੨੪. ਸੀਮਾਵਿਨਿਚ੍ਛਯਕਥਾ

੧੫੬. ਸੀਮਾਤਿ ਏਤ੍ਥ (ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ) ਸੀਮਾ ਨਾਮੇਸਾ ਬਦ੍ਧਸੀਮਾ ਅਬਦ੍ਧਸੀਮਾਤਿ ਦੁਵਿਧਾ ਹੋਤਿ. ਤਤ੍ਥ ਏਕਾਦਸ ਵਿਪਤ੍ਤਿਸੀਮਾਯੋ ਅਤਿਕ੍ਕਮਿਤ੍ਵਾ ਤਿਵਿਧਸਮ੍ਪਤ੍ਤਿਯੁਤ੍ਤਾ ਨਿਮਿਤ੍ਤੇਨ ਨਿਮਿਤ੍ਤਂ ਬਨ੍ਧਿਤ੍ਵਾ ਸਮ੍ਮਤਾ ਸੀਮਾ ਬਦ੍ਧਸੀਮਾ ਨਾਮ. ਅਤਿਖੁਦ੍ਦਕਾ, ਅਤਿਮਹਤੀ, ਖਣ੍ਡਨਿਮਿਤ੍ਤਾ, ਛਾਯਾਨਿਮਿਤ੍ਤਾ, ਅਨਿਮਿਤ੍ਤਾ, ਬਹਿਸੀਮੇ ਠਿਤਸਮ੍ਮਤਾ, ਨਦਿਯਾ ਸਮ੍ਮਤਾ, ਸਮੁਦ੍ਦੇ ਸਮ੍ਮਤਾ, ਜਾਤਸ੍ਸਰੇ ਸਮ੍ਮਤਾ, ਸੀਮਾਯ ਸੀਮਂ ਸਮ੍ਭਿਨ੍ਦਨ੍ਤੇਨ ਸਮ੍ਮਤਾ, ਸੀਮਾਯ ਸੀਮਂ ਅਜ੍ਝੋਤ੍ਥਰਨ੍ਤੇਨ ਸਮ੍ਮਤਾਤਿ ਇਮੇਹਿ ਏਕਾਦਸਹਿ ਆਕਾਰੇਹਿ ਸੀਮਤੋ ਕਮ੍ਮਾਨਿ ਵਿਪਜ੍ਜਨ੍ਤੀਤਿ ਵਚਨਤੋ ਏਤਾ ਵਿਪਤ੍ਤਿਸੀਮਾਯੋ ਨਾਮ.

ਤਤ੍ਥ ਅਤਿਖੁਦ੍ਦਕਾ ਨਾਮ ਯਤ੍ਥ ਏਕਵੀਸਤਿ ਭਿਕ੍ਖੂ ਨਿਸੀਦਿਤੁਂ ਨ ਸਕ੍ਕੋਨ੍ਤਿ. ਅਤਿਮਹਤੀ ਨਾਮ ਯਾ ਕੇਸਗ੍ਗਮਤ੍ਤੇਨਪਿ ਤਿਯੋਜਨਂ ਅਤਿਕ੍ਕਮਿਤ੍ਵਾ ਸਮ੍ਮਤਾ. ਖਣ੍ਡਨਿਮਿਤ੍ਤਾ ਨਾਮ ਅਘਟਿਤਨਿਮਿਤ੍ਤਾ ਵੁਚ੍ਚਤਿ. ਪੁਰਤ੍ਥਿਮਾਯ ਦਿਸਾਯ ਨਿਮਿਤ੍ਤਂ ਕਿਤ੍ਤੇਤ੍ਵਾ ਅਨੁਕ੍ਕਮੇਨ ਦਕ੍ਖਿਣਾਯ ਦਿਸਾਯ ਪਚ੍ਛਿਮਾਯ ਉਤ੍ਤਰਾਯ ਦਿਸਾਯ ਕਿਤ੍ਤੇਤ੍ਵਾ ਪੁਨ ਪੁਰਤ੍ਥਿਮਾਯ ਦਿਸਾਯ ਪੁਬ੍ਬਕਿਤ੍ਤਿਤਂ ਪਟਿਕਿਤ੍ਤੇਤ੍ਵਾ ਠਪੇਤੁਂ ਵਟ੍ਟਤਿ, ਏਵਂ ਅਖਣ੍ਡਨਿਮਿਤ੍ਤਾ ਹੋਤਿ. ਸਚੇ ਪਨ ਅਨੁਕ੍ਕਮੇਨ ਆਹਰਿਤ੍ਵਾ ਉਤ੍ਤਰਾਯ ਦਿਸਾਯ ਨਿਮਿਤ੍ਤਂ ਕਿਤ੍ਤੇਤ੍ਵਾ ਤਤ੍ਥੇਵ ਠਪੇਤਿ, ਖਣ੍ਡਨਿਮਿਤ੍ਤਾ ਹੋਤਿ. ਅਪਰਾਪਿ ਖਣ੍ਡਨਿਮਿਤ੍ਤਾ ਨਾਮ ਯਾ ਅਨਿਮਿਤ੍ਤੁਪਗਂ ਤਚਸਾਰਰੁਕ੍ਖਂ ਵਾ ਖਾਣੁਕਂ ਵਾ ਪਂਸੁਪੁਞ੍ਜਂ ਵਾ ਵਾਲੁਕਪੁਞ੍ਜਂ ਵਾ ਅਞ੍ਞਤਰਂ ਅਨ੍ਤਰਾ ਏਕਨਿਮਿਤ੍ਤਂ ਕਤ੍ਵਾ ਸਮ੍ਮਤਾ. ਛਾਯਾਨਿਮਿਤ੍ਤਾ ਨਾਮ ਪਬ੍ਬਤਛਾਯਾਦੀਨਂ ਯਂ ਕਿਞ੍ਚਿ ਛਾਯਂ ਨਿਮਿਤ੍ਤਂ ਕਤ੍ਵਾ ਸਮ੍ਮਤਾ. ਅਨਿਮਿਤ੍ਤਾ ਨਾਮ ਸਬ੍ਬੇਨ ਸਬ੍ਬਂ ਨਿਮਿਤ੍ਤਾਨਿ ਅਕਿਤ੍ਤੇਤ੍ਵਾ ਸਮ੍ਮਤਾ. ਬਹਿਸੀਮੇ ਠਿਤਸਮ੍ਮਤਾ ਨਾਮ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਨਿਮਿਤ੍ਤਾਨਂ ਬਹਿ ਠਿਤੇਨ ਸਮ੍ਮਤਾ. ਨਦਿਯਾ, ਸਮੁਦ੍ਦੇ, ਜਾਤਸ੍ਸਰੇ ਸਮ੍ਮਤਾ ਨਾਮ ਏਤੇਸੁ ਨਦਿਆਦੀਸੁ ਸਮ੍ਮਤਾ. ਸਾ ਹਿ ਏਵਂ ਸਮ੍ਮਤਾਪਿ ‘‘ਸਬ੍ਬਾ, ਭਿਕ੍ਖਵੇ, ਨਦੀ ਅਸੀਮਾ, ਸਬ੍ਬੋ ਸਮੁਦ੍ਦੋ ਅਸੀਮੋ, ਸਬ੍ਬੋ ਜਾਤਸ੍ਸਰੋ ਅਸੀਮੋ’’ਤਿ (ਮਹਾਵ. ੧੪੭) ਵਚਨਤੋ ਅਸਮ੍ਮਤਾਵ ਹੋਤਿ. ਸੀਮਾਯ ਸੀਮਂ ਸਮ੍ਭਿਨ੍ਦਨ੍ਤੇਨ ਸਮ੍ਮਤਾ (ਮਹਾਵ. ਅਟ੍ਠ. ੧੪੮) ਨਾਮ ਅਤ੍ਤਨੋ ਸੀਮਾਯ ਪਰੇਸਂ ਸੀਮਂ ਸਮ੍ਭਿਨ੍ਦਨ੍ਤੇਨ ਸਮ੍ਮਤਾ. ਸਚੇ ਹਿ ਪੋਰਾਣਕਸ੍ਸ ਵਿਹਾਰਸ੍ਸ ਪੁਰਤ੍ਥਿਮਾਯ ਦਿਸਾਯ ਅਮ੍ਬੋ ਚੇਵ ਜਮ੍ਬੁ ਚਾਤਿ ਦ੍ਵੇ ਰੁਕ੍ਖਾ ਅਞ੍ਞਮਞ੍ਞਂ ਸਂਸਟ੍ਠਵਿਟਪਾ ਹੋਨ੍ਤਿ, ਤੇਸੁ ਅਮ੍ਬਸ੍ਸ ਪਚ੍ਛਿਮਦਿਸਾਭਾਗੇ ਜਮ੍ਬੁ, ਵਿਹਾਰਸੀਮਾ ਚ ਜਮ੍ਬੁਂ ਅਨ੍ਤੋਕਤ੍ਵਾ ਅਮ੍ਬਂ ਕਿਤ੍ਤੇਤ੍ਵਾ ਬਦ੍ਧਾ ਹੋਤਿ. ਅਥ ਪਚ੍ਛਾ ਤਸ੍ਸ ਵਿਹਾਰਸ੍ਸ ਪੁਰਤ੍ਥਿਮਾਯ ਦਿਸਾਯ ਵਿਹਾਰੇ ਕਤੇ ਸੀਮਂ ਬਨ੍ਧਨ੍ਤਾ ਭਿਕ੍ਖੂ ਤਂ ਅਮ੍ਬਂ ਅਨ੍ਤੋਕਤ੍ਵਾ ਜਮ੍ਬੁਂ ਕਿਤ੍ਤੇਤ੍ਵਾ ਬਨ੍ਧਨ੍ਤਿ, ਸੀਮਾਯ ਸੀਮਂ ਸਮ੍ਭਿਨ੍ਨਾ ਹੋਤਿ. ਤਸ੍ਮਾ ਸਚੇ ਪਠਮਤਰਂ ਕਤਸ੍ਸ ਵਿਹਾਰਸ੍ਸ ਸੀਮਾ ਅਸਮ੍ਮਤਾ ਹੋਤਿ, ਸੀਮਾਯ ਉਪਚਾਰੋ ਠਪੇਤਬ੍ਬੋ. ਸਚੇ ਸਮ੍ਮਤਾ ਹੋਤਿ, ਪਚ੍ਛਿਮਕੋਟਿਯਾ ਹਤ੍ਥਮਤ੍ਤਾ ਸੀਮਨ੍ਤਰਿਕਾ ਠਪੇਤਬ੍ਬਾ. ਕੁਰੁਨ੍ਦਿਯਂ ‘‘ਵਿਦਤ੍ਥਿਮਤ੍ਤਮ੍ਪਿ’’, ਮਹਾਪਚ੍ਚਰਿਯਂ ‘‘ਚਤੁਰਙ੍ਗੁਲਮਤ੍ਤਮ੍ਪਿ ਵਟ੍ਟਤੀ’’ਤਿ ਵੁਤ੍ਤਂ. ਏਕਰੁਕ੍ਖੋਪਿ ਚ ਦ੍ਵਿਨ੍ਨਂ ਸੀਮਾਨਂ ਨਿਮਿਤ੍ਤਂ ਹੋਤਿ. ਸੋ ਪਨ ਵਡ੍ਢਨ੍ਤੋ ਸੀਮਸਙ੍ਕਰਂ ਕਰੋਤਿ, ਤਸ੍ਮਾ ਨ ਕਾਤਬ੍ਬੋ. ਸੀਮਾਯ ਸੀਮਂ ਅਜ੍ਝੋਤ੍ਥਰਨ੍ਤੇਨ ਸਮ੍ਮਤਾ ਨਾਮ ਅਤ੍ਤਨੋ ਸੀਮਾਯ ਪਰੇਸਂ ਸੀਮਂ ਅਜ੍ਝੋਤ੍ਥਰਨ੍ਤੇਨ ਸਮ੍ਮਤਾ. ਸਚੇ ਹਿ ਪਰੇਸਂ ਬਦ੍ਧਸੀਮਂ ਸਕਲਂ ਵਾ ਤਸ੍ਸਾ ਪਦੇਸਂ ਵਾ ਅਨ੍ਤੋਕਤ੍ਵਾ ਅਤ੍ਤਨੋ ਸੀਮਂ ਸਮ੍ਮਨ੍ਨਨ੍ਤਿ, ਸੀਮਾਯ ਸੀਮਂ ਅਜ੍ਝੋਤ੍ਥਰਿਤਾ ਨਾਮ ਹੋਤਿ. ਭਿਕ੍ਖੁਨੀਨਂ ਪਨ ਸੀਮਂ ਅਜ੍ਝੋਤ੍ਥਰਿਤ੍ਵਾ ਅਨ੍ਤੋਪਿ ਭਿਕ੍ਖੂਨਂ ਸੀਮਂ ਸਮ੍ਮਨ੍ਨਿਤੁਂ ਵਟ੍ਟਤਿ. ਭਿਕ੍ਖੁਨੀਨਮ੍ਪਿ ਭਿਕ੍ਖੂਨਂ ਸੀਮਾਯ ਏਸੇਵ ਨਯੋ. ਨ ਹਿ ਤੇ ਅਞ੍ਞਮਞ੍ਞਸ੍ਸ ਕਮ੍ਮੇ ਗਣਪੂਰਕਾ ਹੋਨ੍ਤਿ, ਨ ਕਮ੍ਮਵਾਚਂ ਵਗ੍ਗਂ ਕਰੋਨ੍ਤਿ. ਇਤਿ ਇਮਾ ਏਕਾਦਸ ਵਿਪਤ੍ਤਿਸੀਮਾਯੋ ਅਤਿਕ੍ਕਮਿਤ੍ਵਾ ਸੀਮਾ ਸਮ੍ਮਨ੍ਨਿਤਬ੍ਬਾ.

੧੫੭. ਤਿਵਿਧਸਮ੍ਪਤ੍ਤਿਯੁਤ੍ਤਾ ਨਾਮ ਨਿਮਿਤ੍ਤਸਮ੍ਪਤ੍ਤਿਯਾ ਪਰਿਸਸਮ੍ਪਤ੍ਤਿਯਾ ਕਮ੍ਮਵਾਚਾਸਮ੍ਪਤ੍ਤਿਯਾ ਚ ਯੁਤ੍ਤਾ. ਤਤ੍ਥ ਨਿਮਿਤ੍ਤਸਮ੍ਪਤ੍ਤਿਯਾ ਯੁਤ੍ਤਾ ਨਾਮ ਪਬ੍ਬਤਨਿਮਿਤ੍ਤਂ ਪਾਸਾਣਨਿਮਿਤ੍ਤਂ ਵਨਨਿਮਿਤ੍ਤਂ ਰੁਕ੍ਖਨਿਮਿਤ੍ਤਂ ਮਗ੍ਗਨਿਮਿਤ੍ਤਂ ਵਮ੍ਮਿਕਨਿਮਿਤ੍ਤਂ ਨਦੀਨਿਮਿਤ੍ਤਂ ਉਦਕਨਿਮਿਤ੍ਤਨ੍ਤਿ ਏਵਂ ਵੁਤ੍ਤੇਸੁ ਅਟ੍ਠਸੁ ਨਿਮਿਤ੍ਤੇਸੁ ਤਸ੍ਮਿਂ ਤਸ੍ਮਿਂ ਦਿਸਾਭਾਗੇ ਯਥਾਲਦ੍ਧਾਨਿ ਨਿਮਿਤ੍ਤੁਪਗਾਨਿ ਨਿਮਿਤ੍ਤਾਨਿ ‘‘ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤਂ. ਪਬ੍ਬਤੋ, ਭਨ੍ਤੇ. ਏਸੋ ਪਬ੍ਬਤੋ ਨਿਮਿਤ੍ਤ’’ਨ੍ਤਿਆਦਿਨਾ ਨਯੇਨ ਸਮ੍ਮਾ ਕਿਤ੍ਤੇਤ੍ਵਾ ਸਮ੍ਮਤਾ.

ਤਤ੍ਰਾਯਂ ਵਿਨਿਚ੍ਛਯੋ (ਮਹਾਵ. ਅਟ੍ਠ. ੧੩੮) – ਵਿਨਯਧਰੇਨ ਪੁਚ੍ਛਿਤਬ੍ਬਂ ‘‘ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤ’’ਨ੍ਤਿ? ‘‘ਪਬ੍ਬਤੋ, ਭਨ੍ਤੇ’’ਤਿ. ਇਦਂ ਪਨ ਉਪਸਮ੍ਪਨ੍ਨੋ ਵਾ ਆਚਿਕ੍ਖਤੁ ਅਨੁਪਸਮ੍ਪਨ੍ਨੋ ਵਾ, ਵਟ੍ਟਤਿਯੇਵ. ਪੁਨ ਵਿਨਯਧਰੇਨ ‘‘ਏਸੋ ਪਬ੍ਬਤੋ ਨਿਮਿਤ੍ਤ’’ਨ੍ਤਿ ਏਵਂ ਨਿਮਿਤ੍ਤਂ ਕਿਤ੍ਤੇਤਬ੍ਬਂ, ‘‘ਏਤਂ ਪਬ੍ਬਤਂ ਨਿਮਿਤ੍ਤਂ ਕਰੋਮ, ਕਰਿਸ੍ਸਾਮ, ਨਿਮਿਤ੍ਤਂ ਕਤੋ, ਨਿਮਿਤ੍ਤਂ ਹੋਤੁ, ਹੋਤਿ, ਭਵਿਸ੍ਸਤੀ’’ਤਿ ਏਵਂ ਪਨ ਕਿਤ੍ਤੇਤੁਂ ਨ ਵਟ੍ਟਤਿ. ਪਾਸਾਣਾਦੀਸੁਪਿ ਏਸੇਵ ਨਯੋ. ਪੁਰਤ੍ਥਿਮਾਯ ਦਿਸਾਯ, ਪੁਰਤ੍ਥਿਮਾਯ ਅਨੁਦਿਸਾਯ, ਦਕ੍ਖਿਣਾਯ ਦਿਸਾਯ, ਦਕ੍ਖਿਣਾਯ ਅਨੁਦਿਸਾਯ, ਪਚ੍ਛਿਮਾਯ ਦਿਸਾਯ, ਪਚ੍ਛਿਮਾਯ ਅਨੁਦਿਸਾਯ, ਉਤ੍ਤਰਾਯ ਦਿਸਾਯ, ਉਤ੍ਤਰਾਯ ਅਨੁਦਿਸਾਯ ਕਿਂ ਨਿਮਿਤ੍ਤਂ? ਉਦਕਂ, ਭਨ੍ਤੇ. ਏਤਂ ਉਦਕਂ ਨਿਮਿਤ੍ਤਨ੍ਤਿ ਕਿਤ੍ਤੇਤਬ੍ਬਂ. ਏਤ੍ਥ ਪਨ ਅਟ੍ਠਪੇਤ੍ਵਾ ਪੁਨ ‘‘ਪੁਰਤ੍ਥਿਮਾਯ ਦਿਸਾਯ ਕਿਂ ਨਿਮਿਤ੍ਤਂ? ਪਬ੍ਬਤੋ, ਭਨ੍ਤੇ. ਏਸੋ ਪਬ੍ਬਤੋ ਨਿਮਿਤ੍ਤ’’ਨ੍ਤਿ ਏਵਂ ਪਠਮਂ ਕਿਤ੍ਤਿਤਨਿਮਿਤ੍ਤਂ ਕਿਤ੍ਤੇਤ੍ਵਾਵ ਠਪੇਤਬ੍ਬਂ. ਏਵਞ੍ਹਿ ਨਿਮਿਤ੍ਤੇਨ ਨਿਮਿਤ੍ਤਂ ਘਟਿਤਂ ਹੋਤਿ, ਨਿਮਿਤ੍ਤਾਨਿ ਸਕਿਂ ਕਿਤ੍ਤਿਤਾਨਿਪਿ ਕਿਤ੍ਤਿਤਾਨੇਵ ਹੋਨ੍ਤਿ. ਅਨ੍ਧਕਟ੍ਠਕਥਾਯਂ ਪਨ ‘‘ਤਿਕ੍ਖਤ੍ਤੁਂ ਸੀਮਮਣ੍ਡਲਂ ਬਨ੍ਧਨ੍ਤੇਨ ਨਿਮਿਤ੍ਤਂ ਕਿਤ੍ਤੇਤਬ੍ਬ’’ਨ੍ਤਿ ਵੁਤ੍ਤਂ.

੧੫੮. ਇਦਾਨਿ ਨਿਮਿਤ੍ਤੁਪਗਾਨਿ ਪਬ੍ਬਤਾਦੀਨਿ ਵੇਦਿਤਬ੍ਬਾਨਿ – ਤਿਵਿਧੋ ਪਬ੍ਬਤੋ ਸੁਦ੍ਧਪਂਸੁਪਬ੍ਬਤੋ ਸੁਦ੍ਧਪਾਸਾਣਪਬ੍ਬਤੋ ਉਭਯਮਿਸ੍ਸਕੋਤਿ. ਸੋ ਤਿਵਿਧੋਪਿ ਵਟ੍ਟਤਿ, ਵਾਲਿਕਰਾਸਿ ਪਨ ਨ ਵਟ੍ਟਤਿ. ਇਤਰੋਪਿ ਹਤ੍ਥਿਪ੍ਪਮਾਣਤੋ ਓਮਕਤਰੋ ਨ ਵਟ੍ਟਤਿ, ਹਤ੍ਥਿਪ੍ਪਮਾਣਤੋ ਪਟ੍ਠਾਯ ਸਿਨੇਰੁਪ੍ਪਮਾਣੋਪਿ ਵਟ੍ਟਤਿ. ਸਚੇ ਚਤੂਸੁ ਦਿਸਾਸੁ ਚਤ੍ਤਾਰੋ ਤੀਸੁ ਵਾ ਤਯੋ ਪਬ੍ਬਤਾ ਹੋਨ੍ਤਿ, ਚਤੂਹਿ ਵਾ ਤੀਹਿ ਵਾ ਪਬ੍ਬਤਨਿਮਿਤ੍ਤੇਹਿ ਸਮ੍ਮਨ੍ਨਿਤੁਮ੍ਪਿ ਵਟ੍ਟਤਿ, ਦ੍ਵੀਹਿ ਪਨ ਨਿਮਿਤ੍ਤੇਹਿ ਏਕੇਨ ਵਾ ਸਮ੍ਮਨ੍ਨਿਤੁਂ ਨ ਵਟ੍ਟਤਿ. ਇਤੋ ਪਰੇਸੁ ਪਾਸਾਣਨਿਮਿਤ੍ਤਾਦੀਸੁਪਿ ਏਸੇਵ ਨਯੋ. ਤਸ੍ਮਾ ਪਬ੍ਬਤਨਿਮਿਤ੍ਤਂ ਕਰੋਨ੍ਤੇਨ ਪੁਚ੍ਛਿਤਬ੍ਬਂ ‘‘ਏਕਾਬਦ੍ਧੋ, ਨ ਏਕਾਬਦ੍ਧੋ’’ਤਿ. ਸਚੇ ਏਕਾਬਦ੍ਧੋ ਹੋਤਿ, ਨ ਕਾਤਬ੍ਬੋ. ਤਞ੍ਹਿ ਚਤੂਸੁ ਵਾ ਅਟ੍ਠਸੁ ਵਾ ਦਿਸਾਸੁ ਕਿਤ੍ਤੇਨ੍ਤੇਨਪਿ ਏਕਮੇਵ ਨਿਮਿਤ੍ਤਂ ਕਿਤ੍ਤਿਤਂ ਹੋਤਿ, ਤਸ੍ਮਾ ਯੋ ਏਵਂ ਚਕ੍ਕਸਣ੍ਠਾਨੇਨ ਵਿਹਾਰਮ੍ਪਿ ਪਰਿਕ੍ਖਿਪਿਤ੍ਵਾ ਠਿਤੋ ਪਬ੍ਬਤੋ, ਤਂ ਏਕਦਿਸਾਯ ਕਿਤ੍ਤੇਤ੍ਵਾ ਅਞ੍ਞਾਸੁ ਦਿਸਾਸੁ ਤਂ ਬਹਿਦ੍ਧਾ ਕਤ੍ਵਾ ਅਨ੍ਤੋ ਅਞ੍ਞਾਨਿ ਨਿਮਿਤ੍ਤਾਨਿ ਕਿਤ੍ਤੇਤਬ੍ਬਾਨਿ. ਸਚੇ ਪਬ੍ਬਤਸ੍ਸ ਤਤਿਯਭਾਗਂ ਵਾ ਉਪਡ੍ਢਂ ਵਾ ਅਨ੍ਤੋਸੀਮਾਯ ਕਤ੍ਤੁਕਾਮਾ ਹੋਨ੍ਤਿ, ਪਬ੍ਬਤਂ ਅਕਿਤ੍ਤੇਤ੍ਵਾ ਯਤ੍ਤਕਂ ਪਦੇਸਂ ਅਨ੍ਤੋ ਕਤ੍ਤੁਕਾਮਾ, ਤਸ੍ਸ ਪਰਤੋ ਤਸ੍ਮਿਂਯੇਵ ਪਬ੍ਬਤੇ ਜਾਤਰੁਕ੍ਖਵਮ੍ਮਿਕਾਦੀਸੁ ਅਞ੍ਞਤਰਂ ਨਿਮਿਤ੍ਤਂ ਕਿਤ੍ਤੇਤਬ੍ਬਂ. ਸਚੇ ਏਕਯੋਜਨਦ੍ਵਿਯੋਜਨਪ੍ਪਮਾਣਂ ਸਬ੍ਬਂ ਪਬ੍ਬਤਂ ਅਨ੍ਤੋ ਕਤ੍ਤੁਕਾਮਾ ਹੋਨ੍ਤਿ, ਪਬ੍ਬਤਸ੍ਸ ਪਰਤੋ ਭੂਮਿਯਂ ਜਾਤਰੁਕ੍ਖਵਮ੍ਮਿਕਾਦੀਨਿ ਨਿਮਿਤ੍ਤਾਨਿ ਕਿਤ੍ਤੇਤਬ੍ਬਾਨਿ.

ਪਾਸਾਣਨਿਮਿਤ੍ਤੇ ਅਯਗੁਲ਼ੋਪਿ ਪਾਸਾਣਸਙ੍ਖ੍ਯਮੇਵ ਗਚ੍ਛਤਿ, ਤਸ੍ਮਾ ਯੋ ਕੋਚਿ ਪਾਸਾਣੋ ਵਟ੍ਟਤਿ. ਪਮਾਣਤੋ ਪਨ ਹਤ੍ਥਿਪ੍ਪਮਾਣੋ ਪਬ੍ਬਤਸਙ੍ਖ੍ਯਂ ਗਤੋ, ਤਸ੍ਮਾ ਸੋ ਨ ਵਟ੍ਟਤਿ, ਮਹਾਗੋਣਮਹਾਮਹਿਂਸਪ੍ਪਮਾਣੋ ਪਨ ਵਟ੍ਟਤਿ. ਹੇਟ੍ਠਿਮਪਰਿਚ੍ਛੇਦੇਨ ਦ੍ਵਤ੍ਤਿਂਸਪਲਗੁਲ਼ਪਿਣ੍ਡਪ੍ਪਮਾਣੋ ਵਟ੍ਟਤਿ, ਤਤੋ ਖੁਦ੍ਦਕਤਰੋ ਇਟ੍ਠਕਾ ਵਾ ਮਹਨ੍ਤੀਪਿ ਨ ਵਟ੍ਟਤਿ, ਅਨਿਮਿਤ੍ਤੁਪਗਪਾਸਾਣਾਨਂ ਰਾਸਿਪਿ ਨ ਵਟ੍ਟਤਿ, ਪਗੇਵ ਪਂਸੁਵਾਲੁਕਰਾਸਿ. ਭੂਮਿਸਮੋ ਖਲਮਣ੍ਡਲਸਦਿਸੋ ਪਿਟ੍ਠਿਪਾਸਾਣੋ ਵਾ ਭੂਮਿਤੋ ਖਾਣੁਕੋ ਵਿਯ ਉਟ੍ਠਿਤਪਾਸਾਣੋ ਵਾ ਹੋਤਿ, ਸੋਪਿ ਪਮਾਣੁਪਗੋ ਚੇ, ਵਟ੍ਟਤਿ. ਪਿਟ੍ਠਿਪਾਸਾਣੋ ਅਤਿਮਹਨ੍ਤੋਪਿ ਪਾਸਾਣਸਙ੍ਖ੍ਯਮੇਵ ਗਚ੍ਛਤਿ, ਤਸ੍ਮਾ ਸਚੇ ਮਹਤੋ ਪਿਟ੍ਠਿਪਾਸਾਣਸ੍ਸ ਏਕਪ੍ਪਦੇਸਂ ਅਨ੍ਤੋਸੀਮਾਯ ਕਤ੍ਤੁਕਾਮਾ ਹੋਨ੍ਤਿ, ਤਂ ਅਕਿਤ੍ਤੇਤ੍ਵਾ ਤਸ੍ਸੁਪਰਿ ਅਞ੍ਞੋ ਪਾਸਾਣੋ ਕਿਤ੍ਤੇਤਬ੍ਬੋ. ਸਚੇ ਪਿਟ੍ਠਿਪਾਸਾਣੁਪਰਿ ਵਿਹਾਰਂ ਕਰੋਨ੍ਤਿ, ਵਿਹਾਰਮਜ੍ਝੇਨ ਵਾ ਪਿਟ੍ਠਿਪਾਸਾਣੋ ਵਿਨਿਵਿਜ੍ਝਿਤ੍ਵਾ ਗਚ੍ਛਤਿ, ਏਵਰੂਪੋ ਪਿਟ੍ਠਿਪਾਸਾਣੋ ਨ ਵਟ੍ਟਤਿ. ਸਚੇ ਹਿ ਤਂ ਕਿਤ੍ਤੇਨ੍ਤਿ, ਨਿਮਿਤ੍ਤਸ੍ਸ ਉਪਰਿ ਵਿਹਾਰੋ ਹੋਤਿ, ਨਿਮਿਤ੍ਤਞ੍ਚ ਨਾਮ ਬਹਿਸੀਮਾਯ ਹੋਤਿ, ਵਿਹਾਰੋਪਿ ਬਹਿਸੀਮਾਯਂ ਆਪਜ੍ਜਤਿ. ਵਿਹਾਰਂ ਪਰਿਕ੍ਖਿਪਿਤ੍ਵਾ ਠਿਤਪਿਟ੍ਠਿਪਾਸਾਣੋ ਏਕਤ੍ਥ ਕਿਤ੍ਤੇਤ੍ਵਾ ਅਞ੍ਞਤ੍ਥ ਨ ਕਿਤ੍ਤੇਤਬ੍ਬੋ.

ਵਨਨਿਮਿਤ੍ਤੇ ਤਿਣਵਨਂ ਵਾ ਤਚਸਾਰਤਾਲਨਾਲ਼ਿਕੇਰਾਦਿਰੁਕ੍ਖਵਨਂ ਵਾ ਨ ਵਟ੍ਟਤਿ, ਅਨ੍ਤੋਸਾਰਾਨਂ ਪਨ ਸਾਕਸਾਲਾਦੀਨਂ ਅਨ੍ਤੋਸਾਰਮਿਸ੍ਸਕਾਨਂ ਵਾ ਰੁਕ੍ਖਾਨਂ ਵਨਂ ਵਟ੍ਟਤਿ, ਤਞ੍ਚ ਖੋ ਹੇਟ੍ਠਿਮਪਰਿਚ੍ਛੇਦੇਨ ਚਤੁਪਞ੍ਚਰੁਕ੍ਖਮਤ੍ਤਮ੍ਪਿ, ਤਤੋ ਓਰਂ ਨ ਵਟ੍ਟਤਿ, ਪਰਂ ਯੋਜਨਸਤਿਕਮ੍ਪਿ ਵਟ੍ਟਤਿ. ਸਚੇ ਪਨ ਵਨਮਜ੍ਝੇ ਵਿਹਾਰਂ ਕਰੋਨ੍ਤਿ, ਵਨਂ ਨ ਕਿਤ੍ਤੇਤਬ੍ਬਂ. ਏਕਦੇਸਂ ਅਨ੍ਤੋਸੀਮਾਯ ਕਾਤੁਕਾਮੇਹਿਪਿ ਵਨਂ ਅਕਿਤ੍ਤੇਤ੍ਵਾ ਤਤ੍ਥ ਰੁਕ੍ਖਪਾਸਾਣਾਦਯੋ ਕਿਤ੍ਤੇਤਬ੍ਬਾ. ਵਿਹਾਰਂ ਪਰਿਕ੍ਖਿਪਿਤ੍ਵਾ ਠਿਤਵਨਂ ਏਕਤ੍ਥ ਕਿਤ੍ਤੇਤ੍ਵਾ ਅਞ੍ਞਤ੍ਥ ਨ ਕਿਤ੍ਤੇਤਬ੍ਬਂ.

ਰੁਕ੍ਖਨਿਮਿਤ੍ਤੇ ਤਚਸਾਰੋ ਤਾਲਨਾਲ਼ਿਕੇਰਾਦਿਰੁਕ੍ਖੋ ਨ ਵਟ੍ਟਤਿ, ਅਨ੍ਤੋਸਾਰੋ ਜੀਵਮਾਨਕੋ ਅਨ੍ਤਮਸੋ ਉਬ੍ਬੇਧਤੋ ਅਟ੍ਠਙ੍ਗੁਲੋ ਪਰਿਣਾਹਤੋ ਸੂਚਿਦਣ੍ਡਕਪ੍ਪਮਾਣੋਪਿ ਵਟ੍ਟਤਿ. ਤਤੋ ਓਰਂ ਨ ਵਟ੍ਟਤਿ, ਪਰਂ ਦ੍ਵਾਦਸਯੋਜਨੋ ਸੁਪ੍ਪਤਿਟ੍ਠਿਤਨਿਗ੍ਰੋਧੋਪਿ ਵਟ੍ਟਤਿ. ਵਂਸਨਲ਼ਕਸਰਾਵਾਦੀਸੁ ਬੀਜਂ ਰੋਪੇਤ੍ਵਾ ਵਡ੍ਢਾਪਿਤੋ ਪਮਾਣੁਪਗੋਪਿ ਨ ਵਟ੍ਟਤਿ, ਤਤੋ ਅਪਨੇਤ੍ਵਾ ਪਨ ਤਂ ਖਣਮ੍ਪਿ ਭੂਮਿਯਂ ਰੋਪੇਤ੍ਵਾ ਕੋਟ੍ਠਕਂ ਕਤ੍ਵਾ ਉਦਕਂ ਆਸਿਞ੍ਚਿਤ੍ਵਾ ਕਿਤ੍ਤੇਤੁਂ ਵਟ੍ਟਤਿ. ਨਵਮੂਲਸਾਖਾਨਿਗ੍ਗਮਨਂ ਅਕਾਰਣਂ, ਖਨ੍ਧਂ ਛਿਨ੍ਦਿਤ੍ਵਾ ਰੋਪਿਤੇ ਪਨ ਏਤਂ ਯੁਜ੍ਜਤਿ. ਕਿਤ੍ਤੇਨ੍ਤੇਨ ਚ ‘‘ਰੁਕ੍ਖੋ’’ਤਿਪਿ ਵਤ੍ਤੁਂ ਵਟ੍ਟਤਿ ‘‘ਸਾਕਰੁਕ੍ਖੋ’’ਤਿਪਿ ‘‘ਸਾਲਰੁਕ੍ਖੋ’’ਤਿਪਿ. ਏਕਾਬਦ੍ਧਂ ਪਨ ਸੁਪ੍ਪਤਿਟ੍ਠਿਤਨਿਗ੍ਰੋਧਸਦਿਸਂ ਏਕਤ੍ਥ ਕਿਤ੍ਤੇਤ੍ਵਾ ਅਞ੍ਞਤ੍ਥ ਕਿਤ੍ਤੇਤੁਂ ਨ ਵਟ੍ਟਤਿ.

ਮਗ੍ਗਨਿਮਿਤ੍ਤੇ ਅਰਞ੍ਞਖੇਤ੍ਤਨਦੀਤਲ਼ਾਕਮਗ੍ਗਾਦਯੋ ਨ ਵਟ੍ਟਨ੍ਤਿ, ਜਙ੍ਘਮਗ੍ਗੋ ਵਾ ਸਕਟਮਗ੍ਗੋ ਵਾ ਵਟ੍ਟਤਿ. ਯੋ ਨਿਬ੍ਬਿਜ੍ਝਿਤ੍ਵਾ ਦ੍ਵੇ ਤੀਣਿ ਗਾਮਨ੍ਤਰਾਨਿ ਗਚ੍ਛਤਿ, ਯੋ ਪਨ ਜਙ੍ਘਮਗ੍ਗਸਕਟਮਗ੍ਗਤੋ ਓਕ੍ਕਮਿਤ੍ਵਾ ਪੁਨ ਸਕਟਮਗ੍ਗਮੇਵ ਓਤਰਤਿ, ਯੇ ਵਾ ਜਙ੍ਘਮਗ੍ਗਸਕਟਮਗ੍ਗਾ ਅਵਲ਼ਞ੍ਜਾ, ਤੇ ਨ ਵਟ੍ਟਨ੍ਤਿ, ਜਙ੍ਘਸਤ੍ਥਸਕਟਸਤ੍ਥੇਹਿ ਵਲ਼ਞ੍ਜਿਯਮਾਨਾਯੇਵ ਵਟ੍ਟਨ੍ਤਿ. ਸਚੇ ਦ੍ਵੇ ਮਗ੍ਗਾ ਨਿਕ੍ਖਮਿਤ੍ਵਾ ਪਚ੍ਛਾ ਸਕਟਧੁਰਮਿਵ ਏਕੀਭਵਨ੍ਤਿ, ਦ੍ਵੇਧਾ ਭਿਨ੍ਨਟ੍ਠਾਨੇ ਵਾ ਸਮ੍ਬਨ੍ਧਟ੍ਠਾਨੇ ਵਾ ਸਕਿਂ ਕਿਤ੍ਤੇਤ੍ਵਾ ਪੁਨ ਨ ਕਿਤ੍ਤੇਤਬ੍ਬਾ. ਏਕਾਬਦ੍ਧਨਿਮਿਤ੍ਤਞ੍ਹੇਤਂ ਹੋਤਿ. ਸਚੇ ਵਿਹਾਰਂ ਪਰਿਕ੍ਖਿਪਿਤ੍ਵਾ ਚਤ੍ਤਾਰੋ ਮਗ੍ਗਾ ਚਤੂਸੁ ਦਿਸਾਸੁ ਗਚ੍ਛਨ੍ਤਿ, ਮਜ੍ਝੇ ਏਕਂ ਕਿਤ੍ਤੇਤ੍ਵਾ ਅਪਰਂ ਕਿਤ੍ਤੇਤੁਂ ਨ ਵਟ੍ਟਤਿ. ਏਕਾਬਦ੍ਧਨਿਮਿਤ੍ਤਞ੍ਹੇਤਂ. ਕੋਣਂ ਨਿਬ੍ਬਿਜ੍ਝਿਤ੍ਵਾ ਗਤਂ ਪਨ ਪਰਭਾਗੇ ਕਿਤ੍ਤੇਤੁਂ ਵਟ੍ਟਤਿ. ਵਿਹਾਰਮਜ੍ਝੇਨ ਨਿਬ੍ਬਿਜ੍ਝਿਤ੍ਵਾ ਗਤਮਗ੍ਗੋ ਪਨ ਨ ਕਿਤ੍ਤੇਤਬ੍ਬੋ, ਕਿਤ੍ਤਿਤੇ ਨਿਮਿਤ੍ਤਸ੍ਸ ਉਪਰਿ ਵਿਹਾਰੋ ਹੋਤਿ. ਸਚੇ ਸਕਟਮਗ੍ਗਸ੍ਸ ਅਨ੍ਤਿਮਚਕ੍ਕਮਗ੍ਗਂ ਨਿਮਿਤ੍ਤਂ ਕਰੋਨ੍ਤਿ, ਮਗ੍ਗੋ ਬਹਿਸੀਮਾਯ ਹੋਤਿ, ਸਚੇ ਬਾਹਿਰਚਕ੍ਕਮਗ੍ਗਂ ਨਿਮਿਤ੍ਤਂ ਕਰੋਨ੍ਤਿ, ਬਾਹਿਰਚਕ੍ਕਮਗ੍ਗੋ ਬਹਿਸੀਮਾਯ ਹੋਤਿ, ਸੇਸਂ ਅਨ੍ਤੋਸੀਮਂ ਭਜਤਿ. ਮਗ੍ਗਂ ਕਿਤ੍ਤੇਨ੍ਤੇਨ ‘‘ਮਗ੍ਗੋ ਪਨ੍ਥੋ ਪਥੋ ਪਜ੍ਜੋ’’ਤਿਆਦੀਸੁ ਦਸਸੁ ਯੇਨ ਕੇਨਚਿ ਨਾਮੇਨ ਚ ਕਿਤ੍ਤੇਤੁਂ ਵਟ੍ਟਤਿ, ਪਰਿਖਾਸਣ੍ਠਾਨੇਨ ਵਿਹਾਰਂ ਪਰਿਕ੍ਖਿਪਿਤ੍ਵਾ ਗਤਮਗ੍ਗੋ ਏਕਤ੍ਥ ਕਿਤ੍ਤੇਤ੍ਵਾ ਅਞ੍ਞਤ੍ਥ ਕਿਤ੍ਤੇਤੁਂ ਨ ਵਟ੍ਟਤਿ.

ਵਮ੍ਮਿਕਨਿਮਿਤ੍ਤੇ ਹੇਟ੍ਠਿਮਪਰਿਚ੍ਛੇਦੇਨ ਤਂ ਦਿਵਸਂ ਜਾਤੋ ਅਟ੍ਠਙ੍ਗੁਲੁਬ੍ਬੇਧੋ ਗੋਵਿਸਾਣਪ੍ਪਮਾਣੋਪਿ ਵਮ੍ਮਿਕੋ ਵਟ੍ਟਤਿ, ਤਤੋ ਓਰਂ ਨ ਵਟ੍ਟਤਿ. ਪਰਂ ਹਿਮਵਨ੍ਤਪਬ੍ਬਤਸਦਿਸੋਪਿ ਵਟ੍ਟਤਿ, ਵਿਹਾਰਂ ਪਰਿਕ੍ਖਿਪਿਤ੍ਵਾ ਠਿਤਂ ਪਨ ਏਕਾਬਦ੍ਧਂ ਏਕਤ੍ਥ ਕਿਤ੍ਤੇਤ੍ਵਾ ਅਞ੍ਞਤ੍ਥ ਕਿਤ੍ਤੇਤੁਂ ਨ ਵਟ੍ਟਤਿ.

ਨਦੀਨਿਮਿਤ੍ਤੇ ਯਸ੍ਸਾ ਧਮ੍ਮਿਕਾਨਂ ਰਾਜੂਨਂ ਕਾਲੇ ਅਨ੍ਵਡ੍ਢਮਾਸਂ ਅਨੁਦਸਾਹਂ ਅਨੁਪਞ੍ਚਾਹਨ੍ਤਿ ਏਵਂ ਦੇਵੇ ਵਸ੍ਸਨ੍ਤੇ ਵਲਾਹਕੇਸੁ ਵਿਗਤਮਤ੍ਤੇਸੁ ਸੋਤਂ ਪਚ੍ਛਿਜ੍ਜਤਿ, ਅਯਂ ਨਦੀਸਙ੍ਖ੍ਯਂ ਨ ਗਚ੍ਛਤਿ. ਯਸ੍ਸਾ ਪਨ ਈਦਿਸੇ ਸੁਵੁਟ੍ਠਿਕਾਲੇ ਵਸ੍ਸਾਨਸ੍ਸ ਚਾਤੁਮਾਸੇ ਸੋਤਂ ਨ ਪਚ੍ਛਿਜ੍ਜਤਿ, ਯਤ੍ਥ ਤਿਤ੍ਥੇਨ ਵਾ ਅਤਿਤ੍ਥੇਨ ਵਾ ਸਿਕ੍ਖਾਕਰਣੀਯੇ ਆਗਤਲਕ੍ਖਣੇਨ ਤਿਮਣ੍ਡਲਂ ਪਟਿਚ੍ਛਾਦੇਤ੍ਵਾ ਅਨ੍ਤਰਵਾਸਕਂ ਅਨੁਕ੍ਖਿਪਿਤ੍ਵਾ ਉਤ੍ਤਰਨ੍ਤਿਯਾ ਭਿਕ੍ਖੁਨਿਯਾ ਏਕਙ੍ਗੁਲਦ੍ਵਙ੍ਗੁਲਮਤ੍ਤਮ੍ਪਿ ਅਨ੍ਤਰਵਾਸਕੋ ਤੇਮਿਯਤਿ, ਅਯਂ ਨਦੀ ਸੀਮਂ ਬਨ੍ਧਨ੍ਤਾਨਂ ਨਿਮਿਤ੍ਤਂ ਹੋਤਿ. ਭਿਕ੍ਖੁਨਿਯਾ ਨਦੀਪਾਰਗਮਨੇਪਿ ਉਪੋਸਥਾਦਿਸਙ੍ਘਕਮ੍ਮਕਰਣੇਪਿ ਨਦੀਪਾਰਸੀਮਾਸਮ੍ਮਨ੍ਨਨੇਪਿ ਅਯਮੇਵ ਨਦੀ. ਯਾ ਪਨ ਮਗ੍ਗੋ ਵਿਯ ਸਕਟਧੁਰਸਣ੍ਠਾਨੇਨ ਵਾ ਪਰਿਖਾਸਣ੍ਠਾਨੇਨ ਵਾ ਵਿਹਾਰਂ ਪਰਿਕ੍ਖਿਪਿਤ੍ਵਾ ਗਤਾ, ਤਂ ਏਕਤ੍ਥ ਕਿਤ੍ਤੇਤ੍ਵਾ ਅਞ੍ਞਤ੍ਥ ਕਿਤ੍ਤੇਤੁਂ ਨ ਵਟ੍ਟਤਿ. ਵਿਹਾਰਸ੍ਸ ਚਤੂਸੁ ਦਿਸਾਸੁ ਅਞ੍ਞਮਞ੍ਞਂ ਵਿਨਿਬ੍ਬਿਜ੍ਝਿਤ੍ਵਾ ਗਤੇ ਨਦੀਚਤੁਕ੍ਕੇਪਿ ਏਸੇਵ ਨਯੋ. ਅਸਮ੍ਮਿਸ੍ਸਾ ਨਦਿਯੋ ਪਨ ਚਤਸ੍ਸੋਪਿ ਕਿਤ੍ਤੇਤੁਂ ਵਟ੍ਟਤਿ. ਸਚੇ ਵਤਿਂ ਕਰੋਨ੍ਤੋ ਵਿਯ ਰੁਕ੍ਖਪਾਦੇ ਨਿਖਣਿਤ੍ਵਾ ਵਲ੍ਲਿਪਲਾਲਾਦੀਹਿ ਨਦੀਸੋਤਂ ਰੁਨ੍ਧਨ੍ਤਿ, ਉਦਕਂ ਅਜ੍ਝੋਤ੍ਥਰਿਤ੍ਵਾ ਆਵਰਣਂ ਪਵਤ੍ਤਤਿਯੇਵ, ਨਿਮਿਤ੍ਤਂ ਕਾਤੁਂ ਵਟ੍ਟਤਿ. ਯਥਾ ਪਨ ਉਦਕਂ ਨ ਪਵਤ੍ਤਤਿ, ਏਵਂ ਸੇਤੁਮ੍ਹਿ ਕਤੇ ਅਪਵਤ੍ਤਮਾਨਾ ਨਦੀਨਿਮਿਤ੍ਤਂ ਕਾਤੁਂ ਨ ਵਟ੍ਟਤਿ, ਪਵਤ੍ਤਨਟ੍ਠਾਨੇ ਨਦੀਨਿਮਿਤ੍ਤਂ, ਅਪ੍ਪਵਤ੍ਤਨਟ੍ਠਾਨੇ ਉਦਕਨਿਮਿਤ੍ਤਂ ਕਾਤੁਂ ਵਟ੍ਟਤਿ. ਯਾ ਪਨ ਦੁਬ੍ਬੁਟ੍ਠਿਕਾਲੇ ਵਾ ਗਿਮ੍ਹੇ ਵਾ ਨਿਰੁਦਕਭਾਵੇਨ ਨ ਪਵਤ੍ਤਤਿ, ਸਾ ਵਟ੍ਟਤਿ. ਮਹਾਨਦਿਤੋ ਉਦਕਮਾਤਿਕਂ ਨੀਹਰਨ੍ਤਿ, ਸਾ ਕੁਨ੍ਨਦੀਸਦਿਸਾ ਹੁਤ੍ਵਾ ਤੀਣਿ ਸਸ੍ਸਾਨਿ ਸਮ੍ਪਾਦੇਨ੍ਤੀ ਨਿਚ੍ਚਂ ਪਵਤ੍ਤਤਿ, ਕਿਞ੍ਚਾਪਿ ਪਵਤ੍ਤਤਿ, ਨਿਮਿਤ੍ਤਂ ਕਾਤੁਂ ਨ ਵਟ੍ਟਤਿ. ਯਾ ਪਨ ਮੂਲੇ ਮਹਾਨਦਿਤੋ ਨੀਹਤਾਪਿ ਕਾਲਨ੍ਤਰੇਨ ਤੇਨੇਵ ਨੀਹਤਮਗ੍ਗੇਨ ਨਦਿਂ ਭਿਨ੍ਦਿਤ੍ਵਾ ਸਯਂ ਗਚ੍ਛਤਿ, ਗਚ੍ਛਨ੍ਤੀ ਪਰਤੋ ਸੁਸੁਮਾਰਾਦਿਸਮਾਕਿਣ੍ਣਾ ਨਾਵਾਦੀਹਿ ਸਞ੍ਚਰਿਤਬ੍ਬਾ ਨਦੀ ਹੋਤਿ, ਤਂ ਨਿਮਿਤ੍ਤਂ ਕਾਤੁਂ ਵਟ੍ਟਤਿ.

ਉਦਕਨਿਮਿਤ੍ਤੇ ਨਿਰੁਦਕਟ੍ਠਾਨੇ ਨਾਵਾਯ ਵਾ ਚਾਟਿਆਦੀਸੁ ਵਾ ਉਦਕਂ ਪੂਰੇਤ੍ਵਾ ਉਦਕਨਿਮਿਤ੍ਤਂ ਕਿਤ੍ਤੇਤੁਂ ਨ ਵਟ੍ਟਤਿ, ਭੂਮਿਗਤਮੇਵ ਵਟ੍ਟਤਿ. ਤਞ੍ਚ ਖੋ ਅਪ੍ਪਵਤ੍ਤਨਉਦਕਂ ਆਵਾਟਪੋਕ੍ਖਰਣੀਤਲ਼ਆਕਜਾਤਸ੍ਸਰਲੋਣਿਸਮੁਦ੍ਦਾਦੀਸੁ ਠਿਤਂ, ਅਟ੍ਠਿਤਂ ਪਨ ਓਘਨਦੀਉਦਕਵਾਹਕਮਾਤਿਕਾਦੀਸੁ ਉਦਕਂ ਨ ਵਟ੍ਟਤਿ. ਅਨ੍ਧਕਟ੍ਠਕਥਾਯਂ ਪਨ ‘‘ਗਮ੍ਭੀਰੇਸੁ ਆਵਾਟਾਦੀਸੁ ਉਕ੍ਖੇਪਿਮਂ ਉਦਕਂ ਨਿਮਿਤ੍ਤਂ ਨ ਕਾਤਬ੍ਬ’’ਨ੍ਤਿ ਵੁਤ੍ਤਂ, ਤਂ ਦੁਵੁਤ੍ਤਂ, ਅਤ੍ਤਨੋਮਤਿਮਤ੍ਤਮੇਵ. ਠਿਤਂ ਪਨ ਅਨ੍ਤਮਸੋ ਸੂਕਰਖਤਾਯਪਿ ਗਾਮਦਾਰਕਾਨਂ ਕੀਲ਼ਨਵਾਪਿਯਮ੍ਪਿ ਤਂ ਖਣਞ੍ਞੇਵ ਪਥਵਿਯਂ ਆਵਾਟਂ ਕਤ੍ਵਾ ਕੁਟੇਹਿ ਆਹਰਿਤ੍ਵਾ ਪੂਰਿਤਉਦਕਮ੍ਪਿ ਸਚੇ ਯਾਵ ਕਮ੍ਮਵਾਚਾਪਰਿਯੋਸਾਨਾ ਤਿਟ੍ਠਤਿ, ਅਪ੍ਪਂ ਵਾ ਹੋਤੁ ਬਹੁਂ ਵਾ, ਵਟ੍ਟਤਿ. ਤਸ੍ਮਿਂ ਪਨ ਠਾਨੇ ਨਿਮਿਤ੍ਤਸਞ੍ਞਾਕਰਣਤ੍ਥਂ ਪਾਸਾਣਵਾਲਿਕਾਪਂਸੁਆਦਿਰਾਸਿ ਵਾ ਪਾਸਾਣਤ੍ਥਮ੍ਭੋ ਵਾ ਦਾਰੁਤ੍ਥਮ੍ਭੋ ਵਾ ਕਾਤਬ੍ਬੋ. ਤਂ ਕਾਤੁਂ ਕਾਰੇਤੁਞ੍ਚ ਭਿਕ੍ਖੁਸ੍ਸ ਵਟ੍ਟਤਿ, ਲਾਭਸੀਮਾਯਂ ਪਨ ਨ ਵਟ੍ਟਤਿ. ਸਮਾਨਸਂਵਾਸਕਸੀਮਾ ਕਸ੍ਸਚਿ ਪੀਲ਼ਨਂ ਨ ਕਰੋਤਿ, ਕੇਵਲਂ ਭਿਕ੍ਖੂਨਂ ਵਿਨਯਕਮ੍ਮਮੇਵ ਸਾਧੇਤਿ, ਤਸ੍ਮਾ ਏਤ੍ਥ ਵਟ੍ਟਤਿ.

ਇਮੇਹਿ ਚ ਅਟ੍ਠਹਿ ਨਿਮਿਤ੍ਤੇਹਿ ਅਸਮ੍ਮਿਸ੍ਸੇਹਿਪਿ ਅਞ੍ਞਮਞ੍ਞਂ ਸਮ੍ਮਿਸ੍ਸੇਹਿਪਿ ਸੀਮਾ ਸਮ੍ਮਨ੍ਨਿਤੁਂ ਵਟ੍ਟਤਿਯੇਵ. ਸਾ ਏਵਂ ਸਮ੍ਮਨ੍ਨਿਤ੍ਵਾ ਬਜ੍ਝਮਾਨਾ ਏਕੇਨ ਦ੍ਵੀਹਿ ਵਾ ਨਿਮਿਤ੍ਤੇਹਿ ਅਬਦ੍ਧਾ ਹੋਤਿ, ਤੀਣਿ ਪਨ ਆਦਿਂ ਕਤ੍ਵਾ ਵੁਤ੍ਤਪ੍ਪਕਾਰਾਨਂ ਨਿਮਿਤ੍ਤਾਨਂ ਸਤੇਨਪਿ ਬਦ੍ਧਾ ਹੋਤਿ. ਸਾ ਤੀਹਿ ਸਿਙ੍ਘਾਟਕਸਣ੍ਠਾਨਾ ਹੋਤਿ, ਚਤੂਹਿ ਚਤੁਰਸ੍ਸਾ ਵਾ ਸਿਙ੍ਘਾਟਕਅਡ੍ਢਚਨ੍ਦਮੁਦਿਙ੍ਗਾਦਿਸਣ੍ਠਾਨਾ ਵਾ, ਤਤੋ ਅਧਿਕੇਹਿ ਨਾਨਾਸਣ੍ਠਾਨਾ. ਏਵਂ ਵੁਤ੍ਤਨਯੇਨ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਸਮ੍ਮਤਾ ‘‘ਨਿਮਿਤ੍ਤਸਮ੍ਪਤ੍ਤਿਯੁਤ੍ਤਾ’’ਤਿ ਵੇਦਿਤਬ੍ਬਾ.

੧੫੯. ਪਰਿਸਸਮ੍ਪਤ੍ਤਿਯੁਤ੍ਤਾ ਨਾਮ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਚਤੂਹਿ ਭਿਕ੍ਖੂਹਿ ਸਨ੍ਨਿਪਤਿਤ੍ਵਾ ਯਾਵਤਿਕਾ ਤਸ੍ਮਿਂ ਗਾਮਖੇਤ੍ਤੇ ਬਦ੍ਧਸੀਮਂ ਵਾ ਨਦੀਸਮੁਦ੍ਦਜਾਤਸ੍ਸਰੇ ਵਾ ਅਨੋਕ੍ਕਮਿਤ੍ਵਾ ਠਿਤਾ ਭਿਕ੍ਖੂ, ਤੇ ਸਬ੍ਬੇ ਹਤ੍ਥਪਾਸੇ ਵਾ ਕਤ੍ਵਾ ਛਨ੍ਦਂ ਵਾ ਆਹਰਿਤ੍ਵਾ ਸਮ੍ਮਤਾ.

੧੬੦. ਕਮ੍ਮਵਾਚਾਸਮ੍ਪਤ੍ਤਿਯੁਤ੍ਤਾ ਨਾਮ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਯਾਵਤਾ ਸਮਨ੍ਤਾ ਨਿਮਿਤ੍ਤਾ ਕਿਤ੍ਤਿਤਾ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਏਤੇਹਿ ਨਿਮਿਤ੍ਤੇਹਿ ਸੀਮਂ ਸਮ੍ਮਨ੍ਨੇਯ੍ਯ ਸਮਾਨਸਂਵਾਸਂ ਏਕੂਪੋਸਥਂ, ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਯਾਵਤਾ ਸਮਨ੍ਤਾ ਨਿਮਿਤ੍ਤਾ ਕਿਤ੍ਤਿਤਾ, ਸਙ੍ਘੋ ਏਤੇਹਿ ਨਿਮਿਤ੍ਤੇਹਿ ਸੀਮਂ ਸਮ੍ਮਨ੍ਨਤਿ ਸਮਾਨਸਂਵਾਸਂ ਏਕੂਪੋਸਥਂ, ਯਸ੍ਸਾਯਸ੍ਮਤੋ ਖਮਤਿ ਏਤੇਹਿ ਨਿਮਿਤ੍ਤੇਹਿ ਸੀਮਾਯ ਸਮ੍ਮੁਤਿ ਸਮਾਨਸਂਵਾਸਾਯ ਏਕੂਪੋਸਥਾਯ, ਸੋ ਤੁਣ੍ਹਸ੍ਸ. ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮ੍ਮਤਾ ਸੀਮਾ ਸਙ੍ਘੇਨ ਏਤੇਹਿ ਨਿਮਿਤ੍ਤੇਹਿ ਸਮਾਨਸਂਵਾਸਾ ਏਕੂਪੋਸਥਾ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਮਹਾਵ. ੧੩੯) –

ਏਵਂ ਵੁਤ੍ਤਾਯ ਪਰਿਸੁਦ੍ਧਾਯ ਞਤ੍ਤਿਦੁਤਿਯਕਮ੍ਮਵਾਚਾਯ ਸਮ੍ਮਤਾ. ਕਮ੍ਮਵਾਚਾਪਰਿਯੋਸਾਨੇ ਨਿਮਿਤ੍ਤਾਨਂ ਅਨ੍ਤੋ ਸੀਮਾ ਹੋਤਿ, ਨਿਮਿਤ੍ਤਾਨਿ ਸੀਮਤੋ ਬਹਿ ਹੋਨ੍ਤਿ.

੧੬੧. ਏਵਂ ਬਦ੍ਧਾਯ ਚ ਸੀਮਾਯ ਤਿਚੀਵਰੇਨ ਵਿਪ੍ਪਵਾਸਸੁਖਤ੍ਥਂ ਦਲ਼੍ਹੀਕਮ੍ਮਤ੍ਥਞ੍ਚ ਅਵਿਪ੍ਪਵਾਸਸਮ੍ਮੁਤਿ ਕਾਤਬ੍ਬਾ. ਸਾ ਪਨ ਏਵਂ ਕਤ੍ਤਬ੍ਬਾ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਯਾ ਸਾ ਸਙ੍ਘੇਨ ਸੀਮਾ ਸਮ੍ਮਤਾ ਸਮਾਨਸਂਵਾਸਾ ਏਕੂਪੋਸਥਾ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਤਂ ਸੀਮਂ ਤਿਚੀਵਰੇਨ ਅਵਿਪ੍ਪਵਾਸਂ ਸਮ੍ਮਨ੍ਨੇਯ੍ਯ ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚ, ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਯਾ ਸਾ ਸਙ੍ਘੇਨ ਸੀਮਾ ਸਮ੍ਮਤਾ ਸਮਾਨਸਂਵਾਸਾ ਏਕੂਪੋਸਥਾ, ਸਙ੍ਘੋ ਤਂ ਸੀਮਂ ਤਿਚੀਵਰੇਨ ਅਵਿਪ੍ਪਵਾਸਂ ਸਮ੍ਮਨ੍ਨਤਿ ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚ, ਯਸ੍ਸਾਯਸ੍ਮਤੋ ਖਮਤਿ ਏਤਿਸ੍ਸਾ ਸੀਮਾਯ ਤਿਚੀਵਰੇਨ ਅਵਿਪ੍ਪਵਾਸਾਯ ਸਮ੍ਮੁਤਿ ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚ, ਸੋ ਤੁਣ੍ਹਸ੍ਸ. ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮ੍ਮਤਾ ਸਾ ਸੀਮਾ ਸਙ੍ਘੇਨ ਤਿਚੀਵਰੇਨ ਅਵਿਪ੍ਪਵਾਸਾ ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਮਹਾਵ. ੧੪੩).

ਏਤ੍ਥ (ਮਹਾਵ. ਅਟ੍ਠ. ੧੪੪) ਚ ਨਿਗਮਨਗਰਾਨਮ੍ਪਿ ਗਾਮੇਨੇਵ ਸਙ੍ਗਹੋ ਵੇਦਿਤਬ੍ਬੋ. ਗਾਮੂਪਚਾਰੋਤਿ ਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪੋ, ਅਪਰਿਕ੍ਖਿਤ੍ਤਸ੍ਸ ਪਰਿਕ੍ਖੇਪੋਕਾਸੋ. ਇਮੇਸੁ ਪਨ ਗਾਮਗਾਮੂਪਚਾਰੇਸੁ ਅਧਿਟ੍ਠਿਤਤੇਚੀਵਰਿਕੋ ਭਿਕ੍ਖੁ ਪਰਿਹਾਰਂ ਨ ਲਭਤਿ. ਅਯਞ੍ਹਿ ਅਵਿਪ੍ਪਵਾਸਸੀਮਾ ‘‘ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚਾ’’ਤਿ ਵੁਤ੍ਤਤ੍ਤਾ ਗਾਮਞ੍ਚ ਗਾਮੂਪਚਾਰਞ੍ਚ ਨ ਓਤ੍ਥਰਤਿ, ਸਮਾਨਸਂਵਾਸਕਸੀਮਾਵ ਓਤ੍ਥਰਤਿ. ਸਮਾਨਸਂਵਾਸਕਸੀਮਾ ਚੇਤ੍ਥ ਅਤ੍ਤਨੋ ਧਮ੍ਮਤਾਯ ਗਚ੍ਛਤਿ, ਅਵਿਪ੍ਪਵਾਸਸੀਮਾ ਪਨ ਯਤ੍ਥ ਸਮਾਨਸਂਵਾਸਕਸੀਮਾ, ਤਤ੍ਥੇਵ ਗਚ੍ਛਤਿ. ਨ ਹਿ ਤਸ੍ਸਾ ਵਿਸੁਂ ਨਿਮਿਤ੍ਤਕਿਤ੍ਤਨਂ ਅਤ੍ਥਿ, ਤਤ੍ਥ ਸਚੇ ਅਵਿਪ੍ਪਵਾਸਾਯ ਸਮ੍ਮੁਤਿਕਾਲੇ ਗਾਮੋ ਅਤ੍ਥਿ, ਤਂ ਸਾ ਨ ਓਤ੍ਥਰਤਿ. ਸਚੇ ਪਨ ਸਮ੍ਮਤਾਯ ਸੀਮਾਯ ਪਚ੍ਛਾ ਗਾਮੋ ਨਿਵਿਸਤਿ, ਸੋਪਿ ਸੀਮਸਙ੍ਖ੍ਯਂਯੇਵ ਗਚ੍ਛਤਿ. ਯਥਾ ਚ ਪਚ੍ਛਾ ਨਿਵਿਟ੍ਠੋ, ਏਵਂ ਪਠਮਂ ਨਿਵਿਟ੍ਠਸ੍ਸ ਪਚ੍ਛਾ ਵਡ੍ਢਿਤਪ੍ਪਦੇਸੋਪਿ ਸੀਮਸਙ੍ਖ੍ਯਮੇਵ ਗਚ੍ਛਤਿ. ਸਚੇ ਸੀਮਾਸਮ੍ਮੁਤਿਕਾਲੇ ਗੇਹਾਨਿ ਕਤਾਨਿ, ‘‘ਪਵਿਸਿਸ੍ਸਾਮਾ’’ਤਿ ਆਲਯੋਪਿ ਅਤ੍ਥਿ, ਮਨੁਸ੍ਸਾ ਪਨ ਅਪ੍ਪਵਿਟ੍ਠਾ, ਪੋਰਾਣਕਗਾਮਂ ਵਾ ਸਚੇ ਗੇਹਮੇਵ ਛਡ੍ਡੇਤ੍ਵਾ ਅਞ੍ਞਤ੍ਥ ਗਤਾ, ਅਗਾਮੋਯੇਵ ਏਸ, ਸੀਮਾ ਓਤ੍ਥਰਤਿ. ਸਚੇ ਪਨ ਏਕਮ੍ਪਿ ਕੁਲਂ ਪਵਿਟ੍ਠਂ ਵਾ ਅਗਤਂ ਵਾ ਅਤ੍ਥਿ, ਗਾਮੋਯੇਵ, ਸੀਮਾ ਨ ਓਤ੍ਥਰਤਿ. ਅਯਮੇਤ੍ਥ ਸਙ੍ਖੇਪੋ.

੧੬੨. ਅਯਂ ਪਨ ਵਿਤ੍ਥਾਰੋ (ਮਹਾਵ. ਅਟ੍ਠ. ੧੩੮) ਸੀਮਂ ਬਨ੍ਧਿਤੁਕਾਮੇਨ ਹਿ ਸਾਮਨ੍ਤਵਿਹਾਰੇਸੁ ਭਿਕ੍ਖੂ ਤਸ੍ਸ ਤਸ੍ਸ ਵਿਹਾਰਸ੍ਸ ਸੀਮਾਪਰਿਚ੍ਛੇਦਂ ਪੁਚ੍ਛਿਤ੍ਵਾ ਬਦ੍ਧਸੀਮਵਿਹਾਰਾਨਂ ਸੀਮਾਯ ਸੀਮਨ੍ਤਰਿਕਂ, ਅਬਦ੍ਧਸੀਮਵਿਹਾਰਾਨਂ ਸੀਮਾਯ ਉਪਚਾਰਂ ਠਪੇਤ੍ਵਾ ਦਿਸਾਚਾਰਿਕਭਿਕ੍ਖੂਨਂ ਨਿਸ੍ਸਞ੍ਚਾਰਸਮਯੇ ਸਚੇ ਏਕਸ੍ਮਿਂ ਗਾਮਖੇਤ੍ਤੇ ਸੀਮਂ ਬਨ੍ਧਿਤੁਕਾਮਾ, ਯੇ ਤਤ੍ਥ ਬਦ੍ਧਸੀਮਵਿਹਾਰਾ, ਤੇਸੁ ਭਿਕ੍ਖੂਨਂ ‘‘ਮਯਂ ਅਜ੍ਜ ਸੀਮਂ ਬਨ੍ਧਿਸ੍ਸਾਮ, ਤੁਮ੍ਹੇ ਸਕਸੀਮਾਯ ਪਰਿਚ੍ਛੇਦਤੋ ਮਾ ਨਿਕ੍ਖਮਿਤ੍ਥਾ’’ਤਿ ਪੇਸੇਤਬ੍ਬਂ. ਯੇ ਅਬਦ੍ਧਸੀਮਵਿਹਾਰਾ, ਤੇਸੁ ਭਿਕ੍ਖੂ ਏਕਜ੍ਝਂ ਸਨ੍ਨਿਪਾਤੇਤਬ੍ਬਾ, ਛਨ੍ਦਾਰਹਾਨਂ ਛਨ੍ਦੋ ਆਹਰਾਪੇਤਬ੍ਬੋ. ‘‘ਸਚੇ ਅਞ੍ਞਾਨਿਪਿ ਗਾਮਖੇਤ੍ਤਾਨਿ ਅਨ੍ਤੋਕਾਤੁਕਾਮਾ, ਤੇਸੁ ਗਾਮੇਸੁ ਯੇ ਭਿਕ੍ਖੂ ਵਸਨ੍ਤਿ, ਤੇਹਿਪਿ ਆਗਨ੍ਤਬ੍ਬਂ, ਅਨਾਗਚ੍ਛਨ੍ਤਾਨਂ ਛਨ੍ਦੋ ਆਹਰਿਤਬ੍ਬੋ’’ਤਿ ਮਹਾਸੁਮਤ੍ਥੇਰੋ ਆਹ. ਮਹਾਪਦੁਮਤ੍ਥੇਰੋ ਪਨ ‘‘ਨਾਨਾਗਾਮਖੇਤ੍ਤਾਨਿ ਨਾਮ ਪਾਟਿਯੇਕ੍ਕਂ ਬਦ੍ਧਸੀਮਸਦਿਸਾਨਿ, ਨ ਤਤੋ ਛਨ੍ਦਪਾਰਿਸੁਦ੍ਧਿ ਆਗਚ੍ਛਤਿ, ਅਨ੍ਤੋਨਿਮਿਤ੍ਤਗਤੇਹਿ ਪਨ ਭਿਕ੍ਖੂਹਿ ਆਗਨ੍ਤਬ੍ਬ’’ਨ੍ਤਿ ਵਤ੍ਵਾ ਪੁਨ ਆਹ ‘‘ਸਮਾਨਸਂਵਾਸਕਸੀਮਾਸਮ੍ਮਨ੍ਨਨਕਾਲੇ ਆਗਮਨਮ੍ਪਿ ਅਨਾਗਮਨਮ੍ਪਿ ਵਟ੍ਟਤਿ, ਅਵਿਪ੍ਪਵਾਸਸੀਮਾਸਮ੍ਮਨ੍ਨਨਕਾਲੇ ਪਨ ਅਨ੍ਤੋਨਿਮਿਤ੍ਤਗਤੇਹਿ ਆਗਨ੍ਤਬ੍ਬਂ, ਅਨਾਗਚ੍ਛਨ੍ਤਾਨਂ ਛਨ੍ਦੋ ਆਹਰਿਤਬ੍ਬੋ’’ਤਿ.

ਏਵਂ ਸਨ੍ਨਿਪਤਿਤੇਸੁ ਭਿਕ੍ਖੂਸੁ ਛਨ੍ਦਾਰਹਾਨਂ ਛਨ੍ਦੇ ਆਹਟੇ ਤੇਸੁ ਤੇਸੁ ਮਗ੍ਗੇਸੁ ਨਦੀਤਿਤ੍ਥਗਾਮਦ੍ਵਾਰਾਦੀਸੁ ਚ ਆਗਨ੍ਤੁਕਭਿਕ੍ਖੂਨਂ ਸੀਘਂ ਸੀਘਂ ਹਤ੍ਥਪਾਸਨਯਨਤ੍ਥਞ੍ਚੇਵ ਬਹਿਸੀਮਕਰਣਤ੍ਥਞ੍ਚ ਆਰਾਮਿਕੇ ਚੇਵ ਸਮਣੁਦ੍ਦੇਸੇ ਚ ਠਪੇਤ੍ਵਾ ਭੇਰਿਸਞ੍ਞਂ ਵਾ ਸਙ੍ਖਸਞ੍ਞਂ ਵਾ ਕਤ੍ਵਾ ਨਿਮਿਤ੍ਤਕਿਤ੍ਤਨਾਨਨ੍ਤਰਂ ਵੁਤ੍ਤਾਯ ‘‘ਸੁਣਾਤੁ ਮੇ ਭਨ੍ਤੇ ਸਙ੍ਘੋ’’ਤਿਆਦਿਕਾਯ ਕਮ੍ਮਵਾਚਾਯ ਸੀਮਾ ਬਨ੍ਧਿਤਬ੍ਬਾ. ਕਮ੍ਮਵਾਚਾਪਰਿਯੋਸਾਨੇਯੇਵ ਨਿਮਿਤ੍ਤਾਨਿ ਬਹਿਕਤ੍ਵਾ ਹੇਟ੍ਠਾ ਪਥਵੀਸਨ੍ਧਾਰਕਂ ਉਦਕਪਰਿਯਨ੍ਤਂ ਕਤ੍ਵਾ ਸੀਮਾ ਗਤਾ ਹੋਤਿ.

੧੬੩. ਇਮਂ ਪਨ ਸਮਾਨਸਂਵਾਸਕਸੀਮਂ ਸਮ੍ਮਨ੍ਨਨ੍ਤੇਹਿ ਪਬ੍ਬਜ੍ਜੂਪਸਮ੍ਪਦਾਦੀਨਂ ਸਙ੍ਘਕਮ੍ਮਾਨਂ ਸੁਖਕਰਣਤ੍ਥਂ ਪਠਮਂ ਖਣ੍ਡਸੀਮਾ ਬਨ੍ਧਿਤਬ੍ਬਾ. ਤਂ ਪਨ ਬਨ੍ਧਨ੍ਤੇਹਿ ਵਤ੍ਤਂ ਜਾਨਿਤਬ੍ਬਂ. ਸਚੇ ਹਿ ਬੋਧਿਚੇਤਿਯਭਤ੍ਤਸਾਲਾਦੀਨਿ ਸਬ੍ਬਵਤ੍ਥੂਨਿ ਪਤਿਟ੍ਠਾਪੇਤ੍ਵਾ ਕਤਵਿਹਾਰੇ ਬਨ੍ਧਨ੍ਤਿ, ਵਿਹਾਰਮਜ੍ਝੇ ਬਹੂਨਂ ਸਮੋਸਰਣਟ੍ਠਾਨੇ ਅਬਨ੍ਧਿਤ੍ਵਾ ਵਿਹਾਰਪਚ੍ਚਨ੍ਤੇ ਵਿਵਿਤ੍ਤੋਕਾਸੇ ਬਨ੍ਧਿਤਬ੍ਬਾ. ਅਕਤਵਿਹਾਰੇ ਬਨ੍ਧਨ੍ਤੇਹਿ ਬੋਧਿਚੇਤਿਯਾਦੀਨਂ ਸਬ੍ਬਵਤ੍ਥੂਨਂ ਠਾਨਂ ਸਲ੍ਲਕ੍ਖੇਤ੍ਵਾ ਯਥਾ ਪਤਿਟ੍ਠਿਤੇਸੁ ਵਤ੍ਥੂਸੁ ਵਿਹਾਰਪਚ੍ਚਨ੍ਤੇ ਵਿਵਿਤ੍ਤੋਕਾਸੇ ਹੋਤਿ, ਏਵਂ ਬਨ੍ਧਿਤਬ੍ਬਾ. ਸਾ ਹੇਟ੍ਠਿਮਪਰਿਚ੍ਛੇਦੇਨ ਸਚੇ ਏਕਵੀਸਤਿ ਭਿਕ੍ਖੂ ਗਣ੍ਹਾਤਿ, ਵਟ੍ਟਤਿ, ਤਤੋ ਓਰਂ ਨ ਵਟ੍ਟਤਿ, ਪਰਂ ਭਿਕ੍ਖੁਸਹਸ੍ਸਂ ਗਣ੍ਹਨ੍ਤੀਪਿ ਵਟ੍ਟਤਿ. ਤਂ ਬਨ੍ਧਨ੍ਤੇਹਿ ਸੀਮਮਾਲ਼ਕਸ੍ਸ ਸਮਨ੍ਤਾ ਨਿਮਿਤ੍ਤੁਪਗਾ ਪਾਸਾਣਾ ਠਪੇਤਬ੍ਬਾ, ਨ ਖਣ੍ਡਸੀਮਾਯ ਠਿਤੇਹਿ ਮਹਾਸੀਮਾ ਬਨ੍ਧਿਤਬ੍ਬਾ, ਨ ਮਹਾਸੀਮਾਯ ਠਿਤੇਹਿ ਖਣ੍ਡਸੀਮਾ, ਖਣ੍ਡਸੀਮਾਯਮੇਵ ਪਨ ਠਤ੍ਵਾ ਖਣ੍ਡਸੀਮਾ ਬਨ੍ਧਿਤਬ੍ਬਾ.

ਤਤ੍ਰਾਯਂ ਬਨ੍ਧਨਵਿਧਿ – ਸਮਨ੍ਤਾ ‘‘ਏਸੋ ਪਾਸਾਣੋ ਨਿਮਿਤ੍ਤ’’ਨ੍ਤਿ ਏਵਂ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਕਮ੍ਮਵਾਚਾਯ ਸੀਮਾ ਸਮ੍ਮਨ੍ਨਿਤਬ੍ਬਾ. ਅਥ ਤਸ੍ਸਾ ਏਵ ਦਲ਼੍ਹੀਕਮ੍ਮਤ੍ਥਂ ਅਵਿਪ੍ਪਵਾਸਕਮ੍ਮਵਾਚਾ ਕਾਤਬ੍ਬਾ. ਏਵਞ੍ਹਿ ‘‘ਸੀਮਂ ਸਮੂਹਨਿਸ੍ਸਾਮਾ’’ਤਿ ਆਗਤਾ ਸਮੂਹਨਿਤੁਂ ਨ ਸਕ੍ਖਿਸ੍ਸਨ੍ਤਿ. ਸੀਮਂ ਸਮ੍ਮਨ੍ਨਿਤ੍ਵਾ ਬਹਿ ਸੀਮਨ੍ਤਰਿਕਪਾਸਾਣਾ ਠਪੇਤਬ੍ਬਾ. ਸੀਮਨ੍ਤਰਿਕਾ ਪਚ੍ਛਿਮਕੋਟਿਯਾ ਏਕਰਤਨਪ੍ਪਮਾਣਾ ਵਟ੍ਟਤਿ. ‘‘ਵਿਦਤ੍ਥਿਪ੍ਪਮਾਣਾਪਿ ਵਟ੍ਟਤੀ’’ਤਿ ਕੁਰੁਨ੍ਦਿਯਂ, ‘‘ਚਤੁਰਙ੍ਗੁਲਪ੍ਪਮਾਣਾਪਿ ਵਟ੍ਟਤੀ’’ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਸਚੇ ਪਨ ਵਿਹਾਰੋ ਮਹਾ ਹੋਤਿ, ਦ੍ਵੇਪਿ ਤਿਸ੍ਸੋਪਿ ਤਤੁਤ੍ਤਰਿਮ੍ਪਿ ਖਣ੍ਡਸੀਮਾਯੋ ਬਨ੍ਧਿਤਬ੍ਬਾ.

ਏਵਂ ਖਣ੍ਡਸੀਮਂ ਸਮ੍ਮਨ੍ਨਿਤ੍ਵਾ ਮਹਾਸੀਮਸਮ੍ਮੁਤਿਕਾਲੇ ਖਣ੍ਡਸੀਮਤੋ ਨਿਕ੍ਖਮਿਤ੍ਵਾ ਮਹਾਸੀਮਾਯਂ ਠਤ੍ਵਾ ਸਮਨ੍ਤਾ ਅਨੁਪਰਿਯਾਯਨ੍ਤੇਹਿ ਸੀਮਨ੍ਤਰਿਕਪਾਸਾਣਾ ਕਿਤ੍ਤੇਤਬ੍ਬਾ, ਤਤੋ ਅਵਸੇਸਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਹਤ੍ਥਪਾਸਂ ਅਵਿਜਹਨ੍ਤੇਹਿ ਕਮ੍ਮਵਾਚਾਯ ਸਮਾਨਸਂਵਾਸਕਸੀਮਂ ਸਮ੍ਮਨ੍ਨਿਤ੍ਵਾ ਤਸ੍ਸਾ ਦਲ਼੍ਹੀਕਮ੍ਮਤ੍ਥਂ ਅਵਿਪ੍ਪਵਾਸਕਮ੍ਮਵਾਚਾਪਿ ਕਾਤਬ੍ਬਾ. ਏਵਞ੍ਹਿ ‘‘ਸੀਮਂ ਸਮੂਹਨਿਸ੍ਸਾਮਾ’’ਤਿ ਆਗਤਾ ਸਮੂਹਨਿਤੁਂ ਨ ਸਕ੍ਖਿਸ੍ਸਨ੍ਤਿ. ਸਚੇ ਪਨ ਖਣ੍ਡਸੀਮਾਯ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਤਤੋ ਸੀਮਨ੍ਤਰਿਕਾਯ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਮਹਾਸੀਮਾਯ ਨਿਮਿਤ੍ਤਾਨਿ ਕਿਤ੍ਤੇਨ੍ਤਿ, ਏਵਂ ਤੀਸੁ ਠਾਨੇਸੁ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਯਂ ਸੀਮਂ ਇਚ੍ਛਨ੍ਤਿ, ਤਂ ਪਠਮਂ ਬਨ੍ਧਿਤੁਂ ਵਟ੍ਟਤਿ. ਏਵਂ ਸਨ੍ਤੇਪਿ ਯਥਾਵੁਤ੍ਤਨਯੇਨ ਖਣ੍ਡਸੀਮਤੋਵ ਪਟ੍ਠਾਯ ਬਨ੍ਧਿਤਬ੍ਬਾ. ਏਵਂ ਬਦ੍ਧਾਸੁ ਪਨ ਸੀਮਾਸੁ ਖਣ੍ਡਸੀਮਾਯ ਠਿਤਾ ਭਿਕ੍ਖੂ ਮਹਾਸੀਮਾਯ ਕਮ੍ਮਂ ਕਰੋਨ੍ਤਾਨਂ ਨ ਕੋਪੇਨ੍ਤਿ, ਮਹਾਸੀਮਾਯ ਵਾ ਠਿਤਾ ਖਣ੍ਡਸੀਮਾਯ ਕਰੋਨ੍ਤਾਨਂ, ਸੀਮਨ੍ਤਰਿਕਾਯ ਪਨ ਠਿਤਾ ਉਭਿਨ੍ਨਮ੍ਪਿ ਨ ਕੋਪੇਨ੍ਤਿ. ਗਾਮਖੇਤ੍ਤੇ ਠਤ੍ਵਾ ਕਮ੍ਮਂ ਕਰੋਨ੍ਤਾਨਂ ਪਨ ਸੀਮਨ੍ਤਰਿਕਾਯ ਠਿਤਾ ਕੋਪੇਨ੍ਤਿ. ਸੀਮਨ੍ਤਰਿਕਾ ਹਿ ਗਾਮਖੇਤ੍ਤਂ ਭਜਤਿ.

ਸੀਮਾ ਚ ਨਾਮੇਸਾ ਨ ਕੇਵਲਾ ਪਥਵੀਤਲੇਯੇਵ ਬਦ੍ਧਾ ਬਦ੍ਧਾ ਨਾਮ ਹੋਤਿ, ਅਥ ਖੋ ਪਿਟ੍ਠਿਪਾਸਾਣੇਪਿ ਕੁਟਿਗੇਹੇਪਿ ਲੇਣੇਪਿ ਪਾਸਾਦੇਪਿ ਪਬ੍ਬਤਮਤ੍ਥਕੇਪਿ ਬਦ੍ਧਾ ਬਦ੍ਧਾਯੇਵ ਹੋਤਿ. ਤਤ੍ਥ ਪਿਟ੍ਠਿਪਾਸਾਣੇ ਬਨ੍ਧਨ੍ਤੇਹਿ ਪਾਸਾਣਪਿਟ੍ਠਿਯਂ ਰਾਜਿਂ ਵਾ ਕੋਟ੍ਟੇਤ੍ਵਾ ਉਦੁਕ੍ਖਲਂ ਵਾ ਖਣਿਤ੍ਵਾ ਨਿਮਿਤ੍ਤਂ ਨ ਕਾਤਬ੍ਬਂ, ਨਿਮਿਤ੍ਤੁਪਗਪਾਸਾਣੇ ਠਪੇਤ੍ਵਾ ਨਿਮਿਤ੍ਤਾਨਿ ਕਿਤ੍ਤੇਤਬ੍ਬਾਨਿ. ਕਮ੍ਮਵਾਚਾਪਰਿਯੋਸਾਨੇ ਸੀਮਾ ਪਥਵੀਸਨ੍ਧਾਰਕਂ ਉਦਕਪਰਿਯਨ੍ਤਂ ਕਤ੍ਵਾ ਓਤਰਤਿ. ਨਿਮਿਤ੍ਤਪਾਸਾਣਾ ਯਥਾਠਾਨੇ ਨ ਤਿਟ੍ਠਨ੍ਤਿ, ਤਸ੍ਮਾ ਸਮਨ੍ਤਤੋ ਰਾਜਿ ਵਾ ਉਪਟ੍ਠਾਪੇਤਬ੍ਬਾ, ਚਤੂਸੁ ਵਾ ਕੋਣੇਸੁ ਪਾਸਾਣਾ ਵਿਜ੍ਝਿਤਬ੍ਬਾ, ‘‘ਅਯਂ ਸੀਮਾਪਰਿਚ੍ਛੇਦੋ’’ਤਿ ਵਤ੍ਵਾ ਅਕ੍ਖਰਾਨਿ ਵਾ ਛਿਨ੍ਦਿਤਬ੍ਬਾਨਿ. ਕੇਚਿ ਉਸੂਯਕਾ ‘‘ਸੀਮਂ ਝਾਪੇਸ੍ਸਾਮਾ’’ਤਿ ਅਗ੍ਗਿਂ ਦੇਨ੍ਤਿ, ਪਾਸਾਣਾਵ ਝਾਯਨ੍ਤਿ, ਨ ਸੀਮਾ.

ਕੁਟਿਗੇਹੇਪਿ ਭਿਤ੍ਤਿਂ ਅਕਿਤ੍ਤੇਤ੍ਵਾ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸਟ੍ਠਾਨਂ ਅਨ੍ਤੋਕਰਿਤ੍ਵਾ ਪਾਸਾਣਨਿਮਿਤ੍ਤਾਨਿ ਠਪੇਤ੍ਵਾ ਸੀਮਾ ਸਮ੍ਮਨ੍ਨਿਤਬ੍ਬਾ, ਅਨ੍ਤੋਕੁਟ੍ਟਮੇਵ ਸੀਮਾ ਹੋਤਿ. ਸਚੇ ਅਨ੍ਤੋਕੁਟ੍ਟੇ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸੋ ਨਤ੍ਥਿ, ਪਮੁਖੇ ਨਿਮਿਤ੍ਤਪਾਸਾਣੇ ਠਪੇਤ੍ਵਾ ਸਮ੍ਮਨ੍ਨਿਤਬ੍ਬਾ. ਸਚੇ ਏਵਮ੍ਪਿ ਨਪ੍ਪਹੋਤਿ, ਬਹਿ ਨਿਬ੍ਬੋਦਕਪਤਨਟ੍ਠਾਨੇਪਿ ਨਿਮਿਤ੍ਤਾਨਿ ਠਪੇਤ੍ਵਾ ਸਮ੍ਮਨ੍ਨਿਤਬ੍ਬਾ. ਏਵਂ ਸਮ੍ਮਤਾਯ ਪਨ ਸਬ੍ਬਂ ਕੁਟਿਗੇਹਂ ਸੀਮਟ੍ਠਮੇਵ ਹੋਤਿ.

ਚਤੁਭਿਤ੍ਤਿਯਲੇਣੇਪਿ ਬਨ੍ਧਨ੍ਤੇਹਿ ਕੁਟ੍ਟਂ ਅਕਿਤ੍ਤੇਤ੍ਵਾ ਪਾਸਾਣਾਵ ਕਿਤ੍ਤੇਤਬ੍ਬਾ, ਅਨ੍ਤੋ ਓਕਾਸੇ ਅਸਤਿ ਪਮੁਖੇਪਿ ਨਿਮਿਤ੍ਤਾਨਿ ਠਪੇਤਬ੍ਬਾਨਿ, ਏਵਂ ਲੇਣਸ੍ਸ ਅਨ੍ਤੋ ਚ ਬਹਿ ਚ ਸੀਮਾ ਹੋਤਿ.

ਉਪਰਿਪਾਸਾਦੇਪਿ ਭਿਤ੍ਤਿਂ ਅਕਿਤ੍ਤੇਤ੍ਵਾ ਅਨ੍ਤੋਪਾਸਾਣੇ ਠਪੇਤ੍ਵਾ ਸੀਮਾ ਸਮ੍ਮਨ੍ਨਿਤਬ੍ਬਾ. ਸਚੇ ਨਪ੍ਪਹੋਤਿ, ਪਮੁਖੇਪਿ ਪਾਸਾਣੇ ਠਪੇਤ੍ਵਾ ਸਮ੍ਮਨ੍ਨਿਤਬ੍ਬਾ. ਏਵਂ ਸਮ੍ਮਤਾ ਉਪਰਿਪਾਸਾਦੇਯੇਵ ਹੋਤਿ, ਹੇਟ੍ਠਾ ਨ ਓਤਰਤਿ. ਸਚੇ ਪਨ ਬਹੂਸੁ ਥਮ੍ਭੇਸੁ ਤੁਲਾਨਂ ਉਪਰਿ ਕਤਪਾਸਾਦਸ੍ਸ ਹੇਟ੍ਠਿਮਤਲੇ ਕੁਟ੍ਟੋ ਯਥਾ ਨਿਮਿਤ੍ਤਾਨਂ ਅਨ੍ਤੋ ਹੋਤਿ, ਏਵਂ ਉਟ੍ਠਹਿਤ੍ਵਾ ਤੁਲਾਰੁਕ੍ਖੇਹਿ ਏਕਸਮ੍ਬਨ੍ਧੋ ਠਿਤੋ, ਹੇਟ੍ਠਾਪਿ ਓਤਰਤਿ, ਏਕਥਮ੍ਭਪਾਸਾਦਸ੍ਸ ਪਨ ਉਪਰਿਤਲੇ ਬਦ੍ਧਾ ਸੀਮਾ. ਸਚੇ ਥਮ੍ਭਮਤ੍ਥਕੇ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸੋ ਹੋਤਿ, ਹੇਟ੍ਠਾ ਓਤਰਤਿ. ਸਚੇ ਪਾਸਾਦਭਿਤ੍ਤਿਤੋ ਨਿਗ੍ਗਤੇਸੁ ਨਿਯ੍ਯੂਹਕਾਦੀਸੁ ਪਾਸਾਣੇ ਠਪੇਤ੍ਵਾ ਸੀਮਂ ਬਨ੍ਧਨ੍ਤਿ, ਪਾਸਾਦਭਿਤ੍ਤਿ ਅਨ੍ਤੋਸੀਮਾਯ ਹੋਤਿ. ਹੇਟ੍ਠਾ ਪਨਸ੍ਸਾ ਓਤਰਣਾਨੋਤਰਣਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਹੇਟ੍ਠਾਪਾਸਾਦੇ ਕਿਤ੍ਤੇਨ੍ਤੇਹਿਪਿ ਭਿਤ੍ਤਿ ਚ ਰੁਕ੍ਖਤ੍ਥਮ੍ਭਾ ਚ ਨ ਕਿਤ੍ਤੇਤਬ੍ਬਾ, ਭਿਤ੍ਤਿਲਗ੍ਗੇ ਪਨ ਪਾਸਾਣਤ੍ਥਮ੍ਭੇ ਕਿਤ੍ਤੇਤੁਂ ਵਟ੍ਟਤਿ. ਏਵਂ ਕਿਤ੍ਤਿਤਾ ਸੀਮਾ ਹੇਟ੍ਠਾਪਾਸਾਦਸ੍ਸ ਪਰਿਯਨ੍ਤਥਮ੍ਭਾਨਂ ਅਨ੍ਤੋਯੇਵ ਹੋਤਿ. ਸਚੇ ਪਨ ਹੇਟ੍ਠਾਪਾਸਾਦਸ੍ਸ ਕੁਟ੍ਟੋ ਉਪਰਿਮਤਲੇਨ ਸਮ੍ਬਦ੍ਧੋ ਹੋਤਿ, ਉਪਰਿਪਾਸਾਦਮ੍ਪਿ ਅਭਿਰੁਹਤਿ. ਸਚੇ ਪਾਸਾਦਸ੍ਸ ਬਹਿ ਨਿਬ੍ਬੋਦਕਪਤਨਟ੍ਠਾਨੇ ਨਿਮਿਤ੍ਤਾਨਿ ਕਰੋਨ੍ਤਿ, ਸਬ੍ਬੋ ਪਾਸਾਦੋ ਸੀਮਟ੍ਠੋ ਹੋਤਿ.

ਪਬ੍ਬਤਮਤ੍ਥਕੇ ਤਲਂ ਹੋਤਿ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸਾਰਹਂ, ਤਤ੍ਥ ਪਿਟ੍ਠਿਪਾਸਾਣੇ ਵਿਯ ਸੀਮਂ ਬਨ੍ਧਨ੍ਤਿ, ਹੇਟ੍ਠਾਪਬ੍ਬਤੇਪਿ ਤੇਨੇਵ ਪਰਿਚ੍ਛੇਦੇਨ ਸੀਮਾ ਓਤਰਤਿ. ਤਾਲਮੂਲਕਪਬ੍ਬਤੇਪਿ ਉਪਰਿ ਸੀਮਾ ਬਦ੍ਧਾ ਹੇਟ੍ਠਾ ਓਤਰਤੇਵ. ਯੋ ਪਨ ਵਿਤਾਨਸਣ੍ਠਾਨੋ ਹੋਤਿ, ਉਪਰਿ ਏਕਵੀਸਤਿਯਾ ਭਿਕ੍ਖੂਨਂ ਓਕਾਸੋ ਅਤ੍ਥਿ, ਹੇਟ੍ਠਾ ਨਤ੍ਥਿ, ਤਸ੍ਸੁਪਰਿ ਬਦ੍ਧਾ ਸੀਮਾ ਹੇਟ੍ਠਾ ਨ ਓਤਰਤਿ. ਏਵਂ ਮੁਦਿਙ੍ਗਸਣ੍ਠਾਨੋ ਵਾ ਹੋਤੁ ਪਣਵਸਣ੍ਠਾਨੋ ਵਾ, ਯਸ੍ਸ ਹੇਟ੍ਠਾ ਵਾ ਮਜ੍ਝੇ ਵਾ ਸੀਮਪ੍ਪਮਾਣਂ ਨਤ੍ਥਿ, ਤਸ੍ਸ ਉਪਰਿ ਬਦ੍ਧਾ ਸੀਮਾ ਹੇਟ੍ਠਾ ਨ ਓਤਰਤਿ. ਯਸ੍ਸ ਪਨ ਦ੍ਵੇ ਕੂਟਾਨਿ ਆਸਨ੍ਨੇ ਠਿਤਾਨਿ, ਏਕਸ੍ਸਪਿ ਉਪਰਿ ਸੀਮਪ੍ਪਮਾਣਂ ਨਪ੍ਪਹੋਤਿ, ਤਸ੍ਸ ਕੂਟਨ੍ਤਰਂ ਚਿਨਿਤ੍ਵਾ ਵਾ ਪੂਰੇਤ੍ਵਾ ਵਾ ਏਕਾਬਦ੍ਧਂ ਕਤ੍ਵਾ ਉਪਰਿ ਸੀਮਾ ਸਮ੍ਮਨ੍ਨਿਤਬ੍ਬਾ. ਏਕੋ ਸਪ੍ਪਫਣਸਦਿਸੋ ਪਬ੍ਬਤੋ, ਤਸ੍ਸ ਉਪਰਿ ਸੀਮਪ੍ਪਮਾਣਸ੍ਸ ਅਤ੍ਥਿਤਾਯ ਸੀਮਂ ਬਨ੍ਧਨ੍ਤਿ, ਤਸ੍ਸ ਚੇ ਹੇਟ੍ਠਾ ਆਕਾਸਪਬ੍ਭਾਰਂ ਹੋਤਿ, ਸੀਮਾ ਨ ਓਤਰਤਿ. ਸਚੇ ਪਨਸ੍ਸ ਵੇਮਜ੍ਝੇ ਸੀਮਪ੍ਪਮਾਣੋ ਸੁਸਿਰਪਾਸਾਣੋ ਹੋਤਿ, ਓਤਰਤਿ, ਸੋ ਚ ਪਾਸਾਣੋ ਸੀਮਟ੍ਠੋਯੇਵ ਹੋਤਿ. ਅਥਾਪਿਸ੍ਸ ਹੇਟ੍ਠਾਲੇਣਸ੍ਸ ਕੁਟ੍ਟੋ ਅਗ੍ਗਕੋਟਿਂ ਆਹਚ੍ਚ ਤਿਟ੍ਠਤਿ, ਓਤਰਤਿ, ਹੇਟ੍ਠਾ ਚ ਉਪਰਿ ਚ ਸੀਮਾਯੇਵ ਹੋਤਿ. ਸਚੇ ਪਨ ਹੇਟ੍ਠਾ ਉਪਰਿਮਸ੍ਸ ਸੀਮਾਪਰਿਚ੍ਛੇਦਸ੍ਸ ਪਾਰਤੋ ਅਨ੍ਤੋਲੇਣਂ ਹੋਤਿ, ਬਹਿ ਸੀਮਾ ਨ ਓਤਰਤਿ. ਅਥਾਪਿ ਉਪਰਿਮਸ੍ਸ ਸੀਮਾਪਰਿਚ੍ਛੇਦਸ੍ਸ ਓਰਤੋ ਬਹਿ ਲੇਣਂ ਹੋਤਿ, ਅਨ੍ਤੋ ਸੀਮਾ ਨ ਓਤਰਤਿ. ਅਥਾਪਿ ਉਪਰਿ ਸੀਮਾਪਰਿਚ੍ਛੇਦੋ ਖੁਦ੍ਦਕੋ, ਹੇਟ੍ਠਾ ਲੇਣਂ ਮਹਨ੍ਤਂ ਸੀਮਾਪਰਿਚ੍ਛੇਦਮਤਿਕ੍ਕਮਿਤ੍ਵਾ ਠਿਤਂ, ਸੀਮਾ ਉਪਰਿਯੇਵ ਹੋਤਿ, ਹੇਟ੍ਠਾ ਨ ਓਤਰਤਿ. ਯਦਿ ਪਨ ਲੇਣਂ ਖੁਦ੍ਦਕਂ ਸਬ੍ਬਪਚ੍ਛਿਮਸੀਮਾਪਰਿਮਾਣਂ, ਉਪਰਿ ਸੀਮਾ ਮਹਤੀ ਨਂ ਅਜ੍ਝੋਤ੍ਥਰਿਤ੍ਵਾ ਠਿਤਾ, ਸੀਮਾ ਓਤਰਤਿ. ਅਥ ਲੇਣਂ ਅਤਿਖੁਦ੍ਦਕਂ ਸੀਮਪ੍ਪਮਾਣਂ ਨ ਹੋਤਿ, ਸੀਮਾ ਉਪਰਿਯੇਵ ਹੋਤਿ, ਹੇਟ੍ਠਾ ਨ ਓਤਰਤਿ. ਸਚੇ ਤਤੋ ਉਪਡ੍ਢਂ ਭਿਜ੍ਜਿਤ੍ਵਾ ਪਤਤਿ, ਸੀਮਪ੍ਪਮਾਣਂ ਚੇਪਿ ਹੋਤਿ, ਬਹਿ ਪਤਿਤਂ ਅਸੀਮਾ. ਅਪਤਿਤਂ ਪਨ ਯਦਿ ਸੀਮਪ੍ਪਮਾਣਂ, ਸੀਮਾ ਹੋਤਿਯੇਵ.

ਖਣ੍ਡਸੀਮਾ ਚ ਨੀਚਵਤ੍ਥੁਕਾ ਹੋਤਿ, ਤਂ ਪੂਰੇਤ੍ਵਾ ਉਚ੍ਚਵਤ੍ਥੁਕਂ ਕਰੋਨ੍ਤਿ, ਸੀਮਾਯੇਵ. ਸੀਮਾਯ ਗੇਹਂ ਕਰੋਨ੍ਤਿ, ਸੀਮਟ੍ਠਕਮੇਵ ਹੋਤਿ. ਸੀਮਾਯ ਪੋਕ੍ਖਰਣਿਂ ਖਣਨ੍ਤਿ, ਸੀਮਾਯੇਵ. ਓਘੋ ਸੀਮਾਮਣ੍ਡਲਂ ਓਤ੍ਥਰਿਤ੍ਵਾ ਗਚ੍ਛਤਿ, ਸੀਮਾਮਾਲ਼ਕੇ ਅਟ੍ਟਂ ਬਨ੍ਧਿਤ੍ਵਾ ਕਮ੍ਮਂ ਕਾਤੁਂ ਵਟ੍ਟਤਿ. ਸੀਮਾਯ ਹੇਟ੍ਠਾ ਉਮਙ੍ਗਨਦੀ ਹੋਤਿ, ਇਦ੍ਧਿਮਾ ਭਿਕ੍ਖੁ ਤਤ੍ਥ ਨਿਸੀਦਤਿ. ਸਚੇ ਸਾ ਨਦੀ ਪਠਮਂ ਗਤਾ, ਸੀਮਾ ਪਚ੍ਛਾ ਬਦ੍ਧਾ, ਕਮ੍ਮਂ ਨ ਕੋਪੇਤਿ. ਅਥ ਪਠਮਂ ਸੀਮਾ ਬਦ੍ਧਾ, ਪਚ੍ਛਾ ਨਦੀ ਗਤਾ, ਕਮ੍ਮਂ ਕੋਪੇਤਿ, ਹੇਟ੍ਠਾਪਥਵੀਤਲੇ ਠਿਤੋ ਪਨ ਕੋਪੇਤਿਯੇਵ.

ਸੀਮਾਮਾਲ਼ਕੇ ਵਟਰੁਕ੍ਖੋ ਹੋਤਿ, ਤਸ੍ਸ ਸਾਖਾ ਵਾ ਤਤੋ ਨਿਗ੍ਗਤਪਾਰੋਹੋ ਵਾ ਮਹਾਸੀਮਾਯ ਪਥਵੀਤਲਂ ਵਾ ਤਤ੍ਥਜਾਤਰੁਕ੍ਖਾਦੀਨਿ ਵਾ ਆਹਚ੍ਚ ਤਿਟ੍ਠਤਿ, ਮਹਾਸੀਮਂ ਵਾ ਸੋਧੇਤ੍ਵਾ ਕਮ੍ਮਂ ਕਾਤਬ੍ਬਂ, ਤੇ ਵਾ ਸਾਖਾਪਾਰੋਹਾ ਛਿਨ੍ਦਿਤ੍ਵਾ ਬਹਿਟ੍ਠਕਾ ਕਾਤਬ੍ਬਾ. ਅਨਾਹਚ੍ਚ ਠਿਤਸਾਖਾਦੀਸੁ ਆਰੁਲ਼੍ਹਭਿਕ੍ਖੂ ਹਤ੍ਥਪਾਸਂ ਆਨੇਤਬ੍ਬਾ. ਏਵਂ ਮਹਾਸੀਮਾਯ ਜਾਤਰੁਕ੍ਖਸ੍ਸ ਸਾਖਾ ਵਾ ਪਾਰੋਹੋ ਵਾ ਵੁਤ੍ਤਨਯੇਨੇਵ ਸੀਮਾਮਾਲ਼ਕੇ ਪਤਿਟ੍ਠਾਤਿ, ਵੁਤ੍ਤਨਯੇਨੇਵ ਸੀਮਂ ਸੋਧੇਤ੍ਵਾ ਵਾ ਕਮ੍ਮਂ ਕਾਤਬ੍ਬਂ, ਤੇ ਵਾ ਸਾਖਾਪਾਰੋਹਾ ਛਿਨ੍ਦਿਤ੍ਵਾ ਬਹਿਟ੍ਠਕਾ ਕਾਤਬ੍ਬਾ. ਸਚੇ ਮਾਲ਼ਕੇ ਕਮ੍ਮੇ ਕਰਿਯਮਾਨੇ ਕੋਚਿ ਭਿਕ੍ਖੁ ਮਾਲ਼ਕਸ੍ਸ ਅਨ੍ਤੋ ਪਵਿਸਿਤ੍ਵਾ ਵੇਹਾਸਂ ਠਿਤਸਾਖਾਯ ਨਿਸੀਦਤਿ, ਪਾਦਾ ਵਾਸ੍ਸ ਭੂਮਿਗਤਾ ਹੋਨ੍ਤਿ, ਨਿਵਾਸਨਪਾਰੁਪਨਂ ਵਾ ਭੂਮਿਂ ਫੁਸਤਿ, ਕਮ੍ਮਂ ਕਾਤੁਂ ਨ ਵਟ੍ਟਤਿ. ਪਾਦੇ ਪਨ ਨਿਵਾਸਨਪਾਰੁਪਨਞ੍ਚ ਉਕ੍ਖਿਪਾਪੇਤ੍ਵਾ ਕਾਤੁਂ ਕਮ੍ਮਂ ਵਟ੍ਟਤਿ, ਇਦਞ੍ਚ ਲਕ੍ਖਣਂ ਪੁਰਿਮਨਯੇਪਿ ਵੇਦਿਤਬ੍ਬਂ. ਅਯਂ ਪਨ ਵਿਸੇਸੋ – ਤਤ੍ਰ ਉਕ੍ਖਿਪਾਪੇਤ੍ਵਾ ਕਾਤੁਂ ਨ ਵਟ੍ਟਤਿ, ਹਤ੍ਥਪਾਸਮੇਵ ਆਨੇਤਬ੍ਬੋ. ਸਚੇ ਅਨ੍ਤੋਸੀਮਤੋ ਪਬ੍ਬਤੋ ਅਬ੍ਭੁਗ੍ਗਚ੍ਛਤਿ, ਤਤ੍ਰਟ੍ਠੋ ਭਿਕ੍ਖੁ ਹਤ੍ਥਪਾਸਂ ਆਨੇਤਬ੍ਬੋ. ਇਦ੍ਧਿਯਾ ਅਨ੍ਤੋਪਬ੍ਬਤਂ ਪਵਿਟ੍ਠੇਪਿ ਏਸੇਵ ਨਯੋ. ਬਜ੍ਝਮਾਨਾ ਏਵ ਹਿ ਸੀਮਾ ਪਮਾਣਰਹਿਤਂ ਪਦੇਸਂ ਨ ਓਤਰਤਿ, ਬਦ੍ਧਾਯ ਸੀਮਾਯ ਜਾਤਂ ਯਂ ਕਿਞ੍ਚਿ ਯਤ੍ਥ ਕਤ੍ਥਚਿ ਏਕਸਮ੍ਬਨ੍ਧੇਨ ਗਤਂ ਸੀਮਾਸਙ੍ਖ੍ਯਮੇਵ ਗਚ੍ਛਤੀਤਿ.

ਤਿਯੋਜਨਪਰਮਂ ਪਨ ਸੀਮਂ ਸਮ੍ਮਨ੍ਨਨ੍ਤੇਨ ਮਜ੍ਝੇ ਠਤ੍ਵਾ ਯਥਾ ਚਤੂਸੁਪਿ ਦਿਸਾਸੁ ਦਿਯਡ੍ਢਦਿਯਡ੍ਢਯੋਜਨਂ ਹੋਤਿ, ਏਵਂ ਸਮ੍ਮਨ੍ਨਿਤਬ੍ਬਾ. ਸਚੇ ਪਨ ਮਜ੍ਝੇ ਠਤ੍ਵਾ ਏਕੇਕਦਿਸਤੋ ਤਿਯੋਜਨਂ ਕਰੋਨ੍ਤਿ, ਛਯੋਜਨਂ ਹੋਤੀਤਿ ਨ ਵਟ੍ਟਤਿ. ਚਤੁਰਸ੍ਸਂ ਵਾ ਤਿਕੋਣਂ ਵਾ ਸਮ੍ਮਨ੍ਨਨ੍ਤੇਨ ਯਥਾ ਕੋਣਤੋ ਕੋਣਂ ਤਿਯੋਜਨਂ ਹੋਤਿ, ਏਵਂ ਸਮ੍ਮਨ੍ਨਿਤਬ੍ਬਾ. ਸਚੇ ਹਿ ਯੇਨ ਕੇਨਚਿ ਪਰਿਯਨ੍ਤੇਨ ਕੇਸਗ੍ਗਮਤ੍ਤਮ੍ਪਿ ਤਿਯੋਜਨਂ ਅਤਿਕ੍ਕਾਮੇਤਿ, ਆਪਤ੍ਤਿਞ੍ਚ ਆਪਜ੍ਜਤਿ, ਸੀਮਾ ਚ ਅਸੀਮਾ ਹੋਤਿ.

੧੬੪. ‘‘ਨ, ਭਿਕ੍ਖਵੇ, ਨਦੀਪਾਰਸੀਮਾ ਸਮ੍ਮਨ੍ਨਿਤਬ੍ਬਾ, ਯੋ ਸਮ੍ਮਨ੍ਨੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੪੦) ਵਚਨਤੋ ਨਦੀਪਾਰਸੀਮਾ ਨ ਸਮ੍ਮਨ੍ਨਿਤਬ੍ਬਾ. ਯਤ੍ਰ ਪਨ ਧੁਵਨਾਵਾ ਵਾ ਧੁਵਸੇਤੁ ਵਾ ਅਭਿਮੁਖਤਿਤ੍ਥੇਯੇਵ ਅਤ੍ਥਿ, ਏਵਰੂਪਂ ਨਦੀਪਾਰਸੀਮਂ ਸਮ੍ਮਨ੍ਨਿਤੁਂ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਯਤ੍ਥਸ੍ਸ ਧੁਵਨਾਵਾ ਵਾ ਧੁਵਸੇਤੁ ਵਾ, ਏਵਰੂਪਂ ਨਦੀਪਾਰਸੀਮਂ ਸਮ੍ਮਨ੍ਨਿਤੁ’’ਨ੍ਤਿ ਹਿ ਵੁਤ੍ਤਂ. ਸਚੇ ਧੁਵਨਾਵਾ ਵਾ ਧੁਵਸੇਤੁ ਵਾ ਅਭਿਮੁਖਤਿਤ੍ਥੇ ਨਤ੍ਥਿ, ਈਸਕਂ ਉਦ੍ਧਂ ਅਭਿਰੁਹਿਤ੍ਵਾ ਅਧੋ ਵਾ ਓਰੋਹਿਤ੍ਵਾ ਅਤ੍ਥਿ, ਏਵਮ੍ਪਿ ਵਟ੍ਟਤਿ. ਕਰਵਿਕਤਿਸ੍ਸਤ੍ਥੇਰੋ ਪਨ ‘‘ਗਾਵੁਤਮਤ੍ਤਬ੍ਭਨ੍ਤਰੇਪਿ ਵਟ੍ਟਤੀ’’ਤਿ ਆਹ.

ਇਮਞ੍ਚ ਪਨ ਨਦੀਪਾਰਸੀਮਂ ਸਮ੍ਮਨ੍ਨਨ੍ਤੇਨ ਏਕਸ੍ਮਿਞ੍ਚ ਤੀਰੇ ਠਤ੍ਵਾ ਉਪਰਿਸੋਤੇ ਨਦੀਤੀਰੇ ਨਿਮਿਤ੍ਤਂ ਕਿਤ੍ਤੇਤ੍ਵਾ ਤਤੋ ਪਟ੍ਠਾਯ ਅਤ੍ਤਾਨਂ ਪਰਿਕ੍ਖਿਪਨ੍ਤੇਨ ਯਤ੍ਤਕਂ ਪਰਿਚ੍ਛੇਦਂ ਇਚ੍ਛਤਿ, ਤਸ੍ਸ ਪਰਿਯੋਸਾਨੇ ਅਧੋਸੋਤੇਪਿ ਨਦੀਤੀਰੇ ਨਿਮਿਤ੍ਤਂ ਕਿਤ੍ਤੇਤ੍ਵਾ ਪਰਤੀਰੇ ਸਮ੍ਮੁਖਟ੍ਠਾਨੇ ਨਦੀਤੀਰੇ ਨਿਮਿਤ੍ਤਂ ਕਿਤ੍ਤੇਤਬ੍ਬਂ. ਤਤੋ ਪਟ੍ਠਾਯ ਯਤ੍ਤਕਂ ਪਰਿਚ੍ਛੇਦਂ ਇਚ੍ਛਤਿ, ਤਸ੍ਸ ਵਸੇਨ ਯਾਵ ਉਪਰਿਸੋਤੇ ਪਠਮਂ ਕਿਤ੍ਤਿਤਨਿਮਿਤ੍ਤਸ੍ਸ ਸਮ੍ਮੁਖਾ ਨਦੀਤੀਰੇ ਨਿਮਿਤ੍ਤਂ, ਤਾਵ ਕਿਤ੍ਤੇਤ੍ਵਾ ਪਚ੍ਚਾਹਰਿਤ੍ਵਾ ਪਠਮਕਿਤ੍ਤਿਤਨਿਮਿਤ੍ਤੇਨ ਸਦ੍ਧਿਂ ਘਟੇਤਬ੍ਬਂ. ਅਥ ਸਬ੍ਬਨਿਮਿਤ੍ਤਾਨਂ ਅਨ੍ਤੋ ਠਿਤੇ ਭਿਕ੍ਖੂ ਹਤ੍ਥਪਾਸਗਤੇ ਕਤ੍ਵਾ ਕਮ੍ਮਵਾਚਾਯ ਸੀਮਾ ਸਮ੍ਮਨ੍ਨਿਤਬ੍ਬਾ. ਨਦਿਯਾ ਠਿਤਾ ਅਨਾਗਤਾਪਿ ਕਮ੍ਮਂ ਨ ਕੋਪੇਨ੍ਤਿ, ਸਮ੍ਮੁਤਿਪਰਿਯੋਸਾਨੇ ਠਪੇਤ੍ਵਾ ਨਦਿਂ ਨਿਮਿਤ੍ਤਾਨਂ ਅਨ੍ਤੋ ਪਰਤੀਰੇ ਚ ਓਰਿਮਤੀਰੇ ਚ ਏਕਸੀਮਾ ਹੋਤਿ, ਨਦੀ ਪਨ ਬਦ੍ਧਸੀਮਾਸਙ੍ਖ੍ਯਂ ਨ ਗਚ੍ਛਤਿ. ਵਿਸੁਂ ਨਦੀਸੀਮਾ ਏਵ ਹਿ ਸਾ.

ਸਚੇ ਅਨ੍ਤੋਨਦਿਯਂ ਦੀਪਕੋ ਹੋਤਿ, ਤਂ ਅਨ੍ਤੋਸੀਮਾਯ ਕਾਤੁਕਾਮੇਨ ਪੁਰਿਮਨਯੇਨੇਵ ਅਤ੍ਤਨਾ ਠਿਤਤੀਰੇ ਨਿਮਿਤ੍ਤਾਨਿ ਕਿਤ੍ਤੇਤ੍ਵਾ ਦੀਪਕਸ੍ਸ ਓਰਿਮਨ੍ਤੇ ਚ ਪਾਰਿਮਨ੍ਤੇ ਚ ਨਿਮਿਤ੍ਤਂ ਕਿਤ੍ਤੇਤਬ੍ਬਂ. ਅਥ ਪਰਤੀਰੇ ਨਦਿਯਾ ਓਰਿਮਤੀਰੇ ਨਿਮਿਤ੍ਤਸ੍ਸ ਸਮ੍ਮੁਖਟ੍ਠਾਨੇ ਨਿਮਿਤ੍ਤਂ ਕਿਤ੍ਤੇਤ੍ਵਾ ਤਤੋ ਪਟ੍ਠਾਯ ਪੁਰਿਮਨਯੇਨੇਵ ਯਾਵ ਉਪਰਿਸੋਤੇ ਪਠਮਂ ਕਿਤ੍ਤਿਤਨਿਮਿਤ੍ਤਸ੍ਸ ਸਮ੍ਮੁਖਾ ਨਿਮਿਤ੍ਤਂ, ਤਾਵ ਕਿਤ੍ਤੇਤਬ੍ਬਂ. ਅਥ ਦੀਪਕਸ੍ਸ ਪਾਰਿਮਨ੍ਤੇ ਚ ਓਰਿਮਨ੍ਤੇ ਚ ਨਿਮਿਤ੍ਤਂ ਕਿਤ੍ਤੇਤ੍ਵਾ ਪਚ੍ਚਾਹਰਿਤ੍ਵਾ ਪਠਮਂ ਕਿਤ੍ਤਿਤਨਿਮਿਤ੍ਤੇਨ ਸਦ੍ਧਿਂ ਘਟੇਤਬ੍ਬਂ. ਅਥ ਦ੍ਵੀਸੁ ਤੀਰੇਸੁ ਦੀਪਕੇਸੁ ਚ ਭਿਕ੍ਖੂ ਸਬ੍ਬੇ ਹਤ੍ਥਪਾਸਗਤੇ ਕਤ੍ਵਾ ਕਮ੍ਮਵਾਚਾਯ ਸੀਮਾ ਸਮ੍ਮਨ੍ਨਿਤਬ੍ਬਾ, ਨਦਿਯਂ ਠਿਤਾ ਅਨਾਗਚ੍ਛਨ੍ਤਾਪਿ ਕਮ੍ਮਂ ਨ ਕੋਪੇਨ੍ਤਿ, ਸਮ੍ਮੁਤਿਪਰਿਯੋਸਾਨੇ ਠਪੇਤ੍ਵਾ ਨਦਿਂ ਨਿਮਿਤ੍ਤਾਨਂ ਅਨ੍ਤੋ ਤੀਰਦ੍ਵਯਞ੍ਚ ਦੀਪਕੋ ਚ ਏਕਸੀਮਾ ਹੋਤਿ, ਨਦੀ ਪਨ ਨਦੀਸੀਮਾਯੇਵ.

ਸਚੇ ਪਨ ਦੀਪਕੋ ਵਿਹਾਰਸੀਮਾਪਰਿਚ੍ਛੇਦਤੋ ਉਦ੍ਧਂ ਵਾ ਅਧੋ ਵਾ ਅਧਿਕਤਰੋ ਹੋਤਿ, ਅਥ ਵਿਹਾਰਸੀਮਾਪਰਿਚ੍ਛੇਦਨਿਮਿਤ੍ਤਸ੍ਸ ਉਜੁਕਮੇਵ ਸਮ੍ਮੁਖੀਭੂਤੇ ਦੀਪਕਸ੍ਸ ਓਰਿਮਨ੍ਤੇ ਨਿਮਿਤ੍ਤਂ ਕਿਤ੍ਤੇਤ੍ਵਾ ਤਤੋ ਪਟ੍ਠਾਯ ਦੀਪਕਸਿਖਰਂ ਪਰਿਕ੍ਖਿਪਨ੍ਤੇਨ ਪੁਨ ਦੀਪਕਸ੍ਸ ਓਰਿਮਨ੍ਤੇ ਨਿਮਿਤ੍ਤਸਮ੍ਮੁਖੇ ਪਾਰਿਮਨ੍ਤੇ ਨਿਮਿਤ੍ਤਂ ਕਿਤ੍ਤੇਤਬ੍ਬਂ. ਤਤੋ ਪਰਂ ਪੁਰਿਮਨਯੇਨੇਵ ਪਰਤੀਰੇ ਸਮ੍ਮੁਖਨਿਮਿਤ੍ਤਮਾਦਿਂ ਕਤ੍ਵਾ ਪਰਤੀਰੇ ਨਿਮਿਤ੍ਤਾਨਿ ਚ ਦੀਪਕਸ੍ਸ ਪਾਰਿਮਨ੍ਤਓਰਿਮਨ੍ਤੇ ਨਿਮਿਤ੍ਤਾਨਿ ਚ ਕਿਤ੍ਤੇਤ੍ਵਾ ਪਠਮਕਿਤ੍ਤਿਤਨਿਮਿਤ੍ਤੇਨ ਸਦ੍ਧਿਂ ਘਟਨਾ ਕਾਤਬ੍ਬਾ. ਏਵਂ ਕਿਤ੍ਤੇਤ੍ਵਾ ਸਮ੍ਮਤਾ ਸੀਮਾ ਪਬ੍ਬਤਸਣ੍ਠਾਨਾ ਹੋਤਿ. ਸਚੇ ਪਨ ਦੀਪਕੋ ਵਿਹਾਰਸੀਮਾਪਰਿਚ੍ਛੇਦਤੋ ਉਦ੍ਧਮ੍ਪਿ ਅਧੋਪਿ ਅਧਿਕਤਰੋ ਹੋਤਿ, ਪੁਰਿਮਨਯੇਨੇਵ ਦੀਪਕਸ੍ਸ ਉਭੋਪਿ ਸਿਖਰਾਨਿ ਪਰਿਕ੍ਖਿਪਿਤ੍ਵਾ ਨਿਮਿਤ੍ਤਾਨਿ ਕਿਤ੍ਤੇਨ੍ਤੇਨ ਨਿਮਿਤ੍ਤਘਟਨਾ ਕਾਤਬ੍ਬਾ. ਏਵਂ ਕਿਤ੍ਤੇਤ੍ਵਾ ਸਮ੍ਮਤਾ ਸੀਮਾ ਮੁਦਿਙ੍ਗਸਣ੍ਠਾਨਾ ਹੋਤਿ. ਸਚੇ ਦੀਪਕੋ ਵਿਹਾਰਸੀਮਾਪਰਿਚ੍ਛੇਦਸ੍ਸ ਅਨ੍ਤੋ ਖੁਦ੍ਦਕੋ ਹੋਤਿ, ਸਬ੍ਬਪਠਮੇਨ ਨਯੇਨ ਦੀਪਕੇ ਨਿਮਿਤ੍ਤਾਨਿ ਕਿਤ੍ਤੇਤਬ੍ਬਾਨਿ. ਏਵਂ ਕਿਤ੍ਤੇਤ੍ਵਾ ਸਮ੍ਮਤਾ ਸੀਮਾ ਪਣਵਸਣ੍ਠਾਨਾ ਹੋਤਿ. ਏਵਂ ਤਾਵ ਸੀਮਾਬਨ੍ਧਨਂ ਵੇਦਿਤਬ੍ਬਂ.

੧੬੫. ਏਵਂ ਬਦ੍ਧਾ ਪਨ ਸੀਮਾ ਕਦਾ ਅਸੀਮਾ ਹੋਤੀਤਿ? ਯਦਾ ਸਙ੍ਘੋ ਸੀਮਂ ਸਮੂਹਨਤਿ, ਤਦਾ ਅਸੀਮਾ ਹੋਤਿ. ਕਥਂ ਪਨੇਸਾ ਸਮੂਹਨਿਤਬ੍ਬਾਤਿ? ‘‘ਸੀਮਂ, ਭਿਕ੍ਖਵੇ, ਸਮ੍ਮਨ੍ਨਨ੍ਤੇਨ ਪਠਮਂ ਸਮਾਨਸਂਵਾਸਸੀਮਾ ਸਮ੍ਮਨ੍ਨਿਤਬ੍ਬਾ, ਪਚ੍ਛਾ ਤਿਚੀਵਰੇਨ ਅਵਿਪ੍ਪਵਾਸੋ ਸਮ੍ਮਨ੍ਨਿਤਬ੍ਬੋ. ਸੀਮਂ, ਭਿਕ੍ਖਵੇ, ਸਮੂਹਨਨ੍ਤੇਨ ਪਠਮਂ ਤਿਚੀਵਰੇਨ ਅਵਿਪ੍ਪਵਾਸੋ ਸਮੂਹਨ੍ਤਬ੍ਬੋ, ਪਚ੍ਛਾ ਸਮਾਨਸਂਵਾਸਸੀਮਾ ਸਮੂਹਨ੍ਤਬ੍ਬਾ’’ਤਿ ਵਚਨਤੋ ਪਠਮਂ ਅਵਿਪ੍ਪਵਾਸੋ ਸਮੂਹਨਿਤਬ੍ਬੋ, ਪਚ੍ਛਾ ਸੀਮਾ ਸਮੂਹਨਿਤਬ੍ਬਾਤਿ. ਕਥਂ? ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਯੋ ਸੋ ਸਙ੍ਘੇਨ ਤਿਚੀਵਰੇਨ ਅਵਿਪ੍ਪਵਾਸੋ ਸਮ੍ਮਤੋ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਤਂ ਤਿਚੀਵਰੇਨ ਅਵਿਪ੍ਪਵਾਸਂ ਸਮੂਹਨੇਯ੍ਯ, ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਯੋ ਸੋ ਸਙ੍ਘੇਨ ਤਿਚੀਵਰੇਨ ਅਵਿਪ੍ਪਵਾਸੋ ਸਮ੍ਮਤੋ, ਸਙ੍ਘੋ ਤਂ ਤਿਚੀਰੇਨ ਅਵਿਪ੍ਪਵਾਸਂ ਸਮੂਹਨਤਿ. ਯਸ੍ਸਾਯਸ੍ਮਤੋ ਖਮਤਿ ਏਤਸ੍ਸ ਤਿਚੀਵਰੇਨ ਅਵਿਪ੍ਪਵਾਸਸ੍ਸ ਸਮੁਗ੍ਘਾਤੋ, ਸੋ ਤੁਣ੍ਹਸ੍ਸ. ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮੂਹਤੋ ਸੋ ਸਙ੍ਘੇਨ ਤਿਚੀਵਰੇਨ ਅਵਿਪ੍ਪਵਾਸੋ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਮਹਾਵ. ੧੪੫) –

ਏਵਂ ਤਾਵ ਅਵਿਪ੍ਪਵਾਸੋ ਸਮੂਹਨਿਤਬ੍ਬੋ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਯਾ ਸਾ ਸਙ੍ਘੇਨ ਸੀਮਾ ਸਮ੍ਮਤਾ ਸਮਾਨਸਂਵਾਸਾ ਏਕੂਪੋਸਥਾ, ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਤਂ ਸੀਮਂ ਸਮੂਹਨੇਯ੍ਯ ਸਮਾਨਸਂਵਾਸਂ ਏਕੂਪੋਸਥਂ, ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ, ਯਾ ਸਾ ਸਙ੍ਘੇਨ ਸੀਮਾ ਸਮ੍ਮਤਾ ਸਮਾਨਸਂਵਾਸਾ ਏਕੂਪੋਸਥਾ, ਸਙ੍ਘੋ ਤਂ ਸੀਮਂ ਸਮੂਹਨਤਿ ਸਮਾਨਸਂਵਾਸਂ ਏਕੂਪੋਸਥਂ. ਯਸ੍ਸਾਯਸ੍ਮਤੋ ਖਮਤਿ ਏਤਿਸ੍ਸਾ ਸੀਮਾਯ ਸਮਾਨਸਂਵਾਸਾਯ ਏਕੂਪੋਸਥਾਯ ਸਮੁਗ੍ਘਾਤੋ, ਸੋ ਤੁਣ੍ਹਸ੍ਸ. ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮੂਹਤਾ ਸਾ ਸੀਮਾ ਸਙ੍ਘੇਨ ਸਮਾਨਸਂਵਾਸਾ ਏਕੂਪੋਸਥਾ, ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਮਹਾਵ. ੧੪੬) –

ਏਵਂ ਸੀਮਾ ਸਮੂਹਨਿਤਬ੍ਬਾ.

ਸਮੂਹਨਨ੍ਤੇਨ ਪਨ ਭਿਕ੍ਖੁਨਾ ਵਤ੍ਤਂ ਜਾਨਿਤਬ੍ਬਂ. ਤਤ੍ਰਿਦਂ ਵਤ੍ਤਂ (ਮਹਾਵ. ਅਟ੍ਠ. ੧੪੪) – ਖਣ੍ਡਸੀਮਾਯ ਠਤ੍ਵਾ ਅਵਿਪ੍ਪਵਾਸਸੀਮਾ ਨ ਸਮੂਹਨ੍ਤਬ੍ਬਾ, ਤਥਾ ਅਵਿਪ੍ਪਵਾਸਸੀਮਾਯ ਠਤ੍ਵਾ ਖਣ੍ਡਸੀਮਾਪਿ. ਖਣ੍ਡਸੀਮਾਯ ਪਨ ਠਿਤੇਨ ਖਣ੍ਡਸੀਮਾਵ ਸਮੂਹਨਿਤਬ੍ਬਾ, ਤਥਾ ਇਤਰਾਯ ਠਿਤੇਨ ਇਤਰਾ. ਸੀਮਂ ਨਾਮ ਦ੍ਵੀਹਿ ਕਾਰਣੇਹਿ ਸਮੂਹਨਨ੍ਤਿ ਪਕਤਿਯਾ ਖੁਦ੍ਦਕਂ ਪੁਨ ਆਵਾਸਵਡ੍ਢਨਤ੍ਥਾਯ ਮਹਤਿਂ ਵਾ ਕਾਤੁਂ, ਪਕਤਿਯਾ ਮਹਤਿਂ ਪੁਨ ਅਞ੍ਞੇਸਂ ਵਿਹਾਰੋਕਾਸਦਾਨਤ੍ਥਾਯ ਖੁਦ੍ਦਕਂ ਵਾ ਕਾਤੁਂ. ਤਤ੍ਥ ਸਚੇ ਖਣ੍ਡਸੀਮਞ੍ਚ ਅਵਿਪ੍ਪਵਾਸਸੀਮਞ੍ਚ ਜਾਨਨ੍ਤਿ, ਸਮੂਹਨਿਤੁਞ੍ਚੇਵ ਬਨ੍ਧਿਤੁਞ੍ਚ ਸਕ੍ਖਿਸ੍ਸਨ੍ਤਿ. ਖਣ੍ਡਸੀਮਂ ਪਨ ਜਾਨਨ੍ਤਾ ਅਵਿਪ੍ਪਵਾਸਂ ਅਜਾਨਨ੍ਤਾਪਿ ਸਮੂਹਨਿਤੁਞ੍ਚੇਵ ਬਨ੍ਧਿਤੁਞ੍ਚ ਸਕ੍ਖਿਸ੍ਸਨ੍ਤਿ. ਖਣ੍ਡਸੀਮਂ ਅਜਾਨਨ੍ਤਾ ਅਵਿਪ੍ਪਵਾਸਂਯੇਵ ਜਾਨਨ੍ਤਾ ਚੇਤਿਯਙ੍ਗਣਬੋਧਿਯਙ੍ਗਣਉਪਓਸਥਾਗਾਰਾਦੀਸੁ ਨਿਰਾਸਙ੍ਕਟ੍ਠਾਨੇਸੁ ਠਤ੍ਵਾ ਅਪ੍ਪੇਵ ਨਾਮ ਸਮੂਹਨਿਤੁਂ ਸਕ੍ਖਿਸ੍ਸਨ੍ਤਿ, ਪਟਿਬਨ੍ਧਿਤੁਂ ਪਨ ਨ ਸਕ੍ਖਿਸ੍ਸਨ੍ਤੇਵ. ਸਚੇ ਬਨ੍ਧੇਯ੍ਯੁਂ, ਸੀਮਾਸਮ੍ਭੇਦਂ ਕਤ੍ਵਾ ਵਿਹਾਰਂ ਅਵਿਹਾਰਂ ਕਰੇਯ੍ਯੁਂ, ਤਸ੍ਮਾ ਨ ਸਮੂਹਨਿਤਬ੍ਬਾ. ਯੇ ਪਨ ਉਭੋਪਿ ਨ ਜਾਨਨ੍ਤਿ, ਤੇ ਨੇਵ ਸਮੂਹਨਿਤੁਂ, ਨ ਬਨ੍ਧਿਤੁਂ ਸਕ੍ਖਿਸ੍ਸਨ੍ਤਿ. ਅਯਞ੍ਹਿ ਸੀਮਾ ਨਾਮ ਕਮ੍ਮਵਾਚਾਯ ਵਾ ਅਸੀਮਾ ਹੋਤਿ ਸਾਸਨਨ੍ਤਰਧਾਨੇਨ ਵਾ, ਨ ਚ ਸਕ੍ਕਾ ਸੀਮਂ ਅਜਾਨਨ੍ਤੇਹਿ ਕਮ੍ਮਵਾਚਾ ਕਾਤੁਂ, ਤਸ੍ਮਾ ਨ ਸਮੂਹਨਿਤਬ੍ਬਾ, ਸਾਧੁਕਂ ਪਨ ਞਤ੍ਵਾਯੇਵ ਸਮੂਹਨਿਤਬ੍ਬਾ ਚੇਵ ਬਨ੍ਧਿਤਬ੍ਬਾ ਚਾਤਿ. ਅਯਂ ਤਾਵ ਬਦ੍ਧਸੀਮਾਯ ਵਿਨਿਚ੍ਛਯੋ.

੧੬੬. ਅਬਦ੍ਧਸੀਮਾ ਪਨ ਗਾਮਸੀਮਾ ਸਤ੍ਤਬ੍ਭਨ੍ਤਰਸੀਮਾ ਉਦਕੁਕ੍ਖੇਪਸੀਮਾਤਿ ਤਿਵਿਧਾ. ਤਤ੍ਥ ਯਾਵਤਾ ਏਕਂ ਗਾਮਖੇਤ੍ਤਂ, ਅਯਂ ਗਾਮਸੀਮਾ ਨਾਮ, ਗਾਮਗ੍ਗਹਣੇਨ ਚੇਤ੍ਥ (ਮਹਾਵ. ਅਟ੍ਠ. ੧੪੭) ਨਗਰਮ੍ਪਿ ਨਿਗਮਮ੍ਪਿ ਗਹਿਤਮੇਵ ਹੋਤਿ. ਤਤ੍ਥ ਯਤ੍ਤਕੇ ਪਦੇਸੇ ਤਸ੍ਸ ਤਸ੍ਸ ਗਾਮਸ੍ਸ ਗਾਮਭੋਜਕਾ ਬਲਿਂ ਲਭਨ੍ਤਿ, ਸੋ ਪਦੇਸੋ ਅਪ੍ਪੋ ਵਾ ਹੋਤੁ ਮਹਨ੍ਤੋ ਵਾ, ਗਾਮਸੀਮਾਤ੍ਵੇਵ ਸਙ੍ਖ੍ਯਂ ਗਚ੍ਛਤਿ. ਨਗਰਨਿਗਮਸੀਮਾਸੁਪਿ ਏਸੇਵ ਨਯੋ. ਯਮ੍ਪਿ ਏਕਸ੍ਮਿਂਯੇਵ ਗਾਮਖੇਤ੍ਤੇ ਏਕਂ ਪਦੇਸਂ ‘‘ਅਯਂ ਵਿਸੁਂਗਾਮੋ ਹੋਤੂ’’ਤਿ ਪਰਿਚ੍ਛਿਨ੍ਦਿਤ੍ਵਾ ਰਾਜਾ ਕਸ੍ਸਚਿ ਦੇਤਿ, ਸੋਪਿ ਵਿਸੁਂਗਾਮਸੀਮਾ ਹੋਤਿਯੇਵ, ਤਸ੍ਮਾ ਸਾ ਚ ਇਤਰਾ ਚ ਪਕਤਿਗਾਮਨਗਰਨਿਗਮਸੀਮਾ ਬਦ੍ਧਸੀਮਾਸਦਿਸਾਯੇਵ ਹੋਨ੍ਤਿ, ਕੇਵਲਂ ਪਨ ਤਿਚੀਵਰਵਿਪ੍ਪਵਾਸਪਰਿਹਾਰਂ ਨ ਲਭਨ੍ਤਿ.

ਅਗਾਮਕੇ ਪਨ ਅਰਞ੍ਞੇ ਸਮਨ੍ਤਾ ਸਤ੍ਤਬ੍ਭਨ੍ਤਰਾ ਸਤ੍ਤਬ੍ਭਨ੍ਤਰਸੀਮਾ ਨਾਮ. ਤਤ੍ਥ ਅਗਾਮਕਂ ਨਾਮ ਅਰਞ੍ਞਂ ਵਿਞ੍ਝਾਟਵੀਆਦੀਸੁ ਵਾ ਸਮੁਦ੍ਦਮਜ੍ਝੇ ਵਾ ਮਚ੍ਛਬਨ੍ਧਾਨਂ ਅਗਮਨਪਥੇ ਦੀਪਕੇਸੁ ਲਬ੍ਭਤਿ. ਸਮਨ੍ਤਾ ਸਤ੍ਤਬ੍ਭਨ੍ਤਰਾਤਿ ਮਜ੍ਝੇ ਠਿਤਾਨਂ ਸਬ੍ਬਦਿਸਾਸੁ ਸਤ੍ਤਬ੍ਭਨ੍ਤਰਾ ਵਿਨਿਬ੍ਬੇਧੇਨ ਚੁਦ੍ਦਸ ਹੋਨ੍ਤਿ. ਤਤ੍ਥ ਏਕਂ ਅਬ੍ਭਨ੍ਤਰਂ ਅਟ੍ਠਵੀਸਤਿਹਤ੍ਥਪ੍ਪਮਾਣਂ ਹੋਤਿ. ਅਯਞ੍ਚ ਸੀਮਾ ਪਰਿਸਵਸੇਨ ਵਡ੍ਢਤਿ, ਤਸ੍ਮਾ ਸਮਨ੍ਤਾ ਪਰਿਸਪਰਿਯਨ੍ਤਤੋ ਪਟ੍ਠਾਯ ਅਬ੍ਭਨ੍ਤਰਪਰਿਚ੍ਛੇਦੋ ਕਾਤਬ੍ਬੋ. ਸਚੇ ਪਨ ਦ੍ਵੇ ਸਙ੍ਘਾ ਵਿਸੁਂ ਉਪੋਸਥਂ ਕਰੋਨ੍ਤਿ, ਦ੍ਵਿਨ੍ਨਂ ਸਤ੍ਤਬ੍ਭਨ੍ਤਰਾਨਂ ਅਨ੍ਤਰੇ ਅਞ੍ਞਮੇਕਂ ਅਬ੍ਭਨ੍ਤਰਂ ਉਪਚਾਰਤ੍ਥਾਯ ਠਪੇਤਬ੍ਬਂ.

੧੬੭. ਯਾ ਪਨੇਸਾ ‘‘ਸਬ੍ਬਾ, ਭਿਕ੍ਖਵੇ, ਨਦੀ ਅਸੀਮਾ, ਸਬ੍ਬੋ ਸਮੁਦ੍ਦੋ ਅਸੀਮੋ, ਸਬ੍ਬੋ ਜਾਤਸ੍ਸਰੋ ਅਸੀਮੋ’’ਤਿ (ਮਹਾਵ. ੧੪੭) ਏਵਂ ਨਦੀਆਦੀਨਂ ਬਦ੍ਧਸੀਮਭਾਵਂ ਪਟਿਕ੍ਖਿਪਿਤ੍ਵਾ ਪੁਨ ‘‘ਨਦਿਯਾ ਵਾ, ਭਿਕ੍ਖਵੇ, ਸਮੁਦ੍ਦੇ ਵਾ ਜਾਤਸ੍ਸਰੇ ਵਾ ਯਂ ਮਜ੍ਝਿਮਸ੍ਸ ਪੁਰਿਸਸ੍ਸ ਸਮਨ੍ਤਾ ਉਦਕੁਕ੍ਖੇਪਾ, ਅਯਂ ਤਤ੍ਥ ਸਮਾਨਸਂਵਾਸਾ ਏਕੂਪੋਸਥਾ’’ਤਿ (ਮਹਾਵ. ੧੪੭) ਵੁਤ੍ਤਾ, ਅਯਂ ਉਦਕੁਕ੍ਖੇਪਸੀਮਾ ਨਾਮ. ਤਤ੍ਥ ਨਦੀ ਨਦੀਨਿਮਿਤ੍ਤੇ ਵੁਤ੍ਤਲਕ੍ਖਣਾਵ, ਸਮੁਦ੍ਦੋਪਿ ਪਾਕਟੋਯੇਵ. ਯੋ ਪਨ ਯੇਨ ਕੇਨਚਿ ਖਣਿਤ੍ਵਾ ਅਕਤੋ ਸਯਂਜਾਤੋ ਸੋਬ੍ਭੋ ਸਮਨ੍ਤਤੋ ਆਗਤੇਨ ਉਦਕੇਨ ਪੂਰਿਤੋ ਤਿਟ੍ਠਤਿ, ਯਤ੍ਥ ਨਦਿਯਂ ਵੁਤ੍ਤਪ੍ਪਕਾਰੇ ਵਸ੍ਸਕਾਲੇ ਉਦਕਂ ਸਨ੍ਤਿਟ੍ਠਤਿ, ਅਯਂ ਜਾਤਸ੍ਸਰੋ ਨਾਮ. ਯੋਪਿ ਨਦਿਂ ਵਾ ਸਮੁਦ੍ਦਂ ਵਾ ਭਿਨ੍ਦਿਤ੍ਵਾ ਨਿਕ੍ਖਨ੍ਤਉਦਕੇਨ ਖਤੋ ਸੋਬ੍ਭੋ ਏਤਂ ਲਕ੍ਖਣਂ ਪਾਪੁਣਾਤਿ, ਅਯਮ੍ਪਿ ਜਾਤਸ੍ਸਰੋਯੇਵ. ਏਤੇਸੁ ਨਦੀਆਦੀਸੁ ਯਂ ਠਾਨਂ ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ ਸਮਨ੍ਤਤੋ ਉਦਕੁਕ੍ਖੇਪੇਨ ਪਰਿਚ੍ਛਿਨ੍ਨਂ, ਅਯਂ ਉਦਕੁਕ੍ਖੇਪਸੀਮਾ ਨਾਮ.

ਕਥਂ ਪਨ ਉਦਕੁਕ੍ਖੇਪੋ ਕਾਤਬ੍ਬੋਤਿ? ਯਥਾ ਅਕ੍ਖਧੁਤ੍ਤਾ ਦਾਰੁਗੁਲ਼ਂ ਖਿਪਨ੍ਤਿ, ਏਵਂ ਉਦਕਂ ਵਾ ਵਾਲੁਕਂ ਵਾ ਹਤ੍ਥੇਨ ਗਹੇਤ੍ਵਾ ਥਾਮਮਜ੍ਝਿਮੇਨ ਪੁਰਿਸੇਨ ਸਬ੍ਬਥਾਮੇਨ ਖਿਪਿਤਬ੍ਬਂ. ਯਤ੍ਥ ਏਵਂ ਖਿਤ੍ਤਂ ਉਦਕਂ ਵਾ ਵਾਲੁਕਾ ਵਾ ਪਤਤਿ, ਅਯਮੇਕੋ ਉਦਕੁਕ੍ਖੇਪੋ, ਤਸ੍ਸ ਅਨ੍ਤੋਹਤ੍ਥਪਾਸਂ ਵਿਜਹਿਤ੍ਵਾ ਠਿਤੋ ਕਮ੍ਮਂ ਕੋਪੇਤਿ. ਯਾਵ ਪਰਿਸਾ ਵਡ੍ਢਤਿ, ਤਾਵ ਸੀਮਾਪਿ ਵਡ੍ਢਤਿ, ਪਰਿਸਪਰਿਯਨ੍ਤਤੋ ਉਦਕੁਕ੍ਖੇਪੋਯੇਵ ਪਮਾਣਂ, ਅਯਂ ਪਨ ਏਤੇਸਂ ਨਦੀਆਦੀਨਂ ਅਨ੍ਤੋਯੇਵ ਲਬ੍ਭਤਿ, ਨ ਬਹਿ. ਤਸ੍ਮਾ ਨਦਿਯਾ ਵਾ ਜਾਤਸ੍ਸਰੇ ਵਾ ਯਤ੍ਤਕਂ ਪਦੇਸਂ ਪਕਤਿਵਸ੍ਸਕਾਲੇ ਚਤੂਸੁ ਮਾਸੇਸੁ ਉਦਕਂ ਓਤ੍ਥਰਤਿ, ਸਮੁਦ੍ਦੇ ਯਸ੍ਮਿਂ ਪਦੇਸੇ ਪਕਤਿਵੀਚਿਯੋ ਓਸਰਿਤ੍ਵਾ ਸਣ੍ਠਹਨ੍ਤਿ, ਤਤੋ ਪਟ੍ਠਾਯ ਕਪ੍ਪਿਯਭੂਮਿ, ਤਤ੍ਥ ਠਤ੍ਵਾ ਉਪੋਸਥਾਦਿਕਮ੍ਮਂ ਕਾਤੁਂ ਵਟ੍ਟਤਿ, ਦੁਬ੍ਬੁਟ੍ਠਿਕਾਲੇ ਵਾ ਗਿਮ੍ਹੇ ਵਾ ਨਦੀਜਾਤਸ੍ਸਰੇਸੁ ਸੁਕ੍ਖੇਸੁਪਿ ਸਾ ਏਵ ਕਪ੍ਪਿਯਭੂਮਿ. ਸਚੇ ਪਨ ਸੁਕ੍ਖੇ ਜਾਤਸ੍ਸਰੇ ਵਾਪਿਂ ਵਾ ਖਣਨ੍ਤਿ, ਵਪ੍ਪਂ ਵਾ ਕਰੋਨ੍ਤਿ, ਤਂ ਠਾਨਂ ਗਾਮਖੇਤ੍ਤਂ ਹੋਤਿ. ਯਾ ਪਨੇਸਾ ‘‘ਕਪ੍ਪਿਯਭੂਮੀ’’ਤਿ ਵੁਤ੍ਤਾ, ਤਤੋ ਬਹਿ ਉਦਕੁਕ੍ਖੇਪਸੀਮਾ ਨ ਗਚ੍ਛਤਿ, ਅਨ੍ਤੋ ਗਚ੍ਛਤਿ, ਤਸ੍ਮਾ ਤੇਸਂ ਅਨ੍ਤੋ ਪਰਿਸਪਰਿਯਨ੍ਤਤੋ ਪਟ੍ਠਾਯ ਸਮਨ੍ਤਾ ਉਦਕੁਕ੍ਖੇਪਪਰਿਚ੍ਛੇਦੋ ਕਾਤਬ੍ਬੋ, ਅਯਮੇਤ੍ਥ ਸਙ੍ਖੇਪੋ.

ਅਯਂ ਪਨ ਵਿਤ੍ਥਾਰੋ – ਸਚੇ ਨਦੀ ਨਾਤਿਦੀਘਾ ਹੋਤਿ, ਪਭਵਤੋ ਪਟ੍ਠਾਯ ਯਾਵ ਮੁਖਦ੍ਵਾਰਾ ਸਬ੍ਬਤ੍ਥ ਸਙ੍ਘੋ ਨਿਸੀਦਤਿ, ਉਦਕੁਕ੍ਖੇਪਸੀਮਾਯ ਕਮ੍ਮਂ ਨਤ੍ਥਿ, ਸਕਲਾਪਿ ਨਦੀ ਏਤੇਸਂਯੇਵ ਭਿਕ੍ਖੂਨਂ ਪਹੋਤਿ. ਯਂ ਪਨ ਮਹਾਸੁਮਤ੍ਥੇਰੇਨ ਵੁਤ੍ਤਂ ‘‘ਯੋਜਨਂ ਪਵਤ੍ਤਮਾਨਾਯੇਵ ਨਦੀ, ਤਤ੍ਰਾਪਿ ਉਪਰਿ ਅਡ੍ਢਯੋਜਨਂ ਪਹਾਯ ਹੇਟ੍ਠਾ ਅਡ੍ਢਯੋਜਨੇ ਕਮ੍ਮਂ ਕਾਤੁਂ ਵਟ੍ਟਤੀ’’ਤਿ, ਤਂ ਮਹਾਪਦੁਮਤ੍ਥੇਰੇਨੇਵ ਪਟਿਕ੍ਖਿਤ੍ਤਂ. ਭਗਵਤਾ ਹਿ ‘‘ਤਿਮਣ੍ਡਲਂ ਪਟਿਚ੍ਛਾਦੇਤ੍ਵਾ ਯਤ੍ਥ ਕਤ੍ਥਚਿ ਉਤ੍ਤਰਨ੍ਤਿਯਾ ਭਿਕ੍ਖੁਨਿਯਾ ਅਨ੍ਤਰਵਾਸਕੋ ਤੇਮਿਯਤੀ’’ਤਿ (ਪਾਚਿ. ੬੯੨) ਇਦਂ ਨਦਿਯਾ ਪਮਾਣਂ ਵੁਤ੍ਤਂ, ਨ ਯੋਜਨਂ ਵਾ ਅਡ੍ਢਯੋਜਨਂ ਵਾ, ਤਸ੍ਮਾ ਯਾ ਇਮਸ੍ਸ ਸੁਤ੍ਤਸ੍ਸ ਵਸੇਨ ਪੁਬ੍ਬੇ ਵੁਤ੍ਤਲਕ੍ਖਣਾ ਨਦੀ, ਤਸ੍ਸਾ ਪਭਵਤੋ ਪਟ੍ਠਾਯ ਸਙ੍ਘਕਮ੍ਮਂ ਕਾਤੁਂ ਵਟ੍ਟਤਿ. ਸਚੇ ਪਨੇਤ੍ਥ ਬਹੂ ਭਿਕ੍ਖੂ ਵਿਸੁਂ ਵਿਸੁਂ ਕਮ੍ਮਂ ਕਰੋਨ੍ਤਿ, ਸਬ੍ਬੇਹਿ ਅਤ੍ਤਨੋ ਚ ਅਞ੍ਞੇਸਞ੍ਚ ਉਦਕੁਕ੍ਖੇਪਪਰਿਚ੍ਛੇਦਸ੍ਸ ਅਨ੍ਤਰਾ ਅਞ੍ਞੋ ਉਦਕੁਕ੍ਖੇਪੋ ਸੀਮਨ੍ਤਰਿਕਤ੍ਥਾਯ ਠਪੇਤਬ੍ਬੋ, ਤਤੋ ਅਧਿਕਂ ਵਟ੍ਟਤਿਯੇਵ, ਊਨਂ ਪਨ ਨ ਵਟ੍ਟਤੀਤਿ ਵੁਤ੍ਤਂ. ਜਾਤਸ੍ਸਰਸਮੁਦ੍ਦੇਪਿ ਏਸੇਵ ਨਯੋ.

ਨਦਿਯਾ ਪਨ ‘‘ਕਮ੍ਮਂ ਕਰਿਸ੍ਸਾਮਾ’’ਤਿ ਗਤੇਹਿ ਸਚੇ ਨਦੀ ਪਰਿਪੁਣ੍ਣਾ ਹੋਤਿ ਸਮਤਿਤ੍ਤਿਕਾ, ਉਦਕਸਾਟਿਕਂ ਨਿਵਾਸੇਤ੍ਵਾ ਅਨ੍ਤੋਨਦਿਯਂਯੇਵ ਕਮ੍ਮਂ ਕਾਤਬ੍ਬਂ. ਸਚੇ ਨ ਸਕ੍ਕੋਨ੍ਤਿ, ਨਾਵਾਯਪਿ ਠਤ੍ਵਾ ਕਾਤਬ੍ਬਂ. ਗਚ੍ਛਨ੍ਤਿਯਾ ਪਨ ਨਾਵਾਯ ਕਾਤੁਂ ਨ ਵਟ੍ਟਤਿ. ਕਸ੍ਮਾ? ਉਦਕੁਕ੍ਖੇਪਮਤ੍ਤਮੇਵ ਹਿ ਸੀਮਾ. ਤਂ ਨਾਵਾ ਸੀਘਮੇਵ ਅਤਿਕ੍ਕਮਤਿ, ਏਵਂ ਸਤਿ ਅਞ੍ਞਿਸ੍ਸਾ ਸੀਮਾਯ ਞਤ੍ਤਿ, ਅਞ੍ਞਿਸ੍ਸਾ ਅਨੁਸਾਵਨਾ ਹੋਤਿ, ਤਸ੍ਮਾ ਨਾਵਂ ਅਰਿਤ੍ਤੇਨ ਵਾ ਠਪੇਤ੍ਵਾ ਪਾਸਾਣੇ ਵਾ ਲਮ੍ਬੇਤ੍ਵਾ ਅਨ੍ਤੋਨਦਿਯਂ ਜਾਤਰੁਕ੍ਖੇ ਵਾ ਬਨ੍ਧਿਤ੍ਵਾ ਕਮ੍ਮਂ ਕਾਤਬ੍ਬਂ. ਅਨ੍ਤੋਨਦਿਯਂ ਬਦ੍ਧਅਟ੍ਟਕੇਪਿ ਅਨ੍ਤੋਨਦਿਯਂ ਜਾਤਰੁਕ੍ਖੇਪਿ ਠਿਤੇਹਿ ਕਾਤੁਂ ਵਟ੍ਟਤਿ. ਸਚੇ ਪਨ ਰੁਕ੍ਖਸ੍ਸ ਸਾਖਾ ਵਾ ਤਤੋ ਨਿਕ੍ਖਨ੍ਤਪਾਰੋਹੋ ਵਾ ਬਹਿਨਦੀਤੀਰੇ ਵਿਹਾਰਸੀਮਾਯ ਵਾ ਗਾਮਸੀਮਾਯ ਵਾ ਪਤਿਟ੍ਠਿਤੋ, ਸੀਮਂ ਵਾ ਸੋਧੇਤ੍ਵਾ ਸਾਖਂ ਵਾ ਛਿਨ੍ਦਿਤ੍ਵਾ ਕਮ੍ਮਂ ਕਾਤਬ੍ਬਂ. ਬਹਿਨਦੀਤੀਰੇ ਜਾਤਰੁਕ੍ਖਸ੍ਸ ਅਨ੍ਤੋਨਦਿਯਂ ਪਵਿਟ੍ਠਸਾਖਾਯ ਵਾ ਪਾਰੋਹੇ ਵਾ ਨਾਵਂ ਬਨ੍ਧਿਤ੍ਵਾ ਕਮ੍ਮਂ ਕਾਤੁਂ ਨ ਵਟ੍ਟਤਿ, ਕਰੋਨ੍ਤੇਹਿ ਸੀਮਾ ਵਾ ਸੋਧੇਤਬ੍ਬਾ, ਛਿਨ੍ਦਿਤ੍ਵਾ ਵਾਸ੍ਸ ਬਹਿਪਤਿਟ੍ਠਿਤਭਾਵੋ ਨਾਸੇਤਬ੍ਬੋ. ਨਦੀਤੀਰੇ ਪਨ ਖਾਣੁਕਂ ਕੋਟ੍ਟੇਤ੍ਵਾ ਤਤ੍ਥ ਬਦ੍ਧਨਾਵਾਯ ਨ ਵਟ੍ਟਤਿਯੇਵ. ਨਦਿਯਂ ਸੇਤੁਂ ਕਰੋਨ੍ਤਿ, ਸਚੇ ਅਨ੍ਤੋਨਦਿਯਂਯੇਵ ਸੇਤੁ ਚ ਸੇਤੁਪਾਦਾ ਚ ਹੋਨ੍ਤਿ, ਸੇਤੁਮ੍ਹਿ ਠਿਤੇਹਿ ਕਮ੍ਮਂ ਕਾਤੁਂ ਵਟ੍ਟਤਿ. ਸਚੇ ਪਨ ਸੇਤੁ ਵਾ ਸੇਤੁਪਾਦਾ ਵਾ ਬਹਿਤੀਰੇ ਪਤਿਟ੍ਠਿਤਾ, ਕਮ੍ਮਂ ਕਾਤੁਂ ਨ ਵਟ੍ਟਤਿ, ਸੀਮਂ ਸੋਧੇਤ੍ਵਾ ਕਾਤਬ੍ਬਂ. ਅਥ ਸੇਤੁਪਾਦਾ ਅਨ੍ਤੋ, ਸੇਤੁ ਪਨ ਉਭਿਨ੍ਨਮ੍ਪਿ ਤੀਰਾਨਂ ਉਪਰਿਆਕਾਸੇ ਠਿਤੋ, ਵਟ੍ਟਤਿ.

ਅਨ੍ਤੋਨਦਿਯਂ ਪਾਸਾਣੋ ਵਾ ਦੀਪਕੋ ਵਾ ਹੋਤਿ, ਤਤ੍ਥ ਯਤ੍ਤਕਂ ਪਦੇਸਂ ਪੁਬ੍ਬੇ ਵੁਤ੍ਤਪ੍ਪਕਾਰੇ ਪਕਤਿਵਸ੍ਸਕਾਲੇ ਵਸ੍ਸਾਨਸ੍ਸ ਚਤੂਸੁ ਮਾਸੇਸੁ ਉਦਕਂ ਓਤ੍ਥਰਤਿ, ਸੋ ਨਦੀਸਙ੍ਖ੍ਯਮੇਵ ਗਚ੍ਛਤਿ. ਅਤਿਵੁਟ੍ਠਿਕਾਲੇ ਓਘੇਨ ਓਤ੍ਥਤੋਕਾਸੋ ਨ ਗਹੇਤਬ੍ਬੋ. ਸੋ ਹਿ ਗਾਮਸੀਮਾਸਙ੍ਖ੍ਯਮੇਵ ਗਚ੍ਛਤਿ. ਨਦਿਤੋ ਮਾਤਿਕਂ ਨੀਹਰਨ੍ਤਾ ਨਦਿਯਂ ਆਵਰਣਂ ਕਰੋਨ੍ਤਿ, ਤਂ ਚੇ ਓਤ੍ਥਰਿਤ੍ਵਾ ਵਾ ਵਿਨਿਬ੍ਬਿਜ੍ਝਿਤ੍ਵਾ ਵਾ ਉਦਕਂ ਗਚ੍ਛਤਿ, ਸਬ੍ਬਤ੍ਥ ਪਵਤ੍ਤਨਟ੍ਠਾਨੇ ਕਮ੍ਮਂ ਕਾਤੁਂ ਵਟ੍ਟਤਿ. ਸਚੇ ਪਨ ਆਵਰਣੇਨ ਵਾ ਕੋਟ੍ਟਕਬਨ੍ਧਨੇਨ ਵਾ ਸੋਤਂ ਪਚ੍ਛਿਨ੍ਦਤਿ, ਉਦਕਂ ਨਪ੍ਪਵਤ੍ਤਤਿ, ਅਪ੍ਪਵਤ੍ਤਨਟ੍ਠਾਨੇ ਕਾਤੁਂ ਨ ਵਟ੍ਟਤਿ, ਆਵਰਣਮਤ੍ਤਕੇਪਿ ਕਾਤੁਂ ਨ ਵਟ੍ਟਤਿ. ਸਚੇ ਕੋਚਿ ਆਵਰਣਪ੍ਪਦੇਸੋ ਪੁਬ੍ਬੇ ਵੁਤ੍ਤਪਾਸਾਣਦੀਪਕਪ੍ਪਦੇਸੋ ਵਿਯ ਉਦਕੇਨ ਅਜ੍ਝੋਤ੍ਥਰੀਯਤਿ, ਤਤ੍ਥ ਵਟ੍ਟਤਿ. ਸੋ ਹਿ ਨਦੀਸਙ੍ਖ੍ਯਮੇਵ ਗਚ੍ਛਤਿ. ਨਦਿਂ ਵਿਨਾਸੇਤ੍ਵਾ ਤਲ਼ਾਕਂ ਕਰੋਨ੍ਤਿ, ਹੇਟ੍ਠਾ ਪਾਲ਼ਿਬਦ੍ਧਾ ਉਦਕਂ ਆਗਨ੍ਤ੍ਵਾ ਤਲ਼ਾਕਂ ਪੂਰੇਤ੍ਵਾ ਤਿਟ੍ਠਤਿ, ਏਤ੍ਥ ਕਮ੍ਮਂ ਕਾਤੁਂ ਨ ਵਟ੍ਟਤਿ, ਉਪਰਿ ਪਵਤ੍ਤਨਟ੍ਠਾਨੇ ਹੇਟ੍ਠਾ ਚ ਛਡ੍ਡਿਤੋਦਕਂ ਨਦਿਂ ਓਤਰਿਤ੍ਵਾ ਸਨ੍ਦਨਟ੍ਠਾਨਤੋ ਪਟ੍ਠਾਯ ਵਟ੍ਟਤਿ. ਦੇਵੇ ਅਵਸ੍ਸਨ੍ਤੇ ਹੇਮਨ੍ਤਗਿਮ੍ਹੇਸੁ ਵਾ ਸੁਕ੍ਖਨਦਿਯਾਪਿ ਵਟ੍ਟਤਿ, ਨਦਿਤੋ ਨੀਹਟਮਾਤਿਕਾਯ ਨ ਵਟ੍ਟਤਿ. ਸਚੇ ਸਾ ਕਾਲਨ੍ਤਰੇਨ ਭਿਜ੍ਜਿਤ੍ਵਾ ਨਦੀ ਹੋਤਿ, ਵਟ੍ਟਤਿ. ਕਾਚਿ ਨਦੀ ਉਪ੍ਪਤਿਤ੍ਵਾ ਗਾਮਨਿਗਮਸੀਮਂ ਓਤ੍ਥਰਿਤ੍ਵਾ ਪਵਤ੍ਤਤਿ, ਨਦੀਯੇਵ ਹੋਤਿ, ਕਮ੍ਮਂ ਕਾਤੁਂ ਵਟ੍ਟਤਿ. ਸਚੇ ਪਨ ਵਿਹਾਰਸੀਮਂ ਓਤ੍ਥਰਤਿ, ਵਿਹਾਰਸੀਮਾਤ੍ਵੇਵ ਸਙ੍ਖ੍ਯਂ ਗਚ੍ਛਤਿ.

ਸਮੁਦ੍ਦੇਪਿ ਕਮ੍ਮਂ ਕਰੋਨ੍ਤੇਹਿ ਯਂ ਪਦੇਸਂ ਉਦ੍ਧਂ ਵਡ੍ਢਨਉਦਕਂ ਵਾ ਪਕਤਿਵੀਚਿ ਵਾ ਵੇਗੇਨ ਆਗਨ੍ਤ੍ਵਾ ਓਤ੍ਥਰਤਿ, ਤਤ੍ਥ ਕਾਤੁਂ ਨ ਵਟ੍ਟਤਿ. ਯਸ੍ਮਿਂ ਪਨ ਪਦੇਸੇ ਪਕਤਿਵੀਚਿਯੋ ਓਸਰਿਤ੍ਵਾ ਸਣ੍ਠਹਨ੍ਤਿ, ਸੋ ਉਦਕਨ੍ਤਤੋ ਪਟ੍ਠਾਯ ਅਨ੍ਤੋ ਸਮੁਦ੍ਦੋ ਨਾਮ, ਤਤ੍ਥ ਠਿਤੇਹਿ ਕਮ੍ਮਂ ਕਾਤਬ੍ਬਂ. ਸਚੇ ਊਮਿਵੇਗੋ ਬਾਧਤਿ, ਨਾਵਾਯ ਵਾ ਅਟ੍ਟਕੇ ਵਾ ਠਤ੍ਵਾ ਕਾਤਬ੍ਬਂ. ਤੇਸੁ ਵਿਨਿਚ੍ਛਯੋ ਨਦਿਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਸਮੁਦ੍ਦੇ ਪਿਟ੍ਠਿਪਾਸਾਣੋ ਹੋਤਿ, ਤਂ ਕਦਾਚਿ ਊਮਿਯੋ ਆਗਨ੍ਤ੍ਵਾ ਓਤ੍ਥਰਨ੍ਤਿ, ਕਦਾਚਿ ਨ ਓਤ੍ਥਰਨ੍ਤਿ, ਤਤ੍ਥ ਕਮ੍ਮਂ ਕਾਤੁਂ ਨ ਵਟ੍ਟਤਿ. ਸੋ ਹਿ ਗਾਮਸੀਮਾਸਙ੍ਖ੍ਯਮੇਵ ਗਚ੍ਛਤਿ. ਸਚੇ ਪਨ ਵੀਚੀਸੁ ਆਗਤਾਸੁਪਿ ਅਨਾਗਤਾਸੁਪਿ ਪਕਤਿਉਦਕੇਨੇਵ ਓਤ੍ਥਰੀਯਤਿ, ਵਟ੍ਟਤਿ. ਦੀਪਕੋ ਵਾ ਪਬ੍ਬਤੋ ਵਾ ਹੋਤਿ, ਸੋ ਚੇ ਦੂਰੇ ਹੋਤਿ ਮਚ੍ਛਬਨ੍ਧਾਨਂ ਅਗਮਨਪਥੇ, ਅਰਞ੍ਞਸੀਮਾਸਙ੍ਖ੍ਯਮੇਵ ਗਚ੍ਛਤਿ. ਤੇਸਂ ਗਮਨਪਰਿਯਨ੍ਤਸ੍ਸ ਓਰਤੋ ਪਨ ਗਾਮਸੀਮਾਸਙ੍ਖ੍ਯਂ ਗਚ੍ਛਤਿ, ਤਤ੍ਥ ਗਾਮਸੀਮਂ ਅਸੋਧੇਤ੍ਵਾ ਕਮ੍ਮਂ ਕਾਤੁਂ ਨ ਵਟ੍ਟਤਿ. ਸਮੁਦ੍ਦੋ ਗਾਮਸੀਮਂ ਵਾ ਨਿਗਮਸੀਮਂ ਵਾ ਓਤ੍ਥਰਿਤ੍ਵਾ ਤਿਟ੍ਠਤਿ, ਸਮੁਦ੍ਦੋਵ ਹੋਤਿ, ਤਤ੍ਥ ਕਮ੍ਮਂ ਕਾਤੁਂ ਵਟ੍ਟਤਿ. ਸਚੇ ਪਨ ਵਿਹਾਰਸੀਮਂ ਓਤ੍ਥਰਤਿ, ਵਿਹਾਰਸੀਮਾਤ੍ਵੇਵ ਸਙ੍ਖ੍ਯਂ ਗਚ੍ਛਤਿ.

ਜਾਤਸ੍ਸਰੇ ਕਮ੍ਮਂ ਕਰੋਨ੍ਤੇਹਿ ਯਤ੍ਥ ਪੁਬ੍ਬੇ ਵੁਤ੍ਤਪ੍ਪਕਾਰੇ ਵਸ੍ਸਕਾਲੇ ਵਸ੍ਸੇ ਪਚ੍ਛਿਨ੍ਨਮਤ੍ਤੇ ਪਿਵਿਤੁਂ ਵਾ ਹਤ੍ਥਪਾਦੇ ਵਾ ਧੋਵਿਤੁਂ ਉਦਕਂ ਨ ਹੋਤਿ, ਸੁਕ੍ਖਤਿ, ਅਯਂ ਨ ਜਾਤਸ੍ਸਰੋ, ਗਾਮਖੇਤ੍ਤਸਙ੍ਖ੍ਯਮੇਵ ਗਚ੍ਛਤਿ, ਤਤ੍ਥ ਕਮ੍ਮਂ ਨ ਕਾਤਬ੍ਬਂ. ਯਤ੍ਥ ਪਨ ਵੁਤ੍ਤਪ੍ਪਕਾਰੇ ਵਸ੍ਸਕਾਲੇ ਉਦਕਂ ਸਨ੍ਤਿਟ੍ਠਤਿ, ਅਯਮੇਵ ਜਾਤਸ੍ਸਰੋ. ਤਸ੍ਸ ਯਤ੍ਤਕੇ ਪਦੇਸੇ ਵਸ੍ਸਾਨਂ ਚਾਤੁਮਾਸੇ ਉਦਕਂ ਤਿਟ੍ਠਤਿ, ਤਤ੍ਥ ਕਮ੍ਮਂ ਕਾਤੁਂ ਵਟ੍ਟਤਿ. ਸਚੇ ਗਮ੍ਭੀਰਂ ਉਦਕਂ, ਅਟ੍ਟਕਂ ਬਨ੍ਧਿਤ੍ਵਾ ਤਤ੍ਥ ਠਿਤੇਹਿਪਿ ਜਾਤਸ੍ਸਰਸ੍ਸ ਅਨ੍ਤੋਜਾਤਰੁਕ੍ਖਮ੍ਹਿ ਬਦ੍ਧਅਟ੍ਟਕੇਪਿ ਕਾਤੁਂ ਵਟ੍ਟਤਿ. ਪਿਟ੍ਠਿਪਾਸਾਣਦੀਪਕੇਸੁ ਪਨੇਤ੍ਥ ਨਦਿਯਂ ਵੁਤ੍ਤਸਦਿਸੋਵ ਵਿਨਿਚ੍ਛਯੋ. ਸਮਵਸ੍ਸਦੇਵਕਾਲੇ ਪਹੋਨਕਜਾਤਸ੍ਸਰੋ ਪਨ ਚੇਪਿ ਦੁਬ੍ਬੁਟ੍ਠਿਕਕਾਲੇ ਵਾ ਗਿਮ੍ਹਹੇਮਨ੍ਤੇਸੁ ਵਾ ਸੁਕ੍ਖਤਿ, ਨਿਰੁਦਕੋ ਹੋਤਿ, ਤਤ੍ਥ ਸਙ੍ਘਕਮ੍ਮਂ ਕਾਤੁਂ ਵਟ੍ਟਤਿ. ਯਂ ਅਨ੍ਧਕਟ੍ਠਕਥਾਯਂ ਵੁਤ੍ਤਂ ‘‘ਸਬ੍ਬੋ ਜਾਤਸ੍ਸਰੋ ਸੁਕ੍ਖੋ ਅਨੋਦਕੋ ਗਾਮਖੇਤ੍ਤਂਯੇਵ ਭਜਤੀ’’ਤਿ, ਤਂ ਨ ਗਹੇਤਬ੍ਬਂ. ਸਚੇ ਪਨੇਤ੍ਥ ਉਦਕਤ੍ਥਾਯ ਆਵਾਟਂ ਵਾ ਪੋਕ੍ਖਰਣੀਆਦੀਨਿ ਵਾ ਖਣਨ੍ਤਿ, ਤਂ ਠਾਨਂ ਅਜਾਤਸ੍ਸਰੋ ਹੋਤਿ, ਗਾਮਸੀਮਾਸਙ੍ਖ੍ਯਂ ਗਚ੍ਛਤਿ. ਲਾਬੁਤਿਪੁਸਕਾਦਿਵਪ੍ਪੇ ਕਤੇਪਿ ਏਸੇਵ ਨਯੋ. ਸਚੇ ਪਨ ਨਂ ਪੂਰੇਤ੍ਵਾ ਥਲਂ ਵਾ ਕਰੋਨ੍ਤਿ, ਏਕਸ੍ਮਿਂ ਦਿਸਾਭਾਗੇ ਪਾਲ਼ਿਂ ਬਨ੍ਧਿਤ੍ਵਾ ਸਬ੍ਬਮੇਵ ਨਂ ਮਹਾਤਲ਼ਾਕਂ ਵਾ ਕਰੋਨ੍ਤਿ, ਸਬ੍ਬੋਪਿ ਅਜਾਤਸ੍ਸਰੋ ਹੋਤਿ, ਗਾਮਸੀਮਾਸਙ੍ਖ੍ਯਂ ਗਚ੍ਛਤਿ. ਲੋਣੀਪਿ ਜਾਤਸ੍ਸਰਸਙ੍ਖ੍ਯਮੇਵ ਗਚ੍ਛਤਿ. ਵਸ੍ਸਿਕੇ ਚਤ੍ਤਾਰੋ ਮਾਸੇ ਉਦਕਟ੍ਠਾਨੋਕਾਸੇ ਕਮ੍ਮਂ ਕਾਤੁਂ ਵਟ੍ਟਤੀਤਿ. ਅਯਂ ਅਬਦ੍ਧਸੀਮਾਯ ਵਿਨਿਚ੍ਛਯੋ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਸੀਮਾਵਿਨਿਚ੍ਛਯਕਥਾ ਸਮਤ੍ਤਾ.