ਸਮੁਟ੍ਠਾਨਸੀਸਕਥਾਵਣ੍ਣਨਾ
੩੨੫-੬. ਮਹੇਸਿਨਾ ਦ੍ਵੀਸੁ ਵਿਭਙ੍ਗੇਸੁ ਪਞ੍ਞਤ੍ਤਾਨਿ ਯਾਨਿ ਪਾਰਾਜਿਕਾਦੀਨਿ ਸਿਕ੍ਖਾਪਦਾਨਿ ਉਪੋਸਥੇ ਉਦ੍ਦਿਸਨ੍ਤਿ, ਤੇਸਂ ਸਿਕ੍ਖਾਪਦਾਨਂ ਸਮੁਟ੍ਠਾਨਂ ਭਿਕ੍ਖੂਨਂ ਪਾਟਵਤ੍ਥਾਯ ਇਤੋ ਪਰਂ ਪਵਕ੍ਖਾਮਿ, ਤਂ ਸਮਾਹਿਤਾ ਸੁਣਾਥਾਤਿ ਯੋਜਨਾ.
੩੨੭. ਕਾਯੋ ਚ ਵਾਚਾ ਚ ਕਾਯਵਾਚਾ ਚਾਤਿ ਅਚਿਤ੍ਤਕਾਨਿ ਯਾਨਿ ਤੀਣਿ ਸਮੁਟ੍ਠਾਨਾਨਿ, ਤਾਨੇਵ ਚਿਤ੍ਤੇਨ ਪਚ੍ਚੇਕਂ ਯੋਜਿਤਾਨਿ ਸਚਿਤ੍ਤਕਾਨਿ ਤੀਣਿ ਸਮੁਟ੍ਠਾਨਾਨਿ ਹੋਨ੍ਤੀਤਿ ਏਵਮੇਵ ਸਮੁਟ੍ਠਾਨਂ ਪੁਰਿਮਾਨਂ ਦ੍ਵਿਨ੍ਨਂ ਵਸੇਨ ਏਕਙ੍ਗਿਕਂ, ਤਤਿਯਚਤੁਤ੍ਥਪਞ੍ਚਮਾਨਂ ਵਸੇਨ ਦ੍ਵਙ੍ਗਿਕਂ, ਛਟ੍ਠਸ੍ਸ ਵਸੇਨ ਤਿਵਙ੍ਗਿਕਞ੍ਚਾਤਿ ਏਵਂ ਛਧਾ ਸਮੁਟ੍ਠਾਨਵਿਧਿਂ ਵਦਨ੍ਤੀਤਿ ਯੋਜਨਾ. ਕਾਯੋ, ਵਾਚਾਤਿ ਏਕਙ੍ਗਿਕਂ ਦ੍ਵਯਂ, ਕਾਯਵਾਚਾ, ਕਾਯਚਿਤ੍ਤਂ, ਵਾਚਾਚਿਤ੍ਤਨ੍ਤਿ ਦੁਵਙ੍ਗਿਕਤ੍ਤਯਂ, ਕਾਯਵਾਚਾਚਿਤ੍ਤਨ੍ਤਿ ਅਙ੍ਗਭੇਦੇਨ ਤਿਵਿਧਮ੍ਪਿ ਅਵਯਵਭੇਦੇਨ ਸਮੁਟ੍ਠਾਨਭੇਦਵਿਧਿਂ ਛਪ੍ਪਕਾਰਂ ਵਦਨ੍ਤੀਤਿ ਅਧਿਪ੍ਪਾਯੋ.
੩੨੮. ਤੇਸੁ ਛਸੁ ਸਮੁਟ੍ਠਾਨੇਸੁ ਏਕੇਨ ਵਾ ਸਮੁਟ੍ਠਾਨੇਨ ਦ੍ਵੀਹਿ ਵਾ ਤੀਹਿ ਵਾ ਚਤੂਹਿ ਵਾ ਛਹਿ ਵਾ ਸਮੁਟ੍ਠਾਨੇਹਿ ਨਾਨਾ ਆਪਤ੍ਤਿਯੋ ਜਾਯਰੇਤਿ ਸਮ੍ਬਨ੍ਧੋ.
੩੨੯. ਤਤ੍ਥ ਤਾਸੁ ਨਾਨਾਪਤ੍ਤੀਸੁ. ਪਞ੍ਚ ਸਮੁਟ੍ਠਾਨਾਨਿ ਏਤਿਸ੍ਸਾਤਿ ਪਞ੍ਚਸਮੁਟ੍ਠਾਨਾ, ਏਵਰੂਪਾ ਕਾਚਿ ਆਪਤ੍ਤਿ ਨ ਵਿਜ੍ਜਤਿ. ਏਕਮੇਕਂ ਸਮੁਟ੍ਠਾਨਂ ਯਾਸਨ੍ਤਿ ਵਿਗ੍ਗਹੋ. ਪਚ੍ਛਿਮੇਹੇਵ ਤੀਹਿਪੀਤਿ ਸਚਿਤ੍ਤਕੇਹੇਵ ਤੀਹਿ ਸਮੁਟ੍ਠਾਨੇਹਿ, ਯਾ ਆਪਤ੍ਤਿ ਏਕਸਮੁਟ੍ਠਾਨਾ ਹੋਤਿ, ਸਾ ਸਚਿਤ੍ਤਕਾਨਂ ਤਿਣ੍ਣਮਞ੍ਞਤਰੇਨ ਹੋਤੀਤਿ ਅਧਿਪ੍ਪਾਯੋ.
੩੩੦-੧. ਤਤਿਯਚ੍ਛਟ੍ਠਤੋਪਿ ਚਾਤਿ ਕਾਯਵਾਚਤੋ, ਕਾਯਵਾਚਾਚਿਤ੍ਤਤੋ ਚ. ਚਤੁਤ੍ਥਚ੍ਛਟ੍ਠਤੋ ਚੇਵਾਤਿ ਕਾਯਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ. ਪਞ੍ਚਮਚ੍ਛਟ੍ਠਤੋਪਿ ਚਾਤਿ ਵਾਚਾਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ. ‘‘ਕਾਯਤੋ ਕਾਯਚਿਤ੍ਤਤੋ’’ਤਿ ਪਠਮਂ ਦ੍ਵਿਸਮੁਟ੍ਠਾਨਂ, ‘‘ਵਾਚਤੋ ਵਾਚਾਚਿਤ੍ਤਤੋ’’ਤਿ ਦੁਤਿਯਂ, ‘‘ਕਾਯਵਾਚਤੋ ਕਾਯਵਾਚਾਚਿਤ੍ਤਤੋ’’ਤਿ ਤਤਿਯਂ, ‘‘ਕਾਯਚਿਤ੍ਤਤੋ ਕਾਯਵਾਚਾਚਿਤ੍ਤਤੋ’’ਤਿ ਚਤੁਤ੍ਥਂ, ‘‘ਵਾਚਾਚਿਤ੍ਤਤੋ ਕਾਯਵਾਚਾਚਿਤ੍ਤਤੋ’’ਤਿ ਪਞ੍ਚਮਂ ਦ੍ਵਿਸਮੁਟ੍ਠਾਨਨ੍ਤਿ ਏਵਂ ਪਞ੍ਚਧਾ ਏਵ ਠਿਤੇਹਿ ਦ੍ਵੀਹਿ ਸਮੁਟ੍ਠਾਨੇਹਿ ਏਸਾ ਦ੍ਵਿਸਮੁਟ੍ਠਾਨਾਪਤ੍ਤਿ ਜਾਯਤੇ ਸਮੁਟ੍ਠਾਤਿ. ਨ ਅਞ੍ਞਤੋਤਿ ਕਾਯਤੋ ਵਾਚਤੋਤਿ ਏਕਂ, ਵਾਚਤੋ ਕਾਯਵਾਚਤੋਤਿ ਏਕਨ੍ਤਿ ਏਵਂ ਯਥਾਵੁਤ੍ਤਕ੍ਕਮਵਿਪਰਿਯਾਯੇਨ ਯੋਜਿਤੇਹਿ ਅਞ੍ਞੇਹਿ ਸਮੁਟ੍ਠਾਨੇਹਿ ਨ ਸਮੁਟ੍ਠਾਤਿ.
੩੩੨. ਪਠਮੇਹਿ ਚ ਤੀਹੀਤਿ ‘‘ਕਾਯਤੋ, ਵਾਚਤੋ, ਕਾਯਵਾਚਤੋ’’ਤਿ ਪਠਮਂ ਨਿਦ੍ਦਿਟ੍ਠੇਹਿ ਤੀਹਿ ਅਚਿਤ੍ਤਕਸਮੁਟ੍ਠਾਨੇਹਿ. ਪਚ੍ਛਿਮੇਹਿ ਚਾਤਿ ‘‘ਕਾਯਚਿਤ੍ਤਤੋ, ਵਾਚਾਚਿਤ੍ਤਤੋ, ਕਾਯਵਾਚਾਚਿਤ੍ਤਤੋ’’ਤਿ ਏਵਂ ਪਚ੍ਛਾ ਵੁਤ੍ਤੇਹਿ ਸਚਿਤ੍ਤਕੇਹਿ ਤੀਹਿ ਸਮੁਟ੍ਠਾਨੇਹਿ. ਨ ਅਞ੍ਞਤੋਤਿ ‘‘ਕਾਯਤੋ, ਵਾਚਤੋ, ਕਾਯਚਿਤ੍ਤਤੋ, ਵਾਚਤੋ, ਕਾਯਵਾਚਤੋ, ਕਾਯਚਿਤ੍ਤਤੋ’’ਤਿ ਏਵਂ ਵੁਤ੍ਤਵਿਪਲ੍ਲਾਸਤੋ ਅਞ੍ਞੇਹਿ ਤੀਹਿ ਸਮੁਟ੍ਠਾਨੇਹਿ ਨ ਸਮੁਟ੍ਠਾਤਿ.
੩੩੩-੪. ਪਠਮਾ ਤਤਿਯਾ ਚੇਵ, ਚਤੁਤ੍ਥਚ੍ਛਟ੍ਠਤੋਪਿ ਚਾਤਿ ਕਾਯਤੋ, ਕਾਯਵਾਚਤੋ, ਕਾਯਚਿਤ੍ਤਤੋ, ਕਾਯਵਾਚਾਚਿਤ੍ਤਤੋਤਿ ਏਤੇਹਿ ਚਤੂਹਿ ਸਮੁਟ੍ਠਾਨੇਹਿ ਚੇਵ. ਦੁਤਿਯਾ…ਪੇ… ਚ੍ਛਟ੍ਠਤੋਪਿ ਚਾਤਿ ਵਾਚਤੋ, ਕਾਯਵਾਚਤੋ, ਵਾਚਾਚਿਤ੍ਤਤੋ, ਕਾਯਵਾਚਾਚਿਤ੍ਤਤੋਤਿ ਇਮੇਹਿ ਚਤੂਹਿ ਚਾਤਿ ਚਤੁਸਮੁਟ੍ਠਾਨੇਨਾਪਤ੍ਤਿ.
ਸਾ ਏਵਂ ਦ੍ਵਿਧਾ ਠਿਤੇਹਿ ਚਤੂਹਿ ਸਮੁਟ੍ਠਾਨੇਹਿ ਜਾਯਤੇ. ਨ ਪਨਞ੍ਞਤੋਤਿ ‘‘ਕਾਯਤੋ, ਵਾਚਤੋ, ਕਾਯਵਾਚਤੋ, ਕਾਯਚਿਤ੍ਤਤੋ’’ਤਿ ਏਵਮਾਦਿਨਾ ਵਿਪਲ੍ਲਾਸਨਯੇਨ ਯੋਜਿਤੇਹਿ ਚਤੂਹਿ ਸਮੁਟ੍ਠਾਨੇਹਿ ਨ ਸਮੁਟ੍ਠਾਤਿ. ਛ ਸਮੁਟ੍ਠਾਨਾਨਿ ਯਸ੍ਸਾ ਸਾ ਛਸਮੁਟ੍ਠਾਨਾ. ਸਚਿਤ੍ਤਕੇਹਿ ਤੀਹਿ, ਅਚਿਤ੍ਤਕੇਹਿ ਤੀਹੀਤਿ ਛਹਿ ਏਵ ਸਮੁਟ੍ਠਾਨੇਹਿ ਸਮੁਟ੍ਠਾਤੀਤਿ. ਪਕਾਰਨ੍ਤਰਾਭਾਵਾ ਇਧ ‘‘ਨ ਅਞ੍ਞਤੋ’’ਤਿ ਨ ਵੁਤ੍ਤਂ.
ਆਹ ਚ ਅਟ੍ਠਕਥਾਚਰਿਯੋ ਮਾਤਿਕਟ੍ਠਕਥਾਯਂ.
੩੩੫. ਸਮੁਟ੍ਠਾਤਿ ਏਤਸ੍ਮਾਤਿ ਸਮੁਟ੍ਠਾਨਂ, ਕਾਯਾਦਿ ਛਬ੍ਬਿਧਂ, ਏਕਂ ਸਮੁਟ੍ਠਾਨਂ ਕਾਰਣਂ ਯਸ੍ਸਾ ਸਾ ਏਕਸਮੁਟ੍ਠਾਨਾ. ਪਕਾਰਨ੍ਤਰਾਭਾਵਾ ਤਿਧਾ. ਕਥਂ? ਸਚਿਤ੍ਤਕਾਨਂ ਤਿਣ੍ਣਂ ਸਮੁਟ੍ਠਾਨਾਨਂ ਵਸੇਨ ਤਿਵਿਧਾ. ਦ੍ਵੀਹਿ ਸਮੁਟ੍ਠਾਨੇਹਿ ਸਮੁਟ੍ਠਿਤਾ ਦ੍ਵਿਸਮੁਟ੍ਠਿਤਾ, ਦ੍ਵਿਸਮੁਟ੍ਠਾਨਾਪਤ੍ਤੀਤਿ ਅਤ੍ਥੋ. ਪਞ੍ਚਧਾਤਿ ਵੁਤ੍ਤਨਯੇਨ ਪਞ੍ਚਪ੍ਪਕਾਰਾ. ਤੀਣਿ ਸਮੁਟ੍ਠਾਨਾਨਿ ਯਸ੍ਸਾ ਸਾ ਤਿਸਮੁਟ੍ਠਾਨਾ, ਚਤ੍ਤਾਰਿ ਸਮੁਟ੍ਠਾਨਾਨਿ ਯਸ੍ਸਾ ਸਾ ਚਤੁਰੁਟ੍ਠਾਨਾ, ਤਿਸਮੁਟ੍ਠਾਨਾ ਚ ਚਤੁਰੁਟ੍ਠਾਨਾ ਚ ਤਿਚਤੁਰੁਟ੍ਠਾਨਾਤਿ ਏਕਦੇਸਸਰੂਪੇਕਸੇਸੋ, ਤਿਸਮੁਟ੍ਠਾਨਾ ਦ੍ਵਿਧਾ ਵਿਭਤ੍ਤਾ, ਚਤੁਸਮੁਟ੍ਠਾਨਾ ਚ ਦ੍ਵਿਧਾ ਏਵ ਵਿਭਤ੍ਤਾਤਿ ਅਤ੍ਥੋ. ਛਹਿ ਸਮੁਟ੍ਠਾਨੇਹਿ ਸਮੁਟ੍ਠਿਤਾ ਛਸਮੁਟ੍ਠਿਤਾ, ਛਸਮੁਟ੍ਠਾਨਾਤਿ ਅਤ੍ਥੋ. ਏਕਧਾਤਿ ਪਕਾਰਨ੍ਤਰਾਭਾਵਾ ਏਕਧਾਵ ਠਿਤਾਤਿ ਅਧਿਪ੍ਪਾਯੋ.
੩੩੬. ਸਬ੍ਬਾ ਆਪਤ੍ਤਿਯੋ ਸਮੁਟ੍ਠਾਨਵਿਸੇਸਤੋ ਏਵਂ ਤੇਰਸਧਾ ਠਿਤਾਨਂ ਸਮੁਟ੍ਠਾਨਭੇਦਾਨਂ ਨਾਨਤ੍ਤਤੋ ਤੇਹਿ ਸਮੁਟ੍ਠਿਤਾਨਂ ਪਠਮਂ ਪਞ੍ਞਤ੍ਤਤ੍ਤਾ ਸੀਸਭੂਤਾਨਂ ਸਿਕ੍ਖਾਪਦਾਨਂ ਵਸੇਨ ਤੇਰਸੇਵ ਨਾਮਾਨਿ ਲਭਨ੍ਤਿ, ਤਾਨਿ ਇਤੋ ਪਰਂ ਵਕ੍ਖਾਮੀਤਿ ਯੋਜਨਾ.
੩੩੭. ਪਠਮਨ੍ਤਿਮਵਤ੍ਥੁਞ੍ਚਾਤਿ ਪਠਮਪਾਰਾਜਿਕਸਮੁਟ੍ਠਾਨਂ. ਦੁਤਿਯਨ੍ਤਿ ਅਦਿਨ੍ਨਾਦਾਨਸਮੁਟ੍ਠਾਨਂ. ਸਞ੍ਚਰਿਤ੍ਤਕਨ੍ਤਿ ਸਞ੍ਚਰਿਤ੍ਤਸਮੁਟ੍ਠਾਨਂ. ਸਮਨੁਭਾਸਨਨ੍ਤਿ ਸਮਨੁਭਾਸਨਸਮੁਟ੍ਠਾਨਂ. ‘‘ਕਥਿਨਂ ਏਲ਼ਕਲੋਮਕ’’ਨ੍ਤਿ ਪਦਚ੍ਛੇਦੋ, ਕਥਿਨਸਮੁਟ੍ਠਾਨਂ ਏਲ਼ਕਲੋਮਸਮੁਟ੍ਠਾਨਞ੍ਚ.
੩੩੮. ਪਦਸੋਧਮ੍ਮਨ੍ਤਿ ਪਦਸੋਧਮ੍ਮਸਮੁਟ੍ਠਾਨਂ. ਅਦ੍ਧਾਨਂ ਥੇਯ੍ਯਸਤ੍ਥਨ੍ਤਿ ਅਦ੍ਧਾਨਸਮੁਟ੍ਠਾਨਂ ਥੇਯ੍ਯਸਤ੍ਥਸਮੁਟ੍ਠਾਨਂ. ਦੇਸਨਾਤਿ ਧਮ੍ਮਦੇਸਨਾਸਮੁਟ੍ਠਾਨਂ. ਭੂਤਾਰੋਚਨਕਨ੍ਤਿ ਭੂਤਾਰੋਚਨਸਮੁਟ੍ਠਾਨਂ. ਚੋਰਿਵੁਟ੍ਠਾਪਨਨ੍ਤਿ ਚੋਰਿਵੁਟ੍ਠਾਪਨਸਮੁਟ੍ਠਾਨਂ.
੩੩੯. ਅਨਨੁਞ੍ਞਾਤਕਞ੍ਚਾਤਿ ਅਨਨੁਞ੍ਞਾਤਕਸਮੁਟ੍ਠਾਨਞ੍ਚਾਤਿ ਏਤਾਨਿ ਤੇਰਸ ਤੇਹਿ ਸਮੁਟ੍ਠਾਨੇਹਿ ਸਮੁਟ੍ਠਿਤਾਨਂ ਤੇਸਂ ਸਿਕ੍ਖਾਪਦਾਨਂ ਪਠਮਂ ਪਠਮਂ ਨਿਦ੍ਦਿਟ੍ਠਾਨਂ ਪਠਮਪਾਰਾਜਿਕਾਦਿਸਿਕ੍ਖਾਪਦਸਮੁਟ੍ਠਾਨਾਨਂ ਇਤਰੇਸਂ ਪੁਬ੍ਬਙ੍ਗਮਭਾਵਤੋ ‘‘ਸੀਸਾਨੀ’’ਤਿ ਵੁਤ੍ਤਾਨਿ. ਯਥਾਹ ਪਰਿਵਾਰਟ੍ਠਕਥਾਯਂ ‘‘ਪਠਮਪਾਰਾਜਿਕਂ ਨਾਮ ਏਕਂ ਸਮੁਟ੍ਠਾਨਸੀਸਂ, ਸੇਸਾਨਿ ਤੇਨ ਸਦਿਸਾਨੀ’’ਤਿਆਦਿ (ਪਰਿ. ਅਟ੍ਠ. ੨੫੮). ਤੇਰਸੇਤੇ ਸਮੁਟ੍ਠਾਨਨਯਾਤਿ ਏਤੇ ਸੀਸਵਸੇਨ ਦਸ੍ਸਿਤਾ ਤੇਰਸ ਸਮੁਟ੍ਠਾਨਨਯਾ. ਵਿਞ੍ਞੂਹਿ ਉਪਾਲਿਤ੍ਥੇਰਾਦੀਹਿ.
੩੪੦. ਤਤ੍ਥ ਤੇਰਸਸੁ ਸਮੁਟ੍ਠਾਨਸੀਸੇਸੁ. ਯਾਤਿ ਯਾ ਪਨ ਆਪਤ੍ਤਿ. ਆਦਿਪਾਰਾਜਿਕੁਟ੍ਠਾਨਾਤਿ ਪਠਮਪਾਰਾਜਿਕਸਮੁਟ੍ਠਾਨਾ.
੩੪੧. ਅਦਿਨ੍ਨਾਦਾਨ-ਸਦ੍ਦੋ ਪੁਬ੍ਬਕੋ ਪਠਮੋ ਏਤਿਸ੍ਸਾ ਤਂਸਮੁਟ੍ਠਾਨਾਪਤ੍ਤਿਯਾਤਿ ਅਦਿਨ੍ਨਾਦਾਨਪੁਬ੍ਬਕਾ, ਅਦਿਨ੍ਨਾਦਾਨਸਮੁਟ੍ਠਾਨਾਤਿ ਉਦ੍ਦਿਟ੍ਠਾਤਿ ਯੋਜਨਾ.
੩੪੨. ਜਾਤੂਤਿ ਏਕਂਸੇਨ.
੩੪੩. ਅਯਂ ਸਮੁਟ੍ਠਾਨਵਸੇਨ ‘‘ਸਮਨੁਭਾਸਨਾਸਮੁਟ੍ਠਾਨਾ’’ਤਿ ਵੁਤ੍ਤਾਤਿ ਯੋਜਨਾ.
੩੪੪. ਕਥਿਨ-ਸਦ੍ਦੋ ਉਪਪਦੋ ਯਸ੍ਸਾ ਤਂਸਮੁਟ੍ਠਾਨਾਯ ਆਪਤ੍ਤਿਯਾ ਸਾ ਕਥਿਨੁਪਪਦਾ, ਕਥਿਨਸਮੁਟ੍ਠਾਨਾਤਿ ਮਤਾ ਞਾਤਾ, ਅਯਂ ਸਮੁਟ੍ਠਾਨਵਸੇਨ ‘‘ਕਥਿਨਸਮੁਟ੍ਠਾਨਾ’’ਤਿ ਞਾਤਾਤਿ ਅਤ੍ਥੋ.
੩੪੫. ਏਲ਼ਕਲੋਮ-ਸਦ੍ਦੋ ਆਦਿ ਯਸ੍ਸਾ ਤਂਸਮੁਟ੍ਠਾਨਾਪਤ੍ਤਿਯਾ ਸਾ ਏਲ਼ਕਲੋਮਾਦਿਸਮੁਟ੍ਠਾਨਾਤਿ ਅਤ੍ਥੋ.
੩੪੯. ਏਤ੍ਥ ਸਮੁਟ੍ਠਾਨੇਸੁ.
੩੫੦. ਭੂਤਾਰੋਚਨ-ਸਦ੍ਦੋ ਪੁਬ੍ਬਭਾਗੋ ਏਤਿਸ੍ਸਾ ਤਂਸਮੁਟ੍ਠਾਨਾਯ ਆਪਤ੍ਤਿਯਾਤਿ ਭੂਤਾਰੋਚਨਪੁਬ੍ਬਕਾ, ਭੂਤਾਰੋਚਨਸਮੁਟ੍ਠਾਨਾਤਿ ਅਤ੍ਥੋ.
੩੫੧. ਸਮੁਟ੍ਠਾਨਂ ਸਮੁਟ੍ਠਿਤਂ, ਚੋਰਿਵੁਟ੍ਠਾਪਨਂ ਸਮੁਟ੍ਠਿਤਂ ਯਸ੍ਸਾ ਸਾ ਚੋਰਿਵੁਟ੍ਠਾਪਨਸਮੁਟ੍ਠਿਤਾ, ਚੋਰਿਵੁਟ੍ਠਾਪਨਸਮੁਟ੍ਠਾਨਾਤਿ ਅਤ੍ਥੋ.
੩੫੩. ਤਤ੍ਥਾਤਿ ਤੇਰਸਸਮੁਟ੍ਠਾਨਸੀਸੇਸੁ, ‘‘ਸਮੁਟ੍ਠਾਨਂ ਸਚਿਤ੍ਤਕ’’ਨ੍ਤਿ ਇਦਂ ‘‘ਪਠਮ’’ਨ੍ਤਿਆਦੀਹਿ ਪਚ੍ਚੇਕਂ ਯੋਜੇਤਬ੍ਬਂ. ਪਠਮਂ ਸਮੁਟ੍ਠਾਨਨ੍ਤਿ ਪਠਮਪਾਰਾਜਿਕਸਮੁਟ੍ਠਾਨਂ. ਦੁਤਿਯਂ ਸਮੁਟ੍ਠਾਨਨ੍ਤਿ ਅਦਿਨ੍ਨਾਦਾਨਸਮੁਟ੍ਠਾਨਂ. ਚਤੁਤ੍ਥਂ ਸਮੁਟ੍ਠਾਨਨ੍ਤਿ ਸਮਨੁਭਾਸਨਸਮੁਟ੍ਠਾਨਂ. ਨਵਮਂ ਸਮੁਟ੍ਠਾਨਨ੍ਤਿ ਥੇਯ੍ਯਸਤ੍ਥਸਮੁਟ੍ਠਾਨਂ. ਦਸਮਂ ਸਮੁਟ੍ਠਾਨਨ੍ਤਿ ਧਮ੍ਮਦੇਸਨਾਸਮੁਟ੍ਠਾਨਂ. ਦ੍ਵਾਦਸਮਂ ਸਮੁਟ੍ਠਾਨਨ੍ਤਿ ਚੋਰਿਵੁਟ੍ਠਾਪਨਸਮੁਟ੍ਠਾਨਂ.
੩੫੪. ਸਮੁਟ੍ਠਾਨੇਤਿ ਸਮੁਟ੍ਠਾਨਸੀਸੇ. ਸਦਿਸਾਤਿ ਤੇਨ ਤੇਨ ਸਮੁਟ੍ਠਾਨਸੀਸੇਨ ਸਮੁਟ੍ਠਾਨਾ ਆਪਤ੍ਤਿਯੋ. ਇਧਾਤਿ ਇਮਸ੍ਮਿਂ ਸਮੁਟ੍ਠਾਨਵਿਨਿਚ੍ਛਯੇ. ਦਿਸ੍ਸਰੇਤਿ ਦਿਸ੍ਸਨ੍ਤੇ, ਦਿਸ੍ਸਨ੍ਤੀਤਿ ਅਤ੍ਥੋ. ਅਥ ਵਾ ਇਧ ਦਿਸ੍ਸਰੇਤਿ ਇਧ ਉਭਤੋਵਿਭਙ੍ਗੇ ਏਤੇਸੁ ਤੇਰਸਸਮੁਟ੍ਠਾਨੇਸੁ ਏਕੇਕਸ੍ਮਿਂ ਅਞ੍ਞਾਨਿਪਿ ਸਦਿਸਾਨਿ ਸਮੁਟ੍ਠਾਨਾਨਿ ਦਿਸ੍ਸਨ੍ਤੀਤਿ ਅਤ੍ਥੋ. ਇਦਾਨਿ ਤਾਨਿ ਸਰੂਪਤੋ ਨਿਦਸ੍ਸੇਤੁਮਾਹ ‘‘ਸੁਕ੍ਕਞ੍ਚਾ’’ਤਿਆਦਿ. ਤਤ੍ਥ ਸੁਕ੍ਕਨ੍ਤਿ ਸੁਕ੍ਕਵਿਸ੍ਸਟ੍ਠਿਸਿਕ੍ਖਾਪਦਂ. ਏਸ ਨਯੋ ‘‘ਕਾਯਸਂਸਗ੍ਗੋ’’ਤਿਆਦੀਸੁਪਿ. ਯਦੇਤ੍ਥ ਦੁਵਿਞ੍ਞੇਯ੍ਯਂ, ਤਂ ਵਕ੍ਖਾਮ.
੩੫੫. ਪੁਬ੍ਬੁਪਪਰਿਪਾਕੋ ਚਾਤਿ ‘‘ਜਾਨਂ ਪੁਬ੍ਬੁਪਗਤਂ ਭਿਕ੍ਖੁ’’ਨ੍ਤਿ (ਪਾਚਿ. ੧੨੦) ਸਿਕ੍ਖਾਪਦਞ੍ਚ ‘‘ਭਿਕ੍ਖੁਨਿਪਰਿਪਾਚਿਤ’’ਨ੍ਤਿ (ਪਾਚਿ. ੧੯੨, ੧੯੪) ਪਿਣ੍ਡਪਾਤਸਿਕ੍ਖਾਪਦਞ੍ਚ. ਰਹੋ ਭਿਕ੍ਖੁਨਿਯਾਸਹਾਤਿ ਭਿਕ੍ਖੁਨਿਯਾ ਸਦ੍ਧਿਂ ਰਹੋ ਨਿਸਜ੍ਜਸਿਕ੍ਖਾਪਦਞ੍ਚ. ਸਭੋਜਨੇ, ਰਹੋ ਦ੍ਵੇ ਚਾਤਿ ਸਭੋਜਨੇ ਕੁਲੇ ਅਨੁਪਖਜ੍ਜਸਿਕ੍ਖਾਪਦਞ੍ਚ ਦ੍ਵੇ ਰਹੋਨਿਸਜ੍ਜਸਿਕ੍ਖਾਪਦਾਨਿ ਚ. ਅਙ੍ਗੁਲੀ ਉਦਕੇ ਹਸਨ੍ਤਿ ਅਙ੍ਗੁਲਿਪਤੋਦਞ੍ਚ ਉਦਕਹਸਧਮ੍ਮਸਿਕ੍ਖਾਪਦਞ੍ਚ.
੩੫੬. ਪਹਾਰੇ ਉਗ੍ਗਿਰੇ ਚੇਵਾਤਿ ਪਹਾਰਦਾਨਸਿਕ੍ਖਾਪਦਞ੍ਚ ਤਲਸਤ੍ਤਿਉਗ੍ਗਿਰਣਸਿਕ੍ਖਾਪਦਞ੍ਚ. ਤੇਪਞ੍ਞਾਸਾ ਚ ਸੇਖਿਯਾਤਿ ਪਞ੍ਚਸਤ੍ਤਤਿਸੇਖਿਯਾਸੁ ਵਕ੍ਖਮਾਨਾਨਿ ਉਜ੍ਜਗ੍ਘਿਕਾਦੀਨਿ ਸਮਨੁਭਾਸਨਸਮੁਟ੍ਠਾਨਾਨਿ ਦਸ, ਛਤ੍ਤਪਾਣਿਆਦੀਨਿ ਧਮ੍ਮਦੇਸਨਾਸਮੁਟ੍ਠਾਨਾਨਿ ਏਕਾਦਸ, ਥੇਯ੍ਯਸਤ੍ਥਸਮੁਟ੍ਠਾਨਂ, ਸੂਪੋਦਨਵਿਞ੍ਞਤ੍ਤਿਸਿਕ੍ਖਾਪਦਞ੍ਚਾਤਿ ਬਾਵੀਸਤਿ ਸਿਕ੍ਖਾਪਦਾਨਿ ਠਪੇਤ੍ਵਾ ਪਰਿਮਣ੍ਡਲਨਿਵਾਸਨਾਦੀਨਿ ਇਤਰਾਨਿ ਤੇਪਞ੍ਞਾਸ ਸੇਖਿਯਸਿਕ੍ਖਾਪਦਾਨਿ ਚ. ਅਧਕ੍ਖਕੁਬ੍ਭਜਾਣੁਞ੍ਚਾਤਿ ਭਿਕ੍ਖੁਨੀਨਂ ਅਧਕ੍ਖਕਉਬ੍ਭਜਾਣੁਸਿਕ੍ਖਾਪਦਞ੍ਚ. ਗਾਮਨ੍ਤਰਮਵਸ੍ਸੁਤਾਤਿ ਗਾਮਨ੍ਤਰਗਮਨਂ, ਅਵਸ੍ਸੁਤਸ੍ਸ ਹਤ੍ਥਤੋ ਖਾਦਨੀਯਗ੍ਗਹਣਸਿਕ੍ਖਾਪਦਞ੍ਚ.
੩੫੭-੮. ਤਲਮਟ੍ਠੁਦਸੁਦ੍ਧਿ ਚਾਤਿ ਤਲਘਾਤਂ, ਜਤੁਮਟ੍ਠਂ, ਉਦਕਸੁਦ੍ਧਿਕਾਦਿਯਨਞ੍ਚ. ਵਸ੍ਸਂਵੁਤ੍ਥਾਤਿ ‘‘ਵਸ੍ਸਂਵੁਤ੍ਥਾ…ਪੇ… ਛਪ੍ਪਞ੍ਚਯੋਜਨਾਨੀ’’ਤਿ (ਪਾਚਿ. ੯੭੪) ਸਿਕ੍ਖਾਪਦਞ੍ਚ. ਓਵਾਦਾਯ ਨ ਗਚ੍ਛਨ੍ਤੀਤਿ ਓਵਾਦਾਯ ਅਗਮਨਸਿਕ੍ਖਾਪਦਞ੍ਚ. ਨਾਨੁਬਨ੍ਧੇ ਪਵਤ੍ਤਿਨਿਨ੍ਤਿ ‘‘ਵੁਟ੍ਠਾਪਿਤਂ ਪਵਤ੍ਤਿਨਿਂ ਦ੍ਵੇ ਵਸ੍ਸਾਨਿ ਨਾਨੁਬਨ੍ਧੇਯ੍ਯਾ’’ਤਿ (ਪਾਚਿ. ੧੧੧੨) ਸਿਕ੍ਖਾਪਦਞ੍ਚਾਤਿ ਉਭਤੋਵਿਭਙ੍ਗੇ ਨਿਦ੍ਦਿਟ੍ਠਾ ਇਮੇ ਪਞ੍ਚਸਤ੍ਤਤਿ ਧਮ੍ਮਾ ਕਾਯਚਿਤ੍ਤਸਮੁਟ੍ਠਿਤਾ ਮੇਥੁਨੇਨ ਸਮਾ ਏਕਸਮੁਟ੍ਠਾਨਾ ਮਤਾਤਿ ਯੋਜਨਾ.
ਏਤ੍ਥ ਚ ਪਾਲ਼ਿਯਂ ‘‘ਛਸਤ੍ਤਤੀ’’ਤਿ ਗਣਨਪਰਿਚ੍ਛੇਦੋ ਸਮੁਟ੍ਠਾਨਸਿਕ੍ਖਾਪਦੇਨ ਸਹ ਦਸ੍ਸਿਤੋ. ਇਧ ਪਨ ਤਂ ਵਿਨਾ ਤਂਸਦਿਸਾਨਮੇਵ ਗਣਨਾ ਦਸ੍ਸਿਤਾ. ਤੇਨੇਵ ਪਠਮਂ ਸਮੁਟ੍ਠਾਨਸੀਸਂ ਪਾਲ਼ਿਯਂ ਗਣਨਾਯਪਿ ਦਸ੍ਸਿਤਂ, ਇਧੇਵ ਨ ਦਸ੍ਸਿਤਂ. ਉਪਰਿ ਕਤ੍ਥਚਿ ਸਮੁਟ੍ਠਾਨਸੀਸਸ੍ਸ ਦਸ੍ਸਨਂ ਪਨੇਤ੍ਥ ਵਕ੍ਖਮਾਨਾਨਂ ਤਂਸਦਿਸਭਾਵਦਸ੍ਸਨਤ੍ਥਂ, ਗਣਨਾਯ ਵਕ੍ਖਮਾਨਾਯ ਅਨ੍ਤੋਗਧਭਾਵਦਸ੍ਸਨਤ੍ਥਂ. ਤੇਨੇਵ ਤਤ੍ਥਪਿ ਤਂ ਵਿਨਾ ਗਣਨਂ ਵਕ੍ਖਤਿ.
ਪਠਮਪਾਰਾਜਿਕਸਮੁਟ੍ਠਾਨਵਣ੍ਣਨਾ.
੩੫੯. ਵਿਗ੍ਗਹਨ੍ਤਿ ਮਨੁਸ੍ਸਵਿਗ੍ਗਹਸਿਕ੍ਖਾਪਦਂ. ਉਤ੍ਤਰਿ ਚੇਵਾਤਿ ਉਤ੍ਤਰਿਮਨੁਸ੍ਸਧਮ੍ਮਸਿਕ੍ਖਾਪਦਞ੍ਚ. ਦੁਟ੍ਠੁਲ੍ਲਨ੍ਤਿ ਦੁਟ੍ਠੁਲ੍ਲਵਾਚਾਸਿਕ੍ਖਾਪਦਂ. ਅਤ੍ਤਕਾਮਤਾਤਿ ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦਞ੍ਚ. ਦੁਟ੍ਠਦੋਸਾ ਦੁਵੇ ਚੇਵਾਤਿ ਦ੍ਵੇ ਦੁਟ੍ਠਦੋਸਸਿਕ੍ਖਾਪਦਾਨਿ ਚ. ਦੁਤਿਯਾਨਿਯਤੋਪਿ ਚਾਤਿ ਦੁਤਿਯਅਨਿਯਤਸਿਕ੍ਖਾਪਦਞ੍ਚ.
੩੬੦. ਅਚ੍ਛਿਨ੍ਦਨਞ੍ਚਾਤਿ ਸਾਮਂ ਚੀਵਰਂ ਦਤ੍ਵਾ ਅਚ੍ਛਿਨ੍ਦਨਞ੍ਚ. ਪਰਿਣਾਮੋਤਿ ਸਙ੍ਘਿਕਲਾਭਸ੍ਸ ਅਤ੍ਤਨੋ ਪਰਿਣਾਮਨਞ੍ਚ. ਮੁਸਾਓਮਸਪੇਸੁਣਾਤਿ ਮੁਸਾਵਾਦੋ ਚ ਓਮਸਵਾਦੋ ਚ ਭਿਕ੍ਖੁਪੇਸੁਞ੍ਞਞ੍ਚ. ਦੁਟ੍ਠੁਲ੍ਲਾਰੋਚਨਞ੍ਚੇਵਾਤਿ ਦੁਟ੍ਠੁਲ੍ਲਾਪਤ੍ਤਿਆਰੋਚਨਸਿਕ੍ਖਾਪਦਞ੍ਚ. ਪਥਵੀਖਣਨਮ੍ਪਿ ਚਾਤਿ ਪਥਵੀਖਣਨਸਿਕ੍ਖਾਪਦਞ੍ਚ.
੩੬੧. ਭੂਤਗਾਮਞ੍ਚ ਵਾਦੋ ਚਾਤਿ ਭੂਤਗਾਮਸਿਕ੍ਖਾਪਦਂ, ਅਞ੍ਞਵਾਦਕਸਿਕ੍ਖਾਪਦਞ੍ਚ. ਉਜ੍ਝਾਪਨਕਮੇਵ ਚਾਤਿ ਉਜ੍ਝਾਪਨਕਸਿਕ੍ਖਾਪਦਞ੍ਚ. ਨਿਕ੍ਕਡ੍ਢੋ ਸਿਞ੍ਚਨਞ੍ਚੇਵਾਤਿ ਵਿਹਾਰਤੋ ਨਿਕ੍ਕਡ੍ਢਨਞ੍ਚ ਉਦਕੇ ਤਿਣਾਦਿਸਿਞ੍ਚਨਞ੍ਚ. ਆਮਿਸਹੇਤੁ ਚਾਤਿ ਆਮਿਸਹੇਤੁ ਭਿਕ੍ਖੁਨਿਯੋ ਓਵਾਦਸਿਕ੍ਖਾਪਦਞ੍ਚ.
੩੬੨. ਭੁਤ੍ਤਾਵਿਨ੍ਤਿ ਭੁਤ੍ਤਾਵਿਂ ਅਨਤਿਰਿਤ੍ਤੇਨ ਖਾਦਨੀਯਾਦਿਨਾ ਪਵਾਰਣਸਿਕ੍ਖਾਪਦਞ੍ਚ. ਏਹਨਾਦਰਿਨ੍ਤਿ ‘‘ਏਹਾਵੁਸੋ, ਗਾਮਂ ਵਾ’’ਤਿ (ਪਾਚਿ. ੨੭੫) ਵੁਤ੍ਤਸਿਕ੍ਖਾਪਦਞ੍ਚ ਅਨਾਦਰਿਯਸਿਕ੍ਖਾਪਦਞ੍ਚ. ਭਿਂਸਾਪਨਮੇਵ ਚਾਤਿ ਭਿਕ੍ਖੁਭਿਂਸਨਕਞ੍ਚ. ਅਪਨਿਧੇਯ੍ਯਾਤਿ ਪਤ੍ਤਾਦਿਅਪਨਿਧਾਨਸਿਕ੍ਖਾਪਦਞ੍ਚ. ਸਞ੍ਚਿਚ੍ਚ ਪਾਣਨ੍ਤਿ ਸਞ੍ਚਿਚ੍ਚ ਪਾਣਂ ਜੀਵਿਤਾਵੋਰੋਪਨਞ੍ਚ. ਸਪ੍ਪਾਣਕਮ੍ਪਿ ਚਾਤਿ ਜਾਨਂ ਸਪ੍ਪਾਣਕਉਦਕਸਿਕ੍ਖਾਪਦਞ੍ਚ.
੩੬੩. ਉਕ੍ਕੋਟਨਞ੍ਚਾਤਿ ਪੁਨਕਮ੍ਮਾਯ ਉਕ੍ਕੋਟਨਞ੍ਚ. ਊਨੋਤਿ ਊਨਵੀਸਤਿਵਸ੍ਸਸਿਕ੍ਖਾਪਦਞ੍ਚ. ਸਂਵਾਸੋਤਿ ਉਕ੍ਖਿਤ੍ਤਕੇਨ ਸਦ੍ਧਿਂ ਸਂਵਾਸਸਿਕ੍ਖਾਪਦਞ੍ਚ. ਨਾਸਨੇ ਚਾਤਿ ਨਾਸਿਤਕਸਾਮਣੇਰਸਮ੍ਭੋਗਸਿਕ੍ਖਾਪਦਞ੍ਚ. ਸਹਧਮ੍ਮਿਕਨ੍ਤਿ ਸਹਧਮ੍ਮਿਕਂ ਵੁਚ੍ਚਮਾਨਸਿਕ੍ਖਾਪਦਞ੍ਚ. ਵਿਲੇਖਾ ਚਾਤਿ ‘‘ਵਿਲੇਖਾਯ ਸਂਵਤ੍ਤਨ੍ਤੀ’’ਤਿ (ਪਾਚਿ. ੪੩੯) ਆਗਤਸਿਕ੍ਖਾਪਦਞ੍ਚ. ਮੋਹਨਾਤਿ ਮੋਹਨਸਿਕ੍ਖਾਪਦਞ੍ਚ. ਅਮੂਲਕੇਨ ਚਾਤਿ ਅਮੂਲਕੇਨ ਸਙ੍ਘਾਦਿਸੇਸੇਨ ਅਨੁਦ੍ਧਂਸਨਸਿਕ੍ਖਾਪਦਞ੍ਚ.
੩੬੪. ਕੁਕ੍ਕੁਚ੍ਚਂ ਖੀਯਨਂ ਦਤ੍ਵਾਤਿ ਕੁਕ੍ਕੁਚ੍ਚਉਪ੍ਪਾਦਨਞ੍ਚ ਧਮ੍ਮਿਕਾਨਂ ਕਮ੍ਮਾਨਂ ਛਨ੍ਦਂ ਦਤ੍ਵਾ ਖੀਯਨਞ੍ਚ ਚੀਵਰਂ ਦਤ੍ਵਾ ਖੀਯਨਞ੍ਚ. ਪਰਿਣਾਮੇਯ੍ਯ ਪੁਗ੍ਗਲੇਤਿ ਸਙ੍ਘਿਕਂ ਲਾਭਂ ਪੁਗ੍ਗਲਸ੍ਸ ਪਰਿਣਾਮਨਸਿਕ੍ਖਾਪਦਞ੍ਚ. ਕਿਂ ਤੇ, ਅਕਾਲਂ, ਅਚ੍ਛਿਨ੍ਦੇਤਿ ‘‘ਕਿਂ ਤੇ, ਅਯ੍ਯੇ, ਏਸੋ ਪੁਰਿਸਪੁਗ੍ਗਲੋ ਕਰਿਸ੍ਸਤੀ’’ਤਿ (ਪਾਚਿ. ੭੦੫) ਆਗਤਸਿਕ੍ਖਾਪਦਞ੍ਚ ਅਕਾਲਚੀਵਰਂ ‘‘ਕਾਲਚੀਵਰ’’ਨ੍ਤਿ ਅਧਿਟ੍ਠਹਿਤ੍ਵਾ ਭਾਜਨਸਿਕ੍ਖਾਪਦਞ੍ਚ ਭਿਕ੍ਖੁਨਿਯਾ ਸਦ੍ਧਿਂ ਚੀਵਰਂ ਪਰਿਵਤ੍ਤੇਤ੍ਵਾ ਅਚ੍ਛਿਨ੍ਦਨਸਿਕ੍ਖਾਪਦਞ੍ਚ. ਦੁਗ੍ਗਹਨਿਰਯੇਨ ਚਾਤਿ ਦੁਗ੍ਗਹਿਤੇਨ ਦੁਪਧਾਰਿਤੇਨ ਪਰਂ ਉਜ੍ਝਾਪਨਸਿਕ੍ਖਾਪਦਞ੍ਚ ਨਿਰਯੇਨ ਵਾ ਬ੍ਰਹ੍ਮਚਰਿਯੇਨ ਵਾ ਅਭਿਸਪਨਸਿਕ੍ਖਾਪਦਞ੍ਚ.
੩੬੫. ਗਣਸ੍ਸ ਚਾਤਿ ‘‘ਗਣਸ੍ਸ ਚੀਵਰਲਾਭਂ ਅਨ੍ਤਰਾਯਂ ਕਰੇਯ੍ਯਾ’’ਤਿ (ਪਾਚਿ. ੯੦੮) ਵੁਤ੍ਤਸਿਕ੍ਖਾਪਦਞ੍ਚ. ਵਿਭਙ੍ਗਞ੍ਚਾਤਿ ‘‘ਧਮ੍ਮਿਕਂ ਚੀਵਰਵਿਭਙ੍ਗਂ ਪਟਿਬਾਹੇਯ੍ਯਾ’’ਤਿ (ਪਾਚਿ. ੯੧੨) ਵੁਤ੍ਤਸਿਕ੍ਖਾਪਦਞ੍ਚ. ਦੁਬ੍ਬਲਾਸਾ ਤਥੇਵ ਚਾਤਿ ‘‘ਦੁਬ੍ਬਲਚੀਵਰਪਚ੍ਚਾਸਾਯ ਚੀਵਰਕਾਲਸਮਯਂ ਅਤਿਕ੍ਕਾਮੇਯ੍ਯਾ’’ਤਿ (ਪਾਚਿ. ੯੨੧) ਵੁਤ੍ਤਸਿਕ੍ਖਾਪਦਞ੍ਚ. ਧਮ੍ਮਿਕਂ ਕਥਿਨੁਦ੍ਧਾਰਨ੍ਤਿ ‘‘ਧਮ੍ਮਿਕਂ ਕਥਿਨੁਦ੍ਧਾਰਂ ਪਟਿਬਾਹੇਯ੍ਯਾ’’ਤਿ (ਪਾਚਿ. ੯੨੮) ਵੁਤ੍ਤਸਿਕ੍ਖਾਪਦਞ੍ਚ. ਸਞ੍ਚਿਚ੍ਚਾਫਾਸੁਮੇਵ ਚਾਤਿ ‘‘ਭਿਕ੍ਖੁਨਿਯਾ ਸਞ੍ਚਿਚ੍ਚ ਅਫਾਸੁਂ ਕਰੇਯ੍ਯਾ’’ਤਿ (ਪਾਚਿ. ੯੪੨) ਵੁਤ੍ਤਸਿਕ੍ਖਾਪਦਞ੍ਚ.
੩੬੬. ਸਯਂ ਉਪਸ੍ਸਯਂ ਦਤ੍ਵਾਤਿ ‘‘ਭਿਕ੍ਖੁਨਿਯਾ ਉਪਸ੍ਸਯਂ ਦਤ੍ਵਾ ਕੁਪਿਤਾ ਅਨਤ੍ਤਮਨਾ ਨਿਕ੍ਕਡ੍ਢੇਯ੍ਯਾ’’ਤਿ (ਪਾਚਿ. ੯੫੧) ਵੁਤ੍ਤਸਿਕ੍ਖਾਪਦਞ੍ਚ. ਅਕ੍ਕੋਸੇਯ੍ਯ ਚਾਤਿ ‘‘ਭਿਕ੍ਖੁਂ ਅਕ੍ਕੋਸੇਯ੍ਯ ਵਾ ਪਰਿਭਾਸੇਯ੍ਯ ਵਾ’’ਤਿ (ਪਾਚਿ. ੧੦੨੯) ਵੁਤ੍ਤਸਿਕ੍ਖਾਪਦਞ੍ਚ. ਚਣ੍ਡਿਕਾਤਿ ‘‘ਚਣ੍ਡੀਕਤਾ ਗਣਂ ਪਰਿਭਾਸੇਯ੍ਯਾ’’ਤਿ (ਪਾਚਿ. ੧੦੩੪) ਵੁਤ੍ਤਸਿਕ੍ਖਾਪਦਞ੍ਚ. ਕੁਲਮਚ੍ਛਰਿਨੀ ਅਸ੍ਸਾਤਿ ‘‘ਕੁਲਮਚ੍ਛਰਿਨੀ ਅਸ੍ਸਾ’’ਤਿ (ਪਾਚਿ. ੧੦੪੩) ਵੁਤ੍ਤਸਿਕ੍ਖਾਪਦਞ੍ਚ. ਗਬ੍ਭਿਨਿਂ ਵੁਟ੍ਠਾਪੇਯ੍ਯ ਚਾਤਿ ‘‘ਗਬ੍ਭਿਨਿਂ ਵੁਟ੍ਠਾਪੇਯ੍ਯਾ’’ਤਿ (ਪਾਚਿ. ੧੦੬੮) ਵੁਤ੍ਤਸਿਕ੍ਖਾਪਦਞ੍ਚ.
੩੬੭. ਪਾਯਨ੍ਤਿਨ੍ਤਿ ‘‘ਪਾਯਨ੍ਤਿਂ ਵੁਟ੍ਠਾਪੇਯ੍ਯਾ’’ਤਿ (ਪਾਚਿ. ੧੦੭੩) ਵੁਤ੍ਤਸਿਕ੍ਖਾਪਦਞ੍ਚ. ਦ੍ਵੇ ਚ ਵਸ੍ਸਾਨੀਤਿ ‘‘ਦ੍ਵੇ ਵਸ੍ਸਾਨਿ ਛਸੁ ਧਮ੍ਮੇਸੁ ਅਸਿਕ੍ਖਿਤਸਿਕ੍ਖਂ ਸਿਕ੍ਖਮਾਨਂ ਵੁਟ੍ਠਾਪੇਯ੍ਯਾ’’ਤਿ (ਪਾਚਿ. ੧੦੮੦) ਵੁਤ੍ਤਸਿਕ੍ਖਾਪਦਞ੍ਚ. ਸਙ੍ਘੇਨਾਸਮ੍ਮਤਨ੍ਤਿ ‘‘ਸਿਕ੍ਖਿਤਸਿਕ੍ਖਂ ਸਿਕ੍ਖਮਾਨਂ ਸਙ੍ਘੇਨ ਅਸਮ੍ਮਤਂ ਵੁਟ੍ਠਾਪੇਯ੍ਯਾ’’ਤਿ (ਪਾਚਿ. ੧੦੮੬) ਵੁਤ੍ਤਸਿਕ੍ਖਾਪਦਞ੍ਚ. ਤਿਸ੍ਸੋ ਗਿਹਿਗਤਾ ਵੁਤ੍ਤਾਤਿ ‘‘ਊਨਦ੍ਵਾਦਸਵਸ੍ਸਂ ਗਿਹਿਗਤਂ (ਪਾਚਿ. ੧੦੯੧), ਪਰਿਪੁਣ੍ਣਦ੍ਵਾਦਸਵਸ੍ਸਂ ਗਿਹਿਗਤਂ ਦ੍ਵੇ ਵਸ੍ਸਾਨਿ ਛਸੁ ਧਮ੍ਮੇਸੁ ਅਸਿਕ੍ਖਿਤਸਿਕ੍ਖਂ (ਪਾਚਿ. ੧੦੯੭), ਦ੍ਵੇਵਸ੍ਸਾਨਿ ਸਿਕ੍ਖਿਤਸਿਕ੍ਖਂ ਸਙ੍ਘੇਨ ਅਸਮ੍ਮਤ’’ਨ੍ਤਿ (ਪਾਚਿ. ੧੧੦੩) ਵੁਤ੍ਤਸਿਕ੍ਖਾਪਦਾਨਿ ਚ. ਤਿਸ੍ਸੋਯੇਵ ਕੁਮਾਰਿਕਾਤਿ ‘‘ਊਨਵੀਸਤਿਵਸ੍ਸਂ ਕੁਮਾਰਿਭੂਤ’’ਨ੍ਤਿਆਦਿਨਾ (ਪਾਚਿ. ੧੧੨੦) ਨਯੇਨ ਵੁਤ੍ਤਾ ਤਿਸ੍ਸੋ ਚ.
੩੬੮. ਊਨਦ੍ਵਾਦਸਵਸ੍ਸਾ ਦ੍ਵੇਤਿ ‘‘ਊਨਦ੍ਵਾਦਸਵਸ੍ਸਾ ਵੁਟ੍ਠਾਪੇਯ੍ਯ (ਪਾਚਿ. ੧੧੩੭), ਪਰਿਪੁਣ੍ਣਦ੍ਵਾਦਸਵਸ੍ਸਾ ਸਙ੍ਘੇਨ ਅਸਮ੍ਮਤਾ ਵੁਟ੍ਠਾਪੇਯ੍ਯਾ’’ਤਿ (ਪਾਚਿ. ੧੧੪੨) ਵੁਤ੍ਤਾਨਿ ਦ੍ਵੇ ਸਿਕ੍ਖਾਪਦਾਨਿ ਚ. ਅਲਂ ਤਾਵ ਤੇਤਿ ‘‘ਅਲਂ ਤਾਵ ਤੇ, ਅਯ੍ਯੇ, ਵੁਟ੍ਠਾਪਿਤੇਨਾ’’ਤਿ (ਪਾਚਿ. ੧੧੪੭) ਵੁਤ੍ਤਸਿਕ੍ਖਾਪਦਞ੍ਚ. ਸੋਕਾਵਸ੍ਸਾਤਿ ‘‘ਚਣ੍ਡਿਂ ਸੋਕਾਵਾਸਂ ਸਿਕ੍ਖਮਾਨਂ ਵੁਟ੍ਠਾਪੇਯ੍ਯਾ’’ਤਿ (ਪਾਚਿ. ੧੧੫੯) ਵੁਤ੍ਤਸਿਕ੍ਖਾਪਦਞ੍ਚ. ਪਾਰਿਵਾਸਿਕਚ੍ਛਨ੍ਦਦਾਨਤੋਤਿ ‘‘ਪਾਰਿਵਾਸਿਕਛਨ੍ਦਦਾਨੇਨ ਸਿਕ੍ਖਮਾਨਂ ਵੁਟ੍ਠਾਪੇਯ੍ਯਾ’’ਤਿ (ਪਾਚਿ. ੧੧੬੭) ਵੁਤ੍ਤਸਿਕ੍ਖਾਪਦਞ੍ਚ.
੩੬੯. ਅਨੁਵਸ੍ਸਂ ਦੁਵੇ ਚਾਤਿ ‘‘ਅਨੁਵਸ੍ਸਂ ਵੁਟ੍ਠਾਪੇਯ੍ਯ (ਪਾਚਿ. ੧੧੭੧), ਏਕਂ ਵਸ੍ਸਂ ਦ੍ਵੇ ਵੁਟ੍ਠਾਪੇਯ੍ਯਾ’’ਤਿ (ਪਾਚਿ. ੧੧੭੫) ਵੁਤ੍ਤਸਿਕ੍ਖਾਪਦਾਨਿ ਚਾਤਿ ਏਕੂਨਸਤ੍ਤਤਿ ਸਿਕ੍ਖਾਪਦਾਨਿ. ਅਦਿਨ੍ਨਾਦਾਨਤੁਲ੍ਯਤ੍ਤਾਤਿ ਅਦਿਨ੍ਨਾਦਾਨੇਨ ਸਮਾਨਸਮੁਟ੍ਠਾਨਤ੍ਤਾ. ਤਿਸਮੁਟ੍ਠਾਨਿਕਾ ਕਤਾਤਿ ਸਚਿਤ੍ਤਕੇਹਿ ਤੀਹਿ ਸਮੁਟ੍ਠਾਨੇਹਿ ਸਮੁਟ੍ਠਹਨ੍ਤੀਤਿ ਵੁਤ੍ਤਾ.
ਦੁਤਿਯਪਾਰਾਜਿਕਸਮੁਟ੍ਠਾਨਵਣ੍ਣਨਾ.
੩੭੦. ਸਞ੍ਚਰਿਕੁਟਿਮਹਲ੍ਲਕਨ੍ਤਿ ਸਞ੍ਚਰਿਤ੍ਤਂ, ਸਞ੍ਞਾਚਿਕਾਯ ਕੁਟਿਕਰਣਂ, ਮਹਲ੍ਲਕਵਿਹਾਰਕਰਣਞ੍ਚ. ਧੋਵਾਪਨਞ੍ਚ ਪਟਿਗ੍ਗਹੋਤਿ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਪੁਰਾਣਚੀਵਰਧੋਵਾਪਨਞ੍ਚ ਚੀਵਰਪਟਿਗ੍ਗਹਣਞ੍ਚ. ਚੀਵਰਸ੍ਸ ਚ ਵਿਞ੍ਞਤ੍ਤਿਨ੍ਤਿ ਅਞ੍ਞਾਤਕਂ ਗਹਪਤਿਂ ਵਾ ਗਹਪਤਾਨਿਂ ਵਾ ਚੀਵਰਵਿਞ੍ਞਾਪਨਸਿਕ੍ਖਾਪਦਞ੍ਚ. ਗਹਣਞ੍ਚ ਤਦੁਤ੍ਤਰਿਨ੍ਤਿ ਤਦੁਤ੍ਤਰਿਸਾਦਿਯਨਸਿਕ੍ਖਾਪਦਞ੍ਚ.
੩੭੧. ਉਪਕ੍ਖਟਦ੍ਵਯਞ੍ਚੇਵਾਤਿ ‘‘ਚੀਵਰਚੇਤਾਪਨ੍ਨਂ ਉਪਕ੍ਖਟਂ ਹੋਤੀ’’ਤਿ (ਪਾਰਾ. ੫੨੮) ਆਗਤਸਿਕ੍ਖਾਪਦਦ੍ਵਯਞ੍ਚ. ਤਥਾ ਦੂਤੇਨ ਚੀਵਰਨ੍ਤਿ ਦੂਤੇਨਚੀਵਰਚੇਤਾਪਨ੍ਨਪਹਿਤਸਿਕ੍ਖਾਪਦਞ੍ਚ. ਕੋਸਿਯਨ੍ਤਿ ਕੋਸਿਯਮਿਸ੍ਸਕਸਿਕ੍ਖਾਪਦਞ੍ਚ. ਸੁਦ੍ਧਕਾਲ਼ਾਨਨ੍ਤਿ ‘‘ਸੁਦ੍ਧਕਾਲ਼ਕਾਨ’’ਨ੍ਤਿਆਦਿਸਿਕ੍ਖਾਪਦਞ੍ਚ (ਪਾਰਾ. ੫੪੮). ਦ੍ਵੇ ਭਾਗਾਦਾਨਮੇਵ ਚਾਤਿ ‘‘ਦ੍ਵੇ ਭਾਗਾ ਆਦਾਤਬ੍ਬਾ’’ਤਿ (ਪਾਰਾ. ੫੫੩) ਵੁਤ੍ਤਸਿਕ੍ਖਾਪਦਞ੍ਚ.
੩੭੨. ਛਬ੍ਬਸ੍ਸਾਨੀਤਿ ਛਬ੍ਬਸ੍ਸਾਨਿ ਧਾਰਣਸਿਕ੍ਖਾਪਦਞ੍ਚ. ਪੁਰਾਣਸ੍ਸਾਤਿ ‘‘ਪੁਰਾਣਸਨ੍ਥਤਸ੍ਸਾ’’ਤਿ (ਪਾਰਾ. ੫੬੭) ਵੁਤ੍ਤਸਿਕ੍ਖਾਪਦਞ੍ਚ. ਲੋਮਧੋਵਾਪਨਮ੍ਪਿ ਚਾਤਿ ਏਲ਼ਕਲੋਮਧੋਵਾਪਨਸਿਕ੍ਖਾਪਦਞ੍ਚ. ਰੂਪਿਯਸ੍ਸ ਪਟਿਗ੍ਗਾਹੋਤਿ ਰੂਪਿਯਪਟਿਗ੍ਗਹਣਸਿਕ੍ਖਾਪਦਞ੍ਚ. ਉਭੋ ਨਾਨਪ੍ਪਕਾਰਕਾਤਿ ਰੂਪਿਯਸਂਵੋਹਾਰਕਯਵਿਕ੍ਕਯਸਿਕ੍ਖਾਪਦਾਨਿ ਚ.
੩੭੩. ਊਨਬਨ੍ਧਨਪਤ੍ਤੋ ਚਾਤਿ ਊਨਪਞ੍ਚਬਨ੍ਧਨਪਤ੍ਤਸਿਕ੍ਖਾਪਦਞ੍ਚ. ਵਸ੍ਸਸਾਟਿਕਸੁਤ੍ਤਕਨ੍ਤਿ ਵਸ੍ਸਿਕਸਾਟਿਕਸਿਕ੍ਖਾਪਦਞ੍ਚ ਸੁਤ੍ਤਂ ਵਿਞ੍ਞਾਪੇਤ੍ਵਾ ਚੀਵਰਕਾਰਾਪਨਸਿਕ੍ਖਾਪਦਞ੍ਚ. ਵਿਕਪ੍ਪਾਪਜ੍ਜਨਨ੍ਤਿ ਤਨ੍ਤਵਾਯੇ ਉਪਸਙ੍ਕਮਿਤ੍ਵਾ ਚੀਵਰੇ ਵਿਕਪ੍ਪਾਪਜ੍ਜਨਞ੍ਚ. ਯਾਵ ਦ੍ਵਾਰਦਾਨਞ੍ਚ ਸਿਬ੍ਬਨਨ੍ਤਿ ‘‘ਯਾਵ ਦ੍ਵਾਰਕੋਸਾ ਅਗ੍ਗਲ਼ਟ੍ਠਪਨਾਯਾ’’ਤਿ (ਪਾਚਿ. ੧੩੫) ਵੁਤ੍ਤਸਿਕ੍ਖਾਪਦਞ੍ਚ ‘‘ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀਵਰਂ ਦਦੇਯ੍ਯ (ਪਾਚਿ. ੧੭੧), ਚੀਵਰਂ ਸਿਬ੍ਬੇਯ੍ਯਾ’’ਤਿ (ਪਾਚਿ. ੧੭੬) ਵੁਤ੍ਤਸਿਕ੍ਖਾਪਦਦ੍ਵਯਞ੍ਚ.
੩੭੪. ਪੂਵੇਹੀਤਿ ਪੂਵੇਹਿ ਵਾ ਮਨ੍ਥੇਹਿ ਵਾ ਅਭਿਹਟ੍ਠੁਂ ਪਵਾਰਣਸਿਕ੍ਖਾਪਦਞ੍ਚ. ਪਚ੍ਚਯੋਤਿ ਚਤੁਮਾਸਪਚ੍ਚਯਪਵਾਰਣਸਿਕ੍ਖਾਪਦਞ੍ਚ. ਜੋਤੀਤਿ ਜੋਤਿਯਾ ਸਮਾਦਹਨਸਿਕ੍ਖਾਪਦਞ੍ਚ. ਰਤਨਨ੍ਤਿ ਰਤਨਸਿਕ੍ਖਾਪਦਞ੍ਚ. ਸੂਚਿ…ਪੇ… ਸੁਗਤਸ੍ਸ ਚਾਤਿ ਸੂਚਿਘਰਸਿਕ੍ਖਾਪਦਾਦੀਨਿ ਸਤ੍ਤ ਸਿਕ੍ਖਾਪਦਾਨਿ ਚ.
੩੭੫. ਅਞ੍ਞਵਿਞ੍ਞਤ੍ਤਿਸਿਕ੍ਖਾ ਚਾਤਿ ‘‘ਅਞ੍ਞਂ ਵਿਞ੍ਞਾਪੇਯ੍ਯਾ’’ਤਿ (ਪਾਚਿ. ੭੪੯) ਵੁਤ੍ਤਸਿਕ੍ਖਾਪਦਞ੍ਚ. ਅਞ੍ਞਂ ਚੇਤਾਪਨਮ੍ਪਿ ਚਾਤਿ ‘‘ਅਞ੍ਞਂ ਚੇਤਾਪੇਤ੍ਵਾ ਅਞ੍ਞਂ ਚੇਤਾਪੇਯ੍ਯਾ’’ਤਿ (ਪਾਚਿ. ੭੪੯) ਵੁਤ੍ਤਸਿਕ੍ਖਾਪਦਞ੍ਚ. ਸਙ੍ਘਿਕੇਨ ਦੁਵੇ ਵੁਤ੍ਤਾਤਿ ‘‘ਸਙ੍ਘਿਕੇਨ ਅਞ੍ਞਂ ਚੇਤਾਪੇਯ੍ਯ (ਪਾਚਿ. ੭੫੯), ਸਙ੍ਘਿਕੇਨ ਸਞ੍ਞਾਚਿਕੇਨ ਅਞ੍ਞਂ ਚੇਤਾਪੇਯ੍ਯਾ’’ਤਿ (ਪਾਚਿ. ੭੬੪) ਵੁਤ੍ਤਾਨਿ ਦ੍ਵੇ ਸਿਕ੍ਖਾਪਦਾਨਿ ਚ. ਦ੍ਵੇ ਮਹਾਜਨਿਕੇਨਾਤਿ ‘‘ਮਹਾਜਨਿਕੇਨ ਅਞ੍ਞਂ ਚੇਤਾਪੇਯ੍ਯ (ਪਾਚਿ. ੭੬੯), ਮਹਾਜਨਿਕੇਨ ਸਞ੍ਞਾਚਿਕੇਨ ਅਞ੍ਞਂ ਚੇਤਾਪੇਯ੍ਯਾ’’ਤਿ (ਪਾਚਿ. ੭੭੪) ਵੁਤ੍ਤਾਨਿ ਦ੍ਵੇ ਸਿਕ੍ਖਾਪਦਾਨਿ ਚ.
੩੭੬. ਤਥਾ ਪੁਗ੍ਗਲਿਕੇਨੇਕਨ੍ਤਿ ‘‘ਪੁਗ੍ਗਲਿਕੇਨ ਸਞ੍ਞਾਚਿਕੇਨ ਅਞ੍ਞਂ ਚੇਤਾਪੇਯ੍ਯਾ’’ਤਿ (ਪਾਚਿ. ੭੭੯) ਵੁਤ੍ਤਮੇਕਸਿਕ੍ਖਾਪਦਞ੍ਚ. ਗਰੁਪਾਵੁਰਣਨ੍ਤਿ ਗਰੁਪਾਵੁਰਣਚੇਤਾਪਨਸਿਕ੍ਖਾਪਦਞ੍ਚ. ਲਹੁਨ੍ਤਿ ਲਹੁਪਾਵੁਰਣਚੇਤਾਪਨਸਿਕ੍ਖਾਪਦਂ. ‘‘ਵਿਘਾਸਾ ਉਦਸਾਟਿ ਚਾ’’ਤਿ ਪਦਚ੍ਛੇਦੋ. ਦ੍ਵੇ ਵਿਘਾਸਾਤਿ ‘‘ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਸਙ੍ਕਾਰਂ ਵਾ ਵਿਘਾਸਂ ਵਾ ਤਿਰੋਕੁਟ੍ਟੇ ਵਾ ਤਿਰੋਪਾਕਾਰੇ ਵਾ ਛਡ੍ਡੇਯ੍ਯ ਵਾ ਛਡ੍ਡਾਪੇਯ੍ਯ ਵਾ (ਪਾਚਿ. ੮੨੫), ਹਰਿਤੇ ਛਡ੍ਡੇਯ੍ਯ ਵਾ ਛਡ੍ਡਾਪੇਯ੍ਯ ਵਾ’’ਤਿ (ਪਾਚਿ. ੮੨੯) ਏਵਂ ਵੁਤ੍ਤਾਨਿ ਦ੍ਵੇ ਵਿਘਾਸਸਿਕ੍ਖਾਪਦਾਨਿ ਚ. ਉਦਸਾਟਿ ਚਾਤਿ ਉਦਕਸਾਟਿਕਸਿਕ੍ਖਾਪਦਞ੍ਚ. ਤਥਾ ਸਮਣਚੀਵਰਨ੍ਤਿ ਤਥਾ ‘‘ਸਮਣਚੀਵਰਂ ਦਦੇਯ੍ਯਾ’’ਤਿ (ਪਾਚਿ. ੯੧੭) ਵੁਤ੍ਤਸਿਕ੍ਖਾਪਦਞ੍ਚਾਤਿ.
੩੭੭. ਇਤਿ ਏਤੇ ਏਕੂਨਪਣ੍ਣਾਸ ਧਮ੍ਮਾ ਦੁਕ੍ਖਨ੍ਤਦਸ੍ਸਿਨਾ ਭਗਵਤਾ ਛਸਮੁਟ੍ਠਾਨਿਕਾ ਤੇਯੇਵ ਸਞ੍ਚਰਿਤ੍ਤਸਮਾ ਸਞ੍ਚਰਿਤ੍ਤਸਿਕ੍ਖਾਪਦੇਨ ਸਮਾ ਕਤਾ ਅਨੁਮਤਾ ਪਞ੍ਞਤ੍ਤਾਤਿ ਯੋਜਨਾ.
ਸਞ੍ਚਰਿਤ੍ਤਸਮੁਟ੍ਠਾਨਵਣ੍ਣਨਾ.
੩੭੮. ਸਙ੍ਘਭੇਦੋਤਿ ਸਙ੍ਘਭੇਦਸਿਕ੍ਖਾਪਦਞ੍ਚ. ਭੇਦਾਨੁਵਤ੍ਤਦੁਬ੍ਬਚਦੂਸਕਾਤਿ ਭੇਦਾਨੁਵਤ੍ਤਕਦੁਬ੍ਬਚਕੁਲਦੂਸਕਸਿਕ੍ਖਾਪਦਾਨਿ ਚ. ਦੁਟ੍ਠੁਲ੍ਲਚ੍ਛਾਦਨਨ੍ਤਿ ਦੁਟ੍ਠੁਲ੍ਲਪਟਿਚ੍ਛਾਦਨਸਿਕ੍ਖਾਪਦਞ੍ਚ. ਦਿਟ੍ਠੀਤਿ ਦਿਟ੍ਠਿਅਪ੍ਪਟਿਨਿਸ੍ਸਜ੍ਜਨਸਿਕ੍ਖਾਪਦਞ੍ਚ. ਛਨ੍ਦਉਜ੍ਜਗ੍ਘਿਕਾ ਦੁਵੇਤਿ ਛਨ੍ਦਂਅਦਤ੍ਵਾਗਮਨਸਿਕ੍ਖਾਪਦਞ੍ਚ ਉਜ੍ਜਗ੍ਘਿਕਾਯ ਅਨ੍ਤਰਘਰੇ ਗਮਨਨਿਸੀਦਨਸਿਕ੍ਖਾਪਦਦ੍ਵਯਞ੍ਚ.
੩੭੯. ਅਪ੍ਪਸਦ੍ਦਾ ਦੁਵੇ ਵੁਤ੍ਤਾਤਿ ‘‘ਅਪ੍ਪਸਦ੍ਦੋ ਅਨ੍ਤਰਘਰੇ ਗਮਿਸ੍ਸਾਮਿ, ਨਿਸੀਦਿਸ੍ਸਾਮੀ’’ਤਿ (ਪਾਚਿ. ੫੮੮, ੫੮੯) ਵੁਤ੍ਤਾਨਿ ਦ੍ਵੇ ਸਿਕ੍ਖਾਪਦਾਨਿ ਚ. ਨ ਬ੍ਯਾਹਰੇਤਿ ‘‘ਨ ਸਕਬਲ਼ੇਨ ਮੁਖੇਨ ਬ੍ਯਾਹਰਿਸ੍ਸਾਮੀ’’ਤਿ (ਪਾਚਿ. ੬੧੯) ਵੁਤ੍ਤਸਿਕ੍ਖਾਪਦਞ੍ਚ. ਛਮਾ, ਨੀਚਾਸਨੇ, ਠਾਨਨ੍ਤਿ ‘‘ਛਮਾਯਂ ਨਿਸੀਦਿਤ੍ਵਾ (ਪਾਚਿ. ੬੪੫), ਨੀਚੇ ਆਸਨੇ ਨਿਸੀਦਿਤ੍ਵਾ (ਪਾਚਿ. ੬੪੭), ਠਿਤੋ ਨਿਸਿਨ੍ਨਸ੍ਸਾ’’ਤਿ (ਪਾਚਿ. ੬੪੮) ਵੁਤ੍ਤਸਿਕ੍ਖਾਪਦਞ੍ਚ. ਪਚ੍ਛਤੋ ਉਪ੍ਪਥੇਨ ਚਾਤਿ ‘‘ਪਚ੍ਛਤੋ ਗਚ੍ਛਨ੍ਤੋ ਪੁਰਤੋ ਗਚ੍ਛਨ੍ਤਸ੍ਸ (ਪਾਚਿ. ੬੪੯), ਉਪ੍ਪਥੇਨ ਗਚ੍ਛਨ੍ਤੋ ਪਥੇਨ ਗਚ੍ਛਨ੍ਤਸ੍ਸਾ’’ਤਿ (ਪਾਚਿ. ੬੫੦) ਵੁਤ੍ਤਸਿਕ੍ਖਾਪਦਦ੍ਵਯਞ੍ਚ.
੩੮੦. ਵਜ੍ਜਚ੍ਛਾਦਾਤਿ ਵਜ੍ਜਤੋ ਪਟਿਚ੍ਛਾਦਨਸਿਕ੍ਖਾਪਦਞ੍ਚ. ਅਨੁਵਤ੍ਤਾ ਚਾਤਿ ਉਕ੍ਖਿਤ੍ਤਾਨੁਵਤ੍ਤਨਸਿਕ੍ਖਾਪਦਞ੍ਚ. ਗਹਣਨ੍ਤਿ ‘‘ਹਤ੍ਥਗ੍ਗਹਣਂ ਵਾ ਸਾਦਿਯੇਯ੍ਯਾ’’ਤਿ (ਪਾਚਿ. ੬੭੫) ਵੁਤ੍ਤਸਿਕ੍ਖਾਪਦਞ੍ਚ. ਓਸਾਰੇਯ੍ਯ ਚਾਤਿ ‘‘ਅਨਪਲੋਕੇਤ੍ਵਾ ਕਾਰਕਸਙ੍ਘਂ ਅਨਞ੍ਞਾਯ ਗਣਸ੍ਸ ਛਨ੍ਦਂ ਓਸਾਰੇਯ੍ਯਾ’’ਤਿ (ਪਾਚਿ. ੬੯੫) ਵੁਤ੍ਤਸਿਕ੍ਖਾਪਦਞ੍ਚ. ਪਚ੍ਚਕ੍ਖਾਮੀਤਿ ਸਿਕ੍ਖਾ ਚਾਤਿ ‘‘ਬੁਦ੍ਧਂ ਪਚ੍ਚਾਚਿਕ੍ਖਾਮੀ’’ਤਿ (ਪਾਚਿ. ੭੧੦) ਵੁਤ੍ਤਸਿਕ੍ਖਾਪਦਞ੍ਚ. ਤਥਾ ਕਿਸ੍ਮਿਞ੍ਚਿਦੇਵ ਚਾਤਿ ‘‘ਕਿਸ੍ਮਿਞ੍ਚਿਦੇਵ ਅਧਿਕਰਣੇ ਪਚ੍ਚਾਕਤਾ’’ਤਿ (ਪਾਚਿ. ੭੧੬) ਵੁਤ੍ਤਸਿਕ੍ਖਾਪਦਞ੍ਚ.
੩੮੧. ਸਂਸਟ੍ਠਾ ਦ੍ਵੇ ਚਾਤਿ ‘‘ਭਿਕ੍ਖੁਨਿਯੋ ਪਨੇਵ ਸਂਸਟ੍ਠਾ ਵਿਹਰਨ੍ਤੀ’’ਤਿ (ਪਾਚਿ. ੭੨੨) ਚ ‘‘ਯਾ ਪਨ ਭਿਕ੍ਖੁਨੀ ਏਵਂ ਵਦੇਯ੍ਯ ਸਂਸਟ੍ਠਾਵ, ਅਯ੍ਯੇ, ਤੁਮ੍ਹੇ ਵਿਹਰਥਾ’’ਤਿਆਦਿਵਚਨਂ (ਪਾਚਿ. ੭੨੮) ਪਟਿਚ੍ਚ ਵੁਤ੍ਤਸਿਕ੍ਖਾਪਦਦ੍ਵਯਞ੍ਚ. ਵਧਿਤ੍ਵਾ ਚਾਤਿ ‘‘ਅਤ੍ਤਾਨਂ ਵਧਿਤ੍ਵਾ ਵਧਿਤ੍ਵਾ ਰੋਦੇਯ੍ਯਾ’’ਤਿ (ਪਾਚਿ. ੮੮੦) ਵੁਤ੍ਤਸਿਕ੍ਖਾਪਦਞ੍ਚ. ਵਿਸਿਬ੍ਬੇਤ੍ਵਾ ਚਾਤਿ ‘‘ਭਿਕ੍ਖੁਨਿਯਾ ਚੀਵਰਂ ਵਿਸਿਬ੍ਬੇਤ੍ਵਾ ਵਾ ਵਿਸਿਬ੍ਬਾਪੇਤ੍ਵਾ ਵਾ’’ਤਿ (ਪਾਚਿ. ੮੯੩) ਵੁਤ੍ਤਸਿਕ੍ਖਾਪਦਞ੍ਚ. ਦੁਕ੍ਖਿਤਨ੍ਤਿ ‘‘ਦੁਕ੍ਖਿਤਂ ਸਹਜੀਵਿਨਿ’’ਨ੍ਤਿ (ਪਾਚਿ. ੯੪੭) ਵੁਤ੍ਤਸਿਕ੍ਖਾਪਦਞ੍ਚ. ਪੁਨਦੇਵ ਚ ਸਂਸਟ੍ਠਾਤਿ ‘‘ਸਂਸਟ੍ਠਾ ਵਿਹਰੇਯ੍ਯ ਗਹਪਤਿਨਾ ਵਾ ਗਹਪਤਿਪੁਤ੍ਤੇਨ ਵਾ’’ਤਿ (ਪਾਚਿ. ੯੫੬) ਏਵਂ ਪੁਨ ਵੁਤ੍ਤਸਂਸਟ੍ਠਸਿਕ੍ਖਾਪਦਞ੍ਚ. ਨੇਵ ਵੂਪਸਮੇਯ੍ਯ ਚਾਤਿ ‘‘‘ਏਹਾਯ੍ਯੇ, ਇਮਂ ਅਧਿਕਰਣਂ ਵੂਪਸਮੇਹੀ’ਤਿ (ਪਾਚਿ. ੯੯੫) ਵੁਚ੍ਚਮਾਨਾ ‘ਸਾਧੂ’ਤਿ ਪਟਿਸ੍ਸੁਣਿਤ੍ਵਾ ਸਾ ਪਚ੍ਛਾ ਅਨਨ੍ਤਰਾਯਿਕਿਨੀ ਨੇਵ ਵੂਪਸਮੇਯ੍ਯਾ’’ਤਿ ਵੁਤ੍ਤਸਿਕ੍ਖਾਪਦਞ੍ਚ.
੩੮੨. ਜਾਨਂ ਸਭਿਕ੍ਖੁਕਾਰਾਮਨ੍ਤਿ ‘‘ਜਾਨਂ ਸਭਿਕ੍ਖੁਕਂ ਆਰਾਮਂ ਅਨਾਪੁਚ੍ਛਾ ਪਵਿਸੇਯ੍ਯਾ’’ਤਿ (ਪਾਚਿ. ੧੦੨੪) ਵੁਤ੍ਤਸਿਕ੍ਖਾਪਦਞ੍ਚ. ਤਥੇਵ ਨ ਪਵਾਰਯੇਤਿ ‘‘ਉਭਤੋਸਙ੍ਘੇ ਤੀਹਿ ਠਾਨੇਹਿ ਨ ਪਵਾਰੇਯ੍ਯਾ’’ਤਿ (ਪਾਚਿ. ੧੦੫੧) ਵੁਤ੍ਤਸਿਕ੍ਖਾਪਦਞ੍ਚ. ਤਥਾ ਅਨ੍ਵਦ੍ਧਮਾਸਞ੍ਚਾਤਿ ‘‘ਅਨ੍ਵਦ੍ਧਮਾਸਂ ਭਿਕ੍ਖੁਨਿਯਾ ਭਿਕ੍ਖੁਸਙ੍ਘਤੋ ਦ੍ਵੇ ਧਮ੍ਮਾ ਪਚ੍ਚਾਸੀਸਿਤਬ੍ਬਾ’’ਤਿ (ਪਾਚਿ. ੧੦੫੯) ਵੁਤ੍ਤਸਿਕ੍ਖਾਪਦਞ੍ਚ. ਸਹਜੀਵਿਨਿਯੋ ਦੁਵੇਤਿ ‘‘ਸਹਜੀਵਿਨਿਂ ਵੁਟ੍ਠਾਪੇਤ੍ਵਾ ਦ੍ਵੇ ਵਸ੍ਸਾਨਿ ਨੇਵ ਅਨੁਗ੍ਗਣ੍ਹੇਯ੍ਯ (ਪਾਚਿ. ੧੧੦੮), ਸਹਜੀਵਿਨਿਂ ਵੁਟ੍ਠਾਪੇਤ੍ਵਾ ਨੇਵ ਵੂਪਕਾਸੇਯ੍ਯਾ’’ਤਿ (ਪਾਚਿ. ੧੧੧੬) ਵੁਤ੍ਤਸਿਕ੍ਖਾਪਦਦ੍ਵਯਞ੍ਚ.
੩੮੩-੪. ਸਚੇ ਮੇ ਚੀਵਰਂ ਅਯ੍ਯੇਤਿ ‘‘ਸਚੇ ਮੇ ਤ੍ਵਂ, ਅਯ੍ਯੇ, ਚੀਵਰਂ ਦਸ੍ਸਸਿ, ਏਵਾਹਂ ਤਂ ਵੁਟ੍ਠਾਪੇਸ੍ਸਾਮੀ’’ਤਿ (ਪਾਚਿ. ੧੧੫੧) ਵੁਤ੍ਤਸਿਕ੍ਖਾਪਦਞ੍ਚ. ਅਨੁਬਨ੍ਧਿਸ੍ਸਸੀਤਿ ‘‘ਸਚੇ ਮਂ ਤ੍ਵਂ, ਅਯ੍ਯੇ, ਦ੍ਵੇ ਵਸ੍ਸਾਨਿ ਅਨੁਬਨ੍ਧਿਸ੍ਸਸਿ, ਏਵਾਹਂ ਤਂ ਵੁਟ੍ਠਾਪੇਸ੍ਸਾਮੀ’’ਤਿ (ਪਾਚਿ. ੧੧੫੫) ਵੁਤ੍ਤਸਿਕ੍ਖਾਪਦਞ੍ਚ. ਅਸਮੇਨ ਸਮ੍ਬੁਦ੍ਧੇਨ ਪਕਾਸਿਤਾ ਇਮੇ ਸਤ੍ਤਤਿਂਸ ਧਮ੍ਮਾ ਸਬ੍ਬੇ ਕਾਯਵਾਚਾਦਿਤੋ ਕਾਯਵਾਚਾਚਿਤ੍ਤਤੋ ਏਕਸਮੁਟ੍ਠਾਨਾ ਕਤਾ ਸਮਨੁਭਾਸਨਾ ਸਿਯੁਂ ਸਮੁਟ੍ਠਾਨਤੋ ਸਮਨੁਭਾਸਨਸਿਕ੍ਖਾਪਦੇਨ ਸਦਿਸਾ ਸਿਯੁਨ੍ਤਿ ਯੋਜਨਾ.
ਸਮਨੁਭਾਸਨਸਮੁਟ੍ਠਾਨਵਣ੍ਣਨਾ.
੩੮੫. ਕਥਿਨਾਨਿ ਚ ਤੀਣੀਤਿ ‘‘ਨਿਟ੍ਠਿਤਚੀਵਰਸ੍ਮਿਂ ਭਿਕ੍ਖੁਨਾ ਉਬ੍ਭਤਸ੍ਮਿਂ ਕਥਿਨੇ’’ਤਿ (ਪਾਰਾ. ੪੬੨) ਵੁਤ੍ਤਾਨਿ ਆਦਿਤੋ ਤੀਣਿ ਸਿਕ੍ਖਾਪਦਾਨਿ. ਪਤ੍ਤੋਤਿ ‘‘ਦਸਾਹਪਰਮਂ ਅਤਿਰੇਕਪਤ੍ਤੋ’’ਤਿ (ਪਾਰਾ. ੬੦੧) ਵੁਤ੍ਤਸਿਕ੍ਖਾਪਦਞ੍ਚ. ਭੇਸਜ੍ਜਮੇਵ ਚਾਤਿ ‘‘ਪਟਿਸਾਯਨੀਯਾਨਿ ਭੇਸਜ੍ਜਾਨੀ’’ਤਿ (ਪਾਰਾ. ੬੨੨) ਵੁਤ੍ਤਸਿਕ੍ਖਾਪਦਞ੍ਚ. ਅਚ੍ਚੇਕਮ੍ਪਿ ਚਾਤਿ ਅਚ੍ਚੇਕਸਿਕ੍ਖਾਪਦਞ੍ਚ. ਸਾਸਙ੍ਕਨ੍ਤਿ ਤਦਨਨ੍ਤਰਮੇਵ ਸਾਸਙ੍ਕਸਿਕ੍ਖਾਪਦਞ੍ਚ. ਪਕ੍ਕਮਨ੍ਤਦ੍ਵਯਮ੍ਪਿ ਚਾਤਿ ‘‘ਤਂ ਪਕ੍ਕਮਨ੍ਤੋ ਨੇਵ ਉਦ੍ਧਰੇਯ੍ਯਾ’’ਤਿ (ਪਾਚਿ. ੧੦੯, ੧੧੫) ਭੂਤਗਾਮਵਗ੍ਗੇ ਵੁਤ੍ਤਸਿਕ੍ਖਾਪਦਦ੍ਵਯਞ੍ਚ.
੩੮੬. ਤਥਾ ਉਪਸ੍ਸਯਂ ਗਨ੍ਤ੍ਵਾਤਿ ‘‘ਭਿਕ੍ਖੁਨੁਪਸ੍ਸਯਂ ਉਪਸਙ੍ਕਮਿਤ੍ਵਾ ਭਿਕ੍ਖੁਨਿਯੋ ਓਵਦੇਯ੍ਯਾ’’ਤਿ (ਪਾਚਿ. ੧੫੮) ਵੁਤ੍ਤਸਿਕ੍ਖਾਪਦਞ੍ਚ. ਪਰਮ੍ਪਰਂ ਭੋਜਨਨ੍ਤਿ ‘‘ਪਰਮ੍ਪਰਭੋਜਨੇ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੨੨੧) ਵੁਤ੍ਤਸਿਕ੍ਖਾਪਦਞ੍ਚ. ਅਨਤਿਰਿਤ੍ਤਨ੍ਤਿ ‘‘ਅਨਤਿਰਿਤ੍ਤਂ ਖਾਦਨੀਯਂ ਵਾ ਭੋਜਨੀਯਂ ਵਾ’’ਤਿ (ਪਾਚਿ. ੨੩੮) ਵੁਤ੍ਤਸਿਕ੍ਖਾਪਦਞ੍ਚ. ਸਭਤ੍ਤੋਤਿ ‘‘ਨਿਮਨ੍ਤਿਤੋ ਸਭਤ੍ਤੋ ਸਮਾਨੋ’’ਤਿ (ਪਾਚਿ. ੨੯੯) ਵੁਤ੍ਤਸਿਕ੍ਖਾਪਦਞ੍ਚ. ਵਿਕਪ੍ਪੇਤ੍ਵਾ ਤਥੇਵ ਚਾਤਿ ‘‘ਚੀਵਰਂ ਵਿਕਪ੍ਪੇਤ੍ਵਾ’’ਤਿ (ਪਾਚਿ. ੩੭੩) ਵੁਤ੍ਤਸਿਕ੍ਖਾਪਦਞ੍ਚ.
੩੮੭. ਰਞ੍ਞੋਤਿ ‘‘ਰਞ੍ਞੋ ਖਤ੍ਤਿਯਸ੍ਸਾ’’ਤਿ (ਪਾਚਿ. ੪੯੮) ਵੁਤ੍ਤਸਿਕ੍ਖਾਪਦਞ੍ਚ. ਵਿਕਾਲੇਤਿ ‘‘ਵਿਕਾਲੇ ਗਾਮਂ ਪਵਿਸੇਯ੍ਯਾ’’ਤਿ (ਪਾਚਿ. ੫੦੯-੫੧੨) ਵੁਤ੍ਤਸਿਕ੍ਖਾਪਦਞ੍ਚ. ਵੋਸਾਸਾਤਿ ‘‘ਵੋਸਾਸਮਾਨਰੂਪਾ ਠਿਤਾ’’ਤਿ (ਪਾਚਿ. ੫੫੮) ਵੁਤ੍ਤਸਿਕ੍ਖਾਪਦਞ੍ਚ. ‘‘ਆਰਞ੍ਞਕੇ ਉਸ੍ਸਯਵਾਦਿਕਾ’’ਤਿ ਪਦਚ੍ਛੇਦੋ. ਆਰਞ੍ਞਕੇਤਿ ‘‘ਤਥਾਰੂਪੇਸੁ ਆਰਞ੍ਞਕੇਸੁ ਸੇਨਾਸਨੇਸੁ ਪੁਬ੍ਬੇ ਅਪ੍ਪਟਿਸਂਵਿਦਿਤ’’ਨ੍ਤਿ (ਪਾਚਿ. ੫੭੦) ਵੁਤ੍ਤਸਿਕ੍ਖਾਪਦਞ੍ਚ. ਉਸ੍ਸਯਵਾਦਿਕਾਤਿ ‘‘ਉਸ੍ਸਯਵਾਦਿਕਾ ਵਿਹਰੇਯ੍ਯਾ’’ਤਿ (ਪਾਚਿ. ੬੭੯) ਵੁਤ੍ਤਸਿਕ੍ਖਾਪਦਞ੍ਚ. ਪਤ੍ਤਸਨ੍ਨਿਚਯਞ੍ਚੇਵਾਤਿ ‘‘ਪਤ੍ਤਸਨ੍ਨਿਚਯਂ ਕਰੇਯ੍ਯਾ’’ਤਿ (ਪਾਚਿ. ੭੩੪) ਵੁਤ੍ਤਸਿਕ੍ਖਾਪਦਞ੍ਚ. ਪੁਰੇ, ਪਚ੍ਛਾ, ਵਿਕਾਲਕੇਤਿ ‘‘ਯਾ ਪਨ ਭਿਕ੍ਖੁਨੀ ਪੁਰੇਭਤ੍ਤਂ ਕੁਲਾਨਿ ਉਪਸਙ੍ਕਮਿਤ੍ਵਾ’’ਤਿ (ਪਾਚਿ. ੮੫੫) ਚ ‘‘ਪਚ੍ਛਾਭਤ੍ਤਂ ਕੁਲਾਨਿ ਉਪਸਙ੍ਕਮਿਤ੍ਵਾ’’ਤਿ (ਪਾਚਿ. ੮੬੦) ਚ ‘‘ਵਿਕਾਲੇ ਕੁਲਾਨਿ ਉਪਸਙ੍ਕਮਿਤ੍ਵਾ’’ਤਿ (ਪਾਚਿ. ੮੬੫) ਚ ਵੁਤ੍ਤਸਿਕ੍ਖਾਪਦਤ੍ਤਯਞ੍ਚ.
੩੮੮-੯. ਪਞ੍ਚਾਹਿਕਨ੍ਤਿ ‘‘ਪਞ੍ਚਾਹਿਕਂ ਸਙ੍ਘਾਟਿਚਾਰਂ ਅਤਿਕ੍ਕਮੇਯ੍ਯਾ’’ਤਿ (ਪਾਚਿ. ੮੯੮) ਵੁਤ੍ਤਸਿਕ੍ਖਾਪਦਞ੍ਚ. ਸਙ੍ਕਮਨਿਨ੍ਤਿ ‘‘ਚੀਵਰਸਙ੍ਕਮਨੀਯਂ ਧਾਰੇਯ੍ਯਾ’’ਤਿ (ਪਾਚਿ. ੯੦੩) ਵੁਤ੍ਤਸਿਕ੍ਖਾਪਦਞ੍ਚ. ਤਥਾ ਆਵਸਥਦ੍ਵਯਨ੍ਤਿ ‘‘ਆਵਸਥਚੀਵਰਂ ਅਨਿਸ੍ਸਜ੍ਜਿਤ੍ਵਾ ਪਰਿਭੁਞ੍ਜੇਯ੍ਯ (ਪਾਚਿ. ੧੦੦੪), ਆਵਸਥਂ ਅਨਿਸ੍ਸਜ੍ਜਿਤ੍ਵਾ ਚਾਰਿਕਂ ਪਕ੍ਕਮੇਯ੍ਯਾ’’ਤਿ (ਪਾਚਿ. ੧੦੦੯) ਏਵਂ ਆਵਸਥੇਨ ਸਦ੍ਧਿਂ ਵੁਤ੍ਤਸਿਕ੍ਖਾਪਦਦ੍ਵਯਞ੍ਚ. ਪਸਾਖੇਤਿ ‘‘ਪਸਾਖੇ ਜਾਤਂ ਗਣ੍ਡਂ ਵਾ’’ਤਿ (ਪਾਚਿ. ੧੦੬੩) ਵੁਤ੍ਤਸਿਕ੍ਖਾਪਦਞ੍ਚ. ਆਸਨੇ ਚਾਤਿ ‘‘ਭਿਕ੍ਖੁਸ੍ਸ ਪੁਰਤੋ ਅਨਾਪੁਚ੍ਛਾ ਆਸਨੇ ਨਿਸੀਦੇਯ੍ਯਾ’’ਤਿ (ਪਾਚਿ. ੧੨੧੫) ਵੁਤ੍ਤਸਿਕ੍ਖਾਪਦਞ੍ਚਾਤਿ ਇਮੇ ਪਨ ਏਕੂਨਤਿਂਸ ਧਮ੍ਮਾ ਕਾਯਵਾਚਤੋ, ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਨਤੋ ਸਬ੍ਬੇ ਦ੍ਵਿਸਮੁਟ੍ਠਾਨਿਕਾ, ਤਤੋਯੇਵ ਕਥਿਨਸਮ੍ਭਵਾ ਕਥਿਨਸਮੁਟ੍ਠਾਨਾ ਹੋਨ੍ਤੀਤਿ ਯੋਜਨਾ.
ਕਥਿਨਸਮੁਟ੍ਠਾਨਵਣ੍ਣਨਾ.
੩੯੦. ਦ੍ਵੇ ਸੇਯ੍ਯਾਤਿ ਦ੍ਵੇ ਸਹਸੇਯ੍ਯਸਿਕ੍ਖਾਪਦਾਨਿ ਚ. ਆਹਚ੍ਚਪਾਦੋ ਚਾਤਿ ਆਹਚ੍ਚਪਾਦਕਸਿਕ੍ਖਾਪਦਞ੍ਚ. ਪਿਣ੍ਡਞ੍ਚਾਤਿ ਆਵਸਥਪਿਣ੍ਡਭੋਜਨਸਿਕ੍ਖਾਪਦਞ੍ਚ. ਗਣਭੋਜਨਨ੍ਤਿ ਗਣਭੋਜਨਸਿਕ੍ਖਾਪਦਞ੍ਚ. ਵਿਕਾਲੇਤਿ ਵਿਕਾਲਭੋਜਨਸਿਕ੍ਖਾਪਦਞ੍ਚ. ਸਨ੍ਨਿਧਿਞ੍ਚੇਵਾਤਿ ਸਨ੍ਨਿਧਿਕਾਰਕਸਿਕ੍ਖਾਪਦਞ੍ਚ. ਦਨ੍ਤਪੋਨਨ੍ਤਿ ਦਨ੍ਤਪੋਨਸਿਕ੍ਖਾਪਦਞ੍ਚ. ਅਚੇਲਕਨ੍ਤਿ ਅਚੇਲਕਸਿਕ੍ਖਾਪਦਞ੍ਚ.
੩੯੧. ਉਯ੍ਯੁਤ੍ਤਞ੍ਚਾਤਿ ‘‘ਉਯ੍ਯੁਤ੍ਤਂ ਸੇਨਂ ਦਸ੍ਸਨਾਯ ਗਚ੍ਛੇਯ੍ਯਾ’’ਤਿ (ਪਾਚਿ. ੩੧੧) ਵੁਤ੍ਤਸਿਕ੍ਖਾਪਦਞ੍ਚ. ‘‘ਵਸੇ ਉਯ੍ਯੋਧਿ’’ਨ੍ਤਿ ਪਦਚ੍ਛੇਦੋ. ਵਸੇਤਿ ‘‘ਸੇਨਾਯ ਵਸੇਯ੍ਯਾ’’ਤਿ (ਪਾਚਿ. ੩੧੮) ਵੁਤ੍ਤਸਿਕ੍ਖਾਪਦਞ੍ਚ. ਉਯ੍ਯੋਧਿਨ੍ਤਿ ‘‘ਉਯ੍ਯੋਧਿਕਂ ਵਾ…ਪੇ… ਅਨੀਕਦਸ੍ਸਨਂ ਵਾ ਗਚ੍ਛੇਯ੍ਯਾ’’ਤਿ (ਪਾਚਿ. ੩੨੩) ਵੁਤ੍ਤਸਿਕ੍ਖਾਪਦਞ੍ਚ. ਸੁਰਾਤਿ ਸੁਰਾਪਾਨਸਿਕ੍ਖਾਪਦਞ੍ਚ. ਓਰੇਨ ਨ੍ਹਾਯਨਨ੍ਤਿ ਓਰੇਨਦ੍ਧਮਾਸਨਹਾਯਨਸਿਕ੍ਖਾਪਦਞ੍ਚ. ਦੁਬ੍ਬਣ੍ਣਕਰਣਞ੍ਚੇਵਾਤਿ ‘‘ਤਿਣ੍ਣਂ ਦੁਬ੍ਬਣ੍ਣਕਰਣਾਨ’’ਨ੍ਤਿ (ਪਾਚਿ. ੩੬੮) ਵੁਤ੍ਤਸਿਕ੍ਖਾਪਦਞ੍ਚ. ਪਾਟਿਦੇਸਨੀਯਦ੍ਵਯਨ੍ਤਿ ਵੁਤ੍ਤਾਵਸੇਸਂ ਪਾਟਿਦੇਸਨੀਯਦ੍ਵਯਞ੍ਚ.
੩੯੨. ਲਸੁਣਨ੍ਤਿ ਲਸੁਣਸਿਕ੍ਖਾਪਦਞ੍ਚ. ਉਪਤਿਟ੍ਠੇਯ੍ਯਾਤਿ ‘‘ਭਿਕ੍ਖੁਸ੍ਸ ਭੁਞ੍ਜਨ੍ਤਸ੍ਸ ਪਾਨੀਯੇਨ ਵਾ ਵਿਧੂਪਨੇਨ ਵਾ ਉਪਤਿਟ੍ਠੇਯ੍ਯਾ’’ਤਿ (ਪਾਚਿ. ੮੧੬) ਵੁਤ੍ਤਸਿਕ੍ਖਾਪਦਞ੍ਚ. ਨਚ੍ਚਦਸ੍ਸਨਮੇਵ ਚਾਤਿ ‘‘ਨਚ੍ਚਂ ਵਾ ਗੀਤਂ ਵਾ ਵਾਦਿਤਂ ਵਾ ਦਸ੍ਸਨਾਯ ਗਚ੍ਛੇਯ੍ਯਾ’’ਤਿ (ਪਾਚਿ. ੮੩੪) ਵੁਤ੍ਤਸਿਕ੍ਖਾਪਦਞ੍ਚ. ਨਗ੍ਗਨ੍ਤਿ ‘‘ਨਗ੍ਗਾ ਨਹਾਯੇਯ੍ਯਾ’’ਤਿ (ਪਾਚਿ. ੮੮੪) ਵੁਤ੍ਤਸਿਕ੍ਖਾਪਦਞ੍ਚ. ਅਤ੍ਥਰਣਨ੍ਤਿ ‘‘ਏਕਤ੍ਥਰਣਪਾਵੁਰਣਾ ਤੁਵਟ੍ਟੇਯ੍ਯੁ’’ਨ੍ਤਿ (ਪਾਚਿ. ੯੩੭) ਵੁਤ੍ਤਸਿਕ੍ਖਾਪਦਞ੍ਚ. ਮਞ੍ਚੇਤਿ ‘‘ਏਕਮਞ੍ਚੇ ਤੁਵਟ੍ਟੇਯ੍ਯੁ’’ਨ੍ਤਿ (ਪਾਚਿ. ੯੩੩) ਵੁਤ੍ਤਸਿਕ੍ਖਾਪਦਞ੍ਚ. ਅਨ੍ਤੋਰਟ੍ਠੇਤਿ ‘‘ਅਨ੍ਤੋਰਟ੍ਠੇ ਸਾਸਙ੍ਕਸਮ੍ਮਤੇ’’ਤਿ (ਪਾਚਿ. ੯੬੨) ਵੁਤ੍ਤਸਿਕ੍ਖਾਪਦਞ੍ਚ. ਤਥਾ ਬਹੀਤਿ ‘‘ਤਿਰੋਰਟ੍ਠੇ ਸਾਸਙ੍ਕਸਮ੍ਮਤੇ’’ਤਿ (ਪਾਚਿ. ੯੬੬) ਵੁਤ੍ਤਸਿਕ੍ਖਾਪਦਞ੍ਚ.
੩੯੩. ਅਨ੍ਤੋਵਸ੍ਸਨ੍ਤਿ ‘‘ਅਨ੍ਤੋਵਸ੍ਸਂ ਚਾਰਿਕਂ ਚਰੇਯ੍ਯਾ’’ਤਿ (ਪਾਚਿ. ੯੭੦) ਵੁਤ੍ਤਸਿਕ੍ਖਾਪਦਞ੍ਚ. ਅਗਾਰਞ੍ਚਾਤਿ ‘‘ਰਾਜਾਗਾਰਂ ਵਾ ਚਿਤ੍ਤਾਗਾਰਂ ਵਾ…ਪੇ… ਪੋਕ੍ਖਰਣਿਂ ਵਾ ਦਸ੍ਸਨਾਯ ਗਚ੍ਛੇਯ੍ਯਾ’’ਤਿ (ਪਾਚਿ. ੯੭੮) ਵੁਤ੍ਤਸਿਕ੍ਖਾਪਦਞ੍ਚ. ਆਸਨ੍ਦਿਨ੍ਤਿ ‘‘ਆਸਨ੍ਦਿਂ ਵਾ ਪਲ੍ਲਙ੍ਕਂ ਵਾ ਪਰਿਭੁਞ੍ਜੇਯ੍ਯਾ’’ਤਿ (ਪਾਚਿ. ੯੮੩) ਵੁਤ੍ਤਸਿਕ੍ਖਾਪਦਞ੍ਚ. ਸੁਤ੍ਤਕਨ੍ਤਨਨ੍ਤਿ ‘‘ਸੁਤ੍ਤਂ ਕਨ੍ਤੇਯ੍ਯਾ’’ਤਿ (ਪਾਚਿ. ੯੮੭) ਵੁਤ੍ਤਸਿਕ੍ਖਾਪਦਞ੍ਚ. ਵੇਯ੍ਯਾਵਚ੍ਚਨ੍ਤਿ ‘‘ਗਿਹਿਵੇਯ੍ਯਾਵਚ੍ਚਂ ਕਰੇਯ੍ਯਾ’’ਤਿ (ਪਾਚਿ. ੯੯੧) ਵੁਤ੍ਤਸਿਕ੍ਖਾਪਦਞ੍ਚ. ਸਹਤ੍ਥਾ ਚਾਤਿ ‘‘ਅਗਾਰਿਕਸ੍ਸ ਵਾ ਪਰਿਬ੍ਬਾਜਕਸ੍ਸ ਵਾ ਪਰਿਬ੍ਬਾਜਿਕਾਯ ਵਾ ਸਹਤ੍ਥਾ ਖਾਦਨੀਯਂ ਵਾ ਭੋਜਨੀਯਂ ਵਾ ਦਦੇਯ੍ਯਾ’’ਤਿ (ਪਾਚਿ. ੧੦੦੦) ਵੁਤ੍ਤਸਿਕ੍ਖਾਪਦਞ੍ਚ. ਆਵਾਸੇ ਚ ਅਭਿਕ੍ਖੁਕੇਤਿ ‘‘ਅਭਿਕ੍ਖੁਕੇ ਆਵਾਸੇ ਵਸ੍ਸਂ ਵਸੇਯ੍ਯਾ’’ਤਿ (ਪਾਚਿ. ੧੦੪੭) ਵੁਤ੍ਤਸਿਕ੍ਖਾਪਦਞ੍ਚ.
੩੯੪. ਛਤ੍ਤਨ੍ਤਿ ‘‘ਛਤ੍ਤੁਪਾਹਨਂ ਧਾਰੇਯ੍ਯਾ’’ਤਿ (ਪਾਚਿ. ੧੧੭੮) ਵੁਤ੍ਤਸਿਕ੍ਖਾਪਦਞ੍ਚ. ਯਾਨਞ੍ਚਾਤਿ ‘‘ਯਾਨੇਨ ਯਾਯੇਯ੍ਯਾ’’ਤਿ (ਪਾਚਿ. ੧੧੮੬) ਵੁਤ੍ਤਸਿਕ੍ਖਾਪਦਞ੍ਚ. ਸਙ੍ਘਾਣਿਨ੍ਤਿ ‘‘ਸਙ੍ਘਾਣਿਂ ਧਾਰੇਯ੍ਯਾ’’ਤਿ (ਪਾਚਿ. ੧੧੯੧) ਵੁਤ੍ਤਸਿਕ੍ਖਾਪਦਞ੍ਚ. ਅਲਙ੍ਕਾਰਨ੍ਤਿ ‘‘ਇਤ੍ਥਾਲਙ੍ਕਾਰਂ ਧਾਰੇਯ੍ਯਾ’’ਤਿ (ਪਾਚਿ. ੧੧੯੫) ਵੁਤ੍ਤਸਿਕ੍ਖਾਪਦਞ੍ਚ. ਗਨ੍ਧਵਾਸਿਤਨ੍ਤਿ ‘‘ਗਨ੍ਧਵਣ੍ਣਕੇਨ ਨਹਾਯੇਯ੍ਯ (ਪਾਚਿ. ੧੧੯੯), ਵਾਸਿਤਕੇਨ ਪਿਞ੍ਞਾਕੇਨ ਨਹਾਯੇਯ੍ਯਾ’’ਤਿ (ਪਾਚਿ. ੧੨੦੩) ਵੁਤ੍ਤਸਿਕ੍ਖਾਪਦਦ੍ਵਯਞ੍ਚ. ‘‘ਭਿਕ੍ਖੁਨੀ…ਪੇ… ਗਿਹਿਨਿਯਾ’’ਤਿ ਏਤੇਨ ‘‘ਭਿਕ੍ਖੁਨਿਯਾ ਉਮ੍ਮਦ੍ਦਾਪੇਯ੍ਯਾ’’ਤਿਆਦੀਨਿ (ਪਾਚਿ. ੧੨੦੭) ਚਤ੍ਤਾਰਿ ਸਿਕ੍ਖਾਪਦਾਨਿ ਵੁਤ੍ਤਾਨਿ.
੩੯੫. ਤਥਾਸਂਕਚ੍ਚਿਕਾਤਿ ‘‘ਅਸਂਕਚ੍ਚਿਕਾ ਗਾਮਂ ਪਵਿਸੇਯ੍ਯਾ’’ਤਿ (ਪਾਚਿ. ੧੨੨੫) ਏਵਂ ਵੁਤ੍ਤਸਿਕ੍ਖਾਪਦਞ੍ਚ. ਇਮੇ ਪਨ ਤੇਚਤ੍ਤਾਲੀਸ ਧਮ੍ਮਾ ਸਬ੍ਬੇ ਕਾਯਚਿਤ੍ਤਵਸੇਨ ਦ੍ਵਿਸਮੁਟ੍ਠਾਨਿਕਾ. ਏਲ਼ਕਲੋਮੇਨ ਸਮੁਟ੍ਠਾਨਤੋ ਸਮਾ ਹੋਨ੍ਤੀਤਿ ਯੋਜਨਾ.
ਏਲ਼ਕਲੋਮਸਮੁਟ੍ਠਾਨਵਣ੍ਣਨਾ.
੩੯੬-੭. ਅਞ੍ਞਤ੍ਰਾਤਿ ‘‘ਮਾਤੁਗਾਮਸ੍ਸ ਉਤ੍ਤਰਿਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਯ੍ਯ ਅਞ੍ਞਤ੍ਰ ਵਿਞ੍ਞੁਨਾ ਪੁਰਿਸਵਿਗ੍ਗਹੇਨਾ’’ਤਿ (ਪਾਚਿ. ੬੩) ਵੁਤ੍ਤਸਿਕ੍ਖਾਪਦਞ੍ਚ. ਅਸਮ੍ਮਤੋ ਚੇਵਾਤਿ ‘‘ਅਸਮ੍ਮਤੋ ਭਿਕ੍ਖੁਨਿਯੋ ਓਵਦੇਯ੍ਯਾ’’ਤਿ (ਪਾਚਿ. ੧੪੬) ਵੁਤ੍ਤਸਿਕ੍ਖਾਪਦਞ੍ਚ. ਤਥਾ ਅਤ੍ਥਙ੍ਗਤੇਨ ਚਾਤਿ ‘‘ਅਤ੍ਥਙ੍ਗਤੇ ਸੂਰਿਯੇ ਭਿਕ੍ਖੁਨਿਯੋ ਓਵਦੇਯ੍ਯਾ’’ਤਿ (ਪਾਚਿ. ੧੫੪) ਵੁਤ੍ਤਸਿਕ੍ਖਾਪਦਞ੍ਚ. ਤਿਰਚ੍ਛਾਨਵਿਜ੍ਜਾ ਦ੍ਵੇ ਵੁਤ੍ਤਾਤਿ ‘‘ਤਿਰਚ੍ਛਾਨਵਿਜ੍ਜਂ ਪਰਿਯਾਪੁਣੇਯ੍ਯ, ਵਾਚੇਯ੍ਯਾ’’ਤਿ (ਪਾਚਿ. ੧੦੧੪, ੧੦੧੮) ਏਵਂ ਵੁਤ੍ਤਾਨਿ ਦ੍ਵੇ ਸਿਕ੍ਖਾਪਦਾਨਿ ਚ. ਅਨੋਕਾਸਕਤਮ੍ਪਿ ਚਾਤਿ ‘‘ਅਨੋਕਾਸਕਤਂ ਭਿਕ੍ਖੁਂ ਪਞ੍ਹਂ ਪੁਚ੍ਛੇਯ੍ਯਾ’’ਤਿ (ਪਾਚਿ. ੧੨੨੦) ਵੁਤ੍ਤਸਿਕ੍ਖਾਪਦਞ੍ਚਾਤਿ ਇਮੇ ਪਨ ਸਬ੍ਬੇ ਛ ਧਮ੍ਮਾ ਵਾਚਤੋ, ਵਾਚਾਚਿਤ੍ਤਤੋ ਚਾਤਿ ਇਮੇਹਿ ਦ੍ਵੀਹਿ ਸਮੁਟ੍ਠਾਨੇਹਿ ਸਮੁਟ੍ਠਾਨਿਕਾ ਹੋਨ੍ਤਿ. ਪਦਸੋਧਮ੍ਮਤੁਲ੍ਯਤਾ ਅਯਮੇਤੇਸਂ ਪਦਸੋਧਮ੍ਮੇਨ ਸਦਿਸਭਾਵੋਤਿ ਯੋਜਨਾ.
ਪਦਸੋਧਮ੍ਮਸਮੁਟ੍ਠਾਨਵਣ੍ਣਨਾ.
੩੯੮-੯. ਏਕਨ੍ਤਿ ‘‘ਭਿਕ੍ਖੁਨਿਯਾ ਸਦ੍ਧਿਂ ਸਂਵਿਧਾਯ ਏਕਦ੍ਧਾਨਮਗ੍ਗਂ ਪਟਿਪਜ੍ਜੇਯ੍ਯਾ’’ਤਿ (ਪਾਚਿ. ੧੮੦) ਵੁਤ੍ਤਸਿਕ੍ਖਾਪਦਞ੍ਚ. ਨਾਵਨ੍ਤਿ ‘‘ਏਕਨਾਵਂ ਅਭਿਰੁਹੇਯ੍ਯਾ’’ਤਿ (ਪਾਚਿ. ੧੮੮) ਵੁਤ੍ਤਸਿਕ੍ਖਾਪਦਞ੍ਚ. ਪਣੀਤਞ੍ਚਾਤਿ ‘‘ਪਣੀਤਭੋਜਨਾਨਿ ਅਗਿਲਾਨੋ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾਭੁਞ੍ਜੇਯ੍ਯਾ’’ਤਿ (ਪਾਚਿ. ੨੫੯) ਵੁਤ੍ਤਸਿਕ੍ਖਾਪਦਞ੍ਚ. ਸਂਵਿਧਾਨਞ੍ਚਾਤਿ ਮਾਤੁਗਾਮੇਨ ਸਦ੍ਧਿਂ ਸਂਵਿਧਾਯ ਗਮਨਸਿਕ੍ਖਾਪਦਞ੍ਚ. ਸਂਹਰੇਤਿ ‘‘ਸਮ੍ਬਾਧੇ ਲੋਮਂ ਸਂਹਰਾਪੇਯ੍ਯਾ’’ਤਿ (ਪਾਚਿ. ੭੯੯) ਵੁਤ੍ਤਸਿਕ੍ਖਾਪਦਞ੍ਚ. ਧਞ੍ਞਨ੍ਤਿ ‘‘ਆਮਕਧਞ੍ਞਂ ਵਿਞ੍ਞਤ੍ਵਾ ਵਾ’’ਤਿ (ਪਾਚਿ. ੮੨੧) ਵੁਤ੍ਤਸਿਕ੍ਖਾਪਦਞ੍ਚ. ਨਿਮਨ੍ਤਿਤਾ ਚੇਵਾਤਿ ‘‘ਨਿਮਨ੍ਤਿਤਾ ਵਾ ਪਵਾਰਿਤਾ ਵਾ ਖਾਦਨੀਯਂ ਵਾ ਭੋਜਨੀਯਂ ਵਾ ਖਾਦੇਯ੍ਯ ਵਾ ਭੁਞ੍ਜੇਯ੍ਯ ਵਾ’’ਤਿ (ਪਾਚਿ. ੧੦੩੮) ਵੁਤ੍ਤਸਿਕ੍ਖਾਪਦਞ੍ਚ. ਪਾਟਿਦੇਸਨਿਯਟ੍ਠਕਨ੍ਤਿ ਭਿਕ੍ਖੁਨੀਨਂ ਵੁਤ੍ਤਾ ਅਟ੍ਠ ਪਾਟਿਦੇਸਨੀਯਾ ਚੇਤਿ ਬੁਦ੍ਧਸੇਟ੍ਠੇਨ ਪਞ੍ਞਤ੍ਤਾ ਏਤਾ ਚੁਦ੍ਦਸ ਸਿਕ੍ਖਾ ਚਤੁਸਮੁਟ੍ਠਾਨਾ ਕਾਯਤੋ, ਕਾਯਵਾਚਤੋ, ਕਾਯਚਿਤ੍ਤਤੋ, ਵਾਚਾਚਿਤ੍ਤਤੋ ਚਾਤਿ ਚਤੂਹਿ ਸਮੁਟ੍ਠਾਨੇਹਿ ਸਮੁਟ੍ਠਹਨ੍ਤਿ. ਸਮੁਟ੍ਠਾਨਤੋ ਅਦ੍ਧਾਨੇਨ ਅਦ੍ਧਾਨਸਿਕ੍ਖਾਪਦੇਨ ਸਮਾ ਹੋਨ੍ਤੀਤਿ ਮਤਾਤਿ ਯੋਜਨਾ.
ਅਦ੍ਧਾਨਸਮੁਟ੍ਠਾਨਵਣ੍ਣਨਾ.
੪੦੦-੧. ਸੁਤਿਨ੍ਤਿ ਉਪਸ੍ਸੁਤਿਤਿਟ੍ਠਨਸਿਕ੍ਖਾਪਦਞ੍ਚ. ਸੂਪਾਦਿਵਿਞ੍ਞਤ੍ਤਿਨ੍ਤਿ ਸੂਪੋਦਨਵਿਞ੍ਞਤ੍ਤਿਸਿਕ੍ਖਾਪਦਞ੍ਚ. ਅਨ੍ਧਕਾਰੇਤਿ ‘‘ਰਤ੍ਤਨ੍ਧਕਾਰੇ ਅਪ੍ਪਦੀਪੇ’’ਤਿ (ਪਾਚਿ. ੮੩੯) ਵੁਤ੍ਤਸਿਕ੍ਖਾਪਦਞ੍ਚ. ਤਥੇਵ ਚ ਪਟਿਚ੍ਛਨ੍ਨੇਤਿ ‘‘ਪਟਿਚ੍ਛਨ੍ਨੇ ਓਕਾਸੇ’’ਤਿ (ਪਾਚਿ. ੮੪੩) ਵੁਤ੍ਤਸਿਕ੍ਖਾਪਦਞ੍ਚ. ਓਕਾਸੇਤਿ ‘‘ਅਜ੍ਝੋਕਾਸੇ ਪੁਰਿਸੇਨ ਸਦ੍ਧਿ’’ਨ੍ਤਿ (ਪਾਚਿ. ੮੪੭) ਏਵਂ ਵੁਤ੍ਤਸਿਕ੍ਖਾਪਦਞ੍ਚ. ਬ੍ਯੂਹੇ ਚਾਤਿ ਤਦਨਨ੍ਤਰਮੇਵ ‘‘ਰਥਿਕਾਯ ਵਾ ਬ੍ਯੂਹੇ ਵਾ ਸਿਙ੍ਘਾਟਕੇ ਵਾ ਪੁਰਿਸੇਨ ਸਦ੍ਧਿ’’ਨ੍ਤਿ (ਪਾਚਿ. ੮੫੧) ਆਗਤਸਿਕ੍ਖਾਪਦਞ੍ਚਾਤਿ ਇਮੇ ਸਬ੍ਬੇਪਿ ਆਦਿਚ੍ਚਬਨ੍ਧੁਨਾ ਦੇਸਿਤਾ ਛ ਧਮ੍ਮਾ ਚਤੁਤ੍ਥਚ੍ਛਟ੍ਠਤੋ ਕਾਯਚਿਤ੍ਤਤੋ, ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਹਨ੍ਤਾ ਥੇਯ੍ਯਸਤ੍ਥਸਮੁਟ੍ਠਾਨਾ ਥੇਯ੍ਯਸਤ੍ਥਸਿਕ੍ਖਾਪਦੇਨ ਸਮਾਨਸਮੁਟ੍ਠਾਨਾ ਸਿਯੁਨ੍ਤਿ ਯੋਜਨਾ.
ਥੇਯ੍ਯਸਤ੍ਥਸਮੁਟ੍ਠਾਨਵਣ੍ਣਨਾ.
੪੦੨. ਛਤ੍ਤ, ਦਣ੍ਡਕਰਸ੍ਸਾਪੀਤਿ ‘‘ਨ ਛਤ੍ਤਪਾਣਿਸ੍ਸ ਦਣ੍ਡਪਾਣਿਸ੍ਸਾ’’ਤਿ (ਪਾਚਿ. ੬੩੫) ਵੁਤ੍ਤਸਿਕ੍ਖਾਪਦਦ੍ਵਯਞ੍ਚ. ਸਤ੍ਥਾਵੁਧਕਰਸ੍ਸਾਪੀਤਿ ‘‘ਨ ਸਤ੍ਥਪਾਣਿਸ੍ਸ (ਪਾਚਿ. ੬੩੬), ਨ ਆਵੁਧਪਾਣਿਸ੍ਸਾ’’ਤਿ (ਪਾਚਿ. ੬੩੭) ਵੁਤ੍ਤਸਿਕ੍ਖਾਪਦਦ੍ਵਯਞ੍ਚ. ਪਾਦੁਕੂਪਾਹਨਾ, ਯਾਨਨ੍ਤਿ ‘‘ਨ ਪਾਦੁਕਾਰੁਲ਼੍ਹਸ੍ਸ (ਪਾਚਿ. ੬੩੮), ਨ ਉਪਾਹਨਾਰੁਲ਼੍ਹਸ੍ਸ (ਪਾਚਿ. ੬੩੯), ਨ ਯਾਨਗਤਸ੍ਸਾ’’ਤਿ (ਪਾਚਿ. ੬੪੦) ਵੁਤ੍ਤਸਿਕ੍ਖਾਪਦਤ੍ਤਯਞ੍ਚ. ਸੇਯ੍ਯਾ, ਪਲ੍ਲਤ੍ਥਿਕਾਯ ਚਾਤਿ ‘‘ਨ ਸਯਨਗਤਸ੍ਸ (ਪਾਚਿ. ੬੪੧), ਨ ਪਲ੍ਲਤ੍ਥਿਕਾਯ ਨਿਸਿਨ੍ਨਸ੍ਸਾ’’ਤਿ (ਪਾਚਿ. ੬੪੨) ਵੁਤ੍ਤਸਿਕ੍ਖਾਪਦਦ੍ਵਯਞ੍ਚ.
੪੦੩. ਵੇਠਿਤੋਗੁਣ੍ਠਿਤੋ ਚਾਤਿ ‘‘ਨ ਵੇਠਿਤਸੀਸਸ੍ਸ (ਪਾਚਿ. ੬੪੩), ਨ ਓਗੁਣ੍ਠਿਤਸੀਸਸ੍ਸਾ’’ਤਿ (ਪਾਚਿ. ੬੪੪) ਵੁਤ੍ਤਸਿਕ੍ਖਾਪਦਦ੍ਵਯਞ੍ਚਾਤਿ ਨਿਦਸ੍ਸਿਤਾ ਸਬ੍ਬੇ ਏਕਾਦਸ ਧਮ੍ਮਾ ਵਾਚਾਚਿਤ੍ਤਸਙ੍ਖਾਤੇਨ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਿਤਾ ਧਮ੍ਮਦੇਸਨਸਮੁਟ੍ਠਾਨਾਤਿ ਸਞ੍ਞਿਤਾ ਸਲ੍ਲਕ੍ਖਿਤਾਤਿ ਯੋਜਨਾ.
ਧਮ੍ਮਦੇਸਨਸਮੁਟ੍ਠਾਨਵਣ੍ਣਨਾ.
੪੦੪. ਏਵਂ ਤਾਵ ਸਮ੍ਭਿਨ੍ਨਸਮੁਟ੍ਠਾਨਂ ਵੇਦਿਤਬ੍ਬਂ, ਨਿਯਤਸਮੁਟ੍ਠਾਨਂ ਤਿਵਿਧਂ, ਤਂ ਏਕਸ੍ਸੇਵ ਸਿਕ੍ਖਾਪਦਸ੍ਸ ਹੋਤੀਤਿ ਵਿਸੁਂਯੇਵ ਦਸ੍ਸੇਤੁਮਾਹ ‘‘ਭੂਤਾਰੋਚਨਕਞ੍ਚੇਵਾ’’ਤਿਆਦਿ. ਭੂਤਾਰੋਚਨਕਞ੍ਚੇਵਾਤਿ ਤੀਹਿ ਅਚਿਤ੍ਤਕਸਮੁਟ੍ਠਾਨੇਹਿ ਸਮੁਟ੍ਠਿਤਂ ਭੂਤਾਰੋਚਨਸਿਕ੍ਖਾਪਦਞ੍ਚ. ਚੋਰਿਵੁਟ੍ਠਾਪਨਮ੍ਪਿ ਚਾਤਿ ਵਾਚਾਚਿਤ੍ਤਤੋ, ਕਾਯਵਾਚਾਚਿਤ੍ਤਤੋ ਚਾਤਿ ਦ੍ਵੀਹਿ ਸਮੁਟ੍ਠਿਤਂ ਚੋਰਿਵੁਟ੍ਠਾਪਨਸਿਕ੍ਖਾਪਦਞ੍ਚ. ਅਨਨੁਞ੍ਞਾਤਮੇਵ ਅਨਨੁਞ੍ਞਾਤਮਤ੍ਤਂ. ਅਨਨੁਞ੍ਞਾਤਮਤ੍ਤਨ੍ਤਿ ਵਾਚਤੋ, ਕਾਯਵਾਚਤੋ, ਵਾਚਾਚਿਤ੍ਤਤੋ, ਕਾਯਵਾਚਾਚਿਤ੍ਤਤੋ ਚਾਤਿ ਚਤੂਹਿ ਸਮੁਟ੍ਠਿਤਂ ਅਨਨੁਞ੍ਞਾਤਸਿਕ੍ਖਾਪਦਞ੍ਚਾਤਿ. ਇਦਂ ਤਯਨ੍ਤਿ ਇਦਂ ਸਿਕ੍ਖਾਪਦਤ੍ਤਯਂ. ਅਸਮ੍ਭਿਨ੍ਨਨ੍ਤਿ ਕੇਨਚਿ ਅਞ੍ਞੇਨ ਸਿਕ੍ਖਾਪਦੇਨ ਅਸਮ੍ਮਿਸ੍ਸਸਮੁਟ੍ਠਾਨਂ.
ਇਤਿ ਉਤ੍ਤਰੇ ਲੀਨਤ੍ਥਪਕਾਸਨਿਯਾ
ਸਮੁਟ੍ਠਾਨਸੀਸਕਥਾਵਣ੍ਣਨਾ ਨਿਟ੍ਠਿਤਾ.