ਭਿਕ੍ਖੁਨੀਵਿਭਙ੍ਗੋ

੧੭੦. ਭਿਕ੍ਖੂਨਂ ਪਾਟਵਤ੍ਥਾਯ, ਵਿਨਯਸ੍ਸ ਵਿਨਿਚ੍ਛਯੇ;

ਭਿਕ੍ਖੁਨੀਨਂ ਵਿਭਙ੍ਗੋਪਿ, ਕਿਞ੍ਚਿਮਤ੍ਤਂ ਭਣਾਮਹਂ.

੧੭੧. ਅਵਸ੍ਸੁਤਸ੍ਸ ਪੋਸਸ੍ਸ, ਭਿਕ੍ਖੁਨੀਪਿ ਅਵਸ੍ਸੁਤਾ;

ਨਨ੍ਦਨ੍ਤੀ ਕਾਯਸਂਸਗ੍ਗਂ, ਕਤਿ ਆਪਤ੍ਤਿਯੋ ਫੁਸੇ;

੧੭੨. ਤਿਸ੍ਸੋ ਆਪਤ੍ਤਿਯੋ ਉਬ੍ਭ-ਜਾਣੁਸ੍ਸਾਧਕ੍ਖਕਸ੍ਸ ਚ;

ਹੋਤਿ ਪਾਰਾਜਿਕਂ ਤਸ੍ਸਾ, ਗਹਣਂ ਸਾਦਿਯਨ੍ਤਿਯਾ.

੧੭੩. ਉਬ੍ਭਕ੍ਖਕਂ ਅਧੋਜਾਣੁ-ਗਹਣਂ ਸਾਦਿਯਨ੍ਤਿਯਾ;

ਥੁਲ੍ਲਚ੍ਚਯਂ ਸਿਯਾ, ਕਾਯ-ਪਟਿਬਦ੍ਧੇ ਤੁ ਦੁਕ੍ਕਟਂ.

੧੭੪. ਛਾਦੇਨ੍ਤੀ ਭਿਕ੍ਖੁਨੀ ਵਜ੍ਜਂ, ਤਿਸ੍ਸੋ ਆਪਤ੍ਤਿਯੋ ਫੁਸੇ;

ਜਾਨਂ ਪਾਰਾਜਿਕਂ ਧਮ੍ਮਂ, ਛਾਦੇਨ੍ਤੀ ਸਾ ਪਰਾਜਿਕਾ.

੧੭੫. ਥੁਲ੍ਲਚ੍ਚਯਂ ਵੇਮਤਿਕਾ, ਪਟਿਚ੍ਛਾਦੇਤਿ ਚੇ ਪਨ;

ਅਥਾਚਾਰਵਿਪਤ੍ਤਿਂ ਚੇ, ਪਟਿਚ੍ਛਾਦੇਤਿ ਦੁਕ੍ਕਟਂ.

੧੭੬. ਨਿਸ੍ਸਜ੍ਜਨ੍ਤੀ ਨ ਤਂ ਲਦ੍ਧਿਂ, ਉਕ੍ਖਿਤ੍ਤਸ੍ਸਾਨੁਵਤ੍ਤਿਕਾ;

ਸਮਨੁਭਾਸਨਾਯੇਵ, ਤਿਸ੍ਸੋ ਆਪਤ੍ਤਿਯੋ ਫੁਸੇ.

੧੭੭. ਞਤ੍ਤਿਯਾ ਦੁਕ੍ਕਟਂ, ਦ੍ਵੀਹਿ, ਕਮ੍ਮਵਾਚਾਹਿ ਥੁਲ੍ਲਤਾ;

ਕਮ੍ਮਵਾਚਾਯ ਓਸਾਨੇ, ਪਾਰਾਜਿਕਮੁਦੀਰਿਤਂ.

੧੭੮. ਪੂਰੇਨ੍ਤੀ ਅਟ੍ਠਮਂ ਵਤ੍ਥੁਂ, ਤਿਸ੍ਸੋ ਆਪਤ੍ਤਿਯੋ ਫੁਸੇ;

ਪੁਰਿਸੇਨਿਧਾਗਚ੍ਛਾਤਿ, ਵੁਤ੍ਤਾਗਚ੍ਛਤਿ ਦੁਕ੍ਕਟਂ.

੧੭੯. ਥੁਲ੍ਲਚ੍ਚਯਂ ਤੁ ਪੋਸਸ੍ਸ, ਹਤ੍ਥਪਾਸਪ੍ਪਵੇਸਨੇ;

ਪੂਰੇਨ੍ਤੀ ਅਟ੍ਠਮਂ ਵਤ੍ਥੁਂ, ਸਮਣੀ ਸਾ ਪਰਾਜਿਤਾ.

ਪਾਰਾਜਿਕਕਥਾ.

੧੮੦. ਉਸ੍ਸਯਵਾਦਿਕਾ ਅਟ੍ਟਂ, ਕਰੋਨ੍ਤੀ ਤਿਵਿਧਂ ਫੁਸੇ;

ਏਕਸ੍ਸਾਰੋਚਨੇ ਤਸ੍ਸਾ, ਹੋਤਿ ਆਪਤ੍ਤਿ ਦੁਕ੍ਕਟਂ.

੧੮੧. ਦੁਤਿਯਾਰੋਚਨੇ ਤਸ੍ਸਾ, ਥੁਲ੍ਲਚ੍ਚਯਮੁਦੀਰਿਤਂ;

ਅਟ੍ਟਸ੍ਸ ਪਰਿਯੋਸਾਨੇ, ਹੋਤਿ ਸਙ੍ਘਾਦਿਸੇਸਤਾ.

੧੮੨. ਚੋਰਿਵੁਟ੍ਠਾਪਿਕਾ ਵਾਪਿ, ਞਤ੍ਤਿਯਾ ਦੁਕ੍ਕਟਂ ਫੁਸੇ;

ਦ੍ਵੀਹਿ ਥੁਲ੍ਲਚ੍ਚਯਂ ਕਮ੍ਮ-ਵਾਚੋਸਾਨੇ ਗਰੁਂ ਸਿਯਾ.

੧੮੩. ਏਕਾ ਗਾਮਨ੍ਤਰਂ ਗਚ੍ਛੇ, ਗਮਨੇ ਦੁਕ੍ਕਟਂ ਸਿਯਾ;

ਪਰਿਕ੍ਖੇਪੇ ਅਤਿਕ੍ਕਨ੍ਤੇ, ਪਾਦੇਨ ਪਠਮੇਨ ਤੁ.

੧੮੪. ਹੋਤਿ ਥੁਲ੍ਲਚ੍ਚਯਾਪਤ੍ਤਿ, ਤਸ੍ਸਾ ਸਮਣਿਯਾ ਪਨ;

ਦੁਤਿਯੇਨ ਅਤਿਕ੍ਕਨ੍ਤੇ, ਗਰੁਕੇ ਪਨ ਤਿਟ੍ਠਤਿ.

੧੮੫. ਚਤੁਤ੍ਥੇ ਦੁਤਿਯੇ ਵੁਤ੍ਤ-ਸਦਿਸੋਵ ਵਿਨਿਚ੍ਛਯੋ;

ਆਪਤ੍ਤੀਨਂ ਪਭੇਦੇ ਤੁ, ਕਾਚਿ ਨਤ੍ਥਿ ਵਿਸੇਸਤਾ.

੧੮੬. ਅਵਸ੍ਸੁਤਾ ਸਯਂ ਹੁਤ੍ਵਾ, ਤਾਦਿਸਸ੍ਸੇਵ ਹਤ੍ਥਤੋ;

ਗਹੇਤ੍ਵਾ ਪਨ ਭੁਞ੍ਜਨ੍ਤੀ, ਭੋਜਨਾਦੀਸੁ ਕਿਞ੍ਚਿਪਿ.

੧੮੭. ਫੁਸੇ ਆਪਤ੍ਤਿਯੋ ਤਿਸ੍ਸੋ, ਭੋਜਨਾਦੀਸੁ ਕਿਞ੍ਚਿਪਿ;

ਪਟਿਗ੍ਗਣ੍ਹਨ੍ਤਿਯਾ ਤਸ੍ਸਾ, ਹੋਤਿ ਥੁਲ੍ਲਚ੍ਚਯਂ ਪਨ.

੧੮੮. ਅਜ੍ਝੋਹਾਰੇਸੁ ਸਬ੍ਬੇਸੁ, ਹੋਤਿ ਸਙ੍ਘਾਦਿਸੇਸਤਾ;

ਉਦਕਂ ਦਨ੍ਤਪੋਨਂ ਵਾ, ਪਟਿਗ੍ਗਣ੍ਹਾਤਿ ਦੁਕ੍ਕਟਂ.

੧੮੯. ‘‘ਸਹਤ੍ਥੇਨ ਗਹੇਤ੍ਵਾ ਤ੍ਵਂ, ਖਾਦ ਵਾ ਭੁਞ੍ਜ ਵਾ’’ਤਿਪਿ;

ਉਯ੍ਯੋਜੇਨ੍ਤੀ ਪਨੇਵਂ ਤੁ, ਤਿਸ੍ਸੋ ਆਪਤ੍ਤਿਯੋ ਫੁਸੇ.

੧੯੦. ਦੁਕ੍ਕਟਂ ਵਚਨੇ ਤਸ੍ਸਾ, ‘‘ਭੁਞ੍ਜਿਸ੍ਸਾਮੀ’’ਤਿ ਗਣ੍ਹਤਿ;

ਅਜ੍ਝੋਹਾਰੇਸੁ ਸਬ੍ਬੇਸੁ, ਤਸ੍ਸਾ ਥੁਲ੍ਲਚ੍ਚਯਂ ਸਿਯਾ.

੧੯੧. ਭੋਜਨਸ੍ਸ ਪਨੋਸਾਨੇ, ਹੋਤਿ ਸਙ੍ਘਾਦਿਸੇਸਤਾ;

ਉਯ੍ਯੋਜੇਤਿ ਚ ਯਾ ਤਸ੍ਸਾ, ਇਮਾ ਤਿਸ੍ਸੋਤਿ ਦੀਪਯੇ.

੧੯੨. ਸਤ੍ਤਮੇ ਅਟ੍ਠਮੇ ਚਾਪਿ, ਨਵਮੇ ਦਸਮੇਪਿ ਚ;

ਚੋਰਿਵੁਟ੍ਠਾਪਨੇਨੇਵ, ਸਮਾਨੋਵ ਵਿਨਿਚ੍ਛਯੋ.

ਸਙ੍ਘਾਦਿਸੇਸਕਥਾ.

੧੯੩. ਪਤ੍ਤਸਨ੍ਨਿਚਯਂ ਯਿਹ, ਕਰੋਨ੍ਤੀ ਭਿਕ੍ਖੁਨੀ ਪਨ;

ਏਕਂ ਨਿਸ੍ਸਗ੍ਗਿਯਂਯੇਵ, ਫੁਸੇ ਪਾਚਿਤ੍ਤਿਯਂ ਤੁ ਸਾ.

੧੯੪. ਅਕਾਲਚੀਵਰਂ ਕਾਲ-ਚੀਵਰਂ ਭਾਜਾਪੇਨ੍ਤਿਯਾ;

ਪਯੋਗੇ ਦੁਕ੍ਕਟਂ ਵੁਤ੍ਤਂ, ਲਾਭੇ ਨਿਸ੍ਸਗ੍ਗਿਯਂ ਸਿਯਾ.

੧੯੫. ਚੀਵਰਂ ਪਰਿਵਤ੍ਤੇਤ੍ਵਾ, ਅਚ੍ਛਿਨ੍ਦਤਿ ਸਚੇ ਪਨ;

ਪਯੋਗੇ ਦੁਕ੍ਕਟਂ, ਛਿਨ੍ਨੇ, ਤਸ੍ਸਾ ਨਿਸ੍ਸਗ੍ਗਿਯਂ ਸਿਯਾ.

੧੯੬. ਵਿਞ੍ਞਾਪੇਤ੍ਵਾਵ ਅਞ੍ਞਂ ਚੇ, ਵਿਞ੍ਞਾਪੇਤਿ ਤਤੋ ਪਰਂ;

ਪਯੋਗੇ ਦੁਕ੍ਕਟਂ, ਵਿਞ੍ਞਾ-ਪਿਤੇ ਨਿਸ੍ਸਗ੍ਗਿਯਂ ਸਿਯਾ.

੧੯੭. ਚੇਤਾਪੇਤ੍ਵਾ ਹਿ ਅਞ੍ਞਂ ਚੇ, ਚੇਤਾਪੇਤਿ ਤਤੋ ਪਰਂ;

ਪਯੋਗੇ ਦੁਕ੍ਕਟਂ, ਚੇਤਾ-ਪਿਤੇ ਨਿਸ੍ਸਗ੍ਗਿਯਂ ਸਿਯਾ.

੧੯੮. ਏਵਮੇਵ ਚ ਸੇਸੇਸੁ, ਛਟ੍ਠਾਦੀਸੁ ਚ ਸਤ੍ਤਸੁ;

ਅਨਨ੍ਤਰਸਮਾਨੋਵ, ਆਪਤ੍ਤੀਨਂ ਵਿਨਿਚ੍ਛਯੋ.

ਨਿਸ੍ਸਗ੍ਗਿਯਕਥਾ.

੧੯੯. ਲਸੁਣਂ ਖਾਦਤਿ ਦ੍ਵੇ ਚੇ, ਦੁਕ੍ਕਟਂ ਗਹਣੇ ਸਿਯਾ;

ਅਜ੍ਝੋਹਾਰਪਯੋਗੇਸੁ, ਪਾਚਿਤ੍ਤਿ ਪਰਿਯਾਪੁਤਾ.

੨੦੦. ਸਂਹਰਾਪੇਨ੍ਤਿਯਾ ਲੋਮਂ, ਸਮ੍ਬਾਧੇ ਦ੍ਵੇਵ ਹੋਨ੍ਤਿ ਹਿ;

ਪਯੋਗੇ ਦੁਕ੍ਕਟਂ ਵੁਤ੍ਤਂ, ਹੋਤਿ ਪਾਚਿਤ੍ਤਿ ਸਂਹਟੇ.

੨੦੧. ਕਰੋਨ੍ਤੀ ਤਲਘਾਤਂ ਤੁ, ਦ੍ਵੇ ਪਨਾਪਤ੍ਤਿਯੋ ਫੁਸੇ;

ਪਯੋਗੇ ਦੁਕ੍ਕਟਂ ਹੋਤਿ, ਕਤੇ ਪਾਚਿਤ੍ਤਿਯਂ ਸਿਯਾ.

੨੦੨. ਜਤੁਨਾ ਮਟ੍ਠਕਂ ਕਿਞ੍ਚਿ, ਸਾਦਿਯਨ੍ਤੀ ਦੁਵੇ ਫੁਸੇ;

ਪਯੋਗੇ ਦੁਕ੍ਕਟਾਦਿਨ੍ਨੇ, ਤਸ੍ਸਾ ਪਾਚਿਤ੍ਤਿਯਂ ਸਿਯਾ.

੨੦੩. ਪਞ੍ਚਮਂ ਤੁ ਚਤੁਤ੍ਥੇਨ, ਸਮਾਨਮਿਤਿ ਦੀਪਯੇ;

ਆਪਤ੍ਤੀਨਂ ਵਿਭਾਗਸ੍ਮਿਂ, ਵਿਸੇਸੋ ਨਤ੍ਥਿ ਕੋਚਿਪਿ.

੨੦੪. ਭਿਕ੍ਖੁਸ੍ਸ ਭੁਞ੍ਜਮਾਨਸ੍ਸ, ਪਾਨੀਯੇਨੁਪਤਿਟ੍ਠਤਿ;

ਹਤ੍ਥਪਾਸੇ ਤੁ ਪਾਚਿਤ੍ਤਿ, ਹਿਤ੍ਵਾ ਤਿਟ੍ਠਤਿ ਦੁਕ੍ਕਟਂ.

੨੦੫. ਵਿਞ੍ਞਾਪੇਤ੍ਵਾਮਕਂ ਧਞ੍ਞਂ, ‘‘ਭੁਞ੍ਜਿਸ੍ਸਾਮੀ’’ਤਿ ਗਣ੍ਹਤਿ;

ਦੁਕ੍ਕਟਂ ਹੋਤਿ ਪਾਚਿਤ੍ਤਿ, ਅਜ੍ਝੋਹਾਰੇਸੁ ਦੀਪਯੇ.

੨੦੬. ਉਚ੍ਚਾਰਾਦਿਂ ਤਿਰੋਕੁਟ੍ਟੇ, ਛਡ੍ਡੇਨ੍ਤੀ ਦ੍ਵੇ ਫੁਸੇ ਹਵੇ;

ਪਯੋਗੇ ਦੁਕ੍ਕਟਂ ਵੁਤ੍ਤਂ, ਪਾਚਿਤ੍ਤਿ ਛਡ੍ਡਿਤੇ ਸਿਯਾ.

੨੦੭. ਉਚ੍ਚਾਰਾਦਿਚਤੁਕ੍ਕਂ ਤੁ, ਛਡ੍ਡੇਤਿ ਹਰਿਤੇ ਸਚੇ;

ਪਯੋਗੇ ਦੁਕ੍ਕਟਂ ਤਸ੍ਸਾ, ਪਾਚਿਤ੍ਤਿ ਛਡ੍ਡਿਤੇ ਸਿਯਾ.

੨੦੮. ਨਚ੍ਚਾਦਿਂ ਦਸ੍ਸਨਤ੍ਥਾਯ, ਸਚੇ ਗਚ੍ਛਤਿ ਦੁਕ੍ਕਟਂ;

ਪਸ੍ਸਨ੍ਤਿਯਾਪਿ ਪਾਚਿਤ੍ਤਿ, ਤਥੇਵ ਚ ਸੁਣਨ੍ਤਿਯਾ.

ਲਸੁਣਵਗ੍ਗੋ ਪਠਮੋ.

੨੦੯. ਪਠਮੇ ਦੁਤਿਯੇ ਚੇਵ, ਤਤਿਯੇ ਚ ਚਤੁਤ੍ਥਕੇ;

ਤੁਲ੍ਯੋ ਲਸੁਣਵਗ੍ਗਸ੍ਸ, ਛਟ੍ਠੇਨਿਧ ਵਿਨਿਚ੍ਛਯੋ.

੨੧੦. ਕੁਲਾਨਿ ਉਪਸਙ੍ਕਮ੍ਮ, ਨਿਸੀਦਿਤ੍ਵਾ ਪਨਾਸਨੇ;

ਸਾਮਿਕੇ ਤੁ ਅਨਾਪੁਚ੍ਛਾ, ਪਕ੍ਕਮਨ੍ਤੀ ਦੁਵੇ ਫੁਸੇ.

੨੧੧. ਪਠਮੇਨ ਚ ਪਾਦੇਨ, ਅਨੋਵਸ੍ਸਮਤਿਕ੍ਕਮੇ;

ਦੁਕ੍ਕਟਂ ਹੋਤਿ, ਪਾਚਿਤ੍ਤਿ, ਦੁਤਿਯਾਤਿਕ੍ਕਮੇ ਸਿਯਾ.

੨੧੨. ਸਾਮਿਕੇ ਤੁ ਅਨਾਪੁਚ੍ਛਾ, ਆਸਨੇ ਚੇ ਨਿਸੀਦਤਿ;

ਪਯੋਗੇ ਦੁਕ੍ਕਟਂ ਹੋਤਿ, ਪਾਚਿਤ੍ਤਿ ਚ ਨਿਸੀਦਿਤੇ.

੨੧੩. ਛਟ੍ਠੇਨ ਸਤ੍ਤਮਂ ਸਬ੍ਬਂ, ਸਮਾਨਂ ਅਟ੍ਠਮੇ ਪਨ;

ਪਯੋਗੇ ਦੁਕ੍ਕਟਂ, ਉਜ੍ਝਾ-ਪਿਤੇ ਪਾਚਿਤ੍ਤਿਯਂ ਸਿਯਾ.

੨੧੪. ਅਤ੍ਤਾਨਂ ਚਾਭਿਸਪ੍ਪੇਨ੍ਤੀ, ਦ੍ਵੇ ਫੁਸੇ ਨਿਰਯਾਦਿਨਾ;

ਪਯੋਗੇ ਦੁਕ੍ਕਟਂ ਵੁਤ੍ਤਂ, ਪਾਚਿਤ੍ਤਿ ਅਭਿਸਪ੍ਪਿਤੇ.

੨੧੫. ਵਧਿਤ੍ਵਾ ਪਨ ਅਤ੍ਤਾਨਂ, ਰੋਦਨ੍ਤੀ ਤੁ ਦੁਵੇ ਫੁਸੇ;

ਵਧਤਿ ਰੋਦਤਿ ਪਾਚਿਤ੍ਤਿ, ਕਰੋਤੇਕਂ ਤੁ ਦੁਕ੍ਕਟਂ.

ਰਤ੍ਤਨ੍ਧਕਾਰਵਗ੍ਗੋ ਦੁਤਿਯੋ.

੨੧੬. ਨਗ੍ਗਾ ਨ੍ਹਾਯਤਿ ਦ੍ਵੇ ਚੇਵ, ਪਯੋਗੇ ਦੁਕ੍ਕਟਂ ਸਿਯਾ;

ਨ੍ਹਾਨਸ੍ਸ ਪਰਿਯੋਸਾਨੇ, ਤਸ੍ਸਾ ਪਾਚਿਤ੍ਤਿਯਂ ਸਿਯਾ.

੨੧੭. ਕਾਰਾਪੇਤਿ ਪਮਾਣਾਤਿ-ਕ੍ਕਨ੍ਤਂ ਉਦਕਸਾਟਿਕਂ;

ਪਯੋਗੇ ਦੁਕ੍ਕਟਂ, ਕਾਰਾ-ਪਿਤੇ ਪਾਚਿਤ੍ਤਿਯਂ ਸਿਯਾ.

੨੧੮. ਚੀਵਰਂ ਤੁ ਵਿਸਿਬ੍ਬੇਤ੍ਵਾ, ਵਿਸਿਬ੍ਬਾਪੇਤ੍ਵ ਵਾ ਪਨ;

ਨੇਵ ਸਿਬ੍ਬਨ੍ਤਿਯਾ ਵੁਤ੍ਤ-ਮੇਕਂ ਪਾਚਿਤ੍ਤਿਯਂ ਪਨ.

੨੧੯. ਪਞ੍ਚਾਹਿਕਂ ਤੁ ਸਙ੍ਘਾਟਿ-ਚਾਰਂ ਪਨ ਅਤਿਕ੍ਕਮੇ;

ਏਕਾਵਸ੍ਸਾ ਪਨਾਪਤ੍ਤਿ, ਪਾਚਿਤ੍ਤਿ ਪਰਿਦੀਪਿਤਾ.

੨੨੦. ਸਚੇ ਸਙ੍ਕਮਨੀਯਂ ਤੁ, ਧਾਰੇਤਿ ਪਨ ਚੀਵਰਂ;

ਪਯੋਗੇ ਦੁਕ੍ਕਟਂ ਵੁਤ੍ਤਂ, ਪਾਚਿਤ੍ਤਿ ਪਨ ਧਾਰਿਤੇ.

੨੨੧. ਗਣਚੀਵਰਲਾਭਸ੍ਸ, ਅਨ੍ਤਰਾਯਂ ਕਰੋਤਿ ਚੇ;

ਪਯੋਗੇ ਦੁਕ੍ਕਟਂ ਹੋਤਿ, ਕਤੇ ਪਾਚਿਤ੍ਤਿਯਂ ਸਿਯਾ.

੨੨੨. ਵਿਭਙ੍ਗਂ ਪਟਿਬਾਹਨ੍ਤੀ, ਚੀਵਰਾਨਂ ਤੁ ਧਮ੍ਮਿਕਂ;

ਪਯੋਗੇ ਦੁਕ੍ਕਟਂ ਵੁਤ੍ਤਂ, ਪਾਚਿਤ੍ਤਿ ਪਟਿਬਾਹਿਤੇ.

੨੨੩. ਅਗਾਰਿਕਾਦਿਨੋ ਦੇਤਿ, ਸਚੇ ਸਮਣਚੀਵਰਂ;

ਪਯੋਗੇ ਦੁਕ੍ਕਟਂ, ਦਿਨ੍ਨੇ, ਪਾਚਿਤ੍ਤਿ ਪਰਿਯਾਪੁਤਾ.

੨੨੪. ਚੀਵਰੇ ਦੁਬ੍ਬਲਾਸਾਯ, ਕਾਲਂ ਚੇ ਸਮਤਿਕ੍ਕਮੇ;

ਪਯੋਗੇ ਦੁਕ੍ਕਟਂ ਵੁਤ੍ਤਂ, ਪਾਚਿਤ੍ਤਿ ਸਮਤਿਕ੍ਕਮੇ.

੨੨੫. ਧਮ੍ਮਿਕਂ ਕਥਿਨੁਦ੍ਧਾਰਂ, ਪਟਿਬਾਹਨ੍ਤਿਯਾ ਦੁਵੇ;

ਪਯੋਗੇ ਦੁਕ੍ਕਟਂ ਹੋਤਿ, ਪਾਚਿਤ੍ਤਿ ਪਟਿਬਾਹਿਤੇ.

ਨ੍ਹਾਨਵਗ੍ਗੋ ਤਤਿਯੋ.

੨੨੬. ਦੁਵੇ ਭਿਕ੍ਖੁਨਿਯੋ ਏਕ-ਮਞ੍ਚਸ੍ਮਿਂ ਚੇ ਤੁਵਟ੍ਟੇਯ੍ਯੁਂ;

ਪਯੋਗੇ ਦੁਕ੍ਕਟਂ ਤਾਸਂ, ਨਿਪਨ੍ਨੇ ਇਤਰਂ ਸਿਯਾ.

੨੨੭. ਦੁਤਿਯਂ ਪਠਮੇਨੇਵ, ਸਦਿਸਂ ਤਤਿਯੇ ਪਨ;

ਪਯੋਗੇ ਦੁਕ੍ਕਟਂ ਹੋਤਿ, ਕਤੇ ਪਾਚਿਤ੍ਤਿਯਂ ਸਿਯਾ.

੨੨੮. ਨੁਪਟ੍ਠਾਪੇਨ੍ਤਿਯਾ ਵਾਪਿ, ਦੁਕ੍ਖਿਤਂ ਸਹਜੀਵਿਨਿਂ;

ਏਕਾਯੇਵ ਪਨਾਪਤ੍ਤਿ, ਪਾਚਿਤ੍ਤਿ ਪਰਿਦੀਪਿਤਾ.

੨੨੯. ਸਚੇ ਉਪਸ੍ਸਯਂ ਦਤ੍ਵਾ, ਨਿਕ੍ਕਡ੍ਢਤਿ ਚ ਭਿਕ੍ਖੁਨਿਂ;

ਪਯੋਗੇ ਦੁਕ੍ਕਟਂ ਤਸ੍ਸਾ, ਹੋਤਿ ਪਾਚਿਤ੍ਤਿ ਕਡ੍ਢਿਤੇ.

੨੩੦. ਛਟ੍ਠੇ ਪਨ ਚ ਸਂਸਟ੍ਠਾ, ਞਤ੍ਤਿਯਾ ਦੁਕ੍ਕਟਂ ਫੁਸੇ;

ਕਮ੍ਮਵਾਚਾਯ ਓਸਾਨੇ, ਪਾਚਿਤ੍ਤਿ ਪਰਿਦੀਪਿਤਾ.

੨੩੧. ਅਨ੍ਤੋਰਟ੍ਠੇ ਤੁ ਸਾਸਙ੍ਕੇ, ਚਾਰਿਕਂ ਤੁ ਚਰਨ੍ਤਿਯਾ;

ਪਯੋਗੇ ਦੁਕ੍ਕਟਂ ਵੁਤ੍ਤਂ, ਪਟਿਪਨ੍ਨਾਯ ਸੇਸਕਂ.

੨੩੨. ਅਟ੍ਠਮਂ ਨਵਮਞ੍ਚੇਵ, ਸਤ੍ਤਮੇਨ ਸਮਂ ਮਤਂ;

ਦਸਮੇ ਪਨ ਏਕਾਵ, ਪਾਚਿਤ੍ਤਿ ਪਰਿਦੀਪਿਤਾ.

ਤੁਵਟ੍ਟਵਗ੍ਗੋ ਚਤੁਤ੍ਥੋ.

੨੩੩. ਰਾਜਾਗਾਰਾਦਿਕਂ ਸਬ੍ਬਂ, ਦਸ੍ਸਨਤ੍ਥਾਯ ਗਚ੍ਛਤਿ;

ਪਯੋਗੇ ਦੁਕ੍ਕਟਂ ਤਸ੍ਸਾ, ਪਾਚਿਤ੍ਤਿ ਯਦਿ ਪਸ੍ਸਤਿ.

੨੩੪. ਆਸਨ੍ਦਿਂ ਵਾਪਿ ਪਲ੍ਲਙ੍ਕਂ, ਪਰਿਭੁਞ੍ਜਨ੍ਤਿਯਾ ਦੁਵੇ;

ਪਯੋਗੇ ਦੁਕ੍ਕਟਂ ਵੁਤ੍ਤਂ, ਭੁਤ੍ਤੇ ਪਾਚਿਤ੍ਤਿਯਂ ਸਿਯਾ.

੨੩੫. ਸੁਤ੍ਤਂ ਕਨ੍ਤਨ੍ਤਿਯਾ ਦ੍ਵੇਵ, ਪਯੋਗੇ ਦੁਕ੍ਕਟਂ ਮਤਂ;

ਉਜ੍ਜਵੁਜ੍ਜਵਨੇ ਤਸ੍ਸਾ, ਪਾਚਿਤ੍ਤਿ ਸਮੁਦਾਹਰੇ.

੨੩੬. ਵੇਯ੍ਯਾਵਚ੍ਚਂ ਗਿਹੀਨਂ ਤੁ, ਦ੍ਵੇਵ ਹੋਨ੍ਤਿ ਕਰੋਨ੍ਤਿਯਾ;

ਪਯੋਗੇ ਦੁਕ੍ਕਟਂ ਵੁਤ੍ਤਂ, ਕਤੇ ਪਾਚਿਤ੍ਤਿਯਂ ਸਿਯਾ.

੨੩੭. ਪਞ੍ਚਮੇ ਪਨ ਏਕਾਵ, ਪਾਚਿਤ੍ਤਿ ਪਰਿਦੀਪਿਤਾ;

ਪਯੋਗੇ ਦੁਕ੍ਕਟਂ ਛਟ੍ਠੇ, ਦਿਨ੍ਨੇ ਪਾਚਿਤ੍ਤਿਯਂ ਸਿਯਾ.

੨੩੮. ਸਤ੍ਤਮਂ ਦੁਤਿਯੇਨੇਵ, ਸਮਾਪਤ੍ਤਿਪਭੇਦਤੋ;

ਅਟ੍ਠਮਂ ਦੁਤਿਯੇ ਵਗ੍ਗੇ, ਪਞ੍ਚਮੇਨ ਸਮਂ ਮਤਂ.

੨੩੯. ਤਿਰਚ੍ਛਾਨਗਤਂ ਵਿਜ੍ਜਂ, ਦ੍ਵੇਵ ਹੋਨ੍ਤਿ ਪਠਨ੍ਤਿਯਾ;

ਪਯੋਗੇ ਦੁਕ੍ਕਟਂ ਹੋਤਿ, ਪਾਚਿਤ੍ਤਿ ਹਿ ਪਦੇ ਪਦੇ.

੨੪੦. ਦਸਮਂ ਨਵਮੇਨੇਵ, ਸਮਾਨਂ ਸਬ੍ਬਥਾ ਪਨ;

‘‘ਪਰਿਯਾਪੁਣਾਤਿ, ਵਾਚੇਤਿ’’, ਪਦਮਤ੍ਤਂ ਵਿਸੇਸਕਂ.