੪. ਪਵਾਰਣਕ੍ਖਨ੍ਧਕਂ

ਅਫਾਸੁਕਵਿਹਾਰਕਥਾਵਣ੍ਣਨਾ

੨੦੯. ਪਵਾਰਣਕ੍ਖਨ੍ਧਕੇ ਆਦਿਤੋ ਲਾਪੋ ਆਲਾਪੋ, ਵਚਨਪਟਿਵਚਨਵਸੇਨ ਸਮਂ ਲਾਪੋ ਸਲ੍ਲਾਪੋ. ਪਿਣ੍ਡਾਯ ਪਟਿਕ੍ਕਮੇਯ੍ਯਾਤਿ ਗਾਮੇ ਪਿਣ੍ਡਾਯ ਚਰਿਤ੍ਵਾ ਪਚ੍ਚਾਗਚ੍ਛੇਯ੍ਯ. ਅਵਕ੍ਕਾਰਪਾਤਿਂ ਧੋਵਿਤ੍ਵਾ ਉਪਟ੍ਠਾਪੇਯ੍ਯਾਤਿ ਅਤਿਰੇਕਪਿਣ੍ਡਪਾਤਂ ਅਪਨੇਤ੍ਵਾ ਠਪਨਤ੍ਥਾਯ ਏਕਂ ਸਮੁਗ੍ਗਪਾਤਿਂ ਧੋਵਿਤ੍ਵਾ ਠਪੇਯ੍ਯ. ਸਮੁਗ੍ਗਪਾਤਿ ਨਾਮ ਸਮੁਗ੍ਗਪੁਟਸਦਿਸਾ ਪਾਤਿ. ਅਪ੍ਪਹਰਿਤੇਤਿ ਅਪਰੂਲ਼੍ਹਹਰਿਤੇ, ਯਸ੍ਮਿਂ ਠਾਨੇ ਪਿਣ੍ਡਪਾਤਜ੍ਝੋਤ੍ਥਰਣੇਨ ਵਿਨਸ੍ਸਨਧਮ੍ਮਾਨਿ ਤਿਣਾਨਿ ਨਤ੍ਥਿ, ਤਸ੍ਮਿਨ੍ਤਿ ਅਤ੍ਥੋ. ਤੇਨ ਨਿਤ੍ਤਿਣਞ੍ਚ ਮਹਾਤਿਣਗਹਨਞ੍ਚ ਯਤ੍ਥ ਸਕਟੇਨਪਿ ਛਡ੍ਡਿਤੇ ਪਿਣ੍ਡਪਾਤੇ ਤਿਣਾਨਿ ਨ ਵਿਨਸ੍ਸਨ੍ਤਿ, ਤਞ੍ਚ ਠਾਨਂ ਪਰਿਗ੍ਗਹਿਤਂ ਹੋਤਿ. ਭੂਤਗਾਮਸਿਕ੍ਖਾਪਦਸ੍ਸ ਹਿ ਅਵਿਕੋਪਨਤ੍ਥਮੇਤਂ ਵੁਤ੍ਤਂ. ਅਪ੍ਪਾਣਕੇਤਿ ਨਿਪ੍ਪਾਣਕੇ, ਪਿਣ੍ਡਪਾਤਜ੍ਝੋਤ੍ਥਰਣੇਨ ਮਰਿਤਬ੍ਬਪਾਣਕਰਹਿਤੇ ਵਾ ਮਹਾਉਦਕਕ੍ਖਨ੍ਧੇ. ਪਰਿਤ੍ਤੋਦਕੇ ਏਵ ਹਿ ਭਤ੍ਤਪਕ੍ਖੇਪੇਨ ਆਲੁਲ਼ਿਤੇ ਸੁਖੁਮਪਾਣਕਾ ਮਰਨ੍ਤਿ, ਨ ਮਹਾਤਲ਼ਾਕਾਦੀਸੂਤਿ. ਪਾਣਕਾਨੁਰਕ੍ਖਣਤ੍ਥਞ੍ਹਿ ਏਤਂ ਵੁਤ੍ਤਂ. ਓਪਿਲਾਪੇਯ੍ਯਾਤਿ ਨਿਮੁਜ੍ਜਾਪੇਯ੍ਯ.

ਵਚ੍ਚਘਟਨ੍ਤਿ ਆਚਮਨਕੁਮ੍ਭੀ. ਰਿਤ੍ਤਨ੍ਤਿ ਰਿਤ੍ਤਕਂ. ਤੁਚ੍ਛਨ੍ਤਿ ਤਸ੍ਸੇਵ ਵੇਵਚਨਂ. ਅਵਿਸਯ੍ਹਨ੍ਤਿ ਉਕ੍ਖਿਪਿਤੁਂ ਅਸਕ੍ਕੁਣੇਯ੍ਯਂ ਅਤਿਭਾਰਿਕਂ. ਹਤ੍ਥਵਿਕਾਰੇਨਾਤਿ ਹਤ੍ਥਸਞ੍ਞਾਯ. ਹਤ੍ਥੇਹਿ ਉਕ੍ਖਿਪਨਂ ਹਤ੍ਥਵਿਲਙ੍ਘਨਂ. ਤੇਨਾਹ ‘‘ਹਤ੍ਥੁਕ੍ਖੇਪਕੇਨਾ’’ਤਿ. ਅਥ ਵਾ ਵਿਲਙ੍ਘੇਤਿ ਦੇਸਨ੍ਤਰਂ ਪਾਪੇਤਿ ਏਤੇਨਾਤਿ ਵਿਲਙ੍ਘਕੋ, ਹਤ੍ਥੋ ਏਵ ਵਿਲਙ੍ਘਕੋ ਹਤ੍ਥਵਿਲਙ੍ਘਕੋ, ਤੇਨ ਹਤ੍ਥਵਿਲਙ੍ਘਕੇਨ, ਅਞ੍ਞਮਞ੍ਞਂ ਸਂਸਿਬ੍ਬਿਤਹਤ੍ਥੇਨਾਤਿ ਵੁਤ੍ਤਂ ਹੋਤਿ. ਦ੍ਵੇ ਹਿ ਜਨਾ ਹਤ੍ਥੇਨ ਹਤ੍ਥਂ ਸਂਸਿਬ੍ਬੇਤ੍ਵਾ ਦ੍ਵੀਸੁ ਹਤ੍ਥੇਸੁ ਠਪੇਤ੍ਵਾ ਉਟ੍ਠਪੇਨ੍ਤਾ ਹਤ੍ਥਵਿਲਙ੍ਘਕੇਨ ਉਟ੍ਠਪੇਨ੍ਤਿ ਨਾਮ. ਤਿਤ੍ਥਿਯਸਮਾਦਾਨਨ੍ਤਿ ਤਿਤ੍ਥਿਯੇਹਿ ਸਮਾਦਾਤਬ੍ਬਂ.

ਅਫਾਸੁਕਵਿਹਾਰਕਥਾਵਣ੍ਣਨਾ ਨਿਟ੍ਠਿਤਾ.

ਪਵਾਰਣਾਭੇਦਕਥਾਵਣ੍ਣਨਾ

੨੧੨. ਦ੍ਵੇਮਾ, ਭਿਕ੍ਖਵੇ, ਪਵਾਰਣਾ ਚਾਤੁਦ੍ਦਸਿਕਾ ਚ ਪਨ੍ਨਰਸਿਕਾ ਚਾਤਿ ਏਤ੍ਥ ਪੁਰਿਮਵਸ੍ਸਂਵੁਤ੍ਥਾਨਂ ਪੁਬ੍ਬਕਤ੍ਤਿਕਪੁਣ੍ਣਮਾ, ਤੇਸਂਯੇਵ ਸਚੇ ਭਣ੍ਡਨਕਾਰਕੇਹਿ ਉਪਦ੍ਦੁਤਾ ਪਵਾਰਣਂ ਪਚ੍ਚੁਕ੍ਕਡ੍ਢਨ੍ਤਿ, ਅਥ ਕਤ੍ਤਿਕਮਾਸਸ੍ਸ ਕਾਲ਼ਪਕ੍ਖਚਾਤੁਦ੍ਦਸੋ ਵਾ ਪਚ੍ਛਿਮਕਤ੍ਤਿਕਪੁਣ੍ਣਮਾ ਵਾ, ਪਚ੍ਛਿਮਵਸ੍ਸਂਵੁਤ੍ਥਾਨਞ੍ਚ ਪਚ੍ਛਿਮਕਤ੍ਤਿਕਪੁਣ੍ਣਮਾ ਏਵ ਵਾਤਿ ਇਮੇ ਤਯੋ ਪਵਾਰਣਦਿਵਸਾਤਿ ਵੇਦਿਤਬ੍ਬਾ. ਇਦਞ੍ਚ ਪਕਤਿਚਾਰਿਤ੍ਤਵਸੇਨ ਵੁਤ੍ਤਂ, ਤਥਾਰੂਪਪਚ੍ਚਯੇ ਪਨ ਸਤਿ ਦ੍ਵਿਨ੍ਨਂ ਕਤ੍ਤਿਕਪੁਣ੍ਣਮਾਨਂ ਪੁਰਿਮੇਸੁ ਚਾਤੁਦ੍ਦਸੇਸੁਪਿ ਪਵਾਰਣਂ ਕਾਤੁਂ ਵਟ੍ਟਤਿ, ਤੇਨੇਵ ਮਹਾਵਿਹਾਰੇ ਭਿਕ੍ਖੂ ਚਾਤੁਦ੍ਦਸਿਯਾ ਪਵਾਰੇਤ੍ਵਾ ਪਨ੍ਨਰਸਿਯਾ ਕਾਯਸਾਮਗ੍ਗਿਂ ਦੇਨ੍ਤਿ, ਚੇਤਿਯਗਿਰਿਮਹਦਸ੍ਸਨਤ੍ਥਮ੍ਪਿ ਅਟ੍ਠਮਿਯਾ ਗਚ੍ਛਨ੍ਤਿ, ਤਮ੍ਪਿ ਚਾਤੁਦ੍ਦਸਿਯਂ ਪਵਾਰੇਤੁਕਾਮਾਨਞ੍ਞੇਵ ਹੋਤਿ.

ਪਵਾਰਣਾਦਾਨਾਨੁਜਾਨਨਕਥਾਵਣ੍ਣਨਾ

੨੧੩. ਸਚੇ ਪਨ ਵੁਡ੍ਢਤਰੋ ਹੋਤੀਤਿ ਸਚੇ ਪਵਾਰਣਦਾਯਕੋ ਭਿਕ੍ਖੁ ਵੁਡ੍ਢਤਰੋ ਹੋਤਿ. ਤੇਨ ਚ ਭਿਕ੍ਖੁਨਾਤਿ ਪਵਾਰਣਦਾਯਕੇਨ ਭਿਕ੍ਖੁਨਾ.

ਅਨਾਪਤ੍ਤਿਪਨ੍ਨਰਸਕਕਥਾਵਣ੍ਣਨਾ

੨੨੨. ਪਨ੍ਨਰਸਕੇਸੁ ਪਵਾਰਿਤਮਤ੍ਤੇਤਿ ਪਵਾਰਿਤਸਮਨਨ੍ਤਰਂ. ਅਵੁਟ੍ਠਿਤਾਯ ਪਰਿਸਾਯਾਤਿ ਪਵਾਰੇਤ੍ਵਾ ਪਚ੍ਛਾ ਅਞ੍ਞਮਞ੍ਞਂ ਕਥੇਨ੍ਤਿਯਾ. ਏਕਚ੍ਚਾਯ ਵੁਟ੍ਠਿਤਾਯਾਤਿ ਏਕਚ੍ਚੇਸੁ ਯਥਾਨਿਸਿਨ੍ਨੇਸੁ ਏਕਚ੍ਚੇਸੁ ਸਕਸਕਟ੍ਠਾਨਂ ਗਤੇਸੁ. ਪੁਨ ਪਵਾਰਿਤਬ੍ਬਨ੍ਤਿ ਪੁਨਪਿ ਸਬ੍ਬੇਹਿ ਸਮਾਗਨ੍ਤ੍ਵਾ ਪਵਾਰੇਤਬ੍ਬਂ. ਆਗਚ੍ਛਨ੍ਤਿ ਸਮਸਮਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਨ੍ਤਿ ਗਤੇ ਅਨਾਨੇਤ੍ਵਾ ਨਿਸਿਨ੍ਨਾਨਞ੍ਞੇਵ ਸਨ੍ਤਿਕੇ ਪਵਾਰੇਤਬ੍ਬਂ. ਸਬ੍ਬਾਯ ਵੁਟ੍ਠਿਤਾਯ ਪਰਿਸਾਯ ਆਗਚ੍ਛਨ੍ਤਿ ਸਮਸਮਾ, ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਨ੍ਤਿ ਯਦਿ ਸਬ੍ਬੇ ਵੁਟ੍ਠਹਿਤ੍ਵਾ ਗਤਾ ਸਨ੍ਨਿਪਾਤੇਤੁਞ੍ਚ ਨ ਸਕ੍ਕਾ, ਏਕਚ੍ਚੇ ਸਨ੍ਨਿਪਾਤੇਤ੍ਵਾ ਪਵਾਰੇਤੁਂ ਵਟ੍ਟਤਿ, ਞਤ੍ਤਿਂ ਠਪੇਤ੍ਵਾ ਕਤ੍ਤਬ੍ਬਸਙ੍ਘਕਮ੍ਮਾਭਾਵਾ ਵਗ੍ਗਂ ਨ ਹੋਤਿ. ਉਪੋਸਥੇਪਿ ਏਸੇਵ ਨਯੋ.

ਪਵਾਰਣਾਠਪਨਕਥਾਵਣ੍ਣਨਾ

੨੩੭. ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਯਪ੍ਪਵਤ੍ਤਾ ਦਸਵਤ੍ਥੁਕਾ ਮਿਚ੍ਛਾਦਿਟ੍ਠਿ. ‘‘ਹੋਤਿ ਤਥਾਗਤੋ ਪਰਂ ਮਰਣਾ, ਨ ਹੋਤਿ ਤਥਾਗਤੋ ਪਰਂ ਮਰਣਾ’’ਤਿਆਦਿਨਾ ਸਸ੍ਸਤੁਚ੍ਛੇਦਸਙ੍ਖਾਤਂ ਅਨ੍ਤਂ ਗਣ੍ਹਾਤੀਤਿ ਅਨ੍ਤਗ੍ਗਾਹਿਕਾ.

ਭਣ੍ਡਨਕਾਰਕਵਤ੍ਥੁਕਥਾਵਣ੍ਣਨਾ

੨੪੦. ਚਤੁਤ੍ਥੇ ਕਤੇ ਸੁਣਨ੍ਤੀਤਿ ਚਤੁਤ੍ਥੇ ਪਨ੍ਨਰਸਿਕੁਪੋਸਥੇ ਕਤੇ ਅਮ੍ਹਾਕਂ ਪਵਾਰਣਂ ਠਪੇਸ੍ਸਨ੍ਤੀਤਿ ਸੁਣਨ੍ਤਿ. ਏਵਮ੍ਪਿ ਦ੍ਵੇ ਚਾਤੁਦ੍ਦਸਿਕਾ ਹੋਨ੍ਤੀਤਿ ਤਤਿਯੇਨ ਸਦ੍ਧਿਂ ਦ੍ਵੇ ਚਾਤੁਦ੍ਦਸਿਕਾ ਹੋਨ੍ਤਿ.

ਪਵਾਰਣਾਸਙ੍ਗਹਕਥਾਵਣ੍ਣਨਾ

੨੪੧. ਅਯਂ ਪਵਾਰਣਾਸਙ੍ਗਹੋ ਏਕਸ੍ਸ ਦਿਨ੍ਨੋਪਿ ਸਬ੍ਬੇਸਂ ਦਿਨ੍ਨੋਵ ਹੋਤੀਤਿ ਆਹ ‘‘ਏਕਸ੍ਸਪਿ ਵਸੇਨ ਦਾਤਬ੍ਬੋ’’ਤਿ. ਆਗਨ੍ਤੁਕਾ ਤੇਸਂ ਸੇਨਾਸਨਂ ਗਹੇਤੁਂ ਨ ਲਭਨ੍ਤੀਤਿ ਸਚੇਪਿ ਸਟ੍ਠਿਵਸ੍ਸਭਿਕ੍ਖੂ ਆਗਚ੍ਛਨ੍ਤਿ, ਤੇਸਂ ਸੇਨਾਸਨਂ ਗਹੇਤੁਂ ਨ ਲਭਨ੍ਤਿ. ਪਵਾਰੇਤ੍ਵਾ ਪਨ ਅਨ੍ਤਰਾਪਿ ਚਾਰਿਕਂ ਪਕ੍ਕਮਿਤੁਂ ਲਭਨ੍ਤੀਤਿ ਪਵਾਰਣਾਸਙ੍ਗਹੇ ਕਤੇ ਅਨ੍ਤਰਾ ਪਕ੍ਕਮਿਤੁਕਾਮਾ ਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਪਵਾਰੇਤੁਂ ਲਭਨ੍ਤਿ. ਸੇਸਮੇਤ੍ਥ ਪਾਲ਼ਿਤੋ ਅਟ੍ਠਕਥਾਤੋ ਚ ਸੁਵਿਞ੍ਞੇਯ੍ਯਮੇਵ.

ਪਵਾਰਣਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.