੧੧. ਕਯਵਿਕ੍ਕਯਸਮਾਪਤ੍ਤਿਵਿਨਿਚ੍ਛਯਕਥਾ

੫੭. ਕਯਵਿਕ੍ਕਯਸਮਾਪਤ੍ਤੀਤਿ ਕਯਵਿਕ੍ਕਯਸਮਾਪਜ੍ਜਨਂ. ‘‘ਇਮਿਨਾ ਇਮਂ ਦੇਹੀ’’ਤਿਆਦਿਨਾ (ਪਾਰਾ. ਅਟ੍ਠ. ੨.੫੯੫) ਹਿ ਨਯੇਨ ਪਰਸ੍ਸ ਕਪ੍ਪਿਯਭਣ੍ਡਂ ਗਣ੍ਹਨ੍ਤੋ ਕਯਂ ਸਮਾਪਜ੍ਜਤਿ, ਅਤ੍ਤਨੋ ਕਪ੍ਪਿਯਭਣ੍ਡਂ ਦੇਨ੍ਤੋ ਵਿਕ੍ਕਯਂ. ਅਯਂ ਪਨ ਕਯਵਿਕ੍ਕਯੋ ਠਪੇਤ੍ਵਾ ਪਞ੍ਚ ਸਹਧਮ੍ਮਿਕੇ ਅਵਸੇਸੇਹਿ ਗਿਹਿਪਬ੍ਬਜਿਤੇਹਿ ਅਨ੍ਤਮਸੋ ਮਾਤਾਪਿਤੂਹਿਪਿ ਸਦ੍ਧਿਂ ਨ ਵਟ੍ਟਤਿ.

ਤਤ੍ਰਾਯਂ ਵਿਨਿਚ੍ਛਯੋ – ਵਤ੍ਥੇਨ ਵਾ ਵਤ੍ਥਂ ਹੋਤੁ, ਭਤ੍ਤੇਨ ਵਾ ਭਤ੍ਤਂ, ਯਂ ਕਿਞ੍ਚਿ ਕਪ੍ਪਿਯਂ ‘‘ਇਮਿਨਾ ਇਮਂ ਦੇਹੀ’’ਤਿ ਵਦਤਿ, ਦੁਕ੍ਕਟਂ. ਏਵਂ ਵਤ੍ਵਾ ਮਾਤੁਯਾਪਿ ਅਤ੍ਤਨੋ ਭਣ੍ਡਂ ਦੇਤਿ, ਦੁਕ੍ਕਟਂ, ‘‘ਇਮਿਨਾ ਇਮਂ ਦੇਹੀ’’ਤਿ ਵੁਤ੍ਤੋ ਵਾ ‘‘ਇਮਂ ਦੇਹਿ, ਇਮਂ ਤੇ ਦਸ੍ਸਾਮੀ’’ਤਿ ਤਂ ਵਤ੍ਵਾ ਵਾ ਮਾਤੁਯਾਪਿ ਭਣ੍ਡਂ ਅਤ੍ਤਨਾ ਗਣ੍ਹਾਤਿ, ਦੁਕ੍ਕਟਂ, ਅਤ੍ਤਨੋ ਭਣ੍ਡੇ ਪਰਹਤ੍ਥਂ, ਪਰਭਣ੍ਡੇ ਚ ਅਤ੍ਤਨੋ ਹਤ੍ਥਂ ਸਮ੍ਪਤ੍ਤੇ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਮਾਤਰਂ ਵਾ ਪਨ ਪਿਤਰਂ ਵਾ ‘‘ਇਮਂ ਦੇਹੀ’’ਤਿ ਵਦਤੋ ਵਿਞ੍ਞਤ੍ਤਿ ਨ ਹੋਤਿ, ‘‘ਇਮਂ ਗਣ੍ਹਾਹੀ’’ਤਿ ਦਦਤੋ ਸਦ੍ਧਾਦੇਯ੍ਯਵਿਨਿਪਾਤਨਂ ਨ ਹੋਤਿ. ਅਞ੍ਞਾਤਕਂ ‘‘ਇਮਂ ਦੇਹੀ’’ਤਿ ਵਦਤੋ ਵਿਞ੍ਞਤ੍ਤਿ, ‘‘ਇਮਂ ਗਣ੍ਹਾਹੀ’’ਤਿ ਦਦਤੋ ਸਦ੍ਧਾਦੇਯ੍ਯਵਿਨਿਪਾਤਨਂ, ‘‘ਇਮਿਨਾ ਇਮਂ ਦੇਹੀ’’ਤਿ ਕਯਵਿਕ੍ਕਯਂ ਆਪਜ੍ਜਤੋ ਨਿਸ੍ਸਗ੍ਗਿਯਂ. ਤਸ੍ਮਾ ਕਪ੍ਪਿਯਭਣ੍ਡਂ ਪਰਿਵਤ੍ਤਨ੍ਤੇਨ ਮਾਤਾਪਿਤੂਹਿਪਿ ਸਦ੍ਧਿਂ ਕਯਵਿਕ੍ਕਯਂ, ਅਞ੍ਞਾਤਕੇਹਿ ਸਦ੍ਧਿਂ ਤਿਸ੍ਸੋ ਆਪਤ੍ਤਿਯੋ ਮੋਚੇਨ੍ਤੇਨ ਪਰਿਵਤ੍ਤੇਤਬ੍ਬਂ.

ਤਤ੍ਰਾਯਂ ਪਰਿਵਤ੍ਤਨਵਿਧਿ – ਭਿਕ੍ਖੁਸ੍ਸ ਪਾਥੇਯ੍ਯਤਣ੍ਡੁਲਾ ਹੋਨ੍ਤਿ, ਸੋ ਅਨ੍ਤਰਾਮਗ੍ਗੇ ਭਤ੍ਤਹਤ੍ਥਂ ਪੁਰਿਸਂ ਦਿਸ੍ਵਾ ‘‘ਅਮ੍ਹਾਕਂ ਤਣ੍ਡੁਲਾ ਅਤ੍ਥਿ, ਨ ਚ ਨੋ ਇਮੇਹਿ ਅਤ੍ਥੋ, ਭਤ੍ਤੇਨ ਪਨ ਅਤ੍ਥੋ’’ਤਿ ਵਦਤਿ, ਪੁਰਿਸੋ ਤਣ੍ਡੁਲੇ ਗਹੇਤ੍ਵਾ ਭਤ੍ਤਂ ਦੇਤਿ, ਵਟ੍ਟਤਿ. ਤਿਸ੍ਸੋਪਿ ਆਪਤ੍ਤਿਯੋ ਨ ਹੋਨ੍ਤਿ, ਅਨ੍ਤਮਸੋ ਨਿਮਿਤ੍ਤਕਮ੍ਮਮਤ੍ਤਮ੍ਪਿ ਨ ਹੋਤਿ. ਕਸ੍ਮਾ? ਮੂਲਸ੍ਸ ਅਤ੍ਥਿਤਾਯ. ਯੋ ਪਨ ਏਵਂ ਅਕਤ੍ਵਾ ‘‘ਇਮਿਨਾ ਇਮਂ ਦੇਹੀ’’ਤਿ ਪਰਿਵਤ੍ਤੇਤਿ, ਯਥਾਵਤ੍ਥੁਕਮੇਵ. ਵਿਘਾਸਾਦਂ ਦਿਸ੍ਵਾ ‘‘ਇਮਂ ਓਦਨਂ ਭੁਞ੍ਜਿਤ੍ਵਾ ਰਜਨਂ ਵਾ ਦਾਰੂਨਿ ਵਾ ਆਹਰਾ’’ਤਿ ਵਦਤਿ, ਰਜਨਛਲ੍ਲਿਗਣਨਾਯ ਦਾਰੁਗਣਨਾਯ ਚ ਨਿਸ੍ਸਗ੍ਗਿਯਾਨਿ ਹੋਨ੍ਤਿ. ‘‘ਇਮਂ ਓਦਨਂ ਭੁਞ੍ਜਿਤ੍ਵਾ ਇਮਂ ਨਾਮ ਕਰੋਥਾ’’ਤਿ ਦਨ੍ਤਕਾਰਾਦੀਹਿ ਸਿਪ੍ਪਿਕੇਹਿ ਧਮ੍ਮਕਰਣਾਦੀਸੁ ਤਂ ਤਂ ਪਰਿਕ੍ਖਾਰਂ ਕਾਰੇਤਿ, ਰਜਕੇਹਿ ਵਾ ਵਤ੍ਥਂ ਧੋਵਾਪੇਤਿ, ਯਥਾਵਤ੍ਥੁਕਮੇਵ. ਨਹਾਪਿਤੇਨ ਕੇਸੇ ਛਿਨ੍ਦਾਪੇਤਿ, ਕਮ੍ਮਕਾਰੇਹਿ ਨਵਕਮ੍ਮਂ ਕਾਰੇਤਿ, ਯਥਾਵਤ੍ਥੁਕਮੇਵ. ਸਚੇ ਪਨ ‘‘ਇਦਂ ਭਤ੍ਤਂ ਭੁਞ੍ਜਿਤ੍ਵਾ ਇਦਂ ਕਰੋਥਾ’’ਤਿ ਨ ਵਦਤਿ, ‘‘ਇਦਂ ਭਤ੍ਤਂ ਭੁਞ੍ਜ, ਭੁਤ੍ਤੋਸਿ, ਭੁਞ੍ਜਿਸ੍ਸਸਿ, ਇਦਂ ਨਾਮ ਕਰੋਹੀ’’ਤਿ ਵਦਤਿ, ਵਟ੍ਟਤਿ. ਏਤ੍ਥ ਚ ਕਿਞ੍ਚਾਪਿ ਵਤ੍ਥਧੋਵਨੇ ਵਾ ਕੇਸਚ੍ਛੇਦਨੇ ਵਾ ਭੂਮਿਸੋਧਨਾਦਿਨਵਕਮ੍ਮੇ ਵਾ ਪਰਭਣ੍ਡਂ ਅਤ੍ਤਨੋ ਹਤ੍ਥਗਤਂ ਨਿਸ੍ਸਜ੍ਜਿਤਬ੍ਬਂ ਨਾਮ ਨਤ੍ਥਿ, ਮਹਾਅਟ੍ਠਕਥਾਯਂ ਪਨ ਦਲ਼੍ਹਂ ਕਤ੍ਵਾ ਵੁਤ੍ਤਤ੍ਤਾ ਨ ਸਕ੍ਕਾ ਏਤਂ ਪਟਿਕ੍ਖਿਪਿਤੁਂ, ਤਸ੍ਮਾ ਯਥਾ ਨਿਸ੍ਸਗ੍ਗਿਯਵਤ੍ਥੁਮ੍ਹਿ ਪਰਿਭੁਤ੍ਤੇ ਵਾ ਨਟ੍ਠੇ ਵਾ ਪਾਚਿਤ੍ਤਿਯਂ ਦੇਸੇਤਿ, ਏਵਮਿਧਾਪਿ ਦੇਸੇਤਬ੍ਬਂ.

ਯਂ ਕਿਞ੍ਚਿ ਕਪ੍ਪਿਯਭਣ੍ਡਂ ਗਣ੍ਹਿਤੁਕਾਮਤਾਯ ਅਗ੍ਘਂ ਪੁਚ੍ਛਿਤੁਂ ਵਟ੍ਟਤਿ, ਤਸ੍ਮਾ ‘‘ਅਯਂ ਤਵ ਪਤ੍ਤੋ ਕਿਂ ਅਗ੍ਘਤੀ’’ਤਿ ਪੁਚ੍ਛਿਤੇ ‘‘ਇਦਂ ਨਾਮਾ’’ਤਿ ਵਦਤਿ, ਸਚੇ ਅਤ੍ਤਨੋ ਕਪ੍ਪਿਯਭਣ੍ਡਂ ਮਹਗ੍ਘਂ ਹੋਤਿ, ਏਵਞ੍ਚ ਨਂ ਪਟਿਵਦਤਿ ‘‘ਉਪਾਸਕ ਮਮ ਇਦਂ ਵਤ੍ਥੁ ਮਹਗ੍ਘਂ, ਤਵ ਪਤ੍ਤਂ ਅਞ੍ਞਸ੍ਸ ਦੇਹੀ’’ਤਿ. ਤਂ ਸੁਤ੍ਵਾ ਇਤਰੋ ‘‘ਅਞ੍ਞਂ ਥਾਲਕਮ੍ਪਿ ਦਸ੍ਸਾਮੀ’’ਤਿ ਵਦਤਿ, ਗਣ੍ਹਿਤੁਂ ਵਟ੍ਟਤਿ. ਸਚੇ ਸੋ ਪਤ੍ਤੋ ਮਹਗ੍ਘੋ, ਭਿਕ੍ਖੁਨੋ ਵਤ੍ਥੁ ਅਪ੍ਪਗ੍ਘਂ, ਪਤ੍ਤਸਾਮਿਕੋ ਚਸ੍ਸ ਅਪ੍ਪਗ੍ਘਭਾਵਂ ਨ ਜਾਨਾਤਿ, ਪਤ੍ਤੋ ਨ ਗਹੇਤਬ੍ਬੋ, ‘‘ਮਮ ਵਤ੍ਥੁ ਅਪ੍ਪਗ੍ਘ’’ਨ੍ਤਿ ਆਚਿਕ੍ਖਿਤਬ੍ਬਂ. ਮਹਗ੍ਘਭਾਵਂ ਞਤ੍ਵਾ ਵਞ੍ਚੇਤ੍ਵਾ ਗਣ੍ਹਨ੍ਤੋਪਿ ਹਿ ਭਣ੍ਡਂ ਅਗ੍ਘਾਪੇਤ੍ਵਾ ਕਾਰੇਤਬ੍ਬਤਂ ਆਪਜ੍ਜਤਿ. ਸਚੇ ਪਤ੍ਤਸਾਮਿਕੋ ‘‘ਹੋਤੁ, ਭਨ੍ਤੇ, ਸੇਸਂ ਮਮ ਪੁਞ੍ਞਂ ਭਵਿਸ੍ਸਤੀ’’ਤਿ ਦੇਤਿ, ਵਟ੍ਟਤਿ. ਕਪ੍ਪਿਯਕਾਰਕਸ੍ਸ ਪਨ ‘‘ਇਮਿਨਾ ਇਮਂ ਗਹੇਤ੍ਵਾ ਦੇਹੀ’’ਤਿ ਆਚਿਕ੍ਖਿਤੁਂ ਵਟ੍ਟਤਿ, ਤਸ੍ਮਾ ਯਸ੍ਸ ਹਤ੍ਥਤੋ ਭਣ੍ਡਂ ਗਣ੍ਹਾਤਿ, ਤਂ ਠਪੇਤ੍ਵਾ ਅਞ੍ਞਂ ਅਨ੍ਤਮਸੋ ਤਸ੍ਸ ਪੁਤ੍ਤਭਾਤਿਕਮ੍ਪਿ ਕਪ੍ਪਿਯਕਾਰਕਂ ਕਤ੍ਵਾ ‘‘ਇਮਿਨਾ ਇਮਂ ਨਾਮ ਗਹੇਤ੍ਵਾ ਦੇਹੀ’’ਤਿ ਆਚਿਕ੍ਖਤਿ, ਸੋ ਚੇ ਛੇਕੋ ਹੋਤਿ, ਪੁਨਪ੍ਪੁਨਂ ਅਪਨੇਤ੍ਵਾ ਵਿਵਦਿਤ੍ਵਾ ਗਣ੍ਹਾਤਿ, ਤੁਣ੍ਹੀਭੂਤੇਨ ਠਾਤਬ੍ਬਂ. ਨੋ ਚੇ ਛੇਕੋ ਹੋਤਿ, ਨ ਜਾਨਾਤਿ ਗਹੇਤੁਂ, ਵਾਣਿਜਕੋ ਚ ਤਂ ਵਞ੍ਚੇਤਿ, ‘‘ਮਾ ਗਣ੍ਹਾਹੀ’’ਤਿ ਵਤ੍ਤਬ੍ਬੋ.

‘‘ਇਦਂ ਪਟਿਗ੍ਗਹਿਤਂ ਤੇਲਂ ਵਾ ਸਪ੍ਪਿ ਵਾ ਅਮ੍ਹਾਕਂ ਅਤ੍ਥਿ, ਅਮ੍ਹਾਕਞ੍ਚ ਅਞ੍ਞੇਨ ਅਪ੍ਪਟਿਗ੍ਗਹਿਤਕੇਨ ਅਤ੍ਥੋ’’ਤਿ ਵੁਤ੍ਤੇ ਪਨ ਸਚੇ ਸੋ ਤਂ ਗਹੇਤ੍ਵਾ ਅਞ੍ਞਂ ਦੇਤਿ, ਪਠਮਂ ਅਤ੍ਤਨੋ ਤੇਲਂ ਨ ਮਿਨਾਪੇਤਬ੍ਬਂ. ਕਸ੍ਮਾ? ਨਾਲ਼ਿਯਞ੍ਹਿ ਅਵਸਿਟ੍ਠਤੇਲਂ ਹੋਤਿ, ਤਂ ਪਚ੍ਛਾ ਮਿਨਨ੍ਤਸ੍ਸ ਅਪ੍ਪਟਿਗ੍ਗਹਿਤਂ ਦੂਸੇਯ੍ਯ. ਅਯਞ੍ਚ ਕਯਵਿਕ੍ਕਯੋ ਨਾਮ ਕਪ੍ਪਿਯਭਣ੍ਡਵਸੇਨ ਵੁਤ੍ਤੋ. ਕਪ੍ਪਿਯੇਨ ਹਿ ਕਪ੍ਪਿਯਂ ਪਰਿਵਤ੍ਤੇਨ੍ਤਸ੍ਸ ਕਯਵਿਕ੍ਕਯਸਿਕ੍ਖਾਪਦੇਨ ਨਿਸ੍ਸਗ੍ਗਿਯਂ ਵੁਤ੍ਤਂ, ਅਕਪ੍ਪਿਯੇਨ ਪਨ ਅਕਪ੍ਪਿਯਂ ਪਰਿਵਤ੍ਤੇਨ੍ਤਸ੍ਸ, ਕਪ੍ਪਿਯੇਨ ਵਾ ਅਕਪ੍ਪਿਯਂ ਅਕਪ੍ਪਿਯੇਨ ਵਾ ਕਪ੍ਪਿਯਂ ਪਰਿਵਤ੍ਤੇਨ੍ਤਸ੍ਸ ਰੂਪਿਯਸਂਵੋਹਾਰਸਿਕ੍ਖਾਪਦੇਨ ਨਿਸ੍ਸਗ੍ਗਿਯਂ, ਤਸ੍ਮਾ ਉਭੋਸੁ ਵਾ ਏਕਸ੍ਮਿਂ ਵਾ ਅਕਪ੍ਪਿਯੇ ਸਤਿ ਰੂਪਿਯਸਂਵੋਹਾਰੋ ਨਾਮ ਹੋਤਿ.

੫੮. ਰੂਪਿਯਸਂਵੋਹਾਰਸ੍ਸ ਚ ਗਰੁਭਾਵਦੀਪਨਤ੍ਥਂ ਇਦਂ ਪਤ੍ਤਚਤੁਕ੍ਕਂ ਵੇਦਿਤਬ੍ਬਂ. ਯੋ ਹਿ ਰੂਪਿਯਂ ਉਗ੍ਗਣ੍ਹਿਤ੍ਵਾ ਤੇਨ ਅਯਬੀਜਂ ਸਮੁਟ੍ਠਾਪੇਤਿ, ਤਂ ਕੋਟ੍ਟਾਪੇਤ੍ਵਾ ਤੇਨ ਲੋਹੇਨ ਪਤ੍ਤਂ ਕਾਰੇਤਿ, ਅਯਂ ਪਤ੍ਤੋ ਮਹਾਅਕਪ੍ਪਿਯੋ ਨਾਮ, ਨ ਸਕ੍ਕਾ ਕੇਨਚਿ ਉਪਾਯੇਨ ਕਪ੍ਪਿਯੋ ਕਾਤੁਂ. ਸਚੇਪਿ ਤਂ ਵਿਨਾਸੇਤ੍ਵਾ ਥਾਲਕਂ ਕਾਰੇਤਿ, ਤਮ੍ਪਿ ਅਕਪ੍ਪਿਯਂ. ਵਾਸਿਂ ਕਾਰੇਤਿ, ਤਾਯ ਛਿਨ੍ਨਦਨ੍ਤਕਟ੍ਠਮ੍ਪਿ ਅਕਪ੍ਪਿਯਂ. ਬਲ਼ਿਸਂ ਕਾਰੇਤਿ, ਤੇਨ ਮਾਰਿਤਾ ਮਚ੍ਛਾਪਿ ਅਕਪ੍ਪਿਯਾ. ਵਾਸਿਂ ਤਾਪੇਤ੍ਵਾ ਉਦਕਂ ਵਾ ਖੀਰਂ ਵਾ ਉਣ੍ਹਾਪੇਤਿ, ਤਮ੍ਪਿ ਅਕਪ੍ਪਿਯਮੇਵ.

ਯੋ ਪਨ ਰੂਪਿਯਂ ਉਗ੍ਗਣ੍ਹਿਤ੍ਵਾ ਤੇਨ ਪਤ੍ਤਂ ਕਿਣਾਤਿ, ਅਯਮ੍ਪਿ ਪਤ੍ਤੋ ਅਕਪ੍ਪਿਯੋ. ‘‘ਪਞ੍ਚਨ੍ਨਮ੍ਪਿ ਸਹਧਮ੍ਮਿਕਾਨਂ ਨ ਕਪ੍ਪਤੀ’’ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਸਕ੍ਕਾ ਪਨ ਕਪ੍ਪਿਯੋ ਕਾਤੁਂ. ਸੋ ਹਿ ਮੂਲੇ ਮੂਲਸਾਮਿਕਾਨਂ, ਪਤ੍ਤੇ ਚ ਪਤ੍ਤਸਾਮਿਕਾਨਂ ਦਿਨ੍ਨੇ ਕਪ੍ਪਿਯੋ ਹੋਤਿ, ਕਪ੍ਪਿਯਭਣ੍ਡਂ ਦਤ੍ਵਾ ਗਹੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ.

ਯੋਪਿ ਰੂਪਿਯਂ ਉਗ੍ਗਣ੍ਹਾਪੇਤ੍ਵਾ ਕਪ੍ਪਿਯਕਾਰਕੇਨ ਸਦ੍ਧਿਂ ਕਮ੍ਮਾਰਕੁਲਂ ਗਨ੍ਤ੍ਵਾ ਪਤ੍ਤਂ ਦਿਸ੍ਵਾ ‘‘ਅਯਂ ਮਯ੍ਹਂ ਰੁਚ੍ਚਤੀ’’ਤਿ ਵਦਤਿ, ਕਪ੍ਪਿਯਕਾਰਕੋ ਚ ਤਂ ਰੂਪਿਯਂ ਦਤ੍ਵਾ ਕਮ੍ਮਾਰਂ ਸਞ੍ਞਾਪੇਤਿ, ਅਯਮ੍ਪਿ ਪਤ੍ਤੋ ਕਪ੍ਪਿਯਵੋਹਾਰੇਨ ਗਹਿਤੋਪਿ ਦੁਤਿਯਪਤ੍ਤਸਦਿਸੋਯੇਵ, ਮੂਲਸ੍ਸ ਸਮ੍ਪਟਿਚ੍ਛਿਤਤ੍ਤਾ ਅਕਪ੍ਪਿਯੋ. ਕਸ੍ਮਾ ਸੇਸਾਨਂ ਨ ਕਪ੍ਪਤੀਤਿ? ਮੂਲਸ੍ਸ ਅਨਿਸ੍ਸਟ੍ਠਤ੍ਤਾ.

ਯੋ ਪਨ ਰੂਪਿਯਂ ਅਸਮ੍ਪਟਿਚ੍ਛਿਤ੍ਵਾ ‘‘ਥੇਰਸ੍ਸ ਪਤ੍ਤਂ ਕਿਣਿਤ੍ਵਾ ਦੇਹੀ’’ਤਿ ਪਹਿਤਕਪ੍ਪਿਯਕਾਰਕੇਨ ਸਦ੍ਧਿਂ ਕਮ੍ਮਾਰਕੁਲਂ ਗਨ੍ਤ੍ਵਾ ਪਤ੍ਤਂ ਦਿਸ੍ਵਾ ‘‘ਇਮੇ ਕਹਾਪਣੇ ਗਹੇਤ੍ਵਾ ਇਮਂ ਦੇਹੀ’’ਤਿ ਕਹਾਪਣੇ ਦਾਪੇਤ੍ਵਾ ਗਹਿਤੋ, ਅਯਂ ਪਤ੍ਤੋ ਏਤਸ੍ਸੇਵ ਭਿਕ੍ਖੁਨੋ ਨ ਵਟ੍ਟਤਿ ਦੁਬ੍ਬਿਚਾਰਿਤਤ੍ਤਾ, ਅਞ੍ਞੇਸਂ ਪਨ ਵਟ੍ਟਤਿ ਮੂਲਸ੍ਸ ਅਸਮ੍ਪਟਿਚ੍ਛਿਤਤ੍ਤਾ. ਮਹਾਸੁਮਤ੍ਥੇਰਸ੍ਸ ਕਿਰ ਉਪਜ੍ਝਾਯੋ ਅਨੁਰੁਦ੍ਧਤ੍ਥੇਰੋ ਨਾਮ ਅਹੋਸਿ. ਸੋ ਅਤ੍ਤਨੋ ਏਵਰੂਪਂ ਪਤ੍ਤਂ ਸਪ੍ਪਿਸ੍ਸ ਪੂਰੇਤ੍ਵਾ ਸਙ੍ਘਸ੍ਸ ਨਿਸ੍ਸਜ੍ਜਿ. ਤਿਪਿਟਕਚੂਲ਼ਨਾਗਤ੍ਥੇਰਸ੍ਸ ਸਦ੍ਧਿਵਿਹਾਰਿਕਾਨਂ ਏਵਰੂਪੋ ਪਤ੍ਤੋ ਅਹੋਸਿ. ਤਂ ਥੇਰੋਪਿ ਸਪ੍ਪਿਸ੍ਸ ਪੂਰੇਤ੍ਵਾ ਸਙ੍ਘਸ੍ਸ ਨਿਸ੍ਸਜ੍ਜਾਪੇਸੀਤਿ. ਇਦਂ ਅਕਪ੍ਪਿਯਪਤ੍ਤਚਤੁਕ੍ਕਂ.

ਸਚੇ ਪਨ ਰੂਪਿਯਂ ਅਸਮ੍ਪਟਿਚ੍ਛਿਤ੍ਵਾ ‘‘ਥੇਰਸ੍ਸ ਪਤ੍ਤਂ ਕਿਣਿਤ੍ਵਾ ਦੇਹੀ’’ਤਿ ਪਹਿਤਕਪ੍ਪਿਯਕਾਰਕੇਨ ਸਦ੍ਧਿਂ ਕਮ੍ਮਾਰਕੁਲਂ ਗਨ੍ਤ੍ਵਾ ਪਤ੍ਤਂ ਦਿਸ੍ਵਾ ‘‘ਅਯਂ ਮਯ੍ਹਂ ਰੁਚ੍ਚਤੀ’’ਤਿ ਵਾ ‘‘ਇਮਾਹਂ ਗਹੇਸ੍ਸਾਮੀ’’ਤਿ ਵਾ ਵਦਤਿ, ਕਪ੍ਪਿਯਕਾਰਕੋ ਚ ਤਂ ਰੂਪਿਯਂ ਦਤ੍ਵਾ ਕਮ੍ਮਾਰਂ ਸਞ੍ਞਾਪੇਤਿ, ਅਯਂ ਪਤ੍ਤੋ ਸਬ੍ਬਕਪ੍ਪਿਯੋ ਬੁਦ੍ਧਾਨਮ੍ਪਿ ਪਰਿਭੋਗਾਰਹੋ. ਇਮਂ ਪਨ ਰੂਪਿਯਸਂਵੋਹਾਰਂ ਕਰੋਨ੍ਤੇਨ ‘‘ਇਮਿਨਾ ਇਮਂ ਗਹੇਤ੍ਵਾ ਦੇਹੀ’’ਤਿ ਕਪ੍ਪਿਯਕਾਰਕਮ੍ਪਿ ਆਚਿਕ੍ਖਿਤੁਂ ਨ ਵਟ੍ਟਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਕਯਵਿਕ੍ਕਯਸਮਾਪਤ੍ਤਿਵਿਨਿਚ੍ਛਯਕਥਾ ਸਮਤ੍ਤਾ.