੬. ਮਚ੍ਛਮਂਸਵਿਨਿਚ੍ਛਯਕਥਾ

੩੮. ਮਚ੍ਛਮਂਸੇਸੁ ਪਨ ਮਚ੍ਛਗ੍ਗਹਣੇਨ ਸਬ੍ਬਮ੍ਪਿ ਜਲਜਂ ਵੁਤ੍ਤਂ. ਤਤ੍ਥ ਅਕਪ੍ਪਿਯਂ ਨਾਮ ਨਤ੍ਥਿ. ਮਂਸੇਸੁ ਪਨ ਮਨੁਸ੍ਸਹਤ੍ਥਿਅਸ੍ਸਸੁਨਖਅਹਿਸੀਹਬ੍ਯਗ੍ਘਦੀਪਿਅਚ੍ਛਤਰਚ੍ਛਾਨਂ ਵਸੇਨ ਦਸ ਮਂਸਾਨਿ ਅਕਪ੍ਪਿਯਾਨਿ. ਤਤ੍ਥ ਮਨੁਸ੍ਸਮਂਸੇ ਥੁਲ੍ਲਚ੍ਚਯਂ, ਸੇਸੇਸੁ ਦੁਕ੍ਕਟਂ. ਇਤਿ ਇਮੇਸਂ ਮਨੁਸ੍ਸਾਦੀਨਂ ਦਸਨ੍ਨਂ ਮਂਸਮ੍ਪਿ ਅਟ੍ਠਿਪਿ ਲੋਹਿਤਮ੍ਪਿ ਚਮ੍ਮਮ੍ਪਿ ਲੋਮਮ੍ਪਿ ਸਬ੍ਬਂ ਨ ਵਟ੍ਟਤਿ. ਵਸਾਸੁ ਪਨ ਏਕਾ ਮਨੁਸ੍ਸਵਸਾਵ ਨ ਵਟ੍ਟਤਿ. ਖੀਰਾਦੀਸੁ ਅਕਪ੍ਪਿਯਂ ਨਾਮ ਨਤ੍ਥਿ. ਇਮੇਸੁ ਪਨ ਅਕਪ੍ਪਿਯਮਂਸੇਸੁ ਅਟ੍ਠਿਆਦੀਸੁ ਵਾ ਯਂ ਕਿਞ੍ਚਿ ਞਤ੍ਵਾ ਵਾ ਅਞਤ੍ਵਾ ਵਾ ਖਾਦਨ੍ਤਸ੍ਸ ਆਪਤ੍ਤਿਯੇਵ. ਯਦਾ ਜਾਨਾਤਿ, ਤਦਾ ਦੇਸੇਤਬ੍ਬਾ. ‘‘ਅਪੁਚ੍ਛਿਤ੍ਵਾਵ ਖਾਦਿਸ੍ਸਾਮੀ’’ਤਿ ਗਣ੍ਹਤੋ ਪਟਿਗ੍ਗਹਣੇਪਿ ਦੁਕ੍ਕਟਂ, ‘‘ਪੁਚ੍ਛਿਤ੍ਵਾ ਖਾਦਿਸ੍ਸਾਮੀ’’ਤਿ ਗਣ੍ਹਤੋ ਅਨਾਪਤ੍ਤਿ. ਉਦ੍ਦਿਸ੍ਸਕਤਂ ਪਨ ਜਾਨਿਤ੍ਵਾ ਖਾਦਨ੍ਤਸ੍ਸੇਵ ਆਪਤ੍ਤਿ, ਪਚ੍ਛਾ ਜਾਨਨ੍ਤੋ ਆਪਤ੍ਤਿਯਾ ਨ ਕਾਰੇਤਬ੍ਬੋ (ਮਹਾਵ. ਅਟ੍ਠ. ੨੮੧).

ਤਤ੍ਥ (ਪਾਰਾ. ਅਟ੍ਠ. ੨.੪੧੦) ਉਦ੍ਦਿਸ੍ਸਕਤਂ ਨਾਮ ਭਿਕ੍ਖੂਨਂ ਅਤ੍ਥਾਯ ਵਧਿਤ੍ਵਾ ਸਮ੍ਪਾਦਿਤਂ ਮਚ੍ਛਮਂਸਂ. ਉਭਯਮ੍ਪਿ ਹਿ ਉਦ੍ਦਿਸ੍ਸਕਤਂ ਨ ਵਟ੍ਟਤਿ. ਤਮ੍ਪਿ ਅਦਿਟ੍ਠਂ ਅਸੁਤਂ ਅਪਰਿਸਙ੍ਕਿਤਂ ਵਟ੍ਟਤਿ. ਤਿਕੋਟਿਪਰਿਸੁਦ੍ਧਞ੍ਹਿ ਮਚ੍ਛਮਂਸਂ ਭਗਵਤਾ ਅਨੁਞ੍ਞਾਤਂ ਅਦਿਟ੍ਠਂ ਅਸੁਤਂ ਅਪਰਿਸਙ੍ਕਿਤਂ. ਤਤ੍ਥ ਅਦਿਟ੍ਠਂ ਨਾਮ ਭਿਕ੍ਖੂਨਂ ਅਤ੍ਥਾਯ ਮਿਗਮਚ੍ਛੇ ਵਧਿਤ੍ਵਾ ਗਯ੍ਹਮਾਨਂ ਅਦਿਟ੍ਠਂ. ਅਸੁਤਂ ਨਾਮ ਭਿਕ੍ਖੂਨਂ ਅਤ੍ਥਾਯ ਮਿਗਮਚ੍ਛੇ ਵਧਿਤ੍ਵਾ ਗਹਿਤਨ੍ਤਿ ਅਸੁਤਂ. ਅਪਰਿਸਙ੍ਕਿਤਂ ਪਨ ਦਿਟ੍ਠਪਰਿਸਙ੍ਕਿਤਂ ਸੁਤਪਰਿਸਙ੍ਕਿਤਂ ਤਦੁਭਯਵਿਨਿਮੁਤ੍ਤਪਰਿਸਙ੍ਕਿਤਞ੍ਚ ਞਤ੍ਵਾ ਤਬ੍ਬਿਪਕ੍ਖਤੋ ਜਾਨਿਤਬ੍ਬਂ. ਕਥਂ? ਇਧ ਭਿਕ੍ਖੂ ਪਸ੍ਸਨ੍ਤਿ ਮਨੁਸ੍ਸੇ ਜਾਲਵਾਗੁਰਾਦਿਹਤ੍ਥੇ ਗਾਮਤੋ ਵਾ ਨਿਕ੍ਖਮਨ੍ਤੇ ਅਰਞ੍ਞੇ ਵਾ ਵਿਚਰਨ੍ਤੇ. ਦੁਤਿਯਦਿਵਸੇ ਚ ਨੇਸਂ ਤਂ ਗਾਮਂ ਪਿਣ੍ਡਾਯ ਪਵਿਟ੍ਠਾਨਂ ਸਮਚ੍ਛਮਂਸਂ ਪਿਣ੍ਡਪਾਤਂ ਅਭਿਹਰਨ੍ਤਿ. ਤੇ ਤੇਨ ਦਿਟ੍ਠੇਨ ਪਰਿਸਙ੍ਕਨ੍ਤਿ ‘‘ਭਿਕ੍ਖੂਨਂ ਨੁ ਖੋ ਅਤ੍ਥਾਯ ਕਤ’’ਨ੍ਤਿ, ਇਦਂ ਦਿਟ੍ਠਪਰਿਸਙ੍ਕਿਤਂ, ਏਤਂ ਗਹੇਤੁਂ ਨ ਵਟ੍ਟਤਿ. ਯਂ ਏਵਂ ਅਪਰਿਸਙ੍ਕਿਤਂ, ਤਂ ਵਟ੍ਟਤਿ. ਸਚੇ ਪਨ ਤੇ ਮਨੁਸ੍ਸਾ ‘‘ਕਸ੍ਮਾ, ਭਨ੍ਤੇ, ਨ ਗਣ੍ਹਥਾ’’ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ‘‘ਨਯਿਦਂ, ਭਨ੍ਤੇ, ਭਿਕ੍ਖੂਨਂ ਅਤ੍ਥਾਯ ਕਤਂ, ਅਮ੍ਹੇਹਿ ਅਤ੍ਤਨੋ ਅਤ੍ਥਾਯ ਵਾ ਰਾਜਯੁਤ੍ਤਾਦੀਨਂ ਵਾ ਅਤ੍ਥਾਯ ਕਤ’’ਨ੍ਤਿ ਵਦਨ੍ਤਿ, ਕਪ੍ਪਤਿ.

ਨ ਹੇਵ ਖੋ ਭਿਕ੍ਖੂ ਪਸ੍ਸਨ੍ਤਿ, ਅਪਿਚ ਖੋ ਸੁਣਨ੍ਤਿ ‘‘ਮਨੁਸ੍ਸਾ ਕਿਰ ਜਾਲਵਾਗੁਰਾਦਿਹਤ੍ਥਾ ਗਾਮਤੋ ਵਾ ਨਿਕ੍ਖਮਨ੍ਤਿ, ਅਰਞ੍ਞੇ ਵਾ ਵਿਚਰਨ੍ਤੀ’’ਤਿ. ਦੁਤਿਯਦਿਵਸੇ ਚ ਤੇਸਂ ਤਂ ਗਾਮਂ ਪਿਣ੍ਡਾਯ ਪਵਿਟ੍ਠਾਨਂ ਸਮਚ੍ਛਮਂਸਂ ਪਿਣ੍ਡਪਾਤਂ ਅਭਿਹਰਨ੍ਤਿ. ਤੇ ਤੇਨ ਸੁਤੇਨ ਪਰਿਸਙ੍ਕਨ੍ਤਿ ‘‘ਭਿਕ੍ਖੂਨਂ ਨੁ ਖੋ ਅਤ੍ਥਾਯ ਕਤ’’ਨ੍ਤਿ, ਇਦਂ ਸੁਤਪਰਿਸਙ੍ਕਿਤਂ ਨਾਮ, ਏਤਂ ਗਹੇਤੁਂ ਨ ਵਟ੍ਟਤਿ. ਯਂ ਏਵਂ ਅਪਰਿਸਙ੍ਕਿਤਂ, ਤਂ ਵਟ੍ਟਤਿ. ਸਚੇ ਪਨ ਤੇ ਮਨੁਸ੍ਸਾ ‘‘ਕਸ੍ਮਾ, ਭਨ੍ਤੇ, ਨ ਗਣ੍ਹਥਾ’’ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ‘‘ਨਯਿਦਂ, ਭਨ੍ਤੇ, ਭਿਕ੍ਖੂਨਂ ਅਤ੍ਥਾਯ ਕਤਂ, ਅਮ੍ਹੇਹਿ ਅਤ੍ਤਨੋ ਅਤ੍ਥਾਯ ਵਾ ਰਾਜਯੁਤ੍ਤਾਦੀਨਂ ਵਾ ਅਤ੍ਥਾਯ ਕਤ’’ਨ੍ਤਿ ਵਦਨ੍ਤਿ, ਕਪ੍ਪਤਿ.

ਨ ਹੇਵ ਖੋ ਪਨ ਭਿਕ੍ਖੂ ਪਸ੍ਸਨ੍ਤਿ ਨ ਸੁਣਨ੍ਤਿ, ਅਪਿਚ ਖੋ ਤੇਸਂ ਤਂ ਗਾਮਂ ਪਿਣ੍ਡਾਯ ਪਵਿਟ੍ਠਾਨਂ ਪਤ੍ਤਂ ਗਹੇਤ੍ਵਾ ਸਮਚ੍ਛਮਂਸਂ ਪਿਣ੍ਡਪਾਤਂ ਅਭਿਸਙ੍ਖਰਿਤ੍ਵਾ ਅਭਿਹਰਨ੍ਤਿ. ਤੇ ਪਰਿਸਙ੍ਕਨ੍ਤਿ ‘‘ਭਿਕ੍ਖੂਨਂ ਨੁ ਖੋ ਅਤ੍ਥਾਯ ਕਤ’’ਨ੍ਤਿ, ਇਦਂ ਤਦੁਭਯਵਿਨਿਮੁਤ੍ਤਪਰਿਸਙ੍ਕਿਤਂ ਨਾਮ, ਏਤਮ੍ਪਿ ਗਹੇਤੁਂ ਨ ਵਟ੍ਟਤਿ. ਯਂ ਏਵਂ ਅਪਰਿਸਙ੍ਕਿਤਂ, ਤਂ ਵਟ੍ਟਤਿ. ਸਚੇ ਪਨ ਤੇ ਮਨੁਸ੍ਸਾ ‘‘ਕਸ੍ਮਾ, ਭਨ੍ਤੇ, ਨ ਗਣ੍ਹਥਾ’’ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ‘‘ਨਯਿਦਂ, ਭਨ੍ਤੇ, ਭਿਕ੍ਖੂਨਂ ਅਤ੍ਥਾਯ ਕਤਂ, ਅਮ੍ਹੇਹਿ ਅਤ੍ਤਨੋ ਅਤ੍ਥਾਯ ਵਾ ਰਾਜਯੁਤ੍ਤਾਦੀਨਂ ਵਾ ਅਤ੍ਥਾਯ ਕਤਂ, ਪਵਤ੍ਤਮਂਸਂ ਵਾ ਕਪ੍ਪਿਯਮੇਵ ਲਭਿਤ੍ਵਾ ਭਿਕ੍ਖੂਨਂ ਅਤ੍ਥਾਯ ਸਮ੍ਪਾਦਿਤ’’ਨ੍ਤਿ ਵਦਨ੍ਤਿ, ਕਪ੍ਪਤਿ. ਮਤਾਨਂ ਪੇਤਕਿਚ੍ਚਤ੍ਥਾਯ ਮਙ੍ਗਲਾਦੀਨਂ ਵਾ ਅਤ੍ਥਾਯ ਕਤੇਪਿ ਏਸੇਵ ਨਯੋ. ਯਂ ਯਞ੍ਹਿ ਭਿਕ੍ਖੂਨਂਯੇਵ ਅਤ੍ਥਾਯ ਅਕਤਂ, ਯਤ੍ਥ ਚ ਨਿਬ੍ਬੇਮਤਿਕੋ ਹੋਤਿ, ਤਂ ਸਬ੍ਬਂ ਕਪ੍ਪਤਿ.

੩੯. ਸਚੇ ਪਨ ਏਕਸ੍ਮਿਂ ਵਿਹਾਰੇ ਭਿਕ੍ਖੂਨਂ ਉਦ੍ਦਿਸ੍ਸਕਤਂ ਹੋਤਿ, ਤੇ ਚ ਅਤ੍ਤਨੋ ਅਤ੍ਥਾਯ ਕਤਭਾਵਂ ਨ ਜਾਨਨ੍ਤਿ, ਅਞ੍ਞੇ ਜਾਨਨ੍ਤਿ. ਯੇ ਜਾਨਨ੍ਤਿ, ਤੇਸਂ ਨ ਵਟ੍ਟਤਿ, ਇਤਰੇਸਂ ਪਨ ਵਟ੍ਟਤਿ. ਅਞ੍ਞੇ ਨ ਜਾਨਨ੍ਤਿ, ਤੇਯੇਵ ਜਾਨਨ੍ਤਿ, ਤੇਸਂਯੇਵ ਨ ਵਟ੍ਟਤਿ, ਅਞ੍ਞੇਸਂ ਵਟ੍ਟਤਿ. ਤੇਪਿ ‘‘ਅਮ੍ਹਾਕਂ ਅਤ੍ਥਾਯ ਕਤ’’ਨ੍ਤਿ ਜਾਨਨ੍ਤਿ, ਅਞ੍ਞੇਪਿ ‘‘ਏਤੇਸਂ ਅਤ੍ਥਾਯ ਕਤ’’ਨ੍ਤਿ ਜਾਨਨ੍ਤਿ, ਸਬ੍ਬੇਸਮ੍ਪਿ ਨ ਵਟ੍ਟਤਿ. ਸਬ੍ਬੇ ਨ ਜਾਨਨ੍ਤਿ, ਸਬ੍ਬੇਸਮ੍ਪਿ ਵਟ੍ਟਤਿ. ਪਞ੍ਚਸੁ ਹਿ ਸਹਧਮ੍ਮਿਕੇਸੁ ਯਸ੍ਸ ਵਾ ਤਸ੍ਸ ਵਾ ਅਤ੍ਥਾਯ ਉਦ੍ਦਿਸ੍ਸਕਤਂ ਸਬ੍ਬੇਸਂ ਨ ਕਪ੍ਪਤਿ.

ਸਚੇ ਪਨ ਕੋਚਿ ਏਕਂ ਭਿਕ੍ਖੁਂ ਉਦ੍ਦਿਸ੍ਸ ਪਾਣਂ ਵਧਿਤ੍ਵਾ ਤਸ੍ਸ ਪਤ੍ਤਂ ਪੂਰੇਤ੍ਵਾ ਦੇਤਿ, ਸੋ ਚ ਅਤ੍ਤਨੋ ਅਤ੍ਥਾਯ ਕਤਭਾਵਂ ਜਾਨਂਯੇਵ ਗਹੇਤ੍ਵਾ ਅਞ੍ਞਸ੍ਸ ਭਿਕ੍ਖੁਨੋ ਦੇਤਿ, ਸੋ ਤਂ ਤਸ੍ਸ ਸਦ੍ਧਾਯ ਪਰਿਭੁਞ੍ਜਤਿ, ਕਸ੍ਸ ਆਪਤ੍ਤੀਤਿ? ਦ੍ਵਿਨ੍ਨਮ੍ਪਿ ਅਨਾਪਤ੍ਤਿ. ਯਞ੍ਹਿ ਉਦ੍ਦਿਸ੍ਸ ਕਤਂ, ਤਸ੍ਸ ਅਭੁਤ੍ਤਤਾਯ ਅਨਾਪਤ੍ਤਿ, ਇਤਰਸ੍ਸ ਅਜਾਨਨਤਾਯ. ਕਪ੍ਪਿਯਮਂਸਸ੍ਸ ਹਿ ਪਟਿਗ੍ਗਹਣੇ ਆਪਤ੍ਤਿ ਨਤ੍ਥਿ, ਉਦ੍ਦਿਸ੍ਸਕਤਞ੍ਚ ਅਜਾਨਿਤ੍ਵਾ ਭੁਤ੍ਤਸ੍ਸ ਪਚ੍ਛਾ ਞਤ੍ਵਾ ਆਪਤ੍ਤਿਦੇਸਨਾਕਿਚ੍ਚਂ ਨਾਮ ਨਤ੍ਥਿ. ਅਕਪ੍ਪਿਯਮਂਸਂ ਪਨ ਅਜਾਨਿਤ੍ਵਾ ਭੁਤ੍ਤੇਨ ਪਚ੍ਛਾ ਞਤ੍ਵਾਪਿ ਆਪਤ੍ਤਿ ਦੇਸੇਤਬ੍ਬਾ. ਉਦ੍ਦਿਸ੍ਸਕਤਞ੍ਹਿ ਞਤ੍ਵਾ ਭੁਞ੍ਜਤੋਵ ਆਪਤ੍ਤਿ, ਅਕਪ੍ਪਿਯਮਂਸਂ ਅਜਾਨਿਤ੍ਵਾ ਭੁਞ੍ਜਨ੍ਤਸ੍ਸਪਿ ਆਪਤ੍ਤਿਯੇਵ, ਤਸ੍ਮਾ ਆਪਤ੍ਤਿਭੀਰੁਕੇਨ ਰੂਪਂ ਸਲ੍ਲਕ੍ਖੇਨ੍ਤੇਨਪਿ ਪੁਚ੍ਛਿਤ੍ਵਾਵ ਮਂਸਂ ਪਟਿਗ੍ਗਹੇਤਬ੍ਬਂ. ਪਰਿਭੋਗਕਾਲੇ ‘‘ਪੁਚ੍ਛਿਤ੍ਵਾ ਪਰਿਭੁਞ੍ਜਿਸ੍ਸਾਮੀ’’ਤਿ ਵਾ ਗਹੇਤ੍ਵਾ ਪੁਚ੍ਛਿਤ੍ਵਾਵ ਪਰਿਭੁਞ੍ਜਿਤਬ੍ਬਂ. ਕਸ੍ਮਾ? ਦੁਵਿਞ੍ਞੇਯ੍ਯਤ੍ਤਾ. ਅਚ੍ਛਮਂਸਮ੍ਪਿ ਹਿ ਸੂਕਰਮਂਸਸਦਿਸਂ ਹੋਤਿ, ਦੀਪਿਮਂਸਾਦੀਨਿ ਚ ਮਿਗਮਂਸਾਦਿਸਦਿਸਾਨਿ, ਤਸ੍ਮਾ ਪੁਚ੍ਛਿਤ੍ਵਾ ਗਹਣਮੇਵ ਵਤ੍ਤਨ੍ਤਿ ਵਦਨ੍ਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਮਚ੍ਛਮਂਸਵਿਨਿਚ੍ਛਯਕਥਾ ਸਮਤ੍ਤਾ.