੧੪. ਪਥਵੀਖਣਨਵਿਨਿਚ੍ਛਯਕਥਾ

੭੨. ਪਥਵੀਤਿ ਦ੍ਵੇ ਪਥਵੀ ਜਾਤਾ ਚ ਪਥਵੀ ਅਜਾਤਾ ਚ ਪਥਵੀਤਿ. ਤਤ੍ਥ ਜਾਤਾ ਨਾਮ ਪਥਵੀ ਸੁਦ੍ਧਪਂਸੁਕਾ ਸੁਦ੍ਧਮਤ੍ਤਿਕਾ ਅਪ੍ਪਪਾਸਾਣਾ ਅਪ੍ਪਸਕ੍ਖਰਾ ਅਪ੍ਪਕਠਲਾ ਅਪ੍ਪਮਰੁਮ੍ਬਾ ਅਪ੍ਪਵਾਲੁਕਾ ਯੇਭੁਯ੍ਯੇਨਪਂਸੁਕਾ ਯੇਭੁਯ੍ਯੇਨਮਤ੍ਤਿਕਾ, ਅਦਡ੍ਢਾਪਿ ਵੁਚ੍ਚਤਿ ‘‘ਜਾਤਾ ਪਥਵੀ’’ਤਿ. ਯੋਪਿ ਪਂਸੁਪੁਞ੍ਜੋ ਵਾ ਮਤ੍ਤਿਕਾਪੁਞ੍ਜੋ ਵਾ ਅਤਿਰੇਕਚਾਤੁਮਾਸਂ ਓਵਟ੍ਠੋ, ਸੋਪਿ ਵੁਚ੍ਚਤਿ ‘‘ਜਾਤਾ ਪਥਵੀ’’ਤਿ. ਅਜਾਤਾ ਨਾਮ ਪਥਵੀ ਸੁਦ੍ਧਪਾਸਾਣਾ ਸੁਦ੍ਧਸਕ੍ਖਰਾ ਸੁਦ੍ਧਕਠਲਾ ਸੁਦ੍ਧਮਰੁਮ੍ਬਾ ਸੁਦ੍ਧਵਾਲੁਕਾ ਅਪ੍ਪਪਂਸੁਕਾ ਅਪ੍ਪਮਤ੍ਤਿਕਾ ਯੇਭੁਯ੍ਯੇਨਪਾਸਾਣਾ ਯੇਭੁਯ੍ਯੇਨਸਕ੍ਖਰਾ ਯੇਭੁਯ੍ਯੇਨਕਠਲਾ ਯੇਭੁਯ੍ਯੇਨਮਰੁਮ੍ਬਾ ਯੇਭੁਯ੍ਯੇਨਵਾਲੁਕਾ, ਦਡ੍ਢਾਪਿ ਵੁਚ੍ਚਤਿ ‘‘ਅਜਾਤਾ ਪਥਵੀ’’ਤਿ. ਯੋਪਿ ਪਂਸੁਪੁਞ੍ਜੋ ਵਾ ਮਤ੍ਤਿਕਾਪੁਞ੍ਜੋ ਵਾ ਓਮਕਚਾਤੁਮਾਸਂ ਓਵਟ੍ਠੋ, ਸੋਪਿ ਵੁਚ੍ਚਤਿ ‘‘ਅਜਾਤਾ ਪਥਵੀ’’ਤਿ (ਪਾਚਿ. ੮੪-੮੬).

ਤਤ੍ਥ ਜਾਤਪਥਵਿਂ ਖਣਨ੍ਤਸ੍ਸ ਖਣਾਪੇਨ੍ਤਸ੍ਸ ਵਾ ਪਾਚਿਤ੍ਤਿਯਂ. ਤਤ੍ਰਾਯਂ ਵਿਨਿਚ੍ਛਯੋ (ਪਾਚਿ. ਅਟ੍ਠ. ੮੬) – ਸਚੇ ਸਯਂ ਖਣਤਿ, ਪਹਾਰੇ ਪਹਾਰੇ ਪਾਚਿਤ੍ਤਿਯਂ. ਸਚੇ ਅਞ੍ਞਂ ਆਣਾਪੇਤਿ, ਸਕਿਂ ਆਣਤ੍ਤੋ ਸਚੇਪਿ ਸਕਲਦਿਵਸਂ ਖਣਤਿ, ਆਣਾਪਕਸ੍ਸ ਏਕਮੇਵ ਪਾਚਿਤ੍ਤਿਯਂ. ਸਚੇ ਪਨ ਕੁਸੀਤੋ ਹੋਤਿ, ਪੁਨਪ੍ਪੁਨਂ ਆਣਾਪੇਤਬ੍ਬੋ, ਤਂ ਆਣਾਪੇਤ੍ਵਾ ਖਣਾਪੇਨ੍ਤਸ੍ਸ ਵਾਚਾਯ ਵਾਚਾਯ ਪਾਚਿਤ੍ਤਿਯਂ. ਸਚੇ ‘‘ਪੋਕ੍ਖਰਣਿਂ ਖਣਾਹੀ’’ਤਿ ਵਦਤਿ, ਵਟ੍ਟਤਿ. ਖਤਾਯੇਵ ਹਿ ਪੋਕ੍ਖਰਣੀ ਨਾਮ ਹੋਤਿ. ਤਸ੍ਮਾ ਅਯਂ ਕਪ੍ਪਿਯਵੋਹਾਰੋ. ਏਸ ਨਯੋ ‘‘ਵਾਪਿਂ ਤਲ਼ਾਕਂ ਆਵਾਟਂ ਖਣਾ’’ਤਿਆਦੀਸੁਪਿ. ‘‘ਇਮਂ ਓਕਾਸਂ ਖਣ, ਇਮਸ੍ਮਿਂ ਓਕਾਸੇ ਪੋਕ੍ਖਰਣਿਂ ਖਣਾ’’ਤਿ ਵਤ੍ਤੁਂ ਪਨ ਨ ਵਟ੍ਟਤਿ. ‘‘ਕਨ੍ਦਂ ਖਣ, ਮੂਲਂ ਖਣਾ’’ਤਿ ਅਨਿਯਮੇਤ੍ਵਾ ਵਤ੍ਤੁਂ ਵਟ੍ਟਤਿ, ‘‘ਇਮਂ ਵਲ੍ਲਿਂ ਖਣ, ਇਮਸ੍ਮਿਂ ਓਕਾਸੇ ਕਨ੍ਦਂ ਵਾ ਮੂਲਂ ਵਾ ਖਣਾ’’ਤਿ ਵਤ੍ਤੁਂ ਨ ਵਟ੍ਟਤਿ.

੭੩. ਪੋਕ੍ਖਰਣਿਂ ਸੋਧੇਨ੍ਤੇਹਿ ਯੋ ਕੁਟੇਹਿ ਉਸ੍ਸਿਞ੍ਚਿਤੁਂ ਸਕ੍ਕਾ ਹੋਤਿ ਤਨੁਕਕਦ੍ਦਮੋ, ਤਂ ਅਪਨੇਤੁਂ ਵਟ੍ਟਤਿ, ਬਹਲੋ ਨ ਵਟ੍ਟਤਿ. ਆਤਪੇਨ ਸੁਕ੍ਖਕਦ੍ਦਮੋ ਫਲਤਿ, ਤਤ੍ਰ ਯੋ ਹੇਟ੍ਠਾ ਪਥਵਿਯਾ ਅਸਮ੍ਬਨ੍ਧੋ, ਤਮੇਵ ਅਪਨੇਤੁਂ ਵਟ੍ਟਤਿ. ਉਦਕੇਨ ਗਤਟ੍ਠਾਨੇ ਉਦਕਪਪ੍ਪਟਕੋ ਨਾਮ ਹੋਤਿ, ਵਾਤਪਹਾਰੇਨ ਚਲਤਿ, ਤਂ ਅਪਨੇਤੁਂ ਵਟ੍ਟਤਿ. ਪੋਕ੍ਖਰਣੀਆਦੀਨਂ ਤਟਂ ਭਿਜ੍ਜਿਤ੍ਵਾ ਉਦਕਸਾਮਨ੍ਤਾ ਪਤਤਿ. ਸਚੇ ਓਮਕਚਾਤੁਮਾਸਂ ਓਵਟ੍ਠਂ, ਛਿਨ੍ਦਿਤੁਂ ਭਿਨ੍ਦਿਤੁਂ ਵਾ ਵਟ੍ਟਤਿ, ਚਾਤੁਮਾਸਤੋ ਉਦ੍ਧਂ ਨ ਵਟ੍ਟਤਿ. ਸਚੇ ਪਨ ਉਦਕੇਯੇਵ ਪਤਤਿ, ਦੇਵੇਨ ਅਤਿਰੇਕਚਾਤੁਮਾਸਂ ਓਵਟ੍ਠੇਪਿ ਉਦਕੇਯੇਵ ਉਦਕਸ੍ਸ ਪਤਿਤਤ੍ਤਾ ਵਟ੍ਟਤਿ.

ਪਾਸਾਣਪਿਟ੍ਠਿਯਂ ਸੋਣ੍ਡਿਂ ਖਣਨ੍ਤਿ, ਸਚੇ ਤਤ੍ਥ ਪਠਮਮੇਵ ਸੁਖੁਮਰਜਂ ਪਤਤਿ, ਤਂ ਦੇਵੇਨ ਓਵਟ੍ਠਂ ਹੋਤਿ, ਚਾਤੁਮਾਸਚ੍ਚਯੇਨ ਅਕਪ੍ਪਿਯਪਥਵੀਸਙ੍ਖ੍ਯਂ ਗਚ੍ਛਤਿ. ਉਦਕੇ ਪਰਿਯਾਦਿਨ੍ਨੇ ਸੋਣ੍ਡਿਂ ਸੋਧੇਨ੍ਤੇਹਿ ਵਿਕੋਪੇਤੁਂ ਨ ਵਟ੍ਟਤਿ. ਸਚੇ ਪਠਮਮੇਵ ਉਦਕੇਨ ਪੂਰਤਿ, ਪਚ੍ਛਾ ਰਜਂ ਪਤਤਿ, ਤਂ ਵਿਕੋਪੇਤੁਂ ਵਟ੍ਟਤਿ. ਤਤ੍ਥ ਹਿ ਦੇਵੇ ਵਸ੍ਸਨ੍ਤੇਪਿ ਉਦਕੇਯੇਵ ਉਦਕਂ ਪਤਤਿ. ਪਿਟ੍ਠਿਪਾਸਾਣੇ ਸੁਖੁਮਰਜਂ ਹੋਤਿ, ਦੇਵੇ ਫੁਸਾਯਨ੍ਤੇ ਅਲ੍ਲੀਯਤਿ, ਤਮ੍ਪਿ ਚਾਤੁਮਾਸਚ੍ਚਯੇਨ ਵਿਕੋਪੇਤੁਂ ਨ ਵਟ੍ਟਤਿ. ਅਕਤਪਬ੍ਭਾਰੇ ਵਮ੍ਮਿਕੋ ਉਟ੍ਠਿਤੋ ਹੋਤਿ, ਯਥਾਸੁਖਂ ਵਿਕੋਪੇਤੁਂ ਵਟ੍ਟਤਿ. ਸਚੇ ਅਬ੍ਭੋਕਾਸੇ ਉਟ੍ਠਹਤਿ, ਓਮਕਚਾਤੁਮਾਸਂ ਓਵਟ੍ਠੋਯੇਵ ਵਟ੍ਟਤਿ. ਰੁਕ੍ਖਾਦੀਸੁ ਆਰੁਲ਼੍ਹਉਪਚਿਕਮਤ੍ਤਿਕਾਯਮ੍ਪਿ ਏਸੇਵ ਨਯੋ. ਗਣ੍ਡੁਪ੍ਪਾਦਗੂਥਮੂਸਿਕੁਕ੍ਕਰਗੋਕਣ੍ਟਕਾਦੀਸੁਪਿ ਏਸੇਵ ਨਯੋ. ਗੋਕਣ੍ਟਕੋ ਨਾਮ ਗਾਵੀਨਂ ਖੁਰਚ੍ਛਿਨ੍ਨਕਦ੍ਦਮੋ ਵੁਚ੍ਚਤਿ. ਸਚੇ ਪਨ ਹੇਟ੍ਠਿਮਤਲੇਨ ਭੂਮਿਸਮ੍ਬਨ੍ਧੋ ਹੋਤਿ, ਏਕਦਿਵਸਮ੍ਪਿ ਨ ਵਟ੍ਟਤਿ. ਕਸਿਤਟ੍ਠਾਨੇ ਨਙ੍ਗਲਚ੍ਛਿਨ੍ਨਮਤ੍ਤਿਕਾਪਿਣ੍ਡਂ ਗਣ੍ਹਨ੍ਤਸ੍ਸ ਏਸੇਵ ਨਯੋ.

ਪੁਰਾਣਸੇਨਾਸਨਂ ਹੋਤਿ ਅਚ੍ਛਦਨਂ ਵਾ ਵਿਨਟ੍ਠਚ੍ਛਦਨਂ ਵਾ ਅਤਿਰੇਕਚਾਤੁਮਾਸਂ ਓਵਟ੍ਠਂ ਜਾਤਪਥਵੀਸਙ੍ਖ੍ਯਮੇਵ ਗਚ੍ਛਤਿ, ਤਤੋ ਅਵਸੇਸਂ ਛਦਨਿਟ੍ਠਕਂ ਵਾ ਗੋਪਾਨਸੀਆਦਿਕਂ ਉਪਕਰਣਂ ਵਾ ‘‘ਇਟ੍ਠਕਂ ਗਣ੍ਹਾਮਿ, ਗੋਪਾਨਸਿਂ ਭਿਤ੍ਤਿਪਾਦਂ ਪਦਰਤ੍ਥਰਣਂ ਪਾਸਾਦਤ੍ਥਮ੍ਭਂ ਗਣ੍ਹਾਮੀ’’ਤਿ ਸਞ੍ਞਾਯ ਗਣ੍ਹਿਤੁਂ ਵਟ੍ਟਤਿ, ਤੇਨ ਸਦ੍ਧਿਂ ਮਤ੍ਤਿਕਾ ਪਤਤਿ, ਅਨਾਪਤ੍ਤਿ, ਭਿਤ੍ਤਿਮਤ੍ਤਿਕਂ ਗਣ੍ਹਨ੍ਤਸ੍ਸ ਪਨ ਆਪਤ੍ਤਿ. ਸਚੇ ਯਾ ਯਾ ਅਤਿਨ੍ਤਾ, ਤਂ ਤਂ ਗਣ੍ਹਾਤਿ, ਅਨਾਪਤ੍ਤਿ. ਅਨ੍ਤੋਗੇਹੇ ਮਤ੍ਤਿਕਾਪੁਞ੍ਜੋ ਹੋਤਿ, ਤਸ੍ਮਿਂ ਏਕਦਿਵਸਂ ਓਵਟ੍ਠੇ ਗੇਹਂ ਛਾਦੇਨ੍ਤਿ. ਸਚੇ ਸਬ੍ਬੋ ਤਿਨ੍ਤੋ, ਚਾਤੁਮਾਸਚ੍ਚਯੇਨ ਜਾਤਪਥਵੀਯੇਵ. ਅਥਸ੍ਸ ਉਪਰਿਭਾਗੋਯੇਵ ਤਿਨ੍ਤੋ, ਅਨ੍ਤੋ ਅਤਿਨ੍ਤੋ, ਯਤ੍ਤਕਂ ਤਿਨ੍ਤਂ, ਤਂ ਕਪ੍ਪਿਯਕਾਰਕੇਹਿ ਕਪ੍ਪਿਯਵੋਹਾਰੇਨ ਅਪਨਾਮੇਤ੍ਵਾ ਸੇਸਂ ਯਥਾਸੁਖਂ ਵਲ਼ਞ੍ਜੇਤੁਂ ਵਟ੍ਟਤਿ ਉਦਕੇਨ ਤੇਮਿਤਤ੍ਤਾ. ਏਕਾਬਦ੍ਧਾਯੇਵ ਹਿ ਜਾਤਪਥਵੀ ਹੋਤਿ, ਨ ਇਤਰਾਤਿ. ਅਬ੍ਭੋਕਾਸੇ ਮਤ੍ਤਿਕਾਪਾਕਾਰੋ ਹੋਤਿ, ਅਤਿਰੇਕਚਾਤੁਮਾਸਂ ਓਵਟ੍ਠੋ ਜਾਤਪਥਵੀਸਙ੍ਖ੍ਯਂ ਗਚ੍ਛਤਿ, ਤਤ੍ਥ ਲਗ੍ਗਪਂਸੁਂ ਪਨ ਅਲ੍ਲਹਤ੍ਥੇਨ ਛੁਪਿਤ੍ਵਾ ਗਹੇਤੁਂ ਵਟ੍ਟਤਿ. ਸਚੇ ਇਟ੍ਠਕਪਾਕਾਰੋ ਹੋਤਿ, ਯੇਭੁਯ੍ਯੇਨਕਠਲਟ੍ਠਾਨੇ ਤਿਟ੍ਠਤਿ, ਯਥਾਸੁਖਂ ਵਿਕੋਪੇਤੁਂ ਵਟ੍ਟਤਿ. ਅਬ੍ਭੋਕਾਸੇ ਠਿਤਮਣ੍ਡਪਤ੍ਥਮ੍ਭਂ ਇਤੋ ਚਿਤੋ ਚ ਸਞ੍ਚਾਲੇਤ੍ਵਾ ਪਥਵਿਂ ਵਿਕੋਪੇਨ੍ਤੇਨ ਗਹੇਤੁਂ ਨ ਵਟ੍ਟਤਿ, ਉਜੁਕਮੇਵ ਉਦ੍ਧਰਿਤੁਂ ਵਟ੍ਟਤਿ. ਅਞ੍ਞਮ੍ਪਿ ਸੁਕ੍ਖਰੁਕ੍ਖਂ ਸੁਕ੍ਖਖਾਣੁਕਂ ਵਾ ਗਣ੍ਹਨ੍ਤਸ੍ਸ ਏਸੇਵ ਨਯੋ.

੭੪. ਨਵਕਮ੍ਮਤ੍ਥਂ ਥਮ੍ਭਂ ਵਾ ਪਾਸਾਣਂ ਵਾ ਰੁਕ੍ਖਂ ਵਾ ਦਣ੍ਡਕੇਹਿ ਉਚ੍ਚਾਲੇਤ੍ਵਾ ਪਵਟ੍ਟੇਨ੍ਤਾ ਗਚ੍ਛਨ੍ਤਿ, ਤਤ੍ਥ ਜਾਤਪਥਵੀ ਭਿਜ੍ਜਤਿ, ਸਚੇ ਸੁਦ੍ਧਚਿਤ੍ਤਾ ਪਵਟ੍ਟੇਨ੍ਤਿ, ਅਨਾਪਤ੍ਤਿ. ਅਥ ਪਨ ਤੇਨ ਅਪਦੇਸੇਨ ਪਥਵਿਂ ਭਿਨ੍ਦਿਤੁਕਾਮਾਯੇਵ ਹੋਨ੍ਤਿ, ਆਪਤ੍ਤਿ. ਸਾਖਾਦੀਨਿ ਕਡ੍ਢਨ੍ਤਾਨਮ੍ਪਿ ਪਥਵਿਯਂ ਦਾਰੂਨਿ ਫਾਲੇਨ੍ਤਾਨਮ੍ਪਿ ਏਸੇਵ ਨਯੋ. ਪਥਵਿਯਂ ਅਟ੍ਠਿਸੂਚਿਕਣ੍ਟਕਾਦੀਸੁਪਿ ਯਂ ਕਿਞ੍ਚਿ ਆਕੋਟੇਤੁਂ ਵਾ ਪਵੇਸੇਤੁਂ ਵਾ ਨ ਵਟ੍ਟਤਿ, ‘‘ਪਸ੍ਸਾਵਧਾਰਾਯ ਵੇਗੇਨ ਪਥਵਿਂ ਭਿਨ੍ਦਿਸ੍ਸਾਮੀ’’ਤਿ ਏਵਂ ਪਸ੍ਸਾਵਮ੍ਪਿ ਕਾਤੁਂ ਨ ਵਟ੍ਟਤਿ. ਕਰੋਨ੍ਤਸ੍ਸ ਭਿਜ੍ਜਤਿ, ਆਪਤ੍ਤਿ, ‘‘ਵਿਸਮਭੂਮਿਂ ਸਮਂ ਕਰਿਸ੍ਸਾਮੀ’’ਤਿ ਸਮ੍ਮਜ੍ਜਨਿਯਾ ਘਂਸਿਤੁਮ੍ਪਿ ਨ ਵਟ੍ਟਤਿ. ਵਤ੍ਤਸੀਸੇਨੇਵ ਹਿ ਸਮ੍ਮਜ੍ਜਿਤਬ੍ਬਂ. ਕੇਚਿ ਕਤ੍ਤਰਯਟ੍ਠਿਯਾ ਭੂਮਿਂ ਕੋਟ੍ਟੇਨ੍ਤਿ, ਪਾਦਙ੍ਗੁਟ੍ਠਕੇਨ ਵਿਲਿਖਨ੍ਤਿ, ‘‘ਚਙ੍ਕਮਿਤਟ੍ਠਾਨਂ ਦਸ੍ਸੇਸ੍ਸਾਮਾ’’ਤਿ ਪੁਨਪ੍ਪੁਨਂ ਭੂਮਿਂ ਭਿਨ੍ਦਨ੍ਤਾ ਚਙ੍ਕਮਨ੍ਤਿ, ਸਬ੍ਬਂ ਨ ਵਟ੍ਟਤਿ, ਵੀਰਿਯਸਮ੍ਪਗ੍ਗਹਤ੍ਥਂ ਪਨ ਸਮਣਧਮ੍ਮਂ ਕਰੋਨ੍ਤੇਨ ਸੁਦ੍ਧਚਿਤ੍ਤੇਨ ਚਙ੍ਕਮਿਤੁਂ ਵਟ੍ਟਤਿ. ‘‘ਹਤ੍ਥਂ ਖੋਵਿਸ੍ਸਾਮਾ’’ਤਿ ਪਥਵਿਯਂ ਘਂਸਨ੍ਤਿ, ਨ ਵਟ੍ਟਤਿ, ਅਘਂਸਨ੍ਤੇਨ ਪਨ ਅਲ੍ਲਹਤ੍ਥਂ ਪਥਵਿਯਂ ਠਪੇਤ੍ਵਾ ਰਜਂ ਗਹੇਤੁਂ ਵਟ੍ਟਤਿ.

ਕੇਚਿ ਕਣ੍ਡੁਕਚ੍ਛੁਆਦੀਹਿ ਆਬਾਧਿਕਾ ਛਿਨ੍ਨਤਟਾਦੀਸੁ ਅਙ੍ਗਪਚ੍ਚਙ੍ਗਾਨਿ ਘਂਸਨ੍ਤਿ, ਨ ਵਟ੍ਟਤਿ. ਜਾਤਪਥਵਿਂ ਦਹਤਿ ਵਾ ਦਹਾਪੇਤਿ ਵਾ, ਪਾਚਿਤ੍ਤਿਯਂ, ਅਨ੍ਤਮਸੋ ਪਤ੍ਤਮ੍ਪਿ ਪਚਨ੍ਤੋ ਯਤ੍ਤਕੇਸੁ ਠਾਨੇਸੁ ਅਗ੍ਗਿਂ ਦੇਤਿ ਵਾ ਦਾਪੇਤਿ ਵਾ, ਤਤ੍ਤਕਾਨਿ ਪਾਚਿਤ੍ਤਿਯਾਨਿ, ਤਸ੍ਮਾ ਪਤ੍ਤਂ ਪਚਨ੍ਤੇਨਪਿ ਪੁਬ੍ਬੇ ਪਕ੍ਕਟ੍ਠਾਨੇਯੇਵ ਪਚਿਤਬ੍ਬੋ. ਅਦਡ੍ਢਾਯ ਪਥਵਿਯਾ ਅਗ੍ਗਿਂ ਠਪੇਤੁਂ ਨ ਵਟ੍ਟਤਿ, ਪਤ੍ਤਪਚਨਕਪਾਲਸ੍ਸ ਪਨ ਉਪਰਿ ਅਗ੍ਗਿਂ ਠਪੇਤੁਂ ਵਟ੍ਟਤਿ. ਦਾਰੂਨਂ ਉਪਰਿ ਠਪੇਤਿ, ਸੋ ਅਗ੍ਗਿ ਤਾਨਿ ਦਹਨ੍ਤੋ ਗਨ੍ਤ੍ਵਾ ਪਥਵਿਂ ਦਹਤਿ, ਨ ਵਟ੍ਟਤਿ. ਇਟ੍ਠਕਕਪਾਲਾਦੀਸੁਪਿ ਏਸੇਵ ਨਯੋ. ਤਤ੍ਰਾਪਿ ਹਿ ਇਟ੍ਠਕਾਦੀਨਂਯੇਵ ਉਪਰਿ ਠਪੇਤੁਂ ਵਟ੍ਟਤਿ. ਕਸ੍ਮਾ? ਤੇਸਂ ਅਨੁਪਾਦਾਨਤ੍ਤਾ. ਨ ਹਿ ਤਾਨਿ ਅਗ੍ਗਿਸ੍ਸ ਉਪਾਦਾਨਸਙ੍ਖ੍ਯਂ ਗਚ੍ਛਨ੍ਤਿ, ਸੁਕ੍ਖਖਾਣੁਸੁਕ੍ਖਰੁਕ੍ਖਾਦੀਸੁਪਿ ਅਗ੍ਗਿਂ ਦਾਤੁਂ ਨ ਵਟ੍ਟਤਿ. ਸਚੇ ਪਨ ‘‘ਪਥਵਿਂ ਅਪ੍ਪਤ੍ਤਮੇਵ ਨਿਬ੍ਬਾਪੇਤ੍ਵਾ ਗਮਿਸ੍ਸਾਮੀ’’ਤਿ ਦੇਤਿ, ਵਟ੍ਟਤਿ. ਪਚ੍ਛਾ ਨਿਬ੍ਬਾਪੇਤੁਂ ਨ ਸਕ੍ਕੋਤਿ, ਅਵਿਸਯਤ੍ਤਾ ਅਨਾਪਤ੍ਤਿ. ਤਿਣੁਕ੍ਕਂ ਗਹੇਤ੍ਵਾ ਗਚ੍ਛਨ੍ਤੋ ਹਤ੍ਥੇ ਡਯ੍ਹਮਾਨੇ ਭੂਮਿਯਂ ਪਾਤੇਤਿ, ਅਨਾਪਤ੍ਤਿ. ਪਤਿਤਟ੍ਠਾਨੇਯੇਵ ਉਪਾਦਾਨਂ ਦਤ੍ਵਾ ਅਗ੍ਗਿਂ ਕਾਤੁਂ ਵਟ੍ਟਤਿ. ਦਡ੍ਢਪਥਵਿਯਾ ਚ ਯਤ੍ਤਕਂ ਠਾਨਂ ਉਸੁਮਾਯ ਅਨੁਗਤਂ, ਸਬ੍ਬਂ ਵਿਕੋਪੇਤੁਂ ਵਟ੍ਟਤਿ.

ਯੋ ਪਨ ਅਜਾਨਨਕੋ ਭਿਕ੍ਖੁ ਅਰਣਿਸਹਿਤੇਨ ਅਗ੍ਗਿਂ ਨਿਬ੍ਬਤ੍ਤੇਤ੍ਵਾ ਹਤ੍ਥੇਨ ਉਕ੍ਖਿਪਿਤ੍ਵਾ ‘‘ਕਿਂ ਕਰੋਮੀ’’ਤਿ ਵਦਤਿ, ‘‘ਜਾਲੇਹੀ’’ਤਿ ਵਤ੍ਤਬ੍ਬੋ. ‘‘ਹਤ੍ਥੋ ਡਯ੍ਹਤੀ’’ਤਿ ਵਦਤਿ, ‘‘ਯਥਾ ਨ ਡਯ੍ਹਤਿ, ਤਥਾ ਕਰੋਹੀ’’ਤਿ ਵਤ੍ਤਬ੍ਬੋ. ‘‘ਭੂਮਿਯਂ ਪਾਤੇਹੀ’’ਤਿ ਪਨ ਨ ਵਤ੍ਤਬ੍ਬੋ. ਸਚੇ ਹਤ੍ਥੇ ਡਯ੍ਹਮਾਨੇ ਪਾਤੇਤਿ, ‘‘ਪਥਵਿਂ ਦਹਿਸ੍ਸਾਮੀ’’ਤਿ ਅਪਾਤਿਤਤ੍ਤਾ ਅਨਾਪਤ੍ਤਿ, ਪਤਿਤਟ੍ਠਾਨੇ ਪਨ ਅਗ੍ਗਿਂ ਕਾਤੁਂ ਵਟ੍ਟਤਿ. ‘‘ਇਮਸ੍ਸ ਥਮ੍ਭਸ੍ਸ ਆਵਾਟਂ ਜਾਨ, ਮਹਾਮਤ੍ਤਿਕਂ ਜਾਨ, ਥੁਸਮਤ੍ਤਿਕਂ ਜਾਨ, ਮਹਾਮਤ੍ਤਿਕਂ ਦੇਹਿ, ਥੁਸਮਤ੍ਤਿਕਂ ਦੇਹਿ, ਮਤ੍ਤਿਕਂ ਆਹਰ, ਪਂਸੁਂ ਆਹਰ, ਮਤ੍ਤਿਕਾਯ ਅਤ੍ਥੋ, ਪਂਸੁਨਾ ਅਤ੍ਥੋ, ਇਮਸ੍ਸ ਥਮ੍ਭਸ੍ਸ ਆਵਾਟਂ ਕਪ੍ਪਿਯਂ ਕਰੋਹਿ, ਇਮਂ ਮਤ੍ਤਿਕਂ ਕਪ੍ਪਿਯਂ ਕਰੋਹਿ, ਇਮਂ ਪਂਸੁਂ ਕਪ੍ਪਿਯਂ ਕਰੋਹੀ’’ਤਿ ਏਵਂ ਕਪ੍ਪਿਯਵੋਹਾਰੇਨ ਯਂ ਕਿਞ੍ਚਿ ਕਾਰਾਪੇਤੁਂ ਵਟ੍ਟਤਿ. ਅਞ੍ਞਵਿਹਿਤੋ ਕੇਨਚਿ ਸਦ੍ਧਿਂ ਕਿਞ੍ਚਿ ਕਥੇਨ੍ਤੋ ਪਾਦਙ੍ਗੁਟ੍ਠਕੇਨ ਕਤ੍ਤਰਯਟ੍ਠਿਯਾ ਵਾ ਪਥਵਿਂ ਵਿਲਿਖਨ੍ਤੋ ਤਿਟ੍ਠਤਿ, ਏਵਂ ਅਸਤਿਯਾ ਵਿਲਿਖਨ੍ਤਸ੍ਸ ਭਿਨ੍ਦਨ੍ਤਸ੍ਸ ਵਾ ਅਨਾਪਤ੍ਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਪਥਵੀਖਣਨਵਿਨਿਚ੍ਛਯਕਥਾ ਸਮਤ੍ਤਾ.