੩੩. ਕਮ੍ਮਾਕਮ੍ਮਵਿਨਿਚ੍ਛਯਕਥਾ
੨੪੯. ਕਮ੍ਮਾਕਮ੍ਮਨ੍ਤਿ ਏਤ੍ਥ (ਪਰਿ. ੪੮੨-੪੮੪) ਪਨ ਕਮ੍ਮਾਨਿ ਚਤ੍ਤਾਰਿ – ਅਪਲੋਕਨਕਮ੍ਮਂ ਞਤ੍ਤਿਕਮ੍ਮਂ ਞਤ੍ਤਿਦੁਤਿਯਕਮ੍ਮਂ ਞਤ੍ਤਿਚਤੁਤ੍ਥਕਮ੍ਮਨ੍ਤਿ. ਇਮਾਨਿ ਚਤ੍ਤਾਰਿ ਕਮ੍ਮਾਨਿ ਕਤਿਹਾਕਾਰੇਹਿ ਵਿਪਜ੍ਜਨ੍ਤਿ? ਪਞ੍ਚਹਾਕਾਰੇਹਿ ਵਿਪਜ੍ਜਨ੍ਤਿ – ਵਤ੍ਥੁਤੋ ਵਾ ਞਤ੍ਤਿਤੋ ਵਾ ਅਨੁਸ੍ਸਾਵਨਤੋ ਵਾ ਸੀਮਤੋ ਵਾ ਪਰਿਸਤੋ ਵਾ.
ਕਥਂ ਵਤ੍ਥੁਤੋ ਕਮ੍ਮਾਨਿ ਵਿਪਜ੍ਜਨ੍ਤਿ? ਸਮ੍ਮੁਖਾਕਰਣੀਯਂ ਕਮ੍ਮਂ ਅਸਮ੍ਮੁਖਾ ਕਰੋਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਪਟਿਪੁਚ੍ਛਾਕਰਣੀਯਂ ਕਮ੍ਮਂ ਅਪਟਿਪੁਚ੍ਛਾ ਕਰੋਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਪਟਿਞ੍ਞਾਯ ਕਰਣੀਯਂ ਕਮ੍ਮਂ ਅਪਟਿਞ੍ਞਾਯ ਕਰੋਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਸਤਿਵਿਨਯਾਰਹਸ੍ਸ ਅਮੂਲ਼੍ਹਵਿਨਯਂ ਦੇਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਅਮੂਲ਼੍ਹਵਿਨਯਾਰਹਸ੍ਸ ਤਸ੍ਸ ਪਾਪਿਯਸਿਕਕਮ੍ਮਂ ਕਰੋਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਤਸ੍ਸ ਪਾਪਿਯਸਿਕਕਮ੍ਮਾਰਹਸ੍ਸ ਤਜ੍ਜਨੀਯਕਮ੍ਮਂ ਕਰੋਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਤਜ੍ਜਨੀਯਕਮ੍ਮਾਰਹਸ੍ਸ ਨਿਯਸ੍ਸਕਮ੍ਮਂ ਕਰੋਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਨਿਯਸ੍ਸਕਮ੍ਮਾਰਹਸ੍ਸ ਪਬ੍ਬਾਜਨੀਯਕਮ੍ਮਂ ਕਰੋਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਪਬ੍ਬਾਜਨੀਯਕਮ੍ਮਾਰਹਸ੍ਸ ਪਟਿਸਾਰਣੀਯਕਮ੍ਮਂ ਕਰੋਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਪਟਿਸਾਰਣੀਯਕਮ੍ਮਾਰਹਸ੍ਸ ਉਕ੍ਖੇਪਨੀਯਕਮ੍ਮਂ ਕਰੋਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਉਕ੍ਖੇਪਨੀਯਕਮ੍ਮਾਰਹਸ੍ਸ ਪਰਿਵਾਸਂ ਦੇਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਪਰਿਵਾਸਾਰਹਸ੍ਸ ਮੂਲਾਯ ਪਟਿਕਸ੍ਸਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਮੂਲਾਯਪਟਿਕਸ੍ਸਨਾਰਹਸ੍ਸ ਮਾਨਤ੍ਤਂ ਦੇਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਮਾਨਤ੍ਤਾਰਹਂ ਅਬ੍ਭੇਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਅਬ੍ਭਾਨਾਰਹਂ ਉਪਸਮ੍ਪਾਦੇਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਅਨੁਪੋਸਥੇ ਉਪੋਸਥਂ ਕਰੋਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਅਪਵਾਰਣਾਯ ਪਵਾਰੇਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਪਣ੍ਡਕਂ ਉਪਸਮ੍ਪਾਦੇਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਥੇਯ੍ਯਸਂਵਾਸਕਂ, ਤਿਤ੍ਥਿਯਪਕ੍ਕਨ੍ਤਕਂ, ਤਿਰਚ੍ਛਾਨਗਤਂ, ਮਾਤੁਘਾਤਕਂ, ਪਿਤੁਘਾਤਕਂ, ਅਰਹਨ੍ਤਘਾਤਕਂ, ਭਿਕ੍ਖੁਨਿਦੂਸਕਂ, ਸਙ੍ਘਭੇਦਕਂ, ਲੋਹਿਤੁਪ੍ਪਾਦਕਂ, ਉਭਤੋਬ੍ਯਞ੍ਜਨਕਂ, ਊਨਵੀਸਤਿਵਸ੍ਸਂ ਪੁਗ੍ਗਲਂ ਉਪਸਮ੍ਪਾਦੇਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ. ਏਵਂ ਵਤ੍ਥੁਤੋ ਕਮ੍ਮਾਨਿ ਵਿਪਜ੍ਜਨ੍ਤਿ.
ਕਥਂ ਞਤ੍ਤਿਤੋ ਕਮ੍ਮਾਨਿ ਵਿਪਜ੍ਜਨ੍ਤਿ? ਪਞ੍ਚਹਾਕਾਰੇਹਿ ਞਤ੍ਤਿਤੋ ਕਮ੍ਮਾਨਿ ਵਿਪਜ੍ਜਨ੍ਤਿ – ਵਤ੍ਥੁਂ ਨ ਪਰਾਮਸਤਿ, ਸਙ੍ਘਂ ਨ ਪਰਾਮਸਤਿ, ਪੁਗ੍ਗਲਂ ਨ ਪਰਾਮਸਤਿ, ਞਤ੍ਤਿਂ ਨ ਪਰਾਮਸਤਿ, ਪਚ੍ਛਾ ਵਾ ਞਤ੍ਤਿਂ ਠਪੇਤਿ. ਇਮੇਹਿ ਪਞ੍ਚਹਾਕਾਰੇਹਿ ਞਤ੍ਤਿਤੋ ਕਮ੍ਮਾਨਿ ਵਿਪਜ੍ਜਨ੍ਤਿ.
ਕਥਂ ਅਨੁਸ੍ਸਾਵਨਤੋ ਕਮ੍ਮਾਨਿ ਵਿਪਜ੍ਜਨ੍ਤਿ? ਪਞ੍ਚਹਾਕਾਰੇਹਿ ਅਨੁਸ੍ਸਾਵਨਤੋ ਕਮ੍ਮਾਨਿ ਵਿਪਜ੍ਜਨ੍ਤਿ – ਵਤ੍ਥੁਂ ਨ ਪਰਾਮਸਤਿ, ਸਙ੍ਘਂ ਨ ਪਰਾਮਸਤਿ, ਪੁਗ੍ਗਲਂ ਨ ਪਰਾਮਸਤਿ, ਸਾਵਨਂ ਹਾਪੇਤਿ, ਅਕਾਲੇ ਵਾ ਸਾਵੇਤਿ. ਇਮੇਹਿ ਪਞ੍ਚਹਾਕਾਰੇਹਿ ਅਨੁਸ੍ਸਾਵਨਤੋ ਕਮ੍ਮਾਨਿ ਵਿਪਜ੍ਜਨ੍ਤਿ.
ਕਥਂ ਸੀਮਤੋ ਕਮ੍ਮਾਨਿ ਵਿਪਜ੍ਜਨ੍ਤਿ? ਏਕਾਦਸਹਿ ਆਕਾਰੇਹਿ ਸੀਮਤੋ ਕਮ੍ਮਾਨਿ ਵਿਪਜ੍ਜਨ੍ਤਿ – ਅਤਿਖੁਦ੍ਦਕਂ ਸੀਮਂ ਸਮ੍ਮਨ੍ਨਤਿ, ਅਤਿਮਹਤਿਂ ਸੀਮਂ ਸਮ੍ਮਨ੍ਨਤਿ, ਖਣ੍ਡਨਿਮਿਤ੍ਤਂ ਸੀਮਂ ਸਮ੍ਮਨ੍ਨਤਿ, ਛਾਯਾਨਿਮਿਤ੍ਤਂ ਸੀਮਂ ਸਮ੍ਮਨ੍ਨਤਿ, ਅਨਿਮਿਤ੍ਤਂ ਸੀਮਂ ਸਮ੍ਮਨ੍ਨਤਿ, ਬਹਿਸੀਮੇ ਠਿਤੋ ਸੀਮਂ ਸਮ੍ਮਨ੍ਨਤਿ, ਨਦਿਯਾ ਸੀਮਂ ਸਮ੍ਮਨ੍ਨਤਿ, ਸਮੁਦ੍ਦੇ ਸੀਮਂ ਸਮ੍ਮਨ੍ਨਤਿ, ਜਾਤਸ੍ਸਰੇ ਸੀਮਂ ਸਮ੍ਮਨ੍ਨਤਿ, ਸੀਮਾਯ ਸੀਮਂ ਸਮ੍ਭਿਨ੍ਦਤਿ, ਸੀਮਾਯ ਸੀਮਂ ਅਜ੍ਝੋਤ੍ਥਰਤਿ. ਇਮੇਹਿ ਏਕਾਦਸਹਿ ਆਕਾਰੇਹਿ ਸੀਮਤੋ ਕਮ੍ਮਾਨਿ ਵਿਪਜ੍ਜਨ੍ਤਿ.
ਕਥਂ ਪਰਿਸਤੋ ਕਮ੍ਮਾਨਿ ਵਿਪਜ੍ਜਨ੍ਤਿ? ਦ੍ਵਾਦਸਹਿ ਆਕਾਰੇਹਿ ਪਰਿਸਤੋ ਕਮ੍ਮਾਨਿ ਵਿਪਜ੍ਜਨ੍ਤਿ – ਚਤੁਵਗ੍ਗਕਰਣੀਯੇ ਕਮ੍ਮੇ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ ਤੇ ਅਨਾਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਅਨਾਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ, ਚਤੁਵਗ੍ਗਕਰਣੇ ਕਮ੍ਮੇ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ, ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਅਨਾਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ, ਚਤੁਵਗ੍ਗਕਰਣੇ ਕਮ੍ਮੇ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ, ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ.
ਪਞ੍ਚਵਗ੍ਗਕਰਣੇ ਕਮ੍ਮੇ…ਪੇ… ਦਸਵਗ੍ਗਕਰਣੇ ਕਮ੍ਮੇ…ਪੇ… ਵੀਸਤਿਵਗ੍ਗਕਰਣੇ ਕਮ੍ਮੇ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ, ਤੇ ਅਨਾਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਅਨਾਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ, ਵੀਸਤਿਵਗ੍ਗਕਰਣੇ ਕਮ੍ਮੇ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ, ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਅਨਾਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ, ਵੀਸਤਿਵਗ੍ਗਕਰਣੇ ਕਮ੍ਮੇ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ, ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਟੋ ਹੋਤਿ, ਸਮ੍ਮੁਖੀਭੂਤਾ ਪਟਿਕ੍ਕੋਸਨ੍ਤਿ. ਇਮੇਹਿ ਦ੍ਵਾਦਸਹਿ ਆਕਾਰੇਹਿ ਪਰਿਸਤੋ ਕਮ੍ਮਾਨਿ ਵਿਪਜ੍ਜਨ੍ਤਿ.
ਚਤੁਵਗ੍ਗਕਰਣੇ ਕਮ੍ਮੇ ਚਤ੍ਤਾਰੋ ਭਿਕ੍ਖੂ ਪਕਤਤ੍ਤਾ ਕਮ੍ਮਪ੍ਪਤ੍ਤਾ, ਅਵਸੇਸਾ ਪਕਤਤ੍ਤਾ ਛਨ੍ਦਾਰਹਾ. ਯਸ੍ਸ ਸਙ੍ਘੋ ਕਮ੍ਮਂ ਕਰੋਤਿ, ਸੋ ਨੇਵ ਕਮ੍ਮਪ੍ਪਤ੍ਤੋ ਨਾਪਿ ਛਨ੍ਦਾਰਹੋ, ਅਪਿਚ ਕਮ੍ਮਾਰਹੋ. ਪਞ੍ਚਵਗ੍ਗਕਰਣੇ ਕਮ੍ਮੇ ਪਞ੍ਚ ਭਿਕ੍ਖੂ ਪਕਤਤ੍ਤਾ ਕਮ੍ਮਪ੍ਪਤ੍ਤਾ, ਅਵਸੇਸਾ ਪਕਤਤ੍ਤਾ ਛਨ੍ਦਾਰਹਾ. ਯਸ੍ਸ ਸਙ੍ਘੋ ਕਮ੍ਮਂ ਕਰੋਤਿ, ਸੋ ਨੇਵ ਕਮ੍ਮਪ੍ਪਤ੍ਤੋ ਨਾਪਿ ਛਨ੍ਦਾਰਹੋ, ਅਪਿਚ ਕਮ੍ਮਾਰਹੋ. ਦਸਵਗ੍ਗਕਰਣੇ ਕਮ੍ਮੇ ਦਸ ਭਿਕ੍ਖੂ ਪਕਤਤ੍ਤਾ ਕਮ੍ਮਪ੍ਪਤ੍ਤਾ, ਅਵਸੇਸਾ ਪਕਤਤ੍ਤਾ ਛਨ੍ਦਾਰਹਾ. ਯਸ੍ਸ ਸਙ੍ਘੋ ਕਮ੍ਮਂ ਕਰੋਤਿ, ਸੋ ਨੇਵ ਕਮ੍ਮਪ੍ਪਤ੍ਤੋ ਨਾਪਿ ਛਨ੍ਦਾਰਹੋ, ਅਪਿਚ ਕਮ੍ਮਾਰਹੋ. ਵੀਸਤਿਵਗ੍ਗਕਰਣੇ ਕਮ੍ਮੇ ਵੀਸਤਿ ਭਿਕ੍ਖੂ ਪਕਤਤ੍ਤਾ ਕਮ੍ਮਪ੍ਪਤ੍ਤਾ, ਅਵਸੇਸਾ ਪਕਤਤ੍ਤਾ ਛਨ੍ਦਾਰਹਾ. ਯਸ੍ਸ ਸਙ੍ਘੋ ਕਮ੍ਮਂ ਕਰੋਤਿ, ਸੋ ਨੇਵ ਕਮ੍ਮਪ੍ਪਤ੍ਤੋ ਨਾਪਿ ਛਨ੍ਦਾਰਹੋ, ਅਪਿਚ ਕਮ੍ਮਾਰਹੋ.
੨੫੦. ਅਪਲੋਕਨਕਮ੍ਮਂ ਕਤਿ ਠਾਨਾਨਿ ਗਚ੍ਛਤਿ? ਞਤ੍ਤਿਕਮ੍ਮਂ, ਞਤ੍ਤਿਦੁਤਿਯਕਮ੍ਮਂ, ਞਤ੍ਤਿਚਤੁਤ੍ਥਕਮ੍ਮਂ ਕਤਿ ਠਾਨਾਨਿ ਗਚ੍ਛਤਿ? ਅਪਲੋਕਨਕਮ੍ਮਂ ਪਞ੍ਚ ਠਾਨਾਨਿ ਗਚ੍ਛਤਿ. ਞਤ੍ਤਿਕਮ੍ਮਂ ਨਵ ਠਾਨਾਨਿ ਗਚ੍ਛਤਿ. ਞਤ੍ਤਿਦੁਤਿਯਕਮ੍ਮਂ ਸਤ੍ਤ ਠਾਨਾਨਿ ਗਚ੍ਛਤਿ. ਞਤ੍ਤਿਚਤੁਤ੍ਥਕਮ੍ਮਂ ਸਤ੍ਤ ਠਾਨਾਨਿ ਗਚ੍ਛਤਿ.
ਅਪਲੋਕਨਕਮ੍ਮਂ ਕਤਮਾਨਿ ਪਞ੍ਚ ਠਾਨਾਨਿ ਗਚ੍ਛਤਿ? ਓਸਾਰਣਂ ਨਿਸ੍ਸਾਰਣਂ ਭਣ੍ਡੁਕਮ੍ਮਂ ਬ੍ਰਹ੍ਮਦਣ੍ਡਂ ਕਮ੍ਮਲਕ੍ਖਣਞ੍ਞੇਵ ਪਞ੍ਚਮਂ. ਅਪਲੋਕਨਕਮ੍ਮਂ ਇਮਾਨਿ ਪਞ੍ਚ ਠਾਨਾਨਿ ਗਚ੍ਛਤਿ.
ਞਤ੍ਤਿਕਮ੍ਮਂ ਕਤਮਾਨਿ ਨਵ ਠਾਨਾਨਿ ਗਚ੍ਛਤਿ? ਓਸਾਰਣਂ ਨਿਸ੍ਸਾਰਣਂ ਉਪੋਸਥਂ ਪਵਾਰਣਂ ਸਮ੍ਮੁਤਿਂ ਦਾਨਂ ਪਟਿਗ੍ਗਹਣਂ ਪਚ੍ਚੁਕ੍ਕਡ੍ਢਨਂ ਕਮ੍ਮਲਕ੍ਖਣਞ੍ਞੇਵ ਨਵਮਂ. ਞਤ੍ਤਿਕਮ੍ਮਂ ਇਮਾਨਿ ਨਵ ਠਾਨਾਨਿ ਗਚ੍ਛਤਿ.
ਞਤ੍ਤਿਦੁਤਿਯਕਮ੍ਮਂ ਕਤਮਾਨਿ ਸਤ੍ਤ ਠਾਨਾਨਿ ਗਚ੍ਛਤਿ? ਓਸਾਰਣਂ ਨਿਸ੍ਸਾਰਣਂ ਸਮ੍ਮੁਤਿਂ ਦਾਨਂ ਉਦ੍ਧਰਣਂ ਦੇਸਨਂ ਕਮ੍ਮਲਕ੍ਖਣਞ੍ਞੇਵ ਸਤ੍ਤਮਂ. ਞਤ੍ਤਿਦੁਤਿਯਕਮ੍ਮਂ ਇਮਾਨਿ ਸਤ੍ਤ ਠਾਨਾਨਿ ਗਚ੍ਛਤਿ.
ਞਤ੍ਤਿਚਤੁਤ੍ਥਕਮ੍ਮਂ ਕਤਮਾਨਿ ਸਤ੍ਤ ਠਾਨਾਨਿ ਗਚ੍ਛਤਿ? ਓਸਾਰਣਂ ਨਿਸ੍ਸਾਰਣਂ ਸਮ੍ਮੁਤਿਂ ਦਾਨਂ ਨਿਗ੍ਗਹਂ ਸਮਨੁਭਾਸਨਂ ਕਮ੍ਮਲਕ੍ਖਣਞ੍ਞੇਵ ਸਤ੍ਤਮਂ. ਞਤ੍ਤਿਚਤੁਤ੍ਥਕਮ੍ਮਂ ਇਮਾਨਿ ਸਤ੍ਤ ਠਾਨਾਨਿ ਗਚ੍ਛਤਿ. ਅਯਂ ਤਾਵ ਪਾਲ਼ਿਨਯੋ.
੨੫੧. ਅਯਂ ਪਨੇਤ੍ਥ ਆਦਿਤੋ ਪਟ੍ਠਾਯ ਵਿਨਿਚ੍ਛਯਕਥਾ (ਪਰਿ. ਅਟ੍ਠ. ੪੮੨) – ਅਪਲੋਕਨਕਮ੍ਮਂ ਨਾਮ ਸੀਮਟ੍ਠਕਸਙ੍ਘਂ ਸੋਧੇਤ੍ਵਾ ਛਨ੍ਦਾਰਹਾਨਂ ਛਨ੍ਦਂ ਆਹਰਿਤ੍ਵਾ ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾ ਤਿਕ੍ਖਤ੍ਤੁਂ ਸਾਵੇਤ੍ਵਾ ਕਤ੍ਤਬ੍ਬਕਮ੍ਮਂ. ਞਤ੍ਤਿਕਮ੍ਮਂ ਨਾਮ ਵੁਤ੍ਤਨਯੇਨੇਵ ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾ ਏਕਾਯ ਞਤ੍ਤਿਯਾ ਕਤ੍ਤਬ੍ਬਕਮ੍ਮਂ. ਞਤ੍ਤਿਦੁਤਿਯਕਮ੍ਮਂ ਨਾਮ ਵੁਤ੍ਤਨਯੇਨੇਵ ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾ ਏਕਾਯ ਞਤ੍ਤਿਯਾ ਏਕਾਯ ਚ ਅਨੁਸ੍ਸਾਵਨਾਯਾਤਿ ਏਵਂ ਞਤ੍ਤਿਦੁਤਿਯਾਯ ਅਨੁਸ੍ਸਾਵਨਾਯ ਕਤ੍ਤਬ੍ਬਕਮ੍ਮਂ. ਞਤ੍ਤਿਚਤੁਤ੍ਥਕਮ੍ਮਂ ਨਾਮ ਵੁਤ੍ਤਨਯੇਨੇਵ ਸਮਗ੍ਗਸ੍ਸ ਸਙ੍ਘਸ੍ਸ ਅਨੁਮਤਿਯਾ ਏਕਾਯ ਞਤ੍ਤਿਯਾ ਤੀਹਿ ਚ ਅਨੁਸ੍ਸਾਵਨਾਹੀਤਿ ਏਵਂ ਞਤ੍ਤਿਚਤੁਤ੍ਥਾਹਿ ਤੀਹਿ ਅਨੁਸ੍ਸਾਵਨਾਹਿ ਕਤ੍ਤਬ੍ਬਕਮ੍ਮਂ.
ਤਤ੍ਰ ਅਪਲੋਕਨਕਮ੍ਮਂ ਅਪਲੋਕੇਤ੍ਵਾਵ ਕਾਤਬ੍ਬਂ, ਞਤ੍ਤਿਕਮ੍ਮਾਦਿਵਸੇਨ ਨ ਕਾਤਬ੍ਬਂ. ਞਤ੍ਤਿਕਮ੍ਮਮ੍ਪਿ ਏਕਂ ਞਤ੍ਤਿਂ ਠਪੇਤ੍ਵਾਵ ਕਾਤਬ੍ਬਂ, ਅਪਲੋਕਨਕਮ੍ਮਾਦਿਵਸੇਨ ਨ ਕਾਤਬ੍ਬਂ. ਞਤ੍ਤਿਦੁਤਿਯਕਮ੍ਮਂ ਪਨ ਅਪਲੋਕੇਤ੍ਵਾ ਕਾਤਬ੍ਬਮ੍ਪਿ ਅਕਾਤਬ੍ਬਮ੍ਪਿ ਅਤ੍ਥਿ. ਤਤ੍ਥ ਸੀਮਾਸਮ੍ਮੁਤਿ ਸੀਮਾਸਮੂਹਨਂ ਕਥਿਨਦਾਨਂ ਕਥਿਨੁਦ੍ਧਾਰੋ ਕੁਟਿਵਤ੍ਥੁਦੇਸਨਾ ਵਿਹਾਰਵਤ੍ਥੁਦੇਸਨਾਤਿ ਇਮਾਨਿ ਛਕਮ੍ਮਾਨਿ ਗਰੁਕਾਨਿ ਅਪਲੋਕੇਤ੍ਵਾ ਕਾਤੁਂ ਨ ਵਟ੍ਟਤਿ, ਞਤ੍ਤਿਦੁਤਿਯਕਮ੍ਮਵਾਚਂ ਸਾਵੇਤ੍ਵਾਵ ਕਾਤਬ੍ਬਾਨਿ. ਅਵਸੇਸਾ ਤੇਰਸ ਸਮ੍ਮੁਤਿਯੋ ਸੇਨਾਸਨਗ੍ਗਾਹਕਮਤਕਚੀਵਰਦਾਨਾਦਿਸਮ੍ਮੁਤਿਯੋ ਚਾਤਿ ਏਤਾਨਿ ਲਹੁਕਕਮ੍ਮਾਨਿ, ਅਪਲੋਕੇਤ੍ਵਾਪਿ ਕਾਤੁਂ ਵਟ੍ਟਨ੍ਤਿ, ਞਤ੍ਤਿਕਮ੍ਮਞਤ੍ਤਿਚਤੁਤ੍ਥਕਮ੍ਮਵਸੇਨ ਪਨ ਨ ਕਾਤਬ੍ਬਮੇਵ. ‘‘ਞਤ੍ਤਿਚਤੁਤ੍ਥਕਮ੍ਮਵਸੇਨ ਕਯਿਰਮਾਨਂ ਦਲ਼੍ਹਤਰਂ ਹੋਤਿ, ਤਸ੍ਮਾ ਕਾਤਬ੍ਬ’’ਨ੍ਤਿ ਏਕਚ੍ਚੇ ਵਦਨ੍ਤਿ. ਏਵਂ ਪਨ ਸਤਿ ਕਮ੍ਮਸਙ੍ਕਰੋ ਹੋਤਿ, ਤਸ੍ਮਾ ਨ ਕਾਤਬ੍ਬਨ੍ਤਿ ਪਟਿਕ੍ਖਿਤ੍ਤਮੇਵ. ਸਚੇ ਪਨ ਅਕ੍ਖਰਪਰਿਹੀਨਂ ਵਾ ਪਦਪਰਿਹੀਨਂ ਵਾ ਦੁਰੁਤ੍ਤਪਦਂ ਵਾ ਹੋਤਿ, ਤਸ੍ਸ ਸੋਧਨਤ੍ਥਂ ਪੁਨਪ੍ਪੁਨਂ ਵਤ੍ਤੁਂ ਵਟ੍ਟਤਿ. ਇਦਂ ਅਕੁਪ੍ਪਕਮ੍ਮਸ੍ਸ ਦਲ਼੍ਹੀਕਮ੍ਮਂ ਹੋਤਿ, ਕੁਪ੍ਪਕਮ੍ਮੇ ਕਮ੍ਮਂ ਹੁਤ੍ਵਾ ਤਿਟ੍ਠਤਿ. ਞਤ੍ਤਿਚਤੁਤ੍ਥਕਮ੍ਮਂ ਞਤ੍ਤਿਞ੍ਚ ਤਿਸ੍ਸੋ ਚ ਕਮ੍ਮਵਾਚਾਯੋ ਸਾਵੇਤ੍ਵਾਵ ਕਾਤਬ੍ਬਂ, ਅਪਲੋਕਨਕਮ੍ਮਾਦਿਵਸੇਨ ਨ ਕਾਤਬ੍ਬਂ.
ਸਮ੍ਮੁਖਾਕਰਣੀਯਂ ਕਮ੍ਮਂ ਅਸਮ੍ਮੁਖਾ ਕਰੋਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਨ੍ਤਿ ਏਤ੍ਥ ਪਨ ਅਤ੍ਥਿ ਕਮ੍ਮਂ ਸਮ੍ਮੁਖਾਕਰਣੀਯਂ, ਅਤ੍ਥਿ ਕਮ੍ਮਂ ਅਸਮ੍ਮੁਖਾਕਰਣੀਯਂ. ਤਤ੍ਥ ਅਸਮ੍ਮੁਖਾਕਰਣੀਯਂ ਨਾਮ ਦੂਤੇਨੂਪਸਮ੍ਪਦਾ, ਪਤ੍ਤਨਿਕ੍ਕੁਜ੍ਜਨਂ, ਪਤ੍ਤੁਕ੍ਕੁਜ੍ਜਨਂ, ਉਮ੍ਮਤ੍ਤਕਸ੍ਸ ਭਿਕ੍ਖੁਨੋ ਉਮ੍ਮਤ੍ਤਕਸਮ੍ਮੁਤਿ, ਸੇਕ੍ਖਾਨਂ ਕੁਲਾਨਂ ਸੇਕ੍ਖਸਮ੍ਮੁਤਿ, ਛਨ੍ਨਸ੍ਸ ਭਿਕ੍ਖੁਨੋ ਬ੍ਰਹ੍ਮਦਣ੍ਡੋ, ਦੇਵਦਤ੍ਤਸ੍ਸ ਪਕਾਸਨੀਯਕਮ੍ਮਂ, ਅਪਸਾਦਨੀਯਂ ਦਸ੍ਸੇਨ੍ਤਸ੍ਸ ਭਿਕ੍ਖੁਨੋ ਭਿਕ੍ਖੁਨਿਸਙ੍ਘੇਨ ਕਾਤਬ੍ਬਂ ਅਵਨ੍ਦਿਯਕਮ੍ਮਨ੍ਤਿ ਅਟ੍ਠਵਿਧਂ ਹੋਤਿ. ਇਦਂ ਅਟ੍ਠਵਿਧਮ੍ਪਿ ਕਮ੍ਮਂ ਅਸਮ੍ਮੁਖਾ ਕਤਂ ਸੁਕਤਂ ਹੋਤਿ ਅਕੁਪ੍ਪਂ, ਸੇਸਾਨਿ ਸਬ੍ਬਕਮ੍ਮਾਨਿ ਸਮ੍ਮੁਖਾ ਏਵ ਕਾਤਬ੍ਬਾਨਿ. ਸਙ੍ਘਸਮ੍ਮੁਖਤਾ ਧਮ੍ਮਸਮ੍ਮੁਖਤਾ ਵਿਨਯਸਮ੍ਮੁਖਤਾ ਪੁਗ੍ਗਲਸਮ੍ਮੁਖਤਾਤਿ ਇਮਂ ਚਤੁਬ੍ਬਿਧਂ ਸਮ੍ਮੁਖਾਵਿਨਯਂ ਉਪਨੇਤ੍ਵਾਵ ਕਾਤਬ੍ਬਾਨਿ. ਏਵਂ ਕਤਾਨਿ ਹਿ ਸੁਕਤਾਨਿ ਹੋਨ੍ਤਿ, ਏਵਂ ਅਕਤਾਨਿ ਪਨੇਤਾਨਿ ਇਮਂ ਸਮ੍ਮੁਖਾਵਿਨਯਸਙ੍ਖਾਤਂ ਵਤ੍ਥੁਂ ਵਿਨਾ ਕਤਤ੍ਤਾ ਵਤ੍ਥੁਵਿਪਨ੍ਨਾਨਿ ਨਾਮ ਹੋਨ੍ਤਿ. ਤੇਨ ਵੁਤ੍ਤਂ ‘‘ਸਮ੍ਮੁਖਾਕਰਣੀਯਂ ਕਮ੍ਮਂ ਅਸਮ੍ਮੁਖਾ ਕਰੋਤਿ, ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮ’’ਨ੍ਤਿ. ਪਟਿਪੁਚ੍ਛਾਕਰਣੀਯਾਦੀਸੁਪਿ ਪਟਿਪੁਚ੍ਛਾਦਿਕਰਣਮੇਵ ਵਤ੍ਥੁ, ਤਂ ਵਤ੍ਥੁਂ ਵਿਨਾ ਕਤਤ੍ਤਾ ਤੇਸਮ੍ਪਿ ਵਤ੍ਥੁਵਿਪਨ੍ਨਤਾ ਵੇਦਿਤਬ੍ਬਾ. ਅਪਿਚ ਊਨਵੀਸਤਿਵਸ੍ਸਂ ਵਾ ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਪੁਬ੍ਬਂ ਵਾ ਏਕਾਦਸਸੁ ਵਾ ਅਭਬ੍ਬਪੁਗ੍ਗਲੇਸੁ ਅਞ੍ਞਤਰਂ ਉਪਸਮ੍ਪਾਦੇਨ੍ਤਸ੍ਸਪਿ ਵਤ੍ਥੁਵਿਪਨ੍ਨਂ ਅਧਮ੍ਮਕਮ੍ਮਂ ਹੋਤਿ. ਅਯਂ ਵਤ੍ਥੁਤੋ ਕਮ੍ਮਵਿਪਤ੍ਤਿਯਂ ਵਿਨਿਚ੍ਛਯੋ.
ਞਤ੍ਤਿਤੋ ਵਿਪਤ੍ਤਿਯਂ ਪਨ ਵਤ੍ਥੁਂ ਨ ਪਰਾਮਸਤੀਤਿ ਯਸ੍ਸ ਉਪਸਮ੍ਪਦਾਦਿਕਮ੍ਮਂ ਕਰੋਤਿ, ਤਂ ਨ ਪਰਾਮਸਤਿ, ਤਸ੍ਸ ਨਾਮਂ ਨ ਗਣ੍ਹਾਤਿ. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਯਂ ਧਮ੍ਮਰਕ੍ਖਿਤੋ ਆਯਸ੍ਮਤੋ ਬੁਦ੍ਧਰਕ੍ਖਿਤਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਵਤ੍ਤਬ੍ਬੇ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਆਯਸ੍ਮਤੋ ਬੁਦ੍ਧਰਕ੍ਖਿਤਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਵਦਤਿ. ਏਵਂ ਵਤ੍ਥੁਂ ਨ ਪਰਾਮਸਤਿ.
ਸਙ੍ਘਂ ਨ ਪਰਾਮਸਤੀਤਿ ਸਙ੍ਘਸ੍ਸ ਨਾਮਂ ਨ ਗਣ੍ਹਾਤਿ. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਯਂ ਧਮ੍ਮਰਕ੍ਖਿਤੋ’’ਤਿ ਵਤ੍ਤਬ੍ਬੇ ‘‘ਸੁਣਾਤੁ ਮੇ, ਭਨ੍ਤੇ, ਅਯਂ ਧਮ੍ਮਰਕ੍ਖਿਤੋ’’ਤਿ ਵਦਤਿ. ਏਵਂ ਸਙ੍ਘਂ ਨ ਪਰਾਮਸਤਿ.
ਪੁਗ੍ਗਲਂ ਨ ਪਰਾਮਸਤੀਤਿ ਯੋ ਉਪਸਮ੍ਪਦਾਪੇਕ੍ਖਸ੍ਸ ਉਪਜ੍ਝਾਯੋ, ਤਂ ਨ ਪਰਾਮਸਤਿ, ਤਸ੍ਸ ਨਾਮਂ ਨ ਗਣ੍ਹਾਤਿ. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਯਂ ਧਮ੍ਮਰਕ੍ਖਿਤੋ ਆਯਸ੍ਮਤੋ ਬੁਦ੍ਧਰਕ੍ਖਿਤਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਵਤ੍ਤਬ੍ਬੇ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਯਂ ਧਮ੍ਮਰਕ੍ਖਿਤੋ ਉਪਸਮ੍ਪਦਾਪੇਕ੍ਖੋ’’ਤਿ ਵਦਤਿ. ਏਵਂ ਪੁਗ੍ਗਲਂ ਨ ਪਰਾਮਸਤਿ.
ਞਤ੍ਤਿਂ ਨ ਪਰਾਮਸਤੀਤਿ ਸਬ੍ਬੇਨ ਸਬ੍ਬਂ ਞਤ੍ਤਿਂ ਨ ਪਰਾਮਸਤਿ, ਞਤ੍ਤਿਦੁਤਿਯਕਮ੍ਮੇ ਞਤ੍ਤਿਂ ਅਟ੍ਠਪੇਤ੍ਵਾ ਦ੍ਵਿਕ੍ਖਤ੍ਤੁਂ ਕਮ੍ਮਵਾਚਾਯ ਏਵ ਅਨੁਸ੍ਸਾਵਨਕਮ੍ਮਂ ਕਰੋਤਿ, ਞਤ੍ਤਿਚਤੁਤ੍ਥਕਮ੍ਮੇਪਿ ਞਤ੍ਤਿਂ ਅਟ੍ਠਪੇਤ੍ਵਾ ਚਤੁਕ੍ਖਤ੍ਤੁਂ ਕਮ੍ਮਵਾਚਾਯ ਏਵ ਅਨੁਸ੍ਸਾਵਨਕਮ੍ਮਂ ਕਰੋਤਿ. ਏਵਂ ਞਤ੍ਤਿਂ ਨ ਪਰਾਮਸਤਿ.
ਪਚ੍ਛਾ ਵਾ ਞਤ੍ਤਿਂ ਠਪੇਤੀਤਿ ਪਠਮਂ ਕਮ੍ਮਵਾਚਾਯ ਅਨੁਸ੍ਸਾਵਨਕਮ੍ਮਂ ਕਤ੍ਵਾ ‘‘ਏਸਾ ਞਤ੍ਤੀ’’ਤਿ ਵਤ੍ਵਾ ‘‘ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ ਵਦਤਿ. ਏਵਂ ਪਚ੍ਛਾ ਞਤ੍ਤਿਂ ਠਪੇਤਿ. ਇਤਿ ਇਮੇਹਿ ਪਞ੍ਚਹਾਕਾਰੇਹਿ ਞਤ੍ਤਿਤੋ ਕਮ੍ਮਾਨਿ ਵਿਪਜ੍ਜਨ੍ਤਿ.
ਅਨੁਸ੍ਸਾਵਨਤੋ ਵਿਪਤ੍ਤਿਯਂ ਪਨ ਵਤ੍ਥੁਆਦੀਨਿ ਤਾਵ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨਿ. ਏਵਂ ਪਨ ਨੇਸਂ ਅਪਰਾਮਸਨਂ ਹੋਤਿ – ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ’’ਤਿ ਪਠਮਾਨੁਸ੍ਸਾਵਨਾਯ ਵਾ ‘‘ਦੁਤਿਯਮ੍ਪਿ ਏਤਮਤ੍ਥਂ ਵਦਾਮਿ…ਪੇ… ਤਤਿਯਮ੍ਪਿ ਏਤਮਤ੍ਥਂ ਵਦਾਮਿ. ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ’’ਤਿ ਦੁਤਿਯਤਤਿਯਾਨੁਸ੍ਸਾਵਨਾਸੁ ਵਾ ‘‘ਅਯਂ ਧਮ੍ਮਰਕ੍ਖਿਤੋ ਆਯਸ੍ਮਤੋ ਬੁਦ੍ਧਰਕ੍ਖਿਤਸ੍ਸ ਉਪਸਮ੍ਪਦਾਪੇਕ੍ਖੋ’’ਤਿ ਵਤ੍ਤਬ੍ਬੇ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਆਯਸ੍ਮਤੋ ਬੁਦ੍ਧਰਕ੍ਖਿਤਸ੍ਸਾ’’ਤਿ ਵਦਨ੍ਤੋ ਵਤ੍ਥੁਂ ਨ ਪਰਾਮਸਤਿ ਨਾਮ. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਯਂ ਧਮ੍ਮਰਕ੍ਖਿਤੋ’’ਤਿ ਵਤ੍ਤਬ੍ਬੇ ‘‘ਸੁਣਾਤੁ ਮੇ, ਭਨ੍ਤੇ, ਅਯਂ ਧਮ੍ਮਰਕ੍ਖਿਤੋ’’ਤਿ ਵਦਨ੍ਤੋ ਸਙ੍ਘਂ ਨ ਪਰਾਮਸਤਿ ਨਾਮ. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਯਂ ਧਮ੍ਮਰਕ੍ਖਿਤੋ ਆਯਸ੍ਮਤੋ ਬੁਦ੍ਧਰਕ੍ਖਿਤਸ੍ਸਾ’’ਤਿ ਵਤ੍ਤਬ੍ਬੇ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਯਂ ਧਮ੍ਮਰਕ੍ਖਿਤੋ ਉਪਸਮ੍ਪਦਾਪੇਕ੍ਖੋ’’ਤਿ ਵਦਨ੍ਤੋ ਪੁਗ੍ਗਲਂ ਨ ਪਰਾਮਸਤਿ ਨਾਮ.
ਸਾਵਨਂ ਹਾਪੇਤੀਤਿ ਸਬ੍ਬੇਨ ਸਬ੍ਬਂ ਕਮ੍ਮਵਾਚਾਯ ਅਨੁਸ੍ਸਾਵਨਂ ਨ ਕਰੋਤਿ, ਞਤ੍ਤਿਦੁਤਿਯਕਮ੍ਮੇ ਦ੍ਵਿਕ੍ਖਤ੍ਤੁਂ ਞਤ੍ਤਿਮੇਵ ਠਪੇਤਿ, ਞਤ੍ਤਿਚਤੁਤ੍ਥਕਮ੍ਮੇ ਚਤੁਕ੍ਖਤ੍ਤੁਂ ਞਤ੍ਤਿਮੇਵ ਠਪੇਤਿ. ਏਵਂ ਸਾਵਨਂ ਹਾਪੇਤਿ. ਯੋਪਿ ਞਤ੍ਤਿਦੁਤਿਯਕਮ੍ਮੇ ਏਕਂ ਞਤ੍ਤਿਂ ਠਪੇਤ੍ਵਾ ਏਕਂ ਕਮ੍ਮਵਾਚਂ ਅਨੁਸ੍ਸਾਵੇਨ੍ਤੋ ਅਕ੍ਖਰਂ ਵਾ ਛਡ੍ਡੇਤਿ, ਪਦਂ ਵਾ ਦੁਰੁਤ੍ਤਂ ਕਰੋਤਿ, ਅਯਮ੍ਪਿ ਸਾਵਨਂ ਹਾਪੇਤਿਯੇਵ. ਞਤ੍ਤਿਚਤੁਤ੍ਥਕਮ੍ਮੇ ਪਨ ਏਕਂ ਞਤ੍ਤਿਂ ਠਪੇਤ੍ਵਾ ਸਕਿਮੇਵ ਵਾ ਦ੍ਵਿਕ੍ਖਤ੍ਤੁਂ ਵਾ ਕਮ੍ਮਵਾਚਾਯ ਅਨੁਸ੍ਸਾਵਨਂ ਕਰੋਨ੍ਤੋਪਿ ਅਕ੍ਖਰਂ ਵਾ ਪਦਂ ਵਾ ਛਡ੍ਡੇਨ੍ਤੋਪਿ ਦੁਰੁਤ੍ਤਂ ਕਰੋਨ੍ਤੋਪਿ ਅਨੁਸ੍ਸਾਵਨਂ ਹਾਪੇਤਿਯੇਵਾਤਿ ਵੇਦਿਤਬ੍ਬੋ.
੨੫੨. ‘‘ਦੁਰੁਤ੍ਤਂ ਕਰੋਤੀ’’ਤਿ ਏਤ੍ਥ ਪਨ ਅਯਂ ਵਿਨਿਚ੍ਛਯੋ. ਯੋ ਹਿ ਅਞ੍ਞਸ੍ਮਿਂ ਅਕ੍ਖਰੇ ਵਤ੍ਤਬ੍ਬੇ ਅਞ੍ਞਂ ਵਦਤਿ, ਅਯਂ ਦੁਰੁਤ੍ਤਂ ਕਰੋਤਿ ਨਾਮ. ਤਸ੍ਮਾ ਕਮ੍ਮਵਾਚਂ ਕਰੋਨ੍ਤੇਨ ਭਿਕ੍ਖੁਨਾ ਯ੍ਵਾਯਂ –
‘‘ਸਿਥਿਲਂ ਧਨਿਤਞ੍ਚ ਦੀਘਰਸ੍ਸਂ, ਗਰੁਕਂ ਲਹੁਕਞ੍ਚ ਨਿਗ੍ਗਹਿਤਂ;
ਸਮ੍ਬਨ੍ਧਂ ਵਵਤ੍ਥਿਤਂ ਵਿਮੁਤ੍ਤਂ, ਦਸਧਾ ਬ੍ਯਞ੍ਜਨਬੁਦ੍ਧਿਯਾ ਪਭੇਦੋ’’ਤਿ. –
ਵੁਤ੍ਤੋ, ਅਯਂ ਸੁਟ੍ਠੁ ਉਪਲਕ੍ਖੇਤਬ੍ਬੋ. ਏਤ੍ਥ ਹਿ ਸਿਥਿਲਂ ਨਾਮ ਪਞ੍ਚਸੁ ਵਗ੍ਗੇਸੁ ਪਠਮਤਤਿਯਂ. ਧਨਿਤਂ ਨਾਮ ਤੇਸ੍ਵੇਵ ਦੁਤਿਯਚਤੁਤ੍ਥਂ. ਦੀਘਨ੍ਤਿ ਦੀਘੇਨ ਕਾਲੇਨ ਵਤ੍ਤਬ੍ਬਆਕਾਰਾਦਿ. ਰਸ੍ਸਨ੍ਤਿ ਤਤੋ ਉਪਡ੍ਢਕਾਲੇਨ ਵਤ੍ਤਬ੍ਬਅਕਾਰਾਦਿ. ਗਰੁਕਨ੍ਤਿ ਦੀਘਮੇਵ, ਯਂ ਵਾ ‘‘ਆਯਸ੍ਮਤੋ ਬੁਦ੍ਧਰਕ੍ਖਿਤਤ੍ਥੇਰਸ੍ਸ ਯਸ੍ਸ ਨਕ੍ਖਮਤੀ’’ਤਿ ਏਵਂ ਸਂਯੋਗਪਰਂ ਕਤ੍ਵਾ ਵੁਚ੍ਚਤਿ. ਲਹੁਕਨ੍ਤਿ ਰਸ੍ਸਮੇਵ, ਯਂ ਵਾ ‘‘ਆਯਸ੍ਮਤੋ ਬੁਦ੍ਧਰਕ੍ਖਿਤਤ੍ਥੇਰਸ੍ਸ ਯਸ੍ਸ ਨ ਖਮਤੀ’’ਤਿ ਏਵਂ ਅਸਂਯੋਗਪਰਂ ਕਤ੍ਵਾ ਵੁਚ੍ਚਤਿ. ਨਿਗ੍ਗਹਿਤਨ੍ਤਿ ਯਂ ਕਰਣਾਨਿ ਨਿਗ੍ਗਹੇਤ੍ਵਾ ਅਵਿਸ੍ਸਜ੍ਜੇਤ੍ਵਾ ਅਵਿਵਟੇਨ ਮੁਖੇਨ ਸਾਨੁਨਾਸਿਕਂ ਕਤ੍ਵਾ ਵਤ੍ਤਬ੍ਬਂ. ਸਮ੍ਬਨ੍ਧਨ੍ਤਿ ਯਂ ਪਰਪਦੇਨ ਸਮ੍ਬਨ੍ਧਿਤ੍ਵਾ ‘‘ਤੁਣ੍ਹਿਸ੍ਸਾ’’ਤਿ ਵਾ ‘‘ਤੁਣ੍ਹਸ੍ਸਾ’’ਤਿ ਵਾ ਵੁਚ੍ਚਤਿ. ਵਵਤ੍ਥਿਤਨ੍ਤਿ ਯਂ ਪਰਪਦੇਨ ਅਸਮ੍ਬਨ੍ਧਂ ਕਤ੍ਵਾ ਵਿਚ੍ਛਿਨ੍ਦਿਤ੍ਵਾ ‘‘ਤੁਣ੍ਹੀ ਅਸ੍ਸਾ’’ਤਿ ਵਾ ‘‘ਤੁਣ੍ਹ ਅਸ੍ਸਾ’’ਤਿ ਵਾ ਵੁਚ੍ਚਤਿ. ਵਿਮੁਤ੍ਤਨ੍ਤਿ ਯਂ ਕਰਣਾਨਿ ਅਨਿਗ੍ਗਹੇਤ੍ਵਾ ਵਿਸ੍ਸਜ੍ਜੇਤ੍ਵਾ ਵਿਵਟੇਨ ਮੁਖੇਨ ਅਨੁਨਾਸਿਕਂ ਅਕਤ੍ਵਾ ਵੁਚ੍ਚਤਿ.
ਤਤ੍ਥ ‘‘ਸੁਣਾਤੁ ਮੇ’’ਤਿ ਵਤ੍ਤਬ੍ਬੇ ਤ-ਕਾਰਸ੍ਸ ਥ-ਕਾਰਂ ਕਤ੍ਵਾ ‘‘ਸੁਣਾਥੁ ਮੇ’’ਤਿ ਵਚਨਂ ਸਿਥਿਲਸ੍ਸ ਧਨਿਤਕਰਣਂ ਨਾਮ, ਤਥਾ ‘‘ਪਤ੍ਤਕਲ੍ਲਂ ਏਸਾ ਞਤ੍ਤੀ’’ਤਿ ਵਤ੍ਤਬ੍ਬੇ ‘‘ਪਤ੍ਥਕਲ੍ਲਂ ਏਸਾ ਞਤ੍ਥੀ’’ਤਿਆਦਿਵਚਨਂ. ‘‘ਭਨ੍ਤੇ ਸਙ੍ਘੋ’’ਤਿ ਵਤ੍ਤਬ੍ਬੇ ਭ-ਕਾਰਘ-ਕਾਰਾਨਂ ਬ-ਕਾਰਗ-ਕਾਰੇ ਕਤ੍ਵਾ ‘‘ਬਨ੍ਤੇ ਸਂਗੋ’’ਤਿ ਵਚਨਂ ਧਨਿਤਸ੍ਸ ਸਿਥਿਲਕਰਣਂ ਨਾਮ. ‘‘ਸੁਣਾਤੁ ਮੇ’’ਤਿ ਵਿਵਟੇਨ ਮੁਖੇਨ ਵਤ੍ਤਬ੍ਬੇ ਪਨ ‘‘ਸੁਣਂਤੁ ਮੇ’’ਤਿ ਵਾ ‘‘ਏਸਾ ਞਤ੍ਤੀ’’ਤਿ ਵਤ੍ਤਬ੍ਬੇ ‘‘ਏਸਂ ਞਤ੍ਤੀ’’ਤਿ ਵਾ ਅਵਿਵਟੇਨ ਮੁਖੇਨ ਅਨਨੁਨਾਸਿਕਂ ਕਤ੍ਵਾ ਵਚਨਂ ਵਿਮੁਤ੍ਤਸ੍ਸ ਨਿਗ੍ਗਹਿਤਵਚਨਂ ਨਾਮ. ‘‘ਪਤ੍ਤਕਲ੍ਲ’’ਨ੍ਤਿ ਅਵਿਵਟੇਨ ਮੁਖੇਨ ਅਨੁਨਾਸਿਕਂ ਕਤ੍ਵਾ ਵਤ੍ਤਬ੍ਬੇ ‘‘ਪਤ੍ਤਕਲ੍ਲਾ’’ਤਿ ਵਿਵਟੇਨ ਮੁਖੇਨ ਅਨੁਨਾਸਿਕਂ ਅਕਤ੍ਵਾ ਵਚਨਂ ਨਿਗ੍ਗਹਿਤਸ੍ਸ ਵਿਮੁਤ੍ਤਵਚਨਂ ਨਾਮ. ਇਤਿ ਸਿਥਿਲੇ ਕਤ੍ਤਬ੍ਬੇ ਧਨਿਤਂ, ਧਨਿਤੇ ਕਤ੍ਤਬ੍ਬੇ ਸਿਥਿਲਂ, ਵਿਮੁਤ੍ਤੇ ਕਤ੍ਤਬ੍ਬੇ ਨਿਗ੍ਗਹਿਤਂ, ਨਿਗ੍ਗਹਿਤੇ ਕਤ੍ਤਬ੍ਬੇ ਵਿਮੁਤ੍ਤਨ੍ਤਿ ਇਮਾਨਿ ਚਤ੍ਤਾਰਿ ਬ੍ਯਞ੍ਜਨਾਨਿ ਅਨ੍ਤੋਕਮ੍ਮਵਾਚਾਯ ਕਮ੍ਮਂ ਦੂਸੇਨ੍ਤਿ. ਏਵਂ ਵਦਨ੍ਤੋ ਹਿ ਅਞ੍ਞਸ੍ਮਿਂ ਅਕ੍ਖਰੇ ਵਤ੍ਤਬ੍ਬੇ ਅਞ੍ਞਂ ਵਦਤਿ, ਦੁਰੁਤ੍ਤਂ ਕਰੋਤੀਤਿ ਵੁਚ੍ਚਤਿ.
ਇਤਰੇਸੁ ਪਨ ਦੀਘਰਸ੍ਸਾਦੀਸੁ ਛਸੁ ਬ੍ਯਞ੍ਜਨੇਸੁ ਦੀਘਟ੍ਠਾਨੇ ਦੀਘਮੇਵ, ਰਸ੍ਸਟ੍ਠਾਨੇ ਰਸ੍ਸਮੇਵਾਤਿ ਏਵਂ ਯਥਾਠਾਨੇ ਤਂ ਤਦੇਵ ਅਕ੍ਖਰਂ ਭਾਸਨ੍ਤੇਨ ਅਨੁਕ੍ਕਮਾਗਤਂ ਪਵੇਣਿਂ ਅਵਿਨਾਸੇਨ੍ਤੇਨ ਕਮ੍ਮਵਾਚਾ ਕਾਤਬ੍ਬਾ. ਸਚੇ ਪਨ ਏਵਂ ਅਕਤ੍ਵਾ ਦੀਘੇ ਵਤ੍ਤਬ੍ਬੇ ਰਸ੍ਸਂ, ਰਸ੍ਸੇ ਵਾ ਵਤ੍ਤਬ੍ਬੇ ਦੀਘਂ ਵਦਤਿ, ਤਥਾ ਗਰੁਕੇ ਵਤ੍ਤਬ੍ਬੇ ਲਹੁਕਂ, ਲਹੁਕੇ ਵਾ ਵਤ੍ਤਬ੍ਬੇ ਗਰੁਕਂ ਵਦਤਿ, ਸਮ੍ਬਨ੍ਧੇ ਵਾ ਪਨ ਵਤ੍ਤਬ੍ਬੇ ਵਵਤ੍ਥਿਤਂ, ਵਵਤ੍ਥਿਤੇ ਵਾ ਵਤ੍ਤਬ੍ਬੇ ਸਮ੍ਬਨ੍ਧਂ ਵਦਤਿ, ਏਵਂ ਵੁਤ੍ਤੇਪਿ ਕਮ੍ਮਵਾਚਾ ਨ ਕੁਪ੍ਪਤਿ. ਇਮਾਨਿ ਹਿ ਛ ਬ੍ਯਞ੍ਜਨਾਨਿ ਕਮ੍ਮਂ ਨ ਕੋਪੇਨ੍ਤਿ. ਯਂ ਪਨ ਸੁਤ੍ਤਨ੍ਤਿਕਤ੍ਥੇਰਾ ‘‘ਦ-ਕਾਰੋ ਤ-ਕਾਰਮਾਪਜ੍ਜਤਿ, ਤ-ਕਾਰੋ ਦ-ਕਾਰਮਾਪਜ੍ਜਤਿ, ਚ-ਕਾਰੋ ਜ-ਕਾਰਮਾਪਜ੍ਜਤਿ, ਜ-ਕਾਰੋ ਚ-ਕਾਰਮਾਪਜ੍ਜਤਿ, ਯ-ਕਾਰੋ ਕ-ਕਾਰਮਾਪਜ੍ਜਤਿ, ਕ-ਕਾਰੋ ਯ-ਕਾਰਮਾਪਜ੍ਜਤਿ, ਤਸ੍ਮਾ ਦ-ਕਾਰਾਦੀਸੁ ਵਤ੍ਤਬ੍ਬੇਸੁ ਤ-ਕਾਰਾਦਿਵਚਨਂ ਨ ਵਿਰੁਜ੍ਝਤੀ’’ਤਿ ਵਦਨ੍ਤਿ, ਤਂ ਕਮ੍ਮਵਾਚਂ ਪਤ੍ਵਾ ਨ ਵਟ੍ਟਤਿ. ਤਸ੍ਮਾ ਵਿਨਯਧਰੇਨ ਨੇਵ ਦ-ਕਾਰੋ ਤ-ਕਾਰੋ ਕਾਤਬ੍ਬੋ…ਪੇ… ਨ ਕ-ਕਾਰੋ ਯ-ਕਾਰੋ. ਯਥਾਪਾਲ਼ਿਯਾ ਨਿਰੁਤ੍ਤਿਂ ਸੋਧੇਤ੍ਵਾ ਦਸਵਿਧਾਯ ਬ੍ਯਞ੍ਜਨਨਿਰੁਤ੍ਤਿਯਾ ਵੁਤ੍ਤਦੋਸੇ ਪਰਿਹਰਨ੍ਤੇਨ ਕਮ੍ਮਵਾਚਾ ਕਾਤਬ੍ਬਾ. ਇਤਰਥਾ ਹਿ ਸਾਵਨਂ ਹਾਪੇਤਿ ਨਾਮ.
ਅਕਾਲੇ ਵਾ ਸਾਵੇਤੀਤਿ ਸਾਵਨਾਯ ਅਕਾਲੇ ਅਨੋਕਾਸੇ ਞਤ੍ਤਿਂ ਅਟ੍ਠਪੇਤ੍ਵਾ ਪਠਮਂਯੇਵ ਅਨੁਸ੍ਸਾਵਨਕਮ੍ਮਂ ਕਤ੍ਵਾ ਪਚ੍ਛਾ ਞਤ੍ਤਿਂ ਠਪੇਤਿ. ਇਤਿ ਇਮੇਹਿ ਪਞ੍ਚਹਾਕਾਰੇਹਿ ਅਨੁਸ੍ਸਾਵਨਤੋ ਕਮ੍ਮਾਨਿ ਵਿਪਜ੍ਜਨ੍ਤਿ.
੨੫੩. ਸੀਮਤੋ ਵਿਪਤ੍ਤਿਯਂ ਪਨ ਅਤਿਖੁਦ੍ਦਕਸੀਮਾ ਨਾਮ ਯਾ ਏਕਵੀਸਤਿ ਭਿਕ੍ਖੂ ਨ ਗਣ੍ਹਾਤਿ. ਕੁਰੁਨ੍ਦਿਯਂ ਪਨ ‘‘ਯਤ੍ਥ ਏਕਵੀਸਤਿ ਭਿਕ੍ਖੂ ਨਿਸੀਦਿਤੁਂ ਨ ਸਕ੍ਕੋਨ੍ਤੀ’’ਤਿ ਵੁਤ੍ਤਂ. ਤਸ੍ਮਾ ਯਾ ਏਵਰੂਪਾ ਸੀਮਾ, ਅਯਂ ਸਮ੍ਮਤਾਪਿ ਅਸਮ੍ਮਤਾ ਗਾਮਖੇਤ੍ਤਸਦਿਸਾਵ ਹੋਤਿ, ਤਤ੍ਥ ਕਤਂ ਕਮ੍ਮਂ ਕੁਪ੍ਪਤਿ. ਏਸ ਨਯੋ ਸੇਸਸੀਮਾਸੁਪਿ. ਏਤ੍ਥ ਪਨ ਅਤਿਮਹਤੀ ਨਾਮ ਯਾ ਕੇਸਗ੍ਗਮਤ੍ਤੇਨਪਿ ਤਿਯੋਜਨਂ ਅਤਿਕ੍ਕਮਿਤ੍ਵਾ ਸਮ੍ਮਤਾ ਹੋਤਿ. ਖਣ੍ਡਨਿਮਿਤ੍ਤਾ ਨਾਮ ਅਘਟਿਤਨਿਮਿਤ੍ਤਾ ਵੁਚ੍ਚਤਿ. ਪੁਰਤ੍ਥਿਮਾਯ ਦਿਸਾਯ ਨਿਮਿਤ੍ਤਂ ਕਿਤ੍ਤੇਤ੍ਵਾ ਅਨੁਕ੍ਕਮੇਨੇਵ ਦਕ੍ਖਿਣਾਯ ਪਚ੍ਛਿਮਾਯ ਉਤ੍ਤਰਾਯ ਦਿਸਾਯ ਕਿਤ੍ਤੇਤ੍ਵਾ ਪੁਨ ਪੁਰਤ੍ਥਿਮਾਯ ਦਿਸਾਯ ਪੁਬ੍ਬਕਿਤ੍ਤਿਤਂ ਨਿਮਿਤ੍ਤਂ ਪਟਿਕਿਤ੍ਤੇਤ੍ਵਾ ਠਪੇਤੁਂ ਵਟ੍ਟਤਿ, ਏਵਂ ਅਖਣ੍ਡਨਿਮਿਤ੍ਤਾ ਹੋਤਿ. ਸਚੇ ਪਨ ਅਨੁਕ੍ਕਮੇਨ ਆਹਰਿਤ੍ਵਾ ਉਤ੍ਤਰਾਯ ਦਿਸਾਯ ਨਿਮਿਤ੍ਤਂ ਕਿਤ੍ਤੇਤ੍ਵਾ ਤਤ੍ਥੇਵ ਠਪੇਤਿ, ਖਣ੍ਡਨਿਮਿਤ੍ਤਾ ਹੋਤਿ. ਅਪਰਾਪਿ ਖਣ੍ਡਨਿਮਿਤ੍ਤਾ ਨਾਮ ਯਾ ਅਨਿਮਿਤ੍ਤੁਪਗਂ ਤਚਸਾਰਰੁਕ੍ਖਂ ਵਾ ਖਾਣੁਕਂ ਵਾ ਪਂਸੁਪੁਞ੍ਜਂ ਵਾ ਵਾਲੁਕਪੁਞ੍ਜਂ ਵਾ ਅਞ੍ਞਤਰਂ ਅਨ੍ਤਰਾ ਏਕਂ ਨਿਮਿਤ੍ਤਂ ਕਤ੍ਵਾ ਸਮ੍ਮਤਾ ਹੋਤਿ. ਛਾਯਾਨਿਮਿਤ੍ਤਾ ਨਾਮ ਯਾ ਪਬ੍ਬਤਚ੍ਛਾਯਾਦੀਨਂ ਯਂ ਕਿਞ੍ਚਿ ਛਾਯਂ ਨਿਮਿਤ੍ਤਂ ਕਤ੍ਵਾ ਸਮ੍ਮਤਾ ਹੋਤਿ. ਅਨਿਮਿਤ੍ਤਾ ਨਾਮ ਯਾ ਸਬ੍ਬੇਨ ਸਬ੍ਬਂ ਨਿਮਿਤ੍ਤਾਨਿ ਅਕਿਤ੍ਤੇਤ੍ਵਾ ਸਮ੍ਮਤਾ ਹੋਤਿ. ਬਹਿਸੀਮੇ ਠਿਤੋ ਸੀਮਂ ਸਮ੍ਮਨ੍ਨਤਿ ਨਾਮ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਨਿਮਿਤ੍ਤਾਨਂ ਬਹਿ ਠਿਤੋ ਸਮ੍ਮਨ੍ਨਤਿ. ਨਦਿਯਾ ਸਮੁਦ੍ਦੇ ਜਾਤਸ੍ਸਰੇ ਸੀਮਂ ਸਮ੍ਮਨ੍ਨਤੀਤਿ ਏਤੇਸੁ ਨਦੀਆਦੀਸੁ ਯਂ ਸਮ੍ਮਨ੍ਨਤਿ, ਸਾ ਏਵਂ ਸਮ੍ਮਤਾਪਿ ‘‘ਸਬ੍ਬਾ, ਭਿਕ੍ਖਵੇ, ਨਦੀ ਅਸੀਮਾ, ਸਬ੍ਬੋ ਸਮੁਦ੍ਦੋ ਅਸੀਮੋ, ਸਬ੍ਬੋ ਜਾਤਸ੍ਸਰੋ ਅਸੀਮੋ’’ਤਿ (ਮਹਾਵ. ੧੪੭) ਵਚਨਤੋ ਅਸਮ੍ਮਤਾਵ ਹੋਤਿ. ਸੀਮਾਯ ਸੀਮਂ ਸਮ੍ਭਿਨ੍ਦਤੀਤਿ ਅਤ੍ਤਨੋ ਸੀਮਾਯ ਪਰੇਸਂ ਸੀਮਂ ਸਮ੍ਭਿਨ੍ਦਤਿ. ਸੀਮਾਯ ਸੀਮਂ ਅਜ੍ਝੋਤ੍ਥਰਤੀਤਿ ਅਤ੍ਤਨੋ ਸੀਮਾਯ ਪਰੇਸਂ ਸੀਮਂ ਅਜ੍ਝੋਤ੍ਥਰਤਿ. ਤਤ੍ਥ ਯਥਾ ਸਮ੍ਭੇਦੋ ਚ ਅਜ੍ਝੋਤ੍ਥਰਣਞ੍ਚ ਹੋਤਿ, ਤਂ ਸਬ੍ਬਂ ਸੀਮਾਕਥਾਯਂ ਵੁਤ੍ਤਮੇਵ. ਇਤਿ ਇਮਾ ਏਕਾਦਸਪਿ ਸੀਮਾ ਅਸੀਮਾ ਗਾਮਖੇਤ੍ਤਸਦਿਸਾ ਏਵ, ਤਾਸੁ ਨਿਸੀਦਿਤ੍ਵਾ ਕਤਂ ਕਮ੍ਮਂ ਕੁਪ੍ਪਤਿ. ਤੇਨ ਵੁਤ੍ਤਂ ‘‘ਇਮੇਹਿ ਏਕਾਦਸਹਿ ਆਕਾਰੇਹਿ ਸੀਮਤੋ ਕਮ੍ਮਾਨਿ ਵਿਪਜ੍ਜਨ੍ਤੀ’’ਤਿ.
ਪਰਿਸਤੋ ਕਮ੍ਮਵਿਪਤ੍ਤਿਯਂ ਪਨ ਕਿਞ੍ਚਿ ਅਨੁਤ੍ਤਾਨਂ ਨਾਮ ਨਤ੍ਥਿ. ਯਮ੍ਪਿ ਤਤ੍ਥ ਕਮ੍ਮਪ੍ਪਤ੍ਤਛਨ੍ਦਾਰਹਲਕ੍ਖਣਂ ਵਤ੍ਤਬ੍ਬਂ ਸਿਯਾ, ਤਮ੍ਪਿ ਪਰਤੋ ‘‘ਚਤ੍ਤਾਰੋ ਭਿਕ੍ਖੂ ਪਕਤਤ੍ਤਾ ਕਮ੍ਮਪ੍ਪਤ੍ਤਾ’’ਤਿਆਦਿਨਾ ਨਯੇਨ ਵੁਤ੍ਤਮੇਵ. ਤਤ੍ਥ ਪਕਤਤ੍ਤਾ ਕਮ੍ਮਪ੍ਪਤ੍ਤਾਤਿ ਚਤੁਵਗ੍ਗਕਰਣੇ ਕਮ੍ਮੇ ਚਤ੍ਤਾਰੋ ਪਕਤਤ੍ਤਾ ਅਨੁਕ੍ਖਿਤ੍ਤਾ ਅਨਿਸ੍ਸਾਰਿਤਾ ਪਰਿਸੁਦ੍ਧਸੀਲਾ ਚਤ੍ਤਾਰੋ ਭਿਕ੍ਖੂ ਕਮ੍ਮਪ੍ਪਤ੍ਤਾ ਕਮ੍ਮਸ੍ਸ ਅਰਹਾ ਅਨੁਚ੍ਛਵਿਕਾ ਸਾਮਿਨੋ. ਨ ਤੇਹਿ ਵਿਨਾ ਤਂ ਕਮ੍ਮਂ ਕਰੀਯਤਿ, ਨ ਤੇਸਂ ਛਨ੍ਦੋ ਵਾ ਪਾਰਿਸੁਦ੍ਧਿ ਵਾ ਏਤਿ, ਅਵਸੇਸਾ ਪਨ ਸਚੇਪਿ ਸਹਸ੍ਸਮਤ੍ਤਾ ਹੋਨ੍ਤਿ, ਸਚੇ ਸਮਾਨਸਂਵਾਸਕਾ ਸਬ੍ਬੇ ਛਨ੍ਦਾਰਹਾਵ ਹੋਨ੍ਤਿ, ਛਨ੍ਦਪਾਰਿਸੁਦ੍ਧਿਂ ਦਤ੍ਵਾ ਆਗਚ੍ਛਨ੍ਤੁ ਵਾ ਮਾ ਵਾ, ਕਮ੍ਮਂ ਪਨ ਤਿਟ੍ਠਤਿ. ਯਸ੍ਸ ਪਨ ਸਙ੍ਘੋ ਪਰਿਵਾਸਾਦਿਕਮ੍ਮਂ ਕਰੋਤਿ, ਸੋ ਨੇਵ ਕਮ੍ਮਪ੍ਪਤ੍ਤੋ ਨਾਪਿ ਛਨ੍ਦਾਰਹੋ, ਅਪਿਚ ਯਸ੍ਮਾ ਤਂ ਪੁਗ੍ਗਲਂ ਵਤ੍ਥੁਂ ਕਤ੍ਵਾ ਸਙ੍ਘੋ ਕਮ੍ਮਂ ਕਰੋਤਿ, ਤਸ੍ਮਾ ਕਮ੍ਮਾਰਹੋਤਿ ਵੁਚ੍ਚਤਿ. ਸੇਸਕਮ੍ਮੇਸੁਪਿ ਏਸੇਵ ਨਯੋ.
੨੫੪. ਅਪਲੋਕਨਕਮ੍ਮਂ ਕਤਮਾਨਿ ਪਞ੍ਚ ਠਾਨਾਨਿ ਗਚ੍ਛਤਿ, ਓਸਾਰਣਂ ਨਿਸ੍ਸਾਰਣਂ ਭਣ੍ਡੁਕਮ੍ਮਂ ਬ੍ਰਹ੍ਮਦਣ੍ਡਂ ਕਮ੍ਮਲਕ੍ਖਣਞ੍ਞੇਵ ਪਞ੍ਚਮਨ੍ਤਿ ਏਤ੍ਥ ‘‘ਓਸਾਰਣਂ ਨਿਸ੍ਸਾਰਣ’’ਨ੍ਤਿ ਪਦਸਿਲਿਟ੍ਠਤਾਯੇਤਂ ਵੁਤ੍ਤਂ, ਪਠਮਂ ਪਨ ਨਿਸ੍ਸਾਰਣਾ ਹੋਤਿ, ਪਚ੍ਛਾ ਓਸਾਰਣਾ. ਤਤ੍ਥ ਯਾ ਸਾ ਕਣ੍ਟਕਸ੍ਸ ਸਾਮਣੇਰਸ੍ਸ ਦਣ੍ਡਕਮ੍ਮਨਾਸਨਾ, ਸਾ ਨਿਸ੍ਸਾਰਣਾਤਿ ਵੇਦਿਤਬ੍ਬਾ. ਤਸ੍ਮਾ ਏਤਰਹਿ ਸਚੇਪਿ ਸਾਮਣੇਰੋ ਬੁਦ੍ਧਸ੍ਸ ਵਾ ਧਮ੍ਮਸ੍ਸ ਵਾ ਸਙ੍ਘਸ੍ਸ ਵਾ ਅਵਣ੍ਣਂ ਭਣਤਿ, ਅਕਪ੍ਪਿਯਂ ‘‘ਕਪ੍ਪਿਯ’’ਨ੍ਤਿ ਦੀਪੇਤਿ, ਮਿਚ੍ਛਾਦਿਟ੍ਠਿਕੋ ਹੋਤਿ, ਅਨ੍ਤਗ੍ਗਾਹਿਕਾਯ ਦਿਟ੍ਠਿਯਾ ਸਮਨ੍ਨਾਗਤੋ, ਸੋ ਯਾਵਤਤਿਯਂ ਨਿਵਾਰੇਤ੍ਵਾ ਤਂ ਲਦ੍ਧਿਂ ਵਿਸ੍ਸਜ੍ਜਾਪੇਤਬ੍ਬੋ. ਨੋ ਚੇ ਵਿਸ੍ਸਜ੍ਜੇਤਿ, ਸਙ੍ਘਂ ਸਨ੍ਨਿਪਾਤੇਤ੍ਵਾ ‘‘ਵਿਸ੍ਸਜ੍ਜੇਹੀ’’ਤਿ ਵਤ੍ਤਬ੍ਬੋ. ਨੋ ਚੇ ਵਿਸ੍ਸਜ੍ਜੇਤਿ, ਬ੍ਯਤ੍ਤੇਨ ਭਿਕ੍ਖੁਨਾ ਅਪਲੋਕਨਕਮ੍ਮਂ ਕਤ੍ਵਾ ਨਿਸ੍ਸਾਰੇਤਬ੍ਬੋ. ਏਵਞ੍ਚ ਪਨ ਕਮ੍ਮਂ ਕਾਤਬ੍ਬਂ –
‘‘ਸਙ੍ਘਂ, ਭਨ੍ਤੇ, ਪੁਚ੍ਛਾਮਿ ‘ਅਯਂ ਇਤ੍ਥਨ੍ਨਾਮੋ ਸਾਮਣੇਰੋ ਬੁਦ੍ਧਸ੍ਸ ਧਮ੍ਮਸ੍ਸ ਸਙ੍ਘਸ੍ਸ ਅਵਣ੍ਣਵਾਦੀ ਮਿਚ੍ਛਾਦਿਟ੍ਠਿਕੋ, ਯਂ ਅਞ੍ਞੇ ਸਾਮਣੇਰਾ ਲਭਨ੍ਤਿ ਦਿਰਤ੍ਤਤਿਰਤ੍ਤਂ ਭਿਕ੍ਖੂਹਿ ਸਦ੍ਧਿਂ ਸਹਸੇਯ੍ਯਂ, ਤਸ੍ਸਾ ਅਲਾਭਾਯ ਨਿਸ੍ਸਾਰਣਾ ਰੁਚ੍ਚਤਿ ਸਙ੍ਘਸ੍ਸਾ’ਤਿ. ਦੁਤਿਯਮ੍ਪਿ. ਤਤਿਯਮ੍ਪਿ ਭਨ੍ਤੇ ਸਙ੍ਘਂ ਪੁਚ੍ਛਾਮਿ ‘ਅਯਂ ਇਤ੍ਥਨ੍ਨਾਮੋ ਸਾਮਣੇਰੋ…ਪੇ… ਰੁਚ੍ਚਤਿ ਸਙ੍ਘਸ੍ਸਾ’ਤਿ, ਚਰ ਪਿਰੇ ਵਿਨਸ੍ਸਾ’’ਤਿ.
ਸੋ ਅਪਰੇਨ ਸਮਯੇਨ ‘‘ਅਹਂ, ਭਨ੍ਤੇ, ਬਾਲਤਾਯ ਅਞਾਣਤਾਯ ਅਲਕ੍ਖਿਕਤਾਯ ਏਵਂ ਅਕਾਸਿਂ, ਸ੍ਵਾਹਂ ਸਙ੍ਘਂ ਖਮਾਪੇਮੀ’’ਤਿ ਖਮਾਪੇਨ੍ਤੋ ਯਾਵਤਤਿਯਂ ਯਾਚਾਪੇਤ੍ਵਾ ਅਪਲੋਕਨਕਮ੍ਮੇਨੇਵ ਓਸਾਰੇਤਬ੍ਬੋ, ਏਵਞ੍ਚ ਪਨ ਓਸਾਰੇਤਬ੍ਬੋ. ਸਙ੍ਘਮਜ੍ਝੇ ਬ੍ਯਤ੍ਤੇਨ ਭਿਕ੍ਖੁਨਾ ਸਙ੍ਘਸ੍ਸ ਅਨੁਮਤਿਯਾ ਸਾਵੇਤਬ੍ਬਂ –
‘‘ਸਙ੍ਘਂ, ਭਨ੍ਤੇ, ਪੁਚ੍ਛਾਮਿ ‘ਅਯਂ ਇਤ੍ਥਨ੍ਨਾਮੋ ਸਾਮਣੇਰੋ ਬੁਦ੍ਧਸ੍ਸ ਧਮ੍ਮਸ੍ਸ ਸਙ੍ਘਸ੍ਸ ਅਵਣ੍ਣਵਾਦੀ ਮਿਚ੍ਛਾਦਿਟ੍ਠਿਕੋ, ਯਂ ਅਞ੍ਞੇ ਸਾਮਣੇਰਾ ਲਭਨ੍ਤਿ ਦਿਰਤ੍ਤਤਿਰਤ੍ਤਂ ਭਿਕ੍ਖੂਹਿ ਸਦ੍ਧਿਂ ਸਹਸੇਯ੍ਯਂ, ਤਸ੍ਸਾ ਅਲਾਭਾਯ ਨਿਸ੍ਸਾਰਿਤੋ, ਸ੍ਵਾਯਂ ਇਦਾਨਿ ਸੋਰਤੋ ਨਿਵਾਤਵੁਤ੍ਤਿ ਲਜ੍ਜਿਧਮ੍ਮਂ ਓਕ੍ਕਨ੍ਤੋ ਹਿਰੋਤ੍ਤਪ੍ਪੇ ਪਤਿਟ੍ਠਿਤੋ ਕਤਦਣ੍ਡਕਮ੍ਮੋ ਅਚ੍ਚਯਂ ਦੇਸੇਤਿ, ਇਮਸ੍ਸ ਸਾਮਣੇਰਸ੍ਸ ਯਥਾ ਪੁਰੇ ਕਾਯਸਮ੍ਭੋਗਸਾਮਗ੍ਗਿਦਾਨਂ ਰੁਚ੍ਚਤਿ ਸਙ੍ਘਸ੍ਸਾ’’’ਤਿ.
ਏਵਂ ਤਿਕ੍ਖਤ੍ਤੁਂ ਵਤ੍ਤਬ੍ਬਂ. ਏਵਂ ਅਪਲੋਕਨਕਮ੍ਮਂ ਓਸਾਰਣਞ੍ਚ ਨਿਸ੍ਸਾਰਣਞ੍ਚ ਗਚ੍ਛਤਿ. ਭਣ੍ਡੁਕਮ੍ਮਂ ਪਬ੍ਬਜ੍ਜਾਵਿਨਿਚ੍ਛਯਕਥਾਯ ਵੁਤ੍ਤਮੇਵ.
ਬ੍ਰਹ੍ਮਦਣ੍ਡੋ ਪਨ ਨ ਕੇਵਲਂ ਛਨ੍ਨਸ੍ਸੇਵ ਪਞ੍ਞਤ੍ਤੋ, ਯੋ ਅਞ੍ਞੋਪਿ ਭਿਕ੍ਖੁ ਮੁਖਰੋ ਹੋਤਿ, ਭਿਕ੍ਖੂ ਦੁਰੁਤ੍ਤਵਚਨੇਹਿ ਘਟ੍ਟੇਨ੍ਤੋ ਖੁਂਸੇਨ੍ਤੋ ਵਮ੍ਭੇਨ੍ਤੋ ਵਿਹਰਤਿ, ਤਸ੍ਸਪਿ ਦਾਤਬ੍ਬੋ, ਏਵਞ੍ਚ ਪਨ ਦਾਤਬ੍ਬੋ. ਸਙ੍ਘਮਜ੍ਝੇ ਬ੍ਯਤ੍ਤੇਨ ਭਿਕ੍ਖੁਨਾ ਸਙ੍ਘਸ੍ਸ ਅਨੁਮਤਿਯਾ ਸਾਵੇਤਬ੍ਬਂ –
‘‘ਭਨ੍ਤੇ, ਇਤ੍ਥਨ੍ਨਾਮੋ ਭਿਕ੍ਖੁ ਮੁਖਰੋ, ਭਿਕ੍ਖੂ ਦੁਰੁਤ੍ਤਵਚਨੇਹਿ ਘਟ੍ਟੇਨ੍ਤੋ ਖੁਂਸੇਨ੍ਤੋ ਵਮ੍ਭੇਨ੍ਤੋ ਵਿਹਰਤਿ, ਸੋ ਭਿਕ੍ਖੁ ਯਂ ਇਚ੍ਛੇਯ੍ਯ, ਤਂ ਵਦੇਯ੍ਯ, ਭਿਕ੍ਖੂਹਿ ਇਤ੍ਥਨ੍ਨਾਮੋ ਭਿਕ੍ਖੁ ਨੇਵ ਵਤ੍ਤਬ੍ਬੋ, ਨ ਓਵਦਿਤਬ੍ਬੋ ਨ ਅਨੁਸਾਸਿਤਬ੍ਬੋ, ਸਙ੍ਘਂ, ਭਨ੍ਤੇ, ਪੁਚ੍ਛਾਮਿ ‘ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਬ੍ਰਹ੍ਮਦਣ੍ਡਸ੍ਸ ਦਾਨਂ ਰੁਚ੍ਚਤਿ ਸਙ੍ਘਸ੍ਸਾ’ਤਿ. ਦੁਤਿਯਮ੍ਪਿ ਪੁਚ੍ਛਾਮਿ…ਪੇ… ਤਤਿਯਮ੍ਪਿ ਪੁਚ੍ਛਾਮਿ ‘ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਬ੍ਰਹ੍ਮਦਣ੍ਡਸ੍ਸ ਦਾਨਂ ਰੁਚ੍ਚਤਿ ਸਙ੍ਘਸ੍ਸਾ’’’ਤਿ.
ਤਸ੍ਸ ਅਪਰੇਨ ਸਮਯੇਨ ਸਮ੍ਮਾ ਵਤ੍ਤਿਤ੍ਵਾ ਖਮਾਪੇਨ੍ਤਸ੍ਸ ਬ੍ਰਹ੍ਮਦਣ੍ਡੋ ਪਟਿਪ੍ਪਸ੍ਸਮ੍ਭੇਤਬ੍ਬੋ, ਏਵਞ੍ਚ ਪਨ ਪਟਿਪ੍ਪਸ੍ਸਮ੍ਭੇਤਬ੍ਬੋ. ਬ੍ਯਤ੍ਤੇਨ ਭਿਕ੍ਖੁਨਾ ਸਙ੍ਘਮਜ੍ਝੇ ਸਾਵੇਤਬ੍ਬਂ –
‘‘ਭਨ੍ਤੇ, ਭਿਕ੍ਖੁਸਙ੍ਘੋ ਅਸੁਕਸ੍ਸ ਭਿਕ੍ਖੁਨੋ ਬ੍ਰਹ੍ਮਦਣ੍ਡਂ ਅਦਾਸਿ, ਸੋ ਭਿਕ੍ਖੁ ਸੋਰਤੋ ਨਿਵਾਤਵੁਤ੍ਤਿ ਲਜ੍ਜਿਧਮ੍ਮਂ ਓਕ੍ਕਨ੍ਤੋ ਹਿਰੋਤ੍ਤਪ੍ਪੇ ਪਤਿਟ੍ਠਿਤੋ ਪਟਿਸਙ੍ਖਾ ਆਯਤਿਂ ਸਂਵਰੇ ਤਿਟ੍ਠਤਿ, ਸਙ੍ਘਂ, ਭਨ੍ਤੇ, ਪੁਚ੍ਛਾਮਿ ‘ਤਸ੍ਸ ਭਿਕ੍ਖੁਨੋ ਬ੍ਰਹ੍ਮਦਣ੍ਡਸ੍ਸ ਪਟਿਪ੍ਪਸ੍ਸਦ੍ਧਿ ਰੁਚ੍ਚਤਿ ਸਙ੍ਘਸ੍ਸਾ’’’ਤਿ.
ਏਵਂ ਯਾਵਤਤਿਯਂ ਵਤ੍ਵਾ ਅਪਲੋਕਨਕਮ੍ਮੇਨੇਵ ਬ੍ਰਹ੍ਮਦਣ੍ਡੋ ਪਟਿਪ੍ਪਸ੍ਸਮ੍ਭੇਤਬ੍ਬੋਤਿ.
ਕਮ੍ਮਲਕ੍ਖਣਞ੍ਞੇਵ ਪਞ੍ਚਮਨ੍ਤਿ ਯਂ ਤਂ ਭਗਵਤਾ ਭਿਕ੍ਖੁਨਿਕ੍ਖਨ੍ਧਕੇ –
‘‘ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਭਿਕ੍ਖੁਨਿਯੋ ਕਦ੍ਦਮੋਦਕੇਨ ਓਸਿਞ੍ਚਨ੍ਤਿ ‘ਅਪ੍ਪੇਵ ਨਾਮ ਅਮ੍ਹੇਸੁ ਸਾਰਜ੍ਜੇਯ੍ਯੁ’ਨ੍ਤਿ, ਕਾਯਂ ਵਿਵਰਿਤ੍ਵਾ ਭਿਕ੍ਖੁਨੀਨਂ ਦਸ੍ਸੇਨ੍ਤਿ, ਊਰੁਂ ਵਿਵਰਿਤ੍ਵਾ ਭਿਕ੍ਖੁਨੀਨਂ ਦਸ੍ਸੇਨ੍ਤਿ, ਅਙ੍ਗਜਾਤਂ ਵਿਵਰਿਤ੍ਵਾ ਭਿਕ੍ਖੁਨੀਨਂ ਦਸ੍ਸੇਨ੍ਤਿ. ਭਿਕ੍ਖੁਨਿਯੋ ਓਭਾਸੇਨ੍ਤਿ, ਭਿਕ੍ਖੁਨੀਹਿ ਸਦ੍ਧਿਂ ਸਮ੍ਪਯੋਜੇਨ੍ਤਿ ‘ਅਪ੍ਪੇਵ ਨਾਮ ਅਮ੍ਹੇਸੁ ਸਾਰਜ੍ਜੇਯ੍ਯੁ’’’ਨ੍ਤਿ (ਚੂਲ਼ਵ. ੪੧੧) –
ਇਮੇਸੁ ਵਤ੍ਥੂਸੁ ਯੇਸਂ ਭਿਕ੍ਖੂਨਂ ਦੁਕ੍ਕਟਂ ਪਞ੍ਞਪੇਤ੍ਵਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਤਸ੍ਸ ਭਿਕ੍ਖੁਨੋ ਦਣ੍ਡਕਮ੍ਮਂ ਕਾਤੁ’’ਨ੍ਤਿ ਵਤ੍ਵਾ ‘‘ਕਿਂ ਨੁ ਖੋ ਦਣ੍ਡਕਮ੍ਮਂ ਕਾਤਬ੍ਬ’’ਨ੍ਤਿ ਸਂਸਯੇ ਉਪ੍ਪਨ੍ਨੇ ‘‘ਅਵਨ੍ਦਿਯੋ ਸੋ, ਭਿਕ੍ਖਵੇ, ਭਿਕ੍ਖੁ ਭਿਕ੍ਖੁਨਿਸਙ੍ਘੇਨ ਕਾਤਬ੍ਬੋ’’ਤਿ ਏਵਂ ਅਵਨ੍ਦਿਯਕਮ੍ਮਂ ਅਨੁਞ੍ਞਾਤਂ, ਤਂ ਕਮ੍ਮਲਕ੍ਖਣਞ੍ਞੇਵ ਪਞ੍ਚਮਂ, ਇਮਸ੍ਸ ਅਪਲੋਕਨਕਮ੍ਮਸ੍ਸ ਠਾਨਂ ਹੋਤਿ. ਤਸ੍ਸ ਹਿ ਕਮ੍ਮਞ੍ਞੇਵ ਲਕ੍ਖਣਂ, ਨ ਓਸਾਰਣਾਦੀਨਿ, ਤਸ੍ਮਾ ਕਮ੍ਮਲਕ੍ਖਣਨ੍ਤਿ ਵੁਚ੍ਚਤਿ. ਤਸ੍ਸ ਕਰਣਂ ਪਟਿਪ੍ਪਸ੍ਸਦ੍ਧਿਯਾ ਸਦ੍ਧਿਂ ਵਿਤ੍ਥਾਰਤੋ ਦਸ੍ਸਯਿਸ੍ਸਾਮ. ਭਿਕ੍ਖੁਨੁਪਸ੍ਸਯੇ ਸਨ੍ਨਿਪਤਿਤਸ੍ਸ ਭਿਕ੍ਖੁਨਿਸਙ੍ਘਸ੍ਸ ਅਨੁਮਤਿਯਾ ਬ੍ਯਤ੍ਤਾਯ ਭਿਕ੍ਖੁਨਿਯਾ ਸਾਵੇਤਬ੍ਬਂ –
‘‘ਅਯ੍ਯੇ, ਅਸੁਕੋ ਨਾਮ ਅਯ੍ਯੋ ਭਿਕ੍ਖੁਨੀਨਂ ਅਪਾਸਾਦਿਕਂ ਦਸ੍ਸੇਤਿ, ਏਤਸ੍ਸ ਅਯ੍ਯਸ੍ਸ ਅਵਨ੍ਦਿਯਕਰਣਂ ਰੁਚ੍ਚਤੀ’’ਤਿ ਭਿਕ੍ਖੁਨਿਸਙ੍ਘਂ ਪੁਚ੍ਛਾਮਿ. ‘ਅਯ੍ਯੇ, ਅਸੁਕੋ ਨਾਮ ਅਯ੍ਯੋ ਭਿਕ੍ਖੁਨੀਨਂ ਅਪਾਸਾਦਿਕਂ ਦਸ੍ਸੇਤਿ, ਏਤਸ੍ਸ ਅਯ੍ਯਸ੍ਸ ਅਵਨ੍ਦਿਯਕਰਣਂ ਰੁਚ੍ਚਤੀ’ਤਿ ਦੁਤਿਯਮ੍ਪਿ. ਤਤਿਯਮ੍ਪਿ ਭਿਕ੍ਖੁਨਿਸਙ੍ਘਂ ਪੁਚ੍ਛਾਮੀ’’ਤਿ.
ਏਵਂ ਤਿਕ੍ਖਤ੍ਤੁਂ ਸਾਵੇਤ੍ਵਾ ਅਪਲੋਕਨਕਮ੍ਮੇਨ ਅਵਨ੍ਦਿਯਕਮ੍ਮਂ ਕਾਤਬ੍ਬਂ.
ਤਤੋ ਪਟ੍ਠਾਯ ਸੋ ਭਿਕ੍ਖੁ ਭਿਕ੍ਖੁਨੀਹਿ ਨ ਵਨ੍ਦਿਤਬ੍ਬੋ. ਸਚੇ ਅਵਨ੍ਦਿਯਮਾਨੋ ਹਿਰੋਤ੍ਤਪ੍ਪਂ ਪਚ੍ਚੁਪਟ੍ਠਪੇਤ੍ਵਾ ਸਮ੍ਮਾ ਵਤ੍ਤਤਿ, ਤੇਨ ਭਿਕ੍ਖੁਨਿਯੋ ਖਮਾਪੇਤਬ੍ਬਾ. ਖਮਾਪੇਨ੍ਤਨ ਭਿਕ੍ਖੁਨੁਪਸ੍ਸਯਂ ਅਗਨ੍ਤ੍ਵਾ ਵਿਹਾਰੇਯੇਵ ਸਙ੍ਘਂ ਵਾ ਗਣਂ ਵਾ ਏਕਂ ਭਿਕ੍ਖੁਂ ਵਾ ਉਪਸਙ੍ਕਮਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਅਹਂ, ਭਨ੍ਤੇ, ਪਟਿਸਙ੍ਖਾ ਆਯਤਿਂ ਸਂਵਰੇ ਤਿਟ੍ਠਾਮਿ, ਨ ਪੁਨ ਅਪਾਸਾਦਿਕਂ ਦਸ੍ਸੇਸ੍ਸਾਮਿ, ਭਿਕ੍ਖੁਨਿਸਙ੍ਘੋ ਮਯ੍ਹਂ ਖਮਤੂ’’ਤਿ ਖਮਾਪੇਤਬ੍ਬਂ. ਤੇਨ ਸਙ੍ਘੇਨ ਵਾ ਗਣੇਨ ਵਾ ਏਕਂ ਭਿਕ੍ਖੁਂ ਪੇਸੇਤ੍ਵਾ ਏਕਭਿਕ੍ਖੁਨਾ ਵਾ ਸਯਮੇਵ ਗਨ੍ਤ੍ਵਾ ਭਿਕ੍ਖੁਨਿਯੋ ਵਤ੍ਤਬ੍ਬਾ ‘‘ਅਯਂ ਭਿਕ੍ਖੁ ਪਟਿਸਙ੍ਖਾ ਆਯਤਿਂ ਸਂਵਰੇ ਠਿਤੋ, ਇਮਿਨਾ ਅਚ੍ਚਯਂ ਦੇਸੇਤ੍ਵਾ ਭਿਕ੍ਖੁਨਿਸਙ੍ਘੋ ਖਮਾਪਿਤੋ, ਭਿਕ੍ਖੁਨਿਸਙ੍ਘੋ ਇਮਂ ਭਿਕ੍ਖੁਂ ਵਨ੍ਦਿਯਂ ਕਰੋਤੂ’’ਤਿ. ਸੋ ਵਨ੍ਦਿਯੋ ਕਾਤਬ੍ਬੋ, ਏਵਞ੍ਚ ਪਨ ਕਾਤਬ੍ਬੋ. ਭਿਕ੍ਖੁਨੁਪਸ੍ਸਯੇ ਸਨ੍ਨਿਪਤਿਤਸ੍ਸ ਭਿਕ੍ਖੁਨਿਸਙ੍ਘਸ੍ਸ ਅਨੁਮਤਿਯਾ ਬ੍ਯਤ੍ਤਾਯ ਭਿਕ੍ਖੁਨਿਯਾ ਸਾਵੇਤਬ੍ਬਂ –
‘‘ਅਯ੍ਯੇ, ਅਸੁਕੋ ਨਾਮ ਅਯ੍ਯੋ ਭਿਕ੍ਖੁਨੀਨਂ ਅਪਾਸਾਦਿਕਂ ਦਸ੍ਸੇਤੀਤਿ ਭਿਕ੍ਖੁਨਿਸਙ੍ਘੇਨ ਅਵਨ੍ਦਿਯੋ ਕਤੋ, ਸੋ ਲਜ੍ਜਿਧਮ੍ਮਂ ਓਕ੍ਕਮਿਤ੍ਵਾ ਪਟਿਸਙ੍ਖਾ ਆਯਤਿਂ ਸਂਵਰੇ ਠਿਤੋ, ਅਚ੍ਚਯਂ ਦੇਸੇਤ੍ਵਾ ਭਿਕ੍ਖੁਨਿਸਙ੍ਘਂ ਖਮਾਪੇਸਿ, ਤਸ੍ਸ ਅਯ੍ਯਸ੍ਸ ਵਨ੍ਦਿਯਕਰਣਂ ਰੁਚ੍ਚਤੀਤਿ ਭਿਕ੍ਖੁਨਿਸਙ੍ਘਂ ਪੁਚ੍ਛਾਮੀ’’ਤਿ –
ਤਿਕ੍ਖਤ੍ਤੁਂ ਵਤ੍ਤਬ੍ਬਂ. ਏਵਂ ਅਪਲੋਕਨਕਮ੍ਮੇਨੇਵ ਵਨ੍ਦਿਯੋ ਕਾਤਬ੍ਬੋ.
੨੫੫. ਅਯਂ ਪਨੇਤ੍ਥ ਪਾਲ਼ਿਮੁਤ੍ਤਕੋਪਿ ਕਮ੍ਮਲਕ੍ਖਣਵਿਨਿਚ੍ਛਯੋ (ਪਰਿ. ਅਟ੍ਠ. ੪੯੫-੪੯੬). ਇਦਞ੍ਹਿ ਕਮ੍ਮਲਕ੍ਖਣਂ ਨਾਮ ਭਿਕ੍ਖੁਨਿਸਙ੍ਘਮੂਲਕਂ ਪਞ੍ਞਤ੍ਤਂ, ਭਿਕ੍ਖੁਸਙ੍ਘਸ੍ਸਪਿ ਪਨੇਤਂ ਲਬ੍ਭਤਿਯੇਵ. ਯਞ੍ਹਿ ਭਿਕ੍ਖੁਸਙ੍ਘੋ ਸਲਾਕਭਤ੍ਤਉਪੋਸਥਗ੍ਗੇਸੁ ਚ ਅਪਲੋਕਨਕਮ੍ਮਂ ਕਰੋਤਿ, ਏਤਮ੍ਪਿ ਕਮ੍ਮਲਕ੍ਖਣਮੇਵ. ਅਚ੍ਛਿਨ੍ਨਚੀਵਰਜਿਣ੍ਣਚੀਵਰਨਟ੍ਠਚੀਵਰਾਨਞ੍ਹਿ ਸਙ੍ਘਂ ਸਨ੍ਨਿਪਾਤੇਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਯਾਵਤਤਿਯਂ ਸਾਵੇਤ੍ਵਾ ਅਪਲੋਕਨਕਮ੍ਮਂ ਕਤ੍ਵਾ ਚੀਵਰਂ ਦਾਤੁਂ ਵਟ੍ਟਤਿ. ਅਪ੍ਪਮਤ੍ਤਕਵਿਸ੍ਸਜ੍ਜਕੇਨ ਪਨ ਚੀਵਰਂ ਕਰੋਨ੍ਤਸ੍ਸ ਪਚ੍ਚਯਭਾਜਨੀਯਕਥਾਯਂ ਵੁਤ੍ਤਪ੍ਪਭੇਦਾਨਿ ਸੂਚਿਆਦੀਨਿ ਅਨਪਲੋਕੇਤ੍ਵਾਪਿ ਦਾਤਬ੍ਬਾਨਿ. ਤੇਸਂ ਦਾਨੇ ਸੋਯੇਵ ਇਸ੍ਸਰੋ, ਤਤੋ ਅਤਿਰੇਕਂ ਦੇਨ੍ਤੇਨ ਅਪਲੋਕੇਤ੍ਵਾ ਦਾਤਬ੍ਬਂ. ਤਤੋ ਹਿ ਅਤਿਰੇਕਦਾਨੇ ਸਙ੍ਘੋ ਸਾਮੀ. ਗਿਲਾਨਭੇਸਜ੍ਜਮ੍ਪਿ ਤਤ੍ਥ ਵੁਤ੍ਤਪ੍ਪਕਾਰਂ ਸਯਮੇਵ ਦਾਤਬ੍ਬਂ, ਅਤਿਰੇਕਂ ਇਚ੍ਛਨ੍ਤਸ੍ਸ ਅਪਲੋਕੇਤ੍ਵਾ ਦਾਤਬ੍ਬਂ. ਯੋਪਿ ਚ ਦੁਬ੍ਬਲੋ ਵਾ ਛਿਨ੍ਨਿਰਿਯਾਪਥੋ ਵਾ ਪਚ੍ਛਿਨ੍ਨਭਿਕ੍ਖਾਚਾਰਪਥੋ ਵਾ ਮਹਾਗਿਲਾਨੋ, ਤਸ੍ਸ ਮਹਾਵਾਸੇਸੁ ਤਤ੍ਰੁਪ੍ਪਾਦਤੋ ਦੇਵਸਿਕਂ ਨਾਲ਼ਿ ਵਾ ਉਪਡ੍ਢਨਾਲ਼ਿ ਵਾ, ਏਕਦਿਵਸਂਯੇਵ ਵਾ ਪਞ੍ਚ ਵਾ ਦਸ ਵਾ ਤਣ੍ਡੁਲਨਾਲ਼ਿਯੋ ਦੇਨ੍ਤੇਨ ਅਪਲੋਕਨਕਮ੍ਮਂ ਕਤ੍ਵਾਵ ਦਾਤਬ੍ਬਾ. ਪੇਸਲਸ੍ਸ ਭਿਕ੍ਖੁਨੋ ਤਤ੍ਰੁਪ੍ਪਾਦਤੋ ਇਣਪਲਿਬੋਧਮ੍ਪਿ ਬਹੁਸ੍ਸੁਤਸ੍ਸ ਸਙ੍ਘਭਾਰਨਿਤ੍ਥਰਕਸ੍ਸ ਭਿਕ੍ਖੁਨੋ ਅਨੁਟ੍ਠਾਪਨੀਯਸੇਨਾਸਨਮ੍ਪਿ ਸਙ੍ਘਕਿਚ੍ਚਂ ਕਰੋਨ੍ਤਾਨਂ ਕਪ੍ਪਿਯਕਾਰਕਾਦੀਨਂ ਭਤ੍ਤਵੇਤਨਮ੍ਪਿ ਅਪਲੋਕਨਕਮ੍ਮੇਨ ਦਾਤੁਂ ਵਟ੍ਟਤਿ.
ਚਤੁਪਚ੍ਚਯਵਸੇਨ ਦਿਨ੍ਨਤਤ੍ਰੁਪ੍ਪਾਦਤੋ ਸਙ੍ਘਿਕਂ ਆਵਾਸਂ ਜਗ੍ਗਾਪੇਤੁਂ ਵਟ੍ਟਤਿ, ‘‘ਅਯਂ ਭਿਕ੍ਖੁ ਇਸ੍ਸਰਵਤਾਯ ਵਿਚਾਰੇਤੀ’’ਤਿ ਕਥਾਪਚ੍ਛਿਨ੍ਦਨਤ੍ਥਂ ਪਨ ਸਲਾਕਗ੍ਗਾਦੀਸੁ ਵਾ ਅਨ੍ਤਰਸਨ੍ਨਿਪਾਤੇ ਵਾ ਸਙ੍ਘਂ ਆਪੁਚ੍ਛਿਤ੍ਵਾਵ ਜਗ੍ਗਾਪੇਤਬ੍ਬੋ. ਚੀਵਰਪਿਣ੍ਡਪਾਤਤ੍ਥਾਯ ਓਦਿਸ੍ਸ ਦਿਨ੍ਨਤਤ੍ਰੁਪ੍ਪਾਦਤੋਪਿ ਅਪਲੋਕੇਤ੍ਵਾ ਆਵਾਸੋ ਜਗ੍ਗਾਪੇਤਬ੍ਬੋ, ਅਨਪਲੋਕੇਤ੍ਵਾਪਿ ਵਟ੍ਟਤਿ, ‘‘ਸੂਰੋ ਵਤਾਯਂ ਭਿਕ੍ਖੁ ਚੀਵਰਪਿਣ੍ਡਪਾਤਤ੍ਥਾਯ ਓਦਿਸ੍ਸ ਦਿਨ੍ਨਤੋ ਆਵਾਸਂ ਜਗ੍ਗਾਪੇਤੀ’’ਤਿ ਏਵਂ ਉਪ੍ਪਨ੍ਨਕਥਾਪਚ੍ਛੇਦਨਤ੍ਥਂ ਪਨ ਅਪਲੋਕਨਕਮ੍ਮਮੇਵ ਕਤ੍ਵਾ ਜਗ੍ਗਾਪੇਤਬ੍ਬੋ.
ਚੇਤਿਯੇ ਛਤ੍ਤਂ ਵਾ ਵੇਦਿਕਂ ਵਾ ਬੋਧਿਘਰਂ ਵਾ ਆਸਨਘਰਂ ਵਾ ਅਕਤਂ ਵਾ ਕਰੋਨ੍ਤੇਨ ਜਿਣ੍ਣਂ ਵਾ ਪਟਿਸਙ੍ਖਰੋਨ੍ਤੇਨ ਸੁਧਾਕਮ੍ਮਂ ਵਾ ਕਰੋਨ੍ਤੇਨ ਮਨੁਸ੍ਸੇ ਸਮਾਦਪੇਤ੍ਵਾ ਕਾਤੁਂ ਵਟ੍ਟਤਿ. ਸਚੇ ਕਾਰਕੋ ਨਤ੍ਥਿ, ਚੇਤਿਯਸ੍ਸ ਉਪਨਿਕ੍ਖੇਪਤੋ ਕਾਰੇਤਬ੍ਬਂ. ਉਪਨਿਕ੍ਖੇਪੇਪਿ ਅਸਤਿ ਅਪਲੋਕਨਕਮ੍ਮਂ ਕਤ੍ਵਾ ਤਤ੍ਰੁਪ੍ਪਾਦਤੋ ਕਾਰੇਤਬ੍ਬਂ, ਸਙ੍ਘਿਕੇਨਪਿ ਅਪਲੋਕੇਤ੍ਵਾ ਚੇਤਿਯਕਿਚ੍ਚਂ ਕਾਤੁਂ ਵਟ੍ਟਤਿ. ਚੇਤਿਯਸ੍ਸ ਸਨ੍ਤਕੇਨ ਅਪਲੋਕੇਤ੍ਵਾਪਿ ਸਙ੍ਘਿਕਕਿਚ੍ਚਂ ਨ ਵਟ੍ਟਤਿ, ਤਾਵਕਾਲਿਕਂ ਪਨ ਗਹੇਤ੍ਵਾ ਪਟਿਪਾਕਤਿਕਂ ਕਾਤੁਂ ਵਟ੍ਟਤਿ. ਚੇਤਿਯੇ ਸੁਧਾਕਮ੍ਮਾਦੀਨਿ ਕਰੋਨ੍ਤੇਹਿ ਪਨ ਭਿਕ੍ਖਾਚਾਰਤੋ ਵਾ ਸਙ੍ਘਤੋ ਵਾ ਯਾਪਨਮਤ੍ਤਂ ਅਲਭਨ੍ਤੇਹਿ ਚੇਤਿਯਸਨ੍ਤਕਤੋ ਯਾਪਨਮਤ੍ਤਂ ਗਹੇਤ੍ਵਾ ਪਰਿਭੁਞ੍ਜਨ੍ਤੇਹਿ ਵਤ੍ਤਂ ਕਾਤੁਂ ਵਟ੍ਟਤਿ, ‘‘ਵਤ੍ਤਂ ਕਰੋਮਾ’’ਤਿ ਮਚ੍ਛਮਂਸਾਦੀਹਿ ਸਙ੍ਘਭਤ੍ਤਂ ਕਾਤੁਂ ਨ ਵਟ੍ਟਤਿ.
ਯੇ ਵਿਹਾਰੇ ਰੋਪਿਤਾ ਫਲਰੁਕ੍ਖਾ ਸਙ੍ਘੇਨ ਪਰਿਗ੍ਗਹਿਤਾ ਹੋਨ੍ਤਿ, ਜਗ੍ਗਨਕਮ੍ਮਂ ਲਭਨ੍ਤਿ. ਯੇਸਂ ਫਲਾਨਿ ਘਣ੍ਟਿਂ ਪਹਰਿਤ੍ਵਾ ਭਾਜੇਤ੍ਵਾ ਪਰਿਭੁਞ੍ਜਨ੍ਤਿ, ਤੇਸੁ ਅਪਲੋਕਨਕਮ੍ਮਂ ਨ ਕਾਤਬ੍ਬਂ. ਯੇ ਪਨ ਅਪਰਿਗ੍ਗਹਿਤਾ, ਤੇਸੁ ਅਪਲੋਕਨਕਮ੍ਮਂ ਕਾਤਬ੍ਬਂ, ਤਂ ਪਨ ਸਲਾਕਗ੍ਗਯਾਗਗ੍ਗਭਤ੍ਤਗ੍ਗਅਨ੍ਤਰਸਅਆਪਾਤੇਸੁਪਿ ਕਾਤੁਂ ਵਟ੍ਟਤਿ, ਉਪੋਸਥਗ੍ਗੇ ਪਨ ਵਟ੍ਟਤਿਯੇਵ. ਤਤ੍ਥ ਹਿ ਅਨਾਗਤਾਨਮ੍ਪਿ ਛਨ੍ਦਪਾਰਿਸੁਦ੍ਧਿ ਆਹਰੀਯਤਿ, ਤਸ੍ਮਾ ਤਂ ਸੁਵਿਸੋਧਿਤਂ ਹੋਤਿ. ਏਵਞ੍ਚ ਪਨ ਕਾਤਬ੍ਬਂ, ਬ੍ਯਤ੍ਤੇਨ ਭਿਕ੍ਖੁਨਾ ਭਿਕ੍ਖੁਸਙ੍ਘਸ੍ਸ ਅਨੁਮਤਿਯਾ ਸਾਵੇਤਬ੍ਬਂ –
‘‘ਭਨ੍ਤੇ, ਯਂ ਇਮਸ੍ਮਿਂ ਵਿਹਾਰੇ ਅਨ੍ਤੋਸੀਮਾਯ ਸਙ੍ਘਸਨ੍ਤਕਂ ਮੂਲਤਚਪਤ੍ਤਅਙ੍ਕੁਰਪੁਪ੍ਫਫਲਖਾਦਨੀਯਾਦਿ ਅਤ੍ਥਿ, ਤਂ ਸਬ੍ਬਂ ਆਗਤਾਗਤਾਨਂ ਭਿਕ੍ਖੂਨਂ ਯਥਾਸੁਖਂ ਪਰਿਭੁਞ੍ਜਿਤੁਂ ਰੁਚ੍ਚਤੀਤਿ ਸਙ੍ਘਂ ਪੁਚ੍ਛਾਮੀ’’ਤਿ –
ਤਿਕ੍ਖਤ੍ਤੁਂ ਪੁਚ੍ਛਿਤਬ੍ਬਂ.
ਚਤੂਹਿ ਪਞ੍ਚਹਿ ਭਿਕ੍ਖੂਹਿ ਕਤਂ ਸੁਕਤਮੇਵ. ਯਸ੍ਮਿਮ੍ਪਿ ਵਿਹਾਰੇ ਦ੍ਵੇ ਤਯੋ ਜਨਾ ਵਸਨ੍ਤਿ, ਤੇਹਿ ਨਿਸੀਦਿਤ੍ਵਾ ਕਤਮ੍ਪਿ ਸਙ੍ਘੇਨ ਕਤਸਦਿਸਮੇਵ. ਯਸ੍ਮਿਂ ਪਨ ਏਕੋ ਭਿਕ੍ਖੁ ਹੋਤਿ, ਤੇਨ ਭਿਕ੍ਖੁਨਾ ਉਪੋਸਥਦਿਵਸੇ ਪੁਬ੍ਬਕਰਣਪੁਬ੍ਬਕਿਚ੍ਚਂ ਕਤ੍ਵਾ ਨਿਸਿਨ੍ਨੇਨ ਕਤਮ੍ਪਿ ਕਤਿਕਵਤ੍ਤਂ ਸਙ੍ਘੇਨ ਕਤਸਦਿਸਮੇਵ ਹੋਤਿ. ਕਰੋਨ੍ਤੇਨ ਪਨ ਫਲਵਾਰੇਨ ਕਾਤੁਮ੍ਪਿ ਚਤ੍ਤਾਰੋ ਮਾਸੇ ਛ ਮਾਸੇ ਏਕਸਂਵਚ੍ਛਰਨ੍ਤਿ ਏਵਂ ਪਰਿਚ੍ਛਿਨ੍ਦਿਤ੍ਵਾਪਿ ਅਪਰਿਚ੍ਛਿਨ੍ਦਿਤ੍ਵਾਪਿ ਕਾਤੁਂ ਵਟ੍ਟਤਿ. ਪਰਿਚ੍ਛਿਨ੍ਨੇ ਯਥਾਪਰਿਚ੍ਛੇਦਂ ਪਰਿਭੁਞ੍ਜਿਤ੍ਵਾ ਪੁਨ ਕਾਤਬ੍ਬਂ. ਅਪਰਿਚ੍ਛਿਨ੍ਨੇ ਯਾਵ ਰੁਕ੍ਖਾ ਧਰਨ੍ਤਿ, ਤਾਵ ਵਟ੍ਟਤਿ. ਯੇਪਿ ਤੇਸਂ ਰੁਕ੍ਖਾਨਂ ਬੀਜੇਹਿ ਅਞ੍ਞੇ ਰੁਕ੍ਖਾ ਰੋਪਿਤਾ ਹੋਨ੍ਤਿ, ਤੇਸਮ੍ਪਿ ਸਾ ਏਵ ਕਤਿਕਾ.
ਸਚੇ ਪਨ ਅਞ੍ਞਸ੍ਮਿਂ ਵਿਹਾਰੇ ਰੋਪਿਤਾ ਹੋਨ੍ਤਿ, ਤੇਸਂ ਯਤ੍ਥ ਰੋਪਿਤਾ, ਤਸ੍ਮਿਂਯੇਵ ਵਿਹਾਰੇ ਸਙ੍ਘੋ ਸਾਮੀ. ਯੇਪਿ ਅਞ੍ਞਤੋ ਬੀਜਾਨਿ ਆਹਰਿਤ੍ਵਾ ਪੁਰਿਮਵਿਹਾਰੇ ਪਚ੍ਛਾ ਰੋਪਿਤਾ, ਤੇਸੁ ਅਞ੍ਞਾ ਕਤਿਕਾ ਕਾਤਬ੍ਬਾ, ਕਤਿਕਾਯ ਕਤਾਯ ਪੁਗ੍ਗਲਿਕਟ੍ਠਾਨੇ ਤਿਟ੍ਠਨ੍ਤਿ, ਯਥਾਸੁਖਂ ਫਲਾਦੀਨਿ ਪਰਿਭੁਞ੍ਜਿਤੁਂ ਵਟ੍ਟਨ੍ਤਿ. ਸਚੇ ਪਨੇਤ੍ਥ ਤਂ ਤਂ ਓਕਾਸਂ ਪਰਿਕ੍ਖਿਪਿਤ੍ਵਾ ਪਰਿਵੇਣਾਨਿ ਕਤ੍ਵਾ ਜਗ੍ਗਨ੍ਤਿ, ਤੇਸਂ ਭਿਕ੍ਖੂਨਂ ਪੁਗ੍ਗਲਿਕਟ੍ਠਾਨੇ ਤਿਟ੍ਠਨ੍ਤਿ, ਅਞ੍ਞੇ ਪਰਿਭੁਞ੍ਜਿਤੁਂ ਨ ਲਭਨ੍ਤਿ. ਤੇਹਿ ਪਨ ਸਙ੍ਘਸ੍ਸ ਦਸਮਭਾਗਂ ਦਤ੍ਵਾ ਪਰਿਭੁਞ੍ਜਿਤਬ੍ਬਾਨਿ. ਯੋਪਿ ਮਜ੍ਝੇਵਿਹਾਰੇ ਰੁਕ੍ਖਂ ਸਾਖਾਹਿ ਪਰਿਵਾਰੇਤ੍ਵਾ ਰਕ੍ਖਤਿ, ਤਸ੍ਸਪਿ ਏਸੇਵ ਨਯੋ.
ਪੋਰਾਣਕਵਿਹਾਰਂ ਗਤਸ੍ਸ ਸਮ੍ਭਾਵਨੀਯਭਿਕ੍ਖੁਨੋ ‘‘ਥੇਰੋ ਆਗਤੋ’’ਤਿ ਫਲਾਫਲਂ ਆਹਰਨ੍ਤਿ, ਸਚੇ ਤਤ੍ਥ ਮੂਲੇ ਸਬ੍ਬਪਰਿਯਤ੍ਤਿਧਰੋ ਬਹੁਸ੍ਸੁਤਭਿਕ੍ਖੁ ਵਿਹਾਸਿ, ‘‘ਅਦ੍ਧਾ ਏਤ੍ਥ ਦੀਘਾ ਕਤਿਕਾ ਕਤਾ ਭਵਿਸ੍ਸਤੀ’’ਤਿ ਨਿਕ੍ਕੁਕ੍ਕੁਚ੍ਚੇਨ ਪਰਿਭੁਞ੍ਜਿਤਬ੍ਬਂ. ਵਿਹਾਰੇ ਫਲਾਫਲਂ ਪਿਣ੍ਡਪਾਤਿਕਾਨਮ੍ਪਿ ਵਟ੍ਟਤਿ, ਧੁਤਙ੍ਗਂ ਨ ਕੋਪੇਤਿ. ਸਾਮਣੇਰਾ ਅਤ੍ਤਨੋ ਆਚਰਿਯੁਪਜ੍ਝਾਯਾਨਂ ਬਹੂਨਿ ਫਲਾਨਿ ਦੇਨ੍ਤਿ, ਅਞ੍ਞੇ ਭਿਕ੍ਖੂ ਅਲਭਨ੍ਤਾ ਖਿਯ੍ਯਨ੍ਤਿ, ਖਿਯ੍ਯਨਮਤ੍ਤਮੇਵ ਤਂ ਹੋਤਿ. ਸਚੇ ਦੁਬ੍ਭਿਕ੍ਖਂ ਹੋਤਿ, ਏਕਂ ਪਨਸਰੁਕ੍ਖਂ ਨਿਸ੍ਸਾਯ ਸਟ੍ਠਿਪਿ ਜਨਾ ਜੀਵਨ੍ਤਿ, ਤਾਦਿਸੇ ਕਾਲੇ ਸਬ੍ਬੇਸਂ ਸਙ੍ਗਹਕਰਣਤ੍ਥਾਯ ਭਾਜੇਤ੍ਵਾ ਖਾਦਿਤਬ੍ਬਂ. ਅਯਂ ਸਾਮੀਚਿ. ਯਾਵ ਪਨ ਕਤਿਕਵਤ੍ਤਂ ਨ ਪਟਿਪ੍ਪਸ੍ਸਮ੍ਭਤਿ, ਤਾਵ ਤੇਹਿ ਖਾਯਿਤਂ ਸੁਖਾਯਿਤਮੇਵ. ਕਦਾ ਪਨ ਕਤਿਕਵਤ੍ਤਂ ਪਟਿਪ੍ਪਸ੍ਸਮ੍ਭਤਿ? ਯਦਾ ਸਮਗ੍ਗੋ ਸਙ੍ਘੋ ਸਨ੍ਨਿਪਤਿਤ੍ਵਾ ‘‘ਇਤੋ ਪਟ੍ਠਾਯ ਭਾਜੇਤ੍ਵਾ ਖਾਦਨ੍ਤੂ’’ਤਿ ਸਾਵੇਭਿ, ਏਕਭਿਕ੍ਖੁਕੇ ਪਨ ਵਿਹਾਰੇ ਏਤੇਨ ਸਾਵਿਤੇਪਿ ਪੁਰਿਮਕਤਿਕਾ ਪਟਿਪ੍ਪਸ੍ਸਮ੍ਭਤਿਯੇਵ. ਸਚੇ ਪਟਿਪ੍ਪਸ੍ਸਦ੍ਧਾਯ ਕਤਿਕਾਯ ਸਾਮਣੇਰਾ ਨੇਵ ਰੁਕ੍ਖਤੋ ਪਾਤੇਨ੍ਤਿ, ਨ ਭੂਮਿਤੋ ਗਹੇਤ੍ਵਾ ਭਿਕ੍ਖੂਨਂ ਦੇਨ੍ਤਿ, ਪਤਿਤਫਲਾਨਿ ਪਾਦੇਹਿ ਪਹਰਨ੍ਤਾ ਵਿਚਰਨ੍ਤਿ, ਤੇਸਂ ਦਸਮਭਾਗਤੋ ਪਟ੍ਠਾਯ ਯਾਵ ਉਪਡ੍ਢਫਲਭਾਗੇਨ ਫਾਤਿਕਮ੍ਮਂ ਕਾਤਬ੍ਬਂ. ਅਦ੍ਧਾ ਫਾਤਿਕਮ੍ਮਲੋਭੇਨ ਆਹਰਿਤ੍ਵਾ ਦਸ੍ਸੇਨ੍ਤਿ, ਪੁਨ ਸੁਭਿਕ੍ਖੇ ਜਾਤੇ ਕਪ੍ਪਿਯਕਾਰਕੇਸੁ ਆਗਨ੍ਤ੍ਵਾ ਸਾਖਾਪਰਿਵਾਰਾਦੀਨਿ ਕਤ੍ਵਾ ਰੁਕ੍ਖੇ ਰਕ੍ਖਨ੍ਤੇਸੁ ਸਾਮਣੇਰਾਨਂ ਫਾਤਿਕਮ੍ਮਂ ਨ ਕਾਤਬ੍ਬਂ, ਭਾਜੇਤ੍ਵਾ ਪਰਿਭੁਞ੍ਜਿਤਬ੍ਬਂ.
‘‘ਵਿਹਾਰੇ ਫਲਾਫਲਂ ਅਤ੍ਥੀ’’ਤਿ ਸਾਮਨ੍ਤਗਾਮੇਹਿ ਮਨੁਸ੍ਸਾ ਗਿਲਾਨਾਨਂ ਵਾ ਗਬ੍ਭਿਨੀਨਂ ਵਾ ਅਤ੍ਥਾਯ ਆਗਨ੍ਤ੍ਵਾ ‘‘ਏਕਂ ਨਾਲ਼ਿਕੇਰਂ ਦੇਥ, ਅਮ੍ਬਂ ਦੇਥ, ਲਬੁਜਂ ਦੇਥਾ’’ਤਿ ਯਾਚਨ੍ਤਿ, ਦਾਤਬ੍ਬਂ, ਨ ਦਾਤਬ੍ਬਨ੍ਤਿ? ਦਾਤਬ੍ਬਂ. ਅਦੀਯਮਾਨੇ ਹਿ ਤੇ ਦੋਮਨਸ੍ਸਿਕਾ ਹੋਨ੍ਤਿ. ਦੇਨ੍ਤੇਨ ਪਨ ਸਙ੍ਘਂ ਸਨ੍ਨਿਪਾਤੇਤ੍ਵਾ ਯਾਵਤਤਿਯਂ ਸਾਵੇਤ੍ਵਾ ਅਪਲੋਕਨਕਮ੍ਮਂ ਕਤ੍ਵਾਵ ਦਾਤਬ੍ਬਂ, ਕਤਿਕਵਤ੍ਤਂ ਵਾ ਕਤ੍ਵਾ ਠਪੇਤਬ੍ਬਂ, ਏਵਞ੍ਚ ਪਨ ਕਾਤਬ੍ਬਂ. ਬ੍ਯਤ੍ਤੇਨ ਭਿਕ੍ਖੁਨਾ ਸਙ੍ਘਸ੍ਸ ਅਨੁਮਤਿਯਾ ਸਾਵੇਤਬ੍ਬਂ –
‘‘ਸਾਮਨ੍ਤਗਾਮੇਹਿ ਮਨੁਸ੍ਸਾ ਆਗਨ੍ਤ੍ਵਾ ਗਿਲਾਨਾਦੀਨਂ ਅਤ੍ਥਾਯ ਫਲਾਫਲਂ ਯਾਚਨ੍ਤਿ, ਦ੍ਵੇ ਨਾਲ਼ਿਕੇਰਾਨਿ ਦ੍ਵੇ ਤਾਲਫਲਾਨਿ ਦ੍ਵੇ ਪਨਸਾਨਿ ਪਞ੍ਚ ਅਮ੍ਬਾਨਿ ਪਞ੍ਚ ਕਦਲਿਫਲਾਨਿ ਗਣ੍ਹਨ੍ਤਾਨਂ ਅਨਿਵਾਰਣਂ, ਅਸੁਕਰੁਕ੍ਖਤੋ ਚ ਅਸੁਕਰੁਕ੍ਖਤੋ ਚ ਫਲਂ ਗਣ੍ਹਨ੍ਤਾਨਂ ਅਨਿਵਾਰਣਂ ਰੁਚ੍ਚਤਿ ਭਿਕ੍ਖੁਸਙ੍ਘਸ੍ਸਾ’’ਤਿ –
ਤਿਕ੍ਖਤ੍ਤੁਂ ਵਤ੍ਤਬ੍ਬਂ. ਤਤੋ ਪਟ੍ਠਾਯ ਗਿਲਾਨਾਦੀਨਂ ਨਾਮਂ ਗਹੇਤ੍ਵਾ ਯਾਚਨ੍ਤਾ ‘‘ਗਣ੍ਹਥਾ’’ਤਿ ਨ ਵਤ੍ਤਬ੍ਬਾ, ਵਤ੍ਤਂ ਪਨ ਆਚਿਕ੍ਖਿਤਬ੍ਬਂ ‘‘ਨਾਲ਼ਿਕੇਰਾਦੀਨਿ ਇਮਿਨਾ ਨਾਮ ਪਰਿਚ੍ਛੇਦੇਨ ਗਣ੍ਹਨ੍ਤਾਨਂ ਅਸੁਕਰੁਕ੍ਖਤੋ ਚ ਅਸੁਕਰੁਕ੍ਖਤੋ ਚ ਫਲਂ ਗਣ੍ਹਨ੍ਤਾਨਂ ਅਨਿਵਾਰਣਂ ਕਤ’’ਨ੍ਤਿ. ਅਨੁਵਿਚਰਿਤ੍ਵਾ ਪਨ ‘‘ਅਯਂ ਮਧੁਰਫਲੋ ਅਮ੍ਬੋ, ਇਤੋ ਗਣ੍ਹਥਾ’’ਤਿਪਿ ਨ ਵਤ੍ਤਬ੍ਬਾ.
ਫਲਭਾਜਨਕਾਲੇ ਪਨ ਆਗਤਾਨਂ ਸਮ੍ਮਤੇਨ ਉਪਡ੍ਢਭਾਗੋ ਦਾਤਬ੍ਬੋ, ਅਸਮ੍ਮਤੇਨ ਅਪਲੋਕੇਤ੍ਵਾ ਦਾਤਬ੍ਬਂ. ਖੀਣਪਰਿਬ੍ਬਯੋ ਵਾ ਮਗ੍ਗਗਮਿਯਸਤ੍ਥਵਾਹੋ ਵਾ ਅਞ੍ਞੋ ਵਾ ਇਸ੍ਸਰੋ ਆਗਨ੍ਤ੍ਵਾ ਯਾਚਤਿ, ਅਪਲੋਕੇਤ੍ਵਾਵ ਦਾਤਬ੍ਬਂ, ਬਲਕ੍ਕਾਰੇਨ ਗਹੇਤ੍ਵਾ ਖਾਦਨ੍ਤੋ ਨ ਵਾਰੇਤਬ੍ਬੋ. ਕੁਦ੍ਧੋ ਹਿ ਸੋ ਰੁਕ੍ਖੇਪਿ ਛਿਨ੍ਦੇਯ੍ਯ, ਅਞ੍ਞਮ੍ਪਿ ਅਨਤ੍ਥਂ ਕਰੇਯ੍ਯ. ਪੁਗ੍ਗਲਿਕਪਰਿਵੇਣਂ ਆਗਨ੍ਤ੍ਵਾ ਗਿਲਾਨਸ੍ਸ ਨਾਮੇਨ ਯਾਚਨ੍ਤੋ ‘‘ਅਮ੍ਹੇਹਿ ਛਾਯਾਦੀਨਂ ਅਤ੍ਥਾਯ ਰੋਪਿਤਂ, ਸਚੇ ਅਤ੍ਥਿ, ਤੁਮ੍ਹੇ ਜਾਨਾਥਾ’’ਤਿ ਵਤ੍ਤਬ੍ਬੋ. ਯਦਿ ਪਨ ਫਲਭਰਿਤਾਵ ਰੁਕ੍ਖਾ ਹੋਨ੍ਤਿ, ਕਣ੍ਟਕੇ ਬਨ੍ਧਿਤ੍ਵਾ ਫਲਵਾਰੇਨ ਗਣ੍ਹਨ੍ਤਿ, ਅਪਚ੍ਚਾਸੀਸਨ੍ਤੇਨ ਹੁਤ੍ਵਾ ਦਾਤਬ੍ਬਂ, ਬਲਕ੍ਕਾਰੇਨ ਗਣ੍ਹਨ੍ਤੋ ਨ ਵਾਰੇਤਬ੍ਬੋ. ਪੁਬ੍ਬੇ ਵੁਤ੍ਤਮੇਵੇਤ੍ਥ ਕਾਰਣਂ.
ਸਙ੍ਘਸ੍ਸ ਫਲਾਰਾਮੋ ਹੋਤਿ, ਪਟਿਜਗ੍ਗਨਂ ਨ ਲਭਤਿ. ਸਚੇ ਤਂ ਕੋਚਿ ਵਤ੍ਤਸੀਸੇਨ ਜਗ੍ਗਤਿ, ਸਙ੍ਘਸ੍ਸੇਵ ਹੋਤਿ. ਅਥਾਪਿ ਕਸ੍ਸਚਿ ਪਟਿਬਲਸ੍ਸ ਭਿਕ੍ਖੁਨੋ ‘‘ਇਮਂ ਸਪ੍ਪੁਰਿਸ ਜਗ੍ਗਿਤ੍ਵਾ ਦੇਹੀ’’ਤਿ ਸਙ੍ਘੋ ਭਾਰਂ ਕਰੋਤਿ, ਸੋ ਚੇ ਵਤ੍ਤਸੀਸੇਨ ਜਗ੍ਗਤਿ, ਏਵਮ੍ਪਿ ਸਙ੍ਘਸ੍ਸੇਵ ਹੋਤਿ. ਫਾਤਿਕਮ੍ਮਂ ਪਚ੍ਚਾਸੀਸਨ੍ਤਸ੍ਸ ਪਨ ਤਤਿਯਭਾਗੇਨ ਵਾ ਉਪਡ੍ਢਭਾਗੇਨ ਵਾ ਫਾਤਿਕਮ੍ਮਂ ਕਾਤਬ੍ਬਂ. ‘‘ਭਾਰਿਯਂ ਕਮ੍ਮ’’ਨ੍ਤਿ ਵਤ੍ਵਾ ਏਤ੍ਤਕੇਨ ਅਨਿਚ੍ਛਨ੍ਤੋ ਪਨ ‘‘ਸਬ੍ਬਂ ਤਵੇਵ ਸਨ੍ਤਕਂ ਕਤ੍ਵਾ ਮੂਲਭਾਗਂ ਦਸਮਭਾਗਮਤ੍ਤਂ ਦਤ੍ਵਾ ਜਗ੍ਗਾਹੀ’’ਤਿਪਿ ਵਤ੍ਤਬ੍ਬੋ, ਗਰੁਭਣ੍ਡਤ੍ਤਾ ਪਨ ਨ ਮੂਲਚ੍ਛੇਜ੍ਜਵਸੇਨ ਦਾਤਬ੍ਬਂ. ਸੋ ਮੂਲਭਾਗਂ ਦਤ੍ਵਾ ਖਾਦਨ੍ਤੋ ਅਕਤਾਵਾਸਂ ਵਾ ਕਤ੍ਵਾ ਕਤਾਵਾਸਂ ਵਾ ਜਗ੍ਗਿਤ੍ਵਾ ਨਿਸ੍ਸਿਤਕਾਨਂ ਆਰਾਮਂ ਨਿਯ੍ਯਾਤੇਤਿ, ਤੇਹਿਪਿ ਮੂਲਭਾਗੋ ਦਾਤਬ੍ਬੋਵ.
ਯਦਾ ਪਨ ਭਿਕ੍ਖੂ ਸਯਂ ਜਗ੍ਗਿਤੁਂ ਪਹੋਨ੍ਤਿ, ਅਥ ਤੇਸਂ ਜਗ੍ਗਿਤੁਂ ਨ ਦਾਤਬ੍ਬਂ, ਜਗ੍ਗਿਤਕਾਲੇ ਪਨ ਨ ਵਾਰੇਤਬ੍ਬਾ, ਜਗ੍ਗਨਕਾਲੇਯੇਵ ਵਾਰੇਤਬ੍ਬਾ. ‘‘ਬਹੁ ਤੁਮ੍ਹੇਹਿ ਖਾਯਿਤਂ, ਇਦਾਨਿ ਮਾ ਜਗ੍ਗਿਤ੍ਥ, ਭਿਕ੍ਖੁਸਙ੍ਘੋਯੇਵ ਜਗ੍ਗਿਸ੍ਸਤੀ’’ਤਿ ਵਤ੍ਤਬ੍ਬਂ. ਸਚੇ ਪਨ ਨੇਵ ਵਤ੍ਤਸੀਸੇਨ ਜਗ੍ਗਨ੍ਤੋ ਅਤ੍ਥਿ, ਨ ਫਾਤਿਕਮ੍ਮੇਨ, ਨ ਸਙ੍ਘੋ ਜਗ੍ਗਿਤੁਂ ਪਹੋਤਿ, ਏਕੋ ਅਨਾਪੁਚ੍ਛਿਤ੍ਵਾਵ ਜਗ੍ਗਿਤ੍ਵਾ ਫਾਤਿਕਮ੍ਮਂ ਵਡ੍ਢੇਤ੍ਵਾ ਪਚ੍ਚਾਸੀਸਤਿ, ਅਪਲੋਕਨਕਮ੍ਮੇਨ ਫਾਤਿਕਮ੍ਮਂ ਵਡ੍ਢੇਤ੍ਵਾਵ ਦਾਤਬ੍ਬਂ. ਇਤਿ ਇਮਂ ਸਬ੍ਬਮ੍ਪਿ ਕਮ੍ਮਲਕ੍ਖਣਮੇਵ ਹੋਤਿ. ਅਪਲੋਕਨਕਮ੍ਮਂ ਇਮਾਨਿ ਪਞ੍ਚ ਠਾਨਾਨਿ ਗਚ੍ਛਤਿ.
੨੫੬. ਞਤ੍ਤਿਕਮ੍ਮਟ੍ਠਾਨਭੇਦੇ ਪਨ (ਪਰਿ. ਅਟ੍ਠ. ੪੯੫-੪੯੬) –
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ, ਅਨੁਸਿਟ੍ਠੋ ਸੋ ਮਯਾ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਆਗਚ੍ਛੇਯ੍ਯ, ‘ਆਗਚ੍ਛਾਹੀ’ਤਿ ਵਤ੍ਤਬ੍ਬੋ’’ਤਿ –
ਏਵਂ ਉਪਸਮ੍ਪਦਾਪੇਕ੍ਖਸ੍ਸ ਓਸਾਰਣਾ ਓਸਾਰਣਾ ਨਾਮ.
‘‘ਸੁਣਨ੍ਤੁ ਮੇ ਆਯਸ੍ਮਨ੍ਤਾ, ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਧਮ੍ਮਕਥਿਕੋ, ਇਮਸ੍ਸ ਨੇਵ ਸੁਤ੍ਤਂ ਆਗਚ੍ਛਤਿ, ਨੋ ਸੁਤ੍ਤਵਿਭਙ੍ਗੋ, ਸੋ ਅਤ੍ਥਂ ਅਸਲ੍ਲਕ੍ਖੇਤ੍ਵਾ ਬ੍ਯਞ੍ਜਨਚ੍ਛਾਯਾਯ ਅਤ੍ਥਂ ਪਟਿਬਾਹਤਿ, ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਇਤ੍ਥਨ੍ਨਾਮਂ ਭਿਕ੍ਖੁਂ ਵੁਟ੍ਠਾਪੇਤ੍ਵਾ ਅਵਸੇਸਾ ਇਮਂ ਅਧਿਕਰਣਂ ਵੂਪਸਮੇਯ੍ਯਾਮਾ’’ਤਿ –
ਏਵਂ ਉਬ੍ਬਾਹਿਕਵਿਨਿਚ੍ਛਯੇ ਧਮ੍ਮਕਥਿਕਸ੍ਸ ਭਿਕ੍ਖੁਨੋ ਨਿਸ੍ਸਾਰਣਾ ਨਿਸ੍ਸਾਰਣਾ ਨਾਮ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਜ੍ਜੁਪੋਸਥੋ ਪਨ੍ਨਰਸੋ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਉਪੋਸਥਂ ਕਰੇਯ੍ਯਾ’’ਤਿ –
ਏਵਂ ਉਪੋਸਥਕਮ੍ਮਵਸੇਨ ਠਪਿਤਾ ਞਤ੍ਤਿ ਉਪੋਸਥੋ ਨਾਮ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਜ੍ਜ ਪਵਾਰਣਾ ਪਨ੍ਨਰਸੀ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਵਾਰੇਯ੍ਯਾ’’ਤਿ –
ਏਵਂ ਪਵਾਰਣਕਮ੍ਮਵਸੇਨ ਠਪਿਤਾ ਞਤ੍ਤਿ ਪਵਾਰਣਾ ਨਾਮ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਸ੍ਸ ਆਯਸ੍ਮਤੋ ਉਪਸਮ੍ਪਦਾਪੇਕ੍ਖੋ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਂ ਅਨੁਸਾਸੇਯ੍ਯ’’ਨ੍ਤਿ, ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਂ ਅਨੁਸਾਸੇਯ੍ਯਾ’’ਤਿ, ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਂ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛੇਯ੍ਯ’’ਨ੍ਤਿ, ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਂ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛੇਯ੍ਯਾ’’ਤਿ, ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਂ ਵਿਨਯਂ ਪੁਚ੍ਛੇਯ੍ਯ’’ਨ੍ਤਿ, ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮਂ ਵਿਨਯਂ ਪੁਚ੍ਛੇਯ੍ਯਾ’’ਤਿ, ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮੇਨ ਵਿਨਯਂ ਪੁਟ੍ਠੋ ਵਿਸ੍ਸਜ੍ਜੇਯ੍ਯ’’ਨ੍ਤਿ, ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਇਤ੍ਥਨ੍ਨਾਮੋ ਇਤ੍ਥਨ੍ਨਾਮੇਨ ਵਿਨਯਂ ਪੁਟ੍ਠੋ ਵਿਸ੍ਸਜ੍ਜੇਯ੍ਯਾ’’ਤਿ –
ਏਵਂ ਅਤ੍ਤਾਨਂ ਵਾ ਪਰਂ ਵਾ ਸਮ੍ਮਨ੍ਨਿਤੁਂ ਠਪਿਤਾ ਞਤ੍ਤਿ ਸਮ੍ਮੁਤਿ ਨਾਮ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਇਦਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਨਿਸ੍ਸਗ੍ਗਿਯਂ ਸਙ੍ਘਸ੍ਸ ਨਿਸ੍ਸਟ੍ਠਂ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਦੇਯ੍ਯਾ’’ਤਿ, ‘‘ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਆਯਸ੍ਮਨ੍ਤਾ ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਦੇਯ੍ਯੁ’’ਨ੍ਤਿ –
ਏਵਂ ਨਿਸ੍ਸਟ੍ਠਚੀਵਰਪਤ੍ਤਾਦੀਨਂ ਦਾਨਂ ਦਾਨਂ ਨਾਮ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਆਪਤ੍ਤਿਂ ਸਰਤਿ ਵਿਵਰਤਿ ਉਤ੍ਤਾਨਿਂ ਕਰੋਤਿ ਦੇਸੇਤਿ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਆਪਤ੍ਤਿਂ ਪਟਿਗ੍ਗਣ੍ਹੇਯ੍ਯ’’ਨ੍ਤਿ, ‘‘ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਅਹਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਆਪਤ੍ਤਿਂ ਪਟਿਗ੍ਗਣ੍ਹੇਯ੍ਯ’’ਨ੍ਤਿ, ਤੇਨ ਵਤ੍ਤਬ੍ਬੋ ‘‘ਪਸ੍ਸਸੀ’’ਤਿ. ਆਮ, ਪਸ੍ਸਾਮੀਤਿ. ‘‘ਆਯਤਿਂ ਸਂਵਰੇਯ੍ਯਾਸੀ’’ਤਿ –
ਏਵਂ ਆਪਤ੍ਤਿਪਟਿਗ੍ਗਹੋ ਪਟਿਗ੍ਗਹੋ ਨਾਮ.
‘‘ਸੁਣਨ੍ਤੁ ਮੇ ਆਯਸ੍ਮਨ੍ਤਾ ਆਵਾਸਿਕਾ, ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਇਦਾਨਿ ਉਪੋਸਥਂ ਕਰੇਯ੍ਯਾਮ, ਪਾਤਿਮੋਕ੍ਖਂ ਉਦ੍ਦਿਸੇਯ੍ਯਾਮ, ਆਗਮੇ ਕਾਲ਼ੇ ਪਵਾਰੇਯ੍ਯਾਮਾ’’ਤਿ.
ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤਂ ਕਾਲ਼ਂ ਅਨੁਵਸੇਯ੍ਯੁਂ, ਆਵਾਸਿਕੇਨ ਭਿਕ੍ਖੁਨਾ ਬ੍ਯਤ੍ਤੇਨ ਪਟਿਬਲੇਨ ਆਵਾਸਿਕਾ ਭਿਕ੍ਖੂ ਞਾਪੇਤਬ੍ਬਾ –
‘‘ਸੁਣਨ੍ਤੁ ਮੇ ਆਯਸ੍ਮਨ੍ਤਾ ਆਵਾਸਿਕਾ, ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਇਦਾਨਿ ਉਪੋਸਥਂ ਕਰੇਯ੍ਯਾਮ, ਪਾਤਿਮੋਕ੍ਖਂ ਉਦ੍ਦਿਸੇਯ੍ਯਾਮ, ਆਗਮੇ ਜੁਣ੍ਹੇ ਪਵਾਰੇਯ੍ਯਾਮਾ’’ਤਿ –
ਏਵਂ ਕਤਾ ਪਵਾਰਣਾਪਚ੍ਚੁਕ੍ਕਡ੍ਢਨਾ ਪਚ੍ਚੁਕ੍ਕਡ੍ਢਨਾ ਨਾਮ.
ਸਬ੍ਬੇਹੇਵ ਏਕਜ੍ਝਂ ਸਨ੍ਨਿਪਤਿਤਬ੍ਬਂ, ਸਨ੍ਨਿਪਤਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਮ੍ਹਾਕਂ ਭਣ੍ਡਨਜਾਤਾਨਂ ਕਲਹਜਾਤਾਨਂ ਵਿਵਾਦਾਪਨ੍ਨਾਨਂ ਵਿਹਰਤਂ ਬਹੁਂ ਅਸ੍ਸਾਮਣਕਂ ਅਜ੍ਝਾਚਿਣ੍ਣਂ ਭਾਸਿਤਪਰਿਕ੍ਕਨ੍ਤਂ, ਸਚੇ ਮਯਂ ਇਮਾਹਿ ਆਪਤ੍ਤੀਹਿ ਅਞ੍ਞਮਞ੍ਞਂ ਕਾਰੇਸ੍ਸਾਮ, ਸਿਯਾਪਿ ਤਂ ਅਧਿਕਰਣਂ ਕਕ੍ਖਲ਼ਤ੍ਤਾਯ ਵਾਲ਼ਤ੍ਤਾਯ ਭੇਦਾਯ ਸਂਵਤ੍ਤੇਯ੍ਯ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਅਧਿਕਰਣਂ ਤਿਣਵਤ੍ਥਾਰਕੇਨ ਵੂਪਸਮੇਯ੍ਯ ਠਪੇਤ੍ਵਾ ਥੁਲ੍ਲਵਜ੍ਜਂ ਠਪੇਤ੍ਵਾ ਗਿਹਿਪ੍ਪਟਿਸਂਯੁਤ੍ਤ’’ਨ੍ਤਿ –
ਏਵਂ ਤਿਣਵਤ੍ਥਾਰਕਸਮਥੇਨ ਕਤ੍ਵਾ ਸਬ੍ਬਪਠਮਾ ਸਬ੍ਬਸਙ੍ਗਾਹਿਕਞਤ੍ਤਿ ਕਮ੍ਮਲਕ੍ਖਣਂ ਨਾਮ.
ਤਥਾ ਤਤੋ ਪਰਾ ਏਕੇਕਸ੍ਮਿਂ ਪਕ੍ਖੇ ਏਕੇਕਂ ਕਤ੍ਵਾ ਦ੍ਵੇ ਞਤ੍ਤਿਯੋ. ਇਤਿ ਯਥਾਵੁਤ੍ਤਪ੍ਪਭੇਦਂ ਓਸਾਰਣਂ ਨਿਸ੍ਸਾਰਣਂ…ਪੇ… ਕਮ੍ਮਲਕ੍ਖਣਞ੍ਞੇਵ ਨਵਮਨ੍ਤਿ ਞਤ੍ਤਿਕਮ੍ਮਂ ਇਮਾਨਿ ਨਵ ਠਾਨਾਨਿ ਗਚ੍ਛਤਿ.
੨੫੭. ਞਤ੍ਤਿਦੁਤਿਯਕਮ੍ਮਟ੍ਠਾਨਭੇਦੇ (ਪਰਿ. ਅਟ੍ਠ. ੪੯੫-੪੯੬) ਪਨ ਵਡ੍ਢਸ੍ਸ ਲਿਚ੍ਛਵਿਨੋ ਪਤ੍ਤਨਿਕ੍ਕੁਜ੍ਜਨਵਸੇਨ ਖਨ੍ਧਕੇ ਵੁਤ੍ਤਾ ਨਿਸ੍ਸਾਰਣਾ, ਤਸ੍ਸੇਵ ਪਤ੍ਤੁਕ੍ਕੁਜ੍ਜਨਵਸੇਨ ਖਨ੍ਧਕੇ ਵੁਤ੍ਤਾ ਓਸਾਰਣਾ ਚ ਵੇਦਿਤਬ੍ਬਾ. ਵੁਤ੍ਤਞ੍ਹੇਤਂ (ਚੂਲ਼ਵ. ੨੬੫-੨੬੬) –
‘‘ਅਟ੍ਠਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਉਪਾਸਕਸ੍ਸ ਪਤ੍ਤੋ ਨਿਕ੍ਕੁਜ੍ਜਿਤਬ੍ਬੋ. ਭਿਕ੍ਖੂਨਂ ਅਲਾਭਾਯ ਪਰਿਸਕ੍ਕਤਿ, ਭਿਕ੍ਖੂਨਂ ਅਨਤ੍ਥਾਯ ਪਰਿਸਕ੍ਕਤਿ, ਭਿਕ੍ਖੂਨਂ ਅਵਾਸਾਯ ਪਰਿਸਕ੍ਕਤਿ, ਭਿਕ੍ਖੂ ਅਕ੍ਕੋਸਤਿ ਪਰਿਭਾਸਤਿ, ਭਿਕ੍ਖੂ ਭਿਕ੍ਖੂਹਿ ਭੇਦੇਤਿ, ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਸਙ੍ਘਸ੍ਸ ਅਵਣ੍ਣਂ ਭਾਸਤਿ. ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਅਟ੍ਠਹਿ ਅਙ੍ਗੇਹਿ ਸਮਨ੍ਨਾਗਤਸ੍ਸ ਉਪਾਸਕਸ੍ਸ ਪਤ੍ਤਂ ਨਿਕ੍ਕੁਜ੍ਜਿਤੁਂ.
ਏਵਞ੍ਚ ਪਨ ਭਿਕ੍ਖਵੇ ਨਿਕ੍ਕੁਜ੍ਜਿਤਬ੍ਬੋ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਵਡ੍ਢੋ ਲਿਚ੍ਛਵੀ ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਂ ਅਮੂਲਿਕਾਯ ਸੀਲਵਿਪਤ੍ਤਿਯਾ ਅਨੁਦ੍ਧਂਸੇਤਿ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤਂ ਨਿਕ੍ਕੁਜ੍ਜੇਯ੍ਯ, ਅਸਮ੍ਭੋਗਂ ਸਙ੍ਘੇਨ ਕਰੇਯ੍ਯ, ਏਸਾ ਞਤ੍ਤਿ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਵਡ੍ਢੋ ਲਿਚ੍ਛਵੀ ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਂ ਅਮੂਲਿਕਾਯ ਸੀਲਵਿਪਤ੍ਤਿਯਾ ਅਨੁਦ੍ਧਂਸੇਤਿ, ਸਙ੍ਘੋ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤਂ ਨਿਕ੍ਕੁਜ੍ਜਤਿ, ਅਸਮ੍ਭੋਗਂ ਸਙ੍ਘੇਨ ਕਰੋਤਿ, ਯਸ੍ਸਾਯਸ੍ਮਤੋ ਖਮਤਿ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤਸ੍ਸ ਨਿਕ੍ਕੁਜ੍ਜਨਾ ਅਸਮ੍ਭੋਗਂ ਸਙ੍ਘੇਨ ਕਰਣਂ, ਸੋ ਤੁਣ੍ਹਸ੍ਸ. ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.
‘‘ਨਿਕ੍ਕੁਜ੍ਜਿਤੋ ਸਙ੍ਘੇਨ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤੋ ਅਸਮ੍ਭੋਗੋ ਸਙ੍ਘੇਨ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.
ਅਟ੍ਠਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਸ੍ਸ ਉਪਾਸਕਸ੍ਸ ਪਤ੍ਤੋ ਉਕ੍ਕੁਜ੍ਜਿਤਬ੍ਬੋ. ਨ ਭਿਕ੍ਖੂਨਂ ਅਲਾਭਾਯ ਪਰਿਸਕ੍ਕਤਿ, ਨ ਭਿਕ੍ਖੂਨਂ ਅਨਤ੍ਥਾਯ ਪਰਿਸਕ੍ਕਤਿ…ਪੇ… ਨ ਸਙ੍ਘਸ੍ਸ ਅਵਣ੍ਣਂ ਭਾਸਤਿ. ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਅਟ੍ਠਹਿ ਅਙ੍ਗੇਹਿ ਸਮਨ੍ਨਾਗਤਸ੍ਸ ਉਪਾਸਕਸ੍ਸ ਪਤ੍ਤਂ ਉਕ੍ਕੁਜ੍ਜਿਤੁਂ.
ਏਵਞ੍ਚ ਪਨ, ਭਿਕ੍ਖਵੇ, ਉਕ੍ਕੁਜ੍ਜਿਤਬ੍ਬੋ. ਤੇਨ, ਭਿਕ੍ਖਵੇ, ਵਡ੍ਢੇਨ ਲਿਚ੍ਛਵਿਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ –
‘‘ਸਙ੍ਘੇਨ ਮੇ, ਭਨ੍ਤੇ, ਪਤ੍ਤੋ ਨਿਕ੍ਕੁਜ੍ਜਿਤੋ, ਅਸਮ੍ਭੋਗੋਮ੍ਹਿ ਸਙ੍ਘੇਨ, ਸੋਹਂ, ਭਨ੍ਤੇ, ਸਮ੍ਮਾ ਵਤ੍ਤਾਮਿ, ਲੋਮਂ ਪਾਤੇਮਿ, ਨੇਤ੍ਥਾਰਂ ਵਤ੍ਤਾਮਿ, ਸਙ੍ਘਂ ਪਤ੍ਤੁਕ੍ਕੁਜ੍ਜਨਂ ਯਾਚਾਮੀ’’ਤਿ.
ਦੁਤਿਯਮ੍ਪਿ ਯਾਚਿਤਬ੍ਬੋ. ਤਤਿਯਮ੍ਪਿ ਯਾਚਿਤਬ੍ਬੋ.
ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਸਙ੍ਘੇਨ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤੋ ਨਿਕ੍ਕੁਜ੍ਜਿਤੋ, ਅਸਮ੍ਭੋਗੋ ਸਙ੍ਘੇਨ, ਸੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਸਙ੍ਘਂ ਪਤ੍ਤੁਕ੍ਕੁਜ੍ਜਨਂ ਯਾਚਤਿ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤਂ ਉਕ੍ਕੁਜ੍ਜੇਯ੍ਯ, ਸਮ੍ਭੋਗਂ ਸਙ੍ਘੇਨ ਕਰੇਯ੍ਯ, ਏਸਾ ਞਤ੍ਤਿ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਸਙ੍ਘੇਨ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤੋ ਨਿਕ੍ਕੁਜ੍ਜਿਤੋ, ਅਸਮ੍ਭੋਗੋ ਸਙ੍ਘੇਨ, ਸੋ ਸਮ੍ਮਾ ਵਤ੍ਤਤਿ, ਲੋਮਂ ਪਾਤੇਤਿ, ਨੇਤ੍ਥਾਰਂ ਵਤ੍ਤਤਿ, ਸਙ੍ਘਂ ਪਤ੍ਤੁਕ੍ਕੁਜ੍ਜਨਂ ਯਾਚਤਿ, ਸਙ੍ਘੋ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤਂ ਉਕ੍ਕੁਜ੍ਜਤਿ, ਸਮ੍ਭੋਗਂ ਸਙ੍ਘੇਨ ਕਰੋਤਿ, ਯਸ੍ਸਾਯਸ੍ਮਤੋ ਖਮਤਿ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤਸ੍ਸ ਉਕ੍ਕੁਜ੍ਜਨਾ ਸਮ੍ਭੋਗਂ ਸਙ੍ਘੇਨ ਕਰਣਂ, ਸੋ ਤੁਣ੍ਹਸ੍ਸ. ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.
‘‘ਉਕ੍ਕੁਜ੍ਜਿਤੋ ਸਙ੍ਘੇਨ ਵਡ੍ਢਸ੍ਸ ਲਿਚ੍ਛਵਿਸ੍ਸ ਪਤ੍ਤੋ ਸਮ੍ਭੋਗੋ ਸਙ੍ਘੇਨ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.
ਏਤ੍ਥ (ਚੂਲ਼ਵ. ਅਟ੍ਠ. ੨੬੫) ਚ ਅਟ੍ਠਸੁ ਅਙ੍ਗੇਸੁ ਏਕਕੇਨਪਿ ਅਙ੍ਗੇਨ ਸਮਨ੍ਨਾਗਤਸ੍ਸ ਪਤ੍ਤਨਿਕ੍ਕੁਜ੍ਜਨਕਮ੍ਮਂ ਕਾਤੁਂ ਵਟ੍ਟਤਿ, ਅਨ੍ਤੋਸੀਮਾਯ ਵਾ ਨਿਸ੍ਸੀਮਂ ਗਨ੍ਤ੍ਵਾ ਨਦੀਆਦੀਸੁ ਵਾ ਨਿਕ੍ਕੁਜ੍ਜਿਤੁਂ ਵਟ੍ਟਤਿਯੇਵ. ਏਵਂ ਨਿਕ੍ਕੁਜ੍ਜਿਤੇ ਪਨ ਪਤ੍ਤੇ ਤਸ੍ਸ ਗੇਹੇ ਕੋਚਿ ਦੇਯ੍ਯਧਮ੍ਮੋ ਨ ਗਹੇਤਬ੍ਬੋ, ‘‘ਅਸੁਕਸ੍ਸ ਗੇਹੇ ਭਿਕ੍ਖਂ ਮਾ ਗਣ੍ਹਿਤ੍ਥਾ’’ਤਿ ਅਞ੍ਞਵਿਹਾਰੇਸੁਪਿ ਪੇਸੇਤਬ੍ਬਂ. ਉਕ੍ਕੁਜ੍ਜਨਕਾਲੇ ਪਨ ਯਾਵਤਤਿਯਂ ਯਾਚਾਪੇਤ੍ਵਾ ਹਤ੍ਥਪਾਸਂ ਵਿਜਹਾਪੇਤ੍ਵਾ ਞਤ੍ਤਿਦੁਤਿਯਕਮ੍ਮੇਨ ਉਕ੍ਕੁਜ੍ਜਿਤਬ੍ਬੋ.
ਸੀਮਾਸਮ੍ਮੁਤਿ, ਤਿਚੀਵਰੇਨ ਅਵਿਪ੍ਪਵਾਸਸਮ੍ਮੁਤਿ, ਸਨ੍ਥਤਸਮ੍ਮੁਤਿ, ਭਤ੍ਤੁਦ੍ਦੇਸਕਸੇਨਾਸਨਗ੍ਗਾਹਾਪਕਭਣ੍ਡਾਗਾਰਿਯਚੀਵਰਪਟਿਗ੍ਗਾਹਕਚੀਵਰਭਾਜਕਯਾਗੁਭਾਜਕਖਜ੍ਜਭਾਜਕਫਲਭਾਜਕਅਪ੍ਪਮਤ੍ਤਕਵਿਸ੍ਸਜ੍ਜਕਸਾਟਿਯਗ੍ਗਾਹਾਪਕਪਤ੍ਤਗ੍ਗਾਹਾਪਕਆਰਾਮਿਕਪੇਸਕਸਾਮਣੇਰਪੇਸਕਸਮ੍ਮੁਤੀਤਿ ਏਤਾਸਂ ਸਮ੍ਮੁਤੀਨਂ ਵਸੇਨ ਸਮ੍ਮੁਤਿ ਵੇਦਿਤਬ੍ਬਾ. ਕਥਿਨਚੀਵਰਦਾਨਮਤਕਚੀਵਰਦਾਨਵਸੇਨ ਦਾਨਂ ਵੇਦਿਤਬ੍ਬਂ. ਕਥਿਨੁਦ੍ਧਾਰਵਸੇਨ ਉਦ੍ਧਾਰੋ ਵੇਦਿਤਬ੍ਬੋ. ਕੁਟਿਵਤ੍ਥੁਵਿਹਾਰਵਤ੍ਥੁਦੇਸਨਾਵਸੇਨ ਦੇਸਨਾ ਵੇਦਿਤਬ੍ਬਾ. ਯਾ ਪਨ ਤਿਣਵਤ੍ਥਾਰਕਸਮਥੇ ਸਬ੍ਬਸਙ੍ਗਾਹਿਕਞਤ੍ਤਿਞ੍ਚ ਏਕੇਕਸ੍ਮਿਂ ਪਕ੍ਖੇ ਏਕੇਕਞਤ੍ਤਿਞ੍ਚਾਤਿ ਤਿਸ੍ਸੋ ਞਤ੍ਤਿਯੋ ਠਪੇਤ੍ਵਾ ਪੁਨ ਏਕੇਕਸ੍ਮਿਂ ਪਕ੍ਖੇ ਏਕੇਕਾਤਿ ਦ੍ਵੇ ਞਤ੍ਤਿਦੁਤਿਯਕਮ੍ਮਵਾਚਾ ਵੁਤ੍ਤਾ, ਤਾਸਂ ਵਸੇਨ ਕਮ੍ਮਲਕ੍ਖਣਂ ਵੇਦਿਤਬ੍ਬਂ. ਇਤਿ ਞਤ੍ਤਿਦੁਤਿਯਕਮ੍ਮਂ ਇਮਾਨਿ ਸਤ੍ਤ ਠਾਨਾਨਿ ਗਚ੍ਛਤਿ.
੨੫੮. ਞਤ੍ਤਿਚਤੁਤ੍ਥਕਮ੍ਮਟ੍ਠਾਨਭੇਦੇ ਪਨ ਤਜ੍ਜਨੀਯਕਮ੍ਮਾਦੀਨਂ ਸਤ੍ਤਨ੍ਨਂ ਕਮ੍ਮਾਨਂ ਵਸੇਨ ਨਿਸ੍ਸਾਰਣਾ, ਤੇਸਂਯੇਵ ਚ ਕਮ੍ਮਾਨਂ ਪਟਿਪ੍ਪਸ੍ਸਮ੍ਭਨਵਸੇਨ ਓਸਾਰਣਾ ਵੇਦਿਤਬ੍ਬਾ. ਭਿਕ੍ਖੁਨੋਵਾਦਕਸਮ੍ਮੁਤਿਵਸੇਨ ਸਮ੍ਮੁਤਿ ਵੇਦਿਤਬ੍ਬਾ. ਪਰਿਵਾਸਦਾਨਮਾਨਤ੍ਤਦਾਨਵਸੇਨ ਦਾਨਂ ਵੇਦਿਤਬ੍ਬਂ. ਮੂਲਾਯਪਟਿਕਸ੍ਸਨਕਮ੍ਮਵਸੇਨ ਨਿਗ੍ਗਹੋ ਵੇਦਿਤਬ੍ਬੋ. ਉਕ੍ਖਿਤ੍ਤਾਨੁਵਤ੍ਤਿਕਾ, ਅਟ੍ਠ ਯਾਵਤਤਿਯਕਾ, ਅਰਿਟ੍ਠੋ, ਚਣ੍ਡਕਾਲ਼ੀ ਚ ਇਮੇਤੇ ਯਾਵਤਤਿਯਕਾਤਿ ਇਮਾਸਂ ਏਕਾਦਸਨ੍ਨਂ ਸਮਨੁਭਾਸਨਾਨਂ ਵਸੇਨ ਸਮਨੁਭਾਸਨਾ ਵੇਦਿਤਬ੍ਬਾ. ਉਪਸਮ੍ਪਦਕਮ੍ਮਅਬ੍ਭਾਨਕਮ੍ਮਵਸੇਨ ਕਮ੍ਮਲਕ੍ਖਣਂ ਵੇਦਿਤਬ੍ਬਂ. ਇਤਿ ਞਤ੍ਤਿਚਤੁਤ੍ਥਕਮ੍ਮਂ ਇਮਾਨਿ ਸਤ੍ਤ ਠਾਨਾਨਿ ਗਚ੍ਛਤਿ. ਏਵਂ ਕਮ੍ਮਾਨਿ ਚ ਕਮ੍ਮਵਿਪਤ੍ਤਿ ਚ ਤੇਸਂ ਕਮ੍ਮਾਨਂ ਕਾਰਕਸਙ੍ਘਪਰਿਚ੍ਛੇਦੋ ਚ ਵਿਪਤ੍ਤਿਵਿਰਹਿਤਾਨਂ ਕਮ੍ਮਾਨਂ ਠਾਨਭੇਦਗਮਨਞ੍ਚ ਵੇਦਿਤਬ੍ਬਂ.
ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ
ਕਮ੍ਮਾਕਮ੍ਮਵਿਨਿਚ੍ਛਯਕਥਾ ਸਮਤ੍ਤਾ.
ਪਕਿਣ੍ਣਕਕਣ੍ਡਮਾਤਿਕਾ
ਗਣਭੋਜਂ ਪਰਮ੍ਪਰਂ, ਨਾਪੁਚ੍ਛਾ ਪਂਸੁਕੂਲਕਂ;
ਅਚ੍ਛਿਨ੍ਨਂ ਪਟਿਭਾਨਞ੍ਚ, ਵਿਪ੍ਪਕਤਉਦ੍ਦਿਸਨਂ.
ਤਿਵਸ੍ਸਨ੍ਤਂ ਦੀਘਾਸਨਂ, ਗਿਲਾਨੁਪਟ੍ਠਵਣ੍ਣਨਂ;
ਅਤ੍ਤਪਾਤਮਨਵੇਕ੍ਖਂ, ਸਿਲਾਪਵਿਜ੍ਝਲਿਮ੍ਪਨਂ.
ਮਿਚ੍ਛਾਦਿਟ੍ਠਿਗੋਪਦਾਨਂ, ਧਮ੍ਮਿਕਾਰਕ੍ਖੁਚ੍ਚਾਰਾਦਿ;
ਨ੍ਹਾਨਘਂਸਂ ਪਣ੍ਡਕਾਦਿ, ਦੀਘਕੇਸਾਦ੍ਯਾਦਾਸਾਦਿ.
ਨਚ੍ਚਾਦਙ੍ਗਛੇਦਨਿਦ੍ਧਿ, ਪਤ੍ਤੋ ਸਬ੍ਬਪਂਸੁਕੂਲਂ;
ਪਰਿਸ੍ਸਾਵਨਂ ਨਗ੍ਗੋ ਚ, ਪੁਪ੍ਫਗਨ੍ਧਆਸਿਤ੍ਤਕਂ.
ਮਲ਼ੋਰਿਕੇਕਭਾਜਨਂ, ਚੇਲਪਟਿ ਪਾਦਘਂਸੀ;
ਬੀਜਨੀ ਛਤ੍ਤਨਖਾਦਿ, ਕਾਯਬਨ੍ਧਨਿਵਾਸਨਂ.
ਕਾਜਹਰਂ ਦਨ੍ਤਕਟ੍ਠਂ, ਰੁਕ੍ਖਾਰੋਹੋ ਛਨ੍ਦਾਰੋਪੋ;
ਲੋਕਾਯਤਂ ਖਿਪਿਤਕੋ, ਲਸੁਣਂ ਨਕ੍ਕਮਿਤਬ੍ਬਂ.
ਅਵਨ੍ਦਿਯੋ ਤੂਲਭਿਸਿ, ਬਿਮ੍ਬੋਹਨਆਸਨ੍ਦਾਦਿ;
ਉਚ੍ਚਾਸਨਮਹਾਸਨਂ, ਚੀਵਰਅਧਮ੍ਮੋਕਾਸੋ.
ਸਦ੍ਧਾਦੇਯ੍ਯਂ ਸਨ੍ਤੁਤ੍ਤਰਂ, ਨਿਕ੍ਖੇਪੋ ਸਤ੍ਥਕਮ੍ਮਾਦਿ;
ਨਹਾਪਿਤੋ ਦਸਭਾਗੋ, ਪਾਥੇਯ੍ਯਂ ਮਹਾਪਦੇਸੋ;
ਆਨਿਸਂਸੋਤਿ ਮਾਤਿਕਾ.