ਪਠਮਗਾਥਾਸਙ੍ਗਣਿਕਂ
ਸਤ੍ਤਨਗਰੇਸੁ ਪਞ੍ਞਤ੍ਤਸਿਕ੍ਖਾਪਦਵਣ੍ਣਨਾ
੩੩੫. ਅਡ੍ਢੁਡ੍ਢਸਤਾਨੀਤਿ ਤੀਣਿ ਸਤਾਨਿ ਪਞ੍ਞਾਸਞ੍ਚ ਸਿਕ੍ਖਾਪਦਾਨਿ. ਵਿਗ੍ਗਹਨ੍ਤਿ ਮਨੁਸ੍ਸਵਿਗ੍ਗਹਂ. ਅਤਿਰੇਕਨ੍ਤਿ ਦਸਾਹਪਰਮਂ ਅਤਿਰੇਕਚੀਵਰਂ. ਕਾਲ਼ਕਨ੍ਤਿ ‘‘ਸੁਦ੍ਧਕਾਲ਼ਕਾਨ’’ਨ੍ਤਿ ਵੁਤ੍ਤਕਾਲ਼ਕਂ. ਭੂਤਨ੍ਤਿ ਭੂਤਾਰੋਚਨਂ. ਪਰਮ੍ਪਰਭਤ੍ਤਨ੍ਤਿ ਪਰਮ੍ਪਰਭੋਜਨਂ. ਭਿਕ੍ਖੁਨੀਸੁ ਚ ਅਕ੍ਕੋਸੋਤਿ ‘‘ਯਾ ਪਨ ਭਿਕ੍ਖੁਨੀ ਭਿਕ੍ਖੁਂ ਅਕ੍ਕੋਸੇਯ੍ਯ ਵਾ ਪਰਿਭਾਸੇਯ੍ਯ ਵਾ’’ਤਿ (ਪਾਚਿ. ੧੦੨੯) ਵੁਤ੍ਤਸਿਕ੍ਖਾਪਦਂ. ਅਨ੍ਤਰਵਾਸਕਨ੍ਤਿ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀਵਰਪਟਿਗ੍ਗਣ੍ਹਨਂ. ਰੂਪਿਯਨ੍ਤਿ ਰੂਪਿਯਸਂਵੋਹਾਰਂ. ਸੁਤ੍ਤਨ੍ਤਿ ‘‘ਸਾਮਂ ਸੁਤ੍ਤਂ ਵਿਞ੍ਞਾਪੇਤ੍ਵਾ ਤਨ੍ਤਵਾਯੇਹੀ’’ਤਿ (ਪਾਰਾ. ੬੩੭) ਵੁਤ੍ਤਸਿਕ੍ਖਾਪਦਂ. ਉਜ੍ਝਾਪਨਕੇਤਿ ਉਜ੍ਝਾਪਨਕੇ ਖਿਯ੍ਯਨਕੇ ਪਾਚਿਤ੍ਤਿਯਂ. ਪਾਚਿਤਪਿਣ੍ਡਨ੍ਤਿ ਭਿਕ੍ਖੁਨੀਪਰਿਪਾਚਿਤਂ. ਚੀਵਰਂ ਦਤ੍ਵਾਤਿ ‘‘ਸਮਗ੍ਗੇਨ ਸਙ੍ਘੇਨ ਚੀਵਰਂ ਦਤ੍ਵਾ’’ਤਿ (ਪਾਚਿ. ੪੮੫) ਵੁਤ੍ਤਸਿਕ੍ਖਾਪਦਂ. ਵੋਸਾਸਨ੍ਤੀਤਿ ‘‘ਭਿਕ੍ਖੂ ਪਨੇਵ ਕੁਲੇਸੁ ਨਿਮਨ੍ਤਿਤਾ ਭੁਞ੍ਜਨ੍ਤਿ, ਤਤ੍ਰ ਚੇਸਾ ਭਿਕ੍ਖੁਨੀ’’ਤਿ (ਪਾਚਿ. ੫੫੮) ਵੁਤ੍ਤਪਾਟਿਦੇਸਨੀਯਂ. ਗਿਰਗ੍ਗਨ੍ਤਿ ‘‘ਯਾ ਪਨ ਭਿਕ੍ਖੁਨੀ ਨਚ੍ਚਂ ਵਾ ਗੀਤਂ ਵਾ’’ਤਿ (ਪਾਚਿ. ੮੩੪) ਵੁਤ੍ਤਸਿਕ੍ਖਾਪਦਂ. ਚਰਿਯਾਤਿ ‘‘ਅਨ੍ਤੋਵਸ੍ਸਂ ਚਾਰਿਕਂ ਚਰੇਯ੍ਯਾ’’ਤਿ (ਪਾਚਿ. ੯੭੦) ਚ, ‘‘ਵਸ੍ਸਂਵੁਤ੍ਥਾ ਚਾਰਿਕਂ ਨ ਪਕ੍ਕਮੇਯ੍ਯਾ’’ਤਿ (ਪਾਚਿ. ੯੭੪) ਚ ਵੁਤ੍ਤਸਿਕ੍ਖਾਪਦਦ੍ਵਯਂ. ਛਨ੍ਦਦਾਨੇਨਾਤਿ ਪਾਰਿਵਾਸਿਕੇਨ ਛਨ੍ਦਦਾਨੇਨ.
ਪਾਰਾਜਿਕਾਨਿ ਚਤ੍ਤਾਰੀਤਿ ਭਿਕ੍ਖੁਨੀਨਂ ਚਤ੍ਤਾਰਿ ਪਾਰਾਜਿਕਾਨਿ. ਕੁਟੀਤਿ ਕੁਟਿਕਾਰਸਿਕ੍ਖਾਪਦਂ. ਕੋਸਿਯਨ੍ਤਿ ਕੋਸਿਯਮਿਸ੍ਸਕਸਿਕ੍ਖਾਪਦਂ. ਸੇਯ੍ਯਾਤਿ ਅਨੁਪਸਮ੍ਪਨ੍ਨੇਨ ਸਹਸੇਯ੍ਯਸਿਕ੍ਖਾਪਦਂ. ਖਣਨੇਤਿ ਪਥਵੀਖਣਨਂ. ਗਚ੍ਛ ਦੇਵਤੇਤਿ ਭੂਤਗਾਮਸਿਕ੍ਖਾਪਦਂ. ਸਿਞ੍ਚਨ੍ਤਿ ਸਪ੍ਪਾਣਕਉਦਕਸਿਞ੍ਚਨਂ. ਮਹਾਵਿਹਾਰੋਤਿ ਮਹਲ੍ਲਕਵਿਹਾਰੋ. ਅਞ੍ਞਨ੍ਤਿ ਅਞ੍ਞਵਾਦਕਂ. ਦ੍ਵਾਰਨ੍ਤਿ ਯਾਵ ਦ੍ਵਾਰਕੋਸਾ. ਸਹਧਮ੍ਮੋਤਿ ਸਹਧਮ੍ਮਿਕਂ ਵੁਚ੍ਚਮਾਨੋ. ਪਯੋਪਾਨਨ੍ਤਿ ਸੁਰੁਸੁਰੁਕਾਰਕਂ. ਏਲ਼ਕਲੋਮਾਨੀਤਿ ਏਲ਼ਕਲੋਮਧੋਵਾਪਨਂ. ਪਤ੍ਤੋਤਿ ਊਨਪਞ੍ਚਬਨ੍ਧਨਪਤ੍ਤੋ. ਓਵਾਦੋਤਿ ਭਿਕ੍ਖੁਨੁਪਸ੍ਸਯਂ ਉਪਸਙ੍ਕਮਿਤ੍ਵਾ ਓਵਾਦੋ. ਭੇਸਜ੍ਜਨ੍ਤਿ ਤਦੁਤ੍ਤਰਿਭੇਸਜ੍ਜਵਿਞ੍ਞਾਪਨਂ. ਸੂਚੀਤਿ ਅਟ੍ਠਿਮਯਾਦਿਸੂਚਿਘਰਂ. ਆਰਞ੍ਞਿਕੋਤਿ ‘‘ਯਾਨਿ ਖੋ ਪਨ ਤਾਨਿ ਆਰਞ੍ਞਕਾਨਿ ਸੇਨਾਸਨਾਨੀ’’ਤਿਆਦਿਨਾ (ਪਾਚਿ. ੫੭੦) ਵੁਤ੍ਤਪਾਟਿਦੇਸਨੀਯਂ. ਓਵਾਦੋਤਿ ‘‘ਯਾ ਪਨ ਭਿਕ੍ਖੁਨੀ ਓਵਾਦਾਯ ਵਾ ਸਂਵਾਸਾਯ ਵਾ ਨ ਗਚ੍ਛੇਯ੍ਯਾ’’ਤਿ (ਪਾਚਿ. ੧੦੫੫) ਵੁਤ੍ਤਸਿਕ੍ਖਾਪਦਂ.
ਪਾਰਾਜਿਕਾਨਿ ਚਤ੍ਤਾਰੀਤਿਆਦਿਨਾ ਛਸੁ ਨਗਰੇਸੁ ਪਞ੍ਞਤ੍ਤਂ ਏਕਤੋ ਸਮ੍ਪਿਣ੍ਡਿਤ੍ਵਾ ਸਾਵਤ੍ਥਿਯਾ ਪਞ੍ਞਤ੍ਤਂ ਵਿਸੁਂ ਗਣੇਤ੍ਵਾ ਸਬ੍ਬਾਨੇਵ ਸਿਕ੍ਖਾਪਦਾਨਿ ਦ੍ਵੀਹਿ ਰਾਸੀਹਿ ਸਙ੍ਗਣ੍ਹਾਤਿ.
ਸਤ੍ਤਨਗਰੇਸੁ ਪਞ੍ਞਤ੍ਤਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.
ਚਤੁਵਿਪਤ੍ਤਿਵਣ੍ਣਨਾ
੩੩੬. ਏਕਤਿਂਸ ਗਰੁਕਾ ਨਾਮ ਉਭਤੋ ਅਟ੍ਠ ਪਾਰਾਜਿਕਾ, ਭਿਕ੍ਖੂਨਂ ਤੇਰਸ, ਭਿਕ੍ਖੁਨੀਨਂ ਦਸ ਸਙ੍ਘਾਦਿਸੇਸਾ. ਅਟ੍ਠੇਤ੍ਥ ਅਨਵਸੇਸਾਤਿ ਏਤੇਸੁ ਯਥਾਵੁਤ੍ਤਗਰੁਕੇਸੁ ਸਾਧਾਰਣਾਸਾਧਾਰਣਵਸੇਨ ਅਟ੍ਠ ਪਾਰਾਜਿਕਾ ਅਨਵਸੇਸਾ ਨਾਮ.
ਅਸਾਧਾਰਣਾਦਿਵਣ੍ਣਨਾ
੩੩੮. ‘‘ਧੋਵਨਞ੍ਚ ਪਟਿਗ੍ਗਹੋ’’ਤਿ ਗਾਥਾ ਅਟ੍ਠਕਥਾਚਰਿਯਾਨਂ. ਤਤ੍ਥ ਧੋਵਨਞ੍ਚ ਪਟਿਗ੍ਗਹੋਤਿ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀਵਰਧੋਵਾਪਨਂ ਚੀਵਰਪਟਿਗ੍ਗਹਣਞ੍ਚ. ਕੋਸੇਯ੍ਯ…ਪੇ… ਦ੍ਵੇ ਲੋਮਾਤਿ ਏਲ਼ਕਲੋਮਵਗ੍ਗੇ ਆਦਿਤੋ ਸਤ੍ਤ ਸਿਕ੍ਖਾਪਦਾਨਿ ਵੁਤ੍ਤਾਨਿ. ਵਸ੍ਸਿਕਾਤਿ ਵਸ੍ਸਿਕਸਾਟਿਕਸਿਕ੍ਖਾਪਦਂ. ਆਰਞ੍ਞਕੇਨ ਚਾਤਿ ਸਾਸਙ੍ਕਸਿਕ੍ਖਾਪਦਂ ਵੁਤ੍ਤਂ. ਪਣੀਤਨ੍ਤਿ ਪਣੀਤਭੋਜਨਵਿਞ੍ਞਤ੍ਤਿ. ਊਨਨ੍ਤਿ ਊਨਵੀਸਤਿਵਸ੍ਸਸਿਕ੍ਖਾਪਦਂ. ਨਿਸੀਦਨੇ ਚ ਯਾ ਸਿਕ੍ਖਾ, ਵਸ੍ਸਿਕਾ ਯਾ ਚ ਸਾਟਿਕਾਤਿ ਨਿਸੀਦਨਵਸ੍ਸਿਕਸਾਟਿਕਾਨਂ ਪਮਾਣਾਤਿਕ੍ਕਮੋ.
ਆਪਤ੍ਤਿਕ੍ਖਨ੍ਧਾ ਚੇਵ ਉਪੋਸਥਾਦੀਨਿ ਚ ‘‘ਪਾਰਾਜਿਕਸਙ੍ਘਾਦਿਸੇਸਾ’’ਤਿਆਦਿਨਾ ਵਿਭਤ੍ਤਤ੍ਤਾ ‘‘ਵਿਭਤ੍ਤਿਯੋ’’ਤਿ ਵੁਤ੍ਤਾਨਿ. ਤੇਵੀਸਤਿ ਸਙ੍ਘਾਦਿਸੇਸਾਤਿ ਭਿਕ੍ਖੁਨੀਨਂ ਆਗਤਾਨਿ ਦਸ, ਭਿਕ੍ਖੂਨਂ ਤੇਰਸਾਤਿ ਤੇਵੀਸਤਿ. ਦ੍ਵੇਚਤ੍ਤਾਲੀਸ ਨਿਸ੍ਸਗ੍ਗਿਯਾਤਿਆਦੀਸੁਪਿ ਏਸੇਵ ਨਯੋ. ਦ੍ਵੀਹਿ…ਪੇ… ਕਿਚ੍ਚਂ ਏਕੇਨ ਸਮ੍ਮਤੀਤਿ ਦ੍ਵੀਹਿ ਵਿਵਾਦਾਧਿਕਰਣਂ, ਚਤੂਹਿ ਅਨੁਵਾਦਾਧਿਕਰਣਂ, ਤੀਹਿ ਆਪਤ੍ਤਾਧਿਕਰਣਂ, ਏਕੇਨ ਕਿਚ੍ਚਾਧਿਕਰਣਂ ਸਮ੍ਮਤੀਤਿ ਅਤ੍ਥੋ.
੩੩੯. ਨਿਰਙ੍ਕਤੋਤਿ ਸਙ੍ਘਮ੍ਹਾ ਅਪਸਾਰਿਤੋ.