੮. ਵਤ੍ਤਕ੍ਖਨ੍ਧਕਂ

ਆਗਨ੍ਤੁਕਵਤ੍ਤਕਥਾਵਣ੍ਣਨਾ

੩੫੬-੩੫੭. ਵਤ੍ਤਕ੍ਖਨ੍ਧਕੇ ਉਪਰਿਪਿਟ੍ਠਿਤੋਤਿ ਪਿਟ੍ਠਿਸਙ੍ਘਾਟਸ੍ਸ ਉਪਰਿਭਾਗਤੋ, ਦ੍ਵਾਰਬਾਹਸ੍ਸ ਉਪਰਿਪਦੇਸਤੋਤਿ ਅਤ੍ਥੋ. ਵਿਸ੍ਸਜ੍ਜੇਤਬ੍ਬਨ੍ਤਿ ਸੁਕ੍ਖਾਪਨਤ੍ਥਂ ਆਤਪੇ ਵਿਸ੍ਸਜ੍ਜਿਤਬ੍ਬਂ. ਅਭਿਵਾਦਾਪੇਤਬ੍ਬੋਤਿ ਤਸ੍ਸ ਵਸ੍ਸੇ ਪੁਚ੍ਛਿਤੇ ਯਦਿ ਦਹਰੋ ਹੋਤਿ, ਸਯਮੇਵ ਵਨ੍ਦਿਸ੍ਸਤਿ, ਤਦਾ ਇਮਿਨਾਵ ਵਨ੍ਦਾਪਿਤੋ ਨਾਮ ਹੋਤਿ. ਨਿਲ੍ਲੋਕੇਤਬ੍ਬੋਤਿ ਓਲੋਕੇਤਬ੍ਬੋ. ਯਥਾਭਾਗਨ੍ਤਿ ਪੁਬ੍ਬੇ ਪਞ੍ਞਤ੍ਤਂ ਪਦੇਸਭਾਗਂ ਅਨਤਿਕ੍ਕਮਿਤ੍ਵਾ. ਸਨ੍ਤਾਨਕਨ੍ਤਿ ਉਣ੍ਣਨਾਭਿਸੁਤ੍ਤਂ. ਉਲ੍ਲੋਕਾਤਿ ਗੇਹਸ੍ਸ ਉਪਰਿਭਾਗਤੋ ਪਟ੍ਠਾਯ, ਪਠਮਂ ਉਪਰਿਭਾਗੋ ਸਮ੍ਮਜ੍ਜਿਤਬ੍ਬੋਤਿ ਵੁਤ੍ਤਂ ਹੋਤਿ.

ਆਵਾਸਿਕਵਤ੍ਤਕਥਾਵਣ੍ਣਨਾ

੩੫੯. ਮਹਾਆਵਾਸੇਤਿ ਮਹਾਵਿਹਾਰਸਦਿਸੇ ਮਹਾਆਵਾਸੇ.

ਅਨੁਮੋਦਨਵਤ੍ਤਕਥਾਵਣ੍ਣਨਾ

੩੬੨. ਪਞ੍ਚਮੇ ਨਿਸਿਨ੍ਨੇਤਿ ਅਨੁਮੋਦਨਤ੍ਥਾਯ ਨਿਸਿਨ੍ਨੇ. ਉਪਨਿਸਿਨ੍ਨਕਥਾ ਨਾਮ ਬਹੂਸੁ ਸਨ੍ਨਿਪਤਿਤੇਸੁ ਪਰਿਕਥਾਕਥਨਂ.

ਭਤ੍ਤਗ੍ਗਵਤ੍ਤਕਥਾਵਣ੍ਣਨਾ

੩੬੪. ਮਨੁਸ੍ਸਾਨਂ ਪਰਿਵਿਸਨਟ੍ਠਾਨਨ੍ਤਿ ਯਤ੍ਥ ਮਨੁਸ੍ਸਾ ਸਪੁਤ੍ਤਦਾਰਾ ਆਵਸਿਤ੍ਵਾ ਦੇਨ੍ਤਿ. ਹਤ੍ਥਧੋਵਨਉਦਕਂ ਸਨ੍ਧਾਯਾਤਿ ਭੁਤ੍ਤਾਵਿਸ੍ਸ ਭੋਜਨਾਵਸਾਨੇ ਹਤ੍ਥਧੋਵਨਉਦਕਂ ਸਨ੍ਧਾਯ. ਤੇਨੇਵਾਹ ‘‘ਅਨ੍ਤਰਾ ਪਿਪਾਸਿਤੇਨ ਪਨ…ਪੇ… ਹਤ੍ਥਾ ਨ ਧੋਵਿਤਬ੍ਬਾ’’ਤਿ. ਪੋਤ੍ਥਕੇਸੁ ਪਨ ‘‘ਪਾਨੀਯਂ ਪਿਵਿਤ੍ਵਾ ਹਤ੍ਥਾ ਨ ਧੋਵਿਤਬ੍ਬਾ’’ਤਿ ਲਿਖਨ੍ਤਿ, ‘‘ਹਤ੍ਥਾ ਧੋਵਿਤਬ੍ਬਾ’’ਤਿ ਪਾਠੇਨ ਭਵਿਤਬ੍ਬਨ੍ਤਿ ਅਮ੍ਹਾਕਂ ਖਨ੍ਤਿ. ਅਞ੍ਞਥਾ ‘‘ਨ ਤਾਵ ਉਦਕਨ੍ਤਿ ਇਦਂ ਹਤ੍ਥਧੋਵਨਉਦਕਂ ਸਨ੍ਧਾਯ ਵੁਤ੍ਤ’’ਨ੍ਤਿ ਵਤ੍ਵਾ ‘‘ਅਨ੍ਤਰਾ ਪਿਪਾਸਿਤੇਨ ਪਨਾ’’ਤਿਆਦਿਨਾ ਵੁਤ੍ਤਵਿਸੇਸੋ ਨ ਉਪਲਬ੍ਭਤਿ. ਅਥ ਮਤਂ ‘‘ਨ ਤਾਵ ਥੇਰੇਨ ਉਦਕਂ ਪਟਿਗ੍ਗਹੇਤਬ੍ਬਨ੍ਤਿ ਇਦਂ ਕਿਂ ਪਾਨੀਯਪਟਿਗ੍ਗਹਣਂ ਸਨ੍ਧਾਯ ਵੁਤ੍ਤਂ, ਉਦਾਹੁ ਹਤ੍ਥਧੋਵਨਉਦਕਗ੍ਗਹਣਂ ਸਨ੍ਧਾਯਾਤਿ ਆਸਙ੍ਕਾਨਿਵਤ੍ਤਨਤ੍ਥਂ ‘ਇਦਂ ਹਤ੍ਥਧੋਵਨਉਦਕਂ ਸਨ੍ਧਾਯ ਵੁਤ੍ਤ’ਨ੍ਤਿਆਦਿ ਕਥਿਤ’’ਨ੍ਤਿ, ਤਞ੍ਚ ਨ, ਤਤ੍ਥ ਆਸਙ੍ਕਾਯ ਏਵ ਅਸਮ੍ਭਵਤੋ. ਨ ਹਿ ਭਗਵਾ ‘‘ਯਾਵ ਅਞ੍ਞੇ ਨ ਭੁਤ੍ਤਾਵਿਨੋ ਹੋਨ੍ਤਿ, ਤਾਵ ਪਾਨੀਯਂ ਨ ਪਾਤਬ੍ਬ’’ਨ੍ਤਿ ਵਕ੍ਖਤੀਤਿ ਸਕ੍ਕਾ ਵਿਞ੍ਞਾਤੁਂ. ਯਦਿ ਚੇਤਂ ਪਾਨੀਯਪਟਿਗ੍ਗਹਣਂ ਸਨ੍ਧਾਯ ਵੁਤ੍ਤਂ, ‘‘ਨ ਤਾਵ ਥੇਰੇਨ ਉਦਕਂ ਪਟਿਗ੍ਗਹੇਤਬ੍ਬ’’ਨ੍ਤਿ ਉਦਕਸਦ੍ਦਪ੍ਪਯੋਗੋ ਚ ਨ ਕਤ੍ਤਬ੍ਬੋ ਸਿਯਾ, ਅਟ੍ਠਕਥਾਯਞ੍ਚ ‘‘ਇਦਂ ਹਤ੍ਥਧੋਵਨਉਦਕਂ ਸਨ੍ਧਾਯ ਵੁਤ੍ਤ’’ਨ੍ਤਿ ਵਤ੍ਵਾ ਤੇਨ ਨਿਵਤ੍ਤਿਤਬ੍ਬਮਤ੍ਥਂ ਦਸ੍ਸੇਨ੍ਤੇਨ ‘‘ਅਨ੍ਤਰਾ ਪਿਪਾਸਿਤੇਨ ਪਨ ਗਲੇ ਵਿਲਗ੍ਗਾਮਿਸੇਨ ਵਾ ਪਾਨੀਯਂ ਪਿਵਿਤਬ੍ਬ’’ਨ੍ਤਿ ਏਤ੍ਤਕਮੇਵ ਵਤ੍ਤਬ੍ਬਂ, ‘‘ਪਾਨੀਯਂ ਪਿਵਿਤ੍ਵਾ ਹਤ੍ਥਾ ਨ ਧੋਵਿਤਬ੍ਬਾ’’ਤਿ ਏਵਂ ਪਨ ਨ ਵਤ੍ਤਬ੍ਬਨ੍ਤਿ. ਧੁਰੇ ਨਿਸਿਨ੍ਨਾ ਹੋਨ੍ਤੀਤਿ ਦ੍ਵਾਰਸਮੀਪੇ ਨਿਸਿਨ੍ਨਾ ਹੋਨ੍ਤਿ.

ਪਿਣ੍ਡਚਾਰਿਕਵਤ੍ਤਕਥਾਵਣ੍ਣਨਾ

੩੬੬. ਪਰਾਮਸਤੀਤਿ ਗਣ੍ਹਾਤਿ. ਠਪੇਤਿ ਵਾਤਿ ‘‘ਤਿਟ੍ਠਥ, ਭਨ੍ਤੇ’’ਤਿ ਵਦਨ੍ਤੀ ਠਪੇਤਿ ਨਾਮ.

ਆਰਞ੍ਞਿਕਵਤ੍ਤਕਥਾਵਣ੍ਣਨਾ

੩੬੭. ਕੇਨਜ੍ਜ, ਭਨ੍ਤੇ, ਯੁਤ੍ਤਨ੍ਤਿ ਕੇਨ ਨਕ੍ਖਤ੍ਤੇਨ ਅਜ੍ਜ ਚਨ੍ਦੋ ਯੁਤ੍ਤੋਤਿ ਏਵਂ ਵਦਨ੍ਤੇਨ ਨਕ੍ਖਤ੍ਤਂ ਪੁਚ੍ਛਿਤਂ ਹੋਤਿ.

ਸੇਨਾਸਨਵਤ੍ਤਕਥਾਵਣ੍ਣਨਾ

੩੬੯-੩੭੦. ਅਙ੍ਗਣੇਤਿ ਅਬ੍ਭੋਕਾਸੇ. ਨ ਵੁਡ੍ਢਂ ਅਨਾਪੁਚ੍ਛਾਤਿ ਏਤ੍ਥ ਤਸ੍ਸ ਓਵਰਕੇ ਤਦੁਪਚਾਰੇ ਚ ਆਪੁਚ੍ਛਿਤਬ੍ਬਨ੍ਤਿ ਵਦਨ੍ਤਿ. ਭੋਜਨਸਾਲਾਦੀਸੁਪਿ ਏਵਮੇਵ ਪਟਿਪਜ੍ਜਿਤਬ੍ਬਨ੍ਤਿ ਭੋਜਨਸਾਲਾਦੀਸੁਪਿ ਉਦ੍ਦੇਸਦਾਨਾਦਿ ਆਪੁਚ੍ਛਿਤ੍ਵਾਵ ਕਾਤਬ੍ਬਨ੍ਤਿ ਅਤ੍ਥੋ.

ਵਚ੍ਚਕੁਟਿਵਤ੍ਤਕਥਾਵਣ੍ਣਨਾ

੩੭੩-੩੭੪. ਇਦਂ ਅਤਿਵਿਵਟਨ੍ਤਿ ਇਦਂ ਠਾਨਂ ਗੁਮ੍ਬਾਦੀਹਿ ਅਪ੍ਪਟਿਚ੍ਛਨ੍ਨਤ੍ਤਾ ਅਤਿਵਿਯ ਪਕਾਸਨਂ. ਨਿਬਦ੍ਧਗਮਨਤ੍ਥਾਯਾਤਿ ਅਤ੍ਤਨੋ ਨਿਬਦ੍ਧਗਮਨਤ੍ਥਾਯ. ਪੁਗ੍ਗਲਿਕਟ੍ਠਾਨਂ ਵਾਤਿ ਅਤ੍ਤਨੋ ਵਿਹਾਰਂ ਸਨ੍ਧਾਯ ਵੁਤ੍ਤਂ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਇਮਸ੍ਮਿਂ ਵਤ੍ਤਕ੍ਖਨ੍ਧਕੇ ਆਗਤਾਨਿ ਆਗਨ੍ਤੁਕਾਵਾਸਿਕਗਮਿਯਾਨੁਮੋਦਨਭਤ੍ਤਗ੍ਗਪਿਣ੍ਡਚਾਰਿਕਾਰਞ੍ਞਿਕ ਸੇਨਾਸਨ ਜਨ੍ਤਾਘਰ ਵਚ੍ਚਕੁਟਿ ਉਪਜ੍ਝਾਚਰਿਯ ਸਦ੍ਧਿਵਿਹਾਰਿਕ ਅਨ੍ਤੇਵਾਸਿਕਵਤ੍ਤਾਨਿ ਚੁਦ੍ਦਸ ਮਹਾਵਤ੍ਤਾਨਿ ਨਾਮ, ਇਤੋ ਅਞ੍ਞਾਨਿ ਪਨ ਕਦਾਚਿ ਤਜ੍ਜਨੀਯਕਮ੍ਮਕਤਾਦਿਕਾਲੇਯੇਵ ਚਰਿਤਬ੍ਬਾਨਿ ਅਸੀਤਿ ਖਨ੍ਧਕਵਤ੍ਤਾਨੀਤਿ ਵੇਦਿਤਬ੍ਬਾਨਿ. ਗਣ੍ਠਿਪਦੇਸੁ ਪਨ ‘‘ਇਮਾਨਿਯੇਵ ਚੁਦ੍ਦਸ ਮਹਾਵਤ੍ਤਾਨਿ ਅਗ੍ਗਹਿਤਗ੍ਗਹਣੇਨ ਗਹਿਯਮਾਨਾਨਿ ਅਸੀਤਿ ਖਨ੍ਧਕਵਤ੍ਤਾਆਨੀ’’ਤਿ ਵੁਤ੍ਤਂ, ਤਂ ਨ ਗਹੇਤਬ੍ਬਂ.

ਵਤ੍ਤਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.