੧੧. ਪਞ੍ਚਸਤਿਕਕ੍ਖਨ੍ਧਕਂ

ਸਙ੍ਗੀਤਿਨਿਦਾਨਕਥਾਵਣ੍ਣਨਾ

੪੩੭. ਪਞ੍ਚਸਤਿਕਕ੍ਖਨ੍ਧਕੇ ਪਾਵਾਯ ਕੁਸਿਨਾਰਨ੍ਤਿ (ਦੀ. ਨਿ. ਅਟ੍ਠ. ੨.੨੩੧) ਪਾਵਾਨਗਰੇ ਪਿਣ੍ਡਾਯ ਚਰਿਤ੍ਵਾ ਕੁਸਿਨਾਰਂ ਗਮਿਸ੍ਸਾਮੀਤਿ ਅਦ੍ਧਾਨਮਗ੍ਗਪ੍ਪਟਿਪਨ੍ਨੋ. ਮਨ੍ਦਾਰਵਪੁਪ੍ਫਂ ਗਹੇਤ੍ਵਾਤਿ ਮਹਾਚਾਟਿਪ੍ਪਮਾਣਂ ਪੁਪ੍ਫਂ ਆਗਨ੍ਤੁਕਦਣ੍ਡਕੇ ਠਪੇਤ੍ਵਾ ਛਤ੍ਤਂ ਵਿਯ ਗਹੇਤ੍ਵਾ. ਅਦ੍ਦਸਂ ਖੋਤਿ ਆਗਚ੍ਛਨ੍ਤਂ ਦੂਰਤੋਵ ਅਦ੍ਦਸਂ. ਦਿਸ੍ਵਾ ਚ ਪਨ ‘‘ਪੁਚ੍ਛਿਸ੍ਸਾਮਿ ਨਂ ਭਗਵਤੋ ਪਵਤ੍ਤਿ’’ਨ੍ਤਿ ਚਿਤ੍ਤਂ ਉਪ੍ਪਾਦੇਤ੍ਵਾ ‘‘ਸਚੇ ਖੋ ਪਨ ਨਿਸਿਨ੍ਨਕੋਵ ਪੁਚ੍ਛਿਸ੍ਸਾਮਿ, ਸਤ੍ਥਰਿ ਅਗਾਰਵੋ ਕਤੋ ਭਵਿਸ੍ਸਤੀ’’ਤਿ ਉਟ੍ਠਹਿਤ੍ਵਾ ਠਿਤਟ੍ਠਾਨਤੋ ਅਪਕ੍ਕਮ੍ਮ ਛਦ੍ਦਨ੍ਤੋ ਨਾਗਰਾਜਾ ਮਣਿਚਮ੍ਮਂ ਵਿਯ ਦਸਬਲਦਤ੍ਤਿਯਂ ਮੇਘਵਣ੍ਣਪਂਸੁਕੂਲਚੀਵਰਂ ਪਾਰੁਪਿਤ੍ਵਾ ਦਸਨਖਸਮੋਧਾਨਸਮੁਜ੍ਜਲਂ ਅਞ੍ਜਲਿਂ ਸਿਰਸ੍ਮਿਂ ਪਤਿਟ੍ਠਾਪੇਤ੍ਵਾ ਸਤ੍ਥਰਿ ਕਤੇਨ ਗਾਰਵੇਨ ਆਜੀਵਕਸ੍ਸ ਅਭਿਮੁਖੋ ਹੁਤ੍ਵਾ ‘‘ਅਪਾਵੁਸੋ ਅਮ੍ਹਾਕਂ ਸਤ੍ਥਾਰਂ ਜਾਨਾਸੀ’’ਤਿ ਆਹ. ਕਿਂ ਪਨ ਸਤ੍ਥੁ ਪਰਿਨਿਬ੍ਬਾਨਂ ਜਾਨਨ੍ਤੋ ਪੁਚ੍ਛਿ ਅਜਾਨਨ੍ਤੋਤਿ? ਆਵਜ੍ਜਨਪ੍ਪਟਿਬਦ੍ਧਂ ਖੀਣਾਸਵਾਨਂ ਜਾਨਨਂ. ਅਨਾਵਜ੍ਜਿਤਤ੍ਤਾ ਪਨੇਸ ਅਜਾਨਨ੍ਤੋ ਪੁਚ੍ਛੀਤਿ ਏਕੇ. ਥੇਰੋ ਸਮਾਪਤ੍ਤਿਬਹੁਲੋ ਰਤ੍ਤਿਟ੍ਠਾਨਦਿਵਾਟ੍ਠਾਨਲੇਣਮਣ੍ਡਪਾਦੀਸੁ ਨਿਚ੍ਚਂ ਸਮਾਪਤ੍ਤਿਫਲੇਨੇਵ ਯਾਪੇਤਿ. ਕੁਲਸਨ੍ਤਕਮ੍ਪਿ ਗਾਮਂ ਪਵਿਸਿਤ੍ਵਾ ਦ੍ਵਾਰੇ ਸਮਾਪਜ੍ਜਿਤ੍ਵਾ ਸਮਾਪਤ੍ਤਿਤੋ ਵੁਟ੍ਠਿਤੋਵ ਭਿਕ੍ਖਂ ਗਣ੍ਹਾਤਿ. ਥੇਰੋ ਕਿਰ ‘‘ਇਮਿਨਾ ਮੇ ਪਚ੍ਛਿਮੇਨ ਅਤ੍ਤਭਾਵੇਨ ਮਹਾਜਨਾਨੁਗ੍ਗਹਂ ਕਰਿਸ੍ਸਾਮਿ, ਯੇ ਮਯ੍ਹਂ ਭਿਕ੍ਖਂ ਵਾ ਦੇਨ੍ਤਿ, ਗਨ੍ਧਮਾਲਾਦੀਹਿ ਵਾ ਸਕ੍ਕਾਰਂ ਕਰੋਨ੍ਤਿ, ਤੇਸਂ ਤਂ ਮਹਪ੍ਫਲਂ ਹੋਤੂ’’ਤਿ ਏਵਂ ਕਰੋਤਿ. ਤਸ੍ਮਾ ਸਮਾਪਤ੍ਤਿਬਹੁਲਤਾਯ ਨ ਜਾਨਿ. ਇਤਿ ਅਜਾਨਨ੍ਤੋਵ ਪੁਚ੍ਛੀਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ. ਨ ਹੇਤ੍ਥ ਅਜਾਨਨਕਾਰਣਂ ਅਤ੍ਥਿ. ਅਭਿਲਕ੍ਖਿਤਂ ਸਤ੍ਥੁ ਪਰਿਨਿਬ੍ਬਾਨਂ ਅਹੋਸਿ ਦਸਸਹਸ੍ਸਿਲੋਕਧਾਤੁਕਮ੍ਪਨਾਦੀਹਿ ਨਿਮਿਤ੍ਤੇਹਿ. ਥੇਰਸ੍ਸ ਪਨ ਪਰਿਸਾਯ ਕੇਹਿਚਿ ਭਿਕ੍ਖੂਹਿ ਭਗਵਾ ਦਿਟ੍ਠਪੁਬ੍ਬੋ, ਕੇਹਿਚਿ ਨ ਦਿਟ੍ਠਪੁਬ੍ਬੋ. ਤਤ੍ਥ ਯੇਹਿ ਦਿਟ੍ਠਪੁਬ੍ਬੋ, ਤੇਪਿ ਪਸ੍ਸਿਤੁਕਾਮਾਵ. ਯੇਹਿਪਿ ਅਦਿਟ੍ਠਪੁਬ੍ਬੋ, ਤੇਪਿ ਪਸ੍ਸਿਤੁਕਾਮਾਵ. ਤਤ੍ਥ ਯੇਹਿ ਨ ਦਿਟ੍ਠਪੁਬ੍ਬੋ, ਤੇ ਅਭਿਦਸ੍ਸਨਕਾਮਤਾਯ ਗਨ੍ਤ੍ਵਾ ‘‘ਕੁਹਿਂ ਭਗਵਾ’’ਤਿ ਪੁਚ੍ਛਨ੍ਤਾ ‘‘ਪਰਿਨਿਬ੍ਬੁਤੋ’’ਤਿ ਸੁਤ੍ਵਾ ਸਨ੍ਧਾਰੇਤੁਂ ਨ ਸਕ੍ਖਿਸ੍ਸਨ੍ਤਿ. ਚੀਵਰਂ ਛਡ੍ਡੇਤ੍ਵਾ ਏਕਵਤ੍ਥਾ ਵਾ ਦੁਨ੍ਨਿਵਤ੍ਥਾ ਵਾ ਉਰਾਨਿ ਪਟਿਪਿਸਨ੍ਤਾ ਪਰੋਦਿਸ੍ਸਨ੍ਤਿ. ਤਤ੍ਥ ਮਨੁਸ੍ਸਾ ‘‘ਮਹਾਕਸ੍ਸਪੇਨ ਸਦ੍ਧਿਂ ਆਗਤਪਂਸੁਕੂਲਿਕਾ ਸਯਮ੍ਪਿ ਇਤ੍ਥਿਯੋ ਵਿਯ ਪਰੋਦਨ੍ਤਿ, ਤੇ ਕਿਂ ਅਮ੍ਹੇ ਸਮਸ੍ਸਾਸੇਨ੍ਤੀ’’ਤਿ ਮਯ੍ਹਂ ਦੋਸਂ ਦਸ੍ਸਨ੍ਤਿ. ਇਦਂ ਪਨ ਸੁਞ੍ਞਂ ਮਹਾਰਞ੍ਞਂ, ਇਧ ਯਥਾ ਤਥਾ ਰੋਦਨ੍ਤੇਸੁ ਦੋਸੋ ਨਤ੍ਥਿ. ਪੁਰਿਮਤਰਂ ਸੁਤ੍ਵਾ ਨਾਮ ਸੋਕੋਪਿ ਤਨੁਕੋ ਹੋਤੀਤਿ ਭਿਕ੍ਖੂਨਂ ਸਤੁਪ੍ਪਾਦਲਾਭਤ੍ਥਂ ਜਾਨਨ੍ਤੋਵ ਪੁਚ੍ਛਿ.

ਅਜ੍ਜ ਸਤ੍ਤਾਹਪਰਿਨਿਬ੍ਬੁਤੋਤਿ ਅਜ੍ਜ ਦਿਵਸਤੋ ਪਟਿਲੋਮਤੋ ਸਤ੍ਤਮੇ ਅਹਨਿ ਪਰਿਨਿਬ੍ਬੁਤੋ. ਤਤੋ ਮੇ ਇਦਨ੍ਤਿ ਤਤੋ ਸਮਣਸ੍ਸ ਗੋਤਮਸ੍ਸ ਪਰਿਨਿਬ੍ਬੁਤਟ੍ਠਾਨਤੋ. ਅਵੀਤਰਾਗਾਤਿ ਪੁਥੁਜ੍ਜਨਾ ਚੇਵ ਸੋਤਾਪਨ੍ਨਸਕਦਾਗਾਮਿਨੋ ਚ. ਤੇਸਞ੍ਹਿ ਦੋਮਨਸ੍ਸਂ ਅਪ੍ਪਹੀਨਂ, ਤਸ੍ਮਾ ਤੇਪਿ ਬਾਹਾ ਪਗ੍ਗਯ੍ਹ ਕਨ੍ਦਨ੍ਤਿ, ਉਭੋ ਹਤ੍ਥੇ ਸੀਸੇ ਠਪੇਤ੍ਵਾ ਰੋਦਨ੍ਤਿ. ਛਿਨ੍ਨਪਾਤਂ ਪਪਤਨ੍ਤੀਤਿ ਛਿਨ੍ਨਾਨਂ ਪਾਤੋ ਵਿਯ ਛਿਨ੍ਨਪਾਤੋ, ਤਂ ਛਿਨ੍ਨਪਾਤਂ, ਭਾਵਨਪੁਂਸਕਨਿਦ੍ਦੇਸੋਯਂ, ਮਜ੍ਝੇ ਛਿਨ੍ਨਾ ਵਿਯ ਹੁਤ੍ਵਾ ਯਤੋ ਵਾ ਤਤੋ ਵਾ ਪਤਨ੍ਤੀਤਿ ਅਤ੍ਥੋ. ਆਵਟ੍ਟਨ੍ਤੀਤਿ ਅਭਿਮੁਖਭਾਵੇਨ ਵਟ੍ਟਨ੍ਤਿ. ਯਤ੍ਥ ਪਤਿਤਾ, ਤਤੋ ਕਤਿਪਯਰਤਨਟ੍ਠਾਨਂ ਵਟ੍ਟਨਵਸੇਨੇਵ ਗਨ੍ਤ੍ਵਾ ਪੁਨ ਯਥਾਪਤਿਤਮੇਵ ਠਾਨਂ ਵਟ੍ਟਨਵਸੇਨ ਆਗਚ੍ਛਨ੍ਤਿ. ਵਿਵਟ੍ਟਨ੍ਤੀਤਿ ਯਤ੍ਥ ਪਤਿਤਾ, ਤਤੋ ਨਿਵਟ੍ਟਨ੍ਤਿ, ਪਤਿਤਟ੍ਠਾਨਤੋ ਪਰਭਾਗਂ ਵਟ੍ਟਮਾਨਾ ਗਚ੍ਛਨ੍ਤੀਤਿ ਅਤ੍ਥੋ. ਅਪਿਚ ਪੁਰਤੋ ਵਟ੍ਟਨਂ ਆਵਟ੍ਟਨਂ, ਪਸ੍ਸਤੋ ਪਚ੍ਛਤੋ ਚ ਵਟ੍ਟਨਂ ਵਿਵਟ੍ਟਨਂ. ਤਸ੍ਮਾ ਦ੍ਵੇ ਪਾਦੇ ਪਸਾਰੇਤ੍ਵਾ ਸਕਿਂ ਪੁਰਤੋ ਸਕਿਂ ਪਚ੍ਛਤੋ ਸਕਿਂ ਵਾਮਤੋ ਸਕਿਂ ਦਕ੍ਖਿਣਤੋ ਸਮ੍ਪਰਿਵਟ੍ਟਮਾਨਾਪਿ ਆਵਟ੍ਟਨ੍ਤਿ ਵਿਵਟ੍ਟਨ੍ਤੀਤਿ ਵੁਚ੍ਚਨ੍ਤਿ. ਵੀਤਰਾਗਾਤਿ ਪਹੀਨਦੋਮਨਸ੍ਸਾ ਇਟ੍ਠਾਨਿਟ੍ਠੇਸੁ ਨਿਬ੍ਬਿਕਾਰਤਾਯ ਸਿਲਾਥਮ੍ਭਸਦਿਸਾ ਅਨਾਗਾਮਿਖੀਣਾਸਵਾ. ਕਾਮਞ੍ਹਿ ਦੋਮਨਸ੍ਸੇ ਅਸਤਿਪਿ ਏਕਚ੍ਚੋ ਰਾਗੋ ਹੋਤਿਯੇਵ, ਰਾਗੇ ਪਨ ਅਸਤਿ ਦੋਮਨਸ੍ਸਸ੍ਸ ਅਸਮ੍ਭਵੋਯੇਵ. ਤਦੇਕਟ੍ਠਭਾਵਤੋ ਹਿ ਰਾਗਪ੍ਪਹਾਨੇਨ ਪਹੀਨਦੋਮਨਸ੍ਸਾ ਵੁਤ੍ਤਾ, ਨ ਖੀਣਾਸਵਾ ਏਵ.

ਸਬ੍ਬੇਹੇਵ ਪਿਯੇਹੀਤਿਆਦੀਸੁ ਪਿਯਾਯਿਤਬ੍ਬਤੋ ਪਿਯੇਹਿ ਮਨਵਡ੍ਢਨਤੋ ਮਨਾਪੇਹਿ ਮਾਤਾਪਿਤਾਭਾਤਾਭਗਿਨੀਆਦਿਕੇਹਿ. ਨਾਨਾਭਾਵੋਤਿ ਜਾਤਿਯਾ ਨਾਨਾਭਾਵੋ, ਜਾਤਿਅਨੁਰੂਪਗਮਨੇਨ ਵਿਸੁਂ ਭਾਵੋ, ਅਸਮ੍ਬਦ੍ਧਭਾਵੋਤਿ ਅਤ੍ਥੋ. ਵਿਨਾਭਾਵੋਤਿ ਮਰਣੇਨ ਵਿਨਾਭਾਵੋ, ਚੁਤਿਯਾ ਤੇਨਤ੍ਤਭਾਵੇਨ ਅਪੁਨਪਵਤ੍ਤਨਤੋ ਵਿਪ੍ਪਯੋਗੋਤਿ ਅਤ੍ਥੋ. ਅਞ੍ਞਥਾਭਾਵੋਤਿ ਭਵੇਨ ਅਞ੍ਞਥਾਭਾਵੋ, ਭਵਨ੍ਤਰਗ੍ਗਹਣੇਨ ‘‘ਕਾਮਾਵਚਰਸਤ੍ਤੋ ਰੂਪਾਵਚਰੋ ਹੋਤੀ’’ਤਿਆਦਿਨਾ ਤਤ੍ਥਾਪਿ ‘‘ਮਨੁਸ੍ਸੋ ਦੇਵੋ ਹੋਤੀ’’ਤਿਆਦਿਨਾ ਚ ਪੁਰਿਮਾਕਾਰਤੋ ਅਞ੍ਞਾਕਾਰਤਾਤਿ ਅਤ੍ਥੋ. ਤਨ੍ਤਿ ਤਸ੍ਮਾ. ਕੁਤੇਤ੍ਥ ਲਬ੍ਭਾਤਿ ਕੁਤੋ ਕੁਹਿਂ ਕਸ੍ਮਿਂ ਨਾਮ ਠਾਨੇ ਏਤ੍ਥ ਏਤਸ੍ਮਿਂ ਖਨ੍ਧਪ੍ਪਵਤ੍ਤੇ ਯਂ ਤਂ ਜਾਤਂ…ਪੇ… ਮਾ ਪਲੁਜ੍ਜੀਤਿ ਲਦ੍ਧੁਂ ਸਕ੍ਕਾ, ਨ ਸਕ੍ਕਾ ਏਵ ਤਾਦਿਸਸ੍ਸ ਕਾਰਣਸ੍ਸ ਅਭਾਵਤੋ. ਇਦਂ ਵੁਤ੍ਤਂ ਹੋਤਿ – ਯਸ੍ਮਾ ਸਬ੍ਬੇਹੇਵ ਪਿਯੇਹਿ ਮਨਾਪੇਹਿ ਨਾਨਾਭਾਵੋ, ਤਸ੍ਮਾ ਦਸ ਪਾਰਮਿਯੋ ਪੂਰੇਤ੍ਵਾਪਿ ਸਮ੍ਬੋਧਿਂ ਪਤ੍ਵਾਪਿ ਧਮ੍ਮਚਕ੍ਕਂ ਪਵਤ੍ਤੇਤ੍ਵਾਪਿ ਯਮਕਪਾਟਿਹਾਰਿਯਂ ਦਸ੍ਸੇਤ੍ਵਾਪਿ ਦੇਵੋਰੋਹਣਂ ਕਤ੍ਵਾਪਿ ਯਂ ਤਂ ਜਾਤਂ ਭੂਤਂ ਸਙ੍ਖਤਂ ਪਲੋਕਧਮ੍ਮਂ, ਤਞ੍ਚ ਤਥਾਗਤਸ੍ਸਪਿ ਸਰੀਰਂ ਮਾ ਪਲੁਜ੍ਜੀਤਿ ਨੇਤਂ ਠਾਨਂ ਵਿਜ੍ਜਤਿ, ਰੋਦਨ੍ਤੇਨਪਿ ਕਨ੍ਦਨ੍ਤੇਨਪਿ ਨ ਸਕ੍ਕਾ ਤਂ ਕਾਰਣਂ ਲਦ੍ਧੁਨ੍ਤਿ.

ਤੇਨ ਖੋ ਪਨਾਵੁਸੋ, ਸਮਯੇਨ ਸੁਭਦ੍ਦੋ ਨਾਮ ਵੁਡ੍ਢਪਬ੍ਬਜਿਤੋਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਨਿਦਾਨਵਣ੍ਣਨਾਯਂ (ਸਾਰਤ੍ਥ. ਟੀ. ੧.ਪਠਮਮਹਾਸਙ੍ਗੀਤਿਕਥਾ) ਵੁਤ੍ਤਨਯਮੇਵ.

ਸਙ੍ਗੀਤਿਨਿਦਾਨਕਥਾਵਣ੍ਣਨਾ ਨਿਟ੍ਠਿਤਾ.

ਖੁਦ੍ਦਾਨੁਖੁਦ੍ਦਕਸਿਕ੍ਖਾਪਦਕਥਾਵਣ੍ਣਨਾ

੪੪੧. ਸਮੂਹਨੇਯ੍ਯਾਤਿ ਆਕਙ੍ਖਮਾਨੋ ਸਮੂਹਨਤੁ, ਯਦਿ ਇਚ੍ਛਤਿ, ਸਮੂਹਨੇਯ੍ਯਾਤਿ ਅਤ੍ਥੋ. ਕਸ੍ਮਾ ਪਨ ‘‘ਸਮੂਹਨਥਾ’’ਤਿ ਏਕਂਸੇਨੇਵ ਅਵਤ੍ਵਾ ‘‘ਆਕਙ੍ਖਮਾਨੋ ਸਮੂਹਨੇਯ੍ਯਾ’’ਤਿ ਵਿਕਪ੍ਪਵਚਨੇਨੇਵ ਭਗਵਾ ਠਪੇਸੀਤਿ? ਮਹਾਕਸ੍ਸਪਸ੍ਸ ਞਾਣਬਲਸ੍ਸ ਦਿਟ੍ਠਤ੍ਤਾ. ਪਸ੍ਸਤਿ ਹਿ ਭਗਵਾ ‘‘ਸਮੂਹਨਥਾਤਿ ਵੁਤ੍ਤੇਪਿ ਸਙ੍ਗੀਤਿਕਾਲੇ ਕਸ੍ਸਪੋ ਨ ਸਮੂਹਨਿਸ੍ਸਤੀ’’ਤਿ, ਤਸ੍ਮਾ ਵਿਕਪ੍ਪੇਨੇਵ ਠਪੇਸਿ. ਯਦਿ ਅਸਮੂਹਨਨਂ ਦਿਟ੍ਠਂ, ਤਦੇਵ ਚ ਇਚ੍ਛਿਤਂ, ਅਥ ਕਸ੍ਮਾ ਭਗਵਾ ‘‘ਆਕਙ੍ਖਮਾਨੋ ਸਮੂਹਨਤੂ’’ਤਿ ਅਵੋਚਾਤਿ? ਤਥਾਰੂਪਪੁਗ੍ਗਲਜ੍ਝਾਸਯਵਸੇਨ. ਸਨ੍ਤਿ ਹਿ ਕੇਚਿ ਖੁਦ੍ਦਾਨੁਖੁਦ੍ਦਕਾਨਿ ਸਿਕ੍ਖਾਪਦਾਨਿ ਸਮਾਦਾਯ ਵਤ੍ਤਿਤੁਂ ਅਨਿਚ੍ਛਨ੍ਤਾ, ਤੇਸਂ ਤਥਾ ਅਵੁਚ੍ਚਮਾਨੇ ਭਗਵਤਿ ਵਿਘਾਤੋ ਉਪ੍ਪਜ੍ਜੇਯ੍ਯ, ਤਂ ਤੇਸਂ ਭਵਿਸ੍ਸਤਿ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ. ਤਥਾ ਪਨ ਵੁਤ੍ਤੇ ਤੇਸਂ ਵਿਘਾਤੋ ਨ ਉਪ੍ਪਜ੍ਜੇਯ੍ਯ, ਅਮ੍ਹਾਕਮੇਵਾਯਂ ਦੋਸੋ, ਯਤੋ ਅਮ੍ਹੇਸੁਯੇਵ ਕੇਚਿ ਸਮੂਹਨਨਂ ਨ ਇਚ੍ਛਨ੍ਤੀਤਿ. ਕੇਚਿ ‘‘ਸਕਲਸ੍ਸ ਪਨ ਸਾਸਨਸ੍ਸ ਸਙ੍ਘਾਯਤ੍ਤਭਾਵਕਰਣਤ੍ਥਂ ਤਥਾ ਵੁਤ੍ਤ’’ਨ੍ਤਿ ਵਦਨ੍ਤਿ. ਯਂ ਕਿਞ੍ਚਿ ਸਤ੍ਥਾਰਾ ਸਿਕ੍ਖਾਪਦਂ ਪਞ੍ਞਤ੍ਤਂ, ਤਂ ਸਮਣਾ ਸਕ੍ਯਪੁਤ੍ਤਿਯਾ ਸਿਰਸਾ ਸਮ੍ਪਟਿਚ੍ਛਿਤ੍ਵਾ ਜੀਵਿਤਂ ਵਿਯ ਰਕ੍ਖਨ੍ਤਿ. ਤਥਾ ਹਿ ਤੇ ‘‘ਖੁਦ੍ਦਾਨੁਖੁਦ੍ਦਕਾਨਿ ਸਿਕ੍ਖਾਪਦਾਨਿ ਆਕਙ੍ਖਮਾਨੋ ਸਙ੍ਘੋ ਸਮੂਹਨਤੂ’’ਤਿ ਵੁਤ੍ਤੇਪਿ ਨ ਸਮੂਹਨਿਂਸੁ. ਅਞ੍ਞਦਤ੍ਥੁ ਪੁਰਤੋ ਵਿਯ ਤਸ੍ਸ ਅਚ੍ਚਯੇਪਿ ਰਕ੍ਖਿਂਸੁਯੇਵਾਤਿ ਸਤ੍ਥੁ ਸਾਸਨਸ੍ਸ ਸਙ੍ਘਸ੍ਸ ਚ ਮਹਨ੍ਤਭਾਵਦਸ੍ਸਨਤ੍ਥਮ੍ਪਿ ਤਥਾ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤਥਾ ਹਿ ਆਯਸ੍ਮਾ ਆਨਨ੍ਦੋ ਅਞ੍ਞੇਪਿ ਵਾ ਭਿਕ੍ਖੂ ‘‘ਕਤਮਂ ਪਨ, ਭਨ੍ਤੇ, ਖੁਦ੍ਦਕਂ, ਕਤਮਂ ਅਨੁਖੁਦ੍ਦਕ’’ਨ੍ਤਿ ਨ ਪੁਚ੍ਛਿਂਸੁ ਸਮੂਹਨਜ੍ਝਾਸਯਸ੍ਸੇਵ ਅਭਾਵਤੋ, ਤੇਨੇਵ ਏਕਸਿਕ੍ਖਾਪਦਮ੍ਪਿ ਅਪਰਿਚ੍ਚਜਿਤ੍ਵਾ ਸਬ੍ਬੇਸਂ ਅਨੁਗ੍ਗਹੇਤਬ੍ਬਭਾਵਦਸ੍ਸਨਤ੍ਥਂ ‘‘ਚਤ੍ਤਾਰਿ ਪਾਰਾਜਿਕਾਨਿ ਠਪੇਤ੍ਵਾ ਅਵਸੇਸਾਨਿ ਖੁਦ੍ਦਾਨੁਖੁਦ੍ਦਕਾਨੀ’’ਤਿਆਦਿਮਾਹਂਸੁ. ਏਵਞ੍ਹਿ ਵਦਨ੍ਤੇਹਿ ‘‘ਖੁਦ੍ਦਾਨੁਖੁਦ੍ਦਕਾ ਇਮੇ ਨਾਮਾ’’ਤਿ ਅਵਿਨਿਚ੍ਛਿਤਤ੍ਤਾ ਸਬ੍ਬੇਸਂ ਅਨੁਗ੍ਗਹੇਤਬ੍ਬਭਾਵੋ ਦਸ੍ਸਿਤੋ ਹੋਤਿ.

੪੪੨. ਅਥ ਖੋ ਆਯਸ੍ਮਾ ਮਹਾਕਸ੍ਸਪੋ ਸਙ੍ਘਂ ਞਾਪੇਸੀਤਿ ਏਤ੍ਥ ਪਨ ਕੇਚਿ ਵਦਨ੍ਤਿ ‘‘ਭਨ੍ਤੇ ਨਾਗਸੇਨ, ਕਤਮਂ ਖੁਦ੍ਦਕਂ, ਕਤਮਂ ਅਨੁਖੁਦ੍ਦਕਨ੍ਤਿ ਮਿਲਿਨ੍ਦਰਞ੍ਞਾ ਪੁਚ੍ਛਿਤੇ ‘ਦੁਕ੍ਕਟਂ ਮਹਾਰਾਜ, ਖੁਦ੍ਦਕਂ, ਦੁਬ੍ਭਾਸਿਤਂ ਅਨੁਖੁਦ੍ਦਕ’ਨ੍ਤਿ (ਮਿ. ਪ. ੪.੨.੧) ਵੁਤ੍ਤਤ੍ਤਾ ਨਾਗਸੇਨਤ੍ਥੇਰੋ ਖੁਦ੍ਦਾਨੁਖੁਦ੍ਦਕਂ ਜਾਨਿ, ਮਹਾਕਸ੍ਸਪਤ੍ਥੇਰੋ ਪਨ ਤਂ ਅਜਾਨਨ੍ਤੋ ‘ਸੁਣਾਤੁ ਮੇ ਆਵੁਸੋ’ਤਿਆਦਿਨਾ ਕਮ੍ਮਵਾਚਂ ਸਾਵੇਸੀ’’ਤਿ, ਨ ਤਂ ਏਵਂ ਗਹੇਤਬ੍ਬਂ. ਨਾਗਸੇਨਤ੍ਥੇਰੋ ਹਿ ਪਰੇਸਂ ਵਾਦਪਥੋਪਚ੍ਛੇਦਨਤ੍ਥਂ ਸਙ੍ਗੀਤਿਕਾਲੇ ਧਮ੍ਮਸਙ੍ਗਾਹਕਮਹਾਥੇਰੇਹਿ ਗਹਿਤਕੋਟ੍ਠਾਸੇਸੁ ਅਨ੍ਤਿਮਕੋਟ੍ਠਾਸਮੇਵ ਗਹੇਤ੍ਵਾ ਮਿਲਿਨ੍ਦਰਾਜਾਨਂ ਸਞ੍ਞਾਪੇਸਿ, ਮਹਾਕਸ੍ਸਪਤ੍ਥੇਰੋ ਪਨ ਏਕਸਿਕ੍ਖਾਪਦਮ੍ਪਿ ਅਸਮੂਹਨਿਤੁਕਾਮਤਾਯ ਤਥਾ ਕਮ੍ਮਵਾਚਂ ਸਾਵੇਸਿ.

ਤਤ੍ਥ ਗਿਹਿਗਤਾਨੀਤਿ ਗਿਹਿਪਟਿਸਂਯੁਤ੍ਤਾਨੀਤਿ ਵਦਨ੍ਤਿ. ਗਿਹੀਸੁ ਗਤਾਨਿ, ਤੇਹਿ ਞਾਤਾਨਿ ਗਿਹਿਗਤਾਨੀਤਿ ਏਵਂ ਪਨੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਧੂਮਕਾਲੋ ਏਤਸ੍ਸਾਤਿ ਧੂਮਕਾਲਿਕਂ ਚਿਤਕਧੂਮਵੂਪਸਮਤੋ ਪਰਂ ਅਪ੍ਪਵਤ੍ਤਨਤੋ. ਅਪ੍ਪਞ੍ਞਤ੍ਤਨ੍ਤਿਆਦੀਸੁ (ਦੀ. ਨਿ. ਅਟ੍ਠ. ੨.੧੩੬; ਅ. ਨਿ. ਅਟ੍ਠ. ੩.੭.੨੩) ਨਵਂ ਅਧਮ੍ਮਿਕਂ ਕਤਿਕਵਤ੍ਤਂ ਵਾ ਸਿਕ੍ਖਾਪਦਂ ਵਾ ਬਨ੍ਧਨ੍ਤਾ ਅਪ੍ਪਞ੍ਞਤ੍ਤਂ ਪਞ੍ਞਪੇਨ੍ਤਿ ਨਾਮ ਪੁਰਾਣਸਨ੍ਥਤਵਤ੍ਥੁਸ੍ਮਿਂ ਸਾਵਤ੍ਥਿਯਂ ਭਿਕ੍ਖੂ ਵਿਯ. ਉਦ੍ਧਮ੍ਮਂ ਉਬ੍ਬਿਨਯਂ ਸਾਸਨਂ ਦੀਪੇਨ੍ਤਾ ਪਞ੍ਞਤ੍ਤਂ ਸਮੁਚ੍ਛਿਨ੍ਦਨ੍ਤਿ ਨਾਮ ਵਸ੍ਸਸਤਪਰਿਨਿਬ੍ਬੁਤੇ ਭਗਵਤਿ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਵਿਯ. ਖੁਦ੍ਦਾਨੁਖੁਦ੍ਦਕਾ ਪਨ ਆਪਤ੍ਤਿਯੋ ਸਞ੍ਚਿਚ੍ਚ ਵੀਤਿਕ੍ਕਮਨ੍ਤਾ ਯਥਾਪਞ੍ਞਤ੍ਤੇਸੁ ਸਿਕ੍ਖਾਪਦੇਸੁ ਸਮਾਦਾਯ ਨ ਵਤ੍ਤਨ੍ਤਿ ਨਾਮ ਅਸ੍ਸਜਿਪੁਨਬ੍ਬਸੁਕਾ ਵਿਯ. ਨਵਂ ਪਨ ਕਤਿਕਵਤ੍ਤਂ ਵਾ ਸਿਕ੍ਖਾਪਦਂ ਵਾ ਅਬਨ੍ਧਨ੍ਤਾ, ਧਮ੍ਮਤੋ ਵਿਨਯਤੋ ਸਾਸਨਂ ਦੀਪੇਨ੍ਤਾ, ਖੁਦ੍ਦਾਨੁਖੁਦ੍ਦਕਮ੍ਪਿ ਚ ਸਿਕ੍ਖਾਪਦਂ ਅਸਮੂਹਨਨ੍ਤਾ ਅਪ੍ਪਞ੍ਞਤ੍ਤਂ ਨ ਪਞ੍ਞਪੇਨ੍ਤਿ, ਪਞ੍ਞਤ੍ਤਂ ਨ ਸਮੁਚ੍ਛਿਨ੍ਦਨ੍ਤਿ, ਯਥਾਪਞ੍ਞਤ੍ਤੇਸੁ ਸਿਕ੍ਖਾਪਦੇਸੁ ਸਮਾਦਾਯ ਵਤ੍ਤਨ੍ਤਿ ਨਾਮ ਆਯਸ੍ਮਾ ਉਪਸੇਨੋ ਵਿਯ ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਵਿਯ ਚ.

੪੪੩. ਭਗਵਤਾ ਓਲ਼ਾਰਿਕੇ ਨਿਮਿਤ੍ਤੇ ਕਯਿਰਮਾਨੇਤਿ ਵੇਸਾਲਿਂ ਨਿਸ੍ਸਾਯ ਚਾਪਾਲੇ ਚੇਤਿਯੇ ਵਿਹਰਨ੍ਤੇਨ ਭਗਵਤਾ –

‘‘ਰਮਣੀਯਾ, ਆਨਨ੍ਦ, ਵੇਸਾਲੀ, ਰਮਣੀਯਂ ਉਦੇਨਚੇਤਿਯਂ, ਰਮਣੀਯਂ ਗੋਤਮਕਚੇਤਿਯਂ, ਰਮਣੀਯਂ ਸਤ੍ਤਮ੍ਬਚੇਤਿਯਂ, ਰਮਣੀਯਂ ਬਹੁਪੁਤ੍ਤਚੇਤਿਯਂ, ਰਮਣੀਯਂ ਸਾਰਨ੍ਦਦਚੇਤਿਯਂ, ਰਮਣੀਯਂ ਚਾਪਾਲਚੇਤਿਯਂ. ਯਸ੍ਸ ਕਸ੍ਸਚਿ, ਆਨਨ੍ਦ, ਚਤ੍ਤਾਰੋ ਇਦ੍ਧਿਪਾਦਾ ਭਾਵਿਤਾ ਬਹੁਲੀਕਤਾ ਯਾਨੀਕਤਾ ਵਤ੍ਥੁਕਤਾ ਅਨੁਟ੍ਠਿਤਾ ਪਰਿਚਿਤਾ ਸੁਸਮਾਰਦ੍ਧਾ, ਸੋ ਆਕਙ੍ਖਮਾਨੋ ਕਪ੍ਪਂ ਵਾ ਤਿਟ੍ਠੇਯ੍ਯ ਕਪ੍ਪਾਵਸੇਸਂ ਵਾ. ਤਥਾਗਤਸ੍ਸ ਖੋ ਪਨ, ਆਨਨ੍ਦ, ਚਤ੍ਤਾਰੋ ਇਦ੍ਧਿਪਾਦਾ ਭਾਵਿਤਾ ਬਹੁਲੀਕਤਾ ਯਾਨੀਕਤਾ ਵਤ੍ਥੁਕਤਾ ਅਨੁਟ੍ਠਿਤਾ ਪਰਿਚਿਤਾ ਸੁਸਮਾਰਦ੍ਧਾ, ਸੋ ਆਕਙ੍ਖਮਾਨੋ, ਆਨਨ੍ਦ, ਤਥਾਗਤੋ ਕਪ੍ਪਂ ਵਾ ਤਿਟ੍ਠੇਯ੍ਯ ਕਪ੍ਪਾਵਸੇਸਂ ਵਾ’’ਤਿ (ਦੀ. ਨਿ. ੨.੧੬੬) –

ਏਵਂ ਓਲ਼ਾਰਿਕੇ ਨਿਮਿਤ੍ਤੇ ਕਯਿਰਮਾਨੇ.

ਮਾਰੇਨ ਪਰਿਯੁਟ੍ਠਿਤਚਿਤ੍ਤੋਤਿ ਮਾਰੇਨ ਅਜ੍ਝੋਤ੍ਥਟਚਿਤ੍ਤੋ. ਮਾਰੋ ਹਿ ਯਸ੍ਸ ਸਬ੍ਬੇਨ ਸਬ੍ਬਂ ਦ੍ਵਾਦਸ ਵਿਪਲ੍ਲਾਸਾ ਅਪ੍ਪਹੀਨਾ, ਤਸ੍ਸ ਚਿਤ੍ਤਂ ਪਰਿਯੁਟ੍ਠਾਤਿ. ਥੇਰਸ੍ਸ ਚ ਚਤ੍ਤਾਰੋ ਵਿਪਲ੍ਲਾਸਾ ਅਪ੍ਪਹੀਨਾ, ਤੇਨਸ੍ਸ ਮਾਰੋ ਚਿਤ੍ਤਂ ਪਰਿਯੁਟ੍ਠਾਸਿ. ਸੋ ਪਨ ਚਿਤ੍ਤਪਰਿਯੁਟ੍ਠਾਨਂ ਕਰੋਨ੍ਤੋ ਕਿਂ ਕਰੋਤੀਤਿ? ਭੇਰਵਂ ਰੂਪਾਰਮ੍ਮਣਂ ਵਾ ਦਸ੍ਸੇਤਿ, ਸਦ੍ਦਾਰਮ੍ਮਣਂ ਵਾ ਸਾਵੇਤਿ, ਤਤੋ ਸਤ੍ਤਾ ਤਂ ਦਿਸ੍ਵਾ ਵਾ ਸੁਤ੍ਵਾ ਵਾ ਸਤਿਂ ਵਿਸ੍ਸਜ੍ਜੇਤ੍ਵਾ ਵਿਵਟਮੁਖਾ ਹੋਨ੍ਤਿ, ਤੇਸਂ ਮੁਖੇਨ ਹਤ੍ਥਂ ਪਵੇਸੇਤ੍ਵਾ ਹਦਯਂ ਮਦ੍ਦਤਿ, ਤਤੋ ਵਿਸਞ੍ਞਾਵ ਹੁਤ੍ਵਾ ਤਿਟ੍ਠਨ੍ਤਿ. ਥੇਰਸ੍ਸ ਪਨੇਸ ਮੁਖੇਨ ਹਤ੍ਥਂ ਪਵੇਸੇਤੁਂ ਕਿਂ ਸਕ੍ਖਿਸ੍ਸਤਿ, ਭੇਰਵਾਰਮ੍ਮਣਂ ਪਨ ਦਸ੍ਸੇਸਿ, ਤਂ ਦਿਸ੍ਵਾ ਥੇਰੋ ਨਿਮਿਤ੍ਤੋਭਾਸਂ ਨ ਪਟਿਵਿਜ੍ਝਿ.

ਖੁਦ੍ਦਾਨੁਖੁਦ੍ਦਕਸਿਕ੍ਖਾਪਦਕਥਾਵਣ੍ਣਨਾ ਨਿਟ੍ਠਿਤਾ.

ਬ੍ਰਹ੍ਮਦਣ੍ਡਕਥਾਵਣ੍ਣਨਾ

੪੪੫. ਉਜ੍ਜਵਨਿਕਾਯਾਤਿ ਪਟਿਸੋਤਗਾਮਿਨਿਯਾ. ਰਜੋਹਰਣਨ੍ਤਿ ਰਜੋਪੁਞ੍ਛਨੀ. ਨ ਕੁਲਵਂ ਗਮੇਨ੍ਤੀਤਿ ਨਿਰਤ੍ਥਕਵਿਨਾਸਨਂ ਨ ਗਮੇਨ੍ਤਿ. ਕੁਚ੍ਛਿਤੋ ਲਵੋ ਕੁਲਵੋ, ਅਨਯਵਿਨਾਸੋਤਿ ਵੁਤ੍ਤਂ ਹੋਤਿ. ‘‘ਧਮ੍ਮਵਿਨਯਸਙ੍ਗੀਤਿਯਾ’’ਤਿ ਵਤ੍ਤਬ੍ਬੇ ਸਙ੍ਗੀਤਿਯਾ ਵਿਨਯਪ੍ਪਧਾਨਤ੍ਤਾ ‘‘ਵਿਨਯਸਙ੍ਗੀਤਿਯਾ’’ਤਿ ਵੁਤ੍ਤਂ. ਵਿਨਯਪ੍ਪਧਾਨਾ ਸਙ੍ਗੀਤਿ ਵਿਨਯਸਙ੍ਗੀਤਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵਾਤਿ.

ਪਞ੍ਚਸਤਿਕਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.