੨੮. ਚਤੁਪਚ੍ਚਯਭਾਜਨੀਯਵਿਨਿਚ੍ਛਯਕਥਾ

੧੯੪. ਚਤੁਪਚ੍ਚਯਭਾਜਨਨ੍ਤਿ ਚੀਵਰਾਦੀਨਂ ਚਤੁਨ੍ਨਂ ਪਚ੍ਚਯਾਨਂ ਭਾਜਨਂ. ਤਤ੍ਥ ਚੀਵਰਭਾਜਨੇ ਤਾਵ ਚੀਵਰਪਟਿਗ੍ਗਾਹਕੋ ਵੇਦਿਤਬ੍ਬੋ, ਚੀਵਰਨਿਦਹਕੋ ਵੇਦਿਤਬ੍ਬੋ, ਭਣ੍ਡਾਗਾਰਿਕੋ ਵੇਦਿਤਬ੍ਬੋ, ਭਣ੍ਡਾਗਾਰਂ ਵੇਦਿਤਬ੍ਬਂ, ਚੀਵਰਭਾਜਕੋ ਵੇਦਿਤਬ੍ਬੋ, ਚੀਵਰਭਾਜਨਂ ਵੇਦਿਤਬ੍ਬਂ.

ਤਤ੍ਥ (ਮਹਾਵ. ਅਟ੍ਠ. ੩੪੦-੩੪੨) ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਭਿਕ੍ਖੁਂ ਚੀਵਰਪਟਿਗ੍ਗਾਹਕਂ ਸਮ੍ਮਨ੍ਨਿਤੁਂ, ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯ, ਨ ਦੋਸਾਗਤਿਂ ਗਚ੍ਛੇਯ੍ਯ, ਨ ਮੋਹਾਗਤਿਂ ਗਚ੍ਛੇਯ੍ਯ, ਨ ਭਯਾਗਤਿਂ ਗਚ੍ਛੇਯ੍ਯ, ਗਹਿਤਾਗਹਿਤਞ੍ਚ ਜਾਨੇਯ੍ਯਾ’’ਤਿ (ਮਹਾਵ. ੩੪੨) ਵਚਨਤੋ ਇਮੇਹਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਚੀਵਰਪਟਿਗ੍ਗਾਹਕੋ ਸਮ੍ਮਨ੍ਨਿਤਬ੍ਬੋ. ਤਤ੍ਥ ਪਚ੍ਛਾ ਆਗਤਾਨਮ੍ਪਿ ਅਤ੍ਤਨੋ ਞਾਤਕਾਦੀਨਂ ਪਠਮਤਰਂ ਪਟਿਗ੍ਗਣ੍ਹਨ੍ਤੋ ਵਾ ਏਕਚ੍ਚਸ੍ਮਿਂ ਪੇਮਂ ਦਸ੍ਸੇਤ੍ਵਾ ਗਣ੍ਹਨ੍ਤੋ ਵਾ ਲੋਭਪਕਤਿਤਾਯ ਅਤ੍ਤਨੋ ਪਰਿਣਾਮੇਨ੍ਤੋ ਵਾ ਛਨ੍ਦਾਗਤਿਂ ਗਚ੍ਛਤਿ ਨਾਮ. ਪਠਮਤਰਂ ਆਗਤਸ੍ਸਪਿ ਕੋਧਵਸੇਨ ਪਚ੍ਛਾ ਗਣ੍ਹਨ੍ਤੋ ਵਾ ਦੁਗ੍ਗਤਮਨੁਸ੍ਸੇਸੁ ਅਵਮਞ੍ਞਂ ਕਤ੍ਵਾ ਗਣ੍ਹਨ੍ਤੋ ਵਾ ‘‘ਕਿਂ ਵੋ ਘਰੇ ਠਪਨੋਕਾਸੋ ਨਤ੍ਥਿ, ਤੁਮ੍ਹਾਕਂ ਸਨ੍ਤਕਂ ਗਹੇਤ੍ਵਾ ਗਚ੍ਛਥਾ’’ਤਿ ਏਵਂ ਸਙ੍ਘਸ੍ਸ ਲਾਭਨ੍ਤਰਾਯਂ ਕਰੋਨ੍ਤੋ ਵਾ ਦੋਸਾਗਤਿਂ ਗਚ੍ਛਤਿ ਨਾਮ. ਯੋ ਪਨ ਮੁਟ੍ਠਸ੍ਸਤਿ ਅਸਮ੍ਪਜਾਨੋ, ਅਯਂ ਮੋਹਾਗਤਿਂ ਗਚ੍ਛਤਿ ਨਾਮ. ਪਚ੍ਛਾ ਆਗਤਾਨਮ੍ਪਿ ਇਸ੍ਸਰਾਨਂ ਭਯੇਨ ਪਠਮਤਰਂ ਪਟਿਗ੍ਗਣ੍ਹਨ੍ਤੋ ਵਾ ‘‘ਚੀਵਰਪਟਿਗ੍ਗਾਹਕਟ੍ਠਾਨਂ ਨਾਮੇਤਂ ਭਾਰਿਯ’’ਨ੍ਤਿ ਸਨ੍ਤਸਨ੍ਤੋ ਵਾ ਭਯਾਗਤਿਂ ਗਚ੍ਛਤਿ ਨਾਮ. ‘‘ਮਯਾ ਇਦਞ੍ਚਿਦਞ੍ਚ ਗਹਿਤਂ, ਇਦਞ੍ਚਿਦਞ੍ਚ ਨ ਗਹਿਤ’’ਨ੍ਤਿ ਏਵਂ ਜਾਨਨ੍ਤੋ ਗਹਿਤਾਗਹਿਤਂ ਜਾਨਾਤਿ ਨਾਮ. ਤਸ੍ਮਾ ਯੋ ਛਨ੍ਦਾਗਤਿਆਦਿਵਸੇਨ ਨ ਗਚ੍ਛਤਿ, ਞਾਤਕਅਞ੍ਞਾਤਕਅਡ੍ਢਦੁਗ੍ਗਤੇਸੁ ਵਿਸੇਸਂ ਅਕਤ੍ਵਾ ਆਗਤਪਟਿਪਾਟਿਯਾ ਗਣ੍ਹਾਤਿ, ਸੀਲਾਚਾਰਪਟਿਪਤ੍ਤਿਯੁਤ੍ਤੋ ਹੋਤਿ ਸਤਿਮਾ ਮੇਧਾਵੀ ਬਹੁਸ੍ਸੁਤੋ, ਸਕ੍ਕੋਤਿ ਦਾਯਕਾਨਂ ਵਿਸ੍ਸਟ੍ਠਾਯ ਵਾਚਾਯ ਪਰਿਮਣ੍ਡਲੇਹਿ ਪਦਬ੍ਯਞ੍ਜਨੇਹਿ ਅਨੁਮੋਦਨਂ ਕਰੋਨ੍ਤੋ ਪਸਾਦਂ ਜਨੇਤੁਂ, ਏਵਰੂਪੋ ਸਮ੍ਮਨ੍ਨਿਤਬ੍ਬੋ.

ਏਵਞ੍ਚ ਪਨ ਸਮ੍ਮਨ੍ਨਿਤਬ੍ਬੋ. ਪਠਮਂ ਭਿਕ੍ਖੁ ਯਾਚਿਤਬ੍ਬੋ, ਯਾਚਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਪਟਿਗ੍ਗਾਹਕਂ ਸਮ੍ਮਨ੍ਨੇਯ੍ਯ, ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਪਟਿਗ੍ਗਾਹਕਂ ਸਮ੍ਮਨ੍ਨਤਿ, ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਚੀਵਰਪਟਿਗ੍ਗਾਹਕਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ. ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਚੀਵਰਪਟਿਗ੍ਗਾਹਕੋ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਮਹਾਵ. ੩੪੨) –

ਇਤਿ ਇਮਾਯ ਕਮ੍ਮਵਾਚਾਯ ਵਾ ਅਪਲੋਕਨੇਨ ਵਾ ਅਨ੍ਤੋਵਿਹਾਰੇ ਸਬ੍ਬਸਙ੍ਘਮਜ੍ਝੇਪਿ ਖਣ੍ਡਸੀਮਾਯਮ੍ਪਿ ਸਮ੍ਮਨ੍ਨਿਤੁਂ ਵਟ੍ਟਤਿਯੇਵ. ਏਵਂ ਸਮ੍ਮਤੇਨ ਚ ਵਿਹਾਰਪਚ੍ਚਨ੍ਤੇ ਵਾ ਪਧਾਨਘਰੇ ਵਾ ਨ ਅਚ੍ਛਿਤਬ੍ਬਂ. ਯਤ੍ਥ ਪਨ ਆਗਤਾਗਤਾ ਮਨੁਸ੍ਸਾ ਸੁਖਂ ਪਸ੍ਸਨ੍ਤਿ, ਤਾਦਿਸੇ ਧੁਰਵਿਹਾਰਟ੍ਠਾਨੇ ਬੀਜਨਿਂ ਪਸ੍ਸੇ ਠਪੇਤ੍ਵਾ ਸੁਨਿਵਤ੍ਥੇਨ ਸੁਪਾਰੁਤੇਨ ਨਿਸੀਦਿਤਬ੍ਬਂ.

੧੯੫. ਚੀਵਰਨਿਦਹਕੋਪਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਭਿਕ੍ਖੁਂ ਚੀਵਰਨਿਦਹਕਂ ਸਮ੍ਮਨ੍ਨਿਤੁਂ, ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯ, ਨ ਦੋਸਾਗਤਿਂ ਗਚ੍ਛੇਯ੍ਯ, ਨ ਮੋਹਾਗਤਿਂ ਗਚ੍ਛੇਯ੍ਯ, ਨ ਭਯਾਗਤਿਂ ਗਚ੍ਛੇਯ੍ਯ, ਨਿਹਿਤਾਨਿਹਿਤਞ੍ਚ ਜਾਨੇਯ੍ਯਾ’’ਤਿ ਵਚਨਤੋ ਪਞ੍ਚਙ੍ਗਸਮਨ੍ਨਾਗਤੋ ਭਿਕ੍ਖੁ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਨਿਦਹਕਂ ਸਮ੍ਮਨ੍ਨੇਯ੍ਯ, ਏਸਾ ਞਤ੍ਤਿ.

‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਨਿਦਹਕਂ ਸਮ੍ਮਨ੍ਨਤਿ, ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਚੀਵਰਨਿਦਹਕਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ. ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਚੀਵਰਨਿਦਹਕੋ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਮਹਾਵ. ੩੪੨) –

ਇਤਿ ਇਮਾਯ ਕਮ੍ਮਵਾਚਾਯ ਵਾ ਅਪਲੋਕਨੇਨ ਵਾ ਵੁਤ੍ਤਨਯੇਨੇਵ ਸਮ੍ਮਨ੍ਨਿਤਬ੍ਬੋ.

੧੯੬. ਭਣ੍ਡਾਗਾਰਿਕੋਪਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਭਿਕ੍ਖੁਂ ਭਣ੍ਡਾਗਾਰਿਕਂ ਸਮ੍ਮਨ੍ਨਿਤੁਂ, ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯ, ਨ ਦੋਸਾਗਤਿਂ ਗਚ੍ਛੇਯ੍ਯ, ਨ ਮੋਹਾਗਤਿਂ ਗਚ੍ਛੇਯ੍ਯ, ਨ ਭਯਾਗਤਿਂ ਗਚ੍ਛੇਯ੍ਯ, ਗੁਤ੍ਤਾਗੁਤ੍ਤਞ੍ਚ ਜਾਨੇਯ੍ਯਾ’’ਤਿ (ਮਹਾਵ. ੩੪੩) ਵਚਨਤੋ ਪਞ੍ਚਙ੍ਗਸਮਨ੍ਨਾਗਤੋ ਭਿਕ੍ਖੁ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਭਣ੍ਡਾਗਾਰਿਕਂ ਸਮ੍ਮਨ੍ਨੇਯ੍ਯਾ’’ਤਿਆਦਿਨਾ (ਮਹਾਵ. ੩੪੩) ਨਯੇਨ ਕਮ੍ਮਵਾਚਾਯ ਵਾ ਅਪਲੋਕਨੇਨ ਵਾ ਸਮ੍ਮਨ੍ਨਿਤਬ੍ਬੋ.

ਏਤ੍ਥ (ਮਹਾਵ. ਅਟ੍ਠ. ੩੪੩) ਚ ਯਤ੍ਥ ਛਦਨਾਦੀਸੁ ਕੋਚਿ ਦੋਸੋ ਨਤ੍ਥਿ, ਤਂ ਗੁਤ੍ਤਂ. ਯਤ੍ਥ ਪਨ ਛਦਨਤਿਣਂ ਵਾ ਛਦਨਿਟ੍ਠਕਾ ਵਾ ਯਤ੍ਥ ਕਤ੍ਥਚਿ ਪਤਿਤਾ, ਯੇਨ ਓਵਸ੍ਸਤਿ ਵਾ, ਮੂਸਿਕਾਦੀਨਂ ਵਾ ਪਵੇਸੋ ਹੋਤਿ, ਭਿਤ੍ਤਿਆਦੀਸੁ ਵਾ ਕਤ੍ਥਚਿ ਛਿਦ੍ਦਂ ਹੋਤਿ, ਉਪਚਿਕਾ ਵਾ ਉਟ੍ਠਹਨ੍ਤਿ, ਤਂ ਸਬ੍ਬਂ ਅਗੁਤ੍ਤਂ ਨਾਮ. ਤਂ ਸਲ੍ਲਕ੍ਖੇਤ੍ਵਾ ਭਣ੍ਡਾਗਾਰਿਕੇਨ ਪਟਿਸਙ੍ਖਰਿਤਬ੍ਬਂ. ਸੀਤਸਮਯੇ ਦ੍ਵਾਰਞ੍ਚ ਵਾਤਪਾਨਞ੍ਚ ਸੁਪਿਹਿਤਂ ਕਾਤਬ੍ਬਂ. ਸੀਤੇਨ ਹਿ ਚੀਵਰਾਨਿ ਕਣ੍ਣਕਿਤਾਨਿ ਹੋਨ੍ਤਿ. ਉਣ੍ਹਸਮਯੇ ਅਨ੍ਤਰਨ੍ਤਰਾ ਵਾਤਪ੍ਪਵੇਸਨਤ੍ਥਂ ਵਿਵਰਿਤਬ੍ਬਂ. ਏਵਂ ਕਰੋਨ੍ਤੋ ਹਿ ਗੁਤ੍ਤਾਗੁਤ੍ਤਂ ਜਾਨਾਤਿ ਨਾਮ.

੧੯੭. ‘‘ਅਨੁਜਾਨਾਮਿ, ਭਿਕ੍ਖਵੇ, ਭਣ੍ਡਾਗਾਰਂ ਸਮ੍ਮਨ੍ਨਿਤੁਂ, ਯਂ ਸਙ੍ਘੋ ਆਕਙ੍ਖਤਿ ਵਿਹਾਰਂ ਵਾ ਅਡ੍ਢਯੋਗਂ ਵਾ ਪਾਸਾਦਂ ਵਾ ਹਮ੍ਮਿਯਂ ਵਾ ਗੁਹਂ ਵਾ’’ਤਿ (ਮਹਾਵ. ੩੪੩) ਵਚਨਤੋ ਭਣ੍ਡਾਗਾਰਂ ਸਮ੍ਮਨ੍ਨਿਤ੍ਵਾ ਠਪੇਤਬ੍ਬਂ. ਏਤ੍ਥ ਚ ਯੋ ਆਰਾਮਮਜ੍ਝੇ ਆਰਾਮਿਕਸਾਮਣੇਰਾਦੀਹਿ ਅਵਿਵਿਤ੍ਤੋ ਸਬ੍ਬੇਸਂ ਸਮੋਸਰਣਟ੍ਠਾਨੇ ਵਿਹਾਰੋ ਵਾ ਅਡ੍ਢਯੋਗੋ ਵਾ ਹੋਤਿ, ਸੋ ਸਮ੍ਮਨ੍ਨਿਤਬ੍ਬੋ. ਪਚ੍ਚਨ੍ਤਸੇਨਾਸਨਂ ਪਨ ਨ ਸਮ੍ਮਨ੍ਨਿਤਬ੍ਬਂ. ਇਮਂ ਪਨ ਭਣ੍ਡਾਗਾਰਂ ਖਣ੍ਡਸੀਮਂ ਗਨ੍ਤ੍ਵਾ ਖਣ੍ਡਸੀਮਾਯ ਨਿਸਿਨ੍ਨੇਹਿ ਸਮ੍ਮਨ੍ਨਿਤੁਂ ਨ ਵਟ੍ਟਤਿ. ਵਿਹਾਰਮਜ੍ਝੇਯੇਵ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਵਿਹਾਰਂ ਭਣ੍ਡਾਗਾਰਂ ਸਮ੍ਮਨ੍ਨੇਯ੍ਯਾ’’ਤਿਆਦਿਨਾ (ਮਹਾਵ. ੩੪੩) ਨਯੇਨ ਕਮ੍ਮਵਾਚਾਯ ਵਾ ਅਪਲੋਕਨੇਨ ਵਾ ਸਮ੍ਮਨ੍ਨਿਤਬ੍ਬਂ.

ਚੀਵਰਪਟਿਗ੍ਗਾਹਕਾਦੀਹਿ ਪਨ ਤੀਹਿਪਿ ਅਤ੍ਤਨੋ ਵਤ੍ਤਂ ਜਾਨਿਤਬ੍ਬਂ. ਤਤ੍ਥ ਚੀਵਰਪਟਿਗ੍ਗਾਹਕੇਨ ਤਾਵ ਯਂ ਯਂ ਮਨੁਸ੍ਸਾ ‘‘ਕਾਲਚੀਵਰ’’ਨ੍ਤਿ ਵਾ ‘‘ਅਕਾਲਚੀਵਰ’’ਨ੍ਤਿ ਵਾ ‘‘ਅਚ੍ਚੇਕਚੀਵਰ’’ਨ੍ਤਿ ਵਾ ‘‘ਵਸ੍ਸਿਕਸਾਟਿਕ’’ਨ੍ਤਿ ਵਾ ‘‘ਨਿਸੀਦਨ’’ਨ੍ਤਿ ਵਾ ‘‘ਪਚ੍ਚਤ੍ਥਰਣ’’ਨ੍ਤਿ ਵਾ ‘‘ਮੁਖਪੁਞ੍ਛਨਚੋਲ਼’’ਨ੍ਤਿ ਵਾ ਦੇਨ੍ਤਿ, ਤਂ ਸਬ੍ਬਂ ਏਕਰਾਸਿਂ ਕਤ੍ਵਾ ਮਿਸ੍ਸੇਤ੍ਵਾ ਨ ਗਣ੍ਹਿਤਬ੍ਬਂ, ਵਿਸੁਂ ਵਿਸੁਂ ਕਤ੍ਵਾਵ ਗਣ੍ਹਿਤ੍ਵਾ ਚੀਵਰਨਿਦਹਕਸ੍ਸ ਤਥੇਵ ਆਚਿਕ੍ਖਿਤ੍ਵਾ ਦਾਤਬ੍ਬਂ. ਚੀਵਰਨਿਦਹਕੇਨਪਿ ਭਣ੍ਡਾਗਾਰਿਕਸ੍ਸ ਦਦਮਾਨੇਨ ‘‘ਇਦਂ ਕਾਲਚੀਵਰਂ…ਪੇ… ਇਦਂ ਮੁਖਪੁਞ੍ਛਨਚੋਲ਼’’ਨ੍ਤਿ ਆਚਿਕ੍ਖਿਤ੍ਵਾਵ ਦਾਤਬ੍ਬਂ. ਭਣ੍ਡਾਗਾਰਿਕੇਨਪਿ ਤਥੇਵ ਵਿਸੁਂ ਵਿਸੁਂ ਸਞ੍ਞਾਣਂ ਕਤ੍ਵਾ ਠਪੇਤਬ੍ਬਂ. ਤਤੋ ਸਙ੍ਘੇਨ ‘‘ਕਾਲਚੀਵਰਂ ਆਹਰਾ’’ਤਿ ਵੁਤ੍ਤੇ ਕਾਲਚੀਵਰਮੇਵ ਦਾਤਬ੍ਬਂ…ਪੇ… ‘‘ਮੁਖਪੁਞ੍ਛਨਚੋਲ਼ਂ ਆਹਰਾ’’ਤਿ ਵੁਤ੍ਤੇ ਤਦੇਵ ਦਾਤਬ੍ਬਂ. ਇਤਿ ਭਗਵਤਾ ਚੀਵਰਪਟਿਗ੍ਗਾਹਕੋ ਅਨੁਞ੍ਞਾਤੋ, ਚੀਵਰਨਿਦਹਕੋ ਅਨੁਞ੍ਞਾਤੋ, ਭਣ੍ਡਾਗਾਰਿਕੋ ਅਨੁਞ੍ਞਾਤੋ, ਭਣ੍ਡਾਗਾਰਂ ਅਨੁਞ੍ਞਾਤਂ, ਨ ਬਾਹੁਲਿਕਤਾਯ, ਨ ਅਸਨ੍ਤੁਟ੍ਠਿਤਾਯ, ਅਪਿਚ ਖੋ ਸਙ੍ਘਾਨੁਗ੍ਗਹਾਯ. ਸਚੇ ਹਿ ਆਹਟਾਹਟਂ ਗਹੇਤ੍ਵਾ ਭਿਕ੍ਖੂ ਭਾਜੇਯ੍ਯੁਂ, ਨੇਵ ਆਹਟਂ, ਨ ਅਨਾਹਟਂ, ਨ ਦਿਨ੍ਨਂ, ਨ ਅਦਿਨ੍ਨਂ, ਨ ਲਦ੍ਧਂ, ਨ ਅਲਦ੍ਧਂ ਜਾਨੇਯ੍ਯੁਂ, ਆਹਟਾਹਟਂ ਥੇਰਾਸਨੇ ਵਾ ਦਦੇਯ੍ਯੁਂ, ਖਣ੍ਡਾਖਣ੍ਡਂ ਵਾ ਛਿਨ੍ਦਿਤ੍ਵਾ ਗਣ੍ਹੇਯ੍ਯੁਂ, ਏਵਂ ਸਤਿ ਅਯੁਤ੍ਤਪਰਿਭੋਗੋ ਚ ਹੋਤਿ, ਨ ਚ ਸਬ੍ਬੇਸਂ ਸਙ੍ਗਹੋ ਕਤੋ ਹੋਤਿ. ਭਣ੍ਡਾਗਾਰੇ ਪਨ ਚੀਵਰਂ ਠਪੇਤ੍ਵਾ ਉਸ੍ਸਨ੍ਨਕਾਲੇ ਏਕੇਕਸ੍ਸ ਭਿਕ੍ਖੁਨੋ ਤਿਚੀਵਰਂ ਵਾ ਦ੍ਵੇ ਦ੍ਵੇ ਵਾ ਏਕੇਕਂ ਵਾ ਚੀਵਰਂ ਦਸ੍ਸਨ੍ਤਿ, ਲਦ੍ਧਾਲਦ੍ਧਂ ਜਾਨਿਸ੍ਸਨ੍ਤਿ, ਅਲਦ੍ਧਭਾਵਂ ਞਤ੍ਵਾ ਸਙ੍ਗਹਂ ਕਾਤੁਂ ਮਞ੍ਞਿਸ੍ਸਨ੍ਤੀਤਿ.

੧੯੮. ਚੀਵਰਭਾਜਕੋਵਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਂ ਭਿਕ੍ਖੁਂ ਚੀਵਰਭਾਜਕਂ ਸਮ੍ਮਨ੍ਨਿਤੁਂ, ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯ, ਨ ਦੋਸਾਗਤਿਂ ਗਚ੍ਛੇਯ੍ਯ, ਨ ਮੋਹਾਗਤਿਂ ਗਚ੍ਛੇਯ੍ਯ, ਨ ਭਯਾਗਤਿਂ ਗਚ੍ਛੇਯ੍ਯ, ਭਾਜਿਤਾਭਾਜਿਤਞ੍ਚ ਜਾਨੇਯ੍ਯਾ’’ਤਿ (ਮਹਾਵ. ੩੪੩) ਵਚਨਤੋ ਪਞ੍ਚਹਙ੍ਗੇਹਿ ਸਮਨ੍ਨਾਗਤੋਯੇਵ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਚੀਵਰਭਾਜਕਂ ਸਮ੍ਮਨ੍ਨੇਯ੍ਯਾ’’ਤਿ(ਮਹਾਵ. ੩੪੩) ਆਦਿਨਾ ਨਯੇਨ ਕਮ੍ਮਵਾਚਾਯ ਵਾ ਅਪਲੋਕਨੇਨ ਵਾ ਸਮ੍ਮਨ੍ਨਿਤ੍ਵਾ ਠਪੇਤਬ੍ਬੋ.

ਏਤ੍ਥ ਸਭਾਗਾਨਂ ਭਿਕ੍ਖੂਨਂ ਅਪਾਪੁਣਨ੍ਤਮ੍ਪਿ ਮਹਗ੍ਘਚੀਵਰਂ ਦੇਨ੍ਤੋ ਛਨ੍ਦਾਗਤਿਂ ਗਚ੍ਛਤਿ ਨਾਮ. ਅਞ੍ਞੇਸਂ ਵੁਡ੍ਢਤਰਾਨਂ ਪਾਪੁਣਨ੍ਤਮ੍ਪਿ ਮਹਗ੍ਘਚੀਵਰਂ ਅਦਤ੍ਵਾ ਅਪ੍ਪਗ੍ਘਂ ਦੇਨ੍ਤੋ ਦੋਸਾਗਤਿਂ ਗਚ੍ਛਤਿ ਨਾਮ. ਮੋਹਮੂਲ਼੍ਹੋ ਚੀਵਰਦਾਨਵਤ੍ਤਂ ਅਜਾਨਨ੍ਤੋ ਮੋਹਾਗਤਿਂ ਗਚ੍ਛਤਿ ਨਾਮ. ਮੁਖਰਾਨਂ ਨਵਕਾਨਮ੍ਪਿ ਭਯੇਨ ਅਪਾਪੁਣਨ੍ਤਂ ਏਵ ਮਹਗ੍ਘਂ ਚੀਵਰਂ ਦੇਨ੍ਤੋ ਭਯਾਗਤਿਂ ਗਚ੍ਛਤਿ ਨਾਮ. ਯੋ ਏਵਂ ਨ ਗਚ੍ਛਤਿ, ਸਬ੍ਬੇਸਂ ਤੁਲਾਭੂਤੋ ਪਮਾਣਭੂਤੋ ਮਜ੍ਝਤ੍ਤੋ, ਸੋ ਸਮ੍ਮਨ੍ਨਿਤਬ੍ਬੋ. ਤੇਨਪਿ ਚੀਵਰਂ ਭਾਜੇਨ੍ਤੇਨ ਪਠਮਂ ‘‘ਇਦਂ ਥੂਲਂ, ਇਦਂ ਸਣ੍ਹਂ, ਇਦਂ ਘਨਂ, ਇਦਂ ਤਨੁਕਂ, ਇਦਂ ਪਰਿਭੁਤ੍ਤਂ, ਇਦਂ ਅਪਰਿਭੁਤ੍ਤਂ, ਇਦਂ ਦੀਘਤੋ ਏਤ੍ਤਕਂ, ਪੁਥੁਲਤੋ ਏਤ੍ਤਕ’’ਨ੍ਤਿ ਏਵਂ ਵਤ੍ਥਾਨਿ ਵਿਚਿਨਿਤ੍ਵਾ ‘‘ਇਦਂ ਏਤ੍ਤਕਂ ਅਗ੍ਘਤਿ, ਇਦਂ ਏਤ੍ਤਕ’’ਨ੍ਤਿ ਏਵਂ ਅਗ੍ਘਪਰਿਚ੍ਛੇਦਂ ਕਤ੍ਵਾ ਸਚੇ ਸਬ੍ਬੇਸਂ ਏਕੇਕਮੇਵ ਦਸਦਸਅਗ੍ਘਨਕਂ ਪਾਪੁਣਾਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਪਾਪੁਣਾਤਿ, ਯਂ ਨਵ ਵਾ ਅਟ੍ਠ ਵਾ ਅਗ੍ਘਤਿ, ਤਂ ਅਞ੍ਞੇਨ ਏਕਅਗ੍ਘਨਕੇਨ ਚ ਦ੍ਵਿਅਗ੍ਘਨਕੇਨ ਚ ਸਦ੍ਧਿਂ ਬਨ੍ਧਿਤ੍ਵਾ ਏਤੇਨ ਉਪਾਯੇਨ ਸਮੇ ਪਟਿਵੀਸੇ ਠਪੇਤ੍ਵਾ ਕੁਸੋ ਪਾਤੇਤਬ੍ਬੋ. ਸਚੇ ਏਕੇਕਸ੍ਸ ਦੀਯਮਾਨੇ ਚੀਵਰੇ ਦਿਵਸੋ ਨਪ੍ਪਹੋਤਿ, ਦਸ ਦਸ ਭਿਕ੍ਖੂ ਗਣੇਤ੍ਵਾ ਦਸ ਦਸ ਚੀਵਰਪਟਿਵੀਸੇ ਏਕਤੋ ਬਨ੍ਧਿਤ੍ਵਾ ਭਣ੍ਡਿਕਂ ਕਤ੍ਵਾ ਏਕੋ ਚੀਵਰਪਟਿਵੀਸੋ ਠਪੇਤਬ੍ਬੋ. ਏਵਂ ਠਪਿਤੇਸੁ ਚੀਵਰਪਟਿਵੀਸੇਸੁ ਕੁਸੋ ਪਾਤੇਤਬ੍ਬੋ. ਤੇਹਿਪਿ ਭਿਕ੍ਖੂਹਿ ਪੁਨ ਕੁਸਪਾਤਂ ਕਤ੍ਵਾ ਭਾਜੇਤਬ੍ਬਂ.

‘‘ਅਨੁਜਾਨਾਮਿ, ਭਿਕ੍ਖਵੇ, ਸਾਮਣੇਰਾਨਂ ਉਪਡ੍ਢਪਟਿਵੀਸਂ ਦਾਤੁ’’ਨ੍ਤਿ (ਮਹਾਵ. ੩੪੩) ਵਚਨਤੋ ਯੇ ਸਾਮਣੇਰਾ ਅਤ੍ਤਿਸ੍ਸਰਾ ਭਿਕ੍ਖੁਸਙ੍ਘਸ੍ਸ ਕਤ੍ਤਬ੍ਬਕਮ੍ਮਂ ਨ ਕਰੋਨ੍ਤਿ, ਉਦ੍ਦੇਸਪਰਿਪੁਚ੍ਛਾਸੁ ਯੁਤ੍ਤਾ ਆਚਰਿਯੁਪਜ੍ਝਾਯਾਨਂਯੇਵ ਵਤ੍ਤਪਟਿਵਤ੍ਤਂ ਕਰੋਨ੍ਤਿ, ਅਞ੍ਞੇਸਂ ਨ ਕਰੋਨ੍ਤਿ, ਏਤੇਸਂਯੇਵ ਉਪਡ੍ਢਭਾਗੋ ਦਾਤਬ੍ਬੋ. ਯੇ ਪਨ ਪੁਰੇਭਤ੍ਤਞ੍ਚ ਪਚ੍ਛਾਭਤ੍ਤਞ੍ਚ ਭਿਕ੍ਖੁਸਙ੍ਘਸ੍ਸੇਵ ਕਤ੍ਤਬ੍ਬਕਿਚ੍ਚਂ ਕਰੋਨ੍ਤਿ, ਤੇਸਂ ਸਮਕੋ ਦਾਤਬ੍ਬੋ. ਇਦਞ੍ਚ ਪਿਟ੍ਠਿਸਮਯੇ ਉਪ੍ਪਨ੍ਨੇਨ ਭਣ੍ਡਾਗਾਰੇ ਠਪਿਤੇਨ ਅਕਾਲਚੀਵਰੇਨੇਵ ਕਥਿਤਂ, ਕਾਲਚੀਵਰਂ ਪਨ ਸਮਕਂਯੇਵ ਦਾਤਬ੍ਬਂ. ਤਤ੍ਰੁਪ੍ਪਾਦਵਸ੍ਸਾਵਾਸਿਕਂ ਸਮ੍ਮੁਞ੍ਜਨੀਬਨ੍ਧਨਾਦਿ ਸਙ੍ਘਸ੍ਸ ਫਾਤਿਕਮ੍ਮਂ ਕਤ੍ਵਾ ਗਹੇਤਬ੍ਬਂ. ਏਤਞ੍ਹੇਤ੍ਥ ਸਬ੍ਬੇਸਂ ਵਤ੍ਤਂ. ਭਣ੍ਡਾਗਾਰਚੀਵਰੇਪਿ ਸਚੇ ਸਾਮਣੇਰਾ ਆਗਨ੍ਤ੍ਵਾ ‘‘ਭਨ੍ਤੇ, ਮਯਂ ਯਾਗੁਂ ਪਚਾਮ, ਭਤ੍ਤਂ ਪਚਾਮ, ਖਜ੍ਜਕਂ ਪਚਾਮ, ਅਪ੍ਪਹਰਿਤਂ ਕਰੋਮ, ਦਨ੍ਤਕਟ੍ਠਂ ਆਹਰਾਮ, ਰਙ੍ਗਛਲ੍ਲਿਂ ਕਪ੍ਪਿਯਂ ਕਤ੍ਵਾ ਦੇਮ, ਕਿਂ ਅਮ੍ਹੇਹਿ ਨ ਕਤਂ ਨਾਮਾ’’ਤਿ ਉਕ੍ਕੁਟ੍ਠਿਂ ਕਰੋਨ੍ਤਿ, ਸਮਭਾਗੋਵ ਦਾਤਬ੍ਬੋ. ਏਤਂਯੇਵ ਵਿਰਜ੍ਝਿਤ੍ਵਾ ਕਰੋਨ੍ਤਿ, ਯੇਸਞ੍ਚ ਕਰਣਭਾਵੋ ਨ ਪਞ੍ਞਾਯਤਿ, ਤੇ ਸਨ੍ਧਾਯ ਵੁਤ੍ਤਂ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਾਮਣੇਰਾਨਂ ਉਪਡ੍ਢਪਟਿਵੀਸਂ ਦਾਤੁ’’ਨ੍ਤਿ. ਕੁਰੁਨ੍ਦਿਯਂ ਪਨ ‘‘ਸਚੇ ਸਾਮਣੇਰਾ ‘ਕਸ੍ਮਾ ਮਯਂ, ਭਨ੍ਤੇ, ਸਙ੍ਘਕਮ੍ਮਂ ਨ ਕਰੋਮ, ਕਰਿਸ੍ਸਾਮਾ’ਤਿ ਯਾਚਨ੍ਤਿ, ਸਮਪਟਿਵੀਸੋ ਦਾਤਬ੍ਬੋ’’ਤਿ ਵੁਤ੍ਤਂ.

ਸਚੇ ਕੋਚਿ ਭਿਕ੍ਖੁ ਸਕਂ ਭਾਗਂ ਗਹੇਤ੍ਵਾ ਸਤ੍ਥਂ ਲਭਿਤ੍ਵਾ ਨਦਿਂ ਵਾ ਕਨ੍ਤਾਰਂ ਵਾ ਉਤ੍ਤਰਿਤ੍ਵਾ ਦਿਸਾਪਕ੍ਕਮਿਤੁਕਾਮੋ ਹੋਤਿ, ਤਸ੍ਸ ‘‘ਅਨੁਜਾਨਾਮਿ, ਭਿਕ੍ਖਵੇ, ਉਤ੍ਤਰਨ੍ਤਸ੍ਸ ਸਕਂ ਭਾਗਂ ਦਾਤੁ’’ਨ੍ਤਿ (ਮਹਾਵ. ੩੪੩) ਵਚਨਤੋ ਚੀਵਰੇਸੁ ਭਣ੍ਡਾਗਾਰਤੋ ਬਹਿ ਨੀਹਟੇਸੁ ਘਣ੍ਟਿਂ ਪਹਰਿਤ੍ਵਾ ਭਿਕ੍ਖੁਸਙ੍ਘੇ ਸਨ੍ਨਿਪਤਿਤੇ ਚੀਵਰਭਾਜਕੇਨ ‘‘ਇਮਸ੍ਸ ਭਿਕ੍ਖੁਨੋ ਕੋਟ੍ਠਾਸੇਨ ਏਤ੍ਤਕੇਨ ਭਵਿਤਬ੍ਬ’’ਨ੍ਤਿ ਤਕ੍ਕੇਤ੍ਵਾ ਨਯਗ੍ਗਾਹੇਨ ਸਮਭਾਗੇਨ ਚੀਵਰਂ ਦਾਤਬ੍ਬਂ. ਤੁਲਾਯ ਤੁਲਿਤਮਿਵ ਹਿ ਸਮਸਮਂ ਦਾਤੁਂ ਨ ਸਕ੍ਕਾ, ਤਸ੍ਮਾ ਊਨਂ ਵਾ ਹੋਤੁ ਅਧਿਕਂ ਵਾ, ਏਵਂ ਤਕ੍ਕੇਨ ਨਯੇਨ ਦਿਨ੍ਨਂ ਸੁਦਿਨ੍ਨਂ. ਨੇਵ ਊਨਕਂ ਪੁਨ ਦਾਤਬ੍ਬਂ, ਨਾਤਿਰਿਤ੍ਤਂ ਪਟਿਗ੍ਗਣ੍ਹਿਤਬ੍ਬਂ. ਸਚੇ ਦਸ ਭਿਕ੍ਖੂ ਹੋਨ੍ਤਿ, ਸਾਟਕਾਪਿ ਦਸੇਵ, ਤੇਸੁ ਏਕੋ ਦ੍ਵਾਦਸ ਅਗ੍ਘਤਿ, ਸੇਸਾ ਦਸਗ੍ਘਨਕਾ. ਸਬ੍ਬੇਸੁ ਦਸਗ੍ਘਨਕਵਸੇਨ ਕੁਸੇ ਪਾਤਿਤੇ ਯਸ੍ਸ ਭਿਕ੍ਖੁਨੋ ਦ੍ਵਾਦਸਗ੍ਘਨਕੋ ਕੁਸੋ ਪਾਤਿਤੋ, ਤੇਨ ਯਤ੍ਤਕਂ ਤਸ੍ਮਿਂ ਪਟਿਵੀਸੇ ਅਧਿਕਂ, ਤਤ੍ਤਕਂ ਅਗ੍ਘਨਕਂ ਯਂ ਕਿਞ੍ਚਿ ਅਤ੍ਤਨੋ ਸਨ੍ਤਕਂ ਕਪ੍ਪਿਯਭਣ੍ਡਂ ਦਤ੍ਵਾ ਸੋ ਅਤਿਰੇਕਭਾਗੋ ਗਹੇਤਬ੍ਬੋ. ਸਚੇ ਸਬ੍ਬੇਸਂ ਪਞ੍ਚ ਪਞ੍ਚ ਵਤ੍ਥਾਨਿ ਪਤ੍ਤਾਨਿ, ਸੇਸਾਨਿਪਿ ਅਤ੍ਥਿ, ਏਕੇਕਂ ਪਨ ਨ ਪਾਪੁਣਾਤਿ, ਛਿਨ੍ਦਿਤ੍ਵਾ ਦਾਤਬ੍ਬਾਨਿ.

ਛਿਨ੍ਦਨ੍ਤੇਨ ਚ ਅਡ੍ਢਮਣ੍ਡਲਾਦੀਨਂ ਵਾ ਉਪਾਹਨਤ੍ਥਵਿਕਾਦੀਨਂ ਵਾ ਪਹੋਨਕਾਨਿ ਖਣ੍ਡਾਨਿ ਕਤ੍ਵਾ ਦਾਤਬ੍ਬਾਨਿ. ਹੇਟ੍ਠਿਮਪਰਿਚ੍ਛੇਦੇਨ ਚਤੁਰਙ੍ਗੁਲਵਿਤ੍ਥਾਰਮ੍ਪਿ ਅਨੁਵਾਤਪ੍ਪਹੋਨਕਾਯਾਮਂ ਖਣ੍ਡਂ ਕਤ੍ਵਾ ਦਾਤੁਂ ਵਟ੍ਟਤਿ, ਅਪਰਿਭੋਗਂ ਪਨ ਨ ਕਾਤਬ੍ਬਂ. ਸਚੇਪਿ ਏਕਸ੍ਸ ਭਿਕ੍ਖੁਨੋ ਕੋਟ੍ਠਾਸੇ ਏਕਂ ਵਾ ਦ੍ਵੇ ਵਾ ਵਤ੍ਥਾਨਿ ਨਪ੍ਪਹੋਨ੍ਤਿ, ਤਤ੍ਥ ਅਞ੍ਞਂ ਸਾਮਣਕਂ ਪਰਿਕ੍ਖਾਰਂ ਠਪੇਤ੍ਵਾ ਯੋ ਤੇਨ ਤੁਸ੍ਸਤਿ, ਤਸ੍ਸ ਤਂ ਭਾਗਂ ਕਤ੍ਵਾ ਪਚ੍ਛਾ ਕੁਸਪਾਤੋ ਕਾਤਬ੍ਬੋ. ਸਚੇ ਦਸ ਦਸ ਭਿਕ੍ਖੂ ਗਣੇਤ੍ਵਾ ਵਗ੍ਗਂ ਕਰੋਨ੍ਤਾਨਂ ਏਕੋ ਵਗ੍ਗੋ ਨ ਪੂਰਤਿ, ਅਟ੍ਠ ਵਾ ਨਵ ਵਾ ਹੋਨ੍ਤਿ, ਤੇਸਂ ਅਟ੍ਠ ਵਾ ਨਵ ਵਾ ਕੋਟ੍ਠਾਸਾ ‘‘ਤੁਮ੍ਹੇ ਇਮੇ ਗਹੇਤ੍ਵਾ ਵਿਸੁਂ ਭਾਜੇਥਾ’’ਤਿ ਦਾਤਬ੍ਬਾ. ਏਵਂ ਦਤ੍ਵਾ ਪਚ੍ਛਾ ਕੁਸਪਾਤੋ ਕਾਤਬ੍ਬੋ.

੧੯੯. ਇਦਾਨਿ ‘‘ਅਟ੍ਠਿਮਾ, ਭਿਕ੍ਖਵੇ, ਮਾਤਿਕਾ ਚੀਵਰਸ੍ਸ ਉਪ੍ਪਾਦਾਯ, ਸੀਮਾਯ ਦੇਤਿ, ਕਤਿਕਾਯ ਦੇਤਿ, ਭਿਕ੍ਖਾਪਞ੍ਞਤ੍ਤਿਯਾ ਦੇਤਿ, ਸਙ੍ਘਸ੍ਸ ਦੇਤਿ, ਉਭਤੋਸਙ੍ਘਸ੍ਸ ਦੇਤਿ, ਵਸ੍ਸਂਵੁਟ੍ਠਸਙ੍ਘਸ੍ਸ ਦੇਤਿ, ਆਦਿਸ੍ਸ ਦੇਤਿ, ਪੁਗ੍ਗਲਸ੍ਸ ਦੇਤੀ’’ਤਿ (ਮਹਾਵ. ੩੭੯) ਚੀਵਰਾਨਂ ਪਟਿਲਾਭਖੇਤ੍ਤਦਸ੍ਸਨਤ੍ਥਂ ਯਾ ਤਾ ਅਟ੍ਠ ਮਾਤਿਕਾ ਵੁਤ੍ਤਾ, ਤਾਸਂ ਵਸੇਨ ਵਿਨਿਚ੍ਛਯੋ ਵੇਦਿਤਬ੍ਬੋ.

ਤਤ੍ਥ ‘‘ਸੀਮਾਯ ਦਮ੍ਮੀ’’ਤਿ ਏਵਂ ਸੀਮਂ ਪਰਾਮਸਿਤ੍ਵਾ ਦੇਨ੍ਤੋ ਸੀਮਾਯ ਦੇਤਿ ਨਾਮ. ਏਵਂ ਸੀਮਾਯ ਦਿਨ੍ਨਂ ਯਾਵਤਿਕਾ ਭਿਕ੍ਖੂ ਅਨ੍ਤੋਸੀਮਾਗਤਾ, ਤੇਹਿ ਭਾਜੇਤਬ੍ਬਂ. ਸੀਮਾ ਚ ਨਾਮੇਸਾ ਖਣ੍ਡਸੀਮਾ ਉਪਚਾਰਸੀਮਾ ਸਮਾਨਸਂਵਾਸਸੀਮਾ ਅਵਿਪ੍ਪਵਾਸਸੀਮਾ ਲਾਭਸੀਮਾ ਗਾਮਸੀਮਾ ਨਿਗਮਸੀਮਾ ਨਗਰਸੀਮਾ ਅਬ੍ਭਨ੍ਤਰਸੀਮਾ ਉਦਕੁਕ੍ਖੇਪਸੀਮਾ ਜਨਪਦਸੀਮਾ ਰਟ੍ਠਸੀਮਾ ਰਜ੍ਜਸੀਮਾ ਦੀਪਸੀਮਾ ਚਕ੍ਕਵਾਲ਼ਸੀਮਾਤਿ ਪਨ੍ਨਰਸਵਿਧਾ ਹੋਤਿ. ਤਤ੍ਥ ਖਣ੍ਡਸੀਮਾ ਸੀਮਾਕਥਾਯਂ ਵੁਤ੍ਤਾਵ. ਉਪਚਾਰਸੀਮਾ ਨਾਮ ਪਰਿਕ੍ਖਿਤ੍ਤਸ੍ਸ ਵਿਹਾਰਸ੍ਸ ਪਰਿਕ੍ਖੇਪੇਨ, ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪਾਰਹਟ੍ਠਾਨੇਨ ਪਰਿਚ੍ਛਿਨ੍ਨਾ ਹੋਤਿ. ਅਪਿਚ ਭਿਕ੍ਖੂਨਂ ਧੁਵਸਨ੍ਨਿਪਾਤਟ੍ਠਾਨਤੋ ਪਰਿਯਨ੍ਤੇ ਠਿਤਭੋਜਨਸਾਲਤੋ ਵਾ ਨਿਬਦ੍ਧਵਸਨਆਵਾਸਤੋ ਵਾ ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ ਦ੍ਵਿਨ੍ਨਂ ਲੇਡ੍ਡੁਪਾਤਾਨਂ ਅਨ੍ਤੋ ਉਪਚਾਰਸੀਮਾਤਿ ਵੇਦਿਤਬ੍ਬਾ. ਸਾ ਪਨ ਆਵਾਸੇਸੁ ਵਡ੍ਢਨ੍ਤੇਸੁ ਵਡ੍ਢਤਿ, ਪਰਿਹਾਯਨ੍ਤੇਸੁ ਪਰਿਹਾਯਤਿ. ਮਹਾਪਚ੍ਚਰਿਯਂ ਪਨ ‘‘ਭਿਕ੍ਖੂਸੁਪਿ ਵਡ੍ਢਨ੍ਤੇਸੁ ਵਡ੍ਢਤੀ’’ਤਿ ਵੁਤ੍ਤਂ. ਤਸ੍ਮਾ ਸਚੇ ਵਿਹਾਰੇ ਸਨ੍ਨਿਪਤਿਤਭਿਕ੍ਖੂਹਿ ਸਦ੍ਧਿਂ ਏਕਾਬਦ੍ਧਾ ਹੁਤ੍ਵਾ ਯੋਜਨਸਤਮ੍ਪਿ ਪੂਰੇਤ੍ਵਾ ਨਿਸੀਦਨ੍ਤਿ, ਯੋਜਨਸਤਮ੍ਪਿ ਉਪਚਾਰਸੀਮਾਵ ਹੋਤਿ, ਸਬ੍ਬੇਸਂ ਲਾਭੋ ਪਾਪੁਣਾਤਿ. ਸਮਾਨਸਂਵਾਸਅਵਿਪ੍ਪਵਾਸਸੀਮਾਦ੍ਵਯਮ੍ਪਿ ਵੁਤ੍ਤਮੇਵ. ਲਾਭਸੀਮਾ ਨਾਮ ਨੇਵ ਸਮ੍ਮਾਸਮ੍ਬੁਦ੍ਧੇਨ ਅਨੁਞ੍ਞਾਤਾ, ਨ ਧਮ੍ਮਸਙ੍ਗਾਹਕਤ੍ਥੇਰੇਹਿ ਠਪਿਤਾ, ਅਪਿਚ ਖੋ ਰਾਜਰਾਜਮਹਾਮਤ੍ਤਾ ਵਿਹਾਰਂ ਕਾਰੇਤ੍ਵਾ ਗਾਵੁਤਂ ਵਾ ਅਡ੍ਢਯੋਜਨਂ ਵਾ ਯੋਜਨਂ ਵਾ ਸਮਨ੍ਤਤੋ ਪਰਿਚ੍ਛਿਨ੍ਦਿਤ੍ਵਾ ‘‘ਅਯਂ ਅਮ੍ਹਾਕਂ ਵਿਹਾਰਸ੍ਸ ਲਾਭਸੀਮਾ’’ਤਿ ਨਾਮਲਿਖਿਤਕੇ ਥਮ੍ਭੇ ਨਿਖਣਿਤ੍ਵਾ ‘‘ਯਂ ਏਤ੍ਥਨ੍ਤਰੇ ਉਪ੍ਪਜ੍ਜਤਿ, ਸਬ੍ਬਂ ਅਮ੍ਹਾਕਂ ਵਿਹਾਰਸ੍ਸ ਦੇਮਾ’’ਤਿ ਸੀਮਾ ਠਪੇਨ੍ਤਿ, ਅਯਂ ਲਾਭਸੀਮਾ ਨਾਮ. ਗਾਮਨਿਗਮਨਗਰਅਬ੍ਭਨ੍ਤਰਉਦਕੁਕ੍ਖੇਪਸੀਮਾਪਿ ਵੁਤ੍ਤਾ ਏਵ.

ਜਨਪਦਸੀਮਾ ਨਾਮ ਕਾਸਿਕੋਸਲਰਟ੍ਠਾਦੀਨਂ ਅਨ੍ਤੋ ਬਹੂ ਜਨਪਦਾ ਹੋਨ੍ਤਿ, ਤਤ੍ਥ ਏਕੇਕੋ ਜਨਪਦਪਰਿਚ੍ਛੇਦੋ ਜਨਪਦਸੀਮਾ. ਰਟ੍ਠਸੀਮਾ ਨਾਮ ਕਾਸਿਕੋਸਲਾਦਿਰਟ੍ਠਪਰਿਚ੍ਛੇਦੋ. ਰਜ੍ਜਸੀਮਾ ਨਾਮ ‘‘ਚੋਲ਼ਭੋਗੋ ਕੇਰਲ਼ਭੋਗੋ’’ਤਿ ਏਵਂ ਏਕੇਕਸ੍ਸ ਰਞ੍ਞੋ ਆਣਾਪਵਤ੍ਤਿਟ੍ਠਾਨਂ. ਦੀਪਸੀਮਾ ਨਾਮ ਸਮੁਦ੍ਦਨ੍ਤੇਨ ਪਰਿਚ੍ਛਿਨ੍ਨਮਹਾਦੀਪਾ ਚ ਅਨ੍ਤਰਦੀਪਾ ਚ. ਚਕ੍ਕਵਾਲ਼ਸੀਮਾ ਚਕ੍ਕਵਾਲ਼ਪਬ੍ਬਤੇਨੇਵ ਪਰਿਚ੍ਛਿਨ੍ਨਾ. ਏਵਮੇਤਾਸੁ ਸੀਮਾਸੁ ਖਣ੍ਡਸੀਮਾਯ ਕੇਨਚਿ ਕਮ੍ਮੇਨ ਸਨ੍ਨਿਪਤਿਤਂ ਸਙ੍ਘਂ ਦਿਸ੍ਵਾ ‘‘ਏਤ੍ਥੇਵ ਸੀਮਾਯ ਸਙ੍ਘਸ੍ਸ ਦੇਮੀ’’ਤਿ ਵੁਤ੍ਤੇ ਯਾਵਤਿਕਾ ਭਿਕ੍ਖੂ ਅਨ੍ਤੋਖਣ੍ਡਸੀਮਾਗਤਾ, ਤੇਹਿ ਭਾਜੇਤਬ੍ਬਂ. ਤੇਸਂਯੇਵ ਹਿ ਤਂ ਪਾਪੁਣਾਤਿ, ਅਞ੍ਞੇਸਂ ਸੀਮਨ੍ਤਰਿਕਾਯ ਵਾ ਉਪਚਾਰਸੀਮਾਯ ਵਾ ਠਿਤਾਨਮ੍ਪਿ ਨ ਪਾਪੁਣਾਤਿ. ਖਣ੍ਡਸੀਮਾਯ ਠਿਤੇ ਪਨ ਰੁਕ੍ਖੇ ਵਾ ਪਬ੍ਬਤੇ ਵਾ ਠਿਤਸ੍ਸ ਹੇਟ੍ਠਾ ਵਾ ਪਥਵੀਵੇਮਜ੍ਝਗਤਸ੍ਸ ਪਾਪੁਣਾਤਿਯੇਵ. ‘‘ਇਮਿਸ੍ਸਾ ਉਪਚਾਰਸੀਮਾਯ ਸਙ੍ਘਸ੍ਸ ਦਮ੍ਮੀ’’ਤਿ ਦਿਨ੍ਨਂ ਪਨ ਖਣ੍ਡਸੀਮਾਸੀਮਨ੍ਤਰਿਕਾਸੁ ਠਿਤਾਨਮ੍ਪਿ ਪਾਪੁਣਾਤਿ. ‘‘ਸਮਾਨਸਂਵਾਸਸੀਮਾਯ ਦਮ੍ਮੀ’’ਤਿ ਦਿਨ੍ਨਂ ਪਨ ਖਣ੍ਡਸੀਮਾਸੀਮਨ੍ਤਰਿਕਾਸੁ ਠਿਤਾਨਂ ਨ ਪਾਪੁਣਾਤਿ. ਅਵਿਪ੍ਪਵਾਸਸੀਮਾਲਾਭਸੀਮਾਸੁ ਦਿਨ੍ਨਂ ਤਾਸੁ ਸੀਮਾਸੁ ਅਨ੍ਤੋਗਤਾਨਂ ਪਾਪੁਣਾਤਿ. ਗਾਮਸੀਮਾਦੀਸੁ ਦਿਨ੍ਨਂ ਤਾਸਂ ਸੀਮਾਨਂ ਅਬ੍ਭਨ੍ਤਰੇ ਬਦ੍ਧਸੀਮਾਯ ਠਿਤਾਨਮ੍ਪਿ ਪਾਪੁਣਾਤਿ. ਅਬ੍ਭਨ੍ਤਰਸੀਮਾਉਦਕੁਕ੍ਖੇਪਸੀਮਾਸੁ ਦਿਨ੍ਨਂ ਤਤ੍ਥ ਅਨ੍ਤੋਗਤਾਨਂਯੇਵ ਪਾਪੁਣਾਤਿ. ਜਨਪਦਰਟ੍ਠਰਜ੍ਜਦੀਪਚਕ੍ਕਵਾਲ਼ਸੀਮਾਸੁਪਿ ਗਾਮਸੀਮਾਦੀਸੁ ਵੁਤ੍ਤਸਦਿਸੋਯੇਵ ਵਿਨਿਚ੍ਛਯੋ.

ਸਚੇ ਪਨ ਜਮ੍ਬੁਦੀਪੇ ਠਿਤੋ ‘‘ਤਮ੍ਬਵਣ੍ਣਿਦੀਪੇ ਸਙ੍ਘਸ੍ਸ ਦਮ੍ਮੀ’’ਤਿ ਵਦਤਿ, ਤਮ੍ਬਪਣ੍ਣਿਦੀਪਤੋ ਏਕੋਪਿ ਆਗਨ੍ਤ੍ਵਾ ਸਬ੍ਬੇਸਂ ਗਣ੍ਹਿਤੁਂ ਲਭਤਿ. ਸਚੇਪਿ ਤਤ੍ਰੇਵ ਏਕੋ ਸਭਾਗਭਿਕ੍ਖੁ ਸਭਾਗਾਨਂ ਭਾਗਂ ਗਣ੍ਹਾਤਿ, ਨ ਵਾਰੇਤਬ੍ਬੋ. ਏਵਂ ਤਾਵ ਯੋ ਸੀਮਂ ਪਰਾਮਸਿਤ੍ਵਾ ਦੇਤਿ, ਤਸ੍ਸ ਦਾਨੇ ਵਿਨਿਚ੍ਛਯੋ ਵੇਦਿਤਬ੍ਬੋ. ਯੋ ਪਨ ‘‘ਅਸੁਕਸੀਮਾਯ’’ਨ੍ਤਿ ਵਤ੍ਤੁਂ ਨ ਜਾਨਾਤਿ, ਕੇਵਲਂ ‘‘ਸੀਮਾ’’ਤਿ ਵਚਨਮਤ੍ਤਮੇਵ ਜਾਨਨ੍ਤੋ ਵਿਹਾਰਂ ਆਗਨ੍ਤ੍ਵਾ ‘‘ਸੀਮਾਯ ਦਮ੍ਮੀ’’ਤਿ ਵਾ ‘‘ਸੀਮਟ੍ਠਕਸਙ੍ਘਸ੍ਸ ਦਮ੍ਮੀ’’ਤਿ ਵਾ ਭਣਤਿ, ਸੋ ਪੁਚ੍ਛਿਤਬ੍ਬੋ ‘‘ਸੀਮਾ ਨਾਮ ਬਹੁਵਿਧਾ, ਕਤਰਸੀਮਂ ਸਨ੍ਧਾਯ ਭਣਸੀ’’ਤਿ. ਸਚੇ ਵਦਤਿ ‘‘ਅਹਂ ‘ਅਸੁਕਸੀਮਾ’ਤਿ ਨ ਜਾਨਾਮਿ, ਸੀਮਟ੍ਠਕਸਙ੍ਘੋ ਭਾਜੇਤ੍ਵਾ ਗਣ੍ਹਤੂ’’ਤਿ, ਕਤਰਸੀਮਾਯ ਭਾਜੇਤਬ੍ਬਂ? ਮਹਾਸੀਵਤ੍ਥੇਰੋ ਕਿਰਾਹ ‘‘ਅਵਿਪ੍ਪਵਾਸਸੀਮਾਯਾ’’ਤਿ. ਤਤੋ ਨਂ ਆਹਂਸੁ ‘‘ਅਵਿਪ੍ਪਵਾਸਸੀਮਾ ਨਾਮ ਤਿਯੋਜਨਾਪਿ ਹੋਤਿ, ਏਵਂ ਸਨ੍ਤੇ ਤਿਯੋਜਨੇ ਠਿਤਾ ਲਾਭਂ ਗਣ੍ਹਿਸ੍ਸਨ੍ਤਿ, ਤਿਯੋਜਨੇ ਠਤ੍ਵਾ ਆਗਨ੍ਤੁਕਵਤ੍ਤਂ ਪੂਰੇਤ੍ਵਾ ਆਰਾਮਂ ਪਵਿਸਿਤਬ੍ਬਂ ਭਵਿਸ੍ਸਤਿ, ਗਮਿਕੋ ਤਿਯੋਜਨਂ ਗਨ੍ਤ੍ਵਾ ਸੇਨਾਸਨਂ ਆਪੁਚ੍ਛਿਸ੍ਸਤਿ, ਨਿਸ੍ਸਯਪ੍ਪਟਿਪਨ੍ਨਸ੍ਸ ਤਿਯੋਜਨਾਤਿਕ੍ਕਮੇ ਨਿਸ੍ਸਯੋ ਪਟਿਪ੍ਪਸ੍ਸਮ੍ਭਿਸ੍ਸਤਿ, ਪਾਰਿਵਾਸਿਕੇਨ ਤਿਯੋਜਨਂ ਅਤਿਕ੍ਕਮਿਤ੍ਵਾ ਅਰੁਣਂ ਉਟ੍ਠਪੇਤਬ੍ਬਂ ਭਵਿਸ੍ਸਤਿ, ਭਿਕ੍ਖੁਨਿਯਾ ਤਿਯੋਜਨੇ ਠਤ੍ਵਾ ਆਰਾਮਪ੍ਪਵੇਸਨਂ ਆਪੁਚ੍ਛਿਤਬ੍ਬਂ ਭਵਿਸ੍ਸਤਿ, ਸਬ੍ਬਮ੍ਪੇਤਂ ਉਪਚਾਰਸੀਮਾਪਰਿਚ੍ਛੇਦਵਸੇਨੇਵ ਕਾਤੁਂ ਵਟ੍ਟਤਿ, ਤਸ੍ਮਾ ਉਪਚਾਰਸੀਮਾਯ ਭਾਜੇਤਬ੍ਬ’’ਨ੍ਤਿ.

੨੦੦. ਕਤਿਕਾਯ ਦੇਤੀਤਿ ਏਤ੍ਥ ਪਨ ਕਤਿਕਾ ਨਾਮ ਸਮਾਨਲਾਭਕਤਿਕਾ. ਤਤ੍ਰੇਵਂ ਕਤਿਕਾ ਕਾਤਬ੍ਬਾ, ਏਕਸ੍ਮਿਂ ਵਿਹਾਰੇ ਸਨ੍ਨਿਪਤਿਤੇਹਿ ਭਿਕ੍ਖੂਹਿ ਯਂ ਵਿਹਾਰਂ ਸਙ੍ਗਣ੍ਹਿਤੁਕਾਮਾ ਸਮਾਨਲਾਭਂ ਕਾਤੁਂ ਇਚ੍ਛਨ੍ਤਿ, ਤਸ੍ਸ ਨਾਮਂ ਗਹੇਤ੍ਵਾ ‘‘ਅਸੁਕੋ ਨਾਮ ਵਿਹਾਰੋ ਪੋਰਾਣਕੋ’’ਤਿ ਵਾ ‘‘ਬੁਦ੍ਧਾਧਿਵੁਤ੍ਥੋ’’ਤਿ ਵਾ ‘‘ਅਪ੍ਪਲਾਭੋ’’ਤਿ ਵਾ ਯ ਕਿਞ੍ਚਿ ਕਾਰਣਂ ਵਤ੍ਵਾ ‘‘ਤਂ ਵਿਹਾਰਂ ਇਮਿਨਾ ਵਿਹਾਰੇਨ ਸਦ੍ਧਿਂ ਏਕਲਾਭਂ ਕਾਤੁਂ ਸਙ੍ਘਸ੍ਸ ਰੁਚ੍ਚਤੀ’’ਤਿ ਤਿਕ੍ਖਤ੍ਤੁਂ ਸਾਵੇਤਬ੍ਬਂ. ਏਤ੍ਤਾਵਤਾ ਤਸ੍ਮਿਂ ਵਿਹਾਰੇ ਨਿਸਿਨ੍ਨੋਪਿ ਇਧ ਨਿਸਿਨ੍ਨੋਵ ਹੋਤਿ. ਤਸ੍ਮਿਂ ਵਿਹਾਰੇਪਿ ਸਙ੍ਘੇਨ ਏਵਮੇਵ ਕਾਤਬ੍ਬਂ. ਏਤ੍ਤਾਵਤਾ ਇਧ ਨਿਸਿਨ੍ਨੋਪਿ ਤਸ੍ਮਿਂ ਨਿਸਿਨ੍ਨੋਵ ਹੋਤਿ. ਏਕਸ੍ਮਿਂ ਵਿਹਾਰੇ ਲਾਭੇ ਭਾਜਿਯਮਾਨੇ ਇਤਰਸ੍ਮਿਂ ਠਿਤਸ੍ਸ ਭਾਗਂ ਗਹੇਤੁਂ ਵਟ੍ਟਤਿ. ਏਵਂ ਏਕੇਨ ਵਿਹਾਰੇਨ ਸਦ੍ਧਿਂ ਬਹੂਪਿ ਆਵਾਸਾ ਏਕਲਾਭਾ ਕਾਤਬ੍ਬਾ. ਏਵਞ੍ਚ ਕਤੇ ਏਕਸ੍ਮਿਂ ਆਵਾਸੇ ਦਿਨ੍ਨੇ ਸਬ੍ਬਤ੍ਥ ਦਿਨ੍ਨਂ ਹੋਤਿ.

੨੦੧. ਭਿਕ੍ਖਾਪਞ੍ਞਤ੍ਤਿ ਨਾਮ ਅਤ੍ਤਨੋ ਪਰਿਚ੍ਚਾਗਪਞ੍ਞਾਪਨਟ੍ਠਾਨਂ, ਯਤ੍ਥ ਸਙ੍ਘਸ੍ਸ ਧੁਵਕਾਰਾ ਕਰੀਯਨ੍ਤਿ. ਏਤ੍ਥ ਚ ਯਸ੍ਮਿਂ ਵਿਹਾਰੇ ਇਮਸ੍ਸ ਚੀਵਰਦਾਯਕਸ੍ਸ ਸਨ੍ਤਕਂ ਸਙ੍ਘਸ੍ਸ ਪਾਕਵਟ੍ਟਂ ਵਾ ਵਤ੍ਤਤਿ, ਯਸ੍ਮਿਂ ਵਿਹਾਰੇ ਭਿਕ੍ਖੂ ਅਤ੍ਤਨੋ ਭਾਰਂ ਕਤ੍ਵਾ ਸਦਾ ਗੇਹੇ ਭੋਜੇਤਿ, ਯਤ੍ਥ ਵਾ ਤੇਨ ਆਵਾਸੋ ਕਾਰਿਤੋ, ਸਲਾਕਭਤ੍ਤਾਦੀਨਿ ਵਾ ਨਿਬਦ੍ਧਾਨਿ, ਇਮੇ ਧੁਵਕਾਰਾ ਨਾਮ. ਯੇਨ ਪਨ ਸਕਲੋਪਿ ਵਿਹਾਰੋ ਪਤਿਟ੍ਠਾਪਿਤੋ, ਤਤ੍ਥ ਵਤ੍ਤਬ੍ਬਮੇਵ ਨਤ੍ਥਿ, ਤਸ੍ਮਾ ਸਚੇ ਸੋ ‘‘ਯਤ੍ਥ ਮਯ੍ਹਂ ਧੁਵਕਾਰਾ ਕਰੀਯਨ੍ਤਿ, ਤਤ੍ਥ ਦਮ੍ਮੀ’’ਤਿ ਵਾ ‘‘ਤਤ੍ਥ ਦੇਥਾ’’ਤਿ ਵਾ ਭਣਤਿ, ਬਹੂਸੁ ਚੇਪਿ ਠਾਨੇਸੁ ਧੁਵਕਾਰਾ ਹੋਨ੍ਤਿ, ਸਬ੍ਬਤ੍ਥ ਦਿਨ੍ਨਮੇਵ ਹੋਤਿ. ਸਚੇ ਪਨ ਏਕਸ੍ਮਿਂ ਵਿਹਾਰੇ ਭਿਕ੍ਖੂ ਬਹੁਤਰਾ ਹੋਨ੍ਤਿ, ਤੇਹਿ ਵਤ੍ਤਬ੍ਬਂ ‘‘ਤੁਮ੍ਹਾਕਂ ਧੁਵਕਾਰੇ ਏਕਤ੍ਥ ਭਿਕ੍ਖੂ ਬਹੂ, ਏਕਤ੍ਥ ਅਪ੍ਪਕਾ’’ਤਿ. ਸਚੇ ‘‘ਭਿਕ੍ਖੁਗਣਨਾਯ ਗਣ੍ਹਥਾ’’ਤਿ ਭਣਤਿ, ਤਥਾ ਭਾਜੇਤ੍ਵਾ ਗਣ੍ਹਿਤੁਂ ਵਟ੍ਟਤਿ. ਏਤ੍ਥ ਚ ਵਤ੍ਥਭੇਸਜ੍ਜਾਦਿ ਅਪ੍ਪਕਮ੍ਪਿ ਸੁਖੇਨ ਭਾਜੀਯਤਿ. ਯਦਿ ਪਨ ਮਞ੍ਚੋ ਵਾ ਪੀਠਂ ਵਾ ਏਕਮੇਵ ਹੋਤਿ, ਤਂ ਪੁਚ੍ਛਿਤ੍ਵਾ ਯਸ੍ਸ ਵਿਹਾਰਸ੍ਸ, ਏਕਵਿਹਾਰੇਪਿ ਵਾ ਯਸ੍ਸ ਸੇਨਾਸਨਸ੍ਸ ਸੋ ਵਿਚਾਰੇਤਿ, ਤਤ੍ਥ ਦਾਤਬ੍ਬਂ. ਸਚੇਪਿ ‘‘ਅਸੁਕਭਿਕ੍ਖੁ ਗਣ੍ਹਤੂ’’ਤਿ ਵਦਤਿ, ਵਟ੍ਟਤਿ. ਅਥ ‘‘ਮਯ੍ਹਂ ਧੁਵਕਾਰੇ ਦੇਥਾ’’ਤਿ ਵਤ੍ਵਾ ਅਵਿਚਾਰੇਤ੍ਵਾ ਗਚ੍ਛਤਿ, ਸਙ੍ਘਸ੍ਸਪਿ ਵਿਚਾਰੇਤੁਂ ਵਟ੍ਟਤਿ. ਏਵਂ ਪਨ ਵਿਚਾਰੇਤਬ੍ਬਂ, ‘‘ਸਙ੍ਘਤ੍ਥੇਰਸ੍ਸ ਵਸਨਟ੍ਠਾਨੇ ਦੇਥਾ’’ਤਿ ਵਤ੍ਤਬ੍ਬਂ. ਸਚੇ ਤਤ੍ਥ ਸੇਨਾਸਨਂ ਪਰਿਪੁਣ੍ਣਂ ਹੋਤਿ, ਯਤ੍ਥ ਨਪ੍ਪਹੋਤਿ, ਤਤ੍ਥ ਦਾਤਬ੍ਬਂ. ਸਚੇ ਏਕੋ ਭਿਕ੍ਖੁ ‘‘ਮਯ੍ਹਂ ਵਸਨਟ੍ਠਾਨੇ ਸੇਨਾਸਨਪਰਿਭੋਗਭਣ੍ਡਂ ਨਤ੍ਥੀ’’ਤਿ ਵਦਤਿ, ਤਤ੍ਥ ਦਾਤਬ੍ਬਂ.

੨੦੨. ਸਙ੍ਘਸ੍ਸ ਦੇਤੀਤਿ ਏਤ੍ਥ ਪਨ ਸਚੇ ਵਿਹਾਰਂ ਪਵਿਸਿਤ੍ਵਾ ‘‘ਇਮਾਨਿ ਚੀਵਰਾਨਿ ਸਙ੍ਘਸ੍ਸ ਦਮ੍ਮੀ’’ਤਿ ਦੇਤਿ, ਉਪਚਾਰਸੀਮਾਯ ਠਿਤੇਨ ਸਙ੍ਘੇਨ ਘਣ੍ਟਿਂ ਪਹਰਿਤ੍ਵਾ ਕਾਲਂ ਘੋਸੇਤ੍ਵਾ ਭਾਜੇਤਬ੍ਬਾਨਿ, ਸੀਮਟ੍ਠਕਸ੍ਸ ਅਸਮ੍ਪਤ੍ਤਸ੍ਸਪਿ ਭਾਗਂ ਗਣ੍ਹਨ੍ਤੋ ਨ ਵਾਰੇਤਬ੍ਬੋ. ਵਿਹਾਰੋ ਮਹਾ ਹੋਤਿ, ਥੇਰਾਸਨਤੋ ਪਟ੍ਠਾਯ ਵਤ੍ਥੇਸੁ ਦੀਯਮਾਨੇਸੁ ਅਲਸਜਾਤਿਕਾ ਮਹਾਥੇਰਾ ਪਚ੍ਛਾ ਆਗਚ੍ਛਨ੍ਤਿ, ‘‘ਭਨ੍ਤੇ, ਵੀਸਤਿਵਸ੍ਸਾਨਂ ਦੀਯਤਿ, ਤੁਮ੍ਹਾਕਂ ਠਿਤਿਕਾ ਅਤਿਕ੍ਕਨ੍ਤਾ’’ਤਿ ਨ ਵਤ੍ਤਬ੍ਬਾ, ਠਿਤਿਕਂ ਠਪੇਤ੍ਵਾ ਤੇਸਂ ਦਤ੍ਵਾ ਪਚ੍ਛਾ ਠਿਤਿਭਾਯ ਦਾਤਬ੍ਬਂ. ‘‘ਅਸੁਕਵਿਹਾਰੇ ਕਿਰ ਬਹੁ ਚੀਵਰਂ ਉਪ੍ਪਨ੍ਨ’’ਨ੍ਤਿ ਸੁਤ੍ਵਾ ਯੋਜਨਨ੍ਤਰਿਕਵਿਹਾਰਤੋਪਿ ਭਿਕ੍ਖੂ ਆਗਚ੍ਛਨ੍ਤਿ, ਸਮ੍ਪਤ੍ਤਸਮ੍ਪਤ੍ਤਾਨਂ ਠਿਤਟ੍ਠਾਨਤੋ ਪਟ੍ਠਾਯ ਦਾਤਬ੍ਬਂ, ਅਸਮ੍ਪਤ੍ਤਾਨਮ੍ਪਿ ਉਪਚਾਰਸੀਮਂ ਪਵਿਟ੍ਠਾਨਂ ਅਨ੍ਤੇਵਾਸਿਕਾਦੀਸੁ ਗਣ੍ਹਨ੍ਤੇਸੁ ਦਾਤਬ੍ਬਮੇਵ. ‘‘ਬਹਿਉਪਚਾਰਸੀਮਾਯ ਠਿਤਾਨਂ ਦੇਥਾ’’ਤਿ ਵਦਨ੍ਤਿ, ਨ ਦਾਤਬ੍ਬਂ. ਸਚੇ ਪਨ ਉਪਚਾਰਸੀਮਂ ਓਕ੍ਕਨ੍ਤੇਹਿ ਏਕਾਬਦ੍ਧਾ ਹੁਤ੍ਵਾ ਅਤ੍ਤਨੋ ਵਿਹਾਰਦ੍ਵਾਰੇ ਵਾ ਅਨ੍ਤੋਵਿਹਾਰੇਯੇਵ ਵਾ ਹੋਨ੍ਤਿ, ਪਰਿਸਵਸੇਨ ਵਡ੍ਢਿਤਾ ਨਾਮ ਸੀਮਾ ਹੋਤਿ, ਤਸ੍ਮਾ ਦਾਤਬ੍ਬਂ. ਸਙ੍ਘਨਵਕਸ੍ਸ ਦਿਨ੍ਨੇਪਿ ਪਚ੍ਛਾ ਆਗਤਾਨਂ ਦਾਤਬ੍ਬਮੇਵ. ਦੁਤਿਯਭਾਗੇ ਪਨ ਥੇਰਾਸਨਂ ਆਰੁਲ਼੍ਹੇ ਆਗਤਾਨਂ ਪਠਮਭਾਗੋ ਨ ਪਾਪੁਣਾਤਿ, ਦੁਤਿਯਭਾਗਤੋ ਵਸ੍ਸਗ੍ਗੇਨ ਦਾਤਬ੍ਬਂ.

ਏਕਸ੍ਮਿਂ ਵਿਹਾਰੇ ਦਸ ਭਿਕ੍ਖੂ ਹੋਨ੍ਤਿ, ਦਸ ਵਤ੍ਥਾਨਿ ‘‘ਸਙ੍ਘਸ੍ਸ ਦੇਮਾ’’ਤਿ ਦੇਨ੍ਤਿ, ਪਾਟੇਕ੍ਕਂ ਭਾਜੇਤਬ੍ਬਾਨਿ. ਸਚੇ ‘‘ਸਬ੍ਬਾਨੇਵ ਅਮ੍ਹਾਕਂ ਪਾਪੁਣਨ੍ਤੀ’’ਤਿ ਗਹੇਤ੍ਵਾ ਗਚ੍ਛਨ੍ਤਿ, ਦੁਪ੍ਪਾਪਿਤਾਨਿ ਚੇਵ ਦੁਗ੍ਗਹਿਤਾਨਿ ਚ, ਗਤਗਤਟ੍ਠਾਨੇ ਸਙ੍ਘਿਕਾਨੇਵ ਹੋਨ੍ਤਿ. ਏਕਂ ਪਨ ਉਦ੍ਧਰਿਤ੍ਵਾ ‘‘ਇਦਂ ਤੁਮ੍ਹਾਕਂ ਪਾਪੁਣਾਤੀ’’ਤਿ ਸਙ੍ਘਤ੍ਥੇਰਸ੍ਸ ਪਾਪੇਤ੍ਵਾ ‘‘ਸੇਸਾਨਿ ਅਮ੍ਹਾਕਂ ਪਾਪੁਣਨ੍ਤੀ’’ਤਿ ਗਹੇਤੁਂ ਵਟ੍ਟਤਿ. ਏਕਮੇਵ ਵਤ੍ਥਂ ‘‘ਸਙ੍ਘਸ੍ਸ ਦੇਮਾ’’ਤਿ ਆਹਰਨ੍ਤਿ, ਅਭਾਜੇਤ੍ਵਾਵ ‘‘ਅਮ੍ਹਾਕਂ ਪਾਪੁਣਾਤੀ’’ਤਿ ਗਣ੍ਹਨ੍ਤਿ, ਦੁਪ੍ਪਾਪਿਤਞ੍ਚੇਵ ਦੁਗ੍ਗਹਿਤਞ੍ਚ. ਸਤ੍ਥਕੇਨ ਵਾ ਹਲਿਦ੍ਦਿਆਦਿਨਾ ਵਾ ਲੇਖਂ ਕਤ੍ਵਾ ਏਕਕੋਟ੍ਠਾਸਂ ‘‘ਇਦਂ ਠਾਨਂ ਤੁਮ੍ਹਾਕਂ ਪਾਪੁਣਾਤੀ’’ਤਿ ਸਙ੍ਘਤ੍ਥੇਰਸ੍ਸ ਪਾਪੇਤ੍ਵਾ ‘‘ਸੇਸਂ ਅਮ੍ਹਾਕਂ ਪਾਪੁਣਾਤੀ’’ਤਿ ਗਹੇਤੁਂ ਵਟ੍ਟਤਿ. ਯਂ ਪਨ ਵਤ੍ਥਸ੍ਸੇਵ ਪੁਪ੍ਫਂ ਵਾ ਵਲਿ ਵਾ, ਤੇਨ ਪਰਿਚ੍ਛੇਦਂ ਕਾਤੁਂ ਨ ਵਟ੍ਟਤਿ. ਸਚੇ ਏਕਂ ਤਨ੍ਤਂ ਉਦ੍ਧਰਿਤ੍ਵਾ ‘‘ਇਦਂ ਠਾਨਂ ਤੁਮ੍ਹਾਕਂ ਪਾਪੁਣਾਤੀ’’ਤਿ ਥੇਰਸ੍ਸ ਦਤ੍ਵਾ ‘‘ਸੇਸਂ ਅਮ੍ਹਾਕਂ ਪਾਪੁਣਾਤੀ’’ਤਿ ਗਣ੍ਹਨ੍ਤਿ, ਵਟ੍ਟਤਿ. ਖਣ੍ਡਂ ਖਣ੍ਡਂ ਛਿਨ੍ਦਿਤ੍ਵਾ ਭਾਜਿਯਮਾਨਂ ਵਟ੍ਟਤਿਯੇਵ.

ਏਕਭਿਕ੍ਖੁਕੇ ਵਿਹਾਰੇ ਸਙ੍ਘਸ੍ਸ ਚੀਵਰੇਸੁ ਉਪ੍ਪਨ੍ਨੇਸੁ ਸਚੇ ਪੁਬ੍ਬੇ ਵੁਤ੍ਤਨਯੇਨੇਵ ਸੋ ਭਿਕ੍ਖੁ ‘‘ਸਬ੍ਬਾਨਿ ਮਯ੍ਹਂ ਪਾਪੁਣਨ੍ਤੀ’’ਤਿ ਗਣ੍ਹਾਤਿ, ਸੁਗ੍ਗਹਿਤਾਨਿ, ਠਿਤਿਕਾ ਪਨ ਨ ਤਿਟ੍ਠਤਿ. ਸਚੇ ਏਕੇਕਂ ਉਦ੍ਧਰਿਤ੍ਵਾ ‘‘ਇਦਂ ਮਯ੍ਹਂ ਪਾਪੁਣਾਤੀ’’ਤਿ ਗਣ੍ਹਾਤਿ, ਠਿਤਿਕਾ ਤਿਟ੍ਠਤਿ. ਤਤ੍ਥ ਅਟ੍ਠਿਤਾਯ ਠਿਤਿਕਾਯ ਪੁਨ ਅਞ੍ਞਸ੍ਮਿਂ ਚੀਵਰੇ ਉਪ੍ਪਨ੍ਨੇ ਸਚੇ ਏਕੋ ਭਿਕ੍ਖੁ ਆਗਚ੍ਛਤਿ, ਮਜ੍ਝੇ ਛਿਨ੍ਦਿਤ੍ਵਾ ਦ੍ਵੀਹਿਪਿ ਗਹੇਤਬ੍ਬਂ. ਠਿਤਾਯ ਠਿਤਿਕਾਯ ਪੁਨ ਅਞ੍ਞਸ੍ਮਿਂ ਚੀਵਰੇ ਉਪ੍ਪਨ੍ਨੇ ਸਚੇ ਨਵਕਤਰੋ ਆਗਚ੍ਛਤਿ, ਠਿਤਿਕਾ ਹੇਟ੍ਠਾ ਓਰੋਹਤਿ. ਸਚੇ ਵੁਡ੍ਢਤਰੋ ਆਗਚ੍ਛਤਿ, ਠਿਤਿਕਾ ਉਦ੍ਧਂ ਆਰੋਹਤਿ. ਅਥ ਅਞ੍ਞੋ ਨਤ੍ਥਿ, ਪੁਨ ਅਤ੍ਤਨੋ ਪਾਪੇਤ੍ਵਾ ਗਹੇਤਬ੍ਬਂ. ‘‘ਸਙ੍ਘਸ੍ਸ ਦੇਮਾ’’ਤਿ ਵਾ ‘‘ਭਿਕ੍ਖੁਸਙ੍ਘਸ੍ਸ ਦੇਮਾ’’ਤਿ ਵਾ ਯੇਨ ਕੇਨਚਿ ਆਕਾਰੇਨ ਸਙ੍ਘਂ ਆਮਸਿਤ੍ਵਾ ਦਿਨ੍ਨਂ ਪਨ ਪਂਸੁਕੂਲਿਕਾਨਂ ਨ ਵਟ੍ਟਤਿ ‘‘ਗਹਪਤਿਚੀਵਰਂ ਪਟਿਕ੍ਖਿਪਾਮਿ, ਪਂਸੁਕੂਲਿਕਙ੍ਗਂ ਸਮਾਦਿਯਾਮੀ’’ਤਿ ਵੁਤ੍ਤਤ੍ਤਾ, ਨ ਪਨ ਅਕਪ੍ਪਿਯਤ੍ਤਾ. ਭਿਕ੍ਖੁਸਙ੍ਘੇਨ ਅਪਲੋਕੇਤ੍ਵਾ ਦਿਨ੍ਨਮ੍ਪਿ ਨ ਗਹੇਤਬ੍ਬਂ. ਯਂ ਪਨ ਭਿਕ੍ਖੁ ਅਤ੍ਤਨੋ ਸਨ੍ਤਕਂ ਦੇਤਿ, ਤਂ ਭਿਕ੍ਖੁਦਤ੍ਤਿਯਂ ਨਾਮ ਵਟ੍ਟਤਿ, ਪਂਸੁਕੂਲਂ ਪਨ ਨ ਹੋਤਿ. ਏਵਂ ਸਨ੍ਤੇਪਿ ਧੁਤਙ੍ਗਂ ਨ ਭਿਜ੍ਜਤਿ. ‘‘ਭਿਕ੍ਖੂਨਂ ਦੇਮ, ਥੇਰਾਨਂ ਦੇਮਾ’’ਤਿ ਵੁਤ੍ਤੇ ਪਨ ਪਂਸੁਕੂਲਿਕਾਨਮ੍ਪਿ ਵਟ੍ਟਤਿ, ‘‘ਇਦਂ ਵਤ੍ਥਂ ਸਙ੍ਘਸ੍ਸ ਦੇਮ, ਇਮਿਨਾ ਉਪਾਹਨਤ੍ਥਵਿਕਪਤ੍ਤਤ੍ਥਵਿਕਆਯੋਗਅਂਸਬਦ੍ਧਕਾਦੀਨਿ ਕਰੋਨ੍ਤੂ’’ਤਿ ਦਿਨ੍ਨਮ੍ਪਿ ਵਟ੍ਟਤਿ. ਪਤ੍ਤਤ੍ਥਵਿਕਾਦੀਨਂ ਅਤ੍ਥਾਯ ਦਿਨ੍ਨਾਨਿ ਬਹੂਨਿਪਿ ਹੋਨ੍ਤਿ, ਚੀਵਰਤ੍ਥਾਯਪਿ ਪਹੋਨ੍ਤਿ, ਤਤੋ ਚੀਵਰਂ ਕਤ੍ਵਾ ਪਾਰੁਪਿਤੁਂ ਵਟ੍ਟਤਿ. ਸਚੇ ਪਨ ਸਙ੍ਘੋ ਭਾਜਿਤਾਤਿਰਿਤ੍ਤਾਨਿ ਵਤ੍ਥਾਨਿ ਛਿਨ੍ਦਿਤ੍ਵਾ ਉਪਾਹਨਤ੍ਥਵਿਕਾਦੀਨਂ ਅਤ੍ਥਾਯ ਭਾਜੇਤਿ, ਤਤੋ ਗਹੇਤੁਂ ਨ ਵਟ੍ਟਤਿ. ਸਾਮਿਕੇਹਿ ਵਿਚਾਰਿਤਮੇਵ ਹਿ ਵਟ੍ਟਤਿ, ਨ ਇਤਰਂ. ਪਂਸੁਕੂਲਿਕਂ ‘‘ਸਙ੍ਘਸ੍ਸ ਧਮ੍ਮਕਰਣਪਟਾਦੀਨਂ ਅਤ੍ਥਾਯ ਦੇਮਾ’’ਤਿ ਵੁਤ੍ਤੇਪਿ ਗਹੇਤੁਂ ਵਟ੍ਟਤਿ, ਪਰਿਕ੍ਖਾਰੋ ਨਾਮ ਪਂਸੁਕੂਲਿਕਾਨਮ੍ਪਿ ਇਚ੍ਛਿਤਬ੍ਬੋ. ਯਂ ਤਤ੍ਥ ਅਤਿਰੇਕਂ ਹੋਤਿ, ਤਂ ਚੀਵਰੇਪਿ ਉਪਨੇਤੁਂ ਵਟ੍ਟਤਿ. ਸੁਤ੍ਤਂ ਸਙ੍ਘਸ੍ਸ ਦੇਨ੍ਤਿ, ਪਂਸੁਕੂਲਿਕੇਹਿਪਿ ਗਹੇਤਬ੍ਬਂ. ਅਯਂ ਤਾਵ ਵਿਹਾਰਂ ਪਵਿਸਿਤ੍ਵਾ ‘‘ਇਮਾਨਿ ਚੀਵਰਾਨਿ ਸਙ੍ਘਸ੍ਸ ਦਮ੍ਮੀ’’ਤਿ ਦਿਨ੍ਨੇਸੁ ਵਿਨਿਚ੍ਛਯੋ. ਸਚੇ ਪਨ ਬਹਿਉਪਚਾਰਸੀਮਾਯ ਅਦ੍ਧਾਨਮਗ੍ਗਪ੍ਪਟਿਪਨ੍ਨੇ ਭਿਕ੍ਖੂ ਦਿਸ੍ਵਾ ‘‘ਸਙ੍ਘਸ੍ਸ ਦਮ੍ਮੀ’’ਤਿ ਸਙ੍ਘਤ੍ਥੇਰਸ੍ਸ ਵਾ ਸਙ੍ਘਨਵਕਸ੍ਸ ਵਾ ਆਰੋਚੇਤਿ, ਸਚੇਪਿ ਯੋਜਨਂ ਫਰਿਤ੍ਵਾ ਪਰਿਸਾ ਠਿਤਾ ਹੋਤਿ, ਏਕਾਬਦ੍ਧਾ ਚੇ, ਸਬ੍ਬੇਸਂ ਪਾਪੁਣਾਤਿ. ਯੇ ਪਨ ਦ੍ਵਾਦਸਹਿ ਹਤ੍ਥੇਹਿ ਪਰਿਸਂ ਅਸਮ੍ਪਤ੍ਤਾ, ਤੇਸਂ ਨ ਪਾਪੁਣਾਤਿ.

੨੦੩. ਉਭਤੋਸਙ੍ਘਸ੍ਸ ਦੇਤੀਤਿ ਏਤ੍ਥ ‘‘ਉਭਤੋਸਙ੍ਘਸ੍ਸ ਦਮ੍ਮੀ’’ਤਿ ਵੁਤ੍ਤੇਪਿ ‘‘ਦ੍ਵਿਧਾ ਸਙ੍ਘਸ੍ਸ ਦਮ੍ਮੀ’’ਤਿ, ‘‘ਦ੍ਵਿਨ੍ਨਂ ਸਙ੍ਘਾਨਂ ਦਮ੍ਮੀ’’ਤਿ, ‘‘ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨੀਸਙ੍ਘਸ੍ਸ ਚ ਦਮ੍ਮੀ’’ਤਿ ਵੁਤ੍ਤੇਪਿ ਉਭਤੋਸਙ੍ਘਸ੍ਸ ਦਿਨ੍ਨਮੇਵ ਹੋਤਿ. ਤਤ੍ਥ ਸਚੇ ਬਹੁਕਾਪਿ ਭਿਕ੍ਖੂ ਹੋਨ੍ਤਿ, ਏਕਾ ਭਿਕ੍ਖੁਨੀ ਹੋਤਿ, ਉਪਡ੍ਢਂ ਦਾਤਬ੍ਬਂ, ਦ੍ਵੇ ਭਾਗੇ ਸਮੇ ਕਤ੍ਵਾ ਏਕੋ ਭਾਗੋ ਦਾਤਬ੍ਬੋਤਿ ਅਤ੍ਥੋ. ਸਚੇ ਬਹੁਕਾਪਿ ਭਿਕ੍ਖੁਨਿਯੋ ਹੋਨ੍ਤਿ, ਏਕੋ ਭਿਕ੍ਖੁ ਹੋਤਿ, ਉਪਡ੍ਢਂ ਦਾਤਬ੍ਬਂ. ‘‘ਉਭਤੋਸਙ੍ਘਸ੍ਸ ਚ ਤੁਯ੍ਹਞ੍ਚ ਦਮ੍ਮੀ’’ਤਿ ਵੁਤ੍ਤੇ ਸਚੇ ਦਸ ਦਸ ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਹੋਨ੍ਤਿ, ਏਕਵੀਸਤਿ ਪਟਿਵੀਸੇ ਕਤ੍ਵਾ ਏਕੋ ਪੁਗ੍ਗਲਸ੍ਸ ਦਾਤਬ੍ਬੋ, ਦਸ ਭਿਕ੍ਖੁਸਙ੍ਘਸ੍ਸ, ਦਸ ਭਿਕ੍ਖੁਨੀਸਙ੍ਘਸ੍ਸ. ਯੇਨ ਪੁਗ੍ਗਲਿਕੋ ਲਦ੍ਧੋ, ਸੋ ਸਙ੍ਘਤੋਪਿ ਅਤ੍ਤਨੋ ਵਸ੍ਸਗ੍ਗੇਨ ਗਹੇਤੁਂ ਲਭਤਿ. ਕਸ੍ਮਾ? ਉਭਤੋਸਙ੍ਘਗ੍ਗਹਣੇਨ ਗਹਿਤਤ੍ਤਾ. ‘‘ਉਭਤੋਸਙ੍ਘਸ੍ਸ ਚ ਚੇਤਿਯਸ੍ਸ ਚ ਦਮ੍ਮੀ’’ਤਿ ਵੁਤ੍ਤੇਪਿ ਏਸੇਵ ਨਯੋ. ਇਧ ਪਨ ਚੇਤਿਯਸ੍ਸ ਸਙ੍ਘਤੋ ਪਾਪੁਣਨਕੋਟ੍ਠਾਸੋ ਨਾਮ ਨਤ੍ਥਿ, ਏਕਪੁਗ੍ਗਲਸ੍ਸ ਪਤ੍ਤਕੋਟ੍ਠਾਸਸਮੋਵ ਕੋਟ੍ਠਾਸੋ ਹੋਤਿ. ‘‘ਉਭਤੋਸਙ੍ਘਸ੍ਸ ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇ ਪਨ ਦ੍ਵਾਵੀਸਤਿ ਕੋਟ੍ਠਾਸੇ ਕਤ੍ਵਾ ਦਸ ਭਿਕ੍ਖੂਨਂ, ਦਸ ਭਿਕ੍ਖੁਨੀਨਂ, ਏਕੋ ਪੁਗ੍ਗਲਸ੍ਸ, ਏਕੋ ਚੇਤਿਯਸ੍ਸ ਦਾਤਬ੍ਬੋ. ਤਤ੍ਥ ਪੁਗ੍ਗਲੋ ਸਙ੍ਘਤੋਪਿ ਅਤ੍ਤਨੋ ਵਸ੍ਸਗ੍ਗੇਨ ਗਹੇਤੁਂ ਲਭਤਿ, ਚੇਤਿਯਸ੍ਸ ਏਕੋਯੇਵ.

‘‘ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨੀਨਞ੍ਚ ਦਮ੍ਮੀ’’ਤਿ ਵੁਤ੍ਤੇ ਪਨ ਨ ਮਜ੍ਝੇ ਭਿਨ੍ਦਿਤ੍ਵਾ ਦਾਤਬ੍ਬਂ, ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਣੇਤ੍ਵਾ ਦਾਤਬ੍ਬਂ. ‘‘ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚਾ’’ਤਿ ਵੁਤ੍ਤੇ ਪਨ ਪੁਗ੍ਗਲੋ ਵਿਸੁਂ ਨ ਲਭਤਿ, ਪਾਪੁਣਨਟ੍ਠਾਨਤੋ ਏਕਮੇਵ ਲਭਤਿ. ਕਸ੍ਮਾ? ਭਿਕ੍ਖੁਸਙ੍ਘਗ੍ਗਹਣੇਨ ਗਹਿਤਤ੍ਤਾ. ‘‘ਭਿਕ੍ਖੁਸਙ੍ਘਸ੍ਸ ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇਪਿ ਚੇਤਿਯਸ੍ਸ ਏਕਪੁਗ੍ਗਲਪਟਿਵੀਸੋ ਲਬ੍ਭਤਿ, ਪੁਗ੍ਗਲਸ੍ਸ ਵਿਸੁਂ ਨ ਲਬ੍ਭਤਿ, ਤਸ੍ਮਾ ਏਕਂ ਚੇਤਿਯਸ੍ਸ ਦਤ੍ਵਾ ਅਵਸੇਸਂ ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਣੇਤ੍ਵਾ ਭਾਜੇਤਬ੍ਬਂ.

‘‘ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਦਮ੍ਮੀ’’ਤਿ ਵੁਤ੍ਤੇਪਿ ਮਜ੍ਝੇ ਭਿਨ੍ਦਿਤ੍ਵਾ ਨ ਦਾਤਬ੍ਬਂ, ਪੁਗ੍ਗਲਗਣਨਾਯ ਏਵ ਵਿਭਜਿਤਬ੍ਬਂ. ‘‘ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚ, ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਚੇਤਿਯਸ੍ਸ ਚ, ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਏਵਂ ਵੁਤ੍ਤੇਪਿ ਚੇਤਿਯਸ੍ਸ ਏਕਪਟਿਵੀਸੋ ਲਬ੍ਭਤਿ, ਪੁਗ੍ਗਲਸ੍ਸ ਵਿਸੁਂ ਨਤ੍ਥਿ, ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਗਣੇਤ੍ਵਾ ਏਵ ਭਾਜੇਤਬ੍ਬਂ. ਯਥਾ ਚ ਭਿਕ੍ਖੁਸਙ੍ਘਂ ਆਦਿਂ ਕਤ੍ਵਾ ਨਯੋ ਨੀਤੋ, ਏਵਂ ਭਿਕ੍ਖੁਨੀਸਙ੍ਘਂ ਆਦਿਂ ਕਤ੍ਵਾਪਿ ਨੇਤਬ੍ਬੋ.

‘‘ਭਿਕ੍ਖੁਸਙ੍ਘਸ੍ਸ ਚ ਤੁਯ੍ਹਞ੍ਚਾ’’ਤਿ ਵੁਤ੍ਤੇ ਪੁਗ੍ਗਲਸ੍ਸ ਵਿਸੁਂ ਨ ਲਬ੍ਭਤਿ, ਵਸ੍ਸਗ੍ਗੇਨੇਵ ਗਹੇਤਬ੍ਬਂ. ‘‘ਭਿਕ੍ਖੁਸਙ੍ਘਸ੍ਸ ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇ ਪਨ ਚੇਤਿਯਸ੍ਸ ਵਿਸੁਂ ਪਟਿਵੀਸੋ ਲਬ੍ਭਤਿ. ‘‘ਭਿਕ੍ਖੁਸਙ੍ਘਸ੍ਸ ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇਪਿ ਚੇਤਿਯਸ੍ਸੇਵ ਵਿਸੁਂ ਲਬ੍ਭਤਿ, ਨ ਪੁਗ੍ਗਲਸ੍ਸ. ‘‘ਭਿਕ੍ਖੂਨਞ੍ਚ ਤੁਯ੍ਹਞ੍ਚਾ’’ਤਿ ਵੁਤ੍ਤੇਪਿ ਵਿਸੁਂ ਨ ਲਬ੍ਭਤਿ, ‘‘ਭਿਕ੍ਖੂਨਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇ ਪਨ ਚੇਤਿਯਸ੍ਸ ਲਬ੍ਭਤਿ. ‘‘ਭਿਕ੍ਖੂਨਞ੍ਚ ਤੁਯ੍ਹਞ੍ਚ ਚੇਤਿਯਸ੍ਸ ਚਾ’’ਤਿ ਵੁਤ੍ਤੇਪਿ ਚੇਤਿਯਸ੍ਸੇਵ ਵਿਸੁਂ ਲਬ੍ਭਤਿ, ਨ ਪੁਗ੍ਗਲਸ੍ਸ. ਭਿਕ੍ਖੁਨੀਸਙ੍ਘਂ ਆਦਿਂ ਕਤ੍ਵਾਪਿ ਏਵਮੇਵ ਯੋਜੇਤਬ੍ਬਂ.

ਪੁਬ੍ਬੇ ਬੁਦ੍ਧਪ੍ਪਮੁਖਸ੍ਸ ਉਭਤੋਸਙ੍ਘਸ੍ਸ ਦਾਨਂ ਦੇਨ੍ਤਿ, ਭਗਵਾ ਮਜ੍ਝੇ ਨਿਸੀਦਤਿ, ਦਕ੍ਖਿਣਤੋ ਭਿਕ੍ਖੂ, ਵਾਮਤੋ ਭਿਕ੍ਖੁਨਿਯੋ ਨਿਸੀਦਨ੍ਤਿ, ਭਗਵਾ ਉਭਿਨ੍ਨਂ ਸਙ੍ਘਤ੍ਥੇਰੋ, ਤਦਾ ਭਗਵਾ ਅਤ੍ਤਨਾ ਲਦ੍ਧਪਚ੍ਚਯੇ ਅਤ੍ਤਨਾਪਿ ਪਰਿਭੁਞ੍ਜਤਿ, ਭਿਕ੍ਖੂਨਮ੍ਪਿ ਦਾਪੇਤਿ. ਏਤਰਹਿ ਪਨ ਪਣ੍ਡਿਤਮਨੁਸ੍ਸਾ ਸਧਾਤੁਕਂ ਪਟਿਮਂ ਵਾ ਚੇਤਿਯਂ ਵਾ ਠਪੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਉਭਤੋਸਙ੍ਘਸ੍ਸ ਦਾਨਂ ਦੇਨ੍ਤਿ, ਪਟਿਮਾਯ ਵਾ ਚੇਤਿਯਸ੍ਸ ਵਾ ਪੁਰਤੋ ਆਧਾਰਕੇ ਪਤ੍ਤਂ ਠਪੇਤ੍ਵਾ ਦਕ੍ਖਿਣੋਦਕਂ ਦਤ੍ਵਾ ‘‘ਬੁਦ੍ਧਾਨਂ ਦੇਮਾ’’ਤਿ, ਤਤ੍ਥ ਪਠਮਂ ਖਾਦਨੀਯਭੋਜਨੀਯਂ ਦੇਨ੍ਤਿ, ਵਿਹਾਰਂ ਵਾ ਆਹਰਿਤ੍ਵਾ ‘‘ਇਦਂ ਚੇਤਿਯਸ੍ਸ ਦੇਮਾ’’ਤਿ ਪਿਣ੍ਡਪਾਤਞ੍ਚ ਮਾਲਾਗਨ੍ਧਾਦੀਨਿ ਚ ਦੇਨ੍ਤਿ, ਤਤ੍ਥ ਕਥਂ ਪਟਿਪਜ੍ਜਿਤਬ੍ਬਨ੍ਤਿ? ਮਾਲਾਗਨ੍ਧਾਦੀਨਿ ਤਾਵ ਚੇਤਿਯੇ ਆਰੋਪੇਤਬ੍ਬਾਨਿ, ਵਤ੍ਥੇਹਿ ਪਟਾਕਾ, ਤੇਲੇਨ ਪਦੀਪਾ ਕਾਤਬ੍ਬਾ. ਪਿਣ੍ਡਪਾਤਮਧੁਫਾਣਿਤਾਦੀਨਿ ਪਨ ਯੋ ਨਿਬਦ੍ਧਚੇਤਿਯਜਗ੍ਗਕੋ ਹੋਤਿ ਪਬ੍ਬਜਿਤੋ ਵਾ ਗਹਟ੍ਠੋ ਵਾ, ਤਸ੍ਸ ਦਾਤਬ੍ਬਾਨਿ. ਨਿਬਦ੍ਧਜਗ੍ਗਕੇ ਅਸਤਿ ਆਹਟਭਤ੍ਤਂ ਠਪੇਤ੍ਵਾ ਵਤ੍ਤਂ ਕਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ, ਉਪਕਟ੍ਠੇ ਕਾਲੇ ਭੁਞ੍ਜਿਤ੍ਵਾ ਪਚ੍ਛਾਪਿ ਵਤ੍ਤਂ ਕਾਤੁਂ ਵਟ੍ਟਤਿਯੇਵ. ਮਾਲਾਗਨ੍ਧਾਦੀਸੁ ਚ ਯਂ ਕਿਞ੍ਚਿ ‘‘ਇਦਂ ਹਰਿਤ੍ਵਾ ਚੇਤਿਯੇ ਪੂਜਂ ਕਰੋਥਾ’’ਤਿ ਵੁਤ੍ਤੇ ਦੂਰਮ੍ਪਿ ਹਰਿਤ੍ਵਾ ਪੂਜੇਤਬ੍ਬਂ, ‘‘ਭਿਕ੍ਖੁਸਙ੍ਘਸ੍ਸ ਹਰਾ’’ਤਿ ਵੁਤ੍ਤੇਪਿ ਹਰਿਤਬ੍ਬਂ. ਸਚੇ ਪਨ ‘‘ਅਹਂ ਪਿਣ੍ਡਾਯ ਚਰਾਮਿ, ਆਸਨਸਾਲਾਯ ਭਿਕ੍ਖੂ ਅਤ੍ਥਿ, ਤੇ ਹਰਿਸ੍ਸਨ੍ਤੀ’’ਤਿ ਵੁਤ੍ਤੇ ‘‘ਭਨ੍ਤੇ, ਤੁਯ੍ਹਮੇਵ ਦਮ੍ਮੀ’’ਤਿ ਵਦਤਿ, ਭੁਞ੍ਜਿਤੁਂ ਵਟ੍ਟਤਿ. ਅਥ ਪਨ ‘‘ਭਿਕ੍ਖੁਸਙ੍ਘਸ੍ਸ ਦਸ੍ਸਾਮੀ’’ਤਿ ਹਰਨ੍ਤਸ੍ਸ ਗਚ੍ਛਤੋ ਅਨ੍ਤਰਾਵ ਕਾਲੋ ਉਪਕਟ੍ਠੋ ਹੋਤਿ, ਅਤ੍ਤਨੋ ਪਾਪੇਤ੍ਵਾ ਭੁਞ੍ਜਿਤੁਂ ਵਟ੍ਟਤਿ.

੨੦੪. ਵਸ੍ਸਂਵੁਟ੍ਠਸਙ੍ਘਸ੍ਸ ਦੇਤੀਤਿ ਏਤ੍ਥ ਪਨ ਸਚੇ ਵਿਹਾਰਂ ਪਵਿਸਿਤ੍ਵਾ ‘‘ਇਮਾਨਿ ਚੀਵਰਾਨਿ ਵਸ੍ਸਂਵੁਟ੍ਠਸਙ੍ਘਸ੍ਸ ਦਮ੍ਮੀ’’ਤਿ ਦੇਤਿ, ਯਤ੍ਤਕਾ ਭਿਕ੍ਖੂ ਤਸ੍ਮਿਂ ਆਵਾਸੇ ਵਸ੍ਸਚ੍ਛੇਦਂ ਅਕਤ੍ਵਾ ਪੁਰਿਮਵਸ੍ਸਂਵੁਟ੍ਠਾ, ਤੇਹਿ ਭਾਜੇਤਬ੍ਬਂ, ਅਞ੍ਞੇਸਂ ਨ ਪਾਪੁਣਾਤਿ. ਦਿਸਾਪਕ੍ਕਨ੍ਤਸ੍ਸਪਿ ਸਤਿ ਗਾਹਕੇ ਯਾਵ ਕਥਿਨਸ੍ਸੁਬ੍ਭਾਰਾ ਦਾਤਬ੍ਬਂ. ‘‘ਅਨਤ੍ਥਤੇ ਪਨ ਕਥਿਨੇ ਅਨ੍ਤੋਹੇਮਨ੍ਤੇ ਏਵਞ੍ਚ ਵਤ੍ਵਾ ਦਿਨ੍ਨਂ ਪਚ੍ਛਿਮਵਸ੍ਸਂਵੁਟ੍ਠਾਨਮ੍ਪਿ ਪਾਪੁਣਾਤੀ’’ਤਿ ਲਕ੍ਖਣਞ੍ਞੂ ਵਦਨ੍ਤਿ. ਅਟ੍ਠਕਥਾਸੁ ਪਨੇਤਂ ਨ ਵਿਚਾਰਿਤਂ. ਸਚੇ ਪਨ ਬਹਿਉਪਚਾਰਸੀਮਾਯਂ ਠਿਤੋ ‘‘ਵਸ੍ਸਂਵੁਟ੍ਠਸਙ੍ਘਸ੍ਸ ਦਮ੍ਮੀ’’ਤਿ ਵਦਤਿ, ਸਮ੍ਪਤ੍ਤਾਨਂ ਸਬ੍ਬੇਸਂ ਪਾਪੁਣਾਤਿ. ਅਥ ‘‘ਅਸੁਕਵਿਹਾਰੇ ਵਸ੍ਸਂਵੁਟ੍ਠਸਙ੍ਘਸ੍ਸਾ’’ਤਿ ਵਦਤਿ, ਤਤ੍ਰ ਵਸ੍ਸਂਵੁਟ੍ਠਾਨਮੇਵ ਯਾਵ ਕਥਿਨਸ੍ਸੁਬ੍ਭਾਰਾ ਪਾਪੁਣਾਤਿ. ਸਚੇ ਪਨ ਗਿਮ੍ਹਾਨਂ ਪਠਮਦਿਵਸਤੋ ਪਟ੍ਠਾਯ ਏਵਂ ਵਦਤਿ, ਤਤ੍ਰ ਸਮ੍ਮੁਖੀਭੂਤਾਨਂ ਸਬ੍ਬੇਸਂ ਪਾਪੁਣਾਤਿ. ਕਸ੍ਮਾ? ਪਿਟ੍ਠਿਸਮਯੇ ਉਪ੍ਪਨ੍ਨਤ੍ਤਾ. ਅਨ੍ਤੋਵਸ੍ਸੇਯੇਵ ‘‘ਵਸ੍ਸਂ ਵਸਨ੍ਤਾਨਂ ਦਮ੍ਮੀ’’ਤਿ ਵੁਤ੍ਤੇ ਛਿਨ੍ਨਵਸ੍ਸਾ ਨ ਲਭਨ੍ਤਿ, ਵਸ੍ਸਂ ਵਸਨ੍ਤਾਵ ਲਭਨ੍ਤਿ. ਚੀਵਰਮਾਸੇ ਪਨ ‘‘ਵਸ੍ਸਂ ਵਸਨ੍ਤਾਨਂ ਦਮ੍ਮੀ’’ਤਿ ਵੁਤ੍ਤੇ ਪਚ੍ਛਿਮਿਕਾਯ ਵਸ੍ਸੂਪਗਤਾਨਂਯੇਵ ਪਾਪੁਣਾਤਿ, ਪੁਰਿਮਿਕਾਯ ਵਸ੍ਸੂਪਗਤਾਨਞ੍ਚ ਛਿਨ੍ਨਵਸ੍ਸਾਨਞ੍ਚ ਨ ਪਾਪੁਣਾਤਿ.

ਚੀਵਰਮਾਸਤੋ ਪਟ੍ਠਾਯ ਯਾਵ ਹੇਮਨ੍ਤਸ੍ਸ ਪਚ੍ਛਿਮੋ ਦਿਵਸੋ, ਤਾਵ ‘‘ਵਸ੍ਸਾਵਾਸਿਕਂ ਦੇਮਾ’’ਤਿ ਵੁਤ੍ਤੇ ਕਥਿਨਂ ਅਤ੍ਥਤਂ ਵਾ ਹੋਤੁ ਅਨਤ੍ਥਤਂ ਵਾ, ਅਤੀਤਵਸ੍ਸਂਵੁਟ੍ਠਾਨਮੇਵ ਪਾਪੁਣਾਤਿ. ਗਿਮ੍ਹਾਨਂ ਪਠਮਦਿਵਸਤੋ ਪਟ੍ਠਾਯ ਵੁਤ੍ਤੇ ਪਨ ਮਾਤਿਕਾ ਆਰੋਪੇਤਬ੍ਬਾ ‘‘ਅਤੀਤਪਸ੍ਸਾਵਾਸਸ੍ਸ ਪਞ੍ਚ ਮਾਸਾ ਅਤਿਕ੍ਕਨ੍ਤਾ, ਅਨਾਗਤੋ ਚਾਤੁਮਾਸਚ੍ਚਯੇਨ ਭਵਿਸ੍ਸਤਿ, ਕਤਰਵਸ੍ਸਾਵਾਸਸ੍ਸ ਦੇਸੀ’’ਤਿ. ਸਚੇ ‘‘ਅਤੀਤਵਸ੍ਸਂਵੁਟ੍ਠਾਨਂ ਦਮ੍ਮੀ’’ਤਿ ਵਦਤਿ, ਤਂ ਅਨ੍ਤੋਵਸ੍ਸਂਵੁਟ੍ਠਾਨਮੇਵ ਪਾਪੁਣਾਤਿ, ਦਿਸਾਪਕ੍ਕਨ੍ਤਾਨਮ੍ਪਿ ਸਭਾਗਾ ਗਣ੍ਹਿਤੁਂ ਲਭਨ੍ਤਿ. ਸਚੇ ‘‘ਅਨਾਗਤੇ ਵਸ੍ਸਾਵਾਸਿਕਂ ਦਮ੍ਮੀ’’ਤਿ ਵਦਤਿ, ਤਂ ਠਪੇਤ੍ਵਾ ਵਸ੍ਸੂਪਨਾਯਿਕਦਿਵਸੇ ਗਹੇਤਬ੍ਬਂ. ਅਥ ‘‘ਅਗੁਤ੍ਤੋ ਵਿਹਾਰੋ, ਚੋਰਭਯਂ ਅਤ੍ਥਿ, ਨ ਸਕ੍ਕਾ ਠਪੇਤੁਂ ਗਣ੍ਹਿਤ੍ਵਾ ਵਾ ਆਹਿਣ੍ਡਿਤੁ’’ਨ੍ਤਿ ਵੁਤ੍ਤੇ ‘‘ਸਮ੍ਪਤ੍ਤਾਨਂ ਦਮ੍ਮੀ’’ਤਿ ਵਦਤਿ, ਭਾਜੇਤ੍ਵਾ ਗਹੇਤਬ੍ਬਂ. ਸਚੇ ਵਦਤਿ ‘‘ਇਤੋ ਮੇ, ਭਨ੍ਤੇ, ਤਤਿਯੇ ਵਸ੍ਸੇ ਵਸ੍ਸਾਵਾਸਿਕਂ ਨ ਦਿਨ੍ਨਂ, ਤਂ ਦਮ੍ਮੀ’’ਤਿ, ਤਸ੍ਮਿਂ ਅਨ੍ਤੋਵਸ੍ਸੇ ਵੁਟ੍ਠਭਿਕ੍ਖੂਨਂ ਪਾਪੁਣਾਤਿ. ਸਚੇ ਤੇ ਦਿਸਾ ਪਕ੍ਕਨ੍ਤਾ, ਅਞ੍ਞੋ ਵਿਸ੍ਸਾਸਿਕੋ ਗਣ੍ਹਾਤਿ, ਦਾਤਬ੍ਬਂ. ਅਥੇਕੋਯੇਵ ਅਵਸਿਟ੍ਠੋ, ਸੇਸਾ ਕਾਲਕਤਾ, ਸਬ੍ਬਂ ਏਕਸ੍ਸੇਵ ਪਾਪੁਣਾਤਿ. ਸਚੇ ਏਕੋਪਿ ਨਤ੍ਥਿ, ਸਙ੍ਘਿਕਂ ਹੋਤਿ, ਸਮ੍ਮੁਖੀਭੂਤੇਹਿ ਭਾਜੇਤਬ੍ਬਂ.

੨੦੫. ਆਦਿਸ੍ਸ ਦੇਤੀਤਿ ਏਤ੍ਥ ਪਨ ਯਾਗੁਯਾ ਵਾ ਭਤ੍ਤੇ ਵਾ ਖਾਦਨੀਯੇ ਵਾ ਚੀਵਰੇ ਵਾ ਸੇਨਾਸਨੇ ਵਾ ਭੇਸਜ੍ਜੇ ਵਾ ਆਦਿਸਿਤ੍ਵਾ ਪਰਿਚ੍ਛਿਨ੍ਦਿਤ੍ਵਾ ਦੇਨ੍ਤੋ ਆਦਿਸ੍ਸ ਦੇਤਿ ਨਾਮ. ਤਤ੍ਰਾਯਂ ਵਿਨਿਚ੍ਛਯੋ – ਭਿਕ੍ਖੂ ਅਜ੍ਜਤਨਾਯ ਵਾ ਸ੍ਵਾਤਨਾਯ ਵਾ ਯਾਗੁਯਾ ਨਿਮਨ੍ਤੇਤ੍ਵਾ ਤੇਸਂ ਘਰਂ ਪਵਿਟ੍ਠਾਨਂ ਯਾਗੁਂ ਦੇਤਿ, ਯਾਗੁਂ ਦਤ੍ਵਾ ਪੀਤਾਯ ਯਾਗੁਯਾ ‘‘ਇਮਾਨਿ ਚੀਵਰਾਨਿ ਯੇਹਿ ਮਯ੍ਹਂ ਯਾਗੁ ਪੀਤਾ, ਤੇਸਂ ਦਮ੍ਮੀ’’ਤਿ ਦੇਤਿ, ਯੇਹਿ ਨਿਮਨ੍ਤਿਤੇਹਿ ਯਾਗੁ ਪੀਤਾ, ਤੇਸਂਯੇਵ ਪਾਪੁਣਾਤਿ. ਯੇਹਿ ਪਨ ਭਿਕ੍ਖਾਚਾਰਵਤ੍ਤੇਨ ਘਰਦ੍ਵਾਰੇਨ ਗਚ੍ਛਨ੍ਤੇਹਿ ਵਾ ਘਰਂ ਪਵਿਟ੍ਠੇਹਿ ਵਾ ਯਾਗੁ ਲਦ੍ਧਾ, ਯੇਸਂ ਵਾ ਆਸਨਸਾਲਤੋ ਪਤ੍ਤਂ ਆਹਰਿਤ੍ਵਾ ਮਨੁਸ੍ਸੇਹਿ ਨੀਤਾ, ਯੇਸਂ ਵਾ ਥੇਰੇਹਿ ਪੇਸਿਤਾ, ਤੇਸਂ ਨ ਪਾਪੁਣਾਤਿ. ਸਚੇ ਪਨ ਨਿਮਨ੍ਤਿਹਭਿਕ੍ਖੂਹਿ ਸਦ੍ਧਿਂ ਅਞ੍ਞੇਪਿ ਬਹੂ ਆਗਨ੍ਤ੍ਵਾ ਅਨ੍ਤੋਗੇਹਞ੍ਚ ਬਹਿਗੇਹਞ੍ਚ ਪੂਰੇਤ੍ਵਾ ਨਿਸਿਨ੍ਨਾ, ਦਾਯਕੋ ਚ ਏਵਂ ਵਦਤਿ ‘‘ਨਿਮਨ੍ਤਿਤਾ ਵਾ ਹੋਨ੍ਤੁ ਅਨਿਮਨ੍ਤਿਤਾ ਵਾ, ਯੇਸਂ ਮਯਾ ਯਾਗੁ ਦਿਨ੍ਨਾ, ਸਬ੍ਬੇਸਂ ਇਮਾਨਿ ਵਤ੍ਥਾਨਿ ਹੋਨ੍ਤੂ’’ਤਿ, ਸਬ੍ਬੇਸਂ ਪਾਪੁਣਾਤਿ. ਯੇਹਿ ਪਨ ਥੇਰਾਨਂ ਹਤ੍ਥਤੋ ਯਾਗੁ ਲਦ੍ਧਾ, ਤੇਸਂ ਨ ਪਾਪੁਣਾਤਿ. ਅਥ ਸੋ ‘‘ਯੇਹਿ ਮਯ੍ਹਂ ਯਾਗੁ ਪੀਤਾ, ਸਬ੍ਬੇਸਂ ਹੋਤੂ’’ਤਿ ਵਦਤਿ, ਸਬ੍ਬੇਸਂ ਪਾਪੁਣਾਤਿ. ਭਤ੍ਤਖਾਦਨੀਯੇਸੁਪਿ ਏਸੇਵ ਨਯੋ. ਚੀਵਰੇ ਪਨ ਪੁਬ੍ਬੇਪਿ ਤੇਨ ਵਸ੍ਸਂ ਵਾਸੇਤ੍ਵਾ ਭਿਕ੍ਖੂਨਂ ਚੀਵਰਂ ਦਿਨ੍ਨਪੁਬ੍ਬਂ ਹੋਤਿ, ਸੋ ਚੇ ਭਿਕ੍ਖੂ ਭੋਜੇਤ੍ਵਾ ਵਦਤਿ ‘‘ਯੇਸਂ ਮਯਾ ਪੁਬ੍ਬੇ ਚੀਵਰਂ ਦਿਨ੍ਨਂ, ਤੇਸਂਯੇਵ ਇਮਂ ਚੀਵਰਂ ਵਾ ਸੁਤ੍ਤਂ ਵਾ ਸਪ੍ਪਿਮਧੁਫਾਣਿਤਾਦੀਨਿ ਵਾ ਹੋਨ੍ਤੂ’’ਤਿ, ਸਬ੍ਬਂ ਤੇਸਂਯੇਵ ਪਾਪੁਣਾਤਿ. ਸੇਨਾਸਨੇਪਿ ‘‘ਯੋ ਮਯਾ ਕਾਰਿਤੇ ਵਿਹਾਰੇ ਵਾ ਪਰਿਵੇਣੇ ਵਾ ਵਸਤਿ, ਤਸ੍ਸਿਦਂ ਹੋਤੂ’’ਤਿ ਵੁਤ੍ਤੇ ਤਸ੍ਸੇਵ ਹੋਤਿ. ਭੇਸਜ੍ਜੇਪਿ ‘‘ਮਯਂ ਕਾਲੇਨ ਕਾਲਂ ਥੇਰਾਨਂ ਸਪ੍ਪਿਆਦੀਨਿ ਭੇਸਜ੍ਜਾਨਿ ਦੇਮ, ਯੇਹਿ ਤਾਨਿ ਲਦ੍ਧਾਨਿ, ਤੇਸਂਯੇਵਿਦਂ ਹੋਤੂ’’ਤਿ ਵੁਤ੍ਤੇ ਤੇਸਂਯੇਵ ਹੋਤਿ.

੨੦੬. ਪੁਗ੍ਗਲਸ੍ਸ ਦੇਤੀਤਿ ਏਤ੍ਥ ਪਨ ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ ਏਵਂ ਪਰਮ੍ਮੁਖਾ ਵਾ, ਪਾਦਮੂਲੇ ਠਪੇਤ੍ਵਾ ‘‘ਇਦਂ, ਭਨ੍ਤੇ, ਤੁਮ੍ਹਾਕਂ ਦਮ੍ਮੀ’’ਤਿ ਏਵਂ ਸਮ੍ਮੁਖਾ ਵਾ ਦੇਤਿ, ਤਂ ਤਸ੍ਸੇਵ ਹੋਤਿ. ਸਚੇ ਪਨ ‘‘ਇਦਂ ਤੁਮ੍ਹਾਕਞ੍ਚ ਤੁਮ੍ਹਾਕਂ ਅਨ੍ਤੇਵਾਸਿਕਾਨਞ੍ਚ ਦਮ੍ਮੀ’’ਤਿ ਏਵਂ ਵਦਤਿ, ਥੇਰਸ੍ਸ ਚ ਅਨ੍ਤੇਵਾਸਿਕਾਨਞ੍ਚ ਪਾਪੁਣਾਤਿ. ਉਦ੍ਦੇਸਂ ਗਹੇਤੁਂ ਆਗਤੋ ਗਹੇਤ੍ਵਾ ਗਚ੍ਛਨ੍ਤੋ ਚ ਅਤ੍ਥਿ, ਤਸ੍ਸਪਿ ਪਾਪੁਣਾਤਿ. ‘‘ਤੁਮ੍ਹੇਹਿ ਸਦ੍ਧਿਂ ਨਿਬਦ੍ਧਚਾਰਿਕਭਿਕ੍ਖੂਨਂ ਦਮ੍ਮੀ’’ਤਿ ਵੁਤ੍ਤੇ ਉਦ੍ਦੇਸਨ੍ਤੇਵਾਸਿਕਾਨਂ ਵਤ੍ਤਂ ਕਤ੍ਵਾ ਉਦ੍ਦੇਸਪਰਿਪੁਚ੍ਛਾਦੀਨਿ ਗਹੇਤ੍ਵਾ ਵਿਚਰਨ੍ਤਾਨਂ ਸਬ੍ਬੇਸਂ ਪਾਪੁਣਾਤਿ. ਅਯਂ ‘‘ਪੁਗ੍ਗਲਸ੍ਸ ਦੇਤੀ’’ਤਿ ਇਮਸ੍ਮਿਂ ਪਦੇ ਵਿਨਿਚ੍ਛਯੋ.

ਸਚੇ ਕੋਚਿ ਭਿਕ੍ਖੁ ਏਕੋਵ ਵਸ੍ਸਂ ਵਸਤਿ, ਤਤ੍ਥ ਮਨੁਸ੍ਸਾ ‘‘ਸਙ੍ਘਸ੍ਸ ਦੇਮਾ’’ਤਿ ਚੀਵਰਾਨਿ ਦੇਨ੍ਤਿ, ਤਤ੍ਥ ਕਿਂ ਕਾਤਬ੍ਬਨ੍ਤਿ? ‘‘ਅਨੁਜਾਨਾਮਿ, ਭਿਕ੍ਖਵੇ, ਤਸ੍ਸੇਵ ਤਾਨਿ ਚੀਵਰਾਨਿ ਯਾਵ ਕਥਿਨਸ੍ਸ ਉਬ੍ਭਾਰਾ’’ਤਿ (ਮਹਾਵ. ੩੬੩) ਵਚਨਤੋ ਸਚੇ (ਮਹਾਵ. ਅਟ੍ਠ. ੩੬੩) ਗਣਪੂਰਕੇ ਭਿਕ੍ਖੂ ਲਭਿਤ੍ਵਾ ਕਥਿਨਂ ਅਤ੍ਥਤਂ ਹੋਤਿ, ਪਞ੍ਚ ਮਾਸੇ, ਨੋ ਚੇ ਅਤ੍ਥਤਂ ਹੋਤਿ, ਏਕਂ ਚੀਵਰਮਾਸਂ ਅਞ੍ਞਤ੍ਥ ਗਹੇਤ੍ਵਾ ਨੀਤਾਨਿਪਿ ਤਸ੍ਸੇਵ ਤਾਨਿ ਚੀਵਰਾਨਿ, ਨ ਤੇਸਂ ਅਞ੍ਞੋ ਕੋਚਿ ਇਸ੍ਸਰੋ. ਯਂ ਯਞ੍ਹਿ ‘‘ਸਙ੍ਘਸ੍ਸ ਦੇਮਾ’’ਤਿ ਵਾ ‘‘ਸਙ੍ਘਂ ਉਦ੍ਦਿਸ੍ਸ ਦੇਮਾ’’ਤਿ ਵਾ ‘‘ਵਸ੍ਸਂਵੁਟ੍ਠਸਙ੍ਘਸ੍ਸ ਦੇਮਾ’’ਤਿ ਵਾ ‘‘ਵਸ੍ਸਾਵਾਸਿਕਂ ਦੇਮਾ’’ਤਿ ਵਾ ਦੇਨ੍ਤਿ, ਸਚੇਪਿ ਮਤਕਚੀਵਰਂ ਅਵਿਭਜਿਤ੍ਵਾ ਤਂ ਵਿਹਾਰਂ ਪਵਿਸਤਿ, ਤਂ ਸਬ੍ਬਂ ਤਸ੍ਸੇਵ ਭਿਕ੍ਖੁਨੋ ਹੋਤਿ. ਯਮ੍ਪਿ ਸੋ ਵਸ੍ਸਾਵਾਸਤ੍ਥਾਯ ਵਡ੍ਢਿਂ ਪਯੋਜੇਤ੍ਵਾ ਠਪਿਤਉਪਨਿਕ੍ਖੇਪਤੋ ਵਾ ਤਤ੍ਰੁਪ੍ਪਾਦਤੋ ਵਾ ਵਸ੍ਸਾਵਾਸਿਕਂ ਗਣ੍ਹਾਤਿ, ਸਬ੍ਬਂ ਸੁਗ੍ਗਹਿਤਮੇਵ ਹੋਤਿ. ਇਦਞ੍ਹੇਤ੍ਥ ਲਕ੍ਖਣਂ – ਯੇਨ ਤੇਨਾਕਾਰੇਨ ਸਙ੍ਘਸ੍ਸ ਉਪ੍ਪਨ੍ਨਵਤ੍ਥਂ ਅਤ੍ਥਤਕਥਿਨਸ੍ਸ ਪਞ੍ਚ ਮਾਸੇ, ਅਨਤ੍ਥਤਕਥਿਨਸ੍ਸ ਏਕਂ ਚੀਵਰਮਾਸਂ ਪਾਪੁਣਾਤਿ. ਸਚੇ ਪਨ ਕੋਚਿ ਭਿਕ੍ਖੁ ਵਸ੍ਸਾਨਤੋ ਅਞ੍ਞਸ੍ਮਿਂ ਉਤੁਕਾਲੇ ਏਕਕੋ ਵਸਤਿ, ਤਤ੍ਥ ਮਨੁਸ੍ਸਾ ‘‘ਸਙ੍ਘਸ੍ਸ ਦੇਮਾ’’ਤਿ ਚੀਵਰਾਨਿ ਦੇਨ੍ਤਿ, ਤੇਨ ਭਿਕ੍ਖੁਨਾ ਅਧਿਟ੍ਠਾਤਬ੍ਬਂ ‘‘ਮਯ੍ਹਿਮਾਨਿ ਚੀਵਰਾਨੀ’’ਤਿ. ਅਧਿਟ੍ਠਹਨ੍ਤੇਨ ਪਨ ਵਤ੍ਤਂ ਜਾਨਿਤਬ੍ਬਂ. ਤੇਨ ਹਿ ਭਿਕ੍ਖੁਨਾ ਘਣ੍ਟਿਂ ਵਾ ਪਹਰਿਤ੍ਵਾ ਕਾਲਂ ਵਾ ਘੋਸੇਤ੍ਵਾ ਥੋਕਂ ਆਗਮੇਤ੍ਵਾ ਸਚੇ ਘਣ੍ਟਿਸਞ੍ਞਾਯ ਵਾ ਕਾਲਸਞ੍ਞਾਯ ਵਾ ਭਿਕ੍ਖੂ ਆਗਚ੍ਛਨ੍ਤਿ, ਤੇਹਿ ਸਦ੍ਧਿਂ ਭਾਜੇਤਬ੍ਬਾਨਿ. ਤੇਹਿ ਚੇ ਭਿਕ੍ਖੂਹਿ ਤਸ੍ਮਿਂ ਚੀਵਰੇ ਭਾਜਿਯਮਾਨੇ ਅਪਾਤਿਤੇ ਕੁਸੇ ਅਞ੍ਞੋ ਭਿਕ੍ਖੁ ਆਗਚ੍ਛਤਿ, ਸਮਕੋ ਦਾਤਬ੍ਬੋ ਭਾਗੋ, ਪਾਤਿਤੇ ਕੁਸੇ ਅਞ੍ਞੋ ਭਿਕ੍ਖੁ ਆਗਚ੍ਛਤਿ, ਨ ਅਕਾਮਾ ਦਾਤਬ੍ਬੋ ਭਾਗੋ. ਏਕਕੋਟ੍ਠਾਸੇਪਿ ਹਿ ਕੁਸਦਣ੍ਡਕੇ ਪਾਤਿਤਮਤ੍ਤੇ ਸਚੇਪਿ ਭਿਕ੍ਖੁਸਹਸ੍ਸਂ ਹੋਤਿ, ਗਹਿਤਮੇਵ ਨਾਮ ਚੀਵਰਂ, ਤਸ੍ਮਾ ਨ ਅਕਾਮਾ ਭਾਗੋ ਦਾਤਬ੍ਬੋ. ਸਚੇ ਪਨ ਅਤ੍ਤਨੋ ਰੁਚਿਯਾ ਦਾਤੁਕਾਮਾ ਹੋਨ੍ਤਿ, ਦੇਨ੍ਤੁ. ਅਨੁਭਾਗੇਪਿ ਏਸੇਵ ਨਯੋ.

ਅਥ ਘਣ੍ਟਿਸਞ੍ਞਾਯ ਵਾ ਕਾਲਸਞ੍ਞਾਯ ਵਾ ਅਞ੍ਞੇ ਭਿਕ੍ਖੂ ਨ ਆਗਚ੍ਛਨ੍ਤਿ, ‘‘ਮਯ੍ਹਿਮਾਨਿ ਚੀਵਰਾਨਿ ਪਾਪੁਣਨ੍ਤੀ’’ਤਿ ਅਧਿਟ੍ਠਾਤਬ੍ਬਾਨਿ. ਏਵਂ ਅਧਿਟ੍ਠਿਤੇ ਸਬ੍ਬਾਨਿ ਤਸ੍ਸੇਵ ਹੋਨ੍ਤਿ, ਠਿਤਿਕਾ ਪਨ ਨ ਤਿਟ੍ਠਤਿ. ਸਚੇ ਏਕੇਕਂ ਉਦ੍ਧਰਿਤ੍ਵਾ ‘‘ਅਯਂ ਪਠਮਭਾਗੋ ਮਯ੍ਹਂ ਪਾਪੁਣਾਤਿ, ਅਯਂ ਦੁਤਿਯਭਾਗੋ’’ਤਿ ਏਵਂ ਗਣ੍ਹਾਤਿ, ਗਹਿਤਾਨਿ ਚ ਸੁਗ੍ਗਹਿਤਾਨਿ ਹੋਨ੍ਤਿ, ਠਿਤਿਕਾ ਚ ਤਿਟ੍ਠਤਿ, ਏਵਂ ਪਾਪੇਤ੍ਵਾ ਗਣ੍ਹਨ੍ਤੇਨਪਿ ਅਧਿਟ੍ਠਿਤਮੇਵ ਹੋਤਿ. ਸਚੇ ਪਨ ਘਣ੍ਟਿਂ ਪਹਰਿਤ੍ਵਾ ਵਾ ਅਪ੍ਪਹਰਿਤ੍ਵਾ ਵਾ ਕਾਲਮ੍ਪਿ ਘੋਸੇਤ੍ਵਾ ਵਾ ਅਘੋਸੇਤ੍ਵਾ ਵਾ ‘‘ਅਹਮੇਵੇਤ੍ਥ, ਮਯ੍ਹਮੇਵ ਇਮਾਨਿ ਚੀਵਰਾਨੀ’’ਤਿ ਗਣ੍ਹਾਤਿ, ਦੁਗ੍ਗਹਿਤਾਨਿ ਹੋਨ੍ਤਿ. ਅਥ ‘‘ਅਞ੍ਞੋ ਕੋਚਿ ਇਧ ਨਤ੍ਥਿ, ਮਯ੍ਹਂ ਏਤਾਨਿ ਪਾਪੁਣਨ੍ਤੀ’’ਤਿ ਗਣ੍ਹਾਤਿ, ਸੁਗ੍ਗਹਿਤਾਨਿ. ਅਥ ਅਨਧਿਟ੍ਠਹਿਤ੍ਵਾਵ ਤਾਨਿ ਚੀਵਰਾਨਿ ਗਹੇਤ੍ਵਾ ਅਞ੍ਞਂ ਵਿਹਾਰਂ ਉਦ੍ਦਿਸ੍ਸ ਗਚ੍ਛਤਿ ‘‘ਤਤ੍ਥ ਭਿਕ੍ਖੂਹਿ ਸਦ੍ਧਿਂ ਭਾਜੇਸ੍ਸਾਮੀ’’ਤਿ, ਤਾਨਿ ਚੀਵਰਾਨਿ ਗਤਗਤਟ੍ਠਾਨੇ ਸਙ੍ਘਿਕਾਨੇਵ ਹੋਨ੍ਤਿ. ਭਿਕ੍ਖੂਹਿ ਦਿਟ੍ਠਮਤ੍ਤਮੇਵੇਤ੍ਥ ਪਮਾਣਂ. ਤਸ੍ਮਾ ਸਚੇ ਕੇਚਿ ਪਟਿਪਥਂ ਆਗਚ੍ਛਨ੍ਤਾ ‘‘ਕੁਹਿਂ, ਆਵੁਸੋ, ਗਚ੍ਛਸੀ’’ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ‘‘ਕਿਂ, ਆਵੁਸੋ, ਮਯਂ ਸਙ੍ਘੋ ਨ ਹੋਮਾ’’ਤਿ ਤਤ੍ਥੇਵ ਭਾਜੇਤ੍ਵਾ ਗਣ੍ਹਨ੍ਤਿ, ਸੁਗ੍ਗਹਿਤਾਨਿ. ਸਚੇਪਿ ਏਸ ਮਗ੍ਗਾ ਓਕ੍ਕਮਿਤ੍ਵਾ ਕਞ੍ਚਿ ਵਿਹਾਰਂ ਵਾ ਆਸਨਸਾਲਂ ਵਾ ਪਿਣ੍ਡਾਯ ਚਰਨ੍ਤੋ ਏਕਗੇਹਮੇਵ ਵਾ ਪਵਿਸਤਿ, ਤਤ੍ਰ ਚ ਨਂ ਭਿਕ੍ਖੂ ਦਿਸ੍ਵਾ ਤਮਤ੍ਥਂ ਪੁਚ੍ਛਿਤ੍ਵਾ ਭਾਜੇਤ੍ਵਾ ਗਣ੍ਹਨ੍ਤਿ, ਸੁਗ੍ਗਹਿਤਾਨੇਵ.

‘‘ਨ, ਭਿਕ੍ਖਵੇ, ਅਞ੍ਞਤ੍ਰ ਵਸ੍ਸਂਵੁਟ੍ਠੇਨ ਅਞ੍ਞਤ੍ਰ ਚੀਵਰਭਾਗੋ ਸਾਦਿਤਬ੍ਬੋ, ਯੋ ਸਾਦਿਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੩੬੪) ਵਚਨਤੋ ਅਞ੍ਞਤ੍ਰ ਵਸ੍ਸਂਵੁਟ੍ਠੋ ਅਞ੍ਞਤ੍ਰ ਭਾਗਂ ਗਣ੍ਹਾਤਿ, ਦੁਕ੍ਕਟਂ. ਏਤ੍ਥ ਪਨ ਕਿਞ੍ਚਾਪਿ ਲਹੁਕਾ ਆਪਤ੍ਤਿ, ਅਥ ਖੋ ਗਹਿਤਾਨਿ ਚੀਵਰਾਨਿ ਗਹਿਤਟ੍ਠਾਨੇ ਦਾਤਬ੍ਬਾਨਿ. ਸਚੇਪਿ ਨਟ੍ਠਾਨਿ ਵਾ ਜਿਣ੍ਣਾਨਿ ਵਾ ਹੋਨ੍ਤਿ, ਤਸ੍ਸੇਵ ਗੀਵਾ. ‘‘ਦੇਹੀ’’ਤਿ ਵੁਤ੍ਤੇ ਅਦੇਨ੍ਤੋ ਧੁਰਨਿਕ੍ਖੇਪੇ ਭਣ੍ਡਗ੍ਘੇਨ ਕਾਰੇਤਬ੍ਬੋ.

ਏਕੋ ਭਿਕ੍ਖੁ ਦ੍ਵੀਸੁ ਆਵਾਸੇਸੁ ਵਸ੍ਸਂ ਵਸਤਿ ‘‘ਏਵਂ ਮੇ ਬਹੁ ਚੀਵਰਂ ਉਪ੍ਪਜ੍ਜਿਸ੍ਸਤੀ’’ਤਿ, ਏਕਂ ਪੁਗ੍ਗਲਪਟਿਵੀਸਂਯੇਵ ਲਭਤਿ. ਤਸ੍ਮਾ ਸਚੇ ਏਕੇਕਸ੍ਮਿਂ ਵਿਹਾਰੇ ਏਕਾਹਮੇਕਾਹਂ ਵਾ ਸਤ੍ਤਾਹਂ ਵਾ ਵਸਤਿ, ਏਕੇਕਸ੍ਮਿਂ ਵਿਹਾਰੇ ਯਂ ਏਕੋ ਪੁਗ੍ਗਲੋ ਲਭਤਿ, ਤਤੋ ਤਤੋ ਉਪਡ੍ਢਂ ਉਪਡ੍ਢਂ ਦਾਤਬ੍ਬਂ. ਏਵਞ੍ਹਿ ਏਕਪੁਗ੍ਗਲਪਟਿਵੀਸੋ ਦਿਨ੍ਨੋ ਹੋਤਿ. ਸਚੇ ਪਨ ਏਕਸ੍ਮਿਂ ਵਿਹਾਰੇ ਵਸਨ੍ਤੋ ਇਤਰਸ੍ਮਿਂ ਸਤ੍ਤਾਹਵਾਰੇਨ ਅਰੁਣਮੇਵ ਉਟ੍ਠਾਪੇਤਿ, ਬਹੁਤਰਂ ਵਸਿਤਵਿਹਾਰਤੋ ਤਸ੍ਸ ਪਟਿਵੀਸੋ ਦਾਤਬ੍ਬੋ. ਏਵਮ੍ਪਿ ਏਕਪੁਗ੍ਗਲਪਟਿਵੀਸੋਯੇਵ ਦਿਨ੍ਨੋ ਹੋਤਿ. ਇਦਞ੍ਚ ਨਾਨਾਲਾਭੇਹਿ ਨਾਨੂਪਚਾਰੇਹਿ ਏਕਸੀਮਾਵਿਹਾਰੇਹਿ ਕਥਿਤਂ, ਨਾਨਾਸੀਮਾਵਿਹਾਰੇ ਪਨ ਸੇਨਾਸਨਗ੍ਗਾਹੋ ਪਟਿਪ੍ਪਸ੍ਸਮ੍ਭਤਿ. ਤਸ੍ਮਾ ਤਤ੍ਥ ਚੀਵਰਪਟਿਵੀਸੋ ਨ ਪਾਪੁਣਾਤਿ, ਸੇਸਂ ਪਨ ਆਮਿਸਭੇਸਜ੍ਜਾਦਿ ਸਬ੍ਬਂ ਸਬ੍ਬਤ੍ਥ ਅਨ੍ਤੋਸੀਮਾਗਤਸ੍ਸ ਪਾਪੁਣਾਤਿ.

੨੦੭. ‘‘ਭਿਕ੍ਖੁਸ੍ਸ, ਭਿਕ੍ਖਵੇ, ਕਾਲਕਤੇ ਸਙ੍ਘੋ ਸਾਮੀ ਪਤ੍ਤਚੀਵਰੇ, ਅਪਿਚ ਗਿਲਾਨੁਪਟ੍ਠਾਕਾ ਬਹੂਪਕਾਰਾ, ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘੇਨ ਤਿਚੀਵਰਞ੍ਚ ਪਤ੍ਤਞ੍ਚ ਗਿਲਾਨੁਪਟ੍ਠਾਕਾਨਂ ਦਾਤੁਂ, ਯਂ ਤਤ੍ਥ ਲਹੁਭਣ੍ਡਂ ਲਹੁਪਰਿਕ੍ਖਾਰਂ, ਤਂ ਸਮ੍ਮੁਖੀਭੂਤੇਨ ਸਙ੍ਘੇਨ ਭਾਜੇਤੁਂ, ਯਂ ਤਤ੍ਥ ਗਰੁਭਣ੍ਡਂ ਗਰੁਪਰਿਕ੍ਖਾਰਂ, ਤਂ ਆਗਤਾਨਾਗਤਚਾਤੁਦ੍ਦਿਸਸ੍ਸ ਸਙ੍ਘਸ੍ਸ ਅਵਿਸ੍ਸਜ੍ਜਿਕਂ ਅਵੇਭਙ੍ਗਿਕ’’ਨ੍ਤਿ (ਮਹਾਵ. ੩੬੯) ਵਚਨਤੋ ਭਿਕ੍ਖੁਸ੍ਮਿਂ ਕਾਲਕਤੇ ਅਪਲੋਕੇਤ੍ਵਾ ਵਾ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਇਤ੍ਥਨ੍ਨਾਮੋ ਭਿਕ੍ਖੁ ਕਾਲਕਤੋ, ਇਦਂ ਤਸ੍ਸ ਤਿਚੀਵਰਞ੍ਚ ਪਤ੍ਤੋ ਚ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਤਿਚੀਵਰਞ੍ਚ ਪਤ੍ਤਞ੍ਚ ਗਿਲਾਨੁਪਟ੍ਠਾਕਾਨਂ ਦਦੇਯ੍ਯ, ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਇਤ੍ਥਨ੍ਨਾਮੋ ਭਿਕ੍ਖੁ ਕਾਲਕਤੋ, ਇਦਂ ਤਸ੍ਸ ਤਿਚੀਵਰਞ੍ਚ ਪਤ੍ਤੋ ਚ, ਸਙ੍ਘੋ ਇਮਂ ਤਿਚੀਵਰਞ੍ਚ ਪਤ੍ਤਞ੍ਚ ਗਿਲਾਨੁਪਟ੍ਠਾਕਾਨਂ ਦੇਤਿ, ਯਸ੍ਸਾਯਸ੍ਮਤੋ ਖਮਤਿ ਇਮਸ੍ਸ ਤਿਚੀਵਰਸ੍ਸ ਚ ਪਤ੍ਤਸ੍ਸ ਚ ਗਿਲਾਨੁਪਟ੍ਠਾਕਾਨਂ ਦਾਨਂ, ਸੋ ਤੁਣ੍ਹਸ੍ਸ. ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦਿਨ੍ਨਂ ਇਦਂ ਸਙ੍ਘੇਨ ਤਿਚੀਵਰਞ੍ਚ ਪਤ੍ਤੋ ਚ ਗਿਲਾਨੁਪਟ੍ਠਾਕਾਨਂ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਮਹਾਵ. ੩੬੭) –

ਏਵਂ ਕਮ੍ਮਵਾਚਂ ਵਾ ਸਾਵੇਤ੍ਵਾ ਗਿਲਾਨੁਪਟ੍ਠਾਕਾਨਂ ਪਤ੍ਤਚੀਵਰਂ ਦਤ੍ਵਾ ਸੇਸਂ ਲਹੁਪਰਿਕ੍ਖਾਰਂ ਸਮ੍ਮੁਖੀਭੂਤੇਨ ਸਙ੍ਘੇਨ ਭਾਜੇਤ੍ਵਾ ਗਹੇਤਬ੍ਬਂ.

੨੦੮. ਗਿਲਾਨੁਪਟ੍ਠਾਕਾਨਂ ਲਾਭੇ ਪਨ ਅਯਂ ਵਿਨਿਚ੍ਛਯੋ – ਸਚੇ ਸਕਲੇ ਭਿਕ੍ਖੁਸਙ੍ਘੇ ਉਪਟ੍ਠਹਨ੍ਤੇ ਕਾਲਂ ਕਰੋਤਿ, ਸਬ੍ਬੇਪਿ ਸਾਮਿਕਾ. ਅਥ ਏਕਚ੍ਚੇਹਿ ਵਾਰੇ ਕਤੇ ਏਕਚ੍ਚੇਹਿ ਅਕਤੇਯੇਵ ਕਾਲਂ ਕਰੋਤਿ, ਤਤ੍ਰ ਏਕਚ੍ਚੇ ਆਚਰਿਯਾ ਵਦਨ੍ਤਿ ‘‘ਸਬ੍ਬੇਪਿ ਅਤ੍ਤਨੋ ਵਾਰੇ ਸਮ੍ਪਤ੍ਤੇ ਕਰੇਯ੍ਯੁਂ, ਤਸ੍ਮਾ ਸਬ੍ਬੇਪਿ ਸਾਮਿਨੋ’’ਤਿ. ਏਕਚ੍ਚੇ ਵਦਨ੍ਤਿ ‘‘ਯੇਹਿ ਜਗ੍ਗਿਤੋ, ਤੇ ਏਵ ਲਭਨ੍ਤਿ, ਇਤਰੇ ਨ ਲਭਨ੍ਤੀ’’ਤਿ. ਸਾਮਣੇਰੇਪਿ ਕਾਲਕਤੇ ਸਚੇ ਚੀਵਰਂ ਅਤ੍ਥਿ, ਗਿਲਾਨੁਪਟ੍ਠਾਕਾਨਂ ਦਾਤਬ੍ਬਂ. ਨੋ ਚੇ ਅਤ੍ਥਿ, ਯਂ ਅਤ੍ਥਿ, ਤਂ ਦਾਤਬ੍ਬਂ. ਅਞ੍ਞਸ੍ਮਿਂ ਪਰਿਕ੍ਖਾਰੇ ਸਤਿ ਚੀਵਰਭਾਗਂ ਕਤ੍ਵਾ ਦਾਤਬ੍ਬਂ. ਭਿਕ੍ਖੁ ਚ ਸਾਮਣੇਰੋ ਚ ਸਚੇ ਸਮਂ ਉਪਟ੍ਠਹਿਂਸੁ, ਸਮਕੋ ਭਾਗੋ ਦਾਤਬ੍ਬੋ. ਅਥ ਸਾਮਣੇਰੋਵ ਉਪਟ੍ਠਹਤਿ, ਭਿਕ੍ਖੁਸ੍ਸ ਸਂਵਿਦਹਨਮਤ੍ਤਮੇਵ ਹੋਤਿ, ਸਾਮਣੇਰਸ੍ਸ ਜੇਟ੍ਠਕੋਟ੍ਠਾਸੋ ਦਾਤਬ੍ਬੋ. ਸਚੇ ਸਾਮਣੇਰੋ ਭਿਕ੍ਖੁਨਾ ਆਨੀਤਉਦਕੇਨ ਯਾਗੁਂ ਪਚਿਤ੍ਵਾ ਪਟਿਗ੍ਗਹਾਪਨਮਤ੍ਤਮੇਵ ਕਰੋਤਿ, ਭਿਕ੍ਖੁ ਉਪਟ੍ਠਹਤਿ, ਭਿਕ੍ਖੁਸ੍ਸ ਜੇਟ੍ਠਭਾਗੋ ਦਾਤਬ੍ਬੋ. ਬਹੂ ਭਿਕ੍ਖੂ ਸਬ੍ਬੇ ਸਮਗ੍ਗਾ ਹੁਤ੍ਵਾ ਉਪਟ੍ਠਹਨ੍ਤਿ, ਸਬ੍ਬੇਸਂ ਸਮਕੋ ਭਾਗੋ ਦਾਤਬ੍ਬੋ. ਯੋ ਪਨੇਤ੍ਥ ਵਿਸੇਸੇਨ ਉਪਟ੍ਠਹਤਿ, ਤਸ੍ਸ ਵਿਸੇਸੋ ਕਾਤਬ੍ਬੋ.

ਯੇਨ ਪਨ ਏਕਦਿਵਸਮ੍ਪਿ ਗਿਲਾਨੁਪਟ੍ਠਾਕਵਸੇਨ ਯਾਗੁਭਤ੍ਤਂ ਵਾ ਪਚਿਤ੍ਵਾ ਦਿਨ੍ਨਂ, ਨ੍ਹਾਨਂ ਵਾ ਪਟਿਸਾਦਿਤਂ, ਸੋਪਿ ਗਿਲਾਨੁਪਟ੍ਠਾਕੋਵ. ਯੋ ਪਨ ਸਮੀਪਂ ਅਨਾਗਨ੍ਤ੍ਵਾ ਭੇਸਜ੍ਜਤਣ੍ਡੁਲਾਦੀਨਿ ਪੇਸੇਤਿ, ਅਯਂ ਗਿਲਾਨੁਪਟ੍ਠਾਕੋ ਨ ਹੋਤਿ. ਯੋ ਪਰਿਯੇਸਿਤ੍ਵਾ ਗਾਹੇਤ੍ਵਾ ਆਗਚ੍ਛਤਿ, ਅਯਂ ਗਿਲਾਨੁਪਟ੍ਠਾਕੋਵ. ਏਕੋ ਵਤ੍ਤਸੀਸੇਨ ਜਗ੍ਗਤਿ, ਏਕੋ ਪਚ੍ਚਾਸਾਯ, ਮਤਕਾਲੇ ਉਭੋਪਿ ਪਚ੍ਚਾਸੀਸਨ੍ਤਿ, ਉਭਿਨ੍ਨਮ੍ਪਿ ਦਾਤਬ੍ਬਂ. ਏਕੋ ਉਪਟ੍ਠਹਿਤ੍ਵਾ ਗਿਲਾਨਸ੍ਸ ਵਾ ਕਮ੍ਮੇਨ ਅਤ੍ਤਨੋ ਵਾ ਕਮ੍ਮੇਨ ਕਤ੍ਥਚਿ ਗਤੋ ‘‘ਪੁਨ ਆਗਨ੍ਤ੍ਵਾ ਜਗ੍ਗਿਸ੍ਸਾਮੀ’’ਤਿ, ਏਤਸ੍ਸਪਿ ਦਾਤਬ੍ਬਂ. ਏਕੋ ਚਿਰਂ ਉਪਟ੍ਠਹਿਤ੍ਵਾ ‘‘ਇਦਾਨਿ ਨ ਸਕ੍ਕੋਮੀ’’ਤਿ ਧੁਰਂ ਨਿਕ੍ਖਿਪਿਤ੍ਵਾ ਗਚ੍ਛਤਿ, ਸਚੇਪਿ ਤਂ ਦਿਵਸਮੇਵ ਗਿਲਾਨੋ ਕਾਲਂ ਕਰੋਤਿ, ਉਪਟ੍ਠਾਕਭਾਗੋ ਨ ਦਾਤਬ੍ਬੋ. ਗਿਲਾਨੁਪਟ੍ਠਾਕੋ ਨਾਮ ਗਿਹੀ ਵਾ ਹੋਤੁ ਪਬ੍ਬਜਿਤੋ ਵਾ ਅਨ੍ਤਮਸੋ ਮਾਤੁਗਾਮੋਪਿ, ਸਬ੍ਬੇ ਭਾਗਂ ਲਭਨ੍ਤਿ. ਸਚੇ ਤਸ੍ਸ ਭਿਕ੍ਖੁਨੋ ਪਤ੍ਤਚੀਵਰਮਤ੍ਤਮੇਵ ਹੋਤਿ, ਅਞ੍ਞਂ ਨਤ੍ਥਿ, ਸਬ੍ਬਂ ਗਿਲਾਨੁਪਟ੍ਠਾਕਾਨਂਯੇਵ ਦਾਤਬ੍ਬਂ. ਸਚੇਪਿ ਸਹਸ੍ਸਂ ਅਗ੍ਘਤਿ, ਅਞ੍ਞਂ ਪਨ ਬਹੁਮ੍ਪਿ ਪਰਿਕ੍ਖਾਰਂ ਤੇ ਨ ਲਭਨ੍ਤਿ, ਸਙ੍ਘਸ੍ਸੇਵ ਹੋਤਿ. ਅਵਸੇਸਂ ਭਣ੍ਡਂ ਬਹੁ ਚੇਵ ਮਹਗ੍ਘਞ੍ਚ, ਤਿਚੀਵਰਂ ਅਪ੍ਪਗ੍ਘਂ, ਤਤੋ ਗਹੇਤ੍ਵਾ ਤਿਚੀਵਰਪਰਿਕ੍ਖਾਰੋ ਦਾਤਬ੍ਬੋ, ਸਬ੍ਬਞ੍ਚੇਤਂ ਸਙ੍ਘਿਕਤੋਵ ਲਬ੍ਭਤਿ. ਸਚੇ ਪਨ ਸੋ ਜੀਵਮਾਨੋਯੇਵ ਸਬ੍ਬਂ ਅਤ੍ਤਨੋ ਪਰਿਕ੍ਖਾਰਂ ਨਿਸ੍ਸਜ੍ਜਿਤ੍ਵਾ ਕਸ੍ਸਚਿ ਅਦਾਸਿ, ਕੋਚਿ ਵਾ ਵਿਸ੍ਸਾਸਂ ਅਗ੍ਗਹੇਸਿ, ਯਸ੍ਸ ਦਿਨ੍ਨਂ, ਯੇਨ ਚ ਗਹਿਤਂ, ਤਸ੍ਸੇਵ ਹੋਤਿ, ਤਸ੍ਸ ਰੁਚਿਯਾ ਏਵ ਗਿਲਾਨੁਪਟ੍ਠਾਕਾ ਲਭਨ੍ਤਿ. ਅਞ੍ਞੇਸਂ ਅਦਤ੍ਵਾ ਦੂਰੇ ਠਪਿਤਪਰਿਕ੍ਖਾਰਾਪਿ ਤਤ੍ਥ ਤਤ੍ਥ ਸਙ੍ਘਸ੍ਸੇਵ ਹੋਨ੍ਤਿ. ਦ੍ਵਿਨ੍ਨਂ ਸਨ੍ਤਕਂ ਹੋਤਿ ਅਵਿਭਤ੍ਤਂ, ਏਕਸ੍ਮਿਂ ਕਾਲਕਤੇ ਇਤਰੋ ਸਾਮੀ. ਬਹੂਨਮ੍ਪਿ ਸਨ੍ਤਕੇ ਏਸੇਵ ਨਯੋ. ਸਬ੍ਬੇਸੁ ਮਤੇਸੁ ਸਙ੍ਘਿਕਂ ਹੋਤਿ. ਸਚੇਪਿ ਅਵਿਭਜਿਤ੍ਵਾ ਸਦ੍ਧਿਵਿਹਾਰਿਕਾਦੀਨਂ ਦੇਨ੍ਤਿ, ਅਦਿਨ੍ਨਮੇਵ ਹੋਤਿ, ਵਿਭਜਿਤ੍ਵਾ ਦਿਨ੍ਨਂ ਪਨ ਸੁਦਿਨ੍ਨਂ. ਤਂ ਤੇਸੁ ਮਤੇਸੁਪਿ ਸਦ੍ਧਿਵਿਹਾਰਿਕਾਦੀਨਂਯੇਵ ਹੋਤਿ, ਨ ਸਙ੍ਘਸ੍ਸ.

ਸਚੇ ਵਸ੍ਸਂਵੁਟ੍ਠੋ ਭਿਕ੍ਖੁ ਅਨੁਪ੍ਪਨ੍ਨੇ ਵਾ ਉਪ੍ਪਨ੍ਨੇ ਵਾ ਚੀਵਰੇ ਅਭਾਜਿਤੇ ਵਾ ਪਕ੍ਕਮਤਿ, ਉਮ੍ਮਤ੍ਤਕੋ ਖਿਤ੍ਤਚਿਤ੍ਤੋ ਵੇਦਨਾਟ੍ਟੋ ਉਕ੍ਖਿਤ੍ਤਕੋ ਵਾ ਹੋਤਿ, ਸਨ੍ਤੇ ਪਤਿਰੂਪੇ ਗਾਹਕੇ ਭਾਗੋ ਦਾਤਬ੍ਬੋ. ਸਚੇ ਪਨ ਵਿਬ੍ਭਮਤਿ ਵਾ ਕਾਲਂ ਵਾ ਕਰੋਤਿ ਸਾਮਣੇਰੋ ਵਾ ਪਟਿਜਾਨਾਤਿ, ਸਿਕ੍ਖਂ ਪਚ੍ਚਕ੍ਖਾਤਕੋ, ਅਨ੍ਤਿਮਵਤ੍ਥੁਂ ਅਜ੍ਝਾਪਨ੍ਨਕੋ, ਪਣ੍ਡਕੋ, ਥੇਯ੍ਯਸਂਵਾਸਕੋ, ਤਿਤ੍ਥਿਯਪਕ੍ਕਨ੍ਤਕੋ, ਤਿਰਚ੍ਛਾਨਗਤੋ, ਮਾਤੁਘਾਤਕੋ, ਪਿਤੁਘਾਤਕੋ, ਅਰਹਨ੍ਤਘਾਤਕੋ, ਭਿਕ੍ਖੁਨੀਦੂਸਕੋ, ਸਙ੍ਘਭੇਦਕੋ, ਲੋਹਿਤੁਪ੍ਪਾਦਕੋ, ਉਭਤੋਬ੍ਯਞ੍ਜਨਕੋ ਵਾ ਪਟਿਜਾਨਾਤਿ, ਸਙ੍ਘੋ ਸਾਮੀ, ਭਾਗੋ ਨ ਦਾਤਬ੍ਬੋ.

ਸਚੇ ਵਸ੍ਸਂਵੁਟ੍ਠਾਨਂ ਭਿਕ੍ਖੂਨਂ ਅਨੁਪ੍ਪਨ੍ਨੇ ਚੀਵਰੇ ਸਙ੍ਘੋ ਭਿਜ੍ਜਤਿ, ਕੋਸਮ੍ਬਕਭਿਕ੍ਖੂ ਵਿਯ ਦ੍ਵੇ ਕੋਟ੍ਠਾਸਾ ਹੋਨ੍ਤਿ, ਤਤ੍ਥ ਮਨੁਸ੍ਸਾ ਏਕਸ੍ਮਿਂ ਪਕ੍ਖੇ ਦਕ੍ਖਿਣੋਦਕਞ੍ਚ ਗਨ੍ਧਾਦੀਨਿ ਚ ਦੇਨ੍ਤਿ, ਏਕਸ੍ਮਿਂ ਚੀਵਰਾਨਿ ਦੇਨ੍ਤਿ ‘‘ਸਙ੍ਘਸ੍ਸ ਦੇਮਾ’’ਤਿ, ਯਤ੍ਥ ਵਾ ਉਦਕਂ ਦਿਨ੍ਨਂ, ਯਸ੍ਮਿਂਯੇਵ ਪਕ੍ਖੇ ਚੀਵਰਾਨਿ ਦੇਨ੍ਤਿ ‘‘ਸਙ੍ਘਸ੍ਸ ਦੇਮਾ’’ਤਿ, ਸਙ੍ਘਸ੍ਸੇਵ ਤਾਨਿ ਚੀਵਰਾਨਿ, ਦ੍ਵਿਨ੍ਨਮ੍ਪਿ ਕੋਟ੍ਠਾਸਾਨਂ ਪਾਪੁਣਨ੍ਤਿ, ਘਣ੍ਟਿਂ ਪਹਰਿਤ੍ਵਾ ਦ੍ਵੀਹਿਪਿ ਪਕ੍ਖੇਹਿ ਏਕਤੋ ਭਾਜੇਤਬ੍ਬਾਨਿ. ਸਚੇ ਪਨ ਮਨੁਸ੍ਸਾ ਏਕਸ੍ਮਿਂ ਪਕ੍ਖੇ ਦਕ੍ਖਿਣੋਦਕਂ ਗਨ੍ਧਾਦੀਨਿ ਚ ਦੇਨ੍ਤਿ, ਏਕਸ੍ਮਿਂ ਪਕ੍ਖੇ ਚੀਵਰਾਨਿ ਦੇਨ੍ਤਿ ‘‘ਪਕ੍ਖਸ੍ਸ ਦੇਮਾ’’ਤਿ, ਪਕ੍ਖਸ੍ਸੇਵ ਤਾਨਿ ਚੀਵਰਾਨਿ. ਏਵਞ੍ਹਿ ਦਿਨ੍ਨੇ ਯਸ੍ਸ ਕੋਟ੍ਠਾਸਸ੍ਸ ਉਦਕਂ ਦਿਨ੍ਨਂ, ਤਸ੍ਸ ਉਦਕਮੇਵ ਹੋਤਿ. ਯਸ੍ਸ ਚੀਵਰਂ ਦਿਨ੍ਨਂ, ਤਸ੍ਸੇਵ ਚੀਵਰਂ. ਯਸ੍ਮਿਂ ਪਦੇਸੇ ਦਕ੍ਖਿਣੋਦਕਂ ਪਮਾਣਂ ਹੋਤਿ, ਤਤ੍ਥ ਏਕੋ ਪਕ੍ਖੋ ਦਕ੍ਖਿਣੋਦਕਸ੍ਸ ਲਦ੍ਧਤ੍ਤਾ ਚੀਵਰਾਨਿ ਲਭਤਿ, ਏਕੋ ਚੀਵਰਾਨਮੇਵ ਲਦ੍ਧਤ੍ਤਾਤਿ ਉਭੋਹਿ ਏਕਤੋ ਹੁਤ੍ਵਾ ਯਥਾਵੁਡ੍ਢਂ ਭਾਜੇਤਬ੍ਬਂ. ‘‘ਇਦਂ ਕਿਰ ਪਰਸਮੁਦ੍ਦੇ ਲਕ੍ਖਣ’’ਨ੍ਤਿ ਮਹਾਅਟ੍ਠਕਥਾਯਂ ਵੁਤ੍ਤਂ. ਸਚੇ ਯਸ੍ਮਿਂ ਪਕ੍ਖੇ ਉਦਕਂ ਦਿਨ੍ਨਂ, ਤਸ੍ਮਿਂਯੇਵ ਪਕ੍ਖੇ ਚੀਵਰਾਨਿ ਦੇਨ੍ਤਿ ‘‘ਪਕ੍ਖਸ੍ਸ ਦੇਮਾ’’ਤਿ, ਪਕ੍ਖਸ੍ਸੇਵ ਤਾਨਿ ਚੀਵਰਾਨਿ, ਇਤਰੋ ਪਕ੍ਖੋ ਅਨਿਸ੍ਸਰੋਯੇਵ. ਸਚੇ ਪਨ ਵਸ੍ਸਂਵੁਟ੍ਠਾਨਂ ਭਿਕ੍ਖੂਨਂ ਉਪ੍ਪਨ੍ਨੇ ਚੀਵਰੇ ਅਭਾਜਿਤੇ ਸਙ੍ਘੋ ਭਿਜ੍ਜਤਿ, ਸਬ੍ਬੇਸਂ ਸਮਕਂ ਭਾਜੇਤਬ੍ਬਂ.

ਸਚੇ ਸਮ੍ਬਹੁਲੇਸੁ ਭਿਕ੍ਖੂਸੁ ਅਦ੍ਧਾਨਮਗ੍ਗਪ੍ਪਟਿਪਨ੍ਨੇਸੁ ਕੇਚਿ ਭਿਕ੍ਖੂ ਪਂਸੁਕੂਲਤ੍ਥਾਯ ਸੁਸਾਨਂ ਓਕ੍ਕਮਨ੍ਤਿ, ਕੇਚਿ ਅਨਾਗਮੇਨ੍ਤਾ ਪਕ੍ਕਮਨ੍ਤਿ, ਅਨਾਗਮੇਨ੍ਤਾਨਂ ਨ ਅਕਾਮਾ ਭਾਗੋ ਦਾਤਬ੍ਬੋ, ਆਗਮੇਨ੍ਤਾਨਂ ਪਨ ਅਕਾਮਾਪਿ ਦਾਤਬ੍ਬੋ ਭਾਗੋ. ਯਦਿ ਪਨ ਮਨੁਸ੍ਸਾ ‘‘ਇਧਾਗਤਾ ਏਵ ਗਣ੍ਹਨ੍ਤੂ’’ਤਿ ਦੇਨ੍ਤਿ, ਸਞ੍ਞਾਣਂ ਵਾ ਕਤ੍ਵਾ ਗਚ੍ਛਨ੍ਤਿ ‘‘ਸਮ੍ਪਤ੍ਤਾ ਗਣ੍ਹਨ੍ਤੂ’’ਤਿ, ਸਮ੍ਪਤ੍ਤਾਨਂ ਸਬ੍ਬੇਸਮ੍ਪਿ ਪਾਪੁਣਾਤਿ. ਸਚੇ ਛਡ੍ਡੇਤ੍ਵਾ ਗਤਾ, ਯੇਨ ਗਹਿਤਂ, ਸੋ ਏਵ ਸਾਮੀ. ਸਚੇ ਕੇਚਿ ਭਿਕ੍ਖੂ ਪਠਮਂ ਸੁਸਾਨਂ ਓਕ੍ਕਮਨ੍ਤਿ, ਕੇਚਿ ਪਚ੍ਛਾ, ਤਤ੍ਥ ਪਠਮਂ ਓਕ੍ਕਨ੍ਤਾ ਪਂਸੁਕੂਲਂ ਲਭਨ੍ਤਿ, ਪਚ੍ਛਾ ਓਕ੍ਕਨ੍ਤਾ ਨ ਲਭਨ੍ਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਚ੍ਛਾ ਓਕ੍ਕਨ੍ਤਾਨਂ ਨ ਅਕਾਮਾ ਭਾਗਂ ਦਾਤੁ’’ਨ੍ਤਿ (ਮਹਾਵ. ੩੪੧) ਵਚਨਤੋ ਪਚ੍ਛਾ ਓਕ੍ਕਨ੍ਤਾਨਂ ਅਕਾਮਾ ਭਾਗੋ ਨ ਦਾਤਬ੍ਬੋ. ਸਚੇ ਪਨ ਸਬ੍ਬੇਪਿ ਸਮਂ ਓਕ੍ਕਨ੍ਤਾ, ਕੇਚਿ ਲਭਨ੍ਤਿ, ਕੇਚਿ ਨ ਲਭਨ੍ਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਦਿਸਾਨਂ ਓਕ੍ਕਨ੍ਤਾਨਂ ਅਕਾਮਾਪਿ ਭਾਗਂ ਦਾਤੁ’’ਨ੍ਤਿ (ਮਹਾਵ. ੩੪੧) ਵਚਨਤੋ ਸਮਂ ਓਕ੍ਕਨ੍ਤਾਨਂ ਅਕਾਮਾਪਿ ਭਾਗੋ ਦਾਤਬ੍ਬੋ. ਸਚੇ ਪਨ ‘‘ਲਦ੍ਧਂ ਪਂਸੁਕੂਲਂ ਸਬ੍ਬੇ ਭਾਜੇਤ੍ਵਾ ਗਣ੍ਹਿਸ੍ਸਾਮਾ’’ਤਿ ਬਹਿਮੇਵ ਕਤਿਕਂ ਕਤ੍ਵਾ ਸੁਸਾਨਂ ਓਕ੍ਕਨ੍ਤਾ ਕੇਚਿ ਲਭਨ੍ਤਿ, ਕੇਚਿ ਨ ਲਭਨ੍ਤਿ, ‘‘ਅਨੁਜਾਨਾਮਿ, ਭਿਕ੍ਖਵੇ, ਕਤਿਕਂ ਕਤ੍ਵਾ ਓਕ੍ਕਨ੍ਤਾਨਂ ਅਕਾਮਾ ਭਾਗਂ ਦਾਤੁ’’ਨ੍ਤਿ (ਮਹਾਵ. ੩੪੧) ਵਚਨਤੋ ਕਤਿਕਂ ਕਤ੍ਵਾ ਓਕ੍ਕਨ੍ਤਾਨਮ੍ਪਿ ਅਕਾਮਾ ਭਾਗੋ ਦਾਤਬ੍ਬੋ. ਅਯਂ ਤਾਵ ਚੀਵਰਭਾਜਨੀਯਕਥਾ.

੨੦੯. ਪਿਣ੍ਡਪਾਤਭਾਜਨੇ ਪਨ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘਭਤ੍ਤਂ ਉਦ੍ਦੇਸਭਤ੍ਤਂ ਨਿਮਨ੍ਤਨਂ ਸਲਾਕਭਤ੍ਤਂ ਪਕ੍ਖਿਕਂ ਉਪੋਸਥਿਕਂ ਪਾਟਿਪਦਿਕ’’ਨ੍ਤਿ (ਚੂਲ਼ਵ. ੩੨੫) ਏਵਂ ਅਨੁਞ੍ਞਾਤੇਸੁ ਸਙ੍ਘਭਤ੍ਤਾਦੀਸੁ ਅਯਂ ਵਿਨਿਚ੍ਛਯੋ (ਚੂਲ਼ਵ. ਅਟ੍ਠ. ੩੨੫) –

ਸਙ੍ਘਭਤ੍ਤਂ ਨਾਮ ਸਕਲਸ੍ਸ ਸਙ੍ਘਸ੍ਸ ਦਾਤਬ੍ਬਂ ਭਤ੍ਤਂ. ਤਸ੍ਮਾ ਸਙ੍ਘਭਤ੍ਤੇ ਠਿਤਿਕਾ ਨਾਮ ਨਤ੍ਥਿ, ਤਤੋਯੇਵ ਚ ‘‘ਅਮ੍ਹਾਕਂ ਅਜ੍ਜ ਦਸ ਦ੍ਵਾਦਸ ਦਿਵਸਾ ਭੁਞ੍ਜਨ੍ਤਾਨਂ, ਇਦਾਨਿ ਅਞ੍ਞਤੋ ਭਿਕ੍ਖੂ ਆਨੇਥਾ’’ਤਿ ਨ ਏਵਂ ਤਤ੍ਥ ਵਤ੍ਤਬ੍ਬਂ, ‘‘ਪੁਰਿਮਦਿਵਸੇਸੁ ਅਮ੍ਹੇਹਿ ਨ ਲਦ੍ਧਂ, ਇਦਾਨਿ ਤਂ ਅਮ੍ਹਾਕਂ ਗਾਹੇਥਾ’’ਤਿ ਏਵਮ੍ਪਿ ਵਤ੍ਤੁਂ ਨ ਲਭਤਿ. ਤਞ੍ਹਿ ਆਗਤਾਗਤਾਨਂ ਪਾਪੁਣਾਤਿਯੇਵ.

ਉਦ੍ਦੇਸਭਤ੍ਤਾਦੀਸੁ ਪਨ ਅਯਂ ਨਯੋ – ਰਞ੍ਞਾ ਵਾ ਰਾਜਮਹਾਮਤ੍ਤੇਨ ਵਾ ‘‘ਸਙ੍ਘਤੋ ਉਦ੍ਦਿਸਿਤ੍ਵਾ ਏਤ੍ਤਕੇ ਭਿਕ੍ਖੂ ਆਨੇਥਾ’’ਤਿ ਪਹਿਤੇ ਕਾਲਂ ਘੋਸੇਤ੍ਵਾ ਠਿਤਿਕਾ ਪੁਚ੍ਛਿਤਬ੍ਬਾ. ਸਚੇ ਅਤ੍ਥਿ, ਤਤੋ ਪਟ੍ਠਾਯ ਗਾਹੇਤਬ੍ਬਂ. ਨੋ ਚੇ, ਥੇਰਾਸਨਤੋ ਪਟ੍ਠਾਯ ਗਾਹੇਤਬ੍ਬਂ. ਉਦ੍ਦੇਸਕੇਨ ਪਿਣ੍ਡਪਾਤਿਕਾਨਮ੍ਪਿ ਨ ਅਤਿਕ੍ਕਾਮੇਤਬ੍ਬਂ. ਤੇ ਪਨ ਧੁਤਙ੍ਗਂ ਰਕ੍ਖਨ੍ਤਾ ਸਯਮੇਵ ਅਤਿਕ੍ਕਮਿਸ੍ਸਨ੍ਤਿ. ਏਵਂ ਗਾਹਿਯਮਾਨੇ ਅਲਸਜਾਤਿਕਾ ਮਹਾਥੇਰਾ ਪਚ੍ਛਾ ਆਗਚ੍ਛਨ੍ਤਿ, ‘‘ਭਨ੍ਤੇ, ਵੀਸਤਿਵਸ੍ਸਾਨਂ ਗਾਹੀਯਤਿ, ਤੁਮ੍ਹਾਕਂ ਠਿਤਿਕਾ ਅਤਿਕ੍ਕਨ੍ਤਾ’’ਤਿ ਨ ਵਤ੍ਤਬ੍ਬਾ, ਠਿਤਿਕਂ ਠਪੇਤ੍ਵਾ ਤੇਸਂ ਗਾਹੇਤ੍ਵਾ ਪਚ੍ਛਾ ਠਿਤਿਕਾਯ ਗਾਹੇਤਬ੍ਬਂ. ‘‘ਅਸੁਕਵਿਹਾਰੇ ਬਹੁ ਉਦ੍ਦੇਸਭਤ੍ਤਂ ਉਪ੍ਪਨ੍ਨ’’ਨ੍ਤਿ ਸੁਤ੍ਵਾ ਯੋਜਨਨ੍ਤਰਿਕਵਿਹਾਰਤੋਪਿ ਭਿਕ੍ਖੂ ਆਗਚ੍ਛਨ੍ਤਿ, ਸਮ੍ਪਤ੍ਤਸਮ੍ਪਤ੍ਤਾਨਂ ਠਿਤਟ੍ਠਾਨਤੋ ਪਟ੍ਠਾਯ ਗਾਹੇਤਬ੍ਬਂ, ਅਸਮ੍ਪਤ੍ਤਾਨਮ੍ਪਿ ਉਪਚਾਰਸੀਮਂ ਪਵਿਟ੍ਠਾਨਂ ਅਨ੍ਤੇਵਾਸਿਕਾਦੀਸੁ ਗਣ੍ਹਨ੍ਤੇਸੁ ਗਾਹੇਤਬ੍ਬਮੇਵ. ‘‘ਬਹਿਉਪਚਾਰਸੀਮਾਯਂ ਠਿਤਾਨਂ ਗਾਹੇਥਾ’’ਤਿ ਵਦਨ੍ਤਿ, ਨ ਗਾਹੇਤਬ੍ਬਂ. ਸਚੇ ਉਪਚਾਰਸੀਮਂ ਓਕ੍ਕਨ੍ਤੇਹਿ ਏਕਾਬਦ੍ਧਾ ਹੁਤ੍ਵਾ ਅਤ੍ਤਨੋ ਵਿਹਾਰਦ੍ਵਾਰੇ ਵਾ ਅਨ੍ਤੋਵਿਹਾਰੇਯੇਵ ਵਾ ਹੋਨ੍ਤਿ, ਪਰਿਸਵਸੇਨ ਵਡ੍ਢਿਤਾ ਨਾਮ ਸੀਮਾ ਹੋਤਿ, ਤਸ੍ਮਾ ਗਾਹੇਤਬ੍ਬਂ. ਸਙ੍ਘਨਵਕਸ੍ਸ ਦਿਨ੍ਨੇਪਿ ਪਚ੍ਛਾ ਆਗਤਾਨਂ ਗਾਹੇਤਬ੍ਬਮੇਵ. ਦੁਤਿਯਭਾਗੇ ਪਨ ਥੇਰਾਸਨਂ ਆਰੁਲ਼੍ਹੇ ਪੁਨ ਆਗਤਾਨਂ ਪਠਮਭਾਗੋ ਨ ਪਾਪੁਣਾਤਿ, ਦੁਤਿਯਭਾਗਤੋ ਵਸ੍ਸਗ੍ਗੇਨ ਗਾਹੇਤਬ੍ਬਂ.

ਏਕਸ੍ਮਿਂ ਵਿਹਾਰੇ ਏਕਂ ਭਤ੍ਤੁਦ੍ਦੇਸਟ੍ਠਾਨਂ ਪਰਿਚ੍ਛਿਨ੍ਦਿਤ੍ਵਾ ਗਾਵੁਤਪ੍ਪਮਾਣਾਯਪਿ ਉਪਚਾਰਸੀਮਾਯ ਯਤ੍ਥ ਕਤ੍ਥਚਿ ਆਰੋਚਿਤਂ ਉਦ੍ਦੇਸਭਤ੍ਤਂ ਤਸ੍ਮਿਂਯੇਵ ਭਤ੍ਤੁਦ੍ਦੇਸਟ੍ਠਾਨੇ ਗਾਹੇਤਬ੍ਬਂ. ਏਕੋ ਏਕਸ੍ਸ ਭਿਕ੍ਖੁਨੋ ਪਹਿਣਤਿ ‘‘ਸ੍ਵੇ ਸਙ੍ਘਤੋ ਉਦ੍ਦਿਸਿਤ੍ਵਾ ਦਸ ਭਿਕ੍ਖੂ ਪਹਿਣਥਾ’’ਤਿ, ਤੇਨ ਸੋ ਅਤ੍ਥੋ ਭਤ੍ਤੁਦ੍ਦੇਸਕਸ੍ਸ ਆਰੋਚੇਤਬ੍ਬੋ. ਸਚੇ ਤਂ ਦਿਵਸਂ ਪਮੁਸ੍ਸਤਿ, ਦੁਤਿਯਦਿਵਸੇ ਪਾਤੋਵ ਆਰੋਚੇਤਬ੍ਬੋ, ਅਥ ਪਮੁਸ੍ਸਿਤ੍ਵਾਵ ਪਿਣ੍ਡਾਯ ਪਵਿਸਨ੍ਤੋ ਸਰਤਿ, ਯਾਵ ਉਪਚਾਰਸੀਮਂ ਨਾਤਿਕ੍ਕਮਤਿ, ਤਾਵ ਯਾ ਭੋਜਨਸਾਲਾਯ ਪਕਤਿਠਿਤਿਕਾ, ਤਸ੍ਸਾਯੇਵ ਵਸੇਨ ਗਾਹੇਤਬ੍ਬਂ. ਸਚੇਪਿ ਉਪਚਾਰਸੀਮਂ ਅਤਿਕ੍ਕਨ੍ਤੋ, ਭਿਕ੍ਖੂ ਚ ਉਪਚਾਰਸੀਮਟ੍ਠਕੇਹਿ ਏਕਾਬਦ੍ਧਾ ਹੋਨ੍ਤਿ, ਅਞ੍ਞਮਞ੍ਞਂ ਦ੍ਵਾਦਸਹਤ੍ਥਨ੍ਤਰਂ ਅਵਿਜਹਿਤ੍ਵਾ ਗਚ੍ਛਨ੍ਤਿ, ਪਕਤਿਠਿਤਿਕਾਯ ਵਸੇਨ ਗਾਹੇਤਬ੍ਬਂ. ਭਿਕ੍ਖੂਨਂ ਪਨ ਤਾਦਿਸੇ ਏਕਾਬਦ੍ਧੇ ਅਸਤਿ ਬਹਿਉਪਚਾਰਸੀਮਾਯ ਯਸ੍ਮਿਂ ਠਾਨੇ ਸਰਤਿ, ਤਤ੍ਥ ਨਵਂ ਠਿਤਿਕਂ ਕਤ੍ਵਾ ਗਾਹੇਤਬ੍ਬਂ. ਅਨ੍ਤੋਗਾਮੇ ਆਸਨਸਾਲਾਯ ਸਰਨ੍ਤੇਨ ਆਸਨਸਾਲਾਯ ਠਿਤਿਕਾਯ ਗਾਹੇਤਬ੍ਬਂ. ਯਤ੍ਥ ਕਤ੍ਥਚਿ ਸਰਿਤ੍ਵਾ ਗਾਹੇਤਬ੍ਬਮੇਵ, ਅਗਾਹੇਤੁਂ ਨ ਵਟ੍ਟਤਿ. ਨ ਹਿ ਏਤਂ ਦੁਤਿਯਦਿਵਸੇ ਲਬ੍ਭਤੀਤਿ.

ਸਚੇ ਸਕਵਿਹਾਰਤੋ ਅਞ੍ਞਂ ਵਿਹਾਰਂ ਗਚ੍ਛਨ੍ਤੇ ਭਿਕ੍ਖੂ ਦਿਸ੍ਵਾ ਕੋਚਿ ਉਦ੍ਦੇਸਭਤ੍ਤਂ ਉਦ੍ਦਿਸਾਪੇਤਿ, ਯਾਵ ਅਨ੍ਤੋਉਪਚਾਰੇ ਵਾ ਉਪਚਾਰਸੀਮਟ੍ਠਕੇਹਿ ਸਦ੍ਧਿਂ ਵੁਤ੍ਤਨਯੇਨ ਏਕਾਬਦ੍ਧਾ ਵਾ ਹੋਨ੍ਤਿ, ਤਾਵ ਸਕਵਿਹਾਰੇ ਠਿਤਿਕਾਵਸੇਨ ਗਾਹੇਤਬ੍ਬਂ. ਬਹਿਉਪਚਾਰੇ ਠਿਤਾਨਂ ਦਿਨ੍ਨਂ ਪਨ ‘‘ਸਙ੍ਘਤੋ, ਭਨ੍ਤੇ, ਏਤ੍ਤਕੇ ਨਾਮ ਭਿਕ੍ਖੂ ਉਦ੍ਦਿਸਥਾ’’ਤਿ ਵੁਤ੍ਤੇ ਸਮ੍ਪਤ੍ਤਸਮ੍ਪਤ੍ਤਾਨਂ ਗਾਹੇਤਬ੍ਬਂ. ਤਤ੍ਥ ਦ੍ਵਾਦਸਹਤ੍ਥਨ੍ਤਰਂ ਅਵਿਜਹਿਤ੍ਵਾ ਏਕਾਬਦ੍ਧਨਯੇਨ ਦੂਰੇ ਠਿਤਾਪਿ ਸਮ੍ਪਤ੍ਤਾਯੇਵਾਤਿ ਵੇਦਿਤਬ੍ਬਾ. ਸਚੇ ਯਂ ਵਿਹਾਰਂ ਗਚ੍ਛਨ੍ਤਿ, ਤਤ੍ਥ ਪਵਿਟ੍ਠਾਨਂ ਆਰੋਚੇਨ੍ਤਿ, ਤਸ੍ਸ ਵਿਹਾਰਸ੍ਸ ਠਿਤਿਕਾਵਸੇਨ ਗਾਹੇਤਬ੍ਬਂ. ਸਚੇਪਿ ਗਾਮਦ੍ਵਾਰੇ ਵਾ ਵੀਥਿਯਂ ਵਾ ਚਤੁਕ੍ਕੇ ਵਾ ਅਨ੍ਤਰਘਰੇ ਵਾ ਭਿਕ੍ਖੂ ਦਿਸ੍ਵਾ ਕੋਚਿ ਸਙ੍ਘੁਦ੍ਦੇਸਂ ਆਰੋਚੇਤਿ, ਤਸ੍ਮਿਂ ਤਸ੍ਮਿਂ ਠਾਨੇ ਅਨ੍ਤੋਉਪਚਾਰਗਤਾਨਂ ਗਾਹੇਤਬ੍ਬਂ.

ਘਰੂਪਚਾਰੋ ਚੇਤ੍ਥ ਏਕਘਰਂ ਏਕੂਪਚਾਰਂ, ਏਕਘਰਂ ਨਾਨੂਪਚਾਰਂ, ਨਾਨਾਘਰਂ ਏਕੂਪਚਾਰਂ, ਨਾਨਾਘਰਂ ਨਾਨੂਪਚਾਰਨ੍ਤਿ ਇਮੇਸਂ ਵਸੇਨ ਵੇਦਿਤਬ੍ਬੋ. ਤਤ੍ਥ ਯਂ ਏਕਕੁਲਸ੍ਸ ਘਰਂ ਏਕਵਲ਼ਞ੍ਜਂ ਹੋਤਿ, ਤਂ ਸੁਪ੍ਪਪਾਤਪਰਿਚ੍ਛੇਦਸ੍ਸ ਅਨ੍ਤੋ ਏਕੂਪਚਾਰਂ ਨਾਮ, ਤਤ੍ਥੁਪ੍ਪਨ੍ਨੋ ਉਦ੍ਦੇਸਲਾਭੋ ਏਕਸ੍ਮਿਂ ਉਪਚਾਰੇ ਭਿਕ੍ਖਾਚਾਰਵਤ੍ਤੇਨਪਿ ਠਿਤਾਨਂ ਸਬ੍ਬੇਸਂ ਪਾਪੁਣਾਤਿ. ਏਤਂ ਏਕਘਰਂ ਏਕੂਪਚਾਰਂ ਨਾਮ. ਯਂ ਪਨ ਏਕਘਰਂ ਦ੍ਵਿਨ੍ਨਂ ਭਰਿਯਾਨਂ ਸੁਖਵਿਹਾਰਤ੍ਥਾਯ ਮਜ੍ਝੇ ਭਿਤ੍ਤਿਂ ਉਟ੍ਠਪੇਤ੍ਵਾ ਨਾਨਾਦ੍ਵਾਰਵਲ਼ਞ੍ਜਂ ਕਤਂ, ਤਤ੍ਥੁਪ੍ਪਨ੍ਨੋ ਉਦ੍ਦੇਸਲਾਭੋ ਭਿਤ੍ਤਿਅਨ੍ਤਰਿਕਸ੍ਸ ਨ ਪਾਪੁਣਾਤਿ, ਤਸ੍ਮਿਂ ਤਸ੍ਮਿਂ ਠਾਨੇ ਨਿਸਿਨ੍ਨਸ੍ਸੇਵ ਪਾਪੁਣਾਤਿ. ਏਤਂ ਏਕਘਰਂ ਨਾਨੂਪਚਾਰਂ ਨਾਮ. ਯਸ੍ਮਿਂ ਪਨ ਘਰੇ ਬਹੂ ਭਿਕ੍ਖੂ ਨਿਮਨ੍ਤੇਤ੍ਵਾ ਅਨ੍ਤੋਗੇਹਤੋ ਪਟ੍ਠਾਯ ਏਕਾਬਦ੍ਧੇ ਕਤ੍ਵਾ ਪਟਿਵਿਸ੍ਸਕਘਰਾਨਿਪਿ ਪੂਰੇਤ੍ਵਾ ਨਿਸੀਦਾਪੇਨ੍ਤਿ, ਤਤ੍ਥ ਉਪ੍ਪਨ੍ਨੋ ਉਦ੍ਦੇਸਲਾਭੋ ਸਬ੍ਬੇਸਂ ਪਾਪੁਣਾਤਿ. ਯਮ੍ਪਿ ਨਾਨਾਕੁਲਸ੍ਸ ਨਿਵੇਸਨਂ ਮਜ੍ਝੇ ਭਿਤ੍ਤਿਂ ਅਕਤ੍ਵਾ ਏਕਦ੍ਵਾਰੇਨੇਵ ਵਲ਼ਞ੍ਜਨ੍ਤਿ, ਤਤ੍ਰਾਪਿ ਏਸੇਵ ਨਯੋ. ਏਤਂ ਨਾਨਾਘਰਂ ਏਕੂਪਚਾਰਂ ਨਾਮ. ਯੋ ਪਨ ਨਾਨਾਨਿਵੇਸਨੇਸੁ ਨਿਸਿਨ੍ਨਾਨਂ ਭਿਕ੍ਖੂਨਂ ਉਦ੍ਦੇਸਲਾਭੋ ਉਪ੍ਪਜ੍ਜਤਿ, ਕਿਞ੍ਚਾਪਿ ਭਿਤ੍ਤਿਚ੍ਛਿਦ੍ਦੇਨ ਭਿਕ੍ਖੂ ਦਿਸ੍ਸਨ੍ਤਿ, ਤਸ੍ਮਿਂ ਤਸ੍ਮਿਂ ਨਿਵੇਸਨੇ ਨਿਸਿਨ੍ਨਾਨਂਯੇਵ ਪਾਪੁਣਾਤਿ. ਏਤਂ ਨਾਨਾਘਰਂ ਨਾਨੂਪਚਾਰਂ ਨਾਮ.

ਯੋ ਪਨ ਗਾਮਦ੍ਵਾਰਵੀਥਿਚਤੁਕ੍ਕੇਸੁ ਅਞ੍ਞਤਰਸ੍ਮਿਂ ਠਾਨੇ ਉਦ੍ਦੇਸਭਤ੍ਤਂ ਲਭਿਤ੍ਵਾ ਅਞ੍ਞਸ੍ਮਿਂ ਭਿਕ੍ਖੁਸ੍ਮਿਂ ਅਸਤਿ ਅਤ੍ਤਨੋਵ ਪਾਪੁਣਾਪੇਤ੍ਵਾ ਦੁਤਿਯਦਿਵਸੇਪਿ ਤਸ੍ਮਿਂਯੇਵ ਠਾਨੇ ਅਞ੍ਞਂ ਲਭਤਿ, ਤੇਨ ਯਂ ਅਞ੍ਞਂ ਨਵਕਂ ਵਾ ਵੁਡ੍ਢਂ ਵਾ ਭਿਕ੍ਖੁਂ ਪਸ੍ਸਤਿ, ਤਸ੍ਸ ਗਾਹੇਤਬ੍ਬਂ. ਸਚੇ ਕੋਚਿ ਨਤ੍ਥਿ, ਅਤ੍ਤਨੋਵ ਪਾਪੇਤ੍ਵਾ ਭੁਞ੍ਜਿਤਬ੍ਬਂ. ਸਚੇ ਆਸਨਸਾਲਾਯ ਨਿਸੀਦਿਤ੍ਵਾ ਕਾਲਂ ਪਟਿਮਾਨੇਨ੍ਤੇਸੁ ਭਿਕ੍ਖੂਸੁ ਕੋਚਿ ਆਗਨ੍ਤ੍ਵਾ ‘‘ਸਙ੍ਘੁਦ੍ਦੇਸਪਤ੍ਤਂ ਦੇਥ, ਉਦ੍ਦੇਸਪਤ੍ਤਂ ਦੇਥ, ਸਙ੍ਘਤੋ ਉਦ੍ਦਿਸਿਤ੍ਵਾ ਪਤ੍ਤਂ ਦੇਥ, ਸਙ੍ਘਿਕਂ ਪਤ੍ਤਂ ਦੇਥਾ’’ਤਿ ਵਾ ਵਦਤਿ, ਉਦ੍ਦੇਸਪਤ੍ਤਂ ਠਿਤਿਕਾਯ ਗਾਹੇਤ੍ਵਾ ਦਾਤਬ੍ਬਂ. ‘‘ਸਙ੍ਘੁਦ੍ਦੇਸਭਿਕ੍ਖੁਂ ਦੇਥ, ਸਙ੍ਘਤੋ ਉਦ੍ਦਿਸਿਤ੍ਵਾ ਭਿਕ੍ਖੁਂ ਦੇਥ, ਸਙ੍ਘਿਕਂ ਭਿਕ੍ਖੁਂ ਦੇਥਾ’’ਤਿ ਵੁਤ੍ਤੇਪਿ ਏਸੇਵ ਨਯੋ.

ਉਦ੍ਦੇਸਕੋ ਪਨੇਤ੍ਥ ਪੇਸਲੋ ਲਜ੍ਜੀ ਮੇਧਾਵੀ ਇਚ੍ਛਿਤਬ੍ਬੋ, ਤੇਨ ਤਿਕ੍ਖਤ੍ਤੁਂ ਠਿਤਿਕਂ ਪੁਚ੍ਛਿਤ੍ਵਾ ਸਚੇ ਕੋਚਿ ਠਿਤਿਕਂ ਜਾਨਨ੍ਤੋ ਨਤ੍ਥਿ, ਥੇਰਾਸਨਤੋ ਗਾਹੇਤਬ੍ਬਂ. ਸਚੇ ਪਨ ‘‘ਅਹਂ ਜਾਨਾਮਿ, ਦਸਵਸ੍ਸੇਨ ਲਦ੍ਧ’’ਨ੍ਤਿ ਕੋਚਿ ਭਣਤਿ, ‘‘ਅਤ੍ਥਾਵੁਸੋ, ਦਸਵਸ੍ਸਾ ਭਿਕ੍ਖੂ’’ਤਿ ਪੁਚ੍ਛਿਤਬ੍ਬਂ. ਸਚੇ ਤਸ੍ਸ ਸੁਤ੍ਵਾਵ ‘‘ਦਸਵਸ੍ਸਮ੍ਹ ਦਸਵਸ੍ਸਮ੍ਹਾ’’ਤਿ ਬਹੂ ਆਗਚ੍ਛਨ੍ਤਿ, ‘‘ਤੁਯ੍ਹਂ ਪਾਪੁਣਾਤਿ, ਤੁਯ੍ਹਂ ਪਾਪੁਣਾਤੀ’’ਤਿ ਅਗਤ੍ਵਾ ‘‘ਸਬ੍ਬੇ ਅਪ੍ਪਸਦ੍ਦਾ ਹੋਥਾ’’ਤਿ ਵਤ੍ਵਾ ਪਟਿਪਾਟਿਯਾ ਠਪੇਤਬ੍ਬਾ, ਠਪੇਤ੍ਵਾ ‘‘ਕਤਿ ਭਿਕ੍ਖੂ ਇਚ੍ਛਥਾ’’ਤਿ ਉਪਾਸਕੋ ਪੁਚ੍ਛਿਤਬ੍ਬੋ, ‘‘ਏਤ੍ਤਕੇ ਨਾਮ, ਭਨ੍ਤੇ’’ਤਿ ਵੁਤ੍ਤੇ ‘‘ਤੁਯ੍ਹਂ ਪਾਪੁਣਾਤਿ, ਤੁਯ੍ਹਂ ਪਾਪੁਣਾਤੀ’’ਤਿ ਅਵਤ੍ਵਾ ਸਬ੍ਬਨਵਕਸ੍ਸ ਵਸ੍ਸਗ੍ਗਞ੍ਚ ਉਤੁ ਚ ਦਿਵਸਭਾਗੋ ਚ ਛਾਯਾ ਚ ਪੁਚ੍ਛਿਤਬ੍ਬਾ. ਸਚੇ ਛਾਯਾਯਪਿ ਪੁਚ੍ਛਿਯਮਾਨਾਯ ਅਞ੍ਞੋ ਵੁਡ੍ਢਤਰੋ ਆਗਚ੍ਛਤਿ, ਤਸ੍ਸ ਦਾਤਬ੍ਬਂ. ਅਥ ਛਾਯਂ ਪੁਚ੍ਛਿਤ੍ਵਾ ‘‘ਤੁਯ੍ਹਂ ਪਾਪੁਣਾਤੀ’’ਤਿ ਵੁਤ੍ਤੇ ਵੁਡ੍ਢਤਰੋ ਆਗਚ੍ਛਤਿ, ਨ ਲਭਤਿ. ਕਥਾਪਪਞ੍ਚੇਨ ਹਿ ਨਿਸਿਨ੍ਨਸ੍ਸਪਿ ਨਿਦ੍ਦਾਯਨ੍ਤਸ੍ਸਪਿ ਗਾਹਿਤਂ ਸੁਗ੍ਗਾਹਿਤਂ, ਅਤਿਕ੍ਕਨ੍ਤਂ ਸੁਅਤਿਕ੍ਕਨ੍ਤਂ. ਭਾਜਨੀਯਭਣ੍ਡਞ੍ਹਿ ਨਾਮੇਤਂ ਸਮ੍ਪਤ੍ਤਸ੍ਸੇਵ ਪਾਪੁਣਾਤਿ, ਤਤ੍ਥ ਸਮ੍ਪਤ੍ਤਭਾਵੋ ਉਪਚਾਰੇਨ ਪਰਿਚ੍ਛਿਨ੍ਦਿਤਬ੍ਬੋ. ਆਸਨਸਾਲਾਯ ਚ ਅਨ੍ਤੋਪਰਿਕ੍ਖੇਪੋ ਉਪਚਾਰੋ, ਤਸ੍ਮਿਂ ਠਿਤਸ੍ਸ ਲਾਭੋ ਪਾਪੁਣਾਤਿ.

ਕੋਚਿ ਆਸਨਸਾਲਤੋ ਅਟ੍ਠ ਉਦ੍ਦੇਸਪਤ੍ਤੇ ਆਹਰਾਪੇਤ੍ਵਾ ਸਤ੍ਤ ਪਤ੍ਤੇ ਪਣੀਤਭੋਜਨਾਨਂ, ਏਕਂ ਉਦਕਸ੍ਸ ਪੂਰੇਤ੍ਵਾ ਆਸਨਸਾਲਂ ਪਹਿਣਤਿ, ਗਹੇਤ੍ਵਾ ਆਗਤਾ ਕਿਞ੍ਚਿ ਅਵਤ੍ਵਾ ਭਿਕ੍ਖੂਨਂ ਹਤ੍ਥੇਸੁ ਪਤਿਟ੍ਠਪੇਤ੍ਵਾ ਪਕ੍ਕਮਨ੍ਤਿ, ਯੇਨ ਯਂ ਲਦ੍ਧਂ, ਤਸ੍ਸੇਵ ਤਂ ਹੋਤਿ. ਯੇਨ ਪਨ ਉਦਕਂ ਲਦ੍ਧਂ, ਤਸ੍ਸ ਅਤਿਕ੍ਕਨ੍ਤਮ੍ਪਿ ਠਿਤਿਕਂ ਠਪੇਤ੍ਵਾ ਅਞ੍ਞਂ ਉਦ੍ਦੇਸਭਤ੍ਤਂ ਗਾਹੇਤਬ੍ਬਂ, ਤਞ੍ਚ ਲੂਖਂ ਵਾ ਲਭਤੁ ਪਣੀਤਂ ਵਾ ਤਿਚੀਵਰਪਰਿਵਾਰਂ ਵਾ, ਤਸ੍ਸੇਵ ਤਂ ਹੋਤਿ. ਈਦਿਸੋ ਹਿਸ੍ਸ ਪੁਞ੍ਞਵਿਸੇਸੋ, ਉਦਕਂ ਪਨ ਯਸ੍ਮਾ ਆਮਿਸਂ ਨ ਹੋਤਿ, ਤਸ੍ਮਾ ਅਞ੍ਞਂ ਉਦ੍ਦੇਸਭਤ੍ਤਂ ਲਭਤਿ. ਸਚੇ ਪਨ ਤੇ ਗਹੇਤ੍ਵਾ ਆਗਤਾ ‘‘ਇਦਂ ਕਿਰ, ਭਨ੍ਤੇ, ਸਬ੍ਬਂ ਭਾਜੇਤ੍ਵਾ ਭੁਞ੍ਜਥਾ’’ਤਿ ਵਤ੍ਵਾ ਗਚ੍ਛਨ੍ਤਿ, ਸਬ੍ਬੇਹਿ ਭਾਜੇਤ੍ਵਾ ਭੁਞ੍ਜਿਤ੍ਵਾ ਉਦਕਂ ਪਾਤਬ੍ਬਂ. ‘‘ਸਙ੍ਘਤੋ ਉਦ੍ਦਿਸਿਤ੍ਵਾ ਅਟ੍ਠ ਮਹਾਥੇਰੇ ਦੇਥ, ਮਜ੍ਝਿਮੇ ਦੇਥ, ਨਵਕੇ ਦੇਥ, ਪਰਿਪੁਣ੍ਣਵਸ੍ਸੇ ਸਾਮਣੇਰੇ ਦੇਥ, ਮਜ੍ਝਿਮਭਾਣਕਾਦਯੋ ਦੇਥ, ਮਯ੍ਹਂ ਞਾਤਿਭਿਕ੍ਖੂ ਦੇਥਾ’’ਤਿ ਵਦਨ੍ਤਸ੍ਸ ਪਨ ‘‘ਉਪਾਸਕ, ਤ੍ਵਂ ਏਵਂ ਵਦਸਿ, ਠਿਤਿਕਾਯ ਪਨ ਤੇਸਂ ਨ ਪਾਪੁਣਾਤੀ’’ਤਿ ਵਤ੍ਵਾ ਠਿਤਿਕਾਵਸੇਨੇਵ ਦਾਤਬ੍ਬਾ. ਦਹਰਸਾਮਣੇਰੇਹਿ ਪਨ ਉਦ੍ਦੇਸਭਤ੍ਤੇਸੁ ਲਦ੍ਧੇਸੁ ਸਚੇ ਦਾਯਕਾਨਂ ਘਰੇ ਮਙ੍ਗਲਂ ਹੋਤਿ, ‘‘ਤੁਮ੍ਹਾਕਂ ਆਚਰਿਯੁਪਜ੍ਝਾਯੇ ਪੇਸੇਥਾ’’ਤਿ ਵਤ੍ਤਬ੍ਬਂ. ਯਸ੍ਮਿਂ ਪਨ ਉਦ੍ਦੇਸਭਤ੍ਤੇ ਪਠਮਭਾਗੋ ਸਾਮਣੇਰਾਨਂ ਪਾਪੁਣਾਤਿ, ਅਨੁਭਾਗੋ ਮਹਾਥੇਰਾਨਂ, ਨ ਤਤ੍ਥ ਸਾਮਣੇਰਾ ‘‘ਮਯਂ ਪਠਮਭਾਗਂ ਲਭਿਮ੍ਹਾ’’ਤਿ ਪੁਰਤੋ ਗਨ੍ਤੁਂ ਲਭਨ੍ਤਿ, ਯਥਾਪਟਿਪਾਟਿਯਾ ਏਵ ਗਨ੍ਤਬ੍ਬਂ. ‘‘ਸਙ੍ਘਤੋ ਉਦ੍ਦਿਸਿਤ੍ਵਾ ਤੁਮ੍ਹੇ ਏਥਾ’’ਤਿ ਵੁਤ੍ਤੇ ‘‘ਮਯ੍ਹਂ ਅਞ੍ਞਦਾਪਿ ਜਾਨਿਸ੍ਸਸਿ, ਠਿਤਿਕਾ ਪਨ ਏਵਂ ਗਚ੍ਛਤੀ’’ਤਿ ਠਿਤਿਕਾਵਸੇਨੇਵ ਗਾਹੇਤਬ੍ਬਂ. ਅਥ ‘‘ਸਙ੍ਘੁਦ੍ਦੇਸਪਤ੍ਤਂ ਦੇਥਾ’’ਤਿ ਵਤ੍ਵਾ ਅਗ੍ਗਾਹਿਤੇਯੇਵ ਪਤ੍ਤੇ ਯਸ੍ਸ ਕਸ੍ਸਚਿ ਪਤ੍ਤਂ ਗਹੇਤ੍ਵਾ ਪੂਰੇਤ੍ਵਾ ਆਹਰਤਿ, ਆਹਟਮ੍ਪਿ ਠਿਤਿਕਾਯ ਏਵ ਗਾਹੇਤਬ੍ਬਂ.

ਏਕੋ ‘‘ਸਙ੍ਘੁਦ੍ਦੇਸਪਤ੍ਤਂ ਆਹਰਾ’’ਤਿ ਪੇਸਿਤੋ ‘‘ਭਨ੍ਤੇ, ਏਕਂ ਪਤ੍ਤਂ ਦੇਥ, ਨਿਮਨ੍ਤਨਭਤ੍ਤਂ ਆਹਰਿਸ੍ਸਾਮੀ’’ਤਿ ਵਦਤਿ, ਸੋ ਚੇ ‘‘ਉਦ੍ਦੇਸਭਤ੍ਤਘਰਤੋ ਅਯਂ ਆਗਤੋ’’ਤਿ ਞਤ੍ਵਾ ਭਿਕ੍ਖੂਹਿ ‘‘ਨਨੁ ਤ੍ਵਂ ਅਸੁਕਘਰਤੋ ਆਗਤੋ’’ਤਿ ਵੁਤ੍ਤੋ ‘‘ਆਮ, ਭਨ੍ਤੇ, ਨ ਨਿਮਨ੍ਤਨਭਤ੍ਤਂ, ਉਦ੍ਦੇਸਭਤ੍ਤ’’ਨ੍ਤਿ ਭਣਤਿ, ਠਿਤਿਕਾਯ ਗਾਹੇਤਬ੍ਬਂ. ਯੋ ਪਨ ‘‘ਏਕਂ ਪਤ੍ਤਂ ਆਹਰਾ’’ਤਿ ਵੁਤ੍ਤੇ ‘‘ਕਿਨ੍ਤਿ ਵਤ੍ਵਾ ਆਹਰਾਮੀ’’ਤਿ ਵਤ੍ਵਾ ‘‘ਯਥਾ ਤੇ ਰੁਚ੍ਚਤੀ’’ਤਿ ਵੁਤ੍ਤੋ ਆਗਚ੍ਛਤਿ, ਅਯਂ ਵਿਸ੍ਸਟ੍ਠਦੂਤੋ ਨਾਮ. ਉਦ੍ਦੇਸਪਤ੍ਤਂ ਵਾ ਪਟਿਪਾਟਿਪਤ੍ਤਂ ਵਾ ਪੁਗ੍ਗਲਿਕਪਤ੍ਤਂ ਵਾ ਯਂ ਇਚ੍ਛਤਿ, ਤਂ ਏਤਸ੍ਸ ਦਾਤਬ੍ਬਂ. ਏਕੋ ਬਾਲੋ ਅਬ੍ਯਤ੍ਤੋ ‘‘ਉਦ੍ਦੇਸਪਤ੍ਤਂ ਆਹਰਾ’’ਤਿ ਪੇਸਿਤੋ ਵਤ੍ਤੁਂ ਨ ਜਾਨਾਤਿ, ਤੁਣ੍ਹੀਭੂਤੋ ਤਿਟ੍ਠਤਿ, ਸੋ ‘‘ਕਸ੍ਸ ਸਨ੍ਤਿਕਂ ਆਗਤੋਸੀ’’ਤਿ ਵਾ ‘‘ਕਸ੍ਸ ਪਤ੍ਤਂ ਹਰਿਸ੍ਸਸੀ’’ਤਿ ਵਾ ਨ ਵਤ੍ਤਬ੍ਬੋ. ਏਵਞ੍ਹਿ ਵੁਤ੍ਤੋ ਪੁਚ੍ਛਾਸਭਾਗੇਨ ‘‘ਤੁਮ੍ਹਾਕਂ ਸਨ੍ਤਿਕਂ ਆਗਤੋਮ੍ਹੀ’’ਤਿ ਵਾ ‘‘ਤੁਮ੍ਹਾਕਂ ਪਤ੍ਤਂ ਹਰਿਸ੍ਸਾਮੀ’’ਤਿ ਵਾ ਵਦੇਯ੍ਯ. ਤਤੋ ਤਂ ਭਿਕ੍ਖੁਂ ਅਞ੍ਞੇ ਭਿਕ੍ਖੂ ਜਿਗੁਚ੍ਛਨ੍ਤਾ ਨ ਓਲੋਕੇਯ੍ਯੁਂ, ‘‘ਕੁਹਿਂ ਗਚ੍ਛਸਿ, ਕਿਂ ਕਰੋਨ੍ਤੋ ਆਹਿਣ੍ਡਸੀ’’ਤਿ ਪਨ ਵਤ੍ਤਬ੍ਬੋ. ਤਸ੍ਸ ‘‘ਉਦ੍ਦੇਸਪਤ੍ਤਤ੍ਥਾਯ ਆਗਤੋਮ੍ਹੀ’’ਤਿ ਵਦਨ੍ਤਸ੍ਸ ਗਾਹੇਤ੍ਵਾ ਪਤ੍ਤੋ ਦਾਤਬ੍ਬੋ.

ਏਕਾ ਕੂਟਟ੍ਠਿਤਿਕਾ ਨਾਮ ਹੋਤਿ. ਰਞ੍ਞੋ ਵਾ ਰਾਜਮਹਾਮਤ੍ਤਸ੍ਸ ਵਾ ਗੇਹੇ ਅਤਿਪਣੀਤਾਨਿ ਅਟ੍ਠ ਉਦ੍ਦੇਸਭਤ੍ਤਾਨਿ ਨਿਚ੍ਚਂ ਦੀਯਨ੍ਤਿ, ਤਾਨਿ ਏਕਚਾਰਿਕਭਤ੍ਤਾਨਿ ਕਤ੍ਵਾ ਭਿਕ੍ਖੂ ਵਿਸੁਂ ਠਿਤਿਕਾਯ ਪਰਿਭੁਞ੍ਜਨ੍ਤਿ. ਏਕਚ੍ਚੇ ਭਿਕ੍ਖੂ ‘‘ਸ੍ਵੇ ਦਾਨਿ ਅਮ੍ਹਾਕਂ ਪਾਪੁਣਿਸ੍ਸਨ੍ਤੀ’’ਤਿ ਅਤ੍ਤਨੋ ਠਿਤਿਕਂ ਸਲ੍ਲਕ੍ਖੇਤ੍ਵਾ ਗਤਾ. ਤੇਸੁ ਅਨਾਗਤੇਸੁਯੇਵ ਅਞ੍ਞੇ ਆਗਨ੍ਤੁਕਾ ਭਿਕ੍ਖੂ ਆਗਨ੍ਤ੍ਵਾ ਆਸਨਸਾਲਾਯ ਨਿਸੀਦਨ੍ਤਿ. ਤਙ੍ਖਣਞ੍ਞੇਵ ਰਾਜਪੁਰਿਸਾ ਆਗਨ੍ਤ੍ਵਾ ‘‘ਪਣੀਤਭਤ੍ਤਪਤ੍ਤੇ ਦੇਥਾ’’ਤਿ ਵਦਨ੍ਤਿ, ਆਗਨ੍ਤੁਕਾ ਠਿਤਿਕਂ ਅਜਾਨਨ੍ਤਾ ਗਾਹੇਨ੍ਤਿ, ਤਙ੍ਖਣਞ੍ਞੇਵ ਚ ਠਿਤਿਕਂ ਜਾਨਨਕਭਿਕ੍ਖੂ ਆਗਨ੍ਤ੍ਵਾ ‘‘ਕਿਂ ਗਾਹੇਥਾ’’ਤਿ ਵਦਨ੍ਤਿ. ਰਾਜਗੇਹੇ ਪਣੀਤਭਤ੍ਤਨ੍ਤਿ. ਕਤਿਵਸ੍ਸਤੋ ਪਟ੍ਠਾਯਾਤਿ. ਏਤ੍ਤਕਵਸ੍ਸਤੋ ਨਾਮਾਤਿ. ‘‘ਮਾ ਗਾਹੇਥਾ’’ਤਿ ਨਿਵਾਰੇਤ੍ਵਾ ਠਿਤਿਕਾਯ ਗਾਹੇਤਬ੍ਬਂ. ਗਾਹਿਤੇ ਆਗਤੇਹਿਪਿ, ਪਤ੍ਤਦਾਨਕਾਲੇ ਆਗਤੇਹਿਪਿ, ਦਿਨ੍ਨਕਾਲੇ ਆਗਤੇਹਿਪਿ, ਰਾਜਗੇਹਤੋ ਪਤ੍ਤੇ ਪੂਰੇਤ੍ਵਾ ਆਹਟਕਾਲੇ ਆਗਤੇਹਿਪਿ, ਰਾਜਾ ‘‘ਅਜ੍ਜ ਭਿਕ੍ਖੂਯੇਵ ਆਗਚ੍ਛਨ੍ਤੂ’’ਤਿ ਪੇਸੇਤ੍ਵਾ ਭਿਕ੍ਖੂਨਂਯੇਵ ਹਤ੍ਥੇ ਪਿਣ੍ਡਪਾਤਂ ਦੇਤਿ, ਏਵਂ ਦਿਨ੍ਨਂ ਪਿਣ੍ਡਪਾਤਂ ਗਹੇਤ੍ਵਾ ਆਗਤਕਾਲੇ ਆਗਤੇਹਿਪਿ ਠਿਤਿਕਂ ਜਾਨਨਕਭਿਕ੍ਖੂਹਿ ‘‘ਮਾ ਭੁਞ੍ਜਿਤ੍ਥਾ’’ਤਿ ਵਾਰੇਤ੍ਵਾ ਠਿਤਿਕਾਯਮੇਵ ਗਾਹੇਤਬ੍ਬਂ.

ਅਥ ਨੇ ਰਾਜਾ ਭੋਜੇਤ੍ਵਾ ਪਤ੍ਤੇਪਿ ਨੇਸਂ ਪੂਰੇਤ੍ਵਾ ਦੇਤਿ, ਯਂ ਆਹਟਂ, ਤਂ ਠਿਤਿਕਾਯ ਗਾਹੇਤਬ੍ਬਂ. ਸਚੇ ਪਨ ‘‘ਮਾ ਤੁਚ੍ਛਹਤ੍ਥਾ ਗਚ੍ਛਨ੍ਤੂ’’ਤਿ ਥੋਕਮੇਵ ਪਤ੍ਤੇਸੁ ਪਕ੍ਖਿਤ੍ਤਂ ਹੋਤਿ, ਤਂ ਨ ਗਾਹੇਤਬ੍ਬਂ. ‘‘ਅਥ ਭੁਞ੍ਜਿਤ੍ਵਾ ਤੁਚ੍ਛਪਤ੍ਤਾਵ ਆਗਚ੍ਛਨ੍ਤਿ, ਯਂ ਤੇਹਿ ਭੁਤ੍ਤਂ, ਤਂ ਨੇਸਂ ਗੀਵਾ ਹੋਤੀ’’ਤਿ ਮਹਾਸੁਮਤ੍ਥੇਰੋ ਆਹ. ਮਹਾਪਦੁਮਤ੍ਥੇਰੋ ਪਨਾਹ ‘‘ਗੀਵਾਕਿਚ੍ਚਂ ਏਤ੍ਥ ਨਤ੍ਥਿ, ਠਿਤਿਕਂ ਪਨ ਅਜਾਨਨ੍ਤੇਹਿ ਯਾਵ ਜਾਨਨਕਾ ਆਗਚ੍ਛਨ੍ਤਿ, ਤਾਵ ਨਿਸੀਦਿਤਬ੍ਬਂ ਸਿਯਾ, ਏਵਂ ਸਨ੍ਤੇਪਿ ਭਿਕ੍ਖੂਹਿ ਭੁਤ੍ਤਂ ਸੁਭੁਤ੍ਤਂ, ਇਦਾਨਿ ਪਤ੍ਤਟ੍ਠਾਨੇਨ ਗਾਹੇਤਬ੍ਬ’’ਨ੍ਤਿ.

ਏਕੋ ਤਿਚੀਵਰਪਰਿਵਾਰੋ ਸਤਗ੍ਘਨਕੋ ਪਿਣ੍ਡਪਾਤੋ ਅਵਸ੍ਸਿਕਸ੍ਸ ਭਿਕ੍ਖੁਨੋ ਪਤ੍ਤੋ, ਵਿਹਾਰੇ ਚ ‘‘ਏਵਰੂਪੋ ਪਿਣ੍ਡਪਾਤੋ ਅਵਸ੍ਸਿਕਸ੍ਸ ਪਤ੍ਤੋ’’ਤਿ ਲਿਖਿਤ੍ਵਾ ਠਪੇਸੁਂ. ਅਥ ਸਟ੍ਠਿਵਸ੍ਸਚ੍ਚਯੇਨ ਅਞ੍ਞੋ ਤਥਾਰੂਪੋ ਪਿਣ੍ਡਪਾਤੋ ਉਪ੍ਪਨ੍ਨੋ, ਅਯਂ ਕਿਂ ਅਵਸ੍ਸਿਕਠਿਤਿਕਾਯ ਗਾਹੇਤਬ੍ਬੋ, ਉਦਾਹੁ ਸਟ੍ਠਿਵਸ੍ਸਠਿਤਿਕਾਯਾਤਿ? ਸਟ੍ਠਿਵਸ੍ਸਠਿਤਿਕਾਯਾਤਿ ਵੁਤ੍ਤਂ. ਅਯਞ੍ਹਿ ਭਿਕ੍ਖੁਠਿਤਿਕਂ ਗਹੇਤ੍ਵਾਯੇਵ ਵਡ੍ਢਿਤੋਤਿ. ਏਕੋ ਉਦ੍ਦੇਸਭਤ੍ਤਂ ਭੁਞ੍ਜਿਤ੍ਵਾ ਸਾਮਣੇਰੋ ਜਾਤੋ, ਪੁਨ ਤਂ ਭਤ੍ਤਂ ਸਾਮਣੇਰਠਿਤਿਕਾਯ ਪਤ੍ਤਂ ਗਣ੍ਹਿਤੁਂ ਲਭਤਿ. ਅਯਂ ਕਿਰ ਅਨ੍ਤਰਾਭਟ੍ਠਕੋ ਨਾਮ. ਯੋ ਪਨ ਪਰਿਪੁਣ੍ਣਵਸ੍ਸੋ ਸਾਮਣੇਰੋ ‘‘ਸ੍ਵੇ ਉਦ੍ਦੇਸਭਤ੍ਤਂ ਲਭਿਸ੍ਸਤੀ’’ਤਿ ਅਜ੍ਜੇਵ ਉਪਸਮ੍ਪਜ੍ਜਤਿ, ਅਤਿਕ੍ਕਨ੍ਤਾ ਤਸ੍ਸ ਠਿਤਿਕਾ. ਏਕਸ੍ਸ ਭਿਕ੍ਖੁਨੋ ਉਦ੍ਦੇਸਭਤ੍ਤਂ ਪਤ੍ਤਂ, ਪਤ੍ਤੋ ਚਸ੍ਸ ਨ ਤੁਚ੍ਛੋ ਹੋਤਿ, ਸੋ ਅਞ੍ਞਸ੍ਸ ਸਮੀਪੇ ਨਿਸਿਨ੍ਨਸ੍ਸ ਪਤ੍ਤਂ ਦਾਪੇਤਿ, ਤਂ ਚੇ ਥੇਯ੍ਯਾਯ ਹਰਨ੍ਤਿ, ਗੀਵਾ ਹੋਤਿ. ਸਚੇ ਪਨ ਸੋ ਭਿਕ੍ਖੁ ‘‘ਮਯ੍ਹਂ ਪਤ੍ਤਂ ਦਮ੍ਮੀ’’ਤਿ ਸਯਮੇਵ ਦੇਤਿ, ਅਸ੍ਸ ਗੀਵਾ ਨ ਹੋਤਿ. ਅਥਾਪਿ ਤੇਨ ਭਤ੍ਤੇਨ ਅਨਤ੍ਥਿਕੋ ਹੁਤ੍ਵਾ ‘‘ਅਲਂ ਮਯ੍ਹਂ, ਤਵੇਤਂ ਭਤ੍ਤਂ ਦਮ੍ਮਿ, ਪਤ੍ਤਂ ਪੇਸੇਤ੍ਵਾ ਆਹਰਾਪੇਹੀ’’ਤਿ ਅਞ੍ਞਂ ਵਦਤਿ, ਯਂ ਤਤੋ ਆਹਰੀਯਤਿ, ਸਬ੍ਬਂ ਪਤ੍ਤਸਾਮਿਕਸ੍ਸ ਹੋਤਿ. ਪਤ੍ਤਂ ਚੇ ਥੇਯ੍ਯਾਯ ਹਰਨ੍ਤਿ, ਸੁਹਟੋ, ਭਤ੍ਤਸ੍ਸ ਦਿਨ੍ਨਤ੍ਤਾ ਗੀਵਾ ਨ ਹੋਤਿ.

ਵਿਹਾਰੇ ਦਸ ਭਿਕ੍ਖੂ ਹੋਨ੍ਤਿ, ਤੇਸੁ ਨਵ ਪਿਣ੍ਡਪਾਤਿਕਾ, ਏਕੋ ਸਾਦਿਯਨਕੋ, ‘‘ਦਸ ਉਦ੍ਦੇਸਪਤ੍ਤੇ ਦੇਥਾ’’ਤਿ ਵੁਤ੍ਤੇ ਪਿਣ੍ਡਪਾਤਿਕਾ ਗਹੇਤੁਂ ਨ ਇਚ੍ਛਨ੍ਤਿ. ਇਤਰੋ ਭਿਕ੍ਖੁ ‘‘ਸਬ੍ਬਾਨਿ ਮਯ੍ਹਂ ਪਾਪੁਣਨ੍ਤੀ’’ਤਿ ਗਣ੍ਹਾਤਿ, ਠਿਤਿਕਾ ਨ ਹੋਤਿ. ਏਕੇਕਂ ਚੇ ਪਾਪੇਤ੍ਵਾ ਗਣ੍ਹਾਤਿ, ਠਿਤਿਕਾ ਤਿਟ੍ਠਤਿ. ਏਵਂ ਗਾਹੇਤ੍ਵਾ ਦਸਹਿਪਿ ਪਤ੍ਤੇਹਿ ਆਹਰਾਪੇਤ੍ਵਾ ‘‘ਭਨ੍ਤੇ, ਮਯ੍ਹਂ ਸਙ੍ਗਹਂ ਕਰੋਥਾ’’ਤਿ ਨਵ ਪਤ੍ਤੇ ਪਿਣ੍ਡਪਾਤਿਕਾਨਂ ਦੇਤਿ, ਭਿਕ੍ਖੁਦਤ੍ਤਿਯਂ ਨਾਮੇਤਂ, ਗਹੇਤੁਂ ਵਟ੍ਟਤਿ. ਸਚੇ ਸੋ ਉਪਾਸਕੋ ‘‘ਭਨ੍ਤੇ, ਘਰਂ ਆਗਨ੍ਤਬ੍ਬ’’ਨ੍ਤਿ ਵਦਤਿ, ਸੋ ਚ ਭਿਕ੍ਖੁ ਤੇ ਭਿਕ੍ਖੂ ‘‘ਏਥ, ਭਨ੍ਤੇ, ਮਯ੍ਹਂ ਸਹਾਯਾ ਹੋਥਾ’’ਤਿ ਤਸ੍ਸ ਘਰਂ ਗਚ੍ਛਤਿ, ਯਂ ਤਤ੍ਥ ਲਭਤਿ, ਸਬ੍ਬਂ ਤਸ੍ਸੇਵ ਹੋਤਿ, ਇਤਰੇ ਤੇਨ ਦਿਨ੍ਨਂ ਲਭਨ੍ਤਿ. ਅਥ ਨੇਸਂ ਘਰੇਯੇਵ ਨਿਸੀਦਾਪੇਤ੍ਵਾ ਦਕ੍ਖਿਣੋਦਕਂ ਦਤ੍ਵਾ ਯਾਗੁਖਜ੍ਜਕਾਦੀਨਿ ਦੇਨ੍ਤਿ ‘‘ਭਨ੍ਤੇ, ਯਂ ਮਨੁਸ੍ਸਾ ਦੇਨ੍ਤਿ, ਤਂ ਗਣ੍ਹਥਾ’’ਤਿ, ਤਸ੍ਸ ਭਿਕ੍ਖੁਨੋ ਵਚਨੇਨੇਵ ਇਤਰੇਸਂ ਵਟ੍ਟਤਿ. ਭੁਤ੍ਤਾਵੀਨਂ ਪਤ੍ਤੇ ਪੂਰੇਤ੍ਵਾ ਗਣ੍ਹਿਤ੍ਵਾ ਗਮਨਤ੍ਥਾਯ ਦੇਨ੍ਤਿ, ਸਬ੍ਬਂ ਤਸ੍ਸੇਵ ਭਿਕ੍ਖੁਨੋ ਹੋਤਿ, ਤੇਨ ਦਿਨ੍ਨਂ ਇਤਰੇਸਂ ਵਟ੍ਟਤਿ. ਯਦਿ ਪਨ ਤੇ ਵਿਹਾਰੇਯੇਵ ਤੇਨ ਭਿਕ੍ਖੁਨਾ ‘‘ਭਨ੍ਤੇ, ਮਯ੍ਹਂ ਭਿਕ੍ਖਂ ਗਣ੍ਹਥ, ਮਨੁਸ੍ਸਾਨਂ ਵਚਨਂ ਕਾਤੁਂ ਵਟ੍ਟਤੀ’’ਤਿ ਵੁਤ੍ਤਾ ਗਚ੍ਛਨ੍ਤਿ, ਤਤ੍ਥ ਯਂ ਭੁਞ੍ਜਨ੍ਤਿ ਚੇਵ ਨੀਹਰਨ੍ਤਿ ਚ, ਸਬ੍ਬਂ ਤਂ ਤੇਸਂਯੇਵ ਸਨ੍ਤਕਂ. ਅਥਾਪਿ ‘‘ਮਯ੍ਹਂ ਭਿਕ੍ਖਂ ਗਣ੍ਹਥਾ’’ਤਿ ਅਵੁਤ੍ਤਾ ‘‘ਮਨੁਸ੍ਸਾਨਂ ਵਚਨਂ ਕਾਤੁਂ ਵਟ੍ਟਤੀ’’ਤਿ ਗਚ੍ਛਨ੍ਤਿ, ਤਤ੍ਰ ਚੇ ਏਕਸ੍ਸ ਮਧੁਰੇਨ ਸਰੇਨ ਅਨੁਮੋਦਨਂ ਕਰੋਨ੍ਤਸ੍ਸ ਸੁਤ੍ਵਾ ਥੇਰਾਨਞ੍ਚ ਉਪਸਮੇ ਪਸੀਦਿਤ੍ਵਾ ਬਹੁਂ ਸਮਣਪਰਿਕ੍ਖਾਰਂ ਦੇਨ੍ਤਿ, ਅਯਂ ਥੇਰੇਸੁ ਪਸਾਦੇਨ ਉਪ੍ਪਨ੍ਨੋ ਅਕਤਭਾਗੋ ਨਾਮ, ਤਸ੍ਮਾ ਸਬ੍ਬੇਸਂ ਪਾਪੁਣਾਤਿ.

ਏਕੋ ਸਙ੍ਘਤੋ ਉਦ੍ਦਿਸਾਪੇਤ੍ਵਾ ਠਿਤਿਕਾਯ ਗਾਹਿਤਪਤ੍ਤਂ ਹਰਿਤ੍ਵਾ ਪਣੀਤਸ੍ਸ ਖਾਦਨੀਯਭੋਜਨੀਯਸ੍ਸ ਪੂਰੇਤ੍ਵਾ ਆਹਰਿਤ੍ਵਾ ‘‘ਇਮਂ, ਭਨ੍ਤੇ, ਸਬ੍ਬੋ ਸਙ੍ਘੋ ਪਰਿਭੁਞ੍ਜਤੂ’’ਤਿ ਦੇਤਿ, ਸਬ੍ਬੇਹਿ ਭਾਜੇਤ੍ਵਾ ਪਰਿਭੁਞ੍ਜਿਤਬ੍ਬਂ. ਪਤ੍ਤਸਾਮਿਕਸ੍ਸ ਪਨ ਅਤਿਕ੍ਕਨ੍ਤਮ੍ਪਿ ਠਿਤਿਕਂ ਠਪੇਤ੍ਵਾ ਅਞ੍ਞਂ ਉਦ੍ਦੇਸਭਤ੍ਤਂ ਦਾਤਬ੍ਬਂ. ਅਥ ਪਠਮਂਯੇਵ ‘‘ਸਬ੍ਬਂ ਸਙ੍ਘਿਕਪਤ੍ਤਂ ਦੇਥਾ’’ਤਿ ਵਦਤਿ, ਏਕਸ੍ਸ ਲਜ੍ਜਿਭਿਕ੍ਖੁਨੋ ਸਨ੍ਤਕੋ ਪਤ੍ਤੋ ਦਾਤਬ੍ਬੋ. ਆਹਰਿਤ੍ਵਾ ਚ ‘‘ਸਬ੍ਬੋ ਸਙ੍ਘੋ ਪਰਿਭੁਞ੍ਜਤੂ’’ਤਿ ਵੁਤ੍ਤੇ ਭਾਜੇਤ੍ਵਾ ਪਰਿਭੁਞ੍ਜਿਤਬ੍ਬਂ. ਏਕੋ ਪਾਤਿਯਾ ਭਤ੍ਤਂ ਆਹਰਿਤ੍ਵਾ ‘‘ਸਙ੍ਘੁਦ੍ਦੇਸਂ ਦਮ੍ਮੀ’’ਤਿ ਵਦਤਿ, ਏਕੇਕਂ ਆਲੋਪਂ ਅਦਤ੍ਵਾ ਠਿਤਿਕਾਯ ਏਕਸ੍ਸ ਯਾਪਨਮਤ੍ਤਂ ਕਤ੍ਵਾ ਦਾਤਬ੍ਬਂ. ਅਥ ਸੋ ਭਤ੍ਤਂ ਆਹਰਿਤ੍ਵਾ ਕਿਞ੍ਚਿ ਵਤ੍ਤੁਂ ਅਜਾਨਨ੍ਤੋ ਤੁਣ੍ਹੀਭੂਤੋ ਅਚ੍ਛਤਿ, ‘‘ਕਸ੍ਸ ਤੇ ਆਨੀਤਂ, ਕਸ੍ਸ ਦਾਤੁਕਾਮੋਸੀ’’ਤਿ ਨ ਵਤ੍ਤਬ੍ਬਂ. ਪੁਚ੍ਛਾਸਭਾਗੇਨ ਹਿ ‘‘ਤੁਮ੍ਹਾਕਂ ਆਨੀਤਂ, ਤੁਮ੍ਹਾਕਂ ਦਾਤੁਕਾਮੋਮ੍ਹੀ’’ਤਿ ਵਦੇਯ੍ਯ, ਤਤੋ ਤਂ ਭਿਕ੍ਖੁਂ ਅਞ੍ਞੇ ਭਿਕ੍ਖੂ ਜਿਗੁਚ੍ਛਨ੍ਤਾ ਗੀਵਂ ਪਰਿਵਤ੍ਤੇਤ੍ਵਾ ਓਲੋਕੇਤਬ੍ਬਮ੍ਪਿ ਨ ਮਞ੍ਞੇਯ੍ਯੁਂ. ਸਚੇ ਪਨ ‘‘ਕੁਹਿਂ ਯਾਸਿ, ਕਿਂ ਕਰੋਨ੍ਤੋ ਆਹਿਣ੍ਡਸੀ’’ਤਿ ਵੁਤ੍ਤੇ ‘‘ਉਦ੍ਦੇਸਭਤ੍ਤਂ ਗਹੇਤ੍ਵਾ ਆਗਤੋਮ੍ਹੀ’’ਤਿ ਵਦਤਿ, ਏਕੇਨ ਲਜ੍ਜਿਭਿਕ੍ਖੁਨਾ ਠਿਤਿਕਾਯ ਗਾਹੇਤਬ੍ਬਂ. ਸਚੇ ਆਭਤਂ ਬਹੁ ਹੋਤਿ, ਸਬ੍ਬੇਸਂ ਪਹੋਤਿ, ਠਿਤਿਕਾਕਿਚ੍ਚਂ ਨਤ੍ਥਿ. ਥੇਰਾਸਨਤੋ ਪਟ੍ਠਾਯ ਪਤ੍ਤਂ ਪੂਰੇਤ੍ਵਾ ਦਾਤਬ੍ਬਂ.

‘‘ਸਙ੍ਘੁਦ੍ਦੇਸਪਤ੍ਤਂ ਦੇਥਾ’’ਤਿ ਵੁਤ੍ਤੇ ‘‘ਕਿਂ ਆਹਰਿਸ੍ਸਸੀ’’ਤਿ ਅਵਤ੍ਵਾ ਪਕਤਿਠਿਤਿਕਾਯ ਏਵ ਗਾਹੇਤਬ੍ਬਂ. ਯੋ ਪਨ ਪਾਯਾਸੋ ਵਾ ਰਸਪਿਣ੍ਡਪਾਤੋ ਵਾ ਨਿਚ੍ਚਂ ਲਬ੍ਭਤਿ, ਏਵਰੂਪਾਨਂ ਪਣੀਤਭੋਜਨਾਨਂ ਆਵੇਣਿਕਾ ਠਿਤਿਕਾ ਕਾਤਬ੍ਬਾ, ਤਥਾ ਸਪਰਿਵਾਰਾਯ ਯਾਗੁਯਾ ਮਹਗ੍ਘਾਨਂ ਫਲਾਨਂ ਪਣੀਤਾਨਞ੍ਚ ਖਜ੍ਜਕਾਨਂ. ਪਕਤਿਭਤ੍ਤਯਾਗੁਫਲਖਜ੍ਜਕਾਨਂ ਏਕਾਵ ਠਿਤਿਕਾ ਕਾਤਬ੍ਬਾ. ‘‘ਸਪ੍ਪਿਂ ਆਹਰਿਸ੍ਸਾਮੀ’’ਤਿ ਵੁਤ੍ਤੇ ਸਬ੍ਬਸਪ੍ਪੀਨਂ ਏਕਾਵ ਠਿਤਿਕਾ ਵਟ੍ਟਤਿ, ਤਥਾ ਸਬ੍ਬਤੇਲਾਨਂ. ‘‘ਮਧੁਂ ਆਹਰਿਸ੍ਸਾਮੀ’’ਤਿ ਵੁਤ੍ਤੇ ਪਨ ਮਧੁਨੋ ਏਕਾਵ ਠਿਤਿਕਾ ਵਟ੍ਟਤਿ, ਤਥਾ ਫਾਣਿਤਸ੍ਸ ਲਟ੍ਠਿਮਧੁਕਾਦੀਨਞ੍ਚ ਭੇਸਜ੍ਜਾਨਂ. ਸਚੇ ਪਨ ਗਨ੍ਧਮਾਲਂ ਸਙ੍ਘੁਦ੍ਦੇਸਂ ਦੇਨ੍ਤਿ, ਪਿਣ੍ਡਪਾਤਿਕਸ੍ਸ ਵਟ੍ਟਤਿ, ਨ ਵਟ੍ਟਤੀਤਿ? ਆਮਿਸਸ੍ਸੇਵ ਪਟਿਕ੍ਖਿਤ੍ਤਤ੍ਤਾ ਵਟ੍ਟਤਿ. ‘‘ਸਙ੍ਘਂ ਉਦ੍ਦਿਸ੍ਸ ਦਿਨ੍ਨਤ੍ਤਾ ਪਨ ਨ ਗਹੇਤਬ੍ਬ’’ਨ੍ਤਿ ਵਦਨ੍ਤਿ.

ਉਦ੍ਦੇਸਭਤ੍ਤਕਥਾ ਨਿਟ੍ਠਿਤਾ.

੨੧੦. ਨਿਮਨ੍ਤਨਂ ਪੁਗ੍ਗਲਿਕਂ ਚੇ, ਸਯਮੇਵ ਇਸ੍ਸਰੋ. ਸਙ੍ਘਿਕਂ ਪਨ ਉਦ੍ਦੇਸਭਤ੍ਤੇ ਵੁਤ੍ਤਨਯੇਨੇਵ ਗਾਹੇਤਬ੍ਬਂ. ਸਚੇ ਪਨੇਤ੍ਥ ਦੂਤੋ ਬ੍ਯਤ੍ਤੋ ਹੋਤਿ, ‘‘ਭਨ੍ਤੇ, ਰਾਜਗੇਹੇ ਭਿਕ੍ਖੁਸਙ੍ਘਸ੍ਸ ਭਤ੍ਤਂ ਗਣ੍ਹਥਾ’’ਤਿ ਅਵਤ੍ਵਾ ‘‘ਭਿਕ੍ਖਂ ਗਣ੍ਹਥਾ’’ਤਿ ਵਦਤਿ, ਪਿਣ੍ਡਪਾਤਿਕਾਨਮ੍ਪਿ ਵਟ੍ਟਤਿ. ਅਥ ਦੂਤੋ ਅਬ੍ਯਤ੍ਤੋ ‘‘ਭਤ੍ਤਂ ਗਣ੍ਹਥਾ’’ਤਿ ਵਦਤਿ, ਭਤ੍ਤੁਦ੍ਦੇਸਕੋ ਬ੍ਯਤ੍ਤੋ ‘‘ਭਤ੍ਤ’’ਨ੍ਤਿ ਅਵਤ੍ਵਾ ‘‘ਭਨ੍ਤੇ, ਤੁਮ੍ਹੇ ਯਾਥ, ਤੁਮ੍ਹੇ ਯਾਥਾ’’ਤਿ ਵਦਤਿ, ਏਵਮ੍ਪਿ ਪਿਣ੍ਡਪਾਤਿਕਾਨਮ੍ਪਿ ਵਟ੍ਟਤਿ, ‘‘ਤੁਮ੍ਹਾਕਂ, ਭਨ੍ਤੇ, ਪਟਿਪਾਟਿਯਾ ਭਤ੍ਤਂ ਪਾਪੁਣਾਤੀ’’ਤਿ ਵੁਤ੍ਤੇ ਪਨ ਨ ਵਟ੍ਟਤਿ. ਸਚੇ ਨਿਮਨ੍ਤਿਤੁਂ ਆਗਤਮਨੁਸ੍ਸੋ ਆਸਨਸਾਲਂ ਪਵਿਸਿਤ੍ਵਾ ‘‘ਅਟ੍ਠ ਭਿਕ੍ਖੂ ਦੇਥਾ’’ਤਿ ਵਾ ‘‘ਅਟ੍ਠ ਪਤ੍ਤੇ ਦੇਥਾ’’ਤਿ ਵਾ ਵਦਤਿ, ਏਵਮ੍ਪਿ ਪਿਣ੍ਡਪਾਤਿਕਾਨਂ ਵਟ੍ਟਤਿ, ‘‘ਤੁਮ੍ਹੇ ਚ ਤੁਮ੍ਹੇ ਚ ਗਚ੍ਛਥਾ’’ਤਿ ਵਤ੍ਤਬ੍ਬਂ. ਸਚੇ ‘‘ਅਟ੍ਠ ਭਿਕ੍ਖੂ ਦੇਥ, ਭਤ੍ਤਂ ਗਣ੍ਹਥ, ਅਟ੍ਠ ਪਤ੍ਤੇ ਦੇਥ, ਭਤ੍ਤਂ ਗਣ੍ਹਥਾ’’ਤਿ ਵਾ ਵਦਤਿ, ਪਟਿਪਾਟਿਯਾ ਗਾਹੇਤਬ੍ਬਂ. ਗਾਹੇਨ੍ਤੇਨ ਪਨ ਵਿਚ੍ਛਿਨ੍ਦਿਤ੍ਵਾ ‘‘ਭਤ੍ਤ’’ਨ੍ਤਿ ਅਵਦਨ੍ਤੇਨ ‘‘ਤੁਮ੍ਹੇ ਚ ਤੁਮ੍ਹੇ ਚ ਗਚ੍ਛਥਾ’’ਤਿ ਵੁਤ੍ਤੇ ਪਿਣ੍ਡਪਾਤਿਕਾਨਂ ਵਟ੍ਟਤਿ. ‘‘ਭਨ੍ਤੇ, ਤੁਮ੍ਹਾਕਂ ਪਤ੍ਤਂ ਦੇਥ, ਤੁਮ੍ਹੇ ਏਥਾ’’ਤਿ ਵੁਤ੍ਤੇ ਪਨ ‘‘ਸਾਧੁ ਉਪਾਸਕਾ’’ਤਿ ਗਨ੍ਤਬ੍ਬਂ. ‘‘ਸਙ੍ਘਤੋ ਉਦ੍ਦਿਸਿਤ੍ਵਾ ਤੁਮ੍ਹੇ ਏਥਾ’’ਤਿ ਵੁਤ੍ਤੇਪਿ ਠਿਤਿਕਾਯ ਗਾਹੇਤਬ੍ਬਂ.

ਨਿਮਨ੍ਤਨਭਤ੍ਤਘਰਤੋ ਪਨ ਪਤ੍ਤਤ੍ਥਾਯ ਆਗਤਸ੍ਸ ਉਦ੍ਦੇਸਭਤ੍ਤੇ ਵੁਤ੍ਤਨਯੇਨੇਵ ਠਿਤਿਕਾਯ ਪਤ੍ਤੋ ਦਾਤਬ੍ਬੋ. ਏਕੋ ‘‘ਸਙ੍ਘਤੋ ਪਟਿਪਾਟਿਯਾ ਪਤ੍ਤ’’ਨ੍ਤਿ ਅਵਤ੍ਵਾ ਕੇਵਲਂ ‘‘ਏਕਂ ਪਤ੍ਤਂ ਦੇਥਾ’’ਤਿ ਵਤ੍ਵਾ ਅਗ੍ਗਾਹਿਤੇਯੇਵ ਪਤ੍ਤੇ ਯਸ੍ਸ ਕਸ੍ਸਚਿ ਪਤ੍ਤਂ ਗਹੇਤ੍ਵਾ ਪੂਰੇਤ੍ਵਾ ਆਹਰਤਿ, ਤਂ ਪਤ੍ਤਸਾਮਿਕਸ੍ਸੇਵ ਹੋਤਿ. ਉਦ੍ਦੇਸਭਤ੍ਤੇ ਵਿਯ ਠਿਤਿਕਾਯ ਨ ਗਾਹੇਤਬ੍ਬਂ. ਇਧਾਪਿ ਯੋ ਆਗਨ੍ਤ੍ਵਾ ਤੁਣ੍ਹੀਭੂਤੋ ਤਿਟ੍ਠਤਿ, ਸੋ ‘‘ਕਸ੍ਸ ਸਨ੍ਤਿਕਂ ਆਗਤੋਸੀ’’ਤਿ ਵਾ ‘‘ਕਸ੍ਸ ਪਤ੍ਤਂ ਹਰਿਸ੍ਸਸੀ’’ਤਿ ਵਾ ਨ ਵਤ੍ਤਬ੍ਬੋ. ਪੁਚ੍ਛਾਸਭਾਗੇਨ ਹਿ ‘‘ਤੁਮ੍ਹਾਕਂ ਸਨ੍ਤਿਕਂ ਆਗਤੋ, ਤੁਮ੍ਹਾਕਂ ਪਤ੍ਤਂ ਹਰਿਸ੍ਸਾਮੀ’’ਤਿ ਵਦੇਯ੍ਯ, ਤਤੋ ਸੋ ਭਿਕ੍ਖੁ ਭਿਕ੍ਖੂਹਿ ਜਿਗੁਚ੍ਛਨੀਯੋ ਅਸ੍ਸ. ‘‘ਕੁਹਿਂ ਗਚ੍ਛਸਿ, ਕਿਂ ਕਰੋਨ੍ਤੋ ਆਹਿਣ੍ਡਸੀ’’ਤਿ ਪਨ ਵੁਤ੍ਤੇ ‘‘ਤਸ੍ਸ ਪਤ੍ਤਤ੍ਥਾਯ ਆਗਤੋਮ੍ਹੀ’’ਤਿ ਵਦਨ੍ਤਸ੍ਸ ਪਟਿਪਾਟਿਭਤ੍ਤਟ੍ਠਿਤਿਕਾਯ ਗਹੇਤ੍ਵਾ ਪਤ੍ਤੋ ਦਾਤਬ੍ਬੋ. ‘‘ਭਤ੍ਤਹਰਣਪਤ੍ਤਂ ਦੇਥਾ’’ਤਿ ਵੁਤ੍ਤੇਪਿ ਪਟਿਪਾਟਿਭਤ੍ਤਟ੍ਠਿਤਿਕਾਯ ਏਵ ਦਾਤਬ੍ਬੋ. ਸਚੇ ਆਹਰਿਤ੍ਵਾ ‘‘ਸਬ੍ਬੋ ਸਙ੍ਘੋ ਭੁਞ੍ਜਤੂ’’ਤਿ ਵਦਤਿ, ਭਾਜੇਤ੍ਵਾ ਭੁਞ੍ਜਿਤਬ੍ਬਂ. ਪਤ੍ਤਸਾਮਿਕਸ੍ਸ ਅਤਿਕ੍ਕਨ੍ਤਮ੍ਪਿ ਠਿਤਿਕਂ ਠਪੇਤ੍ਵਾ ਅਞ੍ਞਂ ਪਟਿਪਾਟਿਭਤ੍ਤਂ ਗਾਹੇਤਬ੍ਬਂ.

ਏਕੋ ਪਾਤਿਯਾ ਭਤ੍ਤਂ ਆਹਰਿਤ੍ਵਾ ‘‘ਸਙ੍ਘਸ੍ਸ ਦਮ੍ਮੀ’’ਤਿ ਵਦਤਿ, ਆਲੋਪਭਤ੍ਤਟ੍ਠਿਤਿਕਤੋ ਪਟ੍ਠਾਯ ਆਲੋਪਸਙ੍ਖੇਪੇਨ ਭਾਜੇਤਬ੍ਬਂ. ਸਚੇ ਪਨ ਤੁਣ੍ਹੀਭੂਤੋ ਅਚ੍ਛਤਿ, ‘‘ਕਸ੍ਸ ਤੇ ਆਭਤਂ, ਕਸ੍ਸ ਦਾਤੁਕਾਮੋਸੀ’’ਤਿ ਨ ਵਤ੍ਤਬ੍ਬੋ. ਸਚੇ ਪਨ ‘‘ਕੁਹਿਂ ਗਚ੍ਛਸਿ, ਕਿਂ ਕਰੋਨ੍ਤੋ ਆਹਿਣ੍ਡਸੀ’’ਤਿ ਵੁਤ੍ਤੇ ਪਨ ‘‘ਸਙ੍ਘਸ੍ਸ ਮੇ ਭਤ੍ਤਂ ਆਭਤਂ, ਥੇਰਾਨਂ ਮੇ ਭਤ੍ਤਂ ਆਭਤ’’ਨ੍ਤਿ ਵਦਤਿ, ਗਹੇਤ੍ਵਾ ਆਲੋਪਭਤ੍ਤਟ੍ਠਿਤਿਕਾਯ ਭਾਜੇਤਬ੍ਬਂ. ਸਚੇ ਪਨ ਏਵਂ ਆਭਤਂ ਭਤ੍ਤਂ ਬਹੁ ਹੋਤਿ, ਸਕਲਸਙ੍ਘਸ੍ਸ ਪਹੋਤਿ, ਅਭਿਹਟਭਿਕ੍ਖਾ ਨਾਮ, ਪਿਣ੍ਡਪਾਤਿਕਾਨਮ੍ਪਿ ਵਟ੍ਟਤਿ, ਠਿਤਿਕਾਪੁਚ੍ਛਨਕਿਚ੍ਚਂ ਨਤ੍ਥਿ, ਥੇਰਾਸਨਤੋ ਪਟ੍ਠਾਯ ਪਤ੍ਤਂ ਪੂਰੇਤ੍ਵਾ ਦਾਤਬ੍ਬਂ.

ਉਪਾਸਕੋ ਸਙ੍ਘਤ੍ਥੇਰਸ੍ਸ ਵਾ ਗਨ੍ਥਧੁਤਙ੍ਗਵਸੇਨ ਅਭਿਞ੍ਞਾਤਸ੍ਸ ਵਾ ਭਤ੍ਤੁਦ੍ਦੇਸਕਸ੍ਸ ਵਾ ਪਹਿਣਤਿ ‘‘ਅਮ੍ਹਾਕਂ ਭਤ੍ਤਗਹਣਤ੍ਥਾਯ ਅਟ੍ਠ ਭਿਕ੍ਖੂ ਗਹੇਤ੍ਵਾ ਆਗਚ੍ਛਥਾ’’ਤਿ, ਸਚੇਪਿ ਞਾਤਿਉਪਟ੍ਠਾਕੇਹਿ ਪੇਸਿਤਂ ਹੋਤਿ, ਇਮੇ ਤਯੋ ਜਨਾ ਪੁਚ੍ਛਿਤੁਂ ਨ ਲਭਨ੍ਤਿ, ਆਰੁਲ਼੍ਹਾਯੇਵ ਮਾਤਿਕਂ. ਸਙ੍ਘਤੋ ਅਟ੍ਠ ਭਿਕ੍ਖੂ ਉਦ੍ਦਿਸਾਪੇਤ੍ਵਾ ਅਤ੍ਤਨਵਮੇਹਿ ਗਨ੍ਤਬ੍ਬਂ. ਕਸ੍ਮਾ? ਭਿਕ੍ਖੁਸਙ੍ਘਸ੍ਸ ਹਿ ਏਤੇ ਭਿਕ੍ਖੂ ਨਿਸ੍ਸਾਯ ਲਾਭੋ ਉਪ੍ਪਜ੍ਜਤੀਤਿ. ਗਨ੍ਥਧੁਤਙ੍ਗਾਦੀਹਿ ਪਨ ਅਨਭਿਞ੍ਞਾਤੋ ਆਵਾਸਿਕਭਿਕ੍ਖੁ ਆਪੁਚ੍ਛਿਤੁਂ ਲਭਤਿ, ਤਸ੍ਮਾ ਤੇਨ ‘‘ਕਿਂ ਸਙ੍ਘਤੋ ਗਣ੍ਹਾਮਿ, ਉਦਾਹੁ ਯੇ ਜਾਨਾਮਿ, ਤੇਹਿ ਸਦ੍ਧਿਂ ਆਗਚ੍ਛਾਮੀ’’ਤਿ ਮਾਤਿਕਂ ਆਰੋਪੇਤ੍ਵਾ ਯਥਾ ਦਾਯਕਾ ਵਦਨ੍ਤਿ, ਤਥਾ ਪਟਿਪਜ੍ਜਿਤਬ੍ਬਂ. ‘‘ਤੁਮ੍ਹਾਕਂ ਨਿਸ੍ਸਿਤਕੇ ਵਾ ਯੇ ਵਾ ਜਾਨਾਥ, ਤੇ ਗਹੇਤ੍ਵਾ ਏਥਾ’’ਤਿ ਵੁਤ੍ਤੇ ਪਨ ਯੇ ਇਚ੍ਛਨ੍ਤਿ, ਤੇਹਿ ਸਦ੍ਧਿਂ ਗਨ੍ਤੁਂ ਲਭਤਿ. ਸਚੇ ‘‘ਅਟ੍ਠ ਭਿਕ੍ਖੂ ਪਹਿਣਥਾ’’ਤਿ ਪੇਸੇਨ੍ਤਿ, ਸਙ੍ਘਤੋਵ ਪੇਸੇਤਬ੍ਬਾ. ਅਤ੍ਤਨਾ ਸਚੇ ਅਞ੍ਞਸ੍ਮਿਂ ਗਾਮੇ ਸਕ੍ਕਾ ਹੋਤਿ ਭਿਕ੍ਖਾ ਲਭਿਤੁਂ, ਅਞ੍ਞੋ ਗਾਮੋ ਗਨ੍ਤਬ੍ਬੋ. ਨ ਸਕ੍ਕਾ ਚੇ ਹੋਤਿ ਲਭਿਤੁਂ, ਸੋਯੇਵ ਗਾਮੋ ਪਿਣ੍ਡਾਯ ਪਵਿਸਿਤਬ੍ਬੋ.

ਨਿਮਨ੍ਤਿਤਭਿਕ੍ਖੂ ਆਸਨਸਾਲਾਯ ਨਿਸਿਨ੍ਨਾ ਹੋਨ੍ਤਿ, ਤਤ੍ਰ ਚੇ ਮਨੁਸ੍ਸਾ ‘‘ਪਤ੍ਤੇ ਦੇਥਾ’’ਤਿ ਆਗਚ੍ਛਨ੍ਤਿ, ਅਨਿਮਨ੍ਤਿਤੇਹਿ ਨ ਦਾਤਬ੍ਬਾ, ‘‘ਏਤੇ ਨਿਮਨ੍ਤਿਤਾ ਭਿਕ੍ਖੂ’’ਤਿ ਵਤ੍ਤਬ੍ਬਂ, ‘‘ਤੁਮ੍ਹੇਪਿ ਦੇਥਾ’’ਤਿ ਵੁਤ੍ਤੇ ਪਨ ਦਾਤੁਂ ਵਟ੍ਟਤਿ. ਉਸ੍ਸਵਾਦੀਸੁ ਮਨੁਸ੍ਸਾ ਸਯਮੇਵ ਪਰਿਵੇਣਾਨਿ ਚ ਪਧਾਨਘਰਾਨਿ ਚ ਗਨ੍ਤ੍ਵਾ ਤਿਪਿਟਕੇ ਚ ਧਮ੍ਮਕਥਿਕੇ ਚ ਭਿਕ੍ਖੁਸਤੇਨਪਿ ਸਦ੍ਧਿਂ ਨਿਮਨ੍ਤੇਨ੍ਤਿ, ਤਦਾ ਤੇਹਿ ਯੇ ਜਾਨਨ੍ਤਿ, ਤੇ ਗਹੇਤ੍ਵਾ ਗਨ੍ਤੁਂ ਵਟ੍ਟਤਿ. ਕਸ੍ਮਾ? ਨ ਹਿ ਮਹਾਭਿਕ੍ਖੁਸਙ੍ਘੇਨ ਅਤ੍ਥਿਕਾ ਮਨੁਸ੍ਸਾ ਪਰਿਵੇਣਪਧਾਨਘਰਾਨਿ ਗਚ੍ਛਨ੍ਤਿ, ਸਨ੍ਨਿਪਾਤਟ੍ਠਾਨਤੋਵ ਯਥਾਸਤ੍ਤਿ ਯਥਾਬਲਂ ਭਿਕ੍ਖੂ ਗਣ੍ਹਿਤ੍ਵਾ ਗਚ੍ਛਨ੍ਤੀਤਿ.

ਸਚੇ ਪਨ ਸਙ੍ਘਤ੍ਥੇਰੋ ਵਾ ਗਨ੍ਥਧੁਤਙ੍ਗਵਸੇਨ ਅਭਿਞ੍ਞਾਤੋ ਵਾ ਭਤ੍ਤੁਦ੍ਦੇਸਕੋ ਵਾ ਅਞ੍ਞਤ੍ਰ ਵਾ ਵਸ੍ਸਂ ਵਸਿਤ੍ਵਾ ਕਤ੍ਥਚਿ ਵਾ ਗਨ੍ਤ੍ਵਾ ਪੁਨ ਸਕਟ੍ਠਾਨਂ ਆਗਚ੍ਛਤਿ, ਮਨੁਸ੍ਸਾ ਚ ਆਗਨ੍ਤੁਕਸ੍ਸ ਸਕ੍ਕਾਰਂ ਕਰੋਨ੍ਤਿ, ਏਕਵਾਰਂ ਯੇ ਜਾਨਨ੍ਤਿ, ਤੇ ਗਹੇਤ੍ਵਾ ਗਨ੍ਤਬ੍ਬਂ. ਪਟਿਬਦ੍ਧਕਾਲਤੋ ਪਟ੍ਠਾਯ ਦੁਤਿਯਵਾਰੇ ਆਰਦ੍ਧੇ ਸਙ੍ਘਤੋਯੇਵ ਗਹੇਤ੍ਵਾ ਗਨ੍ਤਬ੍ਬਂ. ਅਭਿਨਵਆਗਨ੍ਤੁਕਾਵ ਹੁਤ੍ਵਾ ‘‘ਞਾਤੀ ਵਾ ਉਪਟ੍ਠਾਕੇ ਵਾ ਪਸ੍ਸਿਸ੍ਸਾਮੀ’’ਤਿ ਗਚ੍ਛਨ੍ਤਿ, ਤਤ੍ਰ ਚੇ ਤੇਸਂ ਞਾਤੀ ਚ ਉਪਟ੍ਠਾਕਾ ਚ ਸਕ੍ਕਾਰਂ ਕਰੋਨ੍ਤਿ, ਏਤ੍ਥ ਪਨ ਯੇ ਜਾਨਨ੍ਤਿ, ਤੇ ਗਹੇਤ੍ਵਾ ਗਨ੍ਤੁਮ੍ਪਿ ਵਟ੍ਟਤਿ. ਯੋ ਪਨ ਅਤਿਲਾਭੀ ਹੋਤਿ, ਸਕਟ੍ਠਾਨਞ੍ਚ ਆਗਨ੍ਤੁਕਟ੍ਠਾਨਞ੍ਚ ਏਕਸਦਿਸਂ, ਸਬ੍ਬਤ੍ਥ ਮਨੁਸ੍ਸਾ ਸਙ੍ਘਭਤ੍ਤਂ ਸਜ੍ਜੇਤ੍ਵਾਵ ਨਿਸੀਦਨ੍ਤਿ, ਤੇਨ ਸਙ੍ਘਤੋਵ ਗਹੇਤ੍ਵਾ ਗਨ੍ਤਬ੍ਬਨ੍ਤਿ ਅਯਂ ਨਿਮਨ੍ਤਨੇ ਵਿਸੇਸੋ. ਅਵਸੇਸੋ ਸਬ੍ਬਪਞ੍ਹੋ ਉਦ੍ਦੇਸਭਤ੍ਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਕੁਰੁਨ੍ਦਿਯਂ ਪਨ ‘‘ਅਟ੍ਠ ਮਹਾਥੇਰੇ ਦੇਥਾਤਿ ਵੁਤ੍ਤੇ ਅਟ੍ਠ ਮਹਾਥੇਰਾਵ ਦਾਤਬ੍ਬਾ’’ਤਿ ਵੁਤ੍ਤਂ. ਏਸ ਨਯੋ ਮਜ੍ਝਿਮਾਦੀਸੁ. ਸਚੇ ਪਨ ਅਵਿਸੇਸੇਤ੍ਵਾ ‘‘ਅਟ੍ਠ ਭਿਕ੍ਖੂ ਦੇਥਾ’’ਤਿ ਵਦਤਿ, ਸਙ੍ਘਤੋ ਦਾਤਬ੍ਬਾਤਿ.

ਨਿਮਨ੍ਤਨਭਤ੍ਤਕਥਾ ਨਿਟ੍ਠਿਤਾ.

੨੧੧. ਸਲਾਕਭਤ੍ਤਂ ਪਨ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਲਾਕਾਯ ਵਾ ਪਟ੍ਟਿਕਾਯ ਵਾ ਉਪਨਿਬਨ੍ਧਿਤ੍ਵਾ ਓਪੁਞ੍ਜਿਤ੍ਵਾ ਭਤ੍ਤਂ ਉਦ੍ਦਿਸਿਤੁ’’ਨ੍ਤਿ (ਚੂਲ਼ਵ. ੩੨੬) ਵਚਨਤੋ ਰੁਕ੍ਖਸਾਰਮਯਾਯ ਸਲਾਕਾਯ ਵਾ ਵੇਲ਼ੁਵਿਲੀਵਤਾਲਪਣ੍ਣਾਦਿਮਯਾਯ ਪਟ੍ਟਿਕਾਯ ਵਾ ‘‘ਅਸੁਕਸ੍ਸ ਨਾਮ ਸਲਾਕਭਤ੍ਤ’’ਨ੍ਤਿ ਏਵਂ ਅਕ੍ਖਰਾਨਿ ਉਪਨਿਬਨ੍ਧਿਤ੍ਵਾ ਪਚ੍ਛਿਯਂ ਵਾ ਚੀਵਰਭੋਗੇ ਵਾ ਕਤ੍ਵਾ ਸਬ੍ਬਸਲਾਕਾਯੋ ਓਪੁਞ੍ਜਿਤ੍ਵਾ ਪੁਨਪ੍ਪੁਨਂ ਹੇਟ੍ਠੁਪਰਿਯਵਸੇਨ ਆਲੋਲ਼ੇਤ੍ਵਾ ਪਞ੍ਚਙ੍ਗਸਮਨ੍ਨਾਗਤੇਨ ਭਤ੍ਤੁਦ੍ਦੇਸਕੇਨ ਸਚੇ ਠਿਤਿਕਾ ਅਤ੍ਥਿ, ਠਿਤਿਕਤੋ ਪਟ੍ਠਾਯ, ਨੋ ਚੇ ਅਤ੍ਥਿ, ਥੇਰਾਸਨਤੋ ਪਟ੍ਠਾਯ ਸਲਾਕਾ ਦਾਤਬ੍ਬਾ. ਪਚ੍ਛਾ ਆਗਤਾਨਮ੍ਪਿ ਏਕਾਬਦ੍ਧਵਸੇਨ ਦੂਰੇ ਠਿਤਾਨਮ੍ਪਿ ਉਦ੍ਦੇਸਭਤ੍ਤੇ ਵੁਤ੍ਤਨਯੇਨੇਵ ਦਾਤਬ੍ਬਾ.

ਸਚੇ ਵਿਹਾਰਸ੍ਸ ਸਮਨ੍ਤਤੋ ਬਹੂ ਗੋਚਰਗਾਮਾ, ਭਿਕ੍ਖੂ ਪਨ ਨ ਬਹੂ, ਗਾਮਵਸੇਨਪਿ ਸਲਾਕਾ ਪਾਪੁਣਨ੍ਤਿ. ‘‘ਤੁਮ੍ਹਾਕਂ ਅਸੁਕਗਾਮੇ ਸਲਾਕਭਤ੍ਤਂ ਪਾਪੁਣਾਤੀ’’ਤਿ ਗਾਮਵਸੇਨੇਵ ਗਾਹੇਤਬ੍ਬਂ. ਏਵਂ ਗਾਹੇਨ੍ਤੇਨ ਸਚੇਪਿ ਏਕਮੇਕਸ੍ਮਿਂ ਗਾਮੇ ਨਾਨਪ੍ਪਕਾਰਾਨਿ ਸਟ੍ਠਿ ਸਲਾਕਭਤ੍ਤਾਨਿ, ਸਬ੍ਬਾਨਿ ਗਹਿਤਾਨੇਵ ਹੋਨ੍ਤਿ. ਤਸ੍ਸ ਪਤ੍ਤਗਾਮਸਮੀਪੇ ਅਞ੍ਞਾਨਿਪਿ ਦ੍ਵੇ ਤੀਣਿ ਸਲਾਕਭਤ੍ਤਾਨਿ ਹੋਨ੍ਤਿ, ਤਾਨਿ ਤਸ੍ਸੇਵ ਦਾਤਬ੍ਬਾਨਿ. ਨ ਹਿ ਸਕ੍ਕਾ ਤੇਸਂ ਕਾਰਣਾ ਅਞ੍ਞਂ ਭਿਕ੍ਖੁਂ ਪਹਿਣਿਤੁਨ੍ਤਿ.

ਸਚੇ ਏਕਚ੍ਚੇਸੁ ਗਾਮੇਸੁ ਬਹੂਨਿ ਸਲਾਕਭਤ੍ਤਾਨਿ ਸਲ੍ਲਕ੍ਖੇਤ੍ਵਾ ਸਤ੍ਤਨ੍ਨਮ੍ਪਿ ਅਟ੍ਠਨ੍ਨਮ੍ਪਿ ਭਿਕ੍ਖੂਨਂ ਦਾਤਬ੍ਬਾਨਿ. ਦੇਨ੍ਤੇਨ ਪਨ ਚਤੁਨ੍ਨਂ ਪਞ੍ਚਨ੍ਨਂ ਭਤ੍ਤਾਨਂ ਸਲਾਕਾਯੋ ਏਕਤੋ ਬਨ੍ਧਿਤ੍ਵਾ ਦਾਤਬ੍ਬਾ. ਸਚੇ ਤਂ ਗਾਮਂ ਅਤਿਕ੍ਕਮਿਤ੍ਵਾ ਅਞ੍ਞੋ ਗਾਮੋ ਹੋਤਿ, ਤਸ੍ਮਿਞ੍ਚ ਏਕਮੇਵ ਸਲਾਕਭਤ੍ਤਂ, ਤਂ ਪਨ ਪਾਤੋਵ ਦੇਨ੍ਤਿ, ਤਮ੍ਪਿ ਏਤੇਸੁ ਭਿਕ੍ਖੂਸੁ ਏਕਸ੍ਸ ਨਿਗ੍ਗਹੇਨ ਦਤ੍ਵਾ ‘‘ਪਾਤੋਵ ਤਂ ਗਹੇਤ੍ਵਾ ਪਚ੍ਛਾ ਓਰਿਮਗਾਮੇ ਇਤਰਾਨਿ ਭਤ੍ਤਾਨਿ ਗਣ੍ਹਾਹੀ’’ਤਿ ਵਤ੍ਤਬ੍ਬੋ. ਸਚੇ ਓਰਿਮਗਾਮੇ ਸਲਾਕਭਤ੍ਤੇਸੁ ਅਗ੍ਗਹਿਤੇਸ੍ਵੇਵ ਗਹਿਤਸਞ੍ਞਾਯ ਗਚ੍ਛਤਿ, ਪਰਭਾਗਗਾਮੇ ਸਲਾਕਭਤ੍ਤਂ ਗਹੇਤ੍ਵਾ ਪੁਨ ਵਿਹਾਰਂ ਆਗਨ੍ਤ੍ਵਾ ਇਤਰਾਨਿ ਗਹੇਤ੍ਵਾ ਓਰਿਮਗਾਮੋ ਗਨ੍ਤਬ੍ਬੋ. ਨ ਹਿ ਬਹਿਸੀਮਾਯ ਸਙ੍ਘਲਾਭੋ ਗਾਹੇਤੁਂ ਲਬ੍ਭਤੀਤਿ ਅਯਂ ਨਯੋ ਕੁਰੁਨ੍ਦਿਯਂ ਵੁਤ੍ਤੋ. ਸਚੇ ਪਨ ਭਿਕ੍ਖੂ ਬਹੂ ਹੋਨ੍ਤਿ, ਗਾਮਵਸੇਨ ਸਲਾਕਾ ਨ ਪਾਪੁਣਨ੍ਤਿ, ਵੀਥਿਵਸੇਨ ਵਾ ਵੀਥਿਯਂ ਏਕਗੇਹਵਸੇਨ ਵਾ ਏਕਕੁਲਵਸੇਨ ਵਾ ਗਾਹੇਤਬ੍ਬਂ. ਵੀਥਿਆਦੀਸੁ ਚ ਯਤ੍ਥ ਬਹੂਨਿ ਭਤ੍ਤਾਨਿ, ਤਤ੍ਥ ਗਾਮੇ ਵੁਤ੍ਤਨਯੇਨੇਵ ਬਹੂਨਂ ਭਿਕ੍ਖੂਨਂ ਗਾਹੇਤਬ੍ਬਾਨਿ, ਸਲਾਕਾਸੁ ਅਸਤਿ ਉਦ੍ਦਿਸਿਤ੍ਵਾਪਿ ਗਾਹੇਤਬ੍ਬਾਨਿ.

੨੧੨. ਸਲਾਕਦਾਯਕੇਨ ਪਨ ਵਤ੍ਤਂ ਜਾਨਿਤਬ੍ਬਂ. ਤੇਨ ਹਿ ਕਾਲਸ੍ਸੇਵ ਵੁਟ੍ਠਾਯ ਪਤ੍ਤਚੀਵਰਂ ਗਹੇਤ੍ਵਾ ਭੋਜਨਸਾਲਂ ਗਨ੍ਤ੍ਵਾ ਅਸਮ੍ਮਟ੍ਠਟ੍ਠਾਨਂ ਸਮ੍ਮਜ੍ਜਿਤ੍ਵਾ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤ੍ਵਾ ‘‘ਇਦਾਨਿ ਭਿਕ੍ਖੂਹਿ ਵਤ੍ਤਂ ਕਤਂ ਭਵਿਸ੍ਸਤੀ’’ਤਿ ਕਾਲਂ ਸਲ੍ਲਕ੍ਖੇਤ੍ਵਾ ਘਣ੍ਟਿਂ ਪਹਰਿਤ੍ਵਾ ਭਿਕ੍ਖੂਸੁ ਸਨ੍ਨਿਪਤਿਤੇਸੁ ਪਠਮਮੇਵ ਵਾਰਗਾਮੇ ਸਲਾਕਭਤ੍ਤਂ ਗਾਹੇਤਬ੍ਬਂ, ‘‘ਤੁਯ੍ਹਂ ਅਸੁਕਸ੍ਮਿਂ ਨਾਮ ਵਾਰਗਾਮੇ ਸਲਾਕਾ ਪਾਪੁਣਾਤਿ, ਤਤ੍ਰ ਗਚ੍ਛਾ’’ਤਿ ਵਤ੍ਤਬ੍ਬਂ. ਸਚੇ ਅਭਿਰੇਕਗਾਵੁਤੇ ਗਾਮੋ ਹੋਤਿ, ਤਂ ਦਿਵਸਂ ਗਚ੍ਛਨ੍ਤਾ ਕਿਲਮਨ੍ਤਿ, ‘‘ਸ੍ਵੇ ਤੁਯ੍ਹਂ ਵਾਰਗਾਮੇ ਪਾਪੁਣਾਤੀ’’ਤਿ ਅਜ੍ਜੇਵ ਗਾਹੇਤਬ੍ਬਂ. ਯੋ ਵਾਰਗਾਮਂ ਪੇਸਿਯਮਾਨੋ ਨ ਗਚ੍ਛਤਿ, ਅਞ੍ਞਂ ਸਲਾਕਂ ਮਗ੍ਗਤਿ, ਨ ਦਾਤਬ੍ਬਾ. ਸਦ੍ਧਾਨਞ੍ਹਿ ਮਨੁਸ੍ਸਾਨਂ ਪੁਞ੍ਞਹਾਨਿ ਚ ਸਙ੍ਘਸ੍ਸ ਚ ਲਾਭਚ੍ਛੇਦੋ ਹੋਤਿ, ਤਸ੍ਮਾ ਤਸ੍ਸ ਦੁਤਿਯੇਪਿ ਤਤਿਯੇਪਿ ਦਿਵਸੇ ਅਞ੍ਞਾ ਸਲਾਕਾ ਨ ਦਾਤਬ੍ਬਾ, ‘‘ਅਤ੍ਤਨੋ ਪਤ੍ਤਟ੍ਠਾਨਂ ਗਨ੍ਤ੍ਵਾ ਭੁਞ੍ਜਾਹੀ’’ਤਿ ਵਤ੍ਤਬ੍ਬੋ, ਤੀਣਿ ਪਨ ਦਿਵਸਾਨਿ ਅਗਚ੍ਛਨ੍ਤਸ੍ਸ ਵਾਰਗਾਮਤੋ ਓਰਿਮਵਾਰਗਾਮੇ ਸਲਾਕਾ ਗਾਹੇਤਬ੍ਬਾ. ਤਞ੍ਚੇ ਨ ਗਣ੍ਹਾਤਿ, ਤਤੋ ਪਟ੍ਠਾਯ ਤਸ੍ਸ ਅਞ੍ਞਂ ਸਲਾਕਂ ਦਾਤੁਂ ਨ ਵਟ੍ਟਤਿ, ਦਣ੍ਡਕਮ੍ਮਂ ਦਲ਼੍ਹਂ ਕਾਤਬ੍ਬਂ. ਸਟ੍ਠਿਤੋ ਵਾ ਪਣ੍ਣਾਸਤੋ ਵਾ ਨ ਪਰਿਹਾਪੇਤਬ੍ਬਂ. ਵਾਰਗਾਮੇ ਗਾਹੇਤ੍ਵਾ ਵਿਹਾਰਵਾਰੋ ਗਾਹੇਤਬ੍ਬੋ, ‘‘ਤੁਯ੍ਹਂ ਵਿਹਾਰਵਾਰੋ ਪਾਪੁਣਾਤੀ’’ਤਿ ਵਤ੍ਤਬ੍ਬਂ. ਵਿਹਾਰਵਾਰਿਕਸ੍ਸ ਦ੍ਵੇ ਤਿਸ੍ਸੋ ਯਾਗੁਸਲਾਕਾਯੋ ਤਿਸ੍ਸੋ ਚਤਸ੍ਸੋ ਭਤ੍ਤਸਲਾਕਾਯੋ ਚ ਦਾਤਬ੍ਬਾ, ਨਿਬਦ੍ਧਂ ਕਤ੍ਵਾ ਪਨ ਨ ਦਾਤਬ੍ਬਾ. ਯਾਗੁਭਤ੍ਤਦਾਯਕਾ ਹਿ ‘‘ਅਮ੍ਹਾਕਂ ਯਾਗੁਭਤ੍ਤਂ ਵਿਹਾਰਗੋਪਕਾਵਭੁਞ੍ਜਨ੍ਤੀ’’ਤਿ ਅਞ੍ਞਥਤ੍ਤਂ ਆਪਜ੍ਜੇਯ੍ਯੁਂ, ਤਸ੍ਮਾ ਅਞ੍ਞੇਸੁ ਕੁਲੇਸੁ ਦਾਤਬ੍ਬਾ.

ਸਚੇ ਵਿਹਾਰਵਾਰਿਕਾਨਂ ਸਭਾਗਾ ਆਹਰਿਤ੍ਵਾ ਦੇਨ੍ਤਿ, ਇਚ੍ਚੇਤਂ ਕੁਸਲਂ. ਨੋ ਚੇ, ਵਾਰਂ ਗਹੇਤ੍ਵਾ ਤੇਸਂ ਯਾਗੁਭਤ੍ਤਂ ਆਹਰਾਪੇਤਬ੍ਬਂ, ਤਾਵ ਨੇਸਂ ਸਲਾਕਾ ਫਾਤਿਕਮ੍ਮਮੇਵ ਭਵਨ੍ਤਿ. ਵਸ੍ਸਗ੍ਗੇਨ ਪਤ੍ਤਟ੍ਠਾਨੇ ਪਨ ਅਞ੍ਞਮ੍ਪਿ ਪਣੀਤਭਤ੍ਤਸਲਾਕਂ ਗਣ੍ਹਿਤੁਂ ਲਭਨ੍ਤਿਯੇਵ. ਅਤਿਰੇਕਉਤ੍ਤਰਿਭਙ੍ਗਸ੍ਸ ਏਕਚਾਰਿਕਭਤ੍ਤਸ੍ਸ ਵਿਸੁਂ ਠਿਤਿਕਂ ਕਤ੍ਵਾ ਸਲਾਕਾ ਦਾਤਬ੍ਬਾ. ਸਚੇ ਯੇਨ ਸਲਾਕਾ ਲਦ੍ਧਾ, ਸੋ ਤਂ ਦਿਵਸਂ ਤਂ ਭਤ੍ਤਂ ਨ ਲਭਤਿ, ਪੁਨ ਦਿਵਸੇ ਗਾਹੇਤਬ੍ਬਂ. ਭਤ੍ਤਞ੍ਞੇਵ ਲਭਤਿ, ਨ ਉਤ੍ਤਰਿਭਙ੍ਗਂ, ਏਵਮ੍ਪਿ ਪੁਨ ਗਾਹੇਤਬ੍ਬਂ. ਖੀਰਭਤ੍ਤਸਲਾਕਾਯਪਿ ਏਸੇਵ ਨਯੋ. ਸਚੇ ਪਨ ਖੀਰਮੇਵ ਲਭਤਿ, ਨ ਭਤ੍ਤਂ, ਖੀਰਲਾਭਤੋ ਪਟ੍ਠਾਯ ਪੁਨ ਨ ਗਾਹੇਤਬ੍ਬਂ. ਦ੍ਵੇ ਤੀਣਿ ਏਕਚਾਰਿਕਭਤ੍ਤਾਨਿ ਏਕਸ੍ਸੇਵ ਪਾਪੁਣਨ੍ਤਿ, ਦੁਬ੍ਭਿਕ੍ਖਸਮਯੇ ਸਙ੍ਘਨਵਕੇਨ ਲਦ੍ਧਕਾਲੇ ਵਿਜਟੇਤ੍ਵਾ ਵਿਸੁਂ ਗਾਹੇਤਬ੍ਬਾਨਿ. ਪਾਕਤਿਕਸਲਾਕਭਤ੍ਤਂ ਅਲਦ੍ਧਸ੍ਸਪਿ ਪੁਨਦਿਵਸੇ ਗਾਹੇਤਬ੍ਬਂ.

ਸਚੇ ਖੁਦ੍ਦਕੋ ਵਿਹਾਰੋ ਹੋਤਿ, ਸਬ੍ਬੇ ਭਿਕ੍ਖੂ ਏਕਸਮ੍ਭੋਗਾ, ਉਚ੍ਛੁਸਲਾਕਂ ਗਾਹੇਨ੍ਤੇਨ ਯਸ੍ਸ ਕਸ੍ਸਚਿ ਸਮ੍ਮੁਖੀਭੂਤਸ੍ਸ ਪਾਪੇਤ੍ਵਾ ਮਹਾਥੇਰਾਦੀਨਂ ਦਿਵਾ ਤਚ੍ਛੇਤ੍ਵਾ ਦਾਤੁਂ ਵਟ੍ਟਤਿ. ਰਸਸਲਾਕਂ ਪਾਪੇਤ੍ਵਾ ਪਚ੍ਛਾਭਤ੍ਤਮ੍ਪਿ ਪਰਿਸ੍ਸਾਵੇਤ੍ਵਾ ਫਾਣਿਤਂ ਵਾ ਕਾਰੇਤ੍ਵਾ ਪਿਣ੍ਡਪਾਤਿਕਾਦੀਨਮ੍ਪਿ ਦਾਤਬ੍ਬਂ, ਆਗਨ੍ਤੁਕਾਨਂ ਆਗਤਾਨਾਗਤਭਾਵਂ ਞਤ੍ਵਾ ਗਾਹੇਤਬ੍ਬਾ. ਮਹਾਆਵਾਸੇ ਠਿਤਿਕਂ ਕਤ੍ਵਾ ਗਾਹੇਤਬ੍ਬਾ. ਤਕ੍ਕਸਲਾਕਮ੍ਪਿ ਸਭਾਗਟ੍ਠਾਨੇ ਪਾਪੇਤ੍ਵਾ ਵਾ ਧੂਮਾਪੇਤ੍ਵਾ ਪਚਾਪੇਤ੍ਵਾ ਵਾ ਥੇਰਾਨਂ ਦਾਤੁਂ ਵਟ੍ਟਤਿ. ਮਹਾਆਵਾਸੇ ਵੁਤ੍ਤਨਯੇਨੇਵ ਪਟਿਪਜ੍ਜਿਤਬ੍ਬਂ. ਫਲਸਲਾਕਪੂਵਸਲਾਕਭੇਸਜ੍ਜਗਨ੍ਧਮਾਲਾਸਲਾਕਾਯੋਪਿ ਵਿਸੁਂ ਠਿਤਿਕਾਯ ਗਾਹੇਤਬ੍ਬਾ. ਭੇਸਜ੍ਜਾਦਿਸਲਾਕਾਯੋ ਚੇਤ੍ਥ ਕਿਞ੍ਚਾਪਿ ਪਿਣ੍ਡਪਾਤਿਕਾਨਮ੍ਪਿ ਵਟ੍ਟਨ੍ਤਿ, ਸਲਾਕਵਸੇਨ ਪਨ ਗਾਹਿਤਤ੍ਤਾ ਨ ਸਾਦਿਤਬ੍ਬਾ. ਅਗ੍ਗਭਿਕ੍ਖਾਮਤ੍ਤਂ ਸਲਾਕਭਤ੍ਤਂ ਦੇਨ੍ਤਿ, ਠਿਤਿਕਂ ਪੁਚ੍ਛਿਤ੍ਵਾ ਗਾਹੇਤਬ੍ਬਂ. ਅਸਤਿਯਾ ਠਿਤਿਕਾਯ ਥੇਰਾਸਨਤੋ ਪਟ੍ਠਾਯ ਗਾਹੇਤਬ੍ਬਂ. ਸਚੇ ਤਾਦਿਸਾਨਿ ਭਤ੍ਤਾਨਿ ਬਹੂਨਿ ਹੋਨ੍ਤਿ, ਏਕੇਕਸ੍ਸ ਭਿਕ੍ਖੁਨੋ ਦ੍ਵੇ ਤੀਣਿ ਦਾਤਬ੍ਬਾਨਿ. ਨੋ ਚੇ, ਏਕੇਕਮੇਵ ਦਤ੍ਵਾ ਪਟਿਪਾਟਿਯਾ ਗਤਾਯ ਪੁਨ ਥੇਰਾਸਨਤੋ ਪਟ੍ਠਾਯ ਦਾਤਬ੍ਬਂ. ਅਥ ਅਨ੍ਤਰਾਵ ਉਪਚ੍ਛਿਜ੍ਜਤਿ, ਠਿਤਿਕਾ ਸਲ੍ਲਕ੍ਖੇਤਬ੍ਬਾ. ਯਦਿ ਪਨ ਤਾਦਿਸਂ ਭਤ੍ਤਂ ਨਿਬਦ੍ਧਮੇਵ ਹੋਤਿ, ਯਸ੍ਸ ਪਾਪੁਣਾਤਿ, ਸੋ ਵਤ੍ਤਬ੍ਬੋ ‘‘ਲਦ੍ਧਾ ਵਾ ਅਲਦ੍ਧਾ ਵਾ ਸ੍ਵੇਪਿ ਗਣ੍ਹੇਯ੍ਯਾਸੀ’’ਤਿ. ਏਕਂ ਅਨਿਬਦ੍ਧਂ ਹੋਤਿ, ਲਭਨਦਿਵਸੇ ਪਨ ਯਾਵਦਤ੍ਥਂ ਲਭਤਿ. ਅਲਭਨਦਿਵਸਾ ਬਹੁਤਰਾ ਹੋਨ੍ਤਿ, ਤਂ ਯਸ੍ਸ ਪਾਪੁਣਾਤਿ, ਸੋ ਅਲਭਿਤ੍ਵਾ ‘‘ਸ੍ਵੇ ਗਣ੍ਹੇਯ੍ਯਾਸੀ’’ਤਿ ਵਤ੍ਤਬ੍ਬੋ.

ਯੋ ਸਲਾਕਾਸੁ ਗਹਿਤਾਸੁ ਪਚ੍ਛਾ ਆਗਚ੍ਛਤਿ, ਤਸ੍ਸ ਅਤਿਕ੍ਕਨ੍ਤਾਵ ਸਲਾਕਾ ਨ ਉਪਟ੍ਠਾਪੇਤ੍ਵਾ ਦਾਤਬ੍ਬਾ. ਸਲਾਕਂ ਨਾਮ ਘਣ੍ਟਿਂ ਪਹਰਣਤੋ ਪਟ੍ਠਾਯ ਆਗਨ੍ਤ੍ਵਾ ਹਤ੍ਥਂ ਪਸਾਰੇਨ੍ਤੋਵ ਲਭਤਿ, ਅਞ੍ਞਸ੍ਸ ਆਗਨ੍ਤ੍ਵਾ ਸਮੀਪੇ ਠਿਤਸ੍ਸਪਿ ਅਤਿਕ੍ਕਨ੍ਤਾ ਅਤਿਕ੍ਕਨ੍ਤਾਵ ਹੋਤਿ. ਸਚੇ ਪਨਸ੍ਸ ਅਞ੍ਞੋ ਗਣ੍ਹਨ੍ਤੋ ਅਤ੍ਥਿ, ਸਯਂ ਅਨਾਗਤੋਪਿ ਲਭਤਿ, ਸਭਾਗਟ੍ਠਾਨੇ ‘‘ਅਸੁਕੋ ਅਨਾਗਤੋ’’ਤਿ ਞਤ੍ਵਾ ‘‘ਅਯਂ ਤਸ੍ਸ ਸਲਾਕਾ’’ਤਿ ਠਪੇਤੁਂ ਵਟ੍ਟਤਿ. ਸਚੇ ‘‘ਅਨਾਗਤਸ੍ਸ ਨ ਦਾਤਬ੍ਬਾ’’ਤਿ ਕਤਿਕਂ ਕਰੋਨ੍ਤਿ, ਅਧਮ੍ਮਿਕਾ ਹੋਤਿ. ਅਨ੍ਤੋਉਪਚਾਰੇ ਠਿਤਸ੍ਸ ਹਿ ਭਾਜਨੀਯਭਣ੍ਡਂ ਪਾਪੁਣਾਤਿ. ਸਚੇ ਪਨ ‘‘ਅਨਾਗਤਸ੍ਸ ਦੇਥਾ’’ਤਿ ਮਹਾਸਦ੍ਦਂ ਕਰੋਨ੍ਤਿ, ਦਣ੍ਡਕਮ੍ਮਂ ਠਪੇਤਬ੍ਬਂ, ‘‘ਆਗਨ੍ਤ੍ਵਾ ਗਣ੍ਹਨ੍ਤੂ’’ਤਿ ਵਤ੍ਤਬ੍ਬਂ. ਛ ਪਞ੍ਚਸਲਾਕਾ ਨਟ੍ਠਾ ਹੋਨ੍ਤਿ, ਭਤ੍ਤੁਦ੍ਦੇਸਕੋ ਦਾਯਕਾਨਂ ਨਾਮਂ ਨ ਸਰਤਿ, ਸੋ ਚੇ ਨਟ੍ਠਸਲਾਕਾ ਮਹਾਥੇਰਸ੍ਸ ਵਾ ਅਤ੍ਤਨੋ ਵਾ ਪਾਪੇਤ੍ਵਾ ਭਿਕ੍ਖੂ ਵਦੇਯ੍ਯ ‘‘ਮਯਾ ਅਸੁਕਗਾਮੇ ਸਲਾਕਭਤ੍ਤਂ ਮਯ੍ਹਂ ਪਾਪਿਤਂ, ਤੁਮ੍ਹੇ ਤਤ੍ਥ ਲਦ੍ਧਸਲਾਕਭਤ੍ਤਂ ਭੁਞ੍ਜੇਯ੍ਯਾਥਾ’’ਤਿ, ਵਟ੍ਟਤਿ, ਵਿਹਾਰੇ ਅਪਾਪਿਤਂ ਪਨ ਆਸਨਸਾਲਾਯ ਤਂ ਭਤ੍ਤਂ ਲਭਿਤ੍ਵਾ ਤਤ੍ਥੇਵ ਪਾਪੇਤ੍ਵਾ ਭੁਞ੍ਜਿਤੁਂ ਨ ਵਟ੍ਟਤਿ. ‘‘ਅਜ੍ਜ ਪਟ੍ਠਾਯ ਮਯ੍ਹਂ ਸਲਾਕਭਤ੍ਤਂ ਗਣ੍ਹਥਾ’’ਤਿ ਵੁਤ੍ਤੇ ਤਤ੍ਰ ਆਸਨਸਾਲਾਯ ਗਾਹੇਤੁਂ ਨ ਵਟ੍ਟਤਿ, ਵਿਹਾਰਂ ਆਨੇਤ੍ਵਾ ਗਾਹੇਤਬ੍ਬਂ. ‘‘ਸ੍ਵੇ ਪਟ੍ਠਾਯਾ’’ਤਿ ਵੁਤ੍ਤੇ ਪਨ ਭਤ੍ਤੁਦ੍ਦੇਸਕਸ੍ਸ ਆਚਿਕ੍ਖਿਤਬ੍ਬਂ ‘‘ਸ੍ਵੇ ਪਟ੍ਠਾਯ ਅਸੁਕਕੁਲਂ ਨਾਮ ਸਲਾਕਭਤ੍ਤਂ ਦੇਤਿ, ਸਲਾਕਗ੍ਗਾਹਣਕਾਲੇ ਸਰੇਯ੍ਯਾਸੀ’’ਤਿ. ਦੁਬ੍ਭਿਕ੍ਖੇ ਸਲਾਕਭਤ੍ਤਂ ਪਚ੍ਛਿਨ੍ਦਿਤ੍ਵਾ ਸੁਭਿਕ੍ਖੇ ਜਾਤੇ ਕਞ੍ਚਿ ਭਿਕ੍ਖੁਂ ਦਿਸ੍ਵਾ ‘‘ਅਜ੍ਜ ਪਟ੍ਠਾਯ ਅਮ੍ਹਾਕਂ ਸਲਾਕਭਤ੍ਤਂ ਗਣ੍ਹਥਾ’’ਤਿ ਪੁਨ ਪਟ੍ਠਪੇਨ੍ਤਿ, ਅਨ੍ਤੋਗਾਮੇ ਅਗਾਹੇਤ੍ਵਾ ਵਿਹਾਰਂ ਆਨੇਤ੍ਵਾ ਗਾਹੇਤਬ੍ਬਂ. ਇਦਞ੍ਹਿ ਸਲਾਕਭਤ੍ਤਂ ਨਾਮ ਉਦ੍ਦੇਸਭਤ੍ਤਸਦਿਸਂ ਨ ਹੋਤਿ, ਵਿਹਾਰਮੇਵ ਸਨ੍ਧਾਯ ਦੀਯਤਿ, ਤਸ੍ਮਾ ਬਹਿਉਪਚਾਰੇ ਗਾਹੇਤੁਂ ਨ ਵਟ੍ਟਤਿ, ‘‘ਸ੍ਵੇ ਪਟ੍ਠਾਯਾ’’ਤਿ ਵੁਤ੍ਤੇ ਪਨ ਵਿਹਾਰੇ ਗਾਹੇਤਬ੍ਬਮੇਵ.

ਗਮਿਕੋ ਭਿਕ੍ਖੁ ਯਂ ਦਿਸਾਭਾਗਂ ਗਨ੍ਤੁਕਾਮੋ, ਤਤ੍ਥ ਅਞ੍ਞੇਨ ਵਾਰਗਾਮਸਲਾਕਾ ਲਦ੍ਧਾ ਹੋਤਿ, ਤਂ ਗਹੇਤ੍ਵਾ ਇਤਰਂ ਭਿਕ੍ਖੁਂ ‘‘ਮਯ੍ਹਂ ਪਤ੍ਤਸਲਾਕਂ ਤ੍ਵਂ ਗਣ੍ਹਾਹੀ’’ਤਿ ਵਤ੍ਵਾ ਗਨ੍ਤੁਂ ਵਟ੍ਟਤਿ. ਤੇਨ ਪਨ ਉਪਚਾਰਸੀਮਂ ਅਨਤਿਕ੍ਕਨ੍ਤੇਯੇਵ ਤਸ੍ਮਿਂ ਤਸ੍ਸ ਸਲਾਕਾ ਗਾਹੇਤਬ੍ਬਾ. ਛਡ੍ਡਿਤਵਿਹਾਰੇ ਵਸਿਤ੍ਵਾ ਮਨੁਸ੍ਸਾ ‘‘ਬੋਧਿਚੇਤਿਯਾਦੀਨਿ ਜਗ੍ਗਿਤ੍ਵਾ ਭੁਞ੍ਜਨ੍ਤੂ’’ਤਿ ਸਲਾਕਭਤ੍ਤਂ ਪਟ੍ਠਪੇਨ੍ਤਿ, ਭਿਕ੍ਖੂ ਸਭਾਗਟ੍ਠਾਨੇਸੁ ਵਸਿਤ੍ਵਾ ਕਾਲਸ੍ਸੇਵ ਗਨ੍ਤ੍ਵਾ ਤਤ੍ਥ ਵਤ੍ਤਂ ਕਰਿਤ੍ਵਾ ਤਂ ਭਤ੍ਤਂ ਭੁਞ੍ਜਨ੍ਤਿ, ਵਟ੍ਟਤਿ. ਸਚੇ ਤੇਸੁ ਸ੍ਵਾਤਨਾਯ ਅਤ੍ਤਨੋ ਪਾਪੇਤ੍ਵਾ ਗਤੇਸੁ ਆਗਨ੍ਤੁਕੋ ਭਿਕ੍ਖੁ ਛਡ੍ਡਿਤਵਿਹਾਰੇ ਵਸਿਤ੍ਵਾ ਕਾਲਸ੍ਸੇਵ ਵਤ੍ਤਂ ਕਤ੍ਵਾ ਘਣ੍ਟਿਂ ਪਹਰਿਤ੍ਵਾ ਸਲਾਕਭਤ੍ਤਂ ਅਤ੍ਤਨੋ ਪਾਪੇਤ੍ਵਾ ਆਸਨਸਾਲਂ ਗਚ੍ਛਤਿ, ਸੋਵ ਤਸ੍ਸ ਭਤ੍ਤਸ੍ਸ ਇਸ੍ਸਰੋ. ਯੋ ਪਨ ਭਿਕ੍ਖੂਸੁ ਵਤ੍ਤਂ ਕਰੋਨ੍ਤੇਸੁਯੇਵ ਭੂਮਿਯਂ ਦ੍ਵੇ ਤਯੋ ਸਮ੍ਮੁਞ੍ਜਨੀਪਹਾਰੇ ਦਤ੍ਵਾ ਘਣ੍ਟਿਂ ਪਹਰਿਤ੍ਵਾ ‘‘ਧੁਰਗਾਮੇ ਸਲਾਕਭਤ੍ਤਂ ਮਯ੍ਹਂ ਪਾਪੁਣਾਤੀ’’ਤਿ ਗਚ੍ਛਤਿ, ਤਸ੍ਸ ਤਂ ਚੋਰਿਕਾਯ ਗਹਿਤਤ੍ਤਾ ਨ ਪਾਪੁਣਾਤਿ, ਵਤ੍ਤਂ ਕਤ੍ਵਾ ਪਾਪੇਤ੍ਵਾ ਪਚ੍ਛਾਗਤਭਿਕ੍ਖੂਨਂਯੇਵ ਹੋਤਿ.

ਏਕੋ ਗਾਮੋ ਅਤਿਦੂਰੇ ਹੋਤਿ, ਭਿਕ੍ਖੂ ਨਿਚ੍ਚਂ ਗਨ੍ਤੁਂ ਨ ਇਚ੍ਛਨ੍ਤਿ, ਮਨੁਸ੍ਸਾ ‘‘ਮਯਂ ਪੁਞ੍ਞੇਨ ਪਰਿਬਾਹਿਰਾ ਹੋਮਾ’’ਤਿ ਵਦਨ੍ਤਿ, ਯੇ ਤਸ੍ਸ ਗਾਮਸ੍ਸ ਆਸਨ੍ਨਵਿਹਾਰੇ ਸਭਾਗਭਿਕ੍ਖੂ, ਤੇ ਵਤ੍ਤਬ੍ਬਾ ‘‘ਇਮੇਸਂ ਭਿਕ੍ਖੂਨਂ ਅਨਾਗਤਦਿਵਸੇ ਤੁਮ੍ਹੇ ਭੁਞ੍ਜਥਾ’’ਤਿ, ਸਲਾਕਾ ਪਨ ਦੇਵਸਿਕਂ ਪਾਪੇਤਬ੍ਬਾ. ਤਾ ਚ ਖੋ ਪਨ ਘਣ੍ਟਿਪਹਰਣਮਤ੍ਤੇਨ ਵਾ ਪਚ੍ਛਿਚਾਲਨਮਤ੍ਤੇਨ ਵਾ ਪਾਪਿਤਾ ਨ ਹੋਨ੍ਤਿ, ਪਚ੍ਛਿਂ ਪਨ ਗਹੇਤ੍ਵਾ ਸਲਾਕਾ ਪੀਠਕੇ ਆਕਿਰਿਤਬ੍ਬਾ, ਪਚ੍ਛਿ ਪਨ ਮੁਖਵਟ੍ਟਿਯਂ ਨ ਗਹੇਤਬ੍ਬਾ. ਸਚੇ ਹਿ ਤਤ੍ਥ ਅਹਿ ਵਾ ਵਿਚ੍ਛਿਕੋ ਵਾ ਭਵੇਯ੍ਯ, ਦੁਕ੍ਖਂ ਉਪ੍ਪਾਦੇਯ੍ਯ, ਤਸ੍ਮਾ ਹੇਟ੍ਠਾ ਗਹੇਤ੍ਵਾ ਪਚ੍ਛਿਂ ਪਰਮ੍ਮੁਖਂ ਕਤ੍ਵਾ ਸਲਾਕਾ ਆਕਿਰਿਤਬ੍ਬਾ ‘‘ਸਚੇਪਿ ਸਪ੍ਪੋ ਭਵਿਸ੍ਸਤਿ, ਏਤ੍ਤੋਵ ਪਲਾਯਿਸ੍ਸਤੀ’’ਤਿ. ਏਵਂ ਸਲਾਕਾ ਆਕਿਰਿਤ੍ਵਾ ਗਾਮਾਦਿਵਸੇਨ ਪੁਬ੍ਬੇ ਵੁਤ੍ਤਨਯੇਨੇਵ ਗਾਹੇਤਬ੍ਬਾ.

ਅਪਿਚ ਏਕਂ ਮਹਾਥੇਰਸ੍ਸ ਪਾਪੇਤ੍ਵਾ ‘‘ਅਵਸੇਸਾ ਮਯ੍ਹਂ ਪਾਪੁਣਨ੍ਤੀ’’ਤਿ ਅਤ੍ਤਨੋ ਪਾਪੇਤ੍ਵਾ ਵਤ੍ਤਂ ਕਤ੍ਵਾ ਚੇਤਿਯਂ ਵਨ੍ਦਿਤ੍ਵਾ ਵਿਤਕ੍ਕਮਾਲ਼ਕੇ ਠਿਤੇਹਿ ਭਿਕ੍ਖੂਹਿ ‘‘ਪਾਪਿਤਾ, ਆਵੁਸੋ, ਸਲਾਕਾ’’ਤਿ ਵੁਤ੍ਤੇ ‘‘ਆਮ, ਭਨ੍ਤੇ, ਤੁਮ੍ਹੇ ਗਤਗਤਗਾਮੇ ਸਲਾਕਭਤ੍ਤਂ ਗਣ੍ਹਥਾ’’ਤਿ ਵਤ੍ਤਬ੍ਬਂ. ਏਵਞ੍ਹਿ ਪਾਪਿਤਾਪਿ ਸੁਪਾਪਿਤਾਵ ਹੋਨ੍ਤਿ. ਭਿਕ੍ਖੂ ਸਬ੍ਬਰਤ੍ਤਿਂ ਧਮ੍ਮਸ੍ਸਵਨਤ੍ਥਂ ਅਞ੍ਞਂ ਵਿਹਾਰਂ ਗਚ੍ਛਨ੍ਤਾ ‘‘ਮਯਂ ਤਤ੍ਥ ਦਾਨਂ ਅਗ੍ਗਹੇਤ੍ਵਾਵ ਅਮ੍ਹਾਕਂ ਗੋਚਰਗਾਮੇ ਪਿਣ੍ਡਾਯ ਚਰਿਤ੍ਵਾ ਆਗਮਿਸ੍ਸਾਮਾ’’ਤਿ ਸਲਾਕਾ ਅਗ੍ਗਹੇਤ੍ਵਾਵ ਗਤਾ ਵਿਹਾਰੇ ਥੇਰਸ੍ਸ ਪਤ੍ਤਂ ਸਲਾਕਭਤ੍ਤਂ ਭੁਞ੍ਜਿਤੁਂ ਆਗਚ੍ਛਨ੍ਤਿ, ਵਟ੍ਟਤਿ. ਅਥ ਮਹਾਥੇਰੋਪਿ ‘‘ਅਹਂ ਇਧ ਕਿਂ ਕਰੋਮੀ’’ਤਿ ਤੇਹਿਯੇਵ ਸਦ੍ਧਿਂ ਗਚ੍ਛਤਿ, ਤੇਹਿ ਗਤਵਿਹਾਰੇ ਅਭੁਞ੍ਜਿਤ੍ਵਾਵ ਗੋਚਰਗਾਮਂ ਅਨੁਪ੍ਪਤ੍ਤੇਹਿ ‘‘ਦੇਥ, ਭਨ੍ਤੇ, ਪਤ੍ਤੇ, ਸਲਾਕਯਾਗੁਆਦੀਨਿ ਆਹਰਿਸ੍ਸਾਮਾ’’ਤਿ ਵੁਤ੍ਤੇ ਪਤ੍ਤਾ ਨ ਦਾਤਬ੍ਬਾ. ਕਸ੍ਮਾ, ਭਨ੍ਤੇ, ਨ ਦੇਥਾਤਿ. ਵਿਹਾਰਟ੍ਠਕਂ ਭਤ੍ਤਂ ਵਿਹਾਰੇ ਵੁਤ੍ਥਾਨਂ ਪਾਪੁਣਾਤਿ, ਮਯਂ ਅਞ੍ਞਵਿਹਾਰੇ ਵੁਤ੍ਥਾਤਿ. ‘‘ਦੇਥ, ਭਨ੍ਤੇ, ਨ ਮਯਂ ਵਿਹਾਰੇ ਪਾਲਿਕਾਯ ਦੇਮ, ਤੁਮ੍ਹਾਕਂ ਦੇਮ, ਗਣ੍ਹਥ ਅਮ੍ਹਾਕਂ ਭਿਕ੍ਖ’’ਨ੍ਤਿ ਵੁਤ੍ਤੇ ਪਨ ਵਟ੍ਟਤਿ.

ਸਲਾਕਭਤ੍ਤਕਥਾ ਨਿਟ੍ਠਿਤਾ.

੨੧੩. ਪਕ੍ਖਿਕਾਦੀਸੁ ਪਨ ਯਂ ਅਭਿਲਕ੍ਖਿਤੇਸੁ ਚਾਤੁਦ੍ਦਸੀ ਪਞ੍ਚਦਸੀ ਪਞ੍ਚਮੀ ਅਟ੍ਠਮੀਤਿ ਇਮੇਸੁ ਪਕ੍ਖੇਸੁ ਕਮ੍ਮਪ੍ਪਸੁਤੇਹਿ ਉਪੋਸਥਂ ਕਾਤੁਂ ਸਤਿਕਰਣਤ੍ਥਾਯ ਦੀਯਤਿ, ਤਂ ਪਕ੍ਖਿਕਂ ਨਾਮ. ਤਂ ਸਲਾਕਭਤ੍ਤਗਤਿਕਮੇਵ ਹੋਤਿ, ਗਾਹੇਤ੍ਵਾ ਭੁਞ੍ਜਿਤਬ੍ਬਂ. ਸਚੇ ਸਲਾਕਭਤ੍ਤਮ੍ਪਿ ਪਕ੍ਖਿਕਭਤ੍ਤਮ੍ਪਿ ਬਹੁਂ ਸਬ੍ਬੇਸਂ ਵਿਨਿਵਿਜ੍ਝਿਤ੍ਵਾ ਗਚ੍ਛਤਿ, ਦ੍ਵੇਪਿ ਭਤ੍ਤਾਨਿ ਵਿਸੁਂ ਵਿਸੁਂ ਗਾਹੇਤਬ੍ਬਾਨਿ. ਸਚੇ ਭਿਕ੍ਖੁਸਙ੍ਘੋ ਮਹਾ, ਪਕ੍ਖਿਕਂ ਗਾਹੇਤ੍ਵਾ ਤਸ੍ਸ ਠਿਤਿਕਾਯ ਸਲਾਕਭਤ੍ਤਂ ਗਾਹੇਤਬ੍ਬਂ, ਸਲਾਕਭਤ੍ਤਂ ਵਾ ਗਾਹਾਪੇਤ੍ਵਾ ਤਸ੍ਸ ਠਿਤਿਕਾਯ ਪਕ੍ਖਿਕਂ ਗਾਹੇਤਬ੍ਬਂ. ਯੇਸਂ ਨ ਪਾਪੁਣਾਤਿ, ਤੇ ਪਿਣ੍ਡਾਯ ਚਰਿਸ੍ਸਨ੍ਤਿ. ਸਚੇ ਦ੍ਵੇਪਿ ਭਤ੍ਤਾਨਿ ਬਹੂਨਿ, ਭਿਕ੍ਖੂ ਮਨ੍ਦਾ, ਸਲਾਕਭਤ੍ਤਂ ਨਾਮ ਦੇਵਸਿਕਂ ਲਬ੍ਭਤਿ, ਤਸ੍ਮਾ ਤਂ ਠਪੇਤ੍ਵਾ ‘‘ਪਕ੍ਖਿਕਂ, ਆਵੁਸੋ, ਭੁਞ੍ਜਥਾ’’ਤਿ ਪਕ੍ਖਿਕਮੇਵ ਦਾਤਬ੍ਬਂ. ਪਕ੍ਖਿਕਂ ਪਣੀਤਂ ਦੇਨ੍ਤਿ, ਵਿਸੁਂ ਠਿਤਿਕਾ ਕਾਤਬ੍ਬਾ, ‘‘ਸ੍ਵੇ ਪਕ੍ਖੋ’’ਤਿ ਅਜ੍ਜ ਪਕ੍ਖਿਕਂ ਨ ਗਾਹੇਤਬ੍ਬਂ. ਸਚੇ ਪਨ ਦਾਯਕਾ ਵਦਨ੍ਤਿ ‘‘ਸ੍ਵੇਪਿ ਅਮ੍ਹਾਕਂ ਘਰੇ ਲੂਖਭਤ੍ਤਂ ਭਵਿਸ੍ਸਤਿ, ਅਜ੍ਜੇਵ ਪਕ੍ਖਿਕਭਤ੍ਤਂ ਉਦ੍ਦਿਸਥਾ’’ਤਿ, ਏਵਂ ਵਟ੍ਟਤਿ.

ਉਪੋਸਥਿਕਂ ਨਾਮ ਅਨ੍ਵਡ੍ਢਮਾਸੇ ਉਪੋਸਥਦਿਵਸੇ ਉਪੋਸਥਙ੍ਗਾਨਿ ਸਮਾਦਿਯਿਤ੍ਵਾ ਯਂ ਅਤ੍ਤਨਾ ਭੁਞ੍ਜਤਿ, ਤਦੇਵ ਦੀਯਤਿ. ਪਾਟਿਪਦਿਕਂ ਨਾਮ ‘‘ਉਪੋਸਥੇ ਬਹੂ ਸਦ੍ਧਾ ਪਸਨ੍ਨਾ ਭਿਕ੍ਖੂਨਂ ਸਕ੍ਕਾਰਂ ਕਰੋਨ੍ਤਿ, ਪਾਟਿਪਦੇ ਪਨ ਭਿਕ੍ਖੂ ਕਿਲਮਨ੍ਤਿ, ਪਾਟਿਪਦੇ ਦਿਨ੍ਨਂ ਦੁਬ੍ਭਿਕ੍ਖਦਾਨਸਦਿਸਂ ਮਹਪ੍ਫਲਂ ਹੋਤਿ, ਉਪੋਸਥਕਮ੍ਮੇਨ ਵਾ ਪਰਿਸੁਦ੍ਧਸੀਲਾਨਂ ਦੁਤਿਯਦਿਵਸੇ ਦਿਨ੍ਨਂ ਮਹਪ੍ਫਲਂ ਹੋਤੀ’’ਤਿ ਸਲ੍ਲਕ੍ਖੇਤ੍ਵਾ ਪਾਟਿਪਦੇ ਦੀਯਮਾਨਕਦਾਨਂ. ਤਮ੍ਪਿ ਉਭਯਂ ਸਲਾਕਭਤ੍ਤਗਤਿਕਮੇਵ. ਇਤਿ ਇਮਾਨਿ ਸਤ੍ਤਪਿ ਭਤ੍ਤਾਨਿ ਪਿਣ੍ਡਪਾਤਿਕਾਨਂ ਨ ਵਟ੍ਟਨ੍ਤਿ, ਧੁਤਙ੍ਗਭੇਦਂ ਕਰੋਨ੍ਤਿਯੇਵ.

੨੧੪. ਅਪਰਾਨਿਪਿ ਚੀਵਰਕ੍ਖਨ੍ਧਕੇ (ਮਹਾਵ. ੩੫੦) ਵਿਸਾਖਾਯ ਵਰਂ ਯਾਚਿਤ੍ਵਾ ਦਿਨ੍ਨਾਨਿ ਆਗਨ੍ਤੁਕਭਤ੍ਤਂ ਗਮਿਕਭਤ੍ਤਂ ਗਿਲਾਨਭਤ੍ਤਂ ਗਿਲਾਨੁਪਟ੍ਠਾਕਭਤ੍ਤਨ੍ਤਿ ਚਤ੍ਤਾਰਿ ਭਤ੍ਤਾਨਿ ਪਾਲ਼ਿਯਂ ਆਗਤਾਨੇਵ. ਤਤ੍ਥ ਆਗਨ੍ਤੁਕਾਨਂ ਦਿਨ੍ਨਂ ਭਤ੍ਤਂ ਆਗਨ੍ਤੁਕਭਤ੍ਤਂ. ਏਸ ਨਯੋ ਸੇਸੇਸੁ. ਸਚੇ ਪਨੇਤ੍ਥ ਆਗਨ੍ਤੁਕਭਤ੍ਤਾਨਿਪਿ ਆਗਨ੍ਤੁਕਾਪਿ ਬਹੂ ਹੋਨ੍ਤਿ, ਸਬ੍ਬੇਸਂ ਏਕੇਕਂ ਗਾਹੇਤਬ੍ਬਂ. ਭਤ੍ਤੇਸੁ ਅਪ੍ਪਹੋਨ੍ਤੇਸੁ ਠਿਤਿਕਾਯ ਗਾਹੇਤਬ੍ਬਂ. ਏਕੋ ਆਗਨ੍ਤੁਕੋ ਪਠਮਮੇਵ ਆਗਨ੍ਤ੍ਵਾ ਸਬ੍ਬਂ ਆਗਨ੍ਤੁਕਭਤ੍ਤਂ ਅਤ੍ਤਨੋ ਗਾਹੇਤ੍ਵਾ ਨਿਸੀਦਤਿ, ਸਬ੍ਬਂ ਤਸ੍ਸੇਵ ਹੋਤਿ. ਪਚ੍ਛਾ ਆਗਤੇਹਿ ਆਗਨ੍ਤੁਕੇਹਿ ਤੇਨ ਦਿਨ੍ਨਾਨਿ ਪਰਿਭੁਞ੍ਜਿਤਬ੍ਬਾਨਿ. ਤੇਨਪਿ ਏਕਂ ਅਤ੍ਤਨੋ ਗਹੇਤ੍ਵਾ ਸੇਸਾਨਿ ਦਾਤਬ੍ਬਾਨਿ. ਅਯਂ ਉਲ਼ਾਰਤਾ. ਸਚੇ ਪਨ ਪਠਮਂ ਆਗਨ੍ਤ੍ਵਾਪਿ ਅਤ੍ਤਨੋ ਅਗ੍ਗਹੇਤ੍ਵਾ ਤੁਣ੍ਹੀਭੂਤੋ ਨਿਸੀਦਤਿ, ਪਚ੍ਛਾ ਆਗਤੇਹਿ ਸਦ੍ਧਿਂ ਪਟਿਪਾਟਿਯਾ ਗਣ੍ਹਿਤਬ੍ਬਂ. ਸਚੇ ਨਿਚ੍ਚਂ ਆਗਨ੍ਤੁਕਾ ਆਗਚ੍ਛਨ੍ਤਿ, ਆਗਤਦਿਵਸੇਯੇਵ ਭੁਞ੍ਜਿਤਬ੍ਬਂ. ਅਨ੍ਤਰਨ੍ਤਰਾ ਚੇ ਆਗਚ੍ਛਨ੍ਤਿ, ਦ੍ਵੇ ਤੀਣਿ ਦਿਵਸਾਨਿ ਭੁਞ੍ਜਿਤਬ੍ਬਂ. ਮਹਾਪਚ੍ਚਰਿਯਂ ਪਨ ‘‘ਸਤ੍ਤ ਦਿਵਸਾਨਿ ਭੁਞ੍ਜਿਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਆਵਾਸਿਕੋ ਕਤ੍ਥਚਿ ਗਨ੍ਤ੍ਵਾ ਆਗਤੋ, ਤੇਨਪਿ ਆਗਨ੍ਤੁਕਭਤ੍ਤਂ ਭੁਞ੍ਜਿਤਬ੍ਬਂ. ਸਚੇ ਪਨ ਤਂ ਵਿਹਾਰੇ ਨਿਬਨ੍ਧਾਪਿਤਂ ਹੋਤਿ, ਵਿਹਾਰੇ ਗਾਹੇਤਬ੍ਬਂ. ਅਥ ਵਿਹਾਰੋ ਦੂਰੇ ਹੋਤਿ, ਆਸਨਸਾਲਾਯ ਨਿਬਨ੍ਧਾਪਿਤਂ, ਆਸਨਸਾਲਾਯ ਗਾਹੇਤਬ੍ਬਂ. ਸਚੇ ਪਨ ਦਾਯਕਾ ‘‘ਆਗਨ੍ਤੁਕੇਸੁ ਅਸਤਿ ਆਵਾਸਿਕਾਪਿ ਭੁਞ੍ਜਨ੍ਤੂ’’ਤਿ ਵਦਨ੍ਤਿ, ਵਟ੍ਟਤਿ, ਅਵੁਤ੍ਤੇ ਪਨ ਨ ਵਟ੍ਟਤਿ.

ਗਮਿਕਭਤ੍ਤੇਪਿ ਅਯਮੇਵ ਕਥਾਮਗ੍ਗੋ. ਅਯਂ ਪਨ ਵਿਸੇਸੋ – ਆਗਨ੍ਤੁਕੋ ਆਗਨ੍ਤੁਕਭਤ੍ਤਮੇਵ ਲਭਤਿ, ਗਮਿਕੋ ਆਗਨ੍ਤੁਕਭਤ੍ਤਮ੍ਪਿ ਗਮਿਕਭਤ੍ਤਮ੍ਪਿ. ਆਵਾਸਿਕੋਪਿ ਪਕ੍ਕਮਿਤੁਕਾਮੋ ਗਮਿਕੋ ਹੋਤਿ, ਗਮਿਕਭਤ੍ਤਂ ਲਭਤਿ. ਯਥਾ ਪਨ ਆਗਨ੍ਤੁਕਭਤ੍ਤਂ, ਏਵਮਿਦਂ ਦ੍ਵੇ ਤੀਣਿ ਵਾ ਸਤ੍ਤ ਵਾ ਦਿਵਸਾਨਿ ਨ ਲਭਤਿ. ‘‘ਗਮਿਸ੍ਸਾਮੀ’’ਤਿ ਭੁਤ੍ਤੋਪਿ ਤਂ ਦਿਵਸਂ ਕੇਨਚਿ ਕਾਰਣੇਨ ਨ ਗਤੋ, ਪੁਨਦਿਵਸੇਪਿ ਭੁਞ੍ਜਿਤੁਂ ਵਟ੍ਟਤਿ ਸਉਸ੍ਸਾਹਤ੍ਤਾ. ‘‘ਗਮਿਸ੍ਸਾਮੀ’’ਤਿ ਭੁਤ੍ਤਸ੍ਸ ਚੋਰਾ ਵਾ ਪਨ੍ਥਂ ਰੁਨ੍ਧਨ੍ਤਿ, ਉਦਕਂ ਵਾ ਦੇਵੋ ਵਾ ਵਸ੍ਸਤਿ, ਸਤ੍ਥੋ ਵਾ ਨ ਗਚ੍ਛਤਿ, ਸਉਸ੍ਸਾਹੇਨ ਭੁਞ੍ਜਿਤਬ੍ਬਂ. ‘‘ਏਤੇ ਉਪਦ੍ਦਵੇ ਓਲੋਕੇਨ੍ਤੇਨ ਦ੍ਵੇ ਤਯੋ ਦਿਵਸੇ ਭੁਞ੍ਜਿਤੁਂ ਵਟ੍ਟਤੀ’’ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ‘‘ਗਮਿਸ੍ਸਾਮਿ ਗਮਿਸ੍ਸਾਮੀ’’ਤਿ ਪਨ ਲੇਸਂ ਓਡ੍ਡੇਤ੍ਵਾ ਭੁਞ੍ਜਿਤੁਂ ਨ ਲਭਤਿ.

ਗਿਲਾਨਭਤ੍ਤਮ੍ਪਿ ਸਚੇ ਸਬ੍ਬੇਸਂ ਗਿਲਾਨਾਨਂ ਪਹੋਤਿ, ਤਂ ਸਬ੍ਬੇਸਂ ਦਾਤਬ੍ਬਂ. ਨੋ ਚੇ, ਠਿਤਿਕਂ ਕਤ੍ਵਾ ਗਾਹੇਤਬ੍ਬਂ. ਏਕੋ ਗਿਲਾਨੋ ਅਰੋਗਰੂਪੋ ਸਕ੍ਕੋਤਿ ਅਨ੍ਤੋਗਾਮਂ ਗਨ੍ਤੁਂ, ਏਕੋ ਨ ਸਕ੍ਕੋਤਿ, ਅਯਂ ਮਹਾਗਿਲਾਨੋ ਨਾਮ, ਏਤਸ੍ਸ ਗਿਲਾਨਭਤ੍ਤਂ ਦਾਤਬ੍ਬਂ. ਦ੍ਵੇ ਮਹਾਗਿਲਾਨਾ, ਏਕੋ ਲਾਭੀ ਅਭਿਞ੍ਞਾਤੋ ਬਹੁਂ ਖਾਦਨੀਯਭੋਜਨੀਯਂ ਲਭਤਿ, ਏਕੋ ਅਨਾਥੋ ਅਪ੍ਪਲਾਭਤਾਯ ਅਨ੍ਤੋਗਾਮਂ ਪਵਿਸਤਿ, ਏਤਸ੍ਸ ਗਿਲਾਨਭਤ੍ਤਂ ਦਾਤਬ੍ਬਂ. ਗਿਲਾਨਭਤ੍ਤੇ ਦਿਵਸਪਰਿਚ੍ਛੇਦੋ ਨਤ੍ਥਿ, ਯਾਵ ਰੋਗੋ ਨ ਵੂਪਸਮ੍ਮਤਿ, ਸਪ੍ਪਾਯਭੋਜਨਂ ਅਭੁਞ੍ਜਨ੍ਤੋ ਨ ਯਾਪੇਤਿ, ਤਾਵ ਭੁਞ੍ਜਿਤਬ੍ਬਂ. ਯਦਾ ਪਨ ਮਿਸ੍ਸਕਯਾਗੁਂ ਵਾ ਮਿਸ੍ਸਕਭਤ੍ਤਂ ਵਾ ਭੁਤ੍ਤਸ੍ਸਪਿ ਰੋਗੋ ਨ ਕੁਪ੍ਪਤਿ, ਤਤੋ ਪਟ੍ਠਾਯ ਨ ਭੁਞ੍ਜਿਤਬ੍ਬਂ.

ਗਿਲਾਨੁਪਟ੍ਠਾਕਭਤ੍ਤਮ੍ਪਿ ਯਂ ਸਬ੍ਬੇਸਂ ਪਹੋਤਿ, ਤਂ ਸਬ੍ਬੇਸਂ ਦਾਤਬ੍ਬਂ. ਨੋ ਚੇ ਪਹੋਤਿ, ਠਿਤਿਕਂ ਕਤ੍ਵਾ ਗਾਹੇਤਬ੍ਬਂ. ਇਦਮ੍ਪਿ ਦ੍ਵੀਸੁ ਗਿਲਾਨੇਸੁ ਮਹਾਗਿਲਾਨੁਪਟ੍ਠਾਕਸ੍ਸ ਗਾਹੇਤਬ੍ਬਂ, ਦ੍ਵੀਸੁ ਮਹਾਗਿਲਾਨੇਸੁ ਅਨਾਥਗਿਲਾਨੁਪਟ੍ਠਾਕਸ੍ਸ. ਯਂ ਕੁਲਂ ਗਿਲਾਨਭਤ੍ਤਮ੍ਪਿ ਦੇਤਿ ਗਿਲਾਨੁਪਟ੍ਠਾਕਭਤ੍ਤਮ੍ਪਿ, ਤਤ੍ਥ ਯਸ੍ਸ ਗਿਲਾਨਸ੍ਸ ਗਿਲਾਨਭਤ੍ਤਂ ਪਾਪੁਣਾਤਿ, ਤਦੁਪਟ੍ਠਾਕਸ੍ਸਪਿ ਤਤ੍ਥੇਵ ਗਾਹੇਤਬ੍ਬਂ. ਗਿਲਾਨੁਪਟ੍ਠਾਕਭਤ੍ਤੇਪਿ ਦਿਵਸਪਰਿਚ੍ਛੇਦੋ ਨਤ੍ਥਿ, ਯਾਵ ਗਿਲਾਨੋ ਲਭਤਿ, ਤਾਵਸ੍ਸ ਉਪਟ੍ਠਾਕੋਪਿ ਲਭਤੀਤਿ. ਇਮਾਨਿ ਚਤ੍ਤਾਰਿ ਭਤ੍ਤਾਨਿ ਸਚੇ ਏਵਂ ਦਿਨ੍ਨਾਨਿ ਹੋਨ੍ਤਿ ‘‘ਆਗਨ੍ਤੁਕਗਮਿਕਗਿਲਾਨਗਿਲਾਨੁਪਟ੍ਠਾਕਾ ਮਮ ਭਿਕ੍ਖਂ ਗਣ੍ਹਨ੍ਤੂ’’ਤਿ, ਪਿਣ੍ਡਪਾਤਿਕਾਨਮ੍ਪਿ ਵਟ੍ਟਤਿ. ਸਚੇ ਪਨ ‘‘ਆਗਨ੍ਤੁਕਾਦੀਨਂ ਚਤੁਨ੍ਨਂ ਭਤ੍ਤਂ ਨਿਬਨ੍ਧਾਪੇਮਿ, ਮਮ ਭਤ੍ਤਂ ਗਣ੍ਹਨ੍ਤੂ’’ਤਿ ਏਵਂ ਦਿਨ੍ਨਾਨਿ ਹੋਨ੍ਤਿ, ਪਿਣ੍ਡਪਾਤਿਕਾਨਂ ਨ ਵਟ੍ਟਤਿ.

੨੧੫. ਅਪਰਾਨਿਪਿ ਧੁਰਭਤ੍ਤਂ ਕੁਟਿਭਤ੍ਤਂ ਵਾਰਕਭਤ੍ਤਨ੍ਤਿ ਤੀਣਿ ਭਤ੍ਤਾਨਿ. ਤਤ੍ਥ ਧੁਰਭਤ੍ਤਨ੍ਤਿ ਨਿਚ੍ਚਭਤ੍ਤਂ ਵੁਚ੍ਚਤਿ, ਤਂ ਦੁਵਿਧਂ ਸਙ੍ਘਿਕਞ੍ਚ ਪੁਗ੍ਗਲਿਕਞ੍ਚ. ਤਤ੍ਥ ਯਂ ‘‘ਸਙ੍ਘਸ੍ਸ ਧੁਰਭਤ੍ਤਂ ਦੇਮਾ’’ਤਿ ਨਿਬਨ੍ਧਾਪਿਤਂ, ਤਂ ਸਲਾਕਭਤ੍ਤਗਤਿਕਂ. ‘‘ਮਮ ਨਿਬਦ੍ਧਭਿਕ੍ਖਂ ਗਣ੍ਹਨ੍ਤੂ’’ਤਿ ਵਤ੍ਵਾ ਦਿਨ੍ਨਂ ਪਨ ਪਿਣ੍ਡਪਾਤਿਕਾਨਮ੍ਪਿ ਵਟ੍ਟਤਿ. ਪੁਗ੍ਗਲਿਕੇਪਿ ‘‘ਤੁਮ੍ਹਾਕਂ ਧੁਰਭਤ੍ਤਂ ਦਮ੍ਮੀ’’ਤਿ ਵੁਤ੍ਤੇ ਪਿਣ੍ਡਪਾਤਿਕੋ ਚੇ, ਨ ਵਟ੍ਟਤਿ, ‘‘ਮਮ ਨਿਬਦ੍ਧਭਿਕ੍ਖਂ ਗਣ੍ਹਥਾ’’ਤਿ ਵੁਤ੍ਤੇ ਪਨ ਵਟ੍ਟਤਿ, ਸਾਦਿਤਬ੍ਬਂ. ਸਚੇ ਪਚ੍ਛਾ ਕਤਿਪਾਹੇ ਵੀਤਿਵਤ੍ਤੇ ‘‘ਧੁਰਭਤ੍ਤਂ ਗਣ੍ਹਥਾ’’ਤਿ ਵਦਤਿ, ਮੂਲੇ ਸੁਟ੍ਠੁ ਸਮ੍ਪਟਿਚ੍ਛਿਤਤ੍ਤਾ ਵਟ੍ਟਤਿ.

ਕੁਟਿਭਤ੍ਤਂ ਨਾਮ ਯਂ ਸਙ੍ਘਸ੍ਸ ਆਵਾਸਂ ਕਾਰੇਤ੍ਵਾ ‘‘ਅਮ੍ਹਾਕਂ ਸੇਨਾਸਨਵਾਸਿਨੋ ਅਮ੍ਹਾਕਂਯੇਵ ਭਤ੍ਤਂ ਗਣ੍ਹਨ੍ਤੂ’’ਤਿ ਏਵਂ ਨਿਬਨ੍ਧਾਪਿਤਂ, ਤਂ ਸਲਾਕਭਤ੍ਤਗਤਿਕਮੇਵ ਹੋਤਿ, ਗਾਹੇਤ੍ਵਾ ਭੁਞ੍ਜਿਤਬ੍ਬਂ. ‘‘ਅਮ੍ਹਾਕਂ ਸੇਨਾਸਨਵਾਸਿਨੋ ਅਮ੍ਹਾਕਂਯੇਵ ਭਿਕ੍ਖਂ ਗਣ੍ਹਨ੍ਤੂ’’ਤਿ ਵੁਤ੍ਤੇ ਪਨ ਪਿਣ੍ਡਪਾਤਿਕਾਨਮ੍ਪਿ ਵਟ੍ਟਤਿ. ਯਂ ਪਨ ਪੁਗ੍ਗਲੇ ਪਸੀਦਿਤ੍ਵਾ ਤਸ੍ਸ ਆਵਾਸਂ ਕਤ੍ਵਾ ‘‘ਤੁਮ੍ਹਾਕਂ ਦੇਮਾ’’ਤਿ ਦਿਨ੍ਨਂ, ਤਂ ਤਸ੍ਸੇਵ ਹੋਤਿ, ਤਸ੍ਮਿਂ ਕਤ੍ਥਚਿ ਗਤੇ ਨਿਸ੍ਸਿਤਕੇਹਿ ਭੁਞ੍ਜਿਤਬ੍ਬਂ.

ਵਾਰਕਭਤ੍ਤਂ ਨਾਮ ਦੁਬ੍ਭਿਕ੍ਖਸਮਯੇ ‘‘ਵਾਰੇਨ ਭਿਕ੍ਖੂ ਜਗ੍ਗਿਸ੍ਸਾਮਾ’’ਤਿ ਧੁਰਗੇਹਤੋ ਪਟ੍ਠਾਯ ਦਿਨ੍ਨਂ, ਤਮ੍ਪਿ ਭਿਕ੍ਖਾਵਚਨੇਨ ਦਿਨ੍ਨਂ ਪਿਣ੍ਡਪਾਤਿਕਾਨਂ ਵਟ੍ਟਤਿ, ‘‘ਵਾਰਕਭਤ੍ਤ’’ਨ੍ਤਿ ਵੁਤ੍ਤੇ ਪਨ ਸਲਾਕਭਤ੍ਤਗਤਿਕਂ ਹੋਤਿ. ਸਚੇ ਤਣ੍ਡੁਲਾਦੀਨਿ ਪੇਸੇਨ੍ਤਿ ‘‘ਸਾਮਣੇਰਾ ਪਚਿਤ੍ਵਾ ਦੇਨ੍ਤੂ’’ਤਿ, ਪਿਣ੍ਡਪਾਤਿਕਾਨਂ ਵਟ੍ਟਤਿ. ਇਤਿ ਇਮਾਨਿ ਚ ਤੀਣਿ, ਆਗਨ੍ਤੁਕਭਤ੍ਤਾਦੀਨਿ ਚ ਚਤ੍ਤਾਰੀਤਿ ਸਤ੍ਤ, ਤਾਨਿ ਸਙ੍ਘਭਤ੍ਤਾਦੀਹਿ ਸਹ ਚੁਦ੍ਦਸ ਭਤ੍ਤਾਨਿ ਹੋਨ੍ਤਿ.

੨੧੬. ਅਟ੍ਠਕਥਾਯਂ ਪਨ ਵਿਹਾਰਭਤ੍ਤਂ ਅਟ੍ਠਕਭਤ੍ਤਂ ਚਤੁਕ੍ਕਭਤ੍ਤਂ ਗੁਲ਼੍ਹਕਭਤ੍ਤਨ੍ਤਿ ਅਞ੍ਞਾਨਿਪਿ ਚਤ੍ਤਾਰਿ ਭਤ੍ਤਾਨਿ ਵੁਤ੍ਤਾਨਿ. ਤਤ੍ਥ ਵਿਹਾਰਭਤ੍ਤਂ ਨਾਮ ਵਿਹਾਰੇ ਤਤ੍ਰੁਪ੍ਪਾਦਭਤ੍ਤਂ, ਤਂ ਸਙ੍ਘਭਤ੍ਤੇਨ ਸਙ੍ਗਹਿਤਂ. ਤਂ ਪਨ ਤਿਸ੍ਸਮਹਾਵਿਹਾਰਚਿਤ੍ਤਲਪਬ੍ਬਤਾਦੀਸੁ ਪਟਿਸਮ੍ਭਿਦਾਪ੍ਪਤ੍ਤੇਹਿ ਖੀਣਾਸਵੇਹਿ ਯਥਾ ਪਿਣ੍ਡਪਾਤਿਕਾਨਮ੍ਪਿ ਸਕ੍ਕਾ ਹੋਨ੍ਤਿ ਪਰਿਭੁਞ੍ਜਿਤੁਂ, ਤਥਾ ਪਟਿਗ੍ਗਹਿਤਤ੍ਤਾ ਤਾਦਿਸੇਸੁ ਠਾਨੇਸੁ ਪਿਣ੍ਡਪਾਤਿਕਾਨਮ੍ਪਿ ਵਟ੍ਟਤਿ. ‘‘ਅਟ੍ਠਨ੍ਨਂ ਭਿਕ੍ਖੂਨਂ ਦੇਮ, ਚਤੁਨ੍ਨਂ ਦੇਮਾ’’ਤਿ ਏਵਂ ਦਿਨ੍ਨਂ ਪਨ ਅਟ੍ਠਕਭਤ੍ਤਞ੍ਚੇਵ ਚਤੁਕ੍ਕਭਤ੍ਤਞ੍ਚ, ਤਮ੍ਪਿ ਭਿਕ੍ਖਾਵਚਨੇਨ ਦਿਨ੍ਨਂ ਪਿਣ੍ਡਪਾਤਿਕਾਨਂ ਵਟ੍ਟਤਿ. ਮਹਾਭਿਸਙ੍ਖਾਰੇਨ ਅਤਿਰਸਕਪੂਵੇਨ ਪਤ੍ਤਂ ਥਕੇਤ੍ਵਾ ਦਿਨ੍ਨਂ ਗੁਲ਼੍ਹਕਭਤ੍ਤਂ ਨਾਮ. ਇਮਾਨਿ ਤੀਣਿ ਸਲਾਕਭਤ੍ਤਗਤਿਕਾਨੇਵ. ਅਪਰਮ੍ਪਿ ਗੁਲ਼੍ਹਕਭਤ੍ਤਂ ਨਾਮ ਅਤ੍ਥਿ, ਇਧੇਕਚ੍ਚੇ ਮਨੁਸ੍ਸਾ ਮਹਾਧਮ੍ਮਸ੍ਸਵਨਞ੍ਚ ਵਿਹਾਰਪੂਜਞ੍ਚ ਕਾਰੇਤ੍ਵਾ ‘‘ਸਕਲਸਙ੍ਘਸ੍ਸ ਦਾਤੁਂ ਨ ਸਕ੍ਕੋਮ, ਦ੍ਵੇ ਤੀਣਿ ਭਿਕ੍ਖੁਸਤਾਨਿ ਅਮ੍ਹਾਕਂ ਭਿਕ੍ਖਂ ਗਣ੍ਹਨ੍ਤੂ’’ਤਿ ਭਿਕ੍ਖੁਪਰਿਚ੍ਛੇਦਜਾਨਨਤ੍ਥਂ ਗੁਲ਼੍ਹਕੇ ਦੇਨ੍ਤਿ, ਇਦਂ ਪਿਣ੍ਡਪਾਤਿਕਾਨਮ੍ਪਿ ਵਟ੍ਟਤਿ.

ਪਿਣ੍ਡਪਾਤਭਾਜਨੀਯਂ ਨਿਟ੍ਠਿਤਂ.

੨੧੭. ਗਿਲਾਨਪਚ੍ਚਯਭਾਜਨੀਯਂ ਪਨ ਏਵਂ ਵੇਦਿਤਬ੍ਬਂ (ਚੂਲ਼ਵ. ਅਟ੍ਠ. ੩੨੫ ਪਕ੍ਖਿਕਭਤ੍ਤਾਦਿਕਥਾ) – ਸਪ੍ਪਿਆਦੀਸੁ ਭੇਸਜ੍ਜੇਸੁ ਰਾਜਰਾਜਮਹਾਮਤ੍ਤਾ ਸਪ੍ਪਿਸ੍ਸ ਤਾਵ ਕੁਮ੍ਭਸਤਮ੍ਪਿ ਕੁਮ੍ਭਸਹਸ੍ਸਮ੍ਪਿ ਵਿਹਾਰਂ ਪੇਸੇਨ੍ਤਿ, ਘਣ੍ਟਿਂ ਪਹਰਿਤ੍ਵਾ ਥੇਰਾਸਨਤੋ ਪਟ੍ਠਾਯ ਗਹਿਤਭਾਜਨਂ ਪੂਰੇਤ੍ਵਾ ਦਾਤਬ੍ਬਂ, ਪਿਣ੍ਡਪਾਤਿਕਾਨਮ੍ਪਿ ਵਟ੍ਟਤਿ. ਸਚੇ ਅਲਸਜਾਤਿਕਾ ਮਹਾਥੇਰਾ ਪਚ੍ਛਾ ਆਗਚ੍ਛਨ੍ਤਿ, ‘‘ਭਨ੍ਤੇ, ਵੀਸਤਿਵਸ੍ਸਾਨਂ ਦੀਯਤਿ, ਤੁਮ੍ਹਾਕਂ ਠਿਤਿਕਾ ਅਤਿਕ੍ਕਨ੍ਤਾ’’ਤਿ ਨ ਵਤ੍ਤਬ੍ਬਾ, ਠਿਤਿਕਂ ਠਪੇਤ੍ਵਾ ਤੇਸਂ ਦਤ੍ਵਾ ਪਚ੍ਛਾ ਠਿਤਿਕਾਯ ਦਾਤਬ੍ਬਂ. ‘‘ਅਸੁਕਵਿਹਾਰੇ ਬਹੁ ਸਪ੍ਪਿ ਉਪ੍ਪਨ੍ਨ’’ਨ੍ਤਿ ਸੁਤ੍ਵਾ ਯੋਜਨਨ੍ਤਰਵਿਹਾਰਤੋਪਿ ਭਿਕ੍ਖੂ ਆਗਚ੍ਛਨ੍ਤਿ, ਸਮ੍ਪਤ੍ਤਸਮ੍ਪਤ੍ਤਾਨਮ੍ਪਿ ਠਿਤਟ੍ਠਾਨਤੋ ਪਟ੍ਠਾਯ ਦਾਤਬ੍ਬਂ. ਅਸਮ੍ਪਤ੍ਤਾਨਮ੍ਪਿ ਉਪਚਾਰਸੀਮਂ ਪਵਿਟ੍ਠਾਨਂ ਅਨ੍ਤੇਵਾਸਿਕਾਦੀਸੁ ਗਣ੍ਹਨ੍ਤੇਸੁ ਦਾਤਬ੍ਬਮੇਵ. ‘‘ਬਹਿਉਪਚਾਰਸੀਮਾਯ ਠਿਤਾਨਂ ਦੇਥਾ’’ਤਿ ਵਦਨ੍ਤਿ, ਨ ਦਾਤਬ੍ਬਂ. ਸਚੇ ਪਨ ਉਪਚਾਰਸੀਮਂ ਓਕ੍ਕਨ੍ਤੇਹਿ ਏਕਾਬਦ੍ਧਾ ਹੁਤ੍ਵਾ ਅਤ੍ਤਨੋ ਵਿਹਾਰਦ੍ਵਾਰੇ ਅਨ੍ਤੋਵਿਹਾਰੇਯੇਵ ਵਾ ਹੋਨ੍ਤਿ, ਪਰਿਸਵਸੇਨ ਵਡ੍ਢਿਤਾ ਨਾਮ ਸੀਮਾ ਹੋਤਿ, ਤਸ੍ਮਾ ਦਾਤਬ੍ਬਾ. ਸਙ੍ਘਨਵਕਸ੍ਸ ਦਿਨ੍ਨੇਪਿ ਪਚ੍ਛਾ ਆਗਤਾਨਂ ਦਾਤਬ੍ਬਮੇਵ. ਦੁਤਿਯਭਾਗੇ ਪਨ ਥੇਰਾਸਨਂ ਆਰੁਲ਼੍ਹੇ ਆਗਤਾਨਂ ਪਠਮਭਾਗੋ ਨ ਪਾਪੁਣਾਤਿ, ਦੁਤਿਯਭਾਗਤੋ ਵਸ੍ਸਗ੍ਗੇਨ ਦਾਤਬ੍ਬਂ. ਅਨ੍ਤੋਉਪਚਾਰਸੀਮਂ ਪਵਿਸਿਤ੍ਵਾ ਯਤ੍ਥ ਕਤ੍ਥਚਿ ਦਿਨ੍ਨਂ ਹੋਤਿ, ਸਬ੍ਬਂ ਸਨ੍ਨਿਪਾਤਟ੍ਠਾਨੇਯੇਵ ਭਾਜੇਤਬ੍ਬਂ.

ਯਸ੍ਮਿਂ ਵਿਹਾਰੇ ਦਸ ਭਿਕ੍ਖੂ, ਦਸੇਵ ਚ ਸਪ੍ਪਿਕੁਮ੍ਭਾ ਦੀਯਨ੍ਤਿ, ਏਕੇਕਕੁਮ੍ਭਵਸੇਨ ਭਾਜੇਤਬ੍ਬਂ. ਏਕੋ ਸਪ੍ਪਿਕੁਮ੍ਭੋ ਹੋਤਿ, ਦਸਭਿਕ੍ਖੂਹਿ ਭਾਜੇਤ੍ਵਾ ਗਹੇਤਬ੍ਬਂ. ਸਚੇ ‘‘ਯਥਾਠਿਤਂਯੇਵ ਅਮ੍ਹਾਕਂ ਪਾਪੁਣਾਤੀ’’ਤਿ ਗਣ੍ਹਨ੍ਤਿ, ਦੁਗ੍ਗਹਿਤਂ, ਤਂ ਗਤਗਤਟ੍ਠਾਨੇ ਸਙ੍ਘਿਕਮੇਵ ਹੋਤਿ. ਕੁਮ੍ਭਂ ਪਨ ਆਵਜ੍ਜੇਤ੍ਵਾ ਥਾਲਕੇ ਥੋਕਂ ਸਪ੍ਪਿਂ ਕਤ੍ਵਾ ‘‘ਇਦਂ ਮਹਾਥੇਰਸ੍ਸ ਪਾਪੁਣਾਤਿ, ਅਵਸੇਸਂ ਅਮ੍ਹਾਕਂ ਪਾਪੁਣਾਤੀ’’ਤਿ ਵਤ੍ਵਾ ਤਮ੍ਪਿ ਕੁਮ੍ਭੇਯੇਵ ਆਕਿਰਿਤ੍ਵਾ ਯਥਿਚ੍ਛਿਤਂ ਗਹੇਤ੍ਵਾ ਗਨ੍ਤਬ੍ਬਂ. ਸਚੇ ਥਿਨਂ ਸਪ੍ਪਿ ਹੋਤਿ, ਲੇਖਂ ਕਤ੍ਵਾ ‘‘ਲੇਖਤੋ ਪਰਭਾਗੋ ਮਹਾਥੇਰਸ੍ਸ ਪਾਪੁਣਾਤਿ, ਅਵਸੇਸਂ ਅਮ੍ਹਾਕ’’ਨ੍ਤਿ ਗਹਿਤਮ੍ਪਿ ਸੁਗ੍ਗਹਿਤਂ. ਵੁਤ੍ਤਪਰਿਚ੍ਛੇਦਤੋ ਊਨਾਧਿਕੇਸੁ ਭਿਕ੍ਖੂਸੁ ਸਪ੍ਪਿਕੁਮ੍ਭੇਸੁ ਚ ਏਤੇਨੇਵ ਉਪਾਯੇਨ ਭਾਜੇਤਬ੍ਬਂ. ਸਚੇ ਪਨੇਕੋ ਭਿਕ੍ਖੁ, ਏਕੋ ਕੁਮ੍ਭੋ ਹੋਤਿ, ਘਣ੍ਟਿਂ ਪਹਰਿਤ੍ਵਾ ‘‘ਅਯਂ ਮਯ੍ਹਂ ਪਾਪੁਣਾਤੀ’’ਤਿਪਿ ਗਹੇਤੁਂ ਵਟ੍ਟਤਿ. ‘‘ਅਯਂ ਪਠਮਭਾਗੋ ਮਯ੍ਹਂ ਪਾਪੁਣਾਤਿ, ਅਯਂ ਦੁਤਿਯਭਾਗੋ’’ਤਿ ਏਵਂ ਥੋਕਂ ਥੋਕਮ੍ਪਿ ਪਾਪੇਤੁਂ ਵਟ੍ਟਤਿ. ਏਸ ਨਯੋ ਨਵਨੀਤਾਦੀਸੁਪਿ. ਯਸ੍ਮਿਂ ਪਨ ਵਿਪ੍ਪਸਨ੍ਨਤਿਲਤੇਲਾਦਿਮ੍ਹਿ ਲੇਖਾ ਨ ਸਨ੍ਤਿਟ੍ਠਤਿ, ਤਂ ਉਦ੍ਧਰਿਤ੍ਵਾ ਭਾਜੇਤਬ੍ਬਂ. ਸਿਙ੍ਗਿਵੇਰਮਰਿਚਾਦਿਭੇਸਜ੍ਜਮ੍ਪਿ ਅਵਸੇਸਪਤ੍ਤਥਾਲਕਾਦਿਸਮਣਪਰਿਕ੍ਖਾਰੋਪਿ ਸਬ੍ਬੋ ਵੁਤ੍ਤਾਨੁਰੂਪੇਨੇਵ ਨਯੇਨ ਸੁਟ੍ਠੁ ਸਲ੍ਲਕ੍ਖੇਤ੍ਵਾ ਭਾਜੇਤਬ੍ਬੋਤਿ. ਅਯਂ ਗਿਲਾਨਪਚ੍ਚਯਭਾਜਨੀਯਕਥਾ.

੨੧੮. ਇਦਾਨਿ ਸੇਨਾਸਨਗ੍ਗਾਹੇ ਵਿਨਿਚ੍ਛਯੋ ਵੇਦਿਤਬ੍ਬੋ (ਚੂਲ਼ਵ. ਅਟ੍ਠ. ੩੧੮) – ਅਯਂ ਸੇਨਾਸਨਗ੍ਗਾਹੋ ਨਾਮ ਦੁਵਿਧੋ ਹੋਤਿ ਉਤੁਕਾਲੇ ਚ ਵਸ੍ਸਾਵਾਸੇ ਚ. ਤਤ੍ਥ ਉਤੁਕਾਲੇ ਤਾਵ ਕੇਚਿ ਆਗਨ੍ਤੁਕਾ ਭਿਕ੍ਖੂ ਪੁਰੇਭਤ੍ਤਂ ਆਗਚ੍ਛਨ੍ਤਿ, ਕੇਚਿ ਪਚ੍ਛਾਭਤ੍ਤਂ ਪਠਮਯਾਮਂ ਮਜ੍ਝਿਮਯਾਮਂ ਪਚ੍ਛਿਮਯਾਮਂ ਵਾ. ਯੇ ਯਦਾ ਆਗਚ੍ਛਨ੍ਤਿ, ਤੇਸਂ ਤਦਾਵ ਭਿਕ੍ਖੂ ਉਟ੍ਠਾਪੇਤ੍ਵਾ ਸੇਨਾਸਨਂ ਦਾਤਬ੍ਬਂ, ਅਕਾਲੋ ਨਾਮ ਨਤ੍ਥਿ. ਸੇਨਾਸਨਪਞ੍ਞਾਪਕੇਨ ਪਨ ਪਣ੍ਡਿਤੇਨ ਭਵਿਤਬ੍ਬਂ, ਏਕਂ ਵਾ ਦ੍ਵੇ ਵਾ ਮਞ੍ਚਟ੍ਠਾਨਾਨਿ ਠਪੇਤਬ੍ਬਾਨਿ. ਸਚੇ ਵਿਕਾਲੇ ਏਕੋ ਵਾ ਦ੍ਵੇ ਵਾ ਥੇਰਾ ਆਗਚ੍ਛਨ੍ਤਿ, ਤੇ ਵਤ੍ਤਬ੍ਬਾ ‘‘ਭਨ੍ਤੇ, ਆਦਿਤੋ ਪਟ੍ਠਾਯ ਵੁਟ੍ਠਾਪਿਯਮਾਨੇ ਸਬ੍ਬੇਪਿ ਭਿਕ੍ਖੂ ਉਬ੍ਭਣ੍ਡਿਕਾ ਭਵਿਸ੍ਸਨ੍ਤਿ, ਤੁਮ੍ਹੇ ਅਮ੍ਹਾਕਂ ਵਸਨਟ੍ਠਾਨੇ ਵਸਥਾ’’ਤਿ.

ਬਹੂਸੁ ਪਨ ਆਗਤੇਸੁ ਵੁਟ੍ਠਾਪੇਤ੍ਵਾ ਪਟਿਪਾਟਿਯਾ ਦਾਤਬ੍ਬਂ. ਸਚੇ ਏਕੇਕਂ ਪਰਿਵੇਣਂ ਪਹੋਤਿ, ਏਕੇਕਂ ਪਰਿਵੇਣਂ ਦਾਤਬ੍ਬਂ. ਤਤ੍ਥ ਅਗ੍ਗਿਸਾਲਾਦੀਘਸਾਲਾਮਣ੍ਡਲਮਾਲ਼ਾਦਯੋ ਸਬ੍ਬੇਪਿ ਤਸ੍ਸੇਵ ਪਾਪੁਣਨ੍ਤਿ. ਏਵਂ ਅਪ੍ਪਹੋਨ੍ਤੇ ਪਾਸਾਦਗ੍ਗੇਨ ਦਾਤਬ੍ਬਂ, ਪਾਸਾਦੇਸੁ ਅਪ੍ਪਹੋਨ੍ਤੇਸੁ ਓਵਰਕਗ੍ਗੇਨ ਦਾਤਬ੍ਬਂ, ਓਵਰਕੇਸੁ ਅਪ੍ਪਹੋਨ੍ਤੇਸੁ ਸੇਯ੍ਯਗ੍ਗੇਨ ਦਾਤਬ੍ਬਂ, ਸੇਯ੍ਯਗ੍ਗੇਸੁ ਅਪ੍ਪਹੋਨ੍ਤੇਸੁ ਮਞ੍ਚਟ੍ਠਾਨੇਨ ਦਾਤਬ੍ਬਂ, ਮਞ੍ਚਟ੍ਠਾਨੇ ਅਪ੍ਪਹੋਨ੍ਤੇ ਏਕਪੀਠਕਟ੍ਠਾਨਵਸੇਨ ਦਾਤਬ੍ਬਂ, ਭਿਕ੍ਖੁਨੋ ਪਨ ਠਿਤੋਕਾਸਮਤ੍ਤਂ ਨ ਗਾਹੇਤਬ੍ਬਂ. ਏਤਞ੍ਹਿ ਸੇਨਾਸਨਂ ਨਾਮ ਨ ਹੋਤਿ. ਪੀਠਕਟ੍ਠਾਨੇ ਪਨ ਅਪ੍ਪਹੋਨ੍ਤੇ ਏਕਂ ਮਞ੍ਚਟ੍ਠਾਨਂ ਵਾ ਏਕਂ ਪੀਠਟ੍ਠਾਨਂ ਵਾ ‘‘ਵਾਰੇਨ ਵਾਰੇਨ, ਭਨ੍ਤੇ, ਵਿਸ੍ਸਮਥਾ’’ਤਿ ਤਿਣ੍ਣਂ ਜਨਾਨਂ ਦਾਤਬ੍ਬਂ. ਨ ਹਿ ਸਕ੍ਕਾ ਸੀਤਸਮਯੇ ਸਬ੍ਬਰਤ੍ਤਿਂ ਅਜ੍ਝੋਕਾਸੇਵ ਵਸਿਤੁਂ. ਮਹਾਥੇਰੇਨ ਪਠਮਯਾਮਂ ਵਿਸ੍ਸਮਿਤ੍ਵਾ ਨਿਕ੍ਖਮਿਤ੍ਵਾ ਦੁਤਿਯਤ੍ਥੇਰਸ੍ਸ ਵਤ੍ਤਬ੍ਬਂ ‘‘ਆਵੁਸੋ ਇਧ ਪਵਿਸਾਹੀ’’ਤਿ. ਸਚੇ ਮਹਾਥੇਰੋ ਨਿਦ੍ਦਾਗਰੁਕੋ ਹੋਤਿ, ਕਾਲਂ ਨ ਜਾਨਾਤਿ, ਉਕ੍ਕਾਸਿਤ੍ਵਾ ਦ੍ਵਾਰਂ ਆਕੋਟੇਤ੍ਵਾ ‘‘ਭਨ੍ਤੇ ਕਾਲੋ ਜਾਤੋ, ਸੀਤਂ ਅਨੁਦਹਤੀ’’ਤਿ ਵਤ੍ਤਬ੍ਬਂ. ਤੇਨ ਨਿਕ੍ਖਮਿਤ੍ਵਾ ਓਕਾਸੋ ਦਾਤਬ੍ਬੋ, ਅਦਾਤੁਂ ਨ ਲਭਤਿ. ਦੁਤਿਯਤ੍ਥੇਰੇਨਪਿ ਮਜ੍ਝਿਮਯਾਮਂ ਵਿਸ੍ਸਮਿਤ੍ਵਾ ਪੁਰਿਮਨਯੇਨੇਵ ਇਤਰਸ੍ਸ ਦਾਤਬ੍ਬਂ. ਨਿਦ੍ਦਾਗਰੁਕੋ ਵੁਤ੍ਤਨਯੇਨੇਵ ਵੁਟ੍ਠਾਪੇਤਬ੍ਬੋ. ਏਵਂ ਏਕਰਤ੍ਤਿਂ ਏਕਮਞ੍ਚਟ੍ਠਾਨਂ ਤਿਣ੍ਣਂ ਦਾਤਬ੍ਬਂ. ਜਮ੍ਬੁਦੀਪੇ ਪਨ ਏਕਚ੍ਚੇ ਭਿਕ੍ਖੂ ‘‘ਸੇਨਾਸਨਂ ਨਾਮ ਮਞ੍ਚਟ੍ਠਾਨਂ ਵਾ ਪੀਠਟ੍ਠਾਨਂ ਵਾ ਕਿਞ੍ਚਿਦੇਵ ਕਸ੍ਸਚਿ ਸਪ੍ਪਾਯਂ ਹੋਤਿ, ਕਸ੍ਸਚਿ ਅਸਪ੍ਪਾਯ’’ਨ੍ਤਿ ਆਗਨ੍ਤੁਕਾ ਹੋਨ੍ਤੁ ਵਾ ਮਾ ਵਾ, ਦੇਵਸਿਕਂ ਸੇਨਾਸਨਂ ਗਾਹੇਨ੍ਤਿ. ਅਯਂ ਉਤੁਕਾਲੇ ਸੇਨਾਸਨਗ੍ਗਾਹੋ ਨਾਮ.

੨੧੯. ਵਸ੍ਸਾਵਾਸੇ ਪਨ ਅਤ੍ਥਿ ਆਗਨ੍ਤੁਕਵਤ੍ਤਂ, ਅਤ੍ਥਿ ਆਵਾਸਿਕਵਤ੍ਤਂ. ਆਗਨ੍ਤੁਕੇਨ ਤਾਵ ਸਕਟ੍ਠਾਨਂ ਮੁਞ੍ਚਿਤ੍ਵਾ ਅਞ੍ਞਤ੍ਥ ਗਨ੍ਤ੍ਵਾ ਵਸਿਤੁਕਾਮੇਨ ਵਸ੍ਸੂਪਨਾਯਿਕਦਿਵਸਮੇਵ ਤਤ੍ਥ ਨ ਗਨ੍ਤਬ੍ਬਂ. ਵਸਨਟ੍ਠਾਨਂ ਵਾ ਹਿ ਤਤ੍ਰ ਸਮ੍ਬਾਧਂ ਭਵੇਯ੍ਯ, ਭਿਕ੍ਖਾਚਾਰੋ ਵਾ ਨ ਸਮ੍ਪਜ੍ਜੇਯ੍ਯ, ਤੇਨ ਨ ਫਾਸੁਕਂ ਵਿਹਰੇਯ੍ਯ, ਤਸ੍ਮਾ ‘‘ਇਦਾਨਿ ਮਾਸਮਤ੍ਤੇਨ ਵਸ੍ਸੂਪਨਾਯਿਕਾ ਭਵਿਸ੍ਸਤੀ’’ਤਿ ਤਂ ਵਿਹਾਰਂ ਪਵਿਸਿਤਬ੍ਬਂ. ਤਤ੍ਥ ਮਾਸਮਤ੍ਤਂ ਵਸਨ੍ਤੋ ਸਚੇ ਉਦ੍ਦੇਸਤ੍ਥਿਕੋ, ਉਦ੍ਦੇਸਸਮ੍ਪਤ੍ਤਿਂ ਸਲ੍ਲਕ੍ਖੇਤ੍ਵਾ, ਸਚੇ ਕਮ੍ਮਟ੍ਠਾਨਿਕੋ, ਕਮ੍ਮਟ੍ਠਾਨਸਪ੍ਪਾਯਤਂ ਸਲ੍ਲਕ੍ਖੇਤ੍ਵਾ, ਸਚੇ ਪਚ੍ਚਯਤ੍ਥਿਕੋ, ਪਚ੍ਚਯਲਾਭਂ ਸਲ੍ਲਕ੍ਖੇਤ੍ਵਾ ਅਨ੍ਤੋਵਸ੍ਸੇ ਸੁਖਂ ਵਸਿਸ੍ਸਤਿ. ਸਕਟ੍ਠਾਨਤੋ ਚ ਤਤ੍ਥ ਗਚ੍ਛਨ੍ਤੇਨ ਨ ਗੋਚਰਗਾਮੋ ਘਟ੍ਟੇਤਬ੍ਬੋ. ਨ ਤਤ੍ਥ ਮਨੁਸ੍ਸਾ ਵਤ੍ਤਬ੍ਬਾ ‘‘ਤੁਮ੍ਹੇ ਨਿਸ੍ਸਾਯ ਸਲਾਕਭਤ੍ਤਾਦੀਨਿ ਵਾ ਯਾਗੁਖਜ੍ਜਕਾਦੀਨਿ ਵਾ ਵਸ੍ਸਾਵਾਸਿਕਂ ਵਾ ਨਤ੍ਥਿ, ਅਯਂ ਚੇਤਿਯਸ੍ਸ ਪਰਿਕ੍ਖਾਰੋ, ਅਯਂ ਉਪੋਸਥਾਗਾਰਸ੍ਸ, ਇਦਂ ਤਾਲ਼ਞ੍ਚੇਵ ਸੂਚਿ ਚ, ਸਮ੍ਪਟਿਚ੍ਛਥ ਤੁਮ੍ਹਾਕਂ ਵਿਹਾਰ’’ਨ੍ਤਿ. ਸੇਨਾਸਨਂ ਪਨ ਜਗ੍ਗਿਤ੍ਵਾ ਦਾਰੁਭਣ੍ਡਮਤ੍ਤਿਕਾਭਣ੍ਡਾਨਿ ਪਟਿਸਾਮੇਤ੍ਵਾ ਗਮਿਕਵਤ੍ਤਂ ਪੂਰੇਤ੍ਵਾ ਗਨ੍ਤਬ੍ਬਂ.

ਏਵਂ ਗਚ੍ਛਨ੍ਤੇਨਪਿ ਦਹਰੇਹਿ ਪਤ੍ਤਚੀਵਰਭਣ੍ਡਿਕਾਯੋ ਉਕ੍ਖਿਪਾਪੇਤ੍ਵਾ ਤੇਲਨਾਲ਼ਿਕਤ੍ਤਰਦਣ੍ਡਾਦੀਨਿ ਗਾਹੇਤ੍ਵਾ ਛਤ੍ਤਂ ਪਗ੍ਗਯ੍ਹ ਅਤ੍ਤਾਨਂ ਦਸ੍ਸੇਨ੍ਤੇਨ ਗਾਮਦ੍ਵਾਰੇਨੇਵ ਨ ਗਨ੍ਤਬ੍ਬਂ, ਪਟਿਚ੍ਛਨ੍ਨੇਨ ਅਟਵਿਮਗ੍ਗੇਨ ਗਨ੍ਤਬ੍ਬਂ. ਅਟਵਿਮਗ੍ਗੇ ਅਸਤਿ ਗੁਮ੍ਬਾਦੀਨਿ ਮਦ੍ਦਨ੍ਤੇਨ ਨ ਗਨ੍ਤਬ੍ਬਂ, ਗਮਿਕਵਤ੍ਤਂ ਪਨ ਪੂਰੇਤ੍ਵਾ ਵਿਤਕ੍ਕਂ ਛਿਨ੍ਦਿਤ੍ਵਾ ਸੁਦ੍ਧਚਿਤ੍ਤੇਨ ਗਮਨਵਤ੍ਤੇਨੇਵ ਗਨ੍ਤਬ੍ਬਂ. ਸਚੇ ਪਨ ਗਾਮਦ੍ਵਾਰੇਨ ਮਗ੍ਗੋ ਹੋਤਿ, ਗਚ੍ਛਨ੍ਤਞ੍ਚ ਨਂ ਸਪਰਿਵਾਰਂ ਦਿਸ੍ਵਾ ਮਨੁਸ੍ਸਾ ‘‘ਅਮ੍ਹਾਕਂ ਥੇਰੋ ਵਿਯਾ’’ਤਿ ਉਪਧਾਵਿਤ੍ਵਾ ‘‘ਕੁਹਿਂ, ਭਨ੍ਤੇ, ਸਬ੍ਬਪਰਿਕ੍ਖਾਰੇ ਗਹੇਤ੍ਵਾ ਗਚ੍ਛਥਾ’’ਤਿ ਵਦਨ੍ਤਿ, ਤੇਸੁ ਚੇ ਏਕੋ ਏਵਂ ਵਦਤਿ ‘‘ਵਸ੍ਸੂਪਨਾਯਿਕਕਾਲੋ ਨਾਮਾਯਂ, ਯਤ੍ਥ ਅਨ੍ਤੋਵਸ੍ਸੇਨਿਬਦ੍ਧਭਿਕ੍ਖਾਚਾਰੋ ਭਣ੍ਡਪਟਿਚ੍ਛਾਦਨਞ੍ਚ ਲਬ੍ਭਤਿ, ਤਤ੍ਥ ਭਿਕ੍ਖੂ ਗਚ੍ਛਨ੍ਤੀ’’ਤਿ, ਤਸ੍ਸ ਚੇ ਸੁਤ੍ਵਾ ਤੇ ਮਨੁਸ੍ਸਾ ‘‘ਭਨ੍ਤੇ, ਇਮਸ੍ਮਿਮ੍ਪਿ ਗਾਮੇ ਜਨੋ ਭੁਞ੍ਜਤਿ ਚੇਵ ਨਿਵਾਸੇਤਿ ਚ, ਮਾ ਅਞ੍ਞਤ੍ਥ ਗਚ੍ਛਥਾ’’ਤਿ ਵਤ੍ਵਾ ਮਿਤ੍ਤਾਮਚ੍ਚੇ ਪਕ੍ਕੋਸਿਤ੍ਵਾ ਸਬ੍ਬੇ ਸਮ੍ਮਨ੍ਤਯਿਤ੍ਵਾ ਵਿਹਾਰੇ ਨਿਬਦ੍ਧਵਤ੍ਤਞ੍ਚ ਸਲਾਕਭਤ੍ਤਾਦੀਨਿ ਚ ਵਸ੍ਸਾਵਾਸਿਕਞ੍ਚ ਠਪੇਤ੍ਵਾ ‘‘ਇਧੇਵ, ਭਨ੍ਤੇ, ਵਸਥਾ’’ਤਿ ਯਾਚਨ੍ਤਿ, ਸਬ੍ਬੇਸਂ ਸਾਦਿਤੁਂ ਵਟ੍ਟਤਿ. ਸਬ੍ਬਞ੍ਚੇਤਂ ਕਪ੍ਪਿਯਞ੍ਚੇਵ ਅਨਵਜ੍ਜਞ੍ਚ. ਕੁਰੁਨ੍ਦਿਯਂ ਪਨ ‘‘ਕੁਹਿਂ ਗਚ੍ਛਥਾਤਿ ਵੁਤ੍ਤੇ ‘ਅਸੁਕਟ੍ਠਾਨ’ਨ੍ਤਿ ਵਤ੍ਵਾ ‘ਕਸ੍ਮਾ ਤਤ੍ਥ ਗਚ੍ਛਥਾ’ਤਿ ਵੁਤ੍ਤੇ ‘ਕਾਰਣਂ ਆਚਿਕ੍ਖਿਤਬ੍ਬ’’’ਨ੍ਤਿ ਵੁਤ੍ਤਂ. ਉਭਯਮ੍ਪਿ ਪਨੇਤਂ ਸੁਦ੍ਧਚਿਤ੍ਤਤ੍ਤਾਵ ਅਨਵਜ੍ਜਂ. ਇਦਂ ਆਗਨ੍ਤੁਕਵਤ੍ਤਂ ਨਾਮ.

ਇਦਂ ਪਨ ਆਵਾਸਿਕਵਤ੍ਤਂ. ਪਟਿਕਚ੍ਚੇਵ ਹਿ ਆਵਾਸਿਕੇਹਿ ਵਿਹਾਰੋ ਜਗ੍ਗਿਤਬ੍ਬੋ, ਖਣ੍ਡਫੁਲ੍ਲਪਟਿਸਙ੍ਖਰਣਪਰਿਭਣ੍ਡਾਨਿ ਕਾਤਬ੍ਬਾਨਿ, ਰਤ੍ਤਿਟ੍ਠਾਨਦਿਵਾਟ੍ਠਾਨਵਚ੍ਚਕੁਟਿਪਸ੍ਸਾਵਟ੍ਠਾਨਾਨਿ ਪਧਾਨਘਰਵਿਹਾਰਮਗ੍ਗੋਤਿ ਇਮਾਨਿ ਸਬ੍ਬਾਨਿ ਪਟਿਜਗ੍ਗਿਤਬ੍ਬਾਨਿ. ਚੇਤਿਯੇ ਸੁਧਾਕਮ੍ਮਂ ਮੁਣ੍ਡਵੇਦਿਕਾਯ ਤੇਲਮਕ੍ਖਨਂ ਮਞ੍ਚਪੀਠਜਗ੍ਗਨਨ੍ਤਿ ਇਦਮ੍ਪਿ ਸਬ੍ਬਂ ਕਾਤਬ੍ਬਂ ‘‘ਵਸ੍ਸਂ ਵਸਿਤੁਕਾਮਾ ਆਗਨ੍ਤ੍ਵਾ ਉਦ੍ਦੇਸਪਰਿਪੁਚ੍ਛਾਕਮ੍ਮਟ੍ਠਾਨਾਨੁਯੋਗਾਦੀਨਿ ਕਰੋਨ੍ਤਾ ਸੁਖਂ ਵਸਿਸ੍ਸਨ੍ਤੀ’’ਤਿ. ਕਤਪਰਿਕਮ੍ਮੇਹਿ ਆਸਾਲ਼੍ਹੀਜੁਣ੍ਹਪਞ੍ਚਮਿਤੋ ਪਟ੍ਠਾਯ ਵਸ੍ਸਾਵਾਸਿਕਂ ਪੁਚ੍ਛਿਤਬ੍ਬਂ. ਕਤ੍ਥ ਪੁਚ੍ਛਿਤਬ੍ਬਂ? ਯਤੋ ਪਕਤਿਯਾ ਲਬ੍ਭਤਿ. ਯੇਹਿ ਪਨ ਨ ਦਿਨ੍ਨਪੁਬ੍ਬਂ, ਤੇ ਪੁਚ੍ਛਿਤੁਂ ਨ ਵਟ੍ਟਤਿ. ਕਸ੍ਮਾ ਪੁਚ੍ਛਿਤਬ੍ਬਂ? ਕਦਾਚਿ ਹਿ ਮਨੁਸ੍ਸਾ ਦੇਨ੍ਤਿ, ਕਦਾਚਿ ਦੁਬ੍ਭਿਕ੍ਖਾਦੀਹਿ ਉਪਦ੍ਦੁਤਾ ਨ ਦੇਨ੍ਤਿ, ਤਤ੍ਥ ਯੇ ਨ ਦਸ੍ਸਨ੍ਤਿ, ਤੇ ਅਪੁਚ੍ਛਿਤ੍ਵਾ ਵਸ੍ਸਾਵਾਸਿਕੇ ਗਾਹਿਤੇ ਗਾਹਿਤਭਿਕ੍ਖੂਨਂ ਲਾਭਨ੍ਤਰਾਯੋ ਹੋਤਿ, ਤਸ੍ਮਾ ਪੁਚ੍ਛਿਤ੍ਵਾਵ ਗਾਹੇਤਬ੍ਬਂ.

ਪੁਚ੍ਛਨ੍ਤੇਨ ‘‘ਤੁਮ੍ਹਾਕਂ ਵਸ੍ਸਾਵਾਸਿਕਂ ਗਾਹਣਕਾਲੋ ਉਪਕਟ੍ਠੋ’’ਤਿ ਵਤ੍ਤਬ੍ਬਂ. ਸਚੇ ਵਦਨ੍ਤਿ ‘‘ਭਨ੍ਤੇ, ਇਮਂ ਸਂਵਚ੍ਛਰਂ ਛਾਤਕਾਦੀਹਿ ਉਪਦ੍ਦੁਤਮ੍ਹ, ਨ ਸਕ੍ਕੋਮ ਦਾਤੁ’’ਨ੍ਤਿ ਵਾ ‘‘ਯਂ ਪੁਬ੍ਬੇ ਦੇਮ, ਤਤੋ ਊਨਤਰਂ ਦਸ੍ਸਾਮਾ’’ਤਿ ਵਾ ‘‘ਇਦਾਨਿ ਕਪ੍ਪਾਸੋ ਸੁਲਭੋ, ਯਂ ਪੁਬ੍ਬੇ ਦੇਮ, ਤਤੋ ਬਹੁਤਰਂ ਦਸ੍ਸਾਮਾ’’ਤਿ ਵਾ, ਤਂ ਸਲ੍ਲਕ੍ਖੇਤ੍ਵਾ ਤਦਨੁਰੂਪੇਨ ਨਯੇਨ ਤੇਸਂ ਸੇਨਾਸਨੇ ਭਿਕ੍ਖੂਨਂ ਵਸ੍ਸਾਵਾਸਿਕਂ ਗਾਹੇਤਬ੍ਬਂ. ਸਚੇ ਮਨੁਸ੍ਸਾ ਵਦਨ੍ਤਿ ‘‘ਯਸ੍ਸ ਅਮ੍ਹਾਕਂ ਵਸ੍ਸਾਵਾਸਿਕਂ ਪਾਪੁਣਾਤਿ, ਸੋ ਤੇਮਾਸਂ ਪਾਨੀਯਂ ਉਪਟ੍ਠਾਪੇਤੁ, ਵਿਹਾਰਮਗ੍ਗਂ ਜਗ੍ਗਤੁ, ਚੇਤਿਯਙ੍ਗਣਬੋਧਿਯਙ੍ਗਣਾਨਿ ਜਗ੍ਗਤੁ, ਬੋਧਿਰੁਕ੍ਖੇ ਉਦਕਂ ਆਸਿਞ੍ਚਤੂ’’ਤਿ, ਯਸ੍ਸ ਤਂ ਪਾਪੁਣਾਤਿ, ਤਸ੍ਸ ਆਚਿਕ੍ਖਿਤਬ੍ਬਂ. ਯੋ ਪਨ ਗਾਮੋ ਪਟਿਕ੍ਕਮ੍ਮ ਯੋਜਨਦ੍ਵਿਯੋਜਨਨ੍ਤਰੇ ਹੋਤਿ, ਤਤ੍ਰ ਚੇ ਕੁਲਾਨਿ ਉਪਨਿਕ੍ਖੇਪਂ ਠਪੇਤ੍ਵਾ ਪਹਾਰੇ ਵਸ੍ਸਾਵਾਸਿਕਂ ਦੇਨ੍ਤਿਯੇਵ, ਤਾਨਿ ਕੁਲਾਨਿ ਆਪੁਚ੍ਛਿਤ੍ਵਾਪਿ ਤੇਸਂ ਸੇਨਾਸਨੇ ਵਤ੍ਤਂ ਕਤ੍ਵਾ ਵਸਨ੍ਤਸ੍ਸ ਵਸ੍ਸਾਵਾਸਿਤਂ ਗਾਹੇਤਬ੍ਬਂ. ਸਚੇ ਪਨ ਤੇਸਂ ਸੇਨਾਸਨੇ ਪਂਸੁਕੂਲਿਕੋ ਵਸਤਿ, ਆਗਤਞ੍ਚ ਤਂ ਦਿਸ੍ਵਾ ‘‘ਤੁਮ੍ਹਾਕਂ ਵਸ੍ਸਾਵਾਸਿਕਂ ਦੇਮਾ’’ਤਿ ਵਦਨ੍ਤਿ, ਤੇਨ ਸਙ੍ਘਸ੍ਸ ਆਚਿਕ੍ਖਿਤਬ੍ਬਂ. ਸਚੇ ਤਾਨਿ ਕੁਲਾਨਿ ਸਙ੍ਘਸ੍ਸ ਦਾਤੁਂ ਨ ਇਚ੍ਛਨ੍ਤਿ, ‘‘ਤੁਮ੍ਹਾਕਂਯੇਵ ਦੇਮਾ’’ਤਿ ਵਦਨ੍ਤਿ, ਸਭਾਗੋ ਭਿਕ੍ਖੁ ‘‘ਵਤ੍ਤਂ ਕਤ੍ਵਾ ਗਣ੍ਹਾਹੀ’’ਤਿ ਵਤ੍ਤਬ੍ਬੋ. ਪਂਸੁਕੂਲਿਕਸ੍ਸ ਪਨੇਤਂ ਨ ਵਟ੍ਟਤਿ. ਇਤਿ ਸਦ੍ਧਾਦੇਯ੍ਯਦਾਯਕਮਨੁਸ੍ਸਾ ਪੁਚ੍ਛਿਤਬ੍ਬਾ.

ਤਤ੍ਰੁਪ੍ਪਾਦੇ ਪਨ ਕਪ੍ਪਿਯਕਾਰਕਾ ਪੁਚ੍ਛਿਤਬ੍ਬਾ. ਕਥਂ ਪੁਚ੍ਛਿਤਬ੍ਬਾ? ਕਿਂ, ਆਵੁਸੋ, ਸਙ੍ਘਸ੍ਸ ਭਣ੍ਡਪਟਿਚ੍ਛਾਦਨਂ ਭਵਿਸ੍ਸਤੀਤਿ? ਸਚੇ ਵਦਨ੍ਤਿ ‘‘ਭਵਿਸ੍ਸਤਿ, ਭਨ੍ਤੇ, ਏਕੇਕਸ੍ਸ ਨਵਹਤ੍ਥਸਾਟਕਂ ਦਸ੍ਸਾਮ, ਵਸ੍ਸਾਵਾਸਿਕਂ ਗਾਹੇਥਾ’’ਤਿ, ਗਾਹੇਤਬ੍ਬਂ. ਸਚੇਪਿ ਵਦਨ੍ਤਿ ‘‘ਸਾਟਕਾ ਨਤ੍ਥਿ, ਵਤ੍ਥੁ ਪਨ ਅਤ੍ਥਿ, ਗਾਹੇਥ, ਭਨ੍ਤੇ’’ਤਿ, ਵਤ੍ਥੁਮ੍ਹਿ ਸਨ੍ਤੇਪਿ ਗਾਹੇਤੁਂ ਵਟ੍ਟਤਿਯੇਵ. ਕਪ੍ਪਿਯਕਾਰਕਾਨਞ੍ਹਿ ਹਤ੍ਥੇ ‘‘ਕਪ੍ਪਿਯਭਣ੍ਡਂ ਪਰਿਭੁਞ੍ਜਥਾ’’ਤਿ ਦਿਨ੍ਨਵਤ੍ਥੁਤੋ ਯਂ ਯਂ ਕਪ੍ਪਿਯਂ, ਸਬ੍ਬਂ ਪਰਿਭੁਞ੍ਜਿਤੁਂ ਅਨੁਞ੍ਞਾਤਂ. ਯਂ ਪਨੇਤ੍ਥ ਪਿਣ੍ਡਪਾਤਤ੍ਥਾਯ ਗਿਲਾਨਪਚ੍ਚਯਤ੍ਥਾਯ ਚ ਉਦ੍ਦਿਸ੍ਸ ਦਿਨ੍ਨਂ, ਤਂ ਚੀਵਰੇ ਉਪਨਾਮੇਨ੍ਤੇਹਿ ਸਙ੍ਘਸੁਟ੍ਠੁਤਾਯ ਅਪਲੋਕੇਤ੍ਵਾ ਉਪਨਾਮੇਤਬ੍ਬਂ, ਸੇਨਾਸਨਤ੍ਥਾਯ ਪਨ ਉਦ੍ਦਿਸ੍ਸ ਦਿਨ੍ਨਂ ਗਰੁਭਣ੍ਡਂ ਹੋਤਿ. ਚੀਵਰਵਸੇਨੇਵ ਪਨ ਚਤੁਪਚ੍ਚਯਵਸੇਨ ਵਾ ਦਿਨ੍ਨਂ ਚੀਵਰੇ ਉਪਨਾਮੇਨ੍ਤਾਨਂ ਅਪਲੋਕਨਕਮ੍ਮਕਿਚ੍ਚਂ ਨਤ੍ਥਿ. ਅਪਲੋਕਨਕਮ੍ਮਂ ਕਰੋਨ੍ਤੇਹਿ ਚ ਪੁਗ੍ਗਲਵਸੇਨੇਵ ਕਾਤਬ੍ਬਂ, ਸਙ੍ਘਵਸੇਨ ਨ ਕਾਤਬ੍ਬਂ. ਜਾਤਰੂਪਰਜਤਵਸੇਨਪਿ ਆਮਕਧਞ੍ਞਵਸੇਨ ਵਾ ਅਪਲੋਕਨਕਮ੍ਮਂ ਨ ਵਟ੍ਟਤਿ, ਕਪ੍ਪਿਯਭਣ੍ਡਵਸੇਨ ਚੀਵਰਤਣ੍ਡੁਲਾਦਿਵਸੇਨੇਵ ਚ ਵਟ੍ਟਤਿ. ਤਂ ਪਨ ਏਵਂ ਕਤ੍ਤਬ੍ਬਂ ‘‘ਇਦਾਨਿ ਸੁਭਿਕ੍ਖਂ ਸੁਲਭਪਿਣ੍ਡਂ, ਭਿਕ੍ਖੂ ਚੀਵਰੇਨ ਕਿਲਮਨ੍ਤਿ, ਏਤ੍ਤਕਂ ਨਾਮ ਤਣ੍ਡੁਲਭਾਗਂ ਭਿਕ੍ਖੂਨਂ ਚੀਵਰਂ ਕਾਤੁਂ ਰੁਚ੍ਚਤੀ’’ਤਿ, ‘‘ਗਿਲਾਨਪਚ੍ਚਯੋ ਸੁਲਭੋ, ਗਿਲਾਨੋ ਵਾ ਨਤ੍ਥਿ, ਏਤ੍ਤਕਂ ਨਾਮ ਤਣ੍ਡੁਲਭਾਗਂ ਭਿਕ੍ਖੂਨਂ ਚੀਵਰਂ ਕਾਤੁਂ ਰੁਚ੍ਚਤੀ’’ਤਿ.

ਏਵਂ ਚੀਵਰਪਚ੍ਚਯਂ ਸਲ੍ਲਕ੍ਖੇਤ੍ਵਾ ਸੇਨਾਸਨਸ੍ਸ ਕਾਲੇ ਘੋਸਿਤੇ ਸਨ੍ਨਿਪਤਿਤੇ ਸਙ੍ਘੇ ਸੇਨਾਸਨਗ੍ਗਾਹਕੋ ਸਮ੍ਮਨ੍ਨਿਤਬ੍ਬੋ. ਸਮ੍ਮਨ੍ਨਨ੍ਤੇਨ ਚ ਦ੍ਵੇ ਸਮ੍ਮਨ੍ਨਿਤਬ੍ਬਾਤਿ ਵੁਤ੍ਤਂ. ਏਵਞ੍ਹਿ ਨਵਕੋ ਵੁਡ੍ਢਸ੍ਸ, ਵੁਡ੍ਢੋ ਚ ਨਵਕਸ੍ਸ ਗਾਹੇਸ੍ਸਤੀਤਿ. ਮਹਨ੍ਤੇ ਪਨ ਮਹਾਵਿਹਾਰਸਦਿਸੇ ਵਿਹਾਰੇ ਤਯੋ ਚਤ੍ਤਾਰੋ ਜਨਾ ਸਮ੍ਮਨ੍ਨਿਤਬ੍ਬਾ. ਕੁਰੁਨ੍ਦਿਯਂ ਪਨ ‘‘ਅਟ੍ਠਪਿ ਸੋਲ਼ਸਪਿ ਜਨੇ ਸਮ੍ਮਨ੍ਨਿਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਤੇਸਂ ਸਮ੍ਮੁਤਿ ਕਮ੍ਮਵਾਚਾਯਪਿ ਅਪਲੋਕਨੇਨਪਿ ਵਟ੍ਟਤਿਯੇਵ. ਤੇਹਿ ਸਮ੍ਮਤੇਹਿ ਭਿਕ੍ਖੂਹਿ ਸੇਨਾਸਨਂ ਸਲ੍ਲਕ੍ਖੇਤਬ੍ਬਂ. ਚੇਤਿਯਘਰਂ ਬੋਧਿਘਰਂ ਆਸਨਘਰਂ ਸਮ੍ਮੁਞ੍ਜਨਿਅਟ੍ਟੋ ਦਾਰੁਅਟ੍ਟੋ ਵਚ੍ਚਕੁਟਿ ਇਟ੍ਠਕਸਾਲਾ ਵਡ੍ਢਕਿਸਾਲਾ ਦ੍ਵਾਰਕੋਟ੍ਠਕੋ ਪਾਨੀਯਮਾਲ਼ੋ ਮਗ੍ਗੋ ਪੋਕ੍ਖਰਣੀਤਿ ਏਤਾਨਿ ਹਿ ਅਸੇਨਾਸਨਾਨਿ, ਵਿਹਾਰੋ ਅਡ੍ਢਯੋਗੋ ਪਾਸਾਦੋ ਹਮ੍ਮਿਯਂ ਗੁਹਾ ਮਣ੍ਡਪੋ ਰੁਕ੍ਖਮੂਲਂ ਵੇਲ਼ੁਗੁਮ੍ਬੋਤਿ ਇਮਾਨਿ ਸੇਨਾਸਨਾਨਿ, ਤਾਨਿ ਗਾਹੇਤਬ੍ਬਾਨਿ.

੨੨੦. ਗਾਹੇਨ੍ਤੇਨ ਚ ‘‘ਅਨੁਜਾਨਾਮਿ, ਭਿਕ੍ਖਵੇ, ਪਠਮਂ ਭਿਕ੍ਖੂ ਗਣੇਤੁਂ, ਭਿਕ੍ਖੂ ਗਣੇਤ੍ਵਾ ਸੇਯ੍ਯਾ ਗਣੇਤੁਂ, ਸੇਯ੍ਯਾ ਗਣੇਤ੍ਵਾ ਸੇਯ੍ਯਗ੍ਗੇਨ ਗਾਹੇਤੁ’’ਨ੍ਤਿ(ਚੂਲ਼ਵ. ੩੧੮) ਆਦਿਵਚਨਤੋ ਪਠਮਂ ਵਿਹਾਰੇ ਭਿਕ੍ਖੂ ਗਣੇਤ੍ਵਾ ਮਞ੍ਚਟ੍ਠਾਨਾਨਿ ਗਣੇਤਬ੍ਬਾਨਿ, ਤਤੋ ਏਕੇਕਂ ਮਞ੍ਚਟ੍ਠਾਨਂ ਏਕੇਕਸ੍ਸ ਭਿਕ੍ਖੁਨੋ ਗਾਹੇਤਬ੍ਬਂ. ਸਚੇ ਮਞ੍ਚਟ੍ਠਾਨਾਨਿ ਅਤਿਰੇਕਾਨਿ ਹੋਨ੍ਤਿ, ਵਿਹਾਰਗ੍ਗੇਨ ਗਾਹੇਤਬ੍ਬਂ. ਸਚੇ ਵਿਹਾਰਾਪਿ ਅਤਿਰੇਕਾ ਹੋਨ੍ਤਿ, ਪਰਿਵੇਣਗ੍ਗੇਨ ਗਾਹੇਤਬ੍ਬਂ. ਪਰਿਵੇਣੇਸੁਪਿ ਅਤਿਰੇਕੇਸੁ ਪੁਨ ਅਪਰੋਪਿ ਭਾਗੋ ਦਾਤਬ੍ਬੋ. ਅਤਿਮਨ੍ਦੇਸੁ ਹਿ ਭਿਕ੍ਖੂਸੁ ਏਕੇਕਸ੍ਸ ਭਿਕ੍ਖੁਨੋ ਦ੍ਵੇ ਤੀਣਿ ਪਰਿਵੇਣਾਨਿ ਦਾਤਬ੍ਬਾਨਿ. ਗਹਿਤੇ ਪਨ ਦੁਤਿਯਭਾਗੇ ਅਞ੍ਞੋ ਭਿਕ੍ਖੁ ਆਗਚ੍ਛਤਿ, ਨ ਅਤ੍ਤਨੋ ਅਰੁਚਿਯਾ ਸੋ ਭਾਗੋ ਤਸ੍ਸ ਦਾਤਬ੍ਬੋ. ਸਚੇ ਪਨ ਯੇਨ ਗਹਿਤੋ, ਸੋ ਅਤ੍ਤਨੋ ਰੁਚਿਯਾ ਤਂ ਦੁਤਿਯਭਾਗਂ ਵਾ ਪਠਮਭਾਗਂ ਵਾ ਦੇਤਿ, ਵਟ੍ਟਤਿ.

‘‘ਨ, ਭਿਕ੍ਖਵੇ, ਨਿਸ੍ਸੀਮੇ ਠਿਤਸ੍ਸ ਸੇਨਾਸਨਂ ਗਾਹੇਤਬ੍ਬਂ, ਯੋ ਗਾਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੧੮) ਵਚਨਤੋ ਉਪਚਾਰਸੀਧਤੋ ਬਹਿ ਠਿਤਸ੍ਸ ਨ ਗਾਹੇਤਬ੍ਬਂ, ਅਨ੍ਤੋਉਪਚਾਰਸੀਮਾਯ ਪਨ ਦੂਰੇ ਠਿਤਸ੍ਸਪਿ ਲਬ੍ਭਤਿਯੇਵ.

‘‘ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨਸ੍ਸ ਪਤਿਰੂਪਂ ਸੇਯ੍ਯਂ ਦਾਤੁ’’ਨ੍ਤਿ (ਚੂਲ਼ਵ. ੩੧੬) ਵਚਨਤੋ ਯੋ (ਚੂਲ਼ਵ. ਅਟ੍ਠ. ੩੧੬) ਕਾਸਸਾਸਭਗਨ੍ਦਰਾਤਿਸਾਰਾਦੀਹਿ ਗਿਲਾਨੋ ਹੋਤਿ, ਖੇਲ਼ਮਲ੍ਲਕਵਚ੍ਚਕਪਾਲਾਦੀਨਿ ਠਪੇਤਬ੍ਬਾਨਿ ਹੋਨ੍ਤਿ, ਕੁਟ੍ਠੀ ਵਾ ਹੋਤਿ, ਸੇਨਾਸਨਂ ਦੂਸੇਤਿ, ਏਵਰੂਪਸ੍ਸ ਹੇਟ੍ਠਾਪਾਸਾਦਪਣ੍ਣਸਾਲਾਦੀਸੁ ਅਞ੍ਞਤਰਂ ਏਕਮਨ੍ਤਂ ਸੇਨਾਸਨਂ ਦਾਤਬ੍ਬਂ. ਯਸ੍ਮਿਂ ਵਸਨ੍ਤੇ ਸੇਨਾਸਨਂ ਨ ਦੁਸ੍ਸਤਿ, ਤਸ੍ਸ ਵਰਸੇਯ੍ਯਾਪਿ ਦਾਤਬ੍ਬਾਵ. ਯੋਪਿ ਸਿਨੇਹਪਾਨਵਿਰੇਚਨਨਤ੍ਥੁਕਮ੍ਮਾਦੀਸੁ ਯਂ ਕਿਞ੍ਚਿ ਭੇਸਜ੍ਜਂ ਕਰੋਤਿ, ਸਬ੍ਬੋ ਸੋ ਗਿਲਾਨੋਯੇਵ. ਤਸ੍ਸਪਿ ਸਲ੍ਲਕ੍ਖੇਤ੍ਵਾ ਪਤਿਰੂਪਂ ਸੇਨਾਸਨਂ ਦਾਤਬ੍ਬਂ.

‘‘ਨ, ਭਿਕ੍ਖਵੇ, ਏਕੇਨ ਦ੍ਵੇ ਪਟਿਬਾਹੇਤਬ੍ਬਾ, ਯੋ ਪਟਿਬਾਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੧੯) ਵਚਨਤੋ ਏਕੇਨ ਦ੍ਵੇ ਸੇਨਾਸਨਾਨਿ ਨ ਗਹੇਤਬ੍ਬਾਨਿ. ਸਚੇਪਿ ਗਣ੍ਹੇਯ੍ਯ, ਪਚ੍ਛਿਮੇਨ ਗਹਣੇਨ ਪੁਰਿਮਗ੍ਗਹਣਂ ਪਟਿਪ੍ਪਸ੍ਸਮ੍ਭਤਿ. ਗਹਣੇਨ ਹਿ ਗਹਣਂ ਪਟਿਪ੍ਪਸ੍ਸਮ੍ਭਤਿ, ਗਹਣੇਨ ਆਲਯੋ ਪਟਿਪ੍ਪਸ੍ਸਮ੍ਭਤਿ, ਆਲਯੇਨ ਗਹਣਂ ਪਟਿਪ੍ਪਸ੍ਸਮ੍ਭਤਿ, ਆਲਯੇਨ ਆਲਯੋ ਪਟਿਪ੍ਪਸ੍ਸਮ੍ਭਤਿ. ਕਥਂ? ਇਧੇਕਚ੍ਚੋ (ਚੂਲ਼ਵ. ਅਟ੍ਠ. ੩੧੯) ਵਸ੍ਸੂਪਨਾਯਿਕਦਿਵਸੇ ਏਕਸ੍ਮਿਂ ਵਿਹਾਰੇ ਸੇਨਾਸਨਂ ਗਹੇਤ੍ਵਾ ਸਾਮਨ੍ਤਵਿਹਾਰਂ ਗਨ੍ਤ੍ਵਾ ਤਤ੍ਰਾਪਿ ਗਣ੍ਹਾਤਿ, ਤਸ੍ਸ ਇਮਿਨਾ ਗਹਣੇਨ ਪੁਰਿਮਗ੍ਗਹਣਂ ਪਟਿਪ੍ਪਸ੍ਸਮ੍ਭਤਿ. ਅਪਰੋ ‘‘ਇਧ ਵਸਿਸ੍ਸਾਮੀ’’ਤਿ ਆਲਯਮਤ੍ਤਂ ਕਤ੍ਵਾ ਸਾਮਨ੍ਤਵਿਹਾਰਂ ਗਨ੍ਤ੍ਵਾ ਤਤ੍ਥ ਸੇਨਾਸਨਂ ਗਣ੍ਹਾਤਿ, ਤਸ੍ਸ ਇਮਿਨਾ ਗਹਣੇਨੇਵ ਪੁਰਿਮੋ ਆਲਯੋ ਪਟਿਪ੍ਪਸ੍ਸਮ੍ਭਤਿ. ਏਕੋ ‘‘ਇਧ ਵਸਿਸ੍ਸਾਮੀ’’ਤਿ ਸੇਨਾਸਨਂ ਵਾ ਗਹੇਤ੍ਵਾ ਆਲਯਂ ਵਾ ਕਤ੍ਵਾ ਸਾਮਨ੍ਤਵਿਹਾਰਂ ਗਨ੍ਤ੍ਵਾ ‘‘ਇਧੇਵ ਦਾਨਿ ਵਸਿਸ੍ਸਾਮੀ’’ਤਿ ਆਲਯਂ ਕਰੋਤਿ, ਇਚ੍ਚਸ੍ਸ ਆਲਯੇਨ ਵਾ ਗਹਣਂ, ਆਲਯੇਨ ਵਾ ਆਲਯੋ ਪਟਿਪ੍ਪਸ੍ਸਮ੍ਭਤਿ, ਸਬ੍ਬਤ੍ਥ ਪਚ੍ਛਿਮੇ ਗਹਣੇ ਵਾ ਆਲਯੇ ਵਾ ਤਿਟ੍ਠਤਿ. ਯੋ ਪਨ ਏਕਸ੍ਮਿਂ ਵਿਹਾਰੇ ਸੇਨਾਸਨਂ ਗਹੇਤ੍ਵਾ ‘‘ਅਞ੍ਞਸ੍ਮਿਂ ਵਿਹਾਰੇ ਵਸਿਸ੍ਸਾਮੀ’’ਤਿ ਗਚ੍ਛਤਿ, ਤਸ੍ਸ ਉਪਚਾਰਸੀਮਾਤਿਕ੍ਕਮੇ ਸੇਨਾਸਨਗ੍ਗਾਹੋ ਪਟਿਪ੍ਪਸ੍ਸਮ੍ਭਤਿ. ਯਦਿ ਪਨ ‘‘ਤਤ੍ਥ ਫਾਸੁ ਭਵਿਸ੍ਸਤਿ, ਵਸਿਸ੍ਸਾਮਿ, ਨੋ ਚੇ, ਆਗਮਿਸ੍ਸਾਮੀ’’ਤਿ ਗਨ੍ਤ੍ਵਾ ਅਫਾਸੁਕਭਾਵਂ ਞਤ੍ਵਾ ਪਚ੍ਛਾ ਵਾ ਗਚ੍ਛਤਿ, ਵਟ੍ਟਤਿ.

ਸੇਨਾਸਨਗ੍ਗਾਹਕੇਨ ਚ ਸੇਨਾਸਨਂ ਗਾਹੇਤ੍ਵਾ ਵਸ੍ਸਾਵਾਸਿਕਂ ਗਾਹੇਤਬ੍ਬਂ. ਗਾਹੇਨ੍ਤੇਨ ਸਚੇ ਸਙ੍ਘਿਕੋ ਚ ਸਦ੍ਧਾਦੇਯ੍ਯੋ ਚਾਤਿ ਦ੍ਵੇ ਚੀਵਰਪਚ੍ਚਯਾ ਹੋਨ੍ਤਿ, ਤੇਸੁ ਯਂ ਭਿਕ੍ਖੂ ਪਠਮਂ ਗਹਿਤੁਂ ਇਚ੍ਛਨ੍ਤਿ, ਤਂ ਗਹੇਤ੍ਵਾ ਤਸ੍ਸ ਠਿਤਿਕਤੋ ਪਟ੍ਠਾਯ ਇਤਰੋ ਗਾਹੇਤਬ੍ਬੋ. ‘‘ਸਚੇ ਭਿਕ੍ਖੂਨਂ ਅਪ੍ਪਤਾਯ ਪਰਿਵੇਣਗ੍ਗੇਨ ਸੇਨਾਸਨੇ ਗਾਹਿਯਮਾਨੇ ਏਕਂ ਪਰਿਵੇਣਂ ਮਹਾਲਾਭਂ ਹੋਤਿ, ਦਸ ਵਾ ਦ੍ਵਾਦਸ ਵਾ ਚੀਵਰਾਨਿ ਲਭਨ੍ਤਿ, ਤਂ ਵਿਜਟੇਤ੍ਵਾ ਅਞ੍ਞੇਸੁ ਅਲਾਭਕੇਸੁ ਆਵਾਸੇਸੁ ਪਕ੍ਖਿਪਿਤ੍ਵਾ ਅਞ੍ਞੇਸਮ੍ਪਿ ਭਿਕ੍ਖੂਨਂ ਗਾਹੇਤਬ੍ਬ’’ਨ੍ਤਿ ਮਹਾਸੁਮਤ੍ਥੇਰੋ ਆਹ. ਮਹਾਪਦੁਮਤ੍ਥੇਰੋ ਪਨਾਹ ‘‘ਨ ਏਵਂ ਕਾਤਬ੍ਬਂ. ਮਨੁਸ੍ਸਾ ਹਿ ਅਤ੍ਤਨੋ ਆਵਾਸਪਟਿਜਗ੍ਗਨਤ੍ਥਾਯ ਪਚ੍ਚਯਂ ਦੇਨ੍ਤਿ, ਤਸ੍ਮਾ ਅਞ੍ਞੇਹਿ ਭਿਕ੍ਖੂਹਿ ਤਤ੍ਥ ਪਵਿਸਿਤਬ੍ਬ’’ਨ੍ਤਿ.

੨੨੧. ਸਚੇ ਪਨੇਤ੍ਥ ਮਹਾਥੇਰੋ ਪਟਿਕ੍ਕੋਸਤਿ ‘‘ਮਾ, ਆਵੁਸੋ, ਏਵਂ ਗਾਹੇਥ, ਭਗਵਤੋ ਅਨੁਸਿਟ੍ਠਿਂ ਕਰੋਥ. ਵੁਤ੍ਤਞ੍ਹੇਤਂ ਭਗਵਤਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਪਰਿਵੇਣਗ੍ਗੇਨ ਗਾਹੇਤੁ’’ਨ੍ਤਿ (ਚੂਲ਼ਵ. ੩੧੮). ਤਸ੍ਸ ਪਟਿਕ੍ਕੋਸਨਾਯ ਅਟ੍ਠਤ੍ਵਾ ‘‘ਭਨ੍ਤੇ, ਭਿਕ੍ਖੂ ਬਹੂ, ਪਚ੍ਚਯੋ ਮਨ੍ਦੋ, ਸਙ੍ਗਹਂ ਕਾਤੁਂ ਵਟ੍ਟਤੀ’’ਤਿ ਸਞ੍ਞਾਪੇਤ੍ਵਾ ਗਾਹੇਤਬ੍ਬਮੇਵ. ਗਾਹੇਨ੍ਤੇਨ ਚ ਸਮ੍ਮਤੇਨ ਭਿਕ੍ਖੁਨਾ ਮਹਾਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਏਵਂ ਵਤ੍ਤਬ੍ਬਂ ‘‘ਭਨ੍ਤੇ, ਤੁਮ੍ਹਾਕਂ ਸੇਨਾਸਨਂ ਪਾਪੁਣਾਤਿ, ਪਚ੍ਚਯਂ ਧਾਰੇਥਾ’’ਤਿ. ਅਸੁਕਕੁਲਸ੍ਸ ਪਚ੍ਚਯੋ ਅਸੁਕਸੇਨਾਸਨਞ੍ਚ ਮਯ੍ਹਂ ਪਾਪੁਣਾਤਿ, ਆਵੁਸੋਤਿ. ਪਾਪੁਣਾਤਿ ਭਨ੍ਤੇ, ਗਣ੍ਹਥ ਨਨ੍ਤਿ. ਗਣ੍ਹਾਮਿ, ਆਵੁਸੋਤਿ. ਗਹਿਤਂ ਹੋਤਿ. ‘‘ਸਚੇ ਪਨ ‘ਗਹਿਤਂ ਵੋ, ਭਨ੍ਤੇ’ਤਿ ਵੁਤ੍ਤੇ ‘ਗਹਿਤਂ ਮੇ’ਤਿ ਵਾ, ‘ਗਣ੍ਹਿਸ੍ਸਥ, ਭਨ੍ਤੇ’ਤਿ ਵੁਤ੍ਤੇ ‘ਗਣ੍ਹਿਸ੍ਸਾਮੀ’ਤਿ ਵਾ ਵਦਤਿ, ਅਗ੍ਗਹਿਤਂ ਹੋਤੀ’’ਤਿ ਮਹਾਸੁਮਤ੍ਥੇਰੋ ਆਹ. ਮਹਾਪਦੁਮਤ੍ਥੇਰੋ ਪਨਾਹ ‘‘ਅਤੀਤਾਨਾਗਤਵਚਨਂ ਵਾ ਹੋਤੁ ਵਤ੍ਤਮਾਨਵਚਨਂ ਵਾ, ਸਤੁਪ੍ਪਾਦਮਤ੍ਤਂ ਆਲਯਕਰਣਮਤ੍ਤਮੇਵ ਚੇਤ੍ਥ ਪਮਾਣਂ, ਤਸ੍ਮਾ ਗਹਿਤਮੇਵ ਹੋਤੀ’’ਤਿ.

ਯੋਪਿ ਪਂਸੁਕੂਲਿਕੋ ਭਿਕ੍ਖੁ ਸੇਨਾਸਨਂ ਗਹੇਤ੍ਵਾ ਪਚ੍ਚਯਂ ਵਿਸ੍ਸਜ੍ਜੇਤਿ, ਅਯਮ੍ਪਿ ਨ ਅਞ੍ਞਸ੍ਮਿਂ ਆਵਾਸੇ ਪਕ੍ਖਿਪਿਤਬ੍ਬੋ, ਤਸ੍ਮਿਂਯੇਵ ਪਰਿਵੇਣੇ ਅਗ੍ਗਿਸਾਲਾਯ ਵਾ ਦੀਘਸਾਲਾਯ ਵਾ ਰੁਕ੍ਖਮੂਲੇ ਵਾ ਅਞ੍ਞਸ੍ਸ ਗਾਹੇਤੁਂ ਵਟ੍ਟਤਿ. ਪਂਸੁਕੂਲਿਕੋ ‘‘ਵਸਾਮੀ’’ਤਿ ਸੇਨਾਸਨਂ ਜਗ੍ਗਿਸ੍ਸਤਿ, ਇਤਰੋ ‘‘ਪਚ੍ਚਯਂ ਗਣ੍ਹਾਮੀ’’ਤਿ ਏਵਂ ਦ੍ਵੀਹਿ ਕਾਰਣੇਹਿ ਸੇਨਾਸਨਂ ਸੁਜਗ੍ਗਿਤਤਰਂ ਭਵਿਸ੍ਸਤਿ. ਮਹਾਪਚ੍ਚਰਿਯਂ ਪਨ ਵੁਤ੍ਤਂ ‘‘ਪਂਸੁਕੂਲਿਕੇ ਵਾਸਤ੍ਥਾਯ ਸੇਨਾਸਨਂ ਗਣ੍ਹਨ੍ਤੇ ਸੇਨਾਸਨਗ੍ਗਾਹਕੇਨ ਵਤ੍ਤਬ੍ਬਂ, ‘ਭਨ੍ਤੇ ਇਧ ਪਚ੍ਚਯੋ ਅਤ੍ਥਿ, ਸੋ ਕਿਂ ਕਾਤਬ੍ਬੋ’ਤਿ. ਤੇਨ ‘ਹੇਟ੍ਠਾ ਅਞ੍ਞਂ ਗਾਹਾਪੇਹੀ’ਤਿ ਵਤ੍ਤਬ੍ਬੋ. ਸਚੇ ਪਨ ਕਿਞ੍ਚਿ ਅਵਤ੍ਵਾਵ ਵਸਤਿ, ਵੁਟ੍ਠਵਸ੍ਸਸ੍ਸ ਚ ਪਾਦਮੂਲੇ ਠਪੇਤ੍ਵਾ ਸਾਟਕਂ ਦੇਨ੍ਤਿ, ਵਟ੍ਟਤਿ. ਅਥ ‘ਵਸ੍ਸਾਵਾਸਿਕਂ ਦੇਮਾ’ਤਿ ਵਦਨ੍ਤਿ, ਤਸ੍ਮਿਂ ਸੇਨਾਸਨੇ ਵਸ੍ਸਂਵੁਟ੍ਠਭਿਕ੍ਖੂਨਂ ਪਾਪੁਣਾਤੀ’’ਤਿ. ਯੇਸਂ ਪਨ ਸੇਨਾਸਨਂ ਨਤ੍ਥਿ, ਕੇਵਲਂ ਪਚ੍ਚਯਮੇਵ ਦੇਨ੍ਤਿ, ਤੇਸਂ ਪਚ੍ਚਯਂ ਅਵਸ੍ਸਾਵਾਸਿਕਸੇਨਾਸਨੇ ਗਾਹੇਤੁਂ ਵਟ੍ਟਤਿ. ਮਨੁਸ੍ਸਾ ਥੂਪਂ ਕਤ੍ਵਾ ਵਸ੍ਸਾਵਾਸਿਕਂ ਗਾਹਾਪੇਨ੍ਤਿ. ਥੂਪੋ ਨਾਮ ਅਸੇਨਾਸਨਂ, ਤਸ੍ਸ ਸਮੀਪੇ ਰੁਕ੍ਖੇ ਵਾ ਮਣ੍ਡਪੇ ਵਾ ਉਪਨਿਬਨ੍ਧਿਤ੍ਵਾ ਗਾਹੇਤਬ੍ਬਂ. ਤੇਨ ਭਿਕ੍ਖੁਨਾ ਚੇਤਿਯਂ ਜਗ੍ਗਿਤਬ੍ਬਂ. ਬੋਧਿਰੁਕ੍ਖਬੋਧਿਘਰਆਸਨਘਰਸਮ੍ਮੁਞ੍ਜਨਿਅਟ੍ਟਦਾਰੁਅਟ੍ਟਵਚ੍ਚਕੁਟਿਦ੍ਵਾਰਕੋਟ੍ਠਕਪਾਨੀਯਕੁਟਿਪਾਨੀਯਮਾਲ਼ਕਦਨ੍ਤਕਟ੍ਠਮਾਲ਼ਕੇਸੁਪਿ ਏਸੇਵ ਨਯੋ. ਭੋਜਨਸਾਲਾ ਪਨ ਸੇਨਾਸਨਮੇਵ, ਤਸ੍ਮਾ ਤਂ ਏਕਸ੍ਸ ਵਾ ਬਹੂਨਂ ਵਾ ਪਰਿਚ੍ਛਿਨ੍ਦਿਤ੍ਵਾ ਗਾਹੇਤੁਂ ਵਟ੍ਟਤੀਤਿ ਸਬ੍ਬਮਿਦਂ ਵਿਤ੍ਥਾਰੇਨ ਮਹਾਪਚ੍ਚਰਿਯਂ ਵੁਤ੍ਤਂ.

ਸੇਨਾਸਨਗ੍ਗਾਹਕੇਨ ਪਨ ਪਾਟਿਪਦਅਰੁਣਤੋ ਪਟ੍ਠਾਯ ਯਾਵ ਪੁਨ ਅਰੁਣਂ ਨ ਭਿਜ੍ਜਤਿ, ਤਾਵ ਗਾਹੇਤਬ੍ਬਂ. ਇਦਞ੍ਹਿ ਸੇਨਾਸਨਗ੍ਗਾਹਸ੍ਸ ਖੇਤ੍ਤਂ. ਸਚੇ ਪਾਤੋਵ ਗਾਭਿਤੇ ਸੇਨਾਸਨੇ ਅਞ੍ਞੋ ਵਿਤਕ੍ਕਚਾਰਿਕੋ ਭਿਕ੍ਖੁ ਆਗਨ੍ਤ੍ਵਾ ਸੇਨਾਸਨਂ ਯਾਚਤਿ, ‘‘ਗਹਿਤਂ, ਭਨ੍ਤੇ, ਸੇਨਾਸਨਂ, ਵਸ੍ਸੂਪਗਤੋ ਸਙ੍ਘੋ, ਰਮਣੀਯੋ ਵਿਹਾਰੋ, ਰੁਕ੍ਖਮੂਲਾਦੀਸੁ ਯਤ੍ਥ ਇਚ੍ਛਥ, ਤਤ੍ਥ ਵਸਥਾ’’ਤਿ ਵਤ੍ਤਬ੍ਬੋ. ਪਚ੍ਛਿਮਵਸ੍ਸੂਪਨਾਯਿਕਦਿਵਸੇ ਪਨ ਸਚੇ ਕਾਲਂ ਘੋਸੇਤ੍ਵਾ ਸਨ੍ਨਿਪਤਿਤੇ ਸਙ੍ਘੇ ਕੋਚਿ ਦਸਹਤ੍ਥਂ ਵਤ੍ਥਂ ਆਹਰਿਤ੍ਵਾ ਵਸ੍ਸਾਵਾਸਿਕਂ ਦੇਤਿ, ਆਗਨ੍ਤੁਕੋ ਚੇ ਭਿਕ੍ਖੁ ਸਙ੍ਘਤ੍ਥੇਰੋ ਹੋਤਿ, ਤਸ੍ਸ ਦਾਤਬ੍ਬਂ. ਨਵਕੋ ਚੇ ਹੋਤਿ, ਸਮ੍ਮਤੇਨ ਭਿਕ੍ਖੁਨਾ ਸਙ੍ਘਤ੍ਥੇਰੋ ਵਤ੍ਤਬ੍ਬੋ ‘‘ਸਚੇ, ਭਨ੍ਤੇ, ਇਚ੍ਛਥ, ਪਠਮਭਾਗਂ ਮੁਞ੍ਚਿਤ੍ਵਾ ਇਦਂ ਵਤ੍ਥਂ ਗਣ੍ਹਥਾ’’ਤਿ, ਅਮੁਞ੍ਚਨ੍ਤਸ੍ਸ ਨ ਦਾਤਬ੍ਬਂ. ਸਚੇ ਪਨ ਪੁਬ੍ਬੇ ਗਾਹਿਤਂ ਮੁਞ੍ਚਿਤ੍ਵਾ ਗਣ੍ਹਾਤਿ, ਦਾਤਬ੍ਬਂ. ਏਤੇਨੇਵ ਉਪਾਯੇਨ ਦੁਤਿਯਤ੍ਥੇਰਤੋ ਪਟ੍ਠਾਯ ਪਰਿਵਤ੍ਤੇਤ੍ਵਾ ਪਤ੍ਤਟ੍ਠਾਨੇਵ ਆਗਨ੍ਤੁਕਸ੍ਸ ਦਾਤਬ੍ਬਂ. ਸਚੇ ਪਨ ਪਠਮਵਸ੍ਸੂਪਗਤਾ ਦ੍ਵੇ ਤੀਣਿ ਚਤ੍ਤਾਰਿ ਪਞ੍ਚ ਵਾ ਵਤ੍ਥਾਨਿ ਅਲਤ੍ਥੁਂ, ਲਦ੍ਧਂ ਲਦ੍ਧਂ ਏਤੇਨੇਵ ਉਪਾਯੇਨ ਵਿਸ੍ਸਜ੍ਜਾਪੇਤ੍ਵਾ ਯਾਵ ਆਗਨ੍ਤੁਕਸ੍ਸ ਸਮਕਂ ਹੋਤਿ, ਤਾਵ ਦਾਤਬ੍ਬਂ. ਤੇਨ ਸਮਕੇ ਲਦ੍ਧੇ ਅਵਸਿਟ੍ਠੋ ਅਨੁਭਾਗੋ ਥੇਰਾਸਨੇ ਦਾਤਬ੍ਬੋ. ਪਚ੍ਚੁਪ੍ਪਨ੍ਨੇ ਲਾਭੇ ਸਤਿ ਠਿਤਿਕਾਯ ਗਾਹੇਤੁਂ ਕਤਿਕਂ ਕਾਤੁਂ ਵਟ੍ਟਤਿ.

ਸਚੇ ਦੁਬ੍ਭਿਕ੍ਖਂ ਹੋਤਿ, ਦ੍ਵੀਸੁਪਿ ਵਸ੍ਸੂਪਨਾਯਿਕਾਸੁ ਵਸ੍ਸੂਪਗਤਾ ਭਿਕ੍ਖੂ ਭਿਕ੍ਖਾਯ ਕਿਲਮਨ੍ਤਾ ‘‘ਆਵੁਸੋ, ਇਧ ਵਸਨ੍ਤਾ ਸਬ੍ਬੇਵ ਕਿਲਮਾਮ, ਸਾਧੁ ਵਤ ਦ੍ਵੇ ਭਾਗਾ ਹੋਮ, ਯੇਸਂ ਞਾਤਿਪਵਾਰਿਤਟ੍ਠਾਨਾਨਿ ਅਤ੍ਥਿ, ਤੇ ਤਤ੍ਥ ਵਸਿਤ੍ਵਾ ਪਵਾਰਣਾਯ ਆਗਨ੍ਤ੍ਵਾ ਅਤ੍ਤਨੋ ਪਤ੍ਤਂ ਵਸ੍ਸਾਵਾਸਿਕਂ ਗਣ੍ਹਨ੍ਤੂ’’ਤਿ ਵਦਨ੍ਤਿ, ਤੇਸੁ ਯੇ ਤਤ੍ਥ ਵਸਿਤ੍ਵਾ ਪਵਾਰਣਾਯ ਆਗਚ੍ਛਨ੍ਤਿ, ਤੇਸਂ ਅਪਲੋਕੇਤ੍ਵਾ ਵਸ੍ਸਾਵਾਸਿਕਂ ਦਾਤਬ੍ਬਂ. ਸਾਦਿਯਨ੍ਤਾਪਿ ਹਿ ਤੇਨੇਵ ਵਸ੍ਸਾਵਾਸਿਕਸ੍ਸ ਸਾਮਿਨੋ, ਖੀਯਨ੍ਤਾਪਿ ਚ ਆਵਾਸਿਕਾ ਨੇਵ ਅਦਾਤੁਂ ਲਭਨ੍ਤਿ. ਕੁਰੁਨ੍ਦਿਯਂ ਪਨ ਵੁਤ੍ਤਂ ‘‘ਕਤਿਕਵਤ੍ਤਂ ਕਾਤਬ੍ਬਂ ‘ਸਬ੍ਬੇਸਂ ਨੋ ਇਧ ਯਾਗੁਭਤ੍ਤਂ ਨਪ੍ਪਹੋਤਿ, ਸਭਾਗਟ੍ਠਾਨੇ ਵਸਿਤ੍ਵਾ ਆਗਚ੍ਛਥ, ਤੁਮ੍ਹਾਕਂ ਪਤ੍ਤਂ ਵਸ੍ਸਾਵਾਸਿਕਂ ਲਭਿਸ੍ਸਥਾ’ਤਿ. ਤਞ੍ਚੇ ਏਕੋ ਪਟਿਬਾਹਤਿ, ਸੁਪਟਿਬਾਹਿਤਂ. ਨੋ ਚੇ ਪਟਿਬਾਹਤਿ, ਕਤਿਕਾ ਸੁਕਤਾ. ਪਚ੍ਛਾ ਤੇਸਂ ਤਤ੍ਥ ਵਸਿਤ੍ਵਾ ਆਗਤਾਨਂ ਅਪਲੋਕੇਤ੍ਵਾ ਦਾਤਬ੍ਬਂ, ਅਪਲੋਕਨਕਾਲੇ ਪਟਿਬਾਹਿਤੁਂ ਨ ਲਬ੍ਭਤੀ’’ਤਿ. ਪੁਨਪਿ ਵੁਤ੍ਤਂ ‘‘ਸਚੇ ਵਸ੍ਸੂਪਗਤੇਸੁ ਏਕਚ੍ਚਾਨਂ ਵਸ੍ਸਾਵਾਸਿਕੇ ਅਪਾਪੁਣਨ੍ਤੇ ਭਿਕ੍ਖੂ ਕਤਿਕਂ ਕਰੋਨ੍ਤਿ ‘ਛਿਨ੍ਨਵਸ੍ਸਾਨਂ ਵਸ੍ਸਾਵਾਸਿਕਞ੍ਚ ਇਦਾਨਿ ਉਪ੍ਪਜ੍ਜਨਕਵਸ੍ਸਾਵਾਸਿਕਞ੍ਚ ਇਮੇਸਂ ਦਾਤੁਂ ਰੁਚ੍ਚਤੀ’ਤਿ, ਏਵਂ ਕਤਿਕਾਯ ਕਤਾਯ ਗਾਹਿਤਸਦਿਸਮੇਵ ਹੋਤਿ, ਉਪ੍ਪਨ੍ਨੁਪ੍ਪਨ੍ਨਂ ਤੇਸਮੇਵ ਦਾਤਬ੍ਬ’’ਨ੍ਤਿ. ਤੇਮਾਸਂ ਪਾਨੀਯਂ ਉਪਟ੍ਠਾਪੇਤ੍ਵਾ ਵਿਹਾਰਮਗ੍ਗਚੇਤਿਯਙ੍ਗਣਬੋਧਿਯਙ੍ਗਣਾਨਿ ਜਗ੍ਗਿਤ੍ਵਾ ਬੋਧਿਰੁਕ੍ਖੇ ਉਦਕਂ ਸਿਞ੍ਚਿਤ੍ਵਾ ਪਕ੍ਕਨ੍ਤੋਪਿ ਵਿਬ੍ਭਨ੍ਤੋਪਿ ਵਸ੍ਸਾਵਾਸਿਕਂ ਲਭਤਿਯੇਵ. ਭਤਿਨਿਵਿਟ੍ਠਞ੍ਹਿ ਤੇਨ ਕਤਂ, ਸਙ੍ਘਿਕਂ ਪਨ ਅਪਲੋਕਨਕਮ੍ਮਂ ਕਤ੍ਵਾ ਗਾਹਿਤਂ ਅਨ੍ਤੋਵਸ੍ਸੇ ਵਿਬ੍ਭਨ੍ਤੋਪਿ ਲਭਤੇਵ, ਪਚ੍ਚਯਵਸੇਨ ਗਾਹਿਤਂ ਪਨ ਨ ਲਭਤੀਤਿ ਵਦਨ੍ਤਿ.

ਸਚੇ ਵੁਟ੍ਠਵਸ੍ਸੋ ਦਿਸਂਗਮਿਕੋ ਭਿਕ੍ਖੁ ਆਵਾਸਿਕਸ੍ਸ ਹਤ੍ਥਤੋ ਕਿਞ੍ਚਿਦੇਵ ਕਪ੍ਪਿਯਭਣ੍ਡਂ ਗਹੇਤ੍ਵਾ ‘‘ਅਸੁਕਕੁਲੇ ਮਯ੍ਹਂ ਵਸ੍ਸਾਵਾਸਿਕਂ ਪਤ੍ਤਂ, ਤਂ ਗਣ੍ਹਥਾ’’ਤਿ ਵਤ੍ਵਾ ਗਤਟ੍ਠਾਨੇ ਵਿਬ੍ਭਮਤਿ, ਵਸ੍ਸਾਵਾਸਿਕਂ ਸਙ੍ਘਿਕਂ ਹੋਤਿ. ਸਚੇ ਪਨ ਮਨੁਸ੍ਸੇ ਸਮ੍ਮੁਖਾ ਸਮ੍ਪਟਿਚ੍ਛਾਪੇਤ੍ਵਾ ਗਚ੍ਛਤਿ, ਲਭਤਿ. ‘‘ਇਦਂ ਵਸ੍ਸਾਵਾਸਿਕਂ ਅਮ੍ਹਾਕਂ ਸੇਨਾਸਨੇ ਵੁਤ੍ਥਭਿਕ੍ਖੁਨੋ ਦੇਮਾ’’ਤਿ ਵੁਤ੍ਤੇ ਯਸ੍ਸ ਗਾਹਿਤਂ, ਤਸ੍ਸੇਵ ਹੋਤਿ. ਸਚੇ ਪਨ ਸੇਨਾਸਨਸਾਮਿਕਸ੍ਸ ਪਿਯਕਮ੍ਯਤਾਯ ਪੁਤ੍ਤਧੀਤਾਦਯੋ ਬਹੂਨਿ ਵਤ੍ਥਾਨਿ ਆਹਰਿਤ੍ਵਾ ‘‘ਅਮ੍ਹਾਕਂ ਸੇਨਾਸਨੇ ਦੇਮਾ’’ਤਿ ਦੇਨ੍ਤਿ, ਤਤ੍ਥ ਵਸ੍ਸੂਪਗਤਸ੍ਸ ਏਕਮੇਵ ਵਤ੍ਥਂ ਦਾਤਬ੍ਬਂ, ਸੇਸਾਨਿ ਸਙ੍ਘਿਕਾਨਿ ਹੋਨ੍ਤਿ. ਵਸ੍ਸਾਵਾਸਿਕਠਿਤਿਕਾਯ ਗਾਹੇਤਬ੍ਬਾਨਿ, ਠਿਤਿਕਾਯ ਅਸਤਿ ਥੇਰਾਸਨਤੋ ਪਟ੍ਠਾਯ ਗਾਹੇਤਬ੍ਬਾਨਿ. ਸੇਨਾਸਨੇ ਵਸ੍ਸੂਪਗਤਂ ਭਿਕ੍ਖੁਂ ਨਿਸ੍ਸਾਯ ਉਪ੍ਪਨ੍ਨੇਨ ਚਿਤ੍ਤਪ੍ਪਸਾਦੇਨ ਬਹੂਨਿ ਵਤ੍ਥਾਨਿ ਆਹਰਿਤ੍ਵਾ ‘‘ਸੇਨਾਸਨਸ੍ਸ ਦੇਮਾ’’ਤਿ ਦਿਨ੍ਨੇਸੁਪਿ ਏਸੇਵ ਨਯੋ. ਸਚੇ ਪਨ ਪਾਦਮੂਲੇ ਠਪੇਤ੍ਵਾ ‘‘ਏਤਸ੍ਸ ਭਿਕ੍ਖੁਨੋ ਦੇਮਾ’’ਤਿ ਵਦਨ੍ਤਿ, ਤਸ੍ਸੇਵ ਹੋਨ੍ਤਿ.

ਏਕਸ੍ਸ ਗੇਹੇ ਦ੍ਵੇ ਵਸ੍ਸਾਵਾਸਿਕਾਨਿ, ਪਠਮਭਾਗੋ ਸਾਮਣੇਰਸ੍ਸ ਗਾਹਿਤੋ ਹੋਤਿ, ਦੁਤਿਯੋ ਥੇਰਾਸਨੇ. ਸੋ ਏਕਂ ਦਸਹਤ੍ਥਂ, ਏਕਂ ਅਟ੍ਠਹਤ੍ਥਂ ਸਾਟਕਂ ਪੇਸੇਤਿ ‘‘ਵਸ੍ਸਾਵਾਸਿਕਂ ਪਤ੍ਤਭਿਕ੍ਖੂਨਂ ਦੇਥਾ’’ਤਿ, ਵਿਚਿਨਿਤ੍ਵਾ ਵਰਭਾਗਂ ਸਾਮਣੇਰਸ੍ਸ ਦਤ੍ਵਾ ਅਨੁਭਾਗੋ ਥੇਰਾਸਨੇ ਦਾਤਬ੍ਬੋ. ਸਚੇ ਪਨ ਉਭੋਪਿ ਘਰਂ ਨੇਤ੍ਵਾ ਭੋਜੇਤ੍ਵਾ ਸਯਮੇਵ ਪਾਦਮੂਲੇ ਠਪੇਤਿ, ਯਂ ਯਸ੍ਸ ਦਿਨ੍ਨਂ, ਤਦੇਵ ਤਸ੍ਸ ਹੋਤਿ. ਇਤੋ ਪਰਂ ਮਹਾਪਚ੍ਚਰਿਯਂ ਆਗਤਨਯੋ ਹੋਤਿ – ਏਕਸ੍ਸ ਘਰੇ ਦਹਰਸਾਮਣੇਰਸ੍ਸ ਵਸ੍ਸਾਵਾਸਿਕਂ ਪਾਪੁਣਾਤਿ, ਸੋ ਚੇ ਪੁਚ੍ਛਤਿ ‘‘ਅਮ੍ਹਾਕਂ ਵਸ੍ਸਾਵਾਸਿਕਂ ਕਸ੍ਸ ਪਤ੍ਤ’’ਨ੍ਤਿ, ‘‘ਸਾਮਣੇਰਸ੍ਸਾ’’ਤਿ ਅਵਤ੍ਵਾ ‘‘ਦਾਨਕਾਲੇ ਜਾਨਿਸ੍ਸਸੀ’’ਤਿ ਵਤ੍ਵਾ ਦਾਨਦਿਵਸੇ ਏਕਂ ਮਹਾਥੇਰਂ ਪੇਸੇਤ੍ਵਾ ਨੀਹਰਾਪੇਤਬ੍ਬਂ. ਸਚੇ ਯਸ੍ਸ ਵਸ੍ਸਾਵਾਸਿਕਂ ਪਤ੍ਤਂ, ਸੋ ਵਿਬ੍ਭਮਤਿ ਵਾ ਕਾਲਂ ਵਾ ਕਰੋਤਿ, ਮਨੁਸ੍ਸਾ ਚੇ ਪੁਚ੍ਛਨ੍ਤਿ ‘‘ਕਸ੍ਸ ਅਮ੍ਹਾਕਂ ਵਸ੍ਸਾਵਾਸਿਕਂ ਪਤ੍ਤ’’ਨ੍ਤਿ, ਤੇਸਂ ਯਥਾਭੂਤਂ ਆਚਿਕ੍ਖਿਤਬ੍ਬਂ. ਸਚੇ ਤੇ ਵਦਨ੍ਤਿ ‘‘ਤੁਮ੍ਹਾਕਂ ਦੇਮਾ’’ਤਿ, ਤਸ੍ਸ ਭਿਕ੍ਖੁਨੋ ਪਾਪੁਣਾਤਿ. ਅਥ ਸਙ੍ਘਸ੍ਸ ਵਾ ਗਣਸ੍ਸ ਵਾ ਦੇਨ੍ਤਿ, ਸਙ੍ਘਸ੍ਸ ਵਾ ਗਣਸ੍ਸ ਵਾ ਪਾਪੁਣਾਤਿ. ਸਚੇ ਵਸ੍ਸੂਪਗਤਾ ਸੁਦ੍ਧਪਂਸੁਕੂਲਿਕਾਯੇਵ ਹੋਨ੍ਤਿ, ਆਨੇਤ੍ਵਾ ਦਿਨ੍ਨਂ ਵਸ੍ਸਾਵਾਸਿਕਂ ਸੇਨਾਸਨਪਰਿਕ੍ਖਾਰਂ ਵਾ ਕਤ੍ਵਾ ਠਪੇਤਬ੍ਬਂ, ਬਿਮ੍ਬੋਹਨਾਦੀਨਿ ਵਾ ਕਾਤਬ੍ਬਾਨੀਤਿ.

ਅਯਂ ਤਾਵ ਅਨ੍ਤੋਵਸ੍ਸੇ ਵਸ੍ਸੂਪਨਾਯਿਕਦਿਵਸਵਸੇਨ

ਸੇਨਾਸਨਗ੍ਗਾਹਕਥਾ.

੨੨੨. ਅਯਮਪਰੋਪਿ ਉਤੁਕਾਲੇ ਅਨ੍ਤਰਾਮੁਤ੍ਤਕੋ ਨਾਮ ਸੇਨਾਸਨਗ੍ਗਾਹੋ ਵੇਦਿਤਬ੍ਬੋ. ਦਿਵਸਵਸੇਨ ਹਿ ਤਿਵਿਧੋ ਸੇਨਾਸਨਗ੍ਗਾਹੋ ਪੁਰਿਮਕੋ ਪਚ੍ਛਿਮਕੋ ਅਨ੍ਤਰਾਮੁਤ੍ਤਕੋਤਿ. ਵੁਤ੍ਤਞ੍ਹੇਤਂ –

‘‘ਤਯੋਮੇ, ਭਿਕ੍ਖਵੇ, ਸੇਨਾਸਨਗ੍ਗਾਹਾ, ਪੁਰਿਮਕੋ ਪਚ੍ਛਿਮਕੋ ਅਨ੍ਤਰਾਮੁਤ੍ਤਕੋ. ਅਪਰਜ੍ਜੁਗਤਾਯ ਆਸਾਲ਼੍ਹਿਯਾ ਪੁਰਿਮਕੋ ਗਾਹੇਤਬ੍ਬੋ, ਮਾਸਗਤਾਯ ਆਸਾਲ਼੍ਹਿਯਾ ਪਚ੍ਛਿਮਕੋ ਗਾਹੇਤਬ੍ਬੋ, ਅਪਰਜ੍ਜੁਗਤਾਯ ਪਵਾਰਣਾਯ ਆਯਤਿਂ ਵਸ੍ਸਾਵਾਸਤ੍ਥਾਯ ਅਨ੍ਤਰਾਮੁਤ੍ਤਕੋ ਗਾਹੇਤਬ੍ਬੋ’’ਤਿ (ਮਹਾਵ. ੩੧੮).

ਏਤੇਸੁ (ਚੂਲ਼ਵ. ਅਟ੍ਠ. ੩੧੮) ਤੀਸੁ ਸੇਨਾਸਨਗ੍ਗਾਹੇਸੁ ਪੁਰਿਮਕੋ ਪਚ੍ਛਿਮਕੋ ਚਾਤਿ ਇਮੇ ਦ੍ਵੇ ਗਾਹਾ ਥਾਵਰਾ, ਅਨ੍ਤਰਾਮੁਤ੍ਤਕੋ ਪਨ ਸੇਨਾਸਨਪਟਿਜਗ੍ਗਨਤ੍ਥਂ ਭਗਵਤਾ ਅਨੁਞ੍ਞਾਤੋ. ਤਥਾ ਹਿ ਏਕਸ੍ਮਿਂ ਵਿਹਾਰੇ ਮਹਾਲਾਭਂ ਸੇਨਾਸਨਂ ਹੋਤਿ, ਸੇਨਾਸਨਸਾਮਿਕਾ ਵਸ੍ਸੂਪਗਤਂ ਭਿਕ੍ਖੁਂ ਸਬ੍ਬਪਚ੍ਚਯੇਹਿ ਸਕ੍ਕਚ੍ਚਂ ਉਪਟ੍ਠਹਿਤ੍ਵਾ ਪਵਾਰੇਤ੍ਵਾ ਗਮਨਕਾਲੇ ਬਹੁਂ ਸਮਣਪਰਿਕ੍ਖਾਰਂ ਦੇਨ੍ਤਿ, ਮਹਾਥੇਰਾ ਦੂਰਤੋਵ ਆਗਨ੍ਤ੍ਵਾ ਵਸ੍ਸੂਪਨਾਯਿਕਦਿਵਸੇ ਤਂ ਗਹੇਤ੍ਵਾ ਫਾਸੁਂ ਵਸਿਤ੍ਵਾ ਵੁਟ੍ਠਵਸ੍ਸਾ ਲਾਭਂ ਗਣ੍ਹਿਤ੍ਵਾ ਪਕ੍ਕਮਨ੍ਤਿ. ਆਵਾਸਿਕਾ ‘‘ਮਯਂ ਏਤ੍ਥੁਪ੍ਪਨ੍ਨਂ ਲਾਭਂ ਨ ਲਭਾਮ, ਨਿਚ੍ਚਂ ਆਗਨ੍ਤੁਕਮਹਾਥੇਰਾਵ ਲਭਨ੍ਤਿ, ਤੇਯੇਵ ਨਂ ਆਗਨ੍ਤ੍ਵਾ ਪਟਿਜਗ੍ਗਿਸ੍ਸਨ੍ਤੀ’’ਤਿ ਪਲੁਜ੍ਜਨ੍ਤਮ੍ਪਿ ਨ ਓਲੋਕੇਨ੍ਤਿ. ਭਗਵਾ ਤਸ੍ਸ ਪਟਿਜਗ੍ਗਨਤ੍ਥਂ ‘‘ਅਪਰਜ੍ਜੁਗਤਾਯ ਪਵਾਰਣਾਯ ਆਯਤਿਂ ਵਸ੍ਸਾਵਾਸਤ੍ਥਾਯ ਅਨ੍ਤਰਾਮੁਤ੍ਤਕੋ ਗਾਹੇਤਬ੍ਬੋ’’ਤਿ ਆਹ.

ਤਂ ਗਾਹੇਨ੍ਤੇਨ ਸਙ੍ਘਤ੍ਥੇਰੋ ਵਤ੍ਤਬ੍ਬੋ ‘‘ਭਨ੍ਤੇ, ਅਨ੍ਤਰਾਮੁਤ੍ਤਕਸੇਨਾਸਨਂ ਗਣ੍ਹਥਾ’’ਤਿ. ਸਚੇ ਗਣ੍ਹਾਤਿ, ਦਾਤਬ੍ਬਂ. ਨੋ ਚੇ, ਏਤੇਨੇਵ ਉਪਾਯੇਨ ਅਨੁਥੇਰਂ ਆਦਿਂ ਕਤ੍ਵਾ ਯੋ ਗਣ੍ਹਾਤਿ, ਤਸ੍ਸ ਅਨ੍ਤਮਸੋ ਸਾਮਣੇਰਸ੍ਸਪਿ ਦਾਤਬ੍ਬਂ. ਤੇਨ ਤਂ ਸੇਨਾਸਨਂ ਅਟ੍ਠ ਮਾਸੇ ਪਟਿਜਗ੍ਗਿਤਬ੍ਬਂ, ਛਦਨਭਿਤ੍ਤਿਭੂਮੀਸੁ ਯਂ ਕਿਞ੍ਚਿ ਖਣ੍ਡਂ ਵਾ ਫੁਲ੍ਲਂ ਵਾ ਹੋਤਿ, ਤਂ ਸਬ੍ਬਂ ਪਟਿਸਙ੍ਖਰਿਤਬ੍ਬਂ. ਉਦ੍ਦੇਸਪਰਿਪੁਚ੍ਛਾਦੀਹਿ ਦਿਵਸਂ ਖੇਪੇਤ੍ਵਾ ਰਤ੍ਤਿਂ ਤਤ੍ਥ ਵਸਿਤੁਂ ਵਟ੍ਟਤਿ, ਰਤ੍ਤਿਂ ਪਰਿਵੇਣੇ ਵਸਿਤ੍ਵਾ ਤਤ੍ਥ ਦਿਵਸਂ ਖੇਪੇਤੁਮ੍ਪਿ ਵਟ੍ਟਤਿ, ਰਤ੍ਤਿਨ੍ਦਿਵਂ ਤਤ੍ਥੇਵ ਵਸਿਤੁਮ੍ਪਿ ਵਟ੍ਟਤਿ, ਉਤੁਕਾਲੇ ਆਗਤਾਨਂ ਵੁਡ੍ਢਾਨਂ ਨ ਪਟਿਬਾਹਿਤਬ੍ਬਂ. ਵਸ੍ਸੂਪਨਾਯਿਕਦਿਵਸੇ ਪਨ ਸਮ੍ਪਤ੍ਤੇ ਸਚੇ ਸਙ੍ਘਤ੍ਥੇਰੋ ‘‘ਮਯ੍ਹਂ ਇਦਂ ਪਨ ਸੇਨਾਸਨਂ ਦੇਥਾ’’ਤਿ ਵਦਤਿ, ਨ ਲਭਤਿ. ‘‘ਭਨ੍ਤੇ, ਇਦਂ ਅਨ੍ਤਰਾਮੁਤ੍ਤਕਂ ਗਹੇਤ੍ਵਾ ਏਕੇਨ ਭਿਕ੍ਖੁਨਾ ਪਟਿਜਗ੍ਗਿਤ’’ਨ੍ਤਿ ਵਤ੍ਵਾ ਨ ਦਾਤਬ੍ਬਂ, ਅਟ੍ਠ ਮਾਸੇ ਪਟਿਜਗ੍ਗਿਤਭਿਕ੍ਖੁਸ੍ਸੇਵ ਗਾਹਿਤਂ ਹੋਤਿ. ਯਸ੍ਮਿਂ ਪਨ ਸੇਨਾਸਨੇ ਏਕਸਂਵਚ੍ਛਰੇ ਦ੍ਵਿਕ੍ਖਤ੍ਤੁਂ ਪਚ੍ਚਯੇ ਦੇਨ੍ਤਿ ਛਮਾਸਚ੍ਚਯੇਨ ਛਮਾਸਚ੍ਚਯੇਨ, ਤਂ ਅਨ੍ਤਰਾਮੁਤ੍ਤਕਂ ਨ ਗਾਹੇਤਬ੍ਬਂ. ਯਸ੍ਮਿਂ ਵਾ ਤਿਕ੍ਖਤ੍ਤੁਂ ਦੇਨ੍ਤਿ ਚਤੁਮਾਸਚ੍ਚਯੇਨ ਚਤੁਮਾਸਚ੍ਚਯੇਨ, ਯਸ੍ਮਿਂ ਵਾ ਚਤੁਕ੍ਖਤ੍ਤੁਂ ਦੇਨ੍ਤਿ ਤੇਮਾਸਚ੍ਚਯੇਨ ਤੇਮਾਸਚ੍ਚਯੇਨ, ਤਂ ਅਨ੍ਤਰਾਮੁਤ੍ਤਕਂ ਨ ਗਾਹੇਤਬ੍ਬਂ. ਪਚ੍ਚਯੇਨੇਵ ਹਿ ਤਂ ਪਟਿਜਗ੍ਗਨਂ ਲਭਿਸ੍ਸਤਿ. ਯਸ੍ਮਿਂ ਪਨ ਏਕਸਂਵਚ੍ਛਰੇ ਸਕਿਦੇਵ ਬਹੂ ਪਚ੍ਚਯੇ ਦੇਨ੍ਤਿ, ਏਤਂ ਅਨ੍ਤਰਾਮੁਤ੍ਤਕਂ ਗਾਹੇਤਬ੍ਬਨ੍ਤਿ.

੨੨੩. ‘‘ਅਨੁਜਾਨਾਮਿ, ਭਿਕ੍ਖਵੇ, ਅਕਤਂ ਵਾ ਵਿਹਾਰਂ ਵਿਪ੍ਪਕਤਂ ਵਾ ਨਵਕਮ੍ਮਂ ਦਾਤੁਂ, ਖੁਦ੍ਦਕੇ ਵਿਹਾਰੇ ਕਮ੍ਮਂ ਓਲੋਕੇਤ੍ਵਾ ਛਪ੍ਪਞ੍ਚਵਸ੍ਸਿਕਂ ਨਵਕਮ੍ਮਂ ਦਾਤੁਂ, ਅਡ੍ਢਯੋਗੇ ਕਮ੍ਮਂ ਓਲੋਕੇਤ੍ਵਾ ਸਤ੍ਤਟ੍ਠਵਸ੍ਸਿਕਂ ਨਵਕਮ੍ਮਂ ਦਾਤੁਂ, ਮਹਲ੍ਲਕੇ ਵਿਹਾਰੇ ਪਾਸਾਦੇ ਵਾ ਕਮ੍ਮਂ ਓਲੋਕੇਤ੍ਵਾ ਦਸਦ੍ਵਾਦਸਵਸ੍ਸਿਕਂ ਨਵਕਮ੍ਮਂ ਦਾਤੁ’’ਨ੍ਤਿ (ਚੂਲ਼ਵ. ੩੨੩) ਵਚਨਤੋ ਅਕਤਂ ਵਿਪ੍ਪਕਤਂ ਵਾ ਸੇਨਾਸਨਂ ਏਕਸ੍ਸ ਭਿਕ੍ਖੁਨੋ ਅਪਲੋਕਨੇਨ ਵਾ ਕਮ੍ਮਵਾਚਾਯ ਵਾ ਸਾਵੇਤ੍ਵਾ ਨਵਕਮ੍ਮਂ ਕਤ੍ਵਾ ਵਸਿਤੁਂ ਯਥਾਵੁਤ੍ਤਕਾਲਪਰਿਚ੍ਛੇਦਵਸੇਨ ਦਾਤਬ੍ਬਂ. ਨਵਕਮ੍ਮਿਕੋ ਭਿਕ੍ਖੁ ਅਨ੍ਤੋਵਸ੍ਸੇ ਤਂ ਆਵਾਸਂ ਲਭਤਿ, ਉਤੁਕਾਲੇ ਪਟਿਬਾਹਿਤੁਂ ਨ ਲਭਤਿ. ਲਦ੍ਧਨਵਕਮ੍ਮੇਨ ਪਨ ਭਿਕ੍ਖੁਨਾ ਵਾਸਿਫਰਸੁਨਿਖਾਦਨਾਦੀਨਿ ਗਹੇਤ੍ਵਾ ਸਯਂ ਨ ਕਾਤਬ੍ਬਂ, ਕਤਾਕਤਂ ਜਾਨਿਤਬ੍ਬਂ. ਸਚੇ ਸੋ ਆਵਾਸੋ ਜੀਰਤਿ, ਆਵਾਸਸਾਮਿਕਸ੍ਸ ਵਾ ਤਸ੍ਸ ਵਂਸੇ ਉਪ੍ਪਨ੍ਨਸ੍ਸ ਵਾ ਕਸ੍ਸਚਿ ਕਥੇਤਬ੍ਬਂ ‘‘ਆਵਾਸੋ ਤੇ ਨਸ੍ਸਤਿ, ਜਗ੍ਗਥ ਏਤਂ ਆਵਾਸ’’ਨ੍ਤਿ. ਸਚੇ ਸੋ ਨ ਸਕ੍ਕੋਤਿ, ਭਿਕ੍ਖੂਹਿ ਞਾਤੀਹਿ ਵਾ ਉਪਟ੍ਠਾਕੇਹਿ ਵਾ ਸਮਾਦਾਪੇਤ੍ਵਾ ਜਗ੍ਗਿਤਬ੍ਬੋ. ਸਚੇ ਤੇਪਿ ਨ ਸਕ੍ਕੋਨ੍ਤਿ, ਸਙ੍ਘਿਕੇਨ ਪਚ੍ਚਯੇਨ ਜਗ੍ਗਿਤਬ੍ਬੋ, ਤਸ੍ਮਿਮ੍ਪਿ ਅਸਤਿ ਏਕਂ ਆਵਾਸਂ ਵਿਸ੍ਸਜ੍ਜੇਤ੍ਵਾ ਅਵਸੇਸਾ ਜਗ੍ਗਿਤਬ੍ਬਾ, ਬਹੂ ਵਿਸ੍ਸਜ੍ਜੇਤ੍ਵਾ ਏਕਂ ਸਣ੍ਠਪੇਤੁਮ੍ਪਿ ਵਟ੍ਟਤਿਯੇਵ.

ਦੁਬ੍ਭਿਕ੍ਖੇ ਭਿਕ੍ਖੂਸੁ ਪਕ੍ਕਨ੍ਤੇਸੁ ਸਬ੍ਬੇ ਆਵਾਸਾ ਨਸ੍ਸਨ੍ਤਿ, ਤਸ੍ਮਾ ਏਕਂ ਵਾ ਦ੍ਵੇ ਵਾ ਤਯੋ ਵਾ ਆਵਾਸੇ ਵਿਸ੍ਸਜ੍ਜੇਤ੍ਵਾ ਤਤੋ ਯਾਗੁਭਤ੍ਤਚੀਵਰਾਦੀਨਿ ਪਰਿਭੁਞ੍ਜਨ੍ਤੇਹਿ ਸੇਸਾਵਾਸਾ ਜਗ੍ਗਿਤਬ੍ਬਾਯੇਵ.

ਕੁਰੁਨ੍ਦਿਯਂ ਪਨ ਵੁਤ੍ਤਂ ‘‘ਸਙ੍ਘਿਕੇ ਪਚ੍ਚਯੇ ਅਸਤਿ ਏਕੋ ਭਿਕ੍ਖੁ ‘ਤੁਯ੍ਹਂ ਏਕਮਞ੍ਚਟ੍ਠਾਨਂ ਗਹੇਤ੍ਵਾ ਜਗ੍ਗਾਹੀ’ਤਿ ਵਤ੍ਤਬ੍ਬੋ. ਸਚੇ ਬਹੁਤਰਂ ਇਚ੍ਛਤਿ, ਤਿਭਾਗਂ ਵਾ ਉਪਡ੍ਢਭਾਗਂ ਵਾ ਦਤ੍ਵਾਪਿ ਜਗ੍ਗਾਪੇਤਬ੍ਬਂ. ਅਥ ਥਮ੍ਭਮਤ੍ਤਮੇਵੇਤ੍ਥ ਅਵਸਿਟ੍ਠਂ, ਬਹੁਕਮ੍ਮਂ ਕਾਤਬ੍ਬਨ੍ਤਿ ਨ ਇਚ੍ਛਤਿ, ‘ਤੁਯ੍ਹਂ ਪੁਗ੍ਗਲਿਕਮੇਵ ਕਤ੍ਵਾ ਜਗ੍ਗਾਹੀ’ਤਿ ਦਾਤਬ੍ਬਂ. ਏਵਮ੍ਪਿ ਹਿ ‘ਸਙ੍ਘਸ੍ਸ ਭਣ੍ਡਕਠਪਨਟ੍ਠਾਨਞ੍ਚ ਨਵਕਾਨਞ੍ਚ ਵਸਨਟ੍ਠਾਨਂ ਲਭਿਸ੍ਸਤੀ’ਤਿ ਜਗ੍ਗਾਪੇਤਬ੍ਬੋ. ਏਵਂ ਜਗ੍ਗਿਤੋ ਪਨ ਤਸ੍ਮਿਂ ਜੀਵਨ੍ਤੇ ਪੁਗ੍ਗਲਿਕੋ ਹੋਤਿ, ਮਤੇ ਸਙ੍ਘਿਕੋਵ. ਸਚੇ ਸਦ੍ਧਿਵਿਹਾਰਿਕਾਨਂ ਦਾਤੁਕਾਮੋ ਹੋਤਿ, ਕਮ੍ਮਂ ਓਲੋਕੇਤ੍ਵਾ ਤਿਭਾਗਂ ਵਾ ਉਪਡ੍ਢਂ ਵਾ ਪੁਗ੍ਗਲਿਕਂ ਕਤ੍ਵਾ ਜਗ੍ਗਾਪੇਤਬ੍ਬੋ. ਏਵਞ੍ਹਿ ਸਦ੍ਧਿਵਿਹਾਰਿਕਾਨਂ ਦਾਤੁਂ ਲਭਤਿ. ਏਵਂ ਜਗ੍ਗਨਕੇ ਪਨ ਅਸਤਿ ਏਕਂ ਆਵਾਸਂ ਵਿਸ੍ਸਜ੍ਜੇਤ੍ਵਾਤਿਆਦਿਨਾ ਨਯੇਨ ਜਗ੍ਗਾਪੇਤਬ੍ਬੋ’’ਤਿ ਵੁਤ੍ਤਂ. ਇਦਮ੍ਪਿ ਚ ਅਞ੍ਞਂ ਤਤ੍ਥੇਵ ਵੁਤ੍ਤਂ.

ਦ੍ਵੇ ਭਿਕ੍ਖੂ ਸਙ੍ਘਿਕਭੂਮਿਂ ਗਹੇਤ੍ਵਾ ਸੋਧੇਤ੍ਵਾ ਸਙ੍ਘਿਕਸੇਨਾਸਨਂ ਕਰੋਨ੍ਤਿ, ਯੇਨ ਸਾ ਭੂਮਿ ਪਠਮਂ ਗਹਿਤਾ, ਸੋ ਸਾਮੀ. ਉਭੋਪਿ ਪੁਗ੍ਗਲਿਕਂ ਕਰੋਨ੍ਤਿ, ਸੋਯੇਵ ਸਾਮੀ. ਸੋ ਸਙ੍ਘਿਕਂ ਕਰੋਤਿ, ਇਤਰੋ ਪੁਗ੍ਗਲਿਕਂ ਕਰੋਤਿ, ਅਞ੍ਞਂ ਚੇ ਬਹੁ ਸੇਨਾਸਨਟ੍ਠਾਨਂ ਅਤ੍ਥਿ, ਪੁਗ੍ਗਲਿਕਂ ਕਰੋਨ੍ਤੋਪਿ ਨ ਵਾਰੇਤਬ੍ਬੋ. ਅਞ੍ਞਸ੍ਮਿਂ ਪਨ ਤਾਦਿਸੇ ਪਤਿਰੂਪੇ ਠਾਨੇ ਅਸਤਿ ਤਂ ਪਟਿਬਾਹਿਤ੍ਵਾ ਸਙ੍ਘਿਕਂ ਕਰੋਨ੍ਤੇਨੇਵ ਕਾਤਬ੍ਬਂ. ਯਂ ਪਨ ਤਸ੍ਸ ਤਤ੍ਥ ਵਯਕਮ੍ਮਂ ਕਤਂ, ਤਂ ਦਾਤਬ੍ਬਂ. ਸਚੇ ਪਨ ਕਤਾਵਾਸੇ ਵਾ ਆਵਾਸਕਰਣਟ੍ਠਾਨੇ ਵਾ ਛਾਯੂਪਗਫਲੂਪਗਾ ਰੁਕ੍ਖਾ ਹੋਨ੍ਤਿ, ਅਪਲੋਕੇਤ੍ਵਾ ਹਾਰੇਤਬ੍ਬਾ. ਪੁਗ੍ਗਲਿਕਾ ਚੇ ਹੋਨ੍ਤਿ, ਸਾਮਿਕਾ ਆਪੁਚ੍ਛਿਤਬ੍ਬਾ. ਨੋ ਚੇ ਦੇਨ੍ਤਿ, ਯਾਵਤਤਿਯਕਂ ਆਪੁਚ੍ਛਿਤ੍ਵਾ ‘‘ਰੁਕ੍ਖਅਗ੍ਘਨਕਮੂਲਂ ਦਸ੍ਸਾਮਾ’’ਤਿ ਹਾਰੇਤਬ੍ਬਾ.

੨੨੪. ਯੋ ਪਨ ਸਙ੍ਘਿਕਂ ਵਲ੍ਲਿਮਤ੍ਤਮ੍ਪਿ ਅਗ੍ਗਹੇਤ੍ਵਾ ਆਹਰਿਮੇਨ ਉਪਕਰਣੇਨ ਸਙ੍ਘਿਕਾਯ ਭੂਮਿਯਾ ਪੁਗ੍ਗਲਿਕਵਿਹਾਰਂ ਕਾਰੇਤਿ, ਉਪਡ੍ਢਂ ਸਙ੍ਘਿਕਂ ਹੋਤਿ, ਉਪਡ੍ਢਂ ਪੁਗ੍ਗਲਿਕਂ. ਪਾਸਾਦੋ ਚੇ ਹੋਤਿ, ਹੇਟ੍ਠਾਪਾਸਾਦੋ ਸਙ੍ਘਿਕੋ, ਉਪਰਿ ਪੁਗ੍ਗਲਿਕੋ. ਸਚੇ ਯੋ ਹੇਟ੍ਠਾਪਾਸਾਦਂ ਇਚ੍ਛਤਿ, ਹੇਟ੍ਠਾਪਾਸਾਦਂ ਤਸ੍ਸ ਹੋਤਿ. ਅਥ ਹੇਟ੍ਠਾ ਚ ਉਪਰਿ ਚ ਇਚ੍ਛਤਿ, ਉਭਯਤ੍ਥ ਉਪਡ੍ਢਂ ਲਭਤਿ. ਦ੍ਵੇ ਸੇਨਾਸਨਾਨਿ ਕਾਰੇਤਿ, ਏਕਂ ਸਙ੍ਘਿਕਂ, ਏਕਂ ਪੁਗ੍ਗਲਿਕਂ. ਸਚੇ ਵਿਹਾਰੇ ਉਟ੍ਠਿਤੇਨ ਦਬ੍ਬਸਮ੍ਭਾਰੇਨ ਕਾਰੇਤਿ, ਤਿਭਾਗਂ ਲਭਤਿ. ਸਚੇ ਅਕਤਟ੍ਠਾਨੇ ਚਯਂ ਵਾ ਪਮੁਖਂ ਵਾ ਕਰੋਤਿ ਬਹਿਕੁਟ੍ਟੇ, ਉਪਡ੍ਢਂ ਸਙ੍ਘਸ੍ਸ, ਉਪਡ੍ਢਂ ਤਸ੍ਸ. ਅਥ ਮਹਨ੍ਤਂ ਵਿਸਮਂ ਪੂਰੇਤ੍ਵਾ ਅਪਦੇ ਪਦਂ ਦਸ੍ਸੇਤ੍ਵਾ ਕਤਂ ਹੋਤਿ, ਅਨਿਸ੍ਸਰੋ ਤਤ੍ਥ ਸਙ੍ਘੋ.

ਸਚੇ ਭਿਕ੍ਖੁ ਸਙ੍ਘਿਕਵਿਹਾਰਤੋ ਗੋਪਾਨਸਿਆਦੀਨਿ ਗਹੇਤ੍ਵਾ ਅਞ੍ਞਸ੍ਮਿਂ ਸਙ੍ਘਿਕਾਵਾਸੇ ਯੋਜੇਤਿ, ਸੁਯੋਜਿਤਾਨਿ. ਪੁਗ੍ਗਲਿਕਾਵਾਸੇ ਯੋਜੇਨ੍ਤੇਹਿ ਪਨ ਮੂਲਂ ਵਾ ਦਾਤਬ੍ਬਂ, ਪਟਿਪਾਕਤਿਕਂ ਵਾ ਕਾਤਬ੍ਬਂ. ਛਡ੍ਡਿਤਵਿਹਾਰਤੋ ਮਞ੍ਚਪੀਠਾਦੀਨਿ ਥੇਯ੍ਯਚਿਤ੍ਤੇਨ ਗਣ੍ਹਨ੍ਤੋ ਉਦ੍ਧਾਰੇਯੇਵ ਭਣ੍ਡਗ੍ਘੇਨ ਕਾਰੇਤਬ੍ਬੋ. ‘‘ਪੁਨ ਆਵਾਸਿਕਕਾਲੇ ਦਸ੍ਸਾਮੀ’’ਤਿ ਗਹੇਤ੍ਵਾ ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਨ੍ਤਸ੍ਸ ਨਟ੍ਠਂ ਸੁਨਟ੍ਠਂ, ਜਿਣ੍ਣਂ ਸੁਜਿਣ੍ਣਂ. ਅਰੋਗਂ ਚੇ, ਪਾਕਤਿਕਂ ਕਾਤਬ੍ਬਂ, ਪੁਗ੍ਗਲਿਕਪਰਿਭੋਗੇਨ ਪਰਿਭੁਞ੍ਜਨ੍ਤਸ੍ਸ ਨਟ੍ਠਂ ਵਾ ਜਿਣ੍ਣਂ ਵਾ ਗੀਵਾ ਹੋਤਿ. ਤਤੋ ਦ੍ਵਾਰਵਾਤਪਾਨਾਦੀਨਿ ਸਙ੍ਘਿਕਾਵਾਸੇ ਵਾ ਪੁਗ੍ਗਲਿਕਾਵਾਸੇ ਵਾ ਯੋਜਿਤਾਨਿ, ਪਟਿਦਾਤਬ੍ਬਾਨਿਯੇਵ. ਸਚੇ ਕੋਚਿ ਸਙ੍ਘਿਕੋ ਵਿਹਾਰੋ ਉਨ੍ਦ੍ਰਿਯਤਿ, ਯਂ ਤਤ੍ਥ ਮਞ੍ਚਪੀਠਾਦਿਕਂ, ਤਂ ਗੁਤ੍ਤਤ੍ਥਾਯ ਅਞ੍ਞਤ੍ਰ ਹਰਿਤੁਂ ਵਟ੍ਟਤਿ. ਤਸ੍ਮਾ ਅਞ੍ਞਤ੍ਰ ਹਰਿਤ੍ਵਾ ਸਙ੍ਘਿਕਪਰਿਭੋਗੇਨ ਪਰਿਭੁਞ੍ਜਨ੍ਤਸ੍ਸ ਨਟ੍ਠਂ ਸੁਨਟ੍ਠਂ, ਜਿਣ੍ਣਂ ਸੁਜਿਣ੍ਣਂ. ਸਚੇ ਅਰੋਗਂ, ਤਸ੍ਮਿਂ ਵਿਹਾਰੇ ਪਟਿਸਙ੍ਖਤੇ ਪੁਨ ਪਾਕਤਿਕਂ ਕਾਤਬ੍ਬਂ. ਪੁਗ੍ਗਲਿਕਪਰਿਭੋਗੇਨ ਪਰਿਭੁਞ੍ਜਤੋ ਨਟ੍ਠਂ ਵਾ ਜਿਣ੍ਣਂ ਵਾ ਗੀਵਾ ਹੋਤਿ, ਤਸ੍ਮਿਂ ਪਟਿਸਙ੍ਖਤੇ ਦਾਤਬ੍ਬਮੇਵ. ਅਯਂ ਸੇਨਾਸਨਗ੍ਗਾਹਕਥਾ.

੨੨੫. ਅਯਂ ਪਨੇਤ੍ਥ ਚਤੁਪਚ੍ਚਯਸਾਧਾਰਣਕਥਾ (ਚੂਲ਼ਵ. ਅਟ੍ਠ. ੩੨੫ ਪਕ੍ਖਿਕਭਤ੍ਤਾਦਿਕਥਾ) – ਸਮ੍ਮਤੇਨ ਅਪ੍ਪਮਤ੍ਤਕਵਿਸ੍ਸਜ੍ਜਕੇਨ ਭਿਕ੍ਖੁਨਾ ਚੀਵਰਕਮ੍ਮਂ ਕਰੋਨ੍ਤਸ੍ਸ ‘‘ਸੂਚਿਂ ਦੇਹੀ’’ਤਿ ਵਦਤੋ ਏਕਾ ਦੀਘਾ, ਏਕਾ ਰਸ੍ਸਾਤਿ ਦ੍ਵੇ ਸੂਚਿਯੋ ਦਾਤਬ੍ਬਾ. ‘‘ਅਵਿਭਤ੍ਤਂ ਸਙ੍ਘਿਕਭਣ੍ਡ’’ਨ੍ਤਿ ਪੁਚ੍ਛਿਤਬ੍ਬਕਿਚ੍ਚਂ ਨਤ੍ਥਿ. ਪਿਪ੍ਫਲਤ੍ਥਿਕਸ੍ਸ ਏਕੋ ਪਿਪ੍ਫਲਕੋ, ਕਨ੍ਤਾਰਂ ਪਟਿਪਜ੍ਜਿਤੁਕਾਮਸ੍ਸ ਉਪਾਹਨਯੁਗਲ਼ਂ, ਕਾਯਬਨ੍ਧਨਤ੍ਥਿਕਸ੍ਸ ਕਾਯਬਨ੍ਧਨਂ, ‘‘ਅਂਸਬਦ੍ਧਕੋ ਮੇ ਜਿਣ੍ਣੋ’’ਤਿ ਆਗਤਸ੍ਸ ਅਂਸਬਦ੍ਧਕੋ, ਪਰਿਸ੍ਸਾਵਨਤ੍ਥਿਕਸ੍ਸ ਪਰਿਸ੍ਸਾਵਨਂ ਦਾਤਬ੍ਬਂ, ਧਮ੍ਮਕਰਣਤ੍ਥਿਕਸ੍ਸ ਧਮ੍ਮਕਰਣੋ. ਸਚੇ ਪਟ੍ਟਕੋ ਨ ਹੋਤਿ, ਧਮ੍ਮਕਰਣੋ ਪਟ੍ਟਕੇਨ ਸਦ੍ਧਿਂ ਦਾਤਬ੍ਬੋ. ‘‘ਆਗਨ੍ਤੁਕਪਤ੍ਤਂ ਆਰੋਪੇਸ੍ਸਾਮੀ’’ਤਿ ਯਾਚਨ੍ਤਸ੍ਸ ਕੁਸਿਯਾ ਚ ਅਡ੍ਢਕੁਸਿਯਾ ਚ ਪਹੋਨਕਂ ਦਾਤਬ੍ਬਂ. ‘‘ਮਣ੍ਡਲਂ ਨਪ੍ਪਹੋਤੀ’’ਤਿ ਆਗਤਸ੍ਸ ਮਣ੍ਡਲਂ ਏਕਂ ਦਾਤਬ੍ਬਂ, ਅਡ੍ਢਮਣ੍ਡਲਾਨਿ ਦ੍ਵੇ ਦਾਤਬ੍ਬਾਨਿ, ਦ੍ਵੇ ਮਣ੍ਡਲਾਨਿ ਯਾਚਨ੍ਤਸ੍ਸ ਨ ਦਾਤਬ੍ਬਾਨਿ. ਅਨੁਵਾਤਪਰਿਭਣ੍ਡਤ੍ਥਿਕਸ੍ਸ ਏਕਸ੍ਸ ਚੀਵਰਸ੍ਸ ਪਹੋਨਕਂ ਦਾਤਬ੍ਬਂ, ਸਪ੍ਪਿਨਵਨੀਤਾਦਿਅਤ੍ਥਿਕਸ੍ਸ ਗਿਲਾਨਸ੍ਸ ਏਕਂ ਭੇਸਜ੍ਜਂ ਨਾਲ਼ਿਮਤ੍ਤਂ ਕਤ੍ਵਾ ਤਤੋ ਤਤਿਯਕੋਟ੍ਠਾਸੋ ਦਾਤਬ੍ਬੋ. ਏਵਂ ਤੀਣਿ ਦਿਵਸਾਨਿ ਦਤ੍ਵਾ ਨਾਲ਼ਿਯਾ ਪਰਿਪੁਣ੍ਣਾਯ ਚਤੁਤ੍ਥਦਿਵਸਤੋ ਪਟ੍ਠਾਯ ਸਙ੍ਘਂ ਆਪੁਚ੍ਛਿਤ੍ਵਾ ਦਾਤਬ੍ਬਂ, ਗੁਲ਼ਪਿਣ੍ਡੇਪਿ ਏਕਦਿਵਸਂ ਤਤਿਯਭਾਗੋ ਦਾਤਬ੍ਬੋ. ਏਵਂ ਤੀਹਿ ਦਿਵਸੇਹਿ ਨਿਟ੍ਠਿਤੇ ਪਿਣ੍ਡੇ ਤਤੋ ਪਰਂ ਸਙ੍ਘਂ ਆਪੁਚ੍ਛਿਤ੍ਵਾ ਦਾਤਬ੍ਬਂ. ਸਮ੍ਮਨ੍ਨਿਤ੍ਵਾ ਠਪਿਤਯਾਗੁਭਾਜਕਾਦੀਹਿ ਚ ਭਾਜਨੀਯਟ੍ਠਾਨਂ ਆਗਤਮਨੁਸ੍ਸਾਨਂ ਅਨਾਪੁਚ੍ਛਿਤ੍ਵਾਵ ਉਪਡ੍ਢਭਾਗੋ ਦਾਤਬ੍ਬੋ. ਅਸਮ੍ਮਤੇਹਿ ਪਨ ਅਪਲੋਕੇਤ੍ਵਾ ਦਾਤਬ੍ਬੋਤਿ.

ਸਙ੍ਘਸ੍ਸ ਸਨ੍ਤਕਂ ਸਮ੍ਮਤੇਨ ਵਾ ਆਣਤ੍ਤੇਹਿ ਵਾ ਆਰਾਮਿਕਾਦੀਹਿ ਦੀਯਮਾਨਂ, ਗਿਹੀਨਞ੍ਚ ਸਨ੍ਤਕਂ ਸਾਮਿਕੇਨ ਵਾ ਆਣਤ੍ਤੇਨ ਵਾ ਦੀਯਮਾਨਂ ‘‘ਅਪਰਸ੍ਸ ਭਾਗਂ ਦੇਹੀ’’ਤਿ ਅਸਨ੍ਤਂ ਪੁਗ੍ਗਲਂ ਵਤ੍ਵਾ ਗਣ੍ਹਤੋ ਭਣ੍ਡਾਦੇਯ੍ਯਂ. ਅਞ੍ਞੇਨ ਦੀਯਮਾਨਂ ਗਣ੍ਹਨ੍ਤੋ ਭਣ੍ਡਗ੍ਘੇਨ ਕਾਰੇਤਬ੍ਬੋ. ਅਸਮ੍ਮਤੇਨ ਵਾ ਅਨਾਣਤ੍ਤੇਨ ਵਾ ਦੀਯਮਾਨੇ ‘‘ਅਪਰਮ੍ਪਿ ਭਾਗਂ ਦੇਹੀ’’ਤਿ ਵਤ੍ਵਾ ਵਾ ਕੂਟਵਸ੍ਸਾਨਿ ਗਣੇਤ੍ਵਾ ਵਾ ਗਣ੍ਹਨ੍ਤੋ ਉਦ੍ਧਾਰੇਯੇਵ ਭਣ੍ਡਗ੍ਘੇਨ ਕਾਰੇਤਬ੍ਬੋ. ਇਤਰੇਹਿ ਦੀਯਮਾਨਂ ਏਵਂ ਗਣ੍ਹਤੋ ਭਣ੍ਡਾਦੇਯ੍ਯਂ ਸਾਮਿਕੇਨ ਪਨ ‘‘ਇਮਸ੍ਸ ਦੇਹੀ’’ਤਿ ਦਾਪਿਤਂ ਵਾ ਸਯਂ ਦਿਨ੍ਨਂ ਵਾ ਸੁਦਿਨ੍ਨਨ੍ਤਿ ਅਯਂ ਸਬ੍ਬਟ੍ਠਕਥਾਵਿਨਿਚ੍ਛਯਤੋ ਸਾਰੋ.

ਪਿਣ੍ਡਾਯ ਪਵਿਟ੍ਠਸ੍ਸਪਿ ਓਦਨਪਟਿਵੀਸੋ ਅਨ੍ਤੋਉਪਚਾਰਸੀਮਾਯਂ ਠਿਤਸ੍ਸੇਵ ਗਹੇਤੁਂ ਵਟ੍ਟਤਿ. ਯਦਿ ਪਨ ਦਾਯਕਾ ‘‘ਬਹਿਉਪਚਾਰਸੀਮਟ੍ਠਾਨਮ੍ਪਿ, ਭਨ੍ਤੇ, ਗਣ੍ਹਥ, ਆਗਨ੍ਤ੍ਵਾ ਪਰਿਭੁਞ੍ਜਿਸ੍ਸਨ੍ਤੀ’’ਤਿ ਵਦਨ੍ਤਿ, ਏਵਂ ਅਨ੍ਤੋਗਾਮਟ੍ਠਾਨਮ੍ਪਿ ਗਹੇਤੁਂ ਵਟ੍ਟਤਿ.

ਪਾਲ਼ਿਂ ਅਟ੍ਠਕਥਞ੍ਚੇਵ, ਓਲੋਕੇਤ੍ਵਾ ਵਿਚਕ੍ਖਣੋ;

ਸਙ੍ਘਿਕੇ ਪਚ੍ਚਯੇ ਏਵਂ, ਅਪ੍ਪਮਤ੍ਤੋਵ ਭਾਜਯੇਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ ਸਬ੍ਬਾਕਾਰਤੋ

ਚਤੁਪਚ੍ਚਯਭਾਜਨੀਯਵਿਨਿਚ੍ਛਯਕਥਾ ਸਮਤ੍ਤਾ.