੫. ਕੁਲਸਙ੍ਗਹਵਿਨਿਚ੍ਛਯਕਥਾ

੨੭. ਕੁਲਸਙ੍ਗਹੋਤਿ ਪੁਪ੍ਫਫਲਾਦੀਹਿ ਕੁਲਾਨਂ ਸਙ੍ਗਹੋ ਕੁਲਸਙ੍ਗਹੋ. ਤਤ੍ਰਾਯਂ ਵਿਨਿਚ੍ਛਯੋ (ਪਾਰਾ. ਅਟ੍ਠ. ੨.੪੩੧) – ਕੁਲਸਙ੍ਗਹਤ੍ਥਾਯ ਮਾਲਾਵਚ੍ਛਾਦੀਨਿ ਰੋਪੇਤੁਂ ਵਾ ਰੋਪਾਪੇਤੁਂ ਵਾ ਸਿਞ੍ਚਿਤੁਂ ਵਾ ਸਿਞ੍ਚਾਪੇਤੁਂ ਵਾ ਪੁਪ੍ਫਾਨਿ ਓਚਿਨਿਤੁਂ ਵਾ ਓਚਿਨਾਪੇਤੁਂ ਵਾ ਗਨ੍ਥਿਤੁਂ ਵਾ ਗਨ੍ਥਾਪੇਤੁਂ ਵਾ ਨ ਵਟ੍ਟਤਿ. ਤਤ੍ਥ ਅਕਪ੍ਪਿਯਵੋਹਾਰੋ ਕਪ੍ਪਿਯਵੋਹਾਰੋ ਪਰਿਯਾਯੋ ਓਭਾਸੋ ਨਿਮਿਤ੍ਤਕਮ੍ਮਨ੍ਤਿ ਇਮਾਨਿ ਪਞ੍ਚ ਜਾਨਿਤਬ੍ਬਾਨਿ.

੨੮. ਤਤ੍ਥ ਅਕਪ੍ਪਿਯਵੋਹਾਰੋ ਨਾਮ ਅਲ੍ਲਹਰਿਤਾਨਂ ਕੋਟ੍ਟਨਂ ਕੋਟ੍ਟਾਪਨਂ, ਆਵਾਟਸ੍ਸ ਖਣਨਂ ਖਣਾਪਨਂ, ਮਾਲਾਵਚ੍ਛਸ੍ਸ ਰੋਪਨਂ ਰੋਪਾਪਨਂ, ਆਲ਼ਿਯਾ ਬਨ੍ਧਨਂ ਬਨ੍ਧਾਪਨਂ, ਉਦਕਸ੍ਸ ਸੇਚਨਂ ਸੇਚਾਪਨਂ, ਮਾਤਿਕਾਯ ਸਮ੍ਮੁਖਕਰਣਂ, ਕਪ੍ਪਿਯਉਦਕਸਿਞ੍ਚਨਂ, ਹਤ੍ਥਪਾਦਮੁਖਧੋਵਨਨਹਾਨੋਦਕਸਿਞ੍ਚਨਂ. ਕਪ੍ਪਿਯਵੋਹਾਰੋ ਨਾਮ ‘‘ਇਮਂ ਰੁਕ੍ਖਂ ਜਾਨ, ਇਮਂ ਆਵਾਟਂ ਜਾਨ, ਇਮਂ ਮਾਲਾਵਚ੍ਛਂ ਜਾਨ, ਏਤ੍ਥ ਉਦਕਂ ਜਾਨਾ’’ਤਿਆਦਿਵਚਨਂ ਸੁਕ੍ਖਮਾਤਿਕਾਯ ਉਜੁਕਰਣਞ੍ਚ. ਪਰਿਯਾਯੋ ਨਾਮ ‘‘ਪਣ੍ਡਿਤੇਨ ਮਾਲਾਵਚ੍ਛਾਦਯੋ ਰੋਪਾਪੇਤਬ੍ਬਾ, ਨਚਿਰਸ੍ਸੇਵ ਉਪਕਾਰਾਯ ਸਂਵਤ੍ਤਨ੍ਤੀ’’ਤਿਆਦਿਵਚਨਂ. ਓਭਾਸੋ ਨਾਮ ਕੁਦਾਲਖਣਿਤ੍ਤਾਦੀਨਿ ਚ ਮਾਲਾਵਚ੍ਛੇ ਚ ਗਹੇਤ੍ਵਾ ਠਾਨਂ. ਏਵਂ ਠਿਤਞ੍ਹਿ ਸਾਮਣੇਰਾਦਯੋ ਦਿਸ੍ਵਾ ‘‘ਥੇਰੋ ਕਾਰਾਪੇਤੁਕਾਮੋ’’ਤਿ ਗਨ੍ਤ੍ਵਾ ਕਰੋਨ੍ਤਿ. ਨਿਮਿਤ੍ਤਕਮ੍ਮਂ ਨਾਮ ਕੁਦਾਲਖਣਿਤ੍ਤਿਵਾਸਿਫਰਸੁਉਦਕਭਾਜਨਾਨਿ ਆਹਰਿਤ੍ਵਾ ਸਮੀਪੇ ਠਪਨਂ.

੨੯. ਇਮਾਨਿ ਪਞ੍ਚਪਿ ਕੁਲਸਙ੍ਗਹਤ੍ਥਾਯ ਰੋਪਨਰੋਪਾਪਨਾਦੀਸੁ ਨ ਵਟ੍ਟਨ੍ਤਿ. ਫਲਪਰਿਭੋਗਤ੍ਥਾਯ ਕਪ੍ਪਿਯਾਕਪ੍ਪਿਯਵੋਹਾਰਦ੍ਵਯਮੇਵ ਨ ਵਟ੍ਟਤਿ, ਇਤਰਤ੍ਤਯਂ ਵਟ੍ਟਤਿ. ਮਹਾਪਚ੍ਚਰਿਯਂ ਪਨ ‘‘ਕਪ੍ਪਿਯਵੋਹਾਰੋਪਿ ਵਟ੍ਟਤਿ, ਯਞ੍ਚ ਅਤ੍ਤਨੋ ਪਰਿਭੋਗਤ੍ਥਾਯ ਵਟ੍ਟਤਿ, ਤਂ ਅਞ੍ਞਪੁਗ੍ਗਲਸ੍ਸ ਵਾ ਸਙ੍ਘਸ੍ਸ ਵਾ ਚੇਤਿਯਸ੍ਸ ਵਾ ਅਤ੍ਥਾਯਪਿ ਵਟ੍ਟਤੀ’’ਤਿ ਵੁਤ੍ਤਂ. ਆਰਾਮਤ੍ਥਾਯ ਪਨ ਵਨਤ੍ਥਾਯ ਛਾਯਤ੍ਥਾਯ ਚ ਅਕਪ੍ਪਿਯਵੋਹਾਰਮਤ੍ਤਮੇਵ ਨ ਵਟ੍ਟਤਿ, ਸੇਸਂ ਵਟ੍ਟਤਿ. ਨ ਕੇਵਲਞ੍ਚ ਸੇਸਂ, ਯਂ ਕਿਞ੍ਚਿ ਮਾਤਿਕਮ੍ਪਿ ਉਜੁਂ ਕਾਤੁਂ ਕਪ੍ਪਿਯਉਦਕਂ ਸਿਞ੍ਚਿਤੁਂ ਨਹਾਨਕੋਟ੍ਠਕਂ ਕਤ੍ਵਾ ਨਹਾਯਿਤੁਂ ਹਤ੍ਥਪਾਦਮੁਖਧੋਵਨਉਦਕਾਨਿ ਚ ਤਤ੍ਥ ਛਡ੍ਡੇਤੁਮ੍ਪਿ ਵਟ੍ਟਤਿ. ਮਹਾਪਚ੍ਚਰਿਯਂ ਪਨ ਕੁਰੁਨ੍ਦਿਯਞ੍ਚ ‘‘ਕਪ੍ਪਿਯਪਥਵਿਯਂ ਸਯਂ ਰੋਪੇਤੁਮ੍ਪਿ ਵਟ੍ਟਤੀ’’ਤਿ ਵੁਤ੍ਤਂ. ਆਰਾਮਾਦਿਅਤ੍ਥਾਯ ਪਨ ਰੋਪਿਤਸ੍ਸ ਵਾ ਰੋਪਾਪਿਤਸ੍ਸ ਵਾ ਫਲਂ ਪਰਿਭੁਞ੍ਜਿਤੁਮ੍ਪਿ ਵਟ੍ਟਤਿ.

੩੦. ਅਯਂ ਪਨ ਆਦਿਤੋ ਪਟ੍ਠਾਯ ਵਿਤ੍ਥਾਰੇਨ ਆਪਤ੍ਤਿਵਿਨਿਚ੍ਛਯੋ – ਕੁਲਦੂਸਨਤ੍ਥਾਯ ਅਕਪ੍ਪਿਯਪਥਵਿਯਂ ਮਾਲਾਵਚ੍ਛਂ ਰੋਪੇਨ੍ਤਸ੍ਸ ਪਾਚਿਤ੍ਤਿਯਞ੍ਚੇਵ ਦੁਕ੍ਕਟਞ੍ਚ, ਤਥਾ ਅਕਪ੍ਪਿਯਵੋਹਾਰੇਨ ਰੋਪਾਪੇਨ੍ਤਸ੍ਸ. ਕਪ੍ਪਿਯਪਥਵਿਯਂ ਰੋਪਨੇਪਿ ਰੋਪਾਪਨੇਪਿ ਦੁਕ੍ਕਟਮੇਵ. ਉਭਯਤ੍ਰਾਪਿ ਸਕਿਂ ਆਣਤ੍ਤਿਯਾ ਬਹੂਨਮ੍ਪਿ ਰੋਪਨੇ ਏਕਮੇਵ ਸਪਾਚਿਤ੍ਤਿਯਦੁਕ੍ਕਟਂ ਵਾ ਸੁਦ੍ਧਦੁਕ੍ਕਟਂ ਵਾ ਹੋਤਿ. ਪਰਿਭੋਗਤ੍ਥਾਯ ਕਪ੍ਪਿਯਭੂਮਿਯਂ ਵਾ ਅਕਪ੍ਪਿਯਭੂਮਿਯਂ ਵਾ ਕਪ੍ਪਿਯਵੋਹਾਰੇਨ ਰੋਪਾਪਨੇ ਅਨਾਪਤ੍ਤਿ. ਆਰਾਮਾਦਿਅਤ੍ਥਾਯਪਿ ਅਕਪ੍ਪਿਯਪਥਵਿਯਂ ਰੋਪੇਨ੍ਤਸ੍ਸ ਵਾ ਅਕਪ੍ਪਿਯਵਚਨੇਨ ਰੋਪਾਪੇਨ੍ਤਸ੍ਸ ਵਾ ਪਾਚਿਤ੍ਤਿਯਂ. ਅਯਂ ਪਨ ਨਯੋ ਮਹਾਅਟ੍ਠਕਥਾਯਂ ਨ ਸੁਟ੍ਠੁ ਵਿਭਤ੍ਤੋ, ਮਹਾਪਚ੍ਚਰਿਯਂ ਪਨ ਵਿਭਤ੍ਤੋਤਿ.

ਸਿਞ੍ਚਨਸਿਞ੍ਚਾਪਨੇ ਪਨ ਅਕਪ੍ਪਿਯਉਦਕੇਨ ਸਬ੍ਬਤ੍ਥ ਪਾਚਿਤ੍ਤਿਯਂ, ਕੁਲਦੂਸਨਪਰਿਭੋਗਤ੍ਥਾਯ ਦੁਕ੍ਕਟਮ੍ਪਿ. ਕਪ੍ਪਿਯੇਨ ਤੇਸਂਯੇਵ ਦ੍ਵਿਨ੍ਨਂ ਅਤ੍ਥਾਯ ਦੁਕ੍ਕਟਂ, ਪਰਿਭੋਗਤ੍ਥਾਯ ਚੇਤ੍ਥ ਕਪ੍ਪਿਯਵੋਹਾਰੇਨ ਸਿਞ੍ਚਾਪਨੇ ਅਨਾਪਤ੍ਤਿ. ਆਪਤ੍ਤਿਟ੍ਠਾਨੇ ਪਨ ਧਾਰਾਵਚ੍ਛੇਦਵਸੇਨ ਪਯੋਗਬਹੁਲਤਾਯ ਚ ਆਪਤ੍ਤਿਬਹੁਲਤਾ ਵੇਦਿਤਬ੍ਬਾ.

ਕੁਲਸਙ੍ਗਹਤ੍ਥਾਯ ਓਚਿਨਨੇ ਪੁਪ੍ਫਗਣਨਾਯ ਦੁਕ੍ਕਟਪਾਚਿਤ੍ਤਿਯਾਨਿ, ਅਞ੍ਞਤ੍ਥ ਪਾਚਿਤ੍ਤਿਯਾਨੇਵ. ਬਹੂਨਿ ਪਨ ਪੁਪ੍ਫਾਨਿ ਏਕਪਯੋਗੇਨ ਓਚਿਨਨ੍ਤੋ ਪਯੋਗਵਸੇਨ ਕਾਰੇਤਬ੍ਬੋ. ਓਚਿਨਾਪਨੇ ਕੁਲਦੂਸਨਤ੍ਥਾਯ ਸਕਿਂ ਆਣਤ੍ਤੋ ਬਹੁਮ੍ਪਿ ਓਚਿਨਾਤਿ, ਏਕਮੇਵ ਸਪਾਚਿਤ੍ਤਿਯਦੁਕ੍ਕਟਂ, ਅਞ੍ਞਤ੍ਰ ਪਾਚਿਤ੍ਤਿਯਮੇਵ.

੩੧. ਗਨ੍ਥਨਗਨ੍ਥਾਪਨੇਸੁ ਪਨ ਸਬ੍ਬਾਪਿ ਛ ਪੁਪ੍ਫਵਿਕਤਿਯੋ ਵੇਦਿਤਬ੍ਬਾ – ਗਨ੍ਥਿਮਂ ਗੋਪ੍ਫਿਮਂ ਵੇਧਿਮਂ ਵੇਠਿਮਂ ਪੂਰਿਮਂ ਵਾਯਿਮਨ੍ਤਿ. ਤਤ੍ਥ ਗਨ੍ਥਿਮਂ ਨਾਮ ਸਦਣ੍ਡਕੇਸੁ ਵਾ ਉਪ੍ਪਲਪਦੁਮਾਦੀਸੁ ਅਞ੍ਞੇਸੁ ਵਾ ਦੀਘਵਣ੍ਟੇਸੁ ਪੁਪ੍ਫੇਸੁ ਦਟ੍ਠਬ੍ਬਂ. ਦਣ੍ਡਕੇਨ ਵਾ ਦਣ੍ਡਕਂ, ਵਣ੍ਟੇਨ ਵਾ ਵਣ੍ਟਂ ਗਨ੍ਥੇਤ੍ਵਾ ਕਤਮੇਵ ਹਿ ਗਨ੍ਥਿਮਂ. ਤਂ ਭਿਕ੍ਖੁਸ੍ਸ ਵਾ ਭਿਕ੍ਖੁਨਿਯਾ ਵਾ ਕਾਤੁਮ੍ਪਿ ਅਕਪ੍ਪਿਯਵਚਨੇਨ ਕਾਰਾਪੇਤੁਮ੍ਪਿ ਨ ਵਟ੍ਟਤਿ, ‘‘ਏਵਂ ਜਾਨ, ਏਵਂ ਕਤੇ ਸੋਭੇਯ੍ਯ, ਯਥਾ ਏਤਾਨਿ ਪੁਪ੍ਫਾਨਿ ਨ ਵਿਕਿਰਿਯਨ੍ਤਿ, ਤਥਾ ਕਰੋਹੀ’’ਤਿਆਦਿਨਾ ਪਨ ਕਪ੍ਪਿਯਵਚਨੇਨ ਕਾਰਾਪੇਤੁਂ ਵਟ੍ਟਤਿ.

ਗੋਪ੍ਫਿਮਂ ਨਾਮ ਸੁਤ੍ਤੇਨ ਵਾ ਵਾਕਾਦੀਹਿ ਵਾ ਵਸ੍ਸਿਕਪੁਪ੍ਫਾਦੀਨਂ ਏਕਤੋਵਣ੍ਟਿਕਉਭਤੋਵਣ੍ਟਿਕਮਾਲਾਵਸੇਨ ਗੋਪ੍ਫਨਂ, ਵਾਕਂ ਵਾ ਰਜ੍ਜੁਂ ਵਾ ਦਿਗੁਣਂ ਕਤ੍ਵਾ ਤਤ੍ਥ ਅਵਣ੍ਟਕਾਨਿ ਨੀਪਪੁਪ੍ਫਾਦੀਨਿ ਪਵੇਸੇਤ੍ਵਾ ਪਟਿਪਾਟਿਯਾ ਬਨ੍ਧਨ੍ਤਿ, ਏਤਮ੍ਪਿ ਗੋਪ੍ਫਿਮਮੇਵ. ਸਬ੍ਬਂ ਪੁਰਿਮਨਯੇਨੇਵ ਨ ਵਟ੍ਟਤਿ.

ਵੇਧਿਮਂ ਨਾਮ ਸਵਣ੍ਟਕਾਨਿ ਵਸ੍ਸਿਕਪੁਪ੍ਫਾਦੀਨਿ ਵਣ੍ਟੇ, ਅਵਣ੍ਟਕਾਨਿ ਵਕੁਲਪੁਪ੍ਫਾਦੀਨਿ ਅਤ੍ਤਨੋ ਛਿਦ੍ਦੇਸੁ ਸੂਚਿਤਾਲਹੀਰਾਦੀਹਿ ਵਿਨਿਵਿਜ੍ਝਿਤ੍ਵਾ ਆਵੁਨਨ੍ਤਿ, ਏਤਂ ਵੇਧਿਮਂ ਨਾਮ. ਤਂ ਪੁਰਿਮਨਯੇਨੇਵ ਨ ਵਟ੍ਟਤਿ. ਕੇਚਿ ਪਨ ਕਦਲਿਕ੍ਖਨ੍ਧਮ੍ਹਿ ਕਣ੍ਟਕੇ ਵਾ ਤਾਲਹੀਰਾਦੀਨਿ ਵਾ ਪਵੇਸੇਤ੍ਵਾ ਤਤ੍ਥ ਪੁਪ੍ਫਾਨਿ ਵਿਨਿਵਿਜ੍ਝਿਤ੍ਵਾ ਠਪੇਨ੍ਤਿ, ਕੇਚਿ ਕਣ੍ਟਕਸਾਖਾਸੁ, ਕੇਚਿ ਪੁਪ੍ਫਛਤ੍ਤਪੁਪ੍ਫਕੂਟਾਗਾਰਕਰਣਤ੍ਥਂ ਛਤ੍ਤੇ ਚ ਭਿਤ੍ਤਿਯਞ੍ਚ ਪਵੇਸੇਤ੍ਵਾ ਠਪਿਤਕਣ੍ਟਕੇਸੁ, ਕੇਚਿ ਧਮ੍ਮਾਸਨਵਿਤਾਨੇ ਬਦ੍ਧਕਣ੍ਟਕੇਸੁ, ਕੇਚਿ ਕਣਿਕਾਰਪੁਪ੍ਫਾਦੀਨਿ ਸਲਾਕਾਹਿ ਵਿਜ੍ਝਨ੍ਤਿ, ਛਤ੍ਤਾਧਿਛਤ੍ਤਂ ਵਿਯ ਕਰੋਨ੍ਤਿ, ਤਂ ਅਤਿਓਲ਼ਾਰਿਕਮੇਵ. ਪੁਪ੍ਫਵਿਜ੍ਝਨਤ੍ਥਂ ਪਨ ਧਮ੍ਮਾਸਨਵਿਤਾਨੇ ਕਣ੍ਟਕਮ੍ਪਿ ਬਨ੍ਧਿਤੁਂ ਕਣ੍ਟਕਾਦੀਹਿ ਵਾ ਏਕਪੁਪ੍ਫਮ੍ਪਿ ਵਿਜ੍ਝਿਤੁਂ ਪੁਪ੍ਫੇਯੇਵ ਵਾ ਪੁਪ੍ਫਂ ਪਵੇਸੇਤੁਂ ਨ ਵਟ੍ਟਤਿ. ਜਾਲਵਿਤਾਨਵੇਦਿਕਨਾਗਦਨ੍ਤਕਪੁਪ੍ਫਪਟਿਚ੍ਛਕਤਾਲਪਣ੍ਣਗੁਲ਼ਕਾਦੀਨਂ ਪਨ ਛਿਦ੍ਦੇਸੁ ਅਸੋਕਪਿਣ੍ਡਿਯਾ ਵਾ ਅਨ੍ਤਰੇਸੁ ਪੁਪ੍ਫਾਨਿ ਪਵੇਸੇਤੁਂ ਨ ਦੋਸੋ. ਨ ਹੇਤਂ ਵੇਧਿਮਂ ਹੋਤਿ. ਧਮ੍ਮਰਜ੍ਜੁਯਮ੍ਪਿ ਏਸੇਵ ਨਯੋ.

ਵੇਠਿਮਂ ਨਾਮ ਪੁਪ੍ਫਦਾਮਪੁਪ੍ਫਹਤ੍ਥਕੇਸੁ ਦਟ੍ਠਬ੍ਬਂ. ਕੇਚਿ ਹਿ ਮਤ੍ਥਕਦਾਮਂ ਕਰੋਨ੍ਤਾ ਹੇਟ੍ਠਾ ਘਟਕਾਕਾਰਂ ਦਸ੍ਸੇਤੁਂ ਪੁਪ੍ਫੇਹਿ ਵੇਠੇਨ੍ਤਿ, ਕੇਚਿ ਅਟ੍ਠ ਅਟ੍ਠ ਵਾ ਦਸ ਦਸ ਵਾ ਉਪ੍ਪਲਪੁਪ੍ਫਾਦੀਨਿ ਸੁਤ੍ਤੇਨ ਵਾ ਵਾਕੇਨ ਵਾ ਦਣ੍ਡਕੇਸੁ ਬਨ੍ਧਿਤ੍ਵਾ ਉਪ੍ਪਲਹਤ੍ਥਕੇ ਵਾ ਪਦੁਮਹਤ੍ਥਕੇ ਵਾ ਕਰੋਨ੍ਤਿ, ਤਂ ਸਬ੍ਬਂ ਪੁਰਿਮਨਯੇਨੇਵ ਨ ਵਟ੍ਟਤਿ. ਸਾਮਣੇਰੇਹਿ ਉਪ੍ਪਾਟੇਤ੍ਵਾ ਥਲੇ ਠਪਿਤਉਪ੍ਪਲਾਦੀਨਿ ਕਾਸਾਵੇਨ ਭਣ੍ਡਿਕਮ੍ਪਿ ਬਨ੍ਧਿਤੁਂ ਨ ਵਟ੍ਟਤਿ. ਤੇਸਂਯੇਵ ਪਨ ਵਾਕੇਨ ਵਾ ਦਣ੍ਡਕੇਨ ਵਾ ਬਨ੍ਧਿਤੁਂ ਅਂਸਭਣ੍ਡਿਕਂ ਵਾ ਕਾਤੁਂ ਵਟ੍ਟਤਿ. ਅਂਸਭਣ੍ਡਿਕਂ ਨਾਮ ਖਨ੍ਧੇ ਠਪਿਤਕਾਸਾਵਸ੍ਸ ਉਭੋ ਅਨ੍ਤੇ ਆਹਰਿਤ੍ਵਾ ਭਣ੍ਡਿਕਂ ਕਤ੍ਵਾ ਤਸ੍ਮਿਂ ਪਸਿਬ੍ਬਕੇ ਵਿਯ ਪੁਪ੍ਫਾਨਿ ਪਕ੍ਖਿਪਨ੍ਤਿ, ਅਯਂ ਵੁਚ੍ਚਤਿ ਅਂਸਭਣ੍ਡਿਕਾ, ਏਤਂ ਕਾਤੁਂ ਵਟ੍ਟਤਿ. ਦਣ੍ਡਕੇਹਿ ਪਦੁਮਿਨਿਪਣ੍ਣਂ ਵਿਜ੍ਝਿਤ੍ਵਾ ਉਪ੍ਪਲਾਦੀਨਿ ਪਣ੍ਣੇਨ ਵੇਠੇਤ੍ਵਾ ਗਣ੍ਹਨ੍ਤਿ, ਤਤ੍ਰਾਪਿ ਪੁਪ੍ਫਾਨਂ ਉਪਰਿ ਪਦੁਮਿਨਿਪਣ੍ਣਮੇਵ ਬਨ੍ਧਿਤੁਂ ਵਟ੍ਟਤਿ, ਹੇਟ੍ਠਾ ਦਣ੍ਡਕਂ ਪਨ ਬਨ੍ਧਿਤੁਂ ਨ ਵਟ੍ਟਤਿ.

ਪੂਰਿਮਂ ਨਾਮ ਮਾਲਾਗੁਣੇ ਚ ਪੁਪ੍ਫਪਟੇ ਚ ਦਟ੍ਠਬ੍ਬਂ. ਯੋ ਹਿ ਮਾਲਾਗੁਣੇਨ ਚੇਤਿਯਂ ਵਾ ਬੋਧਿਂ ਵਾ ਵੇਦਿਕਂ ਵਾ ਪਰਿਕ੍ਖਿਪਨ੍ਤੋ ਪੁਨ ਆਨੇਤ੍ਵਾ ਪੁਰਿਮਟ੍ਠਾਨਂ ਅਤਿਕ੍ਕਾਮੇਤਿ, ਏਤ੍ਤਾਵਤਾ ਪੂਰਿਮਂ ਨਾਮ ਹੋਤਿ, ਕੋ ਪਨ ਵਾਦੋ ਅਨੇਕਕ੍ਖਤ੍ਤੁਂ ਪਰਿਕ੍ਖਿਪਨ੍ਤਸ੍ਸ. ਨਾਗਦਨ੍ਤਕਨ੍ਤਰੇਹਿ ਪਵੇਸੇਤ੍ਵਾ ਹਰਨ੍ਤੋ ਓਲਮ੍ਬਕਂ ਕਤ੍ਵਾ ਪੁਨ ਨਾਗਦਨ੍ਤਕਂ ਪਰਿਕ੍ਖਿਪਤਿ, ਏਤਮ੍ਪਿ ਪੂਰਿਮਂ ਨਾਮ. ਨਾਗਦਨ੍ਤਕੇ ਪਨ ਪੁਪ੍ਫਵਲਯਂ ਪਵੇਸੇਤੁਂ ਵਟ੍ਟਤਿ. ਮਾਲਾਗੁਣੇਹਿ ਪੁਪ੍ਫਪਟਂ ਕਰੋਨ੍ਤਿ, ਤਤ੍ਰਾਪਿ ਏਕਮੇਵ ਮਾਲਾਗੁਣਂ ਹਰਿਤੁਂ ਵਟ੍ਟਤਿ. ਪੁਨ ਪਚ੍ਚਾਹਰਤੋ ਪੂਰਿਮਮੇਵ ਹੋਤਿ. ਤਂ ਸਬ੍ਬਂ ਪੁਰਿਮਨਯੇਨੇਵ ਨ ਵਟ੍ਟਤਿ. ਮਾਲਾਗੁਣੇਹਿ ਪਨ ਬਹੂਹਿਪਿ ਕਤਂ ਪੁਪ੍ਫਦਾਮਂ ਲਭਿਤ੍ਵਾ ਆਸਨਮਤ੍ਥਕਾਦੀਸੁ ਬਨ੍ਧਿਤੁਂ ਵਟ੍ਟਤਿ. ਅਤਿਦੀਘਂ ਪਨ ਮਾਲਾਗੁਣਂ ਏਕਵਾਰਂ ਹਰਿਤ੍ਵਾ ਪਰਿਕ੍ਖਿਪਿਤ੍ਵਾ ਪੁਨ ਇਤਰਸ੍ਸ ਭਿਕ੍ਖੁਨੋ ਦਾਤੁਂ ਵਟ੍ਟਤਿ, ਤੇਨਪਿ ਤਥੇਵ ਕਾਤੁਂ ਵਟ੍ਟਤਿ.

ਵਾਯਿਮਂ ਨਾਮ ਪੁਪ੍ਫਜਾਲਪੁਪ੍ਫਪਟਪੁਪ੍ਫਰੂਪੇਸੁ ਦਟ੍ਠਬ੍ਬਂ. ਚੇਤਿਯੇ ਪੁਪ੍ਫਜਾਲਂ ਕਰੋਨ੍ਤਸ੍ਸ ਏਕਮੇਕਮ੍ਹਿ ਜਾਲਛਿਦ੍ਦਕੇ ਦੁਕ੍ਕਟਂ. ਭਿਤ੍ਤਿਛਤ੍ਤਬੋਧਿਤ੍ਥਮ੍ਭਾਦੀਸੁਪਿ ਏਸੇਵ ਨਯੋ. ਪੁਪ੍ਫਪਟਂ ਪਨ ਪਰੇਹਿ ਪੂਰਿਤਮ੍ਪਿ ਵਾਯਿਤੁਂ ਨ ਲਬ੍ਭਤਿ. ਗੋਪ੍ਫਿਮਪੁਪ੍ਫੇਹੇਵ ਹਤ੍ਥਿਅਸ੍ਸਾਦਿਰੂਪਕਾਨਿ ਕਰੋਨ੍ਤਿ, ਤਾਨਿਪਿ ਵਾਯਿਮਟ੍ਠਾਨੇ ਤਿਟ੍ਠਨ੍ਤਿ. ਪੁਰਿਮਨਯੇਨੇਵ ਸਬ੍ਬਂ ਨ ਵਟ੍ਟਤਿ. ਅਞ੍ਞੇਹਿ ਕਤਪਰਿਚ੍ਛੇਦੇ ਪਨ ਪੁਪ੍ਫਾਨਿ ਠਪੇਨ੍ਤੇਨ ਹਤ੍ਥਿਅਸ੍ਸਾਦਿਰੂਪਕਮ੍ਪਿ ਕਾਤੁਂ ਵਟ੍ਟਤਿ. ਮਹਾਪਚ੍ਚਰਿਯਂ ਪਨ ਕਲ਼ਮ੍ਬਕੇਨ ਅਡ੍ਢਚਨ੍ਦਕੇਨ ਚ ਸਦ੍ਧਿਂ ਅਟ੍ਠ ਪੁਪ੍ਫਵਿਕਤਿਯੋ ਵੁਤ੍ਤਾ.

੩੨. ਤਤ੍ਥ ਕਲ਼ਮ੍ਬਕੋਤਿ ਅਡ੍ਢਚਨ੍ਦਕਨ੍ਤਰੇ ਘਟਿਕਦਾਮਓਲਮ੍ਬਕੋ ਵੁਤ੍ਤੋ. ਅਡ੍ਢਚਨ੍ਦਕੋਤਿ ਅਡ੍ਢਚਨ੍ਦਾਕਾਰੇਨ ਮਾਲਾਗੁਣਪਰਿਕ੍ਖੇਪੋ. ਤਦੁਭਯਮ੍ਪਿ ਪੂਰਿਮੇਯੇਵ ਪਵਿਟ੍ਠਂ. ਕੁਰੁਨ੍ਦਿਯਂ ਪਨ ‘‘ਦ੍ਵੇ ਤਯੋ ਮਾਲਾਗੁਣੇ ਏਕਤੋ ਕਤ੍ਵਾ ਪੁਪ੍ਫਦਾਮਕਰਣਮ੍ਪਿ ਵਾਯਿਮਂਯੇਵਾ’’ਤਿ ਵੁਤ੍ਤਂ. ਤਮ੍ਪਿ ਇਧ ਪੂਰਿਮਟ੍ਠਾਨੇਯੇਵ ਪਵਿਟ੍ਠਂ. ਨ ਕੇਵਲਞ੍ਚ ਪੁਪ੍ਫਦਾਮਮੇਵ, ਪਿਟ੍ਠਮਯਦਾਮਮ੍ਪਿ ਗੇਣ੍ਡੁਕਪੁਪ੍ਫਦਾਮਮ੍ਪਿ ਕੁਰੁਨ੍ਦਿਯਂ ਵੁਤ੍ਤਂ. ਖਰਪਤ੍ਤਦਾਮਮ੍ਪਿ ਸਿਕ੍ਖਾਪਦਸ੍ਸ ਸਾਧਾਰਣਤ੍ਤਾ ਭਿਕ੍ਖੂਨਮ੍ਪਿ ਭਿਕ੍ਖੁਨੀਨਮ੍ਪਿ ਨੇਵ ਕਾਤੁਂ, ਨ ਕਾਰਾਪੇਤੁਂ ਵਟ੍ਟਤਿ, ਪੂਜਾਨਿਮਿਤ੍ਤਂ ਪਨ ਕਪ੍ਪਿਯਵਚਨਂ ਸਬ੍ਬਤ੍ਥ ਵਤ੍ਤੁਂ ਵਟ੍ਟਤਿ. ਪਰਿਯਾਯਓਭਾਸਨਿਮਿਤ੍ਤਕਮ੍ਮਾਨਿ ਵਟ੍ਟਨ੍ਤਿਯੇਵ.

ਯੋ ਹਰਿਤ੍ਵਾ ਵਾ ਹਰਾਪੇਤ੍ਵਾ ਵਾ ਪਕ੍ਕੋਸਿਤ੍ਵਾ ਵਾ ਪਕ੍ਕੋਸਾਪੇਤ੍ਵਾ ਵਾ ਸਯਂ ਵਾ ਉਪਗਤਾਨਂ ਯਂ ਕਿਞ੍ਚਿ ਅਤ੍ਤਨੋ ਸਨ੍ਤਕਂ ਪੁਪ੍ਫਂ ਕੁਲਸਙ੍ਗਹਤ੍ਥਾਯ ਦੇਤਿ, ਤਸ੍ਸ ਦੁਕ੍ਕਟਂ, ਪਰਸਨ੍ਤਕਂ ਦੇਤਿ, ਦੁਕ੍ਕਟਮੇਵ. ਥੇਯ੍ਯਚਿਤ੍ਤੇਨ ਦੇਤਿ, ਭਣ੍ਡਗ੍ਘੇਨ ਕਾਰੇਤਬ੍ਬੋ. ਏਸ ਨਯੋ ਸਙ੍ਘਿਕੇਪਿ. ਅਯਂ ਪਨ ਵਿਸੇਸੋ – ਸੇਨਾਸਨਤ੍ਥਾਯ ਨਿਯਮਿਤਂ ਇਸ੍ਸਰਵਤਾਯ ਦਦਤੋ ਥੁਲ੍ਲਚ੍ਚਯਨ੍ਤਿ.

੩੩. ਪੁਪ੍ਫਂ ਨਾਮ ਕਸ੍ਸ ਦਾਤੁਂ ਵਟ੍ਟਤਿ, ਕਸ੍ਸ ਨ ਵਟ੍ਟਤੀਤਿ? ਮਾਤਾਪਿਤੂਨਂ ਤਾਵ ਹਰਿਤ੍ਵਾਪਿ ਹਰਾਪੇਤ੍ਵਾਪਿ ਪਕ੍ਕੋਸਿਤ੍ਵਾਪਿ ਪਕ੍ਕੋਸਾਪੇਤ੍ਵਾਪਿ ਦਾਤੁਂ ਵਟ੍ਟਤਿ, ਸੇਸਞਾਤਕਾਨਂ ਪਕ੍ਕੋਸਾਪੇਤ੍ਵਾਵ. ਤਞ੍ਚ ਖੋ ਵਤ੍ਥੁਪੂਜਨਤ੍ਥਾਯ, ਮਣ੍ਡਨਤ੍ਥਾਯ ਪਨ ਸਿਵਲਿਙ੍ਗਾਦਿਪੂਜਨਤ੍ਥਾਯ ਵਾ ਕਸ੍ਸਚਿਪਿ ਦਾਤੁਂ ਨ ਵਟ੍ਟਤਿ. ਮਾਤਾਪਿਤੂਨਞ੍ਚ ਹਰਾਪੇਨ੍ਤੇਨ ਞਾਤਿਸਾਮਣੇਰੇਹੇਵ ਹਰਾਪੇਤਬ੍ਬਂ. ਇਤਰੇ ਪਨ ਯਦਿ ਸਯਮੇਵ ਇਚ੍ਛਨ੍ਤਿ, ਵਟ੍ਟਤਿ. ਸਮ੍ਮਤੇਨ ਪੁਪ੍ਫਭਾਜਕੇਨ ਪੁਪ੍ਫਭਾਜਨਕਾਲੇ ਸਮ੍ਪਤ੍ਤਾਨਂ ਸਾਮਣੇਰਾਨਂ ਉਪਡ੍ਢਭਾਗਂ ਦਾਤੁਂ ਵਟ੍ਟਤਿ. ਕੁਰੁਨ੍ਦਿਯਂ ਪਨ ‘‘ਸਮ੍ਪਤ੍ਤਗਿਹੀਨਂ ਉਪਡ੍ਢਭਾਗਂ’’, ਮਹਾਪਚ੍ਚਰਿਯਂ ‘‘ਚੂਲ਼ਕਂ ਦਾਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਅਸਮ੍ਮਤੇਨ ਅਪਲੋਕੇਤ੍ਵਾ ਦਾਤਬ੍ਬਂ. ਆਚਰਿਯੁਪਜ੍ਝਾਯੇਸੁ ਸਗਾਰਵਾ ਸਾਮਣੇਰਾ ਬਹੂਨਿ ਪੁਪ੍ਫਾਨਿ ਆਹਰਿਤ੍ਵਾ ਰਾਸਿਂ ਕਤ੍ਵਾ ਠਪੇਨ੍ਤਿ, ਥੇਰਾ ਪਾਤੋਵ ਸਮ੍ਪਤ੍ਤਾਨਂ ਸਦ੍ਧਿਵਿਹਾਰਿਕਾਦੀਨਂ ਉਪਾਸਕਾਦੀਨਂ ਵਾ ‘‘ਤ੍ਵਂ ਇਦਂ ਗਣ੍ਹ, ਤ੍ਵਂ ਇਦਂ ਗਣ੍ਹਾ’’ਤਿ ਦੇਨ੍ਤਿ, ਪੁਪ੍ਫਦਾਨਂ ਨਾਮ ਨ ਹੋਤਿ. ‘‘ਚੇਤਿਯਂ ਪੂਜੇਸ੍ਸਾਮਾ’’ਤਿ ਗਹੇਤ੍ਵਾ ਗਚ੍ਛਨ੍ਤਾਪਿ ਪੂਜਂ ਕਰੋਨ੍ਤਾਪਿ ਤਤ੍ਥ ਤਤ੍ਥ ਸਮ੍ਪਤ੍ਤਾਨਂ ਚੇਤਿਯਪੂਜਨਤ੍ਥਾਯ ਦੇਨ੍ਤਿ, ਏਤਮ੍ਪਿ ਪੁਪ੍ਫਦਾਨਂ ਨਾਮ ਨ ਹੋਤਿ. ਉਪਾਸਕੇ ਅਕ੍ਕਪੁਪ੍ਫਾਦੀਹਿ ਪੂਜੇਨ੍ਤੇ ਦਿਸ੍ਵਾ ‘‘ਵਿਹਾਰੇ ਕਣਿਕਾਰਪੁਪ੍ਫਾਦੀਨਿ ਅਤ੍ਥਿ, ਉਪਾਸਕਾ ਤਾਨਿ ਗਹੇਤ੍ਵਾ ਪੂਜੇਥਾ’’ਤਿ ਵਤ੍ਤੁਮ੍ਪਿ ਵਟ੍ਟਤਿ. ਭਿਕ੍ਖੂ ਪੁਪ੍ਫਪੂਜਂ ਕਤ੍ਵਾ ਦਿਵਾਤਰਂ ਗਾਮਂ ਪਵਿਟ੍ਠੇ ‘‘ਕਿਂ, ਭਨ੍ਤੇ, ਅਤਿਦਿਵਾ ਪਵਿਟ੍ਠਤ੍ਥਾ’’ਤਿ ਪੁਚ੍ਛਨ੍ਤਿ, ‘‘ਵਿਹਾਰੇ ਪੁਪ੍ਫਾਨਿ ਬਹੂਨਿ, ਪੂਜਂ ਅਕਰਿਮ੍ਹਾ’’ਤਿ ਵਦਨ੍ਤਿ. ਮਨੁਸ੍ਸਾ ‘‘ਬਹੂਨਿ ਕਿਰ ਵਿਹਾਰੇ ਪੁਪ੍ਫਾਨੀ’’ਤਿ ਪੁਨਦਿਵਸੇ ਪਹੂਤਂ ਖਾਦਨੀਯਂ ਭੋਜਨੀਯਂ ਗਹੇਤ੍ਵਾ ਵਿਹਾਰਂ ਗਨ੍ਤ੍ਵਾ ਪੁਪ੍ਫਪੂਜਞ੍ਚ ਕਰੋਨ੍ਤਿ ਦਾਨਞ੍ਚ ਦੇਨ੍ਤਿ, ਵਟ੍ਟਤਿ.

੩੪. ਮਨੁਸ੍ਸਾ ‘‘ਮਯਂ, ਭਨ੍ਤੇ, ਅਸੁਕਦਿਵਸਂ ਨਾਮ ਪੂਜੇਸ੍ਸਾਮਾ’’ਤਿ ਪੁਪ੍ਫਵਾਰਂ ਯਾਚਿਤ੍ਵਾ ਅਨੁਞ੍ਞਾਤਦਿਵਸੇ ਆਗਚ੍ਛਨ੍ਤਿ, ਸਾਮਣੇਰੇਹਿ ਚ ਪਗੇਵ ਪੁਪ੍ਫਾਨਿ ਓਚਿਨਿਤ੍ਵਾ ਠਪਿਤਾਨਿ ਹੋਨ੍ਤਿ, ਤੇ ਰੁਕ੍ਖੇਸੁ ਪੁਪ੍ਫਾਨਿ ਅਪਸ੍ਸਨ੍ਤਾ ‘‘ਕੁਹਿਂ, ਭਨ੍ਤੇ, ਪੁਪ੍ਫਾਨੀ’’ਤਿ ਵਦਨ੍ਤਿ, ਸਾਮਣੇਰੇਹਿ ਓਚਿਨਿਤ੍ਵਾ ਠਪਿਤਾਨਿ, ਤੁਮ੍ਹੇ ਪਨ ਪੂਜੇਤ੍ਵਾ ਗਚ੍ਛਥ, ਸਙ੍ਘੋ ਅਞ੍ਞਂ ਦਿਵਸਂ ਪੂਜੇਸ੍ਸਤੀਤਿ. ਤੇ ਪੂਜੇਤ੍ਵਾ ਦਾਨਂ ਦਤ੍ਵਾ ਗਚ੍ਛਨ੍ਤਿ, ਵਟ੍ਟਤਿ. ਮਹਾਪਚ੍ਚਰਿਯਂ ਪਨ ਕੁਰੁਨ੍ਦਿਯਞ੍ਚ ‘‘ਥੇਰਾ ਸਾਮਣੇਰੇਹਿ ਦਾਪੇਤੁਂ ਨ ਲਭਨ੍ਤਿ, ਸਚੇ ਸਯਮੇਵ ਤਾਨਿ ਪੁਪ੍ਫਾਨਿ ਤੇਸਂ ਦੇਨ੍ਤਿ, ਵਟ੍ਟਤਿ. ਥੇਰੇਹਿ ਪਨ ‘ਸਾਮਣੇਰੇਹਿ ਓਚਿਨਿਤ੍ਵਾ ਠਪਿਤਾਨੀ’ਤਿ ਏਤ੍ਤਕਮੇਵ ਵਤ੍ਤਬ੍ਬ’’ਨ੍ਤਿ ਵੁਤ੍ਤਂ. ਸਚੇ ਪਨ ਪੁਪ੍ਫਵਾਰਂ ਯਾਚਿਤ੍ਵਾ ਅਨੋਚਿਤੇਸੁ ਪੁਪ੍ਫੇਸੁ ਯਾਗੁਭਤ੍ਤਾਦੀਨਿ ਆਦਾਯ ਆਗਨ੍ਤ੍ਵਾ ਸਾਮਣੇਰੇ ‘‘ਓਚਿਨਿਤ੍ਵਾ ਦੇਥਾ’’ਤਿ ਵਦਨ੍ਤਿ, ਞਾਭਿਸਾਮਣੇਰਾਨਂਯੇਵ ਓਚਿਨਿਤ੍ਵਾ ਦਾਤੁਂ ਵਟ੍ਟਤਿ. ਅਞ੍ਞਾਤਕੇ ਉਕ੍ਖਿਪਿਤ੍ਵਾ ਰੁਕ੍ਖਸਾਖਾਯ ਠਪੇਨ੍ਤਿ, ਨ ਓਰੋਹਿਤ੍ਵਾ ਪਲਾਯਿਤਬ੍ਬਂ, ਓਚਿਨਿਤ੍ਵਾ ਦਾਤੁਂ ਵਟ੍ਟਤਿ. ਸਚੇ ਪਨ ਕੋਚਿ ਧਮ੍ਮਕਥਿਕੋ ‘‘ਬਹੂਨਿ ਉਪਾਸਕਾ ਵਿਹਾਰੇ ਪੁਪ੍ਫਾਨਿ, ਯਾਗੁਭਤ੍ਤਾਦੀਨਿ ਆਦਾਯ ਗਨ੍ਤ੍ਵਾ ਪੁਪ੍ਫਪੂਜਂ ਕਰੋਥਾ’’ਤਿ ਵਦਤਿ, ਤਸ੍ਸੇਵ ਨ ਕਪ੍ਪਤੀਤਿ ਮਹਾਪਚ੍ਚਰਿਯਞ੍ਚ ਕੁਰੁਨ੍ਦਿਯਞ੍ਚ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ‘‘ਏਤਂ ਅਕਪ੍ਪਿਯਂ ਨ ਵਟ੍ਟਤੀ’’ਤਿ ਅਵਿਸੇਸੇਨ ਵੁਤ੍ਤਂ.

੩੫. ਫਲਮ੍ਪਿ ਅਤ੍ਤਨੋ ਸਨ੍ਤਕਂ ਵੁਤ੍ਤਨਯੇਨੇਵ ਮਾਤਾਪਿਤੂਨਞ੍ਚ ਸੇਸਞਾਤੀਨਞ੍ਚ ਦਾਤੁਂ ਵਟ੍ਟਤਿ. ਕੁਲਸਙ੍ਗਹਤ੍ਥਾਯ ਪਨ ਦੇਨ੍ਤਸ੍ਸ ਵੁਤ੍ਤਨਯੇਨੇਵ ਅਤ੍ਤਨੋ ਸਨ੍ਤਕੇ ਪਰਸਨ੍ਤਕੇ ਸਙ੍ਘਿਕੇ ਸੇਨਾਸਨਤ੍ਥਾਯ ਨਿਯਮਿਤੇ ਚ ਦੁਕ੍ਕਟਾਦੀਨਿ ਵੇਦਿਤਬ੍ਬਾਨਿ. ਅਤ੍ਤਨੋ ਸਨ੍ਤਕਂਯੇਵ ਗਿਲਾਨਮਨੁਸ੍ਸਾਨਂ ਵਾ ਸਮ੍ਪਤ੍ਤਇਸ੍ਸਰਾਨਂ ਵਾ ਖੀਣਪਰਿਬ੍ਬਯਾਨਂ ਵਾ ਦਾਤੁਂ ਵਟ੍ਟਤਿ, ਫਲਦਾਨਂ ਨ ਹੋਤਿ. ਫਲਭਾਜਕੇਨਪਿ ਸਮ੍ਮਤੇਨ ਸਙ੍ਘਸ੍ਸ ਫਲਭਾਜਨਕਾਲੇ ਸਮ੍ਪਤ੍ਤਮਨੁਸ੍ਸਾਨਂ ਉਪਡ੍ਢਭਾਗਂ ਦਾਤੁਂ ਵਟ੍ਟਤਿ, ਅਸਮ੍ਮਤੇਨ ਅਪਲੋਕੇਤ੍ਵਾ ਦਾਤਬ੍ਬਂ. ਸਙ੍ਘਾਰਾਮੇਪਿ ਫਲਪਰਿਚ੍ਛੇਦੇਨ ਵਾ ਰੁਕ੍ਖਪਰਿਚ੍ਛੇਦੇਨ ਵਾ ਕਤਿਕਾ ਕਾਤਬ੍ਬਾ ‘‘ਤਤੋ ਗਿਲਾਨਮਨੁਸ੍ਸਾਨਂ ਵਾ ਅਞ੍ਞੇਸਂ ਵਾ ਫਲਂ ਯਾਚਨ੍ਤਾਨਂ ਯਥਾਪਰਿਚ੍ਛੇਦੇਨ ਚਤ੍ਤਾਰਿ ਪਞ੍ਚ ਫਲਾਨਿ ਦਾਤਬ੍ਬਾਨਿ, ਰੁਕ੍ਖਾ ਵਾ ਦਸ੍ਸੇਤਬ੍ਬਾ ‘ਇਤੋ ਗਹੇਤੁਂ ਲਬ੍ਭਤੀ’’’ਤਿ. ‘‘ਇਧ ਫਲਾਨਿ ਸੁਨ੍ਦਰਾਨਿ, ਇਤੋ ਗਣ੍ਹਥਾ’’ਤਿ ਏਵਂ ਪਨ ਨ ਵਤ੍ਤਬ੍ਬਂ. ਅਤ੍ਤਨੋ ਸਨ੍ਤਕਂ ਸਿਰੀਸਚੁਣ੍ਣਂ ਵਾ ਅਞ੍ਞਂ ਵਾ ਯਂ ਕਿਞ੍ਚਿ ਕਸਾਵਂ ਕੁਲਸਙ੍ਗਹਤ੍ਥਾਯ ਦੇਤਿ, ਦੁਕ੍ਕਟਂ. ਪਰਸਨ੍ਤਕਾਦੀਸੁਪਿ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ. ਅਯਂ ਪਨ ਵਿਸੇਸੋ – ਸਙ੍ਘਸ੍ਸ ਰਕ੍ਖਿਤਗੋਪਿਤਾਪਿ ਰੁਕ੍ਖਛਲ੍ਲਿ ਗਰੁਭਣ੍ਡਮੇਵਾਤਿ. ਮਤ੍ਤਿਕਦਨ੍ਤਕਟ੍ਠਵੇਲ਼ੁਪਣ੍ਣੇਸੁਪਿ ਗਰੁਭਣ੍ਡੂਪਗਂ ਞਤ੍ਵਾ ਚੁਣ੍ਣੇ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ.

੩੬. ਜਙ੍ਘਪੇਸਨਿਯਨ੍ਤਿ ਗਿਹੀਨਂ ਦੂਤੇਯ੍ਯਂ ਸਾਸਨਹਰਣਕਮ੍ਮਂ ਵੁਚ੍ਚਤਿ, ਤਂ ਨ ਕਾਤਬ੍ਬਂ. ਗਿਹੀਨਞ੍ਹਿ ਸਾਸਨਂ ਗਹੇਤ੍ਵਾ ਗਚ੍ਛਨ੍ਤਸ੍ਸ ਪਦੇ ਪਦੇ ਦੁਕ੍ਕਟਂ. ਤਂ ਕਮ੍ਮਂ ਨਿਸ੍ਸਾਯ ਲਦ੍ਧਭੋਜਨਂ ਭੁਞ੍ਜਨ੍ਤਸ੍ਸਪਿ ਅਜ੍ਝੋਹਾਰੇ ਅਜ੍ਝੋਹਾਰੇ ਦੁਕ੍ਕਟਂ. ਪਠਮਂ ਸਾਸਨਂ ਅਗ੍ਗਹੇਤ੍ਵਾਪਿ ਪਚ੍ਛਾ ‘‘ਅਯਂ ਦਾਨਿ ਸੋ ਗਾਮੋ, ਹਨ੍ਦ ਨਂ ਸਾਸਨਂ ਆਰੋਚੇਮੀ’’ਤਿ ਮਗ੍ਗਾ ਓਕ੍ਕਮਨ੍ਤਸ੍ਸਪਿ ਪਦੇ ਪਦੇ ਦੁਕ੍ਕਟਂ. ਸਾਸਨਂ ਆਰੋਚੇਤ੍ਵਾ ਲਦ੍ਧਭੋਜਨਂ ਭੁਞ੍ਜਤੋ ਪੁਰਿਮਨਯੇਨੇਵ ਦੁਕ੍ਕਟਂ. ਸਾਸਨਂ ਅਗ੍ਗਹੇਤ੍ਵਾ ਆਗਤੇਨ ਪਨ ‘‘ਭਨ੍ਤੇ, ਤਸ੍ਮਿਂ ਗਾਮੇ ਇਤ੍ਥਨ੍ਨਾਮਸ੍ਸ ਕਾ ਪਵਤ੍ਤੀ’’ਤਿ ਪੁਚ੍ਛਿਯਮਾਨੇਨ ਕਥੇਤੁਂ ਵਟ੍ਟਤਿ, ਪੁਚ੍ਛਿਤਪਞ੍ਹੇ ਦੋਸੋ ਨਤ੍ਥਿ. ਪਞ੍ਚਨ੍ਨਂ ਪਨ ਸਹਧਮ੍ਮਿਕਾਨਂ ਮਾਤਾਪਿਤੂਨਂ ਪਣ੍ਡੁਪਲਾਸਸ੍ਸ ਅਤ੍ਤਨੋ ਵੇਯ੍ਯਾਵਚ੍ਚਕਰਸ੍ਸ ਸਾਸਨਂ ਹਰਿਤੁਂ ਵਟ੍ਟਤਿ, ਗਿਹੀਨਞ੍ਚ ਕਪ੍ਪਿਯਸਾਸਨਂ, ਤਸ੍ਮਾ ‘‘ਮਮ ਵਚਨੇਨ ਭਗਵਤੋ ਪਾਦੇ ਵਨ੍ਦਥਾ’’ਤਿ ਵਾ ‘‘ਚੇਤਿਯਂ ਪਟਿਮਂ ਬੋਧਿਂ ਸਙ੍ਘਤ੍ਥੇਰਂ ਵਨ੍ਦਥਾ’’ਤਿ ਵਾ ‘‘ਚੇਤਿਯੇ ਗਨ੍ਧਪੂਜਂ ਕਰੋਥਾ’’ਤਿ ਵਾ ‘‘ਪੁਪ੍ਫਪੂਜਂ ਕਰੋਥਾ’’ਤਿ ਵਾ ‘‘ਭਿਕ੍ਖੂ ਸਨ੍ਨਿਪਾਤੇਥ, ਦਾਨਂ ਦਸ੍ਸਾਮ, ਧਮ੍ਮਂ ਦੇਸਾਪਯਿਸ੍ਸਾਮਾ’’ਤਿ ਵਾ ਈਦਿਸੇਸੁ ਸਾਸਨੇਸੁ ਕੁਕ੍ਕੁਚ੍ਚਂ ਨ ਕਾਤਬ੍ਬਂ. ਕਪ੍ਪਿਯਸਾਸਨਾਨਿ ਹਿ ਏਤਾਨਿ, ਨ ਗਿਹੀਨਂ ਗਿਹਿਕਮ੍ਮਪਟਿਸਂਯੁਤ੍ਤਾਨੀਤਿ. ਇਮੇਹਿ ਪਨ ਅਟ੍ਠਹਿ ਕੁਲਦੂਸਕਕਮ੍ਮੇਹਿ ਉਪ੍ਪਨ੍ਨਪਚ੍ਚਯਾ ਪਞ੍ਚਨ੍ਨਮ੍ਪਿ ਸਹਧਮ੍ਮਿਕਾਨਂ ਨ ਕਪ੍ਪਨ੍ਤਿ. ਅਭੂਤਾਰੋਚਨਰੂਪਿਯਸਂਵੋਹਾਰੇਹਿ ਉਪ੍ਪਨ੍ਨਪਚ੍ਚਯਸਦਿਸਾਵ ਹੋਨ੍ਤਿ.

ਪਬ੍ਬਾਜਨੀਯਕਮ੍ਮਕਤੋ ਪਨ ਯਸ੍ਮਿਂ ਗਾਮੇ ਵਾ ਨਿਗਮੇ ਵਾ ਕੁਲਦੂਸਕਕਮ੍ਮਂ ਕਤਂ, ਯਸ੍ਮਿਞ੍ਚ ਵਿਹਾਰੇ ਵਸਤਿ, ਨੇਵ ਤਸ੍ਮਿਂ ਗਾਮੇ ਵਾ ਨਿਗਮੇ ਵਾ ਚਰਿਤੁਂ ਲਭਤਿ, ਨ ਵਿਹਾਰੇ ਵਸਿਤੁਂ. ਪਟਿਪ੍ਪਸ੍ਸਦ੍ਧਕਮ੍ਮੇਨਪਿ ਚ ਤੇਨ ਯੇਸੁ ਕੁਲੇਸੁ ਪੁਬ੍ਬੇ ਕੁਲਦੂਸਕਕਮ੍ਮਂ ਕਤਂ, ਤਤੋ ਉਪ੍ਪਨ੍ਨਪਚ੍ਚਯਾ ਨ ਗਹੇਤਬ੍ਬਾ, ਆਸਵਕ੍ਖਯਪਤ੍ਤੇਨਪਿ ਨ ਗਹੇਤਬ੍ਬਾ, ਅਕਪ੍ਪਿਯਾਵ ਹੋਨ੍ਤਿ. ‘‘ਕਸ੍ਮਾ ਨ ਗਣ੍ਹਥਾ’’ਤਿ ਪੁਚ੍ਛਿਤੇਨ ‘‘ਪੁਬ੍ਬੇ ਏਵਂ ਕਤਤ੍ਤਾ’’ਤਿ ਵੁਤ੍ਤੇ ਸਚੇ ਵਦਨ੍ਤਿ ‘‘ਨ ਮਯਂ ਤੇਨ ਕਾਰਣੇਨ ਦੇਮ, ਇਦਾਨਿ ਸੀਲਵਨ੍ਤਤਾਯ ਦੇਮਾ’’ਤਿ, ਗਹੇਤਬ੍ਬਾ. ਪਕਤਿਯਾ ਦਾਨਟ੍ਠਾਨੇਯੇਵ ਕੁਲਦੂਸਕਕਮ੍ਮਂ ਕਤਂ ਹੋਤਿ, ਤਤੋ ਪਕਤਿਦਾਨਮੇਵ ਗਹੇਤੁਂ ਵਟ੍ਟਤਿ. ਯਂ ਵਡ੍ਢੇਤ੍ਵਾ ਦੇਨ੍ਤਿ, ਤਂ ਨ ਵਟ੍ਟਤਿ. ਯਸ੍ਮਾ ਚ ਪੁਚ੍ਛਿਤਪਞ੍ਹੇ ਦੋਸੋ ਨਤ੍ਥਿ, ਤਸ੍ਮਾ ਅਞ੍ਞਮ੍ਪਿ ਭਿਕ੍ਖੁਂ ਪੁਬ੍ਬਣ੍ਹੇ ਵਾ ਸਾਯਨ੍ਹੇ ਵਾ ਅਨ੍ਤਰਘਰਂ ਪਵਿਟ੍ਠਂ ਕੋਚਿ ਪੁਚ੍ਛੇਯ੍ਯ ‘‘ਕਸ੍ਮਾ, ਭਨ੍ਤੇ, ਚਰਥਾ’’ਤਿ. ਯੇਨਤ੍ਥੇਨ ਚਰਤਿ, ਤਂ ਆਚਿਕ੍ਖਿਤ੍ਵਾ ‘‘ਲਦ੍ਧਂ ਨ ਲਦ੍ਧ’’ਨ੍ਤਿ ਵੁਤ੍ਤੇ ਸਚੇ ਨ ਲਦ੍ਧਂ, ‘‘ਨ ਲਦ੍ਧ’’ਨ੍ਤਿ ਵਤ੍ਵਾ ਯਂ ਸੋ ਦੇਤਿ, ਤਂ ਗਹੇਤੁਂ ਵਟ੍ਟਤਿ.

੩੭. ‘‘ਨ ਚ, ਭਿਕ੍ਖਵੇ, ਪਣਿਧਾਯ ਅਰਞ੍ਞੇ ਵਤ੍ਥਬ੍ਬਂ, ਯੋ ਵਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ ਚ, ਭਿਕ੍ਖਵੇ, ਪਣਿਧਾਯ ਪਿਣ੍ਡਾਯ ਚਰਿਤਬ੍ਬਂ…ਪੇ… ਨ ਚ, ਭਿਕ੍ਖਵੇ, ਪਣਿਧਾਯ ਚਙ੍ਕਮਿਤਬ੍ਬਂ…ਪੇ… ਨ ਚ, ਭਿਕ੍ਖਵੇ, ਪਣਿਧਾਯ ਠਾਤਬ੍ਬਂ…ਪੇ… ਨ ਚ, ਭਿਕ੍ਖਵੇ, ਪਣਿਧਾਯ ਨਿਸੀਦਿਤਬ੍ਬਂ…ਪੇ… ਨ ਚ, ਭਿਕ੍ਖਵੇ, ਪਣਿਧਾਯ ਸੇਯ੍ਯਾ ਕਪ੍ਪੇਤਬ੍ਬਾ, ਯੋ ਕਪ੍ਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੨੨੩ ਆਦਯੋ) ਵੁਤ੍ਤਤ੍ਤਾ ‘‘ਏਵਂ (ਪਾਰਾ. ਅਟ੍ਠ. ੨.੨੨੩) ਅਰਞ੍ਞੇ ਵਸਨ੍ਤਂ ਮਂ ਜਨੋ ਅਰਹਤ੍ਤੇ ਵਾ ਸੇਕ੍ਖਭੂਮਿਯਂ ਵਾ ਸਮ੍ਭਾਵੇਸ੍ਸਤਿ, ਤਤੋ ਲੋਕਸ੍ਸ ਸਕ੍ਕਤੋ ਭਵਿਸ੍ਸਾਮਿ ਗਰੁਕਤੋ ਮਾਨਿਤੋ ਪੂਜਿਤੋ’’ਤਿ ਏਵਂ ਪਤ੍ਥਨਂ ਕਤ੍ਵਾ ਅਰਞ੍ਞੇ ਨ ਵਸਿਤਬ੍ਬਂ. ਏਵਂ ਪਣਿਧਾਯ ‘‘ਅਰਞ੍ਞੇ ਵਸਿਸ੍ਸਾਮੀ’’ਤਿ ਗਚ੍ਛਨ੍ਤਸ੍ਸ ਪਦਵਾਰੇ ਪਦਵਾਰੇ ਦੁਕ੍ਕਟਂ, ਤਥਾ ਅਰਞ੍ਞੇ ਕੁਟਿਕਰਣਚਙ੍ਕਮਨਨਿਸੀਦਨਨਿਵਾਸਨਪਾਰੁਪਨਾਦੀਸੁ ਸਬ੍ਬਕਿਚ੍ਚੇਸੁ ਪਯੋਗੇ ਪਯੋਗੇ ਦੁਕ੍ਕਟਂ, ਤਸ੍ਮਾ ਏਵਂ ਅਰਞ੍ਞੇ ਨ ਵਸਿਤਬ੍ਬਂ. ਏਵਂ ਵਸਨ੍ਤੋ ਹਿ ਸਮ੍ਭਾਵਨਂ ਲਭਤੁ ਵਾ ਮਾ ਵਾ, ਦੁਕ੍ਕਟਂ ਆਪਜ੍ਜਤਿ. ਯੋ ਪਨ ਸਮਾਦਿਨ੍ਨਧੁਤਙ੍ਗੋ ‘‘ਧੁਤਙ੍ਗਂ ਰਕ੍ਖਿਸ੍ਸਾਮੀ’’ਤਿ ਵਾ ‘‘ਗਾਮਨ੍ਤੇ ਮੇ ਵਸਤੋ ਚਿਤ੍ਤਂ ਵਿਕ੍ਖਿਪਤਿ, ਅਰਞ੍ਞਂ ਸਪ੍ਪਾਯ’’ਨ੍ਤਿ ਚਿਨ੍ਤੇਤ੍ਵਾ ਵਾ ‘‘ਅਦ੍ਧਾ ਅਰਞ੍ਞੇ ਤਿਣ੍ਣਂ ਵਿਵੇਕਾਨਂ ਅਞ੍ਞਤਰਂ ਪਾਪੁਣਿਸ੍ਸਾਮੀ’’ਤਿ ਵਾ ‘‘ਅਰਞ੍ਞਂ ਪਵਿਸਿਤ੍ਵਾ ਅਰਹਤ੍ਤਂ ਅਪਾਪੁਣਿਤ੍ਵਾ ਨ ਨਿਕ੍ਖਮਿਸ੍ਸਾਮੀ’’ਤਿ ਵਾ ‘‘ਅਰਞ੍ਞਵਾਸੋ ਨਾਮ ਭਗਵਤਾ ਪਸਤ੍ਥੋ, ਮਯਿ ਚ ਅਰਞ੍ਞੇ ਵਸਨ੍ਤੇ ਬਹੂ ਸਬ੍ਰਹ੍ਮਚਾਰੀ ਗਾਮਨ੍ਤਂ ਹਿਤ੍ਵਾ ਆਰਞ੍ਞਕਾ ਭਵਿਸ੍ਸਨ੍ਤੀ’’ਤਿ ਵਾ ਏਵਂ ਅਨਵਜ੍ਜਵਾਸਂ ਵਸਿਤੁਕਾਮੋ ਹੋਤਿ, ਤੇਨੇਵ ਵਸਿਤਬ੍ਬਂ. ਪਿਣ੍ਡਾਯ ਚਰਨ੍ਤਸ੍ਸਪਿ ‘‘ਅਭਿਕ੍ਕਨ੍ਤਾਦੀਨਿ ਸਣ੍ਠਪੇਤ੍ਵਾ ਪਿਣ੍ਡਾਯ ਚਰਿਸ੍ਸਾਮੀ’’ਤਿ ਨਿਵਾਸਨਪਾਰੁਪਨਕਿਚ੍ਚਤੋ ਪਭੁਤਿ ਯਾਵ ਭੋਜਨਪਰਿਯੋਸਾਨਂ, ਤਾਵ ਪਯੋਗੇ ਪਯੋਗੇ ਦੁਕ੍ਕਟਂ, ਸਮ੍ਭਾਵਨਂ ਲਭਤੁ ਵਾ ਮਾ ਵਾ, ਦੁਕ੍ਕਟਮੇਵ. ਖਨ੍ਧਕਵਤ੍ਤਸੇਖਿਯਵਤ੍ਤਪਰਿਪੂਰਣਤ੍ਥਂ ਪਨ ਸਬ੍ਰਹ੍ਮਚਾਰੀਨਂ ਦਿਟ੍ਠਾਨੁਗਤਿਆਪਜ੍ਜਨਤ੍ਥਂ ਵਾ ਪਾਸਾਦਿਕੇਹਿ ਅਭਿਕ੍ਕਮਪਟਿਕ੍ਕਮਾਦੀਹਿ ਪਿਣ੍ਡਾਯ ਪਵਿਸਨ੍ਤੋ ਅਨੁਪਵਜ੍ਜੋ ਵਿਞ੍ਞੂਨਂ. ਚਙ੍ਕਮਨਾਦੀਸੁਪਿ ਏਸੇਵ ਨਯੋ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਕੁਲਸਙ੍ਗਹਵਿਨਿਚ੍ਛਯਕਥਾ ਸਮਤ੍ਤਾ.