੩੦. ਗਰੁਭਣ੍ਡਵਿਨਿਚ੍ਛਯਕਥਾ

੨੨੭. ਗਰੁਭਣ੍ਡਾਨੀਤਿ ਏਤ੍ਥ ‘‘ਪਞ੍ਚਿਮਾਨਿ, ਭਿਕ੍ਖਵੇ, ਅਵਿਸ੍ਸਜ੍ਜਿਯਾਨਿ ਨ ਵਿਸ੍ਸਜ੍ਜੇਤਬ੍ਬਾਨਿ ਸਙ੍ਘੇਨ ਵਾ ਗਣੇਨ ਵਾ ਪੁਗ੍ਗਲੇਨ ਵਾ, ਵਿਸ੍ਸਜ੍ਜਿਤਾਨਿਪਿ ਅਵਿਸ੍ਸਜ੍ਜਿਤਾਨਿ ਹੋਨ੍ਤਿ, ਯੋ ਵਿਸ੍ਸਜ੍ਜੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿਆਦਿਨਾ (ਚੂਲ਼ਵ. ੩੨੧) ਨਯੇਨ ਦਸ੍ਸਿਤਾਨਿ ਆਰਾਮੋ ਆਰਾਮਵਤ੍ਥੁ, ਵਿਹਾਰੋ ਵਿਹਾਰਵਤ੍ਥੁ, ਮਞ੍ਚੋ ਪੀਠਂ ਭਿਸਿ ਬਿਮ੍ਬੋਹਨਂ, ਲੋਹਕੁਮ੍ਭੀ ਲੋਹਭਾਣਕਂ ਲੋਹਵਾਰਕੋ ਲੋਹਕਟਾਹਂ ਵਾਸਿ ਫਰਸੁ ਕੁਠਾਰੀ ਕੁਦਾਲੋ ਨਿਖਾਦਨਂ, ਵਲ੍ਲਿ ਵੇਲ਼ੁ ਮੁਞ੍ਜਂ ਪਬ੍ਬਜਂ ਤਿਣਂ ਮਤ੍ਤਿਕਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਨ੍ਤਿ ਇਮਾਨਿ ਪਞ੍ਚ ਗਰੁਭਣ੍ਡਾਨਿ ਨਾਮ.

ਤਤ੍ਥ (ਚੂਲ਼ਵ. ਅਟ੍ਠ. ੩੨੧) ਆਰਾਮੋ ਨਾਮ ਪੁਪ੍ਫਾਰਾਮੋ ਵਾ ਫਲਾਰਾਮੋ ਵਾ. ਆਰਾਮਵਤ੍ਥੁ ਨਾਮ ਤੇਸਂਯੇਵ ਆਰਾਮਾਨਂ ਅਤ੍ਥਾਯ ਪਰਿਚ੍ਛਿਨ੍ਦਿਤ੍ਵਾ ਠਪਿਤੋਕਾਸੋ, ਤੇਸੁ ਵਾ ਆਰਾਮੇਸੁ ਵਿਨਟ੍ਠੇਸੁ ਤੇਸਂ ਪੋਰਾਣਕਭੂਮਿਭਾਗੋ. ਵਿਹਾਰੋ ਨਾਮ ਯਂ ਕਿਞ੍ਚਿ ਪਾਸਾਦਾਦਿ ਸੇਨਾਸਨਂ. ਵਿਹਾਰਵਤ੍ਥੁ ਨਾਮ ਤਸ੍ਸ ਪਤਿਟ੍ਠਾਨੋਕਾਸੋ. ਮਞ੍ਚੋ ਨਾਮ ਮਸਾਰਕੋ ਬੁਨ੍ਦਿਕਾਬਦ੍ਧੋ ਕੁਲ਼ੀਰਪਾਦਕੋ ਆਹਚ੍ਚਪਾਦਕੋਤਿ ਇਮੇਸਂ ਚਤੁਨ੍ਨਂ ਮਞ੍ਚਾਨਂ ਅਞ੍ਞਤਰੋ. ਪੀਠਂ ਨਾਮ ਮਸਾਰਕਾਦੀਨਂਯੇਵ ਚਤੁਨ੍ਨਂ ਪੀਠਾਨਂ ਅਞ੍ਞਤਰਂ. ਭਿਸਿ ਨਾਮ ਉਣ੍ਣਭਿਸਿਆਦੀਨਂ ਪਞ੍ਚਨ੍ਨਂ ਅਞ੍ਞਤਰਾ. ਬਿਮ੍ਬੋਹਨਂ ਨਾਮ ਰੁਕ੍ਖਤੂਲਲਤਾਤੂਲਪੋਟਕੀਤੂਲਾਨਂ ਅਞ੍ਞਤਰਂ. ਲੋਹਕੁਮ੍ਭੀ ਨਾਮ ਕਾਲ਼ਲੋਹੇਨ ਵਾ ਤਮ੍ਬਲੋਹੇਨ ਵਾ ਯੇਨ ਕੇਨਚਿ ਲੋਹੇਨ ਕਤਕੁਮ੍ਭੀ. ਲੋਹਭਾਣਕਾਦੀਸੁਪਿ ਏਸੇਵ ਨਯੋ. ਏਤ੍ਥ ਪਨ ਭਾਣਕਨ੍ਤਿ ਅਰਞ੍ਜਰੋ ਵੁਚ੍ਚਤਿ. ਵਾਰਕੋਤਿ ਘਟੋ. ਕਟਾਹਂ ਕਟਾਹਮੇਵ. ਵਾਸਿਆਦੀਸੁ ਵਲ੍ਲਿਆਦੀਸੁ ਚ ਦੁਵਿਞ੍ਞੇਯ੍ਯਂ ਨਾਮ ਨਤ੍ਥਿ. ਪਞ੍ਚਾਤਿ ਚ ਰਾਸਿਵਸੇਨ ਵੁਤ੍ਤਂ, ਸਰੂਪਵਸੇਨ ਪਨੇਤਾਨਿ ਪਞ੍ਚਵੀਸਤਿਵਿਧਾਨਿ ਹੋਨ੍ਤਿ. ਵੁਤ੍ਤਞ੍ਹੇਤਂ –

‘‘ਦ੍ਵਿਸਙ੍ਗਹਾਨਿ ਦ੍ਵੇ ਹੋਨ੍ਤਿ, ਤਤਿਯਂ ਚਤੁਸਙ੍ਗਹਂ;

ਚਤੁਤ੍ਥਂ ਨਵਕੋਟ੍ਠਾਸਂ, ਪਞ੍ਚਮਂ ਅਟ੍ਠਭੇਦਨਂ.

‘‘ਇਤਿ ਪਞ੍ਚਹਿ ਰਾਸੀਹਿ, ਪਞ੍ਚਨਿਮ੍ਮਲਲੋਚਨੋ;

ਪਞ੍ਚਵੀਸਵਿਧਂ ਨਾਥੋ, ਗਰੁਭਣ੍ਡਂ ਪਕਾਸਯੀ’’ਤਿ.

ਤਤ੍ਰਾਯਂ ਵਿਨਿਚ੍ਛਯਕਥਾ – ਇਦਞ੍ਹਿ ਸਬ੍ਬਮ੍ਪਿ ਗਰੁਭਣ੍ਡਂ ਸੇਨਾਸਨਕ੍ਖਨ੍ਧਕੇ ‘‘ਅਵਿਸ੍ਸਜ੍ਜਿਯ’’ਨ੍ਤਿ ਵੁਤ੍ਤਂ, ਕੀਟਾਗਿਰਿਵਤ੍ਥੁਸ੍ਮਿਂ ‘‘ਅਵੇਭਙ੍ਗਿਯ’’ਨ੍ਤਿ ਦਸ੍ਸਿਤਂ, ਪਰਿਵਾਰੇ ਪਨ –

‘‘ਅਵਿਸ੍ਸਜ੍ਜਿਯਂ ਅਵੇਭਙ੍ਗਿਯਂ,

ਪਞ੍ਚ ਵੁਤ੍ਤਾ ਮਹੇਸਿਨਾ;

ਵਿਸ੍ਸਜ੍ਜੇਨ੍ਤਸ੍ਸ ਪਰਿਭੁਞ੍ਜਨ੍ਤਸ੍ਸ ਅਨਾਪਤ੍ਤਿ,

ਪਞ੍ਹਾਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੭੯) –

ਆਗਤਂ. ਤਸ੍ਮਾ ਮੂਲਚ੍ਛੇਜ੍ਜਵਸੇਨ ਅਵਿਸ੍ਸਜ੍ਜਿਯਞ੍ਚ ਅਵੇਭਙ੍ਗਿਯਞ੍ਚ, ਪਰਿਵਤ੍ਤਨਵਸੇਨ ਪਨ ਵਿਸ੍ਸਜ੍ਜੇਨ੍ਤਸ੍ਸ ਪਰਿਭੁਞ੍ਜਨ੍ਤਸ੍ਸ ਚ ਅਨਾਪਤ੍ਤੀਤਿ ਏਵਮੇਤ੍ਥ ਅਧਿਪ੍ਪਾਯੋ ਵੇਦਿਤਬ੍ਬੋ.

੨੨੮. ਤਤ੍ਰਾਯਂ ਅਨੁਪੁਬ੍ਬਿਕਥਾ – ਇਦਂ ਤਾਵ ਪਞ੍ਚਵਿਧਮ੍ਪਿ ਚੀਵਰਪਿਣ੍ਡਪਾਤਭੇਸਜ੍ਜਤ੍ਥਾਯ ਉਪਨੇਤੁਂ ਨ ਵਟ੍ਟਤਿ, ਥਾਵਰੇਨ ਚ ਥਾਵਰਂ, ਗਰੁਭਣ੍ਡੇਨ ਚ ਗਰੁਭਣ੍ਡਂ ਪਰਿਵਤ੍ਤੇਤੁਂ ਵਟ੍ਟਤਿ. ਥਾਵਰੇ ਪਨ ਖੇਤ੍ਤਂ ਵਤ੍ਥੁ ਤਲ਼ਾਕਂ ਮਾਤਿਕਾਤਿ ਏਵਰੂਪਂ ਭਿਕ੍ਖੁਸਙ੍ਘਸ੍ਸ ਵਿਚਾਰੇਤੁਂ ਵਾ ਸਮ੍ਪਟਿਚ੍ਛਿਤੁਂ ਵਾ ਅਧਿਵਾਸੇਤੁਂ ਵਾ ਨ ਵਟ੍ਟਤਿ, ਕਪ੍ਪਿਯਕਾਰਕੇਹੇਵ ਵਿਚਾਰਿਤਤੋ ਕਪ੍ਪਿਯਭਣ੍ਡਂ ਵਟ੍ਟਤਿ. ਆਰਾਮੇਨ ਪਨ ਆਰਾਮਂ ਆਰਾਮਵਤ੍ਥੁਂ ਵਿਹਾਰਂ ਵਿਹਾਰਵਤ੍ਥੁਨ੍ਤਿ ਇਮਾਨਿ ਚਤ੍ਤਾਰਿਪਿ ਪਰਿਵਤ੍ਤੇਤੁਂ ਵਟ੍ਟਤਿ.

ਤਤ੍ਰਾਯਂ ਪਰਿਵਤ੍ਤਨਨਯੋ – ਸਙ੍ਘਸ੍ਸ ਨਾਲ਼ਿਕੇਰਾਰਾਮੋ ਦੂਰੇ ਹੋਤਿ, ਕਪ੍ਪਿਯਕਾਰਕਾ ਬਹੁਤਰਂ ਖਾਦਨ੍ਤਿ, ਯਮ੍ਪਿ ਨ ਖਾਦਨ੍ਤਿ, ਤਤੋ ਸਕਟਵੇਤਨਂ ਦਤ੍ਵਾ ਅਪ੍ਪਮੇਵ ਆਹਰਨ੍ਤਿ, ਅਞ੍ਞੇਸਂ ਪਨ ਤਸ੍ਸ ਆਰਾਮਸ੍ਸ ਅਵਿਦੂਰੇ ਗਾਮਵਾਸੀਨਂ ਮਨੁਸ੍ਸਾਨਂ ਵਿਹਾਰਸ੍ਸ ਸਮੀਪੇ ਆਰਾਮੋ ਹੋਤਿ, ਤੇ ਸਙ੍ਘਂ ਉਪਸਙ੍ਕਮਿਤ੍ਵਾ ਸਕੇਨ ਆਰਾਮੇਨ ਤਂ ਆਰਾਮਂ ਯਾਚਨ੍ਤਿ, ਸਙ੍ਘੇਨ ‘‘ਰੁਚ੍ਚਤਿ ਸਙ੍ਘਸ੍ਸਾ’’ਤਿ ਅਪਲੋਕੇਤ੍ਵਾ ਸਮ੍ਪਟਿਚ੍ਛਿਤਬ੍ਬੋ. ਸਚੇਪਿ ਭਿਕ੍ਖੂਨਂ ਰੁਕ੍ਖਸਹਸ੍ਸਂ ਹੋਤਿ, ਮਨੁਸ੍ਸਾਨਂ ਪਞ੍ਚ ਸਤਾਨਿ, ‘‘ਤੁਮ੍ਹਾਕਂ ਆਰਾਮੋ ਖੁਦ੍ਦਕੋ’’ਤਿ ਨ ਵਤ੍ਤਬ੍ਬਂ. ਕਿਞ੍ਚਾਪਿ ਹਿ ਅਯਂ ਖੁਦ੍ਦਕੋ, ਅਥ ਖੋ ਇਤਰਤੋ ਬਹੁਤਰਂ ਆਯਂ ਦੇਤਿ. ਸਚੇਪਿ ਸਮਕਮੇਵ ਦੇਤਿ, ਏਵਮ੍ਪਿ ਇਚ੍ਛਿਤਿਚ੍ਛਿਤਕ੍ਖਣੇ ਪਰਿਭੁਞ੍ਜਿਤੁਂ ਸਕ੍ਕਾਤਿ ਗਹੇਤਬ੍ਬਮੇਵ. ਸਚੇ ਪਨ ਮਨੁਸ੍ਸਾਨਂ ਬਹੁਤਰਾ ਰੁਕ੍ਖਾ ਹੋਨ੍ਤਿ, ‘‘ਨਨੁ ਤੁਮ੍ਹਾਕਂ ਬਹੁਤਰਾ ਰੁਕ੍ਖਾ’’ਤਿ ਵਤ੍ਤਬ੍ਬਂ. ਸਚੇ ‘‘ਅਤਿਰੇਕਂ ਅਮ੍ਹਾਕਂ ਪੁਞ੍ਞਂ ਹੋਤੁ, ਸਙ੍ਘਸ੍ਸ ਦੇਮਾ’’ਤਿ ਵਦਨ੍ਤਿ, ਜਾਨਾਪੇਤ੍ਵਾ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਭਿਕ੍ਖੂਨਂ ਰੁਕ੍ਖਾ ਫਲਧਾਰਿਨੋ, ਮਨੁਸ੍ਸਾਨਂ ਰੁਕ੍ਖਾ ਨ ਤਾਵ ਫਲਂ ਗਣ੍ਹਨ੍ਤਿ, ਕਿਞ੍ਚਾਪਿ ਨ ਗਣ੍ਹਨ੍ਤਿ, ‘‘ਨ ਚਿਰੇਨ ਗਣ੍ਹਿਸ੍ਸਨ੍ਤੀ’’ਤਿ ਸਮ੍ਪਟਿਚ੍ਛਿਤਬ੍ਬਮੇਵ. ਮਨੁਸ੍ਸਾਨਂ ਰੁਕ੍ਖਾ ਫਲਧਾਰਿਨੋ, ਭਿਕ੍ਖੂਨਂ ਰੁਕ੍ਖਾ ਨ ਤਾਵ ਫਲਂ ਗਣ੍ਹਨ੍ਤਿ, ‘‘ਨਨੁ ਤੁਮ੍ਹਾਕਂ ਰੁਕ੍ਖਾ ਫਲਧਾਰਿਨੋ’’ਤਿ ਵਤ੍ਤਬ੍ਬਂ. ਸਚੇ ‘‘ਗਣ੍ਹਥ, ਭਨ੍ਤੇ, ਅਮ੍ਹਾਕਂ ਪੁਞ੍ਞਂ ਭਵਿਸ੍ਸਤੀ’’ਤਿ ਦੇਨ੍ਤਿ, ਜਾਨਾਪੇਤ੍ਵਾ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਏਵਂ ਆਰਾਮੇਨ ਆਰਾਮੋ ਪਰਿਵਤ੍ਤੇਤਬ੍ਬੋ. ਏਤੇਨੇਵ ਨਯੇਨ ਆਰਾਮਵਤ੍ਥੁਪਿ ਵਿਹਾਰੋਪਿ ਵਿਹਾਰਵਤ੍ਥੁਪਿ ਆਰਾਮੇਨ ਪਰਿਵਤ੍ਤੇਤਬ੍ਬਂ, ਆਰਾਮਵਤ੍ਥੁਨਾ ਚ ਮਹਨ੍ਤੇਨ ਵਾ ਖੁਦ੍ਦਕੇਨ ਵਾ ਆਰਾਮਆਰਾਮਵਤ੍ਥੁਵਿਹਾਰਵਿਹਾਰਵਤ੍ਥੂਨਿ.

ਕਥਂ ਵਿਹਾਰੇਨ ਵਿਹਾਰੋ ਪਰਿਵਤ੍ਤੇਤਬ੍ਬੋ? ਸਙ੍ਘਸ੍ਸ ਅਨ੍ਤੋਗਾਮੇ ਗੇਹਂ ਹੋਤਿ, ਮਨੁਸ੍ਸਾਨਂ ਵਿਹਾਰਮਜ੍ਝੇ ਪਾਸਾਦੋ ਹੋਤਿ, ਉਭੋਪਿ ਅਗ੍ਘੇਨ ਸਮਕਾ, ਸਚੇ ਮਨੁਸ੍ਸਾ ਤੇਨ ਪਾਸਾਦੇਨ ਤਂ ਗੇਹਂ ਯਾਚਨ੍ਤਿ, ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਭਿਕ੍ਖੂਨਂ ਚੇ ਮਹਗ੍ਘਤਰਂ ਗੇਹਂ ਹੋਤਿ, ‘‘ਮਹਗ੍ਘਤਰਂ ਅਮ੍ਹਾਕਂ ਗੇਹ’’ਨ੍ਤਿ ਵੁਤ੍ਤੇ ਚ ‘‘ਕਿਞ੍ਚਾਪਿ ਮਹਗ੍ਘਤਰਂ ਪਬ੍ਬਜਿਤਾਨਂ ਅਸਾਰੁਪ੍ਪਂ, ਨ ਸਕ੍ਕਾ ਤਤ੍ਥ ਪਬ੍ਬਜਿਤੇਹਿ ਵਸਿਤੁਂ, ਇਦਂ ਪਨ ਸਾਰੁਪ੍ਪਂ, ਗਣ੍ਹਥਾ’’ਤਿ ਵਦਨ੍ਤਿ, ਏਵਮ੍ਪਿ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਸਚੇ ਪਨ ਮਨੁਸ੍ਸਾਨਂ ਮਹਗ੍ਘਂ ਹੋਤਿ, ‘‘ਨਨੁ ਤੁਮ੍ਹਾਕਂ ਗੇਹਂ ਮਹਗ੍ਘ’’ਨ੍ਤਿ ਵਤ੍ਤਬ੍ਬਂ. ‘‘ਹੋਤੁ, ਭਨ੍ਤੇ, ਅਮ੍ਹਾਕਂ ਪੁਞ੍ਞਂ ਭਵਿਸ੍ਸਤਿ, ਗਣ੍ਹਥਾ’’ਤਿ ਵੁਤ੍ਤੇ ਪਨ ਸਮ੍ਪਟਿਚ੍ਛਿਤੁਂ ਵਟ੍ਟਤਿ. ਏਵਮ੍ਪਿ ਵਿਹਾਰੇਨ ਵਿਹਾਰੋ ਪਰਿਵਤ੍ਤੇਤਬ੍ਬੋ. ਏਤੇਨੇਵ ਨਯੇਨ ਵਿਹਾਰਵਤ੍ਥੁਪਿ ਆਰਾਮੋਪਿ ਆਰਾਮਵਤ੍ਥੁਪਿ ਵਿਹਾਰੇਨ ਪਰਿਵਤ੍ਤੇਤਬ੍ਬਂ, ਵਿਹਾਰਵਤ੍ਥੁਨਾ ਚ ਮਹਗ੍ਘੇਨ ਵਾ ਅਪ੍ਪਗ੍ਘੇਨ ਵਾ ਵਿਹਾਰਵਿਹਾਰਵਤ੍ਥੁਆਰਾਮਆਰਾਮਵਤ੍ਥੂਨਿ. ਏਵਂ ਥਾਵਰੇਨ ਥਾਵਰਪਰਿਵਤ੍ਤਨਂ ਵੇਦਿਤਬ੍ਬਂ.

ਗਰੁਭਣ੍ਡੇਨ ਗਰੁਭਣ੍ਡਪਰਿਵਤ੍ਤਨੇ ਪਨ ਮਞ੍ਚਪੀਠਂ ਮਹਨ੍ਤਂ ਵਾ ਹੋਤੁ ਖੁਦ੍ਦਕਂ ਵਾ, ਅਨ੍ਤਮਸੋ ਚਤੁਰਙ੍ਗੁਲਪਾਦਕਂ ਗਾਮਦਾਰਕੇਹਿ ਪਂਸ੍ਵਾਗਾਰਕੇਸੁ ਕੀਲ਼ਨ੍ਤੇਹਿ ਕਤਮ੍ਪਿ ਸਙ੍ਘਸ੍ਸ ਦਿਨ੍ਨਕਾਲਤੋ ਪਟ੍ਠਾਯ ਗਰੁਭਣ੍ਡਂ ਹੋਤਿ. ਸਚੇਪਿ ਰਾਜਰਾਜਮਹਾਮਤ੍ਤਾਦਯੋ ਏਕਪ੍ਪਹਾਰੇਨੇਵ ਮਞ੍ਚਸਤਂ ਵਾ ਮਞ੍ਚਸਹਸ੍ਸਂ ਵਾ ਦੇਨ੍ਤਿ, ਸਬ੍ਬੇ ਕਪ੍ਪਿਯਮਞ੍ਚਾ ਸਮ੍ਪਟਿਚ੍ਛਿਤਬ੍ਬਾ, ਸਮ੍ਪਟਿਚ੍ਛਿਤ੍ਵਾ ‘‘ਵੁਡ੍ਢਪਟਿਪਾਟਿਯਾ ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਥਾ’’ਤਿ ਦਾਤਬ੍ਬਾ, ਪੁਗ੍ਗਲਿਕਵਸੇਨ ਨ ਦਾਤਬ੍ਬਾ. ਅਤਿਰੇਕਮਞ੍ਚੇ ਭਣ੍ਡਾਗਾਰਾਦੀਸੁ ਪਞ੍ਞਪੇਤ੍ਵਾ ਪਤ੍ਤਚੀਵਰਂ ਨਿਕ੍ਖਿਪਿਤੁਮ੍ਪਿ ਵਟ੍ਟਤਿ. ਬਹਿਸੀਮਾਯ ‘‘ਸਙ੍ਘਸ੍ਸ ਦੇਮਾ’’ਤਿ ਦਿਨ੍ਨਮਞ੍ਚੋ ਸਙ੍ਘਤ੍ਥੇਰਸ੍ਸ ਵਸਨਟ੍ਠਾਨੇ ਦਾਤਬ੍ਬੋ. ਤਤ੍ਥ ਚੇ ਬਹੂ ਮਞ੍ਚਾ ਹੋਨ੍ਤਿ, ਮਞ੍ਚੇਨ ਕਮ੍ਮਂ ਨਤ੍ਥਿ. ਯਸ੍ਸ ਵਸਨਟ੍ਠਾਨੇ ਕਮ੍ਮਂ ਅਤ੍ਥਿ, ਤਤ੍ਥ ‘‘ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਥਾ’’ਤਿ ਦਾਤਬ੍ਬੋ. ਮਹਗ੍ਘੇਨ ਸਤਗ੍ਘਨਕੇਨ ਵਾ ਸਹਸ੍ਸਗ੍ਘਨਕੇਨ ਵਾ ਮਞ੍ਚੇਨ ਅਞ੍ਞਂ ਮਞ੍ਚਸਤਂ ਲਭਤਿ, ਪਰਿਵਤ੍ਤੇਤ੍ਵਾ ਗਹੇਤਬ੍ਬਂ. ਨ ਕੇਵਲਂ ਮਞ੍ਚੇਨ ਮਞ੍ਚੋਯੇਵ, ਆਰਾਮਆਰਾਮਵਤ੍ਥੁਵਿਹਾਰਵਿਹਾਰਵਤ੍ਥੁਪੀਠਭਿਸਿਬਿਮ੍ਬੋਹਨਾਨਿਪਿ ਪਰਿਵਤ੍ਤੇਤੁਂ ਵਟ੍ਟਨ੍ਤਿ. ਏਸ ਨਯੋ ਪੀਠਭਿਸਿਬਿਮ੍ਬੋਹਨੇਸੁਪਿ. ਏਤੇਸੁ ਪਨ ਅਕਪ੍ਪਿਯਂ ਨ ਪਰਿਭੁਞ੍ਜਿਤਬ੍ਬਂ, ਕਪ੍ਪਿਯਂ ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਿਤਬ੍ਬਂ. ਅਕਪ੍ਪਿਯਂ ਵਾ ਮਹਗ੍ਘਂ ਕਪ੍ਪਿਯਂ ਵਾ ਪਰਿਵਤ੍ਤੇਤ੍ਵਾ ਵੁਤ੍ਤਵਤ੍ਥੂਨਿ ਗਹੇਤਬ੍ਬਾਨਿ. ਅਗਰੁਭਣ੍ਡੁਪਗਂ ਪਨ ਭਿਸਿਬਿਮ੍ਬੋਹਨਂ ਨਾਮ ਨਤ੍ਥਿ.

੨੨੯. ਲੋਹਕੁਮ੍ਭੀ ਲੋਹਭਾਣਕਂ ਲੋਹਕਟਾਹਨ੍ਤਿ ਇਮਾਨਿ ਤੀਣਿ ਮਹਨ੍ਤਾਨਿ ਵਾ ਹੋਨ੍ਤੁ ਖੁਦ੍ਦਕਾਨਿ ਵਾ, ਅਨ੍ਤਮਸੋ ਪਸਤਮਤ੍ਤਉਦਕਗਣ੍ਹਨਕਾਨਿਪਿ ਗਰੁਭਣ੍ਡਾਨਿਯੇਵ. ਲੋਹਵਾਰਕੋ ਪਨ ਕਾਲ਼ਲੋਹਤਮ੍ਬਲੋਹਵਟ੍ਟਲੋਹਕਂਸਲੋਹਾਨਂ ਯੇਨ ਕੇਨਚਿ ਕਤੋ ਸੀਹਲ਼ਦੀਪੇ ਪਾਦਗਣ੍ਹਨਕੋ ਭਾਜੇਤਬ੍ਬੋ. ਪਾਦੋ ਚ ਨਾਮ ਮਗਧਨਾਲ਼ਿਯਾ ਪਞ੍ਚਨਾਲ਼ਿਮਤ੍ਤਂ ਗਣ੍ਹਾਤਿ, ਤਤੋ ਅਤਿਰੇਕਗਣ੍ਹਨਕੋ ਗਰੁਭਣ੍ਡਂ. ਇਮਾਨਿ ਤਾਵ ਪਾਲ਼ਿਯਂ ਆਗਤਾਨਿ ਲੋਹਭਾਜਨਾਨਿ. ਪਾਲ਼ਿਯਂ ਪਨ ਅਨਾਗਤਾਨਿ ਭਿਙ੍ਗਾਰਪਟਿਗ੍ਗਹਉਲ਼ਉਙ੍ਕਦਬ੍ਬਿਕਟਚ੍ਛੁਪਾਤਿਤਟ੍ਟਕਸਰਕਸਮੁਗ੍ਗਅਙ੍ਗਾਰਕਪਲ੍ਲਧੂਮਕਟਚ੍ਛੁਆਦੀਨਿ ਖੁਦ੍ਦਕਾਨਿ ਵਾ ਮਹਨ੍ਤਾਨਿ ਵਾ ਸਬ੍ਬਾਨਿ ਗਰੁਭਣ੍ਡਾਨਿ. ਪਤ੍ਤੋ ਅਯਥਾਲਕਂ ਤਮ੍ਬਲੋਹਥਾਲਕਨ੍ਤਿ ਇਮਾਨਿ ਪਨ ਭਾਜਨੀਯਾਨਿ. ਕਂਸਲੋਹਵਟ੍ਟਲੋਹਭਾਜਨਵਿਕਤਿ ਸਙ੍ਘਿਕਪਰਿਭੋਗੇਨ ਵਾ ਗਿਹਿਵਿਕਟਾ ਵਾ ਵਟ੍ਟਤਿ, ਪੁਗ੍ਗਲਿਕਪਰਿਭੋਗੇਨ ਨ ਵਟ੍ਟਤਿ. ਕਂਸਲੋਹਾਦਿਭਾਜਨਂ ਸਙ੍ਘਸ੍ਸ ਦਿਨ੍ਨਮ੍ਪਿ ਹਿ ਪਾਰਿਹਾਰਿਯਂ ਨ ਵਟ੍ਟਤਿ, ਗਿਹਿਵਿਕਟਨੀਹਾਰੇਨੇਵ ਪਰਿਭੁਞ੍ਜਿਤਬ੍ਬਨ੍ਤਿ ਮਹਾਪਚ੍ਚਰਿਯਂ ਵੁਤ੍ਤਂ.

ਠਪੇਤ੍ਵਾ ਪਨ ਭਾਜਨਵਿਕਤਿਂ ਅਞ੍ਞਸ੍ਮਿਮ੍ਪਿ ਕਪ੍ਪਿਯਲੋਹਭਣ੍ਡੇ ਅਞ੍ਜਨੀ ਅਞ੍ਜਨਿਸਲਾਕਾ ਕਣ੍ਣਮਲਹਰਣੀ ਸੂਚਿ ਪਣ੍ਣਸੂਚਿ ਖੁਦ੍ਦਕੋ ਪਿਪ੍ਫਲਕੋ ਖੁਦ੍ਦਕਂ ਆਰਕਣ੍ਟਕਂ ਕੁਞ੍ਚਿਕਾ ਤਾਲ਼ਂ ਕਤ੍ਤਰਯਟ੍ਠਿ ਵੇਧਕੋ ਨਤ੍ਥੁਦਾਨਂ ਭਿਣ੍ਡਿਵਾਲੋ ਲੋਹਕੂਟੋ ਲੋਹਕੁਤ੍ਤਿ ਲੋਹਗੁਲ਼ੋ ਲੋਹਪਿਣ੍ਡਿ ਲੋਹਚਕ੍ਕਲਿਕਂ ਅਞ੍ਞਮ੍ਪਿ ਵਿਪ੍ਪਕਤਲੋਹਭਣ੍ਡਂ ਭਾਜਨੀਯਂ. ਧੂਮਨੇਤ੍ਤਫਾਲਦੀਪਰੁਕ੍ਖਦੀਪਕਪਲ੍ਲਕਓਲਮ੍ਬਕਦੀਪਇਤ੍ਥਿਪੁਰਿਸਤਿਰਚ੍ਛਾਨਗਤਰੂਪਕਾਨਿ ਪਨ ਅਞ੍ਞਾਨਿ ਵਾ ਭਿਤ੍ਤਿਚ੍ਛਦਨਕਵਾਟਾਦੀਸੁ ਉਪਨੇਤਬ੍ਬਾਨਿ ਅਨ੍ਤਮਸੋ ਲੋਹਖਿਲਕਂ ਉਪਾਦਾਯ ਸਬ੍ਬਾਨਿ ਲੋਹਭਣ੍ਡਾਨਿ ਗਰੁਭਣ੍ਡਾਨਿਯੇਵ ਹੋਨ੍ਤਿ, ਅਤ੍ਤਨਾ ਲਦ੍ਧਾਨਿਪਿ ਪਰਿਹਰਿਤ੍ਵਾ ਪੁਗ੍ਗਲਿਕਪਰਿਭੋਗੇਨ ਨ ਪਰਿਭੁਞ੍ਜਿਤਬ੍ਬਾਨਿ, ਸਙ੍ਘਿਕਪਰਿਭੋਗੇਨ ਵਾ ਗਿਹਿਵਿਕਟਾਨਿ ਵਾ ਵਟ੍ਟਨ੍ਤਿ. ਤਿਪੁਭਣ੍ਡੇਪਿ ਏਸੇਵ ਨਯੋ. ਖੀਰਪਾਸਾਣਮਯਾਨਿ ਤਟ੍ਟਕਸਰਕਾਦੀਨਿ ਗਰੁਭਣ੍ਡਾਨਿਯੇਵ.

ਘਟਕੋ ਪਨ ਤੇਲਭਾਜਨਂ ਵਾ ਪਾਦਗਣ੍ਹਨਕਤੋ ਅਤਿਰੇਕਮੇਵ ਗਰੁਭਣ੍ਡਂ. ਸੁਵਣ੍ਣਰਜਤਹਾਰਕੂਟਜਾਤਿਫਲਿਕਭਾਜਨਾਨਿ ਗਿਹਿਵਿਕਟਾਨਿਪਿ ਨ ਵਟ੍ਟਨ੍ਤਿ, ਪਗੇਵ ਸਙ੍ਘਿਕਪਰਿਭੋਗੇਨ ਵਾ ਪੁਗ੍ਗਲਿਕਪਰਿਭੋਗੇਨ ਵਾ. ਸੇਨਾਸਨਪਰਿਭੋਗੇ ਪਨ ਆਮਾਸਮ੍ਪਿ ਅਨਾਮਾਸਮ੍ਪਿ ਸਬ੍ਬਂ ਵਟ੍ਟਤਿ.

ਵਾਸਿਆਦੀਸੁ ਯਾਯ ਵਾਸਿਯਾ ਠਪੇਤ੍ਵਾ ਦਨ੍ਤਕਟ੍ਠਚ੍ਛੇਦਨਂ ਵਾ ਉਚ੍ਛੁਤਚ੍ਛਨਂ ਵਾ ਅਞ੍ਞਂ ਮਹਾਕਮ੍ਮਂ ਕਾਤੁਂ ਨ ਸਕ੍ਕਾ, ਅਯਂ ਭਾਜਨੀਯਾ. ਤਤੋ ਮਹਨ੍ਤਤਰਾ ਯੇਨ ਕੇਨਚਿ ਆਕਾਰੇਨ ਕਤਾ ਵਾਸਿ ਗਰੁਭਣ੍ਡਮੇਵ. ਫਰਸੁ ਪਨ ਅਨ੍ਤਮਸੋ ਵੇਜ੍ਜਾਨਂ ਸਿਰਾਵੇਧਨਫਰਸੁਪਿ ਗਰੁਭਣ੍ਡਮੇਵ. ਕੁਠਾਰਿਯਂ ਫਰਸੁਸਦਿਸੋਯੇਵ ਵਿਨਿਚ੍ਛਯੋ. ਯਾ ਪਨ ਆਵੁਧਸਙ੍ਖੇਪੇਨ ਕਤਾ, ਅਯਂ ਅਨਾਮਾਸਾ. ਕੁਦਾਲੋ ਅਨ੍ਤਮਸੋ ਚਤੁਰਙ੍ਗੁਲਮਤ੍ਤੋਪਿ ਗਰੁਭਣ੍ਡਮੇਵ. ਨਿਖਾਦਨਂ ਚਤੁਰਸ੍ਸਮੁਖਂ ਵਾ ਹੋਤੁ ਦੋਣਿਮੁਖਂ ਵਾ ਵਙ੍ਕਂ ਵਾ ਉਜੁਕਂ ਵਾ, ਅਨ੍ਤਮਸੋ ਸਮ੍ਮੁਞ੍ਜਨੀਦਣ੍ਡਕਵੇਧਨਮ੍ਪਿ ਦਣ੍ਡਬਦ੍ਧਂ ਚੇ, ਗਰੁਭਣ੍ਡਮੇਵ. ਸਮ੍ਮੁਞ੍ਜਨੀਦਣ੍ਡਖਣਨਕਂ ਪਨ ਅਦਣ੍ਡਕਂ ਫਲਮਤ੍ਤਮੇਵ. ਯਂ ਸਕ੍ਕਾ ਸਿਪਾਟਿਕਾਯ ਪਕ੍ਖਿਪਿਤ੍ਵਾ ਪਰਿਹਰਿਤੁਂ, ਤਂ ਭਾਜਨੀਯਂ. ਸਿਖਰਮ੍ਪਿ ਨਿਖਾਦਨੇਨੇਵ ਸਙ੍ਗਹਿਤਂ. ਯੇਹਿ ਮਨੁਸ੍ਸੇਹਿ ਵਿਹਾਰੇ ਵਾਸਿਆਦੀਨਿ ਦਿਨ੍ਨਾਨਿ ਹੋਨ੍ਤਿ, ਤੇ ਚੇ ਘਰੇ ਦਡ੍ਢੇ ਵਾ ਚੋਰੇਹਿ ਵਾ ਵਿਲੁਤ੍ਤੇ ‘‘ਦੇਥ ਨੋ, ਭਨ੍ਤੇ, ਉਪਕਰਣੇ, ਪੁਨ ਪਾਕਤਿਕੇ ਕਰਿਸ੍ਸਾਮਾ’’ਤਿ ਵਦਨ੍ਤਿ, ਦਾਤਬ੍ਬਾ. ਸਚੇ ਆਹਰਨ੍ਤਿ, ਨ ਵਾਰੇਤਬ੍ਬਾ, ਅਨਾਹਰਨ੍ਤਾਪਿ ਨ ਚੋਦੇਤਬ੍ਬਾ.

ਕਮ੍ਮਾਰਤਚ੍ਛਕਾਰਚੁਨ੍ਦਕਾਰਨਲ਼ਕਾਰਮਣਿਕਾਰਪਤ੍ਤਬਨ੍ਧਕਾਨਂ ਅਧਿਕਰਣਿਮੁਟ੍ਠਿਕਸਣ੍ਡਾਸਤੁਲਾਦੀਨਿ ਸਬ੍ਬਾਨਿ ਲੋਹਮਯਉਪਕਰਣਾਨਿ ਸਙ੍ਘੇ ਦਿਨ੍ਨਕਾਲਤੋ ਪਟ੍ਠਾਯ ਗਰੁਭਣ੍ਡਾਨਿ. ਤਿਪੁਕੋਟ੍ਟਕਸੁਵਣ੍ਣਕਾਰਚਮ੍ਮਕਾਰਉਪਕਰਣੇਸੁਪਿ ਏਸੇਵ ਨਯੋ. ਅਯਂ ਪਨ ਵਿਸੇਸੋ – ਤਿਪੁਕੋਟ੍ਟਕਉਪਕਰਣੇਸੁਪਿ ਤਿਪੁਚ੍ਛੇਦਨਕਸਤ੍ਥਕਂ, ਸੁਵਣ੍ਣਕਾਰਉਪਕਰਣੇਸੁ ਸੁਵਣ੍ਣਚ੍ਛੇਦਨਕਸਤ੍ਥਕਂ, ਚਮ੍ਮਕਾਰਉਪਕਰਣੇਸੁ ਕਤਪਰਿਕਮ੍ਮਚਮ੍ਮਚ੍ਛੇਦਨਕਖੁਦ੍ਦਕਸਤ੍ਥਕਨ੍ਤਿ ਇਮਾਨਿ ਭਾਜਨੀਯਭਣ੍ਡਾਨਿ. ਨਹਾਪਿਤਤੁਨ੍ਨਕਾਰਉਪਕਰਣੇਸੁਪਿ ਠਪੇਤ੍ਵਾ ਮਹਾਕਤ੍ਤਰਿਂ ਮਹਾਸਣ੍ਡਾਸਂ ਮਹਾਪਿਪ੍ਫਲਿਕਞ੍ਚ ਸਬ੍ਬਂ ਭਾਜਨੀਯਂ, ਮਹਾਕਤ੍ਤਰਿਆਦੀਨਿ ਗਰੁਭਣ੍ਡਾਨਿ.

ਵਲ੍ਲਿਆਦੀਸੁ ਵੇਤ੍ਤਵਲ੍ਲਿਆਦਿਕਾ ਯਾ ਕਾਚਿ ਅਡ੍ਢਬਾਹੁਪ੍ਪਮਾਣਾ ਵਲ੍ਲਿ ਸਙ੍ਘਸ੍ਸ ਦਿਨ੍ਨਾ ਵਾ ਤਤ੍ਥਜਾਤਕਾ ਵਾ ਰਕ੍ਖਿਤਗੋਪਿਤਾ ਗਰੁਭਣ੍ਡਂ ਹੋਤਿ, ਸਾ ਸਙ੍ਘਕਮ੍ਮੇ ਚ ਚੇਤਿਯਕਮ੍ਮੇ ਚ ਕਤੇ ਸਚੇ ਅਤਿਰੇਕਾ ਹੋਤਿ, ਪੁਗ੍ਗਲਿਕਕਮ੍ਮੇਪਿ ਉਪਨੇਤੁਂ ਵਟ੍ਟਤਿ. ਅਰਕ੍ਖਿਤਾ ਪਨ ਗਰੁਭਣ੍ਡਮੇਵ ਨ ਹੋਤਿ. ਸੁਤ੍ਤਮਕਚਿਵਾਕਨਾਲ਼ਿਕੇਰਹੀਰਚਮ੍ਮਮਯਾ ਰਜ੍ਜੁਕਾ ਵਾ ਯੋਤ੍ਤਾਨਿ ਵਾ ਵਾਕੇ ਚ ਨਾਲ਼ਿਕੇਰਹੀਰੇ ਚ ਵਟ੍ਟੇਤ੍ਵਾ ਕਤਾ ਏਕਵਟ੍ਟਾ ਵਾ ਦ੍ਵਿਵਟ੍ਟਾ ਵਾ ਸਙ੍ਘਸ੍ਸ ਦਿਨ੍ਨਕਾਲਤੋ ਪਟ੍ਠਾਯ ਗਰੁਭਣ੍ਡਂ. ਸੁਤ੍ਤਂ ਪਨ ਅਵਟ੍ਟੇਤ੍ਵਾ ਦਿਨ੍ਨਂ ਮਕਚਿਵਾਕਨਾਲ਼ਿਕੇਰਹੀਰਾ ਚ ਭਾਜਨੀਯਾ. ਯੇਹਿ ਪਨੇਤਾਨਿ ਰਜ੍ਜੁਕਯੋਤ੍ਤਾਦੀਨਿ ਦਿਨ੍ਨਾਨਿ ਹੋਨ੍ਤਿ, ਤੇ ਅਤ੍ਤਨੋ ਕਰਣੀਯੇਨ ਹਰਨ੍ਤਾ ਨ ਵਾਰੇਤਬ੍ਬਾ.

ਯੋ ਕੋਚਿ ਅਨ੍ਤਮਸੋ ਅਟ੍ਠਙ੍ਗੁਲਸੂਚਿਦਣ੍ਡਕਮਤ੍ਤੋਪਿ ਵੇਲ਼ੁ ਸਙ੍ਘਸ੍ਸ ਦਿਨ੍ਨੋ ਵਾ ਤਤ੍ਥਜਾਤਕੋ ਵਾ ਰਕ੍ਖਿਤਗੋਪਿਤੋ ਗਰੁਭਣ੍ਡਂ, ਸੋਪਿ ਸਙ੍ਘਕਮ੍ਮੇ ਚ ਚੇਤਿਯਕਮ੍ਮੇ ਚ ਕਤੇ ਅਤਿਰੇਕੋ ਪੁਗ੍ਗਲਿਕਕਮ੍ਮੇ ਚ ਦਾਤੁਂ ਵਟ੍ਟਤਿ. ਪਾਦਗਣ੍ਹਨਕਤੇਲਨਾਲ਼ਿ ਪਨ ਕਤ੍ਤਰਯਟ੍ਠਿ ਉਪਾਹਨਦਣ੍ਡਕੋ ਛਤ੍ਤਦਣ੍ਡਕੋ ਛਤ੍ਤਸਲਾਕਾਤਿ ਇਦਮੇਤ੍ਥ ਭਾਜਨੀਯਭਣ੍ਡਂ. ਦਡ੍ਢਗੇਹਮਨੁਸ੍ਸਾ ਗਣ੍ਹਿਤ੍ਵਾ ਗਚ੍ਛਨ੍ਤਾ ਨ ਵਾਰੇਤਬ੍ਬਾ. ਰਕ੍ਖਿਤਗੋਪਿਤਂ ਵੇਲ਼ੁਂ ਗਣ੍ਹਨ੍ਤੇਨ ਸਮਕਂ ਵਾ ਅਤਿਰੇਕਂ ਵਾ ਥਾਵਰਂ ਅਨ੍ਤਮਸੋ ਤਂਅਗ੍ਘਨਕਵਲ੍ਲਿਕਾਯਪਿ ਫਾਤਿਕਮ੍ਮਂ ਕਤ੍ਵਾ ਗਹੇਤਬ੍ਬੋ, ਫਾਤਿਕਮ੍ਮਂ ਅਕਤ੍ਵਾ ਗਣ੍ਹਨ੍ਤੇਨ ਤਤ੍ਥੇਵ ਵਲ਼ਞ੍ਜੇਤਬ੍ਬੋ. ਗਮਨਕਾਲੇ ਸਙ੍ਘਿਕੇ ਆਵਾਸੇ ਠਪੇਤ੍ਵਾ ਗਨ੍ਤਬ੍ਬਂ, ਅਸਤਿਯਾ ਗਹੇਤ੍ਵਾ ਗਤੇਨ ਪਹਿਣਿਤ੍ਵਾ ਦਾਤਬ੍ਬੋ. ਦੇਸਨ੍ਤਰਗਤੇਨ ਸਮ੍ਪਤ੍ਤਵਿਹਾਰੋ ਸਙ੍ਘਿਕਾਵਾਸੇ ਠਪੇਤਬ੍ਬੋ.

ਤਿਣਨ੍ਤਿ ਮੁਞ੍ਜਞ੍ਚ ਪਬ੍ਬਜਞ੍ਚ ਠਪੇਤ੍ਵਾ ਅਵਸੇਸਂ ਯਂ ਕਿਞ੍ਚਿ ਤਿਣਂ. ਯਤ੍ਥ ਪਨ ਤਿਣਂ ਨਤ੍ਥਿ, ਤਤ੍ਥ ਪਣ੍ਣੇਹਿ ਛਾਦੇਨ੍ਤਿ, ਤਸ੍ਮਾ ਪਣ੍ਣਮ੍ਪਿ ਤਿਣੇਨੇਵ ਸਙ੍ਗਹਿਤਂ. ਇਤਿ ਮੁਞ੍ਜਾਦੀਸੁ ਯਂ ਕਿਞ੍ਚਿ ਮੁਟ੍ਠਿਪ੍ਪਮਾਣਂ ਤਿਣਂ ਤਾਲਪਣ੍ਣਾਦੀਸੁ ਚ ਏਕਪਣ੍ਣਮ੍ਪਿ ਸਙ੍ਘਸ੍ਸ ਦਿਨ੍ਨਂ ਵਾ ਤਤ੍ਥਜਾਤਕਂ ਵਾ ਬਹਾਰਾਮੇ ਸਙ੍ਘਸ੍ਸ ਤਿਣਵਤ੍ਥੁਤੋ ਜਾਤਤਿਣਂ ਵਾ ਰਕ੍ਖਿਤਗੋਪਿਤਂ ਗਰੁਭਣ੍ਡਂ ਹੋਤਿ, ਤਮ੍ਪਿ ਸਙ੍ਘਕਮ੍ਮੇ ਚ ਚੇਤਿਯਕਮ੍ਮੇ ਚ ਕਤੇ ਅਤਿਰੇਕਂ ਪੁਗ੍ਗਲਿਕਕਮ੍ਮੇ ਦਾਤੁਂ ਵਟ੍ਟਤਿ, ਦਡ੍ਢਗੇਹਮਨੁਸ੍ਸਾ ਗਹੇਤ੍ਵਾ ਗਚ੍ਛਨ੍ਤਾ ਨ ਵਾਰੇਤਬ੍ਬਾ. ਅਟ੍ਠਙ੍ਗੁਲਪ੍ਪਮਾਣੋਪਿ ਰਿਤ੍ਤਪੋਤ੍ਥਕੋ ਗਰੁਭਣ੍ਡਮੇਵ.

ਮਤ੍ਤਿਕਾ ਪਕਤਿਮਤ੍ਤਿਕਾ ਵਾ ਹੋਤੁ ਪਞ੍ਚਵਣ੍ਣਾ ਵਾ ਸੁਧਾ ਵਾ ਸਜ੍ਜੁਰਸਕਙ੍ਗੁਟ੍ਠਸਿਲੇਸਾਦੀਸੁ ਵਾ ਯਂ ਕਿਞ੍ਚਿ ਦੁਲ੍ਲਭਟ੍ਠਾਨੇ ਆਨੇਤ੍ਵਾ ਦਿਨ੍ਨਂ ਤਤ੍ਥਜਾਤਕਂ ਵਾ, ਰਕ੍ਖਿਤਗੋਪਿਤਂ ਤਾਲਫਲਪਕ੍ਕਮਤ੍ਤਂ ਗਰੁਭਣ੍ਡਂ ਹੋਤਿ, ਤਮ੍ਪਿ ਸਙ੍ਘਕਮ੍ਮੇ ਚ ਚੇਤਿਯਕਮ੍ਮੇ ਚ ਨਿਟ੍ਠਿਤੇ ਅਤਿਰੇਕਂ ਪੁਗ੍ਗਲਿਕਕਮ੍ਮੇ ਚ ਦਾਤੁਂ ਵਟ੍ਟਤਿ, ਹਿਙ੍ਗੁਹਿਙ੍ਗੁਲਕਹਰਿਤਾਲਮਨੋਸਿਲਞ੍ਜਨਾਨਿ ਪਨ ਭਾਜਨੀਯਭਣ੍ਡਾਨਿ.

ਦਾਰੁਭਣ੍ਡੇ ‘‘ਯੋ ਕੋਚਿ ਅਟ੍ਠਙ੍ਗੁਲਸੂਚਿਦਣ੍ਡਮਤ੍ਤੋਪਿ ਦਾਰੁਭਣ੍ਡਕੋ ਦਾਰੁਦੁਲ੍ਲਭਟ੍ਠਾਨੇ ਸਙ੍ਘਸ੍ਸ ਦਿਨ੍ਨੋ ਵਾ ਤਤ੍ਥਜਾਤਕੋ ਵਾ ਰਕ੍ਖਿਤਗੋਪਿਤੋ, ਅਯਂ ਗਰੁਭਣ੍ਡਂ ਹੋਤੀ’’ਤਿ ਕੁਰੁਨ੍ਦਿਯਂ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ਸਬ੍ਬਮ੍ਪਿ ਦਾਰੁਵੇਲ਼ੁਚਮ੍ਮਪਾਸਾਣਾਦਿਵਿਕਤਿਂ ਦਾਰੁਭਣ੍ਡੇਨ ਸਙ੍ਗਣ੍ਹਿਤ੍ਵਾ ਆਸਨ੍ਦਿਕਤੋ ਪਟ੍ਠਾਯ ਦਾਰੁਭਣ੍ਡੇ ਵਿਨਿਚ੍ਛਯੋ ਵੁਤ੍ਤੋ. ਤਤ੍ਰਾਯਂ ਨਯੋ – ਆਸਨ੍ਦਿਕੋ ਸਤ੍ਤਙ੍ਗੋ ਭਦ੍ਦਪੀਠਂ ਪੀਠਿਕਾ ਏਕਪਾਦਕਪੀਠਂ ਆਮਣ੍ਡਕਵਣ੍ਟਕਪੀਠਂ ਫਲਕਂ ਕੋਚ੍ਛਂ ਪਲਾਲਪੀਠਨ੍ਤਿ ਇਮੇਸੁ ਤਾਵ ਯਂ ਕਿਞ੍ਚਿ ਖੁਦ੍ਦਕਂ ਵਾ ਹੋਤੁ ਮਹਨ੍ਤਂ ਵਾ, ਸਙ੍ਘਸ੍ਸ ਦਿਨ੍ਨਂ ਗਰੁਭਣ੍ਡਂ ਹੋਤਿ. ਪਲਾਲਪੀਠੇਨ ਚੇਤ੍ਥ ਕਦਲਿਪਤ੍ਤਾਦਿਪੀਠਾਨਿਪਿ ਸਙ੍ਗਹਿਤਾਨਿ. ਬ੍ਯਗ੍ਘਚਮ੍ਮਓਨਦ੍ਧਮ੍ਪਿ ਵਾਲ਼ਰੂਪਪਰਿਕ੍ਖਿਤ੍ਤਂ ਰਤਨਪਰਿਸਿਬ੍ਬਿਤਂ ਕੋਚ੍ਛਂ ਗਰੁਭਣ੍ਡਮੇਵ, ਵਙ੍ਕਫਲਕਂ ਦੀਘਫਲਕਂ ਚੀਵਰਧੋਵਨਫਲਕਂ ਘਟ੍ਟਨਫਲਕਂ ਘਟ੍ਟਨਮੁਗ੍ਗਰੋ ਦਨ੍ਤਕਟ੍ਠਚ੍ਛੇਦਨਗਣ੍ਠਿਕਾ ਦਣ੍ਡਮੁਗ੍ਗਰੋ ਅਮ੍ਬਣਂ ਰਜਨਦੋਣਿ ਉਦਕਪਟਿਚ੍ਛਕੋ ਦਾਰੁਮਯੋ ਵਾ ਦਨ੍ਤਮਯੋ ਵਾ ਵੇਲ਼ੁਮਯੋ ਵਾ ਸਪਾਦਕੋਪਿ ਅਪਾਦਕੋਪਿ ਸਮੁਗ੍ਗੋ ਮਞ੍ਜੂਸਾ ਪਾਦਗਣ੍ਹਨਕਤੋ ਅਤਿਰੇਕਪ੍ਪਮਾਣੋ ਕਰਣ੍ਡੋ ਉਦਕਦੋਣਿ ਉਦਕਕਟਾਹਂ ਉਲ਼ੁਙ੍ਕੋ ਕਟਚ੍ਛੁ ਪਾਨੀਯਸਰਾਵਂ ਪਾਨੀਯਸਙ੍ਖੋਤਿ ਏਤੇਸੁਪਿ ਯਂ ਕਿਞ੍ਚਿ ਸਙ੍ਘੇ ਦਿਨ੍ਨਂ ਗਰੁਭਣ੍ਡਂ. ਸਙ੍ਖਥਾਲਕਂ ਪਨ ਭਾਜਨੀਯਂ, ਤਥਾ ਦਾਰੁਮਯੋ ਉਦਕਤੁਮ੍ਬੋ.

ਪਾਦਕਥਲਿਕਮਣ੍ਡਲਂ ਦਾਰੁਮਯਂ ਵਾ ਹੋਤੁ ਚੋਲ਼ਪਣ੍ਣਾਦਿਮਯਂ ਵਾ, ਸਬ੍ਬਂ ਗਰੁਭਣ੍ਡਂ. ਆਧਾਰਕੋ ਪਤ੍ਤਪਿਧਾਨਂ ਤਾਲਵਣ੍ਟਂ ਬੀਜਨੀ ਚਙ੍ਕੋਟਕਂ ਪਚ੍ਛਿ ਯਟ੍ਠਿਸਮ੍ਮੁਞ੍ਜਨੀ ਮੁਟ੍ਠਿਸਮ੍ਮੁਞ੍ਜਨੀਤਿ ਏਤੇਸੁਪਿ ਯਂ ਕਿਞ੍ਚਿ ਖੁਦ੍ਦਕਂ ਵਾ ਹੋਤੁ ਮਹਨ੍ਤਂ ਵਾ, ਦਾਰੁਵੇਲ਼ੁਪਣ੍ਣਚਮ੍ਮਾਦੀਸੁ ਯੇਨ ਕੇਨਚਿ ਕਤਂ ਗਰੁਭਣ੍ਡਮੇਵ. ਥਮ੍ਭਤੁਲਾਸੋਪਾਨਫਲਕਾਦੀਸੁ ਦਾਰੁਮਯਂ ਵਾ ਪਾਸਾਣਮਯਂ ਵਾ ਯਂ ਕਿਞ੍ਚਿ ਗੇਹਸਮ੍ਭਾਰਰੂਪਂ ਯੋ ਕੋਚਿ ਕਟਸਾਰਕੋ ਯਂ ਕਿਞ੍ਚਿ ਭੂਮਤ੍ਥਰਣਂ ਯਂ ਕਿਞ੍ਚਿ ਅਕਪ੍ਪਿਯਚਮ੍ਮਂ, ਸਬ੍ਬਂ ਸਙ੍ਘੇ ਦਿਨ੍ਨਂ ਗਰੁਭਣ੍ਡਂ, ਭੂਮਤ੍ਥਰਣਂ ਕਾਤੁਂ ਵਟ੍ਟਤਿ. ਏਲ਼ਕਚਮ੍ਮਂ ਪਨ ਪਚ੍ਚਤ੍ਥਰਣਗਤਿਕਂ ਹੋਤਿ, ਤਮ੍ਪਿ ਗਰੁਭਣ੍ਡਮੇਵ. ਕਪ੍ਪਿਯਚਮ੍ਮਾਨਿ ਭਾਜਨੀਯਾਨਿ. ਕੁਰੁਨ੍ਦਿਯਂ ਪਨ ‘‘ਸਬ੍ਬਂ ਮਞ੍ਚਪ੍ਪਮਾਣਂ ਚਮ੍ਮਂ ਗਰੁਭਣ੍ਡ’’ਨ੍ਤਿ ਵੁਤ੍ਤਂ.

ਉਦੁਕ੍ਖਲਂ ਮੁਸਲਂ ਸੁਪ੍ਪਂ ਨਿਸਦਂ ਨਿਸਦਪੋਤੋ ਪਾਸਾਣਦੋਣਿ ਪਾਸਾਣਕਟਾਹਂ ਤੁਰਿਵੇਮਭਸ੍ਤਾਦਿ ਸਬ੍ਬਂ ਪੇਸਕਾਰਾਦਿਭਣ੍ਡਂ ਸਬ੍ਬਂ ਕਸਿਭਣ੍ਡਂ ਸਬ੍ਬਂ ਚਕ੍ਕਯੁਤ੍ਤਕਂ ਯਾਨਂ ਗਰੁਭਣ੍ਡਮੇਵ. ਮਞ੍ਚਪਾਦੋ ਮਞ੍ਚਅਟਨੀ ਪੀਠਪਾਦੋ ਪੀਠਅਟਨੀ ਵਾਸਿਫਰਸੁਆਦੀਨਂ ਦਣ੍ਡਾਤਿ ਏਤੇਸੁ ਯਂ ਕਿਞ੍ਚਿ ਵਿਪ੍ਪਕਤਤਚ੍ਛਨਕਮ੍ਮਂ ਅਨਿਟ੍ਠਿਤਮੇਵ ਭਾਜਨੀਯਂ, ਤਚ੍ਛਿਤਮਟ੍ਠਂ ਪਨ ਗਰੁਭਣ੍ਡਂ ਹੋਤਿ. ਅਨੁਞ੍ਞਾਤਵਾਸਿਯਾ ਪਨ ਦਣ੍ਡੋ ਛਤ੍ਤਮੁਟ੍ਠਿਪਣ੍ਣਂ ਕਤ੍ਤਰਯਟ੍ਠਿ ਉਪਾਹਨਾ ਅਰਣਿਸਹਿਤਂ ਧਮ੍ਮਕਰਣੋ ਪਾਦਗਣ੍ਹਨਕਤੋ ਅਨਤਿਰਿਤ੍ਤਂ ਆਮਲਕਤੁਮ੍ਬਂ ਆਮਲਕਘਟੋ ਲਾਬੁਕਤੁਮ੍ਬਂ ਲਾਬੁਘਟੋ ਵਿਸਾਣਕਤੁਮ੍ਬਨ੍ਤਿ ਸਬ੍ਬਮੇਵੇਤਂ ਭਾਜਨੀਯਂ, ਤਤੋ ਮਹਨ੍ਤਤਰਂ ਗਰੁਭਣ੍ਡਂ. ਹਤ੍ਥਿਦਨ੍ਤੋ ਵਾ ਯਂ ਕਿਞ੍ਚਿ ਵਿਸਾਣਂ ਵਾ ਅਤਚ੍ਛਿਤਂ ਯਥਾਗਤਮੇਵ ਭਾਜਨੀਯਂ. ਤੇਹਿ ਕਤਮਞ੍ਚਪਾਦਾਦੀਸੁ ਪੁਰਿਮਸਦਿਸੋਯੇਵ ਵਿਨਿਚ੍ਛਯੋ. ਤਚ੍ਛਿਤਨਿਟ੍ਠਿਤੋਪਿ ਹਿਙ੍ਗੁਕਰਣ੍ਡਕੋ ਗਣ੍ਠਿਕਾ ਵਿਧੋ ਅਞ੍ਜਨੀ ਅਞ੍ਜਨੀਸਲਾਕਾ ਉਦਕਪੁਞ੍ਛਨੀਤਿ ਇਦਂ ਸਬ੍ਬਂ ਭਾਜਨੀਯਮੇਵ.

ਮਤ੍ਤਿਕਾਭਣ੍ਡੇ ਸਬ੍ਬਂ ਮਨੁਸ੍ਸਾਨਂ ਉਪਭੋਗਪਰਿਭੋਗਂ ਘਟਪੀਠਰਾਦਿਕੁਲਾਲਭਾਜਨਂ ਪਤ੍ਤਕਟਾਹਂ ਅਙ੍ਗਾਰਕਟਾਹਂ ਧੂਮਦਾਨਂ ਦੀਪਰੁਕ੍ਖਕੋ ਦੀਪਕਪਲ੍ਲਿਕਾ ਚਯਨਿਟ੍ਠਕਾ ਛਦਨਿਟ੍ਠਕਾ ਥੂਪਿਕਾਤਿ ਸਙ੍ਘਸ੍ਸ ਦਿਨ੍ਨਕਾਲਤੋ ਪਟ੍ਠਾਯ ਗਰੁਭਣ੍ਡਂ, ਪਾਦਗਣ੍ਹਨਕਤੋ ਅਨਤਿਰਿਤ੍ਤਪ੍ਪਮਾਣੋ ਪਨ ਘਟਕੋ ਪਤ੍ਤਂ ਥਾਲਕਂ ਕਞ੍ਚਨਕੋ ਕੁਣ੍ਡਿਕਾਤਿ ਇਦਮੇਤ੍ਥ ਭਾਜਨੀਯਭਣ੍ਡਂ. ਯਥਾ ਚ ਮਤ੍ਤਿਕਾਭਣ੍ਡੇ, ਏਵਂ ਲੋਹਭਣ੍ਡੇਪਿ ਕੁਣ੍ਡਿਕਾ ਭਾਜਨੀਯਕੋਟ੍ਠਾਸਮੇਵ ਭਜਤੀਤਿ ਅਯਮੇਤ੍ਥ ਅਨੁਪੁਬ੍ਬਿਕਥਾ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਗਰੁਭਣ੍ਡਵਿਨਿਚ੍ਛਯਕਥਾ ਸਮਤ੍ਤਾ.