੧੩. ਦਾਨਲਕ੍ਖਣਾਦਿਵਿਨਿਚ੍ਛਯਕਥਾ

੬੯. ਦਾਨਵਿਸ੍ਸਾਸਗ੍ਗਾਹੇਹਿ ਲਾਭਸ੍ਸ ਪਰਿਣਾਮਨਨ੍ਤਿ ਏਤ੍ਥ ਤਾਵ ਦਾਨਨ੍ਤਿ ਅਤ੍ਤਨੋ ਸਨ੍ਤਕਸ੍ਸ ਚੀਵਰਾਦਿਪਰਿਕ੍ਖਾਰਸ੍ਸ ਸਦ੍ਧਿਵਿਹਾਰਿਕਾਦੀਸੁ ਯਸ੍ਸ ਕਸ੍ਸਚਿ ਦਾਨਂ. ਤਤ੍ਰਿਦਂ ਦਾਨਲਕ੍ਖਣਂ – ‘‘ਇਦਂ ਤੁਯ੍ਹਂ ਦੇਮਿ ਦਦਾਮਿ ਦਜ੍ਜਾਮਿ ਓਣੋਜੇਮਿ ਪਰਿਚ੍ਚਜਾਮਿ ਵਿਸ੍ਸਜ੍ਜਾਮੀ’’ਤਿ ਵਾ ‘‘ਇਤ੍ਥਨ੍ਨਾਮਸ੍ਸ ਦੇਮਿ…ਪੇ… ਵਿਸ੍ਸਜ੍ਜਾਮੀ’’ਤਿ ਵਾ ਵਦਤਿ, ਸਮ੍ਮੁਖਾਪਿ ਪਰਮ੍ਮੁਖਾਪਿ ਦਿਨ੍ਨਂਯੇਵ ਹੋਤਿ. ‘‘ਤੁਯ੍ਹਂ ਗਣ੍ਹਾਹੀ’’ਤਿ ਵੁਤ੍ਤੇ ‘‘ਮਯ੍ਹਂ ਗਣ੍ਹਾਮੀ’’ਤਿ ਵਦਤਿ, ਸੁਦਿਨ੍ਨਂ ਸੁਗ੍ਗਹਿਤਞ੍ਚ. ‘‘ਤਵ ਸਨ੍ਤਕਂ ਕਰੋਹਿ, ਤਵ ਸਨ੍ਤਕਂ ਹੋਤੁ, ਤਵ ਸਨ੍ਤਕਂ ਹੋਤੀ’’ਤਿ ਵੁਤ੍ਤੇ ‘‘ਮਮ ਸਨ੍ਤਕਂ ਕਰੋਮਿ, ਮਮ ਸਨ੍ਤਕਂ ਹੋਤੁ, ਮਮ ਸਨ੍ਤਕਂ ਕਰਿਸ੍ਸਾਮੀ’’ਤਿ ਵਦਤਿ, ਦੁਦਿਨ੍ਨਂ ਦੁਗ੍ਗਹਿਤਞ੍ਚ. ਨੇਵ ਦਾਤਾ ਦਾਤੁਂ ਜਾਨਾਤਿ, ਨ ਇਤਰੋ ਗਹੇਤੁਂ, ਸਚੇ ਪਨ ‘‘ਤਵ ਸਨ੍ਤਕਂ ਕਰੋਹੀ’’ਤਿ ਵੁਤ੍ਤੇ ‘‘ਸਾਧੁ, ਭਨ੍ਤੇ, ਮਯ੍ਹਂ ਗਣ੍ਹਾਮੀ’’ਤਿ ਗਣ੍ਹਾਤਿ, ਸੁਗ੍ਗਹਿਤਂ. ਸਚੇ ਪਨ ਏਕੋ ‘‘ਇਦਂ ਚੀਵਰਂ ਗਣ੍ਹਾਹੀ’’ਤਿ ਵਦਤਿ, ਇਤਰੋ ‘‘ਨ ਗਣ੍ਹਾਮੀ’’ਤਿ ਵਦਤਿ, ਪੁਨ ਸੋ ‘‘ਦਿਨ੍ਨਂ ਮਯਾ ਤੁਯ੍ਹਂ, ਗਣ੍ਹਾਹੀ’’ਤਿ ਵਦਤਿ, ਇਤਰੋਪਿ ‘‘ਨ ਮਯ੍ਹਂ ਇਮਿਨਾ ਅਤ੍ਥੋ’’ਤਿ ਵਦਤਿ, ਤਤੋ ਪੁਰਿਮੋਪਿ ‘‘ਮਯਾ ਦਿਨ੍ਨ’’ਨ੍ਤਿ ਦਸਾਹਂ ਅਤਿਕ੍ਕਾਮੇਤਿ, ਪਚ੍ਛਿਮੋਪਿ ‘‘ਮਯਾ ਪਟਿਕ੍ਖਿਤ੍ਤ’’ਨ੍ਤਿ, ਕਸ੍ਸ ਆਪਤ੍ਤੀਤਿ? ਨ ਕਸ੍ਸਚਿ. ਯਸ੍ਸ ਪਨ ਰੁਚ੍ਚਤਿ, ਤੇਨ ਅਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤਬ੍ਬਂ. ‘‘ਇਤ੍ਥਨ੍ਨਾਮਸ੍ਸ ਦੇਹੀ’’ਤਿ ਦਿਨ੍ਨਂ ਯਾਵ ਪਰਸ੍ਸ ਹਤ੍ਥਂ ਨ ਪਾਪੁਣਾਤਿ, ਤਾਵ ਯੋ ਪਹਿਣਤਿ, ਤਸ੍ਸੇਵ ਸਨ੍ਤਕਂ, ‘‘ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ ਦਿਨ੍ਨਂ ਪਨ ਯਸ੍ਸ ਪਹੀਯਤਿ, ਤਸ੍ਸ ਸਨ੍ਤਕਂ. ਤਸ੍ਮਾ ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ ‘‘ਇਦਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦੇਹੀ’’ਤਿ. ਸੋ ਅਨ੍ਤਰਾਮਗ੍ਗੇ ਯੋ ਪਹਿਣਤਿ, ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ, ਸੁਗ੍ਗਹਿਤਂ. ਯਸ੍ਸ ਪਹੀਯਤਿ, ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ, ਦੁਗ੍ਗਹਿਤਂ.

ਭਿਕ੍ਖੁ (ਮਹਾਵ. ੩੭੮-੩੭੯) ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦੇਹੀ’’ਤਿ. ਸੋ ਅਨ੍ਤਰਾਮਗ੍ਗੇ ਸੁਣਾਤਿ ‘‘ਯੋ ਪਹਿਣਤਿ, ਸੋ ਕਾਲਕਤੋ’’ਤਿ, ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ, ਸ੍ਵਾਧਿਟ੍ਠਿਤਂ. ਯਸ੍ਸ ਪਹੀਯਤਿ, ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ, ਦੁਗ੍ਗਹਿਤਂ. ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦੇਹੀ’’ਤਿ. ਸੋ ਅਨ੍ਤਰਾਮਗ੍ਗੇ ਸੁਣਾਤਿ ‘‘ਯਸ੍ਸ ਪਹੀਯਤਿ, ਸੋ ਕਾਲਕਤੋ’’ਤਿ, ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ, ਦ੍ਵਾਧਿਟ੍ਠਿਤਂ. ਯੋ ਪਹਿਣਤਿ, ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ, ਸੁਗ੍ਗਹਿਤਂ. ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦੇਹੀ’’ਤਿ. ਸੋ ਅਨ੍ਤਰਾਮਗ੍ਗੇ ਸੁਣਾਤਿ ‘‘ਉਭੋ ਕਾਲਕਤਾ’’ਤਿ, ਯੋ ਪਹਿਣਤਿ, ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ, ਸ੍ਵਾਧਿਟ੍ਠਿਤਂ. ਯਸ੍ਸ ਪਹੀਯਤਿ, ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ, ਦ੍ਵਾਧਿਟ੍ਠਿਤਂ. ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ. ਸੋ ਅਨ੍ਤਰਾਮਗ੍ਗੇ ਯੋ ਪਹਿਣਤਿ, ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ, ਦੁਗ੍ਗਹਿਤਂ. ਯਸ੍ਸ ਪਹੀਯਤਿ, ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ, ਸੁਗ੍ਗਹਿਤਂ. ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ. ਸੋ ਅਨ੍ਤਰਾਮਗ੍ਗੇ ਸੁਣਾਤਿ ‘‘ਯੋ ਪਹਿਣਤਿ, ਸੋ ਕਾਲਕਤੋ’’ਤਿ, ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ, ਦ੍ਵਾਧਿਟ੍ਠਿਤਂ. ਯਸ੍ਸ ਪਹੀਯਤਿ, ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ, ਸੁਗ੍ਗਹਿਤਂ. ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ. ਸੋ ਅਨ੍ਤਰਾਮਗ੍ਗੇ ਸੁਣਾਤਿ ‘‘ਯਸ੍ਸ ਪਹੀਯਤਿ, ਸੋ ਕਾਲਕਤੋ’’ਤਿ, ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ, ਸ੍ਵਾਧਿਟ੍ਠਿਤਂ. ਯੋ ਪਹਿਣਤਿ, ਤਸ੍ਸ ਵਿਸ੍ਸਾਸਾ ਗਣ੍ਹਾਤਿ, ਦੁਗ੍ਗਹਿਤਂ. ਭਿਕ੍ਖੁ ਭਿਕ੍ਖੁਸ੍ਸ ਹਤ੍ਥੇ ਚੀਵਰਂ ਪਹਿਣਤਿ ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ. ਸੋ ਅਨ੍ਤਰਾਮਗ੍ਗੇ ਸੁਣਾਤਿ ‘‘ਉਭੋ ਕਾਲਕਤਾ’’ਤਿ. ਯੋ ਪਹਿਣਤਿ, ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ, ਦ੍ਵਾਧਿਟ੍ਠਿਤਂ. ਯਸ੍ਸ ਪਹੀਯਤਿ, ਤਸ੍ਸ ਮਤਕਚੀਵਰਂ ਅਧਿਟ੍ਠਾਤਿ, ਸ੍ਵਾਧਿਟ੍ਠਿਤਂ.

ਪਰਿਚ੍ਚਜਿਤ੍ਵਾ ਦਿਨ੍ਨਂ ਪੁਨ ਕੇਨਚਿ ਕਾਰਣੇਨ ਕੁਪਿਤੋ ਆਹਰਾਪੇਤੁਂ ਨ ਲਭਤਿ. ਅਤ੍ਤਨਾ ਦਿਨ੍ਨਮ੍ਪਿ ਹਿ ਚੀਵਰਂ ਸਕਸਞ੍ਞਾਯ ਅਚ੍ਛਿਨ੍ਦਤੋ ਨਿਸ੍ਸਗ੍ਗਿਯਂ, ਅਞ੍ਞਂ ਪਰਿਕ੍ਖਾਰਂ ਅਨ੍ਤਮਸੋ ਸੂਚਿਮ੍ਪਿ ਅਚ੍ਛਿਨ੍ਦਤੋ ਦੁਕ੍ਕਟਂ. ਸਚੇ ਪਨ ‘‘ਭਨ੍ਤੇ, ਤੁਮ੍ਹਾਕਂ ਇਦਂ ਸਾਰੁਪ੍ਪ’’ਨ੍ਤਿ ਸਯਮੇਵ ਦੇਤਿ, ਗਹੇਤੁਂ ਵਟ੍ਟਤਿ. ਅਥ ਪਨ ‘‘ਆਵੁਸੋ, ਮਯਂ ਤੁਯ੍ਹਂ ‘ਵਤ੍ਤਪਟਿਵਤ੍ਤਂ ਕਰਿਸ੍ਸਤਿ, ਅਮ੍ਹਾਕਂ ਸਨ੍ਤਿਕੇ ਉਪਜ੍ਝਂ ਗਣ੍ਹਿਸ੍ਸਤਿ, ਧਮ੍ਮਂ ਪਰਿਯਾਪੁਣਿਸ੍ਸਤੀ’ਤਿ ਚੀਵਰਂ ਅਦਮ੍ਹਾ, ਸੋ ਦਾਨਿ ਤ੍ਵਂ ਨ ਵਤ੍ਤਂ ਕਰੋਸਿ, ਨ ਉਪਜ੍ਝਂ ਗਣ੍ਹਾਸਿ, ਨ ਧਮ੍ਮਂ ਪਰਿਯਾਪੁਣਾਸੀ’’ਤਿ ਏਵਮਾਦੀਨਿ ਵੁਤ੍ਤੋ ‘‘ਭਨ੍ਤੇ, ਚੀਵਰਤ੍ਥਾਯ ਮਞ੍ਞੇ ਭਣਥ, ਇਦਂ ਵੋ ਚੀਵਰ’’ਨ੍ਤਿ ਦੇਤਿ, ਏਵਮ੍ਪਿ ਵਟ੍ਟਤਿ. ਦਿਸਾਪਕ੍ਕਮਨ੍ਤਂ ਵਾ ਪਨ ਦਹਰਂ ‘‘ਨਿਵਤ੍ਤੇਥ ਨ’’ਨ੍ਤਿ ਭਣਤਿ, ਸੋ ਨ ਨਿਵਤ੍ਤਤਿ, ਚੀਵਰੇ ਗਹੇਤ੍ਵਾ ਨਿਰੁਨ੍ਧਥਾਤਿ, ਏਵਞ੍ਚੇ ਨਿਵਤ੍ਤਤਿ, ਸਾਧੁ. ਸਚੇ ‘‘ਪਤ੍ਤਚੀਵਰਤ੍ਥਾਯ ਮਞ੍ਞੇ ਤੁਮ੍ਹੇ ਭਣਥ, ਗਣ੍ਹਥ ਨ’’ਨ੍ਤਿ ਦੇਤਿ, ਏਵਮ੍ਪਿ ਵਟ੍ਟਤਿ. ਵਿਬ੍ਭਮਨ੍ਤਂ ਵਾ ਦਿਸ੍ਵਾ ‘‘ਮਯਂ ਤੁਯ੍ਹਂ ‘ਵਤ੍ਤਂ ਕਰਿਸ੍ਸਤੀ’ਤਿ ਪਤ੍ਤਚੀਵਰਂ ਅਦਮ੍ਹਾ, ਸੋ ਦਾਨਿ ਤ੍ਵਂ ਵਿਬ੍ਭਮਿਤ੍ਵਾ ਚਰਸੀ’’ਤਿ ਵਦਤਿ, ਇਤਰੋ ‘‘ਗਣ੍ਹਥ ਤੁਮ੍ਹਾਕਂ ਪਤ੍ਤਚੀਵਰ’’ਨ੍ਤਿ ਦੇਤਿ, ਏਵਮ੍ਪਿ ਵਟ੍ਟਤਿ. ‘‘ਮਮ ਸਨ੍ਤਿਕੇ ਉਪਜ੍ਝਂ ਗਣ੍ਹਨ੍ਤਸ੍ਸੇਵ ਦੇਮਿ, ਅਞ੍ਞਤ੍ਥ ਗਣ੍ਹਨ੍ਤਸ੍ਸ ਨ ਦੇਮਿ, ਵਤ੍ਤਂ ਕਰੋਨ੍ਤਸ੍ਸੇਵ ਦੇਮਿ, ਅਕਰੋਨ੍ਤਸ੍ਸ ਨ ਦੇਮਿ, ਧਮ੍ਮਂ ਪਰਿਯਾਪੁਣਨ੍ਤਸ੍ਸੇਵ ਦੇਮਿ, ਅਪਰਿਯਾਪੁਣਨ੍ਤਸ੍ਸ ਨ ਦੇਮਿ, ਅਵਿਬ੍ਭਮਨ੍ਤਸ੍ਸੇਵ ਦੇਮਿ, ਵਿਬ੍ਭਮਨ੍ਤਸ੍ਸ ਨ ਦੇਮੀ’’ਤਿ ਏਵਂ ਪਨ ਦਾਤੁਂ ਨ ਵਟ੍ਟਤਿ, ਦਦਤੋ ਦੁਕ੍ਕਟਂ, ਆਹਰਾਪੇਤੁਂ ਪਨ ਵਟ੍ਟਤਿ, ਵਿਸ੍ਸਜ੍ਜੇਤ੍ਵਾ ਦਿਨ੍ਨਂ ਅਚ੍ਛਿਨ੍ਦਿਤ੍ਵਾ ਗਣ੍ਹਨ੍ਤੋ ਭਣ੍ਡਗ੍ਘੇਨ ਕਾਰੇਤਬ੍ਬੋ. ਅਯਂ ਤਾਵ ਦਾਨੇ ਵਿਨਿਚ੍ਛਯੋ.

੭੦. ਵਿਸ੍ਸਾਸਗ੍ਗਾਹਲਕ੍ਖਣਂ ਪਨ ਇਮਿਨਾ ਸੁਤ੍ਤੇਨ ਜਾਨਿਤਬ੍ਬਂ –

‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਵਿਸ੍ਸਾਸਂ ਗਹੇਤੁਂ ਸਨ੍ਦਿਟ੍ਠੋ ਚ ਹੋਤਿ, ਸਮ੍ਭਤ੍ਤੋ ਚ, ਆਲਪਿਤੋ ਚ, ਜੀਵਤਿ ਚ, ਗਹਿਤੇ ਚ ਅਤ੍ਤਮਨੋ ਹੋਤੀ’’ਤਿ (ਮਹਾਵ. ੩੫੬).

ਤਤ੍ਥ (ਪਾਰਾ. ਅਟ੍ਠ. ੧.੧੩੧) ਸਨ੍ਦਿਟ੍ਠੋਤਿ ਦਿਟ੍ਠਮਤ੍ਤਕਮਿਤ੍ਤੋ. ਸਮ੍ਭਤ੍ਤੋਤਿ ਦਲ਼੍ਹਮਿਤ੍ਤੋ. ਆਲਪਿਤੋਤਿ ‘‘ਮਮ ਸਨ੍ਤਕਂ ਯਂ ਇਚ੍ਛਸਿ, ਤਂ ਗਣ੍ਹੇਯ੍ਯਾਸਿ, ਆਪੁਚ੍ਛਿਤ੍ਵਾ ਗਹਣੇ ਕਾਰਣਂ ਨਤ੍ਥੀ’’ਤਿ ਵੁਤ੍ਤੋ. ਜੀਵਤੀਤਿ ਅਨੁਟ੍ਠਾਨਸੇਯ੍ਯਾਯ ਸਯਿਤੋਪਿ ਯਾਵਜੀਵਿਤਿਨ੍ਦ੍ਰਿਯੁਪਚ੍ਛੇਦਂ ਨ ਪਾਪੁਣਾਤਿ. ਗਹਿਤੇ ਚ ਅਤ੍ਤਮਨੋਤਿ ਗਹਿਤੇ ਤੁਟ੍ਠਚਿਤ੍ਤੋ ਹੋਤਿ. ‘‘ਏਵਰੂਪਸ੍ਸ ਸਨ੍ਤਕਂ ਗਹਿਤੇ ਮੇ ਅਤ੍ਤਮਨੋ ਭਵਿਸ੍ਸਤੀ’’ਤਿ ਜਾਨਨ੍ਤੇਨ ਗਹੇਤੁਂ ਵਟ੍ਟਤਿ. ਅਨਵਸੇਸਪਰਿਯਾਦਾਨਵਸੇਨ ਚੇਤਾਨਿ ਪਞ੍ਚਙ੍ਗਾਨਿ ਵੁਤ੍ਤਾਨਿ, ਵਿਸ੍ਸਾਸਗ੍ਗਾਹੋ ਪਨ ਤੀਹਿ ਅਙ੍ਗੇਹਿ ਰੁਹਤਿ ਸਨ੍ਦਿਟ੍ਠੋ, ਜੀਵਤਿ, ਗਹਿਤੇ ਅਤ੍ਤਮਨੋ, ਸਮ੍ਭਤ੍ਤੋ, ਜੀਵਤਿ, ਗਹਿਤੇ ਅਤ੍ਤਮਨੋ, ਆਲਪਿਤੋ, ਜੀਵਤਿ, ਗਹਿਤੇ ਅਤ੍ਤਮਨੋਤਿ. ਯੋ ਪਨ ਨ ਜੀਵਤਿ, ਨ ਚ ਗਹਿਤੇ ਅਤ੍ਤਮਨੋ ਹੋਤਿ, ਤਸ੍ਸ ਸਨ੍ਤਕਂ ਵਿਸ੍ਸਾਸਗ੍ਗਾਹੇਨ ਗਹਿਤਮ੍ਪਿ ਪੁਨ ਦਾਤਬ੍ਬਂ. ਦਦਮਾਨੇਨ ਚ ਮਤਕਧਨਂ ਤਾਵ ਯੇ ਤਸ੍ਸ ਧਨੇ ਇਸ੍ਸਰਾ ਗਹਟ੍ਠਾ ਵਾ ਪਬ੍ਬਜਿਤਾ ਵਾ, ਤੇਸਂ ਦਾਤਬ੍ਬਂ. ਅਨਤ੍ਤਮਨਸ੍ਸ ਸਨ੍ਤਕਂ ਤਸ੍ਸੇਵ ਦਾਤਬ੍ਬਂ, ਯੋ ਪਨ ਪਠਮਂਯੇਵ ‘‘ਸੁਟ੍ਠੁ ਕਤਂ ਤਯਾ ਮਮ ਸਨ੍ਤਕਂ ਗਣ੍ਹਨ੍ਤੇਨਾ’’ਤਿ ਵਚੀਭੇਦੇਨ ਵਾ ਚਿਤ੍ਤੁਪ੍ਪਾਦਮਤ੍ਤੇਨ ਵਾ ਅਨੁਮੋਦਿਤ੍ਵਾ ਪਚ੍ਛਾ ਕੇਨਚਿ ਕਾਰਣੇਨ ਕੁਪਿਤੋ, ਪਚ੍ਚਾਹਰਾਪੇਤੁਂ ਨ ਲਭਤਿ, ਯੋਪਿ ਅਦਾਤੁਕਾਮੋ, ਚਿਤ੍ਤੇਨ ਪਨ ਅਧਿਵਾਸੇਤਿ, ਨ ਕਿਞ੍ਚਿ ਵਦਤਿ, ਸੋਪਿ ਪੁਨ ਪਚ੍ਚਾਹਰਾਪੇਤੁਂ ਨ ਲਭਤਿ. ਯੋ ਪਨ ‘‘ਮਯਾ ਤੁਮ੍ਹਾਕਂ ਸਨ੍ਤਕਂ ਗਹਿਤਂ ਵਾ ਪਰਿਭੁਤ੍ਤਂ ਵਾ’’ਤਿ ਵੁਤ੍ਤੇ ‘‘ਗਹਿਤਂ ਵਾ ਹੋਤੁ ਪਰਿਭੁਤ੍ਤਂ ਵਾ, ਮਯਾ ਪਨ ਤਂ ਕੇਨਚਿਦੇਵ ਕਰਣੀਯੇਨ ਠਪਿਤਂ, ਤਂ ਪਾਕਤਿਕਂ ਕਾਤੁਂ ਵਟ੍ਟਤੀ’’ਤਿ ਵਦਤਿ, ਅਯਂ ਪਚ੍ਚਾਹਰਾਪੇਤੁਂ ਲਭਤਿ. ਅਯਂ ਵਿਸ੍ਸਾਸਗ੍ਗਾਹੇ ਵਿਨਿਚ੍ਛਯੋ.

੭੧. ਲਾਭਸ੍ਸ ਪਰਿਣਾਮਨਨ੍ਤਿ ਇਦਂ ਪਨ ਅਞ੍ਞੇਸਂ ਅਤ੍ਥਾਯ ਪਰਿਣਤਲਾਭਸ੍ਸ ਅਤ੍ਤਨੋ ਅਞ੍ਞਸ੍ਸ ਵਾ ਪਰਿਣਾਮਨਂ ਸਨ੍ਧਾਯ ਵੁਤ੍ਤਂ. ਤਤ੍ਰਾਯਂ ਵਿਨਿਚ੍ਛਯੋ (ਪਾਰਾ. ਅਟ੍ਠ. ੨.੬੫੯-੬੬੦) – ਸਙ੍ਘਸ੍ਸ ਪਰਿਣਤਂ ਸਹਧਮ੍ਮਿਕਾਨਂ ਵਾ ਗਿਹੀਨਂ ਵਾ ਅਨ੍ਤਮਸੋ ਮਾਤੁਸਨ੍ਤਕਮ੍ਪਿ ‘‘ਇਦਂ ਮਯ੍ਹਂ ਦੇਹੀ’’ਤਿ ਸਙ੍ਘਸ੍ਸ ਪਰਿਣਤਭਾਵਂ ਞਤ੍ਵਾ ਅਤ੍ਤਨੋ ਪਰਿਣਾਮੇਤ੍ਵਾ ਗਣ੍ਹਨ੍ਤਸ੍ਸ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ‘‘ਇਮਸ੍ਸ ਭਿਕ੍ਖੁਨੋ ਦੇਹੀ’’ਤਿ ਏਵਂ ਅਞ੍ਞਸ੍ਸ ਪਰਿਣਾਮੇਨ੍ਤਸ੍ਸ ਸੁਦ੍ਧਿਕਪਾਚਿਤ੍ਤਿਯਂ. ਤਸ੍ਮਾ ਯੋਪਿ ਵਸ੍ਸਿਕਸਾਟਿਕਸਮਯੇ ਮਾਤੁਘਰੇਪਿ ਸਙ੍ਘਸ੍ਸ ਪਰਿਣਤਂ ਵਸ੍ਸਿਕਸਾਟਿਕਂ ਞਤ੍ਵਾ ਅਤ੍ਤਨੋ ਪਰਿਣਾਮੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਪਰਸ੍ਸ ਪਰਿਣਾਮੇਤਿ, ਸੁਦ੍ਧਿਕਪਾਚਿਤ੍ਤਿਯਂ. ਮਨੁਸ੍ਸਾ ‘‘ਸਙ੍ਘਭਤ੍ਤਂ ਕਰਿਸ੍ਸਾਮਾ’’ਤਿ ਸਪ੍ਪਿਤੇਲਾਦੀਨਿ ਆਹਰਨ੍ਤਿ, ਗਿਲਾਨੋ ਚੇਪਿ ਭਿਕ੍ਖੁਸਙ੍ਘਸ੍ਸ ਪਰਿਣਤਭਾਵਂ ਞਤ੍ਵਾ ਕਿਞ੍ਚਿ ਯਾਚਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਮੇਵ. ਸਚੇ ਪਨ ਸੋ ‘‘ਤੁਮ੍ਹਾਕਂ ਸਪ੍ਪਿਆਦੀਨਿ ਆਭਤਾਨਿ ਅਤ੍ਥੀ’’ਤਿ ਪੁਚ੍ਛਿਤ੍ਵਾ ‘‘ਆਮ, ਅਤ੍ਥੀ’’ਤਿ ਵੁਤ੍ਤੇ ‘‘ਮਯ੍ਹਮ੍ਪਿ ਦੇਥਾ’’ਤਿ ਵਦਤਿ, ਵਟ੍ਟਤਿ. ਅਥਾਪਿ ਨਂ ਕੁਕ੍ਕੁਚ੍ਚਾਯਨ੍ਤਂ ਉਪਾਸਕਾ ਵਦਨ੍ਤਿ ‘‘ਸਙ੍ਘੋਪਿ ਅਮ੍ਹੇਹਿ ਦਿਨ੍ਨਮੇਵ ਲਭਤਿ, ਗਣ੍ਹਥ, ਭਨ੍ਤੇ’’ਤਿ, ਏਵਮ੍ਪਿ ਵਟ੍ਟਤਿ.

ਏਕਸ੍ਮਿਂ ਵਿਹਾਰੇ ਸਙ੍ਘਸ੍ਸ ਪਰਿਣਤਂ ਅਞ੍ਞਵਿਹਾਰਂ ਉਦ੍ਦਿਸਿਤ੍ਵਾ ‘‘ਅਸੁਕਸ੍ਮਿਂ ਨਾਮ ਵਿਹਾਰੇ ਸਙ੍ਘਸ੍ਸ ਦੇਥਾ’’ਤਿ ਪਰਿਣਾਮੇਤਿ, ‘‘ਕਿਂ ਸਙ੍ਘਸ੍ਸ ਦਾਨੇਨ, ਚੇਤਿਯਸ੍ਸ ਪੂਜਂ ਕਰੋਥਾ’’ਤਿ ਏਵਂ ਚੇਤਿਯਸ੍ਸ ਵਾ ਪਰਿਣਾਮੇਤਿ, ਦੁਕ੍ਕਟਂ. ਚੇਤਿਯਸ੍ਸ ਪਰਿਣਤਂ ਅਞ੍ਞਚੇਤਿਯਸ੍ਸ ਵਾ ਸਙ੍ਘਸ੍ਸ ਵਾ ਗਣਸ੍ਸ ਵਾ ਪੁਗ੍ਗਲਸ੍ਸ ਵਾ ਪਰਿਣਾਮੇਤਿ, ਦੁਕ੍ਕਟਮੇਵ. ਨਿਯਮੇਤ੍ਵਾ ਅਞ੍ਞਚੇਤਿਯਸ੍ਸ ਅਤ੍ਥਾਯ ਰੋਪਿਤਮਾਲਾਵਚ੍ਛਤੋ ਅਞ੍ਞਚੇਤਿਯਮ੍ਹਿ ਪੁਪ੍ਫਮ੍ਪਿ ਆਰੋਪੇਤੁਂ ਨ ਵਟ੍ਟਤਿ, ਏਕਸ੍ਸ ਚੇਤਿਯਸ੍ਸ ਪਨ ਛਤ੍ਤਂ ਵਾ ਪਟਾਕਂ ਵਾ ਆਰੋਪੇਤ੍ਵਾ ਠਿਤਂ ਦਿਸ੍ਵਾ ਸੇਸਂ ਅਞ੍ਞਚੇਤਿਯਸ੍ਸ ਦਾਪੇਤੁਂ ਵਟ੍ਟਤਿ. ਅਨ੍ਤਮਸੋ ਸੁਨਖਸ੍ਸਪਿ ਪਰਿਣਤਂ ‘‘ਇਮਸ੍ਸ ਸੁਨਖਸ੍ਸ ਮਾ ਦੇਹਿ, ਏਤਸ੍ਸ ਦੇਹੀ’’ਤਿ ਏਵਂ ਅਞ੍ਞਪੁਗ੍ਗਲਸ੍ਸ ਪਰਿਣਾਮੇਤਿ, ਦੁਕ੍ਕਟਂ. ਸਚੇ ਪਨ ਦਾਯਕਾ ‘‘ਮਯਂ ਸਙ੍ਘਭਤ੍ਤਂ ਕਾਤੁਕਾਮਾ, ਚੇਤਿਯਪੂਜਂ ਕਾਤੁਕਾਮਾ, ਏਕਸ੍ਸ ਭਿਕ੍ਖੁਨੋ ਪਰਿਕ੍ਖਾਰਂ ਦਾਤੁਕਾਮਾ, ਤੁਮ੍ਹਾਕਂ ਰੁਚਿਯਾ ਦਸ੍ਸਾਮ, ਭਣਥ ਕਤ੍ਥ ਦੇਮਾ’’ਤਿ ਵਦਨ੍ਤਿ, ਏਵਂ ਵੁਤ੍ਤੇ ਤੇਨ ਭਿਕ੍ਖੁਨਾ ‘‘ਯਤ੍ਥ ਇਚ੍ਛਥ, ਤਤ੍ਥ ਦੇਥਾ’’ਤਿ ਵਤ੍ਤਬ੍ਬਾ. ਸਚੇ ਪਨ ਕੇਵਲਂ ‘‘ਕਤ੍ਥ ਦੇਮਾ’’ਤਿ ਪੁਚ੍ਛਨ੍ਤਿ, ‘‘ਯਤ੍ਥ ਤੁਮ੍ਹਾਕਂ ਦੇਯ੍ਯਧਮ੍ਮੋ ਪਰਿਭੋਗਂ ਵਾ ਲਭੇਯ੍ਯ, ਪਟਿਸਙ੍ਖਾਰਂ ਵਾ ਲਭੇਯ੍ਯ, ਚਿਰਟ੍ਠਿਤਿਕੋ ਵਾ ਅਸ੍ਸ, ਯਤ੍ਥ ਵਾ ਪਨ ਤੁਮ੍ਹਾਕਂ ਚਿਤ੍ਤਂ ਪਸੀਦਤਿ, ਤਤ੍ਥ ਦੇਥਾ’’ਤਿ ਵਤ੍ਤੁਂ ਵਟ੍ਟਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਦਾਨਲਕ੍ਖਣਾਦਿਵਿਨਿਚ੍ਛਯਕਥਾ ਸਮਤ੍ਤਾ.