੧੦. ਭਿਕ੍ਖੁਨਿਕ੍ਖਨ੍ਧਕਂ

ਮਹਾਪਜਾਪਤਿਗੋਤਮੀਵਤ੍ਥੁਕਥਾਵਣ੍ਣਨਾ

੪੦੨. ਭਿਕ੍ਖੁਨਿਕ੍ਖਨ੍ਧਕੇ ਸਕ੍ਕੇਸੁ ਵਿਹਰਤੀਤਿ ਪਠਮਗਮਨੇਨ ਗਨ੍ਤ੍ਵਾ ਵਿਹਰਤਿ. ਮਹਾਪਜਾਪਤਿ ਗੋਤਮੀਤਿ ਏਤ੍ਥ ਗੋਤਮੀਤਿ ਗੋਤ੍ਤਂ. ਨਾਮਕਰਣਦਿਵਸੇ ਪਨਸ੍ਸਾ ਲਦ੍ਧਸਕ੍ਕਾਰਾ ਬ੍ਰਾਹ੍ਮਣਾ ਲਕ੍ਖਣਸਮ੍ਪਤ੍ਤਿਂ ਦਿਸ੍ਵਾ ‘‘ਸਚੇ ਅਯਂ ਧੀਤਰਂ ਲਭਿਸ੍ਸਤਿ, ਚਕ੍ਕਵਤ੍ਤਿਰਞ੍ਞੋ ਮਹੇਸੀ ਭਵਿਸ੍ਸਤਿ. ਸਚੇ ਪੁਤ੍ਤਂ ਲਭਿਸ੍ਸਤਿ, ਚਕ੍ਕਵਤ੍ਤਿਰਾਜਾ ਭਵਿਸ੍ਸਤੀਤਿ ਉਭਯਥਾਪਿ ਮਹਤੀਯੇਵਸ੍ਸਾ ਪਜਾ ਭਵਿਸ੍ਸਤੀ’’ਤਿ ਬ੍ਯਾਕਰਿਂਸੁ, ਤਸ੍ਮਾ ਪੁਤ੍ਤਪਜਾਯ ਚੇਵ ਧੀਤੁਪਜਾਯ ਚ ਮਹਨ੍ਤਤਾਯ ‘‘ਮਹਾਪਜਾਪਤੀ’’ਤਿ ਨਾਮਂ ਅਕਂਸੁ, ਇਧ ਪਨ ਗੋਤ੍ਤੇਨ ਸਦ੍ਧਿਂ ਸਂਸਨ੍ਦਿਤ੍ਵਾ ‘‘ਮਹਾਪਜਾਪਤਿ ਗੋਤਮੀ’’ਤਿ ਵੁਤ੍ਤਂ. ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਭਗਵਾ ਕਪਿਲਪੁਰਂ ਗਨ੍ਤ੍ਵਾ ਪਠਮਮੇਵ ਨਨ੍ਦਂ ਪਬ੍ਬਾਜੇਸਿ, ਸਤ੍ਤਮੇ ਦਿਵਸੇ ਰਾਹੁਲਕੁਮਾਰਂ. ਚੁਮ੍ਬਟਕਕਲਹੇ ਪਨ ਉਭਯਨਗਰਵਾਸਿਕੇਸੁ ਯੁਦ੍ਧਤ੍ਥਾਯ ਨਿਕ੍ਖਨ੍ਤੇਸੁ ਸਤ੍ਥਾ ਗਨ੍ਤ੍ਵਾ ਤੇ ਰਾਜਾਨੋ ਸਞ੍ਞਾਪੇਤ੍ਵਾ ਅਤ੍ਤਦਣ੍ਡਸੁਤ੍ਤਂ (ਸੁ. ਨਿ. ੯੪੧ ਆਦਯੋ) ਕਥੇਸਿ. ਰਾਜਾਨੋ ਪਸੀਦਿਤ੍ਵਾ ਅਡ੍ਢਤੇਯ੍ਯਸਤੇ ਅਡ੍ਢਤੇਯ੍ਯਸਤੇ ਦਾਰਕੇ ਅਦਂਸੁ. ਤਾਨਿ ਪਞ੍ਚ ਕੁਮਾਰਸਤਾਨਿ ਸਤ੍ਥੁ ਸਨ੍ਤਿਕੇ ਪਬ੍ਬਜਿਂਸੁ. ਅਥ ਨੇਸਂ ਪਜਾਪਤਿਯੋ ਸਾਸਨਂ ਪੇਸੇਤ੍ਵਾ ਅਨਭਿਰਤਿਂ ਉਪ੍ਪਾਦਯਿਂਸੁ. ਸਤ੍ਥਾ ਤੇਸਂ ਅਨਭਿਰਤਿਯਾ ਉਪ੍ਪਨ੍ਨਭਾਵਂ ਞਤ੍ਵਾ ਤੇ ਪਞ੍ਚਸਤੇ ਦਹਰਭਿਕ੍ਖੂ ਕੁਣਾਲਦਹਂ ਨੇਤ੍ਵਾ ਅਤ੍ਤਨੋ ਕੁਣਾਲਕਾਲੇ ਨਿਸਿਨ੍ਨਪੁਬ੍ਬੇ ਪਾਸਾਣਤਲੇ ਨਿਸੀਦਿਤ੍ਵਾ ਕੁਣਾਲਜਾਤਕਕਥਾਯ (ਜਾ. ੨.੨੧.ਕੁਣਾਲਜਾਤਕ) ਤੇਸਂ ਅਨਭਿਰਤਿਂ ਵਿਨੋਦੇਤ੍ਵਾ ਸਬ੍ਬੇਪਿ ਤੇ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਸਿ, ਪੁਨ ਮਹਾਵਨਂ ਆਨੇਤ੍ਵਾ ਅਰਹਤ੍ਤਫਲੇ. ਤੇਸਂ ਚਿਤ੍ਤਜਾਨਨਤ੍ਥਂ ਪੁਨਪਿ ਪਜਾਪਤਿਯੋ ਸਾਸਨਂ ਪਹਿਣਿਂਸੁ. ਤੇ ‘‘ਅਭਬ੍ਬਾ ਮਯਂ ਘਰਾਵਾਸਸ੍ਸਾ’’ਤਿ ਪਟਿਸਾਸਨਂ ਪਹਿਣਿਂਸੁ. ਤਾ ‘‘ਨ ਦਾਨਿ ਅਮ੍ਹਾਕਂ ਪਰਘਰਂ ਗਨ੍ਤੁਂ ਯੁਤ੍ਤਂ, ਮਹਾਪਜਾਪਤਿਯਾ ਸਨ੍ਤਿਕਂ ਗਨ੍ਤ੍ਵਾ ਪਬ੍ਬਜ੍ਜਂ ਅਨੁਜਾਨਾਪੇਤ੍ਵਾ ਪਬ੍ਬਜਿਸ੍ਸਾਮਾ’’ਤਿ ਪਞ੍ਚਸਤਾਪਿ ਮਹਾਪਜਾਪਤਿਂ ਉਪਸਙ੍ਕਮਿਤ੍ਵਾ ‘‘ਅਯ੍ਯੇ, ਅਮ੍ਹਾਕਂ ਪਬ੍ਬਜ੍ਜਂ ਅਨੁਜਾਨਾਪੇਥਾ’’ਤਿ ਆਹਂਸੁ. ਮਹਾਪਜਾਪਤਿ ਚ ਤਾ ਇਤ੍ਥਿਯੋ ਗਹੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਸੇਤਚ੍ਛਤ੍ਤਸ੍ਸ ਹੇਟ੍ਠਾ ਰਞ੍ਞੋ ਪਰਿਨਿਬ੍ਬੁਤਕਾਲੇ ਉਪਸਙ੍ਕਮੀਤਿਪਿ ਵਦਨ੍ਤਿਯੇਵ. ਪਕ੍ਕਾਮੀਤਿ ਪੁਨ ਕਪਿਲਪੁਰਮੇਵ ਪਾਵਿਸਿ.

ਯਥਾਭਿਰਨ੍ਤਂ ਵਿਹਰਿਤ੍ਵਾਤਿ ਬੋਧਨੇਯ੍ਯਸਤ੍ਤਾਨਂ ਉਪਨਿਸ੍ਸਯਂ ਓਲੋਕੇਨ੍ਤੋ ਯਥਾਜ੍ਝਾਸਯੇਨ ਵਿਹਰਿਤ੍ਵਾ. ਚਾਰਿਕਂ ਪਕ੍ਕਾਮੀਤਿ ਮਹਾਜਨਸਙ੍ਗਹਂ ਕਰੋਨ੍ਤੋ ਉਤ੍ਤਮਾਯ ਬੁਦ੍ਧਸਿਰਿਯਾ ਅਨੋਪਮੇਨ ਬੁਦ੍ਧਵਿਲਾਸੇਨ ਅਤੁਰਿਤਚਾਰਿਕਂ ਪਕ੍ਕਾਮਿ. ਸਮ੍ਬਹੁਲਾਹਿ ਸਾਕਿਯਾਨੀਹਿ ਸਦ੍ਧਿਨ੍ਤਿ ਅਨ੍ਤੋਨਿਵੇਸਨਸ੍ਮਿਂਯੇਵ ਦਸਬਲਂ ਉਦ੍ਦਿਸ੍ਸ ਪਬ੍ਬਜ੍ਜਾਵੇਸਂ ਗਹੇਤ੍ਵਾ ਤਾਪਿ ਪਞ੍ਚਸਤਾ ਸਾਕਿਯਾਨਿਯੋ ਪਬ੍ਬਜ੍ਜਾਵੇਸਂਯੇਵ ਗਾਹਾਪੇਤ੍ਵਾ ਸਬ੍ਬਾਹਿਪਿ ਤਾਹਿ ਸਮ੍ਬਹੁਲਾਹਿ ਸਾਕਿਯਾਨੀਹਿ ਸਦ੍ਧਿਂ. ਪਕ੍ਕਾਮੀਤਿ ਗਮਨਂ ਅਭਿਨੀਹਰਿ. ਗਮਨਾਭਿਨੀਹਰਣਕਾਲੇ ਪਨਸ੍ਸਾ ‘‘ਸੁਕੁਮਾਰਾ ਰਾਜਿਤ੍ਥਿਯੋ ਪਦਸਾ ਗਨ੍ਤੁਂ ਨ ਸਕ੍ਖਿਸ੍ਸਨ੍ਤੀ’’ਤਿ ਸਾਕਿਯਕੋਲਿਯਰਾਜਾਨੋ ਸੁਵਣ੍ਣਸਿਵਿਕਾਯੋ ਉਪਟ੍ਠਾਪਯਿਂਸੁ, ਤਾ ਪਨ ‘‘ਯਾਨੇ ਆਰੁਯ੍ਹ ਗਚ੍ਛਨ੍ਤੀਹਿ ਸਤ੍ਥਰਿ ਅਗਾਰਵੋ ਕਤੋ ਹੋਤੀ’’ਤਿ ਏਕਪਣ੍ਣਾਸਯੋਜਨਿਕਂ ਮਗ੍ਗਂ ਪਦਸਾਵ ਪਟਿਪਜ੍ਜਿਂਸੁ. ਰਾਜਾਨੋਪਿ ਪੁਰਤੋ ਚ ਪਚ੍ਛਤੋ ਚ ਆਰਕ੍ਖਂ ਸਂਵਿਦਹਾਪੇਤ੍ਵਾ ਤਣ੍ਡੁਲਸਪ੍ਪਿਤੇਲਾਦੀਨਂ ਸਕਟਾਨਿ ਪੂਰੇਤ੍ਵਾ ‘‘ਗਤਗਤਟ੍ਠਾਨੇ ਆਹਾਰਂ ਪਟਿਯਾਦੇਥਾ’’ਤਿ ਪੁਰਿਸੇ ਪੇਸਯਿਂਸੁ. ਸੂਨੇਹਿ ਪਾਦੇਹੀਤਿ ਤਾਸਞ੍ਹਿ ਸੁਖੁਮਾਲਤ੍ਤਾ ਪਾਦੇਸੁ ਏਕੋ ਫੋਟੋ ਉਟ੍ਠੇਤਿ, ਏਕੋ ਭਿਜ੍ਜਤਿ, ਉਭੋ ਪਾਦਾ ਕਟਕਟ੍ਠਿਸਮ੍ਪਰਿਕਿਣ੍ਣਾ ਵਿਯ ਹੁਤ੍ਵਾ ਉਦ੍ਧੁਮਾਤਾ. ਤੇਨ ਵੁਤ੍ਤਂ ‘‘ਸੂਨੇਹਿ ਪਾਦੇਹੀ’’ਤਿ. ਬਹਿਦ੍ਵਾਰਕੋਟ੍ਠਕੇਤਿ ਦ੍ਵਾਰਕੋਟ੍ਠਕਸ੍ਸ ਬਹਿ. ਕਸ੍ਮਾ ਪਨੇਵਂ ਠਿਤਾਤਿ? ਏਵਂ ਕਿਰਸ੍ਸਾ ਅਹੋਸਿ ‘‘ਅਹਂ ਤਥਾਗਤੇਨ ਅਨੁਞ੍ਞਾਤਾ ਸਯਮੇਵ ਪਬ੍ਬਜ੍ਜਾਵੇਸਂ ਅਗ੍ਗਹੇਸਿਂ, ਏਵਂ ਗਹਿਤਭਾਵੋ ਚ ਪਨ ਮੇ ਸਕਲਜਮ੍ਬੁਦੀਪੇ ਪਾਕਟੋ ਜਾਤੋ, ਸਚੇ ਸਤ੍ਥਾ ਪਬ੍ਬਜ੍ਜਂ ਅਨੁਜਾਨਿਸ੍ਸਤਿ, ਇਚ੍ਚੇਤਂ ਕੁਸਲਂ. ਸਚੇ ਨਾਨੁਜਾਨਿਸ੍ਸਤਿ, ਮਹਤੀ ਗਰਹਾ ਭਵਿਸ੍ਸਤੀ’’ਤਿ ਵਿਹਾਰਂ ਪਵਿਸਿਤੁਂ ਅਸਕ੍ਕੋਨ੍ਤੀ ਰੋਦਮਾਨਾ ਅਟ੍ਠਾਸਿ. ਕਿਂ ਨੁ ਤ੍ਵਂ ਗੋਤਮੀਤਿ ਕਿਂ ਨੁ ਰਾਜਕੁਲਾਨਂ ਵਿਪਤ੍ਤਿ ਉਪ੍ਪਨ੍ਨਾ, ਕੇਨ ਨੁ ਤ੍ਵਂ ਕਾਰਣੇਨ ਏਵਂ ਵਿਵਣ੍ਣਭਾਵਂ ਪਤ੍ਤਾ ਸੂਨੇਹਿ ਪਾਦੇਹਿ…ਪੇ… ਠਿਤਾਤਿ.

ਅਞ੍ਞੇਨਪਿ ਪਰਿਯਾਯੇਨਾਤਿ ਅਞ੍ਞੇਨਪਿ ਕਾਰਣੇਨ. ਆਪਾਦਿਕਾਤਿ ਸਂਵਡ੍ਢਿਕਾ, ਤੁਮ੍ਹਾਕਂ ਹਤ੍ਥਪਾਦੇਸੁ ਹਤ੍ਥਪਾਦਕਿਚ੍ਚਂ ਅਸਾਧੇਨ੍ਤੇਸੁ ਹਤ੍ਥੇ ਚ ਪਾਦੇ ਚ ਵਡ੍ਢੇਤ੍ਵਾ ਪਟਿਜਗ੍ਗਿਕਾਤਿ ਅਤ੍ਥੋ. ਪੋਸਿਕਾਤਿ ਦਿਵਸਸ੍ਸ ਦ੍ਵੇ ਤਯੋ ਵਾਰੇ ਨਹਾਪੇਤ੍ਵਾ ਭੋਜੇਤ੍ਵਾ ਪਾਯੇਤ੍ਵਾ ਤੁਮ੍ਹੇ ਪੋਸੇਸਿ. ਥਞ੍ਞਂ ਪਾਯੇਸੀਤਿ ਨਨ੍ਦਕੁਮਾਰੋ ਕਿਰ ਬੋਧਿਸਤ੍ਤਤੋ ਕਤਿਪਾਹੇਨੇਵ ਦਹਰਤਰੋ. ਤਸ੍ਮਿਂ ਜਾਤੇ ਮਹਾਪਜਾਪਤਿ ਅਤ੍ਤਨੋ ਪੁਤ੍ਤਂ ਧਾਤੀਨਂ ਦਤ੍ਵਾ ਸਯਂ ਬੋਧਿਸਤ੍ਤਸ੍ਸ ਧਾਤਿਕਿਚ੍ਚਂ ਸਾਧਯਮਾਨਾ ਅਤ੍ਤਨੋ ਥਞ੍ਞਂ ਪਾਯੇਸਿ. ਤਂ ਸਨ੍ਧਾਯ ਥੇਰੋ ਏਵਮਾਹ. ਸਾਧੁ ਭਨ੍ਤੇਤਿ ‘‘ਬਹੁਕਾਰਾ’’ਤਿਆਦੀਹਿ ਤਸ੍ਸਾ ਗੁਣਂ ਕਥੇਤ੍ਵਾ ਪੁਨ ਪਬ੍ਬਜ੍ਜਂ ਯਾਚਨ੍ਤੋ ਏਵਮਾਹ.

ਮਹਾਪਜਾਪਤਿਗੋਤਮੀਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.

ਅਟ੍ਠਗਰੁਧਮ੍ਮਕਥਾਵਣ੍ਣਨਾ

੪੦੩. ਸਤ੍ਥਾਪਿ ‘‘ਇਤ੍ਥਿਯੋ ਨਾਮ ਪਰਿਤ੍ਤਸਦ੍ਧਾ, ਏਕਾਯਾਚਿਤਮਤ੍ਤੇਯੇਵ ਪਬ੍ਬਜ੍ਜਾਯ ਅਨੁਞ੍ਞਾਤਾਯ ਨ ਮਮ ਸਾਸਨਂ ਗਰੁਂ ਕਤ੍ਵਾ ਗਣ੍ਹਿਸ੍ਸਨ੍ਤੀ’’ਤਿ ਤਿਕ੍ਖਤ੍ਤੁਂ ਪਟਿਕ੍ਖਿਪਿਤ੍ਵਾ ਇਦਾਨਿ ਗਰੁਂ ਕਤ੍ਵਾ ਗਾਹਾਪੇਤੁਕਾਮਤਾਯ ‘‘ਸਚੇ, ਆਨਨ੍ਦ, ਮਹਾਪਜਾਪਤਿ ਗੋਤਮੀ ਅਟ੍ਠ ਗਰੁਧਮ੍ਮੇ ਪਟਿਗ੍ਗਣ੍ਹਾਤਿ, ਸਾਵਸ੍ਸਾ ਹੋਤੁ ਉਪਸਮ੍ਪਦਾ’’ਤਿਆਦਿਮਾਹ. ਤਤ੍ਥ ਸਾਵਸ੍ਸਾਤਿ ਸਾ ਏਵ ਅਸ੍ਸਾ ਪਬ੍ਬਜ੍ਜਾਪਿ ਉਪਸਮ੍ਪਦਾਪਿ ਹੋਤੁ.

ਤਦਹੁਪਸਮ੍ਪਨ੍ਨਸ੍ਸਾਤਿ ਤਂ ਦਿਵਸਮ੍ਪਿ ਉਪਸਮ੍ਪਨ੍ਨਸ੍ਸ. ਅਭਿਵਾਦਨਂ ਪਚ੍ਚੁਟ੍ਠਾਨਂ ਅਞ੍ਜਲਿਕਮ੍ਮਂ ਸਾਮੀਚਿਕਮ੍ਮਂ ਕਾਤਬ੍ਬਨ੍ਤਿ ਮਾਨਾਤਿਮਾਨਂ ਅਕਤ੍ਵਾ ਪਞ੍ਚਪਤਿਟ੍ਠਿਤੇਨ ਅਭਿਵਾਦਨਂ, ਆਸਨਾ ਉਟ੍ਠਾਯ ਪਚ੍ਚੁਗ੍ਗਮਨਵਸੇਨ ਪਚ੍ਚੁਟ੍ਠਾਨਂ, ਦਸਨਖੇ ਸਮੋਧਾਨੇਤ੍ਵਾ ਅਞ੍ਜਲਿਕਮ੍ਮਂ, ਆਸਨਪਞ੍ਞਾਪਨਬੀਜਨਾਦਿਕਂ ਅਨੁਚ੍ਛਵਿਕਕਮ੍ਮਸਙ੍ਖਾਤਂ ਸਾਮੀਚਿਕਮ੍ਮਞ੍ਚ ਕਤ੍ਤਬ੍ਬਂ. ਅਭਿਕ੍ਖੁਕੇ ਆਵਾਸੇਤਿ ਯਤ੍ਥ ਵਸਨ੍ਤਿਯਾ ਅਨਨ੍ਤਰਾਯੇਨ ਓਵਾਦਤ੍ਥਾਯ ਉਪਸਙ੍ਕਮਨਾਰਹੇ ਠਾਨੇ ਓਵਾਦਦਾਯਕੋ ਆਚਰਿਯੋ ਨਤ੍ਥਿ, ਅਯਂ ਅਭਿਕ੍ਖੁਕੋ ਆਵਾਸੋ ਨਾਮ, ਏਵਰੂਪੇ ਆਵਾਸੇ ਵਸ੍ਸਂ ਨ ਉਪਗਨ੍ਤਬ੍ਬਂ. ਅਨ੍ਵਦ੍ਧਮਾਸਨ੍ਤਿ ਅਨੁਪੋਸਥਿਕਂ. ਓਵਾਦੂਪਸਙ੍ਕਮਨਨ੍ਤਿ ਓਵਾਦਤ੍ਥਾਯ ਉਪਸਙ੍ਕਮਨਂ. ਦਿਟ੍ਠੇਨਾਤਿ ਚਕ੍ਖੁਨਾ ਦਿਟ੍ਠੇਨ. ਸੁਤੇਨਾਤਿ ਸੋਤੇਨ ਸੁਤੇਨ. ਪਰਿਸਙ੍ਕਾਯਾਤਿ ਦਿਟ੍ਠਸੁਤਵਸੇਨ ਪਰਿਸਙ੍ਕਿਤੇਨ. ਗਰੁਧਮ੍ਮਨ੍ਤਿ ਗਰੁਕਂ ਸਙ੍ਘਾਦਿਸੇਸਾਪਤ੍ਤਿਂ. ਪਕ੍ਖਮਾਨਤ੍ਤਨ੍ਤਿ ਅਨੂਨਾਨਿ ਪਨ੍ਨਰਸ ਦਿਵਸਾਨਿ ਮਾਨਤ੍ਤਂ. ਛਸੁ ਧਮ੍ਮੇਸੂਤਿ ਵਿਕਾਲਭੋਜਨਚ੍ਛਟ੍ਠੇਸੁ ਸਿਕ੍ਖਾਪਦੇਸੁ. ਸਿਕ੍ਖਿਤਸਿਕ੍ਖਾਯਾਤਿ ਏਕਸਿਕ੍ਖਮ੍ਪਿ ਅਖਣ੍ਡਂ ਕਤ੍ਵਾ ਪੂਰਿਤਸਿਕ੍ਖਾਯ.

ਨ ਅਕ੍ਕੋਸਿਤਬ੍ਬੋ ਨ ਪਰਿਭਾਸਿਤਬ੍ਬੋਤਿ ਦਸਨ੍ਨਂ ਅਕ੍ਕੋਸਵਤ੍ਥੂਨਂ ਅਞ੍ਞਤਰੇਨ ਅਕ੍ਕੋਸਵਤ੍ਥੁਨਾ ਨ ਅਕ੍ਕੋਸਿਤਬ੍ਬੋ, ਭਯੁਪਦਂਸਨਾਯ ਕਾਯਚਿ ਪਰਿਭਾਸਾਯ ਨ ਪਰਿਭਾਸਿਤਬ੍ਬੋ. ਓਵਟੋ ਭਿਕ੍ਖੁਨੀਨਂ ਭਿਕ੍ਖੂਸੁ ਵਚਨਪਥੋਤਿ ਓਵਾਦਾਨੁਸਾਸਨਿਧਮ੍ਮਕਥਾਸਙ੍ਖਾਤੋ ਵਚਨਪਥੋ ਭਿਕ੍ਖੁਨੀਨਂ ਭਿਕ੍ਖੂਸੁ ਓਵਟੋ ਪਿਹਿਤੋ, ਨ ਭਿਕ੍ਖੁਨਿਯਾ ਕੋਚਿ ਭਿਕ੍ਖੁ ਓਵਦਿਤਬ੍ਬੋ ਵਾ ਅਨੁਸਾਸਿਤਬ੍ਬੋ ਵਾ, ‘‘ਭਨ੍ਤੇ ਪੋਰਾਣਕਤ੍ਥੇਰਾ ਇਦਞ੍ਚਿਦਞ੍ਚ ਵਤ੍ਤਂ ਪੂਰਯਿਂਸੂ’’ਤਿ ਏਵਂ ਪਨ ਪਵੇਣਿਵਸੇਨ ਕਥੇਤੁਂ ਵਟ੍ਟਤਿ. ਅਨੋਵਟੋ ਭਿਕ੍ਖੂਨਂ ਭਿਕ੍ਖੁਨੀਸੂਤਿ ਭਿਕ੍ਖੂਨਂ ਪਨ ਭਿਕ੍ਖੁਨੀਸੁ ਵਚਨਪਥੋ ਅਨਿਵਾਰਿਤੋ, ਯਥਾਰੁਚਿਯਾ ਓਵਦਨ੍ਤੁ ਅਨੁਸਾਸਨ੍ਤੁ ਧਮ੍ਮਕਥਂ ਕਥੇਨ੍ਤੂਤਿ ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨੇਸਾ ਗਰੁਧਮ੍ਮਕਥਾ ਮਹਾਵਿਭਙ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ.

ਇਮੇ ਪਨ ਅਟ੍ਠ ਗਰੁਧਮ੍ਮੇ ਸਤ੍ਥੁ ਸਨ੍ਤਿਕੇ ਉਗ੍ਗਹੇਤ੍ਵਾ ਥੇਰੇਨ ਅਤ੍ਤਨੋ ਆਰੋਚਿਯਮਾਨੇ ਸੁਤ੍ਵਾ ਮਹਾਪਜਾਪਤਿਯਾ ਤਾਵਮਹਨ੍ਤਂ ਦੋਮਨਸ੍ਸਂ ਖਣੇਨ ਪਟਿਪ੍ਪਸ੍ਸਮ੍ਭਿ. ਅਨੋਤਤ੍ਤਦਹਤੋ ਆਹਟੇਨ ਸੀਤੁਦਕਸ੍ਸ ਘਟਸਤੇਨ ਮਤ੍ਥਕੇ ਪਰਿਸਿਤ੍ਤਾ ਵਿਯ ਵਿਗਤਪਰਿਲ਼ਾਹਾ ਅਤ੍ਤਮਨਾ ਹੁਤ੍ਵਾ ਗਰੁਧਮ੍ਮਪਟਿਗ੍ਗਹਣੇਨ ਉਪ੍ਪਨ੍ਨਪੀਤਿਪਾਮੋਜ੍ਜਂ ਆਵਿ ਕਰੋਨ੍ਤੀ ‘‘ਸੇਯ੍ਯਥਾਪਿ, ਭਨ੍ਤੇ’’ਤਿਆਦਿਕਂ ਉਦਾਨਂ ਉਦਾਨੇਸਿ. ਤਤ੍ਥ ਦਹਰੋਤਿ ਤਰੁਣੋ. ਯੁਵਾਤਿ ਯੋਬ੍ਬਞ੍ਞਭਾਵੇ ਠਿਤੋ. ਮਣ੍ਡਨਕਜਾਤਿਕੋਤਿ ਅਲਙ੍ਕਾਰਸਭਾਵੋ. ਤਤ੍ਥ ਕੋਚਿ ਤਰੁਣੋਪਿ ਯੁਵਾ ਨ ਹੋਤਿ ਯਥਾ ਅਤਿਤਰੁਣੋ. ਕੋਚਿ ਯੁਵਾਪਿ ਮਣ੍ਡਨਕਜਾਤਿਕੋ ਨ ਹੋਤਿ ਯਥਾ ਉਪਸਨ੍ਤਸਭਾਵੋ ਆਲਸਿਯਬ੍ਯਸਨਾਦੀਹਿ ਵਾ ਅਭਿਭੂਤੋ, ਇਧ ਪਨ ਦਹਰੋ ਚੇਵ ਯੁਵਾ ਚ ਮਣ੍ਡਨਕਜਾਤਿਕੋ ਚ ਅਧਿਪ੍ਪੇਤੋ, ਤਸ੍ਮਾ ਏਵਮਾਹ. ਉਪ੍ਪਲਾਦੀਨਿ ਲੋਕਸਮ੍ਮਤਤ੍ਤਾ ਵੁਤ੍ਤਾਨਿ. ਇਤੋ ਪਰਂ ਯਂ ਯਂ ਵਤ੍ਤਬ੍ਬਂ, ਤਂ ਤਂ ਅਟ੍ਠਕਥਾਯਂ ਦਸ੍ਸਿਤਮੇਵ.

ਤਤ੍ਥ ਮਾਤੁਗਾਮਸ੍ਸ ਪਬ੍ਬਜਿਤਤ੍ਤਾਤਿ ਇਦਂ ਪਞ੍ਚਵਸ੍ਸਸਤਤੋ ਉਦ੍ਧਂ ਅਟ੍ਠਤ੍ਵਾ ਪਞ੍ਚਸੁਯੇਵ ਵਸ੍ਸਸਤੇਸੁ ਸਦ੍ਧਮ੍ਮਟ੍ਠਿਤਿਯਾ ਕਾਰਣਨਿਦਸ੍ਸਨਂ. ਪਟਿਸਮ੍ਭਿਦਾਪਭੇਦਪ੍ਪਤ੍ਤਖੀਣਾਸਵਵਸੇਨੇਵ ਵੁਤ੍ਤਨ੍ਤਿ ਏਤ੍ਥ ‘‘ਪਟਿਸਮ੍ਭਿਦਾਪਤ੍ਤਖੀਣਾਸਵਗ੍ਗਹਣੇਨ ਝਾਨਾਨਿਪਿ ਗਹਿਤਾਨੇਵ ਹੋਨ੍ਤਿ. ਨ ਹਿ ਨਿਜ੍ਝਾਨਕਾਨਂ ਸਬ੍ਬਪ੍ਪਕਾਰਸਮ੍ਪਤ੍ਤਿ ਇਜ੍ਝਤੀ’’ਤਿ ਗਣ੍ਠਿਪਦੇਸੁ ਵੁਤ੍ਤਂ. ਸੁਕ੍ਖਵਿਪਸ੍ਸਕਖੀਣਾਸਵਵਸੇਨ ਵਸ੍ਸਸਹਸ੍ਸਨ੍ਤਿਆਦਿਨਾ ਚ ਯਂ ਵੁਤ੍ਤਂ. ਤਂ ਖਨ੍ਧਕਭਾਣਕਾਨਂ ਮਤੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਦੀਘਨਿਕਾਯਟ੍ਠਕਥਾਯਂ (ਦੀ. ਨਿ. ਅਟ੍ਠ. ੩.੧੬੧) ਪਨ ਏਵਂ ਵੁਤ੍ਤਂ –

‘‘ਪਟਿਸਮ੍ਭਿਦਾਪਤ੍ਤੇਹਿ ਵਸ੍ਸਸਹਸ੍ਸਂ ਅਟ੍ਠਾਸਿ, ਛਲ਼ਭਿਞ੍ਞੇਹਿ ਵਸ੍ਸਸਹਸ੍ਸਂ, ਤੇਵਿਜ੍ਜੇਹਿ ਵਸ੍ਸਸਹਸ੍ਸਂ, ਸੁਕ੍ਖਵਿਪਸ੍ਸਕੇਹਿ ਵਸ੍ਸਸਹਸ੍ਸਂ, ਪਾਤਿਮੋਕ੍ਖੇਨ ਵਸ੍ਸਸਹਸ੍ਸਂ ਅਟ੍ਠਾਸੀ’’ਤਿ.

ਅਙ੍ਗੁਤ੍ਤਰਨਿਕਾਯਟ੍ਠਕਥਾਯਮ੍ਪਿ (ਅ. ਨਿ. ਅਟ੍ਠ. ੧.੧.੧੩੦) –

‘‘ਬੁਦ੍ਧਾਨਞ੍ਹਿ ਪਰਿਨਿਬ੍ਬਾਨਤੋ ਵਸ੍ਸਸਹਸ੍ਸਮੇਵ ਪਟਿਸਮ੍ਭਿਦਾ ਨਿਬ੍ਬਤ੍ਤੇਤੁਂ ਸਕ੍ਕੋਨ੍ਤਿ, ਤਤੋ ਪਰਂ ਛ ਅਭਿਞ੍ਞਾ, ਤਤੋ ਤਾਪਿ ਨਿਬ੍ਬਤ੍ਤੇਤੁਂ ਅਸਕ੍ਕੋਨ੍ਤਾ ਤਿਸ੍ਸੋ ਵਿਜ੍ਜਾ ਨਿਬ੍ਬਤ੍ਤੇਨ੍ਤਿ, ਗਚ੍ਛਨ੍ਤੇ ਗਚ੍ਛਨ੍ਤੇ ਕਾਲੇ ਤਾਪਿ ਨਿਬ੍ਬਤ੍ਤੇਤੁਂ ਅਸਕ੍ਕੋਨ੍ਤਾ ਸੁਕ੍ਖਵਿਪਸ੍ਸਕਾ ਹੋਨ੍ਤਿ. ਏਤੇਨੇਵ ਉਪਾਯੇਨ ਅਨਾਗਾਮਿਨੋ ਸਕਦਾਗਾਮਿਨੋ ਸੋਤਾਪਨ੍ਨਾ’’ਤਿ –

ਵੁਤ੍ਤਂ.

ਸਂਯੁਤ੍ਤਨਿਕਾਯਟ੍ਠਕਥਾਯਂ ਪਨ (ਸਂ. ਨਿ. ਅਟ੍ਠ. ੨.੩.੧੫੬) –

‘‘ਪਠਮਬੋਧਿਯਞ੍ਹਿ ਭਿਕ੍ਖੂ ਪਟਿਸਮ੍ਭਿਦਾਪਤ੍ਤਾ ਅਹੇਸੁਂ. ਅਥ ਕਾਲੇ ਗਚ੍ਛਨ੍ਤੇ ਪਟਿਸਮ੍ਭਿਦਾ ਪਾਪੁਣਿਤੁਂ ਨ ਸਕ੍ਖਿਂਸੁ, ਛਲ਼ਭਿਞ੍ਞਾ ਅਹੇਸੁਂ, ਤਤੋ ਛ ਅਭਿਞ੍ਞਾ ਪਤ੍ਤੁਂ ਅਸਕ੍ਕੋਨ੍ਤਾ ਤਿਸ੍ਸੋ ਵਿਜ੍ਜਾ ਪਾਪੁਣਿਂਸੁ. ਇਦਾਨਿ ਕਾਲੇ ਗਚ੍ਛਨ੍ਤੇ ਤਿਸ੍ਸੋ ਵਿਜ੍ਜਾ ਪਾਪੁਣਿਤੁਂ ਅਸਕ੍ਕੋਨ੍ਤਾ ਆਸਵਕ੍ਖਯਮਤ੍ਤਂ ਪਾਪੁਣਿਸ੍ਸਨ੍ਤਿ, ਤਮ੍ਪਿ ਅਸਕ੍ਕੋਨ੍ਤਾ ਅਨਾਗਾਮਿਫਲਂ, ਤਮ੍ਪਿ ਅਸਕ੍ਕੋਨ੍ਤਾ ਸਕਦਾਗਾਮਿਫਲਂ, ਤਮ੍ਪਿ ਅਸਕ੍ਕੋਨ੍ਤਾ ਸੋਤਾਪਤ੍ਤਿਫਲਂ, ਗਚ੍ਛਨ੍ਤੇ ਕਾਲੇ ਸੋਤਾਪਤ੍ਤਿਫਲਮ੍ਪਿ ਪਤ੍ਤੁਂ ਨ ਸਕ੍ਖਿਸ੍ਸਨ੍ਤੀ’’ਤਿ –

ਵੁਤ੍ਤਂ.

ਯਸ੍ਮਾ ਚੇਤਂ ਸਬ੍ਬਂ ਅਞ੍ਞਮਞ੍ਞਪਟਿਵਿਰੁਦ੍ਧਂ, ਤਸ੍ਮਾ ਤੇਸਂ ਤੇਸਂ ਭਾਣਕਾਨਂ ਮਤਮੇਵ ਆਚਰਿਯੇਨ ਤਤ੍ਥ ਤਤ੍ਥ ਦਸ੍ਸਿਤਨ੍ਤਿ ਗਹੇਤਬ੍ਬਂ. ਅਞ੍ਞਥਾ ਹਿ ਆਚਰਿਯਸ੍ਸੇਵ ਪੁਬ੍ਬਾਪਰਵਿਰੋਧਪ੍ਪਸਙ੍ਗੋ ਸਿਯਾਤਿ.

ਤਾਨਿਯੇਵਾਤਿ ਤਾਨਿਯੇਵ ਪਞ੍ਚ ਵਸ੍ਸਸਹਸ੍ਸਾਨਿ. ਪਰਿਯਤ੍ਤਿਮੂਲਕਂ ਸਾਸਨਨ੍ਤਿ ਆਹ ‘‘ਨ ਹਿ ਪਰਿਯਤ੍ਤਿਯਾ ਅਸਤਿ ਪਟਿਵੇਧੋ ਅਤ੍ਥੀ’’ਤਿਆਦਿ. ਪਰਿਯਤ੍ਤਿਯਾ ਹਿ ਅਨ੍ਤਰਹਿਤਾਯ ਪਟਿਪਤ੍ਤਿ ਅਨ੍ਤਰਧਾਯਤਿ, ਪਟਿਪਤ੍ਤਿਯਾ ਅਨ੍ਤਰਹਿਤਾਯ ਅਧਿਗਮੋ ਅਨ੍ਤਰਧਾਯਤਿ. ਕਿਂਕਾਰਣਾ? ਅਯਞ੍ਹਿ ਪਰਿਯਤ੍ਤਿ ਪਟਿਪਤ੍ਤਿਯਾ ਪਚ੍ਚਯੋ ਹੋਤਿ, ਪਟਿਪਤ੍ਤਿ ਅਧਿਗਮਸ੍ਸ, ਇਤਿ ਪਟਿਪਤ੍ਤਿਤੋਪਿ ਪਰਿਯਤ੍ਤਿਯੇਵ ਪਮਾਣਂ. ਤਤ੍ਥ ਪਟਿਵੇਧੋ ਚ ਪਟਿਪਤ੍ਤਿ ਚ ਹੋਤਿਪਿ ਨ ਹੋਤਿਪਿ. ਏਕਸ੍ਮਿਞ੍ਹਿ ਕਾਲੇ ਪਟਿਵੇਧਕਰਾ ਭਿਕ੍ਖੂ ਬਹੂ ਹੋਨ੍ਤਿ, ‘‘ਏਸ ਭਿਕ੍ਖੁ ਪੁਥੁਜ੍ਜਨੋ’’ਤਿ ਅਙ੍ਗੁਲਿਂ ਪਸਾਰੇਤ੍ਵਾ ਦਸ੍ਸੇਤਬ੍ਬੋ ਹੋਤਿ, ਇਮਸ੍ਮਿਂਯੇਵ ਦੀਪੇ ਏਕਵਾਰਂ ਪੁਥੁਜ੍ਜਨਭਿਕ੍ਖੁ ਨਾਮ ਨਾਹੋਸਿ. ਪਟਿਪਤ੍ਤਿਪੂਰਕਾਪਿ ਕਦਾਚਿ ਬਹੂ ਹੋਨ੍ਤਿ, ਕਦਾਚਿ ਅਪ੍ਪਾ, ਇਤਿ ਪਟਿਵੇਧੋ ਚ ਪਟਿਪਤ੍ਤਿ ਚ ਹੋਤਿਪਿ ਨ ਹੋਤਿਪਿ. ਸਾਸਨਟ੍ਠਿਤਿਯਾ ਪਨ ਪਰਿਯਤ੍ਤਿਯੇਵ ਪਮਾਣਂ. ਪਣ੍ਡਿਤੋ ਹਿ ਤੇਪਿਟਕਂ ਸੁਤ੍ਵਾ ਦ੍ਵੇਪਿ ਪੂਰੇਤਿ. ਯਥਾ ਅਮ੍ਹਾਕਂ ਬੋਧਿਸਤ੍ਤੋ ਆਲ਼ਾਰਸ੍ਸ ਸਨ੍ਤਿਕੇ ਪਞ੍ਚਾਭਿਞ੍ਞਾ ਸਤ੍ਤ ਚ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਯਾ ਪਰਿਕਮ੍ਮਂ ਪੁਚ੍ਛਿ, ਸੋ ‘‘ਨ ਜਾਨਾਮੀ’’ਤਿ ਆਹ, ਤਤੋ ਉਦਕਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਧਿਗਤਵਿਸੇਸਂ ਸਂਸਨ੍ਦਿਤ੍ਵਾ ਨੇਵਸਞ੍ਞਾਨਾਸਞ੍ਞਾਯਤਨਸ੍ਸ ਪਰਿਕਮ੍ਮਂ ਪੁਚ੍ਛਿ, ਸੋ ਆਚਿਕ੍ਖਿ, ਤਸ੍ਸ ਵਚਨਸਮਨਨ੍ਤਰਮੇਵ ਮਹਾਸਤ੍ਤੋ ਤਂ ਸਮ੍ਪਾਦੇਸਿ, ਏਵਮੇਵ ਪਞ੍ਞਵਾ ਭਿਕ੍ਖੁ ਪਰਿਯਤ੍ਤਿਂ ਸੁਤ੍ਵਾ ਦ੍ਵੇਪਿ ਪੂਰੇਤਿ, ਤਸ੍ਮਾ ਪਰਿਯਤ੍ਤਿਯਾ ਠਿਤਾਯ ਸਾਸਨਂ ਠਿਤਂ ਹੋਤਿ. ਯਥਾਪਿ ਮਹਤੋ ਤਲ਼ਾਕਸ੍ਸ ਪਾਲ਼ਿਯਾ ਥਿਰਾਯ ਉਦਕਂ ਨ ਠਸ੍ਸਤੀਤਿ ਨ ਵਤ੍ਤਬ੍ਬਂ, ਉਦਕੇ ਸਤਿ ਪਦੁਮਾਦੀਨਿ ਪੁਪ੍ਫਾਨਿ ਨ ਪੁਪ੍ਫਿਸ੍ਸਨ੍ਤੀਤਿ ਨ ਵਤ੍ਤਬ੍ਬਂ, ਏਵਮੇਵ ਮਹਾਤਲ਼ਾਕਸ੍ਸ ਥਿਰਪਾਲ਼ਿਸਦਿਸੇ ਤੇਪਿਟਕੇ ਬੁਦ੍ਧਵਚਨੇ ਸਤਿ ਮਹਾਤਲ਼ਾਕੇ ਉਦਕਸਦਿਸਾ ਪਟਿਪਤ੍ਤਿਪੂਰਕਾ ਕੁਲਪੁਤ੍ਤਾ ਨਤ੍ਥੀਤਿ ਨ ਵਤ੍ਤਬ੍ਬਂ, ਤੇਸੁ ਸਤਿ ਮਹਾਤਲ਼ਾਕੇ ਪਦੁਮਾਦੀਨਿ ਪੁਪ੍ਫਾਨਿ ਵਿਯ ਸੋਤਾਪਨ੍ਨਾਦਯੋ ਅਰਿਯਪੁਗ੍ਗਲਾ ਨਤ੍ਥੀਤਿ ਨ ਵਤ੍ਤਬ੍ਬਂ. ਏਵਂ ਏਕਨ੍ਤਤੋ ਪਰਿਯਤ੍ਤਿਯੇਵ ਪਮਾਣਂ.

ਪਰਿਯਤ੍ਤਿਯਾ ਅਨ੍ਤਰਹਿਤਾਯਾਤਿ ਏਤ੍ਥ ਪਰਿਯਤ੍ਤੀਤਿ (ਅ. ਨਿ. ਅਟ੍ਠ. ੧.੧.੧੩੦) ਤੇਪਿਟਕਂ ਬੁਦ੍ਧਵਚਨਂ ਸਾਟ੍ਠਕਥਾ ਪਾਲ਼ਿ. ਯਾਵ ਸਾ ਤਿਟ੍ਠਤਿ, ਤਾਵ ਪਰਿਯਤ੍ਤਿ ਪਰਿਪੁਣ੍ਣਾ ਨਾਮ ਹੋਤਿ. ਗਚ੍ਛਨ੍ਤੇ ਗਚ੍ਛਨ੍ਤੇ ਕਾਲੇ ਕਲਿਯੁਗਰਾਜਾਨੋ ਅਧਮ੍ਮਿਕਾ ਹੋਨ੍ਤਿ, ਤੇਸੁ ਅਧਮ੍ਮਿਕੇਸੁ ਤੇਸਮ੍ਪਿ ਅਮਚ੍ਚਾਦਯੋ ਅਧਮ੍ਮਿਕਾ ਹੋਨ੍ਤਿ, ਤਤੋ ਰਟ੍ਠਜਨਪਦਵਾਸਿਨੋਤਿ ਤੇਸਂ ਅਧਮ੍ਮਿਕਤਾਯ ਨ ਦੇਵੋ ਸਮ੍ਮਾ ਵਸ੍ਸਤਿ, ਤਤੋ ਸਸ੍ਸਾਨਿ ਨ ਸਮ੍ਪਜ੍ਜਨ੍ਤਿ, ਤੇਸੁ ਅਸਮ੍ਪਜ੍ਜਨ੍ਤੇਸੁ ਪਚ੍ਚਯਦਾਯਕਾ ਭਿਕ੍ਖੁਸਙ੍ਘਸ੍ਸ ਪਚ੍ਚਯੇ ਦਾਤੁਂ ਨ ਸਕ੍ਕੋਨ੍ਤਿ, ਭਿਕ੍ਖੂ ਪਚ੍ਚਯੇਹਿ ਕਿਲਮਨ੍ਤਾ ਅਨ੍ਤੇਵਾਸਿਕੇ ਸਙ੍ਗਹੇਤੁਂ ਨ ਸਕ੍ਕੋਨ੍ਤਿ. ਗਚ੍ਛਨ੍ਤੇ ਗਚ੍ਛਨ੍ਤੇ ਕਾਲੇ ਪਰਿਯਤ੍ਤਿ ਪਰਿਹਾਯਤਿ, ਅਤ੍ਥਵਸੇਨ ਧਾਰੇਤੁਂ ਨ ਸਕ੍ਕੋਨ੍ਤਿ, ਪਾਲ਼ਿਵਸੇਨੇਵ ਧਾਰੇਨ੍ਤਿ. ਤਤੋ ਕਾਲੇ ਗਚ੍ਛਨ੍ਤੇ ਪਾਲ਼ਿਮ੍ਪਿ ਸਕਲਂ ਧਾਰੇਤੁਂ ਨ ਸਕ੍ਕੋਨ੍ਤਿ, ਪਠਮਂ ਅਭਿਧਮ੍ਮਪਿਟਕਂ ਪਰਿਹਾਯਤਿ, ਪਰਿਹਾਯਮਾਨਂ ਮਤ੍ਥਕਤੋ ਪਟ੍ਠਾਯ ਪਰਿਹਾਯਤਿ. ਪਠਮਮੇਵ ਹਿ ਮਹਾਪਕਰਣਂ ਪਰਿਹਾਯਤਿ, ਤਸ੍ਮਿਂ ਪਰਿਹੀਨੇ ਯਮਕਂ, ਕਥਾਵਤ੍ਥੁ, ਪੁਗ੍ਗਲਪਞ੍ਞਤ੍ਤਿ, ਧਾਤੁਕਥਾ, ਵਿਭਙ੍ਗੋ, ਧਮ੍ਮਸਙ੍ਗਹੋਤਿ.

ਏਵਂ ਅਭਿਧਮ੍ਮਪਿਟਕੇ ਪਰਿਹੀਨੇ ਮਤ੍ਥਕਤੋ ਪਟ੍ਠਾਯ ਸੁਤ੍ਤਨ੍ਤਪਿਟਕਂ ਪਰਿਹਾਯਤਿ. ਪਠਮਞ੍ਹਿ ਅਙ੍ਗੁਤ੍ਤਰਨਿਕਾਯੋ ਪਰਿਹਾਯਤਿ, ਤਸ੍ਮਿਮ੍ਪਿ ਪਠਮਂ ਏਕਾਦਸਕਨਿਪਾਤੋ…ਪੇ… ਤਤੋ ਏਕਕਨਿਪਾਤੋਤਿ. ਏਵਂ ਅਙ੍ਗੁਤ੍ਤਰਨਿਕਾਯੇ ਪਰਿਹੀਨੇ ਮਤ੍ਥਕਤੋ ਪਟ੍ਠਾਯ ਸਂਯੁਤ੍ਤਨਿਕਾਯੋ ਪਰਿਹਾਯਤਿ. ਪਠਮਞ੍ਹਿ ਮਹਾਵਗ੍ਗੋ ਪਰਿਹਾਯਤਿ, ਤਤੋ ਸਲ਼ਾਯਤਨਵਗ੍ਗੋ, ਖਨ੍ਧਕਵਗ੍ਗੋ, ਨਿਦਾਨਵਗ੍ਗੋ, ਸਗਾਥਾਵਗ੍ਗੋਤਿ. ਏਵਂ ਸਂਯੁਤ੍ਤਨਿਕਾਯੇ ਪਰਿਹੀਨੇ ਮਤ੍ਥਕਤੋ ਪਟ੍ਠਾਯ ਮਜ੍ਝਿਮਨਿਕਾਯੋ ਪਰਿਹਾਯਤਿ. ਪਠਮਞ੍ਹਿ ਉਪਰਿਪਣ੍ਣਾਸਕੋ ਪਰਿਹਾਯਤਿ, ਤਤੋ ਮਜ੍ਝਿਮਪਣ੍ਣਾਸਕੋ, ਤਤੋ ਮੂਲਪਣ੍ਣਾਸਕੋਤਿ. ਏਵਂ ਮਜ੍ਝਿਮਨਿਕਾਯੇ ਪਰਿਹੀਨੇ ਮਤ੍ਥਕਤੋ ਪਟ੍ਠਾਯ ਦੀਘਨਿਕਾਯੋ ਪਰਿਹਾਯਤਿ. ਪਠਮਞ੍ਹਿ ਪਾਥਿਕਵਗ੍ਗੋ ਪਰਿਹਾਯਤਿ, ਤਤੋ ਮਹਾਵਗ੍ਗੋ, ਤਤੋ ਸੀਲਕ੍ਖਨ੍ਧਵਗ੍ਗੋਤਿ. ਏਵਂ ਦੀਘਨਿਕਾਯੇ ਪਰਿਹੀਨੇ ਸੁਤ੍ਤਨ੍ਤਪਿਟਕਂ ਪਰਿਹੀਨਂ ਨਾਮ ਹੋਤਿ. ਵਿਨਯਪਿਟਕੇਨ ਸਦ੍ਧਿਂ ਜਾਤਕਮੇਵ ਧਾਰੇਨ੍ਤਿ. ਵਿਨਯਪਿਟਕਞ੍ਹਿ ਲਜ੍ਜਿਨੋ ਧਾਰੇਨ੍ਤਿ, ਲਾਭਕਾਮਾ ਪਨ ‘‘ਸੁਤ੍ਤਨ੍ਤੇ ਕਥਿਤੇਪਿ ਸਲ੍ਲਕ੍ਖੇਨ੍ਤਾ ਨਤ੍ਥੀ’’ਤਿ ਜਾਤਕਮੇਵ ਧਾਰੇਨ੍ਤਿ. ਗਚ੍ਛਨ੍ਤੇ ਕਾਲੇ ਜਾਤਕਮ੍ਪਿ ਧਾਰੇਤੁਂ ਨ ਸਕ੍ਕੋਨ੍ਤਿ. ਅਥ ਨੇਸਂ ਪਠਮਂ ਵੇਸ੍ਸਨ੍ਤਰਜਾਤਕਂ ਪਰਿਹਾਯਤਿ, ਤਤੋ ਪਟਿਲੋਮਕ੍ਕਮੇਨ ਪੁਣ੍ਣਕਜਾਤਕਂ, ਮਹਾਨਾਰਦਜਾਤਕਨ੍ਤਿ ਪਰਿਯੋਸਾਨੇ ਅਪਣ੍ਣਕਜਾਤਕਂ ਪਰਿਹਾਯਤਿ, ਵਿਨਯਪਿਟਕਮੇਵ ਧਾਰੇਨ੍ਤਿ.

ਗਚ੍ਛਨ੍ਤੇ ਕਾਲੇ ਤਮ੍ਪਿ ਮਤ੍ਥਕਤੋ ਪਟ੍ਠਾਯ ਪਰਿਹਾਯਤਿ. ਪਠਮਞ੍ਹਿ ਪਰਿਵਾਰੋ ਪਰਿਹਾਯਤਿ, ਤਤੋ ਖਨ੍ਧਕੋ, ਭਿਕ੍ਖੁਨੀਵਿਭਙ੍ਗੋ, ਮਹਾਵਿਭਙ੍ਗੋਤਿ ਅਨੁਕ੍ਕਮੇਨ ਉਪੋਸਥਕ੍ਖਨ੍ਧਕਮਤ੍ਤਮੇਵ ਧਾਰੇਨ੍ਤਿ. ਤਦਾਪਿ ਪਰਿਯਤ੍ਤਿ ਅਨਨ੍ਤਰਹਿਤਾਵ ਹੋਤਿ. ਯਾਵ ਪਨ ਮਨੁਸ੍ਸੇਸੁ ਚਤੁਪ੍ਪਦਿਕਗਾਥਾਪਿ ਪਵਤ੍ਤਤਿ, ਤਾਵ ਪਰਿਯਤ੍ਤਿ ਅਨਨ੍ਤਰਹਿਤਾਵ ਹੋਤਿ. ਯਦਾ ਸਦ੍ਧੋ ਪਸਨ੍ਨੋ ਰਾਜਾ ਹਤ੍ਥਿਕ੍ਖਨ੍ਧੇ ਸੁਵਣ੍ਣਚਙ੍ਕੋਟਕਮ੍ਹਿ ਸਹਸ੍ਸਤ੍ਥਵਿਕਂ ਠਪਾਪੇਤ੍ਵਾ ‘‘ਬੁਦ੍ਧੇਹਿ ਕਥਿਤਂ ਚਤੁਪ੍ਪਦਿਕਂ ਗਾਥਂ ਜਾਨਨ੍ਤੋ ਇਮਂ ਸਹਸ੍ਸਂ ਗਣ੍ਹਤੂ’’ਤਿ ਨਗਰੇ ਭੇਰਿਂ ਚਰਾਪੇਤ੍ਵਾ ਗਣ੍ਹਨਕਂ ਅਲਭਿਤ੍ਵਾ ‘‘ਏਕਵਾਰਂ ਚਰਾਪਿਤੇ ਨਾਮਂ ਸੁਣਨ੍ਤਾਪਿ ਹੋਨ੍ਤਿ ਅਸੁਣਨ੍ਤਾਪੀ’’ਤਿ ਯਾਵਤਤਿਯਂ ਚਰਾਪੇਤ੍ਵਾ ਗਣ੍ਹਨਕਂ ਅਲਭਿਤ੍ਵਾ ਰਾਜਪੁਰਿਸਾ ਸਹਸ੍ਸਤ੍ਥਵਿਕਂ ਪੁਨ ਰਾਜਕੁਲਂ ਪਵੇਸੇਨ੍ਤਿ, ਤਦਾ ਪਰਿਯਤ੍ਤਿ ਅਨ੍ਤਰਹਿਤਾ ਨਾਮ ਹੋਤਿ.

ਚਿਰਂ ਪਵਤ੍ਤਿਸ੍ਸਤੀਤਿ ਪਰਿਯਤ੍ਤਿਯਾ ਅਨ੍ਤਰਹਿਤਾਯਪਿ ਲਿਙ੍ਗਮਤ੍ਤਂ ਅਦ੍ਧਾਨਂ ਪਵਤ੍ਤਿਸ੍ਸਤਿ. ਕਥਂ? ਗਚ੍ਛਨ੍ਤੇ ਗਚ੍ਛਨ੍ਤੇ ਹਿ ਕਾਲੇ ਚੀਵਰਗ੍ਗਹਣਂ ਪਤ੍ਤਗ੍ਗਹਣਂ ਸਮਿਞ੍ਜਨਪਸਾਰਣਂ ਆਲੋਕਿਤਵਿਲੋਕਿਤਂ ਨ ਪਾਸਾਦਿਕਂ ਹੋਤਿ, ਨਿਗਣ੍ਠਸਮਣਾ ਵਿਯ ਅਲਾਬੁਪਤ੍ਤਂ ਭਿਕ੍ਖੂ ਪਤ੍ਤਂ ਅਗ੍ਗਬਾਹਾਯ ਪਰਿਕ੍ਖਿਪਿਤ੍ਵਾ ਆਦਾਯ ਵਿਚਰਨ੍ਤਿ, ਏਤ੍ਤਾਵਤਾਪਿ ਲਿਙ੍ਗਂ ਅਨਨ੍ਤਰਹਿਤਮੇਵ ਹੋਤਿ. ਗਚ੍ਛਨ੍ਤੇ ਪਨ ਕਾਲੇ ਅਗ੍ਗਬਾਹਤੋ ਓਤਾਰੇਤ੍ਵਾ ਹਤ੍ਥੇਨ ਵਾ ਸਿਕ੍ਕਾਯ ਵਾ ਓਲਮ੍ਬੇਤ੍ਵਾ ਵਿਚਰਨ੍ਤਿ, ਚੀਵਰਮ੍ਪਿ ਰਜਨਸਾਰੁਪ੍ਪਂ ਅਕਤ੍ਵਾ ਓਟ੍ਠਟ੍ਠਿਵਣ੍ਣਂ ਕਤ੍ਵਾ ਰਜਨ੍ਤਿ. ਗਚ੍ਛਨ੍ਤੇ ਕਾਲੇ ਰਜਨਮ੍ਪਿ ਨ ਹੋਤਿ, ਦਸਚ੍ਛਿਨ੍ਦਨਂ ਓਵਟ੍ਟਿਕਾਵਿਜ੍ਝਨਂ ਕਪ੍ਪਮਤ੍ਤਞ੍ਚ ਕਤ੍ਵਾ ਵਲ਼ਞ੍ਜਨ੍ਤਿ, ਪੁਨ ਓਵਟ੍ਟਿਕਂ ਵਿਜ੍ਝਿਤ੍ਵਾ ਕਪ੍ਪਂ ਨ ਕਰੋਨ੍ਤਿ. ਤਤੋ ਉਭਯਮ੍ਪਿ ਅਕਤ੍ਵਾ ਦਸਾ ਛੇਤ੍ਵਾ ਪਰਿਬ੍ਬਾਜਕਾ ਵਿਯ ਚਰਨ੍ਤਿ. ਗਚ੍ਛਨ੍ਤੇ ਕਾਲੇ ‘‘ਕੋ ਇਮਿਨਾ ਅਮ੍ਹਾਕਂ ਅਤ੍ਥੋ’’ਤਿ ਖੁਦ੍ਦਕਂ ਕਾਸਾਵਖਣ੍ਡਂ ਹਤ੍ਥੇ ਵਾ ਗੀਵਾਯਂ ਵਾ ਬਨ੍ਧਨ੍ਤਿ, ਕੇਸੇਸੁ ਵਾ ਅਲ੍ਲੀਯਾਪੇਨ੍ਤਿ, ਦਾਰਭਰਣਂ ਕਰੋਨ੍ਤਾ ਕਸਿਤ੍ਵਾ ਵਪਿਤ੍ਵਾ ਜੀਵਿਕਂ ਕਪ੍ਪੇਤ੍ਵਾ ਵਿਚਰਨ੍ਤਿ, ਤਦਾ ਦਕ੍ਖਿਣਂ ਦੇਨ੍ਤੋ ਜਨੋ ਸਙ੍ਘਂ ਉਦ੍ਦਿਸ੍ਸ ਏਤੇਸਮ੍ਪਿ ਦੇਤਿ. ਇਦਂ ਸਨ੍ਧਾਯ ਭਗਵਤਾ ਵੁਤ੍ਤਂ ‘‘ਭਵਿਸ੍ਸਨ੍ਤਿ ਖੋ ਪਨਾਨਨ੍ਦ, ਅਨਾਗਤਮਦ੍ਧਾਨਂ ਗੋਤ੍ਰਭੁਨੋ ਕਾਸਾਵਕਣ੍ਠਾ ਦੁਸ੍ਸੀਲਾ ਪਾਪਧਮ੍ਮਾ, ਤੇਸੁ ਦੁਸ੍ਸੀਲੇਸੁ ਸਙ੍ਘਂ ਉਦ੍ਦਿਸ੍ਸ ਦਾਨਂ ਦਸ੍ਸਨ੍ਤਿ, ਤਦਾਪਾਹਂ, ਆਨਨ੍ਦ, ਸਙ੍ਘਗਤਂ ਦਕ੍ਖਿਣਂ ਅਸਙ੍ਖ੍ਯੇਯ੍ਯਂ ਅਪ੍ਪਮੇਯ੍ਯਂ ਵਦਾਮੀ’’ਤਿ (ਮ. ਨਿ. ੩.੩੮੦). ਤਤੋ ਗਚ੍ਛਨ੍ਤੇ ਕਾਲੇ ਨਾਨਾਵਿਧਾਨਿ ਕਮ੍ਮਾਨਿ ਕਰੋਨ੍ਤਾ ‘‘ਪਪਞ੍ਚੋ ਏਸ, ਕਿਂ ਇਮਿਨਾ ਅਮ੍ਹਾਕ’’ਨ੍ਤਿ ਕਾਸਾਵਖਣ੍ਡਂ ਛਿਨ੍ਦਿਤ੍ਵਾ ਅਰਞ੍ਞੇ ਖਿਪਨ੍ਤਿ, ਤਸ੍ਮਿਂ ਕਾਲੇ ਲਿਙ੍ਗਂ ਅਨ੍ਤਰਹਿਤਂ ਨਾਮ ਹੋਤਿ. ਕਸ੍ਸਪਦਸਬਲਸ੍ਸ ਕਿਰ ਕਾਲਤੋ ਪਟ੍ਠਾਯ ਯੋਨਕਾਨਂ ਸੇਤਵਤ੍ਥਾਨਿ ਪਾਰੁਪਿਤ੍ਵਾ ਚਰਣਚਾਰਿਤ੍ਤਂ ਜਾਤਂ. ਏਵਂ ਪਰਿਯਤ੍ਤਿਯਾ ਅਨ੍ਤਰਹਿਤਾਯਪਿ ਲਿਙ੍ਗਮਤ੍ਤਂ ਚਿਰਂ ਪਵਤ੍ਤਿਸ੍ਸਤੀਤਿ ਵੇਦਿਤਬ੍ਬਂ.

ਅਟ੍ਠਗਰੁਧਮ੍ਮਕਥਾਵਣ੍ਣਨਾ ਨਿਟ੍ਠਿਤਾ.

ਭਿਕ੍ਖੁਨੀਉਪਸਮ੍ਪਨ੍ਨਾਨੁਜਾਨਨਕਥਾਵਣ੍ਣਨਾ

੪੦੪-੪੦੫. ਯਦਗ੍ਗੇਨਾਤਿ ਯਂ ਦਿਵਸਂ ਆਦਿਂ ਕਤ੍ਵਾ. ਤਦੇਵਾਤਿ ਤਸ੍ਮਿਞ੍ਞੇਵ ਦਿਵਸੇ. ਅਨੁਞ੍ਞਤ੍ਤਿਯਾਤਿ ਅਨੁਞ੍ਞਾਯ. ਏਕਾਹਂ, ਭਨ੍ਤੇ ਆਨਨ੍ਦ, ਭਗਵਨ੍ਤਂ ਵਰਂ ਯਾਚਾਮੀਤਿ ‘‘ਏਵਮੇਵ ਖੋ ਅਹਂ, ਭਨ੍ਤੇ ਆਨਨ੍ਦ, ਇਮੇ ਅਟ੍ਠ ਗਰੁਧਮ੍ਮੇ ਪਟਿਗ੍ਗਣ੍ਹਾਮਿ ਯਾਵਜੀਵਂ ਅਨਤਿਕ੍ਕਮਨੀਯੇ’’ਤਿ ਪਟਿਜਾਨਿਤ੍ਵਾ ਇਦਾਨਿ ਕਸ੍ਮਾ ਵਰਂ ਯਾਚਤੀਤਿ ਚੇ? ਪਰੂਪਵਾਦਵਿਵਜ੍ਜਨਤ੍ਥਂ. ਏਵਞ੍ਹਿ ਕੇਚਿ ਵਦੇਯ੍ਯੁਂ ‘‘ਮਹਾਪਜਾਪਤਿਯਾ ਪਠਮਂ ਸਮ੍ਪਟਿਚ੍ਛਿਤਤ੍ਤਾ ਭਿਕ੍ਖੂਨਂ ਭਿਕ੍ਖੁਨੀਨਞ੍ਚ ਯਥਾਵੁਡ੍ਢਂ ਅਭਿਵਾਦਨਂ ਨਾਹੋਸਿ, ਸਾ ਚੇ ਵਰਂ ਯਾਚੇਯ੍ਯ, ਭਗਵਾ ਅਨੁਜਾਨੇਯ੍ਯਾ’’ਤਿ.

੪੦੬. ਸਰਾਗਾਯਾਤਿ ਸਰਾਗਭਾਵਾਯ ਕਾਮਰਾਗਭਵਰਾਗਪਰਿਬ੍ਰੂਹਨਾਯ. ਸਞ੍ਞੋਗਾਯਾਤਿ ਵਟ੍ਟੇ ਸਂਯੋਜਨਤ੍ਥਾਯ. ਆਚਯਾਯਾਤਿ ਵਟ੍ਟਸ੍ਸ ਵਡ੍ਢਨਤ੍ਥਾਯ. ਮਹਿਚ੍ਛਤਾਯਾਤਿ ਮਹਿਚ੍ਛਭਾਵਾਯ. ਅਸਨ੍ਤੁਟ੍ਠਿਯਾਤਿ ਅਸਨ੍ਤੁਟ੍ਠਿਭਾਵਾਯ. ਸਙ੍ਗਣਿਕਾਯਾਤਿ ਕਿਲੇਸਸਙ੍ਗਣਗਣਸਙ੍ਗਣਵਿਹਾਰਾਯ. ਕੋਸਜ੍ਜਾਯਾਤਿ ਕੁਸੀਤਭਾਵਾਯ. ਦੁਬ੍ਭਰਤਾਯਾਤਿ ਦੁਪ੍ਪੋਸਤਾਯ. ਵਿਰਾਗਾਯਾਤਿ ਸਕਲਵਟ੍ਟਤੋ ਵਿਰਜ੍ਜਨਤ੍ਥਾਯ. ਵਿਸਞ੍ਞੋਗਾਯਾਤਿ ਕਾਮਰਾਗਾਦੀਹਿ ਵਿਸਂਯੁਜ੍ਜਨਤ੍ਥਾਯ. ਅਪਚਯਾਯਾਤਿ ਸਬ੍ਬਸ੍ਸਪਿ ਵਟ੍ਟਸ੍ਸ ਅਪਚਯਤ੍ਥਾਯ, ਨਿਬ੍ਬਾਨਾਯਾਤਿ ਅਤ੍ਥੋ. ਅਪ੍ਪਿਚ੍ਛਤਾਯਾਤਿ ਪਚ੍ਚਯਪ੍ਪਿਚ੍ਛਤਾਦਿਵਸੇਨ ਸਬ੍ਬਸੋ ਇਚ੍ਛਾਪਗਮਾਯ. ਸਨ੍ਤੁਟ੍ਠਿਯਾਤਿ ਦ੍ਵਾਦਸਵਿਧਸਨ੍ਤੁਟ੍ਠਿਭਾਵਾਯ. ਪਵਿਵੇਕਾਯਾਤਿ ਪਵਿਵਿਤ੍ਤਭਾਵਾਯ ਕਾਯਵਿਵੇਕਾਦਿਤਦਙ੍ਗਵਿਵੇਕਾਦਿਵਿਵੇਕਸਿਦ੍ਧਿਯਾ. ਵੀਰਿਯਾਰਮ੍ਭਾਯਾਤਿ ਕਾਯਿਕਸ੍ਸ ਚੇਵ ਚੇਤਸਿਕਸ੍ਸ ਚ ਵੀਰਿਯਸ੍ਸ ਪਗ੍ਗਣ੍ਹਨਤ੍ਥਾਯ. ਸੁਭਰਤਾਯਾਤਿ ਸੁਖਪੋਸਨਤ੍ਥਾਯ. ਏਵਂ ਯੋ ਪਰਿਯਤ੍ਤਿਧਮ੍ਮੋ ਉਗ੍ਗਹਣਧਾਰਣਪਰਿਪੁਚ੍ਛਾਮਨਸਿਕਾਰਵਸੇਨ ਯੋਨਿਸੋ ਪਟਿਪਜ੍ਜਨ੍ਤਸ੍ਸ ਸਰਾਗਾਦਿਭਾਵਪਰਿਵਜ੍ਜਨਸ੍ਸ ਕਾਰਣਂ ਹੁਤ੍ਵਾ ਵਿਰਾਗਾਦਿਭਾਵਾਯ ਸਂਵਤ੍ਤਤਿ, ਏਕਂਸਤੋ ਏਸੋ ਧਮ੍ਮੋ, ਏਸੋ ਵਿਨਯੋ ਸਮ੍ਮਦੇਵ ਅਪਾਯਾਦੀਸੁ ਅਪਤਨਵਸੇਨ ਧਾਰਣਤੋ ਕਿਲੇਸਾਨਂ ਵਿਨਯਨਤੋ, ਸਤ੍ਥੁ ਸਮ੍ਮਾਸਮ੍ਬੁਦ੍ਧਸ੍ਸ ਓਵਾਦਾਨੁਸਿਟ੍ਠਿਭਾਵਤੋ ਏਤਂ ਸਤ੍ਥੁਸਾਸਨਨ੍ਤਿ ਧਾਰੇਯ੍ਯਾਸਿ ਜਾਨੇਯ੍ਯਾਸਿ, ਅਵਬੁਜ੍ਝੇਯ੍ਯਾਸੀਤਿ ਅਤ੍ਥੋ. ਇਮਸ੍ਮਿਂ ਸੁਤ੍ਤੇ ਪਠਮਵਾਰੇਨ ਵਟ੍ਟਂ, ਦੁਤਿਯਵਾਰੇਨ ਵਿਵਟ੍ਟਂ ਕਥਿਤਂ.

੪੦੯-੪੧੦. ਵਿਮਾਨੇਤ੍ਵਾਤਿ ਅਪਰਜ੍ਝਿਤ੍ਵਾ. ਕਮ੍ਮਪ੍ਪਤ੍ਤਾਯੋਪੀਤਿ ਕਮ੍ਮਾਰਹਾਪਿ. ਆਪਤ੍ਤਿਗਾਮਿਨਿਯੋਪੀਤਿ ਆਪਤ੍ਤਿਆਪਨ੍ਨਾਯੋਪਿ. ਵੁਤ੍ਤਨਯੇਨੇਵ ਕਾਰੇਤਬ੍ਬਤਂ ਆਪਜ੍ਜਨ੍ਤੀਤਿ ਤਥਾਕਰਣਸ੍ਸ ਪਟਿਕ੍ਖਿਤ੍ਤਤ੍ਤਾ ਦੁਕ੍ਕਟੇਨ ਕਾਰੇਤਬ੍ਬਤਂ ਆਪਜ੍ਜਨ੍ਤਿ.

੪੧੩-੫. ਦ੍ਵੇ ਤਿਸ੍ਸੋ ਭਿਕ੍ਖੁਨਿਯੋਤਿ ਦ੍ਵੀਹਿ ਤੀਹਿ ਭਿਕ੍ਖੁਨੀਹਿ. ਨ ਆਰੋਚੇਨ੍ਤੀਤਿ ਪਾਤਿਮੋਕ੍ਖੁਦ੍ਦੇਸਕਸ੍ਸ ਨ ਆਰੋਚੇਨ੍ਤਿ. ਨ ਪਚ੍ਚਾਹਰਨ੍ਤੀਤਿ ਭਿਕ੍ਖੁਨੀਨਂ ਨ ਪਚ੍ਚਾਹਰਨ੍ਤਿ. ਵਿਸੇਸਕਨ੍ਤਿ ਵਤ੍ਤਭਙ੍ਗਂ.

੪੨੦. ਤੇਨ ਚ ਭਿਕ੍ਖੁ ਨਿਮਨ੍ਤੇਤਬ੍ਬੋਤਿ ਸਾਮੀਚਿਦਸ੍ਸਨਮੇਤਂ, ਨ ਪਨ ਅਨਿਮਨ੍ਤਿਯਾ ਆਪਤ੍ਤਿ.

੪੨੫. ਤਯੋ ਨਿਸ੍ਸਯੇਤਿ ਸੇਨਾਸਨਨਿਸ੍ਸਯਂ ਅਪਨੇਤ੍ਵਾ ਅਪਰੇ ਤਯੋ ਨਿਸ੍ਸਯੇ. ਰੁਕ੍ਖਮੂਲਸੇਨਾਸਨਞ੍ਹਿ ਸਾ ਨ ਲਭਤਿ.

੪੨੮. ਅਨੁਵਾਦਂ ਪਟ੍ਠਪੇਨ੍ਤੀਤਿ ਇਸ੍ਸਰਿਯਂ ਪਵਤ੍ਤੇਨ੍ਤਿ.

੪੩੦. ਭਿਕ੍ਖੁਦੂਤੇਨ ਉਪਸਮ੍ਪਾਦੇਨ੍ਤੀਤਿ ਭਿਕ੍ਖੁਯੇਵ ਦੂਤੋ ਭਿਕ੍ਖੁਦੂਤੋ, ਤੇਨ ਭਿਕ੍ਖੁਦੂਤੇਨ, ਭਿਕ੍ਖੁਦੂਤਂ ਕਤ੍ਵਾ ਉਪਸਮ੍ਪਾਦੇਨ੍ਤੀਤਿ ਅਤ੍ਥੋ.

੪੩੧. ਨ ਸਮ੍ਮਤੀਤਿ ਨਪ੍ਪਹੋਤਿ. ਨਵਕਮ੍ਮਨ੍ਤਿ ਨਵਕਮ੍ਮਂ ਕਤ੍ਵਾ ‘‘ਏਤ੍ਤਕਾਨਿ ਵਸ੍ਸਾਨਿ ਵਸਤੂ’’ਤਿ ਅਪਲੋਕੇਤ੍ਵਾ ਸਙ੍ਘਿਕਭੂਮਿਦਾਨਂ.

੪੩੨. ਸਨ੍ਨਿਸਿਨ੍ਨਗਬ੍ਭਾਤਿ ਪਤਿਟ੍ਠਿਤਗਬ੍ਭਾ.

੪੩੪. ਪਬ੍ਬਜ੍ਜਮ੍ਪਿ ਨ ਲਭਤੀਤਿ ਤਿਤ੍ਥਾਯਤਨਸਙ੍ਕਨ੍ਤਾਯ ਅਭਬ੍ਬਭਾਵੂਪਗਮਨਤੋ ਨ ਲਭਤਿ. ਇਦਂ ਓਦਿਸ੍ਸ ਅਨੁਞ੍ਞਾਤਂ ਵਟ੍ਟਤੀਤਿ ਏਕਤੋ ਵਾ ਉਭਤੋ ਵਾ ਅਵਸ੍ਸਵੇ ਸਤਿਪਿ ਓਦਿਸ੍ਸ ਅਨੁਞ੍ਞਾਤਤ੍ਤਾ ਵਟ੍ਟਤਿ. ਸੇਸਮੇਤ੍ਥ ਪਾਲ਼ਿਤੋ ਅਟ੍ਠਕਥਾਤੋ ਚ ਸੁਵਿਞ੍ਞੇਯ੍ਯਮੇਵਾਤਿ.

ਭਿਕ੍ਖੁਨੀਉਪਸਮ੍ਪਨ੍ਨਾਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

ਭਿਕ੍ਖੁਨਿਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.