ਅਧਿਕਰਣਪਚ੍ਚਯਕਥਾਵਣ੍ਣਨਾ

੨੮੫. ਵਿਵਾਦਾਧਿਕਰਣਮ੍ਹਾਤਿ ‘‘ਅਧਮ੍ਮਂ ‘ਧਮ੍ਮੋ’ਤਿ ਦੀਪੇਤੀ’’ਤਿਆਦਿਨਯਪ੍ਪਵਤ੍ਤਾ ਅਟ੍ਠਾਰਸਭੇਦਕਰਵਤ੍ਥੁਨਿਸ੍ਸਿਤਾ ਵਿਵਾਦਾਧਿਕਰਣਮ੍ਹਾ.

੨੮੬. ਉਪਸਮ੍ਪਨ੍ਨਂ ਓਮਸਤੋ ਭਿਕ੍ਖੁਸ੍ਸ ਪਾਚਿਤ੍ਤਿ ਹੋਤੀਤਿ ਯੋਜਨਾ.

੨੮੭. ਅਨੁਵਾਦਾਧਿਕਰਣਪਚ੍ਚਯਾਤਿ ਚੋਦਨਾਪਰਨਾਮਧੇਯ੍ਯਂ ਅਨੁਵਾਦਾਧਿਕਰਣਮੇਵ ਪਚ੍ਚਯੋ, ਤਸ੍ਮਾ, ਅਨੁਵਾਦਨਾਧਿਕਰਣਹੇਤੂਤਿ ਅਤ੍ਥੋ.

੨੮੯. ‘‘ਤਥਾ’’ਤਿ ਇਮਿਨਾ ਅਮੂਲਕਤ੍ਤਂ ਅਤਿਦਿਸਤਿ.

੨੯੦. ਆਪਤ੍ਤਿਪਚ੍ਚਯਾਤਿ ਆਪਤ੍ਤਾਧਿਕਰਣਪਚ੍ਚਯਾ.

੨੯੩. ਕਿਚ੍ਚਾਧਿਕਰਣਪਚ੍ਚਯਾਤਿ ਅਪਲੋਕਨਾਦਿਚਤੁਬ੍ਬਿਧਕਮ੍ਮਸਙ੍ਖਾਤਕਿਚ੍ਚਾਧਿਕਰਣਹੇਤੁ.

੨੯੪. ਅਚ੍ਚਜਨ੍ਤੀਵਾਤਿ ਅਤ੍ਤਨੋ ਲਦ੍ਧਿਂ ਅਪਰਿਚ੍ਚਜਨ੍ਤੀ ਏਵ.

੨੯੭. ਪਾਪਿਕਾਯ ਦਿਟ੍ਠਿਯਾ ਪਰਿਚ੍ਚਜਨਤ੍ਥਾਯ ਕਤਾਯ ਯਾਵਤਤਿਯਕਂ ਸਮਨੁਭਾਸਨਾਯ ਤਂ ਦਿਟ੍ਠਿਂ ਅਚ੍ਚਜਨ੍ਤਿਯਾ ਤਸ੍ਸਾ ਭਿਕ੍ਖੁਨਿਯਾ, ਤਸ੍ਸ ਭਿਕ੍ਖੁਸ੍ਸ ਚ ਅਚ੍ਚਜਤੋ ਪਾਚਿਤ੍ਤਿ ਹੋਤੀਤਿ ਯੋਜਨਾ.

ਇਤਿ ਉਤ੍ਤਰੇ ਲੀਨਤ੍ਥਪਕਾਸਨਿਯਾ

ਅਧਿਕਰਣਪਚ੍ਚਯਕਥਾਵਣ੍ਣਨਾ ਨਿਟ੍ਠਿਤਾ.