੭. ਕਥਿਨਕ੍ਖਨ੍ਧਕਂ

ਕਥਿਨਾਨੁਜਾਨਨਕਥਾਵਣ੍ਣਨਾ

੩੦੬. ਕਥਿਨਕ੍ਖਨ੍ਧਕੇ ਸੀਸਵਸੇਨਾਤਿ ਪਧਾਨਙ੍ਗਵਸੇਨ. ‘‘ਕਥਿਨਨ੍ਤਿ ਪਞ੍ਚਾਨਿਸਂਸੇ ਅਨ੍ਤੋਕਰਣਸਮਤ੍ਥਤਾਯ ਥਿਰਨ੍ਤਿ ਅਤ੍ਥੋ’’ਤਿ ਗਣ੍ਠਿਪਦੇਸੁ ਵੁਤ੍ਤਂ. ‘‘ਸੋ ਨੇਸਂ ਭਵਿਸ੍ਸਤੀ’’ਤਿ ਯੁਜ੍ਜਤੀਤਿ ‘‘ਸੋ ਤੁਮ੍ਹਾਕ’’ਨ੍ਤਿ ਅਵਤ੍ਵਾ ‘‘ਨੇਸ’’ਨ੍ਤਿ ਵਚਨਂ ਯੁਜ੍ਜਤਿ. ਯੇ ਅਤ੍ਥਤਕਥਿਨਾਤਿ ਨ ਕੇਵਲਂ ਤੁਮ੍ਹਾਕਮੇਵ, ਯੇ ਅਞ੍ਞੇਪਿ ਅਤ੍ਥਤਕਥਿਨਾ, ਤੇਸਮ੍ਪਿ ਭਵਿਸ੍ਸਤੀਤਿ ਅਤ੍ਥੋ. ਅਨਾਮਨ੍ਤੇਤ੍ਵਾ ਚਰਣਨ੍ਤਿ ਚਾਰਿਤ੍ਤਸਿਕ੍ਖਾਪਦੇ ਵੁਤ੍ਤਨਯੇਨ ਅਨਾਪੁਚ੍ਛਿਤ੍ਵਾ ਕੁਲੇਸੁ ਚਰਣਂ. ਮਤਕਚੀਵਰਨ੍ਤਿ ਮਤਸ੍ਸ ਸਨ੍ਤਕਂ ਚੀਵਰਂ. ਤਤ੍ਰੁਪ੍ਪਾਦੇਨ ਆਭਤਨ੍ਤਿ ਵਿਹਾਰਸਨ੍ਤਕੇਨ ਖੇਤ੍ਤਵਤ੍ਥੁਆਦਿਨਾ ਆਨੀਤਂ.

ਪਠਮਪਵਾਰਣਾਯ ਪਵਾਰਿਤਾਤਿ ਇਦਂ ਵਸ੍ਸਚ੍ਛੇਦਂ ਅਕਤ੍ਵਾ ਵਸ੍ਸਂਵੁਤ੍ਥਭਾਵਸਨ੍ਦਸ੍ਸਨਤ੍ਥਂ ਵੁਤ੍ਤਂ ਅਨ੍ਤਰਾਯੇਨ ਅਪ੍ਪਵਾਰਿਤਾਨਮ੍ਪਿ ਵੁਤ੍ਥਵਸ੍ਸਾਨਂ ਕਥਿਨਤ੍ਥਾਰਸਮ੍ਭਵਤੋ. ਤੇਨੇਵ ‘‘ਅਪ੍ਪਵਾਰਿਤਾ ਵਾ’’ਤਿ ਅਵਤ੍ਵਾ ‘‘ਛਿਨ੍ਨਵਸ੍ਸਾ ਵਾ ਪਚ੍ਛਿਮਿਕਾਯ ਉਪਗਤਾ ਵਾ ਨ ਲਭਨ੍ਤੀ’’ਤਿ ਏਤ੍ਤਕਮੇਵ ਵੁਤ੍ਤਂ. ਅਞ੍ਞਸ੍ਮਿਂ ਵਿਹਾਰੇ ਵੁਤ੍ਥਵਸ੍ਸਾਪਿ ਨ ਲਭਨ੍ਤੀਤਿ ਨਾਨਾਸੀਮਾਯ ਅਞ੍ਞਸ੍ਮਿਂ ਵਿਹਾਰੇ ਵੁਤ੍ਥਵਸ੍ਸਾ ਇਮਸ੍ਮਿਂ ਵਿਹਾਰੇ ਕਥਿਨਤ੍ਥਾਰਂ ਨ ਲਭਨ੍ਤੀਤਿ ਅਤ੍ਥੋ. ਖਲਿਮਕ੍ਖਿਤਸਾਟਕੋਤਿ ਅਹਤਵਤ੍ਥਂ ਸਨ੍ਧਾਯ ਵੁਤ੍ਤਂ. ਦਾਨਕਮ੍ਮਵਾਚਾਤਿ ਕਥਿਨਦੁਸ੍ਸਦਾਨਕਮ੍ਮਵਾਚਾ. ਅਕਾਤੁਂ ਨ ਲਬ੍ਭਤੀਤਿ ਇਮਿਨਾ ਅਨਾਦਰਿਯੇਨ ਅਕਰੋਨ੍ਤਸ੍ਸ ਦੁਕ੍ਕਟਨ੍ਤਿ ਦੀਪੇਤਿ. ਕਮ੍ਮਵਾਚਾ ਪਨ ਏਕਾਯੇਵ ਵਟ੍ਟਤੀਤਿ ਕਥਿਨਤ੍ਥਾਰਸਾਟਕਸ੍ਸ ਦਾਨਕਾਲੇ ਵੁਤ੍ਤਾ ਏਕਾਯੇਵ ਕਮ੍ਮਵਾਚਾ ਵਟ੍ਟਤਿ. ਪੁਨ ਤਸ੍ਸ ਅਞ੍ਞਸ੍ਮਿਂ ਵਤ੍ਥੇ ਦਿਯ੍ਯਮਾਨੇ ਕਮ੍ਮਵਾਚਾਯ ਦਾਤਬ੍ਬਕਿਚ੍ਚਂ ਨਤ੍ਥਿ, ਅਪਲੋਕਨਮੇਵ ਅਲਨ੍ਤਿ ਅਧਿਪ੍ਪਾਯੋ.

੩੦੮. ਮਹਾਭੂਮਿਕਨ੍ਤਿ ਮਹਾਵਿਸਯਂ, ਚਤੁਵੀਸਤਿਆਕਾਰਵਨ੍ਤਤਾਯ ਮਹਾਵਿਤ੍ਥਾਰਿਕਨ੍ਤਿ ਵੁਤ੍ਤਂ ਹੋਤਿ. ਪਞ੍ਚਕਨ੍ਤਿ ਪਞ੍ਚਖਣ੍ਡਂ. ਏਸ ਨਯੋ ਸੇਸੇਸੁਪਿ. ਪਠਮਚਿਮਿਲਿਕਾਤਿ ਕਥਿਨਵਤ੍ਥਤੋ ਅਞ੍ਞਾ ਅਤ੍ਤਨੋ ਪਕਤਿਚਿਮਿਲਿਕਾ. ‘‘ਕੁਚ੍ਛਿਚਿਮਿਲਿਕਂ ਕਤ੍ਵਾ ਸਿਬ੍ਬਿਤਮਤ੍ਤੇਨਾਤਿ ਥਿਰਜਿਣ੍ਣਾਨਂ ਚਿਮਿਲਿਕਾਨਂ ਏਕਤੋ ਕਤ੍ਵਾ ਸਿਬ੍ਬਨਸ੍ਸੇਤਂ ਅਧਿਵਚਨ’’ਨ੍ਤਿ ਗਣ੍ਠਿਪਦੇਸੁ ਵੁਤ੍ਤਂ. ਮਹਾਪਚ੍ਚਰਿਯਂ ਕੁਰੁਨ੍ਦਿਯਞ੍ਚ ‘‘ਵੁਤ੍ਤਵਚਨਨਿਦਸ੍ਸਨਂ ਬ੍ਯਞ੍ਜਨੇ ਏਵ ਭੇਦੋ, ਅਤ੍ਥੇ ਨਤ੍ਥੀਤਿ ਦਸ੍ਸਨਤ੍ਥਂ ਕਤ’’ਨ੍ਤਿ ਵਦਨ੍ਤਿ. ਪਿਟ੍ਠਿਅਨੁਵਾਤਾਰੋਪਨਮਤ੍ਤੇਨਾਤਿ ਦੀਘਤੋ ਅਨੁਵਾਤਸ੍ਸ ਆਰੋਪਨਮਤ੍ਤੇਨ. ਕੁਚ੍ਛਿਅਨੁਵਾਤਾਰੋਪਨਮਤ੍ਤੇਨਾਤਿ ਪੁਥੁਲਤੋ ਅਨੁਵਾਤਸ੍ਸ ਆਰੋਪਨਮਤ੍ਤੇਨ. ਸਾਰੁਪ੍ਪਂ ਹੋਤੀਤਿ ਸਮਣਸਾਰੁਪ੍ਪਂ ਹੋਤਿ. ਰਤ੍ਤਿਨਿਸ੍ਸਗ੍ਗਿਯੇਨਾਤਿ ਰਤ੍ਤਿਅਤਿਕ੍ਕਨ੍ਤੇਨ.

ਕਥਿਨਾਨੁਜਾਨਨਕਥਾਵਣ੍ਣਨਾ ਨਿਟ੍ਠਿਤਾ.

ਆਦਾਯਸਤ੍ਤਕਾਦਿਕਥਾਵਣ੍ਣਨਾ

੩੧੧. ਅਯਨ੍ਤਿ ਆਸਾਵਚ੍ਛੇਦਿਕੋ ਕਥਿਨੁਦ੍ਧਾਰੋ. ਇਧ ਨ ਵੁਤ੍ਤੋਤਿ ਪਾਲ਼ਿਯਂ ਮਾਤਿਕਾਪਦਭਾਜਨੇ ਸਵਨਨ੍ਤਿਕਾਨਨ੍ਤਰਂ ਨ ਵੁਤ੍ਤੋ. ਤਤ੍ਥਾਤਿ ਤਸ੍ਮਿਂ ਸੀਮਾਤਿਕ੍ਕਨ੍ਤਿਕੇ ਕਥਿਨੁਦ੍ਧਾਰੇ. ‘‘ਸੀਮਾਤਿਕ੍ਕਨ੍ਤਿਕੋ ਨਾਮ ਚੀਵਰਕਾਲਸੀਮਾਤਿਕ੍ਕਨ੍ਤਿਕੋ’’ਤਿ ਕੇਨਚਿ ਵੁਤ੍ਤਂ. ‘‘ਬਹਿਸੀਮਾਯਂ ਚੀਵਰਕਾਲਸਮਯਸ੍ਸ ਅਤਿਕ੍ਕਨ੍ਤਤ੍ਤਾ ਸੀਮਾਤਿਕ੍ਕਨ੍ਤਿਕੋ’’ਤਿ ਅਯਂ ਅਮ੍ਹਾਕਂ ਖਨ੍ਤਿ. ਸਹੁਬ੍ਭਾਰੇ ‘‘ਸੋ ਕਤਚੀਵਰੋ’’ਤਿ ਪਾਠੋ ਦਿਸ੍ਸਤਿ, ਏਵਞ੍ਚ ਸਤਿ ਚੀਵਰਪਲਿਬੋਧੋ ਪਠਮਂ ਛਿਜ੍ਜਤੀਤਿ ਵਿਞ੍ਞਾਯਤਿ, ਇਧ ਪਨ ਪਰਿਵਾਰਪਾਲ਼ਿਯਞ੍ਚ ‘‘ਦ੍ਵੇ ਪਲਿਬੋਧਾ ਅਪੁਬ੍ਬਂ ਅਚਰਿਮਂ ਛਿਜ੍ਜਨ੍ਤੀ’’ਤਿ (ਪਰਿ. ੪੧੫) ਵਚਨਤੋ ਤਂ ਨ ਸਮੇਤਿ, ਤਸ੍ਮਾ ਵੀਮਂਸਿਤਬ੍ਬਮੇਤ੍ਥ ਕਾਰਣਂ.

੩੧੨. ‘‘ਸਮਾਦਾਯਵਾਰੋ ਆਦਾਯਵਾਰਸਦਿਸੋ, ਉਪਸਗ੍ਗਮਤ੍ਤਮੇਤ੍ਥ ਵਿਸੇਸੋ’’ਤਿ ਗਣ੍ਠਿਪਦੇਸੁ ਵੁਤ੍ਤਂ. ਕੇਚਿ ਪਨ ‘‘ਸਬ੍ਬਂ ਅਤ੍ਤਨੋ ਪਰਿਕ੍ਖਾਰਂ ਅਨਵਸੇਸੇਤ੍ਵਾ ਪਕ੍ਕਮਨ੍ਤੋ ‘ਸਮਾਦਾਯ ਪਕ੍ਕਮਤੀ’ਤਿ ਵੁਚ੍ਚਤੀ’’ਤਿ ਵਦਨ੍ਤਿ. ਪੁਨ ਸਮਾਦਾਯਵਾਰੇਪਿ ਤੇਯੇਵ ਦਸ੍ਸਿਤਾਤਿ ਸਮ੍ਬਨ੍ਧੋ. ਵਿਪ੍ਪਕਤਚੀਵਰੇ ਪਕ੍ਕਮਨਨ੍ਤਿਕਸ੍ਸ ਕਥਿਨੁਦ੍ਧਾਰਸ੍ਸ ਅਸਮ੍ਭਵਤੋ ‘‘ਯਥਾਸਮ੍ਭਵ’’ਨ੍ਤਿ ਵੁਤ੍ਤਂ. ਪਕ੍ਕਮਨਨ੍ਤਿਕੋ ਹਿ ਕਥਿਨੁਦ੍ਧਾਰੋ ਨਿਟ੍ਠਿਤਚੀਵਰਸ੍ਸੇਵ ਵਸੇਨ ਵੁਤ੍ਤੋ ‘‘ਭਿਕ੍ਖੁ ਅਤ੍ਥਤਕਥਿਨੋ ਕਤਚੀਵਰਂ ਆਦਾਯ ਪਕ੍ਕਮਤੀ’’ਤਿ ਵੁਤ੍ਤਤ੍ਤਾ, ਤਸ੍ਮਾ ਸੋ ਵਿਪ੍ਪਕਤਚੀਵਰੋ ਨ ਸਮ੍ਭਵਤੀਤਿ ਛਲ਼ੇਵ ਉਬ੍ਭਾਰਾ ਤਤ੍ਥ ਦਸ੍ਸਿਤਾ.

ਤਤ੍ਰਾਯਂ ਆਦਿਤੋ ਪਟ੍ਠਾਯ ਵਾਰਵਿਭਾਵਨਾ – ਆਦਾਯਵਾਰਾ ਸਤ੍ਤ, ਤਥਾ ਸਮਾਦਾਯਵਾਰਾਤਿ ਦ੍ਵੇ ਸਤ੍ਤਕਵਾਰਾ, ਤਤੋ ਪਕ੍ਕਮਨਨ੍ਤਿਕਂ ਵਜ੍ਜੇਤ੍ਵਾ ਵਿਪ੍ਪਕਤਚੀਵਰਸ੍ਸ ਆਦਾਯਸਮਾਦਾਯਵਾਰਵਸੇਨ ਦ੍ਵੇ ਛਕ੍ਕਵਾਰਾ, ਤਤੋ ਪਰਂ ਨਿਟ੍ਠਾਨਸਨ੍ਨਿਟ੍ਠਾਨਨਾਸਨਨ੍ਤਿਕਾਨਂ ਵਸੇਨ ਤੀਣਿ ਤਿਕਾਨਿ ਦਸ੍ਸਿਤਾਨਿ. ਤਤ੍ਥ ਪਠਮਤ੍ਤਿਕਂ ਅਨ੍ਤੋਸੀਮਾਯਂ ‘‘ਪਚ੍ਚੇਸ੍ਸਂ ਨ ਪਚ੍ਚੇਸ੍ਸ’’ਨ੍ਤਿ ਇਮਂ ਵਿਧਿਂ ਅਨਾਮਸਿਤ੍ਵਾ ਬਹਿਸੀਮਾਯਮੇਵ ‘‘ਨ ਪਚ੍ਚੇਸ੍ਸ’’ਨ੍ਤਿ ਪਵਤ੍ਤਂ, ਤਸ੍ਮਾ ਪਕ੍ਕਮਨਨ੍ਤਿਕਸੀਮਾਤਿਕ੍ਕਨ੍ਤਿਕਸਉਬ੍ਭਾਰਾ ਤਤ੍ਥ ਨ ਯੁਜ੍ਜਨ੍ਤਿ. ਦੁਤਿਯਤ੍ਤਿਕਂ ਅਨ੍ਤੋਸੀਮਾਯਂ ‘‘ਨ ਪਚ੍ਚੇਸ੍ਸ’’ਨ੍ਤਿ ਪਵਤ੍ਤਂ. ਤਤਿਯਤ੍ਤਿਕਂ ਅਨਧਿਟ੍ਠਿਤ-ਪਦੇਨ ਵਿਸੇਸੇਤ੍ਵਾ ਪਵਤ੍ਤਂ, ਅਤ੍ਥਤੋ ਪਠਮਤ੍ਤਿਕੇਨ ਸਮੇਤਿ. ਅਨਧਿਟ੍ਠਿਤੇਨਾਤਿ ਚ ‘‘ਪਚ੍ਚੇਸ੍ਸਂ ਨ ਪਚ੍ਚੇਸ੍ਸ’’ਨ੍ਤਿ ਏਵਂ ਅਨਧਿਟ੍ਠਿਤੇਨ, ਅਨਿਯਮਿਤੇਨਾਤਿ ਅਤ੍ਥੋ. ਤਤਿਯਤ੍ਤਿਕਾਨਨ੍ਤਰਂ ਚਤੁਤ੍ਥਤ੍ਤਿਕਂ ਸਮ੍ਭਵਨ੍ਤਂ ਅਨ੍ਤੋਸੀਮਾਯਂ ‘‘ਪਚ੍ਚੇਸ੍ਸ’’ਨ੍ਤਿ ਵਚਨਵਿਸੇਸੇਨ ਸਮ੍ਭਵਤਿ. ਤਥਾ ਚ ਯੋਜਿਯਮਾਨਂ ਇਤਰੇਹਿ ਸਵਨਨ੍ਤਿਕਾਦੀਹਿ ਅਵਿਰੁਦ੍ਧਂ ਹੋਤੀਤਿ ਚਤੁਤ੍ਥਤ੍ਤਿਕਂ ਅਹੁਤ੍ਵਾ ਛਕ੍ਕਂ ਜਾਤਨ੍ਤਿ ਵੇਦਿਤਬ੍ਬਂ. ਏਵਂ ਤੀਣਿ ਤਿਕਾਨਿ ਏਕਂ ਛਕ੍ਕਞ੍ਚਾਤਿ ਪਠਮਂ ਪਨ੍ਨਰਸਕਂ ਵੇਦਿਤਬ੍ਬਂ.

੩੧੬-੩੨੦. ਤਤੋ ਇਦਮੇਵ ਪਨ੍ਨਰਸਕਂ ਉਪਸਗ੍ਗਵਿਸੇਸੇਨ ਦੁਤਿਯਂ ਸਮਾਦਾਯਪਨ੍ਨਰਸਕਂ ਨਾਮ ਕਤਂ. ਪੁਨ ‘‘ਵਿਪ੍ਪਕਤਚੀਵਰਂ ਆਦਾਯਾ’’ਤਿ ਤਤਿਯਂ ਪਨ੍ਨਰਸਕਂ, ‘‘ਸਮਾਦਾਯਾ’’ਤਿ ਚਤੁਤ੍ਥਂ ਪਨ੍ਨਰਸਕਂ ਦਸ੍ਸਿਤਨ੍ਤਿ ਏਵਂ ਚਤ੍ਤਾਰਿ ਪਨ੍ਨਰਸਕਾਨਿ ਵੇਦਿਤਬ੍ਬਾਨਿ. ਤਤ੍ਥ ਪਠਮਦੁਤਿਯੇਸੁ ਪਨ੍ਨਰਸਕੇਸੁ ਸਬ੍ਬੇਨ ਸਬ੍ਬਂ ਅਕਤਚੀਵਰਂ ਅਧਿਪ੍ਪੇਤਂ, ਇਤਰੇਸੁ ਦ੍ਵੀਸੁ ਵਿਪ੍ਪਕਤਨ੍ਤਿ ਵੇਦਿਤਬ੍ਬਂ. ਤਤੋ ਪਰਂ ‘‘ਚੀਵਰਾਸਾਯ ਪਕ੍ਕਮਤੀ’’ਤਿਆਦਿਨਾ ਨਯੇਨ ਨਿਟ੍ਠਾਨਸਨ੍ਨਿਟ੍ਠਾਨਨਾਸਨਆਸਾਵਚ੍ਛੇਦਿਕਵਸੇਨ ਏਕੋ ਵਾਰੋਤਿ ਇਦਮੇਕਂ ਚਤੁਕ੍ਕਂ ਜਾਤਂ, ਤਸ੍ਮਾ ਪੁਬ੍ਬੇ ਵੁਤ੍ਤਾਨਿ ਤਿਕਾਨਿ ਆਸਾਵਚ੍ਛੇਦਿਕਾਨਿ ਤੀਣਿ ਚ ਤਿਕਾਨੀਤਿ ਏਤਂ ਅਨਾਸਾਯਦ੍ਵਾਦਸਕਨ੍ਤਿ ਵੇਦਿਤਬ੍ਬਂ. ਤਦਨਨ੍ਤਰੇ ਆਸਾਯਦ੍ਵਾਦਸਕੇ ਕਿਞ੍ਚਾਪਿ ਪਠਮਂ ਦ੍ਵਾਦਸਕਂ ਲਬ੍ਭਤਿ, ਤਥਾਪਿ ਤਂ ਨਿਬ੍ਬਿਸੇਸਨ੍ਤਿ ਤਮੇਕਂ ਦ੍ਵਾਦਸਕਂ ਅਵੁਤ੍ਤਸਿਦ੍ਧਂ ਕਤ੍ਵਾ ਵਿਸੇਸਤੋ ਦਸ੍ਸੇਤੁਂ ਆਦਿਤੋ ਪਟ੍ਠਾਯ ‘‘ਅਨ੍ਤੋਸੀਮਾਯਂ ਪਚ੍ਚੇਸ੍ਸ’’ਨ੍ਤਿ ਵੁਤ੍ਤਂ. ਤਂ ਦੁਤਿਯਚਤੁਕ੍ਕੇ ‘‘ਸੋ ਬਹਿਸੀਮਗਤੋ ਸੁਣਾਤੀ’’ਤਿਆਦਿਵਚਨਸ੍ਸ ਤਤਿਯਚਤੁਕ੍ਕੇ ਸਵਨਨ੍ਤਿਕਾਦੀਨਞ੍ਚ ਓਕਾਸਕਰਣਤ੍ਥਨ੍ਤਿ ਵੇਦਿਤਬ੍ਬਂ. ਇਦਂ ਪਨ ਦ੍ਵਾਦਸਕਂ ਅਨਾਸਾਯਵਸੇਨਪਿ ਲਬ੍ਭਮਾਨਂ ਇਮਿਨਾ ਅਵੁਤ੍ਤਸਿਦ੍ਧਂ ਕਤ੍ਵਾ ਨ ਦਸ੍ਸਿਤਨ੍ਤਿ ਵੇਦਿਤਬ੍ਬਂ. ਏਵਮੇਤ੍ਥ ਦ੍ਵੇ ਦ੍ਵਾਦਸਕਾਨਿ ਉਦ੍ਧਰਿਤਬ੍ਬਾਨਿ. ਕਰਣੀਯਦ੍ਵਾਦਸਕੇਪਿ ਯਥਾਦਸ੍ਸਿਤਂ ਅਨਾਸਾਯਦ੍ਵਾਦਸਕਂ ਅਵੁਤ੍ਤਸਿਦ੍ਧਂ ਆਸਾਯਦ੍ਵਾਦਸਕਞ੍ਚਾਤਿ ਦ੍ਵੇ ਦ੍ਵਾਦਸਕਾਨਿ ਉਦ੍ਧਰਿਤਬ੍ਬਾਨਿ.

੩੨੧-੩੨੨. ਯਸ੍ਮਾ ਦਿਸਂਗਮਿਕਨਵਕੇ ‘‘ਦਿਸਂਗਮਿਕੋ ਪਕ੍ਕਮਤੀ’’ਤਿ ਵਚਨੇਨੇਵ ‘‘ਨ ਪਚ੍ਚੇਸ੍ਸ’’ਨ੍ਤਿ ਇਦਂ ਅਵੁਤ੍ਤਸਿਦ੍ਧਮੇਵ, ਤਸ੍ਮਾ ਤਂ ਨ ਵੁਤ੍ਤਂ. ਏਤ੍ਤਾਵਤਾ ਚ ਆਵਾਸਪਲਿਬੋਧਾਭਾਵੋ ਦਸ੍ਸਿਤੋ. ਚੀਵਰਪਟਿਵੀਸਂ ਅਪਵਿਲਾਯਮਾਨੋਤਿ ਇਮਿਨਾ ਚੀਵਰਪਲਿਬੋਧਸਮਙ੍ਗਿਤਮਸ੍ਸ ਦਸ੍ਸੇਤਿ. ਤਤ੍ਥ ਚੀਵਰਪਟਿਵੀਸਨ੍ਤਿ ਅਤ੍ਤਨੋ ਪਤ੍ਤਬ੍ਬਚੀਵਰਭਾਗਂ. ਅਪਵਿਲਾਯਮਾਨੋਤਿ ਆਕਙ੍ਖਮਾਨੋ. ਤਸ੍ਸ ਚੀਵਰਲਾਭੇ ਸਤਿ ਵਸ੍ਸਂਵੁਤ੍ਥਾਵਾਸੇ ਨਿਟ੍ਠਾਨਸਨ੍ਨਿਟ੍ਠਾਨਨਾਸਨਨ੍ਤਿਕਾਨਂ ਵਸੇਨ ਏਕਂ ਤਿਕਂ, ਤੇਸਂਯੇਵ ਵਸੇਨ ਅਨ੍ਤਰਾਮਗ੍ਗੇ ਏਕਂ, ਗਤਟ੍ਠਾਨੇ ਏਕਨ੍ਤਿ ਤਿਣ੍ਣਂ ਤਿਕਾਨਂ ਵਸੇਨ ਏਕਂ ਨਵਕਂ ਵੇਦਿਤਬ੍ਬਂ.

੩੨੪. ਤਤੋ ਪਰਂ ਨਿਟ੍ਠਾਨਸਨ੍ਨਿਟ੍ਠਾਨਨਾਸਨਨ੍ਤਿਕਸੀਮਾਤਿਕ੍ਕਨ੍ਤਿਕਸਉਬ੍ਭਾਰਾਨਂ ਵਸੇਨ ਫਾਸੁਵਿਹਾਰਪਞ੍ਚਕਂ ਵੁਤ੍ਤਂ. ਸੇਸਮੇਤ੍ਥ ਪਾਲ਼ਿਤੋ ਅਟ੍ਠਕਥਾਤੋ ਚ ਸੁਵਿਞ੍ਞੇਯ੍ਯਮੇਵ.

ਆਦਾਯਸਤ੍ਤਕਾਦਿਕਥਾਵਣ੍ਣਨਾ ਨਿਟ੍ਠਿਤਾ.

ਕਥਿਨਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.