੨. ਪਰਿਕ੍ਖਾਰਵਿਨਿਚ੍ਛਯਕਥਾ

੬. ਪਰਿਕ੍ਖਾਰੋਤਿ ਸਮਣਪਰਿਕ੍ਖਾਰੋ. ਤਤ੍ਰਾਯਂ ਕਪ੍ਪਿਯਾਕਪ੍ਪਿਯਪਰਿਕ੍ਖਾਰਵਿਨਿਚ੍ਛਯੋ (ਪਾਰਾ. ਅਟ੍ਠ. ੧.੮੫) – ਕੇਚਿ ਤਾਲਪਣ੍ਣਚ੍ਛਤ੍ਤਂ ਅਨ੍ਤੋ ਵਾ ਬਹਿ ਵਾ ਪਞ੍ਚਵਣ੍ਣੇਨ ਸੁਤ੍ਤੇਨ ਸਿਬ੍ਬਿਤ੍ਵਾ ਵਣ੍ਣਮਟ੍ਠਂ ਕਰੋਨ੍ਤਿ, ਤਂ ਨ ਵਟ੍ਟਤਿ. ਏਕਵਣ੍ਣੇਨ ਪਨ ਨੀਲੇਨ ਵਾ ਪੀਤਕੇਨ ਵਾ ਯੇਨ ਕੇਨਚਿ ਸੁਤ੍ਤੇਨ ਅਨ੍ਤੋ ਵਾ ਬਹਿ ਵਾ ਸਿਬ੍ਬਿਤੁਂ, ਛਤ੍ਤਦਣ੍ਡਗ੍ਗਾਹਕਂ ਸਲਾਕਪਞ੍ਜਰਂ ਵਾ ਵਿਨਨ੍ਧਿਤੁਂ ਵਟ੍ਟਤਿ, ਤਞ੍ਚ ਖੋ ਥਿਰਕਰਣਤ੍ਥਂ ਵਟ੍ਟਤਿ, ਨ ਵਣ੍ਣਮਟ੍ਠਤ੍ਥਾਯ. ਛਤ੍ਤਪਣ੍ਣੇਸੁ ਮਕਰਦਨ੍ਤਕਂ ਵਾ ਅਡ੍ਢਚਨ੍ਦਕਂ ਵਾ ਛਿਨ੍ਦਿਤੁਂ ਨ ਵਟ੍ਟਤਿ. ਛਤ੍ਤਦਣ੍ਡੇ ਗੇਹਤ੍ਥਮ੍ਭੇਸੁ ਵਿਯ ਘਟਕੋ ਵਾ ਵਾਲ਼ਰੂਪਕਂ ਵਾ ਨ ਵਟ੍ਟਤਿ. ਸਚੇਪਿ ਸਬ੍ਬਤ੍ਥ ਆਰਗ੍ਗੇਨ ਲੇਖਾ ਦਿਨ੍ਨਾ ਹੋਤਿ, ਸਾਪਿ ਨ ਵਟ੍ਟਤਿ. ਘਟਕਂ ਵਾ ਵਾਲ਼ਰੂਪਕਂ ਵਾ ਭਿਨ੍ਦਿਤ੍ਵਾ ਧਾਰੇਤਬ੍ਬਂ, ਲੇਖਾਪਿ ਘਂਸਿਤ੍ਵਾ ਵਾ ਅਪਨੇਤਬ੍ਬਾ, ਸੁਤ੍ਤਕੇਨ ਵਾ ਦਣ੍ਡੋ ਵੇਠੇਤਬ੍ਬੋ. ਦਣ੍ਡਬੁਨ੍ਦੇ ਪਨ ਅਹਿਚ੍ਛਤ੍ਤਕਸਣ੍ਠਾਨਂ ਵਟ੍ਟਤਿ. ਵਾਤਪ੍ਪਹਾਰੇਨ ਅਚਲਨਤ੍ਥਂ ਛਤ੍ਤਮਣ੍ਡਲਿਕਂ ਰਜ੍ਜੁਕੇਹਿ ਗਾਹੇਤ੍ਵਾ ਦਣ੍ਡੇ ਬਨ੍ਧਨ੍ਤਿ, ਤਸ੍ਮਿਂ ਬਨ੍ਧਨਟ੍ਠਾਨੇ ਵਲਯਮਿਵ ਉਕ੍ਕਿਰਿਤ੍ਵਾ ਲੇਖਂ ਠਪੇਨ੍ਤਿ, ਸਾ ਵਟ੍ਟਤਿ.

੭. ਚੀਵਰਮਣ੍ਡਨਤ੍ਥਾਯ ਨਾਨਾਸੁਤ੍ਤਕੇਹਿ ਸਤਪਦਿਸਦਿਸਂ ਸਿਬ੍ਬਨ੍ਤਾ ਆਗਨ੍ਤੁਕਪਟ੍ਟਂ ਠਪੇਨ੍ਤਿ, ਅਞ੍ਞਮ੍ਪਿ ਯਂ ਕਿਞ੍ਚਿ ਸੂਚਿਕਮ੍ਮਵਿਕਾਰਂ ਕਰੋਨ੍ਤਿ, ਪਟ੍ਟਮੁਖੇ ਵਾ ਪਰਿਯਨ੍ਤੇ ਵਾ ਵੇਣਿਂ ਵਾ ਸਙ੍ਖਲਿਕਂ ਵਾ ਮੁਗ੍ਗਰਂ ਵਾ ਏਵਮਾਦਿ ਸਬ੍ਬਂ ਨ ਵਟ੍ਟਤਿ, ਪਕਤਿਸੂਚਿਕਮ੍ਮਮੇਵ ਵਟ੍ਟਤਿ. ਗਣ੍ਠਿਕਪਟ੍ਟਕਞ੍ਚ ਪਾਸਕਪਟ੍ਟਕਞ੍ਚ ਅਟ੍ਠਕੋਣਮ੍ਪਿ ਸੋਲ਼ਸਕੋਣਮ੍ਪਿ ਕਰੋਨ੍ਤਿ, ਤਤ੍ਥ ਅਗ੍ਘਿਯਗਯਮੁਗ੍ਗਰਾਦੀਨਿ ਦਸ੍ਸੇਨ੍ਤਿ, ਕਕ੍ਕਟਕ੍ਖੀਨਿ ਉਕ੍ਕਿਰਨ੍ਤਿ, ਸਬ੍ਬਂ ਨ ਵਟ੍ਟਤਿ, ਚਤੁਕੋਣਮੇਵ ਵਟ੍ਟਤਿ, ਕੋਣਸੁਤ੍ਤਪੀਲ਼ਕਾ ਚ ਚੀਵਰੇ ਰਤ੍ਤੇ ਦੁਵਿਞ੍ਞੇਯ੍ਯਰੂਪਾ ਵਟ੍ਟਨ੍ਤਿ. ਕਞ੍ਜਿਕਪਿਟ੍ਠਖਲਿਅਅਲਕਾਦੀਸੁ ਚੀਵਰਂ ਪਕ੍ਖਿਪਿਤੁਂ ਨ ਵਟ੍ਟਤਿ, ਚੀਵਰਕਮ੍ਮਕਾਲੇ ਪਨ ਹਤ੍ਥਮਲਸੂਚਿਮਲਾਦੀਨਂ ਧੋਵਨਤ੍ਥਂ ਕਿਲਿਟ੍ਠਕਾਲੇ ਚ ਧੋਵਨਤ੍ਥਂ ਵਟ੍ਟਤਿ, ਗਨ੍ਧਂ ਵਾ ਲਾਖਂ ਵਾ ਤੇਲਂ ਵਾ ਰਜਨੇ ਪਕ੍ਖਿਪਿਤੁਂ ਨ ਵਟ੍ਟਤਿ.

ਰਜਨੇਸੁ ਚ ਹਲਿਦ੍ਦਿਂ ਠਪੇਤ੍ਵਾ ਸਬ੍ਬਂ ਮੂਲਰਜਨਂ ਵਟ੍ਟਤਿ, ਮਞ੍ਜਿਟ੍ਠਿਞ੍ਚ ਤੁਙ੍ਗਹਾਰਞ੍ਚ ਠਪੇਤ੍ਵਾ ਸਬ੍ਬਂ ਖਨ੍ਧਰਜਨਂ ਵਟ੍ਟਤਿ. ਤੁਙ੍ਗਹਾਰੋ ਨਾਮ ਏਕੋ ਸਕਣ੍ਟਕਰੁਕ੍ਖੋ, ਤਸ੍ਸ ਹਰਿਤਾਲਵਣ੍ਣਂ ਖਨ੍ਧਰਜਨਂ ਹੋਤਿ. ਲੋਦ੍ਦਞ੍ਚ ਕਣ੍ਡੁਲਞ੍ਚ ਠਪੇਤ੍ਵਾ ਸਬ੍ਬਂ ਤਚਰਜਨਂ ਵਟ੍ਟਤਿ. ਅਲ੍ਲਿਪਤ੍ਤਞ੍ਚ ਨੀਲਿਪਤ੍ਤਞ੍ਚ ਠਪੇਤ੍ਵਾ ਸਬ੍ਬਂ ਪਤ੍ਤਰਜਨਂ ਵਟ੍ਟਤਿ. ਗਿਹਿਪਰਿਭੁਤ੍ਤਕਂ ਪਨ ਅਲ੍ਲਿਪਤ੍ਤੇਨ ਏਕਵਾਰਂ ਰਜਿਤੁਂ ਵਟ੍ਟਤਿ. ਕਿਂਸੁਕਪੁਪ੍ਫਞ੍ਚ ਕੁਸੁਮ੍ਭਪੁਪ੍ਫਞ੍ਚ ਠਪੇਤ੍ਵਾ ਸਬ੍ਬਂ ਪੁਪ੍ਫਰਜਨਂ ਵਟ੍ਟਤਿ. ਫਲਰਜਨੇ ਪਨ ਨ ਕਿਞ੍ਚਿ ਨ ਵਟ੍ਟਤਿ (ਮਹਾਵ. ਅਟ੍ਠ. ੩੪੪).

੮. ਚੀਵਰਂ ਰਜਿਤ੍ਵਾ ਸਙ੍ਖੇਨ ਵਾ ਮਣਿਨਾ ਵਾ ਯੇਨ ਕੇਨਚਿ ਨ ਘਟ੍ਟੇਤਬ੍ਬਂ, ਭੂਮਿਯਂ ਜਾਣੁਕਾਨਿ ਨਿਹਨ੍ਤ੍ਵਾ ਹਤ੍ਥੇਹਿ ਗਹੇਤ੍ਵਾ ਦੋਣਿਯਮ੍ਪਿ ਨ ਘਂਸਿਤਬ੍ਬਂ. ਦੋਣਿਯਂ ਵਾ ਫਲਕੇ ਵਾ ਠਪੇਤ੍ਵਾ ਅਨ੍ਤੇ ਗਾਹਾਪੇਤ੍ਵਾ ਹਤ੍ਥੇਨ ਪਹਰਿਤੁਂ ਪਨ ਵਟ੍ਟਤਿ, ਤਮ੍ਪਿ ਮੁਟ੍ਠਿਨਾ ਨ ਕਾਤਬ੍ਬਂ. ਪੋਰਾਣਕਤ੍ਥੇਰਾ ਪਨ ਦੋਣਿਯਮ੍ਪਿ ਨ ਠਪੇਸੁਂ. ਏਕੋ ਚੀਵਰਂ ਗਹੇਤ੍ਵਾ ਤਿਟ੍ਠਤਿ, ਅਪਰੋ ਹਤ੍ਥੇ ਕਤ੍ਵਾ ਹਤ੍ਥੇਨ ਪਹਰਤਿ. ਚੀਵਰਸ੍ਸ ਕਣ੍ਣਸੁਤ੍ਤਕਂ ਨ ਵਟ੍ਟਤਿ, ਰਜਿਤਕਾਲੇ ਛਿਨ੍ਦਿਤਬ੍ਬਂ. ਯਂ ਪਨ ‘‘ਅਨੁਜਾਨਾਮਿ, ਭਿਕ੍ਖਵੇ, ਕਣ੍ਣਸੁਤ੍ਤਕ’’ਨ੍ਤਿ (ਮਹਾਵ. ੩੪੪) ਏਵਂ ਅਨੁਞ੍ਞਾਤਂ, ਤਂ ਅਨੁਵਾਤੇ ਪਾਸਕਂ ਕਤ੍ਵਾ ਬਨ੍ਧਿਤਬ੍ਬਂ ਰਜਨਕਾਲੇ ਲਗ੍ਗਨਤ੍ਥਾਯ. ਗਣ੍ਠਿਕੇਪਿ ਸੋਭਾਕਰਣਤ੍ਥਂ ਲੇਖਾ ਵਾ ਪੀਲ਼ਕਾ ਵਾ ਨ ਵਟ੍ਟਤਿ, ਨਾਸੇਤ੍ਵਾ ਪਰਿਭੁਞ੍ਜਿਤਬ੍ਬਂ.

੯. ਪਤ੍ਤੇ ਵਾ ਥਾਲਕੇ ਵਾ ਆਰਗ੍ਗੇਨ ਲੇਖਂ ਕਰੋਨ੍ਤਿ ਅਨ੍ਤੋ ਵਾ ਬਹਿ ਵਾ, ਨ ਵਟ੍ਟਤਿ. ਪਤ੍ਤਂ ਭਮਂ ਆਰੋਪੇਤ੍ਵਾ ਮਜ੍ਜਿਤ੍ਵਾ ਪਚਨ੍ਤਿ ‘‘ਮਣਿਵਣ੍ਣਂ ਕਰਿਸ੍ਸਾਮਾ’’ਤਿ, ਨ ਵਟ੍ਟਤਿ, ਤੇਲਵਣ੍ਣੋ ਪਨ ਵਟ੍ਟਤਿ. ਪਤ੍ਤਮਣ੍ਡਲੇ ਭਿਤ੍ਤਿਕਮ੍ਮਂ ਨ ਵਟ੍ਟਤਿ, ਮਕਰਦਨ੍ਤਕਂ ਪਨ ਵਟ੍ਟਤਿ.

ਧਮਕਰਣਛਤ੍ਤਕਸ੍ਸ ਉਪਰਿ ਵਾ ਹੇਟ੍ਠਾ ਵਾ ਧਮਕਰਣਕੁਚ੍ਛਿਯਂ ਵਾ ਲੇਖਾ ਨ ਵਟ੍ਟਤਿ, ਛਤ੍ਤਮੁਖਵਟ੍ਟਿਯਂ ਪਨਸ੍ਸ ਲੇਖਾ ਵਟ੍ਟਤਿ.

੧੦. ਕਾਯਬਨ੍ਧਨਸ੍ਸ ਸੋਭਨਤ੍ਥਂ ਤਹਿਂ ਤਹਿਂ ਦਿਗੁਣਂ ਸੁਤ੍ਤਂ ਕੋਟ੍ਟੇਨ੍ਤਿ, ਕਕ੍ਕਟਕ੍ਖੀਨਿ ਉਟ੍ਠਾਪੇਨ੍ਤਿ, ਨ ਵਟ੍ਟਤਿ, ਉਭੋਸੁ ਪਨ ਅਨ੍ਤੇਸੁ ਦਸਾਮੁਖਸ੍ਸ ਥਿਰਭਾਵਾਯ ਦਿਗੁਣਂ ਕੋਟ੍ਟੇਤੁਂ ਵਟ੍ਟਤਿ. ਦਸਾਮੁਖੇ ਪਨ ਘਟਕਂ ਵਾ ਮਕਰਮੁਖਂ ਵਾ ਦੇਡ੍ਡੁਭਸੀਸਂ ਵਾ ਯਂ ਕਿਞ੍ਚਿ ਵਿਕਾਰਰੂਪਂ ਕਾਤੁਂ ਨ ਵਟ੍ਟਤਿ, ਤਤ੍ਥ ਤਤ੍ਥ ਅਚ੍ਛੀਨਿ ਦਸ੍ਸੇਤ੍ਵਾ ਮਾਲਾਕਮ੍ਮਾਦੀਨਿ ਵਾ ਕਤ੍ਵਾ ਕੋਟ੍ਟਿਤਕਾਯਬਨ੍ਧਨਮ੍ਪਿ ਨ ਵਟ੍ਟਤਿ, ਉਜੁਕਮੇਵ ਪਨ ਮਚ੍ਛਕਣ੍ਟਕਂ ਵਾ ਖਜ੍ਜੂਰਿਪਤ੍ਤਕਂ ਵਾ ਮਟ੍ਠਕਪਟ੍ਟਿਕਂ ਵਾ ਕਤ੍ਵਾ ਕੋਟ੍ਟੇਤੁਂ ਵਟ੍ਟਤਿ. ਕਾਯਬਨ੍ਧਨਸ੍ਸ ਦਸਾ ਏਕਾ ਵਟ੍ਟਤਿ, ਦ੍ਵੇ ਤੀਣਿ ਚਤ੍ਤਾਰਿਪਿ ਵਟ੍ਟਨ੍ਤਿ, ਤਤੋ ਪਰਂ ਨ ਵਟ੍ਟਨ੍ਤਿ. ਰਜ੍ਜੁਕਕਾਯਬਨ੍ਧਨਂ ਏਕਮੇਵ ਵਟ੍ਟਤਿ, ਪਾਮਙ੍ਗਸਣ੍ਠਾਨਂ ਪਨ ਏਕਮ੍ਪਿ ਨ ਵਟ੍ਟਤਿ, ਦਸਾ ਪਨ ਪਾਮਙ੍ਗਸਣ੍ਠਾਨਾਪਿ ਵਟ੍ਟਤਿ, ਬਹੁਰਜ੍ਜੁਕੇ ਏਕਤੋ ਕਤ੍ਵਾ ਏਕੇਨ ਨਿਰਨ੍ਤਰਂ ਵੇਠੇਤ੍ਵਾ ਕਤਂ ਬਹੁਰਜ੍ਜੁਕਨ੍ਤਿ ਨ ਵਤ੍ਤਬ੍ਬਂ, ਤਂ ਵਟ੍ਟਤਿ.

ਕਾਯਬਨ੍ਧਨਵਿਧੇ ਅਟ੍ਠਮਙ੍ਗਲਾਦਿਕਂ ਯਂ ਕਿਞ੍ਚਿ ਵਿਕਾਰਰੂਪਂ ਨ ਵਟ੍ਟਤਿ, ਪਰਿਚ੍ਛੇਦਲੇਖਾਮਤ੍ਤਂ ਵਟ੍ਟਤਿ. ਵਿਧਕਸ੍ਸ ਉਭੋਸੁ ਅਨ੍ਤੇਸੁ ਥਿਰਕਰਣਤ੍ਥਾਯ ਘਟਕਂ ਕਰੋਨ੍ਤਿ, ਅਯਮ੍ਪਿ ਵਟ੍ਟਤਿ.

੧੧. ਅਞ੍ਜਨਿਯਂ ਇਤ੍ਥਿਪੁਰਿਸਚਤੁਪ੍ਪਦਸਕੁਣਰੂਪਂ ਵਾ ਮਾਲਾਕਮ੍ਮਲਤਾਕਮ੍ਮਮਕਰਦਨ੍ਤਕਗੋਮੁਤ੍ਤਕਅਡ੍ਢਚਨ੍ਦਕਾਦਿਭੇਦਂ ਵਾ ਵਿਕਾਰਰੂਪਂ ਨ ਵਟ੍ਟਤਿ, ਘਂਸਿਤ੍ਵਾ ਵਾ ਭਿਨ੍ਦਿਤ੍ਵਾ ਵਾ ਯਥਾ ਵਾ ਨ ਪਞ੍ਞਾਯਤਿ, ਤਥਾ ਸੁਤ੍ਤਕੇਨ ਵੇਠੇਤ੍ਵਾ ਵਲ਼ਞ੍ਜੇਤਬ੍ਬਾ. ਉਜੁਕਮੇਵ ਪਨ ਚਤੁਰਂਸਾ ਵਾ ਅਟ੍ਠਂਸਾ ਵਾ ਸੋਲ਼ਸਂਸਾ ਵਾ ਅਞ੍ਜਨੀ ਵਟ੍ਟਤਿ. ਹੇਟ੍ਠਤੋਪਿਸ੍ਸਾ ਦ੍ਵੇ ਵਾ ਤਿਸ੍ਸੋ ਵਾ ਵਟ੍ਟਲੇਖਾਯੋ ਵਟ੍ਟਨ੍ਤਿ, ਗੀਵਾਯਮ੍ਪਿਸ੍ਸਾ ਪਿਧਾਨਕਬਨ੍ਧਨਤ੍ਥਂ ਏਕਾ ਵਟ੍ਟਲੇਖਾ ਵਟ੍ਟਤਿ.

ਅਞ੍ਜਨੀਸਲਾਕਾਯਪਿ ਵਣ੍ਣਮਟ੍ਠਕਮ੍ਮਂ ਨ ਵਟ੍ਟਤਿ, ਅਞ੍ਜਨੀਥਵਿਕਾਯਪਿ ਯਂ ਕਿਞ੍ਚਿ ਨਾਨਾਵਣ੍ਣੇਨ ਸੁਤ੍ਤੇਨ ਵਣ੍ਣਮਟ੍ਠਕਮ੍ਮਂ ਨ ਵਟ੍ਟਤਿ. ਏਸੇਵ ਨਯੋ ਕੁਞ੍ਚਿਕਕੋਸਕੇਪਿ. ਕੁਞ੍ਚਿਕਾਯ ਵਣ੍ਣਮਟ੍ਠਕਮ੍ਮਂ ਨ ਵਟ੍ਟਤਿ, ਤਥਾ ਸਿਪਾਟਿਕਾਯ. ਏਕਵਣ੍ਣਸੁਤ੍ਤੇਨ ਪਨ ਯੇਨ ਕੇਨਚਿ ਯਂ ਕਿਞ੍ਚਿ ਸਿਬ੍ਬਿਤੁਂ ਵਟ੍ਟਤਿ.

੧੨. ਆਰਕਣ੍ਟਕੇਪਿ ਵਟ੍ਟਮਣਿਕਂ ਵਾ ਅਞ੍ਞਂ ਵਾ ਵਣ੍ਣਮਟ੍ਠਂ ਨ ਵਟ੍ਟਤਿ, ਗੀਵਾਯਂ ਪਨ ਪਰਿਚ੍ਛੇਦਲੇਖਾ ਵਟ੍ਟਤਿ. ਪਿਪ੍ਫਲਿਕੇਪਿ ਮਣਿਕਂ ਵਾ ਪੀਲ਼ਕਂ ਵਾ ਯਂ ਕਿਞ੍ਚਿ ਉਟ੍ਠਾਪੇਤੁਂ ਨ ਵਟ੍ਟਤਿ, ਦਣ੍ਡਕੇ ਪਨ ਪਰਿਚ੍ਛੇਦਲੇਖਾ ਵਟ੍ਟਤਿ. ਨਖਚ੍ਛੇਦਨਂ ਵਲਿਤਕਂਯੇਵ ਕਰੋਨ੍ਤਿ, ਤਸ੍ਮਾ ਤਂ ਵਟ੍ਟਤਿ. ਉਤ੍ਤਰਾਰਣਿਯਂ ਵਾਪਿ ਅਰਣਿਧਨੁਕੇ ਵਾ ਉਪਰਿਪੇਲ੍ਲਨਦਣ੍ਡਕੇ ਵਾ ਮਾਲਾਕਮ੍ਮਾਦਿ ਯਂ ਕਿਞ੍ਚਿ ਵਣ੍ਣਮਟ੍ਠਂ ਨ ਵਟ੍ਟਤਿ. ਪੇਲ੍ਲਨਦਣ੍ਡਕਸ੍ਸ ਪਨ ਵੇਮਜ੍ਝੇ ਮਣ੍ਡਲਂ ਹੋਤਿ, ਤਤ੍ਥ ਪਰਿਚ੍ਛੇਦਲੇਖਾਮਤ੍ਤਂ ਵਟ੍ਟਤਿ. ਸੂਚਿਸਣ੍ਡਾਸਂ ਕਰੋਨ੍ਤਿ, ਯੇਨ ਸੂਚਿਂ ਡਂਸਾਪੇਤ੍ਵਾ ਘਂਸਨ੍ਤਿ, ਤਤ੍ਥ ਮਕਰਮੁਖਾਦਿਕਂ ਯਂ ਕਿਞ੍ਚਿ ਵਣ੍ਣਮਟ੍ਠਂ ਨ ਵਟ੍ਟਤਿ, ਸੂਚਿਡਂਸਨਤ੍ਥਂ ਪਨ ਮੁਖਮਤ੍ਤਂ ਹੋਤਿ, ਤਂ ਵਟ੍ਟਤਿ.

ਦਨ੍ਤਕਟ੍ਠਚ੍ਛੇਦਨਵਾਸਿਯਮ੍ਪਿ ਯਂ ਕਿਞ੍ਚਿ ਵਣ੍ਣਮਟ੍ਠਂ ਨ ਵਟ੍ਟਤਿ, ਉਜੁਕਮੇਵ ਕਪ੍ਪਿਯਲੋਹੇਨ ਉਭੋਸੁ ਵਾ ਪਸ੍ਸੇਸੁ ਚਤੁਰਂਸਂ ਵਾ ਅਟ੍ਠਂਸਂ ਵਾ ਬਨ੍ਧਿਤੁਂ ਵਟ੍ਟਤਿ. ਕਤ੍ਤਰਦਣ੍ਡੇਪਿ ਯਂ ਕਿਞ੍ਚਿ ਵਣ੍ਣਮਟ੍ਠਂ ਨ ਵਟ੍ਟਤਿ, ਹੇਟ੍ਠਾ ਏਕਾ ਵਾ ਦ੍ਵੇ ਵਾ ਵਟ੍ਟਲੇਖਾ ਉਪਰਿ ਅਹਿਚ੍ਛਤ੍ਤਕਮਕੁਲ਼ਮਤ੍ਤਞ੍ਚ ਵਟ੍ਟਤਿ.

੧੩. ਤੇਲਭਾਜਨੇਸੁ ਵਿਸਾਣੇ ਵਾ ਨਾਲ਼ਿਯਂ ਵਾ ਅਲਾਬੁਕੇ ਵਾ ਆਮਣ੍ਡਸਾਰਕੇ ਵਾ ਠਪੇਤ੍ਵਾ ਇਤ੍ਥਿਰੂਪਂ ਪੁਰਿਸਰੂਪਞ੍ਚ ਅਵਸੇਸਂ ਸਬ੍ਬਮ੍ਪਿ ਵਣ੍ਣਮਟ੍ਠਕਮ੍ਮਂ ਵਟ੍ਟਤਿ. ਮਞ੍ਚਪੀਠੇ ਭਿਸਿਬਿਮ੍ਬੋਹਨੇ ਭੂਮਤ੍ਥਰਣੇ ਪਾਦਪੁਞ੍ਛਨੇ ਚਙ੍ਕਮਨਭਿਸਿਯਾ ਸਮ੍ਮੁਞ੍ਜਨਿਯਂ ਕਚਵਰਛਡ੍ਡਨਕੇ ਰਜਨਦੋਣਿਕਾਯ ਪਾਨੀਯਉਲ਼ੁਙ੍ਕੇ ਪਾਨੀਯਘਟੇ ਪਾਦਕਥਲਿਕਾਯ ਫਲਕਪੀਠਕੇ ਵਲਯਾਧਾਰਕੇ ਦਣ੍ਡਾਧਾਰਕੇ ਪਤ੍ਤਪਿਧਾਨੇ ਤਾਲਵਣ੍ਟੇ ਬੀਜਨੇਤਿ ਏਤੇਸੁ ਸਬ੍ਬਂ ਮਾਲਾਕਮ੍ਮਾਦਿ ਵਣ੍ਣਮਟ੍ਠਕਮ੍ਮਂ ਵਟ੍ਟਤਿ.

੧੪. ਸੇਨਾਸਨੇ ਪਨ ਦ੍ਵਾਰਕਵਾਟਵਾਤਪਾਨਕਵਾਟਾਦੀਸੁ ਸਬ੍ਬਰਤਨਮਯਮ੍ਪਿ ਵਣ੍ਣਮਟ੍ਠਕਮ੍ਮਂ ਵਟ੍ਟਤਿ. ਸੇਨਾਸਨੇ ਕਿਞ੍ਚਿ ਪਟਿਸੇਧੇਤਬ੍ਬਂ ਨਤ੍ਥਿ ਅਞ੍ਞਤ੍ਰ ਵਿਰੁਦ੍ਧਸੇਨਾਸਨਾ. ਵਿਰੁਦ੍ਧਸੇਨਾਸਨਂ ਨਾਮ ਅਞ੍ਞੇਸਂ ਸੀਮਾਯ ਰਾਜਵਲ੍ਲਭੇਹਿ ਕਤਸੇਨਾਸਨਂ ਵੁਚ੍ਚਤਿ. ਤਸ੍ਮਾ ਯੇ ਤਾਦਿਸਂ ਸੇਨਾਸਨਂ ਕਰੋਨ੍ਤਿ, ਤੇ ਵਤ੍ਤਬ੍ਬਾ ‘‘ਮਾ ਅਮ੍ਹਾਕਂ ਸੀਮਾਯ ਸੇਨਾਸਨਂ ਕਰੋਥਾ’’ਤਿ. ਅਨਾਦਿਯਿਤ੍ਵਾ ਕਰੋਨ੍ਤਿਯੇਵ, ਪੁਨਪਿ ਵਤ੍ਤਬ੍ਬਾ ‘‘ਮਾ ਏਵਂ ਅਕਤ੍ਥ, ਮਾ ਅਮ੍ਹਾਕਂ ਉਪੋਸਥਪਵਾਰਣਾਨਂ ਅਨ੍ਤਰਾਯਮਕਤ੍ਥ, ਮਾ ਸਾਮਗ੍ਗਿਂ ਭਿਨ੍ਦਿਤ੍ਥ, ਤੁਮ੍ਹਾਕਂ ਸੇਨਾਸਨਂ ਕਤਮ੍ਪਿ ਕਤਟ੍ਠਾਨੇ ਨ ਠਸ੍ਸਤੀ’’ਤਿ. ਸਚੇ ਬਲਕ੍ਕਾਰੇਨ ਕਰੋਨ੍ਤਿਯੇਵ, ਯਦਾ ਤੇਸਂ ਲਜ੍ਜਿਪਰਿਸਾ ਉਸ੍ਸਨ੍ਨਾ ਹੋਤਿ, ਸਕ੍ਕਾ ਚ ਹੋਤਿ ਲਦ੍ਧੁਂ ਧਮ੍ਮਿਕੋ ਵਿਨਿਚ੍ਛਯੋ, ਤਦਾ ਤੇਸਂ ਪੇਸੇਤਬ੍ਬਂ ‘‘ਤੁਮ੍ਹਾਕਂ ਆਵਾਸਂ ਹਰਥਾ’’ਤਿ. ਸਚੇ ਯਾਵਤਤਿਯਂ ਪੇਸਿਤੇ ਹਰਨ੍ਤਿ, ਸਾਧੁ. ਨੋ ਚੇ ਹਰਨ੍ਤਿ, ਠਪੇਤ੍ਵਾ ਬੋਧਿਞ੍ਚ ਚੇਤਿਯਞ੍ਚ ਅਵਸੇਸਸੇਨਾਸਨਾਨਿ ਭਿਨ੍ਦਿਤਬ੍ਬਾਨਿ, ਨੋ ਚ ਖੋ ਅਪਰਿਭੋਗਂ ਕਰੋਨ੍ਤੇਹਿ, ਪਟਿਪਾਟਿਯਾ ਪਨ ਛਦਨਗੋਪਾਨਸੀਇਟ੍ਠਕਾਦੀਨਿ ਅਪਨੇਤ੍ਵਾ ਤੇਸਂ ਪੇਸੇਤਬ੍ਬਂ ‘‘ਤੁਮ੍ਹਾਕਂ ਦਬ੍ਬਸਮ੍ਭਾਰੇ ਹਰਥਾ’’ਤਿ. ਸਚੇ ਹਰਨ੍ਤਿ, ਸਾਧੁ. ਨੋ ਚੇ ਹਰਨ੍ਤਿ, ਅਥ ਤੇਸੁ ਦਬ੍ਬਸਮ੍ਭਾਰੇਸੁ ਹਿਮਵਸ੍ਸਵਾਤਾਤਪਾਦੀਹਿ ਪੂਤਿਭੂਤੇਸੁ ਵਾ ਚੋਰੇਹਿ ਵਾ ਹਟੇਸੁ ਅਗ੍ਗਿਨਾ ਵਾ ਦਡ੍ਢੇਸੁ ਸੀਮਸਾਮਿਕਾ ਭਿਕ੍ਖੂ ਅਨੁਪਵਜ੍ਜਾ, ਨ ਲਬ੍ਭਾ ਚੋਦੇਤੁਂ ‘‘ਤੁਮ੍ਹੇਹਿ ਅਮ੍ਹਾਕਂ ਦਬ੍ਬਸਮ੍ਭਾਰਾ ਨਾਸਿਤਾ’’ਤਿ ਵਾ ‘‘ਤੁਮ੍ਹਾਕਂ ਗੀਵਾ’’ਤਿ ਵਾ. ਯਂ ਪਨ ਸੀਮਸਾਮਿਕੇਹਿ ਭਿਕ੍ਖੂਹਿ ਕਤਂ, ਤਂ ਸੁਕਤਮੇਵ ਹੋਤਿ. ਯੋਪਿ ਭਿਕ੍ਖੁ ਬਹੁਸ੍ਸੁਤੋ ਵਿਨਯਞ੍ਞੂ ਅਞ੍ਞਂ ਭਿਕ੍ਖੁਂ ਅਕਪ੍ਪਿਯਪਰਿਕ੍ਖਾਰਂ ਗਹੇਤ੍ਵਾ ਵਿਚਰਨ੍ਤਂ ਦਿਸ੍ਵਾ ਛਿਨ੍ਦਾਪੇਯ੍ਯ ਵਾ ਭਿਨ੍ਦਾਪੇਯ੍ਯ ਵਾ, ਅਨੁਪਵਜ੍ਜੋ, ਸੋ ਨੇਵ ਚੋਦੇਤਬ੍ਬੋ ਨ ਸਾਰੇਤਬ੍ਬੋ, ਨ ਤਂ ਲਬ੍ਭਾ ਵਤ੍ਤੁਂ ‘‘ਅਯਂ ਨਾਮ ਮਮ ਪਰਿਕ੍ਖਾਰੋ ਤਯਾ ਨਾਸਿਤੋ, ਤਂ ਮੇ ਦੇਹੀ’’ਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਪਰਿਕ੍ਖਾਰਵਿਨਿਚ੍ਛਯਕਥਾ ਸਮਤ੍ਤਾ.