੨੬. ਵਸ੍ਸੂਪਨਾਯਿਕਵਿਨਿਚ੍ਛਯਕਥਾ

੧੭੯. ਵਸ੍ਸੂਪਨਾਯਿਕਾਤਿ ਏਤ੍ਥ ਪੁਰਿਮਿਕਾ ਪਚ੍ਛਿਮਿਕਾਤਿ ਦੁਵੇ ਵਸ੍ਸੂਪਨਾਯਿਕਾ. ਤਤ੍ਥ (ਮਹਾਵ. ਅਟ੍ਠ. ੧੮੪ ਆਦਯੋ) ਆਸਾਲ਼੍ਹੀਪੁਣ੍ਣਮਾਯ ਅਨਨ੍ਤਰੇ ਪਾਟਿਪਦਦਿਵਸੇ ਪੁਰਿਮਿਕਾ ਉਪਗਨ੍ਤਬ੍ਬਾ, ਪਚ੍ਛਿਮਿਕਾ ਪਨ ਆਸਾਲ਼੍ਹੀਪੁਣ੍ਣਮਤੋ ਅਪਰਾਯ ਪੁਣ੍ਣਮਾਯ ਅਨਨ੍ਤਰੇ ਪਾਟਿਪਦਦਿਵਸੇ. ਉਪਗਚ੍ਛਨ੍ਤੇਨ ਚ ਵਿਹਾਰਂ ਪਟਿਜਗ੍ਗਿਤ੍ਵਾ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਾਪੇਤ੍ਵਾ ਸਬ੍ਬਂ ਚੇਤਿਯਵਨ੍ਦਨਾਦਿਸਾਮੀਚਿਕਮ੍ਮਂ ਨਿਟ੍ਠਾਪੇਤ੍ਵਾ ‘‘ਇਮਸ੍ਮਿਂ ਵਿਹਾਰੇ ਇਮਂ ਤੇਮਾਸਂ ਵਸ੍ਸਂ ਉਪੇਮੀ’’ਤਿ ਸਕਿਂ ਵਾ ਦ੍ਵਤ੍ਤਿਕ੍ਖਤ੍ਤੁਂ ਵਾ ਵਾਚਂ ਨਿਚ੍ਛਾਰੇਤ੍ਵਾ ਵਸ੍ਸਂ ਉਪਗਨ੍ਤਬ੍ਬਂ. ਸਚੇਪਿ ‘‘ਇਧ ਵਸਿਸ੍ਸਾਮੀ’’ਤਿ ਆਲਯੋ ਅਤ੍ਥਿ, ਅਸਤਿਯਾ ਪਨ ਵਸ੍ਸਂ ਨ ਉਪੇਤਿ, ਗਹਿਤਸੇਨਾਸਨਂ ਸੁਗ੍ਗਹਿਤਂ, ਛਿਨ੍ਨਵਸ੍ਸੋ ਨ ਹੋਤਿ, ਪਵਾਰੇਤੁਂ ਲਭਤਿਯੇਵ. ਵਿਨਾਪਿ ਹਿ ਵਚੀਭੇਦਂ ਆਲਯਕਰਣਮਤ੍ਤੇਨਪਿ ਵਸ੍ਸਂ ਉਪਗਤਮੇਵ ਹੋਤਿ. ‘‘ਇਧ ਵਸ੍ਸਂ ਵਸਿਸ੍ਸਾਮੀ’’ਤਿ ਚਿਤ੍ਤੁਪ੍ਪਾਦੋਯੇਵੇਤ੍ਥ ਆਲਯੋ ਨਾਮ.

‘‘ਨ, ਭਿਕ੍ਖਵੇ, ਤਦਹੁਵਸ੍ਸੂਪਨਾਯਿਕਾਯ ਵਸ੍ਸਂ ਅਨੁਪਗਨ੍ਤੁਕਾਮੇਨ ਸਞ੍ਚਿਚ੍ਚ ਆਵਾਸੋ ਅਤਿਕ੍ਕਮਿਤਬ੍ਬੋ, ਯੋ ਅਤਿਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੮੬) ਵਚਨਤੋ ਵਸ੍ਸੂਪਨਾਯਿਕਦਿਵਸੇ ਵਸ੍ਸਂ ਅਨੁਪਗਨ੍ਤੁਕਾਮੋ ਵਿਹਾਰਸੀਮਂ ਅਤਿਕ੍ਕਮਤਿ, ਵਿਹਾਰਗਣਨਾਯ ਦੁਕ੍ਕਟਂ. ਸਚੇ ਹਿ ਤਂ ਦਿਵਸਂ ਵਿਹਾਰਸਤਸ੍ਸ ਉਪਚਾਰਂ ਓਕ੍ਕਮਿਤ੍ਵਾ ਅਤਿਕ੍ਕਮਤਿ, ਸਤਂ ਆਪਤ੍ਤਿਯੋ. ਸਚੇ ਪਨ ਵਿਹਾਰਂ ਅਤਿਕ੍ਕਮਿਤ੍ਵਾ ਅਞ੍ਞਸ੍ਸ ਵਿਹਾਰਸ੍ਸ ਉਪਚਾਰਂ ਅਨੋਕ੍ਕਮਿਤ੍ਵਾਵ ਨਿਵਤ੍ਤਤਿ, ਏਕਾਵ ਆਪਤ੍ਤਿ. ਕੇਨਚਿ ਅਨ੍ਤਰਾਯੇਨ ਪੁਰਿਮਿਕਂ ਅਨੁਪਗਤੇਨ ਪਚ੍ਛਿਮਿਕਾ ਉਪਗਨ੍ਤਬ੍ਬਾ.

‘‘ਨ, ਭਿਕ੍ਖਵੇ, ਅਸੇਨਾਸਨਿਕੇਨ ਵਸ੍ਸਂ ਉਪਗਨ੍ਤਬ੍ਬਂ, ਯੋ ਉਪਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੨੦੪) ਵਚਨਤੋ ਯਸ੍ਸ ਪਞ੍ਚਨ੍ਨਂ ਛਦਨਾਨਂ ਅਞ੍ਞਤਰੇਨ ਛਨ੍ਨਂ ਯੋਜਿਤਦ੍ਵਾਰਬਨ੍ਧਨਂ ਸੇਨਾਸਨਂ ਨਤ੍ਥਿ, ਤੇਨ ਨ ਉਪਗਨ੍ਤਬ੍ਬਂ. ‘‘ਨ, ਭਿਕ੍ਖਵੇ, ਛਵਕੁਟਿਕਾਯ ਵਸ੍ਸਂ ਉਪਗਨ੍ਤਬ੍ਬਂ, ਯੋ ਉਪਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ(ਮਹਾਵ. ੨੦੪) ਆਦਿਵਚਨਤੋ ਛਵਕੁਟਿਕਾਯਂ ਛਤ੍ਤੇ ਚਾਟਿਯਞ੍ਚ ਉਪਗਨ੍ਤੁਂ ਨ ਵਟ੍ਟਤਿ. ਤਤ੍ਥ ਛਵਕੁਟਿਕਾ ਨਾਮ ਟਙ੍ਕਿਤਮਞ੍ਚਾਦਿਭੇਦਾ ਕੁਟਿ. ਤਤ੍ਥੇਵ ਉਪਗਨ੍ਤੁਂ ਨ ਵਟ੍ਟਤਿ, ਸੁਸਾਨੇ ਪਨ ਅਞ੍ਞਂ ਕੁਟਿਕਂ ਕਤ੍ਵਾ ਉਪਗਨ੍ਤੁਂ ਵਟ੍ਟਤਿ, ਛਤ੍ਤੇਪਿ ਚਤੂਸੁ ਥਮ੍ਭੇਸੁ ਛਤ੍ਤਂ ਠਪੇਤ੍ਵਾ ਆਵਰਣਂ ਕਤ੍ਵਾ ਦ੍ਵਾਰਂ ਯੋਜੇਤ੍ਵਾ ਉਪਗਨ੍ਤੁਂ ਵਟ੍ਟਤਿ, ਛਤ੍ਤਕੁਟਿ ਨਾਮੇਸਾ ਹੋਤਿ. ਚਾਟਿਯਾਪਿ ਮਹਨ੍ਤੇਨ ਕਪਲ੍ਲੇਨ ਛਤ੍ਤੇ ਵੁਤ੍ਤਨਯੇਨ ਕੁਟਿਕਂ ਕਤ੍ਵਾ ਉਪਗਨ੍ਤੁਂ ਵਟ੍ਟਤਿ.

‘‘ਨ, ਭਿਕ੍ਖਵੇ, ਰੁਕ੍ਖਸੁਸਿਰੇ ਵਸ੍ਸਂ ਉਪਗਨ੍ਤਬ੍ਬਂ, ਯੋ ਉਪਗਚ੍ਛੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੨੦੪) ਵਚਨਤੋ ਸੁਦ੍ਧੇ ਰੁਕ੍ਖਸੁਸਿਰੇ ਉਪਗਨ੍ਤੁਂ ਨ ਵਟ੍ਟਤਿ, ਮਹਨ੍ਤਸ੍ਸ ਪਨ ਰੁਕ੍ਖਸੁਸਿਰਸ੍ਸ ਅਨ੍ਤੋ ਪਦਰਚ੍ਛਦਨਂ ਕੁਟਿਕਂ ਕਤ੍ਵਾ ਪਵਿਸਨਦ੍ਵਾਰਂ ਯੋਜੇਤ੍ਵਾ ਉਪਗਨ੍ਤੁਂ ਵਟ੍ਟਤਿ, ਰੁਕ੍ਖਂ ਛਿਨ੍ਦਿਤ੍ਵਾ ਖਾਣੁਕਮਤ੍ਥਕੇ ਪਦਰਚ੍ਛਦਨਂ ਕੁਟਿਕਂ ਕਤ੍ਵਾਪਿ ਵਟ੍ਟਤਿਯੇਵ. ‘‘ਨ, ਭਿਕ੍ਖਵੇ, ਰੁਕ੍ਖਵਿਟਭਿਯਾ’’ਤਿ(ਮਹਾਵ. ੨੦੪) ਆਦਿਵਚਨਤੋ ਸੁਦ੍ਧੇ ਵਿਟਭਿਮਤ੍ਤੇ ਉਪਗਨ੍ਤੁਂ ਨ ਵਟ੍ਟਤਿ, ਮਹਾਵਿਟਪੇ ਪਨ ਅਟ੍ਟਕਂ ਬਨ੍ਧਿਤ੍ਵਾ ਤਤ੍ਥ ਪਦਰਚ੍ਛਦਨਂ ਕੁਟਿਕਂ ਕਤ੍ਵਾ ਦ੍ਵਾਰਂ ਯੋਜੇਤ੍ਵਾ ਉਪਗਨ੍ਤਬ੍ਬਂ.

‘‘ਅਨੁਜਾਨਾਮਿ, ਭਿਕ੍ਖਵੇ, ਵਜੇ ਵਸ੍ਸਂ ਉਪਗਨ੍ਤੁ’’ਨ੍ਤਿਆਦਿਵਚਨਤੋ ਵਜੇ ਸਤ੍ਥੇ ਨਾਵਾਯਞ੍ਚ ਉਪਗਨ੍ਤੁਂ ਵਟ੍ਟਤਿ. ਤਤ੍ਥ ਵਜੋਤਿ ਗੋਪਾਲਕਾਨਂ ਨਿਵਾਸਟ੍ਠਾਨਂ. ਵਜੇ ਵੁਟ੍ਠਿਤੇ ਵਜੇਨ ਸਦ੍ਧਿਂ ਗਤਸ੍ਸ ਵਸ੍ਸਚ੍ਛੇਦੇ ਅਨਾਪਤ੍ਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਯੇਨ ਵਜੋ, ਤੇਨ ਗਨ੍ਤੁ’’ਨ੍ਤਿ (ਮਹਾਵ. ੨੦੩) ਵੁਤ੍ਤਤ੍ਤਾ. ਸਤ੍ਥੇ ਵਸ੍ਸਂ ਉਪਗਚ੍ਛਨ੍ਤੇਨ ਪਨ ਵਸ੍ਸੂਪਨਾਯਿਕਦਿਵਸੇ ਉਪਾਸਕਾ ਵਤ੍ਤਬ੍ਬਾ ‘‘ਕੁਟਿਕਾ ਲਦ੍ਧੁਂ ਵਟ੍ਟਤੀ’’ਤਿ. ਸਚੇ ਕਰਿਤ੍ਵਾ ਦੇਨ੍ਤਿ, ਤਤ੍ਥ ਪਵਿਸਿਤ੍ਵਾ ‘‘ਇਧ ਵਸ੍ਸਂ ਉਪੇਮੀ’’ਤਿ ਤਿਕ੍ਖਤ੍ਤੁਂ ਵਤ੍ਤਬ੍ਬਂ. ਨੋ ਚੇ ਦੇਨ੍ਤਿ, ਸਾਲਾਸਙ੍ਖੇਪੇਨ ਠਿਤਸਕਟਸ੍ਸ ਹੇਟ੍ਠਾ ਉਪਗਨ੍ਤਬ੍ਬਂ. ਤਮ੍ਪਿ ਅਲਭਨ੍ਤੇਨ ਆਲਯੋ ਕਾਤਬ੍ਬੋ, ਸਤ੍ਥੇ ਪਨ ਵਸ੍ਸਂ ਉਪਗਨ੍ਤੁਂ ਨ ਵਟ੍ਟਤਿ. ਆਲਯੋ ਨਾਮ ‘‘ਇਧ ਵਸ੍ਸਂ ਵਸਿਸ੍ਸਾਮੀ’’ਤਿ ਚਿਤ੍ਤੁਪ੍ਪਾਦਮਤ੍ਤਂ. ਸਚੇ ਮਗ੍ਗਪ੍ਪਟਿਪਨ੍ਨੇਯੇਵ ਸਤ੍ਥੇ ਪਵਾਰਣਾਦਿਵਸੋ ਹੋਤਿ, ਤਤ੍ਥੇਵ ਪਵਾਰੇਤਬ੍ਬਂ. ਅਥ ਸਤ੍ਥੋ ਅਨ੍ਤੋਵਸ੍ਸੇਯੇਵ ਭਿਕ੍ਖੁਨਾ ਪਤ੍ਥਿਤਟ੍ਠਾਨਂ ਪਤ੍ਵਾ ਅਤਿਕ੍ਕਮਤਿ, ਪਤ੍ਥਿਤਟ੍ਠਾਨੇ ਵਸਿਤ੍ਵਾ ਤਤ੍ਥ ਭਿਕ੍ਖੂਹਿ ਸਦ੍ਧਿਂ ਪਵਾਰੇਤਬ੍ਬਂ. ਅਥਾਪਿ ਸਤ੍ਥੋ ਅਨ੍ਤੋਵਸ੍ਸੇਯੇਵ ਅਨ੍ਤਰਾ ਏਕਸ੍ਮਿਂ ਗਾਮੇ ਤਿਟ੍ਠਤਿ ਵਾ ਵਿਪ੍ਪਕਿਰਤਿ ਵਾ, ਤਸ੍ਮਿਂਯੇਵ ਗਾਮੇ ਭਿਕ੍ਖੂਹਿ ਸਦ੍ਧਿਂ ਵਸਿਤ੍ਵਾ ਪਵਾਰੇਤਬ੍ਬਂ, ਅਪ੍ਪਵਾਰੇਤ੍ਵਾ ਤਤੋ ਪਰਂ ਗਨ੍ਤੁਂ ਨ ਵਟ੍ਟਤਿ. ਨਾਵਾਯ ਵਸ੍ਸਂ ਉਪਗਚ੍ਛਨ੍ਤੇਨਪਿ ਕੁਟਿਯਂਯੇਵ ਉਪਗਨ੍ਤਬ੍ਬਂ, ਪਰਿਯੇਸਿਤ੍ਵਾ ਅਲਭਨ੍ਤੇਨ ਆਲਯੋ ਕਾਤਬ੍ਬੋ. ਸਚੇ ਅਨ੍ਤੋਤੇਮਾਸਂ ਨਾਵਾ ਸਮੁਦ੍ਦੇਯੇਵ ਹੋਤਿ, ਤਤ੍ਥੇਵ ਪਵਾਰੇਤਬ੍ਬਂ. ਅਥ ਨਾਵਾ ਕੂਲਂ ਲਭਤਿ, ਅਯਞ੍ਚ ਪਰਤੋ ਗਨ੍ਤੁਕਾਮੋ ਹੋਤਿ, ਗਨ੍ਤੁਂ ਨ ਵਟ੍ਟਤਿ, ਨਾਵਾਯ ਲਦ੍ਧਗਾਮੇਯੇਵ ਵਸਿਤ੍ਵਾ ਭਿਕ੍ਖੂਹਿ ਸਦ੍ਧਿਂ ਪਵਾਰੇਤਬ੍ਬਂ. ਸਚੇਪਿ ਨਾਵਾ ਅਨੁਤੀਰਮੇਵ ਅਞ੍ਞਤ੍ਥ ਗਚ੍ਛਤਿ, ਭਿਕ੍ਖੁ ਚ ਪਠਮਂ ਲਦ੍ਧਗਾਮੇਯੇਵ ਵਸਿਤੁਕਾਮੋ, ਨਾਵਾ ਗਚ੍ਛਤੁ, ਭਿਕ੍ਖੁਨਾ ਤਤ੍ਥੇਵ ਵਸਿਤ੍ਵਾ ਭਿਕ੍ਖੂਹਿ ਸਦ੍ਧਿਂ ਪਵਾਰੇਤਬ੍ਬਂ. ਇਤਿ ਵਜੇ ਸਤ੍ਥੇ ਨਾਵਾਯਨ੍ਤਿ ਤੀਸੁ ਠਾਨੇਸੁ ਨਤ੍ਥਿ ਵਸ੍ਸਚ੍ਛੇਦੇ ਆਪਤ੍ਤਿ, ਪਵਾਰੇਤੁਞ੍ਚ ਲਭਤਿ.

‘‘ਨ, ਭਿਕ੍ਖਵੇ, ਵਸ੍ਸਂ ਉਪਗਨ੍ਤ੍ਵਾ ਪੁਰਿਮਂ ਵਾ ਤੇਮਾਸਂ ਪਚ੍ਛਿਮਂ ਵਾ ਤੇਮਾਸਂ ਅਵਸਿਤ੍ਵਾ ਚਾਰਿਕਾ ਪਕ੍ਕਮਿਤਬ੍ਬਾ, ਯੋ ਪਕ੍ਕਮੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੮੬) ਵਚਨਤੋ ਪੁਰਿਮਿਕਾਯ ਵਸ੍ਸਂ ਉਪਗਤੇਨ ਪੁਰਿਮਂ ਤੇਮਾਸਂ, ਪਚ੍ਛਿਮਿਕਾਯ ਉਪਗਤੇਨ ਪਚ੍ਛਿਮਂ ਤੇਮਾਸਂ ਅਵਸਿਤ੍ਵਾ ਚਾਰਿਕਾ ਨ ਪਕ੍ਕਮਿਤਬ੍ਬਾ, ਵਸ੍ਸਂ ਉਪਗਨ੍ਤ੍ਵਾ ਪਨ ਅਰੁਣਂ ਅਨੁਟ੍ਠਾਪੇਤ੍ਵਾਪਿ ਤਦਹੇਵ ਸਤ੍ਤਾਹਕਰਣੀਯੇਨ ਪਕ੍ਕਮਨ੍ਤਸ੍ਸਪਿ ਅਨ੍ਤੋਸਤ੍ਤਾਹੇ ਨਿਵਤ੍ਤਨ੍ਤਸ੍ਸ ਅਨਾਪਤ੍ਤਿ, ਕੋ ਪਨ ਵਾਦੋ ਦ੍ਵੀਹਤੀਹਂ ਵਸਿਤ੍ਵਾ ਸਤ੍ਤਾਹਕਰਣੀਯੇਨ ਪਕ੍ਕਮਨ੍ਤਸ੍ਸ ਅਨ੍ਤੋਸਤ੍ਤਾਹੇ ਨਿਵਤ੍ਤਨ੍ਤਸ੍ਸ.

੧੮੦. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਤ੍ਤਨ੍ਨਂ ਸਤ੍ਤਾਹਕਰਣੀਯੇਨ ਪਹਿਤੇ ਗਨ੍ਤੁਂ, ਨ ਤ੍ਵੇਵ ਅਪ੍ਪਹਿਤੇ. ਭਿਕ੍ਖੁਸ੍ਸ ਭਿਕ੍ਖੁਨਿਯਾ ਸਿਕ੍ਖਮਾਨਾਯ ਸਾਮਣੇਰਸ੍ਸ ਸਾਮਣੇਰਿਯਾ ਉਪਾਸਕਸ੍ਸ ਉਪਾਸਿਕਾਯਾ’’ਤਿ (ਮਹਾਵ. ੧੮੭) ਵਚਨਤੋ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਅਞ੍ਞਤਰੇਨ ਸਙ੍ਘਗਣਪੁਗ੍ਗਲੇ ਉਦ੍ਦਿਸ੍ਸ ਅਤ੍ਤਨੋ ਵਾ ਅਤ੍ਥਾਯ ਵਿਹਾਰਂ ਅਡ੍ਢਯੋਗਂ ਪਾਸਾਦਂ ਹਮ੍ਮਿਯਂ ਗੁਹਂ ਪਰਿਵੇਣਂ ਕੋਟ੍ਠਕਂ ਉਪਟ੍ਠਾਨਸਾਲਂ ਅਗ੍ਗਿਸਾਲਂ ਕਪ੍ਪਿਯਕੁਟਿਂ ਵਚ੍ਚਕੁਟਿਂ ਚਙ੍ਕਮਂ ਚਙ੍ਕਮਨਸਾਲਂ ਉਦਪਾਨਂ ਉਦਪਾਨਸਾਲਂ ਜਨ੍ਤਾਘਰਂ ਜਨ੍ਤਾਘਰਸਾਲਂ ਪੋਕ੍ਖਰਣਿਂ ਮਣ੍ਡਪਂ ਆਰਾਮਂ ਆਰਾਮਵਤ੍ਥੁਂ ਵਾ ਕਾਰੇਤ੍ਵਾ ‘‘ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਦਾਨਞ੍ਚ ਦਾਤੁਂ ਧਮ੍ਮਞ੍ਚ ਸੋਤੁਂ ਭਿਕ੍ਖੂ ਚ ਪਸ੍ਸਿਤੁ’’ਨ੍ਤਿ ਏਵਂ ਨਿਦ੍ਦਿਸਿਤ੍ਵਾ ਪੇਸਿਤੇ ਗਨ੍ਤਬ੍ਬਂ ਸਤ੍ਤਾਹਕਰਣੀਯੇਨ, ਨ ਤ੍ਵੇਵ ਅਪ੍ਪਹਿਤੇ. ਉਪਾਸਕੋ ਵਾ ਉਪਾਸਿਕਾ ਵਾ ਤਥੇਵ ਸਙ੍ਘਗਣਪੁਗ੍ਗਲੇ ਉਦ੍ਦਿਸ੍ਸ ਵਿਹਾਰਾਦੀਸੁ ਅਞ੍ਞਤਰਂ ਕਾਰੇਤ੍ਵਾ ਅਤ੍ਤਨੋ ਵਾ ਅਤ੍ਥਾਯ ਨਿਵੇਸਨਸਯਨਿਘਰਾਦੀਸੁ ਅਞ੍ਞਤਰਂ ਕਾਰਾਪੇਤ੍ਵਾ ਅਞ੍ਞਂ ਵਾ ਕਿਚ੍ਚਕਰਣੀਯਂ ਨਿਦ੍ਦਿਸਿਤ੍ਵਾ ਗਿਲਾਨੋ ਵਾ ਹੁਤ੍ਵਾ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ ‘‘ਆਗਚ੍ਛਨ੍ਤੁ ਭਦਨ੍ਤਾ, ਇਚ੍ਛਾਮਿ ਦਾਨਞ੍ਚ ਦਾਤੁਂ ਧਮ੍ਮਞ੍ਚ ਸੋਤੁਂ ਭਿਕ੍ਖੂ ਚ ਪਸ੍ਸਿਤੁ’’ਨ੍ਤਿ, ਗਨ੍ਤਬ੍ਬਂ ਸਤ੍ਤਾਹਕਰਣੀਯੇਨ, ਨ ਤ੍ਵੇਵ ਅਪ੍ਪਹਿਤੇ.

‘‘ਅਨੁਜਾਨਾਮਿ, ਭਿਕ੍ਖਵੇ, ਸਤ੍ਤਨ੍ਨਂ ਸਤ੍ਤਾਹਕਰਣੀਯੇਨ ਅਪ੍ਪਹਿਤੇਪਿ ਗਨ੍ਤੁਂ, ਪਗੇਵ ਪਹਿਤੇ. ਭਿਕ੍ਖੁਸ੍ਸ ਭਿਕ੍ਖੁਨਿਯਾ ਸਿਕ੍ਖਮਾਨਾਯ ਸਾਮਣੇਰਸ੍ਸ ਸਾਮਣੇਰਿਯਾ ਮਾਤੁਯਾ ਚ ਪਿਤੁਸ੍ਸ ਚਾ’’ਤਿ (ਮਹਾਵ. ੧੯੮) ਵਚਨਤੋ ‘‘ਗਿਲਾਨਾਨਂ ਏਤੇਸਂ ਭਿਕ੍ਖੁਆਦੀਨਂ ਸਹਧਮ੍ਮਿਕਾਨਂ ਮਾਤਾਪਿਤੂਨਞ੍ਚ ਗਿਲਾਨਾਨਂਯੇਵ ਗਿਲਾਨਭਤ੍ਤਂ ਵਾ ਗਿਲਾਨੁਪਟ੍ਠਾਕਭਤ੍ਤਂ ਵਾ ਭੇਸਜ੍ਜਂ ਵਾ ਪਰਿਯੇਸਿਸ੍ਸਾਮਿ, ਪੁਚ੍ਛਿਸ੍ਸਾਮਿ ਵਾ ਉਪਟ੍ਠਹਿਸ੍ਸਾਮਿ ਵਾ’’ਤਿ ਇਮਿਨਾ ਕਾਰਣੇਨ ਅਪ੍ਪਹਿਤੇਪਿ ਗਨ੍ਤਬ੍ਬਂ, ਪਗੇਵ ਪਹਿਤੇ. ਅਨ੍ਧਕਟ੍ਠਕਥਾਯਂ ਪਨ ‘‘ਯੇ ਮਾਤਾਪਿਤੂਨਂ ਉਪਟ੍ਠਾਕਾ ਞਾਤਕਾ ਵਾ ਅਞ੍ਞਾਤਕਾ ਵਾ, ਤੇਸਮ੍ਪਿ ਅਪ੍ਪਹਿਤੇ ਗਨ੍ਤੁਂ ਵਟ੍ਟਤੀ’’ਤਿ ਵੁਤ੍ਤਂ, ਤਂ ਨੇਵ ਅਟ੍ਠਕਥਾਯਂ, ਨ ਪਾਲ਼ਿਯਂ ਵੁਤ੍ਤਂ, ਤਸ੍ਮਾ ਨ ਗਹੇਤਬ੍ਬਂ.

ਸਚੇ ਪਨ ਭਿਕ੍ਖੁਨੋ ਭਾਤਾ ਵਾ ਅਞ੍ਞੋ ਵਾ ਞਾਤਕੋ ਗਿਲਾਨੋ ਹੋਤਿ, ਸੋ ਚੇ ਭਿਕ੍ਖੁਸ੍ਸ ਸਨ੍ਤਿਕੇ ਦੂਤਂ ਪਹਿਣੇਯ੍ਯ ‘‘ਅਹਂ ਗਿਲਾਨੋ, ਆਗਚ੍ਛਤੁ ਭਦਨ੍ਤੋ, ਇਚ੍ਛਾਮਿ ਭਦਨ੍ਤਸ੍ਸ ਆਗਤ’’ਨ੍ਤਿ, ਗਨ੍ਤਬ੍ਬਂ ਸਤ੍ਤਾਹਕਰਣੀਯੇਨ, ਨ ਤ੍ਵੇਵ ਅਪ੍ਪਹਿਤੇ. ਸਚੇ ਏਕਸ੍ਮਿਂ ਵਿਹਾਰੇ ਭਿਕ੍ਖੂਹਿ ਸਦ੍ਧਿਂ ਵਸਨ੍ਤੋ ਭਿਕ੍ਖੁਭਤ੍ਤਿਕੋ ਗਿਲਾਨੋ ਹੋਤਿ, ਸੋ ਚੇ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਹਿਣੇਯ੍ਯ ‘‘ਅਹਂ ਗਿਲਾਨੋ, ਆਗਚ੍ਛਨ੍ਤੁ ਭਿਕ੍ਖੂ, ਇਚ੍ਛਾਮਿ ਭਿਕ੍ਖੂਨਂ ਆਗਤ’’ਨ੍ਤਿ, ਗਨ੍ਤਬ੍ਬਂ ਸਤ੍ਤਾਹਕਰਣੀਯੇਨ, ਨ ਤ੍ਵੇਵ ਅਪ੍ਪਹਿਤੇ.

ਸਚੇ ਭਿਕ੍ਖੁਸ੍ਸ ਭਿਕ੍ਖੁਨਿਯਾ ਸਿਕ੍ਖਮਾਨਾਯ ਸਾਮਣੇਰਸ੍ਸ ਸਾਮਣੇਰਿਯਾ ਅਨਭਿਰਤਿ ਵਾ ਕੁਕ੍ਕੁਚ੍ਚਂ ਵਾ ਦਿਟ੍ਠਿਗਤਂ ਵਾ ਉਪ੍ਪਨ੍ਨਂ ਹੋਤਿ, ਗਨ੍ਤਬ੍ਬਂ ਸਤ੍ਤਾਹਕਰਣੀਯੇਨ ਅਪ੍ਪਹਿਤੇਪਿ ‘‘ਅਨਭਿਰਤਿਂ ਵੂਪਕਾਸੇਸ੍ਸਾਮਿ ਵਾ ਵੂਪਕਾਸਾਪੇਸ੍ਸਾਮਿ ਵਾ ਕੁਮ੍ਕੁਚ੍ਚਂ ਵਿਨੋਦੇਸ੍ਸਾਮਿ ਵਾ ਵਿਨੋਦਾਪੇਸ੍ਸਾਮਿ ਵਾ ਦਿਟ੍ਠਿਗਤਂ ਵਿਵੇਚੇਸ੍ਸਾਮਿ ਵਾ ਵਿਵੇਚਾਪੇਸ੍ਸਾਮਿ ਵਾ ਧਮ੍ਮਕਥਂ ਵਾ ਕਰਿਸ੍ਸਾਮੀ’’ਤਿ, ਪਗੇਵ ਪਹਿਤੇ. ਸਚੇ ਕੋਚਿ ਭਿਕ੍ਖੁ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ ਪਰਿਵਾਸਾਰਹੋ ਮੂਲਾਯਪਟਿਕਸ੍ਸਨਾਰਹੋ ਮਾਨਤ੍ਤਾਰਹੋ ਅਬ੍ਭਾਨਾਰਹੋ ਵਾ, ਅਪ੍ਪਹਿਤੇਪਿ ਗਨ੍ਤਬ੍ਬਂ ‘‘ਪਰਿਵਾਸਦਾਨਾਦੀਸੁ ਉਸ੍ਸੁਕ੍ਕਂ ਆਪਜ੍ਜਿਸ੍ਸਾਮਿ, ਅਨੁਸ੍ਸਾਵੇਸ੍ਸਾਮਿ, ਗਣਪੂਰਕੋ ਵਾ ਭਵਿਸ੍ਸਾਮੀ’’ਤਿ, ਪਗੇਵ ਪਹਿਤੇ. ਭਿਕ੍ਖੁਨਿਯਾਪਿ ਮਾਨਤ੍ਤਾਰਹਾਯ ਮੂਲਾਯਪਟਿਕਸ੍ਸਨਾਰਹਾਯ ਅਬ੍ਭਾਨਾਰਹਾਯ ਵਾ ਏਸੇਵ ਨਯੋ. ਸਚੇ ਸਾਮਣੇਰੋ ਉਪਸਮ੍ਪਜ੍ਜਿਤੁਕਾਮੋ ਹੋਤਿ, ਵਸ੍ਸਂ ਵਾ ਪੁਚ੍ਛਿਤੁਕਾਮੋ, ਸਿਕ੍ਖਮਾਨਾ ਵਾ ਉਪਸਮ੍ਪਜ੍ਜਿਤੁਕਾਮਾ ਹੋਤਿ, ਸਿਕ੍ਖਾ ਵਾਸ੍ਸਾ ਕੁਪਿਤਾ, ਸਾਮਣੇਰੀ ਵਾ ਸਿਕ੍ਖਾ ਸਮਾਦਿਯਿਤੁਕਾਮਾ ਹੋਤਿ, ਵਸ੍ਸਂ ਵਾ ਪੁਚ੍ਛਿਤੁਕਾਮਾ, ਅਪ੍ਪਹਿਤੇਪਿ ਗਨ੍ਤਬ੍ਬਂ, ਪਗੇਵ ਪਹਿਤੇ.

ਸਚੇ ਭਿਕ੍ਖੁਸ੍ਸ ਭਿਕ੍ਖੁਨਿਯਾ ਵਾ ਸਙ੍ਘੋ ਕਮ੍ਮਂ ਕਾਤੁਕਾਮੋ ਹੋਤਿ, ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਅਪ੍ਪਹਿਤੇਪਿ ਗਨ੍ਤਬ੍ਬਂ, ਪਗੇਵ ਪਹਿਤੇ ‘‘ਕਿਂ ਨੁ ਖੋ ਸਙ੍ਘੋ ਕਮ੍ਮਂ ਨ ਕਰੇਯ੍ਯ, ਲਹੁਕਾਯ ਵਾ ਪਰਿਣਾਮੇਯ੍ਯਾ’’ਤਿ. ਸਚੇਪਿ ਕਤਂਯੇਵ ਹੋਤਿ ਕਮ੍ਮਂ, ਅਪ੍ਪਹਿਤੇਪਿ ਗਨ੍ਤਬ੍ਬਂ ‘‘ਕਿਂ ਨੁ ਖੋ ਸਮ੍ਮਾ ਵਤ੍ਤੇਯ੍ਯ, ਲੋਮਂ ਪਾਤੇਯ੍ਯ, ਨੇਤ੍ਥਾਰਂ ਵਤ੍ਤੇਯ੍ਯ, ਸਙ੍ਘੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯਾ’’ਤਿ.

੧੮੧. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘਕਰਣੀਯੇਨ ਗਨ੍ਤੁ’’ਨ੍ਤਿ (ਮਹਾਵ. ੧੯੯) ਵਚਨਤੋ ਸੇਨਾਸਨਪਟਿਬਦ੍ਧਸਙ੍ਘਕਰਣੀਯੇਨਪਿ ਗਨ੍ਤੁਂ ਵਟ੍ਟਤਿ. ਏਤ੍ਥ (ਮਹਾਵ. ਅਟ੍ਠ. ੧੯੯) ਹਿ ਯਂ ਕਿਞ੍ਚਿ ਉਪੋਸਥਾਗਾਰਾਦੀਸੁ ਸੇਨਾਸਨੇਸੁ ਚੇਤਿਯਛਤ੍ਤਵੇਦਿਕਾਦੀਸੁ ਵਾ ਕਤ੍ਤਬ੍ਬਂ, ਅਨ੍ਤਮਸੋ ਭਿਕ੍ਖੁਨੋ ਪੁਗ੍ਗਲਿਕਸੇਨਾਸਨਮ੍ਪਿ ਸਬ੍ਬਂ ਸਙ੍ਘਕਰਣੀਯਮੇਵਾਤਿ ਅਧਿਪ੍ਪੇਤਂ, ਤਸ੍ਮਾ ਤਸ੍ਸ ਨਿਪ੍ਫਾਦਨਤ੍ਥਂ ਦਬ੍ਬਸਮ੍ਭਾਰਾਦੀਨਿ ਵਾ ਆਹਰਿਤੁਂ ਵਡ੍ਢਕੀਪਭੁਤੀਨਂ ਭਤ੍ਤਵੇਤਨਾਦੀਨਿ ਵਾ ਦਾਤੁਂ ਗਨ੍ਤਬ੍ਬਂ. ਅਪਿਚੇਤ੍ਥ ਅਯਮ੍ਪਿ ਪਾਲ਼ਿਮੁਤ੍ਤਕਨਯੋ ਵੇਦਿਤਬ੍ਬੋ – ਧਮ੍ਮਸ੍ਸਵਨਤ੍ਥਾਯ ਅਨਿਮਨ੍ਤਿਤੇਨ ਗਨ੍ਤੁਂ ਨ ਵਟ੍ਟਤਿ, ਸਚੇ ਏਕਸ੍ਮਿਂ ਮਹਾਵਾਸੇ ਪਠਮਂਯੇਵ ਕਤਿਕਾ ਕਤਾ ਹੋਤਿ ‘‘ਅਸੁਕਦਿਵਸਂ ਨਾਮ ਸਨ੍ਨਿਪਤਿਤਬ੍ਬ’’ਨ੍ਤਿ, ਨਿਮਨ੍ਤਿਤੋਯੇਵ ਨਾਮ ਹੋਤਿ, ਗਨ੍ਤੁਂ ਵਟ੍ਟਤਿ. ‘‘ਭਣ੍ਡਕਂ ਧੋਵਿਸ੍ਸਾਮੀ’’ਤਿ ਗਨ੍ਤੁਂ ਨ ਵਟ੍ਟਤਿ. ਸਚੇ ਪਨ ਆਚਰਿਯੁਪਜ੍ਝਾਯਾ ਪਹਿਣਨ੍ਤਿ, ਵਟ੍ਟਤਿ. ਨਾਤਿਦੂਰੇ ਵਿਹਾਰੋ ਹੋਤਿ, ‘‘ਤਤ੍ਥ ਗਨ੍ਤ੍ਵਾ ਅਜ੍ਜੇਵ ਆਗਮਿਸ੍ਸਾਮੀ’’ਤਿ ਸਮ੍ਪਾਪੁਣਿਤੁਂ ਨ ਸਕ੍ਕੋਤਿ, ਵਟ੍ਟਤਿ. ਉਦ੍ਦੇਸਪਰਿਪੁਚ੍ਛਾਦੀਨਂ ਅਤ੍ਥਾਯਪਿ ਗਨ੍ਤੁਂ ਨ ਲਭਤਿ, ‘‘ਆਚਰਿਯਂ ਪਨ ਪਸ੍ਸਿਸ੍ਸਾਮੀ’’ਤਿ ਗਨ੍ਤੁਂ ਲਭਤਿ. ਸਚੇ ਨਂ ਆਚਰਿਯੋ ‘‘ਅਜ੍ਜ ਮਾ ਗਚ੍ਛਾ’’ਤਿ ਵਦਤਿ, ਵਟ੍ਟਤਿ, ਉਪਟ੍ਠਾਕਕੁਲਂ ਵਾ ਞਾਤਿਕੁਲਂ ਵਾ ਦਸ੍ਸਨਾਯ ਗਨ੍ਤੁਂ ਨ ਲਭਤਿ.

ਸਚੇ ਭਿਕ੍ਖੂਸੁ ਵਸ੍ਸੂਪਗਤੇਸੁ ਗਾਮੋ ਚੋਰੇਹਿ ਵੁਟ੍ਠਾਤਿ, ਤਤ੍ਥ ਕਿਂ ਕਾਤਬ੍ਬਨ੍ਤਿ? ਯੇਨ ਗਾਮੋ, ਤੇਨ ਗਨ੍ਤਬ੍ਬਂ. ਸਚੇ ਗਾਮੋ ਦ੍ਵਿਧਾ ਭਿਜ੍ਜਤਿ, ਯਤ੍ਥ ਬਹੁਤਰਾ ਮਨੁਸ੍ਸਾ, ਤਤ੍ਥ ਗਨ੍ਤਬ੍ਬਂ. ਸਚੇ ਬਹੁਤਰਾ ਅਸ੍ਸਦ੍ਧਾ ਹੋਨ੍ਤਿ ਅਪ੍ਪਸਨ੍ਨਾ, ਯਤ੍ਥ ਸਦ੍ਧਾ ਪਸਨ੍ਨਾ, ਤਤ੍ਥ ਗਨ੍ਤਬ੍ਬਂ. ਏਤ੍ਥ ਚ ਸਚੇ ਗਾਮੋ ਅਵਿਦੂਰਗਤੋ ਹੋਤਿ, ਤਤ੍ਥ ਪਿਣ੍ਡਾਯ ਚਰਿਤ੍ਵਾ ਵਿਹਾਰਮੇਵ ਆਗਨ੍ਤ੍ਵਾ ਵਸਿਤਬ੍ਬਂ. ਸਚੇ ਦੂਰਂ ਗਤੋ, ਸਤ੍ਤਾਹਵਾਰੇਨ ਅਰੁਣੋ ਉਟ੍ਠਾਪੇਤਬ੍ਬੋ, ਨ ਸਕ੍ਕਾ ਚੇ ਹੋਤਿ, ਤਤ੍ਥੇਵ ਸਭਾਗਟ੍ਠਾਨੇ ਵਸਿਤਬ੍ਬਂ. ਸਚੇ ਮਨੁਸ੍ਸਾ ਯਥਾਪਵਤ੍ਤਾਨਿ ਸਲਾਕਭਤ੍ਤਾਦੀਨਿ ਦੇਨ੍ਤਿ, ‘‘ਨ ਮਯਂ ਤਸ੍ਮਿਂ ਵਿਹਾਰੇ ਵਸਿਮ੍ਹਾ’’ਤਿ ਵਤ੍ਤਬ੍ਬਾ. ‘‘ਮਯਂ ਵਿਹਾਰਸ੍ਸ ਵਾ ਪਾਸਾਦਸ੍ਸ ਵਾ ਨ ਦੇਮ, ਤੁਮ੍ਹਾਕਂ ਦੇਮ, ਯਤ੍ਥ ਕਤ੍ਥਚਿ ਵਸਿਤ੍ਵਾ ਭੁਞ੍ਜਥਾ’’ਤਿ ਵੁਤ੍ਤੇ ਪਨ ਯਥਾਸੁਖਂ ਭੁਞ੍ਜਿਤਬ੍ਬਂ, ਤੇਸਂਯੇਵ ਤਂ ਪਾਪੁਣਾਤਿ. ‘‘ਤੁਮ੍ਹਾਕਂ ਵਸਨਟ੍ਠਾਨੇ ਪਾਪੁਣਾਪੇਤ੍ਵਾ ਭੁਞ੍ਜਥਾ’’ਤਿ ਵੁਤ੍ਤੇ ਪਨ ਯਤ੍ਥ ਵਸਨ੍ਤਿ, ਤਤ੍ਥ ਨੇਤ੍ਵਾ ਵਸ੍ਸਗ੍ਗੇਨ ਪਾਪੁਣਾਪੇਤ੍ਵਾ ਭੁਞ੍ਜਿਤਬ੍ਬਂ. ਸਚੇ ਪਵਾਰਿਤਕਾਲੇ ਵਸ੍ਸਾਵਾਸਿਕਂ ਦੇਨ੍ਤਿ, ਯਦਿ ਸਤ੍ਤਾਹਵਾਰੇਨ ਅਰੁਣਂ ਉਟ੍ਠਾਪਯਿਂਸੁ, ਗਹੇਤਬ੍ਬਂ. ਛਿਨ੍ਨਵਸ੍ਸੇਹਿ ਪਨ ‘‘ਨ ਮਯਂ ਤਤ੍ਥ ਵਸਿਮ੍ਹ, ਛਿਨ੍ਨਵਸ੍ਸਾ ਮਯ’’ਨ੍ਤਿ ਵਤ੍ਤਬ੍ਬਂ. ਯਦਿ ‘‘ਯੇਸਂ ਅਮ੍ਹਾਕਂ ਸੇਨਾਸਨਂ ਪਾਪਿਤਂ, ਤੇ ਗਣ੍ਹਨ੍ਤੂ’’ਤਿ ਵਦਨ੍ਤਿ, ਗਹੇਤਬ੍ਬਂ. ਯਂ ਪਨ ‘‘ਵਿਹਾਰੇ ਉਪਨਿਕ੍ਖਿਤ੍ਤਕਂ ਮਾ ਵਿਨਸ੍ਸੀ’’ਤਿ ਇਧ ਆਹਟਂ ਚੀਵਰਾਦਿਵੇਭਙ੍ਗਿਯਭਣ੍ਡਂ, ਤਂ ਤਤ੍ਥੇਵ ਗਨ੍ਤ੍ਵਾ ਅਪਲੋਕੇਤ੍ਵਾ ਭਾਜੇਤਬ੍ਬਂ. ‘‘ਇਤੋ ਅਯ੍ਯਾਨਂ ਚਤ੍ਤਾਰੋ ਪਚ੍ਚਯੇ ਦੇਥਾ’’ਤਿ ਕਪ੍ਪਿਯਕਾਰਕਾਨਂ ਦਿਨ੍ਨੇ ਖੇਤ੍ਤਵਤ੍ਥੁਆਦਿਕੇ ਤਤ੍ਰੁਪ੍ਪਾਦੇਪਿ ਏਸੇਵ ਨਯੋ. ਸਙ੍ਘਿਕਞ੍ਹਿ ਵੇਭਙ੍ਗਿਯਭਣ੍ਡਂ ਅਨ੍ਤੋਵਿਹਾਰੇ ਵਾ ਬਹਿਸੀਮਾਯ ਵਾ ਹੋਤੁ, ਬਹਿਸੀਮਾਯ ਠਿਤਾਨਂ ਅਪਲੋਕੇਤ੍ਵਾ ਭਾਜੇਤੁਂ ਨ ਵਟ੍ਟਤਿ. ਉਭਯਤ੍ਥ ਠਿਤਮ੍ਪਿ ਪਨ ਅਨ੍ਤੋਸੀਮਾਯ ਠਿਤਾਨਂ ਅਪਲੋਕੇਤ੍ਵਾ ਭਾਜੇਤੁਂ ਵਟ੍ਟਤਿਯੇਵ.

ਸਚੇ ਪਨ ਵਸ੍ਸੂਪਗਤਾ ਭਿਕ੍ਖੂ ਵਾਲ਼ੇਹਿ ਉਬ੍ਬਾਲ਼੍ਹਾ ਹੋਨ੍ਤਿ, ਗਣ੍ਹਨ੍ਤਿਪਿ ਪਰਿਪਾਤੇਨ੍ਤਿਪਿ, ਸਰੀਸਪੇਹਿ ਵਾ ਉਬ੍ਬਾਲ਼੍ਹਾ ਹੋਨ੍ਤਿ, ਡਂਸਨ੍ਤਿਪਿ ਪਰਿਪਾਤੇਨ੍ਤਿਪਿ, ਚੋਰੇਹਿ ਵਾ ਉਬ੍ਬਾਲ਼੍ਹਾ ਹੋਨ੍ਤਿ, ਵਿਲੁਮ੍ਪਨ੍ਤਿਪਿ ਆਕੋਟੇਨ੍ਤਿਪਿ, ਪਿਸਾਚੇਹਿ ਵਾ ਉਬ੍ਬਾਲ਼੍ਹਾ ਹੋਨ੍ਤਿ, ਆਵਿਸਨ੍ਤਿਪਿ ਹਨਨ੍ਤਿਪਿ, ‘‘ਏਸੇਵ ਅਨ੍ਤਰਾਯੋ’’ਤਿ ਪਕ੍ਕਮਿਤਬ੍ਬਂ, ਨਤ੍ਥਿ ਵਸ੍ਸਚ੍ਛੇਦੇ ਆਪਤ੍ਤਿ. ਸਚੇ ਗਾਮੋ ਅਗ੍ਗਿਨਾ ਵਾ ਦਡ੍ਢੋ ਹੋਤਿ, ਉਦਕੇਨ ਵਾ ਵੁਲ਼੍ਹੋ. ਭਿਕ੍ਖੂ ਪਿਣ੍ਡਕੇਨ ਕਿਲਮਨ੍ਤਿ, ‘‘ਏਸੇਵ ਅਨ੍ਤਰਾਯੋ’’ਤਿ ਪਕ੍ਕਮਿਤਬ੍ਬਂ, ਵਸ੍ਸਚ੍ਛੇਦੇ ਅਨਾਪਤ੍ਤਿ. ਸੇਨਾਸਨਂ ਅਗ੍ਗਿਨਾ ਵਾ ਦਡ੍ਢਂ ਹੋਤਿ, ਉਦਕੇਨ ਵਾ ਵੁਲ਼੍ਹਂ, ਭਿਕ੍ਖੂ ਸੇਨਾਸਨੇਨ ਕਿਲਮਨ੍ਤਿ, ‘‘ਏਸੇਵ ਅਨ੍ਤਰਾਯੋ’’ਤਿ ਪਕ੍ਕਮਿਤਬ੍ਬਂ, ਵਸ੍ਸਚ੍ਛੇਦੇ ਅਨਾਪਤ੍ਤਿ. ਸਚੇ ਵਸ੍ਸੂਪਗਤਾ ਭਿਕ੍ਖੂ ਨ ਲਭਨ੍ਤਿ ਲੂਖਸ੍ਸ ਵਾ ਪਣੀਤਸ੍ਸ ਵਾ ਭੋਜਨਸ੍ਸ ਯਾਵਦਤ੍ਥਂ ਪਾਰਿਪੂਰਿਂ, ‘‘ਏਸੇਵ ਅਨ੍ਤਰਾਯੋ’’ਤਿ ਪਕ੍ਕਮਿਤਬ੍ਬਂ. ਸਚੇ ਲਭਨ੍ਤਿ ਲੂਖਸ੍ਸ ਵਾ ਪਣੀਤਸ੍ਸ ਵਾ ਭੋਜਨਸ੍ਸ ਯਾਵਦਤ੍ਥਂ ਪਾਰਿਪੂਰਿਂ, ਨ ਲਭਨ੍ਤਿ ਸਪ੍ਪਾਯਾਨਿ ਭੋਜਨਾਨਿ, ‘‘ਏਸੇਵ ਅਨ੍ਤਰਾਯੋ’’ਤਿ ਪਕ੍ਕਮਿਤਬ੍ਬਂ. ਸਚੇਪਿ ਲਭਨ੍ਤਿ ਲੂਖਸ੍ਸ ਵਾ ਪਣੀਤਸ੍ਸ ਵਾ ਭੋਜਨਸ੍ਸ ਯਾਵਦਤ੍ਥਂ ਪਾਰਿਪੂਰਿਂ, ਲਭਨ੍ਤਿ ਸਪ੍ਪਾਯਾਨਿ ਭੋਜਨਾਨਿ, ਨ ਲਭਨ੍ਤਿ ਸਪ੍ਪਾਯਾਨਿ ਭੇਸਜ੍ਜਾਨਿ, ‘‘ਏਸੇਵ ਅਨ੍ਤਰਾਯੋ’’ਤਿ ਪਕ੍ਕਮਿਤਬ੍ਬਂ. ਸਚੇ ਲਭਨ੍ਤਿ ਲੂਖਸ੍ਸ ਵਾ ਪਣੀਤਸ੍ਸ ਵਾ ਭੋਜਨਸ੍ਸ ਯਾਵਦਤ੍ਥਂ ਪਾਰਿਪੂਰਿਂ, ਲਭਨ੍ਤਿ ਸਪ੍ਪਾਯਾਨਿ ਭੋਜਨਾਨਿ, ਲਭਨ੍ਤਿ ਸਪ੍ਪਾਯਾਨਿ ਭੇਸਜ੍ਜਾਨਿ, ਨ ਲਭਨ੍ਤਿ ਪਤਿਰੂਪਂ ਉਪਟ੍ਠਾਕਂ, ‘‘ਏਸੇਵ ਅਨ੍ਤਰਾਯੋ’’ਤਿ ਪਕ੍ਕਮਿਤਬ੍ਬਂ, ਸਬ੍ਬਤ੍ਥ ਵਸ੍ਸਚ੍ਛੇਦੇ ਅਨਾਪਤ੍ਤਿ.

ਸਚੇ ਪਨ ਵਸ੍ਸੂਪਗਤਂ ਭਿਕ੍ਖੁਂ ਇਤ੍ਥੀ ਨਿਮਨ੍ਤੇਤਿ ‘‘ਏਹਿ, ਭਨ੍ਤੇ, ਹਿਰਞ੍ਞਂ ਵਾ ਤੇ ਦੇਮਿ, ਸੁਵਣ੍ਣਂ ਵਾ ਖੇਤ੍ਤਂ ਵਾ ਵਤ੍ਥੁਂ ਵਾ ਗਾਵੁਂ ਵਾ ਗਾਵਿਂ ਵਾ ਦਾਸਂ ਵਾ ਦਾਸਿਂ ਵਾ ਤੇ ਦੇਮਿ, ਧੀਤਰਂ ਵਾ ਤੇ ਦੇਮਿ ਭਰਿਯਤ੍ਥਾਯ, ਅਹਂ ਵਾ ਤੇ ਭਰਿਯਾ ਹੋਮਿ, ਅਞ੍ਞਂ ਵਾ ਤੇ ਭਰਿਯਂ ਆਨੇਮੀ’’ਤਿ, ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ ‘‘ਲਹੁਪਰਿਵਤ੍ਤਂ ਖੋ ਚਿਤ੍ਤਂ ਵੁਤ੍ਤਂ ਭਗਵਤਾ, ਸਿਯਾਪਿਮੇ ਬ੍ਰਹ੍ਮਚਰਿਯਸ੍ਸ ਅਨ੍ਤਰਾਯੋ’’ਤਿ, ਪਕ੍ਕਮਿਤਬ੍ਬਂ, ਨਤ੍ਥਿ ਵਸ੍ਸਚ੍ਛੇਦੇ ਆਪਤ੍ਤਿ. ਵੁਤ੍ਤਨਯੇਨੇਵ ਵੇਸੀ ਵਾ ਨਿਮਨ੍ਤੇਤਿ, ਥੁਲ੍ਲਕੁਮਾਰੀ ਵਾ ਨਿਮਨ੍ਤੇਤਿ, ਪਣ੍ਡਕੋ ਵਾ ਨਿਮਨ੍ਤੇਤਿ, ਞਾਤਕਾ ਵਾ ਨਿਮਨ੍ਤੇਨ੍ਤਿ, ਰਾਜਾਨੋ ਵਾ ਨਿਮਨ੍ਤੇਨ੍ਤਿ, ਚੋਰਾ ਵਾ ਨਿਮਨ੍ਤੇਨ੍ਤਿ, ਧੁਤ੍ਤਾ ਵਾ ਨਿਮਨ੍ਤੇਨ੍ਤਿ, ਏਸੇਵ ਨਯੋ. ਸਚੇ ਵਸ੍ਸੂਪਗਤੋ ਭਿਕ੍ਖੁ ਪਸ੍ਸਤਿ ਅਸਾਮਿਕਂ ਨਿਧਿਂ, ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ ‘‘ਲਹੁਪਰਿਵਤ੍ਤਂ ਖੋ ਚਿਤ੍ਤਂ ਵੁਤ੍ਤਂ ਭਗਵਤਾ, ਸਿਯਾਪਿ ਮੇ ਬ੍ਰਹ੍ਮਚਰਿਯਸ੍ਸ ਅਨ੍ਤਰਾਯੋ’’ਤਿ, ਪਕ੍ਕਮਿਤਬ੍ਬਂ, ਅਨਾਪਤ੍ਤਿ ਵਸ੍ਸਚ੍ਛੇਦੇ.

ਸਚੇ ਵਸ੍ਸੂਪਗਤੋ ਭਿਕ੍ਖੁ ਪਸ੍ਸਤਿ ਸਮ੍ਬਹੁਲੇ ਭਿਕ੍ਖੂ ਸਙ੍ਘਭੇਦਾਯ ਪਰਕ੍ਕਮਨ੍ਤੇ, ਸੁਣਾਤਿ ਵਾ ‘‘ਸਮ੍ਬਹੁਲਾ ਭਿਕ੍ਖੂ ਸਙ੍ਘਭੇਦਾਯ ਪਰਕ੍ਕਮਨ੍ਤੀ’’ਤਿ, ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ ‘‘ਗਰੁਕੋ ਖੋ ਸਙ੍ਘਭੇਦੋ ਵੁਤ੍ਤੋ ਭਗਵਤਾ, ਮਾ ਮਯਿ ਸਮ੍ਮੁਖੀਭੂਤੇ ਸਙ੍ਘੋ ਭਿਜ੍ਜੀ’’ਤਿ, ਪਕ੍ਕਮਿਤਬ੍ਬਂ, ਅਨਾਪਤ੍ਤਿ ਵਸ੍ਸਚ੍ਛੇਦੇ. ਸਚੇ ਵਸ੍ਸੂਪਗਤੋ ਭਿਕ੍ਖੁ ਸੁਣਾਤਿ ‘‘ਅਸੁਕਸ੍ਮਿਂ ਕਿਰ ਆਵਾਸੇ ਸਮ੍ਬਹੁਲਾ ਭਿਕ੍ਖੂ ਸਙ੍ਘਭੇਦਾਯ ਪਰਕ੍ਕਮਨ੍ਤੀ’’ਤਿ, ਤਤ੍ਰ ਚੇ ਭਿਕ੍ਖੁਨੋ ਏਵਂ ਹੋਤਿ ‘‘ਤੇ ਚ ਖੋ ਮੇ ਭਿਕ੍ਖੂ ਮਿਤ੍ਤਾ, ਤ੍ਯਾਹਂ ਵਕ੍ਖਾਮਿ ‘ਗਰੁਕੋ ਖੋ, ਆਵੁਸੋ, ਸਙ੍ਘਭੇਦੋ ਵੁਤ੍ਤੋ ਭਗਵਤਾ, ਮਾ ਆਯਸ੍ਮਨ੍ਤਾਨਂ ਸਙ੍ਘਭੇਦੋ ਰੁਚ੍ਚਿਤ੍ਥਾ’ਤਿ, ਕਰਿਸ੍ਸਨ੍ਤਿ ਮੇ ਵਚਨਂ ਸੁਸ੍ਸੂਸਿਸ੍ਸਨ੍ਤਿ, ਸੋਤਂ ਓਦਹਿਸ੍ਸਨ੍ਤੀ’’ਤਿ, ਪਕ੍ਕਮਿਤਬ੍ਬਂ, ਅਨਾਪਤ੍ਤਿ ਵਸ੍ਸਚ੍ਛੇਦੇ, ਭਿਨ੍ਨੇ ਪਨ ਸਙ੍ਘੇ ਗਨ੍ਤ੍ਵਾ ਕਰਣੀਯਂ ਨਤ੍ਥਿ.

ਸਚੇ ਪਨ ਕੋਚਿ ਭਿਕ੍ਖੁ ‘‘ਇਮਂ ਤੇਮਾਸਂ ਇਧ ਵਸ੍ਸਂ ਵਸਥਾ’’ਤਿ ਵੁਤ੍ਤੇ ਪਟਿਸ੍ਸੁਣਿਤ੍ਵਾ ਵਿਸਂਵਾਦੇਤਿ, ਦੁਕ੍ਕਟਂ. ਨ ਕੇਵਲਂ ਤਸ੍ਸੇਵ ਪਟਿਸ੍ਸਵਸ੍ਸ ਵਿਸਂਵਾਦੇ ਦੁਕ੍ਕਟਂ, ‘‘ਇਮਂ ਤੇਮਾਸਂ ਭਿਕ੍ਖਂ ਗਣ੍ਹਥ, ਉਭੋਪਿ ਮਯਂ ਇਧ ਵਸ੍ਸਂ ਵਸਿਸ੍ਸਾਮ, ਏਕਤੋ ਉਦ੍ਦਿਸਾਪੇਸ੍ਸਾਮਾ’’ਤਿ ਏਵਮਾਦਿਨਾਪਿ ਤਸ੍ਸ ਤਸ੍ਸ ਪਟਿਸ੍ਸਵਸ੍ਸ ਵਿਸਂਵਾਦੇ ਦੁਕ੍ਕਟਂ. ਤਞ੍ਚ ਖੋ ਪਠਮਂ ਸੁਦ੍ਧਚਿਤ੍ਤਸ੍ਸ ਪਚ੍ਛਾ ਵਿਸਂਵਾਦਨਪਚ੍ਚਯਾ, ਪਠਮਮ੍ਪਿ ਅਸੁਦ੍ਧਚਿਤ੍ਤਸ੍ਸ ਪਨ ਪਟਿਸ੍ਸਵੇ ਪਾਚਿਤ੍ਤਿਯਂ. ਵਿਸਂਵਾਦੇ ਦੁਕ੍ਕਟਨ੍ਤਿ ਪਾਚਿਤ੍ਤਿਯੇਨ ਸਦ੍ਧਿਂ ਦੁਕ੍ਕਟਂ ਯੁਜ੍ਜਤਿ.

੧੮੨. ਵਸ੍ਸੂਪਗਤੇਹਿ (ਚੂਲ਼ਵ. ਅਟ੍ਠ. ੩੧੮) ਅਨ੍ਤੋਵਸ੍ਸੇ ਨਿਬਦ੍ਧਵਤ੍ਤਂ ਠਪੇਤ੍ਵਾ ਵਸ੍ਸੂਪਗਤਾ ਭਿਕ੍ਖੂ ‘‘ਸਮ੍ਮੁਞ੍ਜਨਿਯੋ ਬਨ੍ਧਥਾ’’ਤਿ ਵਤ੍ਤਬ੍ਬਾ. ਸੁਲਭਾ ਚੇ ਦਣ੍ਡਕਾ ਚੇਵ ਸਲਾਕਾਯੋ ਚ ਹੋਨ੍ਤਿ, ਏਕਕੇਨ ਛ ਪਞ੍ਚ ਮੁਟ੍ਠਿਸਮ੍ਮੁਞ੍ਜਨਿਯੋ ਦ੍ਵੇ ਤਿਸ੍ਸੋ ਯਟ੍ਠਿਸਮ੍ਮੁਞ੍ਜਨਿਯੋ ਵਾ ਬਨ੍ਧਿਤਬ੍ਬਾ. ਦੁਲ੍ਲਭਾ ਹੋਨ੍ਤਿ, ਦ੍ਵੇ ਤਿਸ੍ਸੋ ਮੁਟ੍ਠਿਸਮ੍ਮੁਞ੍ਜਨਿਯੋ ਏਕਾ ਯਟ੍ਠਿਸਮ੍ਮੁਞ੍ਜਨੀ ਬਨ੍ਧਿਤਬ੍ਬਾ. ਸਾਮਣੇਰੇਹਿ ਪਞ੍ਚ ਪਞ੍ਚ ਉਕ੍ਕਾ ਵਾ ਕੋਟ੍ਟੇਤਬ੍ਬਾ, ਵਸਨਟ੍ਠਾਨੇਸੁ ਕਸਾਵਪਰਿਭਣ੍ਡਂ ਕਾਤਬ੍ਬਂ. ਵਤ੍ਤਂ ਕਰੋਨ੍ਤੇਹਿ ਚ ਨ ਉਦ੍ਦਿਸਿਤਬ੍ਬਂ ਨ ਉਦ੍ਦਿਸਾਪੇਤਬ੍ਬਂ, ਨ ਸਜ੍ਝਾਯੋ ਕਾਤਬ੍ਬੋ, ਨ ਪਬ੍ਬਾਜੇਤਬ੍ਬਂ ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਧਮ੍ਮਸ੍ਸਵਨਂ ਕਾਤਬ੍ਬਂ. ਸਬ੍ਬੇਵ ਹਿ ਏਤੇ ਪਪਞ੍ਚਾ, ਨਿਪ੍ਪਪਞ੍ਚਾ ਹੁਤ੍ਵਾ ਸਮਣਧਮ੍ਮਮੇਵ ਕਰਿਸ੍ਸਾਮਾਤਿ ਵਾ ਸਬ੍ਬੇ ਤੇਰਸ ਧੁਤਙ੍ਗਾਨਿ ਸਮਾਦਿਯਨ੍ਤੁ, ਸੇਯ੍ਯਂ ਅਕਪ੍ਪੇਤ੍ਵਾ ਠਾਨਚਙ੍ਕਮੇਹਿ ਵੀਤਿਨਾਮੇਨ੍ਤੁ, ਮੂਗਬ੍ਬਤਂ ਗਣ੍ਹਨ੍ਤੁ, ਸਤ੍ਤਾਹਕਰਣੀਯੇਨ ਗਤਾਪਿ ਭਾਜਨੀਯਭਣ੍ਡਂ ਲਭਨ੍ਤੂਤਿ ਵਾ ਏਵਰੂਪਂ ਅਧਮ੍ਮਿਕਵਤ੍ਤਂ ਨ ਕਾਤਬ੍ਬਂ. ਏਵਂ ਪਨ ਕਾਤਬ੍ਬਂ – ਪਰਿਯਤ੍ਤਿਧਮ੍ਮੋ ਨਾਮ ਤਿਵਿਧਮ੍ਪਿ ਸਦ੍ਧਮ੍ਮਂ ਪਤਿਟ੍ਠਾਪੇਤਿ, ਤਸ੍ਮਾ ਸਕ੍ਕਚ੍ਚਂ ਉਦ੍ਦਿਸਥ ਉਦ੍ਦਿਸਾਪੇਥ, ਸਜ੍ਝਾਯਂ ਕਰੋਥ, ਪਧਾਨਘਰੇ ਵਸਨ੍ਤਾਨਂ ਸਙ੍ਘਟ੍ਟਨਂ ਅਕਤ੍ਵਾ ਅਨ੍ਤੋਵਿਹਾਰੇ ਨਿਸੀਦਿਤ੍ਵਾ ਉਦ੍ਦਿਸਥ ਉਦ੍ਦਿਸਾਪੇਥ, ਸਜ੍ਝਾਯਂ ਕਰੋਥ, ਧਮ੍ਮਸ੍ਸਵਨਂ ਸਮਿਦ੍ਧਂ ਕਰੋਥ, ਪਬ੍ਬਾਜੇਨ੍ਤਾ ਸੋਧੇਤ੍ਵਾ ਪਬ੍ਬਾਜੇਥ, ਸੋਧੇਤ੍ਵਾ ਉਪਸਮ੍ਪਾਦੇਥ, ਸੋਧੇਤ੍ਵਾ ਨਿਸ੍ਸਯਂ ਦੇਥ. ਏਕੋਪਿ ਹਿ ਕੁਲਪੁਤ੍ਤੋ ਪਬ੍ਬਜ੍ਜਞ੍ਚ ਉਪਸਮ੍ਪਦਞ੍ਚ ਲਭਿਤ੍ਵਾ ਸਕਲਂ ਸਾਸਨਂ ਪਤਿਟ੍ਠਾਪੇਤਿ, ਅਤ੍ਤਨੋ ਥਾਮੇਨ ਯਤ੍ਤਕਾਨਿ ਸਕ੍ਕੋਥ, ਤਤ੍ਤਕਾਨਿ ਧੁਤਙ੍ਗਾਨਿ ਸਮਾਦਿਯਥ, ਅਨ੍ਤੋਵਸ੍ਸਂ ਨਾਮੇਤਂ ਸਕਲਦਿਵਸਂ ਰਤ੍ਤਿਯਾ ਚ ਪਠਮਯਾਮਪਚ੍ਛਿਮਯਾਮੇਸੁ ਅਪ੍ਪਮਤ੍ਤੇਹਿ ਭਵਿਤਬ੍ਬਂ, ਵੀਰਿਯਂ ਆਰਭਿਤਬ੍ਬਂ. ਪੋਰਾਣਕਮਹਾਥੇਰਾਪਿ ਸਬ੍ਬਪਲਿਬੋਧੇ ਛਿਨ੍ਦਿਤ੍ਵਾ ਅਨ੍ਤੋਵਸ੍ਸੇ ਏਕਚਾਰਿਯਵਤ੍ਤਂ ਪੂਰਯਿਂਸੁ, ਭਸ੍ਸੇ ਮਤ੍ਤਂ ਜਾਨਿਤ੍ਵਾ ਦਸਵਤ੍ਥੁਕਥਂ ਦਸਅਸੁਭਦਸਾਨੁਸ੍ਸਤਿਅਟ੍ਠਤਿਂਸਾਰਮ੍ਮਣਕਥਂ ਕਾਤੁਂ ਵਟ੍ਟਤਿ, ਆਗਨ੍ਤੁਕਾਨਂ ਵਤ੍ਤਂ ਕਾਤੁਂ, ਸਤ੍ਤਾਹਕਰਣੀਯੇਨ ਗਤਾਨਂ ਅਪਲੋਕੇਤ੍ਵਾ ਦਾਤੁਂ ਵਟ੍ਟਤੀਤਿ ਏਵਰੂਪਂ ਵਤ੍ਤਂ ਕਾਤਬ੍ਬਂ.

ਅਪਿਚ ਭਿਕ੍ਖੂ ਓਵਦਿਤਬ੍ਬਾ ‘‘ਵਿਗ੍ਗਾਹਿਕਪਿਸੁਣਫਰੁਸਵਚਨਾਨਿ ਮਾ ਵਦਥ, ਦਿਵਸੇ ਦਿਵਸੇ ਸੀਲਾਨਿ ਆਵਜ੍ਜੇਨ੍ਤਾ ਚਤੁਰਾਰਕ੍ਖਂ ਅਹਾਪੇਨ੍ਤਾ ਮਨਸਿਕਾਰਬਹੁਲਾ ਵਿਹਰਥਾ’’ਤਿ. ਦਨ੍ਤਕਟ੍ਠਖਾਦਨਵਤ੍ਤਂ ਆਚਿਕ੍ਖਿਤਬ੍ਬਂ, ਚੇਤਿਯਂ ਵਾ ਬੋਧਿਂ ਵਾ ਵਨ੍ਦਨ੍ਤੇਨ ਗਨ੍ਧਮਾਲਂ ਵਾ ਪੂਜੇਨ੍ਤੇਨ ਪਤ੍ਤਂ ਵਾ ਥਵਿਕਾਯ ਪਕ੍ਖਿਪਨ੍ਤੇਨ ਨ ਕਥੇਤਬ੍ਬਂ, ਭਿਕ੍ਖਾਚਾਰਵਤ੍ਤਂ ਆਚਿਕ੍ਖਿਤਬ੍ਬਂ, ਅਨ੍ਤੋਗਾਮੇ ਮਨੁਸ੍ਸੇਹਿ ਸਦ੍ਧਿਂ ਪਚ੍ਚਯਸਞ੍ਞੁਤ੍ਤਕਥਾ ਵਾ ਵਿਸਭਾਗਕਥਾ ਵਾ ਨ ਕਥੇਤਬ੍ਬਾ, ਰਕ੍ਖਿਤਿਨ੍ਦ੍ਰਿਯੇਹਿ ਭਵਿਤਬ੍ਬਂ, ਖਨ੍ਧਕਵਤ੍ਤਞ੍ਚ ਸੇਖਿਯਵਤ੍ਤਞ੍ਚ ਪੂਰੇਤਬ੍ਬਨ੍ਤਿ ਏਵਰੂਪਾ ਬਹੁਕਾਪਿ ਨਿਯ੍ਯਾਨਿਕਕਥਾ ਆਚਿਕ੍ਖਿਤਬ੍ਬਾਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਵਸ੍ਸੂਪਨਾਯਿਕਵਿਨਿਚ੍ਛਯਕਥਾ ਸਮਤ੍ਤਾ.