੭. ਸਙ੍ਘਭੇਦਕਕ੍ਖਨ੍ਧਕਂ

ਛਸਕ੍ਯਪਬ੍ਬਜ੍ਜਾਕਥਾਵਣ੍ਣਨਾ

੩੩੦. ਸਙ੍ਘਭੇਦਕਕ੍ਖਨ੍ਧਕੇ ਅਨੁਪਿਯਾਯਨ੍ਤਿਆਦੀਸੁ ‘‘ਅਨੁਪਿਯਾ ਨਾਮਾ’’ਤਿ ਵਤ੍ਤਬ੍ਬੇ ਆਕਾਰਸ੍ਸ ਰਸ੍ਸਤ੍ਤਂ ਅਨੁਨਾਸਿਕਸ੍ਸ ਚ ਆਗਮਂ ਕਤ੍ਵਾ ‘‘ਅਨੁਪਿਯਂ ਨਾਮਾ’’ਤਿ ਵੁਤ੍ਤਂ. ਮਲ੍ਲਾਨਨ੍ਤਿ ਮਲ੍ਲਰਾਜੂਨਂ. ਨ ਹੇਟ੍ਠਾ ਪਾਸਾਦਾ ਓਰੋਹਤੀਤਿ ਉਪਰਿਪਾਸਾਦਤੋ ਹੇਟ੍ਠਿਮਤਲਂ ਨ ਓਰੋਹਤਿ, ‘‘ਹੇਟ੍ਠਾਪਾਸਾਦ’’ਨ੍ਤਿਪਿ ਪਠਨ੍ਤਿ. ਅਨੁਰੁਦ੍ਧੋ ਵਾ ਪਬ੍ਬਾਜੇਯ੍ਯਾਤਿ ਯੋਜੇਤਬ੍ਬਂ. ਘਰਾਵਾਸਤ੍ਥਨ੍ਤਿ ਘਰਾਵਾਸਸ੍ਸ ਅਨੁਚ੍ਛਵਿਕਂ ਕਮ੍ਮਂ. ਉਦਕਂ ਅਭਿਨੇਤਬ੍ਬਨ੍ਤਿ ਉਦਕਂ ਆਹਰਿਤਬ੍ਬਂ. ਨਿਨ੍ਨੇਤਬ੍ਬਨ੍ਤਿ ਆਭਤਮੁਦਕਂ ਪੁਨ ਨੀਹਰਿਤਬ੍ਬਂ. ਨਿਦ੍ਧਾਪੇਤਬ੍ਬਨ੍ਤਿ ਅਨ੍ਤਰਨ੍ਤਰਾ ਉਟ੍ਠਿਤਤਿਣਾਨਿ ਉਦ੍ਧਰਿਤ੍ਵਾ ਅਪਨੇਤਬ੍ਬਂ. ਲਵਾਪੇਤਬ੍ਬਨ੍ਤਿ ਪਰਿਪਕ੍ਕਕਾਲੇ ਲਵਾਪੇਤਬ੍ਬਂ. ਉਬ੍ਬਾਹਾਪੇਤਬ੍ਬਨ੍ਤਿ ਖਲਮਣ੍ਡਲਂ ਹਰਾਪੇਤਬ੍ਬਂ. ਉਜੁਂ ਕਾਰਾਪੇਤਬ੍ਬਨ੍ਤਿ ਪੁਞ੍ਜਂ ਕਾਰਾਪੇਤਬ੍ਬਂ. ਪਲਾਲਾਨਿ ਉਦ੍ਧਰਾਪੇਤਬ੍ਬਾਨੀਤਿ ਪਲਾਲਾਨਿ ਅਪਨੇਤਬ੍ਬਾਨਿ. ਭੁਸਿਕਾ ਉਦ੍ਧਰਾਪੇਤਬ੍ਬਾਤਿ ਗੁਨ੍ਨਂ ਖੁਰਗ੍ਗੇਹਿ ਸਞ੍ਛਿਨ੍ਨਾ ਭੁਸਸਙ੍ਖਾਤਾ ਨਾਲ਼ਦਣ੍ਡਾ ਅਪਨੇਤਬ੍ਬਾ. ਓਪੁਨਾਪੇਤਬ੍ਬਨ੍ਤਿ ਵਾਤਮੁਖੇ ਓਪੁਨਾਪੇਤ੍ਵਾ ਪਲਾਲਂ ਅਪਨੇਤਬ੍ਬਂ. ਅਤਿਹਰਾਪੇਤਬ੍ਬਨ੍ਤਿ ਅਨ੍ਤੋਕੋਟ੍ਠਾਗਾਰਂ ਉਪਨੇਤਬ੍ਬਂ. ਨ ਕਮ੍ਮਾਤਿ ਨ ਕਮ੍ਮਾਨਿ. ਘਰਾਵਾਸਤ੍ਥੇਨਾਤਿ ਉਪਯੋਗਤ੍ਥੇ ਕਰਣਵਚਨਂ. ਉਪਜਾਨਾਹੀਤਿ ਚ ਉਪਸਗ੍ਗਮਤ੍ਤੋ ਉਪ-ਸਦ੍ਦੋ. ਤੇਨਾਹ ‘‘ਘਰਾਵਾਸਤ੍ਥਂ ਜਾਨਾਹੀ’’ਤਿ. ਜਾਨਾਹੀਤਿ ਚੇਤ੍ਥ ਪਟਿਪਜ੍ਜਾਤਿ ਅਤ੍ਥੋ ਵੇਦਿਤਬ੍ਬੋ. ਅਕਾਮਕਾਤਿ ਅਨਿਚ੍ਛਮਾਨਾ.

੩੩੧-੩੩੨. ਯਂ ਨ ਨਿਵਤ੍ਤੋਤਿ ਯਸ੍ਮਾ ਨ ਨਿਵਤ੍ਤੋ. ਸੁਞ੍ਞਾਗਾਰਗਤੋਤਿ (ਉਦਾ. ਅਟ੍ਠ. ੨੦) ‘‘ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚ ਅਵਸੇਸਂ ਅਰਞ੍ਞ’’ਨ੍ਤਿ (ਪਾਰਾ.੯੨) ਵੁਤ੍ਤਂ ਅਰਞ੍ਞਂ ਰੁਕ੍ਖਮੂਲਞ੍ਚ ਠਪੇਤ੍ਵਾ ਅਞ੍ਞਂ ਪਬ੍ਬਤਕਨ੍ਦਰਾਦਿ ਪਬ੍ਬਜਿਤਸਾਰੁਪ੍ਪਂ ਨਿਵਾਸਟ੍ਠਾਨਂ ਜਨਸਮ੍ਬਾਧਾਭਾਵਤੋ ਇਧ ‘‘ਸੁਞ੍ਞਾਗਾਰ’’ਨ੍ਤਿ ਅਧਿਪ੍ਪੇਤਂ. ਅਥ ਵਾ ਝਾਨਕਣ੍ਟਕਾਨਂ ਸਦ੍ਦਾਨਂ ਅਭਾਵਤੋ ਵਿਵਿਤ੍ਤਂ ਯਂ ਕਿਞ੍ਚਿ ਅਗਾਰਮ੍ਪਿ ‘‘ਸੁਞ੍ਞਾਗਾਰ’’ਨ੍ਤਿ ਵੇਦਿਤਬ੍ਬਂ. ਤਂ ਸੁਞ੍ਞਾਗਾਰਂ ਉਪਗਤੋ. ਅਭਿਕ੍ਖਣਨ੍ਤਿ ਬਹੁਲਂ. ਉਦਾਨਂ ਉਦਾਨੇਸੀਤਿ ਸੋ ਹਿ ਆਯਸ੍ਮਾ ਅਰਞ੍ਞੇ ਦਿਵਾਵਿਹਾਰਂ ਉਪਗਤੋਪਿ ਰਤ੍ਤਿਵਾਸੂਪਗਤੋਪਿ ਯੇਭੁਯ੍ਯੇਨ ਫਲਸਮਾਪਤ੍ਤਿਸੁਖੇਨ ਨਿਰੋਧਸਮਾਪਤ੍ਤਿਸੁਖੇਨ ਚ ਵੀਤਿਨਾਮੇਸਿ, ਤਸ੍ਮਾ ਤਂ ਸੁਖਂ ਸਨ੍ਧਾਯ ਪੁਬ੍ਬੇ ਅਤ੍ਤਨਾ ਅਨੁਭੂਤਂ ਸਭਯਂ ਸਪਰਿਲ਼ਾਹਂ ਰਜ੍ਜਸੁਖਂ ਜਿਗੁਚ੍ਛਿਤ੍ਵਾ ‘‘ਅਹੋ ਸੁਖਂ ਅਹੋ ਸੁਖ’’ਨ੍ਤਿ ਸੋਮਨਸ੍ਸਸਹਿਤਞਾਣਸਮੁਟ੍ਠਾਨਂ ਪੀਤਿਸਮੁਗ੍ਗਾਰਂ ਸਮੁਗ੍ਗਿਰਤਿ. ਤੇ ਭਿਕ੍ਖੂ ਭਗਵਨ੍ਤਂ ਏਤਦਵੋਚੁਨ੍ਤਿ ਤੇ ਸਮ੍ਬਹੁਲਾ ਭਿਕ੍ਖੂ ਉਲ੍ਲੁਮ੍ਪਨਸਭਾਵਸਣ੍ਠਿਤਾ ਤਸ੍ਸ ਅਨੁਗ੍ਗਣ੍ਹਨਾਧਿਪ੍ਪਾਯੇਨ ਭਗਵਨ੍ਤਂ ਏਤਦਵੋਚੁਂ, ਨ ਉਜ੍ਝਾਨਵਸੇਨ. ਨਿਸ੍ਸਂਸਯਨ੍ਤਿ ਅਸਨ੍ਦੇਹੇਨ, ਏਕਨ੍ਤੇਨਾਤਿ ਅਤ੍ਥੋ. ਤੇ ਕਿਰ ਭਿਕ੍ਖੂ ਪੁਥੁਜ੍ਜਨਾ ਤਸ੍ਸ ਆਯਸ੍ਮਤੋ ਵਿਵੇਕਸੁਖਂ ਸਨ੍ਧਾਯ ਉਦਾਨਂ ਅਜਾਨਨ੍ਤਾ ਏਵਮਾਹਂਸੁ. ਸਮਨੁਸ੍ਸਰਨ੍ਤੋਤਿ ਉਕ੍ਕਣ੍ਠਨਵਸੇਨ ਅਨੁਸ੍ਸਰਨ੍ਤੋ.

ਅਞ੍ਞਤਰਨ੍ਤਿ ਨਾਮਗੋਤ੍ਤੇਨ ਅਪਾਕਟਂ ਏਕਂ ਭਿਕ੍ਖੁਂ. ਆਮਨ੍ਤੇਸੀਤਿ ਆਣਾਪੇਸਿ ਤੇ ਭਿਕ੍ਖੂ ਸਞ੍ਞਾਪੇਤੁਕਾਮੋ. ਏਵਨ੍ਤਿ ਵਚਨਸਮ੍ਪਟਿਗ੍ਗਹੇ, ਸਾਧੂਤਿ ਅਤ੍ਥੋ. ਏਵਂ ਭਨ੍ਤੇਤਿ ਏਤ੍ਥ ਪਨ ਏਵਂ-ਸਦ੍ਦੋ ਪਟਿਞ੍ਞਾਯਂ. ‘‘ਅਭਿਕ੍ਖਣਂ ‘ਅਹੋ ਸੁਖਂ ਅਹੋ ਸੁਖ’ਨ੍ਤਿ ਇਮਂ ਉਦਾਨਂ ਉਦਾਨੇਸੀ’’ਤਿ ਯਥਾ ਤੇ ਭਿਕ੍ਖੂ ਵਦਨ੍ਤਿ, ਤਂ ਏਵਂ ਤਥੇਵਾਤਿ ਅਤ੍ਤਨੋ ਉਦਾਨਂ ਪਟਿਜਾਨਾਤਿ. ‘‘ਕਿਂ ਪਨ ਤ੍ਵਂ ਭਦ੍ਦਿਯਾ’’ਤਿ ਕਸ੍ਮਾ ਭਗਵਾ ਪੁਚ੍ਛਤਿ, ਕਿਂ ਤਸ੍ਸ ਚਿਤ੍ਤਂ ਨ ਜਾਨਾਤੀਤਿ? ਨੋ ਨ ਜਾਨਾਤਿ, ਤੇਨੇਵ ਪਨ ਤਮਤ੍ਥਂ ਵਦਾਪੇਤ੍ਵਾ ਤੇ ਭਿਕ੍ਖੂ ਸਞ੍ਞਾਪੇਤੁਂ ਪੁਚ੍ਛਤਿ. ਵੁਤ੍ਤਞ੍ਹੇਤਂ ‘‘ਜਾਨਨ੍ਤਾਪਿ ਤਥਾਗਤਾ ਪੁਚ੍ਛਨ੍ਤਿ, ਜਾਨਨ੍ਤਾਪਿ ਨ ਪੁਚ੍ਛਨ੍ਤੀ’’ਤਿਆਦਿ (ਪਾਰਾ. ੧੬, ੧੯੪). ਅਤ੍ਥਵਸਨ੍ਤਿ ਕਾਰਣਂ.

ਅਨ੍ਤੋਪਿ ਅਨ੍ਤੇਪੁਰੇਤਿ ਇਤ੍ਥਾਗਾਰਸ੍ਸ ਸਞ੍ਚਰਣਟ੍ਠਾਨਭੂਤੇ ਰਾਜਗੇਹਸ੍ਸ ਅਬ੍ਭਨ੍ਤਰੇ, ਯਤ੍ਥ ਰਾਜਾ ਨਹਾਨਭੋਜਨਸਯਨਾਦਿਂ ਕਪ੍ਪੇਤਿ. ਰਕ੍ਖਾ ਸੁਸਂਵਿਹਿਤਾਤਿ ਆਰਕ੍ਖਾਦਿਕਤਪੁਰਿਸੇਹਿ ਗੁਤ੍ਤਿ ਸੁਟ੍ਠੁ ਸਮਨ੍ਤਤੋ ਵਿਹਿਤਾ. ਬਹਿਪਿ ਅਨ੍ਤੇਪੁਰੇਤਿ ਅਟ੍ਟਕਰਣਟ੍ਠਾਨਾਦਿਕੇ ਅਨ੍ਤੇਪੁਰਤੋ ਬਹਿਭੂਤੇ ਰਾਜਗੇਹੇ. ਏਵਂ ਰਕ੍ਖਿਤੋ ਗੋਪਿਤੋ ਸਨ੍ਤੋਤਿ ਏਵਂ ਰਾਜਗੇਹਰਾਜਧਾਨੀਰਜ੍ਜਦੇਸੇਸੁ ਅਨ੍ਤੋ ਬਹਿ ਚ ਅਨੇਕੇਸੁ ਠਾਨੇਸੁ ਅਨੇਕਸਤੇਹਿ ਸੁਸਂਵਿਹਿਤਰਕ੍ਖਾਵਰਣਗੁਤ੍ਤਿਯਾ ਮਮੇਵ ਨਿਬ੍ਭਯਤ੍ਥਂ ਫਾਸੁਵਿਹਾਰਤ੍ਥਂ ਰਕ੍ਖਿਤੋ ਗੋਪਿਤੋ ਸਮਾਨੋ. ਭੀਤੋਤਿਆਦੀਨਿ ਪਦਾਨਿ ਅਞ੍ਞਮਞ੍ਞਵੇਵਚਨਾਨਿ. ਅਥ ਵਾ ਭੀਤੋਤਿ ਪਰਰਾਜੂਹਿ ਭਾਯਮਾਨੋ. ਉਬ੍ਬਿਗ੍ਗੋਤਿ ਸਕਰਜ੍ਜੇਪਿ ਪਕਤਿਕ੍ਖੋਭਤੋ ਉਪ੍ਪਜ੍ਜਨਕਭਯੁਬ੍ਬੇਗੇਨ ਉਬ੍ਬਿਗ੍ਗੋ ਚਲਿਤੋ. ਉਸ੍ਸਙ੍ਕੀਤਿ ‘‘ਰਞ੍ਞਾ ਨਾਮ ਸਬ੍ਬਕਾਲਂ ਅਵਿਸ੍ਸਤ੍ਥੇਨ ਭਵਿਤਬ੍ਬ’’ਨ੍ਤਿ ਵਚਨਤੋ ਸਬ੍ਬਤ੍ਥ ਅਵਿਸ੍ਸਾਸਨਵਸੇਨ ਤੇਸਂ ਤੇਸਂ ਕਿਚ੍ਚਕਰਣੀਯਾਨਂ ਅਚ੍ਚਯਤੋ ਉਪ੍ਪਜ੍ਜਨਕਪਰਿਸਙ੍ਕਾਯ ਚ ਉਦ੍ਧਮੁਦ੍ਧਂ ਸਙ੍ਕਮਾਨੋ. ਉਤ੍ਰਾਸੀਤਿ ‘‘ਸਨ੍ਤਿਕਾਵਚਰੇਹਿਪਿ ਅਜਾਨਨ੍ਤਸ੍ਸੇਵ ਮੇ ਕਦਾਚਿ ਅਨਤ੍ਥੋ ਭਵੇਯ੍ਯਾ’’ਤਿ ਉਪ੍ਪਨ੍ਨੇਨ ਸਰੀਰਕਮ੍ਪਮ੍ਪਿ ਉਪ੍ਪਾਦਨਸਮਤ੍ਥੇਨ ਤਾਸੇਨ ਉਤ੍ਰਾਸਿ. ‘‘ਉਤ੍ਰਸ੍ਤੋ’’ਤਿਪਿ ਪਠਨ੍ਤਿ. ਵਿਹਰਾਮੀਤਿ ਏਵਂਭੂਤੋ ਹੁਤ੍ਵਾ ਵਿਹਰਾਮਿ.

ਏਤਰਹੀਤਿ ਇਦਾਨਿ ਪਬ੍ਬਜਿਤਕਾਲਤੋ ਪਟ੍ਠਾਯ. ਏਕੋਤਿ ਅਸਹਾਯੋ. ਤੇਨ ਵਿਵੇਕਟ੍ਠਕਾਯਤਂ ਦਸ੍ਸੇਤਿ. ਅਭੀਤੋਤਿਆਦੀਨਂ ਪਦਾਨਂ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ. ਭਯਾਦਿਨਿਮਿਤ੍ਤਸ੍ਸ ਪਰਿਗ੍ਗਹਸ੍ਸ ਤਂਨਿਮਿਤ੍ਤਸ੍ਸ ਚ ਕਿਲੇਸਗਹਨਸ੍ਸ ਅਭਾਵੇਨੇਵਸ੍ਸ ਅਭੀਤਾਦਿਤਾਤਿ ਏਤੇਨ ਚਿਤ੍ਤਵਿਵੇਕਂ ਦਸ੍ਸੇਤਿ. ਅਪ੍ਪੋਸ੍ਸੁਕ੍ਕੋਤਿ ਸਰੀਰਗੁਤ੍ਤਿਯਂ ਨਿਰੁਸ੍ਸੁਕ੍ਕੋ. ਪਨ੍ਨਲੋਮੋਤਿ ਲੋਮਹਂਸੁਪ੍ਪਾਦਕਸ੍ਸ ਛਮ੍ਭਿਤਤ੍ਤਸ੍ਸ ਅਭਾਵੇਨ ਅਨੁਗ੍ਗਤਲੋਮੋ. ਪਦਦ੍ਵਯੇਨਪਿ ਸੇਰਿਵਿਹਾਰਂ ਦਸ੍ਸੇਤਿ. ਪਰਦਤ੍ਤਵੁਤ੍ਤੋਤਿ ਪਰੇਹਿ ਦਿਨ੍ਨੇਨ ਚੀਵਰਾਦਿਨਾ ਵਤ੍ਤਮਾਨੋ. ਏਤੇਨ ਸਬ੍ਬਸੋ ਸਙ੍ਗਾਭਾਵਦੀਪਨਮੁਖੇਨ ਅਨਵਸੇਸਭਯਹੇਤੁਵਿਰਹਂ ਦਸ੍ਸੇਤਿ. ਮਿਗਭੂਤੇਨ ਚੇਤਸਾਤਿ ਵਿਸ੍ਸਤ੍ਥਵਿਹਾਰਿਤਾਯ ਮਿਗਸ੍ਸ ਵਿਯ ਜਾਤੇਨ ਚਿਤ੍ਤੇਨ. ਮਿਗੋ ਹਿ ਅਮਨੁਸ੍ਸਪਥੇ ਅਰਞ੍ਞੇ ਵਸਮਾਨੋ ਵਿਸ੍ਸਤ੍ਥੋ ਤਿਟ੍ਠਤਿ ਨਿਸੀਦਤਿ ਨਿਪਜ੍ਜਤਿ ਯੇਨਕਾਮਞ੍ਚ ਪਕ੍ਕਮਤਿ ਅਪ੍ਪਟਿਹਤਚਾਰੋ, ਏਵਂ ਅਹਮ੍ਪਿ ਵਿਹਰਾਮੀਤਿ ਦਸ੍ਸੇਤਿ. ਵੁਤ੍ਤਞ੍ਹੇਤਂ ਪਚ੍ਚੇਕਸਮ੍ਬੁਦ੍ਧੇਨ –

‘‘ਮਿਗੋ ਅਰਞ੍ਞਮ੍ਹਿ ਯਥਾ ਅਬਦ੍ਧੋ;

ਯੇਨਿਚ੍ਛਕਂ ਗਚ੍ਛਤਿ ਗੋਚਰਾਯ;

ਵਿਞ੍ਞੂ ਨਰੋ ਸੇਰਿਤ ਪੇਕ੍ਖਮਾਨੋ;

ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ’’ਤਿ. (ਸੁ. ਨਿ. ੩੯; ਅਪ. ਥੇਰ ੧.੧.੯੫);

ਇਮਂ ਖੋ ਅਹਂ, ਭਨ੍ਤੇ, ਅਤ੍ਥਵਸਨ੍ਤਿ ਭਗਵਾ ਯਦਿਦਂ ਮਮ ਏਤਰਹਿ ਪਰਮਂ ਵਿਵੇਕਸੁਖਂ ਫਲਸਮਾਪਤ੍ਤਿਸੁਖਂ, ਇਦਮੇਵ ਕਾਰਣਂ ਸਮ੍ਪਸ੍ਸਮਾਨੋ ‘‘ਅਹੋ ਸੁਖਂ, ਅਹੋ ਸੁਖ’’ਨ੍ਤਿ ਉਦਾਨੇਮਿ. ਏਤਮਤ੍ਥਨ੍ਤਿ ਏਤਂ ਭਦ੍ਦਿਯਤ੍ਥੇਰਸ੍ਸ ਪੁਥੁਜ੍ਜਨਵਿਸਯਾਤੀਤਂ ਵਿਵੇਕਸੁਖਸਙ੍ਖਾਤਂ ਅਤ੍ਥਂ ਸਬ੍ਬਾਕਾਰਤੋ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਇਮਂ ਸਹੇਤੁਕਭਯਸੋਕਵਿਗਮਾਨੁਭਾਵਦੀਪਕਂ ਉਦਾਨਂ ਉਦਾਨੇਸਿ.

ਯਸ੍ਸਨ੍ਤਰਤੋ ਨ ਸਨ੍ਤਿ ਕੋਪਾਤਿ ਯਸ੍ਸ ਅਰਿਯਪੁਗ੍ਗਲਸ੍ਸ ਅਨ੍ਤਰਤੋ ਅਬ੍ਭਨ੍ਤਰੇ ਅਤ੍ਤਨੋ ਚਿਤ੍ਤੇ ਚਿਤ੍ਤਕਾਲੁਸ੍ਸਿਯਕਰਣਤੋ ਚਿਤ੍ਤਪ੍ਪਕੋਪਾ ਰਾਗਾਦਯੋ ਆਘਾਤਵਤ੍ਥੁਆਦਿਕਾਰਣਭੇਦਤੋ ਅਨੇਕਭੇਦਾ ਦੋਸਕੋਪਾ ਏਵ ਵਾ ਨ ਸਨ੍ਤਿ, ਮਗ੍ਗੇਨ ਪਹੀਨਤ੍ਤਾ ਨ ਵਿਜ੍ਜਨ੍ਤਿ. ਅਯਞ੍ਹਿ ਅਨ੍ਤਰ-ਸਦ੍ਦੋ ਕਿਞ੍ਚਾਪਿ ‘‘ਮਞ੍ਚ ਤ੍ਵਞ੍ਚ ਕਿਮਨ੍ਤਰ’’ਨ੍ਤਿਆਦੀਸੁ (ਸਂ. ਨਿ. ੧.੨੨੮) ਕਾਰਣੇ ਦਿਸ੍ਸਤਿ, ‘‘ਅਨ੍ਤਰਟ੍ਠਕੇ ਹਿਮਪਾਤਸਮਯੇ’’ਤਿਆਦੀਸੁ (ਮਹਾਵ. ੩੪੬) ਵੇਮਜ੍ਝੇ, ‘‘ਅਨ੍ਤਰਾ ਚ ਜੇਤਵਨਂ ਅਨ੍ਤਰਾ ਚ ਸਾਵਤ੍ਥਿ’’ਨ੍ਤਿਆਦੀਸੁ (ਉਦਾ. ੧੩, ੪੪) ਵਿਵਰੇ, ‘‘ਭਯਮਨ੍ਤਰਤੋ ਜਾਤ’’ਨ੍ਤਿਆਦੀਸੁ (ਇਤਿਵੁ. ੮੮; ਮਹਾਨਿ. ੫) ਚਿਤ੍ਤੇ, ਇਧਾਪਿ ਚਿਤ੍ਤੇ ਏਵ ਦਟ੍ਠਬ੍ਬੋ. ਤੇਨੇਵਾਹ ‘‘ਯਸ੍ਸ ਚਿਤ੍ਤੇ ਕੋਪਾ ਨ ਸਨ੍ਤੀ’’ਤਿ.

ਅਭਵ-ਸਦ੍ਦਸ੍ਸ ਵਿਭਵ-ਸਦ੍ਦੇਨ ਅਤ੍ਥੁਦ੍ਧਾਰੇ ਕਾਰਣਮਾਹ ‘‘ਵਿਭਵੋਤਿ ਚ ਅਭਵੋਤਿ ਚ ਅਤ੍ਥਤੋ ਏਕ’’ਨ੍ਤਿ. ਇਤਿ-ਸਦ੍ਦੋ ਪਕਾਰਵਚਨੋਤਿ ਆਹ ‘‘ਇਤਿ ਅਨੇਕਪ੍ਪਕਾਰਾ ਭਵਾਭਵਤਾ’’ਤਿ. ਵੀਤਿਵਤ੍ਤੋਤਿ ਅਤਿਕ੍ਕਨ੍ਤੋ. ਏਤ੍ਥ ਚ ‘‘ਯਸ੍ਸਾ’’ਤਿ ਇਦਂ ਯੋ ਵੀਤਿਵਤ੍ਤੋਤਿ ਵਿਭਤ੍ਤਿਵਿਪਰਿਣਾਮਵਸੇਨ ਯੋਜੇਤਬ੍ਬਂ. ਤਂ ਵਿਗਤਭਯਨ੍ਤਿ ਤਂ ਏਵਰੂਪਂ ਯਥਾਵੁਤ੍ਤਗੁਣਸਮਨ੍ਨਾਗਤਂ ਖੀਣਾਸਵਂ ਚਿਤ੍ਤਕੋਪਾਭਾਵਤੋ ਇਤਿਭਵਾਭਵਸਮਤਿਕ੍ਕਮਨਤੋ ਚ ਭਯਹੇਤੁਵਿਗਮੇਨ ਵਿਗਤਭਯਂ. ਵਿਵੇਕਸੁਖੇਨ ਅਗ੍ਗਫਲਸੁਖੇਨ ਚ ਸੁਖਿਂ, ਵਿਗਤਭਯਤ੍ਤਾ ਏਵ ਅਸੋਕਂ. ਦੇਵਾ ਨਾਨੁਭਵਨ੍ਤਿ ਦਸ੍ਸਨਾਯਾਤਿ ਅਧਿਗਤਮਗ੍ਗੇ ਠਪੇਤ੍ਵਾ ਸਬ੍ਬੇਪਿ ਉਪਪਤ੍ਤਿਦੇਵਾ ਵਾਯਮਨ੍ਤਾਪਿ ਚਿਤ੍ਤਚਾਰਦਸ੍ਸਨਵਸੇਨ ਦਸ੍ਸਨਾਯ ਦਟ੍ਠੁਂ ਨਾਨੁਭਵਨ੍ਤਿ ਨ ਅਭਿਸਮ੍ਭੁਣਨ੍ਤਿ ਨ ਸਕ੍ਕੋਨ੍ਤਿ, ਪਗੇਵ ਮਨੁਸ੍ਸਾ. ਸੇਕ੍ਖਾਪਿ ਹਿ ਪੁਥੁਜ੍ਜਨਾ ਵਿਯ ਅਰਹਤੋ ਚਿਤ੍ਤਪ੍ਪਵਤ੍ਤਿਂ ਨ ਜਾਨਨ੍ਤਿ. ਤਸ੍ਸ ਦਸ੍ਸਨਂ ਦੇਵਾਨਮ੍ਪਿ ਦੁਲ੍ਲਭਨ੍ਤਿ ਏਤ੍ਥਾਪਿ ਚਿਤ੍ਤਚਾਰਦਸ੍ਸਨਵਸੇਨ ਤਸ੍ਸ ਦਸ੍ਸਨਂ ਦੇਵਾਨਮ੍ਪਿ ਦੁਲ੍ਲਭਂ ਅਲਬ੍ਭਨੀਯਂ, ਦੇਵੇਹਿਪਿ ਤਂ ਦਸ੍ਸਨਂ ਨ ਸਕ੍ਕਾ ਪਾਪੁਣਿਤੁਨ੍ਤਿ ਏਵਮਤ੍ਥੋ ਗਹੇਤਬ੍ਬੋ. ਅਭਾਵਤ੍ਥੋ ਹੇਤ੍ਥ ਦੁ-ਸਦ੍ਦੋ ‘‘ਦੁਪ੍ਪਞ੍ਞੋ’’ਤਿਆਦੀਸੁ ਵਿਯ.

੩੩੩. ਭਤ੍ਤਾਭਿਹਾਰੋਤਿ ਅਭਿਹਰਿਤਬ੍ਬਭਤ੍ਤਂ. ਤਸ੍ਸ ਪਨ ਪਮਾਣਂ ਦਸ੍ਸੇਤੁਂ ‘‘ਪਞ੍ਚ ਚ ਥਾਲਿਪਾਕਸਤਾਨੀ’’ਤਿ ਵੁਤ੍ਤਂ. ਤਤ੍ਥ ਏਕੋ ਥਾਲਿਪਾਕੋ ਦਸਨ੍ਨਂ ਪੁਰਿਸਾਨਂ ਭਤ੍ਤਂ ਗਣ੍ਹਾਤਿ. ਲਾਭਸਕ੍ਕਾਰਸਿਲੋਕੇਨਾਤਿ ਏਤ੍ਥ ਲਾਭੋ ਨਾਮ ਚਤੁਪਚ੍ਚਯਲਾਭੋ. ਸਕ੍ਕਾਰੋਤਿ ਤੇਸਂਯੇਵ ਸੁਕਤਾਨਂ ਸੁਸਙ੍ਖਤਾਨਂ ਲਾਭੋ. ਸਿਲੋਕੋਤਿ ਵਣ੍ਣਘੋਸੋ. ਮਨੋਮਯਂ ਕਾਯਨ੍ਤਿ ਝਾਨਮਨੇਨ ਨਿਬ੍ਬਤ੍ਤਂ ਬ੍ਰਹ੍ਮਕਾਯਂ. ਉਪਪਨ੍ਨੋਤਿ ਉਪਗਤੋ. ਅਤ੍ਤਭਾਵਪ੍ਪਟਿਲਾਭੋਤਿ ਸਰੀਰਪਟਿਲਾਭੋ. ਦ੍ਵੇ ਵਾ ਤੀਣਿ ਵਾ ਮਾਗਧਕਾਨਿ ਗਾਮਖੇਤ੍ਤਾਨੀਤਿ ਏਤ੍ਥ ਮਾਗਧਕਂ ਗਾਮਖੇਤ੍ਤਂ ਅਤ੍ਥਿ ਖੁਦ੍ਦਕਂ, ਅਤ੍ਥਿ ਮਜ੍ਝਿਮਂ, ਅਤ੍ਥਿ ਮਹਨ੍ਤਂ. ਖੁਦ੍ਦਕਂ ਗਾਮਖੇਤ੍ਤਂ ਇਤੋ ਚਤ੍ਤਾਲੀਸ ਉਸਭਾਨਿ, ਏਤ੍ਤੋ ਚਤ੍ਤਾਲੀਸ ਉਸਭਾਨੀਤਿ ਗਾਵੁਤਂ ਹੋਤਿ. ਮਜ੍ਝਿਮਂ ਇਤੋ ਗਾਵੁਤਂ, ਏਤ੍ਤੋ ਗਾਵੁਤਨ੍ਤਿ ਅਡ੍ਢਯੋਜਨਂ ਹੋਤਿ. ਮਹਨ੍ਤਂ ਇਤੋ ਦਿਯਡ੍ਢਗਾਵੁਤਂ, ਏਤ੍ਤੋ ਦਿਯਡ੍ਢਗਾਵੁਤਨ੍ਤਿ ਤਿਗਾਵੁਤਂ ਹੋਤਿ. ਤੇਸੁ ਖੁਦ੍ਦਕੇਨ ਗਾਮਖੇਤ੍ਤੇਨ ਤੀਣਿ, ਖੁਦ੍ਦਕੇਨ ਚ ਮਜ੍ਝਿਮੇਨ ਚ ਦ੍ਵੇ ਗਾਮਖੇਤ੍ਤਾਨਿ ਤਸ੍ਸ ਅਤ੍ਤਭਾਵੋ. ਤਿਗਾਵੁਤਞ੍ਹਿਸ੍ਸ ਸਰੀਰਂ. ਪਰਿਹਰਿਸ੍ਸਾਮੀਤਿ ਪਟਿਜਗ੍ਗਿਸ੍ਸਾਮਿ ਗੋਪਯਿਸ੍ਸਾਮਿ. ਰਕ੍ਖਸ੍ਸੇਤਨ੍ਤਿ ਰਕ੍ਖਸ੍ਸੁ ਏਤਂ.

ਪਞ੍ਚਸਤ੍ਥੁਕਥਾਵਣ੍ਣਨਾ

੩੩੪. ਸਤ੍ਥਾਰੋਤਿ ਗਣਸਤ੍ਥਾਰੋ. ਨਾਸ੍ਸਸ੍ਸਾਤਿ ਨ ਏਤਸ੍ਸ ਭਵੇਯ੍ਯ. ਤਨ੍ਤਿ ਤਂ ਸਤ੍ਥਾਰਂ. ਤੇਨਾਤਿ ਅਮਨਾਪੇਨ. ਸਮੁਦਾਚਰੇਯ੍ਯਾਮਾਤਿ ਕਥੇਯ੍ਯਾਮ. ਸਮ੍ਮਨ੍ਨਤੀਤਿ ਅਮ੍ਹਾਕਂ ਸਮ੍ਮਾਨਂ ਕਰੋਤਿ. ਤੇਨਾਹ ‘‘ਸਮ੍ਮਾਨੇਤੀ’’ਤਿ, ਸਮ੍ਮਨ੍ਨਤੀਤਿ ਵਾ ਪਰੇਹਿ ਸਮ੍ਮਾਨੀਯਤੀਤਿ ਅਤ੍ਥੋ.

੩੩੫. ਨਾਸਾਯ ਪਿਤ੍ਤਂ ਭਿਨ੍ਦੇਯ੍ਯੁਨ੍ਤਿ ਅਚ੍ਛਪਿਤ੍ਤਂ ਵਾ ਮਚ੍ਛਪਿਤ੍ਤਂ ਵਾ ਨਾਸਾਪੁਟੇ ਪਕ੍ਖਿਪੇਯ੍ਯੁਂ. ਪਰਾਭਵਾਯਾਤਿ ਅਵਡ੍ਢਿਯਾ ਵਿਨਾਸਾਯ. ਅਸ੍ਸਤਰੀਤਿ ਵਲ਼ਵਾਯ ਕੁਚ੍ਛਿਸ੍ਮਿਂ ਗਦ੍ਰਭਸ੍ਸਜਾਤਾ, ਤਂ ਅਸ੍ਸੇਨ ਸਦ੍ਧਿਂ ਸਮ੍ਪਯੋਜੇਨ੍ਤਿ, ਸਾ ਗਬ੍ਭਂ ਗਣ੍ਹਿਤ੍ਵਾ ਕਾਲੇ ਸਮ੍ਪਤ੍ਤੇ ਵਿਜਾਯਿਤੁਂ ਨ ਸਕ੍ਕੋਤਿ, ਪਾਦੇਹਿ ਭੂਮਿਂ ਪਹਰਨ੍ਤੀ ਤਿਟ੍ਠਤਿ, ਅਥਸ੍ਸਾ ਚਤ੍ਤਾਰੋ ਪਾਦੇ ਚਤੂਸੁ ਖਾਣੁਕੇਸੁ ਬਨ੍ਧਿਤ੍ਵਾ ਕੁਚ੍ਛਿਂ ਫਾਲੇਤ੍ਵਾ ਪੋਤਕਂ ਨੀਹਰਨ੍ਤਿ, ਸਾ ਤਤ੍ਥੇਵ ਮਰਤਿ. ਤੇਨ ਵੁਤ੍ਤਂ ‘‘ਅਤ੍ਤਵਧਾਯ ਗਬ੍ਭਂ ਗਣ੍ਹਾਤੀ’’ਤਿ.

੩੩੯. ਪੋਤ੍ਥਨਿਕਨ੍ਤਿ ਛੁਰਿਕਂ, ਯਂ ਖਰਨ੍ਤਿਪਿ ਵੁਚ੍ਚਤਿ.

ਨਾਲ਼ਾਗਿਰਿਪੇਸਨਕਥਾਵਣ੍ਣਨਾ

੩੪੨. ਮਾ ਕੁਞ੍ਜਰ ਨਾਗਮਾਸਦੋਤਿ ਭੋ, ਕੁਞ੍ਜਰ, ਬੁਦ੍ਧਨਾਗਂ ਵਧਕਚਿਤ੍ਤੇਨ ਮਾ ਉਪਗਚ੍ਛ. ਦੁਕ੍ਖਨ੍ਤਿ ਦੁਕ੍ਖਕਾਰਣਤ੍ਤਾ ਦੁਕ੍ਖਂ. ਕਥਂ ਤਂ ਦੁਕ੍ਖਨ੍ਤਿ ਆਹ ‘‘ਨ ਹਿ ਨਾਗਹਤਸ੍ਸਾ’’ਤਿਆਦਿ. ਨਾਗਹਤਸ੍ਸ ਸੁਗਤਿਪਟਿਕ੍ਖੇਪੇਨ ਬੁਦ੍ਧਨਾਗਸ੍ਸ ਘਾਤੋ ਦੁਗ੍ਗਤਿਦੁਕ੍ਖਕਾਰਣਨ੍ਤਿ ਦਸ੍ਸੇਤਿ. ਇਤੋਤਿ ਇਤੋ ਜਾਤਿਤੋ. ਯਤੋਤਿ ਯਸ੍ਮਾ. ਇਤੋ ਪਰਂ ਯਤੋਤਿ ਇਤੋ ਪਰਂ ਗਚ੍ਛਨ੍ਤਸ੍ਸਾਤਿ ਵਾ ਅਤ੍ਥੋ. ਮਦੋਤਿ ਮਾਨਮਦੋ. ਪਮਾਦੋਤਿ ਪਮਤ੍ਤਭਾਵੋ. ਪਟਿਕੁਟਿਤੋਤਿ ਸਙ੍ਕੁਟਿਤੋ. ਅਲਕ੍ਖਿਕੋਤਿ ਅਹਿਰਿਕੋ. ਯਤ੍ਰ ਹਿ ਨਾਮਾਤਿ ਯੋ ਨਾਮ.

ਪਞ੍ਚਵਤ੍ਥੁਯਾਚਨਕਥਾਵਣ੍ਣਨਾ

੩੪੩. ਤਿਕਭੋਜਨਨ੍ਤਿ ਤੀਹਿ ਭੁਞ੍ਜਿਤਬ੍ਬਭੋਜਨਂ, ਤਿਣ੍ਣਂ ਏਕਤੋ ਪਟਿਗ੍ਗਹੇਤ੍ਵਾ ਭੁਞ੍ਜਿਤੁਂ ਪਞ੍ਞਪੇਸ੍ਸਾਮੀਤਿ ਅਤ੍ਥੋ. ਕੋਕਾਲਿਕੋਤਿਆਦੀਨਿ ਚਤੁਨ੍ਨਂ ਦੇਵਦਤ੍ਤਪਕ੍ਖਿਯਾਨਂ ਗਣਪਾਮੋਕ੍ਖਾਨਂ ਨਾਮਾਨਿ. ਆਯੁਕਪ੍ਪਨ੍ਤਿ ਏਕਂ ਮਹਾਕਪ੍ਪਂ ਅਸੀਤਿਭਾਗਂ ਕਤ੍ਵਾ ਤਤੋ ਏਕਭਾਗਮਤ੍ਤਂ ਕਾਲਂ ਅਨ੍ਤਰਕਪ੍ਪਸਞ੍ਞਿਤਂ ਕਾਲਂ.

ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚਾਤਿ (ਉਦਾ. ਅਟ੍ਠ. ੪੮) ਦੇਵਦਤ੍ਤੋ ਸਬ੍ਬਂ ਸਙ੍ਘਭੇਦਸ੍ਸ ਪੁਬ੍ਬਭਾਗਂ ਨਿਪ੍ਫਾਦੇਤ੍ਵਾ ‘‘ਏਕਂਸੇਨੇਵ ਅਜ੍ਜ ਆਵੇਣਿਕਂ ਉਪੋਸਥਂ ਸਙ੍ਘਕਮ੍ਮਞ੍ਚ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਏਤਂ ‘‘ਅਜ੍ਜਤਗ੍ਗੇ’’ਤਿਆਦਿਵਚਨਂ ਅਵੋਚ. ਤਤ੍ਥ ਅਞ੍ਞਤ੍ਰੇਵ ਭਗਵਤਾਤਿ ਵਿਨਾ ਏਵ ਭਗਵਨ੍ਤਂ, ਤਂ ਸਤ੍ਥਾਰਂ ਅਕਤ੍ਵਾਤਿ ਅਤ੍ਥੋ. ਅਞ੍ਞਤ੍ਰ ਭਿਕ੍ਖੁਸਙ੍ਘਾ ਉਪੋਸਥਂ ਕਰਿਸ੍ਸਾਮਿ ਸਙ੍ਘਕਮ੍ਮਾਨਿ ਚਾਤਿ ਭਗਵਤੋ ਓਵਾਦਕਾਰਕਂ ਭਿਕ੍ਖੁਸਙ੍ਘਂ ਵਿਨਾ ਮਂ ਅਨੁਵਤ੍ਤਨ੍ਤੇਹਿ ਭਿਕ੍ਖੂਹਿ ਸਦ੍ਧਿਂ ਆਵੇਣਿਕਂ ਉਪੋਸਥਂ ਸਙ੍ਘਕਮ੍ਮਾਨਿ ਚ ਕਰਿਸ੍ਸਾਮਿ. ਅਜ੍ਜਤਗ੍ਗੇ, ਭਨ੍ਤੇ, ਦੇਵਦਤ੍ਤੋ ਸਙ੍ਘਂ ਭਿਨ੍ਦਿਸ੍ਸਤੀਤਿ ਭੇਦਕਾਰਕਾਨਂ ਸਬ੍ਬੇਸਂ ਦੇਵਦਤ੍ਤੇਨ ਸਜ੍ਜਿਤਤ੍ਤਾ ‘‘ਏਕਂਸੇਨੇਵ ਦੇਵਦਤ੍ਤੋ ਅਜ੍ਜ ਸਙ੍ਘਂ ਭਿਨ੍ਦਿਸ੍ਸਤੀ’’ਤਿ ਮਞ੍ਞਮਾਨੋ ਏਵਮਾਹ. ਭਿਨ੍ਦਿਸ੍ਸਤੀਤਿ ਦ੍ਵਿਧਾ ਕਰਿਸ੍ਸਤਿ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਅਵੀਚਿਮਹਾਨਿਰਯੁਪ੍ਪਤ੍ਤਿਸਂਵਤ੍ਤਨਿਯਂ ਕਪ੍ਪਟ੍ਠਿਯਂ ਅਤੇਕਿਚ੍ਛਂ ਦੇਵਦਤ੍ਤੇਨ ਨਿਬ੍ਬਤ੍ਤਿਯਮਾਨਂ ਸਙ੍ਘਭੇਦਕਮ੍ਮਂ ਸਬ੍ਬਾਕਾਰਤੋ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਕੁਸਲਾਕੁਸਲੇਸੁ ਯਥਾਕ੍ਕਮਂ ਸਪ੍ਪੁਰਿਸਾਸਪ੍ਪੁਰਿਸਾਨਂ ਸੁਕਰਾ ਪਟਿਪਤ੍ਤਿ, ਨ ਪਨ ਨੇਸਂ ਅਕੁਸਲਕੁਸਲੇਸੂਤਿ ਇਦਮਤ੍ਥਵਿਭਾਵਨਂ ਉਦਾਨਂ ਉਦਾਨੇਸਿ.

ਤਤ੍ਥ ਸੁਕਰਂ ਸਾਧੁਨਾ ਸਾਧੂਤਿ ਅਤ੍ਤਨੋ ਪਰੇਸਞ੍ਚ ਹਿਤਂ ਸਾਧੇਤੀਤਿ ਸਾਧੁ, ਸਮ੍ਮਾਪਟਿਪਨ੍ਨੋ. ਤੇਨ ਸਾਧੁਨਾ ਸਾਰਿਪੁਤ੍ਤਾਦਿਨਾ ਸਾਵਕੇਨ ਪਚ੍ਚੇਕਸਮ੍ਬੁਦ੍ਧੇਨ ਸਮ੍ਮਾਸਮ੍ਬੁਦ੍ਧੇਨ ਅਞ੍ਞੇਨ ਵਾ ਲੋਕਿਯਸਾਧੁਨਾ ਸਾਧੁ ਸੁਨ੍ਦਰਂ ਭਦ੍ਦਕਂ ਅਤ੍ਤਨੋ ਪਰੇਸਞ੍ਚ ਹਿਤਸੁਖਾਵਹਂ ਸੁਕਰਂ ਸੁਖੇਨ ਕਾਤੁਂ ਸਕ੍ਕਾ. ਸਾਧੁ ਪਾਪੇਨ ਦੁਕ੍ਕਰਨ੍ਤਿ ਤਦੇਵ ਪਨ ਵੁਤ੍ਤਲਕ੍ਖਣਂ ਸਾਧੁ ਪਾਪੇਨ ਦੇਵਦਤ੍ਤਾਦਿਨਾ ਪਾਪਪੁਗ੍ਗਲੇਨ ਦੁਕ੍ਕਰਂ ਕਾਤੁਂ ਨ ਸਕ੍ਕਾ, ਨ ਸੋ ਤਂ ਕਾਤੁਂ ਸਕ੍ਕੋਤੀਤਿ ਅਤ੍ਥੋ. ਪਾਪਂ ਪਾਪੇਨ ਸੁਕਰਨ੍ਤਿ ਪਾਪਂ ਅਸੁਨ੍ਦਰਂ ਅਤ੍ਤਨੋ ਪਰੇਸਞ੍ਚ ਅਨਤ੍ਥਾਵਹਂ ਪਾਪੇਨ ਯਥਾਵੁਤ੍ਤਪਾਪਪੁਗ੍ਗਲੇਨ ਸੁਕਰਂ ਸੁਖੇਨ ਕਾਤੁਂ ਸਕ੍ਕੁਣੇਯ੍ਯਂ. ਪਾਪਮਰਿਯੇਹਿ ਦੁਕ੍ਕਰਨ੍ਤਿ ਅਰਿਯੇਹਿ ਪਨ ਬੁਦ੍ਧਾਦੀਹਿ ਤਂ ਪਾਪਂ ਦੁਕ੍ਕਰਂ ਦੁਰਭਿਸਮ੍ਭਵਂ. ਸੇਤੁਘਾਤੋਯੇਵ ਹਿ ਤੇਸਂ ਤਤ੍ਥਾਤਿ ਦੀਪੇਤਿ.

ਸਙ੍ਘਭੇਦਕਥਾਵਣ੍ਣਨਾ

੩੪੫. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਆਦੇਸਨਾਪਾਟਿਹਾਰਿਯਾਨੁਸਾਸਨਿਯਾਤਿਆਦੀਸੁ ਪਰਸ੍ਸ ਚਿਤ੍ਤਂ ਞਤ੍ਵਾ ਕਥਨਂ ਆਦੇਸਨਾਪਾਟਿਹਾਰਿਯਂ, ਸਾਵਕਾਨਞ੍ਚ ਬੁਦ੍ਧਾਨਞ੍ਚ ਸਤਤਂ ਧਮ੍ਮਦੇਸਨਂ ਅਨੁਸਾਸਨੀਪਾਟਿਹਾਰਿਯਂ, ਇਦ੍ਧਿਵਿਧਂ ਇਦ੍ਧਿਪਾਟਿਹਾਰਿਯਂ. ਤਤ੍ਥ ਇਦ੍ਧਿਪਾਟਿਹਾਰਿਯੇਨ ਸਦ੍ਧਿਂ ਅਨੁਸਾਸਨੀਪਾਟਿਹਾਰਿਯਂ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਆਚਿਣ੍ਣਂ, ਆਦੇਸਨਾਪਾਟਿਹਾਰਿਯੇਨ ਸਦ੍ਧਿਂ ਅਨੁਸਾਸਨੀਪਾਟਿਹਾਰਿਯਂ ਧਮ੍ਮਸੇਨਾਪਤਿਸ੍ਸ. ਤੇਨ ਵੁਤ੍ਤਂ ‘‘ਆਯਸ੍ਮਾ ਸਾਰਿਪੁਤ੍ਤੋ ਆਦੇਸਨਾਪਾਟਿਹਾਰਿਯਾਨੁਸਾਸਨਿਯਾ ਭਿਕ੍ਖੂ ਧਮ੍ਮਿਯਾ ਕਥਾਯ ਓਵਦੀ’’ਤਿਆਦਿ. ਤਦਾ ਹਿ ਦ੍ਵੀਸੁ ਅਗ੍ਗਸਾਵਕੇਸੁ ਧਮ੍ਮਸੇਨਾਪਤਿ ਤੇਸਂ ਭਿਕ੍ਖੂਨਂ ਚਿਤ੍ਤਚਾਰਂ ਞਤ੍ਵਾ ਧਮ੍ਮਂ ਦੇਸੇਸਿ, ਮਹਾਮੋਗ੍ਗਲ੍ਲਾਨਤ੍ਥੇਰੋ ਵਿਕੁਬ੍ਬਨਂ ਦਸ੍ਸੇਤ੍ਵਾ ਧਮ੍ਮਂ ਦੇਸੇਸਿ, ਪਾਲ਼ਿਯਞ੍ਚੇਤ੍ਥ ਦ੍ਵਿਨ੍ਨਮ੍ਪਿ ਥੇਰਾਨਂ ਦੇਸਨਾਯ ਧਮ੍ਮਚਕ੍ਖੁਪਟਿਲਾਭੋਵ ਦਸ੍ਸਿਤੋ. ਦੀਘਭਾਣਕਾ ਪਨ ਏਵਂ ਵਦਨ੍ਤਿ ‘‘ਭਗਵਤਾ ਪੇਸਿਤੇਸੁ ਦ੍ਵੀਸੁ ਅਗ੍ਗਸਾਵਕੇਸੁ ਧਮ੍ਮਸੇਨਾਪਤਿ ਤੇਸਂ ਚਿਤ੍ਤਚਾਰਂ ਞਤ੍ਵਾ ਧਮ੍ਮਂ ਦੇਸੇਸਿ, ਥੇਰਸ੍ਸ ਧਮ੍ਮਦੇਸਨਂ ਸੁਤ੍ਵਾ ਪਞ੍ਚਸਤਾਪਿ ਭਿਕ੍ਖੂ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੁ. ਅਥ ਨੇਸਂ ਮਹਾਮੋਗ੍ਗਲ੍ਲਾਨਤ੍ਥੇਰੋ ਵਿਕੁਬ੍ਬਨਂ ਦਸ੍ਸੇਤ੍ਵਾ ਧਮ੍ਮਂ ਦੇਸੇਸਿ, ਤਂ ਸੁਤ੍ਵਾ ਸਬ੍ਬੇ ਅਰਹਤ੍ਤਫਲੇ ਪਤਿਟ੍ਠਹਿਂਸੂ’’ਤਿ. ਦੇਵਦਤ੍ਤਂ ਉਟ੍ਠਾਪੇਸੀਤਿ ਜਣ੍ਣੁਕੇਨ ਹਦਯਮਜ੍ਝੇ ਪਹਰਿਤ੍ਵਾ ਉਟ੍ਠਾਪੇਸਿ.

੩੪੬. ਸਰਸੀਤਿ ਸਰੋ. ਸੁਵਿਕ੍ਖਾਲਿਤਨ੍ਤਿ ਸੁਟ੍ਠੁ ਵਿਕ੍ਖਾਲਿਤਂ, ਸੁਵਿਸੋਧਿਤਂ ਕਤ੍ਵਾਤਿ ਅਤ੍ਥੋ. ਸਂਖਾਦਿਤ੍ਵਾਤਿ ਸੁਟ੍ਠੁ ਖਾਦਿਤ੍ਵਾ. ਮਹਿਂ ਵਿਕੁਬ੍ਬਤੋਤਿ ਮਹਿਂ ਦਨ੍ਤੇਹਿ ਵਿਲਿਖਨ੍ਤਸ੍ਸ. ਨਦੀਸੁ ਭਿਸਂ ਘਸਾਨਸ੍ਸਾਤਿ ਯੋਜੇਤਬ੍ਬਂ. ਨਦੀਤਿ ਚੇਤ੍ਥ ਮਹਾਸਰੋ ਅਧਿਪ੍ਪੇਤੋ. ਜਗ੍ਗਤੋਤਿ ਹਤ੍ਥਿਯੂਥਂ ਪਾਲੇਨ੍ਤਸ੍ਸ. ਭਿਙ੍ਕੋਵਾਤਿ ਹਤ੍ਥਿਪੋਤਕੋ ਵਿਯ. ਮਮਾਨੁਕੁਬ੍ਬਨ੍ਤਿ ਮਂ ਅਨੁਕਰੋਨ੍ਤੋ.

੩੪੭. ਦੂਤੇਯ੍ਯਨ੍ਤਿ ਦੂਤਕਮ੍ਮਂ. ਗਨ੍ਤੁਮਰਹਤੀਤਿ ਦੂਤੇਯ੍ਯਸਙ੍ਖਾਤਂ ਸਾਸਨਂ ਹਰਿਤੁਂ ਧਾਰੇਤ੍ਵਾ ਹਰਿਤੁਂ ਅਰਹਤਿ. ਸੋਤਾਤਿ ਯਂ ਅਸ੍ਸ ਸਾਸਨਂ ਦੇਨ੍ਤਿ, ਤਸ੍ਸ ਸੋਤਾ. ਸਾਵੇਤਾਤਿ ਤਂ ਉਗ੍ਗਣ੍ਹਿਤ੍ਵਾ ‘‘ਇਦਂ ਨਾਮ ਤੁਮ੍ਹੇਹਿ ਵੁਤ੍ਤ’’ਨ੍ਤਿ ਪਟਿਸਾਵੇਤਾ. ਉਗ੍ਗਹੇਤਾਤਿ ਸੁਉਗ੍ਗਹਿਤਂ ਕਤ੍ਵਾ ਉਗ੍ਗਹੇਤਾ. ਧਾਰੇਤਾਤਿ ਸੁਧਾਰਿਤਂ ਕਤ੍ਵਾ ਧਾਰੇਤਾ. ਵਿਞ੍ਞਾਤਾਤਿ ਅਤ੍ਤਨਾ ਤਸ੍ਸ ਅਤ੍ਥਂ ਜਾਨਿਤਾ. ਵਿਞ੍ਞਾਪੇਤਾਤਿ ਪਰਂ ਵਿਜਾਨਾਪੇਤਾ. ਸਹਿਤਾਸਹਿਤਸ੍ਸਾਤਿ ‘‘ਇਦਂ ਸਹਿਤਂ, ਇਦਂ ਅਸਹਿਤ’’ਨ੍ਤਿ ਏਵਂ ਸਹਿਤਾਸਹਿਤਸ੍ਸ ਕੁਸਲੋ ਉਪਗਤਾਨੁਪਗਤੇਸੁ ਛੇਕੋ ਸਾਸਨਂ ਆਰੋਚੇਨ੍ਤੋ ਸਹਿਤਾਸਹਿਤਂ ਸਲ੍ਲਕ੍ਖੇਤ੍ਵਾ ਆਰੋਚੇਤਿ. ਨ ਬ੍ਯਥਤੀਤਿ ਨ ਵੇਧਤਿ ਨ ਛਮ੍ਭਤਿ. ਉਗ੍ਗਵਾਦਿਨਿਨ੍ਤਿ ਫਰੁਸਵਚਨੇਨ ਸਮਨ੍ਨਾਗਤਂ. ਪੁਚ੍ਛਿਤੋਤਿ ਪਟਿਞ੍ਞਤ੍ਥਾਯ ਪੁਚ੍ਛਿਤੋ.

੩੪੮. ਅਟ੍ਠਹਿ, ਭਿਕ੍ਖਵੇ, ਅਸਦ੍ਧਮ੍ਮੇਹੀਤਿਆਦੀਸੁ ਅਸਦ੍ਧਮ੍ਮੇਹੀਤਿ (ਇਤਿਵੁ. ਅਟ੍ਠ. ੮੯) ਅਸਤਂ ਧਮ੍ਮੇਹਿ, ਅਸਨ੍ਤੇਹਿ ਵਾ ਅਸੋਭਨੇਹਿ ਵਾ ਧਮ੍ਮੇਹਿ. ਅਭਿਭੂਤੋਤਿ ਅਜ੍ਝੋਤ੍ਥਟੋ. ਪਰਿਯਾਦਿਨ੍ਨਚਿਤ੍ਤੋਤਿ ਖੇਪਿਤਚਿਤ੍ਤੋ ਲਾਭਾਦਿਹੇਤੁਕੇਨ ਇਚ੍ਛਾਚਾਰੇਨ ਮਾਨਮਦਾਦਿਨਾ ਚ ਖਯਂ ਪਾਪਿਤਕੁਸਲਚਿਤ੍ਤੋ. ਅਥ ਵਾ ਪਰਿਯਾਦਿਨ੍ਨਚਿਤ੍ਤੋਤਿ ਪਰਿਤੋ ਆਦਿਨ੍ਨਚਿਤ੍ਤੋ, ਵੁਤ੍ਤਪ੍ਪਕਾਰੇਨ ਅਕੁਸਲਕੋਟ੍ਠਾਸੇਨ ਯਥਾ ਕੁਸਲਚਿਤ੍ਤਸ੍ਸ ਉਪ੍ਪਤ੍ਤਿਵਾਰੋ ਨ ਹੋਤਿ, ਏਵਂ ਸਮਨ੍ਤਤੋ ਗਹਿਤਚਿਤ੍ਤਸਨ੍ਤਾਨੋਤਿ ਅਤ੍ਥੋ. ਅਪਾਯੇ ਨਿਬ੍ਬਤ੍ਤਨਾਰਹਤਾਯ ਆਪਾਯਿਕੋ. ਤਤ੍ਥਪਿ ਅਵੀਚਿਸਙ੍ਖਾਤੇ ਮਹਾਨਿਰਯੇ ਉਪ੍ਪਜ੍ਜਤੀਤਿ ਨੇਰਯਿਕੋ. ਏਕਂ ਅਨ੍ਤਰਕਪ੍ਪਂ ਪਰਿਪੁਣ੍ਣਮੇਵ ਕਤ੍ਵਾ ਤਤ੍ਥ ਤਿਟ੍ਠਤੀਤਿ ਕਪ੍ਪਟ੍ਠੋ. ਅਤੇਕਿਚ੍ਛੋਤਿ ਬੁਦ੍ਧੇਹਿਪਿ ਅਨਿਵਤ੍ਤਨੀਯਤ੍ਤਾ ਅਵੀਚਿਨਿਬ੍ਬਤ੍ਤਿਯਾ ਤਿਕਿਚ੍ਛਾਭਾਵਤੋ ਅਤੇਕਿਚ੍ਛੋ, ਅਤਿਕਿਚ੍ਛਨੀਯੋਤਿ ਅਤ੍ਥੋ. ਲਾਭੇਨਾਤਿ ਲਾਭੇਨ ਹੇਤੁਭੂਤੇਨ. ਅਥ ਵਾ ਲਾਭਹੇਤੁਕੇਨ ਮਾਨਾਦਿਨਾ. ਲਾਭਞ੍ਹਿ ਨਿਸ੍ਸਾਯ ਇਧੇਕਚ੍ਚੇ ਪੁਗ੍ਗਲਾ ਪਾਪਿਚ੍ਛਾ ਇਚ੍ਛਾਪਕਤਾ ਇਚ੍ਛਾਚਾਰੇ ਠਤ੍ਵਾ ‘‘ਲਾਭਂ ਨਿਬ੍ਬਤ੍ਤੇਸ੍ਸਾਮਾ’’ਤਿ ਅਨੇਕਵਿਹਿਤਂ ਅਨੇਸਨਂ ਅਪ੍ਪਤਿਰੂਪਂ ਆਪਜ੍ਜਿਤ੍ਵਾ ਇਤੋ ਚੁਤਾ ਅਪਾਯੇਸੁ ਨਿਬ੍ਬਤ੍ਤਨ੍ਤਿ. ਅਪਰੇ ਯਥਾਲਾਭਂ ਲਭਿਤ੍ਵਾ ਤਂਨਿਮਿਤ੍ਤਂ ਮਾਨਾਤਿਮਾਨਮਦਮਚ੍ਛਰਿਯਾਦਿਵਸੇਨ ਪਮਾਦਂ ਆਪਜ੍ਜਿਤ੍ਵਾ ਇਤੋ ਚੁਤਾ ਅਪਾਯੇਸੁ ਨਿਬ੍ਬਤ੍ਤਨ੍ਤਿ, ਅਯਞ੍ਚ ਤਾਦਿਸੋ. ਤੇਨ ਵੁਤ੍ਤਂ ‘‘ਲਾਭੇਨ, ਭਿਕ੍ਖਵੇ, ਅਭਿਭੂਤੋ ਪਰਿਯਾਦਿਨ੍ਨਚਿਤ੍ਤੋ ਦੇਵਦਤ੍ਤੋ ਆਪਾਯਿਕੋ’’ਤਿਆਦਿ. ਅਸਕ੍ਕਾਰੇਨਾਤਿ ਹੀਲ਼ੇਤ੍ਵਾ ਪਰਿਭਵਿਤ੍ਵਾ ਪਰੇਹਿ ਅਤ੍ਤਨਿ ਪਵਤ੍ਤਿਤੇਨ ਅਸਕ੍ਕਾਰੇਨ, ਅਸਕ੍ਕਾਰਹੇਤੁਕੇਨ ਵਾ ਮਾਨਾਦਿਨਾ. ਅਸਨ੍ਤਗੁਣਸਮ੍ਭਾਵਨਾਧਿਪ੍ਪਾਯੇਨ ਪਵਤ੍ਤਾ ਪਾਪਾ ਇਚ੍ਛਾ ਏਤਸ੍ਸਾਤਿ ਪਾਪਿਚ੍ਛੋ, ਤਸ੍ਸ ਭਾਵੋ ਪਾਪਿਚ੍ਛਤਾ, ਤਾਯ. ‘‘ਅਹਂ ਬੁਦ੍ਧੋ ਭਵਿਸ੍ਸਾਮਿ, ਭਿਕ੍ਖੁਸਙ੍ਘਂ ਪਰਿਹਰਿਸ੍ਸਾਮੀ’’ਤਿ ਹਿ ਤਸ੍ਸ ਇਚ੍ਛਾ ਉਪ੍ਪਨ੍ਨਾ. ਕੋਕਾਲਿਕਾਦਯੋ ਪਾਪਾ ਲਾਮਕਾ ਮਿਤ੍ਤਾ ਏਤਸ੍ਸਾਤਿ ਪਾਪਮਿਤ੍ਤੋ, ਤਸ੍ਸ ਭਾਵੋ ਪਾਪਮਿਤ੍ਤਤਾ, ਤਾਯ.

੩੪੯. ਅਭਿਭੁਯ੍ਯਾਤਿ ਅਭਿਭਵਿਤ੍ਵਾ ਮਦ੍ਦਿਤ੍ਵਾ.

੩੫੦. ਤੀਹਿ, ਭਿਕ੍ਖਵੇ, ਅਸਦ੍ਧਮ੍ਮੇਹੀਤਿਆਦਿ ਵੁਤ੍ਤਨਯਮੇਵ. ਓਰਮਤ੍ਤਕੇਨ ਵਿਸੇਸਾਧਿਗਮੇਨ ਅਨ੍ਤਰਾ ਵੋਸਾਨਂ ਆਪਾਦੀਤਿ ਏਤ੍ਥ ਪਨ ਅਯਮਤ੍ਥੋ. ਓਰਮਤ੍ਤਕੇਨਾਤਿ ਅਪ੍ਪਮਤ੍ਤਕੇਨ ਝਾਨਾਭਿਞ੍ਞਾਮਤ੍ਤੇਨ. ਵਿਸੇਸਾਧਿਗਮੇਨਾਤਿ ਉਤ੍ਤਰਿਮਨੁਸ੍ਸਧਮ੍ਮਾਧਿਗਮੇਨ. ਅਨ੍ਤਰਾਤਿ ਵੇਮਜ੍ਝੇ. ਵੋਸਾਨਂ ਆਪਾਦੀਤਿ ਅਕਤਕਿਚ੍ਚੋਵ ਸਮਾਨੋ ‘‘ਕਤਕਿਚ੍ਚੋਮ੍ਹੀ’’ਤਿ ਮਞ੍ਞਮਾਨੋ ਸਮਣਧਮ੍ਮਤੋ ਵਿਗਮਂ ਆਪਜ੍ਜਿ. ਇਦਂ ਵੁਤ੍ਤਂ ਹੋਤਿ – ਝਾਨਾਭਿਞ੍ਞਾਹਿ ਉਤ੍ਤਰਿਕਰਣੀਯੇ ਅਧਿਗਨ੍ਤਬ੍ਬੇ ਮਗ੍ਗਫਲੇ ਅਨਧਿਗਤੇ ਸਤਿਯੇਵ ਤਂ ਅਨਧਿਗਨ੍ਤ੍ਵਾ ਸਮਣਧਮ੍ਮਤੋ ਵਿਗਮਂ ਆਪਜ੍ਜੀਤਿ. ਇਤਿ ਭਗਵਾ ਇਮਿਨਾ ਸੁਤ੍ਤੇਨ ਵਿਸੇਸਤੋ ਪੁਥੁਜ੍ਜਨਭਾਵੇ ਆਦੀਨਵਂ ਪਕਾਸੇਤਿ ‘‘ਭਾਰਿਯੋ ਪੁਥੁਜ੍ਜਨਭਾਵੋ, ਯਤ੍ਰ ਹਿ ਨਾਮ ਝਾਨਾਭਿਞ੍ਞਾਪਰਿਯੋਸਾਨਾ ਸਮ੍ਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾਪਿ ਅਨੇਕਾਨਤ੍ਥਾਵਹਂ ਨਾਨਾਵਿਧਦੁਕ੍ਖਹੇਤੁਅਸਨ੍ਤਗੁਣਸਮ੍ਭਾਵਨਂ ਅਸਪ੍ਪੁਰਿਸਸਂਸਗ੍ਗਂ ਆਲਸਿਯਾਨੁਯੋਗਞ੍ਚ ਅਵਿਜਹਨ੍ਤੋ ਅਵੀਚਿਸਂਵਤ੍ਤਨਿਕਂ ਕਪ੍ਪਟ੍ਠਿਯਂ ਅਤੇਕਿਚ੍ਛਂ ਕਿਬ੍ਬਿਸਂ ਪਸਵਤੀ’’ਤਿ.

ਗਾਥਾਸੁ ਮਾਤਿ ਪਟਿਸੇਧੇ ਨਿਪਾਤੋ. ਜਾਤੂਤਿ ਏਕਂਸੇਨ. ਕੋਚੀਤਿ ਸਬ੍ਬਸਙ੍ਗਾਹਕਵਚਨਂ. ਲੋਕਸ੍ਮਿਨ੍ਤਿ ਸਤ੍ਤਲੋਕੇ. ਇਦਂ ਵੁਤ੍ਤਂ ਹੋਤਿ – ਇਮਸ੍ਮਿਂ ਸਤ੍ਤਲੋਕੇ ਕੋਚਿ ਪੁਗ੍ਗਲੋ ਏਕਂਸੇਨ ਪਾਪਿਚ੍ਛੋ ਮਾ ਹੋਤੂਤਿ. ਤਦਮਿਨਾਪਿ ਜਾਨਾਥ, ਪਾਪਿਚ੍ਛਾਨਂ ਯਥਾ ਗਤੀਤਿ ਪਾਪਿਚ੍ਛਾਨਂ ਪੁਗ੍ਗਲਾਨਂ ਯਥਾਗਤਿ ਯਾਦਿਸੀ ਨਿਬ੍ਬਤ੍ਤਿ ਯਾਦਿਸੋ ਅਭਿਸਮ੍ਪਰਾਯੋਤਿ ਇਮਿਨਾਪਿ ਕਾਰਣੇਨ ਜਾਨਾਥਾਤਿ ਦੇਵਦਤ੍ਤਂ ਨਿਦਸ੍ਸੇਨ੍ਤੋ ਏਵਮਾਹ.

ਪਣ੍ਡਿਤੋਤਿ ਸਮਞ੍ਞਾਤੋਤਿ ਪਰਿਯਤ੍ਤਿਬਾਹੁਸਚ੍ਚੇਨ ਪਣ੍ਡਿਤੋਤਿ ਞਾਤੋ. ਭਾਵਿਤਤ੍ਤੋਤਿ ਸਮ੍ਮਤੋਤਿ ਝਾਨਾਭਿਞ੍ਞਾਹਿ ਭਾਵਿਤਚਿਤ੍ਤੋਤਿ ਸਮ੍ਭਾਵਿਤੋ. ਤਥਾ ਹਿ ਸੋ ‘‘ਮਹਿਦ੍ਧਿਕੋ ਗੋਧਿਪੁਤ੍ਤੋ, ਮਹਾਨੁਭਾਵੋ ਗੋਧਿਪੁਤ੍ਤੋ’’ਤਿ ਧਮ੍ਮਸੇਨਾਪਤਿਨਾਪਿ ਪਸਂਸਿਤੋ ਅਹੋਸਿ. ਜਲਂਵ ਯਸਸਾ ਅਟ੍ਠਾ, ਦੇਵਦਤ੍ਤੋਤਿ ਵਿਸ੍ਸੁਤੋਤਿ ਅਤ੍ਤਨੋ ਕਿਤ੍ਤਿਯਾ ਪਰਿਵਾਰੇਨ ਚ ਜਲਨ੍ਤੋ ਵਿਯ ਓਭਾਸਨ੍ਤੋ ਵਿਯ ਠਿਤੋ ਦੇਵਦਤ੍ਤੋਤਿ ਏਵਂ ਵਿਸ੍ਸੁਤੋ ਪਾਕਟੋ ਅਹੋਸਿ. ‘‘ਮੇ ਸੁਤ’’ਨ੍ਤਿਪਿ ਪਾਠੋ, ਮਯਾ ਸੁਤਂ ਸੁਤਮਤ੍ਤਂ, ਕਤਿਪਾਹੇਨੇਵ ਅਤਥਾਭੂਤਤ੍ਤਾ ਤਸ੍ਸ ਤਂ ਪਣ੍ਡਿਚ੍ਚਾਦਿਸਵਨਮਤ੍ਤਮੇਵਾਤਿ ਅਤ੍ਥੋ.

ਸੋ ਪਮਾਦਂ ਅਨੁਚਿਣ੍ਣੋ, ਆਸਜ੍ਜ ਨਂ ਤਥਾਗਤਨ੍ਤਿ ਸੋ ਏਵਂਭੂਤੋ ਦੇਵਦਤ੍ਤੋ ‘‘ਬੁਦ੍ਧੋਪਿ ਸਾਕਿਯਪੁਤ੍ਤੋ, ਅਹਮ੍ਪਿ ਸਾਕਿਯਪੁਤ੍ਤੋ, ਬੁਦ੍ਧੋਪਿ ਸਮਣੋ, ਅਹਮ੍ਪਿ ਸਮਣੋ, ਬੁਦ੍ਧੋਪਿ ਇਦ੍ਧਿਮਾ, ਅਹਮ੍ਪਿ ਇਦ੍ਧਿਮਾ, ਬੁਦ੍ਧੋਪਿ ਦਿਬ੍ਬਚਕ੍ਖੁਕੋ, ਦਿਬ੍ਬਸੋਤਚੇਤੋਪਰਿਯਞਾਣਲਾਭੀ, ਬੁਦ੍ਧੋਪਿ ਅਤੀਤਾਨਾਗਤਪਚ੍ਚੁਪ੍ਪਨ੍ਨੇ ਧਮ੍ਮੇ ਜਾਨਾਤਿ, ਅਹਮ੍ਪਿ ਤੇ ਜਾਨਾਮੀ’’ਤਿ ਅਤ੍ਤਨੋ ਪਮਾਣਂ ਅਜਾਨਿਤ੍ਵਾ ਸਮ੍ਮਾਸਮ੍ਬੁਦ੍ਧਂ ਅਤ੍ਤਨਾ ਸਮਸਮਟ੍ਠਪਨੇਨ ਪਮਾਦਂ ਆਪਜ੍ਜਨ੍ਤੋ ‘‘ਇਦਾਨਾਹਂ ਬੁਦ੍ਧੋ ਭਵਿਸ੍ਸਾਮਿ, ਭਿਕ੍ਖੁਸਙ੍ਘਂ ਪਰਿਹਰਿਸ੍ਸਾਮੀ’’ਤਿ ਅਭਿਮਾਰਪਯੋਜਨਾਦਿਨਾ ਤਥਾਗਤਂ ਆਸਜ੍ਜ ਆਸਾਦੇਤ੍ਵਾ ਵਿਹੇਠੇਤ੍ਵਾ. ‘‘ਪਮਾਦਮਨੁਜਿਣ੍ਣੋ’’ਤਿਪਿ ਪਠਨ੍ਤਿ. ਤਸ੍ਸਤ੍ਥੋ – ਪਮਾਦਂ ਵੁਤ੍ਤਨਯੇਨ ਪਮਜ੍ਜਨ੍ਤੋ ਪਮਾਦਂ ਨਿਸ੍ਸਾਯ ਭਗਵਤਾ ਸਦ੍ਧਿਂ ਯੁਗਗ੍ਗਾਹਚਿਤ੍ਤੁਪ੍ਪਾਦੇਨ ਸਹੇਵ ਝਾਨਾਭਿਞ੍ਞਾਹਿ ਅਨੁਜਿਣ੍ਣੋ ਪਰਿਹੀਨੋਤਿ. ਅਵੀਚਿਨਿਰਯਂ ਪਤ੍ਤੋ, ਚਤੁਦ੍ਵਾਰਂ ਭਯਾਨਕਨ੍ਤਿ ਜਾਲਾਨਂ ਤਤ੍ਥ ਉਪ੍ਪਨ੍ਨਸਤ੍ਤਾਨਂ ਵਾ ਨਿਰਨ੍ਤਰਤਾਯ ‘‘ਅਵੀਚੀ’’ਤਿ ਲਦ੍ਧਨਾਮਂ ਚਤੂਸੁ ਪਸ੍ਸੇਸੁ ਚਤੁਮਹਾਦ੍ਵਾਰਯੋਗੇਨ ਚਤੁਦ੍ਵਾਰਂ ਅਤਿਭਯਾਨਕਂ ਮਹਾਨਿਰਯਂ ਪਟਿਸਨ੍ਧਿਗ੍ਗਹਣਵਸੇਨ ਪਤ੍ਤੋ. ਤਥਾ ਹਿ ਵੁਤ੍ਤਂ –

‘‘ਚਤੁਕ੍ਕਣ੍ਣੋ ਚਤੁਦ੍ਵਾਰੋ, ਵਿਭਤ੍ਤੋ ਭਾਗਸੋ ਮਿਤੋ;

ਅਯੋਪਾਕਾਰਪਰਿਯਨ੍ਤੋ, ਅਯਸਾ ਪਟਿਕੁਜ੍ਜਿਤੋ.

‘‘ਤਸ੍ਸ ਅਯੋਮਯਾ ਭੂਮਿ, ਜਲਿਤਾ ਤੇਜਸਾ ਯੁਤਾ;

ਸਮਨ੍ਤਾ ਯੋਜਨਸਤਂ, ਫਰਿਤ੍ਵਾ ਤਿਟ੍ਠਤਿ ਸਬ੍ਬਦਾ’’ਤਿ. (ਮ. ਨਿ. ੩.੨੫੦, ੨੬੭; ਅ. ਨਿ. ੩.੩੬);

ਅਦੁਟ੍ਠਸ੍ਸਾਤਿ ਅਦੁਟ੍ਠਚਿਤ੍ਤਸ੍ਸ. ਦੁਬ੍ਭੇਤਿ ਦੁਸ੍ਸੇਯ੍ਯ. ਤਮੇਵ ਪਾਪਂ ਫੁਸਤੀਤਿ ਤਮੇਵ ਅਦੁਟ੍ਠਦੁਬ੍ਭਿਂ ਪਾਪਪੁਗ੍ਗਲਂ ਪਾਪਂ ਨਿਹੀਨਂ ਪਾਪਫਲਂ ਫੁਸਤਿ ਪਾਪੁਣਾਤਿ ਅਭਿਭਵਤਿ. ਭੇਸ੍ਮਾਤਿ ਵਿਪੁਲਭਾਵੇਨ ਗਮ੍ਭੀਰਭਾਵੇਨ ਚ ਭਿਂਸਾਪਨੋ, ਭਿਂਸਾਪੇਨ੍ਤੋ ਵਿਯ ਵਿਪੁਲਗਮ੍ਭੀਰੋਤਿ ਅਤ੍ਥੋ. ਵਾਦੇਨਾਤਿ ਦੋਸੇਨ. ਉਪਹਿਂਸਤੀਤਿ ਬਾਧਤਿ ਆਸਾਦੇਤਿ. ਵਾਦੋ ਤਮ੍ਹਿ ਨ ਰੂਹਤੀਤਿ ਤਸ੍ਮਿਂ ਤਥਾਗਤੇ ਪਰੇਨ ਆਰੋਪਿਯਮਾਨੋ ਦੋਸੋ ਨ ਰੁਹਤਿ ਨ ਤਿਟ੍ਠਤਿ, ਵਿਸਕੁਮ੍ਭੋ ਵਿਯ ਸਮੁਦ੍ਦਸ੍ਸ ਨ ਤਸ੍ਸ ਵਿਕਾਰਂ ਜਨੇਤੀਤਿ ਅਤ੍ਥੋ.

ਏਵਂ ਛਹਿ ਗਾਥਾਹਿ ਪਾਪਿਚ੍ਛਤਾਦਿਸਮਨ੍ਨਾਗਤਸ੍ਸ ਨਿਰਯੂਪਗਭਾਵਦਸ੍ਸਨੇਨ ਦੁਕ੍ਖਤੋ ਅਪਰਿਮੁਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਤਪ੍ਪਟਿਪਕ੍ਖਧਮ੍ਮਸਮਨ੍ਨਾਗਤਸ੍ਸ ਦੁਕ੍ਖਕ੍ਖਯਂ ਦਸ੍ਸੇਨ੍ਤੋ ‘‘ਤਾਦਿਸਂ ਮਿਤ੍ਤ’’ਨ੍ਤਿ ਓਸਾਨਗਾਥਮਾਹ. ਤਸ੍ਸਤ੍ਥੋ – ਯਸ੍ਸ ਸਮ੍ਮਾ ਪਟਿਪਨ੍ਨਸ੍ਸ ਮਗ੍ਗਾਨੁਗੋ ਪਟਿਪਤ੍ਤਿਮਗ੍ਗਂ ਅਨੁਗਤੋ ਸਮ੍ਮਾ ਪਟਿਪਨ੍ਨੋ ਅਪ੍ਪਿਚ੍ਛਤਾਦਿਗੁਣਸਮਨ੍ਨਾਗਮੇਨ ਸਕਲਸ੍ਸ ਵਟ੍ਟਦੁਕ੍ਖਸ੍ਸ ਖਯਂ ਪਰਿਯੋਸਾਨਂ ਪਾਪੁਣੇਯ੍ਯ, ਤਾਦਿਸਂ ਬੁਦ੍ਧਂ ਬੁਦ੍ਧਸਾਵਕਂ ਵਾ ਪਣ੍ਡਿਤੋ ਸਪ੍ਪਞ੍ਞੋ ਅਤ੍ਤਨੋ ਮਿਤ੍ਤਂ ਕੁਬ੍ਬੇਥ ਤੇਨ ਮੇਤ੍ਤਿਂ ਕਰੇਯ੍ਯ, ਤਞ੍ਚ ਸੇਵੇਥ ਤਮੇਵ ਪਯਿਰੁਪਾਸੇਯ੍ਯਾਤਿ.

ਕਿਂ ਪਨੇਤਂ ਸੁਤ੍ਤਂ ਦੇਵਦਤ੍ਤਸ੍ਸ ਨਿਰਯੂਪਪਤ੍ਤਿਤੋ ਪੁਬ੍ਬੇ ਭਾਸਿਤਂ, ਉਦਾਹੁ ਪਚ੍ਛਾਤਿ? ਇਤਿਵੁਤ੍ਤਕਟ੍ਠਕਥਾਯਂ (ਇਤਿਵੁ. ਅਟ੍ਠ. ੮੯) ਤਾਵ –

‘‘ਦੇਵਦਤ੍ਤੇ ਹਿ ਅਵੀਚਿਮਹਾਨਿਰਯਂ ਪਵਿਟ੍ਠੇ ਦੇਵਦਤ੍ਤਪਕ੍ਖਿਕਾ ਅਞ੍ਞਤਿਤ੍ਥਿਯਾ ‘ਸਮਣੇਨ ਗੋਤਮੇਨ ਅਭਿਸਪਿਤੋ ਦੇਵਦਤ੍ਤੋ ਪਥਵਿਂ ਪਵਿਟ੍ਠੋ’ਤਿ ਅਬ੍ਭਾਚਿਕ੍ਖਿਂਸੁ. ਤਂ ਸੁਤ੍ਵਾ ਸਾਸਨੇ ਅਨਭਿਪ੍ਪਸਨ੍ਨਾ ਮਨੁਸ੍ਸਾ ‘ਸਿਯਾ ਨੁ ਖੋ ਏਤਦੇਵਂ, ਯਥਾ ਇਮੇ ਭਣਨ੍ਤੀ’ਤਿ ਆਸਙ੍ਕਂ ਉਪ੍ਪਾਦੇਸੁਂ. ਤਂ ਪਵਤ੍ਤਿਂ ਭਿਕ੍ਖੂ ਭਗਵਤੋ ਆਰੋਚੇਸੁਂ. ਅਥ ਖੋ ਭਗਵਾ ‘ਨ, ਭਿਕ੍ਖਵੇ, ਤਥਾਗਤਾ ਕਸ੍ਸਚਿ ਅਭਿਸਪਂ ਦੇਨ੍ਤਿ, ਤਸ੍ਮਾ ਨ ਦੇਵਦਤ੍ਤੋ ਮਯਾ ਅਭਿਸਪਿਤੋ, ਅਤ੍ਤਨੋ ਕਮ੍ਮੇਨੇਵ ਨਿਰਯਂ ਪਵਿਟ੍ਠੋ’ਤਿ ਵਤ੍ਵਾ ਤੇਸਂ ਮਿਚ੍ਛਾਗਾਹਂ ਪਟਿਸੇਧੇਨ੍ਤੋ ਇਮਾਯ ਅਟ੍ਠੁਪ੍ਪਤ੍ਤਿਯਾ ਇਦਂ ਸੁਤ੍ਤਂ ਅਭਾਸੀ’’ਤਿ –

ਵੁਤ੍ਤਂ, ਤਸ੍ਮਾ ਤੇਸਂ ਮਤੇਨ ਤਸ੍ਸ ਨਿਰਯੂਪਪਤ੍ਤਿਤੋ ਪਚ੍ਛਾਪਿ ਭਗਵਾ ਇਦਂ ਸੁਤ੍ਤਮਭਾਸੀਤਿ ਵੇਦਿਤਬ੍ਬਂ. ਇਧ ਪਨ ਤਸ੍ਸ ਨਿਰਯੂਪਪਤ੍ਤਿਤੋ ਪਠਮਮੇਵ ਉਪ੍ਪਨ੍ਨੇ ਵਤ੍ਥੁਮ੍ਹਿ ਭਾਸਿਤਂ ਪਾਲ਼ਿਆਰੁਲ਼੍ਹਨ੍ਤਿ ਦਟ੍ਠਬ੍ਬਂ. ਤੇਨੇਵ ‘‘ਅਵੀਚਿਨਿਰਯਂ ਪਤ੍ਤੋ’’ਤਿ ਇਦਂ ਪਨ ਆਸਂਸਾਯਂ ਅਤੀਤਵਚਨਨ੍ਤਿ ਵੁਤ੍ਤਂ, ਆਸਂਸਾਤਿ ਚੇਤ੍ਥ ਅਵਸ੍ਸਮ੍ਭਾਵਿਨੀ ਅਤ੍ਥਸਿਦ੍ਧਿ ਅਧਿਪ੍ਪੇਤਾ. ਅਵਸ੍ਸਮ੍ਭਾਵਿਨਿਞ੍ਹਿ ਅਤ੍ਥਸਿਦ੍ਧਿਮਪੇਕ੍ਖਿਤ੍ਵਾ ਅਨਾਗਤਮ੍ਪਿ ਭੂਤਂ ਵਿਯ ਵੋਹਰਨ੍ਤਿ, ਤਞ੍ਚ ਸਦ੍ਦਲਕ੍ਖਣਾਨੁਸਾਰੇਨ ਵੇਦਿਤਬ੍ਬਂ.

ਸਙ੍ਘਭੇਦਕਥਾਵਣ੍ਣਨਾ ਨਿਟ੍ਠਿਤਾ.

ਉਪਾਲਿਪਞ੍ਹਕਥਾਵਣ੍ਣਨਾ

੩੫੧. ਉਪਾਲਿਪਞ੍ਹੇ ਯਂ ਵਤ੍ਤਬ੍ਬਂ, ਤਂ ਅਟ੍ਠਕਥਾਯਂ ਦਸ੍ਸਿਤਮੇਵ. ਤਤ੍ਥ ਅਨੁਨਯਨ੍ਤੋਤਿ ਅਨੁਜਾਨਾਪੇਨ੍ਤੋ, ਭੇਦਸ੍ਸ ਅਨੁਰੂਪਂ ਵਾ ਬੋਧੇਨ੍ਤੋ, ਯਥਾ ਭੇਦੋ ਹੋਤਿ, ਏਵਂ ਭਿਨ੍ਦਿਤਬ੍ਬੇ ਭਿਕ੍ਖੂ ਵਿਞ੍ਞਾਪੇਨ੍ਤੋਤਿ ਅਤ੍ਥੋ. ਤੇਨਾਹ ‘‘ਨ ਤੁਮ੍ਹਾਕ’’ਨ੍ਤਿਆਦਿ.

੩੫੨. ਅਟ੍ਠਾਰਸਭੇਦਕਰਵਤ੍ਥੁਮ੍ਹਿ ਦਸ ਅਕੁਸਲਕਮ੍ਮਪਥਾ ਸਂਕਿਲਿਟ੍ਠਧਮ੍ਮਤਾਯ ਵੋਦਾਨਧਮ੍ਮਪਅਪਕ੍ਖਤ੍ਤਾ ‘‘ਅਧਮ੍ਮੋ’’ਤਿ ਦਸ੍ਸਿਤਾ, ਤਥਾ ਉਪਾਦਾਨਾਦਯੋ, ਬੋਧਿਪਕ੍ਖਿਯਧਮ੍ਮਾਨਂ ਏਕਨ੍ਤਾਨਵਜ੍ਜਭਾਵਤੋ ਨਤ੍ਥਿ ਅਧਮ੍ਮਭਾਵੋ, ਭਗਵਤਾ ਪਨ ਦੇਸਿਤਾਕਾਰੇਨ ਹਾਪੇਤ੍ਵਾ ਵਡ੍ਢੇਤ੍ਵਾ ਵਾ ਕਥਨਂ ਯਥਾਧਮ੍ਮਂ ਅਕਥਨਨ੍ਤਿ ਕਤ੍ਵਾ ਅਧਮ੍ਮਭਾਵੋਤਿ ਦਸ੍ਸੇਨ੍ਤੋ ਆਹ ‘‘ਤਯੋ ਸਤਿਪਟ੍ਠਾਨਾ’’ਤਿਆਦਿ. ਨਿਯ੍ਯਾਨਿਕਨ੍ਤਿ ਸਪਾਟਿਹੀਰਂ ਅਪ੍ਪਟਿਹਤਂ ਹੁਤ੍ਵਾ ਪਵਤ੍ਤਤੀਤਿ ਅਤ੍ਥੋ. ਤਥੇਵਾਤਿ ਇਮਿਨਾ ‘‘ਏਵਂ ਅਮ੍ਹਾਕ’’ਨ੍ਤਿਆਦਿਨਾ ਵੁਤ੍ਤਮਤ੍ਥਂ ਆਕਡ੍ਢਤਿ. ਕਾਤਬ੍ਬਂ ਕਮ੍ਮਂ ਧਮ੍ਮੋ ਨਾਮਾਤਿ ਯਥਾਧਮ੍ਮਂ ਕਰਣਤੋ ਧਮ੍ਮੋ ਨਾਮ, ਇਤਰਂ ਵੁਤ੍ਤਵਿਪਰਿਯਾਯਤੋ ਅਧਮ੍ਮੋ ਨਾਮ.

ਰਾਗਵਿਨਯੋ…ਪੇ… ਅਯਂ ਵਿਨਯੋ ਨਾਮਾਤਿ ਰਾਗਾਦੀਨਂ ਵਿਨਯਨਤੋ ਸਂਵਰਣਤੋ ਪਜਹਨਤੋ ਪਟਿਸਙ੍ਖਾਨਤੋ ਚ ਵਿਨਯੋ ਨਾਮ, ਵੁਤ੍ਤਵਿਪਰਿਯਾਯੇਨ ਇਤਰੋ ਅਵਿਨਯੋ. ਵਤ੍ਥੁਸਮ੍ਪਤ੍ਤਿਆਦਿਵਸੇਨ ਸਬ੍ਬੇਸਂ ਵਿਨਯਕਮ੍ਮਾਨਂ ਅਕੁਪ੍ਪਤਾਤਿ ਆਹ ‘‘ਵਤ੍ਥੁਸਮ੍ਪਤ੍ਤਿ…ਪੇ… ਅਯਂ ਵਿਨਯੋ ਨਾਮਾ’’ਤਿ. ਤਪ੍ਪਟਿਪਕ੍ਖਤੋ ਅਵਿਨਯੋ ਵੇਦਿਤਬ੍ਬੋ. ਤੇਨਾਹ ‘‘ਵਤ੍ਥੁਵਿਪਤ੍ਤੀ’’ਤਿਆਦਿ. ਯਾਸਂ ਆਪਨ੍ਨਸ੍ਸ ਪਬ੍ਬਜ੍ਜਾ ਸਾਵਸੇਸਾ, ਤਾ ਆਪਤ੍ਤਿਯੋ ਸਾਵਸੇਸਾ.

੩੫੪. ਆਪਾਯਿਕੋਤਿਆਦਿਗਾਥਾਸੁ (ਇਤਿਵੁ. ਅਟ੍ਠ. ੧੮) ਸਙ੍ਘਸ੍ਸ ਭੇਦਸਙ੍ਖਾਤੇ ਵਗ੍ਗੇ ਰਤੋਤਿ ਵਗ੍ਗਰਤੋ. ਅਧਮ੍ਮਿਕਤਾਯ ਅਧਮ੍ਮੇ ਭੇਦਕਰਵਤ੍ਥੁਮ੍ਹਿ ਸਙ੍ਘਭੇਦਸਙ੍ਖਾਤੇ ਏਵ ਚ ਅਧਮ੍ਮੇ ਠਿਤੋਤਿ ਅਧਮ੍ਮਟ੍ਠੋ. ਯੋਗਕ੍ਖੇਮਾ ਪਧਂਸਤੀਤਿ ਹਿਤਤੋ ਪਰਿਹਾਯਤਿ, ਚਤੂਹਿਪਿ ਯੋਗੇਹਿ ਅਨੁਪਦ੍ਦੁਤਤ੍ਤਾ ਯੋਗਕ੍ਖੇਮਂ ਨਾਮ ਅਰਹਤ੍ਤਂ ਨਿਬ੍ਬਾਨਞ੍ਚ, ਤਤੋ ਪਨਸ੍ਸ ਧਂਸਨੇ ਵਤ੍ਤਬ੍ਬਮੇਵ ਨਤ੍ਥਿ. ਦਿਟ੍ਠਿਸੀਲਸਾਮਞ੍ਞਤੋ ਸਙ੍ਘਤਟ੍ਠੇਨ ਸਙ੍ਘਂ, ਤਤੋ ਏਵ ਏਕਕਮ੍ਮਾਦਿਵਿਧਾਨਯੋਗੇਨ ਸਮਗ੍ਗਂ ਸਹਿਤਂ ਭਿਨ੍ਦਿਤ੍ਵਾ ਪੁਬ੍ਬੇ ਵੁਤ੍ਤਲਕ੍ਖਣੇਨ ਸਙ੍ਘਭੇਦੇਨ ਭਿਨ੍ਦਿਤ੍ਵਾ. ਕਪ੍ਪਨ੍ਤਿ ਅਨ੍ਤਰਕਪ੍ਪਸਙ੍ਖਾਤਂ ਆਯੁਕਪ੍ਪਂ. ਨਿਰਯਮ੍ਹੀਤਿ ਅਵੀਚਿਮਹਾਨਿਰਯਮ੍ਹਿ.

ਸੁਖਾ ਸਙ੍ਘਸ੍ਸ ਸਾਮਗ੍ਗੀਤਿ (ਇਤਿਵੁ. ਅਟ੍ਟ. ੧੯) ਸੁਖਸ੍ਸ ਪਚ੍ਚਯਭਾਵਤੋ ਸਾਮਗ੍ਗੀ ‘‘ਸੁਖਾ’’ਤਿ ਵੁਤ੍ਤਾ ਯਥਾ ‘‘ਸੁਖੋ ਬੁਦ੍ਧਾਨਮੁਪ੍ਪਾਦੋ’’ਤਿ (ਧ. ਪ. ੧੯੪). ਸਮਗ੍ਗਾਨਞ੍ਚਨੁਗ੍ਗਹੋਤਿ ਸਮਗ੍ਗਾਨਂ ਸਾਮਗ੍ਗਿਅਨੁਮੋਦਨੇਨ ਅਨੁਗ੍ਗਣ੍ਹਨਂ ਸਾਮਗ੍ਗਿਅਨੁਰੂਪਂ ਵਾ, ਯਥਾ ਤੇ ਸਾਮਗ੍ਗਿਂ ਨ ਵਿਜਹਨ੍ਤਿ, ਤਥਾ ਗਹਣਂ ਠਪਨਂ ਅਨੁਬਲਪ੍ਪਦਾਨਨ੍ਤਿ ਅਤ੍ਥੋ. ਸਮਗ੍ਗਂ ਕਤ੍ਵਾਨਾਤਿ ਭਿਨ੍ਨਂ ਸਙ੍ਘਂ ਸਙ੍ਘਰਾਜਿਪ੍ਪਤ੍ਤਂ ਵਾ ਸਮਗ੍ਗਂ ਸਹਿਤਂ ਕਤ੍ਵਾ. ਕਪ੍ਪਨ੍ਤਿ ਆਯੁਕਪ੍ਪਮੇਵ. ਸਗ੍ਗਮ੍ਹਿ ਮੋਦਤੀਤਿ ਕਾਮਾਵਚਰਦੇਵਲੋਕੇ ਅਞ੍ਞੇ ਦੇਵੇ ਦਸਹਿ ਠਾਨੇਹਿ ਅਭਿਭਵਿਤ੍ਵਾ ਦਿਬ੍ਬਸੁਖਂ ਅਨੁਭਵਨ੍ਤੋ ਇਚ੍ਛਿਤਨਿਬ੍ਬਤ੍ਤਿਯਾ ਚ ਮੋਦਤਿ ਪਮੋਦਤਿ ਲਲ਼ਤਿ ਕੀਲ਼ਤਿ.

੩੫੫. ਸਿਯਾ ਨੁ ਖੋ, ਭਨ੍ਤੇ, ਸਙ੍ਘਭੇਦਕੋਤਿਆਦਿ ਪਾਲ਼ਿਅਨੁਸਾਰੇਨੇਵ ਵੇਦਿਤਬ੍ਬਂ. ‘‘ਪਞ੍ਚਹਿ, ਉਪਾਲਿ, ਆਕਾਰੇਹਿ ਸਙ੍ਘੋ ਭਿਜ੍ਜਤਿ ਕਮ੍ਮੇਨ ਉਦ੍ਦੇਸੇਨ ਵੋਹਰਨ੍ਤੋ ਅਨੁਸ੍ਸਾਵਨੇਨ ਸਲਾਕਗ੍ਗਾਹੇਨਾ’’ਤਿ ਏਵਂ ਪਰਿਵਾਰੇ (ਪਰਿ. ੪੫੮) ਆਗਤਮ੍ਪਿ ਸਙ੍ਘਭੇਦਲਕ੍ਖਣਂ ਇਧ ਵੁਤ੍ਤੇਨ ਕਿਂ ਨਾਨਾਕਰਣਨ੍ਤਿ ਦਸ੍ਸੇਤੁਂ ‘‘ਪਰਿਵਾਰੇ ਪਨਾ’’ਤਿਆਦਿਮਾਹ. ਏਤ੍ਥ ਚ ਸੀਮਟ੍ਠਕਸਙ੍ਘੇ ਅਸਨ੍ਨਿਪਤਿਤੇ ਵਿਸੁਂ ਪਰਿਸਂ ਗਹੇਤ੍ਵਾ ਕਤਵੋਹਾਰਾਨੁਸ੍ਸਾਵਨਸਲਾਕਗ੍ਗਾਹਸ੍ਸ ਕਮ੍ਮਂ ਵਾ ਕਰੋਨ੍ਤਸ੍ਸ ਉਦ੍ਦੇਸਂ ਵਾ ਉਦ੍ਦਿਸਨ੍ਤਸ੍ਸ ਭੇਦੋ ਚ ਹੋਤਿ ਆਨਨ੍ਤਰਿਯਕਮ੍ਮਞ੍ਚ. ਸਮਗ੍ਗਸਞ੍ਞਾਯ ਪਨ ‘‘ਵਟ੍ਟਤੀ’’ਤਿ ਸਞ੍ਞਾਯ ਵਾ ਕਰੋਨ੍ਤਸ੍ਸ ਭੇਦੋਵ ਹੋਤਿ, ਨ ਆਨਨ੍ਤਰਿਯਕਮ੍ਮਂ. ਤਤੋ ਊਨਪਰਿਸਾਯ ਕਰੋਨ੍ਤਸ੍ਸ ਨੇਵ ਸਙ੍ਘਭੇਦੋ ਨ ਆਨਨ੍ਤਰਿਯਂ. ਸਬ੍ਬਨ੍ਤਿਮੇਨ ਹਿ ਪਰਿਚ੍ਛੇਦੇਨ ਨਵਨ੍ਨਂ ਜਨਾਨਂ ਯੋ ਸਙ੍ਘਂ ਭਿਨ੍ਦਤਿ, ਤਸ੍ਸ ਆਨਨ੍ਤਰਿਯਕਮ੍ਮਂ ਹੋਤਿ, ਅਨੁਵਤ੍ਤਕਾਨਂ ਅਧਮ੍ਮਵਾਦੀਨਂ ਮਹਾਸਾਵਜ੍ਜਂ ਕਮ੍ਮਂ, ਧਮ੍ਮਵਾਦਿਨੋ ਅਨਵਜ੍ਜਾ. ਸੇਸਮੇਤ੍ਥ ਉਤ੍ਤਾਨਮੇਵਾਤਿ.

ਉਪਾਲਿਪਞ੍ਹਕਥਾਵਣ੍ਣਨਾ ਨਿਟ੍ਠਿਤਾ.

ਸਙ੍ਘਭੇਦਕਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.