞ੍ਚ ਉਪਰਿ ਯੇਨ ਕੇਨਚਿ ਸਰੀਰਾਵਯਵੇਨ ਆਮਸਨਾਦਿਂ ਸਾਦਿਯਤਿ, ਤਸ੍ਸਾ ਅਧਿਵਚਨਂ. ਯਾ ਪਨ ਭਿਕ੍ਖੁਨੀ ਅਞ੍ਞਿਸ੍ਸਾ ਭਿਕ੍ਖੁਨਿਯਾ ਪਾਰਾਜਿਕਸਙ੍ਖਾਤਂ ਵਜ੍ਜਂ ਜਾਨਂ ਪਟਿਚ੍ਛਾਦੇਤਿ, ਸਾ ਵਜ੍ਜਪਟਿਚ੍ਛਾਦਿਕਾ ਨਾਮ. ਸਮਗ੍ਗੇਨ ਪਨ ਸਙ੍ਘੇਨ ਉਕ੍ਖਿਤ੍ਤਂ ਭਿਕ੍ਖੁਂ ਯਾ ਭਿਕ੍ਖੁਨੀ ਯਂਦਿਟ੍ਠਿਕੋ ਸੋ ਹੋਤਿ, ਤਸ੍ਸਾ ਦਿਟ੍ਠਿਯਾ ਗਹਣਵਸੇਨ ਅਨੁਵਤ੍ਤਤਿ, ਸਾ ਉਕ੍ਖਿਤ੍ਤਾਨੁਵਤ੍ਤਿਕਾ ਨਾਮ. ਯਾ ਪਨ ਕਾਯਸਂਸਗ੍ਗਰਾਗੇਨ ਤਿਨ੍ਤਾ ਤਥਾਵਿਧਸ੍ਸੇਵ ਪੁਰਿਸਸ੍ਸ ਹਤ੍ਥਗ੍ਗਹਣਂ ਵਾ ਸਙ੍ਘਾਟਿਕਣ੍ਣਗ੍ਗਹਣਂ ਵਾ ਸਾਦਿਯਤਿ, ਕਾਯਸਂਸਗ੍ਗਸਙ੍ਖਾਤਸ੍ਸ ਅਸਦ੍ਧਮ੍ਮਸ੍ਸ ਪਟਿਸੇਵਨਤ੍ਥਾਯ ਪੁਰਿਸਸ੍ਸ ਹਤ੍ਥਪਾਸੇ ਸਨ੍ਤਿਟ੍ਠਤਿ ਵਾ, ਤਤ੍ਥ ਠਤ੍ਵਾ ਸਲ੍ਲਪਤਿ ਵਾ, ਸਙ੍ਕੇਤਂ ਵਾ ਗਚ੍ਛਤਿ, ਪੁਰਿਸਸ੍ਸ ਆਗਮਨਂ ਵਾ ਸਾਦਿਯਤਿ, ਕੇਨਚਿ ਵਾ ਪਟਿਚ੍ਛਨ੍ਨੋਕਾਸਂ ਪਵਿਸਤਿ, ਹਤ੍ਥਪਾਸੇ ਵਾ ਠਤ੍ਵਾ ਕਾਯਂ ਉਪਸਂਹਰਤਿ, ਅਯਂ ਅਟ੍ਠਵਤ੍ਥੁਕਾ ਨਾਮਾਤਿ ਵੇਦਿਤਬ੍ਬਂ.
ਵਤ੍ਥੁਵਿਪਨ੍ਨਾਤਿ ਪਬ੍ਬਜ੍ਜੁਪਸਮ੍ਪਦਾਯ ਅਵਤ੍ਥੁਭਾਵਤੋ ਵਤ੍ਥੁਵਿਪਨ੍ਨਾ. ਨੇਸਞ੍ਹਿ ‘‘ਨ, ਭਿਕ੍ਖਵੇ, ਪਣ੍ਡਕੋ ਪਬ੍ਬਾਜੇਤਬ੍ਬੋ, ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿਆਦਿਨਾ ਪਬ੍ਬਜ੍ਜਾ ਉਪਸਮ੍ਪਦਾ ਚ ਪਟਿਕ੍ਖਿਤ੍ਤਾ. ਤਸ੍ਮਾ ਤੇ ਭਿਕ੍ਖੁਭਾਵਾਯ ਅਭਬ੍ਬਤ੍ਤਾ ਪਾਰਾਜਿਕਾਪਨ੍ਨਸਦਿਸਤਾਯ ‘‘ਪਾਰਾਜਿਕਾ’’ਤਿ ਵੁਤ੍ਤਾ. ਤਬ੍ਭਾਵਭਾਵਿਤਾਯ ਭਿਕ੍ਖੁਭਾਵੋ ਵਸਤਿ ਏਤ੍ਥਾਤਿ ਵਤ੍ਥੁ, ਪੁਗ੍ਗਲਾਨਂ ਭਿਕ੍ਖੁਭਾਵਾਰਹਤਾ. ਸਾ ਪਨ ਪਬ੍ਬਜ੍ਜਕ੍ਖਨ੍ਧਕਾਗਤਸਬ੍ਬਦੋਸਵਿਰਹਿਤਸਮ੍ਪਤ੍ਤਿਯੁਤ੍ਤਤਾ. ਤਂ ਵਿਪਨ੍ਨਂ ਪਣ੍ਡਕਭਾਵਾਦਿਯੋਗੇਨ ਯੇਸਂ ਤੇ ਵਤ੍ਥੁਵਿਪਨ੍ਨਾ. ਅਹੇਤੁਕਪਟਿਸਨ੍ਧਿਕਾਤਿ ਇਮਿਨਾ ਤੇਸਂ ਵਿਪਾਕਾਵਰਣੇਨ ਸਮਨ੍ਨਾਗਤਭਾਵਂ ਦਸ੍ਸੇਨ੍ਤੋ ਮਗ੍ਗਾਵਰਣੇ ਕਾਰਣਮਾਹ. ਪਾਰਾਜਿਕਾਪਨ੍ਨਸਦਿਸਤ੍ਤਾ ਪਾਰਾਜਿਕਾ. ਥੇਯ੍ਯਸਂਵਾਸਕਾਦਿਕਮ੍ਮਂ ਮਾਤੁਘਾਤਾਦਿਕਂ ਵਿਯ ਆਨਨ੍ਤਰਿਯਂ ਨ ਹੋਤੀਤਿ ਆਹ ‘‘ਇਮੇਸਂ ਤਿਣ੍ਣਂ ਸਗ੍ਗੋ ਅਵਾਰਿਤੋ’’ਤਿ.
ਦੀਘਤਾਯ ਲਮ੍ਬਮਾਨਂ ਅਙ੍ਗਜਾਤਮੇਤਸ੍ਸਾਤਿ ਲਮ੍ਬੀ. ਸੋ ਏਤ੍ਤਾਵਤਾ ਨ ਪਾਰਾਜਿਕੋ, ਅਥ ਖੋ ਯਦਾ ਅਨਭਿਰਤਿਯਾ ਪੀਲ਼ਿਤੋ ਅਤ੍ਤਨੋ ਅਙ੍ਗਜਾਤਂ ਮੁਖੇ ਵਾ ਵਚ੍ਚਮਗ੍ਗੇ ਵਾ ਪਵੇਸੇਤਿ, ਤਦਾ ਪਾਰਾਜਿਕੋ ਹੋਤਿ. ਮੁਦੁ ਪਿਟ੍ਠਿ ਏਤਸ੍ਸਾਤਿ ਮੁਦੁਪਿਟ੍ਠਿਕੋ, ਕਤਪਰਿਕਮ੍ਮਾਯ ਮੁਦੁਕਾਯ ਪਿਟ੍ਠਿਯਾ ਸਮਨ੍ਨਾਗਤੋ. ਸੋਪਿ ਯਦਾ ਅਨਭਿਰਤਿਯਾ ਪੀਲ਼ਿਤੋ ਅਤ੍ਤਨੋ ਅਙ੍ਗਜਾਤਂ ਅਤ੍ਤਨੋ ਮੁਖਵਚ੍ਚਮਗ੍ਗੇਸੁ ਅਞ੍ਞਤਰਂ ਪਵੇਸੇਤਿ, ਤਦਾ ਪਾਰਾਜਿਕੋ ਹੋਤਿ. ਪਰਸ੍ਸ ਅਙ੍ਗਜਾਤਂ ਅਤ੍ਤਨੋ ਮੁਖੇਨ ਗਣ੍ਹਾਤੀਤਿ ਯੋ ਅਨਭਿਰਤਿਯਾ ਪੀਲ਼ਿਤੋ ਪਰਸ੍ਸ ਸੁਤ੍ਤਸ੍ਸ ਵਾ ਪਮਤ੍ਤਸ੍ਸ ਵਾ ਅਙ੍ਗਜਾਤਂ ਅਤ੍ਤਨੋ ਮੁਖੇਨ ਗਣ੍ਹਾਤਿ. ਪਰਸ੍ਸ ਅਙ੍ਗਜਾਤੇ ਅਭਿਨਿਸੀਦਤੀਤਿ ਯੋ ਅਨਭਿਰਤਿਯਾ ਪੀਲ਼ਿਤੋ ਪਰਸ੍ਸ ਅਙ੍ਗਜਾਤਂ ਕਮ੍ਮਨਿਯਂ ਦਿਸ੍ਵਾ ਅਤ੍ਤਨੋ ਵਚ੍ਚਮਗ੍ਗੇਨ ਤਸ੍ਸੂਪਰਿ ਨਿਸੀਦਤਿ, ਤਂ ਅਤ੍ਤਨੋ ਵਚ੍ਚਮਗ੍ਗਂ ਪਵੇਸੇਤੀਤਿ ਅਤ੍ਥੋ.
ਏਤ੍ਥਾਹ – ਮਾਤੁਘਾਤਕਪਿਤੁਘਾਤਕਅਰਹਨ੍ਤਘਾਤਕਾ ਤਤਿਯਪਾਰਾਜਿਕਂ ਆਪਨ੍ਨਾ, ਭਿਕ੍ਖੁਨੀਦੂਸਕੋ ਲਮ੍ਬੀਆਦਯੋ ਚਤ੍ਤਾਰੋ ਪਠਮਪਾਰਾਜਿਕਂ ਆਪਨ੍ਨਾ ਏਵਾਤਿ ਕਥਂ ਚਤੁਵੀਸਤੀਤਿ? ਵੁਚ੍ਚਤੇ – ਮਾਤੁਘਾਤਕਾਦਯੋ ਹਿ ਚਤ੍ਤਾਰੋ ਇਧ ਅਨੁਪਸਮ੍ਪਨ੍ਨਾ ਏਵ ਅਧਿਪ੍ਪੇਤਾ, ਲਮ੍ਬੀਆਦਯੋ ਚਤ੍ਤਾਰੋ ਕਿਞ੍ਚਾਪਿ ਪਠਮਪਾਰਾਜਿਕੇਨ ਸਙ੍ਗਹਿਤਾ, ਯਸ੍ਮਾ ਪਨ ਏਤੇਨ ਪਰਿਯਾਯੇਨ ਮੇਥੁਨਂ ਧਮ੍ਮਂ ਅਪ੍ਪਟਿਸੇਵਿਨੋ ਹੋਨ੍ਤਿ, ਤਸ੍ਮਾ ਵਿਸੁਂ ਵੁਤ੍ਤਾਤਿ. ਏਤੇਨ ਪਰਿਯਾਯੇਨਾਤਿ ਉਭਿਨ੍ਨਂ ਰਾਗਪਰਿਯੁਟ੍ਠਾਨਸਙ੍ਖਾਤੇਨ ਪਰਿਯਾਯੇਨ. ਦੁਤਿਯਵਿਕਪ੍ਪੇ ਕਚ੍ਚਿਤ੍ਥਾਤਿ ਏਤ੍ਥ ਕਚ੍ਚਿ ਅਤ੍ਥਾਤਿ ਪਦਚ੍ਛੇਦੋ ਵੇਦਿਤਬ੍ਬੋ.
ਨਿਗਮਨਵਣ੍ਣਨਾ ਨਿਟ੍ਠਿਤਾ.
ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ ਸਾਰਤ੍ਥਦੀਪਨਿਯਂ
ਚਤੁਤ੍ਥਪਾਰਾਜਿਕਵਣ੍ਣਨਾ ਨਿਟ੍ਠਿਤਾ.