ਸਙ੍ਘਾਦਿਸੇਸਕਥਾ

੩੨੫. ਮੋਚੇਤੁਕਾਮਤਾਚਿਤ੍ਤਂ, ਵਾਯਾਮੋ ਸੁਕ੍ਕਮੋਚਨਂ;

ਅਞ੍ਞਤ੍ਰ ਸੁਪਿਨਨ੍ਤੇਨ, ਹੋਤਿ ਸਙ੍ਘਾਦਿਸੇਸਤਾ.

੩੨੬. ਪਰੇਨੁਪਕ੍ਕਮਾਪੇਤ੍ਵਾ, ਅਙ੍ਗਜਾਤਂ ਪਨਤ੍ਤਨੋ;

ਸੁਕ੍ਕਂ ਯਦਿ ਵਿਮੋਚੇਤਿ, ਗਰੁਕਂ ਤਸ੍ਸ ਨਿਦ੍ਦਿਸੇ.

੩੨੭. ਸਞ੍ਚਿਚ੍ਚੁਪਕ੍ਕਮਨ੍ਤਸ੍ਸ, ਅਙ੍ਗਜਾਤਂ ਪਨਤ੍ਤਨੋ;

ਥੁਲ੍ਲਚ੍ਚਯਂ ਸਮੁਦ੍ਦਿਟ੍ਠਂ, ਸਚੇ ਸੁਕ੍ਕਂ ਨ ਮੁਚ੍ਚਤਿ.

੩੨੮. ਸਞ੍ਚਿਚ੍ਚੁਪਕ੍ਕਮਨ੍ਤਸ੍ਸ, ਆਕਾਸੇ ਕਮ੍ਪਨੇਨਪਿ;

ਹੋਤਿ ਥੁਲ੍ਲਚ੍ਚਯਂ ਤਸ੍ਸ, ਯਦਿ ਸੁਕ੍ਕਂ ਨ ਮੁਚ੍ਚਤਿ.

੩੨੯. ਵਤ੍ਥਿਂ ਕੀਲ਼ਾਯ ਪੂਰੇਤ੍ਵਾ, ਪਸ੍ਸਾਵੇਤੁਂ ਨ ਵਟ੍ਟਤਿ;

ਨਿਮਿਤ੍ਤਂ ਪਨ ਹਤ੍ਥੇਨ, ਕੀਲ਼ਾਪੇਨ੍ਤਸ੍ਸ ਦੁਕ੍ਕਟਂ.

੩੩੦. ਤਿਸ੍ਸਨ੍ਨਂ ਪਨ ਇਤ੍ਥੀਨਂ, ਨਿਮਿਤ੍ਤਂ ਰਤ੍ਤਚੇਤਸਾ;

ਪੁਰਤੋ ਪਚ੍ਛਤੋ ਵਾਪਿ, ਓਲੋਕੇਨ੍ਤਸ੍ਸ ਦੁਕ੍ਕਟਂ.

੩੩੧. ਏਕੇਨੇਕਂ ਪਯੋਗੇਨ, ਦਿਵਸਮ੍ਪਿ ਚ ਪਸ੍ਸਤੋ;

ਨਾਪਤ੍ਤਿਯਾ ਭਵੇ ਅਙ੍ਗਂ, ਉਮ੍ਮੀਲਨਨਿਮੀਲਨਂ.

੩੩੨. ਅਮੋਚਨਾਧਿਪ੍ਪਾਯਸ੍ਸ, ਅਨੁਪਕ੍ਕਮਤੋਪਿ ਚ;

ਸੁਪਿਨਨ੍ਤੇਨ ਮੁਤ੍ਤਸ੍ਮਿਂ, ਅਨਾਪਤ੍ਤਿ ਪਕਾਸਿਤਾ.

ਸੁਕ੍ਕਵਿਸਟ੍ਠਿਕਥਾ.

੩੩੩. ਆਮਸਨ੍ਤੋ ਮਨੁਸ੍ਸਿਤ੍ਥਿਂ, ਕਾਯਸਂਸਗ੍ਗਰਾਗਤੋ;

‘‘ਮਨੁਸ੍ਸਿਤ੍ਥੀ’’ਤਿ ਸਞ੍ਞਾਯ, ਹੋਤਿ ਸਙ੍ਘਾਦਿਸੇਸਿਕੋ.

੩੩੪. ਲੋਮੇਨਨ੍ਤਮਸੋ ਲੋਮਂ, ਫੁਸਨ੍ਤਸ੍ਸਾਪਿ ਇਤ੍ਥਿਯਾ;

ਕਾਯਸਂਸਗ੍ਗਰਾਗੇਨ, ਹੋਤਿ ਆਪਤ੍ਤਿ ਭਿਕ੍ਖੁਨੋ.

੩੩੫. ਇਤ੍ਥਿਯਾ ਯਦਿ ਸਮ੍ਫੁਟ੍ਠੋ, ਫਸ੍ਸਂ ਸੇਵਨਚੇਤਨੋ;

ਵਾਯਮਿਤ੍ਵਾਧਿਵਾਸੇਤਿ, ਹੋਤਿ ਸਙ੍ਘਾਦਿਸੇਸਤਾ.

੩੩੬. ਏਕੇਨ ਪਨ ਹਤ੍ਥੇਨ, ਗਹੇਤ੍ਵਾ ਦੁਤਿਯੇਨ ਵਾ;

ਤਤ੍ਥ ਤਤ੍ਥ ਫੁਸਨ੍ਤਸ੍ਸ, ਏਕਾਵਾਪਤ੍ਤਿ ਦੀਪਿਤਾ.

੩੩੭. ਅਗ੍ਗਹੇਤ੍ਵਾ ਫੁਸਨ੍ਤਸ੍ਸ, ਯਾਵ ਪਾਦਞ੍ਚ ਸੀਸਤੋ;

ਕਾਯਾ ਹਤ੍ਥਮਮੋਚੇਤ੍ਵਾ, ਏਕਾਵ ਦਿਵਸਮ੍ਪਿ ਚ.

੩੩੮. ਅਙ੍ਗੁਲੀਨਂ ਤੁ ਪਞ੍ਚਨ੍ਨਂ, ਗਹਣੇ ਏਕਤੋ ਪਨ;

ਏਕਾਯੇਵ ਸਿਯਾਪਤ੍ਤਿ, ਨ ਹਿ ਕੋਟ੍ਠਾਸਤੋ ਸਿਯਾ.

੩੩੯. ਨਾਨਿਤ੍ਥੀਨਂ ਸਚੇ ਪਞ੍ਚ, ਗਣ੍ਹਾਤ੍ਯਙ੍ਗੁਲਿਯੋ ਪਨ;

ਏਕਤੋ ਪਞ੍ਚ ਸਙ੍ਘਾਦਿ-ਸੇਸਾ ਹੋਨ੍ਤਿਸ੍ਸ ਭਿਕ੍ਖੁਨੋ.

੩੪੦. ਇਤ੍ਥਿਯਾ ਵਿਮਤਿਸ੍ਸਾਪਿ, ਪਣ੍ਡਕਾਦਿਕਸਞ੍ਞਿਨੋ;

ਕਾਯੇਨ ਇਤ੍ਥਿਯਾ ਕਾਯ-ਸਮ੍ਬਦ੍ਧਂ ਫੁਸਤੋਪਿ ਵਾ.

੩੪੧. ਪਣ੍ਡਕੇ ਯਕ੍ਖਿਪੇਤੀਸੁ, ਤਸ੍ਸ ਥੁਲ੍ਲਚ੍ਚਯਂ ਸਿਯਾ;

ਦੁਕ੍ਕਟਂ ਕਾਯਸਂਸਗ੍ਗੇ, ਤਿਰਚ੍ਛਾਨਗਤਿਤ੍ਥਿਯਾ.

੩੪੨. ਭਿਕ੍ਖੁਨੋ ਪਟਿਬਦ੍ਧੇਨ, ਕਾਯੇਨ ਪਨ ਇਤ੍ਥਿਯਾ;

ਕਾਯੇਨ ਪਟਿਬਦ੍ਧਞ੍ਚ, ਫੁਸਨ੍ਤਸ੍ਸਪਿ ਦੁਕ੍ਕਟਂ.

੩੪੩. ਇਤ੍ਥੀਨਂ ਇਤ੍ਥਿਰੂਪਞ੍ਚ, ਦਾਰੁਲੋਹਮਯਾਦਿਕਂ;

ਤਾਸਂ ਵਤ੍ਥਮਲਙ੍ਕਾਰਂ, ਆਮਸਨ੍ਤਸ੍ਸ ਦੁਕ੍ਕਟਂ.

੩੪੪. ਤਤ੍ਥਜਾਤਫਲਂ ਖਜ੍ਜਂ, ਮੁਗ੍ਗਾਦਿਂ ਤਤ੍ਥਜਾਤਕਂ;

ਧਞ੍ਞਾਨਿ ਪਨ ਸਬ੍ਬਾਨਿ, ਆਮਸਨ੍ਤਸ੍ਸ ਦੁਕ੍ਕਟਂ.

੩੪੫. ਸਬ੍ਬਂ ਧਮਨਸਙ੍ਖਾਦਿਂ, ਪਞ੍ਚਙ੍ਗਤੁਰਿਯਮ੍ਪਿ ਚ;

ਰਤਨਾਨਿ ਚ ਸਬ੍ਬਾਨਿ, ਆਮਸਨ੍ਤਸ੍ਸ ਦੁਕ੍ਕਟਂ.

੩੪੬. ਸਬ੍ਬਮਾਵੁਧਭਣ੍ਡਞ੍ਚ, ਜਿਯਾ ਚ ਧਨੁਦਣ੍ਡਕੋ;

ਅਨਾਮਾਸਮਿਦਂ ਸਬ੍ਬਂ, ਜਾਲਞ੍ਚ ਸਰਵਾਰਣਂ.

੩੪੭. ਸੁਵਣ੍ਣਪਟਿਬਿਮ੍ਬਾਦਿ, ਚੇਤਿਯਂ ਆਰਕੂਟਕਂ;

ਅਨਾਮਾਸਨ੍ਤਿ ਨਿਦ੍ਦਿਟ੍ਠਂ, ਕੁਰੁਨ੍ਦਟ੍ਠਕਥਾਯ ਹਿ.

੩੪੮. ਸਬ੍ਬਂ ਓਨਹਿਤੁਂ ਵਾਪਿ, ਓਨਹਾਪੇਤੁਮੇਵ ਵਾ;

ਵਾਦਾਪੇਤੁਞ੍ਚ ਵਾਦੇਤੁਂ, ਵਾਦਿਤਂ ਨ ਚ ਵਟ੍ਟਤਿ.

੩੪੯. ‘‘ਕਰਿਸ੍ਸਾਮੁਪਹਾਰ’’ਨ੍ਤਿ, ਵੁਤ੍ਤੇਨ ਪਨ ਭਿਕ੍ਖੁਨਾ;

ਪੂਜਾ ਬੁਦ੍ਧਸ੍ਸ ਕਾਤਬ੍ਬਾ, ਵਤ੍ਤਬ੍ਬਾਤਿ ਚ ਵਿਞ੍ਞੁਨਾ.

੩੫੦. ਸਯਂ ਫੁਸਿਯਮਾਨਸ੍ਸ, ਇਤ੍ਥਿਯਾ ਪਨ ਧੁਤ੍ਤਿਯਾ;

ਅਵਾਯਮਿਤ੍ਵਾ ਕਾਯੇਨ, ਫਸ੍ਸਂ ਪਟਿਵਿਜਾਨਤੋ.

੩੫੧. ਅਨਾਪਤ੍ਤਿ ਅਸਞ੍ਚਿਚ੍ਚ, ਅਜਾਨਨ੍ਤਸ੍ਸ ਭਿਕ੍ਖੁਨੋ;

ਮੋਕ੍ਖਾਧਿਪ੍ਪਾਯਿਨੋ ਚੇਵ, ਤਥਾ ਉਮ੍ਮਤ੍ਤਕਾਦਿਨੋ.

੩੫੨. ਪਠਮੇਨ ਸਮਾਨਾਵ, ਸਮੁਟ੍ਠਾਨਾਦਯੋ ਪਨ;

ਕਾਯਸਂਸਗ੍ਗਰਾਗਸ੍ਸ, ਤਥਾ ਸੁਕ੍ਕਵਿਸਟ੍ਠਿਯਾ.

ਕਾਯਸਂਸਗ੍ਗਕਥਾ.

੩੫੩. ਦੁਟ੍ਠੁਲ੍ਲਵਾਚਸ੍ਸਾਦੇਨ, ਇਤ੍ਥਿਯਾ ਇਤ੍ਥਿਸਞ੍ਞਿਨੋ;

ਦ੍ਵਿਨ੍ਨਞ੍ਚ ਪਨ ਮਗ੍ਗਾਨਂ, ਵਣ੍ਣਾਵਣ੍ਣਵਸੇਨ ਚ.

੩੫੪. ਮੇਥੁਨਯਾਚਨਾਦੀਹਿ, ਓਭਾਸਨ੍ਤਸ੍ਸ ਭਿਕ੍ਖੁਨੋ;

ਵਿਞ੍ਞੁਂ ਅਨ੍ਤਮਸੋ ਹਤ੍ਥ-ਮੁਦ੍ਦਾਯਪਿ ਗਰੁਂ ਸਿਯਾ.

੩੫੫. ‘‘ਸਿਖਰਣੀਸਿ, ਸਮ੍ਭਿਨ੍ਨਾ, ਉਭਤੋਬ੍ਯਞ੍ਜਨਾ’’ਤਿ ਚ;

ਅਕ੍ਕੋਸਵਚਨੇਨਾਪਿ, ਗਰੁਕਂ ਤੁ ਸੁਣਨ੍ਤਿਯਾ.

੩੫੬. ਪੁਨਪ੍ਪੁਨੋਭਾਸਨ੍ਤਸ੍ਸ, ਏਕਵਾਚਾਯ ਵਾ ਬਹੂ;

ਗਣਨਾਯ ਚ ਵਾਚਾਨਂ, ਇਤ੍ਥੀਨਂ ਗਰੁਕਾ ਸਿਯੁਂ.

੩੫੭. ਸਾ ਚੇ ਨਪ੍ਪਟਿਜਾਨਾਤਿ, ਤਸ੍ਸ ਥੁਲ੍ਲਚ੍ਚਯਂ ਸਿਯਾ;

ਆਦਿਸ੍ਸ ਭਣਨੇ ਚਾਪਿ, ਉਬ੍ਭਜਾਣੁਮਧਕ੍ਖਕਂ.

੩੫੮. ਉਬ੍ਭਕ੍ਖਕਮਧੋਜਾਣੁ-ਮਣ੍ਡਲਂ ਪਨ ਉਦ੍ਦਿਸਂ;

ਵਣ੍ਣਾਦਿਭਣਨੇ ਕਾਯ-ਪਟਿਬਦ੍ਧੇ ਚ ਦੁਕ੍ਕਟਂ.

੩੫੯. ਥੁਲ੍ਲਚ੍ਚਯਂ ਭਵੇ ਤਸ੍ਸ, ਪਣ੍ਡਕੇ ਯਕ੍ਖਿਪੇਤਿਸੁ;

ਅਧਕ੍ਖਕੋਬ੍ਭਜਾਣੁਮ੍ਹਿ, ਦੁਕ੍ਕਟਂ ਪਣ੍ਡਕਾਦਿਸੁ.

੩੬੦. ਉਬ੍ਭਕ੍ਖਕਮਧੋਜਾਣੁ-ਮਣ੍ਡਲੇਪਿ ਅਯਂ ਨਯੋ;

ਸਬ੍ਬਤ੍ਥ ਦੁਕ੍ਕਟਂ ਵੁਤ੍ਤਂ, ਤਿਰਚ੍ਛਾਨਗਤਿਤ੍ਥਿਯਾ.

੩੬੧. ਅਤ੍ਥਧਮ੍ਮਪੁਰੇਕ੍ਖਾਰਂ, ਕਤ੍ਵਾ ਓਭਾਸਤੋਪਿ ਚ;

ਵਦਤੋਪਿ ਅਨਾਪਤ੍ਤਿ, ਪੁਰਕ੍ਖਤ੍ਵਾਨੁਸਾਸਨਿਂ.

੩੬੨. ਤਥਾ ਉਮ੍ਮਤ੍ਤਕਾਦੀਨਂ, ਸਮੁਟ੍ਠਾਨਾਦਯੋ ਨਯਾ;

ਅਦਿਨ੍ਨਾਦਾਨਤੁਲ੍ਯਾਵ, ਵੇਦਨੇਤ੍ਥ ਦ੍ਵਿਧਾ ਮਤਾ.

ਦੁਟ੍ਠੁਲ੍ਲਵਾਚਾਕਥਾ.

੩੬੩. ਵਣ੍ਣਂ ਪਨਤ੍ਤਨੋ ਕਾਮ-ਪਾਰਿਚਰਿਯਾਯ ਭਾਸਤੋ;

ਤਸ੍ਮਿਂਯੇਵ ਖਣੇ ਸਾ ਚੇ, ਜਾਨਾਤਿ ਗਰੁਕਂ ਸਿਯਾ.

੩੬੪. ਨੋ ਚੇ ਜਾਨਾਤਿ ਸਾ ਯਕ੍ਖਿ-ਪੇਤਿਦੇਵੀਸੁ ਪਣ੍ਡਕੇ;

ਹੋਤਿ ਥੁਲ੍ਲਚ੍ਚਯਂ ਤਸ੍ਸ, ਸੇਸੇ ਆਪਤ੍ਤਿ ਦੁਕ੍ਕਟਂ.

੩੬੫. ਚੀਵਰਾਦੀਹਿ ਅਞ੍ਞੇਹਿ, ਵਤ੍ਥੁਕਾਮੇਹਿ ਅਤ੍ਤਨੋ;

ਨਤ੍ਥਿ ਦੋਸੋ ਭਣਨ੍ਤਸ੍ਸ, ਪਾਰਿਚਰਿਯਾਯ ਵਣ੍ਣਨਂ.

੩੬੬. ਇਤ੍ਥਿਸਞ੍ਞਾ ਮਨੁਸ੍ਸਿਤ੍ਥੀ, ਪਾਰਿਚਰਿਯਾਯ ਰਾਗਿਤਾ;

ਓਭਾਸੋ ਤੇਨ ਰਾਗੇਨ, ਖਣੇ ਤਸ੍ਮਿਂ ਵਿਜਾਨਨਂ.

੩੬੭. ਪਞ੍ਚਙ੍ਗਾਨਿ ਇਮਾਨੇਤ੍ਥ, ਵੇਦਿਤਬ੍ਬਾਨਿ ਵਿਞ੍ਞੁਨਾ;

ਸਮੁਟ੍ਠਾਨਾਦਯੋਪ੍ਯਸ੍ਸ, ਅਨਨ੍ਤਰਸਮਾ ਮਤਾ.

ਅਤ੍ਤਕਾਮਪਾਰਿਚਰਿਯਕਥਾ.

੩੬੮. ਪਟਿਗ੍ਗਣ੍ਹਾਤਿ ਸਨ੍ਦੇਸਂ, ਪੁਰਿਸਸ੍ਸਿਤ੍ਥਿਯਾਪਿ ਵਾ;

ਵੀਮਂਸਤਿ ਗਰੁ ਹੋਤਿ, ਪਚ੍ਚਾਹਰਤਿ ਚੇ ਪਨ.

੩੬੯. ‘‘ਯਸ੍ਸਾ ਹਿ ਸਨ੍ਤਿਕਂ ਗਨ੍ਤ੍ਵਾ, ਆਰੋਚੇਹੀ’’ਤਿ ਪੇਸਿਤੋ;

ਤਮਦਿਸ੍ਵਾ ਤਦਞ੍ਞਸ੍ਸ, ਅਵਸ੍ਸਾਰੋਚਕਸ੍ਸ ਸੋ.

੩੭੦. ‘‘ਆਰੋਚੇਹੀ’’ਤਿ ਵਤ੍ਵਾ ਤਂ, ਪਚ੍ਚਾਹਰਤਿ ਚੇ ਪਨ;

ਭਿਕ੍ਖੁ ਸਙ੍ਘਾਦਿਸੇਸਮ੍ਹਾ, ਸਞ੍ਚਰਿਤ੍ਤਾ ਨ ਮੁਚ੍ਚਤਿ.

੩੭੧. ‘‘ਮਾਤਰਾ ਰਕ੍ਖਿਤਂ ਇਤ੍ਥਿਂ, ਗਚ੍ਛ ਬ੍ਰੂਹੀ’’ਤਿ ਪੇਸਿਤੋ;

ਪਿਤੁਰਕ੍ਖਿਤਮਞ੍ਞਂ ਵਾ, ਵਿਸਙ੍ਕੇਤੋਵ ਭਾਸਤੋ.

੩੭੨. ਪਟਿਗ੍ਗਣ੍ਹਨਤਾਦੀਹਿ, ਤੀਹਿ ਅਙ੍ਗੇਹਿ ਸਂਯੁਤੇ;

ਸਞ੍ਚਰਿਤ੍ਤੇ ਸਮਾਪਨ੍ਨੇ, ਗਰੁਕਾਪਤ੍ਤਿਮਾਦਿਸੇ.

੩੭੩. ਦ੍ਵੀਹਿ ਥੁਲ੍ਲਚ੍ਚਯਂ ਵੁਤ੍ਤਂ, ਪਣ੍ਡਕਾਦੀਸੁ ਤੀਹਿਪਿ;

ਏਕੇਨੇਵ ਚ ਸਬ੍ਬਤ੍ਥ, ਹੋਤਿ ਆਪਤ੍ਤਿ ਦੁਕ੍ਕਟਂ.

੩੭੪. ਚੇਤਿਯਸ੍ਸ ਚ ਸਙ੍ਘਸ੍ਸ, ਗਿਲਾਨਸ੍ਸ ਚ ਭਿਕ੍ਖੁਨੋ;

ਗਚ੍ਛਤੋ ਪਨ ਕਿਚ੍ਚੇਨ, ਅਨਾਪਤ੍ਤਿ ਪਕਾਸਿਤਾ.

੩੭੫. ਮਨੁਸ੍ਸਤ੍ਤਂ ਤਥਾ ਤਸ੍ਸਾ, ਨਨਾਲਂਵਚਨੀਯਤਾ;

ਪਟਿਗ੍ਗਣ੍ਹਨਤਾਦੀਨਂ, ਵਸਾ ਪਞ੍ਚਙ੍ਗਿਕਂ ਮਤਂ.

੩੭੬. ਇਦਞ੍ਹਿ ਛਸਮੁਟ੍ਠਾਨਂ, ਅਚਿਤ੍ਤਕਮੁਦੀਰਿਤਂ;

ਅਲਂਵਚਨੀਯਤ੍ਤਂ ਵਾ, ਪਣ੍ਣਤ੍ਤਿਂ ਵਾ ਅਜਾਨਤੋ.

੩੭੭. ਗਹੇਤ੍ਵਾ ਸਾਸਨਂ ਕਾਯ-ਵਿਕਾਰੇਨੂਪਗਮ੍ਮ ਤਂ;

ਵੀਮਂਸਿਤ੍ਵਾ ਹਰਨ੍ਤਸ੍ਸ, ਗਰੁਕਂ ਕਾਯਤੋ ਸਿਯਾ.

੩੭੮. ਸੁਤ੍ਵਾ ਯਥਾਨਿਸਿਨ੍ਨੋਵ, ਵਚਨਂ ਇਤ੍ਥਿਯਾ ਪੁਨ;

ਤਂ ਤਤ੍ਥੇਵਾਗਤਸ੍ਸੇਵ, ਆਰੋਚੇਨ੍ਤਸ੍ਸ ਵਾਚਤੋ.

੩੭੯. ਅਜਾਨਨ੍ਤਸ੍ਸ ਪਣ੍ਣਤ੍ਤਿਂ, ਕਾਯਵਾਚਾਹਿ ਤਂ ਵਿਧਿਂ;

ਕਰੋਤੋ ਹਰਤੋ ਵਾਪਿ, ਗਰੁਕਂ ਕਾਯਵਾਚਤੋ.

੩੮੦. ਜਾਨਿਤ੍ਵਾਪਿ ਕਰੋਨ੍ਤਸ੍ਸ, ਗਰੁਕਾਪਤ੍ਤਿਯੋ ਤਥਾ;

ਸਚਿਤ੍ਤਕੇਹਿ ਤੀਹੇਵ, ਸਮੁਟ੍ਠਾਨੇਹਿ ਜਾਯਰੇ.

ਸਞ੍ਚਰਿਤ੍ਤਕਥਾ.

੩੮੧. ਸਯਂਯਾਚਿਤਕੇਹੇਵ, ਕੁਟਿਕਂ ਅਪ੍ਪਮਾਣਿਕਂ;

ਅਤ੍ਤੁਦ੍ਦੇਸਂ ਕਰੋਨ੍ਤਸ੍ਸ, ਤਥਾਦੇਸਿਤਵਤ੍ਥੁਕਂ.

੩੮੨. ਹੋਨ੍ਤਿ ਸਙ੍ਘਾਦਿਸੇਸਾ ਦ੍ਵੇ, ਸਾਰਮ੍ਭਾਦੀਸੁ ਦੁਕ੍ਕਟਂ;

ਸਚੇ ਏਕਵਿਪਨ੍ਨਾ ਸਾ, ਗਰੁਕਂ ਏਕਕਂ ਸਿਯਾ.

੩੮੩. ਪੁਰਿਸਂ ਯਾਚਿਤੁਂ ਕਮ੍ਮ-ਸਹਾਯਤ੍ਥਾਯ ਵਟ੍ਟਤਿ;

ਮੂਲਚ੍ਛੇਜ੍ਜਵਸੇਨੇਵ, ਯਾਚਮਾਨਸ੍ਸ ਦੁਕ੍ਕਟਂ.

੩੮੪. ਅਵਜ੍ਜਂ ਹਤ੍ਥਕਮ੍ਮਮ੍ਪਿ, ਯਾਚਿਤੁਂ ਪਨ ਵਟ੍ਟਤਿ;

ਹਤ੍ਥਕਮ੍ਮਮ੍ਪਿ ਨਾਮੇਤਂ, ਕਿਞ੍ਚਿ ਵਤ੍ਥੁ ਨ ਹੋਤਿ ਹਿ.

੩੮੫. ਗੋਣਮਾਯਾਚਮਾਨਸ੍ਸ, ਠਪੇਤ੍ਵਾ ਞਾਤਕਾਦਿਕੇ;

ਦੁਕ੍ਕਟਂ ਤਸ੍ਸ ਨਿਦ੍ਦਿਟ੍ਠਂ, ਮੂਲਚ੍ਛੇਜ੍ਜੇਨ ਤੇਸੁਪਿ.

੩੮੬. ‘‘ਗੋਣਂ ਦੇਮਾ’’ਤਿ ਵੁਤ੍ਤੇਪਿ, ਗਹੇਤੁਂ ਨ ਚ ਵਟ੍ਟਤਿ;

ਸਕਟਂ ਦਾਰੁਭਣ੍ਡਤ੍ਤਾ, ਗਹੇਤੁਂ ਪਨ ਵਟ੍ਟਤਿ.

੩੮੭. ਵਾਸਿਫਰਸੁਕੁਦ੍ਦਾਲ-ਕੁਠਾਰਾਦੀਸ੍ਵਯਂ ਨਯੋ;

ਅਨਜ੍ਝਾਵੁਤ੍ਥਕਂ ਸਬ੍ਬਂ, ਹਰਾਪੇਤੁਮ੍ਪਿ ਵਟ੍ਟਤਿ.

੩੮੮. ਵਲ੍ਲਿਆਦਿਮ੍ਹਿ ਸਬ੍ਬਸ੍ਮਿਂ, ਗਰੁਭਣ੍ਡਪ੍ਪਹੋਨਕੇ;

ਪਰੇਸਂ ਸਨ੍ਤਕੇਯੇਵ, ਹੋਤਿ ਆਪਤ੍ਤਿ ਦੁਕ੍ਕਟਂ.

੩੮੯. ਪਚ੍ਚਯੇਸੁ ਹਿ ਤੀਸ੍ਵੇਵ, ਵਿਞ੍ਞਤ੍ਤਿ ਨ ਚ ਵਟ੍ਟਤਿ;

ਤਤਿਯੇ ਪਰਿਕਥੋਭਾਸ-ਨਿਮਿਤ੍ਤਾਨਿ ਚ ਲਬ੍ਭਰੇ.

੩੯੦. ‘‘ਅਦੇਸਿਤੇ ਚ ਵਤ੍ਥੁਸ੍ਮਿਂ, ਪਮਾਣੇਨਾਧਿਕਂ ਕੁਟਿਂ;

ਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ, ਅਰਞ੍ਞਂ ਗਚ੍ਛਤੋਪਿ ਚ.

੩੯੧. ਫਰਸੁਂ ਵਾਪਿ ਵਾਸਿਂ ਵਾ, ਨਿਸੇਨ੍ਤਸ੍ਸਾਪਿ ਦੁਕ੍ਕਟਂ;

ਛਿਨ੍ਦਤੋ ਦੁਕ੍ਕਟਂ ਰੁਕ੍ਖਂ, ਤਸ੍ਸ ਪਾਚਿਤ੍ਤਿਯਾ ਸਹ.

੩੯੨. ਏਵਂ ਪੁਬ੍ਬਪਯੋਗਸ੍ਮਿਂ, ਕੁਟਿਕਾਰਕਭਿਕ੍ਖੁਨੋ;

ਯਥਾਪਯੋਗਮਾਪਤ੍ਤਿਂ, ਵਿਨਯਞ੍ਞੂ ਵਿਨਿਦ੍ਦਿਸੇ.

੩੯੩. ਯਾ ਪਨ ਦ੍ਵੀਹਿ ਪਿਣ੍ਡੇਹਿ, ਨਿਟ੍ਠਾਨਂ ਤੁ ਗਮਿਸ੍ਸਤਿ;

ਹੋਤਿ ਥੁਲ੍ਲਚ੍ਚਯਂ ਤੇਸੁ, ਪਠਮੇ ਦੁਤਿਯੇ ਗਰੁ.

੩੯੪. ਅਨਾਪਤ੍ਤਿ ਸਚਞ੍ਞਸ੍ਸ, ਦੇਤਿ ਵਿਪ੍ਪਕਤਂ ਕੁਟਿਂ;

ਤਥਾ ਭੂਮਿਂ ਸਮਂ ਕਤ੍ਵਾ, ਭਿਨ੍ਦਤੋਪਿ ਚ ਤਂ ਕੁਟਿਂ.

੩੯੫. ਗੁਹਂ ਲੇਣਂ ਕਰੋਨ੍ਤਸ੍ਸ, ਤਿਣਪਣ੍ਣਚ੍ਛਦਮ੍ਪਿ ਵਾ;

ਵਾਸਾਗਾਰਂ ਠਪੇਤ੍ਵਾਨ, ਅਞ੍ਞਸ੍ਸਤ੍ਥਾਯ ਵਾ ਤਥਾ.

੩੯੬. ਦੇਸਾਪੇਤ੍ਵਾਵ ਭਿਕ੍ਖੂਹਿ, ਵਤ੍ਥੁਂ ਪਨ ਚ ਭਿਕ੍ਖੁਨੋ;

ਕ੍ਰਿਯਤੋਵ ਸਮੁਟ੍ਠਾਤਿ, ਕਰੋਤੋ ਅਪ੍ਪਮਾਣਿਕਂ.