ਅਧਿਕਰਣਭੇਦਵਣ੍ਣਨਾ

੩੪੦. ਯਸ੍ਮਾ ਅਧਿਕਰਣਂ ਉਕ੍ਕੋਟੇਨ੍ਤੋ ਸਮਥਪ੍ਪਤ੍ਤਮੇਵ ਉਕ੍ਕੋਟੇਤਿ, ਤਸ੍ਮਾ ‘‘ਵਿਵਾਦਾਧਿਕਰਣਂ ਉਕ੍ਕੋਟੇਨ੍ਤੋ ਕਤਿ ਸਮਥੇ ਉਕ੍ਕੋਟੇਤੀ’’ਤਿਆਦਿ ਵੁਤ੍ਤਂ.

੩੪੧. ਪਾਲ਼ਿਮੁਤ੍ਤਕਵਿਨਿਚ੍ਛਯੇਨੇਵਾਤਿ ਵਿਨਯਲਕ੍ਖਣਂ ਵਿਨਾ ਕੇਵਲਂ ਧਮ੍ਮਦੇਸਨਾਮਤ੍ਤਵਸੇਨੇਵਾਤਿ ਅਤ੍ਥੋ. ਯੇਨਾਪਿ ਵਿਨਿਚ੍ਛਯੇਨਾਤਿ ਪਾਲ਼ਿਮੁਤ੍ਤਕਵਿਨਿਚ੍ਛਯਮੇਵ ਸਨ੍ਧਾਯ ਵੁਤ੍ਤਂ. ਖਨ੍ਧਕਤੋ ਚ ਪਰਿਵਾਰਤੋ ਚ ਸੁਤ੍ਤੇਨਾਤਿ ਖਨ੍ਧਕਪਰਿਵਾਰਤੋ ਆਨੀਤਸੁਤ੍ਤੇਨ. ਨਿਜ੍ਝਾਪੇਨ੍ਤੀਤਿ ਪਞ੍ਞਾਪੇਨ੍ਤਿ.

੩੪੨. ਕਿਚ੍ਚਂ ਨਿਸ੍ਸਾਯ ਉਪ੍ਪਜ੍ਜਨਕਕਿਚ੍ਚਾਨਨ੍ਤਿ ਪੁਬ੍ਬੇ ਕਤਉਕ੍ਖੇਪਨੀਯਾਦਿਕਿਚ੍ਚਂ ਨਿਸ੍ਸਾਯ ਉਪ੍ਪਜ੍ਜਨਕਕਿਚ੍ਚਾਨਂ. ਕੀਦਿਸਾਨਂ? ਯਾਵਤਤਿਯਸਮਨੁਭਾਸਨਾਦੀਨਂ.

੩੪੩. ਤਂ ਹੀਤਿ ਤਂ ਵਿਵਾਦਾਧਿਕਰਣਂ.

੩੪੪. ਅਧਿਕਰਣੇਸੁ ਯੇਨ ਅਧਿਕਰਣੇਨ ਸਮ੍ਮਨ੍ਤਿ, ਤਂ ਦਸ੍ਸੇਤੁਂ ਵੁਤ੍ਤਨ੍ਤਿ ਯਦਾ ਅਧਿਕਰਣੇਹਿ ਸਮ੍ਮਨ੍ਤਿ, ਤਦਾ ਕਿਚ੍ਚਾਧਿਕਰਣੇਨੇਵ ਸਮ੍ਮਨ੍ਤਿ, ਨ ਅਞ੍ਞੇਹਿ ਅਧਿਕਰਣੇਹੀਤਿ ਦਸ੍ਸਨਤ੍ਥਂ ਵੁਤ੍ਤਨ੍ਤਿ ਅਧਿਪ੍ਪਾਯੋ.

੩੫੩. ‘‘ਸਤ੍ਤਨ੍ਨਂ ਸਮਥਾਨਂ ਕਤਮੇ ਛਤ੍ਤਿਂਸ ਸਮੁਟ੍ਠਾਨਾ’’ਤਿ ਪੁਚ੍ਛਿਤ੍ਵਾਪਿ ‘‘ਕਮ੍ਮਸ੍ਸ ਕਿਰਿਯਾ ਕਰਣ’’ਨ੍ਤਿਆਦਿਨਾ ਸਮ੍ਮੁਖਾਵਿਨਯਸ੍ਸ ਸਮੁਟ੍ਠਾਨਾਨਿ ਅਵਿਭਜਿਤ੍ਵਾਵ ਸਤਿਵਿਨਯਾਦੀਨਂ ਛਨ੍ਨਞ੍ਞੇਵ ਛ ਸਮੁਟ੍ਠਾਨਾਨਿ ਵਿਭਤ੍ਤਾਨਿ, ਤਂ ਕਸ੍ਮਾਤਿ ਆਹ ‘‘ਕਿਞ੍ਚਾਪਿ ਸਤ੍ਤਨ੍ਨਂ ਸਮਥਾਨ’’ਨ੍ਤਿਆਦਿ. ਸਤਿਵਿਨਯਾਦੀਨਂ ਵਿਯ ਸਙ੍ਘਸਮ੍ਮੁਖਤਾਦੀਨਂ ਕਿਚ੍ਚਯਤਾ ਨਾਮ ਨਤ੍ਥੀਤਿ ਆਹ ‘‘ਕਮ੍ਮਸਙ੍ਗਹਾਭਾਵੇਨਾ’’ਤਿ.