੩੧. ਚੋਦਨਾਦਿਵਿਨਿਚ੍ਛਯਕਥਾ

੨੩੦. ਚੋਦਨਾਦਿਵਿਨਿਚ੍ਛਯੋਤਿ ਏਤ੍ਥ (ਪਾਰਾ. ਅਟ੍ਠ. ੨.੩੮੫-੬) ਪਨ ਚੋਦੇਤੁਂ ਕੋ ਲਭਤਿ, ਕੋ ਨ ਲਭਤਿ? ਦੁਬ੍ਬਲਚੋਦਕਵਚਨਂ ਤਾਵ ਗਹੇਤ੍ਵਾ ਕੋਚਿ ਨ ਲਭਤਿ. ਦੁਬ੍ਬਲਚੋਦਕੋ ਨਾਮ ਸਮ੍ਬਹੁਲੇਸੁ ਕਥਾਸਲ੍ਲਾਪੇਨ ਨਿਸਿਨ੍ਨੇਸੁ ਏਕੋ ਏਕਂ ਆਰਬ੍ਭ ਅਨੋਦਿਸ੍ਸਕਂ ਕਤ੍ਵਾ ਪਾਰਾਜਿਕਵਤ੍ਥੁਂ ਕਥੇਤਿ, ਅਞ੍ਞੋ ਤਂ ਸੁਤ੍ਵਾ ਇਤਰਸ੍ਸ ਗਨ੍ਤ੍ਵਾ ਆਰੋਚੇਤਿ, ਸੋ ਤਂ ਉਪਸਙ੍ਕਮਿਤ੍ਵਾ ‘‘ਤ੍ਵਂ ਕਿਰ ਮਂ ਇਦਞ੍ਚਿਦਞ੍ਚ ਵਦਸੀ’’ਤਿ ਭਣਤਿ, ਸੋ ‘‘ਨਾਹਂ ਏਵਰੂਪਂ ਜਾਨਾਮਿ, ਕਥਾਪਵਤ੍ਤਿਯਂ ਪਨ ਮਯਾ ਅਨੋਦਿਸ੍ਸਕਂ ਕਤ੍ਵਾ ਵੁਤ੍ਤਮਤ੍ਥਿ. ਸਚੇ ਅਹਂ ਤਵ ਇਮਂ ਦੁਕ੍ਖੁਪ੍ਪਤ੍ਤਿਂ ਜਾਨੇਯ੍ਯਂ, ਏਤ੍ਤਕਮ੍ਪਿ ਨ ਕਥੇਯ੍ਯ’’ਨ੍ਤਿ. ਅਯਂ ਦੁਬ੍ਬਲਚੋਦਕੋ. ਤਸ੍ਸੇਤਂ ਕਥਾਸਲ੍ਲਾਪਂ ਗਹੇਤ੍ਵਾ ਤਂ ਭਿਕ੍ਖੁਂ ਕੋਚਿ ਚੋਦੇਤੁਂ ਨ ਲਭਤਿ, ਏਤਂ ਪਨ ਅਗ੍ਗਹੇਤ੍ਵਾ ਸੀਲਸਮ੍ਪਨ੍ਨੋ ਭਿਕ੍ਖੁ ਭਿਕ੍ਖੁਂ ਵਾ ਭਿਕ੍ਖੁਨਿਂ ਵਾ, ਸੀਲਸਮ੍ਪਨ੍ਨਾ ਚ ਭਿਕ੍ਖੁਨੀ ਭਿਕ੍ਖੁਨੀਮੇਵ ਚੋਦੇਤੁਂ ਲਭਤੀਤਿ ਮਹਾਪਦੁਮਤ੍ਥੇਰੋ ਆਹ. ਮਹਾਸੁਮਤ੍ਥੇਰੋ ਪਨ ‘‘ਪਞ੍ਚਪਿ ਸਹਧਮ੍ਮਿਕਾ ਲਭਨ੍ਤੀ’’ਤਿ ਆਹ. ਗੋਦਤ੍ਤਤ੍ਥੇਰੋ ‘‘ਨ ਕੋਚਿ ਨ ਲਭਤੀ’’ਤਿ ਵਤ੍ਵਾ ‘‘ਭਿਕ੍ਖੁਸ੍ਸ ਸੁਤ੍ਵਾ ਚੋਦੇਤਿ, ਭਿਕ੍ਖੁਨਿਯਾ ਸੁਤ੍ਵਾ…ਪੇ… ਤਿਤ੍ਥਿਯਸਾਵਕਾਨਂ ਸੁਤ੍ਵਾ ਚੋਦੇਤੀ’’ਤਿ ਇਦਂ ਸੁਤ੍ਤਂ ਆਹਰਿ. ਤਿਣ੍ਣਮ੍ਪਿ ਥੇਰਾਨਂ ਵਾਦੇ ਚੁਦਿਤਕਸ੍ਸੇਵ ਪਟਿਞ੍ਞਾਯ ਕਾਰੇਤਬ੍ਬੋ.

ਅਯਂ ਪਨ ਚੋਦਨਾ ਨਾਮ ਦਿਟ੍ਠਚੋਦਨਾ ਸੁਤਚੋਦਨਾ ਪਰਿਸਙ੍ਕਿਤਚੋਦਨਾਤਿ ਤਿਵਿਧਾ ਹੋਤਿ. ਅਪਰਾਪਿ ਚਤੁਬ੍ਬਿਧਾ ਹੋਤਿ ਸੀਲਵਿਪਤ੍ਤਿਚੋਦਨਾ ਆਚਾਰਵਿਪਤ੍ਤਿਚੋਦਨਾ ਦਿਟ੍ਠਿਵਿਪਤ੍ਤਿਚੋਦਨਾ ਆਜੀਵਵਿਪਤ੍ਤਿਚੋਦਨਾਤਿ. ਤਤ੍ਥ ਗਰੁਕਾਨਂ ਦ੍ਵਿਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਵਸੇਨ ਸੀਲਵਿਪਤ੍ਤਿਚੋਦਨਾ ਵੇਦਿਤਬ੍ਬਾ, ਅਵਸੇਸਾਨਂ ਵਸੇਨ ਆਚਾਰਵਿਪਤ੍ਤਿਚੋਦਨਾ, ਮਿਚ੍ਛਾਦਿਟ੍ਠਿਅਨ੍ਤਗ੍ਗਾਹਿਕਦਿਟ੍ਠਿਵਸੇਨ ਦਿਟ੍ਠਿਵਿਪਤ੍ਤਿਚੋਦਨਾ, ਆਜੀਵਹੇਤੁ ਪਞ੍ਞਤ੍ਤਾਨਂ ਛਨ੍ਨਂ ਸਿਕ੍ਖਾਪਦਾਨਂ ਵਸੇਨ ਆਜੀਵਵਿਪਤ੍ਤਿਚੋਦਨਾ ਵੇਦਿਤਬ੍ਬਾ.

ਅਪਰਾਪਿ ਚਤੁਬ੍ਬਿਧਾ ਹੋਤਿ ਵਤ੍ਥੁਸਨ੍ਦਸ੍ਸਨਾ ਆਪਤ੍ਤਿਸਨ੍ਦਸ੍ਸਨਾ ਸਂਵਾਸਪਟਿਕ੍ਖੇਪੋ ਸਾਮੀਚਿਪਟਿਕ੍ਖੇਪੋਤਿ. ਤਤ੍ਥ ਵਤ੍ਥੁਸਨ੍ਦਸ੍ਸਨਾ ਨਾਮ ‘‘ਤ੍ਵਂ ਮੇਥੁਨਂ ਧਮ੍ਮਂ ਪਟਿਸੇਵਿ, ਅਦਿਨ੍ਨਂ ਆਦਿਯਿ, ਮਨੁਸ੍ਸਂ ਘਾਤਯਿਤ੍ਥ, ਅਭੂਤਂ ਆਰੋਚਯਿਤ੍ਥਾ’’ਤਿ ਏਵਂ ਪਵਤ੍ਤਾ. ਆਪਤ੍ਤਿਸਨ੍ਦਸ੍ਸਨਾ ਨਾਮ ‘‘ਤ੍ਵਂ ਮੇਥੁਨਧਮ੍ਮਪਾਰਾਜਿਕਾਪਤ੍ਤਿਂ ਆਪਨ੍ਨੋ’’ਤਿਏਵਮਾਦਿਨਯਪ੍ਪਵਤ੍ਤਾ. ਸਂਵਾਸਪਟਿਕ੍ਖੇਪੋ ਨਾਮ ‘‘ਨਤ੍ਥਿ ਤਯਾ ਸਦ੍ਧਿਂ ਉਪੋਸਥੋ ਵਾ ਪਵਾਰਣਾ ਵਾ ਸਙ੍ਘਕਮ੍ਮਂ ਵਾ’’ਤਿ ਏਵਂ ਪਵਤ੍ਤੋ. ਸਾਮੀਚਿਪਟਿਕ੍ਖੇਪੋ ਨਾਮ ਅਭਿਵਾਦਨਪਚ੍ਚੁਟ੍ਠਾਨਅਞ੍ਜਲੀਕਮ੍ਮਬੀਜਨਾਦਿਕਮ੍ਮਾਨਂ ਅਕਰਣਂ. ਤਂ ਪਟਿਪਾਟਿਯਾ ਵਨ੍ਦਨਾਦੀਨਿ ਕਰੋਨ੍ਤੋ ਏਕਸ੍ਸ ਅਕਤ੍ਵਾ ਸੇਸਾਨਂ ਕਰਣਕਾਲੇ ਵੇਦਿਤਬ੍ਬਂ. ਏਤ੍ਤਾਵਤਾਪਿ ਚੋਦਨਾ ਨਾਮ ਹੋਤਿ. ਯਾਗੁਭਤ੍ਤਾਦਿਨਾ ਪਨ ਯਂ ਇਚ੍ਛਤਿ, ਤਂ ਆਪੁਚ੍ਛਤਿ, ਨ ਤਾਵਤਾ ਚੋਦਨਾ ਹੋਤਿ.

ਅਪਰਾ ਪਾਤਿਮੋਕ੍ਖਟ੍ਠਪਨਕ੍ਖਨ੍ਧਕੇ (ਚੂਲ਼ਵ. ੩੮੭) ‘‘ਏਕਂ, ਭਿਕ੍ਖਵੇ, ਅਧਮ੍ਮਿਕਂ ਪਾਤਿਮੋਕ੍ਖਟ੍ਠਪਨਂ, ਏਕਂ ਧਮ੍ਮਿਕ’’ਨ੍ਤਿਆਦਿਂ ਕਤ੍ਵਾ ਯਾਵ ਦਸ ਅਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ, ਦਸ ਧਮ੍ਮਿਕਾਨੀਤਿ ਏਵਂ ਅਧਮ੍ਮਿਕਾ ਪਞ੍ਚਪਞ੍ਞਾਸ, ਧਮ੍ਮਿਕਾ ਪਞ੍ਚਪਞ੍ਞਾਸਾਤਿ ਦਸੁਤ੍ਤਰਸਤਂ ਚੋਦਨਾ ਵੁਤ੍ਤਾ. ਤਾ ਦਿਟ੍ਠੇਨ ਚੋਦੇਨ੍ਤਸ੍ਸ ਦਸੁਤ੍ਤਰਸਤਂ, ਸੁਤੇਨ ਚੋਦੇਨ੍ਤਸ੍ਸ ਦਸੁਤ੍ਤਰਸਤਂ, ਪਰਿਸਙ੍ਕਾਯ ਚੋਦੇਨ੍ਤਸ੍ਸ ਦਸੁਤ੍ਤਰਸਤਨ੍ਤਿ ਤਿਂਸਾਧਿਕਾਨਿ ਤੀਣਿ ਸਤਾਨਿ ਹੋਨ੍ਤਿ. ਤਾਨਿ ਕਾਯੇਨ ਚੋਦੇਨ੍ਤਸ੍ਸ, ਵਾਚਾਯ ਚੋਦੇਨ੍ਤਸ੍ਸ, ਕਾਯਵਾਚਾਯ ਚੋਦੇਨ੍ਤਸ੍ਸਾਤਿ ਤਿਗੁਣਾਨਿ ਕਤਾਨਿ ਨਵੁਤਾਧਿਕਾਨਿ ਨਵ ਸਤਾਨਿ ਹੋਨ੍ਤਿ. ਤਾਨਿ ਅਤ੍ਤਨਾ ਚੋਦੇਨ੍ਤਸ੍ਸਪਿ ਪਰੇਨ ਚੋਦਾਪੇਨ੍ਤਸ੍ਸਪਿ ਤਤ੍ਤਕਾਨੇਵਾਤਿ ਵੀਸਤਿਊਨਾਨਿ ਦ੍ਵੇ ਸਹਸ੍ਸਾਨਿ ਹੋਨ੍ਤਿ. ਪੁਨ ਦਿਟ੍ਠਾਦਿਭੇਦੇ ਸਮੂਲਿਕਾਮੂਲਿਕਵਸੇਨ ਅਨੇਕਸਹਸ੍ਸਾ ਚੋਦਨਾ ਹੋਨ੍ਤੀਤਿ ਵੇਦਿਤਬ੍ਬਾ.

੨੩੧. ਵੁਤ੍ਤਪ੍ਪਭੇਦਾਸੁ ਪਨ ਇਮਾਸੁ ਚੋਦਨਾਸੁ ਯਾਯ ਕਾਯਚਿ ਚੋਦਨਾਯ ਵਸੇਨ ਸਙ੍ਘਮਜ੍ਝੇ ਓਸਟੇ ਵਤ੍ਥੁਸ੍ਮਿਂ ਚੁਦਿਤਕਚੋਦਕਾ ਵਤ੍ਤਬ੍ਬਾ ‘‘ਤੁਮ੍ਹੇ ਅਮ੍ਹਾਕਂ ਵਿਨਿਚ੍ਛਯੇਨ ਤੁਟ੍ਠਾ ਭਵਿਸ੍ਸਥਾ’’ਤਿ. ਸਚੇ ‘‘ਭਵਿਸ੍ਸਾਮਾ’’ਤਿ ਵਦਨ੍ਤਿ, ਸਙ੍ਘੇਨ ਤਂ ਅਧਿਕਰਣਂ ਸਮ੍ਪਟਿਚ੍ਛਿਤਬ੍ਬਂ. ਅਥ ਪਨ ‘‘ਵਿਨਿਚ੍ਛਿਨਥ ਤਾਵ, ਭਨ੍ਤੇ, ਸਚੇ ਅਮ੍ਹਾਕਂ ਖਮਿਸ੍ਸਤਿ, ਗਣ੍ਹਿਸ੍ਸਾਮਾ’’ਤਿ ਵਦਨ੍ਤਿ, ‘‘ਚੇਤਿਯਂ ਤਾਵ ਵਨ੍ਦਥਾ’’ਤਿਆਦੀਨਿ ਵਤ੍ਵਾ ਦੀਘਸੁਤ੍ਤਂ ਕਤ੍ਵਾ ਵਿਸ੍ਸਜ੍ਜਿਤਬ੍ਬਂ. ਤੇ ਚੇ ਚਿਰਰਤ੍ਤਂ ਕਿਲਨ੍ਤਾ ਪਕ੍ਕਨ੍ਤਪਰਿਸਾ ਉਪਚ੍ਛਿਨ੍ਨਪਕ੍ਖਾ ਹੁਤ੍ਵਾ ਪੁਨ ਯਾਚਨ੍ਤਿ, ਯਾਵਤਤਿਯਂ ਪਟਿਕ੍ਖਿਪਿਤ੍ਵਾ ਯਦਾ ਨਿਮ੍ਮਦਾ ਹੋਨ੍ਤਿ, ਤਦਾ ਨੇਸਂ ਅਧਿਕਰਣਂ ਵਿਨਿਚ੍ਛਿਨਿਤਬ੍ਬਂ. ਵਿਨਿਚ੍ਛਿਨਨ੍ਤੇਹਿ ਚ ਸਚੇ ਅਲਜ੍ਜੁਸ੍ਸਨ੍ਨਾ ਹੋਤਿ ਪਰਿਸਾ, ਉਬ੍ਬਾਹਿਕਾਯ ਤਂ ਅਧਿਕਰਣਂ ਵਿਨਿਚ੍ਛਿਨਿਤਬ੍ਬਂ. ਸਚੇ ਬਾਲੁਸ੍ਸਨ੍ਨਾ ਹੋਤਿ ਪਰਿਸਾ, ‘‘ਤੁਮ੍ਹਾਕਂ ਸਭਾਗੇ ਵਿਨਯਧਰੇ ਪਰਿਯੇਸਥਾ’’ਤਿ ਵਿਨਯਧਰੇ ਪਰਿਯੇਸਾਪੇਤ੍ਵਾ ਯੇਨ ਧਮ੍ਮੇਨ ਯੇਨ ਵਿਨਯੇਨ ਯੇਨ ਸਤ੍ਥੁਸਾਸਨੇਨ ਤਂ ਅਧਿਕਰਣਂ ਵੂਪਸਮ੍ਮਤਿ, ਤਥਾ ਤਂ ਅਧਿਕਰਣਂ ਵੂਪਸਮੇਤਬ੍ਬਂ.

ਤਤ੍ਥ ਚ ਧਮ੍ਮੋਤਿ ਭੂਤਂ ਵਤ੍ਥੁ. ਵਿਨਯੋਤਿ ਚੋਦਨਾ ਚੇਵ ਸਾਰਣਾ ਚ. ਸਤ੍ਥੁਸਾਸਨਨ੍ਤਿ ਞਤ੍ਤਿਸਮ੍ਪਦਾ ਚ ਅਨੁਸ੍ਸਾਵਨਸਮ੍ਪਦਾ ਚ. ਤਸ੍ਮਾ ਚੋਦਕੇਨ ਵਤ੍ਥੁਸ੍ਮਿਂ ਆਰੋਚਿਤੇ ਚੁਦਿਤਕੋ ਪੁਚ੍ਛਿਤਬ੍ਬੋ ‘‘ਸਨ੍ਤਮੇਤਂ, ਨੋ’’ਤਿ. ਏਵਂ ਵਤ੍ਥੁਂ ਉਪਪਰਿਕ੍ਖਿਤ੍ਵਾ ਭੂਤੇਨ ਵਤ੍ਥੁਨਾ ਚੋਦੇਤ੍ਵਾ ਸਾਰੇਤ੍ਵਾ ਞਤ੍ਤਿਸਮ੍ਪਦਾਯ ਚ ਅਨੁਸ੍ਸਾਵਨਸਮ੍ਪਦਾਯ ਚ ਤਂ ਅਧਿਕਰਣਂ ਵੂਪਸਮੇਤਬ੍ਬਂ. ਤਤ੍ਰ ਚੇ ਅਲਜ੍ਜੀ ਲਜ੍ਜਿਂ ਚੋਦੇਤਿ, ਸੋ ਚ ਅਲਜ੍ਜੀ ਬਾਲੋ ਹੋਤਿ ਅਬ੍ਯਤ੍ਤੋ, ਨਾਸ੍ਸ ਨਯੋ ਦਾਤਬ੍ਬੋ, ਏਵਂ ਪਨ ਵਤ੍ਤਬ੍ਬੋ ‘‘ਕਿਮ੍ਹਿ ਨਂ ਚੋਦੇਸੀ’’ਤਿ. ਅਦ੍ਧਾ ਸੋ ਵਕ੍ਖਤਿ ‘‘ਕਿਮਿਦਂ, ਭਨ੍ਤੇ, ਕਿਮ੍ਹਿ ਨਂ ਨਾਮਾ’’ਤਿ. ‘‘ਤ੍ਵਂ ਕਿਮ੍ਹਿ ਨਮ੍ਪਿ ਨ ਜਾਨਾਸਿ, ਨ ਯੁਤ੍ਤਂ ਤਯਾ ਏਵਰੂਪੇਨ ਬਾਲੇਨ ਪਰਂ ਚੋਦੇਤੁ’’ਨ੍ਤਿ ਉਯ੍ਯੋਜੇਤਬ੍ਬੋ, ਨਾਸ੍ਸ ਅਨੁਯੋਗੋ ਦਾਤਬ੍ਬੋ. ਸਚੇ ਪਨ ਸੋ ਅਲਜ੍ਜੀ ਪਣ੍ਡਿਤੋ ਹੋਤਿ ਬ੍ਯਤ੍ਤੋ, ਦਿਟ੍ਠੇਨ ਵਾ ਸੁਤੇਨ ਵਾ ਅਜ੍ਝੋਤ੍ਥਰਿਤ੍ਵਾ ਸਮ੍ਪਾਦੇਤੁਂ ਸਕ੍ਕੋਤਿ, ਏਤਸ੍ਸ ਅਨੁਯੋਗਂ ਦਤ੍ਵਾ ਲਜ੍ਜਿਸ੍ਸੇਵ ਪਟਿਞ੍ਞਾਯ ਕਮ੍ਮਂ ਕਾਤਬ੍ਬਂ.

ਸਚੇ ਲਜ੍ਜੀ ਅਲਜ੍ਜਿਂ ਚੋਦੇਤਿ, ਸੋ ਚ ਲਜ੍ਜੀ ਬਾਲੋ ਹੋਤਿ ਅਬ੍ਯਤ੍ਤੋ, ਨ ਸਕ੍ਕੋਤਿ ਅਨੁਯੋਗਂ ਦਾਤੁਂ, ਤਸ੍ਸ ਨਯੋ ਦਾਤਬ੍ਬੋ ‘‘ਕਿਮ੍ਹਿ ਨਂ ਚੋਦੇਸਿ ਸੀਲਵਿਪਤ੍ਤਿਯਾ ਵਾ ਆਚਾਰਵਿਪਤ੍ਤਿਆਦੀਸੁ ਵਾ ਏਕਿਸ੍ਸਾ’’ਤਿ. ਕਸ੍ਮਾ ਪਨ ਇਮਸ੍ਸੇਵ ਏਵਂ ਨਯੋ ਦਾਤਬ੍ਬੋ, ਨ ਇਤਰਸ੍ਸਾਤਿ, ਨਨੁ ਨ ਯੁਤ੍ਤਂ ਵਿਨਯਧਰਾਨਂ ਅਗਤਿਗਮਨਨ੍ਤਿ? ਨ ਯੁਤ੍ਤਮੇਵ. ਇਦਂ ਪਨ ਅਗਤਿਗਮਨਂ ਨ ਹੋਤਿ, ਧਮ੍ਮਾਨੁਗ੍ਗਹੋ ਨਾਮ ਏਸੋ. ਅਲਜ੍ਜਿਨਿਗ੍ਗਹਤ੍ਥਾਯ ਹਿ ਲਜ੍ਜਿਪਗ੍ਗਹਤ੍ਥਾਯ ਚ ਸਿਕ੍ਖਾਪਦਂ ਪਞ੍ਞਤ੍ਤਂ. ਤਤ੍ਰ ਅਲਜ੍ਜੀ ਨਯਂ ਲਭਿਤ੍ਵਾ ਅਜ੍ਝੋਤ੍ਥਰਨ੍ਤੋ ਏਹਿਤਿ, ਲਜ੍ਜੀ ਪਨ ਨਯਂ ਲਭਿਤ੍ਵਾ ਦਿਟ੍ਠੇ ਦਿਟ੍ਠਸਨ੍ਤਾਨੇਨ ਸੁਤੇ ਸੁਤਸਨ੍ਤਾਨੇਨ ਪਤਿਟ੍ਠਾਯ ਕਥੇਸ੍ਸਤਿ, ਤਸ੍ਮਾ ਤਸ੍ਸ ਧਮ੍ਮਾਨੁਗ੍ਗਹੋ ਵਟ੍ਟਤਿ. ਸਚੇ ਪਨ ਸੋ ਲਜ੍ਜੀ ਪਣ੍ਡਿਤੋ ਹੋਤਿ ਬ੍ਯਤ੍ਤੋ, ਪਤਿਟ੍ਠਾਯ ਕਥੇਤਿ, ਅਲਜ੍ਜੀ ਚ ‘‘ਏਤਮ੍ਪਿ ਨਤ੍ਥਿ, ਏਤਮ੍ਪਿ ਨਤ੍ਥੀ’’ਤਿ ਪਟਿਞ੍ਞਂ ਨ ਦੇਤਿ, ਅਲਜ੍ਜਿਸ੍ਸ ਪਟਿਞ੍ਞਾਯ ਏਵ ਕਾਤਬ੍ਬਂ.

ਤਦਤ੍ਥਦੀਪਨਤ੍ਥਞ੍ਚ ਇਦਂ ਵਤ੍ਥੁ ਵੇਦਿਤਬ੍ਬਂ – ਤਿਪਿਟਕਚੂਲ਼ਾਭਯਤ੍ਥੇਰੋ ਕਿਰ ਲੋਹਪਾਸਾਦਸ੍ਸ ਹੇਟ੍ਠਾ ਭਿਕ੍ਖੂਨਂ ਵਿਨਯਂ ਕਥੇਤ੍ਵਾ ਸਾਯਨ੍ਹਸਮਯੇ ਵੁਟ੍ਠਾਤਿ, ਤਸ੍ਸ ਵੁਟ੍ਠਾਨਸਮਯੇ ਦ੍ਵੇ ਅਤ੍ਤਪਚ੍ਚਤ੍ਥਿਕਾ ਕਥਂ ਪਵਤ੍ਤੇਸੁਂ. ਏਕੋ ‘‘ਏਤਮ੍ਪਿ ਨਤ੍ਥਿ, ਏਤਮ੍ਪਿ ਨਤ੍ਥੀ’’ਤਿ ਪਟਿਞ੍ਞਂ ਨ ਦੇਤਿ, ਅਥ ਅਪ੍ਪਾਵਸੇਸੇ ਪਠਮਯਾਮੇ ਥੇਰਸ੍ਸ ਤਸ੍ਮਿਂ ਪੁਗ੍ਗਲੇ ‘‘ਅਯਂ ਪਤਿਟ੍ਠਾਯ ਕਥੇਤਿ, ਅਯਂ ਪਨ ਪਟਿਞ੍ਞਂ ਨ ਦੇਤਿ, ਬਹੂਨਿ ਚ ਵਤ੍ਥੂਨਿ ਓਸਟਾਨਿ, ਅਦ੍ਧਾ ਏਤਂ ਕਤਂ ਭਵਿਸ੍ਸਤੀ’’ਤਿ ਅਸੁਦ੍ਧਲਦ੍ਧਿ ਉਪ੍ਪਨ੍ਨਾ. ਤਤੋ ਬੀਜਨੀਦਣ੍ਡਕੇਨ ਪਾਦਕਥਲਿਕਾਯ ਸਞ੍ਞਂ ਦਤ੍ਵਾ ‘‘ਅਹਂ, ਆਵੁਸੋ, ਵਿਨਿਚ੍ਛਿਨਿਤੁਂ ਅਨਨੁਚ੍ਛਵਿਕੋ, ਅਞ੍ਞੇਨ ਵਿਨਿਚ੍ਛਿਨਾਪੇਹੀ’’ਤਿ ਆਹ. ‘‘ਕਸ੍ਮਾ, ਭਨ੍ਤੇ’’ਤਿ? ਥੇਰੋ ਤਮਤ੍ਥਂ ਆਰੋਚੇਸਿ. ਚੁਦਿਤਕਪੁਗ੍ਗਲਸ੍ਸ ਕਾਯੇ ਡਾਹੋ ਉਟ੍ਠਿਤੋ, ਤਤੋ ਸੋ ਥੇਰਂ ਵਨ੍ਦਿਤ੍ਵਾ ‘‘ਭਨ੍ਤੇ, ਵਿਨਿਚ੍ਛਿਨਿਤੁਂ ਅਨੁਰੂਪੇਨ ਵਿਨਯਧਰੇਨ ਨਾਮ ਤੁਮ੍ਹਾਦਿਸੇਨੇਵ ਭਵਿਤੁਂ ਵਟ੍ਟਤਿ, ਚੋਦਕੇਨ ਚ ਈਦਿਸੇਨੇਵ ਭਵਿਤੁਂ ਵਟ੍ਟਤੀ’’ਤਿ ਵਤ੍ਵਾ ਸੇਤਕਾਨਿ ਨਿਵਾਸੇਤ੍ਵਾ ‘‘ਚਿਰਂ ਕਿਲਮਿਤਾਤ੍ਥ ਮਯਾ’’ਤਿ ਖਮਾਪੇਤ੍ਵਾ ਪਕ੍ਕਾਮਿ.

ਏਵਂ ਲਜ੍ਜਿਨਾ ਚੋਦਿਯਮਾਨੋ ਅਲਜ੍ਜੀ ਬਹੂਸੁਪਿ ਵਤ੍ਥੂਸੁ ਉਪ੍ਪਨ੍ਨੇਸੁ ਪਟਿਞ੍ਞਂ ਨ ਦੇਤਿ, ਸੋ ਨੇਵ ‘‘ਸੁਦ੍ਧੋ’’ਤਿ ਵਤ੍ਤਬ੍ਬੋ, ਨ ‘‘ਅਸੁਦ੍ਧੋ’’ਤਿ, ਜੀਵਮਤਕੋ ਨਾਮ ਆਮਕਪੂਤਿਕੋ ਨਾਮ ਚੇਸ. ਸਚੇ ਪਨਸ੍ਸ ਅਞ੍ਞਮ੍ਪਿ ਤਾਦਿਸਂ ਵਤ੍ਥੁ ਉਪ੍ਪਜ੍ਜਤਿ, ਨ ਵਿਨਿਚ੍ਛਿਨਿਤਬ੍ਬਂ, ਤਥਾ ਨਾਸਿਤਕੋ ਭਵਿਸ੍ਸਤਿ. ਸਚੇ ਪਨ ਅਲਜ੍ਜੀਯੇਵ ਅਲਜ੍ਜਿਂ ਚੋਦੇਤਿ, ਸੋ ਵਤ੍ਤਬ੍ਬੋ ‘‘ਆਵੁਸੋ, ਤਵ ਵਚਨੇਨਾਯਂ ਕਿਂ ਸਕ੍ਕਾ ਵਤ੍ਤੁ’’ਨ੍ਤਿ. ਇਤਰਮ੍ਪਿ ਤਥੇਵ ਵਤ੍ਵਾ ‘‘ਉਭੋਪਿ ਏਕਸਮ੍ਭੋਗਪਰਿਭੋਗਾ ਹੁਤ੍ਵਾ ਜੀਵਥਾ’’ਤਿ ਉਯ੍ਯੋਜੇਤਬ੍ਬਾ. ਸੀਲਤ੍ਥਾਯ ਨੇਸਂ ਵਿਨਿਚ੍ਛਯੋ ਨ ਕਾਤਬ੍ਬੋ, ਪਤ੍ਤਚੀਵਰਪਰਿਵੇਣਾਦਿਅਤ੍ਥਾਯ ਪਨ ਪਤਿਰੂਪਂ ਸਕ੍ਖਿਂ ਲਭਿਤ੍ਵਾ ਕਾਤਬ੍ਬੋਤਿ.

ਅਥ ਲਜ੍ਜੀ ਲਜ੍ਜਿਂ ਚੋਦੇਤਿ, ਵਿਵਾਦੋ ਚ ਨੇਸਂ ਕਿਸ੍ਮਿਞ੍ਚਿਦੇਵ ਅਪ੍ਪਮਤ੍ਤਕੋ ਹੋਤਿ, ਸਞ੍ਞਾਪੇਤ੍ਵਾ ‘‘ਮਾ ਏਵਂ ਕਰੋਥਾ’’ਤਿ ਅਚ੍ਚਯਂ ਦੇਸਾਪੇਤ੍ਵਾ ਉਯ੍ਯੋਜੇਤਬ੍ਬਾ. ਅਥ ਪਨੇਤ੍ਥ ਚੁਦਿਤਕੇਨ ਸਹਸਾ ਵਿਰਦ੍ਧਂ ਹੋਤਿ, ਆਦਿਤੋ ਪਟ੍ਠਾਯ ਅਲਜ੍ਜੀ ਨਾਮ ਨਤ੍ਥਿ. ਸੋ ਚ ਪਕ੍ਖਾਨੁਰਕ੍ਖਣਤ੍ਥਾਯ ਪਟਿਞ੍ਞਂ ਨ ਦੇਤਿ, ‘‘ਮਯਂ ਸਦ੍ਦਹਾਮ, ਮਯਂ ਸਦ੍ਦਹਾਮਾ’’ਤਿ ਬਹੂ ਉਟ੍ਠਹਨ੍ਤਿ, ਸੋ ਤੇਸਂ ਪਟਿਞ੍ਞਾਯ ਏਕਵਾਰਂ ਦ੍ਵੇਵਾਰਂ ਸੁਦ੍ਧੋ ਹੋਤੁ, ਅਥ ਪਨ ਵਿਰਦ੍ਧਕਾਲਤੋ ਪਟ੍ਠਾਯ ਠਾਨੇ ਨ ਤਿਟ੍ਠਤਿ, ਵਿਨਿਚ੍ਛਯੋ ਨ ਦਾਤਬ੍ਬੋ.

੨੩੨. ਅਦਿਨ੍ਨਾਦਾਨਵਤ੍ਥੁਂ ਵਿਨਿਚ੍ਛਿਨਨ੍ਤੇਨ (ਪਾਰਾ. ਅਟ੍ਠ. ੧.੯੨) ਪਨ ਪਞ੍ਚਵੀਸਤਿ ਅਵਹਾਰਾ ਸਾਧੁਕਂ ਸਲ੍ਲਕ੍ਖੇਤਬ੍ਬਾ. ਤੇਸੁ ਚ ਕੁਸਲੇਨ ਵਿਨਯਧਰੇਨ ਓਤਿਣ੍ਣਂ ਵਤ੍ਥੁਂ ਸਹਸਾ ਅਵਿਨਿਚ੍ਛਿਨਿਤ੍ਵਾਵ ਪਞ੍ਚ ਠਾਨਾਨਿ ਓਲੋਕੇਤਬ੍ਬਾਨਿ, ਯਾਨਿ ਸਨ੍ਧਾਯ ਪੋਰਾਣਾ ਆਹੁ –

‘‘ਵਤ੍ਥੁਂ ਕਾਲਞ੍ਚ ਦੇਸਞ੍ਚ, ਅਗ੍ਘਂ ਪਰਿਭੋਗਪਞ੍ਚਮਂ;

ਤੁਲਯਿਤ੍ਵਾ ਪਞ੍ਚ ਠਾਨਾਨਿ, ਧਾਰੇਯ੍ਯਤ੍ਥਂ ਵਿਚਕ੍ਖਣੋ’’ਤਿ. (ਪਾਰਾ. ਅਟ੍ਠ. ੧.੯੨);

ਤਤ੍ਥ ਵਤ੍ਥੁਨ੍ਤਿ ਭਣ੍ਡਂ. ਅਵਹਾਰਕੇਨ ਹਿ ‘‘ਮਯਾ ਇਦਂ ਨਾਮ ਅਵਹਟ’’ਨ੍ਤਿ ਵੁਤ੍ਤੇਪਿ ਆਪਤ੍ਤਿਂ ਅਨਾਰੋਪੇਤ੍ਵਾਵ ਤਂ ਭਣ੍ਡਂ ‘‘ਸਸਾਮਿਕਂ ਵਾ ਅਸਾਮਿਕਂ ਵਾ’’ਤਿ ਉਪਪਰਿਕ੍ਖਿਤਬ੍ਬਂ. ਸਸਾਮਿਕੇਪਿ ਸਾਮਿਕਾਨਂ ਸਾਲਯਭਾਵੋ ਵਾ ਨਿਰਾਲਯਭਾਵੋ ਵਾ ਉਪਪਰਿਕ੍ਖਿਤਬ੍ਬੋ. ਸਚੇ ਤੇਸਂ ਸਾਲਯਕਾਲੇ ਅਵਹਟਂ, ਭਣ੍ਡਂ ਅਗ੍ਘਾਪੇਤ੍ਵਾ ਆਪਤ੍ਤਿ ਕਾਤਬ੍ਬਾ. ਸਚੇ ਨਿਰਾਲਯਕਾਲੇ, ਪਾਰਾਜਿਕੇਨ ਨ ਕਾਤਬ੍ਬਾ. ਭਣ੍ਡਸਾਮਿਕੇਸੁ ਪਨ ਭਣ੍ਡਂ ਆਹਰਾਪੇਨ੍ਤੇਸੁ ਭਣ੍ਡਂ ਦਾਤਬ੍ਬਂ. ਅਯਮੇਤ੍ਥ ਸਾਮੀਚਿ.

ਇਮਸ੍ਸ ਪਨਤ੍ਥਸ੍ਸ ਦੀਪਨਤ੍ਥਮਿਦਂ ਵਤ੍ਥੁ – ਭਾਤਿਯਰਾਜਕਾਲੇ ਕਿਰ ਮਹਾਚੇਤਿਯਪੂਜਾਯ ਦਕ੍ਖਿਣਦਿਸਤੋ ਏਕੋ ਭਿਕ੍ਖੁ ਸਤ੍ਤਹਤ੍ਥਂ ਪਣ੍ਡੁਕਾਸਾਵਂ ਅਂਸੇ ਕਰਿਤ੍ਵਾ ਚੇਤਿਯਙ੍ਗਣਂ ਪਾਵਿਸਿ. ਤਙ੍ਖਣਮੇਵ ਚ ਰਾਜਾਪਿ ਚੇਤਿਯਵਨ੍ਦਨਤ੍ਥਂ ਆਗਤੋ. ਤਤੋ ਉਸ੍ਸਾਰਣਾਯ ਵਤ੍ਤਮਾਨਾਯ ਮਹਾਜਨਸਮ੍ਮਦ੍ਦੋ ਅਹੋਸਿ. ਅਥ ਸੋ ਭਿਕ੍ਖੁ ਜਨਸਮ੍ਮਦ੍ਦਪੀਲ਼ਿਤੋ ਅਂਸਤੋ ਪਤਨ੍ਤਂ ਕਾਸਾਵਂ ਅਦਿਸ੍ਵਾਵ ਨਿਕ੍ਖਨ੍ਤੋ, ਨਿਕ੍ਖਮਿਤ੍ਵਾ ਕਾਸਾਵਂ ਅਪਸ੍ਸਨ੍ਤੋ ‘‘ਕੋ ਈਦਿਸੇ ਜਨਸਮ੍ਮਦ੍ਦੇ ਕਾਸਾਵਂ ਲਚ੍ਛਤਿ, ਨ ਦਾਨਿ ਤਂ ਮਯ੍ਹ’’ਨ੍ਤਿ ਧੁਰਨਿਕ੍ਖੇਪਂ ਕਤ੍ਵਾ ਗਤੋ. ਅਥਞ੍ਞੋ ਭਿਕ੍ਖੁ ਪਚ੍ਛਾ ਆਗਚ੍ਛਨ੍ਤੋ ਤਂ ਕਾਸਾਵਂ ਦਿਸ੍ਵਾ ਥੇਯ੍ਯਚਿਤ੍ਤੇਨ ਗਹੇਤ੍ਵਾ ਪੁਨ ਵਿਪ੍ਪਟਿਸਾਰੀ ਹੁਤ੍ਵਾ ‘‘ਅਸ੍ਸਮਣੋ ਦਾਨਿਮ੍ਹਿ, ਵਿਬ੍ਭਮਿਸ੍ਸਾਮੀ’’ਤਿ ਚਿਤ੍ਤੇ ਉਪ੍ਪਨ੍ਨੇ ‘‘ਵਿਨਯਧਰੇ ਪੁਚ੍ਛਿਤ੍ਵਾ ਞਸ੍ਸਾਮੀ’’ਤਿ ਚਿਨ੍ਤੇਸਿ.

ਤੇਨ ਸਮਯੇਨ ਚੂਲ਼ਸੁਮਨਤ੍ਥੇਰੋ ਨਾਮ ਸਬ੍ਬਪਰਿਯਤ੍ਤਿਧਰੋ ਵਿਨਯਾਚਰਿਯਪਾਮੋਕ੍ਖੋ ਮਹਾਵਿਹਾਰੇ ਪਟਿਵਸਤਿ. ਸੋ ਭਿਕ੍ਖੁ ਥੇਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਓਕਾਸਂ ਕਾਰੇਤ੍ਵਾ ਅਤ੍ਤਨੋ ਕੁਕ੍ਕੁਚ੍ਚਂ ਪੁਚ੍ਛਿ. ਥੇਰੋ ਤੇਨ ਭਟ੍ਠੇ ਜਨਕਾਯੇ ਪਚ੍ਛਾ ਆਗਨ੍ਤ੍ਵਾ ਗਹਿਤਭਾਵਂ ਞਤ੍ਵਾ ‘‘ਅਤ੍ਥਿ ਦਾਨਿ ਏਤ੍ਥ ਓਕਾਸੋ’’ਤਿ ਚਿਨ੍ਤੇਤ੍ਵਾ ਆਹ ‘‘ਸਚੇ ਕਾਸਾਵਸਾਮਿਕਂ ਭਿਕ੍ਖੁਂ ਆਨੇਯ੍ਯਾਸਿ, ਸਕ੍ਕਾ ਭਵੇਯ੍ਯ ਤਵ ਪਤਿਟ੍ਠਾ ਕਾਤੁ’’ਨ੍ਤਿ. ਕਥਾਹਂ, ਭਨ੍ਤੇ, ਤਂ ਦਕ੍ਖਿਸ੍ਸਾਮੀਤਿ. ਤਹਿਂ ਤਹਿਂ ਗਨ੍ਤ੍ਵਾ ਓਲੋਕੇਹੀਤਿ. ਸੋ ਪਞ੍ਚਪਿ ਮਹਾਵਿਹਾਰੇ ਓਲੋਕੇਤ੍ਵਾ ਨੇਵ ਅਦ੍ਦਕ੍ਖਿ. ਤਤੋ ਨਂ ਥੇਰੋ ਪੁਚ੍ਛਿ ‘‘ਕਤਰਾਯ ਦਿਸਾਯ ਬਹੂ ਭਿਕ੍ਖੂ ਆਗਚ੍ਛਨ੍ਤੀ’’ਤਿ? ‘‘ਦਕ੍ਖਿਣਦਿਸਾਯ, ਭਨ੍ਤੇ’’ਤਿ. ਤੇਨ ਹਿ ਕਾਸਾਵਂ ਦੀਘਤੋ ਚ ਤਿਰਿਯਞ੍ਚ ਮਿਨਿਤ੍ਵਾ ਠਪੇਹਿ, ਠਪੇਤ੍ਵਾ ਦਕ੍ਖਿਣਦਿਸਾਯ ਵਿਹਾਰਪਟਿਪਾਟਿਯਾ ਵਿਚਿਨਿਤ੍ਵਾ ਤਂ ਭਿਕ੍ਖੁਂ ਆਨੇਹੀਤਿ. ਸੋ ਤਥਾ ਕਤ੍ਵਾ ਤਂ ਭਿਕ੍ਖੁਂ ਦਿਸ੍ਵਾ ਥੇਰਸ੍ਸ ਸਨ੍ਤਿਕਂ ਆਨੇਸਿ. ਥੇਰੋ ਪੁਚ੍ਛਿ ‘‘ਤਵੇਦਂ ਕਾਸਾਵ’’ਨ੍ਤਿ? ‘‘ਆਮ, ਭਨ੍ਤੇ’’ਤਿ. ਕੁਹਿਂ ਤੇ ਪਾਤਿਤਨ੍ਤਿ? ਸੋ ਸਬ੍ਬਂ ਆਚਿਕ੍ਖਿ. ਥੇਰੋ ਤੇਨ ਕਤਂ ਧੁਰਨਿਕ੍ਖੇਪਂ ਸੁਤ੍ਵਾ ਇਤਰਂ ਪੁਚ੍ਛਿ ‘‘ਤਯਾ ਇਦਂ ਕੁਹਿਂ ਦਿਸ੍ਵਾ ਗਹਿਤ’’ਨ੍ਤਿ? ਸੋਪਿ ਸਬ੍ਬਂ ਆਰੋਚੇਸਿ. ਤਤੋ ਤਂ ਥੇਰੋ ਆਹ ‘‘ਸਚੇ ਤੇ ਸੁਦ੍ਧਚਿਤ੍ਤੇਨ ਗਹਿਤਂ ਅਭਵਿਸ੍ਸ, ਅਨਾਪਤ੍ਤਿਯੇਵ ਤੇ ਅਸ੍ਸ, ਥੇਯ੍ਯਚਿਤ੍ਤੇਨ ਪਨ ਗਹਿਤਤ੍ਤਾ ਦੁਕ੍ਕਟਂ ਆਪਨ੍ਨੋਸਿ, ਤਂ ਦੇਸੇਤ੍ਵਾ ਅਨਾਪਤ੍ਤਿਕੋ ਹੋਤਿ, ਇਦਞ੍ਚ ਕਾਸਾਵਂ ਅਤ੍ਤਨੋ ਸਨ੍ਤਕਂ ਕਤ੍ਵਾ ਏਤਸ੍ਸੇਵ ਭਿਕ੍ਖੁਨੋ ਦੇਹੀ’’ਤਿ. ਸੋ ਭਿਕ੍ਖੁ ਅਮਤੇਨੇਵ ਅਭਿਸਿਤ੍ਤੋ ਵਰਮਸ੍ਸਾਸਪ੍ਪਤ੍ਤੋ ਅਹੋਸਿ. ਏਵਂ ਵਤ੍ਥੁ ਓਲੋਕੇਤਬ੍ਬਂ.

ਕਾਲੋਤਿ ਅਵਹਾਰਕਾਲੋ. ਤਦੇਵ ਹਿ ਭਣ੍ਡਂ ਕਦਾਚਿ ਅਪ੍ਪਗ੍ਘਂ ਹੋਤਿ, ਕਦਾਚਿ ਮਹਗ੍ਘਂ. ਤਸ੍ਮਾ ਤਂ ਭਣ੍ਡਂ ਯਸ੍ਮਿਂ ਕਾਲੇ ਅਵਹਟਂ, ਤਸ੍ਮਿਂਯੇਵ ਕਾਲੇ ਯੋ ਤਸ੍ਸ ਅਗ੍ਘੋ ਹੋਤਿ, ਤੇਨ ਅਗ੍ਘੇਨ ਆਪਤ੍ਤਿ ਕਾਰੇਤਬ੍ਬਾ. ਏਵਂ ਕਾਲੋ ਓਲੋਕੇਤਬ੍ਬੋ.

ਦੇਸੋਤਿ ਅਵਹਾਰਦੇਸੋ. ਤਞ੍ਹਿ ਭਣ੍ਡਂ ਯਸ੍ਮਿਂ ਦੇਸੇ ਅਵਹਟਂ, ਤਸ੍ਮਿਂਯੇਵ ਦੇਸੇ ਯੋ ਤਸ੍ਸ ਅਗ੍ਘੋ ਹੋਤਿ, ਤੇਨ ਅਗ੍ਘੇਨ ਆਪਤ੍ਤਿ ਕਾਰੇਤਬ੍ਬਾ. ਭਣ੍ਡੁਟ੍ਠਾਨਦੇਸੇ ਹਿ ਭਣ੍ਡਂ ਅਪ੍ਪਗ੍ਘਂ ਹੋਤਿ, ਅਞ੍ਞਤ੍ਥ ਮਹਗ੍ਘਂ.

ਇਮਸ੍ਸਪਿ ਚ ਅਤ੍ਥਸ੍ਸ ਦੀਪਨਤ੍ਥਮਿਦਂ ਵਤ੍ਥੁ – ਅਨ੍ਤਰਸਮੁਦ੍ਦੇ ਕਿਰ ਏਕੋ ਭਿਕ੍ਖੁ ਸੁਸਣ੍ਠਾਨਂ ਨਾਲ਼ਿਕੇਰਂ ਲਭਿਤ੍ਵਾ ਭਮਂ ਆਰੋਪੇਤ੍ਵਾ ਸਙ੍ਖਥਾਲਕਸਦਿਸਂ ਮਨੋਰਮਂ ਪਾਨੀਯਥਾਲਕਂ ਕਤ੍ਵਾ ਤਤ੍ਥੇਵ ਠਪੇਤ੍ਵਾ ਚੇਤਿਯਗਿਰਿਂ ਅਗਮਾਸਿ. ਅਞ੍ਞੋ ਭਿਕ੍ਖੁ ਅਨ੍ਤਰਸਮੁਦ੍ਦਂ ਗਨ੍ਤ੍ਵਾ ਤਸ੍ਮਿਂ ਵਿਹਾਰੇ ਪਟਿਵਸਨ੍ਤੋ ਤਂ ਥਾਲਕਂ ਦਿਸ੍ਵਾ ਥੇਯ੍ਯਚਿਤ੍ਤੇਨ ਗਹੇਤ੍ਵਾ ਚੇਤਿਯਗਿਰਿਮੇਵ ਆਗਤੋ. ਤਸ੍ਸ ਤਤ੍ਥ ਯਾਗੁਂ ਪਿਵਨ੍ਤਸ੍ਸ ਤਂ ਥਾਲਕਂ ਦਿਸ੍ਵਾ ਥਾਲਕਸਾਮਿਕੋ ਭਿਕ੍ਖੁ ਆਹ ‘‘ਕੁਤੋ ਤੇ ਇਦਂ ਲਦ੍ਧ’’ਨ੍ਤਿ. ਅਨ੍ਤਰਸਮੁਦ੍ਦਤੋ ਮੇ ਆਨੀਤਨ੍ਤਿ. ਸੋ ਤਂ ‘‘ਨੇਤਂ ਤਵ ਸਨ੍ਤਕਂ, ਥੇਯ੍ਯਾਯ ਤੇ ਗਹਿਤ’’ਨ੍ਤਿ ਸਙ੍ਘਮਜ੍ਝਂ ਆਕਡ੍ਢਿ. ਤਤ੍ਥ ਚ ਵਿਨਿਚ੍ਛਯਂ ਅਲਭਿਤ੍ਵਾ ਮਹਾਵਿਹਾਰਂ ਅਗਮਿਂਸੁ, ਤਤ੍ਥ ਚ ਭੇਰਿਂ ਪਹਰਾਪੇਤ੍ਵਾ ਮਹਾਚੇਤਿਯਸਮੀਪੇ ਸਨ੍ਨਿਪਾਤਂ ਕਤ੍ਵਾ ਵਿਨਿਚ੍ਛਯਂ ਆਰਭਿਂਸੁ. ਵਿਨਯਧਰਤ੍ਥੇਰਾ ਅਵਹਾਰਂ ਸਞ੍ਞਾਪੇਸੁਂ.

ਤਸ੍ਮਿਞ੍ਚ ਸਨ੍ਨਿਪਾਤੇ ਆਭਿਧਮ੍ਮਿਕਗੋਦਤ੍ਤਤ੍ਥੇਰੋ ਨਾਮ ਵਿਨਯਕੁਸਲੋ ਹੋਤਿ, ਸੋ ਏਵਮਾਹ ‘‘ਇਮਿਨਾ ਇਦਂ ਥਾਲਕਂ ਕੁਹਿਂ ਅਵਹਟ’’ਨ੍ਤਿ? ‘‘ਅਨ੍ਤਰਸਮੁਦ੍ਦੇ ਅਵਹਟ’’ਨ੍ਤਿ. ਤਤ੍ਥ ਤਂ ਕਿਂ ਅਗ੍ਘਤੀਤਿ. ਨ ਕਿਞ੍ਚਿ ਅਗ੍ਘਤਿ. ਤਤ੍ਰ ਹਿ ਨਾਲ਼ਿਕੇਰਂ ਭਿਨ੍ਦਿਤ੍ਵਾ ਮਿਞ੍ਜਂ ਖਾਦਿਤ੍ਵਾ ਕਪਾਲਂ ਛਡ੍ਡੇਤਿ, ਦਾਰੁਅਤ੍ਥਂ ਪਨ ਫਰਤੀਤਿ. ਇਮਸ੍ਸ ਭਿਕ੍ਖੁਨੋ ਏਤ੍ਥ ਹਤ੍ਥਕਮ੍ਮਂ ਕਿਂ ਅਗ੍ਘਤੀਤਿ? ਮਾਸਕਂ ਵਾ ਊਨਮਾਸਕਂ ਵਾਤਿ. ਅਤ੍ਥਿ ਪਨ ਕਤ੍ਥਚਿ ਸਮ੍ਮਾਸਮ੍ਬੁਦ੍ਧੇਨ ਮਾਸਕੇ ਵਾ ਊਨਮਾਸਕੇ ਵਾ ਪਾਰਾਜਿਕਂ ਪਞ੍ਞਤ੍ਤਨ੍ਤਿ. ਏਵਂ ਵੁਤ੍ਤੇ ‘‘ਸਾਧੁ ਸਾਧੁ, ਸੁਕਥਿਤਂ ਸੁਵਿਨਿਚ੍ਛਿਤ’’ਨ੍ਤਿ ਏਕਸਾਧੁਕਾਰੋ ਅਹੋਸਿ. ਤੇਨ ਚ ਸਮਯੇਨ ਭਾਤਿਯਰਾਜਾਪਿ ਚੇਤਿਯਵਨ੍ਦਨਤ੍ਥਂ ਨਗਰਤੋ ਨਿਕ੍ਖਨ੍ਤੋ ਤਂ ਸਦ੍ਦਂ ਸੁਤ੍ਵਾ ‘‘ਕਿਂ ਇਦ’’ਨ੍ਤਿ ਪੁਚ੍ਛਿਤ੍ਵਾ ਸਬ੍ਬਂ ਪਟਿਪਾਟਿਯਾ ਸੁਤ੍ਵਾ ਨਗਰੇ ਭੇਰਿਂ ਚਰਾਪੇਸਿ ‘‘ਮਯਿ ਸਨ੍ਤੇ ਭਿਕ੍ਖੂਨਮ੍ਪਿ ਭਿਕ੍ਖੁਨੀਨਮ੍ਪਿ ਗਿਹੀਨਮ੍ਪਿ ਅਧਿਕਰਣਂ ਆਭਿਧਮ੍ਮਿਕਗੋਦਤ੍ਤਤ੍ਥੇਰੇਨ ਵਿਨਿਚ੍ਛਿਤਂ ਸੁਵਿਨਿਚ੍ਛਿਤਂ, ਤਸ੍ਸ ਵਿਨਿਚ੍ਛਯੇ ਅਤਿਟ੍ਠਮਾਨਂ ਰਾਜਾਣਾਯ ਠਪੇਮੀ’’ਤਿ. ਏਵਂ ਦੇਸੋ ਓਲੋਕੇਤਬ੍ਬੋ.

ਅਗ੍ਘੋਤਿ ਭਣ੍ਡਗ੍ਘੋ. ਨਵਭਣ੍ਡਸ੍ਸ ਹਿ ਯੋ ਅਗ੍ਘੋ ਹੋਤਿ, ਸੋ ਪਚ੍ਛਾ ਪਰਿਹਾਯਤਿ. ਯਥਾ ਨਵਧੋਤੋ ਪਤ੍ਤੋ ਅਟ੍ਠ ਵਾ ਦਸ ਵਾ ਅਗ੍ਘਤਿ, ਸੋ ਪਚ੍ਛਾ ਭਿਨ੍ਨੋ ਵਾ ਛਿਦ੍ਦੋ ਵਾ ਆਣਿਗਣ੍ਠਿਕਾਹਤੋ ਵਾ ਅਪ੍ਪਗ੍ਘੋ ਹੋਤਿ, ਤਸ੍ਮਾ ਨ ਸਬ੍ਬਦਾ ਭਣ੍ਡਂ ਪਕਤਿਅਗ੍ਘੇਨੇਵ ਕਾਤਬ੍ਬਨ੍ਤਿ. ਏਵਂ ਅਗ੍ਘੋ ਓਲੋਕੇਤਬ੍ਬੋ.

ਪਰਿਭੋਗੋਤਿ ਭਣ੍ਡਪਰਿਭੋਗੋ. ਪਰਿਭੋਗੇਨਪਿ ਹਿ ਵਾਸਿਆਦਿਭਣ੍ਡਸ੍ਸ ਅਗ੍ਘੋ ਪਰਿਹਾਯਤਿ. ਤਸ੍ਮਾ ਏਵਂ ਉਪਪਰਿਕ੍ਖਿਤਬ੍ਬਂ – ਸਚੇ ਕੋਚਿ ਕਸ੍ਸਚਿ ਪਾਦਗ੍ਘਨਕਂ ਵਾਸਿਂ ਹਰਤਿ, ਤਤ੍ਰ ਵਾਸਿਸਾਮਿਕੋ ਪੁਚ੍ਛਿਤਬ੍ਬੋ ‘‘ਤਯਾ ਅਯਂ ਵਾਸਿ ਕਿਤ੍ਤਕੇਨ ਕੀਤਾ’’ਤਿ? ‘‘ਪਾਦੇਨ, ਭਨ੍ਤੇ’’ਤਿ. ਕਿਂ ਪਨ ਤੇ ਕਿਣਿਤ੍ਵਾਵ ਠਪਿਤਾ, ਉਦਾਹੁ ਨਂ ਵਲ਼ਞ੍ਜੇਸੀਤਿ? ਸਚੇ ਵਦਤਿ ‘‘ਏਕਦਿਵਸਂ ਮੇ ਦਨ੍ਤਕਟ੍ਠਂ ਵਾ ਰਜਨਛਲ੍ਲਿ ਵਾ ਪਤ੍ਤਪਚਨਕਦਾਰੁ ਵਾ ਛਿਨ੍ਨਂ, ਘਂਸਿਤ੍ਵਾ ਵਾ ਨਿਸਿਤਾ’’ਤਿ, ਅਥਸ੍ਸ ਪੋਰਾਣਕੋ ਅਗ੍ਘੋ ਭਟ੍ਠੋਤਿ ਵੇਦਿਤਬ੍ਬੋ. ਯਥਾ ਚ ਵਾਸਿਯਾ, ਏਵਂ ਅਞ੍ਜਨਿਯਾ ਵਾ ਅਞ੍ਜਨਿਸਲਾਕਾਯ ਵਾ ਕੁਞ੍ਚਿਕਾਯ ਵਾ ਪਲਾਲੇਨ ਵਾ ਥੁਸੇਹਿ ਵਾ ਇਟ੍ਠਕਚੁਣ੍ਣੇਨ ਵਾ ਏਕਵਾਰਂ ਘਂਸਿਤ੍ਵਾ ਧੋਵਿਤਮਤ੍ਤੇਨਪਿ ਅਗ੍ਘੋ ਭਸ੍ਸਤਿ. ਤਿਪੁਮਣ੍ਡਲਸ੍ਸ ਮਕਰਦਨ੍ਤਚ੍ਛੇਦਨੇਨਪਿ ਪਰਿਮਜ੍ਜਨਮਤ੍ਤੇਨਪਿ, ਉਦਕਸਾਟਕਸ੍ਸ ਸਕਿਂ ਨਿਵਾਸਨਪਾਰੁਪਨੇਨਪਿ ਪਰਿਭੋਗਸੀਸੇਨ ਅਂਸੇ ਵਾ ਸੀਸੇ ਵਾ ਠਪਨਮਤ੍ਤੇਨਪਿ, ਤਣ੍ਡੁਲਾਦੀਨਂ ਪਪ੍ਫੋਟਨੇਨਪਿ ਤਤੋ ਏਕਂ ਵਾ ਦ੍ਵੇ ਵਾ ਅਪਨਯਨੇਨਪਿ ਅਨ੍ਤਮਸੋ ਏਕਂ ਪਾਸਾਣਸਕ੍ਖਰਂ ਉਦ੍ਧਰਿਤ੍ਵਾ ਛਡ੍ਡਿਤਮਤ੍ਤੇਨਪਿ, ਸਪ੍ਪਿਤੇਲਾਦੀਨਂ ਭਾਜਨਨ੍ਤਰਪਅਵਤ੍ਤਨੇਨਪਿ ਅਨ੍ਤਮਸੋ ਤਤੋ ਮਕ੍ਖਿਕਂ ਵਾ ਕਿਪਿਲ੍ਲਿਕਂ ਵਾ ਉਦ੍ਧਰਿਤ੍ਵਾ ਛਡ੍ਡਿਤਮਤ੍ਤੇਨਪਿ, ਗੁਲ਼ਪਿਣ੍ਡਕਸ੍ਸ ਮਧੁਰਭਾਵਜਾਨਨਤ੍ਥਂ ਨਖੇਨ ਵਿਜ੍ਝਿਤ੍ਵਾ ਅਣੁਮਤ੍ਤਂ ਗਹਿਤਮਤ੍ਤੇਨਪਿ ਅਗ੍ਘੋ ਭਸ੍ਸਤਿ. ਤਸ੍ਮਾ ਯਂ ਕਿਞ੍ਚਿ ਪਾਦਗ੍ਘਨਕਂ ਵੁਤ੍ਤਨਯੇਨੇਵ ਸਾਮਿਕੇਹਿ ਪਰਿਭੋਗੇਨ ਊਨਂ ਕਤਂ ਹੋਤਿ, ਨ ਤਂ ਅਵਹਟੋ ਭਿਕ੍ਖੁ ਪਾਰਾਜਿਕੇਨ ਕਾਤਬ੍ਬੋਤਿ. ਏਵਂ ਅਗ੍ਘੋ ਓਲੋਕੇਤਬ੍ਬੋ.

ਏਵਂ ਇਮਾਨਿ ਤੁਲਯਿਤ੍ਵਾ ਪਞ੍ਚ ਠਾਨਾਨਿ ਧਾਰੇਯ੍ਯ ਅਤ੍ਥਂ ਵਿਚਕ੍ਖਣੋ, ਆਪਤ੍ਤਿਂ ਵਾ ਅਨਾਪਤ੍ਤਿਂ ਵਾ ਗਰੁਕਂ ਵਾ ਲਹੁਕਂ ਵਾ ਆਪਤ੍ਤਿਂ ਯਥਾਠਾਨੇ ਠਪੇਯ੍ਯਾਤਿ. ਤੇਨਾਹੁ ਅਟ੍ਠਕਥਾਚਰਿਯਾ –

‘‘ਸਿਕ੍ਖਾਪਦਂ ਸਮਂ ਤੇਨ, ਅਞ੍ਞਂ ਕਿਞ੍ਚਿ ਨ ਵਿਜ੍ਜਤਿ;

ਅਨੇਕਨਯਵੋਕਿਣ੍ਣਂ, ਗਮ੍ਭੀਰਤ੍ਥਵਿਨਿਚ੍ਛਯਂ.

‘‘ਤਸ੍ਮਾ ਵਤ੍ਥੁਮ੍ਹਿ ਓਤਿਣ੍ਣੇ, ਭਿਕ੍ਖੁਨਾ ਵਿਨਯਞ੍ਞੁਨਾ;

ਵਿਨਯਾਨੁਗ੍ਗਹੇਨੇਤ੍ਥ, ਕਰੋਨ੍ਤੇਨ ਵਿਨਿਚ੍ਛਯਂ.

‘‘ਪਾਲ਼ਿਂ ਅਟ੍ਠਕਥਞ੍ਚੇਵ, ਸਾਧਿਪ੍ਪਾਯਮਸੇਸਤੋ;

ਓਗਯ੍ਹ ਅਪ੍ਪਮਤ੍ਤੇਨ, ਕਰਣੀਯੋ ਵਿਨਿਚ੍ਛਯੋ.

‘‘ਆਪਤ੍ਤਿਦਸ੍ਸਨੁਸ੍ਸਾਹੋ, ਨ ਕਤ੍ਤਬ੍ਬੋ ਕੁਦਾਚਨਂ;

ਪਸ੍ਸਿਸ੍ਸਾਮਿ ਅਨਾਪਤ੍ਤਿ-ਮਿਤਿ ਕਯਿਰਾਥ ਮਾਨਸਂ.

‘‘ਪਸ੍ਸਿਤ੍ਵਾਪਿ ਚ ਆਪਤ੍ਤਿਂ, ਅਵਤ੍ਵਾਵ ਪੁਨਪ੍ਪੁਨਂ;

ਵੀਮਂਸਿਤ੍ਵਾਥ ਵਿਞ੍ਞੂਹਿ, ਸਂਸਨ੍ਦਿਤ੍ਵਾ ਚ ਤਂ ਵਦੇ.

‘‘ਕਪ੍ਪਿਯੇਪਿ ਚ ਵਤ੍ਥੁਸ੍ਮਿਂ, ਚਿਤ੍ਤਸ੍ਸ ਲਹੁਵਤ੍ਤਿਨੋ;

ਵਸੇਨ ਸਾਮਞ੍ਞਗੁਣਾ, ਚਵਨ੍ਤੀਧ ਪੁਥੁਜ੍ਜਨਾ.

‘‘ਤਸ੍ਮਾ ਪਰਪਰਿਕ੍ਖਾਰਂ, ਆਸੀਵਿਸਮਿਵੋਰਗਂ;

ਅਗ੍ਗਿਂ ਵਿਯ ਚ ਸਮ੍ਪਸ੍ਸਂ, ਨਾਮਸੇਯ੍ਯ ਵਿਚਕ੍ਖਣੋ’’ਤਿ. (ਪਾਰਾ. ਅਟ੍ਠ. ੧.੧੬੦-੧ ਤਤ੍ਰਾਯਂ ਅਨੁਸਾਸਨੀ);

੨੩੩. ਉਤ੍ਤਰਿਮਨੁਸ੍ਸਧਮ੍ਮਾਰੋਚਨਂ ਵਿਨਿਚ੍ਛਿਨਨ੍ਤੇਨ (ਪਾਰਾ. ਅਟ੍ਠ. ੨.੧੯੭) ਪਨ ‘‘ਕਿਂ ਤੇ ਅਧਿਗਤਂ. ਕਿਨ੍ਤਿ ਤੇ ਅਧਿਗਤਂ, ਕਦਾ ਤੇ ਅਧਿਗਤਂ, ਕਤ੍ਥ ਤੇ ਅਧਿਗਤਂ, ਕਤਮੇ ਤੇ ਕਿਲੇਸਾ ਪਹੀਨਾ, ਕਤਮੇਸਂ ਤ੍ਵਂ ਧਮ੍ਮਾਨਂ ਲਾਭੀ’’ਤਿ ਇਮਾਨਿ ਛ ਠਾਨਾਨਿ ਵਿਸੋਧੇਤਬ੍ਬਾਨਿ. ਸਚੇ ਹਿ ਕੋਚਿ ਭਿਕ੍ਖੁ ਉਤ੍ਤਰਿਮਨੁਸ੍ਸਧਮ੍ਮਾਧਿਗਮਂ ਬ੍ਯਾਕਰੇਯ੍ਯ, ਨ ਸੋ ਏਤ੍ਤਾਵਤਾ ਸਕ੍ਕਾਰੋ ਕਾਤਬ੍ਬੋ, ਇਮੇਸਂ ਪਨ ਛਨ੍ਨਂ ਠਾਨਾਨਂ ਸੋਧਨਤ੍ਥਂ ਏਵਂ ਵਤ੍ਤਬ੍ਬੋ ‘‘ਕਿਂ ਤੇ ਅਧਿਗਤਂ, ਕਿਂ ਝਾਨਂ ਉਦਾਹੁ ਵਿਮੋਕ੍ਖਾਦੀਸੁ ਅਞ੍ਞਤਰ’’ਨ੍ਤਿ. ਯੋ ਹਿ ਯੇਨ ਅਧਿਗਤੋ ਧਮ੍ਮੋ, ਸੋ ਤਸ੍ਸ ਪਾਕਟੋ ਹੋਤਿ. ਸਚੇ ‘‘ਇਦਂ ਨਾਮ ਮੇ ਅਧਿਗਤ’’ਨ੍ਤਿ ਵਦਤਿ, ਤਤੋ ‘‘ਕਿਨ੍ਤਿ ਤੇ ਅਧਿਗਤ’’ਨ੍ਤਿ ਪੁਚ੍ਛਿਤਬ੍ਬੋ, ‘‘ਅਨਿਚ੍ਚਲਕ੍ਖਣਾਦੀਸੁ ਕਿਂ ਧੁਰਂ ਕਤ੍ਵਾ ਅਟ੍ਠਤਿਂਸਾਯ ਵਾ ਆਰਮ੍ਮਣੇਸੁ ਰੂਪਾਰੂਪਅਜ੍ਝਤ੍ਤਬਹਿਦ੍ਧਾਦਿਭੇਦੇਸੁ ਵਾ ਧਮ੍ਮੇਸੁ ਕੇਨ ਮੁਖੇਨ ਅਭਿਨਿਵਿਸਿਤ੍ਵਾ’’ਤਿ. ਯੋ ਹਿ ਯਸ੍ਸਾਭਿਨਿਵੇਸੋ, ਸੋ ਤਸ੍ਸ ਪਾਕਟੋ ਹੋਤਿ. ਸਚੇ ‘‘ਅਯਂ ਨਾਮ ਮੇ ਅਭਿਨਿਵੇਸੋ, ਏਵਂ ਮਯਾ ਅਧਿਗਤ’’ਨ੍ਤਿ ਵਦਤਿ, ਤਤੋ ‘‘ਕਦਾ ਤੇ ਅਧਿਗਤ’’ਨ੍ਤਿ ਪੁਚ੍ਛਿਤਬ੍ਬੋ, ‘‘ਕਿਂ ਪੁਬ੍ਬਣ੍ਹੇ, ਉਦਾਹੁ ਮਜ੍ਝਨ੍ਹਿਕਾਦੀਸੁ ਅਞ੍ਞਤਰਸ੍ਮਿਂ ਕਾਲੇ’’ਤਿ. ਸਬ੍ਬੇਸਞ੍ਹਿ ਅਤ੍ਤਨਾ ਅਧਿਗਤਕਾਲੋ ਪਾਕਟੋ ਹੋਤਿ. ਸਚੇ ‘‘ਅਮੁਕਸ੍ਮਿਂ ਨਾਮ ਕਾਲੇ ਅਧਿਗਕ’’ਨ੍ਤਿ ਵਦਤਿ, ਤਤੋ ‘‘ਕਤ੍ਥ ਤੇ ਅਧਿਗਤ’’ਨ੍ਤਿ ਪੁਚ੍ਛਿਤਬ੍ਬੋ, ‘‘ਕਿਂ ਦਿਵਾਟ੍ਠਾਨੇ, ਉਦਾਹੁ ਰਤ੍ਤਿਟ੍ਠਾਨਾਦੀਸੁ ਅਞ੍ਞਤਰਸ੍ਮਿਂ ਓਕਾਸੇ’’ਤਿ. ਸਬ੍ਬੇਸਞ੍ਹਿ ਅਤ੍ਤਨਾ ਅਧਿਗਤੋਕਾਸੋ ਪਾਕਟੋ ਹੋਤਿ. ਸਚੇ ‘‘ਅਮੁਕਸ੍ਮਿਂ ਨਾਮ ਮੇ ਓਕਾਸੇ ਅਧਿਗਤ’’ਨ੍ਤਿ ਵਦਤਿ, ਤਤੋ ‘‘ਕਤਮੇ ਤੇ ਕਿਲੇਸਾ ਪਹੀਨਾ’’ਤਿ ਪੁਚ੍ਛਿਤਬ੍ਬੋ, ‘‘ਕਿਂ ਪਠਮਮਗ੍ਗਵਜ੍ਝਾ, ਉਦਾਹੁ ਦੁਤਿਯਾਦਿਮਗ੍ਗਵਜ੍ਝਾ’’ਤਿ. ਸਬ੍ਬੇਸਞ੍ਹਿ ਅਤ੍ਤਨਾ ਅਧਿਗਤਮਗ੍ਗੇਨ ਪਹੀਨਾ ਕਿਲੇਸਾ ਪਾਕਟਾ ਹੋਨ੍ਤਿ.

ਸਚੇ ‘‘ਇਮੇ ਨਾਮ ਮੇ ਕਿਲੇਸਾ ਪਹੀਨਾ’’ਤਿ ਵਦਤਿ, ਤਤੋ ‘‘ਕਤਮੇਸਂ ਤ੍ਵਂ ਧਮ੍ਮਾਨਂ ਲਾਭੀ’’ਤਿ ਪੁਚ੍ਛਿਤਬ੍ਬੋ, ‘‘ਕਿਂ ਸੋਤਾਪਤ੍ਤਿਮਗ੍ਗਸ੍ਸ, ਉਦਾਹੁ ਸਕਦਾਗਾਮਿਮਗ੍ਗਾਦੀਸੁ ਅਞ੍ਞਤਰਸ੍ਸਾ’’ਤਿ. ਸਬ੍ਬੇਸਞ੍ਹਿ ਅਤ੍ਤਨਾ ਅਧਿਗਤਧਮ੍ਮੋ ਪਾਕਟੋ ਹੋਤਿ. ਸਚੇ ‘‘ਇਮੇਸਂ ਨਾਮਾਹਂ ਧਮ੍ਮਾਨਂ ਲਾਭੀ’’ਤਿ ਵਦਤਿ, ਏਤ੍ਤਾਵਤਾਪਿਸ੍ਸ ਵਚਨਂ ਨ ਸਦ੍ਧਾਤਬ੍ਬਂ. ਬਹੁਸ੍ਸੁਤਾ ਹਿ ਉਗ੍ਗਹਪਰਿਪੁਚ੍ਛਾਕੁਸਲਾ ਭਿਕ੍ਖੂ ਇਮਾਨਿ ਛ ਠਾਨਾਨਿ ਸੋਧੇਤੁਂ ਸਕ੍ਕੋਨ੍ਤਿ, ਇਮਸ੍ਸ ਪਨ ਭਿਕ੍ਖੁਨੋ ਆਗਮਨਪਟਿਪਦਾ ਸੋਧੇਤਬ੍ਬਾ. ਯਦਿ ਆਗਮਨਪਟਿਪਦਾ ਨ ਸੁਜ੍ਝਤਿ, ‘‘ਇਮਾਯ ਪਟਿਪਦਾਯ ਲੋਕੁਤ੍ਤਰਧਮ੍ਮੋ ਨਾਮ ਨ ਲਬ੍ਭਤੀ’’ਤਿ ਅਪਨੇਤਬ੍ਬੋ. ਯਦਿ ਪਨਸ੍ਸ ਆਗਮਨਪਟਿਪਦਾ ਸੁਜ੍ਝਤਿ, ਦੀਘਰਤ੍ਤਂ ਤੀਸੁ ਸਿਕ੍ਖਾਸੁ ਅਪ੍ਪਮਤ੍ਤੋ ਜਾਗਰਿਯਮਨੁਯੁਤ੍ਤੋ ਚਤੂਸੁ ਪਚ੍ਚਯੇਸੁ ਅਲਗ੍ਗੋ ਆਕਾਸੇ ਪਾਣਿਸਮੇਨ ਚੇਤਸਾ ਵਿਹਰਤੀਤਿ ਪਞ੍ਞਾਯਤਿ, ਤਸ੍ਸ ਭਿਕ੍ਖੁਨੋ ਬ੍ਯਾਕਰਣਂ ਪਟਿਪਦਾਯ ਸਦ੍ਧਿਂ ਸਂਸਨ੍ਦਤਿ. ‘‘ਸੇਯ੍ਯਥਾਪਿ ਨਾਮ ਗਙ੍ਗੋਦਕਂ ਯਮੁਨੋਦਕੇਨ ਸਂਸਨ੍ਦਤਿ ਸਮੇਤਿ, ਏਵਮੇਵ ਸੁਪਞ੍ਞਤ੍ਤਾ ਤੇਨ ਭਗਵਤਾ ਸਾਵਕਾਨਂ ਨਿਬ੍ਬਾਨਗਾਮਿਨੀ ਪਟਿਪਦਾ, ਸਂਸਨ੍ਦਤਿ ਨਿਬ੍ਬਾਨਞ੍ਚ ਪਟਿਪਦਾ ਚਾ’’ਤਿ (ਦੀ. ਨਿ. ੨.੨੯੬) ਵੁਤ੍ਤਸਦਿਸਂ ਹੋਤਿ. ਅਪਿਚ ਖੋ ਨ ਏਤ੍ਤਕੇਨਪਿ ਸਕ੍ਕਾਰੋ ਕਾਤਬ੍ਬੋ. ਕਸ੍ਮਾ? ਏਕਚ੍ਚਸ੍ਸ ਹਿ ਪੁਥੁਜ੍ਜਨਸ੍ਸਪਿ ਸਤੋ ਖੀਣਾਸਵਸ੍ਸ ਪਟਿਪਤ੍ਤਿਸਦਿਸਾ ਪਟਿਪਤ੍ਤਿ ਹੋਤਿ, ਤਸ੍ਮਾ ਸੋ ਭਿਕ੍ਖੁ ਤੇਹਿ ਤੇਹਿ ਉਪਾਯੇਹਿ ਉਤ੍ਤਾਸੇਤਬ੍ਬੋ. ਖੀਣਾਸਵਸ੍ਸ ਨਾਮ ਅਸਨਿਯਾਪਿ ਮਤ੍ਥਕੇ ਪਤਮਾਨਾਯ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ ਨ ਹੋਤਿ, ਪੁਥੁਜ੍ਜਨਸ੍ਸ ਅਪ੍ਪਮਤ੍ਤਕੇਨਪਿ ਹੋਤਿ.

ਤਤ੍ਰਿਮਾਨਿ ਵਤ੍ਥੂਨਿ (ਮ. ਨਿ. ਅਟ੍ਠ. ੩.੧੦੨) – ਦੀਘਭਾਣਕਅਭਯਤ੍ਥੇਰੋ ਕਿਰ ਏਕਂ ਪਿਣ੍ਡਪਾਤਿਕਂ ਪਰਿਗ੍ਗਹੇਤੁਂ ਅਸਕ੍ਕੋਨ੍ਤੋ ਦਹਰਸ੍ਸ ਸਞ੍ਞਂ ਅਦਾਸਿ. ਸੋ ਤਂ ਨਹਾਯਮਾਨਂ ਕਲ੍ਯਾਣੀਨਦੀਮੁਖਦ੍ਵਾਰੇ ਨਿਮੁਜ੍ਜਿਤ੍ਵਾ ਪਾਦੇ ਅਗ੍ਗਹੇਸਿ. ਪਿਣ੍ਡਪਾਤਿਕੋ ‘‘ਕੁਮ੍ਭੀਲੋ’’ਤਿ ਸਞ੍ਞਾਯ ਮਹਾਸਦ੍ਦਮਕਾਸਿ, ਤਦਾ ਨਂ ‘‘ਪੁਥੁਜ੍ਜਨੋ’’ਤਿ ਜਾਨਿਂਸੁ.

ਚਨ੍ਦਮੁਖਤਿਸ੍ਸਰਾਜਕਾਲੇ ਪਨ ਮਹਾਵਿਹਾਰੇ ਸਙ੍ਘਤ੍ਥੇਰੋ ਖੀਣਾਸਵੋ ਦੁਬ੍ਬਲਚਕ੍ਖੁਕੋ ਵਿਹਾਰੇਯੇਵ ਅਚ੍ਛਤਿ. ਰਾਜਾ ‘‘ਥੇਰਂ ਪਰਿਗ੍ਗਣ੍ਹਿਸ੍ਸਾਮੀ’’ਤਿ ਭਿਕ੍ਖੂਸੁ ਭਿਕ੍ਖਾਚਾਰਂ ਗਤੇਸੁ ਅਪ੍ਪਸਦ੍ਦੋ ਉਪਸਙ੍ਕਮਿਤ੍ਵਾ ਸਪ੍ਪੋ ਵਿਯ ਪਾਦੇ ਅਗ੍ਗਹੇਸਿ. ਥੇਰੋ ਸਿਲਾਥਮ੍ਭੋ ਵਿਯ ਨਿਚ੍ਚਲੋ ਹੁਤ੍ਵਾ ‘‘ਕੋ ਏਤ੍ਥਾ’’ਤਿ ਆਹ. ‘‘ਅਹਂ, ਭਨ੍ਤੇ, ਤਿਸ੍ਸੋ’’ਤਿ? ‘‘ਸੁਗਨ੍ਧਂ ਵਾਯਸਿ ਨੋ ਤਿਸ੍ਸਾ’’ਤਿ. ਏਵਂ ਖੀਣਾਸਵਸ੍ਸ ਭਯਂ ਨਾਮ ਨਤ੍ਥਿ.

ਏਕਚ੍ਚੋ ਪਨ ਪੁਥੁਜ੍ਜਨੋਪਿ ਅਤਿਸੂਰੋ ਹੋਤਿ ਨਿਬ੍ਭਯੋ. ਸੋ ਰਜਨੀਯੇਨ ਆਰਮ੍ਮਣੇਨ ਪਰਿਗ੍ਗਣ੍ਹਿਤਬ੍ਬੋ. ਵਸਭਰਾਜਾਪਿ ਏਕਂ ਥੇਰਂ ਪਰਿਗ੍ਗਣ੍ਹਮਾਨੋ ਘਰੇ ਨਿਸੀਦਾਪੇਤ੍ਵਾ ਤਸ੍ਸ ਸਨ੍ਤਿਕੇ ਬਦਰਸਾਲ਼ਵਂ ਮਦ੍ਦਮਾਨੋ ਨਿਸੀਦਿ. ਮਹਾਥੇਰਸ੍ਸ ਖੇਲ਼ੋ ਚਲਿਤੋ, ਥੇਰਸ੍ਸ ਪੁਥੁਜ੍ਜਨਭਾਵੋ ਆਵਿਭੂਤੋ. ਖੀਣਾਸਵਸ੍ਸ ਹਿ ਰਸਤਣ੍ਹਾ ਨਾਮ ਸੁਪ੍ਪਹੀਨਾ, ਦਿਬ੍ਬੇਸੁਪਿ ਰਸੇਸੁ ਨਿਕਨ੍ਤਿ ਨਾਮ ਨ ਹੋਤਿ, ਤਸ੍ਮਾ ਇਮੇਹਿ ਉਪਾਯੇਹਿ ਪਰਿਗ੍ਗਹੇਤ੍ਵਾ ਸਚਸ੍ਸ ਭਯਂ ਵਾ ਛਮ੍ਭਿਤਤ੍ਤਂ ਵਾ ਰਸਤਣ੍ਹਾ ਵਾ ਉਪ੍ਪਜ੍ਜਤਿ, ‘‘ਨ ਚ ਤ੍ਵਂ ਅਰਹਾ’’ਤਿ ਅਪਨੇਤਬ੍ਬੋ. ਸਚੇ ਪਨ ਅਭੀਰੁ ਅਚ੍ਛਮ੍ਭੀ ਅਨੁਤ੍ਰਾਸੀ ਹੁਤ੍ਵਾ ਸੀਹੋ ਵਿਯ ਨਿਸੀਦਤਿ, ਦਿਬ੍ਬਾਰਮ੍ਮਣੇਪਿ ਨਿਕਨ੍ਤਿਂ ਨ ਜਨੇਤਿ, ਅਯਂ ਭਿਕ੍ਖੁ ਸਮ੍ਪਨ੍ਨਵੇਯ੍ਯਾਕਰਣੋ ਸਮਨ੍ਤਾ ਰਾਜਰਾਜਮਹਾਮਤ੍ਤਾਦੀਹਿ ਪੇਸਿਤਂ ਸਕ੍ਕਾਰਂ ਅਰਹਤੀਤਿ ਵੇਦਿਤਬ੍ਬੋ. ਏਵਂ ਤਾਵ ਉਤ੍ਤਰਿਮਨੁਸ੍ਸਧਮ੍ਮਾਰੋਚਨਂ ਵਿਨਿਚ੍ਛਿਨਿਤਬ੍ਬਂ.

੨੩੪. ਸਕਲੇ ਪਨ ਵਿਨਯਵਿਨਿਚ੍ਛਯੇ (ਪਾਰਾ. ਅਟ੍ਠ. ੧.੪੫) ਕੋਸਲ੍ਲਂ ਪਤ੍ਥਯਨ੍ਤੇਨ ਚਤੁਬ੍ਬਿਧੋ ਵਿਨਯੋ ਜਾਨਿਤਬ੍ਬੋ.

ਚਤੁਬ੍ਬਿਧਞ੍ਹਿ ਵਿਨਯਂ, ਮਹਾਥੇਰਾ ਮਹਿਦ੍ਧਿਕਾ;

ਨੀਹਰਿਤ੍ਵਾ ਪਕਾਸੇਸੁਂ, ਧਮ੍ਮਸਙ੍ਗਾਹਕਾ ਪੁਰਾ.

ਕਤਮਂ ਚਤੁਬ੍ਬਿਧਂ? ਸੁਤ੍ਤਂ ਸੁਤ੍ਤਾਨੁਲੋਮਂ ਆਚਰਿਯਵਾਦਂ ਅਤ੍ਤਨੋਮਤਿਨ੍ਤਿ. ਯਂ ਸਨ੍ਧਾਯ ਵੁਤ੍ਤਂ ‘‘ਆਹਚ੍ਚਪਦੇਨ ਖੋ, ਮਹਾਰਾਜ, ਰਸੇਨ ਆਚਰਿਯਵਂਸੇਨ ਅਧਿਪ੍ਪਾਯਾ’’ਤਿ (ਮਿ. ਪ. ੪.੨.੩). ਏਤ੍ਥ ਹਿ ਆਹਚ੍ਚਪਦਨ੍ਤਿ ਸੁਤ੍ਤਂ ਅਧਿਪ੍ਪੇਤਂ. ਰਸੋਤਿ ਸੁਤ੍ਤਾਨੁਲੋਮਂ. ਆਚਰਿਯਵਂਸੋਤਿ ਆਚਰਿਯਵਾਦੋ. ਅਧਿਪ੍ਪਾਯੋਤਿ ਅਤ੍ਤਨੋਮਤਿ.

ਤਤ੍ਥ ਸੁਤ੍ਤਂ ਨਾਮ ਸਕਲਵਿਨਯਪਿਟਕੇ ਪਾਲ਼ਿ.

ਸੁਤ੍ਤਾਨੁਲੋਮਂ ਨਾਮ ਚਤ੍ਤਾਰੋ ਮਹਾਪਦੇਸਾ. ਯੇ ਭਗਵਤਾ ਏਵਂ ਵੁਤ੍ਤਾ –

‘‘ਯਂ, ਭਿਕ੍ਖਵੇ, ਮਯਾ ‘ਇਦਂ ਨ ਕਪ੍ਪਤੀ’ਤਿ ਅਪ੍ਪਟਿਕ੍ਖਿਤ੍ਤਂ, ਤਞ੍ਚੇ ਅਕਪ੍ਪਿਯਂ ਅਨੁਲੋਮੇਤਿ, ਕਪ੍ਪਿਯਂ ਪਟਿਬਾਹਤਿ, ਤਂ ਵੋ ਨ ਕਪ੍ਪਤਿ. ਯਂ, ਭਿਕ੍ਖਵੇ, ਮਯਾ ‘ਇਦਂ ਨ ਕਪ੍ਪਤੀ’ਤਿ ਅਪ੍ਪਟਿਕ੍ਖਿਤ੍ਤਂ, ਤਞ੍ਚੇ ਕਪ੍ਪਿਯਂ ਅਨੁਲੋਮੇਤਿ, ਅਕਪ੍ਪਿਯਂ ਪਟਿਬਾਹਤਿ, ਤਂ ਵੋ ਕਪ੍ਪਤਿ. ਯਂ, ਭਿਕ੍ਖਵੇ, ਮਯਾ ‘ਇਦਂ ਕਪ੍ਪਤੀ’ਤਿ ਅਨਨੁਞ੍ਞਾਤਂ, ਤਂ ਚੇ ਅਕਪ੍ਪਿਯਂ ਅਨੁਲੋਮੇਤਿ, ਕਪ੍ਪਿਯਂ ਪਟਿਬਾਹਤਿ, ਤਂ ਵੋ ਨ ਕਪ੍ਪਤਿ. ਯਂ, ਭਿਕ੍ਖਵੇ, ਮਯਾ ‘ਇਦਂ ਕਪ੍ਪਤੀ’ਤਿ ਅਨਨੁਞ੍ਞਾਤਂ, ਤਞ੍ਚੇ ਕਪ੍ਪਿਯਂ ਅਨੁਲੋਮੇਤਿ, ਅਕਪ੍ਪਿਯਂ ਪਟਿਬਾਹਤਿ, ਤਂ ਵੋ ਕਪ੍ਪਤੀ’’ਤਿ (ਮਹਾਵ. ੩੦੫).

ਆਚਰਿਯਵਾਦੋ ਨਾਮ ਧਮ੍ਮਸਙ੍ਗਾਹਕੇਹਿ ਪਞ੍ਚਹਿ ਅਰਹਨ੍ਤਸਤੇਹਿ ਠਪਿਤਾ ਪਾਲ਼ਿਵਿਨਿਮੁਤ੍ਤਾ ਓਕ੍ਕਨ੍ਤਵਿਨਿਚ੍ਛਯਪ੍ਪਵਤ੍ਤਾ ਅਟ੍ਠਕਥਾਤਨ੍ਤਿ.

ਅਤ੍ਤਨੋਮਤਿ ਨਾਮ ਸੁਤ੍ਤਸੁਤ੍ਤਾਨੁਲੋਮਆਚਰਿਯਵਾਦੇ ਮੁਞ੍ਚਿਤ੍ਵਾ ਅਨੁਮਾਨੇਨ ਅਤ੍ਤਨੋ ਅਨੁਬੁਦ੍ਧਿਯਾ ਨਯਗ੍ਗਾਹੇਨ ਉਪਟ੍ਠਿਤਾਕਾਰਕਥਨਂ.

ਅਪਿਚ ਸੁਤ੍ਤਨ੍ਤਾਭਿਧਮ੍ਮਵਿਨਯਟ੍ਠਕਥਾਸੁ ਆਗਤੋ ਸਬ੍ਬੋਪਿ ਥੇਰਵਾਦੋ ਅਤ੍ਤਨੋਮਤਿ ਨਾਮ. ਤਂ ਪਨ ਅਤ੍ਤਨੋਮਤਿਂ ਗਹੇਤ੍ਵਾ ਕਥੇਨ੍ਤੇਨ ਨ ਦਲ਼੍ਹਗ੍ਗਾਹਂ ਗਹੇਤ੍ਵਾ ਵੋਹਰਿਤਬ੍ਬਂ, ਕਾਰਣਂ ਸਲ੍ਲਕ੍ਖੇਤ੍ਵਾ ਅਤ੍ਥੇਨ ਪਾਲ਼ਿਂ, ਪਾਲ਼ਿਯਾ ਚ ਅਤ੍ਥਂ ਸਂਸਨ੍ਦਿਤ੍ਵਾ ਕਥੇਤਬ੍ਬਂ, ਅਤ੍ਤਨੋਮਤਿ ਆਚਰਿਯਵਾਦੇ ਓਤਾਰੇਤਬ੍ਬਾ. ਸਚੇ ਤਤ੍ਥ ਓਤਰਤਿ ਚੇਵ ਸਮੇਤਿ ਚ, ਗਹੇਤਬ੍ਬਾ. ਸਚੇ ਨੇਵ ਓਤਰਤਿ ਨ ਸਮੇਤਿ, ਨ ਗਹੇਤਬ੍ਬਾ. ਅਯਞ੍ਹਿ ਅਤ੍ਤਨੋਮਤਿ ਨਾਮ ਸਬ੍ਬਦੁਬ੍ਬਲਾ, ਅਤ੍ਤਨੋਮਤਿਤੋ ਆਚਰਿਯਵਾਦੋ ਬਲਵਤਰੋ.

ਆਚਰਿਯਵਾਦੋਪਿ ਸੁਤ੍ਤਾਨੁਲੋਮੇ ਓਤਾਰੇਤਬ੍ਬੋ. ਤਤ੍ਥ ਓਤਰਨ੍ਤੋ ਸਮੇਨ੍ਤੋ ਏਵ ਗਹੇਤਬ੍ਬੋ, ਇਤਰੋ ਨ ਗਹੇਤਬ੍ਬੋ. ਆਚਰਿਯਵਾਦਤੋ ਹਿ ਸੁਤ੍ਤਾਨੁਲੋਮਂ ਬਲਵਤਰਂ.

ਸੁਤ੍ਤਾਨੁਲੋਮਮ੍ਪਿ ਸੁਤ੍ਤੇ ਓਤਾਰੇਤਬ੍ਬਂ. ਤਤ੍ਥ ਓਤਰਨ੍ਤਂ ਸਮੇਨ੍ਤਮੇਵ ਗਹੇਤਬ੍ਬਂ, ਇਤਰਂ ਨ ਗਹੇਤਬ੍ਬਂ. ਸੁਤ੍ਤਾਨੁਲੋਮਤੋ ਹਿ ਸੁਤ੍ਤਮੇਵ ਬਲਵਤਰਂ. ਸੁਤ੍ਤਞ੍ਹਿ ਅਪ੍ਪਟਿਵਤ੍ਤਿਯਂ ਕਾਰਕਸਙ੍ਘਸਦਿਸਂ ਬੁਦ੍ਧਾਨਂ ਠਿਤਕਾਲਸਦਿਸਂ. ਤਸ੍ਮਾ ਯਦਾ ਦ੍ਵੇ ਭਿਕ੍ਖੂ ਸਾਕਚ੍ਛਨ੍ਤਿ, ਸਕਵਾਦੀ ਸੁਤ੍ਤਂ ਗਹੇਤ੍ਵਾ ਕਥੇਤਿ, ਪਰਵਾਦੀ ਸੁਤ੍ਤਾਨੁਲੋਮਂ. ਤੇਹਿ ਅਞ੍ਞਮਞ੍ਞਂ ਖੇਪਂ ਵਾ ਗਰਹਂ ਵਾ ਅਕਤ੍ਵਾ ਸੁਤ੍ਤਾਨੁਲੋਮਂ ਸੁਤ੍ਤੇ ਓਤਾਰੇਤਬ੍ਬਂ. ਸਚੇ ਓਤਰਤਿ ਸਮੇਤਿ, ਗਹੇਤਬ੍ਬਂ, ਨੋ ਚੇ, ਨ ਗਹੇਤਬ੍ਬਂ, ਸੁਤ੍ਤਸ੍ਮਿਂਯੇਵ ਠਾਤਬ੍ਬਂ. ਅਥਾਯਂ ਸੁਤ੍ਤਂ ਗਹੇਤ੍ਵਾ ਕਥੇਤਿ, ਪਰੋ ਆਚਰਿਯਵਾਦਂ. ਤੇਹਿਪਿ ਅਞ੍ਞਮਞ੍ਞਂ ਖੇਪਂ ਵਾ ਗਰਹਂ ਵਾ ਅਕਤ੍ਵਾ ਆਚਰਿਯਵਾਦੋ ਸੁਤ੍ਤੇ ਓਤਾਰੇਤਬ੍ਬੋ. ਸਚੇ ਓਤਰਤਿ ਸਮੇਤਿ, ਗਹੇਤਬ੍ਬੋ. ਅਨੋਤਰਨ੍ਤੋ ਅਸਮੇਨ੍ਤੋ ਚ ਗਾਰਯ੍ਹਾਚਰਿਯਵਾਦੋ ਨ ਗਹੇਤਬ੍ਬੋ, ਸੁਤ੍ਤਸ੍ਮਿਂਯੇਵ ਠਾਤਬ੍ਬਂ. ਅਥਾਯਂ ਸੁਤ੍ਤਂ ਗਹੇਤ੍ਵਾ ਕਥੇਤਿ, ਪਰੋ ਅਤ੍ਤਨੋਮਤਿਂ. ਤੇਹਿਪਿ ਅਞ੍ਞਮਞ੍ਞਂ ਖੇਪਂ ਵਾ ਗਰਹਂ ਵਾ ਅਕਤ੍ਵਾ ਅਤ੍ਤਨੋਮਤਿ ਸੁਤ੍ਤੇ ਓਤਾਰੇਤਬ੍ਬਾ. ਸਚੇ ਓਤਰਤਿ ਸਮੇਤਿ, ਗਹੇਤਬ੍ਬਾ, ਨੋ ਚੇ, ਨ ਗਹੇਤਬ੍ਬਾ, ਸੁਤ੍ਤਸ੍ਮਿਂਯੇਵ ਠਾਤਬ੍ਬਂ.

ਅਥਾਯਂ ਸੁਤ੍ਤਾਨੁਲੋਮਂ ਗਹੇਤ੍ਵਾ ਕਥੇਤਿ, ਪਰੋ ਸੁਤ੍ਤਂ, ਸੁਤ੍ਤਾਨੁਲੋਮੇ ਓਤਾਰੇਤਬ੍ਬਂ. ਸਚੇ ਓਤਰਤਿ ਸਮੇਤਿ, ਤਿਸ੍ਸੋ ਸਙ੍ਗੀਤਿਯੋ ਆਰੁਲ਼੍ਹਂ ਪਾਲ਼ਿਆਗਤਂ ਪਞ੍ਞਾਯਤਿ, ਗਹੇਤਬ੍ਬਂ, ਨੋ ਚੇ ਤਥਾ ਪਞ੍ਞਾਯਤਿ, ਨ ਓਤਰਤਿ ਨ ਸਮੇਤਿ, ਬਾਹਿਰਕਸੁਤ੍ਤਂ ਵਾ ਹੋਤਿ ਸਿਲੋਕੋ ਵਾ ਅਞ੍ਞਂ ਵਾ ਗਾਰਯ੍ਹਸੁਤ੍ਤਂ ਗੁਲ਼੍ਹਵੇਸ੍ਸਨ੍ਤਰਗੁਲ਼੍ਹਵਿਨਯਵੇਦਲ੍ਲਾਦੀਨਂ ਅਞ੍ਞਤਰਤੋ ਆਭਤਂ, ਨ ਗਹੇਤਬ੍ਬਂ, ਸੁਤ੍ਤਾਨੁਲੋਮਸ੍ਮਿਂਯੇਵ ਠਾਤਬ੍ਬਂ. ਅਥਾਯਂ ਸੁਤ੍ਤਾਨੁਲੋਮਂ ਗਹੇਤ੍ਵਾ ਕਥੇਤਿ, ਪਰੋ ਆਚਰਿਯਵਾਦਂ. ਆਚਰਿਯਵਾਦੋ ਸੁਤ੍ਤਾਨੁਲੋਮੇ ਓਤਾਰੇਤਬ੍ਬੋ. ਸਚੇ ਓਤਰਤਿ ਸਮੇਤਿ, ਗਹੇਤਬ੍ਬੋ. ਨੋ ਚੇ, ਨ ਗਹੇਤਬ੍ਬੋ, ਸੁਤ੍ਤਾਨੁਲੋਮੇਯੇਵ ਠਾਤਬ੍ਬਂ. ਅਥਾਯਂ ਸੁਤ੍ਤਾਨੁਲੋਮਂ ਗਹੇਤ੍ਵਾ ਕਥੇਤਿ, ਪਰੋ ਅਤ੍ਤਨੋਮਤਿਂ. ਅਤ੍ਤਨੋਮਤਿ ਸੁਤ੍ਤਾਨੁਲੋਮੇ ਓਤਾਰੇਤਬ੍ਬਾ. ਸਚੇ ਓਤਰਤਿ ਸਮੇਤਿ, ਗਹੇਤਬ੍ਬਾ. ਨੋ ਚੇ, ਨ ਗਹੇਤਬ੍ਬਾ, ਸੁਤ੍ਤਾਨੁਲੋਮੇਯੇਵ ਠਾਤਬ੍ਬਂ.

ਅਥਾਯਂ ਆਚਰਿਯਵਾਦਂ ਗਹੇਤ੍ਵਾ ਕਥੇਤਿ, ਪਰੋ ਸੁਤ੍ਤਂ. ਸੁਤ੍ਤਂ ਆਚਰਿਯਵਾਦੇ ਓਤਾਰੇਤਬ੍ਬਂ. ਸਚੇ ਓਤਰਤਿ ਸਮੇਤਿ, ਗਹੇਤਬ੍ਬਂ. ਇਤਰਂ ਗਾਰਯ੍ਹਸੁਤ੍ਤਂ ਨ ਗਹੇਤਬ੍ਬਂ, ਆਚਰਿਯਵਾਦੇਯੇਵ ਠਾਤਬ੍ਬਂ. ਅਥਾਯਂ ਆਚਰਿਯਵਾਦਂ ਗਹੇਤ੍ਵਾ ਕਥੇਤਿ, ਪਰੋ ਸੁਤ੍ਤਾਨੁਲੋਮਂ. ਸੁਤ੍ਤਾਨੁਲੋਮਂ ਆਚਰਿਯਵਾਦੇ ਓਤਾਰੇਤਬ੍ਬਂ. ਓਤਰਨ੍ਤਂ ਸਮੇਨ੍ਤਮੇਵ ਗਹੇਤਬ੍ਬਂ, ਇਤਰਂ ਨ ਗਹੇਤਬ੍ਬਂ, ਆਚਰਿਯਵਾਦੇਯੇਵ ਠਾਤਬ੍ਬਂ. ਅਥਾਯਂ ਆਚਰਿਯਵਾਦਂ ਗਹੇਤ੍ਵਾ ਕਥੇਤਿ, ਪਰੋ ਅਤ੍ਤਨੋਮਤਿਂ. ਅਤ੍ਤਨੋਮਤਿ ਆਚਰਿਯਵਾਦੇ ਓਤਾਰੇਤਬ੍ਬਾ. ਸਚੇ ਓਤਰਤਿ ਸਮੇਤਿ, ਗਹੇਤਬ੍ਬਾ. ਨੋ ਚੇ, ਨ ਗਹੇਤਬ੍ਬਾ, ਆਚਰਿਯਵਾਦੇਯੇਵ ਠਾਤਬ੍ਬਂ.

ਅਥ ਪਨਾਯਂ ਅਤ੍ਤਨੋਮਤਿਂ ਗਹੇਤ੍ਵਾ ਕਥੇਤਿ, ਪਰੋ ਸੁਤ੍ਤਂ. ਸੁਤ੍ਤਂ ਅਤ੍ਤਨੋਮਤਿਯਂ ਓਤਾਰੇਤਬ੍ਬਂ. ਸਚੇ ਓਤਰਤਿ ਸਮੇਤਿ, ਗਹੇਤਬ੍ਬਂ. ਇਤਰਂ ਗਾਰਯ੍ਹਸੁਤ੍ਤਂ ਨ ਗਹੇਤਬ੍ਬਂ, ਅਤ੍ਤਨੋਮਤਿਯਮੇਵ ਠਾਤਬ੍ਬਂ. ਅਥਾਯਂ ਅਤ੍ਤਨੋਮਤਿਂ ਗਹੇਤ੍ਵਾ ਕਥੇਤਿ, ਪਰੋ ਸੁਤ੍ਤਾਨੁਲੋਮਂ. ਸੁਤ੍ਤਾਨੁਲੋਮਂ ਅਤ੍ਤਨੋਮਤਿਯਂ ਓਤਾਰੇਤਬ੍ਬਂ. ਓਤਰਨ੍ਤਂ ਸਮੇਨ੍ਤਮੇਵ ਗਹੇਤਬ੍ਬਂ, ਇਤਰਂ ਨ ਗਹੇਤਬ੍ਬਂ, ਅਤ੍ਤਨੋਮਤਿਯਮੇਵ ਠਾਤਬ੍ਬਂ. ਅਥਾਯਂ ਅਤ੍ਤਨੋਮਤਿਂ ਗਹੇਤ੍ਵਾ ਕਥੇਤਿ, ਪਰੋ ਆਚਰਿਯਵਾਦਂ. ਆਚਰਿਯਵਾਦੋ ਅਤ੍ਤਨੋਮਤਿਯਂ ਓਤਾਰੇਤਬ੍ਬੋ. ਸਚੇ ਓਤਰਤਿ ਸਮੇਤਿ, ਗਹੇਤਬ੍ਬੋ. ਇਤਰੋ ਗਾਰਯ੍ਹਾਚਰਿਯਵਾਦੋ ਨ ਗਹੇਤਬ੍ਬੋ, ਅਤ੍ਤਨੋਮਤਿਯਮੇਵ ਠਾਤਬ੍ਬਂ, ਅਤ੍ਤਨੋ ਗਹਣਮੇਵ ਬਲਿਯਂ ਕਾਤਬ੍ਬਂ. ਸਬ੍ਬਟ੍ਠਾਨੇਸੁ ਚ ਖੇਪੋ ਵਾ ਗਰਹਾ ਵਾ ਨ ਕਾਤਬ੍ਬਾਤਿ.

ਅਥ ਪਨਾਯਂ ਕਪ੍ਪਿਯਨ੍ਤਿ ਗਹੇਤ੍ਵਾ ਕਥੇਤਿ, ਪਰੋ ਅਕਪ੍ਪਿਯਨ੍ਤਿ, ਸੁਤ੍ਤੇ ਚ ਸੁਤ੍ਤਾਨੁਲੋਮੇ ਚ ਓਤਾਰੇਤਬ੍ਬਂ. ਸਚੇ ਕਪ੍ਪਿਯਂ ਹੋਤਿ, ਕਪ੍ਪਿਯੇ ਠਾਤਬ੍ਬਂ. ਸਚੇ ਅਕਪ੍ਪਿਯਂ, ਅਕਪ੍ਪਿਯੇ ਠਾਤਬ੍ਬਂ. ਅਥਾਯਂ ਤਸ੍ਸ ਕਪ੍ਪਿਯਭਾਵਸਾਧਕਂ ਸੁਤ੍ਤਤੋ ਬਹੁਂ ਕਾਰਣਞ੍ਚ ਵਿਨਿਚ੍ਛਯਞ੍ਚ ਦਸ੍ਸੇਤਿ, ਪਰੋ ਕਾਰਣਂ ਨ ਵਿਨ੍ਦਤਿ, ਕਪ੍ਪਿਯੇਵ ਠਾਤਬ੍ਬਂ. ਅਥ ਪਰੋ ਤਸ੍ਸ ਅਕਪ੍ਪਿਯਭਾਵਸਾਧਕਂ ਸੁਤ੍ਤਤੋ ਬਹੁਂ ਕਾਰਣਞ੍ਚ ਵਿਨਿਚ੍ਛਯਞ੍ਚ ਦਸ੍ਸੇਤਿ, ਅਨੇਨ ਅਤ੍ਤਨੋ ਗਹਣਨ੍ਤਿ ਕਤ੍ਵਾ ਦਲ਼੍ਹਂ ਆਦਾਯ ਨ ਠਾਤਬ੍ਬਂ, ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਅਕਪ੍ਪਿਯੇ ਏਵ ਠਾਤਬ੍ਬਂ. ਅਥ ਦ੍ਵਿਨ੍ਨਮ੍ਪਿ ਕਾਰਣਚ੍ਛਾਯਾ ਦਿਸ੍ਸਤਿ, ਪਟਿਕ੍ਖਿਤ੍ਤਭਾਵੋਯੇਵ ਸਾਧੁ, ਅਕਪ੍ਪਿਯੇ ਠਾਤਬ੍ਬਂ. ਵਿਨਯਞ੍ਹਿ ਪਤ੍ਵਾ ਕਪ੍ਪਿਯਾਕਪ੍ਪਿਯਵਿਚਾਰਣਂ ਆਗਮ੍ਮ ਰੁਨ੍ਧਿਤਬ੍ਬਂ, ਗਾਲ਼੍ਹਂ ਕਤ੍ਤਬ੍ਬਂ, ਸੋਤਂ ਪਚ੍ਛਿਨ੍ਦਿਤਬ੍ਬਂ, ਗਰੁਕਭਾਵੇਯੇਵ ਠਾਤਬ੍ਬਂ.

ਅਥ ਪਨਾਯਂ ਅਕਪ੍ਪਿਯਨ੍ਤਿ ਗਹੇਤ੍ਵਾ ਕਥੇਤਿ, ਪਰੋ ਕਪ੍ਪਿਯਨ੍ਤਿ, ਸੁਤ੍ਤੇ ਚ ਸੁਤ੍ਤਾਨੁਲੋਮੇ ਚ ਓਤਾਰੇਤਬ੍ਬਂ. ਸਚੇ ਕਪ੍ਪਿਯਂ ਹੋਤਿ, ਕਪ੍ਪਿਯੇ ਠਾਤਬ੍ਬਂ. ਸਚੇ ਅਕਪ੍ਪਿਯਂ, ਅਕਪ੍ਪਿਯੇ ਠਾਤਬ੍ਬਂ. ਅਥਾਯਂ ਬਹੂਹਿ ਸੁਤ੍ਤਵਿਨਿਚ੍ਛਯਕਾਰਣੇਹਿ ਅਕਪ੍ਪਿਯਭਾਵਂ ਦਸ੍ਸੇਤਿ, ਪਰੋ ਕਾਰਣਂ ਨ ਵਿਨ੍ਦਤਿ, ਅਕਪ੍ਪਿਯੇ ਠਾਤਬ੍ਬਂ. ਅਥ ਪਰੋ ਬਹੂਹਿ ਸੁਤ੍ਤਵਿਨਿਚ੍ਛਯਕਾਰਣੇਹਿ ਕਪ੍ਪਿਯਭਾਵਂ ਦਸ੍ਸੇਤਿ, ਅਯਂ ਕਾਰਣਂ ਨ ਵਿਨ੍ਦਤਿ, ਕਪ੍ਪਿਯੇ ਠਾਤਬ੍ਬਂ. ਅਥ ਦ੍ਵਿਨ੍ਨਮ੍ਪਿ ਕਾਰਣਚ੍ਛਾਯਾ ਦਿਸ੍ਸਤਿ, ਅਤ੍ਤਨੋ ਗਹਣਂ ਨ ਵਿਸ੍ਸਜ੍ਜੇਤਬ੍ਬਂ. ਯਥਾ ਚਾਯਂ ਕਪ੍ਪਿਯਾਕਪ੍ਪਿਯੇ ਅਕਪ੍ਪਿਯਕਪ੍ਪਿਯੇ ਚ ਵਿਨਿਚ੍ਛਯੋ ਵੁਤ੍ਤੋ, ਏਵਂ ਅਨਾਪਤ੍ਤਿਆਪਤ੍ਤਿਵਾਦੇ ਆਪਤ੍ਤਾਨਾਪਤ੍ਤਿਵਾਦੇ ਚ, ਲਹੁਕਗਰੁਕਾਪਤ੍ਤਿਵਾਦੇ ਗਰੁਕਲਹੁਕਾਪਤ੍ਤਿਵਾਦੇ ਚਾਪਿ ਵਿਨਿਚ੍ਛਯੋ ਵੇਦਿਤਬ੍ਬੋ. ਨਾਮਮਤ੍ਤੇਯੇਵ ਹਿ ਏਤ੍ਥ ਨਾਨਂ, ਯੋਜਨਾਨਯੇ ਨਾਨਂ ਨਤ੍ਥਿ, ਤਸ੍ਮਾ ਨ ਵਿਤ੍ਥਾਰਿਤਂ.

ਏਵਂ ਕਪ੍ਪਿਯਾਕਪ੍ਪਿਯਾਦਿਵਿਨਿਚ੍ਛਯੇ ਉਪ੍ਪਨ੍ਨੇ ਯੋ ਸੁਤ੍ਤਸੁਤ੍ਤਾਨੁਲੋਮਆਚਰਿਯਵਾਦਅਤ੍ਤਨੋਮਤੀਸੁ ਅਤਿਰੇਕਕਾਰਣਂ ਲਭਤਿ, ਤਸ੍ਸ ਵਾਦੇ ਠਾਤਬ੍ਬਂ, ਸਬ੍ਬਸੋ ਪਨ ਕਾਰਣਵਿਨਿਚ੍ਛਯਂ ਅਲਭਨ੍ਤੇਨ ਸੁਤ੍ਤਂ ਨ ਜਹਿਤਬ੍ਬਂ, ਸੁਤ੍ਤਸ੍ਮਿਂਯੇਵ ਠਾਤਬ੍ਬਨ੍ਤਿ. ਏਵਂ ਸਕਲਵਿਨਯਵਿਨਿਚ੍ਛਯੇ ਕੋਸਲ੍ਲਂ ਪਤ੍ਥਯਨ੍ਤੇਨ ਅਯਂ ਚਤੁਬ੍ਬਿਧੋ ਵਿਨਯੋ ਜਾਨਿਤਬ੍ਬੋ.

ਇਮਞ੍ਚ ਪਨ ਚਤੁਬ੍ਬਿਧਂ ਵਿਨਯਂ ਞਤ੍ਵਾਪਿ ਵਿਨਯਧਰੇਨ ਪੁਗ੍ਗਲੇਨ ਤਿਲਕ੍ਖਣਸਮਨ੍ਨਾਗਤੇਨ ਭਵਿਤਬ੍ਬਂ. ਤੀਣਿ ਹਿ ਵਿਨਯਧਰਸ੍ਸ ਲਕ੍ਖਣਾਨਿ ਇਚ੍ਛਿਤਬ੍ਬਾਨਿ. ਕਤਮਾਨਿ ਤੀਣਿ? ਸੁਤ੍ਤਞ੍ਚਸ੍ਸ ਸ੍ਵਾਗਤਂ ਹੋਤਿ ਸੁਪ੍ਪਵਤ੍ਤਿ ਸੁਵਿਨਿਚ੍ਛਿਤਂ ਸੁਤ੍ਤਤੋ ਅਨੁਬ੍ਯਞ੍ਜਨਸੋਤਿ ਇਦਮੇਕਂ ਲਕ੍ਖਣਂ. ਵਿਨਯੇ ਖੋ ਪਨ ਠਿਤੋ ਹੋਤਿ ਅਸਂਹੀਰੋਤਿ ਇਦਂ ਦੁਤਿਯਂ. ਆਚਰਿਯਪਰਮ੍ਪਰਾ ਖੋ ਪਨਸ੍ਸ ਸੁਗ੍ਗਹਿਤਾ ਹੋਤਿ ਸੁਮਨਸਿਕਤਾ ਸੂਪਧਾਰਿਤਾਤਿ ਇਦਂ ਤਤਿਯਂ.

ਤਤ੍ਥ ਸੁਤ੍ਤਂ ਨਾਮ ਸਕਲਂ ਵਿਨਯਪਿਟਕਂ. ਤਦਸ੍ਸ ਸ੍ਵਾਗਤਂ ਹੋਤੀਤਿ ਸੁਟ੍ਠੁ ਆਗਤਂ. ਸੁਪ੍ਪਵਤ੍ਤੀਤਿ ਸੁਟ੍ਠੁ ਪਵਤ੍ਤਂ ਪਗੁਣਂ ਵਾਚੁਗ੍ਗਤਂ. ਸੁਵਿਨਿਚ੍ਛਿਤਂ ਸੁਤ੍ਤਸੋ ਅਨੁਬ੍ਯਞ੍ਜਨਸੋਤਿ ਪਾਲ਼ਿਤੋ ਚ ਪਰਿਪੁਚ੍ਛਤੋ ਚ ਅਟ੍ਠਕਥਾਤੋ ਚ ਸੁਵਿਨਿਚ੍ਛਿਤਂ ਹੋਤਿ ਕਙ੍ਖਾਛੇਦਨਂ ਕਤ੍ਵਾ ਉਗ੍ਗਹਿਤਂ. ਵਿਨਯੇ ਖੋ ਪਨ ਠਿਤੋ ਹੋਤੀਤਿ ਵਿਨਯੇ ਲਜ੍ਜਿਭਾਵੇਨ ਪਤਿਟ੍ਠਿਤੋ ਹੋਤਿ. ਅਲਜ੍ਜੀ ਹਿ ਬਹੁਸ੍ਸੁਤੋਪਿ ਸਮਾਨੋ ਲਾਭਗਰੁਕਤਾਯ ਤਨ੍ਤਿਂ ਵਿਸਂਵਾਦੇਤ੍ਵਾ ਉਦ੍ਧਮ੍ਮਂ ਉਬ੍ਬਿਨਯਂ ਸਤ੍ਥੁਸਾਸਨਂ ਦੀਪੇਤ੍ਵਾ ਸਾਸਨੇ ਮਹਨ੍ਤਂ ਉਪਦ੍ਦਵਂ ਕਰੋਤਿ, ਸਙ੍ਘਭੇਦਮ੍ਪਿ ਸਙ੍ਘਰਾਜਿਮ੍ਪਿ ਉਪ੍ਪਾਦੇਤਿ. ਲਜ੍ਜੀ ਪਨ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ ਜੀਵਿਤਹੇਤੁਪਿ ਤਨ੍ਤਿਂ ਅਵਿਸਂਵਾਦੇਤ੍ਵਾ ਧਮ੍ਮਮੇਵ ਵਿਨਯਮੇਵ ਦੀਪੇਤਿ, ਸਤ੍ਥੁਸਾਸਨਂ ਗਰੁਕਂ ਕਤ੍ਵਾ ਠਪੇਤਿ. ਤਥਾ ਹਿ ਪੁਬ੍ਬੇ ਮਹਾਥੇਰਾ ਤਿਕ੍ਖਤ੍ਤੁਂ ਵਾਚਂ ਨਿਚ੍ਛਾਰੇਸੁਂ ‘‘ਅਨਾਗਤੇ ਲਜ੍ਜੀ ਰਕ੍ਖਿਸ੍ਸਤਿ, ਲਜ੍ਜੀ ਰਕ੍ਖਿਸ੍ਸਤਿ, ਲਜ੍ਜੀ ਰਕ੍ਖਿਸ੍ਸਤੀ’’ਤਿ (ਪਾਰਾ. ਅਟ੍ਠ. ੧.੪੫). ਏਵਂ ਯੋ ਲਜ੍ਜੀ, ਸੋ ਵਿਨਯਂ ਅਵਿਜਹਨ੍ਤੋ ਅਵੋਕ੍ਕਮਨ੍ਤੋ ਲਜ੍ਜਿਭਾਵੇਨੇਵ ਵਿਨਯੇ ਠਿਤੋ ਹੋਤਿ ਸੁਪ੍ਪਤਿਟ੍ਠਿਤੋਤਿ.

ਅਸਂਹੀਰੋਤਿ ਸਂਹੀਰੋ ਨਾਮ ਯੋ ਪਾਲ਼ਿਯਂ ਵਾ ਅਟ੍ਠਕਥਾਯਂ ਵਾ ਹੇਟ੍ਠਤੋ ਵਾ ਉਪਰਿਤੋ ਵਾ ਪਦਪਟਿਪਾਟਿਯਾ ਵਾ ਪੁਚ੍ਛਿਯਮਾਨੋ ਵਿਤ੍ਥੁਨਤਿ ਵਿਪ੍ਫਨ੍ਦਤਿ ਸਨ੍ਤਿਟ੍ਠਿਤੁਂ ਨ ਸਕ੍ਕੋਤਿ, ਯਂ ਯਂ ਪਰੇਨ ਵੁਚ੍ਚਤਿ, ਤਂ ਤਂ ਅਨੁਜਾਨਾਤਿ, ਸਕਵਾਦਂ ਛਡ੍ਡੇਤ੍ਵਾ ਪਰਵਾਦਂ ਗਣ੍ਹਾਤਿ. ਯੋ ਪਨ ਪਾਲ਼ਿਯਂ ਵਾ ਅਟ੍ਠਕਥਾਯਂ ਵਾ ਹੇਟ੍ਠੁਪਰਿਯੇਨ ਵਾ ਪਦਪਟਿਪਾਟਿਯਾ ਵਾ ਪੁਚ੍ਛਿਯਮਾਨੋ ਨ ਵਿਤ੍ਥੁਨਤਿ ਨ ਵਿਪ੍ਫਨ੍ਦਤਿ, ਏਕੇਕਲੋਮਂ ਸਣ੍ਡਾਸੇਨ ਗਣ੍ਹਨ੍ਤੋ ਵਿਯ ‘‘ਏਵਂ ਮਯਂ ਵਦਾਮ, ਏਵਂ ਨੋ ਆਚਰਿਯਾ ਵਦਨ੍ਤੀ’’ਤਿ ਵਿਸ੍ਸਜ੍ਜੇਤਿ, ਯਮ੍ਹਿ ਪਾਲ਼ਿ ਚ ਪਾਲ਼ਿਵਿਨਿਚ੍ਛਯੋ ਚ ਸੁਵਣ੍ਣਭਾਜਨੇ ਪਕ੍ਖਿਤ੍ਤਸੀਹਵਸਾ ਵਿਯ ਪਰਿਕ੍ਖਯਂ ਪਰਿਯਾਦਾਨਂ ਅਗਚ੍ਛਨ੍ਤੋ ਤਿਟ੍ਠਤਿ, ਅਯਂ ਵੁਚ੍ਚਤਿ ‘‘ਅਸਂਹੀਰੋ’’ਤਿ.

ਆਚਰਿਯਪਰਮ੍ਪਰਾ ਖੋ ਪਨਸ੍ਸ ਸੁਗ੍ਗਹਿਤਾ ਹੋਤੀਤਿ ਥੇਰਪਰਮ੍ਪਰਾ ਵਂਸਪਰਮ੍ਪਰਾ ਅਸ੍ਸ ਸੁਟ੍ਠੁ ਗਹਿਤਾ ਹੋਤਿ. ਸੁਮਨਸਿਕਤਾਤਿ ਸੁਟ੍ਠੁ ਮਨਸਿਕਤਾ, ਆਵਜ੍ਜਿਤਮਤ੍ਤੇ ਉਜ੍ਜਲਿਤਪਦੀਪੋ ਵਿਯ ਹੋਤਿ. ਸੂਪਧਾਰਿਤਾਤਿ ਸੁਟ੍ਠੁ ਉਪਧਾਰਿਤਾ ਪੁਬ੍ਬਾਪਰਾਨੁਸਨ੍ਧਿਤੋ ਅਤ੍ਥਤੋ ਕਾਰਣਤੋ ਚ ਉਪਧਾਰਿਤਾ. ਅਤ੍ਤਨੋਮਤਿਂ ਪਹਾਯ ਆਚਰਿਯਸੁਦ੍ਧਿਯਾ ਵਤ੍ਤਾ ਹੋਤਿ, ‘‘ਮਯ੍ਹਂ ਆਚਰਿਯੋ ਅਸੁਕਾਚਰਿਯਸ੍ਸ ਸਨ੍ਤਿਕੇ ਉਗ੍ਗਣ੍ਹਿ, ਸੋ ਅਸੁਕਸ੍ਸਾ’’ਤਿ ਏਵਂ ਸਬ੍ਬਂ ਆਚਰਿਯਪਰਮ੍ਪਰਂ ਥੇਰਵਾਦਙ੍ਗਂ ਹਰਿਤ੍ਵਾ ਯਾਵ ਉਪਾਲਿਤ੍ਥੇਰੋ ਸਮ੍ਮਾਸਮ੍ਬੁਦ੍ਧਸ੍ਸ ਸਨ੍ਤਿਕੇ ਉਗ੍ਗਣ੍ਹੀਤਿ ਪਾਪੇਤ੍ਵਾ ਠਪੇਤਿ, ਤਤੋਪਿ ਆਹਰਿਤ੍ਵਾ ਉਪਾਲਿਤ੍ਥੇਰੋ ਸਮ੍ਮਾਸਮ੍ਬੁਦ੍ਧਸ੍ਸ ਸਨ੍ਤਿਕੇ ਉਗ੍ਗਣ੍ਹਿ, ਦਾਸਕਤ੍ਥੇਰੋ ਅਤ੍ਤਨੋ ਉਪਜ੍ਝਾਯਸ੍ਸ ਉਪਾਲਿਤ੍ਥੇਰਸ੍ਸ, ਸੋਣਤ੍ਥੇਰੋ ਅਤ੍ਤਨੋ ਉਪਜ੍ਝਾਯਸ੍ਸ ਦਾਸਕਤ੍ਥੇਰਸ੍ਸ, ਸਿਗ੍ਗਵਤ੍ਥੇਰੋ ਅਤ੍ਤਨੋ ਉਪਜ੍ਝਾਯਸ੍ਸ ਸੋਣਤ੍ਥੇਰਸ੍ਸ, ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਅਤ੍ਤਨੋ ਉਪਜ੍ਝਾਯਸ੍ਸ ਸਿਗ੍ਗਵਤ੍ਥੇਰਸ੍ਸ ਚਣ੍ਡਵਜ੍ਜਿਤ੍ਥੇਰਸ੍ਸ ਚਾਤਿ ਏਵਂ ਸਬ੍ਬਂ ਆਚਰਿਯਪਰਮ੍ਪਰਂ ਥੇਰਵਾਦਙ੍ਗਂ ਆਹਰਿਤ੍ਵਾ ਅਤ੍ਤਨੋ ਆਚਰਿਯਂ ਪਾਪੇਤ੍ਵਾ ਠਪੇਤਿ. ਏਵਂ ਉਗ੍ਗਹਿਤਾ ਹਿ ਆਚਰਿਯਪਰਮ੍ਪਰਾ ਸੁਗ੍ਗਹਿਤਾ ਹੋਤਿ. ਏਵਂ ਅਸਕ੍ਕੋਨ੍ਤੇਨ ਪਨ ਅਵਸ੍ਸਂ ਦ੍ਵੇ ਤਯੋ ਪਰਿਵਟ੍ਟਾ ਉਗ੍ਗਹੇਤਬ੍ਬਾ. ਸਬ੍ਬਪਚ੍ਛਿਮੇਨ ਹਿ ਨਯੇਨ ਯਥਾ ਆਚਰਿਯੋ ਆਚਰਿਯਾਚਰਿਯੋ ਚ ਪਾਲ਼ਿਞ੍ਚ ਪਰਿਪੁਚ੍ਛਞ੍ਚ ਵਦਨ੍ਤਿ, ਤਥਾ ਞਾਤੁਂ ਵਟ੍ਟਤਿ.

ਇਮੇਹਿ ਚ ਪਨ ਤੀਹਿ ਲਕ੍ਖਣੇਹਿ ਸਮਨ੍ਨਾਗਤੇਨ ਵਿਨਯਧਰੇਨ ਵਤ੍ਥੁਵਿਨਿਚ੍ਛਯਤ੍ਥਂ ਸਨ੍ਨਿਪਤਿਤੇ ਸਙ੍ਘੇ ਓਤਿਣ੍ਣੇ ਵਤ੍ਥੁਸ੍ਮਿਂ ਚੋਦਕੇਨ ਚ ਚੁਦਿਤਕੇਨ ਚ ਵੁਤ੍ਤੇ ਵਤ੍ਤਬ੍ਬੇ ਸਹਸਾ ਅਵਿਨਿਚ੍ਛਿਨਿਤ੍ਵਾਵ ਛ ਠਾਨਾਨਿ ਓਲੋਕੇਤਬ੍ਬਾਨਿ. ਕਤਮਾਨਿ ਛ? ਵਤ੍ਥੁ ਓਲੋਕੇਤਬ੍ਬਂ, ਮਾਤਿਕਾ ਓਲੋਕੇਤਬ੍ਬਾ, ਪਦਭਾਜਨੀਯਂ ਓਲੋਕੇਤਬ੍ਬਂ, ਤਿਕਪਰਿਚ੍ਛੇਦੋ ਓਲੋਕੇਤਬ੍ਬੋ, ਅਨ੍ਤਰਾਪਤ੍ਤਿ ਓਲੋਕੇਤਬ੍ਬਾ, ਅਨਾਪਤ੍ਤਿ ਓਲੋਕੇਤਬ੍ਬਾਤਿ.

ਵਤ੍ਥੁਂ ਓਲੋਕੇਨ੍ਤੋਪਿ ਹਿ ‘‘ਤਿਣੇਨ ਵਾ ਪਣ੍ਣੇਨ ਵਾ ਪਟਿਚ੍ਛਾਦੇਤ੍ਵਾ ਆਗਨ੍ਤਬ੍ਬਂ, ਨ ਤ੍ਵੇਵ ਨਗ੍ਗੇਨ ਆਗਨ੍ਤਬ੍ਬਂ, ਯੋ ਆਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੫੧੭) ਏਵਂ ਏਕਚ੍ਚਂ ਆਪਤ੍ਤਿਂ ਪਸ੍ਸਤਿ, ਸੋ ਤਂ ਸੁਤ੍ਤਂ ਆਨੇਤ੍ਵਾ ਤਂ ਅਧਿਕਰਣਂ ਵੂਪਸਮੇਸ੍ਸਤਿ.

ਮਾਤਿਕਂ ਓਲੋਕੇਨ੍ਤੋਪਿ ‘‘ਸਮ੍ਪਜਾਨਮੁਸਾਵਾਦੇ ਪਾਚਿਤ੍ਤਿਯ’’ਨ੍ਤਿਆਦਿਨਾ (ਪਾਚਿ. ੩) ਨਯੇਨ ਪਞ੍ਚਨ੍ਨਂ ਆਪਤ੍ਤੀਨਂ ਅਞ੍ਞਤਰਂ ਆਪਤ੍ਤਿਂ ਪਸ੍ਸਤਿ, ਸੋ ਤਂ ਸੁਤ੍ਤਂ ਆਨੇਤ੍ਵਾ ਤਂ ਅਧਿਕਰਣਂ ਵੂਪਸਮੇਸ੍ਸਤਿ.

ਪਦਭਾਜਨੀਯਂ ਓਲੋਕੇਨ੍ਤੋਪਿ ‘‘ਅਕ੍ਖਯਿਤੇ ਸਰੀਰੇ ਮੇਥੁਨਂ ਧਮ੍ਮਂ ਪਟਿਸੇਵਤਿ, ਆਪਤ੍ਤਿ ਪਾਰਾਜਿਕਸ੍ਸ. ਯੇਭੁਯ੍ਯੇਨ ਖਯਿਤੇ ਸਰੀਰੇ ਮੇਥੁਨਂ ਧਮ੍ਮਂ ਪਟਿਸੇਵਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿਆਦਿਨਾ (ਪਾਰਾ. ੫੯ ਅਤ੍ਥਤੋ ਸਮਾਨਂ) ਨਯੇਨ ਸਤ੍ਤਨ੍ਨਂ ਆਪਤ੍ਤੀਨਂ ਅਞ੍ਞਤਰਂ ਆਪਤ੍ਤਿਂ ਪਸ੍ਸਤਿ, ਸੋ ਪਦਭਾਜਨੀਯਤੋ ਸੁਤ੍ਤਂ ਆਨੇਤ੍ਵਾ ਤਂ ਅਧਿਕਰਣਂ ਵੂਪਸਮੇਸ੍ਸਤਿ.

ਤਿਕਪਰਿਚ੍ਛੇਦਂ ਓਲੋਕੇਨ੍ਤੋਪਿ ਤਿਕਸਙ੍ਘਾਦਿਸੇਸਂ ਵਾ ਤਿਕਪਾਚਿਤ੍ਤਿਯਂ ਵਾ ਤਿਕਦੁਕ੍ਕਟਂ ਵਾ ਅਞ੍ਞਤਰਂ ਵਾ ਆਪਤ੍ਤਿਂ ਤਿਕਪਰਿਚ੍ਛੇਦੇ ਪਸ੍ਸਤਿ, ਸੋ ਤਤੋ ਸੁਤ੍ਤਂ ਆਨੇਤ੍ਵਾ ਤਂ ਅਧਿਕਰਣਂ ਵੂਪਸਮੇਸ੍ਸਤਿ.

ਅਨ੍ਤਰਾਪਤ੍ਤਿਂ ਓਲੋਕੇਨ੍ਤੋਪਿ ‘‘ਪਟਿਲਾਤਂ ਉਕ੍ਖਿਪਤਿ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਚਿ. ੩੫੫) ਏਵਂ ਯਾ ਸਿਕ੍ਖਾਪਦਨ੍ਤਰੇਸੁ ਅਨ੍ਤਰਾਪਤ੍ਤਿ ਹੋਤਿ, ਤਂ ਪਸ੍ਸਤਿ, ਸੋ ਤਂ ਸੁਤ੍ਤਂ ਆਨੇਤ੍ਵਾ ਤਂ ਅਧਿਕਰਣਂ ਵੂਪਸਮੇਸ੍ਸਤਿ.

ਅਨਾਪਤ੍ਤਿਂ ਓਲੋਕੇਨ੍ਤੋਪਿ ‘‘ਅਨਾਪਤ੍ਤਿ ਭਿਕ੍ਖੁ ਅਸਾਦਿਯਨ੍ਤਸ੍ਸ, ਅਥੇਯ੍ਯਚਿਤ੍ਤਸ੍ਸ, ਨ ਮਰਣਾਧਿਪ੍ਪਾਯਸ੍ਸ, ਅਨੁਲ੍ਲਪਨਾਧਿਪ੍ਪਾਯਸ੍ਸ, ਨ ਮੋਚਨਾਧਿਪ੍ਪਾਯਸ੍ਸ ਅਸਞ੍ਚਿਚ੍ਚ ਅਸਤਿਯਾ ਅਜਾਨਨ੍ਤਸ੍ਸਾ’’ਤਿ (ਪਾਰਾ. ੭੨, ੧੩੬, ੧੮੦, ੨੨੫, ੨੬੩ ਥੋਕਂ ਥੋਕਂ ਵਿਸਦਿਸਂ) ਏਵਂ ਤਸ੍ਮਿਂ ਤਸ੍ਮਿਂ ਸਿਕ੍ਖਾਪਦੇ ਨਿਦ੍ਦਿਟ੍ਠਂ ਅਨਾਪਤ੍ਤਿਂ ਪਸ੍ਸਤਿ, ਸੋ ਤਂ ਸੁਤ੍ਤਂ ਆਨੇਤ੍ਵਾ ਤਂ ਅਧਿਕਰਣਂ ਵੂਪਸਮੇਸ੍ਸਤਿ.

ਯੋ ਹਿ ਭਿਕ੍ਖੁ ਚਤੁਬ੍ਬਿਧਵਿਨਯਕੋਵਿਦੋ ਤਿਲਕ੍ਖਣਸਮ੍ਪਨ੍ਨੋ ਇਮਾਨਿ ਛ ਠਾਨਾਨਿ ਓਲੋਕੇਤ੍ਵਾ ਅਧਿਕਰਣਂ ਵੂਪਸਮੇਸ੍ਸਤਿ, ਤਸ੍ਸ ਵਿਨਿਚ੍ਛਯੋ ਅਪ੍ਪਟਿਵਤ੍ਤਿਯੋ ਬੁਦ੍ਧੇਨ ਸਯਂ ਨਿਸੀਦਿਤ੍ਵਾ ਵਿਨਿਚ੍ਛਿਤਸਦਿਸੋ ਹੋਤਿ. ਤਂ ਚੇ ਏਵਂ ਵਿਨਿਚ੍ਛਯਕੁਸਲਂ ਭਿਕ੍ਖੁਂ ਕੋਚਿ ਕਤਸਿਕ੍ਖਾਪਦਵੀਤਿਕ੍ਕਮੋ ਭਿਕ੍ਖੁ ਉਪਸਙ੍ਕਮਿਤ੍ਵਾ ਅਤ੍ਤਨੋ ਕੁਕ੍ਕੁਚ੍ਚਂ ਪੁਚ੍ਛੇਯ੍ਯ, ਤੇਨ ਸਾਧੁਕਂ ਸਲ੍ਲਕ੍ਖੇਤ੍ਵਾ ਸਚੇ ਅਨਾਪਤ੍ਤਿ ਹੋਤਿ, ‘‘ਅਨਾਪਤ੍ਤੀ’’ਤਿ ਵਤ੍ਤਬ੍ਬਂ. ਸਚੇ ਪਨ ਆਪਤ੍ਤਿ ਹੋਤਿ, ਸਾ ਦੇਸਨਾਗਾਮਿਨੀ ਚੇ, ‘‘ਦੇਸਨਾਗਾਮਿਨੀ’’ਤਿ ਵਤ੍ਤਬ੍ਬਂ. ਵੁਟ੍ਠਾਨਗਾਮਿਨੀ ਚੇ, ‘‘ਵੁਟ੍ਠਾਨਗਾਮਿਨੀ’’ਤਿ ਵਤ੍ਤਬ੍ਬਂ. ਅਥਸ੍ਸ ਪਾਰਾਜਿਕਚ੍ਛਾਯਾ ਦਿਸ੍ਸਤਿ, ‘‘ਪਾਰਾਜਿਕਾਪਤ੍ਤੀ’’ਤਿ ਨ ਵਤ੍ਤਬ੍ਬਂ. ਕਸ੍ਮਾ? ਮੇਥੁਨਧਮ੍ਮਵੀਤਿਕ੍ਕਮੋ ਹਿ ਉਤ੍ਤਰਿਮਨੁਸ੍ਸਧਮ੍ਮਵੀਤਿਕ੍ਕਮੋ ਚ ਓਲ਼ਾਰਿਕੋ, ਅਦਿਨ੍ਨਾਦਾਨਮਨਉਸ੍ਸਵਿਗ੍ਗਹਵੀਤਿਕ੍ਕਮਾ ਪਨ ਸੁਖੁਮਾ ਚਿਤ੍ਤਲਹੁਕਾ. ਤੇ ਸੁਖੁਮੇਨੇਵ ਆਪਜ੍ਜਤਿ, ਸੁਖੁਮੇਨ ਰਕ੍ਖਤਿ, ਤਸ੍ਮਾ ਵਿਸੇਸੇਨ ਤਂਵਤ੍ਥੁਕਂ ਕੁਕ੍ਕੁਚ੍ਚਂ ਪੁਚ੍ਛਿਯਮਾਨੋ ‘‘ਆਪਤ੍ਤੀ’’ਤਿ ਅਵਤ੍ਵਾ ਸਚਸ੍ਸ ਆਚਰਿਯੋ ਧਰਤਿ, ਤਤੋ ਤੇਨ ਸੋ ਭਿਕ੍ਖੁ ‘‘ਅਮ੍ਹਾਕਂ ਆਚਰਿਯਂ ਪੁਚ੍ਛਾ’’ਤਿ ਪੇਸੇਤਬ੍ਬੋ. ਸਚੇ ਸੋ ਪੁਨ ਆਗਨ੍ਤ੍ਵਾ ‘‘ਤੁਮ੍ਹਾਕਂ ਆਚਰਿਯੋ ਸੁਤ੍ਤਤੋ ਨਯਤੋ ਓਲੋਕੇਤ੍ਵਾ ‘ਸਤੇਕਿਚ੍ਛੋ’ਤਿ ਮਂ ਆਹਾ’’ਤਿ ਵਦਤਿ, ਤਤੋ ਤੇਨ ਸੋ ‘‘ਸਾਧੁ ਸੁਟ੍ਠੁ ਯਂ ਆਚਰਿਯੋ ਭਣਤਿ, ਤਂ ਕਰੋਹੀ’’ਤਿ ਵਤ੍ਤਬ੍ਬੋ. ਅਥ ਪਨਸ੍ਸ ਆਚਰਿਯੋ ਨਤ੍ਥਿ, ਸਦ੍ਧਿਂ ਉਗ੍ਗਹਿਤਤ੍ਥੇਰੋ ਪਨ ਅਤ੍ਥਿ, ਤਸ੍ਸ ਸਨ੍ਤਿਕਂ ਪੇਸੇਤਬ੍ਬੋ ‘‘ਅਮ੍ਹੇਹਿ ਸਹ ਉਗ੍ਗਹਿਤਤ੍ਥੇਰੋ ਗਣਪਾਮੋਕ੍ਖੋ, ਤਂ ਗਨ੍ਤ੍ਵਾ ਪੁਚ੍ਛਾ’’ਤਿ. ਤੇਨਪਿ ‘‘ਸਤੇਕਿਚ੍ਛੋ’’ਤਿ ਵਿਨਿਚ੍ਛਿਤੇ ‘‘ਸਾਧੁ ਸੁਟ੍ਠੁ ਤਸ੍ਸ ਵਚਨਂ ਕਰੋਹੀ’’ਤਿ ਵਤ੍ਤਬ੍ਬੋ. ਅਥ ਤਸ੍ਸ ਸਦ੍ਧਿਂ ਉਗ੍ਗਹਿਤਤ੍ਥੇਰੋਪਿ ਨਤ੍ਥਿ, ਅਨ੍ਤੇਵਾਸਿਕੋ ਪਣ੍ਡਿਤੋ ਅਤ੍ਥਿ, ਤਸ੍ਸ ਸਨ੍ਤਿਕਂ ਪੇਸੇਤਬ੍ਬੋ ‘‘ਅਸੁਕਦਹਰਂ ਗਨ੍ਤ੍ਵਾ ਪੁਚ੍ਛਾ’’ਤਿ. ਤੇਨਪਿ ‘‘ਸਤੇਕਿਚ੍ਛੋ’’ਤਿ ਵਿਨਿਚ੍ਛਿਤੇ ‘‘ਸਾਧੁ ਸੁਟ੍ਠੁ ਤਸ੍ਸ ਵਚਨਂ ਕਰੋਹੀ’’ਤਿ ਵਤ੍ਤਬ੍ਬੋ. ਅਥ ਦਹਰਸ੍ਸਪਿ ਪਾਰਾਜਿਕਚ੍ਛਾਯਾਵ ਉਪਟ੍ਠਾਤਿ, ਤੇਨਪਿ ‘‘ਪਾਰਾਜਿਕੋਸੀ’’ਤਿ ਨ ਵਤ੍ਤਬ੍ਬੋ. ਦੁਲ੍ਲਭੋ ਹਿ ਬੁਦ੍ਧੁਪ੍ਪਾਦੋ, ਤਤੋ ਦੁਲ੍ਲਭਤਰਾ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ. ਏਵਂ ਪਨ ਵਤ੍ਤਬ੍ਬੋ ‘‘ਵਿਵਿਤ੍ਤਂ ਓਕਾਸਂ ਸਮ੍ਮਜ੍ਜਿਤ੍ਵਾ ਦਿਵਾਵਿਹਾਰਂ ਨਿਸੀਦਿਤ੍ਵਾ ਸੀਲਾਨਿ ਵਿਸੋਧੇਤ੍ਵਾ ਦ੍ਵਤ੍ਤਿਂਸਾਕਾਰਂ ਤਾਵ ਮਨਸਿਕਰੋਹੀ’’ਤਿ. ਸਚੇ ਤਸ੍ਸ ਅਰੋਗਂ ਸੀਲਂ, ਕਮ੍ਮਟ੍ਠਾਨਂ ਘਟਯਤਿ, ਸਙ੍ਖਾਰਾ ਪਾਕਟਾ ਹੁਤ੍ਵਾ ਉਪਟ੍ਠਹਨ੍ਤਿ, ਉਪਚਾਰਪ੍ਪਨਾਪ੍ਪਤ੍ਤਂ ਵਿਯ ਚਿਤ੍ਤਂ ਏਕਗ੍ਗਂ ਹੋਤਿ, ਦਿਵਸਂ ਅਤਿਕ੍ਕਨ੍ਤਮ੍ਪਿ ਨ ਜਾਨਾਤਿ, ਸੋ ਦਿਵਸਾਤਿਕ੍ਕਮੇ ਉਪਟ੍ਠਾਨਂ ਆਗਤੋ ਏਵਂ ਵਤ੍ਤਬ੍ਬੋ ‘‘ਕੀਦਿਸਾ ਤੇ ਚਿਤ੍ਤਪ੍ਪਵਤ੍ਤੀ’’ਤਿ. ਆਰੋਚਿਤਾਯ ਚ ਚਿਤ੍ਤਪਵਤ੍ਤਿਯਾ ਵਤ੍ਤਬ੍ਬੋ ‘‘ਪਬ੍ਬਜ੍ਜਾ ਨਾਮ ਚਿਤ੍ਤਵਿਸੁਦ੍ਧਤ੍ਥਾਯ, ਅਪ੍ਪਮਤ੍ਤੋ ਸਮਣਧਮ੍ਮਂ ਕਰੋਹੀ’’ਤਿ.

ਯਸ੍ਸ ਪਨ ਸੀਲਂ ਭਿਨ੍ਨਂ ਹੋਤਿ, ਤਸ੍ਸ ਕਮ੍ਮਟ੍ਠਾਨਂ ਨ ਘਟਯਤਿ, ਪਤੋਦਾਭਿਤੁਨ੍ਨਂ ਵਿਯ ਚਿਤ੍ਤਂ ਵਿਕਮ੍ਪਤਿ, ਵਿਪ੍ਪਟਿਸਾਰਗ੍ਗਿਨਾ ਡਯ੍ਹਤਿ, ਤਤ੍ਤਪਾਸਾਣੇ ਨਿਸਿਨ੍ਨੋ ਵਿਯ ਤਙ੍ਖਣੇਯੇਵ ਵੁਟ੍ਠਾਤਿ. ਸੋ ਆਗਤੋ ‘‘ਕਾ ਤੇ ਚਿਤ੍ਤਪਵਤ੍ਤੀ’’ਤਿ ਪੁਚ੍ਛਿਤਬ੍ਬੋ. ਆਰੋਚਿਤਾਯ ਚਿਤ੍ਤਪਵਤ੍ਤਿਯਾ ‘‘ਨਤ੍ਥਿ ਲੋਕੇ ਰਹੋ ਨਾਮ ਪਾਪਕਮ੍ਮਂ ਪਕੁਬ੍ਬਤੋ. ਸਬ੍ਬਪਠਮਞ੍ਹਿ ਪਾਪਂ ਕਰੋਨ੍ਤੋ ਅਤ੍ਤਨਾ ਜਾਨਾਤਿ. ਅਥਸ੍ਸ ਆਰਕ੍ਖਦੇਵਤਾ ਪਰਚਿਤ੍ਤਵਿਦੂ ਸਮਣਬ੍ਰਾਹ੍ਮਣਾ ਅਞ੍ਞਾ ਚ ਦੇਵਤਾ ਜਾਨਨ੍ਤਿ, ਤ੍ਵਂਯੇਵ ਦਾਨਿ ਤਵ ਸੋਤ੍ਥਿਂ ਪਰਿਯੇਸਾਹੀ’’ਤਿ ਵਤ੍ਤਬ੍ਬੋ. ਏਵਂ ਕਤਵੀਤਿਕ੍ਕਮੇਨੇਵ ਭਿਕ੍ਖੁਨਾ ਸਯਮੇਵ ਆਗਨ੍ਤ੍ਵਾ ਆਰੋਚਿਤੇ ਪਟਿਪਜ੍ਜਿਤਬ੍ਬਂ.

੨੩੫. ਇਦਾਨਿ ਯਾ ਸਾ ਪੁਬ੍ਬੇ ਵੁਤ੍ਤਪ੍ਪਭੇਦਾ ਚੋਦਨਾ, ਤਸ੍ਸਾਯੇਵ ਸਮ੍ਪਤ੍ਤਿਵਿਪਤ੍ਤਿਜਾਨਨਤ੍ਥਂ ਆਦਿਮਜ੍ਝਪਰਿਯੋਸਾਨਾਦੀਨਂ ਵਸੇਨ ਵਿਨਿਚ੍ਛਯੋ ਵੇਦਿਤਬ੍ਬੋ. ਸੇਯ੍ਯਥਿਦਂ, ਚੋਦਨਾਯ ਕੋ ਆਦਿ, ਕਿਂ ਮਜ੍ਝੇ, ਕਿਂ ਪਰਿਯੋਸਾਨਂ? ਚੋਦਨਾਯ ‘‘ਅਹਂ ਤਂ ਵਤ੍ਤੁਕਾਮੋ, ਕਰੋਤੁ ਮੇ ਆਯਸ੍ਮਾ ਓਕਾਸ’’ਨ੍ਤਿ ਏਵਂ ਓਕਾਸਕਮ੍ਮਂ ਆਦਿ. ਓਤਿਣ੍ਣੇਨ ਵਤ੍ਥੁਨਾ ਚੋਦੇਤ੍ਵਾ ਸਾਰੇਤ੍ਵਾ ਵਿਨਿਚ੍ਛਯੋ ਮਜ੍ਝੇ. ਆਪਤ੍ਤਿਯਂ ਵਾ ਅਨਾਪਤ੍ਤਿਯਂ ਵਾ ਪਤਿਟ੍ਠਾਪਨੇਨ ਸਮਥੋ ਪਰਿਯੋਸਾਨਂ.

ਚੋਦਨਾਯ ਕਤਿ ਮੂਲਾਨਿ, ਕਤਿ ਵਤ੍ਥੂਨਿ, ਕਤਿ ਭੂਮਿਯੋ? ਚੋਦਨਾਯ ਦ੍ਵੇ ਮੂਲਾਨਿ ਸਮੂਲਿਕਾ ਵਾ ਅਮੂਲਿਕਾ ਵਾ. ਤੀਣਿ ਵਤ੍ਥੂਨਿ ਦਿਟ੍ਠਂ ਸੁਤਂ ਪਰਿਸਙ੍ਕਿਤਂ. ਪਞ੍ਚ ਭੂਮਿਯੋ ਕਾਲੇਨ ਵਕ੍ਖਾਮਿ, ਨੋ ਅਕਾਲੇਨ, ਭੂਤੇਨ ਵਕ੍ਖਾਮਿ, ਨੋ ਅਭੂਤੇਨ, ਸਣ੍ਹੇਨ ਵਕ੍ਖਾਮਿ, ਨੋ ਫਰੁਸੇਨ, ਅਤ੍ਥਸਂਹਿਤੇਨ ਵਕ੍ਖਾਮਿ, ਨੋ ਅਨਤ੍ਥਸਂਹਿਤੇਨ, ਮੇਤ੍ਤਚਿਤ੍ਤੋ ਵਕ੍ਖਾਮਿ, ਨੋ ਦੋਸਨ੍ਤਰੋਤਿ. ਇਮਾਯ ਚ ਪਨ ਚੋਦਨਾਯ ਚੋਦਕੇਨ ਪੁਗ੍ਗਲੇਨ ‘‘ਪਰਿਸੁਦ੍ਧਕਾਯਸਮਾਚਾਰੋ ਨੁ ਖੋਮ੍ਹੀ’’ਤਿਆਦਿਨਾ (ਪਰਿ. ੪੩੬) ਨਯੇਨ ਉਪਾਲਿਪਞ੍ਚਕੇਸੁ ਵੁਤ੍ਤੇਸੁ ਪਨ੍ਨਰਸਸੁ ਧਮ੍ਮੇਸੁ ਪਤਿਟ੍ਠਾਤਬ੍ਬਂ. ਚੁਦਿਤਕੇਨ ਦ੍ਵੀਸੁ ਧਮ੍ਮੇਸੁ ਪਤਿਟ੍ਠਾਤਬ੍ਬਂ ਸਚ੍ਚੇ ਚ ਅਕੁਪ੍ਪੇ ਚਾਤਿ.

ਅਨੁਵਿਜ੍ਜਕੇਨ (ਪਰਿ. ੩੬੦) ਚ ਚੋਦਕੋ ਪੁਚ੍ਛਿਤਬ੍ਬੋ ‘‘ਯਂ ਖੋ ਤ੍ਵਂ, ਆਵੁਸੋ, ਇਮਂ ਭਿਕ੍ਖੁਂ ਚੋਦੇਸਿ, ਕਿਮ੍ਹਿ ਨਂ ਚੋਦੇਸਿ, ਸੀਲਵਿਪਤ੍ਤਿਯਾ ਚੋਦੇਸਿ, ਆਚਾਰਵਿਪਤ੍ਤਿਯਾ ਚੋਦੇਸਿ, ਦਿਟ੍ਠਿਵਿਪਤ੍ਤਿਯਾ ਚੋਦੇਸੀ’’ਤਿ. ਸੋ ਚੇ ਏਵਂ ਵਦੇਯ੍ਯ ‘‘ਸੀਲਵਿਪਤ੍ਤਿਯਾ ਵਾ ਚੋਦੇਮਿ, ਆਚਾਰਵਿਪਤ੍ਤਿਯਾ ਵਾ ਚੋਦੇਮਿ, ਦਿਟ੍ਠਿਵਿਪਤ੍ਤਿਯਾ ਵਾ ਚੋਦੇਮੀ’’ਤਿ. ਸੋ ਏਵਮਸ੍ਸ ਵਚਨੀਯੋ ‘‘ਜਾਨਾਸਿ ਪਨਾਯਸ੍ਮਾ ਸੀਲਵਿਪਤ੍ਤਿਂ, ਜਾਨਾਸਿ ਆਚਾਰਵਿਪਤ੍ਤਿਂ, ਜਾਨਾਸਿ ਦਿਟ੍ਠਿਵਿਪਤ੍ਤਿ’’ਨ੍ਤਿ. ਸੋ ਚੇ ਏਵਂ ਵਦੇਯ੍ਯ ‘‘ਜਾਨਾਮਿ ਖੋ ਅਹਂ, ਆਵੁਸੋ, ਸੀਲਵਿਪਤ੍ਤਿਂ, ਜਾਨਾਮਿ ਆਚਾਰਵਿਪਤ੍ਤਿਂ, ਜਾਨਾਮਿ ਦਿਟ੍ਠਿਵਿਪਤ੍ਤਿ’’ਨ੍ਤਿ. ਸੋ ਏਵਮਸ੍ਸ ਵਚਨੀਯੋ ‘‘ਕਤਮਾ ਪਨਾਵੁਸੋ, ਸੀਲਵਿਪਤ੍ਤਿ, ਕਤਮਾ ਆਚਾਰਵਿਪਤ੍ਤਿ, ਕਤਮਾ ਦਿਟ੍ਠਿਵਿਪਤ੍ਤੀ’’ਤਿ? ਸੋ ਚੇ ਏਵਂ ਵਦੇਯ੍ਯ ‘‘ਚਤ੍ਤਾਰਿ ਪਾਰਾਜਿਕਾਨਿ ਤੇਰਸ ਸਙ੍ਘਾਦਿਸੇਸਾ, ਅਯਂ ਸੀਲਵਿਪਤ੍ਤਿ. ਥੁਲ੍ਲਚ੍ਚਯਂ ਪਾਚਿਤ੍ਤਿਯਂ ਪਾਟਿਦੇਸਨੀਯਂ ਦੁਕ੍ਕਟਂ ਦੁਬ੍ਭਾਸਿਤਂ, ਅਯਂ ਆਚਾਰਵਿਪਤ੍ਤਿ. ਮਿਚ੍ਛਾਦਿਟ੍ਠਿ ਅਨ੍ਤਗ੍ਗਾਹਿਕਾ ਦਿਟ੍ਠਿ, ਅਯਂ ਦਿਟ੍ਠਿਵਿਪਤ੍ਤੀ’’ਤਿ.

ਸੋ ਏਵਮਸ੍ਸ ਵਚਨੀਯੋ ‘‘ਯਂ ਖੋ ਤ੍ਵਂ, ਆਵੁਸੋ, ਇਮਂ ਭਿਕ੍ਖੁਂ ਚੋਦੇਸਿ, ਦਿਟ੍ਠੇਨ ਵਾ ਚੋਦੇਸਿ, ਸੁਤੇਨ ਵਾ ਚੋਦੇਸਿ, ਪਰਿਸਙ੍ਕਾਯ ਵਾ ਚੋਦੇਸੀ’’ਤਿ. ਸੋ ਚੇ ਏਵਂ ਵਦੇਯ੍ਯ ‘‘ਦਿਟ੍ਠੇਨ ਵਾ ਚੋਦੇਮਿ, ਸੁਤੇਨ ਵਾ ਚੋਦੇਮਿ, ਪਰਿਸਙ੍ਕਾਯ ਵਾ ਚੋਦੇਮੀ’’ਤਿ. ਸੋ ਏਵਮਸ੍ਸ ਵਚਨੀਯੋ ‘‘ਯਂ ਖੋ ਤ੍ਵਂ, ਆਵੁਸੋ, ਇਮਂ ਭਿਕ੍ਖੁਂ ਦਿਟ੍ਠੇਨ ਚੋਦੇਸਿ, ਕਿਂ ਤੇ ਦਿਟ੍ਠਂ, ਕਿਨ੍ਤਿ ਤੇ ਦਿਟ੍ਠਂ, ਕਦਾ ਤੇ ਦਿਟ੍ਠਂ, ਕਤ੍ਥ ਤੇ ਦਿਟ੍ਠਂ, ਪਾਰਾਜਿਕਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ, ਸਙ੍ਘਾਦਿਸੇਸਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ, ਥੁਲ੍ਲਚ੍ਚਯਂ ਪਾਚਿਤ੍ਤਿਯਂ ਪਾਟਿਦੇਸਨੀਯਂ ਦੁਕ੍ਕਟਂ ਦੁਬ੍ਭਾਸਿਤਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ, ਕਤ੍ਥ ਚਾਯਂ ਭਿਕ੍ਖੁ ਅਹੋਸਿ, ਕਤ੍ਥ ਚ ਤ੍ਵਂ ਕਰੋਸਿ, ਕਿਞ੍ਚ ਤ੍ਵਂ ਕਰੋਸਿ, ਕਿਂ ਅਯਂ ਭਿਕ੍ਖੁ ਕਰੋਤੀ’’ਤਿ?

ਸੋ ਚੇ ਏਵਂ ਵਦੇਯ੍ਯ ‘‘ਨ ਖੋ ਅਹਂ, ਆਵੁਸੋ, ਇਮਂ ਭਿਕ੍ਖੁਂ ਦਿਟ੍ਠੇਨ ਚੋਦੇਮਿ, ਅਪਿਚ ਸੁਤੇਨ ਚੋਦੇਮੀ’’ਤਿ. ਸੋ ਏਵਮਸ੍ਸ ਵਚਨੀਯੋ ‘‘ਯਂ ਖੋ ਤ੍ਵਂ, ਆਵੁਸੋ, ਇਮਂ ਭਿਕ੍ਖੁਂ ਸੁਤੇਨ ਚੋਦੇਸਿ, ਕਿਂ ਤੇ ਸੁਤਂ, ਕਿਨ੍ਤਿ ਤੇ ਸੁਤਂ, ਕਦਾ ਤੇ ਸੁਤਂ, ਕਤ੍ਥ ਤੇ ਸੁਤਂ, ਪਾਰਾਜਿਕਂ ਅਜ੍ਝਾਪਨ੍ਨੋਤਿ ਸੁਤਂ, ਸਙ੍ਘਾਦਿਸੇਸਂ ਅਜ੍ਝਾਪਨ੍ਨੋਤਿ ਸੁਤਂ, ਥੁਲ੍ਲਚ੍ਚਯਂ ਪਾਚਿਤ੍ਤਿਯਂ ਪਾਟਿਦੇਸਨੀਯਂ ਦੁਕ੍ਕਟਂ ਦੁਬ੍ਭਾਸਿਤਂ ਅਜ੍ਝਾਪਨ੍ਨੋਤਿ ਸੁਤਂ, ਭਿਕ੍ਖੁਸ੍ਸ ਸੁਤਂ, ਭਿਕ੍ਖੁਨਿਯਾ ਸੁਤਂ, ਸਿਕ੍ਖਮਾਨਾਯ ਸੁਤਂ, ਸਾਮਣੇਰਸ੍ਸ ਸੁਤਂ, ਸਾਮਣੇਰਿਯਾ ਸੁਤਂ, ਉਪਾਸਕਸ੍ਸ ਸੁਤਂ, ਉਪਾਸਿਕਾਯ ਸੁਤਂ, ਰਾਜੂਨਂ ਸੁਤਂ, ਰਾਜਮਹਾਮਤ੍ਤਾਨਂ ਸੁਤਂ, ਤਿਤ੍ਥਿਯਾਨਂ ਸੁਤਂ, ਤਿਤ੍ਥਿਯਸਾਵਕਾਨਂ ਸੁਤ’’ਨ੍ਤਿ.

ਸੋ ਚੇ ਏਵਂ ਵਦੇਯ੍ਯ ‘‘ਨ ਖੋ ਅਹਂ, ਆਵੁਸੋ, ਇਮਂ ਭਿਕ੍ਖੁਂ ਸੁਤੇਨ ਚੋਦੇਮਿ, ਅਪਿਚ ਪਰਿਸਙ੍ਕਾਯ ਚੋਦੇਮੀ’’ਤਿ. ਸੋ ਏਵਮਸ੍ਸ ਵਚਨੀਯੋ ‘‘ਯਂ ਖੋ ਤ੍ਵਂ, ਆਵੁਸੋ, ਇਮਂ ਭਿਕ੍ਖੁਂ ਪਰਿਸਙ੍ਕਾਯ ਚੋਦੇਸਿ, ਕਿਂ ਪਰਿਸਙ੍ਕਸਿ, ਕਿਨ੍ਤਿ ਪਰਿਸਙ੍ਕਸਿ, ਕਦਾ ਪਰਿਸਙ੍ਕਸਿ, ਕਤ੍ਥ ਪਰਿਸਙ੍ਕਸਿ? ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਤਿ ਪਰਿਸਙ੍ਕਸਿ, ਸਙ੍ਘਾਦਿਸੇਸਂ ਥੁਲ੍ਲਚ੍ਚਯਂ ਪਾਚਿਤ੍ਤਿਯਂ ਪਾਟਿਦੇਸਨੀਯਂ ਦੁਕ੍ਕਟਂ ਦੁਬ੍ਭਾਸਿਤਂ ਅਜ੍ਝਾਪਨ੍ਨੋਤਿ ਪਰਿਸਙ੍ਕਸਿ, ਭਿਕ੍ਖੁਸ੍ਸ ਸੁਤ੍ਵਾ ਪਰਿਸਙ੍ਕਸਿ, ਭਿਕ੍ਖੁਨਿਯਾ ਸੁਤ੍ਵਾ…ਪੇ… ਤਿਤ੍ਥਿਯਸਾਵਕਾਨਂ ਸੁਤ੍ਵਾ ਪਰਿਸਙ੍ਕਸੀ’’ਤਿ.

ਦਿਟ੍ਠਂ ਦਿਟ੍ਠੇਨ ਸਮੇਤਿ, ਦਿਟ੍ਠੇਨ ਸਂਸਨ੍ਦਤੇ ਦਿਟ੍ਠਂ;

ਦਿਟ੍ਠਂ ਪਟਿਚ੍ਚ ਨ ਉਪੇਤਿ, ਅਸੁਦ੍ਧਪਰਿਸਙ੍ਕਿਤੋ;

ਸੋ ਪੁਗ੍ਗਲੋ ਪਟਿਞ੍ਞਾਯ, ਕਾਤਬ੍ਬੋ ਤੇਨੁਪੋਸਥੋ.

ਸੁਤਂ ਸੁਤੇਨ ਸਮੇਤਿ, ਸੁਤੇਨ ਸਂਸਨ੍ਦਤੇ ਸੁਤਂ;

ਸੁਤਂ ਪਟਿਚ੍ਚ ਨ ਉਪੇਤਿ, ਅਸੁਦ੍ਧਪਰਿਸਙ੍ਕਿਤੋ;

ਸੋ ਪੁਗ੍ਗਲੋ ਪਟਿਞ੍ਞਾਯ, ਕਾਤਬ੍ਬੋ ਤੇਨੁਪੋਸਥੋ.

ਮੁਤਂ ਮੁਤੇਨ ਸਮੇਤਿ, ਮੁਤੇਨ ਸਂਸਨ੍ਦਤੇ ਮੁਤਂ;

ਮੁਤਂ ਪਟਿਚ੍ਚ ਨ ਉਪੇਤਿ, ਅਸੁਦ੍ਧਪਰਿਸਙ੍ਕਿਤੋ;

ਸੋ ਪੁਗ੍ਗਲੋ ਪਟਿਞ੍ਞਾਯ, ਕਾਤਬ੍ਬੋ ਤੇਨੁਪੋਸਥੋ.

ਪਟਿਞ੍ਞਾ ਲਜ੍ਜੀਸੁ ਕਤਾ, ਅਲਜ੍ਜੀਸੁ ਏਵਂ ਨ ਵਿਜ੍ਜਤਿ;

ਬਹੁਮ੍ਪਿ ਅਲਜ੍ਜੀ ਭਾਸੇਯ੍ਯ, ਵਤ੍ਤਾਨੁਸਨ੍ਧਿਤੇਨ ਕਾਰਯੇਤਿ. (ਪਰਿ. ੩੫੯);

ਅਪਿਚੇਤ੍ਥ ਸਙ੍ਗਾਮਾਵਚਰੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਨ੍ਤੇਨ ਨੀਚਚਿਤ੍ਤੇਨ ਸਙ੍ਘੋ ਉਪਸਙ੍ਕਮਿਤਬ੍ਬੋ ਰਜੋਹਰਣਸਮੇਨ ਚਿਤ੍ਤੇਨ, ਆਸਨਕੁਸਲੇਨ ਭਵਿਤਬ੍ਬਂ ਨਿਸਜ੍ਜਕੁਸਲੇਨ, ਥੇਰੇ ਭਿਕ੍ਖੂ ਅਨੁਪਖਜ੍ਜਨ੍ਤੇਨ ਨਵੇ ਭਿਕ੍ਖੂ ਆਸਨੇਨ ਅਪ੍ਪਟਿਬਾਹਨ੍ਤੇਨ ਯਥਾਪਤਿਰੂਪੇ ਆਸਨੇ ਨਿਸੀਦਿਤਬ੍ਬਂ, ਅਨਾਨਾਕਥਿਕੇਨ ਭਵਿਤਬ੍ਬਂ ਅਤਿਰਚ੍ਛਾਨਕਥਿਕੇਨ, ਸਾਮਂ ਵਾ ਧਮ੍ਮੋ ਭਾਸਿਤਬ੍ਬੋ, ਪਰੋ ਵਾ ਅਜ੍ਝੇਸਿਤਬ੍ਬੋ, ਅਰਿਯੋ ਵਾ ਤੁਣ੍ਹੀਭਾਵੋ ਨਾਤਿਮਞ੍ਞਿਤਬ੍ਬੋ.

ਸਙ੍ਘੇਨ ਅਨੁਮਤੇਨ ਪੁਗ੍ਗਲੇਨ ਅਨੁਵਿਜ੍ਜਕੇਨ ਅਨੁਵਿਜ੍ਜਿਤੁਕਾਮੇਨ ਨ ਉਪਜ੍ਝਾਯੋ ਪੁਚ੍ਛਿਤਬ੍ਬੋ, ਨ ਆਚਰਿਯੋ ਪੁਚ੍ਛਿਤਬ੍ਬੋ, ਨ ਸਦ੍ਧਿਵਿਹਾਰਿਕੋ ਪੁਚ੍ਛਿਤਬ੍ਬੋ, ਨ ਅਨ੍ਤੇਵਾਸਿਕੋ ਪੁਚ੍ਛਿਤਬ੍ਬੋ, ਨ ਸਮਾਨੁਪਜ੍ਝਾਯਕੋ ਪੁਚ੍ਛਿਤਬ੍ਬੋ, ਨ ਸਮਾਨਾਚਰਿਯਕੋ ਪੁਚ੍ਛਿਤਬ੍ਬੋ, ਨ ਜਾਤਿ ਪੁਚ੍ਛਿਤਬ੍ਬਾ, ਨ ਨਾਮਂ ਪੁਚ੍ਛਿਤਬ੍ਬਂ, ਨ ਗੋਤ੍ਤਂ ਪੁਚ੍ਛਿਤਬ੍ਬਂ, ਨ ਆਗਮੋ ਪੁਚ੍ਛਿਤਬ੍ਬੋ, ਨ ਕੁਲਪਦੇਸੋ ਪੁਚ੍ਛਿਤਬ੍ਬੋ, ਨ ਜਾਤਿਭੂਮਿ ਪੁਚ੍ਛਿਤਬ੍ਬਾ. ਤਂ ਕਿਂਕਾਰਣਾ? ਅਤ੍ਰਸ੍ਸ ਪੇਮਂ ਵਾ ਦੋਸੋ ਵਾ, ਪੇਮੇ ਵਾ ਸਤਿ ਦੋਸੇ ਵਾ ਛਨ੍ਦਾਪਿ ਗਚ੍ਛੇਯ੍ਯ ਦੋਸਾਪਿ ਗਚ੍ਛੇਯ੍ਯ ਮੋਹਾਪਿ ਗਚ੍ਛੇਯ੍ਯ ਭਯਾਪਿ ਗਚ੍ਛੇਯ੍ਯਾਤਿ.

ਸਙ੍ਘੇਨ ਅਨੁਮਤੇਨ ਪੁਗ੍ਗਲੇਨ ਅਨੁਵਿਜ੍ਜਕੇਨ ਅਨੁਵਿਜ੍ਜਿਤੁਕਾਮੇਨ ਸਙ੍ਘਗਰੁਕੇਨ ਭਵਿਤਬ੍ਬਂ, ਨੋ ਪੁਗ੍ਗਲਗਰੁਕੇਨ, ਸਦ੍ਧਮ੍ਮਗਰੁਕੇਨ ਭਵਿਤਬ੍ਬਂ, ਨੋ ਆਮਿਸਗਰੁਕੇਨ, ਅਤ੍ਥਵਸਿਕੇਨ ਭਵਿਤਬ੍ਬਂ, ਨੋ ਪਰਿਸਕਪ੍ਪਿਕੇਨ, ਕਾਲੇਨ ਅਨੁਵਿਜ੍ਜਿਤਬ੍ਬਂ, ਨੋ ਅਕਾਲੇਨ, ਭੂਤੇਨ ਅਨੁਵਿਜ੍ਜਿਤਬ੍ਬਂ, ਨੋ ਅਭੂਤੇਨ, ਸਣ੍ਹੇਨ ਅਨੁਵਿਜ੍ਜਿਤਬ੍ਬਂ, ਨੋ ਫਰੁਸੇਨ, ਅਤ੍ਥਸਂਹਿਤੇਨ ਅਨੁਵਿਜ੍ਜਿਤਬ੍ਬਂ, ਨੋ ਅਨਤ੍ਥਸਂਹਿਤੇਨ, ਮੇਤ੍ਤਚਿਤ੍ਤੇਨ ਅਨੁਵਿਜ੍ਜਿਤਬ੍ਬਂ, ਨੋ ਦੋਸਨ੍ਤਰੇਨ, ਨ ਉਪਕਣ੍ਣਕਜਪ੍ਪਿਨਾ ਭਵਿਤਬ੍ਬਂ, ਨ ਜਿਮ੍ਹਂ ਪੇਕ੍ਖਿਤਬ੍ਬਂ, ਨ ਅਕ੍ਖਿ ਨਿਖਣਿਤਬ੍ਬਂ, ਨ ਭਮੁਕਂ ਉਕ੍ਖਿਪਿਤਬ੍ਬਂ, ਨ ਸੀਸਂ ਉਕ੍ਖਿਪਿਤਬ੍ਬਂ, ਨ ਹਤ੍ਥਵਿਕਾਰੋ ਕਾਤਬ੍ਬੋ, ਨ ਹਤ੍ਥਮੁਦ੍ਦਾ ਦਸ੍ਸੇਤਬ੍ਬਾ.

ਆਸਨਕੁਸਲੇਨ ਭਵਿਤਬ੍ਬਂ ਨਿਸਜ੍ਜਕੁਸਲੇਨ, ਯੁਗਮਤ੍ਤਂ ਪੇਕ੍ਖਨ੍ਤੇਨ ਅਤ੍ਥਂ ਅਨੁਵਿਧਿਯਨ੍ਤੇਨ ਸਕੇ ਆਸਨੇ ਨਿਸੀਦਿਤਬ੍ਬਂ, ਨ ਚ ਆਸਨਾ ਵੁਟ੍ਠਾਤਬ੍ਬਂ, ਨ ਵੀਤਿਹਾਤਬ੍ਬਂ, ਨ ਕੁਮ੍ਮਗ੍ਗੋ ਸੇਵਿਤਬ੍ਬੋ, ਨ ਬਾਹਾਵਿਕ੍ਖੇਪਕਂ ਭਣਿਤਬ੍ਬਂ, ਅਤੁਰਿਤੇਨ ਭਵਿਤਬ੍ਬਂ ਅਸਾਹਸਿਕੇਨ, ਅਚਣ੍ਡਿਕਤੇਨ ਭਵਿਤਬ੍ਬਂ ਵਚਨਕ੍ਖਮੇਨ, ਮੇਤ੍ਤਚਿਤ੍ਤੇਨ ਭਵਿਤਬ੍ਬਂ ਹਿਤਾਨੁਕਮ੍ਪਿਨਾ, ਕਾਰੁਣਿਕੇਨ ਭਵਿਤਬ੍ਬਂ ਹਿਤਪਰਿਸਕ੍ਕਿਨਾ, ਅਸਮ੍ਫਪ੍ਪਲਾਪਿਨਾ ਭਵਿਤਬ੍ਬਂ ਪਰਿਯਨ੍ਤਭਾਣਿਨਾ, ਅਵੇਰਵਸਿਕੇਨ ਭਵਿਤਬ੍ਬਂ ਅਨਸੁਰੁਤ੍ਤੇਨ, ਅਤ੍ਤਾ ਪਰਿਗ੍ਗਹੇਤਬ੍ਬੋ, ਪਰੋ ਪਰਿਗ੍ਗਹੇਤਬ੍ਬੋ, ਚੋਦਕੋ ਪਰਿਗ੍ਗਹੇਤਬ੍ਬੋ, ਚੁਦਿਤਕੋ ਪਰਿਗ੍ਗਹੇਤਬ੍ਬੋ, ਅਧਮ੍ਮਚੋਦਕੋ ਪਰਿਗ੍ਗਹੇਤਬ੍ਬੋ, ਅਧਮ੍ਮਚੁਦਿਤਕੋ ਪਰਿਗ੍ਗਹੇਤਬ੍ਬੋ, ਧਮ੍ਮਚੋਦਕੋ ਪਰਿਗ੍ਗਹੇਤਬ੍ਬੋ, ਧਮ੍ਮਚੁਦਿਤਕੋ ਪਰਿਗ੍ਗਹੇਤਬ੍ਬੋ, ਵੁਤ੍ਤਂ ਅਹਾਪੇਨ੍ਤੇਨ ਅਵੁਤ੍ਤਂ ਅਪ੍ਪਕਾਸੇਨ੍ਤੇਨ ਓਤਿਣ੍ਣਾਨਿ ਪਦਬ੍ਯਞ੍ਜਨਾਨਿ ਸਾਧੁਕਂ ਉਗ੍ਗਹੇਤ੍ਵਾ ਪਰੋ ਪਰਿਪੁਚ੍ਛਿਤ੍ਵਾ ਯਥਾਪਟਿਞ੍ਞਾਯ ਕਾਰੇਤਬ੍ਬੋ, ਮਨ੍ਦੋ ਹਾਸੇਤਬ੍ਬੋ, ਭੀਰੁ ਅਸ੍ਸਾਸੇਤਬ੍ਬੋ, ਚਣ੍ਡੋ ਨਿਸੇਧੇਤਬ੍ਬੋ, ਅਸੁਚਿ ਵਿਭਾਵੇਤਬ੍ਬੋ, ਉਜੁਮਦ੍ਦਵੇਨ ਨ ਛਨ੍ਦਾਗਤਿ ਗਨ੍ਤਬ੍ਬਾ, ਨ ਦੋਸਾਗਤਿ ਗਨ੍ਤਬ੍ਬਾ, ਨ ਮੋਹਾਗਤਿ ਗਨ੍ਤਬ੍ਬਾ, ਨ ਭਯਾਗਤਿ ਗਨ੍ਤਬ੍ਬਾ, ਮਜ੍ਝਤ੍ਤੇਨ ਭਵਿਤਬ੍ਬਂ ਧਮ੍ਮੇਸੁ ਚ ਪੁਗ੍ਗਲੇਸੁ ਚ, ਏਵਞ੍ਚ ਪਨ ਅਨੁਵਿਜ੍ਜਕੋ ਅਨੁਵਿਜ੍ਜਮਾਨੋ ਸਤ੍ਥੁ ਚੇਵ ਸਾਸਨਕਰੋ ਹੋਤਿ, ਵਿਞ੍ਞੂਨਞ੍ਚ ਸਬ੍ਰਹ੍ਮਚਾਰੀਨਂ ਪਿਯੋ ਚ ਹੋਤਿ ਮਨਾਪੋ ਚ ਗਰੁ ਚ ਭਾਵਨੀਯੋ ਚਾਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਚੋਦਨਾਦਿਵਿਨਿਚ੍ਛਯਕਥਾ ਸਮਤ੍ਤਾ.