੯. ਚਮ੍ਪੇਯ੍ਯਕ੍ਖਨ੍ਧਕਂ

ਕਸ੍ਸਪਗੋਤ੍ਤਭਿਕ੍ਖੁਵਤ੍ਥੁਕਥਾਵਣ੍ਣਨਾ

੩੮੦. ਚਮ੍ਪੇਯ੍ਯਕ੍ਖਨ੍ਧਕੇ ਚਮ੍ਪਾਯਨ੍ਤਿ ਏਵਂਨਾਮਕੇ ਨਗਰੇ. ਤਸ੍ਸ ਹਿ ਨਗਰਸ੍ਸ ਆਰਾਮਪੋਕ੍ਖਰਣੀਆਦੀਸੁ ਤੇਸੁ ਤੇਸੁ ਠਾਨੇਸੁ ਚਮ੍ਪਕਰੁਕ੍ਖਾਵ ਉਸ੍ਸਨ੍ਨਾ ਅਹੇਸੁਂ, ਤਸ੍ਮਾ ‘‘ਚਮ੍ਪਾ’’ਤਿ ਸਙ੍ਖਂ ਅਗਮਾਸਿ. ਗਗ੍ਗਰਾਯ ਪੋਕ੍ਖਰਣਿਯਾ ਤੀਰੇਤਿ ਤਸ੍ਸ ਚਮ੍ਪਾਨਗਰਸ੍ਸ ਅਵਿਦੂਰੇ ਗਗ੍ਗਰਾਯ ਨਾਮ ਰਾਜਮਹੇਸਿਯਾ ਖਣਿਤਤ੍ਤਾ ‘‘ਗਗ੍ਗਰਾ’’ਤਿ ਲਦ੍ਧਵੋਹਾਰਾ ਪੋਕ੍ਖਰਣੀ ਅਤ੍ਥਿ, ਤਸ੍ਸਾ ਤੀਰੇ ਸਮਨ੍ਤਤੋ ਨੀਲਾਦਿਪਞ੍ਚਵਣ੍ਣਕੁਸੁਮਪਟਿਮਣ੍ਡਿਤਂ ਮਹਨ੍ਤਂ ਚਮ੍ਪਕਵਨਂ, ਤਸ੍ਮਿਂ ਭਗਵਾ ਕੁਸੁਮਗਨ੍ਧਸੁਗਨ੍ਧੇ ਚਮ੍ਪਕਵਨੇ ਵਿਹਰਤਿ. ਤਂ ਸਨ੍ਧਾਯ ‘‘ਗਗ੍ਗਰਾਯ ਪੋਕ੍ਖਰਣਿਯਾ ਤੀਰੇ’’ਤਿ ਵੁਤ੍ਤਂ. ਤਨ੍ਤਿਬਦ੍ਧੋਤਿ ਤਨ੍ਤਿ ਵੁਚ੍ਚਤਿ ਬ੍ਯਾਪਾਰੋ, ਤਤ੍ਥ ਬਦ੍ਧੋ ਪਸੁਤੋ ਉਸ੍ਸੁਕ੍ਕਂ ਆਪਨ੍ਨੋਤਿ ਅਤ੍ਥੋ, ਤਸ੍ਮਿਂ ਆਵਾਸੇ ਅਕਤਂ ਸੇਨਾਸਨਂ ਕਰੋਤਿ, ਜਿਣ੍ਣਂ ਪਟਿਸਙ੍ਖਰੋਤਿ, ਕਤੇ ਇਸ੍ਸਰੋ ਹੋਤੀਤਿ ਅਧਿਪ੍ਪਾਯੋ. ਤੇਨਾਹ ‘‘ਤਸ੍ਮਿਂ ਆਵਾਸੇ ਕਤ੍ਤਬ੍ਬਤ੍ਤਾ ਤਨ੍ਤਿਪਟਿਬਦ੍ਧੋ’’ਤਿ, ਕਤ੍ਤਬ੍ਬਕਮ੍ਮੇ ਉਸ੍ਸਾਹਮਾਪਨ੍ਨੋਤਿ ਅਤ੍ਥੋ.

ਞਤ੍ਤਿਵਿਪਨ੍ਨਕਮ੍ਮਾਦਿਕਥਾਵਣ੍ਣਨਾ

੩੮੫-੩੮੭. ਪਟਿਕ੍ਕੋਸਨ੍ਤੇਸੂਤਿ ਨਿਵਾਰੇਨ੍ਤੇਸੁ. ਹਾਪਨਂ ਵਾ ਅਞ੍ਞਥਾ ਕਰਣਂ ਵਾ ਨਤ੍ਥੀਤਿ ਞਤ੍ਤਿਕਮ੍ਮਸ੍ਸ ਏਕਾਯ ਏਵ ਞਤ੍ਤਿਯਾ ਕਤ੍ਤਬ੍ਬਤ੍ਤਾ ਤਤੋ ਹਾਪਨਂ ਨ ਸਮ੍ਭਵਤਿ, ਅਨੁਸ੍ਸਾਵਨਾਯ ਅਭਾਵਤੋ ਪਚ੍ਛਾ ਞਤ੍ਤਿਠਪਨਵਸੇਨ ਦ੍ਵੀਹਿ ਞਤ੍ਤੀਹਿ ਕਰਣਵਸੇਨ ਚ ਅਞ੍ਞਥਾ ਕਰਣਂ ਨਤ੍ਥਿ.

ਚਤੁਵਗ੍ਗਕਰਣਾਦਿਕਥਾਵਣ੍ਣਨਾ

੩੮੯. ਉਕ੍ਖੇਪਨੀਯਕਮ੍ਮਕਤੋ ਕਮ੍ਮਨਾਨਾਸਂਵਾਸਕੋ, ਉਕ੍ਖਿਤ੍ਤਾਨੁਵਤ੍ਤਕੋ ਲਦ੍ਧਿਨਾਨਾਸਂਵਾਸਕੋ.

ਦ੍ਵੇਨਿਸ੍ਸਾਰਣਾਦਿਕਥਾਵਣ੍ਣਨਾ

੩੯੫. ਅਪ੍ਪਤ੍ਤੋ ਨਿਸ੍ਸਾਰਣਨ੍ਤਿ ਏਤ੍ਥ ਨਿਸ੍ਸਾਰਣਕਮ੍ਮਂ ਨਾਮ ਕੁਲਦੂਸਕਾਨਞ੍ਞੇਵ ਅਨੁਞ੍ਞਾਤਂ, ਅਯਞ੍ਚ ‘‘ਬਾਲੋ ਹੋਤਿ ਅਬ੍ਯਤ੍ਤੋ’’ਤਿਆਦਿਨਾ ਨਿਦ੍ਦਿਟ੍ਠੋ ਕੁਲਦੂਸਕੋ ਨ ਹੋਤਿ, ਤਸ੍ਮਾ ‘‘ਅਪ੍ਪਤ੍ਤੋ’’ਤਿ ਵੁਤ੍ਤੋ. ਯਦਿ ਏਵਂ ਕਥਂ ਸੁਨਿਸ੍ਸਾਰਿਤੋ ਹੋਤੀਤਿ? ਬਾਲਅਬ੍ਯਤ੍ਤਤਾਦਿਯੁਤ੍ਤਸ੍ਸਪਿ ਕਮ੍ਮਕ੍ਖਨ੍ਧਕੇ ‘‘ਆਕਙ੍ਖਮਾਨੋ ਸਙ੍ਘੋ ਪਬ੍ਬਾਜਨੀਯਕਮ੍ਮਂ ਕਰੇਯ੍ਯਾ’’ਤਿ (ਚੂਲ਼ਵ. ੨੭) ਵੁਤ੍ਤਤ੍ਤਾ. ਤੇਨੇਵਾਹ ‘‘ਤਞ੍ਚੇਸ…ਪੇ… ਤਸ੍ਮਾ ਸੁਨਿਸ੍ਸਾਰਿਤੋ ਹੋਤੀ’’ਤਿ. ਤਤ੍ਥ ਤਨ੍ਤਿ ਪਬ੍ਬਾਜਨੀਯਕਮ੍ਮਂ. ਏਸੋਤਿ ‘‘ਬਾਲੋ’’ਤਿਆਦਿਨਾ ਨਿਦ੍ਦਿਟ੍ਠੋ. ਆਵੇਣਿਕੇਨ ਲਕ੍ਖਣੇਨਾਤਿ ਪਬ੍ਬਾਜਨੀਯਕਮ੍ਮਸ੍ਸ ਆਵੇਣਿਕਭੂਤੇਨ ਕੁਲਦੂਸਕਭਾਵਲਕ੍ਖਣੇਨ.

ਤਞ੍ਚੇ ਸਙ੍ਘੋ ਨਿਸ੍ਸਾਰੇਤਿ, ਸੁਨਿਸ੍ਸਾਰਿਤੋਤਿ ਏਤ੍ਥ ਅਧਿਪ੍ਪੇਤਸ੍ਸ ਪਬ੍ਬਾਜਨੀਯਕਮ੍ਮਸ੍ਸ ਵਸੇਨ ਅਤ੍ਥਂ ਦਸ੍ਸੇਤ੍ਵਾ ਇਦਾਨਿ ਯਦਿ ‘‘ਤਞ੍ਚੇ ਸਙ੍ਘੋ ਨਿਸ੍ਸਾਰੇਤੀ’’ਤਿ ਤਜ੍ਜਨੀਯਾਦਿਕਮ੍ਮਵਸੇਨ ਨਿਸ੍ਸਾਰਣਾ ਅਧਿਪ੍ਪੇਤਾ, ਤਦਾ ਨਿਸ੍ਸਾਰਣਂ ਸਮ੍ਪਤ੍ਤੋਯੇਵ ਤਜ੍ਜਨੀਯਾਦਿਵਸੇਨ ਸੁਨਿਸ੍ਸਾਰਿਤੋਤਿ ਬ੍ਯਤਿਰੇਕਮੁਖੇਨ ਅਤ੍ਥਂ ਦਸ੍ਸੇਤੁਂ ਪੁਨ ‘‘ਤਞ੍ਚੇ ਸਙ੍ਘੋ ਨਿਸ੍ਸਾਰੇਤੀ’’ਤਿ ਉਲ੍ਲਿਙ੍ਗੇਤ੍ਵਾ ਅਤ੍ਥੋ ਕਥਿਤੋ. ਨਤ੍ਥਿ ਏਤਸ੍ਸ ਅਪਦਾਨਂ ਅਵਖਣ੍ਡਨਂ ਆਪਤ੍ਤਿਪਰਿਯਨ੍ਤੋਤਿ ਅਨਪਦਾਨੋ. ਏਕੇਕੇਨਪਿ ਅਙ੍ਗੇਨ ਨਿਸ੍ਸਾਰਣਾ ਅਨੁਞ੍ਞਾਤਾਤਿ ਕਮ੍ਮਕ੍ਖਨ੍ਧਕੇ ਅਨੁਞ੍ਞਾਤਾ. ਸੇਸਮੇਤ੍ਥ ਪਾਲ਼ਿਤੋ ਅਟ੍ਠਕਥਾਤੋ ਚ ਸੁਵਿਞ੍ਞੇਯ੍ਯਮੇਵ.

ਦ੍ਵੇਨਿਸ੍ਸਾਰਣਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਚਮ੍ਪੇਯ੍ਯਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.