੨੨. ਪਬ੍ਬਜ੍ਜਾਵਿਨਿਚ੍ਛਯਕਥਾ

੧੨੩. ਪਬ੍ਬਜ੍ਜਾਤਿ ਏਤ੍ਥ ਪਨ ਪਬ੍ਬਜ੍ਜਾਪੇਕ੍ਖਂ ਕੁਲਪੁਤ੍ਤਂ ਪਬ੍ਬਾਜੇਨ੍ਤੇਨ ਯੇ ਪਾਲ਼ਿਯਂ ‘‘ਨ ਭਿਕ੍ਖਵੇ ਪਞ੍ਚਹਿ ਆਬਾਧੇਹਿ ਫੁਟ੍ਠੋ ਪਬ੍ਬਾਜੇਤਬ੍ਬੋ’’ਤਿਆਦਿਨਾ (ਮਹਾਵ. ੮੯) ਪਟਿਕ੍ਖਿਤ੍ਤਾ ਪੁਗ੍ਗਲਾ, ਤੇ ਵਜ੍ਜੇਤ੍ਵਾ ਪਬ੍ਬਜ੍ਜਾਦੋਸਵਿਰਹਿਤੋ ਪੁਗ੍ਗਲੋ ਪਬ੍ਬਾਜੇਤਬ੍ਬੋ. ਤਤ੍ਰਾਯਂ ਵਿਨਿਚ੍ਛਯੋ (ਮਹਾਵ. ਅਟ੍ਠ. ੮੮) – ਕੁਟ੍ਠਂ ਗਣ੍ਡੋ ਕਿਲਾਸੋ ਸੋਸੋ ਅਪਮਾਰੋਤਿ ਇਮੇਹਿ ਪਞ੍ਚਹਿ ਆਬਾਧੇਹਿ ਫੁਟ੍ਠੋ ਨ ਪਬ੍ਬਾਜੇਤਬ੍ਬੋ, ਪਬ੍ਬਾਜੇਨ੍ਤੋ ਪਨ ਦੁਕ੍ਕਟਂ ਆਪਜ੍ਜਤਿ ‘‘ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਤ੍ਤਾ. ਤਤ੍ਥ ਕੁਟ੍ਠਨ੍ਤਿ ਰਤ੍ਤਕੁਟ੍ਠਂ ਵਾ ਹੋਤੁ ਕਾਲ਼ਕੁਟ੍ਠਂ ਵਾ, ਯਂ ਕਿਞ੍ਚਿ ਕਿਟਿਭਦਦ੍ਦਉਕਚ੍ਛੁਆਦਿਪ੍ਪਭੇਦਮ੍ਪਿ ਸਬ੍ਬਂ ਕੁਟ੍ਠਮੇਵਾਤਿ ਵੁਤ੍ਤਂ. ਤਞ੍ਚੇ ਨਖਪਿਟ੍ਠਿਪ੍ਪਮਾਣਮ੍ਪਿ ਵਡ੍ਢਨਕਪਕ੍ਖੇ ਠਿਤਂ ਹੋਤਿ, ਨ ਪਬ੍ਬਾਜੇਤਬ੍ਬੋ. ਸਚੇ ਪਨ ਨਿਵਾਸਨਪਾਵੁਰਣੇਹਿ ਪਕਤਿਪਟਿਚ੍ਛਨ੍ਨਟ੍ਠਾਨੇ ਨਖਪਿਟ੍ਠਿਪ੍ਪਮਾਣਂ ਅਵਡ੍ਢਨਕਪਕ੍ਖੇ ਠਿਤਂ ਹੋਤਿ, ਵਟ੍ਟਤਿ. ‘‘ਮੁਖੇ ਪਨ ਹਤ੍ਥਪਾਦਪਿਟ੍ਠੀਸੁ ਵਾ ਸਚੇਪਿ ਅਵਡ੍ਢਨਕਪਕ੍ਖੇ ਠਿਤਂ, ਨਖਪਿਟ੍ਠਿਤੋ ਚ ਖੁਦ੍ਦਕਤਰਮ੍ਪਿ ਨ ਵਟ੍ਟਤਿਯੇਵਾ’’ਤਿ ਕੁਰੁਨ੍ਦਿਯਂ ਵੁਤ੍ਤਂ. ਤਿਕਿਚ੍ਛਾਪੇਤ੍ਵਾ ਪਬ੍ਬਾਜੇਨ੍ਤੇਨਪਿ ਪਕਤਿਵਣ੍ਣੇ ਜਾਤੇਯੇਵ ਪਬ੍ਬਾਜੇਤਬ੍ਬੋ, ਗੋਧਾਪਿਟ੍ਠਿਸਦਿਸਚੁਣ੍ਣਓਕਿਰਣਸਰੀਰਮ੍ਪਿ ਪਬ੍ਬਾਜੇਤੁਂ ਨ ਵਟ੍ਟਤਿ.

ਗਣ੍ਡੋਤਿ ਮੇਦਗਣ੍ਡੋ ਵਾ ਹੋਤੁ ਅਞ੍ਞੋ ਵਾ, ਯੋ ਕੋਚਿ ਕੋਲਟ੍ਠਿਮਤ੍ਤਕੋਪਿ ਚੇ ਵਡ੍ਢਨਕਪਕ੍ਖੇ ਠਿਤੋ ਗਣ੍ਡੋ ਹੋਤਿ, ਨ ਪਬ੍ਬਾਜੇਤਬ੍ਬੋ. ਪਟਿਚ੍ਛਨ੍ਨਟ੍ਠਾਨੇ ਪਨ ਕੋਲਟ੍ਠਿਮਤ੍ਤੇ ਅਵਡ੍ਢਨਕਪਕ੍ਖੇ ਠਿਤੇ ਵਟ੍ਟਤਿ, ਮੁਖਾਦਿਕੇ ਅਪ੍ਪਟਿਚ੍ਛਨ੍ਨਟ੍ਠਾਨੇ ਅਵਡ੍ਢਨਕਪਕ੍ਖੇ ਠਿਤੇਪਿ ਨ ਵਟ੍ਟਤਿ. ਤਿਕਿਚ੍ਛਾਪੇਤ੍ਵਾ ਪਬ੍ਬਾਜੇਨ੍ਤੇਨਪਿ ਸਰੀਰਂ ਸਚ੍ਛਵਿਂ ਕਾਰਾਪੇਤ੍ਵਾ ਪਬ੍ਬਾਜੇਤਬ੍ਬੋ. ਉਣ੍ਣਿਗਣ੍ਡਾ ਨਾਮ ਹੋਨ੍ਤਿ ਗੋਥਨਕਾ ਵਿਯ ਅਙ੍ਗੁਲਿਕਾ ਵਿਯ ਚ ਤਤ੍ਥ ਤਤ੍ਥ ਲਮ੍ਬਨ੍ਤਿ, ਏਤੇਪਿ ਗਣ੍ਡਾਯੇਵ, ਤੇਸੁ ਸਤਿ ਪਬ੍ਬਾਜੇਤੁਂ ਨ ਵਟ੍ਟਤਿ. ਦਹਰਕਾਲੇ ਖੀਰਪੀਲ਼ਕਾ ਯੋਬ੍ਬਨ੍ਨਕਾਲੇ ਚ ਮੁਖੇ ਖਰਪੀਲ਼ਕਾ ਨਾਮ ਹੋਨ੍ਤਿ, ਮਹਲ੍ਲਕਕਾਲੇ ਨਸ੍ਸਨ੍ਤਿ, ਨ ਤਾ ਗਣ੍ਡਸਙ੍ਖ੍ਯਂ ਗਚ੍ਛਨ੍ਤਿ, ਤਾਸੁ ਸਤਿ ਪਬ੍ਬਾਜੇਤੁਂ ਵਟ੍ਟਤਿ. ਅਞ੍ਞਾ ਪਨ ਸਰੀਰੇ ਖਰਪੀਲ਼ਕਾ ਨਾਮ, ਅਪਰਾ ਪਦੁਮਕਣ੍ਣਿਕਾ ਨਾਮ ਹੋਨ੍ਤਿ, ਅਞ੍ਞਾ ਸਾਸਪਬੀਜਕਾ ਨਾਮ ਸਾਸਪਮਤ੍ਤਾਯੇਵ ਸਕਲਸਰੀਰਂ ਫਰਨ੍ਤਿ, ਸਬ੍ਬਾ ਕੁਟ੍ਠਜਾਤਿਕਾਵ, ਤਾਸੁ ਸਤਿ ਨ ਪਬ੍ਬਾਜੇਤਬ੍ਬੋ.

ਕਿਲਾਸੋਤਿ ਨ ਭਿਜ੍ਜਨਕਂ ਨ ਪਗ੍ਘਰਣਕਂ ਪਦੁਮਪੁਣ੍ਡਰੀਕਪਤ੍ਤਵਣ੍ਣਂ ਕੁਟ੍ਠਂ. ਯੇਨ ਗੁਨ੍ਨਂ ਵਿਯ ਸਬਲਂ ਸਰੀਰਂ ਹੋਤਿ, ਤਸ੍ਮਿਂ ਕੁਟ੍ਠੇ ਵੁਤ੍ਤਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ. ਸੋਸੋਤਿ ਸੋਸਬ੍ਯਾਧਿ. ਤਸ੍ਮਿਂ ਸਤਿ ਨ ਪਬ੍ਬਾਜੇਤਬ੍ਬੋ. ਅਪਮਾਰੋਤਿ ਪਿਤ੍ਤੁਮ੍ਮਾਦੋ ਵਾ ਯਕ੍ਖੁਮ੍ਮਾਦੋ ਵਾ. ਤਤ੍ਥ ਪੁਬ੍ਬਵੇਰਿਕੇਨ ਅਮਨੁਸ੍ਸੇਨ ਗਹਿਤੋ ਦੁਤ੍ਤਿਕਿਚ੍ਛੋ ਹੋਤਿ, ਅਪ੍ਪਮਤ੍ਤਕੇਪਿ ਪਨ ਅਪਮਾਰੇ ਸਤਿ ਨ ਪਬ੍ਬਾਜੇਤਬ੍ਬੋ.

੧੨੪. ‘‘ਨ, ਭਿਕ੍ਖਵੇ, ਰਾਜਭਟੋ ਪਬ੍ਬਾਜੇਤਬ੍ਬੋ, ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੯੦) ਵਚਨਤੋ ਰਾਜਭਟੋਪਿ ਨ ਪਬ੍ਬਾਜੇਤਬ੍ਬੋ. ਏਤ੍ਥ ਚ ਅਮਚ੍ਚੋ ਵਾ ਹੋਤੁ ਮਹਾਮਤ੍ਤੋ ਵਾ ਸੇਵਕੋ ਵਾ ਕਿਞ੍ਚਿ ਠਾਨਨ੍ਤਰਂ ਪਤ੍ਤੋ ਵਾ ਅਪ੍ਪਤ੍ਤੋ ਵਾ, ਯੋ ਕੋਚਿ ਰਞ੍ਞੋ ਭਤ੍ਤਵੇਤਨਭਟੋ, ਸਬ੍ਬੋ ਰਾਜਭਟੋਤਿ ਸਙ੍ਖ੍ਯਂ ਗਚ੍ਛਤਿ, ਸੋ ਨ ਪਬ੍ਬਾਜੇਤਬ੍ਬੋ. ਤਸ੍ਸ ਪਨ ਪੁਤ੍ਤਨਤ੍ਤਭਾਤੁਕਾ ਯੇ ਰਾਜਤੋ ਭਤ੍ਤਵੇਤਨਂ ਨ ਗਣ੍ਹਨ੍ਤਿ, ਤੇ ਪਬ੍ਬਾਜੇਤੁਂ ਵਟ੍ਟਤਿ. ਯੋ ਪਨ ਰਾਜਤੋ ਲਦ੍ਧਂ ਨਿਬਦ੍ਧਭੋਗਂ ਵਾ ਮਾਸਸਂਵਚ੍ਛਰਪਰਿਬ੍ਬਯਂ ਵਾ ਰਞ੍ਞੋਯੇਵ ਨਿਯ੍ਯਾਦੇਤਿ, ਪੁਤ੍ਤਭਾਤੁਕੇ ਵਾ ਤਂ ਠਾਨਂ ਸਮ੍ਪਟਿਚ੍ਛਾਪੇਤ੍ਵਾ ਰਾਜਾਨਂ ‘‘ਨ ਦਾਨਾਹਂ ਦੇਵਸ੍ਸ ਭਟੋ’’ਤਿ ਆਪੁਚ੍ਛਤਿ, ਯੇਨ ਵਾ ਯਂਕਾਰਣਾ ਵੇਤਨਂ ਗਹਿਤਂ, ਤਂ ਕਮ੍ਮਂ ਕਤਂ ਹੋਤਿ, ਯੋ ਵਾ ‘‘ਪਬ੍ਬਜਸ੍ਸੂ’’ਤਿ ਰਞ੍ਞਾ ਅਨੁਞ੍ਞਾਤੋ ਹੋਤਿ, ਤਮ੍ਪਿ ਪਬ੍ਬਾਜੇਤੁਂ ਵਟ੍ਟਤਿ.

੧੨੫. ਚੋਰੋਪਿ ਧਜਬਨ੍ਧੋ ਨ ਪਬ੍ਬਾਜੇਤਬ੍ਬੋ ‘‘ਨ, ਭਿਕ੍ਖਵੇ, ਧਜਬਨ੍ਧੋ ਚੋਰੋ ਪਬ੍ਬਾਜੇਤਬ੍ਬੋ, ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੯੧) ਵੁਤ੍ਤਤ੍ਤਾ. ਤਤ੍ਥ ਧਜਂ ਬਨ੍ਧਿਤ੍ਵਾ ਵਿਯ ਵਿਚਰਤੀਤਿ ਧਜਬਨ੍ਧੋ, ਮੂਲਦੇਵਾਦਯੋ ਵਿਯ ਲੋਕੇ ਪਾਕਟੋਤਿ ਵੁਤ੍ਤਂ ਹੋਤਿ. ਤਸ੍ਮਾ ਯੋ ਗਾਮਘਾਤਂ ਵਾ ਪਨ੍ਥਦੁਹਨਂ ਵਾ ਨਗਰੇ ਸਨ੍ਧਿਚ੍ਛੇਦਾਦਿਕਮ੍ਮਂ ਵਾ ਕਰੋਨ੍ਤੋ ਵਿਚਰਤਿ, ਪਞ੍ਞਾਯਤਿ ਚ ‘‘ਅਸੁਕੋ ਨਾਮ ਇਦਂ ਇਦਂ ਕਰੋਤੀ’’ਤਿ, ਸੋ ਨ ਪਬ੍ਬਾਜੇਤਬ੍ਬੋ. ਯੋ ਪਨ ਰਾਜਪੁਤ੍ਤੋ ਰਜ੍ਜਂ ਪਤ੍ਥੇਨ੍ਤੋ ਗਾਮਘਾਤਾਦੀਨਿ ਕਰੋਤਿ, ਸੋ ਪਬ੍ਬਾਜੇਤਬ੍ਬੋ. ਰਾਜਾਨੋ ਹਿ ਤਸ੍ਮਿਂ ਪਬ੍ਬਜਿਤੇ ਤੁਸ੍ਸਨ੍ਤਿ, ਸਚੇ ਪਨ ਨ ਤੁਸ੍ਸਨ੍ਤਿ, ਨ ਪਬ੍ਬਾਜੇਤਬ੍ਬੋ. ਪੁਬ੍ਬੇ ਮਹਾਜਨੇ ਪਾਕਟੋ ਚੋਰੋ ਪਚ੍ਛਾ ਚੋਰਕਮ੍ਮਂ ਪਹਾਯ ਪਞ੍ਚ ਸੀਲਾਨਿ ਸਮਾਦਿਯਤਿ, ਤਞ੍ਚੇ ਮਨੁਸ੍ਸਾ ਏਵਂ ਜਾਨਨ੍ਤਿ, ਪਬ੍ਬਾਜੇਤਬ੍ਬੋ. ਯੇ ਪਨ ਅਮ੍ਬਲਬੁਜਾਦਿਚੋਰਕਾ ਸਨ੍ਧਿਚ੍ਛੇਦਾਦਿਚੋਰਾ ਏਵ ਵਾ ਅਦਿਸ੍ਸਮਾਨਾ ਥੇਯ੍ਯਂ ਕਰੋਨ੍ਤਿ, ਪਚ੍ਛਾਪਿ ‘‘ਇਮਿਨਾ ਨਾਮ ਇਦਂ ਕਤ’’ਨ੍ਤਿ ਨ ਪਞ੍ਞਾਯਨ੍ਤਿ, ਤੇਪਿ ਪਬ੍ਬਾਜੇਤੁਂ ਵਟ੍ਟਤਿ.

੧੨੬. ਕਾਰਭੇਦਕੋ ਪਨ ਚੋਰੋ ਨ ਪਬ੍ਬਾਜੇਤਬ੍ਬੋ ‘‘ਨ, ਭਿਕ੍ਖਵੇ, ਕਾਰਭੇਦਕੋ ਚੋਰੋ ਪਬ੍ਬਾਜੇਤਬ੍ਬੋ, ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੯੨) ਵੁਤ੍ਤਤ੍ਤਾ. ਤਤ੍ਥ ਕਾਰੋ ਵੁਚ੍ਚਤਿ ਬਨ੍ਧਨਾਗਾਰਂ. ਇਧ ਪਨ ਅਨ੍ਦੁਬਨ੍ਧਨਂ ਵਾ ਹੋਤੁ ਸਙ੍ਖਲਿਕਬਨ੍ਧਨਂ ਵਾ ਰਜ੍ਜੁਬਨ੍ਧਨਂ ਵਾ ਗਾਮਬਨ੍ਧਨਂ ਵਾ ਨਿਗਮਬਨ੍ਧਨਂ ਵਾ ਨਗਰਬਨ੍ਧਨਂ ਵਾ ਪੁਰਿਸਗੁਤ੍ਤਿ ਵਾ ਜਨਪਦਬਨ੍ਧਨਂ ਵਾ ਦੀਪਬਨ੍ਧਨਂ ਵਾ, ਯੋ ਏਤੇਸੁ ਯਂ ਕਿਞ੍ਚਿ ਬਨ੍ਧਨਂ ਭਿਨ੍ਦਿਤ੍ਵਾ ਵਾ ਛਿਨ੍ਦਿਤ੍ਵਾ ਵਾ ਮੁਞ੍ਚਿਤ੍ਵਾ ਵਾ ਵਿਵਰਿਤ੍ਵਾ ਵਾ ਅਪਸ੍ਸਮਾਨਾਨਂ ਵਾ ਪਲਾਯਤਿ, ਸੋ ਕਾਰਭੇਦਕੋਤਿ ਸਙ੍ਖ੍ਯਂ ਗਚ੍ਛਤਿ. ਤਸ੍ਮਾ ਈਦਿਸੋ ਕਾਰਭੇਦਕੋ ਚੋਰੋ ਦੀਪਬਨ੍ਧਨਂ ਭਿਨ੍ਦਿਤ੍ਵਾ ਦੀਪਨ੍ਤਰਂ ਗਤੋਪਿ ਨ ਪਬ੍ਬਾਜੇਤਬ੍ਬੋ. ਯੋ ਪਨ ਨ ਚੋਰੋ, ਕੇਵਲਂ ਹਤ੍ਥਕਮ੍ਮਂ ਅਕਰੋਨ੍ਤੋ ‘‘ਏਵਂ ਨੋ ਅਪਲਾਯਨ੍ਤੋ ਕਰਿਸ੍ਸਤੀ’’ਤਿ ਰਾਜਯੁਤ੍ਤਾਦੀਹਿ ਬਦ੍ਧੋ, ਸੋ ਕਾਰਂ ਭਿਨ੍ਦਿਤ੍ਵਾ ਪਲਾਤੋਪਿ ਪਬ੍ਬਾਜੇਤਬ੍ਬੋ. ਯੋ ਪਨ ਗਾਮਨਿਗਮਪਟ੍ਟਨਾਦੀਨਿ ਕੇਣਿਯਾ ਗਹੇਤ੍ਵਾ ਤਂ ਅਸਮ੍ਪਾਦੇਨ੍ਤੋ ਬਨ੍ਧਨਾਗਾਰਂ ਪਵੇਸਿਤੋ ਹੋਤਿ, ਸੋਪਿ ਪਲਾਯਿਤ੍ਵਾ ਆਗਤੋ ਨ ਪਬ੍ਬਾਜੇਤਬ੍ਬੋ. ਯੋਪਿ ਕਸਿਕਮ੍ਮਾਦੀਹਿ ਧਨਂ ਸਮ੍ਪਾਦੇਤ੍ਵਾ ਜੀਵਨ੍ਤੋ ‘‘ਨਿਧਾਨਂ ਇਮਿਨਾ ਲਦ੍ਧ’’ਨ੍ਤਿ ਪੇਸੁਞ੍ਞਂ ਉਪਸਂਹਰਿਤ੍ਵਾ ਕੇਨਚਿ ਬਨ੍ਧਾਪਿਤੋ ਹੋਤਿ, ਤਂ ਤਤ੍ਥੇਵ ਪਬ੍ਬਾਜੇਤੁਂ ਨ ਵਟ੍ਟਤਿ, ਪਲਾਯਿਤ੍ਵਾ ਗਤਂ ਪਨ ਗਤਟ੍ਠਾਨੇ ਪਬ੍ਬਾਜੇਤੁਂ ਵਟ੍ਟਤਿ.

੧੨੭. ‘‘ਨ, ਭਿਕ੍ਖਵੇ, ਲਿਖਿਤਕੋ ਚੋਰੋ ਪਬ੍ਬਾਜੇਤਬ੍ਬੋ, ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੯੩) ਵਚਨਤੋ ਪਨ ਲਿਖਿਤਕੋ ਚੋਰੋ ਨ ਪਬ੍ਬਾਜੇਤਬ੍ਬੋ. ਤਤ੍ਥ ਲਿਖਿਤਕੋ ਨਾਮ ਯੋ ਕੋਚਿ ਚੋਰਿਕਂ ਵਾ ਅਞ੍ਞਂ ਵਾ ਗਰੁਂ ਰਾਜਾਪਰਾਧਂ ਕਤ੍ਵਾ ਪਲਾਤੋ, ਰਾਜਾ ਚ ਨਂ ਪਣ੍ਣੇ ਵਾ ਪੋਤ੍ਥਕੇ ਵਾ ‘‘ਇਤ੍ਥਨ੍ਨਾਮੋ ਯਤ੍ਥ ਦਿਸ੍ਸਤਿ, ਤਤ੍ਥ ਗਹੇਤ੍ਵਾ ਮਾਰੇਤਬ੍ਬੋ’’ਤਿ ਵਾ ‘‘ਹਤ੍ਥਪਾਦਾਦੀਨਿ ਅਸ੍ਸ ਛਿਨ੍ਦਿਤਬ੍ਬਾਨੀ’’ਤਿ ਵਾ ‘‘ਏਤ੍ਤਕਂ ਨਾਮ ਦਣ੍ਡਂ ਆਹਰਾਪੇਤਬ੍ਬੋ’’ਤਿ ਵਾ ਲਿਖਾਪੇਤਿ, ਅਯਂ ਲਿਖਿਤਕੋ ਨਾਮ, ਸੋ ਨ ਪਬ੍ਬਾਜੇਤਬ੍ਬੋ.

੧੨੮. ਕਸਾਹਤੋ ਕਤਦਣ੍ਡਕਮ੍ਮੋਪਿ ਨ ਪਬ੍ਬਾਜੇਤਬ੍ਬੋ ‘‘ਨ, ਭਿਕ੍ਖਵੇ, ਕਸਾਹਤੋ ਕਤਦਣ੍ਡਕਮ੍ਮੋ ਪਬ੍ਬਾਜੇਤਬ੍ਬੋ, ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੯੪) ਵਚਨਤੋ. ਏਤ੍ਥ ਪਨ ਯੋ ਵਚਨਪੇਸਨਾਦੀਨਿ ਅਕਰੋਨ੍ਤੋ ਹਞ੍ਞਤਿ, ਨ ਸੋ ਕਤਦਣ੍ਡਕਮ੍ਮੋ. ਯੋ ਪਨ ਕੇਣਿਯਾ ਵਾ ਅਞ੍ਞਥਾ ਵਾ ਕਿਞ੍ਚਿ ਗਹੇਤ੍ਵਾ ਖਾਦਿਤ੍ਵਾ ਪੁਨ ਦਾਤੁਂ ਅਸਕ੍ਕੋਨ੍ਤੋ ‘‘ਅਯਮੇਵ ਤੇ ਦਣ੍ਡੋ ਹੋਤੂ’’ਤਿ ਕਸਾਹਿ ਹਞ੍ਞਤਿ, ਅਯਮੇਵ ਕਸਾਹਤੋ ਕਤਦਣ੍ਡਕਮ੍ਮੋ. ਸੋ ਚ ਕਸਾਹਿ ਵਾ ਹਤੋ ਹੋਤੁ ਅਡ੍ਢਦਣ੍ਡਕਾਦੀਨਂ ਵਾ ਅਞ੍ਞਤਰੇਨ, ਯਾਵ ਅਲ੍ਲਵਣੋ ਹੋਤਿ, ਨ ਤਾਵ ਪਬ੍ਬਾਜੇਤਬ੍ਬੋ, ਵਣੇ ਪਨ ਪਾਕਤਿਕੇ ਕਤ੍ਵਾ ਪਬ੍ਬਾਜੇਤਬ੍ਬੋ. ਸਚੇ ਪਨ ਜਾਣੂਹਿ ਵਾ ਕਪ੍ਪਰੇਹਿ ਵਾ ਨਾਲ਼ਿਕੇਰਪਾਸਾਣਾਦੀਹਿ ਵਾ ਘਾਤੇਤ੍ਵਾ ਮੁਤ੍ਤੋ ਹੋਤਿ, ਸਰੀਰੇ ਚਸ੍ਸ ਗਣ੍ਠਿਯੋ ਪਞ੍ਞਾਯਨ੍ਤਿ, ਨ ਪਬ੍ਬਾਜੇਤਬ੍ਬੋ, ਫਾਸੁਕਂ ਕਤ੍ਵਾ ਏਵ ਗਣ੍ਠੀਸੁ ਸਨ੍ਨਿਸਿਨ੍ਨਾਸੁ ਪਬ੍ਬਾਜੇਤਬ੍ਬੋ.

੧੨੯. ਲਕ੍ਖਣਾਹਤੋ ਪਨ ਕਤਦਣ੍ਡਕਮ੍ਮੋ ਨ ਪਬ੍ਬਾਜੇਤਬ੍ਬੋ ‘‘ਨ, ਭਿਕ੍ਖਵੇ, ਲਕ੍ਖਣਹਤੋ ਕਤਦਣ੍ਡਕਮ੍ਮੋ ਪਬ੍ਬਾਜੇਤਬ੍ਬੋ, ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੯੫) ਵਚਨਤੋ. ਏਤ੍ਥਪਿ ਕਤਦਣ੍ਡਕਮ੍ਮਭਾਵੋ ਪੁਰਿਮਨਯੇਨੇਵ ਵੇਦਿਤਬ੍ਬੋ. ਯਸ੍ਸ ਪਨ ਨਲਾਟੇ ਵਾ ਊਰੁਆਦੀਸੁ ਵਾ ਤਤ੍ਤੇਨ ਲੋਹੇਨ ਲਕ੍ਖਣਂ ਆਹਤਂ ਹੋਤਿ, ਸੋ ਸਚੇ ਭੁਜਿਸ੍ਸੋ, ਯਾਵ ਅਲ੍ਲਵਣੋ ਹੋਤਿ, ਤਾਵ ਨ ਪਬ੍ਬਾਜੇਤਬ੍ਬੋ. ਸਚੇਪਿਸ੍ਸ ਵਣਾ ਰੁਲ਼੍ਹਾ ਹੋਨ੍ਤਿ ਛਵਿਯਾ ਸਮਪਰਿਚ੍ਛੇਦਾ, ਲਕ੍ਖਣਂ ਨ ਪਞ੍ਞਾਯਤਿ, ਤਿਮਣ੍ਡਲਂ ਨਿਵਤ੍ਥਸ੍ਸ ਉਤ੍ਤਰਾਸਙ੍ਗੇ ਕਤੇ ਪਟਿਚ੍ਛਨ੍ਨੋਕਾਸੇ ਚੇ ਹੋਤਿ, ਪਬ੍ਬਾਜੇਤੁਂ ਵਟ੍ਟਤਿ, ਅਪ੍ਪਟਿਚ੍ਛਨ੍ਨੋਕਾਸੇ ਚੇ, ਨ ਵਟ੍ਟਤਿ.

੧੩੦. ‘‘ਨ, ਭਿਕ੍ਖਵੇ, ਇਣਾਯਿਕੋ ਪਬ੍ਬਾਜੇਤਬ੍ਬੋ, ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੯੬) ਵਚਨਤੋ ਇਣਾਯਿਕੋਪਿ ਨ ਪਬ੍ਬਾਜੇਤਬ੍ਬੋ. ਤਤ੍ਥ ਇਣਾਯਿਕੋ ਨਾਮ ਯਸ੍ਸ ਪਿਤਿਪਿਤਾਮਹੇਹਿ ਵਾ ਇਣਂ ਗਹਿਤਂ ਹੋਤਿ, ਸਯਂ ਵਾ ਇਣਂ ਗਹਿਤਂ ਹੋਤਿ, ਯਂ ਵਾ ਆਠਪੇਤ੍ਵਾ ਮਾਤਾਪਿਤੂਹਿ ਕਿਞ੍ਚਿ ਗਹਿਤਂ ਹੋਤਿ, ਸੋ ਤਂ ਇਣਂ ਪਰੇਸਂ ਧਾਰੇਤੀਤਿ ਇਣਾਯਿਕੋ. ਯਂ ਪਨ ਅਞ੍ਞੇ ਞਾਤਕਾ ਆਠਪੇਤ੍ਵਾ ਕਿਞ੍ਚਿ ਗਣ੍ਹਨ੍ਤਿ, ਸੋ ਨ ਇਣਾਯਿਕੋ. ਨ ਹਿ ਤੇ ਤਂ ਆਠਪੇਤੁਂ ਇਸ੍ਸਰਾ, ਤਸ੍ਮਾ ਤਂ ਪਬ੍ਬਾਜੇਤੁਂ ਵਟ੍ਟਤਿ, ਇਤਰਂ ਨ ਵਟ੍ਟਤਿ. ਸਚੇ ਪਨਸ੍ਸ ਞਾਤਿਸਾਲੋਹਿਤਾ ‘‘ਮਯਂ ਦਸ੍ਸਾਮ, ਪਬ੍ਬਾਜੇਥ ਨ’’ਨ੍ਤਿ ਇਣਂ ਅਤ੍ਤਨੋ ਭਾਰਂ ਕਰੋਨ੍ਤਿ, ਅਞ੍ਞੋ ਵਾ ਕੋਚਿ ਤਸ੍ਸ ਆਚਾਰਸਮ੍ਪਤ੍ਤਿਂ ਦਿਸ੍ਵਾ ‘‘ਪਬ੍ਬਾਜੇਥ ਨਂ, ਅਹਂ ਇਣਂ ਦਸ੍ਸਾਮੀ’’ਤਿ ਵਦਤਿ, ਪਬ੍ਬਾਜੇਤੁਂ ਵਟ੍ਟਤਿ. ਤੇਸੁ ਅਸਤਿ ਭਿਕ੍ਖੁਨਾ ਤਥਾਰੂਪਸ੍ਸ ਉਪਟ੍ਠਾਕਸ੍ਸਪਿ ਆਰੋਚੇਤਬ੍ਬਂ ‘‘ਸਹੇਤੁਕੋ ਸਤ੍ਤੋ ਇਣਪਲਿਬੋਧੇਨ ਨ ਪਬ੍ਬਜਤੀ’’ਤਿ. ਸਚੇ ਸੋ ਪਟਿਪਜ੍ਜਤਿ, ਪਬ੍ਬਾਜੇਤਬ੍ਬੋ. ਸਚੇਪਿ ਅਤ੍ਤਨੋ ਕਪ੍ਪਿਯਭਣ੍ਡਂ ਅਤ੍ਥਿ, ‘‘ਏਤਂ ਦਸ੍ਸਾਮੀ’’ਤਿ ਪਬ੍ਬਾਜੇਤਬ੍ਬੋ. ਸਚੇ ਪਨ ਨੇਵ ਞਾਤਕਾਦਯੋ ਪਟਿਪਜ੍ਜਨ੍ਤਿ, ਨ ਅਤ੍ਤਨੋ ਧਨਂ ਅਤ੍ਥਿ, ‘‘ਪਬ੍ਬਾਜੇਤ੍ਵਾ ਭਿਕ੍ਖਾਯ ਚਰਿਤ੍ਵਾ ਮੋਚੇਸ੍ਸਾਮੀ’’ਤਿ ਪਬ੍ਬਾਜੇਤੁਂ ਨ ਵਟ੍ਟਤਿ. ਸਚੇ ਪਬ੍ਬਾਜੇਤਿ, ਦੁਕ੍ਕਟਂ. ਪਲਾਤੋਪਿ ਆਨੇਤ੍ਵਾ ਦਾਤਬ੍ਬੋ. ਨੋ ਚੇ ਦੇਤਿ, ਸਬ੍ਬਂ ਇਣਂ ਗੀਵਾ ਹੋਤਿ. ਅਜਾਨਿਤ੍ਵਾ ਪਬ੍ਬਾਜਯਤੋ ਅਨਾਪਤ੍ਤਿ, ਪਸ੍ਸਨ੍ਤੇਨ ਪਨ ਆਨੇਤ੍ਵਾ ਇਣਸਾਮਿਕਾਨਂ ਦਸ੍ਸੇਤਬ੍ਬੋ, ਅਪਸ੍ਸਨ੍ਤਸ੍ਸ ਗੀਵਾ ਨ ਹੋਤਿ.

ਸਚੇ ਇਣਾਯਿਕੋ ਅਞ੍ਞਂ ਦੇਸਂ ਗਨ੍ਤ੍ਵਾ ਪੁਚ੍ਛਿਯਮਾਨੋਪਿ ‘‘ਨਾਹਂ ਕਸ੍ਸਚਿ ਕਿਞ੍ਚਿ ਧਾਰੇਮੀ’’ਤਿ ਵਤ੍ਵਾ ਪਬ੍ਬਜਤਿ, ਇਣਸਾਮਿਕੋ ਚ ਤਂ ਪਰਿਯੇਸਨ੍ਤੋ ਤਤ੍ਥ ਗਚ੍ਛਤਿ, ਦਹਰੋ ਤਂ ਦਿਸ੍ਵਾ ਪਲਾਯਤਿ, ਸੋ ਥੇਰਂ ਉਪਸਙ੍ਕਮਿਤ੍ਵਾ ‘‘ਅਯਂ, ਭਨ੍ਤੇ, ਕੇਨ ਪਬ੍ਬਾਜਿਤੋ, ਮਮ ਏਤ੍ਤਕਂ ਨਾਮ ਧਨਂ ਗਹੇਤ੍ਵਾ ਪਲਾਤੋ’’ਤਿ ਵਦਤਿ, ਥੇਰੇਨ ਵਤ੍ਤਬ੍ਬਂ ‘‘ਮਯਾ, ਉਪਾਸਕ, ‘ਅਣਣੋ ਅਹ’ਨ੍ਤਿ ਵਦਨ੍ਤੋ ਪਬ੍ਬਾਜਿਤੋ, ਕਿਂ ਦਾਨਿ ਕਰੋਮਿ, ਪਸ੍ਸ ਮੇ ਪਤ੍ਤਚੀਵਰ’’ਨ੍ਤਿ. ਅਯਂ ਤਤ੍ਥ ਸਾਮੀਚਿ. ਪਲਾਤੇ ਪਨ ਗੀਵਾ ਨ ਹੋਤਿ. ਸਚੇ ਪਨ ਨਂ ਥੇਰਸ੍ਸ ਸਮ੍ਮੁਖਾਵ ਦਿਸ੍ਵਾ ‘‘ਅਯਂ ਮਮ ਇਣਾਯਿਕੋ’’ਤਿ ਵਦਤਿ, ‘‘ਤਵ ਇਣਾਯਿਕਂ ਤ੍ਵਮੇਵ ਜਾਨਾਹੀ’’ਤਿ ਵਤ੍ਤਬ੍ਬੋ, ਏਵਮ੍ਪਿ ਗੀਵਾ ਨ ਹੋਤਿ. ਸਚੇਪਿ ਸੋ ‘‘ਪਬ੍ਬਜਿਤੋ ਅਯਂ ਦਾਨਿ ਕੁਹਿਂ ਗਮਿਸ੍ਸਤੀ’’ਤਿ ਵਦਤਿ, ਥੇਰੇਨ ‘‘ਤ੍ਵਂਯੇਵ ਜਾਨਾਹੀ’’ਤਿ ਵਤ੍ਤਬ੍ਬੋ. ਏਵਮ੍ਪਿਸ੍ਸ ਪਲਾਤੇ ਗੀਵਾ ਨ ਹੋਤਿ. ਸਚੇ ਪਨ ਥੇਰੋ ‘‘ਕੁਹਿਂ ਦਾਨਿ ਅਯਂ ਗਮਿਸ੍ਸਤਿ, ਇਧੇਵ ਅਚ੍ਛਤੂ’’ਤਿ ਵਦਤਿ, ਸੋ ਚੇ ਪਲਾਯਤਿ, ਗੀਵਾ ਹੋਤਿ. ਸਚੇ ਸੋ ਸਹੇਤੁਕੋ ਸਤ੍ਤੋ ਹੋਤਿ ਵਤ੍ਤਸਮ੍ਪਨ੍ਨੋ, ਥੇਰੇਨ ‘‘ਈਦਿਸੋ ਅਯ’’ਨ੍ਤਿ ਵਤ੍ਤਬ੍ਬਂ. ਇਣਸਾਮਿਕੋ ਚੇ ‘‘ਸਾਧੂ’’ਤਿ ਵਿਸ੍ਸਜ੍ਜੇਤਿ, ਇਚ੍ਚੇਤਂ ਕੁਸਲਂ, ‘‘ਉਪਡ੍ਢੁਪਡ੍ਢਂ ਦੇਥਾ’’ਤਿ ਵਦਤਿ, ਦਾਤਬ੍ਬਂ. ਅਪਰੇਨ ਸਮਯੇਨ ਅਤਿਆਰਾਧਕੋ ਹੋਤਿ, ‘‘ਸਬ੍ਬਂ ਦੇਥਾ’’ਤਿ ਵੁਤ੍ਤੇਪਿ ਦਾਤਬ੍ਬਮੇਵ. ਸਚੇ ਪਨ ਉਦ੍ਦੇਸਪਰਿਪੁਚ੍ਛਾਦੀਸੁ ਕੁਸਲੋ ਹੋਤਿ ਬਹੂਪਕਾਰੋ ਭਿਕ੍ਖੂਨਂ, ਭਿਕ੍ਖਾਚਾਰਵਤ੍ਤੇਨ ਪਰਿਯੇਸਿਤ੍ਵਾਪਿ ਇਣਂ ਦਾਤਬ੍ਬਮੇਵ.

੧੩੧. ਦਾਸੋਪਿ ਨ ਪਬ੍ਬਾਜੇਤਬ੍ਬੋ ‘‘ਨ, ਭਿਕ੍ਖਵੇ, ਦਾਸੋ ਪਬ੍ਬਾਜੇਤਬ੍ਬੋ, ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੯੭) ਵਚਨਤੋ. ਤਤ੍ਥ ਚਤ੍ਤਾਰੋ ਦਾਸਾ ਅਨ੍ਤੋਜਾਤੋ ਧਨਕ੍ਕੀਤੋ ਕਰਮਰਾਨੀਤੋ ਸਾਮਂ ਦਾਸਬ੍ਯਂ ਉਪਗਤੋਤਿ. ਤਤ੍ਥ ਅਨ੍ਤੋਜਾਤੋ ਨਾਮ ਜਾਤਿਯਾ ਦਾਸੋ ਘਰਦਾਸਿਯਾ ਪੁਤ੍ਤੋ. ਧਨਕ੍ਕੀਤੋ ਨਾਮ ਮਾਤਾਪਿਤੂਨਂ ਸਨ੍ਤਿਕਾ ਪੁਤ੍ਤੋ ਵਾ ਸਾਮਿਕਾਨਂ ਸਨ੍ਤਿਕਾ ਦਾਸੋ ਵਾ ਧਨਂ ਦਤ੍ਵਾ ਦਾਸਚਾਰਿਤ੍ਤਂ ਆਰੋਪੇਤ੍ਵਾ ਕੀਤੋ. ਏਤੇ ਦ੍ਵੇਪਿ ਨ ਪਬ੍ਬਾਜੇਤਬ੍ਬਾ. ਪਬ੍ਬਾਜੇਨ੍ਤੇਨ ਤਤ੍ਥ ਤਤ੍ਥ ਚਾਰਿਤ੍ਤਵਸੇਨ ਅਦਾਸੇ ਕਤ੍ਵਾ ਪਬ੍ਬਾਜੇਤਬ੍ਬਾ. ਕਰਮਰਾਨੀਤੋ ਨਾਮ ਤਿਰੋਰਟ੍ਠਂ ਵਿਲੋਪਂ ਵਾ ਕਤ੍ਵਾ ਉਪਲਾਪੇਤ੍ਵਾ ਵਾ ਤਿਰੋਰਟ੍ਠਤੋ ਭੁਜਿਸ੍ਸਮਾਨੁਸਕਾਨਿ ਆਹਰਨ੍ਤਿ, ਅਨ੍ਤੋਰਟ੍ਠੇਯੇਵ ਵਾ ਕਤਾਪਰਾਧਂ ਕਿਞ੍ਚਿ ਗਾਮਂ ਰਾਜਾ ‘‘ਵਿਲੁਮ੍ਪਥਾ’’ਤਿ ਚ ਆਣਾਪੇਤਿ, ਤਤੋ ਮਾਨੁਸਕਾਨਿਪਿ ਆਹਰਨ੍ਤਿ, ਤਤ੍ਥ ਸਬ੍ਬੇ ਪੁਰਿਸਾ ਦਾਸਾ, ਇਤ੍ਥਿਯੋ ਦਾਸਿਯੋ. ਏਵਰੂਪੋ ਕਰਮਰਾਨੀਤੋ ਦਾਸੋ ਯੇਹਿ ਆਨੀਤੋ, ਤੇਸਂ ਸਨ੍ਤਿਕੇ ਵਸਨ੍ਤੋ ਵਾ ਬਨ੍ਧਨਾਗਾਰੇ ਬਦ੍ਧੋ ਵਾ ਪੁਰਿਸੇਹਿ ਰਕ੍ਖਿਯਮਾਨੋ ਵਾ ਨ ਪਬ੍ਬਾਜੇਤਬ੍ਬੋ, ਪਲਾਯਿਤ੍ਵਾ ਪਨ ਗਤੋ ਗਤਟ੍ਠਾਨੇ ਪਬ੍ਬਾਜੇਤਬ੍ਬੋ. ਰਞ੍ਞਾ ਤੁਟ੍ਠੇਨ ‘‘ਕਰਮਰਾਨੀਤਕੇ ਮੁਞ੍ਚਥਾ’’ਤਿ ਵਤ੍ਵਾ ਵਾ ਸਬ੍ਬਸਾਧਾਰਣੇਨ ਵਾ ਨਯੇਨ ਬਨ੍ਧਨਮੋਕ੍ਖੇ ਕਤੇ ਪਬ੍ਬਾਜੇਤਬ੍ਬੋਵ.

ਸਾਮਂ ਦਾਸਬ੍ਯਂ ਉਪਗਤੋ ਨਾਮ ਜੀਵਿਤਹੇਤੁ ਵਾ ਆਰਕ੍ਖਹੇਤੁ ਵਾ ‘‘ਅਹਂ ਤੇ ਦਾਸੋ’’ਤਿ ਸਯਮੇਵ ਦਾਸਭਾਵਂ ਉਪਗਤੋ ਰਾਜੂਨਂ ਹਤ੍ਥਿਅਸ੍ਸਗੋਮਹਿਂਸਗੋਪਕਾਦਯੋ ਵਿਯ. ਤਾਦਿਸੋ ਦਾਸੋ ਨ ਪਬ੍ਬਾਜੇਤਬ੍ਬੋ. ਰਞ੍ਞੋ ਵਣ੍ਣਦਾਸੀਨਂ ਪੁਤ੍ਤਾ ਹੋਨ੍ਤਿ ਅਮਚ੍ਚਪੁਤ੍ਤਸਦਿਸਾ, ਤੇਪਿ ਨ ਪਬ੍ਬਾਜੇਤਬ੍ਬਾ. ਭੁਜਿਸ੍ਸਿਤ੍ਥਿਯੋ ਅਸਞ੍ਞਤਾ ਵਣ੍ਣਦਾਸੀਹਿ ਸਦ੍ਧਿਂ ਵਿਚਰਨ੍ਤਿ, ਤਾਸਂ ਪੁਤ੍ਤੇ ਪਬ੍ਬਾਜੇਤੁਂ ਵਟ੍ਟਤਿ. ਸਚੇ ਸਯਮੇਵ ਪਣ੍ਣਂ ਆਰੋਪੇਨ੍ਤਿ, ਨ ਵਟ੍ਟਤਿ. ਭਟਿਪੁਤ੍ਤਗਣਾਦੀਨਂ ਦਾਸਾਪਿ ਤੇਹਿ ਅਦਿਨ੍ਨਾ ਨ ਪਬ੍ਬਾਜੇਤਬ੍ਬਾ. ਵਿਹਾਰੇਸੁ ਰਾਜੂਹਿ ਆਰਾਮਿਕਦਾਸਾ ਨਾਮ ਦਿਨ੍ਨਾ ਹੋਨ੍ਤਿ, ਤੇਪਿ ਪਬ੍ਬਾਜੇਤੁਂ ਨ ਵਟ੍ਟਤਿ, ਭੁਜਿਸ੍ਸੇ ਕਤ੍ਵਾ ਪਨ ਪਬ੍ਬਾਜੇਤੁਂ ਵਟ੍ਟਤਿ. ਮਹਾਪਚ੍ਚਰਿਯਂ ‘‘ਅਨ੍ਤੋਜਾਤਧਨਕ੍ਕੀਤਕੇ ਆਨੇਤ੍ਵਾ ਭਿਕ੍ਖੁਸਙ੍ਘਸ੍ਸ ‘ਆਰਾਮਿਕੇ ਦੇਮਾ’ਤਿ ਦੇਨ੍ਤਿ, ਤਕ੍ਕਂ ਸੀਸੇ ਆਸਿਤ੍ਤਕਸਦਿਸਾਵ ਹੋਨ੍ਤਿ, ਤੇ ਪਬ੍ਬਾਜੇਤੁਂ ਵਟ੍ਟਤੀ’’ਤਿ ਵੁਤ੍ਤਂ. ਕੁਰੁਨ੍ਦਿਯਂ ਪਨ ‘‘ਆਰਾਮਿਕਂ ਦੇਮਾਤਿ ਕਪ੍ਪਿਯਵੋਹਾਰੇਨ ਦੇਨ੍ਤਿ, ਯੇਨ ਕੇਨਚਿ ਵੋਹਾਰੇਨ ਦਿਨ੍ਨੋ ਹੋਤੁ, ਨੇਵ ਪਬ੍ਬਾਜੇਤਬ੍ਬੋ’’ਤਿ ਵੁਤ੍ਤਂ. ਦੁਗ੍ਗਤਮਨੁਸ੍ਸਾ ‘‘ਸਙ੍ਘਂ ਨਿਸ੍ਸਾਯ ਜੀਵਿਸ੍ਸਾਮਾ’’ਤਿ ਵਿਹਾਰੇ ਕਪ੍ਪਿਯਕਾਰਕਾ ਹੋਨ੍ਤਿ, ਏਤੇ ਪਬ੍ਬਾਜੇਤੁਂ ਵਟ੍ਟਤਿ. ਯਸ੍ਸ ਮਾਤਾਪਿਤਰੋ ਦਾਸਾ, ਮਾਤਾ ਏਵ ਵਾ ਦਾਸੀ, ਪਿਤਾ ਅਦਾਸੋ, ਤਂ ਪਬ੍ਬਾਜੇਤੁਂ ਨ ਵਟ੍ਟਤਿ. ਯਸ੍ਸ ਪਨ ਮਾਤਾ ਅਦਾਸੀ, ਪਿਤਾ ਦਾਸੋ, ਤਂ ਪਬ੍ਬਾਜੇਤੁਂ ਵਟ੍ਟਤਿ. ਭਿਕ੍ਖੁਸ੍ਸ ਞਾਤਕਾ ਵਾ ਉਪਟ੍ਠਾਕਾ ਵਾ ਦਾਸਂ ਦੇਨ੍ਤਿ ‘‘ਇਮਂ ਪਬ੍ਬਾਜੇਥ, ਤੁਮ੍ਹਾਕਂ ਵੇਯ੍ਯਾਵਚ੍ਚਂ ਕਰਿਸ੍ਸਤੀ’’ਤਿ, ਅਤ੍ਤਨੋ ਵਾਸ੍ਸ ਦਾਸੋ ਅਤ੍ਥਿ, ਭੁਜਿਸ੍ਸੋ ਕਤੋਵ ਪਬ੍ਬਾਜੇਤਬ੍ਬੋ. ਸਾਮਿਕਾ ਦਾਸਂ ਦੇਨ੍ਤਿ ‘‘ਇਮਂ ਪਬ੍ਬਾਜੇਥ, ਸਚੇ ਅਭਿਰਮਿਸ੍ਸਤਿ, ਅਦਾਸੋ. ਵਿਬ੍ਭਮਿਸ੍ਸਤਿ ਚੇ, ਅਮ੍ਹਾਕਂ ਦਾਸੋਵ ਭਵਿਸ੍ਸਤੀ’’ਤਿ, ਅਯਂ ਤਾਵਕਾਲਿਕੋ ਨਾਮ, ਤਂ ਪਬ੍ਬਾਜੇਤੁਂ ਨ ਵਟ੍ਟਤੀਤਿ ਕੁਰੁਨ੍ਦਿਯਂ ਵੁਤ੍ਤਂ. ਨਿਸ੍ਸਾਮਿਕਦਾਸੋ ਹੋਤਿ, ਸੋਪਿ ਭੁਜਿਸ੍ਸੋ ਕਤੋਵ ਪਬ੍ਬਾਜੇਤਬ੍ਬੋ. ਅਜਾਨਨ੍ਤੋ ਪਬ੍ਬਾਜੇਤ੍ਵਾ ਉਪਸਮ੍ਪਾਦੇਤ੍ਵਾ ਵਾ ਪਚ੍ਛਾ ਜਾਨਨ੍ਤਿ, ਭੁਜਿਸ੍ਸਂ ਕਾਤੁਮੇਵ ਵਟ੍ਟਤਿ.

ਇਮਸ੍ਸ ਚ ਅਤ੍ਥਸ੍ਸ ਪਕਾਸਨਤ੍ਥਂ ਇਦਂ ਵਤ੍ਥੁਂ ਵਦਨ੍ਤਿ – ਏਕਾ ਕਿਰ ਕੁਲਦਾਸੀ ਏਕੇਨ ਸਦ੍ਧਿਂ ਅਨੁਰਾਧਪੁਰਾ ਪਲਾਯਿਤ੍ਵਾ ਰੋਹਣੇ ਵਸਮਾਨਾ ਪੁਤ੍ਤਂ ਪਟਿਲਭਿ, ਸੋ ਪਬ੍ਬਜਿਤ੍ਵਾ ਉਪਸਮ੍ਪਨ੍ਨਕਾਲੇ ਲਜ੍ਜੀ ਕੁਕ੍ਕੁਚ੍ਚਕੋ ਅਹੋਸਿ. ਅਥੇਕਦਿਵਸਂ ਮਾਤਰਂ ਪੁਚ੍ਛਿ ‘‘ਕਿਂ ਉਪਾਸਿਕੇ ਤੁਮ੍ਹਾਕਂ ਭਾਤਾ ਵਾ ਭਗਿਨੀ ਵਾ ਨਤ੍ਥਿ, ਨ ਕਿਞ੍ਚਿ ਞਾਤਕਂ ਪਸ੍ਸਾਮੀ’’ਤਿ. ਤਾਤ, ਅਹਂ ਅਨੁਰਾਧਪੁਰੇ ਕੁਲਦਾਸੀ, ਤਵ ਪਿਤਰਾ ਸਦ੍ਧਿਂ ਪਲਾਯਿਤ੍ਵਾ ਇਧ ਵਸਾਮੀਤਿ. ਸੀਲਵਾ ਭਿਕ੍ਖੁ ‘‘ਅਸੁਦ੍ਧਾ ਕਿਰ ਮੇ ਪਬ੍ਬਜ੍ਜਾ’’ਤਿ ਸਂਵੇਗਂ ਲਭਿਤ੍ਵਾ ਮਾਤਰਂ ਤਸ੍ਸ ਕੁਲਸ੍ਸ ਨਾਮਗੋਤ੍ਤਂ ਪੁਚ੍ਛਿਤ੍ਵਾ ਅਨੁਰਾਧਪੁਰਂ ਆਗਮ੍ਮ ਤਸ੍ਸ ਕੁਲਸ੍ਸ ਘਰਦ੍ਵਾਰੇ ਅਟ੍ਠਾਸਿ, ‘‘ਅਤਿਚ੍ਛਥ, ਭਨ੍ਤੇ’’ਤਿ ਵੁਤ੍ਤੇਪਿ ਨਾਤਿਕ੍ਕਮਿ. ਤੇ ਆਗਨ੍ਤ੍ਵਾ ‘‘ਕਿਂ, ਭਨ੍ਤੇ’’ਤਿ ਪੁਚ੍ਛਿਂਸੁ. ‘‘ਤੁਮ੍ਹਾਕਂ ਇਤ੍ਥਨ੍ਨਾਮਾ ਦਾਸੀ ਪਲਾਤਾ ਅਤ੍ਥੀ’’ਤਿ? ‘‘ਅਤ੍ਥਿ, ਭਨ੍ਤੇ’’. ਅਹਂ ਤਸ੍ਸਾ ਪੁਤ੍ਤੋ, ਸਚੇ ਮਂ ਤੁਮ੍ਹੇ ਅਨੁਜਾਨਾਥ, ਪਬ੍ਬਜ੍ਜਂ ਲਭਾਮਿ, ਤੁਮ੍ਹੇ ਮਯ੍ਹਂ ਸਾਮਿਕਾਤਿ. ਤੇ ਹਟ੍ਠਤੁਟ੍ਠਾ ਹੁਤ੍ਵਾ ‘‘ਸੁਦ੍ਧਾ, ਭਨ੍ਤੇ, ਤੁਮ੍ਹਾਕਂ ਪਬ੍ਬਜ੍ਜਾ’’ਤਿ ਤਂ ਭੁਜਿਸ੍ਸਂ ਕਤ੍ਵਾ ਮਹਾਵਿਹਾਰੇ ਵਸਾਪੇਸੁਂ ਚਤੂਹਿ ਪਚ੍ਚਯੇਹਿ ਪਟਿਜਗ੍ਗਨ੍ਤਾ. ਥੇਰੋ ਤਂ ਕੁਲਂ ਨਿਸ੍ਸਾਯ ਵਸਮਾਨੋਯੇਵ ਅਰਹਤ੍ਤਂ ਪਾਪੁਣੀਤਿ.

੧੩੨. ‘‘ਨ, ਭਿਕ੍ਖਵੇ, ਹਤ੍ਥਚ੍ਛਿਨ੍ਨੋ ਪਬ੍ਬਾਜੇਤਬ੍ਬੋ. ਨ ਪਾਦਚ੍ਛਿਨ੍ਨੋ, ਨ ਹਤ੍ਥਪਾਦਚ੍ਛਿਨ੍ਨੋ, ਨ ਕਣ੍ਣਚ੍ਛਿਨ੍ਨੋ, ਨ ਕਣ੍ਣਨਾਸਚ੍ਛਿਨ੍ਨੋ, ਨ ਅਙ੍ਗੁਲਿਚ੍ਛਿਨ੍ਨੋ, ਨ ਅਲ਼ਚ੍ਛਿਨ੍ਨੋ, ਨ ਕਣ੍ਡਰਚ੍ਛਿਨ੍ਨੋ, ਨ ਫਣਹਤ੍ਥਕੋ, ਨ ਖੁਜ੍ਜੋ, ਨ ਵਾਮਨੋ ਨ ਗਲਗਣ੍ਡੀ, ਨ ਲਕ੍ਖਣਾਹਤੋ, ਨ ਕਸਾਹਤੋ, ਨ ਲਿਖਿਤਕੋ, ਨ ਸੀਪਦੀ, ਨ ਪਾਪਰੋਗੀ, ਨ ਪਰਿਸਦੂਸਕੋ, ਨ ਕਾਣੋ, ਨ ਕੁਣੀ, ਨ ਖਞ੍ਜੋ, ਨ ਪਕ੍ਖਹਤੋ, ਨ ਛਿਨ੍ਨਿਰਿਯਾਪਥੋ, ਨ ਜਰਾਦੁਬ੍ਬਲੋ, ਨ ਅਨ੍ਧੋ, ਨ ਮੂਗੋ, ਨ ਬਧਿਰੋ, ਨ ਅਨ੍ਧਮੂਗੋ, ਨ ਅਨ੍ਧਬਧਿਰੋ, ਨ ਮੂਗਬਧਿਰੋ, ਨ ਅਨ੍ਧਮੂਗਬਧਿਰੋ ਪਬ੍ਬਾਜੇਤਬ੍ਬੋ, ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੧੯) ਵਚਨਤੋ ਪਨ ਹਤ੍ਥਚ੍ਛਿਨ੍ਨਾਦਯੋਪਿ ਨ ਪਬ੍ਬਾਜੇਤਬ੍ਬਾ.

ਤਤ੍ਥ ਹਤ੍ਥਚ੍ਛਿਨ੍ਨੋਤਿ ਯਸ੍ਸ ਹਤ੍ਥਤਲੇ ਵਾ ਮਣਿਬਨ੍ਧੇ ਵਾ ਕਪ੍ਪਰੇ ਵਾ ਯਤ੍ਥ ਕਤ੍ਥਚਿ ਏਕੋ ਵਾ ਦ੍ਵੇ ਵਾ ਹਤ੍ਥਾ ਛਿਨ੍ਨਾ ਹੋਨ੍ਤਿ. ਪਾਦਚ੍ਛਿਨ੍ਨੋਤਿ ਯਸ੍ਸ ਅਗ੍ਗਪਾਦੇ ਵਾ ਗੋਪ੍ਫਕੇਸੁ ਵਾ ਜਙ੍ਘਾਯ ਵਾ ਯਤ੍ਥ ਕਤ੍ਥਚਿ ਏਕੋ ਵਾ ਦ੍ਵੇ ਵਾ ਪਾਦਾ ਛਿਨ੍ਨਾ ਹੋਨ੍ਤਿ. ਹਤ੍ਥਪਾਦਚ੍ਛਿਨ੍ਨੋਤਿ ਯਸ੍ਸ ਵੁਤ੍ਤਪ੍ਪਕਾਰੇਨੇਵ ਚਤੂਸੁ ਹਤ੍ਥਪਾਦੇਸੁ ਦ੍ਵੇ ਵਾ ਤਯੋ ਵਾ ਸਬ੍ਬੇ ਵਾ ਹਤ੍ਥਪਾਦਾ ਛਿਨ੍ਨਾ ਹੋਨ੍ਤਿ. ਕਣ੍ਣਚ੍ਛਿਨ੍ਨੋਤਿ ਯਸ੍ਸ ਕਣ੍ਣਮੂਲੇ ਵਾ ਕਣ੍ਣਸਕ੍ਖਲਿਕਾਯ ਵਾ ਏਕੋ ਵਾ ਦ੍ਵੇ ਵਾ ਕਣ੍ਣਾ ਛਿਨ੍ਨਾ ਹੋਨ੍ਤਿ. ਯਸ੍ਸ ਪਨ ਕਣ੍ਣਾਵਟ੍ਟੇ ਛਿਜ੍ਜਨ੍ਤਿ, ਸਕ੍ਕਾ ਚ ਹੋਤਿ ਸਙ੍ਘਾਟੇਤੁਂ, ਸੋ ਕਣ੍ਣਂ ਸਙ੍ਘਾਟੇਤ੍ਵਾ ਪਬ੍ਬਾਜੇਤਬ੍ਬੋ. ਨਾਸਚ੍ਛਿਨ੍ਨੋਤਿ ਯਸ੍ਸ ਅਜਪਦਕੇ ਵਾ ਅਗ੍ਗੇ ਵਾ ਏਕਪੁਟੇ ਵਾ ਯਤ੍ਥ ਕਤ੍ਥਚਿ ਨਾਸਾ ਛਿਨ੍ਨਾ ਹੋਤਿ. ਯਸ੍ਸ ਪਨ ਨਾਸਿਕਾ ਸਕ੍ਕਾ ਹੋਤਿ ਸਨ੍ਧੇਤੁਂ, ਸੋ ਤਂ ਫਾਸੁਕਂ ਕਤ੍ਵਾ ਪਬ੍ਬਾਜੇਤਬ੍ਬੋ. ਕਣ੍ਣਨਾਸਚ੍ਛਿਨ੍ਨੋ ਉਭਯਵਸੇਨ ਵੇਦਿਤਬ੍ਬੋ. ਅਙ੍ਗੁਲਿਚ੍ਛਿਨ੍ਨੋਤਿ ਯਸ੍ਸ ਨਖਸੇਸਂ ਅਦਸ੍ਸੇਤ੍ਵਾ ਏਕਾ ਵਾ ਬਹੂ ਵਾ ਅਙ੍ਗੁਲਿਯੋ ਛਿਨ੍ਨਾ ਹੋਨ੍ਤਿ. ਯਸ੍ਸ ਪਨ ਸੁਤ੍ਤਤਨ੍ਤੁਮਤ੍ਤਮ੍ਪਿ ਨਖਸੇਸਂ ਪਞ੍ਞਾਯਤਿ, ਤਂ ਪਬ੍ਬਾਜੇਤੁਂ ਵਟ੍ਟਤਿ. ਅਲ਼ਚ੍ਛਿਨ੍ਨੋਤਿ ਯਸ੍ਸ ਚਤੂਸੁ ਅਙ੍ਗੁਟ੍ਠਕੇਸੁ ਅਙ੍ਗੁਲਿਯਂ ਵੁਤ੍ਤਨਯੇਨੇਵ ਏਕੋ ਵਾ ਬਹੂ ਵਾ ਅਙ੍ਗੁਟ੍ਠਕਾ ਛਿਨ੍ਨਾ ਹੋਨ੍ਤਿ. ਕਣ੍ਡਰਚ੍ਛਿਨ੍ਨੋਤਿ ਯਸ੍ਸ ਕਣ੍ਡਰਨਾਮਕਾ ਮਹਾਨ੍ਹਾਰੂ ਪੁਰਤੋ ਵਾ ਪਚ੍ਛਤੋ ਵਾ ਛਿਨ੍ਨਾ ਹੋਨ੍ਤਿ, ਯੇਸੁ ਏਕਸ੍ਸਪਿ ਛਿਨ੍ਨਤ੍ਤਾ ਅਗ੍ਗਪਾਦੇਨ ਵਾ ਚਙ੍ਕਮਤਿ, ਮੂਲੇਨ ਵਾ ਚਙ੍ਕਮਤਿ, ਨ ਪਾਦਂ ਪਤਿਟ੍ਠਾਪੇਤੁਂ ਸਕ੍ਕੋਤਿ.

ਫਣਹਤ੍ਥਕੋਤਿ ਯਸ੍ਸ ਵਗ੍ਗੁਲਿਪਕ੍ਖਕਾ ਵਿਯ ਅਙ੍ਗੁਲਿਯੋ ਸਮ੍ਬਦ੍ਧਾ ਹੋਨ੍ਤਿ, ਏਤਂ ਪਬ੍ਬਾਜੇਤੁਕਾਮੇਨ ਅਙ੍ਗੁਲਨ੍ਤਰਿਕਾਯੋ ਫਾਲੇਤ੍ਵਾ ਸਬ੍ਬਂ ਅਨ੍ਤਰਚਮ੍ਮਂ ਅਪਨੇਤ੍ਵਾ ਫਾਸੁਕਂ ਕਤ੍ਵਾ ਪਬ੍ਬਾਜੇਤਬ੍ਬੋ. ਯਸ੍ਸਪਿ ਛ ਅਙ੍ਗੁਲਿਯੋ ਹੋਨ੍ਤਿ, ਤਂ ਪਬ੍ਬਾਜੇਤੁਕਾਮੇਨ ਅਧਿਕਂ ਅਙ੍ਗੁਲਿਂ ਛਿਨ੍ਦਿਤ੍ਵਾ ਫਾਸੁਕਂ ਕਤ੍ਵਾ ਪਬ੍ਬਾਜੇਤਬ੍ਬੋ. ਖੁਜ੍ਜੋਤਿ ਯੋ ਉਰਸ੍ਸ ਵਾ ਪਿਟ੍ਠਿਯਾ ਵਾ ਪਸ੍ਸਸ੍ਸ ਵਾ ਨਿਕ੍ਖਨ੍ਤਤ੍ਤਾ ਖੁਜ੍ਜਸਰੀਰੋ. ਯਸ੍ਸ ਪਨ ਕਿਞ੍ਚਿ ਕਿਞ੍ਚਿ ਅਙ੍ਗਪਚ੍ਚਙ੍ਗਂ ਈਸਕਂ ਵਙ੍ਕਂ, ਤਂ ਪਬ੍ਬਾਜੇਤੁਂ ਵਟ੍ਟਤਿ. ਮਹਾਪੁਰਿਸੋ ਏਵ ਹਿ ਬ੍ਰਹ੍ਮੁਜੁਗਤ੍ਤੋ, ਅਵਸੇਸੋ ਸਤ੍ਤੋ ਅਖੁਜ੍ਜੋ ਨਾਮ ਨਤ੍ਥਿ. ਵਾਮਨੋਤਿ ਜਙ੍ਘਵਾਮਨੋ ਵਾ ਕਟਿਵਾਮਨੋ ਵਾ ਉਭਯਵਾਮਨੋ ਵਾ. ਜਙ੍ਘਵਾਮਨਸ੍ਸ ਕਟਿਤੋ ਪਟ੍ਠਾਯ ਹੇਟ੍ਠਿਮਕਾਯੋ ਰਸ੍ਸੋ ਹੋਤਿ, ਉਪਰਿਮਕਾਯੋ ਪਰਿਪੁਣ੍ਣੋ. ਕਟਿਵਾਮਨਸ੍ਸ ਕਟਿਤੋ ਪਟ੍ਠਾਯ ਉਪਰਿਮਕਾਯੋ ਰਸ੍ਸੋ ਹੋਤਿ, ਹੇਟ੍ਠਿਮਕਾਯੋ ਪਰਿਪੁਣ੍ਣੋ. ਉਭਯਵਾਮਨਸ੍ਸ ਉਭੋਪਿ ਕਾਯਾ ਰਸ੍ਸਾ ਹੋਨ੍ਤਿ, ਯੇਸਂ ਰਸ੍ਸਤ੍ਤਾ ਭੂਤਾਨਂ ਵਿਯ ਪਰਿਵਟੁਮੋ ਮਹਾਕੁਚ੍ਛਿਘਟਸਦਿਸੋ ਅਤ੍ਤਭਾਵੋ ਹੋਤਿ, ਤਂ ਤਿਵਿਧਮ੍ਪਿ ਪਬ੍ਬਾਜੇਤੁਂ ਨ ਵਟ੍ਟਤਿ.

ਗਲਗਣ੍ਡੀਤਿ ਯਸ੍ਸ ਕੁਮ੍ਭਣ੍ਡਂ ਵਿਯ ਗਲੇ ਗਣ੍ਡੋ ਹੋਤਿ. ਦੇਸਨਾਮਤ੍ਤਮੇਵ ਚੇਤਂ, ਯਸ੍ਮਿਂ ਕਿਸ੍ਮਿਞ੍ਚਿ ਪਨ ਪਦੇਸੇ ਗਣ੍ਡੇ ਸਤਿ ਨ ਪਬ੍ਬਾਜੇਤਬ੍ਬੋ. ਤਤ੍ਥ ਵਿਨਿਚ੍ਛਯੋ ‘‘ਨ, ਭਿਕ੍ਖਵੇ, ਪਞ੍ਚਹਿ ਆਬਾਧੇਹਿ ਫੁਟ੍ਠੋ ਪਬ੍ਬਾਜੇਤਬ੍ਬੋ’’ਤਿ (ਮਹਾਵ. ੮੯) ਏਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਲਕ੍ਖਣਾਹਤਕਸਾਹਤਲਿਖਿਤਕੇਸੁ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ. ਸੀਪਦੀਤਿ ਭਾਰਪਾਦੋ ਵੁਚ੍ਚਤਿ. ਯਸ੍ਸ ਪਾਦੋ ਥੂਲੋ ਹੋਤਿ ਸਞ੍ਜਾਤਪੀਲ਼ਕੋ ਖਰੋ, ਸੋ ਨ ਪਬ੍ਬਾਜੇਤਬ੍ਬੋ. ਯਸ੍ਸ ਪਨ ਨ ਤਾਵ ਖਰਭਾਵਂ ਗਣ੍ਹਾਤਿ, ਸਕ੍ਕਾ ਹੋਤਿ ਉਪਨਾਹਂ ਬਨ੍ਧਿਤ੍ਵਾ ਉਦਕਆਵਾਟੇ ਪਵੇਸੇਤ੍ਵਾ ਉਦਕਵਾਲਿਕਾਯ ਪੂਰੇਤ੍ਵਾ ਯਥਾ ਸਿਰਾ ਪਞ੍ਞਾਯਨ੍ਤਿ, ਜਙ੍ਘਾ ਚ ਤੇਲਨਾਲ਼ਿਕਾ ਵਿਯ ਹੋਤਿ, ਏਵਂ ਮਿਲਾਪੇਤੁਂ, ਤਸ੍ਸ ਪਾਦਂ ਈਦਿਸਂ ਕਤ੍ਵਾ ਤਂ ਪਬ੍ਬਾਜੇਤੁਂ ਵਟ੍ਟਤਿ. ਸਚੇ ਪੁਨ ਵਡ੍ਢਤਿ, ਉਪਸਮ੍ਪਾਦੇਨ੍ਤੇਨਪਿ ਤਥਾ ਕਤ੍ਵਾਵ ਉਪਸਮ੍ਪਾਦੇਤਬ੍ਬੋ. ਪਾਪਰੋਗੀਤਿ ਅਰਿਸਭਗਨ੍ਦਰਪਿਤ੍ਤਸੇਮ੍ਹਕਾਸਸੋਸਾਦੀਸੁ ਯੇਨ ਕੇਨਚਿ ਰੋਗੇਨ ਨਿਚ੍ਚਾਤੁਰੋ ਅਤੇਕਿਚ੍ਛਰੋਗੋ ਜੇਗੁਚ੍ਛੋ ਅਮਨਾਪੋ, ਅਯਂ ਨ ਪਬ੍ਬਾਜੇਤਬ੍ਬੋ.

੧੩੩. ਪਰਿਸਦੂਸਕੋਤਿ ਯੋ ਅਤ੍ਤਨੋ ਵਿਰੂਪਤਾਯ ਪਰਿਸਂ ਦੂਸੇਤਿ, ਅਤਿਦੀਘੋ ਵਾ ਹੋਤਿ ਅਞ੍ਞੇਸਂ ਸੀਸਪ੍ਪਮਾਣਨਾਭਿਪ੍ਪਦੇਸੋ, ਅਤਿਰਸ੍ਸੋ ਵਾ ਉਭਯਵਾਮਨਭੂਤਰੂਪਂ ਵਿਯ, ਅਤਿਕਾਲ਼ੋ ਵਾ ਝਾਪਿਤਕ੍ਖੇਤ੍ਤੇ ਖਾਣੁਕੋ ਵਿਯ, ਅਚ੍ਚੋਦਾਤੋ ਵਾ ਦਧਿਤਕ੍ਕਾਦੀਹਿ ਪਮਜ੍ਜਿਤਤਮ੍ਬਲੋਹਵਣ੍ਣੋ, ਅਤਿਕਿਸੋ ਵਾ ਮਨ੍ਦਮਂਸਲੋਹਿਤੋ ਅਟ੍ਠਿਸਿਰਾਚਮ੍ਮਸਰੀਰੋ ਵਿਯ, ਅਤਿਥੂਲੋ ਵਾ ਭਾਰਿਯਮਂਸੋ ਮਹੋਦਰੋ ਮਹਾਭੂਤਸਦਿਸੋ, ਅਭਿਮਹਨ੍ਤਸੀਸੋ ਵਾ ਪਚ੍ਛਿਂ ਸੀਸੇ ਕਤ੍ਵਾ ਠਿਤੋ ਵਿਯ, ਅਤਿਖੁਦ੍ਦਕਸੀਸੋ ਵਾ ਸਰੀਰਸ੍ਸ ਅਨਨੁਰੂਪੇਨ ਅਤਿਖੁਦ੍ਦਕੇਨ ਸੀਸੇਨ ਸਮਨ੍ਨਾਗਤੋ, ਕੂਟਕੂਟਸੀਸੋ ਵਾ ਤਾਲਫਲਪਿਣ੍ਡਿਸਦਿਸੇਨ ਸੀਸੇਨ ਸਮਨ੍ਨਾਗਤੋ, ਸਿਖਰਸੀਸੋ ਵਾ ਉਦ੍ਧਂ ਅਨੁਪੁਬ੍ਬਤਨੁਕੇਨ ਸੀਸੇਨ ਸਮਨ੍ਨਾਗਤੋ, ਨਾਲ਼ਿਸੀਸੋ ਵਾ ਮਹਾਵੇਣੁਪਬ੍ਬਸਦਿਸੇਨ ਸੀਸੇਨ ਸਮਨ੍ਨਾਗਤੋ, ਕਪ੍ਪਸੀਸੋ ਵਾ ਪਬ੍ਭਾਰਸੀਸੋ ਵਾ ਚਤੂਸੁ ਪਸ੍ਸੇਸੁ ਯੇਨ ਕੇਨਚਿ ਪਸ੍ਸੇਨ ਓਨਤੇਨ ਸੀਸੇਨ ਸਮਨ੍ਨਾਗਤੋ, ਵਣਸੀਸੋ ਵਾ ਪੂਤਿਸੀਸੋ ਵਾ ਕਣ੍ਣਿਕਕੇਸੋ ਵਾ ਪਾਣਕੇਹਿ ਖਾਯਿਤਕੇਦਾਰੇ ਸਸ੍ਸਸਦਿਸੇਹਿ ਤਹਿਂ ਤਹਿਂ ਉਟ੍ਠਿਤੇਹਿ ਕੇਸੇਹਿ ਸਮਨ੍ਨਾਗਤੋ, ਨਿਲ੍ਲੋਮਸੀਸੋ ਵਾ ਥੂਲਥਦ੍ਧਕੇਸੋ ਵਾ ਤਾਲਹੀਰਸਦਿਸੇਹਿ ਕੇਸੇਹਿ ਸਮਨ੍ਨਾਗਤੋ, ਜਾਤਿਪਲਿਤੇਹਿ ਪਣ੍ਡਰਕੇਸੋ ਵਾ ਪਕਤਿਤਮ੍ਬਕੇਸੋ ਵਾ ਆਦਿਤ੍ਤੇਹਿ ਵਿਯ ਕੇਸੇਹਿ ਸਮਨ੍ਨਾਗਤੋ, ਆਵਟ੍ਟਸੀਸੋ ਵਾ ਗੁਨ੍ਨਂ ਸਰੀਰੇ ਆਵਟ੍ਟਸਦਿਸੇਹਿ ਉਦ੍ਧਗ੍ਗੇਹਿ ਕੇਸਾਵਟ੍ਟੇਹਿ ਸਮਨ੍ਨਾਗਤੋ, ਸੀਸਲੋਮੇਹਿ ਸਦ੍ਧਿਂ ਏਕਾਬਦ੍ਧਭਮੁਕਲੋਮੋ ਵਾ ਜਾਲਬਦ੍ਧੇਨ ਵਿਯ ਨਲਾਟੇਨ ਸਮਨ੍ਨਾਗਤੋ.

ਸਮ੍ਬਦ੍ਧਭਮੁਕੋ ਵਾ ਨਿਲ੍ਲੋਮਭਮੁਕੋ ਵਾ ਮਕ੍ਕਟਭਮੁਕੋ ਵਾ ਅਤਿਮਹਨ੍ਤਕ੍ਖਿ ਵਾ ਅਤਿਖੁਦ੍ਦਕਕ੍ਖਿ ਵਾ ਮਹਿਂਸਚਮ੍ਮੇ ਵਾਸਿਕੋਣੇਨ ਪਹਰਿਤ੍ਵਾ ਕਤਛਿਦ੍ਦਸਦਿਸੇਹਿ ਅਕ੍ਖੀਹਿ ਸਮਨ੍ਨਾਗਤੋ, ਵਿਸਮਕ੍ਖਿ ਵਾ ਏਕੇਨ ਮਹਨ੍ਤੇਨ, ਏਕੇਨ ਖੁਦ੍ਦਕੇਨ ਅਕ੍ਖਿਨਾ ਸਮਨ੍ਨਾਗਤੋ, ਵਿਸਮਚਕ੍ਕਲੋ ਵਾ ਏਕੇਨ ਉਦ੍ਧਂ, ਏਕੇਨ ਅਧੋਤਿ ਏਵਂ ਵਿਸਮਜਾਤੇਹਿ ਅਕ੍ਖਿਚਕ੍ਕੇਹਿ ਸਮਨ੍ਨਾਗਤੋ, ਕੇਕਰੋ ਵਾ ਗਮ੍ਭੀਰਕ੍ਖਿ ਵਾ ਯਸ੍ਸ ਗਮ੍ਭੀਰੇ ਉਦਪਾਨੇ ਉਦਕਤਾਰਕਾ ਵਿਯ ਅਕ੍ਖਿਤਾਰਕਾ ਪਞ੍ਞਾਯਨ੍ਤਿ, ਨਿਕ੍ਖਨ੍ਤਕ੍ਖਿ ਵਾ ਯਸ੍ਸ ਕਕ੍ਕਟਸ੍ਸੇਵ ਅਕ੍ਖਿਤਾਰਕਾ ਨਿਕ੍ਖਨ੍ਤਾ ਹੋਨ੍ਤਿ, ਹਤ੍ਥਿਕਣ੍ਣੋ ਵਾ ਮਹਨ੍ਤਾਹਿ ਕਣ੍ਣਸਕ੍ਖਲੀਹਿ ਸਮਨ੍ਨਾਗਤੋ, ਮੂਸਿਕਕਣ੍ਣੋ ਵਾ ਜਤੁਕਕਣ੍ਣੋ ਵਾ ਖੁਦ੍ਦਕਾਹਿ ਕਣ੍ਣਸਕ੍ਖਲੀਹਿ ਸਮਨ੍ਨਾਗਤੋ, ਛਿਦ੍ਦਮਤ੍ਤਕਣ੍ਣੋ ਵਾ ਯਸ੍ਸ ਵਿਨਾ ਕਣ੍ਣਸਕ੍ਖਲੀਹਿ ਕਣ੍ਣਚ੍ਛਿਦ੍ਦਮਤ੍ਤਮੇਵ ਹੋਤਿ, ਅਵਿਦ੍ਧਕਣ੍ਣੋ ਵਾ, ਯੋਨਕਜਾਤਿਕੋ ਪਨ ਪਰਿਸਦੂਸਕੋ ਨ ਹੋਤਿ, ਸਭਾਵੋਯੇਵ ਹਿ ਸੋ ਤਸ੍ਸ. ਕਣ੍ਣਭਗਨ੍ਦਰਿਕੋ ਵਾ ਨਿਚ੍ਚਪੂਤਿਨਾ ਕਣ੍ਣੇਨ ਸਮਨ੍ਨਾਗਤੋ, ਗਣ੍ਡਕਣ੍ਣੋ ਵਾ ਸਦਾ ਪਗ੍ਘਰਿਤਪੁਬ੍ਬੇਨ ਕਣ੍ਣੇਨ ਸਮਨ੍ਨਾਗਤੋ, ਟਙ੍ਕਿਤਕਣ੍ਣੋ ਵਾ ਗੋਭਤ੍ਤਨਾਲ਼ਿਕਾਯ ਅਗ੍ਗਸਦਿਸੇਹਿ ਕਣ੍ਣੇਹਿ ਸਮਨ੍ਨਾਗਤੋ, ਅਤਿਪਿਙ੍ਗਲਕ੍ਖਿ ਵਾ, ਮਧੁਪਿਙ੍ਗਲਂ ਪਨ ਪਬ੍ਬਾਜੇਤੁਂ ਵਟ੍ਟਤਿ. ਨਿਪ੍ਪਖੁਮਕ੍ਖਿ ਵਾ ਅਸ੍ਸੁਪਗ੍ਘਰਣਕ੍ਖਿ ਵਾ ਪੁਪ੍ਫਿਤਕ੍ਖਿ ਵਾ ਅਕ੍ਖਿਪਾਕੇਨ ਸਮਨ੍ਨਾਗਤਕ੍ਖਿ ਵਾ.

ਅਤਿਮਹਨ੍ਤਨਾਸਿਕੋ ਵਾ ਅਤਿਖੁਦ੍ਦਕਨਾਸਿਕੋ ਵਾ ਚਿਪਿਟਨਾਸਿਕੋ ਵਾ ਮਜ੍ਝੇ ਅਪ੍ਪਤਿਟ੍ਠਹਿਤ੍ਵਾ ਏਕਪਸ੍ਸੇ ਠਿਤਵਙ੍ਕਨਾਸਿਕੋ ਵਾ ਦੀਘਨਾਸਿਕੋ ਵਾ ਸੁਕਤੁਣ੍ਡਸਦਿਸਾਯ ਜਿਵ੍ਹਾਯ ਲੇਹਿਤੁਂ ਸਕ੍ਕੁਣੇਯ੍ਯਾਯ ਨਾਸਿਕਾਯ ਸਮਨ੍ਨਾਗਤੋ, ਨਿਚ੍ਚਂ ਪਗ੍ਘਰਿਤਸਿਙ੍ਘਾਣਿਕਨਾਸੋ ਵਾ, ਮਹਾਮੁਖੋ ਵਾ ਯਸ੍ਸ ਪਟਙ੍ਗਮਣ੍ਡੂਕਸ੍ਸੇਵ ਮੁਖਨਿਮਿਤ੍ਤਂਯੇਵ ਮਹਨ੍ਤਂ ਹੋਤਿ, ਮੁਖਂ ਪਨ ਲਾਬੁਸਦਿਸਂ ਅਤਿਖੁਦ੍ਦਕਂ, ਭਿਨ੍ਨਮੁਖੋ ਵਾ ਵਙ੍ਕਮੁਖੋ ਵਾ ਮਹਾਓਟ੍ਠੋ ਵਾ ਉਕ੍ਖਲਿਮੁਖਵਟ੍ਟਿਸਦਿਸੇਹਿ ਓਟ੍ਠੇਹਿ ਸਮਨ੍ਨਾਗਤੋ, ਤਨੁਕਓਟ੍ਠੋ ਵਾ ਭੇਰਿਚਮ੍ਮਸਦਿਸੇਹਿ ਦਨ੍ਤੇ ਪਿਦਹਿਤੁਂ ਅਸਮਤ੍ਥੇਹਿ ਓਟ੍ਠੇਹਿ ਸਮਨ੍ਨਾਗਤੋ, ਮਹਾਧਰੋਟ੍ਠੋ ਵਾ ਤਨੁਕਉਤ੍ਤਰੋਟ੍ਠੋ ਵਾ ਤਨੁਕਅਧਰੋਟ੍ਠੋ ਵਾ ਮਹਾਉਤ੍ਤਰੋਟ੍ਠੋ ਵਾ ਓਟ੍ਠਛਿਨ੍ਨਕੋ ਵਾ ਏਲ਼ਮੁਖੋ ਵਾ ਉਪ੍ਪਕ੍ਕਮੁਖੋ ਵਾ ਸਙ੍ਖਤੁਣ੍ਡਕੋ ਵਾ ਬਹਿ ਸੇਤੇਹਿ ਅਨ੍ਤੋ ਅਤਿਰਤ੍ਤੇਹਿ ਓਟ੍ਠੇਹਿ ਸਮਨ੍ਨਾਗਤੋ, ਦੁਗ੍ਗਨ੍ਧਕੁਣਪਮੁਖੋ ਵਾ, ਮਹਾਦਨ੍ਤੋ ਵਾ ਅਟ੍ਠਕਦਨ੍ਤਸਦਿਸੇਹਿ ਦਨ੍ਤੇਹਿ ਸਮਨ੍ਨਾਗਤੋ, ਅਸੁਰਦਨ੍ਤੋ ਵਾ ਹੇਟ੍ਠਾ ਵਾ ਉਪਰਿ ਵਾ ਬਹਿ ਨਿਕ੍ਖਨ੍ਤਦਨ੍ਤੋ, ਯਸ੍ਸ ਪਨ ਸਕ੍ਕਾ ਹੋਤਿ ਓਟ੍ਠੇਹਿ ਪਿਦਹਿਤੁਂ, ਕਥੇਨ੍ਤਸ੍ਸੇਵ ਪਞ੍ਞਾਯਤਿ, ਨੋ ਅਕਥੇਨ੍ਤਸ੍ਸ, ਤਂ ਪਬ੍ਬਾਜੇਤੁਂ ਵਟ੍ਟਤਿ. ਪੂਤਿਦਨ੍ਤੋ ਵਾ ਨਿਦ੍ਦਨ੍ਤੋ ਵਾ ਅਤਿਖੁਦ੍ਦਕਦਨ੍ਤੋ ਵਾ ਯਸ੍ਸ ਪਨ ਦਨ੍ਤਨ੍ਤਰੇ ਕਲਨ੍ਦਕਦਨ੍ਤੋ ਵਿਯ ਸੁਖੁਮਦਨ੍ਤੋ ਹੋਤਿ, ਤਂ ਪਬ੍ਬਾਜੇਤੁਂ ਵਟ੍ਟਤਿ.

ਮਹਾਹਨੁਕੋ ਵਾ ਗੋਹਨੁਸਦਿਸੇਨ ਹਨੁਨਾ ਸਮਨ੍ਨਾਗਤੋ, ਦੀਘਹਨੁਕੋ ਵਾ ਚਿਪਿਟਹਨੁਕੋ ਵਾ ਅਨ੍ਤੋਪਵਿਟ੍ਠੇਨ ਵਿਯ ਅਤਿਰਸ੍ਸੇਨ ਹਨੁਕੇਨ ਸਮਨ੍ਨਾਗਤੋ, ਭਿਨ੍ਨਹਨੁਕੋ ਵਾ ਵਙ੍ਕਹਨੁਕੋ ਵਾ ਨਿਮ੍ਮਸ੍ਸੁਦਾਠਿਕੋ ਵਾ ਭਿਕ੍ਖੁਨੀਸਦਿਸਮੁਖੋ, ਦੀਘਗਲੋ ਵਾ ਬਕਗਲਸਦਿਸੇਨ ਗਲੇਨ ਸਮਨ੍ਨਾਗਤੋ, ਰਸ੍ਸਗਲੋ ਵਾ ਅਨ੍ਤੋਪਵਿਟ੍ਠੇਨ ਵਿਯ ਗਲੇਨ ਸਮਨ੍ਨਾਗਤੋ, ਭਿਨ੍ਨਗਲੋ ਵਾ ਭਟ੍ਠਅਂਸਕੂਟੋ ਵਾ ਅਹਤ੍ਥੋ ਵਾ ਏਕਹਤ੍ਥੋ ਵਾ ਅਤਿਰਸ੍ਸਹਤ੍ਥੋ ਵਾ ਅਤਿਦੀਘਹਤ੍ਥੋ ਵਾ ਭਿਨ੍ਨਉਰੋ ਵਾ ਭਿਨ੍ਨਪਿਟ੍ਠਿ ਵਾ ਕਚ੍ਛੁਗਤ੍ਤੋ ਵਾ ਕਣ੍ਡੁਗਤ੍ਤੋ ਵਾ ਦਦ੍ਦੁਗਤ੍ਤੋ ਵਾ ਗੋਧਾਗਤ੍ਤੋ ਵਾ ਯਸ੍ਸ ਗੋਧਾਯ ਵਿਯ ਗਤ੍ਤਤੋ ਚੁਣ੍ਣਾਨਿ ਪਤਨ੍ਤਿ. ਸਬ੍ਬਞ੍ਚੇਤਂ ਵਿਰੂਪਕਰਣਂ ਸਨ੍ਧਾਯ ਵਿਤ੍ਥਾਰਿਤਵਸੇਨ ਵੁਤ੍ਤਂ, ਵਿਨਿਚ੍ਛਯੋ ਪਨੇਤ੍ਥ ਪਞ੍ਚਾਬਾਧੇਸੁ ਵੁਤ੍ਤਨਯੇਨ ਵੇਦਿਤਬ੍ਬੋ.

ਭਟ੍ਠਕਟਿਕੋ ਵਾ ਮਹਾਆਨਿਸਦੋ ਵਾ ਉਦ੍ਧਨਕੂਟਸਦਿਸੇਹਿ ਆਨਿਸਦਮਂਸੇਹਿ ਅਚ੍ਚੁਗ੍ਗਤੇਹਿ ਸਮਨ੍ਨਾਗਤੋ, ਮਹਾਊਰੁਕੋ ਵਾ ਵਾਤਣ੍ਡਿਕੋ ਵਾ ਮਹਾਜਾਣੁਕੋ ਵਾ ਸਙ੍ਘਟ੍ਟਨਜਾਣੁਕੋ ਵਾ ਦੀਘਜਙ੍ਘੋ ਵਾ ਯਟ੍ਠਿਸਦਿਸਜਙ੍ਘੋ, ਵਿਕਟੋ ਵਾ ਸਙ੍ਘਟ੍ਟੋ ਵਾ ਉਬ੍ਬਦ੍ਧਪਿਣ੍ਡਿਕੋ ਵਾ, ਸੋ ਦੁਵਿਧੋ ਹੇਟ੍ਠਾ ਓਰੁਲ਼੍ਹਾਹਿ ਵਾ ਉਪਰਿ ਆਰੁਲ਼੍ਹਾਹਿ ਵਾ ਮਹਤੀਹਿ ਜਙ੍ਘਪਿਣ੍ਡਿਕਾਹਿ ਸਮਨ੍ਨਾਗਤੋ, ਮਹਾਜਙ੍ਘੋ ਵਾ ਥੂਲਜਙ੍ਘਪਿਣ੍ਡਿਕੋ ਵਾ ਮਹਾਪਾਦੋ ਵਾ ਮਹਾਪਣ੍ਹਿ ਵਾ ਪਿਟ੍ਠਿਕਪਾਦੋ ਵਾ ਪਾਦਵੇਮਜ੍ਝਤੋ ਉਟ੍ਠਿਤਜਙ੍ਘੋ, ਵਙ੍ਕਪਾਦੋ ਵਾ, ਸੋ ਦੁਵਿਧੋ ਅਨ੍ਤੋ ਵਾ ਬਹਿ ਵਾ ਪਰਿਵਤ੍ਤਪਾਦੋ, ਗਣ੍ਠਿਕਙ੍ਗੁਲਿ ਵਾ ਸਿਙ੍ਗਿਵੇਰਫਣਸਦਿਸਾਹਿ ਅਙ੍ਗੁਲੀਹਿ ਸਮਨ੍ਨਾਗਤੋ, ਅਨ੍ਧਨਖੋ ਵਾ ਕਾਲ਼ਵਣ੍ਣੇਹਿ ਪੂਤਿਨਖੇਹਿ ਸਮਨ੍ਨਾਗਤੋ, ਸਬ੍ਬੋਪਿ ਏਸ ਪਰਿਸਦੂਸਕੋ. ਏਵਰੂਪੋ ਪਰਿਸਦੂਸਕੋ ਨ ਪਬ੍ਬਾਜੇਤਬ੍ਬੋ.

੧੩੪. ਕਾਣੋਤਿ ਪਸਨ੍ਨਨ੍ਧੋ ਵਾ ਹੋਤੁ ਪੁਪ੍ਫਾਦੀਹਿ ਵਾ ਉਪਹਤਪਸਾਦੋ, ਦ੍ਵੀਹਿ ਵਾ ਏਕੇਨ ਵਾ ਅਕ੍ਖਿਨਾ ਨ ਪਸ੍ਸਤਿ, ਸੋ ਨ ਪਬ੍ਬਾਜੇਤਬ੍ਬੋ. ਮਹਾਪਚ੍ਚਰਿਯਂ ਪਨ ਏਕਕ੍ਖਿਕਾਣੋ ‘‘ਕਾਣੋ’’ਤਿ ਵੁਤ੍ਤੋ, ਦ੍ਵਿਅਕ੍ਖਿਕਾਣੋ ਅਨ੍ਧੇਨ ਸਙ੍ਗਹਿਤੋ. ਮਹਾਅਟ੍ਠਕਥਾਯਂ ਜਚ੍ਚਨ੍ਧੋ ‘‘ਅਨ੍ਧੋ’’ਤਿ ਵੁਤ੍ਤੋ. ਤਸ੍ਮਾ ਉਭਯਮ੍ਪਿ ਪਰਿਯਾਯੇਨ ਯੁਜ੍ਜਤਿ. ਕੁਣੀਤਿ ਹਤ੍ਥਕੁਣੀ ਵਾ ਪਾਦਕੁਣੀ ਵਾ ਅਙ੍ਗੁਲਿਕੁਣੀ ਵਾ, ਯਸ੍ਸ ਏਤੇਸੁ ਹਤ੍ਥਾਦੀਸੁ ਯਂ ਕਿਞ੍ਚਿ ਵਙ੍ਕਂ ਪਞ੍ਞਾਯਤਿ. ਖਞ੍ਜੋਤਿ ਨਤਜਾਣੁਕੋ ਵਾ ਭਿਨ੍ਨਜਙ੍ਘੋ ਵਾ ਮਜ੍ਝੇ ਸਂਕੁਟਿਤਪਾਦਤ੍ਤਾ ਕੁਣ੍ਠਪਾਦਕੋ ਵਾ ਪਿਟ੍ਠਿਪਾਦਮਜ੍ਝੇਨ ਚਙ੍ਕਮਨ੍ਤੋ, ਅਗ੍ਗੇ ਸਂਕੁਟਿਤਪਾਦਤ੍ਤਾ ਕੁਣ੍ਠਪਾਦਕੋ ਵਾ ਪਿਟ੍ਠਿਪਾਦਗ੍ਗੇਨ ਚਙ੍ਕਮਨ੍ਤੋ, ਅਗ੍ਗਪਾਦੇਨੇਵ ਚਙ੍ਕਮਨਖਞ੍ਜੋ ਵਾ ਪਣ੍ਹਿਕਾਯ ਚਙ੍ਕਮਨਖਞ੍ਜੋ ਵਾ ਪਾਦਸ੍ਸ ਬਾਹਿਰਨ੍ਤੇਨ ਚਙ੍ਕਮਨਖਞ੍ਜੋ ਵਾ ਪਾਦਸ੍ਸ ਅਬ੍ਭਨ੍ਤਰੇਨ ਚਙ੍ਕਮਨਖਞ੍ਜੋ ਵਾ ਗੋਪ੍ਫਕਾਨਂ ਉਪਰਿ ਭਗ੍ਗਤ੍ਤਾ ਸਕਲੇਨ ਪਿਟ੍ਠਿਪਾਦੇਨ ਚਙ੍ਕਮਨਖਞ੍ਜੋ ਵਾ. ਸਬ੍ਬੋਪੇਸ ਖਞ੍ਜੋਯੇਵ, ਨ ਪਬ੍ਬਾਜੇਤਬ੍ਬੋ.

ਪਕ੍ਖਹਤੋਤਿ ਯਸ੍ਸ ਏਕੋ ਹਤ੍ਥੋ ਵਾ ਪਾਦੋ ਵਾ ਅਦ੍ਧਸਰੀਰਂ ਵਾ ਸੁਖਂ ਨ ਵਹਤਿ. ਛਿਨ੍ਨਿਰਿਯਾਪਥੋਤਿ ਪੀਠਸਪ੍ਪੀ ਵੁਚ੍ਚਤਿ. ਜਰਾਦੁਬ੍ਬਲੋਤਿ ਜਿਣ੍ਣਭਾਵੇਨ ਦੁਬ੍ਬਲੋ ਅਤ੍ਤਨੋ ਚੀਵਰਰਜਨਾਦਿਕਮ੍ਮਮ੍ਪਿ ਕਾਤੁਂ ਅਸਮਤ੍ਥੋ. ਯੋ ਪਨ ਮਹਲ੍ਲਕੋਪਿ ਬਲਵਾ ਹੋਤਿ, ਅਤ੍ਤਾਨਂ ਪਟਿਜਗ੍ਗਿਤੁਂ ਸਕ੍ਕੋਤਿ, ਸੋ ਪਬ੍ਬਾਜੇਤਬ੍ਬੋ. ਅਨ੍ਧੋਤਿ ਜਚ੍ਚਨ੍ਧੋ ਵੁਚ੍ਚਤਿ. ਮੂਗੋਤਿ ਯਸ੍ਸ ਵਚੀਭੇਦੋ ਨ ਪਵਤ੍ਤਤਿ, ਯਸ੍ਸਪਿ ਪਵਤ੍ਤਤਿ, ਸਰਣਗਮਨਂ ਪਨ ਪਰਿਪੁਣ੍ਣਂ ਭਾਸਿਤੁਂ ਨ ਸਕ੍ਕੋਤਿ, ਤਾਦਿਸਂ ਮਮ੍ਮਨਮ੍ਪਿ ਪਬ੍ਬਾਜੇਤੁਂ ਨ ਵਟ੍ਟਤਿ. ਯੋ ਪਨ ਸਰਣਗਮਨਮਤ੍ਤਂ ਪਰਿਪੁਣ੍ਣਂ ਭਾਸਿਤੁਂ ਸਕ੍ਕੋਤਿ, ਤਂ ਪਬ੍ਬਾਜੇਤੁਂ ਵਟ੍ਟਤਿ. ਬਧਿਰੋਤਿ ਯੋ ਸਬ੍ਬੇਨ ਸਬ੍ਬਂ ਨ ਸੁਣਾਤਿ. ਯੋ ਪਨ ਮਹਾਸਦ੍ਦਂ ਸੁਣਾਤਿ, ਤਂ ਪਬ੍ਬਾਜੇਤੁਂ ਵਟ੍ਟਤਿ. ਅਨ੍ਧਮੂਗਾਦਯੋ ਉਭਯਦੋਸਵਸੇਨ ਵੁਤ੍ਤਾ. ਯੇਸਞ੍ਚ ਪਬ੍ਬਜ੍ਜਾ ਪਟਿਕ੍ਖਿਤ੍ਤਾ, ਉਪਸਮ੍ਪਦਾਪਿ ਤੇਸਂ ਪਟਿਕ੍ਖਿਤ੍ਤਾਵ. ਸਚੇ ਪਨ ਨੇ ਸਙ੍ਘੋ ਉਪਸਮ੍ਪਾਦੇਤਿ, ਸਬ੍ਬੇਪਿ ਸੂਪਸਮ੍ਪਨ੍ਨਾ, ਕਾਰਕਸਙ੍ਘੋ ਪਨ ਆਚਰਿਯੁਪਜ੍ਝਾਯਾ ਚ ਆਪਤ੍ਤਿਤੋ ਨ ਮੁਚ੍ਚਨ੍ਤਿ.

੧੩੫. ਪਣ੍ਡਕੋ ਉਭਤੋਬ੍ਯਞ੍ਜਨਕੋ ਥੇਯ੍ਯਸਂਵਾਸਕੋ ਤਿਤ੍ਥਿਯਪਕ੍ਕਨ੍ਤਕੋ ਤਿਰਚ੍ਛਾਨਗਤੋ ਮਾਤੁਘਾਤਕੋ ਪਿਤੁਘਾਤਕੋ ਅਰਹਨ੍ਤਘਾਤਕੋ ਲੋਹਿਤੁਪ੍ਪਾਦਕੋ ਸਙ੍ਘਭੇਦਕੋ ਭਿਕ੍ਖੁਨੀਦੂਸਕੋਤਿ ਇਮੇ ਪਨ ਏਕਾਦਸ ਪੁਗ੍ਗਲਾ ‘‘ਪਣ੍ਡਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋ’’ਤਿ (ਮਹਾਵ. ੧੦੯) ਆਦਿਵਚਨਤੋ ਅਭਬ੍ਬਾ, ਨੇਵ ਨੇਸਂ ਪਬ੍ਬਜ੍ਜਾ, ਨ ਉਪਸਮ੍ਪਦਾ ਚ ਰੁਹਤਿ, ਤਸ੍ਮਾ ਨ ਪਬ੍ਬਾਜੇਤਬ੍ਬਾ ਨ ਉਪਸਮ੍ਪਾਦੇਤਬ੍ਬਾ, ਜਾਨਿਤ੍ਵਾ ਪਬ੍ਬਾਜੇਨ੍ਤੋ ਉਪਸਮ੍ਪਾਦੇਨ੍ਤੋ ਚ ਦੁਕ੍ਕਟਂ ਆਪਜ੍ਜਤਿ. ਅਜਾਨਿਤ੍ਵਾਪਿ ਪਬ੍ਬਾਜਿਤਾ ਉਪਸਮ੍ਪਾਦਿਤਾ ਚ ਜਾਨਿਤ੍ਵਾ ਲਿਙ੍ਗਨਾਸਨਾਯ ਨਾਸੇਤਬ੍ਬਾ.

ਤਤ੍ਥ ਪਣ੍ਡਕੋਤਿ ਆਸਿਤ੍ਤਪਣ੍ਡਕੋ ਉਸੂਯਪਣ੍ਡਕੋ ਓਪਕ੍ਕਮਿਕਪਣ੍ਡਕੋ ਪਕ੍ਖਪਣ੍ਡਕੋ ਨਪੁਂਸਕਪਣ੍ਡਕੋਤਿ ਪਞ੍ਚ ਪਣ੍ਡਕਾ. ਤੇਸੁ ਯਸ੍ਸ ਪਰੇਸਂ ਅਙ੍ਗਜਾਤਂ ਮੁਖੇਨ ਗਹੇਤ੍ਵਾ ਅਸੁਚਿਨਾ ਆਸਿਤ੍ਤਸ੍ਸ ਪਰਿਲ਼ਾਹੋ ਵੂਪਸਮ੍ਮਤਿ, ਅਯਂ ਆਸਿਤ੍ਤਪਣ੍ਡਕੋ. ਯਸ੍ਸ ਪਰੇਸਂ ਅਜ੍ਝਾਚਾਰਂ ਪਸ੍ਸਤੋ ਉਸੂਯਾਯ ਉਪ੍ਪਨ੍ਨਾਯ ਪਰਿਲ਼ਾਹੋ ਵੂਪਸਮ੍ਮਤਿ, ਅਯਂ ਉਸੂਯਪਣ੍ਡਕੋ. ਯਸ੍ਸ ਉਪਕ੍ਕਮੇਨ ਬੀਜਾਨਿ ਅਪਨੀਤਾਨਿ, ਅਯਂ ਓਪਕ੍ਕਮਿਕਪਣ੍ਡਕੋ. ਏਕਚ੍ਚੋ ਪਨ ਅਕੁਸਲਵਿਪਾਕਾਨੁਭਾਵੇਨ ਕਾਲ਼ਪਕ੍ਖੇ ਪਣ੍ਡਕੋ ਹੋਤਿ, ਜੁਣ੍ਹਪਕ੍ਖੇ ਪਨਸ੍ਸ ਪਰਿਲ਼ਾਹੋ ਵੂਪਸਮ੍ਮਤਿ, ਅਯਂ ਪਕ੍ਖਪਣ੍ਡਕੋ. ਯੋ ਪਨ ਪਟਿਸਨ੍ਧਿਯਂਯੇਵ ਅਭਾਵਕੋ ਉਪ੍ਪਨ੍ਨੋ, ਅਯਂ ਨ ਪੁਂਸਕਪਣ੍ਡਕੋ. ਤੇਸੁ ਆਸਿਤ੍ਤਪਣ੍ਡਕਸ੍ਸ ਚ ਉਸੂਯਪਣ੍ਡਕਸ੍ਸ ਚ ਪਬ੍ਬਜ੍ਜਾ ਨ ਵਾਰਿਤਾ, ਇਤਰੇਸਂ ਤਿਣ੍ਣਂ ਵਾਰਿਤਾ. ‘‘ਤੇਸੁਪਿ ਪਕ੍ਖਪਣ੍ਡਕਸ੍ਸ ਯਸ੍ਮਿਂ ਪਕ੍ਖੇ ਪਣ੍ਡਕੋ ਹੋਤਿ, ਤਸ੍ਮਿਂਯੇਵਸ੍ਸ ਪਕ੍ਖੇ ਪਬ੍ਬਜ੍ਜਾ ਵਾਰਿਤਾ’’ਤਿ ਕੁਰੁਨ੍ਦਿਯਂ ਵੁਤ੍ਤਂ.

੧੩੬. ਉਭਤੋਬ੍ਯਞ੍ਜਨਕੋਤਿ (ਮਹਾਵ. ਅਟ੍ਠ. ੧੧੬) ਇਤ੍ਥਿਨਿਮਿਤ੍ਤੁਪ੍ਪਾਦਨਕਮ੍ਮਤੋ ਚ ਪੁਰਿਸਨਿਮਿਤ੍ਤੁਪ੍ਪਾਦਨਕਮ੍ਮਤੋ ਚ ਉਭਤੋਬ੍ਯਞ੍ਜਨਮਸ੍ਸ ਅਤ੍ਥੀਤਿ ਉਭਤੋਬ੍ਯਞ੍ਜਨਕੋ. ਸੋ ਦੁਵਿਧੋ ਹੋਤਿ ਇਤ੍ਥਿਉਭਤੋਬ੍ਯਞ੍ਜਨਕੋ ਪੁਰਿਸਉਭਤੋਬ੍ਯਞ੍ਜਨਕੋਤਿ. ਤਤ੍ਥ ਇਤ੍ਥਿਉਭਤੋਬ੍ਯਞ੍ਜਨਕਸ੍ਸ ਇਤ੍ਥਿਨਿਮਿਤ੍ਤਂ ਪਾਕਟਂ ਹੋਤਿ, ਪੁਰਿਸਨਿਮਿਤ੍ਤਂ ਪਟਿਚ੍ਛਨ੍ਨਂ. ਪੁਰਿਸਉਭਤੋਬ੍ਯਞ੍ਜਨਕਸ੍ਸ ਪੁਰਿਸਨਿਮਿਤ੍ਤਂ ਪਾਕਟਂ, ਇਤ੍ਥਿਨਿਮਿਤ੍ਤਂ ਪਟਿਚ੍ਛਨ੍ਨਂ. ਇਤ੍ਥਿਉਭਤੋਬ੍ਯਞ੍ਜਨਕਸ੍ਸ ਇਤ੍ਥੀਸੁ ਪੁਰਿਸਤ੍ਤਂ ਕਰੋਨ੍ਤਸ੍ਸ ਇਤ੍ਥਿਨਿਮਿਤ੍ਤਂ ਪਟਿਚ੍ਛਨ੍ਨਂ ਹੋਤਿ, ਪੁਰਿਸਨਿਮਿਤ੍ਤਂ ਪਾਕਟਂ. ਪੁਰਿਸਉਭਤੋਬ੍ਯਞ੍ਜਨਕਸ੍ਸ ਪੁਰਿਸਾਨਂ ਇਤ੍ਥਿਭਾਵਂ ਉਪਗਚ੍ਛਨ੍ਤਸ੍ਸ ਪੁਰਿਸਨਿਮਿਤ੍ਤਂ ਪਟਿਚ੍ਛਨ੍ਨਂ ਹੋਤਿ, ਇਤ੍ਥਿਨਿਮਿਤ੍ਤਂ ਪਾਕਟਂ ਹੋਤਿ. ਇਤ੍ਥਿਉਭਤੋਬ੍ਯਞ੍ਜਨਕੋ ਸਯਞ੍ਚ ਗਬ੍ਭਂ ਗਣ੍ਹਾਤਿ, ਪਰਞ੍ਚ ਗਣ੍ਹਾਪੇਤਿ, ਪੁਰਿਸਉਭਤੋਬ੍ਯਞ੍ਜਨਕੋ ਪਨ ਸਯਂ ਨ ਗਣ੍ਹਾਤਿ, ਪਰਂ ਪਨ ਗਣ੍ਹਾਪੇਤੀਤਿ ਇਦਮੇਤੇਸਂ ਨਾਨਾਕਰਣਂ. ਇਮਸ੍ਸ ਪਨ ਦੁਵਿਧਸ੍ਸਪਿ ਉਭਤੋਬ੍ਯਞ੍ਜਨਕਸ੍ਸ ਨੇਵ ਪਬ੍ਬਜ੍ਜਾ ਅਤ੍ਥਿ, ਨ ਉਪਸਮ੍ਪਦਾ.

੧੩੭. ਥੇਯ੍ਯਸਂਵਾਸਕੋਤਿ ਤਯੋ ਥੇਯ੍ਯਸਂਵਾਸਕਾ ਲਿਙ੍ਗਤ੍ਥੇਨਕੋ ਸਂਵਾਸਤ੍ਥੇਨਕੋ ਉਭਯਤ੍ਥੇਨਕੋਤਿ. ਤਤ੍ਥ ਯੋ ਸਯਂ ਪਬ੍ਬਜਿਤ੍ਵਾ ਵਿਹਾਰਂ ਗਨ੍ਤ੍ਵਾ ਨ ਭਿਕ੍ਖੁਵਸ੍ਸਾਨਿ ਗਣੇਤਿ, ਨ ਯਥਾਵੁਡ੍ਢਂ ਵਨ੍ਦਨਂ ਸਾਦਿਯਤਿ, ਨ ਆਸਨੇਨ ਪਟਿਬਾਹਤਿ, ਨ ਉਪੋਸਥਪਵਾਰਣਾਦੀਸੁ ਸਨ੍ਦਿਸ੍ਸਤਿ, ਅਯਂ ਲਿਙ੍ਗਮਤ੍ਤਸ੍ਸੇਵ ਥੇਨਿਤਤ੍ਤਾ ਲਿਙ੍ਗਤ੍ਥੇਨਕੋ ਨਾਮ. ਯੋ ਪਨ ਭਿਕ੍ਖੂਹਿ ਪਬ੍ਬਾਜਿਤੋ ਸਾਮਣੇਰੋ ਸਮਾਨੋ ਵਿਦੇਸਂ ਗਨ੍ਤ੍ਵਾ ‘‘ਅਹਂ ਦਸਵਸ੍ਸੋ ਵਾ ਵੀਸਤਿਵਸ੍ਸੋ ਵਾ’’ਤਿ ਮੁਸਾ ਵਤ੍ਵਾ ਭਿਕ੍ਖੁਵਸ੍ਸਾਨਿ ਗਣੇਤਿ, ਯਥਾਵੁਡ੍ਢਂ ਵਨ੍ਦਨਂ ਸਾਦਿਯਤਿ, ਆਸਨੇਨ ਪਟਿਬਾਹਤਿ, ਉਪੋਸਥਪਵਆਰਣਾਦੀਸੁ ਸਨ੍ਦਿਸ੍ਸਤਿ, ਅਯਂ ਸਂਵਾਸਮਤ੍ਤਸ੍ਸੇਵ ਥੇਨਿਤਤ੍ਤਾ ਸਂਵਾਸਤ੍ਥੇਨਕੋ ਨਾਮ. ਭਿਕ੍ਖੁਵਸ੍ਸਗਣਨਾਦਿਕੋ ਹਿ ਸਬ੍ਬੋਪਿ ਕਿਰਿਯਭੇਦੋ ਇਮਸ੍ਮਿਂ ਅਤ੍ਥੇ ‘‘ਸਂਵਾਸੋ’’ਤਿ ਵੇਦਿਤਬ੍ਬੋ. ਸਿਕ੍ਖਂ ਪਚ੍ਚਕ੍ਖਾਯ ‘‘ਨ ਮਂ ਕੋਚਿ ਜਾਨਾਤੀ’’ਤਿ ਪੁਨ ਏਵਂ ਪਟਿਪਜ੍ਜਨ੍ਤੇਪਿ ਏਸੇਵ ਨਯੋ. ਯੋ ਪਨ ਸਯਂ ਪਬ੍ਬਜਿਤ੍ਵਾ ਵਿਹਾਰਂ ਗਨ੍ਤ੍ਵਾ ਭਿਕ੍ਖੁਵਸ੍ਸਾਨਿ ਗਣੇਤਿ, ਯਥਾਵੁਡ੍ਢਂ ਵਨ੍ਦਨਂ ਸਾਦਿਯਤਿ, ਆਸਨੇਨ ਪਟਿਬਾਹਤਿ, ਉਪੋਸਥਪਵਾਰਣਾਦੀਸੁ ਸਨ੍ਦਿਸ੍ਸਤਿ, ਅਯਂ ਲਿਙ੍ਗਸ੍ਸ ਚੇਵ ਸਂਵਾਸਸ੍ਸ ਚ ਥੇਨਿਤਤ੍ਤਾ ਉਭਯਤ੍ਥੇਨਕੋ ਨਾਮ. ਅਯਂ ਤਿਵਿਧੋਪਿ ਥੇਯ੍ਯਸਂਵਾਸਕੋ ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋ, ਪੁਨ ਪਬ੍ਬਜ੍ਜਂ ਯਾਚਨ੍ਤੋਪਿ ਨ ਪਬ੍ਬਾਜੇਤਬ੍ਬੋ.

੧੩੮. ਏਤ੍ਥ ਚ ਅਸਮ੍ਮੋਹਤ੍ਥਂ ਇਦਂ ਪਕਿਣ੍ਣਕਂ ਵੇਦਿਤਬ੍ਬਂ –

‘‘ਰਾਜਦੁਬ੍ਭਿਕ੍ਖਕਨ੍ਤਾਰ, ਰੋਗਵੇਰਿਭਯੇਨ ਵਾ;

ਚੀਵਰਾਹਰਣਤ੍ਥਂ ਵਾ, ਲਿਙ੍ਗਂ ਆਦਿਯਤੀਧ ਯੋ.

‘‘ਸਂਵਾਸਂ ਨਾਧਿਵਾਸੇਤਿ, ਯਾਵ ਸੋ ਸੁਦ੍ਧਮਾਨਸੋ;

ਥੇਯ੍ਯਸਂਵਾਸਕੋ ਨਾਮ, ਤਾਵ ਏਸ ਨ ਵੁਚ੍ਚਤੀ’’ਤਿ. (ਮਹਾਵ. ਅਟ੍ਠ. ੧੧੦);

ਤਤ੍ਰਾਯਂ ਵਿਤ੍ਥਾਰਨਯੋ – ਇਧੇਕਚ੍ਚਸ੍ਸ ਰਾਜਾ ਕੁਦ੍ਧੋ ਹੋਤਿ, ਸੋ ‘‘ਏਵਂ ਮੇ ਸੋਤ੍ਥਿ ਭਵਿਸ੍ਸਤੀ’’ਤਿ ਸਯਮੇਵ ਲਿਙ੍ਗਂ ਗਹੇਤ੍ਵਾ ਪਲਾਯਤਿ. ਤਂ ਦਿਸ੍ਵਾ ਰਞ੍ਞੋ ਆਰੋਚੇਨ੍ਤਿ, ਰਾਜਾ ‘‘ਸਚੇ ਪਬ੍ਬਜਿਤੋ, ਨ ਤਂ ਲਬ੍ਭਾ ਕਿਞ੍ਚਿ ਕਾਤੁ’’ਨ੍ਤਿ ਤਸ੍ਮਿਂ ਕੋਧਂ ਪਟਿਵਿਨੇਤਿ. ਸੋ ‘‘ਵੂਪਸਨ੍ਤਂ ਮੇ ਰਾਜਭਯ’’ਨ੍ਤਿ ਸਙ੍ਘਮਜ੍ਝਂ ਅਨੋਸਰਿਤ੍ਵਾਵ ਗਿਹਿਲਿਙ੍ਗਂ ਗਹੇਤ੍ਵਾ ਆਗਤੋ ਪਬ੍ਬਾਜੇਤਬ੍ਬੋ. ਅਥਾਪਿ ‘‘ਸਾਸਨਂ ਨਿਸ੍ਸਾਯ ਮਯਾ ਜੀਵਿਤਂ ਲਦ੍ਧਂ, ਹਨ੍ਦ ਦਾਨਿ ਅਹਂ ਪਬ੍ਬਜਾਮੀ’’ਤਿ ਉਪ੍ਪਨ੍ਨਸਂਵੇਗੋ ਤੇਨੇਵ ਲਿਙ੍ਗੇਨ ਆਗਨ੍ਤ੍ਵਾ ਆਗਨ੍ਤੁਕਵਤ੍ਤਂ ਨ ਸਾਦਿਯਤਿ, ਭਿਕ੍ਖੂਹਿ ਪੁਟ੍ਠੋ ਵਾ ਅਪੁਟ੍ਠੋ ਵਾ ਯਥਾਭੂਤਮਤ੍ਤਾਨਂ ਆਵਿਕਤ੍ਵਾ ਪਬ੍ਬਜ੍ਜਂ ਯਾਚਤਿ, ਲਿਙ੍ਗਂ ਅਪਨੇਤ੍ਵਾ ਪਬ੍ਬਾਜੇਤਬ੍ਬੋ. ਸਚੇ ਪਨ ਸੋ ਵਤ੍ਤਂ ਸਾਦਿਯਤਿ, ਪਬ੍ਬਜਿਤਾਲਯਂ ਦਸ੍ਸੇਤਿ, ਸਬ੍ਬਂ ਪੁਬ੍ਬੇ ਵੁਤ੍ਤਂ ਵਸ੍ਸਗਣਨਾਦਿਭੇਦਂ ਵਿਧਿਂ ਪਟਿਪਜ੍ਜਤਿ, ਅਯਂ ਨ ਪਬ੍ਬਾਜੇਤਬ੍ਬੋ.

ਇਧ ਪਨੇਕਚ੍ਚੋ ਦੁਬ੍ਭਿਕ੍ਖੇ ਜੀਵਿਤੁਂ ਅਸਕ੍ਕੋਨ੍ਤੋ ਸਯਮੇਵ ਲਿਙ੍ਗਂ ਗਹੇਤ੍ਵਾ ਸਬ੍ਬਪਾਸਣ੍ਡਿਯਭਤ੍ਤਾਨਿ ਭੁਞ੍ਜਨ੍ਤੋ ਦੁਬ੍ਭਿਕ੍ਖੇ ਵੀਤਿਵਤ੍ਤੇ ਸਙ੍ਘਮਜ੍ਝਂ ਅਨੋਸਰਿਤ੍ਵਾਵ ਗਿਹਿਲਿਙ੍ਗਂ ਗਹੇਤ੍ਵਾ ਆਗਤੋਤਿ ਸਬ੍ਬਂ ਪੁਰਿਮਸਦਿਸਮੇਵ.

ਅਪਰੋ ਮਹਾਕਨ੍ਤਾਰਂ ਨਿਤ੍ਥਰਿਤੁਕਾਮੋ ਹੋਤਿ, ਸਤ੍ਥਵਾਹੋ ਚ ਪਬ੍ਬਜਿਤੇ ਗਹੇਤ੍ਵਾ ਗਚ੍ਛਤਿ. ਸੋ ‘‘ਏਵਂ ਮਂ ਸਤ੍ਥਵਾਹੋ ਗਹੇਤ੍ਵਾ ਗਮਿਸ੍ਸਤੀ’’ਤਿ ਸਯਮੇਵ ਲਿਙ੍ਗਂ ਗਹੇਤ੍ਵਾ ਸਤ੍ਥਵਾਹੇਨ ਸਦ੍ਧਿਂ ਕਨ੍ਤਾਰਂ ਨਿਤ੍ਥਰਿਤ੍ਵਾ ਖੇਮਨ੍ਤਂ ਪਤ੍ਵਾ ਸਙ੍ਘਮਜ੍ਝਂ ਅਨੋਸਰਿਤ੍ਵਾਵ ਗਿਹਿਲਿਙ੍ਗਂ ਗਹੇਤ੍ਵਾ ਆਗਤੋਤਿ ਸਬ੍ਬਂ ਪੁਰਿਮਸਦਿਸਮੇਵ.

ਅਪਰੋ ਰੋਗਭਯੇ ਉਪ੍ਪਨ੍ਨੇ ਜੀਵਿਤੁਂ ਅਸਕ੍ਕੋਨ੍ਤੋ ਸਯਮੇਵ ਲਿਙ੍ਗਂ ਗਹੇਤ੍ਵਾ ਸਬ੍ਬਪਾਸਣ੍ਡਿਯਭਤ੍ਤਾਨਿ ਭੁਞ੍ਜਨ੍ਤੋ ਰੋਗਭਯੇ ਵੂਪਸਨ੍ਤੇ ਸਙ੍ਘਮਜ੍ਝਂ ਅਨੋਸਰਿਤ੍ਵਾਵ ਗਿਹਿਲਿਙ੍ਗਂ ਗਹੇਤ੍ਵਾ ਆਗਤੋਤਿ ਸਬ੍ਬਂ ਪੁਰਿਮਸਦਿਸਮੇਵ.

ਅਪਰਸ੍ਸ ਏਕੋ ਵੇਰਿਕੋ ਕੁਦ੍ਧੋ ਹੋਤਿ, ਘਾਤੇਤੁਕਾਮੋ ਨਂ ਵਿਚਰਤਿ. ਸੋ ‘‘ਏਵਂ ਮੇ ਸੋਤ੍ਥਿ ਭਵਿਸ੍ਸਤੀ’’ਤਿ ਸਯਮੇਵ ਲਿਙ੍ਗਂ ਗਹੇਤ੍ਵਾ ਪਲਾਯਤਿ. ਵੇਰਿਕੋ ‘‘ਕੁਹਿਂ ਸੋ’’ਤਿ ਪਰਿਯੇਸਨ੍ਤੋ ‘‘ਪਬ੍ਬਜਿਤ੍ਵਾ ਪਲਾਤੋ’’ਤਿ ਸੁਤ੍ਵਾ ‘‘ਸਚੇ ਪਬ੍ਬਜਿਤੋ, ਨ ਤਂ ਲਬ੍ਭਾ ਕਿਞ੍ਚਿ ਕਾਤੁ’’ਨ੍ਤਿ ਤਸ੍ਮਿਂ ਕੋਧਂ ਪਟਿਵਿਨੇਤਿ. ਸੋ ‘‘ਵੂਪਸਨ੍ਤਂ ਮੇ ਵੇਰਿਭਯ’’ਨ੍ਤਿ ਸਙ੍ਘਮਜ੍ਝਂ ਅਨੋਸਰਿਤ੍ਵਾਵ ਗਿਹਿਲਿਙ੍ਗਂ ਗਹੇਤ੍ਵਾ ਆਗਤੋਤਿ ਸਬ੍ਬਂ ਪੁਰਿਮਸਦਿਸਮੇਵ.

ਅਪਰੋ ਞਾਤਿਕੁਲਂ ਗਨ੍ਤ੍ਵਾ ਸਿਕ੍ਖਂ ਪਚ੍ਚਕ੍ਖਾਯ ਗਿਹੀ ਹੁਤ੍ਵਾ ‘‘ਇਮਾਨਿ ਚੀਵਰਾਨਿ ਇਧ ਨਸ੍ਸਿਸ੍ਸਨ੍ਤਿ, ਸਚੇਪਿ ਇਮਾਨਿ ਗਹੇਤ੍ਵਾ ਵਿਹਾਰਂ ਗਮਿਸ੍ਸਾਮਿ, ਅਨ੍ਤਰਾਮਗ੍ਗੇ ਮਂ ‘ਚੋਰੋ’ਤਿ ਗਹੇਸ੍ਸਨ੍ਤਿ, ਯਂਨੂਨਾਹਂ ਕਾਯਪਰਿਹਾਰਿਯਾਨਿ ਕਤ੍ਵਾ ਗਚ੍ਛੇਯ੍ਯ’’ਨ੍ਤਿ ਚੀਵਰਾਹਰਣਤ੍ਥਂ ਨਿਵਾਸੇਤ੍ਵਾ ਚ ਪਾਰੁਪਿਤ੍ਵਾ ਚ ਵਿਹਾਰਂ ਗਚ੍ਛਤਿ. ਤਂ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ਸਾਮਣੇਰਾ ਚ ਦਹਰਾ ਚ ਅਬ੍ਭੁਗ੍ਗਚ੍ਛਨ੍ਤਿ, ਵਤ੍ਤਂ ਦਸ੍ਸੇਨ੍ਤਿ. ਸੋ ਨ ਸਾਦਿਯਤਿ, ਯਥਾਭੂਤਮਤ੍ਤਾਨਂ ਆਵਿਕਰੋਤਿ. ਸਚੇ ਭਿਕ੍ਖੂ ‘‘ਨ ਦਾਨਿ ਮਯਂ ਤਂ ਮੁਞ੍ਚਿਸ੍ਸਾਮਾ’’ਤਿ ਬਲਕ੍ਕਾਰੇਨ ਪਬ੍ਬਾਜੇਤੁਕਾਮਾ ਹੋਨ੍ਤਿ, ਕਾਸਾਯਾਨਿ ਅਪਨੇਤ੍ਵਾ ਪੁਨ ਪਬ੍ਬਾਜੇਤਬ੍ਬੋ. ਸਚੇ ਪਨ ‘‘ਨਯਿਮੇ ਮਂ ਹੀਨਾਯਾਵਤ੍ਤਭਾਵਂ ਜਾਨਨ੍ਤੀ’’ਤਿ ਤਂਯੇਵ ਭਿਕ੍ਖੁਭਾਵਂ ਪਟਿਜਾਨਿਤ੍ਵਾ ਸਬ੍ਬਂ ਪੁਬ੍ਬੇ ਵੁਤ੍ਤਂ ਵਸ੍ਸਗਣਨਾਦਿਭੇਦਂ ਵਿਧਿਂ ਪਟਿਪਜ੍ਜਤਿ, ਅਯਂ ਨ ਪਬ੍ਬਾਜੇਤਬ੍ਬੋ.

ਅਪਰੋ ਮਹਾਸਾਮਣੇਰੋ ਞਾਤਿਕੁਲਂ ਗਨ੍ਤ੍ਵਾ ਉਪ੍ਪਬ੍ਬਜਿਤ੍ਵਾ ਕਮ੍ਮਨ੍ਤਾਨੁਟ੍ਠਾਨੇਨ ਉਬ੍ਬਾਲ਼੍ਹੋ ਪੁਨ ‘‘ਦਾਨਿ ਅਹਂ ਸਾਮਣੇਰੋ ਭਵਿਸ੍ਸਾਮਿ, ਥੇਰੋਪਿ ਮੇ ਉਪ੍ਪਬ੍ਬਜਿਤਭਾਵਂ ਨ ਜਾਨਾਤੀ’’ਤਿ ਤਦੇਵ ਪਤ੍ਤਚੀਵਰਂ ਆਦਾਯ ਵਿਹਾਰਂ ਗਚ੍ਛਤਿ, ਤਮਤ੍ਥਂ ਭਿਕ੍ਖੂਨਂ ਨ ਆਰੋਚੇਤਿ, ਸਾਮਣੇਰਭਾਵਂ ਪਟਿਜਾਨਾਤਿ, ਅਯਂ ਥੇਯ੍ਯਸਂਵਾਸਕੋਯੇਵ, ਪਬ੍ਬਜ੍ਜਂ ਨ ਲਭਤਿ. ਸਚੇਪਿਸ੍ਸ ਲਿਙ੍ਗਗ੍ਗਹਣਕਾਲੇ ਏਵਂ ਹੋਤਿ ‘‘ਨਾਹਂ ਕਸ੍ਸਚਿ ਆਰੋਚੇਸ੍ਸਾਮੀ’’ਤਿ, ਵਿਹਾਰਞ੍ਚ ਗਤੋ ਆਰੋਚੇਤਿ, ਗਹਣੇਨੇਵ ਥੇਯ੍ਯਸਂਵਾਸਕੋ. ਅਥਾਪਿਸ੍ਸ ਗਹਣਕਾਲੇ ‘‘ਆਚਿਕ੍ਖਿਸ੍ਸਾਮੀ’’ਤਿ ਚਿਤ੍ਤਂ ਉਪ੍ਪਨ੍ਨਂ ਹੋਤਿ, ਵਿਹਾਰਞ੍ਚ ਗਨ੍ਤ੍ਵਾ ‘‘ਕੁਹਿਂ ਤ੍ਵਂ, ਆਵੁਸੋ, ਗਤੋ’’ਤਿ ਵੁਤ੍ਤੋ ‘‘ਨ ਦਾਨਿ ਮਂ ਇਮੇ ਜਾਨਨ੍ਤੀ’’ਤਿ ਵਞ੍ਚੇਤ੍ਵਾ ਨਾਚਿਕ੍ਖਤਿ, ‘‘ਨਾਚਿਕ੍ਖਿਸ੍ਸਾਮੀ’’ਤਿ ਸਹ ਧੁਰਨਿਕ੍ਖੇਪੇਨ ਅਯਮ੍ਪਿ ਥੇਯ੍ਯਸਂਵਾਸਕੋਵ. ਸਚੇ ਪਨਸ੍ਸ ਗਹਣਕਾਲੇਪਿ ‘‘ਆਚਿਕ੍ਖਿਸ੍ਸਾਮੀ’’ਤਿ ਹੋਤਿ, ਵਿਹਾਰਂ ਗਨ੍ਤ੍ਵਾਪਿ ਆਚਿਕ੍ਖਤਿ, ਅਯਂ ਪੁਨ ਪਬ੍ਬਜ੍ਜਂ ਲਭਤਿ.

ਅਪਰੋ ਦਹਰਸਾਮਣੇਰੋ ਮਹਨ੍ਤੋ ਵਾ ਪਨ ਅਬ੍ਯਤ੍ਤੋ. ਸੋ ਪੁਰਿਮਨਯੇਨੇਵ ਉਪ੍ਪਬ੍ਬਜਿਤ੍ਵਾ ਘਰੇ ਵਚ੍ਛਕਗੋਰਕ੍ਖਣਾਦੀਨਿ ਕਮ੍ਮਾਨਿ ਕਾਤੁਂ ਨ ਇਚ੍ਛਤਿ. ਤਮੇਨਂ ਞਾਤਕਾ ਤਾਨਿਯੇਵ ਕਾਸਾਯਾਨਿ ਅਚ੍ਛਾਦੇਤ੍ਵਾ ਥਾਲਕਂ ਵਾ ਪਤ੍ਤਂ ਵਾ ਹਤ੍ਥੇ ਦਤ੍ਵਾ ‘‘ਗਚ੍ਛ, ਸਮਣੋਵ ਹੋਹੀ’’ਤਿ ਘਰਾ ਨੀਹਰਨ੍ਤਿ. ਸੋ ਵਿਹਾਰਂ ਗਚ੍ਛਤਿ, ਨੇਵ ਨਂ ਭਿਕ੍ਖੂ ਜਾਨਨ੍ਤਿ ‘‘ਅਯਂ ਉਪ੍ਪਬ੍ਬਜਿਤ੍ਵਾ ਪੁਨ ਸਯਮੇਵ ਪਬ੍ਬਜਿਤੋ’’ਤਿ, ਨਾਪਿ ਸਯਂ ਜਾਨਾਤਿ ‘‘ਯੋ ਏਵਂ ਪਬ੍ਬਜਤਿ, ਸੋ ਥੇਯ੍ਯਸਂਵਾਸਕੋ ਨਾਮ ਹੋਤੀ’’ਤਿ. ਸਚੇ ਪਨ ਤਂ ਪਰਿਪੁਣ੍ਣਵਸ੍ਸਂ ਉਪਸਮ੍ਪਾਦੇਨ੍ਤਿ, ਸੂਪਸਮ੍ਪਨ੍ਨੋ. ਸਚੇ ਪਨ ਅਨੁਪਸਮ੍ਪਨ੍ਨਕਾਲੇਯੇਵ ਵਿਨਯਵਿਨਿਚ੍ਛਯੇ ਵਤ੍ਤਮਾਨੇ ਸੁਣਾਤਿ ‘‘ਯੋ ਏਵਂ ਪਬ੍ਬਜਤਿ, ਸੋ ਥੇਯ੍ਯਸਂਵਾਸਕੋ ਨਾਮ ਹੋਤੀ’’ਤਿ, ਤੇਨ ‘‘ਮਯਾ ਏਵਂ ਕਤ’’ਨ੍ਤਿ ਭਿਕ੍ਖੂਨਂ ਆਚਿਕ੍ਖਿਤਬ੍ਬਂ. ਏਵਂ ਪੁਨ ਪਬ੍ਬਜ੍ਜਂ ਲਭਤਿ. ਸਚੇ ਪਨ ‘‘ਦਾਨਿ ਨ ਮਂ ਕੋਚਿ ਜਾਨਾਤੀ’’ਤਿ ਨਾਰੋਚੇਤਿ, ਧੁਰਂ ਨਿਕ੍ਖਿਤ੍ਤਮਤ੍ਤੇਯੇਵ ਥੇਯ੍ਯਸਂਵਾਸਕੋ.

ਭਿਕ੍ਖੁ ਸਿਕ੍ਖਂ ਪਚ੍ਚਕ੍ਖਾਯ ਲਿਙ੍ਗਂ ਅਨਪਨੇਤ੍ਵਾ ਦੁਸ੍ਸੀਲਕਮ੍ਮਂ ਕਤ੍ਵਾ ਵਾ ਅਕਤ੍ਵਾ ਵਾ ਪੁਨ ਸਬ੍ਬਂ ਪੁਬ੍ਬੇ ਵੁਤ੍ਤਂ ਵਸ੍ਸਗਣਨਾਦਿਭੇਦਂ ਵਿਧਿਂ ਪਟਿਪਜ੍ਜਤਿ, ਥੇਯ੍ਯਸਂਵਾਸਕੋ ਹੋਤਿ. ਸਿਕ੍ਖਂ ਅਪ੍ਪਚ੍ਚਕ੍ਖਾਯ ਸਲਿਙ੍ਗੇ ਠਿਤੋ ਮੇਥੁਨਂ ਪਟਿਸੇਵਿਤ੍ਵਾ ਵਸ੍ਸਗਣਨਾਦਿਭੇਦਂ ਵਿਧਿਂ ਆਪਜ੍ਜਨ੍ਤੋ ਥੇਯ੍ਯਸਂਵਾਸਕੋ ਨ ਹੋਤਿ, ਪਬ੍ਬਜ੍ਜਾਮਤ੍ਤਂ ਲਭਤਿ. ਅਨ੍ਧਕਟ੍ਠਕਥਾਯਂ ਪਨ ‘‘ਏਸੋ ਥੇਯ੍ਯਸਂਵਾਸਕੋ’’ਤਿ ਵੁਤ੍ਤਂ, ਤਂ ਨ ਗਹੇਤਬ੍ਬਂ.

ਏਕੋ ਭਿਕ੍ਖੁ ਕਾਸਾਯੇ ਸਉਸ੍ਸਾਹੋਵ ਓਦਾਤਂ ਨਿਵਾਸੇਤ੍ਵਾ ਮੇਥੁਨਂ ਪਟਿਸੇਵਿਤ੍ਵਾ ਪੁਨ ਕਾਸਾਯਾਨਿ ਨਿਵਾਸੇਤ੍ਵਾ ਵਸ੍ਸਗਣਨਾਦਿਭੇਦਂ ਵਿਧਿਂ ਆਪਜ੍ਜਤਿ, ਅਯਮ੍ਪਿ ਥੇਯ੍ਯਸਂਵਾਸਕੋ ਨ ਹੋਤਿ, ਪਬ੍ਬਜ੍ਜਾਮਤ੍ਤਂ ਲਭਤਿ. ਸਚੇ ਪਨ ਕਾਸਾਯੇ ਧੁਰਂ ਨਿਕ੍ਖਿਪਿਤ੍ਵਾ ਓਦਾਤਂ ਨਿਵਾਸੇਤ੍ਵਾ ਮੇਥੁਨਂ ਪਟਿਸੇਵਿਤ੍ਵਾ ਪੁਨ ਕਾਸਾਯਾਨਿ ਨਿਵਾਸੇਤ੍ਵਾ ਵਸ੍ਸਗਣਨਾਦਿਭੇਦਂ ਵਿਧਿਂ ਆਪਜ੍ਜਤਿ, ਥੇਯ੍ਯਸਂਵਾਸਕੋ ਹੋਤਿ. ਸਾਮਣੇਰੋ ਸਲਿਙ੍ਗੇ ਠਿਤੋ ਮੇਥੁਨਾਦਿਅਸ੍ਸਮਣਕਰਣਧਮ੍ਮਂ ਆਪਜ੍ਜਿਤ੍ਵਾਪਿਥੇਯ੍ਯਸਂਵਾਸਕੋ ਨ ਹੋਤਿ. ਸਚੇਪਿ ਕਾਸਾਯੇ ਸਉਸ੍ਸਾਹੋਵ ਕਾਸਾਯਾਨਿ ਅਪਨੇਤ੍ਵਾ ਮੇਥੁਨਂ ਪਟਿਸੇਵਿਤ੍ਵਾ ਪੁਨ ਕਾਸਾਯਾਨਿ ਨਿਵਾਸੇਤਿ, ਨੇਵ ਥੇਯ੍ਯਸਂਵਾਸਕੋ ਹੋਤਿ. ਸਚੇ ਪਨ ਕਾਸਾਯੇ ਧੁਰਂ ਨਿਕ੍ਖਿਪਿਤ੍ਵਾ ਨਗ੍ਗੋ ਵਾ ਓਦਾਤਵਤ੍ਥੋ ਵਾ ਮੇਥੁਨਸੇਵਨਾਦੀਹਿ ਅਸ੍ਸਮਣੋ ਹੁਤ੍ਵਾ ਕਾਸਾਯਂ ਨਿਵਾਸੇਤਿ, ਥੇਯ੍ਯਸਂਵਾਸਕੋ ਹੋਤਿ.

ਸਚੇ ਗਿਹਿਭਾਵਂ ਪਤ੍ਥਯਮਾਨੋ ਕਾਸਾਯਂ ਓਵਟ੍ਟਿਕਂ ਕਤ੍ਵਾ ਅਞ੍ਞੇਨ ਵਾ ਆਕਾਰੇਨ ਗਿਹਿਨਿਵਾਸਨੇਨ ਨਿਵਾਸੇਤਿ ‘‘ਸੋਭਤਿ ਨੁ ਖੋ ਮੇ ਗਿਹਿਲਿਙ੍ਗਂ, ਨ ਸੋਭਤੀ’’ਤਿ ਵੀਮਂਸਨਤ੍ਥਂ, ਰਕ੍ਖਤਿ ਤਾਵ. ‘‘ਸੋਭਤੀ’’ਤਿ ਸਮ੍ਪਟਿਚ੍ਛਿਤ੍ਵਾ ਪਨ ਪੁਨ ਲਿਙ੍ਗਂ ਸਾਦਿਯਨ੍ਤੋ ਥੇਯ੍ਯਸਂਵਾਸਕੋ ਹੋਤਿ. ਓਦਾਤਂ ਨਿਵਾਸੇਤ੍ਵਾ ਵੀਮਂਸਨਸਮ੍ਪਟਿਚ੍ਛਨੇਸੁਪਿ ਏਸੇਵ ਨਯੋ. ਸਚੇ ਪਨ ਨਿਵਤ੍ਥਕਾਸਾਵਸ੍ਸ ਉਪਰਿ ਓਦਾਤਂ ਨਿਵਾਸੇਤ੍ਵਾ ਵੀਮਂਸਤਿ ਵਾ ਸਮ੍ਪਟਿਚ੍ਛਤਿ ਵਾ, ਰਕ੍ਖਤਿਯੇਵ. ਭਿਕ੍ਖੁਨਿਯਾਪਿ ਏਸੇਵ ਨਯੋ. ਸਾਪਿ ਗਿਹਿਭਾਵਂ ਪਤ੍ਥਯਮਾਨਾ ਸਚੇ ਕਾਸਾਯਂ ਗਿਹਿਨਿਵਾਸਨਂ ਨਿਵਾਸੇਤਿ ‘‘ਸੋਭਤਿ ਨੁ ਖੋ ਮੇ ਗਿਹਿਲਿਙ੍ਗਂ, ਨ ਸੋਭਤੀ’’ਤਿ ਵੀਮਂਸਨਤ੍ਥਂ, ਰਕ੍ਖਤਿਯੇਵ. ਸਚੇ ‘‘ਸੋਭਤੀ’’ਤਿ ਸਮ੍ਪਟਿਚ੍ਛਤਿ, ਨ ਰਕ੍ਖਤਿ. ਓਦਾਤਂ ਨਿਵਾਸੇਤ੍ਵਾ ਵੀਮਂਸਨਸਮ੍ਪਟਿਚ੍ਛਨੇਸੁਪਿ ਏਸੇਵ ਨਯੋ. ਨਿਵਤ੍ਥਕਾਸਾਯਸ੍ਸ ਪਨ ਉਪਰਿ ਓਦਾਤਂ ਨਿਵਾਸੇਤ੍ਵਾ ਵੀਮਂਸਤੁ ਵਾ ਸਮ੍ਪਟਿਚ੍ਛਤੁ ਵਾ, ਰਕ੍ਖਤਿਯੇਵ.

ਸਚੇ ਕੋਚਿ ਵੁਡ੍ਢਪਬ੍ਬਜਿਤੋ ਵਸ੍ਸਾਨਿ ਅਗਣੇਤ੍ਵਾ ਪਾਲ਼ਿਯਮ੍ਪਿ ਅਟ੍ਠਤ੍ਵਾ ਏਕਪਸ੍ਸੇਨ ਗਨ੍ਤ੍ਵਾ ਮਹਾਪੇਲ਼ਾਦੀਸੁ ਕਟਚ੍ਛੁਨਾ ਉਕ੍ਖਿਤ੍ਤੇ ਭਤ੍ਤਪਿਣ੍ਡੇ ਪਤ੍ਤਂ ਉਪਨਾਮੇਤ੍ਵਾ ਸੇਨੋ ਵਿਯ ਮਂਸਪੇਸਿਂ ਗਹੇਤ੍ਵਾ ਗਚ੍ਛਤਿ, ਥੇਯ੍ਯਸਂਵਾਸਕੋ ਨ ਹੋਤਿ, ਭਿਕ੍ਖੁਵਸ੍ਸਾਨਿ ਪਨ ਗਣੇਤ੍ਵਾ ਗਣ੍ਹਨ੍ਤੋ ਥੇਯ੍ਯਸਂਵਾਸਕੋ ਹੋਤਿ. ਸਯਂ ਸਾਮਣੇਰੋਵ ਸਾਮਣੇਰਪਟਿਪਾਟਿਯਾ ਕੂਟਵਸ੍ਸਾਨਿ ਗਣੇਤ੍ਵਾ ਗਣ੍ਹਨ੍ਤੋ ਥੇਯ੍ਯਸਂਵਾਸਕੋ ਨ ਹੋਤਿ. ਭਿਕ੍ਖੁ ਭਿਕ੍ਖੁਪਟਿਪਾਟਿਯਾ ਕੂਟਵਸ੍ਸਾਨਿ ਗਣੇਤ੍ਵਾ ਗਣ੍ਹਨ੍ਤੋ ਭਣ੍ਡਗ੍ਘੇਨ ਕਾਰੇਤਬ੍ਬੋ.

੧੩੯. ਤਿਤ੍ਥਿਯਪਕ੍ਕਨ੍ਤਕੋਤਿ ਤਿਤ੍ਥਿਯੇਸੁ ਪਕ੍ਕਨ੍ਤੋ ਪਵਿਟ੍ਠੋਤਿ ਤਿਤ੍ਥਿਯਪਕ੍ਕਨ੍ਤਕੋ, ਸੋਪਿ ਨ ਪਬ੍ਬਾਜੇਤਬ੍ਬੋ. ਤਤ੍ਰਾਯਂ ਵਿਨਿਚ੍ਛਯੋ – ਉਪਸਮ੍ਪਨ੍ਨੋ ਭਿਕ੍ਖੁ ‘‘ਤਿਤ੍ਥਿਯੋ ਭਵਿਸ੍ਸਾਮੀ’’ਤਿ ਸਲਿਙ੍ਗੇਨੇਵ ਤੇਸਂ ਉਪਸ੍ਸਯਂ ਗਚ੍ਛਤਿ, ਪਦਵਾਰੇ ਪਦਵਾਰੇ ਦੁਕ੍ਕਟਂ, ਤੇਸਂ ਲਿਙ੍ਗੇ ਆਦਿਨ੍ਨਮਤ੍ਤੇ ਤਿਤ੍ਥਿਯਪਕ੍ਕਨ੍ਤਕੋ ਹੋਤਿ. ਯੋਪਿ ਸਯਮੇਵ ‘‘ਤਿਤ੍ਥਿਯੋ ਭਵਿਸ੍ਸ’’ਨ੍ਤਿ ਕੁਸਚੀਰਾਦੀਨਿ ਨਿਵਾਸੇਤਿ, ਤਿਤ੍ਥਿਯਪਕ੍ਕਨ੍ਤਕੋ ਹੋਤਿਯੇਵ. ਯੋ ਪਨ ਨਗ੍ਗੋ ਨਹਾਯਨ੍ਤੋ ਅਤ੍ਤਾਨਂ ਓਲੋਕੇਤ੍ਵਾ ‘‘ਸੋਭਤਿ ਮੇ ਆਜੀਵਕਭਾਵੋ, ਆਜੀਵਕੋ ਭਵਿਸ੍ਸ’’ਨ੍ਤਿ ਕਾਸਾਯਾਨਿ ਅਨਾਦਾਯ ਨਗ੍ਗੋ ਆਜੀਵਕਾਨਂ ਉਪਸ੍ਸਯਂ ਗਚ੍ਛਤਿ, ਪਦਵਾਰੇ ਪਦਵਾਰੇ ਦੁਕ੍ਕਟਂ. ਸਚੇ ਪਨਸ੍ਸ ਅਨ੍ਤਰਾਮਗ੍ਗੇ ਹਿਰੋਤ੍ਤਪ੍ਪਂ ਉਪ੍ਪਜ੍ਜਤਿ, ਦੁਕ੍ਕਟਾਨਿ ਦੇਸੇਤ੍ਵਾ ਮੁਚ੍ਚਤਿ. ਤੇਸਂ ਉਪਸ੍ਸਯਂ ਗਨ੍ਤ੍ਵਾਪਿ ਤੇਹਿ ਵਾ ਓਵਦਿਤੋ ਅਤ੍ਤਨਾ ਵਾ ‘‘ਇਮੇਸਂ ਪਬ੍ਬਜ੍ਜਾ ਅਤਿਦੁਕ੍ਖਾ’’ਤਿ ਦਿਸ੍ਵਾ ਨਿਵਤ੍ਤਨ੍ਤੋਪਿ ਮੁਚ੍ਚਤਿਯੇਵ. ਸਚੇ ਪਨ ‘‘ਕਿਂ ਤੁਮ੍ਹਾਕਂ ਪਬ੍ਬਜ੍ਜਾਯ ਉਕ੍ਕਟ੍ਠ’’ਨ੍ਤਿ ਪੁਚ੍ਛਿਤ੍ਵਾ ‘‘ਕੇਸਮਸ੍ਸੁਲੁਞ੍ਚਨਾਦੀਨੀ’’ਤਿ ਵੁਤ੍ਤੋ ਏਕਕੇਸਮ੍ਪਿ ਲੁਞ੍ਚਾਪੇਤਿ, ਉਕ੍ਕੁਟਿਕਪ੍ਪਧਾਨਾਦੀਨਿ ਵਾ ਵਤ੍ਤਾਨਿ ਆਦਿਯਤਿ, ਮੋਰਪਿਞ੍ਛਾਦੀਨਿ ਵਾ ਨਿਵਾਸੇਤਿ, ਤੇਸਂ ਲਿਙ੍ਗਂ ਗਣ੍ਹਾਤਿ, ‘‘ਅਯਂ ਪਬ੍ਬਜ੍ਜਾ ਸੇਟ੍ਠਾ’’ਤਿ ਸੇਟ੍ਠਭਾਵਂ ਵਾ ਉਪਗਚ੍ਛਤਿ, ਨ ਮੁਚ੍ਚਤਿ, ਤਿਤ੍ਥਿਯਪਕ੍ਕਨ੍ਤਕੋ ਹੋਤਿ. ਸਚੇ ਪਨ ‘‘ਸੋਭਤਿ ਨੁ ਖੋ ਮੇ ਤਿਤ੍ਥਿਯਪਬ੍ਬਜ੍ਜਾ, ਨਨੁ ਖੋ ਸੋਭਤੀ’’ਤਿ ਵੀਮਂਸਨਤ੍ਥਂ ਕੁਸਚੀਰਾਦੀਨਿ ਵਾ ਨਿਵਾਸੇਤਿ, ਜਟਂ ਵਾ ਬਨ੍ਧਤਿ, ਖਾਰਿਕਾਜਂ ਵਾ ਆਦਿਯਤਿ, ਯਾਵ ਨ ਸਮ੍ਪਟਿਚ੍ਛਤਿ ਲਦ੍ਧਿਂ, ਤਾਵ ਰਕ੍ਖਤਿ, ਸਮ੍ਪਟਿਚ੍ਛਿਤਮਤ੍ਤੇ ਤਿਤ੍ਥਿਯਪਕ੍ਕਨ੍ਤਕੋ ਹੋਤਿ. ਅਚ੍ਛਿਨ੍ਨਚੀਵਰੋ ਪਨ ਕੁਸਚੀਰਾਦੀਨਿ ਨਿਵਾਸੇਨ੍ਤੋ ਰਾਜਭਯਾਦੀਹਿ ਵਾ ਤਿਤ੍ਥਿਯਲਿਙ੍ਗਂ ਗਣ੍ਹਨ੍ਤੋ ਲਦ੍ਧਿਯਾ ਅਭਾਵੇਨ ਨੇਵ ਤਿਤ੍ਥਿਯਪਕ੍ਕਨ੍ਤਕੋ ਹੋਤਿ. ‘‘ਅਯਞ੍ਚ ਤਿਤ੍ਥਿਯਪਕ੍ਕਨ੍ਤਕੋ ਨਾਮ ਉਪਸਮ੍ਪਨ੍ਨਭਿਕ੍ਖੁਨਾ ਕਥਿਤੋ, ਤਸ੍ਮਾ ਸਾਮਣੇਰੋ ਸਲਿਙ੍ਗੇਨ ਤਿਤ੍ਥਿਯਾਯਤਨਂ ਗਤੋਪਿ ਪੁਨ ਪਬ੍ਬਜ੍ਜਞ੍ਚ ਉਪਸਮ੍ਪਦਞ੍ਚ ਲਭਤੀ’’ਤਿ ਕੁਰੁਨ੍ਦਿਯਂ ਵੁਤ੍ਤਂ. ਪੁਰਿਮੋ ਪਨ ਥੇਯ੍ਯਸਂਵਾਸਕੋ ਅਨੁਪਸਮ੍ਪਨ੍ਨੇਨ ਕਥਿਤੋ, ਤਸ੍ਮਾ ਉਪਸਮ੍ਪਨ੍ਨੋ ਕੂਟਵਸ੍ਸਂ ਗਣੇਨ੍ਤੋਪਿ ਅਸ੍ਸਮਣੋ ਨ ਹੋਤਿ. ਲਿਙ੍ਗੇ ਸਉਸ੍ਸਾਹੋ ਪਾਰਾਜਿਕਂ ਆਪਜ੍ਜਿਤ੍ਵਾ ਭਿਕ੍ਖੁਵਸ੍ਸਾਦੀਨਿ ਗਣ੍ਹਨ੍ਤੋਪਿ ਥੇਯ੍ਯਸਂਵਾਸਕੋ ਨ ਹੋਤਿ.

੧੪੦. ਤਿਰਚ੍ਛਾਨਗਤੋਤਿ ਨਾਗੋ ਵਾ ਹੋਤੁ ਸੁਪਣ੍ਣਮਾਣਵਕਾਦੀਨਂ ਵਾ ਅਞ੍ਞਤਰੋ ਅਨ੍ਤਮਸੋ ਸਕ੍ਕਂ ਦੇਵਰਾਜਾਨਂ ਉਪਾਦਾਯ ਯੋ ਕੋਚਿ ਅਮਨੁਸ੍ਸਜਾਤਿਯੋ, ਸਬ੍ਬੋਵ ਇਮਸ੍ਮਿਂ ਅਤ੍ਥੇ ‘‘ਤਿਰਚ੍ਛਾਨਗਤੋ’’ਤਿ ਵੇਦਿਤਬ੍ਬੋ. ਸੋ ਚ ਨੇਵ ਉਪਸਮ੍ਪਾਦੇਤਬ੍ਬੋ ਨ ਪਬ੍ਬਾਜੇਤਬ੍ਬੋ, ਉਪਸਮ੍ਪਨ੍ਨੋਪਿ ਨਾਸੇਤਬ੍ਬੋ.

੧੪੧. ਮਾਤੁਘਾਤਕਾਦੀਸੁ ਪਨ ਯੇਨ ਮਨੁਸ੍ਸਿਤ੍ਥਿਭੂਤਾ ਜਨਿਕਾ ਮਾਤਾ ਸਯਮ੍ਪਿ ਮਨੁਸ੍ਸਜਾਤਿਕੇਨੇਵ ਸਭਾ ਸਞ੍ਚਿਚ੍ਚ ਜੀਵਿਤਾ ਵੋਰੋਪਿਤਾ, ਅਯਂ ਆਨਨ੍ਤਰਿਯੇਨ ਮਾਤੁਘਾਤਕਕਮ੍ਮੇਨ ਮਾਤੁਘਾਤਕੋ. ਏਤਸ੍ਸ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਪਟਿਕ੍ਖਿਤ੍ਤਾ. ਯੇਨ ਪਨ ਮਨੁਸ੍ਸਿਤ੍ਥਿਭੂਤਾਪਿ ਅਜਨਿਕਾ ਪੋਸਾਵਨਿਕਾ ਮਾਤਾ ਵਾ ਚੂਲ਼ਮਾਤਾ ਵਾ ਜਨਿਕਾਪਿ ਵਾ ਨ ਮਨੁਸ੍ਸਿਤ੍ਥਿਭੂਤਾ ਮਾਤਾ ਘਾਤਿਤਾ, ਤਸ੍ਸ ਪਬ੍ਬਜ੍ਜਾ ਨ ਵਾਰਿਤਾ, ਨ ਚ ਆਨਨ੍ਤਰਿਕੋ ਹੋਤਿ. ਯੇਨ ਸਯਂ ਤਿਰਚ੍ਛਾਨਭੂਤੇਨ ਮਨੁਸ੍ਸਿਤ੍ਥਿਭੂਤਾ ਮਾਤਾ ਘਾਤਿਤਾ, ਸੋਪਿ ਆਨਨ੍ਤਰਿਕੋ ਨ ਹੋਤਿ, ਤਿਰਚ੍ਛਾਨਗਤਤ੍ਤਾ ਪਨਸ੍ਸ ਪਬ੍ਬਜ੍ਜਾ ਪਟਿਕ੍ਖਿਤ੍ਤਾ. ਪਿਤੁਘਾਤਕੇਪਿ ਏਸੇਵ ਨਯੋ. ਸਚੇਪਿ ਹਿ ਵੇਸਿਯਾ ਪੁਤ੍ਤੋ ਹੋਤਿ, ‘‘ਅਯਂ ਮੇ ਪਿਤਾ’’ਤਿ ਨ ਜਾਨਾਤਿ, ਯਸ੍ਸ ਸਮ੍ਭਵੇਨ ਨਿਬ੍ਬਤ੍ਤੋ, ਸੋ ਚੇ ਅਨੇਨ ਘਾਤਿਤੋ, ਪਿਤੁਘਾਤਕੋਤ੍ਵੇਵ ਸਙ੍ਖ੍ਯਂ ਗਚ੍ਛਤਿ, ਆਨਨ੍ਤਰਿਯਞ੍ਚ ਫੁਸਤਿ.

ਅਰਹਨ੍ਤਘਾਤਕੋਪਿ ਮਨੁਸ੍ਸਅਰਹਨ੍ਤਵਸੇਨੇਵ ਵੇਦਿਤਬ੍ਬੋ. ਮਨੁਸ੍ਸਜਾਤਿਯਞ੍ਹਿ ਅਨ੍ਤਮਸੋ ਅਪਬ੍ਬਜਿਤਮ੍ਪਿ ਖੀਣਾਸਵਂ ਦਾਰਕਂ ਵਾ ਦਾਰਿਕਂ ਵਾ ਸਞ੍ਚਿਚ੍ਚ ਜੀਵਿਤਾ ਵੋਰੋਪੇਨ੍ਤੋ ਅਰਹਨ੍ਤਘਾਤਕੋਵ ਹੋਤਿ, ਆਨਨ੍ਤਰਿਯਞ੍ਚ ਫੁਸਤਿ, ਪਬ੍ਬਜ੍ਜਾ ਚਸ੍ਸ ਵਾਰਿਤਾ. ਅਮਨੁਸ੍ਸਜਾਤਿਕਂ ਪਨ ਅਰਹਨ੍ਤਂ ਮਨੁਸ੍ਸਜਾਤਿਕਂ ਵਾ ਅਵਸੇਸਂ ਅਰਿਯਪੁਗ੍ਗਲਂ ਘਾਤੇਤ੍ਵਾ ਆਨਨ੍ਤਰਿਕੋ ਨ ਹੋਤਿ, ਪਬ੍ਬਜ੍ਜਾਪਿਸ੍ਸ ਨ ਵਾਰਿਤਾ, ਕਮ੍ਮਂ ਪਨ ਬਲਵਂ ਹੋਤਿ. ਤਿਰਚ੍ਛਾਨੋ ਮਨੁਸ੍ਸਅਰਹਨ੍ਤਮ੍ਪਿ ਘਾਤੇਤ੍ਵਾ ਆਨਨ੍ਤਰਿਕੋ ਨ ਹੋਤਿ, ਕਮ੍ਮਂ ਪਨ ਭਾਰਿਯਨ੍ਤਿ ਅਯਮੇਤ੍ਥ ਵਿਨਿਚ੍ਛਯੋ.

ਯੋ ਪਨ ਦੇਵਦਤ੍ਤੋ ਵਿਯ ਦੁਟ੍ਠਚਿਤ੍ਤੇਨ ਵਧਕਚਿਤ੍ਤੇਨ ਤਥਾਗਤਸ੍ਸ ਜੀਵਮਾਨਕਸਰੀਰੇ ਖੁਦ੍ਦਕਮਕ੍ਖਿਕਾਯ ਪਿਵਨਮਤ੍ਤਮ੍ਪਿ ਲੋਹਿਤਂ ਉਪ੍ਪਾਦੇਤਿ, ਅਯਂ ਲੋਹਿਤੁਪ੍ਪਾਦਕੋ ਨਾਮ. ਏਤਸ੍ਸ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਵਾਰਿਤਾ. ਯੋ ਪਨ ਰੋਗਵੂਪਸਮਤ੍ਥਂ ਜੀਵਕੋ ਵਿਯ ਸਤ੍ਥੇਨ ਫਾਲੇਤ੍ਵਾ ਪੂਤਿਮਂਸਲੋਹਿਤਂ ਹਰਿਤ੍ਵਾ ਫਾਸੁਕਂ ਕਰੋਤਿ, ਬਹੁਂ ਸੋ ਪੁਞ੍ਞਂ ਪਸਵਤੀਤਿ.

ਯੋ ਦੇਵਦਤ੍ਤੋ ਵਿਯ ਸਾਸਨਂ ਉਦ੍ਧਮ੍ਮਂ ਉਬ੍ਬਿਨਯਂ ਕਤ੍ਵਾ ਚਤੁਨ੍ਨਂ ਕਮ੍ਮਾਨਂ ਅਞ੍ਞਤਰਵਸੇਨ ਸਙ੍ਘਂ ਭਿਨ੍ਦਤਿ, ਅਯਂ ਸਙ੍ਘਭੇਦਕੋ ਨਾਮ. ਏਤਸ੍ਸ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਵਾਰਿਤਾ.

ਯੋ ਪਨ ਪਕਤਤ੍ਤਂ ਭਿਕ੍ਖੁਨਿਂ ਤਿਣ੍ਣਂ ਮਗ੍ਗਾਨਂ ਅਞ੍ਞਤਰਸ੍ਮਿਂ ਦੂਸੇਤਿ, ਅਯਂ ਭਿਕ੍ਖੁਨੀਦੂਸਕੋ ਨਾਮ. ਏਤਸ੍ਸ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਵਾਰਿਤਾ. ਯੋ ਪਨ ਕਾਯਸਂਸਗ੍ਗੇਨ ਸੀਲਵਿਨਾਸਂ ਪਾਪੇਤਿ, ਤਸ੍ਸ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਨ ਵਾਰਿਤਾ. ਬਲਕ੍ਕਾਰੇਨ ਓਦਾਤਵਤ੍ਥਵਸਨਂ ਕਤ੍ਵਾ ਅਨਿਚ੍ਛਮਾਨਂਯੇਵ ਦੂਸੇਨ੍ਤੋਪਿ ਭਿਕ੍ਖੁਨੀਦੂਸਕੋਯੇਵ, ਬਲਕ੍ਕਾਰੇਨ ਪਨ ਓਦਾਤਵਤ੍ਥਵਸਨਂ ਕਤ੍ਵਾ ਇਚ੍ਛਮਾਨਂ ਦੂਸੇਨ੍ਤੋ ਭਿਕ੍ਖੁਨੀਦੂਸਕੋ ਨ ਹੋਤਿ. ਕਸ੍ਮਾ? ਯਸ੍ਮਾ ਗਿਹਿਭਾਵੇ ਸਮ੍ਪਟਿਚ੍ਛਿ ਤਮਤ੍ਤੇਯੇਵ ਸਾ ਅਭਿਕ੍ਖੁਨੀ ਹੋਤਿ. ਸਕਿਂਸੀਲਵਿਪਨ੍ਨਂ ਪਚ੍ਛਾ ਦੂਸੇਨ੍ਤੋ ਸਿਕ੍ਖਮਾਨਸਾਮਣੇਰੀਸੁ ਚ ਵਿਪ੍ਪਟਿਪਜ੍ਜਨ੍ਤੋ ਨੇਵ ਭਿਕ੍ਖੁਨੀਦੂਸਕੋ ਹੋਤਿ, ਪਬ੍ਬਜ੍ਜਮ੍ਪਿ ਉਪਸਮ੍ਪਦਮ੍ਪਿ ਲਭਤਿ. ਇਤਿ ਇਮੇ ਏਕਾਦਸ ਅਭਬ੍ਬਪੁਗ੍ਗਲਾ ਵੇਦਿਤਬ੍ਬਾ.

੧੪੨. ਊਨਵੀਸਤਿਵਸ੍ਸਸ੍ਸ ਪਨ ਉਪਸਮ੍ਪਦਾਯੇਵ ਪਟਿਕ੍ਖਿਤ੍ਤਾ, ਨ ਪਬ੍ਬਜ੍ਜਾ, ਤਸ੍ਮਾ ਪਟਿਸਨ੍ਧਿਗ੍ਗਹਣਤੋ ਪਟ੍ਠਾਯ ਪਰਿਪੁਣ੍ਣਵੀਸਤਿਵਸ੍ਸੋ ਉਪਸਮ੍ਪਾਦੇਤਬ੍ਬੋ. ਗਬ੍ਭਵੀਸੋਪਿ ਹਿ ਪਰਿਪੁਣ੍ਣਵੀਸਤਿਵਸ੍ਸੋਤ੍ਵੇਵ ਸਙ੍ਖ੍ਯਂ ਗਚ੍ਛਤਿ. ਯਥਾਹ ਭਗਵਾ –

‘‘ਯਂ, ਭਿਕ੍ਖਵੇ, ਮਾਤੁਕੁਚ੍ਛਿਸ੍ਮਿਂ ਪਠਮਂ ਚਿਤ੍ਤਂ ਉਪ੍ਪਨ੍ਨਂ, ਪਠਮਂ ਵਿਞ੍ਞਾਣਂ ਪਾਤੁਭੂਤਂ, ਤਦੁਪਾਦਾਯ ਸਾਵਸ੍ਸ ਜਾਤਿ. ਅਨੁਜਾਨਾਮਿ, ਭਿਕ੍ਖਵੇ, ਗਬ੍ਭਵੀਸਂ ਉਪਸਮ੍ਪਾਦੇਤੁ’’ਨ੍ਤਿ (ਮਹਾਵ. ੧੨੪).

ਤਤ੍ਥ (ਪਾਚਿ. ਅਟ੍ਠ. ੪੦੪) ਯੋ ਦ੍ਵਾਦਸ ਮਾਸੇ ਮਾਤੁਕੁਚ੍ਛਿਸ੍ਮਿਂ ਵਸਿਤ੍ਵਾ ਮਹਾਪਵਾਰਣਾਯ ਜਾਤੋ, ਸੋ ਤਤੋ ਪਟ੍ਠਾਯ ਯਾਵ ਏਕੂਨਵੀਸਤਿਮੇ ਵਸ੍ਸੇ ਮਹਾਪਵਾਰਣਾ, ਤਂ ਅਤਿਕ੍ਕਮਿਤ੍ਵਾ ਪਾਟਿਪਦੇ ਉਪਸਮ੍ਪਾਦੇਤਬ੍ਬੋ. ਏਤੇਨੁਪਾਯੇਨ ਹਾਯਨਵਡ੍ਢਨਂ ਵੇਦਿਤਬ੍ਬਂ. ਪੋਰਾਣਕਤ੍ਥੇਰਾ ਪਨ ਏਕੂਨਵੀਸਤਿਵਸ੍ਸਂ ਸਾਮਣੇਰਂ ਨਿਕ੍ਖਮਨੀਯਪੁਣ੍ਣਮਾਸਿਂ ਅਤਿਕ੍ਕਮ੍ਮ ਪਾਟਿਪਦਦਿਵਸੇ ਉਪਸਮ੍ਪਾਦੇਨ੍ਤਿ. ਕਸ੍ਮਾ? ਏਕਸ੍ਮਿਂ ਵਸ੍ਸੇ ਛ ਚਾਤੁਦ੍ਦਸਿਕਉਪੋਸਥਾ ਹੋਨ੍ਤਿ, ਇਤਿ ਵੀਸਤਿਯਾ ਵਸ੍ਸੇਸੁ ਚਤ੍ਤਾਰੋ ਮਾਸਾ ਪਰਿਹਾਯਨ੍ਤਿ, ਰਾਜਾਨੋ ਤਤਿਯੇ ਤਤਿਯੇ ਗਸ੍ਸੇ ਵਸ੍ਸਂ ਉਕ੍ਕਡ੍ਢਨ੍ਤਿ, ਇਤਿ ਅਟ੍ਠਾਰਸਵਸ੍ਸੇਸੁ ਛ ਮਾਸਾ ਵਡ੍ਢਨ੍ਤਿ, ਤਤੋ ਉਪੋਸਥਵਸੇਨ ਪਰਿਹੀਨੇ ਚਤ੍ਤਾਰੋ ਮਾਸੇ ਅਪਨੇਤ੍ਵਾ ਦ੍ਵੇ ਮਾਸਾ ਅਵਸੇਸਾ ਹੋਨ੍ਤਿ, ਤੇ ਦ੍ਵੇ ਮਾਸੇ ਗਹੇਤ੍ਵਾ ਵੀਸਤਿ ਵਸ੍ਸਾਨਿ ਪਰਿਪੁਣ੍ਣਾਨਿ ਹੋਨ੍ਤੀਤਿ ਨਿਕ੍ਕਙ੍ਖਾ ਹੁਤ੍ਵਾ ਨਿਕ੍ਖਮਨੀਯਪੁਣ੍ਣਮਾਸਿਂ ਅਤਿਕ੍ਕਮ੍ਮ ਪਾਟਿਪਦੇ ਉਪਸਮ੍ਪਾਦੇਨ੍ਤਿ.

ਏਤ੍ਥ ਪਨ ਯੋ ਪਵਾਰੇਤ੍ਵਾ ਵੀਸਤਿਵਸ੍ਸੋ ਭਵਿਸ੍ਸਤਿ, ਤਂ ਸਨ੍ਧਾਯ ‘‘ਏਕੂਨਵੀਸਤਿਵਸ੍ਸ’’ਨ੍ਤਿ ਵੁਤ੍ਤਂ. ਤਸ੍ਮਾ ਯੋ ਮਾਤੁਕੁਚ੍ਛਿਸ੍ਮਿਂ ਦ੍ਵਾਦਸ ਮਾਸੇ ਵਸਿ, ਸੋ ਏਕਵੀਸਤਿਵਸ੍ਸੋ ਹੋਤਿ. ਯੋ ਸਤ੍ਤ ਮਾਸੇ ਵਸਿ, ਸੋ ਸਤ੍ਤਮਾਸਾਧਿਕਵੀਸਤਿਵਸ੍ਸੋ. ਛਮਾਸਜਾਤੋ ਪਨ ਨ ਜੀਵਤਿ, ਊਨਵੀਸਤਿਵਸ੍ਸਂ ਪਨ ‘‘ਪਰਿਪੁਣ੍ਣਵੀਸਤਿਵਸ੍ਸੋ’’ਤਿ ਸਞ੍ਞਾਯ ਉਪਸਮ੍ਪਾਦੇਨ੍ਤਸ੍ਸ ਅਨਾਪਤ੍ਤਿ, ਪੁਗ੍ਗਲੋ ਪਨ ਅਨੁਪਸਮ੍ਪਨ੍ਨੋਵ ਹੋਤਿ. ਸਚੇ ਪਨ ਸੋ ਦਸਵਸ੍ਸਚ੍ਚਯੇਨ ਅਞ੍ਞਂ ਉਪਸਮ੍ਪਾਦੇਤਿ, ਤਞ੍ਚੇ ਮੁਞ੍ਚਿਤ੍ਵਾ ਗਣੋ ਪੂਰਤਿ, ਸੂਪਸਮ੍ਪਨ੍ਨੋ. ਸੋਪਿ ਚ ਯਾਵ ਨ ਜਾਨਾਤਿ, ਤਾਵਸ੍ਸ ਨੇਵ ਸਗ੍ਗਨ੍ਤਰਾਯੋ ਨ ਮੋਕ੍ਖਨ੍ਤਰਾਯੋ, ਞਤ੍ਵਾ ਪਨ ਪੁਨ ਉਪਸਮ੍ਪਜ੍ਜਿਤਬ੍ਬਂ.

੧੪੩. ਇਤਿ ਇਮੇਹਿ ਪਬ੍ਬਜ੍ਜਾਦੋਸੇਹਿ ਵਿਰਹਿਤੋਪਿ ‘‘ਨ, ਭਿਕ੍ਖਵੇ, ਅਨਨੁਞ੍ਞਾਤੋ ਮਾਤਾਪਿਤੂਹਿ ਪੁਤ੍ਤੋ ਪਬ੍ਬਾਜੇਤਬ੍ਬੋ’’ਤਿ (ਮਹਾਵ. ੧੦੫) ਵਚਨਤੋ ਮਾਤਾਪਿਤੂਹਿ ਅਨਨੁਞ੍ਞਾਤੋ ਨ ਪਬ੍ਬਾਜੇਤਬ੍ਬੋ. ਤਤ੍ਥ (ਮਹਾਵ. ਅਟ੍ਠ. ੧੦੫) ਮਾਤਾਪਿਤੂਹੀਤਿ ਜਨਕੇ ਸਨ੍ਧਾਯ ਵੁਤ੍ਤਂ. ਸਚੇ ਦ੍ਵੇਪਿ ਅਤ੍ਥਿ, ਦ੍ਵੇਪਿ ਆਪੁਚ੍ਛਿਤਬ੍ਬਾ. ਸਚੇ ਪਿਤਾ ਮਤੋ ਹੋਤਿ ਮਾਤਾ ਵਾ, ਯੋ ਜੀਵਤਿ, ਸੋ ਆਪੁਚ੍ਛਿ ਤਬ੍ਬੋ, ਪਬ੍ਬਜਿਤਾਪਿ ਆਪੁਚ੍ਛਿਤਬ੍ਬਾਵ. ਆਪੁਚ੍ਛਨ੍ਤੇਨ ਸਯਂ ਵਾ ਗਨ੍ਤ੍ਵਾ ਆਪੁਚ੍ਛਿਤਬ੍ਬਂ, ਅਞ੍ਞੋ ਵਾ ਪੇਸੇਤਬ੍ਬੋ. ਸੋ ਏਵ ਵਾ ਪੇਸੇਤਬ੍ਬੋ ‘‘ਗਚ੍ਛ ਮਾਤਾਪਿਤਰੋ ਆਪੁਚ੍ਛਿਤ੍ਵਾ ਏਹੀ’’ਤਿ. ਸਚੇ ‘‘ਅਨੁਞ੍ਞਾਤੋਮ੍ਹੀ’’ਤਿ ਵਦਤਿ, ਸਦ੍ਦਹਨ੍ਤੇਨ ਪਬ੍ਬਾਜੇਤਬ੍ਬੋ. ਪਿਤਾ ਸਯਂ ਪਬ੍ਬਜਿਤੋ ਪੁਤ੍ਤਮ੍ਪਿ ਪਬ੍ਬਾਜੇਤੁਕਾਮੋ ਹੋਤਿ, ਮਾਤਰਂ ਆਪੁਚ੍ਛਿਤ੍ਵਾ ਪਬ੍ਬਾਜੇਤੁ. ਮਾਤਾ ਵਾ ਧੀਤਰਂ ਪਬ੍ਬਾਜੇਤੁਕਾਮਾ ਪਿਤਰਂ ਆਪੁਚ੍ਛਿਤ੍ਵਾਵ ਪਬ੍ਬਾਜੇਤੁ. ਪਿਤਾ ਪੁਤ੍ਤਦਾਰੇਨ ਅਨਤ੍ਥਿਕੋ ਪਲਾਯਿ, ਮਾਤਾ ‘‘ਇਮਂ ਪਬ੍ਬਜੇਥਾ’’ਤਿ ਪੁਤ੍ਤਂ ਭਿਕ੍ਖੂਨਂ ਦੇਤਿ, ‘‘ਪਿਤਾਸ੍ਸ ਕੁਹਿ’’ਨ੍ਤਿ ਵੁਤ੍ਤੇ ‘‘ਚਿਤ੍ਤਕੇਲ਼ਿਂ ਕੀਲ਼ਿਤੁਂ ਪਲਾਤੋ’’ਤਿ ਵਦਤਿ, ਤਂ ਪਬ੍ਬਾਜੇਤੁਂ ਵਟ੍ਟਤਿ. ਮਾਤਾ ਕੇਨਚਿ ਪੁਰਿਸੇਨ ਸਦ੍ਧਿਂ ਪਲਾਤਾ ਹੋਤਿ, ਪਿਤਾ ਪਨ ‘‘ਪਬ੍ਬਾਜੇਥਾ’’ਤਿ ਵਦਤਿ, ਏਤ੍ਥਾਪਿ ਏਸੇਵ ਨਯੋ. ਪਿਤਾ ਵਿਪ੍ਪਵੁਤ੍ਥੋ ਹੋਤਿ, ਮਾਤਾ ਪੁਤ੍ਤਂ ‘‘ਪਬ੍ਬਾਜੇਥਾ’’ਤਿ ਅਨੁਜਾਨਾਤਿ, ‘‘ਪਿਤਾਸ੍ਸ ਕੁਹਿ’’ਨ੍ਤਿ ਵੁਤ੍ਤੇ ‘‘ਕਿਂ ਤੁਮ੍ਹਾਕਂ ਪਿਤਰਾ, ਅਹਂ ਜਾਨਿਸ੍ਸਾਮੀ’’ਤਿ ਵਦਤਿ, ਪਬ੍ਬਾਜੇਤੁਂ ਵਟ੍ਟਤੀਤਿ ਕੁਰੁਨ੍ਦਿਯਂ ਵੁਤ੍ਤਂ.

ਮਾਤਾਪਿਤਰੋ ਮਤਾ, ਦਾਰਕੋ ਚੂਲ਼ਮਾਤਾਦੀਨਂ ਸਨ੍ਤਿਕੇ ਸਂਵਦ੍ਧੋ, ਤਸ੍ਮਿਂ ਪਬ੍ਬਾਜਿਯਮਾਨੇ ਞਾਤਕਾ ਕਲਹਂ ਵਾ ਕਰੋਨ੍ਤਿ ਖਿਯ੍ਯਨ੍ਤਿ ਵਾ, ਤਸ੍ਮਾ ਵਿਵਾਦੁਪਚ੍ਛੇਦਨਤ੍ਥਂ ਆਪੁਚ੍ਛਿਤ੍ਵਾ ਪਬ੍ਬਾਜੇਤਬ੍ਬੋ, ਅਨਾਪੁਚ੍ਛਿਤ੍ਵਾ ਪਬ੍ਬਾਜੇਨ੍ਤਸ੍ਸ ਪਨ ਆਪਤ੍ਤਿ ਨਤ੍ਥਿ. ਦਹਰਕਾਲੇ ਗਹੇਤ੍ਵਾ ਪੋਸਕਾ ਮਾਤਾਪਿਤਰੋ ਨਾਮ ਹੋਨ੍ਤਿ, ਤੇਸੁਪਿ ਏਸੇਵ ਨਯੋ. ਪੁਤ੍ਤੋ ਅਤ੍ਤਾਨਂ ਨਿਸ੍ਸਾਯ ਜੀਵਤਿ, ਨ ਮਾਤਾਪਿਤਰੋ. ਸਚੇਪਿ ਰਾਜਾ ਹੋਤਿ, ਆਪੁਚ੍ਛਿਤ੍ਵਾਵ ਪਬ੍ਬਾਜੇਤਬ੍ਬੋ. ਮਾਤਾਪਿਤੂਹਿ ਅਨੁਞ੍ਞਾਤੋ ਪਬ੍ਬਜਿਤ੍ਵਾ ਪੁਨ ਵਿਬ੍ਭਮਤਿ, ਸਚੇਪਿ ਸਤਕ੍ਖਤ੍ਤੁਂ ਪਬ੍ਬਜਿਤ੍ਵਾ ਵਿਬ੍ਭਮਤਿ, ਆਗਤਾਗਤਕਾਲੇ ਪੁਨਪ੍ਪੁਨਂ ਆਪੁਚ੍ਛਿਤ੍ਵਾਵ ਪਬ੍ਬਾਜੇਤਬ੍ਬੋ. ਸਚੇਪਿ ਏਵਂ ਵਦਨ੍ਤਿ ‘‘ਅਯਂ ਵਿਬ੍ਭਮਿਤ੍ਵਾ ਗੇਹਂ ਆਗਤੋ, ਅਮ੍ਹਾਕਂ ਕਮ੍ਮਂ ਨ ਕਰੋਤਿ, ਪਬ੍ਬਜਿਤ੍ਵਾ ਤੁਮ੍ਹਾਕਂ ਵਤ੍ਤਂ ਨ ਪੂਰੇਤਿ, ਨਤ੍ਥਿ ਇਮਸ੍ਸ ਆਪੁਚ੍ਛਨਕਿਚ੍ਚਂ, ਆਗਤਾਗਤਂ ਨਂ ਪਬ੍ਬਾਜੇਯ੍ਯਾਥਾ’’ਤਿ, ਏਵਂ ਨਿਸ੍ਸਟ੍ਠਂ ਪੁਨ ਅਨਾਪੁਚ੍ਛਾਪਿ ਪਬ੍ਬਾਜੇਤੁਂ ਵਟ੍ਟਤਿ.

ਯੋਪਿ ਦਹਰਕਾਲੇਯੇਵ ‘‘ਅਯਂ ਤੁਮ੍ਹਾਕਂ ਦਿਨ੍ਨੋ, ਯਦਾ ਇਚ੍ਛਥ, ਤਦਾ ਪਬ੍ਬਾਜੇਯ੍ਯਾਥਾ’’ਤਿ ਏਵਂ ਦਿਨ੍ਨੋ ਹੋਤਿ, ਸੋਪਿ ਆਗਤਾਗਤੋ ਪੁਨ ਅਨਾਪੁਚ੍ਛਿਤ੍ਵਾਵ ਪਬ੍ਬਾਜੇਤਬ੍ਬੋ. ਯਂ ਪਨ ਦਹਰਕਾਲੇਯੇਵ ‘‘ਇਮਂ, ਭਨ੍ਤੇ, ਪਬ੍ਬਾਜੇਯ੍ਯਾਥਾ’’ਤਿ ਅਨੁਜਾਨਿਤ੍ਵਾ ਪਚ੍ਛਾ ਵੁਡ੍ਢਿਪ੍ਪਤ੍ਤਕਾਲੇ ਨਾਨੁਜਾਨਨ੍ਤਿ, ਅਯਂ ਨ ਅਨਾਪੁਚ੍ਛਾ ਪਬ੍ਬਾਜੇਤਬ੍ਬੋ. ਏਕੋ ਮਾਤਾਪਿਤੂਹਿ ਸਦ੍ਧਿਂ ਭਣ੍ਡਿਤ੍ਵਾ ‘‘ਪਬ੍ਬਾਜੇਥ ਮ’’ਨ੍ਤਿ ਆਗਚ੍ਛਤਿ, ‘‘ਆਪੁਚ੍ਛਿਤ੍ਵਾ ਏਹੀ’’ਤਿ ਚ ਵੁਤ੍ਤੋ ‘‘ਨਾਹਂ ਗਚ੍ਛਾਮਿ, ਸਚੇ ਮਂ ਨ ਪਬ੍ਬਾਜੇਥ, ਵਿਹਾਰਂ ਵਾ ਝਾਪੇਮਿ, ਸਤ੍ਥੇਨ ਵਾ ਤੁਮ੍ਹੇ ਪਹਰਾਮਿ, ਤੁਮ੍ਹਾਕਂ ਞਾਤਕਾਨਂ ਵਾ ਉਪਟ੍ਠਾਕਾਨਂ ਵਾ ਆਰਾਮਚ੍ਛੇਦਨਾਦੀਹਿ ਅਨਤ੍ਥਂ ਉਪ੍ਪਾਦੇਮਿ, ਰੁਕ੍ਖਾ ਵਾ ਪਤਿਤ੍ਵਾ ਮਰਾਮਿ, ਚੋਰਮਜ੍ਝਂ ਵਾ ਪਵਿਸਾਮਿ, ਦੇਸਨ੍ਤਰਂ ਵਾ ਗਚ੍ਛਾਮੀ’’ਤਿ ਵਦਤਿ, ਤਂ ਤਸ੍ਸੇਵ ਰਕ੍ਖਣਤ੍ਥਾਯ ਪਬ੍ਬਾਜੇਤੁਂ ਵਟ੍ਟਤਿ. ਸਚੇ ਪਨਸ੍ਸ ਮਾਤਾਪਿਤਰੋ ਆਗਨ੍ਤ੍ਵਾ ‘‘ਕਸ੍ਮਾ ਅਮ੍ਹਾਕਂ ਪੁਤ੍ਤਂ ਪਬ੍ਬਾਜਯਿਤ੍ਥਾ’’ਤਿ ਵਦਨ੍ਤਿ, ਤੇਸਂ ਤਮਤ੍ਥਂ ਆਰੋਚੇਤ੍ਵਾ ‘‘ਰਕ੍ਖਣਤ੍ਥਾਯ ਨਂ ਪਬ੍ਬਾਜਯਿਮ੍ਹ, ਪਞ੍ਞਾਯਥ ਤੁਮ੍ਹੇ ਪੁਤ੍ਤੇਨਾ’’ਤਿ ਵਤ੍ਤਬ੍ਬਾ. ‘‘ਰੁਕ੍ਖਾ ਪਤਿਸ੍ਸਾਮੀ’’ਤਿ ਅਭਿਰੁਹਿਤ੍ਵਾ ਪਨ ਹਤ੍ਥਪਾਦੇ ਮੁਞ੍ਚਨ੍ਤਂ ਪਬ੍ਬਾਜੇਤੁਂ ਵਟ੍ਟਤਿਯੇਵ.

ਏਕੋ ਵਿਦੇਸਂ ਗਨ੍ਤ੍ਵਾ ਪਬ੍ਬਜ੍ਜਂ ਯਾਚਤਿ, ਆਪੁਚ੍ਛਿਤ੍ਵਾ ਚੇ ਗਤੋ, ਪਬ੍ਬਾਜੇਤਬ੍ਬੋ. ਨੋ ਚੇ, ਦਹਰਭਿਕ੍ਖੁਂ ਪੇਸੇਤ੍ਵਾ ਆਪੁਚ੍ਛਾਪੇਤ੍ਵਾ ਪਬ੍ਬਾਜੇਤਬ੍ਬੋ. ਅਤਿਦੂਰਞ੍ਚੇ ਹੋਤਿ, ਪਬ੍ਬਾਜੇਤ੍ਵਾਪਿ ਭਿਕ੍ਖੂਹਿ ਸਦ੍ਧਿਂ ਪੇਸੇਤ੍ਵਾ ਦਸ੍ਸੇਤੁਂ ਵਟ੍ਟਤਿ. ਕੁਰੁਨ੍ਦਿਯਂ ਪਨ ਵੁਤ੍ਤਂ ‘‘ਸਚੇ ਦੂਰਂ ਹੋਤਿ, ਮਗ੍ਗੋ ਚ ਮਹਾਕਨ੍ਤਾਰੋ, ‘ਗਨ੍ਤ੍ਵਾ ਆਪੁਚ੍ਛਿਸ੍ਸਾਮੀ’ਤਿ ਪਬ੍ਬਾਜੇਤੁਂ ਵਟ੍ਟਤੀ’’ਤਿ. ਸਚੇ ਪਨ ਮਾਤਾਪਿਤੂਨਂ ਬਹੂ ਪੁਤ੍ਤਾ ਹੋਨ੍ਤਿ, ਏਵਞ੍ਚ ਵਦਨ੍ਤਿ ‘‘ਭਨ੍ਤੇ, ਏਤੇਸਂ ਦਾਰਕਾਨਂ ਯਂ ਇਚ੍ਛਥ, ਤਂ ਪਬ੍ਬਾਜੇਯ੍ਯਾਥਾ’’ਤਿ, ਦਾਰਕੇ ਵੀਮਂਸਿਤ੍ਵਾ ਯਂ ਇਚ੍ਛਤਿ, ਸੋ ਪਬ੍ਬਾਜੇਤਬ੍ਬੋ. ਸਚੇਪਿ ਸਕਲੇਨ ਕੁਲੇਨ ਵਾ ਗਾਮੇਨ ਵਾ ਅਨੁਞ੍ਞਾਤੋ ਹੋਤਿ ‘‘ਭਨ੍ਤੇ, ਇਮਸ੍ਮਿਂ ਕੁਲੇ ਵਾ ਗਾਮੇ ਵਾ ਯਂ ਇਚ੍ਛਥ, ਤਂ ਪਬ੍ਬਾਜੇਯ੍ਯਾਥਾ’’ਤਿ, ਯਂ ਇਚ੍ਛਤਿ, ਸੋ ਪਬ੍ਬਾਜੇਤਬ੍ਬੋਤਿ.

੧੪੪. ਏਵਂ (ਮਹਾਵ. ਅਟ੍ਠ. ੩੪) ਪਬ੍ਬਜ੍ਜਾਦੋਸਵਿਰਹਿਤਂ ਮਾਤਾਪਿਤੂਹਿ ਅਨੁਞ੍ਞਾਤਂ ਪਬ੍ਬਾਜੇਨ੍ਤੇਨਪਿ ਚ ਸਚੇ ਅਚ੍ਛਿਨ੍ਨਕੇਸੋ ਹੋਤਿ, ਏਕਸੀਮਾਯਞ੍ਚ ਅਞ੍ਞੇਪਿ ਭਿਕ੍ਖੂ ਅਤ੍ਥਿ, ਕੇਸਚ੍ਛੇਦਨਤ੍ਥਾਯ ਭਣ੍ਡੁਕਮ੍ਮਂ ਆਪੁਚ੍ਛਿਤਬ੍ਬਂ. ਤਤ੍ਰਾਯਂ ਆਪੁਚ੍ਛਨਵਿਧਿ (ਮਹਾਵ. ਅਟ੍ਠ. ੯੮) – ਸੀਮਾਪਰਿਯਾਪਨ੍ਨੇ ਭਿਕ੍ਖੂ ਸਨ੍ਨਿਪਾਤੇਤ੍ਵਾ ਪਬ੍ਬਜ੍ਜਾਪੇਕ੍ਖਂ ਤਤ੍ਥ ਨੇਤ੍ਵਾ ‘‘ਸਙ੍ਘਂ, ਭਨ੍ਤੇ, ਇਮਸ੍ਸ ਦਾਰਕਸ੍ਸ ਭਣ੍ਡੁਕਮ੍ਮਂ ਆਪੁਚ੍ਛਾਮੀ’’ਤਿ ਤਿਕ੍ਖਤ੍ਤੁਂ ਵਾ ਦ੍ਵਿਕ੍ਖਤ੍ਤੁਂ ਵਾ ਸਕਿਂ ਵਾ ਵਤ੍ਤਬ੍ਬਂ. ਏਤ੍ਥ ਚ ‘‘ਇਮਸ੍ਸ ਦਾਰਕਸ੍ਸ ਭਣ੍ਡੁਕਮ੍ਮਂ ਆਪੁਚ੍ਛਾਮੀ’’ਤਿਪਿ ‘‘ਇਮਸ੍ਸ ਸਮਣਕਰਣਂ ਆਪੁਚ੍ਛਾਮੀ’’ਤਿਪਿ ‘‘ਅਯਂ ਸਮਣੋ ਹੋਤੁਕਾਮੋ’’ਤਿਪਿ ‘‘ਅਯਂ ਪਬ੍ਬਜਿਤੁਕਾਮੋ’’ਤਿਪਿ ਵਤ੍ਤੁਂ ਵਟ੍ਟਤਿਯੇਵ. ਸਚੇ ਸਭਾਗਟ੍ਠਾਨਂ ਹੋਤਿ, ਦਸ ਵਾ ਵੀਸਤਿ ਵਾ ਤਿਂਸਂ ਵਾ ਭਿਕ੍ਖੂ ਵਸਨ੍ਤੀਤਿ ਪਰਿਚ੍ਛੇਦੋ ਪਞ੍ਞਾਯਤਿ, ਤੇਸਂ ਠਿਤੋਕਾਸਂ ਵਾ ਨਿਸਿਨ੍ਨੋਕਾਸਂ ਵਾ ਗਨ੍ਤ੍ਵਾਪਿ ਪੁਰਿਮਨਯੇਨੇਵ ਆਪੁਚ੍ਛਿਤਬ੍ਬਂ. ਪਬ੍ਬਜ੍ਜਾਪੇਕ੍ਖਂ ਵਿਨਾਵ ਦਹਰਭਿਕ੍ਖੂ ਵਾ ਸਾਮਣੇਰੇ ਵਾ ਪੇਸੇਤ੍ਵਾਪਿ ‘‘ਏਕੋ, ਭਨ੍ਤੇ, ਪਬ੍ਬਜ੍ਜਾਪੇਕ੍ਖੋ ਅਤ੍ਥਿ, ਤਸ੍ਸ ਭਣ੍ਡੁਕਮ੍ਮਂ ਆਪੁਚ੍ਛਾਮਾ’’ਤਿਆਦਿਨਾ ਨਯੇਨ ਆਪੁਚ੍ਛਾਪੇਤੁਂ ਵਟ੍ਟਤਿ. ਸਚੇ ਕੇਚਿ ਭਿਕ੍ਖੂ ਸੇਨਾਸਨਂ ਵਾ ਗੁਮ੍ਬਾਦੀਨਿ ਵਾ ਪਵਿਸਿਤ੍ਵਾ ਨਿਦ੍ਦਾਯਨ੍ਤਿ ਵਾ ਸਮਣਧਮ੍ਮਂ ਵਾ ਕਰੋਨ੍ਤਿ, ਆਪੁਚ੍ਛਕਾ ਚ ਪਰਿਯੇਸਨ੍ਤਾਪਿ ਅਦਿਸ੍ਵਾ ‘‘ਸਬ੍ਬੇ ਆਪੁਚ੍ਛਿਤਾ ਅਮ੍ਹੇਹੀ’’ਤਿ ਸਞ੍ਞਿਨੋ ਹੋਨ੍ਤਿ, ਪਬ੍ਬਜ੍ਜਾ ਨਾਮ ਲਹੁਕਕਮ੍ਮਂ, ਤਸ੍ਮਾ ਪਬ੍ਬਜਿਤੋ ਸੁਪਬ੍ਬਜਿਤੋ, ਪਬ੍ਬਾਜੇਨ੍ਤਸ੍ਸਪਿ ਅਨਾਪਤ੍ਤਿ.

ਸਚੇ ਪਨ ਵਿਹਾਰੋ ਮਹਾ ਹੋਤਿ ਅਨੇਕਭਿਕ੍ਖੁਸਹਸ੍ਸਾਵਾਸੋ, ਸਬ੍ਬੇ ਭਿਕ੍ਖੂ ਸਨ੍ਨਿਪਾਤਾਪੇਤੁਮ੍ਪਿ ਦੁਕ੍ਕਰਂ, ਪਗੇਵ ਪਟਿਪਾਟਿਯਾ ਆਪੁਚ੍ਛਿਤੁਂ, ਖਣ੍ਡਸੀਮਾਯ ਵਾ ਠਤ੍ਵਾ ਨਦੀਸਮੁਦ੍ਦਾਦੀਨਿ ਵਾ ਗਨ੍ਤ੍ਵਾ ਪਬ੍ਬਾਜੇਤਬ੍ਬੋ. ਯੋ ਪਨ ਨਵਮੁਣ੍ਡੋ ਵਾ ਹੋਤਿ ਵਿਬ੍ਭਨ੍ਤਕੋ ਵਾ ਨਿਗਣ੍ਠਾਦੀਸੁ ਅਞ੍ਞਤਰੋ ਵਾ ਦ੍ਵਙ੍ਗੁਲਕੇਸੋ ਵਾ ਊਨਦ੍ਵਙ੍ਗੁਲਕੇਸੋ ਵਾ, ਤਸ੍ਸ ਕੇਸਚ੍ਛੇਦਨਕਿਚ੍ਚਂ ਨਤ੍ਥਿ, ਤਸ੍ਮਾ ਭਣ੍ਡੁਕਮ੍ਮਂ ਅਨਾਪੁਚ੍ਛਿਤ੍ਵਾਪਿ ਤਾਦਿਸਂ ਪਬ੍ਬਾਜੇਤੁਂ ਵਟ੍ਟਤਿ. ਦ੍ਵਙ੍ਗੁਲਾਤਿਰਿਤ੍ਤਕੇਸੋ ਪਨ ਯੋ ਹੋਤਿ ਅਨ੍ਤਮਸੋ ਏਕਸਿਖਾਮਤ੍ਤਧਰੋਪਿ, ਸੋ ਭਣ੍ਡੁਕਮ੍ਮਂ ਆਪੁਚ੍ਛਿਤ੍ਵਾਵ ਪਬ੍ਬਾਜੇਤਬ੍ਬੋ.

੧੪੫. ਏਵਂ ਆਪੁਚ੍ਛਿਤ੍ਵਾ ਪਬ੍ਬਾਜੇਨ੍ਤੇਨ ਚ ਪਰਿਪੁਣ੍ਣਪਤ੍ਤਚੀਵਰੋਵ ਪਬ੍ਬਾਜੇਤਬ੍ਬੋ. ਸਚੇ ਤਸ੍ਸ ਨਤ੍ਥਿ, ਯਾਚਿਤਕੇਨਪਿ ਪਤ੍ਤਚੀਵਰੇਨ ਪਬ੍ਬਾਜੇਤੁਂ ਵਟ੍ਟਤਿ, ਸਭਾਗਟ੍ਠਾਨੇ ਵਿਸ੍ਸਾਸੇਨ ਗਹੇਤ੍ਵਾਪਿ ਪਬ੍ਬਾਜੇਤੁਂ ਵਟ੍ਟਤਿ. ਸਚੇ (ਮਹਾਵ. ਅਟ੍ਠ. ੧੧੮) ਪਨ ਅਪਕ੍ਕਂ ਪਤ੍ਤਂ ਚੀਵਰੂਪਗਾਨਿ ਚ ਵਤ੍ਥਾਨਿ ਗਹੇਤ੍ਵਾ ਆਗਤੋ ਹੋਤਿ, ਯਾਵ ਪਤ੍ਤੋ ਪਚ੍ਚਤਿ, ਚੀਵਰਾਨਿ ਚ ਕਰੀਯਨ੍ਤਿ, ਤਾਵ ਵਿਹਾਰੇ ਵਸਨ੍ਤਸ੍ਸ ਅਨਾਮਟ੍ਠਪਿਣ੍ਡਪਾਤਂ ਦਾਤੁਂ ਵਟ੍ਟਤਿ, ਥਾਲਕੇਸੁ ਭੁਞ੍ਜਿਤੁਂ ਵਟ੍ਟਤਿ. ਪੁਰੇਭਤ੍ਤਂ ਸਾਮਣੇਰਭਾਗਸਮਕੋ ਆਮਿਸਭਾਗੋ ਦਾਤੁਂ ਵਟ੍ਟਤਿ, ਸੇਨਾਸਨਗ੍ਗਾਹੋ ਪਨ ਸਲਾਕਭਤ੍ਤਉਦ੍ਦੇਸਭਤ੍ਤਨਿਮਨ੍ਤਨਾਦੀਨਿ ਚ ਨ ਵਟ੍ਟਨ੍ਤਿ. ਪਚ੍ਛਾਭਤ੍ਤਮ੍ਪਿ ਸਾਮਣੇਰਭਾਗਸਮੋ ਤੇਲਤਣ੍ਡੁਲਮਧੁਫਾਣਿਤਾਦਿਭੇਸਜ੍ਜਭਾਗੋ ਵਟ੍ਟਤਿ. ਸਚੇ ਗਿਲਾਨੋ ਹੋਤਿ, ਭੇਸਜ੍ਜਮਸ੍ਸ ਕਾਤੁਂ ਵਟ੍ਟਤਿ, ਸਾਮਣੇਰਸ੍ਸ ਵਿਯ ਸਬ੍ਬਂ ਪਟਿਜਗ੍ਗਨਕਮ੍ਮਂ. ਉਪਸਮ੍ਪਦਾਪੇਕ੍ਖਂ ਪਨ ਯਾਚਿਤਕੇਨ ਪਤ੍ਤਚੀਵਰੇਨ ਉਪਸਮ੍ਪਾਦੇਤੁਂ ਨ ਵਟ੍ਟਤਿ. ‘‘ਨ, ਭਿਕ੍ਖਵੇ, ਯਾਚਿਤਕੇਨ ਪਤ੍ਤਚੀਵਰੇਨ ਉਪਸਮ੍ਪਾਦੇਤਬ੍ਬੋ, ਯੋ ਉਪਸਮ੍ਪਾਦੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੧੮) ਵੁਤ੍ਤਂ. ਤਸ੍ਮਾ ਸੋ ਪਰਿਪੁਣ੍ਣਪਤ੍ਤਚੀਵਰੋਯੇਵ ਉਪਸਮ੍ਪਾਦੇਤਬ੍ਬੋ. ਸਚੇ ਤਸ੍ਸ ਨਤ੍ਥਿ, ਆਚਰਿਯੁਪਜ੍ਝਾਯਾ ਚਸ੍ਸ ਦਾਤੁਕਾਮਾ ਹੋਨ੍ਤਿ, ਅਞ੍ਞੇ ਵਾ ਭਿਕ੍ਖੂ ਨਿਰਪੇਕ੍ਖੇਹਿ ਨਿਸ੍ਸਜ੍ਜਿਤ੍ਵਾ ਅਧਿਟ੍ਠਾਨੁਪਗਂ ਪਤ੍ਤਚੀਵਰਂ ਦਾਤਬ੍ਬਂ. ਯਾਚਿਤਕੇਨ ਪਨ ਪਤ੍ਤੇਨ ਵਾ ਚੀਵਰੇਨ ਵਾ ਉਪਸਮ੍ਪਾਦੇਨ੍ਤਸ੍ਸੇਵ ਆਪਤ੍ਤਿ ਹੋਤਿ, ਕਮ੍ਮਂ ਪਨ ਨ ਕੁਪ੍ਪਤਿ.

੧੪੬. ਪਰਿਪੁਣ੍ਣਪਤ੍ਤਚੀਵਰਂ (ਮਹਾਵ. ਅਟ੍ਠ. ੩੪) ਪਬ੍ਬਾਜੇਨ੍ਤੇਨਪਿ ਸਚੇ ਓਕਾਸੋ ਹੋਤਿ, ਸਯਂ ਪਬ੍ਬਾਜੇਤਬ੍ਬੋ. ਸਚੇ ਉਦ੍ਦੇਸਪਰਿਪੁਚ੍ਛਾਦੀਹਿ ਬ੍ਯਾਵਟੋ ਹੋਤਿ, ਓਕਾਸਂ ਨ ਲਭਤਿ, ਏਕੋ ਦਹਰਭਿਕ੍ਖੁ ਵਤ੍ਤਬ੍ਬੋ ‘‘ਏਤਂ ਪਬ੍ਬਾਜੇਹੀ’’ਤਿ. ਅਵੁਤ੍ਤੋਪਿ ਚੇ ਦਹਰਭਿਕ੍ਖੁ ਉਪਜ੍ਝਾਯਂ ਉਦ੍ਦਿਸ੍ਸ ਪਬ੍ਬਾਜੇਤਿ, ਵਟ੍ਟਤਿ. ਸਚੇ ਦਹਰਭਿਕ੍ਖੁ ਨਤ੍ਥਿ, ਸਾਮਣੇਰੋਪਿ ਵਤ੍ਤਬ੍ਬੋ ‘‘ਏਤਂ ਖਣ੍ਡਸੀਮਂ ਨੇਤ੍ਵਾ ਪਬ੍ਬਾਜੇਤ੍ਵਾ ਕਾਸਾਯਾਨਿ ਅਚ੍ਛਾਦੇਤ੍ਵਾ ਏਹੀ’’ਤਿ. ਸਰਣਾਨਿ ਪਨ ਸਯਂ ਦਾਤਬ੍ਬਾਨਿ. ਏਵਂ ਭਿਕ੍ਖੁਨਾਵ ਪਬ੍ਬਾਜਿਤੋ ਹੋਤਿ. ਪੁਰਿਸਞ੍ਹਿ ਭਿਕ੍ਖੁਤੋ ਅਞ੍ਞੋ ਪਬ੍ਬਾਜੇਤੁਂ ਨ ਲਭਤਿ, ਮਾਤੁਗਾਮਂ ਭਿਕ੍ਖੁਨੀਤੋ ਅਞ੍ਞੋ, ਸਾਮਣੇਰੋ ਪਨ ਸਾਮਣੇਰੀ ਵਾ ਆਣਤ੍ਤਿਯਾ ਕਾਸਾਯਾਨਿ ਦਾਤੁਂ ਲਭਨ੍ਤਿ, ਕੇਸੋਰੋਪਨਂ ਯੇਨ ਕੇਨਚਿ ਕਤਂ ਸੁਕਤਂ.

ਸਚੇ ਪਨ ਭਬ੍ਬਰੂਪੋ ਹੋਤਿ ਸਹੇਤੁਕੋ ਞਾਤੋ ਯਸਸ੍ਸੀ ਕੁਲਪੁਤ੍ਤੋ, ਓਕਾਸਂ ਕਤ੍ਵਾਪਿ ਸਯਮੇਵ ਪਬ੍ਬਾਜੇਤਬ੍ਬੋ, ‘‘ਮਤ੍ਤਿਕਾਮੁਟ੍ਠਿਂ ਗਹੇਤ੍ਵਾ ਨਹਾਯਿਤ੍ਵਾ ਆਗਚ੍ਛਾਹੀ’’ਤਿ ਚ ਨ ਪਨ ਵਿਸ੍ਸਜ੍ਜੇਤਬ੍ਬੋ. ਪਬ੍ਬਜਿਤੁਕਾਮਾਨਞ੍ਹਿ ਪਠਮਂ ਬਲਵਉਸ੍ਸਾਹੋ ਹੋਤਿ, ਪਚ੍ਛਾ ਪਨ ਕਾਸਾਯਾਨਿ ਚ ਕੇਸਹਰਣਸਤ੍ਥਕਞ੍ਚ ਦਿਸ੍ਵਾ ਉਤ੍ਰਸਨ੍ਤਿ, ਏਤ੍ਤੋਯੇਵ ਪਲਾਯਨ੍ਤਿ, ਤਸ੍ਮਾ ਸਯਮੇਵ ਨਹਾਨਤਿਤ੍ਥਂ ਨੇਤ੍ਵਾ ਸਚੇ ਨਾਤਿਦਹਰੋ, ‘‘ਨਹਾਹੀ’’ਤਿ ਵਤ੍ਤਬ੍ਬੋ, ਕੇਸਾ ਪਨਸ੍ਸ ਸਯਮੇਵ ਮਤ੍ਤਿਕਂ ਗਹੇਤ੍ਵਾ ਧੋਵਿਤਬ੍ਬਾ. ਦਹਰਕੁਮਾਰਕੋ ਪਨ ਸਯਂ ਉਦਕਂ ਓਤਰਿਤ੍ਵਾ ਗੋਮਯਮਤ੍ਤਿਕਾਹਿ ਘਂਸਿਤ੍ਵਾ ਨਹਾਪੇਤਬ੍ਬੋ. ਸਚੇਪਿਸ੍ਸ ਕਚ੍ਛੁ ਵਾ ਪਿਲ਼ਕਾ ਵਾ ਹੋਨ੍ਤਿ, ਯਥਾ ਮਾਤਾ ਪੁਤ੍ਤਂ ਨ ਜਿਗੁਚ੍ਛਤਿ, ਏਵਮੇਵਂ ਅਜਿਗੁਚ੍ਛਨ੍ਤੇਨ ਸਾਧੁਕਂ ਹਤ੍ਥਪਾਦਤੋ ਚ ਸੀਸਤੋ ਚ ਪਟ੍ਠਾਯ ਘਂਸਿਤ੍ਵਾ ਘਂਸਿਤ੍ਵਾ ਨਹਾਪੇਤਬ੍ਬੋ. ਕਸ੍ਮਾ? ਏਤ੍ਤਕੇਨ ਹਿ ਉਪਕਾਰੇਨ ਕੁਲਪੁਤ੍ਤਾ ਆਚਰਿਯੁਪਜ੍ਝਾਯੇਸੁ ਚ ਸਾਸਨੇ ਚ ਬਲਵਸਿਨੇਹਾ ਤਿਬ੍ਬਗਾਰਵਾ ਅਨਿਵਤ੍ਤਿਧਮ੍ਮਾ ਹੋਨ੍ਤਿ, ਉਪ੍ਪਨ੍ਨਂ ਅਨਭਿਰਤਿਂ ਵਿਨੋਦੇਤ੍ਵਾ ਥੇਰਭਾਵਂ ਪਾਪੁਣਨ੍ਤਿ, ਕਤਞ੍ਞੁਕਤਵੇਦਿਨੋ ਹੋਨ੍ਤਿ.

ਏਵਂ ਨਹਾਪਨਕਾਲੇ ਪਨ ਕੇਸਮਸ੍ਸੁਂ ਓਰੋਪਨਕਾਲੇ ਵਾ ‘‘ਤ੍ਵਂ ਞਾਤੋ ਯਸਸ੍ਸੀ, ਇਦਾਨਿ ਮਯਂ ਤਂ ਨਿਸ੍ਸਾਯ ਪਚ੍ਚਯੇਹਿ ਨ ਕਿਲਮਿਸ੍ਸਾਮਾ’’ਤਿ ਨ ਵਤ੍ਤਬ੍ਬੋ, ਅਞ੍ਞਾਪਿ ਅਨਿਯ੍ਯਾਨਿਕਕਥਾ ਨ ਵਤ੍ਤਬ੍ਬਾ, ਅਥ ਖ੍ਵਸ੍ਸ ‘‘ਆਵੁਸੋ, ਸੁਟ੍ਠੁ ਉਪਧਾਰੇਹਿ, ਸਤਿਂ ਉਪਟ੍ਠਾਪੇਹੀ’’ਤਿ ਵਤ੍ਵਾ ਤਚਪਞ੍ਚਕਕਮ੍ਮਟ੍ਠਾਨਂ ਆਚਿਕ੍ਖਿਤਬ੍ਬਂ. ਆਚਿਕ੍ਖਨ੍ਤੇਨ ਚ ਵਣ੍ਣਸਣ੍ਠਾਨਗਨ੍ਧਾਸਯੋਕਾਸਵਸੇਨ ਅਸੁਚਿਜੇਗੁਚ੍ਛਪਟਿਕ੍ਕੂਲਭਾਵਂ ਨਿਜ੍ਜੀਵਨਿਸ੍ਸਤ੍ਤਭਾਵਂ ਵਾ ਪਾਕਟਂ ਕਰੋਨ੍ਤੇਨ ਆਚਿਕ੍ਖਿਤਬ੍ਬਂ. ਸਚੇ ਹਿ ਸੋ ਪੁਬ੍ਬੇ ਮਦ੍ਦਿਤਸਙ੍ਖਾਰੋ ਹੋਤਿ ਭਾਵਿਤਭਾਵਨੋ ਕਣ੍ਟਕਵੇਧਾਪੇਕ੍ਖੋ ਵਿਯ ਪਰਿਪਕ੍ਕਗਣ੍ਡੋ ਸੂਰਿਯੁਗ੍ਗਮਨਾਪੇਕ੍ਖਂ ਵਿਯ ਚ ਪਰਿਣਤਪਦੁਮਂ, ਅਥਸ੍ਸ ਆਰਦ੍ਧਮਤ੍ਤੇ ਕਮ੍ਮਟ੍ਠਾਨਂ ਮਨਸਿਕਾਰੇ ਇਨ੍ਦਾਸਨਿ ਵਿਯ ਪਬ੍ਬਤੇ ਕਿਲੇਸਪਬ੍ਬਤੇ ਚੁਣ੍ਣਯਮਾਨਂਯੇਵ ਞਾਣਂ ਪਵਤ੍ਤਤਿ, ਖੁਰਗ੍ਗੇਯੇਵ ਅਰਹਤ੍ਤਂ ਪਾਪੁਣਾਤਿ. ਯੇ ਹਿ ਕੇਚਿ ਖੁਰਗ੍ਗੇ ਅਰਹਤ੍ਤਂ ਪਤ੍ਤਾ, ਸਬ੍ਬੇ ਤੇ ਏਵਰੂਪਂ ਸਵਨਂ ਲਭਿਤ੍ਵਾ ਕਲ੍ਯਾਣਮਿਤ੍ਤੇਨ ਆਚਰਿਯੇਨ ਦਿਨ੍ਨਨਯਂ ਨਿਸ੍ਸਾਯ, ਨੋ ਅਨਿਸ੍ਸਾਯ. ਤਸ੍ਮਾਸ੍ਸ ਆਦਿਤੋਵ ਏਵਰੂਪੀ ਕਥਾ ਕਥੇਤਬ੍ਬਾਤਿ.

ਕੇਸੇਸੁ ਪਨ ਓਰੋਪਿਤੇਸੁ ਹਲਿਦ੍ਦਿਚੁਣ੍ਣੇਨ ਵਾ ਗਨ੍ਧਚੁਣ੍ਣੇਨ ਵਾ ਸੀਸਞ੍ਚ ਸਰੀਰਞ੍ਚ ਉਬ੍ਬਟ੍ਟੇਤ੍ਵਾ ਗਿਹਿਗਨ੍ਧਂ ਅਪਨੇਤ੍ਵਾ ਕਾਸਾਯਾਨਿ ਤਿਕ੍ਖਤ੍ਤੁਂ ਵਾ ਦ੍ਵਿਕ੍ਖਤ੍ਤੁਂ ਵਾ ਸਕਿਂ ਵਾ ਪਟਿਗ੍ਗਾਹਾਪੇਤਬ੍ਬੋ. ਅਥਾਪਿਸ੍ਸ ਹਤ੍ਥੇ ਅਦਤ੍ਵਾ ਆਚਰਿਯੋ ਵਾ ਉਪਜ੍ਝਾਯੋ ਵਾ ਸਯਮੇਵ ਅਚ੍ਛਾਦੇਤਿ, ਵਟ੍ਟਤਿ. ਸਚੇ ਅਞ੍ਞਂ ਦਹਰਂ ਵਾ ਸਾਮਣੇਰਂ ਵਾ ਉਪਾਸਕਂ ਵਾ ਆਣਾਪੇਤਿ ‘‘ਆਵੁਸੋ, ਏਤਾਨਿ ਕਾਸਾਯਾਨਿ ਗਹੇਤ੍ਵਾ ਏਤਂ ਅਚ੍ਛਾਦੇਹੀ’’ਤਿ, ਤਞ੍ਞੇਵ ਵਾ ਆਣਾਪੇਤਿ ‘‘ਏਤਾਨਿ ਗਹੇਤ੍ਵਾ ਅਚ੍ਛਾਦੇਹੀ’’ਤਿ, ਸਬ੍ਬਂ ਤਂ ਵਟ੍ਟਤਿ, ਸਬ੍ਬਂ ਤੇਨ ਭਿਕ੍ਖੁਨਾਵ ਦਿਨ੍ਨਂ ਹੋਤਿ. ਯਂ ਪਨ ਨਿਵਾਸਨਂ ਵਾ ਪਾਰੁਪਨਂ ਵਾ ਅਨਾਣਤ੍ਤਿਯਾ ਨਿਵਾਸੇਤਿ ਵਾ ਪਾਰੁਪਤਿ ਵਾ, ਤਂ ਅਪਨੇਤ੍ਵਾ ਪੁਨ ਦਾਤਬ੍ਬਂ. ਭਿਕ੍ਖੁਨਾ ਹਿ ਸਹਤ੍ਥੇਨ ਵਾ ਆਣਤ੍ਤਿਯਾ ਵਾ ਦਿਨ੍ਨਮੇਵ ਕਾਸਾਯਂ ਵਟ੍ਟਤਿ, ਅਦਿਨ੍ਨਂ ਨ ਵਟ੍ਟਤਿ. ਸਚੇਪਿ ਤਸ੍ਸੇਵ ਸਨ੍ਤਕਂ ਹੋਤਿ, ਕੋ ਪਨ ਵਾਦੋ ਉਪਜ੍ਝਾਯਮੂਲਕੇ.

੧੪੭. ਏਵਂ ਪਨ ਦਿਨ੍ਨਾਨਿ ਕਾਸਾਯਾਨਿ ਅਚ੍ਛਾਦਾਪੇਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਾਰਾਪੇਤ੍ਵਾ ਯੇ ਤਤ੍ਥ ਸਨ੍ਨਿਪਤਿਤਾ ਭਿਕ੍ਖੂ, ਤੇਸਂ ਪਾਦੇ ਵਨ੍ਦਾਪੇਤ੍ਵਾ ਅਥ ਸਰਣਗਹਣਤ੍ਥਂ ਉਕ੍ਕੁਟਿਕਂ ਨਿਸੀਦਾਪੇਤ੍ਵਾ ਅਞ੍ਜਲਿਂ ਪਗ੍ਗਣ੍ਹਾਪੇਤ੍ਵਾ ‘‘ਏਵਂ ਵਦੇਹੀ’’ਤਿ ਵਤ੍ਤਬ੍ਬੋ, ‘‘ਯਮਹਂ ਵਦਾਮਿ, ਤਂ ਵਦੇਹੀ’’ਤਿ ਵਤ੍ਤਬ੍ਬੋ. ਅਥਸ੍ਸ ਉਪਜ੍ਝਾਯੇਨ ਵਾ ਆਚਰਿਯੇਨ ਵਾ ‘‘ਬੁਦ੍ਧਂ ਸਰਣਂ ਗਚ੍ਛਾਮੀ’’ਤਿਆਦਿਨਾ ਨਯੇਨ ਸਰਣਾਨਿ ਦਾਤਬ੍ਬਾਨਿ ਯਥਾਵੁਤ੍ਤਪਟਿਪਾਟਿਯਾਵ, ਨ ਉਪ੍ਪਟਿਪਾਟਿਯਾ. ਸਚੇ ਹਿ ਏਕਪਦਮ੍ਪਿ ਏਕਕ੍ਖਰਮ੍ਪਿ ਉਪ੍ਪਟਿਪਾਟਿਯਾ ਦੇਤਿ, ਬੁਦ੍ਧਂ ਸਰਣਂਯੇਵ ਵਾ ਤਿਕ੍ਖਤ੍ਤੁਂ ਦਤ੍ਵਾ ਪੁਨ ਇਤਰੇਸੁ ਏਕੇਕਂ ਤਿਕ੍ਖਤ੍ਤੁਂ ਦੇਤਿ, ਅਦਿਨ੍ਨਾਨਿ ਹੋਨ੍ਤਿ ਸਰਣਾਨਿ.

ਇਮਞ੍ਚ ਪਨ ਸਰਣਗਮਨੁਪਸਮ੍ਪਦਂ ਪਟਿਕ੍ਖਿਪਿਤ੍ਵਾ ਅਨੁਞ੍ਞਾਤਉਪਸਮ੍ਪਦਾ ਏਕਤੋਸੁਦ੍ਧਿਯਾ ਵਟ੍ਟਤਿ, ਸਾਮਣੇਰਪਬ੍ਬਜ੍ਜਾ ਪਨ ਉਭਤੋਸੁਦ੍ਧਿਯਾਵ ਵਟ੍ਟਤਿ, ਨੋ ਏਕਤੋਸੁਦ੍ਧਿਯਾ. ਤਸ੍ਮਾ ਉਪਸਮ੍ਪਦਾਯ ਸਚੇ ਆਚਰਿਯੋ ਞਤ੍ਤਿਦੋਸਞ੍ਚੇਵ ਕਮ੍ਮਵਾਚਾਦੋਸਞ੍ਚ ਵਜ੍ਜੇਤ੍ਵਾ ਕਮ੍ਮਂ ਕਰੋਤਿ, ਸੁਕਤਂ ਹੋਤਿ. ਪਬ੍ਬਜ੍ਜਾਯ ਪਨ ਇਮਾਨਿ ਤੀਣਿ ਸਰਣਾਨਿ ਬੁ-ਕਾਰ ਧ-ਕਾਰਾਦੀਨਂ ਬ੍ਯਞ੍ਜਨਾਨਂ ਠਾਨਕਰਣਸਮ੍ਪਦਂ ਅਹਾਪੇਨ੍ਤੇਨ ਆਚਰਿਯੇਨਪਿ ਅਨ੍ਤੇਵਾਸਿਕੇਨਪਿ ਵਤ੍ਤਬ੍ਬਾਨਿ. ਸਚੇ ਆਚਰਿਯੋ ਵਤ੍ਤੁਂ ਸਕ੍ਕੋਤਿ, ਅਨ੍ਤੇਵਾਸਿਕੋ ਨ ਸਕ੍ਕੋਤਿ, ਅਨ੍ਤੇਵਾਸਿਕੋ ਵਾ ਸਕ੍ਕੋਤਿ, ਆਚਰਿਯੋ ਨ ਸਕ੍ਕੋਤਿ, ਉਭੋਪਿ ਵਾ ਨ ਸਕ੍ਕੋਨ੍ਤਿ, ਨ ਵਟ੍ਟਤਿ. ਸਚੇ ਪਨ ਉਭੋਪਿ ਸਕ੍ਕੋਨ੍ਤਿ, ਵਟ੍ਟਤਿ. ਇਮਾਨਿ ਚ ਪਨ ਦਦਮਾਨੇਨ ‘‘ਬੁਦ੍ਧਂ ਸਰਣਂ ਗਚ੍ਛਾਮੀ’’ਤਿ ਏਵਂ ਏਕਸਮ੍ਬਨ੍ਧਾਨਿ ਅਨੁਨਾਸਿਕਨ੍ਤਾਨਿ ਵਾ ਕਤ੍ਵਾ ਦਾਤਬ੍ਬਾਨਿ, ‘‘ਬੁਦ੍ਧਮ ਸਰਣਮ ਗਚ੍ਛਾਮੀ’’ਤਿ ਏਵਂ ਵਿਚ੍ਛਿਨ੍ਦਿਤ੍ਵਾ ਮਕਾਰਨ੍ਤਾਨਿ ਵਾ ਕਤ੍ਵਾ ਦਾਤਬ੍ਬਾਨਿ. ਅਨ੍ਧਕਟ੍ਠਕਥਾਯਂ ‘‘ਨਾਮਂ ਸਾਵੇਤ੍ਵਾ ‘ਅਹਂ, ਭਨ੍ਤੇ, ਬੁਦ੍ਧਰਕ੍ਖਿਤੋ ਯਾਵਜੀਵਂ ਬੁਦ੍ਧਂ ਸਰਣਂ ਗਚ੍ਛਾਮੀ’’ਤਿ ਵੁਤ੍ਤਂ, ਤਂ ਏਕਟ੍ਠਕਥਾਯਮ੍ਪਿ ਨਤ੍ਥਿ, ਪਾਲ਼ਿਯਮ੍ਪਿ ਨ ਵੁਤ੍ਤਂ, ਤੇਸਂ ਰੁਚਿਮਤ੍ਤਮੇਵ, ਤਸ੍ਮਾ ਨ ਗਹੇਤਬ੍ਬਂ. ਨ ਹਿ ਤਥਾ ਅਵਦਨ੍ਤਸ੍ਸ ਸਰਣਂ ਕੁਪ੍ਪਤਿ. ਏਤ੍ਤਾਵਤਾ ਚ ਸਾਮਣੇਰਭੂਮਿਯਂ ਪਤਿਟ੍ਠਿਤੋ ਹੋਤਿ.

੧੪੮. ਸਚੇ ਪਨੇਸ ਗਤਿਮਾ ਹੋਤਿ ਪਣ੍ਡਿਤਜਾਤਿਕੋ, ਅਥਸ੍ਸ ਤਸ੍ਮਿਂਯੇਵ ਠਾਨੇ ਸਿਕ੍ਖਾਪਦਾਨਿ ਉਦ੍ਦਿਸਿਤਬ੍ਬਾਨਿ. ਕਥਂ? ਯਥਾ ਭਗਵਤਾ ਉਦ੍ਦਿਟ੍ਠਾਨਿ. ਵੁਤ੍ਤਞ੍ਹੇਤਂ –

‘‘ਅਨੁਜਾਨਾਮਿ, ਭਿਕ੍ਖਵੇ, ਸਾਮਣੇਰਾਨਂ ਦਸ ਸਿਕ੍ਖਾਪਦਾਨਿ, ਤੇਸੁ ਚ ਸਾਮਣੇਰੇਹਿ ਸਿਕ੍ਖਿਤੁਂ. ਪਾਣਾਤਿਪਾਤਾ ਵੇਰਮਣਿ, ਅਦਿਨ੍ਨਾਦਾਨਾ ਵੇਰਮਣਿ, ਅਬ੍ਰਹ੍ਮਚਰਿਯਾ ਵੇਰਮਣਿ, ਮੁਸਾਵਾਦਾ ਵੇਰਮਣਿ, ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਵੇਰਮਣਿ, ਵਿਕਾਲਭੋਜਨਾ ਵੇਰਮਣਿ, ਨਚ੍ਚਗੀਤਵਾਦਿਤ ਵਿਸੂਕਦਸ੍ਸਨਾ ਵੇਰਮਣਿ, ਮਾਲਾਗਨ੍ਧ ਵਿਲੇਪਨ ਧਾਰਣ ਮਣ੍ਡਨ ਵਿਭੂਸਨਟ੍ਠਾਨਾ ਵੇਰਮਣਿ, ਉਚ੍ਚਾਸਯਨਮਹਾਸਯਨਾ ਵੇਰਮਣਿ, ਜਾਤਰੂਪਰਜਤਪਟਿਗ੍ਗਹਣਾ ਵੇਰਮਣੀ’’ਤਿ (ਮਹਾਵ. ੧੦੬).

ਅਨ੍ਧਕਟ੍ਠਕਥਾਯਂ ਪਨ ‘‘ਅਹਂ, ਭਨ੍ਤੇ, ਇਤ੍ਥਨ੍ਨਾਮੋ ਯਾਵਜੀਵਂ ਪਾਣਾਤਿਪਾਤਾ ਵੇਰਮਣਿਸਿਕ੍ਖਾਪਦਂ ਸਮਾਦਿਯਾਮੀ’’ਤਿ ਏਵਂ ਸਰਣਦਾਨਂ ਵਿਯ ਸਿਕ੍ਖਾਪਦਦਾਨਮ੍ਪਿ ਵੁਤ੍ਤਂ, ਤਂ ਨੇਵ ਪਾਲ਼ਿਯਂ, ਨ ਅਟ੍ਠਕਥਾਸੁ ਅਤ੍ਥਿ, ਤਸ੍ਮਾ ਯਥਾਪਾਲ਼ਿਯਾਵ ਉਦ੍ਦਿਸਿਤਬ੍ਬਾਨਿ. ਪਬ੍ਬਜ੍ਜਾ ਹਿ ਸਰਣਗਮਨੇਹੇਵ ਸਿਦ੍ਧਾ, ਸਿਕ੍ਖਾਪਦਾਨਿ ਪਨ ਕੇਵਲਂ ਸਿਕ੍ਖਾਪਦਪੂਰਣਤ੍ਥਂ ਜਾਨਿਤਬ੍ਬਾਨਿ, ਤਸ੍ਮਾ ਪਾਲ਼ਿਯਾ ਆਗਤਨਯੇਨੇਵ ਉਗ੍ਗਹੇਤੁਂ ਅਸਕ੍ਕੋਨ੍ਤਸ੍ਸ ਯਾਯ ਕਾਯਚਿ ਭਾਸਾਯ ਅਤ੍ਥਵਸੇਨਪਿ ਆਚਿਕ੍ਖਿਤੁਂ ਵਟ੍ਟਤਿ. ਯਾਵ ਪਨ ਅਤ੍ਤਨਾ ਸਿਕ੍ਖਿਤਬ੍ਬਸਿਕ੍ਖਾਪਦਾਨਿ ਨ ਜਾਨਾਤਿ, ਸਙ੍ਘਾਟਿਪਤ੍ਤਚੀਵਰਧਾਰਣਟ੍ਠਾਨਨਿਸਜ੍ਜਾਦੀਸੁ ਪਾਨਭੋਜਨਾਦਿਵਿਧਿਮ੍ਹਿ ਚ ਨ ਕੁਸਲੋ ਹੋਤਿ, ਤਾਵ ਭੋਜਨਸਾਲਂ ਵਾ ਸਲਾਕਭਾਜਨਟ੍ਠਾਨਂ ਵਾ ਅਞ੍ਞਂ ਵਾ ਤਥਾਰੂਪਟ੍ਠਾਨਂ ਨ ਪੇਸੇਤਬ੍ਬੋ, ਸਨ੍ਤਿਕਾਵਚਰੋਯੇਵ ਕਾਤਬ੍ਬੋ, ਬਾਲਦਾਰਕੋ ਵਿਯ ਪਟਿਪਜ੍ਜਿਤਬ੍ਬੋ, ਸਬ੍ਬਮਸ੍ਸ ਕਪ੍ਪਿਯਾਕਪ੍ਪਿਯਂ ਆਚਿਕ੍ਖਿਤਬ੍ਬਂ, ਨਿਵਾਸਨਪਾਰੁਪਨਾਦੀਸੁ ਅਭਿਸਮਾਚਾਰਿਕੇਸੁ ਵਿਨੇਤਬ੍ਬੋ. ਤੇਨਪਿ –

‘‘ਅਨੁਜਾਨਾਮਿ, ਭਿਕ੍ਖਵੇ, ਦਸਹਙ੍ਗੇਹਿ ਸਮਨ੍ਨਾਗਤਂ ਸਾਮਣੇਰਂ ਨਾਸੇਤੁਂ. ਪਾਣਾਤਿਪਾਤੀ ਹੋਤਿ, ਅਦਿਨ੍ਨਾਦਾਯੀ ਹੋਤਿ, ਅਬ੍ਰਹ੍ਮਚਾਰੀ ਹੋਤਿ, ਮੁਸਾਵਾਦੀ ਹੋਤਿ, ਮਜ੍ਜਪਾਯੀ ਹੋਤਿ, ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਸਙ੍ਘਸ੍ਸ ਅਵਣ੍ਣਂ ਭਾਸਤਿ, ਮਿਚ੍ਛਾਦਿਟ੍ਠਿਕੋ ਹੋਤਿ, ਭਿਕ੍ਖੁਨੀਦੂਸਕੋ ਹੋਤੀ’’ਤਿ (ਮਹਾਵ. ੧੦੮) –

ਏਵਂ ਵੁਤ੍ਤਾਨਿ ਦਸ ਨਾਸਨਙ੍ਗਾਨਿ ਆਰਕਾ ਪਰਿਵਜ੍ਜੇਤ੍ਵਾ ਆਭਿਸਮਾਚਾਰਿਕਂ ਪਰਿਪੂਰੇਨ੍ਤੇਨ ਦਸਵਿਧੇ ਸੀਲੇ ਸਾਧੁਕਂ ਸਿਕ੍ਖਿਤਬ੍ਬਂ.

੧੪੯. ਯੋ ਪਨ (ਮਹਾਵ. ਅਟ੍ਠ. ੧੦੮) ਪਾਣਾਤਿਪਾਤਾਦੀਸੁ ਦਸਸੁ ਨਾਸਨਙ੍ਗੇਸੁ ਏਕਮ੍ਪਿ ਕਮ੍ਮਂ ਕਰੋਤਿ, ਸੋ ਲਿਙ੍ਗਨਾਸਨਾਯ ਨਾਸੇਤਬ੍ਬੋ. ਤੀਸੁ ਹਿ ਨਾਸਨਾਸੁ ਲਿਙ੍ਗਨਾਸਨਾਯੇਵ ਇਧਾਧਿਪ੍ਪੇਤਾ. ਯਥਾ ਚ ਭਿਕ੍ਖੂਨਂ ਪਾਣਾਤਿਪਾਤਾਦੀਸੁ ਤਾ ਤਾ ਆਪਤ੍ਤਿਯੋ ਹੋਨ੍ਤਿ, ਨ ਤਥਾ ਸਾਮਣੇਰਾਨਂ. ਸਾਮਣੇਰੋ ਹਿ ਕੁਨ੍ਥ ਕਿਪਿਲ੍ਲਿਕਮ੍ਪਿ ਮਾਰੇਤ੍ਵਾ ਮਙ੍ਗੁਲਣ੍ਡਕਮ੍ਪਿ ਭਿਨ੍ਦਿਤ੍ਵਾ ਨਾਸੇਤਬ੍ਬਤਂਯੇਵ ਪਾਪੁਣਾਤਿ, ਤਾਵਦੇਵਸ੍ਸ ਸਰਣਗਮਨਾਨਿ ਚ ਉਪਜ੍ਝਾਯਗ੍ਗਹਣਞ੍ਚ ਸੇਨਾਸਨਗ੍ਗਾਹੋ ਚ ਪਟਿਪ੍ਪਸ੍ਸਮ੍ਭਨ੍ਤਿ, ਸਙ੍ਘਲਾਭਂ ਨ ਲਭਤਿ, ਲਿਙ੍ਗਮਤ੍ਤਮੇਵ ਏਕਂ ਅਵਸਿਟ੍ਠਂ ਹੋਤਿ. ਸੋ ਸਚੇ ਆਕਿਣ੍ਣਦੋਸੋਵ ਹੋਤਿ, ਆਯਤਿਂ ਸਂਵਰੇ ਨ ਤਿਟ੍ਠਤਿ, ਨਿਕ੍ਕਡ੍ਢਿਤਬ੍ਬੋ. ਅਥ ਸਹਸਾ ਵਿਰਜ੍ਝਿਤ੍ਵਾ ‘‘ਦੁਟ੍ਠੁ ਮਯਾ ਕਤ’’ਨ੍ਤਿ ਪੁਨ ਸਂਵਰੇ ਠਾਤੁਕਾਮੋ ਹੋਤਿ, ਲਿਙ੍ਗਨਾਸਨਕਿਚ੍ਚਂ ਨਤ੍ਥਿ, ਯਥਾਨਿਵਤ੍ਥਪਾਰੁਤਸ੍ਸੇਵ ਸਰਣਾਨਿ ਦਾਤਬ੍ਬਾਨਿ, ਉਪਜ੍ਝਾਯੋ ਦਾਤਬ੍ਬੋ. ਸਿਕ੍ਖਾਪਦਾਨਿ ਪਨ ਸਰਣਗਮਨੇਨੇਵ ਇਜ੍ਝਨ੍ਤਿ. ਸਾਮਣੇਰਾਨਞ੍ਹਿ ਸਰਣਗਮਨਂ ਭਿਕ੍ਖੂਨਂ ਉਪਸਮ੍ਪਦਕਮ੍ਮਵਾਚਾਸਦਿਸਂ, ਤਸ੍ਮਾ ਭਿਕ੍ਖੂਨਂ ਵਿਯ ਚਤੁਪਾਰਿਸੁਦ੍ਧਿਸੀਲਂ ਇਮਿਨਾਪਿ ਦਸ ਸੀਲਾਨਿ ਸਮਾਦਿਨ੍ਨਾਨੇਵ ਹੋਨ੍ਤਿ, ਏਵਂ ਸਨ੍ਤੇਪਿ ਦਲ਼੍ਹੀਕਰਣਤ੍ਥਂ ਆਯਤਿਂ ਸਂਵਰੇ ਪਤਿਟ੍ਠਾਪਨਤ੍ਥਂ ਪੁਨ ਦਾਤਬ੍ਬਾਨਿ. ਸਚੇ ਪੁਰਿਮਿਕਾਯ ਪੁਨ ਸਰਣਾਨਿ ਗਹਿਤਾਨਿ, ਪਚ੍ਛਿਮਿਕਾਯ ਵਸ੍ਸਾਵਾਸਿਕਂ ਲਚ੍ਛਤਿ. ਸਚੇ ਪਚ੍ਛਿਮਿਕਾਯ ਗਹਿਤਾਨਿ, ਸਙ੍ਘੇਨ ਅਪਲੋਕੇਤ੍ਵਾ ਲਾਭੋ ਦਾਤਬ੍ਬੋ. ਅਦਿਨ੍ਨਾਦਾਨੇ ਤਿਣਸਲਾਕਮਤ੍ਤੇਨਪਿ ਵਤ੍ਥੁਨਾ, ਅਬ੍ਰਹ੍ਮਚਰਿਯੇ ਤੀਸੁ ਮਗ੍ਗੇਸੁ ਯਤ੍ਥ ਕਤ੍ਥਚਿ ਵਿਪ੍ਪਟਿਪਤ੍ਤਿਯਾ, ਮੁਸਾਵਾਦੇ ਹਸਾਧਿਪ੍ਪਾਯਤਾਯਪਿ ਮੁਸਾ ਭਣਿਤੇ ਅਸ੍ਸਮਣੋ ਹੋਤਿ, ਨਾਸੇਤਬ੍ਬਤਂ ਆਪਜ੍ਜਤਿ, ਮਜ੍ਜਪਾਨੇ ਪਨ ਭਿਕ੍ਖੁਨੋ ਅਜਾਨਿਤ੍ਵਾਪਿ ਬੀਜਤੋ ਪਟ੍ਠਾਯ ਮਜ੍ਜਂ ਪਿਵਨ੍ਤਸ੍ਸ ਪਾਚਿਤ੍ਤਿਯਂ. ਸਾਮਣੇਰੋ ਜਾਨਿਤ੍ਵਾ ਪਿਵਨ੍ਤੋਵ ਸੀਲਭੇਦਂ ਆਪਜ੍ਜਤਿ, ਨ ਅਜਾਨਿਤ੍ਵਾ. ਯਾਨਿ ਪਨਸ੍ਸ ਇਤਰਾਨਿ ਪਞ੍ਚ ਸਿਕ੍ਖਾਪਦਾਨਿ, ਏਤੇਸੁ ਭਿਨ੍ਨੇਸੁ ਨ ਨਾਸੇਤਬ੍ਬੋ, ਦਣ੍ਡਕਮ੍ਮਂ ਕਾਤਬ੍ਬਂ. ਸਿਕ੍ਖਾਪਦੇ ਪਨ ਪੁਨ ਦਿਨ੍ਨੇਪਿ ਅਦਿਨ੍ਨੇਪਿ ਵਟ੍ਟਤਿ, ਦਣ੍ਡਕਮ੍ਮੇਨ ਪਨ ਪੀਲ਼ੇਤ੍ਵਾ ਆਯਤਿਂ ਸਂਵਰੇ ਠਪਨਤ੍ਥਾਯ ਦਾਤਬ੍ਬਮੇਵ.

ਅਵਣ੍ਣਭਾਸਨੇ ਪਨ ‘‘ਅਰਹਂ ਸਮ੍ਮਾਸਮ੍ਬੁਦ੍ਧੋ’’ਤਿਆਦੀਨਂ ਪਟਿਪਕ੍ਖਵਸੇਨ ਬੁਦ੍ਧਸ੍ਸ ਵਾ ‘‘ਸ੍ਵਾਕ੍ਖਾਤੋ’’ਤਿਆਦੀਨਂ ਪਟਿਪਕ੍ਖਵਸੇਨ ਧਮ੍ਮਸ੍ਸ ਵਾ ‘‘ਸੁਪ੍ਪਟਿਪਨ੍ਨੋ’’ਤਿਆਦੀਨਂ ਪਟਿਪਕ੍ਖਵਸੇਨ ਸਙ੍ਘਸ੍ਸ ਵਾ ਅਵਣ੍ਣਂ ਭਾਸਨ੍ਤੋ ਰਤਨਤ੍ਤਯਂ ਨਿਨ੍ਦਨ੍ਤੋ ਗਰਹਨ੍ਤੋ ਆਚਰਿਯੁਪਜ੍ਝਾਯਾਦੀਹਿ ‘‘ਮਾ ਏਵਂ ਅਵਚਾ’’ਤਿ ਅਵਣ੍ਣਭਾਸਨੇ ਆਦੀਨਵਂ ਦਸ੍ਸੇਤ੍ਵਾ ਨਿਵਾਰੇਤਬ੍ਬੋ. ‘‘ਸਚੇ ਯਾਵਤਤਿਯਂ ਵੁਚ੍ਚਮਾਨੋ ਨ ਓਰਮਤਿ, ਕਣ੍ਟਕਨਾਸਨਾਯ ਨਾਸੇਤਬ੍ਬੋ’’ਤਿ ਕੁਰੁਨ੍ਦਿਯਂ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ‘‘ਸਚੇ ਏਵਂ ਵੁਚ੍ਚਮਾਨੋ ਤਂ ਲਦ੍ਧਿਂ ਨਿਸ੍ਸਜ੍ਜਤਿ, ਦਣ੍ਡਕਮ੍ਮਂ ਕਾਰੇਤ੍ਵਾ ਅਚ੍ਚਯਂ ਦੇਸਾਪੇਤਬ੍ਬੋ. ਸਚੇ ਨ ਨਿਸ੍ਸਜ੍ਜਤਿ, ਤਥੇਵ ਆਦਾਯ ਪਗ੍ਗਯ੍ਹ ਤਿਟ੍ਠਤਿ, ਲਿਙ੍ਗਨਾਸਨਾਯ ਨਾਸੇਤਬ੍ਬੋ’’ਤਿ ਵੁਤ੍ਤਂ, ਤਂ ਯੁਤ੍ਤਂ. ਅਯਮੇਵ ਹਿ ਨਾਸਨਾ ਇਧਾਧਿਪ੍ਪੇਤਾਤਿ. ਮਿਚ੍ਛਾਦਿਟ੍ਠਿਕੇਪਿ ਏਸੇਵ ਨਯੋ. ਸਸ੍ਸਤੁਚ੍ਛੇਦਾਨਞ੍ਹਿ ਅਞ੍ਞਤਰਦਿਟ੍ਠਿਕੋ ਸਚੇ ਆਚਰਿਯਾਦੀਹਿ ਓਵਦਿਯਮਾਨੋ ਨਿਸ੍ਸਜ੍ਜਤਿ, ਦਣ੍ਡਕਮ੍ਮਂ ਕਾਰੇਤ੍ਵਾ ਅਚ੍ਚਯਂ ਦੇਸਾਪੇਤਬ੍ਬੋ, ਅਪਟਿਨਿਸ੍ਸਜ੍ਜਨ੍ਤੋਵ ਨਾਸੇਤਬ੍ਬੋ. ਭਿਕ੍ਖੁਨੀਦੂਸਕੋ ਚੇਤ੍ਥ ਕਾਮਂ ਅਬ੍ਰਹ੍ਮਚਾਰਿਗ੍ਗਹਣੇਨ ਗਹਿਤੋਵ, ਅਬ੍ਰਹ੍ਮਚਾਰਿਂ ਪਨ ਆਯਤਿਂ ਸਂਵਰੇ ਠਾਤੁਕਾਮਂ ਸਰਣਾਨਿ ਦਤ੍ਵਾ ਉਪਸਮ੍ਪਾਦੇਤੁਂ ਵਟ੍ਟਤਿ. ਭਿਕ੍ਖੁਨੀਦੂਸਕੋ ਆਯਤਿਂ ਸਂਵਰੇ ਠਾਤੁਕਾਮੋਪਿ ਪਬ੍ਬਜ੍ਜਮ੍ਪਿ ਨ ਲਭਤਿ, ਪਗੇਵ ਉਪਸਮ੍ਪਦਨ੍ਤਿ ਏਤਮਤ੍ਥਂ ਦਸ੍ਸੇਤੁਂ ‘‘ਭਿਕ੍ਖੁਨੀਦੂਸਕੋ’’ਤਿ ਇਦਂ ਵਿਸੁਂ ਦਸਮਂ ਅਙ੍ਗਂ ਵੁਤ੍ਤਨ੍ਤਿ ਵੇਦਿਤਬ੍ਬਂ.

੧੫੦. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਸਾਮਣੇਰਸ੍ਸ ਦਣ੍ਡਕਮ੍ਮਂ ਕਾਤੁਂ. ਭਿਕ੍ਖੂਨਂ ਅਲਾਭਾਯ ਪਰਿਸਕ੍ਕਤਿ, ਭਿਕ੍ਖੂਨਂ ਅਨਤ੍ਥਾਯ ਪਰਿਸਕ੍ਕਤਿ, ਭਿਕ੍ਖੂਨਂ ਅਵਾਸਾਯ ਪਰਿਸਕ੍ਕਤਿ, ਭਿਕ੍ਖੂ ਅਕ੍ਕੋਸਤਿ, ਪਰਿਭਾਸਤਿ, ਭਿਕ੍ਖੂ ਭਿਕ੍ਖੂਹਿ ਭੇਦੇਤੀ’’ਤਿ (ਮਹਾਵ. ੧੦੭) ‘‘ਵਚਨਤੋ ਪਨ ਇਮਾਨਿ ਪਞ੍ਚ ਅਙ੍ਗਾਨਿ, ਸਿਕ੍ਖਾਪਦੇਸੁ ਚ ਪਚ੍ਛਿਮਾਨਿ ਵਿਕਾਲਭੋਜਨਾਦੀਨਿ ਪਞ੍ਚਾਤਿ ਦਸ ਦਣ੍ਡਕਮ੍ਮਵਤ੍ਥੂਨਿ. ਕਿਂਪਨੇਤ੍ਥ ਦਣ੍ਡਕਮ੍ਮਂ ਕਤ੍ਤਬ੍ਬ’’ਨ੍ਤਿ? ‘‘ਅਨੁਜਾਨਾਮਿ, ਭਿਕ੍ਖਵੇ, ਯਤ੍ਥ ਵਾ ਵਸਤਿ, ਯਤ੍ਥ ਵਾ ਪਟਿਕ੍ਕਮਤਿ, ਤਤ੍ਥ ਆਵਰਣਂ ਕਾਤੁ’’ਨ੍ਤਿ (ਮਹਾਵ. ੧੦੭) ਵਚਨਤੋ ਯਤ੍ਥ (ਮਹਾਵ. ਅਟ੍ਠ. ੧੦੭) ਵਸਤਿ ਵਾ ਪਵਿਸਤਿ ਵਾ, ਤਤ੍ਥ ਆਵਰਣਂ ਕਾਤਬ੍ਬਂ ‘‘ਮਾ ਇਧ ਪਵਿਸਾ’’ਤਿ. ਉਭਯੇਨਪਿ ਅਤ੍ਤਨੋ ਪਰਿਵੇਣਞ੍ਚ ਵਸ੍ਸਗ੍ਗੇਨ ਪਤ੍ਤਸੇਨਾਸਨਞ੍ਚ ਵੁਤ੍ਤਂ. ਤਸ੍ਮਾ ਨ ਸਬ੍ਬੋ ਸਙ੍ਘਾਰਾਮੋ ਆਵਰਣਂ ਕਾਤਬ੍ਬੋ, ਕਰੋਨ੍ਤੋ ਚ ਦੁਕ੍ਕਟਂ ਆਪਜ੍ਜਤਿ ‘‘ਨ, ਭਿਕ੍ਖਵੇ, ਸਬ੍ਬੋ ਸਙ੍ਘਾਰਾਮੋ ਆਵਰਣਂ ਕਾਤਬ੍ਬੋ, ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਤ੍ਤਾ. ਨ ਚ ਮੁਖਦ੍ਵਾਰਿਕੋ ਆਹਾਰੋ ਆਵਰਣਂ ਕਾਤਬ੍ਬੋ, ਕਰੋਨ੍ਤੋ ਚ ਦੁਕ੍ਕਟਂ ਆਪਜ੍ਜਤਿ ‘‘ਨ, ਭਿਕ੍ਖਵੇ, ਮੁਖਦ੍ਵਾਰਿਕੋ ਆਹਾਰੋ ਆਵਰਣਂ ਕਾਤਬ੍ਬੋ, ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਵੁਤ੍ਤਤ੍ਤਾ. ਤਸ੍ਮਾ ‘‘ਅਜ੍ਜ ਮਾ ਖਾਦ ਮਾ ਭੁਞ੍ਜਾ’’ਤਿ ਵਦਤੋਪਿ ‘‘ਆਹਾਰਮ੍ਪਿ ਨਿਵਾਰੇਸ੍ਸਾਮੀ’’ਤਿ ਪਤ੍ਤਚੀਵਰਂ ਅਨ੍ਤੋ ਨਿਕ੍ਖਿਪਤੋਪਿ ਸਬ੍ਬਪਯੋਗੇਸੁ ਦੁਕ੍ਕਟਂ. ਅਨਾਚਾਰਸ੍ਸ ਪਨ ਦੁਬ੍ਬਚਸਾਮਣੇਰਸ੍ਸ ਦਣ੍ਡਕਮ੍ਮਂ ਕਤ੍ਵਾ ਯਾਗੁਂ ਵਾ ਭਤ੍ਤਂ ਵਾ ਪਤ੍ਤਚੀਵਰਂ ਵਾ ਦਸ੍ਸੇਤ੍ਵਾ ‘‘ਏਤ੍ਤਕੇ ਨਾਮ ਦਣ੍ਡਕਮ੍ਮੇ ਆਹਟੇ ਇਦਂ ਲਚ੍ਛਸੀ’’ਤਿ ਵਤ੍ਤੁਂ ਵਟ੍ਟਤਿ. ਭਗਵਤਾ ਹਿ ਆਵਰਣਮੇਵ ਦਣ੍ਡਕਮ੍ਮਂ ਵੁਤ੍ਤਂ. ਧਮ੍ਮਸਙ੍ਗਾਹਕਤ੍ਥੇਰੇਹਿ ਪਨ ‘‘ਅਪਰਾਧਾਨੁਰੂਪਂ ਉਦਕਦਾਰੁਵਾਲਿਕਾਦੀਨਂ ਆਹਰਾਪਨਮ੍ਪਿ ਕਾਤਬ੍ਬ’’ਨ੍ਤਿ ਵੁਤ੍ਤਂ, ਤਸ੍ਮਾ ਤਮ੍ਪਿ ਕਾਤਬ੍ਬਂ, ਤਞ੍ਚ ਖੋ ‘‘ਓਰਮਿਸ੍ਸਤਿ ਵਿਰਮਿਸ੍ਸਤੀ’’ਤਿ ਅਨੁਕਮ੍ਪਾਯ, ਨ ‘‘ਨਸ੍ਸਿਸ੍ਸਤਿ ਵਿਬ੍ਭਮਿਸ੍ਸਤੀ’’ਤਿਆਦਿਨਯਪ੍ਪਵਤ੍ਤੇਨ ਪਾਪਜ੍ਝਾਸਯੇਨ. ‘‘ਦਣ੍ਡਕਮ੍ਮਂ ਕਰੋਮੀ’’ਤਿ ਚ ਉਣ੍ਹਪਾਸਾਣੇ ਵਾ ਨਿਪਜ੍ਜਾਪੇਤੁਂ ਪਾਸਾਣਿਟ੍ਠਕਾਦੀਨਿ ਵਾ ਸੀਸੇ ਨਿਕ੍ਖਿਪਾਪੇਤੁਂ ਉਦਕਂ ਵਾ ਪਵੇਸੇਤੁਂ ਨ ਵਟ੍ਟਤਿ.

ਉਪਜ੍ਝਾਯਂ ਅਨਾਪੁਚ੍ਛਾਪਿ ਦਣ੍ਡਕਮ੍ਮਂ ਨ ਕਾਰੇਤਬ੍ਬਂ ‘‘ਨ, ਭਿਕ੍ਖਵੇ, ਉਪਜ੍ਝਾਯਂ ਅਨਾਪੁਚ੍ਛਾ ਆਵਰਣਂ ਕਾਤਬ੍ਬਂ, ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੦੮) ਵਚਨਤੋ. ਏਤ੍ਥ ਪਨ ‘‘ਤੁਮ੍ਹਾਕਂ ਸਾਮਣੇਰਸ੍ਸ ਅਯਂ ਨਾਮ ਅਪਰਾਧੋ, ਦਣ੍ਡਕਮ੍ਮਮਸ੍ਸ ਕਰੋਥਾ’’ਤਿ ਤਿਕ੍ਖਤ੍ਤੁਂ ਵੁਤ੍ਤੇ ਸਚੇ ਸੋ ਉਪਜ੍ਝਾਯੋ ਦਣ੍ਡਕਮ੍ਮਂ ਨ ਕਰੋਤਿ, ਸਯਂ ਕਾਤੁਂ ਵਟ੍ਟਤਿ. ਸਚੇਪਿ ਆਦਿਤੋ ਉਪਜ੍ਝਾਯੋ ਵਦਤਿ ‘‘ਮਯ੍ਹਂ ਸਾਮਣੇਰਾਨਂ ਦੋਸੇ ਸਤਿ ਤੁਮ੍ਹੇ ਦਣ੍ਡਕਮ੍ਮਂ ਕਰੋਥਾ’’ਤਿ, ਕਾਤੁਂ ਵਟ੍ਟਤਿਯੇਵ. ਯਥਾ ਚ ਸਾਮਣੇਰਾਨਂ, ਏਵਂ ਸਦ੍ਧਿਵਿਹਾਰਿਕਨ੍ਤੇਵਾਸਿਕਾਨਮ੍ਪਿ ਦਣ੍ਡਕਮ੍ਮਂ ਕਾਤੁਂ ਵਟ੍ਟਤਿ, ਅਞ੍ਞੇਸਂ ਪਨ ਪਰਿਸਾ ਨ ਅਪਲਾਲ਼ੇਤਬ੍ਬਾ, ਅਪਲਾਲ਼ੇਨ੍ਤੋ ਦੁਕ੍ਕਟਂ ਆਪਜ੍ਜਤਿ ‘‘ਨ, ਭਿਕ੍ਖਵੇ, ਅਞ੍ਞਸ੍ਸ ਪਰਿਸਾ ਅਪਲਾਲ਼ੇਤਬ੍ਬਾ, ਯੋ ਅਪਲਾਲ਼ੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੧੦੮) ਵਚਨਤੋ. ਤਸ੍ਮਾ ‘‘ਤੁਮ੍ਹਾਕਂ ਪਤ੍ਤਂ ਦੇਮ, ਚੀਵਰਂ ਦੇਮਾ’’ਤਿ ਅਤ੍ਤਨੋ ਉਪਟ੍ਠਾਨਕਰਣਤ੍ਥਂ ਸਙ੍ਗਣ੍ਹਿਤ੍ਵਾ ਸਾਮਣੇਰਾ ਵਾ ਹੋਨ੍ਤੁ ਉਪਸਮ੍ਪਨ੍ਨਾ ਵਾ, ਅਨ੍ਤਮਸੋ ਦੁਸ੍ਸੀਲਭਿਕ੍ਖੁਸ੍ਸਪਿ ਪਰਸ੍ਸ ਪਰਿਸਭੂਤੇ ਭਿਨ੍ਦਿਤ੍ਵਾ ਗਣ੍ਹਿਤੁਂ ਨ ਵਟ੍ਟਤਿ, ਆਦੀਨਵਂ ਪਨ ਵਤ੍ਤੁਂ ਵਟ੍ਟਤਿ ‘‘ਤਯਾ ਨਹਾਯਿਤੁਂ ਆਗਤੇਨ ਗੂਥਮਕ੍ਖਨਂ ਵਿਯ ਕਤਂ ਦੁਸ੍ਸੀਲਂ ਨਿਸ੍ਸਾਯ ਵਿਹਰਨ੍ਤੇਨਾ’’ਤਿ. ਸਚੇ ਸੋ ਸਯਮੇਵ ਜਾਨਿਤ੍ਵਾ ਉਪਜ੍ਝਂ ਵਾ ਨਿਸ੍ਸਯਂ ਵਾ ਯਾਚਤਿ, ਦਾਤੁਂ ਵਟ੍ਟਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਪਬ੍ਬਜ੍ਜਾਵਿਨਿਚ੍ਛਯਕਥਾ ਸਮਤ੍ਤਾ.