੨੦. ਪਟਿਗ੍ਗਹਣਵਿਨਿਚ੍ਛਯਕਥਾ

੧੦੪. ਖਾਦਨੀਯਾਦਿਪਟਿਗ੍ਗਾਹੋਤਿ ਅਜ੍ਝੋਹਰਿਤਬ੍ਬਸ੍ਸ ਯਸ੍ਸ ਕਸ੍ਸਚਿ ਖਾਦਨੀਯਸ੍ਸ ਵਾ ਭੋਜਨੀਯਸ੍ਸ ਵਾ ਪਟਿਗ੍ਗਹਣਂ. ਤਤ੍ਰਾਯਂ ਵਿਨਿਚ੍ਛਯੋ – ਪਞ੍ਚਹਿ ਅਙ੍ਗੇਹਿ ਪਟਿਗ੍ਗਹਣਂ ਰੁਹਤਿ, ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ ਉਚ੍ਚਾਰਣਮਤ੍ਤਂ ਹੋਤਿ, ਹਤ੍ਥਪਾਸੋ ਪਞ੍ਞਾਯਤਿ, ਅਭਿਹਾਰੋ ਪਞ੍ਞਾਯਤਿ, ਦੇਵੋ ਵਾ ਮਨੁਸ੍ਸੋ ਵਾ ਤਿਰਚ੍ਛਾਨਗਤੋ ਵਾ ਕਾਯੇਨ ਕਾਯਪਟਿਬਦ੍ਧੇਨ ਨਿਸ੍ਸਗ੍ਗਿਯੇਨ ਵਾ ਦੇਤਿ, ਤਞ੍ਚੇ ਭਿਕ੍ਖੁ ਕਾਯੇਨ ਵਾ ਕਾਯਪਟਿਬਦ੍ਧੇਨ ਵਾ ਪਟਿਗ੍ਗਣ੍ਹਾਤਿ. ਏਵਂ ਪਞ੍ਚਹਙ੍ਗੇਹਿ ਪਟਿਗ੍ਗਹਣਂ ਰੁਹਤਿ.

ਤਤ੍ਥ ਠਿਤਨਿਸਿਨ੍ਨਨਿਪਨ੍ਨਾਨਂ ਵਸੇਨ ਏਵਂ ਹਤ੍ਥਪਾਸੋ ਵੇਦਿਤਬ੍ਬੋ – ਸਚੇ ਭਿਕ੍ਖੁ ਨਿਸਿਨ੍ਨੋ ਹੋਤਿ, ਆਸਨਸ੍ਸ ਪਚ੍ਛਿਮਨ੍ਤਤੋ ਪਟ੍ਠਾਯ, ਸਚੇ ਠਿਤੋ, ਪਣ੍ਹਿਅਨ੍ਤਤੋ ਪਟ੍ਠਾਯ, ਸਚੇ ਨਿਪਨ੍ਨੋ, ਯੇਨ ਪਸ੍ਸੇਨ ਨਿਪਨ੍ਨੋ, ਤਸ੍ਸ ਪਾਰਿਮਨ੍ਤਤੋ ਪਟ੍ਠਾਯ, ਦਾਯਕਸ੍ਸ ਨਿਸਿਨ੍ਨਸ੍ਸ ਵਾ ਠਿਤਸ੍ਸ ਵਾ ਨਿਪਨ੍ਨਸ੍ਸ ਵਾ ਠਪੇਤ੍ਵਾ ਪਸਾਰਿਤਹਤ੍ਥਂ ਯਂ ਆਸਨ੍ਨਤਰਂ ਅਙ੍ਗਂ, ਤਸ੍ਸ ਓਰਿਮਨ੍ਤੇਨ ਪਰਿਚ੍ਛਿਨ੍ਦਿਤ੍ਵਾ ਅਡ੍ਢਤੇਯ੍ਯਹਤ੍ਥੋ ਹਤ੍ਥਪਾਸੋ ਨਾਮ.

ਸਚੇ ਪਨ ਦਾਯਕਪਟਿਗ੍ਗਾਹਕੇਸੁ ਏਕੋ ਆਕਾਸੇ ਹੋਤਿ, ਏਕੋ ਭੂਮਿਯਂ, ਭੂਮਟ੍ਠਸ੍ਸ ਚ ਸੀਸੇਨ, ਆਕਾਸਟ੍ਠਸ੍ਸ ਚ ਠਪੇਤ੍ਵਾ ਦਾਤੁਂ ਵਾ ਗਹੇਤੁਂ ਵਾ ਪਸਾਰਿਤਹਤ੍ਥਂ ਯਂ ਆਸਨ੍ਨਤਰਂ ਅਙ੍ਗਂ, ਤਸ੍ਸ ਓਰਿਮਨ੍ਤੇਨ ਹਤ੍ਥਪਾਸਪਮਾਣਂ ਪਰਿਚ੍ਛਿਨ੍ਦਿਤਬ੍ਬਂ. ਸਚੇਪਿ ਏਕੋ ਕੂਪੇ ਹੋਤਿ, ਏਕੋ ਕੂਪਤਟੇ, ਏਕੋ ਵਾ ਪਨ ਰੁਕ੍ਖੇ, ਏਕੋ ਪਥਵਿਯਂ, ਵੁਤ੍ਤਨਯੇਨੇਵ ਹਤ੍ਥਪਾਸਪਮਾਣਂ ਪਰਿਚ੍ਛਿਨ੍ਦਿਤਬ੍ਬਂ. ਏਵਰੂਪੇ ਹਤ੍ਥਪਾਸੇ ਠਤ੍ਵਾ ਸਚੇਪਿ ਪਕ੍ਖੀ ਮੁਖਤੁਣ੍ਡਕੇਨ ਵਾ ਹਤ੍ਥੀ ਵਾ ਸੋਣ੍ਡਾਯ ਗਹੇਤ੍ਵਾ ਪੁਪ੍ਫਂ ਵਾ ਫਲਂ ਵਾ ਦੇਤਿ, ਪਟਿਗ੍ਗਹਣਂ ਰੁਹਤਿ. ਸਚੇ ਪਨ ਅਡ੍ਢਟ੍ਠਮਰਤਨਸ੍ਸਪਿ ਹਤ੍ਥਿਨੋ ਖਨ੍ਧੇ ਨਿਸਿਨ੍ਨੋ ਤੇਨ ਸੋਣ੍ਡਾਯ ਦੀਯਮਾਨਂ ਗਣ੍ਹਾਤਿ, ਵਟ੍ਟਤਿਯੇਵ. ਹਤ੍ਥਾਦੀਸੁ ਯੇਨ ਕੇਨਚਿ ਸਰੀਰਾਵਯਵੇਨ ਅਨ੍ਤਮਸੋ ਪਾਦਙ੍ਗੁਲਿਯਾਪਿ ਦੀਯਮਾਨਂ ਕਾਯੇਨ ਦਿਨ੍ਨਂ ਨਾਮ ਹੋਤਿ. ਪਟਿਗ੍ਗਹਣੇਪਿ ਏਸੇਵ ਨਯੋ. ਯੇਨ ਕੇਨਚਿ ਹਿ ਸਰੀਰਾਵਯਵੇਨ ਗਹਿਤਂ ਕਾਯੇਨ ਗਹਿਤਮੇਵ ਹੋਤਿ. ਸਚੇਪਿ ਨਤ੍ਥੁਕਰਣਿਯਂ ਦੀਯਮਾਨਂ ਨਾਸਾਪੁਟੇਨ ਅਕਲ੍ਲਕੋ ਵਾ ਮੁਖੇਨ ਪਟਿਗ੍ਗਣ੍ਹਾਤਿ, ਆਭੋਗਮੇਵ ਹੇਤ੍ਥ ਪਮਾਣਂ.

੧੦੫. ਕਟਚ੍ਛੁਆਦੀਸੁ ਪਨ ਯੇਨ ਕੇਨਚਿ ਉਪਕਰਣੇਨ ਦਿਨ੍ਨਂ ਕਾਯਪਟਿਬਦ੍ਧੇਨ ਦਿਨ੍ਨਂ ਨਾਮ ਹੋਤਿ. ਪਟਿਗ੍ਗਹਣੇਪਿ ਏਸੇਵ ਨਯੋ. ਯੇਨ ਕੇਨਚਿ ਹਿ ਸਰੀਰਸਮ੍ਬਦ੍ਧੇਨ ਪਤ੍ਤਥਾਲਕਾਦਿਨਾ ਗਹਿਤਂ ਕਾਯਪਟਿਬਦ੍ਧੇਨ ਗਹਿਤਮੇਵ ਹੋਤਿ. ਕਾਯਤੋ ਪਨ ਕਾਯਪਟਿਬਦ੍ਧਤੋ ਚ ਮੋਚੇਤ੍ਵਾ ਹਤ੍ਥਪਾਸੇ ਠਿਤਸ੍ਸ ਕਾਯੇ ਵਾ ਕਾਯਪਟਿਬਦ੍ਧੇ ਵਾ ਪਾਤਿਯਮਾਨਮ੍ਪਿ ਨਿਸ੍ਸਗ੍ਗਿਯੇਨ ਪਯੋਗੇਨ ਦਿਨ੍ਨਂ ਨਾਮ ਹੋਤਿ. ਏਕੋ ਬਹੂਨਿ ਭਤ੍ਤਬ੍ਯਞ੍ਜਨਭਾਜਨਾਨਿ ਸੀਸੇ ਕਤ੍ਵਾ ਭਿਕ੍ਖੁਸ੍ਸ ਸਨ੍ਤਿਕਂ ਆਗਨ੍ਤ੍ਵਾ ਠਿਤਕੋਵ ‘‘ਗਣ੍ਹਥਾ’’ਤਿ ਵਦਤਿ, ਨ ਤਾਵ ਅਭਿਹਾਰੋ ਪਞ੍ਞਾਯਤਿ, ਤਸ੍ਮਾ ਨ ਗਹੇਤਬ੍ਬਂ. ਸਚੇ ਪਨ ਈਸਕਮ੍ਪਿ ਓਨਮਤਿ, ਭਿਕ੍ਖੁਨਾ ਹਤ੍ਥਂ ਪਸਾਰੇਤ੍ਵਾ ਹੇਟ੍ਠਿਮਭਾਜਨਂ ਏਕਦੇਸੇਨਪਿ ਸਮ੍ਪਟਿਚ੍ਛਿਤਬ੍ਬਂ. ਏਤ੍ਤਾਵਤਾ ਸਬ੍ਬਭਾਜਨਾਨਿ ਪਟਿਗ੍ਗਹਿਤਾਨਿ ਹੋਨ੍ਤਿ. ਤਤੋ ਪਟ੍ਠਾਯ ਓਰੋਪੇਤ੍ਵਾ ਉਗ੍ਘਾਟੇਤ੍ਵਾ ਵਾ ਯਂ ਇਚ੍ਛਤਿ, ਤਂ ਗਹੇਤੁਂ ਵਟ੍ਟਤਿ. ਭਤ੍ਤਪਚ੍ਛਿਆਦਿਮ੍ਹਿ ਪਨ ਏਕਭਾਜਨੇ ਵਤ੍ਤਬ੍ਬਮੇਵ ਨਤ੍ਥਿ.

ਕਾਜੇਨ ਭਤ੍ਤਂ ਹਰਨ੍ਤੋਪਿ ਸਚੇ ਕਾਜਂ ਓਨਮੇਤ੍ਵਾ ਦੇਤਿ, ਵਟ੍ਟਤਿ. ਤਿਂਸਹਤ੍ਥੋ ਵੇਣੁ ਹੋਤਿ, ਏਕਸ੍ਮਿਂ ਅਨ੍ਤੇ ਗੁਲ਼ਕੁਮ੍ਭੋ ਬਦ੍ਧੋ, ਏਕਸ੍ਮਿਂ ਸਪ੍ਪਿਕੁਮ੍ਭੋ, ਤਞ੍ਚੇ ਪਟਿਗ੍ਗਣ੍ਹਾਤਿ, ਸਬ੍ਬਂ ਪਟਿਗ੍ਗਹਿਤਮੇਵ. ਉਚ੍ਛੁਯਨ੍ਤਦੋਣਿਤੋ ਪਗ੍ਘਰਨ੍ਤਮੇਵ ‘‘ਰਸਂ ਗਣ੍ਹਥਾ’’ਤਿ ਵਦਤਿ, ਅਭਿਹਾਰੋ ਨ ਪਞ੍ਞਾਯਤੀਤਿ ਨ ਗਹੇਤਬ੍ਬੋ. ਸਚੇ ਪਨ ਕਸਟਂ ਛਡ੍ਡੇਤ੍ਵਾ ਹਤ੍ਥੇਨ ਉਸ੍ਸਿਞ੍ਚਿਤ੍ਵਾ ਦੇਤਿ, ਵਟ੍ਟਤਿ. ਬਹੂ ਪਤ੍ਤਾ ਮਞ੍ਚੇ ਵਾ ਪੀਠੇ ਵਾ ਕਟਸਾਰੇ ਵਾ ਦੋਣਿਯਂ ਵਾ ਫਲਕੇ ਵਾ ਠਪਿਤਾ ਹੋਨ੍ਤਿ, ਯਤ੍ਥ ਠਿਤਸ੍ਸ ਦਾਯਕੋ ਹਤ੍ਥਪਾਸੇ ਹੋਤਿ, ਤਤ੍ਥ ਠਤ੍ਵਾ ਪਟਿਗ੍ਗਹਣਸਞ੍ਞਾਯ ਮਞ੍ਚਾਦੀਨਿ ਅਙ੍ਗੁਲਿਯਾਪਿ ਫੁਸਿਤ੍ਵਾ ਠਿਤੇਨ ਵਾ ਨਿਸਿਨ੍ਨੇਨ ਵਾ ਨਿਪਨ੍ਨੇਨ ਵਾ ਯਂ ਤੇਸੁ ਪਤ੍ਤੇਸੁ ਦੀਯਤਿ, ਤਂ ਸਬ੍ਬਂ ਪਟਿਗ੍ਗਹਿਤਂ ਹੋਤਿ. ਸਚੇਪਿ ‘‘ਪਟਿਗ੍ਗਹੇਸ੍ਸਾਮੀ’’ਤਿ ਮਞ੍ਚਾਦੀਨਿ ਅਭਿਰੁਹਿਤ੍ਵਾ ਨਿਸੀਦਤਿ, ਵਟ੍ਟਤਿਯੇਵ.

ਪਥਵਿਯਂ ਪਨ ਸਚੇਪਿ ਕੁਚ੍ਛਿਯਾ ਕੁਚ੍ਛਿਂ ਆਹਚ੍ਚ ਠਿਤਾ ਹੋਨ੍ਤਿ, ਯਂ ਯਂ ਅਙ੍ਗੁਲਿਯਾ ਵਾ ਸੂਚਿਯਾ ਵਾ ਫੁਸਿਤ੍ਵਾ ਨਿਸਿਨ੍ਨੋ ਹੋਤਿ, ਤਤ੍ਥ ਤਤ੍ਥ ਦੀਯਮਾਨਮੇਵ ਪਟਿਗ੍ਗਹਿਤਂ ਹੋਤਿ. ਯਤ੍ਥ ਕਤ੍ਥਚਿ ਮਹਾਕਟਸਾਰਹਤ੍ਥਤ੍ਥਰਣਾਦੀਸੁ ਠਪਿਤਪਤ੍ਤੇ ਪਟਿਗ੍ਗਹਣਂ ਨ ਰੁਹਤੀਤਿ ਵੁਤ੍ਤਂ, ਤਂ ਹਤ੍ਥਪਾਸਾਤਿਕ੍ਕਮਂ ਸਨ੍ਧਾਯ ਵੁਤ੍ਤਨ੍ਤਿ ਵੇਦਿਤਬ੍ਬਂ, ਹਤ੍ਥਪਾਸੇ ਪਨ ਸਤਿ ਯਤ੍ਥ ਕਤ੍ਥਚਿ ਵਟ੍ਟਤਿ ਅਞ੍ਞਤ੍ਰ ਤਤ੍ਥਜਾਤਕਾ. ਤਤ੍ਥਜਾਤਕੇ ਪਨ ਪਦੁਮਿਨਿਪਣ੍ਣੇ ਵਾ ਕਿਂਸੁਕਪਣ੍ਣਾਦਿਮ੍ਹਿ ਵਾ ਨ ਵਟ੍ਟਤਿ. ਨ ਹਿ ਤਂ ਕਾਯਪਟਿਬਦ੍ਧਸਙ੍ਖ੍ਯਂ ਗਚ੍ਛਤਿ. ਯਥਾ ਚ ਤਤ੍ਥਜਾਤਕੇ, ਏਵਂ ਖਾਣੁਕੇ ਬਨ੍ਧਿਤ੍ਵਾ ਠਪਿਤਮਞ੍ਚਾਦਿਮ੍ਹਿ ਅਸਂਹਾਰਿਮੇ ਫਲਕੇ ਵਾ ਪਾਸਾਣੇ ਵਾ ਨ ਰੁਹਤਿਯੇਵ. ਤੇਪਿ ਹਿ ਤਤ੍ਥਜਾਤਕਸਙ੍ਖ੍ਯੁਪਗਾ ਹੋਨ੍ਤਿ. ਭੂਮਿਯਂ ਅਤ੍ਥਤੇਸੁ ਸੁਖੁਮੇਸੁ ਤਿਨ੍ਤਿਣਿਕਾਦਿਪਣ੍ਣੇਸੁ ਪਟਿਗ੍ਗਹਣਂ ਨ ਰੁਹਤਿ. ਨ ਹਿ ਤਾਨਿ ਸਨ੍ਧਾਰੇਤੁਂ ਸਮਤ੍ਥਾਨੀਤਿ. ਮਹਨ੍ਤੇਸੁ ਪਨ ਪਦੁਮਿਨਿਪਣ੍ਣਾਦੀਸੁ ਰੁਹਤਿ. ਸਚੇ ਹਤ੍ਥਪਾਸਂ ਅਤਿਕ੍ਕਮ੍ਮਠਿਤੋ ਦੀਘਦਣ੍ਡਕੇਨ ਉਲ਼ੁਙ੍ਕੇਨ ਦੇਤਿ, ‘‘ਆਗਨ੍ਤ੍ਵਾ ਦੇਹੀ’’ਤਿ ਵਤ੍ਤਬ੍ਬੋ. ਵਚਨਂ ਅਸੁਤ੍ਵਾ ਵਾ ਅਨਾਦਿਯਿਤ੍ਵਾ ਵਾ ਪਤ੍ਤੇ ਆਕਿਰਤਿਯੇਵ, ਪੁਨ ਪਟਿਗ੍ਗਹੇਤਬ੍ਬਂ. ਦੂਰੇ ਠਤ੍ਵਾ ਭਤ੍ਤਪਿਣ੍ਡਂ ਖਿਪਨ੍ਤੇਪਿ ਏਸੇਵ ਨਯੋ.

੧੦੬. ਸਚੇ ਪਤ੍ਤਥਵਿਕਤੋ ਨੀਹਰਿਯਮਾਨੇ ਪਤ੍ਤੇ ਰਜਨਚੁਣ੍ਣਾਨਿ ਹੋਨ੍ਤਿ, ਸਤਿ ਉਦਕੇ ਧੋਵਿਤਬ੍ਬੋ, ਅਸਤਿ ਰਜਨਚੁਣ੍ਣਂ ਪੁਞ੍ਛਿਤ੍ਵਾ ਪਟਿਗ੍ਗਹੇਤ੍ਵਾ ਵਾ ਪਿਣ੍ਡਾਯ ਚਰਿਤਬ੍ਬਂ. ਸਚੇ ਪਿਣ੍ਡਾਯ ਚਰਨ੍ਤਸ੍ਸ ਪਤ੍ਤੇ ਰਜਂ ਪਤਤਿ, ਪਟਿਗ੍ਗਹੇਤ੍ਵਾ ਭਿਕ੍ਖਾ ਗਣ੍ਹਿਤਬ੍ਬਾ, ਅਪ੍ਪਟਿਗ੍ਗਹੇਤ੍ਵਾ ਗਣ੍ਹਤੋ ਵਿਨਯਦੁਕ੍ਕਟਂ, ਤਂ ਪਨ ਪੁਨ ਪਟਿਗ੍ਗਹੇਤ੍ਵਾ ਭੁਞ੍ਜਤੋ ਅਨਾਪਤ੍ਤਿ. ਸਚੇ ਪਨ ‘‘ਪਟਿਗ੍ਗਹੇਤ੍ਵਾ ਦੇਥਾ’’ਤਿ ਵੁਤ੍ਤੇ ਵਚਨਂ ਅਸੁਤ੍ਵਾ ਵਾ ਅਨਾਦਿਯਿਤ੍ਵਾ ਵਾ ਭਿਕ੍ਖਂ ਦੇਨ੍ਤਿਯੇਵ, ਵਿਨਯਦੁਕ੍ਕਟਂ ਨਤ੍ਥਿ, ਪੁਨ ਪਟਿਗ੍ਗਹੇਤ੍ਵਾ ਅਞ੍ਞਾ ਭਿਕ੍ਖਾ ਗਹੇਤਬ੍ਬਾ. ਸਚੇ ਮਹਾਵਾਤੋ ਤਤੋ ਤਤੋ ਰਜਂ ਪਾਤੇਤਿ, ਨ ਸਕ੍ਕਾ ਹੋਤਿ ਭਿਕ੍ਖਂ ਗਹੇਤੁਂ, ‘‘ਅਨੁਪਸਮ੍ਪਨ੍ਨਸ੍ਸ ਦਸ੍ਸਾਮੀ’’ਤਿ ਸੁਦ੍ਧਚਿਤ੍ਤੇਨ ਆਭੋਗਂ ਕਤ੍ਵਾ ਗਣ੍ਹਿਤੁਂ ਵਟ੍ਟਤਿ. ਏਵਂ ਪਿਣ੍ਡਾਯ ਚਰਿਤ੍ਵਾ ਵਿਹਾਰਂ ਵਾ ਆਸਨਸਾਲਂ ਵਾ ਗਨ੍ਤ੍ਵਾ ਤਂ ਅਨੁਪਸਮ੍ਪਨ੍ਨਸ੍ਸ ਦਤ੍ਵਾ ਪੁਨ ਤੇਨ ਦਿਨ੍ਨਂ ਵਾ ਤਸ੍ਸ ਵਿਸ੍ਸਾਸੇਨ ਵਾ ਪਟਿਗ੍ਗਹੇਤ੍ਵਾ ਭੁਞ੍ਜਿਤੁਂ ਵਟ੍ਟਤਿ. ਸਚੇ ਭਿਕ੍ਖਾਚਾਰੇ ਸਰਜਂ ਪਤ੍ਤਂ ਭਿਕ੍ਖੁਸ੍ਸ ਦੇਤਿ, ਸੋ ਵਤ੍ਤਬ੍ਬੋ ‘‘ਇਮਂ ਪਟਿਗ੍ਗਹੇਤ੍ਵਾ ਭਿਕ੍ਖਂ ਵਾ ਗਣ੍ਹੇਯ੍ਯਾਸਿ ਪਰਿਭੁਞ੍ਜੇਯ੍ਯਾਸਿ ਵਾ’’ਤਿ, ਤੇਨ ਤਥਾ ਕਾਤਬ੍ਬਂ. ਸਚੇ ਰਜਂ ਉਪਰਿ ਉਪ੍ਪਿਲਵਤਿ, ਕਞ੍ਜਿਕਂ ਪਵਾਹੇਤ੍ਵਾ ਸੇਸਂ ਭੁਞ੍ਜਿਤਬ੍ਬਂ. ਸਚੇ ਅਨ੍ਤੋਪਵਿਟ੍ਠਂ ਹੋਤਿ, ਪਟਿਗ੍ਗਹੇਤਬ੍ਬਂ. ਅਨੁਪਸਮ੍ਪਨ੍ਨੇ ਅਸਤਿ ਹਤ੍ਥਤੋ ਅਮੋਚੇਨ੍ਤੇਨੇਵ ਯਤ੍ਥ ਅਨੁਪਸਮ੍ਪਨ੍ਨੋ ਅਤ੍ਥਿ, ਤਤ੍ਥ ਨੇਤ੍ਵਾ ਪਟਿਗ੍ਗਹੇਤਬ੍ਬਂ. ਸੁਕ੍ਖਭਤ੍ਤੇ ਪਤਿਤਰਜਂ ਅਪਨੇਤ੍ਵਾ ਭੁਞ੍ਜਿਤੁਂ ਵਟ੍ਟਤਿ. ਸਚੇ ਅਤਿਸੁਖੁਮਂ ਹੋਤਿ, ਉਪਰਿ ਭਤ੍ਤੇਨ ਸਦ੍ਧਿਂ ਅਪਨੇਤਬ੍ਬਂ, ਪਟਿਗ੍ਗਹੇਤ੍ਵਾ ਵਾ ਭੁਞ੍ਜਿਤਬ੍ਬਂ. ਯਾਗੁਂ ਵਾ ਸੂਪਂ ਵਾ ਪੁਰਤੋ ਠਪੇਤ੍ਵਾ ਆਲੁਲ਼ੇਨ੍ਤਾਨਂ ਭਾਜਨਤੋ ਫੁਸਿਤਾਨਿ ਉਗ੍ਗਨ੍ਤ੍ਵਾ ਪਤ੍ਤੇ ਪਤਨ੍ਤਿ, ਪਤ੍ਤੋ ਪਟਿਗ੍ਗਹੇਤਬ੍ਬੋ.

੧੦੭. ਉਲ਼ੁਙ੍ਕੇਨ ਆਹਰਿਤ੍ਵਾ ਦੇਨ੍ਤਾਨਂ ਪਠਮਤਰਂ ਉਲ਼ੁਙ੍ਕਤੋ ਥੇਵਾ ਪਤ੍ਤੇ ਪਤਨ੍ਤਿ, ਸੁਪਤਿਤਾ, ਅਭਿਹਟਤ੍ਤਾ ਦੋਸੋ ਨਤ੍ਥਿ. ਸਚੇਪਿ ਚਰੁਕੇਨ ਭਤ੍ਤੇ ਆਕਿਰਿਯਮਾਨੇ ਚਰੁਕਤੋ ਮਸਿ ਵਾ ਛਾਰਿਕਾ ਵਾ ਪਤਤਿ, ਅਭਿਹਟਤ੍ਤਾ ਨੇਵਤ੍ਥਿ ਦੋਸੋ. ਅਨਨ੍ਤਰਸ੍ਸ ਭਿਕ੍ਖੁਨੋ ਦੀਯਮਾਨਂ ਪਤ੍ਤਤੋ ਉਪ੍ਪਤਿਤ੍ਵਾ ਇਤਰਸ੍ਸ ਪਤ੍ਤੇ ਪਤਤਿ, ਸੁਪਤਿਤਂ. ਪਟਿਗ੍ਗਹਿਤਮੇਵ ਹਿ ਤਂ ਹੋਤਿ. ਸਚੇ ਜਜ੍ਝਰਿਸਾਖਾਦਿਂ ਫਾਲੇਤ੍ਵਾ ਏਕਸ੍ਸ ਭਿਕ੍ਖੁਨੋ ਦੇਨ੍ਤਾਨਂ ਸਾਖਤੋ ਫੁਸਿਤਾਨਿ ਅਞ੍ਞਸ੍ਸ ਪਤ੍ਤੇ ਪਤਨ੍ਤਿ, ਪਤ੍ਤੋ ਪਟਿਗ੍ਗਹੇਤਬ੍ਬੋ, ਯਸ੍ਸ ਪਤ੍ਤਸ੍ਸ ਉਪਰਿ ਫਾਲੇਨ੍ਤਿ, ਤਸ੍ਸ ਪਤ੍ਤੇ ਪਤਿਤੇਸੁ ਦਾਤੁਕਾਮਤਾਯ ਅਭਿਹਟਤ੍ਤਾ ਦੋਸੋ ਨਤ੍ਥਿ. ਪਾਯਾਸਸ੍ਸ ਪੂਰੇਤ੍ਵਾ ਪਤ੍ਤਂ ਦੇਨ੍ਤਿ, ਉਣ੍ਹਤ੍ਤਾ ਹੇਟ੍ਠਾ ਗਹੇਤੁਂ ਨ ਸਕ੍ਕੋਤਿ, ਮੁਖਵਟ੍ਟਿਯਾਪਿ ਗਹੇਤੁਂ ਵਟ੍ਟਤਿ. ਸਚੇ ਤਥਾਪਿ ਨ ਸਕ੍ਕੋਤਿ, ਆਧਾਰਕੇਨ ਗਹੇਤਬ੍ਬੋ. ਆਸਨਸਾਲਾਯ ਪਤ੍ਤਂ ਗਹੇਤ੍ਵਾ ਨਿਸਿਨ੍ਨੋ ਭਿਕ੍ਖੁ ਨਿਦ੍ਦਂ ਓਕ੍ਕਨ੍ਤੋ ਹੋਤਿ, ਨੇਵ ਆਹਰਿਯਮਾਨਂ, ਨ ਦੀਯਮਾਨਂ ਜਾਨਾਤਿ, ਅਪ੍ਪਟਿਗ੍ਗਹਿਤਂ ਹੋਤਿ. ਸਚੇ ਪਨ ਆਭੋਗਂ ਕਤ੍ਵਾ ਨਿਸਿਨ੍ਨੋ ਹੋਤਿ, ਵਟ੍ਟਤਿ. ਸਚੇਪਿ ਸੋ ਹਤ੍ਥੇਨ ਆਧਾਰਕਂ ਮੁਞ੍ਚਿਤ੍ਵਾ ਪਾਦੇਨ ਪੇਲ੍ਲੇਤ੍ਵਾ ਨਿਦ੍ਦਾਯਤਿ, ਵਟ੍ਟਤਿਯੇਵ. ਪਾਦੇਨ ਆਧਾਰਕਂ ਅਕ੍ਕਮਿਤ੍ਵਾ ਪਟਿਗ੍ਗਣ੍ਹਨ੍ਤਸ੍ਸ ਪਨ ਜਾਗਰਨ੍ਤਸ੍ਸਪਿ ਅਨਾਦਰਪਟਿਗ੍ਗਹਣਂ ਹੋਤਿ, ਤਸ੍ਮਾ ਨ ਕਤ੍ਤਬ੍ਬਂ. ਕੇਚਿ ‘‘ਏਵਂ ਆਧਾਰਕੇਨ ਪਟਿਗ੍ਗਹਣਂ ਕਾਯਪਟਿਬਦ੍ਧਪਟਿਬਦ੍ਧੇਨ ਪਟਿਗ੍ਗਹਣਂ ਨਾਮ ਹੋਤਿ, ਤਸ੍ਮਾ ਨ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਵਚਨਮਤ੍ਤਮੇਵ, ਅਤ੍ਥਤੋ ਪਨ ਸਬ੍ਬਮ੍ਪੇਤਂ ਕਾਯਪਟਿਬਦ੍ਧਮੇਵ ਹੋਤਿ. ਕਾਯਸਂਸਗ੍ਗੇਪਿ ਚੇਸ ਨਯੋ ਦਸ੍ਸਿਤੋ. ਯਮ੍ਪਿ ਭਿਕ੍ਖੁਸ੍ਸ ਦੀਯਮਾਨਂ ਪਤਤਿ, ਤਮ੍ਪਿ ਸਾਮਂ ਗਹੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ.

ਤਤ੍ਰਿਦਂ ਸੁਤ੍ਤਂ –

‘‘ਅਨੁਜਾਨਾਮਿ, ਭਿਕ੍ਖਵੇ, ਯਂ ਦੀਯਮਾਨਂ ਪਤਤਿ, ਤਂ ਸਾਮਂ ਗਹੇਤ੍ਵਾ ਪਰਿਭੁਞ੍ਜਿਤੁਂ, ਪਰਿਚ੍ਚਤ੍ਤਂ ਤਂ, ਭਿਕ੍ਖਵੇ, ਦਾਯਕੇਹੀ’’ਤਿ (ਚੂਲ਼ਵ. ੨੭੩).

ਇਦਞ੍ਚ ਪਨ ਸੁਤ੍ਤਂ ਨੇਯ੍ਯਤ੍ਥਂ, ਤਸ੍ਮਾ ਏਵਮੇਤ੍ਥ ਅਧਿਪ੍ਪਾਯੋ ਵੇਦਿਤਬ੍ਬੋ – ਯਂ ਦੀਯਮਾਨਂ ਦਾਯਕਸ੍ਸ ਹਤ੍ਥਤੋ ਪਰਿਗਲ਼ਿਤ੍ਵਾ ਸੁਦ੍ਧਾਯ ਵਾ ਭੂਮਿਯਾ ਪਦੁਮਿਨਿਪਣ੍ਣੇ ਵਾ ਵਤ੍ਥਕਟਸਾਰਕਾਦੀਸੁ ਵਾ ਪਤਤਿ, ਤਂ ਸਾਮਂ ਗਹੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ. ਯਂ ਪਨ ਸਰਜਾਯ ਭੂਮਿਯਂ ਪਤਤਿ, ਤਂ ਰਜਂ ਪੁਞ੍ਛਿਤ੍ਵਾ ਵਾ ਧੋਵਿਤ੍ਵਾ ਵਾ ਪਟਿਗ੍ਗਹੇਤ੍ਵਾ ਵਾ ਪਰਿਭੁਞ੍ਜਿਤਬ੍ਬਂ. ਸਚੇ ਪਵਟ੍ਟਨ੍ਤਂ ਅਞ੍ਞਸ੍ਸ ਭਿਕ੍ਖੁਨੋ ਸਨ੍ਤਿਕਂ ਗਚ੍ਛਤਿ, ਤੇਨ ਆਹਰਾਪੇਤੁਮ੍ਪਿ ਵਟ੍ਟਤਿ. ਸਚੇ ਤਂ ਭਿਕ੍ਖੁਂ ਵਦਤਿ ‘‘ਤ੍ਵਂਯੇਵ ਖਾਦਾ’’ਤਿ, ਤਸ੍ਸਪਿ ਖਾਦਿਤੁਂ ਵਟ੍ਟਤਿ, ਅਨਾਣਤ੍ਤੇਨ ਪਨ ਤੇਨ ਨ ਗਹੇਤਬ੍ਬਂ. ‘‘ਅਨਾਣਤ੍ਤੇਨਪਿ ਇਤਰਸ੍ਸ ਦਸ੍ਸਾਮੀਤਿ ਗਹੇਤੁਂ ਵਟ੍ਟਤੀ’’ਤਿ ਕੁਰੁਨ੍ਦਿਯਂ ਵੁਤ੍ਤਂ. ਕਸ੍ਮਾ ਪਨੇਤਂ ਇਤਰਸ੍ਸ ਭਿਕ੍ਖੁਨੋ ਗਹੇਤੁਂ ਨ ਵਟ੍ਟਤੀਤਿ? ਭਗਵਤਾ ਅਨਨੁਞ੍ਞਾਤਤ੍ਤਾ. ਭਗਵਤਾ ਹਿ ‘‘ਸਾਮਂ ਗਹੇਤ੍ਵਾ ਪਰਿਭੁਞ੍ਜਿਤੁ’’ਨ੍ਤਿ ਵਦਨ੍ਤੇਨ ਯਸ੍ਸੇਵ ਤਂ ਦੀਯਮਾਨਂ ਪਤਤਿ, ਤਸ੍ਸ ਅਪ੍ਪਟਿਗ੍ਗਹਿਤਕਮ੍ਪਿ ਤਂ ਗਹੇਤ੍ਵਾ ਪਰਿਭੋਗੋ ਅਨੁਞ੍ਞਾਤੋ. ‘‘ਪਰਿਚ੍ਚਤ੍ਤਂ ਤਂ, ਭਿਕ੍ਖਵੇ, ਦਾਯਕੇਹੀ’’ਤਿ ਵਚਨੇਨ ਪਨੇਤ੍ਥ ਪਰਸਨ੍ਤਕਭਾਵੋ ਦੀਪਿਤੋ, ਤਸ੍ਮਾ ਅਞ੍ਞਸ੍ਸ ਸਾਮਂ ਗਹੇਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਤਿ, ਤਸ੍ਸ ਪਨ ਆਣਤ੍ਤਿਯਾ ਵਟ੍ਟਤੀਤਿ ਅਯਂ ਕਿਰੇਤ੍ਥ ਅਧਿਪ੍ਪਾਯੋ. ਯਸ੍ਮਾ ਚ ਏਤਂ ਅਪ੍ਪਟਿਗ੍ਗਹਿਤਕਤ੍ਤਾ ਅਨੁਞ੍ਞਾਤਂ, ਤਸ੍ਮਾ ਯਥਾਠਿਤਂਯੇਵ ਅਨਾਮਸਿਤ੍ਵਾ ਕੇਨਚਿ ਪਿਦਹਿਤ੍ਵਾ ਠਪਿਤਂ ਦੁਤਿਯਦਿਵਸੇਪਿ ਪਰਿਭੁਞ੍ਜਿਤੁਂ ਵਟ੍ਟਤਿ, ਸਨ੍ਨਿਧਿਪਚ੍ਚਯਾ ਅਨਾਪਤ੍ਤਿ, ਪਟਿਗ੍ਗਹੇਤ੍ਵਾ ਪਨ ਪਰਿਭੁਞ੍ਜਿਤਬ੍ਬਂ. ਤਂ ਦਿਵਸਂਯੇਵ ਹਿ ਤਸ੍ਸ ਸਾਮਂ ਗਹੇਤ੍ਵਾ ਪਰਿਭੋਗੋ ਅਨੁਞ੍ਞਾਤੋ, ਨ ਤਤੋ ਪਰਨ੍ਤਿ ਅਯਮ੍ਪਿ ਕਿਰੇਤ੍ਥ ਅਧਿਪ੍ਪਾਯੋ.

੧੦੮. ਇਦਾਨਿ ਅਬ੍ਬੋਹਾਰਿਕਨਯੋ ਵੁਚ੍ਚਤਿ. ਭੁਞ੍ਜਨ੍ਤਾਨਞ੍ਹਿ ਦਨ੍ਤਾ ਖੀਯਨ੍ਤਿ, ਨਖਾ ਖੀਯਨ੍ਤਿ, ਪਤ੍ਤਸ੍ਸ ਵਣ੍ਣੋ ਖੀਯਤਿ, ਸਬ੍ਬਂ ਅਬ੍ਬੋਹਾਰਿਕਂ. ਸਤ੍ਥਕੇਨ ਉਚ੍ਛੁਆਦੀਸੁ ਫਾਲਿਤੇਸੁ ਮਲਂ ਪਞ੍ਞਾਯਤਿ, ਏਤਂ ਨਵਸਮੁਟ੍ਠਿਤਂ ਨਾਮ, ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿਤਬ੍ਬਂ. ਸਤ੍ਥਕਂ ਧੋਵਿਤ੍ਵਾ ਫਾਲਿਤੇਸੁ ਮਲਂ ਨ ਪਞ੍ਞਾਯਤਿ, ਲੋਹਗਨ੍ਧਮਤ੍ਤਂ ਹੋਤਿ, ਤਂ ਅਬ੍ਬੋਹਾਰਿਕਂ. ਯਮ੍ਪਿ ਸਤ੍ਥਕਂ ਗਹੇਤ੍ਵਾ ਪਰਿਹਰਨ੍ਤਿ, ਤੇਨ ਫਾਲਿਤੇਪਿ ਏਸੇਵ ਨਯੋ. ਨ ਹਿ ਤਂ ਪਰਿਭੋਗਤ੍ਥਾਯ ਪਰਿਹਰਨ੍ਤੀਤਿ. ਮੂਲਭੇਸਜ੍ਜਾਦੀਨਿ ਪਿਸਨ੍ਤਾਨਂ ਵਾ ਕੋਟ੍ਟੇਨ੍ਤਾਨਂ ਵਾ ਨਿਸਦਨਿਸਦਪੋਤਕਉਦੁਕ੍ਖਲਮੁਸਲਾਦੀਨਿ ਖੀਯਨ੍ਤਿ, ਪਰਿਹਰਣਕਵਾਸਿਂ ਤਾਪੇਤ੍ਵਾ ਭੇਸਜ੍ਜਤ੍ਥਾਯ ਤਕ੍ਕੇ ਵਾ ਖੀਰੇ ਵਾ ਪਕ੍ਖਿਪਨ੍ਤਿ, ਤਤ੍ਥ ਨੀਲਿਕਾ ਪਞ੍ਞਾਯਤਿ, ਸਤ੍ਥਕੇ ਵੁਤ੍ਤਸਦਿਸੋਵ ਵਿਨਿਚ੍ਛਯੋ. ਆਮਕਤਕ੍ਕਾਦੀਸੁ ਪਨ ਸਯਂ ਨ ਪਕ੍ਖਿਪਿਤਬ੍ਬਾ, ਪਕ੍ਖਿਪਤਿ ਚੇ, ਸਾਮਂਪਾਕਤੋ ਨ ਮੁਚ੍ਚਤਿ. ਦੇਵੇ ਵਸ੍ਸਨ੍ਤੇ ਪਿਣ੍ਡਾਯ ਚਰਨ੍ਤਸ੍ਸ ਸਰੀਰਤੋ ਵਾ ਚੀਵਰਤੋ ਵਾ ਕਿਲਿਟ੍ਠਉਦਕਂ ਪਤ੍ਤੇ ਪਤਤਿ, ਪਟਿਗ੍ਗਹੇਤਬ੍ਬਂ. ਰੁਕ੍ਖਮੂਲਾਦੀਸੁ ਭੁਞ੍ਜਨ੍ਤਸ੍ਸ ਪਤਿਤੇਪਿ ਏਸੇਵ ਨਯੋ. ਸਚੇ ਪਨ ਸਤ੍ਤਾਹਂ ਵਸ੍ਸਨ੍ਤੇ ਦੇਵੇ ਸੁਦ੍ਧਂ ਉਦਕਂ ਹੋਤਿ, ਅਬ੍ਭੋਕਾਸਤੋ ਵਾ ਪਤਤਿ, ਵਟ੍ਟਤਿ.

੧੦੯. ਸਾਮਣੇਰਸ੍ਸ ਓਦਨਂ ਦੇਨ੍ਤੇਨ ਤਸ੍ਸ ਪਤ੍ਤਗਤਂ ਅਚ੍ਛੁਪਨ੍ਤੇਨੇਵ ਦਾਤਬ੍ਬੋ, ਪਤ੍ਤੋ ਵਾਸ੍ਸ ਪਟਿਗ੍ਗਹੇਤਬ੍ਬੋ. ਅਪ੍ਪਟਿਗ੍ਗਹਿਤੇ ਓਦਨਂ ਛੁਪਿਤ੍ਵਾ ਪੁਨ ਅਤ੍ਤਨੋ ਪਤ੍ਤੇ ਓਦਨਂ ਗਣ੍ਹਨ੍ਤਸ੍ਸ ਉਗ੍ਗਹਿਤਕੋ ਹੋਤਿ. ਸਚੇ ਪਨ ਦਾਤੁਕਾਮੋ ਹੁਤ੍ਵਾ ‘‘ਆਹਰ, ਸਾਮਣੇਰ, ਪਤ੍ਤਂ, ਓਦਨਂ ਗਣ੍ਹਾਹੀ’’ਤਿ ਵਦਤਿ, ਇਤਰੋ ‘‘ਅਲਂ ਮਯ੍ਹ’’ਨ੍ਤਿ ਪਟਿਕ੍ਖਿਪਤਿ, ਪੁਨ ‘‘ਤਵੇਤਂ ਮਯਾ ਪਰਿਚ੍ਚਤ੍ਤ’’ਨ੍ਤਿ ਚ ਵੁਤ੍ਤੇ ‘‘ਨ ਮਯ੍ਹਂ ਏਤੇਨਤ੍ਥੋ’’ਤਿ ਵਦਤਿ, ਸਤਕ੍ਖਤ੍ਤੁਮ੍ਪਿ ਪਰਿਚ੍ਚਜਤੁ, ਯਾਵ ਅਤ੍ਤਨੋ ਹਤ੍ਥਗਤਂ, ਤਾਵ ਪਟਿਗ੍ਗਹਿਤਮੇਵ ਹੋਤਿ. ਸਚੇ ਪਨ ਆਧਾਰਕੇ ਠਿਤਂ ਨਿਰਪੇਕ੍ਖੋ ‘‘ਗਣ੍ਹਾਹੀ’’ਤਿ ਵਦਤਿ, ਪੁਨ ਪਟਿਗ੍ਗਹੇਤਬ੍ਬਂ. ਸਾਪੇਕ੍ਖੋ ਆਧਾਰਕੇ ਪਤ੍ਤਂ ਠਪੇਤ੍ਵਾ ‘‘ਏਤ੍ਤੋ ਪੂਵਂ ਵਾ ਭਤ੍ਤਂ ਵਾ ਗਣ੍ਹਾਹੀ’’ਤਿ ਸਾਮਣੇਰਂ ਵਦਤਿ, ਸਾਮਣੇਰੋ ਹਤ੍ਥਂ ਧੋਵਿਤ੍ਵਾ ਸਚੇਪਿ ਸਤਕ੍ਖਤ੍ਤੁਂ ਗਹੇਤ੍ਵਾ ਅਤ੍ਤਨੋ ਪਤ੍ਤਗਤਂ ਅਫੁਸਨ੍ਤੋਵ ਅਤ੍ਤਨੋ ਪਤ੍ਤੇ ਪਕ੍ਖਿਪਤਿ, ਪੁਨ ਪਟਿਗ੍ਗਹਣਕਿਚ੍ਚਂ ਨਤ੍ਥਿ. ਯਦਿ ਪਨ ਅਤ੍ਤਨੋ ਪਤ੍ਤਗਤਂ ਫੁਸਿਤ੍ਵਾ ਤਤੋ ਗਣ੍ਹਾਤਿ, ਸਾਮਣੇਰਸਨ੍ਤਕੇਨ ਸਂਸਟ੍ਠਂ ਹੋਤਿ, ਪੁਨ ਪਟਿਗ੍ਗਹੇਤਬ੍ਬਂ. ਕੇਚਿ ਪਨ ‘‘ਸਚੇਪਿ ਗਯ੍ਹਮਾਨਂ ਛਿਜ੍ਜਿਤ੍ਵਾ ਤਤ੍ਥ ਪਤਤਿ, ਪੁਨ ਪਟਿਗ੍ਗਹੇਤਬ੍ਬ’’ਨ੍ਤਿ ਵਦਨ੍ਤਿ. ਤਂ ‘‘ਏਕਂ ਭਤ੍ਤਪਿਣ੍ਡਂ ਗਣ੍ਹ, ਏਕਂ ਪੂਵਂ ਗਣ੍ਹ, ਇਮਸ੍ਸ ਗੁਲ਼ਪਿਣ੍ਡਸ੍ਸ ਏਤ੍ਤਕਂ ਪਦੇਸਂ ਗਣ੍ਹਾ’’ਤਿ ਏਵਂ ਪਰਿਚ੍ਛਿਨ੍ਦਿਤ੍ਵਾ ਵੁਤ੍ਤੇ ਵੇਦਿਤਬ੍ਬਂ, ਇਧ ਪਨ ਪਰਿਚ੍ਛੇਦੋ ਨਤ੍ਥਿ, ਤਸ੍ਮਾ ਯਂ ਸਾਮਣੇਰਸ੍ਸ ਪਤ੍ਤੇ ਪਤਤਿ, ਤਦੇਵ ਪਟਿਗ੍ਗਹਣਂ ਵਿਜਹਤਿ, ਹਤ੍ਥਗਤਂ ਪਨ ਯਾਵ ਸਾਮਣੇਰੋ ਵਾ ‘‘ਅਲ’’ਨ੍ਤਿ ਨ ਓਰਮਤਿ, ਭਿਕ੍ਖੁ ਵਾ ਨ ਵਾਰੇਤਿ, ਤਾਵ ਭਿਕ੍ਖੁਸ੍ਸੇਵ ਸਨ੍ਤਕਂ, ਤਸ੍ਮਾ ਪਟਿਗ੍ਗਹਣਂ ਨ ਵਿਜਹਤਿ. ਸਚੇ ਅਤ੍ਤਨੋ ਵਾ ਭਿਕ੍ਖੂਨਂ ਵਾ ਯਾਗੁਪਚਨਕਭਾਜਨੇ ਕੇਸਞ੍ਚਿ ਅਤ੍ਥਾਯ ਭਤ੍ਤਂ ਪਕ੍ਖਿਪਤਿ, ‘‘ਸਾਮਣੇਰ, ਭਾਜਨਸ੍ਸ ਉਪਰਿ ਹਤ੍ਥਂ ਕਰੋਹੀ’’ਤਿ ਵਤ੍ਵਾ ਤਸ੍ਸ ਹਤ੍ਥੇ ਪਕ੍ਖਿਪਿਤਬ੍ਬਂ. ਤਸ੍ਸ ਹਤ੍ਥਤੋ ਭਾਜਨੇ ਪਤਿਤਞ੍ਹਿ ਦੁਤਿਯਦਿਵਸੇ ਭਾਜਨਸ੍ਸ ਅਕਪ੍ਪਿਯਭਾਵਂ ਨ ਕਰੋਤਿ ਪਰਿਚ੍ਚਤ੍ਤਤ੍ਤਾ. ਸਚੇ ਏਵਂ ਅਕਤ੍ਵਾ ਪਕ੍ਖਿਪਤਿ, ਪਤ੍ਤਮਿਵ ਭਾਜਨਂ ਨਿਰਾਮਿਸਂ ਕਤ੍ਵਾ ਪਰਿਭੁਞ੍ਜਿਤਬ੍ਬਂ.

੧੧੦. ਦਾਯਕਾ ਯਾਗੁਕੁਟਂ ਠਪੇਤ੍ਵਾ ਗਤਾ, ਤਂ ਦਹਰਸਾਮਣੇਰੋ ਪਟਿਗ੍ਗਣ੍ਹਾਪੇਤੁਂ ਨ ਸਕ੍ਕੋਤਿ, ਭਿਕ੍ਖੁ ਪਤ੍ਤਂ ਉਪਨਾਮੇਤਿ, ਸਾਮਣੇਰੋ ਕੁਟਸ੍ਸ ਗੀਵਂ ਪਤ੍ਤਸ੍ਸ ਮੁਖਵਟ੍ਟਿਯਂ ਠਪੇਤ੍ਵਾ ਆਵਜ੍ਜੇਤਿ, ਪਤ੍ਤਗਤਾ ਯਾਗੁ ਪਟਿਗ੍ਗਹਿਤਾਵ ਹੋਤਿ. ਅਥ ਵਾ ਭਿਕ੍ਖੁ ਭੂਮਿਯਂ ਹਤ੍ਥਂ ਠਪੇਤਿ, ਸਾਮਣੇਰੋ ਪਵਟ੍ਟੇਤ੍ਵਾ ਹਤ੍ਥਂ ਆਰੋਪੇਤਿ, ਵਟ੍ਟਤਿ. ਪੂਵਪਚ੍ਛਿਭਤ੍ਤਪਚ੍ਛਿਉਚ੍ਛੁਭਾਰਾਦੀਸੁਪਿ ਏਸੇਵ ਨਯੋ. ਸਚੇ ਪਟਿਗ੍ਗਹਣੂਪਗਂ ਭਾਰਂ ਦ੍ਵੇ ਤਯੋ ਸਾਮਣੇਰਾ ਦੇਨ੍ਤਿ, ਏਕੇਨ ਵਾ ਬਲਵਤਾ ਉਕ੍ਖਿਤ੍ਤਂ ਦ੍ਵੇ ਤਯੋ ਭਿਕ੍ਖੂ ਗਣ੍ਹਨ੍ਤਿ, ਵਟ੍ਟਤਿ. ਮਞ੍ਚਸ੍ਸ ਵਾ ਪੀਠਸ੍ਸ ਵਾ ਪਾਦੇ ਤੇਲਘਟਂ ਵਾ ਫਾਣਿਤਘਟਂ ਵਾ ਲਗ੍ਗੇਨ੍ਤਿ, ਭਿਕ੍ਖੁਸ੍ਸ ਮਞ੍ਚੇਪਿ ਪੀਠੇਪਿ ਨਿਸੀਦਿਤੁਂ ਵਟ੍ਟਤਿ, ਉਗ੍ਗਹਿਤਕਂ ਨਾਮ ਨ ਹੋਤਿ.

ਨਾਗਦਨ੍ਤਕੇ ਵਾ ਅਙ੍ਕੁਸਕੇ ਵਾ ਦ੍ਵੇ ਤੇਲਘਟਾ ਲਗ੍ਗਿਤਾ ਹੋਨ੍ਤਿ ਉਪਰਿ ਪਟਿਗ੍ਗਹਿਤਕੋ, ਹੇਟ੍ਠਾ ਅਪ੍ਪਟਿਗ੍ਗਹਿਤਕੋ. ਉਪਰਿਮਂ ਗਹੇਤੁਂ ਵਟ੍ਟਤਿ, ਹੇਟ੍ਠਾ ਪਟਿਗ੍ਗਹਿਤਕੋ, ਉਪਰਿ ਅਪ੍ਪਟਿਗ੍ਗਹਿਤਕੋ, ਉਪਰਿਮਂ ਗਹੇਤ੍ਵਾ ਇਤਰਂ ਗਣ੍ਹਤੋ ਉਪਰਿਮੋ ਉਗ੍ਗਹਿਤਕੋ ਹੋਤਿ. ਹੇਟ੍ਠਾਮਞ੍ਚੇ ਅਪ੍ਪਟਿਗ੍ਗਹਿਤਕਂ ਤੇਲਥਾਲਕਂ ਹੋਤਿ, ਤਞ੍ਚੇ ਸਮ੍ਮਜ੍ਜਨ੍ਤੋ ਸਮ੍ਮੁਞ੍ਜਨਿਯਾ ਘਟ੍ਟੇਤਿ, ਉਗ੍ਗਹਿਤਕਂ ਨ ਹੋਤਿ, ‘‘ਪਟਿਗ੍ਗਹਿਤਕਂ ਗਣ੍ਹਿਸ੍ਸਾਮੀ’’ਤਿ ਅਪ੍ਪਟਿਗ੍ਗਹਿਤਕਂ ਗਹੇਤ੍ਵਾ ਞਤ੍ਵਾ ਪੁਨ ਠਪੇਤਿ, ਉਗ੍ਗਹਿਤਕਂ ਨ ਹੋਤਿ, ਬਹਿ ਨੀਹਰਿਤ੍ਵਾ ਸਞ੍ਜਾਨਾਤਿ, ਬਹਿ ਅਟ੍ਠਪੇਤ੍ਵਾ ਹਰਿਤ੍ਵਾ ਤਤ੍ਥੇਵ ਠਪੇਤਬ੍ਬਂ, ਨਤ੍ਥਿ ਦੋਸੋ. ਸਚੇ ਪਨ ਪੁਬ੍ਬੇ ਵਿਵਰਿਤ੍ਵਾ ਠਪਿਤਂ, ਨ ਪਿਦਹਿਤਬ੍ਬਂ. ਯਥਾ ਪੁਬ੍ਬੇ ਠਿਤਂ, ਤਥੇਵ ਠਪੇਤਬ੍ਬਂ. ਸਚੇ ਬਹਿ ਠਪੇਤਿ, ਪੁਨ ਨ ਛੁਪਿਤਬ੍ਬਂ.

੧੧੧. ਪਟਿਗ੍ਗਹਿਤਕੇ ਤੇਲਾਦਿਮ੍ਹਿ ਕਣ੍ਣਿਕਾ ਉਟ੍ਠੇਤਿ, ਸਿਙ੍ਗਿਵੇਰਾਦਿਮ੍ਹਿ ਘਨਚੁਣ੍ਣਂ, ਤਂਸਮੁਟ੍ਠਾਨਮੇਵ ਨਾਮ ਤਂ, ਪੁਨ ਪਟਿਗ੍ਗਹਣਕਿਚ੍ਚਂ ਨਤ੍ਥਿ. ਤਾਲਂ ਵਾ ਨਾਲ਼ਿਕੇਰਂ ਵਾ ਆਰੁਲ਼੍ਹੋ ਯੋਤ੍ਤੇਨ ਫਲਪਿਣ੍ਡਿਂ ਓਤਾਰੇਤ੍ਵਾ ਉਪਰਿ ਠਿਤੋਵ ‘‘ਗਣ੍ਹਥਾ’’ਤਿ ਵਦਤਿ, ਨ ਗਹੇਤਬ੍ਬਂ. ਸਚੇ ਅਞ੍ਞੋ ਭੂਮਿਯਂ ਠਿਤੋ ਯੋਤ੍ਤਪਾਸਕੇ ਗਹੇਤ੍ਵਾ ਉਕ੍ਖਿਪਿਤ੍ਵਾ ਦੇਤਿ, ਵਟ੍ਟਤਿ. ਸਫਲਂ ਮਹਾਸਾਖਂ ਕਪ੍ਪਿਯਂ ਕਾਰੇਤ੍ਵਾ ਪਟਿਗ੍ਗਣ੍ਹਾਤਿ, ਫਲਾਨਿ ਪਟਿਗ੍ਗਹਿਤਾਨੇਵ ਹੋਨ੍ਤਿ, ਯਥਾਸੁਖਂ ਪਰਿਭੁਞ੍ਜਿਤੁਂ ਵਟ੍ਟਤਿ. ਅਨ੍ਤੋਵਤਿਯਂ ਠਤ੍ਵਾ ਵਤਿਂ ਛਿਨ੍ਦਿਤ੍ਵਾ ਉਚ੍ਛੁਂ ਵਾ ਤਿਮ੍ਬਰੂਸਕਂ ਵਾ ਦੇਨ੍ਤਿ, ਹਤ੍ਥਪਾਸੇ ਸਤਿ ਵਟ੍ਟਤਿ. ਦਣ੍ਡਕੇਸੁ ਅਪਹਰਿਤ੍ਵਾ ਨਿਗ੍ਗਤਂ ਗਣ੍ਹਨ੍ਤਸ੍ਸ ਵਟ੍ਟਤਿ, ਪਹਰਿਤ੍ਵਾ ਨਿਗ੍ਗਤੇ ਅਟ੍ਠਕਥਾਸੁ ਦੋਸੋ ਨ ਦਸ੍ਸਿਤੋ. ਮਯਂ ਪਨ ‘‘ਯਂ ਠਾਨਂ ਪਹਟਂ, ਤਤੋ ਸਯਂਪਤਿਤਮਿਵ ਹੋਤੀ’’ਤਿ ਤਕ੍ਕਯਾਮ, ਤਮ੍ਪਿ ਠਤ੍ਵਾ ਗਚ੍ਛਨ੍ਤੇ ਯੁਜ੍ਜਤਿ ਸੁਙ੍ਕਘਾਤਤੋ ਪਵਟ੍ਟੇਤ੍ਵਾ ਬਹਿਪਤਿਤਭਣ੍ਡਂ ਵਿਯ. ਵਤਿਂ ਵਾ ਪਾਕਾਰਂ ਵਾ ਲਙ੍ਘਾਪੇਤ੍ਵਾ ਦੇਨ੍ਤਿ, ਸਚੇ ਪਨ ਅਪੁਥੁਲੋ ਪਾਕਾਰੋ, ਅਨ੍ਤੋਪਾਕਾਰੇ ਬਹਿਪਾਕਾਰੇ ਚ ਠਿਤਸ੍ਸ ਹਤ੍ਥਪਾਸੋ ਪਹੋਤਿ, ਹਤ੍ਥਸਤਮ੍ਪਿ ਉਦ੍ਧਂ ਗਨ੍ਤ੍ਵਾ ਸਮ੍ਪਤ੍ਤਂ ਗਹੇਤੁਂ ਵਟ੍ਟਤਿ.

ਭਿਕ੍ਖੁ ਗਿਲਾਨਂ ਸਾਮਣੇਰਂ ਖਨ੍ਧੇਨ ਵਹਤਿ, ਸੋ ਫਲਾਫਲਂ ਦਿਸ੍ਵਾ ਗਹੇਤ੍ਵਾ ਖਨ੍ਧੇ ਨਿਸਿਨ੍ਨੋਵ ਦੇਤਿ, ਵਟ੍ਟਤਿ. ਅਪਰੋ ਭਿਕ੍ਖੁਂ ਵਹਨ੍ਤੋ ਖਨ੍ਧੇ ਨਿਸਿਨ੍ਨਸ੍ਸ ਭਿਕ੍ਖੁਨੋ ਦੇਤਿ, ਵਟ੍ਟਤਿਯੇਵ. ਭਿਕ੍ਖੁ ਫਲਿਨਿਂ ਸਾਖਂ ਛਾਯਤ੍ਥਾਯ ਗਹੇਤ੍ਵਾ ਗਚ੍ਛਤਿ, ਫਲਾਨਿ ਖਾਦਿਤੁਂ ਚਿਤ੍ਤੇ ਉਪ੍ਪਨ੍ਨੇ ਪਟਿਗ੍ਗਹਾਪੇਤ੍ਵਾ ਖਾਦਿਤੁਂ ਵਟ੍ਟਤਿ. ਮਚ੍ਛਿਕਵਾਰਣਤ੍ਥਂ ਕਪ੍ਪਿਯਂ ਕਾਰੇਤ੍ਵਾ ਪਟਿਗ੍ਗਣ੍ਹਾਤਿ, ਖਾਦਿਤੁਕਾਮੋ ਚੇ ਹੋਤਿ, ਮੂਲਪਟਿਗ੍ਗਹਣਮੇਵ ਵਟ੍ਟਤਿ, ਖਾਦਨ੍ਤਸ੍ਸ ਨਤ੍ਥਿ ਦੋਸੋ. ਭਿਕ੍ਖੁ ਪਟਿਗ੍ਗਹਣਾਰਹਂ ਭਣ੍ਡਂ ਮਨੁਸ੍ਸਾਨਂ ਯਾਨੇ ਠਪੇਤ੍ਵਾ ਮਗ੍ਗਂ ਗਚ੍ਛਤਿ, ਯਾਨਂ ਕਦ੍ਦਮੇ ਲਗ੍ਗਤਿ, ਦਹਰੋ ਚਕ੍ਕਂ ਗਹੇਤ੍ਵਾ ਉਕ੍ਖਿਪਤਿ, ਵਟ੍ਟਤਿ, ਉਗ੍ਗਹਿਤਕਂ ਨਾਮ ਨ ਹੋਤਿ. ਨਾਵਾਯ ਠਪੇਤ੍ਵਾ ਨਾਵਂ ਅਰਿਤ੍ਤੇਨ ਵਾ ਪਾਜੇਤਿ, ਹਤ੍ਥੇਨ ਵਾ ਕਡ੍ਢਤਿ, ਵਟ੍ਟਤਿ. ਉਲ਼ੁਮ੍ਪੇਪਿ ਏਸੇਵ ਨਯੋ. ਚਾਟਿਯਂ ਵਾ ਕੁਣ੍ਡਕੇ ਵਾ ਠਪੇਤ੍ਵਾਪਿ ਤਂ ਅਨੁਪਸਮ੍ਪਨ੍ਨੇਨ ਗਾਹਾਪੇਤ੍ਵਾ ਅਨੁਪਸਮ੍ਪਨ੍ਨਂ ਬਾਹਾਯਂ ਗਹੇਤ੍ਵਾ ਤਰਿਤੁਂ ਵਟ੍ਟਤਿ. ਤਸ੍ਮਿਮ੍ਪਿ ਅਸਤਿ ਅਨੁਪਸਮ੍ਪਨ੍ਨਂ ਗਾਹਾਪੇਤ੍ਵਾ ਤਂ ਬਾਹਾਯਂ ਗਹੇਤ੍ਵਾ ਤਰਿਤੁਂ ਵਟ੍ਟਤਿ.

ਉਪਾਸਕਾ ਗਮਿਕਭਿਕ੍ਖੂਨਂ ਪਾਥੇਯ੍ਯਤਣ੍ਡੁਲੇ ਦੇਨ੍ਤਿ, ਸਾਮਣੇਰਾ ਭਿਕ੍ਖੂਨਂ ਤਣ੍ਡੁਲੇ ਗਹੇਤ੍ਵਾ ਅਤ੍ਤਨੋ ਤਣ੍ਡੁਲੇ ਗਹੇਤੁਂ ਨ ਸਕ੍ਕੋਨ੍ਤਿ, ਭਿਕ੍ਖੂ ਤੇਸਂ ਤਣ੍ਡੁਲੇ ਗਣ੍ਹਨ੍ਤਿ, ਸਾਮਣੇਰਾ ਅਤ੍ਤਨਾ ਗਹਿਤਤਣ੍ਡੁਲੇਸੁ ਖੀਣੇਸੁ ਇਤਰੇਹਿ ਤਣ੍ਡੁਲੇਹਿ ਯਾਗੁਂ ਪਚਿਤ੍ਵਾ ਸਬ੍ਬੇਸਂ ਪਤ੍ਤਾਨਿ ਪਟਿਪਾਟਿਯਾ ਠਪੇਤ੍ਵਾ ਯਾਗੁਂ ਆਕਿਰਨ੍ਤਿ, ਪਣ੍ਡਿਤੋ ਸਾਮਣੇਰੋ ਅਤ੍ਤਨੋ ਪਤ੍ਤਂ ਗਹੇਤ੍ਵਾ ਥੇਰਸ੍ਸ ਦੇਤਿ, ਥੇਰਸ੍ਸ ਪਤ੍ਤਂ ਦੁਤਿਯਤ੍ਥੇਰਸ੍ਸਾਤਿ ਏਵਂ ਸਬ੍ਬਾਨਿਪਿ ਪਰਿਵਤ੍ਤੇਤਿ, ਸਬ੍ਬੇਹਿ ਸਾਮਣੇਰਸ੍ਸ ਸਨ੍ਤਕਂ ਭੁਤ੍ਤਂ ਹੋਤਿ, ਵਟ੍ਟਤਿ. ਸਚੇਪਿ ਸਾਮਣੇਰੋ ਅਪਣ੍ਡਿਤੋ ਹੋਤਿ, ਅਤ੍ਤਨੋ ਪਤ੍ਤੇ ਯਾਗੁਂ ਸਯਮੇਵ ਪਾਤੁਂ ਆਰਭਤਿ, ‘‘ਆਵੁਸੋ, ਤੁਯ੍ਹਂ ਯਾਗੁਂ ਮਯ੍ਹਂ ਦੇਹੀ’’ਤਿ ਥੇਰੇਹਿ ਪਟਿਪਾਟਿਯਾ ਯਾਚਿਤ੍ਵਾਪਿ ਪਿਵਿਤੁਂ ਵਟ੍ਟਤਿ, ਸਬ੍ਬੇਹਿ ਸਾਮਣੇਰਸ੍ਸ ਸਨ੍ਤਕਮੇਵ ਭੁਤ੍ਤਂ ਹੋਤਿ, ਨੇਵ ਉਗ੍ਗਹਿਤਪਚ੍ਚਯਾ, ਨ ਸਨ੍ਨਿਧਿਪਚ੍ਚਯਾ ਵਜ੍ਜਂ ਫੁਸਨ੍ਤਿ. ਏਤ੍ਥ ਪਨ ਮਾਤਾਪਿਤੂਨਂ ਤੇਲਾਦੀਨਿ, ਛਾਯਾਦੀਨਂ ਅਤ੍ਥਾਯ ਸਾਖਾਦੀਨਿ ਚ ਹਰਨ੍ਤਾਨਂ ਇਮੇਸਞ੍ਚ ਵਿਸੇਸੋ ਨ ਦਿਸ੍ਸਤਿ, ਤਸ੍ਮਾ ਕਾਰਣਂ ਉਪਪਰਿਕ੍ਖਿਤਬ੍ਬਂ.

੧੧੨. ਸਾਮਣੇਰੋ ਭਤ੍ਤਂ ਪਚਿਤੁਕਾਮੋ ਤਣ੍ਡੁਲੇ ਧੋਵਿਤ੍ਵਾ ਨਿਚ੍ਚਾਲੇਤੁਂ ਨ ਸਕ੍ਕੋਤਿ, ਭਿਕ੍ਖੁਨਾ ਤਣ੍ਡੁਲੇ ਚ ਭਾਜਨਞ੍ਚ ਪਟਿਗ੍ਗਹੇਤ੍ਵਾ ਤਣ੍ਡੁਲੇ ਧੋਵਿਤ੍ਵਾ ਨਿਚ੍ਚਾਲੇਤ੍ਵਾ ਭਾਜਨਂ ਉਦ੍ਧਨਂ ਆਰੋਪੇਤਬ੍ਬਂ, ਅਗ੍ਗਿ ਨ ਕਾਤਬ੍ਬੋ, ਪਕ੍ਕਕਾਲੇ ਵਿਵਰਿਤ੍ਵਾ ਪਕ੍ਕਭਾਵੋ ਜਾਨਿਤਬ੍ਬੋ. ਸਚੇ ਦੁਪ੍ਪਕ੍ਕਂ ਹੋਤਿ, ਪਾਕਤ੍ਥਾਯ ਪਿਦਹਿਤੁਂ ਨ ਵਟ੍ਟਤਿ, ਰਜਸ੍ਸ ਵਾ ਛਾਰਿਕਾਯ ਵਾ ਅਪਤਨਤ੍ਥਾਯ ਵਟ੍ਟਤਿ, ਪਕ੍ਕਕਾਲੇ ਓਰੋਪਿਤੁਂ ਭੁਞ੍ਜਿਤੁਮ੍ਪਿ ਵਟ੍ਟਤਿ, ਪੁਨ ਪਟਿਗ੍ਗਹਣਕਿਚ੍ਚਂ ਨਤ੍ਥਿ. ਸਾਮਣੇਰੋ ਪਟਿਬਲੋ ਪਚਿਤੁਂ, ਖਣੋ ਪਨਸ੍ਸ ਨਤ੍ਥਿ ਕਤ੍ਥਚਿ ਗਨ੍ਤੁਕਾਮੋ, ਭਿਕ੍ਖੁਨਾ ਸਤਣ੍ਡੁਲੋਦਕਂ ਭਾਜਨਂ ਪਟਿਗ੍ਗਹੇਤ੍ਵਾ ਉਦ੍ਧਨਂ ਆਰੋਪੇਤ੍ਵਾ ‘‘ਅਗ੍ਗਿਂ ਜਾਲੇਤ੍ਵਾ ਗਚ੍ਛਾ’’ਤਿ ਵਤ੍ਤਬ੍ਬੋ. ਤਤੋ ਪਰਂ ਪੁਰਿਮਨਯੇਨੇਵ ਸਬ੍ਬਂ ਕਾਤੁਂ ਵਟ੍ਟਤਿ. ਭਿਕ੍ਖੁ ਯਾਗੁਅਤ੍ਥਾਯ ਸੁਦ੍ਧਭਾਜਨਂ ਆਰੋਪੇਤ੍ਵਾ ਉਦਕਂ ਤਾਪੇਤਿ, ਵਟ੍ਟਤਿ. ਤਤ੍ਤੇ ਉਦਕੇ ਸਾਮਣੇਰੋ ਤਣ੍ਡੁਲੇ ਪਕ੍ਖਿਪਤਿ, ਤਤੋ ਪਟ੍ਠਾਯ ਭਿਕ੍ਖੁਨਾ ਅਗ੍ਗਿ ਨ ਕਾਤਬ੍ਬੋ, ਪਕ੍ਕਯਾਗੁਂ ਪਟਿਗ੍ਗਹੇਤ੍ਵਾ ਪਾਤੁਂ ਵਟ੍ਟਤਿ. ਸਾਮਣੇਰੋ ਯਾਗੁਂ ਪਚਤਿ, ਹਤ੍ਥਕੁਕ੍ਕੁਚ੍ਚਕੋ ਭਿਕ੍ਖੁ ਕੀਲ਼ਨ੍ਤੋ ਭਾਜਨਂ ਆਮਸਤਿ, ਪਿਧਾਨਂ ਆਮਸਤਿ, ਉਗ੍ਗਤਂ ਫੇਣਂ ਛਿਨ੍ਦਿਤ੍ਵਾ ਪਹਰਤਿ, ਤਸ੍ਸੇਵ ਪਾਤੁਂ ਨ ਵਟ੍ਟਤਿ, ਦੁਰੁਪਚਿਣ੍ਣਂ ਨਾਮ ਹੋਤਿ. ਸਚੇ ਪਨ ਦਬ੍ਬਿਂ ਵਾ ਉਲ਼ੁਙ੍ਕਂ ਵਾ ਗਹੇਤ੍ਵਾ ਅਨੁਕ੍ਖਿਪਨ੍ਤੋ ਆਲੋਲ਼ੇਤਿ, ਸਬ੍ਬੇਸਂ ਨ ਵਟ੍ਟਤਿ, ਸਾਮਂਪਾਕਞ੍ਚੇਵ ਹੋਤਿ ਦੁਰੁਪਚਿਣ੍ਣਞ੍ਚ. ਸਚੇ ਉਕ੍ਖਿਪਤਿ, ਉਗ੍ਗਹਿਤਕਮ੍ਪਿ ਹੋਤਿ.

੧੧੩. ਭਿਕ੍ਖੁਨਾ ਪਿਣ੍ਡਾਯ ਚਰਿਤ੍ਵਾ ਆਧਾਰਕੇ ਪਤ੍ਤੋ ਠਪਿਤੋ ਹੋਤਿ. ਤਤ੍ਰ ਚੇ ਅਞ੍ਞੋ ਲੋਲਭਿਕ੍ਖੁ ਕੀਲ਼ਨ੍ਤੋ ਪਤ੍ਤਂ ਆਮਸਤਿ, ਪਤ੍ਤਪਿਧਾਨਂ ਆਮਸਤਿ, ਤਸ੍ਸੇਵ ਤਤੋ ਲਦ੍ਧਭਤ੍ਤਂ ਨ ਵਟ੍ਟਤਿ. ਸਚੇ ਨ ਪਤ੍ਤਂ ਉਕ੍ਖਿਪਿਤ੍ਵਾ ਠਪੇਤਿ, ਸਬ੍ਬੇਸਂ ਨ ਵਟ੍ਟਤਿ. ਤਤ੍ਥਜਾਤਕਫਲਿਨਿਸਾਖਾਯ ਵਾ ਵਲ੍ਲਿਯਾ ਵਾ ਗਹੇਤ੍ਵਾ ਚਾਲੇਤਿ, ਤਸ੍ਸੇਵ ਤਤੋ ਲਦ੍ਧਫਲਂ ਨ ਵਟ੍ਟਤਿ, ਦੁਰੁਪਚਿਣ੍ਣਦੁਕ੍ਕਟਞ੍ਚ ਆਪਜ੍ਜਤਿ. ‘‘ਫਲਰੁਕ੍ਖਂ ਪਨ ਅਪਸ੍ਸਯਿਤੁਂ ਵਾ ਤਤ੍ਥ ਕਣ੍ਟਕਂ ਵਾ ਬਨ੍ਧਿਤੁਂ ਵਟ੍ਟਤਿ, ਦੁਰੁਪਚਿਣ੍ਣਂ ਨ ਹੋਤੀ’’ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਅਰਞ੍ਞੇ ਪਤਿਤਂ ਪਨ ਅਮ੍ਬਫਲਾਦਿਂ ਦਿਸ੍ਵਾ ‘‘ਸਾਮਣੇਰਸ੍ਸ ਦਸ੍ਸਾਮੀ’’ਤਿ ਆਹਰਿਤ੍ਵਾ ਦਾਤੁਂ ਵਟ੍ਟਤਿ. ਸੀਹਵਿਘਾਸਾਦਿਂ ਦਿਸ੍ਵਾਪਿ ‘‘ਸਾਮਣੇਰਸ੍ਸ ਦਸ੍ਸਾਮੀ’’ਤਿ ਪਟਿਗ੍ਗਹੇਤ੍ਵਾ ਵਾ ਅਪ੍ਪਟਿਗ੍ਗਹੇਤ੍ਵਾ ਵਾ ਆਹਰਿਤ੍ਵਾ ਦਾਤੁਂ ਵਟ੍ਟਤਿ. ਸਚੇ ਪਨ ਸਕ੍ਕੋਤਿ ਵਿਤਕ੍ਕਂ ਸੋਧੇਤੁਂ, ਤਤੋ ਲਦ੍ਧਂ ਖਾਦਿਤੁਮ੍ਪਿ ਵਟ੍ਟਤਿ, ਨੇਵ ਆਮਕਮਂਸਪਟਿਗ੍ਗਹਣਪਚ੍ਚਯਾ, ਨ ਉਗ੍ਗਹਿਤਕਪਚ੍ਚਯਾ ਵਜ੍ਜਂ ਫੁਸਤਿ. ਮਾਤਾਪਿਤੂਨਂ ਅਤ੍ਥਾਯ ਤੇਲਾਦੀਨਿ ਗਹੇਤ੍ਵਾ ਗਚ੍ਛਤੋ ਅਨ੍ਤਰਾਮਗ੍ਗੇ ਬ੍ਯਾਧਿ ਉਪ੍ਪਜ੍ਜਤਿ, ਤਤੋ ਯਂ ਇਚ੍ਛਤਿ, ਤਂ ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤਿ. ਸਚੇ ਪਨ ਮੂਲੇਪਿ ਪਟਿਗ੍ਗਹਿਤਂ ਹੋਤਿ, ਪੁਨ ਪਟਿਗ੍ਗਹਣਕਿਚ੍ਚਂ ਨਤ੍ਥਿ. ਮਾਤਾਪਿਤੂਨਂ ਤਣ੍ਡੁਲੇ ਆਹਰਿਤ੍ਵਾ ਦੇਤਿ, ਤੇ ਤਤੋਯੇਵ ਯਾਗੁਆਦੀਨਿ ਸਮ੍ਪਾਦੇਤ੍ਵਾ ਤਸ੍ਸ ਦੇਨ੍ਤਿ, ਵਟ੍ਟਤਿ, ਸਨ੍ਨਿਧਿਪਚ੍ਚਯਾ ਉਗ੍ਗਹਿਤਪਚ੍ਚਯਾ ਵਾ ਦੋਸੋ ਨਤ੍ਥਿ.

੧੧੪. ਭਿਕ੍ਖੁ ਪਿਦਹਿਤ੍ਵਾ ਉਦਕਂ ਤਾਪੇਤਿ, ਯਾਵ ਪਰਿਕ੍ਖਯਾ ਪਰਿਭੁਞ੍ਜਿਤੁਂ ਵਟ੍ਟਤਿ. ਸਚੇ ਪਨੇਤ੍ਥ ਛਾਰਿਕਾ ਪਤਤਿ, ਪਟਿਗ੍ਗਹੇਤਬ੍ਬਂ. ਦੀਘਸਣ੍ਡਾਸੇਨ ਥਾਲਕਂ ਗਹੇਤ੍ਵਾ ਤੇਲਂ ਪਚਨ੍ਤਸ੍ਸ ਛਾਰਿਕਾ ਪਤਤਿ, ਹਤ੍ਥੇਨ ਅਮੁਞ੍ਚਨ੍ਤੇਨੇਵ ਪਚਿਤ੍ਵਾ ਓਤਾਰੇਤ੍ਵਾ ਪਟਿਗ੍ਗਹੇਤਬ੍ਬਂ. ਸਚੇ ਅਙ੍ਗਾਰਾਪਿ ਦਾਰੂਨਿਪਿ ਪਟਿਗ੍ਗਹੇਤ੍ਵਾ ਠਪਿਤਾਨਿ, ਮੂਲਪਟਿਗ੍ਗਹਣਮੇਵ ਵਟ੍ਟਤਿ. ਭਿਕ੍ਖੁ ਉਚ੍ਛੁਂ ਖਾਦਤਿ, ਸਾਮਣੇਰੋ ‘‘ਮਯ੍ਹਮ੍ਪਿ ਦੇਥਾ’’ਤਿ ਵਦਤਿ, ‘‘ਇਤੋ ਛਿਨ੍ਦਿਤ੍ਵਾ ਗਣ੍ਹਾ’’ਤਿ ਵੁਤ੍ਤੋ ਗਣ੍ਹਾਤਿ, ਅਵਸੇਸੇ ਪੁਨ ਪਟਿਗ੍ਗਹਣਕਿਚ੍ਚਂ ਨਤ੍ਥਿ. ਗੁਲ਼ਪਿਣ੍ਡਂ ਖਾਦਨ੍ਤਸ੍ਸਪਿ ਏਸੇਵ ਨਯੋ. ਵੁਤ੍ਤੋਕਾਸਤੋ ਛਿਨ੍ਦਿਤ੍ਵਾ ਗਹਿਤਾਵਸੇਸਞ੍ਹਿ ਅਜਹਿਤਪਟਿਗ੍ਗਹਣਮੇਵ ਹੋਤਿ. ਭਿਕ੍ਖੁ ਗੁਲ਼ਂ ਭਾਜੇਨ੍ਤੋ ਪਟਿਗ੍ਗਹੇਤ੍ਵਾ ਕੋਟ੍ਠਾਸੇ ਕਰੋਤਿ, ਭਿਕ੍ਖੂਪਿ ਸਾਮਣੇਰਾਪਿ ਆਗਨ੍ਤ੍ਵਾ ਏਕਗ੍ਗਹਣੇਨੇਵ ਏਕਮੇਕਂ ਕੋਟ੍ਠਾਸਂ ਗਣ੍ਹਨ੍ਤਿ, ਗਹਿਤਾਵਸੇਸਂ ਪਟਿਗ੍ਗਹਿਤਮੇਵ ਹੋਤਿ. ਸਚੇ ਲੋਲਸਾਮਣੇਰੋ ਗਣ੍ਹਿਤ੍ਵਾ ਗਣ੍ਹਿਤ੍ਵਾ ਪੁਨ ਠਪੇਤਿ, ਤਸ੍ਸ ਗਹਿਤਾਵਸੇਸਂ ਅਪ੍ਪਟਿਗ੍ਗਹਿਤਕਮੇਵ ਹੋਤਿ.

ਭਿਕ੍ਖੁ ਧੂਮਵਟ੍ਟਿਂ ਪਟਿਗ੍ਗਹੇਤ੍ਵਾ ਧੂਮਂ ਪਿਵਤਿ, ਮੁਖਞ੍ਚ ਕਣ੍ਠੋ ਚ ਮਨੋਸਿਲਾਯ ਲਿਤ੍ਤੋ ਵਿਯ ਹੋਤਿ, ਯਾਵਕਾਲਿਕਂ ਭੁਞ੍ਜਿਤੁਂ ਵਟ੍ਟਤਿ, ਯਾਵਕਾਲਿਕੇਨ ਯਾਵਜੀਵਿਕਸਂਸਗ੍ਗੇ ਦੋਸੋ ਨਤ੍ਥਿ. ਪਤ੍ਤਂ ਵਾ ਰਜਨਂ ਵਾ ਪਚਨ੍ਤਸ੍ਸ ਕਣ੍ਣਨਾਸਚ੍ਛਿਦ੍ਦੇਹਿ ਧੂਮੋ ਪਵਿਸਤਿ, ਬ੍ਯਾਧਿਪਚ੍ਚਯਾ ਪੁਪ੍ਫਂ ਵਾ ਫਲਂ ਵਾ ਉਪਸਿਙ੍ਘਤਿ, ਅਬ੍ਬੋਹਾਰਿਕਤ੍ਤਾ ਵਟ੍ਟਤਿ. ਭਤ੍ਤੁਗ੍ਗਾਰੋ ਤਾਲੁਂ ਆਹਚ੍ਚ ਅਨ੍ਤੋਯੇਵ ਪਵਿਸਤਿ, ਅਵਿਸਯਤ੍ਤਾ ਵਟ੍ਟਤਿ, ਮੁਖਂ ਪਵਿਟ੍ਠਂ ਪਨ ਅਜ੍ਝੋਹਰਤੋ ਵਿਕਾਲੇ ਆਪਤ੍ਤਿ. ਦਨ੍ਤਨ੍ਤਰੇ ਲਗ੍ਗਸ੍ਸ ਆਮਿਸਸ੍ਸ ਰਸੋ ਪਵਿਸਤਿ, ਆਪਤ੍ਤਿਯੇਵ. ਸਚੇ ਸੁਖੁਮਂ ਆਮਿਸਂ ਹੋਤਿ, ਰਸੋ ਨ ਪਞ੍ਞਾਯਤਿ, ਅਬ੍ਬੋਹਾਰਿਕਪਕ੍ਖਂ ਭਜਤਿ. ਉਪਕਟ੍ਠੇ ਕਾਲੇ ਨਿਰੁਦਕਟ੍ਠਾਨੇ ਭਤ੍ਤਂ ਭੁਞ੍ਜਿਤ੍ਵਾ ਕਕ੍ਖਾਰੇਤ੍ਵਾ ਦ੍ਵੇ ਤਯੋ ਖੇਲ਼ਪਿਣ੍ਡੇ ਪਾਤੇਤ੍ਵਾ ਉਦਕਟ੍ਠਾਨਂ ਗਨ੍ਤ੍ਵਾ ਮੁਖਂ ਵਿਕ੍ਖਾਲੇਤਬ੍ਬਂ. ਪਟਿਗ੍ਗਹੇਤ੍ਵਾ ਠਪਿਤਸਿਙ੍ਗਿਵੇਰਾਦੀਨਂ ਅਙ੍ਕੁਰਾ ਨਿਕ੍ਖਮਨ੍ਤਿ, ਪੁਨ ਪਟਿਗ੍ਗਹਣਕਿਚ੍ਚਂ ਨਤ੍ਥਿ. ਲੋਣੇ ਅਸਤਿ ਸਮੁਦ੍ਦੋਦਕੇਨ ਲੋਣਕਿਚ੍ਚਂ ਕਾਤੁਂ ਵਟ੍ਟਤਿ, ਪਟਿਗ੍ਗਹੇਤ੍ਵਾ ਠਪਿਤਲੋਣੋਦਕਂ ਲੋਣਂ ਹੋਤਿ, ਲੋਣਂ ਵਾ ਉਦਕਂ ਹੋਤਿ, ਰਸੋ ਵਾ ਫਾਣਿਤਂ ਹੋਤਿ, ਫਾਣਿਤਂ ਵਾ ਰਸੋ ਹੋਤਿ, ਮੂਲਪਟਿਗ੍ਗਹਣਮੇਵ ਵਟ੍ਟਤਿ.

ਹਿਮਕਰਕਾ ਉਦਕਗਤਿਕਾ ਏਵ. ਪਾਰਿਹਾਰਿਕੇਨ ਕਤਕਟ੍ਠਿਨਾ ਉਦਕਂ ਪਸਾਦੇਨ੍ਤਿ, ਤਂ ਅਬ੍ਬੋਹਾਰਿਕਂ, ਆਮਿਸੇਨ ਸਦ੍ਧਿਂ ਵਟ੍ਟਤਿ. ਆਮਿਸਗਤਿਕੇਹਿ ਕਪਿਤ੍ਥਫਲਾਦੀਹਿ ਪਸਾਦਿਤਂ ਪੁਰੇਭਤ੍ਤਮੇਵ ਵਟ੍ਟਤਿ. ਪੋਕ੍ਖਰਣੀਆਦੀਸੁ ਉਦਕਂ ਬਹਲਂ ਹੋਤਿ, ਵਟ੍ਟਤਿ. ਸਚੇ ਪਨ ਮੁਖੇ ਹਤ੍ਥੇ ਚ ਲਗ੍ਗਤਿ, ਨ ਵਟ੍ਟਤਿ, ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿਤਬ੍ਬਂ. ਖੇਤ੍ਤੇਸੁ ਕਸਿਤਟ੍ਠਾਨੇ ਬਹਲਂ ਉਦਕਂ ਹੋਤਿ, ਪਟਿਗ੍ਗਹੇਤਬ੍ਬਂ. ਸਚੇ ਸਨ੍ਦਿਤ੍ਵਾ ਕਨ੍ਦਰਾਦੀਨਿ ਪਵਿਸਿਤ੍ਵਾ ਨਦਿਂ ਪੂਰੇਤਿ, ਵਟ੍ਟਤਿ. ਕਕੁਧਸੋਬ੍ਭਾਦਯੋ ਹੋਨ੍ਤਿ ਰੁਕ੍ਖਤੋ ਪਤਿਤੇਹਿ ਪੁਪ੍ਫੇਹਿ ਸਞ੍ਛਨ੍ਨੋਦਕਾ. ਸਚੇ ਪੁਪ੍ਫਰਸੋ ਨ ਪਞ੍ਞਾਯਤਿ, ਪਟਿਗ੍ਗਹਣਕਿਚ੍ਚਂ ਨਤ੍ਥਿ. ਪਰਿਤ੍ਤਂ ਉਦਕਂ ਹੋਤਿ, ਰਸੋ ਪਞ੍ਞਾਯਤਿ, ਪਟਿਗ੍ਗਹੇਤਬ੍ਬਂ. ਪਬ੍ਬਤਕਨ੍ਦਰਾਦੀਸੁ ਕਾਲ਼ਵਣ੍ਣਪਣ੍ਣਚ੍ਛਨ੍ਨਉਦਕੇਪਿ ਏਸੇਵ ਨਯੋ.

ਪਾਨੀਯਘਟੇ ਸਰੇਣੁਕਾਨਿ ਵਾ ਸਵਣ੍ਟਖੀਰਾਨਿ ਵਾ ਪੁਪ੍ਫਾਨਿ ਪਕ੍ਖਿਤ੍ਤਾਨਿ ਹੋਨ੍ਤਿ, ਪਟਿਗ੍ਗਹੇਤਬ੍ਬਂ, ਪੁਪ੍ਫਾਨਿ ਵਾ ਪਟਿਗ੍ਗਹੇਤ੍ਵਾ ਪਕ੍ਖਿਪਿਤਬ੍ਬਾਨਿ. ਪਾਟਲਿਮਲ੍ਲਿਕਾ ਪਕ੍ਖਿਤ੍ਤਾ ਹੋਨ੍ਤਿ, ਵਾਸਮਤ੍ਤਂ ਤਿਟ੍ਠਤਿ, ਤਂ ਅਬ੍ਬੋਹਾਰਿਕਂ. ਦੁਭਿਯਦਿਵਸੇਪਿ ਆਮਿਸੇਨ ਸਦ੍ਧਿਂ ਵਟ੍ਟਤਿ. ਭਿਕ੍ਖੁਨਾ ਠਪਿਤਪੁਪ੍ਫਵਾਸਿਤਕਪਾਨੀਯਤੋ ਸਾਮਣੇਰੋ ਪਾਨੀਯਂ ਗਹੇਤ੍ਵਾ ਪੀਤਾਵਸੇਸਕਂ ਤਤ੍ਥੇਵ ਆਕਿਰਤਿ, ਪਟਿਗ੍ਗਹੇਤਬ੍ਬਂ. ਪਦੁਮਸਰਾਦੀਸੁ ਉਦਕਂ ਸਨ੍ਥਰਿਤ੍ਵਾ ਠਿਤਂ ਪੁਪ੍ਫਰੇਣੁਂ ਘਟੇਨ ਵਿਕ੍ਖਮ੍ਭੇਤ੍ਵਾ ਉਦਕਂ ਗਹੇਤੁਂ ਵਟ੍ਟਤਿ. ਕਪ੍ਪਿਯਂ ਕਾਰਾਪੇਤ੍ਵਾ ਪਟਿਗ੍ਗਹੇਤ੍ਵਾ ਠਪਿਤਂ ਦਨ੍ਤਕਟ੍ਠਂ ਹੋਤਿ, ਸਚੇ ਤਸ੍ਸ ਰਸਂ ਪਿਵਿਤੁਕਾਮੋ, ਮੂਲਪਟਿਗ੍ਗਹਣਮੇਵ ਵਟ੍ਟਤਿ, ਅਪ੍ਪਟਿਗ੍ਗਹੇਤ੍ਵਾ ਠਪਿਤਂ ਪਟਿਗ੍ਗਹੇਤਬ੍ਬਂ. ਅਜਾਨਨ੍ਤਸ੍ਸ ਰਸੇ ਪਵਿਟ੍ਠੇਪਿ ਆਪਤ੍ਤਿਯੇਵ. ਅਚਿਤ੍ਤਕਞ੍ਹਿ ਇਦਂ ਸਿਕ੍ਖਾਪਦਂ.

੧੧੫. ਮਹਾਭੂਤੇਸੁ ਕਿਂ ਵਟ੍ਟਤਿ, ਕਿਂ ਨ ਵਟ੍ਟਤੀਤਿ? ਖੀਰਂ ਤਾਵ ਵਟ੍ਟਤਿ, ਕਪ੍ਪਿਯਮਂਸਖੀਰਂ ਵਾ ਹੋਤੁ ਅਕਪ੍ਪਿਯਮਂਸਖੀਰਂ ਵਾ, ਪਿਵਨ੍ਤਸ੍ਸ ਅਨਾਪਤ੍ਤਿ. ਅਸ੍ਸੁ ਖੇਲ਼ੋ ਸਿਙ੍ਘਾਣਿਕਾ ਮੁਤ੍ਤਂ ਕਰੀਸਂ ਸੇਮ੍ਹਂ ਦਨ੍ਤਮਲਂ ਅਕ੍ਖਿਗੂਥਕੋ ਕਣ੍ਣਗੂਥਕੋ ਸਰੀਰੇ ਉਟ੍ਠਿਤਲੋਣਨ੍ਤਿ ਇਦਂ ਸਬ੍ਬਂ ਵਟ੍ਟਤਿ. ਯਂ ਪਨੇਤ੍ਥ ਠਾਨਤੋ ਚਵਿਤ੍ਵਾ ਪਤ੍ਤੇ ਵਾ ਹਤ੍ਥੇ ਵਾ ਪਤਤਿ, ਤਂ ਪਟਿਗ੍ਗਹੇਤਬ੍ਬਂ, ਅਙ੍ਗਲਗ੍ਗਂ ਪਟਿਗ੍ਗਹਿਤਕਮੇਵ. ਉਣ੍ਹਪਾਯਾਸਂ ਭੁਞ੍ਜਨ੍ਤਸ੍ਸ ਸੇਦੋ ਅਙ੍ਗੁਲਿਅਨੁਸਾਰੇਨ ਏਕਾਬਦ੍ਧੋਵ ਹੁਤ੍ਵਾ ਪਾਯਾਸੇ ਸਨ੍ਤਿਟ੍ਠਤਿ, ਪਿਣ੍ਡਾਯ ਵਾ ਚਰਨ੍ਤਸ੍ਸ ਹਤ੍ਥਤੋ ਪਤ੍ਤਸ੍ਸ ਮੁਖਵਟ੍ਟਿਤੋ ਵਾ ਪਤ੍ਤਤਲਂ ਓਰੋਹਤਿ, ਏਤ੍ਥ ਪਟਿਗ੍ਗਹਣਕਿਚ੍ਚਂ ਨਤ੍ਥਿ, ਝਾਮਮਹਾਭੂਤੇ ਇਦਂ ਨਾਮ ਨ ਵਟ੍ਟਤੀਤਿ ਨਤ੍ਥਿ, ਦੁਜ੍ਝਾਪਿਤਂ ਪਨ ਨ ਵਟ੍ਟਤਿ. ਸੁਜ੍ਝਾਪਿਤਂ ਪਨ ਮਨੁਸ੍ਸਟ੍ਠਿਮ੍ਪਿ ਚੁਣ੍ਣਂ ਕਤ੍ਵਾ ਲੇਹੇ ਉਪਨੇਤੁਂ ਵਟ੍ਟਤਿ. ਚਤ੍ਤਾਰਿ ਮਹਾਵਿਕਟਾਨਿ ਅਸਤਿ ਕਪ੍ਪਿਯਕਾਰਕੇ ਸਾਮਂ ਗਹੇਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਨ੍ਤਿ. ਏਤ੍ਥ ਚ ਦੁਬ੍ਬਚੋਪਿ ਅਸਮਤ੍ਥੋਪਿ ਕਪ੍ਪਿਯਕਾਰਕੋ ਅਸਨ੍ਤਪਕ੍ਖੇਯੇਵ ਤਿਟ੍ਠਤਿ. ਛਾਰਿਕਾਯ ਅਸਤਿ ਸੁਕ੍ਖਦਾਰੁਂ ਝਾਪੇਤ੍ਵਾ ਛਾਰਿਕਾ ਗਹੇਤਬ੍ਬਾ. ਸੁਕ੍ਖਦਾਰੁਮ੍ਹਿ ਅਸਤਿ ਅਲ੍ਲਦਾਰੁਂ ਰੁਕ੍ਖਤੋ ਛਿਨ੍ਦਿਤ੍ਵਾਪਿ ਕਾਤੁਂ ਵਟ੍ਟਤਿ. ਇਦਂ ਪਨ ਚਤੁਬ੍ਬਿਧਮ੍ਪਿ ਮਹਾਵਿਕਟਂ ਕਾਲੋਦਿਸ੍ਸਂ ਨਾਮ, ਸਪ੍ਪਦਟ੍ਠਕ੍ਖਣੇਯੇਵ ਵਟ੍ਟਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਪਟਿਗ੍ਗਹਣਵਿਨਿਚ੍ਛਯਕਥਾ ਸਮਤ੍ਤਾ.