੧੦. ਕੋਸਮ੍ਬਕਕ੍ਖਨ੍ਧਕਂ
ਕੋਸਮ੍ਬਕਵਿਵਾਦਕਥਾਵਣ੍ਣਨਾ
੪੫੧. ਕੋਸਮ੍ਬਕਕ੍ਖਨ੍ਧਕੇ ਸਚੇ ਹੋਤਿ, ਦੇਸੇਸ੍ਸਾਮੀਤਿ ਸੁਬ੍ਬਚਤਾਯ ਸਿਕ੍ਖਾਕਾਮਤਾਯ ਚ ਆਪਤ੍ਤਿਂ ਪਸ੍ਸਿ. ਨਤ੍ਥਿ ਆਪਤ੍ਤੀਤਿ ਅਨਾਪਤ੍ਤਿਪਕ੍ਖੋਪਿ ਏਤ੍ਥ ਸਮ੍ਭਵਤੀਤਿ ਅਧਿਪ੍ਪਾਯੇਨਾਹ. ਸਾ ਪਨਾਪਤ੍ਤਿ ਏਵ. ਤੇਨਾਹ ‘‘ਸੋ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਅਹੋਸੀ’’ਤਿ.
੪੫੩-੪੫੪. ਸਮ੍ਭਮਅਤ੍ਥਵਸੇਨਾਤਿ ਤੁਰਿਤਤ੍ਥਵਸੇਨ. ‘‘ਅਕਾਰਣੇ ਤੁਮ੍ਹੇਹਿ ਸੋ ਭਿਕ੍ਖੁ ਉਕ੍ਖਿਤ੍ਤੋ’’ਤਿ ਵਦੇਯ੍ਯਾਤਿ ਯਸ੍ਮਾ ਪੁਬ੍ਬੇ ਵਿਨਯਧਰਸ੍ਸ ਵਚਨੇਨ ‘‘ਸਚੇ ਆਪਤ੍ਤਿ ਹੋਤਿ, ਦੇਸੇਸ੍ਸਾਮੀ’’ਤਿ ਅਨੇਨ ਪਟਿਞ੍ਞਾਤਂ, ਇਦਾਨਿਪਿ ਤਸ੍ਸੇਵ ਵਚਨੇਨ ‘‘ਅਸਞ੍ਚਿਚ੍ਚ ਅਸ੍ਸਤਿਯਾ ਕਤਤ੍ਤਾ ਨਤ੍ਥੇਤ੍ਥ ਆਪਤ੍ਤੀ’’ਤਿ ਅਨਾਪਤ੍ਤਿਸਞ੍ਞੀ, ਤਸ੍ਮਾ ‘‘ਅਕਾਰਣੇ ਤੁਮ੍ਹੇਹਿ ਸੋ ਭਿਕ੍ਖੁ ਉਕ੍ਖਿਤ੍ਤੋ’’ਤਿ ਉਕ੍ਖੇਪਕੇ ਭਿਕ੍ਖੂ ਯਦਿ ਵਦੇਯ੍ਯਾਤਿ ਅਧਿਪ੍ਪਾਯੋ. ਉਕ੍ਖਿਤ੍ਤਾਨੁਵਤ੍ਤਕੇ ਵਾ ‘‘ਤੁਮ੍ਹੇ ਆਪਤ੍ਤਿਂ ਆਪਨ੍ਨਾ’’ਤਿ ਵਦੇਯ੍ਯਾਤਿ ਯਸ੍ਮਾ ਵਤ੍ਥੁਜਾਨਨਚਿਤ੍ਤੇਨਾਯਂ ਸਚਿਤ੍ਤਕਾ ਆਪਤ੍ਤਿ, ਅਯਞ੍ਚ ਉਦਕਾਵਸੇਸੇ ਉਦਕਾਵਸੇਸਸਞ੍ਞੀ, ਤਸ੍ਮਾ ਸਾਪਤ੍ਤਿਕਸ੍ਸੇਵ ‘‘ਤੁਮ੍ਹੇ ਛਨ੍ਦਾਗਤਿਂ ਗਚ੍ਛਥਾ’’ਤਿ ਅਧਿਪ੍ਪਾਯੇਨ ‘‘ਤੁਮ੍ਹੇ ਆਪਤ੍ਤਿਂ ਆਪਨ੍ਨਾ’’ਤਿ ਉਕ੍ਖਿਤ੍ਤਾਨੁਵਤ੍ਤਕੇ ਵਦੇਯ੍ਯ.
੪੫੫-੪੫੬. ਕਮ੍ਮਂ ਕੋਪੇਤੀਤਿ ‘‘ਨਾਨਾਸਂਵਾਸਕਚਤੁਤ੍ਥੋ ਚੇ, ਭਿਕ੍ਖਵੇ, ਕਮ੍ਮਂ ਕਰੇਯ੍ਯ, ਅਕਮ੍ਮਂ ਨ ਚ ਕਰਣੀਯ’’ਨ੍ਤਿਆਦਿਵਚਨਤੋ (ਮਹਾਵ. ੩੮੯) ਸਚੇ ਸਙ੍ਘੋ ਤਂ ਗਣਪੂਰਕਂ ਕਤ੍ਵਾ ਕਮ੍ਮਂ ਕਰੇਯ੍ਯ, ਅਯਂ ਤਤ੍ਥ ਨਿਸਿਨ੍ਨੋਪਿ ਤਂ ਕਮ੍ਮਂ ਕੋਪੇਤੀਤਿ ਅਧਿਪ੍ਪਾਯੋ. ਉਪਚਾਰਂ ਮੁਞ੍ਚਿਤ੍ਵਾਤਿ ਏਤ੍ਥ ਉਪਚਾਰੋ ਨਾਮ ਅਞ੍ਞਮਞ੍ਞਂ ਹਤ੍ਥੇਨ ਪਾਪੁਣਨਟ੍ਠਾਨਂ.
੪੫੭. ਭਣ੍ਡਨਜਾਤਾਤਿਆਦੀਸੁ ਕਲਹਸ੍ਸ ਪੁਬ੍ਬਭਾਗੋ ਭਣ੍ਡਨਂ ਨਾਮ, ਤਂ ਜਾਤਂ ਏਤੇਸਨ੍ਤਿ ਭਣ੍ਡਨਜਾਤਾ, ਹਤ੍ਥਪਰਾਮਾਸਾਦਿਵਸੇਨ ਮਤ੍ਥਕਂ ਪਤ੍ਤੋ ਕਲਹੋ ਜਾਤੋ ਏਤੇਸਨ੍ਤਿ ਕਲਹਜਾਤਾ, ਵਿਰੁਦ੍ਧਵਾਦਭੂਤਂ ਵਾਦਂ ਆਪਨ੍ਨਾਤਿ ਵਿਵਾਦਾਪਨ੍ਨਾ. ਮੁਖਸਤ੍ਤੀਹੀਤਿ ਵਾਚਾਸਤ੍ਤੀਹਿ. ਵਿਤੁਦਨ੍ਤਾਤਿ ਵਿਜ੍ਝਨ੍ਤਾ. ਭਗਵਨ੍ਤਂ ਏਤਦਵੋਚਾਤਿ ‘‘ਇਧ, ਭਨ੍ਤੇ, ਕੋਸਮ੍ਬਿਯਂ ਭਿਕ੍ਖੂ ਭਣ੍ਡਨਜਾਤਾ’’ਤਿਆਦਿਵਚਨਂ ਅਵੋਚ, ਤਞ੍ਚ ਖੋ ਨੇਵ ਪਿਯਕਮ੍ਯਤਾਯ, ਨ ਭੇਦਾਧਿਪ੍ਪਾਯੇਨ, ਅਥ ਖੋ ਅਤ੍ਥਕਾਮਤਾਯ ਹਿਤਕਾਮਤਾਯ. ਸਾਮਗ੍ਗੀਕਾਰਕੋ ਕਿਰੇਸ ਭਿਕ੍ਖੁ, ਤਸ੍ਮਾਸ੍ਸ ਏਤਦਹੋਸਿ ‘‘ਯਥਾ ਇਮੇ ਭਿਕ੍ਖੂ ਵਿਵਾਦਂ ਆਰਦ੍ਧਾ, ਨ ਸਕ੍ਕਾ ਮਯਾ, ਨਾਪਿ ਅਞ੍ਞੇਨ ਭਿਕ੍ਖੁਨਾ ਸਮਗ੍ਗੇ ਕਾਤੁਂ, ਅਪ੍ਪੇਵ ਨਾਮ ਸਦੇਵਕੇ ਲੋਕੇ ਅਗ੍ਗਪੁਗ੍ਗਲੋ ਭਗਵਾ ਸਯਂ ਵਾ ਗਨ੍ਤ੍ਵਾ ਅਤ੍ਤਨੋ ਵਾ ਸਨ੍ਤਿਕਂ ਪਕ੍ਕੋਸਾਪੇਤ੍ਵਾ ਏਤੇਸਂ ਭਿਕ੍ਖੂਨਂ ਖਨ੍ਤਿਮੇਤ੍ਤਾਪਟਿਸਂਯੁਤ੍ਤਂ ਸਾਰਣੀਯਧਮ੍ਮਦੇਸਨਂ ਕਥੇਤ੍ਵਾ ਸਾਮਗ੍ਗਿਂ ਕਰੇਯ੍ਯਾ’’ਤਿ ਅਤ੍ਥਕਾਮਤਾਯ ਹਿਤਕਾਮਤਾਯ ਗਨ੍ਤ੍ਵਾ ਅਵੋਚ. ਤਸ੍ਮਾ ਏਵਮਾਹਾਤਿ ਅਤ੍ਥਕਾਮਤ੍ਤਾ ਏਵਮਾਹ, ਨ ਭਗਵਤੋ ਵਚਨਂ ਅਨਾਦਿਯਨ੍ਤੋ. ਯੇ ਪਨ ਤਦਾ ਸਤ੍ਥੁ ਵਚਨਂ ਨ ਗਣ੍ਹਿਂਸੁ, ਤੇ ਕਿਞ੍ਚਿ ਅਵਤ੍ਵਾ ਤੁਣ੍ਹੀਭੂਤਾ ਮਙ੍ਕੁਭੂਤਾ ਅਟ੍ਠਂਸੁ, ਤਸ੍ਮਾ ਉਭਯੇਸਮ੍ਪਿ ਸਤ੍ਥਰਿ ਅਗਾਰਵਪਟਿਪਤ੍ਤਿ ਨਾਹੋਸਿ.
ਕੋਸਮ੍ਬਕਵਿਵਾਦਕਥਾਵਣ੍ਣਨਾ ਨਿਟ੍ਠਿਤਾ.
ਦੀਘਾਵੁਵਤ੍ਥੁਕਥਾਵਣ੍ਣਨਾ
੪੫੮. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸੀਤਿਆਦੀਸੁ ਭੂਤਪੁਬ੍ਬਨ੍ਤਿ ਇਦਂ ਭਗਵਾ ਪਥਵੀਗਤਂ ਨਿਧਿਂ ਉਦ੍ਧਰਿਤ੍ਵਾ ਪੁਰਤੋ ਰਾਸਿਂ ਕਰੋਨ੍ਤੋ ਵਿਯ ਭਵਪਟਿਚ੍ਛਨ੍ਨਂ ਪੁਰਾਵੁਤ੍ਥਂ ਦਸ੍ਸੇਨ੍ਤੋ ਆਹ. ਅਡ੍ਢੋਤਿ ਇਸ੍ਸਰੋ. ਯੋ ਕੋਚਿ ਅਤ੍ਤਨੋ ਸਨ੍ਤਕੇਨ ਵਿਭਵੇਨ ਅਡ੍ਢੋ ਹੋਤਿ, ਅਯਂ ਪਨ ਨ ਕੇਵਲਂ ਅਡ੍ਢੋਯੇਵ, ਮਹਦ੍ਧਨੋ ਮਹਤਾ ਅਪਰਿਮਾਣਸਙ੍ਖੇਨ ਧਨੇਨ ਸਮਨ੍ਨਾਗਤੋਤਿ ਆਹ ‘‘ਮਹਦ੍ਧਨੋ’’ਤਿ. ਭੁਞ੍ਜਿਤਬ੍ਬਤੋ ਪਰਿਭੁਞ੍ਜਿਤਬ੍ਬਤੋ ਵਿਸੇਸਤੋ ਕਾਮਾ ਭੋਗਾ ਨਾਮ, ਤਸ੍ਮਾ ਪਞ੍ਚਕਾਮਗੁਣਵਸੇਨ ਮਹਨ੍ਤਾ ਉਲ਼ਾਰਾ ਭੋਗਾ ਅਸ੍ਸਾਤਿ ਮਹਾਭੋਗੋ. ਮਹਨ੍ਤਂ ਸੇਨਾਬਲਞ੍ਚੇਵ ਥਾਮਬਲਞ੍ਚ ਏਤਸ੍ਸਾਤਿ ਮਹਬ੍ਬਲੋ. ਮਹਨ੍ਤੋ ਹਤ੍ਥਿਅਸ੍ਸਾਦਿਵਾਹਨੋ ਏਤਸ੍ਸਾਤਿ ਮਹਾਵਾਹਨੋ. ਮਹਨ੍ਤਂ ਵਿਜਿਤਂ ਰਟ੍ਠਂ ਏਤਸ੍ਸਾਤਿ ਮਹਾਵਿਜਿਤੋ. ਪਰਿਪੁਣ੍ਣਕੋਸਕੋਟ੍ਠਾਗਾਰੋਤਿ ਕੋਸੋ ਵੁਚ੍ਚਤਿ ਭਣ੍ਡਾਗਾਰਸਾਰਗਬ੍ਭੋ, ਕੋਟ੍ਠਂ ਵੁਚ੍ਚਤਿ ਧਞ੍ਞਸ੍ਸ ਆਠਪਨਟ੍ਠਾਨਂ, ਕੋਟ੍ਠਭੂਤਂ ਅਗਾਰਂ ਕੋਟ੍ਠਾਗਾਰਂ, ਨਿਦਹਿਤ੍ਵਾ ਠਪਿਤੇਨ ਧਨੇਨ ਪਰਿਪੁਣ੍ਣਕੋਸੋ ਧਞ੍ਞਾਨਞ੍ਚ ਪਰਿਪੁਣ੍ਣਕੋਟ੍ਠਾਗਾਰੋਤਿ ਅਤ੍ਥੋ.
ਅਥ ਵਾ ਚਤੁਬ੍ਬਿਧੋ ਕੋਸੋ ਹਤ੍ਥੀ ਅਸ੍ਸਾ ਰਥਾ ਪਤ੍ਤੀਤਿ. ਯਥਾ ਹਿ ਅਸਿਨੋ ਤਿਕ੍ਖਭਾਵਪਰਿਪਾਲਕੋ ਪਰਿਚ੍ਛਦੋ ‘‘ਕੋਸੋ’’ਤਿ ਵੁਚ੍ਚਤਿ, ਏਵਂ ਰਞ੍ਞੋ ਤਿਕ੍ਖਭਾਵਪਰਿਪਾਲਕਤ੍ਤਾ ਚਤੁਰਙ੍ਗਿਨੀ ਸੇਨਾ ‘‘ਕੋਸੋ’’ਤਿ ਵੁਚ੍ਚਤਿ. ਤਿਵਿਧਂ ਕੋਟ੍ਠਾਗਾਰਂ ਧਨਕੋਟ੍ਠਾਗਾਰਂ ਧਞ੍ਞਕੋਟ੍ਠਾਗਾਰਂ ਵਤ੍ਥਕੋਟ੍ਠਾਗਾਰਨ੍ਤਿ. ਤਂ ਸਬ੍ਬਮ੍ਪਿ ਪਰਿਪੁਣ੍ਣਮਸ੍ਸਾਤਿ ਪਰਿਪੁਣ੍ਣਕੋਸਕੋਟ੍ਠਾਗਾਰੋ. ਚਤੁਰਙ੍ਗਿਨਿਂ ਸੇਨਨ੍ਤਿ ਹਤ੍ਥਿਅਸ੍ਸਰਥਪਤ੍ਤਿਸਙ੍ਖਾਤੇਹਿ ਚਤੂਹਿ ਅਙ੍ਗੇਹਿ ਸਮਨ੍ਨਾਗਤਂ ਸੇਨਂ. ਸਨ੍ਨਯ੍ਹਿਤ੍ਵਾਤਿ ਚਮ੍ਮਪਟਿਮੁਞ੍ਚਨਾਦੀਹਿ ਸਨ੍ਨਾਹਂ ਕਾਰੇਤ੍ਵਾ. ਅਬ੍ਭੁਯ੍ਯਾਸੀਤਿ ਅਭਿਉਯ੍ਯਾਸਿ, ਅਭਿਮੁਖੋ ਹੁਤ੍ਵਾ ਨਿਕ੍ਖਮੀਤਿ ਅਤ੍ਥੋ. ਏਕਸਙ੍ਘਾਤਮ੍ਪੀਤਿ ਏਕਪ੍ਪਹਾਰਮ੍ਪਿ. ਧੋਵਨਨ੍ਤਿ ਧੋਵਨੁਦਕਂ. ਪਰਿਨੇਤ੍ਵਾਤਿ ਨੀਹਰਿਤ੍ਵਾ. ‘‘ਅਨਤ੍ਥਦੋ’’ਤਿ ਵਤ੍ਤਬ੍ਬੇ ਦ-ਕਾਰਸ੍ਸ ਤ-ਕਾਰਂ ਕਤ੍ਵਾ ‘‘ਅਨਤ੍ਥਤੋ’’ਤਿ ਵੁਤ੍ਤਨ੍ਤਿ ਆਹ ‘‘ਅਥ ਵਾ’’ਤਿਆਦਿ.
੪੬੪. ਵਗ੍ਗਭਾਵੇਨ ਵਾ ਪੁਥੁ ਨਾਨਾ ਸਦ੍ਦੋ ਅਸ੍ਸਾਤਿ ਪੁਥੁਸਦ੍ਦੋ. ਸਮਜਨੋਤਿ ਭਣ੍ਡਨੇ ਸਮਜ੍ਝਾਸਯੋ ਜਨੋ. ਤਤ੍ਥਾਤਿ ਤਸ੍ਮਿਂ ਜਨਕਾਯੇ. ਅਹਂ ਬਾਲੋਤਿ ਨ ਮਞ੍ਞਿਤ੍ਥਾਤਿ ਬਾਲਲਕ੍ਖਣੇ ਠਿਤੋਪਿ ‘‘ਅਹਂ ਬਾਲੋ’’ਤਿ ਨ ਮਞ੍ਞਿ. ਭਿਯ੍ਯੋ ਚਾਤਿ ਅਤ੍ਤਨੋ ਬਾਲਭਾਵਸ੍ਸ ਅਜਾਨਨਤੋ ਭਿਯ੍ਯੋ ਚ ਭਣ੍ਡਨਸ੍ਸ ਉਪਰਿਫੋਟੋ ਵਿਯ ਸਙ੍ਘਭੇਦਸ੍ਸ ਅਤ੍ਤਨੋ ਕਾਰਣਭਾਵਮ੍ਪਿ ਉਪ੍ਪਜ੍ਜਮਾਨਂ ਨ ਮਞ੍ਞਿਤ੍ਥ ਨਾਞ੍ਞਾਸਿ.
ਕਲਹਵਸੇਨ ਪਵਤ੍ਤਵਾਚਾਯੇਵ ਗੋਚਰਾ ਏਤੇਸਨ੍ਤਿ ਵਾਚਾਗੋਚਰਾ. ਮੁਖਾਯਾਮਨ੍ਤਿ ਵਿਵਦਨਵਸੇਨ ਮੁਖਂ ਆਯਾਮੇਤ੍ਵਾ ਭਾਣਿਨੋ. ਨ ਤਂ ਜਾਨਨ੍ਤੀਤਿ ਤਂ ਕਲਹਂ ਨ ਜਾਨਨ੍ਤਿ. ਕਲਹਂ ਕਰੋਨ੍ਤੋ ਚ ਤਂ ਨ ਜਾਨਨ੍ਤੋ ਨਾਮ ਨਤ੍ਥਿ. ਯਥਾ ਪਨ ਨ ਜਾਨਨ੍ਤਿ, ਤਂ ਦਸ੍ਸੇਤੁਂ ਆਹ ‘‘ਏਵਂ ਸਾਦੀਨਵੋ ਅਯ’’ਨ੍ਤਿ, ਅਯਂ ਕਲਹੋ ਨਾਮ ਅਤ੍ਤਨੋ ਪਰੇਸਞ੍ਚ ਅਤ੍ਥਹਾਪਨਤੋ ਅਨਤ੍ਥੁਪ੍ਪਾਦਨਤੋ ਦਿਟ੍ਠੇਵ ਧਮ੍ਮੇ ਸਮ੍ਪਰਾਯੇ ਚ ਸਾਦੀਨਵੋ ਸਦੋਸੋਤਿ ਅਤ੍ਥੋ. ਤਂ ਨ ਜਾਨਨ੍ਤੀਤਿ ਤਂ ਕਲਹਂ ਨ ਜਾਨਨ੍ਤਿ. ਕਥਂ ਨ ਜਾਨਨ੍ਤੀਤਿ ਆਹ ‘‘ਏਵਂ ਸਾਦੀਨਵੋ ਅਯ’’ਨ੍ਤਿ, ‘‘ਏਵਂ ਸਾਦੀਨਵੋ ਅਯਂ ਕਲਹੋ’’ਤਿ ਏਵਂ ਤਂ ਕਲਹਂ ਨ ਜਾਨਨ੍ਤੀਤਿ ਅਤ੍ਥੋ.
ਅਕ੍ਕੋਚ੍ਛਿ ਮਨ੍ਤਿਆਦੀਸੁ ਅਕ੍ਕੋਚ੍ਛੀਤਿ ਅਕ੍ਕੋਸਿ. ਅਵਧੀਤਿ ਪਹਰਿ. ਅਜਿਨੀਤਿ ਕੂਟਸਕ੍ਖਿਓਤਾਰਣੇਨ ਵਾ ਵਾਦਪਟਿਵਾਦੇਨ ਵਾ ਕਰਣੁਤ੍ਤਰਿਯਕਰਣੇਨ ਵਾ ਅਜੇਸਿ. ਅਹਾਸੀਤਿ ਮਮ ਸਨ੍ਤਕਂ ਪਤ੍ਤਾਦੀਸੁ ਕਿਞ੍ਚਿਦੇਵ ਅਵਹਰਿ. ਯੇ ਚ ਤਨ੍ਤਿ ਯੇ ਕੇਚਿ ਦੇਵਾ ਵਾ ਮਨੁਸ੍ਸਾ ਵਾ ਗਹਟ੍ਠਾ ਵਾ ਪਬ੍ਬਜਿਤਾ ਵਾ ਤਂ ‘‘ਅਕ੍ਕੋਚ੍ਛਿ ਮ’’ਨ੍ਤਿਆਦਿਵਤ੍ਥੁਕਂ ਕੋਧਂ ਸਕਟਧੁਰਂ ਵਿਯ ਨਦ੍ਧਿਨਾ ਪੂਤਿਮਚ੍ਛਾਦੀਨਿ ਵਿਯ ਚ ਕੁਸਾਦੀਹਿ ਪੁਨਪ੍ਪੁਨਂ ਵੇਠੇਨ੍ਤਾ ਉਪਨਯ੍ਹਨ੍ਤਿ ਉਪਨਾਹਵਸੇਨ ਅਨੁਬਨ੍ਧਨ੍ਤਿ, ਤੇਸਂ ਸਕਿਂ ਉਪ੍ਪਨ੍ਨਂ ਵੇਰਂ ਨ ਸਮ੍ਮਤੀਤਿ ਅਤ੍ਥੋ.
ਯੇ ਚ ਤਂ ਨੁਪਨਯ੍ਹਨ੍ਤੀਤਿ ਅਸ੍ਸਤਿਯਾ ਅਮਨਸਿਕਾਰਵਸੇਨ ਵਾ ਕਮ੍ਮਪਚ੍ਚਵੇਕ੍ਖਣਾਦਿਵਸੇਨ ਵਾ ਯੇ ਤਂ ਅਕ੍ਕੋਸਾਦਿਵਤ੍ਥੁਕਂ ਕੋਧਂ ‘‘ਤਯਾਪਿ ਕੋਚਿ ਨਿਦ੍ਦੋਸੋ ਪੁਰਿਮਭਵੇ ਅਕ੍ਕੁਟ੍ਠੋ ਭਵਿਸ੍ਸਤਿ, ਪਹਟੋ ਭਵਿਸ੍ਸਤਿ, ਕੂਟਸਕ੍ਖਿਂ ਓਤਾਰੇਤ੍ਵਾ ਜਿਤੋ ਭਵਿਸ੍ਸਤਿ, ਕਸ੍ਸਚਿ ਤੇ ਪਸਯ੍ਹ ਕਿਞ੍ਚਿ ਅਚ੍ਛਿਨ੍ਨਂ ਭਵਿਸ੍ਸਤਿ, ਤਸ੍ਮਾ ਨਿਦ੍ਦੋਸੋ ਹੁਤ੍ਵਾਪਿ ਅਕ੍ਕੋਸਾਦੀਨਿ ਪਾਪੁਣਾਸੀ’’ਤਿ ਏਵਂ ਨ ਉਪਨਯ੍ਹਨ੍ਤਿ, ਤੇਸੁ ਪਮਾਦੇਨ ਉਪ੍ਪਨ੍ਨਮ੍ਪਿ ਵੇਰਂ ਇਮਿਨਾ ਅਨੁਪਨਯ੍ਹਨੇਨ ਨਿਰਿਨ੍ਧਨੋ ਵਿਯ ਜਾਤਵੇਦੋ ਉਪਸਮ੍ਮਤਿ.
ਨ ਹਿ ਵੇਰੇਨ ਵੇਰਾਨੀਤਿ ਯਥਾ ਹਿ ਖੇਲ਼ਸਿਙ੍ਘਾਣਿਕਾਦਿਅਸੁਚਿਮਕ੍ਖਿਤਂ ਠਾਨਂ ਤੇਹੇਵ ਅਸੁਚੀਹਿ ਧੋਵਨ੍ਤੋ ਸੁਦ੍ਧਂ ਨਿਗ੍ਗਨ੍ਧਂ ਕਾਤੁਂ ਨ ਸਕ੍ਕੋਤਿ, ਅਥ ਖੋ ਤਂ ਠਾਨਂ ਭਿਯ੍ਯੋਸੋ ਮਤ੍ਤਾਯ ਅਸੁਦ੍ਧਤਰਞ੍ਚ ਦੁਗ੍ਗਨ੍ਧਤਰਞ੍ਚ ਹੋਤਿ, ਏਵਮੇਵ ਅਕ੍ਕੋਸਨ੍ਤਂ ਪਚ੍ਚਕ੍ਕੋਸਨ੍ਤੋ ਪਹਰਨ੍ਤਂ ਪਟਿਪਹਰਨ੍ਤੋ ਵੇਰੇਨ ਵੇਰਂ ਵੂਪਸਮੇਤੁਂ ਨ ਸਕ੍ਕੋਤਿ, ਅਥ ਖੋ ਭਿਯ੍ਯੋ ਵੇਰਮੇਵ ਕਰੋਤਿ. ਇਤਿ ਵੇਰਾਨਿ ਨਾਮ ਵੇਰੇਨ ਕਿਸ੍ਮਿਞ੍ਚਿਪਿ ਕਾਲੇ ਨ ਸਮ੍ਮਨ੍ਤਿ, ਅਥ ਖੋ ਵਡ੍ਢਨ੍ਤਿਯੇਵ. ਅਵੇਰੇਨ ਚ ਸਮ੍ਮਨ੍ਤੀਤਿ ਯਥਾ ਪਨ ਤਾਨਿ ਖੇਲ਼ਾਦੀਨਿ ਅਸੁਚੀਨਿ ਵਿਪ੍ਪਸਨ੍ਨੇਨ ਉਦਕੇਨ ਧੋਵਿਯਮਾਨਾਨਿ ਨਸ੍ਸਨ੍ਤਿ, ਤਂ ਠਾਨਂ ਸੁਦ੍ਧਂ ਹੋਤਿ ਨਿਗ੍ਗਨ੍ਧਂ, ਏਵਮੇਵ ਅਵੇਰੇਨ ਖਨ੍ਤਿਮੇਤ੍ਤੋਦਕੇਨ ਯੋਨਿਸੋਮਨਸਿਕਾਰੇਨ ਪਟਿਸਙ੍ਖਾਨੇਨ ਪਚ੍ਚਵੇਕ੍ਖਣੇਨ ਵੇਰਾਨਿ ਵੂਪਸਮ੍ਮਨ੍ਤਿ ਪਟਿਪ੍ਪਸ੍ਸਮ੍ਭਨ੍ਤਿ ਅਭਾਵਂ ਗਚ੍ਛਨ੍ਤਿ. ਏਸ ਧਮ੍ਮੋ ਸਨਨ੍ਤਨੋਤਿ ਏਸ ਅਵੇਰੇਨ ਵੇਰੂਪਸਮਨਸਙ੍ਖਾਤੋ ਪੋਰਾਣਕੋ ਧਮ੍ਮੋ ਸਬ੍ਬੇਸਂ ਬੁਦ੍ਧਪਚ੍ਚੇਕਬੁਦ੍ਧਖੀਣਾਸਵਾਨਂ ਗਤਮਗ੍ਗੋ.
ਨ ਜਾਨਨ੍ਤੀਤਿ ਅਨਿਚ੍ਚਸਞ੍ਞਂ ਨ ਪਚ੍ਚੁਪਟ੍ਠਾਪੇਨ੍ਤੀਤਿ ਅਧਿਪ੍ਪਾਯੋ. ਤਤੋ ਸਮ੍ਮਨ੍ਤਿ ਮੇਧਗਾਤਿ ਤਤੋ ਤਸ੍ਮਾ ਕਾਰਣਾ ਮੇਧਗਾ ਕਲਹਾ ਸਮ੍ਮਨ੍ਤਿ ਵੂਪਸਮਂ ਗਚ੍ਛਨ੍ਤਿ. ਕਥਂ ਤੇ ਸਮ੍ਮਨ੍ਤੀਤਿ ਆਹ ‘‘ਏਵਞ੍ਹੀ’’ਤਿਆਦਿ. ਤਤ੍ਥ ਏਵਞ੍ਹਿ ਤੇ ਜਾਨਨ੍ਤਾਤਿ ਤੇ ਪਣ੍ਡਿਤਾ ‘‘ਮਯਂ ਮਚ੍ਚੁਸਮੀਪਂ ਗਚ੍ਛਾਮਾ’’ਤਿ ਏਵਂ ਜਾਨਨ੍ਤਾ ਯੋਨਿਸੋਮਨਸਿਕਾਰਂ ਉਪ੍ਪਾਦੇਤ੍ਵਾ ਮੇਧਗਾਨਂ ਕਲਹਾਨਂ ਵੂਪਸਮਾਯ ਪਟਿਪਜ੍ਜਨ੍ਤਿ, ਅਥ ਨੇਸਂ ਤਾਯ ਪਟਿਪਤ੍ਤਿਯਾ ਤੇ ਮੇਧਗਾ ਸਮ੍ਮਨ੍ਤੀਤਿ ਅਧਿਪ੍ਪਾਯੋ.
ਤੇਸਮ੍ਪਿ ਹੋਤਿ ਸਙ੍ਗਤੀਤਿ ਯੇ ਮਾਤਾਪਿਤੂਨਂ ਅਟ੍ਠੀਨਿ ਛਿਨ੍ਦਨ੍ਤਿ, ਪਾਣੇ ਹਰਨ੍ਤਿ, ਗਵਾਦੀਨਿ ਚ ਪਸਯ੍ਹ ਗਣ੍ਹਨ੍ਤਿ, ਏਵਂ ਰਟ੍ਠਂ ਵਿਲੁਮ੍ਪਮਾਨਾਨਂ ਤੇਸਮ੍ਪਿ ਸਙ੍ਗਤਿ ਹੋਤਿ, ਕਿਮਙ੍ਗਂ ਪਨ ਤੁਮ੍ਹਾਕਂ ਨ ਸਿਯਾਤਿ ਅਧਿਪ੍ਪਾਯੋ.
ਵਣ੍ਣਾਵਣ੍ਣਦੀਪਨਤ੍ਥਂ ਵੁਤ੍ਤਾਤਿ ‘‘ਬਾਲਸਹਾਯਤਾਯ ਇਮੇ ਭਿਕ੍ਖੂ ਕਲਹਪਸੁਤਾ, ਪਣ੍ਡਿਤਸਹਾਯਾਨਂ ਪਨ ਇਦਂ ਨ ਸਿਯਾ’’ਤਿ ਪਣ੍ਡਿਤਸਹਾਯਸ੍ਸ ਬਾਲਸਹਾਯਸ੍ਸ ਚ ਵਣ੍ਣਾਵਣ੍ਣਦੀਪਨਤ੍ਥਂ ਵੁਤ੍ਤਾ. ਨਿਪਕਨ੍ਤਿ ਨੇਪਕ੍ਕਪਞ੍ਞਾਯ ਸਮਨ੍ਨਾਗਤਂ. ਸਾਧੁਵਿਹਾਰਿ ਧੀਰਨ੍ਤਿ ਭਦ੍ਦਕਵਿਹਾਰਿਂ ਪਣ੍ਡਿਤਂ. ਪਾਕਟਪਰਿਸ੍ਸਯੇ ਚ ਪਟਿਚ੍ਛਨ੍ਨਪਰਿਸ੍ਸਯੇ ਚ ਅਭਿਭਵਿਤ੍ਵਾਤਿ ਸੀਹਬ੍ਯਗ੍ਘਾਦਯੋ ਪਾਕਟਪਰਿਸ੍ਸਯੇ ਚ ਰਾਗਭਯਦੋਸਭਯਾਦਯੋ ਪਟਿਚ੍ਛਨ੍ਨਪਰਿਸ੍ਸਯੇ ਚਾਤਿ ਸਬ੍ਬੇਵ ਪਰਿਸ੍ਸਯੇ ਅਭਿਭਵਿਤ੍ਵਾ.
ਏਕਕਾ ਚਰਿਂਸੂਤਿ ‘‘ਇਦਂ ਰਜ੍ਜਂ ਨਾਮ ਮਹਨ੍ਤਂ ਪਮਾਦਟ੍ਠਾਨਂ, ਕਿਂ ਅਮ੍ਹਾਕਂ ਰਜ੍ਜੇਨ ਕਾਰਿਤੇਨਾ’’ਤਿ ਰਟ੍ਠਂ ਪਹਾਯ ਤਤੋ ਮਹਾਅਰਞ੍ਞਂ ਪਵਿਸਿਤ੍ਵਾ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਚਤੂਸੁ ਇਰਿਯਾਪਥੇਸੁ ਏਕਕਾ ਚਰਿਂਸੂਤਿ ਅਤ੍ਥੋ.
ਏਕਸ੍ਸ ਚਰਿਤਂ ਸੇਯ੍ਯੋਤਿ ਪਬ੍ਬਜਿਤਸ੍ਸ ਪਬ੍ਬਜਿਤਕਾਲਤੋ ਪਟ੍ਠਾਯ ਏਕੀਭਾਵਾਭਿਰਤਸ੍ਸ ਏਕਕਸ੍ਸੇਵ ਚਰਿਤਂ ਸੇਯ੍ਯੋਤਿ ਅਤ੍ਥੋ. ਨਤ੍ਥਿ ਬਾਲੇ ਸਹਾਯਤਾਤਿ ਚੂਲ਼ਸੀਲਂ ਮਜ੍ਝਿਮਸੀਲਂ ਮਹਾਸੀਲਂ ਦਸ ਕਥਾਵਤ੍ਥੂਨਿ ਤੇਰਸ ਧੁਤਗੁਣਾ ਵਿਪਸ੍ਸਨਾਞਾਣਂ ਚਤ੍ਤਾਰੋ ਮਗ੍ਗਾ ਚਤ੍ਤਾਰਿ ਫਲਾਨਿ ਤਿਸ੍ਸੋ ਵਿਜ੍ਜਾ ਛ ਅਭਿਞ੍ਞਾ ਅਮਤਮਹਾਨਿਬ੍ਬਾਨਨ੍ਤਿ ਅਯਂ ਸਹਾਯਤਾ ਨਾਮ, ਸਾ ਬਾਲਂ ਨਿਸ੍ਸਾਯ ਅਧਿਗਨ੍ਤੁਂ ਨ ਸਕ੍ਕਾਤਿ ਨਤ੍ਥਿ ਬਾਲੇ ਸਹਾਯਤਾ. ਮਾਤਙ੍ਗੋ ਅਰਞ੍ਞੇ ਮਾਤਙ੍ਗਰਞ੍ਞੇਤਿ ਸਰਲੋਪੇਨ ਸਨ੍ਧਿ. ‘‘ਮਾਤਙ੍ਗਰਞ੍ਞੋ’’ਤਿਪਿ ਪਾਠੋ, ਅਰਞ੍ਞਕੋ ਮਾਤਙ੍ਗੋ ਵਿਯਾਤਿ ਅਤ੍ਥੋ. ਮਾਤਙ੍ਗ-ਸਦ੍ਦੇਨੇਵ ਹਤ੍ਥਿਭਾਵਸ੍ਸ ਵੁਤ੍ਤਤ੍ਤਾ ਨਾਗਵਚਨਂ ਤਸ੍ਸ ਮਹਤ੍ਤਵਿਭਾਵਨਤ੍ਥਨ੍ਤਿ ਆਹ ‘‘ਨਾਗੋਤਿ ਮਹਨ੍ਤਾਧਿਵਚਨਮੇਤ’’ਨ੍ਤਿ. ਮਹਨ੍ਤਪਰਿਯਾਯੋ ਹਿ ਨਾਗ-ਸਦ੍ਦੋ ਹੋਤਿ ‘‘ਏਤਂ ਨਾਗਸ੍ਸ ਨਾਗੇਨ, ਈਸਾਦਨ੍ਤਸ੍ਸ ਹਤ੍ਥਿਨੋ’’ਤਿਆਦੀਸੁ (ਉਦਾ. ੩੫).
ਦੀਘਾਵੁਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.
ਬਾਲਕਲੋਣਕਗਮਨਕਥਾਵਣ੍ਣਨਾ
੪੬੫. ਬਾਲਕਲੋਣਕਾਰਗਾਮੋਤਿ ਉਪਾਲਿਗਹਪਤਿਸ੍ਸ ਏਵਂਨਾਮਕੋ ਭੋਗਗਾਮੋ. ਤੇਨੁਪਸਙ੍ਕਮੀਤਿ ਧਮ੍ਮਸੇਨਾਪਤਿਮਹਾਮੋਗ੍ਗਲ੍ਲਾਨਤ੍ਥੇਰੇਸੁ ਵਾ ਅਸੀਤਿਮਹਾਸਾਵਕੇਸੁ ਵਾ ਅਨ੍ਤਮਸੋ ਧਮ੍ਮਭਣ੍ਡਾਗਾਰਿਕਂ ਆਨਨ੍ਦਤ੍ਥੇਰਮ੍ਪਿ ਕਞ੍ਚਿ ਅਨਾਮਨ੍ਤੇਤ੍ਵਾ ਸਯਮੇਵ ਪਤ੍ਤਚੀਵਰਮਾਦਾਯ ਅਨੀਕਨਿਸ੍ਸਟੋ ਹਤ੍ਥੀ ਵਿਯ ਯੂਥਨਿਸ੍ਸਟੋ ਕਾਲ਼ਸੀਹੋ ਵਿਯ ਵਾਤਚ੍ਛਿਨ੍ਨੋ ਵਲਾਹਕੋ ਵਿਯ ਚ ਏਕਕੋਵ ਉਪਸਙ੍ਕਮਿ. ਕਸ੍ਮਾ ਉਪਸਙ੍ਕਮਿ? ਗਣੇ ਕਿਰਸ੍ਸ ਆਦੀਨਵਂ ਦਿਸ੍ਵਾ ਏਕਵਿਹਾਰਿਂ ਭਿਕ੍ਖੁਂ ਪਸ੍ਸਿਤੁਕਾਮਤਾ ਉਦਪਾਦਿ, ਤਸ੍ਮਾ ਸੀਤਾਦਿਪੀਲ਼ਿਤੋ ਉਣ੍ਹਾਦਿਂ ਪਤ੍ਥਯਮਾਨੋ ਵਿਯ ਉਪਸਙ੍ਕਮਿ. ਅਥ ਵਾ ਭਗਵਤਾ ਸੋ ਆਦੀਨਵੋ ਪਗੇਵ ਪਰਿਞ੍ਞਾਤੋ, ਨ ਤੇਨ ਸਤ੍ਥਾ ਨਿਬ੍ਬਿਨ੍ਨੋ, ਤਸ੍ਮਿਂ ਪਨ ਅਨ੍ਤੋਵਸ੍ਸੇ ਕੇਚਿ ਬੁਦ੍ਧਵੇਨੇਯ੍ਯਾ ਨਾਹੇਸੁਂ, ਤੇਨ ਅਞ੍ਞਤ੍ਥ ਗਮਨਂ ਤੇਸਂ ਭਿਕ੍ਖੂਨਂ ਦਮਨੁਪਾਯੋਤਿ ਪਾਲਿਲੇਯ੍ਯਕਂ ਉਦ੍ਦਿਸ੍ਸ ਗਚ੍ਛਨ੍ਤੋ ਏਕਵਿਹਾਰਿਂ ਆਯਸ੍ਮਨ੍ਤਂ ਭਗੁਂ ਸਮ੍ਪਹਂਸੇਤੁਂ ਤਤ੍ਥ ਗਤੋ. ਏਵਂ ਗਤੇ ਚ ਸਤ੍ਥਰਿ ਪਞ੍ਚਸਤਾ ਭਿਕ੍ਖੂ ਆਯਸ੍ਮਨ੍ਤਂ ਆਨਨ੍ਦਂ ਆਹਂਸੁ ‘‘ਆਵੁਸੋ ਆਨਨ੍ਦ ਸਤ੍ਥਾ ਏਕਕੋਵ ਗਤੋ, ਮਯਂ ਅਨੁਬਨ੍ਧਿਸ੍ਸਾਮਾ’’ਤਿ. ‘‘ਆਵੁਸੋ, ਯਦਾ ਭਗਵਾ ਸਾਮਂ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਅਨਾਮਨ੍ਤੇਤ੍ਵਾ ਉਪਟ੍ਠਾਕੇ ਅਨਪਲੋਕੇਤ੍ਵਾ ਭਿਕ੍ਖੁਸਙ੍ਘਂ ਅਦੁਤਿਯੋ ਗਚ੍ਛਤਿ, ਤਦਾ ਏਕਚਾਰਿਕਂ ਚਰਿਤੁਂ ਭਗਵਤੋ ਅਜ੍ਝਾਸਯੋ, ਸਾਵਕੇਨ ਨਾਮ ਸਤ੍ਥੁ ਅਜ੍ਝਾਸਯਾਨੁਰੂਪਂ ਪਟਿਪਜ੍ਜਿਤਬ੍ਬਂ, ਤਸ੍ਮਾ ਨ ਇਮੇਸੁ ਦਿਵਸੇਸੁ ਭਗਵਾ ਅਨੁਗਨ੍ਤਬ੍ਬੋ’’ਤਿ ਨਿਵਾਰੇਸਿ, ਸਯਮ੍ਪਿ ਨਾਨੁਗਞ੍ਛਿ. ਧਮ੍ਮਿਯਾ ਕਥਾਯਾਤਿ ਏਕੀਭਾਵੇ ਆਨਿਸਂਸਪਟਿਸਂਯੁਤ੍ਤਾਯ ਧਮ੍ਮਕਥਾਯ.
ਬਾਲਕਲੋਣਕਗਮਨਕਥਾਵਣ੍ਣਨਾ ਨਿਟ੍ਠਿਤਾ.
ਪਾਚੀਨਵਂਸਦਾਯਗਮਨਕਥਾਵਣ੍ਣਨਾ
੪੬੬. ਯੇਨ ਪਾਚੀਨਵਂਸਦਾਯੋਤਿ ਤਤ੍ਥ ਕਸ੍ਮਾ ਉਪਸਙ੍ਕਮਿ? ਯਥਾ ਨਾਮ ਜਿਘਚ੍ਛਿਤਸ੍ਸ ਭੋਜਨੇ, ਪਿਪਾਸਿਤਸ੍ਸ ਪਾਨੀਯੇ, ਸੀਤੇਨ ਫੁਟ੍ਠਸ੍ਸ ਉਣ੍ਹੇ, ਉਣ੍ਹੇਨ ਫੁਟ੍ਠਸ੍ਸ ਸੀਤੇ, ਦੁਕ੍ਖਿਤਸ੍ਸ ਸੁਖੇ ਅਭਿਰੁਚਿ ਉਪ੍ਪਜ੍ਜਤਿ, ਏਵਮੇਵ ਭਗਵਤੋ ਕੋਸਮ੍ਬਕੇ ਭਿਕ੍ਖੂ ਅਞ੍ਞਮਞ੍ਞਂ ਵਿਵਾਦਾਪਨ੍ਨੇ ਅਸਮਗ੍ਗਵਾਸਂ ਵਸਨ੍ਤੇ, ਸਮਗ੍ਗਵਾਸਂ ਵਸਨ੍ਤੇ ਆਵਜ੍ਜੇਨ੍ਤਸ੍ਸ ਇਮੇ ਤਯੋ ਕੁਲਪੁਤ੍ਤਾ ਆਪਾਥਮਾਗਮਿਂਸੁ, ਅਥ ਨੇਸਂ ਪਗ੍ਗਣ੍ਹਿਤੁਕਾਮੋ ਉਪਸਙ੍ਕਮਿ ‘‘ਏਵਾਯਂ ਪਟਿਪਤ੍ਤਿਅਨੁਕ੍ਕਮੇਨ ਕੋਸਮ੍ਬਕਾਨਂ ਭਿਕ੍ਖੂਨਂ ਵਿਨਯਨੂਪਾਯੋ ਹੋਤੀ’’ਤਿ. ਵਿਹਰਨ੍ਤੀਤਿ ਸਾਮਗ੍ਗਿਰਸਂ ਅਨੁਭਵਮਾਨਾ ਵਿਹਰਨ੍ਤਿ.
ਦਾਯਪਾਲੋਤਿ (ਮ. ਨਿ. ਅਟ੍ਠ. ੧.੩੨੫) ਅਰਞ੍ਞਪਾਲੋ. ਸੋ ਅਰਞ੍ਞਂ ਯਥਾ ਇਚ੍ਛਿਤਿਚ੍ਛਿਤਪ੍ਪਦੇਸੇਨ ਮਨੁਸ੍ਸਾ ਪਵਿਸਿਤ੍ਵਾ ਤਤ੍ਥ ਪੁਪ੍ਫਂ ਵਾ ਫਲਂ ਵਾ ਨਿਯ੍ਯਾਸਂ ਵਾ ਦਬ੍ਬਸਮ੍ਭਾਰਂ ਵਾ ਨ ਹਰਨ੍ਤਿ, ਏਵਂ ਵਤਿਯਾ ਪਰਿਕ੍ਖਿਤ੍ਤਸ੍ਸ ਅਰਞ੍ਞਸ੍ਸ ਯੋਜਿਤੇ ਦ੍ਵਾਰੇ ਨਿਸੀਦਿਤ੍ਵਾ ਅਰਞ੍ਞਂ ਰਕ੍ਖਤਿ, ਤਸ੍ਮਾ ‘‘ਦਾਯਪਾਲੋ’’ਤਿ ਵੁਤ੍ਤੋ. ਅਤ੍ਤਕਾਮਰੂਪਾ ਵਿਹਰਨ੍ਤੀਤਿ ਅਤ੍ਤਨੋ ਹਿਤਂ ਕਾਮਯਮਾਨਸਭਾਵਾ ਹੁਤ੍ਵਾ ਵਿਹਰਨ੍ਤਿ. ਯੋ ਹਿ ਇਮਸ੍ਮਿਂ ਸਾਸਨੇ ਪਬ੍ਬਜਿਤ੍ਵਾਪਿ ਵੇਜ੍ਜਕਮ੍ਮਦੂਤਕਮ੍ਮਪਹਿਣਗਮਨਾਦੀਨਂ ਵਸੇਨ ਏਕਵੀਸਤਿਅਨੇਸਨਾਹਿ ਜੀਵਿਕਂ ਕਪ੍ਪੇਤਿ, ਅਯਂ ਨ ਅਤ੍ਤਕਾਮਰੂਪੋ ਨਾਮ. ਯੋ ਪਨ ਇਮਸ੍ਮਿਂ ਸਾਸਨੇ ਪਬ੍ਬਜਿਤ੍ਵਾ ਏਕਵੀਸਤਿਅਨੇਸਨਂ ਪਹਾਯ ਚਤੁਪਾਰਿਸੁਦ੍ਧਿਸੀਲੇ ਪਤਿਟ੍ਠਾਯ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਸਪ੍ਪਾਯਧੁਤਙ੍ਗਂ ਅਧਿਟ੍ਠਾਯ ਅਟ੍ਠਤਿਂਸਾਯ ਆਰਮ੍ਮਣੇਸੁ ਚਿਤ੍ਤਰੁਚਿਯਂ ਕਮ੍ਮਟ੍ਠਾਨਂ ਗਹੇਤ੍ਵਾ ਗਾਮਨ੍ਤਂ ਪਹਾਯ ਅਰਞ੍ਞਂ ਪਵਿਸਿਤ੍ਵਾ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕੁਰੁਮਾਨੋ ਵਿਚਰਤਿ, ਅਯਂ ਅਤ੍ਤਕਾਮੋ ਨਾਮ. ਤੇਪਿ ਤਯੋ ਕੁਲਪੁਤ੍ਤਾ ਏਵਰੂਪਾ ਅਹੇਸੁਂ. ਤੇਨ ਵੁਤ੍ਤਂ ‘‘ਅਤ੍ਤਕਾਮਰੂਪਾ ਵਿਹਰਨ੍ਤੀ’’ਤਿ.
ਮਾ ਤੇਸਂ ਅਫਾਸੁਮਕਾਸੀਤਿ ਤੇਸਂ ਅਫਾਸੁਕਂ ਮਾ ਅਕਾਸੀਤਿ ਭਗਵਨ੍ਤਂ ਵਾਰੇਸਿ. ਏਵਂ ਕਿਰਸ੍ਸ ਅਹੋਸਿ ‘‘ਇਮੇ ਕੁਲਪੁਤ੍ਤਾ ਸਮਗ੍ਗਾ ਵਿਹਰਨ੍ਤਿ, ਏਕਚ੍ਚਸ੍ਸ ਚ ਗਤਟ੍ਠਾਨੇ ਭਣ੍ਡਨਕਲਹਵਿਵਾਦਾ ਵਤ੍ਤਨ੍ਤਿ, ਤਿਖਿਣਸਿਙ੍ਗੋ ਚਣ੍ਡਗੋਣੋ ਵਿਯ ਓਵਿਜ੍ਝਨ੍ਤੋ ਵਿਚਰਤਿ, ਅਥੇਕਮਗ੍ਗੇਨ ਦ੍ਵਿਨ੍ਨਂ ਗਮਨਂ ਨ ਹੋਤਿ, ਕਦਾਚਿ ਅਯਮ੍ਪਿ ਏਵਂ ਕਰੋਨ੍ਤੋ ਇਮੇਸਂ ਕੁਲਪੁਤ੍ਤਾਨਂ ਸਮਗ੍ਗਵਾਸਂ ਭਿਨ੍ਦੇਯ੍ਯ, ਪਾਸਾਦਿਕੋ ਚ ਪਨੇਸ ਸੁਵਣ੍ਣਵਣ੍ਣੋ ਰਸਗਿਦ੍ਧੋ ਮਞ੍ਞੇ, ਗਤਕਾਲਤੋ ਪਟ੍ਠਾਯ ਪਣੀਤਦਾਯਕਾਨਂ ਅਤ੍ਤਨੋ ਉਪਟ੍ਠਾਕਾਨਂ ਵਣ੍ਣਕਥਨਾਦੀਹਿ ਇਮੇਸਂ ਕੁਲਪੁਤ੍ਤਾਨਂ ਅਪ੍ਪਮਾਦਵਿਹਾਰਂ ਭਿਨ੍ਦੇਯ੍ਯ, ਵਸਨਟ੍ਠਾਨਾਨਿ ਚਾਪਿ ਏਤੇਸਂ ਕੁਲਪੁਤ੍ਤਾਨਂ ਨਿਬਦ੍ਧਾਨਿ ਪਰਿਚ੍ਛਿਨ੍ਨਾਨਿ ਤਿਸ੍ਸੋਵ ਪਣ੍ਣਸਾਲਾ ਤਯੋ ਚਙ੍ਕਮਾ ਤੀਣਿ ਦਿਵਾਟ੍ਠਾਨਾਨਿ ਤੀਣਿ ਮਞ੍ਚਪੀਠਾਨਿ, ਅਯਂ ਪਨ ਸਮਣੋ ਮਹਾਕਾਯੋ ਵੁਡ੍ਢਤਰੋ ਮਞ੍ਞੇ ਭਵਿਸ੍ਸਤਿ, ਸੋ ਅਕਾਲੇ ਇਮੇ ਕੁਲਪੁਤ੍ਤੇ ਸੇਨਾਸਨਾ ਵੁਟ੍ਠਪੇਸ੍ਸਤਿ, ਏਵਂ ਸਬ੍ਬਥਾਪਿ ਏਤੇਸਂ ਅਫਾਸੁ ਭਵਿਸ੍ਸਤੀ’’ਤਿ. ਤਂ ਅਨਿਚ੍ਛਨ੍ਤੋ ‘‘ਮਾ ਤੇਸਂ ਅਫਾਸੁਮਕਾਸੀ’’ਤਿ ਭਗਵਨ੍ਤਂ ਵਾਰੇਤਿ.
ਕਿਂ ਪਨੇਸ ਜਾਨਨ੍ਤੋ ਵਾਰੇਸਿ ਅਜਾਨਨ੍ਤੋਤਿ? ਅਜਾਨਨ੍ਤੋ. ਸਮ੍ਮਾਸਮ੍ਬੁਦ੍ਧੋ ਹਿ ਨਾਮ ਯਦਾ ਅਨੇਕਭਿਕ੍ਖੁਸਹਸ੍ਸਪਰਿਵਾਰੋ ਬ੍ਯਾਮਪ੍ਪਭਾਯ ਅਸੀਤਿਅਨੁਬ੍ਯਞ੍ਜਨੇਹਿ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਸਿਰਿਯਾ ਚ ਬੁਦ੍ਧਾਨੁਭਾਵਂ ਦਸ੍ਸੇਨ੍ਤੋ ਵਿਚਰਤਿ, ਤਦਾ ‘‘ਕੋ ਏਸੋ’’ਤਿ ਅਪੁਚ੍ਛਿਤ੍ਵਾਵ ਜਾਨਿਤਬ੍ਬੋ ਹੋਤਿ. ਤਦਾ ਪਨ ਭਗਵਾ ‘‘ਮਾਸ੍ਸੁ ਕੋਚਿ ਮਮ ਬੁਦ੍ਧਾਨੁਭਾਵਂ ਅਞ੍ਞਾਸੀ’’ਤਿ ਤਥਾਰੂਪੇਨ ਇਦ੍ਧਾਭਿਸਙ੍ਖਾਰੇਨ ਸਬ੍ਬਮ੍ਪਿ ਤਂ ਬੁਦ੍ਧਾਨੁਭਾਵਂ ਚੀਵਰਗਬ੍ਭੇਨ ਵਿਯ ਪਟਿਚ੍ਛਾਦੇਤ੍ਵਾ ਵਲਾਹਕਗਬ੍ਭੇਨ ਪਟਿਚ੍ਛਨ੍ਨੋ ਪੁਣ੍ਣਚਨ੍ਦੋ ਵਿਯ ਸਯਮੇਵ ਪਤ੍ਤਚੀਵਰਮਾਦਾਯ ਅਞ੍ਞਾਤਕਵੇਸੇਨ ਅਗਮਾਸਿ. ਇਤਿ ਤਂ ਅਜਾਨਨ੍ਤੋਵ ਦਾਯਪਾਲੋ ਵਾਰੇਸਿ.
ਏਤਦਵੋਚਾਤਿ ਥੇਰੋ ਕਿਰ ‘‘ਮਾ ਸਮਣਾ’’ਤਿ ਦਾਯਪਾਲਸ੍ਸ ਕਥਂ ਸੁਤ੍ਵਾ ਚਿਨ੍ਤੇਸਿ ‘‘ਮਯਂ ਤਯੋ ਜਨਾ ਇਧ ਵਿਹਰਾਮ, ਅਞ੍ਞੋ ਪਬ੍ਬਜਿਤੋ ਨਾਮ ਨਤ੍ਥਿ, ਅਯਞ੍ਚ ਦਾਯਪਾਲੋ ਪਬ੍ਬਜਿਤੇਨ ਵਿਯ ਸਦ੍ਧਿਂ ਕਥੇਤਿ, ਕੋ ਨੁ ਖੋ ਭਵਿਸ੍ਸਤੀ’’ਤਿ ਦਿਵਾਟ੍ਠਾਨਤੋ ਉਟ੍ਠਾਯ ਦ੍ਵਾਰੇ ਠਤ੍ਵਾ ਮਗ੍ਗਂ ਓਲੋਕੇਨ੍ਤੋ ਭਗਵਨ੍ਤਂ ਅਦ੍ਦਸ. ਭਗਵਾਪਿ ਥੇਰਸ੍ਸ ਸਹ ਦਸ੍ਸਨੇਨੇਵ ਸਰੀਰੋਭਾਸਂ ਮੁਞ੍ਚਿ, ਅਸੀਤਿਅਨੁਬ੍ਯਞ੍ਜਨਵਿਰਾਜਿਤਾ ਬ੍ਯਾਮਪ੍ਪਭਾ ਪਸਾਰਿਤਸੁਵਣ੍ਣਪਟੋ ਵਿਯ ਵਿਰੋਚਿਤ੍ਥ. ਥੇਰੋ ‘‘ਅਯਂ ਦਾਯਪਾਲੋ ਫਣਕਤਆਸੀਵਿਸਂ ਗੀਵਾਯ ਗਹੇਤੁਂ ਹਤ੍ਥਂ ਪਸਾਰੇਨ੍ਤੋ ਵਿਯ ਲੋਕੇ ਅਗ੍ਗਪੁਗ੍ਗਲੇਨ ਸਦ੍ਧਿਂ ਕਥੇਨ੍ਤੋਵ ਨ ਜਾਨਾਤਿ, ਅਞ੍ਞਤਰਭਿਕ੍ਖੁਨਾ ਵਿਯ ਸਦ੍ਧਿਂ ਕਥੇਤੀ’’ਤਿ ਨਿਵਾਰੇਨ੍ਤੋ ਏਤਂ ‘‘ਮਾਵੁਸੋ, ਦਾਯਪਾਲਾ’’ਤਿਆਦਿਵਚਨਂ ਅਵੋਚ.
ਤੇਨੁਪਸਙ੍ਕਮੀਤਿ ਕਸ੍ਮਾ ਭਗਵਤੋ ਪਚ੍ਚੁਗ੍ਗਮਨਂ ਅਕਤ੍ਵਾਵ ਉਪਸਙ੍ਕਮਿ? ਏਵਂ ਕਿਰਸ੍ਸ ਅਹੋਸਿ ‘‘ਮਯਂ ਤਯੋ ਜਨਾ ਸਮਗ੍ਗਵਾਸਂ ਵਸਾਮ, ਸਚਾਹਂ ਏਕਕੋਵ ਪਚ੍ਚੁਗ੍ਗਮਨਂ ਕਰਿਸ੍ਸਾਮਿ, ਸਮਗ੍ਗਵਾਸੋ ਨਾਮ ਨ ਭਵਿਸ੍ਸਤਿ, ਪਿਯਮਿਤ੍ਤੇ ਗਹੇਤ੍ਵਾਵ ਪਚ੍ਚੁਗ੍ਗਮਨਂ ਕਰਿਸ੍ਸਾਮਿ. ਯਥਾ ਚ ਭਗਵਾ ਮਯ੍ਹਂ ਪਿਯੋ, ਏਵਂ ਸਹਾਯਾਨਮ੍ਪਿ ਮੇ ਪਿਯੋ’’ਤਿ ਤੇਹਿ ਸਦ੍ਧਿਂ ਪਚ੍ਚੁਗ੍ਗਮਨਂ ਕਾਤੁਕਾਮੋ ਸਯਂ ਅਕਤ੍ਵਾ ਉਪਸਙ੍ਕਮਿ. ਕੇਚਿ ਪਨ ‘‘ਤੇਸਂ ਥੇਰਾਨਂ ਪਣ੍ਣਸਾਲਦ੍ਵਾਰੇ ਚਙ੍ਕਮਨਕੋਟਿਯਾ ਭਗਵਤੋ ਆਗਮਨਮਗ੍ਗੋ ਹੋਤਿ, ਤਸ੍ਮਾ ਥੇਰੋ ਤੇਸਂ ਸਞ੍ਞਂ ਦਦਮਾਨੋਵ ਗਤੋ’’ਤਿ ਵਦਨ੍ਤਿ. ਅਭਿਕ੍ਕਮਥਾਤਿ ਇਤੋ ਆਗਚ੍ਛਥ. ਪਾਦੇ ਪਕ੍ਖਾਲੇਸੀਤਿ ਵਿਕਸਿਤਪਦੁਮਸਨ੍ਨਿਭੇਹਿ ਜਾਲਹਤ੍ਥੇਹਿ ਮਣਿਵਣ੍ਣਂ ਉਦਕਂ ਗਹੇਤ੍ਵਾ ਸੁਵਣ੍ਣਵਣ੍ਣੇਸੁ ਪਿਟ੍ਠਿਪਾਦੇਸੁ ਉਦਕਂ ਆਸਿਞ੍ਚਿਤ੍ਵਾ ਪਾਦੇਨ ਪਾਦਂ ਘਂਸੇਨ੍ਤੋ ਪਕ੍ਖਾਲੇਸਿ. ਬੁਦ੍ਧਾਨਂ ਕਾਯੇ ਰਜੋਜਲ੍ਲਂ ਨਾਮ ਨ ਉਪਲਿਮ੍ਪਤਿ, ਕਸ੍ਮਾ ਪਕ੍ਖਾਲੇਸੀਤਿ? ਸਰੀਰਸ੍ਸ ਉਤੁਗ੍ਗਹਣਤ੍ਥਂ ਤੇਸਞ੍ਚ ਚਿਤ੍ਤਸਮ੍ਪਹਂਸਨਤ੍ਥਂ. ਅਮ੍ਹੇਹਿ ਅਭਿਹਟੇਨ ਉਦਕੇਨ ਭਗਵਾ ਪਾਦੇ ਪਕ੍ਖਾਲੇਸਿ, ਪਰਿਭੋਗਂ ਅਕਾਸੀਤਿ ਤੇਸਂ ਭਿਕ੍ਖੂਨਂ ਬਲਵਸੋਮਨਸ੍ਸਵਸੇਨ ਚਿਤ੍ਤਂ ਪੀਣਿਤਂ ਹੋਤਿ, ਤਸ੍ਮਾ ਪਕ੍ਖਾਲੇਸਿ.
ਆਯਸ੍ਮਨ੍ਤਂ ਅਨੁਰੁਦ੍ਧਂ ਭਗਵਾ ਏਤਦਵੋਚਾਤਿ ਸੋ ਕਿਰ ਤੇਸਂ ਵੁਡ੍ਢਤਰੋ, ਤਸ੍ਸ ਸਙ੍ਗਹੇ ਕਤੇ ਸੇਸਾਨਂ ਕਤੋਵ ਹੋਤੀਤਿ ਥੇਰਞ੍ਞੇਵ ਏਤਂ ‘‘ਕਚ੍ਚਿ ਵੋ ਅਨੁਰੁਦ੍ਧਾ’’ਤਿਆਦਿਵਚਨਂ ਅਵੋਚ. ਅਨੁਰੁਦ੍ਧਾਤਿ ਵਾ ਏਕਸੇਸਨਯੇਨ ਵੁਤ੍ਤਂ ਵਿਰੂਪੇਕਸੇਸਸ੍ਸਪਿ ਇਚ੍ਛਿਤਬ੍ਬਤ੍ਤਾ, ਏਵਞ੍ਚ ਕਤ੍ਵਾ ਬਹੁਵਚਨਨਿਦ੍ਦੇਸੋ ਚ ਸਮਤ੍ਥਿਤੋ ਹੋਤਿ. ਕਚ੍ਚੀਤਿ ਪੁਚ੍ਛਨਤ੍ਥੇ ਨਿਪਾਤੋ. ਵੋਤਿ ਸਾਮਿਵਚਨਂ. ਇਦਂ ਵੁਤ੍ਤਂ ਹੋਤਿ – ਕਚ੍ਚਿ ਅਨੁਰੁਦ੍ਧਾ ਤੁਮ੍ਹਾਕਂ ਖਮਨੀਯਂ, ਇਰਿਯਾਪਥੋ ਵੋ ਖਮਤਿ, ਕਚ੍ਚਿ ਯਾਪਨੀਯਂ, ਕਚ੍ਚਿ ਵੋ ਜੀਵਿਤਂ ਯਾਪੇਤਿ ਘਟਿਯਤਿ, ਕਚ੍ਚਿ ਪਿਣ੍ਡਕੇਨ ਨ ਕਿਲਮਥ, ਕਚ੍ਚਿ ਤੁਮ੍ਹਾਕਂ ਸੁਲਭਪਿਣ੍ਡਂ, ਸਮ੍ਪਤ੍ਤੇ ਵੋ ਦਿਸ੍ਵਾ ਮਨੁਸ੍ਸਾ ਉਲ਼ੁਙ੍ਕਯਾਗੁਂ ਵਾ ਕਟਚ੍ਛੁਭਿਕ੍ਖਂ ਵਾ ਦਾਤਬ੍ਬਂ ਮਞ੍ਞਨ੍ਤੀਤਿ ਭਿਕ੍ਖਾਚਾਰਵਤ੍ਤਂ ਪੁਚ੍ਛਤਿ. ਕਸ੍ਮਾ? ਯਸ੍ਮਾ ਪਚ੍ਚਯੇਨ ਅਕਿਲਮਨ੍ਤੇਨ ਸਕ੍ਕਾ ਸਮਣਧਮ੍ਮੋ ਕਾਤੁਂ, ਵਤ੍ਤਮੇਵ ਵਾ ਏਤਂ ਪਬ੍ਬਜਿਤਾਨਂ.
ਅਥ ਤੇਨ ਪਟਿਵਚਨੇ ਦਿਨ੍ਨੇ ‘‘ਅਨੁਰੁਦ੍ਧਾ ਤੁਮ੍ਹੇ ਰਾਜਪਬ੍ਬਜਿਤਾ ਮਹਾਪੁਞ੍ਞਾ, ਮਨੁਸ੍ਸਾ ਤੁਮ੍ਹਾਕਂ ਅਰਞ੍ਞੇ ਵਸਨ੍ਤਾਨਂ ਅਦਤ੍ਵਾ ਕਸ੍ਸ ਅਞ੍ਞਸ੍ਸ ਦਾਤਬ੍ਬਂ ਮਞ੍ਞਿਸ੍ਸਨ੍ਤਿ, ਤੁਮ੍ਹੇ ਪਨ ਏਤਂ ਭੁਞ੍ਜਿਤ੍ਵਾ ਕਿਂ ਨੁ ਖੋ ਮਿਗਪੋਤਕਾ ਵਿਯ ਅਞ੍ਞਮਞ੍ਞਂ ਘਟ੍ਟੇਨ੍ਤਾ ਵਿਹਰਥ, ਉਦਾਹੁ ਸਾਮਗ੍ਗਿਭਾਵੋ ਵੋ ਅਤ੍ਥੀ’’ਤਿ ਸਾਮਗ੍ਗਿਰਸਂ ਪੁਚ੍ਛਨ੍ਤੋ ‘‘ਕਚ੍ਚਿ ਪਨ ਵੋ ਅਨੁਰੁਦ੍ਧਾ ਸਮਗ੍ਗਾ’’ਤਿਆਦਿਮਾਹ. ਤਤ੍ਥ ਖੀਰੋਦਕੀਭੂਤਾਤਿ ਯਥਾ ਖੀਰਞ੍ਚ ਉਦਕਞ੍ਚ ਅਞ੍ਞਮਞ੍ਞਂ ਸਂਸਨ੍ਦਤਿ, ਵਿਸੁਂ ਨ ਹੋਤਿ, ਏਕਤ੍ਤਂ ਵਿਯ ਉਪੇਤਿ, ਕਚ੍ਚਿ ਏਵਂ ਸਾਮਗ੍ਗਿਵਸੇਨ ਏਕਤ੍ਤੁਪਗਤਚਿਤ੍ਤੁਪ੍ਪਾਦਾ ਵਿਹਰਥਾਤਿ ਪੁਚ੍ਛਤਿ. ਪਿਯਚਕ੍ਖੂਹੀਤਿ ਮੇਤ੍ਤਚਿਤ੍ਤਂ ਪਚ੍ਚੁਪਟ੍ਠਾਪੇਤ੍ਵਾ ਓਲੋਕਨਤੋ ਪਿਯਭਾਵਦੀਪਕਾਨਿ ਚਕ੍ਖੂਨਿ ਪਿਯਚਕ੍ਖੂਨਿ ਨਾਮ, ‘‘ਕਚ੍ਚਿ ਤਥਾਰੂਪੇਹਿ ਚਕ੍ਖੂਹਿ ਅਞ੍ਞਮਞ੍ਞਂ ਪਸ੍ਸਨ੍ਤਾ ਵਿਹਰਥਾ’’ਤਿ ਪੁਚ੍ਛਤਿ. ਤਗ੍ਘਾਤਿ ਏਕਂਸਤ੍ਥੇ ਨਿਪਾਤੋ, ਏਕਂਸੇਨ ਮਯਂ ਭਨ੍ਤੇਤਿ ਵੁਤ੍ਤਂ ਹੋਤਿ. ਯਥਾ ਕਥਂ ਪਨਾਤਿ ਏਤ੍ਥ ਯਥਾਤਿ ਨਿਪਾਤਮਤ੍ਤਂ, ਕਥਨ੍ਤਿ ਕਾਰਣਪੁਚ੍ਛਾ, ਕਥਂ ਪਨ ਤੁਮ੍ਹੇ ਏਵਂ ਵਿਹਰਥ, ਕੇਨ ਕਾਰਣੇਨ ਵਿਹਰਥ, ਤਂ ਮੇ ਕਾਰਣਂ ਬ੍ਰੂਹੀਤਿ ਵੁਤ੍ਤਂ ਹੋਤਿ.
ਮੇਤ੍ਤਂ ਕਾਯਕਮ੍ਮਨ੍ਤਿ ਮੇਤ੍ਤਚਿਤ੍ਤਵਸੇਨ ਪਵਤ੍ਤਂ ਕਾਯਕਮ੍ਮਂ. ਆਵਿ ਚੇਵ ਰਹੋ ਚਾਤਿ ਸਮ੍ਮੁਖਾ ਚੇਵ ਪਰਮ੍ਮੁਖਾ ਚ. ਇਤਰੇਸੁਪਿ ਏਸੇਵ ਨਯੋ. ਤਤ੍ਥ ਸਮ੍ਮੁਖਾ ਕਾਯਵਚੀਕਮ੍ਮਾਨਿ ਸਹਵਾਸੇ ਲਬ੍ਭਨ੍ਤਿ, ਇਤਰਾਨਿ ਵਿਪ੍ਪਵਾਸੇ, ਮਨੋਕਮ੍ਮਂ ਸਬ੍ਬਤ੍ਥ ਲਬ੍ਭਤਿ. ਯਞ੍ਹਿ ਸਹੇਵ ਵਸਨ੍ਤੇਸੁ ਏਕੇਨ ਮਞ੍ਚਪੀਠਂ ਵਾ ਦਾਰੁਭਣ੍ਡਂ ਵਾ ਮਤ੍ਤਿਕਾਭਣ੍ਡਂ ਵਾ ਬਹਿ ਦੁਨ੍ਨਿਕ੍ਖਿਤ੍ਤਂ ਹੋਤਿ, ਤਂ ਦਿਸ੍ਵਾ ‘‘ਕੇਨਿਦਂ ਵਲ਼ਞ੍ਜਿਤ’’ਨ੍ਤਿ ਅਵਞ੍ਞਂ ਅਕਤ੍ਵਾ ਅਤ੍ਤਨਾ ਦੁਨ੍ਨਿਕ੍ਖਿਤ੍ਤਂ ਵਿਯ ਗਹੇਤ੍ਵਾ ਪਟਿਸਾਮੇਨ੍ਤਸ੍ਸ ਪਟਿਜਗ੍ਗਿਤਬ੍ਬਯੁਤ੍ਤਂ ਵਾ ਪਨ ਠਾਨਂ ਪਟਿਜਗ੍ਗਨ੍ਤਸ੍ਸ ਸਮ੍ਮੁਖਾ ਮੇਤ੍ਤਂ ਕਾਯਕਮ੍ਮਂ ਨਾਮ ਹੋਤਿ. ਏਕਸ੍ਮਿਂ ਪਕ੍ਕਨ੍ਤੇ ਤੇਨ ਦੁਨ੍ਨਿਕ੍ਖਿਤ੍ਤਂ ਸੇਨਾਸਨਪਰਿਕ੍ਖਾਰਂ ਤਥੇਵ ਨਿਕ੍ਖਿਪਨ੍ਤਸ੍ਸ ਪਟਿਜਗ੍ਗਿਤਬ੍ਬਯੁਤ੍ਤਂ ਵਾ ਪਨ ਠਾਨਂ ਪਟਿਜਗ੍ਗਨ੍ਤਸ੍ਸ ਪਰਮ੍ਮੁਖਾ ਮੇਤ੍ਤਂ ਕਾਯਕਮ੍ਮਂ ਨਾਮ ਹੋਤਿ. ਸਹਵਸਨ੍ਤਸ੍ਸ ਪਨ ਥੇਰੇਹਿ ਸਦ੍ਧਿਂ ਮਧੁਰਂ ਸਮ੍ਮੋਦਨੀਯਕਥਂ ਪਟਿਸਨ੍ਥਾਰਕਥਂ ਸਾਰਣੀਯਕਥਂ ਧਮ੍ਮਕਥਂ ਸਰਭਞ੍ਞਂ ਸਾਕਚ੍ਛਂ ਪਞ੍ਹਪੁਚ੍ਛਨਂ ਪਞ੍ਹਵਿਸ੍ਸਜ੍ਜਨਨ੍ਤਿ ਏਵਮਾਦਿਕਰਣੇ ਸਮ੍ਮੁਖਾ ਮੇਤ੍ਤਂ ਵਚੀਕਮ੍ਮਂ ਨਾਮ ਹੋਤਿ. ਥੇਰੇਸੁ ਪਨ ਪਕ੍ਕਨ੍ਤੇਸੁ ‘‘ਮਯ੍ਹਂ ਪਿਯਸਹਾਯੋ ਨਨ੍ਦਿਯਤ੍ਥੇਰੋ ਕਿਮਿਲਤ੍ਥੇਰੋ ਏਵਂ ਸੀਲਸਮ੍ਪਨ੍ਨੋ ਏਵਂ ਆਚਾਰਸਮ੍ਪਨ੍ਨੋ’’ਤਿਆਦਿਗੁਣਕਥਨੇ ਪਰਮ੍ਮੁਖਾ ਮੇਤ੍ਤਂ ਵਚੀਕਮ੍ਮਂ ਨਾਮ ਹੋਤਿ. ‘‘ਮਯ੍ਹਂ ਪਿਯਮਿਤ੍ਤੋ ਨਨ੍ਦਿਯਤ੍ਥੇਰੋ ਕਿਮਿਲਤ੍ਥੇਰੋ ਅਵੇਰੋ ਹੋਤੁ ਅਬ੍ਯਾਪਜ੍ਜੋ ਸੁਖੀ’’ਤਿ ਏਵਂ ਸਮਨ੍ਨਾਹਰਤੋ ਪਨ ਸਮ੍ਮੁਖਾਪਿ ਪਰਮ੍ਮੁਖਾਪਿ ਮੇਤ੍ਤਂ ਮਨੋਕਮ੍ਮਂ ਹੋਤਿਯੇਵ.
ਨਾਨਾ ਹਿ ਖੋ ਨੋ ਭਨ੍ਤੇ ਕਾਯਾਤਿ ਅਯਞ੍ਹਿ ਕਾਯੋ ਪਿਟ੍ਠਂ ਵਿਯ ਮਤ੍ਤਿਕਾ ਵਿਯ ਚ ਓਮਦ੍ਦਿਤ੍ਵਾ ਏਕਤੋ ਕਾਤੁਂ ਨ ਸਕ੍ਕਾ. ਏਕਞ੍ਚ ਪਨ ਮਞ੍ਞੇ ਚਿਤ੍ਤਨ੍ਤਿ ਚਿਤ੍ਤਂ ਪਨ ਨੋ ਅਤ੍ਤਨੋ ਵਿਯ ਅਞ੍ਞਮਞ੍ਞਸ੍ਸ ਹਿਤਭਾਵੇਨ ਅਵਿਰੋਧਭਾਵੇਨ ਭੇਦਾਭਾਵੇਨ ਸਮਗ੍ਗਭਾਵੇਨ ਏਕਮੇਵਾਤਿ ਦਸ੍ਸੇਤਿ. ਕਥਂ ਪਨੇਤੇ ਸਕਂ ਚਿਤ੍ਤਂ ਨਿਕ੍ਖਿਪਿਤ੍ਵਾ ਇਤਰੇਸਂ ਚਿਤ੍ਤਵਸੇਨ ਵਤ੍ਤਿਂਸੂਤਿ? ਏਕਸ੍ਸ ਪਤ੍ਤੇ ਮਲਂ ਉਟ੍ਠਹਤਿ, ਏਕਸ੍ਸ ਚੀਵਰਂ ਕਿਲਿਟ੍ਠਂ ਹੋਤਿ, ਏਕਸ੍ਸ ਪਰਿਭਣ੍ਡਕਮ੍ਮਂ ਹੋਤਿ. ਤਤ੍ਥ ਯਸ੍ਸ ਪਤ੍ਤੇ ਮਲਂ ਉਟ੍ਠਿਤਂ, ਤੇਨ ‘‘ਮਮਾਵੁਸੋ ਪਤ੍ਤੇ ਮਲਂ ਉਟ੍ਠਿਤਂ, ਪਚਿਤੁਂ ਵਟ੍ਟਤੀ’’ਤਿ ਵੁਤ੍ਤੇ ਇਤਰੇ ‘‘ਮਯ੍ਹਂ ਚੀਵਰਂ ਕਿਲਿਟ੍ਠਂ ਧੋਵਿਤਬ੍ਬਂ, ਮਯ੍ਹਂ ਪਰਿਭਣ੍ਡਂ ਕਾਤਬ੍ਬ’’ਨ੍ਤਿ ਅਵਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਦਾਰੂਨਿ ਆਹਰਿਤ੍ਵਾ ਭਿਨ੍ਦਿਤ੍ਵਾ ਪਤ੍ਤਕਟਾਹੇ ਬਹਲਤਨੁਮਤ੍ਤਿਕਾਹਿ ਲੇਪਂ ਕਤ੍ਵਾ ਪਤ੍ਤਂ ਪਚਿਤ੍ਵਾ ਤਤੋ ਪਰਂ ਚੀਵਰਂ ਵਾ ਧੋਵਨ੍ਤਿ, ਪਰਿਭਣ੍ਡਂ ਵਾ ਕਰੋਨ੍ਤਿ. ‘‘ਮਮਾਵੁਸੋ ਚੀਵਰਂ ਕਿਲਿਟ੍ਠਂ, ਧੋਵਿਤੁਂ ਵਟ੍ਟਤੀ’’ਤਿ ‘‘ਮਮ ਪਣ੍ਣਸਾਲਾ ਉਕ੍ਲਾਪਾ, ਪਰਿਭਣ੍ਡਂ ਕਾਤੁਂ ਵਟ੍ਟਤੀ’’ਤਿ ਪਠਮਤਰਂ ਆਰੋਚਿਤੇਪਿ ਏਸੇਵ ਨਯੋ.
ਇਦਾਨਿ ਤੇਸਂ ਅਪ੍ਪਮਾਦਲਕ੍ਖਣਂ ਪੁਚ੍ਛਨ੍ਤੋ ‘‘ਕਚ੍ਚਿ ਪਨ ਵੋ ਅਨੁਰੁਦ੍ਧਾ’’ਤਿਆਦਿਮਾਹ. ਤਤ੍ਥ ਵੋਤਿ ਨਿਪਾਤਮਤ੍ਤਂ, ਪਚ੍ਚਤ੍ਤਵਚਨਂ ਵਾ, ਕਚ੍ਚਿ ਤੁਮ੍ਹੇਤਿ ਅਤ੍ਥੋ. ਅਮ੍ਹਾਕਨ੍ਤਿ ਅਮ੍ਹੇਸੁ ਤੀਸੁ ਜਨੇਸੁ. ਪਿਣ੍ਡਾਯ ਪਟਿਕ੍ਕਮਤੀਤਿ ਗਾਮੇ ਪਿਣ੍ਡਾਯ ਚਰਿਤ੍ਵਾ ਪਚ੍ਚਾਗਚ੍ਛਤਿ. ਅਵਕ੍ਕਾਰਪਾਤਿਨ੍ਤਿ ਅਤਿਰੇਕਪਿਣ੍ਡਪਾਤਂ ਅਪਨੇਤ੍ਵਾ ਠਪਨਤ੍ਥਾਯ ਏਕਂ ਸਮੁਗ੍ਗਪਾਤਿਂ ਧੋਵਿਤ੍ਵਾ ਠਪੇਤਿ. ਯੋ ਪਚ੍ਛਾਤਿ ਤੇ ਕਿਰ ਥੇਰਾ ਨ ਏਕਤੋਵ ਭਿਕ੍ਖਾਚਾਰਂ ਪਵਿਸਨ੍ਤਿ. ਫਲਸਮਾਪਤ੍ਤਿਰਤਾ ਹੇਤੇ ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ ਵਤ੍ਤਪਟਿਪਤ੍ਤਿਂ ਪੂਰੇਤ੍ਵਾ ਸੇਨਾਸਨਂ ਪਵਿਸਿਤ੍ਵਾ ਕਾਲਪਰਿਚ੍ਛੇਦਂ ਕਤ੍ਵਾ ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸੀਦਨ੍ਤਿ. ਤੇਸੁ ਯੋ ਪਠਮਤਰਂ ਨਿਸਿਨ੍ਨੋ ਅਤ੍ਤਨੋ ਕਾਲਪਰਿਚ੍ਛੇਦਵਸੇਨ ਪਠਮਤਰਂ ਉਟ੍ਠਾਤਿ, ਸੋ ਪਿਣ੍ਡਾਯ ਚਰਿਤ੍ਵਾ ਪਟਿਨਿਵਤ੍ਤੋ ਭਤ੍ਤਕਿਚ੍ਚਟ੍ਠਾਨਂ ਆਗਨ੍ਤ੍ਵਾ ਜਾਨਾਤਿ ‘‘ਦ੍ਵੇ ਭਿਕ੍ਖੂ ਪਚ੍ਛਤੋ, ਅਹਂ ਪਠਮਤਰਂ ਆਗਤੋ’’ਤਿ. ਅਥ ਪਤ੍ਤਂ ਪਿਦਹਿਤ੍ਵਾ ਆਸਨਪਞ੍ਞਾਪਨਾਦੀਨਿ ਕਤ੍ਵਾ ਯਦਿ ਪਤ੍ਤੇ ਪਟਿਵੀਸਮਤ੍ਤਮੇਵ ਹੋਤਿ, ਨਿਸੀਦਿਤ੍ਵਾ ਭੁਞ੍ਜਤਿ, ਯਦਿ ਅਤਿਰੇਕਂ ਹੋਤਿ, ਅਵਕ੍ਕਾਰਪਾਤਿਯਂ ਪਕ੍ਖਿਪਿਤ੍ਵਾ ਪਾਤਿਂ ਪਿਧਾਯ ਭੁਞ੍ਜਤਿ, ਕਤਭਤ੍ਤਕਿਚ੍ਚੋ ਪਤ੍ਤਂ ਧੋਵਿਤ੍ਵਾ ਵੋਦਕਂ ਕਤ੍ਵਾ ਥਵਿਕਾਯ ਓਸਾਪੇਤ੍ਵਾ ਪਤ੍ਤਚੀਵਰਂ ਗਹੇਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਪਵਿਸਤਿ.
ਦੁਤਿਯੋਪਿ ਆਗਨ੍ਤ੍ਵਾਵ ਜਾਨਾਤਿ ‘‘ਏਕੋ ਪਠਮਂ ਆਗਤੋ, ਏਕੋ ਪਚ੍ਛਤੋ’’ਤਿ. ਸੋ ਸਚੇ ਪਤ੍ਤੇ ਭਤ੍ਤਂ ਪਮਾਣਮੇਵ ਹੋਤਿ, ਭੁਞ੍ਜਤਿ. ਸਚੇ ਮਨ੍ਦਂ, ਅਵਕ੍ਕਾਰਪਾਤਿਤੋ ਗਹੇਤ੍ਵਾ ਭੁਞ੍ਜਤਿ. ਸਚੇ ਅਤਿਰੇਕਂ ਹੋਤਿ, ਅਵਕ੍ਕਾਰਪਾਤਿਯਂ ਪਕ੍ਖਿਪਿਤ੍ਵਾ ਪਮਾਣਮੇਵ ਭੁਞ੍ਜਿਤ੍ਵਾ ਪੁਰਿਮਤ੍ਥੇਰੋ ਵਿਯ ਵਸਨਟ੍ਠਾਨਂ ਪਵਿਸਤਿ. ਤਤਿਯੋਪਿ ਆਗਨ੍ਤ੍ਵਾਵ ਜਾਨਾਤਿ ‘‘ਦ੍ਵੇ ਪਠਮਂ ਆਗਤਾ, ਅਹਂ ਪਚ੍ਛਿਮੋ’’ਤਿ. ਸੋਪਿ ਦੁਤਿਯਤ੍ਥੇਰੋ ਵਿਯ ਭੁਞ੍ਜਿਤ੍ਵਾ ਕਤਭਤ੍ਤਕਿਚ੍ਚੋ ਪਤ੍ਤਂ ਧੋਵਿਤ੍ਵਾ ਵੋਦਕਂ ਕਤ੍ਵਾ ਥਵਿਕਾਯ ਓਸਾਪੇਤ੍ਵਾ ਆਸਨਾਨਿ ਉਕ੍ਖਿਪਿਤ੍ਵਾ ਪਟਿਸਾਮੇਤਿ, ਪਾਨੀਯਘਟੇ ਵਾ ਪਰਿਭੋਜਨੀਯਘਟੇ ਵਾ ਅਵਸੇਸਉਦਕਂ ਛਡ੍ਡੇਤ੍ਵਾ ਘਟੇ ਨਿਕੁਜ੍ਜਿਤ੍ਵਾ ਅਵਕ੍ਕਾਰਪਾਤਿਯਂ ਸਚੇ ਅਵਸੇਸਭਤ੍ਤਂ ਹੋਤਿ, ਤਂ ਵੁਤ੍ਤਨਯੇਨ ਜਹਿਤ੍ਵਾ ਪਾਤਿਂ ਧੋਵਿਤ੍ਵਾ ਪਟਿਸਾਮੇਤਿ, ਭਤ੍ਤਗ੍ਗਂ ਸਮ੍ਮਜ੍ਜਤਿ, ਸੋ ਕਚਵਰਂ ਛਡ੍ਡੇਤ੍ਵਾ ਸਮ੍ਮਜ੍ਜਨਿਂ ਉਕ੍ਖਿਪਿਤ੍ਵਾ ਉਪਚਿਕਾਹਿ ਮੁਤ੍ਤਟ੍ਠਾਨੇ ਠਪੇਤ੍ਵਾ ਪਤ੍ਤਚੀਵਰਮਾਦਾਯ ਵਸਨਟ੍ਠਾਨਂ ਪਵਿਸਤਿ. ਇਦਂ ਥੇਰਾਨਂ ਬਹਿਵਿਹਾਰੇ ਅਰਞ੍ਞੇ ਭਤ੍ਤਕਿਚ੍ਚਕਰਣਟ੍ਠਾਨੇ ਭੋਜਨਸਾਲਾਯ ਵਤ੍ਤਂ. ਇਦਂ ਸਨ੍ਧਾਯ ‘‘ਯੋ ਪਚ੍ਛਾ’’ਤਿਆਦਿ ਵੁਤ੍ਤਂ.
ਯੋ ਪਸ੍ਸਤੀਤਿਆਦਿ ਪਨ ਨੇਸਂ ਅਨ੍ਤੋਵਿਹਾਰੇ ਵਤ੍ਤਨ੍ਤਿ ਵੇਦਿਤਬ੍ਬਂ. ਤਤ੍ਥ ਵਚ੍ਚਘਟਨ੍ਤਿ ਆਚਮਨਕੁਮ੍ਭਿਂ. ਰਿਤ੍ਤਨ੍ਤਿ ਰਿਤ੍ਤਕਂ. ਤੁਚ੍ਛਨ੍ਤਿ ਤਸ੍ਸੇਵ ਵੇਵਚਨਂ. ਅਵਿਸਯ੍ਹਨ੍ਤਿ ਉਕ੍ਖਿਪਿਤੁਂ ਅਸਕ੍ਕੁਣੇਯ੍ਯਂ ਅਤਿਭਾਰਿਯਂ. ਹਤ੍ਥਵਿਕਾਰੇਨਾਤਿ ਹਤ੍ਥਸਞ੍ਞਾਯ. ਤੇ ਕਿਰ ਪਾਨੀਯਘਟਾਦੀਸੁ ਯਂਕਿਞ੍ਚਿ ਤੁਚ੍ਛਕਂ ਗਹੇਤ੍ਵਾ ਪੋਕ੍ਖਰਣਿਂ ਗਨ੍ਤ੍ਵਾ ਅਨ੍ਤੋ ਚ ਬਹਿ ਚ ਧੋਵਿਤ੍ਵਾ ਉਦਕਂ ਪਰਿਸ੍ਸਾਵੇਤ੍ਵਾ ਤੀਰੇ ਠਪੇਤ੍ਵਾ ਅਞ੍ਞਂ ਭਿਕ੍ਖੁਂ ਹਤ੍ਥਵਿਕਾਰੇਨ ਆਮਨ੍ਤੇਨ੍ਤਿ, ਓਦਿਸ੍ਸ ਵਾ ਅਨੋਦਿਸ੍ਸ ਵਾ ਸਦ੍ਦਂ ਨ ਕਰੋਨ੍ਤਿ. ਕਸ੍ਮਾ ਓਦਿਸ੍ਸ ਨ ਕਰੋਨ੍ਤਿ? ਤਞ੍ਹਿ ਭਿਕ੍ਖੁਂ ਸਦ੍ਦੋ ਬਾਧੇਯ੍ਯਾਤਿ. ਕਸ੍ਮਾ ਅਨੋਦਿਸ੍ਸ ਨ ਕਰੋਨ੍ਤਿ? ਅਨੋਦਿਸ੍ਸ ਸਦ੍ਦੇ ਦਿਨ੍ਨੇ ‘‘ਅਹਂ ਪੁਰੇ, ਅਹਂ ਪੁਰੇ’’ਤਿ ਦ੍ਵੇਪਿ ਨਿਕ੍ਖਮੇਯ੍ਯੁਂ. ਤਤੋ ਦ੍ਵੀਹਿ ਕਤ੍ਤਬ੍ਬਕਮ੍ਮੇ ਤਤਿਯਸ੍ਸ ਕਮ੍ਮਚ੍ਛੇਦੋ ਭਵੇਯ੍ਯ. ਸਂਯਤਪਦਸਦ੍ਦੋ ਪਨ ਹੁਤ੍ਵਾ ਅਪਰਸ੍ਸ ਭਿਕ੍ਖੁਨੋ ਦਿਵਾਟ੍ਠਾਨਸਨ੍ਤਿਕਂ ਗਨ੍ਤ੍ਵਾ ਤੇਨ ਦਿਟ੍ਠਭਾਵਂ ਞਤ੍ਵਾ ਹਤ੍ਥਸਞ੍ਞਂ ਕਰੋਤਿ, ਤਾਯ ਸਞ੍ਞਾਯ ਇਤਰੋ ਆਗਚ੍ਛਤਿ, ਤਤੋ ਦ੍ਵੇ ਜਨਾ ਹਤ੍ਥੇਨ ਹਤ੍ਥਂ ਸਂਸਿਬ੍ਬਨ੍ਤਾ ਦ੍ਵੀਸੁ ਹਤ੍ਥੇਸੁ ਠਪੇਤ੍ਵਾ ਉਟ੍ਠਾਪੇਨ੍ਤਿ. ਤਂ ਸਨ੍ਧਾਯਾਹ ‘‘ਹਤ੍ਥਵਿਕਾਰੇਨ ਦੁਤਿਯਂ ਆਮਨ੍ਤੇਤ੍ਵਾ ਹਤ੍ਥਵਿਲਙ੍ਘਕੇਨ ਉਪਟ੍ਠਾਪੇਮਾ’’ਤਿ.
ਪਞ੍ਚਾਹਿਕਂ ਖੋ ਪਨਾਤਿ ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਨ੍ਤਿ ਇਦਂ ਤਾਵ ਪਕਤਿਧਮ੍ਮਸ੍ਸਵਨਮੇਵ, ਤਂ ਅਖਣ੍ਡਂ ਕਤ੍ਵਾ ਪਞ੍ਚਮੇ ਪਞ੍ਚਮੇ ਦਿਵਸੇ ਦ੍ਵੇ ਥੇਰਾ ਨਾਤਿਵਿਕਾਲੇ ਨਹਾਯਿਤ੍ਵਾ ਅਨੁਰੁਦ੍ਧਤ੍ਥੇਰਸ੍ਸ ਵਸਨਟ੍ਠਾਨਂ ਗਚ੍ਛਨ੍ਤਿ. ਤਤ੍ਥ ਤਯੋਪਿ ਨਿਸੀਦਿਤ੍ਵਾ ਤਿਣ੍ਣਂ ਪਿਟਕਾਨਂ ਅਞ੍ਞਤਰਸ੍ਮਿਂ ਅਞ੍ਞਮਞ੍ਞਂ ਪਞ੍ਹਂ ਪੁਚ੍ਛਨ੍ਤਿ, ਅਞ੍ਞਮਞ੍ਞਂ ਵਿਸ੍ਸਜ੍ਜੇਨ੍ਤਿ. ਤੇਸਂ ਏਵਂ ਕਰੋਨ੍ਤਾਨਂਯੇਵ ਅਰੁਣਂ ਉਗ੍ਗਚ੍ਛਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਏਤ੍ਤਾਵਤਾ ਥੇਰੇਨ ਭਗਵਤਾ ਅਪ੍ਪਮਾਦਲਕ੍ਖਣਂ ਪੁਚ੍ਛਿਤੇਨ ਪਮਾਦਟ੍ਠਾਨੇਸੁਯੇਵ ਅਪ੍ਪਮਾਦਲਕ੍ਖਣਂ ਵਿਸ੍ਸਜ੍ਜਿਤਂ ਹੋਤਿ. ਅਞ੍ਞੇਸਞ੍ਹਿ ਭਿਕ੍ਖੂਨਂ ਭਿਕ੍ਖਾਚਾਰਪਵਿਸਨਕਾਲੋ ਨਿਕ੍ਖਮਨਕਾਲੋ ਨਿਵਾਸਨਪਰਿਵਤ੍ਤਨਂ ਚੀਵਰਪਾਰੁਪਨਂ ਅਨ੍ਤੋਗਾਮੇ ਪਿਣ੍ਡਾਯ ਚਰਣਂ ਧਮ੍ਮਕਥਨਂ ਅਨੁਮੋਦਨਂ ਅਨ੍ਤੋਗਾਮਤੋ ਨਿਕ੍ਖਮਿਤ੍ਵਾ ਭਤ੍ਤਕਿਚ੍ਚਕਰਣਂ ਪਤ੍ਤਧੋਵਨਂ ਪਤ੍ਤਓਸਾਪਨਂ ਪਤ੍ਤਚੀਵਰਪਟਿਸਾਮਨਨ੍ਤਿ ਪਪਞ੍ਚਕਰਣਟ੍ਠਾਨਾਨਿ ਏਤਾਨਿ. ਤਸ੍ਮਾ ਥੇਰੋ ‘‘ਅਮ੍ਹਾਕਂ ਏਤ੍ਤਕਂ ਠਾਨਂ ਮੁਞ੍ਚਿਤ੍ਵਾ ਵਿਸ੍ਸਟ੍ਠਕਥਾਪਵਤ੍ਤਨੇਨ ਕਮ੍ਮਟ੍ਠਾਨੇ ਪਮਜ੍ਜਨਟ੍ਠਾਨਾਨਿ, ਤਤ੍ਥਾਪਿ ਮਯਂ, ਭਨ੍ਤੇ, ਕਮ੍ਮਟ੍ਠਾਨਵਿਰੁਦ੍ਧਂ ਨ ਪਟਿਪਜ੍ਜਾਮਾ’’ਤਿ ਅਞ੍ਞੇਸਂ ਪਮਾਦਟ੍ਠਾਨੇਸੁਯੇਵ ਸਿਖਾਪ੍ਪਤ੍ਤਂ ਅਤ੍ਤਨੋ ਅਪ੍ਪਮਾਦਲਕ੍ਖਣਂ ਵਿਸ੍ਸਜ੍ਜੇਸਿ. ਇਮਿਨਾਵ ਏਤਾਨਿ ਠਾਨਾਨਿ ਮੁਞ੍ਚਿਤ੍ਵਾ ਅਞ੍ਞਤ੍ਥ ਵਿਹਾਰਸਮਾਪਤ੍ਤੀਨਂ ਅਵਲ਼ਞ੍ਜਨਵਸੇਨ ਪਮਾਦਕਾਲੋ ਨਾਮ ਅਮ੍ਹਾਕਂ ਨਤ੍ਥੀਤਿ ਦੀਪੇਤਿ.
ਪਾਚੀਨਵਂਸਦਾਯਗਮਨਕਥਾਵਣ੍ਣਨਾ ਨਿਟ੍ਠਿਤਾ.
ਪਾਲਿਲੇਯ੍ਯਕਗਮਨਕਥਾਵਣ੍ਣਨਾ
੪੬੭. ਧਮ੍ਮਿਯਾ ਕਥਾਯਾਤਿ ਸਮਗ੍ਗਵਾਸੇ ਆਨਿਸਂਸਪਟਿਸਂਯੁਤ੍ਤਾਯ ਧਮ੍ਮਕਥਾਯ. ਅਨੁਪੁਬ੍ਬੇਨ (ਉਦਾ. ਅਟ੍ਠ. ੩੫) ਚਾਰਿਕਂ ਚਰਮਾਨੋਤਿ ਅਨੁਕ੍ਕਮੇਨ ਗਾਮਨਿਗਮਪਟਿਪਾਟਿਯਾ ਚਾਰਿਕਂ ਚਰਮਾਨੋ. ਯੇਨ ਪਾਲਿਲੇਯ੍ਯਕਂ ਤਦਵਸਰੀਤਿ ਏਕਕੋਵ ਯੇਨ ਪਾਲਿਲੇਯ੍ਯਕਗਾਮੋ, ਤਂ ਅਵਸਰਿ. ਪਾਲਿਲੇਯ੍ਯਕਗਾਮਵਾਸਿਨੋਪਿ ਪਚ੍ਚੁਗ੍ਗਨ੍ਤ੍ਵਾ ਭਗਵਤੋ ਦਾਨਂ ਦਤ੍ਵਾ ਪਾਲਿਲੇਯ੍ਯਕਗਾਮਸ੍ਸ ਅਵਿਦੂਰੇ ਰਕ੍ਖਿਤਵਨਸਣ੍ਡੋ ਨਾਮ ਅਤ੍ਥਿ, ਤਤ੍ਥ ਭਗਵਤੋ ਪਣ੍ਣਸਾਲਂ ਕਤ੍ਵਾ ‘‘ਏਤ੍ਥ ਭਗਵਾ ਵਸਤੂ’’ਤਿ ਯਾਚਿਤ੍ਵਾ ਵਾਸਯਿਂਸੁ. ਭਦ੍ਦਸਾਲੋਤਿ ਪਨ ਤਤ੍ਥੇਕੋ ਮਨਾਪੋ ਲਟ੍ਠਿਕੋ ਸਾਲਰੁਕ੍ਖੋ. ਭਗਵਾ ਤਂ ਗਾਮਂ ਉਪਨਿਸ੍ਸਾਯ ਵਨਸਣ੍ਡੇ ਪਣ੍ਣਸਾਲਾਯ ਸਮੀਪੇ ਤਸ੍ਮਿਂ ਰੁਕ੍ਖਮੂਲੇ ਵਿਹਾਸਿ. ਤੇਨ ਵੁਤ੍ਤਂ ‘‘ਪਾਲਿਲੇਯ੍ਯਕੇ ਵਿਹਰਤਿ ਰਕ੍ਖਿਤਵਨਸਣ੍ਡੇ ਭਦ੍ਦਸਾਲਮੂਲੇ’’ਤਿ.
ਅਥ ਖੋ ਭਗਵਤੋ ਰਹੋਗਤਸ੍ਸਾਤਿਆਦਿ ਭਗਵਤੋ ਵਿਵੇਕਸੁਖਪਚ੍ਚਵੇਕ੍ਖਣਦਸ੍ਸਨਂ. ਆਕਿਣ੍ਣੋ ਨ ਫਾਸੁ ਵਿਹਾਸਿਨ੍ਤਿ ਸਮ੍ਬਾਧਪ੍ਪਤ੍ਤੋ ਆਕਿਣ੍ਣੋ ਵਿਹਾਸਿਂ. ਕਿਂ ਪਨ ਭਗਵਤੋ ਸਮ੍ਬਾਧੋ ਅਤ੍ਥਿ ਸਂਸਗ੍ਗੋ ਵਾਤਿ? ਨਤ੍ਥਿ. ਨ ਹਿ ਕੋਚਿ ਭਗਵਨ੍ਤਂ ਅਨਿਚ੍ਛਾਯ ਉਪਸਙ੍ਕਮਿਤੁਂ ਸਕ੍ਕੋਤਿ. ਦੁਰਾਸਦਾ ਹਿ ਬੁਦ੍ਧਾ ਭਗਵਨ੍ਤੋ ਸਬ੍ਬਤ੍ਥ ਚ ਅਨੁਪਲਿਤ੍ਤਾ, ਹਿਤੇਸਿਤਾਯ ਪਨ ਸਤ੍ਤੇਸੁ ਅਨੁਕਮ੍ਪਂ ਉਪਾਦਾਯ ‘‘ਮੁਤ੍ਤੋ ਮੋਚੇਸ੍ਸਾਮੀ’’ਤਿ ਪਟਿਞ੍ਞਾਨੁਰੂਪਂ ਚਤੁਰੋਘਨਿਤ੍ਥਰਣਤ੍ਥਂ ਅਟ੍ਠਨ੍ਨਂ ਪਰਿਸਾਨਂ ਅਤ੍ਤਨੋ ਸਨ੍ਤਿਕਂ ਕਾਲੇਨ ਕਾਲਂ ਉਪਸਙ੍ਕਮਨਂ ਅਧਿਵਾਸੇਤਿ, ਸਯਞ੍ਚ ਮਹਾਕਰੁਣਾਸਮੁਸ੍ਸਾਹਿਤੋ ਕਾਲਞ੍ਞੂ ਹੁਤ੍ਵਾ ਤਤ੍ਥ ਉਪਸਙ੍ਕਮੀਤਿ ਇਦਂ ਸਬ੍ਬਬੁਦ੍ਧਾਨਂ ਆਚਿਣ੍ਣਂ. ਨਾਯਮਿਧ ਆਕਿਣ੍ਣਵਿਹਾਰੋ ਅਧਿਪ੍ਪੇਤੋ, ਇਧ ਪਨ ਤੇਹਿ ਕਲਹਕਾਰਕੇਹਿ ਕੋਸਮ੍ਬਕਭਿਕ੍ਖੂਹਿ ਸਦ੍ਧਿਂ ਏਕਵਿਹਾਰੇ ਵਾਸਂ ਵਿਹਾਸਿ, ਤਦਾ ਵਿਨੇਤਬ੍ਬਾਭਾਵਤੋ ਆਕਿਣ੍ਣਵਿਹਾਰਂ ਕਤ੍ਵਾ ਵੁਤ੍ਤਂ ‘‘ਅਹਂ ਖੋ ਪੁਬ੍ਬੇ ਆਕਿਣ੍ਣੋ ਨ ਫਾਸੁ ਵਿਹਾਸਿ’’ਨ੍ਤਿ. ਤੇਨੇਵਾਹ ‘‘ਤੇਹਿ ਕੋਸਮ੍ਬਕੇਹਿ ਭਿਕ੍ਖੂਹਿ ਭਣ੍ਡਨਕਾਰਕੇਹੀ’’ਤਿਆਦਿ.
ਦਹਰਪੋਤਕੇਹੀਤਿ ਦਹਰੇਹਿ ਹਤ੍ਥਿਪੋਤਕੇਹਿ, ਯੇ ਭਿਙ੍ਕਾਤਿਪਿ ਵੁਚ੍ਚਨ੍ਤਿ. ਤੇਹੀਤਿ ਹਤ੍ਥਿਆਦੀਹਿ. ਕਦ੍ਦਮੋਦਕਾਨੀਤਿ ਕਦ੍ਦਮਮਿਸ੍ਸਾਨਿ ਉਦਕਾਨਿ. ਓਗਾਹਾਤਿ ਏਤ੍ਥ ‘‘ਓਗਾਹ’’ਨ੍ਤਿਪਿ ਪਾਲ਼ਿ. ਅਸ੍ਸਾਤਿ ਹਤ੍ਥਿਨਾਗਸ੍ਸ. ਉਪਨਿਘਂਸਨ੍ਤਿਯੋਤਿ ਘਟ੍ਟੇਨ੍ਤਿਯੋ. ਉਪਨਿਘਂਸਿਯਮਾਨੋਪਿ ਅਤ੍ਤਨੋ ਉਲ਼ਾਰਭਾਵੇਨ ਨ ਕੁਜ੍ਝਤਿ, ਤੇਨ ਤਾ ਘਂਸਨ੍ਤਿਯੇਵ. ਵੂਪਕਟ੍ਠੋਤਿ ਵੂਪਕਟ੍ਠੋ ਦੂਰੀਭੂਤੋ.
ਯੂਥਾਤਿ ਹਤ੍ਥਿਘਟਾਯ. ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਸੋ ਕਿਰ ਹਤ੍ਥਿਨਾਗੋ ਯੂਥਵਾਸੇ ਉਕ੍ਕਣ੍ਠਿਤੋ ਤਂ ਵਨਸਣ੍ਡਂ ਪਵਿਟ੍ਠੋ. ਤਤ੍ਥ ਭਗਵਨ੍ਤਂ ਦਿਸ੍ਵਾ ਘਟਸਹਸ੍ਸੇਨ ਨਿਬ੍ਬਾਪਿਤਸਨ੍ਤਾਪੋ ਵਿਯ ਨਿਬ੍ਬੁਤੋ ਹੁਤ੍ਵਾ ਪਸਨ੍ਨਚਿਤ੍ਤੋ ਭਗਵਤੋ ਸਨ੍ਤਿਕੇ ਅਟ੍ਠਾਸਿ, ਤਤੋ ਪਟ੍ਠਾਯ ਵਤ੍ਤਸੀਸੇ ਠਤ੍ਵਾ ਭਦ੍ਦਸਾਲਸ੍ਸ ਪਣ੍ਣਸਾਲਾਯ ਚ ਸਮਨ੍ਤਤੋ ਅਪ੍ਪਹਰਿਤਂ ਕਤ੍ਵਾ ਸਾਖਾਭਙ੍ਗੇਨ ਸਮ੍ਮਜ੍ਜਤਿ, ਭਗਵਤੋ ਮੁਖਧੋਵਨਂ ਦੇਤਿ, ਨਹਾਨੋਦਕਂ ਆਹਰਤਿ, ਦਨ੍ਤਕਟ੍ਠਂ ਦੇਤਿ, ਅਰਞ੍ਞਤੋ ਮਧੁਰਾਨਿ ਫਲਾਫਲਾਨਿ ਆਹਰਿਤ੍ਵਾ ਸਤ੍ਥੁ ਉਪਨੇਤਿ. ਸਤ੍ਥਾ ਤਾਨਿ ਪਰਿਭੁਞ੍ਜਤਿ. ਤੇਨ ਵੁਤ੍ਤਂ ‘‘ਸੋਣ੍ਡਾਯ ਭਗਵਤੋ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤੀ’’ਤਿਆਦਿ. ਸੋ ਕਿਰ ਸੋਣ੍ਡਾਯ ਦਾਰੂਨਿ ਆਹਰਿਤ੍ਵਾ ਅਞ੍ਞਮਞ੍ਞਂ ਘਂਸਿਤ੍ਵਾ ਅਗ੍ਗਿਂ ਉਟ੍ਠਾਪੇਤ੍ਵਾ ਦਾਰੂਨਿ ਜਾਲਾਪੇਤ੍ਵਾ ਤਤ੍ਥ ਪਾਸਾਣਖਣ੍ਡਾਨਿ ਤਾਪੇਤ੍ਵਾ ਤਾਨਿ ਦਣ੍ਡਕੇਹਿ ਵਟ੍ਟੇਤ੍ਵਾ ਸੋਣ੍ਡਿਯਂ ਖਿਪਿਤ੍ਵਾ ਉਦਕਸ੍ਸ ਤਤ੍ਤਭਾਵਂ ਞਤ੍ਵਾ ਭਗਵਤੋ ਸਨ੍ਤਿਕਂ ਉਪਗਨ੍ਤ੍ਵਾ ਤਿਟ੍ਠਤਿ. ਭਗਵਾ ‘‘ਹਤ੍ਥਿਨਾਗੋ ਮਮ ਨਹਾਨਂ ਇਚ੍ਛਤੀ’’ਤਿ ਤਤ੍ਥ ਗਨ੍ਤ੍ਵਾ ਨਹਾਨਕਿਚ੍ਚਂ ਕਰੋਤਿ. ਪਾਨੀਯੇਪਿ ਏਸੇਵ ਨਯੋ. ਤਸ੍ਮਿਂ ਪਨ ਸੀਤਲੇ ਜਾਤੇ ਉਪਸਙ੍ਕਮਤਿ. ਤਂ ਸਨ੍ਧਾਯ ਵੁਤ੍ਤਂ ‘‘ਸੋਣ੍ਡਾਯ ਭਗਵਤੋ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤੀ’’ਤਿ.
ਅਤ੍ਤਨੋ ਚ ਪਵਿਵੇਕਂ ਵਿਦਿਤ੍ਵਾਤਿ ਕੇਹਿਚਿ ਅਨਾਕਿਣ੍ਣਭਾਵਲਦ੍ਧਂ ਕਾਯਵਿਵੇਕਂ ਜਾਨਿਤ੍ਵਾ. ਇਤਰੇ ਪਨ ਵਿਵੇਕਾ ਭਗਵਤੋ ਸਬ੍ਬਕਾਲਂ ਵਿਜ੍ਜਨ੍ਤਿਯੇਵ. ਇਮਂ ਉਦਾਨਂ ਉਦਾਨੇਸੀਤਿ ਇਮਂ ਅਤ੍ਤਨੋ ਹਤ੍ਥਿਨਾਗਸ੍ਸ ਚ ਵਿਵੇਕਾਭਿਰਤਿਯਾ ਸਮਾਨਜ੍ਝਾਸਯਭਾਵਦੀਪਨਂ ਉਦਾਨਂ ਉਦਾਨੇਸਿ.
ਗਾਥਾਯ ਪਨ ਏਵਮਤ੍ਥਯੋਜਨਾ ਵੇਦਿਤਬ੍ਬਾ (ਉਦਾ. ਅਟ੍ਠ. ੩੫) – ਏਤਂ ਈਸਾਦਨ੍ਤਸ੍ਸ ਰਥਈਸਾਸਦਿਸਦਨ੍ਤਸ੍ਸ ਹਤ੍ਥਿਨਾਗਸ੍ਸ ਚਿਤ੍ਤਂ ਨਾਗੇਨ ਬੁਦ੍ਧਨਾਗਸ੍ਸ ਚਿਤ੍ਤੇਨ ਸਮੇਤਿ ਸਂਸਨ੍ਦਤਿ. ਕਥਂ ਸਮੇਤਿ ਚੇ? ਯਦੇਕੋ ਰਮਤੀ ਵਨੇ, ਯਸ੍ਮਾ ਬੁਦ੍ਧਨਾਗੋ ‘‘ਅਹਂ ਖੋ ਪੁਬ੍ਬੇ ਆਕਿਣ੍ਣੋ ਵਿਹਾਸਿ’’ਨ੍ਤਿ ਪੁਰਿਮਂ ਆਕਿਣ੍ਣਵਿਹਾਰਂ ਜਿਗੁਚ੍ਛਿਤ੍ਵਾ ਵਿਵੇਕਂ ਉਪਬ੍ਰੂਹਯਮਾਨੋ ਇਦਾਨਿ ਯਥਾ ਏਕੋ ਅਦੁਤਿਯੋ ਵਨੇ ਅਰਞ੍ਞੇ ਰਮਤਿ ਅਭਿਰਮਤਿ, ਏਵਂ ਅਯਮ੍ਪਿ ਹਤ੍ਥਿਨਾਗੋ ਪੁਬ੍ਬੇ ਅਤ੍ਤਨੋ ਹਤ੍ਥਿਆਦੀਹਿ ਆਕਿਣ੍ਣਵਿਹਾਰਂ ਜਿਗੁਚ੍ਛਿਤ੍ਵਾ ਇਦਾਨਿ ਏਕੋ ਅਸਹਾਯੋ ਵਨੇ ਏਕਵਿਹਾਰਂ ਰਮਤਿ ਅਭਿਨਨ੍ਦਤਿ, ਤਸ੍ਮਾਸ੍ਸ ਚਿਤ੍ਤਂ ਨਾਗੇਨ ਸਮੇਤਿ, ਤਸ੍ਸ ਚਿਤ੍ਤੇਨ ਸਮੇਤੀਤਿ ਕਤ੍ਵਾ ਏਕੀਭਾਵਰਤਿਯਾ ਏਕਸਦਿਸਂ ਹੋਤੀਤਿ ਅਤ੍ਥੋ.
ਪਾਲਿਲੇਯ੍ਯਕਗਮਨਕਥਾਵਣ੍ਣਨਾ ਨਿਟ੍ਠਿਤਾ.
ਅਟ੍ਠਾਰਸਵਤ੍ਥੁਕਥਾਵਣ੍ਣਨਾ
੪੭੩. ਯੋ ਪਟਿਬਾਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ਯੋ ਸੇਨਾਸਨਾਰਹਸ੍ਸ ਸੇਨਾਸਨਂ ਪਟਿਬਾਹਤਿ, ਤਸ੍ਸੇਵ ਆਪਤ੍ਤਿ. ਕਲਹਕਾਰਕਾਦੀਨਂ ਪਨੇਤ੍ਥ ‘‘ਓਕਾਸੋ ਨਤ੍ਥੀ’’ਤਿਆਦਿਕਂ ਸਙ੍ਘਸ੍ਸ ਕਤਿਕਂ ਆਰੋਚੇਤ੍ਵਾ ਨ ਪਞ੍ਞਪੇਨ੍ਤਸ੍ਸ ‘‘ਅਹਂ ਵੁਡ੍ਢੋ’’ਤਿ ਪਸਯ੍ਹ ਅਤ੍ਤਨਾਵ ਅਤ੍ਤਨੋ ਪਞ੍ਞਪੇਤ੍ਵਾ ਗਣ੍ਹਨ੍ਤਂ ‘‘ਯੁਤ੍ਤਿਯਾ ਗਣ੍ਹਥਾ’’ਤਿ ਵਤ੍ਵਾ ਵਾਰੇਨ੍ਤਸ੍ਸ ਚ ਨਤ੍ਥਿ ਆਪਤ੍ਤਿ. ‘‘ਭਣ੍ਡਨਕਾਰਕਂ ਨਿਕ੍ਕਡ੍ਢਤੀਤਿ ਵਚਨਤੋ ਕੁਲਦੂਸਕਸ੍ਸ ਪਬ੍ਬਾਜਨੀਯਕਮ੍ਮਾਨੁਞ੍ਞਾਯ ਚ ਇਧ ਕਲਹਵੂਪਸਮਨਤ੍ਥਂ ਆਗਤਾਨਂ ਕੋਸਮ੍ਬਕਾਨਮ੍ਪਿ ‘ਯਥਾਵੁਡ੍ਢ’ਨ੍ਤਿ ਅਵਤ੍ਵਾ ‘ਵਿਵਿਤ੍ਤੇ ਅਸਤਿ ਵਿਵਿਤ੍ਤਂ ਕਤ੍ਵਾਪਿ ਦਾਤਬ੍ਬ’ਨ੍ਤਿ ਵੁਤ੍ਤਤ੍ਤਾ ਵਿਵਿਤ੍ਤਂ ਕਤ੍ਵਾ ਦੇਨ੍ਤਂ ਪਟਿਬਾਹਨ੍ਤਸ੍ਸੇਵ ਆਪਤ੍ਤੀ’’ਤਿ ਗਣ੍ਠਿਪਦੇਸੁ ਵੁਤ੍ਤਂ.
ਉਪਾਲਿਸਙ੍ਘਸਾਮਗ੍ਗੀਪੁਚ੍ਛਾਵਣ੍ਣਨਾ
੪੭੬. ਨ ਮੂਲਾ ਮੂਲਂ ਗਨ੍ਤ੍ਵਾਤਿ ਮੂਲਤੋ ਮੂਲਂ ਅਗਨ੍ਤ੍ਵਾ. ਅਤ੍ਥਤੋ ਅਪਗਤਾਤਿ ਸਾਮਗ੍ਗਿਸਙ੍ਖਾਤਅਤ੍ਥਤੋ ਅਪਗਤਾ.
੪੭੭. ਯੇਨ ਨਂ ਪਚ੍ਚਤ੍ਥਿਕਾ ਵਦੇਯ੍ਯੁਂ, ਤਂ ਨ ਹਿ ਹੋਤੀਤਿ ਸਮ੍ਬਨ੍ਧੋ. ਅਨਪਗਤਨ੍ਤਿ ਕਾਰਣਤੋ ਅਨਪੇਤਂ, ਸਕਾਰਣਨ੍ਤਿ ਵੁਤ੍ਤਂ ਹੋਤਿ.
ਉਸੂਯਾਯਾਤਿ ਇਮਿਨਾ ਦੋਸਾਗਤਿਗਮਨਸ੍ਸ ਸਙ੍ਗਹਿਤਤ੍ਤਾ ‘‘ਅਗਤਿਗਮਨੇਨਾ’’ਤਿ ਅਵਸੇਸਅਗਤਿਗਮਨਂ ਦਸ੍ਸਿਤਨ੍ਤਿ ਵੇਦਿਤਬ੍ਬਂ. ਅਟ੍ਠਹਿ ਦੂਤਙ੍ਗੇਹੀਤਿ ‘‘ਸੋਤਾ ਚ ਹੋਤਿ ਸਾਵੇਤਾ ਚ ਉਗ੍ਗਹੇਤਾ ਚ ਧਾਰੇਤਾ ਚ ਵਿਞ੍ਞਾਪੇਤਾ ਚ ਕੁਸਲੋ ਚ ਸਹਿਤਾਸਹਿਤਦਸ੍ਸਨੋ ਚ ਅਕਲਹਕਾਰਕੋ ਚਾ’’ਤਿ ਏਵਂ ਵੁਤ੍ਤੇਹਿ ਅਟ੍ਠਹਿ ਦੂਤਙ੍ਗੇਹਿ. ਸੇਸਮੇਤ੍ਥ ਪਾਲ਼ਿਤੋ ਅਟ੍ਠਕਥਾਤੋ ਚ ਸੁਵਿਞ੍ਞੇਯ੍ਯਮੇਵ.
ਕੋਸਮ੍ਬਕਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.
ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਸਾਰਤ੍ਥਦੀਪਨਿਯਂ
ਮਹਾਵਗ੍ਗਵਣ੍ਣਨਾ ਨਿਟ੍ਠਿਤਾ.
ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ