੧੮. ਕਾਲਿਕਵਿਨਿਚ੍ਛਯਕਥਾ

੮੯. ਕਾਲਿਕਾਨਿਪਿ ਚਤ੍ਤਾਰੀਤਿ ਏਤ੍ਥ (ਪਾਚਿ. ਅਟ੍ਠ. ੨੫੫-੨੫੬) ਯਾਵਕਾਲਿਕਂ ਯਾਮਕਾਲਿਕਂ ਸਤ੍ਤਾਹਕਾਲਿਕਂ ਯਾਵਜੀਵਿਕਨ੍ਤਿ ਇਮਾਨਿ ਚਤ੍ਤਾਰਿ ਕਾਲਿਕਾਨਿ ਵੇਦਿਤਬ੍ਬਾਨਿ. ਤਤ੍ਥ ਪੁਰੇਭਤ੍ਤਂ ਪਟਿਗ੍ਗਹੇਤ੍ਵਾ ਪਰਿਭੁਞ੍ਜਿਤਬ੍ਬਂ ਯਂ ਕਿਞ੍ਚਿ ਖਾਦਨੀਯਭੋਜਨੀਯਂ ਯਾਵ ਮਜ੍ਝਨ੍ਹਿਕਸਙ੍ਖਤੋ ਕਾਲੋ, ਤਾਵ ਪਰਿਭੁਞ੍ਜਿਤਬ੍ਬਤੋ ਯਾਵਕਾਲਿਕਂ. ਸਦ੍ਧਿਂ ਅਨੁਲੋਮਪਾਨੇਹਿ ਅਟ੍ਠਵਿਧਂ ਪਾਨਂ ਯਾਵ ਰਤ੍ਤਿਯਾ ਪਚ੍ਛਿਮਯਾਮਸਙ੍ਖਾਤੋ ਯਾਮੋ, ਤਾਵ ਪਰਿਭੁਞ੍ਜਿਤਬ੍ਬਤੋ ਯਾਮੋ ਕਾਲੋ ਅਸ੍ਸਾਤਿ ਯਾਮਕਾਲਿਕਂ. ਸਪ੍ਪਿਆਦਿ ਪਞ੍ਚਵਿਧਂ ਭੇਸਜ੍ਜਂ ਪਟਿਗ੍ਗਹੇਤ੍ਵਾ ਸਤ੍ਤਾਹਂ ਨਿਧੇਤਬ੍ਬਤੋ ਸਤ੍ਤਾਹੋ ਕਾਲੋ ਅਸ੍ਸਾਤਿ ਸਤ੍ਤਾਹਕਾਲਿਕਂ. ਠਪੇਤ੍ਵਾ ਉਦਕਂ ਅਵਸੇਸਂ ਸਬ੍ਬਮ੍ਪਿ ਪਟਿਗ੍ਗਹਿਤਂ ਯਾਵਜੀਵਂ ਪਰਿਹਰਿਤ੍ਵਾ ਸਤਿ ਪਚ੍ਚਯੇ ਪਰਿਭੁਞ੍ਜਿਤਬ੍ਬਤੋ ਯਾਵਜੀਵਿਕਨ੍ਤਿ ਵੁਚ੍ਚਤਿ.

੯੦. ਤਤ੍ਥ ਯਾਵਕਾਲਿਕੇਸੁ ਭੋਜਨੀਯਂ ਨਾਮ ਓਦਨੋ ਕੁਮ੍ਮਾਸੋ ਸਤ੍ਤੁ ਮਚ੍ਛੋ ਮਂਸਨ੍ਤਿ. ਪਞ੍ਚ ਭੋਜਨਾਨਿ ਯਾਮਕਾਲਿਕਂ ਸਤ੍ਤਾਹਕਾਲਿਕਂ ਯਾਵਜੀਵਿਕਞ੍ਚ ਠਪੇਤ੍ਵਾ ਅਵਸੇਸਂ ਖਾਦਨੀਯਂ ਨਾਮ. ਏਤ੍ਥ (ਪਾਚਿ. ਅਟ੍ਠ. ੨੪੮-੯) ਪਨ ਯਂ ਤਾਵ ਸਕ੍ਖਲਿਮੋਦਕਾਦਿ ਪੁਬ੍ਬਣ੍ਣਾਪਰਣ੍ਣਮਯਂ ਖਾਦਨੀਯਂ, ਤਤ੍ਥ ਵਤ੍ਤਬ੍ਬਮੇਵ ਨਤ੍ਥਿ. ਯਮ੍ਪਿ ਵਨਮੂਲਾਦਿਪ੍ਪਭੇਦਂ ਆਮਿਸਗਤਿਕਂ ਹੋਤਿ. ਸੇਯ੍ਯਥਿਦਂ – ਮੂਲਖਾਦਨੀਯਂ ਕਨ੍ਦਖਾਦਨੀਯਂ ਮੁਲ਼ਾਲਖਾਦਨੀਯਂ ਮਤ੍ਥਕਖਾਦਨੀਯਂ ਖਨ੍ਧਖਾਦਨੀਯਂ ਤਚਖਾਦਨੀਯਂ ਪਤ੍ਤਖਾਦਨੀਯਂ ਪੁਪ੍ਫਖਾਦਨੀਯਂ ਫਲਖਾਦਨੀਯਂ ਅਟ੍ਠਿਖਾਦਨੀਯਂ ਪਿਟ੍ਠਖਾਦਨੀਯਂ ਨਿਯ੍ਯਾਸਖਾਦਨੀਯਨ੍ਤਿ, ਇਦਮ੍ਪਿ ਖਾਦਨੀਯਸਙ੍ਖ੍ਯਮੇਵ ਗਚ੍ਛਤਿ.

ਤਤ੍ਥ ਪਨ ਆਮਿਸਗਤਿਕਸਲ੍ਲਕ੍ਖਣਤ੍ਥਂ ਇਦਂ ਮੁਖਮਤ੍ਤਨਿਦਸ੍ਸਨਂ – ਮੂਲਖਾਦਨੀਯੇ ਤਾਵ ਮੂਲਕਮੂਲਂ ਖਾਰਕਮੂਲਂ ਚਚ੍ਚੁਮੂਲਂ ਤਮ੍ਬਕਮੂਲਂ ਤਣ੍ਡੁਲੇਯ੍ਯਕਮੂਲਂ ਵਤ੍ਥੁਲੇਯ੍ਯਕਮੂਲਂ ਵਜਕਲਿਮੂਲਂ ਜਜ੍ਝਰਿਮੂਲਨ੍ਤਿ ਏਵਮਾਦੀਨਿ ਸੂਪੇਯ੍ਯਪਣ੍ਣਮੂਲਾਨਿ ਆਮਿਸਗਤਿਕਾਨਿ. ਏਤ੍ਥ ਚ ਵਜਕਲਿਮੂਲੇ ਜਰਟ੍ਠਂ ਛਿਨ੍ਦਿਤ੍ਵਾ ਛਡ੍ਡੇਨ੍ਤਿ, ਤਂ ਯਾਵਜੀਵਿਕਂ ਹੋਤਿ. ਅਞ੍ਞਮ੍ਪਿ ਏਵਰੂਪਂ ਏਤੇਨੇਵ ਨਯੇਨ ਵੇਦਿਤਬ੍ਬਂ. ਮੂਲਕਖਾਰਕਜਜ੍ਝਰਿਮੂਲਾਨਂ ਪਨ ਜਰਟ੍ਠਾਨਿਪਿ ਆਮਿਸਗਤਿਕਾਨੇਵਾਤਿ ਵੁਤ੍ਤਂ. ਯਾਨਿ ਪਨ ਪਾਲ਼ਿਯਂ –

‘‘ਅਨੁਜਾਨਾਮਿ, ਭਿਕ੍ਖਵੇ, ਮੂਲਾਨਿ ਭੇਸਜ੍ਜਾਨਿ ਹਲਿਦ੍ਦਿਂ ਸਿਙ੍ਗਿਵੇਰਂ ਵਚਂ ਵਚਤ੍ਤਂ ਅਤਿਵਿਸਂ ਕਟੁਕਰੋਹਿਣਿਂ ਉਸੀਰਂ ਭਦ੍ਦਮੁਤ੍ਤਕਂ, ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਮੂਲਾਨਿ ਭੇਸਜ੍ਜਾਨਿ ਨੇਵ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤੀ’’ਤਿ (ਮਹਾਵ. ੨੬੩) –

ਵੁਤ੍ਤਾਨਿ, ਤਾਨਿ ਯਾਵਜੀਵਿਕਾਨਿ. ਤੇਸਂ ਚੂਲ਼ਪਞ੍ਚਮੂਲਂ ਮਹਾਪਞ੍ਚਮੂਲਨ੍ਤਿਆਦਿਨਾ ਨਯੇਨ ਗਣਿਯਮਾਨਾਨਂ ਗਣਨਾਯ ਅਨ੍ਤੋ ਨਤ੍ਥਿ, ਖਾਦਨੀਯਤ੍ਥਞ੍ਚ ਭੋਜਨੀਯਤ੍ਥਞ੍ਚ ਅਫਰਣਭਾਵੋਯੇਵ ਪਨੇਤੇਸਂ ਲਕ੍ਖਣਂ. ਤਸ੍ਮਾ ਯਂ ਕਿਞ੍ਚਿ ਮੂਲਂ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਤਿ, ਤਂ ਯਾਵਕਾਲਿਕਂ, ਇਤਰਂ ਯਾਵਜੀਵਿਕਨ੍ਤਿ ਵੇਦਿਤਬ੍ਬਂ. ਸੁਬਹੁਂ ਵਤ੍ਵਾਪਿ ਹਿ ਇਮਸ੍ਮਿਂਯੇਵ ਲਕ੍ਖਣੇ ਠਾਤਬ੍ਬਂ. ਨਾਮਸਞ੍ਞਾਸੁ ਪਨ ਵੁਚ੍ਚਮਾਨਾਸੁ ਤਂ ਤਂ ਨਾਮਂ ਅਜਾਨਨ੍ਤਾਨਂ ਸਮ੍ਮੋਹੋਯੇਵ ਹੋਤਿ, ਤਸ੍ਮਾ ਨਾਮਸਞ੍ਞਾਯ ਆਦਰਂ ਅਕਤ੍ਵਾ ਲਕ੍ਖਣਮੇਵ ਦਸ੍ਸਿਤਂ. ਯਥਾ ਚ ਮੂਲੇ, ਏਵਂ ਕਨ੍ਦਾਦੀਸੁਪਿ ਲਕ੍ਖਣਂ ਦਸ੍ਸਯਿਸ੍ਸਾਮ, ਤਸ੍ਸੇਵ ਵਸੇਨ ਵਿਨਿਚ੍ਛਯੋ ਵੇਦਿਤਬ੍ਬੋ. ਯਞ੍ਚ ਤਂ ਪਾਲ਼ਿਯਂ ਹਲਿਦ੍ਦਾਦਿ ਅਟ੍ਠਵਿਧਂ ਵੁਤ੍ਤਂ, ਤਸ੍ਸ ਖਨ੍ਧਤਚਪੁਪ੍ਫਫਲਾਦਿ ਸਬ੍ਬਂ ਯਾਵਜੀਵਿਕਨ੍ਤਿ ਵੁਤ੍ਤਂ.

ਕਨ੍ਦਖਾਦਨੀਯੇ ਦੁਵਿਧੋ ਕਨ੍ਦੋ ਦੀਘੋ ਚ ਭਿਸਕਿਂਸੁਕਕਨ੍ਦਾਦਿ, ਵਟ੍ਟੋ ਚ ਉਪ੍ਪਲਕਸੇਰੁਕਕਨ੍ਦਾਦਿ, ਯਂ ਗਣ੍ਠੀਤਿਪਿ ਵਦਨ੍ਤਿ. ਤਤ੍ਥ ਸਬ੍ਬੇਸਂ ਕਨ੍ਦਾਨਂ ਜਿਣ੍ਣਜਰਟ੍ਠਟ੍ਠਾਨਞ੍ਚ ਛਲ੍ਲਿ ਚ ਸੁਖੁਮਮੂਲਾਨਿ ਚ ਯਾਵਜੀਵਿਕਾਨਿ, ਤਰੁਣੋ ਪਨ ਸੁਖਖਾਦਨੀਯੋ ਸਾਲਕਲ੍ਯਾਣਿਪੋਤਕਕਨ੍ਦੋ ਕਿਂਸੁਕਪੋਤਕਕਨ੍ਦੋ ਅਮ੍ਬਾਟਕਕਨ੍ਦੋ ਕੇਤਕਕਨ੍ਦੋ ਮਾਲੁਵਕਨ੍ਦੋ ਭਿਸਸਙ੍ਖਾਤੋ ਪਦੁਮਪੁਣ੍ਡਰੀਕਕਨ੍ਦੋ ਪਿਣ੍ਡਾਲੁਮਸਾਲੁਆਦਯੋ ਚ ਖੀਰਵਲ੍ਲਿਕਨ੍ਦੋ ਆਲੁਵਕਨ੍ਦੋ ਸਿਗ੍ਗੁਕਨ੍ਦੋ ਤਾਲਕਨ੍ਦੋ ਨੀਲੁਪ੍ਪਲਰਤ੍ਤੁਪ੍ਪਲਕੁਮੁਦਸੋਗਨ੍ਧਿਕਾਨਂ ਕਨ੍ਦਾ ਕਦਲਿਕਨ੍ਦੋ ਵੇਲ਼ੁਕਨ੍ਦੋ ਕਸੇਰੁਕਕਨ੍ਦੋਤਿ ਏਵਮਾਦਯੋ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਞ੍ਚ ਭੋਜਨੀਯਤ੍ਥਞ੍ਚ ਫਰਣਕਕਨ੍ਦਾ ਯਾਵਕਾਲਿਕਾ. ਖੀਰਵਲ੍ਲਿਕਨ੍ਦੋ ਅਧੋਤੋ ਯਾਵਜੀਵਿਕੋ, ਧੋਤੋ ਯਾਵਕਾਲਿਕੋ. ਖੀਰਕਾਕੋਲਿਜੀਵਿਕਉਸਭਕਲਸੁਣਾਦਿਕਨ੍ਦਾ ਪਨ ਯਾਵਜੀਵਿਕਾ. ਤੇ ਪਾਲ਼ਿਯਂ ‘‘ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਮੂਲਾਨਿ ਭੇਸਜ੍ਜਾਨੀ’’ਤਿ ਏਵਂ (ਮਹਾਵ. ੨੬੩) ਮੂਲਭੇਸਜ੍ਜਸਙ੍ਗਹੇਨੇਵ ਸਙ੍ਗਹਿਤਾ.

ਮੁਲ਼ਾਲਖਾਦਨੀਯੇ ਪਦੁਮਮੁਲ਼ਾਲਂ ਪੁਣ੍ਡਰੀਕਮੁਲ਼ਾਲਂ ਮੂਲਸਦਿਸਂਯੇਵ. ਏਰਕਮੁਲ਼ਾਲਂ ਕਨ੍ਦੁਲਮੁਲ਼ਾਲਨ੍ਤਿ ਏਵਮਾਦਿ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਣਕਮੁਲ਼ਾਲਂ ਯਾਵਕਾਲਿਕਂ, ਹਲਿਦ੍ਦਿਸਿਙ੍ਗਿਵੇਰਮਕਚਿਚਤੁਰਸ੍ਸਵਲ੍ਲਿਕੇਤਕਤਾਲਹਿਨ੍ਤਾਲਕੁਨ੍ਤਾਲਨਾਲ਼ਿਕੇਰਪੂਗਰੁਕ੍ਖਾਦਿਮੁਲ਼ਾਲਂ ਪਨ ਯਾਵਜੀਵਿਕਂ. ਤਂ ਸਬ੍ਬਮ੍ਪਿ ਪਾਲ਼ਿਯਂ ‘‘ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਮੂਲਾਨਿ ਭੇਸਜ੍ਜਾਨੀ’’ਤਿ ਏਵਂ ਮੂਲਭੇਸਜ੍ਜਸਙ੍ਗਹੇਨੇਵ ਸਙ੍ਗਹਿਤਂ.

ਮਤ੍ਥਕਖਾਦਨੀਯੇ ਤਾਲਹਿਨ੍ਤਾਲਕੁਨ੍ਤਾਲਕੇਤਕਨਾਲ਼ਿਕੇਰਪੂਗਰੁਕ੍ਖਖਜ੍ਜੂਰਿਵੇਤ੍ਤਏਰਕਕਦਲੀਨਂ ਕਲ਼ੀਰਸਙ੍ਖਾਤਾ ਮਤ੍ਥਕਾ, ਵੇਣੁਕਲ਼ੀਰੋ ਨਲ਼ਕਲ਼ੀਰੋ ਉਚ੍ਛੁਕਲ਼ੀਰੋ ਮੂਲਕਕਲ਼ੀਰੋ ਸਾਸਪਕਲ਼ੀਰੋ ਸਤਾਵਰਿਕਲ਼ੀਰੋ ਸਤ੍ਤਨ੍ਨਂ ਧਞ੍ਞਾਨਂ ਕਲ਼ੀਰਾਤਿ ਏਵਮਾਦਿ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਣਕੋ ਰੁਕ੍ਖਵਲ੍ਲਿਆਦੀਨਂ ਮਤ੍ਥਕੋ ਯਾਵਕਾਲਿਕੋ, ਹਲਿਦ੍ਦਿਸਿਙ੍ਗਿਵੇਰਵਚਮਕਚਿਲਸੁਣਾਨਂ ਕਲ਼ੀਰਾ, ਤਾਲਹਿਨ੍ਤਾਲਕੁਨ੍ਤਾਲਨਾਲ਼ਿਕੇਰਕਲ਼ੀਰਾਨਞ੍ਚ ਛਿਨ੍ਦਿਤ੍ਵਾ ਪਾਤਿਤੋ ਜਰਟ੍ਠਬੁਨ੍ਦੋ ਯਾਵਜੀਵਿਕੋ.

ਖਨ੍ਧਖਾਦਨੀਯੇ ਅਨ੍ਤੋਪਥਵੀਗਤੋ ਸਾਲਕਲ੍ਯਾਣੀਖਨ੍ਧੋ ਉਚ੍ਛੁਖਨ੍ਧੋ ਨੀਲੁਪ੍ਪਲਰਤ੍ਤੁਪ੍ਪਲਕੁਮੁਦਸੋਗਨ੍ਧਿਕਾਨਂ ਦਣ੍ਡਕਖਨ੍ਧਾਤਿ ਏਵਮਾਦਿ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਣਕੋ ਖਨ੍ਧੋ ਯਾਵਕਾਲਿਕੋ, ਉਪ੍ਪਲਜਾਤੀਨਂ ਪਣ੍ਣਦਣ੍ਡਕੋ ਪਦੁਮਜਾਤੀਨਂ ਸਬ੍ਬੋਪਿ ਦਣ੍ਡਕੋ ਕਰਵਿਨ੍ਦਦਣ੍ਡਾਦਯੋ ਚ ਅਵਸੇਸਸਬ੍ਬਖਨ੍ਧਾ ਯਾਵਜੀਵਿਕਾ.

ਤਚਖਾਦਨੀਯੇ ਉਚ੍ਛੁਤਚੋਵ ਏਕੋ ਯਾਵਕਾਲਿਕੋ, ਸੋਪਿ ਸਰਸੋ, ਸੇਸੋ ਸਬ੍ਬੋ ਯਾਵਜੀਵਿਕੋ. ਤੇਸਂ ਪਨ ਮਤ੍ਥਕਖਨ੍ਧਤਚਾਨਂ ਤਿਣ੍ਣਮ੍ਪਿ ਪਾਲ਼ਿਯਂ ਕਸਾਵਭੇਸਜ੍ਜੇਨ ਸਙ੍ਗਹੋ ਵੇਦਿਤਬ੍ਬੋ. ਵੁਤ੍ਤਞ੍ਹੇਤਂ –

‘‘ਅਨੁਜਾਨਾਮਿ, ਭਿਕ੍ਖਵੇ, ਕਸਾਵਾਨਿ ਭੇਸਜ੍ਜਾਨਿ ਨਿਮ੍ਬਕਸਾਵਂ ਕੁਟਜਕਸਾਵਂ ਪਟੋਲਕਸਾਵਂ ਫਗ੍ਗਵਕਸਾਵਂ ਨਤ੍ਤਮਾਲਕਸਾਵਂ, ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਕਸਾਵਾਨਿ ਭੇਸਜ੍ਜਾਨਿ ਨੇਵ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤੀ’’ਤਿ (ਮਹਾਵ. ੨੬੩).

ਏਤ੍ਥ ਹਿ ਏਤੇਸਮ੍ਪਿ ਸਙ੍ਗਹੋ ਸਿਜ੍ਝਤਿ. ਵੁਤ੍ਤਕਸਾਵਾਨਿ ਚ ਸਬ੍ਬਕਪ੍ਪਿਯਾਨੀਤਿ ਵੇਦਿਤਬ੍ਬਾਨਿ.

ਪਤ੍ਤਖਾਦਨੀਯੇ ਮੂਲਕਂ ਖਾਰਕੋ ਚਚ੍ਚੁ ਤਮ੍ਬਕੋ ਤਣ੍ਡੁਲੇਯ੍ਯਕੋ ਪਪੁਨ੍ਨਾਗੋ ਵਤ੍ਥੁਲੇਯ੍ਯਕੋ ਵਜਕਲਿ ਜਜ੍ਝਰਿ ਸੇਲ੍ਲੁ ਸਿਗ੍ਗੁ ਕਾਸਮਦ੍ਦਕੋ ਉਮ੍ਮਾਚੀਨਮੁਗ੍ਗੋ ਮਾਸੋ ਰਾਜਮਾਸੋ ਠਪੇਤ੍ਵਾ ਮਹਾਨਿਪ੍ਫਾਵਂ ਅਵਸੇਸਨਿਪ੍ਫਾਵੋ ਅਗ੍ਗਿਮਨ੍ਥੋ ਸੁਨਿਸਨ੍ਨਕੋ ਸੇਤਵਰਣੋ ਨਾਲ਼ਿਕਾ ਭੂਮਿਯਂ ਜਾਤਲੋਣੀਤਿ ਏਤੇਸਂ ਪਤ੍ਤਾਨਿ, ਅਞ੍ਞਾਨਿ ਚ ਏਵਰੂਪਾਨਿ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਞ੍ਚ ਭੋਜਨੀਯਤ੍ਥਞ੍ਚ ਫਰਣਕਾਨਿ ਪਤ੍ਤਾਨਿ ਏਕਂਸੇਨ ਯਾਵਕਾਲਿਕਾਨਿ, ਯਾ ਪਨਞ੍ਞਾ ਮਹਾਨਖਪਿਟ੍ਠਿਮਤ੍ਤਪਣ੍ਣਾ ਲੋਣਿਰੁਕ੍ਖੇ ਚ ਗਚ੍ਛੇ ਚ ਆਰੋਹਤਿ, ਤਸ੍ਸਾ ਪਤ੍ਤਂ ਯਾਵਜੀਵਿਕਂ. ਬ੍ਰਹ੍ਮਿਪਤ੍ਤਞ੍ਚ ਯਾਵਕਾਲਿਕਨ੍ਤਿ ਦੀਪਵਾਸਿਨੋ ਵਦਨ੍ਤਿ. ਅਮ੍ਬਪਲ੍ਲਵਂ ਯਾਵਕਾਲਿਕਂ, ਅਸੋਕਪਲ੍ਲਵਂ ਪਨ ਯਾਵਜੀਵਿਕਂ. ਯਾਨਿ ਚਞ੍ਞਾਨਿ ਪਾਲ਼ਿਯਂ –

‘‘ਅਨੁਜਾਨਾਮਿ, ਭਿਕ੍ਖਵੇ, ਪਣ੍ਣਾਨਿ ਭੇਸਜ੍ਜਾਨਿ ਨਿਮ੍ਬਪਣ੍ਣਂ ਕੁਟਜਪਣ੍ਣਂ ਪਟੋਲਪਣ੍ਣਂ ਸੁਲਸਿਪਣ੍ਣਂ ਕਪ੍ਪਾਸਪਣ੍ਣਂ, ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਪਣ੍ਣਾਨਿ ਭੇਸਜ੍ਜਾਨਿ ਨੇਵ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤੀ’’ਤਿ (ਮਹਾਵ. ੨੬੩) –

ਵੁਤ੍ਤਾਨਿ, ਤਾਨਿ ਯਾਵਜੀਵਿਕਾਨਿ. ਨ ਕੇਵਲਞ੍ਚ ਪਣ੍ਣਾਨਿ, ਤੇਸਂ ਪੁਪ੍ਫਫਲਾਨਿਪਿ. ਯਾਵਜੀਵਿਕਪਣ੍ਣਾਨਂ ਪਨ ਫਗ੍ਗਵਪਣ੍ਣਂ ਅਜ੍ਜੁਕਪਣ੍ਣਂ ਫਣਿਜ੍ਜਕਪਣ੍ਣਂ ਤਮ੍ਬੂਲਪਣ੍ਣਂ ਪਦੁਮਿਨਿਪਣ੍ਣਨ੍ਤਿ ਏਵਂ ਗਣਨਵਸੇਨ ਅਨ੍ਤੋ ਨਤ੍ਥਿ.

ਪੁਪ੍ਫਖਾਦਨੀਯੇ ਮੂਲਕਪੁਪ੍ਫਂ ਖਾਰਕਪੁਪ੍ਫਂ ਚਚ੍ਚੁਪੁਪ੍ਫਂ ਤਮ੍ਬਕਪੁਪ੍ਫਂ ਵਜਕਲਿਪੁਪ੍ਫਂ ਜਜ੍ਝਰਿਪੁਪ੍ਫਂ ਚੂਲ਼ਨਿਪ੍ਫਾਵਪੁਪ੍ਫਂ ਮਹਾਨਿਪ੍ਫਾਵਪੁਪ੍ਫਂ ਕਸੇਰੁਕਪੁਪ੍ਫਂ ਨਾਲ਼ਿਕੇਰਤਾਲਕੇਤਕਾਨਂ ਤਰੁਣਪੁਪ੍ਫਾਨਿ ਸੇਤਵਰਣਪੁਪ੍ਫਂ ਸਿਗ੍ਗੁਪੁਪ੍ਫਂ ਉਪ੍ਪਲਪਦੁਮਜਾਤਿਕਾਨਂ ਪੁਪ੍ਫਾਨਂ ਕਣ੍ਣਿਕਾਮਤ੍ਤਂ ਅਗਨ੍ਧਿਪੁਪ੍ਫਂ ਕਰੀਰਪੁਪ੍ਫਂ ਜੀਵਨ੍ਤੀ ਪੁਪ੍ਫਨ੍ਤਿ ਏਵਮਾਦਿ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਣਪੁਪ੍ਫਂ ਯਾਵਕਾਲਿਕਂ, ਅਸੋਕਬਕੁਲਕੁਯ੍ਯਕਪੁਨ੍ਨਾਗਚਮ੍ਪਕਜਾਤਿਕਰਵੀਰਕਣਿਕਾਰਕੁਨ੍ਦਨਵਮਾਲਿਕਮਲ੍ਲਿਕਾਦੀਨਂ ਪਨ ਪੁਪ੍ਫਂ ਯਾਵਜੀਵਿਕਂ, ਤਸ੍ਸ ਗਣਨਾਯ ਅਨ੍ਤੋ ਨਤ੍ਥਿ. ਪਾਲ਼ਿਯਂ ਪਨਸ੍ਸ ਕਸਾਵਭੇਸਜ੍ਜੇਨ ਸਙ੍ਗਹੋ ਵੇਦਿਤਬ੍ਬੋ.

ਫਲਖਾਦਨੀਯੇ ਪਨਸਲਬੁਜਤਾਲਨਾਲ਼ਿਕੇਰਅਮ੍ਬਜਮ੍ਬੁਅਮ੍ਬਾਟਕਤਿਨ੍ਤਿਣਿਕਮਾਤੁਲੁਙ੍ਗਕਪਿਤ੍ਥਲਾਬੁਕੁਮ੍ਭਣ੍ਡਪੁਸ੍ਸਫਲਤਿਮ੍ਬਰੂਸਕਤਿਪੁਸਵਾਤਿਙ੍ਗਣਚੋਚਮੋਚਮਧੁਕਾਦੀਨਂ ਫਲਾਨਿ, ਯਾਨਿ ਲੋਕੇ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਨ੍ਤਿ, ਸਬ੍ਬਾਨਿ ਤਾਨਿ ਯਾਵਕਾਲਿਕਾਨਿ, ਨਾਮਗਣਨਵਸੇਨ ਤੇਸਂ ਨ ਸਕ੍ਕਾ ਪਰਿਯਨ੍ਤਂ ਦਸ੍ਸੇਤੁਂ. ਯਾਨਿ ਪਨ ਪਾਲ਼ਿਯਂ –

‘‘ਅਨੁਜਾਨਾਮਿ, ਭਿਕ੍ਖਵੇ, ਫਲਾਨਿ ਭੇਸਜ੍ਜਾਨਿ ਬਿਲਙ੍ਗਂ ਪਿਪ੍ਪਲਿਂ ਮਰੀਚਂ ਹਰੀਤਕਂ ਵਿਭੀਤਕਂ ਆਮਲਕਂ ਗੋਟ੍ਠਫਲਂ, ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਫਲਾਨਿ ਭੇਸਜ੍ਜਾਨਿ ਨੇਵ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤੀ’’ਤਿ (ਮਹਾਵ. ੨੬੩) –

ਵੁਤ੍ਤਾਨਿ, ਤਾਨਿ ਯਾਵਜੀਵਿਕਾਨਿ. ਤੇਸਮ੍ਪਿ ਅਪਰਿਪਕ੍ਕਾਨਿ ਅਚ੍ਛਿਵਬਿਮ੍ਬਵਰਣਕੇਤਕਕਾਸ੍ਮਰੀਆਦੀਨਂ ਫਲਾਨਿ ਜਾਤਿਫਲਂ ਕਟੁਕਫਲਂ ਏਲ਼ਾ ਤਕ੍ਕੋਲਨ੍ਤਿ ਏਵਂ ਨਾਮਵਸੇਨ ਨ ਸਕ੍ਕਾ ਪਰਿਯਨ੍ਤਂ ਦਸ੍ਸੇਤੁਂ.

ਅਟ੍ਠਿਖਾਦਨੀਯੇ ਲਬੁਜਟ੍ਠਿ ਪਨਸਟ੍ਠਿ ਅਮ੍ਬਾਟਕਟ੍ਠਿ ਸਾਲਟ੍ਠਿ ਖਜ੍ਜੂਰੀਕੇਤਕਤਿਮ੍ਬਰੂਸਕਾਨਂ ਤਰੁਣਫਲਟ੍ਠਿ ਤਿਨ੍ਤਿਣਿਕਟ੍ਠਿ ਬਿਮ੍ਬਫਲਟ੍ਠਿ ਉਪ੍ਪਲਪਦੁਮਜਾਤੀਨਂ ਪੋਕ੍ਖਰਟ੍ਠੀਤਿ ਏਵਮਾਦੀਨਿ ਤੇਸੁ ਤੇਸੁ ਜਨਪਦੇਸੁ ਮਨੁਸ੍ਸਾਨਂ ਪਕਤਿਆਹਾਰਵਸੇਨ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਣਕਾਨਿ ਅਟ੍ਠੀਨਿ ਯਾਵਕਾਲਿਕਾਨਿ, ਮਧੁਕਟ੍ਠਿ ਪੁਨ੍ਨਾਗਟ੍ਠਿ ਹਰੀਤਕਾਦੀਨਂ ਅਟ੍ਠੀਨਿ ਸਿਦ੍ਧਤ੍ਥਕਟ੍ਠਿ ਰਾਜਿਕਟ੍ਠੀਤਿ ਏਵਮਾਦੀਨਿ ਅਟ੍ਠੀਨਿ ਯਾਵਜੀਵਿਕਾਨਿ. ਤੇਸਂ ਪਾਲ਼ਿਯਂ ਫਲਭੇਸਜ੍ਜੇਨੇਵ ਸਙ੍ਗਹੋ ਵੇਦਿਤਬ੍ਬੋ.

ਪਿਟ੍ਠਖਾਦਨੀਯੇ ਸਤ੍ਤਨ੍ਨਂ ਤਾਵ ਧਞ੍ਞਾਨਂ ਧਞ੍ਞਾਨੁਲੋਮਾਨਂ ਅਪਰਣ੍ਣਾਨਞ੍ਚ ਪਿਟ੍ਠਂ ਪਨਸਪਿਟ੍ਠਂ ਲਬੁਜਪਿਟ੍ਠਂ ਅਮ੍ਬਾਟਕਪਿਟ੍ਠਂ ਸਾਲਪਿਟ੍ਠਂ ਧੋਤਕਤਾਲਪਿਟ੍ਠਂ ਖੀਰਵਲ੍ਲਿਪਿਟ੍ਠਞ੍ਚਾਤਿ ਏਵਮਾਦੀਨਿ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਣਕਾਨਿ ਪਿਟ੍ਠਾਨਿ ਯਾਵਕਾਲਿਕਾਨਿ, ਅਧੋਤਕਂ ਤਾਲਪਿਟ੍ਠਂ ਖੀਰਵਲ੍ਲਿਪਿਟ੍ਠਂ ਅਸ੍ਸਗਨ੍ਧਾਦਿਪਿਟ੍ਠਾਨਿ ਚ ਯਾਵਜੀਵਿਕਾਨਿ. ਤੇਸਂ ਪਾਲ਼ਿਯਂ ਕਸਾਵੇਹਿ ਮੂਲਫਲੇਹਿ ਚ ਸਙ੍ਗਹੋ ਵੇਦਿਤਬ੍ਬੋ.

ਨਿਯ੍ਯਾਸਖਾਦਨੀਯੇ – ਏਕੋ ਉਚ੍ਛੁਨਿਯ੍ਯਾਸੋਵ ਸਤ੍ਤਾਹਕਾਲਿਕੋ, ਸੇਸਾ –

‘‘ਅਨੁਜਾਨਾਮਿ, ਭਿਕ੍ਖਵੇ, ਜਤੂਨਿ ਭੇਸਜ੍ਜਾਨਿ ਹਿਙ੍ਗੁਂ ਹਿਙ੍ਗੁਜਤੁਂ ਹਿਙ੍ਗੁਸਿਪਾਟਿਕਂ ਤਕਂ ਤਕਪਤ੍ਤਿਂ ਤਕਪਣ੍ਣਿਂ ਸਜ੍ਜੁਲਸਂ, ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਜਤੂਨਿ ਭੇਸਜ੍ਜਾਨੀ’’ਤਿ (ਮਹਾਵ. ੨੬੩) –

ਏਵਂ ਪਾਲ਼ਿਯਂ ਵੁਤ੍ਤਾ ਨਿਯ੍ਯਾਸਾ ਯਾਵਜੀਵਿਕਾ. ਤਤ੍ਥ ਯੇਵਾਪਨਕਵਸੇਨ ਸਙ੍ਗਹਿਤਾਨਂ ਅਮ੍ਬਨਿਯ੍ਯਾਸੋ ਕਣਿਕਾਰਨਿਯ੍ਯਾਸੋਤਿ ਏਵਂ ਨਾਮਵਸੇਨ ਨ ਸਕ੍ਕਾ ਪਰਿਯਨ੍ਤਂ ਦਸ੍ਸੇਤੁਂ. ਏਵਂ ਇਮੇਸੁ ਮੂਲਖਾਦਨੀਯਾਦੀਸੁ ਯਂ ਕਿਞ੍ਚਿ ਯਾਵਕਾਲਿਕਂ, ਸਬ੍ਬਮ੍ਪਿ ਇਮਸ੍ਮਿਂ ਅਤ੍ਥੇ ਅਵਸੇਸਂ ਖਾਦਨੀਯਂ ਨਾਮਾਤਿ ਸਙ੍ਗਹਿਤਂ.

੯੧. ਯਾਮਕਾਲਿਕੇਸੁ ਪਨ ਅਟ੍ਠ ਪਾਨਾਨਿ ਨਾਮ ਅਮ੍ਬਪਾਨਂ ਜਮ੍ਬੁਪਾਨਂ ਚੋਚਪਾਨਂ ਮੋਚਪਾਨਂ ਮਧੁਕਪਾਨਂ ਮੁਦ੍ਦਿਕਪਾਨਂ ਸਾਲੂਕਪਾਨਂ ਫਾਰੁਸਕਪਾਨਨ੍ਤਿ ਇਮਾਨਿ ਅਟ੍ਠ ਪਾਨਾਨਿ. ਤਤ੍ਥ (ਮਹਾਵ. ਅਟ੍ਠ. ੩੦੦) ਅਮ੍ਬਪਾਨਨ੍ਤਿ ਆਮੇਹਿ ਵਾ ਪਕ੍ਕੇਹਿ ਵਾ ਅਮ੍ਬੇਹਿ ਕਤਪਾਨਂ. ਤਤ੍ਥ ਆਮੇਹਿ ਕਰੋਨ੍ਤੇਨ ਅਮ੍ਬਤਰੁਣਾਨਿ ਭਿਨ੍ਦਿਤ੍ਵਾ ਉਦਕੇ ਪਕ੍ਖਿਪਿਤ੍ਵਾ ਆਤਪੇ ਆਦਿਚ੍ਚਪਾਕੇਨ ਪਚਿਤ੍ਵਾ ਪਰਿਸ੍ਸਾਵੇਤ੍ਵਾ ਤਦਹੁਪਟਿਗ੍ਗਹਿਤਕੇਹਿ ਮਧੁਸਕ੍ਕਾਰਕਪ੍ਪੂਰਾਦੀਹਿ ਯੋਜੇਤ੍ਵਾ ਕਾਤਬ੍ਬਂ, ਏਵਂ ਕਤਂ ਪੁਰੇਭਤ੍ਤਮੇਵ ਕਪ੍ਪਤਿ. ਅਨੁਪਸਮ੍ਪਨ੍ਨੇਹਿ ਕਤਂ ਲਭਿਤ੍ਵਾ ਪਨ ਪੁਰੇਭਤ੍ਤਂ ਪਟਿਗ੍ਗਹਿਤਂ ਪੁਰੇਭਤ੍ਤਂ ਸਾਮਿਸਪਰਿਭੋਗੇਨਪਿ ਵਟ੍ਟਤਿ, ਪਚ੍ਛਾਭਤ੍ਤਂ ਨਿਰਾਮਿਸਪਰਿਭੋਗੇਨ ਯਾਵ ਅਰੁਣੁਗ੍ਗਮਨਾ ਵਟ੍ਟਤਿ. ਏਸ ਨਯੋ ਸਬ੍ਬਪਾਨੇਸੁ. ਜਮ੍ਬੁਪਾਨਨ੍ਤਿ ਜਮ੍ਬੁਫਲੇਹਿ ਕਤਪਾਨਂ. ਚੋਚਪਾਨਨ੍ਤਿ ਅਟ੍ਠਿਕਕਦਲਿਫਲੇਹਿ ਕਤਪਾਨਂ. ਮੋਚਪਾਨਨ੍ਤਿ ਅਨਟ੍ਠਿਕੇਹਿ ਕਦਲਿਫਲੇਹਿ ਕਤਪਾਨਂ. ਮਧੁਕਪਾਨਨ੍ਤਿ ਮਧੁਕਾਨਂ ਜਾਤਿਰਸੇਨ ਕਤਪਾਨਂ. ਤਂ ਪਨ ਉਦਕਸਮ੍ਭਿਨ੍ਨਂ ਵਟ੍ਟਤਿ, ਸੁਦ੍ਧਂ ਨ ਵਟ੍ਟਤਿ. ਮੁਦ੍ਦਿਕਪਾਨਨ੍ਤਿ ਮੁਦ੍ਦਿਕਾ ਉਦਕੇ ਮਦ੍ਦਿਤ੍ਵਾ ਅਮ੍ਬਪਾਨਂ ਵਿਯ ਕਤਪਾਨਂ. ਸਾਲੂਕਪਾਨਨ੍ਤਿ ਰਤ੍ਤੁਪ੍ਪਲਨੀਲੁਪ੍ਪਲਾਦੀਨਂ ਸਾਲੂਕੇ ਮਦ੍ਦਿਤ੍ਵਾ ਕਤਪਾਨਂ. ਫਾਰੁਸਕਪਾਨਨ੍ਤਿ ਫਾਰੁਸਕਫਲੇਹਿ ਅਮ੍ਬਪਾਨਂ ਵਿਯ ਕਤਪਾਨਂ. ਇਮਾਨਿ ਅਟ੍ਠ ਪਾਨਾਨਿ ਸੀਤਾਨਿਪਿ ਆਦਿਚ੍ਚਪਾਕਾਨਿਪਿ ਵਟ੍ਟਨ੍ਤਿ, ਅਗ੍ਗਿਪਾਕਾਨਿ ਨ ਵਟ੍ਟਨ੍ਤਿ.

ਅਵਸੇਸਾਨਿ ਵੇਤ੍ਤਤਿਨ੍ਤਿਣਿਕਮਾਤੁਲੁਙ੍ਗਕਪਿਤ੍ਥਕੋਸਮ੍ਬਕਰਮਨ੍ਦਾਦਿਖੁਦ੍ਦਕਫਲਪਾਨਾਨਿ ਅਟ੍ਠਪਾਨਗਅਕਾਨੇਵ. ਤਾਨਿ ਕਿਞ੍ਚਾਪਿ ਪਾਲ਼ਿਯਂ ਨ ਵੁਤ੍ਤਾਨਿ, ਅਥ ਖੋ ਕਪ੍ਪਿਯਂ ਅਨੁਲੋਮੇਨ੍ਤਿ, ਤਸ੍ਮਾ ਕਪ੍ਪਨ੍ਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਂ ਫਲਰਸਂ ਠਪੇਤ੍ਵਾ ਧਞ੍ਞਫਲਰਸ’’ਨ੍ਤਿ (ਮਹਾਵ. ਅਟ੍ਠ. ੩੦੦) ਵੁਤ੍ਤਤ੍ਤਾ ਠਪੇਤ੍ਵਾ ਸਾਨੁਲੋਮਧਞ੍ਞਫਲਰਸਂ ਅਞ੍ਞਂ ਫਲਪਾਨਂ ਨਾਮ ਅਕਪ੍ਪਿਯਂ ਨਤ੍ਥਿ, ਸਬ੍ਬਂ ਯਾਮਕਾਲਿਕਮੇਵ. ਤਤ੍ਥ ਸਾਨੁਲੋਮਧਞ੍ਞਫਲਰਸੋ ਨਾਮ ਸਤ੍ਤਨ੍ਨਞ੍ਚੇਵ ਧਞ੍ਞਾਨਂ ਤਾਲਨਾਲ਼ਿਕੇਰਪਨਸਲਬੁਜਅਲਾਬੁਕੁਮ੍ਭਣ੍ਡਪੁਸ੍ਸਫਲਤਿਪੁਸਏਲ਼ਾਲੁਕਾਤਿ ਨਵਨ੍ਨਞ੍ਚ ਮਹਾਫਲਾਨਂ ਸਬ੍ਬੇਸਞ੍ਚ ਪੁਬ੍ਬਣ੍ਣਾਪਰਣ੍ਣਾਨਂ ਅਨੁਲੋਮਧਞ੍ਞਾਨਂ ਰਸੋ ਯਾਵਕਾਲਿਕੋ, ਤਸ੍ਮਾ ਪਚ੍ਛਾਭਤ੍ਤਂ ਨ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਂ ਪਤ੍ਤਰਸਂ ਠਪੇਤ੍ਵਾ ਡਾਕਰਸ’’ਨ੍ਤਿ (ਮਹਾਵ. ੩੦੦) ਵੁਤ੍ਤਤ੍ਤਾ ਪਕ੍ਕਡਾਕਰਸਂ ਠਪੇਤ੍ਵਾ ਯਾਵਕਾਲਿਕਪਤ੍ਤਾਨਮ੍ਪਿ ਸੀਤੋਦਕੇਨ ਮਦ੍ਦਿਤ੍ਵਾ ਕਤਰਸੋ ਵਾ ਆਦਿਚ੍ਚਪਾਕੋ ਵਾ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਂ ਪੁਪ੍ਫਰਸਂ ਠਪੇਤ੍ਵਾ ਮਧੁਕਪੁਪ੍ਫਰਸ’’ਨ੍ਤਿ ਵੁਤ੍ਤਤ੍ਤਾ ਮਧੁਕਪੁਪ੍ਫਰਸਂ ਠਪੇਤ੍ਵਾ ਸਬ੍ਬੋਪਿ ਪੁਪ੍ਫਰਸੋ ਵਟ੍ਟਤਿ.

੯੨. ਸਤ੍ਤਾਹਕਾਲਿਕਂ ਨਾਮ ਸਪ੍ਪਿ ਨਵਨੀਤਂ ਤੇਲਂ ਮਧੁ ਫਾਣਿਤਨ੍ਤਿ ਇਮਾਨਿ ਪਞ੍ਚ ਭੇਸਜ੍ਜਾਨਿ. ਤਤ੍ਥ ਸਪ੍ਪਿ ਨਾਮ ਗੋਸਪ੍ਪਿ ਵਾ ਅਜਿਕਾਸਪ੍ਪਿ ਵਾ ਮਹਿਂਸਸਪ੍ਪਿ ਵਾ ਯੇਸਂ ਮਂਸਂ ਕਪ੍ਪਤਿ, ਤੇਸਂ ਸਪ੍ਪਿ. ਨਵਨੀਤਂ ਨਾਮ ਤੇਸਂਯੇਵ ਨਵਨੀਤਂ. ਤੇਲਂ ਨਾਮ ਤਿਲਤੇਲਂ ਸਾਸਪਤੇਲਂ ਮਧੁਕਤੇਲਂ ਏਰਣ੍ਡਤੇਲਂ ਵਸਾਤੇਲਂ. ਮਧੁ ਨਾਮ ਮਕ੍ਖਿਕਾਮਧੁ. ਫਾਣਿਤਂ ਨਾਮ ਉਚ੍ਛੁਮ੍ਹਾ ਨਿਬ੍ਬਤ੍ਤਂ (ਪਚਿ. ੨੬੦). ਯਾਵਜੀਵਿਕਂ ਪਨ ਹੇਟ੍ਠਾ ਯਾਵਕਾਲਿਕੇ ਮੂਲਖਾਦਨੀਯਾਦੀਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

੯੩. ਤਤ੍ਥ (ਪਾਚਿ. ਅਟ੍ਠ. ੨੫੬) ਅਰੁਣੋਦਯੇ ਪਟਿਗ੍ਗਹਿਤਂ ਯਾਵਕਾਲਿਕਂ ਸਤਕ੍ਖਤ੍ਤੁਮ੍ਪਿ ਨਿਦਹਿਤ੍ਵਾ ਯਾਵ ਕਾਲੋ ਨਾਤਿਕ੍ਕਮਤਿ, ਤਾਵ ਪਰਿਭੁਞ੍ਜਿਤੁਂ ਵਟ੍ਟਤਿ, ਯਾਮਕਾਲਿਕਂ ਏਕਂ ਅਹੋਰਤ੍ਤਂ, ਸਤ੍ਤਾਹਕਾਲਿਕਂ ਸਤ੍ਤਰਤ੍ਤਂ, ਇਤਰਂ ਸਤਿ ਪਚ੍ਚਯੇ ਯਾਵਜੀਵਮ੍ਪਿ ਪਰਿਭੁਞ੍ਜਿਤੁਂ ਵਟ੍ਟਤਿ. ਪਟਿਗ੍ਗਹੇਤ੍ਵਾ ਏਕਰਤ੍ਤਂ ਵੀਤਿਨਾਮਿਤਂ ਪਨ ਯਂ ਕਿਞ੍ਚਿ ਯਾਵਕਾਲਿਕਂ ਵਾ ਯਾਮਕਾਲਿਕਂ ਵਾ ਅਜ੍ਝੋਹਰਿਤੁਕਾਮਤਾਯ ਗਣ੍ਹਨ੍ਤਸ੍ਸ ਪਟਿਗ੍ਗਹਣੇ ਤਾਵ ਦੁਕ੍ਕਟਂ, ਅਜ੍ਝੋਹਰਤੋ ਪਨ ਏਕਮੇਕਸ੍ਮਿਂ ਅਜ੍ਝੋਹਾਰੇ ਸਨ੍ਨਿਧਿਪਚ੍ਚਯਾ ਪਾਚਿਤ੍ਤਿਯਂ. ਸਚੇਪਿ ਪਤ੍ਤੋ ਦੁਦ੍ਧੋਤੋ ਹੋਤਿ, ਯਂ ਅਙ੍ਗੁਲਿਯਾ ਘਂਸਨ੍ਤਸ੍ਸ ਲੇਖਾ ਪਞ੍ਞਾਯਤਿ, ਗਣ੍ਠਿਕਪਤ੍ਤਸ੍ਸ ਵਾ ਗਣ੍ਠਿਕਨ੍ਤਰੇ ਸ੍ਨੇਹੋ ਪਵਿਟ੍ਠੋ ਹੋਤਿ, ਸੋ ਉਣ੍ਹੇ ਓਤਾਪੇਨ੍ਤਸ੍ਸ ਪਗ੍ਘਰਤਿ, ਉਣ੍ਹਯਾਗੁਯਾ ਵਾ ਗਹਿਤਾਯ ਸਨ੍ਦਿਸ੍ਸਤਿ, ਤਾਦਿਸੇ ਪਤ੍ਤੇਪਿ ਪੁਨਦਿਵਸੇ ਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯਂ, ਤਸ੍ਮਾ ਪਤ੍ਤਂ ਧੋਵਿਤ੍ਵਾ ਪੁਨ ਤਤ੍ਥ ਅਚ੍ਛੋਦਕਂ ਵਾ ਆਸਿਞ੍ਚਿਤ੍ਵਾ ਅਙ੍ਗੁਲਿਯਾ ਵਾ ਘਂਸਿਤ੍ਵਾ ਨਿਸ੍ਨੇਹਭਾਵੋ ਜਾਨਿਤਬ੍ਬੋ. ਸਚੇ ਹਿ ਉਦਕੇ ਵਾ ਸ੍ਨੇਹਭਾਵੋ, ਪਤ੍ਤੇ ਵਾ ਅਙ੍ਗੁਲਿਲੇਖਾ ਪਞ੍ਞਾਯਤਿ, ਦੁਦ੍ਧੋਤੋ ਹੋਤਿ, ਤੇਲਵਣ੍ਣਪਤ੍ਤੇ ਪਨ ਅਙ੍ਗੁਲਿਲੇਖਾ ਪਞ੍ਞਾਯਤਿ, ਸਾ ਅਬ੍ਬੋਹਾਰਿਕਾ. ਯਮ੍ਪਿ ਭਿਕ੍ਖੂ ਨਿਰਪੇਕ੍ਖਾ ਸਾਮਣੇਰਾਨਂ ਪਰਿਚ੍ਚਜਨ੍ਤਿ, ਤਞ੍ਚੇ ਸਾਮਣੇਰਾ ਨਿਦਹਿਤ੍ਵਾ ਦੇਨ੍ਤਿ, ਸਬ੍ਬਂ ਵਟ੍ਟਤਿ. ਸਯਂ ਪਟਿਗ੍ਗਹੇਤ੍ਵਾ ਅਪਰਿਚ੍ਚਤ੍ਤਮੇਵ ਹਿ ਦੁਤਿਯਦਿਵਸੇ ਨ ਵਟ੍ਟਤਿ. ਤਤੋ ਹਿ ਏਕਸਿਤ੍ਥਮ੍ਪਿ ਅਜ੍ਝੋਹਰਤੋ ਪਾਚਿਤ੍ਤਿਯਮੇਵ. ਅਕਪ੍ਪਿਯਮਂਸੇਸੁ ਮਨੁਸ੍ਸਮਂਸੇ ਥੁਲ੍ਲਚ੍ਚਯੇਨ ਸਦ੍ਧਿਂ ਪਾਚਿਤ੍ਤਿਯਂ, ਅਵਸੇਸੇਸੁ ਦੁਕ੍ਕਟੇਨ ਸਦ੍ਧਿਂ.

ਯਾਮਕਾਲਿਕਂ ਸਤਿ ਪਚ੍ਚਯੇ ਅਜ੍ਝੋਹਰਤੋ ਪਾਚਿਤ੍ਤਿਯਂ, ਆਹਾਰਤ੍ਥਾਯ ਅਜ੍ਝੋਹਰਤੋ ਦੁਕ੍ਕਟੇਨ ਸਦ੍ਧਿਂ ਪਾਚਿਤ੍ਤਿਯਂ. ਸਚੇ ਪਵਾਰਿਤੋ ਹੁਤ੍ਵਾ ਅਨਤਿਰਿਤ੍ਤਕਤਂ ਅਜ੍ਝੋਹਰਤਿ, ਪਕਤਿਆਮਿਸੇ ਦ੍ਵੇ ਪਾਚਿਤ੍ਤਿਯਾਨਿ, ਮਨੁਸ੍ਸਮਂਸੇ ਥੁਲ੍ਲਚ੍ਚਯੇਨ ਸਦ੍ਧਿਂ ਦ੍ਵੇ, ਸੇਸਅਕਪ੍ਪਿਯਮਂਸੇ ਦੁਕ੍ਕਟੇਨ ਸਦ੍ਧਿਂ. ਯਾਮਕਾਲਿਕਂ ਸਤਿ ਪਚ੍ਚਯੇ ਸਾਮਿਸੇਨ ਮੁਖੇਨ ਅਜ੍ਝੋਹਰਤੋ ਦ੍ਵੇ, ਨਿਰਾਮਿਸੇਨ ਏਕਮੇਵ. ਆਹਾਰਤ੍ਥਾਯ ਅਜ੍ਝੋਹਰਤੋ ਵਿਕਪ੍ਪਦ੍ਵਯੇਪਿ ਦੁਕ੍ਕਟਂ ਵਡ੍ਢਤਿ. ਸਚੇ ਵਿਕਾਲੇ ਅਜ੍ਝੋਹਰਤਿ, ਪਕਤਿਭੋਜਨੇ ਸਨ੍ਨਿਧਿਪਚ੍ਚਯਾ ਚ ਵਿਕਾਲਭੋਜਨਪਚ੍ਚਯਾ ਚ ਦ੍ਵੇ ਪਾਚਿਤ੍ਤਿਯਾਨਿ, ਅਕਪ੍ਪਿਯਮਂਸੇ ਥੁਲ੍ਲਚ੍ਚਯਂ ਦੁਕ੍ਕਟਞ੍ਚ ਵਡ੍ਢਤਿ. ਯਾਮਕਾਲਿਕੇ ਵਿਕਾਲਪਚ੍ਚਯਾ ਅਨਾਪਤ੍ਤਿ. ਅਨਤਿਰਿਤ੍ਤਪਚ੍ਚਯਾ ਪਨ ਵਿਕਾਲੇ ਸਬ੍ਬਵਿਕਪ੍ਪੇਸੁ ਅਨਾਪਤ੍ਤਿ.

ਸਤ੍ਤਾਹਕਾਲਿਕਂ ਪਨ ਯਾਵਜੀਵਿਕਞ੍ਚ ਆਹਾਰਤ੍ਥਾਯ ਪਟਿਗ੍ਗਣ੍ਹਤੋ ਪਟਿਗ੍ਗਣ੍ਹਨਪਚ੍ਚਯਾ ਤਾਵ ਦੁਕ੍ਕਟਂ, ਅਜ੍ਝੋਹਰਤੋ ਪਨ ਸਚੇ ਨਿਰਾਮਿਸਂ ਹੋਤਿ, ਅਜ੍ਝੋਹਾਰੇ ਦੁਕ੍ਕਟਂ. ਅਥ ਆਮਿਸਸਂਸਟ੍ਠਂ ਪਟਿਗ੍ਗਹੇਤ੍ਵਾ ਠਪਿਤਂ ਹੋਤਿ, ਯਥਾਵਤ੍ਥੁਕਂ ਪਾਚਿਤ੍ਤਿਯਮੇਵ.

੯੪. ਸਤ੍ਤਾਹਕਾਲਿਕੇਸੁ ਪਨ ਸਪ੍ਪਿਆਦੀਸੁ ਅਯਂ ਵਿਨਿਚ੍ਛਯੋ (ਪਾਰਾ. ਅਟ੍ਠ. ੨.੬੨੨) – ਸਪ੍ਪਿ ਤਾਵ ਪੁਰੇਭਤ੍ਤਂ ਪਟਿਗ੍ਗਹਿਤਂ ਤਦਹੁਪੁਰੇਭਤ੍ਤਂ ਸਾਮਿਸਮ੍ਪਿ ਨਿਰਾਮਿਸਮ੍ਪਿ ਪਰਿਭੁਞ੍ਜਿਤੁਂ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਸਤ੍ਤਾਹਂ ਨਿਰਾਮਿਸਂ ਪਰਿਭੁਞ੍ਜਿਤਬ੍ਬਂ. ਸਤ੍ਤਾਹਾਤਿਕ੍ਕਮੇ ਸਚੇ ਏਕਭਾਜਨੇ ਠਪਿਤਂ, ਏਕਂ ਨਿਸ੍ਸਗ੍ਗਿਯਂ. ਸਚੇ ਬਹੂਸੁ, ਵਤ੍ਥੁਗਣਨਾਯ ਨਿਸ੍ਸਗ੍ਗਿਯਾਨਿ. ਪਚ੍ਛਾਭਤ੍ਤਂ ਪਟਿਗ੍ਗਹਿਤਂ ਨਿਰਾਮਿਸਮੇਵ ਵਟ੍ਟਤਿ, ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਉਗ੍ਗਹਿਤਕਂ ਕਤ੍ਵਾ ਨਿਕ੍ਖਿਤ੍ਤਂ ਅਜ੍ਝੋਹਰਿਤੁਂ ਨ ਵਟ੍ਟਤਿ, ਅਬ੍ਭਞ੍ਜਨਾਦੀਸੁ ਉਪਨੇਤਬ੍ਬਂ. ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ ਅਨਜ੍ਝੋਹਰਣੀਯਤਂ ਆਪਨ੍ਨਤ੍ਤਾ. ਸਚੇ ਅਨੁਪਸਮ੍ਪਨ੍ਨੋ ਪੁਰੇਭਤ੍ਤਂ ਪਟਿਗ੍ਗਹਿਤਨਵਨੀਤੇਨ ਸਪ੍ਪਿਂ ਕਤ੍ਵਾ ਦੇਤਿ, ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਸਚੇ ਸਯਂ ਕਰੋਤਿ, ਸਤ੍ਤਾਹਮ੍ਪਿ ਨਿਰਾਮਿਸਮੇਵ ਵਟ੍ਟਤਿ. ਪਚ੍ਛਾਭਤ੍ਤਂ ਪਟਿਗ੍ਗਹਿਤਨਵਨੀਤੇਨ ਯੇਨ ਕੇਨਚਿ ਕਤਸਪ੍ਪਿ ਸਤ੍ਤਾਹਮ੍ਪਿ ਨਿਰਾਮਿਸਮੇਵ ਵਟ੍ਟਤਿ, ਉਗ੍ਗਹਿਤਕੇਨ ਕਤੇ ਪੁਬ੍ਬੇ ਵੁਤ੍ਤਸੁਦ੍ਧਸਪ੍ਪਿਨਯੇਨੇਵ ਵਿਨਿਚ੍ਛਯੋ ਵੇਦਿਤਬ੍ਬੋ. ਪੁਰੇਭਤ੍ਤਂ ਪਟਿਗ੍ਗਹਿਤਖੀਰੇਨ ਵਾ ਦਧਿਨਾ ਵਾ ਕਤਸਪ੍ਪਿ ਅਨੁਪਸਮ੍ਪਨ੍ਨੇਨ ਕਤਂ ਸਾਮਿਸਮ੍ਪਿ ਤਦਹੁਪੁਰੇਭਤ੍ਤਂ ਵਟ੍ਟਤਿ, ਸਯਂਕਤਂ ਨਿਰਾਮਿਸਮੇਵ ਵਟ੍ਟਤਿ.

੯੫. ਨਵਨੀਤਂ ਤਾਪੇਨ੍ਤਸ੍ਸ ਹਿ ਸਾਮਂਪਾਕੋ ਨ ਹੋਤਿ, ਸਾਮਂਪਕ੍ਕੇਨ ਪਨ ਤੇਨ ਸਦ੍ਧਿਂ ਆਮਿਸਂ ਨ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਚ ਨ ਵਟ੍ਟਤਿਯੇਵ. ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ ਸਵਤ੍ਥੁਕਸ੍ਸ ਪਟਿਗ੍ਗਹਿਤਤ੍ਤਾ. ਪਚ੍ਛਾਭਤ੍ਤਂ ਪਟਿਗ੍ਗਹਿਤਕੇਹਿ ਕਤਂ ਪਨ ਅਬ੍ਭਞ੍ਜਨਾਦੀਸੁ ਉਪਨੇਤਬ੍ਬਂ. ਪੁਰੇਭਤ੍ਤਮ੍ਪਿ ਚ ਉਗ੍ਗਹਿਤਕੇਹਿ ਕਤਂ, ਉਭਯੇਸਮ੍ਪਿ ਸਤ੍ਤਾਹਾਤਿਕ੍ਕਮੇ ਅਨਾਪਤ੍ਤਿ. ਏਸ ਨਯੋ ਅਕਪ੍ਪਿਯਮਂਸਸਪ੍ਪਿਮ੍ਹਿ. ਅਯਂ ਪਨ ਵਿਸੇਸੋ – ਯਤ੍ਥ ਪਾਲ਼ਿਯਂ ਆਗਤਸਪ੍ਪਿਨਾ ਨਿਸ੍ਸਗ੍ਗਿਯਂ, ਤਤ੍ਥ ਇਮਿਨਾ ਦੁਕ੍ਕਟਂ. ਅਨ੍ਧਕਟ੍ਠਕਥਾਯਂ ਕਾਰਣਪਤਿਰੂਪਕਂ ਵਤ੍ਵਾ ਮਨੁਸ੍ਸਸਪ੍ਪਿ ਚ ਨਵਨੀਤਞ੍ਚ ਪਟਿਕ੍ਖਿਤ੍ਤਂ, ਤਂ ਦੁਪ੍ਪਟਿਕ੍ਖਿਤ੍ਤਂ ਸਬ੍ਬਅਟ੍ਠਕਥਾਸੁ ਅਨੁਞ੍ਞਾਤਤ੍ਤਾ. ਪਰਤੋ ਚਸ੍ਸ ਵਿਨਿਚ੍ਛਯੋਪਿ ਆਗਚ੍ਛਿਸ੍ਸਤਿ. ਪਾਲ਼ਿਯਂ ਆਗਤਨਵਨੀਤਮ੍ਪਿ ਪੁਰੇਭਤ੍ਤਂ ਪਟਿਗ੍ਗਹਿਤਂ ਤਦਹੁਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਨਿਰਾਮਿਸਮੇਵ. ਸਤ੍ਤਾਹਾਤਿਕ੍ਕਮੇ ਨਾਨਾਭਾਜਨੇਸੁ ਠਪਿਤੇ ਭਾਜਨਗਣਨਾਯ, ਏਕਭਾਜਨੇਪਿ ਅਮਿਸ੍ਸੇਤ੍ਵਾ ਪਿਣ੍ਡਪਿਣ੍ਡਵਸੇਨ ਠਪਿਤੇ ਪਿਣ੍ਡਗਣਨਾਯ ਨਿਸ੍ਸਗ੍ਗਿਯਾਨਿ. ਪਚ੍ਛਾਭਤ੍ਤਂ ਪਟਿਗ੍ਗਹਿਤਂ ਸਪ੍ਪਿਨਯੇਨ ਵੇਦਿਤਬ੍ਬਂ. ਏਤ੍ਥ ਪਨ ਦਧਿਗੁਲ਼ਿਕਾਯੋਪਿ ਤਕ੍ਕਬਿਨ੍ਦੂਨਿਪਿ ਹੋਨ੍ਤਿ, ਤਸ੍ਮਾ ਧੋਤਂ ਵਟ੍ਟਤੀਤਿ ਉਪਡ੍ਢਤ੍ਥੇਰਾ ਆਹਂਸੁ. ਮਹਾਸਿਵਤ੍ਥੇਰੋ ਪਨ ‘‘ਭਗਵਤਾ ਅਨੁਞ੍ਞਾਤਕਾਲਤੋ ਪਟ੍ਠਾਯ ਤਕ੍ਕਤੋ ਉਦ੍ਧਟਮਤ੍ਤਮੇਵ ਖਾਦਿਂਸੂ’’ਤਿ ਆਹ. ਤਸ੍ਮਾ ਨਵਨੀਤਂ ਪਰਿਭੁਞ੍ਜਨ੍ਤੇਨ ਧੋਵਿਤ੍ਵਾ ਦਧਿਤਕ੍ਕਮਕ੍ਖਿਕਾਕਿਪਿਲ੍ਲਿਕਾਦੀਨਿ ਅਪਨੇਤ੍ਵਾ ਪਰਿਭੁਞ੍ਜਿਤਬ੍ਬਂ. ਪਚਿਤ੍ਵਾ ਸਪ੍ਪਿਂ ਕਤ੍ਵਾ ਪਰਿਭੁਞ੍ਜਿਤੁਕਾਮੇਨ ਅਧੋਤਮ੍ਪਿ ਪਰਿਭੁਞ੍ਜਿਤੁਂ ਵਟ੍ਟਤਿ. ਯਂ ਤਤ੍ਥ ਦਧਿਗਤਂ ਵਾ ਤਕ੍ਕਗਤਂ ਵਾ, ਤਂ ਖਯਂ ਗਮਿਸ੍ਸਤਿ. ਏਤ੍ਤਾਵਤਾ ਹਿ ਸਵਤ੍ਥੁਕਪਟਿਗ੍ਗਹਿਤਂ ਨਾਮ ਨ ਹੋਤੀਤਿ ਅਯਮੇਤ੍ਥ ਅਧਿਪ੍ਪਾਯੋ. ਆਮਿਸੇਨ ਸਦ੍ਧਿਂ ਪਕ੍ਕਤ੍ਤਾ ਪਨ ਤਸ੍ਮਿਮ੍ਪਿ ਕੁਕ੍ਕੁਚ੍ਚਾਯਨ੍ਤਿ ਕੁਕ੍ਕੁਚ੍ਚਕਾ. ਇਦਾਨਿ ਉਗ੍ਗਹੇਤ੍ਵਾ ਠਪਿਤਨਵਨੀਤੇ ਚ ਪੁਰੇਭਤ੍ਤਂ ਖੀਰਦਧੀਨਿ ਪਟਿਗ੍ਗਹੇਤ੍ਵਾ ਕਤਨਵਨੀਤੇ ਚ ਪਚ੍ਛਾਭਤ੍ਤਂ ਤਾਨਿ ਪਟਿਗ੍ਗਹੇਤ੍ਵਾ ਕਤਨਵਨੀਤੇ ਚ ਉਗ੍ਗਹਿਤਕੇਹਿ ਕਤਨਵਨੀਤੇ ਚ ਅਕਪ੍ਪਿਯਮਂਸਨਵਨੀਤੇ ਚ ਸਬ੍ਬੋ ਆਪਤ੍ਤਾਨਾਪਤ੍ਤਿਪਰਿਭੋਗਾਪਰਿਭੋਗਨਯੋ ਸਪ੍ਪਿਮ੍ਹਿ ਵੁਤ੍ਤਕ੍ਕਮੇਨੇਵ ਗਹੇਤਬ੍ਬੋ. ਤੇਲਭਿਕ੍ਖਾਯ ਪਵਿਟ੍ਠਾਨਂ ਪਨ ਭਿਕ੍ਖੂਨਂ ਤਤ੍ਥੇਵ ਸਪ੍ਪਿਮ੍ਪਿ ਨਵਨੀਤਮ੍ਪਿ ਪਕ੍ਕਤੇਲਮ੍ਪਿ ਅਪਕ੍ਕਤੇਲਮ੍ਪਿ ਆਕਿਰਨ੍ਤਿ. ਤਤ੍ਥ ਤਕ੍ਕਦਧਿਬਿਨ੍ਦੂਨਿਪਿ ਭਤ੍ਤਸਿਤ੍ਥਾਨਿਪਿ ਤਣ੍ਡੁਲਕਣਾਪਿ ਮਕ੍ਖਿਕਾਦਯੋਪਿ ਹੋਨ੍ਤਿ, ਆਦਿਚ੍ਚਪਾਕਂ ਕਤ੍ਵਾ ਪਰਿਸ੍ਸਾਵੇਤ੍ਵਾ ਗਹਿਤਂ ਸਤ੍ਤਾਹਕਾਲਿਕਂ ਹੋਤਿ. ਪਟਿਗ੍ਗਹੇਤ੍ਵਾ ਚ ਠਪਿਤਭੇਸਜ੍ਜੇਹਿ ਸਦ੍ਧਿਂ ਪਚਿਤ੍ਵਾ ਨਤ੍ਥੁਪਾਨਮ੍ਪਿ ਕਾਤੁਂ ਵਟ੍ਟਤਿ. ਸਚੇ ਵਦ੍ਦਲਿਸਮਯੇ ਲਜ੍ਜੀ ਸਾਮਣੇਰੋ ਯਥਾ ਤਤ੍ਥ ਪਤਿਤਤਣ੍ਡੁਲਕਣਾਦਯੋ ਨ ਪਚ੍ਚਨ੍ਤਿ, ਏਵਂ ਅਗ੍ਗਿਮ੍ਹਿ ਵਿਲੀਯਾਪੇਤ੍ਵਾ ਪਰਿਸ੍ਸਾਵੇਤ੍ਵਾ ਪੁਨ ਪਚਿਤ੍ਵਾ ਦੇਤਿ, ਪੁਰਿਮਨਯੇਨੇਵ ਸਤ੍ਤਾਹਂ ਵਟ੍ਟਤਿ.

੯੬. ਤੇਲੇਸੁ ਤਿਲਤੇਲਂ ਤਾਵ ਪੁਰੇਭਤ੍ਤਂ ਪਟਿਗ੍ਗਹਿਤਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਨਿਰਾਮਿਸਮੇਵ ਵਟ੍ਟਤਿ. ਸਤ੍ਤਾਹਾਤਿਕ੍ਕਮੇ ਤਸ੍ਸ ਭਾਜਨਗਣਨਾਯ ਨਿਸ੍ਸਗ੍ਗਿਯਭਾਵੋ ਵੇਦਿਤਬ੍ਬੋ. ਪਚ੍ਛਾਭਤ੍ਤਂ ਪਟਿਗ੍ਗਹਿਤਂ ਸਤ੍ਤਾਹਂ ਨਿਰਾਮਿਸਮੇਵ ਵਟ੍ਟਤਿ, ਉਗ੍ਗਹਿਤਕਂ ਕਤ੍ਵਾ ਨਿਕ੍ਖਿਤ੍ਤਂ ਅਜ੍ਝੋਹਰਿਤੁਂ ਨ ਵਟ੍ਟਤਿ, ਸੀਸਮਕ੍ਖਨਾਦੀਸੁ ਉਪਨੇਤਬ੍ਬਂ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ. ਪੁਰੇਭਤ੍ਤਂ ਤਿਲੇ ਪਟਿਗ੍ਗਹੇਤ੍ਵਾ ਕਤਤੇਲਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਅਨਜ੍ਝੋਹਰਣੀਯਂ ਹੋਤਿ, ਸੀਸਮਕ੍ਖਨਾਦੀਸੁ ਉਪਨੇਤਬ੍ਬਂ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ. ਪਚ੍ਛਾਭਤ੍ਤਂ ਤਿਲੇ ਪਟਿਗ੍ਗਹੇਤ੍ਵਾ ਕਤਤੇਲਂ ਅਨਜ੍ਝੋਹਰਣੀਯਮੇਵ ਸਵਤ੍ਥੁਕਪਟਿਗ੍ਗਹਿਤਤ੍ਤਾ. ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ, ਸੀਸਮਕ੍ਖਨਾਦੀਸੁ ਉਪਨੇਤਬ੍ਬਂ. ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਉਗ੍ਗਹਿਤਕਤਿਲੇਹਿ ਕਤਤੇਲੇਪਿ ਏਸੇਵ ਨਯੋ. ਪੁਰੇਭਤ੍ਤਂ ਪਟਿਗ੍ਗਹਿਤਤਿਲੇ ਭਜ੍ਜਿਤ੍ਵਾ ਵਾ ਤਿਲਪਿਟ੍ਠਂ ਵਾ ਸੇਦੇਤ੍ਵਾ ਉਣ੍ਹੋਦਕੇਨ ਵਾ ਤੇਮੇਤ੍ਵਾ ਕਤਤੇਲਂ ਸਚੇ ਅਨੁਪਸਮ੍ਪਨ੍ਨੇਨ ਕਤਂ, ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਅਤ੍ਤਨਾ ਕਤਂ ਨਿਬ੍ਬਟ੍ਟਿਤਤ੍ਤਾ ਪੁਰੇਭਤ੍ਤਂ ਨਿਰਾਮਿਸਂ ਵਟ੍ਟਤਿ, ਸਾਮਂਪਕ੍ਕਤ੍ਤਾ ਸਾਮਿਸਂ ਨ ਵਟ੍ਟਤਿ. ਸਵਤ੍ਥੁਕਪਟਿਗ੍ਗਹਿਤਤ੍ਤਾ ਪਨ ਪਚ੍ਛਾਭਤ੍ਤਤੋ ਪਟ੍ਠਾਯ ਉਭਯਮ੍ਪਿ ਅਨਜ੍ਝੋਹਰਣੀਯਂ, ਸੀਸਮਕ੍ਖਨਾਦੀਸੁ ਉਪਨੇਤਬ੍ਬਂ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ. ਯਦਿ ਪਨ ਅਪ੍ਪਂ ਉਣ੍ਹੋਦਕਂ ਹੋਤਿ ਅਬ੍ਭੁਕ੍ਕਿਰਣਮਤ੍ਤਂ, ਅਬ੍ਬੋਹਾਰਿਕਂ ਹੋਤਿ ਸਾਮਂਪਾਕਗਣਨਂ ਨ ਗਚ੍ਛਤਿ. ਸਾਸਪਤੇਲਾਦੀਸੁਪਿ ਅਵਤ੍ਥੁਕਪਟਿਗ੍ਗਹਿਤੇਸੁ ਅਵਤ੍ਥੁਕਤਿਲਤੇਲੇ ਵੁਤ੍ਤਸਦਿਸੋਵ ਵਿਨਿਚ੍ਛਯੋ.

ਸਚੇ ਪਨ ਪੁਰੇਭਤ੍ਤਂ ਪਟਿਗ੍ਗਹਿਤਾਨਂ ਸਾਸਪਾਦੀਨਂ ਚੁਣ੍ਣੇਹਿ ਆਦਿਚ੍ਚਪਾਕੇਨ ਸਕ੍ਕਾ ਤੇਲਂ ਕਾਤੁਂ, ਤਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਨਿਰਾਮਿਸਮੇਵ ਵਟ੍ਟਤਿ, ਸਤ੍ਤਾਹਾਤਿਕ੍ਕਮੇ ਨਿਸ੍ਸਗ੍ਗਿਯਂ. ਯਸ੍ਮਾ ਪਨ ਸਾਸਪਮਧੁਕਚੁਣ੍ਣਾਨਿ ਸੇਦੇਤ੍ਵਾ ਏਰਣ੍ਡਕਟ੍ਠੀਨਿ ਚ ਭਜ੍ਜਿਤ੍ਵਾ ਏਵ ਤੇਲਂ ਕਰੋਨ੍ਤਿ, ਤਸ੍ਮਾ ਏਤੇਸਂ ਤੇਲਂ ਅਨੁਪਸਮ੍ਪਨ੍ਨੇਹਿ ਕਤਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਵਤ੍ਥੂਨਂ ਯਾਵਜੀਵਿਕਤ੍ਤਾ ਪਨ ਸਵਤ੍ਥੁਕਪਟਿਗ੍ਗਹਣੇ ਦੋਸੋ ਨਤ੍ਥਿ. ਅਤ੍ਤਨਾ ਕਤਂ ਸਤ੍ਤਾਹਂ ਨਿਰਾਮਿਸਪਰਿਭੋਗੇਨੇਵ ਪਰਿਭੁਞ੍ਜਿਤਬ੍ਬਂ. ਉਗ੍ਗਹਿਤਕੇਹਿ ਕਤਂ ਅਨਜ੍ਝੋਹਰਣੀਯਂ, ਬਾਹਿਰਪਰਿਭੋਗੇ ਵਟ੍ਟਤਿ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ. ਤੇਲਕਰਣਤ੍ਥਾਯ ਸਾਸਪਮਧੁਕਏਰਣ੍ਡਕਟ੍ਠੀਨਿ ਪਟਿਗ੍ਗਹੇਤ੍ਵਾ ਕਤਤੇਲਂ ਸਤ੍ਤਾਹਕਾਲਿਕਂ, ਦੁਤਿਯਦਿਵਸੇ ਕਤਂ ਛਾਹਂ ਵਟ੍ਟਤਿ, ਤਤਿਯਦਿਵਸੇ ਕਤਂ ਪਞ੍ਚਾਹਂ ਵਟ੍ਟਤਿ, ਚਤੁਤ੍ਥ, ਪਞ੍ਚਮ, ਛਟ੍ਠ, ਸਤ੍ਤਮਦਿਵਸੇ ਕਤਂ ਤਦਹੇਵ ਵਟ੍ਟਤਿ. ਸਚੇ ਯਾਵ ਅਰੁਣਸ੍ਸ ਉਗ੍ਗਮਨਾ ਤਿਟ੍ਠਤਿ, ਨਿਸ੍ਸਗ੍ਗਿਯਂ, ਅਟ੍ਠਮਦਿਵਸੇ ਕਤਂ ਅਨਜ੍ਝੋਹਰਣੀਯਂ, ਅਨਿਸ੍ਸਗ੍ਗਿਯਤ੍ਤਾ ਪਨ ਬਾਹਿਰਪਰਿਭੋਗੇ ਵਟ੍ਟਤਿ. ਸਚੇਪਿ ਨ ਕਰੋਤਿ, ਤੇਲਤ੍ਥਾਯ ਗਹਿਤਸਾਸਪਾਦੀਨਂ ਸਤ੍ਤਾਹਾਤਿਕ੍ਕਮੇ ਦੁਕ੍ਕਟਮੇਵ. ਪਾਲ਼ਿਯਂ ਪਨ ਅਨਾਗਤਾਨਿ ਅਞ੍ਞਾਨਿਪਿ ਨਾਲ਼ਿਕੇਰਨਿਮ੍ਬਕੋਸਮ੍ਬਕਰਮਨ੍ਦਾਦੀਨਂ ਤੇਲਾਨਿ ਅਤ੍ਥਿ, ਤਾਨਿ ਪਟਿਗ੍ਗਹੇਤ੍ਵਾ ਸਤ੍ਤਾਹਂ ਅਤਿਕ੍ਕਾਮਯਤੋ ਦੁਕ੍ਕਟਂ ਹੋਤਿ. ਅਯਮੇਤੇਸੁ ਵਿਸੇਸੋ – ਸੇਸਂ ਯਾਵਕਾਲਿਕਵਤ੍ਥੁਂ ਯਾਵਜੀਵਿਕਵਤ੍ਥੁਞ੍ਚ ਸਲ੍ਲਕ੍ਖੇਤ੍ਵਾ ਸਾਮਂਪਾਕਸਵਤ੍ਥੁਕਪੁਰੇਭਤ੍ਤਪਚ੍ਛਾਭਤ੍ਤਪਟਿਗ੍ਗਹਿਤਉਗ੍ਗਹਿਤਵਤ੍ਥੁਵਿਧਾਨਂ ਸਬ੍ਬਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਵਸਾਤੇਲਂ ਨਾਮ ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚ ਵਸਾਨਿ ਅਚ੍ਛਵਸਂ ਮਚ੍ਛਵਸਂ ਸੁਸੁਕਾਵਸਂ ਸੂਕਰਵਸਂ ਗਦ੍ਰਭਵਸ’’ਨ੍ਤਿ (ਮਹਾਵ. ੨੬੨) ਏਵਂ ਅਨੁਞ੍ਞਾਤਵਸਾਨਂ ਤੇਲਂ. ਏਤ੍ਥ ਚ ‘‘ਅਚ੍ਛਵਸ’’ਨ੍ਤਿ ਵਚਨੇਨ ਠਪੇਤ੍ਵਾ ਮਨੁਸ੍ਸਵਸਂ ਸਬ੍ਬੇਸਂ ਅਕਪ੍ਪਿਯਮਂਸਾਨਂ ਵਸਾ ਅਨੁਞ੍ਞਾਤਾ. ਮਚ੍ਛਗ੍ਗਹਣੇਨ ਚ ਸੁਸੁਕਾਪਿ ਗਹਿਤਾ ਹੋਨ੍ਤਿ, ਵਾਲ਼ਮਚ੍ਛਤ੍ਤਾ ਪਨ ਵਿਸੁਂ ਵੁਤ੍ਤਂ. ਮਚ੍ਛਾਦਿਗ੍ਗਹਣੇਨ ਚੇਤ੍ਥ ਸਬ੍ਬੇਸਮ੍ਪਿ ਕਪ੍ਪਿਯਮਂਸਾਨਂ ਵਸਾ ਅਨੁਞ੍ਞਾਤਾ. ਮਂਸੇਸੁ ਹਿ ਦਸ ਮਨੁਸ੍ਸਹਤ੍ਥਿਅਸ੍ਸਸੁਨਖਅਹਿਸੀਹਬ੍ਯਗ੍ਘਦੀਪਿਅਚ੍ਛਤਰਚ੍ਛਾਨਂ ਮਂਸਾਨਿ ਅਕਪ੍ਪਿਯਾਨਿ, ਵਸਾਸੁ ਏਕਾ ਮਨੁਸ੍ਸਵਸਾ. ਖੀਰਾਦੀਸੁ ਅਕਪ੍ਪਿਯਂ ਨਾਮ ਨਤ੍ਥਿ. ਅਨੁਪਸਮ੍ਪਨ੍ਨੇਹਿ ਕਤਂ ਨਿਬ੍ਬਟ੍ਟਿਤਂ ਵਸਾਤੇਲਂ ਪੁਰੇਭਤ੍ਤਂ ਪਟਿਗ੍ਗਹਿਤਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਸਤ੍ਤਾਹਂ ਨਿਰਾਮਿਸਮੇਵ ਵਟ੍ਟਤਿ. ਯਂ ਪਨ ਤਤ੍ਥ ਸੁਖੁਮਰਜਸਦਿਸਂ ਮਂਸਂ ਵਾ ਨ੍ਹਾਰੁ ਵਾ ਅਟ੍ਠਿ ਵਾ ਲੋਹਿਤਂ ਵਾ ਹੋਤਿ, ਤਂ ਅਬ੍ਬੋਹਾਰਿਕਂ. ਸਚੇ ਪਨ ਵਸਂ ਪਟਿਗ੍ਗਹੇਤ੍ਵਾ ਸਯਂ ਕਰੋਤਿ, ਪੁਰੇਭਤ੍ਤਂ ਪਟਿਗ੍ਗਹੇਤ੍ਵਾ ਪਚਿਤ੍ਵਾ ਪਰਿਸ੍ਸਾਵੇਤ੍ਵਾ ਸਤ੍ਤਾਹਂ ਨਿਰਾਮਿਸਪਰਿਭੋਗੇਨ ਪਰਿਭੁਞ੍ਜਿਤਬ੍ਬਂ. ਨਿਰਾਮਿਸਪਰਿਭੋਗਞ੍ਹਿ ਸਨ੍ਧਾਯ ਇਦਂ ਵੁਤ੍ਤਂ ‘‘ਕਾਲੇ ਪਟਿਗ੍ਗਹਿਤਂ ਕਾਲੇ ਨਿਪ੍ਪਕ੍ਕਂ ਕਾਲੇ ਸਂਸਟ੍ਠਂ ਤੇਲਪਰਿਭੋਗੇਨ ਪਰਿਭੁਞ੍ਜਿਤੁ’’ਨ੍ਤਿ (ਮਹਾਵ. ੨੬੨). ਤਤ੍ਰਾਪਿ ਅਬ੍ਬੋਹਾਰਿਕਂ ਅਬ੍ਬੋਹਾਰਿਕਮੇਵ, ਪਚ੍ਛਾਭਤ੍ਤਂ ਪਨ ਪਟਿਗ੍ਗਹੇਤੁਂ ਵਾ ਕਾਤੁਂ ਵਾ ਨ ਵਟ੍ਟਤਿਯੇਵ. ਵੁਤ੍ਤਞ੍ਹੇਤਂ –

‘‘ਵਿਕਾਲੇ ਚੇ, ਭਿਕ੍ਖਵੇ, ਪਟਿਗ੍ਗਹਿਤਂ ਵਿਕਾਲੇ ਨਿਪ੍ਪਕ੍ਕਂ ਵਿਕਾਲੇ ਸਂਸਟ੍ਠਂ, ਤਂ ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਤਿਣ੍ਣਂ ਦੁਕ੍ਕਟਾਨਂ. ਕਾਲੇ ਚੇ, ਭਿਕ੍ਖਵੇ, ਪਟਿਗ੍ਗਹਿਤਂ ਵਿਕਾਲੇ ਨਿਪ੍ਪਕ੍ਕਂ ਵਿਕਾਲੇ ਸਂਸਟ੍ਠਂ, ਤਂ ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ. ਕਾਲੇ ਚੇ, ਭਿਕ੍ਖਵੇ, ਪਟਿਗ੍ਗਹਿਤਂ ਕਾਲੇ ਨਿਪ੍ਪਕ੍ਕਂ ਵਿਕਾਲੇ ਸਂਸਟ੍ਠਂ, ਤਂ ਚੇ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਕਾਲੇ ਚੇ, ਭਿਕ੍ਖਵੇ, ਪਟਿਗ੍ਗਹਿਤਂ ਕਾਲੇ ਨਿਪ੍ਪਕ੍ਕਂ ਕਾਲੇ ਸਂਸਟ੍ਠਂ, ਤਂ ਚੇ ਪਰਿਭੁਞ੍ਜੇਯ੍ਯ, ਅਨਾਪਤ੍ਤੀ’’ਤਿ (ਮਹਾਵ. ੨੬੨).

ਉਪਤਿਸ੍ਸਤ੍ਥੇਰਂ ਪਨ ਅਨ੍ਤੇਵਾਸਿਕਾ ਪੁਚ੍ਛਿਂਸੁ ‘‘ਭਨ੍ਤੇ, ਸਪ੍ਪਿਨਵਨੀਤਵਸਾਨਿ ਏਕਤੋ ਪਚਿਤ੍ਵਾ ਨਿਬ੍ਬਟ੍ਟਿਤਾਨਿ ਵਟ੍ਟਨ੍ਤਿ, ਨ ਵਟ੍ਟਨ੍ਤੀ’’ਤਿ? ‘‘ਨ ਵਟ੍ਟਨ੍ਤਿ, ਆਵੁਸੋ’’ਤਿ. ਥੇਰੋ ਕਿਰੇਤ੍ਥ ਪਕ੍ਕਤੇਲਕਸਟੇ ਵਿਯ ਕੁਕ੍ਕੁਚ੍ਚਾਯਤਿ. ਤਤੋ ਨਂ ਉਤ੍ਤਰਿ ਪੁਚ੍ਛਿਂਸੁ ‘‘ਭਨ੍ਤੇ, ਨਵਨੀਤੇ ਦਧਿਗੁਲ਼ਿਕਾ ਵਾ ਤਕ੍ਕਬਿਨ੍ਦੁ ਵਾ ਹੋਤਿ, ਏਤਂ ਵਟ੍ਟਤੀ’’ਤਿ? ‘‘ਏਤਮ੍ਪਿ, ਆਵੁਸੋ, ਨ ਵਟ੍ਟਤੀ’’ਤਿ. ਤਤੋ ਨਂ ਆਹਂਸੁ ‘‘ਭਨ੍ਤੇ, ਏਕਤੋ ਪਚਿਤ੍ਵਾ ਏਕਤੋ ਸਂਸਟ੍ਠਾਨਿ ਤੇਜਵਨ੍ਤਾਨਿ ਹੋਨ੍ਤਿ, ਰੋਗਂ ਨਿਗ੍ਗਣ੍ਹਨ੍ਤੀ’’ਤਿ. ‘‘ਸਾਧਾਵੁਸੋ’’ਤਿ ਥੇਰੋ ਸਮ੍ਪਟਿਚ੍ਛਿ. ਮਹਾਸੁਮਤ੍ਥੇਰੋ ਪਨਾਹ ‘‘ਕਪ੍ਪਿਯਮਂਸਵਸਾਵ ਸਾਮਿਸਪਰਿਭੋਗੇ ਵਟ੍ਟਤਿ, ਇਤਰਾ ਨਿਰਾਮਿਸਪਰਿਭੋਗੇ ਵਟ੍ਟਤੀ’’ਤਿ. ਮਹਾਪਦੁਮਤ੍ਥੇਰੋ ਪਨ ‘‘ਇਦਂ ਕਿ’’ਨ੍ਤਿ ਪਟਿਕ੍ਖਿਪਿਤ੍ਵਾ ‘‘ਨਨੁ ਵਾਤਾਬਾਧਿਕਾ ਭਿਕ੍ਖੂ ਪਞ੍ਚਮੂਲਕਸਾਵਯਾਗੁਯਂ ਅਚ੍ਛਸੂਕਰਤੇਲਾਦੀਨਿ ਪਕ੍ਖਿਪਿਤ੍ਵਾ ਯਾਗੁਂ ਪਿਵਨ੍ਤਿ, ਸਾ ਤੇਜੁਸ੍ਸਦਤ੍ਤਾ ਰੋਗਂ ਨਿਗ੍ਗਣ੍ਹਾਤੀ’’ਤਿ ਵਤ੍ਵਾ ‘‘ਵਟ੍ਟਤੀ’’ਤਿ ਆਹ.

੯੭. ਮਧੁ ਨਾਮ ਮਧੁਕਰੀਹਿ ਮਧੁਮਕ੍ਖਿਕਾਹਿ ਖੁਦ੍ਦਕਮਕ੍ਖਿਕਾਹਿ ਭਮਰਮਕ੍ਖਿਕਾਹਿ ਚ ਕਤਂ ਮਧੁ. ਤਂ ਪੁਰੇਭਤ੍ਤਂ ਪਟਿਗ੍ਗਹਿਤਂ ਪੁਰੇਭਤ੍ਤਂ ਸਾਮਿਸਪਰਿਭੋਗਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਸਤ੍ਤਾਹਂ ਨਿਰਾਮਿਸਪਰਿਭੋਗਮੇਵ ਵਟ੍ਟਤਿ, ਸਤ੍ਤਾਹਾਤਿਕ੍ਕਮੇ ਨਿਸ੍ਸਗ੍ਗਿਯਂ. ਸਚੇ ਸਿਲੇਸਸਦਿਸਂ ਮਹਾਮਧੁਂ ਖਣ੍ਡਂ ਕਤ੍ਵਾ ਠਪਿਤਂ, ਇਤਰਂ ਵਾ ਨਾਨਾਭਾਜਨੇਸੁ, ਵਤ੍ਥੁਗਣਨਾਯ ਨਿਸ੍ਸਗ੍ਗਿਯਾਨਿ. ਸਚੇ ਏਕਮੇਵ ਖਣ੍ਡਂ, ਏਕਭਾਜਨੇ ਵਾ ਇਤਰਂ, ਏਕਮੇਵ ਨਿਸ੍ਸਗ੍ਗਿਯਂ. ਉਗ੍ਗਹਿਤਕਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ, ਅਰੁਮਕ੍ਖਨਾਦੀਸੁ ਉਪਨੇਤਬ੍ਬਂ. ਮਧੁਪਟਲਂ ਵਾ ਮਧੁਸਿਤ੍ਥਕਂ ਵਾ ਸਚੇ ਮਧੁਨਾ ਅਮਕ੍ਖਿਤਂ ਪਰਿਸੁਦ੍ਧਂ, ਯਾਵਜੀਵਿਕਂ, ਮਧੁਮਕ੍ਖਿਤਂ ਪਨ ਮਧੁਗਤਿਕਮੇਵ. ਚੀਰਿਕਾ ਨਾਮ ਸਪਕ੍ਖਾ ਦੀਘਮਕ੍ਖਿਕਾ ਤੁਮ੍ਬਲ਼ਨਾਮਿਕਾ ਚ ਅਟ੍ਠਿਪਕ੍ਖਿਕਾ ਕਾਲ਼ਮਹਾਭਮਰਾ ਹੋਨ੍ਤਿ, ਤੇਸਂ ਆਸਯੇਸੁ ਨਿਯ੍ਯਾਸਸਦਿਸਂ ਮਧੁ ਹੋਤਿ, ਤਂ ਯਾਵਜੀਵਿਕਂ.

੯੮. ਫਾਣਿਤਂ ਨਾਮ ਉਚ੍ਛੁਰਸਂ ਉਪਾਦਾਯ ਅਪਕ੍ਕਾ ਵਾ ਅਵਤ੍ਥੁਕਪਕ੍ਕਾ ਵਾ ਸਬ੍ਬਾਪਿ ਅਵਤ੍ਥੁਕਾ ਉਚ੍ਛੁਵਿਕਤਿ. ਤਂ ਫਾਣਿਤਂ ਪੁਰੇਭਤ੍ਤਂ ਪਟਿਗ੍ਗਹਿਤਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਸਤ੍ਤਾਹਂ ਨਿਰਾਮਿਸਮੇਵ ਵਟ੍ਟਤਿ, ਸਤ੍ਤਾਹਾਤਿਕ੍ਕਮੇ ਵਤ੍ਥੁਗਣਨਾਯ ਨਿਸ੍ਸਗ੍ਗਿਯਂ. ਬਹੂ ਪਿਣ੍ਡਾ ਚੁਣ੍ਣੇ ਕਤ੍ਵਾ ਏਕਭਾਜਨੇ ਪਕ੍ਖਿਤ੍ਤਾ ਹੋਨ੍ਤਿ ਘਨਸਨ੍ਨਿਵੇਸਾ, ਏਕਮੇਵ ਨਿਸ੍ਸਗ੍ਗਿਯਂ. ਉਗ੍ਗਹਿਤਕਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ, ਘਰਧੂਪਨਾਦੀਸੁ ਉਪਨੇਤਬ੍ਬਂ. ਪੁਰੇਭਤ੍ਤਂ ਪਟਿਗ੍ਗਹਿਤੇਨ ਅਪਰਿਸ੍ਸਾਵਿਤਉਚ੍ਛੁਰਸੇਨ ਕਤਫਾਣਿਤਂ ਸਚੇ ਅਨੁਪਸਮ੍ਪਨ੍ਨੇਨ ਕਤਂ, ਸਾਮਿਸਮ੍ਪਿ ਵਟ੍ਟਤਿ, ਸਯਂਕਤਂ ਨਿਰਾਮਿਸਮੇਵ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਪਨ ਸਵਤ੍ਥੁਕਪਟਿਗ੍ਗਹਿਤਤ੍ਤਾ ਅਨਜ੍ਝੋਹਰਣੀਯਂ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ. ਪਚ੍ਛਾਭਤ੍ਤਂ ਅਪਰਿਸ੍ਸਾਵਿਤਪਟਿਗ੍ਗਹਿਤੇਨ ਕਤਮ੍ਪਿ ਅਨਜ੍ਝੋਹਰਣੀਯਮੇਵ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ. ਏਸ ਨਯੋ ਉਚ੍ਛੁਂ ਪਟਿਗ੍ਗਹੇਤ੍ਵਾ ਕਤਫਾਣਿਤੇਪਿ. ਪੁਰੇਭਤ੍ਤਂ ਪਨ ਪਰਿਸ੍ਸਾਵਿਤਪਟਿਗ੍ਗਹਿਤੇਨ ਕਤਂ ਸਚੇ ਅਨੁਪਸਮ੍ਪਨ੍ਨੇਨ ਕਤਂ, ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਸਤ੍ਤਾਹਂ ਨਿਰਾਮਿਸਮੇਵ. ਸਯਂਕਤਂ ਪੁਰੇਭਤ੍ਤਮ੍ਪਿ ਨਿਰਾਮਿਸਮੇਵ, ਪਚ੍ਛਾਭਤ੍ਤਂ ਪਰਿਸ੍ਸਾਵਿਤਪਟਿਗ੍ਗਹਿਤੇਨ ਕਤਂ ਪਨ ਨਿਰਾਮਿਸਮੇਵ ਸਤ੍ਤਾਹਂ ਵਟ੍ਟਤਿ. ਉਗ੍ਗਹਿਤਕਤਂ ਵੁਤ੍ਤਨਯਮੇਵ. ‘‘ਝਾਮਉਚ੍ਛੁਫਾਣਿਤਂ ਵਾ ਕੋਟ੍ਟਿਤਉਚ੍ਛੁਫਾਣਿਤਂ ਵਾ ਪੁਰੇਭਤ੍ਤਮੇਵ ਵਟ੍ਟਤੀ’’ਤਿ ਮਹਾਅਟ੍ਠਕਥਾਯਂ ਵੁਤ੍ਤਂ. ਮਹਾਪਚ੍ਚਰਿਯਂ ਪਨ ‘‘ਏਤਂ ਸਵਤ੍ਥੁਕਪਕ੍ਕਂ ਵਟ੍ਟਤਿ, ਨੋ ਵਟ੍ਟਤੀ’’ਤਿ ਪੁਚ੍ਛਂ ਕਤ੍ਵਾ ‘‘ਉਚ੍ਛੁਫਾਣਿਤਂ ਪਚ੍ਛਾਭਤ੍ਤਂ ਨੋ ਵਟ੍ਟਨਕਂ ਨਾਮ ਨਤ੍ਥੀ’’ਤਿ ਵੁਤ੍ਤਂ, ਤਂ ਯੁਤ੍ਤਂ. ਸੀਤੋਦਕੇਨ ਕਤਂ ਮਧੁਕਪੁਪ੍ਫਫਾਣਿਤਂ ਪੁਰੇਭਤ੍ਤਂ ਸਾਮਿਸਮ੍ਪਿ ਵਟ੍ਟਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਸਤ੍ਤਾਹਂ ਨਿਰਾਮਿਸਮੇਵ ਵਟ੍ਟਤਿ, ਸਤ੍ਤਾਹਾਤਿਕ੍ਕਮੇ ਵਤ੍ਥੁਗਣਨਾਯ ਦੁਕ੍ਕਟਂ, ਖੀਰਂ ਪਕ੍ਖਿਪਿਤ੍ਵਾ ਕਤਂ ਮਧੁਕਫਾਣਿਤਂ ਯਾਵਕਾਲਿਕਂ. ਖਣ੍ਡਸਕ੍ਖਰਂ ਪਨ ਖੀਰਜਲ੍ਲਿਕਂ ਅਪਨੇਤ੍ਵਾ ਸੋਧੇਨ੍ਤਿ, ਤਸ੍ਮਾ ਵਟ੍ਟਤਿ.

੯੯. ਮਧੁਕਪੁਪ੍ਫਂ ਪਨ ਪੁਰੇਭਤ੍ਤਮ੍ਪਿ ਅਲ੍ਲਂ ਵਟ੍ਟਤਿ. ਭਜ੍ਜਿਤਮ੍ਪਿ ਵਟ੍ਟਤਿ, ਭਜ੍ਜਿਤ੍ਵਾ ਤਿਲਾਦੀਹਿ ਮਿਸ੍ਸਂ ਵਾ ਅਮਿਸ੍ਸਂ ਵਾ ਕਤ੍ਵਾ ਕੋਟ੍ਟਿਤਂ ਵਟ੍ਟਤਿ. ਯਦਿ ਪਨ ਤਂ ਗਹੇਤ੍ਵਾ ਮੇਰਯਤ੍ਥਾਯ ਯੋਜੇਨ੍ਤਿ, ਯੋਜਿਤਂ ਬੀਜਤੋ ਪਟ੍ਠਾਯ ਨ ਵਟ੍ਟਤਿ. ਕਦਲੀਖਜ੍ਜੂਰੀਅਮ੍ਬਲਬੁਜਪਨਸਚਿਞ੍ਚਾਦੀਨਂ ਸਬ੍ਬੇਸਂ ਯਾਵਕਾਲਿਕਫਲਾਨਂ ਫਾਣਿਤਂ ਯਾਵਕਾਲਿਕਮੇਵ. ਮਰਿਚਪਕ੍ਕੇਹਿ ਫਾਣਿਤਂ ਕਰੋਨ੍ਤਿ, ਤਂ ਯਾਵਜੀਵਿਕਂ. ਏਵਂ ਯਥਾਵੁਤ੍ਤਾਨਿ ਸਤ੍ਤਾਹਕਾਲਿਕਾਨਿ ਸਪ੍ਪਿਆਦੀਨਿ ਪਞ੍ਚ ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚ ਭੇਸਜ੍ਜਾਨੀ’’ਤਿ (ਮਹਾਵ. ੨੬੦) ਭੇਸਜ੍ਜਨਾਮੇਨ ਅਨੁਞ੍ਞਾਤਤ੍ਤਾ ਭੇਸਜ੍ਜਕਿਚ੍ਚਂ ਕਰੋਨ੍ਤੁ ਵਾ ਮਾ ਵਾ, ਆਹਾਰਤ੍ਥਂ ਫਰਿਤੁਂ ਸਮਤ੍ਥਾਨਿਪਿ ਪਟਿਗ੍ਗਹੇਤ੍ਵਾ ਤਦਹੁਪੁਰੇਭਤ੍ਤਂ ਯਥਾਸੁਖਂ, ਪਚ੍ਛਾਭਤ੍ਤਤੋ ਪਟ੍ਠਾਯ ਸਤਿ ਪਚ੍ਚਯੇ ਵੁਤ੍ਤਨਯੇਨ ਸਤ੍ਤਾਹਂ ਪਰਿਭੁਞ੍ਜਿਤਬ੍ਬਾਨਿ, ਸਤ੍ਤਾਹਾਤਿਕ੍ਕਮੇ ਪਨ ਭੇਸਜ੍ਜਸਿਕ੍ਖਾਪਦੇਨ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਸਚੇਪਿ ਸਾਸਪਮਤ੍ਤਂ ਹੋਤਿ, ਸਕਿਂ ਵਾ ਅਙ੍ਗੁਲਿਯਾ ਗਹੇਤ੍ਵਾ ਜਿਵ੍ਹਾਯ ਸਾਯਨਮਤ੍ਤਂ, ਨਿਸ੍ਸਜ੍ਜਿਤਬ੍ਬਮੇਵ ਪਾਚਿਤ੍ਤਿਯਞ੍ਚ ਦੇਸੇਤਬ੍ਬਂ. ਨਿਸ੍ਸਟ੍ਠਂ ਪਟਿਲਭਿਤ੍ਵਾ ਨ ਅਜ੍ਝੋਹਰਿਤਬ੍ਬਂ, ਨ ਕਾਯਿਕੇਨ ਪਰਿਭੋਗੇਨ ਪਰਿਭੁਞ੍ਜਿਤਬ੍ਬਂ, ਕਾਯੋ ਵਾ ਕਾਯੇ ਅਰੁ ਵਾ ਨ ਮਕ੍ਖੇਤਬ੍ਬਂ. ਤੇਹਿ ਮਕ੍ਖਿਤਾਨਿ ਕਾਸਾਵਕਤ੍ਤਰਯਟ੍ਠਿਉਪਾਹਨਪਾਦਕਠਲਿਕਮਞ੍ਚਪੀਠਾਦੀਨਿਪਿ ਅਪਰਿਭੋਗਾਨਿ. ‘‘ਦ੍ਵਾਰਵਾਤਪਾਨਕਵਾਟੇਸੁਪਿ ਹਤ੍ਥੇਨ ਗਹਣਟ੍ਠਾਨਂ ਨ ਮਕ੍ਖੇਤਬ੍ਬ’’ਨ੍ਤਿ ਮਹਾਪਚ੍ਚਰਿਯਂ ਵੁਤ੍ਤਂ. ‘‘ਕਸਾਵੇ ਪਨ ਪਕ੍ਖਿਪਿਤ੍ਵਾ ਦ੍ਵਾਰਵਾਤਪਾਨਕਵਾਟਾਨਿ ਮਕ੍ਖੇਤਬ੍ਬਾਨੀ’’ਤਿ ਮਹਾਅਟ੍ਠਕਥਾਯਂ ਵੁਤ੍ਤਂ. ਪਦੀਪੇ ਵਾ ਕਾਲ਼ਵਣ੍ਣੇ ਵਾ ਉਪਨੇਤੁਂ ਵਟ੍ਟਤਿ. ਅਞ੍ਞੇਨ ਪਨ ਭਿਕ੍ਖੁਨਾ ਕਾਯਿਕੇਨ ਪਰਿਭੋਗੇਨ ਪਰਿਭੁਞ੍ਜਿਤਬ੍ਬਂ, ਨ ਅਜ੍ਝੋਹਰਿਤਬ੍ਬਂ. ‘‘ਅਨਾਪਤ੍ਤਿ ਅਨ੍ਤੋਸਤ੍ਤਾਹਂ ਅਧਿਟ੍ਠੇਤੀ’’ਤਿ (ਪਾਰਾ. ੬੨੫) ਵਚਨਤੋ ਪਨ ਸਤ੍ਤਾਹਬ੍ਭਨ੍ਤਰੇ ਸਪ੍ਪਿਞ੍ਚ ਤੇਲਞ੍ਚ ਵਸਞ੍ਚ ਮੁਦ੍ਧਨਿ ਤੇਲਂ ਵਾ ਅਬ੍ਭਞ੍ਜਨਂ ਵਾ ਮਧੁਂ ਅਰੁਮਕ੍ਖਨਂ ਫਾਣਿਤਂ ਘਰਧੂਪਨਂ ਅਧਿਟ੍ਠੇਤਿ ਅਨਾਪਤ੍ਤਿ, ਨੇਵ ਨਿਸ੍ਸਗ੍ਗਿਯਂ ਹੋਤਿ. ਸਚੇ ਅਧਿਟ੍ਠਿਤਤੇਲਂ ਅਨਧਿਟ੍ਠਿਤਤੇਲਭਾਜਨੇ ਆਕਿਰਿਤੁਕਾਮੋ ਹੋਤਿ, ਭਾਜਨੇ ਚੇ ਸੁਖੁਮਂ ਛਿਦ੍ਦਂ, ਪਵਿਟ੍ਠਂ ਪਵਿਟ੍ਠਂ ਤੇਲਂ ਪੁਰਾਣਤੇਲੇਨ ਅਜ੍ਝੋਤ੍ਥਰੀਯਤਿ, ਪੁਨ ਅਧਿਟ੍ਠਾਤਬ੍ਬਂ. ਅਥ ਮਹਾਮੁਖਂ ਹੋਤਿ, ਸਹਸਾਵ ਬਹੁ ਤੇਲਂ ਪਵਿਸਿਤ੍ਵਾ ਪੁਰਾਣਤੇਲਂ ਅਜ੍ਝੋਤ੍ਥਰਤਿ, ਪੁਨ ਅਧਿਟ੍ਠਾਨਕਿਚ੍ਚਂ ਨਤ੍ਥਿ. ਅਧਿਟ੍ਠਿਤਗਤਿਕਮੇਵ ਹਿ ਤਂ ਹੋਤਿ. ਏਤੇਨ ਨਯੇਨ ਅਧਿਟ੍ਠਿਤਤੇਲਭਾਜਨੇ ਅਨਧਿਟ੍ਠਿਤਤੇਲਆਕਿਰਣਮ੍ਪਿ ਵੇਦਿਤਬ੍ਬਂ.

ਸਚੇ ਪਨ ਸਤ੍ਤਾਹਾਤਿਕ੍ਕਨ੍ਤਂ ਅਨੁਪਸਮ੍ਪਨ੍ਨਸ੍ਸ ਪਰਿਚ੍ਚਜਿਤ੍ਵਾ ਦੇਤਿ, ਪੁਨ ਤੇਨ ਅਤ੍ਤਨੋ ਸਨ੍ਤਕਂ ਕਤ੍ਵਾ ਦਿਨ੍ਨਂ ਪਰਿਭੁਞ੍ਜਿਤੁਂ ਵਟ੍ਟਤਿ. ਸਚੇ ਹਿ ਸੋ ਅਭਿਸਙ੍ਖਰਿਤ੍ਵਾ ਵਾ ਅਨਭਿਸਙ੍ਖਰਿਤ੍ਵਾ ਵਾ ਤਸ੍ਸ ਭਿਕ੍ਖੁਨੋ ਨਤ੍ਥੁਕਮ੍ਮਤ੍ਥਂ ਦਦੇਯ੍ਯ, ਗਹੇਤ੍ਵਾ ਨਤ੍ਥੁਕਮ੍ਮਂ ਕਾਤਬ੍ਬਂ. ਸਚੇ ਬਾਲੋ ਹੋਤਿ, ਦਾਤੁਂ ਨ ਜਾਨਾਤਿ, ਅਞ੍ਞੇਨ ਭਿਕ੍ਖੁਨਾ ਵਤ੍ਤਬ੍ਬੋ ‘‘ਅਤ੍ਥਿ ਤੇ ਸਾਮਣੇਰ ਤੇਲ’’ਨ੍ਤਿ? ‘‘ਆਮ, ਭਨ੍ਤੇ, ਅਤ੍ਥੀ’’ਤਿ. ਆਹਰ ਥੇਰਸ੍ਸ ਭੇਸਜ੍ਜਂ ਕਰਿਸ੍ਸਾਮਾਤਿ. ਏਵਮ੍ਪਿ ਵਟ੍ਟਤਿ. ਸਚੇ ਦ੍ਵਿਨ੍ਨਂ ਸਨ੍ਤਕਂ ਏਕੇਨ ਪਟਿਗ੍ਗਹਿਤਂ ਅਵਿਭਤ੍ਤਂ ਹੋਤਿ, ਸਤ੍ਤਾਹਾਤਿਕ੍ਕਮੇ ਦ੍ਵਿਨ੍ਨਮ੍ਪਿ ਅਨਾਪਤ੍ਤਿ, ਪਰਿਭੁਞ੍ਜਿਤੁਂ ਪਨ ਨ ਵਟ੍ਟਤਿ. ਸਚੇ ਯੇਨ ਪਟਿਗ੍ਗਹਿਤਂ, ਸੋ ਇਤਰਂ ਭਣਤਿ ‘‘ਆਵੁਸੋ, ਇਮਂ ਤੇਲਂ ਸਤ੍ਤਾਹਮਤ੍ਤਂ ਪਰਿਭੁਞ੍ਜਿਤੁਂ ਵਟ੍ਟਤੀ’’ਤਿ, ਸੋ ਚ ਪਰਿਭੋਗਂ ਨ ਕਰੋਤਿ, ਕਸ੍ਸ ਆਪਤ੍ਤਿ? ਨ ਕਸ੍ਸਚਿ. ਕਸ੍ਮਾ? ਯੇਨ ਪਟਿਗ੍ਗਹਿਤਂ, ਤੇਨ ਵਿਸ੍ਸਜ੍ਜਿਤਤ੍ਤਾ, ਇਤਰਸ੍ਸ ਅਪ੍ਪਟਿਗ੍ਗਹਿਤਤ੍ਤਾ.

੧੦੦. ਇਮੇਸੁ (ਮਹਾਵ. ਅਟ੍ਠ. ੩੦੫) ਪਨ ਚਤੂਸੁ ਕਾਲਿਕੇਸੁ ਯਾਵਕਾਲਿਕਂ ਯਾਮਕਾਲਿਕਨ੍ਤਿ ਇਦਮੇਵ ਦ੍ਵਯਂ ਅਨ੍ਤੋਵੁਤ੍ਥਕਞ੍ਚੇਵ ਸਨ੍ਨਿਧਿਕਾਰਕਞ੍ਚ ਹੋਤਿ, ਸਤ੍ਤਾਹਕਾਲਿਕਞ੍ਚ ਯਾਵਜੀਵਿਕਞ੍ਚ ਅਕਪ੍ਪਿਯਕੁਟਿਯਂ ਨਿਕ੍ਖਿਪਿਤੁਮ੍ਪਿ ਵਟ੍ਟਤਿ, ਸਨ੍ਨਿਧਿਮ੍ਪਿ ਨ ਜਨੇਤਿ. ਯਾਵਕਾਲਿਕਂ ਪਨ ਅਤ੍ਤਨਾ ਸਦ੍ਧਿਂ ਸਮ੍ਭਿਨ੍ਨਰਸਾਨਿ ਤੀਣਿਪਿ ਯਾਮਕਾਲਿਕਾਦੀਨਿ ਅਤ੍ਤਨੋ ਸਭਾਵਂ ਉਪਨੇਤਿ. ਯਾਮਕਾਲਿਕਂ ਦ੍ਵੇਪਿ ਸਤ੍ਤਾਹਕਾਲਿਕਾਦੀਨਿ ਅਤ੍ਤਨੋ ਸਭਾਵਂ ਉਪਨੇਤਿ, ਸਤ੍ਤਾਹਕਾਲਿਕਮ੍ਪਿ ਅਤ੍ਤਨਾ ਸਦ੍ਧਿਂ ਸਂਸਟ੍ਠਂ ਯਾਵਜੀਵਿਕਂ ਅਤ੍ਤਨੋ ਸਭਾਵਞ੍ਞੇਵ ਉਪਨੇਤਿ, ਤਸ੍ਮਾ ਯਾਵਕਾਲਿਕੇਨ ਤਦਹੁਪਟਿਗ੍ਗਹਿਤੇਨ ਸਦ੍ਧਿਂ ਸਂਸਟ੍ਠਂ ਸਮ੍ਭਿਨ੍ਨਰਸਂ ਸੇਸਕਾਲਿਕਤ੍ਤਯਂ ਤਦਹੁਪੁਰੇਭਤ੍ਤਮੇਵ ਵਟ੍ਟਤਿ. ਯਾਮਕਾਲਿਕੇਨ ਸਂਸਟ੍ਠਂ ਪਨ ਇਤਰਦ੍ਵਯਂ ਤਦਹੁਪਟਿਗ੍ਗਹਿਤਂ ਯਾਵ ਅਰੁਣੁਗ੍ਗਮਨਾ ਵਟ੍ਟਤਿ. ਸਤ੍ਤਾਹਕਾਲਿਕੇਨ ਪਨ ਤਦਹੁਪਟਿਗ੍ਗਹਿਤੇਨ ਸਦ੍ਧਿਂ ਸਂਸਟ੍ਠਂ ਤਦਹੁਪਟਿਗ੍ਗਹਿਤਂ ਵਾ ਪੁਰੇਪਟਿਗ੍ਗਹਿਤਂ ਵਾ ਯਾਵਜੀਵਿਕਂ ਸਤ੍ਤਾਹਂ ਕਪ੍ਪਤਿ. ਦ੍ਵੀਹਪਟਿਗ੍ਗਹਿਤੇਨ ਛਾਹਂ. ਤੀਹਪਟਿਗ੍ਗਹਿਤੇਨ ਪਞ੍ਚਾਹਂ…ਪੇ… ਸਤ੍ਤਾਹਪਟਿਗ੍ਗਹਿਤੇਨ ਤਦਹੇਵ ਕਪ੍ਪਤੀਤਿ ਵੇਦਿਤਬ੍ਬਂ. ਕਾਲਯਾਮਸਤ੍ਤਾਹਾਤਿਕ੍ਕਮੇਸੁ ਚੇਤ੍ਥ ਵਿਕਾਲਭੋਜਨਸਨ੍ਨਿਧਿਭੇਸਜ੍ਜਸਿਕ੍ਖਾਪਦਾਨਂ ਵਸੇਨ ਆਪਤ੍ਤਿਯੋ ਵੇਦਿਤਬ੍ਬਾ.

ਸਚੇ ਪਨ ਏਕਤੋ ਪਟਿਗ੍ਗਹਿਤਾਨਿਪਿ ਚਤ੍ਤਾਰਿ ਕਾਲਿਕਾਨਿ ਸਮ੍ਭਿਨ੍ਨਰਸਾਨਿ ਨ ਹੋਨ੍ਤਿ, ਤਸ੍ਸ ਤਸ੍ਸੇਵ ਕਾਲਸ੍ਸ ਵਸੇਨ ਪਰਿਭੁਞ੍ਜਿਤੁਂ ਵਟ੍ਟਨ੍ਤਿ. ਸਚੇ ਹਿ ਛਲ੍ਲਿਮ੍ਪਿ ਅਨਪਨੇਤ੍ਵਾ ਸਕਲੇਨੇਵ ਨਾਲ਼ਿਕੇਰਫਲੇਨ ਸਦ੍ਧਿਂ ਅਮ੍ਬਪਾਨਾਦਿਪਾਨਕਂ ਪਟਿਗ੍ਗਹਿਤਂ ਹੋਤਿ, ਨਾਲ਼ਿਕੇਰਂ ਅਪਨੇਤ੍ਵਾ ਤਂ ਵਿਕਾਲੇਪਿ ਕਪ੍ਪਤਿ. ਉਪਰਿ ਸਪ੍ਪਿਪਿਣ੍ਡਂ ਠਪੇਤ੍ਵਾ ਸੀਤਲਪਾਯਾਸਂ ਦੇਨ੍ਤਿ, ਯਂ ਪਾਯਾਸੇਨ ਅਸਂਸਟ੍ਠਂ ਸਪ੍ਪਿ, ਤਂ ਅਪਨੇਤ੍ਵਾ ਸਤ੍ਤਾਹਂ ਪਰਿਭੁਞ੍ਜਿਤੁਂ ਵਟ੍ਟਤਿ. ਥਦ੍ਧਮਧੁਫਾਣਿਤਾਦੀਸੁਪਿ ਏਸੇਵ ਨਯੋ. ਤਕ੍ਕੋਲਜਾਤਿਫਲਾਦੀਹਿ ਅਲਙ੍ਕਰਿਤ੍ਵਾ ਪਿਣ੍ਡਪਾਤਂ ਦੇਨ੍ਤਿ, ਤਾਨਿ ਉਦ੍ਧਰਿਤ੍ਵਾ ਧੋਵਿਤ੍ਵਾ ਯਾਵਜੀਵਂ ਪਰਿਭੁਞ੍ਜਿਤਬ੍ਬਾਨਿ. ਯਾਗੁਯਂ ਪਕ੍ਖਿਪਿਤ੍ਵਾ ਦਿਨ੍ਨਸਿਙ੍ਗਿਵੇਰਾਦੀਸੁਪਿ ਤੇਲਾਦੀਸੁ ਪਕ੍ਖਿਪਿਤ੍ਵਾ ਦਿਨ੍ਨਲਟ੍ਠਿਮਧੁਕਾਦੀਸੁਪਿ ਏਸੇਵ ਨਯੋ. ਏਵਂ ਯਂ ਯਂ ਅਸਮ੍ਭਿਨ੍ਨਰਸਂ ਹੋਤਿ, ਤਂ ਤਂ ਏਕਤੋ ਪਟਿਗ੍ਗਹਿਤਮ੍ਪਿ ਯਥਾ ਸੁਦ੍ਧਂ ਹੋਤਿ, ਤਥਾ ਧੋਵਿਤ੍ਵਾ ਤਚ੍ਛੇਤ੍ਵਾ ਵਾ ਤਸ੍ਸ ਤਸ੍ਸ ਕਾਲਸ੍ਸ ਵਸੇਨ ਪਰਿਭੁਞ੍ਜਿਤੁਂ ਵਟ੍ਟਤਿ. ਸਚੇ ਸਮ੍ਭਿਨ੍ਨਰਸਂ ਹੋਤਿ ਸਂਸਟ੍ਠਂ, ਨ ਵਟ੍ਟਤਿ.

ਇਤਿ ਪਾਲ਼ਿਮੁਤ੍ਤਕਵਿਨਯਵਿਨਿਚ੍ਛਯਸਙ੍ਗਹੇ

ਕਾਲਿਕਵਿਨਿਚ੍ਛਯਕਥਾ ਸਮਤ੍ਤਾ.