੬. ਭੇਸਜ੍ਜਕ੍ਖਨ੍ਧਕਂ
ਪਞ੍ਚਭੇਸਜ੍ਜਾਦਿਕਥਾਵਣ੍ਣਨਾ
੨੬੧. ਭੇਸਜ੍ਜਕ੍ਖਨ੍ਧਕੇ ਨਚ੍ਛਾਦੇਨ੍ਤੀਤਿ ਰੁਚਿਂ ਨ ਉਪ੍ਪਾਦੇਨ੍ਤਿ.
੨੬੨. ਸੁਸੁਕਾਤਿ ਸਮੁਦ੍ਦੇ ਭਵਾ ਏਕਾ ਮਚ੍ਛਜਾਤਿ. ਕੁਮ੍ਭੀਲਾਤਿਪਿ ਵਦਨ੍ਤਿ. ਸਂਸਟ੍ਠਨ੍ਤਿ ਪਰਿਸ੍ਸਾਵਿਤਂ. ਤੇਲਪਰਿਭੋਗੇਨਾਤਿ ਸਤ੍ਤਾਹਕਾਲਿਕਪਰਿਭੋਗਂ ਸਨ੍ਧਾਯ ਵੁਤ੍ਤਂ.
੨੬੩. ਪਿਟ੍ਠੇਹੀਤਿ ਪਿਸਿਤੇਹਿ. ਉਬ੍ਭਿਦਂ ਨਾਮ ਊਸਰਪਂਸੁਮਯਂ.
੨੬੪. ਛਕਣਨ੍ਤਿ ਗੋਮਯਂ. ਪਾਕਤਿਕਚੁਣ੍ਣਂ ਨਾਮ ਅਪਕ੍ਕਕਸਾਵਚੁਣ੍ਣਂ. ਤੇਨ ਠਪੇਤ੍ਵਾ ਗਨ੍ਧਚੁਣ੍ਣਂ ਸਬ੍ਬਂ ਵਟ੍ਟਤੀਤਿ ਵਦਨ੍ਤਿ.
੨੬੫. ਸੁਵਣ੍ਣਗੇਰੁਕੋਤਿ ਸੁਵਣ੍ਣਤੁਤ੍ਥਾਦਿ. ਅਞ੍ਜਨੂਪਪਿਸਨਨ੍ਤਿ ਅਞ੍ਜਨਤ੍ਥਾਯ ਉਪਪਿਸਿਤਬ੍ਬਂ ਯਂ ਕਿਞ੍ਚਿ ਚੁਣ੍ਣਜਾਤਂ.
੨੬੮. ਸਾਮਂ ਗਹੇਤ੍ਵਾਤਿ ਏਤ੍ਥ ਸਪ੍ਪਦਟ੍ਠਸ੍ਸ ਅਤ੍ਥਾਯ ਅਞ੍ਞੇਨ ਭਿਕ੍ਖੁਨਾ ਗਹਿਤਮ੍ਪਿ ਸਾਮਂ ਗਹਿਤਸਙ੍ਖਮੇਵ ਗਚ੍ਛਤੀਤਿ ਵੇਦਿਤਬ੍ਬਂ.
੨੬੯. ਘਰਦਿਨ੍ਨਕਾਬਾਧੋ ਨਾਮ ਵਸੀਕਰਣਤ੍ਥਾਯ ਘਰਣਿਯਾ ਦਿਨ੍ਨਭੇਸਜ੍ਜਸਮੁਟ੍ਠਿਤੋ ਆਬਾਧੋ. ਤੇਨਾਹ ‘‘ਵਸੀਕਰਣਪਾਣਕਸਮੁਟ੍ਠਿਤਰੋਗੋ’’ਤਿ. ਘਰ-ਸਦ੍ਦੋ ਚੇਤ੍ਥ ਅਭੇਦੇਨ ਘਰਣਿਯਾ ਵਤ੍ਤਮਾਨੋ ਅਧਿਪ੍ਪੇਤੋ. ‘‘ਅਕਟਯੂਸੇਨਾਤਿ ਅਨਭਿਸਙ੍ਖਤੇਨ ਮੁਗ੍ਗਯੂਸੇਨ. ਕਟਾਕਟੇਨਾਤਿ ਮੁਗ੍ਗੇ ਪਚਿਤ੍ਵਾ ਅਚਾਲੇਤ੍ਵਾਵ ਪਰਿਸ੍ਸਾਵਿਤੇਨ ਮੁਗ੍ਗਸੂਪੇਨਾ’’ਤਿ ਗਣ੍ਠਿਪਦੇਸੁ ਵੁਤ੍ਤਂ.
ਗੁਲ਼ਾਦਿਅਨੁਜਾਨਨਕਥਾਵਣ੍ਣਨਾ
੨੭੨. ਗੁਲ਼ਕਰਣਨ੍ਤਿ ਗੁਲ਼ਕਰਣਟ੍ਠਾਨਂ, ਉਚ੍ਛੁਸਾਲਨ੍ਤਿ ਵੁਤ੍ਤਂ ਹੋਤਿ.
੨੭੪. ਅਵਿਸ੍ਸਤ੍ਥਾਤਿ ਸਾਸਙ੍ਕਾ.
੨੭੬. ਅਪ੍ਪਮਤ੍ਤਕੇਪਿ ਪਵਾਰੇਨ੍ਤੀਤਿ ਅਪ੍ਪਮਤ੍ਤਕੇਪਿ ਗਹਿਤੇ ਪਵਾਰੇਨ੍ਤਿ, ‘‘ਬਹੁਮ੍ਹਿ ਗਹਿਤੇ ਅਞ੍ਞੇਸਂ ਨਪ੍ਪਹੋਤੀ’’ਤਿ ਮਞ੍ਞਮਾਨਾ ਅਪ੍ਪਮਤ੍ਤਕਂ ਗਹੇਤ੍ਵਾ ਪਵਾਰੇਨ੍ਤੀਤਿ ਅਧਿਪ੍ਪਾਯੋ. ਪਟਿਸਙ੍ਖਾਪਿ ਪਟਿਕ੍ਖਿਪਨ੍ਤੀਤਿ ‘‘ਦਿਵਾ ਭੋਜਨਤ੍ਥਾਯ ਭਵਿਸ੍ਸਤੀ’’ਤਿ ਸਲ੍ਲਕ੍ਖੇਤ੍ਵਾਪਿ ਪਟਿਕ੍ਖਿਪਨ੍ਤਿ.
੨੭੯. ਸਮ੍ਬਾਧੇ ਦਹਨਕਮ੍ਮਂ ਪਟਿਕ੍ਖੇਪਾਭਾਵੋ ਵਟ੍ਟਤਿ.
੨੮੦. ਉਭਤੋਪਸਨ੍ਨਾਤਿ ਉਭਯਤੋ ਪਸਨ੍ਨਾ. ਮਾਘਾਤੋਤਿ ‘‘ਮਾ ਘਾਤੇਥ ਪਾਣਿਨੋ’’ਤਿ ਏਵਂ ਮਾਘਾਤਘੋਸਿਤਦਿਵਸੋ.
ਯਾਗੁਮਧੁਗੋਲ਼ਕਾਦਿਕਥਾਵਣ੍ਣਨਾ
੨੮੨. ਮਧੁਗੋਲ਼ਕਨ੍ਤਿ ਸਕ੍ਕਰਾਦਿਸਂਯੁਤ੍ਤਪੂਵਂ. ਆਯੁਂ ਦੇਤੀਤਿ ਆਯੁਦਾਨਂ ਦੇਤਿ. ਵਣ੍ਣਨ੍ਤਿ ਸਰੀਰਵਣ੍ਣਂ. ਸੁਖਨ੍ਤਿ ਕਾਯਿਕਚੇਤਸਿਕਸੁਖਂ. ਬਲਨ੍ਤਿ ਸਰੀਰਥਾਮਂ. ਪਟਿਭਾਨਨ੍ਤਿ ਯੁਤ੍ਤਮੁਤ੍ਤਪਟਿਭਾਨਂ. ਵਾਤਂ ਅਨੁਲੋਮੇਤੀਤਿ ਵਾਤਂ ਅਨੁਲੋਮੇਤ੍ਵਾ ਹਰਤਿ. ਵਤ੍ਥਿਂ ਸੋਧੇਤੀਤਿ ਧਮਨਿਯੋ ਸੁਦ੍ਧਂ ਕਰੋਤਿ. ਆਮਾਵਸੇਸਂ ਪਾਚੇਤੀਤਿ ਸਚੇ ਆਮਾਵਸੇਸਕਂ ਹੋਤਿ, ਤਂ ਪਾਚੇਤਿ. ਅਨੁਪ੍ਪਵੇਚ੍ਛਤੀਤਿ ਦੇਤਿ. ਵਾਤਞ੍ਚ ਬ੍ਯਪਨੇਤੀਤਿ ਸਮ੍ਬਨ੍ਧਿਤਬ੍ਬਂ.
੨੮੩. ਨਨੁ ਚ ‘‘ਪਰਮ੍ਪਰਭੋਜਨੇਨ ਕਾਰੇਤਬ੍ਬੋ’’ਤਿ ਕਸ੍ਮਾ ਵੁਤ੍ਤਂ. ਪਰਮ੍ਪਰਭੋਜਨਞ੍ਹਿ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨ ਨਿਮਨ੍ਤਿਤਸ੍ਸ ਤਂ ਠਪੇਤ੍ਵਾ ਅਞ੍ਞਂ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੁਞ੍ਜਨ੍ਤਸ੍ਸ ਹੋਤਿ, ਇਮੇ ਚ ਭਿਕ੍ਖੂ ਭੋਜ੍ਜਯਾਗੁਂ ਪਰਿਭੁਞ੍ਜਿਂਸੁ, ਪਞ੍ਚਸੁ ਭੋਜਨੇਸੁ ਅਞ੍ਞਤਰਨ੍ਤਿ ਆਹ ‘‘ਭੋਜ੍ਜਯਾਗੁਯਾ ਹਿ ਪਵਾਰਣਾ ਹੋਤੀ’’ਤਿ. ਯਸ੍ਮਾ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਪਟਿਕ੍ਖਿਪਨ੍ਤਸ੍ਸ ਵੁਤ੍ਤਾ ਪਵਾਰਣਾ ਭੋਜ੍ਜਯਾਗੁਂ ਪਟਿਕ੍ਖਿਪਨ੍ਤਸ੍ਸਪਿ ਹੋਤਿਯੇਵ, ਤਸ੍ਮਾ ਭੋਜ੍ਜਯਾਗੁਪਿ ਓਦਨਗਤਿਕਾਯੇਵਾਤਿ ਅਧਿਪ੍ਪਾਯੋ.
੨੮੪. ਸੁਖੁਮੋਜਂ ਪਕ੍ਖਿਪਿਂਸੂਤਿ ‘‘ਭਗਵਾ ਪਰਿਭੁਞ੍ਜਿਸ੍ਸਤੀ’’ਤਿ ਮਞ੍ਞਮਾਨਾ ਪਕ੍ਖਿਪਿਂਸੁ.
ਪਾਟਲਿਗਾਮਵਤ੍ਥੁਕਥਾਵਣ੍ਣਨਾ
੨੮੫. ਪਾਟਲਿਗਾਮੋਤਿ (ਉਦਾ. ਅਟ੍ਠ. ੭੬) ਏਵਂਨਾਮਕੋ ਮਗਧਰਟ੍ਠੇ ਏਕੋ ਗਾਮੋ. ਤਸ੍ਸ ਕਿਰ ਗਾਮਸ੍ਸ ਮਾਪਨਦਿਵਸੇ ਗਾਮਙ੍ਗਣਟ੍ਠਾਨੇ ਦ੍ਵੇ ਤਯੋ ਪਾਟਲਙ੍ਕੁਰਾ ਪਥਵਿਤੋ ਉਬ੍ਭਿਜ੍ਜਿਤ੍ਵਾ ਨਿਕ੍ਖਮਿਂਸੁ. ਤੇਨ ਤਂ ‘‘ਪਾਟਲਿਗਾਮੋ’’ ਤ੍ਵੇਵ ਵੋਹਰਿਂਸੁ. ਤਦਵਸਰੀਤਿ ਤਂ ਪਾਟਲਿਗਾਮਂ ਅਵਸਰਿ ਅਨੁਪਾਪੁਣਿ. ਪਾਟਲਿਗਾਮਿਕਾਤਿ ਪਾਟਲਿਗਾਮਵਾਸਿਨੋ. ਉਪਾਸਕਾਤਿ ਤੇ ਕਿਰ ਭਗਵਤੋ ਪਠਮਦਸ੍ਸਨੇਨ ਕੇਚਿ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਿਤਾ. ਤੇਨ ਵੁਤ੍ਤਂ ‘‘ਉਪਾਸਕਾ’’ਤਿ. ਯੇਨ ਭਗਵਾ ਤੇਨੁਪਸਙ੍ਕਮਿਂਸੂਤਿ ਪਾਟਲਿਗਾਮੇ ਕਿਰ ਅਜਾਤਸਤ੍ਤੁਨੋ ਲਿਚ੍ਛਵਿਰਾਜੂਨਞ੍ਚ ਮਨੁਸ੍ਸਾ ਕਾਲੇਨ ਕਾਲਂ ਗਨ੍ਤ੍ਵਾ ਗੇਹਸਾਮਿਕੇ ਗੇਹਤੋ ਨੀਹਰਿਤ੍ਵਾ ਮਾਸਮ੍ਪਿ ਅਡ੍ਢਮਾਸਮ੍ਪਿ ਵਸਨ੍ਤਿ. ਤੇਨ ਪਾਟਲਿਗਾਮਵਾਸਿਨੋ ਮਨੁਸ੍ਸਾ ਨਿਚ੍ਚੁਪਦ੍ਦੁਤਾ ‘‘ਏਤੇਸਞ੍ਚੇਵ ਆਗਤਕਾਲੇ ਵਸਨਟ੍ਠਾਨਂ ਭਵਿਸ੍ਸਤੀਤਿ ਏਕਪਸ੍ਸੇ ਇਸ੍ਸਰਾਨਂ ਭਣ੍ਡਪਟਿਸਾਮਨਟ੍ਠਾਨਂ, ਏਕਪਸ੍ਸੇ ਵਸਨਟ੍ਠਾਨਂ, ਏਕਪਸ੍ਸੇ ਆਗਨ੍ਤੁਕਾਨਂ ਅਦ੍ਧਿਕਮਨੁਸ੍ਸਾਨਂ, ਏਕਪਸ੍ਸੇ ਦਲਿਦ੍ਦਾਨਂ ਕਪਣਮਨੁਸ੍ਸਾਨਂ, ਏਕਪਸ੍ਸੇ ਗਿਲਾਨਾਨਂ ਵਸਨਟ੍ਠਾਨਂ ਭਵਿਸ੍ਸਤੀ’’ਤਿ ਸਬ੍ਬੇਸਂ ਅਞ੍ਞਮਞ੍ਞਂ ਅਘਟ੍ਟੇਤ੍ਵਾ ਵਸਨਪ੍ਪਹੋਨਕਂ ਨਗਰਮਜ੍ਝੇ ਮਹਤਿਂ ਸਾਲਂ ਕਾਰੇਸੁਂ, ਤਸ੍ਸ ਨਾਮਂ ਆਵਸਥਾਗਾਰਨ੍ਤਿ. ਆਗਨ੍ਤ੍ਵਾ ਵਸਨ੍ਤਿ ਏਤ੍ਥ ਆਗਨ੍ਤੁਕਾਤਿ ਆਵਸਥੋ, ਤਦੇਵ ਆਗਾਰਂ ਆਵਸਥਾਗਾਰਂ.
ਤਂ ਦਿਵਸਞ੍ਚ ਤਂ ਨਿਟ੍ਠਾਨਂ ਅਗਮਾਸਿ. ਤੇ ਤਤ੍ਥ ਗਨ੍ਤ੍ਵਾ ਇਟ੍ਠਕਕਮ੍ਮਸੁਧਾਕਮ੍ਮਚਿਤ੍ਤਕਮ੍ਮਾਦਿਵਸੇਨ ਸੁਪਰਿਨਿਟ੍ਠਿਤਂ ਸੁਸਜ੍ਜਿਤਂ ਦੇਵਵਿਮਾਨਸਦਿਸਂ ਦ੍ਵਾਰਕੋਟ੍ਠਕਤੋ ਪਟ੍ਠਾਯ ਓਲੋਕੇਤ੍ਵਾ ‘‘ਇਦਂ ਆਵਸਥਾਗਾਰਂ ਅਤਿਵਿਯ ਮਨੋਰਮਂ ਸਸ੍ਸਿਰਿਕਂ, ਕੇਨ ਨੁ ਖੋ ਪਠਮਂ ਪਰਿਭੁਤ੍ਤਂ ਅਮ੍ਹਾਕਂ ਦੀਘਰਤ੍ਤਂ ਹਿਤਾਯ ਸੁਖਾਯ ਅਸ੍ਸਾ’’ਤਿ ਚਿਨ੍ਤੇਸੁਂ, ਤਸ੍ਮਿਂਯੇਵ ਚ ਖਣੇ ‘‘ਭਗਵਾ ਤਂ ਗਾਮਂ ਅਨੁਪ੍ਪਤ੍ਤੋ’’ਤਿ ਅਸ੍ਸੋਸੁਂ, ਤੇਨ ਤੇ ਉਪ੍ਪਨ੍ਨਪੀਤਿਸੋਮਨਸ੍ਸਾ ‘‘ਅਮ੍ਹੇਹਿ ਭਗਵਾ ਗਨ੍ਤ੍ਵਾਪਿ ਆਨੇਤਬ੍ਬੋ ਸਿਯਾ, ਸੋ ਸਯਮੇਵ ਅਮ੍ਹਾਕਂ ਵਸਨਟ੍ਠਾਨਂ ਸਮ੍ਪਤ੍ਤੋ, ਅਜ੍ਜ ਮਯਂ ਭਗਵਨ੍ਤਂ ਇਧ ਵਸਾਪੇਤ੍ਵਾ ਪਠਮਂ ਪਰਿਭੁਞ੍ਜਾਪੇਸ੍ਸਾਮ, ਤਥਾ ਭਿਕ੍ਖੁਸਙ੍ਘਂ, ਭਿਕ੍ਖੁਸਙ੍ਘੇ ਆਗਤੇ ਤੇਪਿਟਕਂ ਬੁਦ੍ਧਵਚਨਂ ਆਗਤਮੇਵ ਭਵਿਸ੍ਸਤਿ, ਸਤ੍ਥਾਰਂ ਮਙ੍ਗਲਂ ਵਦਾਪੇਸ੍ਸਾਮ, ਧਮ੍ਮਂ ਕਥਾਪੇਸ੍ਸਾਮ, ਇਤਿ ਤੀਹਿ ਰਤਨੇਹਿ ਪਰਿਭੁਤ੍ਤੇ ਪਚ੍ਛਾ ਅਮ੍ਹਾਕਂ ਪਰੇਸਞ੍ਚ ਪਰਿਭੋਗੋ ਭਵਿਸ੍ਸਤਿ, ਏਵਂ ਨੋ ਦੀਘਰਤ੍ਤਂ ਹਿਤਾਯ ਸੁਖਾਯ ਭਵਿਸ੍ਸਤੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਏਤਦਤ੍ਥਮੇਵ ਭਗਵਨ੍ਤਂ ਉਪਸਙ੍ਕਮਿਂਸੁ. ਤਸ੍ਮਾ ਏਵਮਾਹਂਸੁ ‘‘ਅਧਿਵਾਸੇਤੁ ਨੋ, ਭਨ੍ਤੇ, ਭਗਵਾ ਆਵਸਥਾਗਾਰ’’ਨ੍ਤਿ. ਤੇਨੁਪਸਙ੍ਕਮਿਂਸੂਤਿ (ਦੀ. ਨਿ. ਅਟ੍ਠ. ੩.੨੯੭-੨੯੮; ਮ. ਨਿ. ਅਟ੍ਠ. ੨.੨੨) ਕਿਞ੍ਚਾਪਿ ਤਂ ਦਿਵਸਮੇਵ ਪਰਿਨਿਟ੍ਠਿਤਤ੍ਤਾ ਦੇਵਵਿਮਾਨਂ ਵਿਯ ਸੁਸਜ੍ਜਿਤਂ ਸੁਪਟਿਜਗ੍ਗਿਤਂ, ਬੁਦ੍ਧਾਰਹਂ ਪਨ ਕਤ੍ਵਾ ਨ ਪਞ੍ਞਤ੍ਤਂ. ਬੁਦ੍ਧਾ ਹਿ ਨਾਮ ਅਰਞ੍ਞਜ੍ਝਾਸਯਾ ਅਰਞ੍ਞਾਰਾਮਾ, ਅਨ੍ਤੋਗਾਮੇ ਵਸੇਯ੍ਯੁਂ ਵਾ ਨੋ ਵਾ, ਤਸ੍ਮਾ ਭਗਵਤੋ ਰੁਚਿਂ ਜਾਨਿਤ੍ਵਾਵ ਪਞ੍ਞਪੇਸ੍ਸਾਮਾਤਿ ਚਿਨ੍ਤੇਤ੍ਵਾ ਤੇ ਭਗਵਨ੍ਤਂ ਉਪਸਙ੍ਕਮਿਂਸੁ, ਇਦਾਨਿ ਭਗਵਤੋ ਰੁਚਿਂ ਜਾਨਿਤ੍ਵਾ ਤਥਾ ਪਞ੍ਞਾਪੇਤੁਕਾਮਾ ਯੇਨਾਵਸਥਾਗਾਰਂ ਤੇਨੁਪਸਙ੍ਕਮਿਂਸੁ. ਸਬ੍ਬਸਨ੍ਥਰਿਂ ਆਵਸਥਾਗਾਰਂ ਸਨ੍ਥਰਿਤ੍ਵਾਤਿ ਏਤ੍ਥ ਸਨ੍ਥਰਣਂ ਸਨ੍ਥਰਿ, ਸਬ੍ਬੋ ਸਕਲੋ ਸਨ੍ਥਰਿ ਏਤ੍ਥਾਤਿ ਸਬ੍ਬਸਨ੍ਥਰਿ. ਅਥ ਵਾ ਸਨ੍ਥਤਨ੍ਤਿ ਸਨ੍ਥਰਿ, ਸਬ੍ਬਂ ਸਨ੍ਥਰਿ ਸਬ੍ਬਸਨ੍ਥਰਿ, ਤਂ ਸਬ੍ਬਸਨ੍ਥਰਿਂ. ਭਾਵਨਪੁਂਸਕਨਿਦ੍ਦੇਸੋਵਾਯਂ, ਯਥਾ ਸਬ੍ਬਮੇਵ ਸਨ੍ਥਤਂ ਹੋਤਿ, ਏਵਂ ਸਨ੍ਥਰਿਤ੍ਵਾਤਿ ਅਤ੍ਥੋ. ਸਬ੍ਬਪਠਮਂ ਤਾਵ ‘‘ਗੋਮਯਂ ਨਾਮ ਸਬ੍ਬਮਙ੍ਗਲੇਸੁ ਵਟ੍ਟਤੀ’’ਤਿ ਸੁਧਾਪਰਿਕਮ੍ਮਕਤਮ੍ਪਿ ਭੂਮਿਂ ਅਲ੍ਲਗੋਮਯੇਨ ਓਪੁਞ੍ਜਾਪੇਤ੍ਵਾ ਪਰਿਸੁਕ੍ਖਭਾਵਂ ਞਤ੍ਵਾ ਯਥਾ ਅਕ੍ਕਨ੍ਤਟ੍ਠਾਨੇ ਪਦਂ ਪਞ੍ਞਾਯਤਿ, ਏਵਂ ਚਾਤੁਜ੍ਜਾਤਿਯਗਨ੍ਧੇਹਿ ਲਿਮ੍ਪੇਤ੍ਵਾ ਉਪਰਿ ਨਾਨਾਵਣ੍ਣਕਟਸਾਰਕੇ ਸਨ੍ਥਰਿਤ੍ਵਾ ਤੇਸਂ ਉਪਰਿ ਮਹਾਪਿਟ੍ਠਿਕਕੋਜਵੇ ਆਦਿਂ ਕਤ੍ਵਾ ਹਤ੍ਥਤ੍ਥਰਣਾਦੀਹਿ ਨਾਨਾਵਣ੍ਣੇਹਿ ਅਤ੍ਥਰਣੇਹਿ ਸਨ੍ਥਰਿਤਬ੍ਬਯੁਤ੍ਤਕਂ ਸਬ੍ਬੋਕਾਸਂ ਸਨ੍ਥਰਾਪੇਸੁਂ. ਤੇਨ ਵੁਤ੍ਤਂ ‘‘ਸਬ੍ਬਸਨ੍ਥਰਿਂ ਆਵਸਥਾਗਾਰਂ ਸਨ੍ਥਰਿਤ੍ਵਾ’’ਤਿ.
ਆਸਨਾਨੀਤਿ ਮਜ੍ਝਟ੍ਠਾਨੇ ਤਾਵ ਮਙ੍ਗਲਤ੍ਥਮ੍ਭਂ ਨਿਸ੍ਸਾਯ ਮਹਾਰਹਂ ਬੁਦ੍ਧਾਸਨਂ ਪਞ੍ਞਪੇਤ੍ਵਾ ਤਤ੍ਥ ਯਂ ਯਂ ਮੁਦੁਕਞ੍ਚ ਮਨੋਰਮਞ੍ਚ ਪਚ੍ਚਤ੍ਥਰਣਂ, ਤਂ ਤਂ ਅਤ੍ਥਰਿਤ੍ਵਾ ਉਭਤੋਲੋਹਿਤਕਂ ਮਨੁਞ੍ਞਦਸ੍ਸਨਂ ਉਪਧਾਨਂ ਉਪਦਹਿਤ੍ਵਾ ਉਪਰਿ ਸੁਵਣ੍ਣਰਜਤਤਾਰਕਵਿਚਿਤ੍ਤਵਿਤਾਨਂ ਬਨ੍ਧਿਤ੍ਵਾ ਗਨ੍ਧਦਾਮਪੁਪ੍ਫਦਾਮਪਤ੍ਤਾਦਾਮਾਦੀਹਿ ਅਲਙ੍ਕਰਿਤ੍ਵਾ ਸਮਨ੍ਤਾ ਦ੍ਵਾਦਸਹਤ੍ਥੇ ਠਾਨੇ ਪੁਪ੍ਫਜਾਲਂ ਕਾਰੇਤ੍ਵਾ ਤਿਂਸਹਤ੍ਥਮਤ੍ਤਂ ਠਾਨਂ ਪਟਸਾਣਿਯਾ ਪਰਿਕ੍ਖਿਪਾਪੇਤ੍ਵਾ ਪਚ੍ਛਿਮਭਿਤ੍ਤਿਂ ਨਿਸ੍ਸਾਯ ਭਿਕ੍ਖੁਸਙ੍ਘਸ੍ਸ ਪਲ੍ਲਙ੍ਕਪੀਠਅਪਸ੍ਸਯਪੀਠਮੁਣ੍ਡਪੀਠਾਦੀਨਿ ਪਞ੍ਞਪਾਪੇਤ੍ਵਾ ਉਪਰਿ ਸੇਤਪਚ੍ਚਤ੍ਥਰਣੇਹਿ ਪਚ੍ਚਤ੍ਥਰਾਪੇਤ੍ਵਾ ਸਾਲਾਯ ਪਾਚੀਨਪਸ੍ਸਂ ਅਤ੍ਤਨੋ ਨਿਸਜ੍ਜਾਯੋਗ੍ਗਂ ਕਾਰੇਸੁਂ. ਤਂ ਸਨ੍ਧਾਯ ਵੁਤ੍ਤਂ ‘‘ਆਸਨਾਨਿ ਪਞ੍ਞਪੇਤ੍ਵਾ’’ਤਿ.
ਉਦਕਮਣਿਕਨ੍ਤਿ ਮਹਾਕੁਚ੍ਛਿਕਂ ਸਮੇਖਲਂ ਉਦਕਚਾਟਿਂ. ਏਵਂ ਭਗਵਾ ਭਿਕ੍ਖੁਸਙ੍ਘੋ ਚ ਯਥਾਰੁਚਿਯਾ ਹਤ੍ਥਪਾਦੇ ਧੋਵਿਸ੍ਸਨ੍ਤਿ, ਮੁਖਂ ਵਿਕ੍ਖਾਲੇਸ੍ਸਨ੍ਤੀਤਿ ਤੇਸੁ ਤੇਸੁ ਠਾਨੇਸੁ ਮਣਿਵਣ੍ਣਸ੍ਸ ਉਦਕਸ੍ਸ ਪੂਰੇਤ੍ਵਾ ਵਾਸਤ੍ਥਾਯ ਨਾਨਾਪੁਪ੍ਫਾਨਿ ਚੇਵ ਉਦਕਵਾਸਚੁਣ੍ਣਾਨਿ ਚ ਪਕ੍ਖਿਪਿਤ੍ਵਾ ਕਦਲਿਪਣ੍ਣੇਹਿ ਪਿਦਹਿਤ੍ਵਾ ਪਤਿਟ੍ਠਪੇਸੁਂ. ਤੇਨ ਵੁਤ੍ਤਂ ‘‘ਉਦਕਮਣਿਕਂ ਪਤਿਟ੍ਠਾਪੇਤ੍ਵਾ’’ਤਿ.
ਤੇਲਪਦੀਪਂ ਆਰੋਪੇਤ੍ਵਾਤਿ ਰਜਤਸੁਵਣ੍ਣਾਦਿਮਯਦਣ੍ਡਾਸੁ ਦਣ੍ਡਦੀਪਿਕਾਸੁ ਯੋਨਕਰੂਪਕਾਦੀਨਂ ਹਤ੍ਥੇ ਠਪਿਤਸੁਵਣ੍ਣਰਜਤਾਦਿਮਯਕਪਲ੍ਲਿਕਾਸੁ ਚ ਤੇਲਪਦੀਪੇ ਜਲਯਿਤ੍ਵਾ. ਯੇਨ ਭਗਵਾ ਤੇਨੁਪਸਙ੍ਕਮਿਂਸੂਤਿ ਏਤ੍ਥ ਪਨ ਤੇ ਪਾਟਲਿਗਾਮਿਕਉਪਾਸਕਾ ਨ ਕੇਵਲਂ ਆਵਸਥਾਗਾਰਮੇਵ, ਅਥ ਖੋ ਸਕਲਸ੍ਮਿਮ੍ਪਿ ਗਾਮੇ ਵੀਥਿਯੋ ਸਜ੍ਜਾਪੇਤ੍ਵਾ ਧਜੇ ਉਸ੍ਸਾਪੇਤ੍ਵਾ ਗੇਹਦ੍ਵਾਰੇਸੁ ਪੁਣ੍ਣਘਟੇ ਚ ਕਦਲਿਆਦਯੋ ਚ ਠਪਾਪੇਤ੍ਵਾ ਸਕਲਗਾਮਂ ਦੀਪਮਾਲਾਹਿ ਵਿਪ੍ਪਕਿਣ੍ਣਤਾਰਕਂ ਵਿਯ ਕਤ੍ਵਾ ‘‘ਖੀਰਪਕੇ ਦਾਰਕੇ ਖੀਰਂ ਪਾਯੇਥ, ਦਹਰਕੁਮਾਰੇ ਲਹੁਂ ਲਹੁਂ ਭੋਜੇਤ੍ਵਾ ਸਯਾਪੇਥ, ਉਚ੍ਚਾਸਦ੍ਦਂ ਮਾ ਕਰਿਤ੍ਥ, ਅਜ੍ਜ ਏਕਰਤ੍ਤਿਂ ਸਤ੍ਥਾ ਅਨ੍ਤੋਗਾਮੇ ਵਸਿਸ੍ਸਤਿ, ਬੁਦ੍ਧਾ ਨਾਮ ਅਪ੍ਪਸਦ੍ਦਕਾਮਾ ਹੋਨ੍ਤੀ’’ਤਿ ਭੇਰਿਂ ਚਰਾਪੇਤ੍ਵਾ ਸਯਂ ਦਣ੍ਡਦੀਪਿਕਾ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ.
ਅਥ ਖੋ ਭਗਵਾ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਸਦ੍ਧਿਂ ਭਿਕ੍ਖੁਸਙ੍ਘੇਨ ਯੇਨ ਆਵਸਥਾਗਾਰਂ ਤੇਨੁਪਸਙ੍ਕਮੀਤਿ ‘‘ਯਸ੍ਸ ਦਾਨਿ, ਭਨ੍ਤੇ, ਭਗਵਾ ਕਾਲਂ ਮਞ੍ਞਤੀ’’ਤਿ ਏਵਂ ਕਿਰ ਤੇਹਿ ਕਾਲੇ ਆਰੋਚਿਤੇ ਭਗਵਾ ਲਾਖਾਰਸੇਨ ਤਿਨ੍ਤਰਤ੍ਤਕੋਵਿਲ਼ਾਰਪੁਪ੍ਫਵਣ੍ਣਂ ਸੁਰਤ੍ਤਂ ਦੁਪਟ੍ਟਂ ਕਤ੍ਤਰਿਯਾ ਪਦੁਮਂ ਕਨ੍ਤੇਨ੍ਤੋ ਵਿਯ, ਸਂਵਿਧਾਯ ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੋ ਨਿਵਾਸੇਤ੍ਵਾ ਸੁਵਣ੍ਣਪਾਮਙ੍ਗੇਨ ਪਦੁਮਕਲਾਪਂ ਪਰਿਕ੍ਖਿਪਨ੍ਤੋ ਵਿਯ, ਵਿਜ੍ਜੁਲਤਾਸਸ੍ਸਿਰਿਕਂ ਕਾਯਬਨ੍ਧਨਂ ਬਨ੍ਧਿਤ੍ਵਾ ਰਤ੍ਤਕਮ੍ਬਲੇਨ ਗਜਕੁਮ੍ਭਂ ਪਰਿਯੋਨਨ੍ਧਨ੍ਤੋ ਵਿਯ, ਰਤਨਸਤੁਬ੍ਬੇਧੇ ਸੁਵਣ੍ਣਗ੍ਘਿਕੇ ਪਵਾਲ਼ਜਾਲਂ ਖਿਪਮਾਨੋ ਵਿਯ, ਮਹਤਿ ਸੁਵਣ੍ਣਚੇਤਿਯੇ ਰਤ੍ਤਕਮ੍ਬਲਕਞ੍ਚੁਕਂ ਪਟਿਮੁਞ੍ਚਨ੍ਤੋ ਵਿਯ, ਗਚ੍ਛਨ੍ਤਂ ਪੁਣ੍ਣਚਨ੍ਦਂ ਰਤ੍ਤਵਲਾਹਕੇਨ ਪਟਿਚ੍ਛਾਦਯਮਾਨੋ ਵਿਯ, ਕਞ੍ਚਨਗਿਰਿਮਤ੍ਥਕੇ ਸੁਪਕ੍ਕਲਾਖਾਰਸਂ ਪਰਿਸਿਞ੍ਚਨ੍ਤੋ ਵਿਯ, ਚਿਤ੍ਤਕੂਟਪਬ੍ਬਤਮਤ੍ਥਕਂ ਵਿਜ੍ਜੁਲਤਾਜਾਲੇਨ ਪਰਿਕ੍ਖਿਪਨ੍ਤੋ ਵਿਯ ਚ ਸਚਕ੍ਕਵਾਲ਼ਸਿਨੇਰੁਯੁਗਨ੍ਧਰਮਹਾਪਥਵਿਂ ਚਾਲੇਤ੍ਵਾ ਗਹਿਤਨਿਗ੍ਰੋਧਪਲ੍ਲਵਸਮਾਨਵਣ੍ਣਂ ਰਤ੍ਤਵਰਪਂਸੁਕੂਲਂ ਪਾਰੁਪਿਤ੍ਵਾ ਵਨਗਹਨਤੋ ਕੇਸਰਸੀਹੋ ਵਿਯ, ਉਦਯਪਬ੍ਬਤਕੂਟਤੋ ਪੁਣ੍ਣਚਨ੍ਦੋ ਵਿਯ, ਬਾਲਸੂਰਿਯੋ ਵਿਯ ਚ ਅਤ੍ਤਨਾ ਨਿਸਿਨ੍ਨਤਰੁਸਣ੍ਡਤੋ ਨਿਕ੍ਖਮਿ.
ਅਥਸ੍ਸ ਕਾਯਤੋ ਮੇਘਮੁਖਤੋ ਵਿਜ੍ਜੁਕਲਾਪਾ ਵਿਯ ਰਸ੍ਮਿਯੋ ਨਿਕ੍ਖਮਿਤ੍ਵਾ ਸੁਵਣ੍ਣਰਸਧਾਰਾਪਰਿਸੇਕਪਿਞ੍ਜਰਪਤ੍ਤਪੁਪ੍ਫਫਲਸਾਖਾਵਿਟਪੇ ਵਿਯ ਸਮਨ੍ਤਤੋ ਰੁਕ੍ਖੇ ਕਰਿਂਸੁ. ਤਾਵਦੇਵ ਅਤ੍ਤਨੋ ਅਤ੍ਤਨੋ ਪਤ੍ਤਚੀਵਰਮਾਦਾਯ ਮਹਾਭਿਕ੍ਖੁਸਙ੍ਘੋ ਭਗਵਨ੍ਤਂ ਪਰਿਵਾਰੇਸਿ. ਤੇ ਚ ਨਂ ਪਰਿਵਾਰੇਤ੍ਵਾ ਠਿਤਭਿਕ੍ਖੂ ਏਵਰੂਪਾ ਅਹੇਸੁਂ ਅਪ੍ਪਿਚ੍ਛਾ ਸਨ੍ਤੁਟ੍ਠਾ ਪਵਿਵਿਤ੍ਤਾ ਅਸਂਸਟ੍ਠਾ ਆਰਦ੍ਧਵੀਰਿਯਾ ਵਤ੍ਤਾਰੋ ਵਚਨਕ੍ਖਮਾ ਚੋਦਕਾ ਪਾਪਗਰਹਿਨੋ ਸੀਲਸਮ੍ਪਨ੍ਨਾ ਸਮਾਧਿਸਮ੍ਪਨ੍ਨਾ ਪਞ੍ਞਾਸਮ੍ਪਨ੍ਨਾ ਵਿਮੁਤ੍ਤਿਸਮ੍ਪਨ੍ਨਾ ਵਿਮੁਤ੍ਤਿਞਾਣਦਸ੍ਸਨਸਮ੍ਪਨ੍ਨਾ. ਤੇਹਿ ਪਰਿਵਾਰਿਤੋ ਭਗਵਾ ਰਤ੍ਤਕਮ੍ਬਲਪਰਿਕ੍ਖਿਤ੍ਤੋ ਵਿਯ ਸੁਵਣ੍ਣਕ੍ਖਨ੍ਧੋ, ਰਤ੍ਤਪਦੁਮਸਣ੍ਡਮਜ੍ਝਗਤਾ ਵਿਯ ਸੁਵਣ੍ਣਨਾਵਾ, ਪਵਾਲ਼ਵੇਦਿਕਾਪਰਿਕ੍ਖਿਤ੍ਤੋ ਵਿਯ ਸੁਵਣ੍ਣਪਾਸਾਦੋ ਵਿਰੋਚਿਤ੍ਥ. ਮਹਾਕਸ੍ਸਪਪ੍ਪਮੁਖਾ ਪਨ ਮਹਾਥੇਰਾ ਮੇਘਵਣ੍ਣਂ ਪਂਸੁਕੂਲਚੀਵਰਂ ਪਾਰੁਪਿਤ੍ਵਾ ਮਣਿਵਮ੍ਮਵਮ੍ਮਿਤਾ ਵਿਯ ਮਹਾਨਾਗਾ ਪਰਿਵਾਰਯਿਂਸੁ ਵੀਤਰਾਗਾ ਭਿਨ੍ਨਕਿਲੇਸਾ ਵਿਜਟਿਤਜਟਾ ਛਿਨ੍ਨਬਨ੍ਧਨਾ ਕੁਲੇ ਵਾ ਗਣੇ ਵਾ ਅਲਗ੍ਗਾ.
ਇਤਿ ਭਗਵਾ ਸਯਂ ਵੀਤਰਾਗੋ ਵੀਤਰਾਗੇਹਿ, ਵੀਤਦੋਸੋ ਵੀਤਦੋਸੇਹਿ, ਵੀਤਮੋਹੋ ਵੀਤਮੋਹੇਹਿ, ਨਿਤ੍ਤਣ੍ਹੋ ਨਿਤ੍ਤਣ੍ਹੇਹਿ, ਨਿਕ੍ਕਿਲੇਸੋ ਨਿਕ੍ਕਿਲੇਸੇਹਿ, ਸਯਂ ਬੁਦ੍ਧੋ ਅਨੁਬੁਦ੍ਧੇਹਿ ਪਰਿਵਾਰਿਤੋ ਪਤ੍ਤਪਰਿਵਾਰਿਤਂ ਵਿਯ ਕੇਸਰਂ, ਕੇਸਰਪਰਿਵਾਰਿਤਾ ਵਿਯ ਕਣ੍ਣਿਕਾ, ਅਟ੍ਠਨਾਗਸਹਸ੍ਸਪਰਿਵਾਰਿਤੋ ਵਿਯ ਛਦ੍ਦਨ੍ਤੋ ਨਾਗਰਾਜਾ, ਨਵੁਤਿਹਂਸਸਹਸ੍ਸਪਰਿਵਾਰਿਤੋ ਵਿਯ ਧਤਰਟ੍ਠੋ ਹਂਸਰਾਜਾ, ਸੇਨਙ੍ਗਪਰਿਵਾਰਿਤੋ ਵਿਯ ਚਕ੍ਕਵਤ੍ਤੀ, ਮਰੁਗਣਪਰਿਵਾਰਿਤੋ ਵਿਯ ਸਕ੍ਕੋ ਦੇਵਰਾਜਾ, ਬ੍ਰਹ੍ਮਗਣਪਰਿਵਾਰਿਤੋ ਵਿਯ ਹਾਰਿਤਮਹਾਬ੍ਰਹ੍ਮਾ, ਤਾਰਾਗਣਪਰਿਵੁਤੋ ਵਿਯ ਪੁਣ੍ਣਚਨ੍ਦੋ ਅਸਮੇਨ ਬੁਦ੍ਧਵੇਸੇਨ ਅਪਰਿਮਾਣੇਨ ਬੁਦ੍ਧਵਿਲਾਸੇਨ ਪਾਟਲਿਗਾਮੀਨਂ ਮਗ੍ਗਂ ਪਟਿਪਜ੍ਜਿ.
ਅਥਸ੍ਸ ਪੁਰਤ੍ਥਿਮਕਾਯਤੋ ਸੁਵਣ੍ਣਵਣ੍ਣਾ ਘਨਬੁਦ੍ਧਰਸ੍ਮਿਯੋ ਉਟ੍ਠਹਿਤ੍ਵਾ ਅਸੀਤਿਹਤ੍ਥਂ ਠਾਨਂ ਅਗ੍ਗਹੇਸੁਂ, ਪਚ੍ਛਿਮਕਾਯਤੋ ਦਕ੍ਖਿਣਪਸ੍ਸਤੋ ਵਾਮਪਸ੍ਸਤੋ ਸੁਵਣ੍ਣਵਣ੍ਣਾ ਘਨਰਸ੍ਮਿਯੋ ਉਟ੍ਠਹਿਤ੍ਵਾ ਅਸੀਤਿਹਤ੍ਥਂ ਠਾਨਂ ਅਗ੍ਗਹੇਸੁਂ, ਉਪਰਿਕੇਸਨ੍ਤਤੋ ਪਟ੍ਠਾਯ ਸਬ੍ਬਕੇਸਾਵਤ੍ਤੇਹਿ ਮੋਰਗੀਵਵਣ੍ਣਾ ਘਨਬੁਦ੍ਧਰਸ੍ਮਿਯੋ ਉਟ੍ਠਹਿਤ੍ਵਾ ਗਗਨਤਲੇ ਅਸੀਤਿਹਤ੍ਥਂ ਠਾਨਂ ਅਗ੍ਗਹੇਸੁਂ, ਹੇਟ੍ਠਾਪਾਦਤਲੇਹਿ ਪਵਾਲ਼ਵਣ੍ਣਾ ਰਸ੍ਮਿਯੋ ਉਟ੍ਠਹਿਤ੍ਵਾ ਘਨਪਥਵਿਯਂ ਅਸੀਤਿਹਤ੍ਥਂ ਠਾਨਂ ਅਗ੍ਗਹੇਸੁਂ, ਦਨ੍ਤਤੋ ਅਕ੍ਖੀਨਂ ਸੇਤਟ੍ਠਾਨਤੋ, ਨਖਾਨਞ੍ਚ ਮਂਸਵਿਨਿਮੁਤ੍ਤਟ੍ਠਾਨਤੋ ਓਦਾਤਾ ਘਨਬੁਦ੍ਧਰਸ੍ਮਿਯੋ ਉਟ੍ਠਹਿਤ੍ਵਾ ਅਸੀਤਿਹਤ੍ਥਂ ਠਾਨਂ ਅਗ੍ਗਹੇਸੁਂ, ਰਤ੍ਤਪੀਤਵਣ੍ਣਾਨਂ ਸਮ੍ਭਿਨ੍ਨਟ੍ਠਾਨਤੋ ਮਞ੍ਜਿਟ੍ਠਵਣ੍ਣਾ ਰਸ੍ਮਿਯੋ ਉਟ੍ਠਹਿਤ੍ਵਾ ਅਸੀਤਿਹਤ੍ਥਂ ਠਾਨਂ ਅਗ੍ਗਹੇਸੁਂ, ਸਬ੍ਬਤ੍ਥਕਮੇਵ ਪਭਸ੍ਸਰਾ ਰਸ੍ਮਿਯੋ ਉਟ੍ਠਹਿਂਸੁ. ਏਵਂ ਸਮਨ੍ਤਾ ਅਸੀਤਿਹਤ੍ਥਮਤ੍ਤਂ ਠਾਨਂ ਛਬ੍ਬਣ੍ਣਾ ਬੁਦ੍ਧਰਸ੍ਮਿਯੋ ਵਿਜ੍ਜੋਤਮਾਨਾ ਵਿਪ੍ਫਨ੍ਦਮਾਨਾ ਵਿਧਾਵਮਾਨਾ ਕਞ੍ਚਨਦਣ੍ਡਦੀਪਿਕਾਹਿ ਨਿਚ੍ਛਰਿਤ੍ਵਾ ਆਕਾਸਂ ਪਕ੍ਖਨ੍ਦਮਾਨਾ ਮਹਾਪਦੀਪਜਾਲਾ ਵਿਯ, ਚਾਤੁਦ੍ਦੀਪਿਕਮਹਾਮੇਘਤੋ ਨਿਕ੍ਖਨ੍ਤਵਿਜ੍ਜੁਲਤਾ ਵਿਯ ਚ ਦਿਸੋਦਿਸਂ ਪਕ੍ਖਨ੍ਦਿਂਸੁ. ਯਾਹਿ ਸਬ੍ਬਦਿਸਾਭਾਗਾ ਸੁਵਣ੍ਣਚਮ੍ਪਕਪੁਪ੍ਫੇਹਿ ਵਿਕਿਰਿਯਮਾਨਾ ਵਿਯ, ਸੁਵਣ੍ਣਘਟਤੋ ਨਿਕ੍ਖਨ੍ਤਸੁਵਣ੍ਣਰਸਧਾਰਾਹਿ ਆਸਿਞ੍ਚਿਯਮਾਨਾ ਵਿਯ, ਪਸਾਰਿਤਸੁਵਣ੍ਣਪਟ੍ਟਪਰਿਕ੍ਖਿਤ੍ਤਾ ਵਿਯ, ਵੇਰਮ੍ਭਵਾਤਸਮੁਦ੍ਧਤਕਿਂਸੁਕਕਣਿਕਾਰਕਿਕਿਰਾਤਪੁਪ੍ਫਚੁਣ੍ਣਸਮੋਕਿਣ੍ਣਾ ਵਿਯ ਚੀਨਪਿਟ੍ਠਚੁਣ੍ਣਸਮ੍ਪਰਿਰਞ੍ਜਿਤਾ ਵਿਯ ਚ ਵਿਰੋਚਿਂਸੁ.
ਭਗਵਤੋਪਿ ਅਸੀਤਿਅਨੁਬ੍ਯਞ੍ਜਨਬ੍ਯਾਮਪ੍ਪਭਾਪਰਿਕ੍ਖੇਪਸਮੁਜ੍ਜਲਂ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਪਟਿਮਣ੍ਡਿਤਂ ਸਰੀਰਂ ਅਬ੍ਭਮਹਿਕਾਦਿਉਪਕ੍ਕਿਲੇਸਵਿਮੁਤ੍ਤਂ ਸਮੁਜ੍ਜਲਤਾਰਕਪਭਾਸਿਤਂ ਵਿਯ ਗਗਨਤਲਂ, ਵਿਕਸਿਤਂ ਵਿਯ ਪਦੁਮਵਨਂ, ਸਬ੍ਬਪਾਲਿਫੁਲ੍ਲੋ ਵਿਯ ਯੋਜਨਸਤਿਕੋ ਪਾਰਿਚ੍ਛਤ੍ਤਕੋ, ਪਟਿਪਾਟਿਯਾ ਠਪਿਤਾਨਂ ਦ੍ਵਤ੍ਤਿਂਸਚਨ੍ਦਾਨਂ ਦ੍ਵਤ੍ਤਿਂਸਸੂਰਿਯਾਨਂ ਦ੍ਵਤ੍ਤਿਂਸਚਕ੍ਕਵਤ੍ਤੀਨਂ ਦ੍ਵਤ੍ਤਿਂਸਦੇਵਰਾਜਾਨਂ ਦ੍ਵਤ੍ਤਿਂਸਮਹਾਬ੍ਰਹ੍ਮਾਨਂ ਸਿਰਿਯਾ ਸਿਰਿਂ ਅਭਿਭਵਮਾਨਂ ਵਿਯ ਵਿਰੋਚਿਤ੍ਥ, ਯਥਾ ਤਂ ਦਸਹਿ ਪਾਰਮੀਹਿ ਦਸਹਿ ਉਪਪਾਰਮੀਹਿ ਦਸਹਿ ਪਰਮਤ੍ਥਪਾਰਮੀਹੀਤਿ ਸਮ੍ਮਦੇਵ ਪਰਿਪੂਰਿਤਾਹਿ ਸਮਤਿਂਸਾਯ ਪਾਰਮੀਹਿ ਅਲਙ੍ਕਤਂ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਦਿਨ੍ਨੇਨ ਦਾਨੇਨ ਰਕ੍ਖਿਤੇਨ ਸੀਲੇਨ ਕਤੇਨ ਕਲ੍ਯਾਣਕਮ੍ਮੇਨ ਏਕਸ੍ਮਿਂ ਅਤ੍ਤਭਾਵੇ ਸਮੋਸਰਿਤ੍ਵਾ ਵਿਪਾਕਂ ਦਾਤੁਂ ਓਕਾਸਂ ਅਲਭਮਾਨੇਨ ਸਮ੍ਬਾਧਪ੍ਪਤ੍ਤੇਨ ਵਿਯ ਨਿਬ੍ਬਤ੍ਤਿਤਂ ਨਾਵਾਸਹਸ੍ਸਸ੍ਸ ਭਣ੍ਡਂ ਏਕਂ ਨਾਵਂ ਆਰੋਪਨਕਾਲੋ ਵਿਯ, ਸਕਟਸਹਸ੍ਸਸ੍ਸ ਭਣ੍ਡਂ ਏਕਂ ਸਕਟਂ ਆਰੋਪਨਕਾਲੋ ਵਿਯ, ਪਞ੍ਚਵੀਸਤਿਯਾ ਗਙ੍ਗਾਨਂ ਸਮ੍ਭਿਜ੍ਜ ਮੁਖਦ੍ਵਾਰੇ ਏਕਤੋ ਰਾਸੀਭੂਤਕਾਲੋ ਵਿਯ ਚ ਅਹੋਸਿ.
ਇਮਾਯ ਬੁਦ੍ਧਰਸ੍ਮਿਯਾ ਓਭਾਸਮਾਨਸ੍ਸਪਿ ਭਗਵਤੋ ਪੁਰਤੋ ਅਨੇਕਾਨਿ ਦਣ੍ਡਦੀਪਿਕਾਸਹਸ੍ਸਾਨਿ ਉਕ੍ਖਿਪਿਂਸੁ, ਤਥਾ ਪਚ੍ਛਤੋ ਵਾਮਪਸ੍ਸੇ ਦਕ੍ਖਿਣਪਸ੍ਸੇ. ਜਾਤਿਸੁਮਨਚਮ੍ਪਕਵਨਮਾਲਿਕਾਰਤ੍ਤੁਪ੍ਪਲਨੀਲੁਪ੍ਪਲਬਕੁਲਸਿਨ੍ਦੁਵਾਰਾਦਿਪੁਪ੍ਫਾਨਿ ਚੇਵ ਨੀਲਪੀਤਾਦਿਵਣ੍ਣਸੁਗਨ੍ਧਗਨ੍ਧਚੁਣ੍ਣਾਨਿ ਚ ਚਾਤੁਦ੍ਦੀਪਿਕਮਹਆਮੇਘਵਿਸ੍ਸਟ੍ਠਾ ਸਲਿਲਵੁਟ੍ਠਿਯੋ ਵਿਯ ਵਿਪ੍ਪਕਿਰਿਂਸੁ. ਪਞ੍ਚਙ੍ਗਿਕਤੂਰਿਯਨਿਗ੍ਘੋਸਾ ਚੇਵ ਬੁਦ੍ਧਧਮ੍ਮਸਙ੍ਘਗੁਣਪਟਿਸਂਯੁਤ੍ਤਾ ਥੁਤਿਘੋਸਾ ਚ ਸਬ੍ਬਾ ਦਿਸਾ ਪੂਰਯਮਾਨਾ ਮੁਖਰਾ ਵਿਯ ਅਕਂਸੁ. ਦੇਵਸੁਪਣ੍ਣਨਾਗਯਕ੍ਖਗਨ੍ਧਬ੍ਬਮਨੁਸ੍ਸਾਨਂ ਅਕ੍ਖੀਨਿ ਅਮਤਪਾਨਂ ਵਿਯ ਲਭਿਂਸੁ. ਇਮਸ੍ਮਿਂ ਪਨ ਠਾਨੇ ਠਤ੍ਵਾ ਪਦਸਹਸ੍ਸੇਹਿ ਗਮਨਵਣ੍ਣਂ ਵਤ੍ਤੁਂ ਵਟ੍ਟਤਿ. ਤਤ੍ਰਿਦਂ ਮੁਖਮਤ੍ਤਂ (ਮ. ਨਿ. ਅਟ੍ਠ. ੨.੨੨; ਉਦਾ. ਅਟ੍ਠ. ੭੬) –
‘‘ਏਵਂ ਸਬ੍ਬਙ੍ਗਸਮ੍ਪਨ੍ਨੋ, ਕਮ੍ਪਯਨ੍ਤੋ ਵਸੁਨ੍ਧਰਂ;
ਅਹੇਠਯਨ੍ਤੋ ਪਾਣਾਨਿ, ਯਾਤਿ ਲੋਕਵਿਨਾਯਕੋ.
‘‘ਦਕ੍ਖਿਣਂ ਪਠਮਂ ਪਾਦਂ, ਉਦ੍ਧਰਨ੍ਤੋ ਨਰਾਸਭੋ;
ਗਚ੍ਛਨ੍ਤੋ ਸਿਰਿਸਮ੍ਪਨ੍ਨੋ, ਸੋਭਤੇ ਦ੍ਵਿਪਦੁਤ੍ਤਮੋ.
‘‘ਗਚ੍ਛਤੋ ਬੁਦ੍ਧਸੇਟ੍ਠਸ੍ਸ, ਹੇਟ੍ਠਾਪਾਦਤਲਂ ਮੁਦੁ;
ਸਮਂ ਸਮ੍ਫੁਸਤੇ ਭੂਮਿਂ, ਰਜਸਾਨੁਪਲਿਮ੍ਪਤਿ.
‘‘ਨਿਨ੍ਨਂ ਠਾਨਂ ਉਨ੍ਨਮਤਿ, ਗਚ੍ਛਨ੍ਤੇ ਲੋਕਨਾਯਕੇ;
ਉਨ੍ਨਤਞ੍ਚ ਸਮਂ ਹੋਤਿ, ਪਥਵੀ ਚ ਅਚੇਤਨਾ.
‘‘ਪਾਸਾਣਾ ਸਕ੍ਖਰਾ ਚੇਵ, ਕਥਲਾ ਖਾਣੁਕਣ੍ਟਕਾ;
ਸਬ੍ਬੇ ਮਗ੍ਗਾ ਵਿਵਜ੍ਜਨ੍ਤਿ, ਗਚ੍ਛਨ੍ਤੇ ਲੋਕਨਾਯਕੇ.
‘‘ਨਾਤਿਦੂਰੇ ਉਦ੍ਧਰਤਿ, ਨਾਚ੍ਚਾਸਨ੍ਨੇ ਚ ਨਿਕ੍ਖਿਪਂ;
ਅਘਟ੍ਟਯਨ੍ਤੋ ਨਿਯ੍ਯਾਤਿ, ਉਭੋ ਜਾਣੂ ਚ ਗੋਪ੍ਫਕੇ.
‘‘ਨਾਤਿਸੀਘਂ ਪਕ੍ਕਮਤਿ, ਸਮ੍ਪਨ੍ਨਚਰਣੋ ਮੁਨਿ;
ਨ ਚਾਤਿਸਣਿਕਂ ਯਾਤਿ, ਗਚ੍ਛਮਾਨੋ ਸਮਾਹਿਤੋ.
‘‘ਉਦ੍ਧਂ ਅਧੋ ਤਿਰਿਯਞ੍ਚ, ਦਿਸਞ੍ਚ ਵਿਦਿਸਂ ਤਥਾ;
ਨ ਪੇਕ੍ਖਮਾਨੋ ਸੋ ਯਾਤਿ, ਯੁਗਮਤ੍ਤਞ੍ਹਿ ਪੇਕ੍ਖਤਿ.
‘‘ਨਾਗਵਿਕ੍ਕਨ੍ਤਚਾਰੋ ਸੋ, ਗਮਨੇ ਸੋਭਤੇ ਜਿਨੋ;
ਚਾਰੁ ਗਚ੍ਛਤਿ ਲੋਕਗ੍ਗੋ, ਹਾਸਯਨ੍ਤੋ ਸਦੇਵਕੇ.
‘‘ਉਸਭਰਾਜਾਵ ਸੋਭਨ੍ਤੋ, ਚਾਤੁਚਾਰੀਵ ਕੇਸਰੀ;
ਤੋਸਯਨ੍ਤੋ ਬਹੂ ਸਤ੍ਤੇ, ਗਾਮਸੇਟ੍ਠਂ ਉਪਾਗਮੀ’’ਤਿ. (ਮ. ਨਿ. ਅਟ੍ਠ. ੨.੨੨; ਉਦਾ. ਅਟ੍ਠ. ੭੬);
ਵਣ੍ਣਕਾਲੋ ਨਾਮ ਕਿਰੇਸ. ਏਵਂਵਿਧੇਸੁ ਕਾਲੇਸੁ ਭਗਵਤੋ ਸਰੀਰਵਣ੍ਣੇ ਵਾ ਗੁਣਵਣ੍ਣੇ ਵਾ ਧਮ੍ਮਕਥਿਕਸ੍ਸ ਥਾਮੋਯੇਵ ਪਮਾਣਂ. ਚੁਣ੍ਣਿਯਪਦੇਹਿ ਗਾਥਾਬਨ੍ਧੇਹਿ ਵਾ ਯਤ੍ਤਕਂ ਸਕ੍ਕੋਤਿ, ਤਤ੍ਤਕਂ ਵਤ੍ਤਬ੍ਬਂ, ‘‘ਦੁਕ੍ਕਥਿਤ’’ਨ੍ਤਿ ਵਾ ‘‘ਅਤਿਤ੍ਥੇਨ ਪਕ੍ਖਨ੍ਦੋ’’ਤਿ ਵਾ ਨ ਵਤ੍ਤਬ੍ਬੋ. ਅਪਰਿਮਾਣਵਣ੍ਣਾ ਹਿ ਬੁਦ੍ਧਾ ਭਗਵਨ੍ਤੋ, ਤੇਸਂ ਬੁਦ੍ਧਾਪਿ ਅਨਵਸੇਸਤੋ ਵਣ੍ਣਂ ਵਤ੍ਤੁਂ ਅਸਮਤ੍ਥਾ. ਸਕਲਮ੍ਪਿ ਹਿ ਕਪ੍ਪਂ ਵਦਨ੍ਤਾ ਪਰਿਯੋਸਾਪੇਤੁਂ ਨ ਸਕ੍ਕੋਨ੍ਤਿ, ਪਗੇਵ ਇਤਰਾ ਪਜਾਤਿ. ਇਮਿਨਾ ਸਿਰਿਵਿਲਾਸੇਨ ਅਲਙ੍ਕਤਪਟਿਯਤ੍ਤਂ ਪਾਟਲਿਗਾਮਂ ਪਵਿਸਿਤ੍ਵਾ ਭਗਵਾ ਪਸਨ੍ਨਚਿਤ੍ਤੇਨ ਜਨੇਨ ਪੁਪ੍ਫਗਨ੍ਧਧੂਮਵਾਸਚੁਣ੍ਣਾਦੀਹਿ ਪੂਜਿਯਮਾਨੋ ਆਵਸਥਾਗਾਰਂ ਪਾਵਿਸਿ. ਤੇਨ ਵੁਤ੍ਤਂ ‘‘ਅਥ ਖੋ ਭਗਵਾ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਸਦ੍ਧਿਂ ਭਿਕ੍ਖੁਸਙ੍ਘੇਨ ਯੇਨ ਆਵਸਥਾਗਾਰਂ ਤੇਨੁਪਸਙ੍ਕਮੀ’’ਤਿ.
ਪਾਦੇ ਪਕ੍ਖਾਲੇਤ੍ਵਾਤਿ ਯਦਿਪਿ ਭਗਵਤੋ ਪਾਦੇ ਰਜੋਜਲ੍ਲਂ ਨ ਉਪਲਿਮ੍ਪਤਿ, ਤੇਸਂ ਪਨ ਉਪਾਸਕਾਨਂ ਕੁਸਲਾਭਿਵੁਦ੍ਧਿਂ ਆਕਙ੍ਖਨ੍ਤੋ ਪਰੇਸਂ ਦਿਟ੍ਠਾਨੁਗਤਿਂ ਆਪਜ੍ਜਨਤ੍ਥਂ ਭਗਵਾ ਪਾਦੇ ਪਕ੍ਖਾਲੇਸਿ. ਅਪਿਚ ਉਪਾਦਿਨ੍ਨਕਸਰੀਰਂ ਨਾਮ ਸੀਤਿਕਾਤਬ੍ਬਮ੍ਪਿ ਹੋਤੀਤਿ ਤਦਤ੍ਥਮ੍ਪਿ ਭਗਵਾ ਨਹਾਨਪਾਦਧੋਵਨਾਨਿ ਕਰੋਤਿਯੇਵ. ਭਗਵਨ੍ਤਂਯੇਵ ਪੁਰਕ੍ਖਤ੍ਵਾਤਿ ਭਗਵਨ੍ਤਂ ਪੁਰਤੋ ਕਤ੍ਵਾ. ਤਤ੍ਥ ਭਗਵਾ ਭਿਕ੍ਖੂਨਞ੍ਚੇਵ ਉਪਾਸਕਾਨਞ੍ਚ ਮਜ੍ਝੇ ਨਿਸਿਨ੍ਨੋ ਗਨ੍ਧੋਦਕੇਨ ਨਹਾਪੇਤ੍ਵਾ ਦੁਕੂਲਚੁਮ੍ਬਟੇਨ ਵੋਦਕਂ ਕਤ੍ਵਾ ਜਾਤਿਹਿਙ੍ਗੁਲਕੇਨ ਮਜ੍ਜਿਤ੍ਵਾ ਰਤ੍ਤਕਮ੍ਬਲਪਲਿਵੇਠਿਤੇ ਪੀਠੇ ਠਪਿਤਾ ਰਤ੍ਤਸੁਵਣ੍ਣਘਨਪਟਿਮਾ ਵਿਯ ਅਤਿਵਿਯ ਵਿਰੋਚਿਤ੍ਥ. ਅਯਂ ਪਨੇਤ੍ਥ ਪੋਰਾਣਾਨਂ ਵਣ੍ਣਭਣਨਮਗ੍ਗੋ –
‘‘ਗਨ੍ਤ੍ਵਾਨ ਮਣ੍ਡਲਮਾਲ਼ਂ, ਨਾਗਵਿਕ੍ਕਨ੍ਤਚਾਰਣੋ;
ਓਭਾਸਯਨ੍ਤੋ ਲੋਕਗ੍ਗੋ, ਨਿਸੀਦਿ ਵਰਮਾਸਨੇ.
‘‘ਤਹਿਂ ਨਿਸਿਨ੍ਨੋ ਨਰਦਮ੍ਮਸਾਰਥਿ,
ਦੇਵਾਤਿਦੇਵੋ ਸਤਪੁਞ੍ਞਲਕ੍ਖਣੋ;
ਬੁਦ੍ਧਾਸਨੇ ਮਜ੍ਝਗਤੋ ਵਿਰੋਚਤਿ,
ਸੁਵਣ੍ਣਨੇਕ੍ਖਂ ਵਿਯ ਪਣ੍ਡੁਕਮ੍ਬਲੇ.
‘‘ਨੇਕ੍ਖਂ ਜਮ੍ਬੋਨਦਸ੍ਸੇਵ, ਨਿਕ੍ਖਿਤ੍ਤਂ ਪਣ੍ਡੁਕਮ੍ਬਲੇ;
ਵਿਰੋਚਤਿ ਵੀਤਮਲੋ, ਮਣਿ ਵੇਰੋਚਨੋ ਯਥਾ.
‘‘ਮਹਾਸਾਲੋਵ ਸਮ੍ਫੁਲ੍ਲੋ, ਮੇਰੁਰਾਜਾਵਲਙ੍ਕਤੋ;
ਸੁਵਣ੍ਣਥੂਪਸਙ੍ਕਾਸੋ, ਪਦੁਮੋ ਕੋਸਕੋ ਯਥਾ.
‘‘ਜਲਨ੍ਤੋ ਦੀਪਰੁਕ੍ਖੋਵ, ਪਬ੍ਬਤਗ੍ਗੇ ਯਥਾ ਸਿਖੀ;
ਦੇਵਾਨਂ ਪਾਰਿਚ੍ਛਤ੍ਤੋਵ, ਸਬ੍ਬਫੁਲ੍ਲੋ ਵਿਰੋਚਥਾ’’ਤਿ. (ਮ. ਨਿ. ਅਟ੍ਠ. ੨.੨੨; ਉਦਾ. ਅਟ੍ਠ. ੭੬);
ਪਾਟਲਿਗਾਮਿਕੇ ਉਪਾਸਕੇ ਆਮਨ੍ਤੇਸੀਤਿ ਯਸ੍ਮਾ ਤੇਸੁ ਉਪਾਸਕੇਸੁ ਬਹੂ ਜਨਾ ਸੀਲੇ ਪਤਿਟ੍ਠਿਤਾ, ਤਸ੍ਮਾ ਪਠਮਂ ਤਾਵ ਸੀਲਵਿਪਤ੍ਤਿਯਾ ਆਦੀਨਵਂ ਪਕਾਸੇਤ੍ਵਾ ਪਚ੍ਛਾ ਸੀਲਸਮ੍ਪਦਾਯ ਆਨਿਸਂਸਂ ਦਸ੍ਸੇਤੁਂ ‘‘ਪਞ੍ਚਿਮੇ ਗਹਪਤਯੋ’’ਤਿਆਦਿਨਾ ਧਮ੍ਮਦੇਸਨਤ੍ਥਂ ਆਮਨ੍ਤੇਸਿ. ਤਤ੍ਥ ਦੁਸ੍ਸੀਲੋਤਿ ਨਿਸ੍ਸੀਲੋ (ਦੀ. ਨਿ. ਅਟ੍ਠ. ੨.੧੪੯; ਅ. ਨਿ. ਅਟ੍ਠ. ੩.੫.੨੧੩; ਉਦਾ. ਅਟ੍ਠ. ੭੬). ਅਭਾਵਤ੍ਥੋ ਹੇਤ੍ਥ ਦੁ-ਸਦ੍ਦੋ ‘‘ਦੁਪ੍ਪਞ੍ਞੋ’’ਤਿਆਦੀਸੁ ਵਿਯ. ਸੀਲਵਿਪਨ੍ਨੋਤਿ ਵਿਪਨ੍ਨਸੀਲੋ ਭਿਨ੍ਨਸਂਵਰੋ. ਏਤ੍ਥ ਚ ‘‘ਦੁਸ੍ਸੀਲੋ’’ਤਿ ਪਦੇਨ ਪੁਗ੍ਗਲਸ੍ਸ ਸੀਲਾਭਾਵੋ ਵੁਤ੍ਤੋ. ਸੋ ਪਨਸ੍ਸ ਸੀਲਾਭਾਵੋ ਦੁਵਿਧੋ ਅਸਮਾਦਾਨੇਨ ਵਾ ਸਮਾਦਿਨ੍ਨਸ੍ਸ ਭੇਦੇਨ ਵਾਤਿ. ਤੇਸੁ ਪੁਰਿਮੋ ਨ ਤਥਾ ਸਾਵਜ੍ਜੋ, ਯਥਾ ਦੁਤਿਯੋ ਸਾਵਜ੍ਜਤਰੋ. ਯਥਾਧਿਪ੍ਪੇਤਾਦੀਨਵਨਿਮਿਤ੍ਤਂ ਸੀਲਾਭਾਵਂ ਪੁਗ੍ਗਲਾਧਿਟ੍ਠਾਨਾਯ ਦੇਸਨਾਯ ਦਸ੍ਸੇਤੁਂ ‘‘ਸੀਲਵਿਪਨ੍ਨੋ’’ਤਿ ਵੁਤ੍ਤਂ, ਤੇਨ ‘‘ਦੁਸ੍ਸੀਲੋ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਪਮਾਦਾਧਿਕਰਣਨ੍ਤਿ ਪਮਾਦਕਾਰਣਾ. ਇਦਞ੍ਚ ਸੁਤ੍ਤਂ ਗਹਟ੍ਠਾਨਂ ਵਸੇਨ ਆਗਤਂ, ਪਬ੍ਬਜਿਤਾਨਮ੍ਪਿ ਪਨ ਲਬ੍ਭਤੇਵ. ਗਹਟ੍ਠੋ ਹਿ ਯੇਨ ਯੇਨ ਸਿਪ੍ਪਟ੍ਠਾਨੇਨ ਜੀਵਿਕਂ ਕਪ੍ਪੇਤਿ ਯਦਿ ਕਸਿਯਾ ਯਦਿ ਵਣਿਜ੍ਜਾਯ ਯਦਿ ਗੋਰਕ੍ਖੇਨ. ਪਾਣਾਤਿਪਾਤਾਦਿਵਸੇਨ ਪਮਤ੍ਤੋ ਤਂ ਤਂ ਯਥਾਕਾਲਂ ਸਮ੍ਪਾਦੇਤੁਂ ਨ ਸਕ੍ਕੋਤਿ, ਅਥਸ੍ਸ ਕਮ੍ਮਂ ਵਿਨਸ੍ਸਤਿ. ਮਾਘਾਤਕਾਲੇ ਪਾਣਾਤਿਪਾਤਂ ਪਨ ਅਦਿਨ੍ਨਾਦਾਨਾਦੀਨਿ ਚ ਕਰੋਨ੍ਤੋ ਦਣ੍ਡਵਸੇਨ ਮਹਤਿਂ ਭੋਗਜਾਨਿਂ ਨਿਗਚ੍ਛਤਿ. ਪਬ੍ਬਜਿਤੋ ਦੁਸ੍ਸੀਲੋ ਪਮਾਦਕਾਰਣਾ ਸੀਲਤੋ ਬੁਦ੍ਧਵਚਨਤੋ ਝਾਨਤੋ ਸਤ੍ਤਅਰਿਯਧਨਤੋ ਚ ਜਾਨਿਂ ਨਿਗਚ੍ਛਤਿ.
ਪਾਪਕੋ ਕਿਤ੍ਤਿਸਦ੍ਦੋਤਿ ਗਹਟ੍ਠਸ੍ਸ ‘‘ਅਸੁਕੋ ਅਸੁਕਕੁਲੇ ਜਾਤੋ ਦੁਸ੍ਸੀਲੋ ਪਾਪਧਮ੍ਮੋ ਪਰਿਚ੍ਚਤ੍ਤਇਧਲੋਕਪਰਲੋਕੋ ਸਲਾਕਭਤ੍ਤਮਤ੍ਤਮ੍ਪਿ ਨ ਦੇਤੀ’’ਤਿ ਚਤੁਪਰਿਸਮਜ੍ਝੇ ਪਾਪਕੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ. ਪਬ੍ਬਜਿਤਸ੍ਸ ‘‘ਅਸੁਕੋ ਨਾਮ ਸਤ੍ਥੁਸਾਸਨੇ ਪਬ੍ਬਜਿਤ੍ਵਾ ਨਾਸਕ੍ਖਿ ਸੀਲਾਨਿ ਰਕ੍ਖਿਤੁਂ, ਨ ਬੁਦ੍ਧਵਚਨਂ ਉਗ੍ਗਹੇਤੁਂ, ਵੇਜ੍ਜਕਮ੍ਮਾਦੀਹਿ ਜੀਵਤਿ, ਛਹਿ ਅਗਾਰਵੇਹਿ ਸਮਨ੍ਨਾਗਤੋ’’ਤਿ ਏਵਂ ਪਾਪਕੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ.
ਅਵਿਸਾਰਦੋਤਿ ਗਹਟ੍ਠੋ ਤਾਵ ‘‘ਅਵਸ੍ਸਂ ਬਹੂਨਂ ਸਨ੍ਨਿਪਾਤਟ੍ਠਾਨੇ ਕੋਚਿ ਮਮ ਕਮ੍ਮਂ ਜਾਨਿਸ੍ਸਤਿ, ਅਥ ਮਂ ਨਿਗ੍ਗਣ੍ਹਿਸ੍ਸਨ੍ਤੀ’’ਤਿ ਵਾ, ‘‘ਰਾਜਕੁਲਸ੍ਸ ਵਾ ਦਸ੍ਸਨ੍ਤੀ’’ਤਿ ਸਭਯੋ ਉਪਸਙ੍ਕਮਤਿ, ਮਙ੍ਕੁਭੂਤੋ ਪਤ੍ਤਕ੍ਖਨ੍ਧੋ ਅਧੋਮੁਖੋ ਨਿਸੀਦਤਿ, ਵਿਸਾਰਦੋ ਹੁਤ੍ਵਾ ਕਥੇਤੁਂ ਨ ਸਕ੍ਕੋਤਿ. ਪਬ੍ਬਜਿਤੋਪਿ ‘‘ਬਹੂ ਭਿਕ੍ਖੂ ਸਨ੍ਨਿਪਤਿਤਾ, ਅਵਸ੍ਸਂ ਕੋਚਿ ਮਮ ਕਮ੍ਮਂ ਜਾਨਿਸ੍ਸਤਿ, ਅਥ ਮੇ ਉਪੋਸਥਮ੍ਪਿ ਪਵਾਰਣਮ੍ਪਿ ਠਪੇਤ੍ਵਾ ਸਾਮਞ੍ਞਤੋ ਚਾਵੇਤ੍ਵਾ ਨਿਕ੍ਕਡ੍ਢਿਸ੍ਸਨ੍ਤੀ’’ਤਿ ਸਭਯੋ ਉਪਸਙ੍ਕਮਤਿ, ਵਿਸਾਰਦੋ ਹੁਤ੍ਵਾ ਕਥੇਤੁਂ ਨ ਸਕ੍ਕੋਤਿ. ਏਕਚ੍ਚੋ ਪਨ ਦੁਸ੍ਸੀਲੋਪਿ ਸਮਾਨੋ ਦਪ੍ਪਿਤੋ ਵਿਯ ਵਦਤਿ, ਸੋਪਿ ਅਜ੍ਝਾਸਯੇਨ ਮਙ੍ਕੁ ਹੋਤਿਯੇਵ ਵਿਪ੍ਪਟਿਸਾਰੀਭਾਵਤੋ.
ਸਮ੍ਮੂਲ਼੍ਹੋ ਕਾਲਂ ਕਰੋਤੀਤਿ ਦੁਸ੍ਸੀਲਸ੍ਸ ਹਿ ਮਰਣਮਞ੍ਚੇ ਨਿਪਨ੍ਨਸ੍ਸ ਦੁਸ੍ਸੀਲ੍ਯਕਮ੍ਮਾਨਂ ਸਮਾਦਾਯ ਵਤ੍ਤਿਤਟ੍ਠਾਨਾਨਿ ਆਪਾਥਮਾਗਚ੍ਛਨ੍ਤਿ. ਸੋ ਉਮ੍ਮੀਲੇਤ੍ਵਾ ਅਤ੍ਤਨੋ ਪੁਤ੍ਤਦਾਰਾਦਿਦਸ੍ਸਨਵਸੇਨ ਇਧਲੋਕਂ ਪਸ੍ਸਤਿ, ਨਿਮੀਲੇਤ੍ਵਾ ਗਤਿਨਿਮਿਤ੍ਤੁਪਟ੍ਠਾਨਵਸੇਨ ਪਰਲੋਕਂ ਪਸ੍ਸਤਿ, ਤਸ੍ਸ ਚਤ੍ਤਾਰੋ ਅਪਾਯਾ ਕਮ੍ਮਾਨੁਰੂਪਂ ਉਪਟ੍ਠਹਨ੍ਤਿ. ਸਤ੍ਤਿਸਤੇਨ ਪਹਰਿਯਮਾਨੋ ਵਿਯ ਅਗ੍ਗਿਜਾਲਾਯ ਆਲਿਙ੍ਗਿਯਮਾਨੋ ਵਿਯ ਚ ਹੋਤਿ. ਸੋ ‘‘ਵਾਰੇਥ ਵਾਰੇਥਾ’’ਤਿ ਵਿਰਵਨ੍ਤੋਵ ਮਰਤਿ. ਤੇਨ ਵੁਤ੍ਤਂ ‘‘ਸਮ੍ਮੂਲ਼੍ਹੋ ਕਾਲਂ ਕਰੋਤੀ’’ਤਿ.
ਕਾਯਸ੍ਸ ਭੇਦਾਤਿ ਉਪਾਦਿਨ੍ਨਕਕ੍ਖਨ੍ਧਪਰਿਚ੍ਚਾਗਾ. ਪਰਂ ਮਰਣਾਤਿ ਤਦਨਨ੍ਤਰਂ ਅਭਿਨਿਬ੍ਬਤ੍ਤਕ੍ਖਨ੍ਧਗ੍ਗਹਣੇ. ਅਥ ਵਾ ਕਾਯਸ੍ਸ ਭੇਦਾਤਿ ਜੀਵਿਤਿਨ੍ਦ੍ਰਿਯਸ੍ਸ ਉਪਚ੍ਛੇਦਾ. ਪਰਂ ਮਰਣਾਤਿ ਚੁਤਿਤੋ ਉਦ੍ਧਂ. ਅਪਾਯਨ੍ਤਿਆਦਿ ਸਬ੍ਬਂ ਨਿਰਯਵੇਵਚਨਂ. ਨਿਰਯੋ ਹਿ ਸਗ੍ਗਮੋਕ੍ਖਹੇਤੁਭੂਤਾ ਪੁਞ੍ਞਸਙ੍ਖਾਤਾ ਅਯਾ ਅਪੇਤਤ੍ਤਾ, ਸੁਖਾਨਂ ਵਾ ਆਯਸ੍ਸ ਆਗਮਨਸ੍ਸ ਅਭਾਵਾ ਅਪਾਯੋ. ਦੁਕ੍ਖਸ੍ਸ ਗਤਿ ਪਟਿਸਰਣਨ੍ਤਿ ਦੁਗ੍ਗਤਿ, ਦੋਸਬਹੁਲਤਾਯ ਵਾ ਦੁਟ੍ਠੇਨ ਕਮ੍ਮੁਨਾ ਨਿਬ੍ਬਤ੍ਤਾ ਗਤੀਤਿ ਦੁਗ੍ਗਤਿ. ਵਿਵਸਾ ਨਿਪਤਨ੍ਤਿ ਏਤ੍ਥ ਦੁਕ੍ਕਟਕਾਰਿਨੋਤਿ ਵਿਨਿਪਾਤੋ, ਵਿਨਸ੍ਸਨ੍ਤਾ ਵਾ ਏਤ੍ਥ ਨਿਪਤਨ੍ਤਿ ਸਂਭਿਜ੍ਜਮਾਨਙ੍ਗਪਚ੍ਚਙ੍ਗਾਤਿ ਵਿਨਿਪਾਤੋ. ਨਤ੍ਥਿ ਏਤ੍ਥ ਅਸ੍ਸਾਦਸਞ੍ਞਿਤੋ ਅਯੋਤਿ ਨਿਰਯੋ.
ਅਥ ਵਾ ਅਪਾਯਗ੍ਗਹਣੇਨ ਤਿਰਚ੍ਛਾਨਯੋਨਿਂ ਦੀਪੇਤਿ. ਤਿਰਚ੍ਛਾਨਯੋਨਿ ਹਿ ਅਪਾਯੋ ਸੁਗਤਿਤੋ ਅਪੇਤਤ੍ਤਾ, ਨ ਦੁਗ੍ਗਤਿ ਮਹੇਸਕ੍ਖਾਨਂ ਨਾਗਰਾਜਾਦੀਨਂ ਸਮ੍ਭਵਤੋ. ਦੁਗ੍ਗਤਿਗ੍ਗਹਣੇਨ ਪੇਤ੍ਤਿਵਿਸਯਂ ਦੀਪੇਤਿ. ਸੋ ਹਿ ਅਪਾਯੋ ਚੇਵ ਦੁਗ੍ਗਤਿ ਚ ਸੁਗਤਿਤੋ ਅਪੇਤਤ੍ਤਾ ਦੁਕ੍ਖਸ੍ਸ ਚ ਗਤਿਭੂਤਤ੍ਤਾ, ਨ ਤੁ ਵਿਨਿਪਾਤੋ ਅਸੁਰਸਦਿਸਂ ਅਵਿਨਿਪਤਿਤਤ੍ਤਾ. ਪੇਤਮਹਿਦ੍ਧਿਕਾਨਂ ਵਿਮਾਨਾਨਿਪਿ ਨਿਬ੍ਬਤ੍ਤਨ੍ਤਿ. ਵਿਨਿਪਾਤਗ੍ਗਹਣੇਨ ਅਸੁਰਕਾਯਂ ਦੀਪੇਤਿ. ਸੋ ਹਿ ਯਥਾਵੁਤ੍ਤੇਨਤ੍ਥੇਨ ਅਪਾਯੋ ਚੇਵ ਦੁਗ੍ਗਤਿ ਚ ਸਬ੍ਬਸਮ੍ਪਤ੍ਤਿਸਮੁਸ੍ਸਯੇਹਿ ਵਿਨਿਪਾਤਤ੍ਤਾ ਵਿਨਿਪਾਤੋਤਿ ਚ ਵੁਚ੍ਚਤਿ. ਨਿਰਯਗ੍ਗਹਣੇਨ ਪਨ ਅਵੀਚਿਆਦਿਕਂ ਅਨੇਕਪ੍ਪਕਾਰਂ ਨਿਰਯਮੇਵ ਦੀਪੇਤਿ. ਉਪਪਜ੍ਜਤੀਤਿ ਨਿਬ੍ਬਤ੍ਤਤਿ.
ਆਨਿਸਂਸਕਥਾ ਵੁਤ੍ਤਵਿਪਰਿਯਾਯੇਨ ਵੇਦਿਤਬ੍ਬਾ. ਅਯਂ ਪਨ ਵਿਸੇਸੋ – ਸੀਲਵਾਤਿ ਸਮਾਦਾਨਵਸੇਨ ਸੀਲਵਾ. ਸੀਲਸਮ੍ਪਨ੍ਨੋਤਿ ਪਰਿਸੁਦ੍ਧਂ ਪਰਿਪੁਣ੍ਣਞ੍ਚ ਕਤ੍ਵਾ ਸੀਲਸ੍ਸ ਸਮ੍ਪਾਦਨੇਨ ਸੀਲਸਮ੍ਪਨ੍ਨੋ. ਭੋਗਕ੍ਖਨ੍ਧਨ੍ਤਿ ਭੋਗਰਾਸਿਂ. ਸੁਗਤਿਂ ਸਗ੍ਗਂ ਲੋਕਨ੍ਤਿ ਏਤ੍ਥ ਸੁਗਤਿਗ੍ਗਹਣੇਨ ਮਨੁਸ੍ਸਗਤਿਪਿ ਸਙ੍ਗਯ੍ਹਤਿ, ਸਗ੍ਗਗ੍ਗਹਣੇਨ ਦੇਵਗਤਿ ਏਵ. ਤਤ੍ਥ ਸੁਨ੍ਦਰਾ ਗਤੀਤਿ ਸੁਗਤਿ, ਰੂਪਾਦੀਹਿ ਵਿਸਯੇਹਿ ਸੁਟ੍ਠੁ ਅਗ੍ਗੋਤਿ ਸਗ੍ਗੋ, ਸੋ ਸਬ੍ਬੋਪਿ ਲੁਜ੍ਜਨਪਲੁਜ੍ਜਨਟ੍ਠੇਨ ਲੋਕੋਤਿ.
ਪਾਟਲਿਗਾਮਿਕੇ ਉਪਾਸਕੇ ਬਹੁਦੇਵ ਰਤ੍ਤਿਂ ਧਮ੍ਮਿਯਾ ਕਥਾਯਾਤਿ ਅਞ੍ਞਾਯਪਿ ਪਾਲ਼ਿਮੁਤ੍ਤਾਯ ਧਮ੍ਮਕਥਾਯ ਚੇਵ ਆਵਸਥਾਨੁਮੋਦਨਕਥਾਯ ਚ. ਤਦਾ ਹਿ ਭਗਵਾ ਯਸ੍ਮਾ ਅਜਾਤਸਤ੍ਤੁਨਾ ਤਤ੍ਥ ਪਾਟਲਿਪੁਤ੍ਤਨਗਰਂ ਮਾਪੇਨ੍ਤੇਨ ਅਞ੍ਞਾਸੁ ਗਾਮਨਿਗਮਰਾਜਧਾਨੀਸੁ ਯੇ ਸੀਲਾਚਾਰਸਮ੍ਪਨ੍ਨਾ ਕੁਟੁਮ੍ਬਿਕਾ, ਤੇ ਆਨੇਤ੍ਵਾ ਧਨਧਞ੍ਞਾਨਿ ਘਰਵਤ੍ਥੁਖੇਤ੍ਤਵਤ੍ਥਾਦੀਨਿ ਚੇਵ ਪਰਿਹਾਰਞ੍ਚ ਦਾਪੇਤ੍ਵਾ ਨਿਵੇਸਿਯਨ੍ਤਿ, ਤਸ੍ਮਾ ਪਾਟਲਿਗਾਮਿਕਾ ਉਪਾਸਕਾ ਆਨਿਸਂਸਦਸ੍ਸਾਵਿਤਾਯ ਵਿਸੇਸਤੋ ਸੀਲਗਰੁਕਾਤਿ ਸਬ੍ਬਗੁਣਾਨਞ੍ਚ ਸੀਲਸ੍ਸ ਅਧਿਟ੍ਠਾਨਭਾਵਤੋ ਤੇਸਂ ਪਠਮਂ ਸੀਲਾਨਿਸਂਸੇ ਪਕਾਸੇਤ੍ਵਾ ਤਤੋ ਪਰਂ ਆਕਾਸਗਙ੍ਗਂ ਓਤਾਰੇਨ੍ਤੋ ਵਿਯ ਪਥਵੋਜਂ ਆਕਡ੍ਢਨ੍ਤੋ ਵਿਯ ਮਹਾਜਮ੍ਬੁਂ ਮਤ੍ਥਕੇ ਗਹੇਤ੍ਵਾ ਚਾਲੇਨ੍ਤੋ ਵਿਯ ਯੋਜਨਪ੍ਪਮਾਣਂ ਮਹਾਮਧੁਂ ਚਕ੍ਕਯਨ੍ਤੇਨ ਪੀਲ਼ੇਤ੍ਵਾ ਸੁਮਧੁਰਰਸਂ ਪਾਯਮਾਨੋ ਵਿਯ ਚ ਪਾਟਲਿਗਾਮਿਕਾਨਂ ਉਪਾਸਕਾਨਂ ਹਿਤਸੁਖਾਵਹਂ ਪਕਿਣ੍ਣਕਕਥਂ ਕਥੇਨ੍ਤੋਪਿ ‘‘ਆਵਾਸਦਾਨਂ ਨਾਮੇਤਂ ਗਹਪਤਯੋ ਮਹਨ੍ਤਂ ਪੁਞ੍ਞਂ, ਤੁਮ੍ਹਾਕਂ ਆਵਾਸੋ ਮਯਾ ਪਰਿਭੁਤ੍ਤੋ, ਭਿਕ੍ਖੁਸਙ੍ਘੇਨ ਪਰਿਭੁਤ੍ਤੋ, ਮਯਾ ਚ ਭਿਕ੍ਖੁਸਙ੍ਘੇਨ ਚ ਪਰਿਭੁਤ੍ਤੇ ਧਮ੍ਮਰਤਨੇਨਪਿ ਪਰਿਭੁਤ੍ਤੋਯੇਵ ਹੋਤਿ, ਏਵਂ ਤੀਹਿ ਰਤਨੇਹਿ ਪਰਿਭੁਤ੍ਤੇ ਅਪਰਿਮੇਯ੍ਯੋਵ ਵਿਪਾਕੋ, ਅਪਿਚ ਆਵਾਸਦਾਨਸ੍ਮਿਂ ਦਿਨ੍ਨੇ ਸਬ੍ਬਦਾਨਂ ਦਿਨ੍ਨਮੇਵ ਹੋਤਿ, ਭੂਮਟ੍ਠਕਪਣ੍ਣਸਾਲਾਯ ਵਾ ਸਾਖਾਮਣ੍ਡਪਸ੍ਸ ਵਾ ਸਙ੍ਘਂ ਉਦ੍ਦਿਸ੍ਸ ਕਤਸ੍ਸ ਆਨਿਸਂਸੋ ਪਰਿਚ੍ਛਿਨ੍ਦਿਤੁਂ ਨ ਸਕ੍ਕਾ. ਆਵਾਸਦਾਨਾਨੁਭਾਵੇਨ ਹਿ ਭਵੇ ਨਿਬ੍ਬਤ੍ਤਮਾਨਸ੍ਸਪਿ ਸਮ੍ਪੀਲ਼ਿਤਗਬ੍ਭਵਾਸੋ ਨਾਮ ਨ ਹੋਤਿ, ਦ੍ਵਾਦਸਹਤ੍ਥੋ ਓਵਰਕੋ ਵਿਯਸ੍ਸ ਮਾਤੁਕੁਚ੍ਛਿ ਅਸਮ੍ਬਾਧੋਵ ਹੋਤੀ’’ਤਿ ਏਵਂ ਨਾਨਾਨਯਵਿਚਿਤ੍ਤਂ ਬਹੁਂ ਧਮ੍ਮਕਥਂ ਕਥੇਤ੍ਵਾ –
‘‘ਸੀਤਂ ਉਣ੍ਹਂ ਪਟਿਹਨ੍ਤਿ, ਤਤੋ ਵਾਲ਼ਮਿਗਾਨਿ ਚ;
ਸਰੀਸਪੇ ਚ ਮਕਸੇ, ਸਿਸਿਰੇ ਚਾਪਿ ਵੁਟ੍ਠਿਯੋ.
‘‘ਤਤੋ ਵਾਤਾਤਪੋ ਘੋਰੋ, ਸਞ੍ਜਾਤੋ ਪਟਿਹਞ੍ਞਤਿ;
ਲੇਣਤ੍ਥਞ੍ਚ ਸੁਖਤ੍ਥਞ੍ਚ, ਝਾਯਿਤੁਞ੍ਚ ਵਿਪਸ੍ਸਿਤੁਂ.
‘‘ਵਿਹਾਰਦਾਨਂ ਸਙ੍ਘਸ੍ਸ, ਅਗ੍ਗਂ ਬੁਦ੍ਧੇਨ ਵਣ੍ਣਿਤਂ;
ਤਸ੍ਮਾ ਹਿ ਪਣ੍ਡਿਤੋ ਪੋਸੋ, ਸਮ੍ਪਸ੍ਸਂ ਅਤ੍ਥਮਤ੍ਤਨੋ.
‘‘ਵਿਹਾਰੇ ਕਾਰਯੇ ਰਮ੍ਮੇ, ਵਾਸਯੇਤ੍ਥ ਬਹੁਸ੍ਸੁਤੇ;
ਤੇਸਂ ਅਨ੍ਨਞ੍ਚ ਪਾਨਞ੍ਚ, ਵਤ੍ਥਸੇਨਾਸਨਾਨਿ ਚ.
‘‘ਦਦੇਯ੍ਯ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ;
ਤੇ ਤਸ੍ਸ ਧਮ੍ਮਂ ਦੇਸੇਨ੍ਤਿ, ਸਬ੍ਬਦੁਕ੍ਖਾਪਨੂਦਨਂ;
ਯਂ ਸੋ ਧਮ੍ਮਂ ਇਧਞ੍ਞਾਯ, ਪਰਿਨਿਬ੍ਬਾਤਿ ਅਨਾਸਵੋ’’ਤਿ. (ਚੂਲ਼ਵ. ੨੯੫, ੩੧੫) –
ਏਵਂ ਅਯਮ੍ਪਿ ਆਵਾਸਦਾਨੇ ਆਨਿਸਂਸੋ ਅਯਮ੍ਪਿ ਆਵਾਸਦਾਨੇ ਆਨਿਸਂਸੋਤਿ ਬਹੁਦੇਵ ਰਤ੍ਤਿਂ ਅਤਿਰੇਕਦਿਯਡ੍ਢਯਾਮਂ ਆਵਾਸਦਾਨਾਨਿਸਂਸਂ ਕਥੇਸਿ. ਤਤ੍ਥ ਇਮਾ ਗਾਥਾਵ ਸਙ੍ਗਹਂ ਆਰੁਲ਼੍ਹਾ, ਪਕਿਣ੍ਣਕਧਮ੍ਮਦੇਸਨਾ ਪਨ ਸਙ੍ਗਹਂ ਨ ਆਰੋਹਤਿ. ਸਨ੍ਦਸ੍ਸੇਤ੍ਵਾਤਿਆਦੀਨਿ ਵੁਤ੍ਤਤ੍ਥਾਨੇਵ.
ਅਭਿਕ੍ਕਨ੍ਤਾਤਿ ਅਤਿਕ੍ਕਨ੍ਤਾ ਦ੍ਵੇ ਯਾਮਾ ਗਤਾ. ਯਸ੍ਸਦਾਨਿ ਤੁਮ੍ਹੇ ਕਾਲਂ ਮਞ੍ਞਥਾਤਿ ਯਸ੍ਸ ਗਮਨਸ੍ਸ ਤੁਮ੍ਹੇ ਕਾਲਂ ਮਞ੍ਞਥ, ਗਮਨਕਾਲੋ ਤੁਮ੍ਹਾਕਂ, ਗਚ੍ਛਥਾਤਿ ਵੁਤ੍ਤਂ ਹੋਤਿ. ਕਸ੍ਮਾ ਪਨ ਭਗਵਾ ਤੇ ਉਯ੍ਯੋਜੇਸੀਤਿ? ਅਨੁਕਮ੍ਪਾਯ. ਤਿਯਾਮਰਤ੍ਤਿਞ੍ਹਿ ਨਿਸੀਦਿਤ੍ਵਾ ਵੀਤਿਨਾਮੇਨ੍ਤਾਨਂ ਤੇਸਂ ਸਰੀਰੇ ਆਬਾਧੋ ਉਪ੍ਪਜ੍ਜੇਯ੍ਯ, ਭਿਕ੍ਖੁਸਙ੍ਘੋਪਿ ਚ ਮਹਾ, ਤਸ੍ਸ ਸਯਨਨਿਸਜ੍ਜਾਨਂ ਓਕਾਸਂ ਲਦ੍ਧੁਂ ਵਟ੍ਟਤਿ, ਇਤਿ ਉਭਯਾਨੁਕਮ੍ਪਾਯ ਉਯ੍ਯੋਜੇਸਿ.
ਸੁਞ੍ਞਾਗਾਰਨ੍ਤਿ ਪਾਟਿਯੇਕ੍ਕਂ ਸੁਞ੍ਞਾਗਾਰਂ ਨਾਮ ਤਤ੍ਥ ਨਤ੍ਥਿ. ਤੇ ਕਿਰ ਗਹਪਤਯੋ ਤਸ੍ਸੇਵ ਆਵਸਥਾਗਾਰਸ੍ਸ ਏਕਪਸ੍ਸੇ ਪਟਸਾਣਿਂ ਪਰਿਕ੍ਖਿਪਾਪੇਤ੍ਵਾ ਕਪ੍ਪਿਯਮਞ੍ਚਂ ਪਞ੍ਞਪੇਤ੍ਵਾ ਤਤ੍ਥ ਕਪ੍ਪਿਯਪਚ੍ਚਤ੍ਥਰਣਾਨਿ ਅਤ੍ਥਰਿਤ੍ਵਾ ਉਪਰਿ ਸੁਵਣ੍ਣਰਜਤਤਾਰਕਗਨ੍ਧਮਾਲਾਦਿਦਾਮਪਟਿਮਣ੍ਡਿਤਂ ਵਿਤਾਨਂ ਬਨ੍ਧਿਤ੍ਵਾ ਗਨ੍ਧਤੇਲਪਦੀਪਂ ਆਰੋਪਯਿਂਸੁ ‘‘ਅਪ੍ਪੇਵ ਨਾਮ ਸਤ੍ਥਾ ਧਮ੍ਮਾਸਨਤੋ ਵੁਟ੍ਠਾਯ ਥੋਕਂ ਵਿਸ੍ਸਮੇਤੁਕਾਮੋ ਇਧ ਨਿਪਜ੍ਜੇਯ੍ਯ, ਏਵਂ ਨੋ ਇਦਂ ਆਵਸਥਾਗਾਰਂ ਭਗਵਤਾ ਚਤੂਹਿ ਇਰਿਯਾਪਥੇਹਿ ਪਰਿਭੁਤ੍ਤਂ ਦੀਘਰਤ੍ਤਂ ਹਿਤਾਯ ਸੁਖਾਯ ਭਵਿਸ੍ਸਤੀ’’ਤਿ. ਸਤ੍ਥਾਪਿ ਤਦੇਵ ਸਨ੍ਧਾਯ ਤਤ੍ਥ ਸਙ੍ਘਾਟਿਂ ਪਞ੍ਞਪੇਤ੍ਵਾ ਸੀਹਸੇਯ੍ਯਂ ਕਪ੍ਪੇਸਿ. ਤਂ ਸਨ੍ਧਾਯ ਵੁਤ੍ਤਂ ‘‘ਸੁਞ੍ਞਾਗਾਰਂ ਪਾਵਿਸੀ’’ਤਿ. ਤਤ੍ਥ ਪਾਦਧੋਵਨਟ੍ਠਾਨਤੋ ਪਟ੍ਠਾਯ ਯਾਵ ਧਮ੍ਮਾਸਨਾ ਅਗਮਾਸਿ, ਏਤ੍ਤਕੇ ਠਾਨੇ ਗਮਨਂ ਨਿਪ੍ਫਨ੍ਨਂ. ਧਮ੍ਮਾਸਨਂ ਪਤ੍ਵਾ ਥੋਕਂ ਅਟ੍ਠਾਸਿ, ਇਦਂ ਤਤ੍ਥ ਠਾਨਂ. ਦ੍ਵੇ ਯਾਮੇ ਧਮ੍ਮਾਸਨੇ ਨਿਸੀਦਿ, ਏਤ੍ਤਕੇ ਠਾਨੇ ਨਿਸਜ੍ਜਾ ਨਿਪ੍ਫਨ੍ਨਾ. ਉਪਾਸਕੇ ਉਯ੍ਯੋਜੇਤ੍ਵਾ ਧਮ੍ਮਾਸਨਤੋ ਓਰੁਯ੍ਹ ਯਥਾਵੁਤ੍ਤੇ ਠਾਨੇ ਸੀਹਸੇਯ੍ਯਂ ਕਪ੍ਪੇਸਿ. ਏਤਂ ਠਾਨਂ ਭਗਵਤਾ ਚਤੂਹਿ ਇਰਿਯਾਪਥੇਹਿ ਪਰਿਭੁਤ੍ਤਂ ਅਹੋਸੀਤਿ.
ਪਾਟਲਿਗਾਮਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.
ਸੁਨਿਧਵਸ੍ਸਕਾਰਵਤ੍ਥੁਕਥਾਵਣ੍ਣਨਾ
੨੮੬. ਸੁਨਿਧਵਸ੍ਸਕਾਰਾਤਿ (ਦੀ. ਨਿ. ੨.੧੫੩; ਉਦਾ. ਅਟ੍ਠ. ੭੬) ਸੁਨਿਧੋ ਚ ਵਸ੍ਸਕਾਰੋ ਚ ਦ੍ਵੇ ਬ੍ਰਾਹ੍ਮਣਾ. ਮਗਧਮਹਾਮਤ੍ਤਾਤਿ ਮਗਧਰਞ੍ਞੋ ਮਹਾਅਮਚ੍ਚਾ, ਮਗਧਰਟ੍ਠੇ ਵਾ ਮਹਾਮਤ੍ਤਾ, ਮਹਤਿਯਾ ਇਸ੍ਸਰਿਯਮਤ੍ਤਾਯ ਸਮਨ੍ਨਾਗਤਾਤਿ ਮਗਧਮਹਾਮਤ੍ਤਾ. ਪਾਟਲਿਗਾਮੇ ਨਗਰਂ ਮਾਪੇਨ੍ਤੀਤਿ ਪਾਟਲਿਗਾਮਨ੍ਤਸਙ੍ਖਾਤੇ ਭੂਮਿਪ੍ਪਦੇਸੇ ਨਗਰਂ ਮਾਪੇਨ੍ਤਿ, ਪੁਬ੍ਬੇ ‘‘ਪਾਟਲਿਗਾਮੋ’’ਤਿ ਲਦ੍ਧਨਾਮਂ ਠਾਨਂ ਇਦਾਨਿ ਨਗਰਂ ਕਤ੍ਵਾ ਮਾਪੇਨ੍ਤੀਤਿ ਅਤ੍ਥੋ. ਵਜ੍ਜੀਨਂ ਪਟਿਬਾਹਾਯਾਤਿ ਲਿਚ੍ਛਵਿਰਾਜੂਨਂ ਆਯਮੁਖਪਚ੍ਛਿਨ੍ਦਨਤ੍ਥਂ. ਵਤ੍ਥੂਨੀਤਿ ਘਰਵਤ੍ਥੂਨਿ ਘਰਪਤਿਟ੍ਠਾਪਨਟ੍ਠਾਨਾਨਿ. ਚਿਤ੍ਤਾਨਿ ਨਮਨ੍ਤਿ ਨਿਵੇਸਨਾਨਿ ਮਾਪੇਤੁਨ੍ਤਿ ਰਞ੍ਞੋ ਰਾਜਮਹਾਮਤ੍ਤਾਨਞ੍ਚ ਨਿਵੇਸਨਾਨਿ ਮਾਪੇਤੁਂ ਵਤ੍ਥੁਵਿਜ੍ਜਾਪਾਠਕਾਨਂ ਚਿਤ੍ਤਾਨਿ ਨਮਨ੍ਤਿ. ਤੇ ਕਿਰ ਅਤ੍ਤਨੋ ਸਿਪ੍ਪਾਨੁਭਾਵੇਨ ਹੇਟ੍ਠਾਪਥਵਿਯਂ ਤਿਂਸਹਤ੍ਥਮਤ੍ਤੇ ਠਾਨੇ ‘‘ਇਧ ਨਾਗਾਨਂ ਨਿਵਾਸਪਰਿਗ੍ਗਹੋ, ਇਧ ਯਕ੍ਖਾਨਂ, ਇਧ ਭੂਤਾਨਂ ਨਿਵਾਸਪਰਿਗ੍ਗਹੋ, ਇਧ ਪਾਸਾਣੋ ਵਾ ਖਾਣੁਕੋ ਵਾ ਅਤ੍ਥੀ’’ਤਿ ਜਾਨਨ੍ਤਿ, ਤੇ ਤਦਾ ਸਿਪ੍ਪਂ ਜਪ੍ਪਿਤ੍ਵਾ ਤਾਦਿਸਂ ਸਾਰਮ੍ਭਟ੍ਠਾਨਂ ਪਰਿਹਰਿਤ੍ਵਾ ਅਨਾਰਮ੍ਭੇ ਠਾਨੇ ਤਾਹਿ ਵਤ੍ਥੁਪਰਿਗ੍ਗਾਹਿਕਾਹਿ ਦੇਵਤਾਹਿ ਸਦ੍ਧਿਂ ਮਨ੍ਤਯਮਾਨਾ ਵਿਯ ਤਂਤਂਗੇਹਾਨਿ ਮਾਪੇਨ੍ਤਿ.
ਅਥ ਵਾ ਨੇਸਂ ਸਰੀਰੇ ਦੇਵਤਾ ਅਧਿਮੁਚ੍ਚਿਤ੍ਵਾ ਤਤ੍ਥ ਤਤ੍ਥ ਨਿਵੇਸਨਾਨਿ ਮਾਪੇਤੁਂ ਚਿਤ੍ਤਂ ਨਾਮੇਨ੍ਤਿ. ਤਾ ਚਤੂਸੁ ਕੋਣੇਸੁ ਖਾਣੁਕੇ ਕੋਟ੍ਟੇਤ੍ਵਾ ਵਤ੍ਥੁਮ੍ਹਿ ਗਹਿਤਮਤ੍ਤੇ ਪਟਿਵਿਗਚ੍ਛਨ੍ਤਿ. ਸਦ੍ਧਾਨਂ ਕੁਲਾਨਂ ਸਦ੍ਧਾ ਦੇਵਤਾ ਤਥਾ ਕਰੋਨ੍ਤਿ, ਅਸ੍ਸਦ੍ਧਾਨਂ ਕੁਲਾਨਂ ਅਸ੍ਸਦ੍ਧਾ ਦੇਵਤਾ ਚ. ਕਿਂ ਕਾਰਣਾ? ਸਦ੍ਧਾਨਞ੍ਹਿ ਏਵਂ ਹੋਤਿ ‘‘ਇਧ ਮਨੁਸ੍ਸਾ ਨਿਵੇਸਨਂ ਮਾਪੇਨ੍ਤਾ ਪਠਮਂ ਭਿਕ੍ਖੁਸਙ੍ਘਂ ਨਿਸੀਦਾਪੇਤ੍ਵਾ ਮਙ੍ਗਲਂ ਵਦਾਪੇਸ੍ਸਨ੍ਤਿ, ਅਥ ਮਯਂ ਸੀਲਵਨ੍ਤਾਨਂ ਦਸ੍ਸਨਂ ਧਮ੍ਮਕਥਂ ਪਞ੍ਹਵਿਸ੍ਸਜ੍ਜਨਂ ਅਨੁਮੋਦਨਞ੍ਚ ਸੋਤੁਂ ਲਭਿਸ੍ਸਾਮ, ਮਨੁਸ੍ਸਾਦਾਨਂ ਦਤ੍ਵਾ ਅਮ੍ਹਾਕਂ ਪਤ੍ਤਿਂ ਦਸ੍ਸਨ੍ਤੀ’’ਤਿ. ਅਸ੍ਸਦ੍ਧਾ ਦੇਵਤਾਪਿ ‘‘ਅਤ੍ਤਨੋ ਇਚ੍ਛਾਨੁਰੂਪਂ ਤੇਸਂ ਪਟਿਪਤ੍ਤਿਂ ਪਸ੍ਸਿਤੁਂ ਕਥਞ੍ਚ ਸੋਤੁਂ ਲਭਿਸ੍ਸਾਮਾ’’ਤਿ ਤਥਾ ਕਰੋਨ੍ਤਿ.
ਤਾਵਤਿਂਸੇਹੀਤਿ ਯਥਾ ਹਿ ਏਕਸ੍ਮਿਂ ਕੁਲੇ ਏਕਂ ਪਣ੍ਡਿਤਂ ਮਨੁਸ੍ਸਂ, ਏਕਸ੍ਮਿਞ੍ਚ ਵਿਹਾਰੇ ਏਕਂ ਬਹੁਸ੍ਸੁਤਂ ਭਿਕ੍ਖੁਂ ਉਪਾਦਾਯ ‘‘ਅਸੁਕਕੁਲੇ ਮਨੁਸ੍ਸਾ ਪਣ੍ਡਿਤਾ, ਅਸੁਕਵਿਹਾਰੇ ਭਿਕ੍ਖੂ ਬਹੁਸ੍ਸੁਤਾ’’ਤਿ ਸਦ੍ਦੋ ਅਬ੍ਭੁਗ੍ਗਚ੍ਛਤਿ, ਏਵਮੇਵਂ ਸਕ੍ਕਂ ਦੇਵਰਾਜਾਨਂ ਵਿਸ੍ਸਕਮ੍ਮਞ੍ਚ ਦੇਵਪੁਤ੍ਤਂ ਉਪਾਦਾਯ ‘‘ਤਾਵਤਿਂਸਾ ਪਣ੍ਡਿਤਾ’’ਤਿ ਸਦ੍ਦੋ ਅਬ੍ਭੁਗ੍ਗਤੋ. ਤੇਨਾਹ ‘‘ਤਾਵਤਿਂਸੇਹੀ’’ਤਿ. ਸੇਯ੍ਯਥਾਪੀਤਿਆਦਿਨਾ ਦੇਵੇਹਿ ਤਾਵਤਿਂਸੇਹਿ ਸਦ੍ਧਿਂ ਮਨ੍ਤੇਤ੍ਵਾ ਵਿਯ ਸੁਨਿਧਵਸ੍ਸਕਾਰਾ ਨਗਰਂ ਮਾਪੇਨ੍ਤੀਤਿ ਦਸ੍ਸੇਤਿ.
ਯਾਵਤਾ ਅਰਿਯਂ ਆਯਤਨਨ੍ਤਿ ਯਤ੍ਤਕਂ ਅਰਿਯਮਨੁਸ੍ਸਾਨਂ ਓਸਰਣਟ੍ਠਾਨਂ ਨਾਮ ਅਤ੍ਥਿ. ਯਾਵਤਾ ਵਣਿਪ੍ਪਥੋਤਿ ਯਤ੍ਤਕਂ ਵਾਣਿਜਾਨਂ ਆਹਟਭਣ੍ਡਸ੍ਸ ਰਾਸਿਵਸੇਨੇਵ ਕਯਵਿਕ੍ਕਯਟ੍ਠਾਨਂ ਨਾਮ, ਵਾਣਿਜਾਨਂ ਵਸਨਟ੍ਠਾਨਂ ਵਾ ਅਤ੍ਥਿ. ਇਦਂ ਅਗ੍ਗਨਗਰਨ੍ਤਿ ਤੇਸਂ ਅਰਿਯਾਯਤਨਵਣਿਪ੍ਪਥਾਨਂ ਇਦਂ ਨਗਰਂ ਅਗ੍ਗਂ ਭਵਿਸ੍ਸਤਿ ਜੇਟ੍ਠਕਂ ਪਾਮੋਕ੍ਖਂ. ਪੁਟਭੇਦਨਨ੍ਤਿ ਭਣ੍ਡਪੁਟਭੇਦਨਟ੍ਠਾਨਂ, ਭਣ੍ਡਗਨ੍ਥਿਕਾਨਂ ਮੋਚਨਟ੍ਠਾਨਨ੍ਤਿ ਵੁਤ੍ਤਂ ਹੋਤਿ. ਸਕਲਜਮ੍ਬੁਦੀਪੇ ਅਲਦ੍ਧਭਣ੍ਡਮ੍ਪਿ ਹਿ ਇਧੇਵ ਲਭਿਸ੍ਸਤਿ, ਅਞ੍ਞਤ੍ਥ ਵਿਕ੍ਕਯਂ ਅਗਚ੍ਛਨ੍ਤਮ੍ਪਿ ਇਧ ਵਿਕ੍ਕਯਂ ਗਚ੍ਛਿਸ੍ਸਤਿ, ਤਸ੍ਮਾ ਇਧੇਵ ਪੁਟਂ ਭਿਨ੍ਦਿਸ੍ਸਤੀਤਿ ਅਤ੍ਥੋ. ਆਯਨ੍ਤਿ ਯਾਨਿ ਚਤੂਸੁ ਦ੍ਵਾਰੇਸੁ ਚਤ੍ਤਾਰਿ, ਸਭਾਯਂ ਏਕਨ੍ਤਿ ਏਵਂ ਦਿਵਸੇ ਦਿਵਸੇ ਪਞ੍ਚਸਤਸਹਸ੍ਸਾਨਿ ਤਤ੍ਥ ਉਟ੍ਠਹਿਸ੍ਸਨ੍ਤਿ, ਤਾਨਿਸ੍ਸ ਭਾਵੀਨਿ ਆਯਾਨਿ ਦਸ੍ਸੇਤਿ. ਅਗ੍ਗਿਤੋ ਵਾਤਿਆਦੀਸੁ ਚ-ਕਾਰਤ੍ਥੋ ਵਾ-ਸਦ੍ਦੋ, ਅਗ੍ਗਿਨਾ ਚ ਉਦਕੇਨ ਚ ਮਿਥੁਭੇਦੇਨ ਚ ਨਸ੍ਸਿਸ੍ਸਤੀਤਿ ਅਤ੍ਥੋ. ਤਸ੍ਸ ਹਿ ਏਕੋ ਕੋਟ੍ਠਾਸੋ ਅਗ੍ਗਿਨਾ ਨਸ੍ਸਿਸ੍ਸਤਿ, ਨਿਬ੍ਬਾਪੇਤੁਮ੍ਪਿ ਨਂ ਨ ਸਕ੍ਖਿਸ੍ਸਤਿ, ਏਕਂ ਕੋਟ੍ਠਾਸਂ ਗਙ੍ਗਾ ਗਹੇਤ੍ਵਾ ਗਮਿਸ੍ਸਤਿ, ਏਕੋ ਇਮਿਨਾ ਅਕਥਿਤਂ ਅਮੁਸ੍ਸ, ਅਮੁਨਾ ਅਕਥਿਤਂ ਇਮਸ੍ਸ ਵਦਨ੍ਤਾਨਂ ਪਿਸੁਣਵਾਚਾਨਂ ਵਸੇਨ ਭਿਨ੍ਨਾਨਂ ਮਨੁਸ੍ਸਾਨਂ ਅਞ੍ਞਮਞ੍ਞਭੇਦੇਨ ਵਿਨਸ੍ਸਿਸ੍ਸਤਿ.
ਏਵਂ ਵਤ੍ਵਾ ਭਗਵਾ ਪਚ੍ਚੂਸਕਾਲੇ ਗਙ੍ਗਾਤੀਰਂ ਗਨ੍ਤ੍ਵਾ ਕਤਮੁਖਧੋਵਨੋ ਭਿਕ੍ਖਾਚਾਰਕਾਲਂ ਆਗਮਯਮਾਨੋ ਨਿਸੀਦਿ. ਸੁਨਿਧਵਸ੍ਸਕਾਰਾਪਿ ‘‘ਅਮ੍ਹਾਕਂ ਰਾਜਾ ਸਮਣਸ੍ਸ ਗੋਤਮਸ੍ਸ ਉਪਟ੍ਠਾਕੋ, ਸੋ ਅਮ੍ਹੇ ਉਪਗਤੇ ਪੁਚ੍ਛਿਸ੍ਸਤਿ ‘ਸਤ੍ਥਾ ਕਿਰ ਪਾਟਲਿਗਾਮਂ ਅਗਮਾਸਿ, ਕਿਂ ਤਸ੍ਸ ਸਨ੍ਤਿਕਂ ਉਪਸਙ੍ਕਮਿਤ੍ਥ, ਨ ਉਪਸਙ੍ਕਮਿਤ੍ਥਾ’ਤਿ, ‘ਉਪਸਙ੍ਕਮਿਮ੍ਹਾ’ਤਿ ਚ ਵੁਤ੍ਤੇ ‘ਨਿਮਨ੍ਤਯਿਤ੍ਥ, ਨ ਨਿਮਨ੍ਤਯਿਤ੍ਥਾ’ਤਿ ਪੁਚ੍ਛਿਸ੍ਸਤਿ, ‘ਨ ਨਿਮਨ੍ਤਯਿਮ੍ਹਾ’ਤਿ ਚ ਵੁਤ੍ਤੇ ਅਮ੍ਹਾਕਂ ਦੋਸਂ ਆਰੋਪੇਤ੍ਵਾ ਨਿਗ੍ਗਣ੍ਹਿਸ੍ਸਤਿ, ਇਦਞ੍ਚਾਪਿ ਮਯਂ ਅਕਤਟ੍ਠਾਨੇ ਨਗਰਂ ਮਾਪੇਮ, ਸਮਣਸ੍ਸ ਖੋ ਪਨ ਗੋਤਮਸ੍ਸ ਗਤਗਤਟ੍ਠਾਨੇ ਕਾਲ਼ਕਣ੍ਣਿਸਤ੍ਤਾ ਪਟਿਕ੍ਕਮਨ੍ਤਿ, ਤਂ ਮਯਂ ਨਗਰਮਙ੍ਗਲਂ ਵਾਚਾਪੇਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਨਿਮਨ੍ਤਯਿਂਸੁ. ਤੇਨ ਵੁਤ੍ਤਂ ‘‘ਅਥ ਖੋ ਸੁਨਿਧਵਸ੍ਸਕਾਰਾ’’ਤਿਆਦਿ. ਪੁਬ੍ਬਣ੍ਹਸਮਯਨ੍ਤਿ ਪੁਬ੍ਬਣ੍ਹਕਾਲੇ. ਨਿਵਾਸੇਤ੍ਵਾਤਿ ਗਾਮਪ੍ਪਵੇਸਨਨੀਹਾਰੇਨ ਨਿਵਾਸਨਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ. ਪਤ੍ਤਚੀਵਰਮਾਦਾਯਾਤਿ ਪਤ੍ਤਞ੍ਚ ਚੀਵਰਞ੍ਚ ਆਦਿਯਿਤ੍ਵਾ ਕਾਯਪਟਿਬਦ੍ਧਂ ਕਤ੍ਵਾ, ਚੀਵਰਂ ਪਾਰੁਪਿਤ੍ਵਾ ਪਤ੍ਤਂ ਹਤ੍ਥੇਨ ਗਹੇਤ੍ਵਾਤਿ ਅਤ੍ਥੋ.
ਸੀਲਵਨ੍ਤੇਤ੍ਥਾਤਿ ਸੀਲਵਨ੍ਤੇ ਏਤ੍ਥ ਅਤ੍ਤਨੋ ਵਸਨਟ੍ਠਾਨੇ. ਸਞ੍ਞਤੇਤਿ ਕਾਯਵਾਚਾਚਿਤ੍ਤੇਹਿ ਸਞ੍ਞਤੇ. ਤਾਸਂ ਦਕ੍ਖਿਣਮਾਦਿਸੇਤਿ ਸਙ੍ਘਸ੍ਸ ਦਿਨ੍ਨੇ ਚਤ੍ਤਾਰੋ ਪਚ੍ਚਯੇ ਤਾਸਂ ਘਰਦੇਵਤਾਨਂ ਆਦਿਸੇਯ੍ਯਪਤ੍ਤਿਂ ਦਦੇਯ੍ਯ. ਪੂਜਿਤਾ ਪੂਜਯਨ੍ਤੀਤਿ ‘‘ਇਮੇ ਮਨੁਸ੍ਸਾ ਅਮ੍ਹਾਕਂ ਞਾਤਕਾਪਿ ਨ ਹੋਨ੍ਤਿ, ਤਥਾਪਿ ਨੋ ਪਤ੍ਤਿਂ ਦੇਨ੍ਤੀਤਿ ਆਰਕ੍ਖਂ ਸੁਸਂਵਿਹਿਤਂ ਕਰੋਥਾ’’ਤਿ ਸੁਟ੍ਠੁ ਆਰਕ੍ਖਂ ਕਰੋਨ੍ਤਿ. ਮਾਨਿਤਾ ਮਾਨਯਨ੍ਤੀਤਿ ਕਾਲਾਨੁਕਾਲਂ ਬਲਿਕਮ੍ਮਕਰਣੇਨ ਮਾਨਿਤਾ ‘‘ਏਤੇ ਮਨੁਸ੍ਸਾ ਅਮ੍ਹਾਕਂ ਞਾਤਕਾਪਿ ਨ ਹੋਨ੍ਤਿ, ਤਥਾਪਿ ਚਤੁਮਾਸਛਮਾਸਨ੍ਤਰੇ ਨੋ ਬਲਿਕਮ੍ਮਂ ਕਰੋਨ੍ਤੀ’’ਤਿ ਮਾਨੇਨ੍ਤਿ ਉਪ੍ਪਨ੍ਨਪਰਿਸ੍ਸਯਂ ਹਰਨ੍ਤਿ. ਤਤੋ ਨਨ੍ਤਿ ਤਤੋ ਨਂ ਪਣ੍ਡਿਤਜਾਤਿਕਂ ਮਨੁਸ੍ਸਂ. ਓਰਸਨ੍ਤਿ ਉਰੇ ਠਪੇਤ੍ਵਾ ਸਂਵਡ੍ਢਿਤਂ, ਯਥਾ ਮਾਤਾ ਓਰਸਂ ਪੁਤ੍ਤਂ ਅਨੁਕਮ੍ਪਤਿ, ਉਪ੍ਪਨ੍ਨਪਰਿਸ੍ਸਯਹਰਣਤ੍ਥਮੇਵਸ੍ਸ ਵਾਯਮਤਿ, ਏਵਂ ਅਨੁਕਮ੍ਪਨ੍ਤੀਤਿ ਅਤ੍ਥੋ. ਭਦ੍ਰਾਨਿ ਪਸ੍ਸਤੀਤਿ ਸੁਨ੍ਦਰਾਨਿ ਪਸ੍ਸਤਿ.
ਅਨੁਮੋਦਿਤ੍ਵਾਤਿ ਤੇਹਿ ਤਦਾ ਪਸੁਤਪੁਞ੍ਞਸ੍ਸ ਅਨੁਮੋਦਨਵਸੇਨ ਤੇਸਂ ਧਮ੍ਮਕਥਂ ਕਤ੍ਵਾ. ਸੁਨਿਧਵਸ੍ਸਕਾਰਾਪਿ ‘‘ਯਾ ਤਤ੍ਥ ਦੇਵਤਾ ਆਸੁਂ, ਤਾਸਂ ਦਕ੍ਖਿਣਮਾਦਿਸੇ’’ਤਿ ਭਗਵਤੋ ਵਚਨਂ ਸੁਤ੍ਵਾ ਦੇਵਤਾਨਂ ਪਤ੍ਤਿਂ ਅਦਂਸੁ. ਤਂ ਗੋਤਮਦ੍ਵਾਰਂ ਨਾਮ ਅਹੋਸੀਤਿ ਤਸ੍ਸ ਨਗਰਸ੍ਸ ਯੇਨ ਦ੍ਵਾਰੇਨ ਭਗਵਾ ਨਿਕ੍ਖਮਿ, ਤਂ ਗੋਤਮਦ੍ਵਾਰਂ ਨਾਮ ਅਹੋਸਿ. ਗਙ੍ਗਾਯ ਪਨ ਉਤ੍ਤਰਣਤ੍ਥਂ ਅਨੋਤਿਣ੍ਣਤ੍ਤਾ ਗੋਤਮਤਿਤ੍ਥਂ ਨਾਮ ਨਾਹੋਸਿ. ਪੂਰਾਤਿ ਪੁਣ੍ਣਾ. ਸਮਤਿਤ੍ਤਿਕਾਤਿ ਤੀਰਸਮਂ ਉਦਕਸ੍ਸ ਤਿਤ੍ਤਾ ਭਰਿਤਾ. ਕਾਕਪੇਯ੍ਯਾਤਿ ਤੀਰੇ ਠਿਤਕਾਕੇਹਿ ਪਾਤੁਂ ਸਕ੍ਕੁਣੇਯ੍ਯਉਦਕਾ. ਤੀਹਿਪਿ ਪਦੇਹਿ ਉਭਤੋਕੂਲਸਮਂ ਪਰਿਪੁਣ੍ਣਭਾਵਮੇਵ ਵਦਤਿ. ਉਲ਼ੁਮ੍ਪਨ੍ਤਿ ਪਾਰਗਮਨਤ੍ਥਾਯ ਲਹੁਕੇ ਦਾਰੁਦਣ੍ਡੇ ਗਹੇਤ੍ਵਾ ਕਵਾਟਫਲਕੇ ਵਿਯ ਅਞ੍ਞਮਞ੍ਞਸਮ੍ਬਨ੍ਧੇ ਕਾਤੁਂ ਆਣਿਯੋ ਕੋਟ੍ਟੇਤ੍ਵਾ ਨਾਵਾਸਙ੍ਖੇਪੇਨ ਕਤਂ. ਕੁਲ੍ਲਨ੍ਤਿ ਵੇਲ਼ੁਨਲ਼ਾਦਿਕੇ ਸਙ੍ਘਰਿਤ੍ਵਾ ਵਲ੍ਲਿਆਦੀਹਿ ਕਲਾਪਵਸੇਨ ਬਨ੍ਧਿਤ੍ਵਾ ਕਤਂ.
ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਮਹਾਜਨਸ੍ਸ ਗਙ੍ਗੁਦਕਮਤ੍ਤਸ੍ਸਪਿ ਕੇਵਲਂ ਤਰਿਤੁਂ ਅਸਮਤ੍ਥਤਂ, ਅਤ੍ਤਨੋ ਪਨ ਭਿਕ੍ਖੁਸਙ੍ਘਸ੍ਸ ਚ ਅਤਿਗਮ੍ਭੀਰਵਿਤ੍ਥਤਂ ਸਂਸਾਰਮਹਣ੍ਣਵਂ ਤਰਿਤ੍ਵਾ ਠਿਤਭਾਵਞ੍ਚ ਸਬ੍ਬਾਕਾਰਤੋ ਵਿਦਿਤ੍ਵਾ ਤਦਤ੍ਥਪਰਿਦੀਪਨਂ ਇਮਂ ਉਦਾਨਂ ਉਦਾਨੇਸਿ. ਉਦਾਨਗਾਥਾਯ ਅਤ੍ਥੋ ਪਨ ਅਟ੍ਠਕਥਾਯਂ ਦਸ੍ਸਿਤੋਯੇਵ. ਤਤ੍ਥ ਉਦਕਟ੍ਠਾਨਸ੍ਸੇਤਂ ਅਧਿਵਚਨਨ੍ਤਿ ਯਥਾਵੁਤ੍ਤਸ੍ਸ ਯਸ੍ਸ ਕਸ੍ਸਚਿ ਉਦਕਟ੍ਠਾਨਸ੍ਸ ਏਤਂ ਅਣ੍ਣਵਨ੍ਤਿ ਅਧਿਵਚਨਂ, ਨ ਸਮੁਦ੍ਦਸ੍ਸੇਵਾਤਿ ਅਧਿਪ੍ਪਾਯੋ. ਸਰਨ੍ਤਿ ਇਧ ਨਦੀ ਅਧਿਪ੍ਪੇਤਾ ਸਰਤਿ ਸਨ੍ਦਤੀਤਿ ਕਤ੍ਵਾ. ਗਮ੍ਭੀਰਂ ਵਿਤ੍ਥਤਨ੍ਤਿ ਅਗਾਧਟ੍ਠੇਨ ਗਮ੍ਭੀਰਂ, ਸਕਲਲੋਕਤ੍ਤਯਬ੍ਯਾਪਿਤਾਯ ਵਿਤ੍ਥਤਂ. ਵਿਸਜ੍ਜਾਤਿ ਅਨਾਸਜ੍ਜ ਅਪ੍ਪਤ੍ਵਾ ਏਵ ਪਲ੍ਲਲਾਨਿ ਤੇਸਂ ਅਤਰਣਤੋ. ਕੁਲ੍ਲਞ੍ਹਿ ਜਨੋ ਬਨ੍ਧਤੀਤਿ ਕੁਲ੍ਲਂ ਬਨ੍ਧਿਤੁਂ ਆਯਾਸਂ ਆਪਜ੍ਜਤਿ. ਵਿਨਾ ਏਵ ਕੁਲ੍ਲੇਨਾਤਿ ਈਦਿਸਂ ਉਦਕਂ ਕੁਲ੍ਲੇਨ ਈਦਿਸੇਨ ਵਿਨਾ ਏਵ. ਤਿਣ੍ਣਾ ਮੇਧਾਵਿਨੋ ਜਨਾਤਿ ਅਰਿਯਮਗ੍ਗਞਾਣਸਙ੍ਖਾਤਾਯ ਮੇਧਾਯ ਸਮਨ੍ਨਾਗਤਤ੍ਤਾ ਮੇਧਾਵਿਨੋ ਬੁਦ੍ਧਾ ਚ ਬੁਦ੍ਧਸਾਵਕਾ ਚ ਤਿਣ੍ਣਾ ਪਰਤੀਰੇ ਪਤਿਟ੍ਠਿਤਾ.
ਸੁਨਿਧਵਸ੍ਸਕਾਰਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.
ਕੋਟਿਗਾਮੇ ਸਚ੍ਚਕਥਾਵਣ੍ਣਨਾ
੨੮੭. ਕੋਟਿਗਾਮੋਤਿ ਮਹਾਪਨਾਦਸ੍ਸ ਰਞ੍ਞੋ ਪਾਸਾਦਕੋਟਿਯਂ ਕਤਗਾਮੋ, ਪਤਿਤਸ੍ਸ ਪਾਸਾਦਸ੍ਸ ਥੁਪਿਕਾਯ ਪਤਿਟ੍ਠਿਤਟ੍ਠਾਨੇ ਨਿਵਿਟ੍ਠਗਾਮੋਤਿ ਅਤ੍ਥੋ. ਅਰਿਯਸਚ੍ਚਾਨਨ੍ਤਿ ਯੇ ਪਟਿਵਿਜ੍ਝਨ੍ਤਿ, ਤੇਸਂ ਅਰਿਯਭਾਵਕਰਾਨਂ ਸਚ੍ਚਾਨਂ. ਅਨਨੁਬੋਧਾਤਿ ਅਬੁਜ੍ਝਨੇਨ ਅਜਾਨਨੇਨ. ਅਪ੍ਪਟਿਵੇਧਾਤਿ ਅਪ੍ਪਟਿਵਿਜ੍ਝਨੇਨ. ਅਨੁਬੋਧੋ ਚੇਤ੍ਥ ਪੁਬ੍ਬਭਾਗਿਯਞਾਣਂ, ਪਟਿਵੇਧੋ ਮਗ੍ਗਞਾਣੇਨ ਅਭਿਸਮਯੋ. ਤਤ੍ਥ ਯਸ੍ਮਾ ਅਨੁਬੋਧਪੁਬ੍ਬਕੋ ਪਟਿਵੇਧੋ ਅਨੁਬੋਧੇਨ ਵਿਨਾ ਨ ਹੋਤਿ, ਅਨੁਬੋਧੋਪਿ ਏਕਚ੍ਚੋ ਪਟਿਵੇਧਸਮ੍ਬਨ੍ਧੋ ਤਦੁਭਯਾਭਾਵਹੇਤੁਕਞ੍ਚ ਵਟ੍ਟੇ ਸਂਸਰਣਂ, ਤਸ੍ਮਾ ਵੁਤ੍ਤਂ ‘‘ਅਨਨੁਬੋਧਾ…ਪੇ… ਤੁਮ੍ਹਾਕਞ੍ਚਾ’’ਤਿ. ਤਤ੍ਥ ਸਨ੍ਧਾਵਿਤਨ੍ਤਿ ਪਟਿਸਨ੍ਧਿਗ੍ਗਹਣਵਸੇਨ ਭਵਤੋ ਭਵਨ੍ਤਰੁਪਗਮਨੇਨ ਸਨ੍ਧਾਵਿਤਂ. ਸਂਸਰਿਤਨ੍ਤਿ ਅਪਰਾਪਰਂ ਚਵਨੁਪਪਜ੍ਜਨਵਸੇਨ ਸਂਸਰਿਤਂ. ਮਮਞ੍ਚੇਵ ਤੁਮ੍ਹਾਕਞ੍ਚਾਤਿ ਮਯਾ ਚ ਤੁਮ੍ਹੇਹਿ ਚ. ਅਥ ਵਾ ਸਨ੍ਧਾਵਿਤਂ ਸਂਸਰਿਤਨ੍ਤਿ ਸਨ੍ਧਾਵਨਂ ਸਂਸਰਣਂ ਮਮਞ੍ਚੇਵ ਤੁਮ੍ਹਾਕਞ੍ਚ ਅਹੋਸੀਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ.
ਸਂਸਿਤਨ੍ਤਿ ਸਂਸਰਿਤਂ. ਭਵਨੇਤ੍ਤਿ ਸਮੂਹਤਾਤਿ ਦੀਘਰਜ੍ਜੁਯਾ ਬਦ੍ਧਸਕੁਣਂ ਵਿਯ ਰਜ੍ਜੁਹਤ੍ਥੋ ਪੁਰਿਸੋ ਦੇਸਨ੍ਤਰਂ, ਤਣ੍ਹਾਰਜ੍ਜੁਯਾ ਬਦ੍ਧਸਤ੍ਤਸਨ੍ਤਾਨਂ ਅਭਿਸਙ੍ਖਾਰੋ ਭਵਨ੍ਤਰਂ ਨੇਤਿ ਏਤਾਯਾਤਿ ਭਵਨੇਤ੍ਤਿ, ਸਾ ਭਵਤੋ ਭਵਂ ਨਯਨਸਮਤ੍ਥਾ ਤਣ੍ਹਾਰਜ੍ਜੁ ਅਰਿਯਮਗ੍ਗਸਤ੍ਥੇਨ ਸੁਟ੍ਠੁ ਹਤਾ ਛਿਨ੍ਨਾ ਅਪ੍ਪਵਤ੍ਤਿਕਤਾਤਿ ਭਵਨੇਤ੍ਤਿ ਸਮੂਹਤਾ.
ਅਮ੍ਬਪਾਲੀਵਤ੍ਥੁਕਥਾਵਣ੍ਣਨਾ
੨੮੮. ਯਾਨਸ੍ਸ ਭੂਮੀਤਿ ਯਤ੍ਥ ਸਕ੍ਕਾ ਹੋਤਿ ਯਾਨਂ ਆਰੁਯ੍ਹ ਯਾਨੇਨ ਗਨ੍ਤੁਂ, ਅਯਂ ਯਾਨਸ੍ਸ ਭੂਮਿ ਨਾਮ. ਯਾਨਾ ਪਚ੍ਚੋਰੋਹਿਤ੍ਵਾਤਿ ਵਿਹਾਰਸ੍ਸ ਬਹਿਦ੍ਵਾਰਕੋਟ੍ਠਕੇ ਯਾਨਤੋ ਓਰੋਹਿਤ੍ਵਾ.
ਲਿਚ੍ਛਵੀਵਤ੍ਥੁਕਥਾਵਣ੍ਣਨਾ
੨੮੯. ਨੀਲਾਤਿ ਇਦਂ ਸਬ੍ਬਸਙ੍ਗਾਹਕਵਚਨਂ. ਨੀਲਵਣ੍ਣਾਤਿਆਦਿ ਤਸ੍ਸੇਵ ਵਿਭਾਗਦਸ੍ਸਨਤ੍ਥਂ. ਤਤ੍ਥ ਨ ਤੇਸਂ ਪਕਤਿਵਣ੍ਣੋ ਨੀਲੋ, ਨੀਲਵਿਲੇਪਨਵਿਲਿਤ੍ਤਤ੍ਤਾ ਪਨੇਤਂ ਵੁਤ੍ਤਂ. ਨੀਲਵਤ੍ਥਾਤਿ ਪਟਦੁਕੂਲਕੋਸੇਯ੍ਯਾਦੀਨਿਪਿ ਨੇਸਂ ਨੀਲਾਨੇਵ ਹੋਨ੍ਤਿ. ਨੀਲਾਲਙ੍ਕਾਰਾਤਿ ਨੀਲਮਣਿਅਲਙ੍ਕਾਰੇਹਿ ਨੀਲਪੁਪ੍ਫੇਹਿ ਚ ਅਲਙ੍ਕਤਾ. ਤੇ ਕਿਰ ਅਲਙ੍ਕਾਰਾ ਸੁਵਣ੍ਣਵਿਚਿਤ੍ਤਾਪਿ ਇਨ੍ਦਨੀਲਮਣਿਓਭਾਸੇਹਿ ਏਕਨੀਲਾ ਵਿਯ ਖਾਯਨ੍ਤਿ, ਰਥਾਪਿ ਨੇਸਂ ਨੀਲਮਣਿਖਚਿਤਾ ਨੀਲਵਤ੍ਥਪਰਿਕ੍ਖਿਤ੍ਤਾ ਨੀਲਧਜਨੀਲਵਮ੍ਮਿਕੇਹਿ ਨੀਲਾਭਰਣੇਹਿ ਨੀਲਅਸ੍ਸੇਹਿ ਯੁਤ੍ਤਾ, ਪਤੋਦਯਟ੍ਠਿਯੋਪਿ ਨੀਲਾਯੇਵਾਤਿ ਇਮਿਨਾ ਨਯੇਨ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ. ਪਟਿਵਟ੍ਟੇਸੀਤਿ ਪਹਰਿ. ਕਿਸ੍ਸ ਜੇ ਅਮ੍ਬਪਾਲੀਤਿ ਜੇ-ਤਿ ਆਲਪਨਂ, ਭੋਤਿ ਅਮ੍ਬਪਾਲਿ ਕਿਂਕਾਰਣਾਤਿ ਵੁਤ੍ਤਂ ਹੋਤਿ. ਸਾਹਾਰਨ੍ਤਿ ਏਤ੍ਥ ਆਹਰਨ੍ਤਿ ਇਮਸ੍ਮਾ ਰਾਜਪੁਰਿਸਾ ਬਲਿਨ੍ਤਿ ਆਹਾਰੋ, ਤਬ੍ਭੁਤ੍ਤਜਨਪਦੋ. ਤੇਨ ਸਹਿਤਂ ਸਾਹਾਰਂ, ਸਜਨਪਦਨ੍ਤਿ ਅਤ੍ਥੋ. ਅਙ੍ਗੁਲਿਂ ਫੋਟੇਸੁਨ੍ਤਿ ਅਙ੍ਗੁਲਿਂ ਚਾਲੇਸੁਂ. ਅਮ੍ਬਕਾਯਾਤਿ ਮਾਤੁਗਾਮੇਨ. ਉਪਚਾਰਵਚਨਞ੍ਹੇਤਂ, ਇਤ੍ਥੀਸੁ ਯਦਿਦਂ ਅਮ੍ਬਕਾ ਮਾਤੁਗਾਮੋ ਜਨਨਿਕਾਤਿ. ਓਲੋਕੇਥਾਤਿ ਪਸ੍ਸਥ. ਅਪਲੋਕੇਥਾਤਿ ਅਪਵਤ੍ਤਿਤ੍ਵਾ ਓਲੋਕੇਥ, ਪੁਨਪ੍ਪੁਨਂ ਪਸ੍ਸਥਾਤਿ ਅਤ੍ਥੋ. ਉਪਸਂਹਰਥਾਤਿ ਉਪਨੇਥ, ਇਮਂ ਲਿਚ੍ਛਵੀਪਰਿਸਂ ਤੁਮ੍ਹਾਕਂ ਚਿਤ੍ਤੇਨ ਤਾਵਤਿਂਸਸਦਿਸਂ ਉਪਸਂਹਰਥ ਉਪਨੇਥ ਅਲ੍ਲੀਯਾਪੇਥ. ਯਥੇਵ ਤਾਵਤਿਂਸਾ ਅਭਿਰੂਪਾ ਪਾਸਾਦਿਕਾ ਨੀਲਾਦਿਨਾਨਾਵਣ੍ਣਾ, ਏਵਮਿਮੇ ਲਿਚ੍ਛਵੀਰਾਜਾਨੋਪੀਤਿ ਤਾਵਤਿਂਸੇਹਿ ਸਮਕੇ ਕਤ੍ਵਾ ਪਸ੍ਸਥਾਤਿ ਅਤ੍ਥੋ.
ਕਸ੍ਮਾ ਪਨ ਭਗਵਾ ਅਨੇਕਸਤੇਹਿ ਸੁਤ੍ਤੇਹਿ ਚਕ੍ਖਾਦੀਨਂ ਰੂਪਾਦੀਸੁ ਨਿਮਿਤ੍ਤਗ੍ਗਾਹਂ ਪਟਿਸੇਧੇਤ੍ਵਾ ਇਧ ਮਹਨ੍ਤੇਨ ਉਸ੍ਸਾਹੇਨ ਨਿਮਿਤ੍ਤਗ੍ਗਾਹੇ ਨਿਯੋਜੇਤੀਤਿ? ਹਿਤਕਾਮਤਾਯ ਤੇਸਂ ਭਿਕ੍ਖੂਨਂ ਯਥਾ ਆਯਸ੍ਮਤੋ ਨਨ੍ਦਸ੍ਸ ਹਿਤਕਾਮਤਾਯ ਸਗ੍ਗਸਮ੍ਪਤ੍ਤਿਦਸ੍ਸਨਤ੍ਥਂ. ਤਤ੍ਰ ਕਿਰ ਏਕਚ੍ਚੇ ਭਿਕ੍ਖੂ ਓਸਨ੍ਨਵੀਰਿਯਾ, ਤੇ ਸਮ੍ਪਤ੍ਤਿਯਾ ਪਲੋਭੇਨ੍ਤੋ ‘‘ਅਪ੍ਪਮਾਦੇਨ ਸਮਣਧਮ੍ਮਂ ਕਰੋਨ੍ਤਾਨਂ ਏਵਰੂਪਾ ਇਸ੍ਸਰਿਯਸਮ੍ਪਤ੍ਤਿ ਸੁਲਭਾ’’ਤਿ ਸਮਣਧਮ੍ਮੇ ਉਸ੍ਸਾਹਜਨਨਤ੍ਥਂ ਆਹ. ਅਥ ਵਾ ਨਯਿਦਂ ਨਿਮਿਤ੍ਤਗ੍ਗਾਹੇ ਨਿਯੋਜਨਂ, ਕੇਵਲਂ ਪਨ ‘‘ਦਿਬ੍ਬਸਮ੍ਪਤ੍ਤਿਸਦਿਸਾ ਏਤੇਸਂ ਰਾਜੂਨਂ ਇਸ੍ਸਰਿਯਸਮ੍ਪਤ੍ਤੀ’’ਤਿ ਅਨੁਪੁਬ੍ਬਿਕਥਾਯ ਸਮ੍ਪਤ੍ਤਿਕਥਨਂ ਵਿਯ ਦਟ੍ਠਬ੍ਬਂ. ਅਨਿਚ੍ਚਲਕ੍ਖਣਵਿਭਾਵਨਤ੍ਥਞ੍ਚਾਪਿ ਏਵਮਾਹ. ਨ ਚਿਰਸ੍ਸੇਵ ਹਿ ਸਬ੍ਬੇਪਿਮੇ ਅਜਾਤਸਤ੍ਤੁਸ੍ਸ ਵਸੇਨ ਵਿਨਾਸਂ ਪਾਪੁਣਿਸ੍ਸਨ੍ਤਿ, ਅਥ ਨੇਸਂ ਰਜ੍ਜਸਿਰਿਸਮ੍ਪਤ੍ਤਿਂ ਦਿਸ੍ਵਾ ਠਿਤਭਿਕ੍ਖੂ ‘‘ਤਥਾਰੂਪਾਯਪਿ ਨਾਮ ਸਿਰਿਸਮ੍ਪਤ੍ਤਿਯਾ ਵਿਨਾਸੋ ਪਞ੍ਞਾਯਿਸ੍ਸਤੀ’’ਤਿ ਅਨਿਚ੍ਚਲਕ੍ਖਣਂ ਭਾਵੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿਸ੍ਸਨ੍ਤੀਤਿ ਅਨਿਚ੍ਚਲਕ੍ਖਣਵਿਭਾਵਨਤ੍ਥਂ ਆਹ.
ਅਧਿਵਾਸੇਤੂਤਿ ਅਮ੍ਬਪਾਲਿਯਾ ਨਿਮਨ੍ਤਿਤਭਾਵਂ ਞਤ੍ਵਾਪਿ ਕਸ੍ਮਾ ਨਿਮਨ੍ਤੇਨ੍ਤੀਤਿ? ਅਸਦ੍ਦਹਨਤਾਯ ਚ ਵਤ੍ਤਸੀਸੇਨ ਚ. ਸਾ ਹਿ ਧੁਤ੍ਤਾ ਇਤ੍ਥੀ ਅਨਿਮਨ੍ਤੇਤ੍ਵਾਪਿ ‘‘ਨਿਮਨ੍ਤੇਸਿ’’ਨ੍ਤਿ ਵਦੇਯ੍ਯਾਤਿ ਤੇਸਂ ਅਹੋਸਿ. ਧਮ੍ਮਂ ਸੁਤ੍ਵਾ ਗਮਨਕਾਲੇ ਚ ਨਿਮਨ੍ਤੇਤ੍ਵਾ ਗਮਨਂ ਨਾਮ ਮਨੁਸ੍ਸਾਨਂ ਵਤ੍ਤਮੇਵ.
ਲਿਚ੍ਛਵੀਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.
ਸੀਹਸੇਨਾਪਤਿਵਤ੍ਥੁਕਥਾਵਣ੍ਣਨਾ
੨੯੦. ਅਭਿਞ੍ਞਾਤਾਤਿ (ਅ. ਨਿ. ਅਟ੍ਠ. ੩.੮.੧੨) ਞਾਤਾ ਪਞ੍ਞਾਤਾ ਪਾਕਟਾ. ਸਨ੍ਥਾਗਾਰੇਤਿ ਮਹਾਜਨਸ੍ਸ ਸਨ੍ਥਮ੍ਭਨਾਗਾਰੇ ਵਿਸ੍ਸਮਨਤ੍ਥਾਯ ਕਤੇ ਅਗਾਰੇ. ਸਾ ਕਿਰ ਸਨ੍ਥਾਗਾਰਸਾਲਾ ਨਗਰਮਜ੍ਝੇ ਅਹੋਸਿ, ਚਤੂਸੁ ਦ੍ਵਾਰੇਸੁ ਠਿਤਾਨਂ ਪਞ੍ਞਾਯਤਿ, ਚਤੂਹਿ ਦਿਸਾਹਿ ਆਗਤਮਨੁਸ੍ਸਾ ਪਠਮਂ ਤਤ੍ਥ ਵਿਸ੍ਸਮਿਤ੍ਵਾ ਪਚ੍ਛਾ ਅਤ੍ਤਨੋ ਅਤ੍ਤਨੋ ਫਾਸੁਕਟ੍ਠਾਨਂ ਗਚ੍ਛਨ੍ਤਿ. ਰਾਜਕੁਲਾਨਂ ਰਜ੍ਜਕਿਚ੍ਚਸਨ੍ਥਰਣਤ੍ਥਂ ਕਤਂ ਅਗਾਰਨ੍ਤਿਪਿ ਵਦਨ੍ਤਿਯੇਵ. ਤਤ੍ਥ ਹਿ ਨਿਸੀਦਿਤ੍ਵਾ ਲਿਚ੍ਛਵੀਰਾਜਾਨੋ ਰਜ੍ਜਕਿਚ੍ਚਂ ਸਨ੍ਥਰਨ੍ਤਿ ਕਰੋਨ੍ਤਿ ਵਿਚਾਰੇਨ੍ਤਿ. ਸਨ੍ਨਿਸਿਨ੍ਨਾਤਿ ਤੇਸਂ ਨਿਸੀਦਨਤ੍ਥਂਯੇਵ ਪਞ੍ਞਤ੍ਤੇਸੁ ਮਹਾਰਹਪਚ੍ਚਤ੍ਥਰਣੇਸੁ ਸਮੁਸ੍ਸਿਤਸੇਤਚ੍ਛਤ੍ਤੇਸੁ ਆਸਨੇਸੁ ਸਨ੍ਨਿਸਿਨ੍ਨਾ. ਅਨੇਕਪਰਿਯਾਯੇਨ ਬੁਦ੍ਧਸ੍ਸ ਵਣ੍ਣਂ ਭਾਸਨ੍ਤੀਤਿ ਰਾਜਕੁਲਕਿਚ੍ਚਞ੍ਚੇਵ ਲੋਕਤ੍ਥਕਿਰਿਯਞ੍ਚ ਵਿਚਾਰੇਤ੍ਵਾ ਅਨੇਕੇਹਿ ਕਾਰਣੇਹਿ ਬੁਦ੍ਧਸ੍ਸ ਵਣ੍ਣਂ ਭਾਸਨ੍ਤਿ. ਪਣ੍ਡਿਤਾ ਹਿ ਤੇ ਰਾਜਾਨੋ ਸਦ੍ਧਾਸਮ੍ਪਨ੍ਨਾ ਸੋਤਾਪਨ੍ਨਾਪਿ ਸਕਦਾਗਾਮਿਨੋਪਿ ਅਨਾਗਾਮਿਨੋਪਿ ਅਰਿਯਸਾਵਕਾ, ਤੇ ਸਬ੍ਬੇਪਿ ਲੋਕਿਯਜਟਂ ਭਿਨ੍ਦਿਤ੍ਵਾ ਬੁਦ੍ਧਾਦੀਨਂ ਤਿਣ੍ਣਂ ਰਤਨਾਨਂ ਵਣ੍ਣਂ ਭਾਸਨ੍ਤਿ.
ਤਤ੍ਥ ਤਿਵਿਧੋ ਬੁਦ੍ਧਵਣ੍ਣੋ ਨਾਮ ਚਰਿਯਵਣ੍ਣੋ ਸਰੀਰਵਣ੍ਣੋ ਗੁਣਵਣ੍ਣੋਤਿ. ਤਤ੍ਰਿਮੇ ਰਾਜਾਨੋ ਚਰਿਯਾਯ ਵਣ੍ਣਂ ਆਰਭਿਂਸੁ – ‘‘ਦੁਕ੍ਕਰਂ ਵਤ ਕਤਂ ਸਮ੍ਮਾਸਮ੍ਬੁਦ੍ਧੇਨ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਦਸ ਪਾਰਮਿਯੋ ਦਸ ਉਪਪਾਰਮਿਯੋ ਦਸ ਪਰਮਤ੍ਥਪਾਰਮਿਯੋਤਿ ਸਮਤਿਂਸ ਪਾਰਮਿਯੋ ਪੂਰੇਨ੍ਤੇਨ ਞਾਤਤ੍ਥਚਰਿਯਂ ਲੋਕਤ੍ਥਚਰਿਯਂ ਬੁਦ੍ਧਤ੍ਥਚਰਿਯਂ ਮਤ੍ਥਕਂ ਪਾਪੇਤ੍ਵਾ ਪਞ੍ਚ ਮਹਾਪਰਿਚ੍ਚਾਗੇ ਪਰਿਚ੍ਚਜਨ੍ਤੇਨਾ’’ਤਿ ਅਡ੍ਢਚ੍ਛਕ੍ਕੇਹਿ ਜਾਤਕਸਤੇਹਿ ਬੁਦ੍ਧਵਣ੍ਣਂ ਕਥੇਨ੍ਤਾ ਤੁਸਿਤਭਵਨਂ ਪਾਪੇਤ੍ਵਾ ਠਪਯਿਂਸੁ. ਧਮ੍ਮਸ੍ਸ ਵਣ੍ਣਂ ਭਾਸਨ੍ਤਾ ਪਨੇਤੇ ‘‘ਭਗਵਤਾ ਧਮ੍ਮੋ ਦੇਸਿਤੋ, ਨਿਕਾਯਤੋ ਪਞ੍ਚ ਨਿਕਾਯਾ ਹੋਨ੍ਤਿ, ਪਿਟਕਤੋ ਤੀਣਿ ਪਿਟਕਾਨਿ, ਅਙ੍ਗਤੋ ਨਵ ਅਙ੍ਗਾਨਿ, ਖਨ੍ਧਤੋ ਚਤੁਰਾਸੀਤਿਧਮ੍ਮਕ੍ਖਨ੍ਧਸਹਸ੍ਸਾਨੀ’’ਤਿ ਕੋਟ੍ਠਾਸਵਸੇਨ ਧਮ੍ਮਗੁਣਂ ਕਥਯਿਂਸੁ. ਸਙ੍ਘਸ੍ਸ ਵਣ੍ਣਂ ਭਾਸਨ੍ਤਾ ‘‘ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧਾ ਕੁਲਪੁਤ੍ਤਾ ਭੋਗਕ੍ਖਨ੍ਧਞ੍ਚੇਵ ਞਾਤਿਪਰਿਵਟ੍ਟਞ੍ਚ ਪਹਾਯ ਸੇਤਚ੍ਛਤ੍ਤਉਪਰਜ੍ਜਸੇਨਾਪਤਿਸੇਟ੍ਠਿਭਣ੍ਡਾਗਾਰਿਕਟ੍ਠਾਨਨ੍ਤਰਾਦੀਨਿ ਅਗਣਯਿਤ੍ਵਾ ਨਿਕ੍ਖਮ੍ਮ ਸਤ੍ਥੁ ਵਰਸਾਸਨੇ ਪਬ੍ਬਜਨ੍ਤਿ, ਸੇਤਚ੍ਛਤ੍ਤਂ ਪਹਾਯ ਪਬ੍ਬਜਿਤਾਨਂ ਭਦ੍ਦਿਯਮਹਾਰਾਜਮਹਾਕਪ੍ਪਿਨਪੁਕ੍ਕੁਸਾਤਿਆਦਿਰਾਜਪਬ੍ਬਜਿਤਾਨਂਯੇਵ ਬੁਦ੍ਧਕਾਲੇ ਅਸੀਤਿ ਸਹਸ੍ਸਾਨਿ ਅਹੇਸੁਂ, ਅਨੇਕਕੋਟਿਧਨਂ ਪਹਾਯ ਪਬ੍ਬਜਿਤਾਨਂ ਪਨ ਯਸਕੁਲਪੁਤ੍ਤਸੋਣਸੇਟ੍ਠਿਪੁਤ੍ਤਰਟ੍ਠਪਾਲਪੁਤ੍ਤਾਦੀਨਂ ਪਰਿਚ੍ਛੇਦੋ ਨਤ੍ਥਿ, ਏਵਰੂਪਾ ਚ ਏਵਰੂਪਾ ਚ ਕੁਲਪੁਤ੍ਤਾ ਸਤ੍ਥੁ ਸਾਸਨੇ ਪਬ੍ਬਜਨ੍ਤੀ’’ਤਿ ਪਬ੍ਬਜ੍ਜਾਸਙ੍ਖੇਪਵਸੇਨ ਸਙ੍ਘਗੁਣਂ ਕਥਯਿਂਸੁ.
ਸੀਹੋ ਸੇਨਾਪਤੀਤਿ ਏਵਂਨਾਮਕੋ ਸੇਨਾਯ ਅਧਿਪਤਿ. ਵੇਸਾਲਿਯਞ੍ਹਿ ਸਤ੍ਤ ਸਹਸ੍ਸਾਨਿ ਸਤ੍ਤ ਸਤਾਨਿ ਸਤ੍ਤ ਚ ਰਾਜਾਨੋ, ਤੇ ਸਬ੍ਬੇਪਿ ਸਨ੍ਨਿਪਤਿਤ੍ਵਾ ਸਬ੍ਬੇਸਂ ਮਨਂ ਗਹੇਤ੍ਵਾ ‘‘ਰਟ੍ਠਂ ਵਿਚਾਰੇਤੁਂ ਸਮਤ੍ਥਂ ਏਕਂ ਵਿਚਿਨਥਾ’’ਤਿ ਵਿਚਿਨਨ੍ਤਾ ਸੀਹਰਾਜਕੁਮਾਰਂ ਦਿਸ੍ਵਾ ‘‘ਅਯਂ ਸਕ੍ਖਿਸ੍ਸਤੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਤਸ੍ਸ ਰਤ੍ਤਮਣਿਵਣ੍ਣਕਮ੍ਬਲਪਰਿਯੋਨਦ੍ਧਂ ਸੇਨਾਪਤਿਚ੍ਛਤ੍ਤਂ ਅਦਂਸੁ. ਤਂ ਸਨ੍ਧਾਯ ਵੁਤ੍ਤਂ ‘‘ਸੀਹੋ ਸੇਨਾਪਤੀ’’ਤਿ. ਨਿਗਣ੍ਠਸਾਵਕੋਤਿ ਨਿਗਣ੍ਠਸ੍ਸ ਨਾਟਪੁਤ੍ਤਸ੍ਸ ਪਚ੍ਚਯਦਾਯਕੋ ਉਪਟ੍ਠਾਕੋ. ਜਮ੍ਬੁਦੀਪਤਲਸ੍ਮਿਞ੍ਹਿ ਤਯੋ ਜਨਾ ਨਿਗਣ੍ਠਾਨਂ ਅਗ੍ਗੁਪਟ੍ਠਾਕਾ – ਨਾਲ਼ਨ੍ਦਾਯਂ ਉਪਾਲਿ ਗਹਪਤਿ, ਕਪਿਲਪੁਰੇ ਵਪ੍ਪੋ ਸਕ੍ਕੋ, ਵੇਸਾਲਿਯਂ ਅਯਂ ਸੀਹੋ ਸੇਨਾਪਤੀਤਿ. ਨਿਸਿਨ੍ਨੋ ਹੋਤੀਤਿ ਸੇਸਰਾਜੂਨਮ੍ਪਿ ਪਰਿਸਾਯ ਅਨ੍ਤਰੇ ਆਸਨਾਨਿ ਪਞ੍ਞਾਪਯਿਂਸੁ, ਸੀਹਸ੍ਸ ਪਨ ਮਜ੍ਝੇ ਠਾਨੇਤਿ ਤਸ੍ਮਿਂ ਪਞ੍ਞਤ੍ਤੇ ਮਹਾਰਹੇ ਰਾਜਾਸਨੇ ਨਿਸਿਨ੍ਨੋ ਹੋਤਿ. ਨਿਸ੍ਸਂਸਯਨ੍ਤਿ ਨਿਬ੍ਬਿਚਿਕਿਚ੍ਛਂ ਅਦ੍ਧਾ ਏਕਂਸੇਨ. ਨ ਹੇਤੇ ਯਸ੍ਸ ਵਾ ਤਸ੍ਸ ਵਾ ਅਪ੍ਪੇਸਕ੍ਖਸ੍ਸ ਏਵਂ ਅਨੇਕਸਤੇਹਿ ਕਾਰਣੇਹਿ ਵਣ੍ਣਂ ਭਾਸਨ੍ਤਿ.
ਯੇਨ ਨਿਗਣ੍ਠੋ ਨਾਟਪੁਤ੍ਤੋ ਤੇਨੁਪਸਙ੍ਕਮੀਤਿ ਨਿਗਣ੍ਠੋ ਕਿਰ ਨਾਟਪੁਤ੍ਤੋ ‘‘ਸਚਾਯਂ ਸੀਹੋ ਕਸ੍ਸਚਿਦੇਵ ਸਮਣਸ੍ਸ ਗੋਤਮਸ੍ਸ ਵਣ੍ਣਂ ਕਥੇਨ੍ਤਸ੍ਸ ਸੁਤ੍ਵਾ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਸ੍ਸਤਿ, ਮਯ੍ਹਂ ਪਰਿਹਾਨਿ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਪਠਮਤਰਂਯੇਵ ਸੀਹਂ ਸੇਨਾਪਤਿਂ ਏਤਦਵੋਚ ‘‘ਸੇਨਾਪਤਿ ਇਮਸ੍ਮਿਂ ਲੋਕੇ ‘ਅਹਂ ਬੁਦ੍ਧੋ ਅਹਂ ਬੁਦ੍ਧੋ’ਤਿ ਬਹੂ ਵਦਨ੍ਤਿ, ਸਚੇ ਤ੍ਵਂ ਕਞ੍ਚਿ ਦਸ੍ਸਨਾਯ ਉਪਸਙ੍ਕਮਿਤੁਕਾਮੋ ਅਹੋਸਿ, ਮਂ ਪੁਚ੍ਛੇਯ੍ਯਾਸਿ, ਅਹਂ ਤੇ ਯੁਤ੍ਤਟ੍ਠਾਨਞ੍ਞੇਵ ਪੇਸੇਸ੍ਸਾਮਿ, ਅਯੁਤ੍ਤਟ੍ਠਾਨਤੋ ਨਿਵਾਰੇਸ੍ਸਾਮੀ’’ਤਿ. ਸੋ ਤਂ ਕਥਂ ਅਨੁਸ੍ਸਰਿਤ੍ਵਾ ‘‘ਸਚੇ ਮਂ ਪੇਸੇਸ੍ਸਤਿ, ਗਮਿਸ੍ਸਾਮਿ. ਨੋ ਚੇ, ਨ ਗਮਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਯੇਨ ਨਿਗਣ੍ਠੋ ਨਾਟਪੁਤ੍ਤੋ ਤੇਨੁਪਸਙ੍ਕਮਿ.
ਅਥਸ੍ਸ ਵਚਨਂ ਸੁਤ੍ਵਾ ਨਿਗਣ੍ਠੋ ਮਹਾਪਬ੍ਬਤੇਨ ਵਿਯ ਬਲਵਸੋਕੇਨ ਓਤ੍ਥਟੋ ‘‘ਯਤ੍ਥ ਦਾਨਿਸ੍ਸਾਹਂ ਗਮਨਂ ਨ ਇਚ੍ਛਾਮਿ, ਤਤ੍ਥੇਵ ਗਨ੍ਤੁਕਾਮੋ ਜਾਤੋ, ਹਤੋਹਮਸ੍ਮੀ’’ਤਿ ਅਨਤ੍ਤਮਨੋ ਹੁਤ੍ਵਾ ‘‘ਪਟਿਬਾਹਨੁਪਾਯਮਸ੍ਸ ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਕਿਂ ਪਨ ਤ੍ਵ’’ਨ੍ਤਿਆਦਿਮਾਹ. ਏਵਂ ਵਦਨ੍ਤੋ ਚਰਨ੍ਤਂ ਗੋਣਂ ਤੁਣ੍ਡੇ ਪਹਰਨ੍ਤੋ ਵਿਯ ਜਲਮਾਨਂ ਪਦੀਪਂ ਨਿਬ੍ਬਾਪੇਨ੍ਤੋ ਵਿਯ ਭਤ੍ਤਭਰਿਤਂ ਪਤ੍ਤਂ ਨਿਕੁਜ੍ਜਨ੍ਤੋ ਵਿਯ ਚ ਸੀਹਸ੍ਸ ਉਪ੍ਪਨ੍ਨਂ ਪੀਤਿਂ ਵਿਨਾਸੇਸਿ. ਗਮਿਕਾਭਿਸਙ੍ਖਾਰੋਤਿ ਹਤ੍ਥਿਯਾਨਾਦੀਨਂ ਯੋਜਾਪਨਗਨ੍ਧਮਾਲਾਦਿਗ੍ਗਹਣਵਸੇਨ ਪਵਤ੍ਤੋ ਪਯੋਗੋ. ਸੋ ਪਟਿਪ੍ਪਸ੍ਸਮ੍ਭੀਤਿ ਸੋ ਵੂਪਸਨ੍ਤੋ.
ਦੁਤਿਯਮ੍ਪਿ ਖੋਤਿ ਦੁਤਿਯਵਾਰਮ੍ਪਿ. ਇਮਸ੍ਮਿਞ੍ਚ ਵਾਰੇ ਬੁਦ੍ਧਸ੍ਸ ਵਣ੍ਣਂ ਭਾਸਨ੍ਤਾ ਤੁਸਿਤਭਵਨਤੋ ਪਟ੍ਠਾਯ ਯਾਵ ਮਹਾਬੋਧਿਪਲ੍ਲਙ੍ਕਾ ਦਸਬਲਸ੍ਸ ਹੇਟ੍ਠਾ ਪਾਦਤਲੇਹਿ ਉਪਰਿ ਕੇਸਗ੍ਗੇਹਿ ਪਰਿਚ੍ਛਿਨ੍ਦਿਤ੍ਵਾ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਅਸੀਤਿਅਨੁਬ੍ਯਞ੍ਜਨਬ੍ਯਾਮਪ੍ਪਭਾਵਸੇਨ ਸਰੀਰਵਣ੍ਣਂ ਕਥਯਿਂਸੁ. ਧਮ੍ਮਸ੍ਸ ਵਣ੍ਣਂ ਭਾਸਨ੍ਤਾ ‘‘ਏਕਪਦੇਪਿ ਏਕਬ੍ਯਞ੍ਜਨੇਪਿ ਅਵਕ੍ਖਲਿਤਂ ਨਾਮ ਨਤ੍ਥੀ’’ਤਿ ਸੁਕਥਿਤਵਸੇਨੇਵ ਧਮ੍ਮਗੁਣਂ ਕਥਯਿਂਸੁ. ਸਙ੍ਘਸ੍ਸ ਵਣ੍ਣਂ ਭਾਸਨ੍ਤਾ ‘‘ਏਵਰੂਪਂ ਯਸਸਿਰਿਵਿਭਵਂ ਪਹਾਯ ਸਤ੍ਥੁ ਸਾਸਨੇ ਪਬ੍ਬਜਿਤਾ ਨ ਕੋਸਜ੍ਜਪਕਤਿਕਾ ਹੋਨ੍ਤਿ, ਤੇਰਸਸੁ ਪਨ ਧੁਤਗੁਣੇਸੁ ਪਰਿਪੂਰਕਾਰਿਨੋ ਹੁਤ੍ਵਾ ਸਤ੍ਤਸੁ ਅਨੁਪਸ੍ਸਨਾਸੁ ਕਮ੍ਮਂ ਕਰੋਨ੍ਤਿ, ਅਟ੍ਠਤਿਂਸ ਆਰਮ੍ਮਣਵਿਭਤ੍ਤਿਯੋ ਵਲ਼ਞ੍ਜੇਨ੍ਤੀ’’ਤਿ ਪਟਿਪਦਾਵਸੇਨ ਸਙ੍ਘਗੁਣੇ ਕਥਯਿਂਸੁ.
ਤਤਿਯਵਾਰੇ ਪਨ ਬੁਦ੍ਧਸ੍ਸ ਵਣ੍ਣਂ ਭਾਸਮਾਨਾ ‘‘ਇਤਿਪਿ ਸੋ ਭਗਵਾ’’ਤਿ ਸੁਤ੍ਤਨ੍ਤਪਰਿਯਾਯੇਨੇਵ ਬੁਦ੍ਧਗੁਣੇ ਕਥਯਿਂਸੁ, ‘‘ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ’’ਤਿਆਦਿਨਾ ਸੁਤ੍ਤਨ੍ਤਪਰਿਯਾਯੇਨੇਵ ਧਮ੍ਮਗੁਣੇ, ‘‘ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ’’ਤਿਆਦਿਨਾ ਸੁਤ੍ਤਨ੍ਤਪਰਿਯਾਯੇਨੇਵ ਸਙ੍ਘਗੁਣੇ ਚ ਕਥਯਿਂਸੁ. ਤਤੋ ਸੀਹੋ ਚਿਨ੍ਤੇਸਿ ‘‘ਇਮੇਸਂ ਲਿਚ੍ਛਵੀਰਾਜਕੁਲਾਨਂ ਤਤਿਯਦਿਵਸਤੋ ਪਟ੍ਠਾਯ ਬੁਦ੍ਧਧਮ੍ਮਸਙ੍ਘਗੁਣੇ ਕਥੇਨ੍ਤਾਨਂ ਮੁਖਂ ਨਪ੍ਪਹੋਤਿ, ਅਦ੍ਧਾ ਅਨੋਮਗੁਣਸਮਨ੍ਨਾਗਤੋ ਸੋ ਭਗਵਾ, ਇਮਂ ਦਾਨਿ ਉਪ੍ਪਨ੍ਨਂ ਪੀਤਿਂ ਅਵਿਜਹਿਤ੍ਵਾਵ ਅਹਂ ਅਜ੍ਜ ਸਮ੍ਮਾਸਮ੍ਬੁਦ੍ਧਂ ਪਸ੍ਸਿਸ੍ਸਾਮੀ’’ਤਿ. ਅਥਸ੍ਸ ‘‘ਕਿਞ੍ਹਿ ਮੇ ਕਰਿਸ੍ਸਨ੍ਤਿ ਨਿਗਣ੍ਠਾ’’ਤਿ ਵਿਤਕ੍ਕੋ ਉਦਪਾਦਿ. ਤਤ੍ਥ ਕਿਞ੍ਹਿ ਮੇ ਕਰਿਸ੍ਸਨ੍ਤੀਤਿ ਕਿਂ ਨਾਮ ਮਯ੍ਹਂ ਨਿਗਣ੍ਠਾ ਕਰਿਸ੍ਸਨ੍ਤਿ. ਅਪਲੋਕਿਤਾ ਵਾ ਅਨਪਲੋਕਿਤਾ ਵਾਤਿ ਆਪੁਚ੍ਛਿਤਾ ਵਾ ਅਨਾਪੁਚ੍ਛਿਤਾ ਵਾ. ਨ ਹਿ ਮੇ ਤੇ ਆਪੁਚ੍ਛਿਤਾ ਯਾਨਵਾਹਨਸਮ੍ਪਤ੍ਤਿਇਸ੍ਸਰਿਯਯਸਵਿਸੇਸਂ ਦਸ੍ਸਨ੍ਤਿ, ਨਾਪਿ ਅਨਾਪੁਚ੍ਛਿਤਾ ਮਾਰੇਸ੍ਸਨ੍ਤਿ, ਅਫਲਂ ਏਤੇਸਂ ਆਪੁਚ੍ਛਨਨ੍ਤਿ ਅਧਿਪ੍ਪਾਯੋ.
ਦਿਵਾ ਦਿਵਸ੍ਸਾਤਿ ਦਿਵਸ੍ਸ ਦਿਵਾ ਮਜ੍ਝਨ੍ਹਿਕੇ ਅਤਿਕ੍ਕਨ੍ਤਮਤ੍ਤੇ. ਵੇਸਾਲਿਯਾ ਨਿਯ੍ਯਾਸੀਤਿ ਯਥਾ ਹਿ ਗਿਮ੍ਹਕਾਲੇ ਦੇਵੇ ਵੁਟ੍ਠੇ ਉਦਕਂ ਸਨ੍ਦਮਾਨਂ ਨਦਿਂ ਓਤਰਿਤ੍ਵਾ ਥੋਕਮੇਵ ਗਨ੍ਤ੍ਵਾ ਤਿਟ੍ਠਤਿ ਨਪ੍ਪਵਤ੍ਤਤਿ, ਏਵਂ ਸੀਹਸ੍ਸ ਪਠਮਦਿਵਸੇ ‘‘ਦਸਬਲਂ ਪਸ੍ਸਿਸ੍ਸਾਮੀ’’ਤਿ ਉਪ੍ਪਨ੍ਨਾਯ ਪੀਤਿਯਾ ਨਿਗਣ੍ਠੇਨ ਪਟਿਬਾਹਿਤਕਾਲੋ, ਯਥਾ ਦੁਤਿਯਦਿਵਸੇ ਦੇਵੇ ਵੁਟ੍ਠੇ ਉਦਕਂ ਸਨ੍ਦਮਾਨਂ ਨਦਿਂ ਓਤਰਿਤ੍ਵਾ ਥੋਕਂ ਗਨ੍ਤ੍ਵਾ ਵਾਲਿਕਾਪੁਞ੍ਜਂ ਪਹਰਿਤ੍ਵਾ ਅਪ੍ਪਵਤ੍ਤਂ ਹੋਤਿ, ਏਵਂ ਸੀਹਸ੍ਸ ਦੁਤਿਯਦਿਵਸੇ ‘‘ਦਸਬਲਂ ਪਸ੍ਸਿਸ੍ਸਾਮੀ’’ਤਿ ਉਪ੍ਪਨ੍ਨਾਯ ਪੀਤਿਯਾ ਨਿਗਣ੍ਠੇਨ ਪਟਿਬਾਹਿਤਕਾਲੋ, ਯਥਾ ਤਤਿਯਦਿਵਸੇ ਦੇਵੇ ਵੁਟ੍ਠੇ ਉਦਕਂ ਸਨ੍ਦਮਾਨਂ ਨਦਿਂ ਓਤਰਿਤ੍ਵਾ ਪੁਰਾਣਪਣ੍ਣਸੁਕ੍ਖਦਣ੍ਡਕਨਲ਼ਕਚਵਰਾਦੀਨਿ ਪਰਿਕਡ੍ਢਨ੍ਤਂ ਵਾਲਿਕਾਪੁਞ੍ਜਂ ਭਿਨ੍ਦਿਤ੍ਵਾ ਸਮੁਦ੍ਦਨਿਨ੍ਨਮੇਵ ਹੋਤਿ, ਏਵਂ ਸੀਹੋ ਤਤਿਯਦਿਵਸੇ ਤਿਣ੍ਣਂ ਵਤ੍ਥੂਨਂ ਗੁਣਕਥਂ ਸੁਤ੍ਵਾ ਉਪ੍ਪਨ੍ਨੇ ਪੀਤਿਪਾਮੋਜ੍ਜੇ ‘‘ਅਫਲਾ ਨਿਗਣ੍ਠਾ, ਨਿਪ੍ਫਲਾ ਨਿਗਣ੍ਠਾ, ਕਿਂ ਮੇ ਇਮੇ ਕਰਿਸ੍ਸਨ੍ਤਿ, ਗਮਿਸ੍ਸਾਮਹਂ ਸਤ੍ਥੁ ਸਨ੍ਤਿਕ’’ਨ੍ਤਿ ਗਮਨਂ ਅਭਿਨੀਹਰਿਤ੍ਵਾ ਵੇਸਾਲਿਯਾ ਨਿਯ੍ਯਾਸਿ. ਨਿਯ੍ਯਨ੍ਤੋ ਚ ‘‘ਚਿਰਸ੍ਸਾਹਂ ਦਸਬਲਸ੍ਸ ਸਨ੍ਤਿਕਂ ਗਨ੍ਤੁਕਾਮੋ ਜਾਤੋ, ਨ ਖੋ ਪਨ ਮੇ ਯੁਤ੍ਤਂ ਅਞ੍ਞਾਤਕਵੇਸੇਨ ਗਨ੍ਤੁ’’ਨ੍ਤਿ ‘‘ਯੇ ਕੇਚਿ ਦਸਬਲਸ੍ਸ ਸਨ੍ਤਿਕਂ ਗਨ੍ਤੁਕਾਮੋ, ਸਬ੍ਬੇ ਨਿਕ੍ਖਮਨ੍ਤੂ’’ਤਿ ਘੋਸਨਂ ਕਾਰੇਤ੍ਵਾ ਪਞ੍ਚ ਰਥਸਤਾਨਿ ਯੋਜਾਪੇਤ੍ਵਾ ਉਤ੍ਤਮਰਥੇ ਠਿਤੋ ਤੇਹਿ ਚੇਵ ਪਞ੍ਚਹਿ ਰਥਸਤੇਹਿ ਮਹਤਿਯਾ ਚ ਪਰਿਸਾਯ ਪਰਿਵੁਤੋ ਗਨ੍ਧਪੁਪ੍ਫਚੁਣ੍ਣਵਾਸਾਦੀਨਿ ਗਾਹਾਪੇਤ੍ਵਾ ਨਿਯ੍ਯਾਸਿ.
ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਆਰਾਮਂ ਪਵਿਸਨ੍ਤੋ ਦੂਰਤੋਵ ਅਸੀਤਿਅਨੁਬ੍ਯਞ੍ਜਨਬ੍ਯਾਮਪ੍ਪਭਾਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਨਿ ਛਬ੍ਬਣ੍ਣਾ ਘਨਬੁਦ੍ਧਰਸ੍ਮਿਯੋ ਦਿਸ੍ਵਾ ‘‘ਏਵਰੂਪਂ ਨਾਮ ਪੁਰਿਸਂ ਏਵਂ ਆਸਨ੍ਨੇ ਵਸਨ੍ਤਂ ਏਤ੍ਤਕਂ ਕਾਲਂ ਨਾਦ੍ਦਸਂ, ਵਞ੍ਚਿਤੋ ਵਤਮ੍ਹਿ, ਅਲਾਭਾ ਵਤ ਮੇ’’ਤਿ ਚਿਨ੍ਤੇਤ੍ਵਾ ਮਹਾਨਿਧਿਂ ਦਿਸ੍ਵਾ ਦਲਿਦ੍ਦਪੁਰਿਸੋ ਵਿਯ ਸਞ੍ਜਾਤਪੀਤਿਪਾਮੋਜ੍ਜੋ ਯੇਨ ਭਗਵਾ ਤੇਨੁਪਸਙ੍ਕਮਿ. ਧਮ੍ਮਸ੍ਸ ਚਾਨੁਧਮ੍ਮਂ ਬ੍ਯਾਕਰੋਨ੍ਤੀਤਿ ਭੋਤਾ ਗੋਤਮੇਨ ਵੁਤ੍ਤਕਾਰਣਸ੍ਸ ਅਨੁਕਾਰਣਂ ਕਥੇਨ੍ਤਿ. ਕਾਰਣਵਚਨੋ ਹੇਤ੍ਥ ਧਮ੍ਮ-ਸਦ੍ਦੋ ‘‘ਹੇਤੁਮ੍ਹਿ ਞਾਣਂ ਧਮ੍ਮਪਟਿਸਮ੍ਭਿਦਾ’’ਤਿਆਦੀਸੁ (ਵਿਭ. ੭੨੦) ਵਿਯ. ਕਾਰਣਨ੍ਤਿ ਚੇਤ੍ਥ ਤਥਾਪਵਤ੍ਤਸ੍ਸ ਸਦ੍ਦਸ੍ਸ ਅਤ੍ਥੋ ਅਧਿਪ੍ਪੇਤੋ ਤਸ੍ਸ ਪਵਤ੍ਤਿਹੇਤੁਭਾਵਤੋ. ਅਤ੍ਥਪ੍ਪਯੁਤ੍ਤੋ ਹਿ ਸਦ੍ਦਪ੍ਪਯੋਗੋ. ਅਨੁਕਾਰਣਨ੍ਤਿ ਚ ਸੋ ਏਵਂ ਪਰੇਹਿ ਤਥਾ ਵੁਚ੍ਚਮਾਨੋ. ਸਹਧਮ੍ਮਿਕੋ ਵਾਦਾਨੁਵਾਦੋਤਿ ਪਰੇਹਿ ਵੁਤ੍ਤਕਾਰਣੇਨ ਸਕਾਰਣੋ ਹੁਤ੍ਵਾ ਤੁਮ੍ਹਾਕਂ ਵਾਦੋ ਵਾ ਤਤੋ ਪਰਂ ਤਸ੍ਸ ਅਨੁਵਾਦੋ ਵਾ ਕੋਚਿ ਅਪ੍ਪਮਤ੍ਤਕੋਪਿ ਵਿਞ੍ਞੂਹਿ ਗਰਹਿਤਬ੍ਬਂ ਠਾਨਂ ਕਾਰਣਂ ਨ ਆਗਚ੍ਛਤਿ. ਇਦਂ ਵੁਤ੍ਤਂ ਹੋਤਿ – ਕਿਂ ਸਬ੍ਬਾਕਾਰੇਨਪਿ ਤਵ ਵਾਦੇ ਗਾਰਯ੍ਹਕਾਰਣਂ ਨਤ੍ਥੀਤਿ. ਅਨਬ੍ਭਕ੍ਖਾਤੁਕਾਮਾਤਿ ਨ ਅਭੂਤੇਨ ਵਤ੍ਤੁਕਾਮਾ.
੨੯੧-੨੯੨. ਅਤ੍ਥਿ ਸੀਹ ਪਰਿਯਾਯੋਤਿਆਦੀਨਂ ਅਤ੍ਥੋ ਵੇਰਞ੍ਜਕਣ੍ਡੇ ਆਗਤਨਯੇਨੇਵ ਵੇਦਿਤਬ੍ਬੋ. ਪਰਮੇਨ ਅਸ੍ਸਾਸੇਨਾਤਿ ਚਤੁਮਗ੍ਗਚਤੁਫਲਸਙ੍ਖਾਤੇਨ ਉਤ੍ਤਮਅਸ੍ਸਾਸੇਨ. ਅਸ੍ਸਾਸਾਯ ਧਮ੍ਮਂ ਦੇਸੇਤੀਤਿ ਅਸ੍ਸਾਸਨਤ੍ਥਾਯ ਸਨ੍ਥਮ੍ਭਨਤ੍ਥਾਯ ਧਮ੍ਮਂ ਦੇਸੇਤਿ. ਇਤਿ ਭਗਵਾ ਅਟ੍ਠਹਙ੍ਗੇਹਿ ਸੀਹਸੇਨਾਪਤਿਸ੍ਸ ਧਮ੍ਮਂ ਦੇਸੇਤਿ.
੨੯੩. ਅਨੁਵਿਚ੍ਚਕਾਰਨ੍ਤਿ ਅਨੁਵਿਦਿਤ੍ਵਾ ਚਿਨ੍ਤੇਤ੍ਵਾ ਤੁਲਯਿਤ੍ਵਾ ਕਾਤਬ੍ਬਂ ਕਰੋਹੀਤਿ ਵੁਤ੍ਤ ਹੋਤਿ. ਸਾਧੁ ਹੋਤੀਤਿ ਸੁਨ੍ਦਰੋ ਹੋਤਿ. ਤੁਮ੍ਹਾਦਿਸਸ੍ਮਿਞ੍ਹਿ ਮਂ ਦਿਸ੍ਵਾ ਮਂ ਸਰਣਂ ਗਚ੍ਛਨ੍ਤੇ ਨਿਗਣ੍ਠਂ ਦਿਸ੍ਵਾ ਨਿਗਣ੍ਠਂ ਸਰਣਂ ਗਚ੍ਛਨ੍ਤੇ ‘‘ਕਿਂ ਅਯਂ ਸੀਹੋ ਦਿਟ੍ਠਦਿਟ੍ਠਮੇਵ ਸਰਣਂ ਗਚ੍ਛਤੀ’’ਤਿ ਗਰਹਾ ਉਪ੍ਪਜ੍ਜਤਿ, ਤਸ੍ਮਾ ਅਨੁਵਿਚ੍ਚਕਾਰੋ ਤੁਮ੍ਹਾਦਿਸਾਨਂ ਸਾਧੂਤਿ ਦਸ੍ਸੇਤਿ. ਪਟਾਕਂ ਪਰਿਹਰੇਯ੍ਯੁਨ੍ਤਿ ਤੇ ਕਿਰ ਏਵਰੂਪਂ ਸਾਵਕਂ ਲਭਿਤ੍ਵਾ ‘‘ਅਸੁਕੋ ਨਾਮ ਰਾਜਾ ਵਾ ਰਾਜਮਹਾਮਤ੍ਤੋ ਵਾ ਸੇਟ੍ਠਿ ਵਾ ਅਮ੍ਹਾਕਂ ਸਰਣਂ ਗਤੋ ਸਾਵਕੋ ਜਾਤੋ’’ਤਿ ਪਟਾਕਂ ਉਕ੍ਖਿਪਿਤ੍ਵਾ ਨਗਰੇ ਘੋਸੇਨ੍ਤਾ ਆਹਿਣ੍ਡਨ੍ਤਿ. ਕਸ੍ਮਾ? ‘‘ਏਵਂ ਨੋ ਮਹਨ੍ਤਭਾਵੋ ਆਵਿ ਭਵਿਸ੍ਸਤੀ’’ਤਿ ਚ, ਸਚੇ ਪਨਸ੍ਸ ‘‘ਕਿਮਹਂ ਏਤੇ ਸਰਣਂ ਗਤੋ’’ਤਿ ਵਿਪ੍ਪਟਿਸਾਰੋ ਉਪ੍ਪਜ੍ਜੇਯ੍ਯ, ਤਮ੍ਪਿ ਸੋ ‘‘ਏਤੇਸਂ ਮੇ ਸਰਣਗਤਭਾਵਂ ਬਹੂ ਜਾਨਨ੍ਤਿ, ਦੁਕ੍ਕਰਂ ਦਾਨਿ ਪਟਿਨਿਵਤ੍ਤਿਤੁ’’ਨ੍ਤਿ ਵਿਨੋਦੇਤ੍ਵਾ ਨ ਪਟਿਕ੍ਕਮਿਸ੍ਸਤੀਤਿ ਚ. ਤੇਨਾਹ ‘‘ਪਟਾਕਂ ਪਰਿਹਰੇਯ੍ਯੁ’’ਨ੍ਤਿ. ਓਪਾਨਭੂਤਨ੍ਤਿ ਪਟਿਯਤ੍ਤਉਦਪਾਨੋ ਵਿਯ ਠਿਤਂ. ਕੁਲਨ੍ਤਿ ਤਵ ਨਿਵੇਸਨਂ. ਦਾਤਬ੍ਬਂ ਮਞ੍ਞੇਯ੍ਯਾਸੀਤਿ ਪੁਬ੍ਬੇਪਿ ਦਸਪਿ ਵੀਸਤਿਪਿ ਸਟ੍ਠਿਪਿ ਜਨੇ ਆਗਤੇ ਦਿਸ੍ਵਾ ਨਤ੍ਥੀਤਿ ਅਵਤ੍ਵਾ ਦੇਸਿ, ਇਦਾਨਿ ਮਂ ਸਰਣਂ ਗਤਕਾਰਣਮਤ੍ਤੇਨੇਵ ਮਾ ਇਮੇਸਂ ਦੇਯ੍ਯਧਮ੍ਮਂ ਉਪਚ੍ਛਿਨ੍ਦਿਤ੍ਥ, ਸਮ੍ਪਤ੍ਤਾਨਞ੍ਹਿ ਦਾਤਬ੍ਬਮੇਵਾਤਿ ਓਵਦਤਿ. ਸੁਤਂ ਮੇ ਤਂ ਭਨ੍ਤੇਤਿ ਕੁਤੋ ਸੁਤਂ? ਨਿਗਣ੍ਠਾਨਂ ਸਨ੍ਤਿਕਾ. ਤੇ ਕਿਰ ਕੁਲਘਰੇਸੁ ਏਵਂ ਪਕਾਸੇਨ੍ਤਿ ‘‘ਮਯਂ ਯਸ੍ਸ ਕਸ੍ਸਚਿ ਸਮ੍ਪਤ੍ਤਸ੍ਸ ਦਾਤਬ੍ਬਨ੍ਤਿ ਵਦਾਮ, ਸਮਣੋ ਪਨ ਗੋਤਮੋ ‘ਮਯ੍ਹਮੇਵ ਦਾਨਂ ਦਾਤਬ੍ਬਂ…ਪੇ… ਨ ਅਞ੍ਞੇਸਂ ਸਾਵਕਾਨਂ ਦਿਨ੍ਨਂ ਮਹਪ੍ਫਲ’ਨ੍ਤਿ ਏਵਂ ਵਦਤੀ’’ਤਿ. ਤਂ ਸਨ੍ਧਾਯ ਅਯਂ ‘‘ਸੁਤਂ ਮੇ ਤ’’ਨ੍ਤਿਆਦਿਮਾਹ.
੨੯੪. ਪਵਤ੍ਤਮਂਸਨ੍ਤਿ ਪਕਤਿਯਾ ਪਵਤ੍ਤਂ ਕਪ੍ਪਿਯਮਂਸਂ, ਮੂਲਂ ਗਹੇਤ੍ਵਾ ਅਨ੍ਤਰਾਪਣੇ ਪਰਿਯੇਸਾਹੀਤਿ ਅਧਿਪ੍ਪਾਯੋ. ਸਮ੍ਬਹੁਲਾ ਨਿਗਣ੍ਠਾਤਿ ਪਞ੍ਚਸਤਮਤ੍ਤਾ ਨਿਗਣ੍ਠਾ. ਥੂਲਂ ਪਸੁਨ੍ਤਿ ਥੂਲਂ ਮਹਾਸਰੀਰਂ ਗੋਕਣ੍ਣਮਹਿਂਸਸੂਕਰਸਙ੍ਖਾਤਂ ਪਸੁਂ. ਉਦ੍ਦਿਸ੍ਸਕਤਨ੍ਤਿ ਅਤ੍ਤਾਨਂ ਉਦ੍ਦਿਸਿਤ੍ਵਾ ਕਤਂ, ਮਾਰਿਤਨ੍ਤਿ ਅਤ੍ਥੋ. ਪਟਿਚ੍ਚਕਮ੍ਮਨ੍ਤਿ ਏਤ੍ਥ ਕਮ੍ਮ-ਸਦ੍ਦੋ ਕਮ੍ਮਸਾਧਨੋ ਅਤੀਤਕਾਲਿਕੋਤਿ ਆਹ ‘‘ਅਤ੍ਤਾਨਂ ਪਟਿਚ੍ਚ ਕਤ’’ਨ੍ਤਿ. ਨਿਮਿਤ੍ਤਕਮ੍ਮਸ੍ਸੇਤਂ ਅਧਿਵਚਨਂ ‘‘ਪਟਿਚ੍ਚ ਕਮ੍ਮਂ ਫੁਸਤੀ’’ਤਿਆਦੀਸੁ (ਜਾ. ੧.੪.੭੫) ਵਿਯ. ਨਿਮਿਤ੍ਤਕਮ੍ਮਸ੍ਸਾਤਿ ਨਿਮਿਤ੍ਤਭਾਵੇਨ ਲਦ੍ਧਬ੍ਬਕਮ੍ਮਸ੍ਸ, ਨ ਕਰਣਕਾਰਾਪਨਵਸੇਨ. ਪਟਿਚ੍ਚਕਮ੍ਮਂ ਏਤ੍ਥ ਅਤ੍ਥੀਤਿ ਮਂਸਂ ਪਟਿਚ੍ਚਕਮ੍ਮਂ ਯਥਾ ‘‘ਬੁਦ੍ਧਂ ਏਤਸ੍ਸ ਅਤ੍ਥੀਤਿ ਬੁਦ੍ਧੋ’’ਤਿ. ਅਥ ਵਾ ਪਟਿਚ੍ਚ ਕਮ੍ਮਂ ਫੁਸਤੀਤਿ ਪਾਠਸੇਸੋ ਦਟ੍ਠਬ੍ਬੋ, ਸ੍ਵਾਯਂ ਏਤਂ ਮਂਸਂ ਪਟਿਚ੍ਚ ਤਂ ਪਾਣਵਧਕਕਮ੍ਮਂ ਫੁਸਤੀਤਿ ਅਤ੍ਥੋ. ਤਞ੍ਹਿ ਅਕੁਸਲਂ ਉਪਡ੍ਢਂ ਦਾਯਕਸ੍ਸ, ਉਪਡ੍ਢਂ ਪਟਿਗ੍ਗਾਹਕਸ੍ਸ ਹੋਤੀਤਿ ਨੇਸਂ ਲਦ੍ਧਿ. ਉਪਕਣ੍ਣਕੇਤਿ ਕਣ੍ਣਮੂਲੇ. ਅਲਨ੍ਤਿ ਪਟਿਕ੍ਖੇਪਵਚਨਂ, ਹੋਤੁ ਕਿਂ ਇਮਿਨਾਤਿ ਅਤ੍ਥੋ. ਨ ਚ ਪਨ ਤੇਤਿ ਏਤੇ ਆਯਸ੍ਮਨ੍ਤਾ ਦੀਘਰਤ੍ਤਂ ਅਵਣ੍ਣਕਾਮਾ ਹੁਤ੍ਵਾ ਅਵਣ੍ਣਂ ਭਾਸਨ੍ਤਾਪਿ ਅਬ੍ਭਾਚਿਕ੍ਖਨ੍ਤਾ ਨ ਜਿਰਿਦਨ੍ਤਿ, ਅਬ੍ਭਕ੍ਖਾਨਸ੍ਸ ਅਨ੍ਤਂ ਨ ਗਚ੍ਛਨ੍ਤੀਤਿ ਅਤ੍ਥੋ. ਅਥ ਵਾ ਲਜ੍ਜਨਤ੍ਥੇ ਇਦਂ ਜਿਰਿਦਨ੍ਤੀਤਿ ਪਦਂ ਦਟ੍ਠਬ੍ਬਂ, ਨ ਲਜ੍ਜਨ੍ਤੀਤਿ ਅਤ੍ਥੋ.
ਸੀਹਸੇਨਾਪਤਿਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.
ਕਪ੍ਪਿਯਭੂਮਿਅਨੁਜਾਨਨਕਥਾਵਣ੍ਣਨਾ
੨੯੫. ਅਭਿਲਾਪਮਤ੍ਤਨ੍ਤਿ ਦੇਸਨਾਮਤ੍ਤਂ. ਆਮਿਸਖਾਦਨਤ੍ਥਾਯਾਤਿ ਤਤ੍ਥ ਤਤ੍ਥ ਛਡ੍ਡਿਤਸ੍ਸ ਆਮਿਸਸ੍ਸ ਖਾਦਨਤ੍ਥਾਯ. ਅਨੁਪ੍ਪਗੇਯੇਵਾਤਿ ਪਾਤੋਯੇਵ. ਓਰਵਸਦ੍ਦਨ੍ਤਿ ਮਹਾਸਦ੍ਦਂ. ਤਂ ਪਨ ਅਵਤ੍ਵਾਪੀਤਿ ਅਨ੍ਧਕਟ੍ਠਕਥਾਯਂਵੁਤ੍ਤਨਯੇਨ ਅਵਤ੍ਵਾਪਿ. ਪਿ-ਸਦ੍ਦੇਨ ਤਥਾ ਵਚਨਮ੍ਪਿ ਅਨੁਜਾਨਾਤਿ. ਅਟ੍ਠਕਥਾਸੁ ਵੁਤ੍ਤਨਯੇਨਾਤਿ ਸੇਸਅਟ੍ਠਕਥਾਸੁ ਵੁਤ੍ਤਨਯੇਨ. ‘‘ਕਪ੍ਪਿਯਕੁਟਿਂ ਕਰੋਮਾ’ਤਿ ਵਾ, ‘ਕਪ੍ਪਿਯਕੁਟੀ’ਤਿ ਵਾ ਵੁਤ੍ਤੇ ਸਾਧਾਰਣਲਕ੍ਖਣ’’ਨ੍ਤਿ ਸਬ੍ਬਅਟ੍ਠਕਥਾਸੁ ਵੁਤ੍ਤਉਸ੍ਸਾਵਨਨ੍ਤਿਕਾਕੁਟਿਕਰਣਲਕ੍ਖਣਂ. ਚਯਨ੍ਤਿ ਅਧਿਟ੍ਠਾਨਂ. ਯਤੋ ਪਟ੍ਠਾਯਾਤਿ ਯਤੋ ਇਟ੍ਠਕਤੋ ਸਿਲਤੋ ਮਤ੍ਤਿਕਾਪਿਣ੍ਡਤੋ ਵਾ ਪਟ੍ਠਾਯ. ਪਠਮਿਟ੍ਠਕਾਦੀਨਂ ਹੇਟ੍ਠਾ ਨ ਵਟ੍ਟਨ੍ਤੀਤਿ ਭਿਤ੍ਤਿਯਾ ਪਠਮਿਟ੍ਠਕਾਦੀਨਂ ਹੇਟ੍ਠਾ ਭੂਮਿਯਂ ਪਤਿਟ੍ਠਾਪਿਯਮਾਨਾ ਇਟ੍ਠਕਾਦਯੋ ਭੂਮਿਗਤਿਕਤ੍ਤਾ ‘‘ਕਪ੍ਪਿਯਕੁਟਿਂ ਕਰੋਮਾ’’ਤਿ ਵਤ੍ਵਾ ਪਤਿਟ੍ਠਾਪੇਤੁਂ ਨ ਵਟ੍ਟਨ੍ਤਿ. ਯਦਿ ਏਵਂ ਭੂਮਿਯਂ ਨਿਖਣਿਤ੍ਵਾ ਪਤਿਟ੍ਠਾਪਿਯਮਾਨਾ ਥਮ੍ਭਾ ਕਸ੍ਮਾ ਤਥਾ ਵਤ੍ਵਾ ਪਤਿਟ੍ਠਾਪੇਤੁਂ ਵਟ੍ਟਨ੍ਤੀਤਿ ਆਹ ‘‘ਥਮ੍ਭਾ ਪਨ…ਪੇ… ਵਟ੍ਟਨ੍ਤੀ’’ਤਿ. ਸਙ੍ਘਸਨ੍ਤਕਮੇਵਾਤਿ ਵਾਸਤ੍ਥਾਯ ਕਤਂ ਸਙ੍ਘਿਕਸੇਨਾਸਨਂ ਸਨ੍ਧਾਯ ਵਦਤਿ. ਭਿਕ੍ਖੁਸਨ੍ਤਕਨ੍ਤਿ ਵਾਸਤ੍ਥਾਯ ਏਵ ਕਤਂ ਭਿਕ੍ਖੁਸ੍ਸ ਪੁਗ੍ਗਲਿਕਸੇਨਾਸਨਂ. ਮੁਖਸਨ੍ਨਿਧੀਤਿ ਇਮਿਨਾ ਅਨ੍ਤੋਵੁਤ੍ਥਦੁਕ੍ਕਟਮੇਵ ਦੀਪਿਤਂ.
ਕਪ੍ਪਿਯਭੂਮਿਅਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.
ਕੇਣਿਯਜਟਿਲਵਤ੍ਥੁਕਥਾਵਣ੍ਣਨਾ
੩੦੦. ਯੇਨ ਆਪਣਂ ਤਦਵਸਰੀਤਿਆਦੀਸੁ ਆਪਣਨ੍ਤਿ ਏਕਸ੍ਸ ਨਿਗਮਸ੍ਸੇਤਂ ਅਧਿਵਚਨਂ. ਤਸ੍ਮਿਂ ਕਿਰ ਨਿਗਮੇ ਵੀਸਤਿ ਆਪਣਮੁਖਸਹਸ੍ਸਾਨਿ ਵਿਭਤ੍ਤਾਨਿ ਅਹੇਸੁਂ. ਇਤਿ ਸੋ ਆਪਣਾਨਂ ਉਸ੍ਸਨ੍ਨਤ੍ਤਾ ‘‘ਆਪਣ’’ਨ੍ਤ੍ਵੇਵ ਸਙ੍ਖਂ ਗਤੋ. ਤਸ੍ਸ ਪਨ ਨਿਗਮਸ੍ਸ ਅਵਿਦੂਰੇ ਨਦੀਤੀਰੇ ਘਨਚ੍ਛਾਯੋ ਰਮਣੀਯਭੂਮਿਭਾਗੋ ਮਹਾਵਨਸਣ੍ਡੋ, ਤਸ੍ਮਿਂ ਭਗਵਾ ਵਿਹਰਤਿ. ਕੇਣਿਯੋਤਿ ਤਸ੍ਸ ਨਾਮਂ. ਜਟਿਲੋਤਿ ਆਹਰਿਮਜਟਾਧਰੋ ਤਾਪਸੋ. ਸੋ ਕਿਰ ਬ੍ਰਾਹ੍ਮਣਮਹਾਸਾਲੋ, ਧਨਰਕ੍ਖਣਤ੍ਥਾਯ ਪਨ ਤਾਪਸਪਬ੍ਬਜ੍ਜਂ ਸਮਾਦਾਯ ਰਞ੍ਞੋ ਪਣ੍ਣਾਕਾਰਂ ਦਤ੍ਵਾ ਭੂਮਿਭਾਗਂ ਗਹੇਤ੍ਵਾ ਤਤ੍ਥ ਅਸ੍ਸਮਂ ਕਾਰੇਤ੍ਵਾ ਪਞ੍ਚਹਿ ਸਕਟਸਤੇਹਿ ਵਣਿਜ੍ਜਂ ਪਯੋਜੇਤ੍ਵਾ ਕੁਲਸਹਸ੍ਸਸ੍ਸ ਨਿਸ੍ਸਯੋ ਹੁਤ੍ਵਾ ਵਸਤਿ. ਅਸ੍ਸਮੇਪਿ ਚਸ੍ਸ ਏਕੋ ਤਾਲਰੁਕ੍ਖੋ ਦਿਵਸੇ ਦਿਵਸੇ ਏਕਂ ਸੋਵਣ੍ਣਮਯਂ ਫਲਂ ਮੁਞ੍ਚਤੀਤਿ ਵਦਨ੍ਤਿ. ਸੋ ਦਿਵਾ ਕਾਸਾਵਾਨਿ ਧਾਰੇਤਿ, ਜਟਾ ਚ ਬਨ੍ਧਤਿ, ਰਤ੍ਤਿਂ ਕਾਮਸਮ੍ਪਤ੍ਤਿਂ ਅਨੁਭਵਤਿ.
ਪਵਤ੍ਤਾਰੋਤਿ (ਦੀ. ਨਿ. ਅਟ੍ਠ. ੧.੨੮੫; ਮ. ਨਿ. ਅਟ੍ਠ. ੨.੪੨੭; ਅ. ਨਿ. ਅਟ੍ਠ. ੩.੫.੧੯੨) ਪਵਤ੍ਤਯਿਤਾਰੋ, ਪਾਵਚਨਵਸੇਨ ਵਤ੍ਤਾਰੋਤਿ ਅਤ੍ਥੋ. ਯੇਸਨ੍ਤਿ ਯੇਸਂ ਸਨ੍ਤਕਂ. ਮਨ੍ਤਪਦਨ੍ਤਿ ਮਨ੍ਤਸਦ੍ਦੇ ਬਹਿਕਤ੍ਵਾ ਰਹੋ ਭਾਸਿਤਬ੍ਬਟ੍ਠੇਨ ਮਨ੍ਤਾ ਏਵ ਤਂਤਂਅਤ੍ਥਪਟਿਪਤ੍ਤਿਹੇਤੁਤਾਯ ਪਦਨ੍ਤਿ ਮਨ੍ਤਪਦਂ, ਵੇਦਵਚਨਂ. ਗੀਤਨ੍ਤਿ ਅਟ੍ਠਕਾਦੀਹਿ ਦਸਹਿ ਪੋਰਾਣਬ੍ਰਾਹ੍ਮਣੇਹਿ ਉਦਾਤ੍ਤਾਨੁਦਾਤ੍ਤਾਦਿਸਰਸਮ੍ਪਤ੍ਤਿਵਸੇਨ ਸਜ੍ਝਾਯਿਤਂ. ਪਵੁਤ੍ਤਨ੍ਤਿ ਪਾਵਚਨਵਸੇਨ ਅਞ੍ਞੇਸਂ ਵੁਤ੍ਤਂ, ਵਾਚਿਤਨ੍ਤਿ ਅਤ੍ਥੋ. ਸਮਿਹਿਤਨ੍ਤਿ ਸਮੁਪਬ੍ਯੂਲ਼੍ਹਂ ਰਾਸਿਕਤਂ, ਇਰੁਵੇਦਯਜੁਵੇਦਸਾਮਵੇਦਾਦਿਵਸੇਨ ਤਤ੍ਥਾਪਿ ਪਚ੍ਚੇਕਂ ਮਨ੍ਤਬ੍ਰਾਹ੍ਮਣਾਦਿਵਸੇਨ ਸਜ੍ਝਾਯਨਵਾਚਕਾਦਿਵਸੇਨ ਚ ਪਿਣ੍ਡਂ ਕਤ੍ਵਾ ਠਪਿਤਨ੍ਤਿ ਅਤ੍ਥੋ. ਤਦਨੁਗਾਯਨ੍ਤੀਤਿ ਏਤਰਹਿ ਬ੍ਰਾਹ੍ਮਣਾ ਤਂ ਤੇਹਿ ਪੁਬ੍ਬੇ ਗੀਤਂ ਅਨੁਗਾਯਨ੍ਤਿ ਅਨੁਸਜ੍ਝਾਯਨ੍ਤਿ. ਤਦਨੁਭਾਸਨ੍ਤੀਤਿ ਤਂ ਅਨੁਭਾਸਨ੍ਤਿ, ਇਦਂ ਪੁਰਿਮਸ੍ਸੇਵ ਵੇਵਚਨਂ. ਭਾਸਿਤਮਨੁਭਾਸਨ੍ਤੀਤਿ ਤੇਹਿ ਭਾਸਿਤਂ ਸਜ੍ਝਾਯਿਤਂ ਅਨੁਸਜ੍ਝਾਯਨ੍ਤਿ. ਵਾਚਿਤਮਨੁਵਾਚੇਨ੍ਤੀਤਿ ਤੇਹਿ ਅਞ੍ਞੇਸਂ ਵਾਚਿਤਂ ਅਨੁਵਾਚੇਨ੍ਤਿ. ਸੇਯ੍ਯਥਿਦਨ੍ਤਿ ਤੇ ਕਤਮੇਤਿ ਅਤ੍ਥੋ. ਅਟ੍ਠਕੋਤਿਆਦੀਨਿ ਤੇਸਂ ਨਾਮਾਨਿ. ਤੇ ਕਿਰ ਦਿਬ੍ਬਚਕ੍ਖੁਪਰਿਭਣ੍ਡੇਨ ਯਥਾਕਮ੍ਮੂਪਗਞਾਣੇਨ ਸਤ੍ਤਾਨਂ ਕਮ੍ਮਸ੍ਸਕਤਾਦਿਂ ਪੁਬ੍ਬੇਨਿਵਾਸਞਾਣੇਨ ਅਤੀਤਕਪ੍ਪੇ ਬ੍ਰਾਹ੍ਮਣਾਨਂ ਮਨ੍ਤਜ੍ਝੇਨਵਿਧਿਞ੍ਚ ਓਲੋਕੇਤ੍ਵਾ ਪਰੂਪਘਾਤਂ ਅਕਤ੍ਵਾ ਕਸ੍ਸਪਸਮ੍ਮਾਸਮ੍ਬੁਦ੍ਧਸ੍ਸ ਭਗਵਤੋ ਵਟ੍ਟਸਨ੍ਨਿਸ੍ਸਿਤੇਨ ਵਚਨੇਨ ਸਹ ਸਂਸਨ੍ਦਿਤ੍ਵਾ ਮਨ੍ਤੇ ਗਨ੍ਥੇਸੁਂ. ਅਪਰਾਪਰੇ ਪਨ ਓਕ੍ਕਾਕਰਾਜਕਾਲਾਦੀਸੁ ਉਪ੍ਪਨ੍ਨਬ੍ਰਾਹ੍ਮਣਾ ਪਾਣਾਤਿਪਾਤਾਦੀਨਿ ਪਕ੍ਖਿਪਿਤ੍ਵਾ ਤਯੋ ਵੇਦੇ ਭਿਨ੍ਦਿਤ੍ਵਾ ਬੁਦ੍ਧਵਚਨੇਨ ਸਦ੍ਧਿਂ ਵਿਰੁਦ੍ਧੇ ਅਕਂਸੁ. ਰਤ੍ਤਿਭੋਜਨਂ ਰਤ੍ਤਿ, ਤਤੋ ਉਪਰਤਾਤਿ ਰਤ੍ਤੂਪਰਤਾ. ਅਤਿਕ੍ਕਨ੍ਤੇ ਮਜ੍ਝਨ੍ਹਿਕੇ ਯਾਵ ਸੂਰਿਯਤ੍ਥਙ੍ਗਮਨਾ ਭੋਜਨਂ ਵਿਕਾਲਭੋਜਨਂ ਨਾਮ, ਤਤੋ ਵਿਰਤਤ੍ਤਾ ਵਿਰਤਾ ਵਿਕਾਲਭੋਜਨਾ. ਪਟਿਯਾਦਾਪੇਤ੍ਵਾਤਿ ਸਪ੍ਪਿਮਧੁਸਕ੍ਕਰਾਦੀਹਿ ਚੇਵ ਮਰਿਚੇਹਿ ਚ ਸੁਸਙ੍ਖਤਂ ਪਾਨਂ ਪਟਿਯਾਦਾਪੇਤ੍ਵਾ.
‘‘ਮਹਾ ਖੋ ਕੇਣਿਯ ਭਿਕ੍ਖੁਸਙ੍ਘੋ’’ਤਿ ਕਸ੍ਮਾ ਭਗਵਾ ਪੁਨਪ੍ਪੁਨਂ ਪਟਿਕ੍ਖਿਪਿ? ਤਿਤ੍ਥਿਯਾਨਂ ਪਟਿਕ੍ਖੇਪਪਸਨ੍ਨਤਾਯ. ਤਿਤ੍ਥਿਯਾ ਹਿ ‘‘ਅਹੋ ਵਤਾਯਂ ਅਪ੍ਪਿਚ੍ਛੋ, ਯੋ ਨਿਮਨ੍ਤਿਯਮਾਨੋਪਿ ਨ ਸਾਦਿਯਤੀ’’ਤਿ ਉਪਨਿਮਨ੍ਤਿਯਮਾਨਸ੍ਸ ਪਟਿਕ੍ਖੇਪੇ ਪਸੀਦਨ੍ਤੀਤਿ ਕੇਚਿ, ਅਕਾਰਣਞ੍ਚੇਤਂ. ਨਤ੍ਥਿ ਬੁਦ੍ਧਾਨਂ ਪਚ੍ਚਯਹੇਤੁ ਏਵਰੂਪਂ ਕੋਹਞ੍ਞਂ, ਅਯਂ ਪਨ ਅਡ੍ਢਤੇਲਸਾਨਿ ਭਿਕ੍ਖੁਸਤਾਨਿ ਦਿਸ੍ਵਾ ਏਤ੍ਤਕਾਨਂਯੇਵ ਭਿਕ੍ਖਂ ਪਟਿਯਾਦੇਸ੍ਸਤਿ, ਸ੍ਵੇਵ ਸੇਲੋ ਬ੍ਰਾਹ੍ਮਣੋ ਤੀਹਿ ਪੁਰਿਸਸਤੇਹਿ ਸਦ੍ਧਿਂ ਪਬ੍ਬਜਿਸ੍ਸਤਿ, ਅਯੁਤ੍ਤਂ ਖੋ ਪਨ ਨਵਕੇ ਅਞ੍ਞਤੋ ਪੇਸੇਤ੍ਵਾ ਇਮੇਹੇਵ ਸਦ੍ਧਿਂ ਗਨ੍ਤੁਂ, ਇਮੇ ਵਾ ਅਞ੍ਞਤੋ ਪੇਸੇਤ੍ਵਾ ਨਵਕੇਹਿ ਸਦ੍ਧਿਂ ਗਨ੍ਤੁਂ. ਅਥਾਪਿ ਸਬ੍ਬੇਵ ਗਹੇਤ੍ਵਾ ਗਮਿਸ੍ਸਾਮਿ, ਭਿਕ੍ਖਾਹਾਰੋ ਨਪ੍ਪਹੋਸ੍ਸਤਿ. ਤਤੋ ਭਿਕ੍ਖੂਸੁ ਪਿਣ੍ਡਾਯ ਚਰਨ੍ਤੇਸੁ ਮਨੁਸ੍ਸਾ ਉਜ੍ਝਾਯਿਸ੍ਸਨ੍ਤਿ ‘‘ਚਿਰਸ੍ਸਮ੍ਪਿ ਕੇਣਿਯੋ ਸਮਣਂ ਗੋਤਮਂ ਨਿਮਨ੍ਤੇਤ੍ਵਾ ਯਾਪਨਮਤ੍ਤਂ ਦਾਤੁਂ ਨਾਸਕ੍ਖੀ’’ਤਿ, ਸਯਞ੍ਚ ਵਿਪ੍ਪਟਿਸਾਰੀ ਭਵਿਸ੍ਸਤਿ. ਪਟਿਕ੍ਖੇਪੇ ਪਨ ਕਤੇ ‘‘ਸਮਣੋ ਗੋਤਮੋ ਪੁਨਪ੍ਪੁਨਂ ‘ਤ੍ਵਞ੍ਚ ਬ੍ਰਾਹ੍ਮਣੇਸੁ ਅਭਿਪ੍ਪਸਨ੍ਨੋ’ਤਿ ਬ੍ਰਾਹ੍ਮਣਾਨਂ ਨਾਮਂ ਗਣ੍ਹਾਤੀ’’ਤਿ ਚਿਨ੍ਤੇਤ੍ਵਾ ਬ੍ਰਾਹ੍ਮਣੇਪਿ ਨਿਮਨ੍ਤੇਤੁਕਾਮੋ ਭਵਿਸ੍ਸਤਿ, ਤਤੋ ਬ੍ਰਾਹ੍ਮਣੇ ਪਾਟਿਯੇਕ੍ਕਂ ਨਿਮਨ੍ਤੇਸ੍ਸਤਿ, ਤੇ ਤੇਨ ਨਿਮਨ੍ਤਿਤਾ ਭਿਕ੍ਖੂ ਹੁਤ੍ਵਾ ਭੁਞ੍ਜਿਸ੍ਸਨ੍ਤਿ, ਏਵਮਸ੍ਸ ਸਦ੍ਧਾ ਅਨੁਰਕ੍ਖਿਤਾ ਭਵਿਸ੍ਸਤੀਤਿ ਪੁਨਪ੍ਪੁਨਂ ਪਟਿਕ੍ਖਿਪਿ. ਕਿਞ੍ਚਾਪਿ ਖੋ ਭੋ ਗੋਤਮਾਤਿ ਇਮਿਨਾ ਇਦਂ ਦੀਪੇਤਿ ‘‘ਭੋ ਗੋਤਮ, ਕਿਂ ਜਾਤਂ, ਯਦਿ ਅਹਂ ਬ੍ਰਾਹ੍ਮਣੇਸੁ ਅਭਿਪ੍ਪਸਨ੍ਨੋ, ਅਧਿਵਾਸੇਤੁ ਭਵਂ ਗੋਤਮੋ, ਅਹਂ ਬ੍ਰਾਹ੍ਮਣਾਨਮ੍ਪਿ ਦਾਤੁਂ ਸਕ੍ਕੋਮਿ ਤੁਮ੍ਹਾਕਮ੍ਪੀ’’ਤਿ. ਠਪੇਤ੍ਵਾ ਧਞ੍ਞਫਲਰਸਨ੍ਤਿ ਏਤ੍ਥ ਤਣ੍ਡੁਲਧੋਵਨੋਦਕਮ੍ਪਿ ਧਞ੍ਞਰਸੋਯੇਵਾਤਿ ਵਦਨ੍ਤਿ. ਅਨੁਜਾਨਾਮਿ, ਭਿਕ੍ਖਵੇ, ਉਚ੍ਛੁਰਸਨ੍ਤਿ ਏਤ੍ਥ ਨਿਕ੍ਕਸਟੋ ਉਚ੍ਛੁਰਸੋ ਸਤ੍ਤਾਹਕਾਲਿਕੋਤਿ ਵੇਦਿਤਬ੍ਬਂ.
ਇਮਾਹਿ ਗਾਥਾਹੀਤਿ (ਮ. ਨਿ. ਅਟ੍ਠ. ੨.੪੦੦) ਇਮਾਹਿ ਕੇਣਿਯਸ੍ਸ ਚਿਤ੍ਤਾਨੁਕੂਲਾਹਿ ਗਾਥਾਹਿ. ਤਤ੍ਥ ਅਗ੍ਗਿਪਰਿਚਰਿਯਂ ਵਿਨਾ ਬ੍ਰਾਹ੍ਮਣਾਨਂ ਯਞ੍ਞਾਭਾਵਤੋ ‘‘ਅਗ੍ਗਿਹੁਤ੍ਤਮੁਖਾ ਯਞ੍ਞਾ’’ਤਿ ਵੁਤ੍ਤਂ, ਅਗ੍ਗਿਹੁਤ੍ਤਸੇਟ੍ਠਾ ਅਗ੍ਗਿਜੁਹਨਪ੍ਪਧਾਨਾਤਿ ਅਤ੍ਥੋ. ਬ੍ਰਾਹ੍ਮਣਾ ਹਿ ‘‘ਅਗ੍ਗਿਮੁਖਾ ਦੇਵਾ’’ਤਿ ਅਗ੍ਗਿਜੁਹਨਪੁਬ੍ਬਕਂ ਯਞ੍ਞਂ ਵਿਦਹਨ੍ਤਿ. ਵੇਦੇ ਸਜ੍ਝਾਯਨ੍ਤੇਹਿ ਪਠਮਂ ਸਜ੍ਝਾਯਿਤਬ੍ਬਤੋ ਸਾਵਿਤ੍ਤੀ ‘‘ਛਨ੍ਦਸੋ ਮੁਖ’’ਨ੍ਤਿ ਵੁਤ੍ਤਾ, ਸਾਵਿਤ੍ਤੀ ਵੇਦਸ੍ਸ ਪੁਬ੍ਬਙ੍ਗਮਾਤਿ ਅਤ੍ਥੋ ਤਂਪੁਬ੍ਬਕਤ੍ਤਾ ਵੇਦਸਵਨਸ੍ਸ. ਮਨੁਸ੍ਸਾਨਂ ਸੇਟ੍ਠਭਾਵਤੋ ਰਾਜਾ ‘‘ਮੁਖ’’ਨ੍ਤਿ ਵੁਤ੍ਤੋ. ਓਗਾਹਨ੍ਤੀਨਂ ਨਦੀਨਂ ਆਧਾਰਭਾਵਤੋ ਗਨ੍ਤਬ੍ਬਟ੍ਠਾਨਭਾਵੇਨ ਪਟਿਸਰਣਤੋ ਚ ਸਾਗਰੋ ‘‘ਮੁਖ’’ਨ੍ਤਿ ਵੁਤ੍ਤੋ. ਚਨ੍ਦਸਮਾਯੋਗੇਨ ‘‘ਅਜ੍ਜ ਕਤ੍ਤਿਕਾ, ਅਜ੍ਜ ਰੋਹਿਣੀ’’ਤਿ ਸਞ੍ਞਾਯਨਤੋ ਨਕ੍ਖਤ੍ਤਾਨਿ ਅਭਿਭਵਿਤ੍ਵਾ ਆਲੋਕਕਰਣਤੋ ਨਕ੍ਖਤ੍ਤੇਹਿ ਅਤਿਵਿਸੇਸਸੋਮ੍ਮਭਾਵਤੋ ਚ ‘‘ਨਕ੍ਖਤ੍ਤਾਨਂ ਮੁਖਂ ਚਨ੍ਦੋ’’ਤਿ ਵੁਤ੍ਤਂ. ‘‘ਦੀਪਸਿਖਾ ਅਗ੍ਗਿਜਾਲਾ ਅਸਨਿਵਿਚਕ੍ਕ’’ਨ੍ਤਿ ਏਵਮਾਦੀਨਂ ਤਪਨ੍ਤਾਨਂ ਵਿਜ੍ਜੁਲਤਾਨਂ ਅਗ੍ਗਤ੍ਤਾ ਆਦਿਚ੍ਚੋ ‘‘ਤਪਤਂ ਮੁਖ’’ਨ੍ਤਿ ਵੁਤ੍ਤੋ. ਦਕ੍ਖਿਣੇਯ੍ਯਾਨਂ ਪਨ ਅਗ੍ਗਤ੍ਤਾ ਵਿਸੇਸੇਨ ਤਸ੍ਮਿਂ ਸਮਯੇ ਬੁਦ੍ਧਪ੍ਪਮੁਖਂ ਸਙ੍ਘਂ ਸਨ੍ਧਾਯ ‘‘ਪੁਞ੍ਞਂ ਆਕਙ੍ਖਮਾਨਾਨਂ, ਸਙ੍ਘੋ ਵੇ ਯਜਤਂ ਮੁਖ’’ਨ੍ਤਿ ਵੁਤ੍ਤਂ. ਤੇਨ ਸਙ੍ਘੋ ਪੁਞ੍ਞਸ੍ਸ ਆਯਮੁਖਂ ਅਗ੍ਗਦਕ੍ਖਿਣੇਯ੍ਯਭਾਵੇਨਾਤਿ ਦਸ੍ਸੇਤਿ.
ਕੇਣਿਯਜਟਿਲਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.
ਰੋਜਮਲ੍ਲਵਤ੍ਥੁਕਥਾਵਣ੍ਣਨਾ
੩੦੧. ਰੋਜਵਤ੍ਥੁਮ੍ਹਿ ਵਿਹਾਰੋਤਿ ਗਨ੍ਧਕੁਟਿਂ ਸਨ੍ਧਾਯ ਆਹਂਸੁ. ਅਤਰਮਾਨੋਤਿ ਅਤੁਰਨ੍ਤੋ, ਸਣਿਕਂ ਪਦਪ੍ਪਮਾਣਟ੍ਠਾਨੇ ਪਦਂ ਨਿਕ੍ਖਿਪਨ੍ਤੋ ਵਤ੍ਤਂ ਕਤ੍ਵਾ ਸੁਸਮ੍ਮਟ੍ਠਂ ਮੁਤ੍ਤਾਦਲਸਿਨ੍ਦੁਵਾਰਸਨ੍ਥਰਸਦਿਸਂ ਵਾਲਿਕਂ ਅਵਿਨਾਸੇਨ੍ਤੋਤਿ ਅਤ੍ਥੋ. ਆਲ਼ਿਨ੍ਦਨ੍ਤਿ ਪਮੁਖਂ. ਉਕ੍ਕਾਸਿਤ੍ਵਾਤਿ ਉਕ੍ਕਾਸਿਤਸਦ੍ਦਂ ਕਤ੍ਵਾ. ਅਗ੍ਗਲ਼ਨ੍ਤਿ ਕਵਾਟਂ. ਆਕੋਟੇਹੀਤਿ ਅਗ੍ਗਨਖੇਨ ਈਸਕਂ ਕੁਞ੍ਚਿਕਛਿਦ੍ਦਸਮੀਪੇ ਕੋਟੇਹੀਤਿ ਵੁਤ੍ਤਂ ਹੋਤਿ. ਦ੍ਵਾਰਂ ਕਿਰ ਅਤਿਉਪਰਿ ਅਮਨੁਸ੍ਸਾ, ਅਤਿਹੇਟ੍ਠਾ ਤਿਰਚ੍ਛਾਨਜਾਤਿਕਾ ਕੋਟੇਨ੍ਤਿ, ਤਥਾ ਅਕੋਟੇਤ੍ਵਾ ਮਜ੍ਝੇ ਛਿਦ੍ਦਸਮੀਪੇ ਮਨੁਸ੍ਸਾ ਕੋਟੇਨ੍ਤਿ, ਇਦਂ ਦ੍ਵਾਰਕੋਟਕਵਤ੍ਤਨ੍ਤਿ ਦੀਪੇਨ੍ਤਾ ਵਦਨ੍ਤਿ. ਵਿਵਰਿ ਭਗਵਾ ਦ੍ਵਾਰਨ੍ਤਿ ਨ ਭਗਵਾ ਉਟ੍ਠਾਯ ਦ੍ਵਾਰਂ ਵਿਵਰਿ, ਵਿਵਰਤੂਤਿ ਪਨ ਹਤ੍ਥਂ ਪਸਾਰੇਸਿ. ਤਤੋ ‘‘ਭਗਵਾ ਤੁਮ੍ਹੇਹਿ ਅਨੇਕਾਸੁ ਕਪ੍ਪਕੋਟੀਸੁ ਦਾਨਂ ਦਦਮਾਨੇਹਿ ਨ ਸਹਤ੍ਥਾ ਦ੍ਵਾਰਵਿਵਰਣਕਮ੍ਮਂ ਕਤ’’ਨ੍ਤਿ ਸਯਮੇਵ ਦ੍ਵਾਰਂ ਵਿਵਟਂ. ਤਂ ਪਨ ਯਸ੍ਮਾ ਭਗਵਤੋ ਮਨੇਨ ਵਿਵਟਂ, ਤਸ੍ਮਾ ‘‘ਵਿਵਰਿ ਭਗਵਾ ਦ੍ਵਾਰ’’ਨ੍ਤਿ ਵੁਤ੍ਤਂ.
ਰੋਜਮਲ੍ਲਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.
ਵੁਡ੍ਢਪਬ੍ਬਜਿਤਵਤ੍ਥੁਕਥਾਵਣ੍ਣਨਾ
੩੦੩. ਆਤੁਮਾਵਤ੍ਥੁਮ੍ਹਿ ਅਞ੍ਞਤਰੋ ਵੁਡ੍ਢਪਬ੍ਬਜਿਤੋਤਿ ਸੁਭਦ੍ਦੋ ਨਾਮ ਅਞ੍ਞਤਰੋ ਭਿਕ੍ਖੁ ਵੁਡ੍ਢਕਾਲੇ ਪਬ੍ਬਜਿਤਤ੍ਤਾ ‘‘ਵੁਡ੍ਢਪਬ੍ਬਜਿਤੋ’’ਤਿ ਵੁਤ੍ਤੋ. ਦ੍ਵੇ ਦਾਰਕਾਤਿ ਸਾਮਣੇਰਭੂਮਿਯਂ ਠਿਤਾ ਦ੍ਵੇ ਪੁਤ੍ਤਾ. ਨਾਲ਼ਿਯਾਵਾਪਕੇਨਾਤਿ ਨਾਲ਼ਿਯਾ ਚੇਵ ਥਵਿਕਾਯ ਚ. ਸਂਹਰਿਂਸੂਤਿ ਯਸ੍ਮਾ ਮਨੁਸ੍ਸਾ ਤੇ ਦਾਰਕੇ ਮਞ੍ਜੁਭਾਣਿਨੇ ਪਟਿਭਾਨਵਨ੍ਤੇ ਦਿਸ੍ਵਾ ਕਾਰੇਤੁਕਾਮਾਪਿ ਅਕਾਰੇਤੁਕਾਮਾਪਿ ਕਾਰੇਨ੍ਤਿਯੇਵ, ਕਤਕਾਲੇ ਚ ‘‘ਕਿਂ ਗਣ੍ਹਿਸ੍ਸਥ ਤਾਤਾ’’ਤਿ ਪੁਚ੍ਛਨ੍ਤਿ. ਤੇ ਵਦਨ੍ਤਿ ‘‘ਨ ਅਮ੍ਹਾਕਂ ਅਞ੍ਞੇਨ ਕੇਨਚਿ ਅਤ੍ਥੋ, ਪਿਤਾ ਪਨ ਨੋ ਭਗਵਤੋ ਆਗਤਕਾਲੇ ਯਾਗੁਦਾਨਂ ਕਾਤੁਕਾਮੋ’’ਤਿ. ਤਂ ਸੁਤ੍ਵਾ ਮਨੁਸ੍ਸਾ ਅਪਰਿਗਣੇਤ੍ਵਾਵ ਯਂ ਤੇ ਸਕ੍ਕੋਨ੍ਤਿ ਹਰਿਤੁਂ, ਸਬ੍ਬਂ ਦੇਨ੍ਤਿ. ਯਮ੍ਪਿ ਨ ਸਕ੍ਕੋਨ੍ਤਿ, ਮਨੁਸ੍ਸੇਹਿ ਪੇਸੇਨ੍ਤਿ. ਤਸ੍ਮਾ ਤੇ ਦਾਰਕਾ ਬਹੁਂ ਲੋਣਮ੍ਪਿ ਤੇਲਮ੍ਪਿ ਸਪ੍ਪਿਮ੍ਪਿ ਤਣ੍ਡੁਲਮ੍ਪਿ ਖਾਦਨੀਯਮ੍ਪਿ ਸਂਹਰਿਂਸੁ.
ਆਤੁਮਾਯਂ ਵਿਹਰਤੀਤਿ ਆਤੁਮਂ ਨਿਸ੍ਸਾਯ ਵਿਹਰਤਿ. ਭੁਸਾਗਾਰੇਤਿ ਭੁਸਮਯੇ ਅਗਾਰਕੇ. ਤਤ੍ਥ ਕਿਰ ਮਹਨ੍ਤਂ ਪਲਾਲਪੁਞ੍ਜਂ ਅਬ੍ਭਨ੍ਤਰਤੋ ਪਲਾਲਂ ਨਿਕ੍ਕਡ੍ਢਿਤ੍ਵਾ ਸਾਲਾਸਦਿਸਂ ਪਬ੍ਬਜਿਤਾਨਂ ਵਸਨਯੋਗ੍ਗਟ੍ਠਾਨਸਦਿਸਂ ਕਤਂ, ਤਦਾ ਭਗਵਾ ਤਤ੍ਥ ਵਸਿ. ਅਥ ਭਗਵਤਿ ਆਤੁਮਂ ਆਗਨ੍ਤ੍ਵਾ ਭੁਸਾਗਾਰਕਂ ਪਵਿਟ੍ਠੇ ਸੁਭਦ੍ਦੋ ਸਾਯਨ੍ਹਸਮਯਂ ਗਾਮਦ੍ਵਾਰਂ ਗਨ੍ਤ੍ਵਾ ਮਨੁਸ੍ਸੇ ਆਮਨ੍ਤੇਸਿ ‘‘ਉਪਾਸਕਾ ਨਾਹਂ ਤੁਮ੍ਹਾਕਂ ਸਨ੍ਤਿਕਾ ਅਞ੍ਞਂ ਕਿਞ੍ਚਿ ਪਚ੍ਚਾਸੀਸਾਮਿ, ਮਯ੍ਹਂ ਦਾਰਕੇਹਿ ਆਨੀਤਤੇਲਾਦੀਨਿਯੇਵ ਸਙ੍ਘਸ੍ਸ ਪਹੋਨ੍ਤਿ, ਹਤ੍ਥਕਮ੍ਮਮਤ੍ਤਂ ਮੇ ਦੇਥਾ’’ਤਿ. ਕਿਂ, ਭਨ੍ਤੇ, ਕਰੋਮਾਤਿ? ‘‘ਇਦਞ੍ਚਿਦਞ੍ਚ ਗਣ੍ਹਥਾ’’ਤਿ ਸਬ੍ਬੂਪਕਰਣਾਨਿ ਗਾਹੇਤ੍ਵਾ ਵਿਹਾਰੇ ਉਦ੍ਧਨਾਨਿ ਕਾਰੇਤ੍ਵਾ ਏਕਂ ਕਾਲ਼ਕਂ ਕਾਸਾਵਂ ਨਿਵਾਸੇਤ੍ਵਾ ਤਾਦਿਸਮੇਵ ਪਾਰੁਪਿਤ੍ਵਾ ‘‘ਇਦਂ ਕਰੋਥ, ਇਦਂ ਕਰੋਥਾ’’ਤਿ ਸਬ੍ਬਰਤ੍ਤਿਂ ਵਿਚਾਰੇਨ੍ਤੋ ਸਤਸਹਸ੍ਸਂ ਵਿਸ੍ਸਜ੍ਜੇਤ੍ਵਾ ਭੋਜ੍ਜਯਾਗੁਞ੍ਚ ਮਧੁਗੋਲ਼ਕਞ੍ਚ ਪਟਿਯਾਦਾਪੇਸਿ. ਭੋਜ੍ਜਯਾਗੁ ਨਾਮ ਪਠਮਂ ਭੁਞ੍ਜਿਤ੍ਵਾ ਪਾਤਬ੍ਬਯਾਗੁ, ਤਤ੍ਥ ਸਪ੍ਪਿਮਧੁਫਾਣਿਤਮਚ੍ਛਮਂਸਪੁਪ੍ਫਫਲਰਸਾਦਿ ਯਂਕਿਞ੍ਚਿ ਖਾਦਨੀਯਂ ਨਾਮ, ਸਬ੍ਬਂ ਪਵਿਸਤਿ, ਕੀਲ਼ਿਤੁਕਾਮਾਨਂ ਸੀਸਮਕ੍ਖਨਯੋਗ੍ਗਾ ਹੋਤਿ ਸੁਗਨ੍ਧਗਨ੍ਧਾ.
ਅਥ ਭਗਵਾ ਕਾਲਸ੍ਸੇਵ ਸਰੀਰਪਟਿਜਗ੍ਗਨਂ ਕਤ੍ਵਾ ਭਿਕ੍ਖੁਸਙ੍ਘਪਰਿਵੁਤੋ ਪਿਣ੍ਡਾਯ ਚਰਿਤੁਂ ਆਤੁਮਗਾਮਨਗਰਾਭਿਮੁਖੋ ਪਾਯਾਸਿ. ਮਨੁਸ੍ਸਾ ਤਸ੍ਸ ਆਰੋਚੇਸੁਂ ‘‘ਭਗਵਾ ਪਿਣ੍ਡਾਯ ਗਾਮਂ ਪਵਿਸਤਿ, ਤਯਾ ਕਸ੍ਸ ਯਾਗੁ ਪਟਿਯਾਦਿਤਾ’’ਤਿ. ਸੋ ਯਥਾਨਿਵਤ੍ਥਪਾਰੁਤੇਹੇਵ ਤੇਹਿ ਕਾਲ਼ਕਕਾਸਾਵੇਹਿ ਏਕੇਨ ਹਤ੍ਥੇਨ ਦਬ੍ਬਿਞ੍ਚ ਕਟਚ੍ਛੁਞ੍ਚ ਗਹੇਤ੍ਵਾ ਬ੍ਰਹ੍ਮਾ ਵਿਯ ਦਕ੍ਖਿਣਜਾਣੁਮਣ੍ਡਲਂ ਭੂਮਿਯਂ ਪਤਿਟ੍ਠਾਪੇਤ੍ਵਾ ਵਨ੍ਦਿਤ੍ਵਾ ‘‘ਪਟਿਗ੍ਗਣ੍ਹਾਤੁ ਮੇ, ਭਨ੍ਤੇ, ਭਗਵਾ ਯਾਗੁ’’ਨ੍ਤਿ ਆਹ. ਤੇਨ ਵੁਤ੍ਤਂ ‘‘ਅਥ ਖੋ ਸੋ ਵੁਡ੍ਢਪਬ੍ਬਜਿਤੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਬਹੁਤਰਂ ਯਾਗੁਂ ਪਟਿਯਾਦਾਪੇਤ੍ਵਾ ਭਗਵਤੋ ਉਪਨਾਮੇਸੀ’’ਤਿ. ਜਾਨਨ੍ਤਾਪਿ ਤਥਾਗਤਾ ਪੁਚ੍ਛਨ੍ਤੀਤਿਆਦਿ ਵੁਤ੍ਤਨਯਮੇਵ. ਕੁਤਾਯਨ੍ਤਿ ਕੁਤੋ ਅਯਂ. ਸੇਸਮੇਤ੍ਥ ਉਤ੍ਤਾਨਮੇਵ.
੩੦੪. ਦਸਭਾਗਂ ਦਤ੍ਵਾਤਿ ਦਸਮਭਾਗਂ ਦਤ੍ਵਾ. ਤੇਨੇਵਾਹ ‘‘ਦਸ ਕੋਟ੍ਠਾਸੇ ਕਤ੍ਵਾ ਏਕੋ ਕੋਟ੍ਠਾਸੋ ਭੂਮਿਸਾਮਿਕਾਨਂ ਦਾਤਬ੍ਬੋ’’ਤਿ.
ਵੁਡ੍ਢਪਬ੍ਬਜਿਤਵਤ੍ਥੁਕਥਾਵਣ੍ਣਨਾ ਨਿਟ੍ਠਿਤਾ.
ਚਤੁਮਹਾਪਦੇਸਕਥਾਵਣ੍ਣਨਾ
੩੦੫. ਪਰਿਮਦ੍ਦਨ੍ਤਾਤਿ ਉਪਪਰਿਕ੍ਖਨ੍ਤਾ. ਪਤ੍ਤੁਣ੍ਣਦੇਸੇ ਸਞ੍ਜਾਤਵਤ੍ਥਂ ਪਤ੍ਤੁਣ੍ਣਂ. ਕੋਸੇਯ੍ਯਵਿਸੇਸੋਤਿ ਹਿ ਅਭਿਧਾਨਕੋਸੇ ਵੁਤ੍ਤਂ. ਚੀਨਦੇਸੇ ਸੋਮਾਰਦੇਸੇ ਚ ਸਞ੍ਜਾਤਵਤ੍ਥਾਨਿ ਚੀਨਸੋਮਾਰਪਟਾਨਿ. ਪਤ੍ਤੁਣ੍ਣਾਦੀਨਿ ਤੀਣਿ ਕੋਸੇਯ੍ਯਸ੍ਸ ਅਨੁਲੋਮਾਨਿ ਪਾਣਕੇਹਿ ਕਤਸੁਤ੍ਤਮਯਤ੍ਤਾ. ਇਦ੍ਧਿਮਯਿਕਂ ਏਹਿਭਿਕ੍ਖੂਨਂ ਪੁਞ੍ਞਿਦ੍ਧਿਯਾ ਨਿਬ੍ਬਤ੍ਤਚੀਵਰਂ. ਤਂ ਖੋਮਾਦੀਨਂ ਅਞ੍ਞਤਰਂ ਹੋਤੀਤਿ ਤੇਸਂਯੇਵ ਅਨੁਲੋਮਂ. ਦੇਵਤਾਹਿ ਦਿਨ੍ਨਚੀਵਰਂ ਦੇਵਦਤ੍ਤਿਯਂ. ਤਂ ਕਪ੍ਪਰੁਕ੍ਖੇ ਨਿਬ੍ਬਤ੍ਤਂ ਜਾਲਿਨੀਦੇਵਕਞ੍ਞਾਯ ਅਨੁਰੁਦ੍ਧਤ੍ਥੇਰਸ੍ਸ ਦਿਨ੍ਨਵਤ੍ਥਸਦਿਸਂ. ਤਮ੍ਪਿ ਖੋਮਾਦੀਨਞ੍ਞੇਵ ਅਨੁਲੋਮਂ ਹੋਤਿ ਤੇਸੁ ਅਞ੍ਞਤਰਭਾਵਤੋ. ਦ੍ਵੇ ਪਟਾ ਦੇਸਨਾਮੇਨੇਵ ਵੁਤ੍ਤਾਤਿ ਤੇਸਂ ਸਰੂਪਦਸ੍ਸਨਪਰਮੇਤਂ, ਨਾਞ੍ਞਂ ਨਿਵਤ੍ਤਨਪਰਂ ਪਤ੍ਤੁਣ੍ਣਪਟਸ੍ਸਪਿ ਦੇਸਨਾਮੇਨੇਵ ਵੁਤ੍ਤਤ੍ਤਾ. ਤੁਮ੍ਬਾਤਿ ਭਾਜਨਾਨਿ. ਫਲਤੁਮ੍ਬੋਤਿ ਲਾਬੁਆਦਿ. ਉਦਕਤੁਮ੍ਬੋਤਿ ਉਦਕੁਕ੍ਖਿਪਨਕਕੁਟਕੋ. ਕਿਲਞ੍ਜਚ੍ਛਤ੍ਤਨ੍ਤਿ ਵੇਲ਼ੁਵਿਲੀਵੇਹਿ ਵਾਯਿਤ੍ਵਾ ਕਤਛਤ੍ਤਂ. ਸਮ੍ਭਿਨ੍ਨਰਸਨ੍ਤਿ ਸਮ੍ਮਿਸ੍ਸਿਤਰਸਂ. ਪਾਨਕਂ ਪਟਿਗ੍ਗਹਿਤਂ ਹੋਤੀਤਿ ਅਮ੍ਬਪਾਨਾਦਿਪਾਨਕਂ ਪਟਿਗ੍ਗਹਿਤਂ ਹੋਤਿ, ਤਂ ਵਿਕਾਲੇਪਿ ਕਪ੍ਪਤਿ ਅਸਮ੍ਭਿਨ੍ਨਰਸਤ੍ਤਾ. ਤੇਨ ਤਦਹੁਪਟਿਗ੍ਗਹਿਤੇਨ ਸਦ੍ਧਿਨ੍ਤਿ ਤੇਨ ਸਤ੍ਤਾਹਕਾਲਿਕੇਨ ਤਦਹੁਪਟਿਗ੍ਗਹਿਤੇਨ ਸਦ੍ਧਿਂ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.
ਚਤੁਮਹਾਪਦੇਸਕਥਾਵਣ੍ਣਨਾ ਨਿਟ੍ਠਿਤਾ.
ਭੇਸਜ੍ਜਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.