੩. ਭੇਸਜ੍ਜਾਦਿਕਰਣਵਿਨਿਚ੍ਛਯਕਥਾ

੧੫. ਭੇਸਜ੍ਜਕਰਣਪਰਿਤ੍ਤਪਟਿਸਨ੍ਥਾਰੇਸੁ ਪਨ ਭੇਸਜ੍ਜਕਰਣੇ ਤਾਵ ਅਯਂ ਵਿਨਿਚ੍ਛਯੋ (ਪਾਰਾ. ਅਟ੍ਠ. ੨.੧੮੫-੭) – ਆਗਤਾਗਤਸ੍ਸ ਪਰਜਨਸ੍ਸ ਭੇਸਜ੍ਜਂ ਨ ਕਾਤਬ੍ਬਂ, ਕਰੋਨ੍ਤੋ ਦੁਕ੍ਕਟਂ ਆਪਜ੍ਜਤਿ. ਪਞ੍ਚਨ੍ਨਂ ਪਨ ਸਹਧਮ੍ਮਿਕਾਨਂ ਕਾਤਬ੍ਬਂ ਭਿਕ੍ਖੁਸ੍ਸ ਭਿਕ੍ਖੁਨਿਯਾ ਸਿਕ੍ਖਮਾਨਾਯ ਸਾਮਣੇਰਸ੍ਸ ਸਾਮਣੇਰਿਯਾਤਿ. ਸਮਸੀਲਸਦ੍ਧਾਪਞ੍ਞਾਨਞ੍ਹਿ ਏਤੇਸਂ ਤੀਸੁ ਸਿਕ੍ਖਾਸੁ ਯੁਤ੍ਤਾਨਂ ਭੇਸਜ੍ਜਂ ਅਕਾਤੁਂ ਨ ਲਬ੍ਭਤਿ. ਕਰੋਨ੍ਤੇਨ ਚ ਸਚੇ ਤੇਸਂ ਅਤ੍ਥਿ, ਤੇਸਂ ਸਨ੍ਤਕਂ ਗਹੇਤ੍ਵਾ ਯੋਜੇਤ੍ਵਾ ਦਾਤਬ੍ਬਂ, ਸਚੇ ਨਤ੍ਥਿ, ਅਤ੍ਤਨੋ ਸਨ੍ਤਕਂ ਕਾਤਬ੍ਬਂ. ਸਚੇ ਅਤ੍ਤਨੋਪਿ ਨਤ੍ਥਿ, ਭਿਕ੍ਖਾਚਾਰਵਤ੍ਤੇਨ ਵਾ ਞਾਤਕਪਵਾਰਿਤਟ੍ਠਾਨਤੋ ਵਾ ਪਰਿਯੇਸਿਤਬ੍ਬਂ, ਅਲਭਨ੍ਤੇਨ ਗਿਲਾਨਸ੍ਸ ਅਤ੍ਥਾਯ ਅਕਤਵਿਞ੍ਞਤ੍ਤਿਯਾਪਿ ਆਹਰਿਤ੍ਵਾ ਕਾਤਬ੍ਬਂ.

੧੬. ਅਪਰੇਸਮ੍ਪਿ ਪਞ੍ਚਨ੍ਨਂ ਕਾਤੁਂ ਵਟ੍ਟਤਿ ਮਾਤੁ ਪਿਤੁ ਤਦੁਪਟ੍ਠਾਕਾਨਂ ਅਤ੍ਤਨੋ ਵੇਯ੍ਯਾਵਚ੍ਚਕਰਸ੍ਸ ਪਣ੍ਡੁਪਲਾਸਸ੍ਸ ਚਾਤਿ. ਪਣ੍ਡੁਪਲਾਸੋ ਨਾਮ ਯੋ ਪਬ੍ਬਜ੍ਜਾਪੇਕ੍ਖੋ ਯਾਵ ਪਤ੍ਤਚੀਵਰਂ ਪਟਿਯਾਦਿਯਤਿ, ਤਾਵ ਵਿਹਾਰੇ ਵਸਤਿ. ਤੇਸੁ ਸਚੇ ਮਾਤਾਪਿਤਰੋ ਇਸ੍ਸਰਾ ਹੋਨ੍ਤਿ ਨ ਪਚ੍ਚਾਸੀਸਨ੍ਤਿ, ਅਕਾਤੁਂ ਵਟ੍ਟਤਿ. ਸਚੇ ਪਨ ਰਜ੍ਜੇਪਿ ਠਿਤਾ ਪਚ੍ਚਾਸੀਸਨ੍ਤਿ, ਅਕਾਤੁਂ ਨ ਵਟ੍ਟਤਿ. ਭੇਸਜ੍ਜਂ ਪਚ੍ਚਾਸੀਸਨ੍ਤਾਨਂ ਭੇਸਜ੍ਜਂ ਦਾਤਬ੍ਬਂ, ਯੋਜੇਤੁਂ ਅਜਾਨਨ੍ਤਾਨਂ ਯੋਜੇਤ੍ਵਾ ਦਾਤਬ੍ਬਂ. ਸਬ੍ਬੇਸਂ ਅਤ੍ਥਾਯ ਸਹਧਮ੍ਮਿਕੇਸੁ ਵੁਤ੍ਤਨਯੇਨੇਵ ਪਰਿਯੇਸਿਤਬ੍ਬਂ. ਸਚੇ ਪਨ ਮਾਤਰਂ ਵਿਹਾਰਂ ਆਨੇਤ੍ਵਾ ਜਗ੍ਗਤਿ, ਸਬ੍ਬਂ ਪਰਿਕਮ੍ਮਂ ਅਨਾਮਸਨ੍ਤੇਨ ਕਾਤਬ੍ਬਂ, ਖਾਦਨੀਯਭੋਜਨੀਯਂ ਸਹਤ੍ਥਾ ਦਾਤਬ੍ਬਂ. ਪਿਤਾ ਪਨ ਯਥਾ ਸਾਮਣੇਰੋ, ਏਵਂ ਸਹਤ੍ਥੇਨ ਨ੍ਹਾਪਨਸਮ੍ਬਾਹਨਾਦੀਨਿ ਕਤ੍ਵਾ ਉਪਟ੍ਠਾਤਬ੍ਬੋ. ਯੇ ਚ ਮਾਤਾਪਿਤਰੋ ਉਪਟ੍ਠਹਨ੍ਤਿ ਪਟਿਜਗ੍ਗਨ੍ਤਿ, ਤੇਸਮ੍ਪਿ ਏਵਮੇਵ ਕਾਤਬ੍ਬਂ. ਵੇਯ੍ਯਾਵਚ੍ਚਕਰੋ ਨਾਮ ਯੋ ਵੇਤਨਂ ਗਹੇਤ੍ਵਾ ਅਰਞ੍ਞੇ ਦਾਰੂਨਿ ਵਾ ਛਿਨ੍ਦਤਿ, ਅਞ੍ਞਂ ਵਾ ਕਿਞ੍ਚਿ ਕਮ੍ਮਂ ਕਰੋਤਿ, ਤਸ੍ਸ ਰੋਗੇ ਉਪ੍ਪਨ੍ਨੇ ਯਾਵ ਞਾਤਕਾ ਨ ਪਸ੍ਸਨ੍ਤਿ, ਤਾਵ ਭੇਸਜ੍ਜਂ ਕਾਤਬ੍ਬਂ. ਯੋ ਪਨ ਭਿਕ੍ਖੁਨਿਸ੍ਸਿਤਕੋਵ ਹੁਤ੍ਵਾ ਸਬ੍ਬਕਮ੍ਮਾਨਿ ਕਰੋਤਿ, ਤਸ੍ਸ ਭੇਸਜ੍ਜਂ ਕਾਤਬ੍ਬਮੇਵ. ਪਣ੍ਡੁਪਲਾਸੇਪਿ ਸਾਮਣੇਰੇ ਵਿਯ ਪਟਿਪਜ੍ਜਿਤਬ੍ਬਂ.

੧੭. ਅਪਰੇਸਮ੍ਪਿ ਦਸਨ੍ਨਂ ਕਾਤੁਂ ਵਟ੍ਟਤਿ ਜੇਟ੍ਠਭਾਤੁ ਕਨਿਟ੍ਠਭਾਤੁ ਜੇਟ੍ਠਭਗਿਨਿਯਾ ਕਨਿਟ੍ਠਭਗਿਨਿਯਾ ਚੂਲ਼ਮਾਤੁਯਾ ਮਹਾਮਾਤੁਯਾ ਚੂਲ਼ਪਿਤੁਨੋ ਮਹਾਪਿਤੁਨੋ ਪਿਤੁਚ੍ਛਾਯ ਮਾਤੁਲਸ੍ਸਾਤਿ. ਤੇਸਂ ਪਨ ਸਬ੍ਬੇਸਮ੍ਪਿ ਕਰੋਨ੍ਤੇਨ ਤੇਸਂਯੇਵ ਸਨ੍ਤਕਂ ਭੇਸਜ੍ਜਂ ਗਹੇਤ੍ਵਾ ਕੇਵਲਂ ਯੋਜੇਤ੍ਵਾ ਦਾਤਬ੍ਬਂ. ਸਚੇ ਪਨ ਨਪ੍ਪਹੋਨ੍ਤਿ ਯਾਚਨ੍ਤਿ ਚ ‘‘ਦੇਥ ਨੋ, ਭਨ੍ਤੇ, ਤੁਮ੍ਹਾਕਂ ਪਟਿਦਸ੍ਸਾਮਾ’’ਤਿ, ਤਾਵਕਾਲਿਕਂ ਦਾਤਬ੍ਬਂ. ਸਚੇਪਿ ਨ ਯਾਚਨ੍ਤਿ, ‘‘ਅਮ੍ਹਾਕਂ ਭੇਸਜ੍ਜਂ ਅਤ੍ਥਿ, ਤਾਵਕਾਲਿਕਂ ਗਣ੍ਹਥਾ’’ਤਿ ਵਤ੍ਵਾ ਵਾ ‘‘ਯਦਾ ਤੇਸਂ ਭਵਿਸ੍ਸਤਿ, ਤਦਾ ਦਸ੍ਸਨ੍ਤੀ’’ਤਿ ਆਭੋਗਂ ਵਾ ਕਤ੍ਵਾ ਦਾਤਬ੍ਬਂ. ਸਚੇ ਪਟਿਦੇਨ੍ਤਿ, ਗਹੇਤਬ੍ਬਂ. ਨੋ ਚੇ ਦੇਨ੍ਤਿ, ਨ ਚੋਦੇਤਬ੍ਬਾ. ਏਤੇ ਦਸ ਞਾਤਕੇ ਠਪੇਤ੍ਵਾ ਅਞ੍ਞੇਸਂ ਨ ਕਾਤਬ੍ਬਂ.

ਏਤੇਸਂ ਪੁਤ੍ਤਪਰਮ੍ਪਰਾਯ ਪਨ ਯਾਵ ਸਤ੍ਤਮਾ ਕੁਲਪਰਿਵਟ੍ਟਾ, ਤਾਵ ਚਤ੍ਤਾਰੋ ਪਚ੍ਚਯੇ ਆਹਰਾਪੇਨ੍ਤਸ੍ਸ ਅਕਤਵਿਞ੍ਞਤ੍ਤਿ ਵਾ ਭੇਸਜ੍ਜਂ ਕਰੋਨ੍ਤਸ੍ਸ ਵੇਜ੍ਜਕਮ੍ਮਂ ਵਾ ਕੁਲਦੂਸਕਾਪਤ੍ਤਿ ਵਾ ਨ ਹੋਤਿ. ਸਚੇ ਭਾਤੁ ਜਾਯਾ, ਭਗਿਨਿਯਾ ਸਾਮਿਕੋ ਵਾ ਗਿਲਾਨੋ ਹੋਤਿ, ਞਾਤਕਾ ਚੇ, ਤੇਸਮ੍ਪਿ ਵਟ੍ਟਤਿ. ਅਞ੍ਞਾਤਕਾ ਚੇ, ਭਾਤੁ ਚ ਭਗਿਨਿਯਾ ਚ ਕਤ੍ਵਾ ਦਾਤਬ੍ਬਂ ‘‘ਤੁਮ੍ਹਾਕਂ ਜਗ੍ਗਨਟ੍ਠਾਨੇ ਦੇਥਾ’’ਤਿ. ਅਥ ਵਾ ਤੇਸਂ ਪੁਤ੍ਤਾਨਂ ਕਤ੍ਵਾ ਦਾਤਬ੍ਬਂ ‘‘ਤੁਮ੍ਹਾਕਂ ਮਾਤਾਪਿਤੂਨਂ ਦੇਥਾ’’ਤਿ. ਏਤੇਨੁਪਾਯੇਨ ਸਬ੍ਬਪਦੇਸੁ ਵਿਨਿਚ੍ਛਯੋ ਵੇਦਿਤਬ੍ਬੋ.

ਤੇਸਂ ਅਤ੍ਥਾਯ ਚ ਸਾਮਣੇਰੇਹਿ ਅਰਞ੍ਞਤੋ ਭੇਸਜ੍ਜਂ ਆਹਰਾਪੇਨ੍ਤੇਨ ਞਾਤਿਸਾਮਣੇਰੇਹਿ ਵਾ ਆਹਰਾਪੇਤਬ੍ਬਂ, ਅਞ੍ਞਾਤਕੇਹਿ ਅਤ੍ਤਨੋ ਅਤ੍ਥਾਯ ਵਾ ਆਹਰਾਪੇਤ੍ਵਾ ਦਾਤਬ੍ਬਂ. ਤੇਹਿਪਿ ‘‘ਉਪਜ੍ਝਾਯਸ੍ਸ ਆਹਰਾਮਾ’’ਤਿ ਵਤ੍ਤਸੀਸੇਨ ਆਹਰਿਤਬ੍ਬਂ. ਉਪਜ੍ਝਾਯਸ੍ਸ ਮਾਤਾਪਿਤਰੋ ਗਿਲਾਨਾ ਵਿਹਾਰਂ ਆਗਚ੍ਛਨ੍ਤਿ, ਉਪਜ੍ਝਾਯੋ ਚ ਦਿਸਾਪਕ੍ਕਨ੍ਤੋ ਹੋਤਿ, ਸਦ੍ਧਿਵਿਹਾਰਿਕੇਨ ਉਪਜ੍ਝਾਯਸ੍ਸ ਸਨ੍ਤਕਂ ਭੇਸਜ੍ਜਂ ਦਾਤਬ੍ਬਂ. ਨੋ ਚੇ ਅਤ੍ਥਿ, ਅਤ੍ਤਨੋ ਭੇਸਜ੍ਜਂ ਉਪਜ੍ਝਾਯਸ੍ਸ ਪਰਿਚ੍ਚਜਿਤ੍ਵਾ ਦਾਤਬ੍ਬਂ. ਅਤ੍ਤਨੋਪਿ ਅਸਨ੍ਤੇ ਵੁਤ੍ਤਨਯੇਨੇਵ ਪਰਿਯੇਸਿਤ੍ਵਾ ਉਪਜ੍ਝਾਯਸ੍ਸ ਸਨ੍ਤਕਂ ਕਤ੍ਵਾ ਦਾਤਬ੍ਬਂ. ਉਪਜ੍ਝਾਯੇਨਪਿ ਸਦ੍ਧਿਵਿਹਾਰਿਕਸ੍ਸ ਮਾਤਾਪਿਤੂਸੁ ਏਵਮੇਵ ਪਟਿਪਜ੍ਜਿਤਬ੍ਬਂ. ਏਸੇਵ ਨਯੋ ਆਚਰਿਯਨ੍ਤੇਵਾਸਿਕੇਸੁਪਿ. ਅਞ੍ਞੋਪਿ ਯੋ ਆਗਨ੍ਤੁਕੋ ਵਾ ਚੋਰੋ ਵਾ ਯੁਦ੍ਧਪਰਾਜਿਤੋ ਇਸ੍ਸਰੋ ਵਾ ਞਾਤਕੇਹਿ ਪਰਿਚ੍ਚਤ੍ਤੋ ਕਪਣੋ ਵਾ ਗਮਿਯਮਨੁਸ੍ਸੋ ਵਾ ਗਿਲਾਨੋ ਹੁਤ੍ਵਾ ਵਿਹਾਰਂ ਪਵਿਸਤਿ, ਸਬ੍ਬੇਸਂ ਅਪਚ੍ਚਾਸੀਸਨ੍ਤੇਨ ਭੇਸਜ੍ਜਂ ਕਾਤਬ੍ਬਂ.

੧੮. ਸਦ੍ਧਂ ਕੁਲਂ ਹੋਤਿ ਚਤੂਹਿ ਪਚ੍ਚਯੇਹਿ ਉਪਟ੍ਠਾਯਕਂ ਭਿਕ੍ਖੁਸਙ੍ਘਸ੍ਸ ਮਾਤਾਪਿਤੁਟ੍ਠਾਨਿਯਂ, ਤਤ੍ਰ ਚੇ ਕੋਚਿ ਗਿਲਾਨੋ ਹੋਤਿ, ਤਸ੍ਸਤ੍ਥਾਯ ਵਿਸ੍ਸਾਸੇਨ ‘‘ਭੇਸਜ੍ਜਂ ਕਤ੍ਵਾ ਭਨ੍ਤੇ ਦੇਥਾ’’ਤਿ ਵਦਨ੍ਤਿ, ਨੇਵ ਦਾਤਬ੍ਬਂ ਨ ਕਾਤਬ੍ਬਂ. ਅਥ ਪਨ ਕਪ੍ਪਿਯਂ ਞਤ੍ਵਾ ਏਵਂ ਪੁਚ੍ਛਨ੍ਤਿ ‘‘ਭਨ੍ਤੇ, ਅਸੁਕਸ੍ਸ ਨਾਮ ਰੋਗਸ੍ਸ ਕਿਂ ਭੇਸਜ੍ਜਂ ਕਰੋਨ੍ਤੀ’’ਤਿ, ‘‘ਇਦਞ੍ਚਿਦਞ੍ਚ ਗਹੇਤ੍ਵਾ ਕਰੋਨ੍ਤੀ’’ਤਿ ਵਤ੍ਤੁਂ ਵਟ੍ਟਤਿ. ‘‘ਭਨ੍ਤੇ, ਮਯ੍ਹਂ ਮਾਤਾ ਗਿਲਾਨਾ, ਭੇਸਜ੍ਜਂ ਤਾਵ ਆਚਿਕ੍ਖਥਾ’’ਤਿ ਏਵਂ ਪੁਚ੍ਛਿਤੇ ਪਨ ਨ ਆਚਿਕ੍ਖਿਤਬ੍ਬਂ, ਅਞ੍ਞਮਞ੍ਞਂ ਪਨ ਕਥਾ ਕਾਤਬ੍ਬਾ ‘‘ਆਵੁਸੋ, ਅਸੁਕਸ੍ਸ ਨਾਮ ਭਿਕ੍ਖੁਨੋ ਇਮਸ੍ਮਿਂ ਰੋਗੇ ਕਿਂ ਭੇਸਜ੍ਜਂ ਕਰਿਂਸੂ’’ਤਿ. ਇਦਞ੍ਚਿਦਞ੍ਚ ਭੇਸਜ੍ਜਂ ਭਨ੍ਤੇਤਿ. ਤਂ ਸੁਤ੍ਵਾ ਇਤਰੋ ਮਾਤੁ ਭੇਸਜ੍ਜਂ ਕਰੋਤਿ, ਵਟ੍ਟਤਿ. ਮਹਾਪਦੁਮਤ੍ਥੇਰੋ ਕਿਰ ਵਸਭਰਞ੍ਞੋਪਿ ਦੇਵਿਯਾ ਰੋਗੇ ਉਪ੍ਪਨ੍ਨੇ ਏਕਾਯ ਇਤ੍ਥਿਯਾ ਆਗਨ੍ਤ੍ਵਾ ਪੁਚ੍ਛਿਤੋ ‘‘ਨ ਜਾਨਾਮੀ’’ਤਿ ਅਵਤ੍ਵਾ ਏਵਮੇਵ ਭਿਕ੍ਖੂਹਿ ਸਦ੍ਧਿਂ ਸਮੁਲ੍ਲਪੇਸਿ. ਤਂ ਸੁਤ੍ਵਾ ਤਸ੍ਸਾ ਭੇਸਜ੍ਜਮਕਂਸੁ. ਵੂਪਸਨ੍ਤੇ ਚ ਰੋਗੇ ਤਿਚੀਵਰੇਨ ਤੀਹਿ ਚ ਕਹਾਪਣਸਤੇਹਿ ਸਦ੍ਧਿਂ ਭੇਸਜ੍ਜਚਙ੍ਕੋਟਕਂ ਪੂਰੇਤ੍ਵਾ ਆਹਰਿਤ੍ਵਾ ਥੇਰਸ੍ਸ ਪਾਦਮੂਲੇ ਠਪੇਤ੍ਵਾ ‘‘ਭਨ੍ਤੇ, ਪੁਪ੍ਫਪੂਜਂ ਕਰੋਥਾ’’ਤਿ ਆਹਂਸੁ. ਥੇਰੋ ‘‘ਆਚਰਿਯਭਾਗੋ ਨਾਮ ਅਯ’’ਨ੍ਤਿ ਕਪ੍ਪਿਯਵਸੇਨ ਗਾਹਾਪੇਤ੍ਵਾ ਪੁਪ੍ਫਪੂਜਮਕਾਸਿ. ਏਵਂ ਤਾਵ ਭੇਸਜ੍ਜੇ ਪਟਿਪਜ੍ਜਿਤਬ੍ਬਂ.

੧੯. ਪਰਿਤ੍ਤੇ ਪਨ ‘‘ਗਿਲਾਨਸ੍ਸ ਪਰਿਤ੍ਤਂ ਕਰੋਥ, ਭਨ੍ਤੇ’’ਤਿ ਵੁਤ੍ਤੇ ਨ ਕਾਤਬ੍ਬਂ, ‘‘ਪਰਿਤ੍ਤਂ ਭਣਥਾ’’ਤਿ ਵੁਤ੍ਤੇ ਪਨ ਭਣਿਤਬ੍ਬਂ. ਸਚੇਪਿਸ੍ਸ ਏਵਂ ਹੋਤਿ ‘‘ਮਨੁਸ੍ਸਾ ਨਾਮ ਨ ਜਾਨਨ੍ਤਿ, ਅਕਰਿਯਮਾਨੇ ਵਿਪ੍ਪਟਿਸਾਰਿਨੋ ਭਵਿਸ੍ਸਨ੍ਤੀ’’ਤਿ, ਕਾਤਬ੍ਬਂ. ‘‘ਪਰਿਤ੍ਤੋਦਕਂ ਪਰਿਤ੍ਤਸੁਤ੍ਤਂ ਕਤ੍ਵਾ ਦੇਥਾ’’ਤਿ ਵੁਤ੍ਤੇ ਪਨ ਤੇਸਂਯੇਵ ਉਦਕਂ ਹਤ੍ਥੇਨ ਚਾਲੇਤ੍ਵਾ ਸੁਤ੍ਤਂ ਪਰਿਮਜ੍ਜਿਤ੍ਵਾ ਦਾਤਬ੍ਬਂ. ਸਚੇ ਵਿਹਾਰਤੋ ਉਦਕਂ ਅਤ੍ਤਨੋ ਸਨ੍ਤਕਂ ਵਾ ਸੁਤ੍ਤਂ ਦੇਤਿ, ਦੁਕ੍ਕਟਂ. ਮਨੁਸ੍ਸਾ ਉਦਕਞ੍ਚ ਸੁਤ੍ਤਞ੍ਚ ਗਹੇਤ੍ਵਾ ਨਿਸੀਦਿਤ੍ਵਾ ‘‘ਪਰਿਤ੍ਤਂ ਭਣਥਾ’’ਤਿ ਵਦਨ੍ਤਿ, ਕਾਤਬ੍ਬਂ. ਨੋ ਚੇ ਜਾਨਨ੍ਤਿ, ਆਚਿਕ੍ਖਿਤਬ੍ਬਂ. ਭਿਕ੍ਖੂਨਂ ਨਿਸਿਨ੍ਨਾਨਂ ਪਾਦੇਸੁ ਉਦਕਂ ਆਕਿਰਿਤ੍ਵਾ ਸੁਤ੍ਤਞ੍ਚ ਠਪੇਤ੍ਵਾ ਗਚ੍ਛਨ੍ਤਿ ‘‘ਪਰਿਤ੍ਤਂ ਕਰੋਥ, ਪਰਿਤ੍ਤਂ ਭਣਥਾ’’ਤਿ, ਨ ਪਾਦਾ ਅਪਨੇਤਬ੍ਬਾ. ਮਨੁਸ੍ਸਾ ਹਿ ਵਿਪ੍ਪਟਿਸਾਰਿਨੋ ਹੋਨ੍ਤਿ. ਅਨ੍ਤੋਗਾਮੇਪਿ ਗਿਲਾਨਸ੍ਸ ਅਤ੍ਥਾਯ ਵਿਹਾਰਂ ਪੇਸੇਨ੍ਤਿ ‘‘ਪਰਿਤ੍ਤਂ ਭਣਨ੍ਤੂ’’ਤਿ, ਭਣਿਤਬ੍ਬਂ. ਅਨ੍ਤੋਗਾਮੇ ਰਾਜਗੇਹਾਦੀਸੁ ਰੋਗੇ ਵਾ ਉਪਦ੍ਦਵੇ ਵਾ ਉਪ੍ਪਨ੍ਨੇ ਪਕ੍ਕੋਸਾਪੇਤ੍ਵਾ ਭਣਾਪੇਨ੍ਤਿ, ਆਟਾਨਾਟਿਯਸੁਤ੍ਤਾਦੀਨਿ ਭਣਿਤਬ੍ਬਾਨਿ. ‘‘ਆਗਨ੍ਤ੍ਵਾ ਗਿਲਾਨਸ੍ਸ ਸਿਕ੍ਖਾਪਦਾਨਿ ਦੇਨ੍ਤੁ, ਧਮ੍ਮਂ ਕਥੇਨ੍ਤੁ, ਰਾਜਨ੍ਤੇਪੁਰੇ ਵਾ ਅਮਚ੍ਚਗੇਹੇ ਵਾ ਆਗਨ੍ਤ੍ਵਾ ਸਿਕ੍ਖਾਪਦਾਨਿ ਦੇਨ੍ਤੁ, ਧਮ੍ਮਂ ਕਥੇਨ੍ਤੂ’’ਤਿ ਪੇਸਿਤੇਪਿ ਗਨ੍ਤ੍ਵਾ ਸਿਕ੍ਖਾਪਦਾਨਿ ਦਾਤਬ੍ਬਾਨਿ, ਧਮ੍ਮੋ ਕਥੇਤਬ੍ਬੋ. ‘‘ਮਤਾਨਂ ਪਰਿਵਾਰਤ੍ਥਂ ਆਗਚ੍ਛਨ੍ਤੂ’’ਤਿ ਪਕ੍ਕੋਸਨ੍ਤਿ, ਨ ਗਨ੍ਤਬ੍ਬਂ. ‘‘ਸੀਵਥਿਕਦਸ੍ਸਨੇ ਅਸੁਭਦਸ੍ਸਨੇ ਚ ਮਰਣਸ੍ਸਤਿਂ ਪਟਿਲਭਿਸ੍ਸਾਮਾ’’ਤਿ ਕਮ੍ਮਟ੍ਠਾਨਸੀਸੇਨ ਗਨ੍ਤੁਂ ਵਟ੍ਟਤਿ. ‘‘ਪਹਾਰੇਦਿਨ੍ਨੇ ਮਤੇਪਿ ਅਮਰਣਾਧਿਪ੍ਪਾਯਸ੍ਸ ਅਨਾਪਤ੍ਤਿ ਵੁਤ੍ਤਾ’’ਤਿ ਨ ਏਤ੍ਤਕੇਨੇਵ ਅਮਨੁਸ੍ਸਗਹਿਤਸ੍ਸ ਪਹਾਰੋ ਦਾਤਬ੍ਬੋ, ਤਾਲਪਣ੍ਣਂ ਪਨ ਪਰਿਤ੍ਤਸੁਤ੍ਤਂ ਵਾ ਹਤ੍ਥੇ ਵਾ ਪਾਦੇ ਵਾ ਬਨ੍ਧਿਤਬ੍ਬਂ, ਰਤਨਸੁਤ੍ਤਾਦੀਨਿ ਪਰਿਤ੍ਤਾਨਿ ਭਣਿਤਬ੍ਬਾਨਿ, ‘‘ਮਾ ਸੀਲਵਨ੍ਤਂ ਭਿਕ੍ਖੁਂ ਵਿਹੇਠੇਹੀ’’ਤਿ ਧਮ੍ਮਕਥਾ ਕਾਤਬ੍ਬਾ, ਆਟਾਨਾਟਿਯਪਰਿਤ੍ਤਂ ਵਾ ਭਣਿਤਬ੍ਬਂ.

ਇਧ ਪਨ ਆਟਾਨਾਟਿਯਪਰਿਤ੍ਤਸ੍ਸ ਪਰਿਕਮ੍ਮਂ ਵੇਦਿਤਬ੍ਬਂ (ਦੀ. ਨਿ. ਅਟ੍ਠ. ੩.੨੮੨). ਪਠਮਮੇਵ ਹਿ ਆਟਾਨਾਟਿਯਸੁਤ੍ਤਂ ਨ ਭਣਿਤਬ੍ਬਂ, ਮੇਤ੍ਤਸੁਤ੍ਤਂ (ਖੁ. ਪਾ. ੯.੧ ਆਦਯੋ; ਸੁ. ਨਿ. ੧੪੩ ਆਦਯੋ) ਧਜਗ੍ਗਸੁਤ੍ਤਂ (ਸਂ. ਨਿ. ੧.੨੪੯) ਰਤਨਸੁਤ੍ਤਨ੍ਤਿ (ਖੁ. ਪਾ. ੬.੧ ਆਦਯੋ; ਸੁ. ਨਿ. ੨੨੪ ਆਦਯੋ) ਇਮਾਨਿ ਸਤ੍ਤਾਹਂ ਭਣਿਤਬ੍ਬਾਨਿ. ਸਚੇ ਮੁਞ੍ਚਤਿ, ਸੁਨ੍ਦਰਂ. ਨੋ ਚੇ ਮੁਞ੍ਚਤਿ, ਆਟਾਨਾਟਿਯਸੁਤ੍ਤਂ ਭਣਿਤਬ੍ਬਂ. ਤਂ ਭਣਨ੍ਤੇਨ ਚ ਭਿਕ੍ਖੁਨਾ ਪਿਟ੍ਠਂ ਵਾ ਮਂਸਂ ਵਾ ਨ ਖਾਦਿਤਬ੍ਬਂ, ਸੁਸਾਨੇ ਨ ਵਸਿਤਬ੍ਬਂ. ਕਸ੍ਮਾ? ਅਮਨੁਸ੍ਸਾ ਓਤਾਰਂ ਲਭਨ੍ਤਿ. ਪਰਿਤ੍ਤਕਰਣਟ੍ਠਾਨਂ ਹਰਿਤੂਪਲਿਤ੍ਤਂ ਕਾਰੇਤ੍ਵਾ ਤਤ੍ਥ ਪਰਿਸੁਦ੍ਧਂ ਆਸਨਂ ਪਞ੍ਞਪੇਤ੍ਵਾ ਨਿਸੀਦਿਤਬ੍ਬਂ. ਪਰਿਤ੍ਤਕਾਰਕੋ ਭਿਕ੍ਖੁ ਵਿਹਾਰਤੋ ਘਰਂ ਨੇਨ੍ਤੇਹਿ ਫਲਕਾਵੁਧੇਹਿ ਪਰਿਵਾਰੇਤ੍ਵਾ ਨੇਤਬ੍ਬੋ. ਅਬ੍ਭੋਕਾਸੇ ਨਿਸੀਦਿਤ੍ਵਾ ਨ ਵਤ੍ਤਬ੍ਬਂ, ਦ੍ਵਾਰਵਾਤਪਾਨਾਨਿ ਪਿਦਹਿਤ੍ਵਾ ਨਿਸਿਨ੍ਨੇਨ ਆਵੁਧਹਤ੍ਥੇਹਿ ਸਮ੍ਪਰਿਵਾਰਿਤੇਨ ਮੇਤ੍ਤਚਿਤ੍ਤਂ ਪੁਰੇਚਾਰਿਕਂ ਕਤ੍ਵਾ ਵਤ੍ਤਬ੍ਬਂ, ਪਠਮਂ ਸਿਕ੍ਖਾਪਦਾਨਿ ਗਾਹਾਪੇਤ੍ਵਾ ਸੀਲੇ ਪਤਿਟ੍ਠਿਤਸ੍ਸ ਪਰਿਤ੍ਤਂ ਕਾਤਬ੍ਬਂ. ਏਵਮ੍ਪਿ ਮੋਚੇਤੁਂ ਅਸਕ੍ਕੋਨ੍ਤੇਨ ਵਿਹਾਰਂ ਨੇਤ੍ਵਾ ਚੇਤਿਯਙ੍ਗਣੇ ਨਿਪਜ੍ਜਾਪੇਤ੍ਵਾ ਆਸਨਪੂਜਂ ਕਾਰੇਤ੍ਵਾ ਦੀਪੇ ਜਾਲਾਪੇਤ੍ਵਾ ਚੇਤਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਮਙ੍ਗਲਕਥਾ ਵਤ੍ਤਬ੍ਬਾ, ਸਬ੍ਬਸਨ੍ਨਿਪਾਤੋ ਘੋਸੇਤਬ੍ਬੋ, ਵਿਹਾਰਸ੍ਸ ਉਪਵਨੇ ਜੇਟ੍ਠਕਰੁਕ੍ਖੋ ਨਾਮ ਹੋਤਿ, ਤਤ੍ਥ ‘‘ਭਿਕ੍ਖੁਸਙ੍ਘੋ ਤੁਮ੍ਹਾਕਂ ਆਗਮਨਂ ਪਤਿਮਾਨੇਤੀ’’ਤਿ ਪਹਿਣਿਤਬ੍ਬਂ. ਸਬ੍ਬਸਨ੍ਨਿਪਾਤਟ੍ਠਾਨੇ ਅਨਾਗਨ੍ਤੁਂ ਨਾਮ ਨ ਲਭਤਿ, ਤਤੋ ਅਮਨੁਸ੍ਸਗਹਿਤਕੋ ‘‘ਤ੍ਵਂ ਕੋਨਾਮੋਸੀ’’ਤਿ ਪੁਚ੍ਛਿਤਬ੍ਬੋ, ਨਾਮੇ ਕਥਿਤੇ ਨਾਮੇਨੇਵ ਆਲਪਿਤਬ੍ਬੋ, ‘‘ਇਤ੍ਥਨ੍ਨਾਮ ਤੁਯ੍ਹਂ ਮਾਲਾਗਨ੍ਧਾਦੀਸੁ ਪਤ੍ਤਿ, ਆਸਨਪੂਜਾਯਂ ਪਤ੍ਤਿ, ਪਿਣ੍ਡਪਾਤੇ ਪਤ੍ਤਿ, ਭਿਕ੍ਖੁਸਙ੍ਘੇਨ ਤੁਯ੍ਹਂ ਪਣ੍ਣਾਕਾਰਤ੍ਥਾਯ ਮਹਾਮਙ੍ਗਲਕਥਾ ਵੁਤ੍ਤਾ, ਭਿਕ੍ਖੁਸਙ੍ਘੇ ਗਾਰਵੇਨ ਏਤਂ ਮੁਞ੍ਚਾਹੀ’’ਤਿ ਮੋਚੇਤਬ੍ਬੋ. ਸਚੇ ਨ ਮੁਞ੍ਚਤਿ, ਦੇਵਤਾਨਂ ਆਰੋਚੇਤਬ੍ਬਂ ‘‘ਤੁਮ੍ਹੇ ਜਾਨਾਥ, ਅਯਂ ਅਮਨੁਸ੍ਸੋ ਅਮ੍ਹਾਕਂ ਵਚਨਂ ਨ ਕਰੋਤਿ, ਮਯਂ ਬੁਦ੍ਧਆਣਂ ਕਰਿਸ੍ਸਾਮਾ’’ਤਿ ਪਰਿਤ੍ਤਂ ਕਾਤਬ੍ਬਂ. ਏਤਂ ਤਾਵ ਗਿਹੀਨਂ ਪਰਿਕਮ੍ਮਂ. ਸਚੇ ਪਨ ਭਿਕ੍ਖੁ ਅਮਨੁਸ੍ਸੇਨ ਗਹਿਤੋ ਹੋਤਿ, ਆਸਨਾਨਿ ਧੋਵਿਤ੍ਵਾ ਸਬ੍ਬਸਨ੍ਨਿਪਾਤਂ ਘੋਸਾਪੇਤ੍ਵਾ ਗਨ੍ਧਮਾਲਾਦੀਸੁ ਪਤ੍ਤਿਂ ਦਤ੍ਵਾ ਪਰਿਤ੍ਤਂ ਭਣਿਤਬ੍ਬਂ, ਇਦਂ ਭਿਕ੍ਖੂਨਂ ਪਰਿਕਮ੍ਮਂ. ਏਵਂ ਪਰਿਤ੍ਤੇ ਪਟਿਪਜ੍ਜਿਤਬ੍ਬਂ.

੨੦. ਪਟਿਸਨ੍ਥਾਰੇ ਪਨ ਅਯਂ ਵਿਨਿਚ੍ਛਯੋ (ਪਾਰਾ. ਅਟ੍ਠ. ੨.੧੮੫-੭) – ਅਨਾਮਟ੍ਠਪਿਣ੍ਡਪਾਤੋ ਕਸ੍ਸ ਦਾਤਬ੍ਬੋ, ਕਸ੍ਸ ਨ ਦਾਤਬ੍ਬੋ? ਮਾਤਾਪਿਤੂਨਂ ਤਾਵ ਦਾਤਬ੍ਬੋ. ਸਚੇਪਿ ਕਹਾਪਣਗ੍ਘਨਕੋ ਹੋਤਿ, ਸਦ੍ਧਾਦੇਯ੍ਯਵਿਨਿਪਾਤਨਂ ਨਤ੍ਥਿ. ਮਾਤਾਪਿਤੁਉਪਟ੍ਠਾਕਾਨਂ ਵੇਯ੍ਯਾਵਚ੍ਚਕਰਸ੍ਸ ਪਣ੍ਡੁਪਲਾਸਸ੍ਸ ਚਾਤਿ ਏਤੇਸਮ੍ਪਿ ਦਾਤਬ੍ਬੋ. ਤਤ੍ਥ ਪਣ੍ਡੁਪਲਾਸਸ੍ਸ ਥਾਲਕੇ ਪਕ੍ਖਿਪਿਤ੍ਵਾਪਿ ਦਾਤੁਂ ਵਟ੍ਟਤਿ, ਤਂ ਠਪੇਤ੍ਵਾ ਅਞ੍ਞੇਸਂ ਅਗਾਰਿਕਾਨਂ ਮਾਤਾਪਿਤੂਨਮ੍ਪਿ ਨ ਵਟ੍ਟਤਿ. ਪਬ੍ਬਜਿਤਪਰਿਭੋਗੋ ਹਿ ਅਗਾਰਿਕਾਨਂ ਚੇਤਿਯਟ੍ਠਾਨਿਯੋ. ਅਪਿਚ ਅਨਾਮਟ੍ਠਪਿਣ੍ਡਪਾਥੋ ਨਾਮੇਸ ਸਮ੍ਪਤ੍ਤਸ੍ਸ ਦਾਮਰਿਕਚੋਰਸ੍ਸਪਿ ਇਸ੍ਸਰਿਯਸ੍ਸਪਿ ਦਾਤਬ੍ਬੋ. ਕਸ੍ਮਾ? ਤੇ ਹਿ ਅਦੀਯਮਾਨੇਪਿ ‘‘ਨ ਦੇਨ੍ਤੀ’’ਤਿ ਆਮਸਿਤ੍ਵਾ ਦੀਯਮਾਨੇਪਿ ‘‘ਉਚ੍ਛਿਟ੍ਠਕਂ ਦੇਨ੍ਤੀ’’ਤਿ ਕੁਜ੍ਝਨ੍ਤਿ, ਕੁਦ੍ਧਾ ਜੀਵਿਤਾਪਿ ਵੋਰੋਪੇਨ੍ਤਿ, ਸਾਸਨਸ੍ਸਪਿ ਅਨ੍ਤਰਾਯਂ ਕਰੋਨ੍ਤਿ. ਰਜ੍ਜਂ ਪਤ੍ਥਯਮਾਨਸ੍ਸ ਵਿਚਰਤੋ ਚੋਰਨਾਗਸ੍ਸ ਵਤ੍ਥੁ ਚੇਤ੍ਥ ਕਥੇਤਬ੍ਬਂ. ਏਵਂ ਅਨਾਮਟ੍ਠਪਿਣ੍ਡਪਾਤੇ ਪਟਿਪਜ੍ਜਿਤਬ੍ਬਂ.

ਪਟਿਸਨ੍ਥਾਰੋ ਚ ਨਾਮਾਯਂ ਕਸ੍ਸ ਕਾਤਬ੍ਬੋ, ਕਸ੍ਸ ਨ ਕਾਤਬ੍ਬੋ? ਪਟਿਸਨ੍ਥਾਰੋ ਨਾਮ ਵਿਹਾਰਂ ਸਮ੍ਪਤ੍ਤਸ੍ਸ ਯਸ੍ਸ ਕਸ੍ਸਚਿ ਆਗਨ੍ਤੁਕਸ੍ਸ ਵਾ ਦਲਿਦ੍ਦਸ੍ਸ ਵਾ ਚੋਰਸ੍ਸ ਵਾ ਇਸ੍ਸਰਸ੍ਸ ਵਾ ਕਾਤਬ੍ਬੋਯੇਵ. ਕਥਂ? ਆਗਨ੍ਤੁਕਂ ਤਾਵ ਖੀਣਪਰਿਬ੍ਬਯਂ ਵਿਹਾਰਂ ਸਮ੍ਪਤ੍ਤਂ ਦਿਸ੍ਵਾ ‘‘ਪਾਨੀਯਂ ਪਿਵਾ’’ਤਿ ਦਾਤਬ੍ਬਂ, ਪਾਦਮਕ੍ਖਨਤੇਲਂ ਦਾਤਬ੍ਬਂ, ਕਾਲੇ ਆਗਤਸ੍ਸ ਯਾਗੁਭਤ੍ਤਂ, ਵਿਕਾਲੇ ਆਗਤਸ੍ਸ ਸਚੇ ਤਣ੍ਡੁਲਾ ਅਤ੍ਥਿ, ਤਣ੍ਡੁਲਾ ਦਾਤਬ੍ਬਾ. ਅਵੇਲਾਯ ਸਮ੍ਪਤ੍ਤੋਪਿ ‘‘ਗਚ੍ਛਾਹੀ’’ਤਿ ਨ ਵਤ੍ਤਬ੍ਬੋ, ਸਯਨਟ੍ਠਾਨਂ ਦਾਤਬ੍ਬਂ. ਸਬ੍ਬਂ ਅਪਚ੍ਚਾਸੀਯਨ੍ਤੇਨੇਵ ਕਾਤਬ੍ਬਂ. ‘‘ਮਨੁਸ੍ਸਾ ਨਾਮ ਚਤੁਪਚ੍ਚਯਦਾਯਕਾ, ਏਵਂ ਸਙ੍ਗਹੇ ਕਰਿਯਮਾਨੇ ਪੁਨਪ੍ਪੁਨਂ ਪਸੀਦਿਤ੍ਵਾ ਉਪਕਾਰਂ ਕਰਿਸ੍ਸਨ੍ਤੀ’’ਤਿ ਚਿਤ੍ਤਂ ਨ ਉਪ੍ਪਾਦੇਤਬ੍ਬਂ. ਚੋਰਾਨਂ ਪਨ ਸਙ੍ਘਿਕਮ੍ਪਿ ਦਾਤਬ੍ਬਂ. ਪਟਿਸਨ੍ਥਾਰਾਨਿਸਂਸਦੀਪਨਤ੍ਥਞ੍ਚ ਚੋਰਨਾਗਵਤ੍ਥੁ, ਭਾਤਰਾ ਸਦ੍ਧਿਂ ਜਮ੍ਬੁਦੀਪਗਤਸ੍ਸ ਮਹਾਨਾਗਰਞ੍ਞੋ ਵਤ੍ਥੁ, ਪਿਤੁਰਾਜਸ੍ਸ ਰਜ੍ਜੇ ਚਤੁਨ੍ਨਂ ਅਮਚ੍ਚਾਨਂ ਵਤ੍ਥੁ, ਅਭਯਚੋਰਵਤ੍ਥੂਤਿ ਏਵਮਾਦੀਨਿ ਬਹੂਨਿ ਵਤ੍ਥੂਨਿ ਮਹਾਅਟ੍ਠਕਥਾਯਂ ਵਿਤ੍ਥਾਰਤੋ ਵੁਤ੍ਤਾਨਿ.

ਤਤ੍ਰਾਯਂ ਏਕਵਤ੍ਥੁਦੀਪਨਾ – ਸੀਹਲ਼ਦੀਪੇ ਕਿਰ ਅਭਯੋ ਨਾਮ ਚੋਰੋ ਪਞ੍ਚਸਤਪਰਿਵਾਰੋ ਏਕਸ੍ਮਿਂ ਠਾਨੇ ਖਨ੍ਧਾਵਾਰਂ ਬਨ੍ਧਿਤ੍ਵਾ ਸਮਨ੍ਤਾ ਤਿਯੋਜਨਂ ਉਬ੍ਬਾਸੇਤ੍ਵਾ ਵਸਤਿ. ਅਨੁਰਾਧਪੁਰਵਾਸਿਨੋ ਕਦਮ੍ਬਨਦਿਂ ਨ ਉਤ੍ਤਰਨ੍ਤਿ, ਚੇਤਿਯਗਿਰਿਮਗ੍ਗੇ ਜਨਸਞ੍ਚਾਰੋ ਉਪਚ੍ਛਿਨ੍ਨੋ. ਅਥੇਕਦਿਵਸਂ ਚੋਰੋ ‘‘ਚੇਤਿਯਗਿਰਿਂ ਵਿਲੁਮ੍ਪਿਸ੍ਸਾਮੀ’’ਤਿ ਅਗਮਾਸਿ. ਆਰਾਮਿਕਾ ਦਿਸ੍ਵਾ ਦੀਘਭਾਣਕਅਭਯਤ੍ਥੇਰਸ੍ਸ ਆਰੋਚੇਸੁਂ. ਥੇਰੋ ‘‘ਸਪ੍ਪਿਫਾਣਿਤਾਦੀਨਿ ਅਤ੍ਥੀ’’ਤਿ ਪੁਚ੍ਛਿ. ‘‘ਅਤ੍ਥਿ, ਭਨ੍ਤੇ’’ਤਿ. ‘‘ਚੋਰਾਨਂ ਦੇਥ’’. ‘‘ਤਣ੍ਡੁਲਾ ਅਤ੍ਥੀ’’ਤਿ. ‘‘ਅਤ੍ਥਿ, ਭਨ੍ਤੇ, ਸਙ੍ਘਸ੍ਸਤ੍ਥਾਯ ਆਹਟਾ ਤਣ੍ਡੁਲਾ ਚ ਪਕ੍ਕਸਾਕਞ੍ਚ ਗੋਰਸੋ ਚਾ’’ਤਿ. ‘‘ਭਤ੍ਤਂ ਸਮ੍ਪਾਦੇਤ੍ਵਾ ਚੋਰਾਨਂ ਦੇਥਾ’’ਤਿ. ਆਰਾਮਿਕਾ ਤਥਾ ਕਰਿਂਸੁ. ਚੋਰਾ ਭਤ੍ਤਂ ਭੁਞ੍ਜਿਤ੍ਵਾ ‘‘ਕੇਨਾਯਂ ਪਟਿਸਨ੍ਥਾਰੋ ਕਤੋ’’ਤਿ ਪੁਚ੍ਛਿਂਸੁ. ‘‘ਅਮ੍ਹਾਕਂ ਅਯ੍ਯੇਨ ਅਭਯਤ੍ਥੇਰੇਨਾ’’ਤਿ. ਚੋਰਾ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਆਹਂਸੁ ‘‘ਮਯਂ ‘ਸਙ੍ਘਸ੍ਸ ਚ ਚੇਤਿਯਸ੍ਸ ਚ ਸਨ੍ਤਕਂ ਅਚ੍ਛਿਨ੍ਦਿਤ੍ਵਾ ਗਹੇਸ੍ਸਾਮਾ’ਤਿ ਆਗਤਾ, ਤੁਮ੍ਹਾਕਂ ਪਨ ਇਮਿਨਾ ਪਟਿਸਨ੍ਥਾਰੇਨ ਮਯਂ ਪਸਨ੍ਨਾ, ਅਜ੍ਜ ਪਟ੍ਠਾਯ ਵਿਹਾਰੇ ਧਮ੍ਮਿਕਾਰਕ੍ਖਾ ਅਮ੍ਹਾਕਂ ਆਯਤ੍ਤਾ ਹੋਤੁ, ਨਾਗਰਾ ਆਗਨ੍ਤ੍ਵਾ ਦਾਨਂ ਦੇਨ੍ਤੁ, ਚੇਤਿਯਂ ਵਨ੍ਦਨ੍ਤੂ’’ਤਿ. ਤਤੋ ਪਟ੍ਠਾਯ ਚ ਨਾਗਰੇ ਦਾਨਂ ਦਾਤੁਂ ਆਗਚ੍ਛਨ੍ਤੇ ਨਦੀਤੀਰੇਯੇਵ ਪਚ੍ਚੁਗ੍ਗਨ੍ਤ੍ਵਾ ਰਕ੍ਖਨ੍ਤਾ ਵਿਹਾਰਂ ਨੇਨ੍ਤਿ, ਵਿਹਾਰੇਪਿ ਦਾਨਂ ਦੇਨ੍ਤਾਨਂ ਰਕ੍ਖਂ ਕਤ੍ਵਾ ਤਿਟ੍ਠਨ੍ਤਿ. ਤੇਪਿ ਭਿਕ੍ਖੂਨਂ ਭੁਤ੍ਤਾਵਸੇਸਂ ਚੋਰਾਨਂ ਦੇਨ੍ਤਿ. ਗਮਨਕਾਲੇਪਿ ਤੇ ਚੋਰਾ ਨਦੀਤੀਰਂ ਪਾਪੇਤ੍ਵਾ ਨਿਵਤ੍ਤਨ੍ਤਿ.

ਅਥੇਕਦਿਵਸਂ ਭਿਕ੍ਖੁਸਙ੍ਘੇ ਖੀਯਨਕਕਥਾ ਉਪ੍ਪਨ੍ਨਾ ‘‘ਥੇਰੋ ਇਸ੍ਸਰਵਤਾਯ ਸਙ੍ਘਸਨ੍ਤਕਂ ਚੋਰਾਨਂ ਅਦਾਸੀ’’ਤਿ. ਥੇਰੋ ਸਨ੍ਨਿਪਾਤਂ ਕਾਰਾਪੇਤ੍ਵਾ ਆਹ ‘‘ਚੋਰਾ ‘ਸਙ੍ਘਸ੍ਸ ਪਕਤਿਵਟ੍ਟਞ੍ਚ ਚੇਤਿਯਸਨ੍ਤਕਞ੍ਚ ਅਚ੍ਛਿਨ੍ਦਿਤ੍ਵਾ ਗਣ੍ਹਿਸ੍ਸਾਮਾ’ਤਿ ਆਗਮਿਂਸੁ, ਅਥ ਤੇਸਂ ਮਯਾ ‘ਏਤਂ ਨ ਹਰਿਸ੍ਸਨ੍ਤੀ’ਤਿ ਏਤ੍ਤਕੋ ਨਾਮ ਪਟਿਸਨ੍ਥਾਰੋ ਕਤੋ, ਤਂ ਸਬ੍ਬਮ੍ਪਿ ਏਕਤੋ ਸਮ੍ਪਿਣ੍ਡੇਤ੍ਵਾ ਅਗ੍ਘਾਪੇਥ, ਤੇਨ ਕਾਰਣੇਨ ਅਵਿਲੁਤ੍ਤਂ ਭਣ੍ਡਂ ਏਕਤੋ ਸਮ੍ਪਿਣ੍ਡੇਤ੍ਵਾ ਅਗ੍ਘਾਪੇਥਾ’’ਤਿ. ਤਤੋ ਸਬ੍ਬਮ੍ਪਿ ਥੇਰੇਨ ਦਿਨ੍ਨਕਂ ਚੇਤਿਯਘਰੇ ਏਕਂ ਵਰਪੋਤ੍ਥਕਚਿਤ੍ਤਤ੍ਥਰਣਂ ਨ ਅਗ੍ਘਤਿ. ਤਤੋ ਆਹਂਸੁ ‘‘ਥੇਰੇਨ ਕਤੋ ਪਟਿਸਨ੍ਥਾਰੋ ਸੁਕਤੋ, ਚੋਦੇਤੁਂ ਵਾ ਸਾਰੇਤੁਂ ਵਾ ਨ ਲਬ੍ਭਤਿ, ਗੀਵਾ ਵਾ ਅਵਹਾਰੋ ਵਾ ਨਤ੍ਥੀ’’ਤਿ. ਏਵਂ ਮਹਾਨਿਸਂਸੋ ਪਟਿਸਨ੍ਥਾਰੋਤਿ ਸਲ੍ਲਕ੍ਖੇਤ੍ਵਾ ਕਤ੍ਤਬ੍ਬੋ ਪਣ੍ਡਿਤੇਨ ਭਿਕ੍ਖੁਨਾਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਭੇਸਜ੍ਜਾਦਿਕਰਣਵਿਨਿਚ੍ਛਯਕਥਾ ਸਮਤ੍ਤਾ.