੯. ਚੀਵਰਵਿਪ੍ਪਵਾਸਵਿਨਿਚ੍ਛਯਕਥਾ

੫੧. ਚੀਵਰੇਨਵਿਨਾਵਾਸੋਤਿ ਤਿਚੀਵਰਾਧਿਟ੍ਠਾਨੇਨ ਅਧਿਟ੍ਠਿਤਾਨਂ ਤਿਣ੍ਣਂ ਚੀਵਰਾਨਂ ਅਞ੍ਞਤਰੇਨ ਵਿਪ੍ਪਵਾਸੋ. ਏਵਂ ਅਧਿਟ੍ਠਿਤੇਸੁ ਹਿ ਤੀਸੁ ਚੀਵਰੇਸੁ ਏਕੇਨਪਿ ਵਿਨਾ ਵਸਿਤੁਂ ਨ ਵਟ੍ਟਤਿ, ਵਸਨ੍ਤਸ੍ਸ ਸਹ ਅਰੁਣੁਗ੍ਗਮਨਾ ਚੀਵਰਂ ਨਿਸ੍ਸਗ੍ਗਿਯਂ ਹੋਤਿ, ਤਸ੍ਮਾ ਅਰੁਣੁਗ੍ਗਮਨਸਮਯੇ ਚੀਵਰਂ ਅਡ੍ਢਤੇਯ੍ਯਰਤਨਪ੍ਪਮਾਣੇ ਹਤ੍ਥਪਾਸੇ ਕਤ੍ਵਾ ਵਸਿਤਬ੍ਬਂ. ਗਾਮਨਿਵੇਸਨਉਦੋਸਿਤਅਡ੍ਡਮਾਲ਼ਪਾਸਾਦਹਮ੍ਮਿਯਨਾਵਾਸਤ੍ਥਖੇਤ੍ਤਧਞ੍ਞਕਰਣਆਰਾਮਵਿਹਾਰਰੁਕ੍ਖਮੂਲਅਜ੍ਝੋਕਾਸੇਸੁ ਪਨ ਅਯਂ ਵਿਸੇਸੋ (ਪਾਰਾ. ਅਟ੍ਠ. ੨.੪੭੭-੮) – ਸਚੇ ਏਕਸ੍ਸ ਰਞ੍ਞੋ ਗਾਮਭੋਜਕਸ੍ਸ ਵਾ ਸਨ੍ਤਕੋ ਗਾਮੋ ਹੋਤਿ, ਯੇਨ ਕੇਨਚਿ ਪਾਕਾਰੇਨ ਵਾ ਵਤਿਯਾ ਵਾ ਪਰਿਖਾਯ ਵਾ ਪਰਿਕ੍ਖਿਤ੍ਤੋ ਚ, ਏਵਰੂਪੇ ਗਾਮੇ ਚੀਵਰਂ ਨਿਕ੍ਖਿਪਿਤ੍ਵਾ ਗਾਮਬ੍ਭਨ੍ਤਰੇ ਯਤ੍ਥ ਕਤ੍ਥਚਿ ਯਥਾਰੁਚਿਤਟ੍ਠਾਨੇ ਅਰੁਣਂ ਉਟ੍ਠਾਪੇਤੁਂ ਵਟ੍ਟਤਿ. ਸਚੇ ਪਨ ਅਪਰਿਕ੍ਖਿਤ੍ਤੋ ਹੋਤਿ, ਏਵਰੂਪੇ ਗਾਮੇ ਯਸ੍ਮਿਂ ਘਰੇ ਚੀਵਰਂ ਨਿਕ੍ਖਿਤ੍ਤਂ, ਤਸ੍ਮਿਂ ਵਤ੍ਥਬ੍ਬਂ, ਤਸ੍ਸ ਵਾ ਘਰਸ੍ਸ ਹਤ੍ਥਪਾਸੇ ਸਮਨ੍ਤਾ ਅਡ੍ਢਤੇਯ੍ਯਰਤਨਬ੍ਭਨ੍ਤਰੇ ਵਸਿਤਬ੍ਬਂ. ਤਂ ਪਮਾਣਂ ਅਤਿਕ੍ਕਮਿਤ੍ਵਾ ਸਚੇਪਿ ਇਦ੍ਧਿਮਾ ਭਿਕ੍ਖੁ ਆਕਾਸੇ ਅਰੁਣਂ ਉਟ੍ਠਾਪੇਤਿ, ਚੀਵਰਂ ਨਿਸ੍ਸਗ੍ਗਿਯਮੇਵ ਹੋਤਿ.

ਸਚੇ ਨਾਨਾਰਾਜੂਨਂ ਵਾ ਭੋਜਕਾਨਂ ਵਾ ਗਾਮੋ ਹੋਤਿ ਵੇਸਾਲੀਕੁਸਿਨਾਰਾਦਿਸਦਿਸੋ ਪਰਿਕ੍ਖਿਤ੍ਤੋ ਚ, ਏਵਰੂਪੇ ਗਾਮੇ ਯਸ੍ਮਿਂ ਘਰੇ ਚੀਵਰਂ ਨਿਕ੍ਖਿਤ੍ਤਂ, ਤਤ੍ਥ ਵਾ ਵਤ੍ਥਬ੍ਬਂ, ਤਤ੍ਥ ਸਦ੍ਦਸਙ੍ਘਟ੍ਟਨੇਨ ਵਾ ਜਨਸਮ੍ਬਾਧੇਨ ਵਾ ਵਸਿਤੁਂ ਅਸਕ੍ਕੋਨ੍ਤੇਨ ਸਭਾਯੇ ਵਾ ਵਤ੍ਥਬ੍ਬਂ ਨਗਰਦ੍ਵਾਰਮੂਲੇ ਵਾ. ਤਤ੍ਰਾਪਿ ਵਸਿਤੁਂ ਅਸਕ੍ਕੋਨ੍ਤੇਨ ਯਤ੍ਥ ਕਤ੍ਥਚਿ ਫਾਸੁਕਟ੍ਠਾਨੇ ਵਸਿਤ੍ਵਾ ਅਨ੍ਤੋਅਰੁਣੇ ਆਗਮ੍ਮ ਤੇਸਂਯੇਵ ਸਭਾਯਨਗਰਦ੍ਵਾਰਮੂਲਾਨਂ ਹਤ੍ਥਪਾਸੇ ਵਸਿਤਬ੍ਬਂ. ਘਰਸ੍ਸ ਪਨ ਚੀਵਰਸ੍ਸ ਵਾ ਹਤ੍ਥਪਾਸੇ ਵਤ੍ਤਬ੍ਬਮੇਵ ਨਤ੍ਥਿ.

ਸਚੇ ਘਰੇ ਅਟ੍ਠਪੇਤ੍ਵਾ ‘‘ਸਭਾਯੇ ਠਪੇਸ੍ਸਾਮੀ’’ਤਿ ਸਭਾਯਂ ਗਚ੍ਛਨ੍ਤੋ ਹਤ੍ਥਂ ਪਸਾਰੇਤ੍ਵਾ ‘‘ਹਨ੍ਦਿਮਂ ਚੀਵਰਂ ਠਪੇਹੀ’’ਤਿ ਏਵਂ ਨਿਕ੍ਖੇਪਸੁਖੇ ਹਤ੍ਥਪਾਸਗਤੇ ਕਿਸ੍ਮਿਞ੍ਚਿ ਆਪਣੇ ਚੀਵਰਂ ਨਿਕ੍ਖਿਪਤਿ, ਤੇਨ ਪੁਰਿਮਨਯੇਨੇਵ ਸਭਾਯੇ ਵਾ ਵਤ੍ਥਬ੍ਬਂ, ਦ੍ਵਾਰਮੂਲੇ ਵਾ ਤੇਸਂ ਹਤ੍ਥਪਾਸੇ ਵਾ ਵਸਿਤਬ੍ਬਂ.

ਸਚੇ ਨਗਰਸ੍ਸ ਬਹੂਨਿਪਿ ਦ੍ਵਾਰਾਨਿ ਹੋਨ੍ਤਿ ਬਹੂਨਿ ਚ ਸਭਾਯਾਨਿ, ਸਬ੍ਬਤ੍ਥ ਵਸਿਤੁਂ ਨ ਵਟ੍ਟਤਿ. ਯਸ੍ਸਾ ਪਨ ਵੀਥਿਯਾ ਚੀਵਰਂ ਠਪਿਤਂ, ਯਂ ਤਸ੍ਸਾ ਸਮ੍ਮੁਖਟ੍ਠਾਨੇ ਸਭਾਯਞ੍ਚ ਦ੍ਵਾਰਞ੍ਚ, ਤਸ੍ਸ ਸਭਾਯਸ੍ਸ ਚ ਦ੍ਵਾਰਸ੍ਸ ਚ ਹਤ੍ਥਪਾਸੇ ਵਸਿਤਬ੍ਬਂ. ਏਵਞ੍ਹਿ ਸਤਿ ਸਕ੍ਕਾ ਚੀਵਰਸ੍ਸ ਪਵਤ੍ਤਿਂ ਜਾਨਿਤੁਂ. ਸਭਾਯਂ ਪਨ ਗਚ੍ਛਨ੍ਤੇਨ ਯਸ੍ਸ ਆਪਣਿਕਸ੍ਸ ਹਤ੍ਥੇ ਨਿਕ੍ਖਿਤ੍ਤਂ, ਸਚੇ ਸੋ ਤਂ ਚੀਵਰਂ ਅਤਿਹਰਿਤ੍ਵਾ ਘਰੇ ਨਿਕ੍ਖਿਪਤਿ, ਵੀਥਿਹਤ੍ਥਪਾਸੋ ਨ ਰਕ੍ਖਤਿ, ਘਰਸ੍ਸ ਹਤ੍ਥਪਾਸੇ ਵਤ੍ਥਬ੍ਬਂ. ਸਚੇ ਮਹਨ੍ਤਂ ਘਰਂ ਹੋਤਿ ਦ੍ਵੇ ਵੀਥਿਯੋ ਫਰਿਤ੍ਵਾ ਠਿਤਂ, ਪੁਰਤੋ ਵਾ ਪਚ੍ਛਤੋ ਵਾ ਹਤ੍ਥਪਾਸੇਯੇਵ ਅਰੁਣਂ ਉਟ੍ਠਾਪੇਤਬ੍ਬਂ. ਸਭਾਯੇ ਨਿਕ੍ਖਿਪਿਤ੍ਵਾ ਪਨ ਸਭਾਯੇ ਵਾ ਤਸ੍ਸ ਸਮ੍ਮੁਖੇ ਨਗਰਦ੍ਵਾਰਮੂਲੇ ਵਾ ਤੇਸਂਯੇਵ ਹਤ੍ਥਪਾਸੇ ਵਾ ਅਰੁਣਂ ਉਟ੍ਠਾਪੇਤਬ੍ਬਂ. ਸਚੇ ਪਨ ਗਾਮੋ ਅਪਰਿਕ੍ਖਿਤ੍ਤੋ ਹੋਤਿ, ਯਸ੍ਮਿਂ ਘਰੇ ਚੀਵਰਂ ਨਿਕ੍ਖਿਤ੍ਤਂ, ਤਸ੍ਮਿਂ ਘਰੇ ਤਸ੍ਸ ਘਰਸ੍ਸ ਵਾ ਹਤ੍ਥਪਾਸੇ ਵਤ੍ਥਬ੍ਬਂ.

ਸਚੇ (ਪਾਰਾ. ੪੮੦) ਏਕਕੁਲਸ੍ਸ ਸਨ੍ਤਕਂ ਨਿਵੇਸਨਂ ਹੋਤਿ ਪਰਿਕ੍ਖਿਤ੍ਤਞ੍ਚ ਨਾਨਾਗਬ੍ਭਂ ਨਾਨਾਓਵਰਕਂ, ਅਨ੍ਤੋਨਿਵੇਸਨੇ ਚੀਵਰਂ ਨਿਕ੍ਖਿਪਿਤ੍ਵਾ ਅਨ੍ਤੋਨਿਵੇਸਨੇ ਵਤ੍ਥਬ੍ਬਂ. ਸਚੇ ਅਪਰਿਕ੍ਖਿਤ੍ਤਂ, ਯਸ੍ਮਿਂ ਗਬ੍ਭੇ ਚੀਵਰਂ ਨਿਕ੍ਖਿਤ੍ਤਂ ਹੋਤਿ, ਤਸ੍ਮਿਂ ਗਬ੍ਭੇ ਵਤ੍ਥਬ੍ਬਂ ਗਬ੍ਭਸ੍ਸ ਹਤ੍ਥਪਾਸੇ ਵਾ. ਸਚੇ ਨਾਨਾਕੁਲਸ੍ਸ ਨਿਵੇਸਨਂ ਹੋਤਿ ਪਰਿਕ੍ਖਿਤ੍ਤਞ੍ਚ ਨਾਨਾਗਬ੍ਭਂ ਨਾਨਾਓਵਰਕਂ, ਯਸ੍ਮਿਂ ਗਬ੍ਭੇ ਚੀਵਰਂ ਨਿਕ੍ਖਿਤ੍ਤਂ ਹੋਤਿ, ਤਸ੍ਮਿਂ ਗਬ੍ਭੇ ਵਤ੍ਥਬ੍ਬਂ, ਸਬ੍ਬੇਸਂ ਸਾਧਾਰਣੇ ਘਰਦ੍ਵਾਰਮੂਲੇ ਵਾ ਗਬ੍ਭਸ੍ਸ ਵਾ ਘਰਦ੍ਵਾਰਮੂਲਸ੍ਸ ਵਾ ਹਤ੍ਥਪਾਸੇ. ਸਚੇ ਅਪਰਿਕ੍ਖਿਤ੍ਤਂ ਹੋਤਿ, ਯਸ੍ਮਿਂ ਗਬ੍ਭੇ ਚੀਵਰਂ ਨਿਕ੍ਖਿਤ੍ਤਂ, ਤਸ੍ਮਿਂ ਗਬ੍ਭੇ ਵਤ੍ਥਬ੍ਬਂ ਗਬ੍ਭਸ੍ਸ ਵਾ ਹਤ੍ਥਪਾਸੇ. ਉਦੋਸਿਤਅਡ੍ਡਮਾਲ਼ਪਾਸਾਦਹਮ੍ਮਿਯੇਸੁਪਿ ਨਿਵੇਸਨੇ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ.

ਸਚੇ ਏਕਕੁਲਸ੍ਸ ਨਾਵਾ ਹੋਤਿ, ਅਨ੍ਤੋਨਾਵਾਯਂ ਚੀਵਰਂ ਨਿਕ੍ਖਿਪਿਤ੍ਵਾ ਅਨ੍ਤੋਨਾਵਾਯਂ ਵਤ੍ਥਬ੍ਬਂ. ਸਚੇ ਨਾਨਾਕੁਲਸ੍ਸ ਨਾਵਾ ਹੋਤਿ ਨਾਨਾਗਬ੍ਭਾ ਨਾਨਾਓਵਰਕਾ, ਯਸ੍ਮਿਂ ਓਵਰਕੇ ਚੀਵਰਂ ਨਿਕ੍ਖਿਤ੍ਤਂ ਹੋਤਿ, ਤਸ੍ਮਿਂ ਓਵਰਕੇ ਵਤ੍ਥਬ੍ਬਂ ਓਵਰਕਸ੍ਸ ਹਤ੍ਥਪਾਸੇ ਵਾ.

ਸਚੇ ਏਕਕੁਲਸ੍ਸ ਸਤ੍ਥੋ ਹੋਤਿ, ਤਸ੍ਮਿਂ ਸਤ੍ਥੇ ਚੀਵਰਂ ਨਿਕ੍ਖਿਪਿਤ੍ਵਾ ਪੁਰਤੋ ਵਾ ਪਚ੍ਛਤੋ ਵਾ ਸਤ੍ਤਬ੍ਭਨ੍ਤਰਾ ਨ ਵਿਜਹਿਤਬ੍ਬਾ, ਪਸ੍ਸਤੋ ਅਬ੍ਭਨ੍ਤਰਂ ਨ ਵਿਜਹਿਤਬ੍ਬਂ. ਏਕਂ ਅਬ੍ਭਨ੍ਤਰਂ ਅਟ੍ਠਵੀਸਤਿਹਤ੍ਥਂ ਹੋਤਿ. ਸਚੇ ਨਾਨਾਕੁਲਸ੍ਸ ਸਤ੍ਥੋ ਹੋਤਿ, ਸਤ੍ਥੇ ਚੀਵਰਂ ਨਿਕ੍ਖਿਪਿਤ੍ਵਾ ਚੀਵਰਸ੍ਸ ਹਤ੍ਥਪਾਸੇ ਵਸਿਤਬ੍ਬਂ. ਸਚੇ ਸਤ੍ਥੋ ਗਚ੍ਛਨ੍ਤੋ ਗਾਮਂ ਵਾ ਨਦਿਂ ਵਾ ਪਰਿਯਾਦਿਯਿਤ੍ਵਾ ਤਿਟ੍ਠਤਿ, ਅਨ੍ਤੋਪਵਿਟ੍ਠੇਨ ਸਦ੍ਧਿਂ ਏਕਾਬਦ੍ਧੋ ਹੁਤ੍ਵਾ ਓਰਞ੍ਚ ਪਾਰਞ੍ਚ ਫਰਿਤ੍ਵਾ ਠਿਤੋ ਹੋਤਿ, ਸਤ੍ਥਪਰਿਹਾਰੋ ਲਬ੍ਭਤਿ. ਅਥ ਗਾਮੇ ਵਾ ਨਦਿਯਾ ਵਾ ਪਰਿਯਾਪਨ੍ਨੋ ਹੋਤਿ, ਗਾਮਪਰਿਹਾਰੋ ਚੇਵ ਨਦੀਪਰਿਹਾਰੋ ਚ ਲਬ੍ਭਤਿ. ਸਚੇ ਵਿਹਾਰਸੀਮਂ ਅਤਿਕ੍ਕਮਿਤ੍ਵਾ ਤਿਟ੍ਠਤਿ, ਅਨ੍ਤੋਸੀਮਾਯ ਚ ਚੀਵਰਂ ਹੋਤਿ, ਵਿਹਾਰਂ ਗਨ੍ਤ੍ਵਾ ਵਸਿਤਬ੍ਬਂ. ਸਚੇ ਬਹਿਸੀਮਾਯ ਚੀਵਰਂ ਹੋਤਿ, ਸਤ੍ਥਸਮੀਪੇਯੇਵ ਵਸਿਤਬ੍ਬਂ. ਸਚੇ ਗਚ੍ਛਨ੍ਤੋ ਸਤ੍ਥੋ ਸਕਟੇ ਵਾ ਭਗ੍ਗੇ ਗੋਣੇ ਵਾ ਨਟ੍ਠੇ ਅਨ੍ਤਰਾ ਛਿਜ੍ਜਤਿ, ਯਸ੍ਮਿਂ ਕੋਟ੍ਠਾਸੇ ਚੀਵਰਂ ਨਿਕ੍ਖਿਤ੍ਤਂ, ਤਤ੍ਥ ਵਸਿਤਬ੍ਬਂ.

ਸਚੇ ਏਕਕੁਲਸ੍ਸ ਖੇਤ੍ਤਂ ਹੋਤਿ ਪਰਿਕ੍ਖਿਤ੍ਤਞ੍ਚ, ਅਨ੍ਤੋਖੇਤ੍ਤੇ ਚੀਵਰਂ ਨਿਕ੍ਖਿਪਿਤ੍ਵਾ ਅਨ੍ਤੋਖੇਤ੍ਤੇ ਵਤ੍ਥਬ੍ਬਂ. ਸਚੇ ਅਪਰਿਕ੍ਖਿਤ੍ਤਂ ਹੋਤਿ, ਚੀਵਰਸ੍ਸ ਹਤ੍ਥਪਾਸੇ ਵਸਿਤਬ੍ਬਂ. ਸਚੇ ਨਾਨਾਕੁਲਸ੍ਸ ਖੇਤ੍ਤਂ ਹੋਤਿ ਪਰਿਕ੍ਖਿਤ੍ਤਞ੍ਚ, ਅਨ੍ਤੋਖੇਤ੍ਤੇ ਚੀਵਰਂ ਨਿਕ੍ਖਿਪਿਤ੍ਵਾ ਦ੍ਵਾਰਮੂਲੇ ਵਤ੍ਥਬ੍ਬਂ ਦ੍ਵਾਰਮੂਲਸ੍ਸ ਹਤ੍ਥਪਾਸੇ ਵਾ. ਸਚੇ ਅਪਰਿਕ੍ਖਿਤ੍ਤਂ ਹੋਤਿ, ਚੀਵਰਸ੍ਸ ਹਤ੍ਥਪਾਸੇ ਵਸਿਤਬ੍ਬਂ.

ਸਚੇ ਏਕਕੁਲਸ੍ਸ ਧਞ੍ਞਕਰਣਂ ਹੋਤਿ ਪਰਿਕ੍ਖਿਤ੍ਤਞ੍ਚ, ਅਨ੍ਤੋਧਞ੍ਞਕਰਣੇ ਚੀਵਰਂ ਨਿਕ੍ਖਿਪਿਤ੍ਵਾ ਅਨ੍ਤੋਧਞ੍ਞਕਰਣੇ ਵਤ੍ਥਬ੍ਬਂ. ਸਚੇ ਅਪਰਿਕ੍ਖਿਤ੍ਤਂ ਹੋਤਿ, ਚੀਵਰਸ੍ਸ ਹਤ੍ਥਪਾਸੇ ਵਸਿਤਬ੍ਬਂ. ਸਚੇ ਨਾਨਾਕੁਲਸ੍ਸ ਧਞ੍ਞਕਰਣਂ ਹੋਤਿ ਪਰਿਕ੍ਖਿਤ੍ਤਞ੍ਚ, ਅਨ੍ਤੋਧਞ੍ਞਕਰਣੇ ਚੀਵਰਂ ਨਿਕ੍ਖਿਪਿਤ੍ਵਾ ਦ੍ਵਾਰਮੂਲੇ ਵਾ ਵਤ੍ਥਬ੍ਬਂ ਦ੍ਵਾਰਮੂਲਸ੍ਸ ਵਾ ਹਤ੍ਥਪਾਸੇ. ਸਚੇ ਅਪਰਿਕ੍ਖਿਤ੍ਤਂ ਹੋਤਿ, ਚੀਵਰਸ੍ਸ ਹਤ੍ਥਪਾਸੇ ਵਸਿਤਬ੍ਬਂ. ਪੁਪ੍ਫਾਰਾਮਫਲਾਰਾਮੇਸੁਪਿ ਖੇਤ੍ਤੇ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ.

ਸਚੇ ਏਕਕੁਲਸ੍ਸ ਵਿਹਾਰੋ ਹੋਤਿ ਪਰਿਕ੍ਖਿਤ੍ਤੋ ਚ, ਅਨ੍ਤੋਵਿਹਾਰੇ ਚੀਵਰਂ ਨਿਕ੍ਖਿਪਿਤ੍ਵਾ ਅਨ੍ਤੋਵਿਹਾਰੇ ਵਤ੍ਥਬ੍ਬਂ. ਸਚੇ ਅਪਰਿਕ੍ਖਿਤ੍ਤੋ ਹੋਤਿ, ਯਸ੍ਮਿਂ ਵਿਹਾਰੇ ਚੀਵਰਂ ਨਿਕ੍ਖਿਤ੍ਤਂ, ਤਸ੍ਮਿਂ ਵਤ੍ਥਬ੍ਬਂ ਤਸ੍ਸ ਵਿਹਾਰਸ੍ਸ ਵਾ ਹਤ੍ਥਪਾਸੇ.

ਸਚੇ ਏਕਕੁਲਸ੍ਸ ਰੁਕ੍ਖਮੂਲਂ ਹੋਤਿ, ਯਂ ਮਜ੍ਝਨ੍ਹਿਕੇ ਕਾਲੇ ਸਮਨ੍ਤਾ ਛਾਯਾ ਫਰਤਿ, ਅਨ੍ਤੋਛਾਯਾਯ ਚੀਵਰਂ ਨਿਕ੍ਖਿਪਿਤ੍ਵਾ ਅਨ੍ਤੋਛਾਯਾਯ ਵਤ੍ਥਬ੍ਬਂ. ਵਿਰਲ਼ਸਾਖਸ੍ਸ ਪਨ ਰੁਕ੍ਖਸ੍ਸ ਆਤਪੇਨ ਫੁਟ੍ਠੋਕਾਸੇ ਠਪਿਤਂ ਨਿਸ੍ਸਗ੍ਗਿਯਮੇਵ ਹੋਤਿ, ਤਸ੍ਮਾ ਤਾਦਿਸਸ੍ਸ ਰੁਕ੍ਖਸ੍ਸ ਸਾਖਚ੍ਛਾਯਾਯ ਵਾ ਖਨ੍ਧਚ੍ਛਾਯਾਯ ਵਾ ਠਪੇਤਬ੍ਬਂ. ਸਚੇ ਸਾਖਾਯ ਵਾ ਵਿਟਪੇ ਵਾ ਠਪੇਤਿ, ਉਪਰਿ ਅਞ੍ਞਸਾਖਚ੍ਛਾਯਾਯ ਫੁਟ੍ਠੋਕਾਸੇਯੇਵ ਠਪੇਤਬ੍ਬਂ. ਖੁਜ੍ਜਰੁਕ੍ਖਸ੍ਸ ਛਾਯਾ ਦੂਰਂ ਗਚ੍ਛਤਿ, ਛਾਯਾਯ ਗਤਟ੍ਠਾਨੇ ਠਪੇਤੁਂ ਵਟ੍ਟਤਿਯੇਵ. ਸਚੇ ਨਾਨਾਕੁਲਸ੍ਸ ਰੁਕ੍ਖਮੂਲਂ ਹੋਤਿ, ਚੀਵਰਸ੍ਸ ਹਤ੍ਥਪਾਸੇ ਵਸਿਤਬ੍ਬਂ.

ਅਜ੍ਝੋਕਾਸੇ ਪਨ ਅਗਾਮਕੇ ਅਰਞ੍ਞੇ ਚੀਵਰਂ ਠਪੇਤ੍ਵਾ ਤਸ੍ਸ ਸਮਨ੍ਤਾ ਸਤ੍ਤਬ੍ਭਨ੍ਤਰੇ ਵਸਿਤਬ੍ਬਂ. ਅਗਾਮਕਂ ਨਾਮ ਅਰਞ੍ਞਂ ਵਿਞ੍ਝਾਟਵੀਆਦੀਸੁ ਵਾ ਸਮੁਦ੍ਦਮਜ੍ਝੇ ਵਾ ਮਚ੍ਛਬਨ੍ਧਾਨਂ ਅਗਮਨਪਥੇ ਦੀਪਕੇਸੁ ਲਬ੍ਭਤਿ. ਤਾਦਿਸੇ ਅਰਞ੍ਞੇ ਮਜ੍ਝੇ ਠਿਤਸ੍ਸ ਸਮਨ੍ਤਾ ਸਤ੍ਤਬ੍ਭਨ੍ਤਰਪਰਿਚ੍ਛੇਦੋ, ਵਿਨਿਬ੍ਬੇਧੇਨ ਚੁਦ੍ਦਸ ਹੋਨ੍ਤਿ. ਮਜ੍ਝੇ ਨਿਸਿਨ੍ਨੋ ਪੁਰਤ੍ਥਿਮਾਯ ਵਾ ਪਚ੍ਛਿਮਾਯ ਵਾ ਦਿਸਾਯ ਪਰਿਯਨ੍ਤੇ ਠਪਿਤਚੀਵਰਂ ਰਕ੍ਖਤਿ. ਸਚੇ ਪਨ ਅਰੁਣੁਗ੍ਗਮਨਸਮਯੇ ਕੇਸਗ੍ਗਮਤ੍ਤਮ੍ਪਿ ਪੁਰਤ੍ਥਿਮਂ ਦਿਸਂ ਗਚ੍ਛਤਿ, ਪਚ੍ਛਿਮਾਯ ਦਿਸਾਯ ਚੀਵਰਂ ਨਿਸ੍ਸਗ੍ਗਿਯਂ ਹੋਤਿ. ਏਸ ਨਯੋ ਇਤਰਸ੍ਮਿਂ. ਨਿਸ੍ਸਗ੍ਗਿਯਂ ਪਨ ਚੀਵਰਂ ਅਨਿਸ੍ਸਜ੍ਜਿਤ੍ਵਾ ਪਰਿਭੁਞ੍ਜਨ੍ਤੋ ਦੁਕ੍ਕਟਂ ਆਪਜ੍ਜਤਿ.

੫੨. ਸਚੇ ਪਧਾਨਿਕੋ ਭਿਕ੍ਖੁ ਸਬ੍ਬਰਤ੍ਤਿਂ ਪਧਾਨਮਨੁਯੁਞ੍ਜਿਤ੍ਵਾ ਪਚ੍ਚੂਸਸਮਯੇ ‘‘ਨਹਾਯਿਸ੍ਸਾਮੀ’’ਤਿ ਤੀਣਿ ਚੀਵਰਾਨਿ ਤੀਰੇ ਠਪੇਤ੍ਵਾ ਨਦਿਂ ਓਤਰਤਿ, ਨਹਾਯਨ੍ਤਸ੍ਸੇਵ ਚਸ੍ਸ ਅਰੁਣਂ ਉਟ੍ਠਹਤਿ, ਕਿਂ ਕਾਤਬ੍ਬਂ? ਸੋ ਹਿ ਯਦਿ ਉਤ੍ਤਰਿਤ੍ਵਾ ਚੀਵਰਂ ਨਿਵਾਸੇਤਿ, ਨਿਸ੍ਸਗ੍ਗਿਯਂ ਚੀਵਰਂ, ਅਨਿਸ੍ਸਜ੍ਜਿਤ੍ਵਾ ਪਰਿਭੁਞ੍ਜਨਪਚ੍ਚਯਾ ਦੁਕ੍ਕਟਂ ਆਪਜ੍ਜਤਿ. ਅਥ ਨਗ੍ਗੋ ਗਚ੍ਛਤਿ, ਏਵਮ੍ਪਿ ਦੁਕ੍ਕਟਂ ਆਪਜ੍ਜਤੀਤਿ? ਨਾਪਜ੍ਜਤਿ. ਸੋ ਹਿ ਯਾਵ ਅਞ੍ਞਂ ਭਿਕ੍ਖੁਂ ਦਿਸ੍ਵਾ ਵਿਨਯਕਮ੍ਮਂ ਨ ਕਰੋਤਿ, ਤਾਵ ਤੇਸਂ ਚੀਵਰਾਨਂ ਅਪਰਿਭੋਗਾਰਹਤ੍ਤਾ ਨਟ੍ਠਚੀਵਰਟ੍ਠਾਨੇ ਠਿਤੋ ਹੋਤਿ, ਨਟ੍ਠਚੀਵਰਸ੍ਸ ਚ ਅਕਪ੍ਪਿਯਂ ਨਾਮ ਨਤ੍ਥਿ, ਤਸ੍ਮਾ ਏਕਂ ਨਿਵਾਸੇਤ੍ਵਾ ਦ੍ਵੇ ਹਤ੍ਥੇਨ ਗਹੇਤ੍ਵਾ ਵਿਹਾਰਂ ਗਨ੍ਤ੍ਵਾ ਵਿਨਯਕਮ੍ਮਂ ਕਾਤਬ੍ਬਂ. ਸਚੇ ਦੂਰੇ ਵਿਹਾਰੋ ਹੋਤਿ, ਅਨ੍ਤਰਾਮਗ੍ਗੇ ਮਨੁਸ੍ਸਾ ਸਞ੍ਚਰਨ੍ਤਿ, ਏਕਂ ਨਿਵਾਸੇਤ੍ਵਾ ਏਕਂ ਪਾਰੁਪਿਤ੍ਵਾ ਏਕਂ ਅਂਸਕੂਟੇ ਠਪੇਤ੍ਵਾ ਗਨ੍ਤਬ੍ਬਂ. ਸਚੇ ਵਿਹਾਰੇ ਸਭਾਗਂ ਭਿਕ੍ਖੁਂ ਨ ਪਸ੍ਸਤਿ, ਭਿਕ੍ਖਾਚਾਰਂ ਗਤਾ ਹੋਨ੍ਤਿ, ਸਙ੍ਘਾਟਿਂ ਬਹਿਗਾਮੇ ਠਪੇਤ੍ਵਾ ਸਨ੍ਤਰੁਤ੍ਤਰੇਨ ਆਸਨਸਾਲਂ ਗਨ੍ਤ੍ਵਾ ਵਿਨਯਕਮ੍ਮਂ ਕਾਤਬ੍ਬਂ. ਸਚੇ ਬਹਿਗਾਮੇ ਚੋਰਭਯਂ ਹੋਤਿ, ਪਾਰੁਪਿਤ੍ਵਾ ਗਨ੍ਤਬ੍ਬਂ. ਸਚੇ ਆਸਨਸਾਲਾ ਸਮ੍ਬਾਧਾ ਹੋਤਿ, ਜਨਾਕਿਣ੍ਣਾ ਨ ਸਕ੍ਕਾ ਏਕਮਨ੍ਤੇ ਚੀਵਰਂ ਅਪਨੇਤ੍ਵਾ ਵਿਨਯਕਮ੍ਮਂ ਕਾਤੁਂ, ਏਕਂ ਭਿਕ੍ਖੁਂ ਆਦਾਯ ਬਹਿਗਾਮਂ ਗਨ੍ਤ੍ਵਾ ਵਿਨਯਕਮ੍ਮਂ ਕਤ੍ਵਾ ਚੀਵਰਾਨਿ ਪਰਿਭੁਞ੍ਜਿਤਬ੍ਬਾਨਿ.

ਸਚੇ ਥੇਰਾ ਭਿਕ੍ਖੂ ਦਹਰਾਨਂ ਹਤ੍ਥੇ ਪਤ੍ਤਚੀਵਰਂ ਦਤ੍ਵਾ ਮਗ੍ਗਂ ਗਚ੍ਛਨ੍ਤਾ ਪਚ੍ਛਿਮਯਾਮੇ ਸਯਿਤੁਕਾਮਾ ਹੋਨ੍ਤਿ, ਅਤ੍ਤਨੋ ਅਤ੍ਤਨੋ ਚੀਵਰਂ ਹਤ੍ਥਪਾਸੇ ਕਤ੍ਵਾਵ ਸਯਿਤਬ੍ਬਂ. ਸਚੇ ਗਚ੍ਛਨ੍ਤਾਨਂਯੇਵ ਅਸਮ੍ਪਤ੍ਤੇਸੁ ਦਹਰੇਸੁ ਅਰੁਣਂ ਉਗ੍ਗਚ੍ਛਤਿ, ਚੀਵਰਂ ਨਿਸ੍ਸਗ੍ਗਿਯਂ ਹੋਤਿ, ਨਿਸ੍ਸਯੋ ਪਨ ਨ ਪਟਿਪ੍ਪਸ੍ਸਮ੍ਭਤਿ. ਦਹਰਾਨਮ੍ਪਿ ਪੁਰਤੋ ਗਚ੍ਛਨ੍ਤਾਨਂ ਥੇਰੇਸੁ ਅਸਮ੍ਪਤ੍ਤੇਸੁ ਏਸੇਵ ਨਯੋ. ਮਗ੍ਗਂ ਵਿਰਜ੍ਝਿਤ੍ਵਾ ਅਰਞ੍ਞੇ ਅਞ੍ਞਮਞ੍ਞਂ ਅਪਸ੍ਸਨ੍ਤੇਸੁਪਿ ਏਸੇਵ ਨਯੋ. ਸਚੇ ਪਨ ਦਹਰਾ ‘‘ਮਯਂ, ਭਨ੍ਤੇ, ਮੁਹੁਤ੍ਤਂ ਸਯਿਤ੍ਵਾ ਅਸੁਕਸ੍ਮਿਂ ਨਾਮ ਓਕਾਸੇ ਤੁਮ੍ਹੇ ਸਮ੍ਪਾਪੁਣਿਸ੍ਸਾਮਾ’’ਤਿ ਵਤ੍ਵਾ ਯਾਵ ਅਰੁਣੁਗ੍ਗਮਨਾ ਸਯਨ੍ਤਿ, ਚੀਵਰਞ੍ਚ ਨਿਸ੍ਸਗ੍ਗਿਯਂ ਹੋਤਿ, ਨਿਸ੍ਸਯੋ ਚ ਪਟਿਪ੍ਪਸ੍ਸਮ੍ਭਤਿ. ਦਹਰੇ ਉਯ੍ਯੋਜੇਤ੍ਵਾ ਥੇਰੇਸੁ ਸਯਨ੍ਤੇਸੁਪਿ ਏਸੇਵ ਨਯੋ. ਦ੍ਵੇਧਾਪਥਂ ਦਿਸ੍ਵਾ ਥੇਰਾ ‘‘ਅਯਂ ਮਗ੍ਗੋ’’, ਦਹਰਾ ‘‘ਅਯਂ ਮਗ੍ਗੋ’’ਤਿ ਵਤ੍ਵਾ ਅਞ੍ਞਮਞ੍ਞਸ੍ਸ ਵਚਨਂ ਅਗ੍ਗਹੇਤ੍ਵਾ ਗਤਾ, ਸਹ ਅਰੁਣਸ੍ਸ ਉਗ੍ਗਮਨਾ ਚੀਵਰਾਨਿ ਚ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਨਿਸ੍ਸਯੋ ਚ ਪਟਿਪ੍ਪਸ੍ਸਮ੍ਭਤਿ. ਸਚੇ ਦਹਰਾ ਮਗ੍ਗਤੋ ਓਕ੍ਕਮ੍ਮ ‘‘ਅਨ੍ਤੋਅਰੁਣੇਯੇਵ ਨਿਵਤ੍ਤਿਸ੍ਸਾਮਾ’’ਤਿ ਭੇਸਜ੍ਜਤ੍ਥਾਯ ਗਾਮਂ ਪਵਿਸਿਤ੍ਵਾ ਆਗਚ੍ਛਨ੍ਤਿ, ਅਸਮ੍ਪਤ੍ਤਾਨਂਯੇਵ ਚ ਨੇਸਂ ਅਰੁਣੋ ਉਗ੍ਗਚ੍ਛਤਿ, ਚੀਵਰਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਨਿਸ੍ਸਯੋ ਪਨ ਨ ਪਟਿਪ੍ਪਸ੍ਸਮ੍ਭਤਿ. ਸਚੇ ਪਨ ਧੇਨੁਭਯੇਨ ਵਾ ਸੁਨਖਭਯੇਨ ਵਾ ਮੁਹੁਤ੍ਤਂ ਠਤ੍ਵਾ ‘‘ਗਮਿਸ੍ਸਾਮਾ’’ਤਿ ਠਤ੍ਵਾ ਵਾ ਨਿਸੀਦਿਤ੍ਵਾ ਵਾ ਗਚ੍ਛਨ੍ਤਿ, ਅਨ੍ਤਰਾ ਅਰੁਣੇ ਉਗ੍ਗਤੇ ਚੀਵਰਾਨਿ ਚ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਨਿਸ੍ਸਯੋ ਚ ਪਟਿਪ੍ਪਸ੍ਸਮ੍ਭਤਿ.

ਸਚੇ ‘‘ਅਨ੍ਤੋਅਰੁਣੇਯੇਵ ਆਗਮਿਸ੍ਸਾਮਾ’’ਤਿ ਅਨ੍ਤੋਸੀਮਾਯਂ ਗਾਮਂ ਪਵਿਟ੍ਠਾਨਂ ਅਨ੍ਤਰਾ ਅਰੁਣੋ ਉਗ੍ਗਚ੍ਛਤਿ, ਨੇਵ ਚੀਵਰਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਨ ਨਿਸ੍ਸਯੋ ਪਟਿਪ੍ਪਸ੍ਸਮ੍ਭਤਿ. ਸਚੇ ਪਨ ‘‘ਵਿਭਾਯਤੁ ਤਾਵਾ’’ਤਿ ਨਿਸੀਦਨ੍ਤਿ, ਅਰੁਣੇ ਉਗ੍ਗਤੇ ਨ ਚੀਵਰਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਨਿਸ੍ਸਯੋ ਪਨ ਪਟਿਪ੍ਪਸ੍ਸਮ੍ਭਤਿ. ਸਚੇ ਯੇਪਿ ‘‘ਅਨ੍ਤੋਅਰੁਣੇਯੇਵ ਆਗਮਿਸ੍ਸਾਮਾ’’ਤਿ ਸਾਮਨ੍ਤਵਿਹਾਰਂ ਧਮ੍ਮਸ੍ਸਵਨਤ੍ਥਾਯ ਸਉਸ੍ਸਾਹਾ ਗਚ੍ਛਨ੍ਤਿ, ਅਨ੍ਤਰਾਮਗ੍ਗੇਯੇਵ ਚ ਨੇਸਂ ਅਰੁਣੋ ਉਗ੍ਗਚ੍ਛਤਿ, ਚੀਵਰਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਨਿਸ੍ਸਯੋ ਪਨ ਨ ਪਟਿਪ੍ਪਸ੍ਸਮ੍ਭਤਿ. ਸਚੇ ਧਮ੍ਮਗਾਰਵੇਨ ‘‘ਯਾਵਪਰਿਯੋਸਾਨਂ ਸੁਤ੍ਵਾਵ ਗਮਿਸ੍ਸਾਮਾ’’ਤਿ ਨਿਸੀਦਨ੍ਤਿ, ਸਹ ਅਰੁਣਸ੍ਸ ਉਗ੍ਗਮਨਾ ਚੀਵਰਾਨਿਪਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ, ਨਿਸ੍ਸਯੋ ਚ ਪਟਿਪ੍ਪਸ੍ਸਮ੍ਭਤਿ. ਥੇਰੇਨ ਦਹਰਂ ਚੀਵਰਧੋਵਨਤ੍ਥਾਯ ਗਾਮਕਂ ਪੇਸੇਨ੍ਤੇਨ ਅਤ੍ਤਨੋ ਚੀਵਰਂ ਪਚ੍ਚੁਦ੍ਧਰਿਤ੍ਵਾਵ ਦਾਤਬ੍ਬਂ, ਦਹਰਸ੍ਸਪਿ ਚੀਵਰਂ ਪਚ੍ਚੁਦ੍ਧਰਾਪੇਤ੍ਵਾਵ ਠਪੇਤਬ੍ਬਂ. ਸਚੇ ਅਸਤਿਯਾ ਗਚ੍ਛਤਿ, ਅਤ੍ਤਨੋ ਚੀਵਰਂ ਪਚ੍ਚੁਦ੍ਧਰਿਤ੍ਵਾ ਦਹਰਸ੍ਸ ਚੀਵਰਂ ਵਿਸ੍ਸਾਸੇਨ ਗਹੇਤ੍ਵਾ ਠਪੇਤਬ੍ਬਂ. ਸਚੇ ਥੇਰੋ ਨ ਸਰਤਿ, ਦਹਰੋਵ ਸਰਤਿ, ਦਹਰੇਨ ਅਤ੍ਤਨੋ ਚੀਵਰਂ ਪਚ੍ਚੁਦ੍ਧਰਿਤ੍ਵਾ ਥੇਰਸ੍ਸ ਚੀਵਰਂ ਵਿਸ੍ਸਾਸੇਨ ਗਹੇਤ੍ਵਾ ਗਨ੍ਤ੍ਵਾ ਵਤ੍ਤਬ੍ਬਂ ‘‘ਭਨ੍ਤੇ, ਤੁਮ੍ਹਾਕਂ ਚੀਵਰਂ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਥਾ’’ਤਿ. ਅਤ੍ਤਨੋਪਿ ਚੀਵਰਂ ਅਧਿਟ੍ਠਾਤਬ੍ਬਂ. ਏਵਂ ਏਕਸ੍ਸ ਸਤਿਯਾਪਿ ਆਪਤ੍ਤਿਮੋਕ੍ਖੋ ਹੋਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਚੀਵਰਵਿਪ੍ਪਵਾਸਵਿਨਿਚ੍ਛਯਕਥਾ ਸਮਤ੍ਤਾ.