੪. ਵਿਞ੍ਞਤ੍ਤਿਵਿਨਿਚ੍ਛਯਕਥਾ

੨੧. ਵਿਞ੍ਞਤ੍ਤੀਤਿ ਯਾਚਨਾ. ਤਤ੍ਰਾਯਂ ਵਿਨਿਚ੍ਛਯੋ (ਪਾਰਾ. ਅਟ੍ਠ. ੨.੩੪੨) – ਮੂਲਚ੍ਛੇਜ੍ਜਾਯ ਪੁਰਿਸਂ ਯਾਚਿਤੁਂ ਨ ਵਟ੍ਟਤਿ, ‘‘ਸਹਾਯਤ੍ਥਾਯ ਕਮ੍ਮਕਰਣਤ੍ਥਾਯ ਪੁਰਿਸਂ ਦੇਥਾ’’ਤਿ ਯਾਚਿਤੁਂ ਵਟ੍ਟਤਿ, ਪੁਰਿਸੇਨ ਕਤ੍ਤਬ੍ਬਂ ਹਤ੍ਥਕਮ੍ਮਸਙ੍ਖਾਤਂ ਪੁਰਿਸਤ੍ਤਕਰਂ ਯਾਚਿਤੁਂ ਵਟ੍ਟਤਿਯੇਵ. ਹਤ੍ਥਕਮ੍ਮਞ੍ਹਿ ਕਿਞ੍ਚਿ ਵਤ੍ਥੁ ਨ ਹੋਤਿ, ਤਸ੍ਮਾ ਤਂ ਠਪੇਤ੍ਵਾ ਮਿਗਲੁਦ੍ਦਕਮਚ੍ਛਬਨ੍ਧਨਕਾਦੀਨਂ ਸਕਕਮ੍ਮਂ ਅਵਸੇਸਂ ਸਬ੍ਬਂ ਕਪ੍ਪਿਯਂ. ‘‘ਕਿਂ, ਭਨ੍ਤੇ, ਆਗਤਾਤ੍ਥ ਕੇਨ ਕਮ੍ਮੇਨਾ’’ਤਿ ਪੁਚ੍ਛਿਤੇ ਵਾ ਅਪੁਚ੍ਛਿਤੇ ਵਾ ਯਾਚਿਤੁਂ ਵਟ੍ਟਤਿ, ਵਿਞ੍ਞਤ੍ਤਿਪਚ੍ਚਯਾ ਦੋਸੋ ਨਤ੍ਥਿ. ਮਿਗਲੁਦ੍ਦਕਾਦਯੋ ਪਨ ਸਕਕਮ੍ਮਂ ਨ ਯਾਚਿਤਬ੍ਬਾ, ‘‘ਹਤ੍ਥਕਮ੍ਮਂ ਦੇਥਾ’’ਤਿ ਅਨਿਯਮੇਤ੍ਵਾਪਿ ਨ ਯਾਚਿਤਬ੍ਬਾ. ਏਵਂ ਯਾਚਿਤਾ ਹਿ ਤੇ ‘‘ਸਾਧੁ, ਭਨ੍ਤੇ’’ਤਿ ਭਿਕ੍ਖੂ ਉਯ੍ਯੋਜੇਤ੍ਵਾ ਮਿਗੇਪਿ ਮਾਰੇਤ੍ਵਾ ਆਹਰੇਯ੍ਯੁਂ. ਨਿਯਮੇਤ੍ਵਾ ਪਨ ‘‘ਵਿਹਾਰੇ ਕਿਞ੍ਚਿ ਕਤ੍ਤਬ੍ਬਂ ਅਤ੍ਥਿ, ਤਤ੍ਥ ਹਤ੍ਥਕਮ੍ਮਂ ਦੇਥਾ’’ਤਿ ਯਾਚਿਤਬ੍ਬਾ, ਫਾਲਨਙ੍ਗਲਾਦੀਨਿ ਉਪਕਰਣਾਨਿ ਗਹੇਤ੍ਵਾ ਕਸਿਤੁਂ ਵਾ ਵਪਿਤੁਂ ਵਾ ਲਾਯਿਤੁਂ ਵਾ ਗਚ੍ਛਨ੍ਤਂ ਸਕਕਿਚ੍ਚਪਸੁਤਮ੍ਪਿ ਕਸ੍ਸਕਂ ਵਾ ਅਞ੍ਞਂ ਵਾ ਕਿਞ੍ਚਿ ਹਤ੍ਥਕਮ੍ਮਂ ਯਾਚਿਤੁਂ ਵਟ੍ਟਤੇਵ. ਯੋ ਪਨ ਵਿਘਾਸਾਦੋ ਵਾ ਅਞ੍ਞੋ ਵਾ ਕੋਚਿ ਨਿਕ੍ਕਮ੍ਮੋ ਨਿਰਤ੍ਥਕਕਥਂ ਕਥੇਨ੍ਤੋ ਨਿਦ੍ਦਾਯਨ੍ਤੋ ਵਾ ਵਿਹਰਤਿ, ਏਵਰੂਪਂ ਅਯਾਚਿਤ੍ਵਾਪਿ ‘‘ਏਹਿ ਰੇ ਇਦਂ ਵਾ ਇਦਂ ਵਾ ਕਰੋਹੀ’’ਤਿ ਯਦਿਚ੍ਛਕਂ ਕਾਰਾਪੇਤੁਂ ਵਟ੍ਟਤਿ.

ਹਤ੍ਥਕਮ੍ਮਸ੍ਸ ਪਨ ਸਬ੍ਬਕਪ੍ਪਿਯਭਾਵਦੀਪਨਤ੍ਥਂ ਇਮਂ ਨਯਂ ਕਥੇਨ੍ਤਿ. ਸਚੇ ਹਿ ਭਿਕ੍ਖੁ ਪਾਸਾਦਂ ਕਾਰੇਤੁਕਾਮੋ ਹੋਤਿ, ਥਮ੍ਭਤ੍ਥਾਯ ਪਾਸਾਣਕੋਟ੍ਟਕਾਨਂ ਘਰਂ ਗਨ੍ਤ੍ਵਾ ਵਤ੍ਤਬ੍ਬਂ ‘‘ਹਤ੍ਥਕਮ੍ਮਂ ਲਦ੍ਧੁਂ ਵਟ੍ਟਤਿ ਉਪਾਸਕਾ’’ਤਿ. ‘‘ਕਿਂ ਕਾਤਬ੍ਬਂ, ਭਨ੍ਤੇ’’ਤਿ? ‘‘ਪਾਸਾਣਤ੍ਥਮ੍ਭਾ ਉਦ੍ਧਰਿਤ੍ਵਾ ਦਾਤਬ੍ਬਾ’’ਤਿ. ਸਚੇ ਤੇ ਉਦ੍ਧਰਿਤ੍ਵਾ ਵਾ ਦੇਨ੍ਤਿ, ਉਦ੍ਧਰਿਤ੍ਵਾ ਨਿਕ੍ਖਿਤ੍ਤੇ ਅਤ੍ਤਨੋ ਥਮ੍ਭੇ ਵਾ ਦੇਨ੍ਤਿ, ਵਟ੍ਟਤਿ. ਅਥਾਪਿ ਵਦਨ੍ਤਿ ‘‘ਅਮ੍ਹਾਕਂ, ਭਨ੍ਤੇ, ਹਤ੍ਥਕਮ੍ਮਂ ਕਾਤੁਂ ਖਣੋ ਨਤ੍ਥਿ, ਅਞ੍ਞਂ ਉਦ੍ਧਰਾਪੇਥ, ਤਸ੍ਸ ਮੂਲਂ ਦਸ੍ਸਾਮਾ’’ਤਿ, ਉਦ੍ਧਰਾਪੇਤ੍ਵਾ ‘‘ਪਾਸਾਣਤ੍ਥਮ੍ਭੇ ਉਦ੍ਧਟਮਨੁਸ੍ਸਾਨਂ ਮੂਲਂ ਦੇਥਾ’’ਤਿ ਵਤ੍ਤੁਂ ਵਟ੍ਟਤਿ. ਏਤੇਨੇਵ ਉਪਾਯੇਨ ਪਾਸਾਦਦਾਰੂਨਂ ਅਤ੍ਥਾਯ ਵਡ੍ਢਕੀਨਂ ਸਨ੍ਤਿਕਂ, ਇਟ੍ਠਕਤ੍ਥਾਯ ਇਟ੍ਠਕਵਡ੍ਢਕੀਨਂ, ਛਦਨਤ੍ਥਾਯ ਗੇਹਚ੍ਛਾਦਕਾਨਂ, ਚਿਤ੍ਤਕਮ੍ਮਤ੍ਥਾਯ ਚਿਤ੍ਤਕਾਰਾਨਨ੍ਤਿ ਯੇਨ ਯੇਨ ਅਤ੍ਥੋ ਹੋਤਿ, ਤਸ੍ਸ ਤਸ੍ਸ ਅਤ੍ਥਾਯ ਤੇਸਂ ਤੇਸਂ ਸਿਪ੍ਪਕਾਰਕਾਨਂ ਸਨ੍ਤਿਕਂ ਗਨ੍ਤ੍ਵਾ ਹਤ੍ਥਕਮ੍ਮਂ ਯਾਚਿਤੁਂ ਵਟ੍ਟਤਿ, ਹਤ੍ਥਕਮ੍ਮਯਾਚਨਵਸੇਨ ਚ ਮੂਲਚ੍ਛੇਜ੍ਜਾਯ ਵਾ ਭਤ੍ਤਵੇਤਨਾਨੁਪ੍ਪਦਾਨੇਨ ਵਾ ਲਦ੍ਧਮ੍ਪਿ ਸਬ੍ਬਂ ਗਹੇਤੁਂ ਵਟ੍ਟਤਿ. ਅਰਞ੍ਞਤੋ ਆਹਰਾਪੇਨ੍ਤੇਨ ਚ ਸਬ੍ਬਂ ਅਨਜ੍ਝਾਵੁਤ੍ਥਕਂ ਆਹਰਾਪੇਤਬ੍ਬਂ.

੨੨. ਨ ਕੇਵਲਞ੍ਚ ਪਾਸਾਦਂ ਕਾਰੇਤੁਕਾਮੇਨ, ਮਞ੍ਚਪੀਠਪਤ੍ਤਪਰਿਸ੍ਸਾਵਨਧਮਕਰਣਚੀਵਰਾਦੀਨਿ ਕਾਰਾਪੇਤੁਕਾਮੇਨਪਿ ਦਾਰੁਲੋਹਸੁਤ੍ਤਾਦੀਨਿ ਲਭਿਤ੍ਵਾ ਤੇ ਤੇ ਸਿਪ੍ਪਕਾਰਕੇ ਉਪਸਙ੍ਕਮਿਤ੍ਵਾ ਵੁਤ੍ਤਨਯੇਨੇਵ ਹਤ੍ਥਕਮ੍ਮਂ ਯਾਚਿਤਬ੍ਬਂ. ਹਤ੍ਥਕਮ੍ਮਯਾਚਨਵਸੇਨ ਚ ਮੂਲਚ੍ਛੇਜ੍ਜਾਯ ਵਾ ਭਤ੍ਤਵੇਤਨਾਨੁਪ੍ਪਦਾਨੇਨ ਵਾ ਲਦ੍ਧਮ੍ਪਿ ਸਬ੍ਬਂ ਗਹੇਤਬ੍ਬਂ. ਸਚੇ ਪਨ ਕਾਤੁਂ ਨ ਇਚ੍ਛਨ੍ਤਿ, ਭਤ੍ਤਵੇਤਨਂ ਪਚ੍ਚਾਸੀਸਨ੍ਤਿ, ਅਕਪ੍ਪਿਯਕਹਾਪਣਾਦਿ ਨ ਦਾਤਬ੍ਬਂ, ਭਿਕ੍ਖਾਚਾਰਵਤ੍ਤੇਨ ਤਣ੍ਡੁਲਾਦੀਨਿ ਪਰਿਯੇਸਿਤ੍ਵਾ ਦਾਤੁਂ ਵਟ੍ਟਤਿ. ਹਤ੍ਥਕਮ੍ਮਵਸੇਨ ਪਤ੍ਤਂ ਕਾਰੇਤ੍ਵਾ ਤਥੇਵ ਪਾਚੇਤ੍ਵਾ ਨਵਪਕ੍ਕਸ੍ਸ ਪਤ੍ਤਸ੍ਸ ਪੁਞ੍ਛਨਤੇਲਤ੍ਥਾਯ ਅਨ੍ਤੋਗਾਮਂ ਪਵਿਟ੍ਠੇਨ ‘‘ਭਿਕ੍ਖਾਯ ਆਗਤੋ’’ਤਿ ਸਲ੍ਲਕ੍ਖੇਤ੍ਵਾ ਯਾਗੁਯਾ ਵਾ ਭਤ੍ਤੇ ਵਾ ਆਨੀਤੇ ਹਤ੍ਥੇਨ ਪਤ੍ਤੋ ਪਿਧਾਤਬ੍ਬੋ. ਸਚੇ ਉਪਾਸਿਕਾ ‘‘ਕਿਂ, ਭਨ੍ਤੇ’’ਤਿ ਪੁਚ੍ਛਤਿ, ‘‘ਨਵਪਕ੍ਕੋ ਪਤ੍ਤੋ, ਪੁਞ੍ਛਨਤੇਲੇਨ ਅਤ੍ਥੋ’’ਤਿ ਵਤ੍ਤਬ੍ਬਂ. ਸਚੇ ਸਾ ‘‘ਦੇਹਿ, ਭਨ੍ਤੇ’’ਤਿ ਪਤ੍ਤਂ ਗਹੇਤ੍ਵਾ ਤੇਲੇਨ ਪੁਞ੍ਛਿਤ੍ਵਾ ਯਾਗੁਯਾ ਵਾ ਭਤ੍ਤਸ੍ਸ ਵਾ ਪੂਰੇਤ੍ਵਾ ਦੇਤਿ, ਵਿਞ੍ਞਤ੍ਤਿ ਨਾਮ ਨ ਹੋਤਿ, ਗਹੇਤੁਂ ਵਟ੍ਟਤਿ.

੨੩. ਭਿਕ੍ਖੂ ਪਗੇਵ ਪਿਣ੍ਡਾਯ ਚਰਿਤ੍ਵਾ ਆਸਨਸਾਲਂ ਗਨ੍ਤ੍ਵਾ ਆਸਨਂ ਅਪਸ੍ਸਨ੍ਤਾ ਤਿਟ੍ਠਨ੍ਤਿ. ਤਤ੍ਰ ਚੇ ਉਪਾਸਕਾ ਭਿਕ੍ਖੂ ਠਿਤੇ ਦਿਸ੍ਵਾ ਸਯਮੇਵ ਆਸਨਾਨਿ ਆਹਰਾਪੇਨ੍ਤਿ, ਨਿਸੀਦਿਤ੍ਵਾ ਗਚ੍ਛਨ੍ਤੇਹਿ ਆਪੁਚ੍ਛਿਤ੍ਵਾ ਗਨ੍ਤਬ੍ਬਂ, ਅਨਾਪੁਚ੍ਛਾ ਗਤਾਨਮ੍ਪਿ ਨਟ੍ਠਂ ਗੀਵਾ ਨ ਹੋਤਿ, ਆਪੁਚ੍ਛਿਤ੍ਵਾ ਗਮਨਂ ਪਨ ਵਤ੍ਤਂ. ਸਚੇ ਭਿਕ੍ਖੂਹਿ ‘‘ਆਸਨਾਨਿ ਆਹਰਥਾ’’ਤਿ ਵੁਤ੍ਤੇਹਿ ਆਹਟਾਨਿ ਹੋਨ੍ਤਿ, ਆਪੁਚ੍ਛਿਤ੍ਵਾਵ ਗਨ੍ਤਬ੍ਬਂ, ਅਨਾਪੁਚ੍ਛਾ ਗਤਾਨਂ ਵਤ੍ਤਭੇਦੋ ਚ ਨਟ੍ਠਞ੍ਚ ਗੀਵਾ. ਅਤ੍ਥਰਣਕੋਜਵਕਾਦੀਸੁਪਿ ਏਸੇਵ ਨਯੋ.

ਮਕ੍ਖਿਕਾ ਬਹੁਕਾ ਹੋਨ੍ਤਿ, ‘‘ਮਕ੍ਖਿਕਬੀਜਨਿਂ ਆਹਰਥਾ’’ਤਿ ਵਤ੍ਤਬ੍ਬਂ, ਪੁਚਿਮਨ੍ਦਸਾਖਾਦੀਨਿ ਆਹਰਨ੍ਤਿ, ਕਪ੍ਪਿਯਂ ਕਾਰਾਪੇਤ੍ਵਾ ਪਟਿਗ੍ਗਹੇਤਬ੍ਬਾਨਿ. ਆਸਨਸਾਲਾਯਂ ਉਦਕਭਾਜਨਂ ਰਿਤ੍ਤਂ ਹੋਤਿ, ‘‘ਧਮਕਰਣਂ ਗਣ੍ਹਾਹੀ’’ਤਿ ਨ ਵਤ੍ਤਬ੍ਬਂ. ਧਮਕਰਣਞ੍ਹਿ ਰਿਤ੍ਤਭਾਜਨੇ ਪਕ੍ਖਿਪਨ੍ਤੋ ਭਿਨ੍ਦੇਯ੍ਯ, ‘‘ਨਦਿਂ ਵਾ ਤਲ਼ਾਕਂ ਵਾ ਗਨ੍ਤ੍ਵਾ ਉਦਕਂ ਆਹਰਾ’’ਤਿ ਪਨ ਵਤ੍ਤੁਂ ਵਟ੍ਟਤਿ, ‘‘ਗੇਹਤੋ ਆਹਰਾ’’ਤਿ ਨੇਵ ਵਤ੍ਤੁਂ ਵਟ੍ਟਤਿ, ਨ ਆਹਟਂ ਪਰਿਭੁਞ੍ਜਿਤੁਂ. ਆਸਨਸਾਲਾਯ ਵਾ ਅਰਞ੍ਞੇ ਵਾ ਭਤ੍ਤਕਿਚ੍ਚਂ ਕਰੋਨ੍ਤੇਹਿ ਤਤ੍ਥ ਜਾਤਕਂ ਅਨਜ੍ਝਾਵੁਤ੍ਥਕਂ ਯਂ ਕਿਞ੍ਚਿ ਉਤ੍ਤਰਿਭਙ੍ਗਾਰਹਂ ਪਤ੍ਤਂ ਵਾ ਫਲਂ ਵਾ ਸਚੇ ਕਿਞ੍ਚਿ ਕਮ੍ਮਂ ਕਰੋਨ੍ਤਂ ਆਹਰਾਪੇਤਿ, ਹਤ੍ਥਕਮ੍ਮਵਸੇਨ ਆਹਰਾਪੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ, ਅਲਜ੍ਜੀਹਿ ਪਨ ਭਿਕ੍ਖੂਹਿ ਵਾ ਸਾਮਣੇਰੇਹਿ ਵਾ ਹਤ੍ਥਕਮ੍ਮਂ ਨ ਕਾਰੇਤਬ੍ਬਂ. ਅਯਂ ਤਾਵ ਪੁਰਿਸਤ੍ਤਕਰੇ ਨਯੋ.

੨੪. ਗੋਣਂ ਪਨ ਅਞ੍ਞਾਤਕਅਪ੍ਪਵਾਰਿਤਟ੍ਠਾਨਤੋ ਆਹਰਾਪੇਤੁਂ ਨ ਵਟ੍ਟਤਿ, ਆਹਰਾਪੇਨ੍ਤਸ੍ਸ ਦੁਕ੍ਕਟਂ. ਞਾਤਕਪਵਾਰਿਤਟ੍ਠਾਨਤੋਪਿ ਮੂਲਚ੍ਛੇਜ੍ਜਾਯ ਯਾਚਿਤੁਂ ਨ ਵਟ੍ਟਤਿ, ਤਾਵਕਾਲਿਕਨਯੇਨ ਸਬ੍ਬਤ੍ਥ ਵਟ੍ਟਤਿ. ਏਵਂ ਆਹਰਾਪਿਤਞ੍ਚ ਗੋਣਂ ਰਕ੍ਖਿਤ੍ਵਾ ਜਗ੍ਗਿਤ੍ਵਾ ਸਾਮਿਕਾ ਪਟਿਚ੍ਛਾਪੇਤਬ੍ਬਾ. ਸਚਸ੍ਸ ਪਾਦੋ ਵਾ ਸਿਙ੍ਗਂ ਵਾ ਭਿਜ੍ਜਤਿ ਵਾ ਨਸ੍ਸਤਿ ਵਾ, ਸਾਮਿਕਾ ਚੇ ਸਮ੍ਪਟਿਚ੍ਛਨ੍ਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਸਮ੍ਪਟਿਚ੍ਛਨ੍ਤਿ, ਗੀਵਾ ਹੋਤਿ. ਸਚੇ ‘‘ਤੁਮ੍ਹਾਕਂਯੇਵ ਦੇਮਾ’’ਤਿ ਵਦਨ੍ਤਿ, ਨ ਸਮ੍ਪਟਿਚ੍ਛਿਤਬ੍ਬਂ. ‘‘ਵਿਹਾਰਸ੍ਸ ਦੇਮਾ’’ਤਿ ਵੁਤ੍ਤੇ ਪਨ ‘‘ਆਰਾਮਿਕਾਨਂ ਆਚਿਕ੍ਖਥ ਜਗ੍ਗਨਤ੍ਥਾਯਾ’’ਤਿ ਵਤ੍ਤਬ੍ਬਾ.

੨੫. ‘‘ਸਕਟਂ ਦੇਥਾ’’ਤਿਪਿ ਅਞ੍ਞਾਤਕਅਪ੍ਪਵਾਰਿਤੇ ਵਤ੍ਤੁਂ ਨ ਵਟ੍ਟਤਿ, ਵਿਞ੍ਞਤ੍ਤਿ ਏਵ ਹੋਤਿ, ਦੁਕ੍ਕਟਂ ਆਪਜ੍ਜਤਿ. ਞਾਤਕਪਵਾਰਿਤਟ੍ਠਾਨੇ ਪਨ ਵਟ੍ਟਤਿ, ਤਾਵਕਾਲਿਕਂ ਵਟ੍ਟਤਿ, ਕਮ੍ਮਂ ਪਨ ਕਤ੍ਵਾ ਪੁਨ ਦਾਤਬ੍ਬਂ. ਸਚੇ ਨੇਮਿਆਦੀਨਿ ਭਿਜ੍ਜਨ੍ਤਿ, ਪਾਕਤਿਕਾਨਿ ਕਤ੍ਵਾ ਦਾਤਬ੍ਬਂ, ਨਟ੍ਠੇ ਗੀਵਾ ਹੋਤਿ. ‘‘ਤੁਮ੍ਹਾਕਮੇਵ ਦੇਮਾ’’ਤਿ ਵੁਤ੍ਤੇ ਦਾਰੁਭਣ੍ਡਂ ਨਾਮ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਏਸ ਨਯੋ ਵਾਸਿਫਰਸੁਕੁਠਾਰੀਕੁਦਾਲਨਿਖਾਦਨੇਸੁ ਵਲ੍ਲਿਆਦੀਸੁ ਚ ਪਰਪਰਿਗ੍ਗਹਿਤੇਸੁ. ਗਰੁਭਣ੍ਡਪ੍ਪਹੋਨਕੇਸੁਯੇਵ ਵਲ੍ਲਿਆਦੀਸੁ ਵਿਞ੍ਞਤ੍ਤਿ ਹੋਤਿ, ਨ ਤਤੋ ਓਰਂ.

੨੬. ਅਨਜ੍ਝਾਵੁਤ੍ਥਕਂ ਪਨ ਯਂ ਕਿਞ੍ਚਿ ਆਹਰਾਪੇਤੁਂ ਵਟ੍ਟਤਿ. ਰਕ੍ਖਿਤਗੋਪਿਤਟ੍ਠਾਨੇਯੇਵ ਹਿ ਵਿਞ੍ਞਤ੍ਤਿ ਨਾਮ ਵੁਚ੍ਚਤਿ. ਸਾ ਦ੍ਵੀਸੁ ਪਚ੍ਚਯੇਸੁ ਸਬ੍ਬੇਨ ਸਬ੍ਬਂ ਨ ਵਟ੍ਟਤਿ. ਸੇਨਾਸਨਪਚ੍ਚਯੇ ਪਨ ‘‘ਆਹਰ ਦੇਹੀ’’ਤਿ ਵਿਞ੍ਞਤ੍ਤਿਮਤ੍ਤਮੇਵ ਨ ਵਟ੍ਟਤਿ, ਪਰਿਕਥੋਭਾਸਨਿਮਿਤ੍ਤਕਮ੍ਮਾਨਿ ਵਟ੍ਟਨ੍ਤਿ. ਤਤ੍ਥ ਉਪੋਸਥਾਗਾਰਂ ਵਾ ਭੋਜਨਸਾਲਂ ਵਾ ਅਞ੍ਞਂ ਵਾ ਕਿਞ੍ਚਿ ਸੇਨਾਸਨਂ ਇਚ੍ਛਤੋ ‘‘ਇਮਸ੍ਮਿਂ ਵਤ ਓਕਾਸੇ ਏਵਰੂਪਂ ਸੇਨਾਸਨਂ ਕਾਤੁਂ ਵਟ੍ਟਤੀ’’ਤਿ ਵਾ ‘‘ਯੁਤ੍ਤ’’ਨ੍ਤਿ ਵਾ ‘‘ਅਨੁਰੂਪ’’ਨ੍ਤਿ ਵਾਤਿਆਦਿਨਾ ਨਯੇਨ ਵਚਨਂ ਪਰਿਕਥਾ ਨਾਮ. ਉਪਾਸਕਾ ਤੁਮ੍ਹੇ ਕੁਹਿਂ ਵਸਥਾਤਿ. ਪਾਸਾਦੇ, ਭਨ੍ਤੇਤਿ. ‘‘ਕਿਂ ਭਿਕ੍ਖੂਨਂ ਪਨ ਉਪਾਸਕਾ ਪਾਸਾਦੋ ਨ ਵਟ੍ਟਤੀ’’ਤਿ ਏਵਮਾਦਿਵਚਨਂ ਓਭਾਸੋ ਨਾਮ. ਮਨੁਸ੍ਸੇ ਦਿਸ੍ਵਾ ਰਜ੍ਜੁਂ ਪਸਾਰੇਤਿ, ਖੀਲੇ ਆਕੋਟਾਪੇਤਿ, ‘‘ਕਿਂ ਇਦਂ, ਭਨ੍ਤੇ’’ਤਿ ਵੁਤ੍ਤੇ ‘‘ਇਧ ਆਵਾਸਂ ਕਰਿਸ੍ਸਾਮਾ’’ਤਿ ਏਵਮਾਦਿਕਰਣਂ ਪਨ ਨਿਮਿਤ੍ਤਕਮ੍ਮਂ ਨਾਮ. ਗਿਲਾਨਪਚ੍ਚਯੇ ਪਨ ਵਿਞ੍ਞਤ੍ਤਿਪਿ ਵਟ੍ਟਤਿ, ਪਗੇਵ ਪਰਿਕਥਾਦੀਨਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਵਿਞ੍ਞਤ੍ਤਿਵਿਨਿਚ੍ਛਯਕਥਾ ਸਮਤ੍ਤਾ.