ਉਪੋਸਥਾਦਿਪੁਚ੍ਛਾਵਿਸ੍ਸਜ੍ਜਨਾਵਣ੍ਣਨਾ

੩੩੨. ‘‘ਸਙ੍ਘਂ, ਭਨ੍ਤੇ, ਪਵਾਰੇਮੀਤਿਆਦਿ ਪਵਾਰਣਾਕਥਾ ਨਾਮਾ’’ਤਿ ਗਣ੍ਠਿਪਦੇਸੁ ਵੁਤ੍ਤਂ.

ਅਤ੍ਥਵਸਪਕਰਣਵਣ੍ਣਨਾ

੩੩੪. ਪਠਮਪਾਰਾਜਿਕਵਣ੍ਣਨਾਯਮੇਵ ਵੁਤ੍ਤਨ੍ਤਿ ‘‘ਸਙ੍ਘਸੁਟ੍ਠੁਤਾਯਾ’’ਤਿਆਦੀਨਂ ਅਤ੍ਥਵਣ੍ਣਨਂ ਸਨ੍ਧਾਯ ਵੁਤ੍ਤਂ. ਦਸਕ੍ਖਤ੍ਤੁਂ ਯੋਜਨਾਯ ਪਦਸਤਂ ਵੁਤ੍ਤਨ੍ਤਿ ਏਕਮੂਲਕਨਯੇ ਦਸਕ੍ਖਤ੍ਤੁਂ ਯੋਜਨਾਯ ਕਤਾਯ ਸਙ੍ਖਲਿਕਨਯੇ ਵੁਤ੍ਤਪਦੇਹਿ ਸਦ੍ਧਿਂ ਪਦਸਤਂ ਵੁਤ੍ਤਨ੍ਤਿ ਏਵਮਤ੍ਥੋ ਗਹੇਤਬ੍ਬੋ. ਅਞ੍ਞਥਾ ਏਕਮੂਲਕੇ ਏਵ ਨਯੇ ਨ ਸਕ੍ਕਾ ਪਦਸਤਂ ਲਦ੍ਧੁਂ. ਏਕਮੂਲਕਨਯੇਹਿ ਪੁਰਿਮਪਚ੍ਛਿਮਪਦਾਨਿ ਏਕਤੋ ਕਤ੍ਵਾ ਏਕੇਕਸ੍ਮਿਂ ਵਾਰੇ ਨਵ ਨਵ ਪਦਾਨਿ ਵੁਤ੍ਤਾਨੀਤਿ ਦਸਕ੍ਖਤ੍ਤੁਂ ਯੋਜਨਾਯ ਨਵੁਤਿ ਪਦਾਨਿਯੇਵ ਲਬ੍ਭਨ੍ਤਿ. ਤਸ੍ਮਾ ਤਾਨਿ ਨਵੁਤਿ ਪਦਾਨਿ ਸਙ੍ਖਲਿਕਨਯੇ ਬਦ੍ਧਚਕ੍ਕਵਸੇਨ ਯੋਜਿਤੇ ਦਸ ਪਦਾਨਿ ਲਬ੍ਭਨ੍ਤੀਤਿ ਤੇਹਿ ਸਦ੍ਧਿਂ ਪਦਸਤਨ੍ਤਿ ਸਕ੍ਕਾ ਵਤ੍ਤੁਂ. ਇਤੋ ਅਞ੍ਞਥਾ ਪਨ ਉਭੋਸੁਪਿ ਨਯੇਸੁ ਵਿਸੁਂ ਵਿਸੁਂ ਅਤ੍ਥਸਤਂ ਧਮ੍ਮਸਤਞ੍ਚ ਯਥਾ ਲਬ੍ਭਤਿ, ਤਥਾ ਪਠਮਪਾਰਾਜਿਕਸਂਵਣ੍ਣਨਾਯਮੇਵ ਅਮ੍ਹੇਹਿ ਦਸ੍ਸਿਤਂ, ਤਂ ਤਤ੍ਥ ਵੁਤ੍ਤਨਯੇਨੇਵ ਗਹੇਤਬ੍ਬਂ. ਪੁਰਿਮਪਚ੍ਛਿਮਪਦਾਨਿ ਏਕਤ੍ਤੇਨ ਗਹੇਤ੍ਵਾ ‘‘ਪਦਸਤ’’ਨ੍ਤਿ ਵੁਤ੍ਤਤ੍ਤਾ ‘‘ਤਤ੍ਥ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਪਦਸ੍ਸ ਵਸੇਨ ਅਤ੍ਥਸਤਂ, ਪੁਰਿਮਸ੍ਸ ਪੁਰਿਮਸ੍ਸ ਵਸੇਨ ਧਮ੍ਮਸਤ’’ਨ੍ਤਿ ਵੁਤ੍ਤਂ. ਤਸ੍ਮਿਂ ਪਦਸਤੇ ‘‘ਸਙ੍ਘਸੁਟ੍ਠੂ’’ਤਿਆਦਿਨਾ ਵੁਤ੍ਤਪੁਰਿਮਪਦਾਨਂ ਵਸੇਨ ਧਮ੍ਮਸਤਂ, ‘‘ਸਙ੍ਘਫਾਸੂ’’ਤਿਆਦਿਨਾ ਵੁਤ੍ਤਪਚ੍ਛਿਮਪਦਾਨਂ ਵਸੇਨ ਅਤ੍ਥਸਤਨ੍ਤਿ ਅਧਿਪ੍ਪਾਯੋ.

ਮਹਾਵਗ੍ਗਵਣ੍ਣਨਾ ਨਿਟ੍ਠਿਤਾ.