੭. ਅਨਾਮਾਸਵਿਨਿਚ੍ਛਯਕਥਾ

੪੦. ਅਨਾਮਾਸਨ੍ਤਿ ਨ ਪਰਾਮਸਿਤਬ੍ਬਂ. ਤਤ੍ਰਾਯਂ ਵਿਨਿਚ੍ਛਯੋ (ਪਾਰਾ. ਅਟ੍ਠ. ੨.੨੮੧) – ਯਸ੍ਮਾ ਮਾਤਾ ਵਾ ਹੋਤੁ ਧੀਤਾ ਵਾ ਭਗਿਨੀ ਵਾ, ਇਤ੍ਥੀ ਨਾਮ ਸਬ੍ਬਾਪਿ ਬ੍ਰਹ੍ਮਚਰਿਯਸ੍ਸ ਪਾਰਿਬਨ੍ਥਿਕਾਵ ਅਨਾਮਾਸਾ ਚ, ਤਸ੍ਮਾ ‘‘ਅਯਂ ਮੇ ਮਾਤਾ, ਅਯਂ ਮੇ ਧੀਤਾ, ਅਯਂ ਮੇ ਭਗਿਨੀ’’ਤਿ ਗੇਹਸ੍ਸਿਤਪੇਮੇਨ ਆਮਸਤੋਪਿ ਦੁਕ੍ਕਟਮੇਵ ਵੁਤ੍ਤਂ. ਇਮਂ ਪਨ ਭਗਵਤੋ ਆਣਂ ਅਨੁਸ੍ਸਰਨ੍ਤੇਨ ਸਚੇਪਿ ਨਦੀਸੋਤੇਨ ਵੁਯ੍ਹਮਾਨਂ ਮਾਤਰਂ ਪਸ੍ਸਤਿ, ਨੇਵ ਹਤ੍ਥੇਨ ਪਰਾਮਸਿਤਬ੍ਬਾ, ਪਣ੍ਡਿਤੇਨ ਪਨ ਭਿਕ੍ਖੁਨਾ ਨਾਵਾ ਵਾ ਫਲਕਂ ਵਾ ਕਦਲਿਕ੍ਖਨ੍ਧੋ ਵਾ ਦਾਰੁਕ੍ਖਨ੍ਧੋ ਵਾ ਉਪਸਂਹਰਿਤਬ੍ਬੋ. ਤਸ੍ਮਿਂ ਅਸਤਿ ਕਾਸਾਵਮ੍ਪਿ ਉਪਸਂਹਰਿਤ੍ਵਾ ਪੁਰਤੋ ਠਪੇਤਬ੍ਬਂ, ‘‘ਏਤ੍ਥ ਗਣ੍ਹਾਹੀ’’ਤਿ ਪਨ ਨ ਵਤ੍ਤਬ੍ਬਾ. ਗਹਿਤੇ ‘‘ਪਰਿਕ੍ਖਾਰਂ ਕਡ੍ਢਾਮੀ’’ਤਿ ਕਡ੍ਢਨ੍ਤੇਨ ਗਨ੍ਤਬ੍ਬਂ. ਸਚੇ ਪਨ ਭਾਯਤਿ, ਪੁਰਤੋ ਪੁਰਤੋ ਗਨ੍ਤ੍ਵਾ ‘‘ਮਾ ਭਾਯੀ’’ਤਿ ਸਮਸ੍ਸਾਸੇਤਬ੍ਬਾ. ਸਚੇ ਭਾਯਮਾਨਾ ਪੁਤ੍ਤਸ੍ਸ ਸਹਸਾ ਖਨ੍ਧੇ ਵਾ ਅਭਿਰੁਹਤਿ, ਹਤ੍ਥੇ ਵਾ ਗਣ੍ਹਾਤਿ, ਨ ‘‘ਅਪੇਹਿ ਮਹਲ੍ਲਿਕੇ’’ਤਿ ਨਿਦ੍ਧੁਨਿਤਬ੍ਬਾ, ਥਲਂ ਪਾਪੇਤਬ੍ਬਾ. ਕਦ੍ਦਮੇ ਲਗ੍ਗਾਯਪਿ ਕੂਪੇ ਪਤਿਤਾਯਪਿ ਏਸੇਵ ਨਯੋ. ਤਤ੍ਰਾਪਿ ਹਿ ਯੋਤ੍ਤਂ ਵਾ ਵਤ੍ਥਂ ਵਾ ਪਕ੍ਖਿਪਿਤ੍ਵਾ ਹਤ੍ਥੇਨ ਗਹਿਤਭਾਵਂ ਞਤ੍ਵਾ ਉਦ੍ਧਰਿਤਬ੍ਬਾ, ਨ ਤ੍ਵੇਵ ਆਮਸਿਤਬ੍ਬਾ.

ਨ ਕੇਵਲਞ੍ਚ ਮਾਤੁਗਾਮਸ੍ਸ ਸਰੀਰਮੇਵ ਅਨਾਮਾਸਂ, ਨਿਵਾਸਨਪਾਰੁਪਨਮ੍ਪਿ ਆਭਰਣਭਣ੍ਡਮ੍ਪਿ ਅਨ੍ਤਮਸੋ ਤਿਣਣ੍ਡੁਪਕਂ ਵਾ ਤਾਲਪਣ੍ਣਮੁਦ੍ਦਿਕਂ ਵਾ ਉਪਾਦਾਯ ਅਨਾਮਾਸਮੇਵ. ਤਞ੍ਚ ਖੋ ਨਿਵਾਸਨਪਾਵੁਰਣਂ ਪਿਲ਼ਨ੍ਧਨਤ੍ਥਾਯ ਠਪਿਤਮੇਵ. ਸਚੇ ਪਨ ਨਿਵਾਸਨਂ ਵਾ ਪਾਰੁਪਨਂ ਵਾ ਪਰਿਵਤ੍ਤੇਤ੍ਵਾ ਚੀਵਰਤ੍ਥਾਯ ਪਾਦਮੂਲੇ ਠਪੇਤਿ, ਵਟ੍ਟਤਿ. ਆਭਰਣਭਣ੍ਡੇਸੁ ਪਨ ਸੀਸਪਸਾਧਨਦਨ੍ਤਸੂਚਿਆਦਿਕਪ੍ਪਿਯਭਣ੍ਡਂ ‘‘ਇਮਂ, ਭਨ੍ਤੇ, ਤੁਮ੍ਹਾਕਂ ਦੇਮ, ਗਣ੍ਹਥਾ’’ਤਿ ਦੀਯਮਾਨਂ ਸਿਪਾਟਿਕਾਸੂਚਿਆਦਿਉਪਕਰਣਤ੍ਥਾਯ ਗਹੇਤਬ੍ਬਂ. ਸੁਵਣ੍ਣਰਜਤਮੁਤ੍ਤਾਦਿਮਯਂ ਪਨ ਅਨਾਮਾਸਮੇਵ, ਦੀਯਮਾਨਮ੍ਪਿ ਨ ਗਹੇਤਬ੍ਬਂ. ਨ ਕੇਵਲਞ੍ਚ ਏਤਾਸਂ ਸਰੀਰੂਪਗਮੇਵ ਅਨਾਮਾਸਂ, ਇਤ੍ਥਿਸਣ੍ਠਾਨੇਨ ਕਤਂ ਕਟ੍ਠਰੂਪਮ੍ਪਿ ਦਨ੍ਤਰੂਪਮ੍ਪਿ ਅਯਰੂਪਮ੍ਪਿ ਲੋਹਰੂਪਮ੍ਪਿ ਤਿਪੁਰੂਪਮ੍ਪਿ ਪੋਤ੍ਥਕਰੂਪਮ੍ਪਿ ਸਬ੍ਬਰਤਨਰੂਪਮ੍ਪਿ ਅਨ੍ਤਮਸੋ ਪਿਟ੍ਠਮਯਰੂਪਮ੍ਪਿ ਅਨਾਮਾਸਮੇਵ. ਪਰਿਭੋਗਤ੍ਥਾਯ ਪਨ ‘‘ਇਦਂ ਤੁਮ੍ਹਾਕਂ ਹੋਤੂ’’ਤਿ ਲਭਿਤ੍ਵਾ ਠਪੇਤ੍ਵਾ ਸਬ੍ਬਰਤਨਮਯਂ ਅਵਸੇਸਂ ਭਿਨ੍ਦਿਤ੍ਵਾ ਉਪਕਰਣਾਰਹਂ ਉਪਕਰਣੇ, ਪਰਿਭੋਗਾਰਹਂ ਪਰਿਭੋਗੇ ਉਪਨੇਤੁਂ ਵਟ੍ਟਤਿ.

੪੧. ਯਥਾ ਚ ਇਤ੍ਥਿਰੂਪਕਂ, ਏਵਂ ਸਤ੍ਤਵਿਧਂ ਧਞ੍ਞਮ੍ਪਿ ਅਨਾਮਾਸਮੇਵ. ਤਸ੍ਮਾ ਖੇਤ੍ਤਮਜ੍ਝੇਨ ਗਚ੍ਛਨ੍ਤੇਨ ਤਤ੍ਥਜਾਤਕਮ੍ਪਿ ਧਞ੍ਞਫਲਂ ਨ ਆਮਸਨ੍ਤੇਨ ਗਨ੍ਤਬ੍ਬਂ. ਸਚੇ ਘਰਦ੍ਵਾਰੇ ਵਾ ਅਨ੍ਤਰਾਮਗ੍ਗੇ ਵਾ ਧਞ੍ਞਂ ਪਸਾਰਿਤਂ ਹੋਤਿ, ਪਸ੍ਸੇਨ ਚ ਮਗ੍ਗੋ ਅਤ੍ਥਿ, ਨ ਮਦ੍ਦਨ੍ਤੇਨ ਗਨ੍ਤਬ੍ਬਂ. ਗਮਨਮਗ੍ਗੇ ਅਸਤਿ ਮਗ੍ਗਂ ਅਧਿਟ੍ਠਾਯ ਗਨ੍ਤਬ੍ਬਂ. ਅਨ੍ਤਰਘਰੇ ਧਞ੍ਞਸ੍ਸ ਉਪਰਿ ਆਸਨਂ ਪਞ੍ਞਪੇਤ੍ਵਾ ਦੇਨ੍ਤਿ, ਨਿਸੀਦਿਤੁਂ ਵਟ੍ਟਤਿ. ਕੇਚਿ ਆਸਨਸਾਲਾਯ ਧਞ੍ਞਂ ਆਕਿਰਨ੍ਤਿ, ਸਚੇ ਸਕ੍ਕਾ ਹੋਤਿ ਹਰਾਪੇਤੁਂ, ਹਰਾਪੇਤਬ੍ਬਂ. ਨੋ ਚੇ, ਏਕਮਨ੍ਤਂ ਧਞ੍ਞਂ ਅਮਦ੍ਦਨ੍ਤੇਨ ਪੀਠਕਂ ਪਞ੍ਞਪੇਤ੍ਵਾ ਨਿਸੀਦਿਤਬ੍ਬਂ. ਸਚੇ ਓਕਾਸੋ ਨ ਹੋਤਿ, ਮਨੁਸ੍ਸਾ ਧਞ੍ਞਮਜ੍ਝੇਯੇਵ ਪਞ੍ਞਪੇਤ੍ਵਾ ਦੇਨ੍ਤਿ, ਨਿਸੀਦਿਤਬ੍ਬਂ. ਤਤ੍ਥਜਾਤਕਾਨਿ ਮੁਗ੍ਗਮਾਸਾਦੀਨਿ ਅਪਰਣ੍ਣਾਨਿਪਿ ਤਾਲਪਨਸਾਦੀਨਿ ਵਾ ਫਲਾਨਿ ਕੀਲ਼ਨ੍ਤੇਨ ਨ ਆਮਸਿਤਬ੍ਬਾਨਿ. ਮਨੁਸ੍ਸੇਹਿ ਰਾਸਿਕਤੇਸੁਪਿ ਏਸੇਵ ਨਯੋ. ਅਰਞ੍ਞੇ ਪਨ ਰੁਕ੍ਖਤੋ ਪਤਿਤਾਨਿ ਫਲਾਨਿ ‘‘ਅਨੁਪਸਮ੍ਪਨ੍ਨਾਨਂ ਦਸ੍ਸਾਮੀ’’ਤਿ ਗਣ੍ਹਿਤੁਂ ਵਟ੍ਟਤਿ.

੪੨. ਮੁਤ੍ਤਾ ਮਣਿ ਵੇਲ਼ੁਰਿਯੋ ਸਙ੍ਖੋ ਸਿਲਾ ਪਵਾਲ਼ਂ ਰਜਤਂ ਜਾਤਰੂਪਂ ਲੋਹਿਤਙ੍ਕੋ ਮਸਾਰਗਲ੍ਲਨ੍ਤਿ ਇਮੇਸੁ ਦਸਸੁ ਰਤਨੇਸੁ ਮੁਤ੍ਤਾ ਅਧੋਤਾ ਅਵਿਦ੍ਧਾ ਯਥਾਜਾਤਾਵ ਆਮਸਿਤੁਂ ਵਟ੍ਟਤਿ, ਸੇਸਾ ਅਨਾਮਾਸਾਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ. ਮਹਾਪਚ੍ਚਰਿਯਂ ਪਨ ‘‘ਮੁਤ੍ਤਾ ਧੋਤਾਪਿ ਅਧੋਤਾਪਿ ਅਨਾਮਾਸਾ, ਭਣ੍ਡਮੂਲਤ੍ਥਾਯ ਚ ਸਮ੍ਪਟਿਚ੍ਛਿਤੁਂ ਨ ਵਟ੍ਟਤਿ, ਕੁਟ੍ਠਰੋਗਸ੍ਸ ਭੇਸਜ੍ਜਤ੍ਥਾਯ ਪਨ ਵਟ੍ਟਤੀ’’ਤਿ ਵੁਤ੍ਤਂ, ਤਂ ਯੁਤ੍ਤਂ. ਅਨ੍ਤਮਸੋ ਜਾਤਿਫਲਿਕਂ ਉਪਾਦਾਯ ਸਬ੍ਬੋਪਿ ਨੀਲਪੀਤਾਦਿਵਣ੍ਣਭੇਦੋ ਮਣਿ ਧੋਤਵਿਦ੍ਧਵਟ੍ਟਿਤੋ ਅਨਾਮਾਸੋ, ਯਥਾਜਾਤੋ ਪਨ ਆਕਰਮੁਤ੍ਤੋ ਪਤ੍ਤਾਦਿਭਣ੍ਡਮੂਲਤ੍ਥਂ ਸਮ੍ਪਟਿਚ੍ਛਿਤੁਂ ਵਟ੍ਟਤੀਤਿ ਵੁਤ੍ਤਂ, ਤਮ੍ਪਿ ਮਹਾਪਚ੍ਚਰਿਯਂ ਪਟਿਕ੍ਖਿਤ੍ਤਂ. ਪਚਿਤ੍ਵਾ ਕਤੋ ਕਾਚਮਣਿਯੇਵੇਕੋ ਵਟ੍ਟਤੀਤਿ ਵੁਤ੍ਤਂ. ਵੇਲ਼ੁਰਿਯੇਪਿ ਮਣਿਸਦਿਸੋਵ ਵਿਨਿਚ੍ਛਯੋ.

ਸਙ੍ਖੋ ਧਮਨਸਙ੍ਖੋ ਚ ਧੋਤਵਿਦ੍ਧੋ ਚ ਰਤਨਮਿਸ੍ਸੋ ਅਨਾਮਾਸੋ, ਪਾਨੀਯਸਙ੍ਖੋ ਧੋਤੋਪਿ ਅਧੋਤੋਪਿ ਆਮਾਸੋਵ. ਸੇਸਞ੍ਚ ਅਞ੍ਜਨਾਦਿਭੇਸਜ੍ਜਤ੍ਥਾਯਪਿ ਭਣ੍ਡਮੂਲਤ੍ਥਾਯਪਿ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਸਿਲਾ ਧੋਤਵਿਦ੍ਧਾ ਰਤਨਸਂਯੁਤ੍ਤਾ ਮੁਗ੍ਗਵਣ੍ਣਾਵ ਅਨਾਮਾਸਾ, ਸੇਸਾ ਸਤ੍ਥਕਨਿਘਂਸਨਾਦਿਅਤ੍ਥਾਯ ਗਣ੍ਹਿਤੁਂ ਵਟ੍ਟਤਿ. ਏਤ੍ਥ ਚ ਰਤਨਸਂਯੁਤ੍ਤਾਤਿ ਸੁਵਣ੍ਣੇਨ ਸਦ੍ਧਿਂ ਯੋਜੇਤ੍ਵਾ ਪਚਿਤ੍ਵਾ ਕਤਾਤਿ ਵਦਨ੍ਤਿ. ਪਵਾਲ਼ਂ ਧੋਤਵਿਦ੍ਧਂ ਅਨਾਮਾਸਂ, ਸੇਸਂ ਆਮਾਸਞ੍ਚ ਭਣ੍ਡਮੂਲਤ੍ਥਞ੍ਚ ਸਮ੍ਪਟਿਚ੍ਛਿਤੁਂ ਵਟ੍ਟਤੀਤਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ. ਮਹਾਪਚ੍ਚਰਿਯਂ ਪਨ ‘‘ਧੋਤਮ੍ਪਿ ਅਧੋਤਮ੍ਪਿ ਸਬ੍ਬਂ ਅਨਾਮਾਸਞ੍ਚ ਨ ਚ ਸਮ੍ਪਟਿਚ੍ਛਿਤੁਂ ਵਟ੍ਟਤੀ’’ਤਿ ਵੁਤ੍ਤਂ, ਤਂ ਯੁਤ੍ਤਂ.

ਰਜਤਞ੍ਚ ਜਾਤਰੂਪਞ੍ਚ ਕਤਭਣ੍ਡਮ੍ਪਿ ਅਕਤਭਣ੍ਡਮ੍ਪਿ ਸਬ੍ਬੇਨ ਸਬ੍ਬਂ ਬੀਜਤੋ ਪਟ੍ਠਾਯ ਅਨਾਮਾਸਞ੍ਚ ਅਸਮ੍ਪਟਿਚ੍ਛਨੀਯਞ੍ਚ. ਉਤ੍ਤਰਰਾਜਪੁਤ੍ਤੋ ਕਿਰ ਸੁਵਣ੍ਣਚੇਤਿਯਂ ਕਾਰਾਪੇਤ੍ਵਾ ਮਹਾਪਦੁਮਤ੍ਥੇਰਸ੍ਸ ਪੇਸੇਸਿ. ਥੇਰੋ ‘‘ਨ ਕਪ੍ਪਤੀ’’ਤਿ ਪਟਿਕ੍ਖਿਪਿ. ਚੇਤਿਯਘਰੇ ਸੁਵਣ੍ਣਪਦੁਮਸੁਵਣ੍ਣਬੁਬ੍ਬੁਲ਼ਕਾਦੀਨਿ ਹੋਨ੍ਤਿ, ਏਤਾਨਿਪਿ ਅਨਾਮਾਸਾਨਿ. ਚੇਤਿਯਘਰਗੋਪਕਾ ਪਨ ਰੂਪਿਯਛਡ੍ਡਕਟ੍ਠਾਨੇ ਠਿਤਾ, ਤਸ੍ਮਾ ਤੇਸਂ ਕੇਲ਼ਾਪਯਿਤੁਂ ਵਟ੍ਟਤੀਤਿ ਵੁਤ੍ਤਂ. ਕੁਰੁਨ੍ਧਿਯਂ ਪਨ ਤਮ੍ਪਿ ਪਟਿਕ੍ਖਿਤ੍ਤਂ, ਸੁਵਣ੍ਣਚੇਤਿਯੇ ਕਚਵਰਮੇਵ ਹਰਿਤੁਂ ਵਟ੍ਟਤੀਤਿ ਏਤ੍ਤਕਮੇਵ ਅਨੁਞ੍ਞਾਤਂ. ਆਰਕੂਟਲੋਹਮ੍ਪਿ ਜਾਤਰੂਪਗਤਿਕਮੇਵ ਅਨਾਮਾਸਨ੍ਤਿ ਸਬ੍ਬਟ੍ਠਕਥਾਸੁ ਵੁਤ੍ਤਂ. ਸੇਨਾਸਨਪਰਿਭੋਗੇ ਪਨ ਸਬ੍ਬੋਪਿ ਕਪ੍ਪਿਯੋ, ਤਸ੍ਮਾ ਜਾਤਰੂਪਰਜਤਮਯਾ ਸਬ੍ਬੇਪਿ ਸੇਨਾਸਨਪਰਿਕ੍ਖਾਰਾ ਆਮਾਸਾ, ਭਿਕ੍ਖੂਨਂ ਧਮ੍ਮਵਿਨਯਵਣ੍ਣਨਟ੍ਠਾਨੇ ਰਤਨਮਣ੍ਡਪੇ ਕਰੋਨ੍ਤਿ ਫਲਿਕਤ੍ਥਮ੍ਭੇ ਰਤਨਦਾਮਪਟਿਮਣ੍ਡਿਤੇ, ਤਤ੍ਥ ਸਬ੍ਬੂਪਕਰਣਾਨਿ ਭਿਕ੍ਖੂਨਂ ਪਟਿਜਗ੍ਗਿਤੁਂ ਵਟ੍ਟਨ੍ਤਿ. ਲੋਹਿਤਙ੍ਕਮਸਾਰਗਲ੍ਲਾ ਧੋਤਵਿਦ੍ਧਾ ਅਨਾਮਾਸਾ, ਇਤਰੇ ਆਮਾਸਾ, ਭਣ੍ਡਮੂਲਤ੍ਥਾਯ ਚ ਸਮ੍ਪਟਿਚ੍ਛਿਤੁਂ ਵਟ੍ਟਤੀਤਿ ਵੁਤ੍ਤਂ. ਮਹਾਪਚ੍ਚਰਿਯਂ ਪਨ ‘‘ਧੋਤਾਪਿ ਅਧੋਤਾਪਿ ਸਬ੍ਬਸੋ ਅਨਾਮਾਸਾ, ਨ ਚ ਸਮ੍ਪਟਿਚ੍ਛਿਤੁਂ ਵਟ੍ਟਨ੍ਤੀ’’ਤਿ ਪਟਿਕ੍ਖਿਤ੍ਤਂ.

੪੩. ਸਬ੍ਬਂ ਆਵੁਧਭਣ੍ਡਂ ਅਨਾਮਾਸਂ, ਭਣ੍ਡਮੂਲਤ੍ਥਾਯ ਦੀਯਮਾਨਮ੍ਪਿ ਨ ਸਮ੍ਪਟਿਚ੍ਛਿਤਬ੍ਬਂ. ਸਤ੍ਥਵਣਿਜ੍ਜਾ ਨਾਮ ਨ ਵਟ੍ਟਤਿ. ਸੁਦ੍ਧਧਨੁਦਣ੍ਡੋਪਿ ਧਨੁਜਿਯਾਪਿ ਪਤੋਦੋਪਿ ਤੋਮਰੋਪਿ ਅਙ੍ਕੁਸੋਪਿ ਅਨ੍ਤਮਸੋ ਵਾਸਿਫਰਸੁਆਦੀਨਿਪਿ ਆਵੁਧਸਙ੍ਖੇਪੇਨ ਕਤਾਨਿ ਅਨਾਮਾਸਾਨਿ. ਸਚੇ ਕੇਨਚਿ ਵਿਹਾਰੇ ਸਤ੍ਤਿ ਵਾ ਤੋਮਰੋ ਵਾ ਠਪਿਤੋ ਹੋਤਿ, ਵਿਹਾਰਂ ਜਗ੍ਗਨ੍ਤੇਨ ‘‘ਹਰਨ੍ਤੂ’’ਤਿ ਸਾਮਿਕਾਨਂ ਪੇਸੇਤਬ੍ਬਂ. ਸਚੇ ਨ ਹਰਨ੍ਤਿ, ਤਂ ਅਚਾਲੇਨ੍ਤੇਨ ਵਿਹਾਰੋ ਪਟਿਜਗ੍ਗਿਤਬ੍ਬੋ. ਯੁਦ੍ਧਭੂਮਿਯਂ ਪਨ ਪਤਿਤਂ ਅਸਿਂ ਵਾ ਸਤ੍ਤਿਂ ਵਾ ਤੋਮਰਂ ਵਾ ਦਿਸ੍ਵਾ ਪਾਸਾਣੇਨ ਵਾ ਕੇਨਚਿ ਵਾ ਅਸਿਂ ਭਿਨ੍ਦਿਤ੍ਵਾ ਸਤ੍ਥਕਤ੍ਥਾਯ ਗਹੇਤੁਂ ਵਟ੍ਟਤਿ. ਇਤਰਾਨਿਪਿ ਵਿਯੋਜੇਤ੍ਵਾ ਕਿਞ੍ਚਿ ਸਤ੍ਥਕਤ੍ਥਾਯ, ਕਿਞ੍ਚਿ ਕਤ੍ਤਰਦਣ੍ਡਾਦਿਅਤ੍ਥਾਯ ਗਹੇਤੁਂ ਵਟ੍ਟਤਿ. ‘‘ਇਦਂ ਗਣ੍ਹਥਾ’’ਤਿ ਦੀਯਮਾਨਂ ਪਨ ਵਿਨਾਸੇਤ੍ਵਾ ‘‘ਕਪ੍ਪਿਯਭਣ੍ਡਂ ਕਰਿਸ੍ਸਾਮੀ’’ਤਿ ਸਬ੍ਬਮ੍ਪਿ ਸਮ੍ਪਟਿਚ੍ਛਿਤੁਂ ਵਟ੍ਟਤਿ.

ਮਚ੍ਛਜਾਲਪਕ੍ਖਿਜਾਲਾਦੀਨਿਪਿ ਫਲਕਜਾਲਿਕਾਦੀਨਿਪਿ ਸਰਪਰਿਤ੍ਤਾਣਾਨਿਪਿ ਸਬ੍ਬਾਨਿ ਅਨਾਮਾਸਾਨਿ, ਪਰਿਭੋਗਤ੍ਥਾਯ ਲਬ੍ਭਮਾਨੇਸੁ ਪਨ ਜਾਲਂ ਤਾਵ ‘‘ਆਸਨਸ੍ਸ ਵਾ ਚੇਤਿਯਸ੍ਸ ਵਾ ਉਪਰਿ ਬਨ੍ਧਿਸ੍ਸਾਮਿ, ਛਤ੍ਤਂ ਵਾ ਵੇਠੇਸ੍ਸਾਮੀ’’ਤਿ ਗਹੇਤੁਂ ਵਟ੍ਟਤਿ. ਸਰਪਰਿਤ੍ਤਾਣਂ ਸਬ੍ਬਮ੍ਪਿ ਭਣ੍ਡਮੂਲਤ੍ਥਾਯ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਪਰੂਪਰੋਧਨਿਵਾਰਣਞ੍ਹਿ ਏਤਂ, ਨ ਉਪਰੋਧਕਰਨ੍ਤਿ. ਫਲਕਂ ‘‘ਦਨ੍ਤਕਟ੍ਠਭਾਜਨਂ ਕਰਿਸ੍ਸਾਮੀ’’ਤਿ ਗਹੇਤੁਂ ਵਟ੍ਟਤਿ.

ਚਮ੍ਮਵਿਨਦ੍ਧਾਨਿ ਵੀਣਾਭੇਰਿਆਦੀਨਿ ਅਨਾਮਾਸਾਨਿ. ਕੁਰੁਨ੍ਦਿਯਂ ਪਨ ‘‘ਭੇਰਿਸਙ੍ਘਾਟੋਪਿ ਵੀਣਾਸਙ੍ਘਾਟੋਪਿ ਤੁਚ੍ਛਪੋਕ੍ਖਰਮ੍ਪਿ ਮੁਖਵਟ੍ਟਿਯਂ ਆਰੋਪਿਤਚਮ੍ਮਮ੍ਪਿ ਵੀਣਾਦਣ੍ਡਕੋਪਿ ਸਬ੍ਬਂ ਅਨਾਮਾਸ’’ਨ੍ਤਿ ਵੁਤ੍ਤਂ. ਓਨਹਿਤੁਂ ਵਾ ਓਨਹਾਪੇਤੁਂ ਵਾ ਵਾਦੇਤੁਂ ਵਾ ਵਾਦਾਪੇਤੁਂ ਵਾ ਨ ਲਬ੍ਭਤਿਯੇਵ. ਚੇਤਿਯਙ੍ਗਣੇ ਪੂਜਂ ਕਤ੍ਵਾ ਮਨੁਸ੍ਸੇਹਿ ਛਡ੍ਡਿਤਂ ਦਿਸ੍ਵਾਪਿ ਅਚਾਲੇਤ੍ਵਾਵ ਅਨ੍ਤਰਨ੍ਤਰੇ ਸਮ੍ਮਜ੍ਜਿਤਬ੍ਬਂ, ਕਚਵਰਛਡ੍ਡਨਕਾਲੇ ਪਨ ਕਚਵਰਨਿਯਾਮੇਨੇਵ ਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤੁਂ ਵਟ੍ਟਤੀਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਭਣ੍ਡਮੂਲਤ੍ਥਾਯ ਸਮ੍ਪਟਿਚ੍ਛਿਤੁਮ੍ਪਿ ਵਟ੍ਟਤਿ, ਪਰਿਭੋਗਤ੍ਥਾਯ ਲਬ੍ਭਮਾਨੇਸੁ ਪਨ ਵੀਣਾਦੋਣਿਕਞ੍ਚ ਭੇਰਿਪੋਕ੍ਖਰਞ੍ਚ ਦਨ੍ਤਕਟ੍ਠਭਾਜਨਂ ਕਰਿਸ੍ਸਾਮ, ਚਮ੍ਮਂ ਸਤ੍ਥਕਕੋਸਕਨ੍ਤਿ ਏਵਂ ਤਸ੍ਸ ਤਸ੍ਸ ਪਰਿਕ੍ਖਾਰਸ੍ਸ ਉਪਕਰਣਤ੍ਥਾਯ ਗਹੇਤ੍ਵਾ ਤਥਾ ਤਥਾ ਕਾਤੁਂ ਵਟ੍ਟਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਅਨਾਮਾਸਵਿਨਿਚ੍ਛਯਕਥਾ ਸਮਤ੍ਤਾ.