ਅਨਿਯਤਕਥਾ

੫੪੨. ਰਹੋ ਨਿਸਜ੍ਜਸ੍ਸਾਦੇਨ, ਮਾਤੁਗਾਮਸ੍ਸ ਸਨ੍ਤਿਕਂ;

ਗਨ੍ਤੁਕਾਮੋ ਨਿਵਾਸੇਤਿ, ਅਕ੍ਖਿਂ ਅਞ੍ਜੇਤਿ ਭੁਞ੍ਜਤਿ.

੫੪੩. ਪਯੋਗੇ ਚ ਪਯੋਗੇ ਚ, ਹੋਤਿ ਸਬ੍ਬਤ੍ਥ ਦੁਕ੍ਕਟਂ;

ਗਚ੍ਛਤੋ ਪਦਵਾਰੇਨ, ਗਨ੍ਤ੍ਵਾ ਚਸ੍ਸ ਨਿਸੀਦਤੋ.

੫੪੪. ਨਿਸਜ੍ਜਾਯ ਉਭਿਨ੍ਨਮ੍ਪਿ, ਪਯੋਗਗਣਨਾਯ ਚ;

ਹੋਤਿ ਪਾਚਿਤ੍ਤਿਯਂ ਤਸ੍ਸ, ਬਹੁਕਾਨਿ ਬਹੂਸ੍ਵਪਿ.

੫੪੫. ਸਮੀਪੇਪਿ ਠਿਤੋ ਅਨ੍ਧੋ, ਅਨ੍ਤੋਦ੍ਵਾਦਸਹਤ੍ਥਕੇ;

ਨ ਕਰੋਤਿ ਅਨਾਪਤ੍ਤਿਂ, ਇਤ੍ਥੀਨਂ ਤੁ ਸਤਮ੍ਪਿ ਚ.

੫੪੬. ਚਕ੍ਖੁਮਾਪਿ ਨਿਪਜ੍ਜਿਤ੍ਵਾ, ਨਿਦ੍ਦਾਯਨ੍ਤੋਪਿ ਕੇਵਲਂ;

ਦ੍ਵਾਰੇ ਪਿਹਿਤਗਬ੍ਭਸ੍ਸ, ਨਿਸਿਨ੍ਨੋਪਿ ਨ ਰਕ੍ਖਤਿ.

੫੪੭. ਅਨਨ੍ਧੇ ਸਤਿ ਵਿਞ੍ਞੁਸ੍ਮਿਂ, ਠਿਤਸ੍ਸਾਰਹਸਞ੍ਞਿਨੋ;

ਨਿਸਜ੍ਜਪਚ੍ਚਯਾ ਦੋਸੋ, ਨਤ੍ਥਿ ਵਿਕ੍ਖਿਤ੍ਤਚੇਤਸੋ.

੫੪੮. ਨ ਦੋਸੁਮ੍ਮਤ੍ਤਕਾਦੀਨਂ, ਆਪਤ੍ਤੀਹਿਪਿ ਤੀਹਿਪਿ;

ਸਮੁਟ੍ਠਾਨਾਦਯੋ ਤੁਲ੍ਯਾ, ਪਠਮਨ੍ਤਿਮਵਤ੍ਥੁਨਾ.

ਪਠਮਾਨਿਯਤਕਥਾ.

੫੪੯. ਅਨਨ੍ਧਾਬਧਿਰੋ ਵਿਞ੍ਞੂ, ਇਤ੍ਥੀ ਵਾ ਪੁਰਿਸੋਪਿ ਵਾ;

ਅਨ੍ਤੋਦ੍ਵਾਦਸਹਤ੍ਥਟ੍ਠੋ, ਅਨਾਪਤ੍ਤਿਕਰੋ ਸਿਯਾ.

੫੫੦. ਅਨ੍ਧੋ ਅਬਧਿਰੋ ਵਾਪਿ, ਬਧਿਰੋ ਵਾਪਿ ਚਕ੍ਖੁਮਾ;

ਨ ਕਰੋਤਿ ਅਨਾਪਤ੍ਤਿਂ, ਤਿਸਮੁਟ੍ਠਾਨਮੇਵਿਦਂ.

ਦੁਤਿਯਾਨਿਯਤਕਥਾ.

ਇਤਿ ਵਿਨਯਵਿਨਿਚ੍ਛਯੇ ਅਨਿਯਤਕਥਾ ਨਿਟ੍ਠਿਤਾ.