ਸੇਨਾਸਨਕ੍ਖਨ੍ਧਕਕਥਾਵਣ੍ਣਨਾ

੨੮੨੭. ਆਸਨ੍ਦਿਕੋਤਿ ਚਤੁਰਸ੍ਸਪੀਠਂ. ਅਤਿਕ੍ਕਨ੍ਤਪਮਾਣੋਤਿ ਹੇਟ੍ਠਾ ਅਟਨਿਯਾ ਵਡ੍ਢਕਿਹਤ੍ਥਤੋ ਉਚ੍ਚਤਰਪ੍ਪਮਾਣਪਾਦਕੋ. ਏਕਪਸ੍ਸਤੋ ਦੀਘੋ ਪਨ ਉਚ੍ਚਪਾਦਕੋ ਨ ਵਟ੍ਟਤਿ. ਯਥਾਹ – ‘‘ਉਚ੍ਚਕਮ੍ਪਿ ਆਸਨ੍ਦਿਕਨ੍ਤਿ ਵਚਨਤੋ ਏਕਤੋਭਾਗੇਨ ਦੀਘਪੀਠਮੇਵ ਹਿ ਅਟ੍ਠਙ੍ਗੁਲਾਧਿਕਪਾਦਕਂ ਨ ਵਟ੍ਟਤਿ, ਚਤੁਰਸ੍ਸਆਸਨ੍ਦਿਕੋ ਪਨ ਪਮਾਣਾਤਿਕ੍ਕਨ੍ਤੋਪਿ ਵਟ੍ਟਤੀ’’ਤਿ (ਚੂਲ਼ਵ. ਅਟ੍ਠ. ੨੯੭).

ਤਥਾਤਿ ਇਮਿਨਾ ‘‘ਅਤਿਕ੍ਕਨ੍ਤਪਮਾਣੋ’’ਤਿ ਇਦਂ ਪਚ੍ਚਾਮਸਤਿ. ਪਞ੍ਚਙ੍ਗਪੀਠਨ੍ਤਿ ਚਤ੍ਤਾਰੋ ਪਾਦਾ, ਅਪਸ੍ਸੇਨਨ੍ਤਿ ਇਮੇਹਿ ਪਞ੍ਚਙ੍ਗੇਹਿ ਯੁਤ੍ਤਪੀਠਂ. ਸਤ੍ਤਙ੍ਗਨ੍ਤਿ ਤੀਸੁ ਦਿਸਾਸੁ ਅਪਸ੍ਸਯੇ ਯੋਜੇਤ੍ਵਾ ਕਤਂ. ਤਞ੍ਹਿ ਚਤੂਹਿ ਪਾਦੇਹਿ, ਤੀਹਿ ਅਪਸ੍ਸੇਹਿ ਚ ਯੁਤ੍ਤਤ੍ਤਾ ‘‘ਸਤ੍ਤਙ੍ਗਪੀਠ’’ਨ੍ਤਿ ਵੁਤ੍ਤਂ. ਏਸ ਨਯੋ ਮਞ੍ਚੇਪਿ. ਯਥਾਹ – ‘‘ਸਤ੍ਤਙ੍ਗੋ ਨਾਮ ਤੀਸੁ ਦਿਸਾਸੁ ਅਪਸ੍ਸਯਂ ਕਤ੍ਵਾ ਕਤਮਞ੍ਚੋ, ਅਯਮ੍ਪਿ ਪਮਾਣਾਤਿਕ੍ਕਨ੍ਤੋ ਵਟ੍ਟਤੀ’’ਤਿ (ਚੂਲ਼ਵ. ਅਟ੍ਠ. ੨੯੭).

੨੮੨੮. ਤੂਲੋਨਦ੍ਧਾਤਿ ਉਪਰਿ ਤੂਲਂ ਪਕ੍ਖਿਪਿਤ੍ਵਾ ਬਦ੍ਧਾ. ਘਰੇਯੇਵਾਤਿ ਗਿਹੀਨਂ ਗੇਹੇਯੇਵ ਨਿਸੀਦਿਤੁਂ ਵਟ੍ਟਤੀਤਿ ਸਮ੍ਬਨ੍ਧੋ. ‘‘ਨਿਸੀਦਿਤੁ’’ਨ੍ਤਿ ਇਮਿਨਾਵ ਸਯਨਂ ਪਟਿਕ੍ਖਿਤ੍ਤਂ. ਸੀਸਪਾਦੂਪਧਾਨਨ੍ਤਿ ਸੀਸੂਪਧਾਨਞ੍ਚੇਵ ਪਾਦੂਪਧਾਨਞ੍ਚ. ਚ-ਸਦ੍ਦੋ ਪਿ-ਸਦ੍ਦਤ੍ਥੇ ਸੋ ‘‘ਅਗਿਲਾਨਸ੍ਸਾ’’ਤਿ ਏਤ੍ਥ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬੋ, ਤੇਨ ਅਗਿਲਾਨਸ੍ਸਾਪਿ ਤਾਵ ਵਟ੍ਟਤਿ, ਪਗੇਵ ਗਿਲਾਨਸ੍ਸਾਤਿ ਦੀਪੇਤਿ.

੨੮੨੯. ਨ ਕੇਵਲਂ ਗਿਲਾਨਸ੍ਸ ਸੀਸਪਾਦੂਪਧਾਨਮੇਵ ਵਟ੍ਟਤਿ, ਅਥ ਖੋ ਇਦਮ੍ਪੀਤਿ ਦਸ੍ਸੇਤੁਮਾਹ ‘‘ਸਨ੍ਥਰਿਤ੍ਵਾ’’ਤਿਆਦਿ. ਉਪਧਾਨਾਨਿ ਸਨ੍ਥਰਿਤ੍ਵਾਤਿ ਬਹੂ ਉਪਧਾਨਾਨਿ ਅਤ੍ਥਰਿਤ੍ਵਾ. ਤਤ੍ਥ ਚਾਤਿ ਤਸ੍ਮਿਂ ਉਪਧਾਨਸਨ੍ਥਰੇ. ਪਚ੍ਚਤ੍ਥਰਣਕਂ ਦਤ੍ਵਾਤਿ ਉਪਰਿ ਪਚ੍ਚਤ੍ਥਰਣਕਂ ਅਤ੍ਥਰਿਤ੍ਵਾ.

੨੮੩੦. ਤਿਰਿਯਨ੍ਤਿ ਵਿਤ੍ਥਾਰਤੋ. ਮੁਟ੍ਠਿਰਤਨਨ੍ਤਿ ਪਾਕਤਿਕਮੁਟ੍ਠਿਕਰਤਨਂ. ਤਂ ਪਨ ਵਡ੍ਢਕੀਨਂ ਵਿਦਤ੍ਥਿਮਤ੍ਤਂ. ਮਿਤਨ੍ਤਿ ਪਾਕਟਿਤਂ ਪਮਾਣਯੁਤ੍ਤਂ ਹੋਤੀਤਿ ਯੋਜਨਾ. ਕਤ੍ਥਚਿ ਪੋਤ੍ਥਕੇਸੁ ‘‘ਮਤ’’ਨ੍ਤਿ ਪਾਠੋ ਦਿਸ੍ਸਤਿ, ਸੋ ਨ ਗਹੇਤਬ੍ਬੋ. ਦੀਘਤੋਤਿ ਬਿਮ੍ਬੋਹਨਸ੍ਸ ਦੀਘਤੋ. ਦਿਯਡ੍ਢਨ੍ਤਿ ਦਿਯਡ੍ਢਹਤ੍ਥਂ ਵਾ ਦ੍ਵਿਹਤ੍ਥਂ ਵਾ ਹੋਤੀਤਿ ਕੁਰੁਨ੍ਦਿਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਇਦਮੇਵ ਹਿ ‘‘ਸੀਸਪ੍ਪਮਾਣਬਿਮ੍ਬੋਹਨ’’ਨ੍ਤਿ ਅਧਿਪ੍ਪੇਤਂ. ਯਥਾਹ –

‘‘ਸੀਸਪ੍ਪਮਾਣਂ ਨਾਮ ਯਸ੍ਸ ਵਿਤ੍ਥਾਰਤੋ ਤੀਸੁ ਕਣ੍ਣੇਸੁ ਦ੍ਵਿਨ੍ਨਂ ਕਣ੍ਣਾਨਂ ਅਨ੍ਤਰਂ ਮਿਨਿਯਮਾਨਂ ਵਿਦਤ੍ਥਿ ਚੇਵ ਚਤੁਰਙ੍ਗੁਲਞ੍ਚ ਹੋਤਿ, ਮਜ੍ਝਟ੍ਠਾਨਂ ਮੁਟ੍ਠਿਰਤਨਂ ਹੋਤਿ. ਦੀਘਤੋ ਪਨ ਦਿਯਡ੍ਢਰਤਨਂ ਵਾ ਦ੍ਵਿਰਤਨਂ ਵਾਤਿ ਕੁਰੁਨ੍ਦਿਯਂ ਵੁਤ੍ਤਂ. ਅਯਂ ਸੀਸਪ੍ਪਮਾਣਸ੍ਸ ਉਕ੍ਕਟ੍ਠਪਰਿਚ੍ਛੇਦੋ, ਇਤੋ ਉਦ੍ਧਂ ਨ ਵਟ੍ਟਤਿ, ਹੇਟ੍ਠਾ ਪਨ ਵਟ੍ਟਤੀ’’ਤਿ (ਚੂਲ਼ਵ. ਅਟ੍ਠ. ੨੯੭).

੨੮੩੧. ਚੋਲ਼ਨ੍ਤਿ ਪਿਲੋਤਿਕਾ. ਪਣ੍ਣਨ੍ਤਿ ਰੁਕ੍ਖਲਤਾਨਂ ਪਣ੍ਣਂ. ਉਣ੍ਣਾਤਿ ਏਲ਼ਕਾਦੀਨਂ ਲੋਮਂ. ਤਿਣਨ੍ਤਿ ਦਬ੍ਬਤਿਣਾਦਿ ਯਂ ਕਿਞ੍ਚਿ ਤਿਣਂ. ਵਾਕਨ੍ਤਿ ਕਦਲਿਅਕ੍ਕਮਕਚਿਵਾਕਾਦਿਕਂ. ਏਤੇਹਿ ਪਞ੍ਚਹਿ ਪੂਰਿਤਾ ਭਿਸਿਯੋ ਤੂਲਾਨਂ ਗਣਨਾਵਸਾ ਹੇਤੁਗਬ੍ਭਾਨਂ ਏਤੇਸਂ ਪਞ੍ਚਨ੍ਨਂ ਗਬ੍ਭਾਨਂ ਗਣਨਾਵਸੇਨ ਪਞ੍ਚ ਭਾਸਿਤਾਤਿ ਯੋਜਨਾ.

੨੮੩੨. ਬਿਮ੍ਬੋਹਨਗਬ੍ਭਂ ਦਸ੍ਸੇਤੁਮਾਹ ‘‘ਭਿਸੀ’’ਤਿਆਦਿ. ਪਞ੍ਚੇਵਾਤਿ ਯਥਾਵੁਤ੍ਤਚੋਲ਼ਾਦਿਪਞ੍ਚੇਵ. ਤਥਾ ਤੂਲਾਨਿ ਤੀਣਿਪੀਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਤੀਣਿ ਤੂਲਾਨਿ ਰੁਕ੍ਖਤੂਲਂ ਲਤਾਤੂਲਂ ਪੋਟਕਿਤੂਲ’’ਨ੍ਤਿ (ਚੂਲ਼ਵ. ੨੯੭) ਅਨੁਞ੍ਞਾਤਾਨਿ ਤੀਣਿਪਿ ਤੂਲਾਨਿ. ਏਤ੍ਥ ਚ ਰੁਕ੍ਖਤੂਲਂ ਨਾਮ ਸਿਮ੍ਬਲਿਰੁਕ੍ਖਾਦੀਨਂ ਯੇਸਂ ਕੇਸਞ੍ਚਿ ਰੁਕ੍ਖਾਨਂ ਤੂਲਂ. ਲਤਾਤੂਲਂ ਨਾਮ ਖੀਰਵਲ੍ਲਿਆਦੀਨਂ ਯਾਸਂ ਕਾਸਞ੍ਚਿ ਵਲ੍ਲੀਨਂ ਤੂਲਂ. ਪੋਟਕਿਤੂਲਂ ਨਾਮ ਪੋਟਕਿਤਿਣਾਦੀਨਂ ਯੇਸਂ ਕੇਸਞ੍ਚਿ ਤਿਣਜਾਤਿਕਾਨਂ ਅਨ੍ਤਮਸੋ ਉਚ੍ਛੁਨਲ਼ਾਦੀਨਮ੍ਪਿ ਤੂਲਂ. ਲੋਮਾਨਿ ਮਿਗਪਕ੍ਖੀਨਨ੍ਤਿ ਸੀਹਾਦਿਚਤੁਪ੍ਪਦਾਨਂ, ਮੋਰਾਦਿਪਕ੍ਖੀਨਂ ਲੋਮਾਨਿ. ਇਮੇਤਿ ਭਿਸਿਗਬ੍ਭਾਦਯੋ ਇਮੇ ਦਸ ਬਿਮ੍ਬੋਹਨਸ੍ਸ ਗਬ੍ਭਾਤਿ ਸਮ੍ਬਨ੍ਧੋ.

੨੮੩੩. ਏਵਂ ਕਪ੍ਪਿਯਂ ਭਿਸਿਬਿਮ੍ਬੋਹਨਗਬ੍ਭਂ ਦਸ੍ਸੇਤ੍ਵਾ ਇਦਾਨਿ ਅਕਪ੍ਪਿਯਂ ਦਸ੍ਸੇਤੁਮਾਹ ‘‘ਮਨੁਸ੍ਸਲੋਮ’’ਨ੍ਤਿਆਦਿ. ਲੋਮੇਸੁ ਮਨੁਸ੍ਸਲੋਮਞ੍ਚ ਪੁਪ੍ਫੇਸੁ ਬਕੁਲਪਿਯਙ੍ਗੁਪੁਪ੍ਫਾਦਿਕਂ ਸਬ੍ਬਂ ਪੁਪ੍ਫਞ੍ਚ ਪਣ੍ਣੇਸੁ ਚ ਸੁਦ੍ਧਂ ਕੇਵਲਂ ਤਮਾਲਪਤ੍ਤਞ੍ਚ ਨ ਵਟ੍ਟਤੀਤਿ ਯੋਜਨਾ. ‘‘ਸੁਦ੍ਧ’’ਨ੍ਤਿ ਇਮਿਨਾ ਤਮਾਲਪਤ੍ਤਂ ਸੇਸਗਬ੍ਭੇਹਿ ਮਿਸ੍ਸਂ ਵਟ੍ਟਤੀਤਿ ਬ੍ਯਤਿਰੇਕਤੋ ਦੀਪੇਤਿ.

੨੮੩੪. ਮਸੂਰਕੇਤਿ ਚਮ੍ਮਛਵਿਭਿਸਿਬਿਮ੍ਬੋਹਨੇ.

੨੮੩੫. ‘‘ਸੁਦ੍ਧ’’ਨ੍ਤਿ ਇਮਿਨਾ ਬ੍ਯਤਿਰੇਕਤੋ ਦਸ੍ਸਿਤਮੇਵਤ੍ਥਂ ਸਰੂਪਤੋ ਵਿਭਾਵੇਤੁਮਾਹ ‘‘ਮਿਸ੍ਸ’’ਨ੍ਤਿਆਦਿ.

੨੮੩੬. ਤਿਰਚ੍ਛਾਨਗਤਸ੍ਸ ਵਾਤਿ ਅਨ੍ਤਮਸੋ ਗਣ੍ਡੁਪ੍ਪਾਦਸ੍ਸਾਪਿ. ਕਾਰੇਨ੍ਤਸ੍ਸਾਤਿ ਚਿਤ੍ਤਕਮ੍ਮਕਟ੍ਠਕਮ੍ਮਾਦਿਵਸੇਨ ਕਾਰਾਪੇਨ੍ਤਸ੍ਸ ਵਾ ਕਰੋਨ੍ਤਸ੍ਸ ਵਾ.

੨੮੩੭. ਜਾਤਕਨ੍ਤਿ ਅਪਣ੍ਣਕਜਾਤਕਾਦਿਜਾਤਕਞ੍ਚ. ਵਤ੍ਥੁਨ੍ਤਿ ਵਿਮਾਨਵਤ੍ਥੁਆਦਿਕਂ ਪਸਾਦਜਨਕਂ ਵਾ ਪੇਤਵਤ੍ਥੁਆਦਿਕਂ ਸਂਵੇਗਜਨਕਂ ਵਾ ਵਤ੍ਥੁਂ. ਵਾ-ਸਦ੍ਦੇਨ ਅਟ੍ਠਕਥਾਗਤਂ ਇਧ ਦਸ੍ਸਿਤਪਕਰਣਂ ਸਙ੍ਗਣ੍ਹਾਤਿ. ਪਰੇਹਿ ਵਾਤਿ ਏਤ੍ਥ ਵਾ-ਸਦ੍ਦੋ ਅਵਧਾਰਣੇ, ਤੇਨ ਪਰੇਹਿ ਕਾਰਾਪੇਤੁਮੇਵ ਵਟ੍ਟਤਿ, ਨ ਸਯਂ ਕਾਤੁਨ੍ਤਿ ਦੀਪੇਤਿ. ਸਯਂ ਕਾਤੁਮ੍ਪੀਤਿ ਏਤ੍ਥ ਅਪਿ-ਸਦ੍ਦੋ ਪਗੇਵ ਕਾਰਾਪੇਤੁਨ੍ਤਿ ਦੀਪੇਤਿ.

੨੮੩੮. ਯੋ ਪਨ ਭਿਕ੍ਖੁ ਦ੍ਵੀਹਿ ਵਸ੍ਸੇਹਿ ਵਾ ਏਕੇਨ ਵਾ ਵਸ੍ਸੇਨ ਯਸ੍ਸ ਭਿਕ੍ਖੁਨੋ ਵੁਡ੍ਢਤਰੋ ਵਾ ਹੋਤਿ ਦਹਰਤਰੋ ਵਾ, ਸੋ ਤੇਨ ਭਿਕ੍ਖੁਨਾ ਸਮਾਨਾਸਨਿਕੋ ਨਾਮ ਹੋਤੀਤਿ ਯੋਜਨਾ.

੨੮੩੯. ‘‘ਸਤ੍ਤਵਸ੍ਸੇਨ ਪਞ੍ਚਵਸ੍ਸੋ’’ਤਿ ਇਦਂ ਦ੍ਵੀਹਿ ਵਸ੍ਸੇਹਿ ਵੁਡ੍ਢਨਵਕਾਨਂ ਸਮਾਨਾਸਨਿਕਤ੍ਤੇ ਉਦਾਹਰਣਂ. ‘‘ਛ ਵਸ੍ਸੇਨ ਪਞ੍ਚਵਸ੍ਸੋ’’ਤਿ ਇਦਂ ਏਕਵਸ੍ਸੇਨ ਵੁਡ੍ਢਨਵਕਾਨਂ ਸਮਾਨਾਸਨਿਕਤ੍ਤੇ ਉਦਾਹਰਣਂ.

੨੮੪੦. ਯਂ ਤਿਣ੍ਣਂ ਨਿਸੀਦਿਤੁਂ ਪਹੋਤਿ, ਤਂ ਹੇਟ੍ਠਾ ਦੀਘਾਸਨਂ ਨਾਮਾਤਿ ਯੋਜਨਾ. ‘‘ਸਮਾਨਾਸਨਿਕਾ ਮਞ੍ਚੇ ਨਿਸੀਦਿਤ੍ਵਾ ਮਞ੍ਚਂ ਭਿਨ੍ਦਿਂਸੁ, ਪੀਠੇ ਨਿਸੀਦਿਤ੍ਵਾ ਪੀਠਂ ਭਿਨ੍ਦਿਂਸੂ’’ਤਿ (ਚੂਲ਼ਵ. ੩੨੦) ਆਰੋਪਿਤੇ ਵਤ੍ਥੁਮ੍ਹਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਦੁਵਗ੍ਗਸ੍ਸ ਮਞ੍ਚਂ ਦੁਵਗ੍ਗਸ੍ਸ ਪੀਠ’’ਨ੍ਤਿ (ਚੂਲ਼ਵ. ੩੨੦) ਅਨੁਞ੍ਞਾਤਤ੍ਤਾ ‘‘ਦ੍ਵੇ’’ਤਿ ਸਮਾਨਾਸਨਿਕੇ ਦ੍ਵੇ ਸਨ੍ਧਾਯ ਵੁਤ੍ਤਂ.

੨੮੪੧. ਉਭਤੋਬ੍ਯਞ੍ਜਨਂ, ਇਤ੍ਥਿਂ, ਪਣ੍ਡਕਂ ਠਪੇਤ੍ਵਾ ਸਬ੍ਬੇਹਿਪਿ ਗਹਟ੍ਠੇਹਿ, ਪਬ੍ਬਜਿਤੇਹਿ ਵਾ ਪੁਰਿਸੇਹਿ ਸਹ ਦੀਘਾਸਨੇ ਨਿਸੀਦਿਤੁਂ ਅਨੁਞ੍ਞਾਤਨ੍ਤਿ ਯੋਜਨਾ. ਪੋਤ੍ਥਕੇਸੁ ਪਨ ਕਤ੍ਥਚਿ ‘‘ਸਬ੍ਬੇਸ’’ਨ੍ਤਿ ਸਾਮਿਵਚਨਨ੍ਤੋ ਪਾਠੋ ਦਿਸ੍ਸਤਿ, ਤਤੋ ‘‘ਸਬ੍ਬੇਹਿਪੀ’’ਤਿ ਕਰਣਵਚਨਨ੍ਤੋਵ ਪਾਠੋ ਯੁਤ੍ਤਤਰੋ. ਕਰਣਵਚਨਪ੍ਪਸਙ੍ਗੇ ਵਾ ਸਾਮਿਵਚਨਨਿਦ੍ਦੇਸੋਤਿ ਵੇਦਿਤਬ੍ਬਂ. ਯਥਾਹ ‘‘ਯਂ ਤਿਣ੍ਣਂ ਪਹੋਤਿ, ਤਂ ਸਂਹਾਰਿਮਂ ਵਾ ਹੋਤੁ ਅਸਂਹਾਰਿਮਂ ਵਾ, ਤਥਾਰੂਪੇ ਅਪਿ ਫਲਕਖਣ੍ਡੇ ਅਨੁਪਸਮ੍ਪਨ੍ਨੇਨਾਪਿ ਸਦ੍ਧਿਂ ਨਿਸੀਦਿਤੁਂ ਵਟ੍ਟਤੀ’’ਤਿ (ਚੂਲ਼ਵ. ਅਟ੍ਠ. ੩੨੦).

੨੮੪੨. ਪੁਰਿਮਿਕੋਤਿ ਞਤ੍ਤਿਦੁਤਿਯਾਯ ਕਮ੍ਮਵਾਚਾਯ ਸਮ੍ਮਤੇਨ ‘‘ਨ ਛਨ੍ਦਾਗਤਿਂ ਗਚ੍ਛੇਯ੍ਯ…ਪੇ… ਗਹਿਤਾਗਹਿਤਞ੍ਚ ਜਾਨੇਯ੍ਯਾ’’ਤਿ (ਚੂਲ਼ਵ. ੩੧੭) ਵੁਤ੍ਤੇਹਿ ਪਞ੍ਚਹਿ ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਪੁਰਿਮਵਸ੍ਸੂਪਨਾਯਿਕਦਿਵਸੇ ‘‘ਅਨੁਜਾਨਾਮਿ, ਭਿਕ੍ਖਵੇ, ਪਠਮਂ ਭਿਕ੍ਖੂ ਗਣੇਤੁਂ, ਪਠਮਂ ਭਿਕ੍ਖੂ ਗਣੇਤ੍ਵਾ ਸੇਯ੍ਯਾ ਗਣੇਤੁਂ, ਸੇਯ੍ਯਾ ਗਣੇਤ੍ਵਾ ਸੇਯ੍ਯਗ੍ਗੇਨ ਗਾਹੇਤੁ’’ਨ੍ਤਿਆਦਿਨਾ (ਚੂਲ਼ਵ. ੩੧੮) ਨਯੇਨ ਅਨੁਞ੍ਞਾਤਨਿਯਾਮੇਨੇਵ ਸੇਨਾਸਨਗ੍ਗਾਹਾਪਨਂ ਪੁਰਿਮਿਕੋ ਨਾਮ ਸੇਨਾਸਨਗ੍ਗਾਹੋ. ਏਵਮੇਵ ਪਚ੍ਛਿਮਿਕਾਯ ਵਸ੍ਸੂਪਨਾਯਿਕਦਿਵਸੇ ਸੇਨਾਸਨਗ੍ਗਾਹਾਪਨਂ ਪਚ੍ਛਿਮਿਕੋ ਨਾਮ. ਏਵਮੇਵ ਮਹਾਪਵਾਰਣਾਦਿਵਸਸ੍ਸ ਅਨਨ੍ਤਰਦਿਵਸੇ ‘‘ਭਨ੍ਤੇ, ਅਨ੍ਤਰਾਮੁਤ੍ਤਕਂ ਸੇਨਾਸਨਂ ਗਣ੍ਹਥਾ’’ਤਿ ਵਤ੍ਵਾ ਵੁਡ੍ਢਪਟਿਪਾਟਿਯਾ ਸੇਨਾਸਨਗ੍ਗਾਹਾਪਨਂ ਅਨ੍ਤਰਾਮੁਤ੍ਤਕੋ ਨਾਮ. ਪਕਾਸਿਤੋ ‘‘ਅਪਰਜ੍ਜੁਗਤਾਯ ਆਸਾਲ਼੍ਹਿਯਾਪੁਰਿਮਿਕੋ ਗਾਹਾਪੇਤਬ੍ਬੋ, ਮਾਸਗਤਾਯ ਆਸਾਲ਼੍ਹਿਯਾ ਪਚ੍ਛਿਮਿਕੋ ਗਾਹੇਤਬ੍ਬੋ, ਅਪਰਜ੍ਜੁਗਤਾਯ ਪਵਾਰਣਾਯ ਆਯਤਿਂ ਵਸ੍ਸਾਵਾਸਤ੍ਥਾਯ ਅਨ੍ਤਰਾਮੁਤ੍ਤਕੋ ਗਾਹੇਤਬ੍ਬੋ’’ਤਿ (ਚੂਲ਼ਵ. ੩੧੮) ਵੁਤ੍ਤੋ.

੨੮੪੩. ਵੁਤ੍ਤਮੇਵਤ੍ਥਂ ਨਿਯਮੇਤ੍ਵਾ ਦਸ੍ਸੇਤੁਮਾਹ ‘‘ਪੁਬ੍ਬਾਰੁਣਾ’’ਤਿਆਦਿ. ਇਧ ਪਾਟਿਪਦਾ ਨਾਮ ਦ੍ਵੇ ਵਸ੍ਸੂਪਨਾਯਿਕਦਿਵਸਾ ਚੇਵ ਮਹਾਪਵਾਰਣਾਯ ਅਨਨ੍ਤਰਦਿਵਸੋ ਚ. ਇਮੇਸਂ ਤਿਣ੍ਣਂ ਪਾਟਿਪਦਦਿਵਸਾਨਂ ਅਰੁਣੋ ਪੁਬ੍ਬਾਰੁਣੋ ਨਾਮ. ਤੇ ਦਿਵਸੇ ਅਤਿਕ੍ਕਮ੍ਮ ਦੁਤਿਯਤਿਥਿਪਟਿਬਦ੍ਧੋ ਅਰੁਣੋ ਪੁਨਾਰੁਣੋ ਨਾਮ. ਇਦਨ੍ਤਿ ਉਭਯਾਰੁਣਾਨਨ੍ਤਰਂ. ਸੇਨਾਸਨਗਾਹਕਸ੍ਸਾਤਿ ਏਤ੍ਥ ਸਕਤ੍ਥੇ ਕ-ਪਚ੍ਚਯੋ, ਸੇਨਾਸਨਗ੍ਗਾਹਸ੍ਸਾਤਿ ਅਤ੍ਥੋ. ਯਥਾਹ – ‘‘ਇਦਞ੍ਹਿ ਸੇਨਾਸਨਗ੍ਗਾਹਸ੍ਸ ਖੇਤ੍ਤ’’ਨ੍ਤਿ. ਵਸ੍ਸੂਪਗਤੇ ਵਸ੍ਸੂਪਗਮੇ ਕਾਤਬ੍ਬੇ ਸਤਿ, ਸਾਧੇਤਬ੍ਬਪਯੋਜਨੇ ਭੁਮ੍ਮਂ. ਵਸ੍ਸੂਪਗਤੇਤਿ ਵਾ ਨਿਮਿਤ੍ਤਤ੍ਥੇ ਭੁਮ੍ਮਂ. ਪੁਰਿਮਿਕਾਯ, ਹਿ ਪਚ੍ਛਿਮਿਕਾਯ ਚ ਵਸ੍ਸੂਪਗਮਨਸ੍ਸ ਤਂ ਤਦਹੁ ਸੇਨਾਸਨਗ੍ਗਾਹੋ ਨਿਮਿਤ੍ਤਂ, ਅਨ੍ਤਰਾਮੁਤ੍ਤਕੋ ਪਨ ਆਗਮਿਨੋ ਵਸ੍ਸੂਪਗਮਨਸ੍ਸਾਤਿ ਏਵਂ ਤਿਵਿਧੋਪਿ ਸੇਨਾਸਨਗ੍ਗਾਹੋ ਵਸ੍ਸੂਪਗਮਨਸ੍ਸ ਨਿਮਿਤ੍ਤਂ ਹੋਤਿ.

੨੮੪੪. ਪਾਟਿਪਦਦਿਵਸਸ੍ਸ ਅਰੁਣੇ ਉਗ੍ਗਤੇਯੇਵ ਸੇਨਾਸਨੇ ਪਨ ਗਾਹਿਤੇ ਅਞ੍ਞੋ ਭਿਕ੍ਖੁ ਆਗਨ੍ਤ੍ਵਾ ਸਚੇ ਸੇਨਾਸਨਪਞ੍ਞਾਪਕਂ ਸੇਨਾਸਨਂ ਯਾਚਤਿ, ਸੋ ਭਿਕ੍ਖੁ ਸੇਨਾਸਨਪਞ੍ਞਾਪਕੇਨ ‘‘ਸੇਨਾਸਨਂ ਗਾਹਿਤ’’ਨ੍ਤਿ ਵਤ੍ਤਬ੍ਬੋਤਿ ਯੋਜਨਾ.

੨੮੪੫. ਵਸ੍ਸਾਵਾਸਸ੍ਸ ਇਦਂ ਵਸ੍ਸਾਵਾਸਿਕਂ, ਵਸ੍ਸਂਵੁਤ੍ਥਾਨਂ ਦਾਤਬ੍ਬਚੀਵਰਂ, ਗਾਥਾਬਨ੍ਧਵਸੇਨ ‘‘ਵਸ੍ਸਵਾਸਿਕ’’ਨ੍ਤਿ ਰਸ੍ਸਤ੍ਤਂ. ਸਙ੍ਘਿਕਂ ਅਪਲੋਕੇਤ੍ਵਾ ਗਹਿਤਂ ਵਸ੍ਸਾਵਾਸਿਕਂ ਚੀਵਰਂ ਸਚੇ ਤਤ੍ਰਜਂ ਤਤ੍ਰੁਪ੍ਪਾਦਂ ਹੋਤਿ, ਅਨ੍ਤੋਵਸ੍ਸੇ ਵਿਬ੍ਭਨ੍ਤੋਪਿ ਲਭਤੇਤਿ ਯੋਜਨਾ. ‘‘ਤਤ੍ਰਜਂ ਸਚੇ’’ਤਿ ਇਮਿਨਾ ਚਸ੍ਸ ਦਾਯਕਾਨਂ ਵਸ੍ਸਾਵਾਸਿਕਪਚ੍ਚਯਵਸੇਨ ਗਾਹਿਤਂ ਪਨ ਨ ਲਭਤੀਤਿ ਦੀਪੇਤਿ. ਯਥਾਹ – ‘‘ਪਚ੍ਚਯਵਸੇਨ ਗਾਹਿਤਂ ਪਨ ਨ ਲਭਤੀਤਿ ਵਦਨ੍ਤੀ’’ਤਿ (ਚੂਲ਼ਵ. ਅਟ੍ਠ. ੩੧੮).

੨੮੪੬-੮. ਸਚੇ ਵੁਤ੍ਥਵਸ੍ਸੋ ਯੋ ਭਿਕ੍ਖੁ ਆਵਾਸਿਕਹਤ੍ਥਤੋ ਕਿਞ੍ਚਿ ਤਿਚੀਵਰਾਦਿਕਂ ਕਪ੍ਪਿਯਭਣ੍ਡਂ ਅਤ੍ਤਨੋ ਗਹੇਤ੍ਵਾ ‘‘ਅਸੁਕਸ੍ਮਿਂ ਕੁਲੇ ਮਯ੍ਹਂ ਗਹਿਤਂ ਵਸ੍ਸਾਵਾਸਿਕਚੀਵਰਂ ਗਣ੍ਹ’’ ਇਤਿ ਏਵਂ ਵਤ੍ਵਾ ਤਸ੍ਸ ਆਵਾਸਿਕਸ੍ਸ ਦਤ੍ਵਾ ਦਿਸਂ ਗਚ੍ਛਤਿ ਪਕ੍ਕਮਤਿ, ਸੋ ਤਤ੍ਥ ਗਤਟ੍ਠਾਨੇ ਸਚੇ ਉਪ੍ਪਬ੍ਬਜਤਿ ਗਿਹੀ ਹੋਤਿ, ਤਸ੍ਸ ਦਿਸਂਗਤਸ੍ਸ ਸਮ੍ਪਤ੍ਤਂ ਤਂ ਵਸ੍ਸਾਵਾਸਿਕਂ ਤੇਨ ਤਥਾ ਦਿਨ੍ਨਮ੍ਪਿ ਆਵਾਸਿਕੋ ਭਿਕ੍ਖੁ ਗਹੇਤੁਂ ਨ ਲਭਤਿ, ਤਸ੍ਸ ਪਾਪਿਤਂ ਵਸ੍ਸਾਵਾਸਿਕਚੀਵਰਂ ਸਙ੍ਘਿਕਂਯੇਵ ਸਿਯਾਤਿ ਯੋਜਨਾ. ਯਥਾਹ – ‘‘ਇਧ, ਭਿਕ੍ਖਵੇ, ਵਸ੍ਸਂਵੁਤ੍ਥੋ ਭਿਕ੍ਖੁ ਵਿਬ੍ਭਮਤਿ, ਸਙ੍ਘਸ੍ਸੇਵੇਤ’’ਨ੍ਤਿ.

੨੮੪੯. ਤਸ੍ਮਿਂ ਕੁਲੇ ਦਾਯਕੇ ਮਨੁਸ੍ਸੇ ਸਮ੍ਮੁਖਾ ਚੇ ਪਟਿਚ੍ਛਾਪੇਤਿ, ਤਸ੍ਸ ਦਿਸਂਗਮਿਸ੍ਸ ਸਮ੍ਪਤ੍ਤਂ ਵਸ੍ਸਾਵਾਸਿਕਚੀਵਰਂ ਆਵਾਸਿਕੋ ਲਭਤੀਤਿ ਯੋਜਨਾ.

੨੮੫੦. ਤਤ੍ਥ ਆਰਾਮੋ ਨਾਮ ਪੁਪ੍ਫਾਰਾਮੋ ਵਾ ਫਲਾਰਾਮੋ ਵਾ. ਵਿਹਾਰੋ ਨਾਮ ਯਂ ਕਿਞ੍ਚਿ ਪਾਸਾਦਾਦਿਸੇਨਾਸਨਂ. ਵਤ੍ਥੂਨਿ ਦੁਵਿਧਸ੍ਸਪੀਤਿ ਆਰਾਮਵਤ੍ਥੁ, ਵਿਹਾਰਵਤ੍ਥੂਤਿ ਦੁਵਿਧਸ੍ਸ ਵਤ੍ਥੂਨਿ ਚ. ਆਰਾਮਵਤ੍ਥੁ ਨਾਮ ਤੇਸਂਯੇਵ ਆਰਾਮਾਨਂ ਅਤ੍ਥਾਯ ਪਰਿਚ੍ਛਿਨ੍ਦਿਤ੍ਵਾ ਠਪਿਤੋਕਾਸੋ, ਤੇਸੁ ਵਾ ਆਰਾਮੇਸੁ ਵਿਨਟ੍ਠੇਸੁ ਤੇਸਂ ਪੋਰਾਣਕਭੂਮਿਭਾਗੋ. ਵਿਹਾਰਵਤ੍ਥੁ ਨਾਮ ਤਸ੍ਸ ਪਤਿਟ੍ਠਾਨੋਕਾਸੋ. ਭਿਸਿ ਨਾਮ ਉਣ੍ਣਭਿਸਿਆਦੀਨਂ ਪਞ੍ਚਨ੍ਨਂ ਅਞ੍ਞਤਰਾ. ਬਿਮ੍ਬੋਹਨਂ ਨਾਮ ਵੁਤ੍ਤਪ੍ਪਕਾਰਾਨਂ ਬਿਮ੍ਬੋਹਨਾਨਂ ਅਞ੍ਞਤਰਂ. ਮਞ੍ਚਂ ਨਾਮ ਮਸਾਰਕੋ ਬੁਨ੍ਦਿਕਾਬਦ੍ਧੋ, ਕੁਲ਼ੀਰਪਾਦਕੋ, ਆਹਚ੍ਚਪਾਦਕੋਤਿ ਇਮੇਸਂ ਪੁਬ੍ਬੇ ਵੁਤ੍ਤਾਨਂ ਚਤੁਨ੍ਨਂ ਮਞ੍ਚਾਨਂ ਅਞ੍ਞਤਰਂ. ਪੀਠਂ ਨਾਮ ਮਸਾਰਕਾਦੀਨਂਯੇਵ ਚਤੁਨ੍ਨਂ ਪੀਠਾਨਂ ਅਞ੍ਞਤਰਂ.

੨੮੫੧. ਲੋਹਕੁਮ੍ਭੀ ਨਾਮ ਕਾਲ਼ਲੋਹੇਨ ਵਾ ਤਮ੍ਬਲੋਹੇਨ ਵਾ ਯੇਨ ਕੇਨਚਿ ਲੋਹੇਨ ਕਤਾ ਕੁਮ੍ਭੀ. ਕਟਾਹੋ ਪਾਕਟੋਵ. ‘‘ਭਾਣਕ’’ਨ੍ਤਿ ਅਲਞ੍ਜਰੋ ਵੁਚ੍ਚਤਿ. ਅਲਞ੍ਜਰੋਤਿ ਚ ਬਹੁਉਦਕਗਣ੍ਹਨਿਕਾ ਮਹਾਚਾਟਿ, ਜਲਂ ਗਣ੍ਹਿਤੁਂ ਅਲਨ੍ਤਿ ਅਲਞ੍ਜਰੋ. ‘‘ਵਟ੍ਟਚਾਟਿ ਵਿਯ ਹੁਤ੍ਵਾ ਥੋਕਂ ਦੀਘਮੁਖੋ ਮਜ੍ਝੇ ਪਰਿਚ੍ਛੇਦਂ ਦਸ੍ਸੇਤ੍ਵਾ ਕਤੋ’’ਤਿ ਗਣ੍ਠਿਪਦੇ ਵੁਤ੍ਤਂ. ਵਾਰਕੋਤਿ ਘਟੋ. ਕੁ ਵੁਚ੍ਚਤਿ ਪਥਵੀ, ਤਸ੍ਸਾ ਦਾਲਨਤੋ ਵਿਦਾਰਣਤੋ ‘‘ਕੁਦਾਲੋ’’ਤਿ ਅਯੋਮਯਉਪਕਰਣਵਿਸੇਸੋ ਵੁਚ੍ਚਤਿ.

੨੮੫੨. ਵਲ੍ਲਿਵੇਲ਼ੁਆਦੀਸੁ ਵੇਲ਼ੂਤਿ ਮਹਾਵੇਣੁ. ਤਿਣਨ੍ਤਿ ਗੇਹਚ੍ਛਾਦਨਂ ਤਿਣਂ. ਪਣ੍ਣਂ ਤਾਲਪਣ੍ਣਾਦਿਕਂ. ਮੁਞ੍ਜਨ੍ਤਿ ਮੁਞ੍ਜਤਿਣਂ. ਪਬ੍ਬਜਨ੍ਤਿ ਪਬ੍ਬਜਤਿਣਂ, ਮਤ੍ਤਿਕਾ ਪਕਤਿਮਤ੍ਤਿਕਾ ਵਾ ਗੇਰੁਕਾਦਿਪਞ੍ਚਵਣ੍ਣਾ ਵਾ ਮਤ੍ਤਿਕਾ. ਆਹ ਚ ਅਟ੍ਠਕਥਾਚਰਿਯੋ.

੨੮੫੩. ਦ੍ਵੇਤਿ ਪਠਮਦੁਤਿਯਗਰੁਭਣ੍ਡਾਨਿ. ਦ੍ਵੀਹਿ ਸਙ੍ਗਹਿਤਾਨਿ ‘‘ਆਰੋਮੋ, ਆਰਾਮਵਤ੍ਥੁ, ਇਦਂ ਪਠਮਂ. ਵਿਹਾਰੋ, ਵਿਹਾਰਵਤ੍ਥੁ, ਇਦਂ ਦੁਤਿਯ’’ਨ੍ਤਿ (ਚੂਲ਼ਵ. ੩੨੧-੩੨੨) ਵੁਤ੍ਤਤ੍ਤਾ. ਚਤੁਸਙ੍ਗਹਨ੍ਤਿ ਚਤੂਹਿ ਭਿਸਿਆਦੀਹਿ ਸਙ੍ਗਹੋ ਯਸ੍ਸਾਤਿ ਵਿਗ੍ਗਹੋ. ਨਵਕੋਟ੍ਠਾਸਨ੍ਤਿ ਲੋਹਕੁਮ੍ਭਿਆਦਯੋ ਨਵ ਕੋਟ੍ਠਾਸਾ ਅਸ੍ਸਾਤਿ ਵਿਗ੍ਗਹੋ. ਅਟ੍ਠਧਾ ਵਲ੍ਲਿਆਦੀਹਿ ਅਟ੍ਠਹਿ ਪਕਾਰੇਹਿ.

੨੮੫੪. ਇਤੀਤਿ ਨਿਦਸ੍ਸਨਤ੍ਥੇ. ਏਵਂ ਵੁਤ੍ਤਨਯੇਨ ਪਞ੍ਚਹਿ ਰਾਸੀਹਿ ਨਿਦ੍ਦਿਟ੍ਠਾਨਂ ਗਰੁਭਣ੍ਡਗਣਨਾਨਂ ਪਿਣ੍ਡਵਸੇਨ ਪਞ੍ਚਵੀਸਤਿਵਿਧਂ ਗਰੁਭਣ੍ਡਂ ਪਞ੍ਚਨਿਮ੍ਮਲਲੋਚਨੋ ਨਾਥੋ ਪਕਾਸਯੀਤਿ ਯੋਜਨਾ. ਪਞ੍ਚ ਨਿਮ੍ਮਲਾਨਿ ਲੋਚਨਾਨਿ ਯਸ੍ਸਾਤਿ ਵਿਗ੍ਗਹੋ, ਮਂਸਦਿਬ੍ਬਧਮ੍ਮਬੁਦ੍ਧਸਮਨ੍ਤਚਕ੍ਖੁਵਸੇਨ ਪਞ੍ਚਵਿਧਵਿਪ੍ਪਸਨ੍ਨਲੋਚਨੋਤਿ ਅਤ੍ਥੋ.

੨੮੫੫. ਵਿਸ੍ਸਜ੍ਜੇਨ੍ਤੋਤਿ ਇਸ੍ਸਰਵਤਾਯ ਪਰਸ੍ਸ ਵਿਸ੍ਸਜ੍ਜੇਨ੍ਤੋ. ਵਿਭਾਜੇਨ੍ਤੋਤਿ ਵਸ੍ਸਗ੍ਗੇਨ ਪਾਪੇਤ੍ਵਾ ਵਿਭਾਜੇਨ੍ਤੋ. ਇਦਞ੍ਹਿ ਸਬ੍ਬਮ੍ਪਿ ਗਰੁਭਣ੍ਡਂ ਸੇਨਾਸਨਕ੍ਖਨ੍ਧਕੇ (ਚੂਲ਼ਵ. ੩੨੧) ‘‘ਅਵਿਸ੍ਸਜ੍ਜਿਯਂ. ਕਿਟਾਗਿਰਿਵਤ੍ਥੁਮ੍ਹਿ (ਚੂਲ਼ਵ. ੩੨੨) ਅਵੇਭਙ੍ਗਿਯ’’ਨ੍ਤਿ ਚ ਵੁਤ੍ਤਂ. ਉਭਯਤ੍ਥ ਆਗਤਵੋਹਾਰਭੇਦਦਸ੍ਸਨਮੁਖੇਨ ਤਤ੍ਥ ਵਿਪ੍ਪਟਿਪਜ੍ਜਨ੍ਤਸ੍ਸ ਆਪਤ੍ਤਿਂ ਦਸ੍ਸੇਨ੍ਤੋ ਆਹ ‘‘ਭਿਕ੍ਖੁ ਥੁਲ੍ਲਚ੍ਚਯਂ ਫੁਸੇ’’ਤਿ. ਪਰਿਵਾਰੇ ਪਨ –

ਅਵਿਸ੍ਸਜ੍ਜਿਯਂ ਅਵੇਭਙ੍ਗਿਯਂ, ਪਞ੍ਚ ਵੁਤ੍ਤਾ ਮਹੇਸਿਨਾ;

ਵਿਸ੍ਸਜ੍ਜੇਨ੍ਤਸ੍ਸ ਪਰਿਭੁਞ੍ਜਨ੍ਤਸ੍ਸ ਅਨਾਪਤ੍ਤਿ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾਤਿ. (ਪਰਿ. ੪੭੯) –

ਆਗਤਂ. ਤਸ੍ਮਾ ਮੂਲਚ੍ਛੇਜ੍ਜਵਸੇਨ ਅਵਿਸ੍ਸਜ੍ਜਿਯਂ, ਅਵੇਭਙ੍ਗਿਯਞ੍ਚ, ਪਰਿਵਤ੍ਤਨਵਸੇਨ ਪਨ ਵਿਸ੍ਸਜ੍ਜੇਨ੍ਤਸ੍ਸ, ਪਰਿਭੁਞ੍ਜਨ੍ਤਸ੍ਸ ਚ ਅਨਾਪਤ੍ਤੀਤਿ ਏਵਮੇਤ੍ਥ ਅਧਿਪ੍ਪਾਯੋ.

੨੮੫੬. ਭਿਕ੍ਖੁਨਾ ਪੁਗ੍ਗਲੇਨ ਵਾ ਸਙ੍ਘੇਨ ਵਾ ਗਣੇਨ ਵਾ ਗਰੁਭਣ੍ਡਂ ਤੁ ਵਿਸ੍ਸਜ੍ਜਿਤਂ ਅਵਿਸ੍ਸਟ੍ਠਮੇਵ ਹੋਤਿ, ਵਿਭਤ੍ਤਞ੍ਚ ਅਵਿਭਾਜਿਤਮੇਵ ਹੋਤੀਤਿ ਯੋਜਨਾ.

੨੮੫੭. ਏਤ੍ਥ ਏਤੇਸੁ ਪਞ੍ਚਸੁ ਗਰੁਭਣ੍ਡੇਸੁ ਪੁਰਿਮੇਸੁ ਤੀਸੁ ਅਗਰੁਭਣ੍ਡਕਂ ਕਿਞ੍ਚਿ ਨ ਚ ਅਤ੍ਥੀਤਿ ਯੋਜਨਾ. ਚਤੁਤ੍ਥੇ ਪਨ ਗਰੁਭਣ੍ਡੇ ਅਟ੍ਠਕਥਾਯ ‘‘ਲੋਹਕੁਮ੍ਭੀ, ਲੋਹਭਾਣਕਂ, ਲੋਹਕਟਾਹਨ੍ਤਿ ਇਮਾਨਿ ਤੀਣਿ ਮਹਨ੍ਤਾਨਿ ਵਾ ਹੋਨ੍ਤੁ ਖੁਦ੍ਦਕਾਨਿ ਵਾ, ਅਨ੍ਤਮਸੋ ਪਸਤਮਤ੍ਤਉਦਕਗਣ੍ਹਨਕਾਨਿਪਿ ਗਰੁਭਣ੍ਡਾਨਿਯੇਵਾ’’ਤਿ ਵੁਤ੍ਤਨਯਂ ਦਸ੍ਸੇਤੁਮਾਹ ‘‘ਲੋਹਕੁਮ੍ਭੀ’’ਤਿਆਦਿ.

੨੮੫੮. ਇਦਂ ਤਿਵਿਧਨ੍ਤਿ ਸਮ੍ਬਨ੍ਧੋ. ਪਾਦਗਣ੍ਹਨਕੋਤਿ ਏਤ੍ਥ ਪਾਦੋ ਨਾਮ ਮਗਧਨਾਲ਼ਿਯਾ ਪਞ੍ਚਨਾਲ਼ਿਮਤ੍ਤਗਣ੍ਹਨਕੋ ਭਾਜਨਵਿਸੇਸੋ. ਭਾਜਨਾਨਂ ਪਮਾਣਂ ਕਰੋਨ੍ਤਾ ਸੀਹਲ਼ਦੀਪੇ ਯੇਭੁਯ੍ਯੇਨ ਤੇਨੇਵ ਪਾਦੇਨ ਮਿਨਨ੍ਤਿ. ਤਸ੍ਮਾ ਅਟ੍ਠਕਥਾਯਂ ‘‘ਸੀਹਲ਼ਦੀਪੇ ਪਾਦਗਣ੍ਹਨਕੋ ਭਾਜੇਤਬ੍ਬੋ’’ਤਿ (ਚੂਲ਼ਵ. ਅਟ੍ਠ. ੩੨੧) ਵੁਤ੍ਤਂ. ਲੋਹਵਾਰਕੋਤਿ ਕਾਲ਼ਲੋਹਤਮ੍ਬਲੋਹਵਟ੍ਟਲੋਹਕਂਸਲੋਹਾਨਂ ਯੇਨ ਕੇਨਚਿ ਕਤੋ. ਭਾਜਿਯੋਤਿ ਭਾਜੇਤਬ੍ਬੋ.

੨੮੫੯. ਤਤੋ ਉਦ੍ਧਨ੍ਤਿ ਤਤੋ ਪਾਦਗਣ੍ਹਨਕਵਾਰਕਤੋ ਉਦ੍ਧਂ ਅਧਿਕਂ ਗਣ੍ਹਨਕੋ. ਏਵਂ ਪਾਲ਼ਿਆਗਤਾਨਂ ਵਿਨਿਚ੍ਛਯਂ ਦਸ੍ਸੇਤ੍ਵਾ ਅਟ੍ਠਕਥਾਗਤਾਨਂ (ਚੂਲ਼ਵ. ਅਟ੍ਠ. ੩੨੧) ਦਸ੍ਸੇਤੁਮਾਹ ‘‘ਭਿਙ੍ਗਾਰਾਦੀਨੀ’’ਤਿਆਦਿ. ਭਿਙ੍ਗਾਰੋ ਨਾਮ ਉਕ੍ਖਿਤ੍ਤਹਤ੍ਥਿਸੋਣ੍ਡਾਕਾਰੇਨ ਕਤਜਲਨਿਗ੍ਗਮਕਣ੍ਣਿਕੋ ਉਚ੍ਚਗੀਵੋ ਮਹਾਮੁਖਉਦਕਭਾਜਨਵਿਸੇਸੋ. ਆਦਿ-ਸਦ੍ਦੇਨ ਅਟ੍ਠਕਥਾਗਤਾਨਿ ‘‘ਪਟਿਗ੍ਗਹਉਲ਼ੁਙ੍ਕਦਬ੍ਬਿਕਟਚ੍ਛੁਪਾਤਿਤਟ੍ਟਕਸਰਕਸਮੁਗ੍ਗਅਙ੍ਗਾਰਕਪਲ੍ਲਧੂਮਕਟਚ੍ਛੁਆਦੀਨਿ ਖੁਦ੍ਦਕਾਨਿ ਵਾ ਮਹਨ੍ਤਾਨਿ ਵਾ’’ਤਿ (ਚੂਲ਼ਵ. ਅਟ੍ਠ. ੩੨੧) ਵੁਤ੍ਤਾਨਿ ਸਙ੍ਗਣ੍ਹਾਤਿ. ਸਬ੍ਬਾਨੀਤਿ ਖੁਦ੍ਦਕਾਨਿ ਵਾ ਮਹਨ੍ਤਾਨਿ ਵਾ.

੨੮੬੦. ਤਮ੍ਬਥਾਲਕਾ ਅਯਥਾਲਕਾ ਭਾਜੇਤਬ੍ਬਾਤਿ ਯੋਜਨਾ. ਚ-ਸਦ੍ਦੇਨ ਅਟ੍ਠਕਥਾਯਂ ਵੁਤ੍ਤਂ ‘‘ਠਪੇਤ੍ਵਾ ਪਨ ਭਾਜਨਵਿਕਤਿਂ ਅਞ੍ਞਸ੍ਮਿਮ੍ਪਿ ਕਪ੍ਪਿਯਲੋਹਭਣ੍ਡੇ ਅਞ੍ਜਨੀ ਅਞ੍ਜਨਿਸਲਾਕਾ ਕਣ੍ਣਮਲਹਰਣੀ ਸੂਚਿ ਪਣ੍ਣਸੂਚਿ ਖੁਦ੍ਦਕੋ ਪਿਪ੍ਫਲਕੋ ਖੁਦ੍ਦਕਂ ਆਰਕਣ੍ਟਕਂ ਕੁਞ੍ਚਿਕਾ ਤਾਲ਼ਂ ਕਤ੍ਤਰਯਟ੍ਠਿਵੇਧਕੋ ਨਤ੍ਥੁਦਾਨਂ ਭਿਨ੍ਦਿਵਾਲੋ ਲੋਹਕੂਟੋ ਲੋਹਕੁਟ੍ਟਿ ਲੋਹਗੁਲ਼ੋ ਲੋਹਪਿਣ੍ਡਿ ਲੋਹਅਰਣੀ ਚਕ੍ਕਲਿਕਂ ਅਞ੍ਞਮ੍ਪਿ ਵਿਪ੍ਪਕਤਂ ਲੋਹਭਣ੍ਡਂ ਭਾਜਿਯ’’ਨ੍ਤਿ (ਚੂਲ਼ਵ. ਅਟ੍ਠ. ੩੨੧) ਵਚਨਂ ਸਙ੍ਗਣ੍ਹਾਤਿ. ਧੂਮਨੇਤ੍ਤਨ੍ਤਿ ਧੂਮਨਾਲ਼ਿਕਾ. ਆਦਿ-ਸਦ੍ਦੇਨ ‘‘ਫਾਲਦੀਪਰੁਕ੍ਖਦੀਪਕਪਲ੍ਲਕਓਲਮ੍ਬਕਦੀਪਕਇਤ੍ਥਿਪੁਰਿਸਤਿਰਚ੍ਛਾਨਗਤਰੂਪਕਾਨਿ ਪਨ ਅਞ੍ਞਾਨਿ ਵਾ ਭਿਤ੍ਤਿਚ੍ਛਦਨਕਵਾਟਾਦੀਸੁ ਉਪਨੇਤਬ੍ਬਾਨਿ ਅਨ੍ਤਮਸੋ ਲੋਹਖਿਲਕਂ ਉਪਾਦਾਯ ਸਬ੍ਬਾਨਿ ਲੋਹਭਣ੍ਡਾਨਿ ਗਰੁਭਣ੍ਡਾਨਿਯੇਵ ਹੋਨ੍ਤੀ’’ਤਿ (ਚੂਲ਼ਵ. ਅਟ੍ਠ. ੩੨੧) ਵੁਤ੍ਤਂ ਸਙ੍ਗਣ੍ਹਾਤਿ.

੨੮੬੧. ਅਤ੍ਤਨਾ ਪਟਿਲਦ੍ਧਨ੍ਤਿ ਏਤ੍ਥ ਪਿ-ਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ, ਅਤ੍ਤਨਾ ਪਟਿਲਦ੍ਧਮ੍ਪੀਤਿ ਅਤ੍ਥੋ. ਭਿਕ੍ਖੁਨਾ ਅਤ੍ਤਨਾ ਪਟਿਲਦ੍ਧਮ੍ਪਿ ਤਂ ਲੋਹਭਣ੍ਡਂ ਕਿਞ੍ਚਿਪਿ ਪੁਗ੍ਗਲਿਕਪਰਿਭੋਗੇਨ ਨ ਭੁਞ੍ਜਿਤਬ੍ਬਨ੍ਤਿ ਯੋਜਨਾ.

੨੮੬੨. ਕਂਸਵਟ੍ਟਲੋਹਾਨਂ ਵਿਕਾਰਭੂਤਾਨਿ ਤਮ੍ਬਮਯਭਾਜਨਾਨਿਪਿ ਪੁਗ੍ਗਲਿਕਪਰਿਭੋਗੇਨ ਸਬ੍ਬਸੋ ਪਰਿਭੁਞ੍ਜਿਤੁਂ ਨ ਵਟ੍ਟਨ੍ਤੀਤਿ ਯੋਜਨਾ.

੨੮੬੩. ਏਸੇਵ ਨਯੋਤਿ ‘‘ਨ ਪੁਗ੍ਗਲਿਕਭੋਗੇਨਾ’’ਤਿਆਦਿਨਾ ਦਸ੍ਸਿਤਨਯੋ. ਸਙ੍ਘਿਕੇਸੁ ਵਾ ਗਿਹੀਨਂ ਸਨ੍ਤਕੇਸੁ ਵਾ ਯਥਾਵੁਤ੍ਤਭਣ੍ਡੇਸੁ ਪਰਿਭੋਗਪਚ੍ਚਯਾ ਦੋਸੋ ਨ ਅਤ੍ਥੀਤਿ ਯੋਜਨਾ. ‘‘ਕਂਸਲੋਹਾਦਿਭਾਜਨਂ ਸਙ੍ਘਸ੍ਸ ਦਿਨ੍ਨਮ੍ਪਿ ਪਾਰਿਹਾਰਿਯਂ ਨ ਵਟ੍ਟਤਿ, ਗਿਹਿਵਿਕਤਨੀਹਾਰੇਨੇਵ ਪਰਿਭੁਞ੍ਜਿਤਬ੍ਬ’’ਨ੍ਤਿ (ਚੂਲ਼ਵ. ਅਟ੍ਠ. ੩੨੧) ਮਹਾਪਚ੍ਚਰਿਯਂ ਵੁਤ੍ਤਂ. ਏਤ੍ਥ ਚ ਪਾਰਿਹਾਰਿਯਂ ਨ ਵਟ੍ਟਤਿ ਅਤ੍ਤਨੋ ਸਨ੍ਤਕਂ ਵਿਯ ਗਹੇਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਤੀਤਿ. ‘‘ਗਿਹਿਵਿਕਤਨੀਹਾਰੇਨੇਵ ਪਰਿਭੁਞ੍ਜਿਤਬ੍ਬ’’ਨ੍ਤਿ ਇਮਿਨਾ ਸਚੇ ਆਰਾਮਿਕਾਦਯੋ ਪਟਿਸਾਮੇਤ੍ਵਾ ਪਟਿਦੇਨ੍ਤਿ, ਪਰਿਭੁਞ੍ਜਿਤੁਂ ਵਟ੍ਟਤੀਤਿ ਦਸ੍ਸੇਤਿ.

੨੮੬੪. ਖੀਰਪਾਸਾਣਨ੍ਤਿ ਮੁਦੁਕਾ ਪਾਣਜਾਤਿ. ਵੁਤ੍ਤਞ੍ਹਿ ਮਾਤਿਕਾਟ੍ਠਕਥਾਗਣ੍ਠਿਪਦੇ ‘‘ਖੀਰਪਾਸਾਣੋ ਨਾਮ ਮੁਦੁਕੋ ਪਾਸਾਣੋ’’ਤਿ. ਗਰੁਕਨ੍ਤਿ ਗਰੁਭਣ੍ਡਂ. ਤਟ੍ਟਕਾਦਿਕਨ੍ਤਿ ਆਦਿ-ਸਦ੍ਦੇਨ ਸਰਕਾਦੀਨਂ ਸਙ੍ਗਹੋ. ਘਟਕੋਤਿ ਖੀਰਪਾਸਾਣਮਯੋਯੇਵ ਵਾਰਕੋ. ‘‘ਪਾਦਗਣ੍ਹਨਤੋ ਉਦ੍ਧ’’ਨ੍ਤਿ ਇਮਿਨਾ ਪਾਦਗਣ੍ਹਨਕੋ ਅਗਰੁਭਣ੍ਡਨ੍ਤਿ ਦੀਪੇਤਿ.

੨੮੬੫. ‘‘ਸੁਵਣ੍ਣਰਜਤਹਾਰਕੂਟਜਾਤਿਫਲਿਕਭਾਜਨਾਨਿ ਗਿਹਿਵਿਕਤਾਨਿਪਿ ਨ ਵਟ੍ਟਨ੍ਤਿ, ਪਗੇਵ ਸਙ੍ਘਿਕਪਰਿਭੋਗੇਨ ਵਾ ਪੁਗ੍ਗਲਿਕਪਰਿਭੋਗੇਨ ਵਾ’’ਤਿ (ਚੂਲ਼ਵ. ਅਟ੍ਠ. ੩੨੧) ਅਟ੍ਠਕਥਾਯਂ ਵੁਤ੍ਤਨਯਂ ਦਸ੍ਸੇਤੁਮਾਹ ‘‘ਸਿਙ੍ਗੀ’’ਤਿਆਦਿ. ਸਿਙ੍ਗੀਤਿ ਸੁਵਣ੍ਣਂ. ਸਜ੍ਝੁ ਰਜਤਂ. ਹਾਰਕੂਟਂ ਨਾਮ ਸੁਵਣ੍ਣਵਣ੍ਣਂ ਲੋਹਜਾਤਂ. ਫਲਿਕੇਨ ਉਬ੍ਭਵਂ ਜਾਤਂ, ਫਲਿਕਮਯਂ ਭਾਜਨਨ੍ਤਿ ਅਤ੍ਥੋ. ਗਿਹੀਨਂ ਸਨ੍ਤਕਾਨਿਪੀਤਿ ਅਪਿ-ਸਦ੍ਦੇਨ ਗਿਹਿਵਿਕਤਪਰਿਭੋਗੇਨਾਪਿ ਤਾਵ ਨ ਵਟ੍ਟਨ੍ਤਿ, ਪਗੇਵ ਸਙ੍ਘਿਕਪਰਿਭੋਗੇਨ ਵਾ ਪੁਗ੍ਗਲਿਕਪਰਿਭੋਗੇਨ ਵਾਤਿ ਦੀਪੇਤਿ. ਸੇਨਾਸਨਪਰਿਭੋਗੇ ਪਨ ਆਮਾਸਮ੍ਪਿ ਅਨਾਮਾਸਮ੍ਪਿ ਸਬ੍ਬਂ ਵਟ੍ਟਤਿ.

੨੮੬੬. ਖੁਦ੍ਦਾਤਿ ਯਾਯ ਵਾਸਿਯਾ ਠਪੇਤ੍ਵਾ ਦਨ੍ਤਕਟ੍ਠਚ੍ਛੇਦਨਂ ਵਾ ਉਚ੍ਛੁਤਚ੍ਛਨਂ ਵਾ ਅਞ੍ਞਂ ਮਹਾਕਮ੍ਮਂ ਕਾਤੁਂ ਨ ਸਕ੍ਕਾ, ਏਵਰੂਪਾ ਖੁਦ੍ਦਕਾ ਵਾਸਿ ਭਾਜਨੀਯਾ. ਮਹਤ੍ਤਰੀਤਿ ਯਥਾਵੁਤ੍ਤਪ੍ਪਮਾਣਾਯ ਵਾਸਿਯਾ ਮਹਨ੍ਤਤਰਾ ਯੇਨ ਕੇਨਚਿ ਆਕਾਰੇਨ ਕਤਵਾਸਿ ਗਰੁਭਣ੍ਡਂ. ਵੇਜ੍ਜਾਨਂ ਸਿਰਾਵੇਧਨਕਮ੍ਪਿ ਚ ਫਰਸੁ ਤਥਾ ਗਰੁਭਣ੍ਡਨ੍ਤਿ ਯੋਜਨਾ.

੨੮੬੭. ਕੁਠਾਰੀਤਿ ਏਤ੍ਥ ਫਰਸੁਸਦਿਸੋਵ ਵਿਨਿਚ੍ਛਯੋ. ਯਾ ਪਨ ਆਵੁਧਸਙ੍ਖੇਪੇਨ ਕਤਾ, ਅਯਂ ਅਨਾਮਾਸਾ. ਕੁਦਾਲੋ ਅਨ੍ਤਮਸੋ ਚਤੁਰਙ੍ਗੁਲਮਤ੍ਤੋਪਿ. ਸਿਖਰਨ੍ਤਿ ਧਨੁਰਜ੍ਜੁਤੋ ਨਾਮੇਤ੍ਵਾ ਦਾਰੁਆਦੀਨਂ ਵਿਜ੍ਝਨਕਕਣ੍ਟਕੋ. ਤੇਨੇਵਾਤਿ ਨਿਖਾਦਨੇਨੇਵ.

੨੮੬੮. ਨਿਖਾਦਨਸ੍ਸ ਭੇਦਵਨ੍ਤਤਾਯ ਤਂ ਵਿਭਜਿਤ੍ਵਾ ਦਸ੍ਸੇਤੁਮਾਹ ‘‘ਚਤੁਰਸ੍ਸਮੁਖਂ ਦੋਣਿਮੁਖ’’ਨ੍ਤਿ. ਦੋਣਿਮੁਖਨ੍ਤਿ ਦੋਣਿ ਵਿਯ ਉਭਯਪਸ੍ਸੇਨ ਨਾਮਿਤਮੁਖਂ. ਵਙ੍ਕਨ੍ਤਿ ਅਗ੍ਗਤੋ ਨਾਮੇਤ੍ਵਾ ਕਤਨਿਖਾਦਨਂ. ਪਿ-ਸਦ੍ਦੇਨ ਉਜੁਕਂ ਸਙ੍ਗਣ੍ਹਾਤਿ. ਤਤ੍ਥ ਚਾਤਿ ਤਸ੍ਮਿਂ ਨਿਖਾਦਨੇ. ਸਦਣ੍ਡਂ ਖੁਦ੍ਦਕਞ੍ਚ ਨਿਖਾਦਨਂ ਸਬ੍ਬਂ ਗਰੁਭਣ੍ਡਨ੍ਤਿ ਯੋਜਨਾ. ‘‘ਸਦਣ੍ਡਂ ਖੁਦ੍ਦਕ’’ਨ੍ਤਿ ਇਮਿਨਾ ਵਿਸੇਸਨਦ੍ਵਯੇਨ ਅਦਣ੍ਡਂ ਫਲਮਤ੍ਤਂ ਸਿਪਾਟਿਕਾਯ ਠਪੇਤ੍ਵਾ ਪਰਿਹਰਣਯੋਗ੍ਗਂ ਸਮ੍ਮਜ੍ਜਨਿਦਣ੍ਡਵੇਧਨਕਂ ਨਿਖਾਦਨਂ ਅਗਰੁਭਣ੍ਡਂ, ਤਤੋ ਮਹਨ੍ਤਂ ਨਿਖਾਦਨਂ ਅਦਣ੍ਡਮ੍ਪਿ ਗਰੁਭਣ੍ਡਨ੍ਤਿ ਦੀਪੇਤਿ. ਯੇਹਿ ਮਨੁਸ੍ਸੇਹਿ ਵਿਹਾਰੇ ਵਾਸਿਆਦੀਨਿ ਦਿਨ੍ਨਾਨਿ ਚ ਹੋਨ੍ਤਿ, ਤੇ ਚੇ ਘਰੇ ਦਡ੍ਢੇ ਵਾ ਚੋਰੇਹਿ ਵਾ ਵਿਲੁਤ੍ਤੇ ‘‘ਦੇਥ ਨੋ, ਭਨ੍ਤੇ, ਉਪਕਰਣੇ ਪੁਨ ਪਾਕਤਿਕੇ ਕਰਿਸ੍ਸਾਮਾ’’ਤਿ ਵਦਨ੍ਤਿ, ਦਾਤਬ੍ਬਾ. ਸਚੇ ਆਹਰਨ੍ਤਿ, ਨ ਵਾਰੇਤਬ੍ਬਾ, ਅਨਾਹਰਨ੍ਤਾਪਿ ਨ ਚੋਦੇਤਬ੍ਬਾ.

੨੮੬੯. ‘‘ਕਮ੍ਮਾਰਤਟ੍ਟਕਾਰਚੁਨ੍ਦਕਾਰਨਲ਼ਕਾਰਮਣਿਕਾਰਪਤ੍ਤਬਨ੍ਧਕਾਨਂ ਅਧਿਕਰਣਿਮੁਟ੍ਠਿਕਸਣ੍ਡਾਸਤੁਲਾਦੀਨਿ ਸਬ੍ਬਾਨਿ ਲੋਹਮਯਉਪਕਰਣਾਨਿ ਸਙ੍ਘੇ ਦਿਨ੍ਨਕਾਲਤੋ ਪਟ੍ਠਾਯ ਗਰੁਭਣ੍ਡਾਨਿ. ਤਿਪੁਕੋਟ੍ਟਕਸੁਵਣ੍ਣਕਾਰਚਮ੍ਮਕਾਰਉਪਕਰਣੇਸੁਪਿ ਏਸੇਵ ਨਯੋ. ਅਯਂ ਪਨ ਵਿਸੇਸੋ – ਤਿਪੁਕੋਟ੍ਟਕਉਪਕਰਣੇਸੁਪਿ ਤਿਪੁਚ੍ਛੇਦਨਸਤ੍ਥਕਂ, ਸੁਵਣ੍ਣਕਾਰਉਪਕਰਣੇਸੁ ਸੁਵਣ੍ਣਚ੍ਛੇਦਨਸਤ੍ਥਕਂ, ਚਮ੍ਮਕਾਰਉਪਕਰਣੇਸੁ ਕਤਪਰਿਕਮ੍ਮਚਮ੍ਮਛਿਨ੍ਦਨਕਂ ਖੁਦ੍ਦਕਸਤ੍ਥਨ੍ਤਿ ਇਮਾਨਿ ਭਾਜਨੀਯਭਣ੍ਡਾਨੀ’’ਤਿ (ਚੂਲ਼ਵ. ਅਟ੍ਠ. ੩੨੧) ਅਟ੍ਠਕਥਾਗਤਂ ਵਿਨਿਚ੍ਛਯੇਕਦੇਸਂ ਦਸ੍ਸੇਤੁਮਾਹ ‘‘ਮੁਟ੍ਠਿਕ’’ਨ੍ਤਿਆਦਿ. ਤੁਲਾਦਿਕਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਕਤ੍ਤਰਿਆਦਿਉਪਕਰਣਂ ਸਙ੍ਗਣ੍ਹਾਤਿ.

੨੮੭੦. ‘‘ਨਹਾਪਿਤਤੁਨ੍ਨਕਾਰਾਨਂ ਉਪਕਰਣੇਸੁਪਿ ਠਪੇਤ੍ਵਾ ਮਹਾਕਤ੍ਤਰਿਂ, ਮਹਾਸਣ੍ਡਾਸਂ, ਮਹਾਪਿਪ੍ਫਲਕਞ੍ਚ ਸਬ੍ਬਂ ਭਾਜਨੀਯਂ. ਮਹਾਕਤ੍ਤਰਿਆਦੀਨਿ ਗਰੁਭਣ੍ਡਾਨੀ’’ਤਿ (ਚੂਲ਼ਵ. ਅਟ੍ਠ. ੩੨੧) ਅਟ੍ਠਕਥਾਗਤਂ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਨ੍ਹਾਪਿਤਕਸ੍ਸਾ’’ਤਿਆਦਿ. ਨ੍ਹਾਪਿਤਕਸ੍ਸ ਉਪਕਰਣੇਸੁ ਸਣ੍ਡਾਸੋ, ਮਹਤ੍ਤਰੀ ਕਤ੍ਤਰੀ ਚ ਤੁਨ੍ਨਕਾਰਾਨਞ੍ਚ ਉਪਕਰਣੇਸੁ ਮਹਤ੍ਤਰੀ ਕਤ੍ਤਰੀ ਚ ਮਹਾਪਿਪ੍ਫਲਕਞ੍ਚ ਗਰੁਭਣ੍ਡਕਨ੍ਤਿ ਯੋਜਨਾ.

੨੮੭੧. ਏਤ੍ਤਾਵਤਾ ਚਤੁਤ੍ਥਗਰੁਭਣ੍ਡੇ ਵਿਨਿਚ੍ਛਯਂ ਦਸ੍ਸੇਤ੍ਵਾ ਇਦਾਨਿ ਪਞ੍ਚਮਗਰੁਭਣ੍ਡੇ ਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਵਲ੍ਲੀ’’ਤਿਆਦਿ. ਵੇਤ੍ਤਲਤਾਦਿਕਾ ਵਲ੍ਲਿ ਦੁਲ੍ਲਭਟ੍ਠਾਨੇ ਸਙ੍ਘਸ੍ਸ ਦਿਨ੍ਨਾ ਵਾ ਤਤ੍ਥ ਸਙ੍ਘਸ੍ਸ ਭੂਮਿਯਂ ਜਾਤਾ, ਰਕ੍ਖਿਤਾ ਗੋਪਿਤਾ ਵਾ ਅਡ੍ਢਬਾਹੁਪ੍ਪਮਾਣਾ ਗਰੁਭਣ੍ਡਂ ਹੋਤੀਤਿ ਯੋਜਨਾ. ‘‘ਅਡ੍ਢਬਾਹੂਤਿ ਕਪ੍ਪਰਤੋ ਪਟ੍ਠਾਯ ਯਾਵ ਅਂਸਕੂਟ’’ਨ੍ਤਿ ਗਣ੍ਠਿਪਦੇ ਵੁਤ੍ਤਂ. ‘‘ਅਡ੍ਢਬਾਹੁ ਨਾਮ ਵਿਦਤ੍ਥਿਚਤੁਰਙ੍ਗੁਲ’’ਨ੍ਤਿਪਿ ਵਦਨ੍ਤਿ. ਸਚੇ ਸਾ ਵਲ੍ਲਿ ਸਙ੍ਘਕਮ੍ਮੇ, ਚੇਤਿਯਕਮ੍ਮੇ ਚ ਕਤੇ ਅਤਿਰੇਕਾ ਹੋਤਿ, ਪੁਗ੍ਗਲਿਕਕਮ੍ਮੇਪਿ ਉਪਨੇਤੁਂ ਵਟ੍ਟਤਿ. ਅਰਕ੍ਖਿਤਾ ਪਨ ਗਰੁਭਣ੍ਡਮੇਵ ਨ ਹੋਤਿ.

੨੮੭੨. ਅਟ੍ਠਕਥਾਯਂ ‘‘ਸੁਤ੍ਤਮਕਚਿਵਾਕਨਾਲ਼ਿਕੇਰਹੀਰਚਮ੍ਮਮਯਾ ਰਜ੍ਜੁਕਾ ਵਾ ਯੋਤ੍ਤਾਨਿ ਵਾ ਵਾਕੇ ਚ ਨਾਲ਼ਿਕੇਰਹੀਰੇ ਚ ਵਟ੍ਟੇਤ੍ਵਾ ਕਤਾ ਏਕਵਟ੍ਟਾ ਵਾ ਦ੍ਵਿਵਟ੍ਟਾ ਵਾ ਸਙ੍ਘਸ੍ਸ ਦਿਨ੍ਨਕਾਲਤੋ ਪਟ੍ਠਾਯ ਗਰੁਭਣ੍ਡਂ. ਸੁਤ੍ਤਂ ਪਨ ਅਵਟ੍ਟੇਤ੍ਵਾ ਦਿਨ੍ਨਂ, ਮਕਚਿਵਾਕਨਾਲ਼ਿਕੇਰਹੀਰਾ ਚ ਭਾਜਨੀਯਾ’’ਤਿ (ਚੂਲ਼ਵ. ਅਟ੍ਠ. ੩੨੧) ਆਗਤਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਸੁਤ੍ਤਵਾਕਾਦਿਨਿਬ੍ਬਤ੍ਤਾ’’ਤਿਆਦਿ. ਵਾਕਾਦੀਤਿ ਆਦਿ-ਸਦ੍ਦੇਨ ਮਕਚਿਵਾਕਨਾਲ਼ਿਕੇਰਹੀਰਚਮ੍ਮਾਨਂ ਗਹਣਂ. ਨਾਤਿਦੀਘਾ ਰਜ੍ਜੁਕਾ. ਅਤਿਦੀਘਂ ਯੋਤ੍ਤਕਂ.

੨੮੭੩. ਨਾਲ਼ਿਕੇਰਸ੍ਸ ਹੀਰੇ ਵਾ ਮਕਚਿਵਾਕੇ ਵਾ ਵਟ੍ਟੇਤ੍ਵਾ ਕਤਾ ਏਕਵਟ੍ਟਾਪਿ ਗਰੁਭਣ੍ਡਕਨ੍ਤਿ ਯੋਜਨਾ. ਯੇਹਿ ਪਨੇਤਾਨਿ ਰਜ੍ਜੁਕਯੋਤ੍ਤਾਦੀਨਿ ਦਿਨ੍ਨਾਨਿ ਹੋਨ੍ਤਿ, ਤੇ ਅਤ੍ਤਨੋ ਕਰਣੀਯੇਨ ਹਰਨ੍ਤਾ ਨ ਵਾਰੇਤਬ੍ਬਾ.

੨੮੭੪. ਵਡ੍ਢਕਿਅਙ੍ਗੁਲੇਨ ਅਟ੍ਠਙ੍ਗੁਲਾਯਤੋ ਸੂਚਿਦਣ੍ਡਮਤ੍ਤੋ ਪਰਿਣਾਹਤੋ ਸੀਹਲ਼ਦੀਪੇ ਲੇਖਕਾਨਂ ਲੇਖਨਿਸੂਚਿਦਣ੍ਡਮਤ੍ਤੋ ਸਙ੍ਘਸ੍ਸ ਦਿਨ੍ਨੋ ਵਾ ਤਤ੍ਥਜਾਤਕੋ ਵਾ ਰਕ੍ਖਿਤੋ ਗੋਪਿਤੋ ਵੇਲ਼ੁ ਗਰੁਭਣ੍ਡਂ ਸਿਯਾਤਿ ਯੋਜਨਾ. ‘‘ਯਂ ਮਜ੍ਝਿਮਪੁਰਿਸਸ੍ਸ ਕਨਿਟ੍ਠਙ੍ਗੁਲਿਯਾ ਅਗ੍ਗਪ੍ਪਮਾਣਂ, ਇਦਂ ਸੀਹਲ਼ਦੀਪੇ ਲੇਖਕਾਨਂ ਲੇਖਨਿਸੂਚਿਯਾ ਪਮਾਣ’’ਨ੍ਤਿ ਵਦਨ੍ਤਿ. ਸੋ ਚ ਸਙ੍ਘਕਮ੍ਮੇ ਚ ਚੇਤਿਯਕਮ੍ਮੇ ਚ ਕਤੇ ਅਤਿਰੇਕੋ ਪੁਗ੍ਗਲਿਕਕਮ੍ਮੇ ਦਾਤੁਂ ਵਟ੍ਟਤਿ.

੨੮੭੫. ਦਣ੍ਡੋ ਚ ਸਲਾਕਾ ਚ ਦਣ੍ਡਸਲਾਕਾ, ਛਤ੍ਤਸ੍ਸ ਦਣ੍ਡਸਲਾਕਾਤਿ ਵਿਗ੍ਗਹੋ. ਛਤ੍ਤਦਣ੍ਡੋ ਨਾਮ ਛਤ੍ਤਪਿਣ੍ਡਿ. ਛਤ੍ਤਸਲਾਕਾਤਿ ਛਤ੍ਤਪਞ੍ਜਰਸਲਾਕਾ. ਦਣ੍ਡੋਤਿ ਉਪਾਹਨਦਣ੍ਡਕੋ. ‘‘ਦਣ੍ਡੋ’’ਤਿ ਸਾਮਞ੍ਞੇਨ ਵੁਤ੍ਤੇਪਿ ਅਟ੍ਠਕਥਾਗਤੇਸੁ ਸਰੂਪੇਨ ਇਧਾਵੁਤ੍ਤੋ ਉਪਾਹਨਦਣ੍ਡੋਯੇਵ ਸਾਮਞ੍ਞਵਚਨੇਨ ਪਾਰਿਸੇਸਤੋ ਗਹੇਤਬ੍ਬੋਤਿ. ਦਡ੍ਢਗੇਹਮਨੁਸ੍ਸਾ ਗਣ੍ਹਿਤ੍ਵਾ ਗਚ੍ਛਨ੍ਤਾ ਨ ਵਾਰੇਤਬ੍ਬਾ.

੨੮੭੬. ਮੁਞ੍ਜਾਦੀਸੁ ਗੇਹਚ੍ਛਦਨਾਰਹੇਸੁ ਤਿਣੇਸੁ ਯਂ ਕਿਞ੍ਚਿ ਮੁਟ੍ਠਿਮਤ੍ਤਂ ਤਿਣਂ ਵਾ ਗੇਹਚ੍ਛਦਨਾਰਹਂ ਤਾਲਪਣ੍ਣਾਦਿ ਏਕਮ੍ਪਿ ਸਙ੍ਘਸ੍ਸ ਦਿਨ੍ਨਂ ਵਾ ਤਤ੍ਥ ਸਙ੍ਘਿਕਭੂਮਿਯਂ ਜਾਤਂ ਵਾ ਗਰੁਭਣ੍ਡਂ ਸਿਯਾਤਿ ਯੋਜੇਤਬ੍ਬਾ. ਤਤ੍ਥ ਮੁਟ੍ਠਿਮਤ੍ਤਂ ਨਾਮ ਕਰਲ਼ਮਤ੍ਤਂ. ਇਦਞ੍ਚ ਕਰਲ਼ਂ ਕਤ੍ਵਾ ਛਾਦੇਨ੍ਤਾਨਂ ਛਦਨਕਰਲ਼ਵਸੇਨ ਗਹੇਤਬ੍ਬਂ. ਤਾਲਪਣ੍ਣਾਦੀਤਿ ਆਦਿ-ਸਦ੍ਦੇਨ ਨਾਲ਼ਿਕੇਰਪਣ੍ਣਾਦਿਗੇਹਚ੍ਛਦਨਪਣ੍ਣਾਨਂ ਗਹਣਂ. ਤਮ੍ਪਿ ਮੁਞ੍ਜਾਦਿ ਸਙ੍ਘਕਮ੍ਮੇ ਚ ਚੇਤਿਯਕਮ੍ਮੇ ਚ ਕਤੇ ਅਤਿਰੇਕਂ ਪੁਗ੍ਗਲਿਕਕਮ੍ਮੇ ਦਾਤੁਂ ਵਟ੍ਟਤਿ. ਦਡ੍ਢਗੇਹਮਨੁਸ੍ਸਾ ਗਹੇਤ੍ਵਾ ਗਚ੍ਛਨ੍ਤਿ, ਨ ਵਾਰੇਤਬ੍ਬਾਤਿ.

੨੮੭੭-੮. ਅਟ੍ਠਙ੍ਗੁਲਪ੍ਪਮਾਣੋਤਿ ਦੀਘਤੋ ਅਟ੍ਠਙ੍ਗੁਲਮਤ੍ਤੋ. ਕੇਚਿ ‘‘ਪੁਥੁਲਤੋ’’ਤਿ ਵਦਨ੍ਤਿ. ਰਿਤ੍ਤਪੋਤ੍ਥਕੋਤਿ ਲੇਖਾਹਿ ਸੁਞ੍ਞਪੋਤ੍ਥਕੋ, ਨ ਲਿਖਿਤਪੋਤ੍ਥਕੋਤਿ ਵੁਤ੍ਤਂ ਹੋਤਿ. ‘‘ਅਟ੍ਠਙ੍ਗੁਲਪ੍ਪਮਾਣੋ’’ਤਿ ਇਮਿਨਾ ਅਟ੍ਠਙ੍ਗੁਲਤੋ ਊਨਪ੍ਪਮਾਣੋ ਭਾਜਿਯੋ, ‘‘ਰਿਤ੍ਤਪੋਤ੍ਥਕੋ’’ਤਿ ਇਮਿਨਾ ਅਟ੍ਠਙ੍ਗੁਲਤੋ ਅਤਿਰੇਕਪ੍ਪਮਾਣੋਪਿ ਲਿਖਿਤਪੋਤ੍ਥਕੋ ਭਾਜਿਯੋਤਿ ਦਸ੍ਸੇਤਿ.

‘‘ਮਤ੍ਤਿਕਾ ਪਕਤਿਮਤ੍ਤਿਕਾ ਵਾ ਹੋਤੁ ਪਞ੍ਚਵਣ੍ਣਾ ਵਾ ਸੁਧਾ ਵਾ ਸਜ੍ਜੁਰਸਕਙ੍ਗੁਟ੍ਠਸਿਲੇਸਾਦੀਸੁ ਵਾ ਯਂ ਕਿਞ੍ਚਿ ਦੁਲ੍ਲਭਟ੍ਠਾਨੇ ਆਨੇਤ੍ਵਾ ਵਾ ਦਿਨ੍ਨਂ ਤਤ੍ਥਜਾਤਕਂ ਵਾ ਰਕ੍ਖਿਤਗੋਪਿਤਂ ਤਾਲਫਲਪਕ੍ਕਮਤ੍ਤਂ ਗਰੁਭਣ੍ਡਂ ਹੋਤੀ’’ਤਿ (ਚੂਲ਼ਵ. ਅਟ੍ਠ. ੩੨੧) ਅਟ੍ਠਕਥਾਗਤਵਿਨਿਚ੍ਛਯਂ ਦਸ੍ਸੇਤੁਮਾਹ ‘‘ਮਤ੍ਤਿਕਾ’’ਤਿਆਦਿ. ਪਾਕਤਿਕਾ ਵਾ ਸੇਤਗੇਰੁਕਾਦਿਪਞ੍ਚਵਣ੍ਣਾ ਵਾਪਿ ਮਤ੍ਤਿਕਾਤਿ ਯੋਜਨਾ. ਸਿਲੇਸੋ ਨਾਮ ਕਬਿਟ੍ਠਾਦਿਸਿਲੇਸੋ. ਆਦਿ-ਸਦ੍ਦੇਨ ਸਜ੍ਜੁਰਸਕਙ੍ਗੁਟ੍ਠਾਦੀਨਂ ਗਹਣਂ. ਤਾਲਪਕ੍ਕਪਮਾਣਨ੍ਤਿ ਏਕਟ੍ਠਿਤਾਲਫਲਪਮਾਣਾਪਿ. ਤਮ੍ਪਿ ਮਤ੍ਤਿਕਾਦਿ ਸਙ੍ਘਕਮ੍ਮੇ, ਚੇਤਿਯਕਮ੍ਮੇ ਚ ਨਿਟ੍ਠਿਤੇ ਅਤਿਰੇਕਂ ਪੁਗ੍ਗਲਿਕਕਮ੍ਮੇ ਦਾਤੁਂ ਵਟ੍ਟਤਿ.

੨੮੭੯-੮੦. ‘‘ਵੇਲ਼ੁਆਦਿਕ’’ਨ੍ਤਿ ਪਦਚ੍ਛੇਦੋ. ਰਕ੍ਖਿਤਂ ਗੋਪਿਤਂ ਵਾਪਿ ਗਣ੍ਹਤਾ ਸਮਕਂ ਵਾ ਅਤਿਰੇਕਂ ਵਾ ਥਾਵਰਂ ਅਨ੍ਤਮਸੋ ਤਂਅਗ੍ਘਨਕਂ ਵਾਲਿਕਮੇਵ ਵਾ ਦਤ੍ਵਾ ਗਹੇਤਬ੍ਬਨ੍ਤਿ ਯੋਜਨਾ.

ਅਟ੍ਠਕਥਾਯਂ ਪਨ ‘‘ਰਕ੍ਖਿਤਗੋਪਿਤਂ ਵੇਲ਼ੁਂ ਗਣ੍ਹਨ੍ਤੇਨ ਸਮਕਂ ਵਾ ਅਤਿਰੇਕਂ ਵਾ ਥਾਵਰਂ ਅਨ੍ਤਮਸੋ ਤਂਅਗ੍ਘਨਕਵਾਲਿਕਾਯਪਿ ਫਾਤਿਕਮ੍ਮਂ ਕਤ੍ਵਾ ਗਹੇਤਬ੍ਬੋ. ਫਾਤਿਕਮ੍ਮਂ ਅਕਤ੍ਵਾ ਗਣ੍ਹਨ੍ਤੇਨ ਤਤ੍ਥੇਵ ਵਲ਼ਞ੍ਜੇਤਬ੍ਬੋ, ਗਮਨਕਾਲੇ ਸਙ੍ਘਿਕੇ ਆਵਾਸੇ ਠਪੇਤ੍ਵਾ ਗਨ੍ਤਬ੍ਬਂ. ਅਸਤਿਯਾ ਗਹੇਤ੍ਵਾ ਗਤੇਨ ਪਨ ਪਹਿਣਿਤ੍ਵਾ ਦਾਤਬ੍ਬੋ. ਦੇਸਨ੍ਤਰਗਤੇਨ ਸਮ੍ਪਤ੍ਤਵਿਹਾਰੇ ਸਙ੍ਘਿਕਾਵਾਸੇ ਠਪੇਤਬ੍ਬੋ’’ਤਿ (ਚੂਲ਼ਵ. ਅਟ੍ਠ. ੩੨੧) ਵੇਲ਼ੁਮ੍ਹਿਯੇਵ ਅਯਂ ਵਿਨਿਚ੍ਛਯੋ ਵੁਤ੍ਤੋ, ਇਧ ਪਨ ‘‘ਵਲ੍ਲਿਵੇਲ਼ਾਦਿਕਂ ਕਿਞ੍ਚੀ’’ਤਿ ਵਲ੍ਲਿਆਦੀਨਮ੍ਪਿ ਸਾਮਞ੍ਞੇਨ ਵੁਤ੍ਤਤ੍ਤਾ ਤਂ ਉਪਲਕ੍ਖਣਮਤ੍ਤਂ ਵਲ੍ਲਿਆਦੀਸੁਪਿ ਯਥਾਰਹਂ ਲਬ੍ਭਤੀਤਿ ਵੇਦਿਤਬ੍ਬਂ.

੨੮੮੧. ਅਞ੍ਜਨਨ੍ਤਿ ਸਿਲਾਮਯੋ. ਏਵਂ ਹਰਿਤਾਲਮਨੋਸਿਲਾਪਿ.

੨੮੮੨. ਦਾਰੁਭਣ੍ਡੇ ਅਯਂ ਵਿਨਿਚ੍ਛਯੋ – ਪਰਿਣਾਹਤੋ ਯਥਾਵੁਤ੍ਤ ਸੂਚਿਦਣ੍ਡਪ੍ਪਮਾਣਕੋ ਅਟ੍ਠਙ੍ਗੁਲਦੀਘੋ ਯੋ ਕੋਚਿ ਦਾਰੁਭਣ੍ਡਕੋ ਦਾਰੁਦੁਲ੍ਲਭਟ੍ਠਾਨੇ ਸਙ੍ਘਸ੍ਸ ਦਿਨ੍ਨੋ ਵਾ ਤਤ੍ਥਜਾਤਕੋ ਵਾ ਰਕ੍ਖਿਤਗੋਪਿਤੋ ਗਰੁਭਣ੍ਡਂ ਹੋਤੀਤਿ ਯੋਜਨਾ.

੨੮੮੩. ਏਵਂ ਕੁਰੁਨ੍ਦਟ੍ਠਕਥਾਯ ਆਗਤਵਿਨਿਚ੍ਛਯਂ ਦਸ੍ਸੇਤ੍ਵਾ ਮਹਾਅਟ੍ਠਕਥਾਯ (ਚੂਲ਼ਵ. ਅਟ੍ਠ. ੩੨੧) ਆਗਤਂ ਦਸ੍ਸੇਤੁਮਾਹ ‘‘ਮਹਾਅਟ੍ਠਕਥਾਯ’’ਨ੍ਤਿਆਦਿ. ਤਤ੍ਥ ਆਸਨ੍ਦਿਕਸਤ੍ਤਙ੍ਗਾ ਵੁਤ੍ਤਲਕ੍ਖਣਾਵ. ‘‘ਭਦ੍ਦਪੀਠ’’ਨ੍ਤਿ ਵੇਤ੍ਤਮਯਂ ਪੀਠਂ ਵੁਚ੍ਚਤਿ. ਪੀਠਿਕਾਤਿ ਪਿਲੋਤਿਕਾਬਦ੍ਧਪੀਠਮੇਵ.

੨੮੮੪. ਏਲ਼ਕਪਾਦਪੀਠਂ ਨਾਮ ਦਾਰੁਪਟ੍ਟਿਕਾਯ ਉਪਰਿ ਪਾਦੇ ਠਪੇਤ੍ਵਾ ਭੋਜਨਪਲ੍ਲਙ੍ਕਂ ਵਿਯ ਕਤਪੀਠਂ ਵੁਚ੍ਚਤਿ. ‘‘ਆਮਲਕਵਟ੍ਟਕਪੀਠ’’ਨ੍ਤਿ ਏਤਸ੍ਸ ‘‘ਆਮਣ੍ਡਕਵਟ੍ਟਕ’’ਨ੍ਤਿ ਪਰਿਯਾਯੋ, ਤਸ੍ਮਾ ਉਭਯੇਨਾਪਿ ਆਮਲਕਾਕਾਰੇਨ ਯੋਜਿਤਂ ਬਹੁਪਾਦਕਪੀਠਂ ਵੁਚ੍ਚਤਿ. ਕੇਸੁਚਿ ਪੋਤ੍ਥਕੇਸੁ ‘‘ਤਥਾਮਣ੍ਡਕਪੀਠਕ’’ਨ੍ਤਿ ਪਾਠੋ. ਗਾਥਾਬਨ੍ਧਵਸੇਨ ਮਣ੍ਡਕ-ਸਦ੍ਦਪਯੋਗੋ. ਕੋਚ੍ਛਂ ਭੂਤਗਾਮਵਗ੍ਗੇ ਚਤੁਤ੍ਥਸਿਕ੍ਖਾਪਦੇ ਵੁਤ੍ਤਸਰੂਪਂ. ਪਲਾਲਪੀਠਨ੍ਤਿ ਨਿਪਜ੍ਜਨਤ੍ਥਾਯ ਕਤਾ ਪਲਾਲਭਿਸਿ, ਇਮਿਨਾ ਕਦਲਿਪਤ੍ਤਾਦਿਮਯਪੀਠਮ੍ਪਿ ਉਪਲਕ੍ਖਣਤੋ ਦਸ੍ਸਿਤਂ. ਯਥਾਹ – ‘‘ਪਲਾਲਪੀਠੇਨ ਚੇਤ੍ਥ ਕਦਲਿਪਤ੍ਤਾਦਿਪੀਠਾਨਿਪਿ ਸਙ੍ਗਹਿਤਾਨੀ’’ਤਿ (ਚੂਲ਼ਵ. ਅਟ੍ਠ. ੩੨੧). ਧੋਵਨੇ ਫਲਕਨ੍ਤਿ ਚੀਵਰਧੋਵਨਫਲਕਂ, ਧੋਵਨਾਦਿਸਦ੍ਦਾਨਂ ਵਿਯੇਤ੍ਥ ਵਿਭਤ੍ਤਿਅਲੋਪੋ. ਇਮੇਸੁ ਤਾਵ ਯਂ ਕਿਞ੍ਚਿ ਖੁਦ੍ਦਕਂ ਵਾ ਹੋਤੁ ਮਹਨ੍ਤਂ ਵਾ, ਸਙ੍ਘਸ੍ਸ ਦਿਨ੍ਨਂ ਗਰੁਭਣ੍ਡਂ ਹੋਤਿ. ਬ੍ਯਗ੍ਘਚਮ੍ਮਓਨਦ੍ਧਮ੍ਪਿ ਵਾਲ਼ਰੂਪਪਰਿਕ੍ਖਿਤ੍ਤਂ ਰਤਨਪਰਿਸਿਬ੍ਬਿਤਂ ਕੋਚ੍ਛਂ ਗਰੁਭਣ੍ਡਮੇਵ.

੨੮੮੫. ਭਣ੍ਡਿਕਾਤਿ ਦਣ੍ਡਕਟ੍ਠਚ੍ਛੇਦਨਭਣ੍ਡਿਕਾ. ਮੁਗ੍ਗਰੋਤਿ ਦਣ੍ਡਮੁਗ੍ਗਰੋ. ਦਣ੍ਡਮੁਗ੍ਗਰੋ ਨਾਮ ਯੇਨ ਰਜਿਤਚੀਵਰਂ ਪੋਥੇਨ੍ਤਿ. ਵਤ੍ਥਘਟ੍ਟਨਮੁਗ੍ਗਰੋਤਿ ਚੀਵਰਘਟ੍ਟਨਮੁਗ੍ਗਰੋ, ਯੇਨ ਅਨੁਵਾਤਾਦਿਂ ਘਟ੍ਟੇਨ੍ਤਿ. ਅਮ੍ਬਣਨ੍ਤਿ ਫਲਕੇਹਿ ਪੋਕ੍ਖਰਣਿਸਦਿਸਂ ਕਤਪਾਨੀਯਭਾਜਨਂ. ਮਞ੍ਜੂਸਾ ਨਾਮ ਦੋਣਿਪੇਲ਼ਾ. ਨਾਵਾ ਪੋਤੋ. ਰਜਨਦੋਣਿਕਾ ਨਾਮ ਯਤ੍ਥ ਚੀਵਰਂ ਰਜਨ੍ਤਿ, ਪਕ੍ਕਰਜਨਂ ਵਾ ਆਕਿਰਨ੍ਤਿ.

੨੮੮੬. ਉਲ਼ੁਙ੍ਕੋਤਿ ਨਾਲ਼ਿਕੇਰਫਲਕਟਾਹਾਦਿਮਯੋ ਉਲ਼ੁਙ੍ਕੋ. ਉਭਯਂ ਪਿਧਾਨਸਮਕੋ ਸਮੁਗ੍ਗੋ. ‘‘ਖੁਦ੍ਦਕੋ ਪਰਿਵਿਧਨੋ ਕਰਣ੍ਡ’’ਨ੍ਤਿ ਵਦਨ੍ਤਿ. ਕਰਣ੍ਡੋ ਚ ਪਾਦਗਣ੍ਹਨਕਤੋ ਅਤਿਰੇਕਪ੍ਪਮਾਣੋ ਇਧ ਅਧਿਪ੍ਪੇਤੋ. ਕਟਚ੍ਛੂਤਿ ਦਬ੍ਬਿ. ਆਦਿ-ਸਦ੍ਦੇਨ ਪਾਨੀਯਸਰਾਵਪਾਨੀਯਸਙ੍ਖਾਦੀਨਂ ਗਹਣਂ.

੨੮੮੭. ਗੇਹਸਮ੍ਭਾਰਨ੍ਤਿ ਗੇਹੋਪਕਰਣਂ. ਥਮ੍ਭਤੁਲਾਸੋਪਾਨਫਲਕਾਦਿ ਦਾਰੁਮਯਂ, ਪਾਸਾਣਮਯਮ੍ਪਿ ਇਮਿਨਾਵ ਗਹਿਤਂ. ਕਪ੍ਪਿਯਚਮ੍ਮਨ੍ਤਿ ‘‘ਏਲ਼ਕਾਜਮਿਗਾਨ’’ਨ੍ਤਿਆਦਿਨਾ (ਵਿ. ਵਿ. ੨੬੫੦) ਹੇਟ੍ਠਾ ਦਸ੍ਸਿਤਂ ਕਪ੍ਪਿਯਚਮ੍ਮਂ. ਤਬ੍ਬਿਪਰਿਯਾਯਂ ਅਕਪ੍ਪਿਯਂ. ਅਭਾਜਿਯਂ ਗਰੁਭਣ੍ਡਤ੍ਤਾ. ਭੂਮਤ੍ਥਰਣਂ ਕਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ.

੨੮੮੮. ਅਟ੍ਠਕਥਾਯਂ ‘‘ਏਲ਼ਕਚਮ੍ਮਂ ਪਨ ਪਚ੍ਚਤ੍ਥਰਣਗਤਿਕਮੇਵ ਹੋਤਿ, ਤਮ੍ਪਿ ਗਰੁਭਣ੍ਡਮੇਵਾ’’ਤਿ (ਚੂਲ਼ਵ. ਅਟ੍ਠ. ੩੨੧) ਵੁਤ੍ਤਤ੍ਤਾ ਆਹ ‘‘ਏਲ਼ਚਮ੍ਮਂ ਗਰੁਂ ਵੁਤ੍ਤ’’ਨ੍ਤਿ. ਕੁਰੁਨ੍ਦਿਯਂ ਪਨ ‘‘ਸਬ੍ਬਂ ਮਞ੍ਚਪ੍ਪਮਾਣਂ ਚਮ੍ਮਂ ਗਰੁਭਣ੍ਡ’’ਨ੍ਤਿ (ਚੂਲ਼ਵ. ਅਟ੍ਠ. ੩੨੧) ਵੁਤ੍ਤਂ. ਏਤ੍ਥ ਚ ‘‘ਪਚ੍ਚਤ੍ਥਰਣਗਤਿਕਮੇਵਾ’’ਤਿ ਇਮਿਨਾ ਮਞ੍ਚਪੀਠੇਪਿ ਅਤ੍ਥਰਿਤੁਂ ਵਟ੍ਟਤੀਤਿ ਦੀਪੇਤਿ. ‘‘ਪਾਵਾਰਾਦਿਪਚ੍ਚਤ੍ਥਰਣਮ੍ਪਿ ਗਰੁਭਣ੍ਡ’’ਨ੍ਤਿ ਏਕੇ, ‘‘ਨੋ’’ਤਿ ਅਪਰੇ, ਵੀਮਂਸਿਤ੍ਵਾ ਗਹੇਤਬ੍ਬਂ. ਮਞ੍ਚਪ੍ਪਮਾਣਨ੍ਤਿ ਚ ਪਮਾਣਯੁਤ੍ਤਂ ਮਞ੍ਚਂ. ਪਮਾਣਯੁਤ੍ਤਮਞ੍ਚੋ ਨਾਮ ਯਸ੍ਸ ਦੀਘਸੋ ਨਵ ਵਿਦਤ੍ਥਿਯੋ ਤਿਰਿਯਞ੍ਚ ਤਦੁਪਡ੍ਢਂ. ਉਦ੍ਧਂ ਮੁਖਮਸ੍ਸਾਤਿ ਉਦੁਕ੍ਖਲਂ. ਆਦਿ-ਸਦ੍ਦੇਨ ਮੁਸਲਂ, ਸੁਪ੍ਪਂ, ਨਿਸਦਂ, ਨਿਸਦਪੋਤੋ, ਪਾਸਾਣਦੋਣਿ, ਪਾਸਾਣਕਟਾਹਞ੍ਚ ਸਙ੍ਗਹਿਤਂ. ਪੇਸਕਾਰਾਦੀਤਿ ਆਦਿ-ਸਦ੍ਦੇਨ ਚਮ੍ਮਕਾਰਾਦੀਨਂ ਗਹਣਂ. ਤੁਰਿਵੇਮਾਦਿ ਪੇਸਕਾਰਭਣ੍ਡਞ੍ਚ ਭਸ੍ਤਾਦਿ ਚਮ੍ਮਕਾਰਭਣ੍ਡਞ੍ਚ ਕਸਿਭਣ੍ਡਞ੍ਚ ਯੁਗਨਙ੍ਗਲਾਦਿ ਸਙ੍ਘਿਕਂ ਸਙ੍ਘਸਨ੍ਤਕਂ ਗਰੁਭਣ੍ਡਨ੍ਤਿ ਯੋਜਨਾ.

੨੮੮੯. ‘‘ਤਥੇਵਾ’’ਤਿ ਇਮਿਨਾ ‘‘ਸਙ੍ਘਿਕ’’ਨ੍ਤਿ ਇਦਂ ਪਚ੍ਚਾਮਸਤਿ. ਆਧਾਰਕੋਤਿ ਪਤ੍ਤਾਧਾਰੋ. ਤਾਲਵਣ੍ਟਨ੍ਤਿ ਤਾਲਵਣ੍ਟੇਹਿ ਕਤਂ. ਵੇਲ਼ੁਦਨ੍ਤਵਿਲੀਵੇਹਿ ਵਾ ਮੋਰਪਿਞ੍ਛੇਹਿ ਵਾ ਚਮ੍ਮਵਿਕਤੀਹਿ ਵਾ ਕਤਮ੍ਪਿ ਤਂਸਦਿਸਂ ‘‘ਤਾਲਵਣ੍ਟ’’ਨ੍ਤੇਵ ਵੁਚ੍ਚਤਿ. ਵਟ੍ਟਵਿਧੂਪਨਾਨਂ ਤਾਲਵਣ੍ਟੇਯੇਵ ਅਨ੍ਤੋਗਧਤ੍ਤਾ ‘‘ਬੀਜਨੀ’’ਤਿ ਚਤੁਰਸ੍ਸਵਿਧੂਪਨਞ੍ਚ ਕੇਤਕਪਾਰੋਹਕੁਨ੍ਤਾਲਪਣ੍ਣਾਦਿਮਯਦਨ੍ਤਮਯਵਿਸਾਣਮਯਦਣ੍ਡਕਮਕਸਬੀਜਨੀ ਚ ਵੁਚ੍ਚਤਿ. ਪਚ੍ਛਿ ਪਾਕਟਾਯੇਵ. ਪਚ੍ਛਿਤੋ ਖੁਦ੍ਦਕੋ ਤਾਲਪਣ੍ਣਾਦਿਮਯੋ ਭਾਜਨਵਿਸੇਸੋ ਚਙ੍ਕੋਟਕਂ. ਸਬ੍ਬਾ ਸਮ੍ਮਜ੍ਜਨੀਤਿ ਨਾਲ਼ਿਕੇਰਹੀਰਾਦੀਹਿ ਬਦ੍ਧਾ ਯਟ੍ਠਿਸਮ੍ਮਜ੍ਜਨੀ, ਮੁਟ੍ਠਿਸਮ੍ਮਜ੍ਜਨੀਤਿ ਦੁਵਿਧਾ ਪਰਿਵੇਣਙ੍ਗਣਾਦਿਸਮ੍ਮਜ੍ਜਨੀ ਚ ਤਥੇਵ ਦੁਵਿਧਾ ਖਜ੍ਜੂਰਿਨਾਲ਼ਿਕੇਰਪਣ੍ਣਾਦੀਹਿ ਬਦ੍ਧਾ ਗੇਹਸਮ੍ਮਜ੍ਜਨੀ ਚਾਤਿ ਸਬ੍ਬਾਪਿ ਸਮ੍ਮਜ੍ਜਨੀ ਗਰੁਭਣ੍ਡਂ ਹੋਤਿ.

੨੮੯੦. ਚਕ੍ਕਯੁਤ੍ਤਕਯਾਨਨ੍ਤਿ ਹਤ੍ਥਵਟ੍ਟਕਸਕਟਾਦਿਯੁਤ੍ਤਯਾਨਞ੍ਚ.

੨੮੯੧. ਛਤ੍ਤਨ੍ਤਿ ਪਣ੍ਣਕਿਲਞ੍ਜਸੇਤਚ੍ਛਤ੍ਤਵਸੇਨ ਤਿਵਿਧਂ ਛਤ੍ਤਂ. ਮੁਟ੍ਠਿਪਣ੍ਣਨ੍ਤਿ ਤਾਲਪਣ੍ਣਂ ਸਨ੍ਧਾਯ ਵੁਤ੍ਤਂ. ਵਿਸਾਣਭਾਜਨਞ੍ਚ ਤੁਮ੍ਬਭਾਜਨਞ੍ਚਾਤਿ ਵਿਗ੍ਗਹੋ, ਏਕਦੇਸਸਰੂਪੇਕਸੇਸੋ, ਗਾਥਾਬਨ੍ਧਵਸੇਨ ਨਿਗ੍ਗਹਿਤਾਗਮੋ ਚ. ਵਿਸਾਣਮਯਂ, ਭਾਜਨਂ ਤੁਮ੍ਬਮਯਂ ਭਾਜਨਞ੍ਚਾਤਿ ਅਤ੍ਥੋ. ਇਧ ‘‘ਪਾਦਗਣ੍ਹਨਕਤੋ ਅਤਿਰਿਤ੍ਤਪ੍ਪਮਾਣ’’ਨ੍ਤਿ ਸੇਸੋ. ਅਰਣੀ ਅਰਣਿਸਹਿਤਂ. ਆਦਿ-ਸਦ੍ਦੇਨ ਆਮਲਕਤੁਮ੍ਬਂ ਅਨੁਞ੍ਞਾਤਵਾਸਿਯਾ ਦਣ੍ਡਞ੍ਚ ਸਙ੍ਗਣ੍ਹਾਤਿ. ਲਹੁ ਅਗਰੁਭਣ੍ਡਂ, ਭਾਜਨੀਯਨ੍ਤਿ ਅਤ੍ਥੋ. ਪਾਦਗਣ੍ਹਨਕਤੋ ਅਤਿਰਿਤ੍ਤਪ੍ਪਮਾਣਂ ਗਰੁਭਣ੍ਡਂ.

੨੮੯੨. ਵਿਸਾਣਨ੍ਤਿ ਗੋਵਿਸਾਣਾਦਿ ਯਂ ਕਿਞ੍ਚਿ ਵਿਸਾਣਂ. ਅਤਚ੍ਛਿਤਂ ਯਥਾਗਤਮੇਵ ਭਾਜਨੀਯਂ. ਅਨਿਟ੍ਠਿਤਂ ਮਞ੍ਚਪਾਦਾਦਿ ਯਂ ਕਿਞ੍ਚਿ ਭਾਜਨੀਯਨ੍ਤਿ ਯੋਜਨਾ. ਯਥਾਹ – ‘‘ਮਞ੍ਚਪਾਦੋ ਮਞ੍ਚਅਟਨੀ ਪੀਠਪਾਦੋ ਪੀਠਅਟਨੀ ਵਾਸਿਫਰਸੁਆਦੀਨਂ ਦਣ੍ਡੋਤਿ ਏਤੇਸੁ ਯਂ ਕਿਞ੍ਚਿ ਵਿਪ੍ਪਕਤਤਚ੍ਛਨਕਮ੍ਮਂ ਅਨਿਟ੍ਠਿਤਮੇਵ ਭਾਜਨੀਯਂ, ਤਚ੍ਛਿਤਮਟ੍ਠਂ ਪਨ ਗਰੁਭਣ੍ਡਂ ਹੋਤੀ’’ਤਿ (ਚੂਲ਼ਵ. ਅਟ੍ਠ. ੩੨੧).

੨੮੯੩. ਨਿਟ੍ਠਿਤੋ ਤਚ੍ਛਿਤੋ ਵਾਪੀਤਿ ਤਚ੍ਛਿਤਨਿਟ੍ਠਿਤੋਪਿ. ਵਿਧੋਤਿ ਕਾਯਬਨ੍ਧਨੇ ਅਨੁਞ੍ਞਾਤਵਿਧੋ. ਹਿਙ੍ਗੁਕਰਣ੍ਡਕੋਤਿ ਹਿਙ੍ਗੁਮਯੋ ਵਾ ਤਦਾਧਾਰੋ ਵਾ ਕਰਣ੍ਡਕੋ. ਅਞ੍ਜਨੀਤਿ ਅਞ੍ਜਨਨਾਲ਼ਿਕਾ ਚ ਅਞ੍ਜਨਕਰਣ੍ਡਕੋ ਚ. ਸਲਾਕਾਯੋਤਿ ਅਞ੍ਜਨਿਸਲਾਕਾ. ਉਦਪੁਞ੍ਛਨੀਤਿ ਹਤ੍ਥਿਦਨ੍ਤਵਿਸਾਣਾਦਿਮਯਾ ਉਦਕਪੁਞ੍ਛਨੀ. ਇਦਂ ਸਬ੍ਬਂ ਭਾਜਨੀਯਮੇਵ.

੨੮੯੪. ਪਰਿਭੋਗਾਰਹਨ੍ਤਿ ਮਨੁਸ੍ਸਾਨਂ ਉਪਭੋਗਪਰਿਭੋਗਯੋਗ੍ਗਂ. ਕੁਲਾਲਭਣ੍ਡਨ੍ਤਿ ਘਟਪਿਠਰਾਦਿਕੁਮ੍ਭਕਾਰਭਣ੍ਡਮ੍ਪਿ. ਪਤ੍ਤਙ੍ਗਾਰਕਟਾਹਨ੍ਤਿ ਪਤ੍ਤਕਟਾਹਂ, ਅਙ੍ਗਾਰਕਟਾਹਞ੍ਚ. ਧੂਮਦਾਨਂ ਨਾਲ਼ਿਕਾ. ਕਪਲ੍ਲਿਕਾਤਿ ਦੀਪਕਪਲ੍ਲਿਕਾ.

੨੮੯੫. ਥੁਪਿਕਾਤਿ ਪਾਸਾਦਾਦਿਥੁਪਿਕਾ. ਦੀਪਰੁਕ੍ਖੋਤਿ ਪਦੀਪਾਧਾਰੋ. ਚਯਨਚ੍ਛਦਨਿਟ੍ਠਕਾਤਿ ਪਾਕਾਰਚੇਤਿਯਾਦੀਨਂ ਚਯਨਿਟ੍ਠਕਾ ਚ ਗੇਹਾਦੀਨਂ ਛਦਨਿਟ੍ਠਕਾ ਚ. ਸਬ੍ਬਮ੍ਪੀਤਿ ਯਥਾਵੁਤ੍ਤਂ ਸਬ੍ਬਮ੍ਪਿ ਅਨਵਸੇਸਂ ਪਰਿਕ੍ਖਾਰਂ.

੨੮੯੬. ਕਞ੍ਚਨਕੋਤਿ ਸਰਕੋ. ਘਟਕੋਤਿ ਪਾਦਗਣ੍ਹਨਕਤੋ ਅਨਤਿਰਿਤ੍ਤਪ੍ਪਮਾਣੋ ਘਟਕੋ. ‘‘ਯਥਾ ਚ ਮਤ੍ਤਿਕਾਭਣ੍ਡੇ, ਏਵਂ ਲੋਹਭਣ੍ਡੇਪਿ ਕੁਣ੍ਡਿਕਾ ਭਾਜਨੀਯਕੋਟ੍ਠਾਸਮੇਵ ਭਜਤੀ’’ਤਿ (ਚੂਲ਼ਵ. ਅਟ੍ਠ. ੩੨੧) ਅਟ੍ਠਕਥਾਨਯਂ ਸਙ੍ਗਹੇਤੁਮਾਹ ‘‘ਲੋਹਭਣ੍ਡੇਪਿ ਕੁਣ੍ਡਿਕਾਪਿ ਚ ਭਾਜਿਯਾ’’ਤਿ.

੨੮੯੭. ਗਰੁ ਨਾਮ ਪਚ੍ਛਿਮਂ ਗਰੁਭਣ੍ਡਤ੍ਤਯਂ. ਥਾਵਰਂ ਨਾਮ ਪੁਰਿਮਦ੍ਵਯਂ. ਸਙ੍ਘਸ੍ਸਾਤਿ ਸਙ੍ਘੇਨ. ਪਰਿਵਤ੍ਤੇਤ੍ਵਾਤਿ ਪੁਗ੍ਗਲਿਕਾਦੀਹਿ ਤਾਦਿਸੇਹਿ ਤੇਹਿ ਪਰਿਵਤ੍ਤੇਤ੍ਵਾ. ਤਤ੍ਰਾਯਂ ਪਰਿਵਤ੍ਤਨਨਯੋ (ਚੂਲ਼ਵ. ਅਟ੍ਠ. ੩੨੧) – ਸਙ੍ਘਸ੍ਸ ਨਾਲ਼ਿਕੇਰਾਰਾਮੋ ਦੂਰੇ ਹੋਤਿ, ਕਪ੍ਪਿਯਕਾਰਕਾ ਤਂ ਬਹੁਤਰਂ ਖਾਦਨ੍ਤਿ, ਤਤੋ ਸਕਟਵੇਤਨਂ ਦਤ੍ਵਾ ਅਪ੍ਪਮੇਵ ਆਹਰਨ੍ਤਿ, ਅਞ੍ਞੇਸਂ ਪਨ ਤਸ੍ਸ ਆਰਾਮਸ੍ਸ ਅਵਿਦੂਰਗਾਮਵਾਸੀਨਂ ਮਨੁਸ੍ਸਾਨਂ ਵਿਹਾਰਸ੍ਸ ਸਮੀਪੇ ਆਰਾਮੋ ਹੋਤਿ, ਤੇ ਸਙ੍ਘਂ ਉਪਸਙ੍ਕਮਿਤ੍ਵਾ ਸਕੇਨ ਆਰਾਮੇਨ ਤਂ ਆਰਾਮਂ ਯਾਚਨ੍ਤਿ, ਸਙ੍ਘੇਨ ‘‘ਰੁਚ੍ਚਤਿ ਸਙ੍ਘਸ੍ਸਾ’’ਤਿ ਅਪਲੋਕੇਤ੍ਵਾ ਸਮ੍ਪਟਿਚ੍ਛਿਤਬ੍ਬੋ. ਸਚੇਪਿ ਭਿਕ੍ਖੂਨਂ ਰੁਕ੍ਖਸਹਸ੍ਸਂ ਹੋਤਿ, ਮਨੁਸ੍ਸਾਨਂ ਪਞ੍ਚਸਤਾਨਿ, ‘‘ਨਨੁ ਤੁਮ੍ਹਾਕਂ ਆਰਾਮੋ ਖੁਦ੍ਦਕੋ’’ਤਿ ਨ ਵਤ੍ਤਬ੍ਬਂ. ਕਿਞ੍ਚਾਪਿ ਹਿ ਅਯਂ ਖੁਦ੍ਦਕੋ, ਅਥ ਖੋ ਇਤਰਤੋ ਬਹੁਤਰਂ ਆਯਂ ਦੇਤਿ. ਸਚੇਪਿ ਸਮਕਮੇਵ ਦੇਤਿ, ਏਵਮ੍ਪਿ ਇਚ੍ਛਿਤਿਚ੍ਛਿਤਕ੍ਖਣੇ ਪਰਿਭੁਞ੍ਜਿਤੁਂ ਸਕ੍ਕਾਤਿ ਗਹੇਤਬ੍ਬਮੇਵ.

ਸਚੇ ਪਨ ਮਨੁਸ੍ਸਾਨਂ ਬਹੁਤਰਾ ਰੁਕ੍ਖਾ ਹੋਨ੍ਤਿ, ‘‘ਨਨੁ ਤੁਮ੍ਹਾਕਂ ਬਹੁਤਰਾ ਰੁਕ੍ਖਾ’’ਤਿ ਵਤ੍ਤਬ੍ਬਂ. ਸਚੇ ‘‘ਅਤਿਰੇਕਂ ਅਮ੍ਹਾਕਂ ਪੁਞ੍ਞਂ ਹੋਤੁ, ਸਙ੍ਘਸ੍ਸ ਦੇਮਾ’’ਤਿ ਵਦਨ੍ਤਿ, ਜਾਨਾਪੇਤ੍ਵਾ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਭਿਕ੍ਖੂਨਂ ਰੁਕ੍ਖਾ ਫਲਧਾਰਿਨੋ, ਮਨੁਸ੍ਸਾਨਂ ਰੁਕ੍ਖਾ ਨ ਤਾਵ ਫਲਂ ਗਣ੍ਹਨ੍ਤਿ. ਕਿਞ੍ਚਾਪਿ ਨ ਗਣ੍ਹਨ੍ਤਿ, ਨ ਚਿਰਸ੍ਸੇਵ ਗਣ੍ਹਿਸ੍ਸਨ੍ਤੀਤਿ ਸਮ੍ਪਟਿਚ੍ਛਿਤਬ੍ਬਮੇਵ. ਮਨੁਸ੍ਸਾਨਂ ਰੁਕ੍ਖਾ ਫਲਧਾਰਿਨੋ, ਭਿਕ੍ਖੂਨਂ ਨ ਤਾਵ ਫਲਂ ਗਣ੍ਹਨ੍ਤਿ. ‘‘ਨਨੁ ਤੁਮ੍ਹਾਕਂ ਰੁਕ੍ਖਾ ਫਲਧਾਰਿਨੋ’’ਤਿ ਵਤ੍ਤਬ੍ਬਂ. ਸਚੇ ‘‘ਗਣ੍ਹਥ, ਭਨ੍ਤੇ, ਅਮ੍ਹਾਕਂ ਪੁਞ੍ਞਂ ਭਵਿਸ੍ਸਤੀ’’ਤਿ ਵਦਨ੍ਤਿ, ਜਾਨਾਪੇਤ੍ਵਾ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਏਵਂ ਆਰਾਮੇਨ ਆਰਾਮੋ ਪਰਿਵਤ੍ਤੇਤਬ੍ਬੋ. ਏਤੇਨੇਵ ਨਯੇਨ ਆਰਾਮਵਤ੍ਥੁਪਿ ਵਿਹਾਰੋਪਿ ਵਿਹਾਰਵਤ੍ਥੁਪਿ ਆਰਾਮੇਨ ਪਰਿਵਤ੍ਤੇਤਬ੍ਬਂ. ਆਰਾਮਵਤ੍ਥੁਨਾ ਚ ਮਹਨ੍ਤੇਨ ਵਾ ਖੁਦ੍ਦਕੇਨ ਵਾ ਆਰਾਮਆਰਾਮਵਤ੍ਥੁਵਿਹਾਰਵਿਹਾਰਵਤ੍ਥੂਨਿ.

ਕਥਂ ਵਿਹਾਰੇਨ ਵਿਹਾਰੋ ਪਰਿਵਤ੍ਤੇਤਬ੍ਬੋ? ਸਙ੍ਘਸ੍ਸ ਅਨ੍ਤੋਗਾਮੇ ਗੇਹਂ ਹੋਤਿ, ਮਨੁਸ੍ਸਾਨਂ ਵਿਹਾਰਮਜ੍ਝੇ ਪਾਸਾਦੋ, ਉਭੋਪਿ ਅਗ੍ਘੇਨ ਸਮਕਾ, ਸਚੇ ਮਨੁਸ੍ਸਾ ਤੇਨ ਪਾਸਾਦੇਨ ਤਂ ਗੇਹਂ ਯਾਚਨ੍ਤਿ, ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਭਿਕ੍ਖੂਨਂ ਚੇ ਮਹਗ੍ਘਤਰਂ ਗੇਹਂ ਹੋਤਿ, ‘‘ਮਹਗ੍ਘਤਰਂ ਅਮ੍ਹਾਕਂ ਗੇਹ’’ਨ੍ਤਿ ਵੁਤ੍ਤੇ ਚ ‘‘ਕਿਞ੍ਚਾਪਿ ਮਹਗ੍ਘਤਰਂ, ਪਬ੍ਬਜਿਤਾਨਂ ਪਨ ਅਸਾਰੁਪ੍ਪਂ, ਨ ਸਕ੍ਕਾ ਤਤ੍ਥ ਪਬ੍ਬਜਿਤੇਹਿ ਵਸਿਤੁਂ, ਇਦਂ ਪਨ ਸਾਰੁਪ੍ਪਂ, ਗਣ੍ਹਥਾ’’ਤਿ ਵਦਨ੍ਤਿ, ਏਵਮ੍ਪਿ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਸਚੇ ਪਨ ਮਨੁਸ੍ਸਾਨਂ ਮਹਗ੍ਘਂ ਹੋਤਿ, ‘‘ਨਨੁ ਤੁਮ੍ਹਾਕਂ ਗੇਹਂ ਮਹਗ੍ਘ’’ਨ੍ਤਿ ਵਤ੍ਤਬ੍ਬਂ. ‘‘ਹੋਤੁ, ਭਨ੍ਤੇ, ਅਮ੍ਹਾਕਂ ਪੁਞ੍ਞਂ ਭਵਿਸ੍ਸਤਿ, ਗਣ੍ਹਥਾ’’ਤਿ ਵੁਤ੍ਤੇ ਪਨ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਏਵਂ ਵਿਹਾਰੇਨ ਵਿਹਾਰੋ ਪਰਿਵਤ੍ਤੇਤਬ੍ਬੋ. ਏਤੇਨੇਵ ਨਯੇਨ ਵਿਹਾਰਵਤ੍ਥੁਪਿ ਆਰਾਮੋਪਿ ਆਰਾਮਵਤ੍ਥੁਪਿ ਵਿਹਾਰੇਨ ਪਰਿਵਤ੍ਤੇਤਬ੍ਬਂ. ਵਿਹਾਰਵਤ੍ਥੁਨਾ ਚ ਮਹਗ੍ਘੇਨ ਵਾ ਅਪ੍ਪਗ੍ਘੇਨ ਵਾ ਵਿਹਾਰਵਿਹਾਰਵਤ੍ਥੁਆਰਾਮਆਰਾਮਵਤ੍ਥੂਨਿ. ਏਵਂ ਤਾਵ ਥਾਵਰੇਨ ਥਾਵਰਪਰਿਵਤ੍ਤਨਂ ਵੇਦਿਤਬ੍ਬਂ.

ਗਰੁਭਣ੍ਡੇਨ ਗਰੁਭਣ੍ਡਪਰਿਵਤ੍ਤਨੇ ਪਨ ਮਞ੍ਚਪੀਠਂ ਮਹਨ੍ਤਂ ਵਾ ਹੋਤੁ ਖੁਦ੍ਦਕਂ ਵਾ, ਅਨ੍ਤਮਸੋ ਚਤੁਰਙ੍ਗੁਲਪਾਦਕਂ ਗਾਮਦਾਰਕੇਹਿ ਪਂਸ੍ਵਾਗਾਰਕੇਸੁ ਕੀਲ਼ਨ੍ਤੇਹਿ ਕਤਮ੍ਪਿ ਸਙ੍ਘਸ੍ਸ ਦਿਨ੍ਨਕਾਲਤੋ ਪਟ੍ਠਾਯ ਗਰੁਭਣ੍ਡਂ ਹੋਤਿ. ਸਚੇਪਿ ਰਾਜਰਾਜਮਹਾਮਤ੍ਤਾਦਯੋ ਏਕਪ੍ਪਹਾਰੇਨੇਵ ਮਞ੍ਚਸਤਂ ਵਾ ਮਞ੍ਚਸਹਸ੍ਸਂ ਵਾ ਦੇਨ੍ਤਿ, ਸਬ੍ਬੇ ਕਪ੍ਪਿਯਮਞ੍ਚਾ ਸਮ੍ਪਟਿਚ੍ਛਿਤਬ੍ਬਾ, ਸਮ੍ਪਟਿਚ੍ਛਿਤ੍ਵਾ ਵੁਡ੍ਢਪਟਿਪਾਟਿਯਾ ‘‘ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਥਾ’’ਤਿ ਦਾਤਬ੍ਬਾ, ਪੁਗ੍ਗਲਿਕਵਸੇਨ ਨ ਦਾਤਬ੍ਬਾ. ਅਤਿਰੇਕਮਞ੍ਚੇ ਭਣ੍ਡਾਗਾਰਾਦੀਸੁ ਪਞ੍ਞਪੇਤ੍ਵਾ ਪਤ੍ਤਚੀਵਰਂ ਨਿਕ੍ਖਿਪਿਤੁਮ੍ਪਿ ਵਟ੍ਟਤਿ.

ਬਹਿਸੀਮਾਯ ‘‘ਸਙ੍ਘਸ੍ਸ ਦੇਮਾ’’ਤਿ ਦਿਨ੍ਨਮਞ੍ਚੋ ਸਙ੍ਘਤ੍ਥੇਰਸ੍ਸ ਵਸਨਟ੍ਠਾਨੇ ਦਾਤਬ੍ਬੋ. ਤਤ੍ਥ ਚੇ ਬਹੂ ਮਞ੍ਚਾ ਹੋਨ੍ਤਿ, ਮਞ੍ਚੇਨ ਕਮ੍ਮਂ ਨਤ੍ਥਿ, ਯਸ੍ਸ ਵਸਨਟ੍ਠਾਨੇ ਕਮ੍ਮਂ ਅਤ੍ਥਿ, ਤਤ੍ਥ ‘‘ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਥਾ’’ਤਿ ਦਾਤਬ੍ਬੋ. ਮਹਗ੍ਘੇਨ ਸਤਗ੍ਘਨਕੇਨ, ਸਹਸ੍ਸਗ੍ਘਨਕੇਨ ਵਾ ਮਞ੍ਚੇਨ ਅਞ੍ਞਂ ਮਞ੍ਚਸਤਂ ਲਭਤਿ, ਪਰਿਵਤ੍ਤੇਤ੍ਵਾ ਗਹੇਤਬ੍ਬਂ. ਨ ਕੇਵਲਂ ਮਞ੍ਚੇਨ ਮਞ੍ਚੋਯੇਵ, ਆਰਾਮਆਰਾਮਵਤ੍ਥੁਵਿਹਾਰਵਿਹਾਰਵਤ੍ਥੁਪੀਠਭਿਸਿਬਿਮ੍ਬੋਹਨਾਨਿਪਿ ਪਰਿਵਤ੍ਤੇਤੁਂ ਵਟ੍ਟਨ੍ਤਿ. ਏਸ ਨਯੋ ਪੀਠਭਿਸਿਬਿਮ੍ਬੋਹਨੇਸੁਪਿ ਏਤੇਸੁ ਹਿ ਕਪ੍ਪਿਯਾਕਪ੍ਪਿਯਂ ਵੁਤ੍ਤਨਯਮੇਵ. ਤਤ੍ਥ ਅਕਪ੍ਪਿਯਂ ਨ ਪਰਿਭੁਞ੍ਜਿਤਬ੍ਬਂ, ਕਪ੍ਪਿਯਂ ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਿਤਬ੍ਬਂ. ਅਕਪ੍ਪਿਯਂ ਵਾ ਮਹਗ੍ਘਂ ਕਪ੍ਪਿਯਂ ਵਾ ਪਰਿਵਤ੍ਤੇਤ੍ਵਾ ਵੁਤ੍ਤਵਤ੍ਥੂਨਿ ਗਹੇਤਬ੍ਬਾਨਿ, ਅਗਰੁਭਣ੍ਡੁਪਗਂ ਪਨ ਭਿਸਿਬਿਮ੍ਬੋਹਨਂ ਨਾਮ ਨਤ੍ਥੀਤਿ.

੨੮੯੮. ਭਿਕ੍ਖੁ ਅਧੋਤੇਨ ਪਾਦੇਨ, ਅਲ੍ਲਪਾਦੇਨ ਵਾ ਸੇਨਾਸਨਂ ਨਕ੍ਕਮੇਤਿ ਸਮ੍ਬਨ੍ਧੋ. ਸਯਨ੍ਤਿ ਏਤ੍ਥ, ਆਸਨ੍ਤਿ ਚਾਤਿ ਸਯਨਾਸਨਂ, ਪਰਿਕਮ੍ਮਕਤਭੂਮਤ੍ਥਰਣਾਦਿ. ਅਲ੍ਲਪਾਦੇਨ ਵਾਤਿ ਯੇਨ ਅਕ੍ਕਨ੍ਤਟ੍ਠਾਨੇ ਉਦਕਂ ਪਞ੍ਞਾਯਤਿ, ਏਵਰੂਪੇਨ ਤਿਨ੍ਤਪਾਦੇਨ. ਯਥਾਹ – ‘‘ਅਲ੍ਲੇਹਿ ਪਾਦੇਹੀਤਿ ਯੇਹਿ ਅਕ੍ਕਨ੍ਤਟ੍ਠਾਨੇ ਉਦਕਂ ਪਞ੍ਞਾਯਤਿ, ਏਵਰੂਪੇਹਿ ਪਾਦੇਹਿ ਪਰਿਭਣ੍ਡਕਤਭੂਮਿ ਵਾ ਸੇਨਾਸਨਂ ਵਾ ਨ ਅਕ੍ਕਮਿਤਬ੍ਬਂ. ਸਚੇ ਪਨ ਉਦਕਸਿਨੇਹਮਤ੍ਤਮੇਵ ਪਞ੍ਞਾਯਤਿ, ਨ ਉਦਕਂ, ਵਟ੍ਟਤੀ’’ਤਿ (ਚੂਲ਼ਵ. ਅਟ੍ਠ. ੩੨੪). ਸਉਪਾਹਨੋਤਿ ਏਤ੍ਥ ‘‘ਧੋਤਪਾਦਕ’’ਨ੍ਤਿ ਵਤ੍ਤਬ੍ਬਂ. ਪਾਦੇ ਪਟਿਮੁਕ੍ਕਾਹਿ ਉਪਾਹਨਾਹਿ ਸਉਪਾਹਨੋ ਭਿਕ੍ਖੁ ਧੋਤਪਾਦਕਂ ਧੋਤਪਾਦੇਹਿ ਅਕ੍ਕਮਿਤਬ੍ਬਟ੍ਠਾਨਂ ਤਥੇਵ ਨ ਅਕ੍ਕਮੇਤਿ ਯੋਜਨਾ.

੨੮੯੯. ਪਰਿਕਮ੍ਮਕਤਾਯਾਤਿ ਸੁਧਾਦਿਪਰਿਕਮ੍ਮਕਤਾਯ. ਨਿਟ੍ਠੁਭਨ੍ਤਸ੍ਸਾਤਿ ਖੇਲ਼ਂ ਪਾਤੇਨ੍ਤਸ੍ਸ. ਪਰਿਕਮ੍ਮਕਤਂ ਭਿਤ੍ਤਿਨ੍ਤਿ ਸੇਤਭਿਤ੍ਤਿਂ ਵਾ ਚਿਤ੍ਤਕਮ੍ਮਕਤਂ ਵਾ ਭਿਤ੍ਤਿਂ. ਨ ਕੇਵਲਞ੍ਚ ਭਿਤ੍ਤਿਮੇਵ, ਦ੍ਵਾਰਮ੍ਪਿ ਵਾਤਪਾਨਮ੍ਪਿ ਅਪਸ੍ਸੇਨਫਲਕਮ੍ਪਿ ਪਾਸਾਣਤ੍ਥਮ੍ਭਮ੍ਪਿ ਰੁਕ੍ਖਤ੍ਥਮ੍ਭਮ੍ਪਿ ਚੀਵਰੇਨ ਵਾ ਕੇਨਚਿ ਵਾ ਅਪ੍ਪਟਿਚ੍ਛਾਦੇਤ੍ਵਾ ਅਪਸ੍ਸਯਿਤੁਂ ਨ ਲਭਤਿਯੇਵ. ‘‘ਦ੍ਵਾਰਵਾਤਪਾਨਾਦਯੋ ਪਨ ਅਪਰਿਕਮ੍ਮਕਤਾਪਿ ਅਪਟਿਚ੍ਛਾਦੇਤ੍ਵਾ ਨ ਅਪਸ੍ਸਯਿਤਬ੍ਬਾ’’ਤਿ ਗਣ੍ਠਿਪਦੇ ਵੁਤ੍ਤਂ.

੨੯੦੧. ਨਿਦ੍ਦਾਯਤੋ ਤਸ੍ਸ ਕੋਚਿ ਸਰੀਰਾਵਯਵੋ ਪਚ੍ਚਤ੍ਥਰਣੇ ਸਙ੍ਕੁਟਿਤੇ ਸਹਸਾ ਯਦਿ ਮਞ੍ਚਂ ਫੁਸਤਿ, ਦੁਕ੍ਕਟਨ੍ਤਿ ਯੋਜਨਾ.

੨੯੦੨. ਲੋਮੇਸੁ ਮਞ੍ਚਂ ਫੁਸਨ੍ਤੇਸੁ. ਹਤ੍ਥਪਾਦਾਨਂ ਤਲੇਨ ਅਕ੍ਕਮਿਤੁਂ ਵਟ੍ਟਤੀਤਿ ਯੋਜਨਾ. ਮਞ੍ਚਪੀਠਂ ਨੀਹਰਨ੍ਤਸ੍ਸ ਕਾਯੇ ਪਟਿਹਞ੍ਞਤਿ, ਅਨਾਪਤ੍ਤਿ.

‘‘ਦਾਯਕੇਹਿ ‘ਕਾਯੇਨ ਫੁਸਿਤ੍ਵਾ ਯਥਾਸੁਖਂ ਪਰਿਭੁਞ੍ਜਥਾ’ਤਿ ਦਿਨ੍ਨਸੇਨਾਸਨਂ, ਮਞ੍ਚਪੀਠਾਦਿਞ੍ਚ ਦਾਯਕੇਨ ਵੁਤ੍ਤਨਿਯਾਮੇਨ ਪਰਿਭੁਞ੍ਜਨ੍ਤਸ੍ਸ ਦੋਸੋ ਨਤ੍ਥੀ’’ਤਿ ਮਾਤਿਕਟ੍ਠਕਥਾਯ ਸੀਹਲ਼ਗਣ੍ਠਿਪਦੇ ਵੁਤ੍ਤਤ੍ਤਾ ਤਥਾ ਪਰਿਭੁਞ੍ਜਨ੍ਤਸ੍ਸ ਅਨਾਪਤ੍ਤਿ. ‘‘ਇਮਂ ਮਞ੍ਚਪੀਠਾਦਿਂ ਸਙ੍ਘਸ੍ਸ ਦਮ੍ਮੀ’’ਤਿ ਵੁਤ੍ਤੇ ਗਰੁਭਣ੍ਡਂ ਹੋਤਿ, ਨ ਭਾਜੇਤਬ੍ਬਂ ਸਙ੍ਘਸ੍ਸ ਪਰਾਮਟ੍ਠਤ੍ਤਾ. ‘‘ਇਮਂ ਮਞ੍ਚਪੀਠਾਦਿਂ ਭਦਨ੍ਤਾਨਂ ਵਸ੍ਸਗ੍ਗੇਨ ਗਣ੍ਹਿਤੁਂ ਦਮ੍ਮੀ’’ਤਿ ਵੁਤ੍ਤੇ ਸਤਿਪਿ ਗਰੁਭਣ੍ਡਭਾਵੇ ਕਪ੍ਪਿਯਵਤ੍ਥੁਂ ਭਾਜੇਤ੍ਵਾ ਗਣ੍ਹਿਤੁਂ ਵਟ੍ਟਤਿ, ਅਕਪ੍ਪਿਯਭਣ੍ਡਮੇਵ ਭਾਜੇਤ੍ਵਾ ਗਹੇਤੁਂ ਨ ਲਬ੍ਭਤਿ. ‘‘ਇਮਂ ਮਞ੍ਚਪੀਠਂ ਵਸ੍ਸਗ੍ਗੇਨ ਗਹੇਤੁਂ ਸਙ੍ਘਸ੍ਸ ਦਮ੍ਮੀ’’ਤਿ ਵੁਤ੍ਤੇ ਵਸ੍ਸਗ੍ਗੇਨ ਭਾਜੇਤ੍ਵਾ ਗਹੇਤਬ੍ਬਂ ਵਸ੍ਸਗ੍ਗੇਨ ਭਾਜਨਂ ਪਠਮਂ ਵਤ੍ਵਾ ਪਚ੍ਛਾ ਸਙ੍ਘਸ੍ਸ ਪਰਾਮਟ੍ਠਤ੍ਤਾ. ‘‘ਸਙ੍ਘਸ੍ਸ ਇਮਂ ਮਞ੍ਚਪੀਠਂ ਵਸ੍ਸਗ੍ਗੇਨ ਗਣ੍ਹਿਤੁਂ ਦਮ੍ਮੀ’’ਤਿ ਵੁਤ੍ਤੇ ਪਨ ਗਰੁਭਣ੍ਡਂ ਹੋਤਿ ਪਠਮਂ ਸਙ੍ਘਸ੍ਸ ਪਰਾਮਟ੍ਠਤ੍ਤਾਤਿ ਅਯਮ੍ਪਿ ਵਿਸੇਸੋ ਮਾਤਿਕਟ੍ਠਕਥਾ ਗਣ੍ਠਿਪਦੇਯੇਵ ਵੁਤ੍ਤੋ.

੨੯੦੩-੪. ਉਦ੍ਦੇਸਭਤ੍ਤਵਿਨਿਚ੍ਛਯੇਕਦੇਸਂ ਦਸ੍ਸੇਤੁਮਾਹ ‘‘ਸਹਸ੍ਸਗ੍ਘਨਕੋ’’ਤਿਆਦਿ. ਸਹਸ੍ਸਗ੍ਘਨਕੋ ਸਚੀਵਰੋ ਪਿਣ੍ਡਪਾਤੋ ਅਵਸ੍ਸਿਕਂ ਭਿਕ੍ਖੁਂ ਪਤ੍ਤੋ, ਤਸ੍ਮਿਂ ਵਿਹਾਰੇ ਚ ‘‘ਏਵਰੂਪੋ ਪਿਣ੍ਡਪਾਤੋ ਅਵਸ੍ਸਿਕਂ ਭਿਕ੍ਖੁਂ ਪਤ੍ਤੋ’’ਤਿ ਲਿਖਿਤ੍ਵਾ ਠਪਿਤੋਪਿ ਚ ਹੋਤਿ, ਤਤੋ ਸਟ੍ਠਿਵਸ੍ਸਾਨਮਚ੍ਚਯੇ ਤਾਦਿਸੋ ਸਹਸ੍ਸਗ੍ਘਨਕੋ ਸਚੀਵਰੋ ਕੋਚਿ ਪਿਣ੍ਡਪਾਤੋ ਸਚੇ ਉਪ੍ਪਨ੍ਨੋ ਹੋਤਿ, ਤਂ ਪਿਣ੍ਡਪਾਤਂ ਬੁਧੋ ਵਿਨਿਚ੍ਛਯਕੁਸਲੋ ਭਿਕ੍ਖੁ ਅਵਸ੍ਸਿਕਟ੍ਠਿਤਿਕਾਯ ਅਦਤ੍ਵਾ ਸਟ੍ਠਿਵਸ੍ਸਿਕਟ੍ਠਿਤਿਕਾਯ ਦਦੇਯ੍ਯਾਤਿ ਯੋਜਨਾ.

੨੯੦੫. ਉਦ੍ਦੇਸਭਤ੍ਤਂ ਭੁਞ੍ਜਿਤ੍ਵਾਤਿ ਉਪਸਮ੍ਪਨ੍ਨਕਾਲੇ ਅਤ੍ਤਨੋ ਵਸ੍ਸਗ੍ਗੇਨ ਪਤ੍ਤਂ ਉਦ੍ਦੇਸਭਤ੍ਤਂ ਪਰਿਭੁਞ੍ਜਿਤ੍ਵਾ. ਜਾਤੋ ਚੇ ਸਾਮਣੇਰਕੋਤਿ ਸਿਕ੍ਖਾਪਚ੍ਚਕ੍ਖਾਨਾਦਿਵਸੇਨ ਸਚੇ ਸਾਮਣੇਰੋ ਜਾਤੋ. ਤਨ੍ਤਿ ਉਪਸਮ੍ਪਨ੍ਨਕਾਲੇ ਗਹਿਤਂ ਤਦੇਵ ਉਦ੍ਦੇਸਭਤ੍ਤਂ. ਸਾਮਣੇਰਸ੍ਸ ਪਾਲ਼ਿਯਾਤਿ ਸਾਮਣੇਰਪਟਿਪਾਟਿਯਾ ਅਤ੍ਤਨੋ ਪਤ੍ਤਂ ਪਚ੍ਛਾ ਗਹੇਤੁਂ ਲਭਤਿ.

੨੯੦੬. ਯੋ ਸਾਮਣੇਰੋ ਸਮ੍ਪੁਣ੍ਣਵੀਸਤਿਵਸ੍ਸੋ ‘‘ਸ੍ਵੇ ਉਦ੍ਦੇਸਂ ਲਭਿਸ੍ਸਤੀ’’ਤਿ ਵਤ੍ਤਬ੍ਬੋ, ਅਜ੍ਜ ਸੋ ਉਪਸਮ੍ਪਨ੍ਨੋ ਹੋਤਿ, ਠਿਤਿਕਾ ਅਤੀਤਾ ਸਿਯਾਤਿ ਯੋਜਨਾ, ਸ੍ਵੇ ਪਾਪੇਤਬ੍ਬਾ ਸਾਮਣੇਰਟ੍ਠਿਤਿਕਾ ਅਜ੍ਜ ਉਪਸਮ੍ਪਨ੍ਨਤ੍ਤਾ ਅਤਿਕ੍ਕਨ੍ਤਾ ਹੋਤੀਤਿ ਅਤ੍ਥੋ, ਤਂ ਭਤ੍ਤਂ ਨ ਲਭਤੀਤਿ ਵੁਤ੍ਤਂ ਹੋਤਿ.

੨੯੦੭. ਉਦ੍ਦੇਸਭਤ੍ਤਾਨਨ੍ਤਰਂ ਸਲਾਕਭਤ੍ਤਂ ਦਸ੍ਸੇਤੁਮਾਹ ‘‘ਸਚੇ ਪਨਾ’’ਤਿਆਦਿ. ਸਚੇ ਸਲਾਕਾ ਲਦ੍ਧਾ, ਤਂਦਿਨੇ ਭਤ੍ਤਂ ਨ ਲਦ੍ਧਂ, ਪੁਨਦਿਨੇ ਤਸ੍ਸ ਭਤ੍ਤਂ ਗਹੇਤਬ੍ਬਂ, ਨ ਸਂਸਯੋ ‘‘ਗਹੇਤਬ੍ਬਂ ਨੁ ਖੋ, ਨ ਗਹੇਤਬ੍ਬ’’ਨ੍ਤਿ ਏਵਂ ਸਂਸਯੋ ਨ ਕਾਤਬ੍ਬੋਤਿ ਯੋਜਨਾ.

੨੯੦੮. ਉਤ੍ਤਰਿ ਉਤ੍ਤਰਂ ਅਤਿਰੇਕਂ ਭਙ੍ਗਂ ਬ੍ਯਞ੍ਜਨਂ ਏਤਸ੍ਸਾਤਿ ਉਤ੍ਤਰਿਭਙ੍ਗਂ, ਤਸ੍ਸ, ਅਤਿਰੇਕਬ੍ਯਞ੍ਜਨਸ੍ਸਾਤਿ ਅਤ੍ਥੋ. ਏਕਚਰਸ੍ਸਾਤਿ ਏਕਚਾਰਿਕਸ੍ਸ. ਸਲਾਕਾਯੇਵ ਸਲਾਕਿਕਾ.

੨੯੦੯. ਉਤ੍ਤਰਿਭਙ੍ਗਮੇਵ ਉਤ੍ਤਰਿਭਙ੍ਗਕਂ.

੨੯੧੦. ਯੇਨ ਯੇਨ ਹੀਤਿ ਗਾਹਿਤਸਲਾਕੇਨ ਯੇਨ ਯੇਨ ਭਿਕ੍ਖੁਨਾ. ਯਂ ਯਨ੍ਤਿ ਭਤ੍ਤਬ੍ਯਞ੍ਜਨੇਸੁ ਯਂ ਯਂ ਭਤ੍ਤਂ ਵਾ ਯਂ ਯਂ ਬ੍ਯਞ੍ਜਨਂ ਵਾ.

੨੯੧੧. ਸਙ੍ਘੁਦ੍ਦੇਸਾਦਿਕਨ੍ਤਿ ਸਙ੍ਘਭਤ੍ਤਉਦ੍ਦੇਸਭਤ੍ਤਾਦਿਕਂ. ਆਦਿ-ਸਦ੍ਦੇਨ ਨਿਮਨ੍ਤਨਂ, ਸਲਾਕਂ, ਪਕ੍ਖਿਕਂ, ਉਪੋਸਥਿਕਂ, ਪਾਟਿਪਦਿਕਨ੍ਤਿ ਪਞ੍ਚ ਭਤ੍ਤਾਨਿ ਗਹਿਤਾਨਿ.

ਤਤ੍ਥ ਸਬ੍ਬਸਙ੍ਘਸ੍ਸ ਦਿਨ੍ਨਂ ਸਙ੍ਘਭਤ੍ਤਂ ਨਾਮ. ‘‘ਸਙ੍ਘਤੋ ਏਤ੍ਤਕੇ ਭਿਕ੍ਖੂ ਉਦ੍ਦਿਸਿਤ੍ਵਾ ਦੇਥਾ’’ਤਿਆਦਿਨਾ ਵਤ੍ਵਾ ਦਿਨ੍ਨਂ ਉਦ੍ਦੇਸਭਤ੍ਤਂ. ‘‘ਸਙ੍ਘਤੋ ਏਤ੍ਤਕਾਨਂ ਭਿਕ੍ਖੂਨਂ ਭਤ੍ਤਂ ਗਣ੍ਹਥਾ’’ਤਿਆਦਿਨਾ ਵਤ੍ਵਾ ਦਿਨ੍ਨਂ ਨਿਮਨ੍ਤਨਂ ਨਾਮ. ਅਤ੍ਤਨੋ ਅਤ੍ਤਨੋ ਨਾਮੇਨ ਸਲਾਕਗਾਹਕਾਨਂ ਭਿਕ੍ਖੂਨਂ ਦਿਨ੍ਨਂ ਸਲਾਕਭਤ੍ਤਂ ਨਾਮ. ਚਾਤੁਦ੍ਦਸਿਯਂ ਦਿਨ੍ਨਂ ਪਕ੍ਖਿਕਂ. ਉਪੋਸਥੇ ਦਿਨ੍ਨਂ ਉਪੋਸਥਿਕਂ. ਪਾਟਿਪਦੇ ਦਿਨ੍ਨਂ ਪਾਟਿਪਦਿਕਂ. ਤਂਤਂਨਾਮੇਨ ਦਿਨ੍ਨਮੇਵ ਤਥਾ ਤਥਾ ਵੋਹਰੀਯਤਿ. ਏਤੇਸਂ ਪਨ ਵਿਤ੍ਥਾਰਕਥਾ ‘‘ਅਭਿਲਕ੍ਖਿਤੇਸੂ’’ਤਿਆਦਿਨਾ (ਚੂਲ਼ਵ. ਅਟ੍ਠ. ੩੨੫ ਪਕ੍ਖਿਕਭਤ੍ਤਾਦਿਕਥਾ) ਅਟ੍ਠਕਥਾਯਂ ਵੁਤ੍ਤਨਯੇਨ ਵੇਦਿਤਬ੍ਬਾ. ਆਗਨ੍ਤੁਕਾਦੀਤਿ ਏਤ੍ਥ ਆਦਿ-ਸਦ੍ਦੇਨ ਗਮਿਕਭਤ੍ਤਂ, ਗਿਲਾਨਭਤ੍ਤਂ, ਗਿਲਾਨੁਪਟ੍ਠਾਕਭਤ੍ਤਨ੍ਤਿ ਤੀਣਿ ਗਹਿਤਾਨਿ. ਆਗਨ੍ਤੁਕਾਨਂ ਦਿਨ੍ਨਂ ਭਤ੍ਤਂ ਆਗਨ੍ਤੁਕਭਤ੍ਤਂ. ਏਸੇਵ ਨਯੋ ਸੇਸੇਸੁ.

੨੯੧੨. ਵਿਹਾਰਨ੍ਤਿ ਵਿਹਾਰਭਤ੍ਤਂ ਉਤ੍ਤਰਪਦਲੋਪੇਨ, ਵਿਹਾਰੇ ਤਤ੍ਰੁਪ੍ਪਾਦਭਤ੍ਤਸ੍ਸੇਤਂ ਅਧਿਵਚਨਂ. ਵਾਰਭਤ੍ਤਨ੍ਤਿ ਦੁਬ੍ਭਿਕ੍ਖਸਮਯੇ ‘‘ਵਾਰੇਨ ਭਿਕ੍ਖੂ ਜਗ੍ਗਿਸ੍ਸਾਮਾ’’ਤਿ ਧੁਰਗੇਹਤੋ ਪਟ੍ਠਾਯ ਦਿਨ੍ਨਂ. ਨਿਚ੍ਚਨ੍ਤਿ ਨਿਚ੍ਚਭਤ੍ਤਂ ਉਤ੍ਤਰਪਦਲੋਪੇਨ, ਤਞ੍ਚ ਤਥਾ ਵਤ੍ਵਾਵ ਦਿਨ੍ਨਂ. ਕੁਟਿਭਤ੍ਤਂ ਨਾਮ ਸਙ੍ਘਸ੍ਸ ਆਵਾਸਂ ਕਤ੍ਵਾ ‘‘ਅਮ੍ਹਾਕਂ ਸੇਨਾਸਨਵਾਸਿਨੋ ਅਮ੍ਹਾਕਂ ਭਤ੍ਤਂ ਗਣ੍ਹਨ੍ਤੂ’’ਤਿ ਦਿਨ੍ਨਂ. ਪਨ੍ਨਰਸਵਿਧਂ ਸਬ੍ਬਮੇਵ ਭਤ੍ਤਂ ਇਧ ਇਮਸ੍ਮਿਂ ਸੇਨਾਸਨਕ੍ਖਨ੍ਧਕੇ ਉਦ੍ਦਿਟ੍ਠਂ ਕਥਿਤਂ. ਏਤੇਸਂ ਵਿਤ੍ਥਾਰਵਿਨਿਚ੍ਛਯੋ ਅਤ੍ਥਿਕੇਹਿ ਸਮਨ੍ਤਪਾਸਾਦਿਕਾਯ ਗਹੇਤਬ੍ਬੋ.

੨੯੧੩. ਪਚ੍ਚਯਭਾਜਨੇ ਮਿਚ੍ਛਾਪਟਿਪਤ੍ਤਿਯਾ ਮਹਾਦੀਨਵਤ੍ਤਾ ਅਪ੍ਪਮਤ੍ਤੇਨੇਵ ਪਟਿਪਜ੍ਜਿਤਬ੍ਬਨ੍ਤਿ ਪਚ੍ਚਯਭਾਜਨਕਂ ਅਨੁਸਾਸਨ੍ਤੋ ਆਹ ‘‘ਪਾਲ਼ਿ’’ਨ੍ਤਿਆਦਿ.

ਸੇਨਾਸਨਕ੍ਖਨ੍ਧਕਕਥਾਵਣ੍ਣਨਾ.