੧੦. ਭਣ੍ਡਪਟਿਸਾਮਨਵਿਨਿਚ੍ਛਯਕਥਾ

੫੩. ਭਣ੍ਡਸ੍ਸ ਪਟਿਸਾਮਨਨ੍ਤਿ ਪਰੇਸਂ ਭਣ੍ਡਸ੍ਸ ਗੋਪਨਂ. ਪਰੇਸਞ੍ਹਿ (ਪਾਚਿ. ਅਟ੍ਠ. ੫੦੬) ਕਪ੍ਪਿਯਵਤ੍ਥੁ ਵਾ ਹੋਤੁ ਅਕਪ੍ਪਿਯਵਤ੍ਥੁ ਵਾ, ਅਨ੍ਤਮਸੋ ਮਾਤੁ ਕਣ੍ਣਪਿਲ਼ਨ੍ਧਨਂ ਕਾਲਪਣ੍ਣਮ੍ਪਿ ਗਿਹਿਸਨ੍ਤਕਂ ਭਣ੍ਡਾਗਾਰਿਕਸੀਸੇਨ ਪਟਿਸਾਮੇਨ੍ਤਸ੍ਸ ਪਾਚਿਤ੍ਤਿਯਂ. ਸਚੇ ਪਨ ਮਾਤਾਪਿਤੂਨਂ ਸਨ੍ਤਕਂ ਅਵਸ੍ਸਂ ਪਟਿਸਾਮੇਤਬ੍ਬਂ ਕਪ੍ਪਿਯਭਣ੍ਡਂ ਹੋਤਿ, ਅਤ੍ਤਨੋ ਅਤ੍ਥਾਯ ਗਹੇਤ੍ਵਾ ਪਟਿਸਾਮੇਤਬ੍ਬਂ. ‘‘ਇਦਂ ਪਟਿਸਾਮੇਤ੍ਵਾ ਦੇਹੀ’’ਤਿ ਪਨ ਵੁਤ੍ਤੇ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਪਿਤਬ੍ਬਂ. ਸਚੇ ‘‘ਪਟਿਸਾਮੇਹੀ’’ਤਿ ਪਾਤੇਤ੍ਵਾ ਗਚ੍ਛਨ੍ਤਿ, ਪਲਿਬੋਧੋ ਨਾਮ ਹੋਤਿ, ਪਟਿਸਾਮੇਤੁਂ ਵਟ੍ਟਤਿ. ਵਿਹਾਰੇ ਕਮ੍ਮਂ ਕਰੋਨ੍ਤਾ ਵਡ੍ਢਕੀਆਦਯੋ ਵਾ ਰਾਜਵਲ੍ਲਭਾ ਵਾ ‘‘ਅਤ੍ਤਨੋ ਉਪਕਰਣਭਣ੍ਡਂ ਵਾ ਸਯਨਭਣ੍ਡਂ ਵਾ ਪਟਿਸਾਮੇਤ੍ਵਾ ਦੇਥਾ’’ਤਿ ਵਦਨ੍ਤਿ, ਛਨ੍ਦੇਨਪਿ ਭਯੇਨਪਿ ਨ ਕਾਤਬ੍ਬਮੇਵ, ਗੁਤ੍ਤਟ੍ਠਾਨਂ ਪਨ ਦਸ੍ਸੇਤੁਂ ਵਟ੍ਟਤਿ, ਬਲਕ੍ਕਾਰੇਨ ਪਾਤੇਤ੍ਵਾ ਗਤੇਸੁ ਚ ਪਟਿਸਾਮੇਤੁਂ.

ਸਚੇ (ਪਾਰਾ. ਅਟ੍ਠ. ੧.੧੧੧) ਅਤ੍ਤਨੋ ਹਤ੍ਥੇ ਪਟਿਸਾਮਨਤ੍ਥਾਯ ਠਪਿਤਂ ਭਣ੍ਡਂ ਸਾਮਿਕੇਨ ‘‘ਦੇਹਿ ਮੇ ਭਣ੍ਡ’’ਨ੍ਤਿ ਯਾਚਿਤੋ ਅਦਾਤੁਕਾਮੋ ‘‘ਨਾਹਂ ਗਣ੍ਹਾਮੀ’’ਤਿ ਭਣਤਿ, ਸਮ੍ਪਜਾਨਮੁਸਾਵਾਦੇਪਿ ਅਦਿਨ੍ਨਾਦਾਨਸ੍ਸ ਪਯੋਗਤ੍ਤਾ ਦੁਕ੍ਕਟਂ. ‘‘ਕਿਂ ਤੁਮ੍ਹੇ ਭਣਥ, ਨੇਵਿਦਂ ਮਯ੍ਹਂ ਅਨੁਰੂਪਂ, ਨ ਤੁਮ੍ਹਾਕ’’ਨ੍ਤਿਆਦੀਨਿ ਵਦਨ੍ਤਸ੍ਸਪਿ ਦੁਕ੍ਕਟਮੇਵ. ‘‘ਰਹੋ ਮਯਾ ਏਤਸ੍ਸ ਹਤ੍ਥੇ ਠਪਿਤਂ, ਨ ਅਞ੍ਞੋ ਕੋਚਿ ਜਾਨਾਤਿ, ਦਸ੍ਸਤਿ ਨੁ ਖੋ ਮੇ, ਨੋ’’ਤਿ ਸਾਮਿਕੋ ਵਿਮਤਿਂ ਉਪ੍ਪਾਦੇਤਿ, ਭਿਕ੍ਖੁਸ੍ਸ ਥੁਲ੍ਲਚ੍ਚਯਂ. ਤਸ੍ਸ ਫਰੁਸਾਦਿਭਾਵਂ ਦਿਸ੍ਵਾ ਸਾਮਿਕੋ ‘‘ਨ ਮਯ੍ਹਂ ਦਸ੍ਸਤੀ’’ਤਿ ਧੁਰਂ ਨਿਕ੍ਖਿਪਤਿ, ਤਤ੍ਰ ਸਚਾਯਂ ਭਿਕ੍ਖੁ ‘‘ਕਿਲਮੇਤ੍ਵਾ ਨਂ ਦਸ੍ਸਾਮੀ’’ਤਿ ਦਾਨੇ ਸਉਸ੍ਸਾਹੋ, ਰਕ੍ਖਤਿ ਤਾਵ. ਸਚੇਪਿ ਸੋ ਦਾਨੇ ਨਿਰੁਸ੍ਸਾਹੋ, ਭਣ੍ਡਸਾਮਿਕੋ ਪਨ ਗਹਣੇ ਸਉਸ੍ਸਾਹੋ, ਰਕ੍ਖਤਿਯੇਵ. ਯਦਿ ਪਨ ਤਸ੍ਮਿਂ ਦਾਨੇ ਨਿਰੁਸ੍ਸਾਹੋ ਭਣ੍ਡਸਾਮਿਕੋ ‘‘ਨ ਮਯ੍ਹਂ ਦਸ੍ਸਤੀ’’ਤਿ ਧੁਰਂ ਨਿਕ੍ਖਿਪਤਿ, ਏਵਂ ਉਭਿਨ੍ਨਂ ਧੁਰਨਿਕ੍ਖੇਪੇਨ ਭਿਕ੍ਖੁਨੋ ਪਾਰਾਜਿਕਂ. ਯਦਿਪਿ ਮੁਖੇਨ ‘‘ਦਸ੍ਸਾਮੀ’’ਤਿ ਵਦਤਿ, ਚਿਤ੍ਤੇਨ ਪਨ ਅਦਾਤੁਕਾਮੋ, ਏਵਮ੍ਪਿ ਸਾਮਿਕਸ੍ਸ ਧੁਰਨਿਕ੍ਖੇਪੇ ਪਾਰਾਜਿਕਂ. ਤਂ ਪਨ ਸਙ੍ਗੋਪਨਤ੍ਥਾਯ ਅਤ੍ਤਨੋ ਹਤ੍ਥੇ ਪਰੇਹਿ ਠਪਿਤਂ ਭਣ੍ਡਂ ਅਗੁਤ੍ਤਦੇਸਤੋ ਠਾਨਾ ਚਾਵੇਤ੍ਵਾ ਗੁਤ੍ਤਟ੍ਠਾਨੇ ਠਪਨਤ੍ਥਾਯ ਹਰਤੋ ਅਨਾਪਤ੍ਤਿ. ਥੇਯ੍ਯਚਿਤ੍ਤੇਨਪਿ ਠਾਨਾ ਚਾਵੇਨ੍ਤਸ੍ਸ ਅਵਹਾਰੋ ਨਤ੍ਥਿ. ਕਸ੍ਮਾ? ਅਤ੍ਤਨੋ ਹਤ੍ਥੇ ਨਿਕ੍ਖਿਤ੍ਤਤ੍ਤਾ, ਭਣ੍ਡਦੇਯ੍ਯਂ ਪਨ ਹੋਤਿ. ਥੇਯ੍ਯਚਿਤ੍ਤੇਨ ਪਰਿਭੁਞ੍ਜਤੋਪਿ ਏਸੇਵ ਨਯੋ.

੫੪. ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਸਨ੍ਤਕਂ ਪਨ ਯਂ ਕਿਞ੍ਚਿ ਪਰਿਕ੍ਖਾਰਂ ਪਟਿਸਾਮੇਤੁਂ ਵਟ੍ਟਤਿ. ਸਚੇ ਆਗਨ੍ਤੁਕੋ ਭਿਕ੍ਖੁ ਆਵਾਸਿਕਾਨਂ ਚੀਵਰਕਮ੍ਮਂ ਕਰੋਨ੍ਤਾਨਂ ਸਮੀਪੇ ਪਤ੍ਤਚੀਵਰਂ ਠਪੇਤ੍ਵਾ ‘‘ਏਤੇ ਸਙ੍ਗੋਪੇਸ੍ਸਨ੍ਤੀ’’ਤਿ ਮਞ੍ਞਮਾਨੋ ਨਹਾਯਿਤੁਂ ਵਾ ਅਞ੍ਞਤ੍ਰ ਵਾ ਗਚ੍ਛਤਿ, ਸਚੇ ਤਂ ਆਵਾਸਿਕਾ ਸਙ੍ਗੋਪੇਨ੍ਤਿ, ਇਚ੍ਚੇਤਂ ਕੁਸਲਂ. ਨੋ ਚੇ, ਨਟ੍ਠੇ ਗੀਵਾ ਨ ਹੋਤਿ. ਸਚੇਪਿ ਸੋ ‘‘ਇਦਂ, ਭਨ੍ਤੇ, ਠਪੇਥਾ’’ਤਿ ਵਤ੍ਵਾ ਗਚ੍ਛਤਿ, ਇਤਰੇ ਚ ਕਿਚ੍ਚਪਸੁਤਤ੍ਤਾ ਨ ਜਾਨਨ੍ਤਿ, ਏਸੇਵ ਨਯੋ. ਅਥਾਪਿ ਤੇ ‘‘ਇਦਂ, ਭਨ੍ਤੇ, ਠਪੇਥਾ’’ਤਿ ਵੁਤ੍ਤਾ ‘‘ਮਯਂ ਬ੍ਯਾਵਟਾ’’ਤਿ ਪਟਿਕ੍ਖਿਪਨ੍ਤਿ, ਇਤਰੋ ਚ ‘‘ਅਵਸ੍ਸਂ ਠਪੇਸ੍ਸਨ੍ਤੀ’’ਤਿ ਅਨਾਦਿਯਿਤ੍ਵਾ ਗਚ੍ਛਤਿ, ਏਸੇਵ ਨਯੋ. ਸਚੇ ਪਨ ਤੇ ਤੇਨ ਯਾਚਿਤਾ ਵਾ ਅਯਾਚਿਤਾ ਵਾ ‘‘ਮਯਂ ਠਪੇਸ੍ਸਾਮ, ਤ੍ਵਂ ਗਚ੍ਛਾ’’ਤਿ ਵਦਨ੍ਤਿ, ਤਂ ਸਙ੍ਗੋਪਿਤਬ੍ਬਂ. ਨੋ ਚੇ ਸਙ੍ਗੋਪੇਨ੍ਤਿ, ਨਟ੍ਠੇ ਗੀਵਾ. ਕਸ੍ਮਾ? ਸਮ੍ਪਟਿਚ੍ਛਿਤਤ੍ਤਾ.

ਯੋ ਭਿਕ੍ਖੁ ਭਣ੍ਡਾਗਾਰਿਕੋ ਹੁਤ੍ਵਾ ਪਚ੍ਚੂਸਸਮਯੇ ਏਵ ਭਿਕ੍ਖੂਨਂ ਪਤ੍ਤਚੀਵਰਾਨਿ ਹੇਟ੍ਠਾਪਾਸਾਦਂ ਓਰੋਪੇਤ੍ਵਾ ਦ੍ਵਾਰਂ ਅਪਿਦਹਿਤ੍ਵਾ ਤੇਸਮ੍ਪਿ ਅਨਾਰੋਚੇਤ੍ਵਾਵ ਦੂਰੇ ਭਿਕ੍ਖਾਚਾਰਂ ਗਚ੍ਛਤਿ, ਤਾਨਿ ਚੇ ਚੋਰਾ ਹਰਨ੍ਤਿ, ਤਸ੍ਸੇਵ ਗੀਵਾ. ਯੋ ਪਨ ਭਿਕ੍ਖੁ ਭਿਕ੍ਖੂਹਿ ‘‘ਓਰੋਪੇਥ, ਭਨ੍ਤੇ, ਪਤ੍ਤਚੀਵਰਾਨਿ, ਕਾਲੋ ਸਲਾਕਗ੍ਗਹਣਸ੍ਸਾ’’ਤਿ ਵੁਤ੍ਤੋ ‘‘ਸਮਾਗਤਾਤ੍ਥਾ’’ਤਿ ਪੁਚ੍ਛਿਤ੍ਵਾ ‘‘ਆਮ ਸਮਾਗਤਾਮ੍ਹਾ’’ਤਿ ਵੁਤ੍ਤੇ ਪਤ੍ਤਚੀਵਰਾਨਿ ਨੀਹਰਿਤ੍ਵਾ ਨਿਕ੍ਖਿਪਿਤ੍ਵਾ ਭਣ੍ਡਾਗਾਰਦ੍ਵਾਰਂ ਬਨ੍ਧਿਤ੍ਵਾ ‘‘ਤੁਮ੍ਹੇ ਪਤ੍ਤਚੀਵਰਾਨਿ ਗਹੇਤ੍ਵਾ ਹੇਟ੍ਠਾਪਾਸਾਦਦ੍ਵਾਰਂ ਪਟਿਜਗ੍ਗਿਤ੍ਵਾ ਗਚ੍ਛੇਯ੍ਯਾਥਾ’’ਤਿ ਵਤ੍ਵਾ ਗਚ੍ਛਤਿ. ਤਤ੍ਰ ਚੇਕੋ ਅਲਸਜਾਤਿਕੋ ਭਿਕ੍ਖੁ ਭਿਕ੍ਖੂਸੁ ਗਤੇਸੁ ਪਚ੍ਛਾ ਅਕ੍ਖੀਨਿ ਪੁਞ੍ਛਨ੍ਤੋ ਉਟ੍ਠਹਿਤ੍ਵਾ ਉਦਕਟ੍ਠਾਨਂ ਮੁਖਧੋਵਨਤ੍ਥਂ ਗਚ੍ਛਤਿ, ਤਂ ਖਣਂ ਦਿਸ੍ਵਾ ਚੋਰਾ ਤਸ੍ਸ ਪਤ੍ਤਚੀਵਰਂ ਹਰਨ੍ਤਿ, ਸੁਹਟਂ, ਭਣ੍ਡਾਗਾਰਿਕਸ੍ਸ ਗੀਵਾ ਨ ਹੋਤਿ.

ਸਚੇਪਿ ਕੋਚਿ ਭਣ੍ਡਾਗਾਰਿਕਸ੍ਸ ਅਨਾਰੋਚੇਤ੍ਵਾਵ ਭਣ੍ਡਾਗਾਰੇ ਅਤ੍ਤਨੋ ਪਰਿਕ੍ਖਾਰਂ ਠਪੇਤਿ, ਤਸ੍ਮਿਮ੍ਪਿ ਨਟ੍ਠੇ ਭਣ੍ਡਾਗਾਰਿਕਸ੍ਸ ਗੀਵਾ ਨ ਹੋਤਿ. ਸਚੇ ਪਨ ਭਣ੍ਡਾਗਾਰਿਕੋ ਤਂ ਦਿਸ੍ਵਾ ‘‘ਅਟ੍ਠਾਨੇ ਠਪਿਤ’’ਨ੍ਤਿ ਗਹੇਤ੍ਵਾ ਠਪੇਤਿ, ਨਟ੍ਠੇ ਤਸ੍ਸੇਵ ਗੀਵਾ. ਸਚੇਪਿ ਠਪਿਤਭਿਕ੍ਖੁਨਾ ‘‘ਮਯਾ, ਭਨ੍ਤੇ, ਈਦਿਸੋ ਨਾਮ ਪਰਿਕ੍ਖਾਰੋ ਠਪਿਤੋ, ਉਪਧਾਰੇਯ੍ਯਾਥਾ’’ਤਿ ਵੁਤ੍ਤੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਤਿ, ਦੁਨ੍ਨਿਕ੍ਖਿਤ੍ਤਂ ਵਾ ਮਞ੍ਞਮਾਨੋ ਅਞ੍ਞਸ੍ਮਿਂ ਠਾਨੇ ਠਪੇਤਿ, ਨਟ੍ਠੇ ਤਸ੍ਸੇਵ ਗੀਵਾ. ‘‘ਨਾਹਂ ਜਾਨਾਮੀ’’ਤਿ ਪਟਿਕ੍ਖਿਪਨ੍ਤਸ੍ਸ ਪਨ ਨਤ੍ਥਿ ਗੀਵਾ. ਯੋਪਿ ਤਸ੍ਸ ਪਸ੍ਸਨ੍ਤਸ੍ਸੇਵ ਠਪੇਤਿ, ਭਣ੍ਡਾਗਾਰਿਕਞ੍ਚ ਨ ਸਮ੍ਪਟਿਚ੍ਛਾਪੇਤਿ, ਨਟ੍ਠਂ ਸੁਨਟ੍ਠਮੇਵ. ਸਚੇ ਪਨ ਨਂ ਭਣ੍ਡਾਗਾਰਿਕੋ ਅਞ੍ਞਤ੍ਰ ਠਪੇਤਿ, ਨਟ੍ਠੇ ਗੀਵਾ. ਸਚੇ ਭਣ੍ਡਾਗਾਰਂ ਸੁਗੁਤ੍ਤਂ, ਸਬ੍ਬੋ ਸਙ੍ਘਸ੍ਸ ਚੇਤਿਯਸ੍ਸ ਚ ਪਰਿਕ੍ਖਾਰੋ ਤਤ੍ਥੇਵ ਠਪੀਯਤਿ, ਭਣ੍ਡਾਗਾਰਿਕੋ ਚ ਬਾਲੋ ਅਬ੍ਯਤ੍ਤੋ ਦ੍ਵਾਰਂ ਵਿਵਰਿਤ੍ਵਾ ਧਮ੍ਮਕਥਂ ਵਾ ਸੋਤੁਂ ਅਞ੍ਞਂ ਵਾ ਕਿਞ੍ਚਿ ਕਾਤੁਂ ਕਤ੍ਥਚਿ ਗਚ੍ਛਤਿ, ਤਂ ਖਣਂ ਦਿਸ੍ਵਾ ਯਤ੍ਤਕਂ ਚੋਰਾ ਹਰਨ੍ਤਿ, ਸਬ੍ਬਂ ਤਸ੍ਸ ਗੀਵਾ. ਭਣ੍ਡਾਗਾਰਤੋ ਨਿਕ੍ਖਮਿਤ੍ਵਾ ਬਹਿ ਚਙ੍ਕਮਨ੍ਤਸ੍ਸ ਵਾ ਦ੍ਵਾਰਂ ਵਿਵਰਿਤ੍ਵਾ ਸਰੀਰਂ ਉਤੁਂ ਗਾਹਾਪੇਨ੍ਤਸ੍ਸ ਵਾ ਤਤ੍ਥੇਵ ਸਮਣਧਮ੍ਮਾਨੁਯੋਗੇਨ ਨਿਸਿਨ੍ਨਸ੍ਸ ਵਾ ਤਤ੍ਥੇਵ ਨਿਸੀਦਿਤ੍ਵਾ ਕੇਨਚਿ ਕਮ੍ਮੇਨ ਬ੍ਯਾਵਟਸ੍ਸ ਵਾ ਉਚ੍ਚਾਰਪਸ੍ਸਾਵਪੀਲ਼ਿਤਸ੍ਸਪਿ ਸਤੋ ਤਤ੍ਥੇਵ ਉਪਚਾਰੇ ਵਿਜ੍ਜਮਾਨੇ ਬਹਿ ਗਚ੍ਛਤੋ ਵਾ ਅਞ੍ਞੇਨ ਵਾ ਕੇਨਚਿ ਆਕਾਰੇਨ ਪਮਤ੍ਤਸ੍ਸ ਸਤੋ ਦ੍ਵਾਰਂ ਵਿਵਰਿਤ੍ਵਾ ਵਾ ਵਿਵਟਮੇਵ ਪਵਿਸਿਤ੍ਵਾ ਵਾ ਸਨ੍ਧਿਂ ਛਿਨ੍ਦਿਤ੍ਵਾ ਵਾ ਯਤ੍ਤਕਂ ਤਸ੍ਸ ਪਮਾਦਪਚ੍ਚਯਾ ਚੋਰਾ ਹਰਨ੍ਤਿ, ਸਬ੍ਬਂ ਤਸ੍ਸੇਵ ਗੀਵਾ. ‘‘ਉਣ੍ਹਸਮਯੇ ਪਨ ਵਾਤਪਾਨਂ ਵਿਵਰਿਤ੍ਵਾ ਨਿਪਜ੍ਜਿਤੁਂ ਵਟ੍ਟਤੀ’’ਤਿ ਵਦਨ੍ਤਿ. ਉਚ੍ਚਾਰਪੀਲ਼ਿਤਸ੍ਸ ਪਨ ਤਸ੍ਮਿਂ ਉਪਚਾਰੇ ਅਸਤਿ ਅਞ੍ਞਤ੍ਥ ਗਚ੍ਛਨ੍ਤਸ੍ਸ ਗਿਲਾਨਪਕ੍ਖੇ ਠਿਤਤ੍ਤਾ ਅਵਿਸਯੋ, ਤਸ੍ਮਾ ਗੀਵਾ ਨ ਹੋਤਿ.

੫੫. ਯੋ ਪਨ ਅਨ੍ਤੋ ਉਣ੍ਹਪੀਲ਼ਿਤੋ ਦ੍ਵਾਰਂ ਸੁਗੁਤ੍ਤਂ ਕਤ੍ਵਾ ਬਹਿ ਨਿਕ੍ਖਮਤਿ, ਚੋਰਾ ਤਂ ਗਹੇਤ੍ਵਾ ‘‘ਦ੍ਵਾਰਂ ਵਿਵਰਾ’’ਤਿ ਵਦਨ੍ਤਿ, ਯਾਵਤਤਿਯਂ ਨ ਵਿਵਰਿਤਬ੍ਬਂ. ਯਦਿ ਪਨ ਤੇ ਚੋਰਾ ‘‘ਸਚੇ ਨ ਵਿਵਰਸਿ, ਤਞ੍ਚ ਮਾਰੇਸ੍ਸਾਮ, ਦ੍ਵਾਰਞ੍ਚ ਭਿਨ੍ਦਿਤ੍ਵਾ ਪਰਿਕ੍ਖਾਰਂ ਹਰਿਸ੍ਸਾਮਾ’’ਤਿ ਫਰਸੁਆਦੀਨਿ ਉਕ੍ਖਿਪਨ੍ਤਿ, ‘‘ਮਯਿ ਚ ਮਤੇ ਸਙ੍ਘਸ੍ਸ ਚ ਸੇਨਾਸਨੇ ਵਿਨਟ੍ਠੇ ਗੁਣੋ ਨਤ੍ਥੀ’’ਤਿ ਵਿਵਰਿਤੁਂ ਵਟ੍ਟਤਿ. ਇਧਾਪਿ ‘‘ਅਵਿਸਯਤ੍ਤਾ ਗੀਵਾ ਨਤ੍ਥੀ’’ਤਿ ਵਦਨ੍ਤਿ. ਸਚੇ ਕੋਚਿ ਆਗਨ੍ਤੁਕੋ ਕੁਞ੍ਚਿਕਂ ਵਾ ਦੇਤਿ, ਦ੍ਵਾਰਂ ਵਾ ਵਿਵਰਤਿ, ਯਤ੍ਤਕਂ ਚੋਰਾ ਹਰਨ੍ਤਿ, ਸਬ੍ਬਂ ਤਸ੍ਸ ਗੀਵਾ. ਸਙ੍ਘੇਨ ਭਣ੍ਡਾਗਾਰਂ ਗੁਤ੍ਤਤ੍ਥਾਯ ਸੂਚਿਯਨ੍ਤਕਞ੍ਚ ਕੁਞ੍ਚਿਕਮੁਦ੍ਦਿਕਾ ਚ ਯੋਜੇਤ੍ਵਾ ਦਿਨ੍ਨਾ ਹੋਤਿ, ਭਣ੍ਡਾਗਾਰਿਕੋ ਘਟਿਕਮਤ੍ਤਂ ਦਤ੍ਵਾ ਨਿਪਜ੍ਜਤਿ, ਚੋਰਾ ਵਿਵਰਿਤ੍ਵਾ ਪਰਿਕ੍ਖਾਰਂ ਹਰਨ੍ਤਿ, ਤਸ੍ਸੇਵ ਗੀਵਾ. ਸੂਚਿਯਨ੍ਤਕਞ੍ਚ ਕੁਞ੍ਚਿਕਮੁਦ੍ਦਿਕਞ੍ਚ ਯੋਜੇਤ੍ਵਾ ਨਿਪਨ੍ਨਂ ਪਨੇਤਂ ਸਚੇ ਚੋਰਾ ਆਗਨ੍ਤ੍ਵਾ ‘‘ਦ੍ਵਾਰਂ ਵਿਵਰਾਹੀ’’ਤਿ ਵਦਨ੍ਤਿ, ਤਤ੍ਥ ਪੁਰਿਮਨਯੇਨੇਵ ਪਟਿਪਜ੍ਜਿਤਬ੍ਬਂ. ਏਵਂ ਸੁਗੁਤ੍ਤਂ ਕਤ੍ਵਾ ਨਿਪਨ੍ਨੇ ਪਨ ਸਚੇ ਭਿਤ੍ਤਿਂ ਵਾ ਛਦਨਂ ਵਾ ਭਿਨ੍ਦਿਤ੍ਵਾ ਉਮਙ੍ਗੇਨ ਵਾ ਪਵਿਸਿਤ੍ਵਾ ਹਰਨ੍ਤਿ, ਨ ਤਸ੍ਸ ਗੀਵਾ.

ਸਚੇ ਭਣ੍ਡਾਗਾਰੇ ਅਞ੍ਞੇਪਿ ਥੇਰਾ ਵਸਨ੍ਤਿ, ਵਿਵਟੇ ਦ੍ਵਾਰੇ ਅਤ੍ਤਨੋ ਅਤ੍ਤਨੋ ਪਰਿਕ੍ਖਾਰਂ ਗਹੇਤ੍ਵਾ ਗਚ੍ਛਨ੍ਤਿ, ਭਣ੍ਡਾਗਾਰਿਕੋ ਤੇਸੁ ਗਤੇਸੁ ਦ੍ਵਾਰਂ ਨ ਜਗ੍ਗਤਿ, ਸਚੇ ਤਤ੍ਥ ਕਿਞ੍ਚਿ ਅਵਹਰੀਯਤਿ, ਭਣ੍ਡਾਗਾਰਿਕਸ੍ਸ ਇਸ੍ਸਰਵਤਾਯ ਭਣ੍ਡਾਗਾਰਿਕਸ੍ਸੇਵ ਗੀਵਾ, ਥੇਰੇਹਿ ਪਨ ਸਹਾਯੇਹਿ ਭਵਿਤਬ੍ਬਂ. ਅਯਞ੍ਹਿ ਸਾਮੀਚਿ. ਯਦਿ ਭਣ੍ਡਾਗਾਰਿਕੋ ‘‘ਤੁਮ੍ਹੇ ਬਹਿ ਠਤ੍ਵਾ ਤੁਮ੍ਹਾਕਂ ਪਰਿਕ੍ਖਾਰਂ ਗਣ੍ਹਥ, ਮਾ ਪਵਿਸਿਤ੍ਥਾ’’ਤਿ ਵਦਤਿ, ਤੇਸਞ੍ਚ ਏਕੋ ਲੋਲਮਹਾਥੇਰੋ ਸਾਮਣੇਰੇਹਿ ਚੇਵ ਉਪਟ੍ਠਾਕੇਹਿ ਚ ਸਦ੍ਧਿਂ ਭਣ੍ਡਾਗਾਰਂ ਪਵਿਸਿਤ੍ਵਾ ਨਿਸੀਦਤਿ ਚੇਵ ਨਿਪਜ੍ਜਤਿ ਚ, ਯਤ੍ਤਕਂ ਭਣ੍ਡਂ ਨਸ੍ਸਤਿ, ਸਬ੍ਬਂ ਤਸ੍ਸ ਗੀਵਾ, ਭਣ੍ਡਾਗਾਰਿਕੇਨ ਪਨ ਅਵਸੇਸਥੇਰੇਹਿ ਚ ਸਹਾਯੇਹਿ ਭਵਿਤਬ੍ਬਂ. ਅਥ ਭਣ੍ਡਾਗਾਰਿਕੋਵ ਲੋਲਸਾਮਣੇਰੇ ਚ ਉਪਟ੍ਠਾਕੇ ਚ ਗਹੇਤ੍ਵਾ ਭਣ੍ਡਾਗਾਰੇ ਨਿਸੀਦਤਿ ਚੇਵ ਨਿਪਜ੍ਜਤਿ ਚ, ਯਤ੍ਤਕਂ ਨਸ੍ਸਤਿ, ਸਬ੍ਬਂ ਤਸ੍ਸੇਵ ਗੀਵਾ. ਤਸ੍ਮਾ ਭਣ੍ਡਾਗਾਰਿਕੇਨੇਵ ਤਤ੍ਥ ਵਸਿਤਬ੍ਬਂ, ਅਵਸੇਸੇਹਿ ਅਪ੍ਪੇਵ ਰੁਕ੍ਖਮੂਲੇ ਵਸਿਤਬ੍ਬਂ, ਨ ਚ ਭਣ੍ਡਾਗਾਰੇਤਿ.

੫੬. ਯੇ ਪਨ ਅਤ੍ਤਨੋ ਅਤ੍ਤਨੋ ਸਭਾਗਭਿਕ੍ਖੂਨਂ ਵਸਨਗਬ੍ਭੇਸੁ ਪਰਿਕ੍ਖਾਰਂ ਠਪੇਨ੍ਤਿ, ਪਰਿਕ੍ਖਾਰੇ ਨਟ੍ਠੇ ਯੇਹਿ ਠਪਿਤੋ, ਤੇਸਂਯੇਵ ਗੀਵਾ, ਇਤਰੇਹਿ ਪਨ ਸਹਾਯੇਹਿ ਭਵਿਤਬ੍ਬਂ. ਯਦਿ ਪਨ ਸਙ੍ਘੋ ਭਣ੍ਡਾਗਾਰਿਕਸ੍ਸ ਵਿਹਾਰੇਯੇਵ ਯਾਗੁਭਤ੍ਤਂ ਦਾਪੇਤਿ, ਸੋ ਚ ਭਿਕ੍ਖਾਚਾਰਤ੍ਥਾਯ ਗਾਮਂ ਗਚ੍ਛਤਿ, ਨਟ੍ਠਂ ਤਸ੍ਸੇਵ ਗੀਵਾ. ਭਿਕ੍ਖਾਚਾਰਂ ਪਵਿਸਨ੍ਤੇਹਿ ਅਤਿਰੇਕਚੀਵਰਂ ਰਕ੍ਖਣਤ੍ਥਾਯ ਠਪਿਤਵਿਹਾਰਵਾਰਿਕਸ੍ਸਪਿ ਯਾਗੁਭਤ੍ਤਂ ਵਾ ਨਿਵਾਪਂ ਵਾ ਲਭਮਾਨਸ੍ਸੇਵ ਭਿਕ੍ਖਾਚਾਰਂ ਗਚ੍ਛਤੋ ਯਂ ਤਤ੍ਥ ਨਸ੍ਸਤਿ, ਸਬ੍ਬਂ ਗੀਵਾ. ਨ ਕੇਵਲਞ੍ਚ ਏਤ੍ਤਕਮੇਵ, ਭਣ੍ਡਾਗਾਰਿਕਸ੍ਸ ਵਿਯ ਯਂ ਤਸ੍ਸ ਪਮਾਦਪਚ੍ਚਯਾ ਨਸ੍ਸਤਿ, ਸਬ੍ਬਂ ਗੀਵਾ.

ਸਚੇ ਵਿਹਾਰੋ ਮਹਾ ਹੋਤਿ, ਅਞ੍ਞਂ ਪਦੇਸਂ ਰਕ੍ਖਿਤੁਂ ਗਚ੍ਛਨ੍ਤਸ੍ਸ ਅਞ੍ਞਸ੍ਮਿਂ ਪਦੇਸੇ ਨਿਕ੍ਖਿਤ੍ਤਂ ਹਰਨ੍ਤਿ, ਅਵਿਸਯਤ੍ਤਾ ਗੀਵਾ ਨ ਹੋਤਿ. ਈਦਿਸੇ ਪਨ ਵਿਹਾਰੇ ਵੇਮਜ੍ਝੇ ਸਬ੍ਬੇਸਂ ਓਸਰਣਟ੍ਠਾਨੇ ਪਰਿਕ੍ਖਾਰੇ ਠਪੇਤ੍ਵਾ ਨਿਸੀਦਿਤਬ੍ਬਂ, ਵਿਹਾਰਵਾਰਿਕਾ ਵਾ ਦ੍ਵੇ ਤਯੋ ਠਪੇਤਬ੍ਬਾ. ਸਚੇ ਤੇਸਮ੍ਪਿ ਅਪ੍ਪਮਤ੍ਤਾਨਂ ਇਤੋ ਚਿਤੋ ਚ ਰਕ੍ਖਤਂਯੇਵ ਕਿਞ੍ਚਿ ਨਸ੍ਸਤਿ, ਗੀਵਾ ਨ ਹੋਤਿ. ਵਿਹਾਰਵਾਰਿਕੇ ਬਨ੍ਧਿਤ੍ਵਾ ਹਰਿਤਭਣ੍ਡਮ੍ਪਿ ਚੋਰਾਨਂ ਪਟਿਪਥਂ ਗਤੇਸੁ ਅਞ੍ਞੇਨ ਮਗ੍ਗੇਨ ਹਰਿਤਭਣ੍ਡਮ੍ਪਿ ਨ ਤੇਸਂ ਗੀਵਾ. ਸਚੇ ਵਿਹਾਰਵਾਰਿਕਾਨਂ ਵਿਹਾਰੇ ਦਾਤਬ੍ਬਂ ਯਾਗੁਭਤ੍ਤਂ ਵਾ ਨਿਵਾਪੋ ਵਾ ਨ ਹੋਤਿ, ਤੇਹਿ ਪਤ੍ਤਬ੍ਬਲਾਭਤੋ ਅਤਿਰੇਕਾ ਦ੍ਵੇ ਤਿਸ੍ਸੋ ਯਾਗੁਸਲਾਕਾ ਤੇਸਂ ਪਹੋਨਕਭਤ੍ਤਸਲਾਕਾ ਚ ਠਪੇਤੁਂ ਵਟ੍ਟਤਿ, ਨਿਬਦ੍ਧਂ ਕਤ੍ਵਾ ਪਨ ਨ ਠਪੇਤਬ੍ਬਾ. ਮਨੁਸ੍ਸਾ ਹਿ ਵਿਪ੍ਪਟਿਸਾਰਿਨੋ ਹੋਨ੍ਤਿ ‘‘ਵਿਹਾਰਵਾਰਿਕਾਯੇਵ ਅਮ੍ਹਾਕਂ ਭਤ੍ਤਂ ਭੁਞ੍ਜਨ੍ਤੀ’’ਤਿ, ਤਸ੍ਮਾ ਪਰਿਵਤ੍ਤੇਤ੍ਵਾ ਪਰਿਵਤ੍ਤੇਤ੍ਵਾ ਠਪੇਤਬ੍ਬਾ. ਸਚੇ ਤੇਸਂ ਸਭਾਗਾ ਸਲਾਕਭਤ੍ਤਾਦੀਨਿ ਆਹਰਿਤ੍ਵਾ ਦੇਨ੍ਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਦੇਨ੍ਤਿ, ਵਾਰਂ ਗਾਹਾਪੇਤ੍ਵਾ ਨੀਹਰਾਪੇਤਬ੍ਬਾਨਿ. ਸਚੇ ਵਿਹਾਰਵਾਰਿਕੋ ਦ੍ਵੇ ਤਿਸ੍ਸੋ ਯਾਗੁਸਲਾਕਾ ਚ ਚਤ੍ਤਾਰਿ ਪਞ੍ਚ ਸਲਾਕਭਤ੍ਤਾਨਿ ਚ ਲਭਮਾਨੋ ਭਿਕ੍ਖਾਚਾਰਂ ਗਚ੍ਛਤਿ, ਭਣ੍ਡਾਗਾਰਿਕਸ੍ਸ ਵਿਯ ਸਬ੍ਬਂ ਨਟ੍ਠਂ ਗੀਵਾ ਹੋਤਿ. ਸਚੇ ਸਙ੍ਘਸ੍ਸ ਵਿਹਾਰਪਾਲਾਨਂ ਦਾਤਬ੍ਬਂ ਭਤ੍ਤਂ ਵਾ ਨਿਵਾਪੋ ਵਾ ਨਤ੍ਥਿ, ਭਿਕ੍ਖੂ ਵਿਹਾਰਵਾਰਂ ਗਹੇਤ੍ਵਾ ਅਤ੍ਤਨੋ ਅਤ੍ਤਨੋ ਨਿਸ੍ਸਿਤਕੇ ਵਿਹਾਰਂ ਜਗ੍ਗਾਪੇਨ੍ਤਿ, ਸਮ੍ਪਤ੍ਤਵਾਰਂ ਅਗ੍ਗਹੇਤੁਂ ਨ ਲਭਤਿ. ਯਥਾ ਅਞ੍ਞੇ ਭਿਕ੍ਖੂ ਕਰੋਨ੍ਤਿ, ਤਥੇਵ ਕਾਤਬ੍ਬਂ. ਭਿਕ੍ਖੂਹਿ ਪਨ ਅਸਹਾਯਸ੍ਸ ਵਾ ਅਦੁਤਿਯਸ੍ਸ ਵਾ ਯਸ੍ਸ ਸਭਾਗੋ ਭਿਕ੍ਖੁ ਭਤ੍ਤਂ ਆਨੇਤ੍ਵਾ ਦਾਤਾ ਨਤ੍ਥਿ, ਏਵਰੂਪਸ੍ਸ ਵਾਰੋ ਨ ਪਾਪੇਤਬ੍ਬੋ.

ਯਮ੍ਪਿ ਪਾਕਵਟ੍ਟਤ੍ਥਾਯ ਵਿਹਾਰੇ ਠਪੇਨ੍ਤਿ, ਤਂ ਗਹੇਤ੍ਵਾ ਉਪਜੀਵਨ੍ਤੇਨ ਠਾਤਬ੍ਬਂ. ਯੋ ਤਂ ਨ ਉਪਜੀਵਤਿ, ਸੋ ਵਾਰਂ ਨ ਗਾਹਾਪੇਤਬ੍ਬੋ. ਫਲਾਫਲਤ੍ਥਾਯਪਿ ਵਿਹਾਰੇ ਭਿਕ੍ਖੁਂ ਠਪੇਨ੍ਤਿ, ਜਗ੍ਗਿਤ੍ਵਾ ਗੋਪੇਤ੍ਵਾ ਫਲਵਾਰੇਨ ਭਾਜੇਤ੍ਵਾ ਖਾਦਨ੍ਤਿ. ਯੋ ਤਾਨਿ ਖਾਦਤਿ, ਤੇਨ ਠਾਤਬ੍ਬਂ, ਅਨੁਪਜੀਵਨ੍ਤੋ ਨ ਗਾਹਾਪੇਤਬ੍ਬੋ. ਸੇਨਾਸਨਮਞ੍ਚਪੀਠਪਚ੍ਚਤ੍ਥਰਣਰਕ੍ਖਣਤ੍ਥਾਯਪਿ ਠਪੇਨ੍ਤਿ, ਆਵਾਸੇ ਵਸਨ੍ਤੇਨ ਠਾਤਬ੍ਬਂ, ਅਬ੍ਭੋਕਾਸਿਕੋ ਪਨ ਰੁਕ੍ਖਮੂਲਿਕੋ ਵਾ ਨ ਗਾਹਾਪੇਤਬ੍ਬੋ. ਏਕੋ ਨਵਕੋ ਹੋਤਿ, ਬਹੁਸ੍ਸੁਤੋ ਪਨ ਬਹੂਨਂ ਧਮ੍ਮਂ ਵਾਚੇਤਿ, ਪਰਿਪੁਚ੍ਛਂ ਦੇਤਿ, ਪਾਲ਼ਿਂ ਵਣ੍ਣੇਤਿ, ਧਮ੍ਮਕਥਂ ਕਥੇਤਿ, ਸਙ੍ਘਸ੍ਸ ਭਾਰਂ ਨਿਤ੍ਥਰਤਿ, ਅਯਂ ਲਾਭਂ ਪਰਿਭੁਞ੍ਜਨ੍ਤੋਪਿ ਆਵਾਸੇ ਵਸਨ੍ਤੋਪਿ ਵਾਰਂ ਨ ਗਾਹਾਪੇਤਬ੍ਬੋ. ‘‘ਪੁਰਿਸਵਿਸੇਸੋ ਨਾਮ ਞਾਤਬ੍ਬੋ’’ਤਿ ਵਦਨ੍ਤਿ. ਉਪੋਸਥਾਗਾਰਪਟਿਮਾਘਰਜਗ੍ਗਨਕਸ੍ਸ ਪਨ ਦਿਗੁਣਂ ਯਾਗੁਭਤ੍ਤਂ, ਦੇਵਸਿਕਂ ਤਣ੍ਡੁਲਨਾਲ਼ਿ, ਸਂਵਚ੍ਛਰੇ ਤਿਚੀਵਰਂ ਦਸਵੀਸਗ੍ਘਨਕਂ ਕਪ੍ਪਿਯਭਣ੍ਡਞ੍ਚ ਦਾਤਬ੍ਬਂ. ਸਚੇ ਪਨ ਤਸ੍ਸ ਤਂ ਲਭਮਾਨਸ੍ਸੇਵ ਪਮਾਦੇਨ ਤਤ੍ਥ ਕਿਞ੍ਚਿ ਨਸ੍ਸਤਿ, ਸਬ੍ਬਂ ਗੀਵਾ. ਬਨ੍ਧਿਤ੍ਵਾ ਬਲਕ੍ਕਾਰੇਨ ਅਚ੍ਛਿਨ੍ਨਂ, ਨ ਗੀਵਾ. ਤਤ੍ਥ ਚੇਤਿਯਸ੍ਸ ਵਾ ਸਙ੍ਘਸ੍ਸ ਵਾ ਸਨ੍ਤਕੇਨ ਚੇਤਿਯਸ੍ਸ ਸਨ੍ਤਕਂ ਰਕ੍ਖਾਪੇਤੁਂ ਵਟ੍ਟਤਿ, ਚੇਤਿਯਸ੍ਸ ਸਨ੍ਤਕੇਨ ਸਙ੍ਘਸ੍ਸ ਸਨ੍ਤਕਂ ਰਕ੍ਖਾਪੇਤੁਂ ਨ ਵਟ੍ਟਤਿ. ਯਂ ਪਨ ਚੇਤਿਯਸ੍ਸ ਸਨ੍ਤਕੇਨ ਸਦ੍ਧਿਂ ਸਙ੍ਘਸ੍ਸ ਸਨ੍ਤਕਂ ਠਪਿਤਂ ਹੋਤਿ, ਤਂ ਚੇਤਿਯਸਨ੍ਤਕੇ ਰਕ੍ਖਾਪਿਤੇ ਰਕ੍ਖਿਤਮੇਵ ਹੋਤੀਤਿ ਏਵਂ ਵਟ੍ਟਤਿ. ਪਕ੍ਖਵਾਰੇਨ ਉਪੋਸਥਾਗਾਰਾਦੀਨਿ ਰਕ੍ਖਤੋਪਿ ਪਮਾਦਵਸੇਨ ਨਟ੍ਠਂ ਗੀਵਾਯੇਵਾਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਭਣ੍ਡਪਟਿਸਾਮਨਵਿਨਿਚ੍ਛਯਕਥਾ ਸਮਤ੍ਤਾ.