੨੫. ਉਪੋਸਥਪਵਾਰਣਾਵਿਨਿਚ੍ਛਯਕਥਾ

੧੬੮. ਉਪੋਸਥਪਵਾਰਣਾਤਿ ਏਤ੍ਥ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ) ਦਿਵਸਵਸੇਨ ਤਯੋ ਉਪੋਸਥਾ ਚਾਤੁਦ੍ਦਸਿਕੋ ਪਨ੍ਨਰਸਿਕੋ ਸਾਮਗ੍ਗੀਉਪੋਸਥੋਤਿ. ਤਤ੍ਥ ਹੇਮਨ੍ਤਗਿਮ੍ਹਵਸ੍ਸਾਨਾਨਂ ਤਿਣ੍ਣਂ ਉਤੂਨਂ ਤਤਿਯਸਤ੍ਤਮਪਕ੍ਖੇਸੁ ਦ੍ਵੇ ਦ੍ਵੇ ਕਤ੍ਵਾ ਛ ਚਾਤੁਦ੍ਦਸਿਕਾ, ਸੇਸਾ ਪਨ੍ਨਰਸਿਕਾਤਿ ਏਵਂ ਏਕਸਂਵਚ੍ਛਰੇ ਚਤੁਵੀਸਤਿ ਉਪੋਸਥਾ. ਇਦਂ ਤਾਵ ਪਕਤਿਚਾਰਿਤ੍ਤਂ. ਤਥਾਰੂਪਪਚ੍ਚਯੇ ਸਤਿ ਅਞ੍ਞਸ੍ਮਿਮ੍ਪਿ ਚਾਤੁਦ੍ਦਸੇ ਉਪੋਸਥਂ ਕਾਤੁਂ ਵਟ੍ਟਤਿ. ਪੁਰਿਮਵਸ੍ਸਂਵੁਟ੍ਠਾਨਂ ਪਨ ਪੁਬ੍ਬਕਤ੍ਤਿਕਪੁਣ੍ਣਮਾ, ਤੇਸਂਯੇਵ ਸਚੇ ਭਣ੍ਡਨਕਾਰਕੇਹਿ ਉਪਦ੍ਦੁਤਾ ਪਵਾਰਣਂ ਪਚ੍ਚੁਕ੍ਕਡ੍ਢਨ੍ਤਿ, ਅਥ ਕਤ੍ਤਿਕਮਾਸਸ੍ਸ ਕਾਲ਼ਪਕ੍ਖਚਾਤੁਦ੍ਦਸੋ ਵਾ ਪਚ੍ਛਿਮਕਤ੍ਤਿਕਪੁਣ੍ਣਮਾ ਵਾ ਪਚ੍ਛਿਮਵਸ੍ਸਂਵੁਟ੍ਠਾਨਞ੍ਚ ਪਚ੍ਛਿਮਕਤ੍ਤਿਕਪੁਣ੍ਣਮਾ ਏਵ ਵਾਤਿ ਇਮੇ ਤਯੋ ਪਵਾਰਣਾਦਿਵਸਾਪਿ ਹੋਨ੍ਤਿ. ਇਦਮ੍ਪਿ ਪਕਤਿਚਾਰਿਤ੍ਤਮੇਵ. ਤਥਾਰੂਪਪਚ੍ਚਯੇ ਸਤਿ ਦ੍ਵਿਨ੍ਨਂ ਕਤ੍ਤਿਕਪੁਣ੍ਣਮਾਨਂ ਪੁਰਿਮੇਸੁ ਚਾਤੁਦ੍ਦਸੇਸੁਪਿ ਪਵਾਰਣਂ ਕਾਤੁਂ ਵਟ੍ਟਤਿ. ਯਦਾ ਪਨ ਕੋਸਮ੍ਬਕਕ੍ਖਨ੍ਧਕੇ (ਮਹਾਵ. ੪੫੧ ਆਦਯੋ) ਆਗਤਨਯੇਨ ਭਿਨ੍ਨੇ ਭਿਕ੍ਖੁਸਙ੍ਘੇ ਓਸਾਰਿਤੇ ਤਸ੍ਮਿਂ ਭਿਕ੍ਖੁਸ੍ਮਿਂ ਸਙ੍ਘੋ ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਂ ਕਰੋਤਿ, ਤਦਾ ਤਾਵਦੇਵ ਉਪੋਸਥੋ ਕਾਤਬ੍ਬੋ. ‘‘ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬ’’ਨ੍ਤਿ ਵਚਨਤੋ ਠਪੇਤ੍ਵਾ ਚਾਤੁਦ੍ਦਸਪਨ੍ਨਰਸੇ ਅਞ੍ਞੋਪਿ ਯੋ ਕੋਚਿ ਦਿਵਸੋ ਉਪੋਸਥਦਿਵਸੋ ਨਾਮ ਹੋਤਿ, ਵਸ੍ਸਂਵੁਟ੍ਠਾਨਂ ਪਨ ਕਤ੍ਤਿਕਮਾਸਬ੍ਭਨ੍ਤਰੇ ਅਯਮੇਵ ਸਾਮਗ੍ਗੀਪਵਾਰਣਾਦਿਵਸੋ ਨਾਮ ਹੋਤਿ. ਇਤਿ ਇਮੇਸੁ ਤੀਸੁ ਦਿਵਸੇਸੁ ਉਪੋਸਥੋ ਕਾਤਬ੍ਬੋ. ਕਰੋਨ੍ਤੇਨ ਪਨ ਸਚੇ ਚਾਤੁਦ੍ਦਸਿਕੋ ਹੋਤਿ, ‘‘ਅਜ੍ਜੁਪੋਸਥੋ ਚਾਤੁਦ੍ਦਸੋ’’ਤਿ ਵਤ੍ਤਬ੍ਬਂ. ਸਚੇ ਸਾਮਗ੍ਗੀਉਪੋਸਥੋ ਹੋਤਿ, ‘‘ਅਜ੍ਜੁਪੋਸਥੋ ਸਾਮਗ੍ਗੀ’’ਤਿ ਵਤ੍ਤਬ੍ਬਂ. ਪਨ੍ਨਰਸਿਯਂ ਪਨ ਪਾਲ਼ਿਯਂ ਆਗਤਨਯੇਨੇਵ ‘‘ਅਜ੍ਜੁਪੋਸਥੋ ਪਨ੍ਨਰਸੋ’’ਤਿ ਵਤ੍ਤਬ੍ਬਂ.

੧੬੯. ਸਙ੍ਘੇ ਉਪੋਸਥੋ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ), ਗਣੇ ਉਪੋਸਥੋ, ਪੁਗ੍ਗਲੇ ਉਪੋਸਥੋਤਿ ਏਵਂ ਕਾਰਕਵਸੇਨ ਅਪਰੇਪਿ ਤਯੋ ਉਪੋਸਥਾ ਵੁਤ੍ਤਾ, ਕਤ੍ਤਬ੍ਬਾਕਾਰਵਸੇਨ ਪਨ ਸੁਤ੍ਤੁਦ੍ਦੇਸੋ ਪਾਰਿਸੁਦ੍ਧਿਉਪੋਸਥੋ ਅਧਿਟ੍ਠਾਨੁਪੋਸਥੋਤਿ ਅਪਰੇਪਿ ਤਯੋ ਉਪੋਸਥਾ. ਤਤ੍ਥ ਸੁਤ੍ਤੁਦ੍ਦੇਸੋ ਨਾਮ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ’’ਤਿਆਦਿਨਾ ਨਯੇਨ ਵੁਤ੍ਤੋ ਪਾਤਿਮੋਕ੍ਖੁਦ੍ਦੇਸੋ. ਯੇ ਪਨਿਤਰੇ ਦ੍ਵੇ ਉਪੋਸਥਾ, ਤੇਸੁ ਪਾਰਿਸੁਦ੍ਧਿਉਪੋਸਥੋ ਤਾਵ ਅਞ੍ਞੇਸਞ੍ਚ ਸਨ੍ਤਿਕੇ ਅਞ੍ਞਮਞ੍ਞਞ੍ਚ ਆਰੋਚਨਵਸੇਨ ਦੁਵਿਧੋ. ਤਤ੍ਥ ਯ੍ਵਾਯਂ ਅਞ੍ਞੇਸਂ ਸਨ੍ਤਿਕੇ ਕਰੀਯਤਿ, ਸੋਪਿ ਪਵਾਰਿਤਾਨਞ੍ਚ ਅਪ੍ਪਵਾਰਿਤਾਨਞ੍ਚ ਸਨ੍ਤਿਕੇ ਕਰਣਵਸੇਨ ਦੁਵਿਧੋ. ਤਤ੍ਥ ਮਹਾਪਵਾਰਣਾਯ ਪਵਾਰਿਤਾਨਂ ਸਨ੍ਤਿਕੇ ਪਚ੍ਛਿਮਿਕਾਯ ਉਪਗਤੇਨ ਵਾ ਅਨੁਪਗਤੇਨ ਵਾ ਛਿਨ੍ਨਵਸ੍ਸੇਨ ਵਾ ਚਾਤੁਮਾਸਿਨਿਯਂ ਪਨ ਪਵਾਰਿਤਾਨਂ ਸਨ੍ਤਿਕੇ ਅਨੁਪਗਤੇਨ ਵਾ ਛਿਨ੍ਨਵਸ੍ਸੇਨ ਵਾ ਕਾਯਸਾਮਗ੍ਗਿਂ ਦਤ੍ਵਾ ‘‘ਪਰਿਸੁਦ੍ਧੋ ਅਹਂ ਭਨ੍ਤੇ, ਪਰਿਸੁਦ੍ਧੋਤਿ ਮਂ ਧਾਰੇਥਾ’’ਤਿ ਤਿਕ੍ਖਤ੍ਤੁਂ ਵਤ੍ਵਾ ਕਾਤਬ੍ਬੋ. ਠਪੇਤ੍ਵਾ ਪਨ ਪਵਾਰਣਾਦਿਵਸਂ ਅਞ੍ਞਸ੍ਮਿਂ ਕਾਲੇ ਆਵਾਸਿਕੇਹਿ ਉਦ੍ਦਿਟ੍ਠਮਤ੍ਤੇ ਪਾਤਿਮੋਕ੍ਖੇ ਅਵੁਟ੍ਠਿਤਾਯ ਵਾ ਏਕਚ੍ਚਾਯ ਵੁਟ੍ਠਿਤਾਯ ਵਾ ਸਬ੍ਬਾਯ ਵਾ ਵੁਟ੍ਠਿਤਾਯ ਪਰਿਸਾਯ ਯੇ ਅਞ੍ਞੇ ਸਮਸਮਾ ਵਾ ਥੋਕਤਰਾ ਵਾ ਆਗਚ੍ਛਨ੍ਤਿ, ਤੇਹਿ ਤੇਸਂ ਸਨ੍ਤਿਕੇ ਵੁਤ੍ਤਨਯੇਨੇਵ ਪਾਰਿਸੁਦ੍ਧਿ ਆਰੋਚੇਤਬ੍ਬਾ.

ਯੋ ਪਨਾਯਂ ਅਞ੍ਞਮਞ੍ਞਂ ਆਰੋਚਨਵਸੇਨ ਕਰੀਯਤਿ, ਸੋ ਞਤ੍ਤਿਂ ਠਪੇਤ੍ਵਾ ਕਰਣਵਸੇਨ ਚ ਅਟ੍ਠਪੇਤ੍ਵਾ ਕਰਣਵਸੇਨ ਚ ਦੁਵਿਧੋ. ਤਤ੍ਥ ਯਸ੍ਮਿਂ ਆਵਾਸੇ ਤਯੋ ਭਿਕ੍ਖੂ ਵਿਹਰਨ੍ਤਿ, ਤੇਸੁ ਉਪੋਸਥਦਿਵਸੇ ਸਨ੍ਨਿਪਤਿਤੇਸੁ ਏਕੇਨ ਭਿਕ੍ਖੁਨਾ ‘‘ਸੁਣਨ੍ਤੁ ਮੇ ਆਯਸ੍ਮਨ੍ਤਾ, ਅਜ੍ਜੁਪੋਸਥੋ ਚਾਤੁਦ੍ਦਸੋ’’ਤਿ ਵਾ ‘‘ਪਨ੍ਨਰਸੋ’’ਤਿ ਵਾ ਵਤ੍ਵਾ ‘‘ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਮਯਂ ਅਞ੍ਞਮਞ੍ਞਂ ਪਾਰਿਸੁਦ੍ਧਿਉਪੋਸਥਂ ਕਰੇਯ੍ਯਾਮਾ’’ਤਿ ਞਤ੍ਤਿਯਾ ਠਪਿਤਾਯ ਥੇਰੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ‘‘ਪਰਿਸੁਦ੍ਧੋ ਅਹਂ, ਆਵੁਸੋ, ਪਰਿਸੁਦ੍ਧੋਤਿ ਮਂ ਧਾਰੇਥਾ’’ਤਿ ਤਿਕ੍ਖਤ੍ਤੁਂ ਵਤ੍ਤਬ੍ਬਂ. ਇਤਰੇਹਿ ‘‘ਭਨ੍ਤੇ’’ਤਿ ਵਤ੍ਵਾ ਏਵਮੇਵ ਵਤ੍ਤਬ੍ਬਂ. ਏਵਂ ਞਤ੍ਤਿਂ ਠਪੇਤ੍ਵਾ ਕਾਤਬ੍ਬੋ. ਯਤ੍ਰ ਪਨ ਦ੍ਵੇ ਭਿਕ੍ਖੂ ਵਿਹਰਨ੍ਤਿ, ਤਤ੍ਰ ਞਤ੍ਤਿਂ ਅਟ੍ਠਪੇਤ੍ਵਾ ਵੁਤ੍ਤਨਯੇਨੇਵ ਪਾਰਿਸੁਦ੍ਧਿ ਆਰੋਚੇਤਬ੍ਬਾਤਿ ਅਯਂ ਪਾਰਿਸੁਦ੍ਧਿਉਪੋਸਥੋ.

ਸਚੇ ਪਨ ਏਕੋਵ ਭਿਕ੍ਖੁ ਹੋਤਿ, ਸਬ੍ਬਂ ਪੁਬ੍ਬਕਰਣੀਯਂ ਕਤ੍ਵਾ ਅਞ੍ਞੇਸਂ ਅਨਾਗਮਨਂ ਞਤ੍ਵਾ ‘‘ਅਜ੍ਜ ਮੇ ਉਪੋਸਥੋ ਚਾਤੁਦ੍ਦਸੋ’’ਤਿ ਵਾ ‘‘ਪਨ੍ਨਰਸੋ’’ਤਿ ਵਾ ਵਤ੍ਵਾ ‘‘ਅਧਿਟ੍ਠਾਮੀ’’ਤਿ ਵਤ੍ਤਬ੍ਬਂ. ਅਯਂ ਅਧਿਟ੍ਠਾਨੁਪੋਸਥੋਤਿ ਏਵਂ ਕਤ੍ਤਬ੍ਬਾਕਾਰਵਸੇਨ ਤਯੋ ਉਪੋਸਥਾ ਵੇਦਿਤਬ੍ਬਾ. ਏਤ੍ਤਾਵਤਾ ਨਵ ਉਪੋਸਥਾ ਦੀਪਿਤਾ ਹੋਨ੍ਤਿ. ਤੇਸੁ ਦਿਵਸਵਸੇਨ ਪਨ੍ਨਰਸਿਕੋ, ਕਾਰਕਵਸੇਨ ਸਙ੍ਘੁਪੋਸਥੋ, ਕਤ੍ਤਬ੍ਬਾਕਾਰਵਸੇਨ ਸੁਤ੍ਤੁਦ੍ਦੇਸੋਤਿ ਏਵਂ ਤਿਲਕ੍ਖਣਸਮ੍ਪਨ੍ਨੇ ਉਪੋਸਥੇ ਪਵਤ੍ਤਮਾਨੇ ਉਪੋਸਥਂ ਅਕਤ੍ਵਾ ਤਦਹੁਪੋਸਥੇ ਅਞ੍ਞਂ ਅਭਿਕ੍ਖੁਕਂ ਨਾਨਾਸਂਵਾਸਕੇਹਿ ਵਾ ਸਭਿਕ੍ਖੁਕਂ ਆਵਾਸਂ ਵਾ ਅਨਾਵਾਸਂ ਵਾ ਵਾਸਤ੍ਥਾਯ ਅਞ੍ਞਤ੍ਰ ਸਙ੍ਘੇਨ ਅਞ੍ਞਤ੍ਰ ਅਨ੍ਤਰਾਯਾ ਗਚ੍ਛਨ੍ਤਸ੍ਸ ਦੁਕ੍ਕਟਂ ਹੋਤਿ.

੧੭੦. ਉਪੋਸਥਕਰਣਤ੍ਥਂ ਸਨ੍ਨਿਪਤਿਤੇ ਸਙ੍ਘੇ ਬਹਿ ਉਪੋਸਥਂ ਕਤ੍ਵਾ ਆਗਤੇਨ ਸਨ੍ਨਿਪਾਤਟ੍ਠਾਨਂ ਗਨ੍ਤ੍ਵਾ ਕਾਯਸਾਮਗ੍ਗਿਂ ਅਦੇਨ੍ਤੇਨ ਛਨ੍ਦੋ ਦਾਤਬ੍ਬੋ. ਯੋਪਿ ਗਿਲਾਨੋ ਵਾ ਹੋਤਿ ਕਿਚ੍ਚਪਸੁਤੋ ਵਾ, ਤੇਨਪਿ ਪਾਰਿਸੁਦ੍ਧਿਂ ਦੇਨ੍ਤੇਨ ਛਨ੍ਦੋਪਿ ਦਾਤਬ੍ਬੋ. ਕਥਂ? ਏਕਸ੍ਸ ਭਿਕ੍ਖੁਨੋ ਸਨ੍ਤਿਕੇ ‘‘ਛਨ੍ਦਂ ਦਮ੍ਮਿ, ਛਨ੍ਦਂ ਮੇ ਹਰ, ਛਨ੍ਦਂ ਮੇ ਆਰੋਚੇਹੀ’’ਤਿ ਅਯਮਤ੍ਥੋ ਕਾਯੇਨ ਵਾ ਵਾਚਾਯ ਵਾ ਉਭਯੇਨ ਵਾ ਵਿਞ੍ਞਾਪੇਤਬ੍ਬੋ, ਏਵਂ ਦਿਨ੍ਨੋ ਹੋਤਿ ਛਨ੍ਦੋ. ਅਕਤੁਪੋਸਥੇਨ ਗਿਲਾਨੇਨ ਵਾ ਕਿਚ੍ਚਪਸੁਤੇਨ ਵਾ ਪਾਰਿਸੁਦ੍ਧਿ ਦਾਤਬ੍ਬਾ. ਕਥਂ? ਏਕਸ੍ਸ ਭਿਕ੍ਖੁਨੋ ਸਨ੍ਤਿਕੇ ‘‘ਪਾਰਿਸੁਦ੍ਧਿਂ ਦਮ੍ਮਿ, ਪਾਰਿਸੁਦ੍ਧਿਂ ਮੇ ਹਰ, ਪਾਰਿਸੁਦ੍ਧਿਂ ਮੇ ਆਰੋਚੇਹੀ’’ਤਿ ਅਯਮਤ੍ਥੋ ਕਾਯੇਨ ਵਾ ਵਾਚਾਯ ਵਾ ਉਭਯੇਨ ਵਾ ਵਿਞ੍ਞਾਪੇਤਬ੍ਬੋ, ਏਵਂ ਦਿਨ੍ਨਾ ਹੋਤਿ ਪਾਰਿਸੁਦ੍ਧਿ. ਤਂ ਪਨ ਦੇਨ੍ਤੇਨ ਛਨ੍ਦੋਪਿ ਦਾਤਬ੍ਬੋ. ਵੁਤ੍ਤਞ੍ਹੇਤਂ ਭਗਵਤਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਤਦਹੁਪੋਸਥੇ ਪਾਰਿਸੁਦ੍ਧਿਂ ਦੇਨ੍ਤੇਨ ਛਨ੍ਦਮ੍ਪਿ ਦਾਤੁਂ, ਸਨ੍ਤਿ ਸਙ੍ਘਸ੍ਸ ਕਰਣੀਯ’’ਨ੍ਤਿ (ਮਹਾਵ. ੧੬੫). ਤਤ੍ਥ ਪਾਰਿਸੁਦ੍ਧਿਦਾਨਂ ਸਙ੍ਘਸ੍ਸਪਿ ਅਤ੍ਤਨੋਪਿ ਉਪੋਸਥਕਰਣਂ ਸਮ੍ਪਾਦੇਤਿ, ਨ ਅਵਸੇਸਂ ਸਙ੍ਘਕਿਚ੍ਚਂ, ਛਨ੍ਦਦਾਨਂ ਸਙ੍ਘਸ੍ਸੇਵ ਉਪੋਸਥਕਰਣਞ੍ਚ ਸੇਸਕਿਚ੍ਚਞ੍ਚ ਸਮ੍ਪਾਦੇਤਿ, ਅਤ੍ਤਨੋ ਪਨਸ੍ਸ ਉਪੋਸਥੋ ਅਕਤੋਯੇਵ ਹੋਤਿ, ਤਸ੍ਮਾ ਪਾਰਿਸੁਦ੍ਧਿਂ ਦੇਨ੍ਤੇਨ ਛਨ੍ਦੋਪਿ ਦਾਤਬ੍ਬੋ. ਪੁਬ੍ਬੇ ਵੁਤ੍ਤਂ ਪਨ ਸੁਦ੍ਧਿਕਚ੍ਛਨ੍ਦਂ ਵਾ ਪਾਰਿਸੁਦ੍ਧਿਂ ਵਾ ਇਮਂ ਵਾ ਛਨ੍ਦਪਾਰਿਸੁਦ੍ਧਿਂ ਏਕੇਨ ਬਹੂਨਮ੍ਪਿ ਆਹਰਿਤੁਂ ਵਟ੍ਟਤਿ. ਸਚੇ ਪਨ ਸੋ ਅਨ੍ਤਰਾਮਗ੍ਗੇ ਅਞ੍ਞਂ ਭਿਕ੍ਖੁਂ ਪਸ੍ਸਿਤ੍ਵਾ ਯੇਸਂ ਤੇਨ ਛਨ੍ਦੋ ਵਾ ਪਾਰਿਸੁਦ੍ਧਿ ਵਾ ਗਹਿਤਾ, ਤੇਸਞ੍ਚ ਅਤ੍ਤਨੋ ਚ ਛਨ੍ਦਪਾਰਿਸੁਦ੍ਧਿਂ ਦੇਤਿ, ਤਸ੍ਸੇਵ ਆਗਚ੍ਛਤਿ. ਇਤਰਾ ਪਨ ਬਿਲ਼ਾਲਸਙ੍ਖਲਿਕਾ ਛਨ੍ਦਪਾਰਿਸੁਦ੍ਧਿ ਨਾਮ ਹੋਤਿ, ਸਾ ਨ ਆਗਚ੍ਛਤਿ, ਤਸ੍ਮਾ ਸਯਮੇਵ ਸਨ੍ਨਿਪਾਤਟ੍ਠਾਨਂ ਗਨ੍ਤ੍ਵਾ ਆਰੋਚੇਤਬ੍ਬਂ. ਸਚੇ ਪਨ ਸਞ੍ਚਿਚ੍ਚ ਨਾਰੋਚੇਤਿ, ਦੁਕ੍ਕਟਂ ਆਪਜ੍ਜਤਿ, ਛਨ੍ਦਪਾਰਿਸੁਦ੍ਧਿ ਪਨ ਤਸ੍ਮਿਂ ਹਤ੍ਥਪਾਸਂ ਉਪਗਤਮਤ੍ਤੇਯੇਵ ਆਗਤਾ ਹੋਤਿ.

੧੭੧. ਪਾਰਿਵਾਸਿਯੇਨ ਪਨ ਛਨ੍ਦਦਾਨੇਨ ਯਂ ਕਿਞ੍ਚਿ ਸਙ੍ਘਕਮ੍ਮਂ ਕਾਤੁਂ ਨ ਵਟ੍ਟਤਿ. ਤਤ੍ਥ (ਪਾਚਿ. ਅਟ੍ਠ. ੧੧੬੭) ਚਤੁਬ੍ਬਿਧਂ ਪਾਰਿਵਾਸਿਯਂ ਪਰਿਸਪਾਰਿਵਾਸਿਯਂ ਰਤ੍ਤਿਪਾਰਿਵਾਸਿਯਂ ਛਨ੍ਦਪਾਰਿਵਾਸਿਯਂ ਅਜ੍ਝਾਸਯਪਾਰਿਵਾਸਿਯਨ੍ਤਿ. ਤੇਸੁ ਪਰਿਸਪਾਰਿਵਾਸਿਯਂ ਨਾਮ ਭਿਕ੍ਖੂ ਕੇਨਚਿਦੇਵ ਕਰਣੀਯੇਨ ਸਨ੍ਨਿਪਤਿਤਾ ਹੋਨ੍ਤਿ, ਅਥ ਮੇਘੋ ਵਾ ਉਟ੍ਠੇਤਿ, ਉਸ੍ਸਾਰਣਾ ਵਾ ਕਰੀਯਤਿ, ਮਨੁਸ੍ਸਾ ਵਾ ਅਜ੍ਝੋਤ੍ਥਰਨ੍ਤਾ ਆਗਚ੍ਛਨ੍ਤਿ, ਭਿਕ੍ਖੂ ‘‘ਅਨੋਕਾਸਾ ਮਯਂ, ਅਞ੍ਞਤ੍ਥ ਗਚ੍ਛਾਮਾ’’ਤਿ ਛਨ੍ਦਂ ਅਵਿਸ੍ਸਜ੍ਜੇਤ੍ਵਾਵ ਉਟ੍ਠਹਨ੍ਤਿ. ਇਦਂ ਪਰਿਸਪਾਰਿਵਾਸਿਯਂ. ਕਿਞ੍ਚਾਪਿ ਪਰਿਸਪਾਰਿਵਾਸਿਯਂ, ਛਨ੍ਦਸ੍ਸ ਪਨ ਅਵਿਸ੍ਸਟ੍ਠਤ੍ਤਾ ਕਮ੍ਮਂ ਕਾਤੁਂ ਵਟ੍ਟਤਿ.

ਪੁਨ ਭਿਕ੍ਖੂ ‘‘ਉਪੋਸਥਾਦੀਨਿ ਕਰਿਸ੍ਸਾਮਾ’’ਤਿ ਰਤ੍ਤਿਂ ਸਨ੍ਨਿਪਤਿਤ੍ਵਾ ‘‘ਯਾਵ ਸਬ੍ਬੇ ਸਨ੍ਨਿਪਤਨ੍ਤਿ, ਤਾਵ ਧਮ੍ਮਂ ਸੁਣਿਸ੍ਸਾਮਾ’’ਤਿ ਏਕਂ ਅਜ੍ਝੇਸਨ੍ਤਿ, ਤਸ੍ਮਿਂ ਧਮ੍ਮਕਥਂ ਕਥੇਨ੍ਤੇਯੇਵ ਅਰੁਣੋ ਉਗ੍ਗਚ੍ਛਤਿ. ਸਚੇ ‘‘ਚਾਤੁਦ੍ਦਸਿਕਂ ਉਪੋਸਥਂ ਕਰਿਸ੍ਸਾਮਾ’’ਤਿ ਨਿਸਿਨ੍ਨਾ, ਪਨ੍ਨਰਸੋਤਿ ਕਾਤੁਂ ਵਟ੍ਟਤਿ. ਸਚੇ ਪਨ੍ਨਰਸਿਕਂ ਕਾਤੁਂ ਨਿਸਿਨ੍ਨਾ, ਪਾਟਿਪਦੇ ਅਨੁਪੋਸਥੇ ਉਪੋਸਥਂ ਕਾਤੁਂ ਨ ਵਟ੍ਟਤਿ, ਅਞ੍ਞਂ ਪਨ ਸਙ੍ਘਕਿਚ੍ਚਂ ਕਾਤੁਂ ਵਟ੍ਟਤਿ. ਇਦਂ ਰਤ੍ਤਿਪਾਰਿਵਾਸਿਯਂ ਨਾਮ.

ਪੁਨ ਭਿਕ੍ਖੂ ‘‘ਕਿਞ੍ਚਿਦੇਵ ਅਬ੍ਭਾਨਾਦਿਸਙ੍ਘਕਮ੍ਮਂ ਕਰਿਸ੍ਸਾਮਾ’’ਤਿ ਨਿਸਿਨ੍ਨਾ ਹੋਨ੍ਤਿ, ਤਤ੍ਰੇਕੋ ਨਕ੍ਖਤ੍ਤਪਾਠਕੋ ਭਿਕ੍ਖੁ ਏਵਂ ਵਦਤਿ ‘‘ਅਜ੍ਜ ਨਕ੍ਖਤ੍ਤਂ ਦਾਰੁਣਂ, ਮਾ ਇਮਂ ਕਰੋਥਾ’’ਤਿ. ਤੇ ਤਸ੍ਸ ਵਚਨੇਨ ਛਨ੍ਦਂ ਵਿਸ੍ਸਜ੍ਜੇਤ੍ਵਾ ਤਤ੍ਥੇਵ ਨਿਸਿਨ੍ਨਾ ਹੋਨ੍ਤਿ. ਅਥਞ੍ਞੋ ਆਗਨ੍ਤ੍ਵਾ ‘‘ਨਕ੍ਖਤ੍ਤਂ ਪਤਿਮਾਨੇਨ੍ਤਂ, ਅਤ੍ਥੋ ਬਾਲਂ ਉਪਚ੍ਚਗਾ’’ਤਿ (ਜਾ. ੧.੧.੪੯) ਵਤ੍ਵਾ ‘‘ਕਿਂ ਨਕ੍ਖਤ੍ਤੇਨ, ਕਰੋਥਾ’’ਤਿ ਵਦਤਿ. ਇਦਂ ਛਨ੍ਦਪਾਰਿਵਾਸਿਯਞ੍ਚੇਵ ਅਜ੍ਝਾਸਯਪਾਰਿਵਾਸਿਯਞ੍ਚ. ਏਤਸ੍ਮਿਂ ਪਾਰਿਵਾਸਿਯੇ ਪੁਨ ਛਨ੍ਦਪਾਰਿਸੁਦ੍ਧਿਂ ਅਨਾਨੇਤ੍ਵਾ ਕਮ੍ਮਂ ਕਾਤੁਂ ਨ ਵਟ੍ਟਤਿ.

੧੭੨. ਸਚੇ ਕੋਚਿ ਭਿਕ੍ਖੁ ਗਿਲਾਨੋ ਨ ਸਕ੍ਕੋਤਿ ਛਨ੍ਦਪਾਰਿਸੁਦ੍ਧਿਂ ਦਾਤੁਂ, ਸੋ ਮਞ੍ਚੇਨ ਵਾ ਪੀਠੇਨ ਵਾ ਸਙ੍ਘਮਜ੍ਝਂ ਆਨੇਤਬ੍ਬੋ. ਸਚੇ ਗਿਲਾਨੁਪਟ੍ਠਾਕਾਨਂ ਭਿਕ੍ਖੂਨਂ ਏਵਂ ਹੋਤਿ ‘‘ਸਚੇ ਖੋ ਮਯਂ ਗਿਲਾਨਂ ਠਾਨਾ ਚਾਵੇਸ੍ਸਾਮ, ਆਬਾਧੋ ਵਾ ਅਭਿਵਡ੍ਢਿਸ੍ਸਤਿ, ਕਾਲਕਿਰਿਯਾ ਵਾ ਭਵਿਸ੍ਸਤੀ’’ਤਿ, ਨ ਸੋ ਭਿਕ੍ਖੁ ਠਾਨਾ ਚਾਵੇਤਬ੍ਬੋ, ਸਙ੍ਘੇਨ ਤਤ੍ਥ ਗਨ੍ਤ੍ਵਾ ਉਪੋਸਥੋ ਕਾਤਬ੍ਬੋ. ਸਚੇ ਬਹੂ ਤਾਦਿਸਾ ਗਿਲਾਨਾ ਹੋਨ੍ਤਿ, ਸਙ੍ਘੇਨ ਪਟਿਪਾਟਿਯਾ ਠਤ੍ਵਾ ਸਬ੍ਬੇ ਹਤ੍ਥਪਾਸੇ ਕਾਤਬ੍ਬਾ. ਸਚੇ ਦੂਰੇ ਹੋਨ੍ਤਿ, ਸਙ੍ਘੋ ਨਪ੍ਪਹੋਤਿ, ਤਂ ਦਿਵਸਂ ਉਪੋਸਥੋ ਨ ਕਾਤਬ੍ਬੋ. ਨ ਤ੍ਵੇਵ ਵਗ੍ਗੇਨ ਸਙ੍ਘੇਨ ਉਪੋਸਥੋ ਕਾਤਬ੍ਬੋ, ਕਰੇਯ੍ਯ ਚੇ, ਦੁਕ੍ਕਟਂ.

ਸਚੇ (ਮਹਾਵ. ਅਟ੍ਠ. ੧੪੯) ਏਕਸ੍ਮਿਂ ਵਿਹਾਰੇ ਚਤੂਸੁ ਭਿਕ੍ਖੂਸੁ ਵਸਨ੍ਤੇਸੁ ਏਕਸ੍ਸ ਛਨ੍ਦਪਾਰਿਸੁਦ੍ਧਿਂ ਆਹਰਿਤ੍ਵਾ ਤਯੋ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਤੀਸੁ ਵਾ ਵਸਨ੍ਤੇਸੁ ਏਕਸ੍ਸ ਛਨ੍ਦਪਾਰਿਸੁਦ੍ਧਿਂ ਆਹਰਿਤ੍ਵਾ ਦ੍ਵੇ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ, ਅਧਮ੍ਮੇਨ ਵਗ੍ਗਂ ਉਪੋਸਥਕਮ੍ਮਂ ਹੋਤਿ. ਸਚੇ ਪਨ ਚਤ੍ਤਾਰੋਪਿ ਸਨ੍ਨਿਪਤਿਤ੍ਵਾ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਤਯੋ ਵਾ ਦ੍ਵੇ ਵਾ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ, ਅਧਮ੍ਮੇਨ ਸਮਗ੍ਗਂ ਨਾਮ ਹੋਤਿ. ਸਚੇ ਚਤੂਸੁ ਜਨੇਸੁ ਏਕਸ੍ਸ ਪਾਰਿਸੁਦ੍ਧਿਂ ਆਹਰਿਤ੍ਵਾ ਤਯੋ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ, ਤੀਸੁ ਵਾ ਜਨੇਸੁ ਏਕਸ੍ਸ ਪਾਰਿਸੁਦ੍ਧਿਂ ਆਹਰਿਤ੍ਵਾ ਦ੍ਵੇ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਧਮ੍ਮੇਨ ਵਗ੍ਗਂ ਨਾਮ ਹੋਤਿ. ਸਚੇ ਪਨ ਚਤ੍ਤਾਰੋ ਏਕਤ੍ਥ ਵਸਨ੍ਤਾ ਸਬ੍ਬੇ ਸਨ੍ਨਿਪਤਿਤ੍ਵਾ ਪਾਤਿਮੋਕ੍ਖਂ ਉਦ੍ਦਿਸਨ੍ਤਿ, ਤਯੋ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਦ੍ਵੇ ਅਞ੍ਞਮਞ੍ਞਂ ਪਾਰਿਸੁਦ੍ਧਿਉਪੋਸਥਂ ਕਰੋਨ੍ਤਿ, ਧਮ੍ਮੇਨ ਸਮਗ੍ਗਂ ਨਾਮ ਹੋਤਿ.

੧੭੩. ਪਵਾਰਣਾਕਮ੍ਮੇਸੁ (ਮਹਾਵ. ਅਟ੍ਠ. ੨੧੨) ਪਨ ਸਚੇ ਏਕਸ੍ਮਿਂ ਵਿਹਾਰੇ ਪਞ੍ਚਸੁ ਭਿਕ੍ਖੂਸੁ ਵਸਨ੍ਤੇਸੁ ਏਕਸ੍ਸ ਪਵਾਰਣਂ ਆਹਰਿਤ੍ਵਾ ਚਤ੍ਤਾਰੋ ਗਣਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਚਤੂਸੁ ਵਾ ਤੀਸੁ ਵਾ ਵਸਨ੍ਤੇਸੁ ਏਕਸ੍ਸ ਪਵਾਰਣਂ ਆਹਰਿਤ੍ਵਾ ਤਯੋ ਵਾ ਦ੍ਵੇ ਵਾ ਸਙ੍ਘਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਸਬ੍ਬਮੇਤਂ ਅਧਮ੍ਮੇਨ ਵਗ੍ਗਂ ਪਵਾਰਣਾਕਮ੍ਮਂ. ਸਚੇ ਪਨ ਸਬ੍ਬੇਪਿ ਪਞ੍ਚ ਜਨਾ ਏਕਤੋ ਸਨ੍ਨਿਪਤਿਤ੍ਵਾ ਗਣਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਚਤ੍ਤਾਰੋ ਵਾ ਤਯੋ ਵਾ ਦ੍ਵੇ ਵਾ ਵਸਨ੍ਤਾ ਏਕਤੋ ਸਨ੍ਨਿਪਤਿਤ੍ਵਾ ਸਙ੍ਘਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਸਬ੍ਬਮੇਤਂ ਅਧਮ੍ਮੇਨ ਸਮਗ੍ਗਂ ਪਵਾਰਣਾਕਮ੍ਮਂ. ਸਚੇ ਪਞ੍ਚਸੁ ਜਨੇਸੁ ਏਕਸ੍ਸ ਪਵਾਰਣਂ ਆਹਰਿਤ੍ਵਾ ਚਤ੍ਤਾਰੋ ਸਙ੍ਘਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਚਤੂਸੁ ਵਾ ਤੀਸੁ ਵਾ ਏਕਸ੍ਸ ਪਵਾਰਣਂ ਆਹਰਿਤ੍ਵਾ ਤਯੋ ਵਾ ਦ੍ਵੇ ਵਾ ਗਣਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਸਬ੍ਬਮੇਤਂ ਧਮ੍ਮੇਨ ਵਗ੍ਗਂ ਪਵਾਰਣਾਕਮ੍ਮਂ. ਸਚੇ ਪਨ ਸਬ੍ਬੇਪਿ ਪਞ੍ਚ ਜਨਾ ਏਕਤੋ ਸਨ੍ਨਿਪਤਿਤ੍ਵਾ ਸਙ੍ਘਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਚਤ੍ਤਾਰੋ ਵਾ ਤਯੋ ਵਾ ਏਕਤੋ ਸਨ੍ਨਿਪਤਿਤ੍ਵਾ ਗਣਞਤ੍ਤਿਂ ਠਪੇਤ੍ਵਾ ਪਵਾਰੇਨ੍ਤਿ, ਦ੍ਵੇ ਅਞ੍ਞਮਞ੍ਞਂ ਪਵਾਰੇਨ੍ਤਿ, ਏਕਕੋ ਵਸਨ੍ਤੋ ਅਧਿਟ੍ਠਾਨਪਵਾਰਣਂ ਕਰੋਤਿ, ਸਬ੍ਬਮੇਤਂ ਧਮ੍ਮੇਨ ਸਮਗ੍ਗਂ ਨਾਮ ਪਵਾਰਣਾਕਮ੍ਮਨ੍ਤਿ.

ਏਤ੍ਥ ਸਚੇ ਚਾਤੁਦ੍ਦਸਿਕਾ ਹੋਤਿ, ‘‘ਅਜ੍ਜ ਮੇ ਪਵਾਰਣਾ ਚਾਤੁਦ੍ਦਸੀ’’ਤਿ, ਸਚੇ ਪਨ੍ਨਰਸਿਕਾ, ‘‘ਅਜ੍ਜ ਮੇ ਪਵਾਰਣਾ ਪਨ੍ਨਰਸੀ’’ਤਿ ਏਵਂ ਅਧਿਟ੍ਠਾਤਬ੍ਬਂ. ਪਵਾਰਣਂ ਦੇਨ੍ਤੇਨ ਪਨ ‘‘ਪਵਾਰਣਂ ਦਮ੍ਮਿ, ਪਵਾਰਣਂ ਮੇ ਹਰ, ਮਮਤ੍ਥਾਯ ਪਵਾਰੇਹੀ’’ਤਿ ਕਾਯੇਨ ਵਾ ਵਾਚਾਯ ਵਾ ਕਾਯਵਾਚਾਹਿ ਵਾ ਅਯਮਤ੍ਥੋ ਵਿਞ੍ਞਾਪੇਤਬ੍ਬੋ. ਏਵਂ ਦਿਨ੍ਨਾਯ (ਮਹਾਵ. ਅਟ੍ਠ. ੨੧੩) ਪਵਾਰਣਾਯ ਪਵਾਰਣਾਹਾਰਕੇਨ ਸਙ੍ਘਂ ਉਪਸਙ੍ਕਮਿਤ੍ਵਾ ਏਵਂ ਪਵਾਰੇਤਬ੍ਬਂ ‘‘ਤਿਸ੍ਸੋ, ਭਨ੍ਤੇ, ਭਿਕ੍ਖੁ ਸਙ੍ਘਂ ਪਵਾਰੇਤਿ ਦਿਟ੍ਠੇਨ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ, ਵਦਤੁ ਤਂ, ਭਨ੍ਤੇ, ਸਙ੍ਘੋ ਅਨੁਕਮ੍ਪਂ ਉਪਾਦਾਯ, ਪਸ੍ਸਨ੍ਤੋ ਪਟਿਕਰਿਸ੍ਸਤਿ. ਦੁਤਿਯਮ੍ਪਿ, ਭਨ੍ਤੇ…ਪੇ… ਤਤਿਯਮ੍ਪਿ, ਭਨ੍ਤੇ, ਤਿਸ੍ਸੋ ਭਿਕ੍ਖੁ ਸਙ੍ਘਂ ਪਵਾਰੇਤਿ…ਪੇ… ਪਟਿਕਰਿਸ੍ਸਤੀ’’ਤਿ. ਸਚੇ ਪਨ ਵੁਡ੍ਢਤਰੋ ਹੋਤਿ, ‘‘ਆਯਸ੍ਮਾ, ਭਨ੍ਤੇ, ਤਿਸ੍ਸੋ’’ਤਿ ਵਤ੍ਤਬ੍ਬਂ. ਏਵਞ੍ਹਿ ਤੇਨ ਤਸ੍ਸਤ੍ਥਾਯ ਪਵਾਰਿਤਂ ਹੋਤਿ. ਪਵਾਰਣਂ ਦੇਨ੍ਤੇਨ ਪਨ ਛਨ੍ਦੋਪਿ ਦਾਤਬ੍ਬੋ, ਛਨ੍ਦਦਾਨਂ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਧਾਪਿ ਛਨ੍ਦਦਾਨਂ ਅਵਸੇਸਕਮ੍ਮਤ੍ਥਾਯ. ਤਸ੍ਮਾ ਸਚੇ ਪਵਾਰਣਂ ਦੇਨ੍ਤੋ ਛਨ੍ਦਂ ਦੇਤਿ, ਵੁਤ੍ਤਨਯੇਨ ਆਹਟਾਯ ਪਵਾਰਣਾਯ ਤੇਨ ਚ ਭਿਕ੍ਖੁਨਾ ਸਙ੍ਘੇਨ ਚ ਪਵਾਰਿਤਮੇਵ ਹੋਤਿ. ਅਥ ਪਵਾਰਣਮੇਵ ਦੇਤਿ, ਨ ਛਨ੍ਦਂ, ਤਸ੍ਸ ਚ ਪਵਾਰਣਾਯ ਆਰੋਚਿਤਾਯ ਸਙ੍ਘੇਨ ਚ ਪਵਾਰਿਤੇ ਸਬ੍ਬੇਸਂ ਸੁਪ੍ਪਵਾਰਿਤਂ ਹੋਤਿ, ਅਞ੍ਞਂ ਪਨ ਕਮ੍ਮਂ ਕੁਪ੍ਪਤਿ. ਸਚੇ ਛਨ੍ਦਮੇਵ ਦੇਤਿ, ਨ ਪਵਾਰਣਂ, ਸਙ੍ਘਸ੍ਸ ਪਵਾਰਣਾ ਚ ਸੇਸਕਮ੍ਮਾਨਿ ਚ ਨ ਕੁਪ੍ਪਨ੍ਤਿ, ਤੇਨ ਪਨ ਭਿਕ੍ਖੁਨਾ ਅਪ੍ਪਵਾਰਿਤਂ ਹੋਤਿ, ਪਵਾਰਣਾਦਿਵਸੇ ਪਨ ਬਹਿਸੀਮਾਯ ਪਵਾਰਣਂ ਅਧਿਟ੍ਠਹਿਤ੍ਵਾ ਆਗਤੇਨਪਿ ਛਨ੍ਦੋ ਦਾਤਬ੍ਬੋ ਤੇਨ ਸਙ੍ਘਸ੍ਸ ਪਵਾਰਣਾਕਮ੍ਮਂ ਨ ਕੁਪ੍ਪਤਿ.

ਸਚੇ ਪੁਰਿਮਿਕਾਯ ਪਞ੍ਚ ਭਿਕ੍ਖੂ ਵਸ੍ਸਂ ਉਪਗਤਾ, ਪਚ੍ਛਿਮਿਕਾਯਪਿ ਪਞ੍ਚ, ਪੁਰਿਮੇਹਿ ਞਤ੍ਤਿਂ ਠਪੇਤ੍ਵਾ ਪਵਾਰਿਤੇ ਪਚ੍ਛਿਮੇਹਿ ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿਉਪੋਸਥੋ ਕਾਤਬ੍ਬੋ, ਨ ਏਕਸ੍ਮਿਂ ਉਪੋਸਥਗ੍ਗੇ ਦ੍ਵੇ ਞਤ੍ਤਿਯੋ ਠਪੇਤਬ੍ਬਾ. ਸਚੇਪਿ ਪਚ੍ਛਿਮਿਕਾਯ ਉਪਗਤਾ ਚਤ੍ਤਾਰੋ ਤਯੋ ਦ੍ਵੇ ਏਕੋ ਵਾ ਹੋਤਿ, ਏਸੇਵ ਨਯੋ. ਅਥ ਪੁਰਿਮਿਕਾਯ ਚਤ੍ਤਾਰੋ, ਪਚ੍ਛਿਮਿਕਾਯਪਿ ਚਤ੍ਤਾਰੋ ਤਯੋ ਦ੍ਵੇ ਏਕੋ ਵਾ, ਏਸੇਵ ਨਯੋ. ਅਥਾਪਿ ਪੁਰਿਮਿਕਾਯ ਤਯੋ, ਪਚ੍ਛਿਮਿਕਾਯਪਿ ਤਯੋ ਦ੍ਵੇ ਏਕੋ ਵਾ, ਏਸੇਵ ਨਯੋ. ਇਦਞ੍ਹੇਤ੍ਥ ਲਕ੍ਖਣਂ.

ਸਚੇ ਪੁਰਿਮਿਕਾਯ ਉਪਗਤੇਹਿ ਪਚ੍ਛਿਮਿਕਾਯ ਉਪਗਤਾ ਥੋਕਤਰਾ ਚੇਵ ਹੋਨ੍ਤਿ ਸਮਸਮਾ ਚ, ਸਙ੍ਘਪਵਾਰਣਾਯ ਚ ਗਣਂ ਪੂਰੇਨ੍ਤਿ, ਸਙ੍ਘਪਵਾਰਣਾਵਸੇਨ ਞਤ੍ਤਿ ਠਪੇਤਬ੍ਬਾ. ਸਚੇ ਪਨ ਪਚ੍ਛਿਮਿਕਾਯ ਏਕੋ ਹੋਤਿ, ਤੇਨ ਸਦ੍ਧਿਂ ਤੇ ਚਤ੍ਤਾਰੋ ਹੋਨ੍ਤਿ, ਚਤੁਨ੍ਨਂ ਸਙ੍ਘਞਤ੍ਤਿਂ ਠਪੇਤ੍ਵਾ ਪਵਾਰੇਤੁਂ ਨ ਵਟ੍ਟਤਿ. ਗਣਞਤ੍ਤਿਯਾ ਪਨ ਸੋ ਗਣਪੂਰਕੋ ਹੋਤਿ, ਤਸ੍ਮਾ ਗਣਵਸੇਨ ਞਤ੍ਤਿਂ ਠਪੇਤ੍ਵਾ ਪੁਰਿਮੇਹਿ ਪਵਾਰੇਤਬ੍ਬਂ, ਇਤਰੇਨ ਤੇਸਂ ਸਨ੍ਤਿਕੇ ਪਾਰਿਸੁਦ੍ਧਿਉਪੋਸਥੋ ਕਾਤਬ੍ਬੋਤਿ. ਪੁਰਿਮਿਕਾਯ ਦ੍ਵੇ, ਪਚ੍ਛਿਮਿਕਾਯ ਦ੍ਵੇ ਵਾ ਏਕੋ ਵਾ ਏਸੇਵ ਨਯੋ. ਪੁਰਿਮਿਕਾਯ ਏਕੋ ਪਚ੍ਛਿਮਿਕਾਯ ਏਕੋਤਿ ਏਕੇਨ ਏਕਸ੍ਸ ਸਨ੍ਤਿਕੇ ਪਵਾਰੇਤਬ੍ਬਂ, ਏਕੇਨ ਪਾਰਿਸੁਦ੍ਧਿਉਪੋਸਥੋ ਕਾਤਬ੍ਬੋ. ਸਚੇ ਪੁਰਿਮੇਹਿ ਵਸ੍ਸੂਪਗਤੇਹਿ ਪਚ੍ਛਾ ਵਸ੍ਸੂਪਗਤਾ ਏਕੇਨਪਿ ਅਧਿਕਤਰਾ ਹੋਨ੍ਤਿ, ਪਠਮਂ ਪਾਤਿਮੋਕ੍ਖਂ ਉਦ੍ਦਿਸਿਤ੍ਵਾ ਪਚ੍ਛਾ ਥੋਕਤਰੇਹਿ ਤੇਸਂ ਸਨ੍ਤਿਕੇ ਪਵਾਰੇਤਬ੍ਬਂ.

ਕਤ੍ਤਿਕਾਯ ਚਾਤੁਮਾਸਿਨਿਪਵਾਰਣਾਯ ਪਨ ਸਚੇ ਪਠਮਵਸ੍ਸੂਪਗਤੇਹਿ ਮਹਾਪਵਾਰਣਾਯ ਪਵਾਰਿਤੇਹਿ ਪਚ੍ਛਾ ਉਪਗਤਾ ਅਧਿਕਤਰਾ ਵਾ ਸਮਸਮਾ ਵਾ ਹੋਨ੍ਤਿ, ਪਵਾਰਣਾਞਤ੍ਤਿਂ ਠਪੇਤ੍ਵਾ ਪਵਾਰੇਤਬ੍ਬਂ. ਤੇਹਿ ਪਵਾਰਿਤੇ ਪਚ੍ਛਾ ਇਤਰੇਹਿ ਪਾਰਿਸੁਦ੍ਧਿਉਪੋਸਥੋ ਕਾਤਬ੍ਬੋ. ਅਥ ਮਹਾਪਵਾਰਣਾਯਂ ਪਵਾਰਿਤਾ ਬਹੂ ਹੋਨ੍ਤਿ, ਪਚ੍ਛਾ ਵਸ੍ਸੂਪਗਤਾ ਥੋਕਾ ਵਾ ਏਕੋ ਵਾ, ਪਾਤਿਮੋਕ੍ਖੇ ਉਦ੍ਦਿਟ੍ਠੇ ਪਚ੍ਛਾ ਤੇਸਂ ਸਨ੍ਤਿਕੇ ਤੇਨ ਪਵਾਰੇਤਬ੍ਬਂ. ਕਿਂ ਪਨੇਤਂ ਪਾਤਿਮੋਕ੍ਖਂ ਸਕਲਮੇਵ ਉਦ੍ਦਿਸਿਤਬ੍ਬਂ, ਉਦਾਹੁ ਏਕਦੇਸਮ੍ਪੀਤਿ? ਏਕਦੇਸਮ੍ਪਿ ਉਦ੍ਦਿਸਿਤੁਂ ਵਟ੍ਟਤਿ. ਵੁਤ੍ਤਞ੍ਹੇਤਂ ਭਗਵਤਾ –

‘‘ਪਞ੍ਚਿਮੇ, ਭਿਕ੍ਖਵੇ, ਪਾਤਿਮੋਕ੍ਖੁਦ੍ਦੇਸਾ, ਨਿਦਾਨਂ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ, ਅਯਂ ਪਠਮੋ ਪਾਤਿਮੋਕ੍ਖੁਦ੍ਦੇਸੋ. ਨਿਦਾਨਂ ਉਦ੍ਦਿਸਿਤ੍ਵਾ ਚਤ੍ਤਾਰਿ ਪਾਰਾਜਿਕਾਨਿ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ, ਅਯਂ ਦੁਤਿਯੋ ਪਾਤਿਮੋਕ੍ਖੁਦ੍ਦੇਸੋ. ਨਿਦਾਨਂ ਉਦ੍ਦਿਸਿਤ੍ਵਾ ਚਤ੍ਤਾਰਿ ਪਾਰਾਜਿਕਾਨਿ ਉਦ੍ਦਿਸਿਤ੍ਵਾ ਤੇਰਸ ਸਙ੍ਘਾਦਿਸੇਸੇ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ, ਅਯਂ ਤਤਿਯੋ ਪਾਤਿਮੋਕ੍ਖੁਦ੍ਦੇਸੋ. ਨਿਦਾਨਂ ਉਦ੍ਦਿਸਿਤ੍ਵਾ ਚਤ੍ਤਾਰਿ ਪਾਰਾਜਿਕਾਨਿ ਉਦ੍ਦਿਸਿਤ੍ਵਾ ਤੇਰਸ ਸਙ੍ਘਾਦਿਸੇਸੇ ਉਦ੍ਦਿਸਿਤ੍ਵਾ ਦ੍ਵੇ ਅਨਿਯਤੇ ਉਦ੍ਦਿਸਿਤ੍ਵਾ ਅਵਸੇਸਂ ਭੁਤੇਨ ਸਾਵੇਤਬ੍ਬਂ, ਅਯਂ ਚਤੁਤ੍ਥੋ ਪਾਤਿਮੋਕ੍ਖੁਦ੍ਦੇਸੋ. ਵਿਤ੍ਥਾਰੇਨੇਵ ਪਞ੍ਚਮੋ’’ਤਿ (ਮਾਹਾਵ. ੧੫੦).

ਤਤ੍ਥ (ਮਹਾਵ. ਅਟ੍ਠ. ੧੫੦) ਨਿਦਾਨਂ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਨ੍ਤਿ ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ…ਪੇ… ਆਵਿਕਤਾ ਹਿਸ੍ਸ ਫਾਸੁ ਹੋਤੀ’’ਤਿ ਇਮਂ ਨਿਦਾਨਂ ਉਦ੍ਦਿਸਿਤ੍ਵਾ ‘‘ਉਦ੍ਦਿਟ੍ਠਂ ਖੋ ਆਯਸ੍ਮਨ੍ਤੋ ਨਿਦਾਨਂ, ਤਤ੍ਥਾਯਸ੍ਮਨ੍ਤੇ ਪੁਚ੍ਛਾਮਿ ਕਚ੍ਚਿਤ੍ਥ ਪਰਿਸੁਦ੍ਧਾ. ਦੁਤਿਯਮ੍ਪਿ ਪੁਚ੍ਛਾਮਿ…ਪੇ… ਏਵਮੇਤਂ ਧਾਰਯਾਮਿ. ਸੁਤਾ ਖੋ ਪਨਾਯਸ੍ਮਨ੍ਤੇਹਿ ਚਤ੍ਤਾਰੋ ਪਾਰਾਜਿਕਾ ਧਮ੍ਮਾ …ਪੇ… ਅਵਿਵਦਮਾਨੇਹਿ ਸਿਕ੍ਖਿਤਬ੍ਬ’’ਨ੍ਤਿ ਏਵਂ ਅਵਸੇਸਂ ਸੁਤੇਨ ਸਾਵੇਤਬ੍ਬਂ. ਏਤੇਨ ਨਯੇਨ ਸੇਸਾਪਿ ਚਤ੍ਤਾਰੋ ਪਾਤਿਮੋਕ੍ਖੁਦ੍ਦੇਸਾ ਵੇਦਿਤਬ੍ਬਾ.

੧੭੪. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਤਿ ਅਨ੍ਤਰਾਯੇ ਸਂਖਿਤ੍ਤੇਨ ਪਾਤਿਮੋਕ੍ਖਂ ਉਦ੍ਦਿਸਿਤੁਂ. ਨ, ਭਿਕ੍ਖਵੇ, ਅਸਤਿ ਅਨ੍ਤਰਾਯੇ ਸਂਖਿਤ੍ਤੇਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ, ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੫੦) ਵਚਨਤੋ ਪਨ ਵਿਨਾ ਅਨ੍ਤਰਾਯਾ ਸਂਖਿਤ੍ਤੇਨ ਪਾਤਿਮੋਕ੍ਖਂ ਨ ਉਦ੍ਦਿਸਿਤਬ੍ਬਂ. ਤਤ੍ਰਿਮੇ ਅਨ੍ਤਰਾਯਾ – ਰਾਜਨ੍ਤਰਾਯੋ ਚੋਰਨ੍ਤਰਾਯੋ ਅਗ੍ਯਨ੍ਤਰਾਯੋ ਉਦਕਨ੍ਤਰਾਯੋ ਮਨੁਸ੍ਸਨ੍ਤਰਾਯੋ ਅਮਨੁਸ੍ਸਨ੍ਤਰਾਯੋ ਵਾਲ਼ਨ੍ਤਰਾਯੋ ਸਰੀਸਪਨ੍ਤਰਾਯੋ ਜੀਵਿਤਨ੍ਤਰਾਯੋ ਬ੍ਰਹ੍ਮਚਰਿਯਨ੍ਤਰਾਯੋਤਿ.

ਤਤ੍ਥ ਸਚੇ ਭਿਕ੍ਖੂਸੁ ਉਪੋਸਥਂ ਕਰਿਸ੍ਸਾਮਾਤਿ ਨਿਸਿਨ੍ਨੇਸੁ ਰਾਜਾ ਆਗਚ੍ਛਤਿ, ਅਯਂ ਰਾਜਨ੍ਤਰਾਯੋ. ਚੋਰਾ ਆਗਚ੍ਛਨ੍ਤਿ, ਅਯਂ ਚੋਰਨ੍ਤਰਾਯੋ. ਦਵਡਾਹੋ ਆਗਚ੍ਛਤਿ, ਆਵਾਸੇ ਵਾ ਅਗ੍ਗਿ ਉਟ੍ਠਾਤਿ, ਅਯਂ ਅਗ੍ਯਨ੍ਤਰਾਯੋ. ਮੇਘੋ ਵਾ ਉਟ੍ਠੇਤਿ, ਓਘੋ ਵਾ ਆਗਚ੍ਛਤਿ, ਅਯਂ ਉਦਕਨ੍ਤਰਾਯੋ. ਬਹੂ ਮਨੁਸ੍ਸਾ ਆਗਚ੍ਛਨ੍ਤਿ, ਅਯਂ ਮਨੁਸ੍ਸਨ੍ਤਰਾਯੋ. ਭਿਕ੍ਖੁਂ ਯਕ੍ਖੋ ਗਣ੍ਹਾਤਿ, ਅਯਂ ਅਮਨੁਸ੍ਸਨ੍ਤਰਾਯੋ. ਬ੍ਯਗ੍ਘਾਦਯੋ ਚਣ੍ਡਮਿਗਾ ਆਗਚ੍ਛਨ੍ਤਿ, ਅਯਂ ਵਾਲ਼ਨ੍ਤਰਾਯੋ. ਭਿਕ੍ਖੁਂ ਸਪ੍ਪਾਦਯੋ ਡਂਸਨ੍ਤਿ, ਅਯਂ ਸਰੀਸਪਨ੍ਤਰਾਯੋ. ਭਿਕ੍ਖੁ ਗਿਲਾਨੋ ਵਾ ਹੋਤਿ, ਕਾਲਂ ਵਾ ਕਰੋਤਿ, ਵੇਰਿਨੋ ਵਾ ਤਂ ਮਾਰੇਤੁਕਾਮਾ ਗਣ੍ਹਨ੍ਤਿ, ਅਯਂ ਜੀਵਿਤਨ੍ਤਰਾਯੋ. ਮਨੁਸ੍ਸਾ ਏਕਂ ਵਾ ਬਹੂ ਵਾ ਭਿਕ੍ਖੂ ਬ੍ਰਹ੍ਮਚਰਿਯਾ ਚਾਵੇਤੁਕਾਮਾ ਗਣ੍ਹਨ੍ਤਿ, ਅਯਂ ਬ੍ਰਹ੍ਮਚਰਿਯਨ੍ਤਰਾਯੋ. ਏਵਰੂਪੇਸੁ ਅਨ੍ਤਰਾਯੇਸੁ ਸਂਖਿਤ੍ਤੇਨ ਪਾਤਿਮੋਕ੍ਖੋ ਉਦ੍ਦਿਸਿਤਬ੍ਬੋ, ਪਠਮੋ ਵਾ ਉਦ੍ਦੇਸੋ ਉਦ੍ਦਿਸਿਤਬ੍ਬੋ. ਆਦਿਮ੍ਹਿ ਦ੍ਵੇ ਤਯੋ ਚਤ੍ਤਾਰੋ ਵਾ. ਏਤ੍ਥ ਦੁਤਿਯਾਦੀਸੁ ਉਦ੍ਦੇਸੇਸੁ ਯਸ੍ਮਿਂ ਅਪਰਿਯੋਸਿਤੇ ਅਨ੍ਤਰਾਯੋ ਹੋਤਿ, ਸੋਪਿ ਸੁਤੇਨੇਵ ਸਾਵੇਤਬ੍ਬੋ. ਨਿਦਾਨੁਦ੍ਦੇਸੇ ਪਨ ਅਨਿਟ੍ਠਿਤੇ ਸੁਤੇਨ ਸਾਵੇਤਬ੍ਬਂ ਨਾਮ ਨਤ੍ਥਿ.

ਪਵਾਰਣਾਕਮ੍ਮੇਪਿ ਸਤਿ ਅਨ੍ਤਰਾਯੇ ਦ੍ਵੇਵਾਚਿਕਂ ਏਕਵਾਚਿਕਂ ਸਮਾਨਵਸ੍ਸਿਕਂ ਵਾ ਪਵਾਰੇਤੁਂ ਵਟ੍ਟਤਿ. ਏਤ੍ਥ (ਮਹਾਵ. ਅਟ੍ਠ. ੨੩੪) ਞਤ੍ਤਿਂ ਠਪੇਨ੍ਤੇਨਪਿ ‘‘ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਦ੍ਵੇਵਾਚਿਕਂ ਪਵਾਰੇਯ੍ਯਾ’’ਤਿ ਵਤ੍ਤਬ੍ਬਂ. ਏਕਵਾਚਿਕੇ ‘‘ਏਕਵਾਚਿਕਂ ਪਵਾਰੇਯ੍ਯਾ’’ਤਿ, ਸਮਾਨਵਸ੍ਸਿਕੇਪਿ ‘‘ਸਮਾਨਵਸ੍ਸਿਕਂ ਪਵਾਰੇਯ੍ਯਾ’’ਤਿ ਵਤ੍ਤਬ੍ਬਂ. ਏਤ੍ਥ ਚ ਬਹੂਪਿ ਸਮਾਨਵਸ੍ਸਾ ਏਕਤੋ ਪਵਾਰੇਤੁਂ ਲਭਨ੍ਤਿ. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਜ੍ਜ ਪਵਾਰਣਾ ਪਨ੍ਨਰਸੀ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਵਾਰੇਯ੍ਯਾ’’ਤਿ ਇਮਾਯ ਪਨ ਸਬ੍ਬਸਙ੍ਗਾਹਿਕਾਯ ਞਤ੍ਤਿਯਾ ਠਪਿਤਾਯ ਤੇਵਾਚਿਕਂ ਦ੍ਵੇਵਾਚਿਕਂ ਏਕਵਾਚਿਕਞ੍ਚ ਪਵਾਰੇਤੁਂ ਵਟ੍ਟਤਿ, ਸਮਾਨਵਸ੍ਸਿਕਂ ਨ ਵਟ੍ਟਤਿ. ‘‘ਤੇਵਾਚਿਕਂ ਪਵਾਰੇਯ੍ਯਾ’’ਤਿ ਵੁਤ੍ਤੇ ਪਨ ਤੇਵਾਚਿਕਮੇਵ ਵਟ੍ਟਤਿ, ਅਞ੍ਞਂ ਨ ਵਟ੍ਟਤਿ. ‘‘ਦ੍ਵੇਵਾਚਿਕਂ ਪਵਾਰੇਯ੍ਯਾ’’ਤਿ ਵੁਤ੍ਤੇ ਦ੍ਵੇਵਾਚਿਕਂ ਤੇਵਾਚਿਕਞ੍ਚ ਵਟ੍ਟਤਿ, ਏਕਵਾਚਿਕਞ੍ਚ ਸਮਾਨਵਸ੍ਸਿਕਞ੍ਚ ਨ ਵਟ੍ਟਤਿ. ‘‘ਏਕਵਾਚਿਕਂ ਪਵਾਰੇਯ੍ਯਾ’’ਤਿ ਵੁਤ੍ਤੇ ਪਨ ਏਕਵਾਚਿਕਦ੍ਵੇਵਾਚਿਕਤੇਵਾਚਿਕਾਨਿ ਵਟ੍ਟਨ੍ਤਿ, ਸਮਾਨਵਸ੍ਸਿਕਮੇਵ ਨ ਵਟ੍ਟਤਿ. ‘‘ਸਮਾਨਵਸ੍ਸਿਕ’’ਨ੍ਤਿ ਵੁਤ੍ਤੇ ਸਬ੍ਬਂ ਵਟ੍ਟਤਿ.

੧੭੫. ਕੇਨ ਪਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਨ੍ਤਿ? ‘‘ਅਨੁਜਾਨਾਮਿ, ਭਿਕ੍ਖਵੇ, ਥੇਰਾਧਿਕਂ ਪਾਤਿਮੋਕ੍ਖ’’ਨ੍ਤਿ (ਮਹਾਵ. ੧੫੪) ਵਚਨਤੋ ਥੇਰੇਨ ਵਾ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ, ‘‘ਅਨੁਜਾਨਾਮਿ, ਭਿਕ੍ਖਵੇ, ਯੋ ਤਤ੍ਥ ਭਿਕ੍ਖੁ ਬ੍ਯਤ੍ਤੋ ਪਟਿਬਲੋ, ਤਸ੍ਸਾਧੇਯ੍ਯਂ ਪਾਤਿਮੋਕ੍ਖ’’ਨ੍ਤਿ (ਮਹਾਵ. ੧੫੫) ਵਚਨਤੋ ਨਵਕਤਰੇਨ ਵਾ. ਏਤ੍ਥ (ਮਹਾਵ. ਅਟ੍ਠ. ੧੫੫) ਚ ਕਿਞ੍ਚਾਪਿ ਨਵਕਤਰਸ੍ਸਪਿ ਬ੍ਯਤ੍ਤਸ੍ਸ ਪਾਤਿਮੋਕ੍ਖਂ ਅਨੁਞ੍ਞਾਤਂ, ਅਥ ਖੋ ਏਤ੍ਥ ਅਯਂ ਅਧਿਪ੍ਪਾਯੋ – ਸਚੇ ਥੇਰਸ੍ਸ ਪਞ੍ਚ ਵਾ ਚਤ੍ਤਾਰੋ ਵਾ ਤਯੋ ਵਾ ਪਾਤਿਮੋਕ੍ਖੁਦ੍ਦੇਸਾ ਨਾਗਚ੍ਛਨ੍ਤਿ, ਦ੍ਵੇ ਪਨ ਅਖਣ੍ਡਾ ਸੁਵਿਸਦਾ ਵਾਚੁਗ੍ਗਤਾ ਹੋਨ੍ਤਿ, ਥੇਰਾਯਤ੍ਤਂਵ ਪਾਤਿਮੋਕ੍ਖਂ. ਸਚੇ ਪਨ ਏਤ੍ਤਕਮ੍ਪਿ ਵਿਸਦਂ ਕਾਤੁਂ ਨ ਸਕ੍ਕੋਤਿ, ਬ੍ਯਤ੍ਤਸ੍ਸ ਭਿਕ੍ਖੁਨੋ ਆਯਤ੍ਥਂ ਹੋਤਿ, ਤਸ੍ਮਾ ਸਯਂ ਵਾ ਉਦ੍ਦਿਸਿਤਬ੍ਬਂ, ਅਞ੍ਞੋ ਵਾ ਅਜ੍ਝੇਸਿਤਬ੍ਬੋ. ‘‘ਨ, ਭਿਕ੍ਖਵੇ, ਸਙ੍ਘਮਜ੍ਝੇ ਅਨਜ੍ਝਿਟ੍ਠੇਨ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬਂ, ਯੋ ਉਦ੍ਦਿਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੫੪) ਵਚਨਤੋ ਅਨਜ੍ਝਿਟ੍ਠੇਨ ਪਾਤਿਮੋਕ੍ਖਂ ਨ ਉਦ੍ਦਿਸਿਤਬ੍ਬਂ. ਨ ਕੇਵਲਂ ਪਾਤਿਮੋਕ੍ਖਂਯੇਵ, ਧਮ੍ਮੋਪਿ ਨ ਭਾਸਿਤਬ੍ਬੋ ‘‘ਨ, ਭਿਕ੍ਖਵੇ, ਸਙ੍ਘਮਜ੍ਝੇ ਅਨਜ੍ਝਿਟ੍ਠੇਨ ਧਮ੍ਮੋ ਭਾਸਿਤਬ੍ਬੋ, ਯੋ ਭਾਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੫੦) ਵਚਨਤੋ.

ਅਜ੍ਝੇਸਨਾ ਚੇਤ੍ਥ ਸਙ੍ਘੇਨ ਸਮ੍ਮਤਧਮ੍ਮਜ੍ਝੇਸਕਾਯਤ੍ਤਾ ਵਾ ਸਙ੍ਘਤ੍ਥੇ ਰਾਯਤ੍ਤਾ ਵਾ, ਤਸ੍ਮਾ ਧਮ੍ਮਜ੍ਝੇਸਕੇ ਅਸਤਿ ਸਙ੍ਘਤ੍ਥੇਰਂ ਆਪੁਚ੍ਛਿਤ੍ਵਾ ਵਾ ਤੇਨ ਯਾਚਿਤੋ ਵਾ ਭਾਸਿਤੁਂ ਲਭਤਿ. ਸਙ੍ਘਤ੍ਥੇਰੇਨਪਿ ਸਚੇ ਵਿਹਾਰੇ ਬਹੂ ਧਮ੍ਮਕਥਿਕਾ ਹੋਨ੍ਤਿ, ਵਾਰਪਟਿਪਾਟਿਯਾ ਵਤ੍ਤਬ੍ਬੋ. ‘‘ਤ੍ਵਂ ਧਮ੍ਮਂ ਭਣ, ਧਮ੍ਮਦਾਨਂ ਦੇਹੀ’’ਤਿ ਵਾ ਵੁਤ੍ਤੇਨ ਤੀਹਿਪਿ ਵਿਧੀਹਿ ਧਮ੍ਮੋ ਭਾਸਿਤਬ੍ਬੋ, ‘‘ਓਸਾਰੇਹੀ’’ਤਿ ਵੁਤ੍ਤੋ ਪਨ ਓਸਾਰੇਤੁਮੇਵ ਲਭਤਿ, ‘‘ਕਥੇਹੀ’’ਤਿ ਵੁਤ੍ਤੋ ਕਥੇਤੁਮੇਵ, ‘‘ਸਰਭਞ੍ਞਂ ਭਣਾਹੀ’’ਤਿ ਵੁਤ੍ਤੋ ਸਰਭਞ੍ਞਮੇਵ. ਸਙ੍ਘਤ੍ਥੇਰੋਪਿ ਚ ਉਚ੍ਚਤਰੇ ਆਸਨੇ ਨਿਸਿਨ੍ਨੋ ਯਾਚਿਤੁਂ ਨ ਲਭਤਿ. ਸਚੇ ਉਪਜ੍ਝਾਯੋ ਚੇਵ ਸਦ੍ਧਿਵਿਹਾਰਿਕੋ ਚ ਹੋਤਿ, ਉਪਜ੍ਝਾਯੋ ਚ ਨਂ ਉਚ੍ਚਾਸਨੇ ਨਿਸਿਨ੍ਨੋ ‘‘ਭਣਾ’’ਤਿ ਵਦਤਿ, ਸਜ੍ਝਾਯਂ ਅਧਿਟ੍ਠਹਿਤ੍ਵਾ ਭਣਿਤਬ੍ਬਂ. ਸਚੇ ਪਨੇਤ੍ਥ ਦਹਰਭਿਕ੍ਖੂ ਹੋਨ੍ਤਿ, ‘‘ਤੇਸਂ ਭਣਾਮੀ’’ਤਿ ਭਣਿਤਬ੍ਬਂ. ਸਚੇ ਵਿਹਾਰੇ ਸਙ੍ਘਤ੍ਥੇਰੋ ਅਤ੍ਤਨੋਯੇਵ ਨਿਸ੍ਸਿਤਕੇ ਭਣਾਪੇਤਿ, ਅਞ੍ਞੇ ਮਧੁਰਭਾਣਕੇਪਿ ਨਾਜ੍ਝੇਸਤਿ, ਸੋ ਅਞ੍ਞੇਹਿ ਵਤ੍ਤਬ੍ਬੋ – ‘‘ਭਨ੍ਤੇ, ਅਸੁਕਂ ਨਾਮ ਭਣਾਪੇਮਾ’’ਤਿ. ਸਚੇ ‘‘ਭਣਾਪੇਥਾ’’ਤਿ ਵਦਤਿ, ਤੁਣ੍ਹੀ ਵਾ ਹੋਤਿ, ਭਣਾਪੇਤੁਂ ਵਟ੍ਟਤਿ. ਸਚੇ ਪਨ ਪਟਿਬਾਹਤਿ, ਨ ਭਣਾਪੇਤਬ੍ਬਂ. ਯਦਿ ਪਨ ਅਨਾਗਤੇਯੇਵ ਸਙ੍ਘਤ੍ਥੇਰੇ ਧਮ੍ਮਸ੍ਸਵਨਂ ਆਰਦ੍ਧਂ, ਪੁਨ ਆਗਤੇ ਠਪੇਤ੍ਵਾ ਆਪੁਚ੍ਛਨਕਿਚ੍ਚਂ ਨਤ੍ਥਿ. ਓਸਾਰੇਤ੍ਵਾ ਪਨ ਕਥੇਨ੍ਤੇਨ ਆਪੁਚ੍ਛਿਤ੍ਵਾ ਅਟ੍ਠਪੇਤ੍ਵਾਯੇਵ ਵਾ ਕਥੇਤਬ੍ਬਂ. ਕਥੇਨ੍ਤਸ੍ਸ ਪੁਨ ਆਗਤੇਪਿ ਏਸੇਵ ਨਯੋ.

ਉਪਨਿਸਿਨ੍ਨਕਥਾਯਮ੍ਪਿ ਸਙ੍ਘਤ੍ਥੇਰੋਵ ਸਾਮੀ, ਤਸ੍ਮਾ ਤੇਨ ਸਯਂ ਵਾ ਕਥੇਤਬ੍ਬਂ, ਅਞ੍ਞੋ ਵਾ ਭਿਕ੍ਖੁ ‘‘ਕਥੇਹੀ’’ਤਿ ਵਤ੍ਤਬ੍ਬੋ, ਨੋ ਚ ਖੋ ਉਚ੍ਚਤਰੇ ਆਸਨ੍ਨੇ ਨਿਸਿਨ੍ਨੇਨ, ਮਨੁਸ੍ਸਾਨਂ ਪਨ ‘‘ਭਣਾਹੀ’’ਤਿ ਵਤ੍ਤੁਂ ਵਟ੍ਟਤਿ. ਮਨੁਸ੍ਸਾ ਅਤ੍ਤਨੋ ਜਾਨਨਕਂ ਭਿਕ੍ਖੁਂ ਪੁਚ੍ਛਨ੍ਤਿ, ਤੇਨ ਥੇਰਂ ਆਪੁਚ੍ਛਿਤ੍ਵਾਪਿ ਕਥੇਤਬ੍ਬਂ. ਸਚੇ ਸਙ੍ਘਤ੍ਥੇਰੋ ‘‘ਭਨ੍ਤੇ, ਇਮੇ ਪਞ੍ਹਂ ਪੁਚ੍ਛਨ੍ਤੀ’’ਤਿ ਪੁਟ੍ਠੋ ‘‘ਕਥੇਹੀ’’ਤਿ ਵਾ ਭਣਤਿ, ਤੁਣ੍ਹੀ ਵਾ ਹੋਤਿ, ਕਥੇਤੁਂ ਵਟ੍ਟਤਿ. ਅਨ੍ਤਰਘਰੇ ਅਨੁਮੋਦਨਾਦੀਸੁਪਿ ਏਸੇਵ ਨਯੋ. ਸਚੇ ਸਙ੍ਘਤ੍ਥੇਰੋ ‘‘ਵਿਹਾਰੇ ਵਾ ਅਨ੍ਤਰਘਰੇ ਵਾ ਮਂ ਅਨਾਪੁਚ੍ਛਿਤ੍ਵਾਪਿ ਕਥੇਯ੍ਯਾਸੀ’’ਤਿ ਅਨੁਜਾਨਾਤਿ, ਲਦ੍ਧਕਪ੍ਪਿਯਂ ਹੋਤਿ, ਸਬ੍ਬਤ੍ਥ ਵਤ੍ਤੁਂ ਵਟ੍ਟਤਿ. ਸਜ੍ਝਾਯਂ ਕਰੋਨ੍ਤੇਨਾਪਿ ਥੇਰੋ ਆਪੁਚ੍ਛਿਤਬ੍ਬੋਯੇਵ. ਏਕਂ ਆਪੁਚ੍ਛਿਤ੍ਵਾ ਸਜ੍ਝਾਯਨ੍ਤਸ੍ਸ ਅਪਰੋ ਆਗਚ੍ਛਤਿ, ਪੁਨ ਆਪੁਚ੍ਛਨਕਿਚ੍ਚਂ ਨਤ੍ਥਿ. ਸਚੇਪਿ ‘‘ਵਿਸ੍ਸਮਿਸ੍ਸਾਮੀ’’ਤਿ ਠਪਿਤਸ੍ਸ ਆਗਚ੍ਛਤਿ, ਪੁਨ ਆਰਭਨ੍ਤੇਨ ਆਪੁਚ੍ਛਿਤਬ੍ਬਂ. ਸਙ੍ਘਤ੍ਥੇਰੇ ਅਨਾਗਤੇਯੇਵ ਆਰਦ੍ਧਂ ਸਜ੍ਝਾਯਨ੍ਤਸ੍ਸਾਪਿ ਏਸੇਵ ਨਯੋ. ਏਕੇਨ ਸਙ੍ਘਤ੍ਥੇਰੇਨ ‘‘ਮਂ ਅਨਾਪੁਚ੍ਛਾਪਿ ਯਥਾਸੁਖਂ ਸਜ੍ਝਾਯਾਹੀ’’ਤਿ ਅਨੁਞ੍ਞਾਤੇ ਯਥਾਸੁਖਂ ਸਜ੍ਝਾਯਿਤੁਂ ਵਟ੍ਟਤਿ, ਅਞ੍ਞਸ੍ਮਿਂ ਪਨ ਆਗਤੇ ਤਂ ਆਪੁਚ੍ਛਿਤ੍ਵਾਵ ਸਜ੍ਝਾਯਿਤਬ੍ਬਂ.

ਯਸ੍ਮਿਂ ਪਨ ਵਿਹਾਰੇ ਸਬ੍ਬੇਵ ਭਿਕ੍ਖੂ ਬਾਲਾ ਹੋਨ੍ਤਿ ਅਬ੍ਯਤ੍ਤਾ ਨ ਜਾਨਨ੍ਤਿ ਪਾਤਿਮੋਕ੍ਖਂ ਉਦ੍ਦਿਸਿਤੁਂ, ਤਤ੍ਥ ਕਿਂ ਕਾਤਬ੍ਬਨ੍ਤਿ? ਤੇਹਿ ਭਿਕ੍ਖੂਹਿ ਏਕੋ ਭਿਕ੍ਖੁ ਸਾਮਨ੍ਤਾ ਆਵਾਸਾ ਸਜ੍ਜੁਕਂ ਪਾਹੇਤਬ੍ਬੋ ‘‘ਗਚ੍ਛਾਵੁਸੋ, ਸਂਖਿਤ੍ਤੇਨ ਵਾ ਵਿਤ੍ਥਾਰੇਨ ਵਾ ਪਾਤਿਮੋਕ੍ਖਂ ਪਰਿਯਾਪੁਣਿਤ੍ਵਾ ਆਗਚ੍ਛਾਹੀ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਤੇਹਿ ਭਿਕ੍ਖੂਹਿ ਸਬ੍ਬੇਹੇਵ ਯਤ੍ਥ ਤਾਦਿਸਾ ਭਿਕ੍ਖੂ ਹੋਨ੍ਤਿ, ਸੋ ਆਵਾਸੋ ਉਪੋਸਥਕਰਣਤ੍ਥਾਯ ਅਨ੍ਵਡ੍ਢਮਾਸਂ ਗਨ੍ਤਬ੍ਬੋ, ਅਗਚ੍ਛਨ੍ਤਾਨਂ ਦੁਕ੍ਕਟਂ. ਇਦਞ੍ਚ ਉਤੁਵਸ੍ਸੇਯੇਵ, ਵਸ੍ਸਾਨੇ ਪਨ ਪੁਰਿਮਿਕਾਯ ਪਾਤਿਮੋਕ੍ਖੁਦ੍ਦੇਸਕੇਨ ਵਿਨਾ ਨ ਵਸ੍ਸਂ ਉਪਗਚ੍ਛਿਤਬ੍ਬਂ. ਸਚੇ ਸੋ ਵਸ੍ਸੂਪਗਤਾਨਂ ਪਕ੍ਕਮਤਿ ਵਾ ਵਿਬ੍ਭਮਤਿ ਵਾ ਕਾਲਂ ਵਾ ਕਰੋਤਿ, ਅਞ੍ਞਸ੍ਮਿਂ ਸਤਿਯੇਵ ਪਚ੍ਛਿਮਿਕਾਯ ਵਸਿਤੁਂ ਵਟ੍ਟਤਿ, ਅਸਤਿ ਅਞ੍ਞਤ੍ਥ ਗਨ੍ਤਬ੍ਬਂ, ਅਗਚ੍ਛਨ੍ਤਾਨਂ ਦੁਕ੍ਕਟਂ. ਸਚੇ ਪਨ ਪਚ੍ਛਿਮਿਕਾਯ ਪਕ੍ਕਮਤਿ ਵਾ ਵਿਬ੍ਭਮਤਿ ਵਾ ਕਾਲਂ ਵਾ ਕਰੋਤਿ, ਮਾਸਦ੍ਵਯਂ ਵਸਿਤਬ੍ਬਂ.

ਯਤ੍ਥ ਪਨ ਤੇ ਬਾਲਾ ਭਿਕ੍ਖੂ ਵਿਹਰਨ੍ਤਿ ਅਬ੍ਯਤ੍ਤਾ, ਸਚੇ ਤਤ੍ਥ ਕੋਚਿ ਭਿਕ੍ਖੁ ਆਗਚ੍ਛਤਿ ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਬ੍ਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ, ਤੇਹਿ ਭਿਕ੍ਖੂਹਿ ਸੋ ਭਿਕ੍ਖੁ ਸਙ੍ਗਹੇਤਬ੍ਬੋ ਅਨੁਗ੍ਗਹੇਤਬ੍ਬੋ ਉਪਲਾਪੇਤਬ੍ਬੋ, ਉਪਟ੍ਠਾਪੇਤਬ੍ਬੋ ਚੁਣ੍ਣੇਨ ਮਤ੍ਤਿਕਾਯ ਦਨ੍ਤਕਟ੍ਠੇਨ ਮੁਖੋਦਕੇਨ. ਨੋ ਚੇ ਸਙ੍ਗਹੇਯ੍ਯੁਂ ਅਨੁਗ੍ਗਹੇਯ੍ਯੁਂ ਉਪਲਾਪੇਯ੍ਯੁਂ, ਉਪਟ੍ਠਾਪੇਯ੍ਯੁਂ ਚੁਣ੍ਣੇਨ ਮਤ੍ਤਿਕਾਯ ਦਨ੍ਤਕਟ੍ਠੇਨ ਮੁਖੋਦਕੇਨ, ਸਬ੍ਬੇਸਂ ਦੁਕ੍ਕਟਂ. ਇਧ ਨੇਵ ਥੇਰਾ, ਨ ਦਹਰਾ ਮੁਚ੍ਚਨ੍ਤਿ, ਸਬ੍ਬੇਹਿ ਵਾਰੇਨ ਉਪਟ੍ਠਾਪੇਤਬ੍ਬੋ. ਅਤ੍ਤਨੋ ਵਾਰੇ ਅਨੁਪਟ੍ਠਹਨ੍ਤਸ੍ਸ ਆਪਤ੍ਤਿ. ਤੇਨ ਪਨ ਮਹਾਥੇਰਾਨਂ ਪਰਿਵੇਣਸਮ੍ਮਜ੍ਜਨਦਨ੍ਤਕਟ੍ਠਦਾਨਾਦੀਨਿ ਨ ਸਾਦਿਤਬ੍ਬਾਨਿ, ਏਵਮ੍ਪਿ ਸਤਿ ਮਹਾਥੇਰੇਹਿ ਸਾਯਂਪਾਤਂ ਉਪਟ੍ਠਾਨਂ ਆਗਨ੍ਤਬ੍ਬਂ, ਤੇਨ ਪਨ ਤੇਸਂ ਆਗਮਨਂ ਞਤ੍ਵਾ ਪਠਮਤਰਂ ਮਹਾਥੇਰਾਨਂ ਉਪਟ੍ਠਾਨਂ ਗਨ੍ਤਬ੍ਬਂ. ਸਚਸ੍ਸ ਸਦ੍ਧਿਞ੍ਚਰਾ ਭਿਕ੍ਖੂ ਉਪਟ੍ਠਾਕਾ ਅਤ੍ਥਿ, ‘‘ਮਯ੍ਹਂ ਉਪਟ੍ਠਾਕਾ ਅਤ੍ਥਿ, ਤੁਮ੍ਹੇ ਅਪ੍ਪੋਸ੍ਸੁਕ੍ਕਾ ਵਿਹਰਥਾ’’ਤਿ ਵਤ੍ਤਬ੍ਬਂ. ਅਥਾਪਿਸ੍ਸ ਸਦ੍ਧਿਞ੍ਚਰਾ ਨਤ੍ਥਿ, ਤਸ੍ਮਿਂਯੇਵ ਵਿਹਾਰੇ ਏਕੋ ਵਾ ਦ੍ਵੇ ਵਾ ਵਤ੍ਤਸਮ੍ਪਨ੍ਨਾ ਵਦਨ੍ਤਿ ‘‘ਮਯਂ ਥੇਰਸ੍ਸ ਕਤ੍ਤਬ੍ਬਂ ਕਰਿਸ੍ਸਾਮ, ਅਵਸੇਸਾ ਫਾਸੁ ਵਿਹਰਨ੍ਤੂ’’ਤਿ, ਸਬ੍ਬੇਸਂ ਅਨਾਪਤ੍ਤਿ.

੧੭੬. ‘‘ਯਸ੍ਸ ਸਿਯਾ ਆਪਤ੍ਤਿ, ਸੋ ਆਵਿਕਰੇਯ੍ਯਾ’’ਤਿ(ਮਹਾਵ. ੧੩੪) ਆਦਿਵਚਨਤੋ ਨ ਸਾਪਤ੍ਤਿਕੇਨ ਉਪੋਸਥੋ ਕਾਤਬ੍ਬੋ, ਤਸ੍ਮਾ ਤਦਹੁਪੋਸਥੇ ਆਪਤ੍ਤਿਂ ਸਰਨ੍ਤੇਨ ਦੇਸੇਤਬ੍ਬਾ. ਦੇਸੇਨ੍ਤੇਨ ਚ ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਂ ਵਤ੍ਤਬ੍ਬੋ ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋ, ਤਂ ਪਟਿਦੇਸੇਮੀ’’ਤਿ. ਸਚੇ ਨਵਕਤਰੋ ਹੋਤਿ, ‘‘ਅਹਂ, ਭਨ੍ਤੇ’’ਤਿ ਵਤ੍ਤਬ੍ਬਂ. ‘‘ਤਂ ਪਟਿਦੇਸੇਮੀ’’ਤਿ ਇਦਂ ਪਨ ਅਤ੍ਤਨੋ ਅਤ੍ਤਨੋ ਅਨੁਰੂਪਵਸੇਨ ‘‘ਤਂ ਤੁਯ੍ਹਮੂਲੇ, ਤਂ ਤੁਮ੍ਹਮੂਲੇ ਪਟਿਦੇਸੇਮੀ’’ਤਿ ਵੁਤ੍ਤੇਪਿ ਸੁਵੁਤ੍ਤਮੇਵ ਹੋਤਿ. ਪਟਿਗ੍ਗਾਹਕੇਨਪਿ ਅਤ੍ਤਨੋ ਅਤ੍ਤਨੋ ਅਨੁਰੂਪਵਸੇਨ ‘‘ਪਸ੍ਸਥ, ਭਨ੍ਤੇ, ਤਂ ਆਪਤ੍ਤਿਂ, ਪਸ੍ਸਸਿ, ਆਵੁਸੋ, ਤਂ ਆਪਤ੍ਤਿ’’ਨ੍ਤਿ ਵਾ ਵਤ੍ਤਬ੍ਬਂ, ਪੁਨ ਦੇਸਕੇਨ ‘‘ਆਮ, ਆਵੁਸੋ, ਪਸ੍ਸਾਮਿ, ਆਮ, ਭਨ੍ਤੇ, ਪਸ੍ਸਾਮੀ’’ਤਿ ਵਾ ਵਤ੍ਤਬ੍ਬਂ. ਪੁਨ ਪਟਿਗ੍ਗਾਹਕੇਨ ‘‘ਆਯਤਿਂ, ਭਨ੍ਤੇ, ਸਂਵਰੇਯ੍ਯਾਥ, ਆਯਤਿਂ, ਆਵੁਸੋ, ਸਂਵਰੇਯ੍ਯਾਸੀ’’ਤਿ ਵਾ ਵਤ੍ਤਬ੍ਬਂ. ਏਵਂ ਵੁਤ੍ਤੇ ਦੇਸਕੇਨ ‘‘ਸਾਧੁ ਸੁਟ੍ਠੁ ਆਵੁਸੋ ਸਂਵਰਿਸ੍ਸਾਮਿ, ਸਾਧੁ ਸੁਟ੍ਠੁ, ਭਨ੍ਤੇ, ਸਂਵਰਿਸ੍ਸਾਮੀ’’ਤਿ ਵਾ ਵਤ੍ਤਬ੍ਬਂ. ਸਚੇ ਆਪਤ੍ਤਿਯਾ ਵੇਮਤਿਕੋ ਹੋਤਿ, ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਂ ਵਤ੍ਤਬ੍ਬੋ ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਾਯ ਆਪਤ੍ਤਿਯਾ ਵੇਮਤਿਕੋ, ਯਦਾ ਨਿਬ੍ਬੇਮਤਿਕੋ ਭਵਿਸ੍ਸਾਮਿ, ਤਦਾ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮੀ’’ਤਿ ਵਤ੍ਵਾ ਉਪੋਸਥੋ ਕਾਤਬ੍ਬੋ, ਪਾਤਿਮੋਕ੍ਖਂ ਸੋਤਬ੍ਬਂ, ਨ ਤ੍ਵੇਵ ਤਪ੍ਪਚ੍ਚਯਾ ਉਪੋਸਥਸ੍ਸ ਅਨ੍ਤਰਾਯੋ ਕਾਤਬ੍ਬੋ. ‘‘ਨ, ਭਿਕ੍ਖਵੇ, ਸਭਾਗਾ ਆਪਤ੍ਤਿ ਦੇਸੇਤਬ੍ਬਾ, ਯੋ ਦੇਸੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਨ, ਭਿਕ੍ਖਵੇ, ਸਭਾਗਾ ਆਪਤ੍ਤਿ ਪਟਿਗ੍ਗਹੇਤਬ੍ਬਾ, ਯੋ ਪਟਿਗ੍ਗਣ੍ਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੬੯) ਵਚਨਤੋ ਯਂ ਦ੍ਵੇਪਿ ਜਨਾ ਵਿਕਾਲਭੋਜਨਾਦਿਨਾ ਸਭਾਗਵਤ੍ਥੁਨਾ ਆਪਤ੍ਤਿਂ ਆਪਜ੍ਜਨ੍ਤਿ, ਏਵਰੂਪਾ ਵਤ੍ਥੁਸਭਾਗਾ ਆਪਤ੍ਤਿ ਨੇਵ ਦੇਸੇਤਬ੍ਬਾ, ਨ ਚ ਪਟਿਗ੍ਗਹੇਤਬ੍ਬਾ. ਵਿਕਾਲਭੋਜਨਪਚ੍ਚਯਾ ਆਪਨ੍ਨਂ ਪਨ ਆਪਤ੍ਤਿਸਭਾਗਂ ਅਨਤਿਰਿਤ੍ਤਭੋਜਨਪਚ੍ਚਯਾ ਆਪਨ੍ਨਸ੍ਸ ਸਨ੍ਤਿਕੇ ਦੇਸੇਤੁਂ ਵਟ੍ਟਤਿ.

ਸਚੇ ਪਨ ਸਬ੍ਬੋ ਸਙ੍ਘੋ ਵਿਕਾਲਭੋਜਨਾਦਿਨਾ ਸਭਾਗਵਤ੍ਥੁਨਾ ਲਹੁਕਾਪਤ੍ਤਿਂ ਆਪਜ੍ਜਤਿ, ਤਤ੍ਥ ਕਿਂ ਕਾਤਬ੍ਬਨ੍ਤਿ? ਤੇਹਿ ਭਿਕ੍ਖੂਹਿ ਏਕੋ ਭਿਕ੍ਖੁ ਸਾਮਨ੍ਤਾ ਆਵਾਸਾ ਸਜ੍ਜੁਕਂ ਪਾਹੇਤਬ੍ਬੋ ‘‘ਗਚ੍ਛਾਵੁਸੋ, ਤਂ ਆਪਤ੍ਤਿਂ ਪਟਿਕਰਿਤ੍ਵਾ ਆਗਚ੍ਛ, ਮਯਂ ਤੇ ਸਨ੍ਤਿਕੇ ਆਪਤ੍ਤਿਂ ਪਟਿਕਰਿਸ੍ਸਾਮਾ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ – ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਯਂ ਸਬ੍ਬੋ ਸਙ੍ਘੋ ਸਭਾਗਂ ਆਪਤ੍ਤਿਂ ਆਪਨ੍ਨੋ, ਯਦਾ ਅਞ੍ਞਂ ਭਿਕ੍ਖੁਂ ਸੁਦ੍ਧਂ ਅਨਾਪਤ੍ਤਿਕਂ ਪਸ੍ਸਿਸ੍ਸਤਿ, ਤਦਾ ਤਸ੍ਸ ਸਨ੍ਤਿਕੇ ਤਂ ਆਪਤ੍ਤਿਂ ਪਟਿਕਰਿਸ੍ਸਤੀ’’ਤਿ (ਮਹਾਵ. ੧੭੧) ਵਤ੍ਵਾ ਉਪੋਸਥੋ ਕਾਤਬ੍ਬੋ. ਸਚੇ ਪਨ ਵੇਮਤਿਕੋ ਹੋਤਿ, ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਅਯਂ ਸਬ੍ਬੋ ਸਙ੍ਘੋ ਸਭਾਗਾਯ ਆਪਤ੍ਤਿਯਾ ਵੇਮਤਿਕੋ, ਯਦਾ ਨਿਬ੍ਬੇਮਤਿਕੋ ਭਵਿਸ੍ਸਤਿ, ਤਦਾ ਤਂ ਆਪਤ੍ਤਿਂ ਪਟਿਕਰਿਸ੍ਸਤੀ’’ਤਿ (ਮਹਾਵ. ੧੭੧) ਵਤ੍ਵਾ ਉਪੋਸਥੋ ਕਾਤਬ੍ਬੋ. ਸਚੇ ਪਨੇਤ੍ਥ ਕੋਚਿ ‘‘ਤਂ ਸਭਾਗਂ ਆਪਤ੍ਤਿਂ ਦੇਸੇਤੁਂ ਵਟ੍ਟਤੀ’’ਤਿ ਮਞ੍ਞਮਾਨੋ ਏਕਸ੍ਸ ਸਨ੍ਤਿਕੇ ਦੇਸੇਤਿ, ਦੇਸਿਤਾ ਸੁਦੇਸਿਤਾਵ. ਅਞ੍ਞਂ ਪਨ ਦੇਸਨਾਪਚ੍ਚਯਾ ਦੇਸਕੋ ਪਟਿਗ੍ਗਹਣਪਚ੍ਚਯਾ ਪਟਿਗ੍ਗਾਹਕੋ ਚਾਤਿ ਉਭੋਪਿ ਦੁਕ੍ਕਟਂ ਆਪਜ੍ਜਨ੍ਤਿ, ਤਂ ਨਾਨਾਵਤ੍ਥੁਕਂ ਹੋਤਿ, ਤਸ੍ਮਾ ਅਞ੍ਞਮਞ੍ਞਂ ਦੇਸੇਤਬ੍ਬਂ. ਏਤ੍ਤਾਵਤਾ ਤੇ ਨਿਰਾਪਤ੍ਤਿਕਾ ਹੋਨ੍ਤਿ, ਤੇਸਂ ਸਨ੍ਤਿਕੇ ਸੇਸੇਹਿ ਸਭਾਗਾਪਤ੍ਤਿਯੋ ਦੇਸੇਤਬ੍ਬਾ ਵਾ ਆਰੋਚੇਤਬ੍ਬਾ ਵਾ. ਸਚੇ ਤੇ ਏਵਂ ਅਕਤ੍ਵਾ ਉਪੋਸਥਂ ਕਰੋਨ੍ਤਿ, ‘‘ਪਾਰਿਸੁਦ੍ਧਿਂ ਆਯਸ੍ਮਨ੍ਤੋ ਆਰੋਚੇਥਾ’’ਤਿਆਦਿਨਾ ਨਯੇਨ ਸਾਪਤ੍ਤਿਕਸ੍ਸ ਉਪੋਸਥਕਰਣੇ ਪਞ੍ਞਤ੍ਤਂ ਦੁਕ੍ਕਟਂ ਆਪਜ੍ਜਨ੍ਤਿ.

ਸਚੇ ਕੋਚਿ ਭਿਕ੍ਖੁ ਪਾਤਿਮੋਕ੍ਖੇ ਉਦ੍ਦਿਸ੍ਸਮਾਨੇ ਆਪਤ੍ਤਿਂ ਸਰਤਿ, ਤੇਨ ਭਿਕ੍ਖੁਨਾ ਸਾਮਨ੍ਤੋ ਭਿਕ੍ਖੁ ਏਵਂ ਵਤ੍ਤਬ੍ਬੋ ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋ, ਇਤੋ ਵੁਟ੍ਠਹਿਤ੍ਵਾ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮੀ’’ਤਿ. ਸਾਮਨ੍ਤੋ ਚ ਭਿਕ੍ਖੁ ਸਭਾਗੋਯੇਵ ਵਤ੍ਤਬ੍ਬੋ. ਵਿਸਭਾਗਸ੍ਸ ਹਿ ਵੁਚ੍ਚਮਾਨੇ ਭਣ੍ਡਨਕਲਹਸਙ੍ਘਭੇਦਾਦੀਨਿਪਿ ਹੋਨ੍ਤਿ, ਤਸ੍ਮਾ ਤਸ੍ਸ ਅਵਤ੍ਵਾ ‘‘ਇਤੋ ਵੁਟ੍ਠਹਿਤ੍ਵਾ ਪਟਿਕਰਿਸ੍ਸਾਮੀ’’ਤਿ ਆਭੋਗਂ ਕਤ੍ਵਾ ਉਪੋਸਥੋ ਕਾਤਬ੍ਬੋ. ਸਚੇ ਪਨ ਕੋਚਿ ਪਾਤਿਮੋਕ੍ਖੇ ਉਦ੍ਦਿਸ੍ਸਮਾਨੇ ਆਪਤ੍ਤਿਯਾ ਵੇਮਤਿਕੋ ਹੋਤਿ, ਤੇਨਪਿ ਸਭਾਗੋਯੇਵ ਸਾਮਨ੍ਤੋ ਭਿਕ੍ਖੁ ਏਵਂ ਵਤ੍ਤਬ੍ਬੋ ‘‘ਅਹਂ, ਆਵੁਸੋ, ਇਤ੍ਥਨ੍ਨਾਮਾਯ ਆਪਤ੍ਤਿਯਾ ਵੇਮਤਿਕੋ, ਯਦਾ ਨਿਬ੍ਬੇਮਤਿਕੋ ਭਵਿਸ੍ਸਾਮਿ, ਤਦਾ ਤਂ ਆਪਤ੍ਤਿਂ ਪਟਿਕਰਿਸ੍ਸਾਮੀ’’ਤਿ. ਏਵਞ੍ਚ ਵਤ੍ਵਾ ਉਪੋਸਥੋ ਕਾਤਬ੍ਬੋ, ਪਾਤਿਮੋਕ੍ਖਂ ਸੋਤਬ੍ਬਂ, ਨ ਤ੍ਵੇਵ ਤਪ੍ਪਚ੍ਚਯਾ ਉਪੋਸਥਸ੍ਸ ਅਨ੍ਤਰਾਯੋ ਕਾਤਬ੍ਬੋ.

੧੭੭. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਪੋਸਥਾਗਾਰਂ ਸਮ੍ਮਜ੍ਜਿਤੁ’’ਨ੍ਤਿ(ਮਹਾਵ. ੧੫੯) ਆਦਿਵਚਨਤੋ –

‘‘ਸਮ੍ਮਜ੍ਜਨੀ ਪਦੀਪੋ ਚ, ਉਦਕਂ ਆਸਨੇਨ ਚ;

ਉਪੋਸਥਸ੍ਸ ਏਤਾਨਿ, ਪੁਬ੍ਬਕਰਣਨ੍ਤਿ ਵੁਚ੍ਚਤੀ’’ਤਿ. (ਮਹਾਵ. ਅਟ੍ਠ. ੧੬੮) –

ਏਵਂ ਵੁਤ੍ਤਂ ਚਤੁਬ੍ਬਿਧਂ ਪੁਬ੍ਬਕਰਣਂ ਕਤ੍ਵਾਵ ਉਪੋਸਥੋ ਕਾਤਬ੍ਬੋ. ਕੇਨ ਪਨ ਤਂ ਕਾਤਬ੍ਬਨ੍ਤਿ? ‘‘ਅਨੁਜਾਨਾਮਿ, ਭਿਕ੍ਖਵੇ, ਥੇਰੇਨ ਭਿਕ੍ਖੁਨਾ ਨਵਂ ਭਿਕ੍ਖੁਂ ਆਣਾਪੇਤੁਂ, ਨ, ਭਿਕ੍ਖਵੇ, ਥੇਰੇਨ ਆਣਤ੍ਤੇਨ ਅਗਿਲਾਨੇਨ ਨ ਸਮ੍ਮਜ੍ਜਿਤਬ੍ਬਂ, ਯੋ ਨ ਸਮ੍ਮਜ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿਆਦਿਵਚਨਤੋ ਯੋ ਥੇਰੇਨ ਆਣਤ੍ਤੋ, ਤੇਨ ਕਾਤਬ੍ਬਂ. ਆਣਾਪੇਨ੍ਤੇਨ ਚ ਕਿਞ੍ਚਿ ਕਮ੍ਮਂ ਕਰੋਨ੍ਤੋ ਵਾ ਸਦਾਕਾਲਮੇਵ ਏਕੋ ਵਾ ਭਾਰਨਿਤ੍ਥਰਣਕੋ ਵਾ ਸਰਭਾਣਕਧਮ੍ਮਕਥਿਕਾਦੀਸੁ ਅਞ੍ਞਤਰੋ ਵਾ ਨ ਉਪੋਸਥਾਗਾਰਸਮ੍ਮਜ੍ਜਨਤ੍ਥਂ ਆਣਾਪੇਤਬ੍ਬੋ, ਅਵਸੇਸਾ ਪਨ ਵਾਰੇਨ ਆਣਾਪੇਤਬ੍ਬਾ. ਸਚੇ ਆਣਤ੍ਤੋ ਸਮ੍ਮੁਞ੍ਜਨਿਂ ਤਾਵਕਾਲਿਕਮ੍ਪਿ ਨ ਲਭਤਿ, ਸਾਖਾਭਙ੍ਗਂ ਕਪ੍ਪਿਯਂ ਕਾਰੇਤ੍ਵਾ ਸਮ੍ਮਜ੍ਜਿਤਬ੍ਬਂ, ਤਮ੍ਪਿ ਅਲਭਨ੍ਤਸ੍ਸ ਲਦ੍ਧਕਪ੍ਪਿਯਂ ਹੋਤਿ.

ਆਸਨਪਞ੍ਞਾਪਨਤ੍ਥਂ ਆਣਤ੍ਤੇਨ ਚ ਸਚੇ ਉਪੋਸਥਾਗਾਰੇ ਆਸਨਾਨਿ ਨਤ੍ਥਿ, ਸਙ੍ਘਿਕਾਵਾਸਤੋ ਆਹਰਿਤ੍ਵਾ ਪਞ੍ਞਪੇਤ੍ਵਾ ਪੁਨ ਆਹਰਿਤਬ੍ਬਾਨਿ, ਆਸਨੇਸੁ ਅਸਤਿ ਕਟਸਾਰਕੇਪਿ ਤਟ੍ਟਿਕਾਯੋਪਿ ਪਞ੍ਞਾਪੇਤੁਂ ਵਟ੍ਟਤਿ, ਤਟ੍ਟਿਕਾਸੁਪਿ ਅਸਤਿ ਸਾਖਾਭਙ੍ਗਾਨਿ ਕਪ੍ਪਿਯਂ ਕਾਰੇਤ੍ਵਾ ਪਞ੍ਞਪੇਤਬ੍ਬਾਨਿ, ਕਪ੍ਪਿਯਕਾਰਕਂ ਅਲਭਨ੍ਤਸ੍ਸ ਲਦ੍ਧਕਪ੍ਪਿਯਂ ਹੋਤਿ.

ਪਦੀਪਕਰਣਤ੍ਥਂ ਆਣਾਪੇਨ੍ਤੇਨ ਪਨ ‘‘ਅਸੁਕਸ੍ਮਿਂ ਨਾਮ ਓਕਾਸੇ ਤੇਲਂ ਵਾ ਵਟ੍ਟਿ ਵਾ ਕਪਲ੍ਲਿਕਾ ਵਾ ਅਤ੍ਥਿ, ਤਂ ਗਹੇਤ੍ਵਾ ਕਰੋਹੀ’’ਤਿ ਵਤ੍ਤਬ੍ਬੋ. ਸਚੇ ਤੇਲਾਦੀਨਿ ਨਤ੍ਥਿ, ਪਰਿਯੇਸਿਤਬ੍ਬਾਨਿ, ਪਰਿਯੇਸਿਤ੍ਵਾ ਅਲਭਨ੍ਤਸ੍ਸ ਲਦ੍ਧਕਪ੍ਪਿਯਂ ਹੋਤਿ. ਅਪਿਚ ਕਪਾਲੇ ਅਗ੍ਗਿਪਿ ਜਾਲੇਤਬ੍ਬੋ.

‘‘ਛਨ੍ਦਪਾਰਿਸੁਦ੍ਧਿਉਤੁਕ੍ਖਾਨਂ, ਭਿਕ੍ਖੁਗਣਨਾਚ ਓਵਾਦੋ;

ਉਪੋਸਥਸ੍ਸ ਏਤਾਨਿ, ਪੁਬ੍ਬਕਿਚ੍ਚਨ੍ਤਿ ਵੁਚ੍ਚਤੀ’’ਤਿ. (ਮਹਾਵ. ੧੬੮) –

ਏਵਂ ਵੁਤ੍ਤਂ ਪਨ ਚਤੁਬ੍ਬਿਧਮ੍ਪਿ ਪੁਬ੍ਬਕਿਚ੍ਚਂ ਪੁਬ੍ਬਕਰਣਤੋ ਪਚ੍ਛਾ ਕਾਤਬ੍ਬਂ. ਤਮ੍ਪਿ ਹਿ ਅਕਤ੍ਵਾ ਉਪੋਸਥੋ ਨ ਕਾਤਬ੍ਬੋ.

੧੭੮. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਉਪੋਸਥਂ ਕਰੇਯ੍ਯਾ’’ਤਿ (ਮਹਾਵ. ੧੪੩) ਵਚਨਤੋ ਯਦਾ ਸਙ੍ਘਸ੍ਸ ਉਪੋਸਥਕਮ੍ਮਂ ਪਤ੍ਤਕਲ੍ਲਂ ਹੋਤਿ, ਤਦਾ ਤਂ ਕਾਤਬ੍ਬਂ, ਪਤ੍ਤਕਲ੍ਲਞ੍ਚ ਨਾਮੇਤਂ ਚਤੂਹਿ ਅਙ੍ਗੇਹਿ ਸਙ੍ਗਹਿਤਂ. ਤੇਨਾਹੁ ਅਟ੍ਠਕਥਾਚਰਿਯਾ –

‘‘ਉਪੋਸਥੋ ਯਾਵਤਿਕਾ ਚ ਭਿਕ੍ਖੂ ਕਮ੍ਮਪ੍ਪਤ੍ਤਾ,

ਸਭਾਗਾਪਤ੍ਤਿਯੋ ਚ ਨ ਵਿਜ੍ਜਨ੍ਤਿ;

ਵਜ੍ਜਨੀਯਾ ਚ ਪੁਗ੍ਗਲਾ ਤਸ੍ਮਿਂ ਨ ਹੋਨ੍ਤਿ,

ਪਤ੍ਤਕਲ੍ਲਨ੍ਤਿ ਵੁਚ੍ਚਤੀ’’ਤਿ. (ਮਹਾਵ. ਅਟ੍ਠ. ੧੬੮);

ਤਤ੍ਥ ਉਪੋਸਥੋਤਿ ਤੀਸੁ ਉਪੋਸਥਦਿਵਸੇਸੁ ਅਞ੍ਞਤਰਦਿਵਸੋ. ਤਸ੍ਮਿਞ੍ਹਿ ਸਤਿ ਇਦਂ ਸਙ੍ਘਸ੍ਸ ਉਪੋਸਥਕਮ੍ਮਂ ਪਤ੍ਤਕਲ੍ਲਂ ਨਾਮ ਹੋਤਿ, ਨਾਸਤਿ. ਯਥਾਹ ‘‘ਨ ਚ, ਭਿਕ੍ਖਵੇ, ਅਨੁਪੋਸਥੇ ਉਪੋਸਥੋ ਕਾਤਬ੍ਬੋ’’ਤਿ (ਮਹਾਵ. ੧੮੩).

ਯਾਵਤਿਕਾ ਚ ਭਿਕ੍ਖੂ ਕਮ੍ਮਪ੍ਪਤ੍ਤਾਤਿ ਯਤ੍ਤਕਾ ਭਿਕ੍ਖੂ ਤਸ੍ਸ ਉਪੋਸਥਕਮ੍ਮਸ੍ਸ ਪਤ੍ਤਾ ਯੁਤ੍ਤਾ ਅਨੁਰੂਪਾ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਚਤ੍ਤਾਰੋ ਪਕਤਤ੍ਤਾ, ਤੇ ਚ ਖੋ ਹਤ੍ਥਪਾਸਂ ਅਵਿਜਹਿਤ੍ਵਾ ਏਕਸੀਮਾਯਂ ਠਿਤਾ. ਤੇਸੁ ਹਿ ਚਤੂਸੁ ਭਿਕ੍ਖੂਸੁ ਏਕਸੀਮਾਯਂ ਹਤ੍ਥਪਾਸਂ ਅਵਿਜਹਿਤ੍ਵਾ ਠਿਤੇਸ੍ਵੇਵ ਤਂ ਸਙ੍ਘਸ੍ਸ ਉਪੋਸਥਕਮ੍ਮਂ ਪਤ੍ਤਕਲ੍ਲਂ ਨਾਮ ਹੋਤਿ, ਨ ਇਤਰਥਾ. ਯਥਾਹ ‘‘ਅਨੁਜਾਨਾਮਿ, ਭਿਕ੍ਖਵੇ, ਚਤੁਨ੍ਨਂ ਪਾਤਿਮੋਕ੍ਖਂ ਉਦ੍ਦਿਸਿਤੁ’’ਨ੍ਤਿ (ਮਹਾਵ. ੧੬੮).

ਸਭਾਗਾਪਤ੍ਤਿਯੋ ਚ ਨ ਵਿਜ੍ਜਨ੍ਤੀਤਿ ਏਤ੍ਥ ਯਂ ਸਬ੍ਬੋ ਸਙ੍ਘੋ ਵਿਕਾਲਭੋਜਨਾਦਿਨਾ ਸਭਾਗਵਤ੍ਥੁਨਾ ਲਹੁਕਾਪਤ੍ਤਿਂ ਆਪਜ੍ਜਤਿ, ਏਵਰੂਪਾ ਵਤ੍ਥੁਸਭਾਗਾ ਸਭਾਗਾਤਿ ਵੁਚ੍ਚਤਿ. ਏਤਾਸੁ ਅਵਿਜ੍ਜਮਾਨਾਸੁਪਿ ਸਭਾਗਾਸੁ ਵਿਜ੍ਜਮਾਨਾਸੁਪਿ ਪਤ੍ਤਕਲ੍ਲਂ ਹੋਤਿਯੇਵ.

ਵਜ੍ਜਨੀਯਾ ਚ ਪੁਗ੍ਗਲਾ ਤਸ੍ਮਿਂ ਨ ਹੋਨ੍ਤੀਤਿ ‘‘ਨ, ਭਿਕ੍ਖਵੇ, ਸਗਹਟ੍ਠਾਯ ਪਰਿਸਾਯ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬ’’ਨ੍ਤਿ (ਮਹਾਵ. ੧੫੪) ਵਚਨਤੋ ਗਹਟ੍ਠੋ ਚ, ‘‘ਨ, ਭਿਕ੍ਖਵੇ, ਭਿਕ੍ਖੁਨਿਯਾ ਨਿਸਿਨ੍ਨਪਰਿਸਾਯ ਪਾਤਿਮੋਕ੍ਖਂ ਉਦ੍ਦਿਸਿਤਬ੍ਬ’’ਨ੍ਤਿਆਦਿਨਾ (ਮਹਾਵ. ੧੮੩) ਨਯੇਨ ਵੁਤ੍ਤਾ ਭਿਕ੍ਖੁਨੀ, ਸਿਕ੍ਖਮਾਨਾ, ਸਾਮਣੇਰੋ, ਸਾਮਣੇਰੀ, ਸਿਕ੍ਖਾਪਚ੍ਚਕ੍ਖਾਤਕੋ, ਅਨ੍ਤਿਮਵਤ੍ਥੁਅਜ੍ਝਾਪਨ੍ਨਕੋ, ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕੋ, ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕੋ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕੋ, ਪਣ੍ਡਕੋ, ਥੇਯ੍ਯਸਂਵਾਸਕੋ, ਤਿਤ੍ਥਿਯਪਕ੍ਕਨ੍ਤਕੋ, ਤਿਰਚ੍ਛਾਨਗਤੋ, ਮਾਤੁਘਾਤਕੋ, ਪਿਤੁਘਾਤਕੋ, ਅਰਹਨ੍ਤਘਾਤਕੋ, ਭਿਕ੍ਖੁਨੀਦੂਸਕੋ, ਸਙ੍ਘਭੇਦਕੋ, ਲੋਹਿਤੁਪ੍ਪਾਦਕੋ, ਉਭਤੋਬ੍ਯਞ੍ਜਨਕੋਤਿ ਇਮੇ ਵੀਸਤਿ ਚਾਤਿ ਏਕਵੀਸਤਿ ਪੁਗ੍ਗਲਾ ਵਜ੍ਜਨੀਯਾ ਨਾਮ. ਤੇ ਹਤ੍ਥਪਾਸਤੋ ਬਹਿਕਰਣਵਸੇਨ ਵਜ੍ਜੇਤਬ੍ਬਾ. ਏਤੇਸੁ ਹਿ ਤਿਵਿਧੇ ਉਕ੍ਖਿਤ੍ਤਕੇ ਸਤਿ ਉਪੋਸਥਂ ਕਰੋਨ੍ਤੋ ਸਙ੍ਘੋ ਪਾਚਿਤ੍ਤਿਯਂ ਆਪਜ੍ਜਤਿ, ਸੇਸੇਸੁ ਦੁਕ੍ਕਟਂ, ਏਤ੍ਥ ਚ ਤਿਰਚ੍ਛਾਨਗਤੋਤਿ ਯਸ੍ਸ ਉਪਸਮ੍ਪਦਾ ਪਟਿਕ੍ਖਿਤ੍ਤਾ. ਤਿਤ੍ਥਿਯਾ ਗਹਟ੍ਠੇਨੇਵ ਸਙ੍ਗਹਿਤਾ. ਏਤੇਪਿ ਹਿ ਵਜ੍ਜਨੀਯਾ. ਏਵਂ ਪਤ੍ਤਕਲ੍ਲਂ ਇਮੇਹਿ ਚਤੂਹਿ ਅਙ੍ਗੇਹਿ ਸਙ੍ਗਹਿਤਨ੍ਤਿ ਵੇਦਿਤਬ੍ਬਂ. ਇਦਞ੍ਚ ਸਬ੍ਬਂ ਪਵਾਰਣਾਕਮ੍ਮੇਪਿ ਯੋਜੇਤ੍ਵਾ ਦਸ੍ਸੇਤਬ੍ਬਂ. ‘‘ਨ, ਭਿਕ੍ਖਵੇ, ਪਾਤਿਮੋਕ੍ਖੁਦ੍ਦੇਸਕੇਨ ਸਞ੍ਚਿਚ੍ਚ ਨ ਸਾਵੇਤਬ੍ਬਂ, ਯੋ ਨ ਸਾਵੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਪਾਤਿਮੋਕ੍ਖੁਦ੍ਦੇਸਕੇਨ ਵਾਯਮਿਤੁਂ ‘ਕਥਂ ਸਾਵੇਯ੍ਯ’ਨ੍ਤਿ, ਵਾਯਮਨ੍ਤਸ੍ਸ ਅਨਾਪਤ੍ਤੀ’’ਤਿ (ਮਹਾਵ. ੧੫੪) ਵਚਨਤੋ ਪਾਤਿਮੋਕ੍ਖੁਦ੍ਦੇਸਕੇਨ ਪਰਿਸਂ ਸਾਵੇਤੁਂ ਵਾਯਮਿਤਬ੍ਬਨ੍ਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਉਪੋਸਥਪਵਾਰਣਾਵਿਨਿਚ੍ਛਯਕਥਾ ਸਮਤ੍ਤਾ.