੩. ਸਭੋਜਨਸਿਕ੍ਖਾਪਦਵਣ੍ਣਨਾ

੨੮੦. ਤਤਿਯੇ ਪਿਟ੍ਠਸਙ੍ਘਾਟੋਤਿ ਦ੍ਵਾਰਬਾਹਾਯੇਤਂ ਅਧਿਵਚਨਂ. ਖੁਦ੍ਦਕਂ ਨਾਮ ਸਯਨਿਘਰਂ ਵਿਤ੍ਥਾਰਤੋ ਪਞ੍ਚਹਤ੍ਥਪ੍ਪਮਾਣਂ ਹੋਤਿ, ਤਸ੍ਸ ਚ ਮਜ੍ਝਿਮਟ੍ਠਾਨਂ ਪਿਟ੍ਠਸਙ੍ਘਾਟਤੋ ਅਡ੍ਢਤੇਯ੍ਯਹਤ੍ਥਪ੍ਪਮਾਣਮੇਵ ਹੋਤਿ, ਤਸ੍ਮਾ ਤਾਦਿਸੇ ਸਯਨਿਘਰੇ ਪਿਟ੍ਠਸਙ੍ਘਾਟਤੋ ਹਤ੍ਥਪਾਸਂ ਵਿਜਹਿਤ੍ਵਾ ਨਿਸਿਨ੍ਨੋ ਪਿਟ੍ਠਿਵਂਸਂ ਅਤਿਕ੍ਕਮਿਤ੍ਵਾ ਨਿਸਿਨ੍ਨੋ ਨਾਮ ਹੋਤਿ. ਏਵਂ ਨਿਸਿਨ੍ਨੋ ਚ ਮਜ੍ਝਂ ਅਤਿਕ੍ਕਮਿਤ੍ਵਾ ਨਿਸਿਨ੍ਨੋ ਨਾਮ ਹੋਤੀਤਿ ਆਹ ‘‘ਇਮਿਨਾ ਮਜ੍ਝਾਤਿਕ੍ਕਮਂ ਦਸ੍ਸੇਤੀ’’ਤਿ. ਯਥਾ ਵਾ ਤਥਾ ਵਾ ਕਤਸ੍ਸਾਤਿ ਪਿਟ੍ਠਿਵਂਸਂ ਆਰੋਪੇਤ੍ਵਾ ਵਾ ਅਨਾਰੋਪੇਤ੍ਵਾ ਵਾ ਕਤਸ੍ਸ. ਸਚਿਤ੍ਤਕਨ੍ਤਿ ਅਨੁਪਵਿਸਿਤ੍ਵਾ ਨਿਸੀਦਨਚਿਤ੍ਤੇਨ ਸਚਿਤ੍ਤਕਂ. ਸੇਸਮੇਤ੍ਥ ਉਤ੍ਤਾਨਮੇਵ. ਪਰਿਯੁਟ੍ਠਿਤਰਾਗਜਾਯਮ੍ਪਤਿਕਾਨਂ ਸਨ੍ਨਿਹਿਤਤਾ, ਸਯਨਿਘਰਤਾ, ਦੁਤਿਯਸ੍ਸ ਭਿਕ੍ਖੁਨੋ ਅਭਾਵੋ, ਅਨੁਪਖਜ੍ਜ ਨਿਸੀਦਨਨ੍ਤਿ ਇਮਾਨਿ ਪਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਸਭੋਜਨਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨੮੪-੨੮੯. ਚਤੁਤ੍ਥਪਞ੍ਚਮੇਸੁ ਨਤ੍ਥਿ ਕਿਞ੍ਚਿ ਵਤ੍ਤਬ੍ਬਂ.