੨੯. ਕਥਿਨਤ੍ਥਾਰਵਿਨਿਚ੍ਛਯਕਥਾ

੨੨੬. ਕਥਿਨਨ੍ਤਿ ਏਤ੍ਥ (ਮਹਾਵ. ਅਟ੍ਠ. ੩੦੬) ਪਨ ਕਥਿਨਂ ਅਤ੍ਥਰਿਤੁਂ ਕੇ ਲਭਨ੍ਤਿ, ਕੇ ਨ ਲਭਨ੍ਤਿ? ਗਣਨਵਸੇਨ ਤਾਵ ਪਚ੍ਛਿਮਕੋਟਿਯਾ ਪਞ੍ਚ ਜਨਾ ਲਭਨ੍ਤਿ, ਉਦ੍ਧਂ ਸਤਸਹਸ੍ਸਮ੍ਪਿ, ਪਞ੍ਚਨ੍ਨਂ ਹੇਟ੍ਠਾ ਨ ਲਭਨ੍ਤਿ. ਵੁਟ੍ਠਵਸ੍ਸਵਸੇਨ ਪੁਰਿਮਿਕਾਯ ਵਸ੍ਸਂ ਉਪਗਨ੍ਤ੍ਵਾ ਪਠਮਪਵਾਰਣਾਯ ਪਵਾਰਿਤਾ ਲਭਨ੍ਤਿ. ਛਿਨ੍ਨਵਸ੍ਸਾ ਵਾ ਪਚ੍ਛਿਮਿਕਾਯ ਉਪਗਤਾ ਵਾ ਨ ਲਭਨ੍ਤਿ. ‘‘ਅਞ੍ਞਸ੍ਮਿਂ ਵਿਹਾਰੇ ਵੁਟ੍ਠਵਸ੍ਸਾਪਿ ਨ ਲਭਨ੍ਤੀ’’ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਪੁਰਿਮਿਕਾਯ ਉਪਗਤਾਨਂ ਪਨ ਸਬ੍ਬੇ ਗਣਪੂਰਕਾ ਹੋਨ੍ਤਿ, ਆਨਿਸਂਸਂ ਨ ਲਭਨ੍ਤਿ, ਆਨਿਸਂਸੋ ਇਤਰੇਸਂਯੇਵ ਹੋਤਿ. ਸਚੇ ਪੁਰਿਮਿਕਾਯ ਉਪਗਤਾ ਚਤ੍ਤਾਰੋ ਵਾ ਹੋਨ੍ਤਿ ਤਯੋ ਵਾ ਦ੍ਵੇ ਵਾ ਏਕੋ ਵਾ, ਇਤਰੇ ਗਣਪੂਰਕੇ ਕਤ੍ਵਾ ਕਥਿਨਂ ਅਤ੍ਥਰਿਤਬ੍ਬਂ. ਅਥ ਚਤ੍ਤਾਰੋ ਭਿਕ੍ਖੂ ਉਪਗਤਾ, ਏਕੋ ਪਰਿਪੁਣ੍ਣਵਸ੍ਸੋ ਸਾਮਣੇਰੋ, ਸੋ ਚੇ ਪਚ੍ਛਿਮਿਕਾਯ ਉਪਸਮ੍ਪਜ੍ਜਤਿ, ਗਣਪੂਰਕੋ ਚੇਵ ਹੋਤਿ ਆਨਿਸਂਸਞ੍ਚ ਲਭਤਿ. ਤਯੋ ਭਿਕ੍ਖੂ ਦ੍ਵੇ ਸਾਮਣੇਰਾ, ਦ੍ਵੇ ਭਿਕ੍ਖੂ ਤਯੋ ਸਾਮਣੇਰਾ, ਏਕੋ ਭਿਕ੍ਖੁ ਚਤ੍ਤਾਰੋ ਸਾਮਣੇਰਾਤਿ ਏਤ੍ਥਾਪਿ ਏਸੇਵ ਨਯੋ. ਸਚੇ ਪੁਰਿਮਿਕਾਯ ਉਪਗਤਾ ਕਥਿਨਤ੍ਥਾਰਕੁਸਲਾ ਨ ਹੋਨ੍ਤਿ, ਅਤ੍ਥਾਰਕੁਸਲਾ ਖਨ੍ਧਕਭਾਣਕਤ੍ਥੇਰਾ ਪਰਿਯੇਸਿਤ੍ਵਾ ਆਨੇਤਬ੍ਬਾ. ਕਮ੍ਮਵਾਚਂ ਸਾਵੇਤ੍ਵਾ ਕਥਿਨਂ ਅਤ੍ਥਰਾਪੇਤ੍ਵਾ ਦਾਨਞ੍ਚ ਭੁਞ੍ਜਿਤ੍ਵਾ ਗਮਿਸ੍ਸਨ੍ਤਿ, ਆਨਿਸਂਸੋ ਪਨ ਇਤਰੇਸਂਯੇਵ ਹੋਤਿ.

ਕਥਿਨਂ ਕੇਨ ਦਿਨ੍ਨਂ ਵਟ੍ਟਤਿ? ਯੇਨ ਕੇਨਚਿ ਦੇਵੇਨ ਵਾ ਮਨੁਸ੍ਸੇਨ ਵਾ ਪਞ੍ਚਨ੍ਨਂ ਵਾ ਸਹਧਮ੍ਮਿਕਾਨਂ ਅਞ੍ਞਤਰੇਨ ਦਿਨ੍ਨਂ ਵਟ੍ਟਤਿ. ਕਥਿਨਦਾਯਕਸ੍ਸ ਵਤ੍ਤਂ ਅਤ੍ਥਿ, ਸਚੇ ਸੋ ਤਂ ਅਜਾਨਨ੍ਤੋ ਪੁਚ੍ਛਤਿ – ‘‘ਭਨ੍ਤੇ, ਕਥਂ ਕਥਿਨਂ ਦਾਤਬ੍ਬ’’ਨ੍ਤਿ, ਤਸ੍ਸ ਏਵਂ ਆਚਿਕ੍ਖਿਤਬ੍ਬਂ ‘‘ਤਿਣ੍ਣਂ ਚੀਵਰਾਨਂ ਅਞ੍ਞਤਰਪ੍ਪਹੋਨਕਂ ਸੂਰਿਯੁਗ੍ਗਮਨਸਮਯੇ ਵਤ੍ਥਂ ‘ਕਥਿਨਚੀਵਰਂ ਦੇਮਾ’ਤਿ ਦਾਤੁਂ ਵਟ੍ਟਤਿ. ਤਸ੍ਸ ਪਰਿਕਮ੍ਮਤ੍ਥਂ ਏਤ੍ਤਕਾ ਨਾਮ ਸੂਚਿਯੋ, ਏਤ੍ਤਕਂ ਸੁਤ੍ਤਂ, ਏਤ੍ਤਕਂ ਰਜਨਂ, ਪਰਿਕਮ੍ਮਂ ਕਰੋਨ੍ਤਾਨਂ ਏਤ੍ਤਕਾਨਂ ਭਿਕ੍ਖੂਨਂ ਯਾਗੁਭਤ੍ਤਞ੍ਚ ਦਾਤੁਂ ਵਟ੍ਟਤੀ’’ਤਿ.

ਕਥਿਨਤ੍ਥਾਰਕੇਨਪਿ ਧਮ੍ਮੇਨ ਸਮੇਨ ਉਪ੍ਪਨ੍ਨਂ ਕਥਿਨਂ ਅਤ੍ਥਰਨ੍ਤੇਨ ਵਤ੍ਤਂ ਜਾਨਿਤਬ੍ਬਂ. ਤਨ੍ਤਵਾਯਗੇਹਤੋ ਹਿ ਆਭਤਸਨ੍ਤਾਨੇਨੇਵ ਖਲਿਮਕ੍ਖਿਤਸਾਟਕੋ ਨ ਵਟ੍ਟਤਿ, ਮਲੀਨਸਾਟਕੋਪਿ ਨ ਵਟ੍ਟਤਿ, ਤਸ੍ਮਾ ਕਥਿਨਤ੍ਥਾਰਸਾਟਕਂ ਲਭਿਤ੍ਵਾ ਸੁਟ੍ਠੁ ਧੋਵਿਤ੍ਵਾ ਸੂਚਿਆਦੀਨਿ ਚੀਵਰਕਮ੍ਮੂਪਕਰਣਾਨਿ ਸਜ੍ਜੇਤ੍ਵਾ ਬਹੂਹਿ ਭਿਕ੍ਖੂਹਿ ਸਦ੍ਧਿਂ ਤਦਹੇਵ ਸਿਬ੍ਬਿਤ੍ਵਾ ਨਿਟ੍ਠਿਤਸੂਚਿਕਮ੍ਮਂ ਰਜਿਤ੍ਵਾ ਕਪ੍ਪਬਿਨ੍ਦੁਂ ਦਤ੍ਵਾ ਕਥਿਨਂ ਅਤ੍ਥਰਿਤਬ੍ਬਂ. ਸਚੇ ਤਸ੍ਮਿਂ ਅਨਤ੍ਥਤੇਯੇਵ ਅਞ੍ਞਂ ਕਥਿਨਸਾਟਕਂ ਆਹਰਤਿ, ਅਞ੍ਞਾਨਿ ਚ ਬਹੂਨਿ ਕਥਿਨਾਨਿਸਂਸਵਤ੍ਥਾਨਿ ਦੇਤਿ, ਯੋ ਆਨਿਸਂਸਂ ਬਹੁਂ ਦੇਤਿ, ਤਸ੍ਸ ਸਨ੍ਤਕੇਨ ਅਤ੍ਥਰਿਤਬ੍ਬਂ. ਇਤਰੋ ਤਥਾ ਤਥਾ ਓਵਦਿਤ੍ਵਾ ਸਞ੍ਞਾਪੇਤਬ੍ਬੋ.

ਕਥਿਨਂ ਪਨ ਕੇਨ ਅਤ੍ਥਰਿਤਬ੍ਬਂ? ਯਸ੍ਸ ਸਙ੍ਘੋ ਕਥਿਨਚੀਵਰਂ ਦੇਤਿ. ਸਙ੍ਘੇਨ ਪਨ ਕਸ੍ਸ ਦਾਤਬ੍ਬਂ? ਯੋ ਜਿਣ੍ਣਚੀਵਰੋ ਹੋਤਿ. ਸਚੇ ਬਹੂ ਜਿਣ੍ਣਚੀਵਰਾ, ਵੁਡ੍ਢਸ੍ਸ ਦਾਤਬ੍ਬਂ. ਵੁਡ੍ਢੇਸੁਪਿ ਯੋ ਮਹਾਪਰਿਸੋ ਤਦਹੇਵ ਚੀਵਰਂ ਕਤ੍ਵਾ ਅਤ੍ਥਰਿਤੁਂ ਸਕ੍ਕੋਤਿ, ਤਸ੍ਸ ਦਾਤਬ੍ਬਂ. ਸਚੇ ਵੁਡ੍ਢੋ ਨ ਸਕ੍ਕੋਤਿ, ਨਵਕਤਰੋ ਸਕ੍ਕੋਤਿ, ਤਸ੍ਸ ਦਾਤਬ੍ਬਂ. ਅਪਿਚ ਸਙ੍ਘੇਨ ਮਹਾਥੇਰਸ੍ਸ ਸਙ੍ਗਹਂ ਕਾਤੁਂ ਵਟ੍ਟਤਿ, ਤਸ੍ਮਾ ‘‘ਤੁਮ੍ਹੇ, ਭਨ੍ਤੇ, ਗਣ੍ਹਥ, ਮਯਂ ਕਤ੍ਵਾ ਦਸ੍ਸਾਮਾ’’ਤਿ ਵਤ੍ਤਬ੍ਬਂ. ਤੀਸੁ ਚੀਵਰੇਸੁ ਯਂ ਜਿਣ੍ਣਂ ਹੋਤਿ, ਤਦਤ੍ਥਾਯ ਦਾਤਬ੍ਬਂ. ਪਕਤਿਯਾ ਦੁਪਟ੍ਟਚੀਵਰਸ੍ਸ ਦੁਪਟ੍ਟਤ੍ਥਾਯੇਵ ਦਾਤਬ੍ਬਂ. ਸਚੇਪਿਸ੍ਸ ਏਕਪਟ੍ਟਚੀਵਰਂ ਘਨਂ ਹੋਤਿ, ਕਥਿਨਸਾਟਕਾ ਚ ਪੇਲਵਾ, ਸਾਰੁਪ੍ਪਤ੍ਥਾਯ ਦੁਪਟ੍ਟਪ੍ਪਹੋਨਕਮੇਵ ਦਾਤਬ੍ਬਂ, ‘‘ਅਹਂ ਅਲਭਨ੍ਤੋ ਏਕਪਟ੍ਟਂ ਪਾਰੁਪਾਮੀ’’ਤਿ ਵਦਨ੍ਤਸ੍ਸਪਿ ਦੁਪਟ੍ਟਂ ਦਾਤੁਂ ਵਟ੍ਟਤਿ. ਯੋ ਪਨ ਲੋਭਪਕਤਿਕੋ ਹੋਤਿ, ਤਸ੍ਸ ਨ ਦਾਤਬ੍ਬਂ. ਤੇਨਪਿ ‘‘ਕਥਿਨਂ ਅਤ੍ਥਰਿਤ੍ਵਾ ਪਚ੍ਛਾ ਵਿਸਿਬ੍ਬਿਤ੍ਵਾ ਦ੍ਵੇ ਚੀਵਰਾਨਿ ਕਰਿਸ੍ਸਾਮੀ’’ਤਿ ਨ ਗਹੇਤਬ੍ਬਂ. ਯਸ੍ਸ ਪਨ ਦੀਯਤਿ, ਤਸ੍ਸ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਇਦਂ ਸਙ੍ਘਸ੍ਸ ਕਥਿਨਦੁਸ੍ਸਂ ਉਪ੍ਪਨ੍ਨਂ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਦੇਯ੍ਯ ਕਥਿਨਂ ਅਤ੍ਥਰਿਤੁਂ, ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਇਦਂ ਸਙ੍ਘਸ੍ਸ ਕਥਿਨਦੁਸ੍ਸਂ ਉਪ੍ਪਨ੍ਨਂ, ਸਙ੍ਘੋ ਇਮਂ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦੇਤਿ ਕਥਿਨਂ ਅਤ੍ਥਰਿਤੁਂ, ਯਸ੍ਸਾਯਸ੍ਮਤੋ ਖਮਤਿ ਇਮਸ੍ਸ ਕਥਿਨਦੁਸ੍ਸਸ੍ਸ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਦਾਨਂ ਕਥਿਨਂ ਅਤ੍ਥਰਿਤੁਂ, ਸੋ ਤੁਣ੍ਹਸ੍ਸ. ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦਿਨ੍ਨਂ ਇਦਂ ਸਙ੍ਘੇਨ ਕਥਿਨਦੁਸ੍ਸਂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਕਥਿਨਂ ਅਤ੍ਥਰਿਤੁਂ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਮਹਾਵ. ੩੦੭) –

ਏਵਂ ਦੁਤਿਯਕਮ੍ਮਵਾਚਾਯ ਦਾਤਬ੍ਬਂ.

ਏਵਂ ਦਿਨ੍ਨੇ ਪਨ ਕਥਿਨੇ ਸਚੇ ਤਂ ਕਥਿਨਦੁਸ੍ਸਂ ਨਿਟ੍ਠਿਤਪਰਿਕਮ੍ਮਮੇਵ ਹੋਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਨਿਟ੍ਠਿਤਪਰਿਕਮ੍ਮਂ ਹੋਤਿ, ‘‘ਅਹਂ ਥੇਰੋ’’ਤਿ ਵਾ ‘‘ਬਹੁਸ੍ਸੁਤੋ’’ਤਿ ਵਾ ਏਕੇਨਪਿ ਅਕਾਤੁਂ ਨ ਲਬ੍ਭਤਿ, ਸਬ੍ਬੇਹੇਵ ਸਨ੍ਨਿਪਤਿਤ੍ਵਾ ਧੋਵਨਸਿਬ੍ਬਨਰਜਨਾਨਿ ਨਿਟ੍ਠਾਪੇਤਬ੍ਬਾਨਿ. ਇਦਞ੍ਹਿ ਕਥਿਨਵਤ੍ਤਂ ਨਾਮ ਬੁਦ੍ਧਪ੍ਪਸਤ੍ਥਂ. ਅਤੀਤੇ ਪਦੁਮੁਤ੍ਤਰੋਪਿ ਭਗਵਾ ਕਥਿਨਵਤ੍ਤਂ ਅਕਾਸਿ. ਤਸ੍ਸ ਕਿਰ ਅਗ੍ਗਸਾਵਕੋ ਸੁਜਾਤਤ੍ਥੇਰੋ ਨਾਮ ਕਥਿਨਂ ਗਣ੍ਹਿ. ਤਂ ਸਤ੍ਥਾ ਅਟ੍ਠਸਟ੍ਠਿਯਾ ਭਿਕ੍ਖੁਸਤਸਹਸ੍ਸੇਹਿ ਸਦ੍ਧਿਂ ਨਿਸੀਦਿਤ੍ਵਾ ਅਕਾਸਿ.

ਕਤਪਰਿਯੋਸਿਤਂ ਪਨ ਕਥਿਨਂ ਗਹੇਤ੍ਵਾ ਅਤ੍ਥਾਰਕੇਨ ਭਿਕ੍ਖੁਨਾ ਸਚੇ ਸਙ੍ਘਾਟਿਯਾ ਕਥਿਨਂ ਅਤ੍ਥਰਿਤੁਕਾਮੋ ਹੋਤਿ, ਪੋਰਾਣਿਕਾ ਸਙ੍ਘਾਟਿ ਪਚ੍ਚੁਦ੍ਧਰਿਤਬ੍ਬਾ, ਨਵਾ ਸਙ੍ਘਾਟਿ ਅਧਿਟ੍ਠਾਤਬ੍ਬਾ, ‘‘ਇਮਾਯ ਸਙ੍ਘਾਟਿਯਾ ਕਥਿਨਂ ਅਤ੍ਥਰਾਮੀ’’ਤਿ ਵਾਚਾ ਭਿਨ੍ਦਿਤਬ੍ਬਾ. ਸਚੇ ਉਤ੍ਤਰਾਸਙ੍ਗੇਨ ਕਥਿਨਂ ਅਤ੍ਥਰਿਤੁਕਾਮੋ ਹੋਤਿ, ਪੋਰਾਣਕੋ ਉਤ੍ਤਰਾਸਙ੍ਗੋ ਪਚ੍ਚੁਦ੍ਧਰਿਤਬ੍ਬੋ, ਨਵੋ ਉਤ੍ਤਰਾਸਙ੍ਗੋ ਅਧਿਟ੍ਠਾਤਬ੍ਬੋ, ‘‘ਇਮਿਨਾ ਉਤ੍ਤਰਾਸਙ੍ਗੇਨ ਕਥਿਨਂ ਅਤ੍ਥਰਾਮੀ’’ਤਿ ਵਾਚਾ ਭਿਨ੍ਦਿਤਬ੍ਬਾ. ਸਚੇ ਅਨ੍ਤਰਵਾਸਕੇਨ ਕਥਿਨਂ ਅਤ੍ਥਰਿਤੁਕਾਮੋ ਹੋਤਿ, ਪੋਰਾਣਕੋ ਅਨ੍ਤਰਵਾਸਕੋ ਪਚ੍ਚੁਦ੍ਧਰਿਤਬ੍ਬੋ, ਨਵੋ ਅਨ੍ਤਰਵਾਸਕੋ ਅਧਿਟ੍ਠਾਤਬ੍ਬੋ, ‘‘ਇਮਿਨਾ ਅਨ੍ਤਰਵਾਸਕੇਨ ਕਥਿਨਂ ਅਤ੍ਥਰਾਮੀ’’ਤਿ ਵਾਚਾ ਭਿਨ੍ਦਿਤਬ੍ਬਾ.

ਤੇਨ (ਪਰਿ. ੪੧੩) ਕਥਿਨਤ੍ਥਾਰਕੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ ‘‘ਅਤ੍ਥਤਂ, ਭਨ੍ਤੇ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਥਾ’’ਤਿ. ਤੇਹਿ ਅਨੁਮੋਦਕੇਹਿ ਭਿਕ੍ਖੂਹਿ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ ‘‘ਅਤ੍ਥਤਂ, ਆਵੁਸੋ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਮਾ’’ਤਿ. ਤੇਨ ਕਥਿਨਤ੍ਥਾਰਕੇਨ ਭਿਕ੍ਖੁਨਾ ਸਮ੍ਬਹੁਲੇ ਭਿਕ੍ਖੂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ ‘‘ਅਤ੍ਥਤਂ, ਭਨ੍ਤੇ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਥਾ’’ਤਿ. ਤੇਹਿ ਅਨੁਮੋਦਕੇਹਿ ਭਿਕ੍ਖੂਹਿ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ ‘‘ਅਤ੍ਥਤਂ, ਆਵੁਸੋ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਮਾ’’ਤਿ. ਤੇਨ ਕਥਿਨਤ੍ਥਾਰਕੇਨ ਭਿਕ੍ਖੁਨਾ ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ ‘‘ਅਤ੍ਥਤਂ, ਆਵੁਸੋ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਹੀ’’ਤਿ. ਤੇਨ ਅਨੁਮੋਦਕੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ ‘‘ਅਤ੍ਥਤਂ, ਆਵੁਸੋ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਮੀ’’ਤਿ. ਏਵਂ ਸਬ੍ਬੇਸਂ ਅਤ੍ਥਤਂ ਹੋਤਿ ਕਥਿਨਂ. ਵੁਤ੍ਤਞ੍ਹੇਤਂ ਪਰਿਵਾਰੇ ‘‘ਦ੍ਵਿਨ੍ਨਂ ਪੁਗ੍ਗਲਾਨਂ ਅਤ੍ਥਤਂ ਹੋਤਿ ਕਥਿਨਂ ਅਤ੍ਥਾਰਕਸ੍ਸ ਚ ਅਨੁਮੋਦਕਸ੍ਸ ਚਾ’’ਤਿ (ਪਰਿ. ੪੦੩). ਪੁਨਪਿ ਵੁਤ੍ਤਂ ‘‘ਨ ਸਙ੍ਘੋ ਕਥਿਨਂ ਅਤ੍ਥਰਤਿ, ਨ ਗਣੋ ਕਥਿਨਂ ਅਤ੍ਥਰਤਿ, ਪੁਗ੍ਗਲੋ ਕਥਿਨਂ ਅਤ੍ਥਰਤਿ, ਸਙ੍ਘਸ੍ਸ ਅਨੁਮੋਦਨਾਯ ਗਣਸ੍ਸ ਅਨੁਮੋਦਨਾਯ ਪੁਗ੍ਗਲਸ੍ਸ ਅਤ੍ਥਰਾਯ ਸਙ੍ਘਸ੍ਸ ਅਤ੍ਥਤਂ ਹੋਤਿ ਕਥਿਨਂ, ਗਣਸ੍ਸ ਅਤ੍ਥਤਂ ਹੋਤਿ ਕਥਿਨਂ, ਪੁਗ੍ਗਲਸ੍ਸ ਅਤ੍ਥਤਂ ਹੋਤਿ ਕਥਿਨ’’ਨ੍ਤਿ (ਪਰਿ. ੪੧੪).

ਏਵਂ ਅਤ੍ਥਤੇ ਪਨ ਕਥਿਨੇ ਸਚੇ ਕਥਿਨਚੀਵਰੇਨ ਸਦ੍ਧਿਂ ਆਭਤਂ ਆਨਿਸਂਸਂ ਦਾਯਕਾ ‘‘ਯੇਨ ਅਮ੍ਹਾਕਂ ਕਥਿਨਂ ਗਹਿਤਂ, ਤਸ੍ਸੇਵ ਦੇਮਾ’’ਤਿ ਦੇਨ੍ਤਿ, ਭਿਕ੍ਖੁਸਙ੍ਘੋ ਅਨਿਸ੍ਸਰੋ. ਅਥ ਅਵਿਚਾਰੇਤ੍ਵਾਵ ਦਤ੍ਵਾ ਗਚ੍ਛਨ੍ਤਿ, ਭਿਕ੍ਖੁਸਙ੍ਘੋ ਇਸ੍ਸਰੋ. ਤਸ੍ਮਾ ਸਚੇ ਕਥਿਨਤ੍ਥਾਰਕਸ੍ਸ ਸੇਸਚੀਵਰਾਨਿਪਿ ਦੁਬ੍ਬਲਾਨਿ ਹੋਨ੍ਤਿ, ਸਙ੍ਘੇਨ ਅਪਲੋਕੇਤ੍ਵਾ ਤੇਸਮ੍ਪਿ ਅਤ੍ਥਾਯ ਵਤ੍ਥਾਨਿ ਦਾਤਬ੍ਬਾਨਿ, ਕਮ੍ਮਵਾਚਾ ਪਨ ਏਕਾਯੇਵ ਵਟ੍ਟਤਿ. ਅਵਸੇਸਕਥਿਨਾਨਿਸਂਸੇ ਬਲਵਵਤ੍ਥਾਨਿ ਵਸ੍ਸਾਵਾਸਿਕਠਿਤਿਕਾਯ ਦਾਤਬ੍ਬਾਨਿ, ਠਿਤਿਕਾਯ ਅਭਾਵੇ ਥੇਰਾਸਨਤੋ ਪਟ੍ਠਾਯ ਦਾਤਬ੍ਬਾਨਿ, ਗਰੁਭਣ੍ਡਂ ਨ ਭਾਜੇਤਬ੍ਬਂ. ਸਚੇ ਪਨ ਏਕਸੀਮਾਯ ਬਹੂ ਵਿਹਾਰਾ ਹੋਨ੍ਤਿ, ਸਬ੍ਬੇਹਿ ਭਿਕ੍ਖੂਹਿ ਸਨ੍ਨਿਪਾਤਾਪੇਤ੍ਵਾ ਏਕਤ੍ਥ ਕਥਿਨਂ ਅਤ੍ਥਰਿਤਬ੍ਬਂ, ਵਿਸੁਂ ਵਿਸੁਂ ਅਤ੍ਥਰਿਤੁਂ ਨ ਵਟ੍ਟਤਿ.

‘‘ਅਤ੍ਥਤਕਥਿਨਾਨਂ ਵੋ, ਭਿਕ੍ਖਵੇ, ਪਞ੍ਚ ਕਪ੍ਪਿਸ੍ਸਨ੍ਤਿ, ਅਨਾਮਨ੍ਤਚਾਰੋ ਅਸਮਾਦਾਨਚਾਰੋ ਗਣਭੋਜਨਂ ਯਾਵਦਤ੍ਥਚੀਵਰਂ ਯੋ ਚ ਤਤ੍ਥ ਚੀਵਰੁਪ੍ਪਾਦੋ. ਸੋ ਨੇਸਂ ਭਵਿਸ੍ਸਤੀ’’ਤਿ (ਮਹਾਵ. ੩੦੬) ਵਚਨਤੋ ਅਤ੍ਥਤਕਥਿਨਾਨਂ ਭਿਕ੍ਖੂਨਂ ਅਨਾਮਨ੍ਤਚਾਰਾਦਯੋ ਪਨ ਪਞ੍ਚਾਨਿਸਂਸਾ ਲਬ੍ਭਨ੍ਤਿ. ਤਤ੍ਥ ਅਨਾਮਨ੍ਤਚਾਰੋਤਿ ਅਨਾਮਨ੍ਤੇਤ੍ਵਾ ਚਰਣਂ, ਯਾਵ ਕਥਿਨਂ ਨ ਉਦ੍ਧਰੀਯਤਿ, ਤਾਵ ਚਾਰਿਤ੍ਤਸਿਕ੍ਖਾਪਦੇਨ ਅਨਾਪਤ੍ਤੀਤਿ ਵੁਤ੍ਤਂ ਹੋਤਿ. ਅਸਮਾਦਾਨਚਾਰੋਤਿ ਚੀਵਰਂ ਅਸਮਾਦਾਯ ਚਰਣਂ, ਚੀਵਰਵਿਪ੍ਪਵਾਸੋਤਿ ਅਤ੍ਥੋ. ਗਣਭੋਜਨਨ੍ਤਿ ਗਣਭੋਜਨਸਿਕ੍ਖਾਪਦੇਨ ਅਨਾਪਤ੍ਤਿ ਵੁਤ੍ਤਾ. ਯਾਵਦਤ੍ਥਚੀਵਰਨ੍ਤਿ ਯਾਵਤਾ ਚੀਵਰੇਨ ਅਤ੍ਥੋ, ਤਾਵਤਕਂ ਅਨਧਿਟ੍ਠਿਤਂ ਅਵਿਕਪ੍ਪਿਤਂ ਵਟ੍ਟਤੀਤਿ ਅਤ੍ਥੋ. ਯੋ ਚ ਤਤ੍ਥ ਚੀਵਰੁਪ੍ਪਾਦੋਤਿ ਤਤ੍ਥ ਕਥਿਨਤ੍ਥਤਸੀਮਾਯ ਮਤਕਚੀਵਰਂ ਵਾ ਹੋਤੁ ਸਙ੍ਘਂ ਉਦ੍ਦਿਸ੍ਸ ਦਿਨ੍ਨਂ ਵਾ ਸਙ੍ਘਿਕੇਨ ਤਤ੍ਰੁਪ੍ਪਾਦੇਨ ਆਭਤਂ ਵਾ, ਯੇਨ ਕੇਨਚਿ ਆਕਾਰੇਨ ਯਂ ਸਙ੍ਘਿਕਂ ਚੀਵਰਂ ਉਪ੍ਪਜ੍ਜਤਿ, ਤਂ ਤੇਸਂ ਭਵਿਸ੍ਸਤੀਤਿ ਅਤ੍ਥੋ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਕਥਿਨਤ੍ਥਾਰਵਿਨਿਚ੍ਛਯਕਥਾ ਸਮਤ੍ਤਾ.