੭. ਮਹਾਨਾਮਸਿਕ੍ਖਾਪਦਵਣ੍ਣਨਾ

੩੦੩. ਸਤ੍ਤਮੇ ਮਹਾਨਾਮੋ ਨਾਮਾਤਿ ਅਨੁਰੁਦ੍ਧਤ੍ਥੇਰਸ੍ਸ ਭਾਤਾ ਭਗਵਤੋ ਚੂਲ਼ਪਿਤੁ ਪੁਤ੍ਤੋ. ਸੁਦ੍ਧੋਦਨੋ ਸਕ੍ਕੋਦਨੋ ਸੁਕ੍ਕੋਦਨੋ ਧੋਤੋਦਨੋ ਅਮਿਤੋਦਨੋਤਿ ਇਮੇ ਹਿ ਪਞ੍ਚ ਜਨਾ ਭਾਤਰੋ. ਅਮਿਤਾ ਨਾਮ ਦੇਵੀ ਤੇਸਂ ਭਗਿਨੀ, ਤਿਸ੍ਸਤ੍ਥੇਰੋ ਤਸ੍ਸਾ ਪੁਤ੍ਤੋ. ਤਥਾਗਤੋ ਚ ਨਨ੍ਦਤ੍ਥੇਰੋ ਚ ਸੁਦ੍ਧੋਦਨਸ੍ਸ ਪੁਤ੍ਤਾ, ਮਹਾਨਾਮੋ ਚ ਅਨੁਰੁਦ੍ਧਤ੍ਥੇਰੋ ਚ ਸੁਕ੍ਕੋਦਨਸ੍ਸ, ਆਨਨ੍ਦਤ੍ਥੇਰੋ ਅਮਿਤੋਦਨਸ੍ਸ. ਸੋ ਭਗਵਤੋ ਕਨਿਟ੍ਠੋ, ਮਹਾਨਾਮੋ ਮਹਲ੍ਲਕਤਰੋ ਸਕਦਾਗਾਮੀ ਅਰਿਯਸਾਵਕੋ. ਤੇਨ ਵੁਤ੍ਤਂ ‘‘ਮਹਾਨਾਮੋ ਨਾਮ…ਪੇ… ਅਰਿਯਸਾਵਕੋ’’ਤਿ.

੩੦੫-੩੦੬. ਪਾਲ਼ਿਯਂ ਅਜ੍ਜਣ੍ਹੋਤਿ ਅਜ੍ਜ ਏਕਦਿਵਸਨ੍ਤਿ ਅਤ੍ਥੋ, ‘‘ਅਜ੍ਜਨੋ’’ਤਿ ਵਾ ਅਤ੍ਥੋ ਗਹੇਤਬ੍ਬੋ, ਨੋ ਅਮ੍ਹਾਕਂ. ਕਾਲਂ ਆਹਰਿਸ੍ਸਥਾਤਿ ਸ੍ਵੇ ਹਰਿਸ੍ਸਥ. ਤਤੋ ਚੇ ਉਤ੍ਤਰਿ ਸਾਦਿਯੇਯ੍ਯਾਤਿ ਸਚੇ ਤਤ੍ਥ ਰਤ੍ਤੀਹਿ ਵਾ ਭੇਸਜ੍ਜੇਹਿ ਵਾ ਪਰਿਚ੍ਛੇਦੋ ਕਤੋ ਹੋਤਿ ‘‘ਏਤ੍ਤਕਾਯੇਵ ਵਾ ਰਤ੍ਤਿਯੋ ਏਤ੍ਤਕਾਨਿ ਵਾ ਭੇਸਜ੍ਜਾਨਿ ਵਿਞ੍ਞਾਪੇਤਬ੍ਬਾਨੀ’’ਤਿ, ਤਤੋ ਰਤ੍ਤਿਪਰਿਯਨ੍ਤਤੋ ਵਾ ਭੇਸਜ੍ਜਪਰਿਯਨ੍ਤਤੋ ਵਾ ਉਤ੍ਤਰਿ ਵਿਞ੍ਞਾਪੇਨ੍ਤੋ ਸਾਦਿਯੇਯ੍ਯ. ‘‘ਇਮੇਹਿ ਤਯਾ ਭੇਸਜ੍ਜੇਹਿ ਪਵਾਰਿਤਮ੍ਹ, ਅਮ੍ਹਾਕਞ੍ਚ ਇਮਿਨਾਵ ਭੇਸਜ੍ਜੇਨ ਅਤ੍ਥੋ’’ਤਿ ਆਚਿਕ੍ਖਿਤ੍ਵਾ ਵਿਞ੍ਞਾਪੇਤੁਮ੍ਪਿ ਗਿਲਾਨੋਵ ਲਭਤਿ.

੩੧੦. ਯਸ੍ਮਾ ਸਙ੍ਘਪਵਾਰਣਾਯਮੇਵਾਯਂ ਵਿਧਿ, ਤਸ੍ਮਾ ‘‘ਯੇ ਅਤ੍ਤਨੋ ਪੁਗ੍ਗਲਿਕਾਯ ਪਵਾਰਣਾਯ ਪਵਾਰਿਤਾ’’ਤਿ ਵੁਤ੍ਤਂ. ਸੇਸਂ ਉਤ੍ਤਾਨਮੇਵ. ਸਙ੍ਘਪਵਾਰਣਤਾ, ਭੇਸਜ੍ਜਵਿਞ੍ਞਤ੍ਤਿ, ਅਗਿਲਾਨਤਾ, ਪਰਿਯਨ੍ਤਾਤਿਕ੍ਕਮੋਤਿ ਇਮਾਨਿ ਪਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਮਹਾਨਾਮਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.