ਸੇਦਮੋਚਨਕਥਾਵਣ੍ਣਨਾ

੬੭੯. ਸੁਣਤਂ ਸੁਣਨ੍ਤਾਨਂ ਭਿਕ੍ਖੂਨਂ ਪਟੁਭਾਵਕਰਾ ਵਿਨਯਵਿਨਿਚ੍ਛਯੇ ਪਞ੍ਞਾਕੋਸਲ੍ਲਸਾਧਿਕਾ ਤਤੋਯੇਵ ਵਰਾ ਉਤ੍ਤਮਾ. ਸੇਦਮੋਚਨਗਾਥਾਯੋਤਿ ਅਤ੍ਥਪਚ੍ਚਤ੍ਥਿਕਾਨਂ, ਸਾਸਨਪਚ੍ਚਤ੍ਥਿਕਾਨਞ੍ਚ ਵਿਸ੍ਸਜ੍ਜੇਤੁਮਸਕ੍ਕੁਣੇਯ੍ਯਭਾਵੇਨ ਚਿਨ੍ਤਯਨ੍ਤਸ੍ਸ ਖਿਨ੍ਨਸਰੀਰਾ ਸੇਦੇ ਮੋਚੇਨ੍ਤੀਤਿ ਸੇਦਮੋਚਨਾ. ਅਤ੍ਥਾਨੁਗਤਪਞ੍ਹਾ ਉਪਾਲਿਤ੍ਥੇਰੇਨ ਠਪਿਤਾ ਪਞ੍ਹਗਾਥਾਯੋ, ਤਪ੍ਪਟਿਬਦ੍ਧਾ ਵਿਸ੍ਸਜ੍ਜਨਗਾਥਾਯੋ ਚ ਇਤੋ ਪਰਂ ਵਕ੍ਖਾਮੀਤਿ ਯੋਜਨਾ.

੬੮੧. ਕਬਨ੍ਧਂ ਨਾਮ ਅਸੀਸਂ ਉਰਸਿ ਜਾਤਅਕ੍ਖਿਮੁਖਸਰੀਰਂ. ਯਥਾਹ – ‘‘ਅਸੀਸਕਂ ਕਬਨ੍ਧਂ, ਯਸ੍ਸ ਉਰੇ ਅਕ੍ਖੀਨਿ ਚੇਵ ਮੁਖਞ੍ਚ ਹੋਤੀ’’ਤਿ (ਪਰਿ. ਅਟ੍ਠ. ੪੭੯). ਮੁਖੇਨ ਕਰਣਭੂਤੇਨ. ਕਤ੍ਵਾਤਿ ਸੇਵਿਤ੍ਵਾ.

੬੮੨. ਤਸ੍ਸ ਭਿਕ੍ਖੁਨੋ ਕਥਂ ਪਾਰਾਜਿਕੋ ਸਿਯਾ ਪਾਰਾਜਿਕਧਮ੍ਮੋ ਕਥਂ ਸਿਯਾ.

੬੮੪. ਕਿਞ੍ਚੀਤਿ ਪਾਦਂ ਵਾ ਪਾਦਾਰਹਂ ਵਾ ਪਰਸਨ੍ਤਕਂ. ਪਰਞ੍ਚ ਨ ਸਮਾਦਪੇਤਿ ‘‘ਅਮੁਕਸ੍ਸ ਇਤ੍ਥਨ੍ਨਾਮਂ ਭਣ੍ਡਂ ਅਵਹਰਾਹੀ’’ਤਿ ਪਰਂ ਨ ਆਣਾਪੇਯ੍ਯ.

੬੮੫. ਪਰਸ੍ਸ ਕਿਞ੍ਚਿ ਨਾਦਿਯਨ੍ਤੋਤਿ ਸਮ੍ਬਨ੍ਧੋ. ਆਣਤ੍ਤਿਞ੍ਚਾਤਿ ਚ-ਸਦ੍ਦੇਨ ਸਂਵਿਧਾਨਂ, ਸਙ੍ਕੇਤਞ੍ਚ ਸਙ੍ਗਣ੍ਹਾਤਿ.

੬੮੬. ਗਰੁਕਂ ਭਣ੍ਡਨ੍ਤਿ ਪਾਦਗ੍ਘਨਕਭਾਵੇਨ ਗਰੁਭਣ੍ਡਂ. ‘‘ਪਰਿਕ੍ਖਾਰ’’ਨ੍ਤਿ ਏਤਸ੍ਸ ਵਿਸੇਸਨਂ. ਪਰਸ੍ਸ ਪਰਿਕ੍ਖਾਰਨ੍ਤਿ ਪਰਸਨ੍ਤਕਂ ਯਂ ਕਿਞ੍ਚਿ ਪਰਿਕ੍ਖਾਰਂ.

੬੯੨. ਮਨੁਸ੍ਸੁਤ੍ਤਰਿਕੇ ਧਮ੍ਮੇਤਿ ਉਤ੍ਤਰਿਮਨੁਸ੍ਸਧਮ੍ਮਵਿਸਯੇ. ਕਤਿਕਂ ਕਤ੍ਵਾਨਾਤਿ ‘‘ਏਵਂ ਨਿਸਿਨ੍ਨੇ ਏਵਂ ਠਿਤੇ ਏਵਂ ਗਮਨੇ ਅਤ੍ਥਂ ਆਵਿਕਰੋਤੀ’’ਤਿਆਦਿਂ ਕਤ੍ਵਾ. ਸਮ੍ਭਾਵਨਾਧਿਪ੍ਪਾਯੋਤਿ ‘‘ਅਰਹਾ’’ਤਿ ਗਹੇਤ੍ਵਾ ਮਹਾਸਮ੍ਭਾਵਨਂ ਕਰੋਤੀਤਿ ਅਧਿਪ੍ਪਾਯੋ ਹੁਤ੍ਵਾ. ਅਤਿਕ੍ਕਮਤਿ ਚੇਤਿ ਤਥਾ ਕਤਂ ਕਤਿਕਂ ਅਤਿਕ੍ਕਮਤਿ ਚੇ, ਤਥਾਰੂਪਂ ਨਿਸਜ੍ਜਂ ਵਾ ਠਾਨਂ ਵਾ ਗਮਨਂ ਵਾ ਕਰੋਤੀਤਿ ਅਤ੍ਥੋ. ਚੁਤੋਤਿ ਤਥਾਰੂਪਂ ਨਿਸਜ੍ਜਾਦਿਂ ਦਿਸ੍ਵਾ ਕੇਨਚਿ ਮਨੁਸ੍ਸਜਾਤਿਕੇਨ ‘‘ਅਰਹਾ’’ਤਿ ਤਙ੍ਖਣੇ ਞਾਤੇ ਸੋ ਪੁਗ੍ਗਲੋ ਪਾਰਾਜਿਕਂ ਆਪਜ੍ਜਤਿ.

੬੯੩. ਏਕਵਤ੍ਥੁਕਾ ਕਥਂ ਭਵੇਯ੍ਯੁਨ੍ਤਿ ਯੋਜਨਾ.

੬੯੪. ਇਤ੍ਥਿਯਾਤਿ ਏਕਿਸ੍ਸਾ ਇਤ੍ਥਿਯਾ. ਪਟਿਪਜ੍ਜਨ੍ਤੋਤਿ ਏਕਕ੍ਖਣੇ ਅਞ੍ਞੇਨ ਪੁਰਿਸੇਨ ਵੁਤ੍ਤਸਾਸਨਂ ਵਤ੍ਵਾ, ਇਮਿਨਾ ਚ ‘‘ਪਟਿਗ੍ਗਣ੍ਹਾਤਿ, ਵੀਮਂਸਤੀ’’ਤਿ ਅਙ੍ਗਦ੍ਵਯਸ੍ਸ ਪੁਰਿਮਸਿਦ੍ਧਤਂ ਦੀਪੇਤਿ ਇਮਸ੍ਸ ਪਚ੍ਚਾਹਰਣਕਤਞ੍ਚ. ਕਾਯਸਂਸਗ੍ਗਂ ਸਮਾਪਜ੍ਜਿਤ੍ਵਾ ਦੁਟ੍ਠੁਲ੍ਲਂ ਵਤ੍ਵਾ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਣਨ੍ਤੋ.

੬੯੫. ਯਥਾਵੁਤ੍ਤਂ ਵਤ੍ਤਂ ਅਚਰਿਤ੍ਵਾਤਿ ਭਗਵਤਾ ਵੁਤ੍ਤਂ ਪਰਿਵਾਸਾਦਿਵਤ੍ਤਂ ਅਚਰਿਤ੍ਵਾ.

੬੯੬. ਭਿਕ੍ਖੁਨੀਹਿ ਅਸਾਧਾਰਣਸਿਕ੍ਖਾਪਦਤ੍ਤਾ ਆਹ ‘‘ਨਤ੍ਥਿ ਸਙ੍ਘਾਦਿਸੇਸਤਾ’’ਤਿ.

੬੯੭. ਯੇਨ ਕੁਦ੍ਧੋ ਪਸਂਸਿਤੋਤਿ ਏਤ੍ਥ ‘‘ਨਿਨ੍ਦਿਤੋ ਚਾ’’ਤਿ ਸੇਸੋ.

੬੯੮. ਤਿਤ੍ਥਿਯਾਨਂ ਵਣ੍ਣਮ੍ਹਿ ਭਞ੍ਞਮਾਨੇ ਯੋ ਕੁਜ੍ਝਤਿ, ਸੋ ਆਰਾਧਕੋਤਿ ਯੋਜਨਾ, ਪਰਿਤੋਸਿਤੋ ਪਸਂਸਿਤੋਤਿ ਅਧਿਪ੍ਪਾਯੋ. ਤਿਤ੍ਥਿਯਪੁਬ੍ਬੋ ਇਮਸ੍ਮਿਂ ਸਾਸਨੇ ਪਬ੍ਬਜ੍ਜਂ ਲਭਿਤ੍ਵਾ ਤਿਤ੍ਥਿਯਾਨਂ ਵਣ੍ਣਸ੍ਮਿਂ ਭਞ੍ਞਮਾਨੇ ਸੁਤ੍ਵਾ ਸਚੇ ਕੁਪ੍ਪਤਿ ਅਨਤ੍ਤਮਨਂ ਕਰੋਤਿ, ਆਰਾਧਕੋ ਸਙ੍ਘਾਰਾਧਕੋ ਸਙ੍ਘਂ ਪਰਿਤੋਸੇਨ੍ਤੋ ਹੋਤਿ, ਸਮ੍ਬੁਦ੍ਧਸ੍ਸ ਵਣ੍ਣਸ੍ਮਿਂ ਭਞ੍ਞਮਾਨੇ ਯਦਿ ਕੁਜ੍ਝਤਿ, ਨਿਨ੍ਦਿਤੋਤਿ ਯੋਜਨਾ. ਏਤ੍ਥ ਸਮ੍ਬੁਦ੍ਧਸ੍ਸਾਤਿ ਉਪਲਕ੍ਖਣਂ.

੭੦੧. ਗਹੇਤ੍ਵਾਤਿ ਪਟਿਗ੍ਗਹੇਤ੍ਵਾ.

੭੫੧. ‘‘ਨ ਰਤ੍ਤਚਿਤ੍ਤੋ’’ਤਿਆਦਿਨਾ ਪੁਰਿਮਾਨਂ ਤਿਣ੍ਣਂ ਪਾਰਾਜਿਕਾਨਂ ਵੀਤਿਕ੍ਕਮਚਿਤ੍ਤੁਪ੍ਪਾਦਮਤ੍ਤਸ੍ਸਾਪਿ ਅਭਾਵਂ ਦੀਪੇਤਿ. ਮਰਣਾਯਾਤਿ ਏਤ੍ਥ ‘‘ਮਨੁਸ੍ਸਜਾਤਿਕਸ੍ਸਾ’’ਤਿ ਇਦਂ ਪਾਰਾਜਿਕਪਕਰਣਤੋਵ ਲਬ੍ਭਤਿ. ਤਸ੍ਸਾਤਿ ਕਿਞ੍ਚਿ ਦੇਨ੍ਤਸ੍ਸ. ਤਨ੍ਤਿ ਤਥਾ ਦੀਯਮਾਨਂ.

੭੫੨. ‘‘ਪਰਾਜਯੋ’’ਤਿ ਇਦਂ ਅਭਬ੍ਬਪੁਗ੍ਗਲੇਸੁ ਸਙ੍ਘਭੇਦਕਸ੍ਸ ਅਨ੍ਤੋਗਧਤ੍ਤਾ ਵੁਤ੍ਤਂ. ਸਲਾਕਗ੍ਗਾਹੇਨਾਪਿ ਸਙ੍ਘਂ ਭਿਨ੍ਦਨ੍ਤੋ ਸਙ੍ਘਭੇਦਕੋਵ ਹੋਤਿ.

੭੫੩. ਅਦ੍ਧਯੋਜਨੇ ਯਂ ਤਿਣ੍ਣਂ ਚੀਵਰਾਨਂ ਅਞ੍ਞਤਰਂ ਏਕਂ ਚੀਵਰਂ ਨਿਕ੍ਖਿਪਿਤ੍ਵਾਨਾਤਿ ਯੋਜਨਾ.

੭੫੪. ਸੁਪ੍ਪਤਿਟ੍ਠਿਤਨਿਗ੍ਰੋਧਸਦਿਸੇ ਰੁਕ੍ਖਮੂਲਕੇ ਤਿਚੀਵਰਂ ਨਿਕ੍ਖਿਪਿਤ੍ਵਾ ਅਦ੍ਧਯੋਜਨੇ ਅਰੁਣਂ ਉਟ੍ਠਾਪੇਨ੍ਤਸ੍ਸਾਤਿ ਯੋਜਨਾ.

੭੫੫. ਕਾਯਿਕਾ ਨਾਨਾਵਤ੍ਥੁਕਾਯੋ ਸਮ੍ਬਹੁਲਾ ਆਪਤ੍ਤਿਯੋ ਅਪੁਬ੍ਬਂ ਅਚਰਿਮਂ ਏਕਕ੍ਖਣੇ ਕਥਂ ਫੁਸੇਤਿ ਯੋਜਨਾ.

੭੫੭. ਵਾਚਸਿਕਾ ਨ ਕਾਯਿਕਾ ਨਾਨਾਵਤ੍ਥੁਕਾਯੋ ਸਮ੍ਬਹੁਲਾ ਆਪਤ੍ਤਿਯੋ ਅਪੁਬ੍ਬਂ ਅਚਰਿਮਂ ਏਕਕ੍ਖਣੇ ਕਥਂ ਫੁਸੇਤਿ ਯੋਜਨਾ.

੭੫੮. ਵਿਨਯਨਸਤ੍ਥੇਤਿ ਵਿਨਯਪਿਟਕੇ. ਤਸ੍ਸ ਭਿਕ੍ਖੁਸ੍ਸ.

੭੫੯. ‘‘ਇਤ੍ਥਿਯਾ’’ਤਿਆਦੀਸੁ ਸਹਤ੍ਥੇ ਕਰਣਵਚਨਂ. ਇਤ੍ਥਿਯਾ ਵਾ ਪੁਰਿਸੇਨ ਵਾ ਪਣ੍ਡਕੇਨ ਵਾ ਨਿਮਿਤ੍ਤਕੇ ਮੇਥੁਨਂ ਨ ਸੇਵਨ੍ਤੋ ਨ ਪਟਿਸੇਵਨ੍ਤੋ ਮੇਥੁਨਪਚ੍ਚਯਾ ਚੁਤੋਤਿ ਯੋਜਨਾ.

੭੬੦. ਕਾਯਸਂਸਗ੍ਗੋਯੇਵ ਕਾਯਸਂਸਗ੍ਗਤਾ, ਤਂ ਆਪਨ੍ਨਾ. ਅਟ੍ਠਵਤ੍ਥੁਕਂ ਛੇਜ੍ਜਨ੍ਤਿ ਏਵਂਨਾਮਕਂ ਪਾਰਾਜਿਕਂ.

੭੬੨. ਸਮਯੇ ਪਿਟ੍ਠਿਸਞ੍ਞਿਤੇਤਿ ਗਿਮ੍ਹਾਨਂ ਪਚ੍ਛਿਮਮਾਸਸ੍ਸ ਪਠਮਦਿਵਸਤੋ ਯਾਵ ਹੇਮਨ੍ਤਸ੍ਸ ਪਠਮਦਿਵਸੋ, ਏਤ੍ਥਨ੍ਤਰੇ ਸਤ੍ਤਮਾਸਮਤ੍ਤੇ ਪਿਟ੍ਠਿਸਞ੍ਞਿਤੇ ਸਮਯੇ. ‘‘ਮਾਤੁਯਾਪਿ ਚਾ’’ਤਿ ਵਤ੍ਤਬ੍ਬੇ ‘‘ਮਾਤਰਮ੍ਪਿ ਚਾ’’ਤਿ ਵੁਤ੍ਤਂ. ਸੋਯੇਵ ਵਾ ਪਾਠੋ.

੭੬੪. ‘‘ਅਵਸ੍ਸੁਤਹਤ੍ਥਤੋ ਹਿ ਪਿਣ੍ਡਂ ਗਹੇਤ੍ਵਾ’’ਤਿ ਇਮਿਨਾ ਸਙ੍ਘਾਦਿਸੇਸਸ੍ਸ ਵਤ੍ਥੁਮਾਹ, ਲਸੁਣਨ੍ਤਿ ਪਾਚਿਤ੍ਤਿਯਸ੍ਸ ਵਤ੍ਥੁਂ, ਮਨੁਸ੍ਸਮਂਸਨ੍ਤਿ ਥੁਲ੍ਲਚ੍ਚਯਵਤ੍ਥੁਂ, ਅਕਪ੍ਪਮਞ੍ਞਨ੍ਤਿ ਦੁਕ੍ਕਟਵਤ੍ਥੁਂ. ਅਕਪ੍ਪਮਞ੍ਞਨ੍ਤਿ ਏਤ੍ਥ ‘‘ਮਂਸ’’ਨ੍ਤਿ ਸੇਸੋ. ‘‘ਸਬ੍ਬੇ ਏਕਤੋ’’ਤਿ ਪਦਚ੍ਛੇਦੋ. ਏਕਤੋਤਿ ਏਤ੍ਥ ‘‘ਮਦ੍ਦਿਤ੍ਵਾ’’ਤਿ ਸੇਸੋ, ਅਕਪ੍ਪਿਯਮਂਸੇਹਿ ਸਦ੍ਧਿਂ ਏਕਤੋ ਮਦ੍ਦਿਤ੍ਵਾ ਖਾਦਤੀਤਿ ਅਤ੍ਥੋ. ਸਬ੍ਬਮੇਤਂ ‘‘ਗਹੇਤ੍ਵਾ, ਮਦ੍ਦਿਤ੍ਵਾ, ਖਾਦਤੀ’’ਤਿ ਕਿਰਿਯਾਨਂ ਕਮ੍ਮਵਚਨਂ. ਮਨੁਸ੍ਸਮਂਸਞ੍ਚਾਤਿ ਏਤ੍ਥ ਚ-ਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ ਹੋਤਿ. ਤਸ੍ਸਾਤਿ ਭਿਕ੍ਖੁਨਿਯਾ. ਸਙ੍ਘਾਦਿਸੇਸਪਾਚਿਤ੍ਤਿਯਦੁਕ੍ਕਟਪਾਟਿਦੇਸਨੀਯਥੁਲ੍ਲਚ੍ਚਯਾਨਿ ਏਕਕ੍ਖਣੇ ਹੋਨ੍ਤਿ.

੭੬੫. ‘‘ਪੁਗ੍ਗਲੋ ਏਕੋ’’ਤਿ ਪਦਚ੍ਛੇਦੋ. ਦ੍ਵੇਪਿ ਚ ਪੁਣ੍ਣਵਸ੍ਸਾਤਿ ਪਰਿਪੁਣ੍ਣਵੀਸਤਿਵਸ੍ਸਾ ਚ ਦ੍ਵੇ ਸਾਮਣੇਰਾ. ਏਕਾਵ ਤੇਸਂ ਪਨ ਕਮ੍ਮਵਾਚਾਤਿ ਤੇਸਂ ਉਭਿਨ੍ਨਂ ਸਾਮਣੇਰਾਨਂ ਏਕੇਨ ਆਚਰਿਯੇਨ ਏਕਾਵ ਉਪਸਮ੍ਪਦਕਮ੍ਮਵਾਚਾ ਕਤਾ. ਏਕਸ੍ਸਾਤਿ ਏਕਸ੍ਸਾਪਿ ਸਾਮਣੇਰਸ੍ਸ. ਕਮ੍ਮਨ੍ਤਿ ਉਪਸਮ੍ਪਦਕਮ੍ਮਂ. ਨ ਰੂਹਤੇਤਿ ਨ ਸਮ੍ਪਜ੍ਜਤਿ, ਕਿਮੇਤ੍ਥ ਕਾਰਣਂ, ਵਦ ਭਦ੍ਦਮੁਖਾਤਿ ਅਧਿਪ੍ਪਾਯੋ.

੭੬੬. ਮਹਿਦ੍ਧਿਕੇਸੂਤਿ ਦ੍ਵੀਸੁ ਸਾਮਣੇਰੇਸੁ. ਸਚੇ ਪਨ ਏਕੋ ਕੇਸਗ੍ਗਮਤ੍ਤਮ੍ਪਿ ਆਕਾਸਗੋ ਆਕਾਸਟ੍ਠੋ ਹੋਤਿ, ਆਕਾਸਗਤਸ੍ਸੇਵ ਕਤਂ ਤਂ ਉਪਸਮ੍ਪਦਕਮ੍ਮਂ ਨੇਵ ਰੂਹਤਿ ਨੇਵ ਸਮ੍ਪਜ੍ਜਤਿ, ਭੂਮਿਗਤਸ੍ਸ ਰੂਹਤੀਤਿ ਯੋਜਨਾ.

੭੬੭. ਇਦ੍ਧਿਯਾ ਆਕਾਸੇ ਠਿਤੇਨ ਸਙ੍ਘੇਨ ਭੂਮਿਗਤਸ੍ਸ ਸਾਮਣੇਰਸ੍ਸ ਉਪਸਮ੍ਪਦਕਮ੍ਮਂ ਨ ਕਾਤਬ੍ਬਂ. ਯਦਿ ਕਰੋਤਿ, ਕੁਪ੍ਪਤੀਤਿ ਯੋਜਨਾ. ਇਦਞ੍ਚ ਸਬ੍ਬਕਮ੍ਮਾਨਂ ਸਾਧਾਰਣਲਕ੍ਖਣਂ. ਯਥਾਹ – ‘‘ਸਙ੍ਘੇਨਾਪਿ ਆਕਾਸੇ ਨਿਸੀਦਿਤ੍ਵਾ ਭੂਮਿਗਤਸ੍ਸ ਕਮ੍ਮਂ ਨ ਕਾਤਬ੍ਬਂ. ਸਚੇ ਕਰੋਤਿ, ਕੁਪ੍ਪਤੀ’’ਤਿ (ਪਰਿ. ਅਟ੍ਠ. ੪੮੧).

੭੬੮. ਵਤ੍ਥਂ ਕਪ੍ਪਕਤਞ੍ਚ ਨ ਹੋਤਿ, ਰਤ੍ਤਞ੍ਚ ਨ ਹੋਤਿ, ਕੇਸਕਮ੍ਬਲਾਦਿ ਅਕਪ੍ਪਿਯਞ੍ਚ ਹੋਤਿ, ਨਿਵਤ੍ਥਸ੍ਸ ਪਨਾਪਤ੍ਤਿ ਤਂ ਪਨ ਨਿਵਤ੍ਥਸ੍ਸ ਭਿਕ੍ਖੁਨੋ ਆਪਤ੍ਤਿ ਹੋਤਿ. ਅਨਾਪਤ੍ਤਿ ਕਥਂ ਸਿਯਾ, ਵਦ ਭਦ੍ਦਮੁਖਾਤਿ ਯੋਜਨਾ.

੭੬੯. ਏਤ੍ਥ ਏਤਸ੍ਮਿਂ ਅਕਪ੍ਪਿਯਵਤ੍ਥੁਧਾਰਣੇ ਤਨ੍ਨਿਮਿਤ੍ਤਂ. ਅਚ੍ਛਿਨ੍ਨਚੀਵਰਸ੍ਸ ਭਿਕ੍ਖੁਨੋ ਅਨਾਪਤ੍ਤਿ ਸਿਯਾਤਿ ਯੋਜਨਾ. ‘‘ਕਿਞ੍ਚਿਪੀ’’ਤਿਆਦਿਨਾ ਵੁਤ੍ਤਮੇਵਤ੍ਥਂ ਸਮਤ੍ਥੇਤਿ. ਅਸ੍ਸ ਅਚ੍ਛਿਨ੍ਨਚੀਵਰਸ੍ਸ ਭਿਕ੍ਖੁਸ੍ਸ ਅਕਪ੍ਪਿਯਂ ਨਾਮ ਕਿਞ੍ਚਿਪਿ ਚੀਵਰਂ ਨ ਵਿਜ੍ਜਤਿ, ਤਸ੍ਮਾ ਅਨਾਪਤ੍ਤੀਤਿ ਅਧਿਪ੍ਪਾਯੋ.

੭੭੦. ਕੁਤੋਪਿ ਚ ਪੁਰਿਸਸ੍ਸ ਹਤ੍ਥਤੋ ਭੋਜਨਸ੍ਸ ਕਿਞ੍ਚਿ ਨ ਗਣ੍ਹਤਿ, ਭੋਜਨਤੋ ਕਿਞ੍ਚਿਪਿ ਸਯਮ੍ਪਿ ਕਸ੍ਸਚਿ ਪੁਰਿਸਸ੍ਸ ਨ ਦੇਤਿ, ਤਥਾਪਿ ਗਰੁਕਂ ਵਜ੍ਜਂ ਸਙ੍ਘਾਦਿਸੇਸਾਪਤ੍ਤਿਂ ਉਪੇਤਿ ਆਪਜ੍ਜਤਿ, ਤਂ ਕਥਮਾਪਜ੍ਜਤਿ, ਤ੍ਵਂ ਯਦਿ ਵਿਨਯੇ ਕੁਸਲੋ ਅਸਿ, ਮੇ ਮਯ੍ਹਂ ਵਦ ਏਤਂ ਕਾਰਣਂ ਕਥੇਹੀਤਿ ਯੋਜਨਾ. ਹਵੇਤਿ ਨਿਪਾਤਮਤ੍ਤਂ.

੭੭੧. ਯਾ ਪਨ ਭਿਕ੍ਖੁਨੀ ਅਞ੍ਞਾਯ ਭਿਕ੍ਖੁਨਿਯਾ ‘‘ਇਙ੍ਘ, ਅਯ੍ਯੇ, ਯਂ ਤੇ ਏਸੋ ਪੁਰਿਸਪੁਗ੍ਗਲੋ ਦੇਤਿ ਖਾਦਨੀਯਂ ਵਾ’’ਤਿਆਦਿਨਾ (ਪਾਚਿ. ੭੦੫) ਸਙ੍ਘਾਦਿਸੇਸਮਾਤਿਕਾਯ ਵੁਤ੍ਤਨਯੇਨ ਉਯ੍ਯੋਜਿਤਾ ਅਵਸ੍ਸੁਤਮ੍ਹਾ ਪੁਰਿਸਪੁਗ੍ਗਲਾ ਯਂ ਕਿਞ੍ਚਿ ਭੋਜਨਂ ਆਦਾਯ ਪਟਿਗ੍ਗਹੇਤ੍ਵਾ ਸਚੇ ਭੁਞ੍ਜਤਿ, ਸਾ ਤਥਾ ਭੁਞ੍ਜਨ੍ਤੀ ਯਾਯ ਉਯ੍ਯੋਜਿਤਾ ਭੁਞ੍ਜਤਿ, ਤਸ੍ਸਾ ਉਯ੍ਯੋਜਿਕਾਯ ਧੀਰਾ ਵਿਨਯਧਰਾ ਪਣ੍ਡਿਤਾ ਸਙ੍ਘਾਦਿਸੇਸਂ ਕਥਯਨ੍ਤਿ ਤਸ੍ਸਾ ਉਯ੍ਯੋਜਿਤਾਯ ਭੋਜਨਪਰਿਯੋਸਾਨੇ ਉਯ੍ਯੋਜਿਕਾਯ ਸਙ੍ਘਾਦਿਸੇਸਂ ਵਦਨ੍ਤੀਤਿ ਯੋਜਨਾ. ਯਥਾਹ – ‘‘ਤਸ੍ਸਾ ਹਿ ਭੋਜਨਪਰਿਯੋਸਾਨੇ ਉਯ੍ਯੋਜਿਕਾਯ ਸਙ੍ਘਾਦਿਸੇਸੋ ਹੋਤੀ’’ਤਿ (ਪਰਿ. ਅਟ੍ਠ. ੪੮੧).

੭੭੨. ਤਂ ਕਥਂ ਯਦਿ ਬੁਜ੍ਝਸਿ ਜਾਨਾਸਿ, ਸਾਧੁਕਂ ਬ੍ਰੂਹਿ ਕਥੇਹੀਤਿ ਯੋਜਨਾ.

੭੭੩. ਨਿਸੇਵਿਤੇਤਿ ਤਾਯ ਉਯ੍ਯੋਜਿਤਾਯ ਭਿਕ੍ਖੁਨਿਯਾ ਤਸ੍ਸ ਪੁਰਿਸਪੁਗ੍ਗਲਸ੍ਸ ਹਤ੍ਥਤੋ ਪਟਿਗ੍ਗਹਿਤੇ ਤਸ੍ਮਿਂ ਦਨ੍ਤਪੋਨੇ ਪਰਿਭੁਤ੍ਤੇ ਉਯ੍ਯੋਜਿਕਾ ਲਹੁਵਜ੍ਜਂ ਆਪਜ੍ਜਤੀਤਿ ਅਤ੍ਥੋ.

੭੭੫. ‘‘ਉਕ੍ਖਿਤ੍ਤਕੋ’’ਤਿ ਇਮਿਨਾ ਆਪਤ੍ਤਿਵਜ੍ਜਮਾਹ. ਯਥਾਹ – ‘‘ਤੇਨ ਹਿ ਸਦ੍ਧਿਂ ਵਿਨਯਕਮ੍ਮਂ ਨਤ੍ਥਿ, ਤਸ੍ਮਾ ਸੋ ਸਙ੍ਘਾਦਿਸੇਸਂ ਆਪਜ੍ਜਿਤ੍ਵਾ ਛਾਦੇਨ੍ਤੋ ਵਜ੍ਜਂ ਨ ਫੁਸਤੀ’’ਤਿ.

੭੭੬. ਸਪ੍ਪਾਣਪ੍ਪਾਣਜਨ੍ਤਿ ਸਪ੍ਪਾਣਕੇ ਚ ਅਪ੍ਪਾਣਕੇ ਚ ਜਾਤਂ. ਨੇਵ ਜਙ੍ਗਮਨ੍ਤਿ ਪਾਦੇਹਿ ਭੂਮਿਯਂ ਨੇਵ ਚਰਨ੍ਤਂ. ਨ ਵਿਹਙ੍ਗਮਨ੍ਤਿ ਆਕਾਸੇ ਪਕ੍ਖਂ ਪਸਾਰੇਤ੍ਵਾ ਨ ਚਰਨ੍ਤਂ. ਦ੍ਵਿਜਨ੍ਤਿ ਦ੍ਵੀਹਿ ਪਚ੍ਚਯੇਹਿ, ਦ੍ਵਿਕ੍ਖਤ੍ਤੁਂ ਵਾ ਜਾਤਤ੍ਤਾ ਦ੍ਵਿਜਂ. ਕਨ੍ਤਨ੍ਤਿ ਮਨੋਹਰਂ. ਅਕਨ੍ਤਨ੍ਤਿ ਅਮਨੋਹਰਂ.

੭੭੭. ਸਪ੍ਪਾਣਜੋ ਸਦ੍ਦੋ ਚਿਤ੍ਤਜੋ ਵੁਤ੍ਤੋ, ਅਪ੍ਪਾਣਜੋ ਉਤੁਜੋ ਸਦ੍ਦੋ ਵੁਤ੍ਤੋ, ਸੋ ਪਨ ਦ੍ਵੀਹੇਵ ਪਚ੍ਚਯੇਹਿ ਜਾਤਤ੍ਤਾ ‘‘ਦ੍ਵਿਜੋ’’ਤਿ ਮਤੋਤਿ ਯੋਜਨਾ.

੭੭੮. ‘‘ਵਿਨਯੇ’’ਤਿਆਦਿਗਾਥਾ ਵਣ੍ਣਿਤਤ੍ਥਾਯੇਵ.

ਇਤਿ ਉਤ੍ਤਰੇ ਲੀਨਤ੍ਥਪਕਾਸਨਿਯਾ

ਸੇਦਮੋਚਨਕਥਾਵਣ੍ਣਨਾ ਨਿਟ੍ਠਿਤਾ.