੨੭. ਉਪਜ੍ਝਾਯਾਦਿਵਤ੍ਤਵਿਨਿਚ੍ਛਯਕਥਾ

੧੮੩. ਵਤ੍ਤਨ੍ਤਿ ਏਤ੍ਥ ਪਨ ਵਤ੍ਤਂ ਨਾਮੇਤਂ ਉਪਜ੍ਝਾਯਵਤ੍ਤਂ ਆਚਰਿਯਵਤ੍ਤਂ ਆਗਨ੍ਤੁਕਵਤ੍ਤਂ ਆਵਾਸਿਕਵਤ੍ਤਂ ਗਮਿਕਵਤ੍ਤਂ ਭਤ੍ਤਗ੍ਗਵਤ੍ਤਂ ਪਿਣ੍ਡਚਾਰਿਕਵਤ੍ਤਂ ਆਰਞ੍ਞਿਕਵਤ੍ਤਂ ਸੇਨਾਸਨਵਤ੍ਤਂ ਜਨ੍ਤਾਘਰਵਤ੍ਤਂ ਵਚ੍ਚਕੁਟਿਵਤ੍ਤਨ੍ਤਿ ਬਹੁਵਿਧਂ. ਤਤ੍ਥ ਉਪਜ੍ਝਾਯਵਤ੍ਤਂ ਤਾਵ ਏਵਂ ਵੇਦਿਤਬ੍ਬਂ – ਸਦ੍ਧਿਵਿਹਾਰਿਕੇਨ ਕਾਲਸ੍ਸੇਵ ਉਟ੍ਠਾਯ ਉਪਾਹਨਾ ਓਮੁਞ੍ਚਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਪਜ੍ਝਾਯਸ੍ਸ ਦਨ੍ਤਕਟ੍ਠਂ ਦਾਤਬ੍ਬਂ, ਮੁਖੋਦਕਂ ਦਾਤਬ੍ਬਂ. ਤਤ੍ਥ ਦਨ੍ਤਕਟ੍ਠਂ ਦੇਨ੍ਤੇਨ ਮਹਨ੍ਤਂ ਮਜ੍ਝਿਮਂ ਖੁਦ੍ਦਕਨ੍ਤਿ ਤੀਣਿ ਦਨ੍ਤਕਟ੍ਠਾਨਿ ਉਪਨੇਤ੍ਵਾ ਇਤੋ ਯਂ ਤੀਣਿ ਦਿਵਸਾਨਿ ਗਣ੍ਹਾਤਿ, ਚਤੁਤ੍ਥਦਿਵਸਤੋ ਪਟ੍ਠਾਯ ਤਾਦਿਸਮੇਵ ਦਾਤਬ੍ਬਂ. ਸਚੇ ਅਨਿਯਮਂ ਕਤ੍ਵਾ ਯਂ ਵਾ ਤਂ ਵਾ ਗਣ੍ਹਾਤਿ, ਅਥ ਯਾਦਿਸਂ ਲਭਤਿ, ਤਾਦਿਸਂ ਦਾਤਬ੍ਬਂ. ਮੁਖੋਦਕਂ ਦੇਨ੍ਤੇਨਪਿ ਸੀਤਞ੍ਚ ਉਣ੍ਹਞ੍ਚ ਉਦਕਂ ਉਪਨੇਤ੍ਵਾ ਤਤੋ ਯਂ ਤੀਣਿ ਦਿਵਸਾਨਿ ਵਲ਼ਞ੍ਜੇਤਿ. ਚਤੁਤ੍ਥਦਿਵਸਤੋ ਪਟ੍ਠਾਯ ਤਾਦਿਸਮੇਵ ਮੁਖਧੋਵਨੋਦਕਂ ਦਾਤਬ੍ਬਂ. ਸਚੇ ਦੁਵਿਧਮ੍ਪਿ ਵਲ਼ਞ੍ਜੇਤਿ, ਦੁਵਿਧਮ੍ਪਿ ਉਪਨੇਤਬ੍ਬਂ. ਉਦਕਂ ਮੁਖਧੋਵਨਟ੍ਠਾਨੇ ਠਪੇਤ੍ਵਾ ਵਚ੍ਚਕੁਟਿਤੋ ਪਟ੍ਠਾਯ ਸਮ੍ਮਜ੍ਜਿਤਬ੍ਬਂ. ਥੇਰੇ ਵਚ੍ਚਕੁਟਿਗਤੇ ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ, ਏਵਂ ਪਰਿਵੇਣਂ ਅਸੁਞ੍ਞਂ ਹੋਤਿ. ਥੇਰੇ ਵਚ੍ਚਕੁਟਿਤੋ ਅਨਿਕ੍ਖਨ੍ਤੇਯੇਵ ਆਸਨਂ ਪਞ੍ਞਪੇਤਬ੍ਬਂ. ਸਰੀਰਕਿਚ੍ਚਂ ਕਤ੍ਵਾ ਆਗਨ੍ਤ੍ਵਾ ਤਸ੍ਮਿਂ ਨਿਸਿਨ੍ਨਸ੍ਸ ਸਚੇ ਯਾਗੁ ਹੋਤਿ, ਭਾਜਨਂ ਧੋਵਿਤ੍ਵਾ ਯਾਗੁ ਉਪਨਾਮੇਤਬ੍ਬਾ, ਯਾਗੁਂ ਪਿਵਿਤਸ੍ਸ ਉਦਕਂ ਦਤ੍ਵਾ ਭਾਜਨਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਪਟਿਸਾਮੇਤਬ੍ਬਂ. ਉਪਜ੍ਝਾਯਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ ਕੇਨਚਿ ਕਚਵਰੇਨ ਸਂਕਿਣ੍ਣੋ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ. ਸਚੇ ਪਨ ਅਞ੍ਞੋ ਕਚਵਰੋ ਨਤ੍ਥਿ, ਉਦਕਫੁਸਿਤਾਨੇਵ ਹੋਨ੍ਤਿ, ਹਤ੍ਥੇਨ ਪਮਜ੍ਜਿਤਬ੍ਬੋ.

ਸਚੇ ਉਪਜ੍ਝਾਯੋ ਗਾਮਂ ਪਵਿਸਿਤੁਕਾਮੋ ਹੋਤਿ, ਨਿਵਾਸਨਂ ਦਾਤਬ੍ਬਂ, ਪਟਿਨਿਵਾਸਨਂ ਪਟਿਗ੍ਗਹੇਤਬ੍ਬਂ, ਕਾਯਬਨ੍ਧਨਂ ਦਾਤਬ੍ਬਂ, ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਦਾਤਬ੍ਬਾ, ਧੋਵਿਤ੍ਵਾ ਪਤ੍ਤੋ ਸਉਦਕੋ ਦਾਤਬ੍ਬੋ. ਸਚੇ ਉਪਜ੍ਝਾਯੋ ਪਚ੍ਛਾਸਮਣਂ ਆਕਙ੍ਖਤਿ, ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਉਪਜ੍ਝਾਯਸ੍ਸ ਪਚ੍ਛਾਸਮਣੇਨ ਹੋਤਬ੍ਬਂ, ਨਾਤਿਦੂਰੇ ਗਨ੍ਤਬ੍ਬਂ, ਨਾਚ੍ਚਾਸਨ੍ਨੇ ਗਨ੍ਤਬ੍ਬਂ. ਏਤ੍ਥ ਪਨ ਸਚੇ ਉਪਜ੍ਝਾਯਂ ਨਿਵਤ੍ਤਿਤ੍ਵਾ ਓਲੋਕੇਨ੍ਤਂ ਏਕੇਨ ਵਾ ਦ੍ਵੀਹਿ ਵਾ ਪਦਵੀਤਿਹਾਰੇਹਿ ਸਮ੍ਪਾਪੁਣਾਤਿ, ਏਤ੍ਤਾਵਤਾ ਨਾਤਿਦੂਰੇ ਨਾਚ੍ਚਾਸਨ੍ਨੇ ਗਤੋ ਹੋਤੀਤਿ ਵੇਦਿਤਬ੍ਬਂ. ਸਚੇ ਉਪਜ੍ਝਾਯੇਨ ਭਿਕ੍ਖਾਚਾਰੇ ਯਾਗੁਯਾ ਵਾ ਭਤ੍ਤੇ ਵਾ ਲਦ੍ਧੇ ਪਤ੍ਤੋ ਉਣ੍ਹੋ ਵਾ ਭਾਰਿਕੋ ਵਾ ਹੋਤਿ, ਅਤ੍ਤਨੋ ਪਤ੍ਤਂ ਤਸ੍ਸ ਦਤ੍ਵਾ ਸੋ ਪਤ੍ਤੋ ਗਹੇਤਬ੍ਬੋ, ਨ ਉਪਜ੍ਝਾਯਸ੍ਸ ਭਣਮਾਨਸ੍ਸ ਅਨ੍ਤਰਨ੍ਤਰਾ ਕਥਾ ਓਪਾਤੇਤਬ੍ਬਾ. ਇਤੋ ਪਟ੍ਠਾਯ ਪਨ ਯਤ੍ਥ ਯਤ੍ਥ ਨ-ਕਾਰੇਨ ਪਟਿਸੇਧੋ ਕਰੀਯਤਿ, ਸਬ੍ਬਤ੍ਥ ਦੁਕ੍ਕਟਾਪਤ੍ਤਿ ਵੇਦਿਤਬ੍ਬਾ. ਉਪਜ੍ਝਾਯੋ ਆਪਤ੍ਤਿਸਾਮਨ੍ਤਾ ਭਣਮਾਨੋ ਨਿਵਾਰੇਤਬ੍ਬੋ. ਨਿਵਾਰੇਨ੍ਤੇਨ ਚ ‘‘ਭਨ੍ਤੇ, ਈਦਿਸਂ ਨਾਮ ਵਤ੍ਤੁਂ ਵਟ੍ਟਤਿ, ਆਪਤ੍ਤਿ ਨ ਹੋਤੀ’’ਤਿ ਏਵਂ ਪੁਚ੍ਛਨ੍ਤੇਨ ਵਿਯ ਵਾਰੇਤਬ੍ਬੋ, ‘‘ਵਾਰੇਸ੍ਸਾਮੀ’’ਤਿ ਪਨ ਕਤ੍ਵਾ ‘‘ਮਹਲ੍ਲਕ, ਮਾ ਏਵਂ ਭਣਾ’’ਤਿ ਨ ਵਤ੍ਤਬ੍ਬੋ.

ਸਚੇ ਆਸਨ੍ਨੇ ਗਾਮੋ ਹੋਤਿ, ਵਿਹਾਰੇ ਵਾ ਗਿਲਾਨੋ ਭਿਕ੍ਖੁ ਹੋਤਿ, ਗਾਮਤੋ ਪਠਮਤਰਂ ਆਗਨ੍ਤਬ੍ਬਂ. ਸਚੇ ਦੂਰੇ ਗਾਮੋ ਹੋਤਿ, ਉਪਜ੍ਝਾਯੇਨ ਸਦ੍ਧਿਂ ਆਗਚ੍ਛਨ੍ਤੋਪਿ ਨਤ੍ਥਿ, ਤੇਨੇਵ ਸਦ੍ਧਿਂ ਗਾਮਤੋ ਨਿਕ੍ਖਮਿਤ੍ਵਾ ਚੀਵਰੇਨ ਪਤ੍ਤਂ ਵੇਠੇਤ੍ਵਾ ਅਨ੍ਤਰਾਮਗ੍ਗਤੋ ਪਠਮਤਰਂ ਆਗਨ੍ਤਬ੍ਬਂ. ਏਵਂ ਪਠਮਤਰਂ ਆਗਤੇਨ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਤਬ੍ਬਂ, ਪਟਿਨਿਵਾਸਨਂ ਦਾਤਬ੍ਬਂ, ਨਿਵਾਸਨਂ ਪਟਿਗ੍ਗਹੇਤਬ੍ਬਂ. ਸਚੇ ਚੀਵਰਂ ਸੇਦਗ੍ਗਹਿਤਂ ਹੋਤਿ, ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬਂ, ਨ ਚ ਉਣ੍ਹੇ ਚੀਵਰਂ ਨਿਦਹਿਤਬ੍ਬਂ, ਚੀਵਰਂ ਸਙ੍ਘਰਿਤਬ੍ਬਂ. ਚੀਵਰਂ ਸਙ੍ਘਰਨ੍ਤੇਨ ਚ ਚਤੁਰਙ੍ਗੁਲਂ ਕਣ੍ਣਂ ਉਸ੍ਸਾਰੇਤ੍ਵਾ ਚੀਵਰਂ ਸਙ੍ਘਰਿਤਬ੍ਬਂ. ਕਿਂਕਾਰਣਾ? ਮਾ ਮਜ੍ਝੇ ਭਙ੍ਗੋ ਅਹੋਸੀਤਿ. ਸਮਂ ਕਤ੍ਵਾ ਸਙ੍ਘਰਿਤਸ੍ਸ ਹਿ ਮਜ੍ਝੇ ਭਙ੍ਗੋ ਹੋਤਿ, ਤਤੋ ਨਿਚ੍ਚਂ ਭਿਜ੍ਜਮਾਨਂ ਦੁਬ੍ਬਲਂ ਹੋਤਿ, ਤਂ ਨਿਵਾਰਣਤ੍ਥਮੇਤਂ ਵੁਤ੍ਤਂ. ਤਸ੍ਮਾ ਯਥਾ ਅਜ੍ਜ ਭਙ੍ਗਟ੍ਠਾਨੇਯੇਵ ਸ੍ਵੇ ਨ ਭਿਜ੍ਜਿਸ੍ਸਤਿ, ਤਥਾ ਦਿਵਸੇ ਦਿਵਸੇ ਚਤੁਰਙ੍ਗੁਲਂ ਉਸ੍ਸਾਰੇਤ੍ਵਾ ਸਙ੍ਘਰਿਤਬ੍ਬਂ, ਓਭੋਗੇ ਕਾਯਬਨ੍ਧਨਂ ਕਾਤਬ੍ਬਂ.

ਸਚੇ ਪਿਣ੍ਡਪਾਤੋ ਹੋਤਿ, ਉਪਜ੍ਝਾਯੋ ਚ ਭੁਞ੍ਜਿਤੁਕਾਮੋ ਹੋਤਿ, ਉਦਕਂ ਦਤ੍ਵਾ ਪਿਣ੍ਡਪਾਤੋ ਉਪਨਾਮੇਤਬ੍ਬੋ, ਉਪਜ੍ਝਾਯੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਪੁਚ੍ਛਨ੍ਤੇਨ ਚ ਤਿਕ੍ਖਤ੍ਤੁਂ ‘‘ਪਾਨੀਯਂ, ਭਨ੍ਤੇ, ਆਹਰੀਯਤੂ’’ਤਿ ਪਾਨੀਯੇਨ ਪੁਚ੍ਛਿਤਬ੍ਬੋ. ਸਚੇ ਕਾਲੋ ਅਤ੍ਥਿ, ਉਪਜ੍ਝਾਯੇ ਭੁਤ੍ਤੇ ਸਯਂ ਭੁਞ੍ਜਿਤਬ੍ਬਂ. ਸਚੇ ਉਪਕਟ੍ਠੋ ਕਾਲੋ, ਪਾਨੀਯਂ ਉਪਜ੍ਝਾਯਸ੍ਸ ਸਨ੍ਤਿਕੇ ਠਪੇਤ੍ਵਾ ਸਯਮ੍ਪਿ ਭੁਞ੍ਜਿਤਬ੍ਬਂ. ਭੁਤ੍ਤਾਵਿਸ੍ਸ ਉਦਕਂ ਦਤ੍ਵਾ ਪਤ੍ਤਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਵੋਦਕਂ ਕਤ੍ਵਾ ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬੋ, ਨ ਚ ਉਣ੍ਹੇ ਪਤ੍ਤੋ ਨਿਦਹਿਤਬ੍ਬੋ, ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ, ਨ ਚ ਤਟ੍ਟਿਕਚਮ੍ਮਖਣ੍ਡਾਦੀਹਿ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਸਚੇ ਪਨ ਕਾਲ਼ਵਣ੍ਣਕਤਾ ਵਾ ਸੁਧਾਬਦ੍ਧਾ ਵਾ ਭੂਮਿ ਹੋਤਿ ਨਿਰਜਮਤ੍ਤਿਕਾ, ਤਥਾਰੂਪਾਯ ਭੂਮਿਯਾ ਠਪੇਤੁਂ ਵਟ੍ਟਤਿ, ਧੋਤਵਾਲਿਕਾਯਪਿ ਠਪੇਤੁਂ ਵਟ੍ਟਤਿ, ਪਂਸੁਰਜਸਕ੍ਖਰਾਦੀਸੁ ਨ ਵਟ੍ਟਤਿ. ਤਤ੍ਰ ਪਨ ਪਣ੍ਣਂ ਵਾ ਆਧਾਰਕਂ ਵਾ ਠਪੇਤ੍ਵਾ ਤਤ੍ਰ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ. ਇਦਞ੍ਚ ਚੀਵਰਵਂਸਾਦੀਨਂ ਹੇਟ੍ਠਾ ਹਤ੍ਥਂ ਪਵੇਸੇਤ੍ਵਾ ਅਭਿਮੁਖੇਨ ਹਤ੍ਥੇਨ ਸਣਿਕਂ ਨਿਕ੍ਖਿਪਨਤ੍ਥਂ ਵੁਤ੍ਤਂ. ਅਨ੍ਤੇ ਪਨ ਗਹੇਤ੍ਵਾ ਭੋਗੇਨ ਚੀਵਰਵਂਸਾਦੀਨਂ ਉਪਰਿ ਖਿਪਨ੍ਤਸ੍ਸ ਭਿਤ੍ਤਿਯਂ ਭੋਗੋ ਪਟਿਹਞ੍ਞਤਿ, ਤਸ੍ਮਾ ਤਥਾ ਨ ਕਾਤਬ੍ਬਂ. ਉਪਜ੍ਝਾਯਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

ਸਚੇ ਉਪਜ੍ਝਾਯੋ ਨਹਾਯਿਤੁਕਾਮੋ ਹੋਤਿ, ਨਹਾਨਂ ਪਟਿਯਾਦੇਤਬ੍ਬਂ. ਸਚੇ ਸੀਤੇਨ ਅਤ੍ਥੋ ਹੋਤਿ, ਸੀਤਂ ਪਟਿਯਾਦੇਤਬ੍ਬਂ. ਸਚੇ ਉਣ੍ਹੇਨ ਅਤ੍ਥੋ ਹੋਤਿ, ਉਣ੍ਹਂ ਪਟਿਯਾਦੇਤਬ੍ਬਂ.

ਸਚੇ ਉਪਜ੍ਝਾਯੋ ਜਨ੍ਤਾਘਰਂ ਪਵਿਸਿਤੁਕਾਮੋ ਹੋਤਿ, ਚੁਣ੍ਣਂ ਸਨ੍ਨੇਤਬ੍ਬਂ, ਮਤ੍ਤਿਕਾ ਤੇਮੇਤਬ੍ਬਾ. ਜਨ੍ਤਾਘਰਪੀਠਂ ਆਦਾਯ ਉਪਜ੍ਝਾਯਸ੍ਸ ਪਿਟ੍ਠਿਤੋ ਪਿਟ੍ਠਿਤੋ ਗਨ੍ਤ੍ਵਾ ਜਨ੍ਤਾਘਰਪੀਠਂ ਦਤ੍ਵਾ ਚੀਵਰਂ ਪਟਿਗ੍ਗਹੇਤ੍ਵਾ ਏਕਮਨ੍ਤੇ ਨਿਦ੍ਧੂਮਟ੍ਠਾਨੇ ਠਪੇਤਬ੍ਬਂ, ਚੁਣ੍ਣਂ ਦਾਤਬ੍ਬਂ, ਮਤ੍ਤਿਕਾ ਦਾਤਬ੍ਬਾ. ਸਚੇ ਉਸ੍ਸਹਤਿ, ਜਨ੍ਤਾਘਰਂ ਪਵਿਸਿਤਬ੍ਬਂ, ਪਵਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍ਵਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਂ ਪਵਿਸਿਤਬ੍ਬਂ. ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ, ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ, ਜਨ੍ਤਾਘਰੇ ਉਪਜ੍ਝਾਯਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਜਨ੍ਤਾਘਰੇ ਪਰਿਕਮ੍ਮਂ ਨਾਮ ਅਙ੍ਗਾਰਮਤ੍ਤਿਕਾਉਣ੍ਹੋਦਕਦਾਨਾਦਿਕਂ ਸਬ੍ਬਕਿਚ੍ਚਂ. ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਾ ਨਿਕ੍ਖਮਿਤਬ੍ਬਂ.

ਉਦਕੇਪਿ ਉਪਜ੍ਝਾਯਸ੍ਸ ਅਙ੍ਗਪਚ੍ਚਙ੍ਗਘਂਸਨਾਦਿਕਂ ਪਰਿਕਮ੍ਮਂ ਕਾਤਬ੍ਬਂ, ਨਹਾਤੇਨ ਪਠਮਤਰਂ ਉਤ੍ਤਰਿਤ੍ਵਾ ਅਤ੍ਤਨੋ ਗਤ੍ਤਂ ਵੋਦਕਂ ਕਤ੍ਵਾ ਨਿਵਾਸੇਤ੍ਵਾ ਉਪਜ੍ਝਾਯਸ੍ਸ ਗਤ੍ਤਤੋ ਉਦਕਂ ਪਮਜ੍ਜਿਤਬ੍ਬਂ, ਨਿਵਾਸਨਂ ਦਾਤਬ੍ਬਂ, ਸਙ੍ਘਾਟਿ ਦਾਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਉਪਜ੍ਝਾਯੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਜਨ੍ਤਾਘਰੇ ਹਿ ਉਣ੍ਹਸਨ੍ਤਾਪੇਨ ਪਿਪਾਸਾ ਹੋਤਿ. ਸਚੇ ਉਦ੍ਦਿਸਾਪੇਤੁਕਾਮੋ ਹੋਤਿ, ਉਦ੍ਦਿਸਿਤਬ੍ਬੋ. ਸਚੇ ਪਰਿਪੁਚ੍ਛਿਤੁਕਾਮੋ ਹੋਤਿ, ਪਰਿਪੁਚ੍ਛਿਤਬ੍ਬੋ.

ਯਸ੍ਮਿਂ ਵਿਹਾਰੇ ਉਪਜ੍ਝਾਯੋ ਵਿਹਰਤਿ, ਸਚੇ ਸੋ ਵਿਹਾਰੋ ਉਕ੍ਲਾਪੋ ਹੋਤਿ, ਸਚੇ ਉਸ੍ਸਹਤਿ, ਕੇਨਚਿ ਗੇਲਞ੍ਞੇਨ ਅਨਭਿਭੂਤੋ ਹੋਤਿ, ਸੋਧੇਤਬ੍ਬੋ. ਅਗਿਲਾਨੇਨ ਹਿ ਸਦ੍ਧਿਵਿਹਾਰਿਕੇਨ ਸਟ੍ਠਿਵਸ੍ਸੇਨਪਿ ਸਬ੍ਬਂ ਉਪਜ੍ਝਾਯਵਤ੍ਤਂ ਕਾਤਬ੍ਬਂ, ਅਨਾਦਰੇਨ ਅਕਰੋਨ੍ਤਸ੍ਸ ਵਤ੍ਤਭੇਦੇ ਦੁਕ੍ਕਟਂ, ਨ-ਕਾਰਪਟਿਸਂਯੁਤ੍ਤੇਸੁ ਪਨ ਪਦੇਸੁ ਗਿਲਾਨਸ੍ਸਪਿ ਪਟਿਕ੍ਖਿਤ੍ਤਕਿਰਿਯਂ ਕਰੋਨ੍ਤਸ੍ਸ ਦੁਕ੍ਕਟਮੇਵ. ਵਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀਵਰਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਨਿਸੀਦਨਪਚ੍ਚਤ੍ਥਰਣਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਭਿਸਿਬਿਮ੍ਬੋਹਨਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਮਞ੍ਚੋ ਨੀਚਂ ਕਤ੍ਵਾ ਸਾਧੁਕਂ ਅਪਟਿਘਂਸਨ੍ਤੇਨ ਅਸਙ੍ਘਟ੍ਟੇਨ੍ਤੇਨ ਕਵਾਟਪੀਠਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ, ਪੀਠਂ ਨੀਚਂ ਕਤ੍ਵਾ ਸਾਧੁਕਂ ਅਪਟਿਘਂਸਨ੍ਤੇਨ ਅਸਙ੍ਘਟ੍ਟੇਨ੍ਤੇਨ ਕਵਾਟਪੀਠਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਮਞ੍ਚਪਟਿਪਾਦਕਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਾ, ਖੇਲ਼ਮਲ੍ਲਕੋ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ, ਅਪਸ੍ਸੇਨਫਲਕਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਭੂਮਤ੍ਥਰਣਂ ਯਥਾਪਞ੍ਞਤ੍ਤਂ ਸਲ੍ਲਕ੍ਖੇਤ੍ਵਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਸਚੇ ਵਿਹਾਰੇ ਸਨ੍ਤਾਨਕਂ ਹੋਤਿ, ਉਲ੍ਲੋਕਾ ਪਠਮਂ ਓਹਾਰੇਤਬ੍ਬਂ, ਆਲੋਕਸਨ੍ਧਿਕਣ੍ਣਭਾਗਾ ਪਮਜ੍ਜਿਤਬ੍ਬਾ. ਸਚੇ ਗੇਰੁਕਪਰਿਕਮ੍ਮਕਤਾ ਭਿਤ੍ਤਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਕਾਲ਼ਵਣ੍ਣਕਤਾ ਭੂਮਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਅਕਤਾ ਹੋਤਿ ਭੂਮਿ, ਉਦਕੇਨ ਪਰਿਪ੍ਫੋਸਿਤ੍ਵਾ ਪਰਿਪ੍ਫੋਸਿਤ੍ਵਾ ਸਮ੍ਮਜ੍ਜਿਤਬ੍ਬਾ ‘‘ਮਾ ਵਿਹਾਰੋ ਰਜੇਨ ਉਹਞ੍ਞੀ’’ਤਿ, ਸਙ੍ਕਾਰਂ ਵਿਚਿਨਿਤ੍ਵਾ ਏਕਮਨ੍ਤਂ ਛਡ੍ਡੇਤਬ੍ਬਂ.

ਭੂਮਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਭਿਹਰਿਤ੍ਵਾ ਯਥਾ ਪਠਮਂ ਪਞ੍ਞਤ੍ਤਂ ਅਹੋਸਿ, ਤਥੇਵ ਪਞ੍ਞਪੇਤਬ੍ਬਂ. ਏਤਦਤ੍ਥਮੇਵ ਹਿ ‘‘ਯਥਾਪਞ੍ਞਤ੍ਤਂ ਸਲ੍ਲਕ੍ਖੇਤ੍ਵਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬ’’ਨ੍ਤਿ ਵੁਤ੍ਤਂ. ਸਚੇ ਪਨ ਪਠਮਂ ਅਜਾਨਨ੍ਤੇਨ ਕੇਨਚਿ ਪਞ੍ਞਤ੍ਤਂ ਅਹੋਸਿ, ਸਮਨ੍ਤਤੋ ਭਿਤ੍ਤਿਂ ਦ੍ਵਙ੍ਗੁਲਮਤ੍ਤੇਨ ਵਾ ਤਿਵਙ੍ਗੁਲਮਤ੍ਤੇਨ ਵਾ ਮੋਚੇਤ੍ਵਾ ਪਞ੍ਞਪੇਤਬ੍ਬਂ. ਇਦਞ੍ਹੇਤ੍ਥ ਪਞ੍ਞਾਪਨਵਤ੍ਤਂ – ਸਚੇ ਕਟਸਾਰਕੋ ਹੋਤਿ ਅਤਿਮਹਨ੍ਤੋ ਚ, ਛਿਨ੍ਦਿਤ੍ਵਾ ਕੋਟਿਂ ਨਿਵਤ੍ਤੇਤ੍ਵਾ ਬਨ੍ਧਿਤ੍ਵਾ ਪਞ੍ਞਪੇਤਬ੍ਬੋ. ਸਚੇ ਕੋਟਿਂ ਨਿਵਤ੍ਤੇਤ੍ਵਾ ਬਨ੍ਧਿਤੁਂ ਨ ਜਾਨਾਤਿ, ਨ ਛਿਨ੍ਦਿਤਬ੍ਬੋ. ਮਞ੍ਚਪਟਿਪਾਦਕਾ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਯਥਾਠਾਨੇ ਠਪੇਤਬ੍ਬਾ, ਮਞ੍ਚੋ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪਟਿਘਂਸਨ੍ਤੇਨ ਅਸਙ੍ਘਟ੍ਟੇਨ੍ਤੇਨ ਕਵਾਟਪੀਠਂ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬੋ, ਪੀਠਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪਟਿਘਂਸਨ੍ਤੇਨ ਅਸਙ੍ਘਟ੍ਟੇਨ੍ਤੇਨ ਕਵਾਟਪੀਠਂ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ, ਭਿਸਿਬਿਮ੍ਬੋਹਨਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ, ਨਿਸੀਦਨਪਚ੍ਚਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ, ਖੇਲ਼ਮਲ੍ਲਕੋ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬੋ, ਅਪਸ੍ਸੇਨਫਲਕਂ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਂ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ, ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ, ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ, ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ.

ਸਚੇ ਪੁਰਤ੍ਥਿਮਾ ਸਰਜਾ ਵਾਤਾ ਵਾਯਨ੍ਤਿ, ਪੁਰਤ੍ਥਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਪਚ੍ਛਿਮਾ, ਉਤ੍ਤਰਾ, ਦਕ੍ਖਿਣਾ ਸਰਜਾ ਵਾਤਾ ਵਾਯਨ੍ਤਿ, ਦਕ੍ਖਿਣਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਸੀਤਕਾਲੋ ਹੋਤਿ, ਦਿਵਾ ਵਾਤਪਾਨਾ ਵਿਵਰਿਤਬ੍ਬਾ, ਰਤ੍ਤਿਂ ਥਕੇਤਬ੍ਬਾ. ਸਚੇ ਉਣ੍ਹਕਾਲੋ ਹੋਤਿ, ਦਿਵਾ ਥਕੇਤਬ੍ਬਾ, ਰਤ੍ਤਿਂ ਵਿਵਰਿਤਬ੍ਬਾ.

ਸਚੇ ਉਕ੍ਲਾਪਂ ਹੋਤਿ, ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ, ਕੋਟ੍ਠਕੋ ਸਮ੍ਮਜ੍ਜਿਤਬ੍ਬੋ, ਉਪਟ੍ਠਾਨਸਾਲਾ ਸਮ੍ਮਜ੍ਜਿਤਬ੍ਬਾ, ਅਗ੍ਗਿਸਾਲਾ ਸਮ੍ਮਜ੍ਜਿਤਬ੍ਬਾ, ਵਚ੍ਚਕੁਟਿ ਸਮ੍ਮਜ੍ਜਿਤਬ੍ਬਾ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਪੇਤਬ੍ਬਂ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ.

ਸਚੇ ਉਪਜ੍ਝਾਯਸ੍ਸ ਅਨਭਿਰਤਿ ਉਪ੍ਪਨ੍ਨਾ ਹੋਤਿ, ਸਦ੍ਧਿਵਿਹਾਰਿਕੇਨ ਅਞ੍ਞਤ੍ਥ ਨੇਤਬ੍ਬੋ, ਅਞ੍ਞੋ ਵਾ ਭਿਕ੍ਖੁ ਵਤ੍ਤਬ੍ਬੋ ‘‘ਥੇਰਂ ਗਹੇਤ੍ਵਾ ਅਞ੍ਞਤ੍ਥ ਗਚ੍ਛਾ’’ਤਿ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਉਪਜ੍ਝਾਯਸ੍ਸ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ, ਸਦ੍ਧਿਵਿਹਾਰਿਕੇਨ ਵਿਨੋਦੇਤਬ੍ਬਂ, ਅਞ੍ਞੇਨ ਵਾ ਵਿਨੋਦਾਪੇਤਬ੍ਬਂ ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਉਪਜ੍ਝਾਯਸ੍ਸ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ, ਸਦ੍ਧਿਵਿਹਾਰਿਕੇਨ ਵਿਸ੍ਸਜ੍ਜੇਤਬ੍ਬਂ, ਅਞ੍ਞੋ ਵਾ ਵਤ੍ਤਬ੍ਬੋ ‘‘ਥੇਰਂ ਦਿਟ੍ਠਿਗਤਂ ਵਿਸ੍ਸਜ੍ਜਾਪੇਹੀ’’ਤਿ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਉਪਜ੍ਝਾਯੋ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ ਪਰਿਵਾਸਾਰਹੋ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ, ਪਰਿਵਾਸਦਾਨਤ੍ਥਂ ਸੋ ਸੋ ਭਿਕ੍ਖੁ ਉਪਸਙ੍ਕਮਿਤ੍ਵਾ ਯਾਚਿਤਬ੍ਬੋ. ਸਚੇ ਅਤ੍ਤਨਾ ਪਟਿਬਲੋ ਹੋਤਿ, ਅਤ੍ਤਨਾਵ ਦਾਤਬ੍ਬੋ. ਨੋ ਚੇ ਪਟਿਬਲੋ ਹੋਤਿ, ਅਞ੍ਞੇਨ ਦਾਪੇਤਬ੍ਬੋ. ਸਚੇ ਉਪਜ੍ਝਾਯੋ ਮੂਲਾਯਪਟਿਕਸ੍ਸਨਾਰਹੋ ਹੋਤਿ ਮਾਨਤ੍ਤਾਰਹੋ ਅਬ੍ਭਾਨਾਰਹੋ ਵਾ, ਵੁਤ੍ਤਨਯੇਨੇਵ ਉਸ੍ਸੁਕ੍ਕਂ ਕਾਤਬ੍ਬਂ. ਸਚੇ ਸਙ੍ਘੋ ਉਪਜ੍ਝਾਯਸ੍ਸ ਕਮ੍ਮਂ ਕਤ੍ਤੁਕਾਮੋ ਹੋਤਿ ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ ‘‘ਕੇਨ ਨੁ ਖੋ ਉਪਾਯੇਨ ਸਙ੍ਘੋ ਉਪਜ੍ਝਾਯਸ੍ਸ ਕਮ੍ਮਂ ਨ ਕਰੇਯ੍ਯ, ਲਹੁਕਾਯ ਵਾ ਪਰਿਣਾਮੇਯ੍ਯਾ’’ਤਿ. ਸਦ੍ਧਿਵਿਹਾਰਿਕੇਨ ਹਿ ‘‘ਉਪਜ੍ਝਾਯਸ੍ਸ ਉਕ੍ਖੇਪਨੀਯਕਮ੍ਮਂ ਕਤ੍ਤੁਕਾਮੋ ਸਙ੍ਘੋ’’ਤਿ ਞਤ੍ਵਾ ਏਕਮੇਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ‘‘ਮਾ, ਭਨ੍ਤੇ, ਅਮ੍ਹਾਕਂ ਉਪਜ੍ਝਾਯਸ੍ਸ ਕਮ੍ਮਂ ਕਰਿਤ੍ਥਾ’’ਤਿ ਯਾਚਿਤਬ੍ਬਾ. ਸਚੇ ਕਰੋਨ੍ਤਿਯੇਵ, ‘‘ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਲਹੁਕਕਮ੍ਮਂ ਕਰੋਥਾ’’ਤਿ ਯਾਚਿਤਬ੍ਬਾ. ਸਚੇ ਕਰੋਨ੍ਤਿਯੇਵ, ਅਥ ਉਪਜ੍ਝਾਯੋ ‘‘ਸਮ੍ਮਾ ਵਤ੍ਤਥ, ਭਨ੍ਤੇ’’ਤਿ ਯਾਚਿਤਬ੍ਬੋ. ਇਤਿ ਤਂ ਸਮ੍ਮਾ ਵਤ੍ਤਾਪੇਤ੍ਵਾ ‘‘ਪਟਿਪ੍ਪਸ੍ਸਮ੍ਭੇਥ, ਭਨ੍ਤੇ, ਕਮ੍ਮ’’ਨ੍ਤਿ ਭਿਕ੍ਖੂ ਯਾਚਿਤਬ੍ਬਾ.

ਸਚੇ ਉਪਜ੍ਝਾਯਸ੍ਸ ਚੀਵਰਂ ਧੋਵਿਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਧੋਵਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ ‘‘ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਚੀਵਰਂ ਧੋਵਿਯੇਥਾ’’ਤਿ. ਸਚੇ ਉਪਜ੍ਝਾਯਸ੍ਸ ਚੀਵਰਂ ਕਾਤਬ੍ਬਂ ਹੋਤਿ, ਰਜਨਂ ਵਾ ਪਚਿਤਬ੍ਬਂ, ਚੀਵਰਂ ਵਾ ਰਜੇਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਸਬ੍ਬਂ ਕਾਤਬ੍ਬਂ, ਉਸ੍ਸਕ੍ਕਂ ਵਾ ਕਾਤਬ੍ਬਂ ‘‘ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਚੀਵਰਂ ਰਜਿਯੇਥਾ’’ਤਿ. ਚੀਵਰਂ ਰਜਨ੍ਤੇਨ ਸਾਧੁਕਂ ਸਂਪਰਿਵਤ੍ਤੇਤ੍ਵਾ ਰਜੇਤਬ੍ਬਂ, ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤਬ੍ਬਂ.

ਨ ਉਪਜ੍ਝਾਯਂ ਅਨਾਪੁਚ੍ਛਾ ਏਕਚ੍ਚਸ੍ਸ ਪਤ੍ਤੋ ਦਾਤਬ੍ਬੋ, ਨ ਏਕਚ੍ਚਸ੍ਸ ਪਤ੍ਤੋ ਪਟਿਗ੍ਗਹੇਤਬ੍ਬੋ, ਨ ਏਕਚ੍ਚਸ੍ਸ ਚੀਵਰਂ ਦਾਤਬ੍ਬਂ, ਨ ਏਕਚ੍ਚਸ੍ਸ ਚੀਵਰਂ ਪਟਿਗ੍ਗਹੇਤਬ੍ਬਂ, ਨ ਏਕਚ੍ਚਸ੍ਸ ਪਰਿਕ੍ਖਾਰੋ ਦਾਤਬ੍ਬੋ, ਨ ਏਕਚ੍ਚਸ੍ਸ ਪਰਿਕ੍ਖਾਰੋ ਪਟਿਗ੍ਗਹੇਤਬ੍ਬੋ, ਨ ਏਕਚ੍ਚਸ੍ਸ ਕੇਸਾ ਛੇਦੇਤਬ੍ਬਾ, ਨ ਏਕਚ੍ਚੇਨ ਕੇਸਾ ਛੇਦਾਪੇਤਬ੍ਬਾ, ਨ ਏਕਚ੍ਚਸ੍ਸ ਪਰਿਕਮ੍ਮਂ ਕਾਤਬ੍ਬਂ, ਨ ਏਕਚ੍ਚੇਨ ਪਰਿਕਮ੍ਮਂ ਕਾਰਾਪੇਤਬ੍ਬਂ, ਨ ਏਕਚ੍ਚਸ੍ਸ ਵੇਯ੍ਯਾਵਚ੍ਚੋ ਕਾਤਬ੍ਬੋ, ਨ ਏਕਚ੍ਚੇਨ ਵੇਯ੍ਯਾਵਚ੍ਚੋ ਕਾਰਾਪੇਤਬ੍ਬੋ, ਨ ਏਕਚ੍ਚਸ੍ਸ ਪਚ੍ਛਾਸਮਣੇਨ ਹੋਤਬ੍ਬਂ, ਨ ਏਕਚ੍ਚੋ ਪਚ੍ਛਾਸਮਣੋ ਆਦਾਤਬ੍ਬੋ, ਨ ਏਕਚ੍ਚਸ੍ਸ ਪਿਣ੍ਡਪਾਤੋ ਨੀਹਰਿਤਬ੍ਬੋ, ਨ ਏਕਚ੍ਚੇਨ ਪਿਣ੍ਡਪਾਤੋ ਨੀਹਰਾਪੇਤਬ੍ਬੋ, ਨ ਉਪਜ੍ਝਾਯਂ ਅਨਾਪੁਚ੍ਛਾ ਗਾਮੋ ਪਵਿਸਿਤਬ੍ਬੋ, ਪਿਣ੍ਡਾਯ ਵਾ ਅਞ੍ਞੇਨ ਵਾ ਕਰਣੀਯੇਨ ਪਵਿਸਿਤੁਕਾਮੇਨ ਆਪੁਚ੍ਛਿਤ੍ਵਾਵ ਪਵਿਸਿਤਬ੍ਬੋ. ਸਚੇ ਉਪਜ੍ਝਾਯੋ ਕਾਲਸ੍ਸੇਵ ਵੁਟ੍ਠਾਯ ਦੂਰਂ ਭਿਕ੍ਖਾਚਾਰਂ ਗਨ੍ਤੁਕਾਮੋ ਹੋਤਿ, ‘‘ਦਹਰਾ ਪਿਣ੍ਡਾਯ ਪਵਿਸਨ੍ਤੂ’’ਤਿ ਵਤ੍ਵਾ ਗਨ੍ਤਬ੍ਬਂ. ਅਵਤ੍ਵਾ ਗਤੇ ਪਰਿਵੇਣਂ ਗਨ੍ਤ੍ਵਾ ਉਪਜ੍ਝਾਯਂ ਅਪਸ੍ਸਨ੍ਤੇਨ ਗਾਮਂ ਪਵਿਸਿਤੁਂ ਵਟ੍ਟਤਿ. ਸਚੇ ਗਾਮਂ ਪਵਿਸਨ੍ਤੋਪਿ ਪਸ੍ਸਤਿ, ਦਿਟ੍ਠਟ੍ਠਾਨਤੋ ਪਟ੍ਠਾਯ ਆਪੁਚ੍ਛਿਤੁਂਯੇਵ ਵਟ੍ਟਤਿ. ਨ ਉਪਜ੍ਝਾਯਂ ਅਨਾਪੁਚ੍ਛਾ ਵਾਸਤ੍ਥਾਯ ਵਾ ਅਸੁਭਦਸ੍ਸਨਤ੍ਥਾਯ ਵਾ ਸੁਸਾਨਂ ਗਨ੍ਤਬ੍ਬਂ, ਨ ਦਿਸਾ ਪਕ੍ਕਮਿਤਬ੍ਬਾ, ਪਕ੍ਕਮਿਤੁਕਾਮੇਨ ਪਨ ਕਮ੍ਮਂ ਆਚਿਕ੍ਖਿਤ੍ਵਾ ਯਾਵਤਤਿਯਂ ਯਾਚਿਤਬ੍ਬੋ. ਸਚੇ ਅਨੁਜਾਨਾਤਿ, ਸਾਧੁ, ਨੋ ਚੇ ਅਨੁਜਾਨਾਤਿ, ਤਂ ਨਿਸ੍ਸਾਯ ਵਸਤੋ ਚਸ੍ਸ ਉਦ੍ਦੇਸੋ ਵਾ ਪਰਿਪੁਚ੍ਛਾ ਵਾ ਕਮ੍ਮਟ੍ਠਾਨਂ ਵਾ ਨ ਸਮ੍ਪਜ੍ਜਤਿ, ਉਪਜ੍ਝਾਯੋ ਬਾਲੋ ਹੋਤਿ ਅਬ੍ਯਤ੍ਤੋ, ਕੇਵਲਂ ਅਤ੍ਤਨੋ ਸਨ੍ਤਿਕੇ ਵਸਾਪੇਤੁਕਾਮਤਾਯ ਏਵ ਗਨ੍ਤੁਂ ਨ ਦੇਤਿ, ਏਵਰੂਪੇ ਨਿਵਾਰੇਨ੍ਤੇਪਿ ਗਨ੍ਤੁਂ ਵਟ੍ਟਤਿ. ਸਚੇ ਉਪਜ੍ਝਾਯੋ ਗਿਲਾਨੋ ਹੋਤਿ, ਯਾਵਜੀਵਂ ਉਪਟ੍ਠਾਪੇਤਬ੍ਬੋ, ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ, ਨ ਕਤ੍ਥਚਿ ਗਨ੍ਤਬ੍ਬਂ. ਸਚੇ ਅਞ੍ਞੋ ਭਿਕ੍ਖੁ ਉਪਟ੍ਠਾਕੋ ਅਤ੍ਥਿ, ਭੇਸਜ੍ਜਂ ਪਰਿਯੇਸਿਤ੍ਵਾ ਤਸ੍ਸ ਹਤ੍ਥੇ ਦਤ੍ਵਾ ‘‘ਭਨ੍ਤੇ, ਅਯਂ ਉਪਟ੍ਠਹਿਸ੍ਸਤੀ’’ਤਿ ਵਤ੍ਵਾ ਗਨ੍ਤਬ੍ਬਂ. ਇਦਂ ਤਾਵ ਉਪਜ੍ਝਾਯਵਤ੍ਤਂ.

੧੮੪. ਇਦਮੇਵ ਚ ਅਨ੍ਤੇਵਾਸਿਕੇਨ ਆਚਰਿਯਸ੍ਸ ਕਤ੍ਤਬ੍ਬਤ੍ਤਾ ਆਚਰਿਯਵਤ੍ਤਨ੍ਤਿ ਵੁਚ੍ਚਤਿ. ਨਾਮਮਤ੍ਤਮੇਵ ਹੇਤ੍ਥ ਨਾਨਂ. ਤਤ੍ਥ ਯਾਵ ਚੀਵਰਰਜਨਂ, ਤਾਵ ਵਤ੍ਤੇ ਅਕਰਿਯਮਾਨੇ ਉਪਜ੍ਝਾਯਸ੍ਸ ਆਚਰਿਯਸ੍ਸ ਚ ਪਰਿਹਾਨਿ ਹੋਤਿ, ਤਸ੍ਮਾ ਤਂ ਅਕਰੋਨ੍ਤਸ੍ਸ ਨਿਸ੍ਸਯਮੁਤ੍ਤਕਸ੍ਸਪਿ ਅਮੁਤ੍ਤਕਸ੍ਸਪਿ ਆਪਤ੍ਤਿਯੇਵ, ਏਕਚ੍ਚਸ੍ਸ ਪਤ੍ਤਦਾਨਤੋ ਪਟ੍ਠਾਯ ਅਮੁਤ੍ਤਨਿਸ੍ਸਯਸ੍ਸੇਵ ਆਪਤ੍ਤਿ. ਉਪਜ੍ਝਾਯੇ ਆਚਰਿਯੇ ਵਾ ਵਤ੍ਤਂ ਸਾਦਿਯਨ੍ਤੇ ਸਦ੍ਧਿਵਿਹਾਰਿਕਾ ਅਨ੍ਤੇਵਾਸਿਕਾ ਚ ਬਹੁਕਾਪਿ ਹੋਨ੍ਤੁ, ਸਬ੍ਬੇਸਂ ਆਪਤ੍ਤਿ. ਸਚੇ ਉਪਜ੍ਝਾਯੋ ਆਚਰਿਯੋ ਵਾ ‘‘ਮਯ੍ਹਂ ਉਪਟ੍ਠਾਕੋ ਅਤ੍ਥਿ, ਤੁਮ੍ਹੇ ਅਤ੍ਤਨੋ ਸਜ੍ਝਾਯਮਨਸਿਕਾਰਾਦੀਸੁ ਯੋਗਂ ਕਰੋਥਾ’’ਤਿ ਵਦਤਿ, ਸਦ੍ਧਿਵਿਹਾਰਿਕਾਦੀਨਂ ਅਨਾਪਤ੍ਤਿ. ਉਪਜ੍ਝਾਯੋ ਵਾ ਆਚਰਿਯੋ ਵਾ ਸਚੇ ਸਾਦਿਯਨਂ ਵਾ ਅਸਾਦਿਯਨਂ ਵਾ ਨ ਜਾਨਾਤਿ, ਬਾਲੋ ਹੋਤਿ, ਸਦ੍ਧਿਵਿਹਾਰਿਕਾਦਯੋ ਬਹੂ, ਤੇਸੁ ਏਕੋ ਵਤ੍ਤਸਮ੍ਪਨ੍ਨੋ ਭਿਕ੍ਖੁ ‘‘ਉਪਜ੍ਝਾਯਸ੍ਸ ਵਾ ਆਚਰਿਯਸ੍ਸ ਵਾ ਕਿਚ੍ਚਂ ਅਹਂ ਕਰਿਸ੍ਸਾਮਿ, ਤੁਮ੍ਹੇ ਅਪ੍ਪੋਸ੍ਸੁਕ੍ਕਾ ਵਿਹਰਥਾ’’ਤਿ ਏਵਞ੍ਚੇ ਅਤ੍ਤਨੋ ਭਾਰਂ ਕਤ੍ਵਾ ਇਤਰੇ ਵਿਸ੍ਸਜ੍ਜੇਤਿ, ਤਸ੍ਸ ਭਾਰਕਰਣਤੋ ਪਟ੍ਠਾਯ ਤੇਸਂ ਅਨਾਪਤ੍ਤਿ. ਏਤ੍ਥ ਅਨ੍ਤੇਵਾਸਿਕੇਸੁ ਪਨ ਨਿਸ੍ਸਯਨ੍ਤੇਵਾਸਿਕੇਨ ਯਾਵ ਆਚਰਿਯਂ ਨਿਸ੍ਸਾਯ ਵਸਤਿ, ਤਾਵ ਸਬ੍ਬਂ ਆਚਰਿਯਵਤ੍ਤਂ ਕਾਤਬ੍ਬਂ. ਪਬ੍ਬਜ੍ਜਉਪਸਮ੍ਪਦਧਮ੍ਮਨ੍ਤੇਵਾਸਿਕੇਹਿ ਪਨ ਨਿਸ੍ਸਯਮੁਤ੍ਤਕੇਹਿਪਿ ਆਦਿਤੋ ਪਟ੍ਠਾਯ ਯਾਵ ਚੀਵਰਰਜਨਂ, ਤਾਵ ਵਤ੍ਤਂ ਕਾਤਬ੍ਬਂ. ਅਨਾਪੁਚ੍ਛਿਤ੍ਵਾ ਪਤ੍ਤਦਾਨਾਦਿਮ੍ਹਿ ਪਨ ਏਤੇਸਂ ਅਨਾਪਤ੍ਤਿ.

ਏਤੇਸੁ ਪਬ੍ਬਜ੍ਜਨ੍ਤੇਵਾਸਿਕੋ ਚ ਉਪਸਮ੍ਪਦਨ੍ਤੇਵਾਸਿਕੋ ਚ ਆਚਰਿਯਸ੍ਸ ਯਾਵਜੀਵਂ ਭਾਰਾ. ਨਿਸ੍ਸਯਨ੍ਤੇਵਾਸਿਕੋ ਚ ਧਮ੍ਮਨ੍ਤੇਵਾਸਿਕੋ ਚ ਯਾਵ ਸਮੀਪੇ ਵਸਨ੍ਤਿ, ਤਾਵ ਆਚਰਿਯੁਪਜ੍ਝਾਯੇਹਿਪਿ ਅਨ੍ਤੇਵਾਸਿਕਸਦ੍ਧਿਵਿਹਾਰਿਕਾ ਸਙ੍ਗਹੇਤਬ੍ਬਾ ਅਨੁਗ੍ਗਹੇਤਬ੍ਬਾ ਉਦ੍ਦੇਸੇਨ ਪਰਿਪੁਚ੍ਛਾਯ ਓਵਾਦੇਨ ਅਨੁਸਾਸਨਿਯਾ. ਸਚੇ ਅਨ੍ਤੇਵਾਸਿਕਸਦ੍ਧਿਵਿਹਾਰਿਕਾਨਂ ਪਤ੍ਤੋ ਵਾ ਚੀਵਰਂ ਵਾ ਅਞ੍ਞੋ ਵਾ ਕੋਚਿ ਪਰਿਕ੍ਖਾਰੋ ਨਤ੍ਥਿ, ਅਤ੍ਤਨੋ ਅਤਿਰੇਕਪਤ੍ਤਚੀਵਰਂ ਅਤਿਰੇਕਪਰਿਕ੍ਖਾਰੋ ਵਾ ਅਤ੍ਥਿ, ਦਾਤਬ੍ਬਂ. ਨੋ ਚੇ, ਧਮ੍ਮਿਯੇਨ ਨਯੇਨ ਪਰਿਯੇਸਨਤ੍ਥਾਯ ਉਸ੍ਸੁਕ੍ਕਂ ਕਾਤਬ੍ਬਂ. ਸਚੇ ਅਨ੍ਤੇਵਾਸਿਕਸਦ੍ਧਿਵਿਹਾਰਿਕਾ ਗਿਲਾਨਾ ਹੋਨ੍ਤਿ, ਉਪਜ੍ਝਾਯਵਤ੍ਤੇ ਵੁਤ੍ਤਨਯੇਨ ਦਨ੍ਤਕਟ੍ਠਦਾਨਂ ਆਦਿਂ ਕਤ੍ਵਾ ਆਚਮਨਕੁਮ੍ਭਿਯਾ ਉਦਕਸਿਞ੍ਚਨਪਰਿਯੋਸਾਨਂ ਸਬ੍ਬਂ ਵਤ੍ਤਂ ਕਾਤਬ੍ਬਮੇਵ, ਅਕਰੋਨ੍ਤਾਨਂ ਆਪਤ੍ਤਿ. ਤਸ੍ਮਾ ਆਚਰਿਯੁਪਜ੍ਝਾਯੇਹਿਪਿ ਅਨ੍ਤੇਵਾਸਿਕਸਦ੍ਧਿਵਿਹਾਰਿਕੇਸੁ ਸਮ੍ਮਾ ਵਤ੍ਤਿਤਬ੍ਬਂ. ਆਚਰਿਯੁਪਜ੍ਝਾਯਾਦੀਸੁ ਹਿ ਯੋ ਯੋ ਨ ਸਮ੍ਮਾ ਵਤ੍ਤਤਿ, ਤਸ੍ਸ ਤਸ੍ਸ ਆਪਤ੍ਤਿ. ਉਪਜ੍ਝਾਯਾਦਿਵਤ੍ਤਕਥਾ.

੧੮੫. ਇਦਾਨਿ ਆਗਨ੍ਤੁਕਵਤ੍ਤਾਦੀਨਿ ਵੇਦਿਤਬ੍ਬਾਨਿ. ਆਗਨ੍ਤੁਕੇਨ ਭਿਕ੍ਖੁਨਾ ਉਪਚਾਰਸੀਮਾਸਮੀਪਂ ਗਨ੍ਤ੍ਵਾ ਉਪਾਹਨਾ ਓਮੁਞ੍ਚਿਤ੍ਵਾ ਨੀਚਂ ਕਤ੍ਵਾ ਪਪ੍ਫੋਟੇਤ੍ਵਾ ਉਪਾਹਨਦਣ੍ਡਕੇਨ ਗਹੇਤ੍ਵਾ ਛਤ੍ਤਂ ਉਪਨਾਮੇਤ੍ਵਾ ਸੀਸਂ ਵਿਵਰਿਤ੍ਵਾ ਸੀਸੇ ਚੀਵਰਂ ਖਨ੍ਧੇ ਕਰਿਤ੍ਵਾ ਸਾਧੁਕਂ ਅਤਰਮਾਨੇਨ ਆਰਾਮੋ ਪਵਿਸਿਤਬ੍ਬੋ, ਆਰਾਮਂ ਪਵਿਸਨ੍ਤੇਨ ਸਲ੍ਲਕ੍ਖੇਤਬ੍ਬਂ ‘‘ਕਤ੍ਥ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤੀ’’ਤਿ. ਯਤ੍ਥ ਆਵਾਸਿਕਾ ਭਿਕ੍ਖੂ ਸਨ੍ਨਿਪਤਨ੍ਤਿ ਉਪਟ੍ਠਾਨਸਾਲਾਯ ਵਾ ਮਣ੍ਡਪੇ ਵਾ ਰੁਕ੍ਖਮੂਲੇ ਵਾ, ਤਤ੍ਥ ਗਨ੍ਤ੍ਵਾ ਏਕਮਨ੍ਤਂ ਪਤ੍ਤੋ ਨਿਕ੍ਖਿਪਿਤਬ੍ਬੋ, ਏਕਮਨ੍ਤਂ ਚੀਵਰਂ ਨਿਕ੍ਖਿਪਿਤਬ੍ਬਂ, ਪਤਿਰੂਪਂ ਆਸਨਂ ਗਹੇਤ੍ਵਾ ਨਿਸੀਦਿਤਬ੍ਬਂ, ਪਾਨੀਯਂ ਪੁਚ੍ਛਿਤਬ੍ਬਂ, ਪਰਿਭੋਜਨੀਯਂ ਪੁਚ੍ਛਿਤਬ੍ਬਂ ‘‘ਕਤਮਂ ਪਾਨੀਯਂ, ਕਤਮਂ ਪਰਿਭੋਜਨੀਯ’’ਨ੍ਤਿ. ਸਚੇ ਪਾਨੀਯੇਨ ਅਤ੍ਥੋ ਹੋਤਿ, ਪਾਨੀਯਂ ਗਹੇਤ੍ਵਾ ਪਾਤਬ੍ਬਂ. ਸਚੇ ਪਰਿਭੋਜਨੀਯੇਨ ਅਤ੍ਥੋ ਹੋਤਿ, ਪਰਿਭੋਜਨੀਯਂ ਗਹੇਤ੍ਵਾ ਪਾਦਾ ਧੋਵਿਤਬ੍ਬਾ. ਪਾਦੇ ਧੋਵਨ੍ਤੇਨ ਏਕੇਨ ਹਤ੍ਥੇਨ ਉਦਕਂ ਆਸਿਞ੍ਚਿਤਬ੍ਬਂ, ਏਕੇਨ ਹਤ੍ਥੇਨ ਪਾਦਾ ਧੋਵਿਤਬ੍ਬਾ, ਨ ਤੇਨੇਵ ਹਤ੍ਥੇਨ ਉਦਕਂ ਆਸਿਞ੍ਚਿਤਬ੍ਬਂ, ਨ ਤੇਨੇਵ ਹਤ੍ਥੇਨ ਪਾਦਾ ਧੋਵਿਤਬ੍ਬਾ, ਉਪਾਹਨਪੁਞ੍ਛਨਚੋਲ਼ਕਂ ਪੁਞ੍ਛਿਤ੍ਵਾ ਉਪਾਹਨਾ ਪੁਞ੍ਛਿਤਬ੍ਬਾ, ਉਪਾਹਨਾ ਪੁਞ੍ਛਨ੍ਤੇਨ ਪਠਮਂ ਸੁਕ੍ਖੇਨ ਚੋਲ਼ਕੇਨ ਪੁਞ੍ਛਿਤਬ੍ਬਾ, ਪਚ੍ਛਾ ਅਲ੍ਲੇਨ, ਉਪਾਹਨਪੁਞ੍ਛਨਚੋਲ਼ਕਂ ਧੋਵਿਤ੍ਵਾ ਏਕਮਨ੍ਤਂ ਪਤ੍ਥਰਿਤਬ੍ਬਂ.

ਸਚੇ ਆਵਾਸਿਕੋ ਭਿਕ੍ਖੁ ਵੁਡ੍ਢੋ ਹੋਤਿ, ਅਭਿਵਾਦੇਤਬ੍ਬੋ. ਸਚੇ ਨਵਕੋ ਹੋਤਿ, ਅਭਿਵਾਦਾਪੇਤਬ੍ਬੋ. ਸੇਨਾਸਨਂ ਪੁਚ੍ਛਿਤਬ੍ਬਂ ‘‘ਕਤਮਂ ਮੇ ਸੇਨਾਸਨਂ ਪਾਪੁਣਾਤੀ’’ਤਿ, ਅਜ੍ਝਾਵੁਟ੍ਠਂ ਵਾ ਅਨਜ੍ਝਾਵੁਟ੍ਠਂ ਵਾ ਪੁਚ੍ਛਿਤਬ੍ਬਂ, ‘‘ਗੋਚਰਗਾਮੋ ਆਸਨ੍ਨੇ, ਉਦਾਹੁ ਦੂਰੇ, ਕਾਲਸ੍ਸੇਵ ਪਿਣ੍ਡਾਯ ਚਰਿਤਬ੍ਬਂ, ਉਦਾਹੁ ਦਿਵਾ’’ਤਿ ਏਵਂ ਭਿਕ੍ਖਾਚਾਰੋ ਪੁਚ੍ਛਿਤਬ੍ਬੋ, ਅਗੋਚਰੋ ਪੁਚ੍ਛਿਤਬ੍ਬੋ, ਗੋਚਰੋ ਪੁਚ੍ਛਿਤਬ੍ਬੋ. ਅਗੋਚਰੋ ਨਾਮ ਮਿਚ੍ਛਾਦਿਟ੍ਠਿਕਾਨਂ ਗਾਮੋ ਪਰਿਚ੍ਛਿਨ੍ਨਭਿਕ੍ਖੋ ਵਾ ਗਾਮੋ, ਯਤ੍ਥ ਏਕਸ੍ਸ ਵਾ ਦ੍ਵਿਨ੍ਨਂ ਵਾ ਭਿਕ੍ਖਾ ਦੀਯਤਿ, ਸੇਕ੍ਖਸਮ੍ਮਹਾਨਿ ਕੁਲਾਨਿ ਪੁਚ੍ਛਿਤਬ੍ਬਾਨਿ, ਵਚ੍ਚਟ੍ਠਾਨਂ ਪੁਚ੍ਛਿਤਬ੍ਬਂ, ਪਸ੍ਸਾਵਟ੍ਠਾਨਂ ਪੁਚ੍ਛਿਤਬ੍ਬਂ, ‘‘ਕਿਂ ਇਮਿਸ੍ਸਾ ਪੋਕ੍ਖਰਣਿਯਾ ਪਾਨੀਯਂਯੇਵ ਪਿਵਨ੍ਤਿ, ਨਹਾਨਾਦਿਪਰਿਭੋਗਮ੍ਪਿ ਕਰੋਨ੍ਤੀ’’ਤਿ ਏਵਂ ਪਾਨੀਯਞ੍ਚੇਵ ਪਰਿਭੋਜਨੀਯਞ੍ਚ ਪੁਚ੍ਛਿਤਬ੍ਬਂ, ਕਤ੍ਤਰਦਣ੍ਡੋ ਪੁਚ੍ਛਿਤਬ੍ਬੋ, ਸਙ੍ਘਸ੍ਸ ਕਤਿਕਸਣ੍ਠਾਨਂ ਪੁਚ੍ਛਿਤਬ੍ਬਂ, ਕੇਸੁਚਿ ਠਾਨੇਸੁ ਵਾਲ਼ਮਿਗਾ ਵਾ ਅਮਨੁਸ੍ਸਾ ਵਾ ਹੋਨ੍ਤਿ, ਤਸ੍ਮਾ ‘‘ਕਂ ਕਾਲਂ ਪਵਿਸਿਤਬ੍ਬਂ, ਕਂ ਕਾਲਂ ਨਿਕ੍ਖਮਿਤਬ੍ਬ’’ਨ੍ਤਿ ਪੁਚ੍ਛਿਤਬ੍ਬਂ. ਸਚੇ ਵਿਹਾਰੋ ਅਨਜ੍ਝਾਵੁਟ੍ਠੋ ਹੋਤਿ, ਕਵਾਟਂ ਆਕੋਟੇਤ੍ਵਾ ਮੁਹੁਤ੍ਤਂ ਆਗਮੇਤ੍ਵਾ ਘਟਿਕਂ ਉਗ੍ਘਾਟੇਤ੍ਵਾ ਕਵਾਟਂ ਪਣਾਮੇਤ੍ਵਾ ਬਹਿ ਠਿਤੇਨ ਨਿਲ੍ਲੋਕੇਤਬ੍ਬੋ.

ਸਚੇ ਸੋ ਵਿਹਾਰੋ ਉਕ੍ਲਾਪੋ ਹੋਤਿ, ਮਞ੍ਚੇ ਵਾ ਮਞ੍ਚੋ ਆਰੋਪਿਤੋ ਹੋਤਿ, ਪੀਠੇ ਵਾ ਪੀਠਂ ਆਰੋਪਿਤਂ ਹੋਤਿ, ਸੇਨਾਸਨਂ ਉਪਰਿ ਪੁਞ੍ਜੀਕਤਂ ਹੋਤਿ, ਸਚੇ ਸਕ੍ਕੋਤਿ, ਸਬ੍ਬੋ ਵਿਹਾਰੋ ਸੋਧੇਤਬ੍ਬੋ, ਅਸਕ੍ਕੋਨ੍ਤੇਨ ਅਤ੍ਤਨੋ ਵਸਨੋਕਾਸੋ ਜਗ੍ਗਿਤਬ੍ਬੋ. ਸਬ੍ਬਂ ਸੋਧੇਤੁਂ ਸਕ੍ਕੋਨ੍ਤੇਨ ਪਨ ਉਪਜ੍ਝਾਯਵਤ੍ਤੇ ਵੁਤ੍ਤਨਯੇਨ ਭੂਮਤ੍ਥਰਣਮਞ੍ਚਪੀਠਾਦੀਨਿ ਬਹਿ ਨੀਹਰਿਤ੍ਵਾ ਵਿਹਾਰਂ ਸੋਧੇਤ੍ਵਾ ਪੁਨ ਅਤਿਹਰਿਤ੍ਵਾ ਯਥਾਠਾਨੇ ਪਞ੍ਞਪੇਤਬ੍ਬਾਨਿ.

ਸਚੇ ਉਕ੍ਲਾਪਂ ਹੋਤਿ, ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ, ਕੋਟ੍ਠਕੋ ਸਮ੍ਮਜ੍ਜਿਤਬ੍ਬੋ, ਉਪਟ੍ਠਾਨਸਾਲਾ ਸਮ੍ਮਜ੍ਜਿਤਬ੍ਬਾ, ਅਗ੍ਗਿਸਾਲਾ ਸਮ੍ਮਜ੍ਜਿਤਬ੍ਬਾ, ਵਚ੍ਚਕੁਟਿ ਸਮ੍ਮਜ੍ਜਿਤਬ੍ਬਾ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ. ਇਦਂ ਆਗਨ੍ਤੁਕਵਤ੍ਤਂ.

੧੮੬. ਆਵਾਸਿਕਵਤ੍ਤੇ ਆਵਾਸਿਕੇਨ ਭਿਕ੍ਖੁਨਾ ਆਗਨ੍ਤੁਕਂ ਭਿਕ੍ਖੁਂ ਵੁਡ੍ਢਤਰਂ ਦਿਸ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਤਬ੍ਬਂ, ਪਾਨੀਯੇਨ ਪੁਚ੍ਛਿਤਬ੍ਬੋ, ਪੁਚ੍ਛਨ੍ਤੇਨ ਪਨ ਸਕਿਂ ਆਨੀਤਂ ਪਾਨੀਯਂ ਸਬ੍ਬਂ ਪਿਵਤਿ, ‘‘ਪੁਨ ਆਨੇਮੀ’’ਤਿ ਪੁਚ੍ਛਿਤਬ੍ਬੋਯੇਵ. ਬੀਜਨੇਨਪਿ ਬੀਜਿਤਬ੍ਬੋ, ਬੀਜਨ੍ਤੇਨ ਸਕਿਂ ਪਾਦਪਿਟ੍ਠਿਯਂ ਬੀਜਿਤ੍ਵਾ ਸਕਿਂ ਮਜ੍ਝੇ, ਸਕਿਂ ਸੀਸੇ ਬੀਜਿਤਬ੍ਬੋ, ‘‘ਅਲਂ ਹੋਤੂ’’ਤਿ ਵੁਤ੍ਤੇਨ ਮਨ੍ਦਤਰਂ ਬੀਜਿਤਬ੍ਬਂ, ਪੁਨ ‘‘ਅਲ’’ਨ੍ਤਿ ਵੁਤ੍ਤੇਨ ਤਤੋ ਮਨ੍ਦਤਰਂ ਬੀਜਿਤਬ੍ਬਂ, ਤਤਿਯਵਾਰਂ ਵੁਤ੍ਤੇਨ ਬੀਜਨੀ ਠਪੇਤਬ੍ਬਾ, ਪਾਦਾਪਿਸ੍ਸ ਧੋਵਿਤਬ੍ਬਾ. ਸਚੇ ਅਤ੍ਤਨੋ ਤੇਲਂ ਅਤ੍ਥਿ, ਤੇਲੇਨ ਮਕ੍ਖੇਤਬ੍ਬਾ. ਨੋ ਚੇ ਅਤ੍ਥਿ, ਤਸ੍ਸ ਸਨ੍ਤਕੇਨ ਮਕ੍ਖੇਤਬ੍ਬਾ. ਸਚੇ ਉਸ੍ਸਹਤਿ, ਉਪਾਹਨਾ ਪੁਞ੍ਛਿਤਬ੍ਬਾ. ਉਪਾਹਨਾ ਪੁਞ੍ਛਨ੍ਤੇਨ ਪਠਮਂ ਸੁਕ੍ਖੇਨ ਚੋਲ਼ੇਨ ਪੁਞ੍ਛਿਤਬ੍ਬਾ, ਪਚ੍ਛਾ ਅਲ੍ਲੇਨ, ਉਪਾਹਨਪੁਞ੍ਛਨਚੋਲ਼ਕਂ ਧੋਵਿਤ੍ਵਾ ਏਕਮਨ੍ਤਂ ਵਿਸ੍ਸਜ੍ਜੇਤਬ੍ਬਂ.

ਆਗਨ੍ਤੁਕੋ ਭਿਕ੍ਖੁ ਅਭਿਵਾਦੇਤਬ੍ਬੋ, ਸੇਨਾਸਨਂ ਪਞ੍ਞਪੇਤਬ੍ਬਂ ‘‘ਏਤਂ ਸੇਨਾਸਨਂ ਪਾਪੁਣਾਤੀ’’ਤਿ. ਅਜ੍ਝਾਵੁਟ੍ਠਂ ਵਾ ਅਨਜ੍ਝਾਵੁਟ੍ਠਂ ਵਾ ਆਚਿਕ੍ਖਿਤਬ੍ਬਂ, ਗੋਚਰੋ ਆਚਿਕ੍ਖਿਤਬ੍ਬੋ, ਅਗੋਚਰੋ ਆਚਿਕ੍ਖਿਤਬ੍ਬੋ, ਸੇਕ੍ਖਸਮ੍ਮਤਾਨਿ ਕੁਲਾਨਿ ਆਚਿਕ੍ਖਿਤਬ੍ਬਾਨਿ, ਵਚ੍ਚਟ੍ਠਾਨਂ ਆਚਿਕ੍ਖਿਤਬ੍ਬਂ, ਪਸ੍ਸਾਵਟ੍ਠਾਨਂ ਆਚਿਕ੍ਖਿਤਬ੍ਬਂ, ਪਾਨੀਯਂ ਆਚਿਕ੍ਖਿਤਬ੍ਬਂ, ਪਰਿਭੋਜਨੀਯਂ ਆਚਿਕ੍ਖਿਤਬ੍ਬਂ, ਕਤ੍ਤਰਦਣ੍ਡੋ ਆਚਿਕ੍ਖਿਤਬ੍ਬੋ, ਸਙ੍ਘਸ੍ਸ ਕਤਿਕਸਣ੍ਠਾਨਂ ਆਚਿਕ੍ਖਿਤਬ੍ਬਂ ‘‘ਇਮਂ ਕਾਲਂ ਪਵਿਸਿਤਬ੍ਬਂ, ਇਮਂ ਕਾਲਂ ਨਿਕ੍ਖਮਿਤਬ੍ਬ’’ਨ੍ਤਿ.

ਸਚੇ ਆਗਨ੍ਤੁਕੋ ਨਵਕੋ ਹੋਤਿ, ਨਿਸਿਨ੍ਨਕੇਨੇਵ ਆਚਿਕ੍ਖਿਤਬ੍ਬਂ ‘‘ਅਤ੍ਰ ਪਤ੍ਤਂ ਨਿਕ੍ਖਿਪਾਹਿ, ਅਤ੍ਰ ਚੀਵਰਂ ਨਿਕ੍ਖਿਪਾਹਿ, ਇਦਂ ਆਸਨਂ, ਨਿਸੀਦਾਹੀ’’ਤਿ. ਪਾਨੀਯਂ ਆਚਿਕ੍ਖਿਤਬ੍ਬਂ, ਪਰਿਭੋਜਨੀਯਂ ਆਚਿਕ੍ਖਿਤਬ੍ਬਂ, ਉਪਾਹਨਪੁਞ੍ਛਨਚੋਲ਼ਕਂ ਆਚਿਕ੍ਖਿਤਬ੍ਬਂ, ਆਗਨ੍ਤੁਕੋ ਭਿਕ੍ਖੁ ਅਭਿਵਾਦਾਪੇਤਬ੍ਬੋ, ਸੇਨਾਸਨਾਦੀਨਿਪਿ ਨਿਸਿਨ੍ਨੇਨੇਵ ਆਚਿਕ੍ਖਿਤਬ੍ਬਾਨਿ. ਵੁਡ੍ਢਤਰੇ ਪਨ ਆਗਤੇ ਆਸਨਂ ਪਞ੍ਞਪੇਤਬ੍ਬਨ੍ਤਿ ਏਵਮਾਦਿ ਸਬ੍ਬਂ ਚੀਵਰਕਮ੍ਮਂ ਵਾ ਨਵਕਮ੍ਮਂ ਵਾ ਠਪੇਤ੍ਵਾਪਿ ਕਾਤਬ੍ਬਂ. ਚੇਤਿਯਙ੍ਗਣਂ ਸਮ੍ਮਜ੍ਜਨ੍ਤੇਨ ਸਮ੍ਮੁਞ੍ਜਨਿਂ ਨਿਕ੍ਖਿਪਿਤ੍ਵਾ ਤਸ੍ਸ ਵਤ੍ਤਂ ਕਾਤੁਂ ਆਰਭਿਤਬ੍ਬਂ. ਪਣ੍ਡਿਤੋ ਹਿ ਆਗਨ੍ਤੁਕੋ ‘‘ਸਮ੍ਮਜ੍ਜਾਹਿ ਤਾਵ ਚੇਤਿਯਙ੍ਗਣ’’ਨ੍ਤਿ ਵਕ੍ਖਤਿ. ਗਿਲਾਨਸ੍ਸ ਭੇਸਜ੍ਜਂ ਕਰੋਨ੍ਤੇਨ ਪਨ ਸਚੇ ਨਾਤਿਆਤੁਰੋ ਗਿਲਾਨੋ ਹੋਤਿ, ਭੇਸਜ੍ਜਂ ਅਕਤ੍ਵਾ ਵਤ੍ਤਮੇਵ ਕਾਤਬ੍ਬਂ, ਮਹਾਗਿਲਾਨਸ੍ਸ ਪਨ ਭੇਸਜ੍ਜਮੇਵ ਕਾਤਬ੍ਬਂ. ਪਣ੍ਡਿਤੋ ਹਿ ਆਗਨ੍ਤੁਕੋ ‘‘ਕਰੋਹਿ ਤਾਵ ਭੇਸਜ੍ਜ’’ਨ੍ਤਿ ਵਕ੍ਖਤਿ. ਇਦਂ ਆਵਾਸਿਕਵਤ੍ਤਂ.

੧੮੭. ਗਮਿਕਵਤ੍ਤੇ ਗਮਿਕੇਨ ਭਿਕ੍ਖੁਨਾ ਮਞ੍ਚਪੀਠਾਦਿਦਾਰੁਭਣ੍ਡਂ ਮਤ੍ਤਿਕਾਭਣ੍ਡਮ੍ਪਿ ਰਜਨਭਾਜਨਾਦਿ ਸਬ੍ਬਂ ਅਗ੍ਗਿਸਾਲਾਯਂ ਵਾ ਅਞ੍ਞਸ੍ਮਿਂ ਵਾ ਗੁਤ੍ਤਟ੍ਠਾਨੇ ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਥਕੇਤ੍ਵਾ ਸੇਨਾਸਨਂ ਆਪੁਚ੍ਛਿਤ੍ਵਾ ਪਕ੍ਕਮਿਤਬ੍ਬਂ. ਸਚੇ ਭਿਕ੍ਖੁ ਨ ਹੋਤਿ, ਸਾਮਣੇਰੋ ਆਪੁਚ੍ਛਿਤਬ੍ਬੋ. ਸਚੇ ਸਾਮਣੇਰੋ ਨ ਹੋਤਿ, ਆਰਾਮਿਕੋ ਆਪੁਚ੍ਛਿਤਬ੍ਬੋ. ਸਚੇ ਨ ਹੋਤਿ ਭਿਕ੍ਖੁ ਵਾ ਸਾਮਣੇਰੋ ਵਾ ਆਰਾਮਿਕੋ ਵਾ, ਚਤੂਸੁ ਪਾਸਾਣੇਸੁ ਮਞ੍ਚਂ ਪਞ੍ਞਪੇਤ੍ਵਾ ਮਞ੍ਚੇ ਮਞ੍ਚਂ ਆਰੋਪੇਤ੍ਵਾ ਪੀਠੇ ਪੀਠਂ ਆਰੋਪੇਤ੍ਵਾ ਸੇਨਾਸਨਂ ਉਪਰਿ ਪੁਞ੍ਜਂ ਕਰਿਤ੍ਵਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਥਕੇਤ੍ਵਾ ਪਕ੍ਕਮਿਤਬ੍ਬਂ. ਸਚੇ ਵਿਹਾਰੋ ਓਵਸ੍ਸਤਿ, ਸਚੇ ਉਸ੍ਸਹਤਿ, ਸਬ੍ਬੋ ਛਾਦੇਤਬ੍ਬੋ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ ‘‘ਕਿਨ੍ਤਿ ਨੁ ਖੋ ਵਿਹਾਰੋ ਛਾਦਿਯੇਥਾ’’ਤਿ, ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਯੋ ਦੇਸੋ ਅਨੋਵਸ੍ਸਕੋ ਹੋਤਿ, ਤਤ੍ਥ ਚਤੂਸੁ ਪਾਸਾਣੇਸੁ ਮਞ੍ਚਂ ਪਞ੍ਞਪੇਤ੍ਵਾ ਮਞ੍ਚੇ ਮਞ੍ਚਂ ਆਰੋਪੇਤ੍ਵਾ ਪੀਠੇ ਪੀਠਂ ਆਰੋਪੇਤ੍ਵਾ ਸੇਨਾਸਨਂ ਉਪਰਿ ਪੁਞ੍ਜਂ ਕਰਿਤ੍ਵਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਥਕੇਤ੍ਵਾ ਪਕ੍ਕਮਿਤਬ੍ਬਂ. ਸਚੇ ਵਿਹਾਰੋ ਓਵਸ੍ਸਤਿ, ਸਚੇ ਉਸ੍ਸਹਤਿ, ਸੇਨਾਸਨਂ ਗਾਮਂ ਅਤਿਹਰਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ ‘‘ਕਿਨ੍ਤਿ ਨੁ ਖੋ ਸੇਨਾਸਨਂ ਗਾਮਂ ਅਤਿਹਰਿਯੇਥਾ’’ਤਿ, ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਅਜ੍ਝੋਕਾਸੇ ਚਤੂਸੁ ਪਾਸਾਣੇਸੁ ਮਞ੍ਚਂ ਪਞ੍ਞਪੇਤ੍ਵਾ ਮਞ੍ਚੇ ਮਞ੍ਚਂ ਆਰੋਪੇਤ੍ਵਾ ਪੀਠੇ ਪੀਠਂ ਆਰੋਪੇਤ੍ਵਾ ਸੇਨਾਸਨਂ ਉਪਰਿ ਪੁਞ੍ਜਂ ਕਰਿਤ੍ਵਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਤਿਣੇਨ ਵਾ ਪਣ੍ਣੇਨ ਵਾ ਪਟਿਚ੍ਛਾਦੇਤ੍ਵਾ ਪਕ੍ਕਮਿਤਬ੍ਬਂ ‘‘ਅਪ੍ਪੇਵ ਨਾਮ ਅਙ੍ਗਾਨਿਪਿ ਸੇਸੇਯ੍ਯੁ’’ਨ੍ਤਿ. ਇਦਂ ਗਮਿਕਵਤ੍ਤਂ.

੧੮੮. ਭਤ੍ਤਗ੍ਗਵਤ੍ਤੇ ਸਚੇ ਆਰਾਮੇ ਕਾਲੋ ਆਰੋਚਿਤੋ ਹੋਤਿ, ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਸਾਧੁਕਂ ਅਤਰਮਾਨੇਨ ਗਾਮੋ ਪਵਿਸਿਤਬ੍ਬੋ.

ਨ ਓਕ੍ਕਮ੍ਮ ਥੇਰਾਨਂ ਭਿਕ੍ਖੂਨਂ ਪੁਰਤੋ ਗਨ੍ਤਬ੍ਬਂ. ਸੁਪ੍ਪਟਿਚ੍ਛਨ੍ਨੇਨ, ਸੁਸਂਵੁਤੇਨ, ਓਕ੍ਖਿਤ੍ਤਚਕ੍ਖੁਨਾ, ਅਪ੍ਪਸਦ੍ਦੇਨ ਅਨ੍ਤਰਘਰੇ ਗਨ੍ਤਬ੍ਬਂ, ਨ ਉਕ੍ਖਿਤ੍ਤਕਾਯ, ਨ ਉਜ੍ਜਗ੍ਘਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ, ਨ ਕਾਯਪ੍ਪਚਾਲਕਂ, ਨ ਬਾਹੁਪ੍ਪਚਾਲਕਂ, ਨ ਸੀਸਪ੍ਪਚਾਲਕਂ ਅਨ੍ਤਰਘਰੇ ਗਨ੍ਤਬ੍ਬਂ, ਨ ਖਮ੍ਭਕਤੇਨ, ਨ ਓਗੁਣ੍ਠਿਤੇਨ, ਨ ਉਕ੍ਕੁਟਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ.

ਸੁਪ੍ਪਟਿਚ੍ਛਨ੍ਨੇਨ, ਸੁਸਂਵੁਤੇਨ, ਓਕ੍ਖਿਤ੍ਤਚਕ੍ਖੁਨਾ, ਅਪ੍ਪਸਦ੍ਦੇਨ ਅਨ੍ਤਰਘਰੇ ਨਿਸੀਦਿਤਬ੍ਬਂ, ਨ ਉਕ੍ਖਿਤ੍ਤਕਾਯ, ਨ ਉਜ੍ਜਗ੍ਘਿਕਾਯ ਅਨ੍ਤਰਘਰੇ ਨਿਸੀਦਿਤਬ੍ਬਂ, ਨ ਕਾਯਪ੍ਪਚਾਲਕਂ, ਨ ਬਾਹੁਪ੍ਪਚਾਲਕਂ, ਨ ਸੀਸਪ੍ਪਚਾਲਕਂ ਅਨ੍ਤਰਘਰੇ ਨਿਸੀਦਿਤਬ੍ਬਂ, ਨ ਖਮ੍ਭਕਤੇਨ, ਨ ਓਗੁਣ੍ਠਿਤੇਨ, ਨ ਪਲ੍ਲਤ੍ਥਿਕਾਯ ਅਨ੍ਤਰਘਰੇ ਨਿਸੀਦਿਤਬ੍ਬਂ, ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ. ਸਚੇ ਮਹਾਥੇਰਸ੍ਸ ਨਿਸਿਨ੍ਨਾਸਨੇਨ ਸਮਕਂ ਆਸਨਂ ਹੋਤਿ, ਬਹੂਸੁ ਆਸਨੇਸੁ ਸਤਿ ਏਕਂ ਦ੍ਵੇ ਆਸਨਾਨਿ ਠਪੇਤ੍ਵਾ ਨਿਸੀਦਿਤਬ੍ਬਂ. ਭਿਕ੍ਖੂ ਗਣੇਤ੍ਵਾ ਪਞ੍ਞਤ੍ਤਾਸਨੇਸੁ ਅਨਿਸੀਦਿਤ੍ਵਾ ਮਹਾਥੇਰੇਨ ‘‘ਨਿਸੀਦਾ’’ਤਿ ਵੁਤ੍ਤੇਨ ਨਿਸੀਦਿਤਬ੍ਬਂ. ਨੋ ਚੇ ਮਹਾਥੇਰੋ ਵਦਤਿ, ‘‘ਇਦਂ, ਭਨ੍ਤੇ, ਆਸਨਂ ਉਚ੍ਚ’’ਨ੍ਤਿ ਵਤ੍ਤਬ੍ਬਂ. ‘‘ਨਿਸੀਦਾ’’ਤਿ ਵੁਤ੍ਤੇਨ ਨਿਸੀਦਿਤਬ੍ਬਂ. ਸਚੇ ਪਨ ਏਵਂ ਆਪੁਚ੍ਛਿਤੇਪਿ ਨ ਵਦਤਿ, ਨਿਸੀਦਨ੍ਤਸ੍ਸ ਅਨਾਪਤ੍ਤਿ, ਮਹਾਥੇਰਸ੍ਸੇਵ ਆਪਤ੍ਤਿ. ਨਵਕੋ ਹਿ ਏਵਰੂਪੇ ਆਸਨੇ ਅਨਾਪੁਚ੍ਛਾ ਨਿਸੀਦਨ੍ਤੋ ਆਪਜ੍ਜਤਿ, ਥੇਰੋ ਆਪੁਚ੍ਛਿਤੇ ਅਨਨੁਜਾਨਨ੍ਤੋ. ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ, ਨ ਸਙ੍ਘਾਟਿਕਂ ਓਤ੍ਥਰਿਤ੍ਵਾ ਅਨ੍ਤਰਘਰੇ ਨਿਸੀਦਿਤਬ੍ਬਂ.

ਪਤ੍ਤਧੋਵਨੋਦਕੇ ਦੀਯਮਾਨੇ ਉਭੋਹਿ ਹਤ੍ਥੇਹਿ ਪਤ੍ਤਂ ਪਟਿਗ੍ਗਹੇਤ੍ਵਾ ਉਦਕਂ ਪਟਿਗ੍ਗਹੇਤਬ੍ਬਂ, ਦਕ੍ਖਿਣੋਦਕਂ ਪਨ ਪੁਰਤੋ ਆਧਾਰਕੇ ਪਤ੍ਤਂ ਠਪੇਤ੍ਵਾ ਗਹੇਤਬ੍ਬਂ, ਨੀਚਂ ਕਤ੍ਵਾ ਉਦਕਸਦ੍ਦਂ ਅਕਰੋਨ੍ਤੇਨ ਅਪਟਿਘਂਸਨ੍ਤੇਨ ਪਤ੍ਤੋ ਧੋਵਿਤਬ੍ਬੋ. ਸਚੇ ਉਦਕਪਟਿਗ੍ਗਾਹਕੋ ਹੋਤਿ, ਨੀਚਂ ਕਤ੍ਵਾ ਉਦਕਪਟਿਗ੍ਗਾਹਕੇ ਉਦਕਂ ਆਸਿਞ੍ਚਿਤਬ੍ਬਂ ‘‘ਮਾ ਉਦਕਪਟਿਗ੍ਗਾਹਕੋ ਉਦਕੇਨ ਓਸਿਞ੍ਚਿ, ਮਾ ਸਾਮਨ੍ਤਾ ਭਿਕ੍ਖੂ ਉਦਕੇਨ ਓਸਿਞ੍ਚਿਂਸੁ, ਮਾ ਸਙ੍ਘਾਟਿ ਉਦਕੇਨ ਓਸਿਞ੍ਚੀ’’ਤਿ. ਸਚੇ ਉਦਕਪਟਿਗ੍ਗਾਹਕੋ ਨ ਹੋਤਿ, ਨੀਚਂ ਕਤ੍ਵਾ ਛਮਾਯ ਉਦਕਂ ਆਸਿਞ੍ਚਿਤਬ੍ਬਂ ‘‘ਮਾ ਸਾਮਨ੍ਤਾ ਭਿਕ੍ਖੂ ਉਦਕੇਨ ਓਸਿਞ੍ਚਿਂਸੁ, ਮਾ ਸਙ੍ਘਾਟਿ ਉਦਕੇਨ ਓਸਿਞ੍ਚੀ’’ਤਿ.

ਓਦਨੇ ਦੀਯਮਾਨੇ ਉਭੋਹਿ ਹਤ੍ਥੇਹਿ ਪਤ੍ਤਂ ਪਟਿਗ੍ਗਹੇਤ੍ਵਾ ਓਦਨੋ ਪਟਿਗ੍ਗਹੇਤਬ੍ਬੋ. ਯਥਾ ਸੂਪਸ੍ਸ ਓਕਾਸੋ ਹੋਤਿ, ਏਵਂ ਮਤ੍ਤਾਯ ਓਦਨੋ ਗਣ੍ਹਿਤਬ੍ਬੋ. ਸਚੇ ਹੋਤਿ ਸਪ੍ਪਿ ਵਾ ਤੇਲਂ ਵਾ ਉਤ੍ਤਰਿਭਙ੍ਗਂ ਵਾ, ਥੇਰੇਨ ਵਤ੍ਤਬ੍ਬੋ ‘‘ਸਬ੍ਬੇਸਂ ਸਮਕਂ ਸਮ੍ਪਾਦੇਹੀ’’ਤਿ. ਇਦਞ੍ਚ ਨ ਕੇਵਲਂ ਸਪ੍ਪਿਆਦੀਸੁ, ਓਦਨੇਪਿ ਵਤ੍ਤਬ੍ਬਂ. ਸਪ੍ਪਿਆਦੀਸੁ ਪਨ ਯਂ ਅਪ੍ਪਂ ਹੋਤਿ ਏਕਸ੍ਸ ਵਾ ਦ੍ਵਿਨ੍ਨਂ ਵਾ ਅਨੁਰੂਪਂ, ਤਂ ਸਬ੍ਬੇਸਂ ਸਮਕਂ ਸਮ੍ਪਾਦੇਹੀਤਿ ਵੁਤ੍ਤੇ ਮਨੁਸ੍ਸਾਨਂ ਵਿਹੇਸਾ ਹੋਤਿ, ਤਸ੍ਮਾ ਤਾਦਿਸਂ ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ ਗਹੇਤ੍ਵਾ ਸੇਸਂ ਨ ਗਹੇਤਬ੍ਬਂ. ਸਕ੍ਕਚ੍ਚਂ ਪਿਣ੍ਡਪਾਤੋ ਪਟਿਗ੍ਗਹੇਤਬ੍ਬੋ, ਪਤ੍ਤਸਞ੍ਞਿਨਾ ਪਿਣ੍ਡਪਾਤੋ ਪਟਿਗ੍ਗਹੇਤਬ੍ਬੋ, ਸਮਸੂਪਕੋ ਸਮਤਿਤ੍ਥਿਕੋ ਪਿਣ੍ਡਪਾਤੋ ਪਟਿਗ੍ਗਹੇਤਬ੍ਬੋ, ਨ ਤਾਵ ਥੇਰੇਨ ਭੁਞ੍ਜਿਤਬ੍ਬਂ, ਯਾਵ ਨ ਸਬ੍ਬੇਸਂ ਓਦਨੋ ਸਮ੍ਪਤ੍ਤੋ ਹੋਤਿ. ਇਦਞ੍ਚ ਯਂ ਪਰਿਚ੍ਛਿਨ੍ਨਭਿਕ੍ਖੁਕਂ ਭਤ੍ਤਗ੍ਗਂ, ਯਤ੍ਥ ਮਨੁਸ੍ਸਾ ਸਬ੍ਬੇਸਂ ਪਾਪੇਤ੍ਵਾ ਵਨ੍ਦਿਤੁਕਾਮਾ ਹੋਨ੍ਤਿ, ਤਂ ਸਨ੍ਧਾਯ ਵੁਤ੍ਤਂ. ਯਂ ਪਨ ਮਹਾਭਤ੍ਤਗ੍ਗਂ ਹੋਤਿ, ਯਤ੍ਥ ਏਕਸ੍ਮਿਂ ਪਦੇਸੇ ਭੁਞ੍ਜਨ੍ਤਿ, ਏਕਸ੍ਮਿਂ ਪਦੇਸੇ ਉਦਕਂ ਦੀਯਤਿ, ਤਤ੍ਥ ਯਥਾਸੁਖਂ ਭੁਞ੍ਜਿਤਬ੍ਬਂ.

ਸਕ੍ਕਚ੍ਚਂ ਪਿਣ੍ਡਪਾਤੋ ਭੁਞ੍ਜਿਤਬ੍ਬੋ, ਪਤ੍ਤਸਞ੍ਞਿਨਾ ਪਿਣ੍ਡਪਾਤੋ ਭੁਞ੍ਜਿਤਬ੍ਬੋ, ਸਪਦਾਨੋ ਪਿਣ੍ਡਪਾਤੋ ਭੁਞ੍ਜਿਤਬ੍ਬੋ, ਸਮਸੂਪਕੋ ਪਿਣ੍ਡਪਾਤੋ ਭੁਞ੍ਜਿਤਬ੍ਬੋ, ਨ ਥੂਪਕਤੋ ਓਮਦ੍ਦਿਤ੍ਵਾ ਪਿਣ੍ਡਪਾਤੋ ਭੁਞ੍ਜਿਤਬ੍ਬੋ, ਨ ਸੂਪਂ ਵਾ ਬ੍ਯਞ੍ਜਨਂ ਵਾ ਓਦਨੇਨ ਪਟਿਚ੍ਛਾਦੇਤਬ੍ਬਂ ਭਿਯ੍ਯੋਕਮ੍ਯਤਂ ਉਪਾਦਾਯ, ਨ ਸੂਪਂ ਵਾ ਓਦਨਂ ਵਾ ਅਗਿਲਾਨੇਨ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਿਤਬ੍ਬਂ, ਨ ਉਜ੍ਝਾਨਸਞ੍ਞਿਨਾ ਪਰੇਸਂ ਪਤ੍ਤੋ ਓਲੋਕੇਤਬ੍ਬੋ, ਨਾਤਿਮਹਨ੍ਤੋ ਕਬਲ਼ੋ ਕਾਤਬ੍ਬੋ, ਪਰਿਮਣ੍ਡਲਂ ਆਲੋਪੋ ਕਾਤਬ੍ਬੋ, ਨ ਅਨਾਹਟੇ ਕਬਲ਼ੇ ਮੁਖਦ੍ਵਾਰਂ ਵਿਵਰਿਤਬ੍ਬਂ, ਨ ਭੁਞ੍ਜਮਾਨੇਨ ਸਬ੍ਬੋ ਹਤ੍ਥੋ ਮੁਖੇ ਪਕ੍ਖਿਪਿਤਬ੍ਬੋ, ਨ ਸਕਬਲ਼ੇਨ ਮੁਖੇਨ ਬ੍ਯਾਹਰਿਤਬ੍ਬਂ, ਨ ਪਿਣ੍ਡੁਕ੍ਖੇਪਕਂ ਭੁਞ੍ਜਿਤਬ੍ਬਂ, ਨ ਕਬਲ਼ਾਵਚ੍ਛੇਕਂ, ਨ ਅਵਗਣ੍ਡਕਾਰਕਂ, ਨ ਹਤ੍ਥਨਿਦ੍ਧੁਨਕਂ, ਨ ਸਿਤ੍ਥਾਵਕਾਰਕਂ, ਨ ਜਿਵ੍ਹਾਨਿਚ੍ਛਾਰਕਂ, ਨ ਚਪੁਚਪੁਕਾਰਕਂ, ਨ ਸੁਰੁਸੁਰੁਕਾਰਕਂ, ਨ ਹਤ੍ਥਨਿਲ੍ਲੇਹਕਂ, ਨ ਪਤ੍ਤਨਿਲ੍ਲੇਹਕਂ, ਨ ਓਟ੍ਠਨਿਲ੍ਲੇਹਕਂ ਭੁਞ੍ਜਿਤਬ੍ਬਂ.

ਨ ਸਾਮਿਸੇਨ ਹਤ੍ਥੇਨ ਪਾਨੀਯਥਾਲਕੋ ਪਟਿਗ੍ਗਹੇਤਬ੍ਬੋ, ਨ ਤਾਵ ਥੇਰੇਨ ਹਤ੍ਥਧੋਵਨਉਦਕਂ ਪਟਿਗ੍ਗਹੇਤਬ੍ਬਂ, ਯਾਵ ਨ ਸਬ੍ਬੇ ਭੁਤ੍ਤਾਵਿਨੋ ਹੋਨ੍ਤਿ. ਸਚੇ ਮਨੁਸ੍ਸਾ ‘‘ਧੋਵਥ, ਭਨ੍ਤੇ, ਪਤ੍ਤਞ੍ਚ ਹਤ੍ਥੇ ਚਾ’’ਤਿ ਵਦਨ੍ਤਿ, ਭਿਕ੍ਖੂ ਵਾ ‘‘ਤੁਮ੍ਹੇ ਉਦਕਂ ਗਣ੍ਹਥਾ’’ਤਿ ਵਦਨ੍ਤਿ, ਵਟ੍ਟਤਿ. ਉਦਕੇ ਦੀਯਮਾਨੇ ਉਭੋਹਿ ਹਤ੍ਥੇਹਿ ਪਤ੍ਤਂ ਪਟਿਗ੍ਗਹੇਤ੍ਵਾ ਉਦਕਂ ਪਟਿਗ੍ਗਹੇਤਬ੍ਬਂ, ਨੀਚਂ ਕਤ੍ਵਾ ਉਦਕਸਦ੍ਦਂ ਅਕਰੋਨ੍ਤੇਨ ਅਪਟਿਘਂਸਨ੍ਤੇਨ ਪਤ੍ਤੋ ਧੋਵਿਤਬ੍ਬੋ. ਸਚੇ ਉਦਕਪਟਿਗ੍ਗਾਹਕੋ ਹੋਤਿ, ਨੀਚਂ ਕਤ੍ਵਾ ਉਦਕਪਟਿਗ੍ਗਾਹਕੇ ਉਦਕਂ ਆਸਿਞ੍ਚਿਤਬ੍ਬਂ ‘‘ਮਾ ਉਦਕਪਟਿਗ੍ਗਾਹਕੋ ਉਦਕੇਨ ਓਸਿਞ੍ਚਿ, ਮਾ ਸਾਮਨ੍ਤਾ ਭਿਕ੍ਖੂ ਉਦਕੇਨ ਓਸਿਞ੍ਚਿਂਸੁ, ਮਾ ਸਙ੍ਘਾਟਿ ਉਦਕੇਨ ਓਸਿਞ੍ਚੀ’’ਤਿ. ਸਚੇ ਉਦਕਪਟਿਗ੍ਗਾਹਕੋ ਨ ਹੋਤਿ, ਨੀਚਂ ਕਤ੍ਵਾ ਛਮਾਯ ਉਦਕਂ ਆਸਿਞ੍ਚਿਤਬ੍ਬਂ ‘‘ਮਾ ਸਾਮਨ੍ਤਾ ਭਿਕ੍ਖੂ ਉਦਕੇਨ ਓਸਿਞ੍ਚਿਂਸੁ, ਮਾ ਸਙ੍ਘਾਟਿ ਉਦਕੇਨ ਓਸਿਞ੍ਚੀ’’ਤਿ, ਨ ਸਸਿਤ੍ਥਕਂ ਪਤ੍ਤਧੋਵਨਂ ਅਨ੍ਤਰਘਰੇ ਛਡ੍ਡੇਤਬ੍ਬਂ.

ਭਤ੍ਤਗ੍ਗਤੋ ਉਟ੍ਠਾਯ ਨਿਵਤ੍ਤਨ੍ਤੇਸੁ ਨਵਕੇਹਿ ਭਿਕ੍ਖੂਹਿ ਪਠਮਤਰਂ ਨਿਵਤ੍ਤਿਤਬ੍ਬਂ, ਪਚ੍ਛਾ ਥੇਰੇਹਿ. ਸਮ੍ਬਾਧੇਸੁ ਹਿ ਘਰੇਸੁ ਮਹਾਥੇਰਾਨਂ ਨਿਕ੍ਖਮਨੋਕਾਸੋ ਨ ਹੋਤਿ, ਤਸ੍ਮਾ ਏਵਂ ਵੁਤ੍ਤਂ. ਏਵਂ ਨਿਵਤ੍ਤਨ੍ਤੇਹਿ ਪਨ ਨਵਕੇਹਿ ਗੇਹਦ੍ਵਾਰੇ ਠਤ੍ਵਾ ਥੇਰੇਸੁ ਨਿਕ੍ਖਮਨ੍ਤੇਸੁ ਪਟਿਪਾਟਿਯਾ ਗਨ੍ਤਬ੍ਬਂ. ਸਚੇ ਪਨ ਮਹਾਥੇਰਾ ਧੁਰੇ ਨਿਸਿਨ੍ਨਾ ਹੋਨ੍ਤਿ, ਨਵਕਾ ਅਨ੍ਤੋਗੇਹੇ, ਥੇਰਾਸਨਤੋ ਪਟ੍ਠਾਯ ਪਟਿਪਾਟਿਯਾ ਏਵ ਨਿਕ੍ਖਮਿਤਬ੍ਬਂ, ਕਾਯੇਨ ਕਾਯਂ ਅਸਙ੍ਘਟ੍ਟੇਨ੍ਤੇਨ ਯਥਾ ਅਨ੍ਤਰੇਨ ਮਨੁਸ੍ਸਾ ਗਨ੍ਤੁਂ ਸਕ੍ਕੋਨ੍ਤਿ, ਏਵਂ ਵਿਰਲ਼ਾਯ ਪਾਲ਼ਿਯਾ ਗਨ੍ਤਬ੍ਬਂ.

‘‘ਅਨੁਜਾਨਾਮਿ, ਭਿਕ੍ਖਵੇ, ਥੇਰੇਨ ਭਿਕ੍ਖੁਨਾ ਭਤ੍ਤਗ੍ਗੇ ਅਨੁਮੋਦਿਤੁ’’ਨ੍ਤਿ (ਚੂਲ਼ਵ. ੩੬੨) ਵਚਨਤੋ ਸਙ੍ਘਤ੍ਥੇਰੇਨ ਭਤ੍ਤਗ੍ਗੇ ਅਨੁਮੋਦਿਤਬ੍ਬਂ. ਤਂ ਏਕਮੇਵ ਓਹਾਯ ਸੇਸੇਹਿ ਨ ਗਨ੍ਤਬ੍ਬਂ.

‘‘ਅਨੁਜਾਨਾਮਿ, ਭਿਕ੍ਖਵੇ, ਭਤ੍ਤਗ੍ਗੇ ਚਤੂਹਿ ਪਞ੍ਚਹਿ ਥੇਰਾਨੁਥੇਰੇਹਿ ਭਿਕ੍ਖੂਹਿ ਆਗਮੇਤੁ’’ਨ੍ਤਿ (ਚੂਲ਼ਵ. ੩੬੨) ਵਚਨਤੋ ਸਙ੍ਘਤ੍ਥੇਰੇਨ ਅਨੁਮੋਦਨਤ੍ਥਾਯ ਨਿਸਿਨ੍ਨੇ ਹੇਟ੍ਠਾ ਪਟਿਪਾਟਿਯਾ ਚਤੂਹਿ ਨਿਸੀਦਿਤਬ੍ਬਂ, ਅਨੁਥੇਰੇ ਨਿਸਿਨ੍ਨੇ ਮਹਾਥੇਰੇਨ ਚ ਹੇਟ੍ਠਾ ਚ ਤੀਹਿ ਨਿਸੀਦਿਤਬ੍ਬਂ, ਪਞ੍ਚਮੇ ਨਿਸਿਨ੍ਨੇ ਉਪਰਿ ਚਤੂਹਿ ਨਿਸੀਦਿਤਬ੍ਬਂ, ਸਙ੍ਘਤ੍ਥੇਰੇਨ ਹੇਟ੍ਠਾ ਦਹਰਭਿਕ੍ਖੁਸ੍ਮਿਂ ਅਜ੍ਝਿਟ੍ਠੇਪਿ ਸਙ੍ਘਤ੍ਥੇਰਤੋ ਪਟ੍ਠਾਯ ਚਤੂਹਿ ਨਿਸੀਦਿਤਬ੍ਬਮੇਵ. ਸਚੇ ਪਨ ਅਨੁਮੋਦਕੋ ਭਿਕ੍ਖੁ ‘‘ਗਚ੍ਛਥ, ਭਨ੍ਤੇ, ਆਗਮੇਤਬ੍ਬਕਿਚ੍ਚਂ ਨਤ੍ਥੀ’’ਤਿ ਵਦਤਿ, ਗਨ੍ਤੁਂ ਵਟ੍ਟਤਿ. ਮਹਾਥੇਰੇਨ ‘‘ਗਚ੍ਛਾਮ, ਆਵੁਸੋ’’ਤਿ ਵੁਤ੍ਤੇ ‘‘ਗਚ੍ਛਥਾ’’ਤਿ ਵਦਤਿ, ਏਵਮ੍ਪਿ ਵਟ੍ਟਤਿ, ‘‘ਬਹਿਗਾਮੇ ਆਗਮਿਸ੍ਸਾਮਾ’’ਤਿ ਆਭੋਗਂ ਕਤ੍ਵਾਪਿ ਬਹਿਗਾਮਂ ਗਨ੍ਤ੍ਵਾ ਅਤ੍ਤਨੋ ਨਿਸ੍ਸਿਤਕੇ ‘‘ਤੁਮ੍ਹੇ ਤਸ੍ਸ ਆਗਮਨਂ ਆਗਮੇਥਾ’’ਤਿ ਵਤ੍ਵਾਪਿ ਗਨ੍ਤੁਂ ਵਟ੍ਟਤਿਯੇਵ. ਸਚੇ ਪਨ ਮਨੁਸ੍ਸਾ ਅਤ੍ਤਨੋ ਰੁਚਿਤੇਨ ਏਕੇਨ ਅਨੁਮੋਦਨਂ ਕਾਰੇਨ੍ਤਿ, ਨੇਵ ਤਸ੍ਸ ਅਨੁਮੋਦਤੋ ਆਪਤ੍ਤਿ, ਨ ਮਹਾਥੇਰਸ੍ਸ ਭਾਰੋ ਹੋਤਿ. ਉਪਨਿਸਿਨ੍ਨਕਥਾਯਮੇਵ ਹਿ ਮਨੁਸ੍ਸੇਸੁ ਕਥਾਪੇਨ੍ਤੇਸੁ ਥੇਰੋ ਆਪੁਚ੍ਛਿਤਬ੍ਬੋ. ਮਹਾਥੇਰੇਨ ਚ ਅਨੁਮੋਦਨਾਯ ਅਜ੍ਝਿਟ੍ਠੋਵ ਆਗਮੇਤਬ੍ਬੋਤਿ ਇਦਮੇਤ੍ਥ ਲਕ੍ਖਣਂ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਤਿ ਕਰਣੀਯੇ ਆਨਨ੍ਤਰਿਕਂ ਭਿਕ੍ਖੁਂ ਆਪੁਚ੍ਛਿਤ੍ਵਾ ਗਨ੍ਤੁ’’ਨ੍ਤਿ (ਚੂਲ਼ਵ. ੩੬੨) ਵਚਨਤੋ ਪਨ ਵਚ੍ਚਾਦਿਪੀਲ਼ਿਤੇਨ ਅਨਨ੍ਤਰਂ ਭਿਕ੍ਖੁਂ ਆਪੁਚ੍ਛਿਤ੍ਵਾ ਗਨ੍ਤਬ੍ਬਨ੍ਤਿ. ਇਦਂ ਭਤ੍ਤਗ੍ਗਵਤ੍ਤਂ.

੧੮੯. ਪਿਣ੍ਡਚਾਰਿਕਵਤ੍ਤੇ ਪਨ ਪਿਣ੍ਡਚਾਰਿਕੇਨ ਭਿਕ੍ਖੁਨਾ ‘‘ਇਦਾਨਿ ਗਾਮਂ ਪਵਿਸਿਸ੍ਸਾਮੀ’’ਤਿ ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਸਾਧੁਕਂ ਅਤਰਮਾਨੇਨ ਗਾਮੋ ਪਵਿਸਿਤਬ੍ਬੋ. ਸੁਪ੍ਪਟਿਚ੍ਛਨ੍ਨੇਨ ਅਨ੍ਤਰਘਰੇ ਗਨ੍ਤਬ੍ਬਨ੍ਤਿਆਦਿ ਸਬ੍ਬਂ ਭਤ੍ਤਗ੍ਗਵਤ੍ਤੇ ਵੁਤ੍ਤਨਯੇਨੇਵ ਇਧਾਪਿ ਵੇਦਿਤਬ੍ਬਂ.

ਨਿਵੇਸਨਂ ਪਵਿਸਨ੍ਤੇਨ ਸਲ੍ਲਕ੍ਖੇਤਬ੍ਬਂ ‘‘ਇਮਿਨਾ ਪਵਿਸਿਸ੍ਸਾਮਿ, ਇਮਿਨਾ ਨਿਕ੍ਖਮਿਸ੍ਸਾਮੀ’’ਤਿ, ਨਾਤਿਸਹਸਾ ਪਵਿਸਿਤਬ੍ਬਂ, ਨਾਤਿਦੂਰੇ ਨਾਚ੍ਚਾਸਨ੍ਨੇ ਠਾਤਬ੍ਬਂ, ਨਾਤਿਚਿਰਂ ਠਾਤਬ੍ਬਂ, ਨਾਤਿਲਹੁਕਂ ਨਿਵਤ੍ਤਿਤਬ੍ਬਂ, ਠਿਤੇਨ ਸਲ੍ਲਕ੍ਖੇਤਬ੍ਬਂ ‘‘ਭਿਕ੍ਖਂ ਦਾਤੁਕਾਮਾ ਵਾ ਅਦਾਤੁਕਾਮਾ ਵਾ’’ਤਿ. ਸਚੇ ਕਮ੍ਮਂ ਵਾ ਨਿਕ੍ਖਿਪਤਿ, ਆਸਨਾ ਵਾ ਵੁਟ੍ਠਾਤਿ, ਕਟਚ੍ਛੁਂ ਵਾ ਪਰਾਮਸਤਿ, ਭਾਜਨਂ ਵਾ ਪਰਾਮਸਤਿ, ਠਪੇਤਿ ਵਾ, ‘‘ਦਾਤੁਕਾਮਸ੍ਸਾ’’ਤਿ ਠਾਤਬ੍ਬਂ. ਭਿਕ੍ਖਾਯ ਦੀਯਮਾਨਾਯ ਵਾਮੇਨ ਹਤ੍ਥੇਨ ਸਙ੍ਘਾਟਿਂ ਉਚ੍ਚਾਰੇਤ੍ਵਾ ਦਕ੍ਖਿਣੇਨ ਹਤ੍ਥੇਨ ਪਤ੍ਤਂ ਪਣਾਮੇਤ੍ਵਾ ਉਭੋਹਿ ਹਤ੍ਥੇਹਿ ਪਤ੍ਤਂ ਪਟਿਗ੍ਗਹੇਤ੍ਵਾ ਭਿਕ੍ਖਾ ਪਟਿਗ੍ਗਹੇਤਬ੍ਬਾ, ਇਤ੍ਥੀ ਵਾ ਹੋਤੁ ਪੁਰਿਸੋ ਵਾ, ਭਿਕ੍ਖਾਦਾਨਸਮਯੇ ਮੁਖਂ ਨ ਓਲੋਕੇਤਬ੍ਬਂ, ਸਲ੍ਲਕ੍ਖੇਤਬ੍ਬਂ ‘‘ਸੂਪਂ ਦਾਤੁਕਾਮਾ ਵਾ ਅਦਾਤੁਕਾਮਾ ਵਾ’’ਤਿ. ਸਚੇ ਕਟਚ੍ਛੁਂ ਵਾ ਪਰਾਮਸਤਿ, ਭਾਜਨਂ ਵਾ ਪਰਾਮਸਤਿ, ਠਪੇਤਿ ਵਾ, ‘‘ਦਾਤੁਕਾਮਸ੍ਸਾ’’ਤਿ ਠਾਤਬ੍ਬਂ. ਭਿਕ੍ਖਾਯ ਦਿਨ੍ਨਾਯ ਸਙ੍ਘਾਟਿਯਾ ਪਤ੍ਤਂ ਪਟਿਚ੍ਛਾਦੇਤ੍ਵਾ ਸਾਧੁਕਂ ਅਤਰਮਾਨੇਨ ਨਿਵਤ੍ਤਿਤਬ੍ਬਂ.

ਯੋ ਪਠਮਂ ਗਾਮਤੋ ਪਿਣ੍ਡਾਯ ਪਟਿਕ੍ਕਮਤਿ, ਤੇਨ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਅਵਕ੍ਕਾਰਪਾਤਿ ਧੋਵਿਤ੍ਵਾ ਉਪਟ੍ਠਾਪੇਤਬ੍ਬਾ, ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ. ਯੋ ਪਚ੍ਛਾ ਗਾਮਤੋ ਪਿਣ੍ਡਾਯ ਪਟਿਕ੍ਕਮਤਿ, ਸਚੇ ਹੋਤਿ ਭੁਤ੍ਤਾਵਸੇਸੋ, ਸਚੇ ਆਕਙ੍ਖਤਿ, ਭੁਞ੍ਜਿਤਬ੍ਬਂ. ਨੋ ਚੇ ਆਕਙ੍ਖਤਿ, ਅਪ੍ਪਹਰਿਤੇ ਵਾ ਛਡ੍ਡੇਤਬ੍ਬਂ, ਅਪ੍ਪਾਣਕੇ ਵਾ ਉਦਕੇ ਓਪਿਲਾਪੇਤਬ੍ਬਂ, ਤੇਨ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬਂ, ਅਵਕ੍ਕਾਰਪਾਤਿ ਧੋਵਿਤ੍ਵਾ ਪਟਿਸਾਮੇਤਬ੍ਬਾ, ਪਾਨੀਯਂ ਪਰਿਭੋਜਨੀਯਂ ਪਟਿਸਾਮੇਤਬ੍ਬਂ, ਭਤ੍ਤਗ੍ਗਂ ਸਮ੍ਮਜ੍ਜਿਤਬ੍ਬਂ. ਯੋ ਪਸ੍ਸਤਿ ਪਾਨੀਯਘਟਂ ਵਾ ਪਰਿਭੋਜਨੀਯਘਟਂ ਵਾ ਵਚ੍ਚਘਟਂ ਵਾ ਰਿਤ੍ਤਂ ਤੁਚ੍ਛਂ, ਤੇਨ ਉਪਟ੍ਠਾਪੇਤਬ੍ਬਂ. ਸਚਸ੍ਸ ਹੋਤਿ ਅਵਿਸਯ੍ਹਂ, ਹਤ੍ਥਵਿਕਾਰੇਨ ਦੁਤਿਯਂ ਆਮਨ੍ਤੇਤ੍ਵਾ ਹਤ੍ਥਵਿਲਙ੍ਘਕੇਨ ਉਪਟ੍ਠਾਪੇਤਬ੍ਬਂ, ਨ ਚ ਤਪ੍ਪਚ੍ਚਯਾ ਵਾਚਾ ਭਿਨ੍ਦਿਤਬ੍ਬਾਤਿ. ਇਦਂ ਪਿਣ੍ਡਚਾਰਿਕਵਤ੍ਤਂ.

੧੯੦. ਆਰਞ੍ਞਿਕਵਤ੍ਤੇ ਆਰਞ੍ਞਿਕੇਨ ਭਿਕ੍ਖੁਨਾ ਕਾਲਸ੍ਸੇਵ ਉਟ੍ਠਾਯ ਪਤ੍ਤਂ ਥਵਿਕਾਯ ਪਕ੍ਖਿਪਿਤ੍ਵਾ ਅਂਸੇ ਲਗ੍ਗੇਤ੍ਵਾ ਚੀਵਰਂ ਖਨ੍ਧੇ ਕਰਿਤ੍ਵਾ ਉਪਾਹਨਾ ਆਰੋਹਿਤ੍ਵਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਥਕੇਤ੍ਵਾ ਵਸਨਟ੍ਠਾਨਤੋ ਨਿਕ੍ਖਮਿਤਬ੍ਬਂ. ‘‘ਇਦਾਨਿ ਗਾਮਂ ਪਵਿਸਿਸ੍ਸਾਮਾ’’ਤਿ ਉਪਾਹਨਾ ਓਮੁਞ੍ਚਿਤ੍ਵਾ ਨੀਚਂ ਕਤ੍ਵਾ ਪਪ੍ਫੋਟੇਤ੍ਵਾ ਥਵਿਕਾਯ ਪਕ੍ਖਿਪਿਤ੍ਵਾ ਅਂਸੇ ਲਗ੍ਗੇਤ੍ਵਾ ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਸਾਧੁਕਂ ਅਤਰਮਾਨੇਨ ਗਾਮੋ ਪਵਿਸਿਤਬ੍ਬੋ. ਸੁਪ੍ਪਟਿਚ੍ਛਨ੍ਨੇਨ ਅਨ੍ਤਰਘਰੇ ਗਨ੍ਤਬ੍ਬਨ੍ਤਿਆਦਿ ਸਬ੍ਬਂ ਗਮਨਵਿਧਾਨਂ ਇਧਾਪਿ ਭਤ੍ਤਗ੍ਗਵਤ੍ਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਨਿਵੇਸਨਂ ਪਵਿਸਨ੍ਤੇਨ ਸਲ੍ਲਕ੍ਖੇਤਬ੍ਬਂ ‘‘ਇਮਿਨਾ ਪਵਿਸਿਸ੍ਸਾਮਿ, ਇਮਿਨਾ ਨਿਕ੍ਖਮਿਸ੍ਸਾਮੀ’’ਤਿਆਦਿ ਸਬ੍ਬਂ ਭਿਕ੍ਖਾਚਾਰਵਿਧਾਨਂ ਪਿਣ੍ਡਚਾਰਿਕਵਤ੍ਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਆਰਞ੍ਞਿਕੇਨ ਭਿਕ੍ਖੁਨਾ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਭਾਜਨਾਨਿ ਨਪ੍ਪਹੋਨ੍ਤਿ, ਪਾਨੀਯਮੇਵ ਪਰਿਭੋਜਨੀਯਮ੍ਪਿ ਕਤ੍ਵਾ ਉਪਟ੍ਠਾਪੇਤਬ੍ਬਂ. ਭਾਜਨਂ ਅਲਭਨ੍ਤੇਨ ਵੇਲ਼ੁਨਾਲ਼ਿਕਾਯਪਿ ਉਪਟ੍ਠਾਪੇਤਬ੍ਬਂ. ਤਮ੍ਪਿ ਅਲਭਨ੍ਤਸ੍ਸ ਯਥਾ ਸਮੀਪੇ ਉਦਕਆਵਾਟੋ ਹੋਤਿ, ਏਵਂ ਕਾਤਬ੍ਬਂ. ਅਗ੍ਗਿ ਉਪਟ੍ਠਾਪੇਤਬ੍ਬੋ, ਅਰਣਿਸਹਿਤਂ ਉਪਟ੍ਠਾਪੇਤਬ੍ਬਂ, ਅਰਣਿਸਹਿਤੇ ਸਤਿ ਅਗ੍ਗਿਂ ਅਕਾਤੁਮ੍ਪਿ ਵਟ੍ਟਤਿ. ਯਥਾ ਚ ਆਰਞ੍ਞਿਕਸ੍ਸ, ਏਵਂ ਕਨ੍ਤਾਰਪ੍ਪਟਿਪਨ੍ਨਸ੍ਸਪਿ ਅਰਣਿਸਹਿਤਂ ਇਚ੍ਛਿਤਬ੍ਬਂ. ਗਣਵਾਸਿਨੋ ਪਨ ਤੇਨ ਵਿਨਾਪਿ ਵਟ੍ਟਤਿ. ਕਤ੍ਤਰਦਣ੍ਡੋ ਉਪਟ੍ਠਾਪੇਤਬ੍ਬੋ, ਨਕ੍ਖਤ੍ਤਪਦਾਨਿ ਉਗ੍ਗਹੇਤਬ੍ਬਾਨਿ ਸਕਲਾਨਿ ਵਾ ਏਕਦੇਸਾਨਿ ਵਾ, ਦਿਸਾਕੁਸਲੇਨ ਭਵਿਤਬ੍ਬਂ. ਇਦਂ ਆਰਞ੍ਞਿਕਵਤ੍ਤਂ.

੧੯੧. ਸੇਨਾਸਨਵਤ੍ਤੇ ਯਸ੍ਮਿਂ ਵਿਹਾਰੇ ਵਿਹਰਤਿ, ਸਚੇ ਸੋ ਵਿਹਾਰੋ ਉਕ੍ਲਾਪੋ ਹੋਤਿ, ਸਚੇ ਉਸ੍ਸਹਤਿ, ਸੋਧੇਤਬ੍ਬੋ. ਵਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀਵਰਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਨਿਸੀਦਨਪਚ੍ਚਤ੍ਥਰਣਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਭਿਸਿਬਿਮ੍ਬੋਹਨਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਮਞ੍ਚੋ ਨੀਚਂ ਕਤ੍ਵਾ ਸਾਧੁਕਂ ਅਪਟਿਘਂਸਨ੍ਤੇਨ ਅਸਙ੍ਘਟ੍ਟੇਨ੍ਤੇਨ ਕਵਾਟਪੀਠਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ, ਪੀਠਂ ਨੀਚਂ ਕਤ੍ਵਾ ਸਾਧੁਕਂ ਅਪਟਿਘਂਸਨ੍ਤੇਨ ਅਸਙ੍ਘਟ੍ਟੇਨ੍ਤੇਨ ਕਵਾਟਪੀਠਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਮਞ੍ਚਪਟਿਪਾਦਕਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਾ, ਖੇਲ਼ਮਲ੍ਲਕੋ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ, ਅਪਸ੍ਸੇਨਫਲਕਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਭੂਮਤ੍ਥਰਣਂ ਯਥਾਪਞ੍ਞਤ੍ਤਂ ਸਲ੍ਲਕ੍ਖੇਤ੍ਵਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਸਚੇ ਵਿਹਾਰੇ ਸਨ੍ਤਾਨਕਂ ਹੋਤਿ, ਉਲ੍ਲੋਕਾ ਪਠਮਂ ਓਹਾਰੇਤਬ੍ਬਂ, ਆਲੋਕਸਨ੍ਧਿਕਣ੍ਣਭਾਗਾ ਪਮਜ੍ਜਿਤਬ੍ਬਾ. ਸਚੇ ਗੇਰੁਕਪਰਿਕਮ੍ਮਕਤਾ ਭਿਤ੍ਤਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਕਾਲ਼ਵਣ੍ਣਕਤਾ ਭੂਮਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਅਕਤਾ ਹੋਤਿ ਭੂਮਿ, ਉਦਕੇਨ ਪਰਿਪ੍ਫੋਸਿਤ੍ਵਾ ਪਰਿਪ੍ਫੋਸਿਤ੍ਵਾ ਸਮ੍ਮਜ੍ਜਿਤਬ੍ਬਾ ‘‘ਮਾ ਵਿਹਾਰੋ ਰਜੇਨ ਉਹਞ੍ਞੀ’’ਤਿ, ਸਙ੍ਕਾਰਂ ਵਿਚਿਨਿਤ੍ਵਾ ਏਕਮਨ੍ਤਂ ਛਡ੍ਡੇਤਬ੍ਬਂ.

ਨ ਭਿਕ੍ਖੁਸਾਮਨ੍ਤਾ ਸੇਨਾਸਨਂ ਪਪ੍ਫੋਟੇਤਬ੍ਬਂ, ਨ ਵਿਹਾਰਸਾਮਨ੍ਤਾ ਸੇਨਾਸਨਂ ਪਪ੍ਫੋਟੇਤਬ੍ਬਂ, ਨ ਪਾਨੀਯਸਾਮਨ੍ਤਾ ਸੇਨਾਸਨਂ ਪਪ੍ਫੋਟੇਤਬ੍ਬਂ, ਨ ਪਰਿਭੋਜਨੀਯਸਾਮਨ੍ਤਾ ਸੇਨਾਸਨਂ ਪਪ੍ਫੋਟੇਤਬ੍ਬਂ, ਨ ਪਟਿਵਾਤੇ ਅਙ੍ਗਣੇ ਸੇਨਾਸਨਂ ਪਪ੍ਫੋਟੇਤਬ੍ਬਂ, ਅਧੋਵਾਤੇ ਸੇਨਾਸਨਂ ਪਪ੍ਫੋਟੇਤਬ੍ਬਂ.

ਭੂਮਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ, ਮਞ੍ਚਪਟਿਪਾਦਕਾ ਏਕਮਨ੍ਤਂ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਭਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਾ, ਮਞ੍ਚੋ ਏਕਮਨ੍ਤਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪਟਿਘਂਸਨ੍ਤੇਨ ਅਸਙ੍ਘਟ੍ਟੇਨ੍ਤੇਨ ਕਵਾਟਪੀਠਂ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬੋ, ਪੀਠਂ ਏਕਮਨ੍ਤਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪਟਿਘਂਸਨ੍ਤੇਨ ਅਸਙ੍ਘਟ੍ਟੇਨ੍ਤੇਨ ਕਵਾਟਪੀਠਂ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ, ਭਿਸਿਬਿਮ੍ਬੋਹਨਂ ਏਕਮਨ੍ਤਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ, ਨਿਸੀਦਨਪਚ੍ਚਤ੍ਥਰਣਂ ਓਤਾਪੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ, ਖੇਲ਼ਮਲ੍ਲਕੋ ਏਕਮਨ੍ਤਂ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬੋ, ਅਪਸ੍ਸੇਨਫਲਕਂ ਏਕਮਨ੍ਤਂ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਯਥਾਠਾਨੇ ਠਪੇਤਬ੍ਬਂ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ, ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ, ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ, ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ.

ਸਚੇ ਪੁਰਤ੍ਥਿਮਾ ਸਰਜਾ ਵਾਤਾ ਵਾਯਨ੍ਤਿ, ਪੁਰਤ੍ਥਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਪਚ੍ਛਿਮਾ, ਉਤ੍ਤਰਾ, ਦਕ੍ਖਿਣਾ ਸਰਜਾ ਵਾਤਾ ਵਾਯਨ੍ਤਿ, ਦਕ੍ਖਿਣਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਸੀਤਕਾਲੋ ਹੋਤਿ, ਦਿਵਾ ਵਾਤਪਾਨਾ ਵਿਵਰਿਤਬ੍ਬਾ, ਰਤ੍ਤਿਂ ਥਕੇਤਬ੍ਬਾ. ਸਚੇ ਉਣ੍ਹਕਾਲੋ ਹੋਤਿ, ਦਿਵਾ ਵਾਤਪਾਨਾ ਥਕੇਤਬ੍ਬਾ, ਰਤ੍ਤਿਂ ਵਿਵਰਿਤਬ੍ਬਾ.

ਸਚੇ ਉਕ੍ਲਾਪਂ ਹੋਤਿ, ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ, ਕੋਟ੍ਠਕੋ ਸਮ੍ਮਜ੍ਜਿਤਬ੍ਬੋ, ਉਪਟ੍ਠਾਨਸਾਲਾ ਸਮ੍ਮਜ੍ਜਿਤਬ੍ਬਾ, ਅਗ੍ਗਿਸਾਲਾ ਸਮ੍ਮਜ੍ਜਿਤਬ੍ਬਾ, ਵਚ੍ਚਕੁਟਿ ਸਮ੍ਮਜ੍ਜਿਤਬ੍ਬਾ. ਸਚੇ ਪਾਨੀਯਂ ਨ ਹੋਤਿ, ਪਾਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਪਰਿਭੋਜਨੀਯਂ ਨ ਹੋਤਿ, ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਆਚਮਨਕੁਮ੍ਭਿਯਾ ਉਦਕਂ ਨ ਹੋਤਿ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ.

ਸਚੇ ਵੁਡ੍ਢੇਨ ਸਦ੍ਧਿਂ ਏਕਵਿਹਾਰੇ ਵਿਹਰਤਿ, ਨ ਵੁਡ੍ਢਂ ਅਨਾਪੁਚ੍ਛਾ ਉਦ੍ਦੇਸੋ ਦਾਤਬ੍ਬੋ, ਨ ਪਰਿਪੁਚ੍ਛਾ ਦਾਤਬ੍ਬਾ, ਨ ਸਜ੍ਝਾਯੋ ਕਾਤਬ੍ਬੋ, ਨ ਧਮ੍ਮੋ ਭਾਸਿਤਬ੍ਬੋ, ਨ ਪਦੀਪੋ ਕਾਤਬ੍ਬੋ, ਨ ਪਦੀਪੋ ਵਿਜ੍ਝਾਪੇਤਬ੍ਬੋ, ਨ ਵਾਤਪਾਨਾ ਵਿਵਰਿਤਬ੍ਬਾ, ਨ ਵਾਤਪਾਨਾ ਥਕੇਤਬ੍ਬਾ. ਦ੍ਵਾਰਂ ਨਾਮ ਯਸ੍ਮਾ ਮਹਾਵਲ਼ਞ੍ਜਂ, ਤਸ੍ਮਾ ਤਤ੍ਥ ਆਪੁਚ੍ਛਨਕਿਚ੍ਚਂ ਨਤ੍ਥਿ, ਸੇਸਾਨਿ ਪਨ ਉਦ੍ਦੇਸਦਾਨਾਦੀਨਿ ਆਪੁਚ੍ਛਿਤ੍ਵਾਵ ਕਾਤਬ੍ਬਾਨਿ, ਦੇਵਸਿਕਮ੍ਪਿ ਆਪੁਚ੍ਛਿਤੁਂ ਵਟ੍ਟਤਿ. ਅਥਾਪਿ ‘‘ਭਨ੍ਤੇ, ਆਪੁਚ੍ਛਿਤਮੇਵ ਹੋਤੂ’’ਤਿ ਵੁਤ੍ਤੇ ਵੁਡ੍ਢਤਰੋ ‘‘ਸਾਧੂ’’ਤਿ ਸਮ੍ਪਟਿਚ੍ਛਤਿ, ਸਯਮੇਵ ਵਾ ‘‘ਤ੍ਵਂ ਯਥਾਸੁਖਂ ਵਿਹਰਾਹੀ’’ਤਿ ਵਦਤਿ, ਏਵਮ੍ਪਿ ਵਟ੍ਟਤਿ. ਸਭਾਗਸ੍ਸ ਵਿਸ੍ਸਾਸੇਨਪਿ ਵਟ੍ਟਤਿਯੇਵ. ਸਚੇ ਵੁਡ੍ਢੇਨ ਸਦ੍ਧਿਂ ਏਕਚਙ੍ਕਮੇ ਚਙ੍ਕਮਤਿ, ਯੇਨ ਵੁਡ੍ਢੋ, ਤੇਨ ਪਰਿਵਤ੍ਤੇਤਬ੍ਬਂ, ਨ ਚ ਵੁਡ੍ਢੋ ਸਙ੍ਘਾਟਿਕਣ੍ਣੇਨ ਘਟ੍ਟੇਤਬ੍ਬੋ. ਇਦਂ ਸੇਨਾਸਨਵਤ੍ਤਂ.

੧੯੨. ਜਨ੍ਤਾਘਰਵਤ੍ਤੇ ਯੋ ਪਠਮਂ ਜਨ੍ਤਾਘਰਂ ਗਚ੍ਛਤਿ, ਸਚੇ ਛਾਰਿਕਾ ਉਸ੍ਸਨ੍ਨਾ ਹੋਤਿ, ਛਾਰਿਕਾ ਛਡ੍ਡੇਤਬ੍ਬਾ. ਸਚੇ ਉਕ੍ਲਾਪਂ ਹੋਤਿ, ਜਨ੍ਤਾਘਰਂ ਸਮ੍ਮਜ੍ਜਿਤਬ੍ਬਂ, ਪਰਿਭਣ੍ਡਂ ਸਮ੍ਮਜ੍ਜਿਤਬ੍ਬਂ, ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ, ਕੋਟ੍ਠਕੋ ਸਮ੍ਮਜ੍ਜਿਤਬ੍ਬੋ, ਜਨ੍ਤਾਘਰਸਾਲਾ ਸਮ੍ਮਜ੍ਜਿਤਬ੍ਬਾ, ਚੁਣ੍ਣਂ ਸਨ੍ਨੇਤਬ੍ਬਂ, ਮਤ੍ਤਿਕਾ ਤੇਮੇਤਬ੍ਬਾ, ਉਦਕਦੋਣਿਯਾ ਉਦਕਂ ਆਸਿਞ੍ਚਿਤਬ੍ਬਂ. ਜਨ੍ਤਾਘਰਂ ਪਵਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍ਵਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਂ ਪਵਿਸਿਤਬ੍ਬਂ, ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ, ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ. ਸਚੇ ਉਸ੍ਸਹਤਿ, ਜਨ੍ਤਾਘਰੇ ਥੇਰਾਨਂ ਭਿਕ੍ਖੂਨਂ ਪਰਿਕਮ੍ਮਂ ਕਾਤਬ੍ਬਂ. ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਾ ਨਿਕ੍ਖਮਿਤਬ੍ਬਂ. ਸਚੇ ਉਸ੍ਸਹਤਿ, ਉਦਕੇਪਿ ਥੇਰਾਨਂ ਭਿਕ੍ਖੂਨਂ ਪਰਿਕਮ੍ਮਂ ਕਾਤਬ੍ਬਂ, ਨ ਥੇਰਾਨਂ ਭਿਕ੍ਖੂਨਂ ਪੁਰਤੋ ਨਹਾਯਿਤਬ੍ਬਂ, ਨ ਉਪਰਿਤੋ ਨਹਾਯਿਤਬ੍ਬਂ, ਨਹਾਤੇਨ ਉਤ੍ਤਰਨ੍ਤੇਨ ਓਤਰਨ੍ਤਾਨਂ ਮਗ੍ਗੋ ਦਾਤਬ੍ਬੋ. ਯੋ ਪਚ੍ਛਾ ਜਨ੍ਤਾਘਰਾ ਨਿਕ੍ਖਮਤਿ, ਸਚੇ ਜਨ੍ਤਾਘਰਂ ਚਿਕ੍ਖਲ੍ਲਂ ਹੋਤਿ, ਧੋਵਿਤਬ੍ਬਂ, ਮਤ੍ਤਿਕਾਦੋਣਿਂ ਧੋਵਿਤ੍ਵਾ ਜਨ੍ਤਾਘਰਪੀਠਂ ਪਟਿਸਾਮੇਤ੍ਵਾ ਅਗ੍ਗਿਂ ਵਿਜ੍ਝਾਪੇਤ੍ਵਾ ਦ੍ਵਾਰਂ ਥਕੇਤ੍ਵਾ ਪਕ੍ਕਮਿਤਬ੍ਬਂ. ਇਦਂ ਜਨ੍ਤਾਘਰਵਤ੍ਤਂ.

੧੯੩. ਵਚ੍ਚਕੁਟਿਵਤ੍ਤੇ ਯੋ ਵਚ੍ਚਕੁਟਿਂ ਗਚ੍ਛਤਿ, ਬਹਿ ਠਿਤੇਨ ਉਕ੍ਕਾਸਿਤਬ੍ਬਂ, ਅਨ੍ਤੋ ਨਿਸਿਨ੍ਨੇਨਪਿ ਉਕ੍ਕਾਸਿਤਬ੍ਬਂ, ਚੀਵਰਵਂਸੇ ਵਾ ਚੀਵਰਰਜ੍ਜੁਯਾ ਵਾ ਚੀਵਰਂ ਨਿਕ੍ਖਿਪਿਤ੍ਵਾ ਸਾਧੁਕਂ ਅਤਰਮਾਨੇਨ ਵਚ੍ਚਕੁਟਿ ਪਵਿਸਿਤਬ੍ਬਾ, ਨਾਤਿਸਹਸਾ ਪਵਿਸਿਤਬ੍ਬਾ, ਨ ਉਬ੍ਭਜਿਤ੍ਵਾ ਪਵਿਸਿਤਬ੍ਬਾ, ਵਚ੍ਚਪਾਦੁਕਾਯ ਠਿਤੇਨ ਉਬ੍ਭਜਿਤਬ੍ਬਂ, ਨ ਨਿਤ੍ਥੁਨਨ੍ਤੇਨ ਵਚ੍ਚੋ ਕਾਤਬ੍ਬੋ, ਨ ਦਨ੍ਤਕਟ੍ਠਂ ਖਾਦਨ੍ਤੇਨ ਵਚ੍ਚੋ ਕਾਤਬ੍ਬੋ, ਨ ਬਹਿਦ੍ਧਾ ਵਚ੍ਚਦੋਣਿਕਾਯ ਵਚ੍ਚੋ ਕਾਤਬ੍ਬੋ, ਨ ਬਹਿਦ੍ਧਾ ਪਸ੍ਸਾਵਦੋਣਿਕਾਯ ਪਸ੍ਸਾਵੋ ਕਾਤਬ੍ਬੋ, ਨ ਪਸ੍ਸਾਵਦੋਣਿਕਾਯ ਖੇਲ਼ੋ ਕਾਤਬ੍ਬੋ, ਫਾਲਿਤੇਨ ਵਾ ਖਰੇਨ ਵਾ ਗਣ੍ਠਿਕੇਨ ਵਾ ਕਣ੍ਟਕੇਨ ਵਾ ਸੁਸਿਰੇਨ ਵਾ ਪੂਤਿਨਾ ਵਾ ਕਟ੍ਠੇਨ ਨ ਅਵਲੇਖਿਤਬ੍ਬਂ, ਅਵਲੇਖਨਕਟ੍ਠਂ ਪਨ ਅਗ੍ਗਹੇਤ੍ਵਾ ਪਵਿਟ੍ਠਸ੍ਸ ਆਪਤ੍ਤਿ ਨਤ੍ਥਿ, ਨ ਅਵਲੇਖਨਕਟ੍ਠਂ ਵਚ੍ਚਕੂਪਮ੍ਹਿ ਪਾਤੇਤਬ੍ਬਂ, ਵਚ੍ਚਪਾਦੁਕਾਯ ਠਿਤੇਨ ਪਟਿਚ੍ਛਾਦੇਤਬ੍ਬਂ, ਨਾਤਿਸਹਸਾ ਨਿਕ੍ਖਮਿਤਬ੍ਬਂ, ਨ ਉਬ੍ਭਜਿਤ੍ਵਾ ਨਿਕ੍ਖਮਿਤਬ੍ਬਂ, ਆਚਮਨਪਾਦੁਕਾਯ ਠਿਤੇਨ ਉਬ੍ਭਜਿਤਬ੍ਬਂ, ਨ ਚਪੁਚਪੁਕਾਰਕਂ ਆਚਮੇਤਬ੍ਬਂ, ਨ ਆਚਮਨਸਰਾਵਕੇ ਉਦਕਂ ਸੇਸੇਤਬ੍ਬਂ. ਇਦਞ੍ਚ ਸਬ੍ਬਸਾਧਾਰਣਟ੍ਠਾਨਂ ਸਨ੍ਧਾਯ ਵੁਤ੍ਤਂ. ਤਤ੍ਰ ਹਿ ਅਞ੍ਞੇ ਅਞ੍ਞੇ ਆਗਚ੍ਛਨ੍ਤਿ, ਤਸ੍ਮਾ ਉਦਕਂ ਨ ਸੇਸੇਤਬ੍ਬਂ. ਯਂ ਪਨ ਸਙ੍ਘਿਕੇਪਿ ਵਿਹਾਰੇ ਏਕਦੇਸੇ ਨਿਬਦ੍ਧਗਮਨਤ੍ਥਾਯ ਕਤਂ ਠਾਨਂ ਹੋਤਿ ਪੁਗ੍ਗਲਿਕਟ੍ਠਾਨਂ ਵਾ, ਤਸ੍ਮਿਂ ਵਟ੍ਟਤਿ. ਵਿਰੇਚਨਂ ਪਿਵਿਤ੍ਵਾ ਪੁਨਪ੍ਪੁਨਂ ਪਵਿਸਨ੍ਤਸ੍ਸਪਿ ਵਟ੍ਟਤਿਯੇਵ. ਆਚਮਨਪਾਦੁਕਾਯ ਠਿਤੇਨ ਪਟਿਚ੍ਛਾਦੇਤਬ੍ਬਂ.

ਸਚੇ ਵਚ੍ਚਕੁਟਿ ਉਹਤਾ ਹੋਤਿ ਬਹਿ ਵਚ੍ਚਮਕ੍ਖਿਤਾ, ਉਦਕਂ ਆਹਰਿਤ੍ਵਾ ਧੋਵਿਤਬ੍ਬਾ. ਉਦਕਂ ਅਤ੍ਥਿ, ਭਾਜਨਂ ਨਤ੍ਥਿ, ਅਸਨ੍ਤਂ ਨਾਮ ਹੋਤਿ. ਭਾਜਨਂ ਅਤ੍ਥਿ, ਉਦਕਂ ਨਤ੍ਥਿ, ਏਤਮ੍ਪਿ ਅਸਨ੍ਤਂ. ਉਭਯਸ੍ਮਿਂ ਅਸਤਿ ਅਸਨ੍ਤਮੇਵ, ਕਟ੍ਠੇਨ ਵਾ ਕੇਨਚਿ ਵਾ ਪੁਞ੍ਛਿਤ੍ਵਾ ਗਨ੍ਤਬ੍ਬਂ. ਸਚੇ ਅਵਲੇਖਨਪਿਟਕੋ ਪੂਰਿਤੋ ਹੋਤਿ, ਅਵਲੇਖਨਕਟ੍ਠਂ ਛਡ੍ਡੇਤਬ੍ਬਂ. ਸਚੇ ਕਚਵਰਂ ਅਤ੍ਥਿ, ਵਚ੍ਚਕੁਟਿ ਸਮ੍ਮਜ੍ਜਿਤਬ੍ਬਾ, ਪਰਿਭਣ੍ਡਂ ਸਮ੍ਮਜ੍ਜਿਤਬ੍ਬਂ, ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ, ਕੋਟ੍ਠਕੋ ਸਮ੍ਮਜ੍ਜਿਤਬ੍ਬੋ. ਸਚੇ ਆਚਮਨਕੁਮ੍ਭਿਯਾ ਉਦਕਂ ਨ ਹੋਤਿ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ.

‘‘ਨ, ਭਿਕ੍ਖਵੇ, ਵਚ੍ਚਂ ਕਤ੍ਵਾ ਸਤਿ ਉਦਕੇ ਨਾਚਮੇਤਬ੍ਬਂ, ਯੋ ਨਾਚਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਚੂਲ਼ਵ. ੩੭੩) ਵਚਨਤੋ ਉਦਕੇ ਸਤਿ ਉਦਕਕਿਚ੍ਚਂ ਅਕਰੋਨ੍ਤਸ੍ਸ ਆਪਤ੍ਤਿ. ਸਚੇ ਉਦਕਂ ਅਤ੍ਥਿ, ਪਟਿਚ੍ਛਨ੍ਨਟ੍ਠਾਨਂ ਪਨ ਨਤ੍ਥਿ, ਭਾਜਨੇਨ ਨੀਹਰਿਤ੍ਵਾ ਆਚਮਿਤਬ੍ਬਂ. ਭਾਜਨੇ ਅਸਤਿ ਪਤ੍ਤੇਨ ਨੀਹਰਿਤਬ੍ਬਂ, ਪਤ੍ਤੇਪਿ ਅਸਤਿ ਅਸਨ੍ਤਂ ਨਾਮ ਹੋਤਿ. ‘‘ਇਦਂ ਅਤਿਵਿਵਟਂ, ਪੁਰਤੋ ਅਞ੍ਞਂ ਉਦਕਂ ਭਵਿਸ੍ਸਤੀ’’ਤਿ ਗਤਸ੍ਸ ਉਦਕਂ ਅਲਭਨ੍ਤਸ੍ਸੇਵ ਭਿਕ੍ਖਾਚਾਰਵੇਲਾ ਹੋਤਿ, ਕਟ੍ਠੇਨ ਵਾ ਕੇਨਚਿ ਵਾ ਪੁਞ੍ਛਿਤ੍ਵਾ ਗਨ੍ਤਬ੍ਬਂ, ਭੁਞ੍ਜਿਤੁਮ੍ਪਿ ਅਨੁਮੋਦਿਤੁਮ੍ਪਿ ਵਟ੍ਟਤਿ. ‘‘ਨ, ਭਿਕ੍ਖਵੇ, ਵਚ੍ਚਕੁਟਿਯਾ ਯਥਾਵੁਡ੍ਢਂ ਵਚ੍ਚੋ ਕਾਤਬ੍ਬੋ, ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਆਗਤਪਟਿਪਾਟਿਯਾ ਵਚ੍ਚਂ ਕਾਤੁ’’ਨ੍ਤਿ (ਚੁਲ਼ਵ. ੩੭੩) ਵਚਨਤੋ ਵਚ੍ਚਕੁਟਿਂ ਪਵਿਸਨ੍ਤੇਨ ਆਗਤਪਟਿਪਾਟਿਯਾ ਪਵਿਸਿਤਬ੍ਬਂ. ਵਚ੍ਚਕੁਟਿਯਂ ਪਸ੍ਸਾਵਟ੍ਠਾਨੇ ਨਹਾਨਤਿਤ੍ਥੇਤਿ ਤੀਸੁਪਿ ਆਗਤਪਟਿਪਾਟਿਯੇਵ ਪਮਾਣਂ. ਇਦਂ ਵਚ੍ਚਕੁਟਿਵਤ੍ਤਂ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਉਪਜ੍ਝਾਯਾਦਿਵਤ੍ਤਵਿਨਿਚ੍ਛਯਕਥਾ ਸਮਤ੍ਤਾ.