੧੨. ਰੂਪਿਯਾਦਿਪਟਿਗ੍ਗਹਣਵਿਨਿਚ੍ਛਯਕਥਾ
੫੯. ਰੂਪਿਯਾਦਿਪਟਿਗ੍ਗਹੋਤਿ ਜਾਤਰੂਪਾਦਿਪਟਿਗ੍ਗਣ੍ਹਨਂ. ਤਤ੍ਥ (ਪਾਰਾ. ਅਟ੍ਠ. ੨.੫੮੩-੪) ਜਾਤਰੂਪਂ ਰਜਤਂ ਜਾਤਰੂਪਮਾਸਕੋ ਰਜਤਮਾਸਕੋਤਿ ਚਤੁਬ੍ਬਿਧਂ ਨਿਸ੍ਸਗ੍ਗਿਯਵਤ੍ਥੁ. ਤਮ੍ਬਲੋਹਾਦੀਹਿ ਕਤੋ ਲੋਹਮਾਸਕੋ. ਸਾਰਦਾਰੁਨਾ ਵਾ ਵੇਲ਼ੁਪੇਸਿਕਾਯ ਵਾ ਅਨ੍ਤਮਸੋ ਤਾਲਪਣ੍ਣੇਨਪਿ ਰੂਪਂ ਛਿਨ੍ਦਿਤ੍ਵਾ ਕਤੋ ਦਾਰੁਮਾਸਕੋ. ਲਾਖਾਯ ਵਾ ਨਿਯ੍ਯਾਸੇਨ ਵਾ ਰੂਪਂ ਸਮੁਟ੍ਠਾਪੇਤ੍ਵਾ ਕਤੋ ਜਤੁਮਾਸਕੋ. ਯੋ ਯੋ ਯਤ੍ਥ ਯਤ੍ਥ ਜਨਪਦੇ ਯਦਾ ਯਦਾ ਵੋਹਾਰਂ ਗਚ੍ਛਤਿ, ਅਨ੍ਤਮਸੋ ਅਟ੍ਠਿਮਯੋਪਿ ਚਮ੍ਮਮਯੋਪਿ ਰੁਕ੍ਖਫਲਬੀਜਮਯੋਪਿ ਸਮੁਟ੍ਠਾਪਿਤਰੂਪੋਪਿ ਅਸਮੁਟ੍ਠਾਪਿਤਰੂਪੋਪੀਤਿ ਅਯਂ ਸਬ੍ਬੋਪਿ ਰਜਤਮਾਸਕੇਨੇਵ ਸਙ੍ਗਹਿਤੋ. ਮੁਤ੍ਤਾ ਮਣਿ ਵੇਲ਼ੁਰਿਯੋ ਸਙ੍ਖੋ ਸਿਲਾ ਪਵਾਲ਼ਂ ਲੋਹਿਤਙ੍ਕੋ ਮਸਾਰਗਲ੍ਲਂ ਸਤ੍ਤ ਧਞ੍ਞਾਨਿ ਦਾਸਿਦਾਸਖੇਤ੍ਤਵਤ੍ਥੁਪੁਪ੍ਫਾਰਾਮਫਲਾਰਾਮਾਦਯੋਤਿ ਇਦਂ ਦੁਕ੍ਕਟਵਤ੍ਥੁ. ਤਤ੍ਥ ਨਿਸ੍ਸਗ੍ਗਿਯਵਤ੍ਥੁਂ ਅਤ੍ਤਨੋ ਵਾ ਸਙ੍ਘਗਣਪੁਗ੍ਗਲਚੇਤਿਯਾਨਂ ਵਾ ਅਤ੍ਥਾਯ ਸਮ੍ਪਟਿਚ੍ਛਿਤੁਂ ਨ ਵਟ੍ਟਤਿ. ਅਤ੍ਤਨੋ ਅਤ੍ਥਾਯ ਸਮ੍ਪਟਿਚ੍ਛਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ ਹੋਤਿ, ਸੇਸਾਨਂ ਅਤ੍ਥਾਯ ਦੁਕ੍ਕਟਂ. ਦੁਕ੍ਕਟਵਤ੍ਥੁਂ ਸਬ੍ਬੇਸਮ੍ਪਿ ਅਤ੍ਥਾਯ ਸਮ੍ਪਟਿਚ੍ਛਤੋ ਦੁਕ੍ਕਟਮੇਵ.
ਤਤ੍ਰਾਯਂ ਵਿਨਿਚ੍ਛਯੋ (ਪਾਰਾ. ਅਟ੍ਠ. ੨.੫੩੮-੯) – ਸਚੇ ਕੋਚਿ ਜਾਤਰੂਪਰਜਤਂ ਆਹਰਿਤ੍ਵਾ ‘‘ਇਦਂ ਸਙ੍ਘਸ੍ਸ ਦਮ੍ਮਿ, ਆਰਾਮਂ ਵਾ ਕਰੋਥ ਚੇਤਿਯਂ ਵਾ ਭੋਜਨਸਾਲਾਦੀਨਂ ਵਾ ਅਞ੍ਞਤਰ’’ਨ੍ਤਿ ਵਦਤਿ, ਇਦਂ ਸਮ੍ਪਟਿਚ੍ਛਿਤੁਂ ਨ ਵਟ੍ਟਤਿ. ਸਚੇ ਪਨ ‘‘ਨਯਿਦਂ ਭਿਕ੍ਖੂਨਂ ਸਮ੍ਪਟਿਚ੍ਛਿਤੁਂ ਵਟ੍ਟਤੀ’’ਤਿ ਪਟਿਕ੍ਖਿਤ੍ਤੇ ‘‘ਵਡ੍ਢਕੀਨਂ ਵਾ ਕਮ੍ਮਕਾਰਾਨਂ ਵਾ ਹਤ੍ਥੇ ਭਵਿਸ੍ਸਤਿ, ਕੇਵਲਂ ਤੁਮ੍ਹੇ ਸੁਕਤਦੁਕ੍ਕਟਂ ਜਾਨਾਥਾ’’ਤਿ ਵਤ੍ਵਾ ਤੇਸਂ ਹਤ੍ਥੇ ਦਤ੍ਵਾ ਪਕ੍ਕਮਤਿ, ਵਟ੍ਟਤਿ. ਅਥਾਪਿ ‘‘ਮਮ ਮਨੁਸ੍ਸਾਨਂ ਹਤ੍ਥੇ ਭਵਿਸ੍ਸਤਿ, ਮਯ੍ਹਮੇਵ ਵਾ ਹਤ੍ਥੇ ਭਵਿਸ੍ਸਤਿ, ਕੇਵਲਂ ਤੁਮ੍ਹੇ ਯਂ ਯਸ੍ਸ ਦਾਤਬ੍ਬਂ, ਤਦਤ੍ਥਾਯ ਪੇਸੇਥਾ’’ਤਿ ਵਦਤਿ, ਏਵਮ੍ਪਿ ਵਟ੍ਟਤਿ. ਸਚੇ ਪਨ ਸਂਘਂ ਵਾ ਗਣਂ ਵਾ ਪੁਗ੍ਗਲਂ ਵਾ ਅਨਾਮਸਿਤ੍ਵਾ ‘‘ਇਦਂ ਹਿਰਞ੍ਞਸੁਵਣ੍ਣਂ ਚੇਤਿਯਸ੍ਸ ਦੇਮ, ਵਿਹਾਰਸ੍ਸ ਦੇਮ, ਨਵਕਮ੍ਮਸ੍ਸ ਦੇਮਾ’’ਤਿ ਵਦਨ੍ਤਿ, ਪਟਿਕ੍ਖਿਪਿਤੁਂ ਨ ਵਟ੍ਟਤਿ, ‘‘ਇਮੇ ਇਦਂ ਭਣਨ੍ਤੀ’’ਤਿ ਕਪ੍ਪਿਯਕਾਰਕਾਨਂ ਆਚਿਕ੍ਖਿਤਬ੍ਬਂ. ‘‘ਚੇਤਿਯਾਦੀਨਂ ਅਤ੍ਥਾਯ ਤੁਮ੍ਹੇ ਗਹੇਤ੍ਵਾ ਠਪੇਤ੍ਵਾ’’ਤਿ ਵੁਤ੍ਤੇ ਪਨ ‘‘ਅਮ੍ਹਾਕਂ ਗਹੇਤੁਂ ਨ ਵਟ੍ਟਤੀ’’ਤਿ ਪਟਿਕ੍ਖਿਪਿਤਬ੍ਬਂ.
ਸਚੇ ਪਨ ਕੋਚਿ ਬਹੁਂ ਹਿਰਞ੍ਞਸੁਵਣ੍ਣਂ ਆਨੇਤ੍ਵਾ ‘‘ਇਦਂ ਸਂਘਸ੍ਸ ਦਮ੍ਮਿ, ਚਤ੍ਤਾਰੋ ਪਚ੍ਚਯੇ ਪਰਿਭੁਞ੍ਜਥਾ’’ਤਿ ਵਦਤਿ, ਤਞ੍ਚੇ ਸਂਘੋ ਸਮ੍ਪਟਿਚ੍ਛਤਿ, ਪਟਿਗ੍ਗਹਣੇਪਿ ਪਰਿਭੋਗੇਪਿ ਆਪਤ੍ਤਿ. ਤਤ੍ਰ ਚੇਕੋ ਭਿਕ੍ਖੁ ‘‘ਨਯਿਦਂ ਕਪ੍ਪਤੀ’’ਤਿ ਪਟਿਕ੍ਖਿਪਤਿ, ਉਪਾਸਕੋ ਚ ‘‘ਯਦਿਨ ਕਪ੍ਪਤਿ, ਮਯ੍ਹਮੇਵ ਭਵਿਸ੍ਸਤੀ’’ਤਿ ਤਂ ਆਦਾਯ ਗਚ੍ਛਤਿ. ਸੋ ਭਿਕ੍ਖੁ ‘‘ਤਯਾ ਸਂਘਸ੍ਸ ਲਾਭਨ੍ਤਰਾਯੋ ਕਤੋ’’ਤਿ ਨ ਕੇਨਚਿ ਕਿਞ੍ਚਿ ਵਤ੍ਤਬ੍ਬੋ. ਯੋ ਹਿ ਤਂ ਚੋਦੇਤਿ, ਸ੍ਵੇਵ ਸਾਪਤ੍ਤਿਕੋ ਹੋਤਿ. ਤੇਨ ਪਨੇਕੇਨ ਬਹੂ ਅਨਾਪਤ੍ਤਿਕਾ ਕਤਾ. ਸਚੇ ਪਨ ਭਿਕ੍ਖੂਹਿ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਤ੍ਤੇ ‘‘ਕਪ੍ਪਿਯਕਾਰਕਾਨਂ ਵਾ ਹਤ੍ਥੇ ਭਵਿਸ੍ਸਤਿ, ਮਮ ਪੁਰਿਸਾਨਂ ਵਾ ਮਯ੍ਹਂ ਵਾ ਹਤ੍ਥੇ ਭਵਿਸ੍ਸਤਿ, ਕੇਵਲਂ ਤੁਮ੍ਹੇ ਪਚ੍ਚਯੇ ਪਰਿਭੁਞ੍ਜਥਾ’’ਤਿ ਵਦਤਿ, ਵਟ੍ਟਤਿ.
ਚਤੁਪਚ੍ਚਯਤ੍ਥਾਯ ਚ ਦਿਨ੍ਨਂ ਯੇਨ ਯੇਨ ਪਚ੍ਚਯੇਨ ਅਤ੍ਥੋ ਹੋਤਿ, ਤਂ ਤਦਤ੍ਥਂ ਉਪਨੇਤਬ੍ਬਂ. ਚਿਵਰਤ੍ਥਾਯ ਦਿਨ੍ਨਂ ਚੀਵਰੇਯੇਵ ਉਪਨੇਤਬ੍ਬਂ. ਸਚੇ ਚੀਵਰੇਨ ਤਾਦਿਸੋ ਅਤ੍ਥੋ ਨਤ੍ਥਿ, ਪਿਣ੍ਡਪਾਤਾਦੀਹਿ ਸਂਘੋ ਕਿਲਮਤਿ, ਸਂਘਸੁਟ੍ਠੁਤਾਯ ਅਪਲੋਕੇਤ੍ਵਾ ਤਦਤ੍ਥਾਯਪਿ ਉਪਨੇਤਬ੍ਬਂ. ਏਸ ਨਯੋ ਪਿਣ੍ਡਪਾਤਗਿਲਾਨਪਚ੍ਚਯਤ੍ਥਾਯ ਦਿਨ੍ਨੇਪਿ. ਸੇਨਾਸਨਤ੍ਥਾਯ ਦਿਨ੍ਨਂ ਪਨ ਸੇਨਾਸਨਸ੍ਸ ਗਰੁਭਣ੍ਡਤ੍ਤਾ ਸੇਨਾਸਨੇਯੇਵ ਉਪਨੇਤਬ੍ਬਂ. ਸਚੇ ਪਨ ਭਿਕ੍ਖੂਸੁ ਸੇਨਾਸਨਂ ਛਡ੍ਡੇਤ੍ਵਾ ਗਤੇਸੁ ਸੇਨਾਸਨਂ ਵਿਨਸ੍ਸਤਿ, ਈਦਿਸੇ ਕਾਲੇ ਸੇਨਾਸਨਂ ਵਿਸ੍ਸਜ੍ਜੇਤ੍ਵਾਪਿ ਭਿਕ੍ਖੂਨਂ ਪਰਿਭੋਗੋ ਅਨੁਞ੍ਞਾਤੋ, ਤਸ੍ਮਾ ਸੇਨਾਸਨਜਗ੍ਗਨਤ੍ਥਂ ਮੂਲਚ੍ਛੇਜ੍ਜਂ ਅਕਤ੍ਵਾ ਯਾਪਨਮਤ੍ਤਂ ਪਰਿਭੁਞ੍ਜਿਤਬ੍ਬਂ.
੬੦. ਸਚੇ ਕੋਚਿ ‘‘ਮਯ੍ਹਂ ਤਿਸਸ੍ਸਸਮ੍ਪਾਦਨਕਂ ਮਹਾਤਲ਼ਾਕਂ ਅਤ੍ਥਿ, ਤਂ ਸਂਘਸ੍ਸ ਦਮ੍ਮੀ’’ਤਿ ਵਦਤਿ, ਤਞ੍ਚੇ ਸਂਘੋ ਸਮ੍ਪਟਿਚ੍ਛਤਿ, ਪਟਿਗ੍ਗਹਣੇਪਿ ਪਰਿਭੋਗੇਪਿ ਆਪਤ੍ਤਿਯੇਵ. ਯੋ ਪਨ ਤਂ ਪਟਿਕ੍ਖਿਪਤਿ, ਸੋ ਪੁਰਿਮਨਯੇਨੇਵ ਨ ਕੇਨਚਿ ਕਿਞ੍ਚਿ ਵਤ੍ਤਬ੍ਬੋ. ਯੋ ਹਿ ਤਂ ਚੋਦੇਤਿ, ਸ੍ਵੇਵ ਸਾਪਤ੍ਤਿਕੋ ਹੋਤਿ. ਤੇਨ ਪਨੇਕੇਨ ਬਹੂ ਅਨਾਪਤ੍ਤਿਕਾ ਕਤਾ. ਯੋ ਪਨ ‘‘ਤਾਦਿਸਂਯੇਵ ਤਲ਼ਾਕਂ ਦਮ੍ਮੀ’’ਤਿ ਵਤ੍ਵਾ ਭਿਕ੍ਖੂਹਿ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਤ੍ਤੋ ਵਦਤਿ ‘‘ਅਸੁਕਞ੍ਚ ਅਸੁਕਞ੍ਚ ਸਙ੍ਘਸ੍ਸ ਤਲ਼ਾਕਂ ਅਤ੍ਥਿ, ਤਂ ਕਥਂ ਵਟ੍ਟਤੀ’’ਤਿ. ਸੋ ਵਤ੍ਤਬ੍ਬੋ ‘‘ਕਪ੍ਪਿਯਂ ਕਤ੍ਵਾ ਦਿਨ੍ਨਂ ਭਵਿਸ੍ਸਤੀ’’ਤਿ. ਕਥਂ ਦਿਨ੍ਨਂ ਕਪ੍ਪਿਯਂ ਹੋਤੀਤਿ. ‘‘ਚਤ੍ਤਾਰੋ ਪਚ੍ਚਯੇ ਪਰਿਭੁਞ੍ਜਥਾ’’ਤਿ ਵਤ੍ਵਾ ਦਿਨ੍ਨਨ੍ਤਿ. ਸੋ ਸਚੇ ‘‘ਸਾਧੁ, ਭਨ੍ਤੇ ਚਤ੍ਤਾਰੋ ਪਚ੍ਚਯੇ ਪਰਿਭੁਞ੍ਜਥਾ’’ਤਿ ਦੇਤਿ, ਵਟ੍ਟਤਿ. ਅਥਾਪਿ ‘‘ਤਲ਼ਾਕਂ ਗਣ੍ਹਥਾ’’ਤਿ ਵਤ੍ਵਾ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਤ੍ਤੋ ‘‘ਕਪ੍ਪਿਯਕਾਰਕੋ ਅਤ੍ਥੀ’’ਤਿ ਪੁਚ੍ਛਿਤ੍ਵਾ ‘‘ਨਤ੍ਥੀ’’ਤਿ ਵੁਤ੍ਤੇ ‘‘ਇਦਂ ਅਸੁਕੋ ਨਾਮ ਵਿਚਾਰੇਸ੍ਸਤਿ, ਅਸੁਕਸ੍ਸ ਵਾ ਹਤ੍ਥੇ ਮਯ੍ਹਂ ਵਾ ਹਤ੍ਥੇ ਭਵਿਸ੍ਸਤਿ, ਸਙ੍ਘੋ ਕਪ੍ਪਿਯਭਣ੍ਡਂ ਪਰਿਭੁਞ੍ਜਤੂ’’ਤਿ ਵਦਤਿ, ਵਟ੍ਟਤਿ. ਸਚੇਪਿ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਤ੍ਤੋ ‘‘ਉਦਕਂ ਪਰਿਭੁਞ੍ਜਿਸ੍ਸਤਿ, ਭਣ੍ਡਕਂ ਧੋਵਿਸ੍ਸਤਿ, ਮਿਗਪਕ੍ਖਿਨੋ ਪਿਵਿਸ੍ਸਨ੍ਤੀ’’ਤਿ ਵਦਤਿ, ਏਵਮ੍ਪਿ ਵਟ੍ਟਤਿ. ਅਥਾਪਿ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਤ੍ਤੋ ਵਦਤਿ ‘‘ਕਪ੍ਪਿਯਸੀਸੇਨ ਗਣ੍ਹਥਾ’’ਤਿ. ‘‘ਸਾਧੁ ਉਪਾਸਕ, ਸਙ੍ਘੋ ਪਾਨੀਯਂ ਪਿਵਿਸ੍ਸਤਿ, ਭਣ੍ਡਕਂ ਧੋਵਿਸ੍ਸਤਿ, ਮਿਗਪਕ੍ਖਿਨੋ ਪਿਵਿਸ੍ਸਨ੍ਤੀ’’ਤਿ ਵਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ. ਅਥਾਪਿ ‘‘ਮਮ ਤਲ਼ਾਕਂ ਵਾ ਪੋਕ੍ਖਰਣਿਂ ਵਾ ਸਙ੍ਘਸ੍ਸ ਦਮ੍ਮੀ’’ਤਿ ਵੁਤ੍ਤੇ ‘‘ਸਾਧੁ ਉਪਾਸਕ, ਸਙ੍ਘੋ ਪਾਨੀਯਂ ਪਿਵਿਸ੍ਸਤੀ’’ਤਿਆਦੀਨਿ ਵਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿਯੇਵ.
ਯਦਿ ਪਨ ਭਿਕ੍ਖੂਹਿ ਹਤ੍ਥਕਮ੍ਮਂ ਯਾਚਿਤ੍ਵਾ ਸਹਤ੍ਥੇਨ ਚ ਕਪ੍ਪਿਯਪਥਵਿਂ ਖਣਿਤ੍ਵਾ ਉਦਕਪਰਿਭੋਗਤ੍ਥਾਯ ਤਲ਼ਾਕਂ ਕਾਰਿਤਂ ਹੋਤਿ, ਤਞ੍ਚੇ ਨਿਸ੍ਸਾਯ ਸਸ੍ਸਂ ਨਿਪ੍ਫਾਦੇਤ੍ਵਾ ਮਨੁਸ੍ਸਾ ਵਿਹਾਰੇ ਕਪ੍ਪਿਯਭਣ੍ਡਂ ਦੇਨ੍ਤਿ, ਵਟ੍ਟਤਿ. ਅਥ ਮਨੁਸ੍ਸਾ ਏਵ ਸਙ੍ਘਸ੍ਸ ਉਪਕਾਰਤ੍ਥਾਯ ਸਙ੍ਘਿਕਭੂਮਿਂ ਖਣਿਤ੍ਵਾ ਤਂ ਨਿਸ੍ਸਾਯ ਨਿਪ੍ਫਨ੍ਨਸਸ੍ਸਤੋ ਕਪ੍ਪਿਯਭਣ੍ਡਂ ਦੇਨ੍ਤਿ, ਏਤਮ੍ਪਿ ਵਟ੍ਟਤਿ. ‘‘ਅਮ੍ਹਾਕਂ ਏਕਂ ਕਪ੍ਪਿਯਕਾਰਕਂ ਠਪੇਥਾ’’ਤਿ ਵੁਤ੍ਤੇ ਚ ਠਪੇਤੁਮ੍ਪਿ ਲਬ੍ਭਤਿ. ਅਥ ਤੇ ਮਨੁਸ੍ਸਾ ਰਾਜਬਲਿਨਾ ਉਪਦ੍ਦੁਤਾ ਪਕ੍ਕਮਨ੍ਤਿ, ਅਞ੍ਞੇ ਪਟਿਪਜ੍ਜਨ੍ਤਿ, ਨ ਚ ਭਿਕ੍ਖੂਨਂ ਕਿਞ੍ਚਿ ਦੇਨ੍ਤਿ, ਉਦਕਂ ਵਾਰੇਤੁਂ ਲਬ੍ਭਤਿ, ਤਞ੍ਚ ਖੋ ਕਸਿਕਮ੍ਮਕਾਲੇਯੇਵ, ਨ ਸਸ੍ਸਕਾਲੇ. ਸਚੇ ਤੇ ਵਦਨ੍ਤਿ ‘‘ਨਨੁ, ਭਨ੍ਤੇ, ਪੁਬ੍ਬੇਪਿ ਮਨੁਸ੍ਸਾ ਇਮਂ ਨਿਸ੍ਸਾਯ ਸਸ੍ਸਂ ਅਕਂਸੂ’’ਤਿ, ਤਤੋ ਵਤ੍ਤਬ੍ਬਾ ‘‘ਤੇ ਸਙ੍ਘਸ੍ਸ ਇਮਞ੍ਚ ਇਮਞ੍ਚ ਉਪਕਾਰਂ ਅਕਂਸੁ, ਇਦਞ੍ਚਿਦਞ੍ਚ ਕਪ੍ਪਿਯਭਣ੍ਡਕਂ ਅਦਂਸੂ’’ਤਿ. ਸਚੇ ਤੇ ਵਦਨ੍ਤਿ ‘‘ਮਯਮ੍ਪਿ ਦਸ੍ਸਾਮਾ’’ਤਿ, ਏਵਮ੍ਪਿ ਵਟ੍ਟਤਿ.
ਸਚੇ ਪਨ ਕੋਚਿ ਅਬ੍ਯਤ੍ਤੋ ਅਕਪ੍ਪਿਯਵੋਹਾਰੇਨ ਤਲ਼ਾਕਂ ਪਟਿਗ੍ਗਣ੍ਹਾਤਿ ਵਾ ਕਾਰੇਤਿ ਵਾ, ਤਂ ਭਿਕ੍ਖੂਹਿ ਨ ਪਰਿਭੁਞ੍ਜਿਤਬ੍ਬਂ, ਤਂ ਨਿਸ੍ਸਾਯ ਲਦ੍ਧਕਪ੍ਪਿਯਭਣ੍ਡਮ੍ਪਿ ਅਕਪ੍ਪਿਯਮੇਵ. ਸਚੇ ਭਿਕ੍ਖੂਹਿ ਪਰਿਚ੍ਚਤ੍ਤਭਾਵਂ ਞਤ੍ਵਾ ਸਾਮਿਕੋ ਵਾ ਤਸ੍ਸ ਪੁਤ੍ਤਧੀਤਰੋ ਵਾ ਅਞ੍ਞੋ ਵਾ ਕੋਚਿ ਵਂਸੇ ਉਪ੍ਪਨ੍ਨੋ ਪੁਨ ਕਪ੍ਪਿਯਵੋਹਾਰੇਨ ਦੇਤਿ, ਵਟ੍ਟਤਿ. ਪਚ੍ਛਿਨ੍ਨੇ ਕੁਲਵਂਸੇ ਯੋ ਤਸ੍ਸ ਜਨਪਦਸ੍ਸ ਸਾਮਿਕੋ, ਸੋ ਅਚ੍ਛਿਨ੍ਦਿਤ੍ਵਾ ਕਪ੍ਪਿਯਵੋਹਾਰੇਨ ਪੁਨ ਦੇਤਿ ਚਿਤ੍ਤਲਪਬ੍ਬਤੇ ਭਿਕ੍ਖੁਨਾ ਨੀਹਟਉਦਕਵਾਹਕਂ ਅਲ਼ਨਾਗਰਾਜਮਹੇਸੀ ਵਿਯ, ਏਵਮ੍ਪਿ ਵਟ੍ਟਤਿ. ਕਪ੍ਪਿਯਵੋਹਾਰੇਪਿ ਉਦਕਵਸੇਨ ਪਟਿਗ੍ਗਹਿਤਤਲ਼ਾਕੇ ਸੁਦ੍ਧਚਿਤ੍ਤਾਨਂ ਮਤ੍ਤਿਕੁਦ੍ਧਰਣਪਾਲ਼ਿਬਨ੍ਧਨਾਦੀਨਿ ਚ ਕਾਤੁਂ ਵਟ੍ਟਤਿ. ਤਂ ਨਿਸ੍ਸਾਯ ਪਨ ਸਸ੍ਸਂ ਕਰੋਨ੍ਤੇ ਦਿਸ੍ਵਾ ਕਪ੍ਪਿਯਕਾਰਕਂ ਠਪੇਤੁਂ ਨ ਵਟ੍ਟਤਿ. ਯਦਿ ਤੇ ਸਯਮੇਵ ਕਪ੍ਪਿਯਭਣ੍ਡਂ ਦੇਨ੍ਤਿ, ਗਹੇਤਬ੍ਬਂ. ਨੋ ਚੇ ਦੇਨ੍ਤਿ, ਨ ਚੋਦੇਤਬ੍ਬਂ. ਪਚ੍ਚਯਵਸੇਨ ਪਟਿਗ੍ਗਹਿਤਤਲ਼ਾਕੇ ਕਪ੍ਪਿਯਕਾਰਕਂ ਠਪੇਤੁਂ ਵਟ੍ਟਤਿ, ਮਤ੍ਤਿਕੁਦ੍ਧਰਣਪਾਲ਼ਿਬਨ੍ਧਨਾਦੀਨਿ ਕਾਰੇਤੁਂ ਨ ਵਟ੍ਟਤਿ. ਸਚੇ ਕਪ੍ਪਿਯਕਾਰਕਾ ਸਯਮੇਵ ਕਰੋਨ੍ਤਿ, ਵਟ੍ਟਤਿ. ਅਬ੍ਯਤ੍ਤੇਨ ਪਨ ਲਜ੍ਜਿਭਿਕ੍ਖੁਨਾ ਕਾਰਾਪਿਤੇਸੁ ਕਿਞ੍ਚਾਪਿ ਪਟਿਗ੍ਗਹਣਂ ਕਪ੍ਪਿਯਂ, ਭਿਕ੍ਖੁਸ੍ਸ ਪਨ ਪਯੋਗਪਚ੍ਚਯਾ ਉਪ੍ਪਨ੍ਨੇਨ ਮਿਸ੍ਸਤ੍ਤਾ ਵਿਸਗਤਪਿਣ੍ਡਪਾਤੋ ਵਿਯ ਅਕਪ੍ਪਿਯਮਂਸਰਸਮਿਸ੍ਸਭੋਜਨਂ ਵਿਯ ਚ ਦੁਬ੍ਬਿਨਿਭੋਗਂ ਹੋਤਿ, ਸਬ੍ਬੇਸਂ ਅਕਪ੍ਪਿਯਮੇਵ.
੬੧. ਸਚੇ ਪਨ ਉਦਕਸ੍ਸ ਓਕਾਸੋ ਅਤ੍ਥਿ, ਤਲ਼ਾਕਸ੍ਸ ਪਾਲ਼ਿ ਥਿਰਾ, ‘‘ਯਥਾ ਬਹੁਂ ਉਦਕਂ ਗਣ੍ਹਾਤਿ, ਏਵਂ ਕਰੋਹਿ, ਤੀਰਸਮੀਪੇ ਉਦਕਂ ਕਰੋਹੀ’’ਤਿ ਏਵਂ ਉਦਕਮੇਵ ਵਿਚਾਰੇਤਿ, ਵਟ੍ਟਤਿ. ਉਦ੍ਧਨੇ ਅਗ੍ਗਿਂ ਨ ਪਾਤੇਨ੍ਤਿ, ‘‘ਉਦਕਕਮ੍ਮਂ ਲਬ੍ਭਤੁ ਉਪਾਸਕਾ’’ਤਿ ਵਤ੍ਤੁਂ ਵਟ੍ਟਤਿ, ‘‘ਸਸ੍ਸਂ ਕਤ੍ਵਾ ਆਹਰਥਾ’’ਤਿ ਵਤ੍ਤੁਂ ਪਨ ਨ ਵਟ੍ਟਤਿ. ਸਚੇ ਪਨ ਤਲ਼ਾਕੇ ਅਤਿਬਹੁਂ ਉਦਕਂ ਦਿਸ੍ਵਾ ਪਸ੍ਸਤੋ ਵਾ ਪਿਟ੍ਠਿਤੋ ਵਾ ਮਾਤਿਕਂ ਨੀਹਰਾਪੇਤਿ, ਵਨਂ ਛਿਨ੍ਦਾਪੇਤ੍ਵਾ ਕੇਦਾਰੇ ਕਾਰਾਪੇਤਿ, ਪੋਰਾਣਕੇਦਾਰੇਸੁ ਵਾ ਪਕਤਿਭਾਗਂ ਅਗ੍ਗਹੇਤ੍ਵਾ ਅਤਿਰੇਕਂ ਗਣ੍ਹਾਤਿ, ਨਵਸਸ੍ਸੇ ਵਾ ਅਪਰਿਚ੍ਛਿਨ੍ਨਭਾਗੇ ‘‘ਏਤ੍ਤਕੇ ਕਹਾਪਣੇ ਦੇਥਾ’’ਤਿ ਕਹਾਪਣੇ ਉਟ੍ਠਾਪੇਤਿ, ਸਬ੍ਬੇਸਂ ਅਕਪ੍ਪਿਯਂ.
ਯੋ ਪਨ ‘‘ਕਸਥ ਵਪਥਾ’’ਤਿ ਅਵਤ੍ਵਾ ‘‘ਏਤ੍ਤਕਾਯ ਭੂਮਿਯਾ ਏਤ੍ਤਕੋ ਨਾਮ ਭਾਗੋ’’ਤਿ ਏਵਂ ਭੂਮਿਂ ਵਾ ਪਤਿਟ੍ਠਾਪੇਤਿ, ‘‘ਏਤ੍ਤਕੇ ਭੂਮਿਭਾਗੇ ਅਮ੍ਹੇਹਿ ਸਸ੍ਸਂ ਕਤਂ, ਏਤ੍ਤਕਂ ਨਾਮ ਭਾਗਂ ਗਣ੍ਹਥਾ’’ਤਿ ਵਦਨ੍ਤੇਸੁ ਕਸ੍ਸਕੇਸੁ ਭੂਮਿਪ੍ਪਮਾਣਗਹਣਤ੍ਥਂ ਰਜ੍ਜੁਯਾ ਵਾ ਦਣ੍ਡੇਨ ਵਾ ਮਿਨਾਤਿ, ਖਲੇ ਵਾ ਠਤ੍ਵਾ ਰਕ੍ਖਤਿ, ਖਲਤੋ ਵਾ ਨੀਹਰਾਪੇਤਿ, ਕੋਟ੍ਠਾਗਾਰੇ ਵਾ ਪਟਿਸਾਮੇਤਿ, ਤਸ੍ਸੇਵ ਤਂ ਅਕਪ੍ਪਿਯਂ. ਸਚੇ ਕਸ੍ਸਕਾ ਕਹਾਪਣੇ ਆਹਰਿਤ੍ਵਾ ‘‘ਇਮੇ ਸਙ੍ਘਸ੍ਸ ਆਹਟਾ’’ਤਿ ਵਦਨ੍ਤਿ, ਅਞ੍ਞਤਰੋ ਚ ਭਿਕ੍ਖੁ ‘‘ਨ ਸਙ੍ਘੋ ਕਹਾਪਣੇ ਖਾਦਤੀ’’ਤਿ ਸਞ੍ਞਾਯ ‘‘ਏਤ੍ਤਕੇਹਿ ਕਹਾਪਣੇਹਿ ਸਾਟਕੇ ਆਹਰਥ, ਏਤ੍ਤਕੇਹਿ ਯਾਗੁਆਦੀਨਿ ਸਮ੍ਪਾਦੇਥਾ’’ਤਿ ਵਦਤਿ, ਯਂ ਤੇ ਆਹਰਨ੍ਤਿ, ਤਂ ਸਬ੍ਬੇਸਂ ਅਕਪ੍ਪਿਯਂ. ਕਸ੍ਮਾ? ਕਹਾਪਣਾਨਂ ਵਿਚਾਰਿਤਤ੍ਤਾ. ਸਚੇ ਧਞ੍ਞਂ ਆਹਰਿਤ੍ਵਾ ‘‘ਇਦਂ ਸਙ੍ਘਸ੍ਸ ਆਹਟ’’ਨ੍ਤਿ ਵਦਨ੍ਤਿ, ਅਞ੍ਞਤਰੋ ਚ ਭਿਕ੍ਖੁ ਪੁਰਿਮਨਯੇਨੇਵ ‘‘ਏਤ੍ਤਕੇਹਿ ਵੀਹੀਹਿ ਇਦਞ੍ਚਿਦਞ੍ਚ ਆਹਰਥਾ’’ਤਿ ਵਦਤਿ, ਯਂ ਤੇ ਆਹਰਨ੍ਤਿ, ਤਂ ਤਸ੍ਸੇਵ ਅਕਪ੍ਪਿਯਂ. ਕਸ੍ਮਾ? ਧਞ੍ਞਸ੍ਸ ਵਿਚਾਰਿਤਤ੍ਤਾ. ਸਚੇ ਤਣ੍ਡੁਲਂ ਵਾ ਅਪਰਣ੍ਣਂ ਵਾ ਆਹਰਿਤ੍ਵਾ ‘‘ਇਦਂ ਸਙ੍ਘਸ੍ਸ ਆਹਟ’’ਨ੍ਤਿ ਵਦਨ੍ਤਿ, ਅਞ੍ਞਤਰੋ ਚ ਭਿਕ੍ਖੁ ਪੁਰਿਮਨਯੇਨੇਵ ‘‘ਏਤ੍ਤਕੇਹਿ ਤਣ੍ਡੁਲੇਹਿ ਇਦਞ੍ਚਿਦਞ੍ਚ ਆਹਰਥਾ’’ਤਿ ਵਦਤਿ, ਯਂ ਤੇ ਆਹਰਨ੍ਤਿ, ਤਂ ਸਬ੍ਬੇਸਂ ਕਪ੍ਪਿਯਂ. ਕਸ੍ਮਾ? ਕਪ੍ਪਿਯਾਨਂ ਤਣ੍ਡੁਲਾਦੀਨਂ ਵਿਚਾਰਿਤਤ੍ਤਾ. ਕਯਵਿਕ੍ਕਯੇਪਿ ਅਨਾਪਤ੍ਤਿ ਕਪ੍ਪਿਯਕਾਰਕਸ੍ਸ ਆਚਿਕ੍ਖਿਤਤ੍ਤਾ.
੬੨. ਪੁਬ੍ਬੇ ਪਨ ਚਿਤ੍ਤਲਪਬ੍ਬਤੇ ਏਕੋ ਭਿਕ੍ਖੁ ਚਤੁਸਾਲਦ੍ਵਾਰੇ ‘‘ਅਹੋ ਵਤ ਸ੍ਵੇ ਸਙ੍ਘਸ੍ਸ ਏਤ੍ਤਕਪ੍ਪਮਾਣੇ ਪੂਵੇ ਪਚੇਯ੍ਯੁ’’ਨ੍ਤਿ ਆਰਾਮਿਕਾਨਂ ਸਞ੍ਞਾਜਨਨਤ੍ਥਂ ਭੂਮਿਯਂ ਮਣ੍ਡਲਂ ਅਕਾਸਿ. ਤਂ ਦਿਸ੍ਵਾ ਛੇਕੋ ਆਰਾਮਿਕੋ ਤਥੇਵ ਕਤ੍ਵਾ ਦੁਤਿਯਦਿਵਸੇ ਭੇਰਿਯਾ ਆਕੋਟਿਤਾਯ ਸਨ੍ਨਿਪਤਿਤੇ ਸਙ੍ਘੇ ਪੂਵਂ ਗਹੇਤ੍ਵਾ ਸਙ੍ਘਤ੍ਥੇਰਂ ਆਹ – ‘‘ਭਨ੍ਤੇ, ਅਮ੍ਹੇਹਿ ਇਤੋ ਪੁਬ੍ਬੇ ਨੇਵ ਪਿਤੂਨਂ, ਨ ਪਿਤਾਮਹਾਨਂ ਏਵਰੂਪਂ ਸੁਤਪੁਬ੍ਬਂ, ਏਕੇਨ ਅਯ੍ਯੇਨ ਚਤੁਸਾਲਦ੍ਵਾਰੇ ਪੂਵਤ੍ਥਾਯ ਸਞ੍ਞਾ ਕਤਾ, ਇਤੋ ਦਾਨਿ ਪਭੁਤਿ ਅਯ੍ਯਾ ਅਤ੍ਤਨੋ ਅਤ੍ਤਨੋ ਚਿਤ੍ਤਾਨੁਰੂਪਂ ਵਦਨ੍ਤੁ, ਅਮ੍ਹਾਕਮ੍ਪਿ ਫਾਸੁਵਿਹਾਰੋ ਭਵਿਸ੍ਸਤੀ’’ਤਿ. ਮਹਾਥੇਰੋ ਤਤੋਵ ਨਿਵਤ੍ਤਿ, ਏਕਭਿਕ੍ਖੁਨਾਪਿ ਪੂਵੋ ਨ ਗਹਿਤੋ. ਏਵਂ ਪੁਬ੍ਬੇ ਤਤ੍ਰੁਪ੍ਪਾਦਂ ਨ ਪਰਿਭੁਞ੍ਜਿਂਸੁ. ਤਸ੍ਮਾ –
ਸਲ੍ਲੇਖਂ ਅਚ੍ਚਜਨ੍ਤੇਨ, ਅਪ੍ਪਮਤ੍ਤੇਨ ਭਿਕ੍ਖੁਨਾ;
ਕਪ੍ਪਿਯੇਪਿ ਨ ਕਾਤਬ੍ਬਾ, ਆਮਿਸਤ੍ਥਾਯ ਲੋਲਤਾਤਿ. (ਪਾਰਾ. ਅਟ੍ਠ. ੨.੫੩੮-੯);
ਯੋ ਚਾਯਂ ਤਲ਼ਾਕੇ ਵੁਤ੍ਤੋ, ਪੋਕ੍ਖਰਣੀਉਦਕਵਾਹਕਮਾਤਿਕਾਦੀਸੁਪਿ ਏਸੇਵ ਨਯੋ.
੬੩. ਪੁਬ੍ਬਣ੍ਣਾਪਰਣ੍ਣਉਚ੍ਛੁਫਲਾਫਲਾਦੀਨਂ ਵਿਰੁਹਨਟ੍ਠਾਨਂ ਯਂ ਕਿਞ੍ਚਿ ਖੇਤ੍ਤਂ ਵਾ ਵਤ੍ਥੁਂ ਵਾ ‘‘ਦਮ੍ਮੀ’’ਤਿ ਵੁਤ੍ਤੇਪਿ ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਪਿਤ੍ਵਾ ਤਲ਼ਾਕੇ ਵੁਤ੍ਤਨਯੇਨੇਵ ਯਦਾ ਕਪ੍ਪਿਯਵੋਹਾਰੇਨ ‘‘ਚਤੁਪਚ੍ਚਯਪਰਿਭੋਗਤ੍ਥਾਯ ਦਮ੍ਮੀ’’ਤਿ ਵਦਤਿ, ਤਦਾ ਸਮ੍ਪਟਿਚ੍ਛਿਤਬ੍ਬਂ, ‘‘ਵਨਂ ਦਮ੍ਮਿ ਅਰਞ੍ਞਂ ਦਮ੍ਮੀ’’ਤਿ ਵੁਤ੍ਤੇ ਪਨ ਵਟ੍ਟਤਿ. ਸਚੇ ਮਨੁਸ੍ਸਾ ਭਿਕ੍ਖੂਹਿ ਅਨਾਣਤ੍ਤਾਯੇਵ ਤਤ੍ਥ ਰੁਕ੍ਖੇ ਛਿਨ੍ਦਿਤ੍ਵਾ ਅਪਰਣ੍ਣਾਦੀਨਿ ਸਮ੍ਪਾਦੇਤ੍ਵਾ ਭਿਕ੍ਖੂਨਂ ਭਾਗਂ ਦੇਨ੍ਤਿ, ਵਟ੍ਟਤਿ, ਅਦੇਨ੍ਤਾ ਨ ਚੋਦੇਤਬ੍ਬਾ. ਸਚੇ ਕੇਨਚਿਦੇਵ ਅਨ੍ਤਰਾਯੇਨ ਤੇਸੁ ਪਕ੍ਕਨ੍ਤੇਸੁ ਅਞ੍ਞੇ ਕਰੋਨ੍ਤਿ, ਨ ਚ ਭਿਕ੍ਖੂਨਂ ਕਿਞ੍ਚਿ ਦੇਨ੍ਤਿ, ਤੇ ਵਾਰੇਤਬ੍ਬਾ. ਸਚੇ ਵਦਨ੍ਤਿ ‘‘ਨਨੁ, ਭਨ੍ਤੇ, ਪੁਬ੍ਬੇ ਮਨੁਸ੍ਸਾ ਇਧ ਸਸ੍ਸਾਨਿ ਅਕਂਸੂ’’ਤਿ, ਤਤੋ ਵਤ੍ਤਬ੍ਬਾ ‘‘ਤੇ ਸਙ੍ਘਸ੍ਸ ਇਦਞ੍ਚਿਦਞ੍ਚ ਕਪ੍ਪਿਯਭਣ੍ਡਂ ਅਦਂਸੂ’’ਤਿ. ਸਚੇ ਵਦਨ੍ਤਿ ‘‘ਮਯਮ੍ਪਿ ਦਸ੍ਸਾਮਾ’’ਤਿ, ਏਵਂ ਵਟ੍ਟਤਿ.
ਕਿਞ੍ਚਿ ਸਸ੍ਸੁਟ੍ਠਾਨਕਂ ਭੂਮਿਪ੍ਪਦੇਸਂ ਸਨ੍ਧਾਯ ‘‘ਸੀਮਂ ਦੇਮਾ’’ਤਿ ਵਦਨ੍ਤਿ, ਵਟ੍ਟਤਿ. ਸੀਮਪਰਿਚ੍ਛੇਦਨਤ੍ਥਂ ਪਨ ਥਮ੍ਭਾ ਵਾ ਪਾਸਾਣਾ ਵਾ ਸਯਂ ਨ ਠਪੇਤਬ੍ਬਾ, ਭੂਮਿ ਨਾਮ ਅਨਗ੍ਘਾ, ਅਪ੍ਪਕੇਨਪਿ ਪਾਰਾਜਿਕੋ ਭਵੇਯ੍ਯ. ਆਰਾਮਿਕਾਨਂ ਪਨ ਵਤ੍ਤਬ੍ਬਂ ‘‘ਇਮਿਨਾ ਠਾਨੇਨ ਅਮ੍ਹਾਕਂ ਸੀਮਾ ਗਤਾ’’ਤਿ. ਸਚੇਪਿ ਹਿ ਤੇ ਅਧਿਕਂ ਗਣ੍ਹਨ੍ਤਿ, ਪਰਿਯਾਯੇਨ ਕਥਿਤਤ੍ਤਾ ਅਨਾਪਤ੍ਤਿ. ਯਦਿ ਪਨ ਰਾਜਰਾਜਮਹਾਮਤ੍ਤਾਦਯੋ ਸਯਮੇਵ ਥਮ੍ਭੇ ਠਪਾਪੇਤ੍ਵਾ ‘‘ਚਤ੍ਤਾਰੋ ਪਚ੍ਚਯੇ ਪਰਿਭੁਞ੍ਜਥਾ’’ਤਿ ਦੇਨ੍ਤਿ, ਵਟ੍ਟਤਿਯੇਵ.
ਸਚੇ ਕੋਚਿ ਅਨ੍ਤੋਸੀਮਾਯਂ ਤਲ਼ਾਕਂ ਵਾ ਖਣਤਿ, ਵਿਹਾਰਮਜ੍ਝੇਨ ਵਾ ਮਾਤਿਕਂ ਨੇਤਿ, ਚੇਤਿਯਙ੍ਗਣਬੋਧਿਯਙ੍ਗਣਾਦੀਨਿ ਦੁਸ੍ਸਨ੍ਤਿ, ਵਾਰੇਤਬ੍ਬੋ. ਸਚੇ ਸਙ੍ਘੋ ਕਿਞ੍ਚਿ ਲਭਿਤ੍ਵਾ ਆਮਿਸਗਰੁਕਤਾਯ ਨ ਵਾਰੇਤਿ, ਏਕੋ ਭਿਕ੍ਖੁ ਵਾਰੇਤਿ, ਸੋਵ ਭਿਕ੍ਖੁ ਇਸ੍ਸਰੋ. ਸਚੇ ਏਕੋ ਭਿਕ੍ਖੁ ਨ ਵਾਰੇਤਿ ‘‘ਨੇਥ ਤੁਮ੍ਹੇ’’ਤਿ, ਤੇਸਂਯੇਵ ਪਕ੍ਖੋ ਹੋਤਿ. ਸਙ੍ਘੋ ਵਾਰੇਤਿ, ਸਙ੍ਘੋਵ ਇਸ੍ਸਰੋ. ਸਙ੍ਘਿਕੇਸੁ ਹਿ ਕਮ੍ਮੇਸੁ ਯੋ ਧਮ੍ਮਕਮ੍ਮਂ ਕਰੋਤਿ, ਸੋਵ ਇਸ੍ਸਰੋ. ਸਚੇ ਵਾਰਿਯਮਾਨੋਪਿ ਕਰੋਤਿ, ਹੇਟ੍ਠਾ ਗਹਿਤਂ ਪਂਸੁਂ ਹੇਟ੍ਠਾ ਪਕ੍ਖਿਪਿਤ੍ਵਾ, ਉਪਰਿ ਗਹਿਤਂ ਪਂਸੁਂ ਉਪਰਿ ਪਕ੍ਖਿਪਿਤ੍ਵਾ ਪੂਰੇਤਬ੍ਬਾ.
ਸਚੇ ਕੋਚਿ ਯਥਾਜਾਤਮੇਵ ਉਚ੍ਛੁਂ ਵਾ ਅਪਰਣ੍ਣਂ ਵਾ ਅਲਾਬੁਕੁਮ੍ਭਣ੍ਡਾਦਿਕਂ ਵਾ ਵਲ੍ਲਿਫਲਂ ਦਾਤੁਕਾਮੋ ‘‘ਏਤਂ ਸਬ੍ਬਂ ਉਚ੍ਛੁਖੇਤ੍ਤਂ ਅਪਰਣ੍ਣਵਤ੍ਥੁਂ ਵਲ੍ਲਿਫਲਾਵਾਟਂ ਦਮ੍ਮੀ’’ਤਿ ਵਦਤਿ, ਸਹ ਵਤ੍ਥੁਨਾ ਪਰਾਮਟ੍ਠਤ੍ਤਾ ਨ ਵਟ੍ਟਤੀਤਿ ਮਹਾਸੁਮਤ੍ਥੇਰੋ ਆਹ. ਮਹਾਪਦੁਮਤ੍ਥੇਰੋ ਪਨ ‘‘ਅਭਿਲਾਪਮਤ੍ਤਮੇਤਂ, ਸਾਮਿਕਾਨਂਯੇਵ ਹਿ ਸੋ ਭੂਮਿਭਾਗੋ, ਤਸ੍ਮਾ ਵਟ੍ਟਤੀ’’ਤਿ ਆਹ. ‘‘ਦਾਸਂ ਦਮ੍ਮੀ’’ਤਿ ਵਦਤਿ, ਨ ਵਟ੍ਟਤਿ. ‘‘ਆਰਾਮਿਕਂ ਦਮ੍ਮਿ, ਵੇਯ੍ਯਾਵਚ੍ਚਕਰਂ ਦਮ੍ਮਿ, ਕਪ੍ਪਿਯਕਾਰਕਂ ਦਮ੍ਮੀ’’ਤਿ ਵੁਤ੍ਤੇ ਵਟ੍ਟਤਿ. ਸਚੇ ਆਰਾਮਿਕੋ ਪੁਰੇਭਤ੍ਤਮ੍ਪਿ ਪਚ੍ਛਾਭਤ੍ਤਮ੍ਪਿ ਸਙ੍ਘਸ੍ਸੇਵ ਕਮ੍ਮਂ ਕਰੋਤਿ, ਸਾਮਣੇਰਸ੍ਸ ਵਿਯ ਸਬ੍ਬਂ ਭੇਸਜ੍ਜਂ ਪਟਿਜਗ੍ਗਨਮ੍ਪਿ ਤਸ੍ਸ ਕਾਤਬ੍ਬਂ. ਸਚੇ ਪੁਰੇਭਤ੍ਤਮੇਵ ਸਙ੍ਘਸ੍ਸ ਕਮ੍ਮਂ ਕਰੋਤਿ, ਪਚ੍ਛਾਭਤ੍ਤਂ ਅਤ੍ਤਨੋ ਕਰੋਤਿ, ਸਾਯਂ ਨਿਵਾਪੋ ਨ ਦਾਤਬ੍ਬੋ. ਯੇਪਿ ਪਞ੍ਚਦਿਵਸਵਾਰੇਨ ਵਾ ਪਕ੍ਖਵਾਰੇਨ ਵਾ ਸਙ੍ਘਸ੍ਸ ਕਮ੍ਮਂ ਕਤ੍ਵਾ ਸੇਸਕਾਲੇ ਅਤ੍ਤਨੋ ਕਮ੍ਮਂ ਕਰੋਨ੍ਤਿ, ਤੇਸਮ੍ਪਿ ਕਰਣਕਾਲੇਯੇਵ ਭਤ੍ਤਞ੍ਚ ਨਿਵਾਪੋ ਚ ਦਾਤਬ੍ਬੋ. ਸਚੇ ਸਙ੍ਘਸ੍ਸ ਕਮ੍ਮਂ ਨਤ੍ਥਿ, ਅਤ੍ਤਨੋਯੇਵ ਕਮ੍ਮਂ ਕਤ੍ਵਾ ਜੀਵਨ੍ਤਿ, ਤੇ ਚੇ ਹਤ੍ਥਕਮ੍ਮਮੂਲਂ ਆਨੇਤ੍ਵਾ ਦੇਨ੍ਤਿ, ਗਹੇਤਬ੍ਬਂ. ਨੋ ਚੇ ਦੇਨ੍ਤਿ, ਨ ਕਿਞ੍ਚਿ ਵਤ੍ਤਬ੍ਬਾ. ਯਂ ਕਿਞ੍ਚਿ ਰਜਕਦਾਸਮ੍ਪਿ ਪੇਸਕਾਰਦਾਸਮ੍ਪਿ ਆਰਾਮਿਕਨਾਮੇਨ ਸਮ੍ਪਟਿਚ੍ਛਿਤੁਂ ਵਟ੍ਟਤਿ.
ਸਚੇ ‘‘ਗਾਵੋ ਦੇਮਾ’’ਤਿ ਵਦਨ੍ਤਿ, ‘‘ਨ ਵਟ੍ਟਤੀ’’ਤਿ ਪਟਿਕ੍ਖਿਪਿਤਬ੍ਬਾ. ਇਮਾ ਗਾਵੋ ਕੁਤੋਤਿ. ਪਣ੍ਡਿਤੇਹਿ ਪਞ੍ਚਗੋਰਸਪਰਿਭੋਗਤ੍ਥਾਯ ਦਿਨ੍ਨਾਤਿ. ‘‘ਮਯਮ੍ਪਿ ਪਞ੍ਚਗੋਰਸਪਰਿਭੋਗਤ੍ਥਾਯ ਦੇਮਾ’’ਤਿ ਵੁਤ੍ਤੇ ਵਟ੍ਟਨ੍ਤਿ. ਅਜਿਕਾਦੀਸੁਪਿ ਏਸੇਵ ਨਯੋ. ‘‘ਹਤ੍ਥਿਂ ਦੇਮ, ਅਸ੍ਸਂ, ਮਹਿਂਸਂ, ਕੁਕ੍ਕੁਟਂ, ਸੂਕਰਂ ਦੇਮਾ’’ਤਿ ਵਦਨ੍ਤਿ, ਸਮ੍ਪਟਿਚ੍ਛਿਤੁਂ ਨ ਵਟ੍ਟਤਿ. ਸਚੇ ਕੇਚਿ ਮਨੁਸ੍ਸਾ ‘‘ਅਪ੍ਪੋਸ੍ਸੁਕ੍ਕਾ, ਭਨ੍ਤੇ, ਤੁਮ੍ਹੇ ਹੋਥ, ਮਯਂ ਇਮੇ ਗਹੇਤ੍ਵਾ ਤੁਮ੍ਹਾਕਂ ਕਪ੍ਪਿਯਭਣ੍ਡਂ ਦਸ੍ਸਾਮਾ’’ਤਿ ਗਣ੍ਹਨ੍ਤਿ, ਵਟ੍ਟਤਿ. ਕੁਕ੍ਕੁਟਸੂਕਰੇ ‘‘ਸੁਖਂ ਜੀਵਨ੍ਤੂ’’ਤਿ ਅਰਞ੍ਞੇ ਵਿਸ੍ਸਜ੍ਜਾਪੇਤੁਂ ਵਟ੍ਟਤਿ. ‘‘ਇਮਂ ਤਲ਼ਾਕਂ, ਇਮਂ ਖੇਤ੍ਤਂ, ਇਮਂ ਵਤ੍ਥੁਂ ਵਿਹਾਰਸ੍ਸ ਦੇਮਾ’’ਤਿ ਵੁਤ੍ਤੇ ਪਟਿਕ੍ਖਿਪਿਤੁਂ ਨ ਲਬ੍ਭਤਿ.
੬੪. ਸਚੇ ਕੋਚਿ ਭਿਕ੍ਖੁਂ ਉਦ੍ਦਿਸ੍ਸ ਦੂਤੇਨ ਹਿਰਞ੍ਞਸੁਵਣ੍ਣਾਦਿਚੀਵਰਚੇਤਾਪਨ੍ਨਂ ਪਹਿਣੇਯ੍ਯ ‘‘ਇਮਿਨਾ ਚੀਵਰਚੇਤਾਪਨ੍ਨੇਨ ਚੀਵਰਂ ਚੇਤਾਪੇਤ੍ਵਾ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰੇਨ ਅਚ੍ਛਾਦੇਹੀ’’ਤਿ, ਸੋ ਚੇ ਦੂਤੋ ਤਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਵਂ ਵਦੇਯ੍ਯ ‘‘ਇਦਂ ਖੋ, ਭਨ੍ਤੇ, ਆਯਸ੍ਮਨ੍ਤਂ ਉਦ੍ਦਿਸ੍ਸ ਚੀਵਰਚੇਤਾਪਨ੍ਨਂ ਆਭਤਂ, ਪਟਿਗ੍ਗਣ੍ਹਤੁ ਆਯਸ੍ਮਾ ਚੀਵਰਚੇਤਾਪਨ੍ਨ’’ਨ੍ਤਿ, ਤੇਨ ਭਿਕ੍ਖੁਨਾ ਸੋ ਦੂਤੋ ਏਵਮਸ੍ਸ ਵਚਨੀਯੋ ‘‘ਨ ਖੋ ਮਯਂ, ਆਵੁਸੋ, ਚੀਵਰਚੇਤਾਪਨ੍ਨਂ ਪਟਿਗ੍ਗਣ੍ਹਾਮ, ਚੀਵਰਞ੍ਚ ਖੋ ਮਯਂ ਪਟਿਗ੍ਗਣ੍ਹਾਮ ਕਾਲੇਨ ਕਪ੍ਪਿਯ’’ਨ੍ਤਿ. ਸੋ ਚੇ ਦੂਤੋ ਤਂ ਭਿਕ੍ਖੁਂ ਏਵਂ ਵਦੇਯ੍ਯ ‘‘ਅਤ੍ਥਿ ਪਨਾਯਸ੍ਮਤੋ ਕੋਚਿ ਵੇਯ੍ਯਾਵਚ੍ਚਕਰੋ’’ਤਿ, ਚੀਵਰਤ੍ਥਿਕੇਨ ਭਿਕ੍ਖੁਨਾ ਵੇਯ੍ਯਾਵਚ੍ਚਕਰੋ ਨਿਦ੍ਦਿਸਿਤਬ੍ਬੋ ਆਰਾਮਿਕੋ ਵਾ ਉਪਾਸਕੋ ਵਾ ‘‘ਏਸੋ ਖੋ, ਆਵੁਸੋ, ਭਿਕ੍ਖੂਨਂ ਵੇਯ੍ਯਾਵਚ੍ਚਕਰੋ’’ਤਿ. ਨ ਵਤ੍ਤਬ੍ਬੋ ‘‘ਤਸ੍ਸ ਦੇਹੀ’’ਤਿ ਵਾ ‘‘ਸੋ ਵਾ ਨਿਕ੍ਖਿਪਿਸ੍ਸਤਿ, ਸੋ ਵਾ ਪਰਿਵਤ੍ਤੇਸ੍ਸਤਿ, ਸੋ ਵਾ ਚੇਤਾਪੇਸ੍ਸਤੀ’’ਤਿ. ਸੋ ਚੇ ਦੂਤੋ ਤਂ ਵੇਯ੍ਯਾਵਚ੍ਚਕਰਂ ਸਞ੍ਞਾਪੇਤ੍ਵਾ ਤਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਵਂ ਵਦੇਯ੍ਯ ‘‘ਯਂ ਖੋ, ਭਨ੍ਤੇ, ਆਯਸ੍ਮਾ ਵੇਯ੍ਯਾਵਚ੍ਚਕਰਂ ਨਿਦ੍ਦਿਸਿ, ਆਣਤ੍ਤੋ ਸੋ ਮਯਾ, ਉਪਸਙ੍ਕਮਤੁ ਆਯਸ੍ਮਾ ਕਾਲੇਨ, ਚੀਵਰੇਨ ਤਂ ਅਚ੍ਛਾਦੇਸ੍ਸਤੀ’’ਤਿ. ਚੀਵਰਤ੍ਥਿਕੇਨ ਭਿਕ੍ਖੁਨਾ ਵੇਯ੍ਯਾਵਚ੍ਚਕਰੋ ਉਪਸਙ੍ਕਮਿਤ੍ਵਾ ਦ੍ਵਤ੍ਤਿਕ੍ਖਤ੍ਤੁਂ ਚੋਦੇਤਬ੍ਬੋ ਸਾਰੇਤਬ੍ਬੋ ‘‘ਅਤ੍ਥੋ ਮੇ, ਆਵੁਸੋ, ਚੀਵਰੇਨਾ’’ਤਿ. ਨ ਵਤ੍ਤਬ੍ਬੋ ‘‘ਦੇਹਿ ਮੇ ਚੀਵਰਂ, ਆਹਰ ਮੇ ਚੀਵਰਂ, ਪਰਿਵਤ੍ਤੇਹਿ ਮੇ ਚੀਵਰਂ, ਚੇਤਾਪੇਹਿ ਮੇ ਚੀਵਰ’’ਨ੍ਤਿ. ਸਚੇ ਦ੍ਵਤ੍ਤਿਕ੍ਖਤ੍ਤੁਂ ਚੋਦਯਮਾਨੋ ਸਾਰਯਮਾਨੋ ਤਂ ਚੀਵਰਂ ਅਭਿਨਿਪ੍ਫਾਦੇਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਅਭਿਨਿਪ੍ਫਾਦੇਤਿ, ਤਤ੍ਥ ਗਨ੍ਤ੍ਵਾ ਚਤੁਕ੍ਖਤ੍ਤੁਂ ਪਞ੍ਚਕ੍ਖਤ੍ਤੁਂ ਛਕ੍ਖਤ੍ਤੁਪਰਮਂ ਤੁਣ੍ਹੀਭੂਤੇਨ ਉਦ੍ਦਿਸ੍ਸ ਠਾਤਬ੍ਬਂ, ਨ ਆਸਨੇ ਨਿਸੀਦਿਤਬ੍ਬਂ, ਨ ਆਮਿਸਂ ਪਟਿਗ੍ਗਹੇਤਬ੍ਬਂ, ਨ ਧਮ੍ਮੋ ਭਾਸਿਤਬ੍ਬੋ. ‘‘ਕਿਂ ਕਾਰਣਾ ਆਗਤੋਸੀ’’ਤਿ ਪੁਚ੍ਛਿਯਮਾਨੇਨ ‘‘ਜਾਨਾਹਿ, ਆਵੁਸੋ’’ਤਿ ਏਤ੍ਤਕਮੇਵ ਵਤ੍ਤਬ੍ਬਂ.
ਸਚੇ ਆਸਨੇ ਵਾ ਨਿਸੀਦਤਿ, ਆਮਿਸਂ ਵਾ ਪਟਿਗ੍ਗਣ੍ਹਾਤਿ, ਧਮ੍ਮਂ ਵਾ ਭਾਸਤਿ, ਠਾਨਂ ਭਞ੍ਜਤਿ. ਸਚੇ ਚਤੁਕ੍ਖਤ੍ਤੁਂ ਚੋਦੇਤਿ, ਚਤੁਕ੍ਖਤ੍ਤੁਂ ਠਾਤਬ੍ਬਂ. ਪਞ੍ਚਕ੍ਖਤ੍ਤੁਂ ਚੋਦੇਤਿ, ਦ੍ਵਿਕ੍ਖਤ੍ਤੁਂ ਠਾਤਬ੍ਬਂ. ਛਕ੍ਖਤ੍ਤੁਂ ਚੋਦੇਤਿ, ਨ ਠਾਤਬ੍ਬਂ. ਏਕਾਯ ਹਿ ਚੋਦਨਾਯ ਠਾਨਦ੍ਵਯਂ ਭਞ੍ਜਤਿ. ਯਥਾ ਛਕ੍ਖਤ੍ਤੁਂ ਚੋਦੇਤ੍ਵਾ ਨ ਠਾਤਬ੍ਬਂ, ਏਵਂ ਦ੍ਵਾਦਸਕ੍ਖਤ੍ਤੁਂ ਠਤ੍ਵਾ ਨ ਚੋਦੇਤਬ੍ਬਂ. ਤਸ੍ਮਾ ਸਚੇ ਚੋਦੇਤਿਯੇਵ ਨ ਤਿਟ੍ਠਤਿ, ਛ ਚੋਦਨਾ ਲਬ੍ਭਨ੍ਤਿ. ਸਚੇ ਤਿਟ੍ਠਤਿਯੇਵ ਨ ਚੋਦੇਤਿ, ਦ੍ਵਾਦਸ ਠਾਨਾਨਿ ਲਬ੍ਭਨ੍ਤਿ. ਸਚੇ ਚੋਦੇਤਿਪਿ ਤਿਟ੍ਠਤਿਪਿ, ਏਕਾਯ ਚੋਦਨਾਯ ਦ੍ਵੇ ਠਾਨਾਨਿ ਹਾਪੇਤਬ੍ਬਾਨਿ. ਤਤ੍ਥ ਯੋ ਏਕਦਿਵਸਮੇਵ ਪੁਨਪ੍ਪੁਨਂ ਗਨ੍ਤ੍ਵਾ ਛਕ੍ਖਤ੍ਤੁਂ ਚੋਦੇਤਿ, ਸਕਿਂਯੇਵ ਵਾ ਗਨ੍ਤ੍ਵਾ ‘‘ਅਤ੍ਥੋ ਮੇ, ਆਵੁਸੋ, ਚੀਵਰੇਨਾ’’ਤਿ ਛਕ੍ਖਤ੍ਤੁਂ ਵਦਤਿ, ਤਤ੍ਥ ਏਕਦਿਵਸਮੇਵ ਪੁਨਪ੍ਪੁਨਂ ਗਨ੍ਤ੍ਵਾ ਦ੍ਵਾਦਸਕ੍ਖਤ੍ਤੁਂ ਤਿਟ੍ਠਤਿ, ਸਕਿਮੇਵ ਵਾ ਗਨ੍ਤ੍ਵਾ ਤਤ੍ਰ ਤਤ੍ਰ ਠਾਨੇ ਤਿਟ੍ਠਤਿ, ਸੋਪਿ ਸਬ੍ਬਚੋਦਨਾਯੋ ਸਬ੍ਬਟ੍ਠਾਨਾਨਿ ਚ ਭਞ੍ਜਤਿ, ਕੋ ਪਨ ਵਾਦੋ ਨਾਨਾਦਿਵਸੇਸੁ. ਤਤੋ ਚੇ ਉਤ੍ਤਰਿ ਵਾਯਮਮਾਨੋ ਤਂ ਚੀਵਰਂ ਅਭਿਨਿਪ੍ਫਾਦੇਤਿ, ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ. ਨੋ ਚੇ ਸਕ੍ਕੋਤਿ ਤਂ ਅਭਿਨਿਪ੍ਫਾਦੇਤੁਂ, ਯਤੋ ਰਾਜਤੋ ਰਾਜਮਹਾਮਤ੍ਤਤੋ ਵਾ ਅਸ੍ਸ ਭਿਕ੍ਖੁਨੋ ਤਂ ਚੀਵਰਚੇਤਾਪਨ੍ਨਂ ਆਨੀਤਂ, ਤਸ੍ਸ ਸਨ੍ਤਿਕਂ ਸਾਮਂ ਵਾ ਗਨ੍ਤਬ੍ਬਂ, ਦੂਤੋ ਵਾ ਪਾਹੇਤਬ੍ਬੋ ‘‘ਯਂ ਖੋ ਤੁਮ੍ਹੇ ਆਯਸ੍ਮਨ੍ਤੋ ਭਿਕ੍ਖੁਂ ਉਦ੍ਦਿਸ੍ਸ ਚੀਵਰਚੇਤਾਪਨ੍ਨਂ ਪਹਿਣਿਤ੍ਥ, ਨ ਤਂ ਤਸ੍ਸ ਭਿਕ੍ਖੁਨੋ ਕਿਞ੍ਚਿ ਅਤ੍ਥਂ ਅਨੁਭੋਤਿ, ਯੁਞ੍ਜਨ੍ਤਾਯਸ੍ਮਨ੍ਤੋ ਸਕਂ, ਮਾ ਤੁਮ੍ਹਾਕਂ ਸਨ੍ਤਕਂ ਵਿਨਸ੍ਸਤੂ’’ਤਿ. ਅਯਂ ਤਤ੍ਥ ਸਾਮੀਚਿ. ਯੋ ਪਨ ਨੇਵ ਸਾਮਂ ਗਚ੍ਛਤਿ, ਨ ਦੂਤਂ ਪਾਹੇਤਿ, ਵਤ੍ਤਭੇਦੇ ਦੁਕ੍ਕਟਂ ਆਪਜ੍ਜਤਿ.
੬੫. ਕਿਂ ਪਨ (ਪਾਰਾ. ਅਟ੍ਠ. ੨.੫੩੮-੯) ਸਬ੍ਬਕਪ੍ਪਿਯਕਾਰਕੇਸੁ ਏਵਂ ਪਟਿਪਜ੍ਜਿਤਬ੍ਬਨ੍ਤਿ? ਨ ਪਟਿਪਜ੍ਜਿਤਬ੍ਬਂ. ਅਯਞ੍ਹਿ ਕਪ੍ਪਿਯਕਾਰਕੋ ਨਾਮ ਸਙ੍ਖੇਪਤੋ ਦੁਵਿਧੋ ਨਿਦ੍ਦਿਟ੍ਠੋ ਅਨਿਦ੍ਦਿਟ੍ਠੋ ਚ. ਤਤ੍ਥ ਨਿਦ੍ਦਿਟ੍ਠੋ ਦੁਵਿਧੋ ਭਿਕ੍ਖੁਨਾ ਨਿਦ੍ਦਿਟ੍ਠੋ ਦੂਤੇਨ ਨਿਦ੍ਦਿਟ੍ਠੋਤਿ. ਅਨਿਦ੍ਦਿਟ੍ਠੋਪਿ ਦੁਵਿਧੋ ਮੁਖਵੇਵਟਿਕਕਪ੍ਪਿਯਕਾਰਕੋ ਪਰਮ੍ਮੁਖਕਪ੍ਪਿਯਕਾਰਕੋਤਿ. ਤੇਸੁ ਭਿਕ੍ਖੁਨਾ ਨਿਦ੍ਦਿਟ੍ਠੋ ਸਮ੍ਮੁਖਾਸਮ੍ਮੁਖਵਸੇਨ ਚਤੁਬ੍ਬਿਧੋ ਹੋਤਿ, ਤਥਾ ਦੂਤੇਨ ਨਿਦ੍ਦਿਟ੍ਠੋਪਿ. ਕਥਂ? ਇਧੇਕਚ੍ਚੋ ਭਿਕ੍ਖੁਸ੍ਸ ਚੀਵਰਤ੍ਥਾਯ ਦੂਤੇਨ ਅਕਪ੍ਪਿਯਵਤ੍ਥੁਂ ਪਹਿਣਤਿ, ਦੂਤੋ ਤਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ‘‘ਇਦਂ, ਭਨ੍ਤੇ, ਇਤ੍ਥਨ੍ਨਾਮੇਨ ਤੁਮ੍ਹਾਕਂ ਚੀਵਰਤ੍ਥਾਯ ਪਹਿਤਂ, ਗਣ੍ਹਥ ਨ’’ਨ੍ਤਿ ਵਦਤਿ, ਭਿਕ੍ਖੁ ‘‘ਨਯਿਦਂ ਕਪ੍ਪਤੀ’’ਤਿ ਪਟਿਕ੍ਖਿਪਤਿ, ਦੂਤੋ ‘‘ਅਤ੍ਥਿ ਪਨ ਤੇ, ਭਨ੍ਤੇ, ਵੇਯ੍ਯਾਵਚ੍ਚਕਰੋ’’ਤਿ ਪੁਚ੍ਛਤਿ, ਪੁਞ੍ਞਤ੍ਥਿਕੇਹਿ ਚ ਉਪਾਸਕੇਹਿ ‘‘ਭਿਕ੍ਖੂਨਂ ਵੇਯ੍ਯਾਵਚ੍ਚਂ ਕਰੋਥਾ’’ਤਿ ਆਣਤ੍ਤਾ ਵਾ, ਭਿਕ੍ਖੂਨਂ ਵਾ ਸਨ੍ਦਿਟ੍ਠਸਮ੍ਭਤ੍ਤਾ ਕੇਚਿ ਵੇਯ੍ਯਾਵਚ੍ਚਕਰਾ ਹੋਨ੍ਤਿ, ਤੇਸਂ ਅਞ੍ਞਤਰੋ ਤਸ੍ਮਿਂ ਖਣੇ ਭਿਕ੍ਖੁਸ੍ਸ ਸਨ੍ਤਿਕੇ ਨਿਸਿਨ੍ਨੋ ਹੋਤਿ, ਭਿਕ੍ਖੁ ਤਂ ਨਿਦ੍ਦਿਸਤਿ ‘‘ਅਯਂ ਭਿਕ੍ਖੂਨਂ ਵੇਯ੍ਯਾਵਚ੍ਚਕਰੋ’’ਤਿ, ਦੂਤੋ ਤਸ੍ਸ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ‘‘ਥੇਰਸ੍ਸ ਚੀਵਰਂ ਕਿਣਿਤ੍ਵਾ ਦੇਹੀ’’ਤਿ ਗਚ੍ਛਤਿ, ਅਯਂ ਭਿਕ੍ਖੁਨਾ ਸਮ੍ਮੁਖਾਨਿਦ੍ਦਿਟ੍ਠੋ.
ਨੋ ਚੇ ਭਿਕ੍ਖੁਸ੍ਸ ਸਨ੍ਤਿਕੇ ਨਿਸਿਨ੍ਨੋ ਹੋਤਿ, ਅਪਿਚ ਖੋ ਭਿਕ੍ਖੁ ਨਿਦ੍ਦਿਸਤਿ ‘‘ਅਸੁਕਸ੍ਮਿਂ ਨਾਮ ਗਾਮੇ ਇਤ੍ਥਨ੍ਨਾਮੋ ਭਿਕ੍ਖੂਨਂ ਵੇਯ੍ਯਾਵਚ੍ਚਕਰੋ’’ਤਿ, ਸੋ ਗਨ੍ਤ੍ਵਾ ਤਸ੍ਸ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ‘‘ਥੇਰਸ੍ਸ ਚੀਵਰਂ ਕਿਣਿਤ੍ਵਾ ਦਦੇਯ੍ਯਾਸੀ’’ਤਿ ਆਗਨ੍ਤ੍ਵਾ ਭਿਕ੍ਖੁਸ੍ਸ ਆਰੋਚੇਤ੍ਵਾ ਗਚ੍ਛਤਿ, ਅਯਮੇਕੋ ਭਿਕ੍ਖੁਨਾ ਅਸਮ੍ਮੁਖਾਨਿਦ੍ਦਿਟ੍ਠੋ.
ਨ ਹੇਵ ਖੋ ਸੋ ਦੂਤੋ ਅਤ੍ਤਨਾ ਆਗਨ੍ਤ੍ਵਾ ਆਰੋਚੇਤਿ, ਅਪਿਚ ਖੋ ਅਞ੍ਞਂ ਪਹਿਣਤਿ ‘‘ਦਿਨ੍ਨਂ ਮਯਾ, ਭਨ੍ਤੇ, ਤਸ੍ਸ ਹਤ੍ਥੇ ਚੀਵਰਚੇਤਾਪਨ੍ਨਂ, ਤੁਮ੍ਹੇ ਚੀਵਰਂ ਗਣ੍ਹੇਯ੍ਯਾਥਾ’’ਤਿ, ਅਯਂ ਦੁਤਿਯੋ ਭਿਕ੍ਖੁਨਾ ਅਸਮ੍ਮੁਖਾਨਿਦ੍ਦਿਟ੍ਠੋ.
ਨ ਹੇਵ ਖੋ ਅਞ੍ਞਂ ਪਹਿਣਤਿ, ਅਪਿਚ ਗਚ੍ਛਨ੍ਤੋਵ ਭਿਕ੍ਖੁਂ ਵਦਤਿ ‘‘ਅਹਂ ਤਸ੍ਸ ਹਤ੍ਥੇ ਚੀਵਰਚੇਤਾਪਨ੍ਨਂ ਦਸ੍ਸਾਮਿ, ਤੁਮ੍ਹੇ ਚੀਵਰਂ ਗਣ੍ਹੇਯ੍ਯਾਥਾ’’ਤਿ, ਅਯਂ ਤਤਿਯੋ ਭਿਕ੍ਖੁਨਾ ਅਸਮ੍ਮੁਖਾਨਿਦ੍ਦਿਟ੍ਠੋਤਿ ਏਵਂ ਏਕੋ ਸਮ੍ਮੁਖਾਨਿਦ੍ਦਿਟ੍ਠੋ ਤਯੋ ਅਸਮ੍ਮੁਖਾਨਿਦ੍ਦਿਟ੍ਠਾਤਿ ਇਮੇ ਚਤ੍ਤਾਰੋ ਭਿਕ੍ਖੁਨਾ ਨਿਦ੍ਦਿਟ੍ਠਵੇਯ੍ਯਾਵਚ੍ਚਕਰਾ ਨਾਮ. ਏਤੇਸੁ ਇਧ ਵੁਤ੍ਤਨਯੇਨੇਵ ਪਟਿਪਜ੍ਜਿਤਬ੍ਬਂ.
ਅਪਰੋ ਭਿਕ੍ਖੁ ਪੁਰਿਮਨਯੇਨੇਵ ਦੂਤੇਨ ਪੁਚ੍ਛਿਤੋ ਨਤ੍ਥਿਤਾਯ ਵਾ ਅਵਿਚਾਰੇਤੁਕਾਮਤਾਯ ਵਾ ‘‘ਨਤ੍ਥਮ੍ਹਾਕਂ ਕਪ੍ਪਿਯਕਾਰਕੋ’’ਤਿ ਵਦਤਿ, ਤਸ੍ਮਿਂ ਖਣੇ ਕੋਚਿ ਮਨੁਸ੍ਸੋ ਆਗਚ੍ਛਤਿ, ਦੂਤੋ ਤਸ੍ਸ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ‘‘ਇਮਸ੍ਸ ਹਤ੍ਥਤੋ ਚੀਵਰਂ ਗਣ੍ਹੇਯ੍ਯਾਥਾ’’ਤਿ ਵਤ੍ਵਾ ਗਚ੍ਛਤਿ, ਅਯਂ ਦੂਤੇਨ ਸਮ੍ਮੁਖਾਨਿਦ੍ਦਿਟ੍ਠੋਤਿ ਏਵਂ ਏਕੋ ਸਮ੍ਮੁਖਾਨਿਦ੍ਦਿਟ੍ਠੋ.
ਅਪਰੋ ਦੂਤੋ ਗਾਮਂ ਪਵਿਸਿਤ੍ਵਾ ਅਤ੍ਤਨਾ ਅਭਿਰੁਚਿਤਸ੍ਸ ਕਸ੍ਸਚਿ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ਪੁਰਿਮਨਯੇਨੇਵ ਆਗਨ੍ਤ੍ਵਾ ਵਾ ਆਰੋਚੇਤਿ, ਅਞ੍ਞਂ ਵਾ ਪਹਿਣਤਿ ‘‘ਅਹਂ ਅਸੁਕਸ੍ਸ ਨਾਮ ਹਤ੍ਥੇ ਚੀਵਰਚੇਤਾਪਨ੍ਨਂ ਦਸ੍ਸਾਮਿ, ਤੁਮ੍ਹੇ ਚੀਵਰਂ ਗਣ੍ਹੇਯ੍ਯਾਥਾ’’ਤਿ ਵਤ੍ਵਾ ਵਾ ਗਚ੍ਛਤਿ, ਅਯਂ ਤਤਿਯੋ ਦੂਤੇਨ ਅਸਮ੍ਮੁਖਾਨਿਦ੍ਦਿਟ੍ਠੋਤਿ ਏਵਂ ਏਕੋ ਸਮ੍ਮੁਖਾਨਿਦ੍ਦਿਟ੍ਠੋ ਤਯੋ ਅਸਮ੍ਮੁਖਾਨਿਦ੍ਦਿਟ੍ਠਾਤਿ ਇਮੇ ਚਤ੍ਤਾਰੋ ਦੂਤੇਨ ਨਿਦ੍ਦਿਟ੍ਠਵੇਯ੍ਯਾਵਚ੍ਚਕਰਾ ਨਾਮ. ਏਤੇਸੁ ਮੇਣ੍ਡਕਸਿਕ੍ਖਾਪਦੇ ਵੁਤ੍ਤਨਯੇਨੇਵ ਪਟਿਪਜ੍ਜਿਤਬ੍ਬਂ. ਵੁਤ੍ਤਞ੍ਹੇਤਂ –
‘‘ਸਨ੍ਤਿ, ਭਿਕ੍ਖਵੇ, ਮਨੁਸ੍ਸਾ ਸਦ੍ਧਾ ਪਸਨ੍ਨਾ, ਤੇ ਕਪ੍ਪਿਯਕਾਰਕਾਨਂ ਹਤ੍ਥੇ ਹਿਰਞ੍ਞਂ ਉਪਨਿਕ੍ਖਿਪਨ੍ਤਿ ‘ਇਮਿਨਾ ਯਂ ਅਯ੍ਯਸ੍ਸ ਕਪ੍ਪਿਯਂ, ਤਂ ਦੇਥਾ’ਤਿ. ਅਨੁਜਾਨਾਮਿ, ਭਿਕ੍ਖਵੇ, ਯਂ ਤਤੋ ਕਪ੍ਪਿਯਂ, ਤਂ ਸਾਦਿਤੁਂ, ਨ ਤ੍ਵੇਵਾਹਂ, ਭਿਕ੍ਖਵੇ, ‘ਕੇਨਚਿ ਪਰਿਯਾਯੇਨ ਜਾਤਰੂਪਰਜਤਂ ਸਾਦਿਤਬ੍ਬਂ ਪਰਿਯੇਸਿਤਬ੍ਬ’ਨ੍ਤਿ ਵਦਾਮੀ’’ਤਿ (ਮਹਾਵ. ੨੯੯).
ਏਤ੍ਥ ਚੋਦਨਾਯ ਪਰਿਮਾਣਂ ਨਤ੍ਥਿ, ਮੂਲਂ ਅਸਾਦਿਯਨ੍ਤੇਨ ਸਹਸ੍ਸਕ੍ਖਤ੍ਤੁਮ੍ਪਿ ਚੋਦਨਾਯ ਵਾ ਠਾਨੇਨ ਵਾ ਕਪ੍ਪਿਯਭਣ੍ਡਂ ਸਾਦਿਤੁਂ ਵਟ੍ਟਤਿ. ਨੋ ਚੇ ਦੇਤਿ, ਅਞ੍ਞਂ ਕਪ੍ਪਿਯਕਾਰਕਂ ਠਪੇਤ੍ਵਾਪਿ ਆਹਰਾਪੇਤਬ੍ਬਂ. ਸਚੇ ਇਚ੍ਛਤਿ, ਮੂਲਸਾਮਿਕਾਨਮ੍ਪਿ ਕਥੇਤਬ੍ਬਂ. ਨੋ ਚੇ ਇਚ੍ਛਤਿ, ਨ ਕਥੇਤਬ੍ਬਂ.
ਅਪਰੋ ਭਿਕ੍ਖੁ ਪੁਰਿਮਨਯੇਨੇਵ ਦੂਤੇਨ ਪੁਚ੍ਛਿਤੋ ‘‘ਨਤ੍ਥਮ੍ਹਾਕਂ ਕਪ੍ਪਿਯਕਾਰਕੋ’’ਤਿ ਵਦਤਿ, ਤਦਞ੍ਞੋ ਸਮੀਪੇ ਠਿਤੋ ਸੁਤ੍ਵਾ ‘‘ਆਹਰ ਭੋ, ਅਹਂ ਅਯ੍ਯਸ੍ਸ ਚੀਵਰਂ ਚੇਤਾਪੇਤ੍ਵਾ ਦਸ੍ਸਾਮੀ’’ਤਿ ਵਦਤਿ. ਦੂਤੋ ‘‘ਹਨ੍ਦ ਭੋ ਦਦੇਯ੍ਯਾਸੀ’’ਤਿ ਤਸ੍ਸ ਹਤ੍ਥੇ ਦਤ੍ਵਾ ਭਿਕ੍ਖੁਸ੍ਸ ਅਨਾਰੋਚੇਤ੍ਵਾਵ ਗਚ੍ਛਤਿ, ਅਯਂ ਮੁਖਵੇਵਟਿਕਕਪ੍ਪਿਯਕਾਰਕੋ. ਅਪਰੋ ਭਿਕ੍ਖੁਨੋ ਉਪਟ੍ਠਾਕਸ੍ਸ ਵਾ ਅਞ੍ਞਸ੍ਸ ਵਾ ਹਤ੍ਥੇ ਅਕਪ੍ਪਿਯਵਤ੍ਥੁਂ ਦਤ੍ਵਾ ‘‘ਥੇਰਸ੍ਸ ਚੀਵਰਂ ਦਦੇਯ੍ਯਾਸੀ’’ਤਿ ਏਤ੍ਤੋਵ ਪਕ੍ਕਮਤਿ, ਅਯਂ ਪਰਮ੍ਮੁਖਾਕਪ੍ਪਿਯਕਾਰਕੋਤਿ ਇਮੇ ਦ੍ਵੇ ਅਨਿਦ੍ਦਿਟ੍ਠਕਪ੍ਪਿਯਕਾਰਕਾ ਨਾਮ. ਏਤੇਸੁ ਅਞ੍ਞਾਤਕਅਪ੍ਪਵਾਰਿਤੇਸੁ ਵਿਯ ਪਟਿਪਜ੍ਜਿਤਬ੍ਬਂ. ਸਚੇ ਸਯਮੇਵ ਚੀਵਰਂ ਆਨੇਤ੍ਵਾ ਦਦਨ੍ਤਿ, ਗਹੇਤਬ੍ਬਂ. ਨੋ ਚੇ, ਨ ਕਿਞ੍ਚਿ ਵਤ੍ਤਬ੍ਬਾ. ਯਥਾ ਚ ਦੂਤਸ੍ਸ ਹਤ੍ਥੇ ਚੀਵਰਤ੍ਥਾਯ ਅਕਪ੍ਪਿਯਵਤ੍ਥੁਮ੍ਹਿ ਪੇਸਿਤੇ ਵਿਨਿਚ੍ਛਯੋ ਵੁਤ੍ਤੋ, ਏਵਂ ਪਿਣ੍ਡਪਾਤਾਦੀਨਮ੍ਪਿ ਅਤ੍ਥਾਯ ਪੇਸਿਤੇ ਸਯਂ ਆਗਨ੍ਤ੍ਵਾ ਦੀਯਮਾਨੇ ਚ ਵਿਨਿਚ੍ਛਯੋ ਵੇਦਿਤਬ੍ਬੋ.
੬੬. ਉਪਨਿਕ੍ਖਿਤ੍ਤਸਾਦਿਯਨੇ ਪਨ ਅਯਂ ਵਿਨਿਚ੍ਛਯੋ (ਪਾਰਾ. ਅਟ੍ਠ. ੨.੫੮੩-੪) – ਕਿਞ੍ਚਿ ਅਕਪ੍ਪਿਯਵਤ੍ਥੁਂ ਪਾਦਮੂਲੇ ਠਪੇਤ੍ਵਾ ‘‘ਇਦਂ ਅਯ੍ਯਸ੍ਸ ਹੋਤੂ’’ਤਿ ਵੁਤ੍ਤੇ ਸਚੇਪਿ ਚਿਤ੍ਤੇਨ ਸਾਦਿਯਤਿ, ਗਣ੍ਹਿਤੁਕਾਮੋ ਹੋਤਿ, ਕਾਯੇਨ ਵਾ ਵਾਚਾਯ ਵਾ ‘‘ਨਯਿਦਂ ਕਪ੍ਪਤੀ’’ਤਿ ਪਟਿਕ੍ਖਿਪਤਿ, ਅਨਾਪਤ੍ਤਿ. ਕਾਯਵਾਚਾਹਿ ਵਾ ਅਪ੍ਪਟਿਕ੍ਖਿਪਿਤ੍ਵਾਪਿ ਸੁਦ੍ਧਚਿਤ੍ਤੋ ਹੁਤ੍ਵਾ ‘‘ਨਯਿਦਂ ਅਮ੍ਹਾਕਂ ਕਪ੍ਪਤੀ’’ਤਿ ਨ ਸਾਦਿਯਤਿ, ਅਨਾਪਤ੍ਤਿਯੇਵ. ਤੀਸੁ ਦ੍ਵਾਰੇਸੁ ਹਿ ਯੇਨ ਕੇਨਚਿ ਪਟਿਕ੍ਖਿਤ੍ਤਂ ਪਟਿਕ੍ਖਿਤ੍ਤਮੇਵ ਹੋਤਿ. ਸਚੇ ਪਨ ਕਾਯਵਾਚਾਹਿ ਅਪ੍ਪਟਿਕ੍ਖਿਪਿਤ੍ਵਾ ਚਿਤ੍ਤੇਨ ਅਧਿਵਾਸੇਤਿ, ਕਾਯਵਾਚਾਹਿ ਕਤ੍ਤਬ੍ਬਸ੍ਸ ਪਟਿਕ੍ਖੇਪਸ੍ਸ ਅਕਰਣਤੋ ਅਕਿਰਿਯਸਮੁਟ੍ਠਾਨਂ ਕਾਯਦ੍ਵਾਰੇ ਚ ਵਚੀਦ੍ਵਾਰੇ ਚ ਆਪਤ੍ਤਿਂ ਆਪਜ੍ਜਤਿ, ਮਨੋਦ੍ਵਾਰੇ ਪਨ ਆਪਤ੍ਤਿ ਨਾਮ ਨਤ੍ਥਿ.
ਏਕੋ ਸਤਂ ਵਾ ਸਹਸ੍ਸਂ ਵਾ ਪਾਦਮੂਲੇ ਠਪੇਤਿ ‘‘ਤੁਯ੍ਹਿਦਂ ਹੋਤੂ’’ਤਿ, ਭਿਕ੍ਖੁ ‘‘ਨਯਿਦਂ ਕਪ੍ਪਤੀ’’ਤਿ ਪਟਿਕ੍ਖਿਪਤਿ, ਉਪਾਸਕੋ ‘‘ਪਰਿਚ੍ਚਤ੍ਤਂ ਮਯਾ ਤੁਮ੍ਹਾਕ’’ਨ੍ਤਿ ਗਤੋ, ਅਞ੍ਞੋ ਤਤ੍ਥ ਆਗਨ੍ਤ੍ਵਾ ਪੁਚ੍ਛਤਿ ‘‘ਕਿਂ, ਭਨ੍ਤੇ, ਇਦ’’ਨ੍ਤਿ, ਯਂ ਤੇਨ ਚ ਅਤ੍ਤਨਾ ਚ ਵੁਤ੍ਤਂ, ਤਂ ਆਚਿਕ੍ਖਿਤਬ੍ਬਂ. ਸੋ ਚੇ ਵਦਤਿ ‘‘ਗੋਪਯਿਸ੍ਸਾਮਹਂ, ਭਨ੍ਤੇ, ਗੁਤ੍ਤਟ੍ਠਾਨਂ ਦਸ੍ਸੇਥਾ’’ਤਿ, ਸਤ੍ਤਭੂਮਿਕਮ੍ਪਿ ਪਾਸਾਦਂ ਅਭਿਰੁਹਿਤ੍ਵਾ ‘‘ਇਦਂ ਗੁਤ੍ਤਟ੍ਠਾਨ’’ਨ੍ਤਿ ਆਚਿਕ੍ਖਿਤਬ੍ਬਂ, ‘‘ਇਧ ਨਿਕ੍ਖਿਪਾਹੀ’’ਤਿ ਨ ਵਤ੍ਤਬ੍ਬਂ. ਏਤ੍ਤਾਵਤਾ ਕਪ੍ਪਿਯਞ੍ਚ ਅਕਪ੍ਪਿਯਞ੍ਚ ਨਿਸ੍ਸਾਯ ਠਿਤਂ ਹੋਤਿ, ਦ੍ਵਾਰਂ ਪਿਦਹਿਤ੍ਵਾ ਰਕ੍ਖਨ੍ਤੇਨ ਵਸਿਤਬ੍ਬਂ. ਸਚੇ ਕਿਞ੍ਚਿ ਵਿਕ੍ਕਾਯਿਕਭਣ੍ਡਂ ਪਤ੍ਤਂ ਵਾ ਚੀਵਰਂ ਵਾ ਗਹੇਤ੍ਵਾ ਆਗਚ੍ਛਤਿ, ‘‘ਇਦਂ ਗਹੇਸ੍ਸਥ, ਭਨ੍ਤੇ’’ਤਿ ਵੁਤ੍ਤੇ ‘‘ਉਪਾਸਕ, ਅਤ੍ਥਿ ਅਮ੍ਹਾਕਂ ਇਮਿਨਾ ਅਤ੍ਥੋ, ਵਤ੍ਥੁ ਚ ਏਵਰੂਪਂ ਨਾਮ ਸਂਵਿਜ੍ਜਤਿ, ਕਪ੍ਪਿਯਕਾਰਕੋ ਨਤ੍ਥੀ’’ਤਿ ਵਤ੍ਤਬ੍ਬਂ. ਸਚੇ ਸੋ ਵਦਤਿ ‘‘ਅਹਂ ਕਪ੍ਪਿਯਕਾਰਕੋ ਭਵਿਸ੍ਸਾਮਿ, ਦ੍ਵਾਰਂ ਵਿਵਰਿਤ੍ਵਾ ਦੇਥਾ’’ਤਿ, ਦ੍ਵਾਰਂ ਵਿਵਰਿਤ੍ਵਾ ‘‘ਇਮਸ੍ਮਿਂ ਓਕਾਸੇ ਠਪਿਤ’’ਨ੍ਤਿ ਵਤ੍ਤਬ੍ਬਂ, ‘‘ਇਦਂ ਗਣ੍ਹਾ’’ਤਿ ਨ ਵਤ੍ਤਬ੍ਬਂ. ਏਵਮ੍ਪਿ ਕਪ੍ਪਿਯਞ੍ਚ ਅਕਪ੍ਪਿਯਞ੍ਚ ਨਿਸ੍ਸਾਯ ਠਿਤਮੇਵ ਹੋਤਿ. ਸੋ ਚੇ ਤਂ ਗਹੇਤ੍ਵਾ ਤਸ੍ਸ ਕਪ੍ਪਿਯਭਣ੍ਡਂ ਦੇਤਿ, ਵਟ੍ਟਤਿ. ਸਚੇ ਅਧਿਕਂ ਗਣ੍ਹਾਤਿ, ‘‘ਨ ਮਯਂ ਤਵ ਭਣ੍ਡਂ ਗਣ੍ਹਾਮ, ਨਿਕ੍ਖਮਾਹੀ’’ਤਿ ਵਤ੍ਤਬ੍ਬੋ.
੬੭. ਯੇਨ ਪਨ ਜਾਤਰੂਪਾਦਿਚਤੁਬ੍ਬਿਧਂ ਨਿਸ੍ਸਗ੍ਗਿਯਵਤ੍ਥੁ ਪਟਿਗ੍ਗਹਿਤਂ, ਤੇਨ ਕਿਂ ਕਾਤਬ੍ਬਨ੍ਤਿ? ਸਙ੍ਘਮਜ੍ਝੇ ਨਿਸ੍ਸਜ੍ਜਿਤਬ੍ਬਂ. ਕਥਂ? ਤੇਨ ਭਿਕ੍ਖੁਨਾ (ਪਾਰਾ. ੫੮੪) ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ ‘‘ਅਹਂ, ਭਨ੍ਤੇ, ਰੂਪਿਯਂ ਪਟਿਗ੍ਗਹੇਸਿਂ, ਇਦਂ ਮੇ ਨਿਸ੍ਸਗ੍ਗਿਯਂ, ਇਮਾਹਂ ਨਿਸ੍ਸਜ੍ਜਾਮੀ’’ਤਿ ਨਿਸ੍ਸਜ੍ਜਿਤ੍ਵਾ ਆਪਤ੍ਤਿ ਦੇਸੇਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਆਪਤ੍ਤਿ ਪਟਿਗ੍ਗਹੇਤਬ੍ਬਾ. ਸਚੇ ਤਤ੍ਥ ਆਗਚ੍ਛਤਿ ਆਰਾਮਿਕੋ ਵਾ ਉਪਾਸਕੋ ਵਾ, ਸੋ ਵਤ੍ਤਬ੍ਬੋ ‘‘ਆਵੁਸੋ, ਇਦਂ ਜਾਨਾਹੀ’’ਤਿ. ਸਚੇ ਸੋ ਭਣਤਿ ‘‘ਇਮਿਨਾ ਕਿਂ ਆਹਰਿਸ੍ਸਾਮੀ’’ਤਿ, ਨ ਵਤ੍ਤਬ੍ਬੋ ‘‘ਇਮਂ ਵਾ ਇਮਂ ਵਾ ਆਹਰਾ’’ਤਿ, ਕਪ੍ਪਿਯਂ ਆਚਿਕ੍ਖਿਤਬ੍ਬਂ ਸਪ੍ਪਿਂ ਵਾ ਤੇਲਂ ਵਾ ਮਧੁਂ ਵਾ ਫਾਣਿਤਂ ਵਾ. ਆਚਿਕ੍ਖਨ੍ਤੇਨ ਚ ‘‘ਇਮਿਨਾ ਸਪ੍ਪਿਂ ਵਾ ਤੇਲਂ ਵਾ ਮਧੁਂ ਵਾ ਫਾਣਿਤਂ ਵਾ ਆਹਰਾ’’ਤਿ ਨ ਵਤ੍ਤਬ੍ਬਂ, ‘‘ਇਦਞ੍ਚਿਦਞ੍ਚ ਸਙ੍ਘਸ੍ਸ ਕਪ੍ਪਿਯ’’ਨ੍ਤਿ ਏਤ੍ਤਕਮੇਵ ਵਤ੍ਤਬ੍ਬਂ. ਸਚੇ ਸੋ ਤੇਨ ਪਰਿਵਤ੍ਤੇਤ੍ਵਾ ਕਪ੍ਪਿਯਂ ਆਹਰਤਿ, ਰੂਪਿਯਪਟਿਗ੍ਗਾਹਕਂ ਠਪੇਤ੍ਵਾ ਸਬ੍ਬੇਹੇਵ ਭਾਜੇਤ੍ਵਾ ਪਰਿਭੁਞ੍ਜਿਤਬ੍ਬਂ, ਰੂਪਿਯਪਟਿਗ੍ਗਾਹਕੇਨ ਭਾਗੋ ਨ ਗਹੇਤਬ੍ਬੋ.
ਅਞ੍ਞੇਸਂ (ਪਾਰਾ. ਅਟ੍ਠ. ੨.੫੮੩-੪) ਭਿਕ੍ਖੂਨਂ ਵਾ ਆਰਾਮਿਕਾਨਂ ਵਾ ਪਤ੍ਤਭਾਗਮ੍ਪਿ ਲਭਿਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਤਿ, ਅਨ੍ਤਮਸੋ ਮਕ੍ਕਟਾਦੀਹਿ ਤਤੋ ਹਰਿਤ੍ਵਾ ਅਰਞ੍ਞੇ ਠਪਿਤਂ ਵਾ ਤੇਸਂ ਹਤ੍ਥਤੋ ਗਲ਼ਿਤਂ ਵਾ ਤਿਰਚ੍ਛਾਨਪਟਿਗ੍ਗਹਿਤਮ੍ਪਿ ਪਂਸੁਕੂਲਮ੍ਪਿ ਨ ਵਟ੍ਟਤਿਯੇਵ. ਤਤੋ ਆਹਟੇਨ ਫਾਣਿਤੇਨ ਸੇਨਾਸਨਧੂਪਨਮ੍ਪਿ ਨ ਵਟ੍ਟਤਿ. ਸਪ੍ਪਿਨਾ ਵਾ ਤੇਲੇਨ ਵਾ ਪਦੀਪਂ ਕਤ੍ਵਾ ਦੀਪਾਲੋਕੇ ਨਿਪਜ੍ਜਿਤੁਂ, ਕਸਿਣਪਰਿਕਮ੍ਮਂ ਕਾਤੁਂ, ਪੋਤ੍ਥਕਮ੍ਪਿ ਵਾਚੇਤੁਂ ਨ ਵਟ੍ਟਤਿ. ਤੇਲਮਧੁਫਾਣਿਤੇਹਿ ਪਨ ਸਰੀਰੇ ਵਣਂ ਮਕ੍ਖੇਤੁਂ ਨ ਵਟ੍ਟਤਿਯੇਵ. ਤੇਨ ਵਤ੍ਥੁਨਾ ਮਞ੍ਚਪੀਠਾਦੀਨਿ ਵਾ ਗਣ੍ਹਨ੍ਤਿ, ਉਪੋਸਥਾਗਾਰਂ ਵਾ ਭੋਜਨਸਾਲਂ ਵਾ ਕਰੋਨ੍ਤਿ, ਪਰਿਭੁਞ੍ਜਿਤੁਂ ਨ ਵਟ੍ਟਤਿ. ਛਾਯਾਪਿ ਗੇਹਪਰਿਚ੍ਛੇਦੇਨ ਠਿਤਾਵ ਨ ਵਟ੍ਟਤਿ, ਪਰਿਚ੍ਛੇਦਾਤਿਕ੍ਕਨ੍ਤਾ ਆਗਨ੍ਤੁਕਤ੍ਤਾ ਵਟ੍ਟਤਿ. ਤਂ ਵਤ੍ਥੁਂ ਵਿਸ੍ਸਜ੍ਜੇਤ੍ਵਾ ਕਤੇਨ ਮਗ੍ਗੇਨਪਿ ਸੇਤੁਨਾਪਿ ਨਾਵਾਯਪਿ ਉਲ਼ੁਮ੍ਪੇਨਾਪਿ ਗਨ੍ਤੁਂ ਨ ਵਟ੍ਟਤਿ. ਤੇਨ ਵਤ੍ਥੁਨਾ ਖਣਾਪਿਤਾਯ ਪੋਕ੍ਖਰਣਿਯਾ ਉਬ੍ਭਿਦੋਦਕਂ ਪਾਤੁਂ ਵਾ ਪਰਿਭੁਞ੍ਜਿਤੁਂ ਵਾ ਨ ਵਟ੍ਟਤਿ. ਅਨ੍ਤੋ ਉਦਕੇ ਪਨ ਅਸਤਿ ਅਞ੍ਞਂ ਆਗਨ੍ਤੁਕਂ ਉਦਕਂ ਵਾ ਵਸ੍ਸੋਦਕਂ ਵਾ ਪਵਿਟ੍ਠਂ ਵਟ੍ਟਤਿ. ਕੀਤਾਯ ਯੇਨ ਸਦ੍ਧਿਂ ਕੀਤਾ, ਤਂ ਆਗਨ੍ਤੁਕਮ੍ਪਿ ਨ ਵਟ੍ਟਤਿ. ਤਂ ਵਤ੍ਥੁਂ ਉਪਨਿਕ੍ਖੇਪਂ ਠਪੇਤ੍ਵਾ ਸਙ੍ਘੋ ਪਚ੍ਚਯੇ ਪਰਿਭੁਞ੍ਜਤਿ, ਤੇਪਿ ਪਚ੍ਚਯਾ ਤਸ੍ਸ ਨ ਵਟ੍ਟਨ੍ਤਿ. ਆਰਾਮੋ ਗਹਿਤੋ ਹੋਤਿ, ਸੋਪਿ ਪਰਿਭੁਞ੍ਜਿਤੁਂ ਨ ਵਟ੍ਟਤਿ. ਯਦਿ ਭੂਮਿਪਿ ਬੀਜਮ੍ਪਿ ਅਕਪ੍ਪਿਯਂ, ਨੇਵ ਭੂਮਿਂ, ਨ ਫਲਂ ਪਰਿਭੁਞ੍ਜਿਤੁਂ ਵਟ੍ਟਤਿ. ਸਚੇ ਭੂਮਿਂਯੇਵ ਕਿਣਿਤ੍ਵਾ ਅਞ੍ਞਾਨਿ ਬੀਜਾਨਿ ਰੋਪਿਤਾਨਿ, ਫਲਂ ਵਟ੍ਟਤਿ. ਅਥ ਬੀਜਾਨਿ ਕਿਣਿਤ੍ਵਾ ਕਪ੍ਪਿਯਭੂਮਿਯਂ ਰੋਪਿਤਾਨਿ, ਫਲਂ ਨ ਵਟ੍ਟਤਿ, ਭੂਮਿਯਂ ਨਿਸੀਦਿਤੁਂ ਵਾ ਨਿਪਜ੍ਜਿਤੁਂ ਵਾ ਵਟ੍ਟਤਿ.
ਸਚੇ ਪਨ ਤਤ੍ਥ ਆਗਤੋ ਕਪ੍ਪਿਯਕਾਰਕੋ ਤਂ ਪਰਿਵਤ੍ਤੇਤ੍ਵਾ ਸਙ੍ਘਸ੍ਸ ਕਪ੍ਪਿਯਂ ਸਪ੍ਪਿਤੇਲਾਦਿਂ ਆਹਰਿਤੁਂ ਨ ਜਾਨਾਤਿ, ਸੋ ਵਤ੍ਤਬ੍ਬੋ ‘‘ਆਵੁਸੋ, ਇਮਂ ਛਡ੍ਡੇਹੀ’’ਤਿ. ਸਚੇ ਸੋ ਛਡ੍ਡੇਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਛਡ੍ਡੇਤਿ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ ਰੂਪਿਯਛਡ੍ਡਕੋ ਸਮ੍ਮਨ੍ਨਿਤਬ੍ਬੋ ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯ, ਨ ਦੋਸਾਗਤਿਂ ਗਚ੍ਛੇਯ੍ਯ, ਨ ਮੋਹਾਗਤਿਂ ਗਚ੍ਛੇਯ੍ਯ, ਨ ਭਯਾਗਤਿਂ ਗਚ੍ਛੇਯ੍ਯ, ਛਡ੍ਡਿਤਾਛਡ੍ਡਿਤਞ੍ਚ ਜਾਨੇਯ੍ਯ. ਏਵਞ੍ਚ ਪਨ ਸਮ੍ਮਨ੍ਨਿਤਬ੍ਬੋ, ਪਠਮਂ ਭਿਕ੍ਖੁ ਯਾਚਿਤਬ੍ਬੋ, ਯਾਚਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਰੂਪਿਯਛਡ੍ਡਕਂ ਸਮ੍ਮਨ੍ਨੇਯ੍ਯ, ਏਸਾ ਞਤ੍ਤਿ. ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਰੂਪਿਯਛਡ੍ਡਕਂ ਸਮ੍ਮਨ੍ਨਤਿ, ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਰੂਪਿਯਛਡ੍ਡਕਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ. ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ. ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਰੂਪਿਯਛਡ੍ਡਕੋ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਪਾਰਾ. ੫੮੫).
੬੮. ਤੇਨ ਸਮ੍ਮਤੇਨ (ਪਾਰਾ. ਅਟ੍ਠ. ੨.੫੮੫) ਭਿਕ੍ਖੁਨਾ ਨਿਮਿਤ੍ਤਂ ਅਕਤ੍ਵਾ ਅਕ੍ਖੀਨਿ ਨਿਮੀਲੇਤ੍ਵਾ ਨਦਿਯਾ ਵਾ ਪਪਾਤੇ ਵਾ ਵਨਗਹਨੇ ਵਾ ਗੂਥਂ ਵਿਯ ਅਨਪੇਕ੍ਖੇਨ ਪਤਿਤੋਕਾਸਂ ਅਸਮਨ੍ਨਾਰਹਨ੍ਤੇਨ ਛਡ੍ਡੇਤਬ੍ਬਂ. ਸਚੇ ਨਿਮਿਤ੍ਤਂ ਕਤ੍ਵਾ ਪਾਤੇਤਿ, ਦੁਕ੍ਕਟਂ ਆਪਜ੍ਜਤਿ. ਏਵਂ ਜਿਗੁਚ੍ਛਿਤਬ੍ਬੇਪਿ ਰੂਪਿਯੇ ਭਗਵਾ ਪਰਿਯਾਯੇਨ ਭਿਕ੍ਖੂਨਂ ਪਰਿਭੋਗਂ ਆਚਿਕ੍ਖਿ. ਰੂਪਿਯਪਟਿਗ੍ਗਾਹਕਸ੍ਸ ਪਨ ਕੇਨਚਿ ਪਰਿਯਾਯੇਨ ਤਤੋ ਉਪ੍ਪਨ੍ਨਪਚ੍ਚਯਪਰਿਭੋਗੋ ਨ ਵਟ੍ਟਤਿ. ਯਥਾ ਚਾਯਂ ਏਤਸ੍ਸ ਨ ਵਟ੍ਟਤਿ, ਏਵਂ ਅਸਨ੍ਤਸਮ੍ਭਾਵਨਾਯ ਵਾ ਕੁਲਦੂਸਕਕਮ੍ਮੇਨ ਵਾ ਕੁਹਨਾਦੀਹਿ ਵਾਉਪ੍ਪਨ੍ਨਪਚ੍ਚਯਾ ਨੇਵ ਤਸ੍ਸ, ਨ ਅਞ੍ਞਸ੍ਸ ਵਟ੍ਟਨ੍ਤਿ, ਧਮ੍ਮੇਨ ਸਮੇਨ ਉਪ੍ਪਨ੍ਨਾਪਿ ਅਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਨ੍ਤਿ. ਚਤ੍ਤਾਰੋ ਹਿ ਪਰਿਭੋਗਾ – ਥੇਯ੍ਯਪਰਿਭੋਗੋ ਇਣਪਰਿਭੋਗੋ ਦਾਯਜ੍ਜਪਰਿਭੋਗੋ ਸਾਮਿਪਰਿਭੋਗੋਤਿ. ਤਤ੍ਥ ਸਙ੍ਘਮਜ੍ਝੇਪਿ ਨਿਸੀਦਿਤ੍ਵਾ ਪਰਿਭੁਞ੍ਜਨ੍ਤਸ੍ਸ ਦੁਸ੍ਸੀਲਸ੍ਸ ਪਰਿਭੋਗੋ ਥੇਯ੍ਯਪਰਿਭੋਗੋ ਨਾਮ. ਸੀਲਵਤੋ ਅਪਚ੍ਚਵੇਕ੍ਖਿਤਪਰਿਭੋਗੋ ਇਣਪਰਿਭੋਗੋ ਨਾਮ. ਤਸ੍ਮਾ ਚੀਵਰਂ ਪਰਿਭੋਗੇ ਪਰਿਭੋਗੇ ਪਚ੍ਚਵੇਕ੍ਖਿਤਬ੍ਬਂ, ਪਿਣ੍ਡਪਾਤੋ ਆਲੋਪੇ ਆਲੋਪੇ, ਤਥਾ ਅਸਕ੍ਕੋਨ੍ਤੇਨ ਪੁਰੇਭਤ੍ਤਪਚ੍ਛਾਭਤ੍ਤਪੁਰਿਮਯਾਮਮਜ੍ਝਿਮਯਾਮਪਚ੍ਛਿਮਯਾਮੇਸੁ. ਸਚਸ੍ਸ ਅਪਚ੍ਚਵੇਕ੍ਖਤੋ ਅਰੁਣੋ ਉਗ੍ਗਚ੍ਛਤਿ, ਇਣਪਰਿਭੋਗਟ੍ਠਾਨੇ ਤਿਟ੍ਠਤਿ. ਸੇਨਾਸਨਮ੍ਪਿ ਪਰਿਭੋਗੇ ਪਰਿਭੋਗੇ ਪਚ੍ਚਵੇਕ੍ਖਿਤਬ੍ਬਂ. ਭੇਸਜ੍ਜਸ੍ਸ ਪਟਿਗ੍ਗਹਣੇਪਿ ਪਰਿਭੋਗੇਪਿ ਸਤਿਪਚ੍ਚਯਤਾ ਵਟ੍ਟਤਿ, ਏਵਂ ਸਨ੍ਤੇਪਿ ਪਟਿਗ੍ਗਹਣੇ ਸਤਿਂ ਕਤ੍ਵਾ ਪਰਿਭੋਗੇ ਅਕਰੋਨ੍ਤਸ੍ਸੇਵ ਆਪਤ੍ਤਿ, ਪਟਿਗ੍ਗਹਣੇ ਪਨ ਸਤਿਂ ਅਕਤ੍ਵਾ ਪਰਿਭੋਗੇ ਕਰੋਨ੍ਤਸ੍ਸ ਅਨਾਪਤ੍ਤਿ. ਚਤੁਬ੍ਬਿਧਾ ਹਿ ਸੁਦ੍ਧਿ – ਦੇਸਨਾਸੁਦ੍ਧਿ ਸਂਵਰਸੁਦ੍ਧਿ ਪਰਿਯੇਟ੍ਠਿਸੁਦ੍ਧਿ ਪਚ੍ਚਵੇਕ੍ਖਣਸੁਦ੍ਧੀਤਿ.
ਤਤ੍ਥ ਦੇਸਨਾਸੁਦ੍ਧਿ ਨਾਮ ਪਾਤਿਮੋਕ੍ਖਸਂਵਰਸੀਲਂ. ਤਞ੍ਹਿ ਦੇਸਨਾਯ ਸੁਜ੍ਝਨਤੋ ‘‘ਦੇਸਨਾਸੁਦ੍ਧੀ’’ਤਿ ਵੁਚ੍ਚਤਿ. ਸਂਵਰਸੁਦ੍ਧਿ ਨਾਮ ਇਨ੍ਦ੍ਰਿਯਸਂਵਰਸੀਲਂ. ਤਞ੍ਹਿ ‘‘ਨ ਪੁਨੇਵਂ ਕਰਿਸ੍ਸਾਮੀ’’ਤਿ ਚਿਤ੍ਤਾਧਿਟ੍ਠਾਨਸਂਵਰੇਨੇਵ ਸੁਜ੍ਝਨਤੋ ‘‘ਸਂਵਰਸੁਦ੍ਧੀ’’ਤਿ ਵੁਚ੍ਚਤਿ. ਪਰਿਯੇਟ੍ਠਿਸੁਦ੍ਧਿ ਨਾਮ ਆਜੀਵਪਾਰਿਸੁਦ੍ਧਿਸੀਲਂ. ਤਞ੍ਹਿ ਅਨੇਸਨਂ ਪਹਾਯ ਧਮ੍ਮੇਨ ਸਮੇਨ ਪਚ੍ਚਯੇ ਉਪ੍ਪਾਦੇਨ੍ਤਸ੍ਸ ਪਰਿਯੇਸਨਾਯ ਸੁਦ੍ਧਤ੍ਤਾ ‘‘ਪਰਿਯੇਟ੍ਠਿਸੁਦ੍ਧੀ’’ਤਿ ਵੁਚ੍ਚਤਿ. ਪਚ੍ਚਵੇਕ੍ਖਣਸੁਦ੍ਧਿ ਨਾਮ ਪਚ੍ਚਯਪਰਿਭੋਗਸਨ੍ਨਿਸ੍ਸਿਤਸੀਲਂ. ਤਞ੍ਹਿ ‘‘ਪਟਿਸਙ੍ਖਾ ਯੋਨਿਸੋ ਚੀਵਰਂ ਪਟਿਸੇਵਾਮੀ’’ਤਿਆਦਿਨਾ (ਮ. ਨਿ. ੧.੨੩; ਅ. ਨਿ. ੬.੫੮) ਨਯੇਨ ਵੁਤ੍ਤੇਨ ਪਚ੍ਚਵੇਕ੍ਖਣੇਨ ਸੁਜ੍ਝਨਤੋ ‘‘ਪਚ੍ਚਵੇਕ੍ਖਣਸੁਦ੍ਧੀ’’ਤਿ ਵੁਚ੍ਚਤਿ, ਤੇਨ ਵੁਤ੍ਤਂ ‘‘ਪਟਿਗ੍ਗਹਣੇ ਪਨ ਸਤਿਂ ਅਕਤ੍ਵਾ ਪਰਿਭੋਗੇ ਕਰੋਨ੍ਤਸ੍ਸ ਅਨਾਪਤ੍ਤੀ’’ਤਿ.
ਸਤ੍ਤਨ੍ਨਂ ਸੇਕ੍ਖਾਨਂ ਪਚ੍ਚਯਪਰਿਭੋਗੋ ਦਾਯਜ੍ਜਪਰਿਭੋਗੋ ਨਾਮ. ਤੇ ਹਿ ਭਗਵਤੋ ਪੁਤ੍ਤਾ, ਤਸ੍ਮਾ ਪਿਤੁਸਨ੍ਤਕਾਨਂ ਪਚ੍ਚਯਾਨਂ ਦਾਯਾਦਾ ਹੁਤ੍ਵਾ ਤੇ ਪਚ੍ਚਯੇ ਪਰਿਭੁਞ੍ਜਨ੍ਤਿ. ਕਿਂ ਪਨ ਤੇ ਭਗਵਤੋ ਪਚ੍ਚਯੇ ਪਰਿਭੁਞ੍ਜਨ੍ਤਿ, ਗਿਹੀਨਂ ਪਚ੍ਚਯੇ ਪਰਿਭੁਞ੍ਜਨ੍ਤੀਤਿ? ਗਿਹੀਹਿ ਦਿਨ੍ਨਾਪਿ ਭਗਵਤਾ ਅਨੁਞ੍ਞਾਤਤ੍ਤਾ ਭਗਵਤੋ ਸਨ੍ਤਕਾ ਹੋਨ੍ਤਿ, ਤਸ੍ਮਾ ਭਗਵਤੋ ਪਚ੍ਚਯੇ ਪਰਿਭੁਞ੍ਜਨ੍ਤੀਤਿ ਵੇਦਿਤਬ੍ਬਂ. ਧਮ੍ਮਦਾਯਾਦਸੁਤ੍ਤ (ਮ. ਨਿ. ੧.੨੯ ਆਦਯੋ) ਞ੍ਚੇਤ੍ਥ ਸਾਧਕਂ. ਖੀਣਾਸਵਾਨਂ ਪਰਿਭੋਗੋ ਸਾਮਿਪਰਿਭੋਗੋ ਨਾਮ. ਤੇ ਹਿ ਤਣ੍ਹਾਯ ਦਾਸਬ੍ਯਂ ਅਤੀਤਤ੍ਤਾ ਸਾਮਿਨੋ ਹੁਤ੍ਵਾ ਪਰਿਭੁਞ੍ਜਨ੍ਤਿ. ਇਤਿ ਇਮੇਸੁ ਪਰਿਭੋਗੇਸੁ ਸਾਮਿਪਰਿਭੋਗੋ ਚ ਦਾਯਜ੍ਜਪਰਿਭੋਗੋ ਚ ਸਬ੍ਬੇਸਮ੍ਪਿ ਵਟ੍ਟਤਿ, ਇਣਪਰਿਭੋਗੋ ਨ ਵਟ੍ਟਤਿ, ਥੇਯ੍ਯਪਰਿਭੋਗੇ ਕਥਾਯੇਵ ਨਤ੍ਥਿ.
ਅਪਰੇਪਿ ਚਤ੍ਤਾਰੋ ਪਰਿਭੋਗਾ – ਲਜ੍ਜਿਪਰਿਭੋਗੋ ਅਲਜ੍ਜਿਪਰਿਭੋਗੋ ਧਮ੍ਮਿਯਪਰਿਭੋਗੋ ਅਧਮ੍ਮਿਯਪਰਿਭੋਗੋਤਿ. ਤਤ੍ਥ ਅਲਜ੍ਜਿਨੋ ਲਜ੍ਜਿਨਾ ਸਦ੍ਧਿਂ ਪਰਿਭੋਗੋ ਵਟ੍ਟਤਿ, ਆਪਤ੍ਤਿਯਾ ਨ ਕਾਰੇਤਬ੍ਬੋ. ਲਜ੍ਜਿਨੋ ਅਲਜ੍ਜਿਨਾ ਸਦ੍ਧਿਂ ਯਾਵ ਨ ਜਾਨਾਤਿ, ਤਾਵ ਵਟ੍ਟਤਿ. ਆਦਿਤੋ ਪਟ੍ਠਾਯ ਹਿ ਅਲਜ੍ਜੀ ਨਾਮ ਨਤ੍ਥਿ, ਤਸ੍ਮਾ ਯਦਾਸ੍ਸ ਅਲਜ੍ਜਿਭਾਵਂ ਜਾਨਾਤਿ, ਤਦਾ ਵਤ੍ਤਬ੍ਬੋ ‘‘ਤੁਮ੍ਹੇ ਕਾਯਦ੍ਵਾਰੇ ਵਚੀਦ੍ਵਾਰੇ ਚ ਵੀਤਿਕ੍ਕਮਂ ਕਰੋਥ, ਤਂ ਅਪ੍ਪਤਿਰੂਪਂ, ਮਾ ਏਵਮਕਤ੍ਥਾ’’ਤਿ. ਸਚੇ ਅਨਾਦਿਯਿਤ੍ਵਾ ਕਰੋਤਿਯੇਵ, ਯਦਿ ਤੇਨ ਸਦ੍ਧਿਂ ਪਰਿਭੋਗਂ ਕਰੋਤਿ, ਸੋਪਿ ਅਲਜ੍ਜੀਯੇਵ ਹੋਤਿ. ਯੋਪਿ ਅਤ੍ਤਨੋ ਭਾਰਭੂਤੇਨ ਅਲਜ੍ਜਿਨਾ ਸਦ੍ਧਿਂ ਪਰਿਭੋਗਂ ਕਰੋਤਿ, ਸੋਪਿ ਨਿਵਾਰੇਤਬ੍ਬੋ. ਸਚੇ ਨ ਓਰਮਤਿ, ਅਯਮ੍ਪਿ ਅਲਜ੍ਜੀਯੇਵ ਹੋਤਿ. ਏਵਂ ਏਕੋ ਅਲਜ੍ਜੀ ਅਲਜ੍ਜਿਸਤਮ੍ਪਿ ਕਰੋਤਿ. ਅਲਜ੍ਜਿਨੋ ਪਨ ਅਲਜ੍ਜਿਨਾਵ ਸਦ੍ਧਿਂ ਪਰਿਭੋਗੇ ਆਪਤ੍ਤਿ ਨਾਮ ਨਤ੍ਥਿ. ਲਜ੍ਜਿਨੋ ਲਜ੍ਜਿਨਾ ਸਦ੍ਧਿਂ ਪਰਿਭੋਗੋ ਦ੍ਵਿਨ੍ਨਂ ਖਤ੍ਤਿਯਕੁਮਾਰਾਨਂ ਸੁਵਣ੍ਣਪਾਤਿਯਂ ਭੋਜਨਸਦਿਸੋ. ਧਮ੍ਮਿਯਾਧਮ੍ਮਿਯਪਰਿਭੋਗੋ ਪਚ੍ਚਯਵਸੇਨੇਵ ਵੇਦਿਤਬ੍ਬੋ. ਤਤ੍ਥ ਸਚੇ ਪੁਗ੍ਗਲੋਪਿ ਅਲਜ੍ਜੀ, ਪਿਣ੍ਡਪਾਤੋਪਿ ਅਧਮ੍ਮਿਯੋ, ਉਭੋ ਜੇਗੁਚ੍ਛਾ. ਪੁਗ੍ਗਲੋ ਅਲਜ੍ਜੀ, ਪਿਣ੍ਡਪਾਤੋ ਧਮ੍ਮਿਯੋ, ਪੁਗ੍ਗਲਂ ਜਿਗੁਚ੍ਛਿਤ੍ਵਾ ਪਿਣ੍ਡਪਾਤੋ ਨ ਗਹੇਤਬ੍ਬੋ. ਮਹਾਪਚ੍ਚਰਿਯਂ ਪਨ ‘‘ਦੁਸ੍ਸੀਲੋ ਸਙ੍ਘਤੋ ਉਦ੍ਦੇਸਭਤ੍ਤਾਦੀਨਿ ਲਭਿਤ੍ਵਾ ਸਙ੍ਘਸ੍ਸੇਵ ਦੇਤਿ, ਏਤਾਨਿ ਯਥਾਦਾਨਮੇਵ ਗਹਿਤਤ੍ਤਾ ਵਟ੍ਟਨ੍ਤੀ’’ਤਿ ਵੁਤ੍ਤਂ. ਪੁਗ੍ਗਲੋ ਲਜ੍ਜੀ, ਪਿਣ੍ਡਪਾਤੋ ਅਧਮ੍ਮਿਯੋ, ਪਿਣ੍ਡਪਾਤੋ ਜੇਗੁਚ੍ਛੋ ਨ ਗਹੇਤਬ੍ਬੋ. ਪੁਗ੍ਗਲੋ ਲਜ੍ਜੀ, ਪਿਣ੍ਡਪਾਤੋਪਿ ਧਮ੍ਮਿਯੋ, ਵਟ੍ਟਤਿ.
ਅਪਰੇ ਦ੍ਵੇ ਪਗ੍ਗਹਾ ਦ੍ਵੇ ਚ ਪਰਿਭੋਗਾ – ਲਜ੍ਜਿਪਗ੍ਗਹੋ ਅਲਜ੍ਜਿਪਗ੍ਗਹੋ, ਧਮ੍ਮਪਰਿਭੋਗੋ ਆਮਿਸਪਰਿਭੋਗੋਤਿ. ਤਤ੍ਥ ਅਲਜ੍ਜਿਨੋ ਲਜ੍ਜਿਂ ਪਗ੍ਗਹੇਤੁਂ ਵਟ੍ਟਤਿ, ਨ ਸੋ ਆਪਤ੍ਤਿਯਾ ਕਾਰੇਤਬ੍ਬੋ. ਸਚੇ ਪਨ ਲਜ੍ਜੀ ਅਲਜ੍ਜਿਂ ਪਗ੍ਗਣ੍ਹਾਤਿ, ਅਨੁਮੋਦਨਾਯ ਅਜ੍ਝੇਸਤਿ, ਧਮ੍ਮਕਥਾਯ ਅਜ੍ਝੇਸਤਿ, ਕੁਲੇਸੁ ਉਪਤ੍ਥਮ੍ਭੇਤਿ, ਇਤਰੋਪਿ ‘‘ਅਮ੍ਹਾਕਂ ਆਚਰਿਯੋ ਈਦਿਸੋ ਚ ਈਦਿਸੋ ਚਾ’’ਤਿ ਤਸ੍ਸ ਪਰਿਸਤਿ ਵਣ੍ਣਂ ਭਾਸਤਿ, ਅਯਂ ਸਾਸਨਂ ਓਸਕ੍ਕਾਪੇਤਿ ਅਨ੍ਤਰਧਾਪੇਤੀਤਿ ਵੇਦਿਤਬ੍ਬੋ. ਧਮ੍ਮਪਰਿਭੋਗਆਮਿਸਪਰਿਭੋਗੇਸੁ ਪਨ ਯਤ੍ਥ ਆਮਿਸਪਰਿਭੋਗੋ ਵਟ੍ਟਤਿ, ਧਮ੍ਮਪਰਿਭੋਗੋਪਿ ਤਤ੍ਥ ਵਟ੍ਟਤਿ. ਯੋ ਪਨ ਕੋਟਿਯਂ ਠਿਤੋ, ਗਨ੍ਥੋ ਤਸ੍ਸ ਪੁਗ੍ਗਲਸ੍ਸ ਅਚ੍ਚਯੇਨ ਨਸ੍ਸਿਸ੍ਸਤਿ, ਤਂ ਧਮ੍ਮਾਨੁਗ੍ਗਹੇਨ ਉਗ੍ਗਣ੍ਹਿਤੁਂ ਵਟ੍ਟਤੀਤਿ ਵੁਤ੍ਤਂ. ਤਤ੍ਰਿਦਂ ਵਤ੍ਥੁ – ਮਹਾਭਯੇ ਕਿਰ ਏਕਸ੍ਸੇਵ ਭਿਕ੍ਖੁਨੋ ਮਹਾਨਿਦ੍ਦੇਸੋ ਪਗੁਣੋ ਅਹੋਸਿ. ਅਥ ਚਤੁਨਿਕਾਯਿਕਤਿਸ੍ਸਤ੍ਥੇਰਸ੍ਸ ਉਪਜ੍ਝਾਯੋ ਮਹਾਤਿਪਿਟਕਤ੍ਥੇਰੋ ਨਾਮ ਮਹਾਰਕ੍ਖਿਤਤ੍ਥੇਰਂ ਆਹ ‘‘ਆਵੁਸੋ ਮਹਾਰਕ੍ਖਿਤ, ਏਤਸ੍ਸ ਸਨ੍ਤਿਕੇ ਮਹਾਨਿਦ੍ਦੇਸਂ ਗਣ੍ਹਾਹੀ’’ਤਿ. ‘‘ਪਾਪੋ ਕਿਰਾਯਂ, ਭਨ੍ਤੇ, ਨ ਗਣ੍ਹਾਮੀ’’ਤਿ. ‘‘ਗਣ੍ਹਾਵੁਸੋ, ਅਹਂ ਤੇ ਸਨ੍ਤਿਕੇ ਨਿਸੀਦਿਸ੍ਸਾਮੀ’’ਤਿ. ‘‘ਸਾਧੁ, ਭਨ੍ਤੇ, ਤੁਮ੍ਹੇਸੁ ਨਿਸਿਨ੍ਨੇਸੁ ਗਣ੍ਹਿਸ੍ਸਾਮੀ’’ਤਿ ਪਟ੍ਠਪੇਤ੍ਵਾ ਰਤ੍ਤਿਨ੍ਦਿਵਂ ਨਿਰਨ੍ਤਰਂ ਪਰਿਯਾਪੁਣਨ੍ਤੋ ਓਸਾਨਦਿਵਸੇ ਹੇਟ੍ਠਾਮਞ੍ਚੇ ਇਤ੍ਥਿਂ ਦਿਸ੍ਵਾ ‘‘ਭਨ੍ਤੇ, ਸੁਤਂਯੇਵ ਮੇ ਪੁਬ੍ਬੇ, ਸਚਾਹਂ ਏਵਂ ਜਾਨੇਯ੍ਯਂ, ਨ ਈਦਿਸਸ੍ਸ ਸਨ੍ਤਿਕੇ ਧਮ੍ਮਂ ਪਰਿਯਾਪੁਣੇਯ੍ਯ’’ਨ੍ਤਿ ਆਹ. ਤਸ੍ਸ ਪਨ ਸਨ੍ਤਿਕੇ ਬਹੂ ਮਹਾਥੇਰਾ ਉਗ੍ਗਣ੍ਹਿਤ੍ਵਾ ਮਹਾਨਿਦ੍ਦੇਸਂ ਪਤਿਟ੍ਠਾਪੇਸੁਨ੍ਤਿ.
ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ
ਰੂਪਿਯਾਦਿਪਟਿਗ੍ਗਹਣਵਿਨਿਚ੍ਛਯਕਥਾ ਸਮਤ੍ਤਾ.