੩੪. ਪਕਿਣ੍ਣਕਵਿਨਿਚ੍ਛਯਕਥਾ
੧. ਇਦਾਨਿ ਪਕਿਣ੍ਣਕਕਥਾ ਚ ਵੇਦਿਤਬ੍ਬਾ. ‘‘ਗਣਭੋਜਨੇ ਅਞ੍ਞਤ੍ਰ ਸਮਯਾ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੨੧੭) ਵੁਤ੍ਤਂ ਗਣਭੋਜਨਂ (ਪਾਚਿ. ਅਟ੍ਠ. ੨੧੭-੨੧੮) ਦ੍ਵੀਹਿ ਆਕਾਰੇਹਿ ਪਸਵਤਿ ਵਿਞ੍ਞਤ੍ਤਿਤੋ ਵਾ ਨਿਮਨ੍ਤਨਤੋ ਵਾ. ਕਥਂ ਵਿਞ੍ਞਤ੍ਤਿਤੋ ਪਸਵਤਿ? ਚਤ੍ਤਾਰੋ ਭਿਕ੍ਖੂ ਏਕਤੋ ਠਿਤਾ ਵਾ ਨਿਸਿਨ੍ਨਾ ਵਾ ਉਪਾਸਕਂ ਦਿਸ੍ਵਾ ‘‘ਅਮ੍ਹਾਕਂ ਚਤੁਨ੍ਨਮ੍ਪਿ ਭਤ੍ਤਂ ਦੇਹੀ’’ਤਿ ਵਾ ਵਿਞ੍ਞਾਪੇਯ੍ਯੁਂ, ਪਾਟੇਕ੍ਕਂ ਵਾ ਪਸ੍ਸਿਤ੍ਵਾ ‘‘ਮਯ੍ਹਂ ਦੇਹਿ, ਮਯ੍ਹਂ ਦੇਹੀ’’ਤਿ ਏਵਂ ਏਕਤੋ ਵਾ ਨਾਨਾਤੋ ਵਾ ਵਿਞ੍ਞਾਪੇਤ੍ਵਾ ਏਕਤੋ ਵਾ ਗਚ੍ਛਨ੍ਤੁ ਨਾਨਾਤੋ ਵਾ, ਭਤ੍ਤਂ ਗਹੇਤ੍ਵਾਪਿ ਏਕਤੋ ਵਾ ਭੁਞ੍ਜਨ੍ਤੁ ਨਾਨਾਤੋ ਵਾ. ਸਚੇ ਏਕਤੋ ਗਣ੍ਹਨ੍ਤਿ, ਗਣਭੋਜਨਂ ਹੋਤਿ, ਸਬ੍ਬੇਸਂ ਆਪਤ੍ਤਿ. ਪਟਿਗ੍ਗਹਣਮੇਵ ਹੇਤ੍ਥ ਪਮਾਣਂ. ਏਵਂ ਵਿਞ੍ਞਤ੍ਤਿਤੋ ਪਸਵਤਿ.
ਕਥਂ ਨਿਮਨ੍ਤਨਤੋ ਪਸਵਤਿ? ਚਤ੍ਤਾਰੋ ਭਿਕ੍ਖੂ ਉਪਸਙ੍ਕਮਿਤ੍ਵਾ ‘‘ਤੁਮ੍ਹੇ, ਭਨ੍ਤੇ, ਓਦਨੇਨ ਨਿਮਨ੍ਤੇਮਿ, ਓਦਨਂ ਮੇ ਗਣ੍ਹਥ ਆਕਙ੍ਖਥ ਓਲੋਕੇਥ ਅਧਿਵਾਸੇਥ ਪਟਿਮਾਨੇਥਾ’’ਤਿ ਏਵਂ ਯੇਨ ਕੇਨਚਿ ਵੇਵਚਨੇਨ ਵਾ ਭਾਸਨ੍ਤਰੇਨ ਵਾ ਪਞ੍ਚਨ੍ਨਂ ਭੋਜਨਾਨਂ ਨਾਮਂ ਗਹੇਤ੍ਵਾ ਨਿਮਨ੍ਤੇਤਿ. ਏਵਂ ਏਕਤੋ ਨਿਮਨ੍ਤਿਤਾ ਪਰਿਚ੍ਛਿਨ੍ਨਕਾਲਵਸੇਨ ਅਜ੍ਜਤਨਾਯ ਵਾ ਸ੍ਵਾਤਨਾਯ ਵਾ ਏਕਤੋ ਗਚ੍ਛਨ੍ਤਿ, ਏਕਤੋ ਗਣ੍ਹਨ੍ਤਿ, ਏਕਤੋ ਭੁਞ੍ਜਨ੍ਤਿ, ਗਣਭੋਜਨਂ ਹੋਤਿ, ਸਬ੍ਬੇਸਂ ਆਪਤ੍ਤਿ. ਏਕਤੋ ਨਿਮਨ੍ਤਿਤਾ ਏਕਤੋ ਵਾ ਨਾਨਾਤੋ ਵਾ ਗਚ੍ਛਨ੍ਤਿ, ਏਕਤੋ ਗਣ੍ਹਨ੍ਤਿ, ਏਕਤੋ ਵਾ ਨਾਨਾਤੋ ਵਾ ਭੁਞ੍ਜਨ੍ਤਿ, ਆਪਤ੍ਤਿਯੇਵ. ਏਕਤੋ ਨਿਮਨ੍ਤਿਤਾ ਏਕਤੋ ਵਾ ਨਾਨਾਤੋ ਵਾ ਗਚ੍ਛਨ੍ਤਿ, ਨਾਨਾਤੋ ਗਣ੍ਹਨ੍ਤਿ, ਏਕਤੋ ਵਾ ਨਾਨਾਤੋ ਵਾ ਭੁਞ੍ਜਨ੍ਤਿ, ਅਨਾਪਤ੍ਤਿ. ਚਤ੍ਤਾਰਿ ਪਰਿਵੇਣਾਨਿ ਵਾ ਵਿਹਾਰੇ ਵਾ ਗਨ੍ਤ੍ਵਾ ਨਾਨਾਤੋ ਨਿਮਨ੍ਤਿਤਾ, ਏਕਟ੍ਠਾਨੇ ਠਿਤੇਸੁਯੇਵ ਵਾ ਏਕੋ ਪੁਤ੍ਤੇਨ ਏਕੋ ਪਿਤਰਾਤਿ ਏਵਮ੍ਪਿ ਨਾਨਾਤੋ ਨਿਮਨ੍ਤਿਤਾ ਏਕਤੋ ਵਾ ਨਾਨਾਤੋ ਵਾ ਗਚ੍ਛਨ੍ਤੁ, ਏਕਤੋ ਵਾ ਨਾਨਾਤੋ ਵਾ ਭੁਞ੍ਜਨ੍ਤੁ, ਸਚੇ ਏਕਤੋ ਗਣ੍ਹਨ੍ਤਿ, ਗਣਭੋਜਨਂ ਹੋਤਿ, ਸਬ੍ਬੇਸਂ ਆਪਤ੍ਤਿ. ਏਵਂ ਤਾਵ ਨਿਮਨ੍ਤਨਤੋ ਪਸਵਤਿ.
ਤਸ੍ਮਾ ਸਚੇ ਕੋਚਿ ਸਙ੍ਘਭਤ੍ਤਂ ਕਤ੍ਤੁਕਾਮੇਨ ਨਿਮਨ੍ਤਨਤ੍ਥਾਯ ਪੇਸਿਤੋ ਵਿਹਾਰਂ ਆਗਮ੍ਮ ‘‘ਭਨ੍ਤੇ, ਸ੍ਵੇ ਅਮ੍ਹਾਕਂ ਘਰੇ ਭਿਕ੍ਖਂ ਗਣ੍ਹਥਾ’’ਤਿ ਅਵਤ੍ਵਾ ‘‘ਭਤ੍ਤਂ ਗਣ੍ਹਥਾ’’ਤਿ ਵਾ ‘‘ਸਙ੍ਘਭਤ੍ਤਂ ਗਣ੍ਹਥਾ’’ਤਿ ਵਾ ‘‘ਸਙ੍ਘੋ ਭਤ੍ਤਂ ਗਣ੍ਹਤੂ’’ਤਿ ਵਾ ਵਦਤਿ, ਭਤ੍ਤੁਦ੍ਦੇਸਕੇਨ ਪਣ੍ਡਿਤੇਨ ਭਵਿਤਬ੍ਬਂ. ਨਿਮਨ੍ਤਨਿਕਾ ਗਣਭੋਜਨਤੋ, ਪਿਣ੍ਡਪਾਤਿਕਾ ਚ ਧੁਤਙ੍ਗਭੇਦਤੋ ਮੋਚੇਤਬ੍ਬਾ. ਕਥਂ? ਏਵਂ ਤਾਵ ਵਤ੍ਤਬ੍ਬਂ ‘‘ਸ੍ਵੇ ਨ ਸਕ੍ਕਾ ਉਪਾਸਕਾ’’ਤਿ. ਪੁਨਦਿਵਸੇ, ਭਨ੍ਤੇਤਿ. ਪੁਨਦਿਵਸੇਪਿ ਨ ਸਕ੍ਕਾਤਿ. ਏਵਂ ਯਾਵ ਅਡ੍ਢਮਾਸਮ੍ਪਿ ਹਰਿਤ੍ਵਾ ਪੁਨ ਵਤ੍ਤਬ੍ਬੋ ‘‘ਕਿਂ ਤ੍ਵਂ ਅਵਚਾ’’ਤਿ. ਸਚੇ ਪੁਨਪਿ ‘‘ਸਙ੍ਘਭਤ੍ਤਂ ਗਣ੍ਹਥਾ’’ਤਿ ਵਦਤਿ, ਤਤੋ ‘‘ਇਮਂ ਤਾਵ ਉਪਾਸਕ ਪੁਪ੍ਫਂ ਕਪ੍ਪਿਯਂ ਕਰੋਹਿ, ਇਮਂ ਤਿਣ’’ਨ੍ਤਿ ਏਵਂ ਵਿਕ੍ਖੇਪਂ ਕਤ੍ਵਾ ਪੁਨ ‘‘ਤ੍ਵਂ ਕਿਂ ਕਥਯਿਤ੍ਥਾ’’ਤਿ ਪੁਚ੍ਛਿਤਬ੍ਬੋ. ਸਚੇ ਪੁਨਪਿ ਤਥੇਵ ਵਦਤਿ, ‘‘ਆਵੁਸੋ, ਤ੍ਵਂ ਪਿਣ੍ਡਪਾਤਿਕੇ ਵਾ ਮਹਲ੍ਲਕਤ੍ਥੇਰੇ ਵਾ ਨ ਲਚ੍ਛਸਿ, ਸਾਮਣੇਰੇ ਲਚ੍ਛਸੀ’’ਤਿ ਵਤ੍ਤਬ੍ਬੋ. ‘‘ਨਨੁ, ਭਨ੍ਤੇ, ਅਸੁਕਸ੍ਮਿਂ ਅਸੁਕਸ੍ਮਿਞ੍ਚ ਗਾਮੇ ਭਦਨ੍ਤੇ ਭੋਜੇਸੁਂ, ਅਹਂ ਕਸ੍ਮਾ ਨ ਲਭਾਮੀ’’ਤਿ ਚ ਵੁਤ੍ਤੇ ਤੇ ਨਿਮਨ੍ਤਿਤੁਂ ਜਾਨਨ੍ਤਿ, ਤ੍ਵਂ ਨ ਜਾਨਾਸੀਤਿ. ਤੇ ਕਥਂ ਨਿਮਨ੍ਤੇਸੁਂ, ਭਨ੍ਤੇਤਿ? ਤੇ ਏਵਮਾਹਂਸੁ ‘‘ਅਮ੍ਹਾਕਂ, ਭਨ੍ਤੇ, ਭਿਕ੍ਖਂ ਗਣ੍ਹਥਾ’’ਤਿ. ਸਚੇ ਸੋਪਿ ਤਥੇਵ ਵਦਤਿ, ਵਟ੍ਟਤਿ.
ਅਥ ਪੁਨਪਿ ‘‘ਭਤ੍ਤਂ ਗਣ੍ਹਥਾ’’ਤਿ ਵਦਤਿ, ‘‘ਨ ਦਾਨਿ ਤ੍ਵਂ, ਆਵੁਸੋ, ਬਹੂ ਭਿਕ੍ਖੂ ਲਚ੍ਛਸਿ, ਤਯੋ ਏਵ, ਆਵੁਸੋ, ਲਚ੍ਛਸੀ’’ਤਿ ਵਤ੍ਤਬ੍ਬੋ. ‘‘ਨਨੁ, ਭਨ੍ਤੇ, ਅਮੁਕਸ੍ਮਿਞ੍ਚ ਅਮੁਕਸ੍ਮਿਞ੍ਚ ਗਾਮੇ ਸਕਲਂ ਭਿਕ੍ਖੁਸਙ੍ਘਂ ਭੋਜੇਸੁਂ, ਅਹਂ ਕਸ੍ਮਾ ਨ ਲਭਾਮੀ’’ਤਿ. ‘‘ਤ੍ਵਂ ਨਿਮਨ੍ਤਿਤੁਂ ਨ ਜਾਨਾਸੀ’’ਤਿ. ਤੇ ਕਥਂ ਨਿਮਨ੍ਤੇਸੁਂ, ਭਨ੍ਤੇਤਿ? ਤੇ ਏਵਮਾਹਂਸੁ ‘‘ਅਮ੍ਹਾਕਂ, ਭਨ੍ਤੇ, ਭਿਕ੍ਖਂ ਗਣ੍ਹਥਾ’’ਤਿ. ਸਚੇ ਸੋਪਿ ਤਥੇਵ ‘‘ਭਿਕ੍ਖਂ ਗਣ੍ਹਥਾ’’ਤਿ ਵਦਤਿ, ਵਟ੍ਟਤਿ. ਅਥ ਪੁਨਪਿ ‘‘ਭਤ੍ਤਮੇਵਾ’’ਤਿ ਵਦਤਿ, ਤਤੋ ਵਤ੍ਤਬ੍ਬੋ – ‘‘ਗਚ੍ਛ ਤ੍ਵਂ, ਨਤ੍ਥਮ੍ਹਾਕਂ ਤਵ ਭਤ੍ਤੇਨਤ੍ਥੋ, ਨਿਬਦ੍ਧਗੋਚਰੋ ਏਸ ਅਮ੍ਹਾਕਂ, ਮਯਮੇਤ੍ਥ ਪਿਣ੍ਡਾਯ ਚਰਿਸ੍ਸਾਮਾ’’ਤਿ. ਤਂ ‘‘ਚਰਥ, ਭਨ੍ਤੇ’’ਤਿ ਵਤ੍ਵਾ ਆਗਤਂ ਪੁਚ੍ਛਨ੍ਤਿ ‘‘ਕਿਂ ਭੋ ਲਦ੍ਧਾ ਭਿਕ੍ਖੂ’’ਤਿ? ਕਿਂ ਏਤੇਨ, ਬਹੁ ਏਤ੍ਥ ਵਤ੍ਤਬ੍ਬਂ, ਥੇਰਾ ‘‘ਸ੍ਵੇ ਪਿਣ੍ਡਾਯ ਚਰਿਸ੍ਸਾਮਾ’’ਤਿ ਆਹਂਸੁ, ਮਾ ਦਾਨਿ ਤੁਮ੍ਹੇ ਪਮਜ੍ਜਿਤ੍ਥਾਤਿ. ਦੁਤਿਯਦਿਵਸੇ ਚੇਤਿਯਵਤ੍ਤਂ ਕਤ੍ਵਾ ਠਿਤਭਿਕ੍ਖੂ ਸਙ੍ਘਤ੍ਥੇਰੇਨ ਵਤ੍ਤਬ੍ਬਾ ‘‘ਆਵੁਸੋ, ਧੁਰਗਾਮੇ ਸਙ੍ਘਭਤ੍ਤਂ, ਅਪਣ੍ਡਿਤਮਨੁਸ੍ਸੋ ਪਨ ਅਗਮਾਸਿ, ਗਚ੍ਛਾਮ, ਧੁਰਗਾਮੇ ਪਿਣ੍ਡਾਯ ਚਰਿਸ੍ਸਾਮਾ’’ਤਿ. ਭਿਕ੍ਖੂਹਿ ਥੇਰਸ੍ਸ ਵਚਨਂ ਕਾਤਬ੍ਬਂ, ਨ ਦੁਬ੍ਬਚੇਹਿ ਭਵਿਤਬ੍ਬਂ, ਗਾਮਦ੍ਵਾਰੇ ਅਟ੍ਠਤ੍ਵਾਵ ਪਿਣ੍ਡਾਯ ਚਰਿਤਬ੍ਬਂ, ਤੇਸੁ ਪਤ੍ਤਾਨਿ ਗਹੇਤ੍ਵਾ ਨਿਸੀਦਾਪੇਤ੍ਵਾ ਭੋਜੇਨ੍ਤੇਸੁ ਭੁਞ੍ਜਿਤਬ੍ਬਂ.
ਸਚੇ ਆਸਨਸਾਲਾਯ ਭਤ੍ਤਂ ਠਪੇਤ੍ਵਾ ਰਥਿਕਾਸੁ ਆਹਿਣ੍ਡਨ੍ਤਾ ਆਰੋਚੇਨ੍ਤਿ ‘‘ਆਸਨਸਾਲਾਯਂ, ਭਨ੍ਤੇ, ਭਤ੍ਤਂ ਗਣ੍ਹਥਾ’’ਤਿ, ਨ ਵਟ੍ਟਤਿ. ਅਥ ਪਨ ‘‘ਭਤ੍ਤਂ ਆਦਾਯ ਤਤ੍ਥ ਤਤ੍ਥ ਗਨ੍ਤ੍ਵਾ ਭਤ੍ਤਂ ਗਣ੍ਹਥਾ’’ਤਿ ਵਦਨ੍ਤਿ, ਪਟਿਕਚ੍ਚੇਵ ਵਾ ਵਿਹਾਰਂ ਅਤਿਹਰਿਤ੍ਵਾ ਪਤਿਰੂਪੇ ਠਾਨੇ ਠਪੇਤ੍ਵਾ ਆਗਤਾਗਤਾਨਂ ਦੇਨ੍ਤਿ, ਅਯਂ ਅਭਿਹਟਭਿਕ੍ਖਾ ਨਾਮ ਵਟ੍ਟਤਿ. ਸਚੇ ਪਨ ਭਤ੍ਤਸਾਲਾਯ ਦਾਨਂ ਸਜ੍ਜੇਤ੍ਵਾ ਤਂ ਤਂ ਪਰਿਵੇਣਂ ਪਹਿਣਨ੍ਤਿ ‘‘ਭਤ੍ਤਸਾਲਾਯ ਭਤ੍ਤਂ ਗਣ੍ਹਥਾ’’ਤਿ, ਵਟ੍ਟਤਿ. ਯੇ ਪਨ ਮਨੁਸ੍ਸਾ ਪਿਣ੍ਡਚਾਰਿਕੇ ਭਿਕ੍ਖੂ ਦਿਸ੍ਵਾ ਆਸਨਸਾਲਂ ਸਮ੍ਮਜ੍ਜਿਤ੍ਵਾ ਤਤ੍ਥ ਨਿਸੀਦਾਪੇਤ੍ਵਾ ਭੋਜੇਨ੍ਤਿ, ਨ ਤੇ ਪਟਿਕ੍ਖਿਪਿਤਬ੍ਬਾ. ਯੇ ਪਨ ਗਾਮੇ ਭਿਕ੍ਖਂ ਅਲਭਿਤ੍ਵਾ ਗਾਮਤੋ ਨਿਕ੍ਖਮਨ੍ਤੇ ਭਿਕ੍ਖੂ ਦਿਸ੍ਵਾ ‘‘ਭਨ੍ਤੇ, ਭਤ੍ਤਂ ਗਣ੍ਹਥਾ’’ਤਿ ਵਦਨ੍ਤਿ, ਤੇ ਪਟਿਕ੍ਖਿਪਿਤਬ੍ਬਾ, ਨ ਨਿਵਤ੍ਤਿਤਬ੍ਬਂ. ਸਚੇ ‘‘ਨਿਵਤ੍ਤਥ, ਭਨ੍ਤੇ, ਭਤ੍ਤਂ ਗਣ੍ਹਥਾ’’ਤਿ ਵਦਨ੍ਤਿ, ‘‘ਨਿਵਤ੍ਤਥਾ’’ਤਿ ਵੁਤ੍ਤਪਦੇ ਨਿਵਤ੍ਤਿਤੁਂ ਵਟ੍ਟਤਿ. ‘‘ਨਿਵਤ੍ਤਥ, ਭਨ੍ਤੇ, ਘਰੇ ਭਤ੍ਤਂ ਕਤਂ, ਗਾਮੇ ਭਤ੍ਤਂ ਕਤ’’ਨ੍ਤਿ ਵਦਨ੍ਤਿ, ਗੇਹੇ ਚ ਗਾਮੇ ਚ ਭਤ੍ਤਂ ਨਾਮ ਯਸ੍ਸ ਕਸ੍ਸਚਿ ਹੋਤਿ, ਨਿਵਤ੍ਤਿਤੁਂ ਵਟ੍ਟਤਿ. ‘‘ਨਿਵਤ੍ਤਥ ਭਤ੍ਤਂ ਗਣ੍ਹਥਾ’’ਤਿ ਸਮ੍ਬਨ੍ਧਂ ਕਤ੍ਵਾ ਵਦਨ੍ਤਿ, ਨਿਵਤ੍ਤਿਤੁਂ ਨ ਵਟ੍ਟਤਿ. ਆਸਨਸਾਲਾਤੋ ਪਿਣ੍ਡਾਯ ਚਰਿਤੁਂ ਨਿਕ੍ਖਮਨ੍ਤੇ ਦਿਸ੍ਵਾ ‘‘ਨਿਸੀਦਥ, ਭਨ੍ਤੇ, ਭਤ੍ਤਂ ਗਣ੍ਹਥਾ’’ਤਿ ਵੁਤ੍ਤੇਪਿ ਏਸੇਵ ਨਯੋ.
‘‘ਅਞ੍ਞਤ੍ਰ ਸਮਯਾ’’ਤਿ ਵਚਨਤੋ ਗਿਲਾਨਸਮਯੋ ਚੀਵਰਦਾਨਸਮਯੋ ਚੀਵਰਕਾਰਸਮਯੋ ਅਦ੍ਧਾਨਗਮਨਸਮਯੋ ਨਾਵਾਭਿਰੁਹਨਸਮਯੋ ਮਹਾਸਮਯੋ ਸਮਣਭਤ੍ਤਸਮਯੋਤਿ ਏਤੇਸੁ ਸਤ੍ਤਸੁ ਸਮਯੇਸੁ ਅਞ੍ਞਤਰਸ੍ਮਿਂ ਅਨਾਪਤ੍ਤਿ. ਤਸ੍ਮਾ ਯਥਾ ਮਹਾਚਮ੍ਮਸ੍ਸ ਪਰਤੋ ਮਂਸਂ ਦਿਸ੍ਸਤਿ, ਏਵਂ ਅਨ੍ਤਮਸੋ ਪਾਦਾਪਿ ਫਾਲਿਤਾ ਹੋਨ੍ਤਿ, ਵਾਲਿਕਾਯ ਵਾ ਸਕ੍ਖਰਾਯ ਵਾ ਪਹਟਮਤ੍ਤੇ ਦੁਕ੍ਖਂ ਉਪ੍ਪਾਦੇਨ੍ਤਿ, ਨ ਸਕ੍ਕਾ ਚ ਹੋਤਿ ਅਨ੍ਤੋਗਾਮੇ ਪਿਣ੍ਡਾਯ ਚਰਿਤੁਂ, ਈਦਿਸੇ ਗੇਲਞ੍ਞੇ ਗਿਲਾਨਸਮਯੋਤਿ ਭੁਞ੍ਜਿਤਬ੍ਬਂ, ਨ ਲੇਸਕਪ੍ਪਿਯਂ ਕਾਤਬ੍ਬਂ.
ਚੀਵਰਦਾਨਸਮਯੋ ਨਾਮ ਅਨਤ੍ਥਤੇ ਕਥਿਨੇ ਵਸ੍ਸਾਨਸ੍ਸ ਪਚ੍ਛਿਮੋ ਮਾਸੋ, ਅਤ੍ਥਤੇ ਕਥਿਨੇ ਪਞ੍ਚਮਾਸਾ. ਏਤ੍ਥਨ੍ਤਰੇ ‘‘ਚੀਵਰਦਾਨਸਮਯੋ’’ਤਿ ਭੁਞ੍ਜਿਤਬ੍ਬਂ. ਚੀਵਰੇ ਕਰਿਯਮਾਨੇ ਚੀਵਰਕਾਰਸਮਯੋਤਿ ਭੁਞ੍ਜਿਤਬ੍ਬਂ. ਯਦਾ ਹਿ ਸਾਟਕਞ੍ਚ ਸੁਤ੍ਤਞ੍ਚ ਲਭਿਤ੍ਵਾ ਚੀਵਰਂ ਕਰੋਨ੍ਤਿ, ਅਯਂ ਚੀਵਰਕਾਰਸਮਯੋ ਨਾਮ, ਵਿਸੁਂ ਚੀਵਰਕਾਰਸਮਯੋ ਨਾਮ ਨਤ੍ਥਿ, ਤਸ੍ਮਾ ਯੋ ਤਤ੍ਥ ਚੀਵਰੇ ਕਤ੍ਤਬ੍ਬਂ ਯਂ ਕਿਞ੍ਚਿ ਕਮ੍ਮਂ ਕਰੋਤਿ, ਮਹਾਪਚ੍ਚਰਿਯਞ੍ਹਿ ‘‘ਅਨ੍ਤਮਸੋ ਸੂਚਿਵੇਧਕੋ’’ਤਿਪਿ ਵੁਤ੍ਤਂ. ਤੇਨ ‘‘ਚੀਵਰਕਾਰਸਮਯੋ’’ਤਿ ਭੁਞ੍ਜਿਤਬ੍ਬਂ. ਕੁਰੁਨ੍ਦਿਯਂ ਪਨ ਵਿਤ੍ਥਾਰੇਨੇਵ ਵੁਤ੍ਤਂ ‘‘ਯੋ ਚੀਵਰਂ ਵਿਚਾਰੇਤਿ ਛਿਨ੍ਦਤਿ, ਮੋਘਸੁਤ੍ਤਕਂ ਠਪੇਤਿ, ਆਗਨ੍ਤੁਕਪਤ੍ਤਂ ਠਪੇਤਿ, ਪਚ੍ਚਾਗਤਂ ਸਿਬ੍ਬੇਤਿ, ਆਗਨ੍ਤੁਕਪਤ੍ਤਂ ਬਨ੍ਧਤਿ, ਅਨੁਵਾਤਂ ਛਿਨ੍ਦਤਿ ਘਟੇਤਿ ਆਰੋਪੇਤਿ, ਤਤ੍ਥ ਪਚ੍ਚਾਗਤਂ ਸਿਬ੍ਬੇਤਿ, ਸੁਤ੍ਤਂ ਕਰੋਤਿ ਵਲੇਤਿ, ਪਿਪ੍ਫਲਿਕਂ ਨਿਸੇਤਿ, ਪਰਿਵਤ੍ਤਨਂ ਕਰੋਤਿ, ਸਬ੍ਬੋਪਿ ਚੀਵਰਂ ਕਰੋਤਿਯੇਵਾਤਿ ਵੁਚ੍ਚਤਿ. ਯੋ ਪਨ ਸਮੀਪੇ ਨਿਸਿਨ੍ਨੋ ਜਾਤਕਂ ਵਾ ਧਮ੍ਮਪਦਂ ਵਾ ਕਥੇਤਿ, ਅਯਂ ਨ ਚੀਵਰਕਾਰਕੋ, ਏਤਂ ਠਪੇਤ੍ਵਾ ਸੇਸਾਨਂ ਗਣਭੋਜਨੇ ਅਨਾਪਤ੍ਤੀ’’ਤਿ.
ਅਦ੍ਧਾਨਗਮਨਸਮਯੇ ਅਨ੍ਤਮਸੋ ਅਡ੍ਢਯੋਜਨਂ ਗਨ੍ਤੁਕਾਮੇਨਪਿ ‘‘ਅਡ੍ਢਯੋਜਨਂ ਗਚ੍ਛਿਸ੍ਸਾਮੀ’’ਤਿ ਭੁਞ੍ਜਿਤਬ੍ਬਂ, ਗਚ੍ਛਨ੍ਤੇਨ ਭੁਞ੍ਜਿਤਬ੍ਬਂ, ਗਤੇਨ ਏਕਦਿਵਸਂ ਭੁਞ੍ਜਿਤਬ੍ਬਂ.
ਨਾਵਾਭਿਰੁਹਨਸਮਯੇ ‘‘ਨਾਵਂ ਅਭਿਰੁਹਿਸ੍ਸਾਮੀ’’ਤਿ ਭੁਞ੍ਜਿਤਬ੍ਬਂ, ਆਰੁਲ਼੍ਹੇਨ ਇਚ੍ਛਿਤਟ੍ਠਾਨਂ ਗਨ੍ਤ੍ਵਾਪਿ ਯਾਵ ਨ ਓਰੋਹਤਿ, ਤਾਵ ਭੁਞ੍ਜਿਤਬ੍ਬਂ, ਓਰੁਲ਼੍ਹੇਨ ਏਕਦਿਵਸਂ ਭੁਞ੍ਜਿਤਬ੍ਬਂ.
ਮਹਾਸਮਯੋ ਨਾਮ ਯਤ੍ਥ ਦ੍ਵੇ ਤਯੋ ਭਿਕ੍ਖੂ ਪਿਣ੍ਡਾਯ ਚਰਿਤ੍ਵਾ ਯਾਪੇਨ੍ਤਿ, ਅਨ੍ਤਮਸੋ ਚਤੁਤ੍ਥੇਪਿ ਆਗਤੇ ਨ ਯਾਪੇਨ੍ਤਿ, ਅਯਂ ਮਹਾਸਮਯੋ. ਯਤ੍ਥ ਪਨ ਸਤਂ ਵਾ ਸਹਸ੍ਸਂ ਵਾ ਸਨ੍ਨਿਪਤਨ੍ਤਿ, ਤਤ੍ਥ ਵਤ੍ਤਬ੍ਬਮੇਵ ਨਤ੍ਥਿ, ਤਸ੍ਮਾ ਤਾਦਿਸੇ ਕਾਲੇ ‘‘ਮਹਾਸਮਯੋ’’ਤਿ ਅਧਿਟ੍ਠਹਿਤ੍ਵਾ ਭੁਞ੍ਜਿਤਬ੍ਬਂ.
ਸਮਣਭਤ੍ਤਸਮਯੋ ਨਾਮ ਯੋ ਕੋਚਿ ਪਰਿਬ੍ਬਾਜਕਸਮਾਪਨ੍ਨੋ ਭਤ੍ਤਂ ਕਰੋਤਿ, ਅਯਂ ਸਮਣਭਤ੍ਤਸਮਯੋਵ. ਤਸ੍ਮਾ ਸਹਧਮ੍ਮਿਕੇਸੁ ਵਾ ਤਿਤ੍ਥਿਯੇਸੁ ਵਾ ਅਞ੍ਞਤਰੇਨ ਯੇਨ ਕੇਨਚਿ ਕਤੇ ਭਤ੍ਤੇ ‘‘ਸਮਣਭਤ੍ਤਸਮਯੋ’’ਤਿ ਭੁਞ੍ਜਿਤਬ੍ਬਂ. ‘‘ਅਨਾਪਤ੍ਤਿ ਸਮਯੇ, ਦ੍ਵੇ ਤਯੋ ਏਕਤੋ ਭੁਞ੍ਜਨ੍ਤਿ, ਪਿਣ੍ਡਾਯ ਚਰਿਤ੍ਵਾ ਏਕਤੋ ਸਨ੍ਨਿਪਤਿਤ੍ਵਾ ਭੁਞ੍ਜਨ੍ਤਿ, ਨਿਚ੍ਚਭਤ੍ਤਂ, ਸਲਾਕਭਤ੍ਤਂ, ਪਕ੍ਖਿਕਂ, ਉਪੋਸਥਿਕਂ, ਪਾਟਿਪਦਿਕਂ, ਪਞ੍ਚ ਭੋਜਨਾਨਿ ਠਪੇਤ੍ਵਾ ਸਬ੍ਬਤ੍ਥ ਅਨਾਪਤ੍ਤੀ’’ਤਿ (ਪਾਚਿ. ੨੨੦) ਵਚਨਤੋ ਯੇਪਿ ਅਕਪ੍ਪਿਯਨਿਮਨ੍ਤਨਂ ਸਾਦਿਯਿਤ੍ਵਾ ਦ੍ਵੇ ਵਾ ਤਯੋ ਵਾ ਏਕਤੋ ਗਹੇਤ੍ਵਾ ਭੁਞ੍ਜਨ੍ਤਿ, ਤੇਸਮ੍ਪਿ ਅਨਾਪਤ੍ਤਿ.
ਤਤ੍ਥ ਅਨਿਮਨ੍ਤਿਤਚਤੁਤ੍ਥਂ ਪਿਣ੍ਡਪਾਤਿਕਚਤੁਤ੍ਥਂ ਅਨੁਪਸਮ੍ਪਨ੍ਨਚਤੁਤ੍ਥਂ ਪਤ੍ਤਚਤੁਤ੍ਥਂ ਗਿਲਾਨਚਤੁਤ੍ਥਨ੍ਤਿ ਪਞ੍ਚਨ੍ਨਂ ਚਤੁਤ੍ਥਾਨਂ ਵਸੇਨ ਵਿਨਿਚ੍ਛਯੋ ਵੇਦਿਤਬ੍ਬੋ. ਕਥਂ? ਇਧੇਕਚ੍ਚੋ ਚਤ੍ਤਾਰੋ ਭਿਕ੍ਖੂ ‘‘ਭਤ੍ਤਂ ਗਣ੍ਹਥਾ’’ਤਿ ਨਿਮਨ੍ਤੇਤਿ. ਤੇਸੁ ਤਯੋ ਗਤਾ, ਏਕੋ ਨ ਗਤੋ. ਉਪਾਸਕੋ ‘‘ਏਕੋ, ਭਨ੍ਤੇ, ਥੇਰੋ ਕੁਹਿ’’ਨ੍ਤਿ ਪੁਚ੍ਛਤਿ. ਨਾਗਤੋ ਉਪਾਸਕਾਤਿ. ਸੋ ਅਞ੍ਞਂ ਤਂਖਣਪ੍ਪਤ੍ਤਂ ਕਞ੍ਚਿ ‘‘ਏਹਿ, ਭਨ੍ਤੇ’’ਤਿ ਘਰਂ ਪਵੇਸੇਤ੍ਵਾ ਚਤੁਨ੍ਨਮ੍ਪਿ ਭਤ੍ਤਂ ਦੇਤਿ, ਸਬ੍ਬੇਸਂ ਅਨਾਪਤ੍ਤਿ. ਕਸ੍ਮਾ? ਗਣਪੂਰਕਸ੍ਸ ਅਨਿਮਨ੍ਤਿਤਤ੍ਤਾ. ਤਯੋ ਏਵ ਹਿ ਤਤ੍ਥ ਨਿਮਨ੍ਤਿਤਾ ਗਣ੍ਹਿਂਸੁ, ਤੇਹਿ ਗਣੋ ਨ ਪੂਰਤਿ, ਗਣਪੂਰਕੋ ਚ ਅਨਿਮਨ੍ਤਿਤੋ, ਤੇਨ ਗਣੋ ਭਿਜ੍ਜਤੀਤਿ. ਏਤਂ ਅਨਿਮਨ੍ਤਿਤਚਤੁਤ੍ਥਂ.
ਪਿਣ੍ਡਪਾਤਿਕਚਤੁਤ੍ਥੇ ਨਿਮਨ੍ਤਨਕਾਲੇ ਏਕੋ ਪਿਣ੍ਡਪਾਤਿਕੋ ਹੋਤਿ, ਸੋ ਨਾਧਿਵਾਸੇਤਿ, ਗਮਨਵੇਲਾਯਂ ਪਨ ‘‘ਏਹਿ ਭਨ੍ਤੇ’’ਤਿ ਵੁਤ੍ਤੇ ਅਨਧਿਵਾਸਿਤਤ੍ਤਾ ਅਨਾਗਚ੍ਛਨ੍ਤਮ੍ਪਿ ‘‘ਏਥ ਭਿਕ੍ਖਂ ਲਚ੍ਛਥਾ’’ਤਿ ਗਹੇਤ੍ਵਾ ਗਚ੍ਛਨ੍ਤਿ, ਸੋ ਤਂ ਗਣਂ ਭਿਨ੍ਦਤਿ, ਤਸ੍ਮਾ ਸਬ੍ਬੇਸਂ ਅਨਾਪਤ੍ਤਿ.
ਅਨੁਪਸਮ੍ਪਨ੍ਨਚਤੁਤ੍ਥੇ ਸਾਮਣੇਰੇਨ ਸਦ੍ਧਿਂ ਨਿਮਨ੍ਤਿਤਾ ਹੋਨ੍ਤਿ, ਸੋਪਿ ਗਣਂ ਭਿਨ੍ਦਤਿ.
ਪਤ੍ਤਚਤੁਤ੍ਥੇ ਏਕੋ ਸਯਂ ਆਗਨ੍ਤ੍ਵਾ ਪਤ੍ਤਂ ਪੇਸੇਤਿ, ਏਵਮ੍ਪਿ ਗਣੋ ਭਿਜ੍ਜਤਿ, ਤਸ੍ਮਾ ਸਬ੍ਬੇਸਂ ਅਨਾਪਤ੍ਤਿ.
ਗਿਲਾਨਚਤੁਤ੍ਥੇ ਗਿਲਾਨੇਨ ਸਦ੍ਧਿਂ ਨਿਮਨ੍ਤਿਤਾ ਹੋਨ੍ਤਿ, ਤਤ੍ਥ ਗਿਲਾਨਸ੍ਸੇਵ ਅਨਾਪਤ੍ਤਿ, ਇਤਰੇਸਂ ਪਨ ਗਣਪੂਰਕੋ ਹੋਤਿ. ਨ ਹਿ ਗਿਲਾਨੇਨ ਗਣੋ ਭਿਜ੍ਜਤਿ, ਤਸ੍ਮਾ ਤੇਸਂ ਆਪਤ੍ਤਿ. ਮਹਾਪਚ੍ਚਰਿਯਂ ਪਨ ਅਵਿਸੇਸੇਨ ਵੁਤ੍ਤਂ ‘‘ਸਮਯਲਦ੍ਧਕੋ ਸਯਮੇਵ ਮੁਚ੍ਚਤਿ, ਸੇਸਾਨਂ ਗਣਪੂਰਕਤ੍ਤਾ ਆਪਤ੍ਤਿਕਰੋ ਹੋਤੀ’’ਤਿ. ਤਸ੍ਮਾ ਚੀਵਰਦਾਨਸਮਯਲਦ੍ਧਕਾਦੀਨਮ੍ਪਿ ਵਸੇਨ ਚਤੁਕ੍ਕਾਨਿ ਵੇਦਿਤਬ੍ਬਾਨਿ.
ਸਚੇ ਪਨ ਅਧਿਵਾਸੇਤ੍ਵਾ ਗਤੇਸੁਪਿ ਚਤੂਸੁ ਜਨੇਸੁ ਏਕੋ ਪਣ੍ਡਿਤੋ ਭਿਕ੍ਖੁ ‘‘ਅਹਂ ਤੁਮ੍ਹਾਕਂ ਗਣਂ ਭਿਨ੍ਦਿਸ੍ਸਾਮਿ, ਨਿਮਨ੍ਤਨਂ ਸਾਦਿਯਥਾ’’ਤਿ ਵਤ੍ਵਾ ਯਾਗੁਖਜ੍ਜਕਾਵਸਾਨੇ ਭਤ੍ਤਤ੍ਥਾਯ ਪਤ੍ਤਂ ਗਣ੍ਹਨ੍ਤਾਨਂ ਅਦਤ੍ਵਾ ‘‘ਇਮੇ ਤਾਵ ਭਿਕ੍ਖੂ ਭੋਜੇਤ੍ਵਾ ਵਿਸ੍ਸਜ੍ਜੇਥ, ਅਹਂ ਪਚ੍ਛਾ ਅਨੁਮੋਦਨਂ ਕਤ੍ਵਾ ਗਮਿਸ੍ਸਾਮੀ’’ਤਿ ਨਿਸਿਨ੍ਨੋ, ਤੇਸੁ ਭੁਤ੍ਵਾ ਗਤੇਸੁ ‘‘ਦੇਥ, ਭਨ੍ਤੇ, ਪਤ੍ਤ’’ਨ੍ਤਿ ਉਪਾਸਕੇਨ ਪਤ੍ਤਂ ਗਹੇਤ੍ਵਾ ਭਤ੍ਤੇ ਦਿਨ੍ਨੇ ਭੁਞ੍ਜਿਤ੍ਵਾ ਅਨੁਮੋਦਨਂ ਕਤ੍ਵਾ ਗਚ੍ਛਤਿ, ਸਬ੍ਬੇਸਂ ਅਨਾਪਤ੍ਤਿ. ਪਞ੍ਚਨ੍ਨਞ੍ਹਿ ਭੋਜਨਾਨਂਯੇਵ ਵਸੇਨ ਗਣਭੋਜਨੇ ਵਿਸਙ੍ਕੇਤਂ ਨਤ੍ਥਿ, ਓਦਨੇਨ ਨਿਮਨ੍ਤੇਤ੍ਵਾ ਕੁਮ੍ਮਾਸਂ ਗਣ੍ਹਨ੍ਤਾਪਿ ਆਪਜ੍ਜਨ੍ਤਿ, ਤਾਨਿ ਚ ਤੇਹਿ ਏਕਤੋ ਨ ਗਹਿਤਾਨਿ, ਯਾਗੁਆਦੀਹਿ ਪਨ ਵਿਸਙ੍ਕੇਤਂ ਹੋਤਿ, ਤਾਨਿ ਤੇਹਿ ਏਕਤੋ ਗਹਿਤਾਨੀਤਿ ਏਵਂ ਏਕੋ ਪਣ੍ਡਿਤੋ ਅਞ੍ਞੇਸਮ੍ਪਿ ਅਨਾਪਤ੍ਤਿਂ ਕਰੋਤਿ. ਨਿਚ੍ਚਭਤ੍ਤਨ੍ਤਿ ਧੁਵਭਤ੍ਤਂ ਵੁਚ੍ਚਤਿ, ‘‘ਨਿਚ੍ਚਭਤ੍ਤਂ ਗਣ੍ਹਥਾ’’ਤਿ ਵਦਨ੍ਤਿ, ਬਹੂਨਂ ਏਕਤੋ ਗਹੇਤੁਂ ਵਟ੍ਟਤਿ. ਸਲਾਕਭਤ੍ਤਾਦੀਸੁਪਿ ਏਸੇਵ ਨਯੋ.
੨. ‘‘ਪਰਮ੍ਪਰਭੋਜਨੇ ਅਞ੍ਞਤ੍ਰ ਸਮਯਾ ਪਾਚਿਤ੍ਤਿਯ’’ਨ੍ਤਿ (ਪਾਚਿ. ੨੨੨-੨੨੩, ੨੨੫) ਵੁਤ੍ਤਂ ਪਰਮ੍ਪਰਭੋਜਨਂ ਪਨ ਨਿਮਨ੍ਤਨਤੋਯੇਵ ਪਸਵਤਿ. ਯੋ ਹਿ ‘‘ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨ ਭੋਜਨੇਨ ਭਤ੍ਤਂ ਗਣ੍ਹਥਾ’’ਤਿਆਦਿਨਾ ਨਿਮਨ੍ਤਿਤੋ ਤਂ ਠਪੇਤ੍ਵਾ ਅਞ੍ਞਂ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਭੋਜਨਂ ਭੁਞ੍ਜਤਿ, ਤਸ੍ਸੇਤਂ ਭੋਜਨਂ ‘‘ਪਰਮ੍ਪਰਭੋਜਨ’’ਨ੍ਤਿ ਵੁਚ੍ਚਤਿ. ਏਵਂ ਭੁਞ੍ਜਨ੍ਤਸ੍ਸ ਠਪੇਤ੍ਵਾ ਗਿਲਾਨਸਮਯਂ ਚੀਵਰਦਾਨਸਮਯਂ ਚੀਵਰਕਾਰਸਮਯਞ੍ਚ ਅਞ੍ਞਸ੍ਮਿਂ ਸਮਯੇ ਪਾਚਿਤ੍ਤਿਯਂ ਵੁਤ੍ਤਂ, ਤਸ੍ਮਾ ਨਿਮਨ੍ਤਨਪਟਿਪਾਟਿਯਾਵ ਭੁਞ੍ਜਿਤਬ੍ਬਂ, ਨ ਉਪ੍ਪਟਿਪਾਟਿਯਾ.
‘‘ਅਨੁਜਾਨਾਮਿ, ਭਿਕ੍ਖਵੇ, ਵਿਕਪ੍ਪੇਤ੍ਵਾ ਪਰਮ੍ਪਰਭੋਜਨਂ ਭੁਞ੍ਜਿਤੁ’’ਨ੍ਤਿ (ਪਾਚਿ. ੨੨੬) ਵਚਨਤੋ ਪਠਮਨਿਮਨ੍ਤਨਂ ਅਞ੍ਞਸ੍ਸ ਵਿਕਪ੍ਪੇਤ੍ਵਾਪਿ ਪਰਿਭੁਞ੍ਜਿਤੁਂ ਵਟ੍ਟਤਿ. ਅਯਂ (ਪਾਚਿ. ਅਟ੍ਠ. ੨੨੬ ਆਦਯੋ) ਵਿਕਪ੍ਪਨਾ ਨਾਮ ਸਮ੍ਮੁਖਾਪਿ ਪਰਮ੍ਮੁਖਾਪਿ ਵਟ੍ਟਤਿ. ਸਮ੍ਮੁਖਾ ਦਿਸ੍ਵਾ ‘‘ਮਯ੍ਹਂ ਭਤ੍ਤਪਚ੍ਚਾਸਂ ਤੁਯ੍ਹਂ ਵਿਕਪ੍ਪੇਮੀ’’ਤਿ ਵਾ ‘‘ਦਮ੍ਮੀ’’ਤਿ ਵਾ ਵਤ੍ਵਾ ਭੁਞ੍ਜਿਤਬ੍ਬਂ, ਅਦਿਸ੍ਵਾ ਪਞ੍ਚਸੁ ਸਹਧਮ੍ਮਿਕੇਸੁ ਯਸ੍ਸ ਕਸ੍ਸਚਿ ਨਾਮਂ ਗਹੇਤ੍ਵਾ ‘‘ਮਯ੍ਹਂ ਭਤ੍ਤਪਚ੍ਚਾਸਂ ਇਤ੍ਥਨ੍ਨਾਮਸ੍ਸ ਵਿਕਪ੍ਪੇਮੀ’’ਤਿ ਵਾ ‘‘ਦਮ੍ਮੀ’’ਤਿ ਵਾ ਵਤ੍ਵਾ ਭੁਞ੍ਜਿਤਬ੍ਬਂ. ਦ੍ਵੇ ਤੀਣਿ ਨਿਮਨ੍ਤਨਾਨਿ ਪਨ ਏਕਸ੍ਮਿਂ ਪਤ੍ਤੇ ਪਕ੍ਖਿਪਿਤ੍ਵਾ ਮਿਸ੍ਸੇਤ੍ਵਾ ਏਕਂ ਕਤ੍ਵਾ ਭੁਞ੍ਜਿਤੁਂ ਵਟ੍ਟਤਿ. ‘‘ਅਨਾਪਤ੍ਤਿ ਦ੍ਵੇ ਤਯੋ ਨਿਮਨ੍ਤਨੇ ਏਕਤੋ ਭੁਞ੍ਜਤੀ’’ਤਿ (ਪਾਚਿ. ੨੨੯) ਹਿ ਵੁਤ੍ਤਂ. ਸਚੇ ਦ੍ਵੇ ਤੀਣਿ ਕੁਲਾਨਿ ਨਿਮਨ੍ਤੇਤ੍ਵਾ ਏਕਸ੍ਮਿਂ ਠਾਨੇ ਨਿਸੀਦਾਪੇਤ੍ਵਾ ਇਤੋ ਚਿਤੋ ਚ ਆਹਰਿਤ੍ਵਾ ਭਤ੍ਤਂ ਆਕਿਰਨ੍ਤਿ, ਸੂਪਬ੍ਯਞ੍ਜਨਂ ਆਕਿਰਨ੍ਤਿ, ਏਕਮਿਸ੍ਸਕਂ ਹੋਤਿ, ਏਤ੍ਥਾਪਿ ਅਨਾਪਤ੍ਤਿ.
ਸਚੇ ਪਨ ਮੂਲਨਿਮਨ੍ਤਨਂ ਹੇਟ੍ਠਾ ਹੋਤਿ, ਪਚ੍ਛਿਮਂ ਪਚ੍ਛਿਮਂ ਉਪਰਿ, ਤਂ ਉਪਰਿਤੋ ਪਟ੍ਠਾਯ ਭੁਞ੍ਜਨ੍ਤਸ੍ਸ ਆਪਤ੍ਤਿ, ਹਤ੍ਥਂ ਪਨ ਅਨ੍ਤੋ ਪਵੇਸੇਤ੍ਵਾ ਪਠਮਨਿਮਨ੍ਤਨਤੋ ਏਕਮ੍ਪਿ ਕਬਲ਼ਂ ਉਦ੍ਧਰਿਤ੍ਵਾ ਭੁਤ੍ਤਕਾਲਤੋ ਪਟ੍ਠਾਯ ਯਥਾ ਤਥਾ ਵਾ ਭੁਞ੍ਜਨ੍ਤਸ੍ਸ ਅਨਾਪਤ੍ਤਿ. ‘‘ਸਚੇਪਿ ਤਤ੍ਥ ਖੀਰਂ ਵਾ ਰਸਂ ਵਾ ਆਕਿਰਨ੍ਤਿ, ਯੇਨ ਅਜ੍ਝੋਤ੍ਥਤਂ ਭਤ੍ਤਂ ਏਕਰਸਂ ਹੋਤਿ, ਕੋਟਿਤੋ ਪਟ੍ਠਾਯ ਭੁਞ੍ਜਨ੍ਤਸ੍ਸ ਅਨਾਪਤ੍ਤੀ’’ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ਵੁਤ੍ਤਂ ‘‘ਖੀਰਭਤ੍ਤਂ ਵਾ ਰਸਭਤ੍ਤਂ ਵਾ ਲਭਿਤ੍ਵਾ ਨਿਸਿਨ੍ਨਸ੍ਸ ਤਤ੍ਥੇਵ ਅਞ੍ਞੇਪਿ ਖੀਰਭਤ੍ਤਂ ਵਾ ਰਸਭਤ੍ਤਂ ਵਾ ਆਕਿਰਨ੍ਤਿ, ਖੀਰਂ ਵਾ ਰਸਂ ਵਾ ਪਿਵਤੋ ਅਨਾਪਤ੍ਤਿ, ਭੁਞ੍ਜਨ੍ਤੇਨ ਪਠਮਂ ਲਦ੍ਧਮਂਸਖਣ੍ਡਂ ਵਾ ਭਤ੍ਤਪਿਣ੍ਡਂ ਵਾ ਮੁਖੇ ਪਕ੍ਖਿਪਿਤ੍ਵਾ ਕੋਟਿਤੋ ਪਟ੍ਠਾਯ ਭੁਞ੍ਜਿਤੁਂ ਵਟ੍ਟਤਿ. ਸਪ੍ਪਿਪਾਯਾਸੇਪਿ ਏਸੇਵ ਨਯੋ’’ਤਿ.
ਮਹਾਉਪਾਸਕੋ ਭਿਕ੍ਖੁਂ ਨਿਮਨ੍ਤੇਤਿ, ਤਸ੍ਸ ਕੁਲਂ ਉਪਗਤਸ੍ਸ ਉਪਾਸਕੋਪਿ ਤਸ੍ਸ ਪੁਤ੍ਤਦਾਰਭਾਤੁਭਗਿਨਿਆਦਯੋਪਿ ਅਤ੍ਤਨੋ ਅਤ੍ਤਨੋ ਕੋਟ੍ਠਾਸਂ ਆਹਰਿਤ੍ਵਾ ਪਤ੍ਤੇ ਪਕ੍ਖਿਪਨ੍ਤਿ, ‘‘ਉਪਾਸਕੇਨ ਪਠਮਂ ਦਿਨ੍ਨਂ ਅਭੁਞ੍ਜਿਤ੍ਵਾ ਪਚ੍ਛਾ ਲਦ੍ਧਂ ਭੁਞ੍ਜਨ੍ਤਸ੍ਸ ਆਪਤ੍ਤੀ’’ਤਿ ਮਹਾਅਟ੍ਠਕਥਾਯਂ ਵੁਤ੍ਤਂ. ਕੁਰੁਨ੍ਦਟ੍ਠਕਥਾਯਂ ‘‘ਵਟ੍ਟਤੀ’’ਤਿ ਵੁਤ੍ਤਂ. ਮਹਾਪਚ੍ਚਰਿਯਂ ‘‘ਸਚੇ ਪਾਟੇਕ੍ਕਂ ਪਚਨ੍ਤਿ, ਅਤ੍ਤਨੋ ਅਤ੍ਤਨੋ ਪਕ੍ਕਭਤ੍ਤਤੋ ਆਹਰਿਤ੍ਵਾ ਦੇਨ੍ਤਿ, ਤਤ੍ਥ ਪਚ੍ਛਾ ਆਹਟਂ ਪਠਮਂ ਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯਂ. ਯਦਿ ਪਨ ਸਬ੍ਬੇਸਂ ਏਕੋਵ ਪਾਕੋ ਹੋਤਿ, ਪਰਮ੍ਪਰਭੋਜਨਂ ਨ ਹੋਤੀ’’ਤਿ ਵੁਤ੍ਤਂ. ਮਹਾਉਪਾਸਕੋ ਨਿਮਨ੍ਤੇਤ੍ਵਾ ਨਿਸੀਦਾਪੇਤਿ, ਅਞ੍ਞੋ ਮਨੁਸ੍ਸੋ ਪਤ੍ਤਂ ਗਣ੍ਹਾਤਿ, ਨ ਦਾਤਬ੍ਬਂ. ਕਿਂ, ਭਨ੍ਤੇ, ਨ ਦੇਥਾਤਿ. ਨਨੁ ਉਪਾਸਕ ਤਯਾ ਨਿਮਨ੍ਤਿਤਮ੍ਹਾਤਿ. ‘‘ਹੋਤੁ, ਭਨ੍ਤੇ, ਲਦ੍ਧਂ ਲਦ੍ਧਂ ਭੁਞ੍ਜਥਾ’’ਤਿ ਵਦਤਿ, ਭੁਞ੍ਜਿਤੁਂ ਵਟ੍ਟਤਿ. ‘‘ਅਞ੍ਞੇਨ ਆਹਰਿਤ੍ਵਾ ਭਤ੍ਤੇ ਦਿਨ੍ਨੇ ਆਪੁਚ੍ਛਿਤ੍ਵਾਪਿ ਭੁਞ੍ਜਿਤੁਂ ਵਟ੍ਟਤੀ’’ਤਿ ਕੁਰੁਨ੍ਦਿਯਂ ਵੁਤ੍ਤਂ.
ਅਨੁਮੋਦਨਂ ਕਤ੍ਵਾ ਗਚ੍ਛਨ੍ਤਂ ਧਮ੍ਮਂ ਸੋਤੁਕਾਮਾ ‘‘ਸ੍ਵੇਪਿ, ਭਨ੍ਤੇ, ਆਗਚ੍ਛੇਯ੍ਯਾਥਾ’’ਤਿ ਸਬ੍ਬੇ ਨਿਮਨ੍ਤੇਨ੍ਤਿ, ਪੁਨਦਿਵਸੇ ਆਗਨ੍ਤ੍ਵਾ ਲਦ੍ਧਂ ਲਦ੍ਧਂ ਭੁਞ੍ਜਿਤੁਂ ਵਟ੍ਟਤਿ. ਕਸ੍ਮਾ? ਸਬ੍ਬੇਹਿ ਨਿਮਨ੍ਤਿਤਤ੍ਤਾ. ਏਕੋਪਿ ਭਿਕ੍ਖੁ ਪਿਣ੍ਡਾਯ ਚਰਨ੍ਤੋ ਭਤ੍ਤਂ ਲਭਤਿ, ਤਮਞ੍ਞੋ ਉਪਾਸਕੋ ਨਿਮਨ੍ਤੇਤ੍ਵਾ ਘਰੇ ਨਿਸੀਦਾਪੇਤਿ, ਨ ਚ ਤਾਵ ਭਤ੍ਤਂ ਸਮ੍ਪਜ੍ਜਤਿ, ਸਚੇ ਸੋ ਭਿਕ੍ਖੁ ਪਿਣ੍ਡਾਯ ਚਰਿਤ੍ਵਾ ਲਦ੍ਧਭਤ੍ਤਂ ਭੁਞ੍ਜਤਿ, ਆਪਤ੍ਤਿ. ਅਭੁਞ੍ਜਿਤ੍ਵਾ ਨਿਸਿਨ੍ਨੇ ‘‘ਕਿਂ, ਭਨ੍ਤੇ, ਨ ਭੁਞ੍ਜਸੀ’’ਤਿ ਵੁਤ੍ਤੇ ‘‘ਤਯਾ ਨਿਮਨ੍ਤਿਤਤ੍ਤਾ’’ਤਿ ਵਤ੍ਵਾ ‘‘ਲਦ੍ਧਂ ਲਦ੍ਧਂ ਭੁਞ੍ਜਥ, ਭਨ੍ਤੇ’’ਤਿ ਵੁਤ੍ਤੇ ਭੁਞ੍ਜਿਤੁਂ ਵਟ੍ਟਤਿ. ਸਕਲੇਨ ਗਾਮੇਨ ਏਕਤੋ ਹੁਤ੍ਵਾ ਨਿਮਨ੍ਤਿਤਸ੍ਸ ਯਤ੍ਥ ਕਤ੍ਥਚਿ ਭੁਞ੍ਜਤੋ ਅਨਾਪਤ੍ਤਿ. ਪੂਗੇਪਿ ਏਸੇਵ ਨਯੋ. ‘‘ਅਨਾਪਤ੍ਤਿ ਸਕਲੇਨ ਗਾਮੇਨ ਨਿਮਨ੍ਤਿਤੋ ਤਸ੍ਮਿਂ ਗਾਮੇ ਯਤ੍ਥ ਕਤ੍ਥਚਿ ਭੁਞ੍ਜਤਿ, ਸਕਲੇਨ ਪੂਗੇਨ ਨਿਮਨ੍ਤਿਤੋ ਤਸ੍ਮਿਂ ਪੂਗੇ ਯਤ੍ਥ ਕਤ੍ਥਚਿ ਭੁਞ੍ਜਤਿ, ਨਿਮਨ੍ਤਿਯਮਾਨੋ ‘ਭਿਕ੍ਖਂ ਗਹੇਸ੍ਸਾਮੀ’ਤਿ ਭਣਤਿ, ਨਿਚ੍ਚਭਤ੍ਤੇ ਸਲਾਕਭਤ੍ਤੇ ਪਕ੍ਖਿਕੇ ਉਪੋਸਥਿਕੇ ਪਾਟਿਪਦਿਕੇ ਪਞ੍ਚ ਭੋਜਨਾਨਿ ਠਪੇਤ੍ਵਾ ਸਬ੍ਬਤ੍ਥ ਅਨਾਪਤ੍ਤੀ’’ਤਿ (ਪਾਚਿ. ੨੨੯) ਵੁਤ੍ਤਂ.
ਤਤ੍ਥ ਨਿਮਨ੍ਤਿਯਮਾਨੋ ਭਿਕ੍ਖਂ ਗਹੇਸ੍ਸਾਮੀਤਿ ਭਣਤੀਤਿ ਏਤ੍ਥ ‘‘ਭਤ੍ਤਂ ਗਣ੍ਹਾ’’ਤਿ ਨਿਮਨ੍ਤਿਯਮਾਨੋ ‘‘ਨ ਮਯ੍ਹਂ ਤਵ ਭਤ੍ਤੇਨਤ੍ਥੋ, ਭਿਕ੍ਖਂ ਗਣ੍ਹਿਸ੍ਸਾਮੀ’’ਤਿ ਵਦਤਿ, ਅਨਾਪਤ੍ਤੀਤਿ ਅਤ੍ਥੋ. ਏਤ੍ਥ ਪਨ ਮਹਾਪਦੁਮਤ੍ਥੇਰੋ ਆਹ ‘‘ਏਵਂ ਵਦਨ੍ਤੋ ਇਮਸ੍ਮਿਂ ਸਿਕ੍ਖਾਪਦੇ ਅਨਿਮਨ੍ਤਨਂ ਕਾਤੁਂ ਸਕ੍ਕੋਤਿ, ਭੁਞ੍ਜਨਤ੍ਥਾਯ ਪਨ ਓਕਾਸੋ ਕਤੋ ਹੋਤੀਤਿ ਨੇਵ ਗਣਭੋਜਨਤੋ, ਨ ਚਾਰਿਤ੍ਤਤੋ ਮੁਚ੍ਚਤੀ’’ਤਿ. ਮਹਾਸੁਮਤ੍ਥੇਰੋ ਆਹ ‘‘ਯਦਗ੍ਗੇਨ ਅਨਿਮਨ੍ਤਨਂ ਕਾਤੁਂ ਸਕ੍ਕੋਤਿ, ਤਦਗ੍ਗੇਨ ਨੇਵ ਗਣਭੋਜਨਂ, ਨ ਚਾਰਿਤ੍ਤਂ ਹੋਤੀ’’ਤਿ.
ਤਤ੍ਥ ਚਾਰਿਤ੍ਤਨ੍ਤਿ –
‘‘ਯੋ ਪਨ ਭਿਕ੍ਖੁ ਨਿਮਨ੍ਤਿਤੋ ਸਭਤ੍ਤੋ ਸਮਾਨੋ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਕੁਲੇਸੁ ਚਾਰਿਤ੍ਤਂ ਆਪਜ੍ਜੇਯ੍ਯ ਅਞ੍ਞਤ੍ਰ ਸਮਯਾ ਪਾਚਿਤ੍ਤਿਯਂ. ਤਤ੍ਥਾਯਂ ਸਮਯੋ ਚੀਵਰਦਾਨਸਮਯੋ ਚੀਵਰਕਾਰਸਮਯੋ. ਅਯਂ ਤਤ੍ਥ ਸਮਯੋ’’ਤਿ (ਪਾਚਿ. ੨੯੯) –
ਏਵਮਾਗਤਂ ਚਾਰਿਤ੍ਤਸਿਕ੍ਖਾਪਦਂ ਵੁਤ੍ਤਂ. ਇਮਿਨਾ ਹਿ ਸਿਕ੍ਖਾਪਦੇਨ ਯੋ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨ ‘‘ਭਤ੍ਤਂ ਗਣ੍ਹਥਾ’’ਤਿਆਦਿਨਾ ਅਕਪ੍ਪਿਯਨਿਮਨ੍ਤਨੇਨ ਨਿਮਨ੍ਤਿਤੋ, ਤੇਨੇਵ ਨਿਮਨ੍ਤਨਭਤ੍ਤੇਨ ਸਭਤ੍ਤੋ ਸਮਾਨੋ ਸਨ੍ਤਂ ਭਿਕ੍ਖੁਂ ‘‘ਅਹਂ ਇਤ੍ਥਨ੍ਨਾਮਸ੍ਸ ਘਰਂ ਗਚ੍ਛਾਮੀ’’ਤਿ ਵਾ ‘‘ਚਾਰਿਤ੍ਤਂ ਆਪਜ੍ਜਾਮੀ’’ਤਿ ਵਾ ਈਦਿਸੇਨ ਵਚਨੇਨ ਅਨਾਪੁਚ੍ਛਿਤ੍ਵਾ ਯੇਨ ਭਤ੍ਤੇਨ ਨਿਮਨ੍ਤਿਤੋ, ਤਂ ਭੁਤ੍ਵਾ ਵਾ ਅਭੁਤ੍ਵਾ ਵਾ ਅਵੀਤਿਵਤ੍ਤੇਯੇਵ ਮਜ੍ਝਨ੍ਹਿਕੇ ਯਸ੍ਮਿਂ ਕੁਲੇ ਨਿਮਨ੍ਤਿਤੋ, ਤਤੋ ਅਞ੍ਞਾਨਿ ਕੁਲਾਨਿ ਪਵਿਸੇਯ੍ਯ, ਤਸ੍ਸ ਵੁਤ੍ਤਲਕ੍ਖਣਂ ਦੁਵਿਧਮ੍ਪਿ ਸਮਯਂ ਠਪੇਤ੍ਵਾ ਅਞ੍ਞਤ੍ਥ ਪਾਚਿਤ੍ਤਿਯਂ ਵੁਤ੍ਤਂ. ਤਸ੍ਮਾ ਅਕਪ੍ਪਿਯਨਿਮਨ੍ਤਨੇਨ ਨਿਮਨ੍ਤਿਯਮਾਨੋ ਸਚੇ ‘‘ਭਿਕ੍ਖਂ ਗਣ੍ਹਿਸ੍ਸਾਮੀ’’ਤਿ ਵਦਤਿ, ਇਮਿਨਾਪਿ ਸਿਕ੍ਖਾਪਦੇਨ ਅਨਾਪਤ੍ਤਿ.
੩. ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾਤਿ ਏਤ੍ਥ (ਪਾਚਿ. ਅਟ੍ਠ. ੨੯੮) ਪਨ ਕਿਤ੍ਤਾਵਤਾ ਸਨ੍ਤੋ ਹੋਤਿ, ਕਿਤ੍ਤਾਵਤਾ ਅਸਨ੍ਤੋ? ਅਨ੍ਤੋਵਿਹਾਰੇ ਯਤ੍ਥ ਠਿਤਸ੍ਸ ਕੁਲਾਨਿ ਪਯਿਰੁਪਾਸਨਚਿਤ੍ਤਂ ਉਪ੍ਪਨ੍ਨਂ, ਤਤੋ ਪਟ੍ਠਾਯ ਯਂ ਪਸ੍ਸੇ ਵਾ ਅਭਿਮੁਖੇ ਵਾ ਪਸ੍ਸਤਿ, ਯਸ੍ਸ ਸਕ੍ਕਾ ਹੋਤਿ ਪਕਤਿਵਚਨੇਨ ਆਰੋਚੇਤੁਂ, ਅਯਂ ਸਨ੍ਤੋ ਨਾਮ, ਇਤੋ ਚਿਤੋ ਚ ਪਰਿਯੇਸਿਤ੍ਵਾ ਆਰੋਚਨਕਿਚ੍ਚਂ ਪਨ ਨਤ੍ਥਿ. ਯੋ ਹਿ ਏਵਂ ਪਰਿਯੇਸਿਤਬ੍ਬੋ, ਸੋ ਅਸਨ੍ਤੋਯੇਵ. ਅਪਿਚ ਅਨ੍ਤੋਉਪਚਾਰਸੀਮਾਯ ਭਿਕ੍ਖੁਂ ਦਿਸ੍ਵਾ ‘‘ਆਪੁਚ੍ਛਿਸ੍ਸਾਮੀ’’ਤਿ ਗਚ੍ਛਤਿ. ਤਤ੍ਥ ਯਂ ਪਸ੍ਸਤਿ, ਸੋ ਆਪੁਚ੍ਛਿਤਬ੍ਬੋ. ਨੋ ਚੇ ਪਸ੍ਸਤਿ, ਅਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਪਵਿਟ੍ਠੋ ਨਾਮ ਹੋਤਿ. ਵਿਕਾਲਗਾਮਪ੍ਪਵੇਸਨੇਪਿ ਅਯਮੇਵ ਨਯੋ.
ਸਚੇ (ਪਾਚਿ. ਅਟ੍ਠ. ੫੧੨) ਪਨ ਸਮ੍ਬਹੁਲਾ ਕੇਨਚਿ ਕਮ੍ਮੇਨ ਗਾਮਂ ਪਵਿਸਨ੍ਤਿ, ‘‘ਵਿਕਾਲੇ ਗਾਮਪ੍ਪਵੇਸਨਂ ਆਪੁਚ੍ਛਾਮੀ’’ਤਿ ਸਬ੍ਬੇਹਿ ਅਞ੍ਞਮਞ੍ਞਂ ਆਪੁਚ੍ਛਿਤਬ੍ਬਂ. ਤਸ੍ਮਿਂ ਗਾਮੇ ਤਂ ਕਮ੍ਮਂ ਨ ਸਮ੍ਪਜ੍ਜਤੀਤਿ ਅਞ੍ਞਂ ਗਾਮਂ ਗਚ੍ਛਨ੍ਤਿ, ਗਾਮਸਤਮ੍ਪਿ ਹੋਤੁ, ਪੁਨ ਆਪੁਚ੍ਛਨਕਿਚ੍ਚਂ ਨਤ੍ਥਿ. ਸਚੇ ਪਨ ਉਸ੍ਸਾਹਂ ਪਟਿਪ੍ਪਸ੍ਸਮ੍ਭੇਤ੍ਵਾ ਵਿਹਾਰਂ ਗਚ੍ਛਨ੍ਤਾ ਅਨ੍ਤਰਾ ਅਞ੍ਞਂ ਗਾਮਂ ਪਵਿਸਿਤੁਕਾਮਾ ਹੋਨ੍ਤਿ, ਪੁਨ ਆਪੁਚ੍ਛਿਤਬ੍ਬਮੇਵ. ਕੁਲਘਰੇ ਵਾ ਆਸਨਸਾਲਾਯ ਵਾ ਭਤ੍ਤਕਿਚ੍ਚਂ ਕਤ੍ਵਾ ਤੇਲਭਿਕ੍ਖਾਯ ਵਾ ਸਪ੍ਪਿਭਿਕ੍ਖਾਯ ਵਾ ਚਰਿਤੁਕਾਮੋ ਹੋਤਿ, ਸਚੇ ਪਸ੍ਸੇ ਭਿਕ੍ਖੁ ਅਤ੍ਥਿ, ਆਪੁਚ੍ਛਿਤ੍ਵਾ ਗਨ੍ਤਬ੍ਬਂ. ਅਸਨ੍ਤੇ ਭਿਕ੍ਖੁਮ੍ਹਿ ‘‘ਨਤ੍ਥੀ’’ਤਿ ਗਨ੍ਤਬ੍ਬਂ, ਵੀਥਿਂ ਓਤਰਿਤ੍ਵਾ ਭਿਕ੍ਖੁਂ ਪਸ੍ਸਤਿ, ਆਪੁਚ੍ਛਨਕਿਚ੍ਚਂ ਨਤ੍ਥਿ, ਅਨਾਪੁਚ੍ਛਿਤ੍ਵਾਪਿ ਚਰਿਤਬ੍ਬਮੇਵ. ਗਾਮਮਜ੍ਝੇਨ ਮਗ੍ਗੋ ਹੋਤਿ, ਤੇਨ ਗਚ੍ਛਨ੍ਤਸ੍ਸ ‘‘ਤੇਲਾਦਿਭਿਕ੍ਖਾਯ ਚਰਿਸ੍ਸਾਮੀ’’ਤਿ ਚਿਤ੍ਤੇ ਉਪ੍ਪਨ੍ਨੇ ਸਚੇ ਪਸ੍ਸੇ ਭਿਕ੍ਖੁ ਅਤ੍ਥਿ, ਆਪੁਚ੍ਛਿਤ੍ਵਾ ਚਰਿਤਬ੍ਬਂ. ਮਗ੍ਗਾ ਅਨੋਕ੍ਕਮ੍ਮ ਭਿਕ੍ਖਾਯ ਚਰਨ੍ਤਸ੍ਸ ਪਨ ਆਪੁਚ੍ਛਨਕਿਚ੍ਚਂ ਨਤ੍ਥਿ. ਸਚੇ ਸੀਹੋ ਵਾ ਬ੍ਯਗ੍ਘੋ ਵਾ ਆਗਚ੍ਛਤਿ, ਮੇਘੋ ਵਾ ਉਟ੍ਠੇਤਿ, ਅਞ੍ਞੋ ਵਾ ਕੋਚਿ ਉਪਦ੍ਦਵੋ ਉਪ੍ਪਜ੍ਜਤਿ, ਏਵਰੂਪਾਸੁ ਆਪਦਾਸੁ ਅਨਾਪੁਚ੍ਛਾਪਿ ਬਹਿਗਾਮਤੋ ਅਨ੍ਤੋਗਾਮਂ ਪਵਿਸਿਤੁਂ ਵਟ੍ਟਤਿ.
੪. ‘‘ਨ ਚ, ਭਿਕ੍ਖਵੇ, ਅਭਿਨ੍ਨੇ ਸਰੀਰੇ ਪਂਸੁਕੂਲਂ ਗਹੇਤਬ੍ਬਂ, ਯੋ ਗਣ੍ਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੧੩੭) ਵਚਨਤੋ ਅਬ੍ਭੁਣ੍ਹੇ ਅਲ੍ਲਸਰੀਰੇ ਪਂਸੁਕੂਲਂ ਨ ਗਹੇਤਬ੍ਬਂ, ਗਣ੍ਹਨ੍ਤੋ ਦੁਕ੍ਕਟਂ ਆਪਜ੍ਜਤਿ. ਉਪਦ੍ਦਵਾ ਚ ਤਸ੍ਸ ਹੋਨ੍ਤਿ, ਭਿਨ੍ਨੇ ਪਨ ਗਹੇਤੁਂ ਵਟ੍ਟਤਿ.
ਕਿਤ੍ਤਾਵਤਾ ਪਨ ਭਿਨ੍ਨਂ ਹੋਤਿ? ਕਾਕਕੁਲਲਸੋਣਸਿਙ੍ਗਾਲਾਦੀਹਿ ਮੁਖਤੁਣ੍ਡਕੇਨ ਵਾ ਦਾਠਾਯ ਵਾ ਈਸਕਂ ਫਾਲਿਤਮਤ੍ਤੇਨਪਿ. ਯਸ੍ਸ ਪਨ ਪਤਤੋ ਘਂਸਨੇਨ ਛਵਿਮਤ੍ਤਂ ਛਿਨ੍ਨਂ ਹੋਤਿ, ਚਮ੍ਮਂ ਅਚ੍ਛਿਨ੍ਨਂ, ਏਤਂ ਅਭਿਨ੍ਨਮੇਵ, ਚਮ੍ਮੇ ਪਨ ਛਿਨ੍ਨੇ ਭਿਨ੍ਨਂ. ਯਸ੍ਸਪਿ ਸਜੀਵਕਾਲੇਯੇਵ ਪਭਿਨ੍ਨਾ ਗਣ੍ਡਕੁਟ੍ਠਪੀਲ਼ਕਾ ਵਾ ਵਣੋ ਵਾ ਹੋਤਿ, ਇਦਮ੍ਪਿ ਭਿਨ੍ਨਂ, ਤਤਿਯਦਿਵਸਤੋ ਪਭੁਤਿ ਉਦ੍ਧੁਮਾਤਕਾਦਿਭਾਵੇਨ ਕੁਣਪਭਾਵਂ ਉਪਗਤਮ੍ਪਿ ਭਿਨ੍ਨਮੇਵ. ਸਬ੍ਬੇਨ ਸਬ੍ਬਂ ਪਨ ਅਭਿਨ੍ਨੇਪਿ ਸੁਸਾਨਗੋਪਕੇਹਿ ਵਾ ਅਞ੍ਞੇਹਿ ਵਾ ਮਨੁਸ੍ਸੇਹਿ ਗਾਹਾਪੇਤੁਂ ਵਟ੍ਟਤਿ. ਨੋ ਚੇ ਅਞ੍ਞਂ ਲਭਤਿ, ਸਤ੍ਥਕੇਨ ਵਾ ਕੇਨਚਿ ਵਾ ਵਣਂ ਕਤ੍ਵਾ ਗਹੇਤਬ੍ਬਂ. ਵਿਸਭਾਗਸਰੀਰੇ ਪਨ ਸਤਿਂ ਉਪਟ੍ਠਪੇਤ੍ਵਾ ਸਮਣਸਞ੍ਞਂ ਉਪ੍ਪਾਦੇਤ੍ਵਾ ਸੀਸੇ ਵਾ ਹਤ੍ਥਪਾਦਪਿਟ੍ਠਿਯਂ ਵਾ ਵਣਂ ਕਤ੍ਵਾ ਗਹੇਤੁਂ ਵਟ੍ਟਤਿ.
੫. ਅਚ੍ਛਿਨ੍ਨਚੀਵਰਕੇਨ ਭਿਕ੍ਖੁਨਾ ਕਥਂ ਪਟਿਪਜ੍ਜਿਤਬ੍ਬਨ੍ਤਿ? ‘‘ਅਨੁਜਾਨਾਮਿ, ਭਿਕ੍ਖਵੇ, ਅਚ੍ਛਿਨ੍ਨਚੀਵਰਸ੍ਸ ਵਾ ਨਟ੍ਠਚੀਵਰਸ੍ਸ ਵਾ ਅਞ੍ਞਾਤਕਂ ਗਹਪਤਿਂ ਵਾ ਗਹਪਤਾਨਿਂ ਵਾ ਚੀਵਰਂ ਵਿਞ੍ਞਾਪੇਤੁਂ. ਯਂ ਆਵਾਸਂ ਪਠਮਂ ਉਪਗਚ੍ਛਤਿ, ਸਚੇ ਤਤ੍ਥ ਹੋਤਿ ਸਙ੍ਘਸ੍ਸ ਵਿਹਾਰਚੀਵਰਂ ਵਾ ਉਤ੍ਤਰਤ੍ਥਰਣਂ ਵਾ ਭੂਮਤ੍ਥਰਣਂ ਵਾ ਭਿਸਿਚ੍ਛਵਿ ਵਾ, ਤਂ ਗਹੇਤ੍ਵਾ ਪਾਰੁਪਿਤੁਂ ‘ਲਭਿਤ੍ਵਾ ਓਦਹਿਸ੍ਸਾਮੀ’ਤਿ. ਨੋ ਚੇ ਹੋਤਿ ਸਙ੍ਘਸ੍ਸ ਵਿਹਾਰਚੀਵਰਂ ਵਾ ਉਤ੍ਤਰਤ੍ਥਰਣਂ ਵਾ ਭੂਮਤ੍ਥਰਣਂ ਵਾ ਭਿਸਿਚ੍ਛਵਿ ਵਾ, ਤਿਣੇਨ ਵਾ ਪਣ੍ਣੇਨ ਵਾ ਪਟਿਚ੍ਛਾਦੇਤ੍ਵਾ ਆਗਨ੍ਤਬ੍ਬਂ, ਨ ਤ੍ਵੇਵ ਨਗ੍ਗੇਨ ਆਗਨ੍ਤਬ੍ਬਂ, ਯੋ ਆਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੫੧੭) ਵਚਨਤੋ ਇਧ ਵੁਤ੍ਤਨਯੇਨ ਪਟਿਪਜ੍ਜਿਤਬ੍ਬਂ.
ਅਯਂ ਪਨੇਤ੍ਥ ਅਨੁਪੁਬ੍ਬਕਥਾ (ਪਾਰਾ. ਅਟ੍ਠ. ੨.੫੧੭). ਸਚੇ ਹਿ ਚੋਰੇ ਪਸ੍ਸਿਤ੍ਵਾ ਦਹਰਾ ਪਤ੍ਤਚੀਵਰਾਨਿ ਗਹੇਤ੍ਵਾ ਪਲਾਤਾ, ਚੋਰਾ ਥੇਰਾਨਂ ਨਿਵਾਸਨਪਾਰੁਪਨਮਤ੍ਤਂਯੇਵ ਹਰਿਤ੍ਵਾ ਗਚ੍ਛਨ੍ਤਿ, ਥੇਰੇਹਿ ਨੇਵ ਤਾਵ ਚੀਵਰਂ ਵਿਞ੍ਞਾਪੇਤਬ੍ਬਂ, ਨ ਸਾਖਾਪਲਾਸਂ ਭਞ੍ਜਿਤਬ੍ਬਂ. ਅਥ ਦਹਰਾ ਸਬ੍ਬਂ ਭਣ੍ਡਕਂ ਛਡ੍ਡੇਤ੍ਵਾ ਪਲਾਤਾ, ਚੋਰਾ ਥੇਰਾਨਞ੍ਚ ਨਿਵਾਸਨਪਾਰੁਪਨਂ ਤਞ੍ਚ ਭਣ੍ਡਕਂ ਹਰਿਤ੍ਵਾ ਗਚ੍ਛਨ੍ਤਿ, ਦਹਰੇਹਿ ਆਗਨ੍ਤ੍ਵਾ ਅਤ੍ਤਨੋ ਨਿਵਾਸਨਪਾਰੁਪਨਾਨਿ ਨ ਤਾਵ ਥੇਰਾਨਂ ਦਾਤਬ੍ਬਾਨਿ. ਨ ਹਿ ਤੇ ਅਨਚ੍ਛਿਨ੍ਨਚੀਵਰਾ ਅਤ੍ਤਨੋ ਅਤ੍ਥਾਯ ਸਾਖਾਪਲਾਸਂ ਭਞ੍ਜਿਤੁਂ ਲਭਨ੍ਤਿ, ਅਚ੍ਛਿਨ੍ਨਚੀਵਰਾਨਂ ਪਨ ਅਤ੍ਥਾਯ ਲਭਨ੍ਤਿ. ਅਚ੍ਛਿਨ੍ਨਚੀਵਰਾਵ ਅਤ੍ਤਨੋਪਿ ਪਰੇਸਮ੍ਪਿ ਅਤ੍ਥਾਯ ਲਭਨ੍ਤਿ, ਤਸ੍ਮਾ ਥੇਰੇਹਿ ਵਾ ਸਾਖਾਪਲਾਸਂ ਭਞ੍ਜਿਤ੍ਵਾ ਵਾਕਾਦੀਹਿ ਗਨ੍ਥੇਤ੍ਵਾ ਦਹਰਾਨਂ ਦਾਤਬ੍ਬਂ, ਦਹਰੇਹਿ ਵਾ ਥੇਰਾਨਂ ਅਤ੍ਥਾਯ ਭਞ੍ਜਿਤ੍ਵਾ ਗਨ੍ਥੇਤ੍ਵਾ ਤੇਸਂ ਹਤ੍ਥੇ ਦਤ੍ਵਾ ਵਾ ਅਦਤ੍ਵਾ ਵਾ ਅਤ੍ਤਨਾ ਨਿਵਾਸੇਤ੍ਵਾ ਅਤ੍ਤਨੋ ਨਿਵਾਸਨਪਾਰੁਪਨਾਨਿ ਥੇਰਾਨਂ ਦਾਤਬ੍ਬਾਨਿ, ਨੇਵ ਭੂਤਗਾਮਪਾਤਬ੍ਯਤਾਯ ਪਾਚਿਤ੍ਤਿਯਂ ਹੋਤਿ, ਨ ਤੇਸਂ ਧਾਰਣੇ ਦੁਕ੍ਕਟਂ.
ਸਚੇ ਅਨ੍ਤਰਾਮਗ੍ਗੇ ਰਜਕਤ੍ਥਰਣਂ ਵਾ ਹੋਤਿ, ਅਞ੍ਞੇ ਵਾ ਤਾਦਿਸੇ ਮਨੁਸ੍ਸੇ ਪਸ੍ਸਨ੍ਤਿ, ਚੀਵਰਂ ਵਿਞ੍ਞਾਪੇਤਬ੍ਬਂ. ਯਾਨਿ ਚ ਨੇਸਂ ਤੇ ਵਾ ਵਿਞ੍ਞਤ੍ਤਮਨੁਸ੍ਸਾ ਅਞ੍ਞੇ ਵਾ ਸਾਖਾਪਲਾਸਨਿਵਾਸਨੇ ਭਿਕ੍ਖੂ ਦਿਸ੍ਵਾ ਉਸ੍ਸਾਹਜਾਤਾ ਵਤ੍ਥਾਨਿ ਦੇਨ੍ਤਿ, ਤਾਨਿ ਸਦਸਾਨਿ ਵਾ ਹੋਨ੍ਤੁ ਅਦਸਾਨਿ ਵਾ ਨੀਲਾਦਿਨਾਨਾਵਣ੍ਣਾਨਿ ਵਾ, ਕਪ੍ਪਿਯਾਨਿਪਿ ਅਕਪ੍ਪਿਯਾਨਿਪਿ ਸਬ੍ਬਾਨਿਪਿ ਅਚ੍ਛਿਨ੍ਨਚੀਵਰਟ੍ਠਾਨੇ ਠਿਤਤ੍ਤਾ ਤੇਸਂ ਨਿਵਾਸੇਤੁਞ੍ਚ ਪਾਰੁਪਿਤੁਞ੍ਚ ਵਟ੍ਟਨ੍ਤਿ.
ਵੁਤ੍ਤਮ੍ਪਿਹੇਤਂ ਪਰਿਵਾਰੇ –
‘‘ਅਕਪ੍ਪਕਤਂ ਨਾਪਿ ਰਜਨਾਯ ਰਤ੍ਤਂ,
ਤੇਨ ਨਿਵਤ੍ਥੋ ਯੇਨਕਾਮਂ ਵਜੇਯ੍ਯ;
ਨ ਚਸ੍ਸ ਹੋਤਿ ਆਪਤ੍ਤਿ,
ਸੋ ਚ ਧਮ੍ਮੋ ਸੁਗਤੇਨ ਦੇਸਿਤੋ;
ਪਞ੍ਹਾਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੮੧);
ਅਯਞ੍ਹਿ ਪਞ੍ਹੋ ਅਚ੍ਛਿਨ੍ਨਚੀਵਰਕਭਿਕ੍ਖੁਂ ਸਨ੍ਧਾਯ ਵੁਤ੍ਤੋ. ਅਥ ਪਨ ਤਿਤ੍ਥਿਯੇਹਿ ਸਮਾਗਚ੍ਛਨ੍ਤਿ, ਤੇ ਚ ਨੇਸਂ ਕੁਸਚੀਰਵਾਕਚੀਰਫਲਕਚੀਰਾਨਿ ਦੇਨ੍ਤਿ, ਤਾਨਿਪਿ ਲਦ੍ਧਿਂ ਅਗ੍ਗਹੇਤ੍ਵਾ ਨਿਵਾਸੇਤੁਂ ਵਟ੍ਟਨ੍ਤਿ, ਨਿਵਾਸੇਤ੍ਵਾਪਿ ਲਦ੍ਧਿ ਨ ਗਹੇਤਬ੍ਬਾ.
ਯਂ ਆਵਾਸਂ ਪਠਮਂ ਉਪਗਚ੍ਛਨ੍ਤਿ, ਤਤ੍ਥ ਵਿਹਾਰਚੀਵਰਾਦੀਸੁ ਯਂ ਅਤ੍ਥਿ, ਤਂ ਅਨਾਪੁਚ੍ਛਾਪਿ ਗਹੇਤ੍ਵਾ ਨਿਵਾਸੇਤੁਂ ਵਾ ਪਾਰੁਪਿਤੁਂ ਵਾ ਲਭਤਿ. ਤਞ੍ਚ ਖੋ ‘‘ਲਭਿਤ੍ਵਾ ਓਦਹਿਸ੍ਸਾਮਿ, ਪੁਨ ਠਪੇਸ੍ਸਾਮੀ’’ਤਿ ਅਧਿਪ੍ਪਾਯੇਨ, ਨ ਮੂਲਚ੍ਛੇਜ੍ਜਾਯ. ਲਭਿਤ੍ਵਾ ਚ ਪਨ ਞਾਤਿਤੋ ਵਾ ਉਪਟ੍ਠਾਕਤੋ ਵਾ ਅਞ੍ਞਤੋ ਵਾ ਕੁਤੋਚਿ ਪਾਕਤਿਕਮੇਵ ਕਾਤਬ੍ਬਂ. ਵਿਦੇਸਗਤੇਨ ਪਨ ਏਕਸ੍ਮਿਂ ਸਙ੍ਘਿਕੇ ਆਵਾਸੇ ਸਙ੍ਘਿਕਪਰਿਭੋਗੇਨ ਭੁਞ੍ਜਨਤ੍ਥਾਯ ਠਪੇਤਬ੍ਬਂ. ਸਚਸ੍ਸ ਪਰਿਭੋਗੇਨੇਵ ਤਂ ਜੀਰਤਿ ਵਾ ਨਸ੍ਸਤਿ ਵਾ, ਗੀਵਾ ਨ ਹੋਤਿ. ਸਚੇ ਪਨ ਏਤੇਸਂ ਵੁਤ੍ਤਪ੍ਪਕਾਰਾਨਂ ਗਿਹਿਵਤ੍ਥਾਦੀਨਂ ਭਿਸਿਚ੍ਛਵਿਪਰਿਯਨ੍ਤਾਨਂ ਕਿਞ੍ਚਿ ਨ ਲਭਤਿ, ਤੇਨ ਤਿਣੇਨ ਵਾ ਪਣ੍ਣੇਨ ਵਾ ਪਟਿਚ੍ਛਾਦੇਤ੍ਵਾ ਆਗਨ੍ਤਬ੍ਬਨ੍ਤਿ.
੬. ‘‘ਨ, ਭਿਕ੍ਖਵੇ, ਪਟਿਭਾਨਚਿਤ੍ਤਂ ਕਾਰਾਪੇਤਬ੍ਬਂ ਇਤ੍ਥਿਰੂਪਕਂ ਪੁਰਿਸਰੂਪਕਂ, ਯੋ ਕਾਰਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੯੯) ਵਚਨਤੋ ਇਤ੍ਥਿਪੁਰਿਸਰੂਪਂ ਕਾਤੁਂ ਵਾ ਕਾਰਾਪੇਤੁਂ ਵਾ ਭਿਕ੍ਖੁਨੋ ਨ ਵਟ੍ਟਤਿ. ਨ ਕੇਵਲਂ (ਚੂਲ਼ਵ. ਅਟ੍ਠ. ੨੯੯) ਇਤ੍ਥਿਪੁਰਿਸਰੂਪਮੇਵ, ਤਿਰਚ੍ਛਾਨਰੂਪਮ੍ਪਿ ਅਨ੍ਤਮਸੋ ਗਣ੍ਡੁਪ੍ਪਾਦਰੂਪਂ ਭਿਕ੍ਖੁਨੋ ਸਯਂ ਕਾਤੁਂ ਵਾ ‘‘ਕਰੋਹੀ’’ਤਿ ਵਤ੍ਤੁਂ ਵਾ ਨ ਵਟ੍ਟਤਿ, ‘‘ਉਪਾਸਕ ਦ੍ਵਾਰਪਾਲਂ ਕਰੋਹੀ’’ਤਿ ਵਤ੍ਤੁਮ੍ਪਿ ਨ ਲਭਤਿ. ਜਾਤਕਪਕਰਣਅਸਦਿਸਦਾਨਾਦੀਨਿ ਪਨ ਪਸਾਦਨੀਯਾਨਿ ਨਿਬ੍ਬਿਦਾਪਟਿਸਂਯੁਤ੍ਤਾਨਿ ਵਾ ਵਤ੍ਥੂਨਿ ਪਰੇਹਿ ਕਾਰਾਪੇਤੁਂ ਲਭਤਿ, ਮਾਲਾਕਮ੍ਮਾਦੀਨਿ ਸਯਮ੍ਪਿ ਕਾਤੁਂ ਲਭਤਿ.
੭. ‘‘ਨ, ਭਿਕ੍ਖਵੇ, ਵਿਪ੍ਪਕਤਭੋਜਨੋ ਭਿਕ੍ਖੁ ਵੁਟ੍ਠਾਪੇਤਬ੍ਬੋ, ਯੋ ਵੁਟ੍ਠਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੧੬) ਵਚਨਤੋ ਅਨ੍ਤਰਘਰੇ (ਚੂਲ਼ਵ. ਅਟ੍ਠ. ੩੧੬) ਵਾ ਵਿਹਾਰੇ ਵਾ ਅਰਞ੍ਞੇ ਵਾ ਯਤ੍ਥ ਕਤ੍ਥਚਿ ਭੁਞ੍ਜਮਾਨੋ ਭਿਕ੍ਖੁ ਅਨਿਟ੍ਠਿਤੇ ਭੋਜਨੇ ਨ ਵੁਟ੍ਠਾਪੇਤਬ੍ਬੋ, ਅਨ੍ਤਰਘਰੇ ਪਚ੍ਛਾ ਆਗਤੇਨ ਭਿਕ੍ਖਂ ਗਹੇਤ੍ਵਾ ਗਨ੍ਤਬ੍ਬਂ. ਸਚੇ ਮਨੁਸ੍ਸਾ ਵਾ ਭਿਕ੍ਖੂ ਵਾ ‘‘ਪਵਿਸਥਾ’’ਤਿ ਵਦਨ੍ਤਿ, ‘‘ਮਯਿ ਪਵਿਸਨ੍ਤੇ ਭਿਕ੍ਖੂ ਉਟ੍ਠਹਿਸ੍ਸਨ੍ਤੀ’’ਤਿ ਵਤ੍ਤਬ੍ਬਂ. ‘‘ਏਥ, ਭਨ੍ਤੇ, ਆਸਨਂ ਅਤ੍ਥੀ’’ਤਿ ਵੁਤ੍ਤੇ ਪਨ ਪਵਿਸਿਤਬ੍ਬਂ. ਸਚੇ ਕੋਚਿ ਕਿਞ੍ਚਿ ਨ ਵਦਤਿ, ਆਸਨਸਾਲਂ ਗਨ੍ਤ੍ਵਾ ਅਤਿਸਮੀਪਂ ਅਗਨ੍ਤ੍ਵਾ ਸਭਾਗਟ੍ਠਾਨੇ ਠਾਤਬ੍ਬਂ. ਓਕਾਸੇ ਕਤੇ ‘‘ਪਵਿਸਥਾ’’ਤਿ ਵੁਤ੍ਤੇਨ ਪਵਿਸਿਤਬ੍ਬਂ. ਸਚੇ ਪਨ ਯਂ ਆਸਨਂ ਤਸ੍ਸ ਪਾਪੁਣਾਤਿ, ਤਤ੍ਥ ਅਭੁਞ੍ਜਨ੍ਤੋ ਭਿਕ੍ਖੁ ਨਿਸਿਨ੍ਨੋ ਹੋਤਿ, ਤਂ ਉਟ੍ਠਾਪੇਤੁਂ ਵਟ੍ਟਤਿ. ਯਾਗੁਖਜ੍ਜਕਾਦੀਸੁ ਪਨ ਯਂ ਕਿਞ੍ਚਿ ਪਿਵਿਤ੍ਵਾ ਖਾਦਿਤ੍ਵਾ ਵਾ ਯਾਵ ਅਞ੍ਞੋ ਆਗਚ੍ਛਤਿ, ਤਾਵ ਨਿਸਿਨ੍ਨਂ ਰਿਤ੍ਤਹਤ੍ਥਮ੍ਪਿ ਉਟ੍ਠਾਪੇਤੁਂ ਨ ਵਟ੍ਟਤਿ. ਵਿਪ੍ਪਕਤਭੋਜਨੋਯੇਵ ਹਿ ਸੋ ਹੋਤਿ.
ਸਚੇ ਪਨ ਆਪਤ੍ਤਿਂ ਅਤਿਕ੍ਕਮਿਤ੍ਵਾਪਿ ਵੁਟ੍ਠਾਪੇਤਿਯੇਵ, ਯਂ ਸੋ ਵੁਟ੍ਠਾਪੇਤਿ, ਅਯਞ੍ਚ ਭਿਕ੍ਖੁ ਪਵਾਰਿਤੋ ਹੋਤਿ, ਤੇਨ ਵਤ੍ਤਬ੍ਬੋ ‘‘ਗਚ੍ਛ ਉਦਕਂ ਆਹਰਾਹੀ’’ਤਿ. ਵੁਡ੍ਢਤਰਂ ਭਿਕ੍ਖੁਂ ਆਣਾਪੇਤੁਂ ਇਦਮੇਵ ਏਕਟ੍ਠਾਨਂ. ਸਚੇ ਸੋ ਉਦਕਮ੍ਪਿ ਨ ਆਹਰਤਿ, ਸਾਧੁਕਂ ਸਿਤ੍ਥਾਨਿ ਗਿਲਿਤ੍ਵਾ ਵੁਡ੍ਢਸ੍ਸ ਆਸਨਂ ਦਾਤਬ੍ਬਂ. ਵੁਤ੍ਤਮ੍ਪਿ ਚੇਤਂ –
‘‘ਸਚੇ ਵੁਟ੍ਠਾਪੇਤਿ, ਪਵਾਰਿਤੋ ਚ ਹੋਤਿ, ‘ਗਚ੍ਛ ਉਦਕਂ ਆਹਰਾ’ਤਿ ਵਤ੍ਤਬ੍ਬੋ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਸਾਧੁਕਂ ਸਿਤ੍ਥਾਨਿ ਗਿਲਿਤ੍ਵਾ ਵੁਡ੍ਢਸ੍ਸ ਆਸਨਂ ਦਾਤਬ੍ਬਂ. ਨਤ੍ਵੇਵਾਹਂ, ਭਿਕ੍ਖਵੇ, ‘ਕੇਨਚਿ ਪਰਿਯਾਯੇਨ ਵੁਡ੍ਢਤਰਸ੍ਸ ਭਿਕ੍ਖੁਨੋ ਆਸਨਂ ਪਟਿਬਾਹਿਤਬ੍ਬ’ਨ੍ਤਿ ਵਦਾਮਿ, ਯੋ ਪਟਿਬਾਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੧੬).
੮. ‘‘ਅਨੁਜਾਨਾਮਿ, ਭਿਕ੍ਖਵੇ, ਨਵਕੇਨ ਭਿਕ੍ਖੁਨਾ ਉਦ੍ਦਿਸਨ੍ਤੇਨ ਸਮਕੇ ਵਾ ਆਸਨੇ ਨਿਸੀਦਿਤੁਂ ਉਚ੍ਚਤਰੇ ਵਾ ਧਮ੍ਮਗਾਰਵੇਨ, ਥੇਰੇਨ ਭਿਕ੍ਖੁਨਾ ਉਦ੍ਦਿਸਾਪੇਨ੍ਤੇਨ ਸਮਕੇ ਵਾ ਆਸਨੇ ਨਿਸੀਦਿਤੁਂ ਨੀਚਤਰੇ ਵਾ ਧਮ੍ਮਗਾਰਵੇਨਾ’’ਤਿ (ਚੂਲ਼ਵ. ੩੨੦) ਵਚਨਤੋ ਨਵਕਤਰੇਨ ਭਿਕ੍ਖੁਨਾ ਉਦ੍ਦਿਸਨ੍ਤੇਨ ਉਚ੍ਚਤਰੇਪਿ ਆਸਨੇ ਨਿਸੀਦਿਤੁਂ, ਵੁਡ੍ਢਤਰੇਨ ਭਿਕ੍ਖੁਨਾ ਉਦ੍ਦਿਸਾਪੇਨ੍ਤੇਨ ਨੀਚਤਰੇਪਿ ਆਸਨੇ ਨਿਸੀਦਿਤੁਂ ਵਟ੍ਟਤਿ.
੯. ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਵਸ੍ਸਨ੍ਤਰੇਨ ਸਹ ਨਿਸੀਦਿਤੁ’’ਨ੍ਤਿ (ਚੂਲ਼ਵ. ੩੨੦) ਵਚਨਤੋ ਤਿਵਸ੍ਸਨ੍ਤਰੇਨ ਭਿਕ੍ਖੁਨਾ ਸਦ੍ਧਿਂ ਏਕਾਸਨੇ ਨਿਸੀਦਿਤੁਂ ਵਟ੍ਟਤਿ. ਤਿਵਸ੍ਸਨ੍ਤਰੋ (ਚੂਲ਼ਵ. ਅਟ੍ਠ. ੩੨੦) ਨਾਮ ਯੋ ਦ੍ਵੀਹਿ ਵਸ੍ਸੇਹਿ ਮਹਨ੍ਤਤਰੋ ਵਾ ਦਹਰਤਰੋ ਵਾ ਹੋਤਿ, ਯੋ ਪਨ ਏਕੇਨ ਵਸ੍ਸੇਨ ਮਹਨ੍ਤਤਰੋ ਵਾ ਦਹਰਤਰੋ ਵਾ, ਯੋ ਵਾ ਸਮਾਨਵਸ੍ਸੋ, ਤਤ੍ਥ ਵਤ੍ਤਬ੍ਬਮੇਵ ਨਤ੍ਥਿ, ਇਮੇ ਸਬ੍ਬੇ ਏਕਸ੍ਮਿਂ ਮਞ੍ਚੇ ਵਾ ਪੀਠੇ ਵਾ ਦ੍ਵੇ ਦ੍ਵੇ ਹੁਤ੍ਵਾ ਨਿਸੀਦਿਤੁਂ ਲਭਨ੍ਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਦੁਵਗ੍ਗਸ੍ਸ ਮਞ੍ਚਂ ਦੁਵਗ੍ਗਸ੍ਸ ਪੀਠ’’ਨ੍ਤਿ (ਚੂਲ਼ਵ. ੩੨੦) ਹਿ ਵੁਤ੍ਤਂ.
੧੦. ਯਂ ਪਨ ਤਿਣ੍ਣਂ ਪਹੋਤਿ, ਤਂ ਸਂਹਾਰਿਮਂ ਵਾ ਹੋਤੁ ਅਸਂਹਾਰਿਮਂ ਵਾ, ਤਥਾਰੂਪੇ ਅਪਿ ਫਲਕਖਣ੍ਡੇ ਅਨੁਪਸਮ੍ਪਨ੍ਨੇਨਪਿ ਸਦ੍ਧਿਂ ਨਿਸੀਦਿਤੁਂ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਯਂ ਤਿਣ੍ਣਂ ਪਹੋਤਿ, ਏਤ੍ਤਕਂ ਪਚ੍ਛਿਮਂ ਦੀਘਾਸਨ’’ਨ੍ਤਿ (ਚੂਲ਼ਵ. ੩੨੦) ਹਿ ਵੁਤ੍ਤਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਠਪੇਤ੍ਵਾ ਪਣ੍ਡਕਂ ਮਾਤੁਗਾਮਂ ਉਭਤੋਬ੍ਯਞ੍ਜਨਕਂ ਅਸਮਾਨਾਸਨਿਕੇਹਿ ਸਹ ਦੀਘਾਸਨੇ ਨਿਸੀਦਿਤੁ’’ਨ੍ਤਿ (ਚੂਲ਼ਵ. ੩੨੦) ਵਚਨਤੋ ਪਨ ਦੀਘਾਸਨੇਪਿ ਪਣ੍ਡਕਾਦੀਹਿ ਸਹ ਨਿਸੀਦਿਤੁਂ ਨ ਵਟ੍ਟਤਿ.
੧੧. ਗਿਲਾਨਂ ਉਪਟ੍ਠਹਨ੍ਤੇਨ ‘‘ਨਤ੍ਥਿ ਵੋ, ਭਿਕ੍ਖਵੇ, ਮਾਤਾ, ਨਤ੍ਥਿ ਪਿਤਾ, ਯੇ ਵੋ ਉਪਟ੍ਠਹੇਯ੍ਯੁਂ, ਤੁਮ੍ਹੇ ਚੇ, ਭਿਕ੍ਖਵੇ, ਅਞ੍ਞਮਞ੍ਞਂ ਨ ਉਪਟ੍ਠਹਿਸ੍ਸਥ, ਅਥ ਕੋ ਚਰਹਿ ਉਪਟ੍ਠਹਿਸ੍ਸਤਿ. ਯੋ, ਭਿਕ੍ਖਵੇ, ਮਂ ਉਪਟ੍ਠਹੇਯ੍ਯ, ਸੋ ਗਿਲਾਨਂ ਉਪਟ੍ਠਹੇਯ੍ਯਾ’’ਤਿ (ਮਹਾਵ. ੩੬੫) ਇਮਂ ਭਗਵਤੋ ਅਨੁਸਾਸਨਿਂ ਅਨੁਸ੍ਸਰਨ੍ਤੇਨ ਸਕ੍ਕਚ੍ਚਂ ਉਪਟ੍ਠਾਤਬ੍ਬੋ.
ਸਚੇ ਉਪਜ੍ਝਾਯੋ ਹੋਤਿ, ਉਪਜ੍ਝਾਯੇਨ ਯਾਵਜੀਵਂ ਉਪਟ੍ਠਾਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਆਚਰਿਯੋ ਹੋਤਿ, ਆਚਰਿਯੇਨ ਯਾਵਜੀਵਂ ਉਪਟ੍ਠਾਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਸਦ੍ਧਿਵਿਹਾਰਿਕੋ ਹੋਤਿ, ਸਦ੍ਧਿਵਿਹਾਰਿਕੇਨ ਯਾਵਜੀਵਂ ਉਪਟ੍ਠਾਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਅਨ੍ਤੇਵਾਸਿਕੋ ਹੋਤਿ, ਅਨ੍ਤੇਵਾਸਿਕੇਨ ਯਾਵਜੀਵਂ ਉਪਟ੍ਠਾਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਸਮਾਨੁਪਜ੍ਝਾਯਕੋ ਹੋਤਿ, ਸਮਾਨੁਪਜ੍ਝਾਯਕੇਨ ਯਾਵਜੀਵਂ ਉਪਟ੍ਠਾਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਸਮਾਨਾਚਰਿਯਕੋ ਹੋਤਿ, ਸਮਾਨਾਚਰਿਯਕੇਨ ਯਾਵਜੀਵਂ ਉਪਟ੍ਠਾਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਨ ਹੋਤਿ ਉਪਜ੍ਝਾਯੋ ਵਾ ਆਚਰਿਯੋ ਵਾ ਸਦ੍ਧਿਵਿਹਾਰਿਕੋ ਵਾ ਅਨ੍ਤੇਵਾਸਿਕੋ ਵਾ ਸਮਾਨੁਪਜ੍ਝਾਯਕੋ ਵਾ ਸਮਾਨਾਚਰਿਯਕੋ ਵਾ, ਸਙ੍ਘੇਨ ਉਪਟ੍ਠਾਤਬ੍ਬੋ. ਨੋ ਚੇ ਉਪਟ੍ਠਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੩੬੫) –
ਵਚਨਤੋ ਯਸ੍ਸ (ਮਹਾਵ. ਅਟ੍ਠ. ੩੬੫) ਤੇ ਉਪਜ੍ਝਾਯਾਦਯੋ ਤਸ੍ਮਿਂ ਵਿਹਾਰੇ ਨਤ੍ਥਿ, ਆਗਨ੍ਤੁਕੋ ਹੋਤਿ ਏਕਚਾਰਿਕਭਿਕ੍ਖੁ, ਸਙ੍ਘਸ੍ਸ ਭਾਰੋ, ਤਸ੍ਮਾ ਸਙ੍ਘੇਨ ਉਪਟ੍ਠਾਤਬ੍ਬੋ. ਨੋ ਚੇ ਉਪਟ੍ਠਹੇਯ੍ਯ, ਸਕਲਸ੍ਸ ਸਙ੍ਘਸ੍ਸ ਆਪਤ੍ਤਿ. ਵਾਰਂ ਠਪੇਤ੍ਵਾ ਜਗ੍ਗਨ੍ਤੇਸੁ ਪਨ ਯੋ ਅਤ੍ਤਨੋ ਵਾਰੇ ਨ ਜਗ੍ਗਤਿ, ਤਸ੍ਸੇਵ ਆਪਤ੍ਤਿ, ਸਙ੍ਘਤ੍ਥੇਰੋਪਿ ਵਾਰਤੋ ਨ ਮੁਚ੍ਚਤਿ. ਸਚੇ ਸਕਲੋ ਸਙ੍ਘੋ ਏਕਸ੍ਸ ਭਾਰਂ ਕਰੋਤਿ, ਏਕੋ ਵਾ ਵਤ੍ਤਸਮ੍ਪਨ੍ਨੋ ਭਿਕ੍ਖੁ ‘‘ਅਹਮੇਵ ਜਗ੍ਗਿਸ੍ਸਾਮੀ’’ਤਿ ਜਗ੍ਗਤਿ, ਸਙ੍ਘੋ ਆਪਤ੍ਤਿਤੋ ਮੁਚ੍ਚਤਿ.
ਗਿਲਾਨੇਨ ਪਨ –
‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਗਿਲਾਨੋ ਦੂਪਟ੍ਠੋ ਹੋਤਿ. ਅਸਪ੍ਪਾਯਕਾਰੀ ਹੋਤਿ, ਸਪ੍ਪਾਯੇ ਮਤ੍ਤਂ ਨ ਜਾਨਾਤਿ, ਭੇਸਜ੍ਜਂ ਨ ਪਟਿਸੇਵਿਤਾ ਹੋਤਿ, ਅਤ੍ਥਕਾਮਸ੍ਸ ਗਿਲਾਨੁਪਟ੍ਠਾਕਸ੍ਸ ਯਥਾਭੂਤਂ ਆਬਾਧਂ ਨਾਵਿਕਤ੍ਤਾ ਹੋਤਿ ‘ਅਭਿਕ੍ਕਮਨ੍ਤਂ ਵਾ ਅਭਿਕ੍ਕਮਤੀਤਿ, ਪਟਿਕ੍ਕਮਨ੍ਤਂ ਵਾ ਪਟਿਕ੍ਕਮਤੀਤਿ, ਠਿਤਂ ਵਾ ਠਿਤੋ’ਤਿ, ਉਪ੍ਪਨ੍ਨਾਨਂ ਸਾਰੀਰਿਕਾਨਂ ਵੇਦਨਾਨਂ ਦੁਕ੍ਖਾਨਂ ਤਿਬ੍ਬਾਨਂ ਖਰਾਨਂ ਕਟੁਕਾਨਂ ਅਸਾਤਾਨਂ ਅਮਨਾਪਾਨਂ ਪਾਣਹਰਾਨਂ ਅਨਧਿਵਾਸਕਜਾਤਿਕੋ ਹੋਤੀ’’ਤਿ (ਮਹਾਵ. ੩੬੬) –
ਏਵਂ ਵੁਤ੍ਤਾਨਿ ਪਞ੍ਚ ਅਯੁਤ੍ਤਙ੍ਗਾਨਿ ਆਰਕਾ ਪਰਿਵਜ੍ਜੇਤ੍ਵਾ –
‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਗਿਲਾਨੋ ਸੂਪਟ੍ਠੋ ਹੋਤਿ. ਸਪ੍ਪਾਯਕਾਰੀ ਹੋਤਿ, ਸਪ੍ਪਾਯੇ ਮਤ੍ਤਂ ਜਾਨਾਤਿ, ਭੇਸਜ੍ਜਂ ਪਟਿਸੇਵਿਤਾ ਹੋਤਿ, ਅਤ੍ਥਕਾਮਸ੍ਸ ਗਿਲਾਨੁਪਟ੍ਠਾਕਸ੍ਸ ਯਥਾਭੂਤਂ ਆਬਾਧਂ ਆਵਿਕਤ੍ਤਾ ਹੋਤਿ ‘ਅਭਿਕ੍ਕਮਨ੍ਤਂ ਵਾ ਅਭਿਕ੍ਕਮਤੀਤਿ, ਪਟਿਕ੍ਕਮਨ੍ਤਂ ਵਾ ਪਟਿਕ੍ਕਮਤੀਤਿ, ਠਿਤਂ ਵਾ ਠਿਤੋ’ਤਿ, ਉਪ੍ਪਨ੍ਨਾਨਂ ਸਾਰੀਰਿਕਾਨਂ ਵੇਦਨਾਨਂ ਦੁਕ੍ਖਾਨਂ ਤਿਬ੍ਬਾਨਂ ਖਰਾਨਂ ਕਟੁਕਾਨਂ ਅਸਾਤਾਨਂ ਅਮਨਾਪਾਨਂ ਪਾਣਹਰਾਨਂ ਅਧਿਵਾਸਕਜਾਤਿਕੋ ਹੋਤੀ’’ਤਿ (ਮਹਾਵ. ੩੬੬) –
ਏਵਂ ਵੁਤ੍ਤਪਞ੍ਚਙ੍ਗਸਮਨ੍ਨਾਗਤੇਨ ਭਵਿਤਬ੍ਬਂ.
ਗਿਲਾਨੁਪਟ੍ਠਾਕੇਨ ਚ –
‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਗਿਲਾਨੁਪਟ੍ਠਾਕੋ ਨਾਲਂ ਗਿਲਾਨਂ ਉਪਟ੍ਠਾਤੁਂ. ਨ ਪਟਿਬਲੋ ਹੋਤਿ ਭੇਸਜ੍ਜਂ ਸਂਵਿਧਾਤੁਂ, ਸਪ੍ਪਾਯਾਸਪ੍ਪਾਯਂ ਨ ਜਾਨਾਤਿ, ਅਸਪ੍ਪਾਯਂ ਉਪਨਾਮੇਤਿ, ਸਪ੍ਪਾਯਂ ਅਪਨਾਮੇਤਿ, ਆਮਿਸਨ੍ਤਰੋ ਗਿਲਾਨਂ ਉਪਟ੍ਠਾਤਿ, ਨੋ ਮੇਤ੍ਤਚਿਤ੍ਤੋ, ਜੇਗੁਚ੍ਛੀ ਹੋਤਿ ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਖੇਲ਼ਂ ਵਾ ਵਨ੍ਤਂ ਵਾ ਨੀਹਾਤੁਂ, ਨ ਪਟਿਬਲੋ ਹੋਤਿ ਗਿਲਾਨਂ ਕਾਲੇਨ ਕਾਲਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤੁਂ ਸਮਾਦਪੇਤੁਂ ਸਮੁਤ੍ਤੇਜੇਤੁਂ ਸਮ੍ਪਹਂਸੇਤੁ’’ਨ੍ਤਿ (ਮਹਾਵ. ੩੬੬) –
ਏਵਂ ਵੁਤ੍ਤਾਨਿ ਪਞ੍ਚ ਅਯੁਤ੍ਤਙ੍ਗਾਨਿ ਆਰਕਾ ਪਰਿਵਜ੍ਜੇਤ੍ਵਾ –
‘‘ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਗਿਲਾਨੁਪਟ੍ਠਾਕੋ ਅਲਂ ਗਿਲਾਨਂ ਉਪਟ੍ਠਾਤੁਂ. ਪਟਿਬਲੋ ਹੋਤਿ ਭੇਸਜ੍ਜਂ ਸਂਵਿਧਾਤੁਂ, ਸਪ੍ਪਾਯਾਸਪ੍ਪਾਯਂ ਜਾਨਾਤਿ, ਅਸਪ੍ਪਾਯਂ ਅਪਨਾਮੇਤਿ, ਸਪ੍ਪਾਯਂ ਉਪਨਾਮੇਤਿ, ਮੇਤ੍ਤਚਿਤ੍ਤੋ ਗਿਲਾਨਂ ਉਪਟ੍ਠਾਤਿ, ਨੋ ਆਮਿਸਨ੍ਤਰੋ, ਅਜੇਗੁਚ੍ਛੀ ਹੋਤਿ ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਖੇਲ਼ਂ ਵਾ ਵਨ੍ਤਂ ਵਾ ਨੀਹਾਤੁਂ, ਪਟਿਬਲੋ ਹੋਤਿ ਗਿਲਾਨਂ ਕਾਲੇਨ ਕਾਲਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤੁਂ ਸਮਾਦਪੇਤੁਂ ਸਮੁਤ੍ਤੇਜੇਤੁਂ ਸਮ੍ਪਹਂਸੇਤੁ’’ਨ੍ਤਿ (ਮਹਾਵ. ੩੬੬) –
ਏਵਂ ਵੁਤ੍ਤਪਞ੍ਚਙ੍ਗਸਮਨ੍ਨਾਗਤੇਨ ਭਵਿਤਬ੍ਬਂ.
੧੨. ਧਮ੍ਮਿਂ ਕਥਂ ਕਰੋਨ੍ਤੇਨ (ਮਹਾਵ. ਅਟ੍ਠ. ੨.੧੮੦) ਚ ‘‘ਸੀਲਵਾ ਹਿ ਤ੍ਵਂ ਕਤਕੁਸਲੋ, ਕਸ੍ਮਾ ਮੀਯਮਾਨੋ ਭਾਯਸਿ, ਨਨੁ ਸੀਲਵਤੋ ਸਗ੍ਗੋ ਨਾਮ ਮਰਣਮਤ੍ਤਪਟਿਬਦ੍ਧੋਯੇਵਾ’’ਤਿ ਏਵਂ ਗਿਲਾਨਸ੍ਸ ਭਿਕ੍ਖੁਨੋ ਮਰਣਵਣ੍ਣੋ ਨ ਸਂਵਣ੍ਣੇਤਬ੍ਬੋ. ਸਚੇ ਹਿ ਤਸ੍ਸ ਸਂਵਣ੍ਣਨਂ ਸੁਤ੍ਵਾ ਆਹਾਰੁਪਚ੍ਛੇਦਾਦਿਨਾ ਉਪਕ੍ਕਮੇਨ ਏਕਜਵਨਵਾਰਾਵਸੇਸੇਪਿ ਆਯੁਸ੍ਮਿਂ ਅਨ੍ਤਰਾ ਕਾਲਂ ਕਰੋਤਿ, ਇਮਿਨਾਵ ਮਾਰਿਤੋ ਹੋਤਿ. ਪਣ੍ਡਿਤੇਨ ਪਨ ਭਿਕ੍ਖੁਨਾ ਇਮਿਨਾ ਨਯੇਨ ਅਨੁਸਿਟ੍ਠਿ ਦਾਤਬ੍ਬਾ ‘‘ਸੀਲਵਤੋ ਨਾਮ ਅਨਚ੍ਛਰਿਯਾ ਮਗ੍ਗਫਲੁਪ੍ਪਤ੍ਤਿ, ਤਸ੍ਮਾ ਵਿਹਾਰਾਦੀਸੁ ਆਸਤ੍ਤਿਂ ਅਕਤ੍ਵਾ ਬੁਦ੍ਧਗਤਂ ਧਮ੍ਮਗਤਂ ਸਙ੍ਘਗਤਂ ਕਾਯਗਤਞ੍ਚ ਸਤਿਂ ਉਪਟ੍ਠਪੇਤ੍ਵਾ ਮਨਸਿਕਾਰੇ ਅਪ੍ਪਮਾਦੋ ਕਾਤਬ੍ਬੋ’’ਤਿ. ਮਰਣਵਣ੍ਣੇਪਿ ਸਂਵਣ੍ਣਿਤੇ ਸੋ ਤਾਯ ਸਂਵਣ੍ਣਨਾਯ ਕਞ੍ਚਿ ਉਪਕ੍ਕਮਂ ਅਕਤ੍ਵਾ ਅਤ੍ਤਨੋ ਧਮ੍ਮਤਾਯ ਯਥਾਯੁਨਾ ਯਥਾਨੁਸਨ੍ਧਿਨਾਵ ਮਰਤਿ, ਤਪ੍ਪਚ੍ਚਯਾ ਸਂਵਣ੍ਣਕੋ ਆਪਤ੍ਤਿਯਾ ਨ ਕਾਰੇਤਬ੍ਬੋ.
੧੩. ‘‘ਨ ਚ, ਭਿਕ੍ਖਵੇ, ਅਤ੍ਤਾਨਂ ਪਾਤੇਤਬ੍ਬਂ, ਯੋ ਪਾਤੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੧੮੩) ਵਚਨਤੋ ਗਿਲਾਨੇਨ (ਪਾਰਾ. ਅਟ੍ਠ. ੨.੧੮੨-੧੮੩) ਭਿਕ੍ਖੁਨਾਪਿ ਯੇਨ ਕੇਨਚਿ ਉਪਕ੍ਕਮੇਨ ਅਨ੍ਤਮਸੋ ਆਹਾਰੁਪਚ੍ਛੇਦਨੇਨਪਿ ਅਤ੍ਤਾ ਨ ਮਾਰੇਤਬ੍ਬੋ. ਯੋਪਿ ਗਿਲਾਨੋ ਵਿਜ੍ਜਮਾਨੇ ਭੇਸਜ੍ਜੇ ਚ ਉਪਟ੍ਠਾਕੇਸੁ ਚ ਮਰਿਤੁਕਾਮੋ ਆਹਾਰਂ ਉਪਚ੍ਛਿਨ੍ਦਤਿ, ਦੁਕ੍ਕਟਮੇਵ. ਯਸ੍ਸ ਪਨ ਮਹਾਆਬਾਧੋ ਚਿਰਾਨੁਬਨ੍ਧੋ, ਭਿਕ੍ਖੂ ਉਪਟ੍ਠਹਨ੍ਤਾ ਕਿਲਮਨ੍ਤਿ ਜਿਗੁਚ੍ਛਨ੍ਤਿ, ‘‘ਕਦਾ ਨੁ ਖੋ ਗਿਲਾਨਤੋ ਮੁਚ੍ਚਿਸ੍ਸਾਮਾ’’ਤਿ ਅਟ੍ਟੀਯਨ੍ਤਿ. ਸਚੇ ਸੋ ‘‘ਅਯਂ ਅਤ੍ਤਭਾਵੋ ਪਟਿਜਗ੍ਗਿਯਮਾਨੋਪਿ ਨ ਤਿਟ੍ਠਤਿ, ਭਿਕ੍ਖੂ ਚ ਕਿਲਮਨ੍ਤੀ’’ਤਿ ਆਹਾਰਂ ਉਪਚ੍ਛਿਨ੍ਦਤਿ, ਭੇਸਜ੍ਜਂ ਨ ਸੇਵਤਿ, ਵਟ੍ਟਤਿ. ਯੋ ਪਨ ‘‘ਅਯਂ ਰੋਗੋ ਖਰੋ, ਆਯੁਸਙ੍ਖਾਰਾ ਨ ਤਿਟ੍ਠਨ੍ਤਿ, ਅਯਞ੍ਚ ਮੇ ਵਿਸੇਸਾਧਿਗਮੋ ਹਤ੍ਥਪ੍ਪਤ੍ਤੋ ਵਿਯ ਦਿਸ੍ਸਤੀ’’ਤਿ ਉਪਚ੍ਛਿਨ੍ਦਤਿ, ਵਟ੍ਟਤਿਯੇਵ. ਅਗਿਲਾਨਸ੍ਸਪਿ ਉਪ੍ਪਨ੍ਨਸਂਵੇਗਸ੍ਸ ‘‘ਆਹਾਰਪਰਿਯੇਸਨਂ ਨਾਮ ਪਪਞ੍ਚੋ, ਕਮ੍ਮਟ੍ਠਾਨਮੇਵ ਅਨੁਯੁਞ੍ਜਿਸ੍ਸਾਮੀ’’ਤਿ ਕਮ੍ਮਟ੍ਠਾਨਸੀਸੇਨ ਉਪਚ੍ਛਿਨ੍ਦਨ੍ਤਸ੍ਸ ਵਟ੍ਟਤਿ. ਵਿਸੇਸਾਧਿਗਮਂ ਬ੍ਯਾਕਰਿਤ੍ਵਾ ਆਹਾਰਂ ਉਪਚ੍ਛਿਨ੍ਦਤਿ, ਨ ਵਟ੍ਟਤਿ. ਸਭਾਗਾਨਞ੍ਹਿ ਲਜ੍ਜੀਭਿਕ੍ਖੂਨਂ ਕਥੇਤੁਂ ਵਟ੍ਟਤਿ.
੧੪. ‘‘ਨ ਚ, ਭਿਕ੍ਖਵੇ, ਅਪ੍ਪਟਿਵੇਕ੍ਖਿਤ੍ਵਾ ਆਸਨੇ ਨਿਸੀਦਿਤਬ੍ਬਂ, ਯੋ ਨਿਸੀਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੧੮੦) ਵਚਨਤੋ ਆਸਨਂ ਅਨੁਪਪਰਿਕ੍ਖਿਤ੍ਵਾ ਨ ਨਿਸੀਦਿਤਬ੍ਬਂ. ਕੀਦਿਸਂ (ਪਾਰਾ. ਅਟ੍ਠ. ੨.੧੮੦) ਪਨ ਆਸਨਂ ਉਪਪਰਿਕ੍ਖਿਤਬ੍ਬਂ, ਕੀਦਿਸਂ ਨ ਉਪਪਰਿਕ੍ਖਿਤਬ੍ਬਂ? ਯਂ ਸੁਦ੍ਧਂ ਆਸਨਮੇਵ ਹੋਤਿ ਅਪਚ੍ਚਤ੍ਥਰਣਕਂ, ਯਞ੍ਚ ਆਗਨ੍ਤ੍ਵਾ ਠਿਤਾਨਂ ਪਸ੍ਸਤਂਯੇਵ ਅਤ੍ਥਰੀਯਤਿ, ਤਂ ਨ ਪਚ੍ਚਵੇਕ੍ਖਿਤਬ੍ਬਂ, ਨਿਸੀਦਿਤੁਂ ਵਟ੍ਟਤਿ. ਯਮ੍ਪਿ ਮਨੁਸ੍ਸਾ ਸਯਂ ਹਤ੍ਥੇਨ ਅਕ੍ਕਮਿਤ੍ਵਾ ‘‘ਇਧ ਭਨ੍ਤੇ ਨਿਸੀਦਥਾ’’ਤਿ ਦੇਨ੍ਤਿ, ਤਸ੍ਮਿਮ੍ਪਿ ਵਟ੍ਟਤਿ. ਸਚੇਪਿ ਪਠਮਮੇਵ ਆਗਨ੍ਤ੍ਵਾਪਿ ਨਿਸਿਨ੍ਨਾ ਪਚ੍ਛਾ ਉਦ੍ਧਂ ਵਾ ਅਧੋ ਵਾ ਸਙ੍ਕਮਨ੍ਤਿ, ਪਟਿਵੇਕ੍ਖਣਕਿਚ੍ਚਂ ਨਤ੍ਥਿ. ਯਮ੍ਪਿ ਤਨੁਕੇਨ ਵਤ੍ਥੇਨ ਯਥਾ ਤਲਂ ਦਿਸ੍ਸਤਿ, ਏਵਂ ਪਟਿਚ੍ਛਨ੍ਨਂ ਹੋਤਿ, ਤਸ੍ਮਿਮ੍ਪਿ ਪਟਿਵੇਕ੍ਖਣਕਿਚ੍ਚਂ ਨਤ੍ਥਿ. ਯਂ ਪਨ ਪਟਿਕਚ੍ਚੇਵ ਪਾਵਾਰਕੋਜਵਾਦੀਹਿ ਅਤ੍ਥਤਂ ਹੋਤਿ, ਤਂ ਹਤ੍ਥੇਨ ਪਰਾਮਸਿਤ੍ਵਾ ਸਲ੍ਲਕ੍ਖੇਤ੍ਵਾ ਨਿਸੀਦਿਤਬ੍ਬਂ. ਮਹਾਪਚ੍ਚਰਿਯਂ ਪਨ ‘‘ਘਨਸਾਟਕੇਨਪਿ ਅਤ੍ਥਤੇ ਯਸ੍ਮਿਂ ਵਲਿ ਨ ਪਞ੍ਞਾਯਤਿ, ਤਂ ਨ ਪਟਿਵੇਕ੍ਖਿਤਬ੍ਬ’’ਨ੍ਤਿ ਵੁਤ੍ਤਂ.
੧੫. ‘‘ਨ, ਭਿਕ੍ਖਵੇ, ਦਵਾਯ ਸਿਲਾ ਪਟਿਵਿਜ੍ਝਿਤਬ੍ਬਾ, ਯੋ ਪਟਿਵਿਜ੍ਝੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੧੮੩) ਵਚਨਤੋ ਹਸਾਧਿਪ੍ਪਾਯੇਨ ਪਾਸਾਣੋ ਨ ਪਵਟ੍ਟੇਤਬ੍ਬੋ. ਨ ਕੇਵਲਞ੍ਚ (ਪਾਰਾ. ਅਟ੍ਠ. ੨.੧੮੨-੧੮੩) ਪਾਸਾਣੋ, ਅਞ੍ਞਮ੍ਪਿ ਯਂ ਕਿਞ੍ਚਿ ਦਾਰੁਖਣ੍ਡਂ ਵਾ ਇਟ੍ਠਕਖਣ੍ਡਂ ਵਾ ਹਤ੍ਥੇਨ ਵਾ ਯਨ੍ਤੇਨ ਵਾ ਪਟਿਵਿਜ੍ਝਿਤੁਂ ਨ ਵਟ੍ਟਤਿ. ਚੇਤਿਯਾਦੀਨਂ ਅਤ੍ਥਾਯ ਪਾਸਾਣਾਦਯੋ ਹਸਨ੍ਤਾ ਹਸਨ੍ਤਾ ਪਵਟ੍ਟੇਨ੍ਤਿਪਿ ਖਿਪਨ੍ਤਿਪਿ ਉਕ੍ਖਿਪਨ੍ਤਿਪਿ, ‘‘ਕਮ੍ਮਸਮਯੋ’’ਤਿ ਵਟ੍ਟਤਿ, ਅਞ੍ਞਮ੍ਪਿ ਈਦਿਸਂ ਨਵਕਮ੍ਮਂ ਵਾ ਕਰੋਨ੍ਤਾ ਭਣ੍ਡਕਂ ਵਾ ਧੋਵਨ੍ਤਾ ਰੁਕ੍ਖਂ ਵਾ ਧੋਵਨਦਣ੍ਡਕਂ ਵਾ ਉਕ੍ਖਿਪਿਤ੍ਵਾ ਪਟਿਵਿਜ੍ਝਨ੍ਤਿ, ਵਟ੍ਟਤਿ, ਭਤ੍ਤਵਿਸ੍ਸਗ੍ਗਕਾਲਾਦੀਸੁ ਕਾਕੇ ਵਾ ਸੋਣੇ ਵਾ ਕਟ੍ਠਂ ਵਾ ਕਥਲਂ ਵਾ ਖਿਪਿਤ੍ਵਾ ਪਲਾਪੇਨ੍ਤਿ, ਵਟ੍ਟਤਿ.
੧੬. ‘‘ਨ, ਭਿਕ੍ਖਵੇ, ਦਾਯੋ ਆਲਿਮ੍ਪਿਤਬ੍ਬੋ, ਯੋ ਆਲਿਮ੍ਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੮੩) ਵਚਨਤੋ ਵਨੇ ਅਗ੍ਗਿ ਨ ਦਾਤਬ੍ਬੋ. ਸਚੇ (ਪਾਰਾ. ਅਟ੍ਠ. ੨.੧੯੦) ਪਨ ‘‘ਏਤ੍ਥਨ੍ਤਰੇ ਯੋ ਕੋਚਿ ਸਤ੍ਤੋ ਮਰਤੂ’’ਤਿ ਅਗ੍ਗਿਂ ਦੇਤਿ, ਪਾਰਾਜਿਕਾਨਨ੍ਤਰਿਯਥੁਲ੍ਲਚ੍ਚਯਪਾਚਿਤ੍ਤਿਯਵਤ੍ਥੂਨਂ ਅਨੁਰੂਪਤੋ ਪਾਰਾਜਿਕਾਦੀਨਿ ਅਕੁਸਲਰਾਸਿ ਚ ਹੋਤਿ. ‘‘ਅਲ੍ਲਤਿਣਵਨਪ੍ਪਤਯੋ ਡਯ੍ਹਨ੍ਤੂ’’ਤਿ ਅਗ੍ਗਿਂ ਦੇਨ੍ਤਸ੍ਸ ਪਾਚਿਤ੍ਤਿਯਂ, ‘‘ਦਬ੍ਬੂਪਕਰਣਾਨਿ ਵਿਨਸ੍ਸਨ੍ਤੂ’’ਤਿ ਅਗ੍ਗਿਂ ਦੇਨ੍ਤਸ੍ਸ ਦੁਕ੍ਕਟਂ. ‘‘ਖਿਡ੍ਡਾਧਿਪ੍ਪਾਯੇਨਪਿ ਦੁਕ੍ਕਟ’’ਨ੍ਤਿ ਸਙ੍ਖੇਪਟ੍ਠਕਥਾਯਂ ਵੁਤ੍ਤਂ. ‘‘ਯਂ ਕਿਞ੍ਚਿ ਅਲ੍ਲਸੁਕ੍ਖਂ ਸਇਨ੍ਦ੍ਰਿਯਾਨਿਨ੍ਦ੍ਰਿਯਂ ਡਯ੍ਹਤੂ’’ਤਿ ਅਗ੍ਗਿਂ ਦੇਨ੍ਤਸ੍ਸ ਵਤ੍ਥੁਵਸੇਨ ਪਾਰਾਜਿਕਥੁਲ੍ਲਚ੍ਚਯਪਾਚਿਤ੍ਤਿਯਦੁਕ੍ਕਟਾਨਿ ਵੇਦਿਤਬ੍ਬਾਨਿ.
ਪਟਗ੍ਗਿਦਾਨਂ ਪਨ ਪਰਿਤ੍ਤਕਰਣਞ੍ਚ ਭਗਵਤਾ ਅਨੁਞ੍ਞਾਤਂ, ਤਸ੍ਮਾ ਅਰਞ੍ਞੇ ਵਨਕਮ੍ਮਿਕੇਹਿ ਵਾ ਦਿਨ੍ਨਂ ਸਯਂ ਵਾ ਉਟ੍ਠਿਤਂ ਅਗ੍ਗਿਂ ਆਗਚ੍ਛਨ੍ਤਂ ਦਿਸ੍ਵਾ ‘‘ਤਿਣਕੁਟਿਯੋ ਮਾ ਵਿਨਸ੍ਸਨ੍ਤੂ’’ਤਿ ਤਸ੍ਸ ਅਗ੍ਗਿਨੋ ਪਟਿਅਗ੍ਗਿਂ ਦਾਤੁਂ ਵਟ੍ਟਤਿ, ਯੇਨ ਸਦ੍ਧਿਂ ਆਗਚ੍ਛਨ੍ਤੋ ਅਗ੍ਗਿ ਏਕਤੋ ਹੁਤ੍ਵਾ ਨਿਰੁਪਾਦਾਨੋ ਨਿਬ੍ਬਾਤਿ. ‘‘ਪਰਿਤ੍ਤਮ੍ਪਿ ਕਾਤੁਂ ਵਟ੍ਟਤੀ’’ਤਿ ਤਿਣਕੁਟਿਕਾਨਂ ਸਮਨ੍ਤਾ ਭੂਮਿਤਚ੍ਛਨਂ ਪਰਿਖਾਖਣਨਂ ਵਾ, ਯਥਾ ਆਗਤੋ ਅਗ੍ਗਿ ਉਪਾਦਾਨਂ ਅਲਭਿਤ੍ਵਾ ਨਿਬ੍ਬਾਤਿ, ਏਤਞ੍ਚ ਸਬ੍ਬਂ ਉਟ੍ਠਿਤੇਯੇਵ ਅਗ੍ਗਿਸ੍ਮਿਂ ਅਸਤਿ ਅਨੁਪਸਮ੍ਪਨ੍ਨੇ ਸਯਮ੍ਪਿ ਕਾਤੁਂ ਵਟ੍ਟਤਿ. ਅਨੁਟ੍ਠਿਤੇ ਪਨ ਅਨੁਪਸਮ੍ਪਨ੍ਨੇਹਿ ਕਪ੍ਪਿਯਵੋਹਾਰੇਨ ਕਾਰੇਤਬ੍ਬਂ, ਉਦਕੇਨ ਪਨ ਨਿਬ੍ਬਾਪੇਨ੍ਤੇਹਿ ਅਪ੍ਪਾਣਕਮੇਵ ਉਦਕਂ ਆਸਿਞ੍ਚਿਤਬ੍ਬਂ.
੧੭. ਅਸ੍ਸਦ੍ਧੇਸੁ (ਪਾਰਾ. ਅਟ੍ਠ. ੨.੧੮੧) ਮਿਚ੍ਛਾਦਿਟ੍ਠਿਕੁਲੇਸੁ ਸਕ੍ਕਚ੍ਚਂ ਪਣੀਤਭੋਜਨਂ ਲਭਿਤ੍ਵਾ ਅਨੁਪਪਰਿਕ੍ਖਿਤ੍ਵਾ ਨੇਵ ਅਤ੍ਤਨਾ ਪਰਿਭੁਞ੍ਜਿਤਬ੍ਬਂ, ਨ ਪਰੇਸਂ ਦਾਤਬ੍ਬਂ. ਵਿਸਮਿਸ੍ਸਮ੍ਪਿ ਹਿ ਤਾਨਿ ਕੁਲਾਨਿ ਪਿਣ੍ਡਪਾਤਂ ਦੇਨ੍ਤਿ. ਯਮ੍ਪਿ ਆਭਿਦੋਸਿਕਂ ਭਤ੍ਤਂ ਵਾ ਖਜ੍ਜਕਂ ਵਾ ਤਤੋ ਲਭਤਿ, ਤਮ੍ਪਿ ਨ ਪਰਿਭੁਞ੍ਜਿਤਬ੍ਬਂ. ਅਪਿਹਿਤਵਤ੍ਥੁਮ੍ਪਿ ਹਿ ਸਪ੍ਪਵਿਚ੍ਛਿਕਾਦੀਹਿ ਅਧਿਸਯਿਤਂ ਛਡ੍ਡਨੀਯਧਮ੍ਮਂ ਤਾਨਿ ਕੁਲਾਨਿ ਦੇਨ੍ਤਿ. ਗਨ੍ਧਹਲਿਦ੍ਦਾਦਿਮਕ੍ਖਿਤੋਪਿ ਤਤੋ ਪਿਣ੍ਡਪਾਤੋ ਨ ਗਹੇਤਬ੍ਬੋ. ਸਰੀਰੇ ਰੋਗਟ੍ਠਾਨਾਨਿ ਪੁਞ੍ਛਿਤ੍ਵਾ ਠਪਿਤਭਤ੍ਤਮ੍ਪਿ ਹਿ ਤਾਨਿ ਦਾਤਬ੍ਬਂ ਮਞ੍ਞਨ੍ਤੀਤਿ.
੧੮. ‘‘ਅਨਾਪਤ੍ਤਿ, ਭਿਕ੍ਖਵੇ, ਗੋਪਕਸ੍ਸ ਦਾਨੇ’’ਤਿ (ਪਾਰਾ. ੧੫੬) ਵੁਤ੍ਤਂ. ਤਤ੍ਥ (ਪਾਰਾ. ਅਟ੍ਠ. ੧.੧੫੬) ਕਤਰਂ ਗੋਪਕਦਾਨਂ ਵਟ੍ਟਤਿ, ਕਤਰਂ ਨ ਵਟ੍ਟਤਿ? ਮਹਾਸੁਮਤ੍ਥੇਰੋ ਤਾਵ ਆਹ ‘‘ਯਂ ਗੋਪਕਸ੍ਸ ਪਰਿਚ੍ਛਿਨ੍ਦਿਤ੍ਵਾ ਦਿਨ੍ਨਂ ਹੋਤਿ ‘ਏਤ੍ਤਕਂ ਦਿਵਸੇ ਦਿਵਸੇ ਗਣ੍ਹਾ’ਤਿ, ਤਦੇਵ ਵਟ੍ਟਤਿ, ਤਤੋ ਉਤ੍ਤਰਿ ਨ ਵਟ੍ਟਤੀ’’ਤਿ. ਮਹਾਪਦੁਮਤ੍ਥੇਰੋ ਪਨਾਹ ‘‘ਕਿਂ ਗੋਪਕਾਨਂ ਪਣ੍ਣਂ ਆਰੋਪੇਤ੍ਵਾ ਨਿਮਿਤ੍ਤਸਞ੍ਞਂ ਵਾ ਕਤ੍ਵਾ ਦਿਨ੍ਨਂ ਅਤ੍ਥਿ, ਏਤੇਸਂ ਹਤ੍ਥੇ ਵਿਸ੍ਸਟ੍ਠਕਸ੍ਸ ਏਤੇ ਇਸ੍ਸਰਾ, ਤਸ੍ਮਾ ਯਂ ਦੇਨ੍ਤਿ, ਤਂ ਬਹੁਕਮ੍ਪਿ ਵਟ੍ਟਤੀ’’ਤਿ. ਕੁਰੁਨ੍ਦਟ੍ਠਕਥਾਯਂ ਪਨ ਵੁਤ੍ਤਂ ‘‘ਮਨੁਸ੍ਸਾਨਂ ਆਰਾਮਂ ਵਾ ਅਞ੍ਞਂ ਵਾ ਫਲਾਫਲਂ ਦਾਰਕਾ ਰਕ੍ਖਨ੍ਤਿ, ਤੇਹਿ ਦਿਨ੍ਨਂ ਵਟ੍ਟਤਿ, ਆਹਰਾਪੇਤ੍ਵਾ ਪਨ ਨ ਗਹੇਤਬ੍ਬਂ. ਸਙ੍ਘਿਕੇ ਪਨ ਚੇਤਿਯਸ੍ਸ ਸਨ੍ਤਕੇ ਚ ਕੇਣਿਯਾ ਗਹੇਤ੍ਵਾ ਰਕ੍ਖਨ੍ਤਸ੍ਸੇਵ ਦਾਨਂ ਵਟ੍ਟਤਿ, ਵੇਤਨੇਨ ਰਕ੍ਖਨ੍ਤਸ੍ਸ ਅਤ੍ਤਨੋ ਭਾਗਮਤ੍ਤਂ ਵਟ੍ਟਤੀ’’ਤਿ. ਮਹਾਪਚ੍ਚਰਿਯਂ ਪਨ ‘‘ਯਂ ਗਿਹੀਨਂ ਆਰਾਮਰਕ੍ਖਕਾ ਭਿਕ੍ਖੂਨਂ ਦੇਨ੍ਤਿ, ਏਤਮ੍ਪਿ ਵਟ੍ਟਤਿ. ਭਿਕ੍ਖੁਸਙ੍ਘਸ੍ਸ ਆਰਾਮਗੋਪਕਾ ਯਂ ਅਤ੍ਤਨੋ ਭਤਿਯਾ ਖਣ੍ਡਿਤ੍ਵਾ ਦੇਨ੍ਤਿ, ਏਤਂ ਵਟ੍ਟਤਿ. ਯੋਪਿ ਉਪਡ੍ਢਾਰਾਮਂ ਵਾ ਕੇਚਿਦੇਵ ਰੁਕ੍ਖੇ ਵਾ ਭਤਿਂ ਲਭਿਤ੍ਵਾ ਰਕ੍ਖਤਿ, ਤਸ੍ਸਪਿ ਅਤ੍ਤਨੋ ਸਮ੍ਪਤ੍ਤਰੁਕ੍ਖਤੋਯੇਵ ਦਾਤੁਂ ਵਟ੍ਟਤਿ, ਕੇਣਿਯਾ ਗਹੇਤ੍ਵਾ ਰਕ੍ਖਨ੍ਤਸ੍ਸ ਪਨ ਸਬ੍ਬਮ੍ਪਿ ਵਟ੍ਟਤੀ’’ਤਿ ਵੁਤ੍ਤਂ. ਏਤਂ ਪਨ ਸਬ੍ਬਂ ਬ੍ਯਞ੍ਜਨਤੋ ਨਾਨਂ, ਅਤ੍ਥਤੋ ਏਕਮੇਵ, ਤਸ੍ਮਾ ਅਧਿਪ੍ਪਾਯਂ ਞਤ੍ਵਾ ਗਹੇਤਬ੍ਬਂ.
ਅਪਿਚੇਤ੍ਥ ਅਯਮ੍ਪਿ ਵਿਨਿਚ੍ਛਯੋ ਵੇਦਿਤਬ੍ਬੋ (ਪਾਰਾ. ਅਟ੍ਠ. ੧.੧੫੬) – ਯਤ੍ਥ ਆਵਾਸਿਕਾ ਆਗਨ੍ਤੁਕਾਨਂ ਨ ਦੇਨ੍ਤਿ, ਫਲਵਾਰੇ ਚ ਸਮ੍ਪਤ੍ਤੇ ਅਞ੍ਞੇਸਂ ਅਭਾਵਂ ਦਿਸ੍ਵਾ ਚੋਰਿਕਾਯ ਅਤ੍ਤਨਾਵ ਖਾਦਨ੍ਤਿ, ਤਤ੍ਥ ਆਗਨ੍ਤੁਕੇਹਿ ਘਣ੍ਟਿਂ ਪਹਰਿਤ੍ਵਾ ਭਾਜੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ. ਯਤ੍ਥ ਪਨ ਆਵਾਸਿਕਾ ਰੁਕ੍ਖੇ ਰਕ੍ਖਿਤ੍ਵਾ ਫਲਵਾਰੇ ਸਮ੍ਪਤ੍ਤੇ ਭਾਜੇਤ੍ਵਾ ਖਾਦਨ੍ਤਿ, ਚਤੂਸੁ ਪਚ੍ਚਯੇਸੁ ਸਮ੍ਮਾ ਉਪਨੇਨ੍ਤਿ, ਅਨਿਸ੍ਸਰਾ ਤਤ੍ਥ ਆਗਨ੍ਤੁਕਾ. ਯੇਪਿ ਰੁਕ੍ਖਾ ਚੀਵਰਤ੍ਥਾਯ ਨਿਯਮੇਤ੍ਵਾ ਦਿਨ੍ਨਾ, ਤੇਸੁਪਿ ਆਗਨ੍ਤੁਕਾ ਅਨਿਸ੍ਸਰਾ. ਏਸ ਨਯੋ ਸੇਸਪਚ੍ਚਯਤ੍ਥਾਯ ਨਿਯਮੇਤ੍ਵਾ ਦਿਨ੍ਨੇਪਿ. ਯੇ ਪਨ ਤਥਾ ਅਨਿਯਮੇਤ੍ਵਾ ਆਵਾਸਿਕਾ ਚ ਤੇ ਰਕ੍ਖਿਤ੍ਵਾ ਗੋਪੇਤ੍ਵਾ ਚੋਰਿਕਾਯ ਪਰਿਭੁਞ੍ਜਨ੍ਤਿ, ਨ ਤੇਸੁ ਆਵਾਸਿਕਾਨਂ ਕਤਿਕਾਯ ਠਾਤਬ੍ਬਂ. ਯੇ ਫਲਪਰਿਭੋਗਤ੍ਥਾਯ ਦਿਨ੍ਨਾ, ਆਵਾਸਿਕਾ ਚ ਨੇ ਰਕ੍ਖਿਤ੍ਵਾ ਗੋਪੇਤ੍ਵਾ ਸਮ੍ਮਾ ਉਪਨੇਨ੍ਤਿ, ਤੇਸੁਯੇਵ ਤੇਸਂ ਕਤਿਕਾਯ ਠਾਤਬ੍ਬਂ. ਮਹਾਪਚ੍ਚਰਿਯਂ ਪਨ ਵੁਤ੍ਤਂ ‘‘ਚਤੁਨ੍ਨਂ ਪਚ੍ਚਯਾਨਂ ਨਿਯਮੇਤ੍ਵਾ ਦਿਨ੍ਨਂ ਥੇਯ੍ਯਚਿਤ੍ਤੇਨ ਪਰਿਭੁਞ੍ਜਨ੍ਤੋ ਭਣ੍ਡਂ ਅਗ੍ਘਾਪੇਤ੍ਵਾ ਕਾਰੇਤਬ੍ਬੋ, ਪਰਿਭੋਗਵਸੇਨ ਭਾਜੇਤ੍ਵਾ ਪਰਿਭੁਞ੍ਜਨ੍ਤਸ੍ਸ ਭਣ੍ਡਦੇਯ੍ਯਂ. ਯਂ ਪਨੇਤ੍ਥ ਸੇਨਾਸਨਤ੍ਥਾਯ ਨਿਯਮਿਤਂ, ਤਂ ਪਰਿਭੋਗਵਸੇਨੇਵ ਭਾਜੇਤ੍ਵਾ ਪਰਿਭੁਞ੍ਜਨ੍ਤਸ੍ਸ ਥੁਲ੍ਲਚ੍ਚਯਞ੍ਚ ਭਣ੍ਡਦੇਯ੍ਯਞ੍ਚਾ’’ਤਿ.
ਓਦਿਸ੍ਸ ਚੀਵਰਤ੍ਥਾਯ ਦਿਨ੍ਨਂ ਚੀਵਰੇਯੇਵ ਉਪਨੇਤਬ੍ਬਂ. ਸਚੇ ਦੁਬ੍ਭਿਕ੍ਖਂ ਹੋਤਿ, ਭਿਕ੍ਖੂ ਪਿਣ੍ਡਪਾਤੇਨ ਕਿਲਮਨ੍ਤਿ, ਚੀਵਰਂ ਪਨ ਸੁਲਭਂ, ਸਙ੍ਘਸੁਟ੍ਠੁਤਾਯ ਅਪਲੋਕਨਕਮ੍ਮਂ ਕਤ੍ਵਾ ਪਿਣ੍ਡਪਾਤੇਪਿ ਉਪਨੇਤੁਂ ਵਟ੍ਟਤਿ. ਸੇਨਾਸਨੇਨ ਗਿਲਾਨਪਚ੍ਚਯੇਨ ਵਾ ਕਿਲਮਨ੍ਤੇਸੁ ਸਙ੍ਘਸੁਟ੍ਠੁਤਾਯ ਅਪਲੋਕਨਕਮ੍ਮਂ ਕਤ੍ਵਾ ਤਦਤ੍ਥਾਯਪਿ ਉਪਨੇਤੁਂ ਵਟ੍ਟਤਿ. ਓਦਿਸ੍ਸ ਪਿਣ੍ਡਪਾਤਤ੍ਥਾਯ ਚ ਗਿਲਾਨਪਚ੍ਚਯਤ੍ਥਾਯ ਚ ਦਿਨ੍ਨੇਪਿ ਏਸੇਵ ਨਯੋ. ਓਦਿਸ੍ਸ ਸੇਨਾਸਨਤ੍ਥਾਯ ਦਿਨ੍ਨਂ ਪਨ ਗਰੁਭਣ੍ਡਂ ਹੋਤਿ, ਤਂ ਰਕ੍ਖਿਤ੍ਵਾ ਗੋਪੇਤ੍ਵਾ ਤਦਤ੍ਥਮੇਵ ਉਪਨੇਤਬ੍ਬਂ. ਸਚੇ ਪਨ ਦੁਬ੍ਭਿਕ੍ਖਂ ਹੋਤਿ, ਭਿਕ੍ਖੂ ਪਿਣ੍ਡਪਾਤੇਨ ਨ ਯਾਪੇਨ੍ਤਿ, ਏਤ੍ਥ ਰਾਜਰੋਗਚੋਰਭਯਾਦੀਹਿ ਅਞ੍ਞਤ੍ਥ ਗਚ੍ਛਨ੍ਤਾਨਂ ਵਿਹਾਰਾ ਪਲੁਜ੍ਜਨ੍ਤਿ, ਤਾਲਨਾਲ਼ਿਕੇਰਾਦਿਕੇ ਵਿਨਾਸੇਨ੍ਤਿ, ਸੇਨਾਸਨਪਚ੍ਚਯਂ ਪਨ ਨਿਸ੍ਸਾਯ ਯਾਪੇਤੁਂ ਸਕ੍ਕਾ ਹੋਤਿ, ਏਵਰੂਪੇ ਕਾਲੇ ਸੇਨਾਸਨਂ ਵਿਸ੍ਸਜ੍ਜੇਤ੍ਵਾਪਿ ਸੇਨਾਸਨਜਗ੍ਗਨਤ੍ਥਾਯ ਪਰਿਭੋਗੋ ਭਗਵਤਾ ਅਨੁਞ੍ਞਾਤੋ. ਤਸ੍ਮਾ ਏਕਂ ਵਾ ਦ੍ਵੇ ਵਾ ਵਰਸੇਨਾਸਨਾਨਿ ਠਪੇਤ੍ਵਾ ਇਤਰਾਨਿ ਲਾਮਕਕੋਟਿਯਾ ਪਿਣ੍ਡਪਾਤਤ੍ਥਾਯ ਵਿਸ੍ਸਜ੍ਜੇਤੁਂ ਵਟ੍ਟਨ੍ਤਿ, ਮੂਲਵਤ੍ਥੁਚ੍ਛੇਦਂ ਪਨ ਕਤ੍ਵਾ ਨ ਉਪਨੇਤਬ੍ਬਂ.
ਯੋ ਪਨ ਆਰਾਮੋ ਚਤੁਪਚ੍ਚਯਤ੍ਥਾਯ ਨਿਯਮੇਤ੍ਵਾ ਦਿਨ੍ਨੋ, ਤਤ੍ਥ ਅਪਲੋਕਨਕਮ੍ਮਂ ਨ ਕਾਤਬ੍ਬਂ. ਯੇਨ ਪਚ੍ਚਯੇਨ ਪਨ ਊਨਂ, ਤਦਤ੍ਥਂ ਉਪਨੇਤੁਂ ਵਟ੍ਟਤਿ, ਆਰਾਮੋ ਪਟਿਜਗ੍ਗਿਤਬ੍ਬੋ, ਵੇਤਨਂ ਦਤ੍ਵਾਪਿ ਜਗ੍ਗਾਪੇਤੁਂ ਵਟ੍ਟਤਿ. ਯੇ ਪਨ ਵੇਤਨਂ ਲਭਿਤ੍ਵਾ ਆਰਾਮੇਯੇਵ ਗੇਹਂ ਕਤ੍ਵਾ ਵਸਨ੍ਤਾ ਰਕ੍ਖਨ੍ਤਿ, ਤੇ ਚੇ ਆਗਤਾਨਂ ਭਿਕ੍ਖੂਨਂ ਨਾਲ਼ਿਕੇਰਂ ਵਾ ਤਾਲਪਕ੍ਕਂ ਵਾ ਦੇਨ੍ਤਿ, ਯਂ ਤੇਸਂ ਸਙ੍ਘੇਨ ਅਨੁਞ੍ਞਾਤਂ ਹੋਤਿ ‘‘ਦਿਵਸੇ ਦਿਵਸੇ ਏਤ੍ਤਕਂ ਨਾਮ ਖਾਦਥਾ’’ਤਿ, ਤਦੇਵ ਤੇ ਦਾਤੁਂ ਲਭਨ੍ਤਿ, ਤਤੋ ਉਤ੍ਤਰਿ ਤੇਸਂ ਦੇਨ੍ਤਾਨਮ੍ਪਿ ਗਹੇਤੁਂ ਨ ਵਟ੍ਟਨ੍ਤਿ. ਯੋ ਪਨ ਆਰਾਮਂ ਕੇਣਿਯਾ ਗਹੇਤ੍ਵਾ ਸਙ੍ਘਸ੍ਸ ਚਤੁਪਚ੍ਚਯਤ੍ਥਾਯ ਕਪ੍ਪਿਯਭਣ੍ਡਮੇਵ ਦੇਤਿ, ਅਯਂ ਬਹੁਕਮ੍ਪਿ ਦਾਤੁਂ ਲਭਤਿ. ਚੇਤਿਯਸ੍ਸ ਪਦੀਪਤ੍ਥਾਯ ਵਾ ਖਣ੍ਡਫੁਲ੍ਲਪਟਿਸਙ੍ਖਰਣਤ੍ਥਾਯ ਵਾ ਦਿਨ੍ਨਆਰਾਮੋਪਿ ਜਗ੍ਗਿਤਬ੍ਬੋ, ਵੇਤਨਂ ਦਤ੍ਵਾਪਿ ਜਗ੍ਗਾਪੇਤਬ੍ਬੋ. ਵੇਤਨਞ੍ਚ ਪਨੇਤ੍ਥ ਚੇਤਿਯਸਨ੍ਤਕਮ੍ਪਿ ਸਙ੍ਘਸਨ੍ਤਕਮ੍ਪਿ ਦਾਤੁਂ ਵਟ੍ਟਤਿ. ਏਤਮ੍ਪਿ ਆਰਾਮਂ ਵੇਤਨੇਨ ਤਤ੍ਥੇਵ ਵਸਿਤ੍ਵਾ ਰਕ੍ਖਨ੍ਤਾਨਞ੍ਚ ਕੇਣਿਯਾ ਗਹੇਤ੍ਵਾ ਕਪ੍ਪਿਯਭਣ੍ਡਦਾਯਕਾਨਞ੍ਚ ਤਤ੍ਥਜਾਤਕਫਲਦਾਨਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.
੧੯. ਧਮ੍ਮਿਕਰਕ੍ਖਂ (ਪਾਚਿ. ਅਟ੍ਠ. ੬੭੯) ਯਾਚਨ੍ਤੇਨ ਅਤੀਤਂ ਅਨਾਗਤਂ ਵਾ ਆਰਬ੍ਭ ਓਦਿਸ੍ਸ ਆਚਿਕ੍ਖਿਤੁਂ ਨ ਵਟ੍ਟਤਿ. ਅਤੀਤਞ੍ਹਿ ਆਰਬ੍ਭ ਅਤ੍ਥਿ ਓਦਿਸ੍ਸ ਆਚਿਕ੍ਖਨਾ, ਅਤ੍ਥਿ ਅਨੋਦਿਸ੍ਸ ਆਚਿਕ੍ਖਨਾ, ਅਨਾਗਤਂ ਆਰਬ੍ਭਪਿ ਅਤ੍ਥਿ ਓਦਿਸ੍ਸ ਆਚਿਕ੍ਖਨਾ, ਅਤ੍ਥਿ ਅਨੋਦਿਸ੍ਸ ਆਚਿਕ੍ਖਨਾ. ਕਥਂ ਅਤੀਤਂ ਆਰਬ੍ਭ ਓਦਿਸ੍ਸ ਆਚਿਕ੍ਖਨਾ ਹੋਤਿ? ਭਿਕ੍ਖੂਨਂ ਵਿਹਾਰੇ ਗਾਮਦਾਰਕਾ ਵਾ ਧੁਤ੍ਤਾਦਯੋ ਵਾ ਯੇ ਕੇਚਿ ਅਨਾਚਾਰਂ ਆਚਰਨ੍ਤਿ, ਰੁਕ੍ਖਂ ਵਾ ਛਿਨ੍ਦਨ੍ਤਿ, ਫਲਾਫਲਂ ਵਾ ਹਰਨ੍ਤਿ, ਪਰਿਕ੍ਖਾਰੇ ਵਾ ਅਚ੍ਛਿਨ੍ਦਨ੍ਤਿ, ਭਿਕ੍ਖੁ ਵੋਹਾਰਿਕੇ ਉਪਸਙ੍ਕਮਿਤ੍ਵਾ ‘‘ਅਮ੍ਹਾਕਂ ਵਿਹਾਰੇ ਇਦਂ ਨਾਮ ਕਤ’’ਨ੍ਤਿ ਵਦਤਿ. ‘‘ਕੇਨਾ’’ਤਿ ਵੁਤ੍ਤੇ ‘‘ਅਸੁਕੇਨ ਚ ਅਸੁਕੇਨ ਚਾ’’ਤਿ ਆਚਿਕ੍ਖਤਿ. ਏਵਂ ਅਤੀਤਂ ਆਰਬ੍ਭ ਓਦਿਸ੍ਸ ਆਚਿਕ੍ਖਨਾ ਹੋਤਿ, ਸਾ ਨ ਵਟ੍ਟਤਿ. ਤਞ੍ਚੇ ਸੁਤ੍ਵਾ ਤੇ ਵੋਹਾਰਿਕਾ ਤੇਸਂ ਦਣ੍ਡਂ ਕਰੋਨ੍ਤਿ, ਸਬ੍ਬਂ ਭਿਕ੍ਖੁਸ੍ਸ ਗੀਵਾ ਹੋਤਿ, ‘‘ਦਣ੍ਡਂ ਗਣ੍ਹਿਸ੍ਸਨ੍ਤੀ’’ਤਿ ਅਧਿਪ੍ਪਾਯੇਪਿ ਸਤਿ ਗੀਵਾਯੇਵ ਹੋਤਿ. ਸਚੇ ਪਨ ‘‘ਤਸ੍ਸ ਦਣ੍ਡਂ ਗਣ੍ਹਥਾ’’ਤਿ ਵਦਤਿ, ਪਞ੍ਚਮਾਸਕਮਤ੍ਤੇ ਗਹਿਤੇ ਪਾਰਾਜਿਕਂ ਹੋਤਿ. ‘‘ਕੇਨਾ’’ਤਿ ਵੁਤ੍ਤੇ ਪਨ ‘‘ਅਸੁਕੇਨਾਤਿ ਵਤ੍ਤੁਂ ਅਮ੍ਹਾਕਂ ਨ ਵਟ੍ਟਤਿ, ਤੁਮ੍ਹੇਯੇਵ ਜਾਨਿਸ੍ਸਥ. ਕੇਵਲਞ੍ਹਿ ਮਯਂ ਰਕ੍ਖਂ ਯਾਚਾਮ, ਤਂ ਨੋ ਦੇਥ, ਅਵਹਟਭਣ੍ਡਞ੍ਚ ਆਹਰਾਪੇਥਾ’’ਤਿ ਵਤ੍ਤਬ੍ਬਂ. ਏਵਂ ਅਨੋਦਿਸ੍ਸ ਆਚਿਕ੍ਖਨਾ ਹੋਤਿ, ਸਾ ਵਟ੍ਟਤਿ. ਏਵਂ ਵੁਤ੍ਤੇ ਸਚੇਪਿ ਤੇ ਵੋਹਾਰਿਕਾ ਕਾਰਕੇ ਗਵੇਸਿਤ੍ਵਾ ਤੇਸਂ ਦਣ੍ਡਂ ਕਰੋਨ੍ਤਿ, ਸਬ੍ਬਸਾਪਤੇਯ੍ਯੇਪਿ ਗਹਿਤੇ ਭਿਕ੍ਖੁਨੋ ਨੇਵ ਗੀਵਾ, ਨ ਆਪਤ੍ਤਿ. ਪਰਿਕ੍ਖਾਰਂ ਹਰਨ੍ਤੇ ਦਿਸ੍ਵਾ ਤੇਸਂ ਅਨਤ੍ਥਕਾਮਤਾਯ ‘‘ਚੋਰੋ ਚੋਰੋ’’ਤਿ ਵਤ੍ਤੁਮ੍ਪਿ ਨ ਵਟ੍ਟਤਿ. ਏਵਂ ਵੁਤ੍ਤੇਪਿ ਹਿ ਯਂ ਤੇਸਂ ਦਣ੍ਡਂ ਕਰੋਨ੍ਤਿ, ਸਬ੍ਬਂ ਭਿਕ੍ਖੁਨੋ ਗੀਵਾ ਹੋਤਿ. ਅਤ੍ਤਨੋ ਵਚਨਕਰਂ ਪਨ ‘‘ਇਮਿਨਾ ਮੇ ਪਰਿਕ੍ਖਾਰੋ ਗਹਿਤੋ, ਤਂ ਆਹਰਾਪੇਹਿ, ਮਾ ਚਸ੍ਸ ਦਣ੍ਡਂ ਕਰੋਹੀ’’ਤਿ ਵਤ੍ਤੁਂ ਵਟ੍ਟਤਿ. ਦਾਸਦਾਸੀਵਾਪਿਆਦੀਨਮ੍ਪਿ ਅਤ੍ਥਾਯ ਅਡ੍ਡਂ ਕਰੋਨ੍ਤਿ ਅਯਂ ਅਕਪ੍ਪਿਯਅਡ੍ਡੋ ਨਾਮ, ਨ ਵਟ੍ਟਤਿ.
ਕਥਂ ਅਨਾਗਤਂ ਆਰਬ੍ਭ ਓਦਿਸ੍ਸ ਆਚਿਕ੍ਖਨਾ ਹੋਤਿ? ਵੁਤ੍ਤਨਯੇਨੇਵ ਪਰੇਹਿ ਅਨਾਚਾਰਾਦੀਸੁ ਕਤੇਸੁ ਭਿਕ੍ਖੁ ਵੋਹਾਰਿਕੇ ਏਵਂ ਵਦਤਿ ‘‘ਅਮ੍ਹਾਕਂ ਵਿਹਾਰੇ ਇਦਞ੍ਚਿਦਞ੍ਚ ਕਰੋਨ੍ਤਿ, ਰਕ੍ਖਂ ਨੋ ਦੇਥ ਆਯਤਿਂ ਅਕਰਣਤ੍ਥਾਯਾ’’ਤਿ. ‘‘ਕੇਨ ਏਵਂ ਕਤ’’ਨ੍ਤਿ ਵੁਤ੍ਤੇ ਚ ‘‘ਅਸੁਕੇਨ ਚ ਅਸੁਕੇਨ ਚਾ’’ਤਿ ਆਚਿਕ੍ਖਤਿ. ਏਵਂ ਅਨਾਗਤਂ ਆਰਬ੍ਭ ਓਦਿਸ੍ਸ ਆਚਿਕ੍ਖਨਾ ਹੋਤਿ, ਸਾਪਿ ਨ ਵਟ੍ਟਤਿ. ਤੇਸਞ੍ਹਿ ਦਣ੍ਡੇ ਕਤੇ ਪੁਰਿਮਨਯੇਨੇਵ ਸਬ੍ਬਂ ਭਿਕ੍ਖੁਸ੍ਸ ਗੀਵਾ, ਸੇਸਂ ਪੁਰਿਮਸਦਿਸਮੇਵ. ਸਚੇ ਵੋਹਾਰਿਕਾ ‘‘ਭਿਕ੍ਖੂਨਂ ਵਿਹਾਰੇ ਏਵਰੂਪਂ ਅਨਾਚਾਰਂ ਕਰੋਨ੍ਤਾਨਂ ਇਮਂ ਨਾਮ ਦਣ੍ਡਂ ਕਰੋਮਾ’’ਤਿ ਭੇਰਿਂ ਚਰਾਪੇਤ੍ਵਾ ਆਣਾਯ ਅਤਿਟ੍ਠਮਾਨੇ ਪਰਿਯੇਸਿਤ੍ਵਾ ਦਣ੍ਡਂ ਕਰੋਨ੍ਤਿ, ਭਿਕ੍ਖੁਨੋ ਨੇਵ ਗੀਵਾ, ਨ ਆਪਤ੍ਤਿ. ਵਿਹਾਰਸੀਮਾਯ ਰੁਕ੍ਖਾਦੀਨਿ ਛਿਨ੍ਦਨ੍ਤਾਨਂ ਵਾਸਿਫਰਸੁਆਦੀਨਿ ਗਹੇਤ੍ਵਾ ਪਾਸਾਣੇਹਿ ਕੋਟ੍ਟੇਨ੍ਤਿ, ਨ ਵਟ੍ਟਤਿ. ਸਚੇ ਧਾਰਾ ਭਿਜ੍ਜਤਿ, ਕਾਰਾਪੇਤ੍ਵਾ ਦਾਤਬ੍ਬਾ. ਉਪਧਾਵਿਤ੍ਵਾ ਤੇਸਂ ਪਰਿਕ੍ਖਾਰੇ ਗਣ੍ਹਨ੍ਤਿ, ਤਮ੍ਪਿ ਨ ਕਾਤਬ੍ਬਂ. ਲਹੁਪਰਿਵਤ੍ਤਞ੍ਹਿ ਚਿਤ੍ਤਂ, ਥੇਯ੍ਯਚੇਤਨਾਯ ਉਪ੍ਪਨ੍ਨਾਯ ਮੂਲਚ੍ਛੇਜ੍ਜਮ੍ਪਿ ਗਚ੍ਛੇਯ੍ਯ.
੨੦. ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਸਙ੍ਕਾਰਂ ਵਾ ਵਿਘਾਸਂ ਵਾ ਤਿਰੋਕੁਟ੍ਟੇ ਵਾ ਤਿਰੋਪਾਕਾਰੇ ਵਾ ਛਡ੍ਡੇਤੁਂ ਵਾ ਛਡ੍ਡਾਪੇਤੁਂ ਵਾ ਨ ਵਟ੍ਟਤਿ. ਚਤ੍ਤਾਰਿਪਿ (ਪਾਚਿ. ਅਟ੍ਠ. ੮੨੬) ਵਤ੍ਥੂਨਿ ਏਕਪਯੋਗੇਨ ਛਡ੍ਡੇਨ੍ਤਸ੍ਸ ਏਕਮੇਵ ਦੁਕ੍ਕਟਂ, ਪਾਟੇਕ੍ਕਂ ਛਡ੍ਡੇਨ੍ਤਸ੍ਸ ਵਤ੍ਥੁਗਣਨਾਯ ਦੁਕ੍ਕਟਾਨਿ. ਆਣਤ੍ਤਿਯਮ੍ਪਿ ਏਸੇਵ ਨਯੋ. ਦਨ੍ਤਕਟ੍ਠਛਡ੍ਡਨੇਪਿ ਦੁਕ੍ਕਟਮੇਵ. ਓਲੋਕੇਤ੍ਵਾ ਵਾ ਅਵਲਞ੍ਜੇ ਵਾ ਉਚ੍ਚਾਰਾਦੀਨਿ ਛਡ੍ਡੇਨ੍ਤਸ੍ਸ ਅਨਾਪਤ੍ਤਿ. ਯਮ੍ਪਿ ਮਨੁਸ੍ਸਾਨਂ ਉਪਭੋਗਪਰਿਭੋਗਂ ਰੋਪਿਮਂ ਖੇਤ੍ਤਂ ਹੋਤੁ ਨਾਲ਼ਿਕੇਰਾਦਿਆਰਾਮੋ ਵਾ, ਤਤ੍ਥਾਪਿ ਯਤ੍ਥ ਕਤ੍ਥਚਿ ਰੋਪਿਮਹਰਿਤਟ੍ਠਾਨੇ ਏਤਾਨਿ ਵਤ੍ਥੂਨਿ ਛਡ੍ਡੇਤੁਂ ਨ ਵਟ੍ਟਤਿ. ਛਡ੍ਡੇਨ੍ਤਸ੍ਸ ਪੁਰਿਮਨਯੇਨੇਵ ਆਪਤ੍ਤਿਭੇਦੋ ਵੇਦਿਤਬ੍ਬੋ. ਖੇਤ੍ਤੇ ਵਾ ਆਰਾਮੇ ਵਾ ਨਿਸੀਦਿਤ੍ਵਾ ਭੁਞ੍ਜਮਾਨੋ ਉਚ੍ਛੁਆਦੀਨਿ ਵਾ ਖਾਦਮਾਨੋ ਗਚ੍ਛਨ੍ਤੋ ਉਚ੍ਛਿਟ੍ਠੋਦਕਚਲਕਾਦੀਨਿ ਹਰਿਤਟ੍ਠਾਨੇ ਛਡ੍ਡੇਤਿ, ਅਨ੍ਤਮਸੋ ਉਦਕਂ ਪਿਵਿਤ੍ਵਾ ਮਤ੍ਥਕਚ੍ਛਿਨ੍ਨਨਾਲ਼ਿਕੇਰਮ੍ਪਿ ਛਡ੍ਡੇਤਿ, ਦੁਕ੍ਕਟਂ. ਕਸਿਤਟ੍ਠਾਨੇ ਨਿਕ੍ਖਿਤ੍ਤਬੀਜੇ ਅਙ੍ਕੁਰੇ ਉਟ੍ਠਿਤੇਪਿ ਅਵੁਟ੍ਠਿਤੇਪਿ ਦੁਕ੍ਕਟਮੇਵ. ਅਨਿਕ੍ਖਿਤ੍ਤਬੀਜੇਸੁ ਪਨ ਖੇਤ੍ਤਕੋਣਾਦੀਸੁ ਵਾ ਅਸਞ੍ਜਾਤਰੋਪਿਮੇਸੁ ਖੇਤ੍ਤਮਰਿਯਾਦਾਦੀਸੁ ਵਾ ਛਡ੍ਡੇਤੁਂ ਵਟ੍ਟਤਿ, ਮਨੁਸ੍ਸਾਨਂ ਕਚਵਰਛਡ੍ਡਨਟ੍ਠਾਨੇਪਿ ਵਟ੍ਟਤਿ. ਮਨੁਸ੍ਸੇਸੁ ਸਸ੍ਸਂ ਉਦ੍ਧਰਿਤ੍ਵਾ ਗਤੇਸੁ ਛਡ੍ਡਿਤਖੇਤ੍ਤਂ ਨਾਮ ਹੋਤਿ, ਤਤ੍ਥ ਵਟ੍ਟਤਿ. ਯਤ੍ਥ ਪਨ ‘‘ਲਾਯਿਤਮ੍ਪਿ ਪੁਬ੍ਬਣ੍ਣਾਦਿ ਪੁਨ ਉਟ੍ਠਹਿਸ੍ਸਤੀ’’ਤਿ ਰਕ੍ਖਨ੍ਤਿ, ਤਤ੍ਥ ਨ ਵਟ੍ਟਤਿ.
੨੧. ‘‘ਨ, ਭਿਕ੍ਖਵੇ, ਨਹਾਯਮਾਨੇਨ ਭਿਕ੍ਖੁਨਾ ਰੁਕ੍ਖੇ ਕਾਯੋ ਉਗ੍ਘਂਸੇਤਬ੍ਬੋ, ਯੋ ਉਗ੍ਘਂਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੪੩) ਵਚਨਤੋ ਨਹਾਯਨ੍ਤੇਨ (ਚੂਲ਼ਵ. ਅਟ੍ਠ. ੨੪੩ ਆਦਯੋ) ਰੁਕ੍ਖੇ ਵਾ ਨਹਾਨਤਿਤ੍ਥੇ ਨਿਖਨਿਤ੍ਵਾ ਠਪਿਤਤ੍ਥਮ੍ਭੇ ਵਾ ਇਟ੍ਠਕਸਿਲਾਦਾਰੁਕੁਟ੍ਟਾਨਂ ਅਞ੍ਞਤਰਸ੍ਮਿਂ ਕੁਟ੍ਟੇ ਵਾ ਕਾਯੋ ਨ ਘਂਸੇਤਬ੍ਬੋ.
‘‘ਨ, ਭਿਕ੍ਖਵੇ, ਅਟ੍ਟਾਨੇ ਨਹਾਯਿਤਬ੍ਬਂ, ਯੋ ਨਹਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੪੩) ਵਚਨਤੋ ਅਟ੍ਟਾਨੇਪਿ ਨਹਾਯਿਤੁਂ ਨ ਵਟ੍ਟਤਿ. ਅਟ੍ਟਾਨਂ ਨਾਮ ਰੁਕ੍ਖਂ ਫਲਕਂ ਵਿਯ ਤਚ੍ਛੇਤ੍ਵਾ ਅਟ੍ਠਪਦਾਕਾਰੇਨ ਰਾਜਿਯੋ ਛਿਨ੍ਦਿਤ੍ਵਾ ਨਹਾਨਤਿਤ੍ਥੇ ਨਿਖਨਨ੍ਤਿ, ਤਤ੍ਥ ਚੁਣ੍ਣਾਨਿ ਆਕਿਰਿਤ੍ਵਾ ਮਨੁਸ੍ਸਾ ਕਾਯਂ ਘਂਸਨ੍ਤਿ.
‘‘ਨ, ਭਿਕ੍ਖਵੇ, ਗਨ੍ਧਬ੍ਬਹਤ੍ਥਕੇਨ ਨਹਾਯਿਤਬ੍ਬਂ, ਯੋ ਨਹਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼੍ਵ. ੨੪੩) ਵਚਨਤੋ ਨਹਾਨਤਿਤ੍ਥੇ ਠਪਿਤੇਨ ਦਾਰੁਮਯਹਤ੍ਥੇਨ ਚੁਣ੍ਣਾਨਿ ਗਹੇਤ੍ਵਾ ਮਨੁਸ੍ਸਾ ਸਰੀਰਂ ਘਂਸਨ੍ਤਿ, ਤੇਨ ਨਹਾਯਿਤੁਂ ਨ ਵਟ੍ਟਤਿ.
‘‘ਨ, ਭਿਕ੍ਖਵੇ, ਕੁਰੁਵਿਨ੍ਦਕਸੁਤ੍ਤਿਯਾ ਨਹਾਯਿਤਬ੍ਬਂ, ਯੋ ਨਹਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੪੩) ਵਚਨਤੋ ਕੁਰੁਵਿਨ੍ਦਕਸੁਤ੍ਤਿਯਾਪਿ ਨਹਾਯਿਤੁਂ ਨ ਵਟ੍ਟਤਿ. ਕੁਰੁਵਿਨ੍ਦਕਸੁਤ੍ਤਿ ਨਾਮ ਕੁਰੁਵਿਨ੍ਦਕਪਾਸਾਣਚੁਣ੍ਣਾਨਿ ਲਾਖਾਯ ਬਨ੍ਧਿਤ੍ਵਾ ਕਤਗੁਲ਼ਿਕਕਲਾਪਕੋ ਵੁਚ੍ਚਤਿ, ਯਂ ਉਭੋਸੁ ਅਨ੍ਤੇਸੁ ਗਹੇਤ੍ਵਾ ਸਰੀਰਂ ਘਂਸਨ੍ਤਿ.
‘‘ਨ, ਭਿਕ੍ਖਵੇ, ਵਿਗ੍ਗਯ੍ਹ ਪਰਿਕਮ੍ਮਂ ਕਾਰਾਪੇਤਬ੍ਬਂ, ਯੋ ਕਾਰਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੪੩) ਵਚਨਤੋ ਅਞ੍ਞਮਞ੍ਞਂ ਸਰੀਰੇਨ ਘਂਸਿਤੁਂ ਨ ਵਟ੍ਟਤਿ.
‘‘ਨ, ਭਿਕ੍ਖਵੇ, ਮਲ੍ਲਕੇਨ ਨਹਾਯਿਤਬ੍ਬਂ, ਯੋ ਨਹਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਅਕਤਮਲ੍ਲਕ’’ਨ੍ਤਿ (ਚੂਲ਼ਵ. ੨੪੩-੨੪੪) ਵਚਨਤੋ ਮਕਰਦਣ੍ਡਕੇ ਛਿਨ੍ਦਿਤ੍ਵਾ ਮਲ੍ਲਕਮੂਲਸਣ੍ਠਾਨੇਨ ਕਤਂ ‘‘ਮਲ੍ਲਕ’’ਨ੍ਤਿ ਵੁਚ੍ਚਤਿ, ਇਦਂ ਗਿਲਾਨਸ੍ਸਪਿ ਨ ਵਟ੍ਟਤਿ. ਅਕਤਮਲ੍ਲਕਂ ਨਾਮ ਦਨ੍ਤੇ ਅਚ੍ਛਿਨ੍ਦਿਤ੍ਵਾ ਕਤਂ, ਇਦਂ ਅਗਿਲਾਨਸ੍ਸ ਨ ਵਟ੍ਟਤਿ, ਇਟ੍ਠਕਖਣ੍ਡਂ ਪਨ ਕਪਾਲਖਣ੍ਡਂ ਵਾ ਵਟ੍ਟਤਿ.
‘‘ਅਨੁਜਾਨਾਮਿ, ਭਿਕ੍ਖਵੇ, ਉਕ੍ਕਾਸਿਕਂ ਪੁਥੁਪਾਣਿਕ’’ਨ੍ਤਿ (ਚੂਲ਼ਵ. ੨੪੪) ਵਚਨਤੋ ਉਕ੍ਕਾਸਿਕਂ ਪੁਥੁਪਾਣਿਕਞ੍ਚ ਵਟ੍ਟਤਿ. ਉਕ੍ਕਾਸਿਕਂ ਨਾਮ ਵਤ੍ਥਵਟ੍ਟਿ, ਤਸ੍ਮਾ ਨਹਾਯਨ੍ਤਸ੍ਸ ਯਸ੍ਸ ਕਸ੍ਸਚਿ ਨਹਾਨਸਾਟਕਵਟ੍ਟਿਯਾ ਪਿਟ੍ਠਿਂ ਘਂਸਿਤੁਂ ਵਟ੍ਟਤਿ. ਪੁਥੁਪਾਣਿਕਨ੍ਤਿ ਹਤ੍ਥਪਰਿਕਮ੍ਮਂ ਵੁਚ੍ਚਤਿ, ਤਸ੍ਮਾ ਸਬ੍ਬੇਸਂ ਹਤ੍ਥੇਨ ਪਿਟ੍ਠਿਪਰਿਕਮ੍ਮਂ ਕਾਤੁਂ ਵਟ੍ਟਤਿ.
ਇਦਂ ਪਨੇਤ੍ਥ ਨਹਾਨਵਤ੍ਤਂ – ਉਦਕਤਿਤ੍ਥਂ ਗਨ੍ਤ੍ਵਾ ਯਤ੍ਥ ਵਾ ਤਤ੍ਥ ਵਾ ਚੀਵਰਂ ਨਿਕ੍ਖਿਪਿਤ੍ਵਾ ਵੇਗੇਨ ਠਿਤਕੇਨੇਵ ਨ ਓਤਰਿਤਬ੍ਬਂ, ਸਬ੍ਬਦਿਸਾ ਪਨ ਓਲੋਕੇਤ੍ਵਾ ਵਿਵਿਤ੍ਤਭਾਵਂ ਞਤ੍ਵਾ ਖਾਣੁਗੁਮ੍ਬਲਤਾਦੀਨਿ ਵਵਤ੍ਥਪੇਤ੍ਵਾ ਤਿਕ੍ਖਤ੍ਤੁਂ ਉਕ੍ਕਾਸਿਤ੍ਵਾ ਅਵਕੁਜ੍ਜ ਠਿਤੇਨ ਉਤ੍ਤਰਾਸਙ੍ਗਚੀਵਰਂ ਅਪਨੇਤ੍ਵਾ ਪਸਾਰੇਤਬ੍ਬਂ, ਕਾਯਬਨ੍ਧਨਂ ਮੋਚੇਤ੍ਵਾ ਚੀਵਰਪਿਟ੍ਠੇਯੇਵ ਠਪੇਤਬ੍ਬਂ. ਸਚੇ ਉਦਕਸਾਟਿਕਾ ਨਤ੍ਥਿ, ਉਦਕਨ੍ਤੇ ਉਕ੍ਕੁਟਿਕਂ ਨਿਸੀਦਿਤ੍ਵਾ ਨਿਵਾਸਨਂ ਮੋਚੇਤ੍ਵਾ ਸਚੇ ਨਿਨ੍ਨਟ੍ਠਾਨਂ ਅਤ੍ਥਿ, ਆਤਪੇ ਪਸਾਰੇਤਬ੍ਬਂ. ਨੋ ਚੇ ਅਤ੍ਥਿ, ਸਂਹਰਿਤ੍ਵਾ ਠਪੇਤਬ੍ਬਂ. ਓਤਰਨ੍ਤੇਨ ਸਣਿਕਂ ਨਾਭਿਪ੍ਪਮਾਣਮਤ੍ਤਂ ਓਤਰਿਤ੍ਵਾ ਵੀਚਿਂ ਅਨੁਟ੍ਠਪੇਨ੍ਤੇਨ ਸਦ੍ਦਂ ਅਕਰੋਨ੍ਤੇਨ ਨਿਵਤ੍ਤਿਤ੍ਵਾ ਆਗਤਦਿਸਾਭਿਮੁਖੇਨ ਨਿਮੁਜ੍ਜਿਤਬ੍ਬਂ, ਏਵਂ ਚੀਵਰਂ ਰਕ੍ਖਿਤਂ ਹੋਤਿ. ਉਮ੍ਮੁਜ੍ਜਨ੍ਤੇਨਪਿ ਸਦ੍ਦਂ ਅਕਰੋਨ੍ਤੇਨ ਸਣਿਕਂ ਉਮ੍ਮੁਜ੍ਜਿਤ੍ਵਾ ਨਹਾਨਪਰਿਯੋਸਾਨੇ ਉਦਕਨ੍ਤੇ ਉਕ੍ਕੁਟਿਕੇਨ ਨਿਸੀਦਿਤ੍ਵਾ ਨਿਵਾਸਨਂ ਪਰਿਕ੍ਖਿਪਿਤ੍ਵਾ ਉਟ੍ਠਾਯ ਸੁਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਚੀਵਰਂ ਪਾਰੁਪਿਤ੍ਵਾਵ ਠਾਤਬ੍ਬਂ.
੨੨. ‘‘ਨ, ਭਿਕ੍ਖਵੇ, ਵਲ੍ਲਿਕਾ ਧਾਰੇਤਬ੍ਬਾ… ਨ ਪਾਮਙ੍ਗੋ ਧਾਰੇਤਬ੍ਬੋ… ਨ ਕਣ੍ਠਸੁਤ੍ਤਕਂ ਧਾਰੇਤਬ੍ਬਂ… ਨ ਕਟਿਸੁਤ੍ਤਕਂ ਧਾਰੇਤਬ੍ਬਂ… ਨ ਓਵਟ੍ਟਿਕਂ ਧਾਰੇਤਬ੍ਬਂ… ਨ ਕਾਯੂਰਂ ਧਾਰੇਤਬ੍ਬਂ… ਨ ਹਤ੍ਥਾਭਰਣਂ ਧਾਰੇਤਬ੍ਬਂ… ਨ ਅਙ੍ਗੁਲਿਮੁਦ੍ਦਿਕਾ ਧਾਰੇਤਬ੍ਬਾ, ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੪੫) ਵਚਨਤੋ ਕਣ੍ਣਪਿਲ਼ਨ੍ਧਨਾਦਿ ਯਂ ਕਿਞ੍ਚਿ ਆਭਰਣਂ ਨ ਵਟ੍ਟਤਿ. ਤਤ੍ਥ (ਚੂਲ਼ਵ. ਅਟ੍ਠ. ੨੪੫) ਵਲ੍ਲਿਕਾਤਿ ਕਣ੍ਣਤੋ ਨਿਕ੍ਖਨ੍ਤਮੁਤ੍ਤੋਲਮ੍ਬਕਾਦੀਨਂ ਏਤਂ ਅਧਿਵਚਨਂ. ਨ ਕੇਵਲਞ੍ਚ ਵਲ੍ਲਿਕਾ ਏਵ, ਯਂ ਕਿਞ੍ਚਿ ਕਣ੍ਣਪਿਲ਼ਨ੍ਧਨਂ ਅਨ੍ਤਮਸੋ ਤਾਲਪਣ੍ਣਮ੍ਪਿ ਨ ਵਟ੍ਟਤਿ. ਪਾਮਙ੍ਗਨ੍ਤਿ ਯਂ ਕਿਞ੍ਚਿ ਪਲਮ੍ਬਕਸੁਤ੍ਤਂ. ਕਣ੍ਠਸੁਤ੍ਤਕਨ੍ਤਿ ਯਂ ਕਿਞ੍ਚਿ ਗੀਵੂਪਗਂ ਆਭਰਣਂ. ਕਟਿਸੁਤ੍ਤਕਨ੍ਤਿ ਯਂ ਕਿਞ੍ਚਿ ਕਟਿਪਿਲ਼ਨ੍ਧਨਂ, ਅਨ੍ਤਮਸੋ ਸੁਤ੍ਤਤਨ੍ਤੁਮਤ੍ਤਮ੍ਪਿ. ਓਵਟ੍ਟਿਕਨ੍ਤਿ ਵਲਯਂ. ਕਾਯੂਰਾਦੀਨਿ ਪਾਕਟਾਨੇਵ.
੨੩. ‘‘ਨ, ਭਿਕ੍ਖਵੇ, ਦੀਘਾ ਕੇਸਾ ਧਾਰੇਤਬ੍ਬਾ, ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇਮਾਸਿਕਂ ਵਾ ਦੁਵਙ੍ਗੁਲਂ ਵਾ’’ਤਿ (ਚੂਲ਼ਵ. ੨੪੬) ਵਚਨਤੋ ਸਚੇ ਕੇਸਾ ਅਨ੍ਤੋਦ੍ਵੇਮਾਸੇ ਦ੍ਵਙ੍ਗੁਲਂ ਪਾਪੁਣਨ੍ਤਿ, ਅਨ੍ਤੋਦ੍ਵੇਮਾਸੇਯੇਵ ਛਿਨ੍ਦਿਤਬ੍ਬਾ, ਦ੍ਵਙ੍ਗੁਲੇਹਿ ਅਤਿਕ੍ਕਾਮੇਤੁਂ ਨ ਵਟ੍ਟਤਿ. ਸਚੇਪਿ ਨ ਦੀਘਾ, ਦ੍ਵੇਮਾਸਤੋ ਏਕਦਿਵਸਮ੍ਪਿ ਅਤਿਕ੍ਕਾਮੇਤੁਂ ਨ ਲਭਤਿਯੇਵ. ਉਭਯਥਾਪਿ ਉਕ੍ਕਟ੍ਠਪਰਿਚ੍ਛੇਦੋਵ ਵੁਤ੍ਤੋ, ਤਤੋ ਓਰਂ ਪਨ ਨ ਵਟ੍ਟਨਭਾਵੋ ਨਾਮ ਨਤ੍ਥਿ.
‘‘ਨ, ਭਿਕ੍ਖਵੇ, ਕਤ੍ਤਰਿਕਾਯ ਕੇਸਾ ਛੇਦਾਪੇਤਬ੍ਬਾ, ਯੋ ਛੇਦਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਆਬਾਧਪਚ੍ਚਯਾ ਕਤ੍ਤਰਿਕਾਯ ਕੇਸੇ ਛੇਦਾਪੇਤੁ’’ਨ੍ਤਿ (ਚੂਲ਼ਵ. ੨੭੫) ਵਚਨਤੋ ਆਬਾਧਂ ਵਿਨਾ ਕਤ੍ਤਰਿਕਾਯ ਕੇਸੇ ਛੇਦਾਪੇਤੁਂ ਨ ਵਟ੍ਟਤਿ.
‘‘ਨ, ਭਿਕ੍ਖਵੇ, ਕੋਚ੍ਛੇਨ ਕੇਸਾ ਓਸਣ੍ਠੇਤਬ੍ਬਾ… ਨ ਫਣਕੇਨ ਕੇਸਾ ਓਸਣ੍ਠੇਤਬ੍ਬਾ… ਨ ਹਤ੍ਥਫਣਕੇਨ ਕੇਸਾ ਓਸਣ੍ਠੇਤਬ੍ਬਾ… ਨ ਸਿਤ੍ਥਤੇਲਕੇਨ ਕੇਸਾ ਓਸਣ੍ਠੇਤਬ੍ਬਾ… ਨ ਉਦਕਤੇਲਕੇਨ ਕੇਸਾ ਓਸਣ੍ਠੇਤਬ੍ਬਾ, ਯੋ ਓਸਣ੍ਠੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੪੬) ਵਚਨਤੋ ਮਣ੍ਡਨਤ੍ਥਾਯ ਕੋਚ੍ਛਾਦੀਹਿ ਕੇਸਾ ਨ ਓਸਣ੍ਠੇਤਬ੍ਬਾ, ਉਦ੍ਧਲੋਮੇਨ ਪਨ ਅਨੁਲੋਮਨਿਪਾਤਨਤ੍ਥਂ ਹਤ੍ਥਂ ਤੇਮੇਤ੍ਵਾ ਸੀਸਂ ਪੁਞ੍ਛਿਤਬ੍ਬਂ, ਉਣ੍ਹਾਭਿਤਤ੍ਤਰਜਸਿਰਾਨਮ੍ਪਿ ਅਲ੍ਲਹਤ੍ਥੇਨ ਪੁਞ੍ਛਿਤੁਂ ਵਟ੍ਟਤਿ.
੨੪. ‘‘ਨ, ਭਿਕ੍ਖਵੇ, ਆਦਾਸੇ ਵਾ ਉਦਕਪਤ੍ਤੇ ਵਾ ਮੁਖਨਿਮਿਤ੍ਤਂ ਓਲੋਕੇਤਬ੍ਬਂ, ਯੋ ਓਲੋਕੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਆਬਾਧਪਚ੍ਚਯਾ ਆਦਾਸੇ ਵਾ ਉਦਕਪਤ੍ਤੇ ਵਾ ਮੁਖਨਿਮਿਤ੍ਤਂ ਓਲੋਕੇਤੁ’’ਨ੍ਤਿ (ਚੂਲ਼ਵ. ੨੪੭) ਵਚਨਤੋ ਆਬਾਧਂ ਵਿਨਾ ਆਦਾਸੇ ਵਾ ਉਦਕਪਤ੍ਤੇ ਵਾ ਮੁਖਂ ਨ ਓਲੋਕੇਤਬ੍ਬਂ. ਏਤ੍ਥ ਚ ਕਂਸਪਤ੍ਤਾਦੀਨਿਪਿ ਯੇਸੁ ਮੁਖਨਿਮਿਤ੍ਤਂ ਪਞ੍ਞਾਯਤਿ, ਸਬ੍ਬਾਨਿ ਆਦਾਸਸਙ੍ਖਮੇਵ ਗਚ੍ਛਨ੍ਤਿ, ਕਞ੍ਜਿਯਾਦੀਨਿਪਿ ਚ ਉਦਕਪਤ੍ਤਸਙ੍ਖਮੇਵ. ਤਸ੍ਮਾ ਯਤ੍ਥ ਕਤ੍ਥਚਿ ਓਲੋਕੇਨ੍ਤਸ੍ਸ ਦੁਕ੍ਕਟਂ. ਆਬਾਧਪਚ੍ਚਯਾ ਪਨ ‘‘ਸਞ੍ਛਵਿ ਨੁ ਖੋ ਮੇ ਵਣੋ, ਉਦਾਹੁ ਨ ਤਾਵਾ’’ਤਿ ਜਾਨਨਤ੍ਥਂ ਵਟ੍ਟਤਿ, ‘‘ਜਿਣ੍ਣੋ ਨੁ ਖੋਮ੍ਹਿ, ਨੋ’’ਤਿ ਏਵਂ ਆਯੁਸਙ੍ਖਾਰਂ ਓਲੋਕਨਤ੍ਥਮ੍ਪਿ ਵਟ੍ਟਤੀਤਿ ਵੁਤ੍ਤਂ.
‘‘ਨ, ਭਿਕ੍ਖਵੇ, ਮੁਖਂ ਆਲਿਮ੍ਪਿਤਬ੍ਬਂ… ਨ ਮੁਖਂ ਉਮ੍ਮਦ੍ਦਿਤਬ੍ਬਂ… ਨ ਮੁਖਂ ਚੁਣ੍ਣੇਤਬ੍ਬਂ… ਨ ਮਨੋਸਿਲਿਕਾਯ ਮੁਖਂ ਲਞ੍ਛੇਤਬ੍ਬਂ… ਨ ਅਙ੍ਗਰਾਗੋ ਕਾਤਬ੍ਬੋ… ਨ ਮੁਖਰਾਗੋ ਕਾਤਬ੍ਬੋ… ਨ ਅਙ੍ਗਰਾਗਮੁਖਰਾਗੋ ਕਾਤਬ੍ਬੋ, ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਆਬਾਧਪਚ੍ਚਯਾ ਮੁਖਂ ਆਲਿਮ੍ਪਿਤੁ’’ਨ੍ਤਿ (ਚੂਲ਼ਵ. ੨੪੭) ਵਚਨਤੋ ਆਬਾਧਂ ਵਿਨਾ ਮੁਖਵਿਲਿਮ੍ਪਨਾਦਿ ਨ ਕਾਤਬ੍ਬਂ.
੨੫. ‘‘ਨ, ਭਿਕ੍ਖਵੇ, ਨਚ੍ਚਂ ਵਾ ਗੀਤਂ ਵਾ ਵਾਦਿਤਂ ਵਾ ਦਸ੍ਸਨਾਯ ਗਨ੍ਤਬ੍ਬਂ, ਯੋ ਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੪੮) ਵਚਨਤੋ ਨਚ੍ਚਾਦਿਂ ਦਸ੍ਸਨਾਯ ਨ ਗਨ੍ਤਬ੍ਬਂ. ਏਤ੍ਥ (ਪਾਚਿ. ਅਟ੍ਠ. ੮੩੫) ਚ ਨਚ੍ਚਨ੍ਤਿ ਨਟਾਦਯੋ ਵਾ ਨਚ੍ਚਨ੍ਤੁ ਸੋਣ੍ਡਾ ਵਾ ਅਨ੍ਤਮਸੋ ਮੋਰਸੂਵਮਕ੍ਕਟਾਦਯੋਪਿ, ਸਬ੍ਬਮੇਤਂ ਨਚ੍ਚਮੇਵ, ਤਸ੍ਮਾ ਅਨ੍ਤਮਸੋ ਮੋਰਨਚ੍ਚਮ੍ਪਿ ਦਸ੍ਸਨਾਯ ਗਚ੍ਛਨ੍ਤਸ੍ਸ ਦੁਕ੍ਕਟਂ. ਸਯਮ੍ਪਿ ਨਚ੍ਚਨ੍ਤਸ੍ਸ ਵਾ ਨਚ੍ਚਾਪੇਨ੍ਤਸ੍ਸ ਵਾ ਦੁਕ੍ਕਟਮੇਵ. ਗੀਤਨ੍ਤਿ ਨਟਾਦੀਨਂ ਵਾ ਗੀਤਂ ਹੋਤੁ ਅਰਿਯਾਨਂ ਪਰਿਨਿਬ੍ਬਾਨਕਾਲੇ ਰਤਨਤ੍ਤਯਗੁਣੂਪਸਞ੍ਹਿਤਂ ਸਾਧੁਕੀਲ਼ਿਤਗੀਤਂ ਵਾ ਅਸਞ੍ਞਤਭਿਕ੍ਖੂਨਂ ਧਮ੍ਮਭਾਣਕਗੀਤਂ ਵਾ ਅਨ੍ਤਮਸੋ ਦਨ੍ਤਗੀਤਮ੍ਪਿ, ‘‘ਯਂ ਗਾਯਿਸ੍ਸਾਮਾ’’ਤਿ ਪੁਬ੍ਬਭਾਗੇ ਓਕੂਜਨ੍ਤਾ ਕਰੋਨ੍ਤਿ, ਸਬ੍ਬਮੇਤਂ ਗੀਤਮੇਵ, ਸਯਂ ਗਾਯਨ੍ਤਸ੍ਸਪਿ ਗਾਯਾਪੇਨ੍ਤਸ੍ਸਪਿ ਦੁਕ੍ਕਟਮੇਵ.
‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਆਯਤਕੇਨ ਗੀਤਸ੍ਸਰੇਨ ਧਮ੍ਮਂ ਗਾਯਨ੍ਤਸ੍ਸ. ਅਤ੍ਤਨਾਪਿ ਤਸ੍ਮਿਂ ਸਰੇ ਸਾਰਜ੍ਜਤਿ, ਪਰੇਪਿ ਤਸ੍ਮਿਂ ਸਰੇ ਸਾਰਜ੍ਜਨ੍ਤਿ, ਗਹਪਤਿਕਾਪਿ ਉਜ੍ਝਾਯਨ੍ਤਿ, ਸਰਕੁਤ੍ਤਿਮ੍ਪਿ ਨਿਕਾਮਯਮਾਨਸ੍ਸ ਸਮਾਧਿਸ੍ਸ ਭਙ੍ਗੋ ਹੋਤਿ, ਪਚ੍ਛਿਮਾ ਜਨਤਾ ਦਿਟ੍ਠਾਨੁਗਤਿਂ ਆਪਜ੍ਜਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਆਯਤਕੇਨ ਗੀਤਸ੍ਸਰੇਨ ਧਮ੍ਮਂ ਗਾਯਨ੍ਤਸ੍ਸ. ਨ, ਭਿਕ੍ਖਵੇ, ਆਯਤਕੇਨ ਗੀਤਸ੍ਸਰੇਨ ਧਮ੍ਮੋ ਗਾਯਿਤਬ੍ਬੋ, ਯੋ ਗਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੪੯) –
ਵਚਨਤੋ ਆਯਤਕੇਨ ਗੀਤਸ੍ਸਰੇਨ ਧਮ੍ਮੋਪਿ ਨ ਗਾਯਿਤਬ੍ਬੋ.
ਆਯਤਕੋ (ਚੂਲ਼ਵ. ਅਟ੍ਠ. ੨੪੯) ਨਾਮ ਗੀਤਸ੍ਸਰੋ ਤਂ ਤਂ ਵਤ੍ਤਂ ਭਿਨ੍ਦਿਤ੍ਵਾ ਅਕ੍ਖਰਾਨਿ ਵਿਨਾਸੇਤ੍ਵਾ ਪਵਤ੍ਤੋ. ਧਮ੍ਮੇ ਪਨ ਸੁਤ੍ਤਨ੍ਤਵਤ੍ਤਂ ਨਾਮ ਅਤ੍ਥਿ, ਜਾਤਕਵਤ੍ਤਂ ਨਾਮ ਅਤ੍ਥਿ, ਗਾਥਾਵਤ੍ਤਂ ਨਾਮ ਅਤ੍ਥਿ, ਤਂ ਵਿਨਾਸੇਤ੍ਵਾ ਅਤਿਦੀਘਂ ਕਾਤੁਂ ਨ ਵਟ੍ਟਤਿ, ਚਤੁਰਸ੍ਸੇਨ ਵਤ੍ਤੇਨ ਪਰਿਮਣ੍ਡਲਾਨਿ ਪਦਬ੍ਯਞ੍ਜਨਾਨਿ ਦਸ੍ਸੇਤਬ੍ਬਾਨਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਰਭਞ੍ਞ’’ਨ੍ਤਿ (ਚੂਲ਼ਵ. ੨੪੯) ਵਚਨਤੋ ਪਨ ਸਰੇਨ ਧਮ੍ਮਂ ਭਣਿਤੁਂ ਵਟ੍ਟਤਿ. ਸਰਭਞ੍ਞੇ ਕਿਰ ਤਰਙ੍ਗਵਤ੍ਤਧੋਤਕਵਤ੍ਤਗਲਿਤਵਤ੍ਤਾਦੀਨਿ ਦ੍ਵਤ੍ਤਿਂਸ ਵਤ੍ਤਾਨਿ ਅਤ੍ਥਿ, ਤੇਸੁ ਯਂ ਇਚ੍ਛਤਿ, ਤਂ ਕਾਤੁਂ ਲਭਤਿ. ਸਬ੍ਬੇਸਂ ਪਦਬ੍ਯਞ੍ਜਨਂ ਅਵਿਨਾਸੇਤ੍ਵਾ ਵਿਕਾਰਂ ਅਕਤ੍ਵਾ ਸਮਣਸਾਰੁਪ੍ਪੇਨ ਚਤੁਰਸ੍ਸੇਨ ਨਯੇਨ ਪਵਤ੍ਤਨਂਯੇਵ ਲਕ੍ਖਣਂ.
ਵਾਦਿਤਂ ਨਾਮ ਤਨ੍ਤਿਬਦ੍ਧਾਦਿਵਾਦਨੀਯਭਣ੍ਡਂ ਵਾਦਿਤਂ ਵਾ ਹੋਤੁ ਕੁਟਭੇਰਿਵਾਦਿਤਂ ਵਾ ਅਨ੍ਤਮਸੋ ਉਦਕਭੇਰਿਵਾਦਿਤਮ੍ਪਿ, ਸਬ੍ਬਮੇਤਂ ਨ ਵਟ੍ਟਤਿ. ਯਂ ਪਨ ਨਿਟ੍ਠੁਭਨ੍ਤੋ ਵਾ ਸਾਸਙ੍ਕੇ ਵਾ ਠਿਤੋ ਅਚ੍ਛਰਿਕਂ ਵਾ ਫੋਟੇਤਿ, ਪਾਣਿਂ ਵਾ ਪਹਰਤਿ, ਤਤ੍ਥ ਅਨਾਪਤ੍ਤਿ, ਸਬ੍ਬਂ ਅਨ੍ਤਰਾਰਾਮੇ ਠਿਤਸ੍ਸ ਪਸ੍ਸਤੋ ਅਨਾਪਤ੍ਤਿ, ਪਸ੍ਸਿਸ੍ਸਾਮੀਤਿ ਵਿਹਾਰਤੋ ਵਿਹਾਰਂ ਗਚ੍ਛਨ੍ਤਸ੍ਸ ਆਪਤ੍ਤਿਯੇਵ. ਆਸਨਸਾਲਾਯਂ ਨਿਸਿਨ੍ਨੋ ਪਸ੍ਸਤਿ, ਅਨਾਪਤ੍ਤਿ. ਪਸ੍ਸਿਸ੍ਸਾਮੀਤਿ ਉਟ੍ਠਹਿਤ੍ਵਾ ਗਚ੍ਛਤੋ ਆਪਤ੍ਤਿ, ਵੀਥਿਯਂ ਠਤ੍ਵਾ ਗੀਵਂ ਪਰਿਵਤ੍ਤੇਤ੍ਵਾ ਪਸ੍ਸਤੋਪਿ ਆਪਤ੍ਤਿਯੇਵ. ਸਲਾਕਭਤ੍ਤਾਦੀਨਂ ਵਾ ਅਤ੍ਥਾਯ ਅਞ੍ਞੇਨ ਵਾ ਕੇਨਚਿ ਕਰਣੀਯੇਨ ਗਨ੍ਤ੍ਵਾ ਗਤਟ੍ਠਾਨੇ ਪਸ੍ਸਤਿ ਵਾ ਸੁਣਾਤਿ ਵਾ, ਅਨਾਪਤ੍ਤਿ. ਆਪਦਾਸੁ ਤਾਦਿਸੇਨ ਉਪਦ੍ਦਵੇਨ ਉਪਦ੍ਦੁਤੋ ਸਮਜ੍ਜਟ੍ਠਾਨਂ ਪਵਿਸਤਿ, ਏਵਂ ਪਵਿਸਿਤ੍ਵਾ ਪਸ੍ਸਨ੍ਤਸ੍ਸ ਸੁਣਨ੍ਤਸ੍ਸ ਵਾ ਅਨਾਪਤ੍ਤਿ. ‘‘ਚੇਤਿਯਸ੍ਸ ਉਪਹਾਰਂ ਦੇਥ ਉਪਾਸਕਾ’’ਤਿ ਵਤ੍ਤੁਮ੍ਪਿ, ‘‘ਤੁਮ੍ਹਾਕਂ ਚੇਤਿਯਸ੍ਸ ਉਪਹਾਰਂ ਕਰੋਮਾ’’ਤਿ ਵੁਤ੍ਤੇ ਸਮ੍ਪਟਿਚ੍ਛਿਤੁਮ੍ਪਿ ਨ ਲਭਤਿ. ‘‘ਤੁਮ੍ਹਾਕਂ ਚੇਤਿਯਸ੍ਸ ਉਪਟ੍ਠਾਨਂ ਕਰੋਮਾ’’ਤਿ ਵੁਤ੍ਤੇ ਪਨ ‘‘ਉਪਟ੍ਠਾਨਕਰਣਂ ਨਾਮ ਸੁਨ੍ਦਰ’’ਨ੍ਤਿ ਵਤ੍ਤੁਂ ਵਟ੍ਟਤਿ.
੨੬. ‘‘ਨ, ਭਿਕ੍ਖਵੇ, ਅਤ੍ਤਨੋ ਅਙ੍ਗਜਾਤਂ ਛੇਤਬ੍ਬਂ, ਯੋ ਛਿਨ੍ਦੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ (ਚੂਲ਼ਵ. ੨੫੧) ਵਚਨਤੋ ਅਙ੍ਗਜਾਤਂ (ਚੂਲ਼ਵ. ੨੫੧) ਛਿਨ੍ਦਨ੍ਤਸ੍ਸ ਥੁਲ੍ਲਚ੍ਚਯਂ, ਅਞ੍ਞਂ ਪਨ ਕਣ੍ਣਨਾਸਾਅਙ੍ਗੁਲਿਆਦਿਂ ਯਂ ਕਿਞ੍ਚਿ ਛਿਨ੍ਦਨ੍ਤਸ੍ਸ ਤਾਦਿਸਂ ਵਾ ਦੁਕ੍ਖਂ ਉਪ੍ਪਾਦੇਨ੍ਤਸ੍ਸ ਦੁਕ੍ਕਟਂ. ਅਹਿਕੀਟਦਟ੍ਠਾਦੀਸੁ ਪਨ ਅਞ੍ਞਾਬਾਧਪਚ੍ਚਯਾ ਵਾ ਲੋਹਿਤਂ ਵਾ ਮੋਚੇਨ੍ਤਸ੍ਸ ਛਿਨ੍ਦਨ੍ਤਸ੍ਸ ਵਾ ਅਨਾਪਤ੍ਤਿ.
੨੭. ‘‘ਨ, ਭਿਕ੍ਖਵੇ, ਗਿਹੀਨਂ ਉਤ੍ਤਰਿਮਨੁਸ੍ਸਧਮ੍ਮਂ ਇਦ੍ਧਿਪਾਟਿਹਾਰਿਯਂ ਦਸ੍ਸੇਤਬ੍ਬਂ, ਯੋ ਦਸ੍ਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੫੨) ਵਚਨਤੋ ਗਿਹੀਨਂ ਵਿਕੁਬ੍ਬਨਿਦ੍ਧਿਂ ਦਸ੍ਸੇਤੁਂ ਨ ਵਟ੍ਟਤਿ, ਅਧਿਟ੍ਠਾਨਿਦ੍ਧਿ ਪਨ ਅਪ੍ਪਟਿਕ੍ਖਿਤ੍ਤਾ.
੨੮. ‘‘ਨ, ਭਿਕ੍ਖਵੇ, ਸੋਵਣ੍ਣਮਯੋ ਪਤ੍ਤੋ ਧਾਰੇਤਬ੍ਬੋ…ਪੇ… ਨ ਰੂਪਿਯਮਯੋ…ਪੇ… ਨ ਮਣਿਮਯੋ…ਪੇ… ਨ ਵੇਲ਼ੁਰਿਯਮਯੋ…ਪੇ… ਨ ਫਲਿਕਮਯੋ…ਪੇ… ਨ ਕਂਸਮਯੋ…ਪੇ… ਨ ਕਾਚਮਯੋ…ਪੇ… ਨ ਤਿਪੁਮਯੋ …ਪੇ… ਨ ਸੀਸਮਯੋ…ਪੇ… ਨ ਤਮ੍ਬਲੋਹਮਯੋ ਪਤ੍ਤੋ ਧਾਰੇਤਬ੍ਬੋ, ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੫੨) ਵਚਨਤੋ ਸੁਵਣ੍ਣਮਯਾਦਿਪਤ੍ਤੋ ਨ ਵਟ੍ਟਤਿ. ਸਚੇਪਿ ਗਿਹੀ ਭਤ੍ਤਗ੍ਗੇ ਸੁਵਣ੍ਣਤਟ੍ਟਿਕਾਦੀਸੁ ਬ੍ਯਞ੍ਜਨਂ ਕਤ੍ਵਾ ਉਪਨਾਮੇਨ੍ਤਿ, ਆਮਸਿਤੁਮ੍ਪਿ ਨ ਵਟ੍ਟਤਿ. ਫਲਿਕਮਯਕਾਚਮਯਕਂਸਮਯਾਨਿ ਪਨ ਤਟ੍ਟਿਕਾਦੀਨਿ ਭਾਜਨਾਨਿ ਪੁਗ੍ਗਲਿਕਪਰਿਭੋਗੇਨੇਵ ਨ ਵਟ੍ਟਨ੍ਤਿ, ਸਙ੍ਘਿਕਪਰਿਭੋਗੇਨ ਵਾ ਗਿਹਿਵਿਕਟਾਨਿ ਵਾ ਵਟ੍ਟਨ੍ਤਿ. ਤਮ੍ਬਲੋਹਮਯੋਪਿ ਪਤ੍ਤੋਯੇਵ ਨ ਵਟ੍ਟਤਿ, ਥਾਲਕਂ ਪਨ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਦ੍ਵੇ ਪਤ੍ਤੇ ਅਯੋਪਤ੍ਤਂ ਮਤ੍ਤਿਕਾਪਤ੍ਤ’’ਨ੍ਤਿ (ਚੂਲ਼ਵ. ੨੫੨) ਦ੍ਵੇਯੇਵ ਚ ਪਤ੍ਤਾ ਅਨੁਞ੍ਞਾਤਾ.
‘‘ਨ, ਭਿਕ੍ਖਵੇ, ਤੁਮ੍ਬਕਟਾਹੇ ਪਿਣ੍ਡਾਯ ਚਰਿਤਬ੍ਬਂ, ਯੋ ਚਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੫੫) ਵਚਨਤੋ ਲਾਬੁਕਟਾਹਂ ਪਰਿਹਰਿਤੁਂ ਨ ਵਟ੍ਟਤਿ, ਤਂ ਲਭਿਤ੍ਵਾ ਪਨ ਤਾਵਕਾਲਿਕਂ ਪਰਿਭੁਞ੍ਜਿਤੁਂ ਵਟ੍ਟਤਿ. ਘਟਿਕਟਾਹੇਪਿ ਏਸੇਵ ਨਯੋ.
‘‘ਨ, ਭਿਕ੍ਖਵੇ, ਛਵਸੀਸਪਤ੍ਤੋ ਧਾਰੇਤਬ੍ਬੋ, ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੫੫) ਵਚਨਤੋ ਛਵਸੀਸਮਯੋਪਿ ਪਤ੍ਤੋ ਨ ਵਟ੍ਟਤਿ.
‘‘ਅਨੁਜਾਨਾਮਿ, ਭਿਕ੍ਖਵੇ, ਪਤ੍ਤਾਧਾਰਕ’’ਨ੍ਤਿ (ਚੂਲ਼ਵ. ੨੫੪) ਵਚਨਤੋ ਭੂਮਿਦਾਰੁਦਣ੍ਡਵਅਲਵੇਤ੍ਤਾਦੀਹਿ ਕਤੇ ਭੂਮਿਆਧਾਰਕੇ ਦਾਰੁਦਣ੍ਡਆਧਾਰਕੇ ਚ ਪਤ੍ਤਂ ਠਪੇਤੁਂ ਵਟ੍ਟਤਿ. ਏਤ੍ਥ ਚ ‘‘ਭੂਮਿਆਧਾਰਕੇ ਤਯੋ ਦਣ੍ਡਾਧਾਰਕੇ ਦ੍ਵੇ ਪਤ੍ਤੇ ਉਪਰੂਪਰਿ ਠਪੇਤੁਂ ਵਟ੍ਟਤੀ’’ਤਿ ਕੁਰੁਨ੍ਦਿਯਂ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ਵੁਤ੍ਤਂ ‘‘ਭੂਮਿਆਧਾਰਕੇ ਤਿਣ੍ਣਂ ਪਤ੍ਤਾਨਂ ਅਨੋਕਾਸੋ, ਦ੍ਵੇ ਠਪੇਤੁਂ ਵਟ੍ਟਤਿ. ਦਾਰੁਆਧਾਰਕਦਣ੍ਡਾਧਾਰਕੇਸੁਪਿ ਸੁਸਜ੍ਜਿਤੇਸੁ ਏਸੇਵ ਨਯੋ. ਭਮਕੋਟਿਸਦਿਸੋ ਪਨ ਦਾਰੁਆਧਾਰਕੋ ਤੀਹਿ ਦਣ੍ਡਕੇਹਿ ਬਦ੍ਧੋ, ਦਣ੍ਡਾਧਾਰਕੋ ਚ ਏਕਸ੍ਸਪਿ ਪਤ੍ਤਸ੍ਸ ਅਨੋਕਾਸੋ, ਤਤ੍ਥ ਠਪੇਤ੍ਵਾਪਿ ਹਤ੍ਥੇਨ ਗਹੇਤ੍ਵਾਵ ਨਿਸੀਦਿਤਬ੍ਬਂ, ਭੂਮਿਯਂ ਪਨ ਨਿਕ੍ਕੁਜ੍ਜਿਤ੍ਵਾ ਏਕਮੇਵ ਠਪੇਤਬ੍ਬ’’ਨ੍ਤਿ.
‘‘ਨ, ਭਿਕ੍ਖਵੇ, ਮਿਡ੍ਢਨ੍ਤੇ ਪਤ੍ਤੋ ਨਿਕ੍ਖਿਪਿਤਬ੍ਬੋ, ਯੋ ਨਿਕ੍ਖਿਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੫੪) ਵਚਨਤੋ ਆਲਿਨ੍ਦਕਮਿਡ੍ਢਿਕਾਦੀਨਂ ਅਨ੍ਤੇ ਠਪੇਤੁਂ ਨ ਵਟ੍ਟਤਿ. ਸਚੇ ਪਨ ਪਰਿਵਤ੍ਤੇਤ੍ਵਾ ਤਤ੍ਥੇਵ ਪਤਿਟ੍ਠਾਤਿ, ਏਵਰੂਪਾਯ ਵਿਤ੍ਥਿਣ੍ਣਾਯ ਮਿਡ੍ਢਿਕਾਯ ਠਪੇਤੁਂ ਵਟ੍ਟਤਿ.
‘‘ਨ, ਭਿਕ੍ਖਵੇ, ਪਰਿਭਣ੍ਡਨ੍ਤੇ ਪਤ੍ਤੋ ਨਿਕ੍ਖਿਪਿਤਬ੍ਬੋ, ਯੋ ਨਿਕ੍ਖਿਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੫੪) ਵਚਨਤੋ ਬਾਹਿਰਪਸ੍ਸੇ ਕਤਾਯ ਤਨੁਕਮਿਡ੍ਢਿਕਾਯ ਅਨ੍ਤੇਪਿ ਏਸੇਵ ਨਯੋ. ‘‘ਅਨੁਜਾਨਾਮਿ, ਭਿਕ੍ਖਵੇ, ਚੋਲ਼ਕ’’ਨ੍ਤਿ (ਚੂਲ਼ਵ. ੨੫੪) ਵਚਨਤੋ ਚੋਲ਼ਕਂ ਪਤ੍ਥਰਿਤ੍ਵਾ ਤਤ੍ਥ ਠਪੇਤੁਂ ਵਟ੍ਟਤਿ. ਤਸ੍ਮਿਂ ਪਨ ਅਸਤਿ ਕਟਸਾਰਕੇ ਵਾ ਤਟ੍ਟਿਕਾਯ ਵਾ ਮਤ੍ਤਿਕਾਯ ਵਾ ਪਰਿਭਣ੍ਡਕਤਾਯ ਭੂਮਿਯਾ ਯਤ੍ਥ ਨ ਦੁਸ੍ਸਤਿ, ਤਥਾਰੂਪਾਯ ਵਾਲਿਕਾਯ ਵਾ ਠਪੇਤੁਂ ਵਟ੍ਟਤਿ. ਪਂਸੁਰਜਾਦੀਸੁ ਪਨ ਖਰਭੂਮਿਯਂ ਵਾ ਠਪੇਨ੍ਤਸ੍ਸ ਦੁਕ੍ਕਟਂ.
‘‘ਨ, ਭਿਕ੍ਖਵੇ, ਪਤ੍ਤੋ ਲਗ੍ਗੇਤਬ੍ਬੋ, ਯੋ ਲਗ੍ਗੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੫੪) ਵਚਨਤੋ ਨਾਗਦਨ੍ਤਾਦੀਸੁ ਯਤ੍ਥ ਕਤ੍ਥਚਿ ਲਗ੍ਗੇਤੁਂ ਨ ਵਟ੍ਟਤਿ, ਚੀਵਰਵਂਸੇਪਿ ਬਨ੍ਧਿਤ੍ਵਾ ਠਪੇਤੁਂ ਨ ਵਟ੍ਟਤਿ.
‘‘ਨ, ਭਿਕ੍ਖਵੇ, ਮਞ੍ਚੇ ਪਤ੍ਤੋ ਨਿਕ੍ਖਿਪਿਤਬ੍ਬੋ, ਯੋ ਨਿਕ੍ਖਿਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੫੪) ਵਚਨਤੋ ਭਣ੍ਡਕਟ੍ਠਪਨਤ੍ਥਮੇਵ ਵਾ ਕਤਂ ਹੋਤੁ ਨਿਸੀਦਨਸਯਨਤ੍ਥਂ ਵਾ, ਯਤ੍ਥ ਕਤ੍ਥਚਿ ਮਞ੍ਚੇ ਵਾ ਪੀਠੇ ਵਾ ਠਪੇਨ੍ਤਸ੍ਸ ਦੁਕ੍ਕਟਂ, ਅਞ੍ਞੇਨ ਪਨ ਭਣ੍ਡਕੇਨ ਸਦ੍ਧਿਂ ਬਨ੍ਧਿਤ੍ਵਾ ਠਪੇਤੁਂ, ਅਟਨਿਯਂ ਬਨ੍ਧਿਤ੍ਵਾ ਓਲਮ੍ਬਿਤੁਂ ਵਾ ਵਟ੍ਟਤਿ, ਬਨ੍ਧਿਤ੍ਵਾਪਿ ਉਪਰਿ ਠਪੇਤੁਂ ਨ ਵਟ੍ਟਤਿਯੇਵ. ਸਚੇ ਪਨ ਮਞ੍ਚੋ ਵਾ ਪੀਠਂ ਵਾ ਉਕ੍ਖਿਪਿਤ੍ਵਾ ਚੀਵਰਵਂਸਾਦੀਸੁ ਅਟ੍ਟਕਚ੍ਛਨ੍ਨੇਨ ਠਪਿਤਂ ਹੋਤਿ, ਤਤ੍ਥ ਠਪੇਤੁਂ ਵਟ੍ਟਤਿ. ਅਂਸਵਟ੍ਟਨਕੇਨ ਅਂਸਕੂਟੇ ਲਗ੍ਗੇਤ੍ਵਾ ਅਙ੍ਕੇ ਠਪੇਤੁਂ ਵਟ੍ਟਤਿ, ਛਤ੍ਤੇ ਭਤ੍ਤਪੂਰੋਪਿ ਅਂਸਕੂਟੇ ਲਗ੍ਗਿਤਪਤ੍ਤੋਪਿ ਠਪੇਤੁਂ ਨ ਵਟ੍ਟਤਿ. ਭਣ੍ਡਕੇਨ ਪਨ ਸਦ੍ਧਿਂ ਬਨ੍ਧਿਤ੍ਵਾ ਅਟ੍ਟਕਂ ਕਤ੍ਵਾ ਵਾ ਠਪਿਤੇ ਯੋ ਕੋਚਿ ਠਪੇਤੁਂ ਵਟ੍ਟਤਿ.
‘‘ਨ, ਭਿਕ੍ਖਵੇ, ਪਤ੍ਤਹਤ੍ਥੇਨ ਕਵਾਟਂ ਪਣਾਮੇਤਬ੍ਬਂ, ਯੋ ਪਣਾਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੫੫) ਵਚਨਤੋ ਪਤ੍ਤਹਤ੍ਥੇਨ ਕਵਾਟਂ ਨ ਪਣਾਮੇਤਬ੍ਬਂ. ਏਤ੍ਥ ਚ ਨ ਕੇਵਲਂ ਯਸ੍ਸ ਪਤ੍ਤੋ ਹਤ੍ਥੇ, ਸੋ ਏਵ ਪਤ੍ਤਹਤ੍ਥੋ. ਨ ਕੇਵਲਞ੍ਚ ਕਵਾਟਮੇਵ ਪਣਾਮੇਤੁਂ ਨ ਲਭਤਿ, ਅਪਿਚ ਖੋ ਪਨ ਹਤ੍ਥੇ ਵਾ ਪਿਟ੍ਠਿਪਾਦੇ ਵਾ ਯਤ੍ਥ ਯਤ੍ਥਚਿ ਸਰੀਰਾਵਯਵੇ ਪਤ੍ਤਸ੍ਮਿਂ ਸਤਿ ਹਤ੍ਥੇਨ ਵਾ ਪਾਦੇਨ ਵਾ ਸੀਸੇਨ ਵਾ ਯੇਨ ਕੇਨਚਿ ਸਰੀਰਾਵਯਵੇਨ ਕਵਾਟਂ ਵਾ ਪਣਾਮੇਤੁਂ ਘਟਿਕਂ ਵਾ ਉਕ੍ਖਿਪਿਤੁਂ ਸੂਚਿਂ ਵਾ ਕੁਞ੍ਚਿਕਾਯ ਅਵਾਪੁਰਿਤੁਂ ਨ ਲਭਤਿ, ਅਂਸਕੂਟੇ ਪਨ ਪਤ੍ਤਂ ਲਗ੍ਗੇਤ੍ਵਾ ਯਥਾਸੁਖਂ ਅਵਾਪੁਰਿਤੁਂ ਲਭਤਿ.
‘‘ਨ, ਭਿਕ੍ਖਵੇ, ਚਲਕਾਨਿ ਵਾ ਅਟ੍ਠਿਕਾਨਿ ਵਾ ਉਚ੍ਛਿਟ੍ਠੋਦਕਂ ਵਾ ਪਤ੍ਤੇਨ ਨੀਹਰਿਤਬ੍ਬਂ, ਯੋ ਨੀਹਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੫੫) ਵਚਨਤੋ ਚਲਕਾਦੀਨਿ ਪਤ੍ਤੇਨ ਨੀਹਰਿਤੁਂ ਨ ਵਟ੍ਟਤਿ. ਏਤ੍ਥ ਚ ਚਲਕਾਨੀਤਿ ਚਬ੍ਬੇਤ੍ਵਾ ਅਪਵਿਦ੍ਧਾਮਿਸਾਨਿ. ਅਟ੍ਠਿਕਾਨੀਤਿ ਮਚ੍ਛਮਂਸਅਅਕਾਨਿ. ਉਚ੍ਛਿਟ੍ਠੋਦਕਨ੍ਤਿ ਮੁਖਵਿਕ੍ਖਾਲਿਤੋਦਕਂ. ਏਤੇਸੁ ਯਂ ਕਿਞ੍ਚਿ ਪਤ੍ਤੇਨ ਨੀਹਰਨ੍ਤਸ੍ਸ ਦੁਕ੍ਕਟਂ. ਪਤ੍ਤਂ ਪਟਿਗ੍ਗਹਂ ਕਤ੍ਵਾ ਹਤ੍ਥਂ ਧੋਵਿਤੁਮ੍ਪਿ ਨ ਲਭਤਿ. ਹਤ੍ਥਧੋਤਪਾਦਧੋਤਉਦਕਮ੍ਪਿ ਪਤ੍ਤੇ ਆਕਿਰਿਤ੍ਵਾ ਨੀਹਰਿਤੁਂ ਨ ਵਟ੍ਟਤਿ, ਅਨੁਚ੍ਛਿਟ੍ਠਂ ਸੁਦ੍ਧਪਤ੍ਤਂ ਉਚ੍ਛਿਟ੍ਠਹਤ੍ਥੇਨ ਗਣ੍ਹਿਤੁਂ ਨ ਵਟ੍ਟਤਿ, ਵਾਮਹਤ੍ਥੇਨ ਪਨੇਤ੍ਥ ਉਦਕਂ ਆਸਿਞ੍ਚਿਤ੍ਵਾ ਏਕਂ ਉਦਕਗਣ੍ਡੁਸਂ ਗਹੇਤ੍ਵਾ ਉਚ੍ਛਿਟ੍ਠਹਤ੍ਥੇਨ ਗਣ੍ਹਿਤੁਂ ਵਟ੍ਟਤਿ. ਏਤ੍ਤਾਵਤਾਪਿ ਹਿ ਸੋ ਉਚ੍ਛਿਟ੍ਠਪਤ੍ਤੋ ਹੋਤਿ, ਹਤ੍ਥਂ ਪਨ ਬਹਿਉਦਕੇਨ ਵਿਕ੍ਖਾਲੇਤ੍ਵਾ ਗਹੇਤੁਂ ਵਟ੍ਟਤਿ. ਮਚ੍ਛਮਂਸਫਲਾਫਲਾਦੀਨਿ ਚ ਖਾਦਨ੍ਤੋ ਯਂ ਤਤ੍ਥ ਅਟ੍ਠਿਂ ਵਾ ਚਲਕਂ ਵਾ ਛਡ੍ਡੇਤੁਕਾਮੋ ਹੋਤਿ, ਤਂ ਪਤ੍ਤੇ ਠਪੇਤੁਂ ਨ ਲਭਤਿ. ਯਂ ਪਨ ਪਟਿਖਾਦਿਤੁਕਾਮੋ ਹੋਤਿ, ਤਂ ਪਤ੍ਤੇ ਠਪੇਤੁਂ ਲਭਤਿ. ਅਟ੍ਠਿਕਕਣ੍ਟਕਾਦੀਨਿ ਤਤ੍ਥੇਵ ਕਤ੍ਵਾ ਹਤ੍ਥੇਨ ਲੁਞ੍ਚਿਤ੍ਵਾ ਖਾਦਿਤੁਂ ਵਟ੍ਟਤਿ. ਮੁਖਤੋ ਨੀਹਟਂ ਪਨ ਯਂ ਕਿਞ੍ਚਿ ਪੁਨ ਖਾਦਿਤੁਕਾਮੋ ਪਤ੍ਤੇ ਠਪੇਤੁਂ ਨ ਲਭਤਿ, ਸਿਙ੍ਗਿਵੇਰਨਾਲ਼ਿਕੇਰਖਣ੍ਡਾਦੀਨਿ ਡਂਸਿਤ੍ਵਾ ਪੁਨ ਠਪੇਤੁਂ ਲਭਤਿ.
੨੯. ‘‘ਨ ਚ, ਭਿਕ੍ਖਵੇ, ਸਬ੍ਬਪਂਸੁਕੂਲਿਕੇਨ ਭਵਿਤਬ੍ਬਂ, ਯੋ ਭਵੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੫੫) ਵਚਨਤੋ ਸਬ੍ਬਪਂਸੁਕੂਲਿਕੇਨ ਨ ਭਵਿਤਬ੍ਬਂ. ਏਤ੍ਥ ਪਨ ਚੀਵਰਞ੍ਚ ਮਞ੍ਚਪੀਠਞ੍ਚ ਪਂਸੁਕੂਲਂ ਵਟ੍ਟਤਿ, ਅਜ੍ਝੋਹਰਣੀਯਂ ਪਨ ਦਿਨ੍ਨਮੇਵ ਗਹੇਤਬ੍ਬਂ.
੩੦. ‘‘ਨ, ਭਿਕ੍ਖਵੇ, ਅਦ੍ਧਾਨਮਗ੍ਗਪ੍ਪਟਿਪਨ੍ਨੇਨ ਭਿਕ੍ਖੁਨਾ ਪਰਿਸ੍ਸਾਵਨਂ ਯਾਚਿਯਮਾਨੇਨ ਨ ਦਾਤਬ੍ਬਂ, ਯੋ ਨ ਦਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੫੯) ਵਚਨਤੋ ਅਪਰਿਸ੍ਸਾਵਨਕਸ੍ਸ (ਚੂਲ਼ਵ. ਅਟ੍ਠ. ੨੫੯) ਯਾਚਮਾਨਸ੍ਸ ਪਰਿਸ੍ਸਾਵਨਂ ਅਦਾਤੁਂ ਨ ਵਟ੍ਟਤਿ. ਯੋ ਪਨ ਅਤ੍ਤਨੋ ਹਤ੍ਥੇ ਪਰਿਸ੍ਸਾਵਨੇ ਵਿਜ੍ਜਮਾਨੇਪਿ ਯਾਚਤਿ, ਤਸ੍ਸ ਨ ਅਕਾਮਾ ਦਾਤਬ੍ਬਂ.
‘‘ਨ ਚ, ਭਿਕ੍ਖਵੇ, ਅਪਰਿਸ੍ਸਾਵਨਕੇਨ ਭਿਕ੍ਖੁਨਾ ਅਦ੍ਧਾਨਮਗ੍ਗੋ ਪਟਿਪਜ੍ਜਿਤਬ੍ਬੋ, ਯੋ ਪਟਿਪਜ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੫੯) ਵਚਨਤੋ ਅਪਰਿਸ੍ਸਾਵਨਕੇਨ ਮਗ੍ਗੋ ਨ ਗਨ੍ਤਬ੍ਬੋ. ਸਚੇਪਿ ਨ ਹੋਤਿ ਪਰਿਸ੍ਸਾਵਨਂ ਵਾ ਧਮ੍ਮਕਰਣਂ ਵਾ, ਸਙ੍ਘਾਟਿਕਣ੍ਣੋ ਅਧਿਟ੍ਠਾਤਬ੍ਬੋ ‘‘ਇਮਿਨਾ ਪਰਿਸ੍ਸਾਵੇਤ੍ਵਾ ਪਿਵਿਸ੍ਸਾਮੀ’’ਤਿ.
‘‘ਅਨੁਜਾਨਾਮਿ, ਭਿਕ੍ਖਵੇ, ਦਣ੍ਡਪਰਿਸ੍ਸਾਵਨ’’ਨ੍ਤਿ (ਚੂਲ਼ਵ. ੨੫੯) ਵਚਨਤੋ ਦਣ੍ਡਪਰਿਸ੍ਸਾਵਨਮ੍ਪਿ ਵਟ੍ਟਤਿ. ਦਣ੍ਡਪਰਿਸ੍ਸਾਵਨਂ ਨਾਮ ਯਤ੍ਥ ਰਜਕਾਨਂ ਖਾਰਪਰਿਸ੍ਸਾਵਨਂ ਵਿਯ ਚਤੂਸੁ ਪਾਦੇਸੁ ਬਦ੍ਧਨਿਸ੍ਸੇਣਿਕਾਯ ਸਾਟਕਂ ਬਨ੍ਧਿਤ੍ਵਾ ਮਜ੍ਝੇ ਦਣ੍ਡਕੇ ਉਦਕਂ ਆਸਿਞ੍ਚਨ੍ਤਿ, ਤਂ ਉਭੋਪਿ ਕੋਟ੍ਠਾਸੇ ਪੂਰੇਤ੍ਵਾ ਪਰਿਸ੍ਸਾਵਤਿ.
‘‘ਅਨੁਜਾਨਾਮਿ, ਭਿਕ੍ਖਵੇ, ਓਤ੍ਥਰਕ’’ਨ੍ਤਿ (ਚੂਲ਼ਵ. ੨੫੯) ਵਚਨਤੋ ਓਤ੍ਥਰਕਂ ਪਰਿਸ੍ਸਾਵਨਮ੍ਪਿ ਵਟ੍ਟਤਿ. ਓਤ੍ਥਰਕਂ ਨਾਮ ਯਂ ਉਦਕੇ ਓਤ੍ਥਰਿਤ੍ਵਾ ਘਟਕੇਨ ਉਦਕਂ ਗਣ੍ਹਨ੍ਤਿ, ਤਞ੍ਹਿ ਚਤੂਸੁ ਦਣ੍ਡਕੇਸੁ ਵਤ੍ਥਂ ਬਨ੍ਧਿਤ੍ਵਾ ਉਦਕੇ ਚਤ੍ਤਾਰੋ ਖਾਣੁਕੇ ਨਿਖਨਿਤ੍ਵਾ ਤੇਸੁ ਬਨ੍ਧਿਤ੍ਵਾ ਸਬ੍ਬਪਰਿਯਨ੍ਤੇ ਉਦਕਤੋ ਮੋਚੇਤ੍ਵਾ ਮਜ੍ਝੇ ਓਤ੍ਥਰਿਤ੍ਵਾ ਘਟੇਨ ਉਦਕਂ ਗਣ੍ਹਨ੍ਤਿ.
੩੧. ‘‘ਨ, ਭਿਕ੍ਖਵੇ, ਨਗ੍ਗੇਨ ਨਗ੍ਗੋ ਅਭਿਵਾਦੇਤਬ੍ਬੋ, ਯੋ ਅਭਿਵਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿਆਦਿਵਚਨਤੋ (ਚੂਲ਼ਵ. ੨੬੧) ਨ ਨਗ੍ਗੇਨ ਨਗ੍ਗੋ ਅਭਿਵਾਦੇਤਬ੍ਬੋ, ਨ ਨਗ੍ਗੇਨ ਅਭਿਵਾਦੇਤਬ੍ਬਂ, ਨ ਨਗ੍ਗੇਨ ਨਗ੍ਗੋ ਅਭਿਵਾਦਾਪੇਤਬ੍ਬੋ, ਨ ਨਗ੍ਗੇਨ ਅਭਿਵਾਦਾਪੇਤਬ੍ਬਂ, ਨ ਨਗ੍ਗੇਨ ਨਗ੍ਗਸ੍ਸ ਪਰਿਕਮ੍ਮਂ ਕਾਤਬ੍ਬਂ, ਨ ਨਗ੍ਗੇਨ ਨਗ੍ਗਸ੍ਸ ਦਾਤਬ੍ਬਂ, ਨ ਨਗ੍ਗੇਨ ਪਟਿਗ੍ਗਹੇਤਬ੍ਬਂ, ਨ ਨਗ੍ਗੇਨ ਖਾਦਿਤਬ੍ਬਂ, ਨ ਨਗ੍ਗੇਨ ਭੁਞ੍ਜਿਤਬ੍ਬਂ, ਨ ਨਗ੍ਗੇਨ ਸਾਯਿਤਬ੍ਬਂ, ਨ ਨਗ੍ਗੇਨ ਪਾਤਬ੍ਬਂ.
‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਸ੍ਸੋ ਪਟਿਚ੍ਛਾਦਿਯੋ ਜਨ੍ਤਾਘਰਪਟਿਚ੍ਛਾਦਿਂ ਉਦਕਪਟਿਚ੍ਛਾਦਿਂ ਵਤ੍ਥਪਟਿਚ੍ਛਾਦਿ’’ਨ੍ਤਿ (ਚੂਲ਼ਵ. ੨੬੧) ਵਚਨਤੋ ਤਿਸ੍ਸੋ ਪਟਿਚ੍ਛਾਦਿਯੋ ਵਟ੍ਟਨ੍ਤਿ. ਏਤ੍ਥ ਚ ਜਨ੍ਤਾਘਰਪਟਿਚ੍ਛਾਦਿ ਉਦਕਪਟਿਚ੍ਛਾਦਿ ਚ ਪਰਿਕਮ੍ਮਂ ਕਰੋਨ੍ਤਸ੍ਸੇਵ ਵਟ੍ਟਤਿ, ਸੇਸੇਸੁ ਅਭਿਵਾਦਨਾਦੀਸੁ ਨ ਵਟ੍ਟਤਿ. ਵਤ੍ਥਪਟਿਚ੍ਛਾਦਿ ਪਨ ਸਬ੍ਬਕਮ੍ਮੇਸੁ ਵਟ੍ਟਤਿ.
੩੨. ‘‘ਨ, ਭਿਕ੍ਖਵੇ, ਪੁਪ੍ਫਾਭਿਕਿਣ੍ਣੇਸੁ ਸਯਨੇਸੁ ਸਯਿਤਬ੍ਬਂ, ਯੋ ਸਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੬੪) ਵਚਨਤੋ ਪੁਪ੍ਫੇਹਿ ਸਨ੍ਥਤੇਸੁ ਸਯਨੇਸੁ ਨ ਸਯਿਤਬ੍ਬਂ, ਗਨ੍ਧਗਨ੍ਧਂ ਪਨ ਗਹੇਤ੍ਵਾ ਕਵਾਟੇ ਪਞ੍ਚਙ੍ਗੁਲਿਂ ਦਾਤੁਂ ਵਟ੍ਟਤਿ ਪੁਪ੍ਫਂ ਗਹੇਤ੍ਵਾ ਵਿਹਾਰੇ ਏਕਮਨ੍ਤਂ ਨਿਕ੍ਖਿਪਿਤੁਂ.
੩੩. ‘‘ਨ, ਭਿਕ੍ਖਵੇ, ਆਸਿਤ੍ਤਕੂਪਧਾਨੇ ਭੁਞ੍ਜਿਤਬ੍ਬਂ, ਯੋ ਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੬੪) ਵਚਨਤੋ ਆਸਿਤ੍ਤਕੂਪਧਾਨੇ ਠਪੇਤ੍ਵਾ ਨ ਭੁਞ੍ਜਿਤਬ੍ਬਂ. ਆਸਿਤ੍ਤਕੂਪਧਾਨਨ੍ਤਿ ਤਮ੍ਬਲੋਹੇਨ ਵਾ ਰਜਤੇਨ ਵਾ ਕਤਾਯ ਪੇਲ਼ਾਯ ਏਤਂ ਅਧਿਵਚਨਂ, ਪਟਿਕ੍ਖਿਤ੍ਤਤ੍ਤਾ ਪਨ ਦਾਰੁਮਯਾਪਿ ਨ ਵਟ੍ਟਤਿ.
੩੪. ‘‘ਅਨੁਜਾਨਾਮਿ, ਭਿਕ੍ਖਵੇ, ਮਲ਼ੋਰਿਕ’’ਨ੍ਤਿ (ਚੂਲ਼ਵ. ੨੬੪) ਵਚਨਤੋ ਮਲ਼ੋਰਿਕਾਯ ਠਪੇਤ੍ਵਾ ਭੁਞ੍ਜਿਤੁਂ ਵਟ੍ਟਤਿ. ਮਲ਼ੋਰਿਕਾਤਿ ਦਣ੍ਡਾਧਾਰਕੋ ਵੁਚ੍ਚਤਿ. ਯਟ੍ਠਿਆਧਾਰਕਪਣ੍ਣਾਧਾਰਕਪਚ੍ਛਿਕਪੀਠਾਦੀਨਿਪਿ ਏਤ੍ਥੇਵ ਪਵਿਟ੍ਠਾਨਿ. ਆਧਾਰਕਸਙ੍ਖੇਪਗਮਨਤੋ ਹਿ ਪਟ੍ਠਾਯ ਛਿਦ੍ਦਂ ਵਿਦ੍ਧਮ੍ਪਿ ਅਵਿਦ੍ਧਮ੍ਪਿ ਵਟ੍ਟਤਿਯੇਵ.
੩੫. ‘‘ਨ, ਭਿਕ੍ਖਵੇ, ਏਕਭਾਜਨੇ ਭੁਞ੍ਜਿਤਬ੍ਬਂ, ਯੋ ਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ(ਚੂਲ਼ਵ. ੨੬੪) ਆਦਿਵਚਨਤੋ ਨ ਏਕਭਾਜਨੇ ਭੁਞ੍ਜਿਤਬ੍ਬਂ, ਨ ਏਕਥਾਲਕੇ ਪਾਤਬ੍ਬਂ. ਸਚੇ ਪਨ ਏਕੋ ਭਿਕ੍ਖੁ ਭਾਜਨਤੋ ਫਲਂ ਵਾ ਪੂਪਂ ਵਾ ਗਹੇਤ੍ਵਾ ਗਚ੍ਛਤਿ, ਤਸ੍ਮਿਂ ਅਪਗਤੇ ਇਤਰਸ੍ਸ ਸੇਸਕਂ ਭੁਞ੍ਜਿਤੁਂ ਵਟ੍ਟਤਿ, ਇਤਰਸ੍ਸਪਿ ਤਸ੍ਮਿਂ ਖੀਣੇ ਪੁਨ ਗਹੇਤੁਂ ਵਟ੍ਟਤਿ.
‘‘ਨ, ਭਿਕ੍ਖਵੇ, ਏਕਮਞ੍ਚੇ ਤੁਵਟ੍ਟਿਤਬ੍ਬਂ, ਯੋ ਤੁਵਟ੍ਟੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ(ਚੂਲ਼ਵ. ੨੬੪) ਆਦਿਵਚਨਤੋ ਨ ਏਕਮਞ੍ਚੇ ਨਿਪਜ੍ਜਿਤਬ੍ਬਂ, ਨ ਏਕਤ੍ਥਰਣੇ ਨਿਪਜ੍ਜਿਤਬ੍ਬਂ. ਵਵਤ੍ਥਾਨਂ ਪਨ ਦਸ੍ਸੇਤ੍ਵਾ ਮਜ੍ਝੇ ਕਾਸਾਵਂ ਵਾ ਕਤ੍ਤਰਯਟ੍ਠਿਂ ਵਾ ਅਨ੍ਤਮਸੋ ਕਾਯਬਨ੍ਧਨਮ੍ਪਿ ਠਪੇਤ੍ਵਾ ਨਿਪਜ੍ਜਨ੍ਤਾਨਂ ਅਨਾਪਤ੍ਤਿ. ਏਕਪਾਵੁਰਣੇਹਿ ਏਕਤ੍ਥਰਣਪਾਵੁਰਣੇਹਿ ਚ ਨ ਨਿਪਜ੍ਜਿਤਬ੍ਬਂ. ਏਕਂ ਅਤ੍ਥਰਣਞ੍ਚੇਵ ਪਾਵੁਰਣਞ੍ਚ ਏਤੇਸਨ੍ਤਿ ਏਕਤ੍ਥਰਣਪਾਵੁਰਣਾ. ਸਂਹਾਰਿਮਾਨਂ ਪਾਵਾਰਤ੍ਥਰਣਕਟਸਾਰਕਾਦੀਨਂ ਏਕਂ ਅਨ੍ਤਂ ਅਤ੍ਥਰਿਤ੍ਵਾ ਏਕਂ ਪਾਰੁਪਿਤ੍ਵਾ ਨਿਪਜ੍ਜਨ੍ਤਾਨਮੇਤਂ ਅਧਿਵਚਨਂ.
੩੬. ‘‘ਨ, ਭਿਕ੍ਖਵੇ, ਚੇਲਪ੍ਪਟਿਕਾ ਅਕ੍ਕਮਿਤਬ੍ਬਾ, ਯੋ ਅਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੬੮) ਵਚਨਤੋ ਨ ਚੇਲਸਨ੍ਥਾਰੋ ਅਕ੍ਕਮਿਤਬ੍ਬੋ, ‘‘ਅਨੁਜਾਨਾਮਿ, ਭਿਕ੍ਖਵੇ, ਗਿਹੀਨਂ ਮਙ੍ਗਲਤ੍ਥਾਯ ਯਾਚਿਯਮਾਨੇਨ ਚੇਲਪ੍ਪਟਿਕਂ ਅਕ੍ਕਮਿਤੁ’’ਨ੍ਤਿ (ਚੂਲ਼ਵ. ੨੬੮) ਵਚਨਤੋ ਪਨ ਕਾਚਿ ਇਤ੍ਥੀ (ਚੂਲ਼ਵ. ਅਟ੍ਠ. ੨੬੮) ਅਪਗਤਗਬ੍ਭਾ ਵਾ ਹੋਤਿ ਗਰੁਗਬ੍ਭਾ ਵਾ, ਏਵਰੂਪੇਸੁ ਠਾਨੇਸੁ ਮਙ੍ਗਲਤ੍ਥਾਯ ਯਾਚਿਯਮਾਨੇਨ ਅਕ੍ਕਮਿਤੁਂ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਧੋਤਪਾਦਕਂ ਅਕ੍ਕਮਿਤੁ’’ਨ੍ਤਿ (ਚੂਲ਼ਵ. ੨੬੮) ਵਚਨਤੋ ਪਾਦਧੋਵਨਟ੍ਠਾਨੇ ਧੋਤੇਹਿ ਪਾਦੇਹਿ ਅਕ੍ਕਮਨਤ੍ਥਾਯ ਅਤ੍ਥਤਪਚ੍ਚਤ੍ਥਰਣਂ ਅਕ੍ਕਮਿਤੁਂ ਵਟ੍ਟਤਿ.
੩੭. ‘‘ਨ, ਭਿਕ੍ਖਵੇ, ਕਤਕਂ ਪਰਿਭੁਞ੍ਜਿਤਬ੍ਬਂ, ਯੋ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੬੯) ਵਚਨਤੋ ਕਤਕਂ ਨ ਵਟ੍ਟਤਿ. ਕਤਕਂ ਨਾਮ ਪਦੁਮਕਣ੍ਣਿਕਾਕਾਰਂ ਪਾਦਘਂਸਨਤ੍ਥਂ ਕਣ੍ਟਕੇ ਉਟ੍ਠਾਪੇਤ੍ਵਾ ਕਤਂ. ਤਂ ਵਟ੍ਟਂ ਵਾ ਹੋਤੁ ਚਤੁਰਸ੍ਸਾਦਿਭੇਦਂ ਵਾ, ਬਾਹੁਲਿਕਾਨੁਯੋਗਤ੍ਤਾ ਪਟਿਕ੍ਖਿਤ੍ਤਮੇਵ, ਨੇਵ ਪਟਿਗ੍ਗਹੇਤੁਂ, ਨ ਪਰਿਭੁਞ੍ਜਿਤੁਂ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਸ੍ਸੋ ਪਾਦਘਂਸਨਿਯੋ ਸਕ੍ਖਰਂ ਕਥਲਂ ਸਮੁਦ੍ਦਫੇਣਕ’’ਨ੍ਤਿ (ਚੂਲ਼ਵ. ੨੬੯) ਵਚਨਤੋ ਸਕ੍ਖਰਾਦੀਹਿ ਪਾਦਘਂਸਨਂ ਵਟ੍ਟਤਿ. ਸਕ੍ਖਰਾਤਿ ਪਾਸਾਣੋ ਵੁਚ੍ਚਤਿ, ਪਾਸਾਣਫੇਣਕੋਪਿ ਵਟ੍ਟਤਿਯੇਵ.
੩੮. ‘‘ਨ, ਭਿਕ੍ਖਵੇ, ਚਾਮਰਿਬੀਜਨੀ ਧਾਰੇਤਬ੍ਬਾ, ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੬੯) ਵਚਨਤੋ ਚਾਮਰਿਵਾਲੇਹਿ ਕਤਬੀਜਨੀ ਨ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਮਕਸਬੀਜਨਿਂ. ਅਨੁਜਾਨਾਮਿ ਭਿਕ੍ਖਵੇ ਤਿਸ੍ਸੋ ਬੀਜਨਿਯੋ ਵਾਕਮਯਂ ਉਸੀਰਮਯਂ ਮੋਰਪਿਞ੍ਛਮਯਂ. ਅਨੁਜਾਨਾਮਿ, ਭਿਕ੍ਖਵੇ, ਵਿਧੂਪਨਞ੍ਚ ਤਾਲਵਣ੍ਟਞ੍ਚਾ’’ਤਿ (ਚੂਲ਼ਵ. ੨੬੯) ਵਚਨਤੋ ਮਕਸਬੀਜਨੀਆਦਿ ਵਟ੍ਟਤਿ. ਤਤ੍ਥ ਵਿਧੂਪਨਨ੍ਤਿ ਬੀਜਨੀ ਵੁਚ੍ਚਤਿ. ਤਾਲਵਣ੍ਟਂ ਪਨ ਤਾਲਪਣ੍ਣੇਹਿ ਵਾ ਕਤਂ ਹੋਤੁ ਵੇਲ਼ੁਦਨ੍ਤਵਿਲੀਵੇਹਿ ਵਾ ਮੋਰਪਿਞ੍ਛੇਹਿ ਵਾ ਚਮ੍ਮਵਿਕਤੀਹਿ ਵਾ, ਸਬ੍ਬਂ ਵਟ੍ਟਤਿ. ਮਕਸਬੀਜਨੀ ਦਨ੍ਤਮਯਵਿਸਾਣਮਯਦਣ੍ਡਕਾਪਿ ਵਟ੍ਟਤਿ. ਵਾਕਮਯਬੀਜਨਿਯਾ ਕੇਤਕਪਾਰੋਹਕੁਨ੍ਤਾਲਪਣ੍ਣਾਦਿਮਯਾਪਿ ਸਙ੍ਗਹਿਤਾ.
੩੯. ‘‘ਨ, ਭਿਕ੍ਖਵੇ, ਛਤ੍ਤਂ ਧਾਰੇਤਬ੍ਬਂ, ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਛਤ੍ਤ’’ਨ੍ਤਿ (ਚੂਲ਼ਵ. ੨੭੦) ਵਚਨਤੋ ਅਗਿਲਾਨੇਨ ਛਤ੍ਤਂ ਨ ਧਾਰੇਤਬ੍ਬਂ. ਯਸ੍ਸ ਪਨ ਕਾਯਡਾਹੋ ਵਾ ਪਿਤ੍ਤਕੋਪੋ ਵਾ ਹੋਤਿ ਚਕ੍ਖੁ ਵਾ ਦੁਬ੍ਬਲਂ, ਅਞ੍ਞੋ ਵਾ ਕੋਚਿ ਆਬਾਧੋ ਵਿਨਾ ਛਤ੍ਤੇਨ ਉਪ੍ਪਜ੍ਜਤਿ, ਤਸ੍ਸ ਗਾਮੇ ਵਾ ਅਰਞ੍ਞੇ ਵਾ ਛਤ੍ਤਂ ਵਟ੍ਟਤਿ. ਵਸ੍ਸੇ ਪਨ ਚੀਵਰਗੁਤ੍ਤਤ੍ਥਮ੍ਪਿ ਵਾਲ਼ਮਿਗਚੋਰਭਯੇਸੁ ਅਤ੍ਤਗੁਤ੍ਤਤ੍ਥਮ੍ਪਿ ਵਟ੍ਟਤਿ, ਏਕਪਣ੍ਣਚ੍ਛਤ੍ਤਂ ਪਨ ਸਬ੍ਬਤ੍ਥੇਵ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਅਗਿਲਾਨੇਨਪਿ ਆਰਾਮੇ ਆਰਾਮੂਪਚਾਰੇ ਛਤ੍ਤਂ ਧਾਰੇਤੁ’’ਨ੍ਤਿ (ਚੂਲ਼ਵ. ੨੭੦) ਵਚਨਤੋ ਪਨ ਅਗਿਲਾਨਸ੍ਸਪਿ ਆਰਾਮਆਰਾਮੂਪਚਾਰੇਸੁ ਛਤ੍ਤਂ ਧਾਰੇਤੁਂ ਵਟ੍ਟਤਿ.
੪੦. ‘‘ਨ, ਭਿਕ੍ਖਵੇ, ਦੀਘਾ ਨਖਾ ਧਾਰੇਤਬ੍ਬਾ, ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਮਂਸਪ੍ਪਮਾਣੇਨ ਨਖਂ ਛਿਨ੍ਦਿਤੁ’’ਨ੍ਤਿ (ਚੂਲ਼ਵ. ੨੭੪) ਵਚਨਤੋ ਦੀਘਾ ਨਖਾ ਛਿਨ੍ਦਿਤਬ੍ਬਾ. ‘‘ਨ, ਭਿਕ੍ਖਵੇ, ਵੀਸਤਿਮਟ੍ਠਂ ਕਾਰਾਪੇਤਬ੍ਬਂ, ਯੋ ਕਾਰਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਮਲਮਤ੍ਤਂ ਅਪਕਡ੍ਢਿਤੁ’’ਨ੍ਤਿ (ਚੂਲ਼ਵ. ੨੭੪) ਵਚਨਤੋ ਵੀਸਤਿਪਿ ਨਖੇ ਲਿਖਿਤਮਟ੍ਠੇ ਕਾਰਾਪੇਤੁਂ ਨ ਵਟ੍ਟਤਿ, ਨਖਤੋ ਮਲਮਤ੍ਤਂ ਪਨ ਅਪਕਡ੍ਢਿਤੁਂ ਵਟ੍ਟਤਿ.
‘‘ਨ, ਭਿਕ੍ਖਵੇ, ਸਮ੍ਬਾਧੇ ਲੋਮਂ ਸਂਹਰਾਪੇਤਬ੍ਬਂ, ਯੋ ਸਂਹਰਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਆਬਾਧਪਚ੍ਚਯਾ ਸਮ੍ਬਾਧੇ ਲੋਮਂ ਸਂਹਰਾਪੇਤੁ’’ਨ੍ਤਿ (ਚੂਲ਼ਵ. ੨੭੫) ਵਚਨਤੋ ਗਣ੍ਡਵਣਾਦਿਆਬਾਧਂ ਵਿਨਾ ਸਮ੍ਬਾਧੇ ਲੋਮਂ ਸਂਹਰਾਪੇਤੁਂ ਨ ਵਟ੍ਟਤਿ. ‘‘ਨ, ਭਿਕ੍ਖਵੇ, ਦੀਘਂ ਨਾਸਿਕਾਲੋਮਂ ਧਾਰੇਤਬ੍ਬਂ, ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੭੫) ਵਚਨਤੋ ਸਣ੍ਡਾਸੇਨ ਨਾਸਿਕਾਲੋਮਂ ਸਂਹਰਾਪੇਤੁਂ ਵਟ੍ਟਤਿ. ਸਕ੍ਖਰਾਦੀਹਿ ਨਾਸਿਕਾਲੋਮਂ ਗਾਹਾਪਨੇਪਿ ਆਪਤ੍ਤਿ ਨਤ੍ਥਿ, ਅਨੁਰਕ੍ਖਣਤ੍ਥਂ ਪਨ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਣ੍ਡਾਸ’’ਨ੍ਤਿ (ਚੂਲ਼ਵ. ੨੭੫) ਸਣ੍ਡਾਸੋ ਅਨੁਞ੍ਞਾਤੋ. ‘‘ਨ, ਭਿਕ੍ਖਵੇ, ਪਲਿਤਂ ਗਾਹਾਪੇਤਬ੍ਬਂ, ਯੋ ਗਾਹਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੭੫) ਵਚਨਤੋ ਪਲਿਤਂ ਗਾਹਾਪੇਤੁਂ ਨ ਵਟ੍ਟਤਿ. ਯਂ ਪਨ ਭਮੁਕਾਯ ਵਾ ਨਲਾਟੇ ਵਾ ਦਾਠਿਕਾਯ ਵਾ ਉਗ੍ਗਨ੍ਤ੍ਵਾ ਬੀਭਚ੍ਛਂ ਹੁਤ੍ਵਾ ਠਿਤਂ, ਤਾਦਿਸਂ ਲੋਮਂ ਪਲਿਤਂ ਵਾ ਅਪਲਿਤਂ ਵਾ ਗਾਹਾਪੇਤੁਂ ਵਟ੍ਟਤਿ.
੪੧. ‘‘ਨ, ਭਿਕ੍ਖਵੇ, ਅਕਾਯਬਨ੍ਧਨੇਨ ਗਾਮੋ ਪਵਿਸਿਤਬ੍ਬੋ, ਯੋ ਪਵਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੭੮) ਵਚਨਤੋ ਅਕਾਯਬਨ੍ਧਨੇਨ ਗਾਮੋ ਨ ਪਵਿਸਿਤਬ੍ਬੋ, ਅਬਨ੍ਧਿਤ੍ਵਾ ਨਿਕ੍ਖਮਨ੍ਤੇਨ ਯਤ੍ਥ ਸਰਤਿ, ਤਤ੍ਥ ਬਨ੍ਧਿਤਬ੍ਬਂ. ‘‘ਆਸਨਸਾਲਾਯ ਬਨ੍ਧਿਸ੍ਸਾਮੀ’’ਤਿ ਗਨ੍ਤੁਂ ਵਟ੍ਟਤਿ, ਸਰਿਤ੍ਵਾ ਯਾਵ ਨ ਬਨ੍ਧਤਿ, ਨ ਤਾਵ ਪਿਣ੍ਡਾਯ ਚਰਿਤਬ੍ਬਂ.
੪੨. ‘‘ਨ, ਭਿਕ੍ਖਵੇ, ਗਿਹਿਨਿਵਤ੍ਥਂ ਨਿਵਾਸੇਤਬ੍ਬਂ, ਯੋ ਨਿਵਾਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ(ਚੂਲ਼ਵ. ੨੮੦) ਆਦਿਵਚਨਤੋ ਹਤ੍ਥਿਸੋਣ੍ਡਾਦਿਵਸੇਨ ਗਿਹਿਨਿਵਤ੍ਥਂ ਨ ਨਿਵਾਸੇਤਬ੍ਬਂ, ਸੇਤਪਟਪਾਰੁਤਾਦਿਵਸੇਨ ਨ ਗਿਹਿਪਾਰੁਤਂ ਪਾਰੁਪਿਤਬ੍ਬਂ, ਮਲ੍ਲਕਮ੍ਮਕਰਾਦਯੋ ਵਿਯ ਕਚ੍ਛਂ ਬਨ੍ਧਿਤ੍ਵਾ ਨ ਨਿਵਾਸੇਤਬ੍ਬਂ. ਏਵਂ ਨਿਵਾਸੇਤੁਂ ਗਿਲਾਨਸ੍ਸਪਿ ਮਗ੍ਗਪ੍ਪਟਿਪਨ੍ਨਸ੍ਸਪਿ ਨ ਵਟ੍ਟਤਿ. ਯਮ੍ਪਿ ਮਗ੍ਗਂ ਗਚ੍ਛਨ੍ਤਾ ਏਕਂ ਵਾ ਦ੍ਵੇ ਵਾ ਕੋਣੇ ਉਕ੍ਖਿਪਿਤ੍ਵਾ ਅਨ੍ਤਰਵਾਸਕਸ੍ਸ ਉਪਰਿ ਲਗ੍ਗਨ੍ਤਿ, ਅਨ੍ਤੋ ਵਾ ਏਕਂ ਕਾਸਾਵਂ ਤਥਾ ਨਿਵਾਸੇਤ੍ਵਾ ਬਹਿ ਅਪਰਂ ਨਿਵਾਸੇਨ੍ਤਿ, ਸਬ੍ਬਂ ਨ ਵਟ੍ਟਤਿ. ਗਿਲਾਨੋ ਪਨ ਅਨ੍ਤੋਕਾਸਾਵਸ੍ਸ ਓਵਟ੍ਟਿਕਂ ਦਸ੍ਸੇਤ੍ਵਾ ਅਪਰਂ ਉਪਰਿ ਨਿਵਾਸੇਤੁਂ ਲਭਤਿ, ਅਗਿਲਾਨੇਨ ਦ੍ਵੇ ਨਿਵਾਸੇਨ੍ਤੇਨ ਸਗੁਣਂ ਕਤ੍ਵਾ ਨਿਵਾਸੇਤਬ੍ਬਾਨਿ.
੪੩. ‘‘ਨ, ਭਿਕ੍ਖਵੇ, ਉਭਤੋਕਾਜਂ ਹਰਿਤਬ੍ਬਂ, ਯੋ ਹਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੮੧) ਵਚਨਤੋ ਉਭਤੋਕਾਜਂ ਹਰਿਤੁਂ ਨ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਏਕਤੋਕਾਜਂ ਅਨ੍ਤਰਾਕਾਜਂ ਸੀਸਭਾਰਂ ਖਨ੍ਧਭਾਰਂ ਕਟਿਭਾਰਂ ਓਲਮ੍ਬਕ’’ਨ੍ਤਿ ਵਚਨਤੋ ਏਕਤੋਕਾਜਾਦਿਂ ਹਰਿਤੁਂ ਵਟ੍ਟਤਿ.
੪੪. ‘‘ਨ, ਭਿਕ੍ਖਵੇ, ਦੀਘਂ ਦਨ੍ਤਕਟ੍ਠਂ ਖਾਦਿਤਬ੍ਬਂ, ਯੋ ਖਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੮੨) ਵਚਨਤੋ ਨ ਦੀਘਂ ਦਨ੍ਤਕਟ੍ਠਂ ਖਾਦਿਤਬ੍ਬਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠਙ੍ਗੁਲਪਰਮਂ ਦਨ੍ਤਕਟ੍ਠਂ. ਅਨੁਜਾਨਾਮਿ, ਭਿਕ੍ਖਵੇ, ਚਤੁਰਙ੍ਗੁਲਪਚ੍ਛਿਮਂ ਦਨ੍ਤਕਟ੍ਠ’’ਨ੍ਤਿ (ਚੂਲ਼ਵ. ੨੮੨) ਵਚਨਤੋ ਮਨੁਸ੍ਸਾਨਂ ਪਮਾਣਙ੍ਗੁਲੇਨ ਅਟ੍ਠਙ੍ਗੁਲਪਰਮਂ ਚਤੁਰਙ੍ਗੁਲਪਚ੍ਛਿਮਞ੍ਚ ਦਨ੍ਤਕਟ੍ਠਂ ਖਾਦਿਤਬ੍ਬਂ.
੪੫. ‘‘ਨ, ਭਿਕ੍ਖਵੇ, ਰੁਕ੍ਖੋ ਅਭਿਰੁਹਿਤਬ੍ਬੋ, ਯੋ ਅਭਿਰੁਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਸਤਿ ਕਰਣੀਯੇ ਪੋਰਿਸਂ ਰੁਕ੍ਖਂ ਅਭਿਰੁਹਿਤੁਂ ਆਪਦਾਸੁ ਯਾਵਦਤ੍ਥ’’ਨ੍ਤਿ (ਚੂਲ਼ਵ. ੨੮੪) ਵਚਨਤੋ ਨ ਰੁਕ੍ਖਂ ਅਭਿਰੁਹਿਤਬ੍ਬਂ, ਸੁਕ੍ਖਕਟ੍ਠਗਹਣਾਦਿਕਿਚ੍ਚੇ ਪਨ ਸਤਿ ਪੁਰਿਸਪ੍ਪਮਾਣਂ ਅਭਿਰੁਹਿਤੁਂ ਵਟ੍ਟਤਿ. ਆਪਦਾਸੂਤਿ ਵਾਲ਼ਮਿਗਾਦਯੋ ਵਾ ਦਿਸ੍ਵਾ ਮਗ੍ਗਮੂਲ਼੍ਹੋ ਵਾ ਦਿਸਾ ਓਲੋਕੇਤੁਕਾਮੋ ਹੁਤ੍ਵਾ ਦਵਡਾਹਂ ਵਾ ਉਦਕੋਘਂ ਵਾ ਆਗਚ੍ਛਨ੍ਤਂ ਦਿਸ੍ਵਾ ਅਤਿਉਚ੍ਚਮ੍ਪਿ ਰੁਕ੍ਖਂ ਆਰੋਹਿਤੁਂ ਵਟ੍ਟਤਿ.
੪੬. ‘‘ਨ, ਭਿਕ੍ਖਵੇ, ਬੁਦ੍ਧਵਚਨਂ ਛਨ੍ਦਸੋ ਆਰੋਪੇਤਬ੍ਬਂ, ਯੋ ਆਰੋਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਸਕਾਯ ਨਿਰੁਤ੍ਤਿਯਾ ਬੁਦ੍ਧਵਚਨਂ ਪਰਿਯਾਪੁਣਿਤੁ’’ਨ੍ਤਿ (ਚੂਲ਼ਵ. ੨੮੫) ਵਚਨਤੋ ਵੇਦਂ ਵਿਯ ਬੁਦ੍ਧਵਚਨਂ ਸਕ੍ਕਟਭਾਸਾਯ ਵਾਚਨਾਮਗ੍ਗਂ ਆਰੋਚੇਤੁਂ ਨ ਵਟ੍ਟਤਿ, ਸਕਾਯ ਪਨ ਮਾਗਧਿਕਾਯ ਨਿਰੁਤ੍ਤਿਯਾ ਪਰਿਯਾਪੁਣਿਤਬ੍ਬਂ.
੪੭. ‘‘ਨ, ਭਿਕ੍ਖਵੇ, ਲੋਕਾਯਤਂ ਪਰਿਯਾਪੁਣਿਤਬ੍ਬਂ, ਯੋ ਪਰਿਯਾਪੁਣੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ(ਚਊਲ਼ਵ. ੨੮੬) ਆਦਿਵਚਨਤੋ ਲੋਕਾਯਤਸਙ੍ਖਾਤਂ ‘‘ਸਬ੍ਬਂ ਉਚ੍ਛਿਟ੍ਠਂ, ਸਬ੍ਬਂ ਅਨੁਚ੍ਛਿਟ੍ਠਂ, ਸੇਤੋ ਕਾਕੋ, ਕਾਲ਼ੋ ਬਕੋ ਇਮਿਨਾ ਚ ਇਮਿਨਾ ਚ ਕਾਰਣੇਨਾ’’ਤਿ ਏਵਮਾਦਿਨਿਰਤ੍ਥਕਕਾਰਣਪਟਿਸਂਯੁਤ੍ਤਂ ਤਿਤ੍ਥਿਯਸਤ੍ਥਂ ਨੇਵ ਪਰਿਯਾਪੁਣਿਤਬ੍ਬਂ, ਨ ਪਰਸ੍ਸ ਵਾਚੇਤਬ੍ਬਂ. ਨ ਚ ਤਿਰਚ੍ਛਾਨਵਿਜ੍ਜਾ ਪਰਿਯਾਪੁਣਿਤਬ੍ਬਾ, ਨ ਪਰਸ੍ਸ ਵਾਚੇਤਬ੍ਬਾ.
੪੮. ‘‘ਨ, ਭਿਕ੍ਖਵੇ, ਖਿਪਿਤੇ ‘ਜੀਵਾ’ਤਿ ਵਤ੍ਤਬ੍ਬੋ, ਯੋ ਵਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਗਿਹੀਨਂ ‘ਜੀਵਥ ਭਨ੍ਤੇ’ਤਿ ਵੁਚ੍ਚਮਾਨੇਨ ‘ਚਿਰਂ ਜੀਵਾ’ਤਿ ਵਤ੍ਤੁ’’ਨ੍ਤਿ (ਚੂਲ਼ਵ. ੨੮੮) ਵਚਨਤੋ ਖਿਪਿਤੇ ‘‘ਜੀਵਾ’’ਤਿ ਨ ਵਤ੍ਤਬ੍ਬਂ, ਗਿਹਿਨਾ ਪਨ ‘‘ਜੀਵਥਾ’’ਤਿ ਵੁਚ੍ਚਮਾਨੇਨ ‘‘ਚਿਰਂ ਜੀਵਾ’’ਤਿ ਵਤ੍ਤੁਂ ਵਟ੍ਟਤਿ.
੪੯. ‘‘ਨ, ਭਿਕ੍ਖਵੇ, ਲਸੁਣਂ ਖਾਦਿਤਬ੍ਬਂ, ਯੋ ਖਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਆਬਾਧਪਚ੍ਚਯਾ ਲਸੁਣਂ ਖਾਦਿਤੁ’’ਨ੍ਤਿ (ਚੂਲ਼ਵ. ੨੮੯) ਵਚਨਤੋ ਆਬਾਧਂ ਵਿਨਾ ਲਸੁਣਂ ਖਾਦਿਤੁਂ ਨ ਵਟ੍ਟਤਿ, ਸੂਪਸਮ੍ਪਾਕਾਦੀਸੁ (ਪਾਚਿ. ਅਟ੍ਠ. ੭੯੭) ਪਕ੍ਖਿਤ੍ਤਂ ਪਨ ਵਟ੍ਟਤਿ. ਤਞ੍ਹਿ ਪਚ੍ਚਮਾਨੇਸੁ ਮੁਗ੍ਗਸੂਪਾਦੀਸੁ ਵਾ ਮਚ੍ਛਮਂਸਵਿਕਤਿਯਾ ਵਾ ਤੇਲੇ ਵਾ ਬਦਰਸਾਲ਼ਵਾਦੀਸੁ ਵਾ ਅਮ੍ਬਿਲਸਾਕਾਦੀਸੁ ਵਾ ਉਤ੍ਤਰਿਭਙ੍ਗੇਸੁ ਵਾ ਯਤ੍ਥ ਕਤ੍ਥਚਿ ਅਨ੍ਤਮਸੋ ਯਾਗੁਭਤ੍ਤੇਪਿ ਪਕ੍ਖਿਤ੍ਤਂ ਵਟ੍ਟਤਿ.
੫੦. ‘‘ਨ, ਭਿਕ੍ਖਵੇ, ਅਧੋਤੇਹਿ ਪਾਦੇਹਿ ਸੇਨਾਸਨਂ ਅਕ੍ਕਮਿਤਬ੍ਬਂ, ਯੋ ਅਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੨੪) ਵਚਨਤੋ ਅਧੋਤੇਹਿ ਪਾਦੇਹਿ ਮਞ੍ਚਪੀਠਾਦਿਸੇਨਾਸਨਂ ਪਰਿਕਮ੍ਮਕਤਾ ਵਾ ਭੂਮਿ ਨ ਅਕ੍ਕਮਿਤਬ੍ਬਾ. ‘‘ਨ, ਭਿਕ੍ਖਵੇ, ਅਲ੍ਲੇਹਿ ਪਾਦੇਹਿ ਸੇਨਾਸਨਂ ਅਕ੍ਕਮਿਤਬ੍ਬਂ, ਯੋ ਅਕ੍ਕਮੇਯ੍ਯ ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੨੪) ਵਚਨਤੋ ਯੇਹਿ (ਚੂਲ਼ਵ. ਅਟ੍ਠ. ੩੨੪) ਅਕ੍ਕਨ੍ਤਟ੍ਠਾਨੇ ਉਦਕਂ ਪਞ੍ਞਾਯਤਿ, ਏਵਰੂਪੇਹਿ ਅਲ੍ਲਪਾਦੇਹਿ ਪਰਿਭਣ੍ਡਕਤਾ ਭੂਮਿ ਵਾ ਸੇਨਾਸਨਂ ਵਾ ਨ ਅਕ੍ਕਮਿਤਬ੍ਬਂ. ਸਚੇ ਪਨ ਉਦਕਸਿਨੇਹਮਤ੍ਤਮੇਵ ਪਞ੍ਞਾਯਤਿ, ਨ ਉਦਕਂ, ਵਟ੍ਟਤਿ. ਪਾਦਪੁਞ੍ਛਨਿਂ ਪਨ ਅਲ੍ਲਪਾਦੇਹਿਪਿ ਅਕ੍ਕਮਿਤੁਂ ਵਟ੍ਟਤਿਯੇਵ. ‘‘ਨ, ਭਿਕ੍ਖਵੇ, ਸਉਪਾਹਨੇਨ ਸੇਨਾਸਨਂ ਅਕ੍ਕਮਿਤਬ੍ਬਂ, ਯੋ ਅਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੨੪) ਵਚਨਤੋ ਧੋਤਪਾਦੇਹਿ ਅਕ੍ਕਮਿਤਬ੍ਬਟ੍ਠਾਨਂ ਸਉਪਾਹਨੇਨ ਅਕ੍ਕਮਿਤੁਂ ਨ ਵਟ੍ਟਤਿ.
‘‘ਨ, ਭਿਕ੍ਖਵੇ, ਪਰਿਕਮ੍ਮਕਤਾਯ ਭੂਮਿਯਾ ਨਿਟ੍ਠੁਭਿਤਬ੍ਬਂ, ਯੋ ਨਿਟ੍ਠੁਭੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੨੪) ਵਚਨਤੋ ਪਰਿਕਮ੍ਮਕਤਾਯ ਭੂਮਿਯਾ ਨ ਨਿਟ੍ਠੁਭਿਤਬ੍ਬਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਖੇਲ਼ਮਲ੍ਲਕ’’ਨ੍ਤਿ (ਚੂਲ਼ਵ. ੩੨੪) ਏਵਂ ਅਨੁਞ੍ਞਾਤੇ ਖੇਲ਼ਮਲ੍ਲਕੇ ਨਿਟ੍ਠੁਭਿਤਬ੍ਬਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਚੋਲ਼ਕੇਨ ਪਲਿਵੇਠੇਤੁ’’ਨ੍ਤਿ (ਚੂਲ਼ਵ. ੩੨੪) ਵਚਨਤੋ ਸੁਧਾਭੂਮਿਯਾ ਵਾ ਪਰਿਭਣ੍ਡਭੂਮਿਯਾ ਵਾ ਮਞ੍ਚਪੀਠਂ ਨਿਕ੍ਖਿਪਨ੍ਤੇਨ ਸਚੇ ਤਟ੍ਟਿਕਾ ਵਾ ਕਟਸਾਰਕੋ ਵਾ ਨਤ੍ਥਿ, ਚੋਲ਼ਕੇਨ ਮਞ੍ਚਪੀਠਾਨਂ ਪਾਦਾ ਵੇਠੇਤਬ੍ਬਾ, ਤਸ੍ਮਿਂ ਅਸਤਿ ਪਣ੍ਣਮ੍ਪਿ ਅਤ੍ਥਰਿਤੁਂ ਵਟ੍ਟਤਿ, ਕਿਞ੍ਚਿ ਅਨਤ੍ਥਰਿਤ੍ਵਾ ਠਪੇਨ੍ਤਸ੍ਸ ਪਨ ਦੁਕ੍ਕਟਂ. ਯਦਿ ਪਨ ਤਤ੍ਥ ਨੇਵਾਸਿਕਾ ਅਨਤ੍ਥਤਾਯ ਭੂਮਿਯਾਪਿ ਠਪੇਨ੍ਤਿ, ਅਧੋਤਪਾਦੇਹਿਪਿ ਵਲ਼ਞ੍ਜੇਨ੍ਤਿ, ਤਥੇਵ ਵਲ਼ਞ੍ਜੇਤੁਂ ਵਟ੍ਟਤਿ.
‘‘ਨ, ਭਿਕ੍ਖਵੇ, ਪਰਿਕਮ੍ਮਕਤਾ ਭਿਤ੍ਤਿ ਅਪਸ੍ਸੇਤਬ੍ਬਾ, ਯੋ ਅਪਸ੍ਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੨੪) ਵਚਨਤੋ ਪਰਿਕਮ੍ਮਕਤਾ ਭਿਤ੍ਤਿ ਸੇਤਭਿਤ੍ਤਿ ਵਾ ਹੋਤੁ ਚਿਤ੍ਤਕਮ੍ਮਕਤਾ ਵਾ, ਨ ਅਪਸ੍ਸੇਤਬ੍ਬਾ. ਨ ਕੇਵਲਞ੍ਚ ਭਿਤ੍ਤਿਮੇਵ, ਦ੍ਵਾਰਮ੍ਪਿ ਵਾਤਪਾਨਮ੍ਪਿ ਅਪਸ੍ਸੇਨਫਲਕਮ੍ਪਿ ਪਾਸਾਣਤ੍ਥਮ੍ਭਮ੍ਪਿ ਰੁਕ੍ਖਤ੍ਥਮ੍ਭਮ੍ਪਿ ਚੀਵਰੇਨ ਵਾ ਯੇਨ ਕੇਨਚਿ ਅਪ੍ਪਟਿਚ੍ਛਾਦੇਤ੍ਵਾ ਅਪਸ੍ਸਿਤੁਂ ਨ ਲਭਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਚ੍ਚਤ੍ਥਰਿਤ੍ਵਾ ਨਿਪਜ੍ਜਿਤੁ’’ਨ੍ਤਿ (ਚੂਲ਼ਵ. ੩੨੫) ਵਚਨਤੋ ਪਨ ਧੋਤਪਾਦੇਹਿ ਅਕ੍ਕਮਿਤਬ੍ਬਂ, ਪਰਿਭਣ੍ਡਕਤਂ ਭੂਮਿਂ ਵਾ ਭੂਮਤ੍ਥਰਣਂ ਸੇਨਾਸਨਂ ਵਾ ਸਙ੍ਘਿਕਮਞ੍ਚਪੀਠਂ ਵਾ ਅਤ੍ਤਨੋ ਸਨ੍ਤਕੇਨ ਪਚ੍ਚਤ੍ਥਰਣੇਨ ਪਚ੍ਚਤ੍ਥਰਿਤ੍ਵਾਵ ਨਿਪਜ੍ਜਿਤਬ੍ਬਂ. ਸਚੇ ਨਿਦ੍ਦਾਯਤੋਪਿ ਪਚ੍ਚਤ੍ਥਰਣੇ ਸਙ੍ਕੁਟਿਤੇ ਕੋਚਿ ਸਰੀਰਾਵਯਵੋ ਮਞ੍ਚਂ ਵਾ ਪੀਠਂ ਵਾ ਫੁਸਤਿ, ਆਪਤ੍ਤਿਯੇਵ, ਲੋਮੇਸੁ ਪਨ ਫੁਸਨ੍ਤੇਸੁ ਲੋਮਗਣਨਾਯ ਆਪਤ੍ਤਿਯੋ. ਪਰਿਭੋਗਸੀਸੇਨ ਅਪਸ੍ਸਯਨ੍ਤਸ੍ਸਪਿ ਏਸੇਵ ਨਯੋ. ਹਤ੍ਥਤਲਪਾਦਤਲੇਹਿ ਪਨ ਫੁਸਿਤੁਂ ਅਕ੍ਕਮਿਤੁਂ ਵਾ ਵਟ੍ਟਤਿ, ਮਞ੍ਚਂ ਵਾ ਪੀਠਂ ਵਾ ਹਰਨ੍ਤਸ੍ਸ ਕਾਯੇ ਪਟਿਹਞ੍ਞਤਿ, ਅਨਾਪਤ੍ਤਿ.
੫੧. ‘‘ਦਸਯਿਮੇ, ਭਿਕ੍ਖਵੇ, ਅਵਨ੍ਦਿਯਾ. ਪੁਰੇਉਪਸਮ੍ਪਨ੍ਨੇਨ ਪਚ੍ਛੁਪਸਮ੍ਪਨ੍ਨੋ ਅਵਨ੍ਦਿਯੋ, ਅਨੁਪਸਮ੍ਪਨ੍ਨੋ ਅਵਨ੍ਦਿਯੋ, ਨਾਨਾਸਂਵਾਸਕੋ ਵੁਡ੍ਢਤਰੋ ਅਧਮ੍ਮਵਾਦੀ ਅਵਨ੍ਦਿਯੋ, ਮਾਤੁਗਾਮੋ ਅਵਨ੍ਦਿਯੋ, ਪਣ੍ਡਕੋ ਅਵਨ੍ਦਿਯੋ, ਪਾਰਿਵਾਸਿਕੋ ਅਵਨ੍ਦਿਯੋ, ਮੂਲਾਯਪਟਿਕਸ੍ਸਨਾਰਹੋ ਅਵਨ੍ਦਿਯੋ, ਮਾਨਤ੍ਤਾਰਹੋ ਅਵਨ੍ਦਿਯੋ, ਮਾਨਤ੍ਤਚਾਰਿਕੋ ਅਵਨ੍ਦਿਯੋ, ਅਬ੍ਭਾਨਾਰਹੋ ਅਵਨ੍ਦਿਯੋ’’ਤਿ (ਚੂਲ਼ਵ. ੩੧੨) ਵਚਨਤੋ ਇਮੇ ਦਸ ਅਵਨ੍ਦਿਯਾਤਿ ਵੇਦਿਤਬ੍ਬਾ.
‘‘ਪਚ੍ਛੁਪਸਮ੍ਪਨ੍ਨੇਨ ਪੁਰੇਉਪਸਮ੍ਪਨ੍ਨੋ ਵਨ੍ਦਿਯੋ, ਨਾਨਾਸਂਵਾਸਕੋ ਵੁਡ੍ਢਤਰੋ ਧਮ੍ਮਵਾਦੀ ਵਨ੍ਦਿਯੋ, ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਨ੍ਦਿਯੋ’’ਤਿ (ਚੂਲ਼ਵ. ੩੧੨) – ਵਚਨਤੋ ਇਮੇ ਤਯੋ ਵਨ੍ਦਿਤਬ੍ਬਾ.
੫੨. ‘‘ਅਨੁਜਾਨਾਮਿ, ਭਿਕ੍ਖਵੇ, ਤੀਣਿ ਤੂਲਾਨਿ ਰੁਕ੍ਖਤੂਲਂ ਲਤਾਤੂਲਂ ਪੋਟਕੀਤੂਲ’’ਨ੍ਤਿ (ਚੂਲ਼ਵ. ੨੯੭) ਵਚਨਤੋ ਇਮਾਨਿ ਤੀਣਿ ਤੂਲਾਨਿ ਕਪ੍ਪਿਯਾਨਿ. ਤਤ੍ਥ (ਚੂਲ਼ਵ. ਅਟ੍ਠ. ੨੯੭) ਰੁਕ੍ਖਤੂਲਨ੍ਤਿ ਸਿਮ੍ਬਲਿਰੁਕ੍ਖਾਦੀਨਂ ਯੇਸਂ ਕੇਸਞ੍ਚਿ ਰੁਕ੍ਖਾਨਂ ਤੂਲਂ. ਲਤਾਤੂਲਨ੍ਤਿ ਖੀਰਵਲ੍ਲਿਆਦੀਨਂ ਯਾਸਂ ਕਾਸਞ੍ਚਿ ਵਲ੍ਲੀਨਂ ਤੂਲਂ. ਪੋਟਕੀਤੂਲਨ੍ਤਿ ਪੋਟਕੀਤਿਣਾਦੀਨਂ ਯੇਸਂ ਕੇਸਞ੍ਚਿ ਤਿਣਜਾਤਿਕਾਨਂ ਅਨ੍ਤਮਸੋ ਉਚ੍ਛੁਨਲ਼ਾਦੀਨਮ੍ਪਿ ਤੂਲਂ. ਏਤੇਹਿ ਤੀਹਿ ਸਬ੍ਬਭੂਤਗਾਮਾ ਸਙ੍ਗਹਿਤਾ ਹੋਨ੍ਤਿ. ਰੁਕ੍ਖਵਲ੍ਲਿਤਿਣਜਾਤਿਯੋ ਹਿ ਮੁਞ੍ਚਿਤ੍ਵਾ ਅਞ੍ਞੋ ਭੂਤਗਾਮੋ ਨਾਮ ਨਤ੍ਥਿ, ਤਸ੍ਮਾ ਯਸ੍ਸ ਕਸ੍ਸਚਿ ਭੂਤਗਾਮਸ੍ਸ ਤੂਲਂ ਬਿਮ੍ਬੋਹਨੇ ਵਟ੍ਟਤਿ. ਭਿਸਿਂ ਪਨ ਪਾਪੁਣਿਤ੍ਵਾ ਸਬ੍ਬਮੇਤਂ ਅਕਪ੍ਪਿਯਤੂਲਨ੍ਤਿ ਵੁਚ੍ਚਤਿ. ਨ ਕੇਵਲਞ੍ਚ ਬਿਮ੍ਬੋਹਨੇ ਏਤਂ ਤੂਲਮੇਵ, ਹਂਸਮੋਰਾਦੀਨਂ ਸਬ੍ਬਸਕੁਣਾਨਂ ਸੀਹਾਦੀਨਂ ਸਬ੍ਬਚਤੁਪ੍ਪਦਾਨਞ੍ਚ ਲੋਮਮ੍ਪਿ ਵਟ੍ਟਤਿ, ਪਿਯਙ੍ਗੁਪੁਪ੍ਫਬਕੁਲਪੁਪ੍ਫਾਦੀਨਂ ਪਨ ਯਂ ਕਿਞ੍ਚਿ ਪੁਪ੍ਫਂ ਨ ਵਟ੍ਟਤਿ. ਤਮਾਲਪਤ੍ਤਂ ਸੁਦ੍ਧਮੇਵ ਨ ਵਟ੍ਟਤਿ, ਮਿਸ੍ਸਕਂ ਪਨ ਵਟ੍ਟਤਿ, ਭਿਸੀਨਂ ਅਨੁਞ੍ਞਾਤਂ ਪਞ੍ਚਵਿਧਂ ਉਣ੍ਣਾਦਿਤੂਲਮ੍ਪਿ ਵਟ੍ਟਤਿ.
੫੩. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚ ਭਿਸਿਯੋ ਉਣ੍ਣਭਿਸਿਂ ਚੋਲ਼ਭਿਸਿਂ ਵਾਕਭਿਸਿਂ ਤਿਣਭਿਸਿਂ ਪਣ੍ਣਭਿਸਿ’’ਨ੍ਤਿ (ਚੂਲ਼ਵ. ੨੯੭) ਵਚਨਤੋ ਪਞ੍ਚਹਿ ਉਣ੍ਣਾਦੀਹਿ ਪੂਰਿਤਾ ਪਞ੍ਚ ਭਿਸਿਯੋ ਅਨੁਞ੍ਞਾਤਾ. ਤੂਲਗਣਨਾਯ ਹਿ ਏਤਾਸਂ ਗਣਨਾ ਵੁਤ੍ਤਾ. ਤਤ੍ਥ ਉਣ੍ਣਗ੍ਗਹਣੇਨ ਨ ਕੇਵਲਂ ਏਲ਼ਕਲੋਮਮੇਵ ਗਹਿਤਂ, ਠਪੇਤ੍ਵਾ ਪਨ ਮਨੁਸ੍ਸਲੋਮਂ ਯਂ ਕਿਞ੍ਚਿ ਕਪ੍ਪਿਯਾਕਪ੍ਪਿਯਮਂਸਜਾਤੀਨਂ ਪਕ੍ਖਿਚਤੁਪ੍ਪਦਾਨਂ ਲੋਮਂ ਸਬ੍ਬਂ ਇਧ ਉਣ੍ਣਗ੍ਗਹਣੇਨੇਵ ਗਹਿਤਂ. ਤਸ੍ਮਾ ਛਨ੍ਨਂ ਚੀਵਰਾਨਂ ਛਨ੍ਨਂ ਅਨੁਲੋਮਚੀਵਰਾਨਞ੍ਚ ਅਞ੍ਞਤਰੇਨ ਭਿਸਿਚ੍ਛਵਿਂ ਕਤ੍ਵਾ ਤਂ ਸਬ੍ਬਂ ਪਕ੍ਖਿਪਿਤ੍ਵਾ ਭਿਸਿਂ ਕਾਤੁਂ ਵਟ੍ਟਤਿ. ਏਲ਼ਕਲੋਮਾਨਿ ਪਨ ਅਪਕ੍ਖਿਪਿਤ੍ਵਾ ਕਮ੍ਬਲਮੇਵ ਚਤੁਗ੍ਗੁਣਂ ਪਞ੍ਚਗੁਣਂ ਵਾ ਪਕ੍ਖਿਪਿਤ੍ਵਾ ਕਤਾਪਿ ਉਣ੍ਣਭਿਸਿਸਙ੍ਖ੍ਯਮੇਵ ਗਚ੍ਛਤਿ.
ਚੋਲ਼ਭਿਸਿਆਦੀਸੁ ਯਂ ਕਿਞ੍ਚਿ ਨਵਚੋਲ਼ਂ ਵਾ ਪੁਰਾਣਚੋਲ਼ਂ ਵਾ ਸਂਹਰਿਤ੍ਵਾ ਅਨ੍ਤੋ ਪਕ੍ਖਿਪਿਤ੍ਵਾ ਵਾ ਕਤਾ ਚੋਲ਼ਭਿਸਿ. ਯਂ ਕਿਞ੍ਚਿ ਵਾਕਂ ਪਕ੍ਖਿਪਿਤ੍ਵਾ ਕਤਾ ਵਾਕਭਿਸਿ. ਯਂ ਕਿਞ੍ਚਿ ਤਿਣਂ ਪਕ੍ਖਿਪਿਤ੍ਵਾ ਕਤਾ ਤਿਣਭਿਸਿ. ਅਞ੍ਞਤ੍ਰ ਸੁਦ੍ਧਤਮਾਲਪਤ੍ਤਾ ਯਂ ਕਿਞ੍ਚਿ ਪਣ੍ਣਂ ਪਕ੍ਖਿਪਿਤ੍ਵਾ ਕਤਾ ਪਣ੍ਣਭਿਸੀਤਿ ਵੇਦਿਤਬ੍ਬਾ. ਤਮਾਲਪਤ੍ਤਂ ਪਨ ਅਞ੍ਞੇਨ ਮਿਸ੍ਸਮੇਵ ਵਟ੍ਟਤਿ. ਸੁਦ੍ਧਂ ਨ ਵਟ੍ਟਤਿ. ਯਂ ਪਨੇਤਂ ਉਣ੍ਣਾਦਿਪਞ੍ਚਵਿਧਂ ਤੂਲਂ ਭਿਸਿਯਂ ਵਟ੍ਟਤਿ, ਤਂ ਮਸੂਰਕੇਪਿ ਵਟ੍ਟਤੀਤਿ ਕੁਰੁਨ੍ਦਿਯਂ ਵੁਤ੍ਤਂ. ਏਤੇਨ ਮਸੂਰਕਂ ਪਰਿਭੁਞ੍ਜਿਤੁਂ ਵਟ੍ਟਤੀਤਿ ਸਿਦ੍ਧਂ ਹੋਤਿ. ਭਿਸਿਯਾ ਪਮਾਣਨਿਯਮੋ ਨਤ੍ਥਿ, ਮਞ੍ਚਭਿਸਿ ਪੀਠਭਿਸਿ ਭੂਮਤ੍ਥਰਣਭਿਸਿ ਚਙ੍ਕਮਨਭਿਸਿ ਪਾਦਪੁਞ੍ਛਨਭਿਸੀਤਿ ਏਤਾਸਂ ਅਨੁਰੂਪਤੋ ਸਲ੍ਲਕ੍ਖੇਤ੍ਵਾ ਅਤ੍ਤਨੋ ਰੁਚਿਵਸੇਨ ਪਮਾਣਂ ਕਾਤਬ੍ਬਂ. ਬਿਮ੍ਬੋਹਨਂ ਪਨ ਪਮਾਣਯੁਤ੍ਤਮੇਵ ਵਟ੍ਟਤਿ.
੫੪. ‘‘ਨ, ਭਿਕ੍ਖਵੇ, ਅਡ੍ਢਕਾਯਿਕਾਨਿ ਬਿਮ੍ਬੋਹਨਾਨਿ ਧਾਰੇਤਬ੍ਬਾਨਿ, ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੯੭) ਯੇਸੁ ਕਟਿਤੋ ਪਟ੍ਠਾਯ ਯਾਵ ਸੀਸਂ ਉਪਦਹਨ੍ਤਿ, ਤਾਦਿਸਾਨਿ ਉਪਡ੍ਢਕਾਯਪ੍ਪਮਾਣਾਨਿ ਬਿਮ੍ਬੋਹਨਾਨਿ ਪਟਿਕ੍ਖਿਪਿਤ੍ਵਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਸੀਸਪ੍ਪਮਾਣਂ ਬਿਮ੍ਬੋਹਨ’’ਨ੍ਤਿ (ਚੂਲ਼ਵ. ੨੯੭) ਸੀਸਪ੍ਪਮਾਣਂ ਅਨੁਞ੍ਞਾਤਂ. ਸੀਸਪ੍ਪਮਾਣਂ ਨਾਮ ਯਸ੍ਸ ਵਿਤ੍ਥਾਰਤੋ ਤੀਸੁ ਕਣ੍ਣੇਸੁ ਦ੍ਵਿਨ੍ਨਂ ਕਣ੍ਣਾਨਂ ਅਨ੍ਤਰਂ ਮਿਨਿਯਮਾਨਂ ਵਿਦਤ੍ਥਿ ਚੇਵ ਚਤੁਰਙ੍ਗੁਲਞ੍ਚ ਹੋਤਿ, ਮਜ੍ਝਟ੍ਠਾਨਂ ਮੁਟ੍ਠਿਰਤਨਂ ਹੋਤਿ. ‘‘ਦੀਘਤੋ ਪਨ ਦਿਯਡ੍ਢਰਤਨਂ ਵਾ ਦ੍ਵਿਰਤਨਂ ਵਾ’’ਤਿ ਕੁਰੁਨ੍ਦਿਯਂ ਵੁਤ੍ਤਂ. ਅਯਂ ਸੀਸਪ੍ਪਮਾਣਸ੍ਸ ਉਕ੍ਕਟ੍ਠਪਰਿਚ੍ਛੇਦੋ, ਇਤੋ ਉਦ੍ਧਂ ਨ ਵਟ੍ਟਤਿ, ਹੇਟ੍ਠਾ ਵਟ੍ਟਤਿ. ਅਗਿਲਾਨਸ੍ਸ ਸੀਸੂਪਧਾਨਞ੍ਚ ਪਾਦੂਪਧਾਨਞ੍ਚਾਤਿ ਦ੍ਵਯਮੇਵ ਵਟ੍ਟਤਿ, ਗਿਲਾਨਸ੍ਸ ਬਿਮ੍ਬੋਹਨਾਨਿ ਸਨ੍ਥਰਿਤ੍ਵਾ ਉਪਰਿ ਪਚ੍ਚਤ੍ਥਰਣਂ ਦਤ੍ਵਾ ਨਿਪਜ੍ਜਿਤੁਮ੍ਪਿ ਵਟ੍ਟਤਿ. ‘‘ਯਾਨਿ ਪਨ ਭਿਸੀਨਂ ਅਨੁਞ੍ਞਾਤਾਨਿ ਪਞ੍ਚ ਕਪ੍ਪਿਯਤੂਲਾਨਿ, ਤੇਹਿ ਬਿਮ੍ਬੋਹਨਂ ਮਹਨ੍ਤਮ੍ਪਿ ਵਟ੍ਟਤੀ’’ਤਿ ਫੁਸ੍ਸਦੇਵਤ੍ਥੇਰੋ ਆਹ. ਵਿਨਯਧਰਉਪਤਿਸ੍ਸਤ੍ਥੇਰੋ ਪਨ ‘‘ਬਿਮ੍ਬੋਹਨਂ ਕਰਿਸ੍ਸਾਮੀਤਿ ਕਪ੍ਪਿਯਤੂਲਂ ਵਾ ਅਕਪ੍ਪਿਯਤੂਲਂ ਵਾ ਪਕ੍ਖਿਪਿਤ੍ਵਾ ਕਰੋਨ੍ਤਸ੍ਸ ਪਮਾਣਮੇਵ ਵਟ੍ਟਤੀ’’ਤਿ ਆਹ.
੫੫. ‘‘ਅਨੁਜਾਨਾਮਿ, ਭਿਕ੍ਖਵੇ, ਆਸਨ੍ਦਿਕ’’ਨ੍ਤਿ (ਚੂਲ਼ਵ. ੨੯੭) ਵਚਨਤੋ ਚਤੁਰਸ੍ਸਪੀਠਸਙ੍ਖਾਤੋ ਆਸਨ੍ਦਿਕੋ ਵਟ੍ਟਤਿ, ਸੋ ਚ ‘‘ਅਨੁਜਾਨਾਮਿ, ਭਿਕ੍ਖਵੇ, ਉਚ੍ਚਕਮ੍ਪਿ ਆਸਨ੍ਦਿਕ’’ਨ੍ਤਿ (ਚੂਲ਼ਵ. ੨੯੭) ਵਚਨਤੋ ਅਟ੍ਠਙ੍ਗੁਲਤੋ ਉਚ੍ਚਪਾਦਕੋਪਿ ਵਟ੍ਟਤਿ. ਏਕਤੋਭਾਗੇਨ ਦੀਘਪੀਠਮੇਵ ਹਿ ਅਟ੍ਠਙ੍ਗੁਲਤੋ ਉਚ੍ਚਪਾਦਕਂ ਨ ਵਟ੍ਟਤਿ, ਤਸ੍ਮਾ ਚਤੁਰਸ੍ਸਪੀਠਂ ਪਮਾਣਾਤਿਕ੍ਕਨ੍ਤਮ੍ਪਿ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਤ੍ਤਙ੍ਗ’’ਨ੍ਤਿ (ਚੂਲ਼ਵ. ੨੯੭) ਵਚਨਤੋ ਤੀਸੁ ਦਿਸਾਸੁ ਅਪਸ੍ਸਯਂ ਕਤ੍ਵਾ ਕਤਮਞ੍ਚੋਪਿ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਚ੍ਚਕਮ੍ਪਿ ਸਤ੍ਤਙ੍ਗ’’ਨ੍ਤਿ (ਚੂਲ਼ਵ. ੨੯੭) ਵਚਨਤੋ ਅਯਮ੍ਪਿ ਪਮਾਣਾਤਿਕ੍ਕਨ੍ਤੋ ਚ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਦ੍ਦਪੀਠ’’ਨ੍ਤਿਆਦਿਨਾ (ਚੂਲ਼ਵ. ੨੯੭) ਪਾਲ਼ਿਯਂ ਅਨੁਞ੍ਞਾਤਂ ਵੇਤ੍ਤਮਯਪੀਠਂ ਪਿਲੋਤਿਕਾਬਦ੍ਧਪੀਠਂ ਦਾਰੁਪਟ੍ਟਿਕਾਯ ਉਪਰਿ ਪਾਦੇ ਠਪੇਤ੍ਵਾ ਭੋਜਨਫਲਕਂ ਵਿਯ ਕਤਂ ਏਲ਼ਕਪਾਦਪੀਠਂ ਆਮਲਕਾਕਾਰੇਨ ਯੋਜਿਤਂ ਬਹੁਪਾਦਕਂ ਆਮਣ੍ਡਕਵਟ੍ਟਿਕਪੀਠਂ ਪਲਾਲਪੀਠਂ ਫਲਕਪੀਠਞ੍ਚ ਪਾਲ਼ਿਯਂ ਅਨਾਗਤਞ੍ਚ ਅਞ੍ਞਮ੍ਪਿ ਯਂ ਕਿਞ੍ਚਿ ਦਾਰੁਮਯਪੀਠਂ ਵਟ੍ਟਤਿ.
‘‘ਨ, ਭਿਕ੍ਖਵੇ, ਉਚ੍ਚੇ ਮਞ੍ਚੇ ਸਯਿਤਬ੍ਬਂ, ਯੋ ਸਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੨੯੭) ਵਚਨਤੋ ਪਮਣਾਤਿਕ੍ਕਨ੍ਤੇ ਮਞ੍ਚੇ ਸਯਨ੍ਤਸ੍ਸ ਦੁਕ੍ਕਟਂ, ਤਂ ਪਨ ਕਰੋਨ੍ਤਸ੍ਸ ਕਾਰਾਪੇਨ੍ਤਸ੍ਸ ਚ ਛੇਦਨਕਂ ਪਾਚਿਤ੍ਤਿਯਂ. ਅਞ੍ਞੇਨ ਕਤਂ ਪਟਿਲਭਿਤ੍ਵਾ ਪਰਿਭੁਞ੍ਜਨ੍ਤੇਨ ਛਿਨ੍ਦਿਤ੍ਵਾ ਪਰਿਭੁਞ੍ਜਿਤਬ੍ਬਂ. ਸਚੇ ਨ ਛਿਨ੍ਦਿਤੁਕਾਮੋ ਹੋਤਿ, ਭੂਮਿਯਂ ਨਿਖਨਿਤ੍ਵਾ ਪਮਾਣਂ ਉਪਰਿ ਦਸ੍ਸੇਤਿ, ਉਤ੍ਤਾਨਕਂ ਵਾ ਕਤ੍ਵਾ ਪਰਿਭੁਞ੍ਜਤਿ, ਉਕ੍ਖਿਪਿਤ੍ਵਾ ਤੁਲਾਸਙ੍ਘਾਟੇ ਠਪੇਤ੍ਵਾ ਅਟ੍ਟਂ ਕਤ੍ਵਾ ਪਰਿਭੁਞ੍ਜਤਿ, ਵਟ੍ਟਤਿ. ‘‘ਨ, ਭਿਕ੍ਖਵੇ, ਉਚ੍ਚਾ ਮਞ੍ਚਪਟਿਪਾਦਕਾ ਧਾਰੇਤਬ੍ਬਾ, ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਅਟ੍ਠਙ੍ਗੁਲਪਰਮਂ ਮਞ੍ਚਪਟਿਪਾਦਕ’’ਨ੍ਤਿ (ਚੂਲ਼ਵ. ੨੯੭) ਵਚਨਤੋ ਮਨੁਸ੍ਸਾਨਂ ਪਮਾਣਙ੍ਗੁਲੇਨ ਅਟ੍ਠਙ੍ਗੁਲਪਰਮੋਵ ਮਞ੍ਚਪਟਿਪਾਦਕੋ ਵਟ੍ਟਤਿ, ਤਤੋ ਉਦ੍ਧਂ ਨ ਵਟ੍ਟਤਿ.
੫੬. ‘‘ਨ, ਭਿਕ੍ਖਵੇ, ਉਚ੍ਚਾਸਯਨਮਹਾਸਯਨਾਨਿ ਧਾਰੇਤਬ੍ਬਾਨਿ, ਸੇਯ੍ਯਥਿਦਂ, ਆਸਨ੍ਦਿ ਪਲ੍ਲਙ੍ਕੋ ਗੋਨਕੋ ਚਿਤ੍ਤਕੋ ਪਟਿਕਾ ਪਟਲਿਕਾ ਤੂਲਿਕਾ ਵਿਕਤਿਕਾ ਉਦ੍ਦਲੋਮਿ ਏਕਨ੍ਤਲੋਮਿ ਕਟ੍ਟਿਸ੍ਸਂ ਕੋਸੇਯ੍ਯਂ ਕੁਤ੍ਤਕਂ ਹਤ੍ਥਤ੍ਥਰਂ ਅਸ੍ਸਤ੍ਥਰਂ ਰਥਤ੍ਥਰਂ ਅਜਿਨਪਵੇਣੀ ਕਦਲਿਮਿਗਪਵਰਪਚ੍ਚਤ੍ਥਰਣਂ ਸਉਤ੍ਤਰਚ੍ਛਦਂ ਉਭਤੋਲੋਹਿਤਕੂਪਧਾਨਂ, ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੨੫੪) ਵਚਨਤੋ ਉਚ੍ਚਾਸਯਨਮਹਾਸਯਨਾਨਿ ਨ ਵਟ੍ਟਨ੍ਤਿ. ਤਤ੍ਥ (ਮਹਾਵ. ਅਟ੍ਠ. ੨੫੪) ਉਚ੍ਚਾਸਯਨਂ ਨਾਮ ਪਮਾਣਾਤਿਕ੍ਕਨ੍ਤਂ ਮਞ੍ਚਂ. ਮਹਾਸਯਨਂ ਨਾਮ ਅਕਪ੍ਪਿਯਤ੍ਥਰਣਂ. ਆਸਨ੍ਦਿਆਦੀਸੁ ਆਸਨ੍ਦੀਤਿ ਪਮਾਣਾਤਿਕ੍ਕਨ੍ਤਾਸਨਂ. ਪਲ੍ਲਙ੍ਕੋਤਿ ਪਾਦੇਸੁ ਵਾਲ਼ਰੂਪਾਨਿ ਠਪੇਤ੍ਵਾ ਕਤੋ. ਗੋਨਕੋਤਿ ਦੀਘਲੋਮਕੋ ਮਹਾਕੋਜਵੋ. ਚਤੁਰਙ੍ਗੁਲਾਧਿਕਾਨਿ ਕਿਰ ਤਸ੍ਸ ਲੋਮਾਨਿ. ਚਿਤ੍ਤਕੋਤਿ ਰਤਨਚਿਤ੍ਰਉਣ੍ਣਾਮਯਤ੍ਥਰਕੋ. ਪਟਿਕਾਤਿ ਉਣ੍ਣਾਮਯੋ ਸੇਤਤ੍ਥਰਕੋ. ਪਟਲਿਕਾਤਿ ਘਨਪੁਪ੍ਫਕੋ ਉਣ੍ਣਾਮਯਲੋਮਤ੍ਥਰਕੋ, ਯੋ ‘‘ਆਮਲਕਪਟੋ’’ਤਿਪਿ ਵੁਚ੍ਚਤਿ. ਤੂਲਿਕਾਤਿ ਪਕਤਿਤੂਲਿਕਾਯੇਵ. ਵਿਕਤਿਕਾਤਿ ਸੀਹਬ੍ਯਗ੍ਘਾਦਿਰੂਪਵਿਚਿਤ੍ਰੋ ਉਣ੍ਣਾਮਯਤ੍ਥਰਕੋ. ਉਦ੍ਦਲੋਮੀਤਿ ਏਕਤੋ ਉਗ੍ਗਤਲੋਮਂ ਉਣ੍ਣਾਮਯਤ੍ਥਰਣਂ. ਏਕਨ੍ਤਲੋਮੀਤਿ ਉਭਤੋ ਉਗ੍ਗਤਲੋਮਂ ਉਣ੍ਣਾਮਯਤ੍ਥਰਣਂ. ਕਟ੍ਟਿਸ੍ਸਨ੍ਤਿ ਰਤਨਪਰਿਸਿਬ੍ਬਿਤਂ ਕੋਸੇਯ੍ਯਕਟ੍ਟਿਸ੍ਸਮਯਂ ਪਚ੍ਚਤ੍ਥਰਣਂ. ਕੋਸੇਯ੍ਯਨ੍ਤਿ ਰਤਨਪਰਿਸਿਬ੍ਬਿਤਂ ਕੋਸਿਯਸੁਤ੍ਤਮਯਂ ਪਚ੍ਚਤ੍ਥਰਣਂ, ਸੁਦ੍ਧਕੋਸੇਯ੍ਯਂ ਪਨ ਵਟ੍ਟਤਿ.
ਕੁਤ੍ਤਕਨ੍ਤਿ ਸੋਲ਼ਸਨ੍ਨਂ ਨਾਟਕਿਤ੍ਥੀਨਂ ਠਤ੍ਵਾ ਨਚ੍ਚਨਯੋਗ੍ਗਂ ਉਣ੍ਣਾਮਯਤ੍ਥਰਣਂ. ਹਤ੍ਥਤ੍ਥਰਅਸ੍ਸਤ੍ਥਰਾ ਹਤ੍ਥਿਅਸ੍ਸਪਿਟ੍ਠੀਸੁ ਅਤ੍ਥਰਣਕਅਤ੍ਥਰਣਾ ਏਵ. ਰਥਤ੍ਥਰੇਪਿ ਏਸੇਵ ਨਯੋ. ਅਜਿਨਪਵੇਣੀਤਿ ਅਜਿਨਚਮ੍ਮੇਹਿ ਮਞ੍ਚਪ੍ਪਮਾਣੇਨ ਸਿਬ੍ਬਿਤ੍ਵਾ ਕਤਾ ਪਵੇਣੀ. ਕਦਲਿਮਿਗਪਵਰਪਚ੍ਚਤ੍ਥਰਣਨ੍ਤਿ ਕਦਲਿਮਿਗਚਮ੍ਮਂ ਨਾਮ ਅਤ੍ਥਿ, ਤੇਨ ਕਤਂ ਪਵਰਪਚ੍ਚਤ੍ਥਰਣਨ੍ਤਿ ਅਤ੍ਥੋ. ਤਂ ਕਿਰ ਸੇਤਵਤ੍ਥਸ੍ਸ ਉਪਰਿ ਕਦਲਿਮਿਗਚਮ੍ਮਂ ਪਤ੍ਥਰਿਤ੍ਵਾ ਸਿਬ੍ਬਿਤ੍ਵਾ ਕਰੋਨ੍ਤਿ. ਸਉਤ੍ਤਰਚ੍ਛਦਨ੍ਤਿ ਸਹ ਉਤ੍ਤਰਚ੍ਛਦੇਨ, ਉਪਰਿਬਦ੍ਧੇਨ ਰਤ੍ਤਵਿਤਾਨੇਨ ਸਦ੍ਧਿਨ੍ਤਿ ਅਤ੍ਥੋ. ਸੇਤਵਿਤਾਨਮ੍ਪਿ ਹੇਟ੍ਠਾ ਅਕਪ੍ਪਿਯਪਚ੍ਚਤ੍ਥਰਣੇ ਸਤਿ ਨ ਵਟ੍ਟਤਿ, ਅਸਤਿ ਪਨ ਵਟ੍ਟਤਿ. ਉਭਤੋਲੋਹਿਤਕੂਪਧਾਨਨ੍ਤਿ ਸੀਸੂਪਧਾਨਞ੍ਚ ਪਾਦੂਪਧਾਨਞ੍ਚਾਤਿ ਮਞ੍ਚਸ੍ਸ ਉਭਤੋਲੋਹਿਤਕੂਪਧਾਨਂ, ਏਤਂ ਨ ਕਪ੍ਪਤਿ. ਯਂ ਪਨ ਏਕਮੇਵ ਉਪਧਾਨਂ ਉਭੋਸੁ ਪਸ੍ਸੇਸੁ ਰਤ੍ਤਂ ਵਾ ਹੋਤੁ ਪਦੁਮਵਣ੍ਣਂ ਵਾ ਵਿਚਿਤ੍ਰਂ ਵਾ, ਸਚੇ ਪਮਾਣਯੁਤ੍ਤਂ, ਵਟ੍ਟਤਿ, ਮਹਾਉਪਧਾਨਂ ਪਨ ਪਟਿਕ੍ਖਿਤ੍ਤਂ. ਗੋਨਕਾਦੀਨਿ (ਚੂਲ਼ਵ. ਅਟ੍ਠ. ੩੨੦) ਸਙ੍ਘਿਕਵਿਹਾਰੇ ਵਾ ਪੁਗ੍ਗਲਿਕਵਿਹਾਰੇ ਵਾ ਮਞ੍ਚਪੀਠਕੇਸੁ ਅਤ੍ਥਰਿਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਨ੍ਤਿ, ਧਮ੍ਮਾਸਨੇ ਪਨ ਗਿਹਿਵਿਕਤਨੀਹਾਰੇਨ ਲਬ੍ਭਨ੍ਤਿ, ਤਤ੍ਰਾਪਿ ਨਿਪਜ੍ਜਿਤੁਂ ਨ ਵਟ੍ਟਤਿ.
‘‘ਅਨੁਜਾਨਾਮਿ, ਭਿਕ੍ਖਵੇ, ਠਪੇਤ੍ਵਾ ਤੀਣਿ ਆਸਨ੍ਦਿਂ ਪਲ੍ਲਙ੍ਕਂ ਤੂਲਿਕਂ ਗਿਹਿਵਿਕਤਂ ਅਭਿਨਿਸੀਦਿਤੁਂ, ਨ ਤ੍ਵੇਵ ਅਭਿਨਿਪਜ੍ਜਿਤੁ’’ਨ੍ਤਿ (ਚੂਲ਼ਵ. ੩੧੪) – ਵਚਨਤੋ ਆਸਨ੍ਦਾਦਿਤ੍ਤਯਂ ਠਪੇਤ੍ਵਾ ਅਵਸੇਸੇਸੁ ਗੋਨਕਾਦੀਸੁ ਗਿਹਿਵਿਕਤੇਸੁ ਧਮ੍ਮਾਸਨੇ ਵਾ ਭਤ੍ਤਗ੍ਗੇ ਵਾ ਅਨ੍ਤਰਘਰੇ ਵਾ ਨਿਸੀਦਿਤੁਂ ਵਟ੍ਟਤਿ, ਨਿਪਜ੍ਜਿਤੁਂ ਨ ਵਟ੍ਟਤਿ. ਤੂਲੋਨਦ੍ਧਂ ਪਨ ਮਞ੍ਚਪੀਠਂ ਭਤ੍ਤਗ੍ਗੇ ਅਨ੍ਤਰਘਰੇਯੇਵ ਨਿਸੀਦਿਤੁਂ ਵਟ੍ਟਤਿ, ਤਤ੍ਥਾਪਿ ਨਿਪਜ੍ਜਿਤੁਂ ਵਟ੍ਟਤਿ. ਤੂਲੋਨਦ੍ਧਂ ਪਨ ਮਞ੍ਚਪੀਠਂ ਕਾਰਾਪੇਨ੍ਤਸ੍ਸਪਿ ਉਦ੍ਦਾਲਨਕਂ ਪਾਚਿਤ੍ਤਿਯਂ.
‘‘ਅਨੁਜਾਨਾਮਿ, ਭਿਕ੍ਖਵੇ, ਓਨਦ੍ਧਮਞ੍ਚਂ ਓਨਦ੍ਧਪੀਠ’’ਨ੍ਤਿ (ਚੂਲ਼ਵ. ੨੯੭) ਵਚਨਤੋ ਪਨ ਚਮ੍ਮਾਦੀਹਿ ਓਨਦ੍ਧਂ ਮਞ੍ਚਪੀਠਂ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਾਵਾਰਂ. ਅਨੁਜਾਨਾਮਿ, ਭਿਕ੍ਖਵੇ, ਕੋਸੇਯ੍ਯਪਾਵਾਰਂ. ਅਨੁਜਾਨਾਮਿ, ਭਿਕ੍ਖਵੇ, ਕੋਜਵਂ. ਅਨੁਜਾਨਾਮਿ, ਭਿਕ੍ਖਵੇ, ਕਮ੍ਬਲ’’ਨ੍ਤਿ (ਮਹਾਵ. ੩੩੭-੩੩੮) – ਵਚਨਤੋ ਪਾਵਾਰਾਦੀਨਿ ਸਙ੍ਘਿਕਾਨਿ ਵਾ ਹੋਨ੍ਤੁ ਪੁਗ੍ਗਲਿਕਾਨਿ ਵਾ, ਯਥਾਸੁਖਂ ਵਿਹਾਰੇ ਵਾ ਅਨ੍ਤਰਘਰੇ ਵਾ ਯਤ੍ਥ ਕਤ੍ਥਚਿ ਪਰਿਭੁਞ੍ਜਿਤੁਂ ਵਟ੍ਟਨ੍ਤਿ. ਕੋਜਵਂ ਪਨੇਤ੍ਥ ਪਕਤਿਕੋਜਵਮੇਵ ਵਟ੍ਟਤਿ, ਮਹਾਪਿਟ੍ਠਿਯਕੋਜਵਂ ਨ ਵਟ੍ਟਤਿ.
‘‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਂ ਪਾਸਾਦਪਰਿਭੋਗ’’ਨ੍ਤਿ (ਚੂਲ਼ਵ. ੩੨੦) ਵਚਨਤੋ ਸੁਵਣ੍ਣਰਜਤਾਦਿਵਿਚਿਤ੍ਰਾਨਿ (ਚੂਲ਼ਵ. ਅਟ੍ਠ. ੩੨੦) ਕਵਾਟਾਨਿ ਮਞ੍ਚਪੀਠਾਨਿ ਤਾਲਵਣ੍ਟਾਨਿ ਸੁਵਣ੍ਣਰਜਤਯੋਨਿ ਪਾਨੀਯਘਟਪਾਨੀਯਸਰਾਵਾਨਿ, ਯਂ ਕਿਞ੍ਚਿ ਚਿਤ੍ਤਕਮ੍ਮਕਤਂ, ਸਬ੍ਬਂ ਸੇਨਾਸਨਪਰਿਭੋਗੇ ਵਟ੍ਟਤਿ. ‘‘ਪਾਸਾਦਸ੍ਸ ਦਾਸਿਦਾਸਂ ਖੇਤ੍ਤਵਤ੍ਥੁਂ ਗੋਮਹਿਂਸਂ ਦੇਮਾ’’ਤਿ ਵਦਨ੍ਤਿ, ਪਾਟੇਕ੍ਕਂ ਗਹਣਕਿਚ੍ਚਂ ਨਤ੍ਥਿ, ਪਾਸਾਦੇ ਪਟਿਗ੍ਗਹਿਤੇ ਪਟਿਗ੍ਗਹਿਤਮੇਵ ਹੋਤਿ.