੧੯. ਕਪ੍ਪਿਯਭੂਮਿਵਿਨਿਚ੍ਛਯਕਥਾ

੧੦੧. ਕਪ੍ਪਿਯਾਚਤੁਭੂਮਿਯੋਤਿ ਏਤ੍ਥ ‘‘ਅਨੁਜਾਨਾਮਿ, ਭਿਕ੍ਖਵੇ, ਚਤਸ੍ਸੋ ਕਪ੍ਪਿਯਭੂਮਿਯੋ ਉਸ੍ਸਾਵਨਨ੍ਤਿਕਂ ਗੋਨਿਸਾਦਿਕਂ ਗਹਪਤਿਂ ਸਮ੍ਮੁਤਿ’’ਨ੍ਤਿ (ਮਹਾਵ. ੨੯੫) ਵਚਨਤੋ ਉਸ੍ਸਾਵਨਨ੍ਤਿਕਾ ਗੋਨਿਸਾਦਿਕਾ ਗਹਪਤਿ ਸਮ੍ਮੁਤੀਤਿ ਇਮਾ ਚਤਸ੍ਸੋ ਕਪ੍ਪਿਯਭੂਮਿਯੋ ਵੇਦਿਤਬ੍ਬਾ. ਤਤ੍ਥ (ਮਹਾਵ. ਅਟ੍ਠ. ੨੯੫) ਉਸ੍ਸਾਵਨਨ੍ਤਿਕਾ ਤਾਵ ਏਵਂ ਕਾਤਬ੍ਬਾ – ਯੋ ਥਮ੍ਭਾਨਂ ਵਾ ਉਪਰਿ ਭਿਤ੍ਤਿਪਾਦੇ ਵਾ ਨਿਖਨਿਤ੍ਵਾ ਵਿਹਾਰੋ ਕਰੀਯਤਿ, ਤਸ੍ਸ ਹੇਟ੍ਠਾ ਥਮ੍ਭਪਟਿਚ੍ਛਕਾ ਪਾਸਾਣਾ ਭੂਮਿਗਤਿਕਾ ਏਵ. ਪਠਮਤ੍ਥਮ੍ਭਂ ਪਨ ਪਠਮਭਿਤ੍ਤਿਪਾਦਂ ਵਾ ਪਤਿਟ੍ਠਾਪੇਨ੍ਤੇਹਿ ਬਹੂਹਿ ਸਮ੍ਪਰਿਵਾਰੇਤ੍ਵਾ ‘‘ਕਪ੍ਪਿਯਕੁਟਿਂ ਕਰੋਮ, ਕਪ੍ਪਿਯਕੁਟਿਂ ਕਰੋਮਾ’’ਤਿ ਵਾਚਂ ਨਿਚ੍ਛਾਰੇਨ੍ਤੇਹਿ ਮਨੁਸ੍ਸੇਸੁ ਉਕ੍ਖਿਪਿਤ੍ਵਾ ਪਤਿਟ੍ਠਾਪੇਨ੍ਤੇਸੁ ਆਮਸਿਤ੍ਵਾ ਵਾ ਸਯਂ ਉਕ੍ਖਿਪਿਤ੍ਵਾ ਵਾ ਥਮ੍ਭੋ ਵਾ ਭਿਤ੍ਤਿਪਾਦੋ ਵਾ ਪਤਿਟ੍ਠਾਪੇਤਬ੍ਬੋ. ਕੁਰੁਨ੍ਦਿਮਹਾਪਚ੍ਚਰੀਸੁ ਪਨ ‘‘ਕਪ੍ਪਿਯਕੁਟਿ ਕਪ੍ਪਿਯਕੁਟੀਤਿ ਵਤ੍ਵਾ ਪਤਿਟ੍ਠਾਪੇਤਬ੍ਬ’’ਨ੍ਤਿ ਵੁਤ੍ਤਂ. ਅਨ੍ਧਕਟ੍ਠਕਥਾਯਂ ‘‘ਸਙ੍ਘਸ੍ਸ ਕਪ੍ਪਿਯਕੁਟਿਂ ਅਧਿਟ੍ਠਾਮੀ’’ਤਿ ਵੁਤ੍ਤਂ, ਤਂ ਪਨ ਅਵਤ੍ਵਾਪਿ ਅਟ੍ਠਕਥਾਸੁ ਵੁਤ੍ਤਨਯੇਨ ਵੁਤ੍ਤੇ ਦੋਸੋ ਨਤ੍ਥਿ. ਇਦਂ ਪਨੇਤ੍ਥ ਸਾਧਾਰਣਲਕ੍ਖਣਂ ‘‘ਥਮ੍ਭਪਤਿਟ੍ਠਾਪਨਞ੍ਚ ਵਚਨਪਰਿਯੋਸਾਨਞ੍ਚ ਸਮਕਾਲਂ ਵਟ੍ਟਤੀ’’ਤਿ. ਸਚੇ ਹਿ ਅਨਿਟ੍ਠਿਤੇ ਵਚਨੇ ਥਮ੍ਭੋ ਪਤਿਟ੍ਠਾਤਿ, ਅਪ੍ਪਤਿਟ੍ਠਿਤੇ ਵਾ ਤਸ੍ਮਿਂ ਵਚਨਂ ਨਿਟ੍ਠਾਤਿ, ਅਕਤਾ ਹੋਤਿ ਕਪ੍ਪਿਯਕੁਟਿ. ਤੇਨੇਵ ਮਹਾਪਚ੍ਚਰਿਯਂ ਵੁਤ੍ਤਂ ‘‘ਬਹੂਹਿ ਸਮ੍ਪਰਿਵਾਰੇਤ੍ਵਾ ਵਤ੍ਤਬ੍ਬਂ, ਅਵਸ੍ਸਞ੍ਹਿ ਏਤ੍ਥ ਏਕਸ੍ਸਪਿ ਵਚਨਨਿਟ੍ਠਾਨਞ੍ਚ ਥਮ੍ਭਪਤਿਟ੍ਠਾਨਞ੍ਚ ਏਕਤੋ ਭਵਿਸ੍ਸਤੀ’’ਤਿ. ਇਟ੍ਠਕਾਸਿਲਾਮਤ੍ਤਿਕਾਕੁਟ੍ਟਕਾਸੁ ਪਨ ਕੁਟੀਸੁ ਹੇਟ੍ਠਾ ਚਯਂ ਬਨ੍ਧਿਤ੍ਵਾ ਵਾ ਅਬਨ੍ਧਿਤ੍ਵਾ ਵਾ ਕਰੋਨ੍ਤੁ, ਯਤੋ ਪਟ੍ਠਾਯ ਭਿਤ੍ਤਿਂ ਉਟ੍ਠਾਪੇਤੁਕਾਮਾ ਹੋਨ੍ਤਿ, ਤਂ ਸਬ੍ਬਪਠਮਂ ਇਟ੍ਠਕਂ ਵਾ ਸਿਲਂ ਵਾ ਮਤ੍ਤਿਕਾਪਿਣ੍ਡਂ ਵਾ ਗਹੇਤ੍ਵਾ ਵੁਤ੍ਤਨਯੇਨੇਵ ਕਪ੍ਪਿਯਕੁਟਿ ਕਾਤਬ੍ਬਾ, ਇਟ੍ਠਕਾਦਯੋ ਭਿਤ੍ਤਿਯਂ ਪਠਮਿਟ੍ਠਕਾਦੀਨਂ ਹੇਟ੍ਠਾ ਨ ਵਟ੍ਟਨ੍ਤਿ, ਥਮ੍ਭਾ ਪਨ ਉਪਰਿ ਉਗ੍ਗਚ੍ਛਨ੍ਤਿ, ਤਸ੍ਮਾ ਵਟ੍ਟਨ੍ਤਿ. ਅਨ੍ਧਕਟ੍ਠਕਥਾਯਂ ‘‘ਥਮ੍ਭੇਹਿ ਕਰਿਯਮਾਨੇ ਚਤੂਸੁ ਕੋਣੇਸੁ ਚਤ੍ਤਾਰੋ ਥਮ੍ਭਾ, ਇਟ੍ਠਕਾਦਿਕੁਟ੍ਟੇ ਚਤੂਸੁ ਕੋਣੇਸੁ ਦ੍ਵੇ ਤਿਸ੍ਸੋ ਇਟ੍ਠਕਾ ਅਧਿਟ੍ਠਾਤਬ੍ਬਾ’’ਤਿ ਵੁਤ੍ਤਂ. ਤਥਾ ਪਨ ਅਕਤਾਯਪਿ ਦੋਸੋ ਨਤ੍ਥਿ, ਅਟ੍ਠਕਥਾਸੁ ਹਿ ਵੁਤ੍ਤਮੇਵ ਪਮਾਣਂ.

ਗੋਨਿਸਾਦਿਕਾ ਦੁਵਿਧਾ ਆਰਾਮਗੋਨਿਸਾਦਿਕਾ ਵਿਹਾਰਗੋਨਿਸਾਦਿਕਾਤਿ. ਤਾਸੁ ਯਤ੍ਥ ਨੇਵ ਆਰਾਮੋ, ਨ ਸੇਨਾਸਨਾਨਿ ਪਰਿਕ੍ਖਿਤ੍ਤਾਨਿ ਹੋਨ੍ਤਿ, ਅਯਂ ਆਰਾਮਗੋਨਿਸਾਦਿਕਾ ਨਾਮ. ਯਤ੍ਥ ਸੇਨਾਸਨਾਨਿ ਸਬ੍ਬਾਨਿ ਵਾ ਏਕਚ੍ਚਾਨਿ ਵਾ ਪਰਿਕ੍ਖਿਤ੍ਤਾਨਿ, ਆਰਾਮੋ ਅਪਰਿਕ੍ਖਿਤ੍ਤੋ, ਅਯਂ ਵਿਹਾਰਗੋਨਿਸਾਦਿਕਾ ਨਾਮ. ਇਤਿ ਉਭਯਤ੍ਰਾਪਿ ਆਰਾਮਸ੍ਸ ਅਪਰਿਕ੍ਖਿਤ੍ਤਭਾਵੋਯੇਵ ਪਮਾਣਂ. ‘‘ਆਰਾਮੋ ਪਨ ਉਪਡ੍ਢਪਰਿਕ੍ਖਿਤ੍ਤੋਪਿ ਬਹੁਤਰਂ ਪਰਿਕ੍ਖਿਤ੍ਤੋਪਿ ਪਰਿਕ੍ਖਿਤ੍ਤੋਯੇਵ ਨਾਮਾ’’ਤਿ ਕੁਰੁਨ੍ਦਿਮਹਾਪਚ੍ਚਰੀਸੁ ਵੁਤ੍ਤਂ, ਏਤ੍ਥ ਕਪ੍ਪਿਯਕੁਟਿਂ ਲਦ੍ਧੁਂ ਵਟ੍ਟਤਿ.

ਗਹਪਤੀਤਿ ਮਨੁਸ੍ਸਾ ਆਵਾਸਂ ਕਤ੍ਵਾ ‘‘ਕਪ੍ਪਿਯਕੁਟਿਂ ਦੇਮ, ਪਰਿਭੁਞ੍ਜਥਾ’’ਤਿ ਵਦਨ੍ਤਿ, ਏਸਾ ਗਹਪਤਿ ਨਾਮ, ‘‘ਕਪ੍ਪਿਯਕੁਟਿਂ ਕਾਤੁਂ ਦੇਮਾ’’ਤਿ ਵੁਤ੍ਤੇਪਿ ਵਟ੍ਟਤਿਯੇਵ. ਅਨ੍ਧਕਟ੍ਠਕਥਾਯਂ ਪਨ ‘‘ਯਸ੍ਮਾ ਭਿਕ੍ਖੁਂ ਠਪੇਤ੍ਵਾ ਸੇਸਸਹਧਮ੍ਮਿਕਾਨਂ ਸਬ੍ਬੇਸਞ੍ਚ ਦੇਵਮਨੁਸ੍ਸਾਨਂ ਹਤ੍ਥਤੋ ਪਟਿਗ੍ਗਹੋ ਚ ਸਨ੍ਨਿਧਿ ਚ ਅਨ੍ਤੋਵੁਤ੍ਥਞ੍ਚ ਤੇਸਂ ਸਨ੍ਤਕਂ ਭਿਕ੍ਖੁਸ੍ਸ ਵਟ੍ਟਤਿ, ਤਸ੍ਮਾ ਤੇਸਂ ਗੇਹਾਨਿ ਵਾ ਤੇਹਿ ਦਿਨ੍ਨਕਪ੍ਪਿਯਕੁਟਿ ਵਾ ਗਹਪਤੀਤਿ ਵੁਚ੍ਚਤੀ’’ਤਿ ਵੁਤ੍ਤਂ, ਪੁਨਪਿ ਵੁਤ੍ਤਂ ‘‘ਭਿਕ੍ਖੁਸਙ੍ਘਸ੍ਸ ਵਿਹਾਰਂ ਠਪੇਤ੍ਵਾ ਭਿਕ੍ਖੁਨੁਪਸ੍ਸਯੋ ਵਾ ਆਰਾਮਿਕਾਨਂ ਵਾ ਤਿਤ੍ਥਿਯਾਨਂ ਵਾ ਦੇਵਤਾਨਂ ਵਾ ਨਾਗਾਨਂ ਵਾ ਅਪਿ ਬ੍ਰਹ੍ਮਾਨਂ ਵਿਮਾਨਂ ਕਪ੍ਪਿਯਕੁਟਿ ਹੋਤੀ’’ਤਿ, ਤਂ ਸੁਵੁਤ੍ਤਂ. ਸਙ੍ਘਸਨ੍ਤਕਮੇਵ ਹਿ ਭਿਕ੍ਖੁਸਨ੍ਤਕਂ ਵਾ ਗੇਹਂ ਗਹਪਤਿਕੁਟਿਕਾ ਨ ਹੋਤਿ.

ਸਮ੍ਮੁਤਿ ਨਾਮ ਞਤ੍ਤਿਦੁਤਿਯਕਮ੍ਮਵਾਚਾਯ ਸਾਵੇਤ੍ਵਾ ਸਮ੍ਮਤਾ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਾ, ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ ਸਙ੍ਘੋ ਇਤ੍ਥਨ੍ਨਾਮਂ ਵਿਹਾਰਂ ਕਪ੍ਪਿਯਭੂਮਿਂ ਸਮ੍ਮਨ੍ਨੇਯ੍ਯ, ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਵਿਹਾਰਂ ਕਪ੍ਪਿਯਭੂਮਿਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਵਿਹਾਰਸ੍ਸ ਕਪ੍ਪਿਯਭੂਮਿਯਾ ਸਮ੍ਮੁਤਿ, ਸੋ ਤੁਣ੍ਹਸ੍ਸ. ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਵਿਹਾਰੋ ਕਪ੍ਪਿਯਭੂਮਿ ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ (ਮਹਾਵ. ੨੯੫).

ਕਮ੍ਮਵਾਚਂ ਅਵਤ੍ਵਾ ਅਪਲੋਕਨਕਮ੍ਮਵਸੇਨ ਸਾਵੇਤ੍ਵਾ ਕਤਾਪਿ ਸਮ੍ਮਤਾ ਏਵ.

੧੦੨. ਯਂ (ਮਹਾਵ. ਅਟ੍ਠ. ੨੯੫) ਇਮਾਸੁ ਚਤੂਸੁ ਕਪ੍ਪਿਯਭੂਮੀਸੁ ਵੁਤ੍ਤਂ ਆਮਿਸਂ, ਤਂ ਸਬ੍ਬਂ ਅਨ੍ਤੋਵੁਤ੍ਥਸਙ੍ਖ੍ਯਂ ਨ ਗਚ੍ਛਤਿ. ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ ਅਨ੍ਤੋਵੁਤ੍ਥਅਨ੍ਤੋਪਕ੍ਕਮੋਚਨਤ੍ਥਞ੍ਹਿ ਕਪ੍ਪਿਯਕੁਟਿਯੋ ਅਨੁਞ੍ਞਾਤਾ. ਯਂ ਪਨ ਅਕਪ੍ਪਿਯਭੂਮਿਯਂ ਸਹਸੇਯ੍ਯਪ੍ਪਹੋਨਕੇ ਗੇਹੇ ਵੁਤ੍ਤਂ ਸਙ੍ਘਿਕਂ ਵਾ ਪੁਗ੍ਗਲਿਕਂ ਵਾ ਭਿਕ੍ਖੁਸ੍ਸ ਭਿਕ੍ਖੁਨਿਯਾ ਵਾ ਸਨ੍ਤਕਂ ਏਕਰਤ੍ਤਮ੍ਪਿ ਠਪਿਤਂ, ਤਂ ਅਨ੍ਤੋਵੁਤ੍ਥਂ, ਤਤ੍ਥ ਪਕ੍ਕਞ੍ਚ ਅਨ੍ਤੋਪਕ੍ਕਂ ਨਾਮ ਹੋਤਿ, ਏਤਂ ਨ ਕਪ੍ਪਤਿ. ਸਤ੍ਤਾਹਕਾਲਿਕਂ ਪਨ ਯਾਵਜੀਵਿਕਞ੍ਚ ਵਟ੍ਟਤਿ.

ਤਤ੍ਰਾਯਂ ਵਿਨਿਚ੍ਛਯੋ – ਸਾਮਣੇਰੋ ਭਿਕ੍ਖੁਸ੍ਸ ਤਣ੍ਡੁਲਾਦਿਕਂ ਆਮਿਸਂ ਆਹਰਿਤ੍ਵਾ ਕਪ੍ਪਿਯਕੁਟਿਯਂ ਨਿਕ੍ਖਿਪਿਤ੍ਵਾ ਪੁਨਦਿਵਸੇ ਪਚਿਤ੍ਵਾ ਦੇਤਿ, ਅਨ੍ਤੋਵੁਤ੍ਥਂ ਨ ਹੋਤਿ. ਤਤ੍ਥ ਅਕਪ੍ਪਿਯਕੁਟਿਯਂ ਨਿਕ੍ਖਿਤ੍ਤਸਪ੍ਪਿਆਦੀਸੁ ਕਿਞ੍ਚਿ ਪਕ੍ਖਿਪਿਤ੍ਵਾ ਦੇਤਿ. ਮੁਖਸਨ੍ਨਿਧਿ ਨਾਮ ਹੋਤਿ. ਮਹਾਪਚ੍ਚਰਿਯਂ ਪਨ ‘‘ਅਨ੍ਤੋਵੁਤ੍ਥਂ ਹੋਤੀ’’ਤਿ ਵੁਤ੍ਤਂ. ਤਤ੍ਥ ਨਾਮਮਤ੍ਤਮੇਵ ਨਾਨਾਕਰਣਂ, ਭਿਕ੍ਖੁ ਅਕਪ੍ਪਿਯਕੁਟਿਯਂ ਠਪਿਤਸਪ੍ਪਿਞ੍ਚ ਯਾਵਜੀਵਿਕਪਣ੍ਣਞ੍ਚ ਏਕਤੋ ਪਚਿਤ੍ਵਾ ਪਰਿਭੁਞ੍ਜਤਿ, ਸਤ੍ਤਾਹਂ ਨਿਰਾਮਿਸਂ ਵਟ੍ਟਤਿ. ਸਚੇ ਆਮਿਸਸਂਸਟ੍ਠਂ ਕਤ੍ਵਾ ਪਰਿਭੁਞ੍ਜਤਿ, ਅਨ੍ਤੋਵੁਤ੍ਥਞ੍ਚੇਵ ਸਾਮਂਪਕ੍ਕਞ੍ਚ ਹੋਤਿ. ਏਤੇਨੁਪਾਯੇਨ ਸਬ੍ਬਸਂਸਗ੍ਗਾ ਵੇਦਿਤਬ੍ਬਾ. ਯਂ ਕਿਞ੍ਚਿ ਆਮਿਸਂ ਭਿਕ੍ਖੁਨੋ ਪਚਿਤੁਂ ਨ ਵਟ੍ਟਤਿ. ਸਚੇਪਿਸ੍ਸ ਉਣ੍ਹਯਾਗੁਯਾ ਸੁਲਸਿਪਣ੍ਣਾਨਿ ਵਾ ਸਿਙ੍ਗਿਵੇਰਂ ਵਾ ਲੋਣਂ ਵਾ ਪਕ੍ਖਿਪਨ੍ਤਿ, ਤਮ੍ਪਿ ਚਾਲੇਤੁਂ ਨ ਵਟ੍ਟਤਿ, ‘‘ਯਾਗੁਂ ਨਿਬ੍ਬਾਪੇਮੀ’’ਤਿ ਪਨ ਚਾਲੇਤੁਂ ਵਟ੍ਟਤਿ. ਉਤ੍ਤਣ੍ਡੁਲਭਤ੍ਤਂ ਲਭਿਤ੍ਵਾ ਪਿਦਹਿਤੁਂ ਨ ਵਟ੍ਟਤਿ. ਸਚੇ ਪਨ ਮਨੁਸ੍ਸਾ ਪਿਦਹਿਤ੍ਵਾ ਦੇਨ੍ਤਿ, ਵਟ੍ਟਤਿ. ‘‘ਭਤ੍ਤਂ ਮਾ ਨਿਬ੍ਬਾਯਤੂ’’ਤਿ ਪਿਦਹਿਤੁਂ ਵਟ੍ਟਤਿ, ਖੀਰਤਕ੍ਕਾਦੀਸੁ ਪਨ ਸਕਿਂ ਕੁਥਿਤੇਸੁ ਅਗ੍ਗਿਂ ਕਾਤੁਂ ਵਟ੍ਟਤਿ ਪੁਨਪਾਕਸ੍ਸ ਅਨੁਞ੍ਞਾਤਤ੍ਤਾ.

ਇਮਾ ਪਨ ਕਪ੍ਪਿਯਕੁਟਿਯੋ ਕਦਾ ਜਹਿਤਵਤ੍ਥੁਕਾ ਹੋਨ੍ਤਿ? ਉਸ੍ਸਾਵਨਨ੍ਤਿਕਾ ਤਾਵ ਯਾ ਥਮ੍ਭਾਨਂ ਉਪਰਿ ਭਿਤ੍ਤਿਪਾਦੇ ਵਾ ਨਿਖਨਿਤ੍ਵਾ ਕਤਾ, ਸਾ ਸਬ੍ਬੇਸੁ ਥਮ੍ਭੇਸੁ ਚ ਭਿਤ੍ਤਿਪਾਦੇਸੁ ਚ ਅਪਨੀਤੇਸੁ ਜਹਿਤਵਤ੍ਥੁਕਾ ਹੋਤਿ. ਸਚੇ ਪਨ ਥਮ੍ਭੇ ਵਾ ਭਿਤ੍ਤਿਪਾਦੇ ਵਾ ਪਰਿਵਤ੍ਤੇਨ੍ਤਿ, ਯੋ ਯੋ ਠਿਤੋ, ਤਤ੍ਥ ਤਤ੍ਥ ਪਤਿਟ੍ਠਾਤਿ, ਸਬ੍ਬੇਸੁਪਿ ਪਰਿਵਤ੍ਤਿਤੇਸੁ ਅਜਹਿਤਵਤ੍ਥੁਕਾਵ ਹੋਤਿ. ਇਟ੍ਠਕਾਦੀਹਿ ਕਤਾ ਚਯਸ੍ਸ ਉਪਰਿ ਭਿਤ੍ਤਿਅਤ੍ਥਾਯ ਠਪਿਤਂ ਇਟ੍ਠਕਂ ਵਾ ਸਿਲਂ ਵਾ ਮਤ੍ਤਿਕਾਪਿਣ੍ਡਂ ਵਾ ਆਦਿਂ ਕਤ੍ਵਾ ਵਿਨਾਸਿਤਕਾਲੇ ਜਹਿਤਵਤ੍ਥੁਕਾਵ ਹੋਤਿ. ਯੇਹਿ ਪਨ ਇਟ੍ਠਕਾਦੀਹਿ ਅਧਿਟ੍ਠਿਤਾ, ਤੇਸੁ ਅਪਨੀਤੇਸੁਪਿ ਤਦਞ੍ਞੇਸੁ ਪਤਿਟ੍ਠਾਤੀਤਿ ਅਜਹਿਤਵਤ੍ਥੁਕਾਵ ਹੋਤਿ. ਗੋਨਿਸਾਦਿਕਾ ਪਾਕਾਰਾਦੀਹਿ ਪਰਿਕ੍ਖੇਪੇ ਕਤੇ ਜਹਿਤਵਤ੍ਥੁਕਾਵ ਹੋਤਿ. ਪੁਨ ਤਸ੍ਮਿਂ ਆਰਾਮੇ ਕਪ੍ਪਿਯਕੁਟਿਂ ਲਦ੍ਧੁਂ ਵਟ੍ਟਤਿ. ਸਚੇ ਪਨ ਪੁਨਪਿ ਪਾਕਾਰਾਦਯੋ ਤਤ੍ਥ ਤਤ੍ਥ ਖਣ੍ਡਾ ਹੋਨ੍ਤਿ, ਤਤੋ ਤਤੋ ਗਾਵੋ ਪਵਿਸਨ੍ਤਿ, ਪੁਨ ਕਪ੍ਪਿਯਕੁਟਿ ਹੋਤਿ. ਇਤਰਾ ਪਨ ਦ੍ਵੇ ਗੋਪਾਨਸੀਮਤ੍ਤਂ ਠਪੇਤ੍ਵਾ ਸਬ੍ਬਸ੍ਮਿਂ ਛਦਨੇ ਵਿਨਟ੍ਠੇ ਜਹਿਤਵਤ੍ਥੁਕਾਵ ਹੋਨ੍ਤਿ. ਸਚੇ ਗੋਪਾਨਸੀਨਂ ਉਪਰਿ ਏਕਮ੍ਪਿ ਪਕ੍ਖਪਾਸਕਮਣ੍ਡਲਂ ਅਤ੍ਥਿ, ਰਕ੍ਖਤਿ.

੧੦੩. ਯਤ੍ਰ ਪਨਿਮਾ ਚਤਸ੍ਸੋਪਿ ਕਪ੍ਪਿਯਭੂਮਿਯੋ ਨਤ੍ਥਿ, ਤਤ੍ਥ ਕਿਂ ਕਾਤਬ੍ਬਨ੍ਤਿ? ਅਨੁਪਸਮ੍ਪਨ੍ਨਸ੍ਸ ਦਤ੍ਵਾ ਤਸ੍ਸ ਸਨ੍ਤਕਂ ਕਤ੍ਵਾ ਪਰਿਭੁਞ੍ਜਿਤਬ੍ਬਂ. ਤਤ੍ਰਿਦਂ ਵਤ੍ਥੁ – ਕਰਵਿਕਤਿਸ੍ਸਤ੍ਥੇਰੋ ਕਿਰ ਵਿਨਯਧਰਪਾਮੋਕ੍ਖੋ ਮਹਾਸੀਵਤ੍ਥੇਰਸ੍ਸ ਸਨ੍ਤਿਕਂ ਅਗਮਾਸਿ. ਸੋ ਦੀਪਾਲੋਕੇਨ ਸਪ੍ਪਿਕੁਮ੍ਭਂ ਪਸ੍ਸਿਤ੍ਵਾ ‘‘ਭਨ੍ਤੇ, ਕਿਮੇਤ’’ਨ੍ਤਿ ਪੁਚ੍ਛਿ. ਥੇਰੋ ‘‘ਆਵੁਸੋ, ਗਾਮਤੋ ਸਪ੍ਪਿਕੁਮ੍ਭੋ ਆਭਤੋ ਲੂਖਦਿਵਸੇ ਸਪ੍ਪਿਨਾ ਭੁਞ੍ਜਨਤ੍ਥਾਯਾ’’ਤਿ ਆਹ. ਤਤੋ ਨਂ ਤਿਸ੍ਸਤ੍ਥੇਰੋ ‘‘ਨ ਵਟ੍ਟਤਿ, ਭਨ੍ਤੇ’’ਤਿ ਆਹ. ਥੇਰੋ ਪੁਨਦਿਵਸੇ ਪਮੁਖੇ ਨਿਕ੍ਖਿਪਾਪੇਸਿ. ਤਿਸ੍ਸਤ੍ਥੇਰੋ ਪੁਨ ਏਕਦਿਵਸਂ ਆਗਤੋ ਤਂ ਦਿਸ੍ਵਾ ਤਥੇਵ ਪੁਚ੍ਛਿਤ੍ਵਾ ‘‘ਭਨ੍ਤੇ, ਸਹਸੇਯ੍ਯਪ੍ਪਹੋਨਕਟ੍ਠਾਨੇ ਠਪੇਤੁਂ ਨ ਵਟ੍ਟਤੀ’’ਤਿ ਆਹ. ਥੇਰੋ ਪੁਨਦਿਵਸੇ ਬਹਿ ਨੀਹਰਾਪੇਤ੍ਵਾ ਨਿਕ੍ਖਿਪਾਪੇਸਿ, ਤਂ ਚੋਰਾ ਹਰਿਂਸੁ. ਸੋ ਪੁਨ ਏਕਦਿਵਸਂ ਆਗਤਂ ਤਿਸ੍ਸਤ੍ਥੇਰਮਾਹ ‘‘ਆਵੁਸੋ, ਤਯਾ ‘ਨ ਵਟ੍ਟਤੀ’ਤਿ ਵੁਤ੍ਤੇ ਸੋ ਕੁਮ੍ਭੋ ਬਹਿ ਨਿਕ੍ਖਿਤ੍ਤੋ ਚੋਰੇਹਿ ਹਟੋ’’ਤਿ. ਤਤੋ ਨਂ ਤਿਸ੍ਸਤ੍ਥੇਰੋ ਆਹ ‘‘ਨਨੁ, ਭਨ੍ਤੇ, ਅਨੁਪਸਮ੍ਪਨ੍ਨਸ੍ਸ ਦਾਤਬ੍ਬੋ ਅਸ੍ਸ, ਅਨੁਪਸਮ੍ਪਨ੍ਨਸ੍ਸ ਹਿ ਦਤ੍ਵਾ ਤਸ੍ਸ ਸਨ੍ਤਕਂ ਕਤ੍ਵਾ ਪਰਿਭੁਞ੍ਜਿਤੁਂ ਵਟ੍ਟਤੀ’’ਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਕਪ੍ਪਿਯਭੂਮਿਵਿਨਿਚ੍ਛਯਕਥਾ ਸਮਤ੍ਤਾ.