੨੧. ਪਵਾਰਣਾਵਿਨਿਚ੍ਛਯਕਥਾ
੧੧੬. ਪਟਿਕ੍ਖੇਪਪਵਾਰਣਾਤਿ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੁਞ੍ਜਮਾਨੇਨ ਯਸ੍ਸ ਕਸ੍ਸਚਿ ਅਭਿਹਟਭੋਜਨਸ੍ਸ ਪਟਿਕ੍ਖੇਪਸਙ੍ਖਾਤਾ ਪਵਾਰਣਾ. ਸਾ ਚ ਨ ਕੇਵਲਂ ਪਟਿਕ੍ਖੇਪਮਤ੍ਤੇਨ ਹੋਤਿ, ਅਥ ਖੋ ਪਞ੍ਚਙ੍ਗਵਸੇਨ. ਤਤ੍ਰਿਮਾਨਿ ਪਞ੍ਚਙ੍ਗਾਨਿ – ਅਸਨਂ, ਭੋਜਨਂ, ਦਾਯਕਸ੍ਸ ਹਤ੍ਥਪਾਸੇ ਠਾਨਂ, ਅਭਿਹਾਰੋ, ਅਭਿਹਟਸ੍ਸ ਪਟਿਕ੍ਖੇਪੋਤਿ. ਤਤ੍ਥ ਅਸਨਨ੍ਤਿ ਵਿਪ੍ਪਕਤਭੋਜਨਂ, ਭੁਞ੍ਜਮਾਨੋ ਚੇਸ ਪੁਗ੍ਗਲੋ ਹੋਤੀਤਿ ਅਤ੍ਥੋ. ਭੋਜਨਨ੍ਤਿ ਪਵਾਰਣਪ੍ਪਹੋਨਕਂ ਭੋਜਨਂ, ਓਦਨਾਦੀਨਞ੍ਚ ਅਞ੍ਞਤਰਂ ਪਟਿਕ੍ਖਿਪਿਤਬ੍ਬਂ ਭੋਜਨਂ ਹੋਤੀਤਿ ਅਤ੍ਥੋ. ਦਾਯਕਸ੍ਸ ਹਤ੍ਥਪਾਸੇ ਠਾਨਨ੍ਤਿ ਪਵਾਰਣਪ੍ਪਹੋਨਕਂ ਭੋਜਨਂ ਗਣ੍ਹਿਤ੍ਵਾ ਦਾਯਕਸ੍ਸ ਅਡ੍ਢਤੇਯ੍ਯਹਤ੍ਥਪ੍ਪਮਾਣੇ ਓਕਾਸੇ ਅਵਟ੍ਠਾਨਂ. ਅਭਿਹਾਰੋਤਿ ਹਤ੍ਥਪਾਸੇ ਠਿਤਸ੍ਸ ਦਾਯਕਸ੍ਸ ਕਾਯੇਨ ਅਭਿਹਾਰੋ. ਅਭਿਹਟਸ੍ਸ ਪਟਿਕ੍ਖੇਪੋਤਿ ਏਵਂ ਅਭਿਹਟਸ੍ਸ ਕਾਯੇਨ ਵਾ ਵਾਚਾਯ ਵਾ ਪਟਿਕ੍ਖੇਪੋ. ਇਤਿ ਇਮੇਸਂ ਪਞ੍ਚਨ੍ਨਂ ਅਙ੍ਗਾਨਂ ਵਸੇਨ ਪਵਾਰਣਾ ਹੋਤਿ. ਵੁਤ੍ਤਮ੍ਪਿ ਚੇਤਂ –
‘‘ਪਞ੍ਚਹਿ, ਉਪਾਲਿ, ਆਕਾਰੇਹਿ ਪਵਾਰਣਾ ਪਞ੍ਞਾਯਤਿ, ਅਸਨਂ ਪਞ੍ਞਾਯਤਿ, ਭੋਜਨਂ ਪਞ੍ਞਾਯਤਿ, ਹਤ੍ਥਪਾਸੇ ਠਿਤੋ, ਅਭਿਹਰਤਿ, ਪਟਿਕ੍ਖੇਪੋ ਪਞ੍ਞਾਯਤੀ’’ਤਿ (ਪਰਿ. ੪੨੮).
੧੧੭. ਤਤ੍ਰਾਯਂ ਵਿਨਿਚ੍ਛਯੋ (ਪਾਚਿ. ਅਟ੍ਠ. ੨੩੮-੯) – ‘‘ਅਸਨ’’ਨ੍ਤਿਆਦੀਸੁ ਤਾਵ ਯਂ ਅਸ੍ਨਾਤਿ, ਯਞ੍ਚ ਭੋਜਨਂ ਹਤ੍ਥਪਾਸੇ ਠਿਤੇਨ ਅਭਿਹਟਂ ਪਟਿਕ੍ਖਿਪਤਿ, ਤਂ ਓਦਨੋ ਕੁਮ੍ਮਾਸੋ ਸਤ੍ਤੁ ਮਚ੍ਛੋ ਮਂਸਨ੍ਤਿ ਇਮੇਸਂ ਅਞ੍ਞਤਰਮੇਵ ਵੇਦਿਤਬ੍ਬਂ. ਤਤ੍ਥ ਓਦਨੋ ਨਾਮ ਸਾਲਿ ਵੀਹਿ ਯਵੋ ਗੋਧੁਮੋ ਕਙ੍ਗੁ ਵਰਕੋ ਕੁਦ੍ਰੂਸਕੋਤਿ ਸਤ੍ਤਨ੍ਨਂ ਧਞ੍ਞਾਨਂ ਤਣ੍ਡੁਲੇਹਿ ਨਿਬ੍ਬਤ੍ਤੋ. ਤਤ੍ਰ ਸਾਲੀਤਿ ਅਨ੍ਤਮਸੋ ਨੀਵਾਰਂ ਉਪਾਦਾਯ ਸਬ੍ਬਾਪਿ ਸਾਲਿਜਾਤਿ. ਵੀਹੀਤਿ ਸਬ੍ਬਾਪਿ ਵੀਹਿਜਾਤਿ. ਯਵਗੋਧੁਮੇਸੁ ਭੇਦੋ ਨਤ੍ਥਿ. ਕਙ੍ਗੂਤਿ ਸੇਤਰਤ੍ਤਕਾਲ਼ਭੇਦਾ ਸਬ੍ਬਾਪਿ ਕਙ੍ਗੁਜਾਤਿ. ਵਰਕੋਤਿ ਅਨ੍ਤਮਸੋ ਵਰਕਚੋਰਕਂ ਉਪਾਦਾਯ ਸਬ੍ਬਾਪਿ ਸੇਤਵਣ੍ਣਾ ਵਰਕਜਾਤਿ. ਕੁਦ੍ਰੂਸਕੋਤਿ ਕਾਲ਼ਕੁਦ੍ਰੂਸਕੋ ਚੇਵ ਸਾਮਾਕਾਦਿਭੇਦਾ ਚ ਸਬ੍ਬਾਪਿ ਤਿਣਧਞ੍ਞਜਾਤਿ. ਨੀਵਾਰਵਰਕਚੋਰਕਾ ਚੇਤ੍ਥ ਧਞ੍ਞਾਨੁਲੋਮਾਤਿ ਵਦਨ੍ਤਿ, ਧਞ੍ਞਾਨਿ ਹੋਨ੍ਤੁ ਧਞ੍ਞਾਨੁਲੋਮਾਨਿ ਵਾ, ਏਤੇਸਂ ਵੁਤ੍ਤਪ੍ਪਭੇਦਾਨਂ ਸਤ੍ਤਨ੍ਨਂ ਧਞ੍ਞਾਨਂ ਤਣ੍ਡੁਲੇ ਗਹੇਤ੍ਵਾ ‘‘ਭਤ੍ਤਂ ਪਚਿਸ੍ਸਾਮਾ’’ਤਿ ਵਾ ‘‘ਯਾਗੁਂ ਪਚਿਸ੍ਸਾਮਾ’’ਤਿ ਵਾ ‘‘ਅਮ੍ਬਿਲਪਾਯਾਸਾਦੀਸੁ ਅਞ੍ਞਤਰਂ ਪਚਿਸ੍ਸਾਮਾ’’ਤਿ ਵਾ ਯਂ ਕਿਞ੍ਚਿ ਸਨ੍ਧਾਯ ਪਚਨ੍ਤੁ, ਸਚੇ ਉਣ੍ਹਂ ਸੀਤਲਂ ਵਾ ਭੁਞ੍ਜਨ੍ਤਾਨਂ ਭੋਜਨਕਾਲੇ ਗਹਿਤਗਹਿਤਟ੍ਠਾਨੇ ਓਧਿ ਪਞ੍ਞਾਯਤਿ, ਓਦਨਸਙ੍ਗਹਮੇਵ ਗਚ੍ਛਤਿ, ਪਵਾਰਣਂ ਜਨੇਤਿ. ਸਚੇ ਓਧਿ ਨ ਪਞ੍ਞਾਯਤਿ, ਯਾਗੁਸਙ੍ਗਹਂ ਗਚ੍ਛਤਿ, ਪਵਾਰਣਂ ਨ ਜਨੇਤਿ.
ਯੋਪਿ ਪਾਯਾਸੋ ਵਾ ਪਣ੍ਣਫਲਕਲ਼ੀਰਮਿਸ੍ਸਕਾ ਅਮ੍ਬਿਲਯਾਗੁ ਵਾ ਉਦ੍ਧਨਤੋ ਓਤਾਰਿਤਮਤ੍ਤਾ ਅਬ੍ਭੁਣ੍ਹਾ ਹੋਤਿ ਆਵਜ੍ਜਿਤ੍ਵਾ ਪਿਵਿਤੁਂ ਸਕ੍ਕਾ, ਹਤ੍ਥੇਨ ਗਹਿਤੋਕਾਸੇਪਿ ਓਧਿਂ ਨ ਦਸ੍ਸੇਤਿ, ਪਵਾਰਣਂ ਨ ਜਨੇਤਿ. ਸਚੇ ਪਨ ਉਸੁਮਾਯ ਵਿਗਤਾਯ ਸੀਤਲਭੂਤਾ ਘਨਭਾਵਂ ਗਚ੍ਛਤਿ, ਓਧਿਂ ਦਸ੍ਸੇਤਿ, ਪੁਨ ਪਵਾਰਣਂ ਜਨੇਤਿ, ਪੁਬ੍ਬੇ ਤਨੁਭਾਵੋ ਨ ਰਕ੍ਖਤਿ. ਸਚੇਪਿ ਦਧਿਤਕ੍ਕਾਦੀਨਿ ਆਰੋਪੇਤ੍ਵਾ ਬਹੂ ਪਣ੍ਣਫਲਕਲ਼ੀਰੇ ਪਕ੍ਖਿਪਿਤ੍ਵਾ ਮੁਟ੍ਠਿਮਤ੍ਤਾਪਿ ਤਣ੍ਡੁਲਾ ਪਕ੍ਖਿਤ੍ਤਾ ਹੋਨ੍ਤਿ, ਭੋਜਨਕਾਲੇ ਚੇ ਓਧਿ ਪਞ੍ਞਾਯਤਿ, ਪਵਾਰਣਂ ਜਨੇਤਿ. ਅਯਾਗੁਕੇ ਨਿਮਨ੍ਤਨੇ ‘‘ਯਾਗੁਂ ਦਸ੍ਸਾਮਾ’’ਤਿ ਭਤ੍ਤੇ ਉਦਕਕਞ੍ਜਿਕਖੀਰਾਦੀਨਿ ਆਕਿਰਿਤ੍ਵਾ ‘‘ਯਾਗੁਂ ਗਣ੍ਹਥਾ’’ਤਿ ਦੇਨ੍ਤਿ. ਕਿਞ੍ਚਾਪਿ ਤਨੁਕੋ ਹੋਤਿ, ਪਵਾਰਣਂ ਜਨੇਤਿਯੇਵ. ਸਚੇ ਪਨ ਪਕ੍ਕੁਥਿਤੇਸੁ ਉਦਕਾਦੀਸੁ ਪਕ੍ਖਿਪਿਤ੍ਵਾ ਪਚਿਤ੍ਵਾ ਦੇਨ੍ਤਿ, ਯਾਗੁਸਙ੍ਗਹਮੇਵ ਗਚ੍ਛਤਿ. ਯਾਗੁਸਙ੍ਗਹਂ ਗਤੇਪਿ ਤਸ੍ਮਿਂ ਵਾ ਅਞ੍ਞਸ੍ਮਿਂ ਵਾ ਯਤ੍ਥ ਮਚ੍ਛਮਂਸਂ ਪਕ੍ਖਿਪਨ੍ਤਿ, ਸਚੇ ਸਾਸਪਮਤ੍ਤਮ੍ਪਿ ਮਚ੍ਛਮਂਸਖਣ੍ਡਂ ਵਾ ਨ੍ਹਾਰੁ ਵਾ ਪਞ੍ਞਾਯਤਿ, ਪਵਾਰਣਂ ਜਨੇਤਿ, ਸੁਦ੍ਧਰਸਕੋ ਪਨ ਰਸਕਯਾਗੁ ਵਾ ਨ ਜਨੇਤਿ. ਠਪੇਤ੍ਵਾ ਵੁਤ੍ਤਧਞ੍ਞਤਣ੍ਡੁਲੇ ਅਞ੍ਞੇਹਿ ਵੇਣੁਤਣ੍ਡੁਲਾਦੀਹਿ ਵਾ ਕਣ੍ਡਮੂਲਫਲੇਹਿ ਵਾ ਯੇਹਿ ਕੇਹਿਚਿ ਕਤਂ ਭਤ੍ਤਮ੍ਪਿ ਪਵਾਰਣਂ ਨ ਜਨੇਤਿ, ਪਗੇਵ ਘਨਯਾਗੁ. ਸਚੇ ਪਨੇਤ੍ਥ ਮਚ੍ਛਮਂਸਂ ਪਕ੍ਖਿਪਨ੍ਤਿ, ਜਨੇਤਿ. ਮਹਾਪਚ੍ਚਰਿਯਂ ‘‘ਪੁਪ੍ਫਿਅਤ੍ਥਾਯ ਭਤ੍ਤਮ੍ਪਿ ਪਵਾਰਣਂ ਜਨੇਤੀ’’ਤਿ ਵੁਤ੍ਤਂ. ਪੁਪ੍ਫਿਅਤ੍ਥਾਯ ਭਤ੍ਤਂ ਨਾਮ ਪੁਪ੍ਫਿਖਜ੍ਜਕਤ੍ਥਾਯ ਕੁਥਿਤੁਦਕੇ ਪਕ੍ਖਿਪਿਤ੍ਵਾ ਸੇਦਿਤਤਣ੍ਡੁਲਾ ਵੁਚ੍ਚਨ੍ਤਿ. ਸਚੇ ਪਨ ਤੇ ਤਣ੍ਡੁਲੇ ਸੁਕ੍ਖਾਪੇਤ੍ਵਾ ਖਾਦਨ੍ਤਿ, ਵਟ੍ਟਤਿ, ਨੇਵ ਸਤ੍ਤੁਸਙ੍ਖ੍ਯਂ, ਨ ਭਤ੍ਤਸਙ੍ਖ੍ਯਂ ਗਚ੍ਛਨ੍ਤਿ. ਪੁਨ ਤੇਹਿ ਕਤਭਤ੍ਤਂ ਪਵਾਰੇਤਿਯੇਵ. ਤੇ ਤਣ੍ਡੁਲੇ ਸਪ੍ਪਿਤੇਲਾਦੀਸੁ ਵਾ ਪਚਨ੍ਤਿ, ਪੂਵਂ ਵਾ ਕਰੋਨ੍ਤਿ, ਨ ਪਵਾਰੇਨ੍ਤਿ. ਪੁਥੁਕਾ ਵਾ ਤਾਹਿ ਕਤਸਤ੍ਤੁਭਤ੍ਤਾਦੀਨਿ ਵਾ ਨ ਪਵਾਰੇਨ੍ਤਿ.
ਕੁਮ੍ਮਾਸੋ ਨਾਮ ਯਵੇਹਿ ਕਤਕੁਮ੍ਮਾਸੋ. ਅਞ੍ਞੇਹਿ ਪਨ ਮੁਗ੍ਗਾਦੀਹਿ ਕਤਕੁਮ੍ਮਾਸੋ ਪਵਾਰਣਂ ਨ ਜਨੇਤਿ.
ਸਤ੍ਤੁ ਨਾਮ ਸਾਲਿਵੀਹਿਯਵੇਹਿ ਕਤਸਤ੍ਤੁ. ਕਙ੍ਗੁਵਰਕਕੁਦ੍ਰੂਸਕਸੀਸਾਨਿਪਿ ਭਜ੍ਜਿਤ੍ਵਾ ਈਸਕਂ ਕੋਟ੍ਟੇਤ੍ਵਾ ਥੁਸੇ ਪਲਾਪੇਤ੍ਵਾ ਪੁਨ ਦਲ਼੍ਹਂ ਕੋਟ੍ਟੇਤ੍ਵਾ ਚੁਣ੍ਣਂ ਕਰੋਨ੍ਤਿ. ਸਚੇਪਿ ਤਂ ਅਲ੍ਲਤ੍ਤਾ ਏਕਬਦ੍ਧਂ ਹੋਤਿ, ਸਤ੍ਤੁਸਙ੍ਗਹਮੇਵ ਗਚ੍ਛਤਿ. ਖਰਪਾਕਭਜ੍ਜਿਤਾਨਂ ਵੀਹੀਨਂ ਤਣ੍ਡੁਲੇ ਕੋਟ੍ਟੇਤ੍ਵਾ ਦੇਨ੍ਤਿ, ਤਮ੍ਪਿ ਚੁਣ੍ਣਂ ਸਤ੍ਤੁਸਙ੍ਗਹਮੇਵ ਗਚ੍ਛਤਿ. ਸਮਪਾਕਭਜ੍ਜਿਤਾਨਂ ਪਨ ਵੀਹੀਨਂ ਵਾ ਵੀਹਿਪਲਾਸਾਨਂ ਵਾ ਤਣ੍ਡੁਲਾ ਭਜ੍ਜਿਤਤਣ੍ਡੁਲਾ ਏਵ ਵਾ ਨ ਪਵਾਰੇਨ੍ਤਿ. ਤੇਸਂ ਪਨ ਤਣ੍ਡੁਲਾਨਂ ਚੁਣ੍ਣਂ ਪਵਾਰੇਤਿ, ਖਰਪਾਕਭਜ੍ਜਿਤਾਨਂ ਵੀਹੀਨਂ ਕੁਣ੍ਡਕਮ੍ਪਿ ਪਵਾਰੇਤਿ. ਸਮਪਾਕਭਜ੍ਜਿਤਾਨਂ ਪਨ ਆਤਪਸੁਕ੍ਖਾਨਂ ਵਾ ਕੁਣ੍ਡਕਂ ਨ ਪਵਾਰੇਤਿ. ਲਾਜਾ ਵਾ ਤੇਹਿ ਕਤਭਤ੍ਤਸਤ੍ਤੁਆਦੀਨਿ ਵਾ ਨ ਪਵਾਰੇਨ੍ਤਿ, ਭਜ੍ਜਿਤਪਿਟ੍ਠਂ ਵਾ ਯਂ ਕਿਞ੍ਚਿ ਸੁਦ੍ਧਖਜ੍ਜਕਂ ਵਾ ਨ ਪਵਾਰੇਤਿ. ਮਚ੍ਛਮਂਸਪੂਰਿਤਖਜ੍ਜਕਂ ਪਨ ਸਤ੍ਤੁਮੋਦਕੋ ਵਾ ਪਵਾਰੇਤਿ. ਮਚ੍ਛੋ ਮਂਸਞ੍ਚ ਪਾਕਟਮੇਵ.
ਅਯਂ ਪਨ ਵਿਸੇਸੋ – ਸਚੇ ਯਾਗੁਂ ਪਿਵਨ੍ਤਸ੍ਸ ਯਾਗੁਸਿਤ੍ਥਮਤ੍ਤਾਨੇਵ ਦ੍ਵੇ ਮਚ੍ਛਖਣ੍ਡਾਨਿ ਵਾ ਮਂਸਖਣ੍ਡਾਨਿ ਵਾ ਏਕਭਾਜਨੇ ਵਾ ਨਾਨਾਭਾਜਨੇ ਵਾ ਦੇਨ੍ਤਿ, ਤਾਨਿ ਚੇ ਅਖਾਦਨ੍ਤੋ ਅਞ੍ਞਂ ਯਂ ਕਿਞ੍ਚਿ ਪਵਾਰਣਪ੍ਪਹੋਨਕਂ ਪਟਿਕ੍ਖਿਪਤਿ, ਨ ਪਵਾਰੇਤਿ. ਤਤੋ ਏਕਂ ਖਾਦਿਤਂ, ਏਕਂ ਹਤ੍ਥੇ ਵਾ ਪਤ੍ਤੇ ਵਾ ਹੋਤਿ, ਸੋ ਚੇ ਅਞ੍ਞਂ ਪਟਿਕ੍ਖਿਪਤਿ, ਪਵਾਰੇਤਿ. ਦ੍ਵੇਪਿ ਖਾਦਿਤਾਨਿ ਹੋਨ੍ਤਿ, ਮੁਖੇ ਸਾਸਪਮਤ੍ਤਮ੍ਪਿ ਅਵਸਿਟ੍ਠਂ ਨਤ੍ਥਿ, ਸਚੇਪਿ ਅਞ੍ਞਂ ਪਟਿਕ੍ਖਿਪਤਿ, ਨ ਪਵਾਰੇਤਿ. ਕਪ੍ਪਿਯਮਂਸਂ ਖਾਦਨ੍ਤੋ ਕਪ੍ਪਿਯਮਂਸਂ ਪਟਿਕ੍ਖਿਪਤਿ, ਪਵਾਰੇਤਿ. ਕਪ੍ਪਿਯਮਂਸਂ ਖਾਦਨ੍ਤੋ ਅਕਪ੍ਪਿਯਮਂਸਂ ਪਟਿਕ੍ਖਿਪਤਿ, ਨ ਪਵਾਰੇਤਿ. ਕਸ੍ਮਾ? ਅਵਤ੍ਥੁਤਾਯ. ਯਞ੍ਹਿ ਭਿਕ੍ਖੁਨੋ ਖਾਦਿਤੁਂ ਵਟ੍ਟਤਿ, ਤਂਯੇਵ ਪਟਿਕ੍ਖਿਪਤੋ ਪਵਾਰਣਾ ਹੋਤਿ. ਇਦਂ ਪਨ ਜਾਨਨ੍ਤੋ ਅਕਪ੍ਪਿਯਤ੍ਤਾ ਪਟਿਕ੍ਖਿਪਤਿ, ਅਜਾਨਨ੍ਤੋਪਿ ਪਟਿਕ੍ਖਿਪਿਤਬ੍ਬਟ੍ਠਾਨੇ ਠਿਤਮੇਵ ਪਟਿਕ੍ਖਿਪਤਿ ਨਾਮ, ਤਸ੍ਮਾ ਨ ਪਵਾਰੇਤਿ. ਸਚੇ ਪਨ ਅਕਪ੍ਪਿਯਮਂਸਂ ਖਾਦਨ੍ਤੋ ਕਪ੍ਪਿਯਮਂਸਂ ਪਟਿਕ੍ਖਿਪਤਿ, ਪਵਾਰੇਤਿ. ਕਸ੍ਮਾ? ਵਤ੍ਥੁਤਾਯ. ਯਞ੍ਹਿ ਤੇਨ ਪਟਿਕ੍ਖਿਤ੍ਤਂ, ਤਂ ਪਵਾਰਣਾਯ ਵਤ੍ਥੁ, ਯਂ ਪਨ ਖਾਦਤਿ, ਤਂ ਕਿਞ੍ਚਾਪਿ ਪਟਿਕ੍ਖਿਪਿਤਬ੍ਬਟ੍ਠਾਨੇ ਠਿਤਂ, ਖਾਦਿਯਮਾਨਂ ਪਨ ਮਂਸਭਾਵਂ ਨ ਜਹਤਿ, ਤਸ੍ਮਾ ਪਵਾਰੇਤਿ. ਅਕਪ੍ਪਿਯਮਂਸਂ ਵਾ ਖਾਦਨ੍ਤੋ ਅਕਪ੍ਪਿਯਮਂਸਂ ਪਟਿਕ੍ਖਿਪਤਿ, ਪੁਰਿਮਨਯੇਨੇਵ ਨ ਪਵਾਰੇਤਿ. ਕਪ੍ਪਿਯਮਂਸਂ ਵਾ ਅਕਪ੍ਪਿਯਮਂਸਂ ਵਾ ਖਾਦਨ੍ਤੋ ਪਞ੍ਚਨ੍ਨਂ ਭੋਜਨਾਨਂ ਯਂ ਕਿਞ੍ਚਿ ਕਪ੍ਪਿਯਭੋਜਨਂ ਪਟਿਕ੍ਖਿਪਤਿ, ਪਵਾਰੇਤਿ. ਕੁਲਦੂਸਕਵੇਜ੍ਜਕਮ੍ਮਉਤ੍ਤਰਿਮਨੁਸ੍ਸਧਮ੍ਮਾਰੋਚਨਸਾਦਿਤਰੂਪਿਯਾਦੀਹਿ ਨਿਬ੍ਬਤ੍ਤਂ ਬੁਦ੍ਧਪਟਿਕੁਟ੍ਠਂ ਅਨੇਸਨਾਯ ਉਪ੍ਪਨ੍ਨਂ ਅਕਪ੍ਪਿਯਭੋਜਨਂ ਪਟਿਕ੍ਖਿਪਤਿ, ਨ ਪਵਾਰੇਤਿ. ਕਪ੍ਪਿਯਭੋਜਨਂ ਵਾ ਅਕਪ੍ਪਿਯਭੋਜਨਂ ਪਟਿਕ੍ਖਿਪਤਿ, ਨ ਪਵਾਰੇਤਿ. ਕਪ੍ਪਿਯਭੋਜਨਂ ਵਾ ਅਕਪ੍ਪਿਯਭੋਜਨਂ ਵਾ ਭੁਞ੍ਜਨ੍ਤੋਪਿ ਕਪ੍ਪਿਯਭੋਜਨਂ ਪਟਿਕ੍ਖਿਪਤਿ, ਪਵਾਰੇਤਿ. ਅਕਪ੍ਪਿਯਭੋਜਨਂ ਪਟਿਕ੍ਖਿਪਤਿ, ਨ ਪਵਾਰੇਤੀਤਿ ਸਬ੍ਬਤ੍ਥ ਵੁਤ੍ਤਨਯੇਨੇਵ ਕਾਰਣਂ ਵੇਦਿਤਬ੍ਬਂ.
੧੧੮. ਏਵਂ ‘‘ਅਸਨ’’ਨ੍ਤਿਆਦੀਸੁ ਯਞ੍ਚ ਅਸ੍ਨਾਤਿ, ਯਞ੍ਚ ਭੋਜਨਂ ਹਤ੍ਥਪਾਸੇ ਠਿਤੇਨ ਅਭਿਹਟਂ ਪਟਿਕ੍ਖਿਪਨ੍ਤੋ ਪਵਾਰਣਂ ਆਪਜ੍ਜਤਿ, ਤਂ ਉਤ੍ਵਾ ਇਦਾਨਿ ਯਥਾ ਆਪਜ੍ਜਤਿ, ਤਸ੍ਸ ਜਾਨਨਤ੍ਥਂ ਅਯਂ ਵਿਨਿਚ੍ਛਯੋ – ਅਸਨਂ ਭੋਜਨਨ੍ਤਿ ਏਤ੍ਥ ਤਾਵ ਯੇਨ ਏਕਸਿਤ੍ਥਮ੍ਪਿ ਅਜ੍ਝੋਹਟਂ ਹੋਤਿ ਸੋ ਸਚੇ ਪਤ੍ਤਮੁਖਹਤ੍ਥਾਨਂ ਯਤ੍ਥ ਕਤ੍ਥਚਿ ਪਞ੍ਚਸੁ ਭੋਜਨੇਸੁ ਏਕਸ੍ਮਿਮ੍ਪਿ ਸਤਿ ਅਞ੍ਞਂ ਪਞ੍ਚਸੁ ਭੋਜਨੇਸੁ ਏਕਮ੍ਪਿ ਪਟਿਕ੍ਖਿਪਤਿ, ਪਵਾਰੇਤਿ. ਕਤ੍ਥਚਿ ਭੋਜਨਂ ਨਤ੍ਥਿ, ਆਮਿਸਗਨ੍ਧਮਤ੍ਤਂ ਪਞ੍ਞਾਯਤਿ, ਨ ਪਵਾਰੇਤਿ. ਮੁਖੇ ਚ ਹਤ੍ਥੇ ਚ ਭੋਜਨਂ ਨਤ੍ਥਿ, ਪਤ੍ਤੇ ਅਤ੍ਥਿ, ਤਸ੍ਮਿਂ ਪਨ ਆਸਨੇ ਅਭੁਞ੍ਜਿਤੁਕਾਮੋ, ਵਿਹਾਰਂ ਵਾ ਪਵਿਸਿਤ੍ਵਾ ਭੁਞ੍ਜਿਤੁਕਾਮੋ, ਅਞ੍ਞਸ੍ਸ ਵਾ ਦਾਤੁਕਾਮੋ ਤਸ੍ਮਿਂ ਚੇ ਅਨ੍ਤਰੇ ਭੋਜਨਂ ਪਟਿਕ੍ਖਿਪਤਿ, ਨ ਪਵਾਰੇਤਿ. ਕਸ੍ਮਾ? ਵਿਪ੍ਪਕਤਭੋਜਨਭਾਵਸ੍ਸ ਉਪਚ੍ਛਿਨ੍ਨਤ੍ਤਾ. ‘‘ਯੋਪਿ ਅਞ੍ਞਤ੍ਰ ਗਨ੍ਤ੍ਵਾ ਭੁਞ੍ਜਿਤੁਕਾਮੋ ਮੁਖੇ ਭਤ੍ਤਂ ਗਿਲਿਤ੍ਵਾ ਸੇਸਂ ਆਦਾਯ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਅਞ੍ਞਂ ਭੋਜਨਂ ਪਟਿਕ੍ਖਿਪਤਿ, ਤਸ੍ਸਪਿ ਪਵਾਰਣਾ ਨ ਹੋਤੀ’’ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਯਥਾ ਚ ਪਤ੍ਤੇ, ਏਵਂ ਹਤ੍ਥੇਪਿ. ਮੁਖੇਪਿ ਵਾ ਵਿਜ੍ਜਮਾਨਂ ਭੋਜਨਂ ਸਚੇ ਅਨਜ੍ਝੋਹਰਿਤੁਕਾਮੋ ਹੋਤਿ, ਤਸ੍ਮਿਞ੍ਚ ਖਣੇ ਅਞ੍ਞਂ ਪਟਿਕ੍ਖਿਪਤਿ, ਨ ਪਵਾਰੇਤਿ. ਏਕਸ੍ਮਿਞ੍ਹਿ ਪਦੇ ਵੁਤ੍ਤਂ ਲਕ੍ਖਣਂ ਸਬ੍ਬਤ੍ਥ ਵੇਦਿਤਬ੍ਬਂ ਹੋਤਿ. ਅਪਿਚ ਕੁਰੁਨ੍ਦਿਯਂ ਏਸ ਨਯੋ ਦਸ੍ਸਿਤੋਯੇਵ. ਵੁਤ੍ਤਞ੍ਹਿ ਤਤ੍ਥ ‘‘ਮੁਖੇ ਭਤ੍ਤਂ ਗਿਲਿਤਂ, ਹਤ੍ਥੇ ਭਤ੍ਤਂ ਵਿਘਾਸਾਦਸ੍ਸ ਦਾਤੁਕਾਮੋ, ਪਤ੍ਤੇ ਭਤ੍ਤਂ ਭਿਕ੍ਖੁਸ੍ਸ ਦਾਤੁਕਾਮੋ, ਸਚੇ ਤਸ੍ਮਿਂ ਖਣੇ ਪਟਿਕ੍ਖਿਪਤਿ, ਨ ਪਵਾਰੇਤੀ’’ਤਿ.
ਹਤ੍ਥਪਾਸੇ ਠਿਤੋਤਿ ਏਤ੍ਥ ਪਨ ਸਚੇ ਭਿਕ੍ਖੁ ਨਿਸਿਨ੍ਨੋ ਹੋਤਿ, ਆਸਨਸ੍ਸ ਪਚ੍ਛਿਮਨ੍ਤਤੋ ਪਟ੍ਠਾਯ, ਸਚੇ ਠਿਤੋ, ਪਣ੍ਹਿਅਨ੍ਤਤੋ ਪਟ੍ਠਾਯ, ਸਚੇ ਨਿਪਨ੍ਨੋ, ਯੇਨ ਪਸ੍ਸੇਨ ਨਿਪਨ੍ਨੋ, ਤਸ੍ਸ ਪਾਰਿਮਨ੍ਤਤੋ ਪਟ੍ਠਾਯ, ਦਾਯਕਸ੍ਸ ਨਿਸਿਨ੍ਨਸ੍ਸ ਵਾ ਠਿਤਸ੍ਸ ਵਾ ਨਿਪਨ੍ਨਸ੍ਸ ਵਾ ਠਪੇਤ੍ਵਾ ਪਸਾਰਿਤਹਤ੍ਥਂ ਯਂ ਆਸਨ੍ਨਤਰਂ ਅਙ੍ਗਂ, ਤਸ੍ਸ ਓਰਿਮਨ੍ਤੇਨ ਪਰਿਚ੍ਛਿਨ੍ਦਿਤ੍ਵਾ ਅਡ੍ਢਤੇਯ੍ਯਹਤ੍ਥੋ ‘‘ਹਤ੍ਥਪਾਸੋ’’ਤਿ ਵੇਦਿਤਬ੍ਬੋ. ਤਸ੍ਮਿਂ ਠਤ੍ਵਾ ਅਭਿਹਟਂ ਪਟਿਕ੍ਖਿਪਨ੍ਤਸ੍ਸੇਵ ਪਵਾਰਣਾ ਹੋਤਿ, ਨ ਤਤੋ ਪਰਂ.
ਅਭਿਹਰਤੀਤਿ ਹਤ੍ਥਪਾਸਬ੍ਭਨ੍ਤਰੇ ਠਿਤੋ ਗਹਣਤ੍ਥਂ ਉਪਨਾਮੇਤਿ. ਸਚੇ ਪਨ ਅਨਨ੍ਤਰਨਿਸਿਨ੍ਨੋਪਿ ਭਿਕ੍ਖੁ ਹਤ੍ਥੇ ਵਾ ਊਰੂਸੁ ਵਾ ਆਧਾਰਕੇ ਵਾ ਠਿਤਂ ਪਤ੍ਤਂ ਅਨਭਿਹਰਿਤ੍ਵਾ ‘‘ਭਤ੍ਤਂ ਗਣ੍ਹਾਹੀ’’ਤਿ ਵਦਤਿ, ਤਂ ਪਟਿਕ੍ਖਿਪਤੋ ਪਵਾਰਣਾ ਨਤ੍ਥਿ. ਭਤ੍ਤਪਚ੍ਛਿਂ ਆਨੇਤ੍ਵਾ ਪੁਰਤੋ ਭੂਮਿਯਂ ਠਪੇਤ੍ਵਾ ‘‘ਗਣ੍ਹਾਹੀ’’ਤਿ ਵੁਤ੍ਤੇਪਿ ਏਸੇਵ ਨਯੋ. ਈਸਕਂ ਪਨ ਉਦ੍ਧਰਿਤ੍ਵਾ ਵਾ ਅਪਨਾਮੇਤ੍ਵਾ ਵਾ ‘‘ਗਣ੍ਹਥਾ’’ਤਿ ਵੁਤ੍ਤੇ ਪਟਿਕ੍ਖਿਪਤੋ ਪਵਾਰਣਾ ਹੋਤਿ. ਥੇਰਾਸਨੇ ਨਿਸਿਨ੍ਨੋ ਥੇਰੋ ਦੂਰੇ ਨਿਸਿਨ੍ਨਸ੍ਸ ਦਹਰਭਿਕ੍ਖੁਸ੍ਸ ਪਤ੍ਤਂ ਪੇਸੇਤ੍ਵਾ ‘‘ਇਤੋ ਓਦਨਂ ਗਣ੍ਹਾਹੀ’’ਤਿ ਵਦਤਿ, ਗਣ੍ਹਿਤ੍ਵਾ ਪਨ ਗਤੋ ਤੁਣ੍ਹੀ ਤਿਟ੍ਠਤਿ, ਦਹਰੋ ‘‘ਅਲਂ ਮਯ੍ਹ’’ਨ੍ਤਿ ਪਟਿਕ੍ਖਿਪਤਿ, ਨ ਪਵਾਰੇਤਿ. ਕਸ੍ਮਾ? ਥੇਰਸ੍ਸ ਦੂਰਭਾਵਤੋ ਦੂਤਸ੍ਸ ਚ ਅਨਭਿਹਰਣਤੋ. ਸਚੇ ਪਨ ਗਹੇਤ੍ਵਾ ਆਗਤੋ ਭਿਕ੍ਖੁ ‘‘ਇਦਂ ਭਤ੍ਤਂ ਗਣ੍ਹਾ’’ਤਿ ਵਦਤਿ, ਤਂ ਪਟਿਕ੍ਖਿਪਤੋ ਪਵਾਰਣਾ ਹੋਤਿ. ਪਰਿਵੇਸਨਾਯਏਕੋ ਏਕੇਨ ਹਤ੍ਥੇਨ ਓਦਨਪਚ੍ਛਿਂ, ਏਕੇਨ ਕਟਚ੍ਛੁਂ ਗਹੇਤ੍ਵਾ ਭਿਕ੍ਖੁਂ ਪਰਿਵਿਸਤਿ, ਤਤ੍ਰ ਚੇ ਅਞ੍ਞੋ ਆਗਨ੍ਤ੍ਵਾ ‘‘ਅਹਂ ਪਚ੍ਛਿਂ ਧਾਰੇਸ੍ਸਾਮਿ, ਤ੍ਵਂ ਓਦਨਂ ਦੇਹੀ’’ਤਿ ਵਤ੍ਵਾ ਗਹਿਤਮਤ੍ਤਮੇਵ ਕਰੋਤਿ, ਪਰਿਵੇਸਕੋ ਏਵ ਪਨ ਤਂ ਧਾਰੇਤਿ, ਤਸ੍ਮਾ ਸਾ ਅਭਿਹਟਾਵ ਹੋਤਿ, ਤਤੋ ਦਾਤੁਕਾਮਤਾਯ ਗਣ੍ਹਨ੍ਤਂ ਪਟਿਕ੍ਖਿਪਨ੍ਤਸ੍ਸ ਪਵਾਰਣਾ ਹੋਤਿ. ਸਚੇ ਪਨ ਪਰਿਵੇਸਕੇਨ ਫੁਟ੍ਠਮਤ੍ਤਾਵ ਹੋਤਿ, ਇਤਰੋਵ ਨਂ ਧਾਰੇਤਿ, ਤਤੋ ਦਾਤੁਕਾਮਤਾਯ ਗਣ੍ਹਨ੍ਤਂ ਪਟਿਕ੍ਖਿਪਨ੍ਤਸ੍ਸ ਪਵਾਰਣਾ ਨ ਹੋਤਿ, ਕਟਚ੍ਛੁਨਾ ਉਦ੍ਧਟਭਤ੍ਤੇ ਪਨ ਹੋਤਿ. ਕਟਚ੍ਛੁਨਾ ਅਭਿਹਾਰੋਯੇਵ ਹਿ ਤਸ੍ਸ ਅਭਿਹਾਰੋ. ‘‘ਦ੍ਵਿਨ੍ਨਂ ਸਮਭਾਰੇਪਿ ਪਟਿਕ੍ਖਿਪਨ੍ਤੋ ਪਵਾਰੇਤਿਯੇਵਾ’’ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਅਨਨ੍ਤਰਸ੍ਸ ਭਿਕ੍ਖੁਨੋ ਭਤ੍ਤੇ ਦੀਯਮਾਨੇ ਇਤਰੋ ਪਤ੍ਤਂ ਹਤ੍ਥੇਨ ਪਿਦਹਤਿ, ਪਵਾਰਣਾ ਨਤ੍ਥਿ. ਕਸ੍ਮਾ? ਅਞ੍ਞਸ੍ਸ ਅਭਿਹਟੇ ਪਟਿਕ੍ਖਿਤ੍ਤਤ੍ਤਾ.
ਪਟਿਕ੍ਖੇਪੋ ਪਞ੍ਞਾਯਤੀਤਿ ਏਤ੍ਥ ਵਾਚਾਯ ਅਭਿਹਟਂ ਪਟਿਕ੍ਖਿਪਤੋ ਪਵਾਰਣਾ ਨਤ੍ਥਿ, ਕਾਯੇਨ ਅਭਿਹਟਂ ਪਨ ਯੇਨ ਕੇਨਚਿ ਆਕਾਰੇਨ ਕਾਯੇਨ ਵਾ ਵਾਚਾਯ ਵਾ ਪਟਿਕ੍ਖਿਪਨ੍ਤਸ੍ਸ ਪਵਾਰਣਾ ਹੋਤੀਤਿ ਵੇਦਿਤਬ੍ਬੋ. ਤਤ੍ਰ ਕਾਯੇਨ ਪਟਿਕ੍ਖੇਪੋ ਨਾਮ ਅਙ੍ਗੁਲਿਂ ਵਾ ਹਤ੍ਥਂ ਵਾ ਮਕ੍ਖਿਕਾਬੀਜਨਿਂ ਵਾ ਚੀਵਰਕਣ੍ਣਂ ਵਾ ਚਾਲੇਤਿ, ਭਮੁਕਾਯ ਵਾ ਆਕਾਰਂ ਕਰੋਤਿ, ਕੁਦ੍ਧੋ ਵਾ ਓਲੋਕੇਤਿ. ਵਾਚਾਯ ਪਟਿਕ੍ਖੇਪੋ ਨਾਮ ‘‘ਅਲ’’ਨ੍ਤਿ ਵਾ ‘‘ਨ ਗਣ੍ਹਾਮੀ’’ਤਿ ਵਾ ‘‘ਮਾ ਆਕਿਰਾ’’ਤਿ ਵਾ ‘‘ਅਪਗਚ੍ਛਾ’’ਤਿ ਵਾ ਵਦਤਿ. ਏਵਂ ਯੇਨ ਕੇਨਚਿ ਆਕਾਰੇਨ ਕਾਯੇਨ ਵਾ ਵਾਚਾਯ ਵਾ ਪਟਿਕ੍ਖਿਤ੍ਤੇ ਪਵਾਰਣਾ ਹੋਤਿ.
੧੧੯. ਏਕੋ ਅਭਿਹਟੇ ਭਤ੍ਤੇ ਪਵਾਰਣਾਯ ਭੀਤੋ ਹਤ੍ਥੇ ਅਪਨੇਤ੍ਵਾ ਪੁਨਪ੍ਪੁਨਂ ਪਤ੍ਤੇ ਓਦਨਂ ਆਕਿਰਨ੍ਤਂ ‘‘ਆਕਿਰ ਆਕਿਰ, ਕੋਟ੍ਟੇਤ੍ਵਾ ਕੋਟ੍ਟੇਤ੍ਵਾ ਪੂਰੇਹੀ’’ਤਿ ਵਦਤਿ, ਏਤ੍ਥ ਕਥਨ੍ਤਿ? ਮਹਾਸੁਮਤ੍ਥੇਰੋ ਤਾਵ ‘‘ਅਨਾਕਿਰਣਤ੍ਥਾਯ ਵੁਤ੍ਤਤ੍ਤਾ ਪਵਾਰਣਾ ਹੋਤੀ’’ਤਿ ਆਹ. ਮਹਾਪਦੁਮਤ੍ਥੇਰੋ ਪਨ ‘‘ਆਕਿਰ ਪੂਰੇਹੀਤਿ ਵਦਨ੍ਤਸ੍ਸ ਨਾਮ ਕਸ੍ਸਚਿ ਪਵਾਰਣਾ ਅਤ੍ਥੀ’’ਤਿ ਵਤ੍ਵਾ ‘‘ਨ ਪਵਾਰੇਤੀ’’ਤਿ ਆਹ.
ਅਪਰੋ ਭਤ੍ਤਂ ਅਭਿਹਰਨ੍ਤਂ ਭਿਕ੍ਖੁਂ ਸਲ੍ਲਕ੍ਖੇਤ੍ਵਾ ‘‘ਕਿਂ, ਆਵੁਸੋ, ਇਤੋਪਿ ਕਿਞ੍ਚਿ ਗਣ੍ਹਿਸ੍ਸਸਿ, ਦਮ੍ਮਿ ਤੇ ਕਿਞ੍ਚੀ’’ਤਿ ਆਹ, ਤਤ੍ਰਾਪਿ ‘‘ਏਵਂ ਨਾਗਮਿਸ੍ਸਤੀਤਿ ਵੁਤ੍ਤਤ੍ਤਾ ਪਵਾਰਣਾ ਹੋਤੀ’’ਤਿ ਮਹਾਸੁਮਤ੍ਥੇਰੋ ਆਹ. ਮਹਾਪਦੁਮਤ੍ਥੇਰੋ ਪਨ ‘‘ਗਣ੍ਹਿਸ੍ਸਸੀਤਿ ਵਦਨ੍ਤਸ੍ਸ ਨਾਮ ਕਸ੍ਸਚਿ ਪਵਾਰਣਾ ਅਤ੍ਥੀ’’ਤਿ ਵਤ੍ਵਾ ‘‘ਨ ਪਵਾਰੇਤੀ’’ਤਿ ਆਹ.
ਏਕੋ ਸਮਂਸਕਂ ਰਸਂ ਅਭਿਹਰਿਤ੍ਵਾ ‘‘ਰਸਂ ਗਣ੍ਹਥਾ’’ਤਿ ਵਦਤਿ, ਤਂ ਸੁਤ੍ਵਾ ਪਟਿਕ੍ਖਿਪਤੋ ਪਵਾਰਣਾ ਨਤ੍ਥਿ. ‘‘ਮਚ੍ਛਮਂਸਰਸ’’ਨ੍ਤਿ ਵੁਤ੍ਤੇ ਪਟਿਕ੍ਖਿਪਤੋ ਪਵਾਰਣਾ ਹੋਤਿ, ‘‘ਇਦਂ ਗਣ੍ਹਥਾ’’ਤਿ ਵੁਤ੍ਤੇਪਿ ਹੋਤਿਯੇਵ. ਮਂਸਂ ਵਿਸੁਂ ਕਤ੍ਵਾ ‘‘ਮਂਸਰਸਂ ਗਣ੍ਹਥਾ’’ਤਿ ਵਦਤਿ, ‘‘ਤਤ੍ਥ ਚੇ ਸਾਸਪਮਤ੍ਤਮ੍ਪਿ ਮਂਸਖਣ੍ਡਂ ਅਤ੍ਥਿ, ਤਂ ਪਟਿਕ੍ਖਿਪਤੋ ਪਵਾਰਣਾ ਹੋਤਿ. ਸਚੇ ਪਨ ਪਰਿਸ੍ਸਾਵਿਤੋ ਹੋਤਿ, ਵਟ੍ਟਤੀ’’ਤਿ ਅਭਯਤ੍ਥੇਰੋ ਆਹ.
ਮਂਸਰਸੇਨ ਆਪੁਚ੍ਛਨ੍ਤਂ ਮਹਾਥੇਰੋ ‘‘ਮੁਹੁਤ੍ਤਂ ਆਗਮੇਹੀ’’ਤਿ ਵਤ੍ਵਾ ‘‘ਥਾਲਕਂ, ਆਵੁਸੋ, ਆਹਰਾ’’ਤਿ ਆਹ, ਏਤ੍ਥ ਕਥਨ੍ਤਿ? ਮਹਾਸੁਮਤ੍ਥੇਰੋ ਤਾਵ ‘‘ਅਭਿਹਾਰਕਸ੍ਸ ਗਮਨਂ ਉਪਚ੍ਛਿਨ੍ਨਂ, ਤਸ੍ਮਾ ਪਵਾਰੇਤੀ’’ਤਿ ਆਹ. ਮਹਾਪਦੁਮਤ੍ਥੇਰੋ ਪਨ ‘‘ਅਯਂ ਕੁਹਿਂ ਗਚ੍ਛਤਿ, ਕੀਦਿਸਂ ਏਤਸ੍ਸ ਗਮਨਂ, ਗਣ੍ਹਨ੍ਤਸ੍ਸਪਿ ਨਾਮ ਕਸ੍ਸਚਿ ਪਵਾਰਣਾ ਅਤ੍ਥੀ’’ਤਿ ਵਤ੍ਵਾ ‘‘ਨ ਪਵਾਰੇਤੀ’’ਤਿ ਆਹ.
ਕਲ਼ੀਰਪਨਸਾਦੀਹਿ ਮਿਸ੍ਸੇਤ੍ਵਾ ਮਂਸਂ ਪਚਨ੍ਤਿ, ਤਂ ਗਹੇਤ੍ਵਾ ‘‘ਕਲ਼ੀਰਸੂਪਂ ਗਣ੍ਹਥ, ਪਨਸਬ੍ਯਞ੍ਜਨਂ ਗਣ੍ਹਥਾ’’ਤਿ ਵਦਨ੍ਤਿ, ਏਵਮ੍ਪਿ ਨ ਪਵਾਰੇਤਿ. ਕਸ੍ਮਾ? ਅਪਵਾਰਣਾਰਹਸ੍ਸ ਨਾਮੇਨ ਵੁਤ੍ਤਤ੍ਤਾ. ਸਚੇ ਪਨ ‘‘ਮਚ੍ਛਸੂਪਂ ਮਂਸਸੂਪ’’ਨ੍ਤਿ ਵਾ ‘‘ਇਦਂ ਗਣ੍ਹਥਾ’’ਤਿ ਵਾ ਵਦਨ੍ਤਿ, ਪਵਾਰੇਤਿ, ਮਂਸਕਰਮ੍ਬਕੋ ਨਾਮ ਹੋਤਿ. ਤਂ ਦਾਤੁਕਾਮੋਪਿ ‘‘ਕਰਮ੍ਬਕਂ ਗਣ੍ਹਥਾ’’ਤਿ ਵਦਤਿ, ਵਟ੍ਟਤਿ, ਨ ਪਵਾਰੇਤਿ, ‘‘ਮਂਸਕਰਮ੍ਬਕ’’ਨ੍ਤਿ ਵਾ ‘‘ਇਦ’’ਨ੍ਤਿ ਵਾ ਵੁਤ੍ਤੇ ਪਨ ਪਵਾਰੇਤਿ. ਏਸ ਨਯੋ ਸਬ੍ਬੇਸੁ ਮਚ੍ਛਮਂਸਮਿਸ੍ਸਕੇਸੁ.
੧੨੦. ‘‘ਯੋ ਪਨ ਨਿਮਨ੍ਤਨੇ ਭੁਞ੍ਜਮਾਨੋ ਮਂਸਂ ਅਭਿਹਟਂ ‘ਉਦ੍ਦਿਸ੍ਸਕਤ’ਨ੍ਤਿ ਮਞ੍ਞਮਾਨੋ ਪਟਿਕ੍ਖਿਪਤਿ, ਪਵਾਰਿਤੋਵ ਹੋਤੀ’’ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਮਿਸ੍ਸਕਕਥਾ ਪਨ ਕੁਰੁਨ੍ਦਿਯਂ ਸੁਟ੍ਠੁ ਵੁਤ੍ਤਾ. ਏਵਞ੍ਹਿ ਤਤ੍ਥ ਵੁਤ੍ਤਂ – ਪਿਣ੍ਡਚਾਰਿਕੋ ਭਿਕ੍ਖੁ ਭਤ੍ਤਮਿਸ੍ਸਕਂ ਯਾਗੁਂ ਆਹਰਿਤ੍ਵਾ ‘‘ਯਾਗੁਂ ਗਣ੍ਹਥਾ’’ਤਿ ਵਦਤਿ, ਨ ਪਵਾਰੇਤਿ, ‘‘ਭਤ੍ਤਂ ਗਣ੍ਹਥਾ’’ਤਿ ਵੁਤ੍ਤੇ ਪਵਾਰੇਤਿ. ਕਸ੍ਮਾ? ਯੇਨਾਪੁਚ੍ਛਿਤੋ, ਤਸ੍ਸ ਅਤ੍ਥਿਤਾਯ. ਅਯਮੇਤ੍ਥ ਅਧਿਪ੍ਪਾਯੋ – ‘‘ਯਾਗੁਮਿਸ੍ਸਕਂ ਗਣ੍ਹਥਾ’’ਤਿ ਵਦਤਿ, ਤਤ੍ਰ ਚੇ ਯਾਗੁ ਬਹੁਤਰਾ ਵਾ ਹੋਤਿ ਸਮਸਮਾ ਵਾ, ਨ ਪਵਾਰੇਤਿ. ਯਾਗੁ ਮਨ੍ਦਾ, ਭਤ੍ਤਂ ਬਹੁਤਰਂ, ਪਵਾਰੇਤਿ. ਇਦਞ੍ਚ ਸਬ੍ਬਅਟ੍ਠਕਥਾਸੁ ਵੁਤ੍ਤਤ੍ਤਾ ਨ ਸਕ੍ਕਾ ਪਟਿਕ੍ਖਿਪਿਤੁਂ, ਕਾਰਣਂ ਪਨੇਤ੍ਥ ਦੁਦ੍ਦਸਂ. ‘‘ਭਤ੍ਤਮਿਸ੍ਸਕਂ ਗਣ੍ਹਥਾ’’ਤਿ ਵਦਤਿ, ਭਤ੍ਤਂ ਬਹੁਤਰਂ ਵਾ ਸਮਂ ਵਾ ਅਪ੍ਪਤਰਂ ਵਾ ਹੋਤਿ, ਪਵਾਰੇਤਿਯੇਵ. ਭਤ੍ਤਂ ਵਾ ਯਾਗੁਂ ਵਾ ਅਨਾਮਸਿਤ੍ਵਾ ‘‘ਮਿਸ੍ਸਕਂ ਗਣ੍ਹਥਾ’’ਤਿ ਵਦਤਿ, ਤਤ੍ਰ ਚੇ ਭਤ੍ਤਂ ਬਹੁਤਰਂ ਵਾ ਸਮਕਂ ਵਾ ਹੋਤਿ, ਪਵਾਰੇਤਿ, ਅਪ੍ਪਤਰਂ ਨ ਪਵਾਰੇਤਿ, ਇਦਞ੍ਚ ਕਰਮ੍ਬਕੇਨ ਨ ਸਮਾਨੇਤਬ੍ਬਂ. ਕਰਮ੍ਬਕੋ ਹਿ ਮਂਸਮਿਸ੍ਸਕੋਪਿ ਹੋਤਿ ਅਮਂਸਮਿਸ੍ਸਕੋਪਿ, ਤਸ੍ਮਾ ਕਰਮ੍ਬਕਨ੍ਤਿ ਵੁਤ੍ਤੇ ਪਵਾਰਣਾ ਨਤ੍ਥਿ, ਇਦਂ ਪਨ ਭਤ੍ਤਮਿਸ੍ਸਕਮੇਵ. ਏਤ੍ਥ ਵੁਤ੍ਤਨਯੇਨੇਵ ਪਵਾਰਣਾ ਹੋਤਿ. ਬਹੁਰਸੇ ਭਤ੍ਤੇ ਰਸਂ, ਬਹੁਖੀਰੇ ਖੀਰਂ, ਬਹੁਸਪ੍ਪਿਮ੍ਹਿ ਚ ਪਾਯਾਸੇ ਸਪ੍ਪਿਂ ਗਣ੍ਹਥਾਤਿ ਵਿਸੁਂ ਕਤ੍ਵਾ ਦੇਤਿ, ਤਂ ਪਟਿਕ੍ਖਿਪਤੋ ਪਵਾਰਣਾ ਨਤ੍ਥਿ.
ਯੋ ਪਨ ਗਚ੍ਛਨ੍ਤੋ ਪਵਾਰੇਤਿ, ਸੋ ਗਚ੍ਛਨ੍ਤੋਵ ਭੁਞ੍ਜਿਤੁਂ ਲਭਤਿ. ਕਦ੍ਦਮਂ ਵਾ ਉਦਕਂ ਵਾ ਪਤ੍ਵਾ ਠਿਤੇਨ ਅਤਿਰਿਤ੍ਤਂ ਕਾਰੇਤਬ੍ਬਂ. ਸਚੇ ਅਨ੍ਤਰਾ ਨਦੀ ਪੂਰਾ ਹੋਤਿ, ਨਦੀਤੀਰੇ ਗੁਮ੍ਬਂ ਅਨੁਪਰਿਯਾਯਨ੍ਤੇਨ ਭੁਞ੍ਜਿਤਬ੍ਬਂ. ਅਥ ਨਾਵਾ ਵਾ ਸੇਤੁ ਵਾ ਅਤ੍ਥਿ, ਤਂ ਅਭਿਰੁਹਿਤ੍ਵਾਪਿ ਚਙ੍ਕਮਨ੍ਤੇਨੇਵ ਭੁਞ੍ਜਿਤਬ੍ਬਂ, ਗਮਨਂ ਨ ਉਪਚ੍ਛਿਨ੍ਦਿਤਬ੍ਬਂ. ਯਾਨੇ ਵਾ ਹਤ੍ਥਿਅਸ੍ਸਪਿਟ੍ਠੇ ਵਾ ਚਨ੍ਦਮਣ੍ਡਲੇ ਵਾ ਸੂਰਿਯਮਣ੍ਡਲੇ ਵਾ ਨਿਸੀਦਿਤ੍ਵਾ ਪਵਾਰਿਤੇਨ ਯਾਵ ਮਜ੍ਝਨ੍ਹਿਕਂ, ਤਾਵ ਤੇਸੁ ਗਚ੍ਛਨ੍ਤੇਸੁਪਿ ਨਿਸਿਨ੍ਨੇਨੇਵ ਭੁਞ੍ਜਿਤਬ੍ਬਂ. ਯੋ ਠਿਤੋ ਪਵਾਰੇਤਿ, ਠਿਤੇਨੇਵ, ਯੋ ਨਿਸਿਨ੍ਨੋ ਪਵਾਰੇਤਿ, ਨਿਸਿਨ੍ਨੇਨੇਵ ਪਰਿਭੁਞ੍ਜਿਤਬ੍ਬਂ, ਤਂ ਤਂ ਇਰਿਯਾਪਥਂ ਵਿਕੋਪੇਨ੍ਤੇਨ ਅਤਿਰਿਤ੍ਤਂ ਕਾਰੇਤਬ੍ਬਂ. ਯੋ ਉਕ੍ਕੁਟਿਕੋ ਨਿਸੀਦਿਤ੍ਵਾ ਪਵਾਰੇਤਿ, ਤੇਨ ਉਕ੍ਕੁਟਿਕੇਨੇਵ ਭੁਞ੍ਜਿਤਬ੍ਬਂ. ਤਸ੍ਸ ਪਨ ਹੇਟ੍ਠਾ ਪਲਾਲਪੀਠਂ ਵਾ ਕਿਞ੍ਚਿ ਵਾ ਨਿਸੀਦਨਕਂ ਦਾਤਬ੍ਬਂ. ਪੀਠਕੇ ਨਿਸੀਦਿਤ੍ਵਾ ਪਵਾਰਿਤੇਨ ਆਸਨਂ ਅਚਾਲੇਤ੍ਵਾਵ ਚਤਸ੍ਸੋ ਦਿਸਾ ਪਰਿਵਤ੍ਤਨ੍ਤੇਨ ਭੁਞ੍ਜਿਤੁਂ ਲਬ੍ਭਤਿ. ਮਞ੍ਚੇ ਨਿਸੀਦਿਤ੍ਵਾ ਪਵਾਰਿਤੇਨ ਇਤੋ ਵਾ ਏਤ੍ਤੋ ਵਾ ਸਞ੍ਚਰਿਤੁਂ ਨ ਲਬ੍ਭਤਿ. ਸਚੇ ਪਨ ਨਂ ਸਹ ਮਞ੍ਚੇਨ ਉਕ੍ਖਿਪਿਤ੍ਵਾ ਅਞ੍ਞਤ੍ਰ ਨੇਨ੍ਤਿ, ਵਟ੍ਟਤਿ. ਨਿਪਜ੍ਜਿਤ੍ਵਾ ਪਵਾਰਿਤੇਨ ਨਿਪਨ੍ਨੇਨੇਵ ਪਰਿਭੁਞ੍ਜਿਤਬ੍ਬਂ. ਪਰਿਵਤ੍ਤਨ੍ਤੇਨ ਯੇਨ ਪਸ੍ਸੇਨ ਨਿਪਨ੍ਨੋ, ਤਸ੍ਸ ਠਾਨਂ ਨਾਤਿਕ੍ਕਮੇਤਬ੍ਬਂ.
੧੨੧. ਪਵਾਰਿਤੇਨ ਪਨ ਕਿਂਕਾਤਬ੍ਬਨ੍ਤਿ? ਯੇਨ ਇਰਿਯਾਪਥੇਨ ਪਵਾਰਿਤੋ ਹੋਤਿ, ਤਂ ਵਿਕੋਪੇਤ੍ਵਾ ਅਞ੍ਞੇਨ ਇਰਿਯਾਪਥੇਨ ਚੇ ਭੁਞ੍ਜਤਿ, ਅਤਿਰਿਤ੍ਤਂ ਕਾਰਾਪੇਤ੍ਵਾ ਭੁਞ੍ਜਿਤਬ੍ਬਂ. ਅਨਤਿਰਿਤ੍ਤਂ ਪਨ ਯਂ ਕਿਞ੍ਚਿ ਯਾਵਕਾਲਿਕਸਙ੍ਗਹਿਤਂ ਖਾਦਨੀਯਂ ਵਾ ਭੋਜਨੀਯਂ ਵਾ ਖਾਦਤਿ ਵਾ ਭੁਞ੍ਜਤਿ ਵਾ, ਅਜ੍ਝੋਹਾਰੇ ਅਜ੍ਝੋਹਾਰੇ ਪਾਚਿਤ੍ਤਿਯਂ.
ਤਤ੍ਥ ਅਨਤਿਰਿਤ੍ਤਂ ਨਾਮ ਨਾਤਿਰਿਤ੍ਤਂ, ਨ ਅਧਿਕਨ੍ਤਿ ਅਤ੍ਥੋ. ਤਂ ਪਨ ਯਸ੍ਮਾ ਕਪ੍ਪਿਯਕਤਾਦੀਹਿ ਸਤ੍ਤਹਿ ਵਿਨਯਕਮ੍ਮਾਕਾਰੇਹਿ ਅਕਤਂ ਵਾ ਗਿਲਾਨਸ੍ਸ ਅਨਧਿਕਂ ਵਾ ਹੋਤਿ, ਤਸ੍ਮਾ ਪਦਭਾਜਨੇ ਵੁਤ੍ਤਂ –
‘‘ਅਨਤਿਰਿਤ੍ਤਂ ਨਾਮ ਅਕਪ੍ਪਿਯਕਤਂ ਹੋਤਿ, ਅਪ੍ਪਟਿਗ੍ਗਹਿਤਕਤਂ ਹੋਤਿ, ਅਨੁਚ੍ਚਾਰਿਤਕਤਂ ਹੋਤਿ, ਅਹਤ੍ਥਪਾਸੇ ਕਤਂ ਹੋਤਿ, ਅਭੁਤ੍ਤਾਵਿਨਾ ਕਤਂ ਹੋਤਿ, ਭੁਤ੍ਤਾਵਿਨਾ ਚ ਪਵਾਰਿਤੇਨ ਆਸਨਾ ਵੁਟ੍ਠਿਤੇਨ ਕਤਂ ਹੋਤਿ, ‘ਅਲਮੇਤਂ ਸਬ੍ਬ’ਨ੍ਤਿ ਅਵੁਤ੍ਤਂ ਹੋਤਿ, ਨ ਗਿਲਾਨਾਤਿਰਿਤ੍ਤਂ ਹੋਤਿ, ਏਤਂ ਅਨਤਿਰਿਤ੍ਤਂ ਨਾਮਾ’’ਤਿ (ਪਾਚਿ. ੨੩੯).
ਤਤ੍ਥ ਅਕਪ੍ਪਿਯਕਤਨ੍ਤਿ ਯਂ ਤਤ੍ਥ ਫਲਂ ਵਾ ਕਨ੍ਦਮੂਲਾਦਿਂ ਵਾ ਪਞ੍ਚਹਿ ਸਮਣਕਪ੍ਪੇਹਿ ਕਪ੍ਪਿਯਂ ਅਕਤਂ, ਯਞ੍ਚ ਅਕਪ੍ਪਿਯਮਂਸਂ ਵਾ ਅਕਪ੍ਪਿਯਭੋਜਨਂ ਵਾ, ਏਤਂ ਅਕਪ੍ਪਿਯਂ ਨਾਮ. ਤਂ ਅਕਪ੍ਪਿਯਂ ‘‘ਅਲਮੇਤਂ ਸਬ੍ਬ’’ਨ੍ਤਿ ਏਵਂ ਅਤਿਰਿਤ੍ਤਂ ਕਤਮ੍ਪਿ ‘‘ਅਕਪ੍ਪਿਯਕਤ’’ਨ੍ਤਿ ਵੇਦਿਤਬ੍ਬਂ. ਅਪ੍ਪਟਿਗ੍ਗਹਿਤਕਤਨ੍ਤਿ ਭਿਕ੍ਖੁਨਾ ਅਪ੍ਪਟਿਗ੍ਗਹਿਤਂਯੇਵ ਪੁਰਿਮਨਯੇਨ ਅਤਿਰਿਤ੍ਤਂ ਕਤਂ. ਅਨੁਚ੍ਚਾਰਿਤਕਤਨ੍ਤਿ ਕਪ੍ਪਿਯਂ ਕਾਰੇਤੁਂ ਆਗਤੇਨ ਭਿਕ੍ਖੁਨਾ ਈਸਕਮ੍ਪਿ ਅਨੁਕ੍ਖਿਤ੍ਤਂ ਵਾ ਅਨਪਨਾਮਿਤਂ ਵਾ ਕਤਂ. ਅਹਤ੍ਥਪਾਸੇ ਕਤਨ੍ਤਿ ਕਪ੍ਪਿਯਂ ਕਾਰੇਤੁਂ ਆਗਤਸ੍ਸ ਹਤ੍ਥਪਾਸਤੋ ਬਹਿ ਠਿਤੇਨ ਕਤਂ. ਅਭੁਤ੍ਤਾਵਿਨਾ ਕਤਨ੍ਤਿ ਯੋ ‘‘ਅਲਮੇਤਂ ਸਬ੍ਬ’’ਨ੍ਤਿ ਅਤਿਰਿਤ੍ਤਂ ਕਰੋਤਿ, ਤੇਨ ਪਵਾਰਣਪ੍ਪਹੋਨਕਭੋਜਨਂ ਅਭੁਤ੍ਤੇਨ ਕਤਂ. ਭੁਤ੍ਤਾਵਿਨਾ ਪਵਾਰਿਤੇਨ ਆਸਨਾ ਵੁਟ੍ਠਿਤੇਨ ਕਤਨ੍ਤਿ ਇਦਂ ਉਤ੍ਤਾਨਮੇਵ. ‘‘ਅਲਮੇਤਂ ਸਬ੍ਬ’’ਨ੍ਤਿ ਅਵੁਤ੍ਤਨ੍ਤਿ ਵਚੀਭੇਦਂ ਕਤ੍ਵਾ ਏਵਂ ਅਵੁਤ੍ਤਂ ਹੋਤਿ. ਇਤਿ ਇਮੇਹਿ ਸਤ੍ਤਹਿ ਵਿਨਯਕਮ੍ਮਾਕਾਰੇਹਿ ਯਂ ਅਤਿਰਿਤ੍ਤਂ ਕਪ੍ਪਿਯਂ ਅਕਤਂ, ਯਞ੍ਚ ਨ ਗਿਲਾਨਾਤਿਰਿਤ੍ਤਂ, ਤਦੁਭਯਮ੍ਪਿ ‘‘ਅਨਤਿਰਿਤ੍ਤ’’ਨ੍ਤਿ ਵੇਦਿਤਬ੍ਬਂ.
੧੨੨. ਅਤਿਰਿਤ੍ਤਂ ਪਨ ਤਸ੍ਸੇਵ ਪਟਿਪਕ੍ਖਨਯੇਨ ਵੇਦਿਤਬ੍ਬਂ. ਤੇਨੇਵ ਵੁਤ੍ਤਂ ਪਦਭਾਜਨੇ –
‘‘ਅਤਿਰਿਤ੍ਤਂ ਨਾਮ ਕਪ੍ਪਿਯਕਤਂ ਹੋਤਿ, ਪਟਿਗ੍ਗਹਿਤਕਤਂ ਹੋਤਿ, ਉਚ੍ਚਾਰਿਤਕਤਂ ਹੋਤਿ, ਹਤ੍ਥਪਾਸੇ ਕਤਂ ਹੋਤਿ, ਭੁਤ੍ਤਾਵਿਨਾ ਕਤਂ ਹੋਤਿ, ਭੁਤ੍ਤਾਵਿਨਾ ਪਵਾਰਿਤੇਨ ਆਸਨਾ ਅਵੁਟ੍ਠਿਤੇਨ ਕਤਂ ਹੋਤਿ, ‘ਅਲਮੇਤਂ ਸਬ੍ਬ’ਨ੍ਤਿ ਵੁਤ੍ਤਂ ਹੋਤਿ, ਗਿਲਾਨਾਤਿਰਿਤ੍ਤਂ ਹੋਤਿ, ਏਤਂ ਅਤਿਰਿਤ੍ਤਂ ਨਾਮਾ’’ਤਿ (ਪਾਚਿ. ੨੩੯).
ਅਪਿਚੇਤ੍ਥ ਭੁਤ੍ਤਾਵਿਨਾ ਕਤਂ ਹੋਤੀਤਿ ਅਨਨ੍ਤਰਨਿਸਿਨ੍ਨਸ੍ਸ ਸਭਾਗਸ੍ਸ ਭਿਕ੍ਖੁਨੋ ਪਤ੍ਤਤੋ ਏਕਮ੍ਪਿ ਸਿਤ੍ਥਂ ਵਾ ਮਂਸਹੀਰਂ ਵਾ ਖਾਦਿਤ੍ਵਾ ਕਤਮ੍ਪਿ ‘‘ਭੁਤ੍ਤਾਵਿਨਾਵ ਕਤਂ ਹੋਤੀ’’ਤਿ ਵੇਦਿਤਬ੍ਬਂ. ਆਸਨਾ ਅਵੁਟ੍ਠਿਤੇਨਾਤਿ ਏਤ੍ਥ ਪਨ ਅਸਮ੍ਮੋਹਤ੍ਥਂ ਅਯਂ ਵਿਨਿਚ੍ਛਯੋ – ਦ੍ਵੇ ਭਿਕ੍ਖੂ ਪਾਤੋਯੇਵ ਭੁਞ੍ਜਮਾਨਾ ਪਵਾਰਿਤਾ ਹੋਨ੍ਤਿ, ਏਕੇਨ ਤਤ੍ਥੇਵ ਨਿਸੀਦਿਤਬ੍ਬਂ, ਇਤਰੇਨ ਨਿਚ੍ਚਭਤ੍ਤਂ ਵਾ ਸਲਾਕਭਤ੍ਤਂ ਵਾ ਆਨੇਤ੍ਵਾ ਉਪਡ੍ਢਂ ਤਸ੍ਸ ਭਿਕ੍ਖੁਨੋ ਪਤ੍ਤੇ ਆਕਿਰਿਤ੍ਵਾ ਹਤ੍ਥਂ ਧੋਵਿਤ੍ਵਾ ਸੇਸਂ ਤੇਨ ਭਿਕ੍ਖੁਨਾ ਕਪ੍ਪਿਯਂ ਕਾਰਾਪੇਤ੍ਵਾ ਭੁਞ੍ਜਿਤਬ੍ਬਂ. ਕਸ੍ਮਾ? ਯਞ੍ਹਿ ਤਸ੍ਸ ਹਤ੍ਥੇ ਲਗ੍ਗਂ, ਤਂ ਅਕਪ੍ਪਿਯਂ ਹੋਤਿ. ਸਚੇ ਪਨ ਪਠਮਂ ਨਿਸਿਨ੍ਨੋ ਭਿਕ੍ਖੁ ਸਯਮੇਵ ਤਸ੍ਸ ਪਤ੍ਤਤੋ ਹਤ੍ਥੇਨ ਗਣ੍ਹਾਤਿ, ਹਤ੍ਥਧੋਵਨਕਿਚ੍ਚਂ ਨਤ੍ਥਿ. ਸਚੇ ਪਨ ਏਵਂ ‘ਕਪ੍ਪਿਯਂ ਕਾਰੇਤ੍ਵਾ ਭੁਞ੍ਜਨ੍ਤਸ੍ਸ ਪੁਨ ਕਿਞ੍ਚਿ ਬ੍ਯਞ੍ਜਨਂ ਵਾ ਖਾਦਨੀਯਂ ਵਾ ਪਤ੍ਤੇ ਆਕਿਰ’ਨ੍ਤਿ ਯੇਨ ਪਠਮਂ ਕਪ੍ਪਿਯਂ ਕਤਂ ਹੋਤਿ, ਸੋ ਪੁਨ ਕਾਤੁਂ ਨ ਲਭਤਿ. ਯੇਨ ਅਕਤਂ, ਤੇਨ ਕਾਤਬ੍ਬਂ, ਯਞ੍ਚ ਅਕਤਂ, ਤਂ ਕਾਤਬ੍ਬਂ. ਯੇਨ ਅਕਤਨ੍ਤਿ ਅਞ੍ਞੇਨ ਭਿਕ੍ਖੁਨਾ ਯੇਨ ਪਠਮਂ ਨ ਕਤਂ, ਤੇਨ ਕਾਤਬ੍ਬਂ. ਯਞ੍ਚ ਅਕਤਨ੍ਤਿ ਯੇਨ ਪਠਮਂ ਕਪ੍ਪਿਯਂ ਕਤਂ, ਤੇਨਪਿ ਯਂ ਅਕਤਂ, ਤਂ ਕਾਤਬ੍ਬਂ. ਪਠਮਭਾਜਨੇ ਪਨ ਕਾਤੁਂ ਨ ਲਬ੍ਭਤਿ. ਤਤ੍ਥ ਹਿ ਕਰਿਯਮਾਨੇ ਪਠਮਂ ਕਤੇਨ ਸਦ੍ਧਿਂ ਕਤਂ ਹੋਤਿ, ਤਸ੍ਮਾ ਅਞ੍ਞਸ੍ਮਿਂ ਭਾਜਨੇ ਕਾਤੁਂ ਵਟ੍ਟਤੀਤਿ ਅਧਿਪ੍ਪਾਯੋ. ਏਵਂ ਕਤਂ ਪਨ ਤੇਨ ਭਿਕ੍ਖੁਨਾ ਪਠਮਂ ਕਤੇਨ ਸਦ੍ਧਿਂ ਭੁਞ੍ਜਿਤੁਂ ਵਟ੍ਟਤਿ.
ਕਪ੍ਪਿਯਂ ਕਰੋਨ੍ਤੇਨ ਚ ਨ ਕੇਵਲਂ ਪਤ੍ਤੇਯੇਵ, ਕੁਣ੍ਡੇਪਿ ਪਚ੍ਛਿਯਮ੍ਪਿ ਯਤ੍ਥ ਕਤ੍ਥਚਿ ਪੁਰਤੋ ਠਪੇਤ੍ਵਾ ਓਨਾਮਿਤਭਾਜਨੇ ਕਾਤਬ੍ਬਂ. ਤਂ ਸਚੇ ਭਿਕ੍ਖੁਸਤਂ ਪਵਾਰਿਤਂ ਹੋਤਿ, ਸਬ੍ਬੇਸਂ ਭੁਞ੍ਜਿਤੁਂ ਵਟ੍ਟਤਿ, ਅਪ੍ਪਵਾਰਿਤਾਨਮ੍ਪਿ ਵਟ੍ਟਤਿ. ਯੇਨ ਪਨ ਕਪ੍ਪਿਯਂ ਕਤਂ, ਤਸ੍ਸ ਨ ਵਟ੍ਟਤਿ. ਸਚੇਪਿ ਪਵਾਰੇਤ੍ਵਾ ਪਿਣ੍ਡਾਯ ਪਵਿਟ੍ਠਂ ਭਿਕ੍ਖੁਂ ਪਤ੍ਤਂ ਗਹੇਤ੍ਵਾ ਅਵਸ੍ਸਂ ਭੁਞ੍ਜਨਕੇ ਮਙ੍ਗਲਨਿਮਨ੍ਤਨੇ ਨਿਸੀਦਾਪੇਨ੍ਤਿ, ਅਤਿਰਿਤ੍ਤਂ ਕਾਰਾਪੇਤ੍ਵਾਵ ਭੁਞ੍ਜਿਤਬ੍ਬਂ. ਸਚੇ ਤਤ੍ਥ ਅਞ੍ਞੋ ਭਿਕ੍ਖੁ ਨਤ੍ਥਿ, ਆਸਨਸਾਲਂ ਵਾ ਵਿਹਾਰਂ ਵਾ ਪਤ੍ਤਂ ਪੇਸੇਤ੍ਵਾ ਕਾਰੇਤਬ੍ਬਂ, ਕਪ੍ਪਿਯਂ ਕਰੋਨ੍ਤੇਨ ਪਨ ਅਨੁਪਸਮ੍ਪਨ੍ਨਸ੍ਸ ਹਤ੍ਥੇ ਠਿਤਂ ਨ ਕਾਤਬ੍ਬਂ. ਸਚੇ ਆਸਨਸਾਲਾਯਂ ਅਬ੍ਯਤ੍ਤੋ ਭਿਕ੍ਖੁ ਹੋਤਿ, ਸਯਂ ਗਨ੍ਤ੍ਵਾ ਕਪ੍ਪਿਯਂ ਕਾਰਾਪੇਤ੍ਵਾ ਆਨੇਤ੍ਵਾ ਭੁਞ੍ਜਿਤਬ੍ਬਂ.
ਗਿਲਾਨਾਤਿਰਿਤ੍ਤਨ੍ਤਿ ਏਤ੍ਥ ਨ ਕੇਵਲਂ ਯਂ ਗਿਲਾਨਸ੍ਸ ਭੁਤ੍ਤਾਵਸੇਸਂ ਹੋਤਿ, ਤਂ ਗਿਲਾਨਾਤਿਰਿਤ੍ਤਂ, ਅਥ ਖੋ ਯਂ ਕਿਞ੍ਚਿ ਗਿਲਾਨਂ ਉਦ੍ਦਿਸ੍ਸ ‘‘ਅਜ੍ਜ ਵਾ ਯਦਾ ਵਾ ਇਚ੍ਛਤਿ, ਤਦਾ ਖਾਦਿਸ੍ਸਤੀ’’ਤਿ ਆਹਟਂ, ਤਂ ਸਬ੍ਬਂ ਗਿਲਾਨਾਤਿਰਿਤ੍ਤਨ੍ਤਿ ਵੇਦਿਤਬ੍ਬਂ. ਯਾਮਕਾਲਿਕਂ ਪਨ ਸਤ੍ਤਾਹਕਾਲਿਕਂ ਯਾਵਜੀਵਿਕਂ ਵਾ ਯਂ ਕਿਞ੍ਚਿ ਅਨਤਿਰਿਤ੍ਤਂ ਆਹਾਰਤ੍ਥਾਯ ਪਰਿਭੁਞ੍ਜਨ੍ਤਸ੍ਸ ਅਜ੍ਝੋਹਾਰੇ ਅਜ੍ਝੋਹਾਰੇ ਦੁਕ੍ਕਟਂ. ਸਚੇ ਪਨ ਯਾਮਕਾਲਿਕਾਦੀਨਿ ਆਮਿਸਸਂਸਟ੍ਠਾਨਿ ਹੋਨ੍ਤਿ, ਆਹਾਰਤ੍ਥਾਯਪਿ ਅਨਾਹਾਰਤ੍ਥਾਯਪਿ ਪਟਿਗ੍ਗਹੇਤ੍ਵਾ ਅਜ੍ਝੋਹਰਨ੍ਤਸ੍ਸ ਪਾਚਿਤ੍ਤਿਯਮੇਵ, ਅਸਂਸਟ੍ਠਾਨਿ ਪਨ ਸਤਿ ਪਚ੍ਚਯੇ ਭੁਞ੍ਜਨ੍ਤਸ੍ਸ ਅਨਾਪਤ੍ਤਿ.
ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ
ਪਵਾਰਣਾਵਿਨਿਚ੍ਛਯਕਥਾ ਸਮਤ੍ਤਾ.